JKW-KABUM-04-NGA-001-011

From Khyentse Lineage - A Tsadra Foundation Project

ཨེ་ཝྃ་སྒྲ་བཤད།
Wylie title e wa~M sgra bshad JKW-KABUM-04-NGA-001.pdf
Location mkhyen brtse'i bka' 'bum
Volume 4, sde tshan 1, Text 11, Pages 166-168 (Folios 83b3 to 84b6)
Author འཇམ་དབྱངས་མཁྱེན་བརྩེའི་དབང་པོ་
Less details More details
Citation 'jam dbyangs mkhyen brtse'i dbang po. e waM sgra bshad. In 'jam dbyangs mkhyen brtse'i dbang po'i bka' 'bum, Vol. 4: 166-168. Khams sde dge rdzong sar dgon: Rdzong sar blo gros phun tshogs, 2020.
Genre Detailed Explanation - rnam bshad
Colophon

།ཅེས་པའང་མཁྱེན་བརྩེའི་དབང་པོས་སོ། །སརྦ་མངྒ་ལཾ།

ces pa'ang mkhyen brtse'i dbang pos so/__/sarba mang+ga laM/

[edit]
ཨེ་ཝྃ་གྱི་དོན་ཚིག་ལེའུ་བྱས་པ། །རྡོ་རྗེ་ཅན་ལ་ཕྱག་འཚལ་ལོ། །ཡི་གེ་གཉིས་ཀྱི་སྦྱོར་བ་ནི། །ཐབས་ཤེས་ཟུང་འཇུག་སྟོན་པ་སྟེ། །དེ་སླད་ཆོས་ཕུང་བརྒྱད་ཁྲི་དང་། །བཞི་སྟོང་ཀུན་གྱི་འབྱུང་གནས་ཆེ། །ཡིན་ཕྱིར་ལྷའི་བུའི་ཞུས་མདོ་ལས། །ཆོས་ཀྱི་ཕུང་པོ་བརྒྱད་ཁྲི་དང་། །བཞི་སྟོང་དག་གི་གྲངས་རྙེད་ཀྱང་། །ཀུན་གྱི་གཞི་དང་ཕ་མ་ནི། །ཡི་གེ་གཉིས་སུ་དེར་རབ་བསྟན། །ཡི་གེ་ཨེ་ནི་མ་འགྱུར་ལ། །ཝྃ་ནི་ཕ་ཞེས་བྱ་བར་གྲགས། །ཐིག་ལེ་དེ་གཉིས་སྦྱོར་བ་སྟེ། །སྦྱོར་དང་ཤིན་ཏུ་རྨད་བྱུང་པའོ། །ཞེས་གསུངས་དེ་ཡང་འདི་སྐད་ཅེས། །མདོ་རྣམས་ཀུན་གྱི་གླེང་གཞིར་གསུངས། །རྒྱུ་མཚན་ཨེ་ནི་ཨ་ལི་དང་། །ཝྃ་ནི་ཀཱ་ལིའི་ཡི་གེ་སྟེ། །དེ་འདུས་པ་ལས་མིང་དང་ཚིག །ཚིགས་སུ་བཅད་དང་ལེའུ་ནས། །གླེགས་བམ་བར་དུ་རྒྱུན་ཆགས་ཕྱིར། ཁྱད་པར་སྔགས་ལ་བརྗོད་པ་སྒྲས། །བྲིས་པ་གཟུགས་དང་མཚོན་པ་བརྡ། །གནས་ལུགས་དོན་གྱི་ཨེ་ཝྃ་བཞི། །དང་པོ་སྟོང་ཉིད་མཚོན་བྱེད་པར། །ཨེ་ཡི་མིང་གི་རྣམ་གྲངས་གཞན། །ནམ་མཁའ་གསང་ཆེན་པདྨ་སོགས། །བདེ་ཆེན་ཝྃ་གྱི་མངོན་བརྗོད་ཀྱང་། །བདེ་ཆགས་སྙིང་རྗེ་ཐིག་ལེ་སོགས། །དེ་སྐད་དུའང་དུས་འཁོར་ལས། །ཨེ་དང་གསང་ཆེན་ནམ་མཁའི་ཁམས། །བྷ་ག་ཆོས་འབྱུང་ཆུ་སྐྱེས་དང་། །སེངྒེའི་ཁྲིར་བཞུགས་རྡོ་རྗེ་ཅན། །ཝྃ་དང་རྡོར་འཛིན་རྡོ་རྗེ་སེམས། །དུས་ཀྱི་འཁོར་ལོ་ཧེ་རུ་ཀཿ རྒྱུད་རྣམས་ཀུན་གྱི་གནས་སུ་གསུངས། ཡུལ་ཅན་དུ་མའི་མིང་རྣམས་དང་། །སེམས་ཅན་དུ་མའི་བསམ་པའོ། །ཞེས་གསུངས་གཉིས་པ་གཟུང་སྒྲུབ་ཕྱིར། །དབུས་སུ་ཨ་ཡིག་གྲི་གུག་དབྱིབས། །ཤར་དུ་ཨེ་ཡིག་དབྱུག་པ་དང་། །ལྷོ་རུ་རྀ་ཡིག་ཚེགས་དྲག་སྟེ། །ནུབ་ཏུ་ལྀ་ཡིག་དགྲ་སྟྭར་བཏགས། །བྱང་དུ་ཨོ་ཡིག་ཐིག་ལེར་བྲི། །ཨ་ལ་ལྀ་བྱིན་མགོ་བོར་འགྱུར། །ཨེ་བྱིན་གཡོན་ཕྱོགས་ཨེ་ཉིད་དེ། །རྀ་བྱིན་ཟླ་ཆོས་ཨོ་བྱིན་པས། །ཀླད་ཀོར་དུ་འགྱུར་སྟོང་ཆེན་གྱི། །ཡི་གེ་ལྔ་འདུས་ཨེ་ཝྃ་གྲུབ། །དེ་སྐད་དུ་ཡང་རྩ་རྒྱུད་ལས། །ཡི་གེ་ཨེ་དབུས་ཡི་གེ་ཝྃ། །སངས་རྒྱས་ཀུན་གྱི་བདེ་བའི་གནས། །སྐུ་གསུང་ཐུགས་ཀྱི་སྦྱོར་བ་ཡིས། །ནམ་མཁའི་ཁམས་སུ་རྡོ་རྗེ་སེམས། །ཟླ་བ་ས་བོན་ཡི་གེ་ལུས། །ཉི་མ་རྡུལ་དང་ཚེགས་དྲག་དང་། །སེམས་ཀྱི་རྣམ་པ་ཡི་གེ་ལས། །ཨེ་ཝྃ་ནམ་མཁའི་ཁམས་སུ་གནས། །ཞེས་གསུངས་གསུམ་པ་ཐབས་ཤེས་དང་། རྡོ་རྗེ་དྲིལ་བུ་ཞལ་སྦྱོར་སོགས། །ཆོས་རྣམས་བདེ་སྟོང་མཚོན་བྱེད་པའོ། །བཞི་པ་བདེ་སྟོང་ཟུང་འཇུག་ཕྱི། །ལྷན་ཅིག་སྐྱེས་པའི་ཡེ་ཤེས་ལས། །དེ་ཉིད་རབ་ཏུ་བརྗོད་པ་ཡིན། །རྒྱས་པར་ཀཱ་ལ་ཙཀྲ་དང་། །སྡོམ་འབྱུང་སོགས་ལས་རྟོགས་པར་བྱོས། །མདོར་བསྡུས་འདི་བྲིས་དགེ་བ་ཡིས། །སྣོད་བཅུད་ཐབས་ཤེས་འཁོར་ལོར་དང་། །རླུང་སྔགས་ཨེ་ཝྃ་ཐིག་ལེར་རྫོགས། །བདེ་སྟོང་ཐུགས་སུ་སྨིན་གྱུར་ཅིག །ཅེས་པའང་མཁྱེན་བརྩེའི་དབང་པོས་སོ། །སརྦ་མངྒ་ལཾ། ། ༈ བླ་མ་ས་སྐྱ་པ་ཆེན་པོས། །བསྐྱེད་རིམ་རྟོག་པ་ཡིན་མོད་ཀྱི། །རྟོག་པའི་ངོ་བོ་སེམས་ཡིན་ཏེ། །སེམས་ཀྱི་མཚན་ཉིད་གསལ་རིག་ཉིད། །གསལ་རིག་རང་བཞིན་སྟོང་པ་ཡིན། །སྟོང་པ་གདོད་ནས་ཆོས་ཀྱི་དབྱིངས། །འཁྲུལ་པ་ཆོས་ཀྱི་དབྱིངས་ཉིད་དུ། །ཤེས་པས་རྟོག་པ་ཐམས་ཅད་ཀྱང་། །ཇི་ལྟར་བསྒོམས་ཀྱང་མི་རྟོག་ཉིད། །བཙལ་ཡང་འཁྲུལ་པ་ག་ལ་སྲིད། །ཅེས་དང་། དེ་ལྟར་ཆོས་ཀྱི་དབྱིངས་གོ་ན། །མཚན་བཅས་དགེ་སྦྱོར་མི་སྲིད་དེ། །དེ་ཡིས་བསྐྱེད་རིམ་བསྒོམས་ན་ཡང་། །མཚན་མ་མེད་པའི་དགེ་སྦྱོར་ཡིན། །ཅེས་སོ།། །། ༈
[edit]

