JKW-KABUM-21-ZHA-020

From Khyentse Lineage - A Tsadra Foundation Project

གཏེར་ཆེན་པོའི་བུམ་པ་བཟང་པོ་སྒྲུབ་ཚུལ་སྤྱི་ལ་འཇུག་པ་ཤིན་ཏུ་མདོར་བསྡུས་འདོད་རྒུའི་ཆར་འབེབས།
Wylie title gter chen po'i bum pa bzang po sgrub tshul spyi la 'jug pa shin tu mdor bsdus 'dod rgu'i char 'bebs JKW-KABUM-21-ZHA-020.pdf
Location mkhyen brtse'i bka' 'bum
Volume 21, sde tshan 20, Pages 527-539 (Folios 1a to 7a4)
Author འཇམ་དབྱངས་མཁྱེན་བརྩེའི་དབང་པོ་
Less details More details
Citation 'jam dbyangs mkhyen brtse'i dbang po. gter chen po'i bum pa bzang po sgrub tshul spyi la 'jug pa shin tu mdor bsdus 'dod rgu'i char 'bebs. In 'jam dbyangs mkhyen brtse'i dbang po'i bka' 'bum, Vol. 21: 527-539. Khams sde dge rdzong sar dgon: Rdzong sar blo gros phun tshogs, 2020.
Genre Vase Consecration - bum sgrub  ·  Activity Practices - las tshogs
RTZ In the Rinchen Terdzö: https://rtz.tsadra.org/index.php/Terdzo-TSHI-016
Colophon

།ཞེས་པའང་ཉེར་མཁོའི་ཆེད་དུ་མཉྫུ་གྷོ་ཥས་ལྷག་པའི་བསམ་པས་བྲིས་པ་སྲིད་ཞིའི་དགེ་མཚན་དུས་རྟག་ཏུ་རྒྱས་པར་གྱུར་ཅིག། །།སརྦ་དཱ་མངྒ་ལཾ་བྷ་བ་ཏུ།།

zhes pa'ang nyer mkho'i ched du many+dzu g+ho Shas lhag pa'i bsam pas bris pa srid zhi'i dge mtshan dus rtag tu rgyas par gyur cig/__//sarba dA mang+ga laM b+ha ba tu//

":Property:textsubnumber|textsubnumber" can not be assigned to a declared number type with value 1.

[edit]
༄༅། །གཏེར་ཆེན་པོའི་བུམ་པ་བཟང་པོ་སྒྲུབ་ཚུལ་སྤྱི་ལ་འཇུག་པ་ཤིན་ཏུ་མདོར་བསྡུས་འདོད་རྒུའི་ཆར་འབེབས་ཞེས་བྱ་བ་བཞུགས་སོ།། །།

ཨོཾ་སྭ་སྟི། རྒྱུད་སྡེ་རྣམས་སུ་གཏེར་ཆེན་པོའི་བུམ་པ་སྒྲུབ་ཚུལ་དང་། གཞུག་པའི་ཚུལ་ཇི་སྙེད་ཅིག་གསུངས་ཤིང་། ནོར་ལྷ་རྣམས་ཀྱི་བྲིས་སྐུ་དང་གཟུངས་སྔགས་ཀྱང་རིན་པོ་ཆེ་དང་འབྲུ་སྨན་སོགས་དཔལ་ཅན་གྱི་རྫས་དང་བཅས་ཏེ་བང་མཛོད་དུ་སྦ་བར་རྟོགས་པ་དང་མན་ངག་ལས་གསུངས་པ་དག་ཕན་ཚུན་སྦྱར་ཏེ་ཛམྦྷ་ལ་རིགས་ལྔ་དང་། ལྷ་མོ་བརྟན་མ། ཀླུ་ཆེན་དགུ་སོགས་ཀྱི་གཏེར་བུམ་སྒྲུབ་པའི་ཚུལ་ཇི་སྙེད་པ་ཞིག་བླ་མ་རྣམས་ཀྱིས་ཕྱག་ལེན་དུ་མཛད་པ་དམིགས་བསལ་སོ་སོའི་གཞུང་ནས་འབྱུང་བ་ལྟར་བྱ། རང་གཞུང་བུམ་པ་སྒྲུབ་ཚུལ་ཟུར་དུ་མེད་པའི་སྤྱི་ཁྱབ་ལ། ནོར་བུམ་རིགས་རྣམས་ཆེ་ཆུང་བྲེ་གང་ཤོང་བ་ལས་མི་ཆུང་བའི་རིན་པོ་ཆེའམ་རྫའི་བུམ་པ་གཙང་མ་ལྷ་སོ་སོའི་སྐུ་མདོག་དང་མཐུན་པའམ། དཀར་པོའི་ཚོན་གྱིས་ལེགས་པར་བསྒྱུར་བ་ལ་རྒྱས་པར་ཁོར་ཡུག་ཏུ་བཀྲ་ཤིས་རྟགས་བརྒྱད་སོགས་བྲི། བསྡུ་ན་མདུན་རྟགས་སུ་ནོར་བུ་དང་ས་བོན་ཙམ་བྲིས་པའི་ནང་དམིགས་བསལ་རང་རང་གི་གཞུང་ནས་འབྱུང་བ་ལྟར་དང་། སྤྱིར་བཏང་ཙམ་ལ་ཐིལ་དུ་ས་སྣ་ཆུ་སྣ་བྱིན་ཅན་བཀྲམ་པའི་སྟེང་། བྱ་རྒྱུད་ལུགས་ཀྱི་བུམ་རྫས་ཉེར་ལྔ་ཁྲོལ་བུའམ་རིལ་བུ། རིན་པོ་ཆེ་སྣ་ཚོགས། དུག་རིགས་མ་གཏོགས་པའི་སྨན་སྣ། འབྲུ་དཀར་རིགས་སྣ་ཚོགས། དར་ཟབ་དང་གོས་ཆེན། དཀར་གསུམ་མངར་གསུམ་སོགས་བཟའ་བཏུང་གི་ཕུད་གཙང་མ། རྟ་ཕྱུགས་ཀྱི་སྤུ་སྣ། བཀྲ་ཤིས་པའི་ཐབ་དང་ཁང་ས། ཞིང་ས་བཟང་པོའི་ས་སོགས་དཔལ་ཅན་གྱི་རྫས་དམ་ཚིག་མི་གཅིག་པས་མཚོན་སེལ་ཅན་གྱི་ལག་ནས་བྱུང་བ་མ་ཡིན་པས་ཕྱུར་བུར་བཀང་བའི་དབུས་སུ་རང་རང་གི་སྐུ་གཟུགས་དང་། སྔགས་བྱང་འདོད་གསོལ་དང་བཅས། སྲོག་འཁོར་རིགས་གང་ཡོད་རྣམས་ལག་ཚགས་དམ་པར་གཞུག །ཁ་འབྲུ་སྨན་བཟང་ཤིང་གི་ཕྱེ་མ་སོགས་ཀྱིས་དགང་། རས་དཀར་པོས་བཅད། སྤྲོ་ན་འཁོར་ལོ་རྩིབས་བརྒྱད་དམ། རྡོ་རྗེ་རྒྱ་གྲམ་སོགས་བྲི། ཚོན་སྐུད་ཀྱིས་མགུལ་བ་བཅིངས་ལ་རྒྱབ་ཕྱོགས་སུ་སྒྲུབ་པ་པོའམ་སྦྱིན་བདག་གི་རྟགས་ཀྱིས་རྒྱས་གདབ། ས་བདག་དང་། ཁྱད་པར་ཀླུ་བུམ་རིགས་རྣམས་སྤྱིན་མེད་པའི་བག་ཕྱེ་སོགས་ཀྱི་དམ་དང་བཅས་དཀར་རྩི་བྱུག །མདུན་རྟགས་ནཱྃ་བྲི། ནང་གི་ཐིལ་དུ་ས་སྣ་ཆུ་སྣ་གཙང་མ་དཀྲམ། གླ་རྩི་སོགས་ཀླུ་ལ་གནོད་པའི་དྲིས་མ་ཕོག་པའི་འབྲུ་སྣ་གཙང་མ་སྤང་སྤོས་ཀྱིས་བུངས་བསྐྱེད་པའི་ཀླུ་སྨན་སོགས་ཀྱིས་བཀང་བའི་དབུས་སུ་རང་རང་གི་སྐུ་དང་སྔགས་བྱང་སོགས་གང་རིགས་གཞུག །ཁ་རས་དཀར་གཙང་མས་བཅད་ཅིང་མགུལ་ཆིངས་བྱ། དེ་ནས་གཞི་གཙང་མའི་སྟེང་དུ་བཀོད་ལ། མཐར་རང་རང་གི་གཞུང་ལས་བཤད་པའི་གཏོར་མ་དང་མཆོད་པ་བཤམ། བདག་བསྐྱེད་ནོར་བུམ་རིགས་ཕལ་ཆེར་ལ་རང་རང་གི་བདག་བསྐྱེད་དམ་ཕྱག་རྡོར་དང་། བརྟན་མ་དང་ཀླུ་བུམ་ལ་ཀླུ་དབང་རྒྱལ་པོའམ། སེང་གེ་སྒྲ་སོགས་གང་འོས་བཟླས་པ་དང་བཅས་པ་བྱ། ལས་བུམ་རྒྱས་བསྡུས་གང་རིགས་ཀྱིས་བསྒྲུབ་པའམ། ཨ་མྲྀ་ཏས་བསང་། སྭ་བྷཱ་བས་སྦྱང་། སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ལྟོ་བ་ལྡིར་བ། ཞབས་ཞུམ་པ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ལྷ་རྫས་ཀྱི་གོས་ཀྱིས་མགུལ་བ་བཅིངས་པ། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་དབུས་སུ་ཟླ་བ་ལ་སྔགས་ཀྱི་ཕྲེང་བས་མཚན་པ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེའི་བྱིན་རླབས་ནུས་མཐུ་ཐམས་ཅད་བསྡུས་ནས་སྔགས་ཕྲེང་ལ་ཐིམ། དེ་ལས་བདུད་རྩིའི་རྒྱུན་བབས་པས་བུམ་པ་གང་བར་གྱུར། ཅེས་བརྗོད་ཅིང་། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། ཅེས་བཟླས་མཐར། སྔགས་ཕྲེང་གདན་དང་བཅས་པ་འོད་དུ་ཞུ་བ་ལས་བུམ་པའི་ཆུ་ནུས་པ་དང་ལྡན་པར་གྱུར། ཅེས་བརྗོད་ཅིང་བསམ། ཡང་ན་བསང་ཆུ། ཨ་མྲྀ་ཏའི་སྔགས་ཀྱིས་བརླབ། སྤྲོ་ན་སྦྱང་ཁྲུས་རྒྱས་པར་བྱ། དེ་ཙམ་མི་ནུས་ན། རང་གི་ཐུགས་ཀ་ནས་ཁྲོ་བོ་བདུད་རྩི་འཁྱིལ་བའི་ཚོགས་དཔག་ཏུ་མེད་པ་སྤྲོས་ཏེ་བགེགས་རྣམས་རྒྱང་རིང་དུ་བསྐྲད་པར་གྱུར་པའི་མོས་པས་ལས་སྔགས་དང་སུམྦྷ་བརྗོད་ཅིང་། གུ་གུལ་གྱིས་བདུག །ཡུངས་ཀར་གྱིས་བྲབ། ཇི་ལྟར་བལྟམས་པ་སོགས་སྔགས་དང་བཅས་པའི་ཁྲུས་གསོལ་མདོར་བསྡུས་དང་། དེ་དག་སྐུ་ལ་སོགས་སྐུ་ཕྱི་བ་རྣམས་བྱ་ཞིང་། བཀྲ་ཤིས་ཀྱི་ཚིགས་བཅད་དང་བཅས་མེ་ཏོག་འཐོར། དེ་ནས་མདུན་རྟེན། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ་ཀྱིས་བསང་། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅་ཧཾ་གིས་སྦྱང་། སྟོང་པའི་ངང་ལས་བུམ་པའི་བུམ་པ་གཅིག་ལས་མེད་ན། གྲངས་དང་མཉམ་པའི་སྟོང་པའི་ངང་ལས་པྃ་ལས་པདྨ་དང་སོགས་སྦྲེལ་ཞིང་། འོག་གི་ཚིག་ཀྱང་ཡངས་ཤིང་རྒྱ་ཆེ་བའི་ནང་དུ། ཞེས་བསྒྱུར་རོ། །པྃ་ལས་པདྨ་དང་། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། རིན་པོ་ཆེ་དང་འབྲུ་བཅུད་ཟས་ནོར་ཚོགས་ཀྱིས་ཡོངས་སུ་གང་བར་གྱུར། ཅེས་བརྗོད་ཅིང་བསམས་ལ། ཆོས་ཉིད་རྣམ་པར་དག་པའི་སྔགས་རྒྱས་སྤེལ་བ་ནི། ཐལ་མོ་ཁོང་སྟོང་དུ་སྙིང་གར་བཞག་ལ། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅་ཧཾ། ཡོ་བྱད་མ་དག་པ་རྣམས་སྦྱངས་ཏེ་སྐྱོན་ཐམས་ཅད་དང་བྲལ་བར་གྱུར། ཅེས་བརྗོད་ཅིང་བསམ། དེ་བཞིན་དུ། ནམ་མཁའ་མཛོད་ཀྱི་སྔགས་རྒྱས་སྤེལ་བ་ནི། ཐལ་མོ་ཁོང་སྟོང་དུ་སྦྱར་བའི་ཚིགས་བར་པ་རྣམས་བཅགས་པ་དཔྲལ་བར་བཞག་ལ། ན་མསྶརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། མགྲོན་སོ་སོའི་མོས་པ་དང་མཐུན་པའི་ཡོ་བྱད་ཀྱིས་ནམ་མཁའི་ཁམས་ཁྱབ་པར་གྱུར། བདུད་རྩི་འཁྱིལ་བའི་སྔགས་རྒྱས་བསྒྱུར་བ་ནི། ཐལ་མོ་སྦྱར་བའི་ཁ་གྱེན་དུ་ཕྱེ་སྟེ་མཐེ་བོང་བསྣོལ་ལ། ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ། རྫས་རྣམས་མགྲོན་སོ་སོའི་སྡུག་བསྔལ་མཐའ་དག་ཞི་བར་བྱེད་པའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། རྒྱ་ཆེན་ཤུགས་ལྡན་འོད་ཀྱི་སྔགས་རྒྱས་སྤྱོད་པར་དབང་བ་ནི། གཡས་ཁུ་ཚུར་བཅངས་པའི་མཛུབ་མོ་བསྒྲེངས། གཡོན་རྡོ་རྗེ་ཁུ་ཚུར་སྙིང་གར་བཞག་ལ། ན་མསྶརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུྃ། འཕགས་པ་རྣམས་ཀྱི་སྤྱན་སྔར་མཆོད་པའི་སྤྲིན་མཐའ་ཡས་པ་དང་། སེམས་ཅན་རྣམས་ཀྱི་དབང་པོ་ལྔའི་སྤྱོད་ཡུལ་དུ་འདོད་པའི་ལོངས་སྤྱོད་ཟད་མི་ཤེས་པ་འབྱུང་བར་གྱུར། ཡེ་ཤེས་སྐར་མདའི་སྔགས་རྒྱས་ཐོབ་པར་བྱ་བ་ནི། གཡས་ཁུ་ཚུར་བཅངས་པ་སྙིང་གར་བཞག །གཡོན་མཐེ་བོང་ལག་པའི་མཐིལ་དུ་བཞག་པའི་མཆོག་སྦྱིན་གྱི་ཕྱག་རྒྱ་བྱས་ལ། ཨོཾ་ཛྙཱ་ན་ཨ་ཝ་ལོ་ཀི་ཏེ་ན་མསྶ་མནྟ་སྥ་ར་ཎ་རསྨི་བྷ་བ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲྀ་ད་ཡ་ཛྭ་ལ་ནི་སྭཱ་ཧཱ། ལུས་ཞིང་རྡུལ་གྱི་གྲངས་དང་མཉམ་པས་འཕགས་པ་རྣམས་ལ་ཕུལ་བས་མཉེས་ཤིང་སེམས་ཅན་རྣམས་ཡོ་བྱད་རྒྱལ་ཕམ་དང་རྩོད་པ་མེད་པར་སོ་སོའི་མོས་པ་བཞིན་ཐོབ་པར་གྱུར། དབང་བསྒྱུར་འཁོར་ལོའམ། ལྷ་མགོན་སྤྱིའི་སྔགས་རྒྱས་དབང་དུ་བསྒྱུར་བ་ནི། སོར་མོ་ནང་དུ་བསྣོལ་བའི་རྡོ་རྗེ་བསྡམས། མཐེ་བོང་གཉིས་གཤིབས་ཏེ་བསྒྲེངས་ལ། ན་མསྶ་མནྟ་བུདྡྷཱ་ནཱཾ་གྲ་ཧེ་ཤྭ་རི་པྲ་པཉྩ་ཏི་མ་ཧཱ་ས་མ་ཡ་སྭཱ་ཧཱ། མགྲོན་ཐམས་ཅད་ཀྱང་དམ་ཚིག་གི་དབང་གིས་བདག་ལ་འགོ་ཞིང་ཕན་པ་དང་བདེ་བའི་ཕྲིན་ལས་འབའ་ཞིག་བསྒྲུབས་པར་གྱུར། ཕྱག་རྒྱ་རྣམས་ཕྱོགས་བཅུར་བསྐོར་ཞིང་སྔགས་རྣམས་ལན་གསུམ་ལ་སོགས་པ་བརྗོད། མགོན་དཀར་སོགས་ཀྱི་སྐབས་སུ་ཚིག་ལྷུག་མེད་པའི་སྔགས་རྐྱང་པ་བརྗོད་པར་གསུངས་པས་དེ་ལྟར་བྱ། གང་ལྟར་ཡང་བུམ་པའི་ནང་གི་འབྲུ་སྨན་རིན་པོ་ཆེ་སོགས་ལྷ་སོ་སོའི་ཐུགས་དང་མཐུན་པའི་ཡོ་བྱད་ཟད་མི་ཤེས་པའི་གཏེར་དང་། ལོངས་སྤྱོད་དང་། བདུད་རྩིའི་རྒྱ་མཚོ་ཆེན་པོར་བྱིན་གྱིས་བརླབས་ནས། བྲིས་སྐུ་དང་སྔགས་བྱང་སོགས་ལྷར་བསྐྱེད་པ་ནི། དེ་ལྟ་བུའི་བུམ་པ་རྣམས་ཀྱི་སྟོད་ཀྱི་ཆར་དབུས་སུ་པྃ་ལས་པདྨ་དང་། ཞེས་སོགས་རང་རང་གི་མངོན་རྟོགས་ལྟར་དམ་ཚིག་པ་བསྐྱེད། གནས་གསུམ་བྱིན་གྱིས་བརླབ། ཡེ་ཤེས་པ་གཞུག །དབང་བསྐུར་རྒྱས་གདབ་རྒྱས་བསྡུས་གང་རིགས་དང་། མཆོད་པ་བསང་སྦྱང་། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ། དེ་བཞིན་དུ། པཱ་དྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་བིདྱཱ། ཤབྡ་ཨཱཿཧཱུྃ་གི་བར་སྦྱར་བས་བརླབ། མཚན་སྔགས་ཀྱི་མཐར། ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ་ནས། ཤབྡའི་བར་སྦྱར་བས་མཆོད། རང་གཞུང་གི་བསྟོད་པ་རྒྱས་བསྡུས་གང་རིགས་ཀྱིས་བསྟོད། ཐུགས་རྒྱུད་བསྐུལ་བར་དམིགས་ཏེ་བཟླས་པ་གཙོ་བོར་བྱ། འདིའི་སྐབས་བུམ་པ་ལ་གཟུངས་ཐག་བཏགས་ཏེ་བཟུང་ཡང་ལེགས། བཟླས་དམིགས་སོ་སོའི་གཞུང་ནས་འབྱུང་བ་ལྟར་དང་སྤྱིར་བཏང་ནོར་བུམ་ལ། རང་གི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་རྒྱུད་བསྐུལ། དེའི་ཐུགས་ཀ་ནས་འོད་ཟེར་འཕྲོས། འཕགས་པ་མཆོད། སེམས་ཅན་ཐམས་ཅད་དབུལ་ཕོངས་ཀྱི་སྡུག་བསྔལ་དང་བྲལ་བར་བྱས། སྣོད་བཅུད་སྲིད་ཞིའི་དགེ་མཚན་ལེགས་ཚོགས་དཔལ་ཡོན་དྭང་བཅུད་མ་ལུས་པ་བསྡུས་ཏེ་མདུན་གྱི་རྟེན་རྫས་རྣམས་ལ་ཐིམ་པས་འདོད་རྒུ་ཐམས་ཅད་ཡིད་བཞིན་དུ་འབྱུང་བའི་གཏེར་ཆེན་པོའི་བུམ་པ་བཟང་པོར་གྱུར་པར་བསམས་ལ་བཟླས་པ་བྱ། བརྟན་མ་ལ། རང་གི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་རྒྱུད་བསྐུལ། དེའི་ཐུགས་ཀ་ནས་འོད་ཟེར་འཕྲོས། དཔག་ཚད་བརྒྱད་ཁྲི་ཚུན་ཆད་ཀྱི་སྣོད་བཅུད་ཀྱི་རྒུད་པ་ཐམས་ཅད་བསལ། དཔལ་དང་གཟི་བྱིན་བསྐྱེད། བཅུད་དང་དྭང་མ་ཐམས་ཅད་བསྡུས་ཏེ་མདུན་གྱི་རྟེན་རྫས་རྣམས་ལ་ཐིམ་པས་ས་བཅུད་དང་དགེ་མཚན་ཐམས་ཅད་འཕེལ་བའི་ནུས་པ་དང་ལྡན་པར་གྱུར་པའི་མོས་པས་བཟླ། ཀླུ་བུམ་སྐབས། རང་གི་ཐུགས་ཀ་ནས་འོད་ཟེར་བདུད་རྩིའི་རང་བཞིན་ཅན་འཕྲོས། མདུན་བསྐྱེད་འཁོར་དང་བཅས་པ་ལ་ཕོག་པས་ཟག་པ་མེད་པའི་བདེ་བ་ཁྱད་པར་ཅན་བསྐྱེད། དེའི་ཐུགས་ཀ་ནས་འོད་ཟེར་འཕྲོས། བརྟན་གཡོའི་དྭང་བཅུད་མ་ལུས་པ་བསྡུས་ནས་མདུན་གྱི་རྟེན་རྫས་རྣམས་ལ་ཐིམ་པས་སྣོད་བཅུད་ཀྱི་དཔལ་འབྱོར་ཕུན་སུམ་ཚོགས་པ་ཐམས་ཅད་སྐྱེད་པའི་ནུས་པ་དང་ལྡན་པར་གྱུར་པའི་མོས་པས་བཟླའོ། །ཐུན་མཐར་མཆོད་བསྟོད་རང་རང་གི་གཞུང་ལྟར་དང་། འདོད་གསོལ་སོ་སོའི་གཞུང་ལྟར་རམ། ནོར་བུམ་ལ། མགོན་པོ་ཛམྦྷ་ལས་བདག་དང་སེམས་ཅན་ཐམས་ཅད་ལ་ལོག་པའི་འཚོ་བ་མ་ཡིན་པའི་ཆོས་དང་མཐུན་པའི་འབྱོར་བ་ཕུན་སུམ་ཚོགས་པ་སྩལ་དུ་གསོལ། །ཞེས་པ་ལྟ་བུ་དང་། བརྟན་མ་ལ། སའི་ལྷ་མོས་བདག་དང་སྦྱིན་པའི་བདག་པོ་ལ་ལོངས་སྤྱོད་ཕུན་སུམ་ཚོགས་པ་ཐམས་ཅད་སྩལ་ཞིང་། ཡུལ་ཕྱོགས་འདིར་བཀྲ་ཤིས་པ་དང་། བདེ་ལེགས་དཔལ་འབྱོར་གྱི་དངོས་གྲུབ་རྒྱུན་མི་ཆད་པར་འབྱུང་བར་མཛད་དུ་གསོལ། ཞེས་དང་། ཀླུ་ལ། ཀླུའི་རྒྱལ་པོ་འཁོར་དང་བཅས་པས་བདག་དང་སྦྱིན་པའི་བདག་པོ་ལ་སོགས་གོང་ལྟར་བྱ། གཏོར་མ་རང་རང་གི་གཞུང་ལྟར་རམ། སྤྱི་ཁྱབ་ལ་བསང་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་ཞུ་བ་ལས་བྱུང་བའི་གཏོར་མ་ལྷའི་བདུད་རྩི་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་གིས་བརླབ། མཚན་སྔགས་སམ་སྙིང་པོའི་མཐར། ཨ་ཀཱ་རོ་བཏགས་པས་དབུལ། མཆོད་བསྟོད་འདོད་གསོལ་བྱ། ཡི་གེ་བརྒྱ་པ་ལན་གསུམ་དང་། མ་འབྱོར་པ་དང་སོགས་ཀྱིས་ནོངས་པ་བཤགས། རྟེན་འབྲེལ་སྙིང་པོ་བཟླས་པའི་མེ་ཏོག་ཐལ་མོ་སྦྱར་བའི་བར་དུ་ཐོགས་ཏེ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་སྲིད་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པའི་ས་ལ་མ་བཞག་གི་བར་དུ་རྒྱལ་བ་རྣམས་མྱ་ངན་ལས་མི་འདའ་བར་བརྟན་པར་བཞུགས་སུ་གསོལ། ཁྱད་པར་དུ་གཏེར་ཆེན་པོའི་བུམ་པ་བཟང་པོ་འདི་རྣམས་ལ་བསྐྱེད་ཅིང་སྤྱན་དྲངས་པའི་ལྷ་ཚོགས་རྣམས་ཇི་སྲིད་འབྱུང་བ་བཞིའི་གནོད་པས་མ་ཞིག་གི་བར་དུ་བརྟན་པར་བཞུགས་སུ་གསོལ། བརྟན་པར་བཞུགས་ནས་ཀྱང་བདག་དང་སེམས་ཅན་ཐམས་ཅད་ལ་ལོག་པའི་འཚོ་བ་མ་ཡིན་པའི་ཆོས་དང་མཐུན་པའི་འབྱོར་བ་ཕུན་སུམ་ཚོགས་པ་སྩལ་དུ་གསོལ། །ཞེས་སམ། བརྟན་པར་བཞུགས་ནས་ཀྱང་བདག་དང་སྦྱིན་པའི་བདག་པོ་ལ་ལོངས་སྤྱོད་ཕུན་སུམ་ཚོགས་པ་ཐམས་ཅད་སྩལ་ཞིང་། ཡུལ་ཕྱོགས་འདིར་བཀྲ་ཤིས་པ་དང་། བདེ་ལེགས་དཔལ་འབྱོར་གྱི་དངོས་གྲུབ་རྒྱུན་མི་ཆད་པར་འབྱུང་བར་མཛུད་དུ་གསོལ། ཞེས་དང་། ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། མང་ཏུ་བརྗོད་ཅིང་མེ་ཏོག་འཐོར། རང་གི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། སྙིང་གར་ཧཱུྃ་སྔོན་པོ། དགེ་བ་འདི་ཡིས་མྱུར་དུ་བདག །སོགས་བདག་བསྐྱེད་ཀྱི་དགེ་བསྔོ་དང་། ཐམས་ཅད་ནམ་མཁའི་མཛོད་བཞིན་དུ། །ལོངས་སྤྱོད་ཟད་པ་མེད་པར་ཤོག །རྩོད་པ་མེད་ཅིང་འཚེ་མེད་པར། །རང་དབང་དུ་ནི་སྤྱོད་པར་ཤོག །ལྷ་ཡང་དུས་སུ་ཆར་འབེབས་ཤིང་། །ལོ་ཏོག་ཕུན་སུམ་ཚོགས་པར་ཤོག །རྒྱལ་པོ་ཆོས་བཞིན་བྱེད་པ་དང་། །འཇིག་རྟེན་དག་ཀྱང་དར་བར་ཤོག །འབད་དང་རྩོལ་བས་མ་གོས་པ། །ཡིད་བཞིན་ནོར་བུ་དཔག་བསམ་བཞིན། །སེམས་ཅན་རེ་བ་སྐོང་མཛད་པ། །བསམ་པ་འགྲུབ་པའི་བཀྲ་ཤིས་ཤོག །ཅེས་སོགས་བསྔོ་སྨོན་ཤིས་བརྗོད་ཁྱད་པར་བ་དང་། གཞན་ཡང་། ཆེ་བའི་ཆེ་མཆོག་སྟོན་མཆོག་བླ་ན་མེད། །ཆོས་རྗེ་ཉི་མ་རྒྱལ་བའི་བྱིན་རླབས་ཀྱིས། །བདུད་དང་བགེགས་རིགས་གནོད་པའི་དགྲ་ཞི་སྟེ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཆོས་ཉིད་བདེན་པའི་ཆོས་མཆོག་བླ་ན་མེད། །དམ་ཆོས་བདུད་རྩི་བདེན་པའི་བྱིན་རླབས་ཀྱིས། །ཉོན་མོངས་སྡུག་བསྔལ་གདུང་བའི་དགྲ་ཞི་སྟེ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །དགེ་འདུན་ཡོན་ཏན་རིན་ཆེན་དཔལ་འབར་བ། །རྒྱལ་སྲས་ཕན་མཛད་བདེན་པའི་བྱིན་རླབས་ཀྱིས། །ཉེས་པའི་སྐྱོན་བྲལ་དགེ་ཚོགས་རྣམ་པར་འཕེལ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཚངས་དང་ལྷ་དབང་སྲུང་མའི་བྱིན་རླབས་ཀྱིས། །ཕན་མཛད་ལྷ་ཡི་བཀྲ་ཤིས་གནས་གྱུར་ནས། །བདེ་ལེགས་བསམ་པ་ཡིད་བཞིན་འགྲུབ་པ་དང་། །ཚེ་རིང་ནད་མེད་བདེ་སྐྱིད་ལྡན་པར་ཤོག །ཅེས་དང་། གནས་འདིར་ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ཡང་བདེ་ལེགས་ཤིང་། །ཉིན་མཚན་རྟག་ཏུ་བདེ་ལེགས་པ། །དཀོན་མཆོག་གསུམ་གྱི་བཀྲ་ཤིས་ཤོག །ཅེས་སོགས་མདོ་རྒྱུད་ནས་འབྱུང་བའི་བཀྲ་ཤིས་ཀྱི་ཚིགས་སུ་བཅད་པ་རྒྱ་ཆེར་བརྗོད་པས་དགེ་ལེགས་སུ་བྱ། དེ་ལྟ་བུར་ཐུན་དུ་བཅད་ལ་ལེགས་པར་བསྒྲུབས་པའི་རྗེས། ནོར་ལྷའི་རིགས་ཀྱི་བུམ་གཏེར་མཛོད་དང་། ཁྱིམ་ཕུགས། ཕྱུགས་ལྷས་ཀྱི་གོང་། བརྟན་མའི་བུམ་པ་ཡུལ་གྱི་དབུས། མཁར་གྱི་རྩེ། ཞིང་ས་བཟང་པོའི་དཀྱིལ། ཀླུ་བུམ་ཀླུ་གནས་ངེས་པའི་མཚོ་དང་། ཆུ་མིག །རྫིང་བུ་སོགས་ཀྱི་མགོའམ། མདུན་སོགས་ཀྱིས་མཚོན་ཏེ་གང་དུ་སྦ་བའི་སར་ལག་ཚགས་དམ་པར་བྱས་ལ་གཞུག །འཇུག་པའི་སྐབས་སུའང་ཆོ་ག་ཚར་རེ་བསྐྱར་ན་ལེགས། མ་གྲུབ་ན་བརྟན་བཞུགས་དང་བསྔོ་སྨོན་བཀྲ་ཤིས་རྒྱས་པར་བརྗོད། །དེ་ལྟར་བགྱིས་པས་སྣོད་བཅུད་ཀྱི་རྒུད་པ་ཞི་ཞིང་། དཔལ་འབྱོར་ལེགས་ཚོགས་ཐམས་ཅད་རྒྱས་པར་འགྱུར་བས་མཚོན་ཕན་ཡོན་བསམ་གྱིས་མི་ཁྱབ་པ་ནི་སོ་སོའི་གཞུང་ལས་ཤེས་པར་བྱའོ། །ཞེས་པའང་ཉེར་མཁོའི་ཆེད་དུ་མཉྫུ་གྷོ་ཥས་ལྷག་པའི་བསམ་པས་བྲིས་པ་སྲིད་ཞིའི་དགེ་མཚན་དུས་རྟག་ཏུ་རྒྱས་པར་གྱུར་ཅིག། །།སརྦ་དཱ་མངྒ་ལཾ་བྷ་བ་ཏུ།། །།

[edit]

bum gter sgrub tshul spyi la 'jug pa 'dod rgu'i char 'bebs/ @#/__/gter chen po'i bum pa bzang po sgrub tshul spyi la 'jug pa shin tu mdor bsdus 'dod rgu'i char 'bebs zhes bya ba bzhugs so//__// oM swa sti/__rgyud sde rnams su gter chen po'i bum pa sgrub tshul dang /__gzhug pa'i tshul ji snyed cig gsungs shing /__nor lha rnams kyi bris sku dang gzungs sngags kyang rin po che dang 'bru sman sogs dpal can gyi rdzas dang bcas te bang mdzod du sba bar rtogs pa dang man ngag las gsungs pa dag phan tshun sbyar te dzam+b+ha la rigs lnga dang /__lha mo brtan ma/__klu chen dgu sogs kyi gter bum sgrub pa'i tshul ji snyed pa zhig bla ma rnams kyis phyag len du mdzad pa dmigs bsal so so'i gzhung nas 'byung ba ltar bya/__rang gzhung bum pa sgrub tshul zur du med pa'i spyi khyab la/__nor bum rigs rnams che chung bre gang shong ba las mi chung ba'i rin po che'am rdza'i bum pa gtsang ma lha so so'i