འཕགས་པ་ཐུགས་རྗེ་ཆེན་པོ་པདྨ་གཙུག་ཏོར་གྱི་སྒྲུབ་ཐབས་སྙིང་པོར་དྲིལ་བ་གཞན་ཕན་ཟླ་སྣང་།

🚧 This website is under continued development. We appreciate your patience!

First text in section. Back to Volume PageNext Text

Wylie title	'phags pa thugs rje chen po pad+ma gtsug tor gyi sgrub thabs snying por dril ba gzhan phan zla snang
Location	mkhyen brtse'i bka' 'bum Volume 15, sde tshan 1, Text 1, Pages 1-10 (Folios 1a to 5b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	མཆོག་གྱུར་གླིང་པ་ (mchog gyur gling pa)
Citation	'jam dbyangs mkhyen brtse'i dbang po. 'phags pa thugs rje chen po pad+ma gtsug tor gyi sgrub thabs snying por dril ba gzhan phan zla snang. In 'jam dbyangs mkhyen brtse'i dbang po'i bka' 'bum, Vol. 15: 1-10. Khams sde dge rdzong sar dgon: Rdzong sar blo gros phun tshogs, 2020.
Genre	Sadhanas - Evocation Ritual - sgrub thabs
Cycle	འཕགས་པ་ཐུགས་རྗེ་ཆེན་པོ་པདྨ་གཙུག་ཏོར་ ('phags pa thugs rje chen po pad+ma gtsug tor)
Deity	thugs rje chen po
RTZ	In the Rinchen Terdzö: https://rtz.tsadra.org/index.php/Terdzo-RA-008
Colophon	ཞེས་པའང་རྩོད་བྲལ་དུས་བབ་ཀྱི་གཏེར་སྟོན་ཨོ་རྒྱན་མཆོག་གྱུར་བདེ་ཆེན་གླིང་པའི་ཞལ་སྔ་ནས་ཀྱི་བཀའ་དྲིན་ལས། ཟབ་ཆོས་འདི་ཉིད་ཐོག་མར་ཐོས་པའི་སྐལ་བཟང་ཅན་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རང་གཞན་མང་པོར་སྨན་པའི་བསམ་པས་གཏེར་གཞུང་རྩ་བའི་དགོངས་དོན་ལྟར་བཀླགས་ཆོག་ཏུ་བསྡེབས་པའི་དགེ་བས་འགྲོ་ཀུན་འཕགས་པ་ཐུགས་རྗེ་ཆེན་པོའི་གོ་འཕང་མྱུར་དུ་ཐོབ་པའི་རྒྱུར་གྱུར་ཅིག། །།སརྦ་དཱ་མངྒ་ལཾ་བྷ་བ་ཏུ།།
	zhes pa'ang rtsod bral dus bab kyi gter ston o rgyan mchog gyur bde chen gling pa'i zhal snga nas kyi bka' drin las/__zab chos 'di nyid thog mar thos pa'i skal bzang can mtsho skyes bla ma dgyes pa'i 'bangs mkhyen brtse'i dbang pos rang gzhan mang por sman pa'i bsam pas gter gzhung rtsa ba'i dgongs don ltar bklags chog tu bsdebs pa'i dge bas 'gro kun 'phags pa thugs rje chen po'i go 'phang myur du thob pa'i rgyur gyur cig/___//sarba dA mang+ga laM b+ha ba tu//

1 Texts in this Section (sde tshan or chos tshan)

1 1-10	འཕགས་པ་ཐུགས་རྗེ་ཆེན་པོ་པདྨ་གཙུག་ཏོར་གྱི་སྒྲུབ་ཐབས་སྙིང་པོར་དྲིལ་བ་གཞན་ཕན་ཟླ་སྣང་། 'phags pa thugs rje chen po pad+ma gtsug tor gyi sgrub thabs snying por dril ba gzhan phan zla snang Sadhanas - Evocation Ritual - sgrub thabs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །པ ར ཧི ཏ ཙ ནྡྲ བྷཱ ནཱ མཱ ཪྻ མ ཧཱ ཀཱ རུ ཎཱ པ དྨོ ཥྞཱི ཥ སྱ སཱ དྷ ཀ ག རྦྷཾ པི ཎྜ བི ཧ ར ཏི སྨ ། །

༄༅། །འཕགས་པ་ཐུགས་རྗེ་ཆེན་པོ་པདྨ་གཙུག་ཏོར་གྱི་སྒྲུབ་ཐབས་སྙིང་པོར་དྲིལ་བ་གཞན་ཕན་ཟླ་སྣང་ཞེས་བྱ་བ་བཞུགས་སོ།

།ན་མོ་གུ་རུ་ལོ་ཀེ་ཤྭ་རཱ་ཡ། འཆི་མེད་གྲུབ་པའི་སློབ་དཔོན་ཆེན་པོ་པདྨ་སཾ་བྷ་བའི་དགོངས་བཅུད། རྒྱུད་སྡེ་གཉིས་པ་སྤྱོད་པའི་རྒྱུད་དང་རྗེས་སུ་འབྲེལ་བར་འཕགས་པ་ཐུགས་རྗེ་ཆེན་པོ་པདྨ་གཙུག་ཏོར་ལྷ་ལྔའི་རྣལ་འབྱོར་ཉམས་སུ་བླང་བར་འདོད་པས། ཚོགས་ཞིང་ནམ་མཁའ་གང་བར་སད་པའི་སྤྱན་སྔར། བདག་དང་སེམས་ཅན་སྡུག་བསྔལ་སྒྲོལ་དོན་དུ༔ བྱང་ཆུབ་བར་དུ་སྐྱབས་སུ་གཟུང་བའི་གནས༔ བླ་མ་ཐུགས་རྗེ་ཆེན་པོ་དཀོན་མཆོག་གསུམ༔ ཡི་དམ་མཁའ་འགྲོའི་ཚོགས་ལ་སྐྱབས་སུ་མཆི༔ བདག་ནི་སྔོན་གྱི་རྒྱལ་བའི་མཛད་པ་བཞིན༔ སེམས་ཅན་ཀུན་གྱི་དོན་རབ་བརྩམ་པར་བྱ༔ སེམས་ཅན་མ་བརྒལ་བསྒྲལ་དང་མ་གྲོལ་དགྲོལ༔ སེམས་ཅན་དབུགས་དབྱུང་མྱ་ངན་འདས་འགོད་འཇུག༔ འགྲོ་རྣམས་བདེ་ལྡན་སྡུག་བསྔལ་བྲལ་བ་དང་༔ འཕགས་པའི་བདེ་ཐོབ་བཏང་སྙོམས་ལ་གནས་ཤོག༔ ཕྱོགས་བཅུའི་རྒྱལ་བ་སྲས་བཅས་འདིར་བྱོན་ལ༔ འཕོ་འགྱུར་འབྲལ་མེད་ཀློང་དུ་བཞུགས་སུ་གསོལ༔ ཡེ་ནས་རྣམ་དག་ངང་དུ་ཕྱག་འཚལ་ལོ༔ ཆོས་ཉིད་རྣམ་རོལ་མཆོད་སྤྲིན་རྒྱ་མཚོས་མཆོད༔ མ་རིག་སྡིག་པའི་ལས་བགྱིས་མཐོལ་ལོ་བཤགས༔ དབྱིངས་རིག་འདུ་འབྲལ་མེད་ལ་ཡི་རང་ངོ་༔ ཁྱབ་བརྡལ་ཕྱོགས་ལྷུང་བྲལ་བའི་ཆོས་འཁོར་བསྐོར༔ དུས་གསུམ་རྟག་པར་མྱ་ངན་མི་འདའ་བཞུགས༔ དམིགས་མེད་དགེ་ཚོགས་མཁའ་མཉམ་འགྲོ་ལ་བསྔོ༔ ཐུགས་རྗེ་ཆེན་པོའི་གོ་འཕང་ཐོབ་པར་ཤོག༔ ཅེས་ལན་གསུམ་གྱིས་ཚོགས་བསགས་པ་སྔོན་དུ་འགྲོ་བས། ཧྲཱིཿ ཕྱི་ནང་ཆོས་རྣམས་དམིགས་མེད་དེ་ཡི་ངང་༔ པྃ་ལས་སྣ་ཚོགས་པདྨ་འདབ་སྟོང་དབུས༔ ཧཱུྃ་ལས་རྡོ་རྗེ་རྒྱ་གྲམ་ཧཱུྃ་གིས་མཚན༔ དེ་ཡི་འོད་ཀྱིས་རྡོ་ར་མེ་རིའི་གུར༔ སྣ་ཚོགས་རྡོ་རྗེའི་ལྟེ་བར་བྷྲཱུྃ་ལྔ་ལྡན༔ ཡོངས་གྱུར་གཞལ་ཡས་ཁང་ཆེན་སྒོ་བཞི་པ༔ དབུས་ཕྱུར་རྡོ་རྗེ་ནོར་བུའི་ཏོག་གིས་སྤྲས༔ གདུགས་འཕན་དར་དཔྱངས་རིན་ཆེན་དུ་མས་བརྒྱན༔ དེ་ནང་པདྨ་འདབ་ལྔའི་གེ་སར་ལ༔ པད་ཟླའི་གདན་སྟེང་ས་བོན་ཕྱག་མཚན་ལས༔ འོད་འཕྲོས་དོན་གཉིས་བྱས་འདུས་སྤྱན་རས་གཟིགས༔ དཀར་པོ་ཕྱག་བཞི་ཞབས་གཉིས་སྐྱིལ་ཀྲུང་བཞུགས༔ དར་དང་རིན་ཆེན་རྒྱན་གྱིས་ལེགས་པར་བརྒྱན༔ རྩ་ཕྱག་ཐལ་སྦྱར་ནོར་འཛིན་འོག་མ་གཉིས༔ ཤེལ་ཕྲེང་པདྨ་དཀར་པོའི་ཡུ་བ་འཛིན༔ དེ་ཡི་ཕྱོགས་བཞིར་རིགས་བཞིའི་སྤྱན་རས་གཟིགས༔ དཀར་སེར་དམར་ལྗང་ཞལ་གཅིག་ཕྱག་གཉིས་པ༔ སྐྱབས་སྦྱིན་པདྨ་འཛིན་ཏེ་ལོངས་སྐུའི་ཆས༔ གནས་གསུམ་ཡིག་འབྲུ་གསུམ་གྱིས་མཚན་པར་གསལ༔ སྒོ་བཞི་འདོད་སྣམ་མཆོད་པའི་ལྷ་མོས་བསྐོར༔ རང་བྱུང་རྡོ་རྗེ་གསུམ་གྱི་ཡི་གེ་ལས༔ འོད་ཟེར་འཕྲོས་པས་ཡེ་ཤེས་སེམས་དཔའི་ཚོགས༔ ནམ་མཁའ་གང་བར་སྤྱན་དྲངས་གཉིས་མེད་ཐིམ༔ ཧྲཱིཿ བདག་གི་མགོན་པོ་ཐུགས་རྗེ་ཅན༔ འགྲོ་བའི་དོན་ཕྱིར་སྤྱན་འདྲེན་ན༔ སྲས་དང་སློབ་མའི་ཚོགས་དང་བཅས༔ གནས་འདི་ཉིད་དུ་གཤེགས་སུ་གསོལ༔ ཨོཾ་ཨཱཪྻ་ལོ་ཀེ་ཤྭ་ར་ས་པ་རི་ཝཱ་ར་ཨེ་ཧྱེ་ཧི་བཛྲ་ས་མཱ་ཛཿ ཏིཥྛ་ལྷན༔ སླར་ཡང་ཐུགས་ཀའི་ཧྲཱིཿལས་འོད་འཕྲོས་པས༔ དབང་གི་ལྷ་ཚོགས་ནམ་མཁའ་གང་བ་ཡིས༔ རིན་ཆེན་བུམ་པ་མང་པོ་བདུད་རྩིས་བཀང་༔ བཀོད་པ་དུ་མར་བཅས་པ་ཐམས་ཅད་ལ༔ ཀུན་བཟང་རྣམ་རོལ་མཆོད་པ་རྒྱ་མཚོས་མཆོད༔ ཨོཾ་སརྦ་ཏ་ཐཱ་ག་ཏ་པྲ་ཝཱ་ར་སཏྐ་ར་མ་ཧཱ་སཏྐ་ར་མ་ཧཱ་ཨརྒྷཾ་ནས་ཤབྡ་པྲ་ཏཱིཙྪ་ཨཱཿཧཱུྃ༔ དེ་བཞིན་གཤེགས་པས་ལྷ་ལ་དབང་བསྐུར་གསོལ༔ བཀྲ་ཤིས་གླུ་ལེན་མེ་ཏོག་འཐོར་བཞིན་པས༔ ཇི་སྙེད་སངས་རྒྱས་འདུས་པས་དབང་བསྐུར་རོ༔ ཨོཾ་སརྦ་ཏ་ཐཱ་ག་ཏ་ཨ་མི་ཏཱ་བྷ་ཨ་བྷི་ཥིཉྩ་ས་མ་ཡ་ཤྲི་ཡེ་ཧཱུྃ༔ སྒྲིབ་དག་ཆུ་ལྷག་འོད་དཔག་མེད་པ་ཡི༔ རྣམ་པར་བཞེངས་ནས་སྤྱི་བོར་དབུ་བརྒྱན་གྱུར༔ ཅེས་བསྙེན་སྒྲུབ་ཡན་ལག་བཞི་དང་ལྡན་པས་བདག་ཉིད་ལྷའི་དཀྱིལ་འཁོར་དུ་གསལ་བཏབ་ལ་ཕྱག་འཚལ་བ་ནི། འདས་དུས་སངས་རྒྱས་པདྨ་དྲི་མ་མེད༔ ད་ལྟར་སངས་རྒྱས་པདྨ་ཚེ་དཔག་མེད༔ པདྨའི་སྤྱན་ལྡན་འཁོར་བཅས་མ་འོངས་དུས༔ གྲངས་མེད་འགྲོ་དོན་མཛད་ལ་ཕྱག་འཚལ་ལོ༔ ན་མོ་པཱུ་རུ་ཤ་ཡ་ཧོཿ མཆོད་པ་འབུལ་བ་ནི། རང་གི་སྙིང་ག་ནས་མཆོད་པའི་ལྷ་མོ་ནམ་མཁའ་གང་བར་སྤྲོས་ཏེ་མཆོད་པར་བསམས་ལ། སྲིད་ཞིའི་མགོན་གྱུར་འཕགས་པའི་ཚོགས་རྣམས་ལ༔ ཡན་ལག་བརྒྱད་ལྡན་མཆོད་ཡོན་བཟང་པོ་དང་༔ དྲི་བཟང་འོ་ཆབ་སྦྱར་བའི་ཞབས་བསིལ་མཆོག༔ དཀར་དམར་མཛེས་པའི་རྣམ་བཀྲའི་མེ་ཏོག་ཚལ༔ སྦྱར་དང་ལྷན་སྐྱེས་དྲི་བསུང་ངད་ལྡན་སྤྲིན༔ སྨན་མཆོག་བྱུག་ཏུ་འོས་པའི་དྲི་ཆབ་རིགས༔ ལྷ་མིའི་ངོ་མཚར་ཞལ་ཟས་བདུད་རྩི་མཆོག༔ རྔ་ཟླུམ་པི་ཝང་སིལ་སྙན་དུང་གི་སྒྲ༔ བཀོད་པ་ཁྱད་འཕགས་ལྷ་དང་ལྷ་མོའི་ཚོགས༔ བ་དན་ཕྱེ་ཕུར་གདུགས་འཕན་བླ་བྲེ་དང་༔ རྒྱལ་མཚན་ལ་སོགས་ནམ་མཁའ་བཀང་སྟེ་འབུལ༔ ཨོཾ་སརྦ་ཏ་ཐཱ་ག་ཏ་ཨརྒྷཾ་ནས། ཤབྡ་སརྦ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཧྲཱིཿ འགྲོ་མགོན་སྲས་དང་འཕགས་ཚོགས་སྤྲུལ་པར་བཅས༔ མ་རིག་རྣམ་དག་ཡེ་ཤེས་མེ་ལོང་མཆོག༔ དུག་ལྔའི་གདུང་སེལ་སྙིང་པོ་ཞོ་ཡི་ཟས༔ ཉོན་མོངས་གཅོང་གཞིལ་གི་ཝཾ་སྨན་གྱི་ཕུལ༔ ཕྱི་ནང་ཆོས་རྣམས་དབང་སྡུད་ལི་ཁྲི་མཆོག༔ རྒྱུད་དག་གསང་སྔགས་འབྲས་སྤྱོད་བིལྦའི་འབྲས༔ རྡོ་རྗེའི་ཚེ་མཆོག་འཕེལ་བའི་དཱུརྦ་དང་༔ ལོག་སྨྲ་ཀུན་བཅོམ་གཡས་འཁྱིལ་ཆོས་ཀྱི་སྒྲ༔ བདུད་སྡེ་ཕམ་མཛད་ཁྲོ་བོ་ཡུངས་ཀར་ཚོགས༔ འདི་དག་འབུལ་གྱིས་བཀྲ་ཤིས་ལྡན་པར་ཤོག༔ ཨོཾ་སརྦ་ཏ་ཐཱ་ག་ཏ་ཨཱཪྻ་ལོ་ཀེ་ཤྭ་ར་ས་པ་རི་ཝཱ་ར་མངྒ་ལ་ཀུ་རུ་པཱུ་ཛི་ཏེ་ཨཱཿཧཱུྃ༔ ཧྲཱིཿ དཀྱིལ་འཁོར་ལྷ་ཚོགས་ཐམས་ཅད་ལ༔ དཔལ་བེའུ་ཡེ་ཤེས་དྲྭ་བ་ཆེ༔ འཁོར་ལོ་ཕྱོགས་ལྷུང་ཀུན་དང་བྲལ༔ པདྨ་ཆགས་མེད་ཡེ་ཤེས་ཏེ༔ རྒྱལ་མཚན་རྟོག་མེད་བདུད་ལས་རྒྱལ༔ གདུགས་མཆོག་ཁོར་ཡུག་འོད་གསལ་བ༔ བུམ་པ་ཅིར་སྣང་ཆོས་ཀྱི་གཏེར༔ ཆོས་དུང་གྲགས་སྟོང་གདངས་རྩལ་ཅན༔ གསེར་ཉ་ཡེ་ཤེས་བྱང་ཆུབ་སེམས༔ རྒྱལ་བའི་ཚོགས་ལ་འབུལ་བར་བགྱི༔ ཨོཾ་སརྦ་ཏ་ཐཱ་ག་ཏ་ཨཱཪྻ་ལོ་ཀེ་ཤྭ་ར་ས་པ་རི་ཝཱ་ར་ཨཥྟ་མངྒ་ལཾ་པཱུ་ཛི་ཏེ་ཨཱཿཧཱུྃ༔ བསྟོད་པ་ནི། ཧྲཱིཿ ཚད་མེད་ཐུགས་རྗེ་མཐའ་བཞིའི་དྲི་མ་མེད༔ ཆགས་བྲལ་པདྨ་འགྲོ་འདྲེན་ཕྲེང་བ་བསྣམས༔ རེ་འདོད་ཀུན་སྐོང་ནོར་བུ་རིན་པོ་ཆེ༔ འཛིན་ཏེ་རིགས་བཞིས་བསྐོར་ལ་ཕྱག་འཚལ་བསྟོད༔ བཟླས་པ་བྱ་བ་ནི། བདག་གི་ཐུགས་ཀ་ནས་ཡེ་ཤེས་པ་ལོགས་སུ་བྱེ་ནས་མདུན་གྱི་ནམ་མཁར་བཞུགས་པའི་བདག་མདུན་གཉིས་ཀའི་གཙོ་བོའི་ཐུགས་ཀར་རང་འདྲའི་ཡེ་ཤེས་སེམས་དཔའ་ཚོན་གང་བ། དེའི་ཐུགས་ཀར་པད་ཟླའི་སྟེང་དུ་ཏིང་ངེ་འཛིན་སེམས་དཔའ་ཧྲཱིཿཡིག་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས། འཕགས་པ་རྣམས་མཆོད། སེམས་ཅན་ཐམས་ཅད་ཐུགས་རྗེ་ཆེན་པོའི་གོ་འཕང་ལ་བཀོད། ཚུར་འདུས་རང་གི་ཐུགས་ཀར་ཐིམ་པས་རྒྱུད་བྱིན་གྱིས་བརླབས་པར་བསམས་ལ། ཨོཾ་པདྨ་ཨཥྞཱི་ཥ་བི་མ་ལེ་ཧཱུྃ་ཕཊ྄ཿ ཅེས་གཙོ་བོར་བཟླ། མཐར་རང་གི་སྙིང་ག་ནས་འོད་ཟེར་ཐོན། མདུན་གྱི་ལྷའི་ཐུགས་ཀར་ཐིམ། ཐུགས་རྒྱུད་བསྐུལ། མདུན་གྱི་ལྷའི་ཐུགས་ཀ་ནས་ཐོན། བདག་གི་ཐུགས་ཀའི་སྟོད་ཀྱི་ས་བོན་དང་སྔགས་ཕྲེང་ལ་ཐིམ་པས་དངོས་གྲུབ་ཐོབ་པར་བསམས་ལ། གོང་གི་སྔགས་དང་། ཨོཾ་མ་ཎི་པདྨེ་ཧཱུྃ༔ ཞེས་པའང་ཅི་ནུས་སུ་བཟླས་མཐར། མདུན་གྱི་ལྷ་ལ་མཆོད་ཅིང་བསྟོད་ནས། མགོན་པོ་སྤྱན་རས་གཟིགས་དབང་ཕྱུག་གིས་བདག་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་གདབ། མ་རྙེད་ཡོངས་སུ་མ་ཚང་དང་། སོགས་ཀྱི་མཐར་ཡི་གེ་བརྒྱ་པ་ལན་གསུམ་བརྗོད་པས་ནོངས་པ་བཤགས་ཤིང་། ཡེ་ཤེས་པ་རང་གནས་སུ་གཤེགས་པར་བསམ། རང་དམ་ཚིག་ཐུགས་རྗེ་ཆེན་པོར་གསལ་བའི་ཐུགས་ཀ་ནས་འོད་ཟེར་འཕྲོས་པས་གཞལ་ཡས་ཁང་འཁོར་དང་བཅས་པ་འོད་དུ་ཞུ་ནས་རང་ལ་ཐིམ་པའི་གནས་གསུམ་དུ་ཨོཾ་ཨཱཿཧཱུྃ་གིས་མཚན་པར་མོས་ཏེ། འདི་ལྟ་བུ་ཡི་དགེ་བ་ཡིས༔ འཁོར་བ་དོང་ནས་སྤྲུགས་པ་དང་༔ འབྲེལ་ཐོགས་འགྲོ་བ་ཐམས་ཅད་ཀུན༔ བདེ་བ་ཅན་དུ་སྐྱེ་བར་ཤོག༔ ཅེས་བསྔོ་སྨོན་རྒྱས་པར་བྱས་ཏེ་ཐུན་མཚམས་ཀྱི་བྱ་བ་ལ་འཇུག །བསྙེན་སྒྲུབ་སོགས་ཀྱི་སྐབས་སུ་གཏོར་མ་འབུལ་ན། ཐུན་མཐར་དཀར་གསུམ་མངར་གསུམ་གྱི་གཏོར་མ། ཨོཾ་ཧ་ཡ་གྲཱི་བ་ཧཱུྃ་ཕཊ྄༔ ཅེས་པས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་གཏོར་མ་འདོད་རྒུ་འབྱུང་བའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ལན་གསུམ་གྱིས་བརླབ། མདུན་གྱི་ལྷའི་ལྗགས་འོད་ཟེར་གྱི་སྦུ་གུས་དྲངས་ཏེ་གསོལ་བས་དགྱེས་ཤིང་ཚིམ་པར་བསམས་ལ། སྔགས་ཀྱི་མཐར་ཨ་ཀཱ་རོ་བཏགས་པ་ལན་གསུམ་གྱིས་འབུལ། མཆོད་བསྟོད་སོགས་རྗེས་སྔར་བཞིན་བྱ། སྤྲོ་ན་གཏོར་མ་ཆ་གསུམ་ཡང་ཆོ་ག་རྒྱས་བསྡུས་ཇི་ལྟར་རིགས་པས་འབུལ་ལོ། །བསྙེན་པ་བྱེད་ན། གནས་གཙང་ཞིང་ཡིད་དང་མཐུན་པར་འབྱོར་ན་སྐུ་བརྙན་བྲིས་འབུར་གང་རིགས་དགྲམ། གང་ལྟར་ཡང་གཏོར་མ་དཀར་ཟླུམ་ཉེར་སྤྱོད་དང་བཅས་པ་བཤམ། ཁྲུས་དང་གཙང་སྦྲ་ལ་གནས་པས་གོང་དུ་བཤད་པའི་རྣལ་འབྱོར་ཐུན་བཞིའམ་གསུམ་ལ་སོགས་པར་ཉམས་སུ་བླང་། སྔ་ཐུན་གྱི་བཟླས་པའི་མཐར་གཏོར་མ་འབུལ། དེ་ལྟ་བུའི་རིམ་པས་ཡི་གེ་བཅུ་པ་འབུམ་ཕྲག་བཅུ་སོགས་བཟླ་བར་བྱ་སྟེ། འཕགས་པ་དོན་ཡོད་ཞགས་པའི་རྟོག་པ་ཆེན་མོ་ལས། གསང་སྔགས་ཀྱི་སྙིང་པོ་ཡི་གེ་བཅུ་པ་འབུམ་ཕྲག་བཟླས་བརྗོད་བྱས་ན་ཕྱིར་མི་ལྡོག་པར་གྱུར་ནས་ས་བཅུ་ལ་གནས་པར་འགྱུར་ཞིང་། ལྷ་དང་མིའི་སྐྱེ་རྒུ་དག་འདི་ནི་དེ་བཞིན་གཤེགས་པའོ་ཞེས་བརྗོད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར། དོན་ཡོད་པའི་པདྨ་གཙུག་ཏོར་གྱི་འཁོར་ལོས་སྒྱུར་བར་འགྱུར་ཏེ་ཐེ་ཚོམ་མི་བྱའོ། །ཞེས་པས་མཚོན་ཏེ། གཟུངས་སྔགས་འདི་དྲན་པ་ཙམ་གྱིས་ཀྱང་མཚམས་མེད་པ་ལྔ་བྱང་བ་དང་། ནམ་དུའང་ངན་སོང་དུ་མི་འགྲོ་ཞིང་། འཇིག་རྟེན་གྱི་ཁམས་བདེ་བ་ཅན་དུ་པདྨོ་ལས་བརྫུས་ཏེ་སྐྱེ་བ་དང་། དུང་ལ་ལན་བདུན་བཟླས་ཏེ་བུས་ན་སྒྲ་ཐོས་པ་ཐམས་ཅད་མཐོ་རིས་སུ་སྐྱེ་བ་དང་། ཙནྡན་ལ་སོགས་བདུགས་ཏེ་གོས་གྱོན་པ་ཙམ་གྱིས་སྡིག་སྒྲིབ་ཐམས་ཅད་ཟད་པ་སོགས་ཕན་ཡོན་བསམ་གྱིས་མི་ཁྱབ་པར་གསུངས་སོ། །དེའང་གྲུབ་ན་ཡི་གེའི་གྲངས་ཀྱི་འབུམ་ཕྲག་སྟེ་འབུམ་ཕྲག་བཅུ་བཟླ། མ་གྲུབ་ན་འབུམ་ཕྲག་བཞི་དང་། ཡི་གེ་དྲུག་པའང་ཅི་ནུས་བཟླ་བ་ནི་ཕྱག་ལེན་ནོ། །ཁྱད་པར་ཉ་སྟོང་བརྒྱད་གསུམ་སོགས་དུས་བཟང་པོར་ཁྲུས་དང་གཙང་སྦྲ་དང་བཅས་གསོ་སྦྱོང་ལ་གནས་པས་བཟླས་ན་ཕན་ཡོན་ལྷག་པར་ཆེ་ཞིང་། མདོར་ན་དུས་དང་རྒྱུན་གྱི་ཉམས་ལེན་ལ་བརྩོན་པས་དལ་བའི་རྟེན་ལ་སྙིང་པོ་ལེན་པར་བྱའོ། །ཞེས་པའང་རྩོད་བྲལ་དུས་བབ་ཀྱི་གཏེར་སྟོན་ཨོ་རྒྱན་མཆོག་གྱུར་བདེ་ཆེན་གླིང་པའི་ཞལ་སྔ་ནས་ཀྱི་བཀའ་དྲིན་ལས། ཟབ་ཆོས་འདི་ཉིད་ཐོག་མར་ཐོས་པའི་སྐལ་བཟང་ཅན་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རང་གཞན་མང་པོར་སྨན་པའི་བསམ་པས་གཏེར་གཞུང་རྩ་བའི་དགོངས་དོན་ལྟར་བཀླགས་ཆོག་ཏུ་བསྡེབས་པའི་དགེ་བས་འགྲོ་ཀུན་འཕགས་པ་ཐུགས་རྗེ་ཆེན་པོའི་གོ་འཕང་མྱུར་དུ་ཐོབ་པའི་རྒྱུར་གྱུར་ཅིག། །།སརྦ་དཱ་མངྒ་ལཾ་བྷ་བ་ཏུ།།

