རྡོ་རྗེ་དབྱངས་ཅན་མའི་སྒྲུབ་ཐབས་དང་ཤེས་རབ་བློ་འཕེལ་མི་བརྗེད་གཟུངས་ཐོབ་ཟུང་འབྲེལ་དུ་ཉམས་སུ་བླང་བའི་ཚུལ་ཡེ་ཤེས་རྒྱས་བྱེད།

🚧 This website is under continued development. We appreciate your patience!

Previous Text Back to Volume PageNext Text

Wylie title	rdo rje dbyangs can ma'i sgrub thabs dang shes rab blo 'phel mi brjed gzungs thob zung 'brel du nyams su blang ba'i tshul ye shes rgyas byed
Location	mkhyen brtse'i bka' 'bum Volume 14, sde tshan 12, Text 4, Pages 180-187 (Folios 6b3 to 10a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཕྲེང་པོ་གཏེར་སྟོན་ཤེས་རབ་འོད་ཟེར་ ('phreng po gter ston shes rab 'od zer)
Citation	'jam dbyangs mkhyen brtse'i dbang po. rdo rje dbyangs can ma'i sgrub thabs dang shes rab blo 'phel mi brjed gzungs thob zung 'brel du nyams su blang ba'i tshul ye shes rgyas byed. In 'jam dbyangs mkhyen brtse'i dbang po'i bka' 'bum, Vol. 14: 180-187. Khams sde dge rdzong sar dgon: Rdzong sar blo gros phun tshogs, 2020.
Genre	Sadhanas - Evocation Ritual - sgrub thabs
Cycle	པདྨའི་ཞལ་གདམས་རྩ་གསུམ་མཐོང་བ་རང་གྲོལ་ (pad+ma'i zhal gdams rtsa gsum mthong ba rang grol)
Parent Cycle	གྲོལ་ཏིག་དགོངས་པ་རང་གྲོལ་གྱི་ཆོས་སྡེ་ (grol tig dgongs pa rang grol gyi chos sde)
Deity	rdo rje dbyangs can ma
Colophon	།ཞེས་པའང་འགྲན་ཟླ་དང་བྲལ་བའི་ལོ་ཙཱ་བ་ཆེན་པོ་བཻ་རོ་ཙ་ན་རཀྵི་ཏའི་རྣམ་པར་འཕྲུལ་བ་ཀུན་མཁྱེན་ཆོས་ཀྱི་རྒྱལ་པོ་འགྲོ་འདུལ་པྲཛྙཱ་རསྨིའི་ལྗགས་སྒྲིག་རྡོ་རྗེ་དབྱངས་ཅན་མའི་སྒྲུབ་ཐབས་བློ་གྲོས་ཀྱི་སྣང་བ་གསལ་བར་བྱེད་པ་དང་། རྗེ་དེ་ཉིད་ཀྱི་ཟབ་གཏེར་ལས་བྱོན་པའི་ཤེས་རབ་བློ་འཕེལ་མི་བརྗེད་གཟུངས་ཐོབ་ཀྱི་མན་ངག་ཟུང་འབྲེལ་དུ་ཉམས་སུ་བླང་བའི་ཚུལ་ཕྱག་གཞེས་ལྟར་བཀླགས་པས་གྲུབ་པར་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་སྦྱར་བ་སརྦ་ས་ཏྭ་ཛྙཱ་ན་སྱ་དཱི་པྟ་སྥུཊཾ་བྷུ་ཡཱཏྲ།།
	zhes pa'ang 'gran zla dang bral ba'i lo tsA ba chen po bai ro tsa na rak+Shi ta'i rnam par 'phrul ba kun mkhyen chos kyi rgyal po 'gro 'dul pradz+nyA rasmi'i ljags sgrig rdo rje dbyangs can ma'i sgrub thabs blo gros kyi snang ba gsal bar byed pa dang /__rje de nyid kyi zab gter las byon pa'i shes rab blo 'phel mi brjed gzungs thob kyi man ngag zung 'brel du nyams su blang ba'i tshul phyag gzhes ltar bklags pas grub par mtsho skyes bla ma dgyes pa'i 'bangs mkhyen brtse'i dbang pos sbyar ba sarba sa twa dz+nyA na s+ya dI p+ta s+phuTaM b+hu yAtra

1 Texts in this Section (sde tshan or chos tshan)

