སེང་གདོང་བཀའ་བཅུའི་མངོན་རྟོགས་རྗེས་གནང་གི་ཐོ་ཡིག་ཕྲིན་ལས་སྙིང་པོ།

🚧 This website is under continued development. We appreciate your patience!

Previous Text Back to Volume PageLast text in section.

Wylie title	seng gdong bka' bcu'i mngon rtogs rjes gnang gi tho yig phrin las snying po
Location	mkhyen brtse'i bka' 'bum Volume 12, sde tshan 2, Text 4, Pages 326-346 (Folios 88b6 to 98a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. seng gdong bka' bcu'i mngon rtogs rjes gnang gi tho yig phrin las snying po. In 'jam dbyangs mkhyen brtse'i dbang po'i bka' 'bum, Vol. 12: 326-346. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris  ·  Permission to Invoke (anujñā) - rjes gnang  ·  Sadhanas - Evocation Ritual - sgrub thabs
Cycle	ཟབ་གསང་སེང་གདོང་སྙན་བརྒྱུད་ (zab gsang seng gdong snyan brgyud)
Deity	seng gdong ma
Colophon	།ཅེས་པའང་བྱ་བྲལ་སྤོང་བ་པ་འཇམ་དབྱངས་མཁྱེན་བརྩེའི་དབང་པོས་ཡིག་ཆ་སྔ་མའི་དོན་གྱི་བཅུད་ཕྱུངས་ཏེ་བྲིས་པའི་ལེགས་བྱས་ཀྱིས་ཚུལ་འདིའི་བཀའ་སྲོལ་མི་ནུབ་པར་དར་ཞིང་རྒྱས་པའི་རྒྱུར་སིདྡྷི་རསྟུ།།
	ces pa'ang bya bral spong ba pa 'jam dbyangs mkhyen brtse'i dbang pos yig cha snga ma'i don gyi bcud phyungs te bris pa'i legs byas kyis tshul 'di'i bka' srol mi nub par dar zhing rgyas pa'i rgyur sid+d+hi rastu

1 Texts in this Section (sde tshan or chos tshan)

4 326-346	སེང་གདོང་བཀའ་བཅུའི་མངོན་རྟོགས་རྗེས་གནང་གི་ཐོ་ཡིག་ཕྲིན་ལས་སྙིང་པོ། seng gdong bka' bcu'i mngon rtogs rjes gnang gi tho yig phrin las snying po Notes - zin bris   ·   Permission to Invoke (anujñā) - rjes gnang   ·   Sadhanas - Evocation Ritual - sgrub thabs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

ཟབ་གསང་སེང་གདོང་སྙན་བརྒྱུད་ཀྱི་སྒྲུབ་ཐབས་བཀའ་བཅུའི་མངོན་རྟོགས་རྗེས་གནང་གི་ཐོ་ཡིག་ཕྲིན་ལས་སྙིང་པོ་ཞེས་བྱ་བ་བཞུགས་སོ། །ན་མོ་གུ་རུ་སིཾ་ཧ་མུ་ཁ་དེ་བ་ག་ཎེ་བྷྱཿ རྣམ་ཀུན་མཆོག་ལྡན་ཤེས་རབ་དབྱིངས་ཀྱི་ཡུམ། །སྙིང་རྗེ་ཁྲོས་པའི་གར་མཛད་སེང་གེའི་གདོང་། །གཙོ་འཁོར་སྤྲུལ་པའི་ཚོགས་ལ་གུས་བཏུད་ནས། །མངོན་པར་རྟོགས་པ་ཕྲིན་ལས་སྙིང་པོ་དབྱེ། །དེ་ལ་གྲུབ་པའི་དབང་ཕྱུག་ཆེན་པོ་སངས་རྒྱས་མགོན་པོ་ནས་རིམ་པར་བརྒྱུད་པའི་ཟབ་གསང་སེང་གདོང་སྙན་བརྒྱུད་ཅེས་གྲགས་པ་ལ། སྒྲུབ་ཐབས་ལས་ཚོགས་མན་ངག་དང་བཅས་པའི་བཀའ་སྲོལ་བསམ་གྱིས་མི་ཁྱབ་པར་བཞུགས་པ་ལས། འདིར་ད་ལྟའི་བར་རྗེས་གནང་བཀའ་མ་ཆད་པར་བྱོན་པའི་སྒྲུབ་ཐབས་ཀྱི་མངོན་རྟོགས་སྙིང་པོར་དྲིལ་བ་ལ། དང་པོ་ཕྱི་སྒྲུབ་རྡོ་རྗེ་མཁའ་འགྲོ་སེང་གདོང་མ་གཙོ་རྐྱང་གི་མངོན་རྟོགས་ནི། སྐྱབས་འགྲོ། སེམས་བསྐྱེད། ཚད་མེད་བཞི་བསྒོམ་པ་རྒྱས་བསྡུས་གང་རུང་སྔོན་དུ་འགྲོ་བས། སྤྲོ་ན་ཀུན་བཟང་བླ་མའི་རྣལ་འབྱོར་ནི། རང་གི་སྤྱི་བོར་པད་ཟླའི་གདན་ལ་བླ་མ་ཀུན་བཟང་ཧེ་རུ་ཀ་ཡབ་ཡུམ་སྐུ་མདོག་དཀར་པོ། ཞལ་གཅིག་ཕྱག་གཉིས་སྐྱིལ་ཀྲུང་ཏིང་ངེ་འཛིན་གྱི་ཕྱག་རྒྱ་ཅན། ཟུང་འཇུག་བདེ་བ་ཆེན་པོའི་རང་བཞིན་དུ་བཞུགས་པའི་ཡབ་ཡུམ་གཉིས་ཀྱི་ཐུགས་ཀར་ཧཱུྃ་ཡིག་དཀར་པོ་རེ་རེ། དེ་ལས་བདུད་རྩིའི་རྒྱུན་དཔག་ཏུ་མེད་པ་བབས་པས་སྐུ་ལུས་ཐམས་ཅད་ལྟེམས་ཀྱིས་ཁེངས། བླ་མ་ཀུན་བཟང་ཧེ་རུ་ཀ་ཡབ་ཡུམ་གྱིས་བདག་གི་ནད་གདོན་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་བྱིན་གྱིས་རླབ་ཏུ་གསོལ། ཞེས་གསོལ་བ་བཏབ་པས། བླ་མ་ཡབ་ཡུམ་གྱི་སྦྱོར་མཚམས་ནས་བདུད་རྩི་དང་ཧཱུྃ་ཡིག་དཀར་པོའི་རྒྱུན་དཔག་ཏུ་མེད་པ་བབས། བདག་གི་ཚངས་བུག་ནས་ཞུགས་ནད་གདོན་སྡིག་སྒྲིབ་ཉེས་ལྟུང་ཐམས་ཅད་སངས་ཀྱིས་དག་པར་གྱུར། ཅེས་བརྗོད་ཅིང་ངག་ཏུ། ཧཱུྃ་ཧཱུྃ་ཧཱུྃ། ཞེས་ཅི་ནུས་བཟླས་མཐར་སླར་ཡང་གསོལ་བ་གདབ་པས། ཧེ་རུ་ཀ་ཡབ་ཡུམ་འོད་དུ་ཞུ་རང་གི་སྒོ་གསུམ་དང་དབྱེར་མེད་དུ་གྱུར་པར་བསམས་ལ། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ་྅ཧཾ། ཞེས་བརྗོད་ཅིང་ཉམས་ལེན་སྟོང་ཉིད་ལ་བློ་བཞག །སྟོང་པའི་ངང་ལས་རྡོ་རྗེ་སྲུང་བའི་འཁོར་ལོ་དང་དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བའི་དབུས་སུ། སྤྲོ་ན་གཞལ་ཡས་ཁང་བསྒོམ། ཨེ་ཨེ་ལས་ཆོས་འབྱུང་གྲུ་གསུམ་མཐིང་ནག་ཉིས་བརྩེགས་ཀྱི་ལྟེ་བར་པད་ཉི་རུ་དྲ་ཕོ་མོའི་གདན་གྱི་སྟེང་དུ་ཧཱུྃ་ལས་རྡོ་རྗེ་སྔོན་པོ་རྩེ་ལྔ་པའི་ལྟེ་བར་ཧཱུྃ་གིས་མཚན་པའི་འོད་ཟེར་སྤྲོ་བསྡུས་ཡོངས་སུ་གྱུར་པ་ལས། ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་སྐུ་མདོག་མཐིང་ནག་སེང་ཞལ་དཀར་པོ་རྔམ་པའི་ཞལ་ཅན་སྤྱན་གསུམ་ལྗགས་འདྲིལ་མཆེ་བ་གཙིགས་པ། སྨ་ར་དང་སྨིན་མ་ལས་མེ་སྟག་འཕྲོ་ཞིང་ལྕགས་ཀྱི་རལ་པ་ནག་པོ་སྤྲུགས་པའི་གསེབ་ནས་རང་འདྲའི་ཁྲོ་མོའི་ཚོགས་དཔག་ཏུ་མེད་པ་སྤྲོ་བ། རལ་པ་ཕྱེད་གྱེན་དུ་བརྫེས་ཤིང་དུག་སྦྲུལ་ནག་པོས་བཅིངས་པའི་སྟེང་དུ་རུས་པའི་འཁོར་ལོ་དང་རྡོ་རྗེ་ནག་པོ་ཕྱེད་པས་མཚན་པ། མི་མགོ་སྐམ་པོ་ལྔའི་དབུ་རྒྱན་དང་། རློན་པ་ལྔ་བཅུའི་དོ་ཤལ་ཅན། ཞིང་ཆེན་གྱི་པགས་པ་དང་གླང་པོ་ཆེའི་ཀོ་བས་སྟོད་གཡོགས་ཤིང་སྟག་ལྤགས་ཀྱི་ཤམ་ཐབས་འཕྱང་བ། ཐལ་ཆེན་གྱི་ཚོམ་བུ་དང་། ཁྲག་གི་ཐིག་ལེ་དང་། ཞག་གི་ཟོར་རིས་རྣམས་ཀྱིས་མཚན་ཅིང་། སྦྲུལ་རིགས་ལྔ་དང་། རུས་པའི་ཕྱག་རྒྱ་ལྔས་བརྒྱན་པ། ཕྱག་གཡས་གསེར་གྱི་རྡོ་རྗེ་རྩེ་ལྔ་པ་ནམ་མཁར་ཕྱར་ཞིང་། གཡོན་བདུད་བཞིའི་ཁྲག་གིས་གང་བའི་ཐོད་པ་ཐུགས་ཀར་འཛིན་པ། གྲུ་མོ་གཡོན་ན་ཁ་ཊྭཱཾ་ག་འཆང་ཞིང་། ཞབས་གཡས་བརྐྱངས་པའི་སྐྱིལ་ཀྲུང་ཕྱེད་པའི་གར་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་ཡེ་ཤེས་པ་དབང་ལྷ་དང་བཅས་པ་ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོཿ ཡེ་ཤེས་པ་རང་ལ་གཉིས་སུ་མེད་པར་ཐིམ། དབང་ལྷས་དབང་བསྐུར་མི་བསྐྱོད་པས་དབུར་བརྒྱན། ཨོཾ་བཛྲ་ཌཱ་ཀི་ནི་སིཾ་ཧ་མུ་ཁ་ཨརྒྷཾ་སོགས་ཀྱིས་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད་ཕུལ། གདོད་ནས་རྣམ་དག་སྒྲིབ་ཀུན་ངེས་པར་གྲོལ། །འཇིག་རྟེན་འདས་ཀྱང་ཚུལ་ནི་སྣ་ཚོགས་སྟོན། །རྒྱལ་བ་ཀུན་གྱི་ཡུམ་གྱུར་ཀུན་བཟང་མོ། །རྗེ་བཙུན་སེང་གདོང་མ་ལ་ཕྱག་འཚལ་བསྟོད། །ཅེས་བསྟོད། རང་གི་ཐུགས་ཀར་ཉི་མ་ལ་ཧཱུྃ་གི་མཐར་སྔགས་ཀྱི་ཕྲེང་བ་ཁ་དོག་སྣ་ཚོགས་པ་གཡོན་དུ་འཁོར་བ་ལས་འོད་ཟེར་འཕྲོས། གང་འདོད་པའི་ཕྲིན་ལས་ཐམས་ཅད་འགྲུབ་པར་བསམས་ལ། ཨཿཀཿསཿམཿརཿཙཿཤཿདཿརཿསཿམཿརཿཡཿཕཊཿ ཅེས་རྩ་སྔགས། ཨོཾ་བཛྲ་ཌཱ་ཀི་ནཱི་སིཾ་ཧ་མུ་ཁ་ཧཱུྃ་ཧཱུྃ་ཕཊ། ཅེས་སྙིང་པོ་དང་། ཨོཾ་ཛྙཱ་ན་ཌཱ་ཀི་ནཱི་སརྦ་སིདྡྷི་ཕ་ལ་ཧཱུྃ། ཞེས་ལས་སྦྱོར་གྱི་སྔགས་རྣམས་ཅི་ནུས་བཟླས་མཐར། མཆོད་ཅིང་བསྟོད། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་བཏབ་པས་དབང་དང་དངོས་གྲུབ་ཐམས་ཅད་ཐོབ་པར་བསམ། ལྷར་སྣང་འོད་གསལ་གྱི་དབྱིངས་སུ་ཐིམ་པར་མོས་ཏེ་ཟབ་གསལ་དབྱེར་མེད་ཕྱག་རྒྱ་ཆེན་པོའི་ངང་དུ་མཉམ་པར་བཞག །སླར་ཡང་རང་ཉིད་ཡེ་ཤེས་མཁའ་འགྲོའི་སྐུར་གྱུར་པར་བསམས་ལ་བསྔོ་སྨོན་ཤིས་བརྗོད་བྱའོ། ། ༈ གཉིས་པ་ནང་སྒྲུབ་སེང་གདོང་སྔོན་མོ་རིགས་ལྔའི་མངོན་རྟོགས་ནི། ཁོ་བོས་བྱས་པའི་སྒྲུབ་ཐབས་ཕྲིན་ལས་རྣམ་རོལ་ལས་ཤེས་པར་བྱའོ། ། ༈ གསུམ་པ་དེ་ལས་འཕྲོས་པའི་ནང་སྒྲུབ་སེང་གདོང་དམར་མོ་གནོད་སྦྱིན་དབང་སྡུད་རྒྱལ་མོ་གཙོ་རྐྱང་གི་མངོན་རྟོགས་ནི། སྐྱབས་སེམས་ཚད་མེད་བླ་མའི་རྣལ་འབྱོར་བཅས་གོང་ལྟར་སྔོན་དུ་འགྲོ་བས། ཨོཾ་སྭ་བྷཱ་བ་སོགས། སྟོང་པའི་ངང་ལས་རྡོ་རྗེ་སྲུང་བའི་འཁོར་ལོ་དང་དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བའི་དབུས་སུ་ཨེ་ཨེ་ལས་གཏེར་གྱི་བུམ་པ་བརྩེགས་པའི་ཆོས་འབྱུང་དམར་པོ་གྲུ་གསུམ་བསྣོལ་མའི་ནང་དུ་པད་ཉི་ནོར་བདག་གི་གདན་དང་བཅས་པ། དེའི་སྟེང་དུ་ཧཱུྃ་ལས་ལྕགས་ཀྱུ་ཧཱུྃ་དམར་པོས་མཚན་པའི་འོད་ཟེར་འཕྲོ་འདུས་ཡོངས་སུ་གྱུར་པ་ལས། ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་གནོད་སྦྱིན་དབང་སྡུད་རྒྱལ་མོ་སྐུ་མདོག་དམར་མོ་སེང་ཞལ་སེར་མོ་བཞད་པའི་ཞལ་ཅན་སྤྱན་གསུམ་ལྗགས་འདྲིལ་མཆེ་བ་གཙིགས་པ། སྨ་ར་སྨིན་མ་ལས་མེ་སྟག་འཕྲོ་ཞིང་བྱེའུའི་རལ་པ་དམར་པོ་ཐུར་དུ་སྤྲུགས་པས་རང་འདྲའི་ཁྲོ་མོའི་ཚོགས་དཔག་ཏུ་མེད་པ་སྤྲོ་བ། རལ་བ་ཕྱེད་གྱེན་དུ་བརྫེས་ཤིང་དུག་སྦྲུལ་ནག་པོས་བཅིངས་པའི་སྟེང་དུ་རུས་པའི་འཁོར་ལོ་དང་རྡོ་རྗེ་ནག་པོ་ཕྱེད་པས་མཚན་པ། མི་མགོ་སྐམ་པོ་ལྔའི་དབུ་རྒྱན་དང་། རློན་པ་ལྔ་བཅུའི་དོ་ཤལ་ཅན། ཞིང་ཆེན་གྱི་པགས་པ་དང་གླང་པོ་ཆེའི་ཀོ་བས་སྟོད་གཡོགས་ཤིང་། སྟག་ལྤགས་ཀྱི་ཤམ་ཐབས་འཕྱང་བ། ཐལ་ཆེན་གྱི་ཚོམ་བུ་དང་། ཁྲག་གི་ཐིག་ལེ་དང་། ཞག་གི་ཟོར་རིས་རྣམས་ཀྱིས་མཚན་ཞིང་སྦྲུལ་རིགས་ལྔ་དང་རུས་པའི་ཕྱག་རྒྱ་ལྔས་བརྒྱན་པ། ཕྱག་གཡས་ལྕགས་ཀྱུ་དམར་པོ་སེང་ཞལ་གྱིས་མཚན་པ་ནམ་མཁར་ཕྱར་ཞིང་། གཡོན་གཏེར་གྱི་ནེའུ་ལེའི་མགྲིན་པ་ནས་བཙིར་ཞིང་དཀུར་བརྟེན་པ། མཆན་ཁུང་གཡོན་ན་ནལ་བུའི་རྒྱལ་མཚན་ཕྱར་ཞིང་ཞབས་གཉིས་པདྨའི་སྐྱིལ་མོ་ཀྲུང་གིས་ཡེ་ཤེས་ཀྱི་མེ་འབར་བའི་ཀློང་ན་བཞུགས་པའི་སྐུ་ལུས་ཐམས་ཅད་སྤྱན་གྱིས་གང་བ། དེའི་དཔྲལ་བར་ཨོཾ་དཀར་པོ་སོགས་གོང་ལྟར་ལ། འོད་དཔག་མེད་ཀྱིས་དབུར་བརྒྱན། ཨོཾ་པདྨ་ཌཱ་ཀཱི་ནཱི་སིཾ་ཧ་མུ་ཁ་ཨརྒྷཾ་སོགས་དང་། ཨོཾ་ཨཱཿཧཱུྃ། ཁམས་གསུམ་དབང་སྡུད་གནོད་སྦྱིན་རྒྱལ་མོ་ནི། །སྒྲུབ་ལ་མ་བུ་བཞིན་དུ་སྲུང་སྐྱོབ་མཛད། །ཕྲིན་ལས་དབང་གི་དངོས་གྲུབ་སྩོལ་མཛད་པའི། །པདྨ་མཁའ་འགྲོ་མ་ལ་ཕྱག་འཚལ་བསྟོད། །ཐུགས་ཀར་ཉི་མ་ལ་ཧཱུྃ་དམར་པོའི་མཐར་སྔགས་ཕྲེང་ཁ་དོག་དམར་པོ་གཡོན་དུ་འཁོར་བ་ལས་འོད་ཟེར་འཕྲོས་པས་རབ་འབྱམས་དབང་གི་དངོས་གྲུབ་མ་ལུས་པ་ཐོབ་པར་གྱུར། ཅེས་བརྗོད་ཅིང་བསམས་ལ། རྩ་སྔགས་ཡི་གེ་བཅུ་བཞི་པ་དང་། སྙིང་པོ། ཨོཾ་པདྨ་ཌཱ་ཀི་ནཱི་སིཾ་ཧ་མུ་ཁ་ཧཱུྃ་ཧཱུྃ་ཕཊ། ཅེས་བཟླ། ལས་སྦྱོར་དབང་སྡུད་ཀྱི་སྔགས་རིགས་བཟླ་བར་འདོད་ན་གཞུང་དུ་ཤེས། རྗེས་མཆོད་བསྟོད། གསོལ་གདབ། བསྡུ་ལྡངས། བསྔོ་སྨོན། ཤིས་བརྗོད་རྣམས་བྱའོ། ། ༈ བཞི་པ་ནང་སྒྲུབ་དབང་སྡུད་པདྨ་མཁའ་འགྲོ་རིགས་ལྔའི་མངོན་རྟོགས་ནི། སྐྱབས་སེམས་སོགས་གོང་ལྟར་ལ། སྟོང་པའི་ངང་ལས་རྡོ་རྗེ་སྲུང་བའི་འཁོར་ལོ་དང་དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བའི་དབུས་སུ་ཨེ་ཨེ་ལས་གཏེར་ཆེན་པོའི་བུམ་པ་བརྩེགས་པའི་ཆོས་འབྱུང་བསྣོལ་མ་ཁ་སྦྱོར་གྱི་ལྟེ་བར་སྣ་ཚོགས་པདྨ་འདབ་མ་བརྒྱད་པའི་དབུས་དང་ཕྱོགས་བཞིར་པད་ཉི་གནོད་སྦྱིན་གཏེར་བདག་གི་གདན་ལ། དབུས་སུ་ཧཱུྃ་དམར་པོ་ལས་གསིལ་བྱེད་ཧཱུྃ་དམར་པོས་མཚན་པ། དེ་ཡོངས་སུ་གྱུར་པ་ལས་དབང་སྡུད་པདྨ་མཁའ་འགྲོ་སྐུ་མདོག་དམར་མོ། སེང་ཞལ་སེར་པོ་གཡས་སུ་ཕྱོགས་ཤིང་བྱེ་རུའི་རལ་པ་གསིགས་པ་ལས་རང་འདྲའི་སྤྲུལ་པ་སྤྲོ་བ། གཡས་གསིལ་བྱེད་ཕྱར་ཞིང་། གཡོན་ལྷུང་བཟེད་བདུད་རྩིས་བཀང་བ་བསྣམས་པ། མཆན་ཁུང་གཡོན་ན་གླེགས་བམ་འཆང་ཞིང་། ཞིང་དབྱུག་འཁྱུད་པ། ཞབས་པདྨའི་སྐྱིལ་མོ་ཀྲུང་གིས་བཞུགས་ཤིང་། སྐུ་ལ་སྤྱན་བྱེ་བས་མཛེས་པ། ཤར་གྱི་གདན་ལ་ཧཱུྃ་དང་རལ་གྲི་ལས་གནོད་སྦྱིན་གཡུལ་ལས་རྒྱལ་བ་མོ་སྐུ་མདོག་སྔོ་ནག །སེང་ཞལ་དཀར་པོ་གཡས་སུ་ཕྱོགས་ཤིང་གནམ་ལྕགས་ཀྱི་རལ་པ་སྤྲུགས་པའི་གསེབ་ནས་རང་འདྲའི་སྤྲུལ་པ་སྤྲོ་བ། སྐུ་ལ་བསེ་ཁྲབ་དང་དབུ་ལ་རྨོག་གིས་བརྗིད་པ། གཡས་གནམ་ལྕགས་ཀྱི་རལ་གྲི་ཕྱར་ཞིང་། གཡོན་མདའ་གཞུ་བསྣམས་པ། གྲུ་མོ་གཡོན་དུ་མདུང་དར་བ་དན་དང་བཅས་པ་བསྒྲེང་ཞིང་བསེ་ཕུབ་འཆང་བ། ཞབས་གཡོན་བརྐྱང་པའི་གར་སྟབས་ཀྱིས་བཞུགས་པ། བྱང་དུ་ཧཱུྃ་དང་དུང་ཆེན་ལས་སྡེ་བརྒྱད་དབང་སྡུད་མཁའ་འགྲོ་སྐུ་མདོག་དམར་ལྗང་། སེང་ཞལ་ལྗང་ནག་གཡས་སུ་ཕྱོགས་ཤིང་མུ་མེན་གྱི་རལ་པ་སྤྲུགས་པའི་གསེབ་ནས་མ་མོ་ཐལ་མདོག་ཕྱག་མཚན་རང་འདྲའི་སྤྲུལ་པ་སྤྲོ་བ། གཡས་ཅང་ཏེའུ་འཁྲོལ་ཞིང་། གཡོན་དུང་ཆེན་གྱི་གླིང་བུ་འབུད་པ། ཞབས་དོར་སྟབས་ཀྱིས་བཞེངས་པ། ནུབ་ཏུ་ཧཱུྃ་དང་མྱོས་བྱེད་ལས་སྲིད་གསུམ་དབང་སྡུད་མཁའ་འགྲོ་མ་སྐུ་མདོག་དམར་ནག་སེང་ཞལ་སེར་པོ་གཡས་སུ་ཕྱོགས་ཤིང་བྱེ་རུའི་རལ་པ་སྤྲུགས་པའི་གསེབ་ནས་རང་འདྲའི་སྤྲུལ་པ་སྤྲོ་བ། གཡས་རིན་པོ་ཆེའི་སྣོད་མྱོས་བྱེད་ཀྱིས་གང་བ་དང་། གཡོན་ཞགས་པ་དམར་པོ་བསྣམས་པ། གྲུ་མོ་གཡོན་ན་བདུད་ཀྱི་ཁྲམ་ཤིང་བསྒྲེང་ཞིང་ཞབས་གཉིས་དོར་སྟབས་ཀྱིས་བཞེངས་པ། ལྷོར་ཧཱུྃ་དང་འབྲུ་བཅུད་ལས་དཔལ་སྐྱེད་དབང་སྒྱུར་མཁའ་འགྲོ་སྐུ་མདོག་སེར་ནག །སེང་ཞལ་དམར་པོ་གཡས་སུ་ཕྱོགས་ཤིང་། གསེར་གྱི་རལ་པ་སྤྲུགས་པའི་གསེབ་ནས་མ་མོ་ཐལ་མདོག་ཕྱག་མཚན་རང་འདྲའི་སྤྲུལ་པ་སྤྲོ་བ། གཡས་པས་མཚོན་གྱི་གྲུ་གུ་ཕྱར་ཞིང་། གཡོན་པས་འབྲུ་བཅུད་ཀྱིས་བཀང་པའི་སྣོད་བསྣམས་པ། གྲུ་མོ་གཡོན་ན་ཏི་རའི་རྒྱལ་མཚན་ཕྱར་ཞིང་རིན་པོ་ཆེའི་རྒྱན་གྱིས་བརྒྱན་པ། ཞབས་གཉིས་གར་སྟབས་ཀྱིས་འགྱིང་བ། ཐམས་ཅད་ཀྱང་ཞིང་ལྤགས་དང་གླང་ཀོས་སྟོད་གཡོགས་ཤིང་། སྟག་ལྤགས་ཀྱི་ཤམ་ཐབས་གྲོལ་བ། དུར་ཁྲོད་ཀྱི་ཆས་ཀྱིས་འཇིགས་པར་བྱས་ཤིང་། སྦྲུལ་རིགས་ལྔ་དང་རུས་པ་དང་ཐོད་པའི་རྒྱན་ཅན། ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་དཔྲལ་བར་ཨོཾ་དཀར་པོ་སོགས་ནས། གཙོ་མོ་ལ་འོད་དཔག་མེད། རིགས་བཞི་ལ་རིམ་པར་རྣམ་སྣང་། དོན་གྲུབ། མི་བསྐྱོད་པ། རིན་ཆེན་འབྱུང་ལྡན་རྣམས་ཀྱིས་དབུར་བརྒྱན། ཨོཾ་པདྨ་ཌཱ་ཀི་ནཱི་ས་པ་རི་ཝཱ་ར་ཨརྒྷཾ་སོགས་དང་། ཨོཾ་ཨཱཿཧཱུྃ། གནོད་སྦྱིན་པདྨ་མཁའ་འགྲོ་མ། །དབང་སྡུད་སེང་གདོང་གཏེར་གྱི་བདག །རྣལ་འབྱོར་འདོད་པའི་དོན་ཀུན་སྒྲུབ། །འཁོར་དང་བཅས་ལ་ཕྱག་འཚལ་བསྟོད། །སོ་སོའི་ཐུགས་ཀར་ཉི་གདན་ལ་ཧཱུྃ་ཡིག་རིགས་ཀྱི་ཁ་དོག་གིས་མཚན་པའི་མཐར། སྔགས་ཀྱི་ཕྲེང་བ་གཡོན་དུ་འཁོར་བ་ལས་འོད་ཟེར་ཛཿདང་ལྕགས་ཀྱུའི་རྣམ་པར་སྤྲོས་པས་ཁམས་གསུམ་སྣོད་བཅུད་ཀྱི་དཔལ་འབྱོར་ཐམས་ཅད་དབང་དུ་བྱས་པར་བསམས་ལ། རྩ་སྔགས་ཡི་གེ་བཅུ་བཞི་པ་དང་། སྙིང་པོ། ཨོཾ་པདྨ་ཌཱཀི་ནཱི་སིཾ་ཧ་མུ་ཁ་ཧཱུྃ་ཧཱུྃ་ཕཊ། ཅེས་པ་ཅི་ནུས་སུ་བཟླ། རྗེས་འདྲའོ། ། ༈ ལྔ་པ་གསང་སྒྲུབ་སྐོར་གསུམ་ལས་གཅེར་བུ་ཁྲོས་མ་ནག་མོའི་མངོན་རྟོགས་ནི། སྟོང་པའི་ངང་ལས་རྡོ་རྗེ་སྲུང་བའི་འཁོར་ལོ་དང་དུར་ཁྲོད་ཆེན་པོ་བརྒྱད་ཀྱིས་ཡོངས་སུ་བསྐོར་བའི་དབུས་སུ། ཨེ་ཨེ་ལས་ཆོས་འབྱུང་ནག་པོ་ཉིས་བརྩེགས་ཀྱི་ནང་ཁྲག་ཞག་འཁྲུགས་པའི་ཀློང་དུ་པད་ཉི་རོའི་གདན་ལ་ཧཱུྃ་ལས་གྲི་གུག་ནག་པོའི་ཡུ་བ་ཧཱུྃ་གིས་མཚན་པ། དེ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས་ཡེ་ཤེས་ཀྱི་མཁའ་འགྲོ་མ་སེང་གདོང་ཁྲོས་མ་ནག་མོ། སྐུ་མདོག་མཐིང་ནག་སེང་ཞལ་དཀར་པོ་སྤྱན་གསུམ་པ་གཡས་སུ་ཕྱོགས་ཤིང་གནམ་ལྕགས་ཀྱི་རལ་པ་སྤྲུགས་པའི་གསེབ་ནས་མཁའ་འགྲོ་དང་སྡེ་བརྒྱད་ཀྱི་དམག་ཚོགས་སྤྲོ་བ། བ་སྤུའི་བུ་ག་ནས་མེ་སྟག་གི་ཚྭ་ཚྭ་འཕྲོ་ཞིང་། ཐོག་སེར་དང་ཁྱབ་འཇུག་གི་སྐད་འབྱིན་པ། དབང་པོའི་སྒོ་ནས་ཁྲག་གི་ཆར་འབབས་པ། གཡས་རྡོ་རྗེའི་གྲི་གུག་ནམ་མཁར་ཕྱར་ཞིང་། གཡོན་པས་དགྲ་སྙིང་ཞལ་དུ་གསོལ་བ། གྲུ་མོ་ན་བདུད་ཀྱི་ཁྲམ་ཤིང་བསྒྲེང་ཞིང་སྐེད་ལ་མ་མོའི་ཚོན་གྲུ་དང་ནད་རྐྱལ་འཕྱང་བ། སྐུ་ལུས་ཐམས་ཅད་སྤྱན་གྱིས་ཁེངས་ཤིང་གཅེར་བུ་རྒྱན་སྤངས་པ། ཞབས་གཡོན་བརྐྱང་པའི་དོར་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་དཔྲལ་བར་ཨོཾ་སོགས་ནས། མི་བསྐྱོད་པས་དབུར་བརྒྱན། ཨོཾ་བཛྲ་ཌཱ་ཀཱི་ནཱི་ཀྲོ་དྷི་ཀཱ་ལི་སིཾ་ཧ་མུ་ཁ་ཨརྒྷཾ་སོགས། ཨོཾ་ཨཱཿཧཱུྃ། བདུད་མོ་ནག་མོ་སེང་གདོང་མ། །ཤ་ཁྲག་ལ་དགའ་སྲོག་ལ་རྔམས། །འཇིགས་བྱེད་ནག་མོ་བདུད་ཀྱི་ཡུམ། །མཁའ་འགྲོའི་དབང་ཕྱུག་མ་ལ་བསྟོད། ཐུགས་ཀར་གནམ་ལྕགས་ལས་གྲུབ་པའི་འཁོར་ལོ་རྩིབས་སྟོང་དང་ལྡན་པའི་ལྟེ་བར་ཧཱུྃ་ཡིག་གི་མཐར་སྔགས་ཕྲེང་ཁ་དོག་ནག་པོ་མེ་རླུང་གི་རང་བཞིན་སྤུ་གྲི་འདྲ་བས་བསྐོར་བ་ལས་འོད་ཟེར་མེ་རླུང་དང་མཚོན་ཆའི་ཆར་བབ་པས་དགྲ་བགེགས་ཐམས་ཅད་རྡུལ་དུ་བརླག་པར་བསམས་ལ། རྩ་སྔགས། ཕཊཿཡཿརཿམཿསཿརཿདཿཤཿཙཿརཿམཿསཿཀཿཨཿ སྙིང་པོ་ཨོཾ་བཛྲ་ཌཱ་ཀི་ནཱི་སིཾ་ཧ་མུ་ཁ་ཧཱུྃ་ཧཱུྃ་ཕཊ། ཅེས་བཟླ། ། ༈ དྲུག་པ་གསང་སྒྲུབ་སྐོར་གསུམ་ལས། གཅེར་བུ་ཁྲོས་ནག་ཞལ་གསུམ་ཕྱག་དྲུག་ཕུར་ཞབས་ཅན་མའི་མངོན་རྟོགས་ནི། སྟོང་པའི་ངང་ལས་རྡོ་རྗེ་སྲུང་བའི་འཁོར་ལོ་དུར་ཁྲོད་བརྒྱད་དང་བཅས་པས་ཡོངས་སུ་བསྐོར་བའི་དབུས་སུ་ཆོས་འབྱུང་དམར་ནག་ཁྲག་མཚོ་ཁོལ་བ། དེའི་ལྟེ་བར་པད་ཉི་དགྲ་བགེགས་ཀྱི་གདན་ལ། ཧཱུྃ་ལས་གྲི་གུག་ཧཱུྃ་གིས་མཚན་པ་འོད་ཟེར་འཕྲོ་འདུས་ཡོངས་སུ་གྱུར་པ་ལས། སེང་གདོང་ཁྲོས་མ་ནག་མོ་སྐུ་མདོག་མཐིང་ནག །སྔོ་དཀར་དམར་བའི་སེང་ཞལ་གསུམ་གནམ་ལྕགས་ཀྱི་རལ་པ་སྤྲུགས་པ་ལས་རང་འདྲའི་སྤྲུལ་པ་སྤྲོ་བ། ཞལ་རེ་རེ་ལ་སྤྱན་གསུམ་གསུམ་དང་ལྡན་ཞིང་དབུ་གཙུག་ན་རྟ་མགོ་ལྗང་ནག་གསུམ་ཞལ་ནམ་མཁའི་དབྱིངས་སུ་གདངས་ཤིང་རྡོ་རྗེའི་རྟ་སྐད་འཚེར་བ། ཕྱག་དྲུག་གི་གཡས་གསུམ་གྲི་གུག །ལྕགས་ཀྱུ། དགྲ་སྟྭ། གཡོན་གསུམ་ཐོད་ཁྲག །ཞིང་དབྱུག །ཁ་ཊྭཱཾ་ཕྱར་ཞིང་། གྲུ་མོ་གཡོན་དུ་ཁྲམ་ཤིང་བསྒྲེང་བ། གཅེར་བུ་རུས་པ་དང་སྦྲུལ་གྱིས་བརྒྱན་ཅིང་སྟག་ཤམ་ཅན། སྐུ་སྨད་ཕུར་པའི་དཔལ་གྱིས་དགྲ་བགེགས་ཀྱི་སྙིང་གར་གཟིར་ཞིང་། སྐུ་ལ་ཡེ་ཤེས་ཀྱི་སྤྱན་མང་པོས་མཛེས་པ། མེ་ཕུང་འབར་ཞིང་འཁྲུགས་པའི་ཀློང་ན་བཞུགས་པ། དེའི་དཔྲལ་བར་ཨོཾ་སོགས་ནས། མི་བསྐྱོད་པས་དབུར་བརྒྱན། ཨོཾ་བཛྲ་ཌཱ་ཀི་ནཱི་སིཾ་ཧ་མུ་ཁ་ཀྲོ་དྷཱི་ཀཱ་ལི་ཨརྒྷཾ་སོགས་དང་། ཨོཾ་ཨཱཿཧཱུྃ། དཔལ་ཆེན་བདུད་མོ་ནག་མོ་ནི། །དགྲ་བགེགས་སྲོག་གཅོད་ཤ་ཟ་མོ། །དབུགས་ལེན་རྔམ་པའི་ཁྲོ་གཟུགས་ཅན། །བདུད་མོ་ནག་མོ་ཁྱོད་ལ་བསྟོད། །ཐུགས་ཀར་ཉི་སྟེང་ཧཱུྃ་ནག་པོའི་མཐར་སྔགས་ཀྱི་ཕྲེང་བ་ལས་འོད་ཟེར་མེ་དང་མཚོན་ཆའི་ཚོགས་དཔག་ཏུ་མེད་པ་འཕྲོས་པས་མ་རུངས་པའི་གདུག་པ་ཅན་ཐམས་ཅད་ཚར་བཅད་པར་བསམས་ལ། རྩ་སྔགས་ཡི་གེ་བཅུ་བཞི་པ་དང་། སྙིང་པོ། ཨོཾ་བཛྲ་ཌཱ་ཀི་ནཱི་སིཾ་ཧ་མུ་ཁ་ཀཱི་ལི་ཀཱི་ལ་ཡ་ཧཱུྃ་ཧཱུྃ་ཕཊ། ཅེས་བཟླ། ། ༈ བདུན་པ་གསང་སྒྲུབ་སྐོར་གསུམ་ལས། གཅེར་བུ་ཁྲོས་ནག་ཕུར་ཞབས་ཅན་ཞལ་གཅིག་ཕྱག་གཉིས་མའི་མངོན་རྟོགས་ནི། སྟོང་པའི་ངང་ལས་རྡོ་རྗེ་སྲུང་བའི་འཁོར་ལོ་དུར་ཁྲོད་བརྒྱད་དང་བཅས་པས་ཡོངས་སུ་བསྐོར་བའི་དབུས་སུ་ཆོས་འབྱུང་དམར་ནག་ཁྲག་མཚོ་ཁོལ་བ། དེའི་ལྟེ་བར་པད་ཉི་དགྲ་བགེགས་ཀྱི་གདན་ལ། ཧཱུྃ་ལས་གྲི་གུག་ཧཱུྃ་གིས་མཚན་པ་ལས་འོད་ཟེར་འཕྲོས་འདུས་ཡོངས་སུ་གྱུར་པ་ལས། སེང་གདོང་ཁྲོས་མ་ནག་མོ་སྐུ་མདོག་མཐིང་ནག །སེང་ཞལ་དཀར་པོ་སྤྱན་གསུམ་པ་གཡས་སུ་གཟིགས་ཤིང་གནམ་ལྕགས་ཀྱི་རལ་པ་སྤྲུགས་པ། དབུ་གཙུག་ན་རྟ་མགོ་ལྗང་ཞུར་རྡོ་རྗེའི་རྟ་སྐད་འཚེར་བ། ཕྱག་གཡས་ཉི་མ་དང་། གཡོན་ཟླ་བ་ཆ་ལང་དུ་རྡེབ་པའི་ཉི་ཟླ་གཉིས་ཀྱི་དབུས་སུ་ཕུར་བུ་རྩེ་གཅིག་པས་མཚན་པ། གཅེར་བུ་རྒྱན་སྤངས་ཤིང་སྐུ་ལུས་ཐམས་ཅད་སྤྱན་གྱིས་གང་བ། སྐུ་སྨད་ཕུར་བུ་རྩེ་གཅིག་མའི་དཔལ་ཆེན་ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་དཔྲལ་བར་ཨོཾ་སོགས་ནས། མི་བསྐྱོད་པས་དབུར་བརྒྱན་གོང་ལྟར་མཆོད། དགའ་རབ་དབང་ཕྱུག་བུ་མོ་ནི། །མནའ་ཟན་གཤེད་མ་ཁྲོ་མོའི་སྐུ། །སྡེ་བརྒྱད་མ་མོ་ཀུན་གྱི་གཙོ། །གཅེར་བུ་ཁྲོས་མ་ནག་མོར་བསྟོད། །ཐུགས་ཀར་གནམ་ལྕགས་ཀྱི་འཁོར་ལོ་རྩིབས་བཞི་བའི་ལྟེ་བར་ཉི་གདན་ལ་ཧཱུྃ་མཐིང་ནག་གི་མཐར་སྔགས་ཕྲེང་མེ་ཕུང་མཚོན་ཆའི་རང་བཞིན་ཅན་ཁ་དོག་ནག་པོ་གཡོན་དུ་འཁོར་བ་ལས་འོད་ཟེར་མེ་དང་མཚོན་ཆའི་ཆར་བབ་པས་དགྲ་བགེགས་ཐམས་ཅད་བརླག་པར་བསམས་ལ། རྩ་སྔགས། ཕཊཿཡཿརཿམཿསཿརཿདཿཤཿཙཿརཿམཿསཿཀཿཨཿ སྙིང་པོ། ཨོཾ་བཛྲ་ཌཱ་ཀི་ནཱི་སིཾ་ཧ་མུ་ཁ་ཀཱི་ལི་ཀཱི་ལ་ཡ་སརྦ་བིགྷྣཱན་བྷནྡྷ་ཧཱུྃ་ཧཱུྃ་ཕཊ། ཅེས་པས། ། ༈ བརྒྱད་པ་ཡང་གསང་སྒྲུབ་སྐོར་གསུམ་གྱི་ལས་མཐའ་ཕྱིར་ཟློག་ཆེན་མོའི་མངོན་རྟོགས་ནི། སྟོང་པའི་ངང་ལས་རྡོ་རྗེ་སྲུང་བའི་འཁོར་ལོ་དུར་ཁྲོད་བརྒྱད་དང་བཅས་པས་ཡོངས་སུ་བསྐོར་བའི་དབུས་སུ་ཆོས་འབྱུང་དམར་ནག་ཁྲག་མཚོ་ཁོལ་བ། དེའི་ལྟེ་བར་པད་ཉི་དགྲ་བགེགས་ཀྱི་གདན་ལ། ཧཱུྃ་ལས་གྲི་གུག་ཧཱུྃ་གིས་མཚན་པ་འོད་ཟེར་འཕྲོ་འདུས་ཡོངས་སུ་གྱུར་པ་ལས། སེང་གདོང་ཁྲོས་མ་ནག་མོ་ཕྱིར་ཟློག་པ་ཆེན་མོ་སྐུ་མདོག་མཐིང་ནག །སེང་ཞལ་དཀར་པོ་སྤྱན་གསུམ་པའི་ཞལ་གནམ་དུ་གདངས་ཤིང་གནམ་ལྕགས་ཀྱི་རལ་པ་སྦྲུལ་ནག་གིས་སྤྱི་བོར་བཅིངས་པའི་ལྷག་མ་ཐུར་དུ་སྤྲུགས་པ་ལས་ཕུར་བུ་དང་ཐོགས་སེར་གྱི་ཆར་འབེབས་པ། ཕྱག་གཡས་གནམ་ལྕགས་ཀྱི་གྲི་གུག་ནམ་མཁར་ཕྱར་ཞིང་། གཡོན་བདུད་ཀྱི་ཁྲམ་ཤིང་ཁྲ་བོ་སྒོ་བརྒྱད་དང་ལྡན་པ་ཐུར་དུ་བསྡིགས་པ་ལས་སྡེ་བརྒྱད་ཀྱི་དམག་ཚོགས་འགྱེད་པ། སྐུ་སྟོད་ལ་དར་ནག་པོའི་སྟོད་གཡོགས་དང་། སྐུ་སྨད་ལ་ཞིང་གི་གཡང་གཞི་དཀྲིས་པ། ཞབས་གཉིས་འཆམ་སྟབས་ཀྱིས་དུ་བ་མེ་རླུང་འཚུབས་མར་འཁྱིལ་བའི་དབུས་ན་བཞུགས་པའི་སྐུའི་གནས་དང་བ་སྤུའི་བུ་ག་ཐམས་ཅད་དུ་ཕྱིར་ཟློག་སྔགས་ཀྱི་མཚོན་ཆ་མེ་སྟག་འཕྲོ་བས་གང་བ། དེའི་དཔྲལ་བར་ཨོཾ་སོགས་ནས། མི་བསྐྱོད་པས་དབུར་བརྒྱན། གོང་ལྟར་མཆོད། རྡོ་རྗེ་སྔགས་ཀྱི་མཚོན་འཆང་བས། །མ་རུངས་གདུག་པའི་ཚོགས་རྣམས་ཀུན། །ཕྱིར་ཟློག་གཟིར་ཞིང་རླག་མཛད་པའི། །ལས་བྱེད་མཁའ་འགྲོ་ལ་ཕྱག་འཚལ་བསྟོད། །སྐུའི་ཆ་ལས་སྔགས་ཀྱི་འོད་ཟེར་རབ་ཏུ་འབར་བས་གདུག་པ་ཅན་ཐམས་ཅད་ཕྱིར་ཟློག་ཅིང་ཚར་བཅད་པར་བསམས་ལ། ཕཊཿཡཿརཿམཿསཿརཿདཿཤཿཙཿརཿམཿསཿཀཿཨཿ ཨོཾ་པྲ་ཏྱཱཾ་གི་རགྷྲྀ་དུ་གྷྲྀ་དུ་ཛྭ་ར་གྷྲྀ་དུ་ཧཱུྃ་ཕཊཿ ཡཀྨོ་ཕྲེཾ་བྷྱོཿཟློག །ལོཀྨོ་ཕྲེཾ་བྷྱོཿཟློག །ཌཱ་ཀི་མ་ཏྲི་ཀ་ཕྲེཾ་བྷྱོཿཟློག །ཅེས་བཟླ། ། ༈ དགུ་པ་ལས་མཐའ་རྒྱས་སེང་གདོང་དམར་མོ་ཚེ་སྒྲུབ་རྒྱལ་མོའི་མངོན་རྟོགས་ནི། སྟོང་པའི་ངང་ལས་རྡོ་རྗེ་སྲུང་བའི་འཁོར་ལོ་དུར་ཁྲོད་བརྒྱད་ཀྱིས་བསྐོར་བའི་དབུས་སུ་ཨེ་ཨེ་ལས་ཆོས་འབྱུང་གྲུ་གསུམ་དམར་པོ་ཉིས་བརྩེགས་ཀྱི་ལྟེ་ བར་པད་ཉི་རུ་དྲའི་གདན་ལ་ཧཱུྃ་དམར་པོ་ལས་ཚེ་བུམ་ཧཱུྃ་དམར་པོས་མཚན་པ། དེ་ལས་འོད་ཟེར་འཕྲོས་འདུས་ཡོངས་སུ་གྱུར་པ་ལས་ཌཱ་ཀི་སེང་གདོང་འཆི་བདག་འཇོམས་མ་སྐུ་མདོག་དམར་མོ། །སེང་ཞལ་སེར་པོ་སྤྱན་གསུམ་དང་ལྡན་པ་གཡས་སུ་ཕྱོགས་ཤིང་དབུ་སྐྲ་བྱེ་རུའི་རལ་པ་སྤྲུགས་པའི་གསེབ་ནས་མེ་སྟགས་དང་ཕུར་བུའི་ཚྭ་ཚྭ་འཕྲོ་བ། དུར་ཁྲོད་འཇིགས་པའི་ཆས་ཀྱིས་བརྒྱན་ཅིང་། ཕྱག་གཉིས་མཉམ་བཞག་གི་སྟེང་ན་འཆི་མེད་ཚེའི་བུམ་པ་བསྣམས་པ། གྲུ་མོ་གཡོན་ན་ཁ་ཊྭཱཾ་ག་བསྒྲེང་ཞིང་ཞབས་གཉིས་པ་ཟླའི་སྐྱིལ་མོ་ཀྲུང་གིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་དཔྲལ་བར་ཨོཾ་སོགས་ནས། སྣང་བ་མཐའ་ཡས་ཀྱིས་དབུར་བརྒྱན། ཨོཾ་པདྨ་ཌཱ་ཀི་ནཱི་སིཾ་ཧ་མུ་ཁ་ཨརྒྷཾ་སོགས་དང་། ཨོཾ་ཨཱཿཧཱུྃ། འཆི་མེད་ཚེ་ཡི་དངོས་གྲུབ་སྩོལ། །ནད་གདོན་མ་ལུས་ཞི་བར་མཛད། །དཔལ་ལྡན་མཁའ་འགྲོ་སེང་གེའི་གདོང་། །འཆི་བདག་འཇོམས་མ་ཁྱོད་ལ་བསྟོད། །ཐུགས་ཀར་ཉི་མ་ལ་ཧཱུྃ་དམར་པོའི་མཐར་སྔགས་ཕྲེང་ཁ་དོག་སྣ་ཚོགས་གཡོན་དུ་འཁོར་བ་ལས་འོད་ཟེར་འཕྲོས། འཁོར་འདས་ཀྱི་ཚེ་བཅུད་ཐམས་ཅད་བསྡུས་ནས་བདག་ལ་ཐིམ་པས་འཆི་མེད་ཚེའི་དངོས་གྲུབ་ཐོབ་པར་བསམས་ལ། རྩ་སྔགས་ཡི་གེ་བཅུ་བཞི་པ་དང་། ཨོཾ་བཛྲ་ཨཱ་ཁུ་ཥེ་ཧཱུྃ་བྷྲཱུྃ་ནྲྀ་ཛཿ པདྨ་ཌཱ་ཀི་ནཱི་སིཾ་ཧ་མུ་ཁ་སརྦ་སིདྡྷི་ཕ་ལ་ཧོཿ ཨོཾ་བཛྲ་ཨཱ་ཡུ་ཥེ་མ་མ་ཀརྨ་ཁུག་ཁུག་ཛཿཛཿཀུ་རུ་ཀུ་རུ་སྭཱ་ཧཱ། ཞེས་བཟླ། ། ༈ བཅུ་པ་མཁའ་འགྲོ་མ་སེང་གེའི་གདོང་ཅན་འབྱུང་བཞི་བཅུད་སྡུད་ཀྱི་ཚེ་སྒྲུབ་ཟབ་མོའི་མངོན་རྟོགས་ནི། སྟོང་པའི་ངང་ལས་རྡོ་རྗེ་སྲུང་བའི་འཁོར་ལོ་དུར་ཁྲོད་བརྒྱད་དང་བཅས་པས་བསྐོར་བའི་དབུས་སུ། ཨེ་ཨེ་ལས་ཆོས་འབྱུང་གྲུ་གསུམ་སེར་པོ་ཉིས་བརྩེགས་ཀྱི་ལྟེ་བར་པད་ཉི་རུ་དྲའི་གདན་ལ་ཧཱུྃ་སེར་པོ་ལས་ཚེ་བུམ་ཧཱུྃ་སེར་པོས་མཚན་པ། དེ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས། འཆི་མེད་ཡེ་ཤེས་ཀྱི་མཁའ་འགྲོ་མ་སྐུ་མདོག་སེར་མོ། སེང་ཞལ་དམར་པོ་སྤྱན་གསུམ་དང་ལྡན་པ་གཡོན་དུ་ཕྱོགས་ཤིང་དབུ་སྐྲ་གསེར་གྱི་རལ་པ་གསིག་པའི་གསེབ་ནས་མེ་སྟག་དང་ཕུར་བུའི་ཚྭ་ཚྭ་འཕྲོ་བ། དུར་ཁྲོད་འཇིགས་པའི་ཆས་ཀྱིས་བརྒྱན་ཅིང་ཕྱག་གཉིས་ཀྱིས་འཆི་མེད་ཚེའི་བུམ་པ་ཐུགས་ཀར་འཛིན་པ། གྲུ་མོ་གཡོན་ན་ཁ་ཊྭཱཾ་ག་བསྒྲེང་ཞིང་ཞབས་དོར་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་དཔྲལ་བར་ཨོཾ་སོགས་ནས། འོད་དཔག་མེད་ཀྱིས་དབུར་བརྒྱན། གོང་ལྟར་མཆོད་ཅིང་བསྟོད། ཐུགས་ཀར་ཉི་དཀྱིལ་ལ་ཧཱུྃ་དམར་པོའི་མཐར་སྔགས་ཕྲེང་ཁ་དོག་སྣ་ཚོགས་གཡོན་དུ་འཁོར་བ་ལས་འོད་ཟེར་འཕྲོས། ཕྱོགས་བཞི་ནས་སེང་གདོང་མ་དཀར་སེར་དམར་ལྗང་བ་རང་གི་སྐུ་མདོག་དང་མཐུན་པའི་འཆི་མེད་ཚེའི་བུམ་པ་བསྣམས་པ་དཔག་ཏུ་མེད་པས་འབྱུང་བ་ཆེན་པོ་ཆུ་དང་། ས་དང་། མེ་དང་། རླུང་གི་ནུས་བཅུད་དང་། འཁོར་འདས་ཀྱི་དགེ་མཚན་མ་ལུས་པ་བསྡུས་ཏེ་བདག་ལ་ཐིམ་པས་འབྱུང་བཞིའི་དྭངས་མ་སྟོབས་སུ་གྱུར་ཏེ་འཆི་མེད་ཚེའི་དངོས་གྲུབ་ཐོབ་པར་བསམས་ལ། རྩ་སྔགས་ཡི་གེ་བཅུ་བཞི་པ་དང་། ཨཿཀཿསཿམཿརཿཙཿཤཿཕཊཿ ཞེས་བཟླའོ། ། ༈ དེ་ལྟར་མངོན་རྟོགས་རིགས་དགུའི་རྗེས་སུ་གནང་བ་ནི། སྦྱོར་བ་སྟེགས་བུའི་དབུས་སུ་མཎྜལ་བསྐྱེད་ཆོག་དང་མཐུན་པར་བྲི། མ་གྲུབ་ན་ལྷའི་སྐུ་མདོག་དང་མཐུན་པའི་ཚོན་ཕུང་ངམ། མེ་ཏོག་གི་ཚོམ་བུ་བཀོད། དེའི་ཁར་མཉྫིའི་སྟེང་དུ་རྗེས་གནང་གི་གཏོར་མ་ཟུར་གསུམ་ལྷའི་སྐུ་མདོག་དང་མཐུན་པ་ལ་ཐེབ་ཀྱུས་བསྐོར་བ་དར་གདུགས་དང་། སྐུ་ཙཀ་ཡོད་ན་བཙུགས་པའི་མདུན་དུ་བུམ་པ་བཅུད་ལྡན་དང་། འབུལ་གཏོར། མཐར་ཆུ་གཉིས་སྔོན་འགྲོའི་ཉེར་སྤྱོད་གཡོན་བསྐོར་དུ་བཤམ། ཚེ་སྒྲུབ་གཉིས་ལ་བུམ་པའི་གཡས་གཡོན་དུ་ཚེ་རིལ་དང་ཚེ་ཆང་ཡང་བཤམས་ལ་བཟླས་པའི་སྐབས་ཚེ་བཅུད་བསྟིམ། དངོས་གཞི་བདག་མདུན་བུམ་གསུམ་དང་། རྗེས་གནང་གི་ཆིངས་རྣམས་ཁོ་བོས་བྱས་པའི་སེང་གདོང་རིགས་ལྔའི་སྒྲུབ་རྗེས་ལ་ཁ་སྤོས་པས་འགྲུབ་ལ། ཚེ་སྒྲུབ་གཉིས་ཀྱི་སྐབས། ཐུགས་ཀྱི་རྗེས་གནང་ཚར་ནས། ཚེའི་རིལ་བུ་དང་བདུད་རྩི་འདི་དག་ཀྱང་ཞལ་དུ་བཞེས་པས་རྩ་ཁམས་ཐམས་ཅད་བདུད་རྩིའི་དངས་མས་ཁེངས་ནས་རྡོ་རྗེ་སེམས་དཔའི་ཚེ་དང་ལང་ཚོ་ལ་མངའ་བརྙེས་པའི་མོས་པ་མཛོད། ཅེས་བརྡ་སྦྱར་ལ་སྔགས་བརྗོད་བཞིན་དུ་ཚེ་རིལ་དང་ཚེ་ཆང་སྦྱིན་ནས་གཏོར་མའི་བཀའ་བསྒོ་སོགས་བྱའོ། །འདི་རྣམས་ཀྱི་མངོན་རྟོགས་ལ་རྒྱས་པར་སྤྲོ་ན་དུར་ཁྲོད་དྲག་པོའི་གཞལ་ཡས་ཁང་སྤྱི་ལྟར་བསྒོམ་པར་གསུང་ཤིང་། རང་གི་ཉམས་ལེན་སྐབས་ཐོག་མར་ལྷ་མོ་སོ་སོ་མདུན་བསྐྱེད་ཀྱི་ཚུལ་དུ་བསྒོམ་ཞིང་མཆོད་བསྟོད་བཟླས་པ་དབང་བླང་བ་སོགས་ཀྱི་རྗེས་རང་ལ་བསྟིམས་ནས་རང་ལྷར་བསྒོམ་པ་སོགས་མཛད་ནའང་། རྗེས་གནང་གི་སྐབས་སུ་འདི་ཙམ་གྱིས་དོན་གྲུབ་པ་བླ་མའི་ཕྱག་བཞེས་ལྟར་བྲིས་པ་ཡིན་ལ། དེ་བཞིན་དུ་རྗེས་གནང་ལའང་རྒྱས་འབྲིང་བསྡུས་པའི་ཆིངས་སྦྱོར་ཚུལ་ཡོད་མོད། དོན་གྱི་སྙིང་པོ་སྐུ་གསུང་ཐུགས་ཀྱི་རྗེས་གནང་གཏོར་མའི་བཀའ་བསྒོ་དང་བཅས་པ་རྣམས་སུ་འདུས་པ་ཡིན་ནོ། །རིག་སྔགས་འབུམ་ཕྲག་ཀུན་གྱི་སྙིང་པོའི་ཕུལ། །སེང་གདོང་མཁའ་འགྲོའི་སྒྲུབ་ཐབས་རྗེས་གནང་ཚོགས། །མདོར་བསྡུས་ཚིག་གི་ཕྲེང་བར་སྤེལ་བའི་དགེས། །འགྲོ་ཀུན་གྲུབ་གཉིས་དགའ་སྟོན་རྒྱས་གྱུར་ཅིག །ཅེས་པའང་བྱ་བྲལ་སྤོང་བ་པ་འཇམ་དབྱངས་མཁྱེན་བརྩེའི་དབང་པོས་ཡིག་ཆ་སྔ་མའི་དོན་གྱི་བཅུད་ཕྱུངས་ཏེ་བྲིས་པའི་ལེགས་བྱས་ཀྱིས་ཚུལ་འདིའི་བཀའ་སྲོལ་མི་ནུབ་པར་དར་ཞིང་རྒྱས་པའི་རྒྱུར་སིདྡྷི་རསྟུ།། །།

[edit]

seng gdong bka' bcu'i mngon rtogs rjes gnang gi tho yig phrin las snying po/ zab gsang seng gdong snyan brgyud kyi sgrub thabs bka' bcu'i mngon rtogs rjes gnang gi tho yig phrin las snying po zhes bya ba bzhugs so/__/na mo gu ru siM ha mu kha de ba ga Ne b+h+yaH_rnam kun mchog ldan shes rab dbyings kyi yum/__/snying rje khros pa'i gar mdzad seng ge'i gdong /__/gtso 'khor sprul pa'i tshogs la gus btud nas/__/mngon par rtogs pa phrin las snying po dbye/__/de la grub pa'i dbang phyug chen po sangs rgyas mgon po nas rim par brgyud pa'i zab gsang seng gdong snyan brgyud ces grags pa la/__sgrub thabs las tshogs man ngag dang bcas pa'i bka' srol bsam gyis mi khyab par bzhugs pa las/__'dir da lta'i bar rjes gnang bka' ma chad par byon pa'i sgrub thabs kyi mngon rtogs snying por dril ba la/__dang po phyi sgrub rdo rje mkha' 'gro seng gdong ma gtso rkyang gi mngon rtogs ni/__skyabs 'gro/__sems bskyed/__tshad med bzhi bsgom pa rgyas bsdus gang rung sngon du 'gro bas/__spro na kun bzang bla ma'i rnal 'byor ni/__rang gi spyi bor pad zla'i gdan la bla ma kun bzang he ru ka yab yum sku mdog dkar po/__zhal gcig phyag gnyis skyil krung ting nge 'dzin gyi phyag rgya can/__zung 'jug bde ba chen po'i rang bzhin du bzhugs pa'i yab yum gnyis kyi thugs kar hU~M yig dkar po re re/__de las bdud rtsi'i rgyun dpag tu med pa babs pas sku lus thams cad ltems kyis khengs/__bla ma kun bzang he ru ka yab yum gyis bdag gi nad gdon sdig sgrib nyes ltung dri ma'i tshogs thams cad byang zhing dag par byin gyis rlab tu gsol/__zhes gsol ba btab pas/__bla ma yab yum gyi sbyor mtshams nas bdud rtsi dang hU~M yig dkar po'i rgyun dpag tu med pa babs/__bdag gi tshangs bug nas zhugs nad gdon sdig sgrib nyes ltung thams cad sangs kyis dag par gyur/__ces brjod cing ngag tu/__hU~M hU~M hU~M/__zhes ci nus bzlas mthar slar yang gsol ba gdab pas/__he ru ka yab yum 'od du zhu rang gi sgo gsum dang dbyer med du gyur par bsams la/__oM swa b+hA ba shud+d+haHsarba d+harmAHswa b+hA ba shud+d+ho \u0f85haM/__zhes brjod cing nyams len stong nyid la blo bzhag__/stong pa'i ngang las rdo rje srung ba'i 'khor lo dang dur khrod chen po brgyad kyis yongs su bskor ba'i dbus su/__spro na gzhal yas khang bsgom/__e e las chos 'byung gru gsum mthing nag nyis brtsegs kyi lte bar pad nyi ru dra pho mo'i gdan gyi steng du hU~M las rdo rje sngon po rtse lnga pa'i lte bar hU~M gis mtshan pa'i 'od zer spro bsdus yongs su gyur pa las/__ye shes kyi mkha' 'gro ma seng ge'i gdong pa can sku mdog mthing nag seng zhal dkar po rngam pa'i zhal can spyan gsum ljags 'dril mche ba gtsigs pa/__sma ra dang smin ma las me stag 'phro zhing lcags kyi ral pa nag po sprugs pa'i gseb nas rang 'dra'i khro mo'i tshogs dpag tu med pa spro ba/__ral pa phyed gyen du brdzes shing dug sbrul nag pos bcings pa'i steng du rus pa'i 'khor lo dang rdo rje nag po phyed pas mtshan pa/__mi mgo skam po lnga'i dbu rgyan dang /__rlon pa lnga bcu'i do shal can/__zhing chen gyi pags pa dang glang po che'i ko bas stod g.yogs shing stag lpags kyi sham thabs 'phyang ba/__thal chen gyi tshom bu dang /__khrag gi thig le dang /__zhag gi zor ris rnams kyis mtshan cing /__sbrul rigs lnga dang /__rus pa'i phyag rgya lngas brgyan pa/__phyag g.yas gser gyi rdo rje rtse lnga pa nam mkhar phyar zhing /__g.yon bdud bzhi'i khrag gis gang ba'i thod pa thugs kar 'dzin pa/__gru mo g.yon na kha T+wAM ga 'chang zhing /__zhabs g.yas brkyangs pa'i skyil krung phyed pa'i gar stabs kyis ye shes kyi me 'bar ba'i dbus na bzhugs pa'i dpral bar oM dkar po/__mgrin par AHdmar po/__thugs kar hU~M sngon po/__thugs ka'i hU~M las 'od zer 'phros pas ye shes pa dbang lha dang bcas pa oM badz+ra sa mA dzaH__dzaHhU~M ba~M hoH__ye shes pa rang la gnyis su med par thim/__dbang lhas dbang bskur mi bskyod pas dbur brgyan/__oM badz+ra DA ki ni siM ha mu kha ar+g+haM sogs kyis phyi mchod dang /__oM AHhU~M gis nang mchod phul/__gdod nas rnam dag sgrib kun nges par grol/__/'jig rten 'das kyang tshul ni sna tshogs ston/__/rgyal ba kun gyi yum gyur kun bzang mo/__/rje btsun seng gdong ma la phyag 'tshal bstod/__/ces bstod/__rang gi thugs kar nyi ma la hU~M gi mthar sngags kyi phreng ba kha dog sna tshogs pa g.yon du 'khor ba las 'od zer 'phros/_gang 'dod pa'i phrin las thams cad 'grub par bsams la/__aHkaHsaHmaHraHtsaHshaHdaHraHsaHmaHraHyaHphaTaH__ces rtsa sngags/__oM badz+ra DA ki nI siM ha mu kha hU~M hU~M phaT/__ces snying po dang /__oM dz+nyA na DA ki nI sarba sid+d+hi pha la hU~M/__zhes las sbyor gyi sngags rnams ci nus bzlas mthar/__mchod cing bstod/__bcom ldan 'das mas bdag dang sems can thams cad la mchog dang thun mong gi dngos grub ma lus pa stsal du gsol/__zhes gsol ba btab pas dbang dang dngos grub thams cad thob par bsam/__lhar snang 'od gsal gyi dbyings su thim par mos te zab gsal dbyer med phyag rgya chen po'i ngang du mnyam par bzhag__/slar yang rang nyid ye shes mkha' 'gro'i skur gyur par bsams la bsngo smon shis brjod bya'o/____/_!__gnyis pa nang sgrub seng gdong sngon mo rigs lnga'i mngon rtogs ni/__kho bos byas pa'i sgrub thabs phrin las rnam rol las shes par bya'o/____/_!_gsum pa de las 'phros pa'i nang sgrub seng gdong dmar mo gnod sbyin dbang sdud rgyal mo gtso rkyang gi mngon rtogs ni/__skyabs sems tshad med bla ma'i rnal 'byor bcas gong ltar sngon du 'gro bas/__oM swa b+hA ba sogs/__stong pa'i ngang las rdo rje srung ba'i 'khor lo dang dur khrod chen po brgyad kyis yongs su bskor ba'i dbus su e e las gter gyi bum pa brtsegs pa'i chos 'byung dmar po gru gsum bsnol ma'i nang du pad nyi nor bdag gi gdan dang bcas pa/__de'i steng du hU~M las lcags kyu hU~M dmar pos mtshan pa'i 'od zer 'phro 'dus yongs su gyur pa las/__ye shes kyi mkha' 'gro ma seng ge'i gdong pa can gnod sbyin dbang sdud rgyal mo sku mdog dmar mo seng zhal ser mo bzhad pa'i zhal can spyan gsum ljags 'dril mche ba gtsigs pa/__sma ra smin ma las me stag 'phro zhing bye'u'i ral pa dmar po thur du sprugs pas rang 'dra'i khro mo'i tshogs dpag tu med pa spro ba/__ral ba phyed gyen du brdzes shing dug sbrul nag pos bcings pa'i steng du rus pa'i 'khor lo dang rdo rje nag po phyed pas mtshan pa/__mi mgo skam po lnga'i dbu rgyan dang /__rlon pa lnga bcu'i do shal can/__zhing chen gyi pags pa dang glang po che'i ko bas stod g.yogs shing /__stag lpags kyi sham thabs 'phyang ba/__thal chen gyi tshom bu dang /__khrag gi thig le dang /__zhag gi zor ris rnams kyis mtshan zhing sbrul rigs lnga dang rus pa'i phyag rgya lngas brgyan pa/__phyag g.yas lcags kyu dmar po seng zhal gyis mtshan pa nam mkhar phyar zhing /__g.yon gter gyi ne'u le'i mgrin pa nas btsir zhing dkur brten pa/__mchan khung g.yon na nal bu'i rgyal mtshan phyar zhing zhabs gnyis pad+ma'i skyil mo krung gis ye shes kyi me 'bar