JKW-KABUM-09-TA-007-003

Previous Text Back to Volume PageNext Text

དཔལ་གསང་བ་འདུས་པ་འཇམ་དཔལ་རྡོ་རྗེའི་མངོན་རྟོགས་གཏོར་ཆོག་བརྒྱུད་པའི་གསོལ་འདེབས་བཅས།

Wylie title	dpal gsang ba 'dus pa 'jam dpal rdo rje'i mngon rtogs gtor chog brgyud pa'i gsol 'debs bcas
Location	mkhyen brtse'i bka' 'bum Volume 9, sde tshan 7, Text 3, Pages 331-338 (Folios 6a2 to 9b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. dpal gsang ba 'dus pa 'jam dpal rdo rje'i mngon rtogs gtor chog brgyud pa'i gsol 'debs bcas. In 'jam dbyangs mkhyen brtse'i dbang po'i bka' 'bum, Vol. 9: 331-338. Khams sde dge rdzong sar dgon: Rdzong sar blo gros phun tshogs, 2020.
Genre	Torma-offering Rituals - gtor chog
Cycle	དཔལ་གསང་བ་འདུས་པ་ (dpal gsang ba 'dus pa)
Deity	'jam dpal rdo rje
Colophon	།ཅེས་འཇམ་རྡོར་མངོན་རྟོགས་བརྒྱུད་པའི་གསོལ་འདེབས་དང་བཅས་པ་འདི་ཡང་དགེ་སློང་ཚུལ་ཁྲིམས་རྒྱ་མཚོ་ལགས་ཀྱི་ཉམས་བཞེས་སུ་བྱ་བྲལ་བས་བཀྲ་ཤིས་པའི་ཆོས་སྡེར་སུག་བྲིས་སུ་བཏབ་པའོ།
	ces 'jam rdor mngon rtogs brgyud pa'i gsol 'debs dang bcas pa 'di yang dge slong tshul khrims rgya mtsho lags kyi nyams bzhes su bya bral bas bkra shis pa'i chos sder sug bris su btab pa'o

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །དཔལ་གསང་བ་འདུས་པ་འཇམ་དཔལ་རྡོ་རྗེའི་མངོན་རྟོགས་གཏོར་ཆོག་བརྒྱུད་པའི་གསོལ་འདེབས་བཅས་བཞུགས་སོ། །ཨོཾ་སྭ་སྟི། དཀྱིལ་འཁོར་ཀུན་གྱི་གཙོ་བོ་འཇམ་དཔལ་དབྱངས། དབྱེར་མེད་བླ་མ་དམ་པར་གུས་བཏུད་ནས། །གང་དེའི་སྒྲུབ་ཐབས་ཉུང་གསལ་གོ་བདེ་བ། །དང་པོའི་ལས་ཅན་དོན་དུ་བཤད་ཀྱིས་ཉོན། །དེ་ལ་འདིར་འཇམ་དཔལ་རྡོ་རྗེ་ལྷ་བཅུ་དགུའི་དཀྱིལ་འཁོར་དུ་དབང་ཐོབ་ཅིང་དམ་ཚིག་དང་སྡོམ་པར་ལྡན་པའི་རྣལ་འབྱོར་པས་འདི་ཉིད་ཀྱི་སྒྲུབ་ཐབས་ཉམས་སུ་ལེན་པའི་ཚུལ་ནི། སྟན་བདེ་བ་ལ་འདུག་སྟེ་སྐྱབས་འགྲོ་སེམས་བསྐྱེད་ནི། བདག་དང་འགྲོ་བ་ནམ་མཁའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ༴ དམ་པའི་ཆོས་རྣམས་ལ༴ འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ལན་གསུམ། བདག་གིས་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བཅོམ་ལྡན་འདས་འཇམ་དཔལ་རྡོ་རྗེའི་བསྒོམ་བཟླས་ཉམས་སུ་བླང་བར་བགྱིའོ། །རང་སྐད་ཅིག་གི་འཇམ་དཔལ་རྡོ་རྗེར་གསལ་བའི་ཐུགས་ཀའི་མཾ་ཡིག་སེར་པོ་དེ་ལས་འོད་ཟེར་འཕྲོས་པས་རང་བཞིན་གྱི་གནས་ནས་འཇམ་དཔལ་རྡོ་རྗེའི་དཀྱིལ་འཁོར་གྱི་ལྷ་ཚོགས་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ན་མོ་གུ་རུ་བྷྱཿ ན་མོ་མཉྫུ་ཤྲཱི་བཛྲ་ས་པ་རི་ཝཱ་ར་བྷྱཿ དཀོན་མཆོག་གསུམ་ལ་བདག་སྐྱབས་མཆི། སོགས་ལན་གསུམ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་དང་བྲལ་བའི་བཏང་སྙོམས་ལ་གནས་པར་གྱུར་ཅིག །ཨོཾ་ཤུནྱཱ་ཏ་ཛྙཱ་ན་བཛྲ་སྭ་བྷཱ་ཝ་ཨདྨ་ཀོ྅ཧཾ། སྟོང་པའི་ངང་ལས་ཀུན་བཟང་ཡབ་ཡུམ་གྱི་ངོ་བོ་ཆོས་འབྱུང་གི་ནང་དུ་རྣམ་སྣང་ཞུ་བ་ལས་བྱུང་བའི་གཞལ་ཡས་ཁང་གི་ནང་དུ་པདྨ་རྒྱས་པ་དང་། ཟླ་བའི་གདན་གྱི་སྟེང་དུ་མཾ་ལས་རལ་གྲི་མཾ་གྱིས་མཚན་པ་དེ་ལས་འོད་ཟེར་འཕྲོས་སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་རང་ཉིད་འཇམ་དཔལ་རྡོ་རྗེ་སྐུ་མདོག་གསེར་བཙོ་མ་ལྟ་བུ་ཞལ་གསུམ་ཕྱག་དྲུག་པ། རྩ་ཞལ་སེར་པོ། གཡས་སྔོ། གཡོན་དཀར་པོ། ཕྱག་དང་པོ་གཉིས་ཀྱིས་ཡུམ་ལ་འཁྱུད་པ། གཡས་འོག་མས་རལ་གྲི་དང་མདའ། གཡོན་འོག་མས་ཨུཏྤལ་དང་གཞུ་འཛིན་པ། རིན་པོ་ཆེས་བརྒྱན་པ། མཚན་དང་དཔེ་བྱད་ཀྱིས་སྤྲས་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། དེའི་པང་ན་ཡུམ་འཇམ་དཔལ་རྡོ་རྗེ་ཞལ་གསུམ་ཕྱག་དྲུག་མ་སྐུ་མདོག་ཕྱག་མཚན་ཡབ་དང་འདྲ་བས་འཁྱུད་པ། གཉིས་ཀ་གཉིས་སུ་མེད་པའི་སྦྱོར་བ་ལ་གནས་ཤིང་སྤྲུལ་པའི་འོད་ཟེར་འཕྲོ་བ། ཡབ་ཡུམ་གཉིས་ཀའི་གནས་སུ་ཟླ་བའི་གདན་ལ་མིག་ཏུ་ཀྵིཾ་ལས་ས་སྙིང་དཀར་པོ། རྣ་བར་ཛིཾ་ལས་ཕྱག་རྡོར་སྔོན་པོ། སྣར་པཾ་ལས་ནམ་སྙིང་སེར་པོ། ལྕེར་ལཾ་ལས་འཇིག་རྟེན་དབང་ཕྱུག་དམར་པོ། ལུས་ཀཾ་ལས་སྒྲིབ་སེལ་ལྗང་གུ། ཡིད་སཾ་ལས་ཀུན་བཟང་སྔོན་པོ། སྙིང་གར་ཧཱུྃ་ལས་ཐུགས་རྡོ་རྗེ་སྔོན་པོ། མགྲིན་པར་ཨཱཿལས་གསུང་རྡོ་རྗེ་དམར་པོ། དཔྲལ་བར་ཨོཾ་ལས་སྐུ་རྡོ་རྗེ་དཀར་པོ། རང་གི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་རལ་གྲི་སེར་པོ་ལམ་གྱིས་མཚན་པ། ཐུགས་རྡོ་རྗེའི་ཐུགས་ཀའི་ཧཱུྃ་ལས་ཐུགས་རྡོ་རྗེ་དཔག་ཏུ་མེད་པ་སྤྲོས། སེམས་ཅན་ཐམས་ཅད་ཀྱི་དོན་བྱས། སླར་འདུས་མདུན་གྱི་ནམ་མཁར་བཞུགས་པར་གྱུར། ཡང་འོད་ཟེར་འཕྲོས་པས་ཡེ་ཤེས་པ་དཔག་ཏུ་མེད་པ་ཨོཾ་བཛྲ་ས་མཱ་ཛཿ ཨོཾ་བཛྲ་པུཥྤེ་སོགས་ནས། ཤབྡའི་བར་གྱིས་མཆོད། ཡེ་ཤེས་པ་དང་ཐུགས་རྡོ་རྗེ་གཉིས་ཀ་རང་གི་སྙིང་གའི་ཐུགས་རྡོ་རྗེ་ལ་ཐིམ་པས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་རང་བཞིན་དུ་གྱུར། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨདྨ་ཀོ྅ཧཾ། མགྲིན་པའི་གསུང་རྡོ་རྗེའི་ཨཱཿལས་གསུང་རྡོ་རྗེ་དཔག་ཏུ་མེད་པ་སྤྲོས། སེམས་ཅན་གྱི་དོན་བྱས། སླར་ཚུར་འདུས་མདུན་གྱི་ནམ་མཁར་བཞུགས་པར་གྱུར། ཡང་འོད་ཟེར་འཕྲོས་པས་ཡེ་ཤེས་པ་དཔག་ཏུ་མེད་པ་ཨོཾ་བཛྲ་ས་མཱ་ཛཿ གོང་བཞིན་མཆོད། ཡེ་ཤེས་པ་དང་གསུང་རྡོ་རྗེ་གཉིས་ཀ་རང་གི་སྙིང་གའི་གསུང་རྡོ་རྗེ་ལ་ཐིམ་པས་དེ་བཞིན་གཤེགས་པ་ཐམས་ཅད་ཀྱི་གསུང་གི་རང་བཞིན་གྱུར། ཨོཾ་སརྦ་ཏ་ཐཱ་ག་ཏ་ཝཱཀྐ་བཛྲ་སྭ་བྷཱ་ཝ་ཨདྨ་ཀོ྅ཧཾ། ཡང་སྤྱི་བོའི་སྐུ་རྡོ་རྗེའི་ཨོཾ་ལས་སྐུ་རྡོ་རྗེ་དཔག་ཏུ་མེད་པ་སྤྲོས། སེམས་ཅན་གྱི་དོན་བྱས་མདུན་གྱི་ནམ་མཁར་བཞུགས་པར་གྱུར། ཡང་འོད་ཟེར་འཕྲོས་པས་ཡེ་ཤེས་པ་དཔག་ཏུ་མེད་པ་ཨོཾ་བཛྲ་ས་མཱ་ཛཿ སྔར་བཞིན་མཆོད། ཡེ་ཤེས་པ་དང་སྐུ་རྡོ་རྗེ་གཉིས་ཀ་སྤྱི་བོའི་སྐུ་རྡོ་རྗེ་ལ་ཐིམ་པས། དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེའི་རང་བཞིན་དུ་གྱུར། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ཡང་རང་གི་སྙིང་གའི་མཾ་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿ སྔར་བཞིན་མཆོད། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མི། ཞེས་གསོལ་བ་བཏབ་པས་རིན་པོ་ཆེའི་བུམ་པ་བདུད་རྩིས་གང་བས་དབང་བསྐུར། དྲི་མ་དག་ཆུ་ལྷག་མ་ཡར་ལུད་པ་ལས་ཡབ་ཡུམ་གཉིས་ལ་མི་བསྐྱོད་པས་དབུར་བརྒྱན། ཨོཾ་མཉྫུ་བཛྲ་ཨརྒྷཾ་ནས་ཤབྡའི་བར། ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨདྨ་ཀོ྅ཧཾ། ཨོཾ་ཨཱཿཧཱུྃ་ཧ་ཧོ་ཧྲཱི། ཨོཾ་སརྦ་ཏ་ཐཱ་ག་ཏ་ཨ་མྲྀ་ཏ་བཛྲ་སྭ་བྷཱ་ཝ་ཨདྨཱ་ཀོ྅ཧཾ། མི་བསྐྱོད་པ་ནི་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །གསང་བའི་དབྱིངས་ལ་ཕྱག་འཚལ་ལོ། །ཨོཾ་སརྦ་ཏ་ཐཱ་ག་ཏ་པཱུ་ཏི་བཛྲ་སྭ་བྷཱ་ཝཱ་ཨཱདྨ་ཀོ྅ཧཾ། རང་གི་ཐུགས་ཀར་མཾ་ཡིག་གི་མཐར་སྔགས་ཀྱིས་བསྐོར་བ་ལས་འོད་ཟེར་འཕྲོས། སེམས་ཅན་གྱི་དོན་བྱས་ཚུར་འདུས་རང་ལ་ཐིམ་པས་ཚེ་དང་བསོད་ནམས་དང་ཡེ་ཤེས་ཐམས་ཅད་རྒྱས་པར་གྱུར། ཨོཾ་ཨཱཿམཱཾ་ཧཱུྃ། ཞེས་ཅི་ནུས་བཟླས་མཐར། བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱིས་བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། མྱུར་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་འཇམ་དཔལ་རྡོ་རྗེའི་གོང་འཕང་ཚེ་འདི་ཉིད་ལ་ཐོབ་པར་བྱིན་གྱིས་བརླབ་ཏུ་གསོལ། རང་གི་སྙིང་ག་ནས་འོད་ཟེར་འཕྲོས་པས་ཆོས་འབྱུང་གཞལ་ཡས་ཁང་དང་བཅས་པ་རང་ཉིད་ལ་ཐིམ། རང་ཉིད་ཐུགས་ཀའི་མཾ་ལ་ཐིམ། དེ་ཡང་ནམ་མཁའ་ལ་འཇའ་ཡལ་བ་ལྟར་གྱུར། དེའི་ངང་ལས་རང་ཉིད་འཇམ་དཔལ་རྡོ་རྗེའི་སྐུར་གྱུར། དགེ་བ་འདི་ཡིས་མྱུར་དུ་བདག །འཇམ་དཔལ་རྡོ་རྗེ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་དགོད་པར་ཤོག །ཅེས་སོགས་བསྔོ་སྨོན་རྒྱས་པར་བྱའོ། །ཐུན་མཚམས་སུ་གཏོར་མ་འབུལ་བར་འདོད་ན། གཏོར་མ་ཟླུམ་པོ་མཐེབ་ཀྱུས་བསྐོར་བ་ཆུ་ཆང་གིས་སྦྱངས། ཨོཾ་ཨཱཿབིགྷྣན་ཏ་ཀྲྀ་ཏ་ཧཱུྃ་ཕཊ། ཨོཾ་སྭ་བྷཱ་ཝ་ཤུདྡྷ་སརྦ་དྷརྨ་སྭ་བྷཱ་ཝ་ཤུདྡྷོ་྅ཧཾ། སྟོང་པའི་ངང་ལས་ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བའི་ནང་དུ་གཏོར་མ་ཤ་ལྔ་བདུད་རྩི་ལྔ་ཞུ་བ་ལས་བྱུང་བའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ་གྱིས་བྱིན་གྱིས་བརླབ། ཨོཾ་མཉྫུ་བཛྲ་ས་པ་རི་ཝཱ་ར་ཨི་དམ་བ་ལིང་བྷུཉྫ་ཁ་ཁ་ཁཱ་ཧི་ཁཱ་ཧི། ལན་གསུམ། མཚན་སྔགས་སྔོན་དུ་འགྲོ་བའི། ཨརྒྷཾ་ནས་ཤབྡའི་བར་མཚན་སྔགས་ཀྱི་མཐར། ཨོཾ་ཨཱཿཧཱུྃ་བཏགས་པས་ནང་མཆོད་ཕུལ། མི་བསྐྱོད་པ་ནི་ཡེ་ཤེས་ཆེ། སོགས་ཀྱི་མཐར། འཇམ་དཔལ་རྡོ་རྗེའི་ལྷ་ཚོགས་རྣམས། །མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །གི་བར་ཡིག་བརྒྱ་ལན་གསུམ་གྱིས་ལྷག་ཆད་ཁ་བསྐང་། མ་འབྱོར་པ་དང་སོགས། རྟེན་ཡོད་ན་བརྟན་བཞུགས་དང་། མེད་ན་ཨོཾ་ཁྱེད་ཀྱི་སེམས་ཅན་དོན་ཀུན་མཛད། །ཅེས་སོགས་ཀྱི་མཐར། བཛྲ་མཱུཿ ཡེ་ཤེས་པ་གཤེགས། དམ་ཚིག་པ་རང་ལ་ཐིམ་པར་བསམ། དགེ་བ་བསྔོ་བ་སོགས་བྱའོ། ། ༈ འཇམ་པའི་རྡོ་རྗེ་སངས་རྒྱས་ཡེ་ཤེས་ཞབས། །དཔལ་བདེ་བ་དང་བི་མ་ལ་གུབྟ། །རིན་ཆེན་རྣམ་གཉིས་རི་སུལ་རྣལ་འབྱོར་མ། །གཉན་ལོ་ཆོས་རྒྱན་རྣམས་ལ་གསོལ་བ་འདེབས། །གོང་མ་ལྔ་དང་དམ་པ་ཀུན་དགའ་གྲགས། །བཀྲ་ཤིས་དཔལ་དང་ཀུན་དགའ་བསོད་ནམས་ཞབས། །རྡོ་དཔལ་ཀཱིཏྟི་ཤྲཱི་གངས་པ་དང་། །ས་བཟང་ཁུ་དབོན་རྣམས་ལ་གསོལ་བ་འདེབས། །ངོར་ཆེན་མུས་ཆེན་རྒྱལ་ཚབ་ཀུན་མཁྱེན་རྗེ། །རཏྣ་ཝརྔྷ་དཀོན་མཆོག་ལྷུན་གྲུབ་དང་། །སངས་རྒྱས་སེང་གེ་ནམ་མཁའ་དཔལ་བཟང་པོ། །མཆོག་ལེགས་ཁུ་དབོན་རྣམས་ལ༴ སེམས་དཔའ་ཆེན་པོ་མཁྱེན་རབ་བསྟན་འཛིན་བཟང་། །འགྲོ་བའི་བླ་མ་མཁྱེན་རབ་བྱམས་པའི་དཔལ། །གདམས་པའི་བཀའ་བབས་རྩ་བའི་བླ་མ་སོགས། །དངོས་བརྒྱུད་ཡོངས་འཛིན་རྣམས་ལ༴ དེ་ལྟར་གུས་པས་གསོལ་བ་བཏབ་པའི་མཐུས། །ཕུང་ཁམས་སྐྱེ་མཆེད་གདན་གསུམ་ཚངས་བའི་ལྷར། །ངེས་པར་ཤེས་ནས་ལུས་རྟེན་འདི་ཉིད་ལ། །འཇའ་ལུས་མངོན་དུ་འགྱུར་བར་བྱིན་གྱིས་རློབས། །ཅེས་འཇམ་རྡོར་མངོན་རྟོགས་བརྒྱུད་པའི་གསོལ་འདེབས་དང་བཅས་པ་འདི་ཡང་དགེ་སློང་ཚུལ་ཁྲིམས་རྒྱ་མཚོ་ལགས་ཀྱི་ཉམས་བཞེས་སུ་བྱ་བྲལ་བས་བཀྲ་ཤིས་པའི་ཆོས་སྡེར་སུག་བྲིས་སུ་བཏབ་པའོ། ། ༈ བརྒྱུད་འདེབས་ཁ་སྐོང་ནི། སངས་རྒྱས་སེང་གེ་ནམ་མཁའ་དཔལ་བཟང་པོ། །དཔལ་ལྡན་དོན་གྲུབ་རྣམས་ལ་གསོལ་བ་འདེབས། །ཤེར་འབྱུང་ཡེ་ཤེས་བཟང་པོ་བུདྡྷའི་ཞབས། །བསྟན་འཛིན་ལྷུན་གྲུབ་མཁན་ཆེན་མངྒ་ལ། །སངས་རྒྱས་ཡེ་ཤེས་ཀུན་བློ་ནམ་མཁའི་མཚན། །རྩ་བའི་བླ་མ་རྣམས་ལ་གསོལ་བ་འདེབས། །དེ་ལྟར་གུས་པས་སོགས་སྦྲེལ་ལོ། མངྒ་ལཾ།།

[edit]

'jam rdor mngon rtogs gtor chog brgyud pa'i gsol 'debs/ @#/_/dpal gsang ba 'dus pa 'jam dpal rdo rje'i mngon rtogs gtor chog brgyud pa'i gsol 'debs bcas bzhugs so/__/oM swa sti/__dkyil 'khor kun gyi gtso bo 'jam dpal dbyangs/__dbyer med bla ma dam par gus btud nas/__/gang de'i sgrub thabs nyung gsal go bde ba/__/dang po'i las can don du bshad kyis