JKW-KABUM-09-TA-001-009

Previous Text Back to Volume PageNext Text

སྒྲོལ་དཀར་ཡིད་བཞིན་འཁོར་ལོའི་ཐུན་མོང་མ་ཡིན་པའི་རྗེས་གནང་གི་ཆོ་ག་གསལ་བར་བཀོད་པ་འཆི་མེད་གྲུབ་པའི་བདུད་རྩི།

Wylie title	sgrol dkar yid bzhin 'khor lo'i thun mong ma yin pa'i rjes gnang gi cho ga gsal bar bkod pa 'chi med grub pa'i bdud rtsi
Location	mkhyen brtse'i bka' 'bum Volume 9, sde tshan 1, Text 9, Pages 49-74 (Folios 25a1 to 37b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	འཇམ་དབྱངས་མཁྱེན་བརྩེའི་དབང་ཕྱུག་ ('jam dbyangs mkhyen brtse'i dbang phyug)
Citation	'jam dbyangs mkhyen brtse'i dbang po. sgrol dkar yid bzhin 'khor lo'i thun mong ma yin pa'i rjes gnang gi cho ga gsal bar bkod pa 'chi med grub pa'i bdud rtsi. In 'jam dbyangs mkhyen brtse'i dbang po'i bka' 'bum, Vol. 9: 49-74. Khams sde dge rdzong sar dgon: Rdzong sar blo gros phun tshogs, 2020.
Genre	Longevity Rituals - tshe sgrub  ·  Permission to Invoke (anujñā) - rjes gnang
Cycle	སྒྲོལ་དཀར་ཡིད་བཞིན་འཁོར་ལོ་ཐུན་མོང་མ་ཡིན་ (sgrol dkar yid bzhin 'khor lo thun mong ma yin)
Deity	sgrol ma yid bzhin 'khor lo
Colophon	།ཅེས་སྒྲོལ་མ་དཀར་མོ་ཐུན་མོང་མ་ཡིན་པ་འོད་ཟེར་དྲུག་སྦྲགས་ཀྱི་རྗེས་སུ་གནང་བའི་ཚུལ་གསལ་བར་བཀོད་པ་འདི་ནི། འཇམ་དབྱངས་མཁྱེན་བརྩེའི་དབང་ཕྱུག་གིས་མཛད་པའི་རྗེས་གནང་ཐུན་མོང་པའི་ཡིག་ཆ་ལ། སྙན་བརྒྱུད་ཞལ་ཤེས་ཀྱི་ཟིན་ཐོ་རྣམས་ཀྱིས་བརྒྱན་ཏེ་རྗེ་བླ་མ་རྣམས་ཀྱིས་ཇི་ལྟར་ཕྱག་ལེན་མཛད་པ་ལ་གཞི་བྱས། ཚིག་གི་མཐའ་བསྐྱེད་ཚུལ་མི་འགལ་བས་ཟུར་བརྒྱན་ཏེ་ཉམས་སུ་བླང་བདེ་བར། ཁྱབ་བདག་རྡོ་རྗེ་སེམས་དཔའི་ངོ་བོར་བཞུགས་པ་མཁན་ཆེན་ཐམས་ཅད་མཁྱེན་པ་བྱམས་པ་ཀུན་དགའ་བསྟན་འཛིན། རྒྱུད་སྡེ་རྒྱ་མཚོའི་མངའ་བདག་རྡོ་རྗེ་འཆང་རིན་ཆེན་བློ་གསལ་བསྟན་སྐྱོང་། འཇམ་མགོན་བླ་མ་བྱམས་པ་ངག་དབང་བསྟན་འཛིན་སྙན་གྲགས། ཟབ་རྒྱས་གདམས་པའི་གཏེར་མཛོད་རྡོ་རྗེ་འཛིན་པ་ཆེན་པོ་ངག་དབང་ལེགས་གྲུབ་རྣམས་ལས་ཚུལ་འདིའི་བཀའ་དྲིན་ཅི་རིགས་པ་ཐོབ་ཅིང་། གཞན་ཡང་ངེས་པར་ཐམས་ཅད་མཁྱེན་པ་ཀརྨ་ངག་དབང་ཡོན་ཏན་རྒྱ་མཚོ་དང་། རྗེ་བླ་མ་དཀོན་མཆོག་བསྟན་པ་རབ་རྒྱས་སོགས་ལས་སྒྲོལ་མ་དཀར་མོའི་ཆོས་ཚུལ་མང་དུ་ཐོས་པའི་རྒྱལ་ཁམས་ཉུལ་བའི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་སྦྱར་བའི་དགེ་བས་ཟབ་གསང་སྙན་བརྒྱུད་རིན་པོ་ཆེའི་བསྟན་པ་བསྐལ་པ་རྒྱ་མཚོར་འཚོ་ཞིང་གཞེས་པའི་རྒྱུར་གྱུར་ཅིག་དཔེ་འདི་ཚར་ལུགས་ཐུན་མོང་མ་ཡིན་པའི་བརྒྱུད་འཛིན་ལས་གཞན་ལ་བཀའ་རྒྱ་དམ་པར་བྱ་བ་གཅེས་སོ།།
	ces sgrol ma dkar mo thun mong ma yin pa 'od zer drug sbrags kyi rjes su gnang ba'i tshul gsal bar bkod pa 'di ni/__'jam dbyangs mkhyen brtse'i dbang phyug gis mdzad pa'i rjes gnang thun mong pa'i yig cha la/__snyan brgyud zhal shes kyi zin tho rnams kyis brgyan te rje bla ma rnams kyis ji ltar phyag len mdzad pa la gzhi byas/__tshig gi mtha' bskyed tshul mi 'gal bas zur brgyan te nyams su blang bde bar/__khyab bdag rdo rje sems dpa'i ngo bor bzhugs pa mkhan chen thams cad mkhyen pa byams pa kun dga' bstan 'dzin/__rgyud sde rgya mtsho'i mnga' bdag rdo rje 'chang rin chen blo gsal bstan skyong /__'jam mgon bla ma byams pa ngag dbang bstan 'dzin snyan grags/__zab rgyas gdams pa'i gter mdzod rdo rje 'dzin pa chen po ngag dbang legs grub rnams las tshul 'di'i bka' drin ci rigs pa thob cing /__gzhan yang nges par thams cad mkhyen pa karma ngag dbang yon tan rgya mtsho dang /__rje bla ma dkon mchog bstan pa rab rgyas sogs las sgrol ma dkar mo'i chos tshul mang du thos pa'i rgyal khams nyul ba'i bya bral ba 'jam dbyangs mkhyen brtse'i dbang pos sbyar ba'i dge bas zab gsang snyan brgyud rin po che'i bstan pa bskal pa rgya mtshor 'tsho zhing gzhes pa'i rgyur gyur cig dpe 'di tshar lugs thun mong ma yin pa'i brgyud 'dzin las gzhan la bka' rgya dam par bya ba gces so

Tibetan Text

Wylie

[edit]

༄༅། །སྒྲོལ་དཀར་ཡིད་བཞིན་འཁོར་ལོའི་ཐུན་མོང་མ་ཡིན་པའི་རྗེས་གནང་གི་ཆོ་ག་གསལ་བར་བཀོད་པ་འཆི་མེད་གྲུབ་པའི་བདུད་རྩི་ཞེས་བྱ་བ་བཞུགས་སོ། །དྲན་པས་ཚེ་དང་ཡེ་ཤེས་མཆོག་སྟེར་བའི། །བླ་མ་ཡིད་བཞིན་འཁོར་ལོར་གུས་བཏུད་ནས། །གང་དེའི་ཐུན་མོང་མིན་པའི་རྗེས་གནང་ཚུལ། །འཆི་མེད་གྲུབ་པའི་བདུད་རྩིའི་དགའ་སྟོན་སྦྱིན། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། གནས་དབེན་ཞིང་ཡིད་དང་མཐུན་པར་ཡར་ངོའི་ཚེས་བརྒྱད་ལ་སོགས་པའི་དུས་ཁྱད་པར་ཅན་གྱི་ཚེ། སྟེགས་ཀྱི་ཁར་མཉྫིའི་སྟེང་དུ་མཎྜ་ལར་པདྨ་དཀར་པོ་འདབ་བརྒྱད་ཀྱི་ལྟེ་བར་ཟླ་གདན་ལ་ཚོམ་བུ་དཀར་པོ་གཅིག་བཀོད། མདུན་དུ་གཏོར་མ་དཀར་ཟླུམ་དང་། ཆོ་ག་རྒྱས་པ་ལྟར་ན་ཆ་གསུམ་ཡང་བཤམ། མཐའ་སྐོར་དུ་མཚམས་འཛིན་མེ་ཏོག་དང་བཅས་པའི་ཆུ་གཉིས་སྔོན་འགྲོའི་ཉེར་སྤྱོད། སློབ་དཔོན་གྱི་མདུན་དུ་རྡོར་དྲིལ། བུམ་པ་བཅུད་ལྡན། མེ་ཏོག་གི་སྣོད། སློབ་མ་ལ་དགོས་པའི་མཎྜལ་མེ་ཏོག་སོགས་སྟ་གོན་བྱའོ། །གཉིས་པ་ལ། སློབ་དཔོན་གྱི་བྱ་བ་དང་། སློབ་མའི་བྱ་བ་གཉིས་ལས། དང་པོ་ནི། རྒྱས་པར་སྤྲོ་ན་སྒྲུབ་ཅིང་མཆོད་པའི་ཆོ་ག་བདུད་རྩིའི་རོལ་མཚོ་ལས་ཇི་ལྟར་འབྱུང་བ་བཞིན་གཏོར་མ་ཆ་གསུམ་གྱི་བར་ཉམས་སུ་བླང་། དེ་ཙམ་མི་ནུས་ན། ཐོག་མར་བརྒྱུད་འདེབས་སྔོན་དུ་འགྲོ་བས་མཆོད་པ་རྣམས། ཨོཾ་བཛྲ་ཡཀྵ་ཧཱུྃ་གིས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཨོཾ་ལས་བྱུང་བའི་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་ལ་སོགས་པ་མཆོད་རྫས་བསམ་གྱིས་མི་ཁྱབ་པ་དྭངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་གྱུར། ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤབྡའི་བར་གྱིས་བརླབ། དྷརྨཱ་ར་ཎི་ལན་གསུམ་གྱིས་བྱིན་དབབ། བདག་བསྐྱེད་སྐྱབས་འགྲོ་ནས་ཐུན་མཚམས་ཀྱི་ལྷར་ལྡང་བའི་བར་འཇམ་མགོན་ཀུན་དགའ་བློ་གྲོས་ཀྱི་སྒྲུབ་ཐབས་ལྟར་བྱ། མདུན་བསྐྱེད་ཚོམ་བུ་བསང་སྦྱང་། སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཏཱྃ་ཡིག་དཀར་པོ་ནས། འོད་དཔག་མེད་ཀྱིས་དབུར་བརྒྱན། ཞེས་པའི་བར་བདག་བསྐྱེད་བཞིན་ལ་རང་ཉིད་ཅེས་པའི་ཚིག་དོར། བདག་ལ་མངོན་པར་དབང་བསྐུར་བ། ཞེས་པའི་ཚབ་ཏུ་འདི་ལ་ཞེས་བསྒྱུར། མཆོད་པ་བསང་སྦྱང་བྱིན་རླབས་སྔོན་དུ་འགྲོ་བས། ཨོཾ་སརྦ་ཏ་ཐཱ་ག་ཏ་ཨཱཪྻཱ་ཏཱ་རཱ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་སྭཱ་ཧཱ་ནས། ཤབྡའི་བར་གྱིས་མཆོད། དྷརྨཱ་ར་ཎི་ཏས་རོལ་མོ་དབུལ། འཁོར་བ་ལས་སྒྲོལ་སོགས་ཀྱིས་བསྟོད། གཏོར་མ་ཆབ་ཀྱིས་བྲན་ལ་བསང་སྦྱང་། སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་བའི་ནང་དུ་ཨོཾ་ཞུ་བ་ལས་བྱུང་བའི་གཏོར་མ་ལྷ་ཡི་བདུད་རྩི་ཁ་དོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར་པར་བསམས་ལ། ཨོཾ་ཨཿཧཱུྃ་གསུམ་གྱིས་བརླབ། ནམ་མཁའ་མཛོད་ཀྱི་ཕྱག་རྒྱ་དང་བཅས། ན་མསྶ་མནྟ་བུདྡྷ་པོ་དྷི་སཏྭཱ་ནཱཾ། ཨ་པྲ་ཏི་ཧ་ཏ་ཤཱ་ས་ནཱ་ནཱཾ། ཧེ་ཧེ་བྷ་ག་ཝ་ཏཱི་མ་ཧཱ་སཏཱ། སརྦ་བུདྡྷ་ཨ་བ་ལོ་ཀི་ཏེ། མཱ་བི་ལམྦ། མཱ་བི་ལམྦ། ཨི་དཾ་བ་ལིཾ་གྲྀཧྞཱ་པ་ཡ་གྲྀཧྞཱ་པ་ཡ། ཧཱུྃ་ཧཱུྃ་སརྦ་བི་སཉྩ་རེ་སྭཱ་ཧཱ། ལན་གསུམ་གྱིས་ཕུལ། གོང་བཞིན་མཆོད་ཅིང་བསྟོད། །བཅོམ་ལྡན་འདས་མས་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། །ཞེས་གསོལ་བ་གདབ། མདུན་བསྐྱེད་ཀྱི་ཐུགས་ཀར་ཟླ་བའི་རང་བཞིན་གྱི་འཁོར་ལོ་དཀར་པོ་སོགས་ནས། འོད་ཟེར་སྣ་ལྔའི་ཕྲེང་བ་གཡས་སྐོར་དུ་ཡོད་པ། དེ་ལས་འོད་ཟེར་འཕྲོས་པས་བདག་དང་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་ཐམས་ཅད་ཞི་བར་བྱས། །ཚེ་དང་བསོད་ནམས་ཡེ་ཤེས་ལ་སོགས་པ་གོང་ནས་གོང་དུ་འཕེལ་ཞིང་རྒྱས་པར་གྱུར་པར་བསམས་ལ་སྔགས་སྤེལ་ཚིག་ཅན་ཅི་ནུས་བཟླས་མཐར་གོང་བཞིན་གསོལ་བ་བཏབ། བུམ་པའི་ཁར་དུང་ཆོས་དྲི་བཟང་གི་ཆུས་གང་བའི་སྟེང་གཟུངས་ཐག་རྡོ་རྗེ་བཞག་ལ། བསང་སྦྱང་། སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ལྟོ་བ་ལྡིར་བ། ཞབས་ཞུམ་པ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ལྷ་རྫས་ཀྱི་གོས་ཀྱིས་མགུལ་པ་དཀྲིས་ཤིང་། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་ནང་དུ་པྃ་ལས་པདྨ་དཀར་པོ་འདབ་མ་བརྒྱད་པའི་སྟེང་དུ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཏཱྃ་ཡིག་དཀར་པོ་སོགས་ནས། བསྟོད་པའི་བར་མདུན་བསྐྱེད་བཞིན་བྱ། བུམ་ནང་གི་ལྷ་ཡི་ཐུགས་ཀར་ཟླ་བའི་རང་བཞིན་གྱི་འཁོར་ལོ་སོགས་ནས། འོད་ཟེར་སྣ་ལྔའི་ཕྲེང་བ་གཡས་སྐོར་དུ་ཡོད་པ། རང་གི་སྙིང་ག་ནས་སྔགས་ཀྱི་ཕྲེང་བ་གཟུངས་ཐག་ལ་བརྟེན་ནས་སོང་བས་བུམ་ནང་གི་ལྷ་ཡི་ཐུགས་ཀར་ཕོག་པས་ཐུགས་རྒྱུད་བསྐུལ་ཏེ། ཐུགས་ཀའི་འཁོར་ལོ་སྔགས་ཕྲེང་དང་བཅས་པ་དང་། སྐུའི་ཆ་ཤས་ཐམས་ཅད་ནས་ཀྱང་བདུད་རྩིའི་རྒྱུན་དཔག་ཏུ་མེད་པ་བབས་པས་བུམ་པ་གང་བར་གྱུར་པར་བསམས་ལ། སྔགས་སྤེལ་ཚིག་ཅན་སྟོང་ཕྲག་གཅིག་བཟླ། །གོང་བཞིན་མཆོད་ཅིང་བསྟོད་ལ་གསོལ་བ་གདབ། ཡིག་བརྒྱ་ལན་གསུམ་གྱིས་ལྷག་ཆད་ཁ་བསྐང་། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། ཨོཾ་ཨཱཿཧཱུྃ་གིས་མཆོད་ཡོན་ཕུལ་བའི་རྐྱེན་གྱིས་ཡེ་ཤེས་དཀོན་མཆོག་ལྷུན་གྲུབ་སོགས་ཀྱི་ཡིག་ཆར་དམ་ཡེ་དབྱེར་མེད་འོད་ཞུ་མཛད་སྣང་། པ་གཤེགས། དམ་ཚིག་པ་འོད་དུ་ཞུ་བ་ལས་བུམ་པའི་ཆུ་བདུད་རྩིའི་རང་བཞིན་དུ་གྱུར། ཞེས་བརྗོད་ཅིང་དུང་ཆོས་ཀྱི་ཆུ་བུམ་ནང་དུ་ཕུལ། གཉིས་པ་སློབ་མ་ལ་བྱ་བ་ནི། དབང་གིས་སྨིན་ཅིང་སྣོད་དང་ལྡན་པའི་སློབ་མ་རྣམས། གཞན་རྒྱུད་སྡེ་འོག་མ་གསུམ་ལ་འདི་བཞིན་ནོ། །ཁྲུས་བྱས། ཕྱག་དང་ཡོན་ཕུལ་ཏེ་རང་རང་གི་གྲལ་ལ་སྙིམས་པ་མེ་ཏོག་དང་བཅས་ཏེ་འཁོད་པ་ལ། སློབ་དཔོན་གྱིས། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ། སོགས་ཀུན་སློང་དང་ཀུན་སྤྱོད་གསལ་འདེབས་སྔོན་དུ་འགྲོ་བས། ངེས་འབྱུང་དང་བྱང་ཆུབ་སེམས་ཀྱི་གཏམ་ཅི་རིགས་པ་དང་། བཤད་བྱའི་ཆོས་མདོ་སྔགས་ཀྱི་བྱེ་བྲག །རྒྱུད་སྡེའི་དབྱེ་བསྡུ་སོགས་ཇི་ལྟར་འཚམས་པ་བཤད་རྗེས། ལོ་རྒྱུས་ཀྱི་ཁྱད་པར། ད་ལམ་འདིར་སྐབས་སུ་བབས་པ་ནི། སློབ་དཔོན་ཆེན་པོ་ངག་གི་དབང་ཕྱུག་གྲགས་པས། ཆོས་སྤྱོད་དབང་པོ་ཐུལ་བ་ནི། །འཁོར་བ་རུ་ནི་ཇི་སྲིད་གནས། །དེ་སྲིད་བསོད་ནམས་ལ་སོགས་ཚོགས། །བྱང་ཆུབ་སྒྲུབ་བྱེད་རབ་ཏུ་སྐྱེ། །འཁོར་བར་སྲོག་ལས་གཅེས་པ་ནི། །ཅི་ཡང་ཡོད་པ་མ་མཐོང་སྟེ། །དེ་བས་མྱུར་དུ་ཐབས་མང་པོས། འཆི་བ་སླུ་བ་ཀུན་ཏུ་སྤྱད། །ཅེས་གསུངས་པ་ལྟར་ཆོས་སྒྲུབ་པའི་དལ་འབྱོར་གྱི་ལུས་རྟེན་ཡུན་རིང་དུ་འཚོ་བའི་ཐབས་ཚུལ་ལྷུར་ལེན་པ་ཤིན་ཏུ་གལ་ཆེ་བ་ཡིན་ཞིང་། དེ་ལའང་། ལུས་དང་ངག་གི་ལས་ཀྱིས་ཕྱི། །བསམ་གཏན་ལས་ཀྱིས་ནང་གི་ཡིན། །ནོར་བུ་སྨན་སོགས་ཕྱི་ཡིན་ཏེ། །རྣལ་འབྱོར་ནུས་པ་ནང་གིའོ། །ཞེས་གསུངས་པ་ལྟར་ཕྱི་ནོར་བུ་རིན་པོ་ཆེའི་རིགས་དང་བཅུད་ལེན་གྱི་སྨན་སྦྱོར་སོགས་ལ་བརྟེན་པ་དང་། ནང་རྣལ་འབྱོར་པའི་བསམ་གཏན་གྱི་ནུས་པས་ཚེ་སྲིང་བའི་ཐབས་གཉིས་སུ་ཡོད་པ་ལས། འདིར་ནང་གི་རྣལ་འབྱོར་མཆོག་ཏུ་གྱུར་པ་མཚན་འཛིན་པའམ། སྐུའི་སྣང་བརྙན་དྲན་པ་ཙམ་གྱིས་ཀྱང་དུས་མ་ཡིན་པའི་འཆི་བའི་འཇིགས་པ་ལས་སྐྱོབ་ཅིང་། ཚེ་དང་བསོད་ནམས་དང་ཡེ་ཤེས་སོགས་གོང་ནས་གོང་དུ་འཕེལ་ཞིང་རྒྱས་པ་ལ་བརྟེན་ནས་མཐར་ཐུག་རྫོགས་པའི་སངས་རྒྱས་ཀྱི་གོ་འཕང་ཡང་དཀའ་བ་མེད་པར་འཐོབ་ནུས་པའི་ལྷ་ཁྱད་པར་ཅན། བྱ་རྒྱུད་པདྨའི་རིགས་ཀྱི་ཡུམ་དུ་གཏོགས་པ་རྗེ་བཙུན་སྒྲོལ་མ་དཀར་མོ་ཡིད་བཞིན་གྱི་འཁོར་ལོའི་སྐོར་ཡིན། དེ་ལའང་ཐུན་མོང་དང་ཐུན་མོང་མ་ཡིན་པའི་བཀའ་སྲོལ་མི་འདྲ་བ་དུ་མ་ཞིག་ཡོད་པ་ལས། ད་ལམ་འདིར་སྐབས་སུ་བབ་པ་ནི། སྙིང་རྗེ་ཆེན་པོ་བ་རི་ལོ་ཙཱ་བ་རིན་ཆེན་གྲགས་ནས་རིམ་པར་བརྒྱུད་པའི་སྒྲོལ་དཀར་འོད་ཟེར་དྲུག་སྦྲགས་ཞེས་ཐུན་མོང་མ་ཡིན་པའི་རྗེས་སུ་གནང་བ་ཟབ་མོ་འབུལ་བའི་སྐབས་ཡིན། དེ་ལའང་ཐོག་མར་ཡིད་ཆེས་ཤིང་ཁུངས་བཙུན་པའི་ཕྱིར་ལོ་རྒྱུས་ཅུང་ཟད་ཅིག་སྙན་དུ་གསོལ་ན། རྗེ་བཙུན་སྒྲོལ་མའི་ཡེ་ཤེས་ཀྱི་སྐུས་རྗེས་སུ་བཟུང་བའི་སློབ་དཔོན་ཆེན་པོ་ངག་གི་དབང་ཕྱུག་གྲགས་པས་རིང་པོར་འཚོ་བའི་ཐབས་ཚུལ་གྱི་ཆོ་ག་མ་ལུས་པ་ཕྱོགས་གཅིག་ཏུ་བསྡུས་པ་འཆི་བདག་སླུ་བའི་རྟོག་པ་ཞེས་བྱ་བའི་བསྟན་བཅོས་ཆེན་པོ་ཞིག་མཛད་པ་ལས། སྒྲོལ་མ་དཀར་མོའི་སྒྲུབ་པའི་ཐབས་ཚུལ་འདི་ཉིད་ཀྱང་བྱུང་བ་ཡིན་ཞིང་། འདིའི་མན་ངག་རྣམས་སློབ་དཔོན་ཉིད་ལ་སྒྲོལ་མས་དངོས་སུ་གནང་སྐད། དེ་ལ་རྩོད་པའི་དུས་ཀྱི་ཐམས་ཅད་མཁྱེན་པ་བླ་མ་རྡོ་རྗེ་གདན་པས་གསན། སྒྲུབ་ཐབས་ཀྱང་མང་དུ་མཛད། དེ་ལ་སྙིང་རྗེའི་དབང་ཕྱུག་འཕགས་མཆོག་ཕྱག་ན་པདྨོའི་རྣམ་འཕྲུལ་ཐུགས་རྗེ་ཆེན་པོ་དང་ལྡན་པ་བླ་མ་བ་རི་ལོ་ཙཱ་བ་རིན་ཆེན་གྲགས་ཀྱི་གསན། སྒྲུབ་ཐབས་མང་པོ་བོད་དུ་བསྒྱུར། དེ་ལ་བླ་མ་གླེ་ནག་པས་གསན། སྒྲུབ་པ་ལོ་དྲུག་ཏུ་མཛད་པས་མངོན་སུམ་དུ་ཞལ་གཟིགས་ཏེ་ཆོས་ཀྱི་བདུད་རྩི་བཞེས། འདིས་ཇོ་བོ་རྗེ་ལས་བརྒྱུད་པའི་མན་ངག་ཀྱང་སྤྱན་སྔ་རིན་པོ་ཆེ་ལས་གསན་ཞེས་ལོ་རྒྱུས་ཁ་ཅིག་ལས་འབྱུང་། དེ་ལ་དགེ་བའི་བཤེས་གཉེན་སྒྲེ་པ་རིན་པོ་ཆེས་གསན་པ་ཡིན་ཏེ། ཁོང་གིས་དང་པོར་ཐོས་བསམ་མཛད་པའི་དུས་སུ་ལ་སྟོད་སྟག་རི་པ་ཡིན་ཟེར་བའི་རྣལ་འབྱོར་པ་ཅིག་ལ་ལག་རིས་བསྟན་པས། ཇོ་བོ་བཙུན་པ་ཁྱོད་ལ་ཆོས་ཀྱི་ལས་འཕྲོ་གཤའ་མ་ཅིག་འདུག་པ་ལ་ཚེ་ལ་ལོང་མི་འདུག་སྟེ། ལོ་གསུམ་ལས་མི་ཐུབ་པར་འདུག་ཟེར་བ་དང་། སྔར་ནས་ཁོང་རང་གི་རྨི་ལམ་དུ་ལྟས་ངན་ཡང་ཡང་བྱུང་བ་གཉིས་འཛོམ་པས། ཚེ་འདི་ལ་ཐུགས་གཤའ་མར་དབྱུང་སྟེ་ལོ་གཅིག་ཐུབ་བམ་ཅི་ཙམ་ཐུབ་ཐུབ་ཀྱི་ཚེ་ལྷག་མ་འདི་ལ་ཆོས་ལག་ལེན་བཤའ་མར་ཐེབས་པ་ཅིག་བྱ། དེ་ལ་ཐོག་མར་གདམས་ངག་ཁྱད་པར་ཅན་སྟོན་པའི་དགེ་བའི་བཤེས་གཉེན་ཅིག་བཙལ་དགོས་དགོངས་ནས་གསན་པ་འཕྲོ་བཅད་ནས་དབུས་སུ་བྱོན་པའི་ལམ་ཁར་གཞུའི་མཁར་གོང་དུ་བླ་མ་གླེ་ནག་པ་དང་མཇལ་ནས་ལོ་རྒྱུས་བྱས་པས། བྱང་ཆུབ་སྒྲུབ་པ་ལ་ལམ་གྱི་བར་ཆད་སེལ་བའི་ཐབས་ཁྱད་པར་ཅན་ང་ལ་ཡོད་ཀྱི་སྟོན་པ་ཁྱོད་ཐུགས་བདེ་འབོལ་གྱིས་ཐོང་ཞིག་གསུངས་ནས་འདིའི་སྒྲུབ་ཐབས་གདམས་ངག་དང་བཅས་པ་མ་ལུས་པ་གནང་། ད་ཁྱོད་ཀྱིས་གཞན་དུ་མ་འགྲོ་བར་འདི་རང་དུ་སྡོད་ལ་སྒོམས་ཤིག་གསུངས་ནས། ལུང་པ་དེ་རང་གི་ལུང་ལག་མཁར་ལུང་བྱ་བ་ཅིག་གི་ཕུར་སྒྲུབ་པ་རྩེ་གཅིག་ཏུ་མཛད་པས་ཟླ་བ་བཅུ་གཅིག་ལོན་ཙ་ན་རྗེ་བཙུན་མས་ཞལ་མངོན་སུམ་དུ་གཟིགས་ནས་ཁྱོད་ཀྱིས་ལོ་དྲུག་ཅུ་ཙམ་ཐུབ། སེམས་ཅན་ལ་ཕན་ཐོགས་པར་ཡོང་གསུངས། དེ་ནས་ཕྱིས་དགུང་ལོ་དྲུག་ཅུ་ལོན་པའི་དུས་སུ་རྗེ་བཙུན་མ་ལ་གསོལ་བ་བཏབ་པས། ངའི་སྐུ་ཅིག་བཞེངས་དང་ལོ་བཅུ་ཙམ་སྡོད་པར་འདུག་གི་གསུངས་ནས་རས་བྲིས་ཞིག་བཞེངས་སྐད། དགུང་ལོ་བདུན་ཅུ་བཞེས་པའི་དུས་སུ་གསོལ་བ་བཏབ་པས་ཡང་ངའི་སྐུ་གཅིག་བཞེངས་དང་ལོ་བཅུ་ཐུབ་པར་འདུག་གསུངས་ནས་ལུགས་མ་ཞིག་བཞེངས་སྐད། སྐུ་དེ་གཉིས་བྱིན་རླབས་ཆེ་བར་གྲགས་ཏེ། རས་བྲིས་དེ་ཕྱིས་ར་སྒྲེང་ན་བཞུགས་སྐད། དགུང་ལོ་བརྒྱད་ཅུ་བཞེས་པའི་དུས་རྗེ་བཙུན་མ་ལ་གསོལ་བ་བཏབ་པས། ད་རུང་ང་ཡི་སྐུ་ཞིག་བཞེངས་ན་ལོ་མང་དུ་ཐུབ་པར་འདུག་གསུངས་པ་ལ། ཁོང་རང་གི་བཞུགས་སའི་མདུན་གྱི་གྱང་ལོགས་ལ་རི་མོ་ཞིག་བཞེངས་སྐད། དེ་ནས་ལོ་བཅོ་ལྔའི་བར་དུ་བཞུགས་ཏེ། ཡོངས་སུ་རྫོགས་པ་དགུང་ལོ་དགུ་བཅུ་རྩ་ལྔར་བཞུགས་པར་གྲགས་སོ། །འདིས་སྤྱན་སྔ་རིན་པོ་ཆེ་ལས་ཇོ་བོ་ནས་བརྒྱུད་པའི་གདམས་པ་རྫོགས་པར་གསན་པས་བརྒྱུད་པའི་ཆུ་བོ་གཉིས་འདྲེས་སུ་གྱུར། དེ་ལ་སྟོན་མཆོག་ཐུབ་པའི་དབང་པོས་མ་འོངས་པ་ན་རི་བྲག་ཚང་ཚིག་དུ་ཆོས་སྨྲ་བའི་དགེ་སློང་འཚོ་བྱེད་ཅེས་འབྱུང་ཞེས་ལུང་བསྟན་པའི་ས་གསུམ་ན་མཉམ་མེད་སྒམ་པོ་པ་བསོད་ནམས་རིན་ཆེན་གྱིས་གསན་ཏེ། རྗེ་དེ་ཉིད་ཀྱིས་དགུང་ལོ་བཞི་བཅུ་རྩ་གཉིས་བཞེས་པའི་དུས་སུ་སྒྲུབ་པ་མཛད་པས་རྟོགས་པ་ཁྱད་པར་ཅན་ཐུགས་རྒྱུད་ལ་འཁྲུངས་ནའང་། མཁའ་འགྲོས་སྐུའི་ཚད་ལོ་གསུམ་ལས་མེད་པར་ལུང་བསྟན་པས། རྒྱལ་ཁམས་སུ་རོ་སྙོམས་ཀྱི་སྤྱོད་པ་ལ་བྱོན་པ་ན་ཨེ་ནས་མར་ཕེབས་པས་དགེ་བའི་བཤེས་གཉེན་སྒྲེ་པ་དང་མཇལ་བས། ཁོང་ན་རེ། ཁྱེད་སྐྱེས་བུ་དམ་པ་ཅིག་ཏུ་འདུག་པས་སེམས་ཅན་གྱི་དོན་རྒྱ་ཆེན་པོ་འགྲུབ་པར་འདུག་གི་གསུངས་པས། བླ་མ་སྒམ་པོ་པས། ང་ལ་སེམས་ཅན་གྱི་དོན་བྱ་བའི་ལོང་མེད། མཁའ་འགྲོ་མའི་ལུང་བསྟན་ལ་ད་ཚེ་ལོ་གསུམ་ལས་མེད་གསུངས་པ་བྱུང་བའི་ཚུལ་ཞུས་པས། དགེ་བཤེས་སྒྲེ་བའི་ཞལ་ནས། འོ་ན་ང་ལ་དེས་མི་གནོད་པའི་ཐབས་ཡོད་ཀྱི། རོ་ཁུང་བྲུས་ཀྱང་ཨའུ་རྩི། རྐང་ལག་འཐོར་ཡང་ཨའུ་རྩི། འཆི་རྟགས་ཚང་ཡང་ཨའུ་རྩི་བའི་གདམས་ངག །ཇོ་མོ་སྒྲོལ་མ་ཡིད་བཞིན་འཁོར་ལོའི་སྒྲུབ་ཐབས་བྱ་བའི་གདམས་པ་ཁྱད་པ་ཅན་ཞིག་ཡོད་ཀྱི་གསུངས་ནས་འདི་གནང་བས་དགུང་ལོ་བརྒྱད་ཅུ་རྩ་ལྔར་བསྲིངས་ཏེ་ཕྲིན་ལས་ནམ་མཁའ་དང་མཉམ་པར་གྱུར། དེས་རང་གི་སྲས་ཀྱི་ཐུ་བོ་རྗེ་སྒོམ་པ་ཚུལ་ཁྲིམས་སྙིང་པོར་གནང་བ་ནས་རིམ་པར་བརྒྱུད་པ་སོགས། མ་བྱོན་པའི་སངས་རྒྱས་རབ་གསལ་གྱི་རྣམ་པར་འཕྲུལ་པ་གངས་ཅན་མཁས་གྲུབ་ཡོངས་ཀྱི་གཙུག་རྒྱན་ཚར་ཆེན་ཆོས་ཀྱི་རྒྱལ་པོ་བློ་གསལ་རྒྱ་མཚོ་ལ་བཀའ་བབ་ཅིང་། དེ་ཉིད་ཀྱིས་སྙན་བརྒྱུད་རྒྱ་མཚོའི་བསྟན་པའི་སྲོག་ཤིང་འཇམ་དཔལ་དབྱངས་མཁྱེན་བརྩེའི་དབང་ཕྱུག་ལ་གནང་བ་ནས་བཟུང་སྟེ་བདག་གི་རྩ་བའི་བླ་མ་དམ་པའི་བར་དུ་ལྷག་པའི་ལྷ་འདི་ཉིད་ཐུགས་ཉམས་སུ་བཞེས་ཤིང་དངོས་གྲུབ་བརྙེས་པ་ཤ་སྟག་ཏུ་བྱོན་པ་དང་། གཞན་ཡང་བརྒྱུད་སྲོལ་འདི་ལ་ཁ་ཆེ་པཎྜི་ཏ་ཤཱཀྱ་ཤྲཱི་བྷ་དྲ་ནས་བརྒྱུད་པ་དང་། གཉན་ལོ་དར་མ་གྲགས་ནས་བརྒྱུད་པ་རྣམས་ཀྱང་དོན་གྱིས་འདུས་པས་ཁྱད་པར་དུ་འཕགས་པའི་རྗེས་སུ་གནང་བ་ཟབ་མོ་སྒྲུབ་པར་བྱེད་པ་ལ། སློབ་དཔོན་གྱི་བྱ་བ་དང་། སློབ་མ་ལ་བྱ་བ་གཉིས་སུ་ཡོད་པ་ལས། ཐོག་མར་སློབ་དཔོན་གྱི་བྱ་བ་བརྒྱུད་པའི་གསོལ་འདེབས་དང་མཆོད་པ་བྱིན་རླབས་སྔོན་དུ་འགྲོ་བས་བདག་བསྐྱེད་བཟླས་པ་དང་བཅས་པ་བྱ་བ་དང་། མདུན་གྱི་ཚོམ་བུ་བཅོམ་ལྡན་འདས་མར་ཡན་ལག་བཞི་རྫོགས་ཀྱི་ཚུལ་གྱིས་བསྐྱེད་ཅིང་མཆོད་བསྟོད་གཏོར་མ་འབུལ་བ་དང་། ཐུགས་རྒྱུད་བསྐུལ་བའི་ཕྱིར་བཟླས་པ་བྱ་བ། བུམ་པ་བསྒྲུབ་པ་སོགས་སྔོན་དུ་ལེགས་པར་གྲུབ་ཟིན་ནས། ད་ཁྱོད་རང་རྣམས་ཀྱི་ངོ་སྐལ་དུ་གྱུར་པ་སློབ་མའི་བྱ་བ་ལའང་སྦྱོར་དངོས་རྗེས་གསུམ་ལས། སྦྱོར་བའི་རིམ་པ་མཎྜལ་འབུལ་ཞིང་གསོལ་བ་གདབ་པ། རྒྱུད་དག་པར་བྱ་བ། ཁྱད་པར་གྱི་གསོལ་བ་འདེབས་པ་རྣམས་སྔོན་དུ་འགྲོ་དགོས་པས། ཐོག་མར་སློབ་དཔོན་ལ་རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོ་དངོས་ཡིན་སྙམ་པའི་མོས་གུས་དང་ལྡན་པས་རྗེས་སུ་གནང་བ་ཟབ་མོ་ཞུ་བའི་ཡོན་དུ་དམིགས་ཏེ་མཎྜལ་ཞིག་འབུལ་བར་ཞུ། དེ་ལྟར་མཎྜལ་ཕུལ་ནས་ཕྱག་སྙིམས་པ་མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། །གང་གི་དྲིན་གྱིས་བདེ་ཆེན་ཉིད་སོགས་ནས། རྡོ་རྗེ་ཅན་ཞབས་པད་ལ་འདུད། །འཁོར་བ་ལས་སྒྲོལ་ཏཱ་རེ་མ། །ཏུཏྟཱ་རེ་ཡིས་འཇིགས་བརྒྱད་སྒྲོལ། །ཏུ་རེས་ན་བ་རྣམས་ལས་སྒྲོལ། །སྒྲོལ་མ་ཡུམ་ལ་ཕྱག་འཚལ་ལོ། །ཞེས་གསོལ་བ་བཏབ་ནས། རྒྱུད་དག་པར་བྱ་བའི་སླད་དུ་དམིགས་པ་འདི་བཞིན་མཛོད། མདུན་གྱི་ནམ་མཁར་བླ་མ་དང་གཉིས་སུ་མེད་པའི་རྗེ་བཙུན་སྒྲོལ་མ་དཀར་མོ་ཡིད་བཞིན་གྱི་འཁོར་ལོ་ལ་གཞན་ཡང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའི་ཚོགས་བསམ་གྱིས་མི་ཁྱབ་པས་བསྐོར་བ་སྤྲིན་ཕུང་ཆེན་པོ་འཐིབས་པ་བཞིན་མངོན་སུམ་ལྟ་བུར་བཞུགས་པར་མོས་པ་བྱས་ཏེ། དེ་དག་གི་སྤྱན་སྔར་བདག་གཞན་གྱིས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་བཤགས་པ་ལ་སོགས་པའི་ཡན་ལག་བདུན་པ་བགྱི་སྙམ་པས་འདིའི་རྗེས་ཟློས་ལན་གསུམ་མཛོད། །དཀོན་མཆོག་གསུམ་ལ་བདག་སྐྱབས་མཆི་ནས། འགྲུབ་པར་ཤོག །ཅེས་རྒྱུད་དག་པར་བྱས་ནས། སླར་ཡང་ཁྱད་པར་གྱི་དོན་ཞུ་བའི་སླད་དུ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། །དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་བླ་མ་རིན་པོ་ཆེས། བདག་གི་དུས་མ་ཡིན་པར་འཆི་བའི་འཇིགས་པ་ཐམས་ཅད་བསལ་ནས་རྗེ་བཙུན་བཅོམ་ལྡན་འདས་མ་སྒྲོལ་མ་དཀར་མོ་ཡིད་བཞིན་འཁོར་ལོ་ཚེ་སྦྱིན་མའི་རྗེས་སུ་གནང་བ་མ་ལུས་པ་སྩལ་དུ་གསོལ། །ཞེས་པ་རྣམས་རྗེས་གནང་གི་སྔོན་འགྲོ་ཡིན། དངོས་གཞི་ལ་ཐོག་མར་རྗེས་གནང་གི་གཞི་དགོད་པའི་སླད་དུ། སློབ་དཔོན་ལ་རྗེ་བཙུན་སྒྲོལ་མ་དཀར་མོ་དངོས་ཡིན་སྙམ་པའི་མོས་གུས་དྲག་པོ་དུང་བ་ཞིག་བྱས་པའི་རྐྱེན་གྱིས། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། མདུན་བསྐྱེད་ཀྱི་ཐུགས་ཀར་ཕོག་པས་ཐུགས་རྒྱུད་བསྐུལ་ཏེ། དེའི་ཐུགས་ཀ་ནས་འོད་ཟེར་དཀར་པོ་བསམ་གྱིས་མི་ཁྱབ་པ་འཕྲོས་ཁྱེད་རང་རྣམས་ཀྱི་ལུས་ལ་ཕོག་པས་ནད་གདོན་སྡིག་སྒྲིབ་དུས་མ་ཡིན་པའི་འཆི་བའི་འཇིགས་པ་བག་ཆགས་དང་བཅས་པ་དང་། དེར་མ་ཟད་རྣམ་སྨིན་གདོས་བཅས་ཤ་ཁྲག་གིས་བསྡུས་པའི་ཕུང་པོ་ཁམས་དང་སྐྱེ་མཆེད་སོགས་མ་དག་པའི་སྣང་བ་ཐམས་ཅད་མི་དམིགས་ཏེ་སྟོང་པ་ཉིད་དུ་སྦྱངས་པའི་མོས་པ་མཛོད། །ཨོཾ་སྭ་བྷཱ་ཝ་སོགས། སྟོང་པའི་ངང་ལས་པྃ་ལས་པདྨ་དཀར་པོ་འདབ་མ་བརྒྱད་པའི་ལྟེ་བར། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཁྱེད་རང་རྣམས་ཀྱི་རྣམ་པར་ཤེས་པའི་ངོ་བོ་ཏཱྃ་ཡིག་དཀར་པོ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་ཁྱེད་རང་རྣམས་རྗེ་བཙུན་སྒྲོལ་མ་ནས། ཟླ་བའི་རྒྱབ་ཡོལ་དང་འོད་ཀོར་ཅན་གྱི་སྐུ་ཅན་དུ་ལམ་གྱིས་གསལ་བའི་སྙིང་གར་ཟླ་བའི་རང་བཞིན་གྱི་འཁོར་ལོ་དཀར་པོ་རྩིབས་བརྒྱད་པ་ནས། འོད་ཟེར་སྣ་ལྔའི་ཕྲེང་བ་གཡས་སྐོར་དུ་ཡོད་པའི་མོས་པ་མཛོད། །ཁྱེད་རང་རྣམས་ཀྱི་ཕྱི་རོལ་ཏུ་འཁོར་ལོ་དཀར་པོ་རྩིབས་བརྒྱད་པ་སྦུབས་ཅན་ཞྭ་ཐེབ་ཁ་སྦྱར་བ་ལྟ་བུ་གཡས་སྐོར་དུ་འཁོར་བ་མེ་དཔུང་འབར་ཞིང་འཁྲུགས་པས་གདོན་བགེགས་གནོད་བྱེད་ཐམས་ཅད་བྱ་སྒྲོ་མགར་གྱི་སོ་མལ་དུ་བབས་པ་ལྟར་གཞོབ་ཐུལ་ཐུལ་དུ་ཚིག་པའི་མོས་པ་མཛོད། སླར་ཡང་སྙིང་གའི་ཏཱྃ་ཡིག་སྔགས་ཕྲེང་དང་བཅས་པ་ལས་འོད་ཟེར་དཀར་པོ་སོགས་ནས། ཞི་བའི་ཕྲིན་ལས་ཐམས་ཅད་འགྲུབ་པའི་མོས་པ་མཛོད། །སོགས་བདག་བསྐྱེད་བཞིན་ལ་གོང་གི་རིགས་འགྲེས་ཚིག་ཁ་བསྒྱུར་དང་བཅས་ཏེ། གསར་ཞིང་མཉེན་ལྕུག་དང་ལྡན་པས་བུན་ལོང་གིས་གཏམས་པར་གྱུར་པའི་མོས་པ་མཛོད། །སླར་ཡང་ཁྱེད་རང་རྣམས་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་རྣམས་གསལ་བཏབ་ནས། སློབ་དཔོན་ལ་མོས་གུས་དྲག་པོ་དུང་བ་ཞིག་བྱས་པས་སློབ་དཔོན་མདུན་བསྐྱེད་དང་བཅས་པའི་ཐུགས་ཀ་ནས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། ཁྱད་པར་དུ་ཡང་བཅོམ་ལྡན་འདས་མ་ཡིད་བཞིན་འཁོར་ལོའི་ཐུགས་རྒྱུད་བསྐུལ་ཏེ་དེ་རྣམས་ཀྱི་གསང་བ་གསུམ་གྱི་གནས་ནས་སྐུ་གསུང་ཐུགས་ཀྱི་བྱིན་རླབས་ཐམས་ཅད་ཟླ་བའི་རང་བཞིན་གྱི་འཁོར་ལོ་དཀར་པོ་རྩིབས་བརྒྱད་པ་ལྟེ་བ་ཡིག་འབྲུ་དང་བཅས་པ་སྔགས་ཀྱི་རང་སྒྲ་སྒྲོགས་ཤིང་འཆི་མེད་བདུད་རྩིའི་ཆར་འབེབས་བཞིན་པའི་རྣམ་པ་ནམ་མཁའ་གང་བར་བྱོན་པ་དང་ལྷན་ཅིག་ཏུ། མདུན་བསྐྱེད་དང་སློབ་དཔོན་ལས་ཀྱང་དེ་འདྲ་བའི་འཁོར་ལོ་དཔག་ཏུ་མེད་པ་ཆད་དེ་ཁྱེད་རང་རྣམས་ཀྱི་སྤྱི་བོ་ཚངས་པའི་སྒོ། བ་སྤུའི་བུ་ག །དབང་པོའི་སྒོ་རྣམས་ནས་ཐོགས་མེད་དུ་ཞུགས་ཏེ། ཐུགས་ཀའི་འཁོར་ལོ་ལ་སིབ་སིབ་ཐིམ་པས་དེ་ལས་ཀྱང་འཆི་མེད་བདུད་རྩིའི་རྒྱུན་དཔག་ཏུ་མེད་པ་སྐྱ་ཆིལ་ཆིལ་བབས། ལུས་ཐམས་ཅད་འཆི་མེད་ཡེ་ཤེས་ཀྱི་བདུད་རྩིའི་ཆུ་རྒྱུན་གྱིས་ཁེངས་པས། དུས་མ་ཡིན་པའི་འཆི་བའི་འཇིགས་པ་བག་ཆགས་དང་བཅས་པ་ཐམས་ཅད་སངས་ཤིང་དག །ཚེ་དང་བསོད་ནམས་ཡེ་ཤེས་དང་ཡོན་ཏན་ལ་སོགས་པ་ཐམས་ཅད་གོང་ནས་གོང་དུ་འཕེལ་ཞིང་རྒྱས་པར་གྱུར་པའི་ཐུགས་མོས་བརྟན་པོ་གནང་བར་ཞུ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཨཱ་བེ་ཤ་ཡ་ཨ་ཨཱཿ ཛཿཧཱུྃ་བྃ་ཧོ། ཞེས་ལན་མང་དུ་བརྗོད་སྤོས་རོལ་བྱ། སླར་ཡང་སློབ་དཔོན་གྱི་ཐུགས་ཀའི་ཏཱྃ་ཡིག་ལས་འོད་ཟེར་འཕྲོས་པས། དབང་གི་ལྷ་རྗེ་བཙུན་སྒྲོལ་མ་འཇིགས་པ་བརྒྱད་ལས་སྐྱོབ་པའི་ལྷ་ཚོགས་ཐམས་ཅད་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ ཞེས་པས་སྐུར་བྱེད་ནམ་མཁའི་ལྷ་ཚོགས་སྤྱན་དྲངས་པ་ལ་ཁྱེད་རང་རྣམས་ཀྱིས་ཡན་ལག་བཞི་པ་སྒྲུབ་པའི་སླད་དུ་གསོལ་བ་འདེབས་པ་འདིའི་རྗེས་ཟློས་མཛོད། །དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ། །ཞེས་གསོལ་བ་བཏབ་པས། དབང་གི་ལྷ་རྣམས་དང་སློབ་དཔོན་ལྷན་ཅིག་པས་བུམ་པ་འཆི་མེད་ཡེ་ཤེས་ཀྱི་བདུད་རྩིས་གང་བ་རེ་ཐོགས་ནས་ཁྱེད་རང་རྣམས་ཀྱི་སྤྱི་བོར་བཞག་སྟེ། ཇི་ལྟར་བལྟམས་པ་སོགས་ནས། དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ། ཞེས་དང་། ཡི་གེ་བཅུ་པའི་མཐར། ཨོཾ་བཛྲཱི་བྷ་བ་ཨ་བྷི་ཥིཉྩ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་འོད་དཔག་མེད་སྤྲུལ་སྐུའི་རྣམ་པ་ཅན་གྱིས་དབུར་བརྒྱན། སློབ་དཔོན་གྱིས། ཛཿཧཱུྃ་བྃ་ཧོཿ ཞེས་བརྗོད་པས་ནམ་མཁར་བཞུགས་པའི་དབང་གི་ལྷ་རྣམས་ཀྱང་ཁྱེད་རང་རྣམས་ལ་སིབ་སིབ་ཐིམ་པའི་མོས་པ་མཛོད། །དེ་ལྟར་ཁྱོད་རྣམས་རྗེ་བཙུན་སྒྲོལ་མ་དཀར་མོའི་སྐུར་བསྐྱེད་ཅིང་བྱིན་གྱིས་བརླབས་པ་དེ་ཉིད་ལ་མངའ་དབུལ་གྱི་སླད་དུ་མེ་ཏོག་ལ་སོགས་པའི་མཆོད་པ་རྣམས་ཀྱིས་ཀྱང་མཆོད་པའི་མོས་པ་མཛོད། །སློབ་དཔོན་གྱིས། ཨོཾ་བཛྲ་པུཥྤེ་ཨཱཿཧཱུྃ། ནས། ནཻ་བིདྱ་ཨཱཿཧཱུྃ། གི་བར་ཕྱག་རྒྱ་དང་བཅས་པ་བྱ་ཞིང་། ལས་རྡོར་གྱིས་མཆོད་པ་སྟོབ་པའི་ཚུལ་བྱ། སླར་ཡང་སློབ་དཔོན་མདུན་བསྐྱེད་དང་བཅས་པས་མེ་ཏོག་གི་ཆར་འབབས་ཤིང་བཀྲ་ཤིས་པའི་ཚིགས་སུ་བཅད་པས་ཀྱང་མངའ་གསོལ་བའི་མོས་པ་མཛོད། །ཅེས་དང་། རྡོ་རྗེ་དྲིལ་བུ་འཛིན་པས་མེ་ཏོག་འཐོར་བཞིན་དུ། ཕུན་སུམ་ཚོགས་པ་ནས། བཀྲ་ཤིས་གསུམ་པའོ། །ཞེས་པའི་བར་བརྗོད། དེ་ལྟར་ན་རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོའི་སྐུ་ཡི་རྗེས་སུ་གནང་བ་ཐོབ། ཁྱེད་རང་རྣམས་ཀྱིས་ལུས་ཀྱི་སྒོ་ནས་བསགས་པའི་སྡིག་པ་དང་སྒྲིབ་པ་དུས་མ་ཡིན་པའི་འཆི་བའི་འཇིགས་པ་བག་ཆགས་དང་བཅས་པ་ཐམས་ཅད་བྱང་ཞིང་དག་པར་བྱས། གནས་སྐབས་སུ་ལུས་ལྷ་ཡི་སྐུར་བསྒོམ་པ་ལ་དབང་ཞིང་། མཐར་ཐུག་སྒྲོལ་མ་དཀར་མོ་ཡིད་བཞིན་འཁོར་ལོའི་སྐུ་དང་དབྱེར་མེད་པར་བྱིན་གྱིས་བརླབས་པ་ཡིན་སྙམ་དུ་ཐུགས་མོས་མཛོད། རྗེས་གནང་དངོས་ལ་ལུང་གསུམ་ལས། ཐོག་མར་རྗེས་སུ་བཟླས་པའི་ལུང་གི་སླད་དུ། སློབ་དཔོན་དང་ཁྱེད་རང་རྣམས་ཀྱི་ཐུགས་ཀར་སྔར་གསལ་བཏབ་བཞིན་པའི་འཁོར་ལོ་སྔགས་ཕྲེང་དང་བཅས་པ་དེ་ཉིད་སླར་ཡང་དྲན་པར་བྱས་ཏེ། སློབ་དཔོན་ལ་གུས་འདུད་དྲག་པོ་དུང་བ་ཞིག་མཛད་པ་ལ་བརྟེན་ནས། སློབ་དཔོན་གྱི་ཐུགས་ཀའི་ཏཱྃ་ཡིག་སྔགས་ཕྲེང་རྣམས་དང་བཅས་པ་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱུང་བ་ཞལ་ནས་ཐོན། ཁྱེད་རང་རྣམས་ཀྱི་ཞལ་དུ་ཞུགས། ཐུགས་ཀའི་ཏཱྃ་ཡིག་སྔགས་ཕྲེང་རྣམས་དང་བཅས་པ་ལ་སིབ་སིབ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད། །དེ་ནས་སྤྱི་བོའི་བླ་མ་འོད་དཔག་མེད་ཡོངས་སུ་གྱུར་པ་ལས་མགོན་པོ་ཚེ་དང་ཡེ་ཤེས་དཔག་ཏུ་མེད་པ་སྐུ་མདོག་དཀར་ལ་དམར་བའི་མདངས་ཆགས་པ། ཞལ་གཅིག་ཕྱག་གཉིས་ཀྱིས་གསེར་གྱི་བུམ་པ་འཆི་མེད་བདུད་རྩིའི་ཆུ་རྒྱུན་གྱིས་གང་བ་མཉམ་གཞག་གི་སྟེང་ན་འཛིན་པ། དར་དང་རིན་པོ་ཆེའི་རྒྱན་གྱིས་བརྒྱན་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་ཐུགས་ཀའི་ཧྲཱིཿཡིག་ལས་འོད་ཟེར་ཕྱོགས་བཅུར་འཕྲོས་པས་སྣོད་བཅུད་འཁོར་འདས་ཀྱིས་བསྡུས་པའི་ཚེ་དང་བསོད་ནམས་ཡེ་ཤེས་ཐམས་ཅད་འོད་ཟེར་གྱི་རྣམ་པར་བསྡུས་ཏེ་བུམ་པའི་ནང་དུ་སོང་བས་འཆི་མེད་བདུད་རྩིའི་ཆུ་རྒྱུན་དུ་གྱུར། དེ་ཉིད་གྱེན་དུ་འཕྱུར་ཞིང་ཁ་ནས་ལུད་པ་ཁྱེད་རང་རྣམས་ཀྱི་སྤྱི་བོ་ཚངས་པའི་བུ་ག་ནས་མར་ཞུགས། ལུས་ཀྱི་ནང་ཐམས་ཅད་གང་བས། ནད་གདོན་སྡིག་སྒྲིབ་དུས་མ་ཡིན་པའི་འཆི་བའི་འཇིགས་པ་ཐམས་ཅད་སྦྱངས། འཆི་མེད་ཚེ་ཡི་དངོས་གྲུབ་ཐོབ། སླར་ཡང་ཐུགས་ཀའི་འཁོར་ལོ་སྔགས་ཕྲེང་དང་བཅས་པ་ལས་ཀྱང་འཆི་མེད་བདུད་རྩིའི་ཟིལ་དངར་གྱི་རྒྱུན་དང་། འོད་ཟེར་དཀར་པོ་སྔགས་ཀྱི་སྒྲ་སྒྲོགས་པའི་ཚོགས་དཔག་ཏུ་མེད་པ་འཕྲོས། རང་རང་གི་ལུས་ཀྱི་སྤྱི་གཙུག་ནས་རྐང་མཐིལ་གྱི་བར་ཐམས་ཅད་མེར་གྱིས་ཁེངས་པས་ནད་གདོན་སྡིག་སྒྲིབ་དུས་མ་ཡིན་པའི་འཆི་བའི་འཇིགས་པ་བག་ཆགས་དང་བཅས་པ་ཐམས་ཅད་བྱང་ཞིང་དག །འཆི་མེད་ཚེ་ཡི་དངོས་གྲུབ་ཐོབ། ལུས་ཀྱི་བ་སྤུའི་བུ་ག་ཚུན་ཆད་ཀྱང་བདུད་རྩིའི་ཟིལ་པ་ཕྲམ་མེར་ཡོད་པའི་མོས་པ་དང་བཅས་ཏེ་སྔགས་འདིའི་རྗེས་ཟློས་ལན་བརྒྱ་རྩ་བརྒྱད་མཛད་པར་ཞུ། ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཨཱ་ཡུཿཔུཎྱེ་ཛྙཱ་ན་པུཥྟིཾ་ཀུ་རུ་སྭཱ་ཧཱ། ཞེས་དང་། སླར་ཡང་འདི་རྣམས་ཀྱི་རྗེས་ཟློས་ཀྱང་ལན་གསུམ་གསུམ་རེ་མཛད་པར་ཞུ། ཨ་ཨཱ་སོགས་ནས། ཨཾ་ཨཿ། ཀ་ཁ་ག་གྷ་ང་ནས། ཧ་ཀྵཿ ཡེ་དྷརྨཱ་ནས། ཤྲ་མ་ཎཿ དེ་ལྟར་བཟླས་པས་རྒྱུད་བྱིན་གྱིས་བརླབས་ཤིང་དབྱེར་མེད་དུ་བརྟན་པར་བྱས་པའི་མོས་པ་དང་བཅས་ཏེ། སློབ་དཔོན་ལ་དྲིན་ལན་གྱི་ཚུལ་དུ་མེ་ཏོག་འཐོར་བཞིན་པས་འདིའི་རྗེས་ཟློས་ལན་གསུམ་མཛོད། །བཅོམ་ལྡན་བདག་ལ་སྩལ་ལགས་ཀྱི། །བཅོམ་ལྡན་བདག་ལ་བྱིན་གྱིས་རློབས། །སློབ་དཔོན་གྱིས་ཀྱང་ཁྱེད་རང་རྣམས་ཀྱིས་ཕུལ་བའི་མེ་ཏོག་གི་ཕྲེང་བ་དེ་ཉིད་སྔགས་ཀྱི་ཕྲེང་བར་བྱིན་གྱིས་བརླབས་ཏེ་སྤྱི་བོར་བཞག་པས་སྙིང་གའི་སྔགས་ཕྲེང་བྱང་ཆུབ་མ་ཐོབ་ཀྱི་བར་དུ་བརྟན་ཅིང་ནུས་ལྡན་དུ་བྱས་པའི་མོས་པ་མཛོད། །བཅོམ་ལྡན་འདི་ལ་སྩལ་ལགས་ཀྱི། །བཅོམ་ལྡན་འདས་མའི་བྱིན་རླབས་ནི། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །རྡོ་རྗེ་སློབ་མ་འདི་རྣམས་ཀྱི་རྒྱུད་ལ་རྗེ་བཙུན་སྒྲོལ་མ་དཀར་མོ་ཡིད་བཞིན་གྱི་འཁོར་ལོའི་གསུང་གསང་སྔགས་ཀྱི་བྱིན་རླབས་མ་ལུས་པ་འཇུག་ཅིང་བརྟན་པར་གྱུར་ཅིག །ཅེས་བརྗོད་ཅིང་མེ་ཏོག་འཐོར། དམ་བཅའ་བའི་ལུང་གི་སླད་དུ། དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོ་ཡི་དམ་གྱི་ལྷར་བཟུང་བར་བགྱིའོ་སྙམ་པས་འདིའི་རྗེས་ཟློས་ལན་གསུམ་གནང་བར་ཞུ། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ། དུས་འདི་ནས་བཟུང་སྟེ་ཇི་སྲིད་བྱང་ཆུབ་མ་ཐོབ་ཀྱི་བར་དུ་རྗེ་བཙུན་སྒྲོལ་མ་དཀར་མོ་ཡི་དམ་གྱི་ལྷར་བཟུང་བར་བགྱིའོ། །དེ་ལྟར་ན་རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོའི་གསུང་གི་རྗེས་སུ་གནང་བ་ཐོབ། ཁྱེད་རང་རྣམས་ཀྱིས་ངག་གི་སྒོ་ནས་བསགས་པའི་སྡིག་པ་དང་སྒྲིབ་པ་དུས་མ་ཡིན་པའི་འཆི་བའི་འཇིགས་པ་བག་ཆགས་དང་བཅས་པ་ཐམས་ཅད་བྱང་ཞིང་དག་པར་བྱས། གནས་སྐབས་སུ་ངག་སྔགས་བཟླ་བ་ལ་དབང་ཞིང་། མཐར་ཐུག་རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོའི་གསུང་དང་དབྱེར་མེད་པར་བྱིན་གྱིས་བརླབས་པ་ཡིན་སྙམ་དུ་མོས་པ་མཛོད། །བྱིན་གྱིས་བརླབ་པའི་ལུང་གི་སླད་དུ། ཁྱེད་རང་རྣམས་ཀྱི་སྙིང་གའི་འཁོར་ལོའི་དབུས་ཀྱི་ཏཱྃ་ཡིག་ལ་སེམས་ཞུགས་པ་བཞིན་ཆེར་གྱིས་གཏད་པས། དེ་ལས་འོད་ཟེར་བསམ་གྱིས་མི་ཁྱབ་པ་འཕྲོས། སྣོད་བཅུད་ཐམས་ཅད་ལ་ཕོག་པས་དེ་ཐམས་ཅད་ལན་ཚྭ་ཆུར་བཅུག་པ་བཞིན་འོད་དུ་ཞུ་ནས་འོད་མཆིན་ཁའི་གུར་ཁང་ལ་ཐིམ། དེ་འོད་ལྗང་གུའི་གུར་ཁང་ལ་ཐིམ། དེ་འོད་མཐིང་གའི་གུར་ཁང་ལ་ཐིམ། དེ་འོད་དམར་པོའི་གུར་ཁང་ལ་ཐིམ། དེ་འོད་སེར་པོའི་གུར་ཁང་ལ་ཐིམ། དེ་འོད་དཀར་པོའི་གུར་ཁང་ལ་ཐིམ། དེ་འཁོར་ལོ་དཀར་པོའི་གུར་ཁང་ལ་ཐིམ། དེ་རང་རྗེ་བཙུན་མར་གསལ་བ་ལ་ཐིམ། དེ་ཐུགས་ཀའི་འཁོར་ལོ་སྔགས་ཕྲེང་དང་བཅས་པ་ལ་ཐིམ། དེ་ཏཱྃ་ཡིག་ལ་ཐིམ། དེའི་ཁོག་པ་མགོ་བོ་ལ་ཐིམ། མགོ་བོ་ཟླ་ཚེས་ལ་ཐིམ། ཟླ་ཚེས་ཐིག་ལེ་ལ་ཐིམ། ཐིག་ལེ་ནཱ་ད་ལ་ཐིམ། ནཱ་ད་ཡང་མི་དམིགས་པ་ནམ་མཁའ་ལ་འཇའ་ཡལ་བ་བཞིན་གྱུར་པ་ལ་བརྟེན་ནས་འཁོར་འདས་གཉིས་སྣང་གིས་བསྡུས་པའི་ཆོས་ཐམས་ཅད་རང་བཞིན་གྱིས་མ་དམིགས་པའི་གནས་ལུགས་འོད་གསལ་སྤྲོས་པའི་མཐའ་ཐམས་ཅད་དང་བྲལ་བ་ནམ་མཁའ་ལྟ་བུ་རྒྱུད་ལ་སྐྱེས་པར་མོས་པ་བྱས་ཏེ་དེའི་ངང་ལ་བློ་ལྷོད་ཀྱིས་གློད་དེ་ཅུང་ཟད་རེ་མཉམ་པར་འཇོག་པར་ཞུ། དེ་ལྟར་ན་རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོའི་ཐུགས་ཀྱི་རྗེས་སུ་གནང་བ་ཐོབ། ཁྱེད་རང་རྣམས་ཀྱིས་ཡིད་ཀྱི་སྒོ་ནས་བསགས་པའི་སྡིག་པ་དང་སྒྲིབ་པ་དུས་མ་ཡིན་པའི་འཆི་བའི་འཇིགས་པ་བག་ཆགས་དང་བཅས་པ་ཐམས་ཅད་བྱང་ཞིང་དག་པར་བྱས། གནས་སྐབས་སུ་ཡིད་འོད་གསལ་གྱི་ཡེ་ཤེས་སུ་བསྒོམ་པ་ལ་དབང་ཞིང་། མཐར་ཐུག་རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོའི་ཐུགས་དང་དབྱེར་མེད་པར་བྱིན་གྱིས་བརླབས་པ་ཡིན་སྙམ་དུ་ཐུགས་མོས་མཛོད། །སླར་ཡང་ཁྱེད་རང་རྣམས་སྐད་ཅིག་གིས་སྒྲོལ་མ་དཀར་མོའི་སྐུར་ལམ་གྱིས་གསལ་བ་ལ་སྐུ་གསུང་ཐུགས་ཀྱི་བྱིན་རླབས་དེ་རྣམས་བརྟན་པར་བྱ་བའི་སླད་དུ་སློབ་དཔོན་གྱིས་མེ་ཏོག་གི་ཆར་འབེབས་ཤིང་བདེན་པའི་ཚིག་གིས་ཀྱང་མངའ་གསོལ་བའི་མོས་པ་མཛོད། །བཅོམ་ལྡན་འདས་མའི་བྱིན་རླབས་ནི། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོའི་སྐུ་གསུང་ཐུགས་ཀྱི་བྱིན་རླབས་ཐམས་ཅད་རྡོ་རྗེ་སློབ་མ་འདི་རྣམས་ཀྱི་རྒྱུད་ལ་འཇུག་ཅིང་བརྟན་པར་གྱུར་ཅིག །ཛཿཧཱུྃ་བྃ་ཧོཿ ཞེས་བརྗོད་ཅིང་མེ་ཏོག་གཏོར། དེ་རྣམས་ཀྱིས་རྗེས་སུ་གནང་བའི་དངོས་གཞི་ལེགས་པར་གྲུབ་ནས། གནས་སྐབས་དེ་དག་ཏུ་ཐོབ་ཅིང་ཁས་བླངས་པའི་དམ་ཚིག་དང་སྡོམ་པ་ལ་སྲུང་སྡོམ་ཚུལ་བཞིན་དུ་བགྱིའོ་སྙམ་པས་འདིའི་རྗེས་ཟློས་ལན་གསུམ་མཛོད། གཙོ་བོས་ཇི་ལྟར་སོགས། རྗེས་སུ་གནང་བ་ལེགས་པར་ཐོབ་པའི་བཀའ་དྲིན་གཏང་རག་གི་ཡོན་དུ་དམིགས་ཏེ་མཎྜལ་ཞིག་འབུལ་བར་ཞུ། དེ་ལྟར་མཎྜལ་དུ་མ་ཟད་ལུས་ལོངས་སྤྱོད་ཐམས་ཅད་ཀྱང་འབུལ་ན་ཆ་ཤས་ནས་བཞེས་ལ་ལོངས་སྤྱད་དུ་གསོལ་སྙམ་པས་འདིའི་རྗེས་ཟློས་ལན་གསུམ་མཛོད། དེང་ནས་བརྩམས་ཏེ་སོགས། དེ་རྣམས་ཀྱི་སྒོ་ནས་རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོའི་རྗེས་སུ་གནང་བ་ཐུན་མོང་མ་ཡིན་པ་ཟབ་གསང་སྙན་བརྒྱུད་ཀྱི་ཚུལ་དུ་བཞུགས་པ་ཉིད་ལེགས་པར་ཕུལ་གྲུབ་པ་ཡིན་པས། འདིའི་སྒོ་ནས་ཀྱང་རང་དང་གཞན་གྱི་དོན་རྒྱ་ཆེན་པོ་མཛད་པར་ཞུ། བསོད་ནམས་འདི་ཡིས་སོགས་བརྗོད་ལ་སློབ་མ་རྣམས་རང་གནས་སུ་གཏང་ངོ་། །གསུམ་པ་རྗེས་ནི། མཆོད་པ་ཁ་གསོ། བསང་སྦྱང་བྱིན་རླབས་གོང་བཞིན་ལ། མཚན་སྔགས་སྔོན་དུ་འགྲོ་བའི་ཆུ་གཉིས་ཉེར་སྤྱོད་རོལ་མོ་དང་བཅས་པས་མཆོད། འཁོར་བ་ལས་སྒྲོལ་སོགས་ཀྱིས་བསྟོད། འདོད་དོན་གསོལ། ཡི་གེ་བརྒྱ་པ་ལན་གསུམ་གྱིས་ལྷག་ཆད་ཁ་བསྐང་། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། ཨོཾ་ཁྱོད་ཀྱིས་སོགས་དང་། བཛྲ་མུཿས་ཚོམ་བུའི་ཡེ་ཤེས་པ་གཤེགས། དམ་ཚིག་པ་རང་ལ་ཐིམ། དགེ་བ་འདི་ཡིས་མྱུར་དུ་བདག་སོགས་བསྔོ་སྨོན་དང་། ཆེ་བའི་ཆེ་མཆོག་སོགས་ཤིས་པ་བརྗོད་པས་མེ་ཏོག་གི་ཆར་སིལ་མ་དགྲམ། ལས་ཀྱི་རྗེས་མི་མངོན་པར་བྱའོ། །བརྒྱ་ཚར་སོགས་མཛད་ན། ཐོག་མ་དེ་ལ་འདི་ཁ་སོར་བཞག་དང་། གཉིས་པ་མན་ཆད་ལ་མཎྜལ་ས་གཞི་སྤོས་བྱུགས་དང་། གསོལ་གདབ་བསྟོད་པ་གཉིས་ཚར་གཅིག་གི་རྗེས་སུ་འདི་ཡི་ཁྱད་པར་གྱི་གསོལ་གདབ་སྦྲེལ་བ་ལས་རྒྱུན་བཤགས་མི་དགོས། བཟླས་ལུང་སྔགས་གསུམ་གསུམ་མཛད། །གཞན་དཀྱུས་བཞིན་མཛད་པ་ཕྱག་ལེན་ཡིན་ནོ། །དེ་ལྟར་འཕགས་མ་ཡིད་བཞིན་འཁོར་ལོ་ཡི། །ཐུན་མོང་མིན་པའི་རྗེས་སུ་གནང་བའི་ཚུལ། །འཆི་མེད་གྲུབ་པའི་བདུད་རྩིས་ལུས་ཅན་ཀུན། །ཚེ་དང་ཡེ་ཤེས་པདྨོ་རྒྱས་གྱུར་ཅིག །ཅེས་སྒྲོལ་མ་དཀར་མོ་ཐུན་མོང་མ་ཡིན་པ་འོད་ཟེར་དྲུག་སྦྲགས་ཀྱི་རྗེས་སུ་གནང་བའི་ཚུལ་གསལ་བར་བཀོད་པ་འདི་ནི། འཇམ་དབྱངས་མཁྱེན་བརྩེའི་དབང་ཕྱུག་གིས་མཛད་པའི་རྗེས་གནང་ཐུན་མོང་པའི་ཡིག་ཆ་ལ། སྙན་བརྒྱུད་ཞལ་ཤེས་ཀྱི་ཟིན་ཐོ་རྣམས་ཀྱིས་བརྒྱན་ཏེ་རྗེ་བླ་མ་རྣམས་ཀྱིས་ཇི་ལྟར་ཕྱག་ལེན་མཛད་པ་ལ་གཞི་བྱས། ཚིག་གི་མཐའ་བསྐྱེད་ཚུལ་མི་འགལ་བས་ཟུར་བརྒྱན་ཏེ་ཉམས་སུ་བླང་བདེ་བར། ཁྱབ་བདག་རྡོ་རྗེ་སེམས་དཔའི་ངོ་བོར་བཞུགས་པ་མཁན་ཆེན་ཐམས་ཅད་མཁྱེན་པ་བྱམས་པ་ཀུན་དགའ་བསྟན་འཛིན། རྒྱུད་སྡེ་རྒྱ་མཚོའི་མངའ་བདག་རྡོ་རྗེ་འཆང་རིན་ཆེན་བློ་གསལ་བསྟན་སྐྱོང་། འཇམ་མགོན་བླ་མ་བྱམས་པ་ངག་དབང་བསྟན་འཛིན་སྙན་གྲགས། ཟབ་རྒྱས་གདམས་པའི་གཏེར་མཛོད་རྡོ་རྗེ་འཛིན་པ་ཆེན་པོ་ངག་དབང་ལེགས་གྲུབ་རྣམས་ལས་ཚུལ་འདིའི་བཀའ་དྲིན་ཅི་རིགས་པ་ཐོབ་ཅིང་། གཞན་ཡང་ངེས་པར་ཐམས་ཅད་མཁྱེན་པ་ཀརྨ་ངག་དབང་ཡོན་ཏན་རྒྱ་མཚོ་དང་། རྗེ་བླ་མ་དཀོན་མཆོག་བསྟན་པ་རབ་རྒྱས་སོགས་ལས་སྒྲོལ་མ་དཀར་མོའི་ཆོས་ཚུལ་མང་དུ་ཐོས་པའི་རྒྱལ་ཁམས་ཉུལ་བའི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་སྦྱར་བའི་དགེ་བས་ཟབ་གསང་སྙན་བརྒྱུད་རིན་པོ་ཆེའི་བསྟན་པ་བསྐལ་པ་རྒྱ་མཚོར་འཚོ་ཞིང་གཞེས་པའི་རྒྱུར་གྱུར་ཅིག་དཔེ་འདི་ཚར་ལུགས་ཐུན་མོང་མ་ཡིན་པའི་བརྒྱུད་འཛིན་ལས་གཞན་ལ་བཀའ་རྒྱ་དམ་པར་བྱ་བ་གཅེས་སོ།། །། ༈

[edit]