ba'i klong na bzhugs pa'i sku lus thams cad spyan gyis gang ba/__de'i dpral bar oM dkar po sogs gong ltar la/__'od dpag med kyis dbur brgyan/__oM pad+ma DA kI nI siM ha mu kha ar+g+haM sogs dang /__oM AHhU~M/__khams gsum dbang sdud gnod sbyin rgyal mo ni/__/sgrub la ma bu bzhin du srung skyob mdzad/__/phrin las dbang gi dngos grub stsol mdzad pa'i/__/pad+ma mkha' 'gro ma la phyag 'tshal bstod/__/thugs kar nyi ma la hU~M dmar po'i mthar sngags phreng kha dog dmar po g.yon du 'khor ba las 'od zer 'phros pas rab 'byams dbang gi dngos grub ma lus pa thob par gyur/__ces brjod cing bsams la/__rtsa sngags yi ge bcu bzhi pa dang /__snying po/__oM pad+ma DA ki nI siM ha mu kha hU~M hU~M phaT/__ces bzla/__las sbyor dbang sdud kyi sngags rigs bzla bar 'dod na gzhung du shes/__rjes mchod bstod/__gsol gdab/__bsdu ldangs/__bsngo smon/__shis brjod rnams bya'o/____/_!_bzhi pa nang sgrub dbang sdud pad+ma mkha' 'gro rigs lnga'i mngon rtogs ni/__skyabs sems sogs gong ltar la/__stong pa'i ngang las rdo rje srung ba'i 'khor lo dang dur khrod chen po brgyad kyis yongs su bskor ba'i dbus su e e las gter chen po'i bum pa brtsegs pa'i chos 'byung bsnol ma kha sbyor gyi lte bar sna tshogs pad+ma 'dab ma brgyad pa'i dbus dang phyogs bzhir pad nyi gnod sbyin gter bdag gi gdan la/__dbus su hU~M dmar po las gsil byed hU~M dmar pos mtshan pa/__de yongs su gyur pa las dbang sdud pad+ma mkha' 'gro sku mdog dmar mo/__seng zhal ser po g.yas su phyogs shing bye ru'i ral pa gsigs pa las rang 'dra'i sprul pa spro ba/__g.yas gsil byed phyar zhing /__g.yon lhung bzed bdud rtsis bkang ba bsnams pa/__mchan khung g.yon na glegs bam 'chang zhing /__zhing dbyug 'khyud pa/__zhabs pad+ma'i skyil mo krung gis bzhugs shing /__sku la spyan bye bas mdzes pa/__shar gyi gdan la hU~M dang ral gri las gnod sbyin g.yul las rgyal ba mo sku mdog sngo nag__/seng zhal dkar po g.yas su phyogs shing gnam lcags kyi ral pa sprugs pa'i gseb nas rang 'dra'i sprul pa spro ba/__sku la bse khrab dang dbu la rmog gis brjid pa/__g.yas gnam lcags kyi ral gri phyar zhing /__g.yon mda' gzhu bsnams pa/__gru mo g.yon du mdung dar ba dan dang bcas pa bsgreng zhing bse phub 'chang ba/__zhabs g.yon brkyang pa'i gar stabs kyis bzhugs pa/__byang du hU~M dang dung chen las sde brgyad dbang sdud mkha' 'gro sku mdog dmar ljang /__seng zhal ljang nag g.yas su phyogs shing mu men gyi ral pa sprugs pa'i gseb nas ma mo thal mdog phyag mtshan rang 'dra'i sprul pa spro ba/__g.yas cang te'u 'khrol zhing /__g.yon dung chen gyi gling bu 'bud pa/__zhabs dor stabs kyis bzhengs pa/__nub tu hU~M dang myos byed las srid gsum dbang sdud mkha' 'gro ma sku mdog dmar nag seng zhal ser po g.yas su phyogs shing bye ru'i ral pa sprugs pa'i gseb nas rang 'dra'i sprul pa spro ba/__g.yas rin po che'i snod myos byed kyis gang ba dang /__g.yon zhags pa dmar po bsnams pa/__gru mo g.yon na bdud kyi khram shing bsgreng zhing zhabs gnyis dor stabs kyis bzhengs pa/__lhor hU~M dang 'bru bcud las dpal skyed dbang sgyur mkha' 'gro sku mdog ser nag__/seng zhal dmar po g.yas su phyogs shing /__gser gyi ral pa sprugs pa'i gseb nas ma mo thal mdog phyag mtshan rang 'dra'i sprul pa spro ba/__g.yas pas mtshon gyi gru gu phyar zhing /__g.yon pas 'bru bcud kyis bkang pa'i snod bsnams pa/__gru mo g.yon na ti ra'i rgyal mtshan phyar zhing rin po che'i rgyan gyis brgyan pa/__zhabs gnyis gar stabs kyis 'gying ba/__thams cad kyang zhing lpags dang glang kos stod g.yogs shing /__stag lpags kyi sham thabs grol ba/__dur khrod kyi chas kyis 'jigs par byas shing /__sbrul rigs lnga dang rus pa dang thod pa'i rgyan can/__ye shes kyi me 'bar ba'i dbus na bzhugs pa'i dpral bar oM dkar po sogs nas/__gtso mo la 'od dpag med/__rigs bzhi la rim par rnam snang /__don grub/__mi bskyod pa/__rin chen 'byung ldan rnams kyis dbur brgyan/__oM pad+ma DA ki nI sa pa ri wA ra ar+g+haM sogs dang /__oM AHhU~M/__gnod sbyin pad+ma mkha' 'gro ma/__/dbang sdud seng gdong gter gyi bdag__/rnal 'byor 'dod pa'i don kun sgrub/__/'khor dang bcas la phyag 'tshal bstod/__/so so'i thugs kar nyi gdan la hU~M yig rigs kyi kha dog gis mtshan pa'i mthar/__sngags kyi phreng ba g.yon du 'khor ba las 'od zer dzaHdang lcags kyu'i rnam par spros pas khams gsum snod bcud kyi dpal 'byor thams cad dbang du byas par bsams la/__rtsa sngags yi ge bcu bzhi pa dang /__snying po/__oM pad+ma DAki nI siM ha mu kha hU~M hU~M phaT/__ces pa ci nus su bzla/__rjes 'dra'o/____/_!_lnga pa gsang sgrub skor gsum las gcer bu khros ma nag mo'i mngon rtogs ni/__stong pa'i ngang las rdo rje srung ba'i 'khor lo dang dur khrod chen po brgyad kyis yongs su bskor ba'i dbus su/__e e las chos 'byung nag po nyis brtsegs kyi nang khrag zhag 'khrugs pa'i klong du pad nyi ro'i gdan la hU~M las gri gug nag po'i yu ba hU~M gis mtshan pa/__de las 'od zer 'phro 'dus yongs su gyur pa las ye shes kyi mkha' 'gro ma seng gdong khros ma nag mo/__sku mdog mthing nag seng zhal dkar po spyan gsum pa g.yas su phyogs shing gnam lcags kyi ral pa sprugs pa'i gseb nas mkha' 'gro dang sde brgyad kyi dmag tshogs spro ba/__ba spu'i bu ga nas me stag gi tshwa tshwa 'phro zhing /__thog ser dang khyab 'jug gi skad 'byin pa/__dbang po'i sgo nas khrag gi char 'babs pa/__g.yas rdo rje'i gri gug nam mkhar phyar zhing /__g.yon pas dgra snying zhal du gsol ba/__gru mo na bdud kyi khram shing bsgreng zhing sked la ma mo'i tshon gru dang nad rkyal 'phyang ba/__sku lus thams cad spyan gyis khengs shing gcer bu rgyan spangs pa/__zhabs g.yon brkyang pa'i dor stabs kyis ye shes kyi me 'bar ba'i dbus na bzhugs pa'i dpral bar oM sogs nas/__mi bskyod pas dbur brgyan/__oM badz+ra DA kI nI kro d+hi kA li siM ha mu kha ar+g+haM sogs/__oM AHhU~M/__bdud mo nag mo seng gdong ma/__/sha khrag la dga' srog la rngams/__/'jigs byed nag mo bdud kyi yum/__/mkha' 'gro'i dbang phyug ma la bstod/__thugs kar gnam lcags las grub pa'i 'khor lo rtsibs stong dang ldan pa'i lte bar hU~M yig gi mthar sngags phreng kha dog nag po me rlung gi rang bzhin spu gri 'dra bas bskor ba las 'od zer me rlung dang mtshon cha'i char bab pas dgra bgegs thams cad rdul du brlag par bsams la/_rtsa sngags/_phaTaHyaHraHmaHsaHraHdaHshaHtsaHraHmaHsaHkaHaH__snying po oM badz+ra DA ki nI siM ha mu kha hU~M hU~M phaT/__ces bzla/____/_!