nyon/__/de la 'dir 'jam dpal rdo rje lha bcu dgu'i dkyil 'khor du dbang thob cing dam tshig dang sdom par ldan pa'i rnal 'byor pas 'di nyid kyi sgrub thabs nyams su len pa'i tshul ni/__stan bde ba la 'dug ste skyabs 'gro sems bskyed ni/__bdag dang 'gro ba nam mkha' dang mnyam pa'i sems can thams cad dus 'di nas bzung ste ji srid byang chub snying po la mchis kyi bar du dpal ldan bla ma dam pa rnams la skyabs su mchi'o/__/rdzogs pa'i sangs rgyas bcom ldan 'das rnams la=__dam pa'i chos rnams la=__'phags pa'i dge 'dun rnams la skyabs su mchi'o/__/lan gsum/__bdag gis sems can thams cad kyi don du rdzogs pa'i sangs rgyas kyi go 'phang thob par bya/__de'i ched du bcom ldan 'das 'jam dpal rdo rje'i bsgom bzlas nyams su blang bar bgyi'o/__/rang skad cig gi 'jam dpal rdo rjer gsal ba'i thugs ka'i maM yig ser po de las 'od zer 'phros pas rang bzhin gyi gnas nas 'jam dpal rdo rje'i dkyil 'khor gyi lha tshogs la sangs rgyas dang byang chub sems dpa'i tshogs kyis bskor ba oM badz+ra sa mA dzaH__na mo gu ru b+h+yaH__na mo many+dzu shrI badz+ra sa pa ri wA ra b+h+yaH__dkon mchog gsum la bdag skyabs mchi/__sogs lan gsum/__sems can thams cad bde ba dang bde ba'i rgyu dang ldan par gyur cig__/sdug bsngal dang sdug bsngal gyi rgyu dang bral bar gyur cig__/sdug bsngal med pa'i bde ba dang mi 'bral bar gyur cig__/nye ring chags sdang dang bral ba'i btang snyoms la gnas par gyur cig__/oM shun+yA ta dz+nyA na badz+ra swa b+hA wa ad+ma ko\u0f85haM/__stong pa'i ngang las kun bzang yab yum gyi ngo bo chos 'byung gi nang du rnam snang zhu ba las byung ba'i gzhal yas khang gi nang du pad+ma rgyas pa dang /__zla ba'i gdan gyi steng du maM las ral gri maM gyis mtshan pa de las 'od zer 'phros sems can gyi don byas/__tshur 'dus yongs su gyur pa las rang nyid 'jam dpal rdo rje sku mdog gser btso ma lta bu zhal gsum phyag drug pa/__rtsa zhal ser po/__g.yas sngo/__g.yon dkar po/__phyag dang po gnyis kyis yum la 'khyud pa/__g.yas 'og mas ral gri dang mda'/__g.yon 'og mas ut+pal dang gzhu 'dzin pa/__rin po ches brgyan pa/__mtshan dang dpe byad kyis spras pa/__zhabs rdo rje'i skyil krung gis bzhugs