JKW-KABUM-13-PA-023-016

Previous Text Back to Volume PageNext Text

སྟག་ལུང་པའི་རྩ་གསུམ་སྙིང་པོའི་ཡང་བཅུད་ཀྱི་འཆི་མེད་མཆོག་སྒྲུབ་ཚེ་དབང་ཟིན་ཐོ།

Wylie title	stag lung pa'i rtsa gsum snying po'i yang bcud kyi 'chi med mchog sgrub tshe dbang zin tho
Location	mkhyen brtse'i bka' 'bum Volume 13, sde tshan 23, Text 16, Pages 545-551 (Folios 42a2 to 45a4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	རིག་འཛིན་ཚེ་དབང་བཀྲ་ཤིས་ (rig 'dzin tshe dbang bkra shis)
Citation	'jam dbyangs mkhyen brtse'i dbang po. stag lung pa'i rtsa gsum snying po'i yang bcud kyi 'chi med mchog sgrub tshe dbang zin tho. In 'jam dbyangs mkhyen brtse'i dbang po'i bka' 'bum, Vol. 13: 545-551. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris  ·  Longevity Empowerment - tshe dbang
Cycle	ཚེ་སྒྲུབ་ཡང་གསང་འཆི་མེད་མཆོག་གྲུབ་ (tshe sgrub yang gsang 'chi med mchog grub)
Parent Cycle	རྩ་གསུམ་སྙིང་པོའི་བཅུད་ཐིག་ (rtsa gsum snying po'i bcud thig)
Colophon	།དེ་ལྟར་རིག་འཛིན་ཆེན་པོ་ཚེ་དབང་བཀྲ་ཤིས་ཀྱི་ལྗགས་བསྒྲིགས་དབང་ཆོག་འཆི་བདག་གི་གཡུལ་ལས་རྒྱལ་བ་ལས་ཇི་ལྟར་འབྱུང་བ་ལྟར་རྒྱས་པར་བསྐུར་བའི་ཚུལ་ཡིན་ལ། རྐྱེན་སེལ་སོགས་ལ་བསྡུ་ན་ཡང་ཟབ་དཀོན་མཆོག་སྤྱི་འདུས་ཀྱི་ཚེ་དབང་ཇི་བཞིན་བགྱིས་པས་ཀྱང་རུང་ཞེས་གསུང་རྒྱུན་ལས་འབྱུང་ངོ་། །འདིས་ཀྱང་མཐའ་ཡས་པའི་ཡིད་ཅན་ཐམས་ཅད་འཆི་མེད་རིག་འཛིན་མཆོག་གི་གོ་འཕང་འཐོབ་པའི་རྒྱུར་གྱུར་ཅིག
	de ltar rig 'dzin chen po tshe dbang bkra shis kyi ljags bsgrigs dbang chog 'chi bdag gi g.yul las rgyal ba las ji ltar 'byung ba ltar rgyas par bskur ba'i tshul yin la/__rkyen sel sogs la bsdu na yang zab dkon mchog spyi 'dus kyi tshe dbang ji bzhin bgyis pas kyang rung zhes gsung rgyun las 'byung ngo /_/'dis kyang mtha' yas pa'i yid can thams cad 'chi med rig 'dzin mchog gi go 'phang 'thob pa'i rgyur gyur cig

