མངོན་རྒྱན་འཆད་ཐབས་གཞན་ཕན་ཉེར་མཁོ།

🚧 This website is under continued development. We appreciate your patience!

Previous Text Back to Volume PageNext Text

Wylie title	mngon rgyan 'chad thabs gzhan phan nyer mkho
Location	mkhyen brtse'i bka' 'bum Volume 5, sde tshan 4, Text 2, Pages 578-583 (Folios 3b1 to 6a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	བྱམས་པ་ (Maitreya)
Citation	'jam dbyangs mkhyen brtse'i dbang po. mngon rgyan 'chad thabs gzhan phan nyer mkho. In 'jam dbyangs mkhyen brtse'i dbang po'i bka' 'bum, Vol. 5: 578-583. Khams sde dge rdzong sar dgon: Rdzong sar blo gros phun tshogs, 2020.
Genre	Commentary Synoptic - bsdus don 'grel pa  ·  Commentary with Annotations - mchan 'grel

1 Texts in this Section (sde tshan or chos tshan)

2 578-583	མངོན་རྒྱན་འཆད་ཐབས་གཞན་ཕན་ཉེར་མཁོ། mngon rgyan 'chad thabs gzhan phan nyer mkho Commentary Synoptic - bsdus don 'grel pa   ·   Commentary with Annotations - mchan 'grel	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

རྒྱན་གྱི་འཆད་ཐབས་ཉུང་གསལ་གཞན་ཕན་ཉེར་མཁོ་བཞུགས། །ཨོཾ་སྭ་སྟི་སིདྡྷི། འདིར་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པ་རྒྱན་གྱི་དོན་བསྡུས་ཏེ་འཆད་པ་ལ་བཞི། མཚན་གྱི་དོན། འགྱུར་གྱི་ཕྱག །གཞུང་གི་དོན། མཇུག་གི་དོན་ནོ། །དང་པོ་ནི། ཆོས་ཁུངས་བཙུན་པར་བསྟན་པའི་ཕྱིར་རྒྱ་གར་ན་སྐད་རིགས་བཞི་ཡོད་པའི་ལེགས་སྦྱར་ལྷའི་སྐད་དུ། བསྟན་བཅོས་འདིའི་མཚན་ལ། ཨ་བྷི་ས་མ་ཡ་ཨ་ལངྐ་ར་ནཱ་མ་པྲཛྙཱ་པཱ་ར་མི་ཏ་ཨུ་པ་དེ་ཤ་ཤཱསྟྲ། ཞེས་བརྗོད་ཅིང་བོད་ཀྱི་སྐད་དུ་བསྒྱུར་ན་འབྲས་བུ་ཤེར་ཕྱིན་དང་ལམ་ཤེར་ཕྱིན་བརྗོད་བྱར་བྱེད་པའི་གཞུང་སྟོང་ཕྲག་བརྒྱ་པ་སོགས་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་རྟོགས་བྱེད་ཀྱི་ཐབས་མན་ངག་དང་བསྟན་བཅོས་ཀྱི་གཞི་མཐུན་ཡིན་པས་མན་ངག་གི་བསྟན་བཅོས་ཏེ་འཆོས་སྐྱོབ་ཀྱི་ཡོན་ཏན་གཉིས་དང་ལྡན་པ་ཡིན་ཅིང་། མཁྱེན་གསུམ་གྱི་རྣམ་པ་ཀུན་མངོན་དུ་ཕྱོགས་པར་མ་ནོར་བར་རྟོགས་པའི་ལམ་མཐའ་དག་གསལ་བྱེད་ཀྱི་རྒྱན་ཅེས་བྱ་བ་ནི་མཚན་སྒྲོག་པའོ། །གཉིས་པ་འགྱུར་ཕྱག་ནི། མ་རིག་པའི་གཉིད་ལས་སངས་ཤིང་ཤེས་བྱ་ལ་བློ་པདྨའི་འདབ་མ་ལྟར་རྒྱས་པའི་སངས་རྒྱས་དང་། ཀུན་རྫོབ་ཏུ་སེམས་ཅན་གྱི་དོན་དུ་བླ་མེད་བྱང་ཆུབ་དོན་དུ་གཉེར་བ་ལ་སེམས་མི་མཐུན་ཕྱོགས་ཀྱིས་མི་བརྫི་བའི་དཔའ་བོ་ཐམས་ཅད་དང་ཡང་ན་བྱང་ཆུབ་ནི་དེ་ཁོ་ན་ཉིད་ཡིན་ལ་དེ་དང་མཐུན་པར་སེམས་ཉིད་ཆོས་ཉིད་ལ་ཞུགས་པའི་དཔའ་བོ་ཐམས་ཅད་ལ་ཕྱག་འཚལ་ལོ། །གསུམ་པ་གཞུང་དོན་ལ་མཆོད་པར་བརྗོད་པ། བསྟན་བཅོས་བརྩམས་པའི་དགོས་པ། བརྩམ་པའི་བསྟན་བཅོས་ཀྱི་ལུས་སོ། ། ༈ དང་པོ་ནི། སྲིད་པ་ཐ་མའི་ཚེ་ཡང་དག་པའི་གདམས་ངག་གཞན་ལས་ཉན་ཅིང་ཚུལ་དེ་གཞན་ལའང་ངག་གིས་ཐོས་པར་བྱ་དགོས་པས་ཉན་ཐོས་སྲིད་པ་ཐ་མའི་ཚེ་གཞན་ལ་མ་ལྟོས་པར་རང་གི་བྱང་ཆུབ་མངོན་དུ་བྱ་ནུས་པའི་རང་བྱུང་རང་རྒྱལ་སོགས་ཞི་བ་ཐར་པ་འཚོལ་བ་རྣམས་ཕུང་སོགས་ཀྱི་གཞི་ཀུན་གང་ཟག་གི་བདག་མེད་དུ་ཤེས་པ་ཉིད་ཀྱིས་ཉོན་མོངས་པ་དང་སྡུག་བསྔལ་ཀུན་ཉེ་བར་ཞི་བའི་ལྷག་བཅས་ལྷག་མེད་ཀྱི་མྱ་ངན་ལས་འདས་པར་ཁྲིད་པར་མཛད་པ་གང་ཡིན་པ་དང་། །བྱང་ཆུབ་སེམས་དཔའ་འགྲོ་བ་ལ་ཕན་པར་བྱེད་པ་རྣམས་ཐེག་པ་གསུམ་གྱི་ལམ་བདེན་མེད་དུ་ཤེས་པའི་ལམ་ཤེས་པ་ཉིད་ཀྱིས་འཇིག་རྟེན་ཏེ་འགྲོ་བ་མཐའ་དག་གི་དོན་སྒྲུབ་པར་མཛད་པ་གང་ཡིན་པ་དང་། རྣམ་པ་ཐམས་ཅད་སྐྱེ་བ་མེད་པ་ཐུགས་སུ་ཆུད་པའི་རྣམ་མཁྱེན་གང་དང་ཡང་དག་པར་ལྡན་པས་ཐུབ་པ་སངས་རྒྱས་བཅོམ་ལྡན་འདས་རྣམས་ཀྱིས་བརྗོད་བྱའི་རྣམ་པ་ཀུན་དང་ལྡན་པའི་རྗོད་བྱེད་ཆོས་ཀྱི་འཁོར་ལོ་རིམ་པ་གསུམ་སོགས་སྣ་ཚོགས་པ་འདི་གསུངས་པ། །དེས་ན་ཉན་ཐོས་འཕགས་པ་དང་། རང་རྒྱལ་འཕགས་པ་དང་། བྱང་ཆུབ་སེམས་དཔའི་འཕགས་པའི་ཚོགས་དང་བཅས་པ་དང་། སངས་རྒྱས་འཕགས་པ་རྣམས་ཀྱི་ཡང་ནི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ལ་ཕྱག་འཚལ་ལོ། །འདིར་ཡུམ་མཁྱེན་པ་གསུམ་གྱིས་གང་ཟག་གི་བདག་མེད་གཟུང་འཛིན་གཉིས་སྟོང་ལམ་གསུམ་བདེན་མེད་རྣམ་པ་ཐམས་ཅད་བདེན་མེད་སོགས་རྟོགས་པའི་ངོ་བོའི་ཡོན་ཏན། ཉེར་ཞིང་འཁྲིད་པ་གཞན་དོན་སྒྲུབ་པ་ཆོས་འཁོར་བསྐོར་བ་སོགས་ནུས་པའི་ཡོན་ཏན་དང་ལྡན་པའི་སྒོ་ནས་བསྟོད་པའོ། །འདིར་གདུལ་བྱ་དབང་རྣོན་གྱིས་དབུ་མའི་ལྟ་བ་རྟོགས་པའི་སྒོ་ནས་ཡོན་ཏན་གཉིས་པོ་དེ་མི་འགལ་བར་ཚད་མའི་སྟོབས་ཀྱིས་ངེས་པ་རྙེད་ལ། དབང་བརྟུལ་གྱིས་ཚིག་ཙམ་གྱི་སྒོ་ནས་དད་པ་སྐྱེ་ལ་དེ་ལས་རྒྱན་ལ་ཐོས་སོགས་ཀྱིས་ཞུགས་ནས་རྣམ་མཁྱེན་ཐོབ་པར་འགྱུར་རོ། །གཉིས་པ་ལ་དགོས་སོགས་བཞི་ལས་བརྗོད་བྱ་ནི་རྣམ་པ་ཐམས་ཅད་མཁྱེན་པ་ཉིད་ཀྱི་ལམ་ལ་སོགས་པ་མངོན་རྟོགས་བརྒྱད་སྟོན་པས་ཤེར་ཕྱིན་གྱི་མདོ་འདི་ལས་བཤད་པ་གང་ཡིན་པའོ། །ཉིང་དགོས་ནི་མུ་སྟེགས་དང་ཉན་རང་སོགས་གཞན་གྱིས་ཐོས་སོགས་ཀྱིས་མྱོང་བ་མ་ཡིན་པའི་རྣམ་མཁྱེན་ཏེའོ། །སུས་མྱོང་ན་སེམས་བསྐྱེད་དང་གདམས་ངག་སོགས་རྣམ་མཁྱེན་མཚོན་བྱེད་ཀྱི་ཆོས་བཅུ་སྦྱིན་སོགས་ཀྱི་སྤྱོད་པ་བཅུ་ཡི་བདག་ཉིད་ཅན་ཀྱི་ཐེག་ཆེན་གྱི་ལམ་འབྲས་ཡུམ་གྱི་མདོ་ཡི་དོན་མ་ལུས་པ་ཉམས་སུ་མྱོང་བ་ཤིན་ཏུ་གསལ་བའི་ཤེས་རབ་ཀྱིས་ངེས་པར་བྱས་པ་མི་བརྗེད་པའི་དྲན་པ་ལ་བཞག་ནས་མོས་སྤྱོད་པ་རྣམས་སུ་ཡང་ཡང་སྒོམ་པའི་བྱང་ཆུབ་སེམས་དཔའ་བློ་དང་ལྡན་པས་ས་དང་པོ་རབ་ཏུ་དགའ་བ་ལ་སོགས་པ་རྟོགས་པའི་རིམ་གྱིས་སངས་རྒྱས་ཀྱི་སར་མངོན་སུམ་དུ་ཉིང་དགོས་རྣམ་མཁྱེན་དེ་མཐོང་བར་འགྱུར་བའི་ཕྱིར་དུ་ཤེར་ཕྱིན་གྱི་མདོའི་དོན་དཀའ་ཚེགས་མེད་པར། །བདེ་བླག་ཏུ་ནི་མྱུར་དུ་རྟོགས་པར་འགྱུར་བ་ཞེས་བྱ་བ་ནི་བསྟན་བཅོས་མངོན་རྟོགས་རྒྱན་རྩོམ་པའི་དགོས་པ་ཡིན་ནོ། །འབྲེལ་པ་ནི་བསྟན་བཅོས་བརྗོད་བྱ་དང་འབྲེལ། དགོས་པ་བསྟན་བཅོས་དང་འབྲེལ། གནས་སྐབས་ཉིང་དགོས་མོས་སྤྱོད་དང་ས་བཅུ་སོགས་དགོས་པ་དང་འབྲེལ། མཐར་ཐུག་གི་ཉིང་དགོས་རྣམ་མཁྱེན་དེ་གནས་སྐབས་ཀྱི་ཉིང་དགོས་དང་འབྲེལ་བ་དེ་རྣམས་འབྲེལ་པ་ཡིན་ནོ། །གསུམ་པ་བརྩམས་པའི་བསྟན་བཅོས་ཀྱི་ལུས་དངོས་ལ་གཉིས། མཁྱེན་གསུམ་མདོར་བསྟན་པ་དང་། ཡན་ལག་རྒྱས་པར་བཤད་པའོ། །དང་པོ་ལ་གཉིས། ལུས་མདོར་བསྟན་པ་དང་། ལུས་རྒྱས་པར་བཤད་པའོ། །དང་པོ་ནི། ཤེས་རབ་སོགས། གཉིས་པ་ལུས་རྒྱས་པར་བཤད་པ་ནི། སེམས་བསྐྱེད་པ་ནི་སོགས། གཉིས་པ་ཡན་ལག་རྒྱས་པར་བཤད་པ་ལ། རྣམ་མཁྱེན་ནས། ཆོས་སྐུའི་ཡན་ལག་རྒྱས་པར་བཤད་ཀྱི་བརྒྱད། དེ་རེ་རེ་ལའང་གཉིས། མཚོན་བྱེད་ཀྱི་རྒྱས་པར་བཤད་པ་དང་། སྐབས་བསྡུ་བའོ། །དེ་རྣམས་ནི་རིམ་པར། སེམས་བསྐྱེད་པ་ནི་སོགས་ནས། བརྒྱད་པའོ། །ཞེས་པའི་བར་གྱིས་བསྟན་ཏེ་བསྡུས་དོན་དུ་ཞིབ་པར་གསལ་ལོ། །གཉིས་པ་སྐབས་དྲུག་ཏུ་ཕྱེ་བ་ནི་ཉམས་སུ་བླང་བར་བྱ་བའི་མཁྱེན་པ་གསུམ་ནི། མཚན་ཉིད་ཀྱི་སྐབས་དང་རྣམ་རྫོགས་སྦྱོར་བ་ནི་མཁྱེན་གསུམ། དེ་ཡི་ཉམས་སུ་ལེན་བྱེད་ཀྱི་སྦྱོར་བའི་སྐབས་དང་། རྩེ་སྦྱོར་ནི་སྦྱོར་བ་དེ་རབ་ཏུ་གྱུར་པའི་སྐབས་དང་མཐར་གྱིས་པ་ནི་སྦྱོར་བ་དེ་ཡི་གོ་རིམ་གྱི་སྐབས་དང་། སྐད་ཅིག་སྦྱོར་བ་ནི་སྦྱོར་བ་དེ་མཐར་ཐུག་པའི་སྐབས་དང་། ཆོས་སྐུ་ནི་སྦྱོར་བ་དེ་ཡི་རྣམ་སྨིན་གྱི་སྐབས་དང་ནི་སྟེ་མཚན་ཉིད་སྐབས་སྦྱོར་བའི་སྐབས་རབ་ཀྱི་སྐབས་ཞེས་སོགས་དོན་བསྡུས་པའི་ཚུལ་གཞན་ཏེ་སྐབས་རྣམ་པ་དྲུག་ཏུ་བཤད་དོ། །གསུམ་པ་སྐབས་གསུམ་དུ་ཕྱེ་བ་ནི་འཇུག་པའི་ཡུལ་མཁྱེན་པ་ནི་རྣམ་པ་གསུམ་པོ་རྒྱུའི་སྐབས་དང་ཉམས་ལེན་གྱི་སྦྱོར་བ་རྣམ་པ་བཞི་ཡི་བདག་ཉིད་ནི་སྦྱོར་བའི་སྐབས་དང་། ཆོས་སྐུ་ཕྲིན་ལས་དང་བཅས་པ་ནི་འབྲས་བུའི་སྐབས་དང་ནི། །ཞེས་དེ་ལྟར་དོན་བསྡུས་ཚུལ་གཞན་ཏེ་སྐབས་རྣམ་པ་གསུམ་