སངས་རྒྱས་ཡེ་ཤེས་ཞབས་ཀྱིས་མཛད་པའི་དེ་ཁོ་ན་ཉིད་བསྒོམ་པའི་ཞལ་ལུང་རྡོ་རྗེའི་ཚིག་གི་དུམ་བུ་འགའ་ཞིག་ཁོལ་དུ་ཕྱུང་བ།

🚧 This website is under continued development. We appreciate your patience!

Previous Text Back to Volume PageNext Text

Wylie title	sangs rgyas ye shes zhabs kyis mdzad pa'i de kho na nyid bsgom pa'i zhal lung rdo rje'i tshig gi dum bu 'ga' zhig khol du phyung ba
Location	mkhyen brtse'i bka' 'bum Volume 5, sde tshan 2, Text 7, Pages 317-352 (Folios 125a1 to 142b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	(Buddhajñānapāda)
Citation	'jam dbyangs mkhyen brtse'i dbang po. sangs rgyas ye shes zhabs kyis mdzad pa'i de kho na nyid bsgom pa'i zhal lung rdo rje'i tshig gi dum bu 'ga' zhig khol du phyung ba. In 'jam dbyangs mkhyen brtse'i dbang po'i bka' 'bum, Vol. 5: 317-352. Khams sde dge rdzong sar dgon: Rdzong sar blo gros phun tshogs, 2020.
Genre	Detailed Explanation - rnam bshad
Cycle	དཔལ་གསང་བ་འདུས་པ་ (dpal gsang ba 'dus pa)
Colophon	།འདི་ཉིད་རྒྱ་གར་གྱི་མཁན་པོ་ཀ་མ་ལ་གུ་ཧྱ་དང་ལོ་ཙཱ་བ་མངའ་བདག་ཡེ་ཤེས་རྒྱལ་མཚན་གྱིས་བསྒྱུར་བ་སྣང་ངོ་།
	'di nyid rgya gar gyi mkhan po ka ma la gu h+ya dang lo tsA ba mnga' bdag ye shes rgyal mtshan gyis bsgyur ba snang ngo

1 Texts in this Section (sde tshan or chos tshan)

7 317-352	སངས་རྒྱས་ཡེ་ཤེས་ཞབས་ཀྱིས་མཛད་པའི་དེ་ཁོ་ན་ཉིད་བསྒོམ་པའི་ཞལ་ལུང་རྡོ་རྗེའི་ཚིག་གི་དུམ་བུ་འགའ་ཞིག་ཁོལ་དུ་ཕྱུང་བ། sangs rgyas ye shes zhabs kyis mdzad pa'i de kho na nyid bsgom pa'i zhal lung rdo rje'i tshig gi dum bu 'ga' zhig khol du phyung ba Detailed Explanation - rnam bshad	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

སྐུ་ཚེ་འདིར་ཡེ་ཤེས་ཀྱི་སྐུ་མངོན་སུམ་དུ་བརྙེས་པའི་སློབ་དཔོན་བུདྡྷ་ཛྙཱ་ནའི་ཞབས་ལ། རྗེ་བཙུན་འཇམ་དཔལ་རྡོ་རྗེ་སྤྲུལ་པའི་དགེ་སློང་དུ་རོལ་པས་མངོན་སུམ་དུ་རྗེས་སུ་བཟུང་ནས་གསུངས་པའི་རིམ་པ་གཉིས་པའི་དེ་ཁོ་ན་ཉིད་བསྒོམ་པ་ཞེས་བྱ་བའི་ཞལ་གྱི་ལུང་ལས་ཕྱུང་བའི་རྡོ་རྗེའི་ཚིག་གི་དུམ་བུ་འགའ་ཞིག་བྲི་བར་བྱའོ། །དེ་ནས་ཡོན་ཏན་ཀུན་འབྱུང་ཨོ་རྒྱན་ཡུལ་དུ་བགྲོད། །འཇོ་སྒེག་རྡོ་རྗེ་ཞེས་རབ་མཚན་གསོལ་རབ་ཏུ་གྲགས། །སོགས་ནས། ལྷོ་ཕྱོགས་ནམ་མཁའི་ཤིང་ལྡན་ཀངྐ་ན་རུ་བགྲོད། །གྲུབ་པའི་དབང་ཕྱུག་པཱ་ལི་པཱ་དར་རབ་གྲགས་པ། །རྫུ་འཕྲུལ་ལྡན་པའི་སློབ་མའི་ཚོགས་དང་རབ་ཏུ་བཅས། །དེ་ཀུན་ཡོ་བྱད་གོས་ཟས་ནོར་རྒྱུན་གྱིས་སྦྱོར་བ། །བླ་མ་དམ་པ་དེ་དྲུང་ལོ་དགུར་རབ་ཏུ་བཏུད། །འདུས་པའི་རྒྱུད་ཆེན་འགྲེལ་བཅས་བཅོ་བརྒྱད་རབ་ཏུ་མཉན། །བདག་གིས་མ་རྟོགས་བླ་མ་ཆེན་པོས་དེ་བཞིན་གསུངས། །འདི་མ་རྟོགས་པར་གཞན་ནི་དོན་མེད་པར་བསམ་ནས། །གླེགས་བམ་མགུལ་བཏགས་བྱང་ཕྱོགས་ཡུལ་དུ་རབ་བགྲོད་དེ། །རྡོ་རྗེ་གདན་དུ་ཀུ་བ་རྩ་ཞེས་བྱ་བའི་ཚལ། །སྟག་དང་དྲེད་སོགས་མང་ཞིང་ཤིན་ཏུ་འཇིགས་པའི་སར། །ཟླ་བ་དྲུག་གནས་པ་ཡིས་ཆོས་རྣམས་དེ་ཉིད་རྟོགས། །སྤྲུལ་པའི་དགེ་སློང་བླ་མ་གཉིས་དང་བཅས་པ་ཕྲད། །མགོ་དང་ལག་གཉིས་ཡོལ་དང་ཚེས་བརྒྱད་རྒྱལ་ལ་བབས། །སྟོན་ཟླ་ར་བའི་ཐོ་རངས་སྐྱ་རེངས་ཤར་དུས་སུ། །འཇམ་དཔལ་དབྱངས་ཀྱིས་དཀྱིལ་འཁོར་འཁོར་ལོར་སྤྲུལ་པ་ལས། །བདག་གིས་དོན་འདི་བླང་ཕྱིར་གསོལ་བ་རབ་ཏུ་བཏབ། །ཁྱོད་ནི་སེམས་ཅན་ཀུན་གྱི་ཡབ་སྟེ་ཡུམ་ཡང་ཡིན། །སོགས་ནས། རྗེ་བཙུན་བདག་ལ་ཕན་ཕྱིར་སྦས་པ་ཤོད། །ཅེས་ལ་སོགས་ཤློཀ་བདུན་གྱིས་གསོལ་བ་བཏབ་པས། དེ་ནས་འཇམ་དབྱངས་བྱང་ཆུབ་སེམས་དཔའ་ཆེན་པོ་ཡིས། །བདག་ལ་འཛུམ་པའི་བཞིན་བཅས་ལེགས་ཞེས་ལན་གསུམ་གསུངས། །རོལ་པའི་གར་དང་ཆོས་ཀུན་དེ་བཞིན་ཉིད། །སྒྲ་བརྙན་ལྟ་བུ་རྡོ་རྗེའི་གླུ་ཡིས་བདག་ལ་བསྟན། །ཨ་བི་ཡྃ་རྃ་བྃ་ལྃ་ཧཱུྃ་ཨ་ལ་ལ་ཧོ། །རྗེ་བཙུན་ཐུགས་རྗེ་ཅན་རྣམས་ཀྱིས། །འདི་རྟོགས་པ་ཡི་བདེ་གཤེགས་ཀྱིས། །ཕུན་སུམ་ཚོགས་པ་འཐོབ་འགྱུར་བའི། །འདས་དང་ད་ལྟར་མ་བྱོན་པའི། །རྡོ་རྗེ་འཛིན་པས་སྣོད་འགའ་ལ། །གསུངས་ཤིང་གསུང་དང་གསུང་འགྱུར་བ། །ཡང་དག་དོན་རབ་རབ་རྟོགས་ཕྱིར། །ང་ཡིས་ཁྱོད་ལ་བསྟན་པར་བྱ། །ཡིད་གཅིག་བསྡུས་ལ་མཉན་པར་གྱིས། །ཆོས་རྣམས་གཟུགས་ལ་སོགས་པ་རྣམས། །ཀུན་མཁྱེན་པར་གྱི་རང་བཞིན་ནི། །ནམ་མཁའི་དཀྱིལ་ལྟར་རྣམ་དག་པའི། །ཟབ་གསལ་གཉིས་མེད་ཡེ་ཤེས་དེ། །དེ་ནི་དངོས་མེད་སྒོམ་དངོས་མེད། །དངོས་པོ་ཐམས་ཅད་དང་བྲལ་བའི། །ཁམས་དང་སྐྱེ་མཆེད་ཀྱིས་མ་ཟིན། །རང་བཞིན་གྱི་ནི་འོད་གསལ་བ། །གདོད་ནས་དག་པ་ནམ་མཁའ་བཞིན། །མེད་ནས་ཆོས་རྣམས་མཚན་ཉིད་སྤངས། །ཆོས་དང་ཆོས་ཉིད་ཀྱང་མེད་དེ། །དངོས་པོ་མེད་པས་མཁའ་དང་མཚུངས། །ཚིག་དང་ཡི་གེ་ཀུན་ལས་གྲོལ། །དེ་ནི་དུས་དང་ཕྱོགས་རྣམས་དང་། །ཆོས་རྣམས་ཀུན་གྱི་ངོ་བོར་སོང་། །ལུས་མ་ཡིན་ཏེ་ངག་དང་ནི། །ཡིད་ཀྱང་མ་ཡིན་འདོད་ཁམས་དང་། །གཟུགས་དང་གཟུགས་མེད་ཁམས་མ་ཡིན། །འབྱུང་ཆེན་བཞི་ཡང་མ་ཡིན་ཏེ། །དེ་བས་དེ་ནི་གང་ན་ཡང་། །མི་གནས་པས་ན་མཉམ་པ་ཉིད། །དེ་འདྲ་རྡོ་རྗེ་འཆང་ཆེན་པོ། །ཆོས་རྣམས་ཀུན་གྱི་ཆོས་ཉིད་མཆོག །ཐབས་ཀྱིས་བསྒྲུབ་པར་བྱ་བའི་དངོས། །བརྟག་པ་ཀུན་ལས་རབ་དབེན་པ། །ཕུན་སུམ་ཚོགས་རྒྱུད་དཔག་དཀའ་བ། །ཕྱག་རྒྱ་ཆེན་པོ་རབ་སྣང་བའི། །ཟེར་གྱིས་རང་བཞིན་སྨིན་བྱེད་པའི། །དེ་བཞིན་གཉིས་མེད་རང་བཞིན་མཆོག །རྡོ་རྗེ་འཛིན་པ་ཆེན་པོས་ཀྱང་། །བརྗོད་དུ་མེད་པའི་སྐུ་ཆེན་པོ། །དེ་ཉིད་རྒྱལ་སྲས་ཞིང་བཅས་དང་། །སྲིད་གསུམ་རྒྱུ་དང་མི་རྒྱུར་བཅས། །ཐམས་ཅད་ཀུན་གྱི་བདག་ཉིད་དེ། །དངོས་ཀུན་གཙོ་བོ་རང་སེམས་ཀྱི། །ངོ་བོ་ཉིད་དེ་དེ་རྟོགས་ན། །སངས་རྒྱས་བྱང་ཆུབ་དེ་ཉིད་དོ། །འཇིག་རྟེན་གསུམ་ཡང་དེ་ཉིད་དོ། །འབྱུང་ཆེན་རྣམས་ཀྱང་དེ་ཉིད་དོ། །ཅི་ཡི་ཕྱིར་ན་ཆོས་ཐམས་ཅད། །སེམས་ལ་གནས་ཏེ་དེ་ཉིད་ཀྱང་། །ནམ་མཁའ་ལ་གནས་ནམ་མཁའ་ནི། །གང་དུ་མི་གནས་འོད་གསལ་བ། །གཟོད་ནས་རྣམ་དག་སྟོང་པའོ། །སངས་རྒྱས་མྱ་ངན་འདས་པའི་ཁམས། །སྐྱེ་མེད་རྡོ་རྗེ་མངོན་བྱང་ཆུབ། །བདེར་གཤེགས་ཀུན་གྱི་སྙིང་པོ་མཆོག །གཉིས་མེད་རྟོག་བྲལ་དོན་ཆེན་ཏེ། །རིམ་པ་གཉིས་པར་རབ་ཏུ་བཤད། །དེ་འདྲའི་དོན་དེས་དངོས་པོ་ཀུན། །རྣམ་པར་ཁྱབ་སྟེ་རྣམ་གནས་ཀྱང་། །ཐོག་མེད་དུས་ནས་དེ་ལས་ཀྱང་། །རྣམ་རྟོག་ཆེན་པོའི་བྱུང་ཚུལ་ཏེ། །དེ་ལས་ཡང་ནི་འབྱུང་བ་ཆེ། །རླུང་གི་དཀྱིལ་འཁོར་ཉིད་བྱུང་སྟེ། །དེ་ལས་ཀྱང་ནི་མེ་ཡི་ཁམས། །ཆེན་པོ་བྱུང་ནས་ཁྱབ་མཛད་དེ། །དེ་ལས་ཆུ་ཁམས་ཆེན་པོ་ཡང་། །བྱུང་སྟེ་ཁྱབ་མཛད་དེ་ལས་ཀྱང་། །ས་བྱུང་བཞི་བསྡུས་ངོ་བོ་ལས། །རི་སོགས་སེམས་ཅན་ཐམས་ཅད་ཀྱང་། །སྣ་ཚོགས་ཕྲ་བ་སྦོམ་པོ་དང་། །སྐྱེས་པ་བུད་མེད་མ་ནིང་དང་། །གཞོན་ནུ་དང་ནི་རྒན་པོ་དང་། །ལྷ་དང་ཀླུ་དང་གནོད་སྦྱིན་དང་། །གདོན་དང་སྐར་མ་གཤིན་རྗེ་དང་། །ཆུ་བདག་བརྒྱ་བྱིན་དམྱལ་བ་དང་། །ཡི་དྭགས་དུད་འགྲོ་དང་དེ་ཀུན། །སྤངས་དང་ཤེས་རབ་ཙམ་བརྟེན་པའི། །འགྲོ་བ་ཀུན་ལ་རྒྱས་པར་གནས། །དེ་བས་དེ་ནི་གོང་མ་ཡི། །གཉིས་མེད་རྟོག་བྲལ་རབ་བསྒྲིབས་ཏེ། །མ་རྟོགས་པས་ན་འགྲོ་བ་ཀུན། །འཁོར་བར་རབ་ཏུ་འཁོར་བར་འགྱུར། །དེ་ནི་འཁོར་བའི་སྡུག་བསྔལ་ཆེ། །དུག་ཆུ་ལྟ་བུར་འཁྲུལ་པ་ཡིས། །རྣམ་བསྒྲུབས་ཐག་པའི་སྦྲུལ་ལྟ་བུར། །སྣང་ཞིང་མེད་པ་ཉིད་དུ་འདོད། །དེ་བས་གཉིས་མེད་དོན་ཆེན་པོ། །རང་རིག་དཀྱིལ་འཁོར་ཆེན་པོ་མཆོག །རྒྱུན་དང་རྣམ་གྲངས་ཀྱིས་གནས་པས། །དེ་ཡི་ངོ་བོ་རྟོགས་པར་བྱ། །གང་ཞིག་དེ་རྟོགས་རབ་འདུན་པ། །སེམས་ཀྱི་སྨོན་ལམ་ཡང་དག་ཅན། །སྔོན་དུ་བསོད་ནམས་མཐུ་བསྐྱེད་དང་། །སྐྱེས་བུ་ཡང་དག་བཞི་ལ་བརྟེན། །སྤྲོ་དང་གུས་དང་བསྙེན་བཀུར་དང་། །འདུན་པར་ལྡན་ཞིང་སྒོམ་པ་དང་། །བརྟན་པོ་སོམ་ཉི་རྣམ་སྤངས་པ། །རྗེས་མཐུན་གཏོང་ཕོད་དེས་ཤེས་འགྱུར། །དེ་ཡིས་རྗེ་བཙུན་ཡང་དག་པ། །མཆོག་གི་གདམས་ངག་རྒྱུད་ལ་ལྡན། །ཐེག་ཆེན་ལམ་གྱི་སྤྱོད་པ་དང་། །སྒོམ་པ་ལ་ནི་ལྷུར་ལེན་དང་། །དེ་ཉིད་བཅུ་ལ་སོགས་པ་ཡི། །གསང་བ་རབ་གསང་ཤིན་ཏུ་གསང་། །ཤེས་ཤིང་དེ་ཡི་དོན་གབ་པར། །སྟོན་བྱེད་བླ་མ་མཉེས་པར་བྱ། །ཡུལ་དང་མཁའ་དབྱིངས་ཁྱིམ་དང་རྟ། །གླང་པོ་ཆེ་སོགས་མལ་སྟན་དང་། །ཆུང་མ་སྡུག་དང་ཡིད་འོང་བུ། །བུ་ཚ་སྲིང་མོ་ཚ་མོ་སོགས། །གཞན་ཡང་གསེར་དང་དངུལ་གྱི་རྫས། །ཟངས་ལྕགས་སོགས་ལས་བྱས་པ་ཡིས། །མཛེས་པའི་རྫས་དང་མུ་ཏིག་གི །ཕྲེང་དང་པདྨ་རཱ་ག་དང་། །པུ་ཤེལ་ཨིནྡྲ་ནཱི་ལ་དང་། །མ་རྒད་གཡུ་སོགས་མཆོད་པའི་ཚོགས། །ཞིང་འདི་མཁས་པས་རབ་བཀང་སྟེ། །དེ་འདྲའི་རྗེ་བཙུན་དབང་པོ་མཆོད། །གསལ་ཞིང་རབ་དགའ་མཁའ་མཉམ་པ། །གཞན་དུ་རིག་པར་མི་འགྱུར་བས། །བུད་མེད་སྒྱུ་མའི་ཕྱག་རྒྱ་ནི། །སྒྱུ་མ་ཀུན་ལས་ཁྱད་པར་འཕགས། །སྒྱུ་མ་དེ་ཡང་འཇིག་རྟེན་འདིར། །སྤྱན་ལ་སོགས་པ་རྣམ་དག་པར། །རིགས་ནི་རྣམ་པ་བཞིར་འགྱུར་ཏེ། །མིང་དང་མཚན་ཉིད་བཤད་པར་བྱ། །ཀ་མ་ལཱི་དང་ཤངྑཱི་ནི། །ཙི་ཏྲ་ནཱི་དང་ཧསྟི་ནཱི། །ཞེས་སོགས་ཕྱག་རྒྱའི་མཚན་ཉིད་རྒྱས་པར་དང་། གོང་གསུངས་བུ་མོ་བཙལ་ནས་ཀྱང་། །བླ་མ་ལ་ནི་དབུལ་བར་བྱ། །དེ་ནས་བླ་མ་དེ་མཉེས་ནས། །དེ་དང་སྙོམས་པར་ཞུགས་པ་ཡིས། །བདེ་གཤེགས་ཞུ་གྱུར་བཅུ་དྲུག་ཆ། །གྱུར་པ་བླ་མའི་ཁ་རུ་ལྷུང་། །ཞེས་དང་། དེ་ནས་དེ་ལ་རང་བྱུང་གི །ཆོས་སྐུ་རབ་དག་མཁའ་མཉམ་པ། །ལྷག་པའི་ལྷ་ཞེས་བྱ་བ་ནི། །རྟོགས་བྱའི་ཕྱིར་དུ་བུ་མོ་བྱིན། །ཞེས་སོགས་དབང་བར་པ་གཉིས་དང་། ཁྱད་པར་དབང་བཞི་པའི་དོན་ཤིན་ཏུ་རྒྱས་པར་བསྟན་ཏེ། དེ་ཡང་། ནམ་མཁའི་ཁམས་དང་རྡོ་རྗེ་སྦྱོར་བ་ལས་ནི་ཡང་དག་སྤྱན་ཅན་བདེ་ཆེན་འབྱུང་བར་འགྱུར། །གང་གང་ཡང་དག་དགའ་བྱེད་ཆགས་བྲལ་དགའ་གཉིས་བར་དུ་བདེན་གཉིས་མཐོང་བྱས་བརྟན་པར་གྱིས། །པདྨའི་མཁའ་ལ་རྡོ་རྗེ་ནོར་བུ་པད་སྙིང་གཉིས་ལ་འབྱོར་དང་རྡོ་རྗེ་སྐྱིལ་ཀྲུང་སེམས། །ནོར་བུའི་བར་དུ་མཐོང་བྱས་གང་དེ་བདེ་བ་འབྱུང་བ་ངེས་པ་དེ་ཉིད་ཡེ་ཤེས་ཏེ། །འདི་ནི་རྫོགས་པའི་རིམ་པ་ཡིན་པར་བླ་མ་མཆོག་རྣམས་ཀུན་གྱིས་ཡང་དག་བཤད། །འདོད་ཆགས་བྲལ་བར་མ་དམིགས་ཡེ་ཤེས་ལྷ་ནི་སྐད་ཅིག་དེ་རུ་བསམས། །ཆུ་ཚོད་བརྒྱད་དམ་ཉིན་གཅིག་དང་ནི་ཟླ་བ་གཅིག་ཏུ་འམ། །ལོ་གཅིག་བསྐལ་པའམ་བསྐལ་པ་སྟོང་དུ་ཡེ་ཤེས་དེ་མྱོང་བྱ། །པདྨ་ལ་གནས་བདུད་རྩིའི་ཁུ་བ་བློ་གྲོས་ཅན་གྱིས་ཁ་ཡིས་བླངས་ནས་བཏུང་བྱའོ། །དེ་འདྲའི་དངོས་པོ་ཐམས་ཅད་ཀྱི། །མཐའ་ཡི་དེ་ཉིད་ཟབ་གསལ་བ། །ཐོག་མེད་དུས་ནས་སོ་སོ་ཡི། །སྐྱེ་བོ་ང་དང་ངར་འཛིན་པས། །མ་བརྟགས་པར་ནི་བདག་ཏུ་བཟུང་། །དུས་ལས་བྱུང་དང་འདོད་རྒྱལ་དང་། །གནམ་གྱིས་བསྐོས་དང་གྱི་ན་དང་། །འཛིན་པ་པོས་ནི་སྤྲུལ་པ་དང་། །ཁམས་ཀུན་ལས་ནི་ངེས་འབྱུང་དང་། །དབང་ཕྱུག་དང་ནི་འབྱིན་པའོ། །དུས་དང་གཙོ་བོ་བྱེད་པ་དང་། །བྱེད་པ་པོ་ནི་མ་ཡིན་དང་། །རྣལ་འབྱོར་དང་ནི་ཚད་མ་དང་། །དག་པ་དང་ནི་མ་དག་པ། །ནང་ནས་བརྗོད་དུ་མེད་པའི་བདག །སྐྱེས་བུ་དང་ནི་ཁྱབ་བདག་དང་། །སྲོག་དང་གང་ཟག་རྣམ་ཤེས་དང་། །ཀུན་གཞི་དང་ནི་ཤེས་པ་པོ། །མཐོང་བ་པོ་དང་གཟུང་འཛིན་དང་། །ཤེས་པ་དང་ནི་ཤེས་བྱ་དང་། །ཤེད་ལས་སྐྱེས་དང་ཤེད་བུ་དང་། །སྲོག་དང་གསོ་བ་ལ་སོགས་པ། །མུ་སྟེགས་རྣམས་ཀྱིས་རྣམ་པར་རྟོགས། །ནམ་མཁའ་དང་ནི་འགོག་པ་གཉིས། །ཤིན་ཏུ་འདུས་མ་བྱས་པ་སྟེ། །ཤིན་ཏུ་བརྟན་བྱས་འདུས་བྱས་ཀུན། །སྐད་ཅིག་མ་སྟེ་བདག་པོ་མེད། །ཕྲ་རབ་རྡུལ་ལས་གྲུབ་པ་ནི། །བློ་ཡི་རྣམ་པ་མེད་པ་རུ། །ཁ་ཆེ་བྱེ་བྲག་སྨྲ་བས་རྟོགས། །རང་གི་རིག་པ་སྐྱེ་བྱེད་པ། །བལྟ་བྱ་སྤྱོད་ཡུལ་རྣམ་པར་ནི། །འདུས་མ་བྱས་པ་གསུམ་པོ་དང་། །མོ་གཤམ་བུ་བཞིན་མེད་པ་དང་། །འདུ་བྱེད་ཐམས་ཅད་བེམ་རིག་དང་། །དུས་གསུམ་རྒྱུ་བ་མ་ཡིན་དང་། །དམན་མིན་ཐོགས་མེད་གཟུགས་སུ་ནི། །མདོ་སྡེ་པ་ཡིས་རབ་ཏུ་རྟོགས། །ཡན་ལག་ཅན་ཡང་དོན་དམ་མིན། །རྡུལ་ཕྲན་དག་ཀྱང་དེ་བཞིན་ནོ། །སོ་སོར་སྣང་བ་མི་དམིགས་པ། །རྨི་ལམ་ལྟ་བུར་མི་སྣང་སྟེ། །གཟུང་འཛིན་སྤངས་པའི་ཡེ་ཤེས་ཏེ། །དོན་དམ་ཤེལ་ལྟར་དག་པ་རུ། །རྣལ་འབྱོར་སྤྱོད་པས་རབ་ཏུ་རྟོགས། །སོ་སོར་སྣང་བའི་གཞུང་ཐམས་ཅད། །དོན་དམ་མིན་ཏེ་གཅིག་པ་དང་། །དུ་མའི་རང་བཞིན་བྲལ་བའི་ཕྱིར། །ནམ་མཁའི་ཆུ་སྐྱེས་བཞིན་དུ་ནི། །གཉིས་མེད་གཉིས་སུ་མེད་མིན་ཞི། །ཤིན་ཏུ་དྲི་མེད་ནམ་མཁའ་ལྟར། །བློ་ལྡན་དབུ་མ་པ་ཡིས་རྟོགས། །དེ་ལ་རྟོགས་ཏེ་མཐའ་ཡས་པ། །དོན་དེ་ཁོ་ན་ལ་གནས་ནས། །ཐ་དད་སོ་སོར་རྟོགས་པའོ། །དེ་བས་དེ་དག་ཐམས་ཅད་ཀྱང་། །ཡང་དག་མིན་པས་བླ་དང་བཅས། །འོག་མ་འོག་མའི་རྣལ་འབྱོར་བློ། །གོང་མ་གོང་མས་ཁྱད་པར་འཕགས། །འོག་མའི་བློ་ནི་གོང་མ་ཡི། །ཤེས་རབ་ཀྱིས་ནི་སུན་འབྱིན་ནོ། །དེ་བས་གོང་མའི་རིམ་པ་ཡིས། །ལྷན་ཅིག་པ་ཡི་སློབ་དཔོན་གྱིས། །བྱིན་གྱིས་བརླབ་པ་ཡང་དག་བྱ། །གསལ་ཞིང་རབ་དྭངས་ནམ་མཁའ་འདྲ། །རང་བྱུང་ལྷག་པའི་ལྷ་ཆེན་པོ། །ལྷན་ཅིག་སྐྱེས་པའི་ཡེ་ཤེས་ཀྱིས། །བླ་མའི་ཁ་ལས་རྟོགས་པར་བྱ། །དེ་ལྟར་དམ་ཚིག་སྡོམ་ལྡན་པའི། །སྣོད་དུ་རྩེ་གཅིག་ཆུ་འདྲ་ལས། །ཡེ་ཤེས་གཟུགས་བརྙན་ལྟ་བུ་རུ། །རྣལ་འབྱོར་པ་ཡིས་རབ་ཏུ་བརྟགས། །དེ་ཐོབ་ཕྱིན་ཆད་རྣལ་འབྱོར་པས། །འཁོར་བ་ཉིད་ན་གནས་པའི་ཚེ། །དེ་ཡི་ཉེས་བས་མི་གོས་སོ། །ཇི་ལྟར་སྔགས་དང་སྨན་ལྡན་པས། །སྦྲུལ་དག་གསོད་པར་བྱེད་པ་བཞིན། །དེ་འདྲའི་རྣལ་འབྱོར་དབང་ཕྱུག་ཆེ། །ཡེ་ཤེས་སྨན་གྱིས་རྒྱས་བཏབ་པས། །ཉོན་མོངས་ཀྱིས་ནི་ཅི་བྱར་ཡོད། །གང་ཞིག་ལག་ན་གདུགས་ཐོགས་ལ། །དེ་ལ་ཆར་པས་ཅི་བྱར་ཡོད། །དེ་བཞིན་གཉིས་མེད་ཡེ་ཤེས་ཀྱི། །གདུགས་ཐོགས་ལ་ནི་རྟོག་པ་ཡི། །ཆར་པ་རབ་ཏུ་འབབ་གྱུར་ཡང་། །དེ་ལ་དེ་ཡིས་ཇི་ལྟར་གནོད། །དེ་འདྲའི་རབ་མཆོག་ཡེ་ཤེས་ནི། །སོ་སོ་སྐྱེ་བོས་ག་ལ་ཤེས། །ཉན་ཐོས་རྣམས་ཀྱིས་མི་ཤེས་སོ། །རང་སངས་རྒྱས་ཀྱིས་ཀྱང་མི་ཤེས། །རྣལ་འབྱོར་སྤྱོད་དང་དབུ་མ་པ། །བྱང་ཆུབ་སེམས་དཔས་མི་ཤེས་སོ། །བླ་བཅས་སངས་རྒྱས་ཀུན་གྱིས་ཀྱང་། །འདི་ནི་ཅུང་ཟད་མི་ཤེས་སོ། །འདི་ཡི་དོན་ཤེས་མ་འོངས་པའི། །རྡོ་རྗེ་འཛིན་པ་མཉེས་བྱས་ནས། །རང་གི་བསོད་ནམས་ཆེན་སྟོབས་ཀྱིས། །ཡི་གེ་མེད་པར་རྣམ་པར་འཕོ། །དེ་ལ་དཀྱིལ་འཁོར་སྦྱིན་སྲེག་དང་། །གཏོར་མ་བཟླས་པ་བགྲང་ཕྲེང་དང་། །སྐྱིལ་མོ་ཀྲུང་དང་སྟང་སྟབས་སོགས། །སྤྲོས་བྲལ་རྣམ་པར་སླུ་བ་སྟེ། །བྱ་བ་མ་ཡིན་དགག་པ་མིན། །ལྷག་པའི་ལྷ་ཡིས་སྤྲུལ་ཕྱིར་རོ། །བྱ་བ་རྣམས་ལ་རྣལ་འབྱོར་པ། །ལམ་ཆེན་དག་ཏུ་ཡོངས་འཛིན་པ། །རི་དྭགས་སྨིག་རྒྱུ་སྙེག་པ་ལྟར། །རྟག་ཏུ་སྣང་ཡང་མ་ཟིན་ནོ། །བྱ་བའི་ནད་ཆེན་གྱིས་ཟིན་ལ། །ཡེ་ཤེས་གཡོ་མེད་སྨན་ཆེན་གྱིས། །གསོ་བྱེད་སྐྱེས་བུ་དམ་པའོ། །དེ་བས་ལུས་ངག་ཡིད་གསུམ་གྱི། །སྡོམ་པ་མཆོག་ལ་གནས་བྱས་ནས། །ངའོ་སྙམ་པའི་གཟི་བསྐྱེད་ལ། །རིམ་པ་གཉིས་པ་དེ་ཉིད་སྒྲུབ། །དགོན་པའམ་ཡང་ན་གྲོང་གི་མཐར། །གང་རུང་ཅི་རུང་དེ་ལྟ་བུར། །བྱ་བར་འོས་པའི་ལས་ཀུན་ཡང་། །བྱས་ནས་བདེ་བའི་སྟན་ལ་འདུག །དེ་ནས་སེམས་ཅན་ཐམས་ཅད་ཀུན། །ཚངས་སྤྱོད་ཆེན་པོས་བཞིས་དམིགས་ཏེ། །དེ་ལ་སོགས་པ་རང་རྒྱུད་ཀྱི། །ལས་ཀྱི་སྒྲིབ་པ་དག་བྱས་ནས། །སེམས་ཙམ་ལ་ནི་བལྟ་བྱས་ཏེ། །ཕྱི་རོལ་རང་བཞིན་སྟོང་པར་བྱ། །སེམས་ཙམ་དེ་ཡང་སྟོང་བྱས་ནས། །རང་རིག་ཙམ་དུ་གནས་པར་བྱ། །རང་རིག་དེ་ཡང་ཟླ་བ་སོགས། །གདན་དུ་བརྟགས་ནས་ཡི་གེའོ། །སྨྱུ་གུས་བསྣུན་བྱས་མཚན་མར་གྱུར། །དེ་ནས་རང་ཉིད་ལྷར་བསྐྱེད་ལ། །ལྷ་ཡི་ང་རྒྱལ་དང་ལྡན་པར། །ཕྱག་རྒྱ་བཞིས་ནི་རྒྱས་བཏབ་སྟེ། །དཀྱིལ་འཁོར་འཁོར་ལོ་སྤྲུལ་པར་བྱ། །དེ་མཉེས་དེ་ལ་གོམས་བསླབས་པས། །ཕྱི་རོལ་ལུས་ནི་ལྡོག་བྱེད་དེ། །སངས་རྒྱས་རྣམས་ཀྱི་སྤྱོད་ཡུལ་མཆོག །མཐའ་ཡི་དེ་ཉིད་བསྒོམ་པར་བྱ། །རང་སྙིང་དམ་ཚིག་ཕྱག་རྒྱ་ཡིས། །ཐུགས་ཀར་མཚན་མ་ལ་གནས་པ། །དེ་བཞིན་གཤེགས་ཀུན་ཡེ་ཤེས་མཆོག །རིམ་པ་དང་པོ་པ་རྣམས་ལ། །ཡི་གེ་གཟུགས་སུ་རབ་སྣང་བ། །གཞོམ་དུ་མེད་པ་རང་ལྷ་ཡི། །ས་བོན་འོད་ཟེར་ལྔ་འབར་བ། །དེ་ཡི་ཁ་དོག་རྣམ་ལྔ་ཡིས། །འོད་ཟེར་སྟོང་གི་སྒོ་ཡི་ནི། །གཡས་ནས་རྣམ་པར་སྤྲོ་བར་བྱ། །དེ་ཡི་རྩ་ལ་དཀྱིལ་འཁོར་གྱི། །འཁོར་ལོ་ལྡན་པའི་བདེ་གཤེགས་རྣམས། །ཕྱོགས་བཅུའི་འཇིག་རྟེན་བཀང་བྱས་ནས། །དབུགས་ཀྱི་ཀུན་རྟོག་ལས་བྱུང་བའི། །སེམས་ཅན་ཐམས་ཅད་སངས་རྒྱས་སྐུ། །བསྐྱེད་ནས་ཟླ་བ་ཞུ་བྱས་ཏེ། །ཐིམ་ནས་རྣམ་པར་དག་བྱས་ནས། །དེ་རྣམས་ཡེ་ཤེས་ངོ་བོ་རུ། །གཡོན་པའི་ཧ་སར་ཞུགས་པར་བྱ། །དེ་ཡི་མཚན་མ་དབུས་གནས་པ། །ས་བོན་ལ་ནི་གཞུག་བྱས་པར། །དེ་ཉིད་སངས་རྒྱས་ཐམས་ཅད་ཀྱི། །ཡོན་ཏན་ཀུན་བསྐྱེད་རིན་པོ་ཆེ། །དངོས་པོ་ཀུན་ལ་ཁྱབ་པའི་བདག །མི་ཤིགས་པ་ཡི་ཐིག་ལེ་ཆེ། །འོད་ཟེར་ལྔ་དང་རབ་ལྡན་པ། །ཙི་ན་ཀ་ཡ་འབྲུ་ཙམ་དུ། །རང་གི་སེམས་སུ་ཆོས་ཐམས་ཅད། །བསྡུས་ནས་རྣམ་པར་བསམ་པར་བྱ། །དེ་ཡི་འོད་ཟེར་རིམ་པ་ཡིས། །རང་གི་གནས་ནི་ཁྱབ་བར་བྱ། །དེ་ལས་ཕྱིར་བྱུང་དམ་ཚིག་རྒྱ། །ནང་གསལ་དེ་ཡིས་ཕྱི་ཡི་ལུས། །གསལ་བྱས་དཀྱིལ་འཁོར་གསལ་བྱས་ནས། །དེ་ཡི་གནས་ཀྱང་གསལ་བར་བྱ། །དེ་ལས་ཕྱིར་བྱུང་བདག་ཉིད་ནང་། །བྱང་ཆུབ་སེམས་གཟུགས་བཅུ་དྲུག་པོ། །མཐེ་བོའི་རྩ་བར་ཡི་གེ་ཨ། །རྗེ་ངར་གཉིས་ལ་དེ་བཞིན་ཨཱ། །བརླ་གཉིས་ལ་ནི་ཨི་ཡི་གཟུགས། །གསང་བ་ལ་ནི་ཨཱི་ཡི་གཟུགས། །ལྟེ་བའི་རྩ་རུ་ཨུ་གཟུགས་ནས། །དེ་བཞིན་གསུས་པར་ཨཱུ་ཡི་གཟུགས། །ནུ་མ་གཉིས་སུ་ར་གཟུགས་ནས། །དེ་བཞིན་ལག་པར་རཱྀ་གཟུགས་ཏེ། །མགྲིན་པ་ལ་ནི་ལྀ་ཡི་གཟུགས། །དེ་བཞིན་མ་མཆུར་ཡི་གེ་ལཱྀ། །འགྲམ་པ་གཉིས་སུ་ཨེ་གཟུགས་སོ། །དེ་ཡི་མིག་གཉིས་ཡང་ནི་ཨཻ། །རྣ་བའི་རྩ་བར་ཨོ་ཡི་གཟུགས། །སྤྱི་བོར་ཨཽ་གཟུགས་ཡང་དག་གནས། །ཨཾ་ཨཿའི་གཟུགས་སུ་ཚིགས་ཀུན་ལ། །བཅུ་དྲུག་དུས་སུ་རྫོགས་འགྱུར་བ། །གོང་མའི་འོད་ཀྱིས་རྣམས་བཀུག་སྟེ། །ཐིག་ལེ་རུ་ནི་བཞུགས་པར་བྱ། །དེ་རུ་སེམས་ནི་ཅུང་ཟད་ཙམ། །གཟུང་བས་ལྷ་ཡི་འཁོར་ལོ་ཆེ། །རྟེན་དང་བཅས་པ་མོས་པས་བསྒོམས། །དེ་དབུས་བདག་པོ་ཐུགས་ཀ་རུ། །གོང་མའི་རིམ་པས་མི་ཤིགས་པའི། །ཐིག་ལེ་ཆེན་པོ་སྒོམ་བྱས་ནས། །ཡུངས་ཀར་ཚད་ཙམ་དེ་ལས་སྤྲོ། །རང་གི་གནས་དང་ཕྱག་རྒྱ་ཡི། །ནང་གསལ་དཀྱིལ་འཁོར་གསལ་བྱས་ནས། །དེ་ཡི་གནས་དང་བདག་པོ་ཡི། །ནང་གསལ་ཕྱི་ལུས་གསལ་བྱས་ནས། །དཀྱིལ་འཁོར་རྟེན་བཅས་གསལ་བར་བྱ། །དེ་ནས་བཅུ་དྲུག་གནས་པ་ཡི། །འོད་ཟེར་བཞག་པ་ཕྱུང་བྱས་ཏེ། །ཕྱི་ཡི་ལུས་ནི་གསལ་བར་བྱ། །དེ་ཡི་དཀྱིལ་འཁོར་འཁོར་ལོ་དང་། །རྟེན་དང་བཅས་པ་གསལ་བྱས་ནས། །ཕྱོགས་བཅུའི་འཇིག་རྟེན་བཞུགས་པ་ཡི། །བདེ་གཤེགས་ཀུན་གྱི་སྤྱན་སྔར་གཤེགས། །བདུད་རྩི་ཞུ་ནས་ཞལ་ཞུགས་ཏེ། །ཐིག་ལེར་བདུད་རྩི་བླངས་བྱས་ནས། །རྡོ་རྗེའི་ལམ་དུ་བྱུང་ནས་སུ། །འོ་མའི་རྒྱུན་ལྟར་འོང་བྱས་ནས། །ཐབས་ཀྱི་ཡེ་ཤེས་གཡས་ཞུགས་ཏེ། །དེ་བཞིན་གཞན་ནི་གཡོན་དུ་ཞུགས། །དེ་ནས་ཡེ་ཤེས་ཐིག་ལེ་ལ། །སྣང་བའི་ཐིགས་པས་ཐིམ་པར་འགྱུར། །དེ་ནི་འཛག་པའི་ངང་ཚུལ་ཅན། །འོད་ཟེར་ལྔ་འབར་དཀར་འཚེར་བ། །ཅུང་ཟད་དམར་བའི་ནང་དུ་སེམས། །མི་གཡོ་ཞིང་ནི་གཟུང་བར་བྱ། །དེ་ལ་གོང་མའི་རིམ་པ་ལྟར། །སྤྲོ་བ་དང་ནི་བསྡུ་བ་དང་། །གཟུང་བ་ཡང་དག་བྱས་གྱུར་པས། །འགོག་པའི་རྡོ་རྗེ་སེམས་ཉིད་དུ། །ནམ་ཞིག་དེ་ལ་རེག་གྱུར་པས། །སངས་རྒྱས་ཀུན་གྱིས་མཆོག་འཛིན་པ། །ཡིད་བཞིན་དཔལ་དང་འདྲ་བ་ཡི། །རྟགས་རྣམས་ཡང་དག་སྐྱེ་བར་འགྱུར། །ཕུང་པོ་ཁམས་དང་སྐྱེ་མཆེད་ཀྱི། །ལྷ་རྣམས་ཡེ་ཤེས་མེ་ཡིས་སུ། །ཐོག་མར་སྙིང་གར་སྡུད་བྱེད་པའི། །ཆོ་ག་འདི་ནི་དང་པོར་བཤད། །དེ་ལ་བསྒྲུབ་པས་བྱིན་བརླབས་པས། །སྣ་ཡི་རྩེ་མོར་འགྲོ་བས་ན། །མི་ཤིགས་ཐིག་ལེའི་རྗེས་ཐོགས་ལ། །གསང་བའི་ཐིག་ལེ་བསྒོམ་པར་བཤད། །གོང་མའི་ཡེ་ཤེས་ཐིག་ལེ་ལས། །འོད་ཟེར་ལྕགས་ཀྱུ་འདྲ་བ་རྣམས། །ཕྱོགས་བཅུར་སྤྲོས་པས་བདེ་གཤེགས་རྣམས། །དཀྱིལ་འཁོར་འཁོར་ལོ་དང་བཅས་ཀུན། །བཀུག་ནས་ཡེ་ཤེས་ངོ་བོ་རུ། །རང་གི་སྙིང་གར་རབ་ཏུ་བཙུད། །དེ་རྣམས་ཞུ་ནས་ཐིག་ལེ་ལ། །ཞུགས་པས་རྡུལ་དང་མུན་པ་དང་། །སྙིང་སྟོབས་ཚུལ་དུ་ཐིག་ལེ་ཡང་། །སྙིང་གི་པདྨ་ལ་བབས་ནས། །རང་གི་རྡོ་རྗེ་ནོར་བུ་ཡི། །དཀྱིལ་དུ་རྣམ་པར་གནས་པ་ལས། །འབྱུང་བ་ལྔ་ཡི་གཟུགས་ཅན་མཆོག །ཡེ་ཤེས་ལྔ་ཡི་ངོ་བོ་ཉིད། །འོད་ཟེར་ལྔ་འབར་རང་ལྷ་ཡི། །མཚན་མ་ཕྲ་མོ་རྣམ་བསམས་ནས། །དེ་ཡི་བུམ་པར་རྟེན་གྱི་ཚད། །ཡུངས་ཀར་ཙམ་དབུས་འཁོར་ལོ་ཆེ། །ཐིག་ལེར་བཅས་པ་མོས་པར་བསྒོམ། །གལ་ཏེ་དེ་ལ་རང་གི་སེམས། །བྱིང་བར་སོང་ངམ་སྐྱེ་བ་ན། །རྡོ་རྗེ་ལས་ནི་ཕྱིར་བྱུང་སྟེ། །སྣ་རྩེར་རྣམ་པར་གནས་བྱས་ནས། །དགའ་བྲལ་དགའ་བས་བརྟག་པར་བྱ། །འདི་ཡི་ཐིག་ལེ་རྣལ་འབྱོར་ལས། །གོང་གི་རིམ་པས་འོད་ཟེར་ལྔ། །སྟེང་གི་སྒོ་ལས་བྱུང་བ་དང་། །སླར་ཡང་བདུད་རྩི་འགུགས་པ་དང་། །དེ་བཞིན་གཞི་ལ་གཞུག་པ་དང་། །དབུས་དགག་སྟོང་པའི་ཡན་ལག་གོ། །དེ་ནས་གསང་བའི་ཐིག་ལེ་ཆེ། །རབ་ཏུ་ཕྲ་བ་གོང་མ་བཞིན། །རང་སེམས་དལ་བུ་དལ་བུས་གཟུང་། །དངོས་པོ་མེད་པའི་གནས་སུ་འགྱུར། །དེ་ཡང་བཟུང་བ་གོམས་པ་ཡིས། །ཕྱིན་ཅི་ལོག་ནི་རྣམ་པར་ལྡོག །སྨིག་རྒྱུ་ལྟ་བུ་སྣང་བ་ནི། །རྟགས་ནི་དང་པོར་ཤེས་པར་བྱ། །དེ་བཞིན་དུ་ནི་ཆུ་ལོག་པས། །དུ་བ་ལྟ་བུར་འབྱུང་བ་ནི། །གཉིས་པ་ཡིན་པར་ཤེས་པར་བྱ། །མེ་ནི་རྣམ་པར་ལོག་གྱུར་པས། །མཁའ་སྣང་འདྲ་བ་གསུམ་པའོ། །རླུང་ནི་དེ་བཞིན་ལོག་པས་ན། །མར་མེ་ལྟ་བུར་རབ་སྣང་བས། །རྟགས་ནི་བཞི་པ་ཤེས་པར་བྱ། །དེ་བཞིན་ཕྱིན་ལོག་རྣམ་པར་ཤེས། །ལོག་པས་ཟབ་གསལ་གཉིས་མེད་ཀྱི། །དོན་དྲན་སྤྲིན་མེད་ནམ་མཁའ་ལྟར། །གསལ་བ་རྟགས་ནི་ལྔ་པའོ། །མཚན་མ་ལྔ་པོ་དེ་ཡིས་ནི། །མི་གནས་མྱ་ངན་འདས་ཐོབ་བས། །རྣལ་འབྱོར་པས་ནི་འདི་ལ་འབད། །གཟུང་བ་ཡི་ནི་ཡན་ལག་གོ། །དེ་ལྟར་དེ་ལ་མཚན་མ་ལྔ། །མཐོང་བྱས་དོན་དེས་ཁྱབ་བྱའི་ཕྱིར། །རྡོ་རྗེ་ཡི་ནི་ལམ་ནས་སུ། །ནམ་མཁའི་ཁམས་སུ་སྤྲོ་བར་བྱ། །སྤྲོས་པ་དེ་ལས་མངོན་མཐོང་བའི། །སོ་སོར་སྣང་བ་བསྐྱེད་པར་བྱ། །སངས་རྒྱས་རྗེས་སུ་དྲན་པ་དང་། །ཆོས་ནི་ཡང་དག་རྗེས་དྲན་དང་། །རྡོ་རྗེ་རྗེས་སུ་དྲན་པ་དང་། །རིགས་ནི་ཡང་དག་རྗེས་དྲན་དང་། །ཁྲོ་བོ་རྗེས་སུ་དྲན་པ་ནི། །སྣང་མཛད་དང་ནི་ཚེ་དཔག་མེད། །མི་བསྐྱོད་རིན་ཆེན་འབྱུང་ལྡན་སོགས། །གཤིན་རྗེ་གཤེད་སོགས་ཁྲོ་བོ་ཡི། །དཀྱིལ་འཁོར་སྐུ་སོགས་ཇི་སྙེད་པོ། །སྤྲོ་བསྡུ་ལས་ནི་གསལ་བར་བྱ། །དེ་བཞིན་དམ་ཚིག་རྗེས་དྲན་ནི། །རྗེས་སུ་ཆགས་དང་ཆོ་ག་བཞི། །དང་པོ་སྤྲོ་བསྡུ་ལས་གསལ་བྱ། །དཀྱིལ་འཁོར་རྗེས་སུ་དྲན་པ་ནི། །ཆོ་ག་གཉིས་པ་ལ་སོགས་པའི། །དཀྱིལ་འཁོར་སྤྲོ་བསྡུ་ལས་གསལ་བྱ། །སྐུ་ནི་རྗེས་སུ་དྲན་པ་དང་། །གསུང་དང་ཐུགས་ནི་རྗེས་དྲན་དང་། །སེམས་ཅན་རྗེས་སུ་དྲན་པ་ནི། །སྐུ་དང་གསུང་ཐུགས་བསྒོམས་པ་ཡི། །རྡོ་རྗེ་གསུམ་ནི་སྤྲོ་བསྡུ་ལས། །རྣམ་པར་སྨིན་ཅིང་དྲན་པའོ། །དེ་བཞིན་སྔགས་ནི་ཐམས་ཅད་ཀྱི། །སྤྱི་གཟུགས་རྗེས་སུ་དྲན་པ་ནི། །ཡེ་ཤེས་ལྔ་ཡིས་རྡོ་རྗེ་སེམས། །བསྐྱེད་པ་དང་ནི་རང་གི་ལྷ། །ལོངས་སྤྱོད་བཞི་ལྡན་སྤྲོ་བསྡུ་ལས། །རྗེས་སུ་གསལ་བ་རྙེད་པའོ། །དམ་ཚིག་རྗེས་སུ་དྲན་པ་ནི། །བདུད་རྩི་མྱང་བ་ལ་སོགས་པ། །སྤྲོ་བསྡུ་ལས་ནི་གསལ་བྱེད་པའོ། །ཤེས་རབ་ཕ་རོལ་ཕྱིན་པ་དང་། །མ་སྐྱེས་རྗེས་སུ་དྲན་པ་ནི། །སྤྲོས་པའི་དཀྱིལ་འཁོར་དེ་དག་ཀྱང་། །ཅི་ཡང་ཡོད་པ་མ་ཡིན་ཏེ། །དེ་ནི་གཉིས་མེད་ངོ་བོ་རུ། །སྤྲོ་བསྡུ་ལས་ནི་དྲན་པའོ། །ཞེ་སྡང་རིགས་ལ་སོགས་པ་ཡི། །མཆོད་པ་རྗེས་དྲན་སྦྱོར་བ་ནི། །རང་གི་རིགས་ཀྱི་བུ་མོ་མཆོག །བར་མའི་ལོངས་སྤྱོད་བཞི་དག་པ། །རྗེས་སུ་ཆགས་པས་མཉེས་བྱ་བ། །སྤྲོ་བསྡུ་ལས་ནི་གསལ་བྱེད་པའོ། །རྗེས་སུ་དྲན་པའི་ཡན་ལག་གོ། །དེ་ལྟར་ཡན་ལག་གསུམ་གྱིས་ནི། །གསང་བའི་ཐིག་ལེ་བསྒོམ་བྱས་ནས། །ནོར་བུ་ལས་ནི་བྱུང་ནས་ཀྱང་། །ཁམས་གསུམ་ཁྱབ་པར་བྱེད་པས་ནི། །སྤྲུལ་པའི་ཐིག་ལེ་བསྒོམ་པར་བཤད། །རང་གི་སྤྱི་བོའི་དབུས་སུ་ནི། །སྐུ་ཡི་རྡོ་རྗེའི་ཐུགས་ཀ་རུ། །མཚན་མ་ལ་གནས་རླུང་དཀྱིལ་འཁོར། །དུད་ཀ་འདྲ་བར་ཟླ་བ་ལ། །ཨོཾ་དཀར་འོང་བའི་མཚན་ཉིད་བསམ། །དེ་བཞིན་མགྲིན་པའི་དབུས་སུ་ཡང་། །གསུང་གི་རྡོ་རྗེ་ཐུགས་ཀ་ཡི། །མཚན་པའི་དབུས་སུ་ཆུ་དཀྱིལ་འཁོར། །དཀར་པོ་དབུས་སུ་ཟླ་བ་ལ། །ཨཱཿདམར་གནས་པའི་རང་བཞིན་བསྒོམ། །ཐུགས་ཀར་ཐུགས་ཀྱི་རྡོ་རྗེ་ཡི། །ཐུགས་ཀར་མཚན་མ་ལ་གནས་པའི། །མེ་ཡི་དཀྱིལ་འཁོར་དམར་པོ་ལ། །ཟླ་གནས་དབུས་སུ་ཧཱུྃ་ནག་པོ། །འགྲོ་བའི་རང་བཞིན་བསམས་ནས་ཀྱང་། །ནུ་མ་གཉིས་ཀྱི་བར་དུ་ཡང་། །དམ་ཚིག་ཕྱག་རྒྱའི་ཐུགས་ཀ་རུ། །མཚན་མ་ལ་གནས་དབང་ཆེན་ནི། །དཀྱིལ་འཁོར་སེར་པོ་ཟླ་བ་ལ། །རང་གི་ལྷ་ཡི་ས་བོན་ཆེ། །འབྱུང་དང་འཇུག་དང་གནས་པ་ལ། །རྣམ་པར་གྲོལ་བའི་ས་བོན་བསམ། །དེ་ལྟར་ཕྱག་རྒྱ་བཞི་ཆེན་དང་། །བདག་ཉིད་འབྲེལ་པར་བྱས་ནས་སུ། །རིམ་པ་འདི་ཡིས་མི་ཤིགས་པའི། །རྡོ་རྗེ་བཟླས་པའི་ངོ་བོ་བྱ། །གཡས་པ་ནས་ནི་འབྱུང་བའི་ཁམས། །རླུང་གི་དཀྱིལ་འཁོར་ཆེན་པོ་སྟེ། །ཁ་དོག་དུད་ཀ་རྒྱུ་བ་ལས། །འབྱུང་བ་ཧཱུྃ་གི་ངོ་བོ་ཡིས། །སྣང་སྲིད་ཆོས་ཀུན་ཁྱབ་བྱས་ནས། །ཆོས་ཀུན་དག་བྱས་བདུད་རྩིར་གྱུར། །ཨོཾ་གྱི་ངོ་བོས་འོང་བྱས་ནས། །རང་གི་རྒྱུད་ཀྱི་བག་ཆགས་ནི། །བཀྲུས་ནས་དག་བྱས་དེ་ལ་ཞུགས། །ཨཱ་ལི་ངོ་བོས་དག་བྱས་ནས། །དེ་ལ་ལྷ་ཡི་དེ་བཞིན་ཉིད། །གཟུང་བ་དལ་བུས་དལ་བུས་བྱས། །དངོས་པོ་མེད་པའི་གནས་སུ་འགྱུར། །གཡོན་པ་ནས་ནི་འབྱུང་བའི་ཁམས། །ཆུ་ཡི་དཀྱིལ་འཁོར་ཆེན་པོ་སྟེ། །ཁ་དོག་དཀར་པོ་རབ་གནས་པ། །དེ་ལས་བྱུང་བའི་ཧཱུྃ་དང་ནི། །ཨོཾ་གྱི་རང་བཞིན་འདུ་བ་དང་། །ཨཱཿཡི་རང་བཞིན་གནས་པ་དང་། །དེ་ཉིད་བཟུང་བས་སྔ་མ་བཞིན། །གཉིས་ཀ་ལས་ནི་དྲག་ཏུ་འབྱུང་། །མེ་ཡི་དཀྱིལ་འཁོར་ཉིད་ཡིན་ཏེ། །ཁ་དོག་དམར་པོའི་ངོ་བོ་ལ། །ཧཱུྃ་གིས་སྤྲོས་དང་ཨོཾ་གྱིས་བསྡུས། །ཨཱཿཡིས་གནས་པ་དེ་ཉིད་གཟུང་། །སྔ་མ་བཞིན་དུ་ཤེས་བར་བྱ། །དེ་བཞིན་གཉིས་ལས་དལ་བུས་འབྱུང་། །དབང་ཆེན་གྱི་ནི་དཀྱིལ་འཁོར་རྒྱུ། །ཁ་དོག་གསེར་ལྟར་རབ་སྣང་བ། །དེ་ལ་ཧཱུྃ་གིས་འབྱུང་བ་དང་། །ཨོཾ་གྱིས་སྡུད་དང་ཨཱཿཡིས་གནས། །དེ་ལ་དེ་ཉིད་རབ་བཟུང་བས། །འཇུག་དང་གནས་དང་ལྡང་བ་ལས། །གྲོལ་བའི་ཡེ་ཤེས་རྙེད་འགྱུར་བ། །སོམ་ཉི་ཡིད་གཉིས་མ་བྱེད་ཅིག །ཕྱག་རྒྱ་བཞི་འབྲེལ་བཟླས་པ་ནི། །ཉིས་བརྒྱ་ཉི་ཤུ་རྩ་ལྔ་སྟེ། །དེ་ནི་དགུ་བརྒྱ་རྣམ་པ་བསྒྲེས། །ཞག་གཅིག་ཏུ་ནི་ཉི་ཤུ་བཞིས། །ཁྲི་ཕྲག་གཉིས་དང་གཅིག་སྟོང་དང་། །བརྒྱ་ཕྲག་དྲུག་ཏུ་དུས་ཐམས་ཅད། །རྣལ་འབྱོར་དབང་ཕྱུག་ཆེན་པོ་ཡིས། །ཉིན་མཚན་བཟླས་བརྗོད་གྲངས་བྱེད་དོ། །འདི་ཡི་རྣམ་པས་ཆོས་ཐམས་ཅད། །སྒྱུ་མ་དང་ནི་སྨིག་རྒྱུ་དང་། །བྲག་ཅ་འགལ་མེའི་འཁོར་ལོ་དང་། །འཁྲུལ་པ་དྲི་ཟའི་གྲོང་ཁྱེར་དང་། །ཆུ་བུར་དང་ནི་མིག་འཕྲུལ་དང་། །གཟུགས་བརྙན་ཆུ་ཟླ་ལ་སོགས་པར། །ཐམས་ཅད་ཤེས་ཤིང་ས་བཅུ་པའི། །དབང་ཕྱུག་རྣམས་དང་སྐལ་མཉམ་སྟེ། །རང་བཞིན་བཟླས་པ་འདི་ལ་ནི། །རྣལ་འབྱོར་པས་ནི་རབ་ཏུ་འབར། །འདི་ནི་ཐོག་མ་མེད་དུས་ནས། །རང་བཞིན་ཡང་དག་རྟག་ཟློ་ཡང་། །བླ་མ་ཡང་དག་མ་བསྟེན་པར། །དོན་འདི་རྟོགས་པར་མི་འགྱུར་རོ། །དེ་ནི་ཡང་དག་ཤེས་ནས་ནི། །བསྒོམ་པའི་བར་ཆད་ཕྱི་རོལ་གྱི། །བཟླས་པ་ཡོངས་སུ་སྤང་བར་བྱ། །བཟླས་པའི་ངོ་བོ་ཆེན་པོ་མཆོག །རྡོ་རྗེ་འཆང་བ་བརྗོད་མེད་སྐུ། །བསམ་བརྗོད་ཡུལ་ལས་རབ་འདས་པས། །ངག་གིས་ཇི་ལྟར་བཟླས་པ་བྱེད། །དེ་བས་གླང་ཆེན་རྙེད་གྱུར་པ། །རྗེས་ཀྱིས་དེ་ལ་ཅི་ཞིག་བྱ། །དོན་དེ་ལ་གནས་རྣལ་འབྱོར་ཆེ། །ཕྱི་རོལ་ཡང་ནི་རྟེན་མི་འགལ། །གླང་པོ་ཆེ་ཡི་སྟོབས་ཀྱིས་ནི། །བུད་ཤིང་འབྱུང་བ་ལྟ་བུའོ། །དེ་བས་རྡོ་རྗེའི་བཟླས་པ་མཆོག །འབད་པས་བདེ་གཤེགས་ཐམས་ཅད་ཀྱི། །བྱིན་རླབས་ཉིད་ནི་འོང་བས་ན། །ཕྱག་རྒྱ་ཆེན་པོ་འགྲུབ་པ་ཡི། །མཚན་མ་ཡང་དང་ཡང་འབྱུང་འགྱུར། །དེ་འབྱུང་ཆོ་ག་ལ་གནས་པས། །སྐད་ཅིག་གིས་ནི་ཀུན་མཁྱེན་ཆེ། །རྒྱུད་ལས་རབ་ཏུ་འཕོ་བར་ནི། །ཐེ་ཚོམ་མེད་པར་ངེས་པས་ན། །ཆོ་ག་འདི་ལ་རབ་ཏུ་འབད། །དེ་ལྟར་དགའ་གསུམ་བྱེ་བྲག་གི །ཐིག་ལེ་རྣམ་གསུམ་བསྒོམ་པ་ཡི། །ཆོ་ག་ཡང་དག་བསྟན་པའོ། །ད་ནི་གཉིས་མེད་ཡེ་ཤེས་ཉིད། །ཀུན་རྫོབ་གཟུགས་ལ་བརྟེན་ནས་ཀྱང་། །མི་གཡོ་ལ་སོགས་གཡོ་དང་བཅས། །ཚང་སོགས་ལྷ་དང་ལྷ་མིན་སོགས། །ཐམས་ཅད་རབ་ཏུ་མི་སྣང་ཡང་། །ཐིག་ལེ་འགོག་པར་མི་འགྱུར་ཏེ། །རྒྱུ་དང་མི་རྒྱུར་བཅས་པ་ཀུན། །སླར་ཡང་དེ་ལས་འབྱུང་བར་བྱེད། །དེ་ལས་སྐྱེ་བོ་རྣམས་ཀྱིས་ནི། །ཡང་དག་མ་རྟོགས་པ་ཡི་ཕྱིར། །ཚངས་པའི་སྒོ་ང་ལས་སྐྱེས་པར། །འཁྲུལ་པས་ཆོས་རྣམས་ཀྱིས་མི་བསྒུལ། །གང་གིས་ཀྱང་ནི་མི་ཤིགས་པ། །ཇི་སྲིད་འདི་ནི་ལུས་གནས་པས། །ལས་དང་ལས་མིན་རབ་བྱེད་པ། །བརྟན་པོ་འཇིགས་པ་རབ་སྤངས་པའི། །མི་ཤིགས་ཐིག་ལེ་བསྒོམ་པར་བཤད། །ཚངས་པའི་སྤྱོད་པ་བཞི་པོ་དང་། །ཕྱི་རོལ་སྟོང་བཅས་ལ་སོགས་པ། །རང་གི་ལྷ་རུ་བསྐྱེད་ནས་ཀྱང་། །ཕྱག་རྒྱ་བཞིས་ནི་རྒྱས་བཏབ་པ། །སྔ་མ་བཞིན་དུ་ཤེས་བྱས་ནས། །རིམ་པ་འདི་ཡི་ཐིག་ལེ་ལ། །རང་གི་སེམས་ནི་ཡང་དག་བཟུང་། །རང་གི་ཡེ་ཤེས་སེམས་དཔའ་ཡི། །མཚན་མའི་དབུས་གནས་ས་བོན་ལས། །འོད་ཟེར་ལྔ་འཕྲོས་དེ་ཡི་རྩེ། །དཀྱིལ་འཁོར་འཁོར་ལོ་དཔག་མེད་སྤྲུལ། །དེ་ཡིས་ཁམས་ཀུན་ཁྱབ་བྱས་ནས། །དབུགས་ཀྱི་རྟ་ཞོན་ཀུན་རྟོག་རྣམས། །རྣམ་པར་བསལ་ཏེ་དེ་དག་ཀྱང་། །དཀྱིལ་འཁོར་འཁོར་ལོ་རབ་བྱས་ཏེ། །གཉིས་པའི་དཀྱིལ་འཁོར་བསྡུ་བྱས་ནས། །ཡེ་ཤེས་ངོ་བོ་སྣ་བུག་གཡོན། །ཞུགས་བྱས་མཚན་མའི་དབུས་གནས་བྱ། །ས་བོན་ལ་ནི་ཐིམ་པས་ཀྱང་། །དེ་ནི་ཕྱོགས་དུས་གནས་པ་ཡི། །སངས་རྒྱས་ཡོན་ཏན་ཅི་གསུངས་པ། །ཡང་དག་སྐྱེད་བྱེད་མི་ཤིགས་པའི། །ཐིག་ལེ་འོད་ཟེར་ལྔ་འབར་བ། །རྣམ་པར་གསལ་བྱས་དེ་ལས་ཀྱང་། །འོད་ཟེར་འབྱུང་བས་རབ་གནས་ཀྱང་། །ཡེ་ཤེས་སེམས་དཔའི་ནང་གསལ་ཏེ། །དེ་ཡི་ཕྱི་ཡི་དཀྱིལ་འཁོར་དང་། །ནང་ནི་གསལ་བྱ་དེ་ལས་བྱུང་། །མཐེ་བོའི་རྩ་དང་རྗེ་ངར་དང་། །བརླ་གཉིས་དང་ནི་གསང་བའི་གནས། །ལྟེ་བ་དང་ནི་གསུས་པ་དང་། །ནུ་མ་གཉིས་དང་ལག་རྩེ་དང་། །མགྲིན་པ་དང་ནི་མཆུ་གཉིས་དང་། །འགྲམ་པ་གཉིས་དང་མིག་གཉིས་དང་། །རྣ་བའི་རྩ་དང་སྤྱི་བོ་དང་། །ཚིགས་ཀུན་ཐིག་ལེ་ཨཱཿསོགས་ཀྱི། །གཟུགས་སུ་གནས་པ་བསྒྲུབ་བྱས་ནས། །མི་ཤིགས་ཐིག་ལེ་ཐིམ་པར་བྱ། །དེར་ནི་རང་གི་སེམས་ཅུང་ཟད། །གཟུང་བས་རྟེན་དང་རྟེན་ཅན་གྱི། །འཁོར་ལོ་མོས་བྱས་དེ་དབུས་སུ། །མི་ཤིགས་ཐིག་ལེ་ཡེ་ཤེས་པ། །སྣང་བའི་ངོ་བོ་བསྒོམ་པར་བྱ། །དེ་ཡི་འོད་ཀྱིས་ངང་གནས་སོགས། །གསལ་བྱས་ཡེ་ཤེས་ཐིག་ལེ་ཡི། །ནང་གསལ་བཞག་པའི་འོད་ཟེར་གྱིས། །ཕྱོགས་བཅུའི་འཇིག་རྟེན་ཁམས་བཞུགས་པའི། །སྤྱན་སྔར་བདུད་རྩི་ཞུ་བྱས་ནས། །ཞལ་དུ་ཞུགས་ནས་སྙིང་ག་ཡི། །མི་ཤིགས་ཐིག་ལེར་རབ་སོང་སྟེ། །ཀྵུཾ་གཟུགས་བདུད་རྩིར་རབ་བླངས་ནས། །རྡོ་རྗེའི་ལམ་ནས་ཕྱུང་ནས་སུ། །འོ་མའི་རྒྱུན་ལྟར་ཕྱོགས་བཅུ་ནས། །འོངས་པ་ཡིས་ནི་སེམས་ཅན་དང་། །སངས་རྒྱས་རྣམས་དང་མི་རྒྱུར་བཅས། །ཡང་དག་བསྡུས་ནས་གུར་སོགས་ཞུགས། །དེ་བཞིན་ཆོས་དབྱིངས་ཕྱག་རྒྱ་དང་། །རྟེན་གྱི་འཁོར་ལོ་ཞུགས་བྱས་ནས། །དེ་དག་ཡང་ནི་རང་བསྡུས་ཏེ། །དཀྱིལ་འཁོར་དུ་ནི་རབ་བསྡུས་ནས། །དེ་ཡང་བདག་ལ་བསྡུ་བྱས་ཏེ། །བདག་ཉིད་ཀྱང་ནི་མི་སྣང་བར། །ཡེ་ཤེས་སེམས་དཔའི་གནས་ལ་དམིགས། །དེ་ཡང་འཁོར་ལོ་འཁོར་ལོ་ཡང་། །ཡེ་ཤེས་སེམས་དཔར་ཞུགས་པར་བྱ། །ཡེ་ཤེས་སེམས་དཔའ་མི་སྣང་ནས། །མཚན་མ་འབའ་ཞིག་ལ་དམིགས་བྱ། །མཚན་མ་དེ་ཡང་བསྡུ་བྱས་ནས། །མི་ཤིགས་ཐིག་ལེར་སེམས་བཟུང་སྟེ། །དེ་ལས་ཡང་ནི་ནང་གི་ཚོགས། །ཀུན་བསྡུས་རང་སྣང་ཐིག་ལེ་ཆེ། །འབའ་ཞིག་ལ་སེམས་ཡང་དག་བཟུང་། །ཅི་ལྟར་ནུས་བཞིན་བསྒོམ་པས་དེར། །སེམས་ནི་ཡང་དང་ཡང་དུ་ཞུགས། །ཡང་ནི་དེ་ལས་ཕྱིར་བྱུང་སྟེ། །དེ་ཡི་གནས་དང་རང་གི་ལུས། །དམིགས་ནས་དཀྱིལ་འཁོར་འཁོར་ལོ་དང་། །རྟེན་དང་ཁམས་གསུམ་སྣང་བར་བྱ། །དེ་ནས་ཡང་ནི་གོང་མ་ལྟར། །རིམ་པར་བཅུ་གནས་ཐིམ་བྱས་ལ། །སེམས་ནི་ཐིག་ལེར་བཞག་པར་བྱ། །རང་གི་དབང་པོ་དེར་བཟུང་ནས། །ས་ཡི་དཀྱིལ་འཁོར་ཆུ་ལ་ཞུགས། །ཆུ་དེ་མེ་ལ་དེ་བཞིན་ཞུགས། །མེ་ཡང་རླུང་ལ་རབ་ཏུ་ཞུགས། །རླུང་ཡང་སེམས་ལ་ཞུགས་པར་གྱུར། །སེམས་ནི་གཉིས་མེད་ཡེ་ཤེས་སུ། །ཅུང་ཟད་ཞུགས་པས་རྟགས་གནས་པ། །སྨིག་རྒྱུ་འདྲ་དང་དུ་བ་དང་། །མར་མེ་མཁའ་སྣང་རབ་འདྲ་བ། །སྤྲིན་མེད་ནམ་མཁའ་ལྟར་སྣང་བའི། །མཚན་མ་ལྔ་པོ་འབྱུང་བར་འགྱུར། །རྡོ་རྗེ་སེམས་དཔའ་ཞུགས་ཕྱིར་རོ། །ཐིག་ལེ་ལ་ནི་སེམས་བཟུང་སྟེ། །གླལ་ཞིང་རྒོད་དང་འདར་ལ་སོགས། །རྣལ་འབྱོར་དེ་ལ་གང་ཚེ་འབྱུང་། །ཐིག་ལེ་ཡང་དག་སྤྲོ་བྱས་ནས། །གོང་མའི་རིམ་པས་ཀུན་ཁྱབ་བྱ། །འདི་ནི་ཡང་དག་གོམས་བྱས་པས། །མི་གནས་མྱ་ངན་འདས་པ་ཆེ། །ཐབས་ཀུན་གྱི་ནི་བསྒྲུབ་བྱ་མཆོག །རྡོ་རྗེ་འཆང་བ་ཆེན་པོ་ཐོབ། །འདི་ནི་ལྷན་ཅིག་སྐྱེས་པ་ཡི། །ཡེ་ཤེས་འབའ་ཞིག་དབང་བྱས་ནས། །རིམ་པ་གཉིས་པ་བསྒོམ་པའི་ཐབས། །མི་ཤིགས་ཐིག་ལེ་བསྒོམ་པའོ། །དེ་ལྟར་ཆོས་ཀུན་དེ་བཞིན་ཉིད། །དཔག་མེད་དམ་པའི་ཕུན་སུམ་ཚོགས། །དེ་དམིགས་ཡང་དག་སྐྱེས་གྱུར་པ། །བསྒོམ་པའི་ཆོ་ག་རྣམ་བཤད་ནས། །རྣམ་གྲངས་དག་ཀྱང་ཡོངས་སུ་བསྟན། །དེ་བཞིན་ཉིད་དང་ཡང་དག་མཐའ། །བསམ་གྱིས་མི་ཁྱབ་པ་ཡི་དབྱིངས། །ཆོས་ཉིད་དང་ནི་ཆོས་སྐྱོན་མེད། །སྟོང་པ་ཉིད་དང་མཚན་མ་མེད། །སྨོན་པ་མེད་པ་ཉིད་དང་ཡང་། །ཉོན་མོངས་ཁུར་ཆེན་འདོར་བྱེད་པ། །སྐྱེ་བ་མེད་དང་འོད་གསལ་བ། །མངོན་པར་བྱང་ནི་ཆུབ་པ་དང་། །གཞན་གྱི་སེམས་ཤེས་བྱེད་པ་དང་། །ལྷ་ཡི་རྣ་བ་སྟེར་བ་དང་། །དེ་བཞིན་ལྷ་ཡི་མིག་སྟེར་དང་། །རྫུ་འཕྲུལ་དཔག་མེད་སྤྲུལ་ཆེན་དང་། །དངོས་པོ་མཐར་ནི་ཕྱིན་པ་དང་། །དོན་དམ་པ་ཡི་བདེན་པ་དང་། །རྫོགས་པ་ཡི་ནི་རིམ་པ་དང་། །ཡོངས་སུ་དག་པའི་སྐུ་གཙང་དང་། །ཀུན་གྱིས་བསྟེན་བྱ་ཉིད་དག་དང་། །མཁའ་ལྟར་རྣམ་པར་དག་པ་དང་། །གློ་བུར་དྲི་མས་མི་གོས་དང་། །གདོད་ནས་འོད་གསལ་བ་ཉིད་དང་། །གང་གིས་ཀྱང་ནི་མི་ཤིགས་དང་། །དངོས་པོ་མེད་པ་ཉིད་དང་ནི། །རྒྱུ་སོགས་བཅུ་གཉིས་འབྱུང་བྱེད་དང་། །དཔལ་ཆེན་ཡེ་ཤེས་ཡོངས་དག་དང་། །ཐིག་ལེ་ཆེན་པོ་ཡང་དག་དང་། །སངས་རྒྱས་ཀུན་གྱི་གསང་ཆེན་དང་། ནམ་མཁའ་ནམ་མཁའི་སྤྱོད་ཡུལ་དང་། །བསྒོམ་པ་མེད་པ་ཉིད་དང་ནི། །རྗེ་བཙུན་མན་ངག་ཆེན་པོ་དང་། །སྣ་ནས་རྣ་བར་འཕོ་བྱེད་དང་། །ཉན་ཐོས་ཀྱིས་ནི་ཤེས་མིན་དང་། །རང་སངས་རྒྱས་སོགས་མི་ཤེས་དང་། །ཡི་གེ་མེད་པ་ཉིད་དང་ནི། །ཚིག་དང་བྲལ་དང་བརྗོད་མེད་སོགས། །དེ་ལ་མདོ་དང་རྒྱུད་རྣམས་ལས། །དེ་འདྲ་རྣམ་པ་མཐའ་ཡས་པ། །གསུངས་ཤིང་ཡང་དག་གསུང་འགྱུར་བ། །དེར་ནི་དེ་བཞིན་ཉིད་འདི་ལས། །གཞན་ནི་ཅིར་ཡང་མ་གསུངས་སོ། །དེ་བས་དད་པ་སྔོན་འགྲོ་བའི། །སེམས་ཀྱིས་ཆོས་ཀུན་དེ་བཞིན་ཉིད། །ཟབ་གསལ་གཉིས་མེད་དོན་ཆེན་པོ། །རིམ་པ་གཉིས་པ་དེ་ཁོ་ན། །བླ་མའི་གསུང་ནི་ཡང་དག་གཟུང་། །དེ་བཟུང་གོང་མའི་རིམ་པ་ཡིས། །རྟག་ཏུ་གོམས་བྱེད་སྐྱེས་བུ་གང་། །དེ་ལ་བརྟེན་པའི་རྟགས་སྐྱེས་ནས། །ས་ནས་སར་ནི་འཕར་བ་ལྟར། །དེ་ཡི་རྣམ་པ་གོང་དུ་འཕེལ། །རིག་འཛིན་ལ་སོགས་སྤྲུལ་པ་ཡིས། །གཞན་ནི་དོན་དེ་ལ་སྦྱོར་བྱེད། །དེ་ཡིས་བརྟན་འགྱུར་རྣལ་འབྱོར་པ། །སྒྲུབ་པའི་བདག་ཉིད་ཅན་དུ་འགྱུར། །བདག་ཉིད་ཅན་དེས་བསྒྲུབ་པའི་མཆོག །ཇི་སྐད་གསུངས་པ་བརྩམ་པར་བྱ། །ལྷ་མོ་ཀླུ་མོ་གནོད་སྦྱིན་མོ། །མི་མོ་མི་འམ་ཅི་མོའམ། །མཁའ་འགྲོ་མ་ལ་སོགས་པ་རྣམས། །རང་གི་ནུས་པས་བརྩམ་པར་བྱ། །སྨྱོན་པའི་བརྟུལ་ཞུགས་ལ་སོགས་པས། །ཟླ་དྲུག་སོགས་པར་རབ་ཏུ་འབད། །དེ་ཡིས་རྗེ་བཙུན་ཡིད་མེད་པ། །དཔལ་ལྡན་སངས་རྒྱས་ཀུན་ངོ་བོ། །རྡོ་རྗེ་འཛིན་པ་ཐམས་ཅད་གནས། །ཆོས་ཀུན་དེ་བཞིན་ཉིད་ཟབ་པ། །སངས་རྒྱས་རྣམས་ཀྱི་བསྒྲུབ་བྱ་མཆོག །གོང་མའི་རིམ་པ་རྣལ་འབྱོར་པས། །འབད་པ་ཆེ་ཐང་རབ་བྱས་པས། །དེ་ལྟར་དེ་རུ་མཚན་ཉིད་ཀྱི། །ཚུལ་དུ་ཅུང་ཟད་རབ་གནས་པའི། །དགའ་དང་དགའ་བ་བར་མ་དང་། །དགའ་དང་བྲལ་བའི་དུས་སུ་ཡང་། །ཇི་བཞིན་གནས་པའི་དགའ་བ་གསུམ། །ཇི་སྐད་གསུངས་པ་ཐོབ་པར་འགྱུར། །དེ་ནས་མཐའ་མེད་འཁོར་བའི་བར། །རྟག་པ་དང་ནི་མི་གདུང་དང་། །བསིལ་བ་དང་ནི་གཅིག་པ་དང་། །བདེ་བ་དང་ནི་དྲི་མེད་དང་། །དགའ་བ་དང་ནི་ཡིད་དགའ་བ། །འདི་ནི་བདེ་ཆེན་རོ་མྱང་བརྒྱད། །བདག་པོ་རྡོ་རྗེ་འཆང་བ་མཆོག །རྫོགས་པའི་རིམ་པའི་རྣལ་འབྱོར་པས། །བྱ་བ་བྱས་པ་བྱེད་པ་བྱས། །དབང་ཕྱུག་ཆེན་པོ་ཁུར་ཆེན་པོར། །ཚེར་མ་དཀྲུགས་པ་ཐམས་ཅད་མཁྱེན། །སྐྱེས་བུ་དཔའ་བོ་ཅང་ཤེས་པ། །གླང་པོ་ཆེན་པོ་དུལ་བ་པོ། །འཁོར་བའི་མཐའ་ནི་ཕ་རོལ་སོན། །དོན་དམ་དང་ནི་ཀུན་རྫོབ་ཀྱི། །བདེན་པ་གཉིས་མེད་རྣལ་འབྱོར་ཆེ། །ཐ་བ་སྤངས་པའམ་ལམ་ཀུན་རྫོགས། །ཡོན་ཏན་འབྱུང་གནས་ཀུན་ཏུ་བཟང་། །ཐམས་ཅད་འདུས་པའི་དེ་ཁོ་ན། །སྐུ་སོགས་ཁམས་ཀུན་འགེངས་པའོ། །གོང་ན་མེད་པ་ཡང་དག་གནས། །དེ་ལྟར་དེ་སོགས་རབ་གྲགས་པ། །མིང་ནི་རྣམ་པ་མཐའ་ཡས་པ། །གཉིས་མེད་ཡེ་ཤེས་མཚོན་པ་སྟེ། །མདོ་དང་རྒྱུད་རྣམས་ཐམས་ཅད་དུ། །བློ་ལྡན་རྣམས་ཀྱིས་རྟོགས་པར་བྱ། །ས་བཅུ་དང་ནི་རབ་ལྡན་པའི། །གོང་མའི་ལྷ་མོ་རྡོ་རྗེ་འཛིན། །དགེ་བ་བཅུ་གསུམ་ལ་གནས་པ། །སྐད་ཅིག་གིས་ནི་ཡང་དག་ཏུ། །སྒྲིབ་བྲལ་དེ་ཡིས་རྟོགས་པར་བྱེད། །ཕྲེང་བ་ཧ་ར་ནུ་འབུར་སོགས། །མདོག་དང་ཀུ་ཙ་ལ་སོགས་པ། །པདྨ་བཏགས་པའི་དགའ་ཤེས་པ། །དང་པོ་རབ་ཏུ་ཤེས་པར་བྱ། །ཥཛྛ་རཱི་ནི་ཥཱ་ན་སོགས། །གླུ་དབྱངས་བསྟོད་དང་སིང་སྒྲ་ཡི། །སྙན་པའི་དབྱངས་ཀྱིས་དགའ་འགྱུར་བས། །གཉིས་པ་རུ་ནི་ཤེས་པར་བྱ། །ཙནྡན་ལ་སོགས་སྣ་ཚོགས་དྲིས། །ལུས་བྱུག་ལྷན་ཅིག་རྩེན་བྱེད་ཚེ། །དགའ་བ་ཡང་དག་ཐོབ་བྱེད་པ། །གསུམ་པ་རུ་ནི་ཤེས་པར་བྱ། མ་མཆུའི་སྦྲང་རྩིས་གཞིབ་བྱས་པས། །མགོར་གནས་བྱང་ཆུབ་སེམས་འགྱུ་བས། །རོ་འཐུང་དགའ་བས་བདག་མཉེས་པས། །བཞི་པར་རབ་ཏུ་ཤེས་པར་བྱ། །ལུས་ལ་བྱུག་ཅིང་སྣ་ཚོགས་ཀྱི། །སྤྱོད་པས་རྩེན་ཚེ་རེག་བྱ་ཡིས། །ཡང་དག་དགའ་བར་བྱེད་པས་ན། །ལྔ་པ་རུ་ནི་ཤེས་པར་བྱ། །དེ་ཡིས་ཡེ་ཤེས་རྣམ་པ་གསུམ། །རིག་པར་བྱེད་ཅིང་རང་གི་ཡིད། །ཡང་དག་དགའ་བར་རབ་བྱེད་པ། །དྲུག་པར་ཤེས་བྱ་རྣལ་འབྱོར་པས། །དེ་ཡི་ལུས་ནི་བདག་གི་ནི། །རྟེན་དུ་གནས་པ་སྲ་བ་ཡིས། །ཡང་དག་དགའ་བར་བྱེད་པས་ན། །བདུན་པ་རུ་ནི་ཤེས་པར་བྱ། །དེ་ཡི་པདྨའི་ཟིལ་སོགས་དང་། །བྱང་སེམས་རླན་གྱིས་རང་གི་སེམས། །རབ་ཏུ་དགའ་བར་བྱེད་པས་ན། །བརྒྱད་པར་རབ་ཏུ་ཤེས་པར་བྱ། །གསང་གནས་དྲོད་སོགས་ཚ་བ་ཡིས། །བདག་གི་ཡིད་ནི་ཡང་དག་པར། །དགའ་བ་བྱེད་པའི་མཆོག་ཡིན་པས། །དགུ་པ་རུ་ནི་ཤེས་པར་བྱ། །དེ་ནས་བསྐྱོད་པས་ཡེ་ཤེས་མེས། །ཕུང་པོ་ཁམས་སོགས་སྲེག་བྱེད་པས། །ཡིད་ནི་ཡང་དག་དགའ་འགྱུར་བས། །བཅུ་པར་རབ་ཏུ་ཤེས་པར་བྱ། །བཅུ་པོ་དེ་ཡིས་དང་པོ་དང་། །ཕྱིས་ཀྱི་འབྲས་བུ་མཆོག་འགྱུར་བ། །གང་དུ་གསུངས་པ་རབ་ཐོབ་སྟེ། །དེ་བས་དེ་འདྲའི་དོན་ཆེན་ལ། །ཡང་དག་འཇུག་པར་མི་ནུས་པའི། །གདུལ་བྱ་རྣམས་ལ་བདེ་གཤེགས་ཀྱིས། །རབ་ཏུ་དགའ་སོགས་མཚན་ཉིད་དུ། །བསྟན་ནས་དེ་ཡི་དོན་ཞུགས་པས། །དེ་ཡིས་རྟོགས་ཀྱང་བླ་དང་བཅས། །དེ་ཉིད་དང་པོའི་རྣལ་འབྱོར་ལ། །རྟེན་དང་རྟེན་ཅན་དཀྱིལ་འཁོར་གྱི། །འཁོར་ལོ་རབ་ཏུ་བརྟན་བྱས་ནས། །དེ་ཞུགས་དེ་ལ་བརྟན་བྱས་པས། །རྟོགས་ཀྱང་དོན་འདི་མ་ཤེས་ན། །ཡང་དག་སངས་རྒྱས་མ་ཡིན་ནོ། །འདི་ནི་རང་བྱུང་བཅོམ་ལྡན་འདས། །གཅིག་པུར་རབ་ཏུ་ཆེ་བའི་ལྷ། །ལྷག་པའི་ལྷ་ཞེས་བྱ་བ་ནི། །བཅུ་གསུམ་པ་ཞེས་བྱ་བར་བཤད། །དེ་ལྟར་རིམ་པ་གཉིས་པ་ཡི། །དེ་བཞིན་ཉིད་ནི་ཐབས་བཅས་པའི། །བདུད་རྩི་མཆོག་འདི་རྣལ་འབྱོར་གང་། །འཐུང་བར་བྱེད་པ་སངས་རྒྱས་ཀྱི། །དེ་ཡི་སྲས་སུ་ངེས་པ་སྟེ། །བྱང་ཆུབ་སེམས་དཔའ་རྣམས་ཀྱི་གྲོགས། རིག་པ་འཛིན་པའི་དཔོན་པོ་སྟེ། །མཁའ་འགྲོ་མ་ཡི་ཁྱོ་རུ་འགྱུར། །ཉན་ཐོས་རང་འདྲེན་རྣམས་ཀྱི་ནི། །འདྲེན་པར་བྱེད་པའི་གཙོ་བོ་སྟེ། །སེམས་ཅན་ཕལ་པའི་རྗེ་བཙུན་ནོ། །དེ་ལ་ཕྱོགས་བཅུ་ཁམས་བཞུགས་པའི། །སངས་རྒྱས་བྱང་ཆུབ་སེམས་དཔའ་དང་། །རིག་པའི་ལྷ་དང་ཁྲོ་བོ་སོགས། །མེ་ཏོག་ལ་སོགས་མཆོད་པ་བཅས། །ཞག་གཅིག་སྐྱ་རེངས་དང་པོ་དང་། །ཕྱེད་ནི་དྲོས་པའི་དུས་ཉིད་དང་། །ཆལ་ཆིལ་མཚམས་སུ་ནམ་མཁའ་ལས། །མཆོད་པ་བྱས་ནས་སྔགས་བརྗོད་ཅིང་། །རང་གི་ཞིང་དུ་འགྲོ་བར་འགྱུར། །དེ་བས་དག་པའི་ལྷ་རྣམས་ཀྱང་། །དེ་བཞིན་དུ་ནི་མཆོད་བྱེད་ན། །མ་དག་པ་ཡི་ལྷ་རྣམས་ནི། །དེ་ལ་ཅི་ཡི་ཕྱིར་མི་མཆོད། །སེམས་ཅན་ཕལ་པ་གཞན་གྱིས་ནི། །མེ་ཏོག་སྙིམ་པ་བཀང་ནས་ནི། །མགྲིན་པ་དམའ་བས་ཞབས་འདུད་ཅིང་། །རྟག་ཏུ་བཀུར་བར་ཤིན་ཏུ་འོས། །དེ་ནི་སྐྱེས་བུ་རྐང་གཉིས་གཙོ། །ཀུན་མཁྱེན་རྣམས་ཀྱིས་བཞག་པ་སྟེ། །ཕྱིར་ལོག་ཁུར་ཆེན་པོར་བྱེད་པས། །མ་འོངས་རྡོ་རྗེ་འཆང་བ་སྟེ། །དེ་ལ་བརྙས་བྱེད་སེམས་ཅན་གང་། །སྒྲུབ་པ་པོ་དེ་གླང་དང་འདྲ། །དེ་ཡིས་ང་ལ་བརྙས་བྱེད་པས། །ངས་ནི་དེ་ཀུན་དུས་ཀུན་སྤོང་། །ཅིག་ཤོས་ལུས་ལ་ང་གནས་ཕྱིར། །མཆོད་ཅིང་བརྗོད་པས་ལུས་རྣམས་ཀྱི། །སྒྲིབ་པ་དེ་ཡིས་དག་བྱེད་དོ། །རིམ་པ་གཉིས་འདིར་སྒྲུབ་པ་པོ། །རྩེ་གཅིག་པ་ཡིས་རྣམ་པར་གཟུང་། །དེ་བཟུང་ཚེ་འདི་ཉིད་ལ་ཡང་། །བརྟུལ་ཞུགས་ཆོ་ག་ཉིད་ཀྱིས་ནི། །ལྷ་མོས་རྐྱེན་ནི་རབ་བྱས་ཏེ། །ཕྱག་རྒྱ་ཆེན་པོ་རང་རྒྱུད་ལ། །འཕོ་བར་ཐེ་ཚོམ་མི་བྱའོ། །ད་ནི་རང་ཉིད་བྱིན་བརླབས་པའི། །རིམ་པ་འདི་ནི་རྣལ་འབྱོར་པ། །བྱ་བས་བསྐལ་པ་འགའ་ཞིག་ལ། །ཡང་དག་ཏུ་ནི་བཤད་པར་བྱ། །གང་ཞིག་བླ་མ་མཉེས་བྱས་ནས། །དེས་གནང་དམ་སྡོམ་བཅས་པ་རུ། །བུམ་པ་ལ་སོགས་རབ་ཐོབ་སྟེ། །བླ་མའི་ཞལ་ལས་རྙེད་པ་ཡི། །དེ་བཞིན་ཉིད་ནི་རབ་ཐོབ་ཅིང་། །གསང་དང་མཆོག་ཏུ་གསང་རིགས་པས། །ཇི་སྐད་བཤད་པའི་བྱ་བ་ཡིས། །ཡང་དག་བསྒོམ་ནི་མི་ནུས་པས། །ཇི་བཞིན་པ་ཡི་དེ་ཁོ་ན། །རིམ་པ་འདི་ཡིས་བསྒོམ་པར་བྱ། །གང་ཞིག་དུས་ནི་ཕྱི་ཞིག་ལ། །འཆི་བའི་མཚན་མ་བདག་གིས་མཐོང་། །འཆི་བར་གྱུར་པའི་དུས་བྱུང་ན། །ནད་ཀྱིས་ཡང་དག་མ་རྙོང་པར། །འཕོ་བའི་སྦྱོར་བ་ཡང་དག་བྱ། །དཔྲལ་བ་དང་ནི་ལྟེ་བ་དང་། །སྤྱི་གཙུག་དང་ནི་མིག་དང་ནི། །རྣ་བ་དང་ནི་སྣ་དག་དང་། །ཆུ་ཡི་གནས་དང་ཆུ་མིན་གནས། །ཁ་ཡི་གནས་དང་ཡེ་ཤེས་ཀྱི། །འགྲོ་འོང་གིས་ནི་རྟགས་ཤེས་བྱ། དཔྲལ་བ་གཟུགས་ཀྱི་ཁམས་ཀྱི་ནི། །རྟགས་སྐྱེས་པ་རུ་ཤེས་པར་བྱ། །ལྟེ་བར་འདོད་ཁམས་ལྷ་རྣམས་ཀྱིས། །རྟགས་བྱུང་དེ་རུ་སྐྱེ་བར་ངེས། །སྤྱི་གཙུག་གཟུགས་མེད་ཁམས་རྣམས་ཀྱི། །རྟགས་བྱུང་དེ་རུ་སྐྱེ་བར་འགྱུར། །རྣ་གཉིས་ཡེ་ཤེས་འཕོ་བ་ན། །གནོད་སྦྱིན་གནས་སུ་སྐྱེ་བར་འགྱུར། །སྣ་གཉིས་རིག་པ་འཛིན་པ་ཡི། །གནས་སུ་ངེས་པར་འགྲོ་བའོ། །མིག་གཉིས་ཀྱི་རྣམས་རྒྱལ་པོར་འགྱུར། །རྟགས་ནི་ཡང་དག་སྐྱེ་བར་འགྱུར། །ཁ་རུ་ཡེ་ཤེས་འཕོ་བ་ན། །ཡི་དྭགས་རྟགས་སུ་ཤེས་པར་བྱ། །ཆུ་གནས་དུད་འགྲོ་རྣམས་ཀྱི་ནི། །རྟགས་སུ་ཡང་དག་རབ་ཤེས་བྱ། །ཆུ་མིན་བུ་གར་ཡེ་ཤེས་འགྲོ། །དམྱལ་བའི་རྟགས་སུ་ཤེས་པར་བྱ། །དེ་ལྟར་ཡེ་ཤེས་འཕོ་བ་ཡི། །རྣམ་པའི་ཆ་ནི་ཤེས་བྱས་ནས། །སྒྲོགས་པ་ལྔ་ཡི་ཡི་གེ་ཡིས། །སྟེང་གི་སྒོ་བདུན་དགག་པར་བྱ། །ཆུ་ཡིས་སྒོ་རུ་སུཾ་གིས་དགག །ཆུ་མིན་ཀྵུཾ་གིས་དགག་པར་བྱ། །དེ་ལྟར་སྒོ་དགུ་བཀག་ནས་ཀྱང་། །རིམ་པ་འདི་ཡིས་རང་སེམས་ཀྱི། །གནས་ནི་རབ་ཏུ་བཙལ་བྱས་པས། །དབྱིངས་ཉིད་དུ་ནི་ངེས་པར་འགྲོ། །ཕུང་པོ་སྐྱེ་མཆེད་ཁམས་རྣམས་སུ། །རྣལ་འབྱོར་རྒྱུད་ཀྱིས་དཔྱད་པ་ལྟར། །རྣམ་པར་བསྒོམས་བྱས་ཡེ་ཤེས་སོ། །གོང་ན་མེད་པ་རྟོགས་པར་འགྱུར། །བདག་ཉིད་ཇི་སྐད་གསུངས་པ་བཞིན། །ལྷ་ཡི་ལུག་སུ་གྱུར་བྱས་པ། །ཆོས་ཀྱི་དབྱིངས་དང་རྣམ་ཤེས་དང་། །བདག་ཉིས་སངས་རྒྱས་སྐུར་བྱས་པའི། །གནས་ནི་རིན་ཆེན་སྣ་ཚོགས་པའི། །ཁ་དོག་སྣ་ལྔས་རབ་བརྒྱན་པའི། །རྡོ་རྗེ་རྩེ་མོ་དགུ་པ་མཆོག །བདག་གི་སྤྱི་བོའི་སྟེང་དུ་ནི། །བསམས་ནས་དེ་རུ་རང་གི་སེམས། །རྡོ་རྗེ་དཀར་པོ་བཅུ་ཚལ་ཙམ། །རྩེ་ལྔ་བསམས་ནས་བརྟག་པར་བྱ། །ཡར་གྱི་རྩེ་ལྔ་ཐབས་ལྔ་སྟེ། །དེ་བཞིན་མར་བལྟས་ཤེས་རབ་ལྔ། །དབུས་ཀྱི་བུམ་པ་རི་བོང་ཅན། །བསམས་ནས་དེ་རུ་ཡེ་ཤེས་ཆེ། །སེར་པོ་བྱང་ཆུབ་སེམས་འདྲ་བ། །འཛག་པའི་ངང་ཚུལ་དང་འདྲ་བ། །ཐིག་ལེ་ཙ་ན་ཀ་ཡི་འབྲུ། །ལྔ་འབྱོར་ཚད་དུ་བསྒོམ་པར་བྱ། །དེ་ནས་ཆོས་རྣམས་ཐམས་ཅད་ཀུན། །མེད་པར་བསམས་ནས་བདག་དམིགས་ཏེ། །བདག་ཀྱང་བདག་ལ་ཐིམ་བྱས་ནས། །སེམས་ཙམ་དེ་ཡང་མདའ་བཞིན་དུ། །སྤྱི་བོར་རྡོ་རྗེ་འོག་ཆ་ཡི། །སྦུ་གུར་ཞུགས་ནས་ཐིག་ལེར་ཐིམ། །དེ་ནི་དེ་བཞིན་གཤེགས་པ་རྣམས། །ལྷ་མོ་རྣམས་ཀྱི་རང་བཞིན་གྱི། །གནས་སུ་ཤེས་པར་རབ་ཏུ་བྱ། །དེ་ནི་གདོད་ནས་གྲུབ་པའི་གཟུགས། །དེ་རུ་ཤེས་པ་རབ་ཞུགས་པ། །སེམས་དེ་ཡང་དང་ཡང་དུ་གཟུང་། །དེ་ལས་སེམས་དེ་ཡར་བ་ལྟར། །རྡོ་རྗེ་རྩེ་དགུ་སྟེང་ཆ་ཡི། །སྦུ་གུར་བྱུང་ནས་སྣ་ཚོགས་ཀྱི། །པདྨར་ཟླ་བ་གནས་པ་ལ། །རྡོ་རྗེ་སེམས་དཔའི་སྐུར་གྱུར་ཏེ། །མཚན་དང་དཔེ་བྱད་ཀུན་བརྒྱན་ལ། །རྒྱན་ཀུན་བརྒྱན་པའི་ན་བཟའ་དང་། །བྲལ་ནས་ཤིན་ཏུ་གསལ་དམིགས་ཏེ། །དེ་གཉིས་མེད་པའི་སྦྱོར་བ་ཡིས། །བྱིན་རླབས་ལས་བྱུང་འཁོར་ལོ་ཆེ། །རྣམ་པར་འཕྲོ་ཞིང་འདུ་བར་བསམ། །དེ་ལྟར་རྣམ་པར་བསྒོམ་པ་མཆོག །ཡང་དང་ཡང་དུ་ཅི་ནུས་བསྒོམ། །བསམ་པ་དེ་ཡི་རྐྱེན་གྱིས་ནི། །བདག་སེམས་དབྱིངས་སུ་ཞུགས་པའི་ཚེ། །གསལ་ཞིང་རབ་དག་མཁའ་འདྲ་རྟོགས། །དེ་ནས་རྫུ་འཕྲུལ་ཤུགས་ལྡན་པ། །ལོ་ལྔ་ལོན་པའི་བྱིས་པའི་གཟུགས། །འགྲུབ་ཚེ་དཔེ་མེད་བདེ་རྫོགས་རྟོགས། །དེ་ལས་སྐྱེ་གནས་གཞན་དུ་ནི། །འཕེལ་བར་བྱེད་ཚེ་སྤྲུལ་པའི་གཟུགས། །ཡང་དག་ཏུ་ནི་རྟོགས་པར་འགྱུར། །དེ་ལྟ་བས་ན་སེམས་ཅན་གྱི། །བསམ་པ་གང་དང་གང་དག་གི། །མི་རྣམས་ཡིད་ནི་ཡང་དག་སྦྱོར། །དེ་དང་དེ་ནི་མདོ་བཞིན་དུ། །སྣ་ཚོགས་ནོར་བུ་ལྟ་བུར་འགྱུར། །ཆོས་སྐུ་རབ་དགའ་མཁའ་མཉམ་པ། །ཤི་དང་བརྒྱལ་དང་གཉིད་ལོག་དང་། །གླལ་དང་འཁྲིག་དུས་སྐད་ཅིག་ཙམ། །མྱོང་བར་འགྱུར་བས་རབ་བསྒོམས་ན། །ལུས་ཅན་རྣམས་ཀྱི་ཡིད་ནི་སྦྱོང་། །ཞེས་སོ། །འདི་ནི་དོན་ལྡན་འགའ་ཞིག་ལ། །ང་ནི་དེ་ཡི་ལུས་གནས་ཏེ། །སྒྲུབ་པ་གཞན་ལས་མཆོད་པ་ལེན། །དེ་ཡིས་དེ་མཉེས་རང་གི་རྒྱུད། །ལས་ཀྱི་སྒྲིབ་པ་དག་བྱེད་དོ། །ཞེས་སོགས་དང་། ཁྱོད་ཀྱང་ཟས་ཀྱི་སྤྱོད་པ་དང་། །ང་ལ་ཅུང་ཟད་འཁྲུལ་རྟོག་པས། །ཁྱོད་ཀྱི་ཚེ་འདི་ཉིད་ལ་ནི། །གཟུགས་བཅས་ཕུང་པོ་རང་ལུས་ནི། །གནས་ནི་ཡང་དག་མི་འགྱུར་ཏེ། །རྣམ་པར་ཤེས་པ་མི་ཤིགས་པ། །ཕྱག་རྒྱ་ཆེན་པོ་རབ་ཏུ་འགྲུབ། །དེ་བས་ཁྱོད་ཀྱི་ཡང་དག་བློས། །སངས་རྒྱས་ཀུན་གྱི་འདུས་པའི་རྒྱུད། །གསང་ཆེན་གསང་ལས་ཆེས་གསང་བ། །གོང་ན་མེད་པའི་ལུང་ཆེན་པོ། །འདི་ཡི་རིམ་པ་དང་པོ་ཡིས། །སྒྲུབ་པའི་ཐབས་དང་སྦྱིན་སྲེག་དང་། །གཏོར་མ་སྣ་ཚོགས་འཁོར་ལོ་དང་། །བསྡུས་པ་དང་ནི་རྣམ་བཤད་དང་། །དཀྱིལ་འཁོར་ཆོ་ག་ལ་སོགས་པ། །མི་ཤེས་མུན་བསྒྲིབ་སེམས་ཅན་གྱི། །ཐུར་མ་ལྟ་བུ་བརྩམས་པར་གྱིས། །ཞེས་སོགས་རྗེས་སུ་གདམས་ཏེ། དེ་ལྟར་རོལ་པའི་གར་བཅས་སྒྲ་བརྙན་ལྟ་བུ་རྡོ་རྗེའི་གླུ། །འཁོར་ལོར་བཅས་པ་དེ་ཉིད་གླུ་བླངས་བདག་ལ་བསྟོད་ཅིང་དེར། །ནམ་མཁའི་ཁམས་སུ་སྤྲིན་རྣམས་མེད་པ་ལྟ་བུར་ཐིམ་པར་གྱུར། །དགེ་སློང་བླ་མ་གཉིས་བཅས་དེ་ཡང་དེ་བཞིན་མི་སྣང་གྱུར། །རྡོ་རྗེ་གདན་གྱི་རྒྱབ་ནས་རྒྱང་གྲགས་ལྔ་བཅུ་སོར་བའི་སར། །པདྨ་ཏ་ཡི་ཕུག་ལ་བརྟེན་ཏེ་སེམས་ཅན་དོན་བྱའི་ཕྱིར། །འདི་བསྡུས་རབ་བྱེད་ཐམས་ཅད་བརྩམས་དང་སྟོན་སོགས་བྱས། །ཞེས་སོགས་རྒྱས་བར་བསྟན་ཅིང་། མཐར། དལ་འབྱོར་ལུས་འདི་ཤིན་ཏུ་གཡོ་སླ་བས། །ཇི་ལྟར་རླུང་གིས་མར་མེ་གསོད་པ་ལྟར། །སྐད་ཅིག་ཙམ་དུ་མི་སྡོད་དུས་འདའ་བྱེད། །དེ་བས་འདི་ནི་ཆུད་གསོན་མི་བྱ་སྟེ། །དངོས་ཀུན་དེ་ཉིད་མཆོག་ཆེན་རབ་བསྒོམ་བྱ། །ཞེས་དང་། དེ་ལྟར་རབ་ཏུ་ཤེས་པར་བྱས་ནས་སུ། །རྫོགས་པ་ཆེན་པོ་ཡེ་ཤེས་སྤྱི་ཡི་གཟུགས། །ཡོངས་སུ་དག་སྐུ་རྡོ་རྗེ་འཆང་ཆེན་པོ། །དཔལ་ལྡན་ཀུན་གྱི་ངོ་བོ་རིམ་གཉིས་འདིས། །སྡུག་བསྔལ་ལམ་བཅས་བསྐལ་པ་གསུམ་དུ་ཡང་། །རང་གི་རྗེས་མཐུན་བྱང་ཆུབ་བླ་དང་བཅས། །ཐོབ་ནས་དེ་བདེ་ཅུང་ཙམ་རབ་ཚོགས་པ། །རྣལ་འབྱོར་དེ་ཡིས་ཅི་ཕྱིར་དེ་མི་སྒོམ། །ཞེས་དང་། འདི་ནི་རང་བཞིན་འགྲུབ་པའི་མན་ངག་ལས། །བརྒྱུད་པའི་བླ་མ་ཡང་དག་རབ་བརྟེན་དང་། །རང་གི་བསོད་ནམས་ཚོགས་ནི་སྔོན་བསྐྱེད་པས། །རྟོགས་པར་རབ་ཏུ་འགྱུར་བ་མ་རྟོགས་པར། །བསོད་ནམས་ཆུང་བས་བསྐལ་པ་དཔག་མེད་པར། །འདི་ནི་མི་རྟོགས་འདི་དོན་མ་རྟོགས་ན། །རྣལ་འབྱོར་ཆེ་ཞེས་དེ་ལ་མི་བྱའོ། །ཞེས་སོགས་དང་། ཐེ་ཚོམ་སོམ་ཉི་མེད་པར་དད་པ་ཡིས། །འདི་དོན་གྲུབ་པས་ཡང་དག་བླངས་བྱས་ནས། །ཤེས་རབ་ཀྱིས་ནི་ཡང་དང་ཡང་དུ་རུང་། །དཔྱད་པས་བདག་ལ་གཉིས་མེད་ཡེ་ཤེས་ཆེ། །ཆུ་གཙང་ནང་དུ་ཟླ་བའི་དཀྱིལ་འཁོར་ལྟར། །འབྱུང་འགྱུར་འདི་ལ་ཐེ་ཚོམ་མ་བྱེད་ཅིག །ཅེས་གསུངས་སོ། །འདི་ཉིད་རྒྱ་གར་གྱི་མཁན་པོ་ཀ་མ་ལ་གུ་ཧྱ་དང་ལོ་ཙཱ་བ་མངའ་བདག་ཡེ་ཤེས་རྒྱལ་མཚན་གྱིས་བསྒྱུར་བ་སྣང་ངོ་། ། ༈

[edit]

sangs rgyas ye shes zhabs kyis mdzad pa'i de kho na nyid bsgom pa'i zhal lung rdo rje'i tshig gi dum bu 'ga' zhig khol du phyung ba/ sku tshe 'dir ye shes kyi sku mngon sum du brnyes pa'i slob dpon bud+d+ha dz+nyA na'i zhabs la/__rje btsun 'jam dpal rdo rje sprul pa'i dge slong du rol pas mngon sum du rjes su bzung nas gsungs pa'i rim pa gnyis pa'i de kho na nyid bsgom pa zhes bya ba'i zhal gyi lung las phyung ba'i rdo rje'i tshig gi dum bu 'ga' zhig bri bar bya'o/__/de nas yon tan kun 'byung o rgyan yul du bgrod/__/'jo sgeg rdo rje zhes rab mtshan gsol rab tu grags/__/sogs nas/__lho phyogs nam mkha'i shing ldan kang+ka na ru bgrod/__/grub pa'i dbang phyug pA li pA dar rab grags pa/__/rdzu 'phrul ldan pa'i slob ma'i tshogs dang rab tu bcas/__/de kun yo byad gos zas nor rgyun gyis sbyor ba/__/bla ma dam pa de drung lo dgur rab tu btud/__/'dus pa'i rgyud chen 'grel bcas bco brgyad rab tu mnyan/__/bdag gis ma rtogs bla ma chen pos de bzhin gsungs/__/'di ma rtogs par gzhan ni don med par bsam nas/__/glegs bam mgul btags byang phyogs yul du rab bgrod de/__/rdo rje gdan du ku ba rtsa zhes bya ba'i tshal/__/stag dang dred sogs mang zhing shin tu 'jigs pa'i sar/__/zla ba drug gnas pa yis chos rnams de nyid rtogs/__/sprul pa'i dge slong bla ma gnyis dang bcas pa phrad/__/mgo dang lag gnyis yol dang tshes brgyad rgyal la babs/__/ston zla ra ba'i tho rangs skya rengs shar dus su/__/'jam dpal dbyangs kyis dkyil 'khor 'khor lor sprul pa las/__/bdag gis don 'di blang phyir gsol ba rab tu btab/__/khyod ni sems can kun gyi yab ste yum yang yin/__/sogs nas/__rje btsun bdag la phan phyir sbas pa shod/__/ces la sogs sh+loka bdun gyis gsol ba btab pas/__de nas 'jam dbyangs byang chub sems dpa' chen po yis/__/bdag la 'dzum pa'i bzhin bcas legs zhes lan gsum gsungs/__/rol pa'i gar dang chos kun de bzhin nyid/__/sgra brnyan lta bu rdo rje'i glu yis bdag la bstan/__/a bi ya~M ra~M ba~M la~M hU~M a la la ho/__/rje btsun thugs rje can rnams kyis/__/'di rtogs pa yi bde gshegs kyis/__/phun sum tshogs pa 'thob 'gyur ba'i/__/'das dang da ltar ma byon pa'i/__/rdo rje 'dzin pas snod 'ga' la/__/gsungs shing gsung dang gsung 'gyur ba/__/yang dag don rab rab rtogs phyir/__/nga yis khyod la bstan par bya/__/yid gcig bsdus la mnyan par gyis/__/chos rnams gzugs la sogs pa rnams/__/kun mkhyen par gyi rang bzhin ni/__/nam mkha'i dkyil ltar rnam dag pa'i/__/zab gsal gnyis med ye shes de/__/de ni dngos med sgom dngos med/__/dngos po thams cad dang bral ba'i/__/khams dang skye mched kyis ma zin/__/rang bzhin gyi ni 'od gsal ba/__/gdod nas dag pa nam mkha' bzhin/__/med nas chos rnams mtshan nyid spangs/__/chos dang chos nyid kyang med de/__/dngos po med pas mkha' dang mtshungs/__/tshig dang yi ge kun las grol/__/de ni dus dang phyogs rnams dang /__/chos rnams kun gyi ngo bor song /__/lus ma yin te ngag dang ni/__/yid kyang ma yin 'dod khams dang /__/gzugs dang gzugs med khams ma yin/__/'byung chen bzhi yang ma yin te/__/de bas de ni gang na yang /__/mi gnas pas na mnyam pa nyid/__/de 'dra rdo rje 'chang chen po/__/chos rnams kun gyi chos nyid mchog__/thabs kyis bsgrub par bya ba'i dngos/__/brtag pa kun las rab dben pa/__/phun sum tshogs rgyud dpag dka' ba/__/phyag rgya chen po rab snang ba'i/__/zer gyis rang bzhin smin byed pa'i/__/de bzhin gnyis med rang bzhin mchog__/rdo rje 'dzin pa chen pos kyang /__/brjod du med pa'i sku chen po/__/de nyid rgyal sras zhing bcas dang /__/srid gsum rgyu dang mi rgyur bcas/__/thams cad kun gyi bdag nyid de/__/dngos kun gtso bo rang sems kyi/__/ngo bo nyid de de rtogs na/__/sangs rgyas byang chub de nyid do/__/'jig rten gsum yang de nyid do/__/'byung chen rnams kyang de nyid do/__/ci yi phyir na chos thams cad/__/sems la gnas te de nyid kyang /__/nam mkha' la gnas nam mkha' ni/__/gang du mi gnas 'od gsal ba/__/gzod nas rnam dag stong pa'o/__/sangs rgyas mya ngan 'das pa'i khams/__/skye med rdo rje mngon byang chub/__/bder gshegs kun gyi snying po mchog__/gnyis med rtog bral don chen te/__/rim pa gnyis par rab tu bshad/__/de 'dra'i don des dngos po kun/__/rnam par khyab ste rnam gnas kyang /__/thog med dus nas de las kyang /__/rnam rtog chen po'i byung tshul te/__/de las yang ni 'byung ba che/__/rlung gi dkyil 'khor nyid byung ste/__/de las kyang ni me yi khams/__/chen po byung nas khyab mdzad de/__/de las chu khams chen po yang /__/byung ste khyab mdzad de las kyang /__/sa byung bzhi bsdus ngo bo las/__/ri sogs sems can thams cad kyang /__/sna tshogs phra ba sbom po dang /__/skyes pa bud med ma ning dang /__/gzhon nu dang ni rgan po dang /__/lha dang klu dang gnod sbyin dang /__/gdon dang skar ma gshin rje dang /__/chu bdag brgya byin dmyal ba dang /__/yi dwags dud 'gro dang de kun/__/spangs dang shes rab tsam brten pa'i/__/'gro ba kun la rgyas par gnas/__/de bas de ni gong ma yi/__/gnyis med rtog bral rab bsgribs te/__/ma rtogs pas na 'gro ba kun/__/'khor bar rab tu 'khor bar 'gyur/__/de ni 'khor ba'i sdug bsngal che/__/dug chu lta bur 'khrul pa yis/__/rnam bsgrubs thag pa'i sbrul lta bur/__/snang zhing med pa nyid du 'dod/__/de bas gnyis med don chen po/__/rang rig dkyil 'khor chen po mchog__/rgyun dang rnam grangs kyis gnas pas/__/de yi ngo bo rtogs par bya/__/gang zhig de rtogs rab 'dun pa/__/sems kyi smon lam yang dag can/__/sngon du bsod nams mthu bskyed dang /__/skyes bu yang dag bzhi la brten/__/spro dang gus dang bsnyen bkur dang /__/'dun par ldan zhing sgom pa dang /__/brtan po som nyi rnam spangs pa/__/rjes mthun gtong phod des shes 'gyur/__/de yis rje btsun yang dag pa/__/mchog gi gdams ngag rgyud la ldan/__/theg chen lam gyi spyod pa dang /__/sgom pa la ni lhur len dang /__/de nyid bcu la sogs pa yi/__/gsang ba rab gsang shin tu gsang /__/shes shing de yi don gab par/__/ston byed bla ma mnyes par bya/__/yul dang mkha' dbyings khyim dang rta/__/glang po che sogs mal stan dang /__/chung ma sdug dang yid 'ong bu/__/bu tsha sring mo tsha mo sogs/__/gzhan yang gser dang dngul gyi rdzas/__/zangs lcags sogs las byas pa yis/__/mdzes pa'i rdzas dang mu tig gi__/phreng dang pad+ma rA ga dang /__/pu shel in+d+ra nI la dang /__/ma rgad g.yu sogs mchod pa'i tshogs/__/zhing 'di mkhas pas rab bkang ste/__/de 'dra'i rje btsun dbang po mchod/__/gsal zhing rab dga' mkha' mnyam pa/__/gzhan du rig par mi 'gyur bas/__/bud med sgyu ma'i phyag rgya ni/__/sgyu ma kun las khyad par 'phags/__/sgyu ma de yang 'jig rten 'dir/__/spyan la sogs pa rnam dag par/__/rigs ni rnam pa bzhir 'gyur te/__/ming dang mtshan nyid bshad par bya/__/ka ma lI dang shang+khI ni/__/tsi tra nI dang hasti nI/__/zhes sogs phyag rgya'i mtshan nyid rgyas par dang /__gong gsungs bu mo btsal nas kyang /__/bla ma la ni dbul bar bya/__/de nas bla ma de mnyes nas/__/de dang snyoms par zhugs pa yis/__/bde gshegs zhu gyur bcu drug cha/__/gyur pa bla ma'i kha ru lhung /__/zhes dang /__de nas de la rang byung gi__/chos sku rab dag mkha' mnyam pa/__/lhag pa'i lha zhes bya ba ni/__/rtogs bya'i phyir du bu mo byin/__/zhes sogs dbang bar pa gnyis dang /__khyad par dbang bzhi pa'i don shin tu rgyas par bstan te/__de yang /__nam mkha'i khams dang rdo rje sbyor ba las ni yang dag spyan can bde chen 'byung bar 'gyur/__/gang gang yang dag dga' byed chags bral dga' gnyis bar du bden gnyis mthong byas brtan par gyis/__/pad+ma'i mkha' la rdo rje nor bu pad snying gnyis la 'byor dang rdo rje skyil krung sems/__/nor bu'i bar du mthong byas gang de bde ba 'byung ba nges pa de nyid ye shes te/__/'di ni rdzogs pa'i rim pa yin par bla ma mchog rnams kun gyis yang dag bshad/__/'dod chags bral bar ma dmigs ye shes lha ni skad cig de ru bsams/__/chu tshod brgyad dam nyin gcig dang ni zla ba gcig tu 'am/__/lo gcig bskal pa'am bskal pa stong du ye shes de myong bya/__/pad+ma la gnas bdud rtsi'i khu ba blo gros can gyis kha yis blangs nas btung bya'o/__/de 'dra'i dngos po thams cad kyi/__/mtha' yi de nyid zab gsal ba/__/thog med dus nas so so yi/___/skye bo nga dang ngar 'dzin pas/__/ma brtags par ni bdag tu bzung /__/dus las byung dang 'dod rgyal dang /__/gnam gyis bskos dang gyi na dang /__/'dzin pa pos ni sprul pa dang /__/khams kun las ni nges 'byung dang /__/dbang phyug dang ni 'byin pa'o/__/dus dang gtso bo byed pa dang /__/byed pa po ni ma yin dang /__/rnal 'byor dang ni tshad ma dang /__/dag pa dang ni ma dag pa/__/nang nas brjod du med pa'i bdag__/skyes bu dang ni khyab bdag dang /__/srog dang gang zag rnam shes dang /__/kun gzhi dang ni shes pa po/__/mthong ba po dang gzung 'dzin dang /__/shes pa dang ni shes bya dang /__/shed las skyes dang shed bu dang /__/srog dang gso ba la sogs pa/__/mu stegs rnams kyis rnam par rtogs/__/nam mkha' dang ni 'gog pa gnyis/__/shin tu 'dus ma byas pa ste/__/shin tu brtan byas 'dus byas kun/__/skad cig ma ste bdag po med/__/phra rab rdul las grub pa ni/__/blo yi rnam pa med pa ru/__/kha che bye brag smra bas rtogs/__/rang gi rig pa skye byed pa/__/blta bya spyod yul rnam par ni/__/'dus ma byas pa gsum po dang /__/mo gsham bu bzhin med pa dang /__/'du byed thams cad bem rig dang /__/dus gsum rgyu ba ma yin dang /__/dman min thogs med gzugs su ni/__/mdo sde pa yis rab tu rtogs/__/yan lag can yang don dam min/__/rdul phran dag kyang de bzhin no/__/so sor snang ba mi dmigs pa/__/rmi lam lta bur mi snang ste/__/gzung 'dzin spangs pa'i ye shes te/__/don dam shel ltar dag pa ru/__/rnal 'byor spyod pas rab tu rtogs/__/so sor snang ba'i gzhung thams cad/__/don dam min te gcig pa dang /__/du ma'i rang bzhin bral ba'i phyir/__/nam mkha'i chu skyes bzhin du ni/__/gnyis med gnyis su med min zhi/__/shin tu dri med nam mkha' ltar/__/blo ldan dbu ma pa yis rtogs/__/de la rtogs te mtha' yas pa/__/don de kho na la gnas nas/__/tha dad so sor rtogs pa'o/__/de bas de dag thams cad kyang /__/yang dag min pas bla dang bcas/__/'og ma 'og ma'i rnal 'byor blo/__/gong ma gong mas khyad par 'phags/__/'og ma'i blo ni gong ma yi/__/shes rab kyis ni sun 'byin no/__/de bas gong ma'i rim pa yis/__/lhan cig pa yi slob dpon gyis/__/byin gyis brlab pa yang dag bya/__/gsal zhing rab dwangs nam mkha' 'dra/__/rang byung lhag pa'i lha chen po/__/lhan cig skyes pa'i ye shes kyis/__/bla ma'i kha las rtogs par bya/__/de ltar dam tshig sdom ldan pa'i/__/snod du rtse gcig chu 'dra las/__/ye shes gzugs brnyan lta bu ru/__/rnal 'byor pa yis rab tu brtags/__/de thob phyin chad rnal 'byor pas/__/'khor ba nyid na gnas pa'i tshe/__/de yi nyes bas mi gos so/__/ji ltar sngags dang sman ldan pas/__/sbrul dag gsod par byed pa bzhin/__/de 'dra'i rnal 'byor dbang phyug che/__/ye shes sman gyis rgyas btab pas/__/nyon mongs kyis ni ci byar yod/__/gang zhig lag na gdugs thogs la/__/de la char pas ci byar yod/__/de bzhin gnyis med ye shes kyi/__/gdugs thogs la ni rtog pa yi/__/char pa rab tu 'bab gyur yang /__/de la de yis ji ltar gnod/__/de 'dra'i rab mchog ye shes ni/__/so so skye bos ga la shes/__/nyan thos rnams kyis mi shes so/__/rang sangs rgyas kyis kyang mi shes/__/rnal 'byor spyod dang dbu ma pa/__/byang chub sems dpas mi shes so/___/bla bcas sangs rgyas kun gyis kyang /__/'di ni cung zad mi shes so/__/'di yi don shes ma 'ongs pa'i/__/rdo rje 'dzin pa mnyes byas nas/__/rang gi bsod nams chen stobs kyis/__/yi ge med par rnam par 'pho/__/de la dkyil 'khor sbyin sreg dang /__/gtor ma bzlas pa bgrang phreng dang /__/skyil mo krung dang stang stabs sogs/__/spros bral rnam par slu ba ste/__/bya ba ma yin dgag pa min/__/lhag pa'i lha yis sprul phyir ro/__/bya ba rnams la rnal 'byor pa/__/lam chen dag tu yongs 'dzin pa/__/ri dwags smig rgyu snyeg pa ltar/__/rtag tu snang yang ma zin no/__/bya ba'i nad chen gyis zin la/__/ye shes g.yo med sman chen gyis/__/gso byed skyes bu dam pa'o/__/de bas lus ngag yid gsum gyi/__/sdom pa mchog la gnas byas nas/__/nga'o snyam pa'i gzi bskyed la/__/rim pa gnyis pa de nyid sgrub/__/dgon pa'am yang na grong gi mthar/__/gang rung ci rung de lta bur/__/bya bar 'os pa'i las kun yang /__/byas nas bde ba'i stan la 'dug__/de nas sems can thams cad kun/__/tshangs spyod chen pos bzhis dmigs te/__/de la sogs pa rang rgyud kyi/__/las kyi sgrib pa dag byas nas/__/sems tsam la ni blta byas te/__/phyi rol rang bzhin stong par bya/__/sems tsam de yang stong byas nas/__/rang rig tsam du gnas par bya/__/rang rig de yang zla ba sogs/__/gdan du brtags nas yi ge'o/__/smyu gus bsnun byas mtshan mar gyur/__/de nas rang nyid lhar bskyed la/__/lha yi nga rgyal dang ldan par/__/phyag rgya bzhis ni rgyas btab ste/__/dkyil 'khor 'khor lo sprul par bya/__/de mnyes de la goms bslabs pas/__/phyi rol lus ni ldog byed de/__/sangs rgyas rnams kyi spyod yul mchog__/mtha' yi de nyid bsgom par bya/__/rang snying dam tshig phyag rgya yis/__/thugs kar mtshan ma la gnas pa/__/de bzhin gshegs kun ye shes mchog__/rim pa dang po pa rnams la/__/yi ge gzugs su rab snang ba/__/gzhom du med pa rang lha yi/__/sa bon 'od zer lnga 'bar ba/__/de yi kha dog rnam lnga yis/__/'od zer stong gi sgo yi ni/__/g.yas nas