[edit]

thugs chen pad+ma gtsug tor gyi sgrub thabs gzhan phan zla snang / @#/__/pa_ra_hi_ta_tsa_n+d+ra_b+hA_nA_mA_R+Ya_ma_hA_kA_ru_NA_pa_d+mo_Sh+NI_Sha_s+ya_sA_d+ha_ka_ga_r+b+haM_pi_N+Da_bi_ha_ra_ti_sma_/_/_ @#/__/'phags pa thugs rje chen po pad+ma gtsug tor gyi sgrub thabs snying por dril ba gzhan phan zla snang zhes bya ba bzhugs so/_/ na mo gu ru lo ke shwa rA ya/__'chi med grub pa'i slob dpon chen po pad+ma saM b+ha ba'i dgongs bcud/__rgyud sde gnyis pa spyod pa'i rgyud dang rjes su 'brel bar 'phags pa thugs rje chen po pad+ma gtsug tor lha lnga'i rnal 'byor nyams su blang bar 'dod pas/__tshogs zhing nam mkha' gang bar sad pa'i spyan sngar/__bdag dang sems can sdug bsngal sgrol don du:__byang chub bar du skyabs su gzung ba'i gnas:__bla ma thugs rje chen po dkon mchog gsum:__yi dam mkha' 'gro'i tshogs la skyabs su mchi:__bdag ni sngon gyi rgyal ba'i mdzad pa bzhin:__sems can kun gyi don rab brtsam par bya:__sems can ma brgal bsgral dang ma grol dgrol:__sems can dbugs dbyung mya ngan 'das 'god 'jug:__'gro rnams bde ldan sdug bsngal bral ba dang :__'phags pa'i bde thob btang snyoms la gnas shog:__phyogs bcu'i rgyal ba sras bcas 'dir byon la:__'pho 'gyur 'bral med klong du bzhugs su gsol:__ye nas rnam dag ngang du phyag 'tshal lo:__chos nyid rnam rol mchod sprin rgya mtshos mchod:__ma rig sdig pa'i las bgyis mthol lo bshags:___dbyings rig 'du 'bral med la yi rang ngo :__khyab brdal phyogs lhung bral ba'i chos 'khor bskor:__dus gsum rtag par mya ngan mi 'da' bzhugs:__dmigs med dge tshogs mkha' mnyam 'gro la bsngo:__thugs rje chen po'i go 'phang thob par shog:__ces lan gsum gyis tshogs bsags pa sngon du 'gro bas/__hrIH__phyi nang chos rnams dmigs med de yi ngang :__pa~M las sna tshogs pad+ma 'dab stong dbus:__hU~M las rdo rje rgya gram hU~M gis mtshan:__de yi 'od kyis rdo ra me ri'i gur:__sna tshogs rdo rje'i lte bar b+h+rU~M lnga ldan:__yongs gyur gzhal yas khang chen sgo bzhi pa:__dbus phyur rdo rje nor bu'i tog gis spras:__gdugs 'phan dar dpyangs rin chen du mas brgyan:__de nang pad+ma 'dab lnga'i ge sar la:__pad zla'i gdan steng sa bon phyag mtshan las:__'od 'phros don gnyis byas 'dus spyan ras gzigs:__dkar po phyag bzhi zhabs gnyis skyil krung bzhugs:__dar dang rin chen rgyan gyis legs par brgyan:__rtsa phyag thal sbyar nor 'dzin 'og ma gnyis:__shel phreng pad+ma dkar po'i yu ba 'dzin:__de yi phyogs bzhir rigs bzhi'i spyan ras gzigs:__dkar ser dmar ljang zhal