དུ་བཤད་དོ། །བཤད་ཚུལ་གསུམ་པོ་དེ་ལ་སྐབས་ཀྱི་གྲངས་བློ་ལ་འཆར་ཚུལ་མང་ཉུང་ཡོད་ཀྱང་། དོན་ནི་སྔར་རྒྱས་པར་བཤད་པ་གཞན་དུ་ཤེས་པར་བྱ་དགོས་སོ། །བཞི་པ་མཇུག་གི་དོན་གཉིས་མཛད་པ་པོ་གང་ཡིན་པ་དང་། ལོ་པཎ་གང་གིས་བསྒྱུར་བའོ། །དང་པོ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གི་བསྟན་བཅོས་མངོན་པར་རྟོགས་པའི་རྒྱན་ཅེས་བྱ་བ། འགྲོ་བ་མགོན་མེད་པ་རྣམས་སྐྱོབ་བའི་རྗེ་བོ་སྒོ་གསུམ་མི་མཐུན་ཕྱོགས་ལས་བསྡམས་པའི་བཙུན་པ་སློབ་པ་དང་མི་སློབ་པའི་གནས་སྐབས་ཐམས་ཅད་དུ་བྱམས་པའི་མཚན་མི་འདོར་བས་བྱམས་པ་ལེགས་པའི་ལམ་དོན་དུ་གཉེར་བ་རྣམས་ཀྱི་མགོན་པོས་ཐུགས་རྗེ་གཞན་དབང་དུ་གྱུར་པའི་སྒོ་ནས་གདུལ་བྱ་རྣམས་ཀྱི་ཤེར་ཕྱིན་གྱི་མདོའི་དོན་རྟོགས་ཕྱིར་མཛད་པ་མ་ཚང་བ་མེད་པར་རྫོགས་སོ། །གཉིས་པ་གང་གིས་བསྒྱུར་བའི་འགྱུར་བྱང་ནི་རྒྱ་གར་གྱི་མཁན་པོ་བིདྱཱ་ཀཱ་ར་པྲ་བྷ་སྟེ་རིག་བྱེད་འོད་ཟེར་རམ་རིག་པའི་འབྱུང་གནས་དང་། ཞུ་ཆེན་གྱི་ལོ་ཙཱ་བ་བནྡེ་དཔལ་བརྩེགས་ཀྱིས་སཾ་སྐྲྀ་ཏ་ལམ་བོད་སྐད་དུ་བསྒྱུར་ཅིང་ཞུས་ཏེ་འཆད་ཉན་གྱིས་གཏན་ལ་ཕབ་པ་ལས། སླད་ཀྱི་པཎྜིཏ་གོ་མཱི་འཆི་མེད་དང་། ལོ་ཙཱ་བ་དགེ་སློང་བློ་ལྡན་ཤེས་རབ་ཀྱིས་བསྒྱུར་ཅིང་ཞུས་ཏེ་ལེགས་པར་གཏན་ལ་ཕབ་པའོ། །འདིས་ཀྱང་བསྟན་འགྲོ་ལ་མྱུར་དུ་ཕན་ཐོགས་པར་གྱུར་ཅིག །མངྒ་ལཾ།། །།སྨྲས་པ། མཚན་ཉིད་ལྡན་པའི་བཤེས་གཉེན་ལ་བརྟེན་ནས། །མདོ་དང་རྒྱན་ལ་ཐོས་སོགས་ཀྱིས་ཞུགས་ཏེ། །ངེས་འབྱུང་བྱང་སེམས་ཡང་དག་ལྟར་སྦྱོར་བ། །ཐོག་མར་མཁྱེན་གསུམ་ཉམས་ལེན་བསྡུས་དོན་ཡིན། །ཡུལ་ལྔ་ལམ་མཁས་བསམ་པའི་གོ་གྱོན་ནས། །འཇུག་པའི་སེམས་བསྐྱེད་སྦྱོར་བའི་ཕྱིན་དྲུག་བརྩོན། །གྲངས་མེད་གསུམ་གྱི་ཚོགས་ཀྱི་མགོ་བཅོམ་པ། །བཞི་པའི་ཐར་ཆ་མཚན་ཉིད་ཚང་བའོ། །དེ་ནས་བསྒོམ་བྱའི་རྣམ་ཀུན་བརྒྱ་དོན་གསུམ། །རྣམ་ཐར་བསྡུས་འདི་ཚང་ལ་མ་ནོར་བའི། །ལམ་དུ་མཚན་ཉིད་བཞི་ཡི་གཏན་ཕབ་ནས། །རྣམ་ཀུན་རང་བཞིན་མེད་པར་མཉམ་བཞག་བསྒོམ། །ཞི་ལྷག་ཟུང་འབྲེལ་སྒོམ་པ་རབ་རྩེར་སོན། །བརྒྱ་དང་དོན་གསུམ་དམིགས་བཅས་ཀུན་རྫོབ་ཏུ། །གོ་རིམ་མ་འཆོལ་མཐར་གྱིས་འབད་པ་བསྒོམ། །གོམས་པའི་རྩོལ་མེད་སྐད་ཅིག་གཅིག་ལ་རྫོགས། །སྦྱོར་བཞིའི་དོན་བསྡུས་སྐུ་བཞི་ཕྲིན་ལས་བཅས། །མངོན་དུ་བྱེད་པ་འབྲས་བུའི་བསྡུས་དོན་ཡིན།། །། ༈

[edit]

