མཻ་ཏྲི་ལུགས་ཀྱི་རྡོ་རྗེ་རྣལ་འབྱོར་མའི་བྱིན་རླབས་ཀྱི་ཆོ་ག་མཁའ་སྤྱོད་གྲུབ་པའི་རྒྱན།

🚧 This website is under continued development. We appreciate your patience!

Previous Text Back to Volume PageNext Text

Wylie title	mai tri lugs kyi rdo rje rnal 'byor ma'i byin rlabs kyi cho ga mkha' spyod grub pa'i rgyan
Location	mkhyen brtse'i bka' 'bum Volume 8, sde tshan 12, Text 5, Pages 252-274 (Folios 13b3 to 24b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	མཻ་ཏྲི་པ་ (Maitrīpa)
Citation	'jam dbyangs mkhyen brtse'i dbang po. mai tri lugs kyi rdo rje rnal 'byor ma'i byin rlabs kyi cho ga mkha' spyod grub pa'i rgyan. In 'jam dbyangs mkhyen brtse'i dbang po'i bka' 'bum, Vol. 8: 252-274. Khams sde dge rdzong sar dgon: Rdzong sar blo gros phun tshogs, 2020.
Genre	Permission to Invoke (anujñā) - rjes gnang
Cycle	མཻ་ཏྲི་ལུགས་ཀྱི་རྡོ་རྗེ་རྣལ་འབྱོར་མ་ (mai tri lugs kyi rdo rje rnal 'byor ma)
Deity	rdo rje rnal 'byor ma
Colophon	།ཅེས་པའང་འཇམ་མགོན་ས་སྐྱ་པ་ཆེན་པོ་སོགས་ཀྱི་ཞལ་སྔ་ནས་ཚུལ་འདིའི་བཀའ་དྲིན་ཐོབ་པ་བྱ་བྲལ་བ་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་མདྒ་ལཾ་བྷཱ་ཡཱ་ཏྲ།།
	ces pa'ang 'jam mgon sa skya pa chen po sogs kyi zhal snga nas tshul 'di'i bka' drin thob pa bya bral ba 'jam dbyangs bla ma dgyes pa'i 'bangs mkhyen brtse'i dbang pos bris pa mad+ga laM b+hA yA tra

1 Texts in this Section (sde tshan or chos tshan)

5 252-274	མཻ་ཏྲི་ལུགས་ཀྱི་རྡོ་རྗེ་རྣལ་འབྱོར་མའི་བྱིན་རླབས་ཀྱི་ཆོ་ག་མཁའ་སྤྱོད་གྲུབ་པའི་རྒྱན། mai tri lugs kyi rdo rje rnal 'byor ma'i byin rlabs kyi cho ga mkha' spyod grub pa'i rgyan Permission to Invoke (anujñā) - rjes gnang	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །གྲུབ་ཆེན་མཻ་ཏྲི་པའི་ལུགས་ཀྱི་རྡོ་རྗེ་རྣལ་འབྱོར་མའི་བྱིན་རླབས་ཀྱི་ཆོ་ག་བཀླགས་པས་གྲུབ་པར་བཀོད་པ་མཁའ་སྤྱོད་གྲུབ་པའི་རྒྱན་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། འཁོར་ལོའི་མགོན་དང་དབྱེར་མེད་པའི། །རིག་པ་འཛིན་མའི་རྗེ་བཙུན་མར། །བཏུད་ནས་དེ་ཡི་བྱིན་རླབས་ཚུལ། །མཁའ་སྤྱོད་གྲུབ་པའི་རྒྱན་དུ་སྦྱིན། །འདི་ལ་བཞི། །སྦྱོར་བ། དངོས་གཞི། རྗེས་ཀྱི་ཆོ་ག །འཕྲོས་དོན་གཞན་ཅུང་ཟད་བཤད་པའོ། །དང་པོ་ལ་གཉིས། ཆོ་གར་མ་གཏོགས་པའི་སྦྱོར་བ་དང་། ཆོ་གར་གཏོགས་པའི་སྦྱོར་བའོ། །དང་པོ་ནི། དབང་ཐོབ་ཅིང་བྱིན་རླབས་ཟབ་མོས་རྒྱུད་སྨིན་པ། དམ་ཚིག་དང་སྡོམ་པར་ལྡན་ཅིང་གཞིའི་བསྙེན་པ་ལས་སུ་རུང་བའི་རྣལ་འབྱོར་པས། མར་ངོའི་ཚེས་བཅུ་ལ་སོགས་པའི་དུས་ཁྱད་པར་ཅན་གྱི་ཚེ་དཀྱིལ་འཁོར་གྱི་བཤམ་བཀོད་དང་། །མཆོད་པའི་ཡོ་བྱད་སོགས་སྤྲུ་ལུང་པ་ཀུན་དགའ་སྨོན་ལམ་གྱིས་མཛད་པའི་ཡིག་ཆ་ལས་འབྱུང་བ་ལྟར་འདུ་བྱ། དེའང་ངག་ཆོས་པའི་ཡིག་ཆར་སྐུ་འབྲི་མ་ཐུབ་ན་ཚོན་ཕུང་ཙམ་གྱིས་ཆོག་པ་དང་། མཆོད་པ་དང་། །བུམ་པ་བཅའ་བ་སོགས་ཀྱང་སྤྱི་ལྟར་བྱས་པས་ཆོག་པར་གསུངས་པ་སྤྲོས་པ་བསྡུས་པའི་ཚེ་དགོངས་པར་མངོན་ནའང་། རྒྱ་གཞུང་ལས་སྔ་མ་ལྟར་འབྱུང་བས་ལེགས་སོ། །གཞན་ཡང་ཆོ་ག་གཞན་དང་མ་འབྲེལ་ན་སྔོན་འགྲོ་གཏོར་མ་དང་། སློབ་དཔོན་གྱི་མདུན་དུ་ཌཱ་མ་རུ་དང་། ཚོགས་ཀྱི་མཆོད་པ་བྱེད་ན་ཉེ་ལོགས་ཅི་བདེ་བར་ཚོགས་ཀྱི་ཡོ་བྱད་དང་བཅས་པའང་འདུ་བྱ། གཉིས་པ་ནི། སྔོན་འགྲོ་གཏོར་མ་དང་། གནས་ཡོ་བྱིན་རླབས་རྣམས་ནཱ་རོ་མཁའ་སྤྱོད་སོགས་དང་འདྲ། ཚོགས་པ་མང་པོ་ཡོད་ན་ཞུ་འབུལ་ཕྱག་བཅོ་བརྒྱད་མ་བདེ་ཀྱེ་ལྟར་བྱའོ། །གཉིས་པ་དངོས་གཞི་ལ་བཞི། བདག་བསྐྱེད། མདུན་བསྐྱེད། བུམ་བསྐྱེད། སློབ་མ་རྗེས་སུ་གཟུང་བའོ། །དང་པོ་ནི། སྐྱབས་འགྲོ། སེམས་བསྐྱེད། རྡོ་རྗེ་སེམས་དཔའི་བསྒོམ་བཟླས་ཀྱང་ནཱ་རོ་མཁའ་སྤྱོད་སོགས་ཀྱི་ཆོ་ག་ལས་འབྱུང་བ་ལྟར་བྱ། བདུད་རྩི་བྱིན་རླབས་ནི། རང་ཉིད་སྐད་ཅིག་གིས་རྡོ་རྗེ་རྣལ་འབྱོར་མ་རིག་པ་འཛིན་མ་རྩེན་མའི་སྐུར་གྱུར་ཅེས་བརྗོད་ཅིང་བསམས་ལ། སྤྲུ་ལུང་པའི་ཡིག་ཆའི་དཀྱུས་ནས་འབྱུང་བ་ལྟར་འབྲུ་གསུམ་བརྗོད་ཅིང་མྱང་བ་ནས་བཟུང་ཛཿཧཱུྃ་བྃ་ཧོཿཞེས་པའི་བར་དང་། སྤྲོ་ན་སླར་ཡང་རང་གི་སྙིང་གའི་བྃ་ལས་འོད་ཟེར་འཕྲོས། དབང་གི་ལྷ་རིགས་ལྔ་མདུན་གྱི་ནམ་མཁར་སྤྱན་དྲངས། ཨོཾ་ཨབྷི་ཥིཉྩ་ཏུ་མཱཾ་སརྦ་ཏ་ཐཱ་ག་ཏ་ཞེས་གསོལ་བ་བཏབ་པས་དབང་གི་ལྷ་རྣམས་ཀྱིས། ཇི་ལྟར་བལྟམས་པ་ནས་ཤྲི་ཡེ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་མི་བསྐྱོད་པས་དབུར་བརྒྱན་ཞེས་བརྗོད། རྫོགས་རིམ་དང་སྤྱོད་པའི་དམིགས་པ་ཅུང་ཟད་བསྒོམ་ཞིང་། བཟླས་པ་ཅི་རིགས་པ་བྱས་ལ། བཅོམ་ལྡན་འདས་མ་བདག་དང་སེམས་ཅན་ཐམས་ཅད་ལ་མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། །ཞེས་འདོད་པའི་དོན་ལ་གསོལ་བ་གདབ། གཉིས་པ་ནི། མདུན་གྱི་དཀྱིལ་འཁོར་ལ་བདུད་རྩི་འཐོར་ཞིང་སུམྦྷས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་ཆོས་འབྱུང་གི་ནང་དུ་ནས། མི་བསྐྱོད་པས་དབུར་བརྒྱན་ཞེས་པའི་བར་བདག་བསྐྱེད་བཞིན་ལ། རང་ཉིད་ཅེས་པའི་ཚིག་དོར། ཨབྷི་ཥིཉྩ་ཏུ་མཱཾ་སོགས་ཀྱི་མལ་དུ། དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་བ་སྩལ་དུ་གསོལ་ཞེས་བསྒྱུར། མདུན་བསྐྱེད་ཀྱི་སྟེང་གི་ནམ་མཁར་བླ་མ་དང་། ཁོར་ཡུག་ཏུ་དཔའ་བོ་རྣལ་འབྱོར་མའི་ཚོགས་ཀྱིས་བསྐོར་བར་གྱུར་ཅེས་བརྗོད་ཅིང་བསམས་ལ། སྤྲོ་ན་ནཱ་རོ་མཁའ་སྤྱོད་སོགས་ཀྱི་ཆོ་ག་རྒྱས་པ་ལས་འབྱུང་བ་ལྟར་མཆོད་ཕྲེང་སྤྲོས་ཏེ་བྱས་ཀྱང་རུང་མོད། དཀྱུས་ལྟར་ན་ཕྱི་མཆོད་དང་། ནང་བདུད་རྩིའི་མཆོད་པའི་རྗེས། ཡིད་བྱུང་གི་མཆོད་པ་ན་མོ་ཆོས་ཀྱི་དབྱིངས་སོགས་ནས། ཙཱ་ཡ་སྭཱ་ཧཱ་ཞེས་པའི་བར་དང་། རྐང་བརྒྱད་ཀྱི་བསྟོད་པ་རྣམས་ནཱ་རོ་མཁའ་སྤྱོད་ལྟར་བྱ། མདུན་བསྐྱེད་ལ་དམིགས་པའི་བཟླས་པ་ཅུང་ཟད་བྱས་རྗེས་འདོད་དོན་ལ་གསོལ་བ་གདབ། གཏོར་མ་བསང་སྦྱངས། སྟོང་པའི་ངང་ལས་ཨ་ལས་བྱུང་བའི་ཐོད་པ་ཡངས་ཤིང་རྒྱ་ཆེ་བའི་ནང་དུ། ཤ་ལྔ་བདུད་རྩི་ལྔ་ཡེ་ཤེས་ལྔ་རྣམས་ཞུ་བ་ལས་བྱུང་བའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར་པར་བསམས་ལ། ཨོཾ་ཨཱཿཧཱུྃ་ཧ་ཧོ་ཧྲཱིཿ ཞེས་ལན་གསུམ་གྱིས་བརླབས་ཏེ་དང་པོ་རྗེ་བཙུན་མ་ལ་དཀྱུས་ལྟར་དབུལ། གཉིས་པ་ནག་པོ་ཆེན་པོ་སོགས་ཆོས་སྐྱོང་འཇིག་རྟེན་ལས་འདས་པ་རྣམས་ལ་གཏོར་ཆོག་ལྟར་དབུལ་བའམ། མ་གྲུབ་ན། རང་གི་སྙིང་ག་ནས་འོད་ཟེར་འཕྲོས་པས་དཔལ་རྡོ་རྗེ་ནག་པོ་ཆེན་པོ་སོགས་ཆོས་སྐྱོང་ཡེ་ཤེས་པའི་ཚོགས་ཐམས་ཅད་ཨོཾ་བཛྲ་ས་མཱ་ཛཿསྤྱན་དྲངས། པདྨ་ཀ་མ་ལཱ་ཡ་སྟྭཾ་གྱིས་གདན་དབུལ། ཨོཾ་ཤྲཱི་མ་ཧཱ་ཀཱ་ལ་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ལན་གསུམ་གྱིས་དབུལ། ཕྱི་ནང་གི་མཆོད་པས་མཆོད། སྔོན་ཚེ་རྡོ་རྗེ་འཆང་གི་སྤྱན་སྔ་སོགས་ཀྱིས་བསྟོད། ཆོས་སྐྱོང་སྲུང་མ་འཁོར་བཅས་རྣམས། མཆོད་སྦྱིན་གཏོར་མ་སོགས་ཀྱིས་འདོད་དོན་གསོལ། གསུམ་པ་ནས་བདུན་པའི་བར་གྱི་གཏོར་མ་ལྔ་མཁའ་འགྲོ་སྡེ་ལྔ་ལ་དབུལ་ཏེ། རྡོ་རྗེ་རྩེ་ལྔ་པའི་ཕྱག་རྒྱ་བཅས་ལ། ཨོཾ་ཤྲཱི་ཧེ་རུ་ཀ་སོགས་ལས་སྔགས་ཀྱིས་ཐུགས་རྒྱུད་བསྐུལ། ཨོཾ་བུདྡྷ་ཌཱ་ཀི་སོགས་གཏོར་མ་དབུལ། ཨོཾ་སརྦ་ཌཱ་ཀི་སོགས་ཀྱིས་བསྟབ་པ་བྱ། གཏོར་མ་གཅིག་ལས་མེད་ན་གཏོར་མ་སོ་སོར་འབུལ་བའི་སྔགས་རྣམས་སྦྲེལ། མཐར་ཨོཾ་བཛྲ་ཨརྒྷཾ་སོགས་ཀྱིས་ཕྱི་མཆོད། ཨོཾ་ཨཱཿཧཱུྃ་གིས་ནང་མཆོད། མི་བསྐྱོད་རྡོ་རྗེ་ཡེ་ཤེས་ཆེ་སོགས་དེ་ཉིད་ལྔ་པའམ། ཇི་སྙེད་རྡོ་རྗེ་མཁའ་འགྲོ་མ་སོགས་ཤློ་ཀ་གཅིག་གིས་བསྟོད། མཆོད་སྦྱིན་གཏོར་མ་འདི་བཞེས་སོགས་ཀྱིས་འདོད་དོན་གསོལ། ཐ་མ་གཞི་བདག་ལ་འབུལ་བ་ནི། བྷཱུ་མི་པ་ཏི་ས་པ་རི་ཝཱ་ར་ཨཱ་ཀཪྵ་ཡ་ཛཿས་མགྲོན་དགུག །བྷཱུ་མི་པ་ཏི་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ལན་གསུམ་གྱིས་དབུལ། ཨརྒྷཾ་སོགས་ཀྱིས་མཆོད། གཞི་བདག་གནས་བདག་འཁོར་བཅས་རྣམས། །མཆོད་སྦྱིན་གཏོར་མ་སོགས་ཀྱིས་འདོད་དོན་གསོལ། བྷཱུ་མི་པ་ཏི་ས་པ་རི་ཝཱ་ར་གཙྪཿས་གཤེགས་སུ་གསོལ་ལ་ལྷག་མ་ཨ་ཀཱ་རོ་ལན་གསུམ་གྱིས་རིགས་དྲུག་སྤྱི་ལ་བསྔོ། སློབ་མ་གཞུག་པའི་ཆེད་དུ་གསོལ་བ་གདབ་པ་དཀྱུས་ལྟར་བྱ། གསུམ་པ་ནི། བུམ་པ་བསང་སྦྱངས། སྟོང་པའི་ངང་ལས་པད་ཟླའི་གདན་ལ་བྷྲཱུྃ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་ལ་དྭངས་ཤིང་ཐོགས་པ་མེད་པ་ལྷའི་གོས་ཀྱིས་མགུལ་པ་གཡོགས་ཤིང་དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་ཐམས་ཅད་ཀྱིས་ཡོངས་སུ་གང་བའི་དབུས་སུ་ཆོས་འབྱུང་གི་ནང་དུ་ནས། མི་བསྐྱོད་པས་དབུར་བརྒྱན་ཞེས་པའི་བར་མདུན་བསྐྱེད་ལྟར། ཕྱི་ནང་གིས་མཆོད། དཔལ་ལྡན་རྡོ་རྗེ་མཁའ་འགྲོ་སོགས་ཀྱིས་བསྟོད། བདག་གི་ཐུགས་ཀ་ནས་སོགས་བཟླས་པ་དང་འོད་ཞུ་བར་དཀྱུས་ལྟར་བྱའོ། །བཞི་པ་ལ་གཉིས། ཐོག་མར་བདག་ཉིད་འཇུག་པ་དང་། སློབ་མ་རྗེས་སུ་གཟུང་བ་དངོས་སོ། །དང་པོ་ནི། སྤྲུ་ལུང་པའི་ཡིག་ཆར་མི་གསལ་ཡང་། ངག་དབང་ཆོས་གྲགས་པས་སྤྲོ་ན་བྱ་གསུངས་བ་ལྟར་ཡིག་ཆ་གཞན་ལས་ཀྱང་འབྱུང་བས་སློབ་མ་ལ་ཇི་ཙམ་བསྐུར་བའི་བྱིན་རླབས་ཀྱི་ཆོས་རྣམས་བདག་འཇུག་གི་ཚུལ་དུ་བླང་ངོ་། །གཉིས་པ་ནི། དབང་བཞི་རྫོགས་པར་ཐོབ་ཅིང་དམ་ཚིག་དང་སྡོམ་པར་ལྡན་པའི་སློབ་མ་ཉེར་ལྔ་མན་ཟུང་དུ་མ་གྱུར་པ་རྣམས་ཁྲུས་བྱ། ཕྱག་དང་འཇུག་པའི་ཡོན་ཕུལ་ཏེ་རང་རང་གི་གྲལ་དུ་འཁོད་པ་ལ་སློབ་དཔོན་གྱིས། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་བྱ། དེའི་ཆེད་དུ་བྱིན་རླབས་ཀྱི་བཀའ་ཟབ་མོ་གསན་ལ་དོན་ཚུལ་བཞིན་དུ་ཉམས་སུ་བླང་བར་བགྱིའོ་སྙམ་པ་བྱང་ཆུབ་ཀྱི་མཆོག་ཏུ་ཐུགས་བསྐྱེད་པ་དང་། ཆོས་གསན་པའི་ཀུན་ཏུ་སྤྱོད་པ་རྣམས་ཀྱང་ལེགས་པར་གསལ་བཏབ་ནས་གསན་པར་ཞུ། དེ་ལ་གང་གསན་པར་བྱ་བའི་ཆོས་ནི། གངས་ཅན་བསྟན་པའི་མངའ་བདག་རྗེ་བཙུན་ས་སྐྱ་པ་ཡབ་སྲས་ལ་རྣལ་འབྱོར་བླ་མེད་དང་རྗེས་སུ་འབྲེལ་བའི་ཟབ་རྒྱས་ཀྱི་གདམས་པ་རྒྱ་མཚོ་ལྟ་བུ་ཞིག་བཀའ་བབས་པའི་ནང་ནས་མཆོག་ཏུ་གྱུར་པ་ལྕགས་རིའི་ཁོངས་ལས་མི་འདའ་བའི་སྙན་བརྒྱུད་གསེར་ཆོས་བཅུ་གསུམ་ཞེས་ཡོངས་སུ་གྲགས་པའི་ནང་ཚན། མཆོག་བསྒྲུབས་པས་ཐུན་མོང་ཞར་ལས་འབྱུང་བ་དམར་མོ་སྐོར་གསུམ་དུ་གྲགས་པའི་ཡ་གྱལ། གྲུབ་ཆེན་མཻ་ཏྲི་གུཔྟས་རྒྱུད་རལ་པ་གྱེན་བརྫེས་ལ་བརྟེན་ནས་ལེགས་པར་བཀྲལ་བའི་སྒྲུབ་ཐབས་དང་། པཎ་གྲུབ་ཛ་ཡ་སེ་ནས་མཛད་པའི་རྗེས་གནང་གི་ཡི་གེ་དང་བླ་མ་བརྒྱུད་པའི་ཕྱག་གཞེས་ལྟར་རྡོ་རྗེ་ཕག་མོ་རིག་པ་འཛིན་མ་རྩེན་མའི་བྱིན་རླབས་ཟབ་མོ་བསྒྲུབ་པ་ལ་སྔོན་འགྲོ་སློབ་དཔོན་གྱི་བྱ་བ་རྣམས་ལེགས་པར་གྲུབ་ནས། དངོས་གཞི་སློབ་མ་ལ་བྱ་བ་ལ། ལྷ་དང་སྐལ་པ་མཉམ་པའི་ཆེད་དུ་དཀྱིལ་འཁོར་དུ་འཇུག་པ་དང་། ཞུགས་ནས་བྱིན་རླབས་དབང་བཞིའི་ཚུལ་དུ་བསྐུར་བ་རྣམ་པ་གཉིས་སུ་ཡོད་པ་ལས། ཐོག་མར་བྱིན་རླབས་ཀྱི་འཇུག་པའི་ཆོས་རྣམས་ཞུ་བའི་ཡོན་དུ་སློབ་དཔོན་ལ་རྗེ་བཙུན་རྡོ་རྗེ་རྣལ་འབྱོར་མ་དངོས་ཡིན་སྙམ་པའི་མོས་གུས་དང་ལྡན་པའི་སྒོ་ནས་མཎྜལ་ལན་གསུམ་འབུལ་བར་ཞུ། དེ་ལྟར་མཎྜལ་ཕུལ་ནས་ཕྱག་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཇི་ལྟར་རྡོ་རྗེ་སེམས་དཔའ་ཡིས། །འགྲོ་བ་བྱང་ཆུབ་བསྒྲུབ་པའི་ཕྱིར། །ཡེ་ཤེས་རྡོ་རྗེ་རྣལ་འབྱོར་མར། །ཐམས་ཅད་རིག་པར་རང་གིས་བྱིན། །དེ་བཞིན་བདག་ལའང་མགོན་པོ་ཀྱེ། །ད་ལྟ་ཉིད་དུ་སྦྱིན་པར་རིགས། །ཞེས་པས་གསོལ་བ་བཏབ་ནས། རྒྱུད་དག་པར་བྱ་བའི་སླད་དུ་དམིགས་པ་འདི་བཞིན་མཛོད། དཀྱིལ་འཁོར་གྱི་དབུས་ན་བཞུགས་པའི་བླ་མ་དང་རྗེ་བཙུན་རྡོ་རྗེ་རྣལ་འབྱོར་མ་གཉིས་སུ་མེད་པ་ལ་གཞན་ཡང་སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་རྣལ་འབྱོར་མའི་ཚོགས་བསམ་གྱིས་མི་ཁྱབ་པས་བསྐོར་བ་སྤྲིན་ཕུང་གཏིབས་པ་ལྟར་བཞུགས་པར་མོས་པ་བྱས། དེ་དག་གི་སྤྱན་སྔར་རང་གཞན་གྱི་ཕ་མས་ཐོག་དྲངས་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱིས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་བཤགས་པ་ལ་སོགས་པའི་ཡན་ལག་བདུན་པ་བགྱིད་སྙམ་པས་འདིའི་རྗེས་ཟློས་མཛོད། དཀོན་མཆོག་གསུམ་ལ་སོགས་ལན་གསུམ་བརྗོད། ཅེས་རྒྱུད་དག་པར་བྱས་ནས། སྔོན་ཆད་རྗེ་བཙུན་རྡོ་རྗེ་རྣལ་འབྱོར་མའི་སིནྡྷཱུ་རའི་དཀྱིལ་འཁོར་དུ་མ་ཞུགས་པའམ། ཞུགས་ཀྱང་སླར་ཡང་བསྐྱར་ནས་འཇུག་པའི་མཚོན་བྱེད་དུ་རས་ཡུག་དམར་པོ་རེས་གདོང་དམ་དུ་བཅིངས་པར་མོས་པ་མཛོད། ཨཱ་ཁཾ་ཝཱི་ར་ཧཱུྃ། ཞེས་གདོང་བཅིང་། དེ་ནས་དཀྱིལ་འཁོར་གྱི་ལྷ་དང་མཇལ་བའི་ཚེ་ཕྱག་སྟོང་པར་མཇལ་དུ་མི་བཏུབ་པས་ཨུ་དུམྦར་ལ་སོགས་པའི་མེ་ཏོག་གི་ཕྲེང་བ་རེ་བྱིན་པར་མོས་པ་མཛོད། ཨཱ་ཁཾ་ཝཱི་ར་ཧཱུྃ། ཞེས་པས་མེ་ཏོག་གི་ཕྲེང་བ་གཏད་ལ། བར་ཆད་བསལ་བའི་སླད་དུ། སློབ་དཔོན་གྱི་ཐུགས་ཀ་ནས་ཁྲོ་མོ་ཁཎྜ་རོ་ཧིའི་ཚོགས་དཔག་ཏུ་མེད་པ་སྤྲོས་ཏེ་ཁྱེད་རང་རྣམས་ལ་བྱིན་རླབས་ཟབ་མོ་བསྒྲུབ་པ་ལ་བར་དུ་གཅོད་པའི་བགེགས་དང་ལོག་འདྲེན་ཐམས་ཅད་རྒྱང་རིང་དུ་བསྐྲད་པར་མོས་པ་མཛོད། སུམྦྷ་སོགས་བརྗོད་ཅིང་བུམ་ཆུ་གཏོར། སླར་ཡང་སློབ་དཔོན་གྱིས་བདུད་རྩི་ཁྱེད་རང་རྣམས་ཀྱི་ལྗགས་ཐོག་དང་། སྐུ་ལུས་ལ་གཏོར་ཏེ་ནང་རྩ་ཁམས་ཀྱི་བར་ཆད་ཐམས་ཅད་བསྲུང་བ་བྱས་པར་མོས་པ་མཛོད། ཨོཾ་ཨཱཿཧཱུྃ་ཞེས་བརྗོད། དེ་ལྟར་བྱས་པས་ལུས་ཐམས་ཅད་ཡེ་ཤེས་ཀྱི་བདུད་རྩིས་གང་ཞིང་ཟག་མེད་ཀྱི་བདེ་བས་བྱིན་གྱིས་བརླབས་པ་ཡིན་སྙམ་དུ་མོས་པ་མཛོད། དེ་ནས་གསང་སྔགས་ནང་གི་སེམས་བསྐྱེད་པའི་སླད་དུ་ཁྱེད་རང་རྣམས་ཀྱི་སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་ཆ་ཤས་ཡོངས་སུ་རྫོགས་པ་བཅོ་ལྔའི་ཉ་གང་བ་ལྟ་བུ་སྐྱ་འཁྱིལ་བ་རེ་གསལ་བཏབ་ལ། དེའི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་འོད་ཟེར་འཕྲོ་བ་དང་བཅས་པ་གྱེན་དུ་ལངས་པ་བྱུང་བར་མོས་ཏེ་བདེན་གཉིས་དབྱེར་མེད་དུ་སེམས་བསྐྱེད་པར་བགྱིའོ་སྙམ་པས་འདིའི་རྗེས་ཟློས་མཛོད། ཨོཾ་སརྦ་ཡོ་ག་ཙིཏྟ་ཨུཏྤཱ་ད་ཡཱ་མི། སློབ་དཔོན་གྱིས་ཁྱེད་རང་རྣམས་ཀྱི་སྙིང་གར་རྡོ་རྗེ་བཞག་པས་བརྟན་པར་བྱས་པར་མོས་པ་མཛོད། སུ་ར་ཏི་ས་མ་ཡ་སྟཾ་ཧོཿསིདྡྷྱ་བཛྲ་ཡ་ཐཱ་སུ་ཁཾ། ཞེས་པས་བདེན་གཉིས་དབྱེར་མེད་དུ་སེམས་བསྐྱེད་ནས། གཞན་ཡང་འོག་ནས་འབྱུང་བའི་གསང་སྔགས་ཀྱི་ཀུན་སྤྱོད་ཐམས་ཅད་སྣོད་དང་མི་ལྡན་པ་རྣམས་ཀྱི་མདུན་དུ་མ་སྨྲ་ཞིག་ཅེས་གསང་བར་གདམས་པ་ནི། སྤྱི་བོར་རྡོ་རྗེ་བཞག་སྟེ། དེང་ཁྱོད་དེ་བཞིན་གཤེགས་པ་ཐམས་ཅད་དང་རྡོ་རྗེ་རྣལ་འབྱོར་མའི་རིགས་སུ་ཞུགས་ཀྱི། དེ་བཞིན་གཤེགས་པ་ཐམས་ཅད་ཀྱི་གསང་ཆེན་དམ་པ་འདི་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་དུ་མ་ཞུགས་པ་རྣམས་ཀྱི་མདུན་དུ་སྨྲ་བར་མི་བྱ་སྟེ་མ་དད་པ་རྣམས་ལ་ཡང་མ་ཡིན་ནོ། །ཞེས་གསང་བར་གདམས་ནས། ནང་འཇུག་གི་སླད་དུ་རྗེ་བཙུན་མའི་ཐུགས་ཀ་ནས་སྤྲོས་པའི་ལྷ་མོ་རྣམས་ཀྱིས་ཛཿཧཱུྃ་བཾ་ཧོཿཞེས་གསུངས་ཤིང་དཀྱིལ་འཁོར་གྱི་དྲུང་དུ་ཁྲིད་ནས་ཤར་ཕྱོགས་སུ་འཁོད་པར་མོས་པས། སླར་ཡང་ཁྱད་པར་ཅན་གྱི་དོན་ལ་ནན་ཏན་དུ་གསོལ་བ་གདབ་པའི་ཡིད་ཀྱིས་དཀྱིལ་འཁོར་གྱི་ཕྱོགས་བཞི་ནས་སློབ་དཔོན་དང་དཀྱིལ་འཁོར་གྱི་དབུས་ན་བཞུགས་པའི་རྗེ་བཙུན་མ་ཐ་མི་དད་པ་ལ་མཎྜལ་སྔོན་དུ་འགྲོ་བས་གསོལ་བ་འདེབས་པ་འདིའི་རྗེས་ཟློས་ལན་བཞིའི་བར་དུ་གནང་བ་ཞུ་ཞེས་མཚམས་སྦྱར་ལ། གོ་སྐབས་ཡངས་ཤིང་བྱེད་པར་སྤྲོ་ན་དཀྱིལ་འཁོར་གྱི་ཕྱོགས་སོ་སོ་དང་། དེ་ཙམ་མ་གྲུབ་ན་ཡིད་ཀྱིས་དེ་ལྟར་བྱེད་པར་བསམ་ཞིང་དངོས་སུ་མཎྜལ་རེ་དང་། ལྷ་མོ་ལུས་ངག་ཡིད་ཀྱིས་སུ། །ཡེ་ཤེས་རྒྱ་མཚོ་ཁྱོད་ཕྱག་འཚལ། །ཇི་ལྟར་སངས་རྒྱས་སྟོབས་ཆེན་གྱིས། །ཐམས་ཅད་ཡེ་ཤེས་བྱིན་བརླབས་པ། །དེ་བཞིན་བདག་རྒྱུད་དག་ལ་ཡང་། །ཡེ་ཤེས་རྒྱུན་གྱིས་མཛད་དུ་གསོལ། །ཞེས་སྤེལ་ལ་ལན་བཞི་བྱའོ། །དེ་ལྟར་གསོལ་བ་བཏབ་ནས་ནང་འཇུག་གི་དངོས་གཞི་ཡེ་ཤེས་དབབ་པའི་སླད་དུ་དམིགས་པ་འདི་བཞིན་དུ་མཛོད། ཁྱེད་རང་རྣམས་ཀྱི་སྙིང་གའི་དབུས་སུ་བྃ་ཡིག་དམར་པོ་མར་མེ་ལྟར་འདི་སྤྲུ་ལུང་པའི་ཡིག་ཆར་གོང་དུ་འབྱུང་ཡང་སྐབས་འདིར་བྱས་ན་སྤྱི་དང་མཐུན་པས་ལེགས། འབར་བ་ཞིག་གསལ་བཏབ་སྟེ། ཆོས་ཐམས་ཅད་སྒྱུ་མ་ལྟ་བུར་ཤེས་པའི་ངང་ནས་བྃ་ཡིག་ལ་སེམས་ཞུགས་པ་བཞིན་ཆེར་གྱིས་གཏད་པས་དེ་ལས་འོད་ཟེར་འཕྲོས། རང་རང་གི་ལུས་དང་ཁམས་གསུམ་ཐམས་ཅད་གང་བས་ཁམས་གསུམ་ཐམས་ཅད་འོད་དུ་ཞུ། མེ་ལོང་ལ་ཧས་བཏབ་པ་ལྟར་རིམ་གྱིས་བསྡུས་ཏེ་རང་རང་གི་ལུས་ལ་ཐིམ། ལུས་ཀྱི་རྐང་པ་གཉིས་བརླ་ལ། དེ་ལྟོ་བ་ལ། དེ་སྐེད་པ་ལ། དེ་སྙིང་ག་ལ། ལག་པ་གཉིས་དཔུང་པ་ལ། དེ་སྙིང་ག་ལ། དེ་མགྲིན་པ་ལ། དེ་མགོ་བོ་ལ། དེ་སེམས་ལ། དེ་ནམ་མཁའ་ལ། དེའང་རང་བཞིན་གྱིས་འོད་གསལ་བར་གྱུར་པར་མོས་པ་མཛོད། དེའི་ངང་ལས་ཆོས་འབྱུང་གི་ནང་དུ་པདྨ་དང་ཉི་མ་ལ་གནས་པའི་བྃ་ཡིག་དམར་པོ་ལས་ཁྱེད་རང་རྣམས་བཅོམ་ལྡན་འདས་མ་རྡོ་རྗེ་ཕག་མོ་རིག་པ་འཛིན་མར་གྱུར་པ་ནི། །ཞལ་གཅིག་ཕྱག་གཉིས་མ་ཛ་བའི་མེ་ཏོག་ལྟར་དམར་བའི་མདངས་ཅན་ཞལ་མཆེ་བ་གཙིགས་ཤིང་ཁྲོ་གཉེར་དང་བཅས་པས་སྟེང་དུ་ཕྱོགས་པ། དམར་ལ་ཟླུམ་པའི་སྤྱན་གསུམ་གྱེན་དུ་གཟིགས་པ། དབུ་སྐྲ་ནག་པོ་སིལ་བུ་ཐུར་དུ་འཕྱང་བ། ཕྱག་གཡོན་བདུད་རྩིས་གང་བའི་ཐོད་པ་དང་བཅས་པས་ཞབས་གཡོན་གྱི་སྒྱིད་ཁུང་ནས་འཁྱུད་ཅིང་སྟེང་དུ་བཏེག་ནས་ཐོད་པའི་བདུད་རྩི་ཞལ་དུ་གསོལ་བའི་ཚུལ་དུ་འཛིན་པ། གཡས་ན་རྡོ་རྗེ་རྩེ་ལྔ་པ་འཛིན་པས་ཞབས་གཡས་པུས་མོ་བཙུགས་པའི་རྟིང་པ་ལ་བསྣུན་པ། མནྡ་ར་དང་། མྱ་ངན་མེད་པ་དང་། ཡོངས་འདུའི་མེ་ཏོག་གི་ཕྲེང་བ་གཡོན་ན་འཛིན་ཅིང་རྒྱན་གཞན་ཐམས་ཅད་སྤངས་པ། ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་གནས་རྣམས་སུ་ཟླ་བའི་གདན་ལ་ལྟེ་བར་ཨོཾ་བྃ་དམར་མོ་རྡོ་རྗེ་ཕག་མོ། སྙིང་གར་ཧྃ་ཡྃ་སྔོན་མོ་གཤིན་རྗེ་མ། ཁར་ཧྲཱིྃ་མྃ་དཀར་མོ་རྨོངས་བྱེད་མ། མཚོགས་མར་ཧྲིཾ་ཧྲཱིྃ་སེར་མོ་སྐྱོད་བྱེད་མ། སྤྱི་གཙུག་ཏུ་ཧུྃ་ཧཱུྃ་ལྗང་གུ་སྐྲག་བྱེད་མ། ཚིགས་ཆེན་བརྒྱད་ལ་ཕ྄ཊ་ཕ྄ཊ་དུད་ཀ་ཙཎྜི་ཀ །དཔྲལ་བར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། མིག་སོགས་བུ་ག་ཐམས་ཅད་ལ་ཧཱུྃ་ཡིག་རེ་རེས་མཚན་པ། མཁའ་འགྲོ་དུ་མ་སྤྲོ་ཞིང་སྡུད་པའི་སྐུར་གྱུར་པར་མོས་པ་དང་བཅས་ཏེ་སེམས་འཛིན་པར་ཞུ། ཡང་ཁྱེད་རང་རྣམས་ལྷ་མོར་གསལ་བ་བྃ་ཡིག་ཆེན་པོ་གཅིག་ཏུ་གྱུར། དེ་ཇེ་ཆེ་ཇེ་ཆེ་ལ་མཐར་ནམ་མཁའ་དང་འདྲེས་པའི་སྟོང་ཉིད་ཀྱི་ངང་དུ་མཉམ་པར་འཇོག་པར་ཞུ། སླར་ཡང་ཁྱེད་རང་རྣམས་ལྷ་མོའི་སྐུར་ལམ་སྟེ་གསལ་བའི་ལྟེ་བར་ཆོས་འབྱུང་ཟུར་དྲུག་པའི་དབུས་སུ་བྃ་ཡིག་ལ་ཨོཾ་གསུམ་མའི་སྔགས་ཀྱི་ཕྲེང་བས་བསྐོར་བ་གྲྭ་བཞིར་དགའ་བ་འཁྱིལ་པ་དང་བཅས་གསལ་བཏབ་ནས་གཡོན་སྐོར་དུ་དྲག་ཏུ་འཁོར་བ་ལ་སེམས་བཟུང་བས་དྲོད་ཀྱི་ཡེ་ཤེས་སྐྱེས། འཁོར་ལོ་དེ་ཉིད་གསང་གནས་སུ་འཁོར་བ་དང་། དགའ་བ་འཁྱིལ་པ་གཡོན་དུ་འཁོར་བ་ལ་སེམས་བཟུང་བས་བདེ་བའི་ཡེ་ཤེས་སྐྱེས། མཛོད་སྤུར་དགའ་བ་འཁྱིལ་པ་གཡོན་སྐོར་དུ་འཁོར་བ་ལ་སེམས་བཟུང་བས་མི་རྟོག་པའི་ཡེ་ཤེས་སྐྱེས་ཤིང་ལུས་ཐམས་ཅད་དྲོད་དང་བདེ་བས་གང་། དེའི་ཚེ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་རྡོ་རྗེ་རྣལ་འབྱོར་མའི་རྣམ་པར་སྤྱན་དྲངས་ཏེ་ལུས་ལ་སིབ་སིབ་ཐིམ་པས་སངས་རྒྱས་ཐམས་ཅད་ཀྱི་ཡེ་ཤེས་རྒྱུད་ལ་ཞུགས་པར་མོས་པ་མཛོད་ཅེས་བརྡ་སྦྱར་ལ། གུ་གུལ་གྱིས་བདུག །ཌཱ་མ་རུས་ཐོག་དྲངས་པའི་རོལ་མོའི་སྒྲ་དྲག་ཏུ་བྱ་ཞིང་ཨོཾ་གསུམ་མའི་སྔགས་བརྗོད་པས་དབབ། དེ་ལྟར་ཡེ་ཤེས་ཕབ་པས་ལུས་བདེ་ཞིང་གར་བྱེད་པ་དང་། ངག་སཾ་སྐྲྀ་ཏའི་སྐད་སྨྲ་བ་དང་། ཡིད་ལ་བདེ་གསལ་མི་རྟོག་པའི་ཉམས་ཅི་རིགས་པ་འབྱུང་བ་ཡིན་ལ། དེ་བརྟན་པར་བྱ་བའི་ཕྱིར་སྤྱི་བོར་རྡོ་རྗེ་རྒྱ་གྲམ་དུ་བཞག་སྟེ་བརྟན་པར་བྱས་པར་མོས་པ་མཛོད། ཏིཥྛ་བཛྲ་ཞེས་བརྗོད། དཀྱིལ་འཁོར་གྱི་ལྷ་ལ་མེ་ཏོག་འདོར་བ་ནི། འདི་ན་རྗེ་བཙུན་རྡོ་རྗེ་རྣལ་འབྱོར་མའི་སིནྡྷཱུ་རའི་དཀྱིལ་འཁོར་བཞུགས་པ་ཡིན་ཏེ། རིམ་པ་ལྟར་བྱོན་ནས་གཡོན་པའི་ཕྱག་གིས་མེ་ཏོག་དེ་རྗེ་བཙུན་མའི་དབུ་ལ་ཕུལ་བར་མོས་ཏེ། ཨོཾ་པྲ་ཏཱི་ཙྪ་བཛྲ་ཧོཿ ཞེས་གསུང་ཞིང་མེ་ཏོག་འདོར་བར་ཞུ། དེ་ཉིད་སློབ་དཔོན་གྱིས་བླངས་ཏེ་ཁྱེད་རང་རྣམས་ཀྱི་སྤྱི་བོར་བཞག་སྟེ་སྔགས་ཀྱི་ཕྲེང་བས་བྱིན་གྱིས་བརླབས་པར་མོས་པ་མཛོད། ཨོཾ་པྲ་ཏི་གྲྀཧྞ་སྟྭཾ་ཨི་མཾ་ས་ཏྭ་མ་ཧཱ་བ་ལ་ཨོཾ། ཞེས་པས་བྱིན་གྱིས་བརླབས་ནས། སློབ་དཔོན་གྱིས་ཨོཾ་བཛྲ་ནེ་ཏྲ་ཨ་པ་ཧཱ་ར་པ་ཊ་ལཾ་ཧྲཱིཿཔྲྃ། ཞེས་པས་ཁྱེད་རང་རྣམས་ཀྱི་མ་རིག་པའི་ལིང་ཏོག་དང་མིག་རས་ལྷན་ཅིག་ཏུ་བསལ་ཏེ། དཀྱིལ་འཁོར་གྱི་ལྷ་ངོ་བསྟན་པ་ནི། འདི་ན་རྗེ་བཙུན་རྡོ་རྗེ་རྣལ་འབྱོར་མའི་སིནྡྷཱུ་རའི་དཀྱིལ་འཁོར་བཞུགས་པ་ཡིན་ཏེ། ཆོས་འབྱུང་ལ་གནས་པའི་པད་ཉིའི་སྟེང་དུ་བཅོམ་ལྡན་འདས་མ་རྡོ་རྗེ་ཕག་མོ་རིག་པ་འཛིན་མ་རྩེན་མ་ཞལ་གཅིག་ཕྱག་གཉིས་མ་ཛ་བའི་མེ་ཏོག་ལྟར་དམར་བའི་མདངས་ཅན། ཞལ་མཆེ་བ་གཙིགས་ཤིང་ཁྲོ་གཉེར་དང་བཅས་པས་སྟེང་དུ་ཕྱོགས་པ། དམར་ལ་ཟླུམ་པའི་སྤྱན་གསུམ་གྱེན་དུ་གཟིགས་པ། དབུ་སྐྲ་ནག་པོ་སིལ་བུ་ཐུར་དུ་འཕྱང་བ། ཕྱག་གཡོན་བདུད་རྩིས་གང་བའི་ཐོད་པ་དང་བཅས་པས་ཞབས་གཡོན་གྱི་སྒྱིད་ཁུང་ནས་འཁྱུད་ཅིང་སྟེང་དུ་བཏེག་ནས་ཐོད་པའི་བདུད་རྩི་ཞལ་དུ་གསོལ་བའི་ཚུལ་དུ་འཛིན་པ། གཡས་ན་རྡོ་རྗེ་རྩེ་ལྔ་པ་འཛིན་པས་ཞབས་གཡས་པུས་མོ་བཙུགས་པའི་རྟིང་པ་ལ་བསྣུན་པ། མནྡ་ར་དང་། མྱ་ངན་མེད་པ་དང་། ཡོངས་འདུའི་མེ་ཏོག་གི་ཕྲེང་བ་གཡོན་ན་འཛིན་ཅིང་རྒྱན་གཞན་ཐམས་ཅད་སྤངས་པ། ཡེ་ཤེས་ཀྱི་མེ་འབར་བའི་དབུས་ན་བཞུགས་པ་སྟེ། མདོར་ན་རྗེ་བཙུན་རྡོ་རྗེ་རྣལ་འབྱོར་མ་རིག་པ་འཛིན་མའི་དཀྱིལ་འཁོར་རྟེན་དང་བརྟེན་པར་བཅས་པ་མངོན་སུམ་བཞིན་དུ་གཟིགས་པའི་མོས་པ་མཛོད། དེས་དཀྱིལ་འཁོར་དུ་འཇུག་པའི་ཆོས་རྣམས་གྲུབ་ནས། ཞུགས་པའི་དཀྱིལ་འཁོར་དུ་དབང་བཞི་བྱིན་རླབས་ཀྱི་ཚུལ་དུ་བསྐུར་བ་ཞུ་བའི་ཡོན་དུ་མཎྜལ་འབུལ་བར་ཞུ། མཎྜལ་ཕུལ་ནས་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། བྱང་ཆུབ་རྡོ་རྗེས་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་བསྐྱབ་བའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་པས་གསོལ་བ་བཏབ་ནས་དམིགས་པ་འདི་བཞིན་མཛོད། དཀྱིལ་འཁོར་གྱི་ཤར་ཕྱོགས་སུ་རིན་པོ་ཆེའི་ཁྲི་དང་པད་ཟླའི་གདན་ལ་ཁྱེད་རང་རྣམས་རྗེ་བཙུན་རྡོ་རྗེ་རྣལ་འབྱོར་མའི་ང་རྒྱལ་གྱིས་འཁོད་པའི་སྟེང་དུ་གདུགས་དཀར་པོ་གསེར་གྱི་ཡུ་བ་ཅན་དང་། གཡས་སུ་རྒྱལ་མཚན། །གཡོན་དུ་བ་དན། ཁོར་ཡུག་ཏུ་མཆོད་པའི་སྤྲིན་ཚོགས་དང་བཅས་པ་ལ། རྗེ་བཙུན་མའི་ཐུགས་ཀ་ནས་སྤྲུལ་པའི་དབང་གི་ལྷ་རྣམས་ཀྱིས་བགེགས་སྐྲོད་པ་དང་། མཆོད་པ་དང་བཀྲ་ཤིས་ཀྱི་གླུ་དང་བཅས་པ་བརྗོད་ཅིང་གཙོ་མོའི་ཕྱག་ན་བུམ་པ་དཀར་པོ་ཡེ་ཤེས་ཀྱི་བདུད་རྩིས་གང་བ་ཐོགས་ཏེ་ཁྱེད་རང་རྣམས་ཀྱི་སྤྱི་བོར་བཞག་ཅིང་དབང་བསྐུར་བར་མོས་པ་མཛོད། ལས་ཀྱི་རྡོ་རྗེས་བུམ་པ་སློབ་མའི་ཕྱོགས་སུ་བཏེག །སློབ་དཔོན་གྱིས་རྡོ་རྗེ་དྲིལ་བུ་འཛིན་ཅིང་མེ་ཏོག་འཐོར་བ་དང་བཅས་ཏེ། བཀྲ་ཤིས་གང་ཞིག་ཆོས་ཀྱི་དབྱིངས་ལས་ལེགས་བྱུང་བ། །ཧེ་རུ་ཀ་དཔལ་འཇིགས་བྱེད་རྒྱལ་པོ་འབར་བའི་སྐུ། །ཤེས་རབ་ཕག་མོའི་པདྨར་རྡོ་རྗེ་རོལ་མཛད་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །ཧེ་རུ་ཀ་དཔལ་འབར་བའི་སྐུ་མངའ་བ། །ཧ་ཧའི་གད་རྒྱངས་ས་གསུམ་གཡོ་བར་བྱེད། །ཧཱུྃ་ཧཱུྃ་ཕ྄ཊ་ཕ྄ཊ་བདུད་ཀྱི་ཀླད་འགེམས་པའི། །བདེ་མཆོག་འཁོར་ལོའི་བཀྲ་ཤིས་དེང་འདིར་སྩོལ། །ཨེ་ཝཾ་མཉམ་པར་སྦྱོར་བ་སྔགས་ཀྱི་སྐུ། །ཨཱ་ལི་ཀཱ་ལི་གཉིས་མེད་རོལ་པའི་གསུང་། །ཨོཾ་གྱི་ངོ་བོར་སོན་པའི་ཐུགས་མངའ་བ། །རྡོ་རྗེ་ཕག་མོའི་བཀྲ་ཤིས་དེང་འདིར་སྩོལ། །ཞེས་བརྗོད་པའི་མཐར་བུམ་པ་སྤྱི་བོར་བཞག་ཅིང་། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། དེ་བཞིན་བདག་གིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཙཀྲ་ཝཱི་ར་སྟྭཾ་ཨ་བྷི་ཥིཉྩ་མི། བཛྲཱི་བྷ་ཝ་ཨ་བྷི་ཥིཉྩ་ཧཱུྃ་ཞེས་གསུང་ཞིང་དབང་བསྐུར་བས་ཁྱེད་རང་རྣམས་ཀྱི་ལུས་ཐམས་ཅད་བྱང་ཆུབ་སེམས་ཀྱི་ཆུ་རྒྱུན་གྱིས་གང་། ཆུ་ལྷག་མ་ཡར་ལུད་པ་ལས་མི་བསྐྱོད་པ་སོགས་སངས་རྒྱས་རིགས་ལྔས་དབུར་བརྒྱན། རྗེ་བཙུན་མའི་ཐུགས་ཀ་ནས་སྤྲོས་པའི་ལྷ་མོ་མེ་ཏོག་མ་ལ་སོགས་པ་རྣམས་ཀྱིས་ཀྱང་མཆོད་པར་མོས་པ་མཛོད། ཨོཾ་བཛྲ་པུཥྤེ་ཨཱཿཧཱུྃ་སོགས་ནས། ནཻ་ཝི་དྱེའི་བར་སྦྱར་བས་མཆོད། དེ་ནས་ཁྱེད་རང་རྣམས་དཀྱིལ་འཁོར་གྱི་ནུབ་ཕྱོགས་སུ་འཁོད་པའམ། འཁོད་པར་མོས་ཏེ་སྔགས་ཀྱི་བཟླས་ལུང་གི་སླད་དུ་དམིགས་པ་འདི་བཞིན་མཛོད། སློབ་དཔོན་ལ་རྗེ་བཙུན་མ་དངོས་ཡིན་སྙམ་པའི་གུས་འདུད་དྲག་པོ་བྱས་པས་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་སྔགས་ཀྱི་ཕྲེང་བ་བྱེ་རུ་སྟར་ལ་བརྒྱུས་པ་ལྟར་བསམ་གྱིས་མི་ཁྱབ་པ་བྱུང་། སློབ་དཔོན་གྱི་ཞལ་ནས་ཐོན། དེ་ལས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་རྣལ་འབྱོར་མ་རྣམས་ཀྱི་ཐུགས་ཀ་ནས་ཐུགས་གཉིས་སུ་མེད་པའི་ཡེ་ཤེས་དང་། བྱིན་རླབས་ཐམས་ཅད་སྔགས་ཕྲེང་གི་རྣམ་པར་སྤྱན་དྲངས་ཏེ། ཞལ་ནས་ཐོན་པའི་སྔགས་ཕྲེང་དང་དབྱེར་མེད་དུ་གྱུར་པ་དེ་ཉིད་ཁྱེད་རང་རྣམས་རྗེ་བཙུན་མའི་སྐུ་ཅན་དུ་གྱུར་པའི་ཞལ་དུ་ཞུགས། ཐུགས་ཀའི་བྃ་ཡིག་གི་མཐར་གཡོན་སྐོར་དུ་དམར་འཁྱིལ་གྱིས་འཁོད་པར་མོས་པ་བྱས་ཏེ་སྔགས་འདིའི་རྗེས་ཟློས་ལན་གསུམ་མཛོད། ཅེས་བརྗོད་ལ་ཨོཾ་གསུམ་མའི་རྗེས་ཟློས་བྱེད་དུ་གཞུག །དེ་བརྟན་པར་བྱ་བའི་སླད་དུ་སློབ་དཔོན་གྱིས་ལག་པ་གཡོན་པ་རྡོ་རྗེ་དང་བཅས་པ་ཁྱེད་རང་རྣམས་ཀྱི་སྤྱི་བོར་བཞག་ཅིང་སྔགས་བརྗོད་པས་བྱིན་གྱིས་བརླབས་པའི་མོས་པ་མཛོད། ཅེས་བརྗོད་ལ་ཐལ་མོ་སྤྱི་བོར་བཞག་ཅིང་སྔགས་བརྗོད། སྤྱོད་པའི་རྗེས་གནང་གི་སླད་དུ། ཁྱེད་རང་རྣམས་རྗེ་བཙུན་མའི་སྐུའི་རྣམ་འགྱུར་དུ་བྱས་པའི་ཕྱག་གཡོན་དུ་བདུད་རྩི་དང་། གཡས་སུ་རྡོ་རྗེ་བཟུང་ནས་དམིགས་པ་འདི་བཞིན་དུ་མཛོད། སེམས་ཅན་གྱི་དོན་བྱ་བའི་ཕྱིར་སྤྱོད་ཡུལ་གྱི་གནས་སུ་འཇུག་པར་འདོད་པས་མཁའ་འགྲོ་སྤྲོ་བསྡུ་དང་བཅས་ནམ་མཁའ་ལ་འཕུར་ཞིང་། མ་ན་བྷཾ་ག་དང་། དཔལ་གྱི་རིའི་རྩེ་མོར་རིམ་གྱིས་ཕྱིན་ཏེ། མནྡ་ར་དང་། མྱ་ངན་མེད་པ་དང་། ཡོངས་འདུ་རྣམས་སྐྱེས་པའི་ལྡུམ་གྱི་ར་བ་རྩེ་མོ་བརྒྱད་དང་ལྡན་པའི་རིན་པོ་ཆེའི་ཁང་པར་ཞུགས་པར་བསམས་ལ། ཞབས་གཡོན་བརྐྱངས་པའི་མཐིལ་རི་ལ་བརྡབས་པས་བརྟན་གཡོ་ཐམས་ཅད་བསྐྱོད་ཅིང་སེམས་ཅན་ཐམས་ཅད་ཀྱི་རྒྱུད་བདེ་བས་གང་ཞིང་འོད་དུ་ཞུ་ནས་བདུད་རྩིའི་རང་བཞིན་དུ་གྱུར་པ་རྣམས་རླུང་འཇུག་པ་དང་བསྟུན་ནས་གཡོན་གྱི་ཐོད་པར་བསྡུས་ཤིང་སྣ་བུག་གཡོན་ནས་བཏུངས་པས་ཟག་མེད་ཀྱི་བདེ་བས་རྒྱུད་གང་བར་མོས་པ་མཛོད། ཅེས་སྒོམ་དུ་གཞུག་ཅིང་བདུད་རྩི་སྦྱིན། དེ་དག་ནི་སྔགས་དང་སྤྱོད་པའི་རྗེས་སུ་གནང་བ་སྟེ། དེ་ལྟར་ན་ཁྱེད་རྣམས་ཀྱིས་བུམ་པའི་དབང་བསྐུར་བ་བྱིན་རླབས་ཀྱི་ཚུལ་གྱིས་ཐོབ་པ་ཡིན་ནོ། །གསང་དབང་གི་སླད་དུ། ཐབས་བདེ་བ་ཆེན་པོ་མཚོན་པར་བྱེད་པ་ཤ་ཆེན་ནམ་ཤ་ཕལ་པ་མར་ལ་བཙོས་པ་ཕྱག་གཡས་དང་། ཤེས་རབ་སྟོང་པ་ཉིད་མཚོན་པར་བྱེད་པ་སིནྡྷུ་རའི་དཀྱིལ་འཁོར་གྱི་འོག་གི་ཐོད་པའི་བདུད་རྩི་ཕྱག་གཡོན་དུ་བྱིན་ཏེ་དབང་བསྐུར་བར་མོས་པ་མཛོད། །ཅེས་བརྗོད་ལ་ཨོཾ་གསུམ་མའི་སྔགས་བརྗོད་བཞིན་དུ་བྱིན། དེས་ཁྱེད་རྣམས་ཀྱིས་གསང་བའི་དབང་བསྐུར་བ་བྱིན་རླབས་ཀྱི་ཚུལ་གྱིས་ཐོབ་པ་ཡིན་ནོ། །ཤེས་རབ་ཡེ་ཤེས་ཀྱི་དབང་གི་སླད་དུ། སིནྡྷུ་རའི་མཎྜལ་གྱི་ལྷ་མོའི་གནས་གསུམ་ནས་བླངས་པའི་རྡུལ་ཚོན་གྱིས་ཁྱེད་རང་རྣམས་ཀྱི་གནས་གསུམ་དུ་ཐིག་ལེ་བཀོད་པ་ལ་བརྟེན་ནས། རྗེ་བཙུན་མའི་སྐུ་གསུང་ཐུགས་ཀྱི་དངོས་གྲུབ་ཐམས་ཅད་སྩལ་ཞིང་ལུས་སེམས་ལ་བདེ་བས་ཁྱབ་ཅིང་རྒྱས་པར་མོས་པ་མཛོད། རྩ་སྔགས་བརྗོད་བཞིན་དུ་ཐིག་ལེ་བྱ། དེས་ཁྱེད་རྣམས་ཀྱིས་ཤེས་རབ་ཡེ་ཤེས་ཀྱི་དབང་བསྐུར་བ་བྱིན་རླབས་ཀྱི་ཚུལ་གྱིས་ཐོབ་པ་ཡིན་ནོ། །དབང་བཞི་པའི་སླད་དུ། ཆོས་ཐམས་ཅད་སྐྱེ་འགག་མེད་པ་སྤྲོས་པའི་མཐའ་ཐམས་ཅད་དང་བྲལ་བར་ཤེས་པར་བྱས་ཏེ་དེའི་ངང་དུ་ཅུང་ཟད་རེ་མཉམ་པར་འཇོག་པར་ཞུ། དེས་ཁྱེད་རྣམས་ཀྱིས་དབང་བཞི་པ་བྱིན་རླབས་ཀྱི་ཚུལ་གྱིས་ཐོབ་པ་ཡིན་ནོ། །བར་འདིར་སྒྲུབ་ཐབས་ཀྱི་ལུང་བཀླག་ཅིང་། རྗེས་དམ་ཚིག་ཁས་བླང་། གཏང་རག་གི་མཎྜལ། ལུས་ལོངས་སྤྱོད་འབུལ་བ་རྣམས་སྤྱི་ལྟར་བྱའོ། །དེ་རྣམས་ཀྱི་སྒོ་ནས་རྗེ་བཙུན་རྡོ་རྗེ་རྣལ་འབྱོར་མ་མཻ་ཏྲི་མཁའ་སྤྱོད་དུ་གྲགས་པའི་བྱིན་རླབས་ཀྱི་བཀའ་ཟབ་མོ་ལེགས་པར་གསན་པ་ཡིན་པས་རང་གཞན་གྱི་དོན་རྒྱ་ཆེན་པོ་མཛད་པར་ཞུ། །བསོད་ནམས་འདི་ཡིས་སོགས་བརྗོད་ལ་སློབ་མ་རྣམས་རང་གནས་སུ་གཏང་། ཚོགས་ཀྱི་མཆོད་པ་ཡོད་ན་སྤྱི་ལྟར་བྱ་ཞིང་དགའ་སྟོན་ལ་ལོངས་སྤྱད། གསུམ་པ་ནི། མཆོད་པ་རྣམས་ཞལ་བསོས་ལ་བསང་སྦྱང་བྱིན་གྱིས་བརླབ། ཕྱི་ནང་གི་མཆོད་པ་དང་། བསྟོད་པས་བསྟོད། ཧེ་རུ་ཀའི་ཡིག་བརྒྱ་ལན་གསུམ་དང་། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། ཨོཾ་ཁྱོད་ཀྱིས་སོགས་ནས། བཛྲ་མུཿས་སིནྡྷུ་རའི་ཡེ་ཤེས་པ་དང་། བུམ་ནང་གི་ཡེ་ཤེས་པ་དང་། གཏོར་མགྲོན་གྱི་ཡེ་ཤེས་པ་རྣམས་གཤེགས། མདུན་བསྐྱེད་ཀྱི་དམ་ཚིག་པ་སིནྡྷུ་རའི་རང་བཞིན་དུ་གྱུར་པར་བསམ། རང་གི་གནས་རྣམས་སུ་ཟླ་བའི་དཀྱིལ་འཁོར་རེ་རེའི་སྟེང་དུ་ལྟེ་བར་ཨོཾ་བྃ་སོགས་གོ་ཆ་དགོད། དགེ་བ་འདི་ཡིས་མྱུར་དུ་བདག །རྡོ་རྗེ་ཕག་མོ་འགྲུབ་གྱུར་སོགས་བསྔོ་སྨོན་དང་བཀྲ་ཤིས་ཇི་ལྟར་རིགས་པར་བརྗོད། ལས་གྱི་རྗེས་མི་མངོན་པར་བྱའོ། །བཞི་པ་ནི། བྱིན་རླབས་ཀྱི་སྐབས་ཡིག་རྙིང་དང་། སྒྲུབ་ཐབས་རིན་འབྱུང་སོགས་ལས་གོང་དུ་བཀོད་པ་དང་ཅུང་ཟད་མི་མཐུན་པའི་ཁྱད་པར། །བུམ་དབང་གི་སྐབས་སུ་ལྷར་བསལ་བ་སྔོན་དུ་འགྲོ་བས་སློབ་མ་ལྷ་མོར་བསྐྱེད་ཅིང་གོ་ཆ་སོགས་བཀོད་པར་ཆུ་དབང་བསྐུར། གསང་དབང་འདྲ། བྱིན་རླབས་ཀྱི་དངོས་གཞི་སློབ་མ་ལྷར་གསལ་བ་དང་། རྩ་སྔགས་ཀྱི་བྱིན་གྱིས་བརླབ་པ་དང་། བདུད་རྩིས་འཐོར་འཐུང་བྱ་བ་སྔོན་དུ་འགྲོ་བས། གོང་བུ་བསྡུ་བ། རྗེས་གཞིག །དྲོད་དང་། མི་རྟོག་པ་དང་། བདེ་བའི་ཡེ་ཤེས་དབབ་པ་རྣམས་ཀྱི་མཐར་བརྟན་པར་བྱེད་པ་རྣམས་དབང་གོང་མ་གཉིས་ཀྱི་དོད་ཐུབ་དང་། སྤྱོད་པའི་རྗེས་གནང་སྦྱིན་པར་མཛད་དེ། རྒྱ་གཞུང་གི་དགོངས་པར་གསུངས་པ་དོན་ལ་གནས་མོད། འདིར་བཀོད་པའང་སྤྲུ་ལུང་པའི་ཡིག་ཆ་ལས། བླ་མ་བརྒྱུད་པའི་ཕྱག་ལེན་གྱིས་གོང་འོག་འབྲེལ་བསྡེབས་ཏེ་དོན་གྱི་གནད་ཚང་བར་མཛད་པ་ལྟར་ལ་རྒྱ་གཞུང་སོགས་ཀྱི་དགོངས་པ་མེད་དུ་མི་རུང་བས་ཅུང་ཟད་བརྒྱན་ཏེ་བཀོད་པ་ཡིན་པས་འགལ་བར་མི་བསམ་ཞིང་། ཁྱད་པར་རང་ལུགས་ལ་དེང་སང་གི་བར་དུ་བླ་མ་རྣམས་ཀྱི་ཕྱག་གཞེས་ཀྱང་འདི་ལྟར་མཛད་པ་ཡིན་ནོ། །ངག་དབང་ཆོས་གྲགས་ཀྱི་ཡིག་ཆ་ནི་སྤྲུ་ལུང་བའི་ཡི་གེའི་སྙིང་པོའི་བཅུད་ཕྱུངས་པ་ལྟ་བུར་སྣང་ནའང་ཅུང་ཟད་བསྡུས་ཆེས་པར་སྣང་ངོ་། །གོང་བུ་བསྡུ་བའི་སྐབས་ཇི་སྐད་དུ། རང་ལུས་སུམ་ཅུ་རྩ་དྲུག་ཁམས་ཀྱི་ཚོགས། །མིག་སྣ་རྣ་ལྕེ་ལུས་ཏེ་དབང་པོ་ལྔ། །ངག་དང་རྐང་ལག་བཤང་གཅི་ལས་དབང་ལྔ། །རང་བཞིན་དག་ཀྱང་དེ་ལྟར་མ་རྟོགས་པའི། །མ་ལུས་འགྲོ་དྲུག་སེམས་ཅན་ཚོགས། །ལས་དང་ཉོན་མོངས་སྡུག་བསྔལ་གྱི། །འཁོར་ལོ་བསྐོར་བ་འདི་དག་ནི། །ངེས་པར་བྱང་ཆུབ་ལ་གཞུག་བྱ། །ཞེས་གསུངས་ཏེ། དེ་ལྟ་བུའི་ཚུལ་ལ་དམིགས་པ་མེད་པའི་སྙིང་རྗེ་སྒྱུ་མ་ལྟ་བུས་སྣོད་བཅུད་འོད་གསལ་དུ་བསྡུ་བ་ལ་འཇུག་པ་ཡིན་ནོ། །རྗེས་སུ་གཞིག་པ་ནི་ཡེ་ཤེས་དབབ་པའི་སྐབས་སུ་བཤད་པ་ལྟར་རང་ལུས་བྃ་ཡིག་ཏུ་གསལ་བ་སྟོང་པར་གཞུག་པ་དེ་ཡིན་ལ། གང་ལྟར་ཡང་སྟོང་ཉིད་ཀྱི་ངང་ལས་རང་རྡོ་རྗེ་རྣལ་འབྱོར་མར་བསྒོམ་པ་མན་ཆད་འདྲའོ། །འདིའི་བསྙེན་སྒྲུབ་ལས་གསུམ་ལ་བརྟེན་ནས་མཁའ་སྤྱོད་ཀྱི་དངོས་གྲུབ་བསྒྲུབ་པའི་ཚུལ་ལ། བསྙེན་པ་ནི་སྤྲུ་ལུང་པའི་ཡིག་ཆའི་དཀྱུས་སུ་གསལ། སིནྡྷུར་སྒྲུབ་པ་དང་། གྲུབ་ནས་ལས་ལ་སྦྱར་ཏེ་སྤྱོད་པ་བྱ་བའི་ཚུལ་ནི་དཀྱུས་སུ་མདོ་ཙམ་གསུངས་པ་ལྟར། རྒྱས་པར་ནཱ་རོ་མཁའ་སྤྱོད་མའི་མན་ངག་དང་མཐུན་པས་དེའི་ཁྲིད་ཡིག་རྣམས་ལས་གསུངས་པ་ལྟར་ཤེས་པར་བྱའོ། །རིག་པ་འཛིན་མའི་བྱིན་རླབས་ཚུལ། །ཤིན་ཏུ་གསལ་བར་བརྗོད་པའི་དགེས། །མཁའ་སྤྱོད་གྲུབ་པའི་ཚོགས་རྣམས་ཀྱིས། །ས་གསུམ་འཇིག་རྟེན་རྒྱན་གྱུར་ཅིག །ཅེས་པའང་འཇམ་མགོན་ས་སྐྱ་པ་ཆེན་པོ་སོགས་ཀྱི་ཞལ་སྔ་ནས་ཚུལ་འདིའི་བཀའ་དྲིན་ཐོབ་པ་བྱ་བྲལ་བ་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་མདྒ་ལཾ་བྷཱ་ཡཱ་ཏྲ།། །། ༈

[edit]

mai tri lugs kyi rdo rje rnal 'byor ma'i byin rlabs kyi cho ga mkha' spyod grub pa'i rgyan/ @#/_/grub chen mai tri pa'i lugs kyi rdo rje rnal 'byor ma'i byin rlabs kyi cho ga bklags pas grub par bkod pa mkha' spyod grub pa'i rgyan zhes bya ba bzhugs so/__/oM swa sti sid+d+haM/__'khor lo'i mgon dang dbyer med pa'i/__/rig pa 'dzin ma'i rje btsun mar/__/btud nas de yi byin rlabs tshul/__/mkha' spyod grub pa'i rgyan du sbyin/__/'di la bzhi/__/sbyor ba/__dngos gzhi/__rjes kyi cho ga__/'phros don gzhan cung zad bshad pa'o/__/dang po la gnyis/__cho gar ma gtogs pa'i sbyor ba dang /__cho gar gtogs pa'i sbyor ba'o/__/dang po ni/__dbang thob cing byin rlabs zab mos rgyud smin pa/__dam tshig dang sdom par ldan cing gzhi'i bsnyen pa las su rung ba'i rnal 'byor pas/__mar ngo'i tshes bcu la sogs pa'i dus khyad par can gyi tshe dkyil 'khor gyi bsham bkod dang /__/mchod pa'i yo byad sogs spru lung pa kun dga' smon lam gyis mdzad pa'i yig cha las 'byung ba ltar 'du bya/__de'ang ngag chos pa'i yig char sku 'bri ma thub na tshon phung tsam gyis chog pa dang /__mchod pa dang /__/bum pa bca' ba sogs kyang spyi ltar byas pas chog par gsungs pa spros pa bsdus pa'i tshe dgongs par mngon na'ang /__rgya gzhung las snga ma ltar 'byung bas legs so/__/gzhan yang cho ga gzhan dang ma 'brel na sngon 'gro gtor ma dang /__slob dpon gyi mdun du DA ma ru dang /__tshogs kyi mchod pa byed na nye logs ci bde bar tshogs kyi yo byad dang bcas pa'ang 'du bya/__gnyis pa ni/__sngon 'gro gtor ma dang /__gnas yo byin rlabs rnams nA ro mkha' spyod sogs dang 'dra/__tshogs pa mang po yod