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །རྩ་གསུམ་སྙིང་པོའི་ཡང་བཅུད་ཀྱི་འཆི་མེད་མཆོག་སྒྲུབ་ཚེ་དབང་ཟིན་ཐོ་བཞུགས། ན་མོ་གུ་རུ་ཨ་མི་ཏཱ་བྷཱ་ཡ། འཆི་མེད་མཆོག་སྒྲུབ་ཀྱི་ཚེ་དབང་ལ། དཀྱིལ་འཁོར་མཆོད་གཏོར་དབང་རྫས་སོགས་བཤམ་བཀོད་གྲུབ་ནས། ལས་བྱང་སྤྱི་འགྲེ་མདོར་བསྡུས་ཀྱི་གཞུང་བསྲང་། སློབ་མ་རྣམས་ལ་ཁྲུས་བགེགས་བསྐྲད། སྲུང་འཁོར། ལོ་རྒྱུས་ཅི་རིགས་དང་། ཁྱད་པར་ཚེ་དབང་འདི་ནི་འདམ་དབུ་མ་བྲག་དཀར་བསྟན་འཛིན་རྫོང་དུ་རིག་འཛིན་ཆེན་པོ་ཚེ་དབང་བཀྲ་ཤིས་ལ་ཤིང་རྟ་ལོ་དབང་ཆེན་སྤྲེལ་ཟླའི་ཡར་ངོའི་ཚེས་བཅུར་མཉམ་མེད་ཨོ་རྒྱན་ཆེན་པོ་ཡབ་ཡུམ་གྱིས་དངོས་སུ་སྩལ་བའི་བྱིན་རླབས་ཅན་གྱི་ཚེ་དབང་ཟབ་མོ་བསྒྲུབ་པ་ལ་ཞེས་སོགས་འབྲེལ་བཀོད་ལ་མཎྜལ་ཕུལ། །བླ་མ་རྩ་གསུམ་ལྷ་ཚོགས་དགོངས༔ བདག་ཅག་སྐལ་ལྡན་བུ་རྣམས་ལ༔ བདེ་གཤེགས་རིགས་འདུས་འཆི་མེད་ལྷའི༔ བྱིན་རླབས་དབང་བསྐུར་སྩལ་དུ་གསོལ༔ ཞེས་ལན་གསུམ་གྱིས་གསོལ་བ་གདབ། ཨོཾ་ཨཱཿཧཱུྃ༔ །འཆི་མེད་ལྷ་ཚོགས་ཐུགས་རྗེ་ཅན༔ །དཀྱིལ་འཁོར་ཡོངས་རྫོགས་ལྷ་རྣམས་ལ༔ ཚེ་ཡི་རིག་འཛིན་མ་ཐོབ་པར༔ བདག་སོགས་གུས་པས་སྐྱབས་སུ་མཆི༔ ཞེས་ལན་གསུམ་གྱིས་སྐྱབས་འགྲོ་དང་། བདག་གཞན་འཆི་མེད་ཐོབ་བྱའི་ཕྱིར༔ ཚེ་ཡི་ལྷ་ཚོགས་བསྒྲུབས་ནས་ནི༔ གང་ལ་གང་འདུལ་ཕྲིན་ལས་ཀྱིས༔ འགྲོ་དོན་བྱེད་པར་སེམས་བསྐྱེད་དོ༔ ཞེས་ལན་གསུམ་གྱིས་སེམས་བསྐྱེད། ལས་ཆུས་གཏོར་ཞིང་། ཨོཾ་པདྨཱནྟ་ཀྲྀ་ཏ་ཕཊ་ཀྱིས་བསང་། སྭ་བྷཱ་བས་སྦྱང་། སྟོང་པ་ཉིད་དུ་གྱུར། སྟོང་པའི་ངང་ལས་གནས་ཁང་རིན་པོ་ཆེའི་གཞལ་ཡས་ཁང་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་སེང་གེས་བཏེགས་པའི་རིན་པོ་ཆེའི་ཁྲིར། པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཁྱེད་རང་གི་སེམས་ཉིད་ཡི་གེ་ཧྲཱིཿདམར་པོ་ཡོངས་སུ་གྱུར་པ་ལས་སྐད་ཅིག་གིས་བཅོམ་ལྡན་འདས་མགོན་པོ་ཚེ་དཔག་ཏུ་མེད་པ་སྐུ་མདོག་དམར་པོ་ཆོས་གོས་ངུར་སྨྲིག་རྣམ་གསུམ་གསོལ་བ། ཞབས་རྡོ་རྗེའི་སྐྱིལ་ཀྲུང་ཅན། ཕྱག་མཉམ་གཞག་མཛད་པའི་སྟེང་ན་འཆི་མེད་ཚེ་དང་ཡེ་ཤེས་ཀྱི་བདུད་རྩིས་གང་བའི་བུམ་པ་བསྣམས་པའི་སྐུ་མཚན་དཔེ་གསལ་རྫོགས་འོད་ཟེར་འཕྲོ་བའི་རང་བཞིན་གསལ་བཏབ་པའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། དེ་ལས་འོད་འཕྲོས་བདེ་བ་ཅན། པོ་ཊ་ལ། རྔ་ཡབ་དཔལ་རི་སོགས་ནས་མགོན་པོ་ཚེ་དཔག་ཏུ་མེད་པའི་ལྷ་ཚོགས་རྩ་གསུམ་རྒྱལ་བ་རབ་འབྱམས་ཀྱིས་བསྐོར་བ་ཉི་ཟེར་གྱི་རྡུལ་འཁྲུགས་པ་ལྟར་སྤྱན་དྲངས་ཏེ་ཁྱེད་རང་རྣམས་ལ་སིབ་སིབ་ཐིམ་པར་གྱུར་སྙམ་པའི་མོས་པ་མཛོད། ངོ་བོ་ཆོས་སྐུའི་སོགས་དང་། གང་ལྟར་ཡང་། སྔགས་མཐར་ཛྙཱ་ན་ཨཱ་བེ་ཤ་ཡ་ཨ་ཨཱཿཞེས་སྤོས་རོལ་དང་བཅས་བྱིན་དབབ། ཏིཥྛ་བཛྲས་བརྟན་པར་བྱ། དེས་དབང་གི་སྔོན་འགྲོ་གྲུབ་ནས། དངོས་གཞིའི་དབང་བསྐུར་བ་ལ་ལྔ་ལས། དང་པོ་བུམ་དབང་གི་སླད་དུ་མདུན་བསྐྱེད་ཀྱི་བུམ་པ་གཞལ་ཡས་ཁང་མཚན་ཉིད་དང་ལྡན་པའི་ནང་དུ་བུམ་བཅུད་ལྷའི་རང་བཞིན་དུ་གསལ་བས་དབང་བསྐུར་བ་ནི། ཧྲཱིཿ ཕྱི་ནི་བུམ་པ་ནང་ནི་བདུད་རྩིས་གང་༔ གསང་བའི་དོན་དུ་པདྨ་ཚེ་དཔག་མེད༔ གནས་ལྔར་ཕྱག་མཚན་ལྔ་དང་རིགས་ལྔས་མཚན༔ འོད་ཟེར་དཔག་ཡས་ནམ་མཁའ་གང་བར་སྤྲོས༔ འཁོར་འདས་སྣང་སྲིད་སྣོད་བཅུད་མ་ལུས་པའི༔ ཚེ་བསོད་དཔལ་འབྱོར་ཡོན་ཏན་ཀུན་བསྡུས་ཏེ༔ གཞིར་གནས་ཕྱག་གི་བུམ་པའི་ནང་དུ་ཞུགས༔ གནས་ལྔའི་ཕྱག་མཚན་ལྔ་ཡི་འོད་ཟེར་ནི༔ ཁྱེད་རང་ལྷར་གསལ་དཔྲལ་མགྲིན་སྙིང་ལྟེར་ཐིམ༔ བུམ་གསང་ཤེས་རབ་བཞི་པ་ཡེ་ཤེས་ཀྱི༔ དབང་ཐོབ་དུག་ལྔའི་བག་ཆགས་དབྱིངས་དག་ནས༔ རྣམ་སྣང་འོད་དཔག་མི་བསྐྱོད་རིན་ཆེན་འབྱུང་༔ དོན་གྲུབ་ལྷ་དང་རང་བཞིན་ཡེ་ཤེས་ལྔའི༔ བྱིན་རླབས་ས་བོན་རྒྱུད་ལ་བཞག་པར་གྱུར༔ ཨོཾ་ཨཱཿཧཱུྃ་བཛྲ་གུ་རུ་པདྨ་དེ་ཝ་ཌཱ་ཀི་ནི་སརྦ་སིདྡྷི་ཕ་ལ་ཧཱུྃ༔ ཨོཾ་ཨ་མི་དེ་ཝ་ཨཱ་ཡུ་ཥེ་སརྦ་ཛྙཱ་ན་སིདྡྷི་ཕ་ལ་ཀཱ་ཡ་ཝཱ་ཀ་ཙིཏྟ་གུ་ཎ་ཀརྨ་ཨ་བྷི་ཥིཉྩ་ཨོཾ་ཨཱཿབྷྲཱུྃ་ཏྲཱྃ་ཧྲཱིཿཨཱཿ ཞེས་དབང་བསྐུར་བུམ་ཆུ་བླུད། འཇིག་རྟེན་འདྲེན་པའི་གཙོ་བོ་ཚེ་དཔག་མེད་སོགས་ཀྱིས་ཤིས་པ་བརྗོད། གཉིས་པ་ཚེ་འབྲང་གི་དབང་ནི། མདུན་བསྐྱེད་ཀྱི་ཕྱག་གི་བུམ་པ་འཁོར་འདས་སྣོད་བཅུད་ཀྱི་དྭངས་མ་ཡོན་ཏན་གྱིས་གཏམས་པའི་ཁར་བླ་མ་ཚེ་དཔག་མེད་ལོངས་སྤྱོད་རྫོགས་སྐུའི་རྒྱན་ཅན་དེའི་དབུ་གཙུག་ན་རིག་འཛིན་བརྒྱུད་པའི་བླ་མ་རྣམས་ཐོ་བརྩེགས་སུ་བཞུགས་པ་ལ་མོས་གུས་དུང་དུང་བ་ཞིག་བྱས་པས་ཁྱེད་རང་རྣམ་པའི་སྤྱི་བོར་བྱོན། ལུས་ངག་ཡིད་གསུམ་གྱི་འགལ་རྐྱེན་བསལ། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་ཆར་ལྟར་ཕབ་ཅིང་རྒྱུད་ལ་བཞག །མཐར་བླ་མ་རྣམས་ཡས་མར་ཐིམ། བུམ་པའི་ཆུ་དང་དབྱེར་མེད་དུ་འདྲེས། ཁྱེད་རང་གི་ཚངས་བུག་ནས་ཞུགས། ལུས་ཀྱི་ནང་ཐམས་ཅད་གང་། ཡོངས་རྫོགས་དབང་ཆེན་དམ་པ་ཐོབ་པར་གྱུར་སྙམ་པ་མཛོད། ཧྲཱིཿ བཅོམ་ལྡན་ཚེ་དཔག་མེད་མགོན་གྱི༔ སྐུ་ཡི་ཚེ་དབང་འདི་ལ་སྩོལ༔ མི་ཟད་རྒྱན་གྱི་འཁོར་ལོའི་སྐུའི༔ གོ་འཕང་དམ་པ་མངོན་གྱུར་ཅིག༔ ཀཱ་ཡ་སིདྡྷི་ཨོཾ༔ དེ་བཞིན་དུ་གསུང་། ཐུགས། ཡེ་ཤེས་དང་། སྔགས་ཝཱཀ །ཙིཏྟ། ཛྙཱ་ན་སིདྡྷི་ཧོ༔ ཞེས་འདོན་པ་བསྒྱུར་ཏེ་གནས་རྣམས་སུ་བསྐུར། ཧྲཱིཿ ཆོས་དབྱིངས་ངང་ལས་རང་བྱུང་རང་ཤར་བའི༔ འགྲོ་བའི་འཆི་བདག་འཇོམས་མཛད་བཅོམ་ལྡན་འདས༔ རྒྱལ་བ་ཀུན་གྱི་གསུང་གི་དབང་ཕྱུག་ལྷ༔ བཅོམ་ལྡན་ཚེ་དཔག་མེད་པའི་བཀྲ་ཤིས་ཤོག༔ ཅེས་མེ་ཏོག་འཐོར། གསུམ་པ་ཐབས་བདེ་བ་ཆེན་པོ་དམ་རྫས་མཆོག་གི་རིལ་བུ་བྱིན་པས་སྣང་བ་ལྷའི་རོལ་པ་དང་། སྒྲ་གྲགས་སྔགས་ཀྱི་རང་བཞིན་དུ་སྒྲོགས་པའི་མོས་པ་མཛོད། ཧྲཱིཿ རྡོ་རྗེ་བཅུད་ལྡན་འཆི་མེད་ཐབས་ཀྱི་རྫས༔ འདོད་ཡོན་མི་ཟད་འོད་ཟེར་རྣམ་ལྔ་འཁྲུགས༔ རེས་མྱོང་རྡོ་རྗེའི་སྐུ་འགྲུབ་རྫས་མཆོག་འདི༔ མྱངས་པས་འཆི་མེད་ཚེ་ཡི་དབང་ཐོབ་ཤོག༔ ཨོཾ་ཨ་མི་དེ་ཝ་ཨཱཿཡུར་ཛྙཱ་ན་སརྦ་སིདྡྷི་ཕ་ལ་ཧོཿ ཁྱེད་སྐུ་པདྨ་རཱ་གའི་ལྷུན་པོ་ལ། །ཉིན་བྱེད་འོད་ཟེར་འབུམ་གྱིས་འཁྱུད་པ་བཞིན། །མཚན་དཔེའི་གཟི་བྱིན་ཀུན་ནས་ལྷང་ངེ་བ། །བཅོམ་ལྡན་ཚེ་དཔག་མེད་པའི་བཀྲ་ཤིས་ཤོག །བཞི་པ་ཤེས་རབ་ཡེ་ཤེས་ཀྱི་བདུད་རྩི་མྱངས་པས་ཆོས་ཐམས་ཅད་ཀྱི་གནས་ལུགས་སྟོང་པ་ཉིད་སྤྲོས་པའི་མཐའ་ཐམས་ཅད་དང་བྲལ་བ་དེ་བཞིན་ཉིད་ཀྱི་ཏིང་འཛིན་རྒྱུད་ལ་འབྱོར་པའི་མོས་པ་མཛོད། ཧྲཱིཿ འཆི་མེད་བདུད་རྩི་པཉྩ་ཨ་མྲྀ་ཏ༔ རྩ་བརྒྱད་ལན་ལག་སྟོང་སྦྱར་བདུད་རྩི་སྨན༔ འཐུངས་པས་འཚོ་བ་ཡིད་བཞིན་རྫས་མཆོག་འདི༔ མྱངས་པས་ཨཱ་ཡུ་ཚེ་ཡི་དབང་ཐོབ་ཤོག༔ ཨོཾ་ཨ་མི་དེ་ཝ་ཨཱ་ཡུ་ཥེ་པཉྩ་ཛྙཱ་ན་ཨ་བྷི་ཥིཉྩ་ཧཱུྃ༔ རབ་མཛེས་པདྨ་ཟླ་བའི་ཁྲི་སྟེང་དུ༔ ས་བོན་ཧྲཱིཿལས་མཚན་དཔེའི་འོད་ཟེར་ཅན༔ ཏིང་འཛིན་ཕྱག་རྒྱ་བདུད་རྩིའི་བུམ་པ་འཛིན༔ འགྲོ་བའི་འཆི་བདག་འཇོམས་པའི་བཀྲ་ཤིས་ཤོག །ལྔ་པ་ཚེ་མདའ་གསོར་ཅིང་རྒྱས་གདབ་པ་ནི། ཁྱེད་རང་རྣམ་པའི་ཚེ་བརྐུས་པ་ཡར་བ་གས་པ་འཁྱོགས་པ་ཞིག་པ་རལ་བ་རྣམས་དང་སྔོན་གྱི་ལས་དང་འཕྲལ་གྱི་རྐྱེན་ལས་བྱུང་བའི་ཚེ་ཐུང་བའི་མཚན་མ་ཡོད་པ་ཐམས་ཅད་རབ་ཏུ་ཞི་ནས་ཚེ་མི་ཤིགས་པ་རྡོ་རྗེ། མི་འགྱུར་བ་གཡུང་དྲུང་། མི་ནུབ་པ་རྒྱལ་མཚན་དུ་བྱས་ཏེ་འཆི་བ་མེད་པ་ཚེའི་དངོས་གྲུབ་ཐོབ་པར་གྱུར་སྙམ་པ་མཛོད། མདའ་དར་གཡབ་ཅིང་། ཧྲཱིཿ ཤར་ཕྱོགས་དྲི་ཟའི་ལག་ནས་ལྕགས་ཀྱུས་ཁུག༔ ཅེས་པ་ནས། འོད་འབར་འཆི་མེད་ཚེ་ཡི་དབང་ཐོབ་ཤོག༔ ཨོཾ་ཨ་མི་དེ་ཝ་ཨཱ་ཡུ་ཥེ་ཚེ་བྷྲཱུྃ་གཡུ་བྷྲཱུྃ་གཡུ་ཚེ་བྷྲཱུྃ་ཨཱ་ཡུར་ཛྙཱ་ན་གཡུ་ཚེ་བྷྲཱུྃ་སྭཱ་ཧཱ༔ ཞེས་སྤྱི་བོར་རྒྱ་གྲམ་དུ་བཀོད། ལོ་བརྒྱ་འཚོ་ཞིང་སོགས་ཀྱིས་བཀྲ་ཤིས་བརྗོད། དེས་རྩ་གསུམ་སྙིང་ཏིག་གི་ཡང་གསང་འཆི་མེད་མཆོག་སྒྲུབ་ཀྱི་འཆི་མེད་ཚེའི་དབང་བཞི་ལེགས་པར་གྲུབ་པ་ཡིན་པས་ཞེས་སོགས་མཚམས་སྦྱར་ལ། དམ་ཚིག་ཁས་བླང་། གཏང་རག་གི་མཎྜལ། ལུས་ལོངས་སྤྱོད་འབུལ་བ་སོགས་སྤྱི་ལྟར་བྱའོ། །དེ་ལྟར་རིག་འཛིན་ཆེན་པོ་ཚེ་དབང་བཀྲ་ཤིས་ཀྱི་ལྗགས་བསྒྲིགས་དབང་ཆོག་འཆི་བདག་གི་གཡུལ་ལས་རྒྱལ་བ་ལས་ཇི་ལྟར་འབྱུང་བ་ལྟར་རྒྱས་པར་བསྐུར་བའི་ཚུལ་ཡིན་ལ། རྐྱེན་སེལ་སོགས་ལ་བསྡུ་ན་ཡང་ཟབ་དཀོན་མཆོག་སྤྱི་འདུས་ཀྱི་ཚེ་དབང་ཇི་བཞིན་བགྱིས་པས་ཀྱང་རུང་ཞེས་གསུང་རྒྱུན་ལས་འབྱུང་ངོ་། །འདིས་ཀྱང་མཐའ་ཡས་པའི་ཡིད་ཅན་ཐམས་ཅད་འཆི་མེད་རིག་འཛིན་མཆོག་གི་གོ་འཕང་འཐོབ་པའི་རྒྱུར་གྱུར་ཅིག ། ༈

