JKW-KABUM-07-JA-015-011

Previous Text Back to Volume PageNext Text

རྗེ་བཙུན་རྡོ་རྗེ་རྣལ་འབྱོར་མ་ལ་བརྟེན་པའི་རྒྱུན་གྱི་ཚོགས་མཆོད་མདོར་བསྡུས་པ་བསོད་ནམས་རྟག་པ་དམ་པའི་སྤྲིན་ཆེན།

Wylie title	rje btsun rdo rje rnal 'byor ma la brten pa'i rgyun gyi tshogs mchod mdor bsdus pa bsod nams rtag pa dam pa'i sprin chen
Location	mkhyen brtse'i bka' 'bum Volume 7, sde tshan 15, Text 11, Pages 434-439 (Folios 66b2 to 69a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	ནཱ་རོ་པ་ (Nāropa)
Citation	'jam dbyangs mkhyen brtse'i dbang po. rje btsun rdo rje rnal 'byor ma la brten pa'i rgyun gyi tshogs mchod mdor bsdus pa bsod nams rtag pa dam pa'i sprin chen. In 'jam dbyangs mkhyen brtse'i dbang po'i bka' 'bum, Vol. 7: 434-439. Khams sde dge rdzong sar dgon: Rdzong sar blo gros phun tshogs, 2020.
Genre	Daily Practice - rgyun khyer  ·  Feast Offering - tshogs mchod - tshogs kyi 'khor lo
Cycle	ནཱ་རོ་མཁའ་སྤྱོད་མ་ (na ro mkha' spyod ma)
Deity	rdo rje rnal 'byor ma
Colophon	།ཞེས་པའང་ཡོངས་ཀྱི་དགེ་བའི་བཤེས་གཉེན་ཆེན་པོ་དཔལ་ལྡན་བླ་མ་དམ་པ་ངག་གི་དབང་ཕྱུག་བྱམས་པ་ཕུན་ཚོགས་ཀྱིས་འདི་ལྟར་བྲིས་ཞེས་ལྷ་རྫས་ཀྱི་མེ་ཏོག་དང་བཅས་བཀའ་སྩལ་ཕེབས་པ་གུས་པས་མཆོད་དེ་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་བྲིས་པའི་དགེ་བས་འགྲོ་ཀུན་ཚོགས་ཟུང་རྒྱ་མཚོ་མྱུར་དུ་རྫོགས་ནས་མཁའ་སྤྱོད་རྡོ་རྗེ་བཙུན་མོའི་གོ་འཕང་ཚེ་གཅིག་ཁོ་ནས་རེག་པའི་རྒྱུར་གྱུར་ཅིག།
	zhes pa'ang yongs kyi dge ba'i bshes gnyen chen po dpal ldan bla ma dam pa ngag gi dbang phyug byams pa phun tshogs kyis 'di ltar bris zhes lha rdzas kyi me tog dang bcas bka' stsal phebs pa gus pas mchod de bya bral ba 'jam dbyangs mkhyen brtse'i dbang pos bris pa'i dge bas 'gro kun tshogs zung rgya mtsho myur du rdzogs nas mkha' spyod rdo rje btsun mo'i go 'phang tshe gcig kho nas reg pa'i rgyur gyur cig

