JKW-KABUM-12-NA-011

Previous Section Back to Volume PageNext Section

ཐུགས་རྗེ་ཆེན་པོ་ཡང་སྙིང་འདུས་པའི་སྒྲུབ་ཐབས་རྒྱུན་ཁྱེར་མདོར་བསྡུས་པའི་རིམ་པ།

Wylie title	thugs rje chen po yang snying 'dus pa'i sgrub thabs rgyun khyer mdor bsdus pa'i rim pa
Location	mkhyen brtse'i bka' 'bum Volume 12, sde tshan 11, Pages 451-455 (Folios 1a to 3a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	གུ་རུ་ཆོས་ཀྱི་དབང་ཕྱུག་ (Gu ru chos kyi dbang phyug)
Citation	'jam dbyangs mkhyen brtse'i dbang po. thugs rje chen po yang snying 'dus pa'i sgrub thabs rgyun khyer mdor bsdus pa'i rim pa. In 'jam dbyangs mkhyen brtse'i dbang po'i bka' 'bum, Vol. 12: 451-455. Khams sde dge rdzong sar dgon: Rdzong sar blo gros phun tshogs, 2020.
Genre	Daily Practice - rgyun khyer  ·  Revelations - gter ma
Cycle	ཐུགས་རྗེ་ཆེན་པོ་ཡང་སྙིང་འདུས་པ་ (thugs rje chen po yang snying 'dus pa)
Deity	thugs rje chen po
RTZ	In the Rinchen Terdzö: https://rtz.tsadra.org/index.php/Terdzo-ZA-003
Colophon	།ཞེས་པའང་གཏེར་གཞུང་རྩ་བའི་དགོངས་དོན་ཉུང་གསལ་སྙིང་པོར་དྲིལ་བའི་ཚུལ་གྱིས་བྱ་བྲལ་མ་ཎི་བ་འཇམ་དབྱངས་མཁྱེན་བརྩེའི་དབང་པོས་བྲིས་པ་སྟེ། དགེ་བས་མཐའ་ཡས་པའི་སེམས་ཅན་ཐམས་ཅད་ཐུགས་རྗེ་ཆེན་པོའི་གོ་འཕང་མྱུར་དུ་ཐོབ་པའི་རྒྱུར་གྱུར་ཅིག །མངྒ་ལཾ།།
	zhes pa'ang gter gzhung rtsa ba'i dgongs don nyung gsal snying por dril ba'i tshul gyis bya bral ma Ni ba 'jam dbyangs mkhyen brtse'i dbang pos bris pa ste/__dge bas mtha' yas pa'i sems can thams cad thugs rje chen po'i go 'phang myur du thob pa'i rgyur gyur cig__/mang+ga laM//

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །ཐུགས་རྗེ་ཆེན་པོ་ཡང་སྙིང་འདུས་པའི་སྒྲུབ་ཐབས་རྒྱུན་ཁྱེར་མདོར་བསྡུས་པའི་རིམ་པ་བཞུགས་སོ། །