sgrol dkar yid bzhin 'khor lo'i thun mong ma yin pa'i rjes gnang gi cho ga gsal bar bkod pa 'chi med grub pa'i bdud rtsi/ @#/_/sgrol dkar yid bzhin 'khor lo'i thun mong ma yin pa'i rjes gnang gi cho ga gsal bar bkod pa 'chi med grub pa'i bdud rtsi zhes bya ba bzhugs so/__/dran pas tshe dang ye shes mchog ster ba'i/__/bla ma yid bzhin 'khor lor gus btud nas/__/gang de'i thun mong min pa'i rjes gnang tshul/__/'chi med grub pa'i bdud rtsi'i dga' ston sbyin/__/'di la gsum/__sbyor ba/__dngos gzhi/__rjes so/__/dang po ni/__gnas dben zhing yid dang mthun par yar ngo'i tshes brgyad la sogs pa'i dus khyad par can gyi tshe/__stegs kyi khar many+dzi'i steng du maN+Da lar pad+ma dkar po 'dab brgyad kyi lte bar zla gdan la tshom bu dkar po gcig bkod/__mdun du gtor ma dkar zlum dang /__cho ga rgyas pa ltar na cha gsum yang bsham/__mtha' skor du mtshams 'dzin me tog dang bcas pa'i chu gnyis sngon 'gro'i nyer spyod/__slob dpon gyi mdun du rdor dril/__bum pa bcud ldan/__me tog gi snod/__slob ma la dgos pa'i maN+Dal me tog sogs sta gon bya'o/__/gnyis pa la/__slob dpon gyi bya ba dang /__slob ma'i bya ba gnyis las/__dang po ni/__rgyas par spro na sgrub cing mchod pa'i cho ga bdud rtsi'i rol mtsho las ji ltar 'byung ba bzhin gtor ma cha gsum gyi bar nyams su blang /__de tsam mi nus na/__thog mar brgyud 'debs sngon du 'gro bas mchod pa rnams/__oM badz+ra yak+Sha hU~M gis bsang /__swa b+hA was sbyang /__stong pa'i ngang las oM las byung ba'i rin po che las grub pa'i snod yangs shing rgya che ba rnams kyi nang du oM 'od du zhu ba las byung ba'i lha rdzas las grub pa'i mchod yon/__zhabs bsil/__me tog__/bdug spos/__mar me/__dri chab/__zhal zas/__rol mo la sogs pa mchod rdzas bsam gyis mi khyab pa dwangs shing thogs pa med pa nam mkha'i mtha' klas par gyur/__oM badz+ra ar+g+haM AHhU~M nas/__shab+da'i bar gyis brlab/__d+harmA ra Ni lan gsum gyis byin dbab/__bdag bskyed skyabs 'gro nas thun mtshams kyi lhar ldang ba'i bar 'jam mgon kun dga' blo gros kyi sgrub thabs ltar bya/__mdun bskyed tshom bu bsang sbyang /__stong pa'i ngang las pa~M las pad+ma dang a las zla ba'i dkyil 'khor gyi steng du tA~M yig dkar po nas/__'od dpag med kyis dbur brgyan/__zhes pa'i bar bdag bskyed bzhin la rang nyid ces pa'i tshig dor/__bdag la mngon par dbang bskur ba/__zhes pa'i tshab tu 'di la zhes bsgyur/__mchod pa bsang sbyang byin rlabs sngon du 'gro bas/__oM sarba ta thA ga ta AR+YA tA rA sa pa ri wA ra ar+g+haM pra tI ts+tsha swA hA nas/__shab+da'i bar gyis mchod/__d+harmA ra Ni tas rol mo dbul/__'khor ba las sgrol sogs kyis bstod/__gtor ma chab kyis bran la bsang sbyang /__stong pa'i ngang las rin po che las grub pa'i snod yangs shing rgya ba'i nang du oM zhu ba las byung ba'i gtor ma lha yi bdud rtsi kha dog dri ro nus pa phun sum tshogs pa bdud rtsi'i rgya mtsho chen por gyur par bsams la/__oM aHhU~M gsum gyis brlab/__nam mkha' mdzod kyi phyag rgya dang bcas/__na mas+sa man+ta bud+d+ha po d+hi satwA nAM/__a pra ti ha ta shA sa nA nAM/__he he b+ha ga wa tI ma hA satA/__sarba bud+d+ha a ba lo ki te/__mA bi lam+ba/__mA bi lam+ba/__i daM ba liM gr-ih+NA pa ya gr-ih+NA pa ya/__hU~M hU~M sarba bi sany+tsa re swA hA/__lan gsum gyis phul/__gong bzhin mchod cing bstod/__/bcom ldan 'das mas bdag dang sems can thams cad la mchog dang thun mong gi dngos grub ma lus pa stsal du gsol/__/zhes gsol ba gdab/__mdun bskyed kyi thugs kar zla ba'i rang bzhin gyi 'khor lo dkar po sogs nas/__'od zer sna lnga'i phreng ba g.yas skor du yod pa/__de las 'od zer 'phros pas bdag dang sems can thams cad kyi nad gdon sdig sgrib thams cad zhi bar byas/__/tshe dang bsod nams ye shes la sogs pa gong nas gong du 'phel zhing rgyas par gyur par bsams la sngags spel tshig can ci nus bzlas mthar gong bzhin gsol ba btab/__bum pa'i khar dung chos dri bzang gi chus gang ba'i steng gzungs thag rdo rje bzhag la/__bsang sbyang /__stong pa'i ngang las pa~M las pad+ma dang a las zla ba'i dkyil 'khor gyi steng du b+h+rU~M las rin po che'i bum pa yangs shing rgya che ba/__lto ba ldir ba/__zhabs zhum pa/__mgrin pa phra ba/__kha g.yel ba/__mchu 'phyang ba/__lha rdzas kyi gos kyis mgul pa dkris shing /__dpag bsam gyi shing gis kha brgyan pa/__nang chu dang bcud sna tshogs kyis yongs su gang ba'i nang du pa~M las pad+ma dkar po 'dab ma brgyad pa'i steng du a las zla ba'i dkyil 'khor gyi steng du tA~M yig dkar po sogs nas/__bstod pa'i bar mdun bskyed bzhin bya/__bum nang gi lha yi thugs kar zla ba'i rang bzhin gyi 'khor lo sogs nas/__'od zer sna lnga'i phreng ba g.yas skor du yod pa/__rang gi snying ga nas sngags kyi phreng ba gzungs thag la brten nas song bas bum nang gi lha yi thugs kar phog pas thugs rgyud bskul te/__thugs ka'i 'khor lo sngags phreng dang bcas pa dang /__sku'i cha shas thams cad nas kyang bdud rtsi'i rgyun dpag tu med pa babs pas bum pa gang bar gyur par bsams la/__sngags spel tshig can stong phrag gcig bzla/__/gong bzhin mchod cing bstod la gsol ba gdab/__yig brgya lan gsum gyis lhag chad kha bskang /__ma 'byor pa dang sogs kyis nongs pa bzod par gsol/__oM AHhU~M gis mchod yon phul ba'i rkyen gyis ye shes dkon mchog lhun grub sogs kyi yig char dam ye dbyer med 'od zhu mdzad snang /__pa gshegs/__dam tshig pa 'od du zhu ba las bum pa'i chu bdud rtsi'i rang bzhin du gyur/__zhes brjod cing dung chos kyi chu bum nang du phul/__gnyis pa slob ma la bya ba ni/__dbang gis smin cing snod dang ldan pa'i slob ma rnams/__gzhan rgyud sde 'og ma gsum la 'di bzhin no/__/khrus byas/__phyag dang yon phul te rang rang gi gral la snyims pa me tog dang bcas te 'khod pa la/__slob dpon gyis/__'o nam mkha' dang mnyam pa'i sems can thams cad kyi don du/__sogs kun slong dang kun spyod gsal 'debs sngon du 'gro bas/__nges 'byung dang byang chub sems kyi gtam ci rigs pa dang /__bshad bya'i chos mdo sngags kyi bye brag__/rgyud sde'i dbye bsdu sogs ji ltar 'tshams pa bshad rjes/__lo rgyus kyi khyad par/__da lam 'dir skabs su babs pa ni/__slob dpon chen po ngag gi dbang phyug grags pas/__chos spyod dbang po thul ba ni/__/'khor ba ru ni ji srid gnas/__/de srid bsod nams la sogs tshogs/__/byang chub sgrub byed rab tu skye/__/'khor bar srog las gces pa ni/__/ci yang yod pa ma mthong ste/__/de bas myur du thabs mang pos/__'chi ba slu ba kun tu spyad/__/ces gsungs pa ltar chos sgrub pa'i dal 'byor gyi lus rten yun ring du 'tsho ba'i thabs tshul lhur len pa shin tu gal che ba yin zhing /__de la'ang /__lus dang ngag gi las kyis phyi/__/bsam gtan las kyis nang gi yin/__/nor bu sman sogs phyi yin te/__/rnal 'byor nus pa nang gi'o/__/zhes gsungs pa ltar phyi nor bu rin po che'i rigs dang bcud len gyi sman sbyor sogs la brten pa dang /__nang rnal 'byor pa'i bsam gtan gyi nus pas tshe sring ba'i thabs gnyis su yod pa las/__'dir nang gi rnal 'byor mchog tu gyur pa mtshan 'dzin pa'am/__sku'i snang brnyan dran pa tsam gyis kyang dus ma yin pa'i 'chi ba'i 'jigs pa las skyob cing /__tshe dang bsod nams dang ye shes sogs gong nas gong du 'phel zhing rgyas pa la brten nas mthar thug rdzogs pa'i sangs rgyas kyi go 'phang yang dka' ba med par 'thob nus pa'i lha khyad par can/__bya rgyud pad+ma'i rigs kyi yum du gtogs pa rje btsun sgrol ma dkar mo yid bzhin gyi 'khor lo'i skor yin/__de la'ang thun mong dang thun mong ma yin pa'i bka' srol mi 'dra ba du ma zhig yod pa las/__da lam 'dir skabs su bab pa ni/__snying rje chen po ba ri lo tsA ba rin chen grags nas rim par brgyud pa'i sgrol dkar 'od zer drug sbrags zhes thun mong ma yin pa'i rjes su gnang ba zab mo 'bul ba'i skabs yin/__de la'ang thog mar yid ches shing khungs btsun pa'i phyir lo rgyus cung zad cig snyan du gsol na/__rje btsun sgrol ma'i ye shes kyi skus rjes su bzung ba'i slob dpon chen po ngag gi dbang phyug grags pas ring por 'tsho ba'i thabs tshul gyi cho ga ma lus pa phyogs gcig tu bsdus pa 'chi bdag slu ba'i rtog pa zhes bya ba'i bstan bcos chen po zhig mdzad pa las/__sgrol ma dkar mo'i sgrub pa'i thabs tshul 'di nyid kyang byung ba yin zhing /__'di'i man ngag rnams slob dpon nyid la sgrol mas dngos su gnang skad/__de la rtsod pa'i dus kyi thams cad mkhyen pa bla ma rdo rje gdan pas gsan/__sgrub thabs kyang mang du mdzad/__de la snying rje'i dbang phyug 'phags mchog phyag na pad+mo'i rnam 'phrul thugs rje chen po dang ldan pa bla ma