JKW-KABUM-15-BA-001-002

Previous Text Back to Volume PageNext Text

ཐུགས་རྗེ་ཆེན་པོ་པདྨ་གཙུག་ཏོར་གྱི་དབང་ཆོག་གཞན་ཕན་ཀུན་ཁྱབ།

Wylie title	thugs rje chen po pad+ma gtsug tor gyi dbang chog gzhan phan kun khyab
Location	mkhyen brtse'i bka' 'bum Volume 15, sde tshan 1, Text 2, Pages 10-24 (Folios 5b2 to 12b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	མཆོག་གྱུར་གླིང་པ་ (mchog gyur gling pa)
Citation	'jam dbyangs mkhyen brtse'i dbang po. thugs rje chen po pad+ma gtsug tor gyi dbang chog gzhan phan kun khyab. In 'jam dbyangs mkhyen brtse'i dbang po'i bka' 'bum, Vol. 15: 10-24. Khams sde dge rdzong sar dgon: Rdzong sar blo gros phun tshogs, 2020.
Genre	Empowerment Ritual - dbang chog - dbang skur
Cycle	འཕགས་པ་ཐུགས་རྗེ་ཆེན་པོ་པདྨ་གཙུག་ཏོར་ ('phags pa thugs rje chen po pad+ma gtsug tor)
Deity	thugs rje chen po
RTZ	In the Rinchen Terdzö: https://rtz.tsadra.org/index.php/Terdzo-RA-008
Colophon	ཞེས་པའང་རང་གཞན་རྣམས་ལ་སྨན་པའི་བསམ་པས། གཏེར་ཆེན་བླ་མ་མཆོག་གི་བཀའ་དྲིན་ལས་ཟབ་ཆོས་འདི་ཉིད་དང་པོར་ཐོས་པའི་སྐལ་བཟང་ཅན་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་མདོར་བསྡུས་སྙིང་པོར་དྲིལ་ཏེ་སྦྱར་བའི་དགེ་བས་སེམས་ཅན་ཐམས་ཅད་འཕགས་མཆོག་ཐུགས་རྗེ་ཆེན་པོའི་གོ་འཕང་མྱུར་དུ་ཐོབ་པའི་རྒྱུར་གྱུར་ཅིག།
	zhes pa'ang rang gzhan rnams la sman pa'i bsam pas/__gter chen bla ma mchog gi bka' drin las zab chos 'di nyid dang por thos pa'i skal bzang can mtsho skyes bla ma dgyes pa'i 'bangs mkhyen brtse'i dbang pos mdor bsdus snying por dril te sbyar ba'i dge bas sems can thams cad 'phags mchog thugs rje chen po'i go 'phang myur du thob pa'i rgyur gyur cig

Tibetan Text

Wylie

[edit]

༄༅། །ཐུགས་རྗེ་ཆེན་པོ་པདྨ་གཙུག་ཏོར་གྱི་དབང་ཆོག་གཞན་ཕན་ཀུན་ཁྱབ་ཅེས་བྱ་བ་བཞུགས་སོ།། །།ན་མོ་གུ་རུ་ལོ་ཀེ་ཤྭ་ར་པདྨོ་ཥྞཱིཥཱ་ཡ། །འཕགས་པ་ཐུགས་རྗེ་ཆེན་པོ་པདྨ་གཙུག་ཏོར་གྱི་དཀྱིལ་འཁོར་དུ་སློབ་མ་རྗེས་སུ་འཛིན་པའི་ཆོ་ག་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། རྡུལ་ཚོན་རས་བྲིས་ཚོམ་བུའི་དཀྱིལ་འཁོར་ཇི་ལྟར་རིགས་པ་སྐབས་དང་སྦྱར་བའི་དབུས་སུ་མཉྫིའི་ཁར་བུམ་པ་བཅུད་ལྡན་ཁ་རྒྱན་མགུལ་ཆིངས་དང་བཅས་པའི་སྟེང་དུ་དུང་ཆོས་དྲི་བཟང་གི་ཆུས་གང་བ་བཞག་པ་ལ་གཟུངས་ཐག་གདགས། གཞན་ཡང་ཤར་དུ་དབུ་རྒྱན། ལྷོར་རྡོ་རྗེ། ནུབ་ཏུ་དྲིལ་བུ། བྱང་དུ་ཁྲི་གདུགས་པུསྟི། མཐའ་སྐོར་དུ་མཆོད་གཏོར། ཉེ་ལོགས་ཅི་བདེ་བར་ལས་བུམ་དང་། མཎྜལ་མེ་ཏོག་སོགས་འོག་ཏུ་དགོས་པའི་ཡོ་བྱད་ཐམས་ཅད་འདུ་བྱའོ། །གཉིས་པ་ལ་གཉིས། སློབ་དཔོན་གྱི་བྱ་བ་དང་། སློབ་མ་ལ་བྱ་བའོ། །དང་པོ་ནི། སྐྱབས་སེམས་ཚོགས་བསགས་སྔོན་དུ་འགྲོ་བས། མཆོད་གཏོར་རྣམས། ཨོཾ་ཧ་ཡ་གྲཱི་བ་ཧཱུྃ་ཕཊ་ཀྱིས་བསང་། སྭ་བྷ་ཝས་སྦྱང་། སྟོང་པའི་ངང་ལས་གནས་ཁང་འོག་མིན་པདྨོ་བཀོད་པའི་ཞིང་ཁམས་ཆེན་པོར་གསལ་བའི་དབུས་སུ། ལྷ་རྫས་དང་ཏིང་ངེ་འཛིན་ལས་གྲུབ་པའི་མཆོད་གཏོར་རྣམས་དྭངས་ཤིང་ཐོགས་པ་མེད་པ་ནམ་མཁའི་མཐའ་དང་མཉམ་པར་གྱུར། ཨོཾ་བཛྲ་ཨརྒྷཾ་ནས། ཤབྡ་སརྦ་པཱུ་ཛ་ཨཱཿཧཱུྃ་ཞེས་དང་། སྤྲོ་ན་མཆོད་པའི་སྤྲིན་གྱི་གཟུངས་ཀྱང་བཟླ། དེ་ནས་བདག་མདུན་ལྷན་ཅིག་ཏུ་བསྒྲུབས་ཏེ་ཡེ་ཤེས་པ་མདུན་ཏུ་ཕྱེ་ཞིང་བཟླས་པ་བྱ་བ་སོགས་སྒྲུབ་ཐབས་ལྟར་གཏོར་འབུལ་མཆོད་བསྟོད་ཡན་གྲུབ་རྗེས། བུམ་པ་དུང་ཞལ་བཅས་བསང་སྦྱང་། སྟོང་པའི་ངང་ལས་བྷྲཱུྃ་ཡིག་ཡོངས་གྱུར་ལས། །རྣམ་རྒྱལ་བུམ་པ་མཚན་ཉིད་ཡོངས་རྫོགས་སྟེང་། །དུང་ཞལ་བདུད་རྩིས་བཅུད་ཀྱིས་གང་བའི་དབུས། །སྣ་ཚོགས་པདྨ་འདབ་ལྔའི་གེ་སར་ལ༔ སོགས་ནས། མཚན་པར་གསལ༔ ཞེས་པའི་མཐར། རང་བྱུང་རྡོ་རྗེ་གསུམ་སོགས་སྦྲེལ། སྤྱན་འདྲེན་ནས་བསྟོད་པ་ཡན་སྒྲུབ་ཐབས་ལྟར་བྱས་ལ། གཟུངས་ཐག་ནས་བཟུང་སྟེ། རང་གི་ཐུགས་ཀ་ནས་སྔགས་ཀྱི་ཕྲེང་བ་བྱུང་། གཟུངས་ཐག་ལ་འཁྲིལ་ཏེ་དུང་ཞལ་གྱི་ལྷའི་ཐུགས་ཀར་ཕོག་པས་ཐུགས་རྒྱུད་བསྐུལ། དེ་རྣམས་ཀྱི་སྐུ་ལས་བདུད་རྩིའི་རྒྱུན་དཔག་ཏུ་མེད་པ་བབས་པས་དུང་ཞལ་གང་བར་བསམས་ལ། བཟླས་པ་ཅི་ནུས་བྱ། མཐར་དུང་ཞལ་གྱི་ལྷ་འོད་དུ་ཞུ་བའི་བདུད་རྩི་བུམ་པའི་ཆུ་དང་རོ་གཅིག་པར་བསམས་ལ་དུང་ཆུ་བུམ་པར་བླུག །ལས་བུམ་དུ་རྟ་མགྲིན་གྱི་བསྐྱེད་བཟླས་དང་། བདག་འཇུག་རྒྱས་བསྡུས་ཇི་ལྟར་རིགས་པ་བླང་། གཉིས་པ་ནི། སློབ་མ་རྣམས་ལ་ཁྲུས་བྱ། བགེགས་ཕྲལ། སྲུང་འཁོར་བསྒོམ། ཆོས་བཤད་ཅི་རིགས་པ་དང་། མཚམས་སྦྱོར་གྱི་ཁྱད་པར། ད་ལམ་འདིར་ལྷ་སྲས་མུ་རུབ་བཙད་པོ་ཡེ་ཤེས་རོལ་པ་རྩལ་གྱི་རྣམ་འཕྲུལ། ཚད་མ་གསུམ་གྱིས་གྲུབ་ཅིང་རྩོད་པ་ཐམས་ཅད་དང་བྲལ་བའི་གཏེར་ཆེན་ཆོས་ཀྱི་རྒྱལ་པོ་ཨོ་རྒྱན་མཆོག་གྱུར་བདེ་ཆེན་གླིང་པས། དགུང་ལོ་ཉི་ཤུ་རྩ་གཅིག་བཞེས་པ་ས་མོ་བྱའི་ལོ་ཁྲུམས་སྟོད་ཟླ་བའི་ཚེས་བཅུའི་ཉི་མ་གུང་གི་དུས་ལ་བབ་པ་ན། བརྡབ་རོང་མེ་རི་འབར་བའི་བྲག་ནས་བཞེས་པའི་ཁ་བྱང་དང་། གོ་ཆེའི་བྲག་ཁྱུང་གཤོག་འདྲ་བ་ནས་བཞེས་པའི་ཡང་བྱང་གཉིས་ལ་བརྟེན་ནས། ལས་ལྡན་གྱི་གྲོགས་ལྔས་ཐུན་མོང་དུ་མཐོང་བར་མདོ་ཁམས་ལྷོ་ཟླའི་ཕྱོགས་ཀྱི་ཟླ་སྲིབས་གུ་རུ་རིན་པོ་ཆེའི་སྒྲུབ་གནས་རྫོང་ཆེན་བཅོ་བརྒྱད་དུ་གྲགས་པའི་ཡ་གྱལ། པདྨ་གསུང་གི་སྒྲུབ་གནས་ན་བུན་རྫོང་ཞེས་ཨོ་རྒྱན་མཚོ་སྐྱེས་རྡོ་རྗེས་ཟབ་མོ་ཧཱུྃ་གི་སྒྲུབ་པ་མཛད་པའི་གནས་བྲག་རི་དུག་སྦྲུལ་སྤུངས་འདྲའི་སྐེད་པ་ལྷོ་ཕྱོགས་རིན་ཆེན་སྤུངས་པ་ནས་བར་ཆད་མེད་པར་སྤྱན་དྲངས་པའི་གསེར་ཤོག་སེར་པོའི་ངོས་ལས་ལོ་གསུམ་གསང་བའི་མཐར་གཏན་ལ་ཕབ་སྟེ་ཐུགས་ཉམས་སུ་བཞེས་པའི་སྐབས་འོད་གསལ་གྱི་སྣང་བར་འོག་མིན་པདྨ་འོད་ཀྱི་ཕོ་བྲང་ཆེན་པོར་རིགས་ཀུན་ཁྱབ་བདག་མ་ཧཱ་གུ་རུ་རྗེ་འབངས་དང་བཅས་པས་མངོན་སུམ་དུ་རྗེས་སུ་བཟུང་ཞིང་བྱིན་རླབས་དབང་བསྐུར་གྱི་རིམ་པ་རྒྱས་པར་སྩལ། སླར་གནས་དུས་ཀྱི་རྟེན་འབྲེལ་ཕུན་སུམ་ཚོགས་པའི་སྐབས་སུ་རིམ་པར་སྤེལ་བའི་དུས་གསུམ་མཁྱེན་པ་ཨོ་རྒྱན་ཆེན་པོའི་ཐུགས་བཅུད། བྱིན་རླབས་ཀྱི་ཚན་ཁ་དང་ངོ་མཚར་གྱི་ཁྱད་པར་དུ་མས་འཕགས་པ་ཐུགས་རྗེ་ཆེན་པོ་པདྨ་གཙུག་ཏོར་ཐེག་དགུ་དང་འབྲེལ་བ་ལས། སྤྱོད་པའི་རྒྱུད་དང་རྗེས་སུ་འབྲེལ་བའི་འཇིག་རྟེན་དབང་ཕྱུག་འགྲོ་འདུལ་ཕྱག་བཞི་པའི་དཀྱིལ་འཁོར་དུ་མངོན་པར་དབང་བསྐུར་བའི་བྱ་བ་བསྒྲུབ་པ་ལ། སློབ་དཔོན་གྱིས་བགྱི་འོས་གྲུབ་ནས། ཁྱེད་རང་རྣམས་ཀྱི་ངོ་སྐལ་ཐོག་མར་དཀྱིལ་འཁོར་དུ་འཇུག་པའི་ཕྱིར་མཎྜལ་ཕུལ། ཞེས་བརྡ་སྦྱར་ལ་མཎྜལ་འབུལ་དུ་གཞུག །དེ་ནས་ཐུན་མོང་གི་གསོལ་བ་འདེབས་པ་འདིའི་རྗེས་ཟློས་མཛོད། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བ། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་སྩོལ། ལན་གསུམ། ཆས་སུ་འཇུག་པའི་སླད་དུ། སྔོན་ཆད་འཕགས་པ་ཐུགས་རྗེ་ཆེན་པོ་པདྨ་གཙུག་ཏོར་གྱི་དཀྱིལ་འཁོར་མ་མཇལ་བའི་བརྡར་རས་ཡུག་དམར་པོ་རེས་གདོང་བཅིངས་པའི་མོས་པ་མཛོད། ཨོཾ་ཙཀྵུ་བྷནྡྷ་ཝ་ར་མ་ནཱ་ཡ་སྭཱ་ཧཱ། ལྷ་དང་མཇལ་བའི་ཚེ་ཕྱག་རྟེན་དུ་མེ་ཏོག་གི་ཕྲེང་བ་རེ་ཡང་བྱིན་པར་མོས་མཛོད། ཨཱ་ཁཾ་བཱི་ར་ཧཱུྃ༔ རྒྱུད་སྦྱང་བའི་སླད་དུ། བླ་མ་དང་དཀྱིལ་འཁོར་གྱི་གཙོ་བོ་འཕགས་པ་ཐུགས་རྗེ་ཆེན་པོ་པདྨ་གཙུག་ཏོར་སྐྱབས་ཡུལ་རྒྱ་མཚོའི་ཚོགས་ཀྱིས་བསྐོར་བ་ཞལ་མངོན་སུམ་དུ་བཞུགས་པའི་སྤྱན་སྔར། སྐྱབས་སེམས་ཚད་མེད་ཡན་ལག་བདུན་པ་རྣམས་ཚུལ་བཞིན་ཏུ་བསྒྲུབ་པར་བགྱིའོ་སྙམ་པས་འདིའི་རྗེས་ཟློས་མཛོད། ན་མོཿ བདག་དང་སེམས་ཅན་སོགས་ནས། གོ་འཕང་ཐོབ་པར་ཤོག༔ བར་ལན་གསུམ་རེ། དེ་ནས་ཁྱད་པར་ཅན་གྱི་དོན་ཞུ་བའི་སླད་དུ་གསོལ་བ་འདེབས་པ་འདིའི་རྗེས་ཟློས་མཛོད། ན་མོཿ རྡོ་རྗེའི་བླ་མ་དགོངས་སུ་གསོལ༔ བདག་ལ་ཐུགས་རྗེ་ཆེན་པོ་ཡི༔ དབང་བསྐུར་མཆོག་ནི་སྩལ་དུ་གསོལ༔ ལན་གསུམ། ཞེས་གསོལ་བ་བཏབ་པ་ལ། སློབ་དཔོན་གྱིས་དམ་ཚིག་གི་གནས་ལ་དྲི་བ་ནི་འདི་ལ་གསན་པས་ཁྱབ་སྟེ༔ ཨེ་མ་འདི་ནི་སྤྱོད་པའི་རྒྱུད༔ ཚུལ་བཞིན་དམ་ཚིག་ཐུབ་བྱའམ༔ ཞེས་དྲིས་པའི་ལན་དུ་དམ་ཚིག་ཁས་བླང་བ་འདིའི་རྗེས་ཟློས་མཛོད༔ ཀྱེ་ཧོཿ སློབ་དཔོན་ཐབས་མཁས་དགོངས་སུ་གསོལ༔ གསང་སྔགས་དམ་ཚིག་ཚུལ་བཞིན་བསྲུང་༔ མཁན་པོ་ཕ་མ་རྗེ་ལྟར་མཆོད༔ བྱང་ཆུབ་སེམས་ནི་མི་སྤང་ངོ་༔ མུ་སྟེགས་ཅན་ལའང་སྨད་མི་བྱ༔ རྡོ་རྗེ་དྲིལ་བུ་ཕྱག་རྒྱ་གཟུང་༔ ལྷ་སྔགས་ཏིང་འཛིན་གསུམ་མི་གཏང་༔ ཁོ་ན་ཉིད་བཞི་འབད་པས་བསྒོམ༔ ཞེས་ཁས་བླངས་པ་ལ། སླར་ཡང་ནན་ཏན་གྱི་ཚུལ་དུ་མནའ་ཆུ་སྦྱིན་ཅིང་རྡོ་རྗེའི་བྲོ་བོར་བར་གདམས་པ་ནི། ཨེ་མ་ཧོཿ དེ་ལྟར་ཡིན་ན་སྐལ་བར་ལྡན༔ དེ་ཕྱིར་སྙིང་ནས་བྲོ་བོར་ཅིག༔ ཅེས་བརྗོད་ལ་མནའ་ཆུ་སྦྱིན། དེ་ལྟར་གདམས་པ་ལ་རྡོ་རྗེའི་བྲོ་བོར་བ་འདིའི་རྗེས་ཟློས་མཛོད༔ ཨི་དན་ན་ར་ཀན༔ ཞེས་པས་དམ་ལ་བཞག་ནས། དེ་ནས་ནང་འཇུག་གི་དངོས་གཞི་ཡེ་ཤེས་དབབ་པའི་སླད་དུ་དམིགས་པ་འདི་བཞིན་དུ་མཛོད། ཨོཾ་སྭ་བྷཱ་བ་སོགས། ཁྱེད་རང་རྣམས་ཀྱི་ཕུང་ཁམས་སྐྱེ་མཆེད་ཀྱིས་མཚོན་པའི་མ་དག་པའི་སྣང་བ་ཐམས་ཅད་མི་དམིགས་ཏེ་སྟོང་པ་ཉིད་དུ་གྱུར། སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ། སེམས་ཉིད་རྣམ་པར་མི་རྟོག་པའི་ཡེ་ཤེས་ཧྲཱིཿལས་པདྨ་ཧྲཱིཿས་མཚན་པ། དེ་ལས་འོད་ཟེར་འཕྲོས་འདུས་ཡོངས་སུ་གྱུར་པ་ལས་ཁྱེད་རང་རྣམས་སྐད་ཅིག་གིས་འཕགས་པ་ཐུགས་རྗེ་ཆེན་པོ་པདྨ་གཙུག་ཏོར་འགྲོ་འདུལ་ཡིད་བཞིན་ནོར་བུ་སྐུ་མདོག་དཀར་གསལ་ཞལ་གཅིག་ཕྱག་བཞིའི་ཕྱག་དང་པོ་གཉིས་ཀྱིས་ཐུགས་ཀར་ཐལ་མོ་སྦྱར་བའི་བར་དུ་ཡིད་བཞིན་གྱི་ནོར་བུ་འཛིན་ཅིང་། གཡས་འོག་མས་ཤེལ་ཕྲེང་དང་། གཡོན་འོག་མས་མེ་ཏོག་པདྨ་དཀར་པོ་བསྣམས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཅིང་ཞབས་རྡོ་རྗེའི་སྐྱིལ་མོ་ཀྲུང་དུ་བཞུགས་པའི་གནས་གསུམ་ཡིག་འབྲུ་གསུམ་གྱིས་མཚན་པ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་སེམས་དཔའི་ཚོགས་བསམ་གྱིས་མི་ཁྱབ་པ་སྤྱན་དྲངས་ཏེ་སིབ་སིབ་ཐིམ་པས་རྒྱུད་བྱིན་གྱིས་བརླབས་པར་མོས་མཛོད། ཧྲཱིཿ བདག་གི་མགོན་པོ་ཐུགས་རྗེ་ཅན༔ འགྲོ་བའི་དོན་ཕྱིར་སྤྱན་འདྲེན་ན༔ སྲས་དང་སློབ་མའི་ཚོགས་དང་བཅས༔ གནས་འདི་ཉིད་དུ་གཤེགས་སུ་གསོལ༔ ཨོཾ་ཨཱཪྻ་ལོ་ཀེ་ཤྭ་ར་ས་པ་རི་ཝཱ་ར་ཨེ་ཧྱེ་ཧི་བཛྲ་ས་མཱ་ཛཿ ཛཿཧཱུྃ་བྃ་ཧོཿ ཞེས་ཡང་ཡང་བརྗོད་ཅིང་སྤོས་རོལ་བཅས་བྱིན་དབབ། རྡོ་རྗེ་སྤྱི་བོར་བཞག་ཅིང་། ཏིཥྛ་བཛྲ་ཞེས་པས་བརྟན་པར་བྱས་པའི་མོས་པ་མཛོད། དེ་ནས་རིགས་བརྟག་པའི་ཕྱིར་མེ་ཏོག་འབུལ་བར་གདམས་པ་ནི། ཧོཿ འདི་དུས་གསང་བའི་སྒོར་ཞུགས་པ༔ བརྟག་པའི་མེ་ཏོག་ལྷ་ལ་འབུལ༔ ཅེས་གདམས་པ་ལ། ཁྱེད་རང་རྣམས་ཀྱིས་ཀྱང་ཡེ་ཤེས་ཀྱི་ལྷ་ལ་བཟང་ངན་མ་མཆིས་མོད། རང་གིས་ལས་བསགས་པའི་ལྷ་དེ་ལ་འབབ་པར་ཤོག་ཅིག་སྙམ་དུ་མེ་ཏོག་དེ་ཉིད་རིན་པོ་ཆེ་གསེར་གྱི་མེ་ཏོག་ཏུ་མོས་པས་དཀྱིལ་འཁོར་ལ་འདོར་བའི་མོས་པ་དང་བཅས་དངོས་སུ་ཚོམ་བུའི་དཀྱིལ་འཁོར་འདིར་ཚིག་འདིའི་རྗེས་ཟློས་དང་བཅས་ཏེ་འདོར་མཛོད། ཧོཿ བསྐལ་པ་གོང་ནས་ལྷ་མཆོག་དེ་དག་ལ༔ ཡེ་ཤེས་རིག་པའི་མེ་ཏོག་འདི་འབུལ་གྱི༔ འགྱུར་མེད་ཡེ་ཤེས་དཀྱིལ་འཁོར་དེར་བབས་ནས༔ ཐུགས་རྗེ་ཆེན་པོས་རྗེས་སུ་གཟུང་དུ་གསོལ༔ པུཥྤེ་པྲ་ཏཱིཙྪ་ཧོཿ དེ་ལྟར་དོར་བས་དབུས་སུ་བབས་ན་རྡོ་རྗེ། ཤར་དུ་དེ་བཞིན་གཤེགས་པ། ལྷོར་རིན་ཆེན། ནུབ་ཏུ་པདྨ། བྱང་དུ་ལས་ཀྱི་རིགས་ཀྱི་ཐུགས་རྗེ་ཆེན་པོའི་རིགས་སུ་མཚོན་པ་ཡིན་ལ། སླར་ཡང་མེ་ཏོག་གང་ལ་བབས་པའི་ལྷས་མེ་ཏོག་དེ་ཉིད་ཕྱག་གིས་བཞེས་ཏེ་ཁྱེད་རང་རྣམས་ཀྱི་སྤྱི་བོར་བཅིངས་པ་དང་ལྷན་ཅིག་ཏུ་གསང་བའི་མཚན་ཀྱང་བྱིན་པར་མོས་མཛོད། ཀྱེ༔ རིག་པའི་མེ་ཏོག་ཕུལ་བའི་བྱིན་རླབས་ཀྱིས༔ རང་རིག་ཡེ་ཤེས་ལྷ་དང་ངོ་འཕྲོད་དེ༔ མ་འོངས་དེ་བཞིན་གཤེགས་པ་དྲི་མ་མེད༔ རྩེ་གཅིག་མི་གཏང་ཡེ་ཤེས་སྒྲུབ་པར་གྱིས༔ དེ་ནས་མ་རིག་པའི་ལིང་ཏོག་བསལ་བའི་སླད་དུ་གསོལ་བ་འདེབས་པ་འདིའི་རྗེས་ཟློས་མཛོད། ཀྱེ་ཧོཿ སློབ་དཔོན་ཐབས་མཁས་དགོངས་སུ་གསོལ༔ བདག་གི་མ་རིག་མིག་ཕྱེས་ལ༔ གསང་བའི་དཀྱིལ་འཁོར་ཆེན་པོ་སྟོན༔ རིག་རྩལ་ལྷ་དང་སྤྲད་དུ་གསོལ༔ ཞེས་གསོལ་བ་བཏབ་པ་ལ་བརྟེན་ནས། སློབ་དཔོན་གྱི་ཐུགས་ཀ་ནས་ཡེ་ཤེས་ཀྱི་འོད་ཟེར་གསེར་གྱི་ཐུར་མ་ལྟ་བུ་བྱུང་ནས་ཁྱེད་རང་རྣམས་ཀྱི་མ་རིག་པའི་ལིང་ཏོག་དང་མིག་རས་ལྷན་ཅིག་ཏུ་བསལ་བར་མོས་མཛོད། ཧྲཱིཿ སྔོན་གྱི་རྒྱལ་བ་རྣམས་ཀྱིས་ནི༔ མ་རིག་མིག་ནི་ཕྱེས་པ་ལྟར༔ འཁོར་འདས་སོ་མཚམས་ལིང་ཏོག་འདི༔ ཡེ་ཤེས་ཐུར་མས་དབྱེ་བར་བྱ༔ བཛྲ་ཛྙཱ་ན་ཙཀྵུ་པྲ་བེ་ཤ་ཡ་ཕཊ༔ དེ་ནས་སློབ་དཔོན་གྱིས༔ བྷྲཱུྃ་པྲ་བེ་ཤ་ཡ་ཕཊ༔ ཅེས་བརྗོད་པས་ཕོ་བྲང་གི་སྒོ་བཞི་ཤག་གིས་ཕྱེ་ནས། ཁྱེད་རང་རྣམས་སློབ་དཔོན་གྱི་ལག་གི་རྡོ་རྗེ་ལ་འཇུས་ཏེ་དཀྱིལ་འཁོར་ཆེན་པོའི་ནང་དུ་ཁྲིད་པའི་མོས་པ་དང་བཅས་བཅོམ་ལྡན་འདས་འཕགས་པ་ཐུགས་རྗེ་ཆེན་པོ་འགྲོ་འདུལ་པདྨ་གཙུག་ཏོར་ལྷ་ལྔའི་རྟེན་དང་བརྟེན་པར་བཅས་པའི་དཀྱིལ་འཁོར་མངོན་སུམ་བཞིན་ཏུ་མཇལ་བའི་མོས་པ་མཛོད། ཅེས་པ་ཙམ་མམ། སྤྲོ་ན་རྟེན་དང་བརྟེན་པ་རྒྱས་པར་བསྟན། སླར་ཡང་སློབ་དཔོན་གྱིས་སྤྲོ་བ་བསྐྱེད་པ་ནི་འདི་ལ་གསན་པས་ཁྱབ་སྟེ། ཨེ་མ་སྐལ་ལྡན་རིགས་ཀྱི་བུ༔ ད་ནི་ལས་དང་སྐལ་བར་ལྡན༔ དུས་གསུམ་སངས་རྒྱས་དངོས་དང་མཇལ༔ བསྐལ་པ་དུ་མའི་སྒྲིབ་པ་དག༔ དེས་དཀྱིལ་འཁོར་དུ་འཇུ ག་པའི་ཆོས་རྣམས་སོང་ནས། ཞུགས་ནས་མངོན་པར་དབང་བསྐུར་བ་ཞུ་བའི་སླད་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། ཨེ་མ་འདྲེན་པ་བླ་ན་མེད༔ དབང་བསྐུར་བ་ནི་སྩལ་དུ་གསོལ༔ ཞེས་གསོལ་བ་བཏབ་པས། སློབ་དཔོན་དང་མདུན་བསྐྱེད་ཀྱི་དཀྱིལ་འཁོར་པ་རྣམས་ཀྱི་ཐུགས་ཀ་ནས་འོད་ཟེར་འཕྲོས། དབང་གི་ལྷ་ནམ་མཁའ་གང་བར་སྤྱན་དྲངས། སློབ་དཔོན་དང་ལྷན་ཅིག་པས་བཀྲ་ཤིས་པའི་རྣམ་པ་དུ་མ་དང་ལྡན་པས་རིན་པོ་ཆེའི་བུམ་པ་བདུད་རྩིའི་ཆུ་རྒྱུན་གྱིས་གང་བས་དབང་བསྐུར་བ་ལ་བརྟེན་ནས་སྒྲིབ་གཉིས་བག་ཆགས་དང་བཅས་པ་ཐམས་ཅད་བྱང་ཞིང་དག་སྟེ་སངས་རྒྱས་ཆོས་ཀྱི་སྐུ་འགྲུབ་པའི་སྐལ་བ་ཅན་དུ་བྱས་པར་མོས་མཛོད། སྤྲོས་མེད་དོན་དམ་ཟླུམ་པོའི་བུམ་པ་ན༔ རང་བྱུང་ཐུགས་རྗེ་ཆེན་པོ་ཞུ་བའི་ཆུ༔ འཛིན་སེམས་ཞེ་སྡང་ལ་སོགས་རྣམ་པར་དག༔ མེ་ལོང་ཡེ་ཤེས་བུམ་པས་དབང་བསྐུར་རོ༔ ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ༔ ཨོཾ་མ་ཎི་པདྨེ་ཧཱུྃ༔ ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཧཱུྃ། བདུད་རྩིའི་རྒྱུན་གྱིས་ལུས་གང་བའི་ལྷག་མ་སྤྱི་བོར་འཁྱིལ་བ་ལས་རིགས་ཀྱི་བདག་པོ་འོད་དཔག་མེད་ཀྱིས་དབུར་བརྒྱན་པ་ལ། རིན་པོ་ཆེའི་ཅོད་པན་གྱིས་དབང་བསྐུར་བས་སྐུ་དང་ཡེ་ཤེས་ཕྲིན་ལས་དང་བཅས་པའི་ཡོན་ཏན་ཐམས་ཅད་ཡོངས་སུ་རྫོགས་ཤིང་སངས་རྒྱས་ཀྱི་གཟུགས་སྐུ་མཚན་དཔེས་བརྒྱན་པ་འགྲུབ་པའི་སྐལ་བ་ཅན་དུ་བྱས་པའི་མོས་པ་མཛོད། ཧྲཱིཿ སྐྱེ་མེད་དོན་དམ་སྙིང་པོ་འགག་མེད་ལས༔ ཕྱག་མཚན་ལྔས་བརྒྱན་རིགས་ལྔའི་ཅོད་པན་འདི༔ ཞེན་སེམས་ང་རྒྱལ་མ་ལུས་ཡེ་ནས་དག༔ མཉམ་ཉིད་ཡེ་ཤེས་རིགས་ལྔས་དབང་བསྐུར་རོ༔ སྔགས་མཐར། རཏྣ་སཾ་བྷ་བ་མུ་ཀུ་ཊ་ཨ་བྷི་ཥིཉྩ་ཧཱུྃ༔ རྡོ་རྗེ་དང་དྲིལ་བུ་ཕྱག་ཏུ་གཏད་པས་སངས་རྒྱས་ཀྱི་ཐུགས་རྣམ་པར་མི་རྟོག་པའི་ཡེ་ཤེས་དང་། གསུང་དབྱངས་ཡན་ལག་དྲུག་ཅུ་འགྲུབ་པའི་སྐལ་བ་ཅན་ཏུ་བྱས་པའི་མོས་པ་མཛོད། ཧོཿ ཁྱེད་ཀྱིས་རྡོ་རྗེ་དྲིལ་བུ་ཆོངས༔ ཐུགས་ཀྱི་དབྱིངས་སུ་འཚང་རྒྱའོ༔ སྔགས་མཐར་བཛྲ་གཎྜེ་ཨ་བྷི་ཥིཉྩཱ་མི། ཞེས་བརྗོད། དེ་ནས་རྡོ་རྗེ་སློབ་དཔོན་ཏུ་དབང་བསྐུར་བའི་ཕྱིར། ཁྱེད་རང་རྣམས་སེང་གེས་བཏེག་པའི་རིན་པོ་ཆེའི་ཁྲིར་འཁོད་པའི་སྟེང་དུ་གདུགས་དཀར་པོ་གསེར་གྱི་ཡུ་བ་ཅན་ནམ་མཁའ་དང་མཉམ་པའི་བླ་བྲེ་ཕུབ་ཅིང་ཕྱག་ཏུ་གླེགས་བམ་གཏད་ནས་འཁོར་ལོས་སྒྱུར་བའི་རྒྱལ་པོ་རྒྱལ་སར་དབང་བསྐུར་བ་ལྟར་ཁམས་གསུམ་ཆོས་ཀྱི་རྒྱལ་པོའི་རྒྱལ་ཚབ་ཏུ་མངོན་པར་དབང་བསྐུར་བའི་མོས་པ་མཛོད། ཧོཿ དེང་ཕྱིན་རྡོ་རྗེ་སློབ་དཔོན་ཏེ༔ ཕྱག་རྒྱ་གསུམ་དང་མ་བྲལ་ཅིག༔ རང་གཞན་དོན་ལ་བརྩོན་པར་གྱིས༔ ཞེས་དང་ཡེ་དྷརྨཱཿབརྗོད་ཅིང་མེ་ཏོག་འཐོར། དེས་དབང་གི་དངོས་གཞི་གྲུབ་ནས། མཐའ་རྟེན་ཏུ་རིག་སྔགས་གྲུབ་པར་བྱེད་པ་བཟླས་ལུང་། མཚན་མེད་ཀྱི་རྣལ་འབྱོར་བསྒོམ་པའི་ཕྱིར་རིག་གཏད། དགེ་ལེགས་ཀྱི་འབྱོར་པ་སྤེལ་བའི་སླད་དུ་བཀྲ་ཤིས་པའི་རྫས་རྟགས་སྦྱིན་པ་རྣམས་སུ་ཡོད་པ་ལས། ཐོག་མར་བཟླས་ལུང་གི་སླད་དུ་སློབ་དཔོན་དང་མདུན་བསྐྱེད་ཀྱི་ཞལ་ནས་སྔགས་ཀྱི་ཕྲེང་བ་བྱུང་། ཁྱེད་རང་རྣམས་ཀྱི་རྣ་བ་གཡས་པ་ནས་ཞུགས། སྙིང་གའི་ས་བོན་ལ་ཐིམ་པས་སྔགས་ཀྱི་བྱིན་རླབས་མ་ལུས་པ་རྒྱུད་ལ་ཞུགས་པར་མོས་ཏེ་སྔགས་འདི་གཉིས་ཀྱི་རྗེས་ཟློས་ལན་གསུམ་མཛོད། ཨོཾ་པདྨ་ཨུཥྞཱི་ཥ་བི་མ་ལེ་ཧཱུྃ་ཕཊ༔ ཨོཾ་མ་ཎི་པདྨེ་ཧཱུྃ༔ རིག་པ་གཏད་པ་ནི། དེ་ལྟར་ལྷ་སྔགས་ཀྱིས་མཚོན་པའི་དུས་གསུམ་གྱི་རྣམ་པར་རྟོག་པའི་རྗེས་སུ་མ་འབྲང་བར་སེམས་ཉིད་གཉུག་མའི་དབྱིངས་སུ་མཉམ་པར་ཞོག་ཅིག༔ ཅེས་གདམས། ཤིས་པར་བྱ་བའི་སླད་དུ་བཀྲ་ཤིས་པའི་རྫས་བརྒྱད་དང་། རྟགས་བརྒྱད་རྣམས་སོ་སོའི་བྱེད་ལས་གྲུབ་པའི་དངོས་པོ་ཅན་ལག་ཏུ་གཏད་པས་དགེ་ལེགས་ཀྱི་འབྱོར་པ་སྤེལ་བའི་མོས་པ་མཛོད། ཧྲཱིཿ མ་རིག་རྣམ་དག་ཡེ་ཤེས་མེ་ལོང་མཆོག༔ དུག་ལྔའི་གདུང་སེལ་སྙིང་པོ་ཞོ་ཡི་ཟས༔ ཉོན་མོངས་གཅོང་གཞིལ་གི་ཝཾ་སྨན་གྱི་ཕུལ༔ ཕྱི་ནང་ཆོས་རྣམས་དབང་སྡུད་ལི་ཁྲི་མཆོག༔ རྒྱུད་དག་གསང་སྔགས་འབྲས་སྤྱོད་བིལྦའི་འབྲས༔ རྡོ་རྗེའི་ཚེ་མཆོག་འཕེལ་བའི་དཱུརྦ་དང་༔ ལོག་སྨྲ་ཀུན་བཅོམ་གཡས་འཁྱིལ་ཆོས་ཀྱི་སྒྲ༔ བདུད་སྡེ་ཕམ་མཛད་ཁྲོ་བོ་ཡུངས་ཀར་ཚོགས༔ འདི་དག་དབང་བསྐུར་བཀྲ་ཤིས་ལྡན་པར་ཤོག༔ ཨོཾ་མངྒ་ལཾ་ཀུ་རུ་ཨ་བྷི་ཥིཉྩཱ་མི། ཧྲཱིཿ དཔལ་བེའུ་ཡེ་ཤེས་དྲྭ་བ་ཆེ༔ འཁོར་ལོ་ཕྱོགས་ལྷུང་ཀུན་དང་བྲལ༔ པདྨ་ཆགས་མེད་ཡེ་ཤེས་ཏེ༔ རྒྱལ་མཚན་རྟོག་མེད་བདུད་ལས་རྒྱལ༔ གདུགས་མཆོག་ཁོར་ཡུག་འོད་གསལ་བ༔ བུམ་པ་ཅིར་སྣང་ཆོས་ཀྱི་གཏེར༔ ཆོས་དུང་གྲགས་སྟོང་གདངས་རྩལ་ཅན༔ གསེར་ཉ་ཡེ་ཤེས་བྱང་ཆུབ་སེམས༔ སྐལ་ལྡན་རྣམས་ལ་དབང་བསྐུར་བས༔ །བཀྲ་ཤིས་ཕུན་སུམ་ཚོགས་པར་ཤོག༔ ཨོཾ་ཨཥྚ་མངྒ་ལཾ་ཨ་བྷི་ཥིཉྩཱ་མི། རྗེས་འབྲེལ་དུ་ཤིས་པ་བརྗོད་པ་ཇི་ལྟར་རིགས་པ་དང་བཅས་མེ་ཏོག་གི་ཆར་དབབ། དེ་ལྟར་འཕགས་པ་ཐུགས་རྗེ་ཆེན་པོ་འགྲོ་འདུལ་པདྨ་གཙུག་ཏོར་གྱི་དཀྱིལ་འཁོར་དུ་དབང་བསྐུར་བ་ལེགས་པར་ཐོབ་པའི་ཕན་ཡོན་ནི། འཕགས་པ་དོན་ཡོད་ཞགས་པའི་རྟོག་པ་ཆེན་པོ་ལས། དོན་ཡོད་པའི་ཞགས་པ་པདྨ་གཙུག་ཏོར་གྱི་སྙིང་པོ་ཁྲོ་བོའི་རིགས་ཀྱི་གསང་སྔགས་རིམ་པར་ཕྱེ་བ་གཟུངས་སྔགས་ཆེན་པོ་སྙིང་པོ་བཅུ་པོ་འདི་ལན་ཅིག་དྲན་ནམ། ཀློག་གམ། མིང་བཟུང་བའམ་དྲན་ནམ། ལག་ན་རྡོ་རྗེ་དུས་ཚིགས་གཅིག་ཏུ་དྲན་པ་ཙམ་གྱིས་ཀྱང་། དེས་མཚམས་མེད་པ་བྱེད་པ། མནར་མེད་པར་གཞོལ་བ། བསྐལ་པར་གནས་པའང་དེ་ཡིས་རྣམ་པར་དག་པར་འགྱུར་ལ། སྡིག་པ་དང་སྒྲིབ་པ་བསགས་པ་རྣམས་ཟད་པར་འགྱུར། ལུས་ཡོངས་སུ་དག་ཅིང་དྲི་མ་མེད་པར་འགྱུར། སྒྲིབ་པ་དང་སྡིག་པ་དང་བྲལ་བར་འགྱུར། ཚེ་འཕོས་ནས་ཀྱང་འཇིག་རྟེན་གྱི་ཁམས་བདེ་བ་ཅན་དུ་བརྫུས་ཏེ་སྐྱེ་བར་འགྱུར། ཚེ་རབས་སུ་ཚེ་རབས་དྲན་པར་འགྱུར། ནམ་ཡང་ངན་འགྲོར་འགྲོ་བར་མི་འགྱུར། བསྐལ་པ་བྱེ་བ་འབུམ་ཕྲག་བརྒྱད་ཅུར་འཁོར་ལོས་སྒྱུར་བ་མཆོག་ཏུ་འགྱུར། བསྐལ་པ་བྱེ་བ་འབུམ་ཕྲག་བརྒྱད་ཅུར་འཇིག་རྟེན་གྱི་ཁམས་བདེ་བ་ཅན་ཏུ་བདེ་བ་མྱོང་བར་འགྱུར། ཅེས་སོགས་རྒྱ་ཆེར་གསུངས་པ་ལྟར། གཟུངས་སྔགས་ཟབ་མོ་འདི་ལན་ཅིག་ཙམ་དྲན་པས་ཀྱང་ཕན་ཡོན་དེ་ལྟ་བུ་དང་ལྡན་ན། དབང་བསྐུར་བ་ཐོབ་པ་དང་། སྒོམ་བཟླས་བགྱིས་པ་སོགས་ཀྱི་ཕན་ཡོན་བསམ་གྱིས་མི་ཁྱབ་པ་ལྟ་སྨོས་ཀྱང་ཅི་དགོས་པས་སྟོན་པ་ཐུགས་རྗེ་ཅན་གྱི་གསུང་གིས་ནམ་ཡང་མི་བསླུ་བའི་ཕྱིར་དད་པ་དང་། སྤྲོ་བ་དང་། ངེས་ཤེས་མཆོག་ཏུ་བསྐྱེད་ནས་རང་གིས་ཉམས་སུ་ལེན་པ་དང་། གཞན་དག་ལ་འཆད་ཅིང་སྟོན་པ་ལ་སོགས་པའི་སྒོ་ནས་དལ་བའི་རྟེན་ལ་སྙིང་པོ་ལེན་པའི་ཐབས་ལ་འབད་པར་བྱའོ། །དེ་ལྟ་བུའི་ཕན་ཡོན་ཆེན་པོ་དང་ལྡན་པའི་དབང་གི་སྲོག་དམ་ཚིག་དང་སྡོམ་པ་ལ་སྲུང་སྡོམ་ཚུལ་བཞིན་ཏུ་བྱ་དགོས་པར་གདམས་པའང་འདི་ལ་གསན་པས་ཁྱབ་སྟེ། དཀོན་མཆོག་གསུམ་དང་བླ་མ་ནི༔ གཙུག་ཏུ་བཀུར་ཞིང་གསོལ་བར་བྱ༔ ཕ་མ་གྲོགས་དང་མཛའ་བོ་རྣམས༔ བཀུར་ཞིང་དུས་མཆོད་རྣམས་ལ་བརྩོན༔ མི་དགེ་མི་སྤྱོད་ཤ་ཆང་སྤང་༔ ཁྲུས་དང་གཙང་སྦྲ་རྣམས་ལ་འབད༔ ཅེས་གདམས་པ་ལ་ཁྱེད་རྣམས་ཀྱིས་ཀྱང་དོན་དེ་ལས་འདའ་བར་མི་བགྱིད་དོ་སྙམ་པས་མདོར་བསྡུས་ཏེ་འཛིན་པར་ཁས་བླང་བ་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས། རྗེས་གཏང་རག་གི་མཎྜལ། ལུས་ལོངས་སྤྱོད་འབུལ་བ། དགེ་བ་བསྔོ་བ་རྣམས་སྤྱི་ལྟར་བྱས་ནས་སློབ་མ་རྣམས་རང་གནས་སུ་གཏང་ངོ་། །གསུམ་པ་རྗེས་ནི། མཆོད་པ་ཞལ་གསོས་ལ་བྱིན་གྱིས་བརླབ། མཆོད་བསྟོད་རྒྱས་བསྡུས་གང་རིགས་དང་། མ་རྙེད་ཡོངས་སུ་མ་ཚང་དང་། སོགས་ཀྱི་མཐར་ཡི་གེ་བརྒྱ་པ་བརྗོད་ཅིང་བཟོད་པར་གསོལ། མདུན་བསྐྱེད་རྟེན་ཡོད་ན་བརྟན་བཞུགས་དང་། མེད་ན་བཛྲ་མུཿས་ཡེ་ཤེས་པ་རང་གནས་སུ་གཤེགས། རང་དམ་ཚིག་ཐུགས་རྗེ་ཆེན་པོར་སོགས་སྒྲུབ་ཐབས་ལྟར་བསྔོ་སྨོན་བར་བྱ་ཞིང་། ཤིས་པ་བརྗོད་པས་མཐའ་བརྒྱན་ནོ། ཞེས་པའང་རང་གཞན་རྣམས་ལ་སྨན་པའི་བསམ་པས། གཏེར་ཆེན་བླ་མ་མཆོག་གི་བཀའ་དྲིན་ལས་ཟབ་ཆོས་འདི་ཉིད་དང་པོར་ཐོས་པའི་སྐལ་བཟང་ཅན་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་མདོར་བསྡུས་སྙིང་པོར་དྲིལ་ཏེ་སྦྱར་བའི་དགེ་བས་སེམས་ཅན་ཐམས་ཅད་འཕགས་མཆོག་ཐུགས་རྗེ་ཆེན་པོའི་གོ་འཕང་མྱུར་དུ་ཐོབ་པའི་རྒྱུར་གྱུར་ཅིག། །། ༈

[edit]

thugs rje chen po pad+ma gtsug tor gyi dbang chog gzhan phan kun khyab/ @#/_/thugs rje chen po pad+ma gtsug tor gyi dbang chog gzhan phan kun khyab ces bya ba bzhugs so//__//na mo gu ru lo ke shwa ra pad+mo Sh+NIShA ya/__/'phags pa thugs rje chen po pad+ma gtsug tor gyi dkyil 'khor du slob ma rjes su 'dzin pa'i cho ga la gsum/__sbyor ba/__dngos gzhi/__rjes so/__/dang po ni/__rdul tshon ras bris tshom bu'i dkyil 'khor ji ltar rigs pa skabs dang sbyar ba'i dbus su many+dzi'i khar bum pa bcud ldan kha rgyan mgul chings dang bcas pa'i steng du dung chos dri bzang gi chus gang ba bzhag pa la gzungs thag gdags/__gzhan yang shar du dbu rgyan/__lhor rdo rje/__nub tu dril bu/__byang du khri gdugs pusti/__mtha' skor du mchod gtor/__nye logs ci bde bar las bum