ན་མོ་གུ་རུ་ལོ་ཀེ་ཤྭ་རཱ་ཡ། གཏེར་སྟོན་གྲུབ་ཐོབ་ཐམས་ཅད་ཀྱི་རྒྱལ་པོ་གུ་རུ་ཆོས་ཀྱི་དབང་ཕྱུག་གི་ཟབ་གཏེར་དམ་ཆོས་འདུས་པ་སྐོར་དགུའི་ཡ་གྱལ། འཕགས་པ་ཐུགས་རྗེ་ཆེན་པོ་ཡང་སྙིང་འདུས་པའི་རྒྱུན་ཁྱེར་ཉམས་ལེན་མདོར་བསྡུས་ཏེ་ཉམས་སུ་བླང་བར་འདོད་པས། སྐྱབས་སེམས་ཚད་མེད་བཞི་བསྒོམ་པ་སྔོན་དུ་འགྲོ་བས། ཨོཾ༔ ཡེ་ནས་མ་སྐྱེས་སྟོང་གསལ་ངང་༔ ཀུན་སྣང་བྱང་ཆུབ་སེམས་སྤྲིན་ལས༔ རང་བྱུང་རིག་པ་ཧྲཱིཿདཀར་གསལ༔ ཧྲཱིཿལས་བྷྲཱུྃ་འཕྲོས་གཞལ་ཡས་ཁང་༔ དལ་དབུས་པདྨའི་སྙིང་པོ་ཟླུམ༔ འདབ་དྲུག་མུ་ཁྱུད་པད་སྟོང་མཛེས༔ གྲུ་ཆད་བར་ཁྱམས་སྒོ་ཁྱུད་རྫོགསཿ མཉམ་ཡངས་འོད་ཀྱི་ཁང་པར་གསལ༔ དལ་དབུས་རང་རིག་ཧྲཱིཿའོད་འབར༔ རྣམ་སྨིན་ལུས་བསྲེགས་ཧྲཱིཿདེ་ཉིད༔ ཉི་ཟླ་པད་སྟེང་ཐུགས་རྗེ་ཆེ༔ ཞལ་གཅིག་ཕྱག་གཉིས་སྐུ་མདོག་དམར༔ ཕྱག་གཡས་པད་ཕྲེང་ཐུགས་ཀར་འཛིན༔ ཕྱག་གཡོན་པད་སྟེང་བདུད་རྩི་བུམ༔ རིན་ཆེན་རྒྱན་རྫོགས་སྐྱིལ་ཀྲུང་བཞུགས༔ རང་འདྲའི་ཡུམ་མཆོག་གསང་ཡེ་མ༔ ལུས་དང་གྲིབ་མའི་ཚུལ་དུ་འཁྲིལ༔ འཇའ་རིས་འོད་ལྔའི་རྒྱལ་ཡོལ་མཛེས༔ སྤྱི་གཙུག་རིགས་བདག་འོད་དཔག་མེད༔ ཐུགས་ཀར་རྟ་མགྲིན་ཡེ་ཤེས་སེམས༔ རིགས་འདུས་རང་ལས་སྤྲུལ་པའི་འཁོར༔ ནོར་འཛིན་སྲས་མཆོག་གཡས་ནས་འདུད༔ གསང་སྔགས་འཛིན་མ་གཡོན་ནས་འདུད༔ འདབ་དྲུག་བཅོམ་ལྡན་ཐུབ་དྲུག་དང་༔ ཕྱི་རིམ་སངས་རྒྱས་སྟོང་རྩ་གཉིས༔ སྒོ་བཞིར་ཁྲག་འཐུང་རིགས་བཞི་སོགས༔ བླ་མ་རིག་འཛིན་མཁའ་འགྲོའི་སྤྲིན༔ ཐུགས་རྗེ་ཆེན་པོའི་དཀྱིལ་འཁོར་དུཿ འགྲོ་བ་དྲངས་ཤིང་བསྒྲལ་སླད་དུ༔ དུག་ལྔའི་ཚུལ་གྱིས་དུག་ལྔ་འཇོམས༔ སརྦ་ཛྙཱ་ན་མཎྜལ་ཧཱུྃ་བྷྲཱུྃ༔ ཞེས་པས་དམ་ཚིག་གི་དཀྱིལ་འཁོར་གསལ་བཏབ་ལ། ཧྲཱི༔ ཡེ་ནས་རང་བྱུང་ཐུགས་རྗེ་ཆེ༔ དུས་གསུམ་རྒྱལ་བའི་སྐུ་གསུང་ཐུགས༔ ཡེ་ཤེས་ལྔ་བདག་ཅོད་པན་འཆང་༔ འབྲུ་བརྒྱད་གསལ་བསྒོམ་རང་དབང་ཐོབ༔ ཨོཾ་ཨཱཿཧཱུྃ༔ ཨོཾ་ཨཱཿཧཱུྃ་སྭཱ་ཧཱས་རྒྱས་གདབ་ཅིང་དབང་བསྐུར། དྷཱིཿ ཚུར་གཤེགས་ཚུར་གཤེགས་བཅོམ་ལྡན་འདས༔ བདེ་ཆེན་ཆོས་དབྱིངས་ངང་ཉིད་ལས༔ རྩོལ་བྲལ་མཚན་བཅས་མི་དམིགས་ཀྱང་༔ ཐུགས་རྗེའི་ཉི་གསལ་འོད་བཞིན་དུ༔ འཁོར་འདས་མཉམ་སྦྱོང་ཐུགས་རྗེའི་བདག༔ རིགས་བདག་གཙོ་འཁོར་སྤྲུལ་པའི་ཚུལ༔ དཀྱིལ་འཁོར་ཕྱག་རྒྱར་སྐུར་བཞེངས་ལ༔ དམ་ཚིག་དཀྱིལ་འཁོར་བདག་ལ་དགོངས༔ ཨོཾ་མ་ཎི་པདྨེ་ཧཱུྃ་ཧྲཱིཿསརྦ་ཏ་ཐཱ་ག་ཏ་མ་ཧཱ་ཀཱ་རུ་ཎི་ཀ་མཎྜ་ལ་ས་པ་རི་ཝཱ་ར་ཨེ་ཧྱེ་ཧི་ས་མ་ཡ་ཛཿ ཛཿཧཱུྃ་བྃ་ཧོཿ ཞེས་པས་སྤྱན་དྲང་། ཀཱ་ཡ་ཝཱ་ཀ་ཙིཏྟ་ཏིཥྛ་ས་མ་ཡས། དམ་ཚིག་པ་དང་དབྱེར་མེད་དུ་བཞུགས་པར་མོས། ན་མོ་པུ་རུ་ཤ་ཡ་ཧོཿ ཨ་ཏི་པཱུ་ཧོཿ པྲ་ཏཱིཙྪ་ཧོཿས་ཕྱག་བྱ། ཧྲཱིཿ ཀུན་འབྱུང་ནམ་མཁའི་ཀློང་ཡངས་ནས༔ བདུག་སྤོས་མེ་ཏོག་མར་མེ་དྲི༔ བཤོས་གཙང་སིལ་སྙན་རོལ་མོ་དང་༔ གཟུགས་སྒྲ་དྲི་རོ་རེག་བྱ་ཆོས༔ རང་བྱུང་རྣམ་དག་བདུད་རྩི་དང་༔ འཛིན་ཆགས་བྲལ་བའི་གཏོར་མ་དང་༔ རིགས་དྲུག་བསྒྲལ་བའི་རཀྟ་དང་༔ གཉིས་མེད་སྦྱོར་བའི་བྱང་ཆུབ་སེམས༔ ཀུན་བཟང་མཆོད་སྤྲིན་མཆོག་ཏུ་རོལ༔ ཨོཾ་མ་ཎི་པདྨེ་ཧཱུྃ་ཧྲཱིཿ ཨོཾ་ན་མསྶརྦ་ཏ་ཐཱ་ག་ཏ་མ་ཧཱ་ཀཱ་རུ་ཎི་ཀ་གུ་ཧྱ་ཛྙཱ་ན་སརྦ་ཡོ་གི་ནཱི་བཛྲ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་བིདྱཱ་ཤཔྡ་པཉྩ་ཀཱ་མ་གུ་ཎ་མ་ཧཱ་ཨ་མྲྀ་ཏ་རཀྟ་བྷ་ལིཾ་ཏ་ཏ་ན་ག་ཎ་དྷ་རྨ་དྷཱ་ཏུ་སརྦ་པཱུ་ཛ་ཧོཿ ཞེས་མཆོད་ཅིང་བསྟོད་པ་ནི། ཧྲཱིཿ བདེ་གཤེགས་རྒྱལ་བ་འདུས་པའི་སྐུ༔ ཐུགས་རྗེ་ཆེན་པོ་སྤྱན་རས་གཟིགས༔ ཡེ་ནས་རང་བྱུང་ཐུགས་རྗེའི་སྐུ༔ འཇིག་རྟེན་མགོན་ལ་ཕྱག་འཚལ་བསྟོད༔ རིགས་འདུས་རང་ལས་སྤྲུལ་འཁོར་རྣམས༔ འགྲོ་འདུལ་ཕྲིན་ལས་ཅིར་ཡང་སྟོན༔ སྐུ་གསུང་ཐུགས་ཡོན་ཕྲིན་ལས་བདག༔ བདུད་བཞི་འཇོམས་ལ་ཕྱག་འཚལ་བསྟོད༔ བཟླས་པ་ནི། ཧྲཱིཿ ལྷ་གསུམ་ཐུགས་ཀར་ཟླ་བའི་སྟེང་༔ ཧྲཱི༔མཐར་ཡི་གེ་དྲུག་མས་བསྐོར༔ བདག་ཉིད་རྩ་བའི་ཐུགས་ཀ་ནས༔ སྔགས་ཕྲེང་འོད་ཟེར་དཀར་པོ་འཕྲོས༔ བདེ་གཤེགས་ཀུན་གྱི་སྐུ་ལ་ཕོག༔ སྐུ་མཆོད་མཉེས་ནས་དངོས་གྲུབ་ཐོབ༔ བདག་ལ་འདུས་ཤིང་འོད་ཟེར་དེས༔ ཁམས་གསུམ་སེམས་ཅན་ལུས་སྒྲིབ་སྦྱངས༔ སེམས་ཅན་ལུས་ཀུན་དབང་དུ་གྱུར༔ ཨོཾ་མ་ཎི་པདྨེ་ཧཱུྃ་ཧྲཱིཿ ཞེས་བཟླ་ཞིང་། དེ་བཞིན་ཏུ། སྤྱི་གཙུག་སྣང་མཐའི་ཐུགས་ཀ་ནས༔ སྔགས་ཕྲེང་འོད་ཟེར་དམར་པོ་འཕྲོས༔ བདེ་གཤེགས་ཀུན་གྱི་གསུང་ལ་ཕོག༔ གསུང་མཉེས་གསུང་གི་དངོས་གྲུབ་ཐོབ༔ ཁམས་གསུམ་སེམས་ཅན་ངག་སྒྲིབ་སྦྱངས༔ སེམས་ཅན་ངག་ཀུན་དབང་དུ་གྱུར༔ ཅེས་དང་། རྟ་མགྲིན་ཐུགས་ཀའི་སྔགས་ཕྲེང་ལས༔ འོད་ཟེར་མཐིང་ག་རབ་འཕྲོས་པས༔ བདེ་གཤེགས་ཀུན་གྱི་ཐུགས་ལ་ཕོག༔ ཐུགས་མཆོད་མཉེས་ནས་དངོས་གྲུབ་ཐོབ༔ ཁམས་གསུམ་སེམས་ཅན་ཡིད་སྒྲིབ་སྦྱངས༔ སེམས་ཅན་ཀུན་ཡིད་དབང་དུ་གྱུར༔ ཅེས་སོ་སོར་བཟླས་པ་ཅི་ནུས་དང་། སྐབས་སུ་ལྷ་སྔགས་ཀྱིས་མཆོད་པའི་སྤྲོས་པ་ཐམས་ཅད་རིག་སྟོང་གཉུག་མའི་རང་བཞིན་དུ་ཤེས་པར་བྱས་ལ། དེའི་ངང་ནས་བཟླས་པ་ཆུ་བོའི་རྒྱུན་བཞིན་དུ་བརྩོན། ཐུན་མཐར་མཆོད་ཅིང་བསྟོད་ལ། དགེ་བ་འདི་ཡིས་མྱུར་དུ་བདག །ཐུགས་རྗེ་ཆེན་པོ་འགྲུབ་གྱུར་ནས། །ཞེས་སོགས་བསྔོ་སྨོན་ཤིས་བརྗོད་ཇི་ལྟར་རིགས་པར་བྱའོ། །ཞེས་པའང་གཏེར་གཞུང་རྩ་བའི་དགོངས་དོན་ཉུང་གསལ་སྙིང་པོར་དྲིལ་བའི་ཚུལ་གྱིས་བྱ་བྲལ་མ་ཎི་བ་འཇམ་དབྱངས་མཁྱེན་བརྩེའི་དབང་པོས་བྲིས་པ་སྟེ། དགེ་བས་མཐའ་ཡས་པའི་སེམས་ཅན་ཐམས་ཅད་ཐུགས་རྗེ་ཆེན་པོའི་གོ་འཕང་མྱུར་དུ་ཐོབ་པའི་རྒྱུར་གྱུར་ཅིག །མངྒ་ལཾ།།

[edit]

thugs rje chen po yang snying 'dus pa'i sgrub thabs rgyun khyer mdor bsdus pa'i rim pa/ @#/__/thugs rje chen po yang snying 'dus pa'i sgrub thabs rgyun khyer mdor bsdus pa'i rim pa bzhugs so/__/ na mo gu ru lo ke shwa rA ya/__gter ston grub thob thams cad kyi rgyal po gu ru chos kyi dbang phyug gi zab gter dam chos 'dus pa skor dgu'i ya gyal/__'phags pa thugs rje chen po yang snying 'dus pa'i rgyun khyer nyams len mdor bsdus te nyams su blang bar 'dod pas/__skyabs sems tshad med bzhi bsgom pa sngon du 'gro bas/__oM:__ye nas ma skyes stong gsal ngang :__kun snang byang chub sems sprin las:__rang byung rig pa hrIHdkar gsal:__hrIHlas b+h+rU~M 'phros gzhal yas khang :__dal dbus pad+ma'i snying po zlum:__'dab drug mu khyud pad stong mdzes:__gru chad bar khyams sgo khyud rdzogasaH__mnyam yangs 'od kyi khang par gsal:__dal dbus rang rig hrIH'od 'bar:__rnam smin lus bsregs hrIHde nyid:__nyi zla pad steng thugs rje che:__zhal gcig phyag gnyis sku mdog dmar:__phyag g.yas pad phreng thugs kar 'dzin:__phyag g.yon pad steng bdud rtsi bum:__rin chen rgyan rdzogs skyil krung bzhugs:__rang 'dra'i yum mchog gsang ye ma:__lus dang grib ma'i tshul du 'khril:__'ja' ris 'od lnga'i rgyal yol mdzes:__spyi gtsug rigs bdag 'od dpag med:__thugs kar rta mgrin ye shes sems:__rigs 'dus rang las sprul pa'i 'khor:__nor 'dzin sras mchog g.yas nas 'dud:__gsang sngags 'dzin ma g.yon nas 'dud:__'dab drug bcom ldan thub drug dang :__phyi rim sangs rgyas stong rtsa gnyis:__sgo bzhir khrag 'thung rigs