na zhu 'bul phyag bco brgyad ma bde kye ltar bya'o/__/gnyis pa dngos gzhi la bzhi/__bdag bskyed/__mdun bskyed/__bum bskyed/__slob ma rjes su gzung ba'o/__/dang po ni/__skyabs 'gro/__sems bskyed/__rdo rje sems dpa'i bsgom bzlas kyang nA ro mkha' spyod sogs kyi cho ga las 'byung ba ltar bya/__bdud rtsi byin rlabs ni/__rang nyid skad cig gis rdo rje rnal 'byor ma rig pa 'dzin ma rtsen ma'i skur gyur ces brjod cing bsams la/__spru lung pa'i yig cha'i dkyus nas 'byung ba ltar 'bru gsum brjod cing myang ba nas bzung dzaHhU~M ba~M hoHzhes pa'i bar dang /__spro na slar yang rang gi snying ga'i ba~M las 'od zer 'phros/__dbang gi lha rigs lnga mdun gyi nam mkhar spyan drangs/__oM ab+hi Shiny+tsa tu mAM sarba ta thA ga ta zhes gsol ba btab pas dbang gi lha rnams kyis/__ji ltar bltams pa nas shri ye hU~M/__zhes gsung zhing bum pa'i chus spyi bo nas dbang bskur/__sku gang /__dri ma dag__/chu'i lhag ma yar lud pa las mi bskyod pas dbur brgyan zhes brjod/__rdzogs rim dang spyod pa'i dmigs pa cung zad bsgom zhing /__bzlas pa ci rigs pa byas la/__bcom ldan 'das ma bdag dang sems can thams cad la mchog dang thun mong gi dngos grub ma lus pa stsal du gsol/__/zhes 'dod pa'i don la gsol ba gdab/__gnyis pa ni/__mdun gyi dkyil 'khor la bdud rtsi 'thor zhing sum+b+has bsang /__swa b+hA was sbyangs/__stong pa'i ngang las chos 'byung gi nang du nas/__mi bskyod pas dbur brgyan zhes pa'i bar bdag bskyed bzhin la/__rang nyid ces pa'i tshig dor/__ab+hi Shiny+tsa tu mAM sogs kyi mal du/__de bzhin gshegs pa thams cad kyis 'di la mngon par dbang bskur ba stsal du gsol zhes bsgyur/__mdun bskyed kyi steng gi nam mkhar bla ma dang /__khor yug tu dpa' bo rnal 'byor ma'i tshogs kyis bskor bar gyur ces brjod cing bsams la/__spro na nA ro mkha' spyod sogs kyi cho ga rgyas pa las 'byung ba ltar mchod phreng spros te byas kyang rung mod/__dkyus ltar na phyi mchod dang /__nang bdud rtsi'i mchod pa'i rjes/__yid byung gi mchod pa na mo chos kyi dbyings sogs nas/__tsA ya swA hA zhes pa'i bar dang /__rkang brgyad kyi bstod pa rnams nA ro mkha' spyod ltar bya/__mdun bskyed la dmigs pa'i bzlas pa cung zad byas rjes 'dod don la gsol ba gdab/__gtor ma bsang sbyangs/__stong pa'i ngang las a las byung ba'i thod pa yangs shing rgya che ba'i nang du/__sha lnga bdud rtsi lnga ye shes lnga rnams zhu ba las byung ba'i ye shes kyi bdud rtsi'i rgya mtsho chen por gyur par bsams la/__oM AHhU~M ha ho hrIH__zhes lan gsum gyis brlabs te dang po rje btsun ma la dkyus ltar dbul/__gnyis pa nag po chen po sogs chos skyong 'jig rten las 'das pa rnams la gtor chog ltar dbul ba'am/__ma grub na/__rang gi snying ga nas 'od zer 'phros pas dpal rdo rje nag po chen po sogs chos skyong ye shes pa'i tshogs thams cad oM badz+ra sa mA dzaHspyan drangs/__pad+ma ka ma lA ya s+t+waM gyis gdan dbul/__oM shrI ma hA kA la sa pa ri wA ra oM a kA ro sogs lan gsum gyis dbul/__phyi nang gi mchod pas mchod/__sngon tshe rdo rje 'chang gi spyan snga sogs kyis bstod/__chos skyong srung ma 'khor bcas rnams/__mchod sbyin gtor ma sogs kyis 'dod don gsol/__gsum pa nas bdun pa'i bar gyi gtor ma lnga mkha' 'gro sde lnga la dbul te/__rdo rje rtse lnga pa'i phyag rgya bcas la/__oM shrI he ru ka sogs las sngags kyis thugs rgyud bskul/__oM bud+d+ha DA ki sogs gtor ma dbul/__oM sarba DA ki sogs kyis bstab pa bya/__gtor ma gcig las med na gtor ma so sor 'bul ba'i sngags rnams sbrel/__mthar oM badz+ra ar+g+haM sogs kyis phyi mchod/__oM AHhU~M gis nang mchod/__mi bskyod rdo rje ye shes che sogs de nyid lnga pa'am/__ji snyed rdo rje mkha' 'gro ma sogs sh+lo ka gcig gis bstod/__mchod sbyin gtor ma 'di bzhes sogs kyis 'dod don gsol/__tha ma gzhi bdag la 'bul ba ni/__b+hU mi pa ti sa pa ri wA ra A kaR+Sha ya dzaHsa mgron dgug__/b+hU mi pa ti sa pa ri wA ra oM a kA ro sogs lan gsum gyis dbul/__ar+g+haM sogs kyis mchod/__gzhi bdag gnas bdag 'khor bcas rnams/__/mchod sbyin gtor ma sogs kyis 'dod don gsol/__b+hU mi pa ti sa pa ri wA ra gats+tshaHsa gshegs su gsol la lhag ma a kA ro lan gsum gyis rigs drug spyi la bsngo/__slob ma gzhug pa'i ched du gsol ba gdab pa dkyus ltar bya/__gsum pa ni/__bum pa bsang sbyangs/__stong pa'i ngang las pad zla'i gdan la b+h+rU~M las rin po che'i bum pa yangs shing rgya che la dwangs shing thogs pa med pa lha'i gos kyis mgul pa g.yogs shing dpag bsam gyi shing gis kha brgyan pa/__nang chu dang bcud thams cad kyis yongs su gang ba'i dbus su chos 'byung gi nang du nas/__mi bskyod pas dbur brgyan zhes pa'i bar mdun bskyed ltar/__phyi nang gis mchod/__dpal ldan rdo rje mkha' 'gro sogs kyis bstod/__bdag gi thugs ka nas sogs bzlas pa dang 'od zhu bar dkyus ltar bya'o/__/bzhi pa la gnyis/__thog mar bdag nyid 'jug pa dang /__slob ma rjes su gzung ba dngos so/__/dang po ni/__spru lung pa'i yig char mi gsal yang /__ngag dbang chos grags pas spro na bya gsungs ba ltar yig cha gzhan las kyang 'byung bas slob ma la ji tsam bskur ba'i byin rlabs kyi chos rnams bdag 'jug gi tshul du blang ngo /__/gnyis pa ni/__dbang bzhi rdzogs par thob cing dam tshig dang sdom par ldan pa'i slob ma nyer lnga man zung du ma gyur pa rnams khrus bya/__phyag dang 'jug pa'i yon phul te rang rang gi gral du 'khod pa la slob dpon gyis/__'o nam mkha' dang mnyam pa'i sems can thams cad kyi don du rdzogs pa'i sangs rgyas kyi go 'phang rin po che thob par bya/__de'i ched du byin rlabs kyi bka' zab mo gsan la don tshul bzhin du nyams su blang bar bgyi'o snyam pa byang chub kyi mchog tu thugs bskyed pa dang /__chos gsan pa'i kun tu spyod pa rnams kyang legs par gsal btab nas gsan par zhu/__de la gang gsan par bya ba'i chos ni/__gangs can bstan pa'i mnga' bdag rje btsun sa skya pa yab sras la rnal 'byor bla med dang rjes su 'brel ba'i zab rgyas kyi gdams pa rgya mtsho lta bu zhig bka' babs pa'i nang nas mchog tu gyur pa lcags ri'i khongs las mi 'da' ba'i snyan brgyud gser chos bcu gsum zhes yongs su grags pa'i nang tshan/__mchog bsgrubs pas thun mong zhar las 'byung ba dmar mo skor gsum du grags pa'i ya gyal/__grub chen mai tri gup+tas rgyud ral pa gyen brdzes la brten nas legs par bkral ba'i sgrub thabs dang /__paN grub dza ya se nas mdzad pa'i rjes gnang gi yi ge dang bla ma brgyud pa'i phyag gzhes ltar rdo rje phag mo rig pa 'dzin ma rtsen ma'i byin rlabs zab mo bsgrub pa la sngon 'gro slob dpon gyi bya ba rnams legs par grub nas/__dngos gzhi slob ma la bya ba la/__lha dang skal pa mnyam pa'i ched du dkyil 'khor du 'jug pa dang /__zhugs nas byin rlabs dbang bzhi'i tshul du bskur ba rnam pa gnyis