[edit]

stag lung pa'i rtsa gsum snying po'i yang bcud kyi 'chi med mchog sgrub tshe dbang zin tho/____ @#/_/rtsa gsum snying po'i yang bcud kyi 'chi med mchog sgrub tshe dbang zin tho bzhugs/__na mo gu ru a mi tA b+hA ya/__'chi med mchog sgrub kyi tshe dbang la/__dkyil 'khor mchod gtor dbang rdzas sogs bsham bkod grub nas/__las byang spyi 'gre mdor bsdus kyi gzhung bsrang /__slob ma rnams la khrus bgegs bskrad/__srung 'khor/__lo rgyus ci rigs dang /__khyad par tshe dbang 'di ni 'dam dbu ma brag dkar bstan 'dzin rdzong du rig 'dzin chen po tshe dbang bkra shis la shing rta lo dbang chen sprel zla'i yar ngo'i tshes bcur mnyam med o rgyan chen po yab yum gyis dngos su stsal ba'i byin rlabs can gyi tshe dbang zab mo bsgrub pa la zhes sogs 'brel bkod la maN+Dal phul/__/bla ma rtsa gsum lha tshogs dgongs:__bdag cag skal ldan bu rnams la:__bde gshegs rigs 'dus 'chi med lha'i:__byin rlabs dbang bskur stsal du gsol:__zhes lan gsum gyis gsol ba gdab/__oM AHhU~M:__/'chi med lha tshogs thugs rje can:__/dkyil 'khor yongs rdzogs lha rnams la:__tshe yi rig 'dzin ma thob par:__bdag sogs gus pas skyabs su mchi:__zhes lan gsum gyis skyabs 'gro dang /__bdag gzhan 'chi med thob bya'i phyir:__tshe yi lha tshogs bsgrubs nas ni:__gang la gang 'dul phrin las kyis:__'gro don byed par sems bskyed do:__zhes lan gsum gyis sems bskyed/__las chus gtor zhing /__oM pad+mAn+ta kr-i ta phaT kyis bsang /__swa b+hA bas sbyang /__stong pa nyid du gyur/__stong pa'i ngang las gnas khang rin po che'i gzhal yas khang tshad dang mtshan nyid thams cad yongs su rdzogs pa'i dbus su seng ges btegs pa'i rin po che'i khrir/__pa~M las pad+ma dang a las zla ba'i dkyil 'khor gyi steng du khyed rang gi sems nyid yi ge hrIHdmar po yongs su gyur pa las skad cig gis bcom ldan 'das mgon po