mngon rgyan 'chad thabs gzhan phan nyer mkho/ rgyan gyi 'chad thabs nyung gsal gzhan phan nyer mkho bzhugs/__/oM swa sti sid+d+hi/__'dir shes rab kyi pha rol tu phyin pa'i man ngag gi bstan bcos mngon par rtogs pa rgyan gyi don bsdus te 'chad pa la bzhi/__mtshan gyi don/__'gyur gyi phyag__/gzhung gi don/__mjug gi don no/__/dang po ni/__chos khungs btsun par bstan pa'i phyir rgya gar na skad rigs bzhi yod pa'i legs sbyar lha'i skad du/__bstan bcos 'di'i mtshan la/__a b+hi sa ma ya a lang+ka ra nA ma pradz+nyA pA ra mi ta u pa de sha shAs+t+ra/__zhes brjod cing bod kyi skad du bsgyur na 'bras bu sher phyin dang lam sher phyin brjod byar byed pa'i gzhung stong phrag brgya pa sogs shes rab kyi pha rol tu phyin pa'i don rtogs byed kyi thabs man ngag dang bstan bcos kyi gzhi mthun yin pas man ngag gi bstan bcos te 'chos skyob kyi yon tan gnyis dang ldan pa yin cing /__mkhyen gsum gyi rnam pa kun mngon du phyogs par ma nor bar rtogs pa'i lam mtha' dag gsal byed kyi rgyan ces bya ba ni mtshan sgrog pa'o/__/gnyis pa 'gyur phyag ni/__ma rig pa'i gnyid las sangs shing shes bya la blo pad+ma'i 'dab ma ltar rgyas pa'i sangs rgyas dang /__kun rdzob tu sems can gyi don du bla med byang chub don du gnyer ba la sems mi mthun phyogs kyis mi brdzi ba'i dpa' bo thams cad dang yang na byang chub ni de kho na nyid yin la de dang mthun par sems nyid chos nyid la zhugs pa'i dpa' bo thams cad la phyag 'tshal lo/_/gsum pa gzhung don la mchod par brjod pa/__bstan bcos brtsams pa'i dgos pa/__brtsam pa'i bstan bcos kyi lus so/____/_!_dang po ni/__srid pa tha ma'i tshe yang dag pa'i gdams ngag gzhan las nyan cing tshul de gzhan la'ang ngag gis thos par bya dgos pas nyan thos srid pa tha ma'i tshe gzhan la ma ltos par rang gi byang chub mngon du bya nus pa'i rang byung rang rgyal sogs zhi ba thar pa 'tshol ba rnams phung sogs kyi gzhi kun gang zag gi bdag med du shes pa nyid kyis nyon mongs pa dang sdug bsngal kun nye bar zhi ba'i lhag bcas lhag med kyi mya ngan las 'das par khrid par mdzad pa gang yin pa dang /__/byang chub sems dpa' 'gro ba la phan par byed pa rnams theg pa gsum gyi lam bden med du shes pa'i lam shes pa nyid kyis 'jig rten te 