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །རྗེ་བཙུན་རྡོ་རྗེ་རྣལ་འབྱོར་མ་ལ་བརྟེན་པའི་རྒྱུན་གྱི་ཚོགས་མཆོད་མདོར་བསྡུས་པ་བསོད་ནམས་རྟག་པ་དམ་པའི་སྤྲིན་ཆེན་ཞེས་བྱ་བ་བཞུགས་སོ། །ན་མོ་གུ་རུ་བཛྲ་ཡོ་གི་ནྱཻ། གང་ཞིག་སྙིང་རྗེ་ཆེན་པོས་ཡིད་ལྷག་པར་དྲངས་ཏེ། དུས་མྱུར་བ་ཉིད་དུ་གཞན་དོན་རྫོགས་བྱང་གི་གོ་འཕང་ཐོབ་པར་འདོད་པའི་དོན་གཉེར་གྱི་རྡོ་རྗེ་ཐེག་པ་བླ་ན་མེད་པའི་ཐབས་ལ་བརྟེན་ནས་བདེ་སྟོང་དབྱེར་མེད་ཀྱི་རྩིས་ཟིན་པས་ཚོགས་ཟུང་རྒྱ་མཚོ་སྐད་ཅིག་གིས་རྫོགས་པའི་ཐབས་ལྷུར་ལེན་པ་དག་གིས། བཟའ་བཏུང་གི་དངོས་པོ་ལ་བརྟེན་རྒྱུན་གྱི་ཚོགས་མཆོད་མདོར་བསྡུས་ཏེ་བྱ་བའི་ཚུལ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། རྗེ་བཙུན་རྡོ་རྗེ་རྣལ་འབྱོར་མའི་སྐུ་བྲིས་འབུར་གང་རུང་བའི་སྤྱན་སྔར་རང་ཉིད་ཀྱི་བཟའ་བ་དང་བཏུང་བའི་ཕུད་གཙང་ཞིང་བཀོད་པས་མཛེས་པ་དང་། འབྱོར་ན་མཆོད་པའི་བྱེ་བྲག་གཞན་ཡང་ཇི་ལྟར་རིགས་པ་བཤམ། ནང་མཆོད་ཆུ་ཆང་གིས་བྲན་པའམ། ཆབ་གཙང་མས་བྲན། དངོས་གཞི་ནི། བདག་གི་རྣལ་འབྱོར་སྔོན་དུ་འགྲོ་བའམ། ཐུན་མཚམས་ཀྱི་ལྷ་སྐུ་སྒྱུ་མ་ལྟ་བུའི་ཏིང་ངེ་འཛིན་གྱི་གསལ་སྣང་བརྟན་པོས་བཟའ་བཏུང་གི་དངོས་པོ་རྣམས། སུམྦྷས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཡྃ་ལས་རླུང་། རྃ་ལས་མེའི་དཀྱིལ་འཁོར་གྱི་སྟེང་དུ། ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བར་ཚོགས་རྫས་ཤ་ལྔ་བདུད་རྩི་ལྔ་བསྐོལ་ཞིང་འོད་དུ་ཞུ་བ་ལས་བྱུང་བའི་ཡེ་ཤེས་ཀྱི་བདུད་རྩི་འདོད་ཡོན་རྒྱ་མཚོའི་སྤྲིན་ཕུང་འཕྲོ་བར་གྱུར། ཨོཾ་ཨཱཿཧཱུྃ་ཧ་ཧོཿཧྲཱིཿ ལན་མང་དུ་བརྗོད་པས་བྱིན་གྱིས་བརླབ། འབར་བའི་ཕྱག་རྒྱ་དཔྲལ་བའི་དབྱིངས་སུ་གཡོན་དུ་བསྐོར་ཞིང་། ཕཻཾ། ཞེས་བརྗོད་པ་དང་། རང་གི་སྙིང་ག་ནས་འོད་ཟེར་འཕྲོས་པས་རང་བཞིན་གྱི་གནས་ནས་བླ་མ་རྗེ་བཙུན་རྡོ་རྗེ་རྣལ་འབྱོར་མ་ལ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ ཞེས་པས་ཚོགས་ཞིང་མཁའ་ཁྱབ་ཏུ་སད་པའི་སྤྱན་སྔར། རང་ལས་སྤྲུལ་པའི་མཆོད་པའི་ལྷ་མོ་རྣམས་ཀྱིས་བདེ་སྟོང་གི་ཉམས་འགྱུར་ཕུན་སུམ་ཚོགས་པས་མཆོད་པའི་སྤྲིན་རྒྱ་མཚོས་མཆོད་པ་ལ་བརྟེན་སྐྱབས་ཡུལ་རྣམས་ཟག་མེད་ཀྱི་བདེ་བས་མཆོག་ཏུ་དགྱེས་པས་བདག་གཞན་ཡིད་ཅན་ཐམས་ཅད་ཀྱི་ཚོགས་ཟུང་མཐའ་དག་སྐད་ཅིག་གིས་རྫོགས་པར་མོས་ལ། ཨོཾ་ཨཱཿཧཱུྃ། གང་ཤར་བདེ་སྟོང་རོལ་པ་ལས་བྱུང་བའི། །ཚོགས་མཆོད་འདོད་ཡོན་བདུད་རྩིའི་སྤྲིན་ཆེན་པོ། །རྩ་བརྒྱུད་བླ་མ་མཆོག་གསུམ་མཉེས་ཕྱིར་འབུལ། །བཞེས་ནས་ཐུགས་རྗེས་བྱིན་གྱིས་བརླབ་ཏུ་གསོལ། ཨོཾ་གུ་རུ་ཏྲི་རཏྣ་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ཀྱིས་བླ་མ་དང་དཀོན་མཆོག །ཨོཾ་ཨཱཿཧཱུྃ། གང་ཤར་བདེ་སྟོང་རོལ་པ་ལས་བྱུང་བའི། །ཚོགས་མཆོད་འདོད་ཡོན་བདུད་རྩིའི་སྤྲིན་ཆེན་པོ། །ཡི་དམ་དཀྱིལ་འཁོར་ལྷ་ཚོགས་མཉེས་ཕྱིར་འབུལ། །བཞེས་ནས་མཆོག་ཐུན་དངོས་གྲུབ་སྩལ་དུ་གསོལ། ཨོཾ་མཎྜལ་དེ་བ་ག་ཎ་ས་པ་རི་ཝཱ་ར་ཨོཾ་ཨཱ་ཀཱ་རོ་སོགས་ལན་གསུམ་གྱིས་བླ་མ་ཡི་དམ་གྱི་ལྷ་སྤྱི་དང་། ཨོཾ་ཨཱཿཧཱུྃ། གང་ཤར་བདེ་སྟོང་རོལ་པ་ལས་བྱུང་བའི། །ཚོགས་མཆོད་འདོད་ཡོན་བདུད་རྩིའི་སྤྲིན་ཆེན་པོ། །རྣལ་འབྱོར་མ་དཔལ་འཁོར་བཅས་མཉེས་ཕྱིར་འབུལ། །བཞེས་ནས་བདེ་སྟོང་ཡེ་ཤེས་སྐྱེད་དུ་གསོལ། ཨོཾ་ཨོཾ་ཨོཾ་སརྦ་བུདྡྷ་ཌཱ་ཀི་ནཱི་སོགས་ཀྱི་མཐར། ཨ་ཀཱ་རོ་བཏགས་པ་ལན་གསུམ་གྱིས་ཁྱད་པར་རྡོ་རྗེ་རྣལ་འབྱོར་མ། ཨོཾ་ཨཱཿཧཱུྃ། གང་ཤར་བདེ་སྟོང་རོལ་པ་ལས་བྱུང་བའི། །ཚོགས་མཆོད་འདོད་ཡོན་བདུད་རྩིའི་སྤྲིན་ཆེན་པོ། །རྡོ་རྗེ་ཆོས་སྲུང་རྒྱ་མཚོ་མཉེས་ཕྱིར་འབུལ། །བཞེས་ནས་བར་ཆད་ཀུན་སོལ་མཐུན་རྐྱེན་སྒྲུབས། ཨོཾ་ཤྲཱི་བཛྲ་དྷརྨཱ་པཱ་ལ་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ལན་གསུམ་གྱིས་ཆོས་སྐྱོང་སྲུང་མ། ཨོཾ་ཨཱཿཧཱུྃ། གང་ཤར་བདེ་སྟོང་རོལ་པ་ལས་བྱུང་བའི། །ཚོགས་མཆོད་འདོད་ཡོན་བདུད་རྩིའི་སྤྲིན་ཆེན་པོ། །གནས་གསུམ་དཔའ་བོ་མཁའ་འགྲོ་མཉེས་ཕྱིར་འབུལ། །བཞེས་ནས་ཟབ་མོའི་ལམ་གྱི་གྲོགས་མཛོད་ཅིག །མཁའ་འགྲོ་སྤྱི་གཏོར་གྱི་སྔགས་སམ། ཨོཾ་ཏྲི་སྠཱ་ན་ཌཱ་ཀ་ཌཱ་ཀི་ནི་ས་པ་རི་ཝཱ་ར་ཨོཾ་ཨ་ཀཱ་རོ་སོགས་ཀྱིས་གནས་གསུམ་གྱི་དཔའ་བོ་མཁའ་འགྲོ་འཁོར་དང་བཅས་པར་ཕུལ། དེ་ནས་ཚོགས་ཀྱི་ཆ་བར་པ་རང་ཉིད་ཀྱིས་རོལ་པའི་སླད་དུ། བདག་ཉིད་རྡོ་རྗེ་རྣལ་འབྱོར་མའི། །སྙིང་གར་ཡི་དམ་ལྷ་ཚོགས་དང་། །ལྟེ་བར་གཏུམ་མོའི་མེ་ལྕེའི་ཁྲོད། །ཆོས་སྲུང་ནོར་ལྷའི་ཚོགས་བཅས་གསལ། །ཚོགས་མཆོད་ཡེ་ཤེས་བདུད་རྩིའི་རྒྱུན། །ལག་གཉིས་རྡོ་རྗེའི་དགང་བླུགས་ཀྱིས། །ཕུལ་བས་ཟག་མེད་བདེ་བས་མཉེས། །མཆོག་ཐུན་དངོས་གྲུབ་སྩོལ་བར་གྱུར། །ཅེས་བརྗོད་ཅིང་བསམ་ལ། ཨོཾ་ཨཱཿཧཱུྃ་གིས་ཆོས་ཉིད་གསལ་ཁྱབ་ཀྱི་ངང་དུ་རོལ། ལྷག་མ། ཨོཾ་ཨཱཿཧཱུྃ་ཧ་ཧོ་ཧྲཱིཿས་བརླབས། ཕཻཾ། ཨུཥྩི་ཊ་བ་ལིཾ་ཏ་བྷཀྵ་སཱི། གང་ཤར་བདེ་སྟོང་རོལ་པ་ལས་བྱུང་བའི། །ལྷག་མའི་འདོད་ཡོན་བདུད་རྩིའི་སྤྲིན་ཆེན་པོ། །འབྱུང་པོ་ལྷག་མར་དབང་བའི་ཚོགས་ལ་སྦྱིན། །ངོམས་ཤིང་ཚིམས་པའི་སྐལ་བ་ལྡན་གྱུར་ཅིག །ཅེས་བརྗོད་ཅིང་ཕྱིར་རོལ་གཙང་སར་བསྐྱལ། སྤྲོ་ན་རྡོ་རྗེའི་གླུའམ་དཔྱིད་ཀྱི་རྒྱལ་མོའི་གླུ་བླངས། །བཀྲ་ཤིས་གང་ཞིག་ཆོས་ཀྱི་དབྱིངས་ནས་ལེགས་བྱུང་བའི། །ཧེ་རུ་ཀ་དཔལ་འཇིགས་བྱེད་རྒྱལ་པོ་འབར་བའི་སྐུ། །ཤེས་རབ་ཕག་མོའི་པདྨར་རྡོ་རྗེས་རོལ་མཛད་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །འཆི་ཚེ་མགོན་དང་དཔའ་བོ་མ་ཚོགས་ཀྱི། །ཞེས་སོགས་དང་། ལྷ་མོ་ཚད་མ་སོགས་སྨོན་ལམ་གདབ། མཐར། ཨོཾ་གུ་རུ་བཛྲ་ཡོ་གི་ནཱི་ས་པ་རི་ཝཱ་ར་ཨརྒྷཾ་སོགས་ནས། ཤབྡ་པྲ་ཏཱི་ཙྪ་སྭཱ་ཧཱས་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད་ཕུལ། དཔལ་ལྡན་རྡོ་རྗེ་མཁའ་འགྲོ་སོགས་ཀྱིས་བསྟོད། ཡི་གེ་བརྒྱ་པའི་མཐར། མ་འབྱོར་པ་དང་སོགས་ཀྱིས་ནོངས་པ་བཤགས། རྟེན་ཡོད་པ་རྣམས། ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱས། མེ་ཏོག་འཐོར་ཞིང་བརྟན་བཞུགས་བྱ། རྟེན་མེད་པའི་གཏོར་མགྲོན། བཛྲ་མུཿས་གཤེགས། དགེ་བ་འདི་ཡིས་མྱུར་དུ་བདག །རྣལ་འབྱོར་མ་དཔལ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །ཅེས་བསྔོ་སྨོན་དང་། གནས་འདིར་ཉིན་མོ་བདེ་ལེགས་སོགས་ཤིས་བརྗོད་ཇི་ལྟར་རིགས་པས་མཚམས་སྦྱར་ཏེ་དེ་ལྟར་ཕུལ་བའི་ཚོགས་རྫས་རྒྱ་ཆེ་བ་ཡོད་ན་ཡོན་ཏན་གྱི་ཞིང་བླ་མ་དང་དགེ་འདུན་ལ་ཆོས་སྟོན་དུ་གསོལ་བའམ། ཕན་འདོགས་པའི་ཞིང་ནད་པ་དང་དབུལ་ཕོངས་སོགས་ལ་སྦྱིན་པས་མཚོན་སླར་ཡང་ཚོགས་ཟུང་སྤེལ་བའི་ཐབས་ལ་བརྩོན་པར་བྱའོ། །ཞེས་པའང་ཡོངས་ཀྱི་དགེ་བའི་བཤེས་གཉེན་ཆེན་པོ་དཔལ་ལྡན་བླ་མ་དམ་པ་ངག་གི་དབང་ཕྱུག་བྱམས་པ་ཕུན་ཚོགས་ཀྱིས་འདི་ལྟར་བྲིས་ཞེས་ལྷ་རྫས་ཀྱི་མེ་ཏོག་དང་བཅས་བཀའ་སྩལ་ཕེབས་པ་གུས་པས་མཆོད་དེ་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་བྲིས་པའི་དགེ་བས་འགྲོ་ཀུན་ཚོགས་ཟུང་རྒྱ་མཚོ་མྱུར་དུ་རྫོགས་ནས་མཁའ་སྤྱོད་རྡོ་རྗེ་བཙུན་མོའི་གོ་འཕང་ཚེ་གཅིག་ཁོ་ནས་རེག་པའི་རྒྱུར་གྱུར་ཅིག། །། ༈

[edit]

rje btsun rdo rje rnal 'byor ma la brten pa'i rgyun gyi tshogs mchod mdor bsdus pa bsod nams rtag pa dam pa'i sprin chen/ @#/_/rje btsun rdo rje rnal 'byor ma la brten pa'i rgyun gyi tshogs mchod mdor bsdus pa bsod nams rtag pa dam pa'i sprin chen zhes bya ba bzhugs so/__/na mo gu ru badz+ra yo gi n+yai/__gang zhig snying rje chen pos yid lhag par drangs te/__dus myur ba nyid du gzhan don rdzogs byang gi go 'phang thob par 'dod pa'i don gnyer gyi rdo rje theg pa bla na med pa'i thabs la brten nas bde stong dbyer med kyi rtsis zin pas tshogs zung rgya mtsho skad cig gis rdzogs pa'i thabs lhur