ཟབ་ལམ་བླ་མའི་རྣལ་འབྱོར་མཁའ་སྤྱོད་གྲུབ་སྟེར།

🚧 This website is under continued development. We appreciate your patience!

Previous Text Back to Volume PageNext Text

Wylie title	zab lam bla ma'i rnal 'byor mkha' spyod grub ster
Location	mkhyen brtse'i bka' 'bum Volume 22, sde tshan 7, Text 28, Pages 277-280 (Folios 47a2 to 48b1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. zab lam bla ma'i rnal 'byor mkha' spyod grub ster. In 'jam dbyangs mkhyen brtse'i dbang po'i bka' 'bum, Vol. 22: 277-280. Khams sde dge rdzong sar dgon: Rdzong sar blo gros phun tshogs, 2020.
Genre	Guru Yoga Texts - bla ma'i rnal 'byor
Colophon	།ཞེས་པའང་དད་ལྡན་དགེ་བའི་བཤེས་གཉེན་གུ་ཎ་ལཀྵྨཱིའི་བཞེད་ངོར་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རབ་ཚེས་ས་ཕོ་སྟག་ལོའི་ཆུ་སྟོད་ཟླ་བའི་དཀར་ཕྱོགས་མཁའ་འགྲོ་མ་འདུ་བའི་ཚེས་བཅུའི་དུས་བཟང་པོར་བྲིས་པ་དོན་དང་ལྡན་པར་གྱུར་ཅིག །
	zhes pa'ang dad ldan dge ba'i bshes gnyen gu Na lak+Sh+mI'i bzhed ngor 'jam dbyangs bla ma dgyes pa'i 'bangs mkhyen brtse'i dbang pos rab tshes sa pho stag lo'i chu stod zla ba'i dkar phyogs mkha' 'gro ma 'du ba'i tshes bcu'i dus bzang por bris pa don dang ldan par gyur cig