rnam par spro bar bya/__/de yi rtsa la dkyil 'khor gyi/__/'khor lo ldan pa'i bde gshegs rnams/_/phyogs bcu'i 'jig rten bkang byas nas/__/dbugs kyi kun rtog las byung ba'i/__/sems can thams cad sangs rgyas sku/__/bskyed nas zla ba zhu byas te/__/thim nas rnam par dag byas nas/__/de rnams ye shes ngo bo ru/__/g.yon pa'i ha sar zhugs par bya/__/de yi mtshan ma dbus gnas pa/__/sa bon la ni gzhug byas par/__/de nyid sangs rgyas thams cad kyi/__/yon tan kun bskyed rin po che/__/dngos po kun la khyab pa'i bdag__/mi shigs pa yi thig le che/__/'od zer lnga dang rab ldan pa/__/tsi na ka ya 'bru tsam du/__/rang gi sems su chos thams cad/__/bsdus nas rnam par bsam par bya/__/de yi 'od zer rim pa yis/__/rang gi gnas ni khyab bar bya/__/de las phyir byung dam tshig rgya/__/nang gsal de yis phyi yi lus/__/gsal byas dkyil 'khor gsal byas nas/__/de yi gnas kyang gsal bar bya/__/de las phyir byung bdag nyid nang /__/byang chub sems gzugs bcu drug po/__/mthe bo'i rtsa bar yi ge a/__/rje ngar gnyis la de bzhin A/__/brla gnyis la ni i yi gzugs/__/gsang ba la ni I yi gzugs/__/lte ba'i rtsa ru u gzugs nas/__/de bzhin gsus par U yi gzugs/__/nu ma gnyis su ra gzugs nas/__/de bzhin lag par r-I gzugs te/__/mgrin pa la ni l-i yi gzugs/__/de bzhin ma mchur yi ge l-I/__/'gram pa gnyis su e gzugs so/__/de yi mig gnyis yang ni ai/__/rna ba'i rtsa bar o yi gzugs/__/spyi bor au gzugs yang dag gnas/__/aM aH'i gzugs su tshigs kun la/__/bcu drug dus su rdzogs 'gyur ba/__/gong ma'i 'od kyis rnams bkug ste/__/thig le ru ni bzhugs par bya/__/de ru sems ni cung zad tsam/__/gzung bas lha yi 'khor lo che/__/rten dang bcas pa mos pas bsgoms/__/de dbus bdag po thugs ka ru/__/gong ma'i rim pas mi shigs pa'i/__/thig le chen po sgom byas nas/__/yungs kar tshad tsam de las spro/__/rang gi gnas dang phyag rgya yi/__/nang gsal dkyil 'khor gsal byas nas/__/de yi gnas dang bdag po yi/__/nang gsal phyi lus gsal byas nas/__/dkyil 'khor rten bcas gsal bar bya/__/de nas bcu drug gnas pa yi/__/'od zer bzhag pa phyung byas te/__/phyi yi lus ni gsal bar bya/__/de yi dkyil 'khor 'khor lo dang /__/rten dang bcas pa gsal byas nas/__/phyogs bcu'i 'jig rten bzhugs pa yi/__/bde gshegs kun gyi spyan sngar gshegs/__/bdud rtsi zhu nas zhal zhugs te/__/thig ler bdud rtsi blangs byas nas/__/rdo rje'i lam du byung nas su/__/'o ma'i rgyun ltar 'ong byas nas/__/thabs kyi ye shes g.yas zhugs te/__/de bzhin gzhan ni g.yon du zhugs/__/de nas ye shes thig le la/__/snang ba'i thigs pas thim par 'gyur/__/de ni 'dzag pa'i ngang tshul can/__/'od zer lnga 'bar dkar 'tsher ba/__/cung zad dmar ba'i nang du sems/__/mi g.yo zhing ni gzung bar bya/__/de la gong ma'i rim pa ltar/__/spro ba dang ni bsdu ba dang /__/gzung ba yang dag byas gyur pas/__/'gog pa'i rdo rje sems nyid du/__/nam zhig de la reg gyur pas/__/sangs rgyas kun gyis mchog 'dzin pa/__/yid bzhin dpal dang 'dra ba yi/__/rtags rnams yang dag skye bar 'gyur/__/phung po khams dang skye mched kyi/__/lha rnams ye shes me yis su/__/thog mar snying gar sdud byed pa'i/__/cho ga 'di ni dang por bshad/__/de la bsgrub pas byin brlabs pas/__/sna yi rtse mor 'gro bas na/__/mi shigs thig le'i rjes thogs la/__/gsang ba'i thig le bsgom par bshad/__/gong ma'i ye shes thig le las/__/'od zer lcags kyu 'dra ba rnams/__/phyogs bcur spros pas bde gshegs rnams/__/dkyil 'khor 'khor lo dang bcas kun/__/bkug nas ye shes ngo bo ru/__/rang gi snying gar rab tu btsud/__/de rnams zhu nas thig le la/__/zhugs pas rdul dang mun pa dang /__/snying stobs tshul du thig le yang /__/snying gi pad+ma la babs nas/__/rang gi rdo rje nor bu yi/__/dkyil du rnam par gnas pa las/__/'byung ba lnga yi gzugs can mchog__/ye shes lnga yi ngo bo nyid/__/'od zer lnga 'bar rang lha yi/__/mtshan ma phra mo rnam bsams nas/__/de yi bum par rten gyi tshad/__/yungs kar tsam dbus 'khor lo che/__/thig ler bcas pa mos par bsgom/__/gal te de la rang gi sems/__/bying bar song ngam skye ba na/__/rdo rje las ni phyir byung ste/__/sna rtser rnam par gnas byas nas/__/dga' bral dga' bas brtag par bya/__/'di yi thig le rnal 'byor las/__/gong gi rim pas 'od zer lnga/__/steng gi sgo las byung ba dang /__/slar yang bdud rtsi 'gugs pa dang /__/de bzhin gzhi la gzhug pa dang /__/dbus dgag stong pa'i yan lag go/__/de nas gsang ba'i thig le che/___/rab tu phra ba gong ma bzhin/__/rang sems dal bu dal bus gzung /__/dngos po med pa'i gnas su 'gyur/__/de yang bzung ba goms pa yis/__/phyin ci log ni rnam par ldog__/smig rgyu lta bu snang ba ni/__/rtags ni dang por shes par bya/__/de bzhin du ni chu log pas/__/du ba lta bur 'byung ba ni/__/gnyis pa yin par shes par bya/__/me ni rnam par log gyur pas/__/mkha' snang 'dra ba gsum pa'o/__/rlung ni de bzhin log pas na/__/mar me lta bur rab snang bas/__/rtags ni bzhi pa shes par bya/__/de bzhin phyin log rnam par shes/__/log pas zab gsal gnyis med kyi/__/don dran sprin med nam mkha' ltar/__/gsal ba rtags ni lnga pa'o/__/mtshan ma lnga po de yis ni/__/mi gnas mya ngan 'das thob bas/__/rnal 'byor pas ni 'di la 'bad/__/gzung ba yi ni yan lag go/__/de ltar de la mtshan ma lnga/__/mthong byas don des khyab bya'i phyir/__/rdo rje yi ni lam nas su/__/nam mkha'i khams su spro bar bya/__/spros pa de las mngon mthong ba'i/__/so sor snang ba bskyed par bya/__/sangs rgyas rjes su dran pa dang /__/chos ni yang dag rjes dran dang /__/rdo rje rjes su dran pa dang /__/rigs ni yang dag rjes dran dang /__/khro bo rjes su dran pa ni/__/snang mdzad dang ni tshe dpag med/__/mi bskyod rin chen 'byung ldan sogs/__/gshin rje gshed sogs khro bo yi/__/dkyil 'khor sku sogs ji snyed po/__/spro bsdu las ni gsal bar bya/__/de bzhin dam tshig rjes dran ni/__/rjes su chags dang cho ga bzhi/__/dang po spro bsdu las gsal bya/__/dkyil 'khor rjes su dran pa ni/__/cho ga gnyis pa la sogs pa'i/__/dkyil 'khor spro bsdu las gsal bya/__/sku ni rjes su dran pa dang /__/gsung dang thugs ni rjes dran dang /__/sems can rjes su dran pa ni/__/sku dang gsung thugs bsgoms pa yi/__/rdo rje gsum ni spro bsdu las/__/rnam par smin cing dran pa'o/__/de bzhin sngags ni thams cad kyi/__/spyi gzugs rjes su dran pa ni/__/ye shes lnga yis rdo rje sems/__/bskyed pa dang ni rang gi lha/__/longs spyod bzhi ldan spro bsdu las/__/rjes su gsal ba rnyed pa'o/__/dam tshig rjes su dran pa ni/__/bdud rtsi myang ba la sogs pa/__/spro bsdu las ni gsal byed pa'o/__/shes rab pha rol phyin pa dang /__/ma skyes rjes su dran pa ni/__/spros pa'i dkyil 'khor de dag kyang /__/ci yang yod pa ma yin te/__/de ni gnyis med ngo bo ru/__/spro bsdu las ni dran pa'o/__/zhe sdang rigs la sogs pa yi/__/mchod pa rjes dran sbyor ba ni/__/rang gi rigs kyi bu mo mchog__/bar ma'i longs spyod bzhi dag pa/__/rjes su chags pas mnyes bya ba/__/spro bsdu las ni gsal byed pa'o/__/rjes su dran pa'i yan lag go/__/de ltar yan lag gsum gyis ni/__/gsang ba'i thig le bsgom byas nas/__/nor bu las ni byung nas kyang /__/khams gsum khyab par byed pas ni/__/sprul pa'i thig le bsgom par bshad/__/rang gi spyi bo'i dbus su ni/__/sku yi rdo rje'i thugs ka ru/__/mtshan ma la gnas rlung dkyil 'khor/__/dud ka 'dra bar zla ba la/__/oM dkar 'ong ba'i mtshan nyid bsam/__/de bzhin mgrin pa'i dbus su yang /__/gsung gi rdo rje thugs ka yi/__/mtshan pa'i dbus su chu dkyil 'khor/__/dkar po dbus su zla ba la/__/AHdmar gnas pa'i rang bzhin bsgom/__/thugs kar thugs kyi rdo rje yi/__/thugs kar mtshan ma la gnas pa'i/__/me yi dkyil 'khor dmar po la/__/zla gnas dbus su hU~M nag po/__/'gro ba'i rang bzhin bsams nas kyang /__/nu ma gnyis kyi bar du yang /__/dam tshig phyag rgya'i thugs ka ru/__/mtshan ma la gnas dbang chen ni/__/dkyil 'khor ser po zla ba la/__/rang gi lha yi sa bon che/__/'byung dang 'jug dang gnas pa la/__/rnam par grol ba'i sa bon bsam/__/de ltar phyag rgya bzhi chen dang /__/bdag nyid 'brel par byas nas su/__/rim pa 'di yis mi shigs pa'i/__/rdo rje bzlas pa'i ngo bo bya/__/g.yas pa nas ni 'byung ba'i khams/__/rlung gi dkyil 'khor chen po ste/__/kha dog dud ka rgyu ba las/__/'byung ba hU~M gi ngo bo yis/__/snang srid chos kun khyab byas nas/__/chos kun dag byas bdud rtsir gyur/__/oM gyi ngo bos 'ong byas nas/__/rang gi rgyud kyi bag chags ni/__/bkrus nas dag byas de la zhugs/__/A li ngo bos dag byas nas/__/de la lha yi de bzhin nyid/__/gzung ba dal bus dal bus byas/__/dngos po med pa'i gnas su 'gyur/__/g.yon pa nas ni 'byung ba'i khams/__/chu yi dkyil 'khor chen po ste/__/kha dog dkar po rab gnas pa/__/de las byung ba'i hU~M dang ni/__/oM gyi rang bzhin 'du ba dang /__/AHyi rang bzhin gnas pa dang /__/de nyid bzung bas snga ma bzhin/__/gnyis ka las ni drag tu 'byung /__/me yi dkyil 'khor nyid yin te/__/kha dog dmar po'i ngo bo la/__/hU~M gis spros dang oM gyis bsdus/__/AHyis gnas pa de nyid gzung /__/snga ma bzhin du shes bar bya/__/de bzhin gnyis las dal bus 'byung /__/dbang chen gyi ni dkyil 'khor rgyu/__/kha dog gser ltar rab snang ba/__/de la hU~M gis 'byung ba dang /__/oM gyis sdud dang AHyis gnas/__/de la de nyid rab bzung bas/__/'jug dang gnas dang ldang ba las/__/grol ba'i ye shes rnyed 'gyur ba/__/som nyi yid gnyis ma byed cig__/phyag rgya bzhi 'brel bzlas pa ni/__/nyis brgya nyi shu rtsa lnga ste/__/de ni dgu brgya rnam pa bsgres/__/zhag gcig tu ni nyi shu bzhis/__/khri phrag gnyis dang gcig stong dang /__/brgya phrag drug tu dus thams cad/__/rnal 'byor dbang phyug chen po yis/__/nyin mtshan bzlas brjod grangs byed do/__/'di yi rnam pas chos thams cad/__/sgyu ma dang ni smig rgyu dang /__/brag ca 'gal me'i 'khor lo dang /__/'khrul pa dri za'i grong khyer dang /__/chu bur dang ni mig 'phrul dang /__/gzugs brnyan chu zla la sogs par/__/thams cad shes shing sa bcu pa'i/__/dbang phyug rnams dang skal mnyam ste/__/rang bzhin bzlas pa 'di la ni/__/rnal 'byor pas ni rab tu 'bar/__/'di ni thog ma med dus nas/__/rang bzhin yang dag rtag zlo yang /__/bla ma yang dag ma bsten par/__/don 