JKW-KABUM-08-NYA-017-002

From Khyentse Lineage - A Tsadra Foundation Project

རིགས་གསུམ་སྤྱིའི་བསྙེན་ཐབས་གཞན་ཕན་ལྷུན་གྲུབ།
Wylie title rigs gsum spyi'i bsnyen thabs gzhan phan lhun grub JKW-KABUM-08-NYA-017.pdf
Location mkhyen brtse'i bka' 'bum
Volume 8, sde tshan 17, Text 2, Pages 495-503 (Folios 40a2 to 44a6)
Author འཇམ་དབྱངས་མཁྱེན་བརྩེའི་དབང་པོ་
Less details More details
Citation 'jam dbyangs mkhyen brtse'i dbang po. rigs gsum spyi'i bsnyen thabs gzhan phan lhun grub. In 'jam dbyangs mkhyen brtse'i dbang po'i bka' 'bum, Vol. 8: 495-503. Khams sde dge rdzong sar dgon: Rdzong sar blo gros phun tshogs, 2020.
Genre Recitation Manual - bsnyen yig
Deity rigs gsum mgon po
Colophon

།ཞེས་པའང་མཁན་ཆེན་སངས་རྒྱས་ཕུན་ཚོགས་པའི་གསུང་རབ་ལ་གཞི་བྱས་ཏེ་ཉུང་གསལ་སྙིང་པོར་དྲིལ་བའི་ཚུལ་གྱིས་འཇམ་དབྱངས་མཁྱེན་བརྩེའི་དབང་པོས་བྲིས་པའི་དགེ་བས་འགྲོ་ཀུན་སྟོབས་བཅུ་མངའ་བའི་མཁྱེན་བརྩེ་ནུས་པའི་ཡེ་ཤེས་ལ་མྱུར་དུ་རེག་པའི་རྒྱུར་གྱུར་ཅིག

zhes pa'ang mkhan chen sangs rgyas phun tshogs pa'i gsung rab la gzhi byas te nyung gsal snying por dril ba'i tshul gyis 'jam dbyangs mkhyen brtse'i dbang pos bris pa'i dge bas 'gro kun stobs bcu mnga' ba'i mkhyen brtse nus pa'i ye shes la myur du reg pa'i rgyur gyur cig

":Property:textsubnumber|textsubnumber" can not be assigned to a declared number type with value 1.

[edit]
༄༅། །རིགས་གསུམ་སྤྱིའི་བསྙེན་ཐབས་གཞན་ཕན་ལྷུན་གྲུབ་ཅེས་བྱ་བ་བཞུགས་སོ། །ན་མོ་གུ་རུ་ཏྲི་ཀུ་ལ་ནཱ་ཐཱ་ཡ། རིགས་གསུམ་སྤྱིའི་བསྙེན་པ་བྱ་བའི་ཚུལ་ལ། བྱ་སྤྱོད་ཀྱི་རྒྱུད་སྡེ་སོ་སོའི་རང་ལུགས་ལྟར་བསྙེན་པ་སོགས་བྱ་བའི་ཚུལ་ནི་རྒྱུད་སྡེ་སྤྱིའི་རྣམ་གཞག་དང་། བསྙེན་ཡིག་སྤྱིར་བཏང་རྣམས་ལས་ཤེས་པར་འགྱུར་ལ། འདིར་ད་ལྟར་གྱི་ཕྱག་གཞེས་དཀྱུས་མ་ལྟར་བསྙེན་པ་ལས་རུང་ཙམ་གཏོང་བར་འདོད་པས་ལག་ཏུ་ལེན་པའི་ཚུལ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། འདི་ཉིད་ཀྱི་དབང་བསྐུར་བ་ཐོབ་ཅིང་། དམ་ཚིག་དང་སྡོམ་པ་རྣམ་པར་དག་པ། ངེས་འབྱུང་དང་བྱང་ཆུབ་སེམས་ཀྱིས་རྒྱུད་ལེགས་པར་འབྱོངས་ཤིང་། གཞན་དོན་དུ་རྫོགས་པའི་སངས་རྒྱས་ཀྱི་གོ་འཕང་མྱུར་དུ་འགྲུབ་པར་འདོད་པས། བཀྲ་ཤིས་ཤིང་དབེན་ལ་ཉམས་དགའ་བའི་གནས་སུ། རང་དབང་འདུས་ངེས་པའི་བསམ་གཏན་གྱི་ཁང་བུར་ཕྱག་དར་བྱ། དྲི་བཟང་པོའི་ཆུས་ཆག་ཆག་གདབ་ཅིང་སྤོས་ཀྱིས་བདུག །ཤ་ཆང་སྒོག་བཙོང་སོགས་སྤངས་ནས་དཀར་གསུམ་གཙོ་བོར་གྱུར་པའི་ཁ་ཟས་དང་། བྱུང་ན་པགས་པ་ཅན་དང་མ་འབྲེལ་བའི་གོས་སོགས་དང་མཚམས་གཡོག་རྣམས་ལྷུས་ཐིང་པར་བྱས། གཟའ་སྐར་སྦྱོར་བྱེད་བཟང་པོ་འཛོམ་པའི་ཚེ་མཚམས་ཀྱི་བཅད་རྒྱ་བྱ། འབྱོར་ན་རིགས་གསུམ་སྤྱིའི་སྐུ་བྲིས་འབུར་དང་དཀོན་མཆོག་གི་རྟེན་ཅི་འབྱོར་བཤམས་པའི་མདུན་དུ་ཆུ་གཉིས་སྔོན་འགྲོའི་མཆོད་པ་དང་། གཏོར་མ་དཀར་པོ་ཟླུམ་པོ་བཞི་བཤམས་པའི་དང་པོ་གཟུངས་གཏོར་ཏེ་ཡི་དམ་གྱི་ལྷ་ལ་འབུལ་རྒྱུ་ཡིན། གཉིས་པ་ཆོས་སྐྱོང་ནག་པོ་ཆེན་པོ་འཁོར་བཅས་ལ། གསུམ་པ་དང་། བཞི་པ་ཕྱོགས་སྐྱོང་དང་འབྱུང་པོ། བགེགས་གཏོར་ཉིན་རེ་བཞིན་འདོར་རྒྱུ་བྱེད། སྒྲུབ་པ་པོ་རང་ཉིད་སྟན་ནང་ཚངས་ཅན། བྱུང་ན་འོག་ཏུ་ཤིང་ཁྲི་དང་བཅས་པ། ཤིང་ཁྲི་ཡོད་ན་འོག་ཏུ་རྡུལ་ཚོན་གྱིས་རྡོ་རྗེ་རྒྱ་གྲམ་བྲི། མེད་ན་གཡམ་པ་སོགས་ལ་རྡོ་རྗེ་རྒྱ་གྲམ་བྲིས་པ་གདན་གྱི་འོག་ཏུ་བཞག །ཁ་བལྟ་ཕྱོགས་བྱུང་ན་ཤར་དུ་བྱ། ཡེ་མ་བྱུང་ན་ཁྱིམ་གྱི་མདོ་ཕུག་དང་བསྟུན། ཐོག་མ་ཉིད་དུ་རྩ་བའི་བླ་མ་སོགས་རྩ་བརྒྱུད་ཀྱི་བླ་མ་ལ་གསོལ་བ་དྲག་ཏུ་བཏབ། ཆ་གསུམ་ཡིད་ཆེས་ངོ་ཤེས་པ་ལན་གསུམ་ལ་སོགས་པ་བཏང་། སྒྲུབ་པ་ལ་བར་ཆད་མི་འབྱུང་བའི་ཕྲིན་ལས་བཅོལ་ལ་མཚམས་དམ་དུ་བཅད། གྲུབ་ན་ཐེག་པ་ཆེན་པོའི་གསོ་སྦྱོང་སྤྱི་ལྟར་བླང་ངོ་། །གཉིས་པ་ནི། བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འཁོད་དེ། ས་ཕྱོགས་དང་གནས་ཁང་ཐམས་ཅད་དག་པའི་ཞིང་གི་བཀོད་པ་ཚད་མེད་པར་གསལ་བའི་མདུན་གྱི་ནམ་མཁར་སྐྱབས་ཡུལ་རྣམས་མངོན་སུམ་བཞིན་དུ་བཞུགས་པའི་སྤྱན་སྔར་བདག་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་པས་སྐྱབས་སུ་འགྲོ་བར་མོས་ལ། བདག་དང་འགྲོ་བ་ཞེས་སོགས་སྐྱབས་འགྲོ་ནས་བཟུང་བཟླས་པའི་བར་གྱི་ངག་འདོན་རྣམས་ཐར་རྩེ་པཎ་ཆེན་ནམ་མཁའ་དཔལ་བཟང་གིས་མཛད་པའི་དཀྱིལ་ཆོག་གི་དབུ་ནས་འབྱུང་བ་ལྟར་བྱ། བཟླས་པ་ཐོག་མར་འཇམ་དབྱངས་ཀྱི་སྔགས་གཙོ་བོར་བཟླ། ཐུན་མཇུག་རྣམས་སུ་འཁོར་གཉིས་ཀྱི་སྔགས་ཀྱང་ཅུང་ཟད་རེ་བཟླས་རྗེས། མདུན་བསྐྱེད་ཀྱི་ལྷ་ལ་མཆོད་བསྟོད་ནས་བཟུང་། རང་དམ་ཚིག་པའི་ང་རྒྱལ་གྱིས་འཁོད་པར་གྱུར། ཅེས་བརྗོད་ཅིང་བསམ་པའི་བར་སྒྲུབ་ཐབས་ཀྱི་དཀྱུས་ལྟར་ལ། དགེ་བ་འདི་ཡིས་མྱུར་དུ་བདག །རིགས་གསུམ་མགོན་པོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་དང་། བརྒྱུད་པའི་གསོལ་འདེབས་དང་ལམ་རིམ་གྱི་སྨོན་ལམ་འབྲེལ་མཚུངས་སུ་བྱ་བར་སྤྲོ་ནའང་འདིར་བྱ་བ་ཕྱག་ལེན་དུ་འབྱུང་བས། ཁྱབ་བདག་རྡོ་རྗེ་འཆང་དང་གསང་བའི་བདག །ཨིནྡྲཱ་བྷཱུ་ཏི་གྲུབ་བརྙེས་འཆི་མེད་ཞབས། །འཕགས་པ་ཀླུ་སྒྲུབ་ཀླུ་ཡི་བྱང་ཆུབ་དང་། །ཡེ་ཤེས་རྡོ་རྗེ་རྣམས་ལ་གསོལ་བ་འདེབས། །གྲགས་འབྱོར་ཤེས་རབ་བླ་ཆེན་ས་སྐྱ་པ། །རྗེ་བཙུན་གྲགས་པ་ས་སྐྱ་པཎྜི་ཏ། །ཤཱཀྱ་གྲགས་དང་དེ་དབོན་ཀུན་དགའ་དཔལ། །དར་མ་ཡེ་ཤེས་རྣམས་ལ༴ བག་སྟོན་ཆེ་དང་ཚུལ་ཁྲིམས་རྒྱལ་མཚན་ཞབས། །ངག་གི་དབང་པོ་བྱང་ཆུབ་སེང་གེ་དང་། །གཞོན་ནུ་བློ་གྲོས་ངོར་ཆེན་རྡོ་རྗེ་འཆང་། །ཀུན་དགའ་དབང་ཕྱུག༴ རཏྣ་ཝརྡྷ་ལྷ་མཆོག་སེང་གེ་དང་། །སངས་རྒྱས་སེང་གེ་པཎ་ཆེན་བྲང་ཏི་པ། །སྒྲུབ་ཁང་པ་དང་ཤེས་རབ་འབྱུང་གནས་ཞབས། །ལྷུན་གྲུབ་དཔལ་ལྡན༴ སངས་རྒྱས་ཕུན་ཚོགས་བསྟན་འཛིན་ལྷུན་གྲུབ་དང་། །ནམ་མཁའ་བསམ་འགྲུབ་ཀུན་དགའ་བློ་གྲོས་ཞབས། །ནམ་མཁའ་འཆི་མེད་ཀུན་དགའ་བསྟན་འཛིན་དཔལ། །རྩ་བའི་བླ་མ༴ སྔོན་འགྲོའི་རིམ་པས་རང་རྒྱུད་ལེགས་སྦྱངས་ནས། །བདག་མདུན་གྲོགས་པོ་ལྟ་བུའི་རྣལ་འབྱོར་དང་། །སྐྱོན་བརྒྱད་སྤངས་པའི་བཟླས་བརྗོད་ལ་འབད་པས། །གྲུབ་གཉིས་ཀུན་དགའ་གསར་པ་མྱོང་བར་ཤོག །བསྙེན་སོགས་རྣམ་པར་དག་བྱས་འགྲོ་ཀུན་ལ། །དམིགས་མེད་སྙིང་རྗེས་ཀུན་བསླངས་དཀྱིལ་འཁོར་ཆེ། །འཇུག་ཅིང་སྐལ་པ་དང་འཚམས་ཆོས་བསྟན་པས། །འབྲེལ་ཚད་དོན་ལྡན་འཇམ་དབྱངས་རྗེས་འགྲོར་ཤོག །འཁོར་འདས་ཤེས་བྱ་རྟོགས་པའི་བློ་གྲོས་ཅན། །ལུས་ཅན་སྲིད་ལས་གདོན་པའི་སྙིང་སྟོབས་དང་། །ཚར་བཅད་རྗེས་སུ་འཛིན་པའི་མཐུ་སྟོབས་སོགས། །རིགས་གསུམ་ཡོན་ཏན་རྒྱ་མཚོ་ཐོབ་པར་ཤོག །ཅེས་དང་། གཞན་ཡང་བསྔོ་སྨོན་གང་ཤེས་བྱས་ནས་ཐུན་མཚམས་ཀྱི་བྱ་བ་ལ་འཇུག །ཐུན་བཞིའམ་གསུམ་གང་མོས་བྱ། ཐུན་གྱི་སྒང་ལ་ངག་བཅད་དང་། ཇ་ལྟ་བུ་མ་གཏོགས་ཁ་ཟས་རགས་པ་མི་ཟ། ཆབ་ལེན་སོགས་གཙང་སྦྲ་དང་། བདག་མདུན་གྱི་ལྷ་སྐུའི་གསལ་སྣང་ལ་སེམས་རྩེ་གཅིག་ཏུ་འཛིན། འོད་ཟེར་སྤྲོ་བསྡུ་སོགས་དམིགས་པ་གོ་མ་འགགས་པ་ལ་བསླབ་པས་མཚོན་སེམས་གཞན་དུ་མ་ཡེངས་པ་དང་། གཉིད་རྨུགས་སོགས་ཀྱི་དབང་དུ་མི་བཏང་བར་བཟླས་བརྗོད་ཀྱི་སྐྱོན་རྣམས་སྤངས་ལ་བཟླ། དགེ་སྦྱོར་ཆག་མེད་གཞན་གང་དགོས་རྣམས་ཐུན་མཚམས་རྣམས་སུ་བྱ། སྔ་ཐུན་གྱི་མཇུག་ཏུ་གཏོར་མ་འབུལ་བ་ཕྱག་ལེན་དུ་མཛད་པས། ཐུན་མགོར་མཆོད་པ་དང་གཏོར་མ་ཞལ་བསོས་ལ་ཆབ་ཀྱིས་བྲན། མཆོད་པ་རྣམས་ཨ་མྲྀ་ཏེས་བསང་། སྭ་བྷཱ་བས་སྦྱང་། སྟོང་པའི་ངང་ལས་ཨོཾ་ལས་སོགས་ནས། དྷ་རྨཱ་ར་ཎི་ཏ་ལན་གསུམ་རོལ་མོ་དང་བཅས་པས་བྱིན་དབབ་པའི་བར་དཀྱིལ་ཆོག་གི་དབུ་ནས་འབྱུང་བ་ལྟར་བྱ། སྐྱབས་འགྲོ་ནས་བཟུང་། རང་དམ་ཚིག་པའི་ང་རྒྱལ་གྱིས་འཁོད་པར་གྱུར་ཅེས་པའི་བར་དཀྱུས་ལྟར་ལ། གཏོར་མ་ཆུ་གཙང་གིས་བྲན། ཨ་མྲྀ་ཏེས་བསང་། སྭཱ་བྷཱ་བས་སྦྱང་། ཨ་ཀཱ་རོ་ཕྱག་རྒྱ་བཅས་པས་བརླབ། རང་གི་སྙིང་གའི་ས་བོན་ལས་འོད་ཟེར་འཕྲོས་པས་བཅོམ་ལྡན་འདས་རིགས་གསུམ་གྱི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ ཞེས་པས་གཏོར་མགྲོན་སྤྱན་དྲང་། དེ་རྣམས་ཀྱི་ཞལ་ལས་འོད་ཀྱི་སྦུ་གུ་བྱུང་ནས་གཏོར་མ་གསོལ་བར་བསམ་ཞིང་། ཨོཾ་ཨ་ར་པ་ཙ་ན་དྷཱིཿསོགས་སྔགས་གསུམ་སྦྲེལ་བའི་མཐར། ཨོཾ་ཨ་ཀཱ་རོ་སོགས་བཏགས་པ་ལན་གསུམ་གྱིས་ཕུལ། ཨོཾ་སརྦ་ཏ་ཐཱ་ག་ཏ་ཏྲི་ཀུ་ལ་ནཱ་ཐ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། །སྐུ་གསུང་ཐུགས་འཇམ་སོགས་ཀྱིས་བསྟོད། བཅོམ་ལྡན་འདས་བདག་དང་སོགས་ཀྱིས་འདོད་དོན་གསོལ། གཏོར་མ་གཉིས་པ་སྒོས་ཀྱི་ཆོས་སྐྱོང་དང་། ལྷག་མ་རྣམས་ཆ་གསུམ་གྱི་ཆོ་གས་བཏང་བའི་ཚུལ་དཀྱིལ་ཆོག་ལྟར་བྱ། བགེགས་གཏོར་ཕྱིར་དོར་ཚར་ནས། མདུན་གྱི་གཏོར་མགྲོན་ཡི་དམ་དང་ཆོས་སྐྱོང་ལ་དམིགས་ཏེ། ཡི་གེ་བརྒྱ་པ་ལན་གསུམ་དང་། མ་འབྱོར་པ་དང་སོགས་ཀྱིས་ནོངས་པ་བཤགས། རྟེན་ཡོད་ན། འདིར་ནི་གཟུགས་དང་སོགས་ཀྱི་མཐར། །ཨོཾ་སུ་པྲ་ཏིཥྛ་བཛྲ་ཡ་སྭཱ་ཧཱ། ཞེས་བརྗོད་ཅིང་མེ་ཏོག་འཐོར་བ་དང་བཅས་བརྟན་བཞུགས་བྱ། མེད་ན། ཨོཾ། ཁྱེད་ཀྱིས་སེམས་ཅན་དོན་ཀུན་མཛད་སོགས་ཀྱི་མཐར། །ཨོཾ་བཛྲ་མུཿཞེས་དང་། མཐེབ་སྲིན་གྱིས་སེ་གོལ་གཏོག་པ་དང་བཅས་གཏོར་མགྲོན་རྣམས་རང་བཞིན་གྱི་གནས་སུ་གཤེགས་པར་བསམ། དགེ་བ་འདི་ཡིས་སོགས་བསྔོ་སྨོན་བརྒྱུད་འདེབས་གོང་ལྟར་བྱའོ། །གསུམ་པ་ནི། དེ་ལྟ་བུའི་རིམ་པས་གྲངས་བསྙེན་གཙོ་བོ་ལ་འབྲུ་འབུམ་སྟེ་འབུམ་ཕྲག་བདུན་ཁ་སྐོང་དང་བཅས་པ་དང་། འཁོར་གཉིས་ལ་དེའི་བཅུ་ཆ་སྟེ་ཁྲི་ཕྲག་བདུན་ཁ་སྐོང་དང་བཅས་པས་ལེགས་པར་གྲུབ་ནས། སྔགས་ཀྱི་ལྷག་ཆད་ཁ་བསྐང་བ་དང་། ནུས་པ་དབྱུང་བའི་ཕྱིར་ཞི་བའི་སྦྱིན་སྲེག་བྱ་སྤྱོད་སྤྱིའི་ལུགས་ཀྱི་ཆོ་གས་ཁོག་ཕུབས་ཏེ་ཁྱད་ཆོས་རྣམས་མ་འཁྲུལ་བར་སྦྱར་བས་སྔགས་ཀྱི་བཅུ་ཆ་འབུལ། དེ་ནས་མཚམས་ཁད་ཀྱིས་གྲོལ་བ་དང་། རྒྱུན་དུའང་སྒོམ་བཟླས་མ་ཆག་པར་བརྩོན་པ་སོགས་ཀྱིས་མཚོན་མཚམས་ཀྱི་སྤང་བླང་ཐམས་ཅད་བསྙེན་ཡིག་སྤྱི་འགྲོ་ལྟར་ཤེས་པར་བྱའོ། །དེ་ལྟར་བགྱིས་པའི་ཕན་ཡོན་ཀྱང་། སྤྱིར་བྱ་སྤྱོད་ཀྱི་རྒྱུད་ལས་སྔགས་ཀྱི་དངོས་གྲུབ་རབ་རིག་པ་འཛིན་པའི་གོ་འཕང་ལ་བརྟེན་ནས་བྱང་ཆུབ་ཆེན་པོ་འགྲུབ་པ་དང་། འབྲིང་གྲུབ་པ་ཆེན་པོ། ཐ་མ་ཞི་སོགས་དམན་པའི་ལས་རབ་འབྱམས་ཇི་སྙེད་ཅིག་གསུངས་པ་དེ་ཐམས་ཅད་ཀྱང་བཟླས་བརྗོད་དང་། སྦྱིན་སྲེག་ཁོ་ནས་གྲུབ་པའི་ཚུལ་ལེགས་པར་གྲུབ་པའི་རྒྱུད་ལས། རབ་འབྲིང་ཐ་མ་རེ་རེ་ལའང་། །དངོས་གྲུབ་རྣམ་པ་གསུམ་དབྱེ་བ། །གསང་སྔགས་རྣམས་ཀྱི་མཐུར་ཤེས་ནས། །དངོས་གྲུབ་ཕྱིར་ནི་བསྙེན་པ་བརྩམ། །ཞེས་དང་། ཆོ་ག་འདི་དག་བྱས་པ་ཡིས། །ལྷ་རྣམས་ཡོངས་སུ་དགྱེས་པར་འགྱུར། །དགྱེས་པར་གྱུར་ནས་དངོས་གྲུབ་ནི། །ཆེན་པོ་མྱུར་དུ་སྩོལ་བ་མཛད། །ཅེས་དང་། གཞན་ཡང་བཟླས་བརྗོད་ཀྱིས་སྡིག་སྒྲིབ་ཐམས་ཅད་ཟད་ནས་སེམས་དྭང་བའི་ཏིང་ངེ་འཛིན་ཁྱད་པར་ཅན་ཐོབ་ཅིང་། དེ་ལས་འཇིག་རྟེན་དང་འཇིག་རྟེན་འདས་པའི་དངོས་གྲུབ་ཐམས་ཅད་འཐོབ་པར་འགྱུར་བ་ཡིན་ཏེ། དཔུང་བཟང་གིས་ཞུས་པ་ལས། །ཚེ་རབས་གཞན་དུ་གང་དང་གང་བྱས་པའི། །སྡིག་པ་མ་ལུས་བཟླས་བརྗོད་བྱས་པས་འབྱང་། །བཟླས་པས་སྡིག་པ་མ་ལུས་བྱང་བྱས་ནས། །དྭང་བའི་ཡིད་ཀྱིས་དངོས་གྲུབ་ཐོབ་པར་འགྱུར། །ཞེས་སོགས་རྒྱ་ཆེར་གསུངས་ཤིང་། བྱེ་བྲག་ཏུ་བཅོམ་ལྡན་འདས་རིགས་གསུམ་མགོན་པོ་ནི་རྒྱལ་བ་སྲས་དང་བཅས་པའི་མཁྱེན་བརྩེ་ནུས་གསུམ་གཅིག་ཏུ་བསྡུས་པའི་རང་གཟུགས་སུ་གྲུབ་པས་གང་གིས་བསྙེན་པ་རྣམས་ལ་ཐམས་ཅད་མཁྱེན་པའི་ལམ་གྱི་སྙིང་པོ་སྟོང་ཉིད་རྟོག་པའི་ཤེས་རབ། དམིགས་པ་མེད་པའི་སྙིང་རྗེ། བདུད་དང་བདུད་ཀྱི་རིས་ཀྱིས་མི་བརྫི་བའི་མཐུ་ཆེན་པོ་ཐོབ་པས་མཐར་ཐུག་བྱང་ཆུབ་མཆོག་གི་གོ་འཕང་ལ་མྱུར་དུ་རེག་པ་དང་། བྱ་བའི་རྒྱུད་སོགས་ལས་ལྷག་པའི་ལྷའི་རིགས་ཇི་སྙེད་ཅིག་གསུངས་པ་ཐམས་ཅད་ཀྱང་དེ་བཞིན་གཤེགས་པ་དང་། པདྨ་དང་། རྡོ་རྗེའི་རིགས་གསུམ་དུ་འདུ་ཞིང་། དེ་རྣམས་ཀྱི་རིགས་ཀྱི་བདག་པོའང་འཇམ་དཔལ། སྤྱན་རས་གཟིགས། །ཕྱག་ན་རྡོ་རྗེ་གསུམ་དུ་ངེས་པས། འདིའི་བསྙེན་པ་རྫོགས་པས་རིགས་ཐམས་ཅད་ཀྱི་བསྙེན་པ་ལས་སུ་རུང་ཞིང་དངོས་གྲུབ་བསྒྲུབ་པ་ལ་དབང་བས་མཚོན་དགོས་པ་བསམ་གྱིས་མི་ཁྱབ་པ་དང་། བྱེ་བྲག་འཇམ་དཔལ་རྩ་བའི་རྒྱུད་དང་། སྤྱན་རས་གཟིགས་ཡི་གེ་དྲུག་པའི་གཟུངས། ཕྱག་རྡོར་དབང་བསྐུར་གྱི་རྒྱུད་སོགས་སྔགས་རྒྱུད་རབ་འབྱམས་དང་། མདོ་སྡེ་རིན་པོ་ཆེ་རྣམས་ནས་འཕགས་པ་འདི་རྣམས་ཀྱི་མཚན་གཟུང་བ་དང་། དྲན་པ་ཙམ་ལའང་ཕན་ཡོན་བསམ་གྱིས་མི་ཁྱབ་པར་བསྔགས་པའི་ཕྱིར། བསྙེན་སོགས་དག་པར་བགྱིས་པ་ལས་ཇི་སྐད་གསུངས་པའི་དངོས་གྲུབ་མཐའ་དག་འགྲུབ་པར་སྨོས་ཅི་དགོས་པས་ན། བློ་གྲོས་དང་ལྡན་པ་རྣམས་ཀྱིས་རིགས་གསུམ་སེམས་དཔའི་མདོ་རྒྱུད་རྣམས་ལེགས་པར་མཇལ་ཞིང་དད་པའི་མིག་བསྒྲུབས་ཏེ་སྒོམ་བཟླས་ཟབ་མོའི་དུས་དང་རྒྱུན་གྱི་རྣལ་འབྱོར་ལ་གཅིག་ཏུ་བརྩོན་པར་བྱའོ། །ཞེས་པའང་མཁན་ཆེན་སངས་རྒྱས་ཕུན་ཚོགས་པའི་གསུང་རབ་ལ་གཞི་བྱས་ཏེ་ཉུང་གསལ་སྙིང་པོར་དྲིལ་བའི་ཚུལ་གྱིས་འཇམ་དབྱངས་མཁྱེན་བརྩེའི་དབང་པོས་བྲིས་པའི་དགེ་བས་འགྲོ་ཀུན་སྟོབས་བཅུ་མངའ་བའི་མཁྱེན་བརྩེ་ནུས་པའི་ཡེ་ཤེས་ལ་མྱུར་དུ་རེག་པའི་རྒྱུར་གྱུར་ཅིག །
[edit]