'gro ba mtha' dag gi don sgrub par mdzad pa gang yin pa dang /__rnam pa thams cad skye ba med pa thugs su chud pa'i rnam mkhyen gang dang yang dag par ldan pas thub pa sangs rgyas bcom ldan 'das rnams kyis brjod bya'i rnam pa kun dang ldan pa'i rjod byed chos kyi 'khor lo rim pa gsum sogs sna tshogs pa 'di gsungs pa/__/des na nyan thos 'phags pa dang /__rang rgyal 'phags pa dang /__byang chub sems dpa'i 'phags pa'i tshogs dang bcas pa dang /__sangs rgyas 'phags pa rnams kyi yang ni yum shes rab kyi pha rol tu phyin pa de la phyag 'tshal lo/__/'dir yum mkhyen pa gsum gyis gang zag gi bdag med gzung 'dzin gnyis stong lam gsum bden med rnam pa thams cad bden med sogs rtogs pa'i ngo bo'i yon tan/__nyer zhing 'khrid pa gzhan don sgrub pa chos 'khor bskor ba sogs nus pa'i yon tan dang ldan pa'i sgo nas bstod pa'o/__/'dir gdul bya dbang rnon gyis dbu ma'i lta ba rtogs pa'i sgo nas yon tan gnyis po de mi 'gal bar tshad ma'i stobs kyis nges pa rnyed la/__dbang brtul gyis tshig tsam gyi sgo nas dad pa skye la de las rgyan la thos sogs kyis zhugs nas rnam mkhyen thob par 'gyur ro/__/gnyis pa la dgos sogs bzhi las brjod bya ni rnam pa thams cad mkhyen pa nyid kyi lam la sogs pa mngon rtogs brgyad ston pas sher phyin gyi mdo 'di las bshad pa gang yin pa'o/__/nying dgos ni mu stegs dang nyan rang sogs gzhan gyis thos sogs kyis myong ba ma yin pa'i rnam mkhyen te'o/__/sus myong na sems bskyed dang gdams ngag sogs rnam mkhyen mtshon byed kyi chos bcu sbyin sogs kyi spyod pa bcu yi bdag nyid can kyi theg chen gyi lam 'bras yum gyi mdo yi don ma lus pa nyams su myong ba shin tu gsal ba'i shes rab kyis nges par byas pa mi brjed pa'i dran pa la bzhag nas mos spyod pa rnams su yang yang sgom pa'i byang chub sems dpa' blo dang ldan pas sa dang po rab tu dga' ba la sogs pa rtogs pa'i rim gyis sangs rgyas kyi sar mngon sum du nying dgos rnam mkhyen de mthong bar 'gyur ba'i phyir du sher phyin gyi mdo'i don dka' tshegs med par/__/bde blag tu