4 180-187	རྡོ་རྗེ་དབྱངས་ཅན་མའི་སྒྲུབ་ཐབས་དང་ཤེས་རབ་བློ་འཕེལ་མི་བརྗེད་གཟུངས་ཐོབ་ཟུང་འབྲེལ་དུ་ཉམས་སུ་བླང་བའི་ཚུལ་ཡེ་ཤེས་རྒྱས་བྱེད། rdo rje dbyangs can ma'i sgrub thabs dang shes rab blo 'phel mi brjed gzungs thob zung 'brel du nyams su blang ba'i tshul ye shes rgyas byed Sadhanas - Evocation Ritual - sgrub thabs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །རྡོ་རྗེ་དབྱངས་ཅན་མའི་སྒྲུབ་ཐབས་དང་ཤེས་རབ་བློ་འཕེལ་མི་བརྗེད་གཟུངས་ཐོབ་ཟུང་འབྲེལ་དུ་ཉམས་སུ་བླང་བའི་ཚུལ་ཡེ་ཤེས་རྒྱས་བྱེད་ཅེས་བྱ་བ་བཞུགས་སོ། །གུ་རུཤྩ་སྭ་ར་སྭ་སྟྱེ་བྷེ་དཾ་ན་མཱ་མི། རྡོ་རྗེ་དབྱངས་ཅན་མའི་ཏིང་ངེ་འཛིན་དང་གཟུངས་ཀྱི་སྒོ་ཟབ་མོ་ལ་བརྟེན་ནས་སྤོབས་པའི་གཏེར་མཛོད་ཡོངས་སུ་གྲོལ་བར་དོན་དུ་གཉེར་པའི་གང་ཟག་གིས། ཐོ་རངས་སོགས་དུས་དགེ་བའི་རྒྱུར་སྐྱབས་ཡུལ་ནམ་མཁའ་གང་བར་སད་པའི་སྤྱན་སྔར། སངས་རྒྱས་ཆོས་དང་སོགས་སྐྱབས་སེམས་དང་། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞི་བསྒོམ། ཨོཾ་སྭ་བྷཱ་ཝ་སོགས། བདག་ཏུ་འཛིན་པར་བྱེད་པའི་གཟུང་འཛིན་གྱི་རྣམ་པར་རྟོག་པའི་ཆོས་ཐམས་ཅད་རང་བཞིན་གྱིས་རྣམ་པར་དག་པའི་སྟོང་པ་ཉིད་དུ་གྱུར། སྟོང་པའི་ངང་ལས་ཀུན་གཞིའི་རྒྱ་མཚོ་ཆེན་པོ་ཀློང་ཡངས་པའི་དབུས་སུ། པྃ་ལས་ཆུ་སྐྱེས་དཀར་པོ་འདབ་མ་བརྒྱད་པ་སེམས་བྱུང་གི་སྡོང་བུ་དང་ཡལ་གས་རྣམ་པར་མཛེས་པའི་དབུས་སུ་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་ཉ་གང་བའི་རྣམ་པ་ཅན་དང་། དེའི་སྟེང་དུ་དོན་དམ་བྱང་ཆུབ་སེམས་ཀྱི་རང་གཟུགས་ཧྲཱིཾ་དཀར་པོ་ལས་འོད་ཟེར་དཔག་ཏུ་མེད་པ་འཕྲོས། སེམས་ཅན་གྱི་མ་རིག་པའི་སྒྲིབ་གཉིས་སྦྱངས། དེ་བཞིན་གཤེགས་པ་རྣམས་ལ་མཉེས་པའི་མཆོད་པ་ཕུལ། ཚུར་འདུས་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་མ་རྡོ་རྗེ་དབྱངས་ཅན་ལྷ་མོ་སྐུ་མདོག་དཀར་མོ་ཞལ་གཅིག་ཕྱག་གཉིས་མ། ཐུགས་རྗེའི་སྤྱན་གསུམ་དང་ལྡན་ཞིང་། ཤིན་ཏུ་འཛུམ་ཞིང་སྒེག་པའི་ཉམས་དང་ལྡན་པ། ཕྱག་གཡས་པདྨ་དཀར་པོའི་ཡུ་བ་མཐེབ་སྲིན་གྱིས་ཐུགས་ཀར་འཛིན་ཅིང་། གཡོན་མཆོག་སྦྱིན་གྱི་ཕྱག་རྒྱས་པུསྟ་ཀཿསྦྱིན་ཐབས་སུ་བསྣམས་པ། དབུ་སྐྲ་ཕྱེད་ཆིངས་ཀྱི་ཟུར་ཕུད་གསུམ་པ་ཅན། རིན་པོ་ཆེ་དང་མེ་ཏོག་དུ་མས་མཛེས་པར་བརྒྱན་ཅིང་། རིན་པོ་ཆེའི་དབུ་རྒྱན། སྙན་རྒྱན། མགུལ་རྒྱན། དོ་ཤལ། གདུ་བུ། སྐ་རགས། ལྷའི་གོས་ཀྱི་ལྷབ་ལྷུབ་འཆང་ཞིང་། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དེ་ལྟར་རང་ཉིད་ལྷར་གསལ་བའི་ངང་ནས། དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། ཐུགས་ཀའི་ཆ་སྨད་དུ་པད་དཀར་ཟླ་བའི་སྟེང་དུ་ཧྲཱིཾ་གྱི་མཐར། ཨོཾ་པི་ཙུ་པི་ཙུ་པྲཛྙཱ་ཝརྡྷཱ་ནི། ཛྭ་ལ་ཛྭ་ལ་མེདྷཱ་ཝརྡྷཱ་ནི། དྷི་རི་དྷི་རི་བུདྡྷི་ཝརྡྷཱ་་ནི་སྭཱ་ཧཱ། །ཞེས་པའི་སྔགས་ཕྲེང་གིས་བསྐོར་བའི་ས་བོན་ལས་འོད་ཟེར་འཕྲོས། རང་བཞིན་གྱི་གནས་ནས་བསྒོམས་པ་འདྲ་བའི་ཡེ་ཤེས་པ་བཛྲ་ས་མཱ་ཛཿས་སྤྱན་དྲང་། ཨོཾ་བཛྲ་སྭ་ར་སྭ་ཏཱི་ཨརྒྷཾ་སོགས་ནས། ཤབྡ་པྲ་ཏཱིཙྪ་སྭཱ་ཧཱས་མཆོད། ཛཿཧཱུྃ་བྃ་ཧོཿ གཉིས་སུ་མེད་པར་ཐིམ། སླར་ཡང་ཐུགས་ཀའི་ས་བོན་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་བཛྲ་ས་མཱ་ཛཿས་སྤྱན་དྲང་། ཨོཾ་པཉྩ་ཀུ་ལ་མཱ་ཏྲཱི་ས་པ་རི་ཝཱར་ཨརྒྷཾ་སོགས་གྱིས་མཆོད། དེ་བཞིན་གཤེགས་པའི་ཚོགས་ཐམས་ཅད་ཀྱིས་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། ཨོཾ་སརྦ་ཏ་ཐཱ་ག་ཏ་ཨ་བྷིཥིཉྩ་ས་མ་ཡ་ཤྲཱི་ཧཱུྃ། ཞེས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་རྣམ་པར་སྣང་མཛད་ཀྱིས་དབུ་བརྒྱན་པར་གྱུར་ཅེས་བརྗོད་ཅིང་བསམས་ལ་ལྷའི་སྐུ་སྣང་ལ་རང་བཞིན་མེད་པ་ལ་ཡིད་གཏད་དེ་སེམས་འཛིན། དེས་སྐྱོ་ན་བཟླས་པ་བྱ་བ་ལ་གསུམ། རྩ་བ། ཁྱད་པར། ལས་སྦྱོར་རོ། །དང་པོ་བདག་བསྐྱེད་རྩ་བའི་བཟླས་པ་ནི། རང་གི་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་འོད་ཟེར་འཕྲོས། ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་མཁྱེན་བརྩེ་ནུས་པ་མ་ལུས་པ་དང་། དཔའ་བོ་རྣལ་འབྱོར་མའི་ཚོགས་དང་། མཁས་ཤིང་གྲུབ་པ་བརྙེས་པ་དང་། ལྷ་དང་དྲང་སྲོང་མངོན་པར་ཤེས་པ་རྣམས་ཀྱི་མཁྱེན་རབ་དང་ནུས་མཐུ་མ་ལུས་པ་ཐམས་ཅད་འོད་ཟེར་དཀར་པོའི་རྣམ་པས་ཚུར་འདུས་རང་ལ་ཐིམ་པས་མི་ཤེས་པའི་རབ་རིབ་ཐམས་ཅད་སྦྱངས། བློ་གྲོས་ཀྱི་སྣང་བ་ཕྱོགས་མེད་དུ་རྒྱས་པར་གྱུར་ཅེས་བརྗོད་ཅིང་བསམས་ལ། ཨོཾ་པི་ཙུ་པི་ཙུ་པྲཛྙཱ་ཝརྡྷཱ་ནི། ཛྭ་ལ་ཛྭ་ལ་མེ་དྷཱ་ཝརྡྷཱ་ནི། དྷི་རི་དྷི་རི་བུདྡྷི་ཝརྡྷཱ་ནི་སྭཱ་ཧཱ། ཞེས་སྨྲ་བ་བཅད་དེ་བཟླ། ཡང་ཐུགས་སྲོག་ཁོ་ནར་སེམས་བཟུང་ཞིང་འོད་ཟེར་སྤྲོ་བསྡུ་དང་བཅས་ཧྲཱིཾ་འབའ་ཞིག་བཟླ་སྟེ། བསྙེན་ཚད་ནི་རྩ་སྔགས་འབུམ་ཕྲག་ཕྱེད་གཉིས་ལས་མི་ཉུངས་དང་། ཡི་གེ་གཅིག་པ་འབུམ་ཚོ་བདུན་ལས་མི་ཉུང་བར་བཟླའོ། །དེ་ལྟར་འབད་པས་རྒྱལ་བའི་གསུང་རབ་མཐའ་དག་ལ་བློ་གྲོས་ཀྱི་སྤོབས་པ་ཐོགས་མེད་དུ་འཇུག་པར་འགྱུར་བར་གསུངས་སོ། །གཉིས་པ་ཁྱད་པར་ཤེས་རབ་བློ་འཕེལ་གྱི་བཟླས་པ་ནི། རང་ཉིད་ལྷ་སྐུ་སྣང་ལ་རང་བཞིན་མེད་པ་མེ་ལོང་ནང་གི་གཟུགས་བརྙན་ལྟ་བུའི་ངང་ནས༔ ལྕེ་ཉིད་ཤེས་རབ་ཀྱི་རལ་གྲི་སོ་གཉིས་པ་ནམ་མཁའི་མདོག་ཅན་གྱི་དབུས་སུ་དྷཱིཿཡིག་དམར་པོ་འོད་ཟེར་ཀུན་ནས་འཕྲོ་བ༔ དེ་ལས་འོད་ཟེར་འཕྲོས་པས་ཕྱོགས་བཅུར་བཞུགས་པའི་སངས་རྒྱས་བྱང་སེམས་ཐམས་ཅད་ཀྱི་མཁྱེན་བརྩེ་འོད་ཟེར་རྣམ་པ་ལྔའི་ཚུལ་གྱིས་བཀུག་ཅིང་ཐིམ༔ དེ་དང་ལྷན་ཅིག་ཏུ་མགྲིན་པར་སྒྲ་བརྙན་སྔོན་པོའི་དབུས་སུ་ཧྲཱིཾ་ཡིག་གིས་མཚན་པའི་རྒྱུད་བཞི་ཐབས་ཤེས་ཀྱིས་རྒྱལ་བ་རྣམས་མཆོད་ཅིང་བསྐུལ་ནས་ངག་གི་དངོས་གྲུབ་ཆར་བཞིན་དུ་བབས་པར་གྱུར༔ ཅེས་བརྗོད་ཅིང་བསམས་ལ། དྷཱིཿཧྲཱིྃ་ཞེས་པའི་སྔགས་རྩེ་གཅིག་ཏུ་བཟླའོ། །གསུམ་པ་ལས་སྦྱོར་ནི། གོང་གི་རྩ་སྔགས་ལན་བདུན་རྩ་བས་ཁྱོར་བ་གང་ངམ། མ་རྙེད་ན་ཆུ་གཙང་མ་ལ་བཏབ་སྟེ་ཉི་མ་ཤར་བའི་ཚེ་བཏུང་བ་ཟླ་བ་དྲུག་ཏུ་བྱ་བ་དང་། སྔ་དྲོའི་ཚེ་རྟག་པར། ཏདྱ་ཐཱ། ཁ་ལི་ཁ་ལི་བ་ལི་ཏེ་སྭཱ་ཧཱ་ཞེས་ཆུ་གཙང་མ་ལ་བཏབ་སྟེ་གདོང་འཁྲུ་ཞིང་སྔགས་ལན་བཅུ་བདུན་བཟླས་ཏེ་བཏུངས་ན། ཉི་མ་གཅིག་བཞིན་དུ་ཚིགས་བཅད་དུ་མ་འཛིན་པར་ནུས་པ་གདོན་མི་ཟའོ། །འདི་ཉམས་སུ་བླང་བའི་སྐབས་སུ་གོས་རྙིང་དང་བུད་མེད་གྲིབ་ཅན་སྤང་ཞིང་། བུད་མེད་ཀྱིས་ཀྱང་སྐྱེས་པ་གྲིབ་ཅན་སྤང་བར་གསུངས་སོ། །ཐུན་ལས་ལྡང་བ་ན། ཨོཾ་སྭར་སྭ་ཏཱི་ཨརྒྷཾ་སོགས་གྱིས་མཆོད། རྒྱལ་བ་ཀུན་གྱི་གསུང་རབ་རྒྱ་མཚོ་ཡི། །རྣམ་པར་འཕྲུལ་པའི་དཔལ་ལས་ལེགས་འོངས་ཤིང་། །སྒྲུབ་པ་པོ་ལ་བློ་གྲོས་མཆོག་སྟེར་བའི། །རྡོ་རྗེ་དབྱངས་ཅན་མ་ལ་ཕྱག་འཚལ་བསྟོད། །ཅེས་བསྟོད། རང་ཉིད་ཆོས་ཀྱི་སྐུ་ལས་མ་གཡོས་ཀྱང་། །ཐུགས་རྗེའི་རྣམ་སྤྲུལ་དབྱངས་ཅན་རིག་པའི་ལྷ། །ཡེ་ཤེས་ལྷ་མོ་འཁོར་དང་བཅས་པ་ཡིས། །དོན་དམ་ཆོས་ཉིད་མི་འཇིགས་བློ་གྲོས་སྩོལ། །སྟོན་ཟླ་ལྟར་དཀར་ཡིད་འཕྲོག་ལྷ་མོ་ཡི། །རབ་དཀར་མཁྱེན་པའི་འོད་ཟེར་སྟོང་ལྡན་གྱིས། །བདག་གི་བློ་གྲོས་ཀུ་མུད་ཁ་ཕྱེས་ལ། །དྲི་བྲལ་ཤེས་བྱའི་འདབ་མ་རྒྱས་པར་མཛོད། །ཅེས་འདོད་དོན་གསོལ། ཡི་གེ་བརྒྱ་པས་ལྷག་ཆད་ཁ་བསྐང་། དགེ་བ་འདི་ཡིས་མྱུར་དུ་བདག །སྒྲ་དབྱངས་ལྷ་མོ་འགྲུབ་གྱུར་ནས། །ཞེས་སོགས་བསྔོ་སྨོན་གྱིས་རྒྱས་གདབ། དེ་ལྟར་ཉམས་སུ་བླངས་པའི་ཕན་ཡོན་ནི། གསུང་གི་རྡོ་རྗེ་པདྨ་སཾ་བྷ་ཝས། དམིགས་པ་འདི་དང་རིག་སྔགས་འདི་གཉིས་ཀྱིས་བླུན་པོ་བ་ལང་རྫི་ཡང་མཁས་པ་པཎྜི་ཏར་འགྱུར་ན༔ བློ་དང་ལྡན་པ་རྣམས་གྱིས་ཚུལ་བཞིན་དུ་བསྒྲུབས་ན་འདོད་པའི་འབྲས་བུ་འབྱུང་བ་ལྟ་ཅི་སྨོས༔ མཚོ་རྒྱལ༔ སངས་རྒྱས་ཀུན་གྱིས་འགྲོ་བ་རྣམས་ནམ་ཡང་བསླུ་བར་མི་འགྱུར་པས་ཐེ་ཚོམ་སྤོངས་ལ་དེ་ལྟར་ཉམས་སུ་ལོངས་ཤིག་གསུངས་སོ༔ ཞེས་བཀའ་སྩལ་པ་ལྟར་རོ། །འདི་དང་འབྲེལ་བར་དབྱངས་ཅན་གྱི་རིལ་བུ་བསྒྲུབ་པར་འདོད་ན། ཨ་རུ་ར་གསེར་༡མདོག བ་རུ་ར༢། སྐྱུ་རུ་༣ར། སྒྲོན་ཤིང་༤། གོ་སྙོད་ཀྱི་འབྲས་༥བུ། དུག་མོ་ཉུང་གི་འབྲས་༦བུ། ལུག་རུ་༧དཀར། དམར༨། སེར་༩གསུམ། སྤང་རྒྱན་༡༠དཀར་པོ་སྟེ་རྫས་སྣ་བཅུ་འམ། པི་པི་ལིང་དང་། ཤིང་མངར་ཏེ་བཅུ་གཉིས་པོ་མཉམ་པར་སྦྱར་ལ་ཞིབ་བཏགས་དར་ཚགས་ལ་དྲང་། ཀ་ར། སྦྲང་རྩིའི་དྭང་མ། བ་དམར་མོའི་འོ་མ་བཅས་ཀྱིས་རིལ་བུ་སྲན་སྤོས་ཙམ་དུ་བྱ། རིལ་ཆགས་འཐེམ་ཞིང་གཤེར་བག་མེད་པ་རིན་པོ་ཆེའི་སྣོད་དུ་བླུགས་པ་སྟེགས་བུའི་དབུས་སུ་གཞག །མཆོད་པ་བཤམ། བདག་བསྐྱེད་བཟླས་པ་བཅས་སྔོན་དུ་སོང་ནས། རིལ་བུ་བསང་སྦྱང་། རིལ་བུ་མི་དམིགས་ཏེ་སྟོང་པའི་ངང་ལས་བདུད་རྩིའི་རྒྱ་མཚོ་དྭངས་ཞིང་འཁྱིལ་བའི་དབུས་སུ་པྃ་ལས་པདྨ་དཀར་པོ་འདབ་མ་བརྒྱད་པ་སྡོང་བུ་དང་བཅས་པའི་རྩེར་ཟླ་བའི་དཀྱིལ་འཁོར། དེའི་སྟེང་དུ་རིལ་བུ་ཧྲཱིྃ་དཀར་པོར་གསལ་བ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་མ་རིག་པའི་སྒྲིབ་གཉིས་སྦྱངས། དེ་བཞིན་གཤེགས་པ་རྣམས་ལ་མཉེས་པའི་མཆོད་པ་ཕུལ། ཚུར་འདུས་ཡོངས་སུ་གྱུར་པ་ལས། རྡོ་རྗེ་དབྱངས་ཅན་སོགས་ནས། རྣམ་པར་སྣང་མཛད་ཀྱིས་དབུ་བརྒྱན་པར་གྱུར་ཅེས་པའི་བར་གོང་ལྟར་གསལ་གདབ། མཆོད་པ་བྱིན་རླབས་སྤྱི་ལྟར་རམ་ནམ་མཁའ་མཛོད་ཀྱི་སྔགས་རྒྱས་སྤེལ་ལ། ཨོཾ་སྭ་ར་སྭ་ཏཱི་ཨརྒྷཾ་སོགས་ཀྱིས་མཆོད། རྒྱལ་བ་ཀུན་གྱི་གསུང་རབ་སོགས་ཀྱིས་བསྟོད། ངང་ཉིད་ཆོས་ཀྱི་སྐུ་ལས་སོགས་འདོད་དོན་གསོལ། མདུན་བསྐྱེད་ཀྱི་ཐུགས་ཀའི་ས་བོན་སོགས་ནས། འོད་ཟེར་དཀར་པོའི་རྣམ་པས་ཚུར་འདུས་ཏེ་མདུན་བསྐྱེད་ཀྱི་ཐུགས་ཀར་ཐིམ་པར་གྱུར་པའི་མོས་པས་སྔགས་གཉིས་ཇི་ཙམ་ནུས་པ་བཟླ། ཐུན་ལས་ལྡང་བ་ན་མཆོད་བསྟོད་དང་། གསོལ་བ་གདབ། ནོངས་པ་བཤགས། མདུན་བསྐྱེད་རིལ་བུ་ལ་བརྟན་བཞུགས་དང་། བསྔོ་སྨོན་བཀྲ་ཤིས་བརྗོད། དེ་ལྟ་བུའི་རིམ་པས་འོད་དང་། དུ་བ་དང་། སྒྲ་སྙན་པར་སྒྲོགས་པ་སོགས་དངོས་ཉམས་རྨི་ལམ་དུ་རྟགས་མཐོང་བའི་བར་དུ་བསྒྲུབ། ཐུན་ཐ་མའི་ནོངས་པ་བཤགས་པའི་རྗེས། དབྱངས་ཅན་མ་འོད་དུ་ཞུ་བ་ཡོངས་སུ་གྱུར་པ་ལས་སྨན་གྱི་རིལ་བུ་བློ་གྲོས་ཀྱི་མཐུ་ཐོགས་པ་མེད་པ་སྟེར་བའི་ནུས་བྱིན་དང་ལྡན་པར་གྱུར་པའི་མོས་པ་དང་བཅས་རྟེན་འབྲེལ་སྙིང་པོ་མང་དུ་བཟླས་པས་མེ་ཏོག་གི་ཆར་ཕབས་ཤིས་པ་བརྗོད། བསྔོ་སྨོན་རྒྱ་ཆེར་བྱ། ཚུལ་བཞིན་དུ་བསྒྲུབས་པའི་རིལ་བུ་དེ་ཉིད་རླུང་མི་འཆོར་པའི་སྣོད་བཟང་པོར་ཚགས་བྱ་ཞིང་། ར་བ་བཞི་སོགས་ཟླ་བ་གང་ཡང་རུང་བའི་ཡར་ངོའི་ཚེས་གཅིག་གི་ཐོ་རངས་ནས་བརྩམས་ཏེ་ལྟོ་སྟོང་གི་དུས་སུ་ཁྲུས་བྱས་ལ་བདག་གི་རྣལ་འབྱོར་སྔོན་དུ་འགྲོ་བས། རིལ་བུ་ལྷའི་ངོ་བོར་ཤེས་པས་སྔགས་བཟླ་བཞིན་དུ་མིད་དོ། །དེ་ལྟར་བསྟེན་པའི་ཕན་ཡོན་བྱང་། ཞག་བདུན་ཐོས་པས་དགེ་བ་དང་། །ལྐུག་པ་གླེན་པ་དག་ཀྱང་འཚོ། །བཅུ་གཅིག་སྐད་བཟང་མགྲིན་པ་བདེ། །ཉི་ཤུས་མི་བརྗེད་གཟུངས་ཐོབ་འགྱུར། །ཟླ་བ་གཅིག་ཏུ་ཟོས་གྱུར་ན། །བློ་ནི་མེ་དང་འདྲ་བར་འགྱུར། །རབ་ཏུ་བསྟེན་ན་ཚེ་རིང་ཞིང་། །རྒས་པའི་སྐྱོན་གྱིས་གོས་པ་མེད། །ཅེས་གསུངས་སོ། །ཞེས་པའང་འགྲན་ཟླ་དང་བྲལ་བའི་ལོ་ཙཱ་བ་ཆེན་པོ་བཻ་རོ་ཙ་ན་རཀྵི་ཏའི་རྣམ་པར་འཕྲུལ་བ་ཀུན་མཁྱེན་ཆོས་ཀྱི་རྒྱལ་པོ་འགྲོ་འདུལ་པྲཛྙཱ་རསྨིའི་ལྗགས་སྒྲིག་རྡོ་རྗེ་དབྱངས་ཅན་མའི་སྒྲུབ་ཐབས་བློ་གྲོས་ཀྱི་སྣང་བ་གསལ་བར་བྱེད་པ་དང་། རྗེ་དེ་ཉིད་ཀྱི་ཟབ་གཏེར་ལས་བྱོན་པའི་ཤེས་རབ་བློ་འཕེལ་མི་བརྗེད་གཟུངས་ཐོབ་ཀྱི་མན་ངག་ཟུང་འབྲེལ་དུ་ཉམས་སུ་བླང་བའི་ཚུལ་ཕྱག་གཞེས་ལྟར་བཀླགས་པས་གྲུབ་པར་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་སྦྱར་བ་སརྦ་ས་ཏྭ་ཛྙཱ་ན་སྱ་དཱི་པྟ་སྥུཊཾ་བྷུ་ཡཱཏྲ།། །། ༈