gcig phyag gnyis pa:__skyabs sbyin pad+ma 'dzin te longs sku'i chas:__gnas gsum yig 'bru gsum gyis mtshan par gsal:__sgo bzhi 'dod snam mchod pa'i lha mos bskor:__rang byung rdo rje gsum gyi yi ge las:__'od zer 'phros pas ye shes sems dpa'i tshogs:__nam mkha' gang bar spyan drangs gnyis med thim:__hrIH__bdag gi mgon po thugs rje can:__'gro ba'i don phyir spyan 'dren na:__sras dang slob ma'i tshogs dang bcas:__gnas 'di nyid du gshegs su gsol:__oM AR+Ya lo ke shwa ra sa pa ri wA ra e h+ye hi badz+ra sa mA dzaH__tiSh+Tha lhan:__slar yang thugs ka'i hrIHlas 'od 'phros pas:__dbang gi lha tshogs nam mkha' gang ba yis:__rin chen bum pa mang po bdud rtsis bkang :__bkod pa du mar bcas pa thams cad la:__kun bzang rnam rol mchod pa rgya mtshos mchod:__oM sarba ta thA ga ta pra wA ra sat+ka ra ma hA sat+ka ra ma hA ar+g+haM nas shab+da pra tIts+tsha AHhU~M:__de bzhin gshegs pas lha la dbang bskur gsol:__bkra shis glu len me tog 'thor bzhin pas:__ji snyed sangs rgyas 'dus pas dbang bskur ro:__oM sarba ta thA ga ta a mi tA b+ha a b+hi Shiny+tsa sa ma ya shri ye hU~M:__sgrib dag chu lhag 'od dpag med pa yi:__rnam par bzhengs nas spyi bor dbu brgyan gyur:__ces bsnyen sgrub yan lag bzhi dang ldan pas bdag nyid lha'i dkyil 'khor du gsal btab la phyag 'tshal ba ni/__'das dus sangs rgyas pad+ma dri ma med:__da ltar sangs rgyas pad+ma tshe dpag med:__pad+ma'i spyan ldan 'khor bcas ma 'ongs dus:__grangs med 'gro don mdzad la phyag 'tshal lo:__na mo pU ru sha ya hoH__mchod pa 'bul ba ni/__rang gi snying ga nas mchod pa'i lha mo nam mkha' gang bar spros te mchod par bsams la/__srid zhi'i mgon gyur 'phags pa'i tshogs rnams la:__yan lag brgyad ldan mchod yon bzang po dang :__dri bzang 'o chab sbyar ba'i zhabs bsil mchog:__dkar dmar mdzes pa'i rnam bkra'i me tog tshal:__sbyar dang lhan skyes dri bsung ngad ldan sprin:__sman mchog byug tu 'os pa'i dri chab rigs:__lha mi'i ngo mtshar zhal zas bdud rtsi mchog:__rnga zlum pi wang sil snyan dung gi sgra:__bkod pa khyad 'phags lha dang lha mo'i tshogs:__ba dan phye phur gdugs 'phan bla bre dang :__rgyal mtshan la sogs nam mkha' bkang ste 'bul:__oM sarba ta thA ga ta ar+g+haM nas/__shab+da sarba pU dza me g+ha sa mu dra s+pha ra Na sa ma ye hU~M:__hrIH__'gro mgon sras dang 'phags tshogs sprul par bcas:__ma rig rnam dag ye shes me long mchog:__dug lnga'i gdung sel snying po zho yi zas:__nyon mongs gcong gzhil gi waM sman gyi phul:__phyi nang chos rnams dbang sdud li khri mchog:__rgyud dag gsang sngags 'bras spyod bilba'i 'bras:__rdo rje'i tshe mchog 'phel ba'i dUrba dang :__log smra kun