རང་གཞན་གྱི་རྟོགས་པ་བརྗོད་པའི་རྡོ་རྗེའི་ཐོལ་གླུ་དཔེ་དོན་འབྲེལ་བ།

🚧 This website is under continued development. We appreciate your patience!

Previous Text Back to Volume PageNext Text

Wylie title	rang gzhan gyi rtogs pa brjod pa'i rdo rje'i thol glu dpe don 'brel ba
Location	mkhyen brtse'i bka' 'bum Volume 22, sde tshan 12, Text 53, Pages 508-510 (Folios 82b5 to 83b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. rang gzhan gyi rtogs pa brjod pa'i rdo rje'i thol glu dpe don 'brel ba. In 'jam dbyangs mkhyen brtse'i dbang po'i bka' 'bum, Vol. 22: 508-510. Khams sde dge rdzong sar dgon: Rdzong sar blo gros phun tshogs, 2020.
Genre	Autobiographies - Expressions of Realization - rtogs brjod  ·  Vajra Songs - rdo rje'i glu

1 Texts in this Section (sde tshan or chos tshan)

53 508-510	རང་གཞན་གྱི་རྟོགས་པ་བརྗོད་པའི་རྡོ་རྗེའི་ཐོལ་གླུ་དཔེ་དོན་འབྲེལ་བ། rang gzhan gyi rtogs pa brjod pa'i rdo rje'i thol glu dpe don 'brel ba Autobiographies - Expressions of Realization - rtogs brjod   ·   Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