sku mdog dang mthun pa'am/__dkar po'i tshon gyis legs par bsgyur ba la rgyas par khor yug tu bkra shis rtags brgyad sogs bri/__bsdu na mdun rtags su nor bu dang sa bon tsam bris pa'i nang dmigs bsal rang rang gi gzhung nas 'byung ba ltar dang /__spyir btang tsam la thil du sa sna chu sna byin can bkram pa'i steng /__bya rgyud lugs kyi bum rdzas nyer lnga khrol bu'am ril bu/__rin po che sna tshogs/__dug rigs ma gtogs pa'i sman sna/__'bru dkar rigs sna tshogs/__dar zab dang gos chen/__dkar gsum mngar gsum sogs bza' btung gi phud gtsang ma/__rta phyugs kyi spu sna/__bkra shis pa'i thab dang khang sa/__zhing sa bzang po'i sa sogs dpal can gyi rdzas dam tshig mi gcig pas mtshon sel can gyi lag nas byung ba ma yin pas phyur bur bkang ba'i dbus su rang rang gi sku gzugs dang /__sngags byang 'dod gsol dang bcas/__srog 'khor rigs gang yod rnams lag tshags dam par gzhug__/kha 'bru sman bzang shing gi phye ma sogs kyis dgang /__ras dkar pos bcad/__spro na 'khor lo rtsibs brgyad dam/__rdo rje rgya gram sogs bri/__tshon skud kyis mgul ba bcings la rgyab phyogs su sgrub pa po'am sbyin bdag gi rtags kyis rgyas gdab/__sa bdag dang /__khyad par klu bum rigs rnams spyin med pa'i bag phye sogs kyi dam dang bcas dkar rtsi byug__/mdun rtags nA~M bri/__nang gi thil du sa sna chu sna gtsang ma dkram/__gla rtsi sogs klu la gnod pa'i dris ma phog pa'i 'bru sna gtsang ma spang spos kyis bungs bskyed pa'i klu sman sogs kyis bkang ba'i dbus su rang rang gi sku dang sngags byang sogs gang rigs gzhug__/kha ras dkar gtsang mas bcad cing mgul chings bya/__de nas gzhi gtsang ma'i steng du bkod la/__mthar rang rang gi gzhung las bshad pa'i gtor ma dang mchod pa bsham/__bdag bskyed nor bum rigs phal cher la rang rang gi bdag bskyed dam phyag rdor dang /__brtan ma dang klu bum la klu dbang rgyal po'am/__seng ge sgra sogs gang 'os bzlas pa dang bcas pa bya/__las bum rgyas bsdus gang rigs kyis bsgrub pa'am/__a mr-i tas bsang /__swa b+hA bas sbyang /__stong pa'i ngang las pa~M las pad+ma dang a las zla ba'i dkyil 'khor gyi steng du b+h+rU~M las rin po che'i bum pa yangs shing rgya che ba/__lto ba ldir ba/__zhabs zhum pa/__mgrin pa phra ba/__kha g.yel ba/__mchu 'phyang ba/__lha rdzas kyi gos kyis mgul ba bcings pa/__dpag bsam gyi shing gis kha brgyan pa/__nang chu dang bcud sna tshogs kyis yongs su gang ba'i dbus su zla ba la sngags kyi phreng bas mtshan pa/__de las 'od zer 'phros/__'phags pa mchod/__sems can gyi don byas/__sangs rgyas dang byang chub sems dpa' thams cad kyi thugs rje'i byin rlabs nus mthu thams cad bsdus nas sngags phreng la thim/__de las bdud rtsi'i rgyun babs pas bum pa gang bar gyur/__ces brjod cing /__oM badz+ra a mr-i ta kuN+Da lI ha na ha na hU~M phaT/__ces bzlas mthar/__sngags phreng gdan dang bcas pa 'od du zhu ba las bum pa'i chu nus pa dang ldan par gyur/__ces brjod cing bsam/__yang na bsang chu/__a mr-i ta'i sngags kyis brlab/__spro na sbyang khrus rgyas par bya/__de tsam mi nus na/__rang gi thugs ka nas khro bo bdud rtsi 'khyil ba'i tshogs dpag tu med pa spros te bgegs rnams rgyang ring du bskrad par gyur pa'i mos pas las sngags dang sum+b+ha brjod cing /__gu gul gyis bdug__/yungs kar gyis brab/__ji ltar bltams pa sogs sngags dang bcas pa'i khrus gsol mdor bsdus dang /__de dag sku la sogs sku phyi ba rnams bya zhing /__bkra shis kyi tshigs bcad dang bcas me tog 'thor/__de nas mdun rten/__oM badz+ra a mr-i ta kuN+Da lI ha na ha na