rigs gsum spyi'i bsnyen thabs gzhan phan lhun grub/ @#/_/rigs gsum spyi'i bsnyen thabs gzhan phan lhun grub ces bya ba bzhugs so/__/na mo gu ru tri ku la nA thA ya/__rigs gsum spyi'i bsnyen pa bya ba'i tshul la/__bya spyod kyi rgyud sde so so'i rang lugs ltar bsnyen pa sogs bya ba'i tshul ni rgyud sde spyi'i rnam gzhag dang /__bsnyen yig spyir btang rnams las shes par 'gyur la/__'dir da ltar gyi phyag gzhes dkyus ma ltar bsnyen pa las rung tsam gtong bar 'dod pas lag tu len pa'i tshul la gsum/__sbyor ba/__dngos gzhi/__rjes so/__/dang po ni/__'di nyid kyi dbang bskur ba thob cing /__dam tshig dang sdom pa rnam par dag pa/__nges 'byung dang byang chub sems kyis rgyud legs par 'byongs shing /__gzhan don du rdzogs pa'i sangs rgyas kyi go 'phang myur du 'grub par 'dod pas/__bkra shis shing dben la nyams dga' ba'i gnas su/__rang dbang 'dus nges pa'i bsam gtan gyi khang bur phyag dar bya/__dri bzang po'i chus chag chag gdab cing spos kyis bdug__/sha chang sgog btsong sogs spangs nas dkar gsum gtso bor gyur pa'i kha zas dang /__byung na pags pa can dang ma 'brel ba'i gos sogs dang mtshams g.yog rnams lhus thing par byas/__gza' skar sbyor byed bzang po 'dzom pa'i tshe mtshams kyi bcad rgya bya/__'byor na rigs gsum spyi'i sku bris 'bur dang dkon mchog gi rten ci 'byor bshams pa'i mdun du chu gnyis sngon 'gro'i mchod pa dang /__gtor ma dkar po zlum po bzhi bshams pa'i dang po gzungs gtor te yi dam gyi lha la 'bul rgyu yin/__gnyis pa chos skyong nag po chen po 'khor bcas la/__gsum pa dang /__bzhi pa phyogs skyong dang 'byung po/__bgegs gtor nyin re bzhin 'dor rgyu byed/__sgrub pa po rang nyid stan nang tshangs can/__byung na 'og tu shing khri dang bcas pa/__shing khri yod na 'og tu rdul tshon gyis rdo rje rgya gram bri/__med na g.yam pa sogs la rdo rje rgya gram bris pa gdan gyi 'og tu bzhag__/kha blta phyogs byung na shar du bya/__ye ma byung na khyim gyi mdo phug dang bstun/__thog ma nyid du rtsa ba'i bla ma sogs rtsa brgyud kyi bla ma la gsol ba drag tu btab/__cha gsum yid ches ngo shes pa lan gsum la sogs pa btang /__sgrub pa la bar chad mi 'byung ba'i phrin las bcol la mtshams dam du bcad/__grub na theg pa chen po'i gso sbyong spyi ltar blang ngo /__/gnyis pa ni/__bde ba'i stan la bsam gtan gyi spyod lam dang ldan pas 'khod de/__sa phyogs dang gnas khang thams cad dag pa'i zhing gi bkod pa tshad med par gsal ba'i mdun gyi nam mkhar skyabs yul rnams mngon sum bzhin du bzhugs pa'i spyan sngar bdag gzhan sems can thams cad sgo gsum 'jug pa gcig pas skyabs su 'gro bar mos la/__bdag dang 'gro ba zhes sogs skyabs 'gro nas bzung bzlas pa'i bar gyi ngag 'don rnams thar rtse paN chen nam mkha' dpal bzang gis mdzad pa'i dkyil chog gi dbu nas 'byung ba ltar bya/__bzlas pa thog mar 'jam dbyangs kyi sngags gtso bor bzla/__thun mjug rnams su 'khor gnyis kyi sngags kyang cung zad re bzlas rjes/__mdun bskyed kyi lha la mchod bstod nas bzung /__rang dam tshig pa'i nga rgyal gyis 'khod par gyur/__ces brjod cing bsam pa'i bar sgrub thabs kyi dkyus ltar la/__dge ba 'di yis myur du bdag__/rigs gsum mgon po 'grub gyur nas/__/'gro ba gcig kyang ma lus pa/__/de yi sa la 'god par shog__/ces dang /__brgyud pa'i gsol 'debs dang lam rim gyi smon lam 'brel mtshungs su bya bar spro na'ang 'dir bya ba phyag len du 'byung bas/__khyab bdag rdo rje 'chang dang gsang ba'i bdag__/in+d+rA b+hU ti grub brnyes 'chi med zhabs/__/'phags pa klu sgrub klu yi byang chub dang /__/ye shes rdo rje rnams la gsol ba 'debs/__/grags 'byor shes rab bla chen sa skya pa/__/rje btsun grags pa sa skya paN+Di ta/_/shAkya grags dang de dbon kun dga' dpal/__/dar ma ye shes rnams la=__bag ston che dang tshul khrims rgyal mtshan zhabs/__/ngag gi dbang po byang chub seng ge dang /__/gzhon nu blo gros ngor chen rdo rje 'chang /__/kun dga' dbang phyug=__rat+na war+d+ha lha mchog seng ge dang /__/sangs rgyas seng ge paN chen brang ti pa/__/sgrub khang pa dang shes rab 'byung gnas zhabs/__/lhun grub dpal ldan=__sangs rgyas phun tshogs bstan 'dzin lhun grub dang /__/nam mkha' bsam 'grub kun dga' blo gros zhabs/__/nam mkha' 'chi med kun dga' bstan 'dzin dpal/__/rtsa ba'i bla ma=__sngon 'gro'i rim pas rang rgyud legs sbyangs nas/__/bdag mdun grogs po lta bu'i rnal 'byor dang /__/skyon brgyad spangs pa'i bzlas brjod la 'bad pas/__/grub gnyis kun dga' gsar pa myong bar shog__/bsnyen sogs rnam par dag byas 'gro kun la/_/dmigs med snying rjes kun bslangs dkyil 'khor che/__/'jug cing skal pa dang 'tshams chos bstan pas/__/'brel tshad don ldan 'jam dbyangs rjes 'gror shog__/'khor 'das shes bya rtogs pa'i blo gros can/__/lus can srid las gdon pa'i snying stobs dang /__/tshar bcad rjes su 'dzin pa'i mthu stobs sogs/__/rigs gsum yon tan rgya mtsho thob par shog__/ces dang /__gzhan yang bsngo smon gang shes byas nas thun mtshams kyi bya ba la 'jug__/thun bzhi'am gsum gang mos bya/__thun gyi sgang la ngag bcad dang /__ja lta bu ma gtogs kha zas rags pa mi za/__chab len sogs gtsang sbra dang /__bdag mdun gyi lha sku'i gsal snang la sems rtse gcig tu 'dzin/__'od zer spro bsdu sogs dmigs pa go ma 'gags pa la bslab pas mtshon sems gzhan du ma yengs pa dang /__gnyid rmugs sogs kyi dbang du mi btang bar bzlas brjod kyi skyon rnams spangs la bzla/__dge sbyor chag med gzhan gang dgos rnams thun mtshams rnams su bya/__snga thun gyi mjug tu gtor ma 'bul ba phyag len du mdzad pas/__thun mgor mchod pa dang gtor ma zhal bsos la chab kyis bran/__mchod pa rnams a mr-i tes bsang /__swa b+hA bas sbyang /__stong pa'i