ba ri lo tsA ba rin chen grags kyi gsan/__sgrub thabs mang po bod du bsgyur/__de la bla ma gle nag pas gsan/__sgrub pa lo drug tu mdzad pas mngon sum du zhal gzigs te chos kyi bdud rtsi bzhes/__'dis jo bo rje las brgyud pa'i man ngag kyang spyan snga rin po che las gsan zhes lo rgyus kha cig las 'byung /__de la dge ba'i bshes gnyen sgre pa rin po ches gsan pa yin te/__khong gis dang por thos bsam mdzad pa'i dus su la stod stag ri pa yin zer ba'i rnal 'byor pa cig la lag ris bstan pas/__jo bo btsun pa khyod la chos kyi las 'phro gsha' ma cig 'dug pa la tshe la long mi 'dug ste/__lo gsum las mi thub par 'dug zer ba dang /__sngar nas khong rang gi rmi lam du ltas ngan yang yang byung ba gnyis 'dzom pas/__tshe 'di la thugs gsha' mar dbyung ste lo gcig thub bam ci tsam thub thub kyi tshe lhag ma 'di la chos lag len bsha' mar thebs pa cig bya/__de la thog mar gdams ngag khyad par can ston pa'i dge ba'i bshes gnyen cig btsal dgos dgongs nas gsan pa 'phro bcad nas dbus su byon pa'i lam khar gzhu'i mkhar gong du bla ma gle nag pa dang mjal nas lo rgyus byas pas/__byang chub sgrub pa la lam gyi bar chad sel ba'i thabs khyad par can nga la yod kyi ston pa khyod thugs bde 'bol gyis thong zhig gsungs nas 'di'i sgrub thabs gdams ngag dang bcas pa ma lus pa gnang /__da khyod kyis gzhan du ma 'gro bar 'di rang du sdod la sgoms shig gsungs nas/__lung pa de rang gi lung lag mkhar lung bya ba cig gi phur sgrub pa rtse gcig tu mdzad pas zla ba bcu gcig lon tsa na rje btsun mas zhal mngon sum du gzigs nas khyod kyis lo drug cu tsam thub/__sems can la phan thogs par yong gsungs/__de nas phyis dgung lo drug cu lon pa'i dus su rje btsun ma la gsol ba btab pas/__nga'i sku cig bzhengs dang lo bcu tsam sdod par 'dug gi gsungs nas ras bris zhig bzhengs skad/__dgung lo bdun cu bzhes pa'i dus su gsol ba btab pas yang nga'i sku gcig bzhengs dang lo bcu thub par 'dug gsungs nas lugs ma zhig bzhengs skad/__sku de gnyis byin rlabs che bar grags te/__ras bris de phyis ra sgreng na bzhugs skad/__dgung lo brgyad cu bzhes pa'i dus rje btsun ma la gsol ba btab pas/__da rung nga yi sku zhig bzhengs na lo mang du thub par 'dug gsungs pa la/__khong rang gi bzhugs sa'i mdun gyi gyang logs la ri mo zhig bzhengs skad/__de nas lo bco lnga'i bar du bzhugs te/__yongs su rdzogs pa dgung lo dgu bcu rtsa lngar bzhugs par grags so/__/'dis spyan snga rin po che las jo bo nas brgyud pa'i gdams pa rdzogs par gsan pas brgyud pa'i chu bo gnyis 'dres su gyur/__de la ston mchog thub pa'i dbang pos ma 'ongs pa na ri brag tshang tshig du chos smra ba'i dge slong 'tsho byed ces 'byung zhes lung bstan pa'i sa gsum na mnyam med sgam po pa bsod nams rin chen gyis gsan te/__rje de nyid kyis dgung lo bzhi bcu rtsa gnyis bzhes pa'i dus su sgrub pa mdzad pas rtogs pa khyad par can thugs rgyud la 'khrungs na'ang /__mkha' 'gros sku'i tshad lo gsum las med par lung bstan pas/__rgyal khams su ro snyoms kyi spyod pa la byon pa na e nas mar phebs pas dge ba'i bshes gnyen sgre pa dang mjal bas/__khong na re/__khyed skyes bu dam pa cig tu 'dug pas sems can gyi don rgya chen po 'grub par 'dug gi gsungs pas/__bla ma sgam po pas/__nga la sems can gyi don bya ba'i long med/__mkha' 'gro ma'i lung bstan la da tshe lo gsum las med gsungs pa byung ba'i tshul zhus pas/__dge bshes sgre ba'i zhal nas/__'o na nga la des mi gnod pa'i thabs yod kyi/__ro khung brus kyang a'u rtsi/__rkang lag 'thor yang a'u rtsi/__'chi rtags tshang yang a'u rtsi ba'i gdams ngag__/jo mo sgrol ma yid bzhin 'khor lo'i sgrub thabs bya ba'i gdams pa khyad pa can zhig yod kyi gsungs nas 'di gnang bas dgung lo brgyad cu rtsa lngar bsrings te phrin las nam mkha' dang mnyam par gyur/__des rang gi sras kyi thu bo rje sgom pa tshul khrims snying por gnang ba nas rim par brgyud pa sogs/__ma byon pa'i sangs rgyas rab gsal gyi rnam par 'phrul pa gangs can mkhas grub yongs kyi gtsug rgyan tshar chen chos kyi rgyal po blo gsal rgya mtsho la bka' bab cing /__de nyid kyis snyan brgyud rgya mtsho'i bstan pa'i srog shing 'jam dpal dbyangs mkhyen brtse'i dbang phyug la gnang ba nas bzung ste bdag gi rtsa ba'i bla ma dam pa'i bar du lhag pa'i lha 'di nyid thugs nyams su bzhes shing dngos grub brnyes pa sha stag tu byon pa dang /__gzhan yang brgyud srol 'di la kha che paN+Di ta shAkya shrI b+ha dra nas brgyud pa dang /__gnyan lo dar ma grags nas brgyud pa rnams kyang don gyis 'dus pas khyad par du 'phags pa'i rjes su gnang ba zab mo sgrub par byed pa la/__slob dpon gyi bya ba dang /__slob ma la bya ba gnyis su yod pa las/__thog mar slob dpon gyi bya ba brgyud pa'i gsol 'debs dang mchod pa byin rlabs sngon du 'gro bas bdag bskyed bzlas pa dang bcas pa bya ba dang /__mdun gyi tshom bu bcom ldan 'das mar yan lag bzhi rdzogs kyi tshul gyis bskyed cing mchod bstod gtor ma 'bul ba dang /__thugs rgyud bskul ba'i phyir bzlas pa bya ba/__bum pa bsgrub pa sogs sngon du legs par grub zin nas/__da khyod rang rnams kyi ngo skal du gyur pa slob ma'i bya ba la'ang sbyor dngos rjes gsum las/__sbyor ba'i rim pa maN+Dal 'bul zhing gsol ba gdab pa/__rgyud dag par bya ba/__khyad par gyi gsol ba 'debs pa rnams sngon du 'gro dgos pas/__thog mar slob dpon la rje btsun sgrol ma dkar mo yid bzhin 'khor lo dngos yin snyam pa'i mos gus dang ldan pas rjes su gnang ba zab mo zhu ba'i yon du dmigs te maN+Dal zhig 'bul bar zhu/__de ltar maN+Dal phul nas phyag snyims pa me tog dang bcas pas thal mo sbyar te gsol ba 'debs pa 'di'i rjes zlos lan gsum mdzod/__/gang gi drin gyis bde chen nyid sogs nas/__rdo rje can zhabs pad la 'dud/__/'khor ba las sgrol tA re ma/__/tut+tA re yis 'jigs brgyad sgrol/__/tu res na ba rnams las sgrol/__/sgrol ma yum la phyag 'tshal lo/__/zhes gsol ba btab nas/__rgyud dag par bya ba'i slad du dmigs pa 'di bzhin mdzod/__mdun gyi nam mkhar bla ma dang gnyis su med pa'i rje btsun sgrol ma dkar mo yid bzhin gyi 'khor lo la gzhan yang phyogs bcu'i sangs rgyas dang byang chub sems dpa'i tshogs bsam gyis mi khyab pas bskor ba sprin phung chen po 'thibs pa bzhin mngon sum lta bur bzhugs par mos pa byas te/__de dag gi spyan sngar bdag gzhan gyis tshe 'khor ba thog ma med pa nas bsags pa'i sdig pa bshags pa la sogs pa'i yan lag bdun pa bgyi snyam pas 'di'i rjes zlos lan gsum mdzod/__/dkon mchog gsum la bdag skyabs mchi nas/__'grub par shog__/ces rgyud dag par byas nas/__slar yang khyad par gyi don zhu ba'i slad du gsol ba 'debs pa 'di'i rjes zlos lan gsum mdzod/__/dus gsum sangs rgyas thams cad 'dus pa'i ngo bo bla ma rin po ches/__bdag gi dus ma yin par 'chi ba'i 'jigs pa thams cad bsal nas rje btsun bcom ldan 'das ma sgrol ma dkar mo yid bzhin 'khor lo tshe sbyin ma'i rjes su gnang ba ma lus pa stsal du gsol/__/zhes pa rnams rjes gnang gi sngon 'gro yin/__dngos gzhi la thog mar rjes gnang gi gzhi dgod pa'i slad du/__slob dpon la rje btsun sgrol ma dkar mo dngos yin snyam pa'i mos gus drag po dung ba zhig byas pa'i rkyen gyis/__slob dpon gyi thugs ka nas 'od zer 'phros/__mdun bskyed kyi thugs kar phog pas thugs rgyud bskul te/__de'i thugs ka nas 'od zer dkar po bsam gyis mi khyab pa 'phros khyed rang rnams kyi lus la phog pas nad gdon sdig sgrib dus ma yin pa'i 'chi ba'i 'jigs pa bag chags dang bcas pa dang /__der ma zad rnam smin gdos bcas sha khrag