རིག་འདུས་ཚེ་དབང་གྲངས་གསོག་འཆི་མེད་བདུད་རྩིའི་ཡང་སྙིང་།

From Khyentse Lineage - A Tsadra Foundation Project
JKW-KABUM-15-BA-031
Wylie title rig 'dus tshe dbang grangs gsog 'chi med bdud rtsi'i yang snying JKW-KABUM-15-BA-031.pdf
Location mkhyen brtse'i bka' 'bum
Volume 15, sde tshan 31, Pages 593-598 (Folios 1a to 3b1)
Author འཇམ་དབྱངས་མཁྱེན་བརྩེའི་དབང་པོ་
Less details More details
Tertön འཇིགས་མེད་གླིང་པ་ ('jigs med gling pa)
Citation 'jam dbyangs mkhyen brtse'i dbang po. rig 'dus tshe dbang grangs gsog 'chi med bdud rtsi'i yang snying. In 'jam dbyangs mkhyen brtse'i dbang po'i bka' 'bum, Vol. 15: 593-598. Khams sde dge rdzong sar dgon: Rdzong sar blo gros phun tshogs, 2020.
Genre Longevity Empowerment - tshe dbang
Cycle ནང་སྒྲུབ་རིག་འཛིན་འདུས་པ་ (nang sgrub rig 'dzin 'dus pa)
Parent Cycle ཀློང་ཆེན་སྙིང་གི་ཐིག་ལེ་ (klong chen snying gi thig le)
Colophon

།ཞེས་པའང་ཀུན་མཁྱེན་བླ་མའི་བྱིན་རླབས་སྙིང་དབུས་སུ་ཞུགས་པའི་གཞོན་ནུ་ཨ་བྷ་ཡས་ཉེར་མཁོའི་ཆེད་དུ་སྤེལ་བ་སརྦ་དཱ་ཀ་ལྱཱ་ཎ་བྷ་བ་ཏུ།

zhes pa'ang kun mkhyen bla ma'i byin rlabs snying dbus su zhugs pa'i gzhon nu a b+ha yas nyer mkho'i ched du spel ba sarba dA ka l+yA Na b+ha ba tu/

1 Texts in this Section (sde tshan or chos tshan)

[edit]
༄༅། །རིག་འཛིན་ཚེ་དབང་གྲངས་གསོག་སོགས་ཀྱི་ཚེ་ཉེ་བར་བསྡུས་པ་འཆི་མེད་བདུད་རྩིའི་ཡང་སྙིང་ཞེས་བྱ་བ་བཞུགས་སོ། །