ngang las oM las sogs nas/__d+ha rmA ra Ni ta lan gsum rol mo dang bcas pas byin dbab pa'i bar dkyil chog gi dbu nas 'byung ba ltar bya/__skyabs 'gro nas bzung /__rang dam tshig pa'i nga rgyal gyis 'khod par gyur ces pa'i bar dkyus ltar la/__gtor ma chu gtsang gis bran/__a mr-i tes bsang /__swA b+hA bas sbyang /__a kA ro phyag rgya bcas pas brlab/__rang gi snying ga'i sa bon las 'od zer 'phros pas bcom ldan 'das rigs gsum gyi dkyil 'khor la sangs rgyas dang byang chub sems dpa'i tshogs kyis bskor ba mdun gyi nam mkhar oM badz+ra sa mA dzaH__zhes pas gtor mgron spyan drang /__de rnams kyi zhal las 'od kyi sbu gu byung nas gtor ma gsol bar bsam zhing /__oM a ra pa tsa na d+hIHsogs sngags gsum sbrel ba'i mthar/__oM a kA ro sogs btags pa lan gsum gyis phul/__oM sarba ta thA ga ta tri ku la nA tha sa pa ri wA ra ar+g+haM sogs kyis mchod/__/sku gsung thugs 'jam sogs kyis bstod/__bcom ldan 'das bdag dang sogs kyis 'dod don gsol/__gtor ma gnyis pa sgos kyi chos skyong dang /__lhag ma rnams cha gsum gyi cho gas btang ba'i tshul dkyil chog ltar bya/__bgegs gtor phyir dor tshar nas/__mdun gyi gtor mgron yi dam dang chos skyong la dmigs te/__yi ge brgya pa lan gsum dang /__ma 'byor pa dang sogs kyis nongs pa bshags/__rten yod na/__'dir ni gzugs dang sogs kyi mthar/__/oM su pra tiSh+Tha badz+ra ya swA hA/__zhes brjod cing me tog 'thor ba dang bcas brtan bzhugs bya/__med na/__oM/__khyed kyis sems can don kun mdzad sogs kyi mthar/__/oM badz+ra muHzhes dang /__mtheb srin gyis se gol gtog pa dang bcas gtor mgron rnams rang bzhin gyi gnas su gshegs par bsam/__dge ba 'di yis sogs bsngo smon brgyud 'debs gong ltar bya'o/__/gsum pa ni/__de lta bu'i rim pas grangs bsnyen gtso bo la 'bru 'bum ste 'bum phrag bdun kha skong dang bcas pa dang /__'khor gnyis la de'i bcu cha ste khri phrag bdun kha skong dang bcas pas legs par grub nas/__sngags kyi lhag chad kha bskang ba dang /__nus pa dbyung ba'i phyir zhi ba'i sbyin sreg bya spyod spyi'i lugs kyi cho gas khog phubs te khyad chos rnams ma 'khrul bar sbyar bas sngags kyi bcu cha 'bul/__de nas mtshams khad kyis grol ba dang /__rgyun du'ang sgom bzlas ma chag par brtson pa sogs kyis mtshon mtshams kyi spang blang thams cad bsnyen yig spyi 'gro ltar shes par bya'o/__/de ltar bgyis pa'i phan yon kyang /__spyir bya spyod kyi rgyud las sngags kyi dngos grub rab rig pa 'dzin pa'i go 'phang la brten nas byang chub chen po 'grub pa dang /__'bring grub pa chen po/__tha ma zhi sogs dman pa'i las rab 'byams ji snyed cig gsungs pa de thams cad kyang bzlas brjod dang /__sbyin sreg kho nas grub