JKW-KABUM-09-TA-001-004

Previous Text Back to Volume PageNext Text

ཚེ་སྒྲུབ་ཉེ་བརྒྱུད་ཀྱི་སྒོ་ནས་བརྟན་བཞུགས་འབུལ་བའི་ཆོ་ག་ཉེ་བར་བསྡུས་པ་འཆི་མེད་གྲུབ་པའི་དགའ་སྟོན།

Wylie title	tshe sgrub nye brgyud kyi sgo nas brtan bzhugs 'bul ba'i cho ga nye bar bsdus pa 'chi med grub pa'i dga' ston
Location	mkhyen brtse'i bka' 'bum Volume 9, sde tshan 1, Text 4, Pages 20-25 (Folios 10b2 to 13a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	ཐང་སྟོང་རྒྱལ་པོ་ (thang stong rgyal po)
Citation	'jam dbyangs mkhyen brtse'i dbang po. tshe sgrub nye brgyud kyi sgo nas brtan bzhugs 'bul ba'i cho ga nye bar bsdus pa 'chi med grub pa'i dga' ston. In 'jam dbyangs mkhyen brtse'i dbang po'i bka' 'bum, Vol. 9: 20-25. Khams sde dge rdzong sar dgon: Rdzong sar blo gros phun tshogs, 2020.
Genre	Longevity Rituals - tshe sgrub  ·  Prayers for Long Life - zhabs brtan gsol 'debs - brtan bzhugs
Cycle	ཐང་རྒྱལ་ལུགས་ཚེ་སྒྲུབ་འཆི་མེད་དཔལ་སྟེར་ (thang rgyal lugs tshe sgrub 'chi med dpal ster)
Deity	tshe dpag med
Colophon	ཞེས་པ་འདི་ནི་རྗེ་གྲུབ་ཐོབ་ཆེན་པོ་ངུར་སྨྲིག་འཆང་བའི་རྣམ་པར་སྣང་བ་མཉྫུ་གྷོ་ཥའི་ཞལ་སྔ་ནས་མཛད་པའོ།།
	zhes pa 'di ni rje grub thob chen po ngur smrig 'chang ba'i rnam par snang ba many+dzu g+ho Sha'i zhal snga nas mdzad pa'o

Tibetan Text

Wylie

[edit]

༄༅། །ཚེ་སྒྲུབ་ཉེ་བརྒྱུད་ཀྱི་སྒོ་ནས་བརྟན་བཞུགས་འབུལ་བའི་ཆོ་ག་ཉེ་བར་བསྡུས་པ་འཆི་མེད་གྲུབ་པའི་དགའ་སྟོན་ཞེས་བྱ་བ་བཞུགས་སོ། །ན་མོ་གུ་རུ་བྷྱཿ འཆི་མེད་གྲུབ་པའི་ཡེ་ཤེས་སྐུ། །བླ་མ་ཚེ་དཔག་མེད་མགོན་ཞབས། །བཏུད་ནས་བསྟན་འཛིན་སྐྱེས་བུ་ལ། །བརྟན་བཞུགས་འབུལ་བའི་ཆོ་ག་དབྱེ། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། དུས་ཚེས་དགེ་བར་གནས་ཁང་བཀོད་པས་མཛེས་པར་དཀོན་མཆོག་སྤྱི་དང་། ཚེ་དཔག་མེད་ཀྱི་རྟེན་བཀྲམ་པའི་ཕུགས་སུ་བླ་མའི་བཞུགས་ཁྲི་ལ་སྟན་དཀར་རྡོ་རྗེ་དང་གཡུང་དྲུང་གི་རི་མོ་ཅན་གདིང་། ཉེ་ལོགས་ཅི་རིགས་པར་དབང་ཆོག་ལས་ཇི་ལྟར་འབྱུང་བའི་མདུན་བསྐྱེད་ཀྱི་རྟེན་མཆོད་གཏོར་དང་བཅས་པ། བཀྲ་ཤིས་རྫས་བརྒྱད་སོགས་མངའ་འབུལ་གྱི་ཆས། མཎྜལ་དང་རོལ་མོའི་བྱེ་བྲག་སོགས་འོག་ཏུ་མཁོ་བ་རྣམས་འདུ་བྱས་ནས། སྔོན་གཏོར་གཏོང་བ་དང་། །གནས་ཡོ་བྱིན་རླབས་ནས་བཟུང་སྟེ། གཏོར་མ་འབུལ་བའི་བར་དབང་ཆོག་ལྟར་དང་། ལས་བུམ་དུ་བདུད་རྩི་འཁྱིལ་བ་བསྐྱེད་བཟླས་པ་སྤྱི་ལྟར་བྱའོ། །གཉིས་པ་ནི། བརྟན་བཞུགས་འབུལ་ཡུལ་དེ་ཉིད་སྤོས་དང་རོལ་མོ་སོགས་བཀུར་སྟི་དང་བཅས་གདན་དྲངས་ཏེ་ཁྲི་ལ་བཞུགས་སུ་གསོལ། སྦྱོང་བ་གསུམ་སྤྱི་ལྟར་སྔོན་དུ་འགྲོ་བས་ཁྲུས་གསོལ་དང་བཅས་པའི་མཐར། བརྟན་བཞུགས་འབུལ་ཡུལ། ཨ་མྲྀ་ཏས་བསང་། སྭཱ་བྷཱ་ཝས་སྦྱང་། སྟོང་པའི་ངང་ལས་གནས་ཡུལ་སྣོད་བཅུད་ཐམས་ཅད་བདེ་བ་ཅན་གྱི་ཞིང་གི་བཀོད་པ་ལྟར་ཕུན་སུམ་ཚོགས་པའི་རྒྱན་ཐམས་ཅད་ཀྱིས་བརྒྱན་པ། མཛེས་ཤིང་ལྷུན་སྟུག་པའི་དབུས་སུ་རྨ་བྱས་བཏེག་པའི་རིན་པོ་ཆེའི་ཁྲི་སྣ་ཚོགས་པདྨ་དང་ཟླ་བའི་སྟེང་དུ་དཔལ་ལྡན་བླ་མ་དམ་པའི་ཐུགས་རྣམ་པར་མི་རྟོག་པའི་ཡེ་ཤེས་ཀྱི་ངོ་བོ་ཡི་གེ་ཧྲཱིཿདམར་པོ་ཡོངས་སུ་གྱུར་པ་ལས། བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པ་སོགས་ནས། མཚན་དཔེའི་གཟི་བྱིན་འབར་བའི་སྐུར་གྱུར་པའི་དབུའི་སྤྱི་བོའི་གཙུག་ནས་བརྒྱུད་པའི་བླ་མ་རྣམས་ཐོ་བརྩེགས་སུ་བཞུགས་པའི་སོ་སོའི་ཐུགས་ཀ་ནས་འོད་ཟེར་འཕྲོས་པས་རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་སྤྱན་དྲངས། སྤྱི་བོའི་སྟེང་གི་བླ་མ་བརྒྱུད་པ་རྣམས་དང་། དཔལ་ལྡན་བླ་མ་དམ་པའི་སྐུ་ལུས་ལ་སིབ་སིབ་ཐིམ་པས་འཆི་མེད་ཚེའི་རིག་འཛིན་བརྙེས་པར་གྱུར། རྩ་སྔགས་མཐར། ཛཿཧཱུྃ་བྃ་ཧོཿ བཛྲ་ཨཱ་བེ་ཤ་ཡ་ཨཱ་ཨཱཿ ཞེས་བརྗོད་ཅིང་སྤོས་རོལ་དང་བཅས་བྱིན་དབབ། །ཨོཾ་ཨཱཿཧཱུྃ་ཧྲཱིཿཧྲཱིཿ སྣང་བ་མཐའ་ཡས་འགྲོ་ཀུན་རྗེས་སུ་སྐྱོང་། །སོགས་བརྒྱུད་འདེབས་ཀྱི་མཐར། ཞེས་གསོལ་བ་བཏབ་པས་རྩ་བརྒྱུད་ཀྱི་བླ་མ་དམ་པ་རྣམས་ཀྱི་སྐུ་ལུས་ལས་འོད་ཟེར་འཕྲོས། སྣོད་བཅུད་ཐམས་ཅད་ལ་ཁྱབ་པས། དཔལ་ལྡན་བླ་མ་དམ་པའི་སྐུ་ཚེ་ཡར་བ་དང་འཐོར་བ་དང་ཉམས་ཆགས་སུ་གྱུར་བ་ཐམས་ཅད་དང་། འབྱུང་བ་བཞིའི་བཅུད། སེམས་ཅན་ཐམས་ཅད་ཀྱི་ཚེ་དཔལ་བསོད་ནམས། སངས་རྒྱས་བྱང་སེམས་ཉན་རང་ཆོས་སྲུང་སོགས་འཁོར་འདས་ཐམས་ཅད་ཀྱི་བཅུད་དང་དགེ་མཚན་རྣམས་བསྡུས། རྩ་བརྒྱུད་ཀྱི་བླ་མ་རྣམས་ལ་ཐིམ། སླར་ཡང་དེ་དག་གི་སྐུ་ལས་འཆི་མེད་བདུད་རྩིའི་རྒྱུན་བབས། དཔལ་ལྡན་བླ་མ་དམ་པའི་དབུ་གཙུག་ནས་ཞུགས། སྐུ་ལུས་ཀྱི་ནང་ཐམས་ཅད་གང་། འཆི་མེད་ཚེ་དང་ཡེ་ཤེས་ཀྱི་དངོས་གྲུབ་བརྙེས་པར་གྱུར། ཅེས་བརྗོད་ཅིང་། རྩ་སྔགས་དང་སྤོས་རོལ་བྱ། དེ་ནས་ཚེ་བུམ་བཏེག་ལ། གོང་གི་དམིགས་པ་དང་བཅས། ཨོཾ་ཨཱཿཧཱུྃ་ཧྲཱིཿཧྲཱིཿ སྣང་བ་མཐའ་ཡས་སོགས་ནས། ཐང་སྟོང་རྒྱལ་པོར་གསོལ་བཏབ་བསླུ་བ་མེད། །གསོལ་བ་འདེབས་སོ་འགལ་རྐྱེན་བར་ཆད་སོལ། །བྱིན་གྱིས་རློབས་ཤིག་འཆི་མེད་དངོས་གྲུབ་སྩོལ། །ཨོཾ་ཨཱཿཧཱུྃ་སོགས་བརྗོད་ཅིང་ཕུལ་ལ། རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། བཅོམ་ལྡན་འདས་མགོན་པོ་ཚེ་དང་ཡེ་ཤེས་དཔག་ཏུ་མེད་པའི་ལྷ་ཚོགས་འཁོར་དང་བཅས་པའི་ཐུགས་རྗེའི་བྱིན་རླབས་ལ་བརྟེན་ནས་དཔལ་ལྡན་བླ་མ་དམ་པའི་སྐུ་ཚེ་མི་ཤིགས་པའི་རྡོ་རྗེར་གྱུར་ཅིག །མི་འགྱུར་བའི་གཡུང་དྲུང་དུ་གྱུར་ཅིག །མི་ནུབ་པའི་རྒྱལ་མཚན་དུ་གྱུར་ཅིག །འཆི་མེད་ཚེའི་རིག་འཛིན་བརྙེས་པར་གྱུར་ཅིག །ཅེས་དང་། སྔགས་བརྗོད་ཅིང་མེ་ཏོག་འཐོར། རོལ་མོའི་སྒྲ་སྦྱར། དེ་བཞིན་དུ་ཚེ་རིལ། བཀྲ་ཤིས་ཚེ་བརྟན་སོགས་ནས། དེ་རིང་ཁྱོད་ཀྱིས་གསོལ་བར་བགྱི། །འདི་གསོལ་བཅོམ་ལྡན་ཚེ་དཔག་མེད། །ཞལ་མཐོང་འགྱུར་བར་གདོན་མི་ཟ། །ཞེས་དང་། སྔགས་བརྗོད་ཅིང་འབུལ། ཐབས་ཀྱི་རྫས་ཚེའི་རིལ་བུ་ཕུལ་བ་ལ་བརྟེན་ནས་ཐབས་བདེ་བ་ཆེན་པོ་མཆོག་ཏུ་མི་འགྱུར་བ་རྡོ་རྗེ་ཚེའི་དངོས་གྲུབ་བརྙེས་པར་གྱུར་ཅིག །སྔགས་རོལ་བྱ། འཆི་མེད་ཚེ་ཡི་དཔལ་ལ་སོགས་བརྗོད་ཅིང་ཚེ་ཆང་ཕུལ། ཤེས་རབ་ཀྱི་རྫས་ཚེའི་བདུད་རྩི་ཕུལ་བ་ལ་བརྟེན་ནས་ཤེས་རབ་སྟོང་པ་ཉིད་ཅིས་ཀྱང་མི་ཤིགས་པ་རྡོ་རྗེ་ཚེའི་དངོས་གྲུབ་བརྙེས་པར་གྱུར་ཅིག །སྔགས་རོལ་བྱ། དེ་ནས་བཀྲ་ཤིས་པའི་རྫས་བརྒྱད་བསང་སྦྱང་བྱིན་བརླབ་སྤྱི་ལྟར་བྱས་ལ། སྔོན་བཅོམ་ལྡན་འདས་ལ་སོགས་ནས། བཀྲ་ཤིས་པའི་རྫས་སུ་བྱིན་གྱིས་བརླབས་པ་དེ་བཞིན་དུ། དེང་འདིར་དཔལ་ལྡན་བླ་མ་དམ་པའང་མེ་ལོང་གི་རྫས་ལ་བརྟེན་ནས་ཞབས་པད་བསྐལ་པ་རྒྱ་མཚོར་བརྟན་ཅིང་། ཤིན་ཏུ་བཀྲ་ཤིས་པར་གྱུར་ཅིག །མེ་ལོང་ཡེ་ཤེས་རྒྱ་མཚོ་ཆེན་པོ་སྟེ། །སོགས་བརྗོད་ལ། དེ་བཞིན་དུ་ཡུངས་ཀར་གྱི་བར་འགྲེས་ཤེས་པར་བྱ། སྤྲོ་ན་བཀྲ་ཤིས་རྟགས་བརྒྱད་དང་རྒྱལ་སྲིད་སྣ་བདུན་སོགས་ཀྱང་འབུལ། སླར་ཡང་སྤྱི་བོའི་སྟེང་གི་བླ་མ་བརྒྱུད་པ་རྣམས་རིམ་གྱིས་འོད་དུ་ཞུ་ནས་དཔལ་ལྡན་བླ་མ་དམ་པའི་སྐུ་ལུས་ལ་ཐིམ་པས་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་འཆི་མེད་ཚེ་མཐའ་ཡས་པའི་རང་བཞིན་དུ་གྱུར་པ་ལ་ཕྱོགས་བཅུའི་རྒྱལ་བ་སྲས་དང་བཅས་པ་རྣམས་དང་། ལྷ་དང་དྲང་སྲོང་བདེན་ཚིག་གྲུབ་པ་རྣམས་ཀྱིས་ཀྱང་མེ་ཏོག་གི་ཆར་འབེབས་