ཛམྦྷ་ལ་དཀར་པོ་འབྲུག་ཞོན་གཙོ་རྐྱང་གི་ཕྱི་ནང་གསང་བའི་སྒྲུབ་ཐབས་རིན་ཆེན་སྙིང་པོ

🚧 This website is under continued development. We appreciate your patience!

First text in section. Back to Volume PageNext Text

Wylie title	dzam+b+ha la dkar po 'brug zhon gtso rkyang gi phyi nang gsang ba'i sgrub thabs rin chen snying po
Location	mkhyen brtse'i bka' 'bum Volume 14, sde tshan 17, Text 1, Pages 283-293 (Folios 1a to 6a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	གུ་རུ་ཆོས་ཀྱི་དབང་ཕྱུག་ (Gu ru chos kyi dbang phyug)
Citation	'jam dbyangs mkhyen brtse'i dbang po. dzam+b+ha la dkar po 'brug zhon gtso rkyang gi phyi nang gsang ba'i sgrub thabs rin chen snying po. In 'jam dbyangs mkhyen brtse'i dbang po'i bka' 'bum, Vol. 14: 283-297. Khams sde dge rdzong sar dgon: Rdzong sar blo gros phun tshogs, 2020.
Genre	Sadhanas - Evocation Ritual - sgrub thabs
Cycle	ཛམྦྷ་ལ་དཀར་པོ་འབྲུག་ཞོན་གཙོ་རྐྱང་ (dzam+b+ha la dkar po 'brug zhon gtso rkyang)
Deity	dzaM dkar
RTZ	In the Rinchen Terdzö: https://rtz.tsadra.org/index.php/Terdzo-WI-043
Colophon	།དེ་ལྟར་འཕགས་པ་ཛམྦྷ་ལ་དཀར་པོ་གཙོ་རྐྱང་གི་ཕྱི་ནང་གསང་བའི་སྒྲུབ་པ་དཀྱུས་གཅིག་ཏུ་བྱ་བའི་ཚུལ་བཀླགས་པས་གྲུབ་པ་འདིའང་གཏེར་གཞུང་རྩ་བའི་དགོངས་པ་ཇི་ལྟ་བར་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པའི་དགེ་བས་འགྲོ་ཀུན་འདོད་རྒུའི་དཔལ་འབྱོར་ཟད་མི་ཤེས་པ་ལ་ལོངས་སུ་སྤྱོད་པའི་རྒྱུར་གྱུར་ཅིག།
	de ltar 'phags pa dzam+b+ha la dkar po gtso rkyang gi phyi nang gsang ba'i sgrub pa dkyus gcig tu bya ba'i tshul bklags pas grub pa 'di'ang gter gzhung rtsa ba'i dgongs pa ji lta bar mtsho skyes bla ma dgyes pa'i 'bangs mkhyen brtse'i dbang pos bris pa'i dge bas 'gro kun 'dod rgu'i dpal 'byor zad mi shes pa la longs su spyod pa'i rgyur gyur cig

1 Texts in this Section (sde tshan or chos tshan)

1 283-293	ཛམྦྷ་ལ་དཀར་པོ་འབྲུག་ཞོན་གཙོ་རྐྱང་གི་ཕྱི་ནང་གསང་བའི་སྒྲུབ་ཐབས་རིན་ཆེན་སྙིང་པོ dzam+b+ha la dkar po 'brug zhon gtso rkyang gi phyi nang gsang ba'i sgrub thabs rin chen snying po Sadhanas - Evocation Ritual - sgrub thabs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །ཛམྦྷ་ལ་དཀར་པོ་འབྲུག་ཞོན་གཙོ་རྐྱང་གི་ཕྱི་ནང་གསང་བའི་སྒྲུབ་ཐབས་རིན་ཆེན་སྙིང་པོ་ཞེས་བྱ་བ་བཞུགས་སོ།། །། ན་མོ་གུ་རུ་ཨཱཪྻ་ཛམྦྷ་ལཱ་ཡ། འདིར་མངའ་བདག་གསུང་སྤྲུལ་གུ་རུ་རིན་པོ་ཆེ་ཆོས་ཀྱི་དབང་ཕྱུག་གི་ཟབ་གཏེར་ནས་བྱོན་པའི་ཛམྦྷ་ལ་དཀར་པོའི་སྒྲུབ་ཐབས་རིན་ཆེན་སྤུངས་པ་ལས། གཙོ་རྐྱང་གི་གསང་སྒྲུབ་གཙོ་བོར་བཏོན་པའི་ཕྱི་ནང་གསང་བའི་སྒྲུབ་པ་དཀྱུས་གཅིག་ཏུ་ཉམས་སུ་བླང་བའི་ཚུལ་སྙིང་པོར་དྲིལ་བ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། གཞུང་ལས། བཅའ་གཞི་འདི་ལྟར་བྱ་སྟེ༔ དང་པོ་རྫའི་གའུ་བྱས་ལ༔ ནང་དུ་ནོར་བདག་ཛམྦྷ་ལ་དཀར་པོ༔ ཞལ་གཅིག་ཕྱག་གཉིས་པ༔ གཡས་ན་བེ་ཅོན་དང་རྡོ་རྗེ་བསྣམས་པ༔ གཡོན་པར་ཁ་ཊྭཱྃ་ནེའུ་ལེ་འཛིན་པ༔ སྤྱན་གསུམ་པ༔ ཞལ་གདངས་པ༔ འབྲུག་ལ་ཞོན་པ༔ རལ་པ་གྱེན་དུ་བརྗེས་པ༔ སྐུ་ཤ་རྒྱས་པ༔ རིན་པོ་ཆེ་སྣ་ཚོགས་པས་བརྒྱན་པར་བྱའོ༔ དེའི་ཐུགས་ཀར་ཕྱུག་པོ་ལ་སོགས་པས་བཙལ་བའི་གསེར་དངུལ་ཟངས་ལྕགས་གཡུ་སྟེ་རིན་པོ་ཆེ་སྣ་ལྔ་ཤེལ་དང་དྲུག་གཞུག་གོ༔ དེ་ནས་རྫའི་གའུའི་ནང་དུ༔ སྤོས་དང་༔ གླ་རྩི་དང་༔ ཙནྡན་གྱིས་བྱུག་གོ༔ དེའི་ནང་དུ་རྫས་བསག་པ་ནི༔ ཤ་ཡིབས༔ མར་རྙིང་༔ ཐུད༔ ཀ་ར༔ བུ་རམ༔ སྦྲང་༔ ཞོ༔ ཆང་༔ ཟས་ཕུད༔ མི་ནོར་དར་བའི་ས་ནས་སྣ་ཚོགས་བསག་གོ༔ ནས༔ འབྲས༔ ཁྲེ༔ ཁྲ་མ༔ བྲ་བོ༔ སྲན་མ༔ ཉུངས་དཀར་ནག༔ གྲོ་ནས་འབྲུ་སྣ་ཚོགས་ཀྱང་བསག་གོ༔ ཕྱུག་པོ་གཡང་ཅན་གྱི་ཕྱུགས་ལུག་གི་སྤུ་སྣ་ཚོགས་དང་༔ ཕྱུག་པོ་གྲོང་བདུན་གྱི་ཁང་ས་ཞིང་ས་རྣམས་གཡང་སྐར་ལ་བསག་གོ༔ ས་དེ་གཉིས་ལ་རཏྣ་བརྡར་ལ༔ འབྲང་རྒྱས་མཐེ་བོང་ཙམ་གསུམ་བྱས་ལ༔ ཛམྦྷ་ལའི་སྐུའི་ནང་དུ་གཞུག་གོ༔ དེ་ནས་མི་རྣམས་འདུ་བའི་སྙིང་པོ་གྲོ་ག་ལ་བྲིས༔ འཕགས་པའི་ནང་དུ་གཞུག་གོ༔ དེ་ནས་རྫའི་གའུ་དེ་དར་དང་རས་གཙང་མར་དྲིལ་བ༔ རང་གི་མདུན་དུ་མཎྜལ་བྱས་ལ་གཞུག༔ ཅེས་འབྱུང་བ་ལྟར་གསང་བ་གའུ་ལ་བརྟེན་ནས་བསྒྲུབ་པའི་བཅའ་གཞི་ཇི་སྐད་གསུངས་པ་བཞིན་འདུ་བྱས་ཏེ། གའུ་དེ་ཉིད་ཀྱི་བར་མཚམས་ས་སྦྱིན་གྱིས་བསྡམས། རྩི་དཀར་པོ་གསོལ། མདུན་རྟགས་རིན་པོ་ཆེ་འབར་བ་དྲིས་པ་དར་ཟབ་སྣ་ཚོགས་ཀྱིས་དྲིལ་ཏེ་སྟེགས་བུའི་དབུས་སུ་མེ་ཏོག་གི་ཚོམ་བུ་བཀོད་པའི་སྙིང་པོར་བཞུགས་སུ་གསོལ། དེའི་མདུན་དུ་རིན་པོ་ཆེའི་སྣོད་གས་ཆག་མེད་པར་གཏོར་མ་ནོར་བུའི་དབྱིབས་ཅན་དཀར་གསུམ་མངར་གསུམ་སོགས་ཁ་ཟས་བཟང་རྒུས་བསྐོར་བ་དང་། ཉེར་སྤྱོད་ཀྱི་མཆོད་པ། རང་གི་མདུན་དུ་ཆུ་སྦྱིན་གྱི་བུམ་པ་དང་། འཁར་གཞོང་སོགས་འོག་ཏུ་དགོས་པའི་ཡོ་བྱད་རྣམས་ལེགས་པར་བསྟར་རོ། །གཉིས་པ་ནི། སྐྱབས་ཡུལ་ནམ་མཁའ་གང་བའི་སྤྱན་སྔར། །ན་མོ༔ བླ་མ་བདེ་གཤེགས་འདུས་པའི་སྐུ༔ དཀོན་མཆོག་གསུམ་གྱི་རང་བཞིན་ལ༔ བདག་དང་འགྲོ་དྲུག་སེམས་ཅན་རྣམས༔ བྱང་ཆུབ་བར་དུ་སྐྱབས་སུ་མཆི༔ ལན་གསུམ་གྱིས་སྐྱབས་འགྲོ་དང་། སེམས་ཅན་ཐམས་ཅད་ཀྱི་དོན་དུ་བདག་གིས་ཛམྦྷ་ལ་བསྒྲུབས་ནས༔ སེམས་ཅན་ཐམས་ཅད་ཀྱི་དབུལ་བའི་སྡུག་བསྔལ་བསལ་བར་བྱའོ༔ ཞེས་སེམས་བསྐྱེད། མཆོད་པ་རྣམས་རྃ་ཡྃ་ཁྃ་གྱིས་བསང་སྦྱང་། སྟོང་པའི་ངང་ལས་གནས་ཁང་གནོད་སྦྱིན་དབང་པོའི་ཕོ་བྲང་ཆེན་པོར་གསལ་བའི་དབུས་སུ་ལྷ་རྫས་དང་ཏིང་ངེ་འཛིན་ལས་གྲུབ་པའི་མཆོད་གཏོར་ཀུན་ཏུ་བཟང་པོའི་མཆོད་སྤྲིན་ལྟ་བུས་ཡོངས་སུ་གང་བར་གྱུར་པར་བསམས་ལ། ན་མ་སྶརྦ་ཏ་ཐཱ་ག་ཏ་བྷྱོ་བི་ཤྭ་སོགས་ནམ་མཁའ་མཛོད་ཀྱི་སྔགས་རྒྱས་བརླབ། དེ་ནས་བདག་བསྐྱེད་རྒྱས་པར་བླ་མ་གསང་བ་འདུས་པའི་གཞུང་ལྟར་གསལ་གདབ་པའམ། བསྡུ་ན། རང་སྐད་ཅིག་གིས་དབང་ཆེན་རྟ་མགྲིན་གྲི་ཐོད་འཛིན་པ་ཡུམ་དང་བཅས་པའི་སྐུར་གྱུར་པར་བསམ། མདུན་བསྐྱེད་ནི་གྭའུ། ཨམྲྀ་ཏས་བསང་། སྭ་བྷཱ་བས་སྦྱང་། སྟོང་པའི་ངང་ལས་རང་གི་མདུན་དུ་པྃ་ལྗང་གུ་ལས་སྣ་ཚོགས་པདྨ་འདབ་མ་བརྒྱད་པ་དང་༔ ཨཱ་དཀར་པོ་ལས་ཟླ་བའི་དཀྱིལ་འཁོར་གྱི་སྟེང་དུ་ཡི་གེ་ཧྲཱིཿདཀར་པོ་རིང་ཆ་ཚེག་དྲག་དང་བཅས་པ༔ དེ་ལས་འོད་ཟེར་འཕྲོས༔ འཕགས་པ་མཆོད༔ སེམས་ཅན་གྱི་དོན་བྱས༔ ཚུར་འདུས་པ་ལས་ཛམྦྷ་ལ་སྐུ་མདོག་དཀར་པོ་ཞལ་གཅིག་ཕྱག་གཉིས་པ༔ གཡུ་འབྲུག་ལ་ཆིབས་པ་སྤྱན་གསུམ་ཁྲོ་ཚུལ་ཅན༔ ཞལ་གདངས་པ༔ སྐྲ་སེར་པོ་གྱེན་དུ་བརྗེས་པ༔ བརྗིད་པའི་མདངས་དང་ལྡན་པ༔ སྐུ་ལུས་ཆེ་ལ་ཚོ་ཞིང་རབ་ཏུ་རྒྱས་པ༔ གཡས་རྡོ་རྗེ་བེ་ཅོན་བསྣམས་པ༔ གཡོན་ནེའུ་ལེ་དང་༔ ཁ་ཊྭཱྃ་ག་མཆན་ཁུང་དུ་བཅུག་པ༔ རིན་པོ་ཆེ་སྣ་ཚོགས་ཀྱི་ཕྲེང་བ་དང་དར་གྱིས་བརྒྱན་པའོ༔ རང་ཡི་དམ་དུ་གསལ་བའི་ཐུགས་ཀའི་ས་བོན་ལས་འོད་ཟེར་འཕྲོས་པས༔ རི་རབ་ཀྱི་བྱང་ཤར་མཚམས་ནམ་མཁའ་མཛོད་ཀྱི་གནས་ནས༔ ཡེ་ཤེས་སེམས་དཔའ་ནམ་མཁའ་མཛོད་སྤྱན་དྲངས༔ མདུན་གྱི་ནམ་མཁའ་བཞུགས་པར་གྱུར༔ ཨོཾ། ཆོས་ཉིད་རྣམ་དག་ཕོ་བྲང་མཆོག༔ གནོད་སྦྱིན་ལོངས་སྤྱོད་གཞལ་ཡས་ནས༔ དངོས་གྲུབ་སྣ་ཚོགས་བླང་བའི་ཕྱིར༔ ཆུ་དབང་གཏེར་སྐྱོང་འདིར་གཤེགས་ཤིག༔ ཨོཾ་པདྨ་ཀྲོ་དྷ་ཨཱཪྻ་ཛམྦྷ་ལ་ཧྲྀ་ད་ཡ་ཧཱུྃ་ས་པ་རི་ཝཱ་ར་ས་མ་ཡ་ཛ་ཛཿ ཞེས་པས་སྤྱན་དྲང་། གནོད་སྦྱིན་གཏེར་སྐྱོང་འཁོར་དང་བཅས༔ ཉི་ཟླ་ལྟར་བརྗིད་རིན་ཆེན་སྐུ༔ དངོས་གྲུབ་མི་ཟད་གཏེར་འཆང་བའི༔ ནོར་ལྷ་ཁྱོད་ལ་ཕྱག་འཚལ་ལོ༔ ན་མོ་པུ་རུ་ཤ་ཡ་ཧོ༔ ཞེས་ཕྱག་བྱ། ཧྲཱིཿ གནོད་སྦྱིན་ནོར་ལྷ་འཁོར་དང་བཅས༔ ལྷ་རྫས་ཕྱི་མཆོད་འབུལ་བ་ནི༔ མེ་ཏོག་བདུག་སྤོས་མར་མེ་དང་༔ ཞལ་ཟས་སིལ་སྙན་ཡིད་འོང་རྣམས༔ སྤྱན་ཤངས་ཐུགས་ཀ་སྐུ་ལུས་དང་༔ ཞལ་དང་སྙན་དུ་མཆོད་པ་འབུལ༔ ཨོཾ་པདྨ་ཀྲོ་དྷ་ཨཱཪྻ་ཛམྦྷ་ལ་ཧྲྀ་ད་ཡ་ཧཱུྃ་ས་པ་རི་ཝཱ་ར་པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་བིདྱཱ། ཤབྡ་སརྦ་པཱུ་ཛ་མེ་གྷ་སྭཱ་ཧཱ་ཞེས་ཕྱག་རྒྱ་དང་བཅས་པས་མཆོད། གནོད་སྦྱིན་དེད་དཔོན་མཁའ་འགྲོའི་གཙོ༔ སྔོན་གྱི་ཐུགས་དམ་བརྩེར་དགོངས་ལ༔ བདག་ཅག་རེ་བ་སྐོང་བའི་ཕྱིར༔ བླ་རྟེན་འདི་ལ་བརྟན་པར་བཞུགས༔ ཨོཾ་ཨེ་ཧྱེ་ཧི་ཛམྦྷ་ལ་ས་མ་ཡ་ཛཿ ཛཿཧཱུྃ་བྃ་ཧོཿ མདུན་བསྐྱེད་དང་གཉིས་སུ་མེད་པར་བསམ། བཟླས་པ་བྱ་བ་ནི། རང་གི་སྙིང་གའི་ཡི་དམ་གྱི་ས་བོན་ལས་འོད་ཟེར་འཕྲོས་པས་འཕགས་པའི་ཐུགས་ཀར་ཕོག༔ ཐུགས་ཀའི་པདྨའི་སྟེང་གི་ཧྲཱིཿལ་སྔགས་ཀྱིས་བསྐོར་བ་བྱས་པས་ལྟེ་བ་ནས་ཐོན་ཏེ༔ བདག་གི་ལྟེ་བ་ན་ཚུར་ཞུགས༔ ཡང་བདག་གི་ས་བོན་ལ་བསྐོར་ནས་འོད་ཟེར་དུ་ཐོན་ཏེ་འཕགས་པའི་ཞལ་དུ་ཞུགས་ནས་འཁོར་བར་བསམ༔ ཕར་འཕྲོས་འཕགས་པ་མཆོད༔ ཚུར་འཕྲོས་དངོས་གྲུབ་ཐོབ༔ སེམས་ཅན་རྣམས་ལ་ཕོག་པས་འགྲོ་དྲུག་སོ་སོའི་སྡུག་བསྔལ་དང་བྲལ་བར་བྱས༔ བདེ་བ་དང་ལྡན་ཏེ་ཐར་པ་བྱང་ཆུབ་ཐོབ་པར་བསམ་མོ༔ ཨོཾ་པདྨ་ཀྲོ་དྷ་ཨཱཪྻ་ཛམྦྷ་ལ་ཧྲྀ་ད་ཡ་ཧཱུྃ༔ ཞེས་བཟླས་སོ། །གཞན་ཡང་འོད་ཟེར་འཕྲོས་པས༔ ལྷ་དང་༔ ཀླུ་དང་༔ མིའི་ལག་ན་གནས་པའི་རིན་པོ་ཆེ་དང་འབྲུ་ནོར་ཐམས་ཅད་ཀྱི་བཅུད་བསྡུས་ཏེ་བདག་གི་གནས་ཁང་ལོངས་སྤྱོད་ཀྱིས་གང་བར་བསམ་མོ། །ཐུན་བསྡུ་བ་ན་ནང་གཏོར་མ་ལ་བརྟེན་ནས་སྒྲུབ་པ་ནི། གཏོར་མ་ལ་ཆུ་གཙང་བྲན། རྃ་ཡྃ་ཁྃ་བྷྲཱུྃ་ལས་རིན་ཆེན་སྣོད་ཡངས་སུ༔ གཏོར་མ་འདོད་ཡོན་ཕུང་པོར་གྱུར༔ ཨོཾ་ཨཱཿཧཱུྃ་ལན་གསུམ་གྱིས་བརླབ། མདུན་བསྐྱེད་ཀྱི་ལྗགས་ལས་འོད་ཀྱི་སྦུ་གུ་བྱུང་བས་གཏོར་མའི་བཅུད་དྲངས་ཏེ་གསོལ་བས་མཉེས་ཏེ་བདག་ལ་དངོས་གྲུབ་ཅི་འདོད་པ་གནང་བར་གྱུར་པའི་མོས་པ་དང་བཅས། སྔགས་ཀྱི་མཐར་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་བཏགས་པ་ལན་བདུན་གྱིས་ཕུལ། སྔགས་ཀྱི་མཐར་ས་པ་རི་ཝཱ་ར་པུཥྤེ། དྷཱུ་པེ་སོགས་ནས། ཤབྡ་པཱུ་ཛ་མེ་གྷ་སྭཱ་ཧཱས་མཆོད། ཧཱུྃ། ནོར་བདག་ཆེན་པོ་ཨཱཪྻ་ཛམྦྷ་ལ༔ ཁྱོད་ནི་རིན་ཆེན་གཏེར་གྱི་བདག་པོ་སྟེ༔ ནོར་ལ་དབང་བསྒྱུར་རིན་ཆེན་ཆར་དུ་འབེབས༔ རྣལ་འབྱོར་བདག་ལ་ནོར་གྱི་དངོས་གྲུབ་སྩོལ༔ ཐུགས་རྗེའི་མངའ་བདག་འཕགས་པ་ནམ་མཁའ་མཛོད༔ བསྐལ་པ་དཔག་ཏུ་མེད་པའི་སྔོན་རོལ་ནས༔ བསོད་ནམས་ཚོགས་བསགས་ནམ་མཁའི་མཛོད་དང་ལྡན༔ ཡེ་ཤེས་ཚོགས་རྫོགས་བྱང་ཆུབ་སེམས་དང་ལྡན༔ ཚོགས་གཉིས་རྫོགས་པའི་སྐུ་ནི་ཆེ་ལ་སྦོམ༔ ཉོན་མོངས་སྐྱོན་བྲལ་སྐུ་མདོག་དཀར་ལ་འཚེར༔ འགྲོ་བའི་རེ་སྐོང་རིན་ཆེན་ནེའུ་ལེ་དང་༔ བེ་ཅོན་ཁ་ཊྭཱཾ་ལས་ནི་རིན་ཆེན་འབེབས༔ འགྲོ་དོན་བཞེངས་མཛད་གཡུ་འབྲུག་སྔོན་མོ་བཅིབས༔ ཐུགས་རྗེའི་ངང་ཉིད་སྤྱན་མིག་ཁྲོ་ཚུལ་གཟིགས༔ བྱམས་པས་འགྲོ་སྐྱོང་འཛུམ་པའི་མདངས་དང་ལྡན༔ རིན་ཆེན་རྒྱན་མཛེས་ལོངས་སྤྱོད་རྫོགས་པའི་སྐུ༔ རིན་ཆེན་གཏེར་གྱིས་འགྲོ་བའི་དགོས་འདོད་སྐོང་༔ དབུལ་བ་སེལ་མཛད་བྱང་ཆུབ་སེམས་དང་ལྡན༔ ཁྱེད་ཀྱི་ཐུགས་དམ་ཆེ་བའི་ཡོན་ཏན་སྐུ༔ རིན་ཆེན་ལོངས་སྤྱོད་ཆེན་པོའི་ཆར་པ་འབེབས༔ དབུལ་བའི་སྡུག་བསྔལ་འཕགས་པས་སྒྲོལ་མཛད་པ༔ འཕགས་པ་ཛམྦྷ་ལ་ལ་ཕྱག་འཚལ་བསྟོད༔ ༈ བདག་ལ་འདོད་དོན་འགྲུབ་པའི་དངོས་གྲུབ་སྩོལ༔ དམ་པ་ཆོས་ཀྱི་དངོས་གྲུབ་སྩལ་དུ་གསོལ༔ འཚོ་བ་ཟས་ཀྱི༴ རིན་ཆེན་ནོར་གྱི༴ མི་ཟད་གཏེར་གྱི༴ བདུད་འདུལ་སྔགས་ཀྱི༴ དང་པོ་ཆོས་ཀྱི༴ བར་དུ་ལས་ཀྱི༴ ཐ་མ་ནོར་གྱི༴ འདོད་ཡོན་ལྔ་ཡི༴ ཅི་བསམ་འགྲུབ་པའི་དངོས་གྲུབ་སྩལ་དུ་གསོལ༔ མི་སྙིང་སྒུལ་ཅིག་ཨཱཪྻ་ཛམྦྷ་ལ༔ གྲགས་ཆེར་སྒྲོགས་ཤིག་ཨཱཪྻ་ཛམྦྷ་ལ༔ ལྷ་འདྲེ་མི་གསུམ་སྡུས་ཤིག་ཛམྦྷ་ལ༔ མཆོག་དང་ཐུན་མོང་དངོས་གྲུབ་ཐམས་ཅད་ཀུན༔ མ་ལུས་མྱུར་དུ་བསྒྲུབ་པའི་གྲོགས་མཛོད་ལ༔ བསམ་པའི་དོན་རྣམས་ལྷུན་གྱིས་གྲུབ་པར་མཛོད༔ སྔོན་གྱི་དམ་ཚིག་གཉེན་པོ་རྗེས་དགོངས་ལ༔ དཔལ་ཆེན་རྟ་མགྲིན་བཀའ་ལས་མ་འདའ་བར༔ ལྷ་ཡི་ལོངས་སྤྱོད་བདག་ལ་སྩལ་དུ་གསོལ༔ ཅེས་བསྟོད་ཅིང་ཕྲིན་ལས་གསོལ། སྤྲོ་ན་རིགས་མཐུན་གྱི་གཞུང་ལྟར་ཕྱྭ་གཡང་འགུགས་པའི་བསྐུལ་བ་བགྱིས་ནའང་ལེགས། དེ་ནས་ཕྱི་ཆུ་སྦྱིན་ལ་བརྟེན་ནས་སྒྲུབ་པ་ནི། ཆུ་གཙང་མས་བཀང་བའི་རིན་པོ་ཆེའི་བུམ་པ་བཟང་པོ་ཐོགས་ལ། སྟོང་པའི་ངང་ལས་བྷྲཱུྃ་ལས་རིན་པོ་ཆེའི་བུམ་པ་བཟང་པོའི་ནང་དུ་ཨོཾ་དཀར་པོ༔ ཨཱཿདམར་པོ༔ ཧཱུྃ་མཐིང་ག་གསུམ་གྱི་འཕྲོ་འདུ་ལས་ཆུ་བདུད་རྩི་རོ་མཆོག་བརྒྱ་དང་ལྡན་པས་ཁེངས་པར་གྱུར༔ ཨོཾ་ཨཱཿཧཱུྃ་ཞེས་ལན་གསུམ་གྱིས་བརླབས་པ་འཁར་གཞོང་གཙང་མར་སྦྲེང་ཞིང་། མདུན་བསྐྱེད་ཀྱི་ཞལ་དུ་ཕུལ་བས་ཤིན་ཏུ་མཉེས་པར་བསམས་ལ། ཨོཾ་པདྨ་ཀྲོ་དྷ་ཨཱཪྻ་ཛམྦྷ་ལ་ཧྲྀ་ད་ཡ་ཧཱུྃ་དྷ་ནཾ་མེ་དྷི་སྭཱ་ཧཱ། ཞེས་བརྒྱ་རྩ་བརྒྱད་ཀྱིས་ཕུལ། ཨོཾ་པདྨ་ཀྲོ་དྷ་ཨཱཪྻ་ཛམྦྷ་ལ་ཧྲྀ་ད་ཡ་ཧཱུྃ་ས་པ་རི་ཝཱ་ར་པུཥྤེ་སོགས་ཀྱིས་མཆོད། བསྟོད་གསོལ་རྒྱས་པར་བྱ་བའམ། ཧཱུྃ། ནོར་བདག་ཆེན་པོ་ཨཱཪྻ་ཛམྦྷ་ལ༔ ཁྱོད་ནི་རིན་ཆེན་གཏེར་གྱི་བདག་པོ་སྟེ༔ ནོར་ལ་དབང་བསྒྱུར་རིན་ཆེན་ཆར་དུ་འབེབས༔ རྣལ་འབྱོར་བདག་ལ་ནོར་གྱི་དངོས་གྲུབ་སྩོལ༔ ཨོཾ་ཨཱཿཧཱུྃ་སིདྡྷི་སྡུས་སྡུས་ཧཱུྃ་ཧཱུྃ་ཞེས་བརྗོད་པས་མཆོག་དང་ཐུན་མོང་གི་དངོས་གྲུབ་མ་ལུས་པ་ཐོབ་པར་བསམ། ཆུ་སྲིན་ལག་གིས་བླངས་ཏེ་སྤྱི་བོར་རེག་ཅིང་གཙང་སར་དོར་རོ། །རྗེས་སུ། མ་རྙེད་ཡོངས་སུ་མ་ཚང་དང་། །གང་ཡང་ནུས་པ་མ་མཆིས་པ། །འདིར་ནི་བགྱི་བ་གང་ནོངས་པ། །དེ་ཀུན་ཁྱོད་ཀྱིས་བཟོད་མཛད་རིགས། །ཞེས་དང་ཡི་གེ་བརྒྱ་པས་ནོངས་པ་བཤགས། ཨོཾ། འདིར་ནི་གཟུགས་དང་ལྷན་ཅིག་ཏུ། །འཁོར་བ་སྲིད་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་སྩལ་དུ་གསོལ། །ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། །ཞེས་བརྗོད་ཅིང་མེ་ཏོག་འཐོར་བ་དང་བཅས་བརྟན་བཞུགས་བྱས་པས་འགྲོ་བ་སེམས་ཅན་གྱི་དོན་དུ་འཁོར་བ་མ་སྟོངས་བར་དུ་གའུ་ལ་བཞུགས་པར་བསམ། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང་། བསོད་ནམས་ཡེ་ཤེས་ལས་བྱུང་བའི། །དམ་པ་སྐུ་གཉིས་ཐོབ་པར་ཤོག །ཅེས་སོགས་བསྔོ་སྨོན་དང་བཀྲ་ཤིས་གང་ཤེས་བྱའོ། །གསུམ་པ་ནི། དེ་ལྟ་བུའི་རིམ་པས་དབང་པོ་རབ་ཀྱིས་ཞག་བདུན། འབྲིང་གིས་ཉེར་གཅིག ཐ་མས་ཀྱང་ཟླ་བ་གཅིག་ཏུ་བསྒྲུབས་ན་དངོས་གྲུབ་ཀྱི་འབྱོར་པ་རྒྱས་པའི་རྟགས་མཐོང་བར་འགྱུར་ཏེ། གཞུང་ལས། རྟགས་ནི་ཟས་ནོར་མང་པོ་འབུལ་བ་རྨིས་པ་དང་༔ མི་མང་པོས་ཕྱག་དང་བཀུར་སྟི་བྱེད་པ་རྨི་བ་དང་༔ གོས་བཟང་པོ་གྱོན་པ་དང་༔ རིན་པོ་ཆེས་བརྒྱན་པ་དང་༔ ཉི་ཟླ་ཤར་བ་དང་༔ མེ་ཏོག་དང་རིན་པོ་ཆེ་བསྡུས་པ་རྨི་བ་འོང་ངོ་༔ དེ་ལྟར་རྟགས་བྱུང་བ་དང་གའུ་འབྲུའི་གསེབ་དམ༔ བོར་བའམ༔ མཛོད་མིས་མི་མཐོང་བར་སྦའོ༔ དེས་ཟས་ནོར་ཐམས་ཅད་འཕེལ་ལོ༔ ཞེས་གསུངས་པ་ལྟར་རྟགས་མཐོང་བ་ན་གའུ་བཀུར་སྟི་དང་བཅས་ཇི་སྐད་བཤད་པའི་གནས་སུ་སྦས་ལ། སྤྲོ་ན་གོང་ལྟར་སྒྲུབ་པ་ཚར་གཅིག་བསྐྱར། དེ་ཙམ་མ་གྲུབ་ཀྱང་བརྟན་བཞུགས་དང་ཤིས་བརྗོད་རྒྱས་པར་བྱ། དུས་དུས་སུ་མཆོད་ཅིང་གསོལ་བ་བཏབ་པས་དངོས་གྲུབ་ཀྱི་འབྱོར་པ་རྒྱ་མཚོ་ཆེན་པོའི་རླབས་ལྟར་འཕེལ་བར་འགྱུར་རོ། །ཞག་བདུན་སོགས་བསྒྲུབས་ན་སྒྲུབ་པ་གྲོལ་ཁའི་གོང་ནས་ཞག་གསུམ་སོགས་ཀྱི་ཐུན་གྱི་མཇུག་གམ། རྒྱུན་དུ་ཚད་མེད་བྱེད་ན་བཟླས་པའི་མཇུག་ཏུ། ཕེ་ཤི་ནྲྀ་ཛཿ ཞེས་བཏགས་པ་བརྒྱ་རྩ་རེ་བཟླས་པས་སྐྱེ་འགྲོ་ཐམས་ཅད་དད་ཅིང་འདུན་པར་འགྱུར་ཏེ་མི་སྙིང་སྒུལ་བའི་རིག་པ་ཞེས་བྱའོ། །དེ་ལྟར་འཕགས་པ་ཛམྦྷ་ལ་དཀར་པོ་གཙོ་རྐྱང་གི་ཕྱི་ནང་གསང་བའི་སྒྲུབ་པ་དཀྱུས་གཅིག་ཏུ་བྱ་བའི་ཚུལ་བཀླགས་པས་གྲུབ་པ་འདིའང་གཏེར་གཞུང་རྩ་བའི་དགོངས་པ་ཇི་ལྟ་བར་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པའི་དགེ་བས་འགྲོ་ཀུན་འདོད་རྒུའི་དཔལ་འབྱོར་ཟད་མི་ཤེས་པ་ལ་ལོངས་སུ་སྤྱོད་པའི་རྒྱུར་གྱུར་ཅིག། །། ༈

[edit]

gu ru chos dbang gi dzaM dkar gtso rkyang gi phyi nang gsang sgrub dkyus gcig tu bya tshul rin chen snying po/ @#/__/dzam+b+ha la dkar po 'brug zhon gtso rkyang gi phyi nang gsang ba'i sgrub thabs rin chen snying po zhes bya ba bzhugs so//__// na mo gu ru AR+Ya dzam+b+ha lA ya/__'dir mnga' bdag gsung sprul gu ru rin po che chos kyi dbang phyug gi zab gter nas byon pa'i dzam+b+ha la dkar po'i sgrub thabs rin chen spungs pa las/__gtso rkyang gi gsang sgrub gtso bor bton pa'i phyi nang gsang ba'i sgrub pa dkyus gcig tu nyams su blang ba'i tshul snying por dril ba la gsum/__sbyor ba/__dngos gzhi/__rjes so/__/dang po ni/__gzhung las/__bca' gzhi 'di ltar bya ste:__dang po rdza'i ga'u byas la:__nang du nor bdag dzam+b+ha la dkar po:__zhal gcig phyag gnyis pa:__g.yas na be con dang rdo rje bsnams pa:__g.yon par kha T+wA~M ne'u le 'dzin pa:__spyan gsum pa:__zhal gdangs pa:__'brug la zhon pa:__ral pa gyen du brjes pa:__sku sha rgyas pa:__rin po che sna tshogs pas brgyan par bya'o:__de'i thugs kar phyug po la sogs pas btsal ba'i gser dngul zangs lcags g.yu ste rin po che sna lnga shel dang drug gzhug go:__de nas rdza'i ga'u'i nang du:__spos dang :__gla rtsi dang :__tsan+dan gyis byug go:__de'i nang du rdzas bsag pa ni:__sha yibs:__mar rnying :__thud:__ka ra:__bu ram:__sbrang :__zho:__chang :__zas phud:__mi nor dar ba'i sa nas sna tshogs bsag go:__nas:__'bras:__khre:__khra ma:__bra bo:__sran ma:__nyungs dkar nag:__gro nas 'bru sna tshogs kyang bsag go:__phyug po g.yang can gyi phyugs lug gi spu sna tshogs dang :__phyug po grong bdun gyi khang sa zhing sa rnams g.yang skar la bsag go:__sa de gnyis la rat+na brdar la:__'brang rgyas mthe bong tsam gsum byas la:__dzam+b+ha la'i sku'i nang du gzhug go:__de nas mi rnams 'du ba'i snying po gro ga la bris:__'phags pa'i nang du gzhug go:__de nas rdza'i ga'u de dar dang ras gtsang mar dril ba:__rang gi mdun du maN+Dal byas la gzhug:__ces 'byung ba ltar gsang ba ga'u la brten nas bsgrub pa'i bca' gzhi ji skad gsungs pa bzhin 'du byas te/__ga'u de nyid kyi bar mtshams sa sbyin gyis bsdams/__rtsi dkar po gsol/__mdun rtags rin po che 'bar ba dris pa dar zab sna tshogs kyis dril te stegs bu'i dbus su me tog gi tshom bu bkod pa'i snying por bzhugs su gsol/__de'i mdun du rin po che'i snod gas chag med par gtor ma nor bu'i dbyibs can dkar gsum mngar gsum sogs kha zas bzang rgus bskor ba dang /__nyer spyod kyi mchod pa/__rang gi mdun du chu sbyin gyi bum pa dang /__'khar gzhong sogs 'og tu dgos pa'i yo byad rnams legs par bstar ro/__/gnyis pa ni/__skyabs yul nam mkha' gang ba'i spyan sngar/__/na mo:__bla ma bde gshegs 'dus pa'i sku:__dkon mchog gsum gyi rang bzhin la:__bdag dang 'gro drug sems can rnams:__byang chub bar du skyabs su mchi:__lan gsum gyis skyabs 'gro dang /__sems can thams cad kyi don du bdag gis dzam+b+ha la bsgrubs nas:__sems can thams cad kyi dbul ba'i sdug bsngal bsal bar bya'o:__zhes sems bskyed/__mchod pa rnams ra~M ya~M kha~M gyis bsang sbyang /__stong pa'i ngang las gnas khang gnod sbyin dbang po'i pho brang chen por gsal ba'i dbus su lha rdzas dang ting nge 'dzin las grub pa'i mchod gtor kun tu bzang po'i mchod sprin lta bus