dang /__maN+Dal me tog sogs 'og tu dgos pa'i yo byad thams cad 'du bya'o/__/gnyis pa la gnyis/__slob dpon gyi bya ba dang /__slob ma la bya ba'o/__/dang po ni/__skyabs sems tshogs bsags sngon du 'gro bas/__mchod gtor rnams/__oM ha ya grI ba hU~M phaT kyis bsang /__swa b+ha was sbyang /__stong pa'i ngang las gnas khang 'og min pad+mo bkod pa'i zhing khams chen por gsal ba'i dbus su/__lha rdzas dang ting nge 'dzin las grub pa'i mchod gtor rnams dwangs shing thogs pa med pa nam mkha'i mtha' dang mnyam par gyur/__oM badz+ra ar+g+haM nas/__shab+da sarba pU dza AHhU~M zhes dang /__spro na mchod pa'i sprin gyi gzungs kyang bzla/__de nas bdag mdun lhan cig tu bsgrubs te ye shes pa mdun tu phye zhing bzlas pa bya ba sogs sgrub thabs ltar gtor 'bul mchod bstod yan grub rjes/__bum pa dung zhal bcas bsang sbyang /__stong pa'i ngang las b+h+rU~M yig yongs gyur las/__/rnam rgyal bum pa mtshan nyid yongs rdzogs steng /__/dung zhal bdud rtsis bcud kyis gang ba'i dbus/__/sna tshogs pad+ma 'dab lnga'i ge sar la:__sogs nas/__mtshan par gsal:__zhes pa'i mthar/__rang byung rdo rje gsum sogs sbrel/__spyan 'dren nas bstod pa yan sgrub thabs ltar byas la/__gzungs thag nas bzung ste/__rang gi thugs ka nas sngags kyi phreng ba byung /__gzungs thag la 'khril te dung zhal gyi lha'i thugs kar phog pas thugs rgyud bskul/__de rnams kyi sku las bdud rtsi'i rgyun dpag tu med pa babs pas dung zhal gang bar bsams la/__bzlas pa ci nus bya/__mthar dung zhal gyi lha 'od du zhu ba'i bdud rtsi bum pa'i chu dang ro gcig par bsams la dung chu bum par blug__/las bum du rta mgrin gyi bskyed bzlas dang /__bdag 'jug rgyas bsdus ji ltar rigs pa blang /__gnyis pa ni/__slob ma rnams la khrus bya/__bgegs phral/__srung 'khor bsgom/__chos bshad ci rigs pa dang /__mtshams sbyor gyi khyad par/__da lam 'dir lha sras mu rub btsad po ye shes rol pa rtsal gyi rnam 'phrul/__tshad ma gsum gyis grub cing rtsod pa thams cad dang bral ba'i gter chen chos kyi rgyal po o rgyan mchog gyur bde chen gling pas/__dgung lo nyi shu rtsa gcig bzhes pa sa mo bya'i lo khrums stod zla ba'i tshes bcu'i nyi ma gung gi dus la bab pa na/__brdab rong me ri 'bar ba'i brag nas bzhes pa'i kha byang dang /__go che'i brag khyung gshog 'dra ba nas bzhes pa'i yang byang gnyis la brten nas/__las ldan gyi grogs lngas thun mong du mthong bar mdo khams lho zla'i phyogs kyi zla sribs gu ru rin po che'i sgrub gnas rdzong chen bco brgyad du grags pa'i ya gyal/__pad+ma gsung gi sgrub gnas na bun rdzong zhes o rgyan mtsho skyes rdo rjes zab mo hU~M gi sgrub pa mdzad pa'i gnas brag ri dug sbrul spungs 'dra'i sked pa lho phyogs rin chen spungs pa nas bar chad med par spyan drangs pa'i gser shog ser po'i ngos las lo gsum gsang ba'i mthar gtan la phab ste thugs nyams su bzhes pa'i skabs 'od gsal gyi snang bar 'og min pad+ma 'od kyi pho brang chen por rigs kun khyab bdag ma hA gu ru rje 'bangs dang bcas pas mngon sum du rjes su bzung zhing byin rlabs dbang bskur gyi rim pa rgyas par stsal/__slar gnas dus kyi rten 'brel phun sum tshogs pa'i skabs su rim par spel ba'i dus gsum mkhyen pa o rgyan chen po'i thugs bcud/__byin rlabs kyi tshan kha dang ngo mtshar gyi khyad par du mas 'phags pa thugs rje chen po pad+ma gtsug tor theg dgu dang 'brel ba las/__spyod pa'i rgyud dang rjes su 'brel ba'i 'jig rten dbang phyug 'gro 'dul phyag bzhi pa'i dkyil 'khor du mngon par dbang bskur ba'i bya ba bsgrub pa la/__slob dpon gyis bgyi 'os grub nas/__khyed rang rnams kyi ngo skal thog mar dkyil 'khor du 'jug pa'i phyir maN+Dal phul/__zhes brda sbyar la maN+Dal 'bul du gzhug__/de nas thun mong gi gsol ba 'debs pa 'di'i rjes zlos mdzod/__kun mkhyen ye shes phung po can/__/srid pa'i 'khor lo rnam sbyong ba/__/de ring bshad pa'i rin chen gter/__/gtso bos bdag la bka' drin stsol/__lan gsum/__chas su 'jug pa'i slad du/__sngon chad 'phags pa thugs rje chen po pad+ma gtsug tor gyi dkyil 'khor ma mjal ba'i brdar ras yug dmar po res gdong bcings pa'i mos pa mdzod/__oM tsak+Shu b+han+d+ha wa ra ma nA ya swA hA/__lha dang mjal ba'i tshe phyag rten du me tog gi phreng ba re yang byin par mos mdzod/__A khaM bI ra hU~M:__rgyud sbyang ba'i slad du/__bla ma dang dkyil 'khor gyi gtso bo 'phags pa thugs rje chen po pad+ma gtsug tor skyabs yul rgya mtsho'i