1 Texts in this Section (sde tshan or chos tshan)

28 277-280	ཟབ་ལམ་བླ་མའི་རྣལ་འབྱོར་མཁའ་སྤྱོད་གྲུབ་སྟེར། zab lam bla ma'i rnal 'byor mkha' spyod grub ster Guru Yoga Texts - bla ma'i rnal 'byor	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །ཟབ་ལམ་བླ་མའི་རྣལ་འབྱོར་མཁའ་སྤྱོད་གྲུབ་སྟེར་ཞེས་བྱ་བ། ན་མོ་གུ་ར་བེ། ཟབ་ལམ་བླ་མའི་རྣལ་འབྱོར་བསྒོམ་པར་འདོད་པས་སྐྱབས་སེམས་སྔོན་དུ་འགྲོ་བས། ཨོཾ་སྭ་བྷཱ་བ་སོགས། གདོད་ནས་སྟོང་དང་རྟེན་འབྱུང་དབྱེར་མེད་པའི། །རྣམ་རོལ་གནས་ཡུལ་དག་པ་མཁའ་སྤྱོད་ཞིང་། །ཡིད་འཕྲོག་མཆོད་སྤྲིན་རྒྱ་མཚོ་འཁྲིགས་པའི་དབུས། །མདུན་གྱི་ནམ་མཁར་པད་ཉི་འཇིགས་དུས་སྟེང་། །ངོ་བོ་སྲས་བཅས་རྒྱལ་བའི་ཡེ་ཤེས་དངོས། །རིགས་བརྒྱའི་ཁྱབ་བདག་རྩ་བའི་བླ་མ་མཆོག །སྐལ་བཟང་བསྟན་པའི་ཉི་མ་དཔལ་བཟང་པོ། །རྣམ་པ་རྒྱལ་ཀུན་སྐྱེད་ཡུམ་རྣལ་འབྱོར་མ། །དམར་གསལ་ཞལ་གཅིག་ཕྱག་གཉིས་སྤྱན་གསུམ་མཛེས། །ཕྱག་གཉིས་གྲི་ཐོད་ཕྲག་གཡོན་ཁ་ཊྭཱཾ་འཆང་། །དབུ་སྐྲ་གནག་སྣུམ་རུས་པའི་ཕྱག་རྒྱས་སྤྲས། །ཡེ་ཤེས་མེ་དཔུང་བརྐྱང་བསྐུམ་དོར་སྟབས་བཞེངས། །ཕུང་ཁམས་སྐྱེ་མཆེད་གདན་གསུམ་ཚང་བའི་ལྷ། །སྒྱུ་འཕྲུལ་དྲ་བ་ཆེན་པོའི་གནས་གསུམ་དུ། །རྡོ་རྗེའི་ཡི་གེས་མཚན་པའི་འོད་ཟེར་གྱིས། །ཡེ་ཤེས་སེམས་དཔའ་བཛྲ་ས་མཱ་ཛཿ ཛཿཧཱུྃ་བྃ་ཧོཿདམ་ཡེ་དབྱེར་མེད་གྱུར། །བདག་དང་མཁའ་མཉམ་འགྲོ་བ་མ་ལུས་ཀུན། །ཞིང་རྡུལ་མཉམ་པའི་ལུས་སུ་རབ་སྤྲུལ་ནས། །སྒོ་གསུམ་གུས་པ་ཆེན་པོས་ཕྱག་འཚལ་ཞིང་། །ཕྱི་ནང་གསང་བ་མཆོག་གི་མཆོད་སྤྲིན་དང་། །ལུས་དང་ལོངས་སྤྱོད་ལྟོས་པ་མེད་པར་འབུལ། །སྡིག་ལྟུང་ཀུན་བཤགས་དགེ་ལ་རྗེས་ཡི་རངས། །ཆོས་འཁོར་བསྐོར་བཞིན་བསྐལ་བརྒྱར་བཞུགས་གསོལ་འདེབས། །བསོད་ནམས་དངོས་ཀུན་བྱང་ཆུབ་ཆེན་པོར་བསྔོ། །འགྲོ་རྣམས་མཁའ་སྤྱོད་དངོས་གྲུབ་མཆོག་ཐོབ་ཤོག །ཅེས་ཡན་ལག་བདུན་པ་དང་། མཎྜལ་རྒྱས་བསྡུས་གང་རིགས་འབུལ། ཕུར་ཚུགས་སུ་གསོལ་བ་འདེབས་པ་ནི། སྐལ༷་བཟ༷ང་གདུལ་བྱ་རྒྱ་མཚོའི་མགོན་གཅིག་པུ། །བསྟན༷་པའི༷་ཉི༷་མ༷་འཇིགས་མེད་སྨྲ་བའི་དབང་། །མཁྱེན་རབ་ཟབ་མོས་ངེས་དོན་བསྟན་པ་འཛིན། །སྐྱབས་མཆོག་རྗེ་བཙུན་དབང་མོར་གསོལ་བ་འདེབས། །འཇ༷མ་པའི་དབྱང༷ས་སོགས་སྲས་བཅས་རྒྱལ་ཀུན་གྱི། །མཁྱེ༷ན་བརྩེ༷་ནུས་པའི༷་ཡེ་ཤེས་གཅིག་བསྡུས་པ། །མཁས་གྲུབ་དབ༷ང་པོ༷་རིགས་ཀུན་ཁྱབ་བདག་ཆེ། །རྩ་བའི་བླ་མའི་ཞབས་ལ་གསོལ་བ་འདེབས། །གསོལ་བ་འདེབས་སོ་རིགས་བདག་རྣལ་འབྱོར་མ། །བྱིན་གྱིས་རློབས་ཤིག་རྗེ་བཙུན་མཁྱེན་བརྩེའི་དབང་། །ཐུགས་རྗེས་ཟུངས་ཤིག་ཡེ་ཤེས་སྣང་བ་ཡིས། །མཁའ་སྤྱོད་ཆེན་པོའི་གྲོང་དུ་དབུགས་དབྱུང་གསོལ། །ཞེས་ཅི་ནུས་དང་། སྤྲོ་ན་ཁོ་བོས་བྱས་པའི་ཐུགས་དམ་གནད་བསྐུལ་གསོལ་འདེབས་བྱ། སྔགས་བཟླ་བར་སྤྲོ་ན། ཨོཾ་གསུམ་མ་ཅི་ནུས་དང་། ཨོཾ་ཨཱཿགུ་རུ་བཛྲ་ཡོ་གི་ནཱི་སུ་ཀལྤ་ཤཱ་ས་ན་སཱུ་རྱ་ཛྙཱ་ན་སརྦ་སིདྡྷི་ཧཱུྃ། ཞེས་པའང་ཅི་རིགས་པར་བཟླའོ། །རྗེ་བཙུན་བླ་མའི་གནས་གསུམ་འབྲུ་གསུམ་ལས། །འོད་ཟེར་བདུད་རྩི་རིམ་དང་ཅིག་ཅར་བྱུང་། །རང་ལ་ཐིམ་པས་དབང་བཞིའི་ཡེ་ཤེས་སྨིན། །སྒྲིབ་དག་སྐུ་བཞི་ཐོབ་པའི་ནུས་ལྡན་གྱུར། །མཐར་ནི་བླ་མ་འོད་ཞུ་རང་ལ་ཐིམ། །ཐུགས་ཡིད་གཅིག་འདྲེས་བྱིན་རླབས་རྒྱུད་ལ་ཞུགས། །སྟོང་གསལ་འཛིན་མེད་བློ་འདས་འོད་གསལ་ངང་། །གནས་ལུགས་མ་བཅོས་གཉུག་མའི་རང་ཞལ་བལྟ། །ཞེས་དབང་བླང་ཞིང་དེ་ཁོ་ན་ཉིད་ལ་མཉམ་པར་བཞག །ཐུན་ལས་ལྡང་བ་ན། དགེ་བ་འདི་ཡིས་བདག་སོགས་སེམས་ཅན་ཀུན། །བླ་མ་རྡོ་རྗེ་བཙུན་མོས་རྗེས་བཟུང་སྟེ། །གནས་སྐབས་མཐར་ཐུག་རྒུད་པ་ཀུན་ཞི་ཞིང་། །གྲུབ་གཉིས་དགའ་སྟོན་རྒྱས་པའི་བཀྲ་ཤིས་ཤོག །ཅེས་སོགས་བསྔོ་སྨོན་བཀྲ་ཤིས་གང་ཤེས་བྱའོ། །ཞེས་པའང་དད་ལྡན་དགེ་བའི་བཤེས་གཉེན་གུ་ཎ་ལཀྵྨཱིའི་བཞེད་ངོར་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རབ་ཚེས་ས་ཕོ་སྟག་ལོའི་ཆུ་སྟོད་ཟླ་བའི་དཀར་ཕྱོགས་མཁའ་འགྲོ་མ་འདུ་བའི་ཚེས་བཅུའི་དུས་བཟང་པོར་བྲིས་པ་དོན་དང་ལྡན་པར་གྱུར་ཅིག ། ༈