pa'i tshul legs par grub pa'i rgyud las/__rab 'bring tha ma re re la'ang /__/dngos grub rnam pa gsum dbye ba/__/gsang sngags rnams kyi mthur shes nas/__/dngos grub phyir ni bsnyen pa brtsam/__/zhes dang /__cho ga 'di dag byas pa yis/__/lha rnams yongs su dgyes par 'gyur/__/dgyes par gyur nas dngos grub ni/__/chen po myur du stsol ba mdzad/__/ces dang /__gzhan yang bzlas brjod kyis sdig sgrib thams cad zad nas sems dwang ba'i ting nge 'dzin khyad par can thob cing /__de las 'jig rten dang 'jig rten 'das pa'i dngos grub thams cad 'thob par 'gyur ba yin te/__dpung bzang gis zhus pa las/__/tshe rabs gzhan du gang dang gang byas pa'i/__/sdig pa ma lus bzlas brjod byas pas 'byang /__/bzlas pas sdig pa ma lus byang byas nas/__/dwang ba'i yid kyis dngos grub thob par 'gyur/__/zhes sogs rgya cher gsungs shing /__bye brag tu bcom ldan 'das rigs gsum mgon po ni rgyal ba sras dang bcas pa'i mkhyen brtse nus gsum gcig tu bsdus pa'i rang gzugs su grub pas gang gis bsnyen pa rnams la thams cad mkhyen pa'i lam gyi snying po stong nyid rtog pa'i shes rab/__dmigs pa med pa'i snying rje/__bdud dang bdud kyi ris kyis mi brdzi ba'i mthu chen po thob pas mthar thug byang chub mchog gi go 'phang la myur du reg pa dang /__bya ba'i rgyud sogs las lhag pa'i lha'i rigs ji snyed cig gsungs pa thams cad kyang de bzhin gshegs pa dang /__pad+ma dang /__rdo rje'i rigs gsum du 'du zhing /__de rnams kyi rigs kyi bdag po'ang 'jam dpal/__spyan ras gzigs/__/phyag na rdo rje gsum du nges pas/__'di'i bsnyen pa rdzogs pas rigs thams cad kyi bsnyen pa las su rung zhing dngos grub bsgrub pa la dbang bas mtshon dgos pa bsam gyis mi khyab pa dang /__bye brag 'jam dpal rtsa ba'i rgyud dang /__spyan ras gzigs yi ge drug pa'i gzungs/__phyag rdor dbang bskur gyi rgyud sogs sngags rgyud rab 'byams dang /__mdo sde rin po che rnams nas 'phags pa 'di rnams kyi mtshan gzung ba dang /__dran pa tsam la'ang phan yon bsam gyis mi khyab par bsngags pa'i phyir/__bsnyen sogs dag par bgyis pa las ji skad gsungs pa'i dngos grub mtha' dag 'grub par smos ci dgos pas na/__blo gros dang ldan pa rnams kyis rigs gsum sems dpa'i mdo rgyud rnams legs par mjal zhing dad pa'i mig bsgrubs te sgom bzlas zab mo'i dus dang rgyun gyi rnal 'byor la gcig tu brtson par bya'o/__/zhes pa'ang mkhan chen sangs rgyas phun tshogs pa'i gsung rab la gzhi byas te nyung gsal snying por dril ba'i tshul gyis 'jam dbyangs mkhyen brtse'i dbang pos bris pa'i dge bas 'gro kun stobs bcu mnga' ba'i mkhyen brtse nus pa'i ye shes la myur du reg pa'i rgyur gyur cig___/

Footnotes

Other Information