bcom g.yas 'khyil chos kyi sgra:__bdud sde pham mdzad khro bo yungs kar tshogs:__'di dag 'bul gyis bkra shis ldan par shog:__oM sarba ta thA ga ta AR+Ya lo ke shwa ra sa pa ri wA ra mang+ga la ku ru pU dzi te AHhU~M:__hrIH__dkyil 'khor lha tshogs thams cad la:__dpal be'u ye shes drwa ba che:__'khor lo phyogs lhung kun dang bral:__pad+ma chags med ye shes te:__rgyal mtshan rtog med bdud las rgyal:__gdugs mchog khor yug 'od gsal ba:__bum pa cir snang chos kyi gter:__chos dung grags stong gdangs rtsal can:__gser nya ye shes byang chub sems:__rgyal ba'i tshogs la 'bul bar bgyi:__oM sarba ta thA ga ta AR+Ya lo ke shwa ra sa pa ri wA ra aSh+ta mang+ga laM pU dzi te AHhU~M:__bstod pa ni/__hrIH__tshad med thugs rje mtha' bzhi'i dri ma med:__chags bral pad+ma 'gro 'dren phreng ba bsnams:__re 'dod kun skong nor bu rin po che:__'dzin te rigs bzhis bskor la phyag 'tshal bstod:__bzlas pa bya ba ni/__bdag gi thugs ka nas ye shes pa logs su bye nas mdun gyi nam mkhar bzhugs pa'i bdag mdun gnyis ka'i gtso bo'i thugs kar rang 'dra'i ye shes sems dpa' tshon gang ba/__de'i thugs kar pad zla'i steng du ting nge 'dzin sems dpa' hrIHyig gi mthar sngags kyi phreng bas bskor ba las 'od zer 'phros/__'phags pa rnams mchod/__sems can thams cad thugs rje chen po'i go 'phang la bkod/__tshur 'dus rang gi thugs kar thim pas rgyud byin gyis brlabs par bsams la/__oM pad+ma aSh+NI Sha bi ma le hU~M phaTa?H__ces gtso bor bzla/__mthar rang gi snying ga nas 'od zer thon/__mdun gyi lha'i thugs kar thim/__thugs rgyud bskul/__mdun gyi lha'i thugs ka nas thon/__bdag gi thugs ka'i stod kyi sa bon dang sngags phreng la thim pas dngos grub thob par bsams la/__gong gi sngags dang /__oM ma Ni pad+me hU~M:__zhes pa'ang ci nus su bzlas mthar/__mdun gyi lha la mchod cing bstod nas/__mgon po spyan ras gzigs dbang phyug gis bdag la mchog dang thun mong gi dngos grub ma lus pa stsal du gsol/__zhes gsol ba gdab/__ma rnyed yongs su ma tshang dang /__sogs kyi mthar yi ge brgya pa lan gsum brjod pas nongs pa bshags shing /__ye shes pa rang gnas su gshegs par bsam/__rang dam tshig thugs rje chen por gsal ba'i thugs ka nas 'od zer 'phros pas gzhal yas khang 'khor dang bcas pa 'od du zhu nas rang la thim pa'i gnas gsum du oM AHhU~M gis mtshan par mos te/__'di lta bu yi dge ba yis:__'khor ba dong nas sprugs pa dang :__'brel thogs 'gro ba thams cad kun:__bde ba can du skye bar shog:__ces bsngo smon rgyas par byas te thun mtshams kyi bya ba la 'jug__/bsnyen sgrub sogs kyi skabs su gtor ma 'bul na/__thun mthar dkar gsum mngar gsum gyi gtor ma/__oM ha ya grI ba hU~M