yongs su gang bar gyur par bsams la/__na ma s+sarba ta thA ga ta b+h+yo bi shwa sogs nam mkha' mdzod kyi sngags rgyas brlab/__de nas bdag bskyed rgyas par bla ma gsang ba 'dus pa'i gzhung ltar gsal gdab pa'am/__bsdu na/__rang skad cig gis dbang chen rta mgrin gri thod 'dzin pa yum dang bcas pa'i skur gyur par bsam/__mdun bskyed ni gwa'u/__amr-i tas bsang /__swa b+hA bas sbyang /__stong pa'i ngang las rang gi mdun du pa~M ljang gu las sna tshogs pad+ma 'dab ma brgyad pa dang :__A dkar po las zla ba'i dkyil 'khor gyi steng du yi ge hrIHdkar po ring cha tsheg drag dang bcas pa:__de las 'od zer 'phros:__'phags pa mchod:__sems can gyi don byas:__tshur 'dus pa las dzam+b+ha la sku mdog dkar po zhal gcig phyag gnyis pa:__g.yu 'brug la chibs pa spyan gsum khro tshul can:__zhal gdangs pa:__skra ser po gyen du brjes pa:__brjid pa'i mdangs dang ldan pa:__sku lus che la tsho zhing rab tu rgyas pa:__g.yas rdo rje be con bsnams pa:__g.yon ne'u le dang :__kha T+wA~M ga mchan khung du bcug pa:__rin po che sna tshogs kyi phreng ba dang dar gyis brgyan pa'o:__rang yi dam du gsal ba'i thugs ka'i sa bon las 'od zer 'phros pas:__ri rab kyi byang shar mtshams nam mkha' mdzod kyi gnas nas:__ye shes sems dpa' nam mkha' mdzod spyan drangs:__mdun gyi nam mkha' bzhugs par gyur:__oM/__chos nyid rnam dag pho brang mchog:__gnod sbyin longs spyod gzhal yas nas:__dngos grub sna tshogs blang ba'i phyir:__chu dbang gter skyong 'dir gshegs shig:__oM pad+ma kro d+ha AR+Ya dzam+b+ha la hr-i da ya hU~M sa pa ri wA ra sa ma ya dza dzaH__zhes pas spyan drang /__gnod sbyin gter skyong 'khor dang bcas:__nyi zla ltar brjid rin chen sku:__dngos grub mi zad gter 'chang ba'i:__nor lha khyod la phyag 'tshal lo:__na mo pu ru sha ya ho:__zhes phyag bya/__hrIH__gnod sbyin nor lha 'khor dang bcas:__lha rdzas phyi mchod 'bul ba ni:__me tog bdug spos mar me dang :__zhal zas sil snyan yid 'ong rnams:__spyan shangs thugs ka sku lus dang :__zhal dang snyan du mchod pa 'bul:__oM pad+ma kro d+ha AR+Ya dzam+b+ha la hr-i da ya hU~M sa pa ri wA ra puSh+pe/__d+hU pe/__A lo ke/__gan+d+he/__nai bid+yA/__shab+da sarba pU dza me g+ha swA hA zhes phyag rgya dang bcas pas mchod/__gnod sbyin ded dpon mkha' 'gro'i gtso:__sngon gyi thugs dam brtser dgongs la:__bdag cag re ba skong ba'i phyir:__bla rten 'di la brtan par bzhugs:__oM e h+ye hi dzam+b+ha la sa ma ya dzaH__dzaHhU~M ba~M hoH__mdun bskyed dang gnyis su med par bsam/__bzlas pa bya ba ni/__rang gi snying ga'i yi dam gyi sa bon las 'od zer 'phros pas 'phags pa'i thugs kar phog:__thugs ka'i pad+ma'i steng gi hrIHla sngags kyis bskor ba byas pas lte ba nas thon te:__bdag gi lte ba na tshur zhugs:__yang bdag gi sa bon la bskor nas 'od zer du thon te 'phags pa'i zhal du zhugs nas 'khor bar bsam:__phar 'phros 'phags pa mchod:__tshur 'phros dngos grub thob:__sems can rnams la phog pas 'gro drug so so'i sdug bsngal dang bral bar byas:__bde ba dang ldan te thar pa byang chub thob par bsam mo:__oM pad+ma kro d+ha AR+Ya dzam+b+ha la hr-i da