[edit]

zab lam bla ma'i rnal 'byor mkha' spyod grub ster/ @#/_/zab lam bla ma'i rnal 'byor mkha' spyod grub ster zhes bya ba/__na mo gu ra be/__zab lam bla ma'i rnal 'byor bsgom par 'dod pas skyabs sems sngon du 'gro bas/__oM swa b+hA ba sogs/__gdod nas stong dang rten 'byung dbyer med pa'i/__/rnam rol gnas yul dag pa mkha' spyod zhing /__/yid 'phrog mchod sprin rgya mtsho 'khrigs pa'i dbus/__/mdun gyi nam mkhar pad nyi 'jigs dus steng /__/ngo bo sras bcas rgyal ba'i ye shes dngos/__/rigs brgya'i khyab bdag rtsa ba'i bla ma mchog__/skal bzang bstan pa'i nyi ma dpal bzang po/__/rnam pa rgyal kun skyed yum rnal 'byor ma/__/dmar gsal zhal gcig phyag gnyis spyan gsum mdzes/__/phyag gnyis gri thod phrag g.yon kha T+wAM 'chang /__/dbu skra gnag snum rus pa'i phyag rgyas spras/__/ye shes me dpung brkyang bskum dor stabs bzhengs/__/phung khams skye mched gdan gsum tshang ba'i lha/__/sgyu 'phrul dra ba chen po'i gnas gsum du/___/rdo rje'i yi ges mtshan pa'i 'od zer gyis/__/ye shes sems dpa' badz+ra sa mA dzaH__dzaHhU~M ba~M hoHdam ye dbyer med gyur/__/bdag dang mkha' mnyam 'gro ba ma lus kun/__/zhing rdul mnyam pa'i lus su rab sprul nas/__/sgo gsum gus pa chen pos phyag 'tshal zhing /_/phyi nang gsang ba mchog gi mchod sprin dang /__/lus dang longs spyod ltos pa med par 'bul/__/sdig ltung kun bshags dge la rjes yi rangs/__/chos 'khor bskor bzhin bskal brgyar bzhugs gsol 'debs/__/bsod nams dngos kun byang chub chen por bsngo/__/'gro rnams mkha' spyod dngos grub mchog thob shog__/ces yan lag bdun pa dang /__maN+Dal rgyas bsdus gang rigs 'bul/__phur tshugs su gsol ba 'debs pa ni/__skalaX bzaXng gdul bya rgya mtsho'i mgon gcig pu/__/bstanaX pa'iX nyiX maX 'jigs med smra ba'i dbang /__/mkhyen rab zab mos nges don bstan pa 'dzin/__/skyabs mchog rje btsun dbang mor gsol ba 'debs/__/'jaXm pa'i dbyangaXs sogs sras bcas rgyal kun gyi/__/mkhyeXn brtseX nus pa'iX ye shes gcig bsdus pa/__/mkhas grub dbaXng poX rigs kun khyab bdag che/__/rtsa ba'i bla ma'i zhabs la gsol ba 'debs/__/gsol ba 'debs so rigs bdag rnal 'byor ma/__/byin gyis rlobs shig rje btsun mkhyen brtse'i dbang /__/thugs rjes zungs shig ye shes snang ba yis/__/mkha' spyod chen po'i grong du dbugs dbyung gsol/__/zhes ci nus dang /__spro na kho bos byas pa'i thugs dam gnad bskul gsol 'debs bya/__sngags bzla bar spro na/__oM gsum ma ci nus dang /__oM AHgu ru badz+ra yo gi nI su kalpa shA sa na sU r+ya dz+nyA na sarba sid+d+hi hU~M/__zhes pa'ang ci rigs par bzla'o/__/rje btsun bla ma'i gnas gsum 'bru gsum las/__/'od zer bdud rtsi rim dang cig car byung /__/rang la thim pas dbang bzhi'i ye shes smin/__/sgrib dag sku bzhi thob pa'i nus ldan gyur/__/mthar ni bla ma 'od zhu rang la thim/__/thugs yid gcig 'dres byin rlabs rgyud la zhugs/__/stong gsal 'dzin med blo 'das 'od gsal ngang /__/gnas lugs ma bcos gnyug ma'i rang zhal blta/__/zhes dbang blang zhing de kho na nyid la mnyam par bzhag__/thun las ldang ba na/__dge ba 'di yis bdag sogs sems can kun/__/bla ma rdo rje btsun mos rjes bzung ste/__/gnas skabs mthar thug rgud pa kun zhi zhing /__/grub gnyis dga' ston rgyas pa'i bkra shis shog_/ces sogs bsngo smon bkra shis gang shes bya'o/__/zhes pa'ang dad ldan dge ba'i bshes gnyen gu Na lak+Sh+mI'i bzhed ngor 'jam dbyangs bla ma dgyes pa'i 'bangs mkhyen brtse'i dbang pos rab tshes sa pho stag lo'i chu stod zla ba'i dkar phyogs mkha' 'gro ma 'du ba'i tshes bcu'i dus bzang por bris pa don dang ldan par gyur cig__/__!