[edit]

rdo rje dbyangs can ma'i sgrub thabs dang shes rab blo 'phel mi brjed gzungs thob zung 'brel du nyams su blang ba'i tshul ye shes rgyas byed/ @#/_/rdo rje dbyangs can ma'i sgrub thabs dang shes rab blo 'phel mi brjed gzungs thob zung 'brel du nyams su blang ba'i tshul ye shes rgyas byed ces bya ba bzhugs so/__/gu rush+tsa swa ra swa s+t+ye b+he daM na mA mi/__rdo rje dbyangs can ma'i ting nge 'dzin dang gzungs kyi sgo zab mo la brten nas spobs pa'i gter mdzod yongs su grol bar don du gnyer pa'i gang zag gis/__tho rangs sogs dus dge ba'i rgyur skyabs yul nam mkha' gang bar sad pa'i spyan sngar/__sangs rgyas chos dang sogs skyabs sems dang /__sems can thams cad bde ba dang sogs tshad med bzhi bsgom/__oM swa b+hA wa sogs/__bdag tu 'dzin par byed pa'i gzung 'dzin gyi rnam par rtog pa'i chos thams cad rang bzhin gyis rnam par dag pa'i stong pa nyid du gyur/__stong pa'i ngang las kun gzhi'i rgya mtsho chen po klong yangs pa'i dbus su/__pa~M las chu skyes dkar po 'dab ma brgyad pa sems byung gi sdong bu dang yal gas rnam par mdzes pa'i dbus su kun rdzob byang chub sems kyi ngo bo zla ba'i dkyil 'khor nya gang ba'i rnam pa can dang /__de'i steng du don dam byang chub sems kyi rang gzugs hrIM dkar po las 'od zer dpag tu med pa 'phros/__sems can gyi ma rig pa'i sgrib gnyis sbyangs/__de bzhin gshegs pa rnams la mnyes pa'i mchod pa phul/__tshur 'dus yongs su gyur pa las/__rang nyid bcom ldan 'das ma rdo rje dbyangs can lha mo sku mdog dkar mo zhal gcig phyag gnyis ma/__thugs rje'i spyan gsum dang ldan zhing /__shin tu 'dzum zhing sgeg pa'i nyams dang ldan pa/__phyag g.yas pad+ma dkar po'i yu ba mtheb srin gyis thugs kar 'dzin cing /__g.yon mchog sbyin gyi phyag rgyas pusta kaHsbyin thabs su bsnams pa/__dbu skra phyed chings kyi zur phud gsum pa can/__rin po che dang me tog du mas mdzes par brgyan cing /__rin po che'i dbu rgyan/__snyan rgyan/__mgul rgyan/__do shal/__gdu bu/__ska rags/__lha'i gos kyi lhab lhub 'chang zhing /__zhabs rdo rje'i skyil mo krung gis bzhugs pa/__de ltar rang nyid lhar gsal ba'i ngang nas/__dpral bar oM dkar po/__mgrin par AHdmar po/__thugs kar hU~M sngon po/__thugs ka'i cha smad du pad dkar zla ba'i steng du hrIM gyi mthar/__oM pi tsu pi tsu pradz+nyA war+d+hA ni/__dz+wa la