'di rtogs par mi 'gyur ro/__/de ni yang dag shes nas ni/__/bsgom pa'i bar chad phyi rol gyi/__/bzlas pa yongs su spang bar bya/__/bzlas pa'i ngo bo chen po mchog__/rdo rje 'chang ba brjod med sku/__/bsam brjod yul las rab 'das pas/__/ngag gis ji ltar bzlas pa byed/__/de bas glang chen rnyed gyur pa/__/rjes kyis de la ci zhig bya/__/don de la gnas rnal 'byor che/__/phyi rol yang ni rten mi 'gal/__/glang po che yi stobs kyis ni/__/bud shing 'byung ba lta bu'o/__/de bas rdo rje'i bzlas pa mchog__/'bad pas bde gshegs thams cad kyi/__/byin rlabs nyid ni 'ong bas na/__/phyag rgya chen po 'grub pa yi/__/mtshan ma yang dang yang 'byung 'gyur/__/de 'byung cho ga la gnas pas/__/skad cig gis ni kun mkhyen che/__/rgyud las rab tu 'pho bar ni/__/the tshom med par nges pas na/__/cho ga 'di la rab tu 'bad/__/de ltar dga' gsum bye brag gi__/thig le rnam gsum bsgom pa yi/__/cho ga yang dag bstan pa'o/__/da ni gnyis med ye shes nyid/__/kun rdzob gzugs la brten nas kyang /__/mi g.yo la sogs g.yo dang bcas/__/tshang sogs lha dang lha min sogs/__/thams cad rab tu mi snang yang /__/thig le 'gog par mi 'gyur te/__/rgyu dang mi rgyur bcas pa kun/__/slar yang de las 'byung bar byed/__/de las skye bo rnams kyis ni/__/yang dag ma rtogs pa yi phyir/__/tshangs pa'i sgo nga las skyes par/__/'khrul pas chos rnams kyis mi bsgul/__/gang gis kyang ni mi shigs pa/__/ji srid 'di ni lus gnas pas/__/las dang las min rab byed pa/__/brtan po 'jigs pa rab spangs pa'i/__/mi shigs thig le bsgom par bshad/__/tshangs pa'i spyod pa bzhi po dang /__/phyi rol stong bcas la sogs pa/__/rang gi lha ru bskyed nas kyang /__/phyag rgya bzhis ni rgyas btab pa/__/snga ma bzhin du shes byas nas/__/rim pa 'di yi thig le la/__/rang gi sems ni yang dag bzung /__/rang gi ye shes sems dpa' yi/__/mtshan ma'i dbus gnas sa bon las/__/'od zer lnga 'phros de yi rtse/__/dkyil 'khor 'khor lo dpag med sprul/__/de yis khams kun khyab byas nas/__/dbugs kyi rta zhon kun rtog rnams/__/rnam par bsal te de dag kyang /__/dkyil 'khor 'khor lo rab byas te/__/gnyis pa'i dkyil 'khor bsdu byas nas/__/ye shes ngo bo sna bug g.yon/__/zhugs byas mtshan ma'i dbus gnas bya/__/sa bon la ni thim pas kyang /__/de ni phyogs dus gnas pa yi/__/sangs rgyas yon tan ci gsungs pa/__/yang dag skyed byed mi shigs pa'i/__/thig le 'od zer lnga 'bar ba/__/rnam par gsal byas de las kyang /__/'od zer 'byung bas rab gnas kyang /__/ye shes sems dpa'i nang gsal te/__/de yi phyi yi dkyil 'khor dang /__/nang ni gsal bya de las byung /__/mthe bo'i rtsa dang rje ngar dang /__/brla gnyis dang ni gsang ba'i gnas/__/lte ba dang ni gsus pa dang /__/nu ma gnyis dang lag rtse dang /__/mgrin pa dang ni mchu gnyis dang /__/'gram pa gnyis dang mig gnyis dang /__/rna ba'i rtsa dang spyi bo dang /__/tshigs kun thig le AHsogs kyi/__/gzugs su gnas pa bsgrub byas nas/__/mi shigs thig le thim par bya/__/der ni rang gi sems cung zad/__/gzung bas rten dang rten can gyi/__/'khor lo mos byas de dbus su/__/mi shigs thig le ye shes pa/__/snang ba'i ngo bo bsgom par bya/__/de yi 'od kyis ngang gnas sogs/__/gsal byas ye shes thig le yi/__/nang gsal bzhag pa'i 'od zer gyis/__/phyogs bcu'i 'jig rten khams bzhugs pa'i/__/spyan sngar bdud rtsi zhu byas nas/__/zhal du zhugs nas snying ga yi/__/mi shigs thig ler rab song ste/__/k+ShuM gzugs bdud rtsir rab blangs nas/__/rdo rje'i lam nas phyung nas su/__/'o ma'i rgyun ltar phyogs bcu nas/__/'ongs pa yis ni sems can dang /__/sangs rgyas rnams dang mi rgyur bcas/__/yang dag bsdus nas gur sogs zhugs/__/de bzhin chos dbyings phyag rgya dang /__/rten gyi 'khor lo zhugs byas nas/__/de dag yang ni rang bsdus te/__/dkyil 'khor du ni rab bsdus nas/__/de yang bdag la bsdu byas te/__/bdag nyid kyang ni mi snang bar/__/ye shes sems dpa'i gnas la dmigs/__/de yang 'khor lo 'khor lo yang /__/ye shes sems dpar zhugs par bya/__/ye shes sems dpa' mi snang nas/__/mtshan ma 'ba' zhig la dmigs bya/__/mtshan ma de yang bsdu byas nas/__/mi shigs thig ler sems bzung ste/__/de las yang ni nang gi tshogs/__/kun bsdus rang snang thig le che/__/'ba' zhig la sems yang dag bzung /__/ci ltar nus bzhin bsgom pas der/__/sems ni yang dang yang du zhugs/__/yang ni de las phyir byung ste/__/de yi gnas dang rang gi lus/__/dmigs nas dkyil 'khor 'khor lo dang /__/rten dang khams gsum snang bar bya/__/de nas yang ni gong ma ltar/__/rim par bcu gnas thim byas la/__/sems ni thig ler bzhag par bya/__/rang gi dbang po der bzung nas/__/sa yi dkyil 'khor chu la zhugs/__/chu de me la de bzhin zhugs/__/me yang rlung la rab tu zhugs/__/rlung yang sems la zhugs par gyur/__/sems ni gnyis med ye shes su/__/cung zad zhugs pas rtags gnas pa/__/smig rgyu 'dra dang du ba dang /__/mar me mkha' snang rab 'dra ba/__/sprin med nam mkha' ltar snang ba'i/__/mtshan ma lnga po 'byung bar 'gyur/__/rdo rje sems dpa' zhugs phyir ro/__/thig le la ni sems bzung ste/__/glal zhing rgod dang 'dar la sogs/__/rnal 'byor de la gang tshe 'byung /__/thig le yang dag spro byas nas/__/gong ma'i rim pas kun khyab bya/__/'di ni yang dag goms byas pas/__/mi gnas mya ngan 'das pa che/__/thabs kun gyi ni bsgrub bya mchog__/rdo rje 'chang ba chen po thob/__/'di ni lhan cig skyes pa yi/__/ye shes 'ba' zhig dbang byas nas/__/rim pa gnyis pa bsgom pa'i thabs/__/mi shigs thig le bsgom pa'o/__/de ltar chos kun de bzhin nyid/__/dpag med dam pa'i phun sum tshogs/__/de dmigs yang dag skyes gyur pa/__/bsgom pa'i cho ga rnam bshad nas/__/rnam grangs dag kyang yongs su bstan/__/de bzhin nyid dang yang dag mtha'/__/bsam gyis mi khyab pa yi dbyings/__/chos nyid dang ni chos skyon med/__/stong pa nyid dang mtshan ma med/__/smon pa med pa nyid dang yang /__/nyon mongs khur chen 'dor byed pa/__/skye ba med dang 'od gsal ba/__/mngon par byang ni chub pa dang /__/gzhan gyi sems shes byed pa dang /__/lha yi rna ba ster ba dang /__/de bzhin lha yi mig ster dang /__/rdzu 'phrul dpag med sprul chen dang /__/dngos po mthar ni phyin pa dang /__/don dam pa yi bden pa dang /__/rdzogs pa yi ni rim pa dang /__/yongs su dag pa'i sku gtsang dang /__/kun gyis bsten bya nyid dag dang /__/mkha' ltar rnam par dag pa dang /__/glo bur dri mas mi gos dang /__/gdod nas 'od gsal ba nyid dang /__/gang gis kyang ni mi shigs dang /__/dngos po med pa nyid dang ni/__/rgyu sogs bcu gnyis 'byung byed dang /__/dpal chen ye shes yongs dag dang /__/thig le chen po yang dag dang /__/sangs rgyas kun gyi gsang chen dang /__nam mkha' nam mkha'i spyod yul dang /__/bsgom pa med pa nyid dang ni/__/rje btsun man ngag chen po dang /__/sna nas rna bar 'pho byed dang /__/nyan thos kyis ni shes min dang /__/rang sangs rgyas sogs mi shes dang /__/yi ge med pa nyid dang ni/__/tshig dang bral dang brjod med sogs/__/de la mdo dang rgyud rnams las/__/de 'dra rnam pa mtha' yas pa/__/gsungs shing yang dag gsung 'gyur ba/__/der ni de bzhin nyid 'di las/__/gzhan ni cir yang ma gsungs so/__/de bas dad pa sngon 'gro ba'i/__/sems kyis chos kun de bzhin nyid/__/zab gsal gnyis med don chen po/__/rim pa gnyis pa de kho na/__/bla ma'i gsung ni yang dag gzung /__/de bzung gong ma'i rim pa yis/__/rtag tu goms byed skyes bu gang /__/de la brten pa'i rtags skyes nas/__/sa nas sar ni 'phar ba ltar/__/de yi rnam pa gong du 'phel/__/rig 'dzin la sogs sprul pa yis/__/gzhan ni don de la sbyor byed/__/de yis brtan 'gyur rnal 'byor pa/__/sgrub pa'i bdag nyid can du 'gyur/__/bdag nyid can des bsgrub pa'i mchog__/ji skad gsungs pa brtsam par bya/__/lha mo klu mo gnod sbyin mo/__/mi mo mi 'am ci mo'am/__/mkha' 'gro ma la sogs pa rnams/__/rang gi nus pas brtsam par bya/__/smyon pa'i brtul zhugs la sogs pas/__/zla drug sogs par rab tu 'bad/__/de yis rje btsun yid med pa/__/dpal ldan sangs rgyas kun ngo bo/__/rdo rje 'dzin pa thams cad gnas/__/chos kun de bzhin nyid zab pa/__/sangs rgyas rnams kyi bsgrub bya mchog__/gong ma'i rim pa rnal 'byor pas/__/'bad pa che thang rab byas pas/__/de ltar de ru mtshan nyid kyi/__/tshul du cung zad rab gnas pa'i/__/dga' dang dga' ba bar ma dang /__/dga' dang bral ba'i dus su yang /__/ji bzhin gnas pa'i dga' ba gsum/__/ji skad gsungs pa thob par 'gyur/__/de nas mtha' med 'khor ba'i bar/__/rtag pa dang ni mi gdung dang /__/bsil ba dang ni gcig pa dang /__/bde ba dang ni dri med dang /__/dga' ba dang ni yid dga' ba/__/'di ni bde chen ro myang brgyad/__/bdag po rdo rje 'chang ba mchog__/rdzogs pa'i rim pa'i rnal 'byor pas/__/bya ba byas pa byed pa byas/__/dbang phyug chen po khur chen por/__/tsher ma dkrugs pa thams cad mkhyen/__/skyes bu dpa' bo cang shes pa/__/glang po chen po dul ba po/__/'khor ba'i mtha' ni pha rol son/__/don dam dang ni kun rdzob kyi/__/bden pa gnyis med rnal 'byor che/__/tha ba spangs pa'am lam kun rdzogs/__/yon tan 'byung gnas kun tu bzang /__/thams cad 'dus pa'i de kho na/__/sku sogs khams kun 'gengs pa'o/__/gong na med pa yang dag gnas/__/de ltar de sogs rab grags pa/__/ming ni rnam pa mtha' yas pa/__/gnyis med ye shes mtshon pa ste/__/mdo dang rgyud rnams thams cad du/__/blo ldan rnams kyis rtogs par bya/__/sa bcu dang ni rab ldan pa'i/__/gong ma'i lha mo rdo rje 'dzin/__/dge ba bcu gsum la gnas pa/__/skad cig gis ni yang dag tu/__/sgrib bral de yis rtogs par byed/__/phreng ba ha ra nu 'bur sogs/__/mdog dang ku tsa la sogs pa/__/pad+ma btags pa'i dga' shes pa/__/dang po rab tu shes par bya/__/Shadz+Tha rI ni ShA na sogs/__/glu dbyangs bstod dang sing sgra yi/__/snyan pa'i dbyangs kyis dga' 'gyur bas/__/gnyis pa ru ni shes par bya/__/tsan+dan la sogs sna tshogs dris/__/lus byug lhan cig rtsen byed tshe/__/dga' ba yang dag thob byed pa/__/gsum pa ru ni shes par bya/__ma mchu'i sbrang rtsis gzhib byas pas/__/mgor gnas byang chub sems 'gyu bas/__/ro 'thung dga' bas bdag mnyes pas/__/bzhi par rab tu shes par bya/__/lus la byug cing sna tshogs kyi/__/spyod pas rtsen tshe reg bya yis/__/yang dag dga' bar byed pas na/__/lnga