hU~M phaT kyis bsang /__oM swa b+hA ba shud+d+haHsarba d+harmAHswa b+hA ba shud+d+ho\u0f85 haM gis sbyang /__stong pa'i ngang las bum pa'i bum pa gcig las med na/__grangs dang mnyam pa'i stong pa'i ngang las pa~M las pad+ma dang sogs sbrel zhing /__'og gi tshig kyang yangs shing rgya che ba'i nang du/__zhes bsgyur ro/__/pa~M las pad+ma dang /__a las zla ba'i dkyil 'khor gyi steng du b+h+rU~M las rin po che'i bum pa yangs shing rgya che ba rnams kyi nang du/__rin po che dang 'bru bcud zas nor tshogs kyis yongs su gang bar gyur/__ces brjod cing bsams la/__chos nyid rnam par dag pa'i sngags rgyas spel ba ni/__thal mo khong stong du snying gar bzhag la/__oM swa b+hA ba shud+d+haHsarba d+harmAHswa b+hA ba shud+d+ho\u0f85 haM/__yo byad ma dag pa rnams sbyangs te skyon thams cad dang bral bar gyur/__ces brjod cing bsam/__de bzhin du/__nam mkha' mdzod kyi sngags rgyas spel ba ni/__thal mo khong stong du sbyar ba'i tshigs bar pa rnams bcags pa dpral bar bzhag la/__na mas+sarba ta thA ga te b+h+yo bi shwa mu khe b+h+yaHsarba thA khaM ut+ga te s+pha ra Na i maM ga ga na khaM swA hA/__mgron so so'i mos pa dang mthun pa'i yo byad kyis nam mkha'i khams khyab par gyur/__bdud rtsi 'khyil ba'i sngags rgyas bsgyur ba ni/__thal mo sbyar ba'i kha gyen du phye ste mthe bong bsnol la/__oM badz+ra a mr-i ta kuN+Da lI ha na ha na hU~M phaT/__rdzas rnams mgron so so'i sdug bsngal mtha' dag zhi bar byed pa'i ye shes kyi bdud rtsi'i rgya mtsho chen por gyur/__rgya chen shugs ldan 'od kyi sngags rgyas spyod par dbang ba ni/__g.yas khu tshur bcangs pa'i mdzub mo bsgrengs/__g.yon rdo rje khu tshur snying gar bzhag la/__na mas+sarba ta thA ga ta a wa lo ki te oM sam+b+ha ra sam+b+ha ra hU~M/__'phags pa rnams kyi spyan sngar mchod pa'i sprin mtha' yas pa dang /__sems can rnams kyi dbang po lnga'i spyod yul du 'dod pa'i longs spyod zad mi shes pa 'byung bar gyur/__ye shes skar mda'i sngags rgyas thob par bya ba ni/__g.yas khu tshur bcangs pa snying gar bzhag__/g.yon mthe bong lag pa'i mthil du bzhag pa'i mchog sbyin gyi phyag rgya byas la/__oM dz+nyA na a wa lo ki te na mas+sa man+ta s+pha ra Na rasmi b+ha ba sa ma ya ma hA ma Ni du ru du ru hr-i da ya dz+wa la ni swA hA/__lus zhing rdul gyi grangs dang mnyam pas 'phags pa rnams la phul bas mnyes shing sems can rnams yo byad rgyal pham dang rtsod pa med par so so'i mos pa bzhin thob par gyur/__dbang bsgyur 'khor lo'am/__lha mgon spyi'i sngags rgyas dbang du bsgyur ba ni/__sor mo nang du bsnol ba'i rdo rje bsdams/__mthe bong gnyis gshibs te bsgrengs la/__na mas+sa man+ta bud+d+hA nAM gra he shwa ri pra pany+tsa ti ma hA sa ma ya swA hA/__mgron thams cad kyang dam tshig gi dbang gis bdag la 'go zhing phan pa dang bde ba'i phrin las 'ba' zhig bsgrubs par gyur/__phyag rgya rnams phyogs bcur bskor zhing sngags rnams lan gsum la sogs pa brjod/__mgon dkar sogs kyi skabs su tshig lhug med pa'i sngags rkyang pa brjod par gsungs pas de ltar bya/__gang ltar yang bum pa'i nang gi 'bru sman rin po che sogs lha so so'i thugs dang mthun pa'i yo byad zad mi shes pa'i gter dang /__longs spyod dang /__bdud rtsi'i rgya mtsho chen por byin gyis brlabs nas/__bris sku dang sngags byang sogs lhar bskyed pa ni/__de lta bu'i bum pa rnams kyi stod kyi char dbus su pa~M las pad+ma dang /__zhes sogs rang rang gi mngon rtogs ltar dam tshig pa bskyed/__gnas gsum byin gyis brlab/__ye shes pa gzhug__/dbang bskur rgyas gdab rgyas bsdus