pa/__de'i pang na yum 'jam dpal rdo rje zhal gsum phyag drug ma sku mdog phyag mtshan yab dang 'dra bas 'khyud pa/__gnyis ka gnyis su med pa'i sbyor ba la gnas shing sprul pa'i 'od zer 'phro ba/__yab yum gnyis ka'i gnas su zla ba'i gdan la mig tu k+ShiM las sa snying dkar po/__rna bar dziM las phyag rdor sngon po/__snar paM las nam snying ser po/__lcer laM las 'jig rten dbang phyug dmar po/__lus kaM las sgrib sel ljang gu/__yid saM las kun bzang sngon po/__snying gar hU~M las thugs rdo rje sngon po/__mgrin par AHlas gsung rdo rje dmar po/__dpral bar oM las sku rdo rje dkar po/__rang gi thugs kar zla ba'i dkyil 'khor gyi steng du ral gri ser po lam gyis mtshan pa/__thugs rdo rje'i thugs ka'i hU~M las thugs rdo rje dpag tu med pa spros/__sems can thams cad kyi don byas/__slar 'dus mdun gyi nam mkhar bzhugs par gyur/__yang 'od zer 'phros pas ye shes pa dpag tu med pa oM badz+ra sa mA dzaH__oM badz+ra puSh+pe sogs nas/__shab+da'i bar gyis mchod/__ye shes pa dang thugs rdo rje gnyis ka rang gi snying ga'i thugs rdo rje la thim pas de bzhin gshegs pa thams cad kyi thugs kyi rang bzhin du gyur/__oM sarba ta thA ga ta tsit+ta badz+ra swa b+hA wa ad+ma ko\u0f85haM/__mgrin pa'i gsung rdo rje'i AHlas gsung rdo rje dpag tu med pa spros/__sems can gyi don byas/__slar tshur 'dus mdun gyi nam mkhar bzhugs par gyur/__yang 'od zer 'phros pas ye shes pa dpag tu med pa oM badz+ra sa mA dzaH__gong bzhin mchod/__ye shes pa dang gsung rdo rje gnyis ka rang gi snying ga'i gsung rdo rje la thim pas de bzhin gshegs pa thams cad kyi gsung gi rang bzhin gyur/__oM sarba ta thA ga ta wAk+ka badz+ra swa b+hA wa ad+ma ko\u0f85haM/__yang spyi bo'i sku rdo rje'i oM las sku rdo rje dpag tu med pa spros/__sems can gyi don byas mdun gyi nam mkhar bzhugs par gyur/__yang 'od zer 'phros pas ye shes pa dpag tu med pa oM badz+ra sa mA dzaH__sngar bzhin mchod/__ye shes pa dang sku rdo rje gnyis ka spyi bo'i sku rdo rje la thim pas/__de bzhin gshegs pa thams cad kyi sku rdo rje'i rang bzhin du gyur/__oM sarba ta thA ga ta kA ya badz+ra swa b+hA wa Ad+ma ko\u0f85haM/__yang rang gi snying ga'i maM las 'od