dz+wa la med+hA war+d+hA ni/__d+hi ri d+hi ri bud+d+hi war+d+hA ni swA hA/__/zhes pa'i sngags phreng gis bskor ba'i sa bon las 'od zer 'phros/__rang bzhin gyi gnas nas bsgoms pa 'dra ba'i ye shes pa badz+ra sa mA dzaHsa spyan drang /__oM badz+ra swa ra swa tI ar+g+haM sogs nas/__shab+da pra tIts+tsha swA hAs mchod/__dzaHhU~M ba~M hoH__gnyis su med par thim/__slar yang thugs ka'i sa bon las 'od zer 'phros pas dbang gi lha rigs lnga 'khor dang bcas pa badz+ra sa mA dzaHsa spyan drang /__oM pany+tsa ku la mA trI sa pa ri wAr ar+g+haM sogs gyis mchod/__de bzhin gshegs pa'i tshogs thams cad kyis mngon par dbang bskur du gsol/__zhes gsol ba btab pas/__oM sarba ta thA ga ta a b+hiShiny+tsa sa ma ya shrI hU~M/__zhes dbang bskur/__sku gang /__dri ma dag__/chu'i lhag ma yar lud pa las rnam par snang mdzad kyis dbu brgyan par gyur ces brjod cing bsams la lha'i sku snang la rang bzhin med pa la yid gtad de sems 'dzin/__des skyo na bzlas pa bya ba la gsum/__rtsa ba/__khyad par/__las sbyor ro/__/dang po bdag bskyed rtsa ba'i bzlas pa ni/__rang gi thugs ka'i sa bon sngags phreng dang bcas pa las 'od zer 'phros/__phyogs bcu'i de bzhin gshegs pa thams cad kyi mkhyen brtse nus pa ma lus pa dang /__dpa' bo rnal 'byor ma'i tshogs dang /__mkhas shing grub pa brnyes pa dang /__lha dang drang srong mngon par shes pa rnams kyi mkhyen rab dang nus mthu ma lus pa thams cad 'od zer dkar po'i rnam pas tshur 'dus rang la thim pas mi shes pa'i rab rib thams cad sbyangs/__blo gros kyi snang ba phyogs med du rgyas par gyur ces brjod cing bsams la/__oM pi tsu pi tsu pradz+nyA war+d+hA ni/__dz+wa la dz+wa la me d+hA war+d+hA ni/__d+hi ri d+hi ri bud+d+hi war+d+hA ni swA hA/__zhes smra ba bcad de bzla/__yang thugs srog kho nar sems bzung zhing 'od zer spro bsdu dang bcas hrIM 'ba' zhig bzla ste/__bsnyen tshad ni rtsa sngags 'bum phrag phyed gnyis las mi nyungs dang /__yi ge gcig pa 'bum tsho bdun las mi nyung bar bzla'o/__/de ltar 'bad pas rgyal ba'i gsung rab mtha' dag la blo gros kyi spobs pa thogs med du 'jug par 'gyur bar gsungs so/__/gnyis pa khyad par shes rab blo 'phel gyi bzlas pa ni/__rang nyid lha sku snang la rang bzhin med pa me long nang gi gzugs brnyan lta bu'i ngang nas:__lce nyid shes rab kyi ral gri so gnyis pa nam mkha'i mdog can gyi dbus su d+hIHyig dmar po 'od zer kun nas 'phro ba:__de las 'od zer 'phros pas phyogs bcur bzhugs pa'i sangs rgyas byang sems thams cad kyi mkhyen brtse 'od zer rnam pa lnga'i tshul gyis bkug cing thim:__de dang lhan cig tu mgrin par sgra brnyan sngon po'i dbus su hrIM yig gis mtshan pa'i rgyud bzhi thabs shes kyis rgyal ba rnams mchod cing bskul nas ngag gi dngos