ཤིང་། ཤིས་པ་བརྗོད་པའི་ཚིགས་སུ་བཅད་པས་ཀྱང་མངའ་གསོལ་བར་གྱུར། ཤིས་བརྗོད་རྒྱས་པའི་མཐར་མེ་ཏོག་གི་ཆར་དབབ། རོལ་མོ་བྱ། སྤྲོ་ན་བརྗོད་བྱ་ཕུན་སུམ་ཚོགས་ཤིང་། རྗོད་བྱེད་རྒྱས་བསྡུས་འཚམས་པའི་ཞལ་བཞེས་ཞུ་བའི་བཤད་པ་དང་། མཎྜལ་གྱི་རྣམ་གཞག་ཇི་ལྟར་རིགས་པ་ཞུ་ཞིང་། གང་ལྟར་ཡང་མཎྜལ་རྒྱས་པར་འབུལ། བླ་མ་དམ་པ་དེ་རང་གི་བརྟན་བཞུགས་གསོལ་འདེབས་དམིགས་བསལ་ཡོད་ན་དང་། སྤྱི་འགྲོའི་བརྟན་བཞུགས་བསྟན་པ་རྒྱས་པའི་སྨོན་ལམ་དང་བཅས་ལྷག་བསམ་རྣམ་པར་དག་པས་མགྲིན་གཅིག་ཏུ་གདབ། གསུམ་པ་ནི། ཁ་ན་མ་ཐོ་བ་སྤངས་པའི་དགའ་སྟོན་རྒྱ་ཆེར་སྤེལ། མདུན་བསྐྱེད་ཀྱི་རྗེས་ཆོག་དཀྱུས་ལྟར་དང་། ལེགས་ཚོགས་ཀྱི་རྟེན་འབྲེལ་ཕུན་སུམ་ཚོགས་པ་བསྒྲིགས་པས་མཐའ་བརྒྱན་པར་བྱའོ། །སྲིད་འདིར་ཕན་བདེའི་སྒོ་གཅིག་པུ། །བསྟན་པའང་དེ་ཉིད་འཛིན་ལ་རག །དེ་ཕྱིར་བརྟན་བཞུགས་ཆོ་གའི་ཚུལ། །སྤེལ་འདིས་དོན་གཉིས་ལྷུན་གྲུབ་ཤོག །ཅེས་བླ་མ་ཞི་ཁྲོའི་ཚེ་སྒྲུབ་འཆི་མེད་དཔལ་སྟེར་དང་རྗེས་སུ་འབྲེལ་བའི་བརྟན་བཞུགས་ཀྱི་ཆོ་ག་སྙིང་པོར་དྲིལ་བའི་ལེའུ་ཚན་ནོ། །ཞེས་པ་འདི་ནི་རྗེ་གྲུབ་ཐོབ་ཆེན་པོ་ངུར་སྨྲིག་འཆང་བའི་རྣམ་པར་སྣང་བ་མཉྫུ་གྷོ་ཥའི་ཞལ་སྔ་ནས་མཛད་པའོ།། །།

[edit]

tshe sgrub nye brgyud kyi sgo nas brtan bzhugs 'bul ba'i cho ga nye bar bsdus pa 'chi med grub pa'i dga' ston/ @#/_/tshe sgrub nye brgyud kyi sgo nas brtan bzhugs 'bul ba'i cho ga nye bar bsdus pa 'chi med grub pa'i dga' ston zhes bya ba bzhugs so/__/na mo gu ru b+h+yaH__'chi med grub pa'i ye shes sku/__/bla ma tshe dpag med mgon zhabs/__/btud nas bstan 'dzin skyes bu la/__/brtan bzhugs 'bul ba'i cho ga dbye/__/'di la gsum/__sbyor ba/__dngos gzhi/__rjes so/__/dang po ni/__dus tshes dge bar gnas khang bkod pas mdzes par dkon mchog spyi dang /__tshe dpag med kyi rten bkram pa'i phugs su bla ma'i bzhugs khri la stan dkar rdo rje dang g.yung drung gi ri mo can gding /__nye logs ci rigs par dbang chog las ji ltar 'byung ba'i mdun bskyed kyi rten mchod gtor dang bcas pa/__bkra shis rdzas brgyad sogs mnga' 'bul gyi chas/__maN+Dal dang rol mo'i bye brag sogs 'og tu mkho ba rnams 'du byas nas/__sngon gtor