pa ru ni shes par bya/__/de yis ye shes rnam pa gsum/__/rig par byed cing rang gi yid/__/yang dag dga' bar rab byed pa/__/drug par shes bya rnal 'byor pas/__/de yi lus ni bdag gi ni/__/rten du gnas pa sra ba yis/__/yang dag dga' bar byed pas na/__/bdun pa ru ni shes par bya/__/de yi pad+ma'i zil sogs dang /__/byang sems rlan gyis rang gi sems/__/rab tu dga' bar byed pas na/__/brgyad par rab tu shes par bya/__/gsang gnas drod sogs tsha ba yis/__/bdag gi yid ni yang dag par/__/dga' ba byed pa'i mchog yin pas/__/dgu pa ru ni shes par bya/__/de nas bskyod pas ye shes mes/__/phung po khams sogs sreg byed pas/__/yid ni yang dag dga' 'gyur bas/__/bcu par rab tu shes par bya/__/bcu po de yis dang po dang /__/phyis kyi 'bras bu mchog 'gyur ba/__/gang du gsungs pa rab thob ste/__/de bas de 'dra'i don chen la/__/yang dag 'jug par mi nus pa'i/__/gdul bya rnams la bde gshegs kyis/__/rab tu dga' sogs mtshan nyid du/__/bstan nas de yi don zhugs pas/__/de yis rtogs kyang bla dang bcas/__/de nyid dang po'i rnal 'byor la/__/rten dang rten can dkyil 'khor gyi/__/'khor lo rab tu brtan byas nas/__/de zhugs de la brtan byas pas/__/rtogs kyang don 'di ma shes na/__/yang dag sangs rgyas ma yin no/__/'di ni rang byung bcom ldan 'das/__/gcig pur rab tu che ba'i lha/__/lhag pa'i lha zhes bya ba ni/__/bcu gsum pa zhes bya bar bshad/__/de ltar rim pa gnyis pa yi/__/de bzhin nyid ni thabs bcas pa'i/__/bdud rtsi mchog 'di rnal 'byor gang /__/'thung bar byed pa sangs rgyas kyi/__/de yi sras su nges pa ste/__/byang chub sems dpa' rnams kyi grogs/__rig pa 'dzin pa'i dpon po ste/__/mkha' 'gro ma yi khyo ru 'gyur/__/nyan thos rang 'dren rnams kyi ni/__/'dren par byed pa'i gtso bo ste/__/sems can phal pa'i rje btsun no/__/de la phyogs bcu khams bzhugs pa'i/__/sangs rgyas byang chub sems dpa' dang /__/rig pa'i lha dang khro bo sogs/__/me tog la sogs mchod pa bcas/__/zhag gcig skya rengs dang po dang /__/phyed ni dros pa'i dus nyid dang /__/chal chil mtshams su nam mkha' las/__/mchod pa byas nas sngags brjod cing /__/rang gi zhing du 'gro bar 'gyur/__/de bas dag pa'i lha rnams kyang /__/de bzhin du ni mchod byed na/__/ma dag pa yi lha rnams ni/__/de la ci yi phyir mi mchod/__/sems can phal pa gzhan gyis ni/__/me tog snyim pa bkang nas ni/__/mgrin pa dma' bas zhabs 'dud cing /__/rtag tu bkur bar shin tu 'os/__/de ni skyes bu rkang gnyis gtso/__/kun mkhyen rnams kyis bzhag pa ste/__/phyir log khur chen por byed pas/__/ma 'ongs rdo rje 'chang ba ste/__/de la brnyas byed sems can gang /__/sgrub pa po de glang dang 'dra/__/de yis nga la brnyas byed pas/__/ngas ni de kun dus kun spong /__/cig shos lus la nga gnas phyir/__/mchod cing brjod pas lus rnams kyi/__/sgrib pa de yis dag byed do/__/rim pa gnyis 'dir sgrub pa po/__/rtse gcig pa yis rnam par gzung /__/de bzung tshe 'di nyid la yang /__/brtul zhugs cho ga nyid kyis ni/__/lha mos rkyen ni rab byas te/__/phyag rgya chen po rang rgyud la/__/'pho bar the tshom mi bya'o/__/da ni rang nyid byin brlabs pa'i/__/rim pa 'di ni rnal 'byor pa/__/bya bas bskal pa 'ga' zhig la/__/yang dag tu ni bshad par bya/__/gang zhig bla ma mnyes byas nas/__/des gnang dam sdom bcas pa ru/__/bum pa la sogs rab thob ste/__/bla ma'i zhal las rnyed pa yi/__/de bzhin nyid ni rab thob cing /__/gsang dang mchog tu gsang rigs pas/__/ji skad bshad pa'i bya ba yis/__/yang dag bsgom ni mi nus pas/__/ji bzhin pa yi de kho na/__/rim pa 'di yis bsgom par bya/__/gang zhig dus ni phyi zhig la/__/'chi ba'i mtshan ma bdag gis mthong /__/'chi bar gyur pa'i dus byung na/__/nad kyis yang dag ma rnyong par/__/'pho ba'i sbyor ba yang dag bya/__/dpral ba dang ni lte ba dang /__/spyi gtsug dang ni mig dang ni/__/rna ba dang ni sna dag dang /__/chu yi gnas dang chu min gnas/__/kha yi gnas dang ye shes kyi/__/'gro 'ong gis ni rtags shes bya/__dpral ba gzugs kyi khams kyi ni/__/rtags skyes pa ru shes par bya/__/lte bar 'dod khams lha rnams kyis/__/rtags byung de ru skye bar nges/__/spyi gtsug gzugs med khams rnams kyi/__/rtags byung de ru skye bar 'gyur/__/rna gnyis ye shes 'pho ba na/__/gnod sbyin gnas su skye bar 'gyur/__/sna gnyis rig pa 'dzin pa yi/__/gnas su nges par 'gro ba'o/__/mig gnyis kyi rnams rgyal por 'gyur/__/rtags ni yang dag skye bar 'gyur/__/kha ru ye shes 'pho ba na/__/yi dwags rtags su shes par bya/__/chu gnas dud 'gro rnams kyi ni/__/rtags su yang dag rab shes bya/__/chu min bu gar ye shes 'gro/__/dmyal ba'i rtags su shes par bya/__/de ltar ye shes 'pho ba yi/__/rnam pa'i cha ni shes byas nas/__/sgrogs pa lnga yi yi ge yis/__/steng gi sgo bdun dgag par bya/__/chu yis sgo ru suM gis dgag__/chu min k+ShuM gis dgag par bya/__/de ltar sgo dgu bkag nas kyang /__/rim pa 'di yis rang sems kyi/__/gnas ni rab tu btsal byas pas/__/dbyings nyid du ni nges par 'gro/__/phung po skye mched khams rnams su/__/rnal 'byor rgyud kyis dpyad pa ltar/__/rnam par bsgoms byas ye shes so/__/gong na med pa rtogs par 'gyur/__/bdag nyid ji skad gsungs pa bzhin/__/lha yi lug su gyur byas pa/__/chos kyi dbyings dang rnam shes dang /__/bdag nyis sangs rgyas skur byas pa'i/__/gnas ni rin chen sna tshogs pa'i/__/kha dog sna lngas rab brgyan pa'i/__/rdo rje rtse mo dgu pa mchog__/bdag gi spyi bo'i steng du ni/__/bsams nas de ru rang gi sems/__/rdo rje dkar po bcu tshal tsam/__/rtse lnga bsams nas brtag par bya/__/yar gyi rtse lnga thabs lnga ste/__/de bzhin mar bltas shes rab lnga/__/dbus kyi bum pa ri bong can/__/bsams nas de ru ye shes che/__/ser po byang chub sems 'dra ba/__/'dzag pa'i ngang tshul dang 'dra ba/__/thig le tsa na ka yi 'bru/__/lnga 'byor tshad du bsgom par bya/__/de nas chos rnams thams cad kun/__/med par bsams nas bdag dmigs te/__/bdag kyang bdag la thim byas nas/__/sems tsam de yang mda' bzhin du/__/spyi bor rdo rje 'og cha yi/__/sbu gur zhugs nas thig ler thim/__/de ni de bzhin gshegs pa rnams/__/lha mo rnams kyi rang bzhin gyi/__/gnas su shes par rab tu bya/__/de ni gdod nas grub pa'i gzugs/__/de ru shes pa rab zhugs pa/__/sems de yang dang yang du gzung /__/de las sems de yar ba ltar/__/rdo rje rtse dgu steng cha yi/__/sbu gur byung nas sna tshogs kyi/__/pad+mar zla ba gnas pa la/__/rdo rje sems dpa'i skur gyur te/__/mtshan dang dpe byad kun brgyan la/__/rgyan kun brgyan pa'i na bza' dang /__/bral nas shin tu gsal dmigs te/__/de gnyis med pa'i sbyor ba yis/__/byin rlabs las byung 'khor lo che/__/rnam par 'phro zhing 'du bar bsam/__/de ltar rnam par bsgom pa mchog__/yang dang yang du ci nus bsgom/__/bsam pa de yi rkyen gyis ni/__/bdag sems dbyings su zhugs pa'i tshe/__/gsal zhing rab dag mkha' 'dra rtogs/__/de nas rdzu 'phrul shugs ldan pa/__/lo lnga lon pa'i byis pa'i gzugs/__/'grub tshe dpe med bde rdzogs rtogs/__/de las skye gnas gzhan du ni/__/'phel bar byed tshe sprul pa'i gzugs/__/yang dag tu ni rtogs par 'gyur/__/de lta bas na sems can gyi/__/bsam pa gang dang gang dag gi/__/mi rnams yid ni yang dag sbyor/__/de dang de ni mdo bzhin du/__/sna tshogs nor bu lta bur 'gyur/__/chos sku rab dga' mkha' mnyam pa/__/shi dang brgyal dang gnyid log dang /__/glal dang 'khrig dus skad cig tsam/__/myong bar 'gyur bas rab bsgoms na/__/lus can rnams kyi yid ni sbyong /__/zhes so/__/'di ni don ldan 'ga' zhig la/__/nga ni de yi lus gnas te/__/sgrub pa gzhan las mchod pa len/__/de yis de mnyes rang gi rgyud/__/las kyi sgrib pa dag byed do/__/zhes sogs dang /__khyod kyang zas kyi spyod pa dang /__/nga la cung zad 'khrul rtog pas/__/khyod kyi tshe 'di nyid la ni/__/gzugs bcas phung po rang lus ni/__/gnas ni yang dag mi 'gyur te/__/rnam par shes pa mi shigs pa/__/phyag rgya chen po rab tu 'grub/__/de bas khyod kyi yang dag blos/__/sangs rgyas kun gyi 'dus pa'i rgyud/__/gsang chen gsang las ches gsang ba/__/gong na med pa'i lung chen po/__/'di yi rim pa dang po yis/__/sgrub pa'i thabs dang sbyin sreg dang /__/gtor ma sna tshogs 'khor lo dang /_/bsdus pa dang ni rnam bshad dang /__/dkyil 'khor cho ga la sogs pa/__/mi shes mun bsgrib sems can gyi/__/thur ma lta bu brtsams par gyis/__/zhes sogs rjes su gdams te/__de ltar rol pa'i gar bcas sgra brnyan lta bu rdo rje'i glu/__/'khor lor bcas pa de nyid glu blangs bdag la bstod cing der/__/nam mkha'i khams su sprin rnams med pa lta bur thim par gyur/__/dge slong bla ma gnyis bcas de yang de bzhin mi snang gyur/__/rdo rje gdan gyi rgyab nas rgyang grags lnga bcu sor ba'i sar/__/pad+ma ta yi phug la brten te sems can don bya'i phyir/__/'di bsdus rab byed thams cad brtsams dang ston sogs byas/__/zhes sogs rgyas bar bstan cing /__mthar/__dal 'byor lus 'di shin tu g.yo sla bas/__/ji ltar rlung gis mar me gsod pa ltar/__/skad cig tsam du mi sdod dus 'da' byed/__/de bas 'di ni chud gson mi bya ste/__/dngos kun de nyid mchog chen rab bsgom bya/__/zhes dang /__de ltar rab tu shes par byas nas su/__/rdzogs pa chen po ye shes spyi yi gzugs/__/yongs su dag sku rdo rje 'chang chen po/__/dpal ldan kun gyi ngo bo rim gnyis 'dis/__/sdug bsngal lam bcas bskal pa gsum du yang /__/rang gi rjes mthun byang chub bla dang bcas/__/thob nas de bde cung tsam rab tshogs pa/__/rnal 'byor de yis ci phyir de mi sgom/__/zhes dang /__'di ni rang bzhin 'grub pa'i man ngag las/__/brgyud pa'i bla ma yang dag rab brten dang /__/rang gi bsod nams tshogs ni sngon bskyed pas/__/rtogs par rab tu 'gyur ba ma rtogs par/__/bsod nams chung bas bskal pa dpag med par/__/'di ni mi rtogs 'di don ma rtogs na/__/rnal 'byor che zhes de la mi bya'o/__/zhes sogs dang /__the tshom som nyi med par dad pa yis/__/'di don grub pas yang dag blangs byas nas/__/shes rab kyis ni yang dang yang du rung /__/dpyad pas bdag la gnyis med ye shes che/__/chu gtsang nang du zla ba'i dkyil 'khor ltar/__/'byung 'gyur 'di la the tshom ma byed cig__/ces gsungs so/__/'di nyid rgya gar gyi mkhan po ka ma la gu h+ya dang lo tsA ba mnga' bdag ye shes rgyal mtshan gyis bsgyur ba snang ngo /____/_!_