tshogs kyis bskor ba zhal mngon sum du bzhugs pa'i spyan sngar/__skyabs sems tshad med yan lag bdun pa rnams tshul bzhin tu bsgrub par bgyi'o snyam pas 'di'i rjes zlos mdzod/__na moH__bdag dang sems can sogs nas/__go 'phang thob par shog:__bar lan gsum re/__de nas khyad par can gyi don zhu ba'i slad du gsol ba 'debs pa 'di'i rjes zlos mdzod/__na moH__rdo rje'i bla ma dgongs su gsol:__bdag la thugs rje chen po yi:__dbang bskur mchog ni stsal du gsol:__lan gsum/__zhes gsol ba btab pa la/__slob dpon gyis dam tshig gi gnas la dri ba ni 'di la gsan pas khyab ste:__e ma 'di ni spyod pa'i rgyud:__tshul bzhin dam tshig thub bya'am:__zhes dris pa'i lan du dam tshig khas blang ba 'di'i rjes zlos mdzod:__kye hoH__slob dpon thabs mkhas dgongs su gsol:__gsang sngags dam tshig tshul bzhin bsrung :__mkhan po pha ma rje ltar mchod:__byang chub sems ni mi spang ngo :__mu stegs can la'ang smad mi bya:__rdo rje dril bu phyag rgya gzung :__lha sngags ting 'dzin gsum mi gtang :__kho na nyid bzhi 'bad pas bsgom:__zhes khas blangs pa la/__slar yang nan tan gyi tshul du mna' chu sbyin cing rdo rje'i bro bor bar gdams pa ni/__e ma hoH__de ltar yin na skal bar ldan:__de phyir snying nas bro bor cig:__ces brjod la mna' chu sbyin/__de ltar gdams pa la rdo rje'i bro bor ba 'di'i rjes zlos mdzod:__i dan na ra kan:__zhes pas dam la bzhag nas/__de nas nang 'jug gi dngos gzhi ye shes dbab pa'i slad du dmigs pa 'di bzhin du mdzod/__oM swa b+hA ba sogs/__khyed rang rnams kyi phung khams skye mched kyis mtshon pa'i ma dag pa'i snang ba thams cad mi dmigs te stong pa nyid du gyur/__stong pa'i ngang las pa~M las pad+ma dang a las zla ba'i dkyil 'khor gyi steng du/__sems nyid rnam par mi rtog pa'i ye shes hrIHlas pad+ma hrIHsa mtshan pa/__de las 'od zer 'phros 'dus yongs su gyur pa las khyed rang rnams skad cig gis 'phags pa thugs rje chen po pad+ma gtsug tor 'gro 'dul yid bzhin nor bu sku mdog dkar gsal zhal gcig phyag bzhi'i phyag dang po gnyis kyis thugs kar thal mo sbyar ba'i bar du yid bzhin gyi nor bu 'dzin cing /__g.yas 'og mas shel phreng dang /__g.yon 'og mas me tog pad+ma dkar po bsnams pa/__dar dang rin po che'i rgyan thams cad kyis brgyan cing zhabs rdo rje'i skyil mo krung du bzhugs pa'i gnas gsum yig 'bru gsum gyis mtshan pa las 'od zer 'phros pas bsgoms pa dang 'dra ba'i ye shes sems dpa'i tshogs bsam gyis mi khyab pa spyan drangs te sib sib thim pas rgyud byin gyis brlabs par mos mdzod/__hrIH__bdag gi mgon po thugs rje can:__'gro ba'i don phyir spyan 'dren na:__sras dang slob ma'i tshogs dang bcas:__gnas 'di nyid du gshegs su gsol:__oM AR+Ya lo ke shwa ra sa pa ri wA ra e h+ye hi badz+ra sa mA dzaH__dzaHhU~M ba~M hoH__zhes yang yang brjod cing spos rol bcas byin dbab/__rdo rje spyi bor bzhag cing /__tiSh+Tha badz+ra zhes pas brtan par byas pa'i mos pa mdzod/__de nas rigs brtag pa'i phyir me tog 'bul bar gdams pa ni/__hoH__'di dus gsang ba'i sgor zhugs pa:__brtag pa'i me tog lha la 'bul:__ces gdams pa la/__khyed rang rnams kyis kyang ye shes kyi lha la bzang ngan ma mchis mod/__rang gis las bsags pa'i lha de la 'bab par shog cig snyam du me tog de nyid rin po che gser gyi me tog tu mos pas dkyil 'khor la 'dor ba'i mos pa dang bcas dngos su tshom bu'i dkyil 'khor 'dir tshig 'di'i rjes zlos dang bcas te 'dor mdzod/__hoH__bskal pa gong nas lha mchog de dag la:__ye shes rig pa'i me tog 'di 'bul gyi:__'gyur med ye shes dkyil 'khor der babs nas:__thugs rje chen pos rjes su gzung du gsol:__puSh+pe pra tIts+tsha hoH__de ltar dor bas dbus su babs na rdo rje/__shar du de bzhin gshegs pa/__lhor rin chen/__nub tu pad+ma/__byang du las kyi rigs kyi thugs rje chen po'i rigs su mtshon pa yin la/__slar yang me tog gang la babs pa'i lhas me tog de nyid phyag gis bzhes te khyed rang rnams kyi spyi bor bcings pa dang lhan cig tu gsang ba'i mtshan kyang byin par mos mdzod/__kye:__rig pa'i me tog phul ba'i byin rlabs kyis:__rang rig ye shes lha dang ngo 'phrod de:__ma 'ongs de bzhin gshegs pa dri ma med:__rtse gcig mi gtang ye shes sgrub par gyis:__de nas ma rig pa'i ling tog bsal ba'i slad du gsol ba 'debs pa 'di'i rjes zlos mdzod/__kye hoH__slob dpon thabs mkhas dgongs su gsol:__bdag gi ma rig mig phyes la:__gsang ba'i dkyil 'khor chen po ston:__rig rtsal lha dang