bzhi sogs:__bla ma rig 'dzin mkha' 'gro'i sprin:__thugs rje chen po'i dkyil 'khor duH__'gro ba drangs shing bsgral slad du:__dug lnga'i tshul gyis dug lnga 'joms:__sarba dz+nyA na maN+Dal hU~M b+h+rU~M:__zhes pas dam tshig gi dkyil 'khor gsal btab la/__hrI:__ye nas rang byung thugs rje che:__dus gsum rgyal ba'i sku gsung thugs:__ye shes lnga bdag cod pan 'chang :__'bru brgyad gsal bsgom rang dbang thob:__oM AHhU~M:__oM AHhU~M swA hAs rgyas gdab cing dbang bskur/__d+hIH__tshur gshegs tshur gshegs bcom ldan 'das:__bde chen chos dbyings ngang nyid las:__rtsol bral mtshan bcas mi dmigs kyang :__thugs rje'i nyi gsal 'od bzhin du:__'khor 'das mnyam sbyong thugs rje'i bdag:__rigs bdag gtso 'khor sprul pa'i tshul:__dkyil 'khor phyag rgyar skur bzhengs la:__dam tshig dkyil 'khor bdag la dgongs:__oM ma Ni pad+me hU~M hrIHsarba ta thA ga ta ma hA kA ru Ni ka maN+Da la sa pa ri wA ra e h+ye hi sa ma ya dzaH__dzaHhU~M ba~M hoH__zhes pas spyan drang /__kA ya wA ka tsit+ta tiSh+Tha sa ma yas/__dam tshig pa dang dbyer med du bzhugs par mos/__na mo pu ru sha ya hoH__a ti pU hoH__pra tIts+tsha hoHsa phyag bya/__hrIH__kun 'byung nam mkha'i klong yangs nas:__bdug spos me tog mar me dri:__bshos gtsang sil snyan rol mo dang :__gzugs sgra dri ro reg bya chos:__rang byung rnam dag bdud rtsi dang :__'dzin chags bral ba'i gtor ma dang :__rigs drug bsgral ba'i rak+ta dang :__gnyis med sbyor ba'i byang chub sems:__kun bzang mchod sprin mchog tu rol:__oM ma Ni pad+me hU~M hrIH__oM na mas+sarba ta thA ga ta ma hA kA ru Ni ka gu h+ya dz+nyA na sarba yo gi nI badz+ra puSh+pe d+hU pe A lo ke gan+d+he nai bid+yA shap+da pany+tsa kA ma gu Na ma hA a mr-i ta rak+ta b+ha liM ta ta na ga Na d+ha rma d+hA tu sarba pU dza hoH__zhes mchod cing bstod pa ni/__hrIH__bde gshegs rgyal ba 'dus