ya hU~M:__zhes bzlas so/__/gzhan yang 'od zer 'phros pas:__lha dang :__klu dang :__mi'i lag na gnas pa'i rin po che dang 'bru nor thams cad kyi bcud bsdus te bdag gi gnas khang longs spyod kyis gang bar bsam mo/__/thun bsdu ba na nang gtor ma la brten nas sgrub pa ni/__gtor ma la chu gtsang bran/__ra~M ya~M kha~M b+h+rU~M las rin chen snod yangs su:__gtor ma 'dod yon phung por gyur:__oM AHhU~M lan gsum gyis brlab/__mdun bskyed kyi ljags las 'od kyi sbu gu byung bas gtor ma'i bcud drangs te gsol bas mnyes te bdag la dngos grub ci 'dod pa gnang bar gyur pa'i mos pa dang bcas/__sngags kyi mthar sa pa ri wA ra i daM ba liM ta kha kha khA hi btags pa lan bdun gyis phul/__sngags kyi mthar sa pa ri wA ra puSh+pe/__d+hU pe sogs nas/__shab+da pU dza me g+ha swA hAs mchod/__hU~M/__nor bdag chen po AR+Ya dzam+b+ha la:__khyod ni rin chen gter gyi bdag po ste:__nor la dbang bsgyur rin chen char du 'bebs:__rnal 'byor bdag la nor gyi dngos grub stsol:__thugs rje'i mnga' bdag 'phags pa nam mkha' mdzod:__bskal pa dpag tu med pa'i sngon rol nas:__bsod nams tshogs bsags nam mkha'i mdzod dang ldan:__ye shes tshogs rdzogs byang chub sems dang ldan:__tshogs gnyis rdzogs pa'i sku ni che la sbom:__nyon mongs skyon bral sku mdog dkar la 'tsher:__'gro ba'i re skong rin chen ne'u le dang :__be con kha T+wAM las ni rin chen 'bebs:__'gro don bzhengs mdzad g.yu 'brug sngon mo bcibs:__thugs rje'i ngang nyid spyan mig khro tshul gzigs:__byams pas 'gro skyong 'dzum pa'i mdangs dang ldan:__rin chen rgyan mdzes longs spyod rdzogs pa'i sku:__rin chen gter gyis 'gro ba'i dgos 'dod skong :__dbul ba sel mdzad byang chub sems dang ldan:__khyed kyi thugs dam che ba'i yon tan sku:__rin chen longs spyod chen po'i char pa 'bebs:__dbul ba'i sdug bsngal 'phags pas sgrol mdzad pa:__'phags pa dzam+b+ha la la phyag 'tshal bstod:__!__bdag la 'dod don 'grub pa'i dngos grub stsol:__dam pa chos kyi dngos grub stsal du gsol:__'tsho ba zas kyi=__rin chen nor gyi=__mi zad gter gyi=__bdud 'dul sngags kyi=__dang po chos kyi=__bar du las kyi=__tha ma nor gyi=__'dod yon lnga yi=__ci bsam 'grub pa'i dngos grub stsal du gsol:__mi snying sgul cig AR+Ya dzam+b+ha la:__grags cher sgrogs shig AR+Ya dzam+b+ha la:__lha 'dre mi gsum sdus shig dzam+b+ha la:__mchog dang thun mong dngos grub thams cad kun:__ma lus myur du bsgrub pa'i grogs mdzod la:__bsam pa'i don rnams lhun gyis grub par mdzod:__sngon gyi dam tshig gnyen po rjes dgongs la:__dpal chen rta mgrin bka' las ma 'da' bar:__lha yi longs spyod bdag la stsal du gsol:__ces bstod cing phrin las gsol/__spro na rigs mthun gyi gzhung ltar phywa g.yang 'gugs pa'i bskul ba bgyis na'ang legs/__de nas phyi chu sbyin la brten nas sgrub pa ni/__chu gtsang mas bkang ba'i rin po che'i bum pa bzang po thogs la/__stong pa'i ngang las b+h+rU~M las rin po che'i bum pa bzang po'i nang du oM dkar po:__AHdmar po:__hU~M mthing ga gsum gyi 'phro 'du las chu bdud rtsi ro mchog brgya dang ldan pas khengs par gyur:__oM AHhU~M zhes lan gsum gyis brlabs