grub char bzhin du babs par gyur:__ces brjod cing bsams la/__d+hIHhrI~M zhes pa'i sngags rtse gcig tu bzla'o/__/gsum pa las sbyor ni/__gong gi rtsa sngags lan bdun rtsa bas khyor ba gang ngam/__ma rnyed na chu gtsang ma la btab ste nyi ma shar ba'i tshe btung ba zla ba drug tu bya ba dang /__snga dro'i tshe rtag par/__tad+ya thA/__kha li kha li ba li te swA hA zhes chu gtsang ma la btab ste gdong 'khru zhing sngags lan bcu bdun bzlas te btungs na/__nyi ma gcig bzhin du tshigs bcad du ma 'dzin par nus pa gdon mi za'o/__/'di nyams su blang ba'i skabs su gos rnying dang bud med grib can spang zhing /__bud med kyis kyang skyes pa grib can spang bar gsungs so/__/thun las ldang ba na/__oM swar swa tI ar+g+haM sogs gyis mchod/__rgyal ba kun gyi gsung rab rgya mtsho yi/__/rnam par 'phrul pa'i dpal las legs 'ongs shing /__/sgrub pa po la blo gros mchog ster ba'i/__/rdo rje dbyangs can ma la phyag 'tshal bstod/__/ces bstod/__rang nyid chos kyi sku las ma g.yos kyang /__/thugs rje'i rnam sprul dbyangs can rig pa'i lha/__/ye shes lha mo 'khor dang bcas pa yis/__/don dam chos nyid mi 'jigs blo gros stsol/__/ston zla ltar dkar yid 'phrog lha mo yi/__/rab dkar mkhyen pa'i 'od zer stong ldan gyis/__/bdag gi blo gros ku mud kha phyes la/__/dri bral shes bya'i 'dab ma rgyas par mdzod/__/ces 'dod don gsol/__yi ge brgya pas lhag chad kha bskang /__dge ba 'di yis myur du bdag__/sgra dbyangs lha mo 'grub gyur nas/__/zhes sogs bsngo smon gyis rgyas gdab/__de ltar nyams su blangs pa'i phan yon ni/__gsung gi rdo rje pad+ma saM b+ha was/__dmigs pa 'di dang rig sngags 'di gnyis kyis blun po ba lang rdzi yang mkhas pa paN+Di tar 'gyur na:__blo dang ldan pa rnams gyis tshul bzhin du bsgrubs na 'dod pa'i 'bras bu 'byung ba lta ci smos:__mtsho rgyal:__sangs rgyas kun gyis 'gro ba rnams nam yang bslu bar mi 'gyur pas the tshom spongs la de ltar nyams su longs shig gsungs so:__zhes bka' stsal pa ltar ro/__/'di dang 'brel bar dbyangs can gyi ril bu bsgrub par 'dod na/__a ru ra gser 1mdog__ba ru ra2/__skyu ru 3ra/__sgron shing 4/__go snyod kyi 'bras 5bu/__dug mo nyung gi 'bras 6bu/__lug ru 7dkar/__dmar8/__ser 9gsum/__spang rgyan 10dkar po ste rdzas sna bcu 'am/__pi pi ling dang /__shing mngar te bcu gnyis po mnyam par sbyar la zhib btags dar tshags la drang /__ka ra/__sbrang rtsi'i dwang ma/__ba dmar mo'i 'o ma bcas kyis ril bu sran spos tsam du bya/__ril chags 'them zhing gsher bag med pa rin po che'i snod du blugs pa stegs bu'i dbus su gzhag__/mchod pa bsham/__bdag bskyed bzlas pa bcas sngon du song nas/__ril bu bsang sbyang /__ril bu mi dmigs te stong pa'i ngang las bdud rtsi'i rgya mtsho dwangs zhing 'khyil