gang rigs dang /__mchod pa bsang sbyang /__stong pa'i ngang las oM las byung ba'i rin po che las grub pa'i snod yangs shing rgya che ba rnams kyi nang du oM 'od du zhu ba las byung ba'i lha rdzas las grub pa'i mchod yon/__zhabs bsil/__me tog__/bdug spos/__mar me/__dri chab/__zhal zas/__rol mo rnams dwangs shing thogs pa med pa nam mkha'i mtha' klas par gyur/__oM badz+ra ar+g+haM AHhU~M/__de bzhin du/__pA d+yaM/__puSh+pe/__d+hU pe/__A lo ke/__gan+d+he/__nai bid+yA/__shab+da AHhU~M gi bar sbyar bas brlab/__mtshan sngags kyi mthar/__sa pa ri wA ra ar+g+haM pra tIts+tsha swA hA nas/__shab+da'i bar sbyar bas mchod/__rang gzhung gi bstod pa rgyas bsdus gang rigs kyis bstod/__thugs rgyud bskul bar dmigs te bzlas pa gtso bor bya/__'di'i skabs bum pa la gzungs thag btags te bzung yang legs/__bzlas dmigs so so'i gzhung nas 'byung ba ltar dang spyir btang nor bum la/__rang gi thugs ka nas 'od zer 'phros/__mdun bskyed kyi thugs rgyud bskul/__de'i thugs ka nas 'od zer 'phros/__'phags pa mchod/__sems can thams cad dbul phongs kyi sdug bsngal dang bral bar byas/__snod bcud srid zhi'i dge mtshan legs tshogs dpal yon dwang bcud ma lus pa bsdus te mdun gyi rten rdzas rnams la thim pas 'dod rgu thams cad yid bzhin du 'byung ba'i gter chen po'i bum pa bzang por gyur par bsams la bzlas pa bya/__brtan ma la/__rang gi thugs ka nas 'od zer 'phros/__mdun bskyed kyi thugs rgyud bskul/__de'i thugs ka nas 'od zer 'phros/__dpag tshad brgyad khri tshun chad kyi snod bcud kyi rgud pa thams cad bsal/__dpal dang gzi byin bskyed/__bcud dang dwang ma thams cad bsdus te mdun gyi rten rdzas rnams la thim pas sa bcud dang dge mtshan thams cad 'phel ba'i nus pa dang ldan par gyur pa'i mos pas bzla/__klu bum skabs/__rang gi thugs ka nas 'od zer bdud rtsi'i rang bzhin can 'phros/__mdun bskyed 'khor dang bcas pa la phog pas zag pa med pa'i bde ba khyad par can bskyed/__de'i thugs ka nas 'od zer 'phros/__brtan g.yo'i dwang bcud ma lus pa bsdus nas mdun gyi rten rdzas rnams la thim pas snod bcud kyi dpal 'byor phun sum tshogs pa thams cad skyed pa'i nus pa dang ldan par gyur pa'i mos pas bzla'o/__/thun mthar mchod bstod rang rang gi gzhung ltar dang /__'dod gsol so so'i gzhung ltar ram/__nor bum la/__mgon po dzam+b+ha las bdag dang sems can thams cad la log pa'i 'tsho ba ma yin pa'i chos dang mthun pa'i 'byor ba phun sum tshogs pa stsal du gsol/__/zhes pa lta bu dang /__brtan ma la/__sa'i lha mos bdag dang sbyin pa'i bdag po la longs spyod phun sum tshogs pa thams cad stsal zhing /__yul phyogs 'dir bkra shis pa dang /__bde legs dpal 'byor gyi dngos grub rgyun mi chad par 'byung bar mdzad du gsol/__zhes dang /__klu la/__klu'i rgyal po 'khor dang bcas pas bdag dang sbyin pa'i bdag po la sogs gong ltar bya/__gtor ma rang rang gi gzhung ltar ram/__spyi khyab la bsang sbyang /__stong pa'i ngang las rin po che las grub pa'i snod yangs shing rgya che ba rnams kyi nang du oM zhu ba las byung ba'i gtor ma lha'i bdud rtsi kha dog dri ro nus pa phun sum tshogs pa bdud rtsi'i rgya mtsho chen por gyur/__oM AHhU~M gis brlab/__mtshan sngags sam snying po'i mthar/__a kA ro btags pas dbul/__mchod bstod 'dod gsol bya/__yi ge brgya pa lan gsum dang /__ma 'byor pa dang sogs kyis nongs pa bshags/__rten 'brel snying po bzlas pa'i me tog thal mo sbyar ba'i bar du thogs te/__phyogs bcu na bzhugs pa'i sangs rgyas dang byang chub sems dpa' thams cad bdag la dgongs su gsol/__ji srid nam mkha'i