བླ་མ་སྐུ་གསུམ་ལ་གསོལ་འདེབས་རྡོ་རྗེའི་ཐོལ་གླུ་གཉུག་མའི་སྒྲ་དབྱངས།

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma sku gsum la gsol 'debs rdo rje'i thol glu gnyug ma'i sgra dbyangs
Location	mkhyen brtse'i bka' 'bum Volume 22, sde tshan 12, Text 42, Pages 483-485 (Folios 70a5 to 71a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bla ma sku gsum la gsol 'debs rdo rje'i thol glu gnyug ma'i sgra dbyangs. In 'jam dbyangs mkhyen brtse'i dbang po'i bka' 'bum, Vol. 22: 483-485. Khams sde dge rdzong sar dgon: Rdzong sar blo gros phun tshogs, 2020.
Genre	Supplications - gsol 'debs  ·  Vajra Songs - rdo rje'i glu

1 Texts in this Section (sde tshan or chos tshan)

42 483-485	བླ་མ་སྐུ་གསུམ་ལ་གསོལ་འདེབས་རྡོ་རྗེའི་ཐོལ་གླུ་གཉུག་མའི་སྒྲ་དབྱངས། bla ma sku gsum la gsol 'debs rdo rje'i thol glu gnyug ma'i sgra dbyangs Supplications - gsol 'debs   ·   Vajra Songs - rdo rje'i glu	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

བླ་མ་སྐུ་གསུམ་ལ་གསོལ་བ་འདེབས་པའི་རྡོ་རྗེའི་ཐོལ་གླུ་གཉུག་མའི་སྒྲ་དབྱངས་ཅེས་བྱ་བ། ཨ་ཧོ། ཡེ་ནས་མངོན་སངས་རྒྱས་པའི་ཀ་དག་གི་ཀློང་ནས། །གཟུང་འཛིན་འཁྲུལ་པས་མ་གོས་རང་རིག་གི་ངོ་བོ། །ཐོག་མའི་མགོན་པོ་ཀུན་བཟང་ཡབ་ཡུམ་དེ་བཞུགས་ཡོད། །ཁྱད་ཆོས་དྲུག་ལྡན་ཆོས་སྐུའི་དངོས་གྲུབ་རང་སྩོལ་ཤོག །རང་སྣང་རང་བཞིན་མེད་པའི་ངོ་བོ་ལས་སྐྱེས་པའི། །ཀུན་བརྟགས་འཁྲུལ་པ་ཟད་པའི་རིག་སྟོང་གི་རོལ་པ། །རིགས་ལྔའི་སངས་རྒྱས་འཁོར་ཚོགས་རྒྱ་མཚོ་དེ་བཞུགས་ཡོད། །ཁ་སྦྱོར་ཡན་ལག་བདུན་ལྡན་དངོས་གྲུབ་རང་སྩོལ་ཤོག །ཐུགས་རྗེ་ཕྱོགས་རིས་མེད་པའི་བདེ་ཆེན་གྱི་ཀློང་ནས། །གང་ཤར་མཚན་དཔེའི་ཡོན་ཏན་རང་ངོ་རུ་གྲོལ་བའི། །རིག་འཛིན་མཁའ་འགྲོ་རྒྱ་མཚོའི་ཚོམ་བུ་དེ་བཞུགས་ཡོད། །སྣང་སྟོང་ལྷུན་གྲུབ་ཆེན་པོའི་དངོས་གྲུབ་རང་སྩོལ་ཤོག །ཚོགས་བརྒྱད་དབུ་མར་ཐིམ་པ་སྲིན་ཡུལ་གྱི་གྲོང་དུ། །འཁོར་འདས་མིང་བཏགས་ཟད་པའི་སྐུ་གསུམ་གྱི་ངོ་བོ། །འཆི་མེད་འཇའ་ལུས་པདྨ་ཐོད་ཕྲེང་དེ་བཞུགས་ཡོད། །དོན་གཉིས་ལྷུན་གྱིས་གྲུབ་པའི་དངོས་གྲུབ་རང་སྩོལ་ཤོག །རང་ལུས་ཕུང་ཁམས་སྐྱེ་མཆེད་ཡོངས་གྲུབ་ཀྱི་ཀློང་ནས། །ཞི་དང་ཁྲོ་གར་རྨད་བྱུང་སྒྱུ་འཕྲུལ་གྱི་དྲྭ་བ། །གདན་གསུམ་ཡོངས་རྫོགས་དཀྱིལ་འཁོར་ལྷ་ཚོགས་དེ་བཞུགས་ཡོད། །སྣང་ཞེན་ཕྱག་རྒྱར་རོལ་པའི་དངོས་གྲུབ་རང་སྩོལ་ཤོག །འཁོར་ལོ་ལྔ་ཡི་རྩ་སྦྱོང་རྩ་གནས་ཀྱི་གྲོང་དུ། །བདེ་སྟོང་མཉམ་པར་སྦྱོར་བའི་ལྷན་སྐྱེས་ཀྱི་གར་མཁན། །དཔའ་བོ་ཌཱ་ཀིའི་ཕྱག་རྒྱས་མཛེས་པ་དེ་བཞུགས་ཡོད། །རླུང་སེམས་དབུ་མར་ཐིམ་པའི་དངོས་གྲུབ་རང་སྩོལ་ཤོག །སྒྲོན་དྲུག་འཇའ་ཟེར་བཞད་པའི་འཛུམ་དཀར་གྱི་ཀློང་ནས། །སྣང་བཞིའི་ངོ་བོ་གོང་འཕེལ་རང་ངོ་རུ་གྲོལ་བའི། །ཆོས་ཟད་བློ་འདས་དོན་གྱི་བླ་མ་དེ་བཞུགས་ཡོད། །ཟག་བཅས་འོད་སྐུར་ཐིམ་པའི་དངོས་གྲུབ་རང་སྩོལ་ཤོག །རང་བྱུང་རང་ལ་ཤར་བའི་གསོལ་འདེབས་ཀྱི་གླུ་དབྱངས། །མགྲིན་པ་རྡོ་རྗེའི་རོལ་མོའི་དཀོར་མཛོད་ནས་བླངས་པས། །ལྷན་སྐྱེས་སྐུ་བཞིའི་དབང་ཕྱུག་བདེ་གཤེགས་ཀྱི་སྙིང་པོར། །གདོད་མའི་བཙན་ས་ཟིན་པའི་སྨོན་ལམ་ཞིག་ཞུའོ།། །། ༈