tshe dpag tu med pa sku mdog dmar po chos gos ngur smrig rnam gsum gsol ba/__zhabs rdo rje'i skyil krung can/__phyag mnyam gzhag mdzad pa'i steng na 'chi med tshe dang ye shes kyi bdud rtsis gang ba'i bum pa bsnams pa'i sku mtshan dpe gsal rdzogs 'od zer 'phro ba'i rang bzhin gsal btab pa'i dpral bar oM/__mgrin par AH__thugs kar hU~M/__de las 'od 'phros bde ba can/__po Ta la/__rnga yab dpal ri sogs nas mgon po tshe dpag tu med pa'i lha tshogs rtsa gsum rgyal ba rab 'byams kyis bskor ba nyi zer gyi rdul 'khrugs pa ltar spyan drangs te khyed rang rnams la sib sib thim par gyur snyam pa'i mos pa mdzod/__ngo bo chos sku'i sogs dang /__gang ltar yang /__sngags mthar dz+nyA na A be sha ya a AHzhes spos rol dang bcas byin dbab/__tiSh+Tha badz+ras brtan par bya/__des dbang gi sngon 'gro grub nas/__dngos gzhi'i dbang bskur ba la lnga las/__dang po bum dbang gi slad du mdun bskyed kyi bum pa gzhal yas khang mtshan nyid dang ldan pa'i nang du bum bcud lha'i rang bzhin du gsal bas dbang bskur ba ni/__hrIH__phyi ni bum pa nang ni bdud rtsis gang :__gsang ba'i don du pad+ma tshe dpag med:__gnas lngar phyag mtshan lnga dang rigs lngas mtshan:__'od zer dpag yas nam mkha' gang bar spros:__'khor 'das snang srid snod bcud ma lus pa'i:__tshe bsod dpal 'byor yon tan kun bsdus te:__gzhir gnas phyag gi bum pa'i nang du zhugs:__gnas lnga'i phyag mtshan lnga yi 'od zer ni:__khyed rang lhar gsal dpral mgrin snying lter thim:__bum gsang shes rab bzhi pa ye shes kyi:__dbang thob dug lnga'i bag chags dbyings dag nas:__rnam snang 'od dpag mi bskyod rin chen 'byung :__don grub lha dang rang bzhin ye shes lnga'i:__byin rlabs sa bon rgyud la bzhag par gyur:__oM AHhU~M badz+ra gu ru pad+ma de wa DA ki ni sarba sid+d+hi pha la hU~M:__oM a mi de wa A yu She sarba dz+nyA na sid+d+hi pha la kA ya wA ka tsit+ta gu Na karma a b+hi Shiny+tsa oM AHb+h+rU~M trA~M hrIHAH__zhes dbang bskur bum chu blud/__'jig rten 'dren pa'i gtso