_drug pa gsang sgrub skor gsum las/__gcer bu khros nag zhal gsum phyag drug phur zhabs can ma'i mngon rtogs ni/__stong pa'i ngang las rdo rje srung ba'i 'khor lo dur khrod brgyad dang bcas pas yongs su bskor ba'i dbus su chos 'byung dmar nag khrag mtsho khol ba/__de'i lte bar pad nyi dgra bgegs kyi gdan la/__hU~M las gri gug hU~M gis mtshan pa 'od zer 'phro 'dus yongs su gyur pa las/__seng gdong khros ma nag mo sku mdog mthing nag__/sngo dkar dmar ba'i seng zhal gsum gnam lcags kyi ral pa sprugs pa las rang 'dra'i sprul pa spro ba/__zhal re re la spyan gsum gsum dang ldan zhing dbu gtsug na rta mgo ljang nag gsum zhal nam mkha'i dbyings su gdangs shing rdo rje'i rta skad 'tsher ba/__phyag drug gi g.yas gsum gri gug__/lcags kyu/__dgra s+t+wa/__g.yon gsum thod khrag__/zhing dbyug__/kha T+wAM phyar zhing /__gru mo g.yon du khram shing bsgreng ba/__gcer bu rus pa dang sbrul gyis brgyan cing stag sham can/__sku smad phur pa'i dpal gyis dgra bgegs kyi snying gar gzir zhing /__sku la ye shes kyi spyan mang pos mdzes pa/__me phung 'bar zhing 'khrugs pa'i klong na bzhugs pa/__de'i dpral bar oM sogs nas/__mi bskyod pas dbur brgyan/__oM badz+ra DA ki nI siM ha mu kha kro d+hI kA li ar+g+haM sogs dang /__oM AHhU~M/__dpal chen bdud mo nag mo ni/__/dgra bgegs srog gcod sha za mo/__/dbugs len rngam pa'i khro gzugs can/__/bdud mo nag mo khyod la bstod/__/thugs kar nyi steng hU~M nag po'i mthar sngags kyi phreng ba las 'od zer me dang mtshon cha'i tshogs dpag tu med pa 'phros pas ma rungs pa'i gdug pa can thams cad tshar bcad par bsams la/__rtsa sngags yi ge bcu bzhi pa dang /__snying po/__oM badz+ra DA ki nI siM ha mu kha kI li kI la ya hU~M hU~M phaT/__ces bzla/____/_!_bdun pa gsang sgrub skor gsum las/__gcer bu khros nag phur zhabs can zhal gcig phyag gnyis ma'i mngon rtogs ni/__stong pa'i ngang las rdo rje srung ba'i 'khor lo dur khrod brgyad dang bcas pas yongs su bskor ba'i dbus su chos 'byung dmar nag khrag mtsho khol ba/__de'i lte bar pad nyi dgra bgegs kyi gdan la/__hU~M las gri gug hU~M gis mtshan pa las 'od zer 'phros 'dus yongs su gyur pa las/__seng gdong khros ma nag mo sku mdog mthing nag__/seng zhal dkar po spyan gsum pa g.yas su gzigs shing gnam lcags kyi ral pa sprugs pa/__dbu gtsug na rta mgo ljang zhur rdo rje'i rta skad 'tsher ba/__phyag g.yas nyi ma dang /__g.yon zla ba cha lang du rdeb pa'i nyi zla gnyis kyi dbus su phur bu rtse gcig pas mtshan pa/__gcer bu rgyan spangs shing sku lus thams cad spyan gyis gang ba/__sku smad phur bu rtse gcig ma'i dpal chen ye shes kyi me 'bar ba'i dbus na bzhugs pa'i dpral bar oM sogs nas/__mi bskyod pas dbur brgyan gong ltar mchod/__dga' rab dbang phyug bu mo ni/__/mna' zan gshed ma khro mo'i sku/__/sde brgyad ma mo kun gyi gtso/__/gcer bu khros ma nag mor bstod/__/thugs kar gnam lcags kyi 'khor lo rtsibs bzhi ba'i lte bar nyi gdan la hU~M mthing nag gi mthar sngags phreng me phung mtshon cha'i rang bzhin can kha dog nag po g.yon du 'khor ba las 'od zer me dang mtshon cha'i char bab pas dgra bgegs thams cad brlag par bsams la/__rtsa sngags/__phaTaHyaHraHmaHsaHraHdaHshaHtsaHraHmaHsaHkaHaH__snying po/__oM badz+ra DA ki nI siM ha mu kha kI li kI la ya sarba big+h+nAn b+han+d+ha hU~M hU~M phaT/__ces pas/____/_!_brgyad pa yang gsang sgrub skor gsum gyi las mtha' phyir zlog chen mo'i mngon rtogs ni/__stong pa'i ngang las rdo rje srung ba'i 'khor lo dur khrod brgyad dang bcas pas yongs su bskor ba'i dbus su chos 'byung dmar nag khrag mtsho khol ba/__de'i lte bar pad nyi dgra bgegs kyi gdan la/__hU~M las gri gug hU~M gis mtshan pa 'od zer 'phro 'dus yongs su gyur pa las/__seng gdong khros ma nag mo phyir zlog pa chen mo sku mdog mthing nag__/seng zhal dkar po spyan gsum pa'i zhal gnam du gdangs shing gnam lcags kyi ral pa sbrul nag gis spyi bor bcings pa'i lhag ma thur du sprugs pa las phur bu dang thogs ser gyi char 'bebs pa/__phyag g.yas gnam lcags kyi gri gug nam mkhar phyar zhing /__g.yon bdud kyi khram shing khra bo sgo brgyad dang ldan pa thur du bsdigs pa las sde brgyad kyi dmag tshogs 'gyed pa/__sku stod la dar nag po'i stod g.yogs dang /__sku smad la zhing gi g.yang gzhi dkris pa/__zhabs gnyis 'cham stabs kyis du ba me rlung 'tshubs mar 'khyil ba'i dbus na bzhugs pa'i sku'i gnas dang ba spu'i bu ga thams cad du phyir zlog sngags kyi mtshon cha me stag 'phro bas gang ba/__de'i dpral bar oM sogs nas/__mi bskyod pas dbur brgyan/__gong ltar mchod/__rdo rje sngags kyi mtshon 'chang bas/__/ma rungs gdug pa'i tshogs rnams kun/__/phyir zlog gzir zhing rlag mdzad pa'i/__/las byed mkha' 'gro la phyag 'tshal bstod/__/sku'i cha las sngags kyi 'od zer rab tu 'bar bas gdug pa can thams cad phyir zlog cing tshar bcad par bsams la/__phaTaHyaHraHmaHsaHraHdaHshaHtsaHraHmaHsaHkaHaH__oM pra t+yAM gi rag+hr-i du g+hr-i du dz+wa ra g+hr-i du hU~M phaTaH__yak+mo phreM b+h+yoHzlog__/lok+mo phreM b+h+yoHzlog__/DA ki ma tri ka phreM b+h+yoHzlog__/ces bzla/____/_!