pa'i sku:__thugs rje chen po spyan ras gzigs:__ye nas rang byung thugs rje'i sku:__'jig rten mgon la phyag 'tshal bstod:__rigs 'dus rang las sprul 'khor rnams:__'gro 'dul phrin las cir yang ston:__sku gsung thugs yon phrin las bdag:__bdud bzhi 'joms la phyag 'tshal bstod:__bzlas pa ni/__hrIH__lha gsum thugs kar zla ba'i steng :__hrI:mthar yi ge drug mas bskor:__bdag nyid rtsa ba'i thugs ka nas:__sngags phreng 'od zer dkar po 'phros:__bde gshegs kun gyi sku la phog:__sku mchod mnyes nas dngos grub thob:__bdag la 'dus shing 'od zer des:__khams gsum sems can lus sgrib sbyangs:__sems can lus kun dbang du gyur:__oM ma Ni pad+me hU~M hrIH__zhes bzla zhing /__de bzhin tu/__spyi gtsug snang mtha'i thugs ka nas:__sngags phreng 'od zer dmar po 'phros:__bde gshegs kun gyi gsung la phog:__gsung mnyes gsung gi dngos grub thob:__khams gsum sems can ngag sgrib sbyangs:__sems can ngag kun dbang du gyur:__ces dang /__rta mgrin thugs ka'i sngags phreng las:__'od zer mthing ga rab 'phros pas:__bde gshegs kun gyi thugs la phog:__thugs mchod mnyes nas dngos grub thob:__khams gsum sems can yid sgrib sbyangs:__sems can kun yid dbang du gyur:__ces so sor bzlas pa ci nus dang /__skabs su lha sngags kyis mchod pa'i spros pa thams cad rig stong gnyug ma'i rang bzhin du shes par byas la/__de'i ngang nas bzlas pa chu bo'i rgyun bzhin du brtson/__thun mthar mchod cing bstod la/__dge ba 'di yis myur du bdag__/thugs rje chen po 'grub gyur nas/__/zhes sogs bsngo smon shis brjod ji ltar rigs par bya'o/__/zhes pa'ang gter gzhung rtsa ba'i dgongs don nyung gsal snying por dril ba'i tshul gyis bya bral ma Ni ba 'jam dbyangs mkhyen brtse'i dbang pos bris pa ste/__dge bas mtha' yas pa'i sems can thams cad thugs rje chen po'i go 'phang myur du thob pa'i rgyur gyur cig__/mang+ga laM//