[edit]

bla ma sku gsum la gsol 'debs rdo rje'i thol glu gnyug ma'i sgra dbyangs/__ bla ma sku gsum la gsol ba 'debs pa'i rdo rje'i thol glu gnyug ma'i sgra dbyangs ces bya ba/__a ho/__ye nas mngon sangs rgyas pa'i ka dag gi klong nas/__/gzung 'dzin 'khrul pas ma gos rang rig gi ngo bo/__/thog ma'i mgon po kun bzang yab yum de bzhugs yod/__/khyad chos drug ldan chos sku'i dngos grub rang stsol shog__/rang snang rang bzhin med pa'i ngo bo las skyes pa'i/__/kun brtags 'khrul pa zad pa'i rig stong gi rol pa/__/rigs lnga'i sangs rgyas 'khor tshogs rgya mtsho de bzhugs yod/__/kha sbyor yan lag bdun ldan dngos grub rang stsol shog__/thugs rje phyogs ris med pa'i bde chen gyi klong nas/__/gang shar mtshan dpe'i yon tan rang ngo ru grol ba'i/__/rig 'dzin mkha' 'gro rgya mtsho'i tshom bu de bzhugs yod/__/snang stong lhun grub chen po'i dngos grub rang stsol shog__/tshogs brgyad dbu mar thim pa srin yul gyi grong du/__/'khor 'das ming btags zad pa'i sku gsum gyi ngo bo/__/'chi med 'ja' lus pad+ma thod phreng de bzhugs yod/__/don gnyis lhun gyis grub pa'i dngos grub rang stsol shog__/rang lus phung khams skye mched yongs grub kyi klong nas/__/zhi dang khro gar rmad byung sgyu 'phrul gyi drwa ba/__/gdan gsum yongs rdzogs dkyil 'khor lha tshogs de bzhugs yod/__/snang zhen phyag rgyar rol pa'i dngos grub rang stsol shog__/'khor lo lnga yi rtsa sbyong rtsa gnas kyi grong du/__/bde stong mnyam par sbyor ba'i lhan skyes kyi gar mkhan/__/dpa' bo DA ki'i phyag rgyas mdzes pa de bzhugs yod/__/rlung sems dbu mar thim pa'i dngos grub rang stsol shog__/sgron drug 'ja' zer bzhad pa'i 'dzum dkar gyi klong nas/__/snang bzhi'i ngo bo gong 'phel rang ngo ru grol ba'i/__/chos zad blo 'das don gyi bla ma de bzhugs yod/__/zag bcas 'od skur thim pa'i dngos grub rang stsol shog__/rang byung rang la shar ba'i gsol 'debs kyi glu dbyangs/_/mgrin pa rdo rje'i rol mo'i dkor mdzod nas blangs pas/__/lhan skyes sku bzhi'i dbang phyug bde gshegs kyi snying por/_/gdod ma'i btsan sa zin pa'i smon lam zhig zhu'o//__//___!_