_dgu pa las mtha' rgyas seng gdong dmar mo tshe sgrub rgyal mo'i mngon rtogs ni/__stong pa'i ngang las rdo rje srung ba'i 'khor lo dur khrod brgyad kyis bskor ba'i dbus su e e las chos 'byung gru gsum dmar po nyis brtsegs kyi lte _bar pad nyi ru dra'i gdan la hU~M dmar po las tshe bum hU~M dmar pos mtshan pa/__de las 'od zer 'phros 'dus yongs su gyur pa las DA ki seng gdong 'chi bdag 'joms ma sku mdog dmar mo/__/seng zhal ser po spyan gsum dang ldan pa g.yas su phyogs shing dbu skra bye ru'i ral pa sprugs pa'i gseb nas me stags dang phur bu'i tshwa tshwa 'phro ba/__dur khrod 'jigs pa'i chas kyis brgyan cing /__phyag gnyis mnyam bzhag gi steng na 'chi med tshe'i bum pa bsnams pa/__gru mo g.yon na kha T+wAM ga bsgreng zhing zhabs gnyis pa zla'i skyil mo krung gis ye shes kyi me 'bar ba'i dbus na bzhugs pa'i dpral bar oM sogs nas/__snang ba mtha' yas kyis dbur brgyan/__oM pad+ma DA ki nI siM ha mu kha ar+g+haM sogs dang /__oM AHhU~M/__'chi med tshe yi dngos grub stsol/__/nad gdon ma lus zhi bar mdzad/__/dpal ldan mkha' 'gro seng ge'i gdong /__/'chi bdag 'joms ma khyod la bstod/__/thugs kar nyi ma la hU~M dmar po'i mthar sngags phreng kha dog sna tshogs g.yon du 'khor ba las 'od zer 'phros/__'khor 'das kyi tshe bcud thams cad bsdus nas bdag la thim pas 'chi med tshe'i dngos grub thob par bsams la/__rtsa sngags yi ge bcu bzhi pa dang /__oM badz+ra A khu She hU~M b+h+rU~M nr-i dzaH__pad+ma DA ki nI siM ha mu kha sarba sid+d+hi pha la hoH__oM badz+ra A yu She ma ma karma khug khug dzaHdzaHku ru ku ru swA hA/__zhes bzla/____/_!_bcu pa mkha' 'gro ma seng ge'i gdong can 'byung bzhi bcud sdud kyi tshe sgrub zab mo'i mngon rtogs ni/__stong pa'i ngang las rdo rje srung ba'i 'khor lo dur khrod brgyad dang bcas pas bskor ba'i dbus su/__e e las chos 'byung gru gsum ser po nyis brtsegs kyi lte bar pad nyi ru dra'i gdan la hU~M ser po las tshe bum hU~M ser pos mtshan pa/__de las 'od zer 'phro 'dus yongs su gyur pa las/__'chi med ye shes kyi mkha' 'gro ma sku mdog ser mo/__seng zhal dmar po spyan gsum dang ldan pa g.yon du phyogs shing dbu skra gser gyi ral pa gsig pa'i gseb nas me stag dang phur bu'i tshwa tshwa 'phro ba/__dur khrod 'jigs pa'i chas kyis brgyan cing phyag gnyis kyis 'chi med tshe'i bum pa thugs kar 'dzin pa/__gru mo g.yon na kha T+wAM ga bsgreng zhing zhabs dor stabs kyis ye shes kyi me 'bar ba'i dbus na bzhugs pa'i dpral bar oM sogs nas/__'od dpag med kyis dbur brgyan/__gong ltar mchod cing bstod/__thugs kar nyi dkyil la hU~M dmar po'i mthar sngags phreng kha dog sna tshogs g.yon du 'khor ba las 'od zer 'phros/__phyogs bzhi nas seng gdong ma dkar ser dmar ljang ba rang gi sku mdog dang mthun pa'i 'chi med tshe'i bum pa bsnams pa dpag tu med pas 'byung ba chen po chu dang /__sa dang /__me dang /__rlung gi nus bcud dang /__'khor 'das kyi dge mtshan ma lus pa bsdus te bdag la thim pas 'byung bzhi'i dwangs ma stobs su gyur te 'chi med tshe'i dngos grub thob par bsams la/__rtsa sngags yi ge bcu bzhi pa dang /__aHkaHsaHmaHraHtsaHshaHphaTaH__zhes bzla'o/____/_!_de ltar mngon rtogs rigs dgu'i rjes su gnang ba ni/__sbyor ba stegs bu'i dbus su maN+Dal bskyed chog dang mthun par bri/__ma grub na lha'i sku mdog dang mthun pa'i tshon phung ngam/__me tog gi tshom bu bkod/__de'i khar many+dzi'i steng du rjes gnang gi gtor ma zur gsum lha'i sku mdog dang mthun pa la theb kyus bskor ba dar gdugs dang /__sku tsaka yod na btsugs pa'i mdun du bum pa bcud ldan dang /__'bul gtor/__mthar chu gnyis sngon 'gro'i nyer spyod g.yon bskor du bsham/__tshe sgrub gnyis la bum pa'i g.yas g.yon du tshe ril dang tshe chang yang bshams la bzlas pa'i skabs tshe bcud bstim/__dngos gzhi bdag mdun bum gsum dang /__rjes gnang gi chings rnams kho bos byas pa'i seng gdong rigs lnga'i sgrub rjes la kha spos pas 'grub la/__tshe sgrub gnyis kyi skabs/__thugs kyi rjes gnang tshar nas/__tshe'i ril bu dang bdud rtsi 'di dag kyang zhal du bzhes pas rtsa khams thams cad bdud rtsi'i dngas mas khengs nas rdo rje sems dpa'i tshe dang lang tsho la mnga' brnyes pa'i mos pa mdzod/__ces brda sbyar la sngags brjod bzhin du tshe ril dang tshe chang sbyin nas gtor ma'i bka' bsgo sogs bya'o/__/'di rnams kyi mngon rtogs la rgyas par spro na dur khrod drag po'i gzhal yas khang spyi ltar bsgom par gsung shing /__rang gi nyams len skabs thog mar lha mo so so mdun bskyed kyi tshul du bsgom zhing mchod bstod bzlas pa dbang blang ba sogs kyi rjes rang la bstims nas rang lhar bsgom pa sogs mdzad na'ang /__rjes gnang gi skabs su 'di tsam gyis don grub pa bla ma'i phyag bzhes ltar bris pa yin la/__de bzhin du rjes gnang la'ang rgyas 'bring bsdus pa'i chings sbyor tshul yod mod/__don gyi snying po sku gsung thugs kyi rjes gnang gtor ma'i bka' bsgo dang bcas pa rnams su 'dus pa yin no/__/rig sngags 'bum phrag kun gyi snying po'i phul/__/seng gdong mkha' 'gro'i sgrub thabs rjes gnang tshogs/__/mdor bsdus tshig gi phreng bar spel ba'i dges/__/'gro kun grub gnyis dga' ston rgyas gyur cig__/ces pa'ang bya bral spong ba pa 'jam dbyangs mkhyen brtse'i dbang pos yig cha snga ma'i don gyi bcud phyungs te bris pa'i legs byas kyis tshul 'di'i bka' srol mi nub par dar zhing rgyas pa'i rgyur sid+d+hi rastu//__//