ni myur du rtogs par 'gyur ba zhes bya ba ni bstan bcos mngon rtogs rgyan rtsom pa'i dgos pa yin no/__/'brel pa ni bstan bcos brjod bya dang 'brel/__dgos pa bstan bcos dang 'brel/__gnas skabs nying dgos mos spyod dang sa bcu sogs dgos pa dang 'brel/__mthar thug gi nying dgos rnam mkhyen de gnas skabs kyi nying dgos dang 'brel ba de rnams 'brel pa yin no/__/gsum pa brtsams pa'i bstan bcos kyi lus dngos la gnyis/__mkhyen gsum mdor bstan pa dang /__yan lag rgyas par bshad pa'o/__/dang po la gnyis/__lus mdor bstan pa dang /__lus rgyas par bshad pa'o/__/dang po ni/__shes rab sogs/__gnyis pa lus rgyas par bshad pa ni/__sems bskyed pa ni sogs/__gnyis pa yan lag rgyas par bshad pa la/__rnam mkhyen nas/__chos sku'i yan lag rgyas par bshad kyi brgyad/__de re re la'ang gnyis/__mtshon byed kyi rgyas par bshad pa dang /__skabs bsdu ba'o/__/de rnams ni rim par/__sems bskyed pa ni sogs nas/__brgyad pa'o/__/zhes pa'i bar gyis bstan te bsdus don du zhib par gsal lo/__/gnyis pa skabs drug tu phye ba ni nyams su blang bar bya ba'i mkhyen pa gsum ni/__mtshan nyid kyi skabs dang rnam rdzogs sbyor ba ni mkhyen gsum/__de yi nyams su len byed kyi sbyor ba'i skabs dang /__rtse sbyor ni sbyor ba de rab tu gyur pa'i skabs dang mthar gyis pa ni sbyor ba de yi go rim gyi skabs dang /__skad cig sbyor ba ni sbyor ba de mthar thug pa'i skabs dang /__chos sku ni sbyor ba de yi rnam smin gyi skabs dang ni ste mtshan nyid skabs sbyor ba'i skabs rab kyi skabs zhes sogs don bsdus pa'i tshul gzhan te skabs rnam pa drug tu bshad do/__/gsum pa skabs gsum du phye ba ni 'jug pa'i yul mkhyen pa ni rnam pa gsum po rgyu'i skabs dang nyams len gyi sbyor ba rnam pa bzhi yi bdag nyid ni sbyor ba'i skabs dang /__chos sku phrin las dang bcas pa ni 'bras bu'i skabs dang ni/__/zhes de ltar don bsdus tshul gzhan te skabs rnam pa gsum du bshad do/__/bshad tshul gsum po de la skabs kyi grangs blo la 'char tshul mang nyung yod kyang /__don ni sngar rgyas par bshad pa gzhan