gis bsdus pa'i phung po khams dang skye mched sogs ma dag pa'i snang ba thams cad mi dmigs te stong pa nyid du sbyangs pa'i mos pa mdzod/__/oM swa b+hA wa sogs/__stong pa'i ngang las pa~M las pad+ma dkar po 'dab ma brgyad pa'i lte bar/__a las zla ba'i dkyil 'khor gyi steng du khyed rang rnams kyi rnam par shes pa'i ngo bo tA~M yig dkar po/__de las 'od zer 'phros/__'phags pa mchod/__sems can gyi don byas/__tshur 'dus yongs su gyur pa las khyed rang rnams rje btsun sgrol ma nas/__zla ba'i rgyab yol dang 'od kor can gyi sku can du lam gyis gsal ba'i snying gar zla ba'i rang bzhin gyi 'khor lo dkar po rtsibs brgyad pa nas/__'od zer sna lnga'i phreng ba g.yas skor du yod pa'i mos pa mdzod/__/khyed rang rnams kyi phyi rol tu 'khor lo dkar po rtsibs brgyad pa sbubs can zhwa theb kha sbyar ba lta bu g.yas skor du 'khor ba me dpung 'bar zhing 'khrugs pas gdon bgegs gnod byed thams cad bya sgro mgar gyi so mal du babs pa ltar gzhob thul thul du tshig pa'i mos pa mdzod/__slar yang snying ga'i tA~M yig sngags phreng dang bcas pa las 'od zer dkar po sogs nas/__zhi ba'i phrin las thams cad 'grub pa'i mos pa mdzod/__/sogs bdag bskyed bzhin la gong gi rigs 'gres tshig kha bsgyur dang bcas te/__gsar zhing mnyen lcug dang ldan pas bun long gis gtams par gyur pa'i mos pa mdzod/__/slar yang khyed rang rnams kyi spyi bor oM dkar po/__mgrin par AHdmar po/__thugs kar hU~M sngon po rnams gsal btab nas/__slob dpon la mos gus drag po dung ba zhig byas pas slob dpon mdun bskyed dang bcas pa'i thugs ka nas 'od zer 'phros pas phyogs bcu'i sangs rgyas dang byang chub sems dpa' thams cad dang /__khyad par du yang bcom ldan 'das ma yid bzhin 'khor lo'i thugs rgyud bskul te de rnams kyi gsang ba gsum gyi gnas nas sku gsung thugs kyi byin rlabs thams cad zla ba'i rang bzhin gyi 'khor lo dkar po rtsibs brgyad pa lte ba yig 'bru dang bcas pa sngags kyi rang sgra sgrogs shing 'chi med bdud rtsi'i char 'bebs bzhin pa'i rnam pa nam mkha' gang bar byon pa dang lhan cig tu/__mdun bskyed dang slob dpon las kyang de 'dra ba'i 'khor lo dpag tu med pa chad de khyed rang rnams kyi spyi bo tshangs pa'i sgo/__ba spu'i bu ga__/dbang po'i sgo rnams nas thogs med du zhugs te/__thugs ka'i 'khor lo la sib sib thim pas de las kyang 'chi med bdud rtsi'i rgyun dpag tu med pa skya chil chil babs/__lus thams cad 'chi med ye shes kyi bdud rtsi'i chu rgyun gyis khengs pas/__dus ma yin pa'i 'chi ba'i 'jigs pa bag chags dang bcas pa thams cad sangs shing dag__/tshe dang bsod nams ye shes dang yon tan la sogs pa thams cad gong nas gong du 'phel zhing rgyas par gyur pa'i thugs mos brtan po gnang bar zhu/__oM tA re tut+tA re tu re swA hA/__A be sha ya a AH__dzaHhU~M ba~M ho/__zhes lan mang du brjod spos rol bya/__slar yang slob dpon gyi thugs ka'i tA~M yig las 'od zer 'phros pas/__dbang gi lha rje btsun sgrol ma 'jigs pa brgyad las skyob pa'i lha tshogs thams cad mdun gyi nam mkhar oM badz+ra sa mA dzaH__zhes pas skur byed nam mkha'i lha tshogs spyan drangs pa la khyed rang rnams kyis yan lag bzhi pa sgrub pa'i slad du gsol ba 'debs pa 'di'i rjes zlos mdzod/__/de bzhin gshegs pa thams cad kyis bdag la mngon par dbang bskur ba stsal du gsol/__/zhes gsol ba btab pas/__dbang gi lha rnams dang slob dpon lhan cig pas bum pa 'chi med ye shes kyi bdud rtsis gang ba re thogs nas khyed rang rnams kyi spyi bor bzhag ste/__ji ltar bltams pa sogs nas/__dbang bskur ro/__/oM sarba ta thA ga ta a b+hi She ka te sa ma ya shrI ye hU~M/__zhes dang /__yi ge bcu pa'i mthar/__oM badz+rI b+ha ba a b+hi Shiny+tsa hU~M/__zhes gsung zhing bum pa'i chus spyi bo nas dbang bskur/__sku gang /__dri ma dag__/chu'i lhag ma yar lud pa las 'od dpag med sprul sku'i rnam pa can gyis dbur brgyan/__slob dpon gyis/__dzaHhU~M ba~M hoH___zhes brjod pas nam mkhar bzhugs pa'i dbang gi lha rnams kyang khyed rang rnams la sib sib thim pa'i mos pa mdzod/__/de ltar khyod rnams rje btsun sgrol ma dkar mo'i skur bskyed cing byin gyis brlabs pa de nyid la mnga' dbul gyi slad du me tog la sogs pa'i mchod pa rnams kyis kyang mchod pa'i mos pa mdzod/__/slob dpon gyis/__oM badz+ra puSh+pe AHhU~M/__nas/__nai bid+ya AHhU~M/__gi bar phyag rgya dang bcas pa bya zhing /__las rdor gyis mchod pa stob pa'i tshul bya/__slar yang slob dpon mdun bskyed dang bcas pas me tog gi char 'babs shing bkra shis pa'i tshigs su bcad pas kyang mnga' gsol ba'i mos pa mdzod/__/ces dang /__rdo rje dril bu 'dzin pas me tog 'thor bzhin du/__phun sum tshogs pa nas/__bkra shis gsum pa'o/__/zhes pa'i bar brjod/__de ltar na rje btsun sgrol ma dkar mo yid bzhin 'khor lo'i sku yi rjes su gnang ba thob/__khyed rang rnams kyis lus kyi sgo nas bsags pa'i sdig pa dang sgrib pa dus ma yin pa'i 'chi ba'i 'jigs pa bag chags dang bcas pa thams cad byang zhing dag par byas/__gnas skabs su lus lha yi skur bsgom pa la dbang zhing /__mthar thug sgrol ma dkar mo yid bzhin 'khor lo'i sku dang dbyer med par byin gyis brlabs pa yin snyam du thugs mos mdzod/__rjes gnang dngos la lung gsum las/__thog mar rjes su bzlas pa'i lung gi slad du/__slob dpon dang khyed rang rnams kyi thugs kar sngar gsal btab bzhin pa'i 'khor lo sngags phreng dang bcas pa de nyid slar yang dran par byas te/__slob dpon la gus 'dud drag po dung ba zhig mdzad pa la brten nas/__slob dpon gyi thugs ka'i tA~M yig sngags phreng rnams dang bcas pa las mar me gcig las gnyis mched kyi tshul du byung ba zhal nas thon/__khyed rang rnams kyi zhal du zhugs/__thugs ka'i tA~M yig sngags phreng rnams dang bcas pa la sib sib thim pas rgyud byin gyis brlabs pa'i mos pa mdzod/__/de nas spyi bo'i bla ma 'od dpag med yongs su gyur pa las mgon po tshe dang ye shes dpag tu med pa sku mdog dkar la dmar ba'i mdangs chags pa/__zhal gcig phyag gnyis kyis gser gyi bum pa 'chi med bdud rtsi'i chu rgyun gyis gang ba mnyam gzhag gi steng na 'dzin pa/__dar dang rin po che'i rgyan gyis brgyan pa/__zhabs rdo rje'i skyil mo krung gis bzhugs pa'i thugs ka'i hrIHyig las 'od zer phyogs bcur 'phros pas snod bcud 'khor 'das kyis bsdus pa'i tshe dang bsod nams ye shes thams cad 'od zer gyi rnam par bsdus te bum pa'i nang du song bas 'chi med bdud rtsi'i chu rgyun du gyur/__de nyid gyen du 'phyur zhing kha nas lud pa khyed rang rnams kyi spyi bo tshangs pa'i bu ga nas mar zhugs/__lus kyi nang thams cad gang bas/__nad gdon sdig sgrib dus ma yin pa'i 'chi ba'i 'jigs pa thams cad sbyangs/__'chi med tshe yi dngos grub thob/__slar yang thugs ka'i 'khor lo sngags phreng dang bcas pa las kyang 'chi med bdud rtsi'i zil dngar gyi rgyun dang /__'od zer dkar po sngags kyi sgra sgrogs pa'i tshogs dpag tu med pa 'phros/__rang rang gi lus kyi spyi gtsug nas rkang mthil gyi bar thams cad mer gyis khengs pas nad gdon sdig sgrib dus ma yin pa'i 'chi ba'i 'jigs pa bag chags dang bcas pa thams cad byang zhing dag__/'chi med tshe yi dngos grub thob/__lus kyi ba spu'i bu ga tshun chad kyang bdud rtsi'i zil pa phram mer yod pa'i mos pa dang bcas te sngags 'di'i rjes zlos lan brgya rtsa brgyad mdzad par zhu/__oM tA re tut+tA re tu re ma ma A yuHpuN+ye dz+nyA na puSh+tiM ku ru swA hA/__zhes dang /__slar yang 'di rnams kyi rjes zlos kyang lan gsum gsum re mdzad par zhu/__a A sogs nas/__aM aH/__ka kha ga g+ha nga nas/__ha k+ShaH__ye d+harmA nas/__shra ma NaH__de ltar