bo tshe dpag med sogs kyis shis pa brjod/__gnyis pa tshe 'brang gi dbang ni/__mdun bskyed kyi phyag gi bum pa 'khor 'das snod bcud kyi dwangs ma yon tan gyis gtams pa'i khar bla ma tshe dpag med longs spyod rdzogs sku'i rgyan can de'i dbu gtsug na rig 'dzin brgyud pa'i bla ma rnams tho brtsegs su bzhugs pa la mos gus dung dung ba zhig byas pas khyed rang rnam pa'i spyi bor byon/__lus ngag yid gsum gyi 'gal rkyen bsal/__sku gsung thugs kyi byin rlabs dang dngos grub thams cad char ltar phab cing rgyud la bzhag__/mthar bla ma rnams yas mar thim/__bum pa'i chu dang dbyer med du 'dres/__khyed rang gi tshangs bug nas zhugs/__lus kyi nang thams cad gang /__yongs rdzogs dbang chen dam pa thob par gyur snyam pa mdzod/__hrIH__bcom ldan tshe dpag med mgon gyi:__sku yi tshe dbang 'di la stsol:__mi zad rgyan gyi 'khor lo'i sku'i:__go 'phang dam pa mngon gyur cig:__kA ya sid+d+hi oM:__de bzhin du gsung /__thugs/__ye shes dang /__sngags wAka__/tsit+ta/__dz+nyA na sid+d+hi ho:__zhes 'don pa bsgyur te gnas rnams su bskur/__hrIH__chos dbyings ngang las rang byung rang shar ba'i:__'gro ba'i 'chi bdag 'joms mdzad bcom ldan 'das:__rgyal ba kun gyi gsung gi dbang phyug lha:__bcom ldan tshe dpag med pa'i bkra shis shog:__ces me tog 'thor/__gsum pa thabs bde ba chen po dam rdzas mchog gi ril bu byin pas snang ba lha'i rol pa dang /__sgra grags sngags kyi rang bzhin du sgrogs pa'i mos pa mdzod/__hrIH_rdo rje bcud ldan 'chi med thabs kyi rdzas:__'dod yon mi zad 'od zer rnam lnga 'khrugs:__res myong rdo rje'i sku 'grub rdzas mchog 'di:__myangs pas 'chi med tshe yi dbang thob shog:__oM a mi de wa AHyur dz+nyA na sarba sid+d+hi pha la hoH__khyed sku pad+ma rA ga'i lhun po la/__/nyin byed 'od zer 'bum gyis 'khyud pa bzhin/__/mtshan dpe'i gzi byin kun nas lhang nge ba/__/bcom ldan tshe dpag med pa'i bkra shis shog__/bzhi pa shes rab ye shes kyi bdud rtsi myangs pas chos thams cad kyi gnas lugs stong pa nyid spros