su yod pa las/__thog mar byin rlabs kyi 'jug pa'i chos rnams zhu ba'i yon du slob dpon la rje btsun rdo rje rnal 'byor ma dngos yin snyam pa'i mos gus dang ldan pa'i sgo nas maN+Dal lan gsum 'bul bar zhu/__de ltar maN+Dal phul nas phyag thal mo sbyar te gsol ba 'debs pa 'di'i rjes zlos lan gsum mdzod/__ji ltar rdo rje sems dpa' yis/__/'gro ba byang chub bsgrub pa'i phyir/__/ye shes rdo rje rnal 'byor mar/__/thams cad rig par rang gis byin/__/de bzhin bdag la'ang mgon po kye/__/da lta nyid du sbyin par rigs/__/zhes pas gsol ba btab nas/__rgyud dag par bya ba'i slad du dmigs pa 'di bzhin mdzod/__dkyil 'khor gyi dbus na bzhugs pa'i bla ma dang rje btsun rdo rje rnal 'byor ma gnyis su med pa la gzhan yang sangs rgyas dang byang chub sems dpa' dpa' bo dang rnal 'byor ma'i tshogs bsam gyis mi khyab pas bskor ba sprin phung gtibs pa ltar bzhugs par mos pa byas/__de dag gi spyan sngar rang gzhan gyi pha mas thog drangs nam mkha' dang mnyam pa'i sems can thams cad kyis tshe 'khor ba thog ma med pa nas bsags pa'i sdig pa bshags pa la sogs pa'i yan lag bdun pa bgyid snyam pas 'di'i rjes zlos mdzod/__dkon mchog gsum la sogs lan gsum brjod/__ces rgyud dag par byas nas/__sngon chad rje btsun rdo rje rnal 'byor ma'i sin+d+hU ra'i dkyil 'khor du ma zhugs pa'am/__zhugs kyang slar yang bskyar nas 'jug pa'i mtshon byed du ras yug dmar po res gdong dam du bcings par mos pa mdzod/__A khaM wI ra hU~M/__zhes gdong bcing /__de nas dkyil 'khor gyi lha dang mjal ba'i tshe phyag stong par mjal du mi btub pas u dum+bar la sogs pa'i me tog gi phreng ba re byin par mos pa mdzod/__A khaM wI ra hU~M/__zhes pas me tog gi phreng ba gtad la/__bar chad bsal ba'i slad du/__slob dpon gyi thugs ka nas khro mo khaN+Da ro hi'i tshogs dpag tu med pa spros te khyed rang rnams la byin rlabs zab mo bsgrub pa la bar du gcod pa'i bgegs dang log 'dren thams cad rgyang ring du bskrad par mos pa mdzod/__sum+b+ha sogs brjod cing bum chu gtor/__slar yang slob dpon gyis bdud rtsi khyed rang rnams kyi ljags thog dang /__sku lus la gtor te nang rtsa khams kyi bar chad thams cad bsrung ba byas par mos pa mdzod/__oM AHhU~M zhes brjod/__de ltar byas pas lus thams cad ye shes kyi bdud rtsis gang zhing zag med kyi bde bas byin gyis brlabs pa yin snyam du mos pa mdzod/__de nas gsang sngags nang gi sems bskyed pa'i slad du khyed rang rnams kyi snying gar kun rdzob byang chub sems kyi ngo bo zla ba'i dkyil 'khor cha shas yongs su rdzogs pa bco lnga'i nya gang ba lta bu skya 'khyil ba re gsal btab la/__de'i steng du don dam byang chub sems kyi ngo bo rdo rje dkar po rtse lnga pa 'od zer 'phro ba dang bcas pa gyen du langs pa byung bar mos te bden gnyis dbyer med du sems bskyed par bgyi'o snyam pas 'di'i rjes zlos mdzod/__oM sarba yo ga tsit+ta ut+pA da yA mi/__slob dpon gyis khyed rang rnams kyi snying gar rdo rje bzhag pas brtan par byas par mos pa mdzod/__su ra ti sa ma ya staM hoHsid+d+h+ya badz+ra ya thA su khaM/__zhes pas bden gnyis dbyer med du sems bskyed nas/__gzhan yang 'og nas 'byung ba'i gsang sngags kyi kun spyod thams cad snod dang mi ldan pa rnams kyi mdun du ma smra zhig ces gsang bar gdams pa ni/__spyi bor rdo rje bzhag ste/__deng khyod de bzhin gshegs pa thams cad dang rdo rje rnal 'byor ma'i rigs su zhugs kyi/__de bzhin gshegs pa thams cad kyi gsang chen dam pa 'di de bzhin gshegs pa thams cad kyi dkyil 'khor du ma zhugs pa rnams kyi mdun du smra bar mi bya ste ma dad pa rnams la yang ma yin no/__/zhes gsang bar gdams nas/__nang 'jug gi slad du rje btsun ma'i thugs ka nas spros pa'i lha mo rnams kyis dzaHhU~M baM hoHzhes gsungs shing dkyil 'khor gyi drung du khrid nas shar phyogs su 'khod par mos pas/__slar yang khyad par can gyi don la nan tan du gsol ba gdab pa'i yid kyis dkyil 'khor gyi phyogs bzhi nas slob dpon dang dkyil 'khor gyi dbus na bzhugs pa'i rje btsun ma tha mi dad pa la maN+Dal sngon du 'gro bas gsol ba 'debs pa 'di'i rjes zlos lan bzhi'i bar du gnang ba zhu zhes mtshams sbyar la/__go skabs yangs shing byed par spro na dkyil 'khor gyi phyogs so so dang /__de tsam ma grub na yid kyis de ltar byed par bsam zhing dngos su maN+Dal re dang /__lha mo lus ngag yid kyis su/__/ye shes rgya mtsho khyod phyag 'tshal/__/ji ltar sangs rgyas stobs chen gyis/__/thams cad ye shes byin brlabs pa/__/de bzhin bdag rgyud dag la yang /__/ye shes rgyun gyis mdzad du gsol/__/zhes spel la lan bzhi bya'o/__/de ltar gsol ba btab nas nang 'jug gi dngos gzhi ye shes dbab pa'i slad du dmigs pa 'di bzhin du mdzod/__khyed rang rnams kyi snying ga'i dbus su ba~M yig dmar po mar me ltar 'di spru lung pa'i yig char gong du 'byung yang skabs 'dir byas na spyi dang mthun pas legs/__'bar ba zhig gsal btab ste/__chos thams cad sgyu ma lta bur shes pa'i ngang nas ba~M yig la sems zhugs pa bzhin cher gyis gtad pas de las 'od zer 'phros/__rang rang gi lus dang khams gsum thams cad gang bas khams gsum thams cad 'od du zhu/__me long la has btab pa ltar rim gyis bsdus te rang rang gi lus la thim/__lus kyi rkang pa gnyis brla la/__de lto ba la/__de sked pa la/__de snying ga la/__lag pa gnyis dpung pa la/__de snying ga la/__de mgrin pa la/__de mgo bo la/__de sems la/__de nam mkha' la/__de'ang rang bzhin gyis 'od gsal bar gyur par mos pa mdzod/__de'i ngang las chos 'byung gi nang du pad+ma dang nyi ma la gnas pa'i ba~M yig dmar po las khyed rang rnams bcom ldan 'das ma rdo rje phag mo rig pa 'dzin mar gyur pa ni/__/zhal gcig phyag gnyis ma dza ba'i me tog ltar dmar ba'i mdangs can zhal mche ba gtsigs shing khro gnyer dang bcas pas steng du phyogs pa/__dmar la zlum pa'i spyan gsum gyen du gzigs pa/__dbu skra nag po sil bu thur du 'phyang ba/__phyag g.yon bdud rtsis gang ba'i thod pa dang bcas pas zhabs g.yon gyi sgyid khung nas 'khyud cing steng du bteg nas thod pa'i bdud rtsi zhal du gsol ba'i tshul du 'dzin pa/__g.yas na rdo rje rtse lnga pa 'dzin pas zhabs g.yas pus mo btsugs pa'i rting pa la bsnun pa/__man+da ra dang /__mya ngan med pa dang /__yongs 'du'i me tog gi phreng ba g.yon na 'dzin cing rgyan gzhan thams cad spangs pa/__ye shes kyi me 'bar ba'i dbus na bzhugs pa'i gnas rnams su zla ba'i gdan la lte bar oM ba~M dmar mo rdo rje phag mo/__snying gar ha~M ya~M sngon mo gshin rje ma/__khar hrI~M ma~M dkar mo rmongs byed ma/__mtshogs mar hriM hrI~M ser mo skyod byed ma/__spyi gtsug tu hu~M hU~M ljang gu skrag byed ma/__tshigs chen brgyad la pha?T pha?T dud ka tsaN+Di ka__/dpral bar oM dkar po/__mgrin par AHdmar po/__thugs kar hU~M sngon