bzlas pas rgyud byin gyis brlabs shing dbyer med du brtan par byas pa'i mos pa dang bcas te/__slob dpon la drin lan gyi tshul du me tog 'thor bzhin pas 'di'i rjes zlos lan gsum mdzod/__/bcom ldan bdag la stsal lags kyi/__/bcom ldan bdag la byin gyis rlobs/__/slob dpon gyis kyang khyed rang rnams kyis phul ba'i me tog gi phreng ba de nyid sngags kyi phreng bar byin gyis brlabs te spyi bor bzhag pas snying ga'i sngags phreng byang chub ma thob kyi bar du brtan cing nus ldan du byas pa'i mos pa mdzod/__/bcom ldan 'di la stsal lags kyi/__/bcom ldan 'das ma'i byin rlabs ni/__/'di la 'go bar mdzad du gsol/__/sngags kyi dngos grub stsal du gsol/__/brtul zhugs brtan par mdzad du gsol/__/rdo rje slob ma 'di rnams kyi rgyud la rje btsun sgrol ma dkar mo yid bzhin gyi 'khor lo'i gsung gsang sngags kyi byin rlabs ma lus pa 'jug cing brtan par gyur cig__/ces brjod cing me tog 'thor/__dam bca' ba'i lung gi slad du/__dus 'di nas bzung ste ji srid byang chub snying po la mchis kyi bar du rje btsun sgrol ma dkar mo yid bzhin 'khor lo yi dam gyi lhar bzung bar bgyi'o snyam pas 'di'i rjes zlos lan gsum gnang bar zhu/__slob dpon dgongs su gsol/__bdag ming 'di zhes bgyi ba/__dus 'di nas bzung ste ji srid byang chub ma thob kyi bar du rje btsun sgrol ma dkar mo yi dam gyi lhar bzung bar bgyi'o/__/de ltar na rje btsun sgrol ma dkar mo yid bzhin 'khor lo'i gsung gi rjes su gnang ba thob/__khyed rang rnams kyis ngag gi sgo nas bsags pa'i sdig pa dang sgrib pa dus ma yin pa'i 'chi ba'i 'jigs pa bag chags dang bcas pa thams cad byang zhing dag par byas/__gnas skabs su ngag sngags bzla ba la dbang zhing /__mthar thug rje btsun sgrol ma dkar mo yid bzhin 'khor lo'i gsung dang dbyer med par byin gyis brlabs pa yin snyam du mos pa mdzod/__/byin gyis brlab pa'i lung gi slad du/__khyed rang rnams kyi snying ga'i 'khor lo'i dbus kyi tA~M yig la sems zhugs pa bzhin cher gyis gtad pas/__de las 'od zer bsam gyis mi khyab pa 'phros/__snod bcud thams cad la phog pas de thams cad lan tshwa chur bcug pa bzhin 'od du zhu nas 'od mchin kha'i gur khang la thim/__de 'od ljang gu'i gur khang la thim/__de 'od mthing ga'i gur khang la thim/__de 'od dmar po'i gur khang la thim/__de 'od ser po'i gur khang la thim/__de 'od dkar po'i gur khang la thim/__de 'khor lo dkar po'i gur khang la thim/__de rang rje btsun mar gsal ba la thim/__de thugs ka'i 'khor lo sngags phreng dang bcas pa la thim/__de tA~M yig la thim/__de'i khog pa mgo bo la thim/__mgo bo zla tshes la thim/__zla tshes thig le la thim/__thig le nA da la thim/__nA da yang mi dmigs pa nam mkha' la 'ja' yal ba bzhin gyur pa la brten nas 'khor 'das gnyis snang gis bsdus pa'i chos thams cad rang bzhin gyis ma dmigs pa'i gnas lugs 'od gsal spros pa'i mtha' thams cad dang bral ba nam mkha' lta bu rgyud la skyes par mos pa byas te de'i ngang la blo lhod kyis glod de cung zad re mnyam par 'jog par zhu/__de ltar na rje btsun sgrol ma dkar mo yid bzhin 'khor lo'i thugs kyi rjes su gnang ba thob/__khyed rang rnams kyis yid kyi sgo nas bsags pa'i sdig pa dang sgrib pa dus ma yin pa'i 'chi ba'i 'jigs pa bag chags dang bcas pa thams cad byang zhing dag par byas/__gnas skabs su yid 'od gsal gyi ye shes su bsgom pa la dbang zhing /__mthar thug rje btsun sgrol ma dkar mo yid bzhin 'khor lo'i thugs dang dbyer med par byin gyis brlabs pa yin snyam du thugs mos mdzod/__/slar yang khyed rang rnams skad cig gis sgrol ma dkar mo'i skur lam gyis gsal ba la sku gsung thugs kyi byin rlabs de rnams brtan par bya ba'i slad du slob dpon gyis me tog gi char 'bebs shing bden pa'i tshig gis kyang mnga' gsol ba'i mos pa mdzod/__/bcom ldan 'das ma'i byin rlabs ni/__/'di la 'go bar mdzad du gsol/__/sngags kyi dngos grub stsal du gsol/__/brtul zhugs brtan par mdzad du gsol/__/rje btsun sgrol ma dkar mo yid bzhin 'khor lo'i sku gsung thugs kyi byin rlabs thams cad rdo rje slob ma 'di rnams kyi rgyud la 'jug cing brtan par gyur cig__/dzaHhU~M ba~M hoH___zhes brjod cing me tog gtor/__de rnams kyis rjes su gnang ba'i dngos gzhi legs par grub nas/__gnas skabs de dag tu thob cing khas blangs pa'i dam tshig dang sdom pa la srung sdom tshul bzhin du bgyi'o snyam pas 'di'i rjes zlos lan gsum mdzod/__gtso bos ji ltar sogs/__rjes su gnang ba legs par thob pa'i bka' drin gtang rag gi yon du dmigs te maN+Dal zhig 'bul bar zhu/__de ltar maN+Dal du ma zad lus longs spyod thams cad kyang 'bul na cha shas nas bzhes la longs spyad du gsol snyam pas 'di'i rjes zlos lan gsum mdzod/__deng nas brtsams te sogs/__de rnams kyi sgo nas rje btsun sgrol ma dkar mo yid bzhin 'khor lo'i rjes su gnang ba thun mong ma yin pa zab gsang snyan brgyud kyi tshul du bzhugs pa nyid legs par phul grub pa yin pas/__'di'i sgo nas kyang rang dang gzhan gyi don rgya chen po mdzad par zhu/__bsod nams 'di yis sogs brjod la slob ma rnams rang gnas su gtang ngo /__/gsum pa rjes ni/__mchod pa kha gso/__bsang sbyang byin rlabs gong bzhin la/__mtshan sngags sngon du 'gro ba'i chu gnyis nyer spyod rol mo dang bcas pas mchod/__'khor ba las sgrol sogs kyis bstod/__'dod don gsol/__yi ge brgya pa lan gsum gyis lhag chad kha bskang /__ma 'byor pa dang sogs kyis nongs pa bzod par gsol/__oM khyod kyis sogs dang /__badz+ra muHsa tshom bu'i ye shes pa gshegs/__dam tshig pa rang la thim/__dge ba 'di yis myur du bdag sogs bsngo smon dang /__che ba'i che mchog sogs shis pa brjod pas me tog gi char sil ma dgram/__las kyi rjes mi mngon par bya'o/__/brgya tshar sogs mdzad na/__thog ma de la 'di kha sor bzhag dang /__gnyis pa man chad la maN+Dal sa gzhi spos byugs dang /__gsol gdab bstod pa gnyis tshar gcig gi rjes su 'di yi khyad par gyi gsol gdab sbrel ba las rgyun bshags mi dgos/__bzlas lung sngags gsum gsum mdzad/__/gzhan dkyus bzhin mdzad pa phyag len yin no/__/de ltar 'phags ma yid bzhin 'khor lo yi/__/thun mong min pa'i rjes su gnang ba'i tshul/__/'chi med grub pa'i bdud rtsis lus can kun/__/tshe dang ye shes pad+mo rgyas gyur cig__/ces sgrol ma dkar mo thun mong ma yin pa 'od zer drug sbrags kyi rjes su gnang ba'i tshul gsal bar bkod pa 'di ni/__'jam dbyangs mkhyen brtse'i dbang phyug gis mdzad pa'i rjes gnang thun mong pa'i yig cha la/__snyan brgyud zhal shes kyi zin tho rnams kyis brgyan te rje bla ma rnams kyis ji ltar phyag len mdzad pa la gzhi byas/__tshig gi mtha' bskyed tshul mi 'gal bas zur brgyan te nyams su blang bde bar/__khyab bdag rdo rje sems dpa'i ngo bor bzhugs pa mkhan chen thams cad mkhyen pa byams pa kun dga' bstan 'dzin/__rgyud sde rgya mtsho'i mnga' bdag rdo rje 'chang rin chen blo gsal bstan skyong /__'jam mgon bla ma byams pa ngag dbang bstan 'dzin snyan grags/__zab rgyas gdams pa'i gter mdzod rdo rje 'dzin pa chen po ngag dbang legs grub rnams las tshul 'di'i bka' drin ci rigs pa thob cing /__gzhan yang nges par thams cad mkhyen pa karma ngag dbang yon tan rgya mtsho dang /__rje bla ma dkon mchog bstan pa rab rgyas sogs las sgrol ma dkar mo'i chos tshul mang du thos pa'i rgyal khams nyul ba'i bya bral ba 'jam dbyangs mkhyen brtse'i dbang pos sbyar ba'i dge bas zab gsang snyan brgyud rin po che'i bstan pa bskal pa rgya mtshor 'tsho zhing gzhes pa'i rgyur gyur cig dpe 'di tshar lugs thun mong ma yin pa'i brgyud 'dzin las gzhan la bka' rgya dam par bya ba gces so//___//__!_