pa'i mtha' thams cad dang bral ba de bzhin nyid kyi ting 'dzin rgyud la 'byor pa'i mos pa mdzod/__hrIH__'chi med bdud rtsi pany+tsa a mr-i ta:__rtsa brgyad lan lag stong sbyar bdud rtsi sman:__'thungs pas 'tsho ba yid bzhin rdzas mchog 'di:__myangs pas A yu tshe yi dbang thob shog:__oM a mi de wa A yu She pany+tsa dz+nyA na a b+hi Shiny+tsa hU~M:__rab mdzes pad+ma zla ba'i khri steng du:__sa bon hrIHlas mtshan dpe'i 'od zer can:__ting 'dzin phyag rgya bdud rtsi'i bum pa 'dzin:__'gro ba'i 'chi bdag 'joms pa'i bkra shis shog__/lnga pa tshe mda' gsor cing rgyas gdab pa ni/__khyed rang rnam pa'i tshe brkus pa yar ba gas pa 'khyogs pa zhig pa ral ba rnams dang sngon gyi las dang 'phral gyi rkyen las byung ba'i tshe thung ba'i mtshan ma yod pa thams cad rab tu zhi nas tshe mi shigs pa rdo rje/__mi 'gyur ba g.yung drung /__mi nub pa rgyal mtshan du byas te 'chi ba med pa tshe'i dngos grub thob par gyur snyam pa mdzod/__mda' dar g.yab cing /__hrIH__shar phyogs dri za'i lag nas lcags kyus khug:__ces pa nas/__'od 'bar 'chi med tshe yi dbang thob shog:__oM a mi de wa A yu She tshe b+h+rU~M g.yu b+h+rU~M g.yu tshe b+h+rU~M A yur dz+nyA na g.yu tshe b+h+rU~M swA hA:__zhes spyi bor rgya gram du bkod/__lo brgya 'tsho zhing sogs kyis bkra shis brjod/__des rtsa gsum snying tig gi yang gsang 'chi med mchog sgrub kyi 'chi med tshe'i dbang bzhi legs par grub pa yin pas zhes sogs mtshams sbyar la/__dam tshig khas blang /__gtang rag gi maN+Dal/__lus longs spyod 'bul ba sogs spyi ltar bya'o/__/de ltar rig 'dzin chen po tshe dbang bkra shis kyi ljags bsgrigs dbang chog 'chi bdag gi g.yul las rgyal ba las ji ltar 'byung ba ltar rgyas par bskur ba'i tshul yin la/__rkyen sel sogs la bsdu na yang zab dkon mchog spyi 'dus kyi tshe dbang ji bzhin bgyis pas kyang rung zhes gsung rgyun las 'byung ngo /_/'dis kyang mtha' yas pa'i yid can thams cad 'chi med rig 'dzin mchog gi go 'phang 'thob pa'i rgyur gyur cig___/__!