gtong ba dang /__/gnas yo byin rlabs nas bzung ste/__gtor ma 'bul ba'i bar dbang chog ltar dang /__las bum du bdud rtsi 'khyil ba bskyed bzlas pa spyi ltar bya'o/__/gnyis pa ni/__brtan bzhugs 'bul yul de nyid spos dang rol mo sogs bkur sti dang bcas gdan drangs te khri la bzhugs su gsol/__sbyong ba gsum spyi ltar sngon du 'gro bas khrus gsol dang bcas pa'i mthar/__brtan bzhugs 'bul yul/__a mr-i tas bsang /__swA b+hA was sbyang /__stong pa'i ngang las gnas yul snod bcud thams cad bde ba can gyi zhing gi bkod pa ltar phun sum tshogs pa'i rgyan thams cad kyis brgyan pa/__mdzes shing lhun stug pa'i dbus su rma byas bteg pa'i rin po che'i khri sna tshogs pad+ma dang zla ba'i steng du dpal ldan bla ma dam pa'i thugs rnam par mi rtog pa'i ye shes kyi ngo bo yi ge hrIHdmar po yongs su gyur pa las/__bcom ldan 'das mgon po tshe dang ye shes dpag tu med pa sogs nas/__mtshan dpe'i gzi byin 'bar ba'i skur gyur pa'i dbu'i spyi bo'i gtsug nas brgyud pa'i bla ma rnams tho brtsegs su bzhugs pa'i so so'i thugs ka nas 'od zer 'phros pas rtsa brgyud kyi bla ma yi dam sangs rgyas byang sems dpa' bo mkha' 'gro chos skyong srung ma'i tshogs dang bcas pa spyan drangs/__spyi bo'i steng gi bla ma brgyud pa rnams dang /__dpal ldan bla ma dam pa'i sku lus la sib sib thim pas 'chi med tshe'i rig 'dzin brnyes par gyur/__rtsa sngags mthar/__dzaHhU~M ba~M hoH__badz+ra A be sha ya A AH__zhes brjod cing spos rol dang bcas byin dbab/__/oM AHhU~M hrIHhrIH__snang ba mtha' yas 'gro kun rjes su skyong /__/sogs brgyud 'debs kyi mthar/__zhes gsol ba btab pas rtsa brgyud kyi bla ma dam pa rnams kyi sku lus las 'od zer 'phros/__snod bcud thams cad la khyab pas/__dpal ldan bla ma dam pa'i sku tshe yar ba dang 'thor ba dang nyams chags su gyur ba thams cad dang /__'byung ba bzhi'i bcud/__sems can thams cad kyi tshe dpal bsod nams/__sangs rgyas byang sems nyan