pa 'khar gzhong gtsang mar sbreng zhing /__mdun bskyed kyi zhal du phul bas shin tu mnyes par bsams la/__oM pad+ma kro d+ha AR+Ya dzam+b+ha la hr-i da ya hU~M d+ha naM me d+hi swA hA/__zhes brgya rtsa brgyad kyis phul/__oM pad+ma kro d+ha AR+Ya dzam+b+ha la hr-i da ya hU~M sa pa ri wA ra puSh+pe sogs kyis mchod/__bstod gsol rgyas par bya ba'am/__hU~M/__nor bdag chen po AR+Ya dzam+b+ha la:__khyod ni rin chen gter gyi bdag po ste:__nor la dbang bsgyur rin chen char du 'bebs:__rnal 'byor bdag la nor gyi dngos grub stsol:__oM AHhU~M sid+d+hi sdus sdus hU~M hU~M zhes brjod pas mchog dang thun mong gi dngos grub ma lus pa thob par bsam/__chu srin lag gis blangs te spyi bor reg cing gtsang sar dor ro/__/rjes su/__ma rnyed yongs su ma tshang dang /__/gang yang nus pa ma mchis pa/__/'dir ni bgyi ba gang nongs pa/__/de kun khyod kyis bzod mdzad rigs/__/zhes dang yi ge brgya pas nongs pa bshags/__oM/__'dir ni gzugs dang lhan cig tu/__/'khor ba srid du bzhugs nas kyang /__/nad med tshe dang dbang phyug dang /__/mchog rnams legs par stsal du gsol/__/oM su pra tiSh+Tha badz+rA ya swA hA/__/zhes brjod cing me tog 'thor ba dang bcas brtan bzhugs byas pas 'gro ba sems can gyi don du 'khor ba ma stongs bar du ga'u la bzhugs par bsam/__dge ba 'di yis skye bo kun/__/bsod nams ye shes tshogs rdzogs shing /__bsod nams ye shes las byung ba'i/__/dam pa sku gnyis thob par shog__/ces sogs bsngo smon dang bkra shis gang shes bya'o/__/gsum pa ni/__de lta bu'i rim pas dbang po rab kyis zhag bdun/__'bring gis nyer gcig__tha mas kyang zla ba gcig tu bsgrubs na dngos grub kyi 'byor pa rgyas pa'i rtags mthong bar 'gyur te/__gzhung las/__rtags ni zas nor mang po 'bul ba rmis pa dang :__mi mang pos phyag dang bkur sti byed pa rmi ba dang :__gos bzang po gyon pa dang :__rin po ches brgyan pa dang :__nyi zla shar ba dang :__me tog dang rin po che bsdus pa rmi ba 'ong ngo :__de ltar rtags byung ba dang ga'u 'bru'i gseb dam:__bor ba'am:__mdzod mis mi mthong bar sba'o:__des zas nor thams cad 'phel lo:__zhes gsungs pa ltar rtags mthong ba na ga'u bkur sti dang bcas ji skad bshad pa'i gnas su sbas la/__spro na gong ltar sgrub pa tshar gcig bskyar/__de tsam ma grub kyang brtan bzhugs dang shis brjod rgyas par bya/__dus dus su mchod cing gsol ba btab pas dngos grub kyi 'byor pa rgya mtsho chen po'i rlabs ltar 'phel bar 'gyur ro/__/zhag bdun sogs bsgrubs na sgrub pa grol kha'i gong nas zhag gsum sogs kyi thun gyi mjug gam/__rgyun du tshad med byed na bzlas pa'i mjug tu/__phe shi nr-i dzaH__zhes btags pa brgya rtsa re bzlas pas skye 'gro thams cad dad cing 'dun par 'gyur te mi snying sgul ba'i rig pa zhes bya'o/_/de ltar 'phags pa dzam+b+ha la dkar po gtso rkyang gi phyi nang gsang ba'i sgrub pa dkyus gcig tu bya ba'i tshul bklags pas grub pa 'di'ang gter gzhung rtsa ba'i dgongs pa ji lta bar mtsho skyes bla ma dgyes pa'i 'bangs mkhyen brtse'i dbang pos bris pa'i dge bas 'gro kun 'dod rgu'i dpal 'byor zad mi shes pa la longs su spyod pa'i rgyur gyur cig/___//_!__