du shes par bya dgos so/__/bzhi pa mjug gi don gnyis mdzad pa po gang yin pa dang /__lo paN gang gis bsgyur ba'o/__/dang po ni/__shes rab kyi pha rol tu phyin pa'i man ngag gi bstan bcos mngon par rtogs pa'i rgyan ces bya ba/__'gro ba mgon med pa rnams skyob ba'i rje bo sgo gsum mi mthun phyogs las bsdams pa'i btsun pa slob pa dang mi slob pa'i gnas skabs thams cad du byams pa'i mtshan mi 'dor bas byams pa legs pa'i lam don du gnyer ba rnams kyi mgon pos thugs rje gzhan dbang du gyur pa'i sgo nas gdul bya rnams kyi sher phyin gyi mdo'i don rtogs phyir mdzad pa ma tshang ba med par rdzogs so/__/gnyis pa gang gis bsgyur ba'i 'gyur byang ni rgya gar gyi mkhan po bid+yA kA ra pra b+ha ste rig byed 'od zer ram rig pa'i 'byung gnas dang /__zhu chen gyi lo tsA ba ban+de dpal brtsegs kyis saM skr-i ta lam bod skad du bsgyur cing zhus te 'chad nyan gyis gtan la phab pa las/__slad kyi paN+Dita go mI 'chi med dang /__lo tsA ba dge slong blo ldan shes rab kyis bsgyur cing zhus te legs par gtan la phab pa'o/__/'dis kyang bstan 'gro la myur du phan thogs par gyur cig__/mang+ga laM//__//smras pa/__mtshan nyid ldan pa'i bshes gnyen la brten nas/__/mdo dang rgyan la thos sogs kyis zhugs te/__/nges 'byung byang sems yang dag ltar sbyor ba/__/thog mar mkhyen gsum nyams len bsdus don yin/__/yul lnga lam mkhas bsam pa'i go gyon nas/__/'jug pa'i sems bskyed sbyor ba'i phyin drug brtson/__/grangs med gsum gyi tshogs kyi mgo bcom pa/__/bzhi pa'i thar cha mtshan nyid tshang ba'o/__/de nas bsgom bya'i rnam kun brgya don gsum/__/rnam thar bsdus 'di tshang la ma nor ba'i/__/lam du mtshan nyid bzhi yi gtan phab nas/__/rnam kun rang bzhin med par mnyam bzhag bsgom/__/zhi lhag zung 'brel sgom pa rab rtser son/__/brgya dang don gsum dmigs bcas kun rdzob tu/__/go rim ma 'chol mthar gyis 'bad pa bsgom/__/goms pa'i rtsol med skad cig gcig la rdzogs/__/sbyor bzhi'i don bsdus sku bzhi phrin las bcas/__/mngon du byed pa 'bras bu'i bsdus don yin//___//__!_