rang chos srung sogs 'khor 'das thams cad kyi bcud dang dge mtshan rnams bsdus/__rtsa brgyud kyi bla ma rnams la thim/__slar yang de dag gi sku las 'chi med bdud rtsi'i rgyun babs/__dpal ldan bla ma dam pa'i dbu gtsug nas zhugs/__sku lus kyi nang thams cad gang /__'chi med tshe dang ye shes kyi dngos grub brnyes par gyur/__ces brjod cing /__rtsa sngags dang spos rol bya/__de nas tshe bum bteg la/__gong gi dmigs pa dang bcas/__oM AHhU~M hrIHhrIH__snang ba mtha' yas sogs nas/__thang stong rgyal por gsol btab bslu ba med/__/gsol ba 'debs so 'gal rkyen bar chad sol/__/byin gyis rlobs shig 'chi med dngos grub stsol/__/oM AHhU~M sogs brjod cing phul la/__rtsa ba dang brgyud par bcas pa'i dpal ldan bla ma dam pa rnams dang /__bcom ldan 'das mgon po tshe dang ye shes dpag tu med pa'i lha tshogs 'khor dang bcas pa'i thugs rje'i byin rlabs la brten nas dpal ldan bla ma dam pa'i sku tshe mi shigs pa'i rdo rjer gyur cig__/mi 'gyur ba'i g.yung drung du gyur cig__/mi nub pa'i rgyal mtshan du gyur cig__/'chi med tshe'i rig 'dzin brnyes par gyur cig__/ces dang /__sngags brjod cing me tog 'thor/__rol mo'i sgra sbyar/__de bzhin du tshe ril/__bkra shis tshe brtan sogs nas/__de ring khyod kyis gsol bar bgyi/__/'di gsol bcom ldan tshe dpag med/__/zhal mthong 'gyur bar gdon mi za/__/zhes dang /__sngags brjod cing 'bul/__thabs kyi rdzas tshe'i ril bu phul ba la brten nas thabs bde ba chen po mchog tu mi 'gyur ba rdo rje tshe'i dngos grub brnyes par gyur cig__/sngags rol bya/__'chi med tshe yi dpal la sogs brjod cing tshe chang phul/__shes rab kyi rdzas tshe'i bdud rtsi phul ba la brten nas shes rab stong pa nyid cis kyang mi shigs pa rdo rje tshe'i dngos grub brnyes par gyur cig__/sngags rol bya/__de nas bkra shis pa'i rdzas brgyad bsang sbyang byin brlab spyi ltar byas la/__sngon bcom ldan 'das la sogs nas/__bkra shis pa'i rdzas su byin gyis