ན་མོ་གུ་རུ་བྷྱཿ འདིར་རིག་འཛིན་ཚེ་དབང་གྲངས་གསོག་ཚེ། ཐོག་མར་གཞུང་ལྟར་དབང་རྒྱས་པ་ཚར་གཅིག་སོང་ནས། སླར་ཡང་དབང་གཉིས་པ་ཞུ་བའི་ཡོན་དུ་དམིགས་ཏེ་མཎྜལ་ཞིག་ཕུལ་མཛོད། ཅེས་མཚམས་སྦྱར་ལ་མཎྜལ་འབུལ་དུ་གཞུག །དེ་ལྟར་མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་མཛོད། འཆི་མེད་མགོན་པོ་པདྨ་འབྱུང་༔ སྲོག་གི་འཇིགས་པས་སྐྲག་པ་ལ༔ ཐུགས་རྗེ་ཆེན་པོས་ཉེར་དགོངས་ནས༔ ཚེ་ཡི་དབང་དང་དངོས་གྲུབ་སྩོལ༔ དེ་ནས་ཡེ་ཤེས་དབབ་པའི་སླད་དུ། ཁྱེད་རང་རྣམས་བདེར་གཤེགས་ཀུན་འདུས་འཆི་མེད་པདྨ་འབྱུང་གནས་སུ་གསལ་བཞིན་པའི་རིགས་བདག་ཚེ་དཔག་མེད་མགོན་ཡབ་ཡུམ་མཉམ་པར་སྦྱོར་བའི་མཁའ་གསང་ནས་བདེ་ཆེན་བྱང་ཆུབ་ཀྱི་སེམས་བདུད་རྩིའི་རྣམ་པ་ཅན་དཔག་ཏུ་མེད་པ་བབས། སྤྱི་བོ་ཚངས་པའི་བུ་ག་ནས་མར་ཞུགས། ལུས་ཀྱི་ནང་ཐམས་ཅད་གང་། ཕུང་ཁམས་སྐྱེ་མཆེད་ཐམས་ཅད་ལ་ཁྱབ་པས་འཆི་མེད་རྡོ་རྗེའི་སྲོག་ལ་དབང་ཐོབ་པའི་མོས་པ་མཛོད། སྤྲོ་ན། ཧཱུྃ༔ སྤྲོས་བྲལ་ཆོས་སྐུའི་ཕོ་བྲང་ནས༔ སོགས་དང་། བསྡུ་ན་རྩ་སྔགས་ཀྱི་མཐར། བཛྲ་ཛྙཱ་ན་ཨཱ་བེ་ཤ་ཡ་ཨ་ཨཱཿ ཛཿཧཱུྃ་བྃ་ཧོཿཞེས་བརྗོད་ཅིང་བྱིན་དབབ། ཏིཥྛ་བཛྲ་ཞེས་བརྗོད་ཅིང་མེ་ཏོག་འཐོར་ལ་བརྟན་པར་བྱ། སླར་ཡང་ཚེ་འགུགས་ཤིང་བཅུད་བསྡུ་བའི་སླད་དུ། བདག་མདུན་ཚེ་དཔག་མེད་པར་གསལ་བའི་ཐུགས་ཀ་ནས་འོད་ཟེར་དཀར་པོ་དཔག་ཏུ་མེད་པ་འཕྲོས། འཁོར་འདས་ལམ་གསུམ་གྱིས་བསྡུས་པའི་གཟི་བྱིན་དྭངས་བཅུད་ཚེ་དཔལ་བསོད་ནམས་ཡེ་ཤེས་ཡོན་ཏན་ཐམས་ཅད་རྡོ་ཁབ་ལེན་གྱིས་ལྕགས་ཕྱེ་བླངས་པ་ལྟར་བསྡུས་ཏེ་ཁྱེད་རང་རྣམས་ལ་སིབ་སིབ་ཐིམ་པས་འཆི་མེད་ཚེའི་དངོས་གྲུབ་ཐོབ་པའི་མོས་པ་མཛོད། །ཨོཾ། རང་སྣང་ཟངས་མདོག་དཔལ་གྱི་རི༔ ལྔ་ལྡན་རང་བྱུང་ཕོ་བྲང་ནས༔ བཅོམ་ལྡན་མགོན་པོ་ཚེ་དཔག་མེད༔ དཔལ་ཆེན་གྲུབ་པའི་རིག་འཛིན་བརྒྱད། །རྩ་བརྒྱུད་བླ་མ་ཡི་དམ་ལྷ། །མཁའ་འགྲོ་ཆོས་སྐྱོང་ཚོགས་དང་བཅས། །ཐུགས་དམ་བསྐུལ་ལོ་དབྱིངས་ནས་བཞེངས༔ འཁོར་འདས་ལམ་གསུམ་བཅུད་སྡུས་ལ། །བླ་ཚེ་ཆད་ཉམས་ཡར་བ་ཀུན། །ཡེ་ཤེས་ཀློང་དགུའི་དབྱིངས་སུ་སྐྱིལ། །འགྱུར་མེད་སྲོག་གི་ཀ་བ་ཚུགས༔ ཚེ་མདའ་འདི་ལ་ཚད་ཅིག་སྟོན༔ སྒྲུབ་རྫས་འཆི་མེད་བདུད་རྩིར་སྒྱུར༔ སྐྱེ་འཆི་མེད་པའི་དངོས་གྲུབ་སྩོལ༔ རྩ་སྔགས་བརྗོད། དེ་ནས་ཚེ་བུམ་སྤྱི་བོར་བསྐུར༔ ཧྲཱིཿ སྣང་སྲིད་གཞོན་ནུ་བུམ་པའི་སྐུ༔ སྐྱེ་འཆི་བྲལ་བའི་བཅུད་ཀྱིས་གཏམས༔ སྐལ་ལྡན་བུ་ལ་དབང་བསྐུར་བས༔ འཆི་མེད་རྡོ་རྗེའི་སྲོག་འགྲུབ་ཤོག༔ རྩ་སྔགས་དང་། ཀཱ་ཡ་ཨ་བྷི་ཥིཉྩ་ཨོཾ༔ བདུད་རྩི་མགྲིན་པར་གཏད་ལ༔ ཧྲཱིཿ བདེ་ཆེན་ཡུམ་ལྔའི་བྷནྡྷ་རུ༔ འཆི་མེད་བྱང་སེམས་བདུད་རྩིར་འཁྱིལ༔ སྐལ་ལྡན་བུ་ལ་བྱིན་པ་ཡིས༔ སྐྱེ་འཆི་མེད་པའི་དབང་ཐོབ་ཤོག༔ རྩ་སྔགས་དང་། ཝཱ་ཀ་ཨ་བྷི་ཥིཉྩ་ཨཱཿ ཚེ་རིལ་སྙིང་གར་གཏུགས་ལ༔ ཧྲཱིཿ བརྟན་གཡོའི་ཁམས་དང་སྟོབས་བཅུའི་དཔལ༔ ཡོངས་ཀྱི་བཅུད་འདུས་ཚེའི་རིལ་བུ༔ རིགས་ཀྱི་བུ་ལ་བྱིན་པ་ཡིས༔ རྡོ་རྗེའི་སྲོག་ལ་དབང་ཐོབ་ཤོག༔ རྩ་སྔགས་དང་། ཙིཏྟ་ཨ་བྷི་ཥིཉྩ་ཧཱུྃ༔ ཞེས་དངོས་གཞིའི་དབང་བསྐུར་མཐར། ཨཿ འབྱུང་ལྔའི་དབྱིངས་སུ་འཁྱམས་པའི་ཚེ༔ ཡུམ་ལྔའི་ཀློང་དུ་རྒྱས་བཏབ་པས༔ ཡེ་ཤེས་ལྔ་ལ་སྐྱེ་འཆི་མེད༔ སྐུ་ལྔའི་དབྱིངས་སུ་ཚེ་སྦས་པ༔ རིགས་ལྔའི་རྒྱལ་བས་ཀྱང་མི་གཟིགས༔ དྷརྨཱ་དྷཱ་ཏུ་བཛྲ་རཀྵཿ ཞེས་པས་རྒྱས་བཏབ་ནས། འཇིག་རྟེན་འདྲེན་པའི་གཙོ་བོ་ཚེ་དཔག་མེད། །ཅེས་སོགས་ཀྱིས་ཤིས་པ་བརྗོད། སླར་ཡང་དབང་གསུམ་པ་ཞུ་བའི་ཡོན་དུ་སོགས་སྦྲེལ་ལ་ཚར་གྲངས་ཇི་ཙམ་འོས་པ་བསྐུར་ལ། མཐར་བཀྲ་ཤིས་པའི་རྫས་རྟགས་དང་། རྒྱལ་སྲིད་རིན་པོ་ཆེ་རྣམ་པ་བདུན་གྱིས་མངའ་གསོལ། ཤིས་བརྗོད་ཀྱི་མེ་ཏོག་འཐོར། དམ་ཚིག་ཁས་བླང་། གཏང་རག་གི་མཎྜལ། ལུས་ལོངས་སྤྱོད་དབུལ་བ། དགེ་བ་བསྔོ་བ་རྣམས་སྤྱི་ལྟར་བྱའོ། །ཞེས་པའང་ཀུན་མཁྱེན་བླ་མའི་བྱིན་རླབས་སྙིང་དབུས་སུ་ཞུགས་པའི་གཞོན་ནུ་ཨ་བྷ་ཡས་ཉེར་མཁོའི་ཆེད་དུ་སྤེལ་བ་སརྦ་དཱ་ཀ་ལྱཱ་ཎ་བྷ་བ་ཏུ།། །།

Footnotes

Other Information