sprad du gsol:__zhes gsol ba btab pa la brten nas/__slob dpon gyi thugs ka nas ye shes kyi 'od zer gser gyi thur ma lta bu byung nas khyed rang rnams kyi ma rig pa'i ling tog dang mig ras lhan cig tu bsal bar mos mdzod/__hrIH__sngon gyi rgyal ba rnams kyis ni:__ma rig mig ni phyes pa ltar:__'khor 'das so mtshams ling tog 'di:__ye shes thur mas dbye bar bya:__badz+ra dz+nyA na tsak+Shu pra be sha ya phaT:__de nas slob dpon gyis:__b+h+rU~M pra be sha ya phaT:__ces brjod pas pho brang gi sgo bzhi shag gis phye nas/__khyed rang rnams slob dpon gyi lag gi rdo rje la 'jus te dkyil 'khor chen po'i nang du khrid pa'i mos pa dang bcas bcom ldan 'das 'phags pa thugs rje chen po 'gro 'dul pad+ma gtsug tor lha lnga'i rten dang brten par bcas pa'i dkyil 'khor mngon sum bzhin tu mjal ba'i mos pa mdzod/__ces pa tsam mam/__spro na rten dang brten pa rgyas par bstan/__slar yang slob dpon gyis spro ba bskyed pa ni 'di la gsan pas khyab ste/__e ma skal ldan rigs kyi bu:__da ni las dang skal bar ldan:__dus gsum sangs rgyas dngos dang mjal:__bskal pa du ma'i sgrib pa dag:__des dkyil 'khor du 'ju_ga pa'i chos rnams song nas/__zhugs nas mngon par dbang bskur ba zhu ba'i slad du maN+Dal phul/__gsol ba 'debs pa 'di'i rjes zlos mdzod/__e ma 'dren pa bla na med:__dbang bskur ba ni stsal du gsol:__zhes gsol ba btab pas/__slob dpon dang mdun bskyed kyi dkyil 'khor pa rnams kyi thugs ka nas 'od zer 'phros/__dbang gi lha nam mkha' gang bar spyan drangs/__slob dpon dang lhan cig pas bkra shis pa'i rnam pa du ma dang ldan pas rin po che'i bum pa bdud rtsi'i chu rgyun gyis gang bas dbang bskur ba la brten nas sgrib gnyis bag chags dang bcas pa thams cad byang zhing dag ste sangs rgyas chos kyi sku 'grub pa'i skal ba can du byas par mos mdzod/__spros med don dam zlum po'i bum pa na:__rang byung thugs rje chen po zhu ba'i chu:__'dzin sems zhe sdang la sogs rnam par dag:__me long ye shes bum pas dbang bskur ro:__oM pad+ma uSh+NI Sha bi ma le hU~M phaT:__oM ma Ni pad+me hU~M:__oM sarba ta thA ga ta a b+hi She ka te sa ma ya shrI hU~M/__bdud rtsi'i rgyun gyis lus gang ba'i lhag ma spyi bor 'khyil ba las rigs kyi bdag po 'od dpag med kyis dbur brgyan pa la/__rin po che'i cod pan gyis dbang bskur bas sku dang ye shes phrin las dang bcas pa'i yon tan thams cad yongs su rdzogs shing sangs rgyas kyi gzugs sku mtshan dpes brgyan pa 'grub pa'i skal ba can du byas pa'i mos pa mdzod/__hrIH__skye med don dam snying po 'gag med las:__phyag mtshan lngas brgyan rigs lnga'i cod pan 'di:__zhen sems nga rgyal ma lus ye nas dag:__mnyam nyid ye shes rigs lngas dbang bskur ro:__sngags mthar/__rat+na saM b+ha ba mu ku Ta a b+hi Shiny+tsa hU~M:__rdo rje dang dril bu phyag tu gtad pas sangs rgyas kyi thugs rnam par mi rtog pa'i ye shes dang /__gsung dbyangs yan lag drug cu 'grub pa'i skal ba can tu byas pa'i mos pa mdzod/__hoH__khyed kyis rdo rje dril bu chongs:__thugs kyi dbyings su 'tshang rgya'o:__sngags mthar badz+ra gaN+De a b+hi Shiny+tsA mi/__zhes brjod/__de nas rdo rje slob dpon tu dbang bskur ba'i phyir/__khyed rang rnams seng ges bteg pa'i rin po che'i khrir 'khod pa'i steng du gdugs dkar po gser gyi yu ba can nam mkha' dang mnyam pa'i bla bre phub cing phyag tu glegs bam gtad nas 'khor los sgyur ba'i rgyal po rgyal sar dbang bskur ba ltar khams gsum chos kyi rgyal po'i rgyal tshab tu mngon par dbang bskur ba'i mos pa mdzod/__hoH__deng phyin rdo rje slob dpon te:__phyag rgya gsum dang ma bral cig:__rang gzhan don la brtson par gyis:__zhes dang ye d+harmAHbrjod cing me tog 'thor/__des dbang gi dngos gzhi grub nas/__mtha' rten tu rig sngags grub par byed pa bzlas lung /__mtshan med kyi rnal 'byor bsgom pa'i phyir rig gtad/__dge legs kyi 'byor pa spel ba'i slad du bkra shis pa'i rdzas rtags sbyin pa rnams su yod pa las/__thog mar bzlas lung gi slad du slob dpon dang mdun bskyed kyi zhal nas sngags kyi phreng ba byung /__khyed rang rnams kyi rna ba g.yas pa nas zhugs/__snying ga'i sa bon la thim pas sngags kyi byin rlabs ma lus pa rgyud la zhugs par mos te sngags 'di gnyis kyi rjes zlos lan gsum mdzod/__oM pad+ma uSh+NI Sha bi ma le hU~M phaT:__oM ma Ni pad+me hU~M:__rig pa gtad pa ni/__de ltar lha sngags kyis mtshon pa'i dus gsum gyi rnam par rtog pa'i rjes su ma 'brang bar