zer 'phros pas dbang gi lha rigs lnga 'khor dang bcas pa oM badz+ra sa mA dzaH__sngar bzhin mchod/__oM sarba ta thA ga ta a b+hi Shiny+tsa tu mi/__zhes gsol ba btab pas rin po che'i bum pa bdud rtsis gang bas dbang bskur/__dri ma dag chu lhag ma yar lud pa las yab yum gnyis la mi bskyod pas dbur brgyan/__oM many+dzu badz+ra ar+g+haM nas shab+da'i bar/_oM sarba ta thA ga ta pU dza badz+ra swa b+hA wa ad+ma ko\u0f85haM/__oM AHhU~M ha ho hrI/__oM sarba ta thA ga ta a mr-i ta badz+ra swa b+hA wa ad+mA ko\u0f85haM/__mi bskyod pa ni ye shes che/__/rdo rje dbyings ni mkha' chen po/__/rdo rje gsum mchog dkyil 'khor gsum/__/gsang ba'i dbyings la phyag 'tshal lo/__/oM sarba ta thA ga ta pU ti badz+ra swa b+hA wA Ad+ma ko\u0f85haM/__rang gi thugs kar maM yig gi mthar sngags kyis bskor ba las 'od zer 'phros/__sems can gyi don byas tshur 'dus rang la thim pas tshe dang bsod nams dang ye shes thams cad rgyas par gyur/__oM AHmAM hU~M/__zhes ci nus bzlas mthar/__bde bar gshegs pa thams cad kyi sku gsung thugs yon tan phrin las thams cad kyis bdag dang sems can thams cad la byin gyis brlab tu gsol/__myur du phyag rgya chen po mchog gi dngos grub 'jam dpal rdo rje'i gong 'phang tshe 'di nyid la thob par byin gyis brlab tu gsol/__rang gi snying ga nas 'od zer 'phros pas chos 'byung gzhal yas khang dang bcas pa rang nyid la thim/__rang nyid thugs ka'i maM la thim/__de yang nam mkha' la 'ja' yal ba ltar gyur/__de'i ngang las rang nyid 'jam dpal rdo rje'i skur gyur/__dge ba 'di yis myur du bdag__/'jam dpal rdo rje 'grub gyur nas/__/'gro ba gcig kyang ma lus pa/__/de yi sa la dgod par shog__/ces sogs bsngo smon rgyas par bya'o/__/thun mtshams su gtor ma 'bul bar 'dod na/__gtor ma zlum po mtheb kyus bskor ba chu chang gis sbyangs/__oM AHbig+h+nan ta kr-i ta hU~M phaT/__oM swa b+hA wa shud+d+ha sarba d+harma swa b+hA wa shud+d+ho \u0f85haM/__stong pa'i ngang las a las ye shes kyi ka pA la yangs shing rgya che ba'i nang du gtor ma sha lnga bdud rtsi lnga zhu ba las byung ba'i ye shes kyi bdud rtsi'i rgya mtsho chen por gyur/__oM AHhU~M ha ho hrIH__lan gsum gyis byin gyis brlab/__oM