mtha' dang mnyam pa'i sems can thams cad mi gnas pa'i mya ngan las 'das pa'i sa la ma bzhag gi bar du rgyal ba rnams mya ngan las mi 'da' bar brtan par bzhugs su gsol/__khyad par du gter chen po'i bum pa bzang po 'di rnams la bskyed cing spyan drangs pa'i lha tshogs rnams ji srid 'byung ba bzhi'i gnod pas ma zhig gi bar du brtan par bzhugs su gsol/__brtan par bzhugs nas kyang bdag dang sems can thams cad la log pa'i 'tsho ba ma yin pa'i chos dang mthun pa'i 'byor ba phun sum tshogs pa stsal du gsol/__/zhes sam/__brtan par bzhugs nas kyang bdag dang sbyin pa'i bdag po la longs spyod phun sum tshogs pa thams cad stsal zhing /__yul phyogs 'dir bkra shis pa dang /__bde legs dpal 'byor gyi dngos grub rgyun mi chad par 'byung bar mdzud du gsol/__zhes dang /__oM su pra tiSh+Tha badz+rA ya swA hA/__mang tu brjod cing me tog 'thor/__rang gi dpral bar oM dkar po/__mgrin par AHdmar po/__snying gar hU~M sngon po/__dge ba 'di yis myur du bdag__/sogs bdag bskyed kyi dge bsngo dang /__thams cad nam mkha'i mdzod bzhin du/__/longs spyod zad pa med par shog__/rtsod pa med cing 'tshe med par/__/rang dbang du ni spyod par shog__/lha yang dus su char 'bebs shing /__/lo tog phun sum tshogs par shog__/rgyal po chos bzhin byed pa dang /__/'jig rten dag kyang dar bar shog__/'bad dang rtsol bas ma gos pa/__/yid bzhin nor bu dpag bsam bzhin/__/sems can re ba skong mdzad pa/__/bsam pa 'grub pa'i bkra shis shog__/ces sogs bsngo smon shis brjod khyad par ba dang /__gzhan yang /__che ba'i che mchog ston mchog bla na med/__/chos rje nyi ma rgyal ba'i byin rlabs kyis/__/bdud dang bgegs rigs gnod pa'i dgra zhi ste/__/rtag tu dpal gnas nyin mtshan bkra shis shog__/chos nyid bden pa'i chos mchog bla na med/__/dam chos bdud rtsi bden pa'i byin rlabs kyis/__/nyon mongs sdug bsngal gdung ba'i dgra zhi ste/__/rtag tu dpal gnas nyin mtshan bkra shis shog__/dge 'dun yon tan rin chen dpal 'bar ba/__/rgyal sras phan mdzad bden pa'i byin rlabs kyis/__/nyes pa'i skyon bral dge tshogs rnam par 'phel/__/rtag tu dpal gnas nyin mtshan bkra shis shog__/tshangs dang lha dbang srung ma'i byin rlabs kyis/__/phan mdzad lha yi bkra shis gnas gyur nas/__/bde legs bsam pa yid bzhin 'grub pa dang /__/tshe ring nad med bde skyid ldan par shog__/ces dang /__gnas 'dir nyin mo bde legs mtshan bde legs/__/nyi ma'i gung yang bde legs shing /__/nyin mtshan rtag tu bde legs pa/__/dkon mchog gsum gyi bkra shis shog__/ces sogs mdo rgyud nas 'byung ba'i bkra shis kyi tshigs su bcad pa rgya cher brjod pas dge legs su bya/__de lta bur thun du bcad la legs par bsgrubs pa'i rjes/__nor lha'i rigs kyi bum gter mdzod dang /__khyim phugs/__phyugs lhas kyi gong /__brtan ma'i bum pa yul gyi dbus/__mkhar gyi rtse/__zhing sa bzang po'i dkyil/__klu bum klu gnas nges pa'i mtsho dang /__chu mig__/rdzing bu sogs kyi mgo'am/__mdun sogs kyis mtshon te gang du sba ba'i sar lag tshags dam par byas la gzhug__/'jug pa'i skabs su'ang cho ga tshar re bskyar na legs/__ma grub na brtan bzhugs dang bsngo smon bkra shis rgyas par brjod/__/de ltar bgyis pas snod bcud kyi rgud pa zhi zhing /__dpal 'byor legs tshogs thams cad rgyas par 'gyur bas mtshon phan yon bsam gyis mi khyab pa ni so so'i gzhung las shes par bya'o/__/zhes pa'ang nyer mkho'i ched du many+dzu g+ho Shas lhag pa'i bsam pas bris pa srid zhi'i dge mtshan dus rtag tu rgyas par gyur cig/__//sarba dA mang+ga laM b+ha ba tu//__//

Footnotes

Other Information