phaTa?:__ces pas bsang /__swa b+hA was sbyang /__stong pa'i ngang las gtor ma 'dod rgu 'byung ba'i ye shes kyi bdud rtsi'i rgya mtsho chen por gyur/__oM AHhU~M lan gsum gyis brlab/__mdun gyi lha'i ljags 'od zer gyi sbu gus drangs te gsol bas dgyes shing tshim par bsams la/__sngags kyi mthar a kA ro btags pa lan gsum gyis 'bul/__mchod bstod sogs rjes sngar bzhin bya/__spro na gtor ma cha gsum yang cho ga rgyas bsdus ji ltar rigs pas 'bul lo/__/bsnyen pa byed na/__gnas gtsang zhing yid dang mthun par 'byor na sku brnyan bris 'bur gang rigs dgram/__gang ltar yang gtor ma dkar zlum nyer spyod dang bcas pa bsham/__khrus dang gtsang sbra la gnas pas gong du bshad pa'i rnal 'byor thun bzhi'am gsum la sogs par nyams su blang /__snga thun gyi bzlas pa'i mthar gtor ma 'bul/__de lta bu'i rim pas yi ge bcu pa 'bum phrag bcu sogs bzla bar bya ste/__'phags pa don yod zhags pa'i rtog pa chen mo las/__gsang sngags kyi snying po yi ge bcu pa 'bum phrag bzlas brjod byas na phyir mi ldog par gyur nas sa bcu la gnas par 'gyur zhing /__lha dang mi'i skye rgu dag 'di ni de bzhin gshegs pa'o zhes brjod pa bla na med pa yang dag par rdzogs pa'i byang chub las phyir mi ldog par 'gyur/__don yod pa'i pad+ma gtsug tor gyi 'khor los sgyur bar 'gyur te the tshom mi bya'o/__/zhes pas mtshon te/__gzungs sngags 'di dran pa tsam gyis kyang mtshams med pa lnga byang ba dang /__nam du'ang ngan song du mi 'gro zhing /__'jig rten gyi khams bde ba can du pad+mo las brdzus te skye ba dang /__dung la lan bdun bzlas te bus na sgra thos pa thams cad mtho ris su skye ba dang /__tsan+dan la sogs bdugs te gos gyon pa tsam gyis sdig sgrib thams cad zad pa sogs phan yon bsam gyis mi khyab par gsungs so/___/de'ang grub na yi ge'i grangs kyi 'bum phrag ste 'bum phrag bcu bzla/__ma grub na 'bum phrag bzhi dang /__yi ge drug pa'ang ci nus bzla ba ni phyag len no/__/khyad par nya stong brgyad gsum sogs dus bzang por khrus dang gtsang sbra dang bcas gso sbyong la gnas pas bzlas na phan yon lhag par che zhing /__mdor na dus dang rgyun gyi nyams len la brtson pas dal ba'i rten la snying po len par bya'o/__/zhes pa'ang rtsod bral dus bab kyi gter ston o rgyan mchog gyur bde chen gling pa'i zhal snga nas kyi bka' drin las/__zab chos 'di nyid thog mar thos pa'i skal bzang can mtsho skyes bla ma dgyes pa'i 'bangs mkhyen brtse'i dbang pos rang gzhan mang por sman pa'i bsam pas gter gzhung rtsa ba'i dgongs don ltar bklags chog tu bsdebs pa'i dge bas 'gro kun 'phags pa thugs rje chen po'i go 'phang myur du thob pa'i rgyur gyur cig/___//sarba dA mang+ga laM b+ha ba tu//_