ba'i dbus su pa~M las pad+ma dkar po 'dab ma brgyad pa sdong bu dang bcas pa'i rtser zla ba'i dkyil 'khor/__de'i steng du ril bu hrI~M dkar por gsal ba las 'od zer 'phros/__sems can thams cad kyi ma rig pa'i sgrib gnyis sbyangs/__de bzhin gshegs pa rnams la mnyes pa'i mchod pa phul/__tshur 'dus yongs su gyur pa las/__rdo rje dbyangs can sogs nas/__rnam par snang mdzad kyis dbu brgyan par gyur ces pa'i bar gong ltar gsal gdab/__mchod pa byin rlabs spyi ltar ram nam mkha' mdzod kyi sngags rgyas spel la/__oM swa ra swa tI ar+g+haM sogs kyis mchod/__rgyal ba kun gyi gsung rab sogs kyis bstod/__ngang nyid chos kyi sku las sogs 'dod don gsol/__mdun bskyed kyi thugs ka'i sa bon sogs nas/__'od zer dkar po'i rnam pas tshur 'dus te mdun bskyed kyi thugs kar thim par gyur pa'i mos pas sngags gnyis ji tsam nus pa bzla/__thun las ldang ba na mchod bstod dang /__gsol ba gdab/__nongs pa bshags/__mdun bskyed ril bu la brtan bzhugs dang /__bsngo smon bkra shis brjod/__de lta bu'i rim pas 'od dang /__du ba dang /__sgra snyan par sgrogs pa sogs dngos nyams rmi lam du rtags mthong ba'i bar du bsgrub/__thun tha ma'i nongs pa bshags pa'i rjes/__dbyangs can ma 'od du zhu ba yongs su gyur pa las sman gyi ril bu blo gros kyi mthu thogs pa med pa ster ba'i nus byin dang ldan par gyur pa'i mos pa dang bcas rten 'brel snying po mang du bzlas pas me tog gi char phabs shis pa brjod/__bsngo smon rgya cher bya/__tshul bzhin du bsgrubs pa'i ril bu de nyid rlung mi 'chor pa'i snod bzang por tshags bya zhing /__ra ba bzhi sogs zla ba gang yang rung ba'i yar ngo'i tshes gcig gi tho rangs nas brtsams te lto stong gi dus su khrus byas la bdag gi rnal 'byor sngon du 'gro bas/__ril bu lha'i ngo bor shes pas sngags bzla bzhin du mid do/__/de ltar bsten pa'i phan yon byang /__zhag bdun thos pas dge ba dang /__/lkug pa glen pa dag kyang 'tsho/__/bcu gcig skad bzang mgrin pa bde/__/nyi shus mi brjed gzungs thob 'gyur/__/zla ba gcig tu zos gyur na/__/blo ni me dang 'dra bar 'gyur/__/rab tu bsten na tshe ring zhing /__/rgas pa'i skyon gyis gos pa med/__/ces gsungs so/__/zhes pa'ang 'gran zla dang bral ba'i lo tsA ba chen po bai ro tsa na rak+Shi ta'i rnam par 'phrul ba kun mkhyen chos kyi rgyal po 'gro 'dul pradz+nyA rasmi'i ljags sgrig rdo rje dbyangs can ma'i sgrub thabs blo gros kyi snang ba gsal bar byed pa dang /__rje de nyid kyi zab gter las byon pa'i shes rab blo 'phel mi brjed gzungs thob kyi man ngag zung 'brel du nyams su blang ba'i tshul phyag gzhes ltar bklags pas grub par mtsho skyes bla ma dgyes pa'i 'bangs mkhyen brtse'i dbang pos sbyar ba sarba sa twa dz+nyA na s+ya dI p+ta s+phuTaM b+hu yAtra//___//_!_