po/__mig sogs bu ga thams cad la hU~M yig re res mtshan pa/__mkha' 'gro du ma spro zhing sdud pa'i skur gyur par mos pa dang bcas te sems 'dzin par zhu/__yang khyed rang rnams lha mor gsal ba ba~M yig chen po gcig tu gyur/__de je che je che la mthar nam mkha' dang 'dres pa'i stong nyid kyi ngang du mnyam par 'jog par zhu/__slar yang khyed rang rnams lha mo'i skur lam ste gsal ba'i lte bar chos 'byung zur drug pa'i dbus su ba~M yig la oM gsum ma'i sngags kyi phreng bas bskor ba grwa bzhir dga' ba 'khyil pa dang bcas gsal btab nas g.yon skor du drag tu 'khor ba la sems bzung bas drod kyi ye shes skyes/__'khor lo de nyid gsang gnas su 'khor ba dang /__dga' ba 'khyil pa g.yon du 'khor ba la sems bzung bas bde ba'i ye shes skyes/__mdzod spur dga' ba 'khyil pa g.yon skor du 'khor ba la sems bzung bas mi rtog pa'i ye shes skyes shing lus thams cad drod dang bde bas gang /__de'i tshe phyogs bcu'i sangs rgyas dang byang chub sems dpa' thams cad kyang rdo rje rnal 'byor ma'i rnam par spyan drangs te lus la sib sib thim pas sangs rgyas thams cad kyi ye shes rgyud la zhugs par mos pa mdzod ces brda sbyar la/__gu gul gyis bdug__/DA ma rus thog drangs pa'i rol mo'i sgra drag tu bya zhing oM gsum ma'i sngags brjod pas dbab/__de ltar ye shes phab pas lus bde zhing gar byed pa dang /__ngag saM skr-i ta'i skad smra ba dang /__yid la bde gsal mi rtog pa'i nyams ci rigs pa 'byung ba yin la/__de brtan par bya ba'i phyir spyi bor rdo rje rgya gram du bzhag ste brtan par byas par mos pa mdzod/__tiSh+Tha badz+ra zhes brjod/__dkyil 'khor gyi lha la me tog 'dor ba ni/__'di na rje btsun rdo rje rnal 'byor ma'i sin+d+hU ra'i dkyil 'khor bzhugs pa yin te/__rim pa ltar byon nas g.yon pa'i phyag gis me tog de rje btsun ma'i dbu la phul bar mos te/__oM pra tI ts+tsha badz+ra hoH__zhes gsung zhing me tog 'dor bar zhu/__de nyid slob dpon gyis blangs te khyed rang rnams kyi spyi bor bzhag ste sngags kyi phreng bas byin gyis brlabs par mos pa mdzod/__oM pra ti gr-ih+Na s+t+waM i maM sa twa ma hA ba la oM/__zhes pas byin gyis brlabs nas/__slob dpon gyis oM badz+ra ne tra a pa hA ra pa Ta laM hrIHpra~M/__zhes pas khyed rang rnams kyi ma rig pa'i ling tog dang mig ras lhan cig tu bsal te/__dkyil 'khor gyi lha ngo bstan pa ni/__'di na rje btsun rdo rje rnal 'byor ma'i sin+d+hU ra'i dkyil 'khor bzhugs pa yin te/__chos 'byung la gnas pa'i pad nyi'i steng du bcom ldan 'das ma rdo rje phag mo rig pa 'dzin ma rtsen ma zhal gcig phyag gnyis ma dza ba'i me tog ltar dmar ba'i mdangs can/__zhal mche ba gtsigs shing khro gnyer dang bcas pas steng du phyogs pa/__dmar la zlum pa'i spyan gsum gyen du gzigs pa/__dbu skra nag po sil bu thur du 'phyang ba/__phyag g.yon bdud rtsis gang ba'i thod pa dang bcas pas zhabs g.yon gyi sgyid khung nas 'khyud cing steng du bteg nas thod pa'i bdud rtsi zhal du gsol ba'i tshul du 'dzin pa/__g.yas na rdo rje rtse lnga pa 'dzin pas zhabs g.yas pus mo btsugs pa'i rting pa la bsnun pa/__man+da ra dang /__mya ngan med pa dang /__yongs 'du'i me tog gi phreng ba g.yon na 'dzin cing rgyan gzhan thams cad spangs pa/__ye shes kyi me 'bar ba'i dbus na bzhugs pa ste/__mdor na rje btsun rdo rje rnal 'byor ma rig pa 'dzin ma'i dkyil 'khor rten dang brten par bcas pa mngon sum bzhin du gzigs pa'i mos pa mdzod/__des dkyil 'khor du 'jug pa'i chos rnams grub nas/__zhugs pa'i dkyil 'khor du dbang bzhi byin rlabs kyi tshul du bskur ba zhu ba'i yon du maN+Dal 'bul bar zhu/__maN+Dal phul nas gsol ba 'debs pa 'di'i rjes zlos lan gsum mdzod/__byang chub rdo rjes sangs rgyas la/__/mchod chen ji ltar stsal ba ltar/__/bdag kyang bskyab ba'i don gyi phyir/__/nam mkha'i rdo rje deng bdag stsol/__/zhes pas gsol ba btab nas dmigs pa 'di bzhin mdzod/__dkyil 'khor gyi shar phyogs su rin po che'i khri dang pad zla'i gdan la khyed rang rnams rje btsun rdo rje rnal 'byor ma'i nga rgyal gyis 'khod pa'i steng du gdugs dkar po gser gyi yu ba can dang /_g.yas su rgyal mtshan/__/g.yon du ba dan/__khor yug tu mchod pa'i sprin tshogs dang bcas pa la/__rje btsun ma'i thugs ka nas sprul pa'i dbang gi lha rnams kyis bgegs skrod pa dang /__mchod pa dang bkra shis kyi glu dang bcas pa brjod cing gtso mo'i phyag na bum pa dkar po ye shes kyi bdud rtsis gang ba thogs te khyed rang rnams kyi spyi bor bzhag cing dbang bskur bar mos pa mdzod/__las kyi rdo rjes bum pa slob ma'i phyogs su bteg__/slob dpon gyis rdo rje dril bu 'dzin cing me tog 'thor ba dang bcas te/__bkra shis gang zhig chos kyi dbyings las legs byung ba/__/he ru ka dpal 'jigs byed rgyal po 'bar ba'i sku/__/shes rab phag mo'i pad+mar rdo rje rol mdzad pa'i/__/bden pa des kyang bde mchog la gnas bkra shis shog__/he ru ka dpal 'bar ba'i sku mnga' ba/__/ha ha'i gad rgyangs sa gsum g.yo bar byed/__/hU~M hU~M pha?T pha?T bdud kyi klad 'gems pa'i/__/bde mchog 'khor lo'i bkra shis deng 'dir stsol/__/e waM mnyam par sbyor ba sngags kyi sku/__/A li kA li gnyis med rol pa'i gsung /__/oM gyi ngo bor son pa'i thugs mnga' ba/__/rdo rje phag mo'i bkra shis deng 'dir stsol/__/zhes brjod pa'i mthar bum pa spyi bor bzhag cing /__ji ltar bltams pa tsam gyis ni/__/lha rnams kyis ni khrus gsol ltar/__/lha yi chu ni dag pa yis/__de bzhin bdag gis dbang bskur ro/__/oM sarba ta thA ga ta a b+hi She ka ta sa ma ya shrI ye hU~M/__tsakra wI ra s+t+waM a b+hi Shiny+tsa mi/__badz+rI b+ha wa a b+hi Shiny+tsa hU~M zhes gsung zhing dbang bskur bas khyed rang rnams kyi lus thams cad byang chub sems kyi chu rgyun gyis gang /__chu lhag ma yar lud pa las mi bskyod pa sogs sangs rgyas rigs lngas dbur brgyan/__rje btsun ma'i thugs ka nas spros pa'i lha mo me tog ma la sogs pa rnams kyis kyang mchod par mos pa mdzod/__oM badz+ra puSh+pe AHhU~M sogs nas/__nai wi d+ye'i bar sbyar bas mchod/__de nas khyed rang rnams dkyil 'khor gyi nub phyogs su 'khod pa'am/__'khod par mos te sngags kyi bzlas lung gi slad du dmigs pa 'di bzhin mdzod/__slob dpon la rje btsun ma dngos yin snyam pa'i gus 'dud drag po byas pas thugs ka'i sa bon sngags phreng dang bcas pa las sngags kyi phreng ba bye ru star la brgyus pa ltar bsam gyis mi khyab pa byung /__slob dpon gyi zhal nas thon/__de las 'od zer 'phros pas phyogs bcu'i sangs rgyas dang byang chub sems dpa' dpa' bo dang rnal 'byor ma rnams kyi thugs ka nas thugs gnyis su med pa'i ye shes dang /__byin rlabs thams cad sngags phreng gi rnam par spyan drangs te/__zhal nas thon pa'i sngags phreng dang dbyer med du gyur pa de nyid khyed rang rnams rje btsun ma'i sku can du gyur pa'i zhal du