brlabs pa de bzhin du/__deng 'dir dpal ldan bla ma dam pa'ang me long gi rdzas la brten nas zhabs pad bskal pa rgya mtshor brtan cing /__shin tu bkra shis par gyur cig__/me long ye shes rgya mtsho chen po ste/__/sogs brjod la/__de bzhin du yungs kar gyi bar 'gres shes par bya/__spro na bkra shis rtags brgyad dang rgyal srid sna bdun sogs kyang 'bul/__slar yang spyi bo'i steng gi bla ma brgyud pa rnams rim gyis 'od du zhu nas dpal ldan bla ma dam pa'i sku lus la thim pas sku gsung thugs mi zad pa rgyan gyi 'khor lo 'chi med tshe mtha' yas pa'i rang bzhin du gyur pa la phyogs bcu'i rgyal ba sras dang bcas pa rnams dang /__lha dang drang srong bden tshig grub pa rnams kyis kyang me tog gi char 'bebs shing /__shis pa brjod pa'i tshigs su bcad pas kyang mnga' gsol bar gyur/__shis brjod rgyas pa'i mthar me tog gi char dbab/__rol mo bya/__spro na brjod bya phun sum tshogs shing /__rjod byed rgyas bsdus 'tshams pa'i zhal bzhes zhu ba'i bshad pa dang /__maN+Dal gyi rnam gzhag ji ltar rigs pa zhu zhing /__gang ltar yang maN+Dal rgyas par 'bul/__bla ma dam pa de rang gi brtan bzhugs gsol 'debs dmigs bsal yod na dang /__spyi 'gro'i brtan bzhugs bstan pa rgyas pa'i smon lam dang bcas lhag bsam rnam par dag pas mgrin gcig tu gdab/__gsum pa ni/__kha na ma tho ba spangs pa'i dga' ston rgya cher spel/__mdun bskyed kyi rjes chog dkyus ltar dang /__legs tshogs kyi rten 'brel phun sum tshogs pa bsgrigs pas mtha' brgyan par bya'o/__/srid 'dir phan bde'i sgo gcig pu/__/bstan pa'ang de nyid 'dzin la rag__/de phyir brtan bzhugs cho ga'i tshul/__/spel 'dis don gnyis lhun grub shog__/ces bla ma zhi khro'i tshe sgrub 'chi med dpal ster dang rjes su 'brel ba'i brtan bzhugs kyi cho ga snying por dril ba'i le'u tshan no/_/zhes pa 'di ni rje grub thob chen po ngur smrig 'chang ba'i rnam par snang ba many+dzu g+ho Sha'i zhal snga nas mdzad pa'o//__//