sems nyid gnyug ma'i dbyings su mnyam par zhog cig:__ces gdams/_shis par bya ba'i slad du bkra shis pa'i rdzas brgyad dang /__rtags brgyad rnams so so'i byed las grub pa'i dngos po can lag tu gtad pas dge legs kyi 'byor pa spel ba'i mos pa mdzod/__hrIH__ma rig rnam dag ye shes me long mchog:__dug lnga'i gdung sel snying po zho yi zas:__nyon mongs gcong gzhil gi waM sman gyi phul:__phyi nang chos rnams dbang sdud li khri mchog:__rgyud dag gsang sngags 'bras spyod bilba'i 'bras:__rdo rje'i tshe mchog 'phel ba'i dUrba dang :__log smra kun bcom g.yas 'khyil chos kyi sgra:__bdud sde pham mdzad khro bo yungs kar tshogs:__'di dag dbang bskur bkra shis ldan par shog:__oM mang+ga laM ku ru a b+hi Shiny+tsA mi/__hrIH__dpal be'u ye shes drwa ba che:__'khor lo phyogs lhung kun dang bral:__pad+ma chags med ye shes te:__rgyal mtshan rtog med bdud las rgyal:__gdugs mchog khor yug 'od gsal ba:__bum pa cir snang chos kyi gter:__chos dung grags stong gdangs rtsal can:__gser nya ye shes byang chub sems:__skal ldan rnams la dbang bskur bas:__/bkra shis phun sum tshogs par shog:__oM aSh+Ta mang+ga laM a b+hi Shiny+tsA mi/__rjes 'brel du shis pa brjod pa ji ltar rigs pa dang bcas me tog gi char dbab/__de ltar 'phags pa thugs rje chen po 'gro 'dul pad+ma gtsug tor gyi dkyil 'khor du dbang bskur ba legs par thob pa'i phan yon ni/__'phags pa don yod zhags pa'i rtog pa chen po las/__don yod pa'i zhags pa pad+ma gtsug tor gyi snying po khro bo'i rigs kyi gsang sngags rim par phye ba gzungs sngags chen po snying po bcu po 'di lan cig dran nam/__klog gam/__ming bzung ba'am dran nam/__lag na rdo rje dus tshigs gcig tu dran pa tsam gyis kyang /__des mtshams med pa byed pa/__mnar med par gzhol ba/__bskal par gnas pa'ang de yis rnam par dag par 'gyur la/__sdig pa dang sgrib pa bsags pa rnams zad par 'gyur/__lus yongs su dag cing dri ma med par 'gyur/__sgrib pa dang sdig pa dang bral bar 'gyur/__tshe 'phos nas kyang 'jig rten gyi khams bde ba can du brdzus te skye bar 'gyur/__tshe rabs su tshe rabs dran par 'gyur/__nam yang ngan 'gror 'gro bar mi 'gyur/__bskal pa bye ba 'bum phrag brgyad cur 'khor los sgyur ba mchog tu 'gyur/__bskal pa bye ba 'bum phrag brgyad cur 'jig rten gyi khams bde ba can tu bde ba myong bar 'gyur/__ces sogs rgya cher gsungs pa ltar/__gzungs sngags zab mo 'di lan cig tsam dran pas kyang phan yon de lta bu dang ldan na/__dbang bskur ba thob pa dang /__sgom bzlas bgyis pa sogs kyi phan yon bsam gyis mi khyab pa lta smos kyang ci dgos pas ston pa thugs rje can gyi gsung gis nam yang mi bslu ba'i phyir dad pa dang /__spro ba dang /__nges shes mchog tu bskyed nas rang gis nyams su len pa dang /__gzhan dag la 'chad cing ston pa la sogs pa'i sgo nas dal ba'i rten la snying po len pa'i thabs la 'bad par bya'o/__/de lta bu'i phan yon chen po dang ldan pa'i dbang gi srog dam tshig dang sdom pa la srung sdom tshul bzhin tu bya dgos par gdams pa'ang 'di la gsan pas khyab ste/__dkon mchog gsum dang bla ma ni:__gtsug tu bkur zhing gsol bar bya:__pha ma grogs dang mdza' bo rnams:__bkur zhing dus mchod rnams la brtson:__mi dge mi spyod sha chang spang :__khrus dang gtsang sbra rnams la 'bad:__ces gdams pa la khyed rnams kyis kyang don de las 'da' bar mi bgyid do snyam pas mdor bsdus te 'dzin par khas blang ba 'di'i rjes zlos mdzod/__gtso bos ji ltar sogs/_rjes gtang rag gi maN+Dal/__lus longs spyod 'bul ba/__dge ba bsngo ba rnams spyi ltar byas nas slob ma rnams rang gnas su gtang ngo /__/gsum pa rjes ni/__mchod pa zhal gsos la byin gyis brlab/__mchod bstod rgyas bsdus gang rigs dang /__ma rnyed yongs su ma tshang dang /__sogs kyi mthar yi ge brgya pa brjod cing bzod par gsol/__mdun bskyed rten yod na brtan bzhugs dang /__med na badz+ra muHsa ye shes pa rang gnas su gshegs/__rang dam tshig thugs rje chen por sogs sgrub thabs ltar bsngo smon bar bya zhing /__shis pa brjod pas mtha' brgyan no/__zhes pa'ang rang gzhan rnams la sman pa'i bsam pas/__gter chen bla ma mchog gi bka' drin las zab chos 'di nyid dang por thos pa'i skal bzang can mtsho skyes bla ma dgyes pa'i 'bangs mkhyen brtse'i dbang pos mdor bsdus snying por dril te sbyar ba'i dge bas sems can thams cad 'phags mchog thugs rje chen po'i go 'phang myur du thob pa'i rgyur gyur cig/___//__!_