len pa dag gis/__bza' btung gi dngos po la brten rgyun gyi tshogs mchod mdor bsdus te bya ba'i tshul la gsum/__sbyor ba/__dngos gzhi/__rjes so/__/dang po ni/__rje btsun rdo rje rnal 'byor ma'i sku bris 'bur gang rung ba'i spyan sngar rang nyid kyi bza' ba dang btung ba'i phud gtsang zhing bkod pas mdzes pa dang /__'byor na mchod pa'i bye brag gzhan yang ji ltar rigs pa bsham/__nang mchod chu chang gis bran pa'am/__chab gtsang mas bran/__dngos gzhi ni/__bdag gi rnal 'byor sngon du 'gro ba'am/__thun mtshams kyi lha sku sgyu ma lta bu'i ting nge 'dzin gyi gsal snang brtan pos bza' btung gi dngos po rnams/__sum+b+has bsang /__swa b+hA was sbyang /__stong pa'i ngang las ya~M las rlung /__ra~M las me'i dkyil 'khor gyi steng du/__a las ye shes kyi ka pA la yangs shing rgya che bar tshogs rdzas sha lnga bdud rtsi lnga bskol zhing 'od du zhu ba las byung ba'i ye shes kyi bdud rtsi 'dod yon rgya mtsho'i sprin phung 'phro bar gyur/__oM AHhU~M ha hoHhrIH__lan mang du brjod pas byin gyis brlab/__'bar ba'i phyag rgya dpral ba'i dbyings su g.yon du bskor zhing /__phaiM/__zhes brjod pa dang /__rang gi snying ga nas 'od zer 'phros pas rang bzhin gyi gnas nas bla ma rje btsun rdo rje rnal 'byor ma la sangs rgyas byang sems dpa' bo mkha' 'gro chos skyong srung ma'i tshogs kyis bskor ba mdun gyi nam mkhar oM badz+ra sa mA dzaH__zhes pas tshogs zhing mkha' khyab tu sad pa'i spyan sngar/__rang las sprul pa'i mchod pa'i lha mo rnams kyis bde stong gi nyams 'gyur phun sum tshogs pas mchod pa'i sprin rgya mtshos mchod pa la brten skyabs yul rnams zag med kyi bde bas mchog tu dgyes pas bdag gzhan yid can thams cad kyi tshogs zung mtha' dag skad cig gis rdzogs par mos la/__oM AHhU~M/__gang shar bde stong rol pa las byung ba'i/__/tshogs mchod 'dod yon bdud rtsi'i sprin chen po/__/rtsa brgyud bla ma mchog gsum mnyes phyir 'bul/__/bzhes nas thugs rjes byin gyis brlab tu gsol/__oM gu ru tri rat+na sa pa