JKW-KABUM-06-CHA-002-010

Previous Text Back to Volume PageNext Text

ཏིང་འཛིན་རྣམ་གསུམ་ལས་བརྩམས་པའི་ཚིགས་སུ་བཅད་པ།

Wylie title	ting 'dzin rnam gsum las brtsams pa'i tshigs su bcad pa
Location	mkhyen brtse'i bka' 'bum Volume 6, sde tshan 2, Text 10, Pages 195-197 (Folios 32a5 to 33a2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. ting 'dzin rnam gsum las brtsams pa'i tshigs su bcad pa. In 'jam dbyangs mkhyen brtse'i dbang po'i bka' 'bum, Vol. 6: 195-197. Khams sde dge rdzong sar dgon: Rdzong sar blo gros phun tshogs, 2020.
Genre	Meditation Texts - mnyam gzhag / ting nge ‘dzin

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

ཏིང་འཛིན་རྣམ་གསུམ་ལས་བརྩམས་པའི་ཚིགས་སུ་བཅད་པ་ནི། སེམས་ཀྱི་རྡོ་རྗེ་འཇམ་པའི་དབྱངས། །དེ་དང་གཉིས་མིན་བླ་མ་ལ། །བཏུད་ནས་ཚིག་གི་བདུད་རྩི་ཡིས། །དོན་གྱི་པདྨོ་ཅུང་ཟད་དབྱེ། །བདག་དང་ཕུང་པོ་རྣམ་རིག་དང་། །དཔྱད་པ་ཙམ་གྱིས་མི་མཚོན་པའི། །གཟོད་ནས་སྟོང་ཉིད་འདུས་མ་བྱས། །འཁོར་འདས་ཀུན་ལ་ཁྱབ་པར་གནས། །དེ་སླད་སྟོང་དང་རྟེན་འབྱུང་གཉིས། །འགལ་མེད་རྟོགས་པའི་རིག་ཤེས་དང་། །གང་གིས་མྱོང་བ་དབྱེར་མེད་པའི། །དེ་བཞིན་ཉིད་ལས་མཉམ་བཞག་པས། །ཆོས་ཅན་ཆོས་ཉིད་ལྟ་བ་ཀུན། །བློ་ཡི་མདུན་ན་མི་གནས་པ། །གཞི་དོན་གཉུག་མའི་ཡེ་ཤེས་ནི། །སྙིང་གི་དབུས་སུ་སད་པར་བྱ། །གང་ཚེ་སྣང་ཙམ་བདེ་ཆེན་གྱི། །རྣམ་རོལ་འགགས་པ་མ་མཆིས་ཀྱང་། །བདེན་ཞེན་དབུ་མར་འཇིག་པའི་མོད། །དམིགས་མེད་སྙིང་རྗེའི་སྒྱུ་ཐབས་ངོམས། །སྟོང་ཉིད་སྤྲོས་པ་བརྟུལ་པའི་དབྱིངས། །རིག་རྩལ་ཀུན་ཏུ་སྣང་བ་ཡང་། །གསལ་དང་སྣང་བ་མི་ཕྱེད་པ། །ཟུང་འཇུག་ངེས་པའི་ལམ་དུ་འདོད། །ཐབས་དེས་གཞན་ལ་སྨན་པ་ཡི། །གཟུགས་སྐུའི་འབྲས་བུ་འབྱུང་བའི་རྒྱུ། །རྡོ་རྗེ་མི་ཤིགས་ནཱ་དའི་སྤྲིན། །ཡི་གེའི་འཁོར་ལོ་ཆེན་པོར་རྫོགས། །དེ་ལས་གཟུང་དང་འཛིན་པའི་ཆོས། །འོད་གསལ་མེ་ཡིས་བསྲེགས་པ་ལས། །སྐུ་དང་ཡེ་ཤེས་འབྱམས་ཀླས་པའི། །དག་པའི་ཆོ་འཕྲུལ་བསམ་མི་ཁྱབ། །གཅིག་པུ་ཉིད་ཀྱང་དུ་མར་སྣང་། །སྣང་དུས་ཉིད་ནས་ཅིར་མི་དམིགས། །གང་གིས་ཚུལ་འདི་གོམས་པ་ཡིས། །ཚོགས་གཉིས་སྟན་ཐོག་གཅིག་ཏུ་རྫོགས། །ཨེ་མ་རྡོ་རྗེའི་ཚིག་གི་རྒྱུད། །བྱིས་པའི་བློ་ཡིས་རྟོགས་མིན་གྱིས། །གང་ཤར་སྨྲ་ལ་ཉེས་པ་ཀུན། །རྡོ་རྗེ་ཅན་གྱིས་བཟོད་པར་མཛོད། །དགེ་བས་བརྟན་གཡོ་ཀུན་གྱི་དངོས། །དེ་བཞིན་ཉིད་ཀྱི་དབྱིངས་སིམ་ནས། །ཟུང་འཇུག་བདེ་ཆེན་ཡེ་ཤེས་སྐུས། །ཡིད་ཅན་རྒྱ་མཚོ་སྨིན་གྱུར་ཅིག །སརྦ་དཱ་ཤྲེ་ཡོ་བྷ་བ་ཏུ།། །། ༈