many+dzu badz+ra sa pa ri wA ra i dam ba ling b+huny+dza kha kha khA hi khA hi/__lan gsum/__mtshan sngags sngon du 'gro ba'i/__ar+g+haM nas shab+da'i bar mtshan sngags kyi mthar/__oM AHhU~M btags pas nang mchod phul/__mi bskyod pa ni ye shes che/__sogs kyi mthar/__'jam dpal rdo rje'i lha tshogs rnams/__/mchod sbyin gtor ma 'di bzhes la/__/zhes pa nas/__yid la 'dod pa kun 'grub shog__/gi bar yig brgya lan gsum gyis lhag chad kha bskang /__ma 'byor pa dang sogs/__rten yod na brtan bzhugs dang /__med na oM khyed kyi sems can don kun mdzad/__/ces sogs kyi mthar/__badz+ra mUH__ye shes pa gshegs/__dam tshig pa rang la thim par bsam/__dge ba bsngo ba sogs bya'o/____/__!__'jam pa'i rdo rje sangs rgyas ye shes zhabs/__/dpal bde ba dang bi ma la gub+ta/__/rin chen rnam gnyis ri sul rnal 'byor ma/__/gnyan lo chos rgyan rnams la gsol ba 'debs/__/gong ma lnga dang dam pa kun dga' grags/__/bkra shis dpal dang kun dga' bsod nams zhabs/__/rdo dpal kIt+ti shrI gangs pa dang /__/sa bzang khu dbon rnams la gsol ba 'debs/__/ngor chen mus chen rgyal tshab kun mkhyen rje/__/rat+na war+ng+ha dkon mchog lhun grub dang /__/sangs rgyas seng ge nam mkha' dpal bzang po/__/mchog legs khu dbon rnams la=__sems dpa' chen po mkhyen rab bstan 'dzin bzang /__/'gro ba'i bla ma mkhyen rab byams pa'i dpal/__/gdams pa'i bka' babs rtsa ba'i bla ma sogs/__/dngos brgyud yongs 'dzin rnams la=__de ltar gus pas gsol ba btab pa'i mthus/__/phung khams skye mched gdan gsum tshangs ba'i lhar/__/nges par shes nas lus rten 'di nyid la/__/'ja' lus mngon du 'gyur bar byin gyis rlobs/__/ces 'jam rdor mngon rtogs brgyud pa'i gsol 'debs dang bcas pa 'di yang dge slong tshul khrims rgya mtsho lags kyi nyams bzhes su bya bral bas bkra shis pa'i chos sder sug bris su btab pa'o/____/_!_brgyud 'debs kha skong ni/__sangs rgyas seng ge nam mkha' dpal bzang po/__/dpal ldan don grub rnams la gsol ba 'debs/__/sher 'byung ye shes bzang po bud+d+ha'i zhabs/__/bstan 'dzin lhun grub mkhan chen mang+ga la/__/sangs rgyas ye shes kun blo nam mkha'i mtshan/__/rtsa ba'i bla ma rnams la gsol ba 'debs/__/de ltar gus pas sogs sbrel lo/__/