རང་གཞན་གྱི་རྟོགས་པ་བརྗོད་པའི་རྡོ་རྗེའི་ཐོལ་གླུ་དཔེ་དོན་འབྲེལ་བ་ཞེས་བྱ་བ། ཨ་ཧོ། ཆོས་ཀུན་གདོད་ནས་སྐྱེ་མེད་ཆེན་པོ་རུ་ཐིམ་པས། །ཟུང་འཇུག་རིག་སྟོང་དབྱེར་མེད་དོན་དམ་གྱི་སངས་རྒྱས། །འཁོར་འདས་མིང་བཏགས་ཟད་པའི་བློ་བྲལ་གྱི་རོལ་པ། །འདུ་འབྲལ་སྤངས་པའི་གཞོན་ནུ་བུམ་སྐུ་ལ་འདུད་དོ། །རྙེད་དཀའི་དལ་འབྱོར་སྤུ་སྡུག་མཚར་བ་ཡི་ཀློང་དུ། །རྒྱུ་འབྲས་བསླུ་མེད་དགེ་བར་སྤྱོད་པ་ཡི་འདབ་གཤོག །སྐྱོ་ཤས་ངེས་འབྱུང་དྲི་བཞོན་གཡོ་བ་དང་འགྲོགས་ཏེ། །སྡུག་བསྔལ་ཀུན་བྲལ་གཏན་བདེའི་མཁའ་དབྱིངས་ལ་འཕྱོ་བའི། །ང་ཅག་འདུན་པ་འདབ་ཆགས་རྒོད་པོ་ལ་ཤོར་སོང་། །ཆོས་བརྒྱད་འཆིང་བ་རབ་གྲོལ་བས་མཐའ་ཡི་ཚལ་དུ། །ཟུང་འཇུག་གསང་སྔགས་ཆུ་རྒྱུན་བཏུང་བ་ལ་རོལ་ཅིང་། །འགྱུར་མེད་སྐུ་བཞིའི་སྨན་ལྗོངས་ངོས་ཡངས་སུ་རྩེ་ནས། །བསམ་གཏན་གཉུག་མའི་བྲག་སྐྱིབས་གནས་མལ་དུ་བཟུང་བའི། །ང་ཅག་འདུན་པ་སྐྱེད་ཚལ་རི་དྭགས་ལ་ཤོར་སོང་། །སྐྱབས་གསུམ་རང་ངོ་ཤེས་པའི་གྲིབ་བསིལ་ལ་བསྟི་ཞིང་། །གཞན་ཕན་པདྨ་གཞོན་ནུའི་ཟེའུ་འབྲུ་ལ་ཆགས་པས། །ཕར་ཕྱིན་སྤྱོད་པ་རྒྱ་མཚོའི་སྦྲང་རྩི་ཡིས་མྱོས་ཏེ། །ལུང་རྟོགས་ཆོས་ཚུལ་རྒྱ་མཚོ་མགྲིན་གླུ་རུ་ལྡིར་བའི། །ང་ཅག་འདུན་པ་སྨན་ལྗོངས་བུང་བ་ལ་ཤོར་སོང་། །རང་རྒྱུད་དུལ་བའི་ཞིང་ས་གཤིན་པོ་ཡི་ངོགས་སུ། །སྨིན་གྲོལ་བདུད་རྩིའི་ཆར་གྱིས་བར་མེད་དུ་བྲན་པས། །ཐར་པའི་ས་བོན་བསྐྱེད་རྫོགས་ཕང་ཕུང་དུ་གཡོ་བར། །ཟུང་འཇུག་བདེ་ཆེན་སྐུ་བཞིའི་འབྲས་བུ་ཡིས་མཛེས་པ། །ང་ཅག་འདུན་པ་སྟོན་ཀའི་ལོ་ཏོག་ལ་ཤོར་སོང་། །འཆད་རྩོད་རྩོམ་པའི་སྤྲིན་དཀར་ལང་ལོང་དུ་གཡོ་ཞིང་། །གཞན་ཕན་སེམས་བསྐྱེད་དབྱར་གྱི་རྔ་གསང་དེ་བརྡུངས་པས། །སྐལ་བཟང་ཐིག་ལེས་སྒེག་པའི་འདབ་ཆགས་ཀྱི་ཚོགས་ཀུན། །དགའ་དང་གུས་པའི་ཟློས་གར་སྣ་ཚོགས་སུ་རྩེ་བའི། །ང་ཅག་འདུན་པ་དབྱར་གྱི་རྨ་བྱ་ལ་ཤོར་སོང་། །ཚོགས་གཉིས་འབྲས་བུས་ཕྱུག་པའི་ནགས་ཚལ་གྱི་དབུས་ནས། །དོན་གཉིས་གཅིག་ཅར་འགྲུབ་པའི་གླུ་དབྱངས་ཀྱི་རོལ་མོས། །སྲིད་པའི་སྡུག་བསྔལ་བྲལ་བ༷འི་ངལ་བསོ་ལ་སྦྱར་ཅིང་། །མྱང་འདས་ཐར་པའི་དགའ་ཚལ་མངོན་སུམ་དུ་འགུགས་པའི། །ང་ཅག་འདུན་པ་དཔྱིད་ཀྱི་ཁུ་བྱུག་ལ་ཤོར་སོང་། །ཐོས་པའི་གངས་རིའི་སྤོ་ལ་གནས་མལ་དུ་བཅས་ཤིང་། །བསམ་བྱུང་རྣམ་པར་དག་པའི་གཡུ་རལ་གྱིས་མཛེས་ཏེ། །སྒོམ་སྤང་འཕགས་པའི་ང་རོ་བར་མེད་དུ་སྒྲོགས་བས། །ལོག་རྟོག་འཁྲུལ་པའི་རི་དྭགས་ཆོས་དབྱིངས་སུ་བཅིལ་བའི། །ང་ཅག་འདུན་པ་སེང་ལྕམ་དཀར་མོ་ལ་ཤོར་སོང་། །སྣང་དང་སྟོང་པ་ཟུང་འཇུག་ཤིང་རྟ་ལ་ཞོན་ནས། །བསྐྱེད་དང་རྫོགས་པའི་འོད་ཟེར་བར་མེད་དུ་སྤྲོ་བས། །ལས་ཉོན་ཤེས་བྱའི་སྒྲིབ་པའི་མུན་པ་ཀུན་བཅོམ་སྟེ། །བདེ་སྟོང་དབྱེར་མེད་སྐུ་བཞིའི་ཆུ་སྐྱེས་མཆོག་བཞད་པའི། །ང་ཅག་འདུན་པ་སྣང་བྱེད་བདག་པོ་ལ་ཤོར་སོང་། །དཔེ་བརྒྱད་དོན་བརྒྱད་སྦྱར་བའི་ཉམས་ལེན་གྱི་གླུ་དབྱངས། །གང་ཤར་རང་གྲོལ་ཆོས་ཉིད་གཉུག་མ་ཡི་རང་སྒྲ། །མགྲིན་པ་ལོངས་སྤྱོད་འཁོར་ལོའི་དཀོར་མཛོད་ནས་བླངས་པས། །ཆོས་བརྒྱད་འཁྲུལ་པ་ཞིག་པར་བྱིན་གྱིས་རང་རློབས་ཤིག ། ༈