zhugs/__thugs ka'i ba~M yig gi mthar g.yon skor du dmar 'khyil gyis 'khod par mos pa byas te sngags 'di'i rjes zlos lan gsum mdzod/__ces brjod la oM gsum ma'i rjes zlos byed du gzhug__/de brtan par bya ba'i slad du slob dpon gyis lag pa g.yon pa rdo rje dang bcas pa khyed rang rnams kyi spyi bor bzhag cing sngags brjod pas byin gyis brlabs pa'i mos pa mdzod/__ces brjod la thal mo spyi bor bzhag cing sngags brjod/__spyod pa'i rjes gnang gi slad du/__khyed rang rnams rje btsun ma'i sku'i rnam 'gyur du byas pa'i phyag g.yon du bdud rtsi dang /__g.yas su rdo rje bzung nas dmigs pa 'di bzhin du mdzod/__sems can gyi don bya ba'i phyir spyod yul gyi gnas su 'jug par 'dod pas mkha' 'gro spro bsdu dang bcas nam mkha' la 'phur zhing /__ma na b+haM ga dang /__dpal gyi ri'i rtse mor rim gyis phyin te/__man+da ra dang /__mya ngan med pa dang /__yongs 'du rnams skyes pa'i ldum gyi ra ba rtse mo brgyad dang ldan pa'i rin po che'i khang par zhugs par bsams la/__zhabs g.yon brkyangs pa'i mthil ri la brdabs pas brtan g.yo thams cad bskyod cing sems can thams cad kyi rgyud bde bas gang zhing 'od du zhu nas bdud rtsi'i rang bzhin du gyur pa rnams rlung 'jug pa dang bstun nas g.yon gyi thod par bsdus shing sna bug g.yon nas btungs pas zag med kyi bde bas rgyud gang bar mos pa mdzod/__ces sgom du gzhug cing bdud rtsi sbyin/__de dag ni sngags dang spyod pa'i rjes su gnang ba ste/__de ltar na khyed rnams kyis bum pa'i dbang bskur ba byin rlabs kyi tshul gyis thob pa yin no/__/gsang dbang gi slad du/__thabs bde ba chen po mtshon par byed pa sha chen nam sha phal pa mar la btsos pa phyag g.yas dang /__shes rab stong pa nyid mtshon par byed pa sin+d+hu ra'i dkyil 'khor gyi 'og gi thod pa'i bdud rtsi phyag g.yon du byin te dbang bskur bar mos pa mdzod/__/ces brjod la oM gsum ma'i sngags brjod bzhin du byin/__des khyed rnams kyis gsang ba'i dbang bskur ba byin rlabs kyi tshul gyis thob pa yin no/__/shes rab ye shes kyi dbang gi slad du/__sin+d+hu ra'i maN+Dal gyi lha mo'i gnas gsum nas blangs pa'i rdul tshon gyis khyed rang rnams kyi gnas gsum du thig le bkod pa la brten nas/__rje btsun ma'i sku gsung thugs kyi dngos grub thams cad stsal zhing lus sems la bde bas khyab cing rgyas par mos pa mdzod/__rtsa sngags brjod bzhin du thig le bya/__des khyed rnams kyis shes rab ye shes kyi dbang bskur ba byin rlabs kyi tshul gyis thob pa yin no/__/dbang bzhi pa'i slad du/__chos thams cad skye 'gag med pa spros pa'i mtha' thams cad dang bral bar shes par byas te de'i ngang du cung zad re mnyam par 'jog par zhu/__des khyed rnams kyis dbang bzhi pa byin rlabs kyi tshul gyis thob pa yin no/__/bar 'dir sgrub thabs kyi lung bklag cing /__rjes dam tshig khas blang /__gtang rag gi maN+Dal/__lus longs spyod 'bul ba rnams spyi ltar bya'o/__/de rnams kyi sgo nas rje btsun rdo rje rnal 'byor ma mai tri mkha' spyod du grags pa'i byin rlabs kyi bka' zab mo legs par gsan pa yin pas rang gzhan gyi don rgya chen po mdzad par zhu/__/bsod nams 'di yis sogs brjod la slob ma rnams rang gnas su gtang /__tshogs kyi mchod pa yod na spyi ltar bya zhing dga' ston la longs spyad/__gsum pa ni/__mchod pa rnams zhal bsos la bsang sbyang byin gyis brlab/__phyi nang gi mchod pa dang /__bstod pas bstod/__he ru ka'i yig brgya lan gsum dang /__ma 'byor pa dang sogs kyis nongs pa bzod par gsol/__oM khyod kyis sogs nas/__badz+ra muHsa sin+d+hu ra'i ye shes pa dang /__bum nang gi ye shes pa dang /__gtor mgron gyi ye shes pa rnams gshegs/__mdun bskyed kyi dam tshig pa sin+d+hu ra'i rang bzhin du gyur par bsam/__rang gi gnas rnams su zla ba'i dkyil 'khor re re'i steng du lte bar oM ba~M sogs go cha dgod/__dge ba 'di yis myur du bdag__/rdo rje phag mo 'grub gyur sogs bsngo smon dang bkra shis ji ltar rigs par brjod/__las gyi rjes mi mngon par bya'o/__/bzhi pa ni/__byin rlabs kyi skabs yig rnying dang /__sgrub thabs rin 'byung sogs las gong du bkod pa dang cung zad mi mthun pa'i khyad par/__/bum dbang gi skabs su lhar bsal ba sngon du 'gro bas slob ma lha mor bskyed cing go cha sogs bkod par chu dbang bskur/__gsang dbang 'dra/__byin rlabs kyi dngos gzhi slob ma lhar gsal ba dang /__rtsa sngags kyi byin gyis brlab pa dang /__bdud rtsis 'thor 'thung bya ba sngon du 'gro bas/__gong bu bsdu ba/__rjes gzhig__/drod dang /__mi rtog pa dang /__bde ba'i ye shes dbab pa rnams kyi mthar brtan par byed pa rnams dbang gong ma gnyis kyi dod thub dang /__spyod pa'i rjes gnang sbyin par mdzad de/__rgya gzhung gi dgongs par gsungs pa don la gnas mod/__'dir bkod pa'ang spru lung pa'i yig cha las/__bla ma brgyud pa'i phyag len gyis gong 'og 'brel bsdebs te don gyi gnad tshang bar mdzad pa ltar la rgya gzhung sogs kyi dgongs pa med du mi rung bas cung zad brgyan te bkod pa yin pas 'gal bar mi bsam zhing /__khyad par rang lugs la deng sang gi bar du bla ma rnams kyi phyag gzhes kyang 'di ltar mdzad pa yin no/__/ngag dbang chos grags kyi yig cha ni spru lung ba'i yi ge'i snying po'i bcud phyungs pa lta bur snang na'ang cung zad bsdus ches par snang ngo /__/gong bu bsdu ba'i skabs ji skad du/__rang lus sum cu rtsa drug khams kyi tshogs/__/mig sna rna lce lus te dbang po lnga/__/ngag dang rkang lag bshang gci las dbang lnga/__/rang bzhin dag kyang de ltar ma rtogs pa'i/__/ma lus 'gro drug sems can tshogs/__/las dang nyon mongs sdug bsngal gyi/__/'khor lo bskor ba 'di dag ni/__/nges par byang chub la gzhug bya/__/zhes gsungs te/_de lta bu'i tshul la dmigs pa med pa'i snying rje sgyu ma lta bus snod bcud 'od gsal du bsdu ba la 'jug pa yin no/__/rjes su gzhig pa ni ye shes dbab pa'i skabs su bshad pa ltar rang lus ba~M yig tu gsal ba stong par gzhug pa de yin la/__gang ltar yang stong nyid kyi ngang las rang rdo rje rnal 'byor mar bsgom pa man chad 'dra'o/__/'di'i bsnyen sgrub las gsum la brten nas mkha' spyod kyi dngos grub bsgrub pa'i tshul la/__bsnyen pa ni spru lung pa'i yig cha'i dkyus su gsal/__sin+d+hur sgrub pa dang /__grub nas las la sbyar te spyod pa bya ba'i tshul ni dkyus su mdo tsam gsungs pa ltar/__rgyas par nA ro mkha' spyod ma'i man ngag dang mthun pas de'i khrid yig rnams las gsungs pa ltar shes par bya'o/__/rig pa 'dzin ma'i byin rlabs tshul/__/shin tu gsal bar brjod pa'i dges/__/mkha' spyod grub pa'i tshogs rnams kyis/__/sa gsum 'jig rten rgyan gyur cig__/ces pa'ang 'jam mgon sa skya pa chen po sogs kyi zhal snga nas tshul 'di'i bka' drin thob pa bya bral ba 'jam dbyangs bla ma dgyes pa'i 'bangs mkhyen brtse'i dbang pos bris pa mad+ga laM b+hA yA tra//____//__!_