ri wA ra oM a kA ro sogs kyis bla ma dang dkon mchog__/oM AHhU~M/__gang shar bde stong rol pa las byung ba'i/__/tshogs mchod 'dod yon bdud rtsi'i sprin chen po/__/yi dam dkyil 'khor lha tshogs mnyes phyir 'bul/__/bzhes nas mchog thun dngos grub stsal du gsol/__oM maN+Dal de ba ga Na sa pa ri wA ra oM A kA ro sogs lan gsum gyis bla ma yi dam gyi lha spyi dang /__oM AHhU~M/__gang shar bde stong rol pa las byung ba'i/__/tshogs mchod 'dod yon bdud rtsi'i sprin chen po/__/rnal 'byor ma dpal 'khor bcas mnyes phyir 'bul/__/bzhes nas bde stong ye shes skyed du gsol/__oM oM oM sarba bud+d+ha DA ki nI sogs kyi mthar/__a kA ro btags pa lan gsum gyis khyad par rdo rje rnal 'byor ma/__oM AHhU~M/__gang shar bde stong rol pa las byung ba'i/__/tshogs mchod 'dod yon bdud rtsi'i sprin chen po/__/rdo rje chos srung rgya mtsho mnyes phyir 'bul/__/bzhes nas bar chad kun sol mthun rkyen sgrubs/__oM shrI badz+ra d+harmA pA la sa pa ri wA ra oM a kA ro sogs lan gsum gyis chos skyong srung ma/__oM AHhU~M/__gang shar bde stong rol pa las byung ba'i/__/tshogs mchod 'dod yon bdud rtsi'i sprin chen po/_/gnas gsum dpa' bo mkha' 'gro mnyes phyir 'bul/__/bzhes nas zab mo'i lam gyi grogs mdzod cig__/mkha' 'gro spyi gtor gyi sngags sam/__oM tri s+thA na DA ka DA ki ni sa pa ri wA ra oM a kA ro sogs kyis gnas gsum gyi dpa' bo mkha' 'gro 'khor dang bcas par phul/__de nas tshogs kyi cha bar pa rang nyid kyis rol pa'i slad du/__bdag nyid rdo rje rnal 'byor ma'i/__/snying gar yi dam lha tshogs dang /__/lte bar gtum mo'i me lce'i khrod/__/chos srung nor lha'i tshogs bcas gsal/__/tshogs mchod ye shes bdud rtsi'i rgyun/__/lag gnyis rdo rje'i dgang blugs kyis/__/phul bas zag med bde bas mnyes/__/mchog thun dngos grub stsol bar gyur/__/ces brjod cing bsam la/__oM AHhU~M gis chos nyid gsal khyab kyi ngang du rol/__lhag ma/__oM AHhU~M ha ho hrIHsa brlabs/__phaiM/__uSh+tsi Ta ba liM ta b+hak+Sha sI/__gang shar bde stong