[edit]

rang gzhan gyi rtogs pa brjod pa'i rdo rje'i thol glu dpe don 'brel ba/__ rang gzhan gyi rtogs pa brjod pa'i rdo rje'i thol glu dpe don 'brel ba zhes bya ba/__a ho/__chos kun gdod nas skye med chen po ru thim pas/__/zung 'jug rig stong dbyer med don dam gyi sangs rgyas/__/'khor 'das ming btags zad pa'i blo bral gyi rol pa/__/'du 'bral spangs pa'i gzhon nu bum sku la 'dud do/__/rnyed dka'i dal 'byor spu sdug mtshar ba yi klong du/__/rgyu 'bras bslu med dge bar spyod pa yi 'dab gshog__/skyo shas nges 'byung dri bzhon g.yo ba dang 'grogs te/__/sdug bsngal kun bral gtan bde'i mkha' dbyings la 'phyo ba'i/__/nga cag 'dun pa 'dab chags rgod po la shor song /__/chos brgyad 'ching ba rab grol bas mtha' yi tshal du/__/zung 'jug gsang sngags chu rgyun btung ba la rol cing /__/'gyur med sku bzhi'i sman ljongs ngos yangs su rtse nas/__/bsam gtan gnyug ma'i brag skyibs gnas mal du bzung ba'i/__/nga cag 'dun pa skyed tshal ri dwags la shor song /__/skyabs gsum rang ngo shes pa'i grib bsil la bsti zhing /__/gzhan phan pad+ma gzhon nu'i ze'u 'bru la chags pas/__/phar phyin spyod pa rgya mtsho'i sbrang rtsi yis myos te/__/lung rtogs chos tshul rgya mtsho mgrin glu ru ldir ba'i/__/nga cag 'dun pa sman ljongs bung ba la shor song /__/rang rgyud dul ba'i zhing sa gshin po yi ngogs su/__/smin grol bdud rtsi'i char gyis bar med du bran pas/__/thar pa'i sa bon bskyed rdzogs phang phung du g.yo bar/__/zung 'jug bde chen sku bzhi'i 'bras bu yis mdzes pa/__/nga cag 'dun pa ston ka'i lo tog la shor song /__/'chad rtsod rtsom pa'i sprin dkar lang long du g.yo zhing /_/gzhan phan sems bskyed dbyar gyi rnga gsang de brdungs pas/__/skal bzang thig les sgeg pa'i 'dab chags kyi tshogs kun/__/dga' dang gus pa'i zlos gar sna tshogs su rtse ba'i/__/nga cag 'dun pa dbyar gyi rma bya la shor song /__/tshogs gnyis 'bras bus phyug pa'i nags tshal gyi dbus nas/__/don gnyis gcig car 'grub pa'i glu dbyangs kyi rol mos/__/srid pa'i sdug bsngal bral baX'i ngal bso la sbyar cing /__/myang 'das thar pa'i dga' tshal mngon sum du 'gugs pa'i/__/nga cag 'dun pa dpyid kyi khu byug la shor song /__/thos pa'i gangs ri'i spo la gnas mal du bcas shing /__/bsam byung rnam par dag pa'i g.yu ral gyis mdzes te/__/sgom spang 'phags pa'i nga ro bar med du sgrogs bas/__/log rtog 'khrul pa'i ri dwags chos dbyings su bcil ba'i/__/nga cag 'dun pa seng lcam dkar mo la shor song /__/snang dang stong pa zung 'jug shing rta la zhon nas/__/bskyed dang rdzogs pa'i 'od zer bar med du spro bas/__/las nyon shes bya'i sgrib pa'i mun pa kun bcom ste/__/bde stong dbyer med sku bzhi'i chu skyes mchog bzhad pa'i/__/nga cag 'dun pa snang byed bdag po la shor song /__/dpe brgyad don brgyad sbyar ba'i nyams len gyi glu dbyangs/__/gang shar rang grol chos nyid gnyug ma yi rang sgra/__/mgrin pa longs spyod 'khor lo'i dkor mdzod nas blangs pas/__/chos brgyad 'khrul pa zhig par byin gyis rang rlobs shig__/__!