[edit]

ting 'dzin rnam gsum las brtsams pa'i tshigs su bcad pa/ ting 'dzin rnam gsum las brtsams pa'i tshigs su bcad pa ni/__sems kyi rdo rje 'jam pa'i dbyangs/__/de dang gnyis min bla ma la/__/btud nas tshig gi bdud rtsi yis/__/don gyi pad+mo cung zad dbye/__/bdag dang phung po rnam rig dang /__/dpyad pa tsam gyis mi mtshon pa'i/__/gzod nas stong nyid 'dus ma byas/__/'khor 'das kun la khyab par gnas/__/de slad stong dang rten 'byung gnyis/__/'gal med rtogs pa'i rig shes dang /__/gang gis myong ba dbyer med pa'i/__/de bzhin nyid las mnyam bzhag pas/__/chos can chos nyid lta ba kun/__/blo yi mdun na mi gnas pa/__/gzhi don gnyug ma'i ye shes ni/__/snying gi dbus su sad par bya/__/gang tshe snang tsam bde chen gyi/__/rnam rol 'gags pa ma mchis kyang /__/bden zhen dbu mar 'jig pa'i mod/__/dmigs med snying rje'i sgyu thabs ngoms/__/stong nyid spros pa brtul pa'i dbyings/__/rig rtsal kun tu snang ba yang /__/gsal dang snang ba mi phyed pa/__/zung 'jug nges pa'i lam du 'dod/__/thabs des gzhan la sman pa yi/__/gzugs sku'i 'bras bu 'byung ba'i rgyu/__/rdo rje mi shigs nA da'i sprin/__/yi ge'i 'khor lo chen por rdzogs/__/de las gzung dang 'dzin pa'i chos/__/'od gsal me yis bsregs pa las/__/sku dang ye shes 'byams klas pa'i/__/dag pa'i cho 'phrul bsam mi khyab/__/gcig pu nyid kyang du mar snang /__/snang dus nyid nas cir mi dmigs/__/gang gis tshul 'di goms pa yis/__/tshogs gnyis stan thog gcig tu rdzogs/__/e ma rdo rje'i tshig gi rgyud/__/byis pa'i blo yis rtogs min gyis/__/gang shar smra la nyes pa kun/__/rdo rje can gyis bzod par mdzod/__/dge bas brtan g.yo kun gyi dngos/__/de bzhin nyid kyi dbyings sim nas/__/zung 'jug bde chen ye shes skus/__/yid can rgya mtsho smin gyur cig__/sarba dA shre yo b+ha ba tu//____//__!_