rol pa las byung ba'i/__/lhag ma'i 'dod yon bdud rtsi'i sprin chen po/__/'byung po lhag mar dbang ba'i tshogs la sbyin/__/ngoms shing tshims pa'i skal ba ldan gyur cig__/ces brjod cing phyir rol gtsang sar bskyal/__spro na rdo rje'i glu'am dpyid kyi rgyal mo'i glu blangs/__/bkra shis gang zhig chos kyi dbyings nas legs byung ba'i/__/he ru ka dpal 'jigs byed rgyal po 'bar ba'i sku/__/shes rab phag mo'i pad+mar rdo rjes rol mdzad pa'i/__/bden pa des kyang bde mchog la gnas bkra shis shog__/'chi tshe mgon dang dpa' bo ma tshogs kyi/__/zhes sogs dang /__lha mo tshad ma sogs smon lam gdab/__mthar/__oM gu ru badz+ra yo gi nI sa pa ri wA ra ar+g+haM sogs nas/__shab+da pra tI ts+tsha swA hAs phyi mchod dang /__oM AHhU~M gis nang mchod phul/__dpal ldan rdo rje mkha' 'gro sogs kyis bstod/__yi ge brgya pa'i mthar/__ma 'byor pa dang sogs kyis nongs pa bshags/__rten yod pa rnams/__oM su pra tiSh+Tha badz+rA ya swA hAs/__me tog 'thor zhing brtan bzhugs bya/__rten med pa'i gtor mgron/__badz+ra muHsa gshegs/__dge ba 'di yis myur du bdag__/rnal 'byor ma dpal 'grub gyur nas/__/'gro ba gcig kyang ma lus pa/__/de yi sa la 'god par shog__/ces bsngo smon dang /__gnas 'dir nyin mo bde legs sogs shis brjod ji ltar rigs pas mtshams sbyar te de ltar phul ba'i tshogs rdzas rgya che ba yod na yon tan gyi zhing bla ma dang dge 'dun la chos ston du gsol ba'am/__phan 'dogs pa'i zhing nad pa dang dbul phongs sogs la sbyin pas mtshon slar yang tshogs zung spel ba'i thabs la brtson par bya'o/__/zhes pa'ang yongs kyi dge ba'i bshes gnyen chen po dpal ldan bla ma dam pa ngag gi dbang phyug byams pa phun tshogs kyis 'di ltar bris zhes lha rdzas kyi me tog dang bcas bka' stsal phebs pa gus pas mchod de bya bral ba 'jam dbyangs mkhyen brtse'i dbang pos bris pa'i dge bas 'gro kun tshogs zung rgya mtsho myur du rdzogs nas mkha' spyod rdo rje btsun mo'i go 'phang tshe gcig kho nas reg pa'i rgyur gyur cig/___//__!_