e wa~M sgra bshad/__ e wa~M gyi don tshig le'u byas pa/__/rdo rje can la phyag 'tshal lo/__/yi ge gnyis kyi sbyor ba ni/__/thabs shes zung 'jug ston pa ste/__/de slad chos phung brgyad khri dang /__/bzhi stong kun gyi 'byung gnas che/__/yin phyir lha'i bu'i zhus mdo las/__/chos kyi phung po brgyad khri dang /__/bzhi stong dag gi grangs rnyed kyang /_/kun gyi gzhi dang pha ma ni/__/yi ge gnyis su der rab bstan/__/yi ge e ni ma 'gyur la/_/wa~M ni pha zhes bya bar grags/__/thig le de gnyis sbyor ba ste/__/sbyor dang shin tu rmad byung pa'o/__/zhes gsungs de yang 'di skad ces/__/mdo rnams kun gyi gleng gzhir gsungs/_/rgyu mtshan e ni a li dang /__/wa~M ni kA li'i yi ge ste/__/de 'dus pa las ming dang tshig__/tshigs su bcad dang le'u nas/__/glegs bam bar du rgyun chags phyir/__khyad par sngags la brjod pa sgras/__/bris pa gzugs dang mtshon pa brda/__/gnas lugs don gyi e wa~M bzhi/__/dang po stong nyid mtshon byed par/__/e yi ming gi rnam grangs gzhan/_/nam mkha' gsang chen pad+ma sogs/__/bde chen wa~M gyi mngon brjod kyang /__/bde chags snying rje thig le sogs/__/de skad du'ang dus 'khor las/__/e dang gsang chen nam mkha'i khams/__/b+ha ga chos 'byung chu skyes dang /__/seng+ge'i khrir bzhugs rdo rje can/__/wa~M dang rdor 'dzin rdo rje sems/__/dus kyi 'khor lo he ru kaH__rgyud rnams kun gyi gnas su gsungs/__yul can du ma'i ming rnams dang /__/sems can du ma'i bsam pa'o/_/zhes gsungs gnyis pa gzung sgrub phyir/__/dbus su a yig gri gug dbyibs/__/shar du e yig dbyug pa dang /__/lho ru r-i yig tshegs drag ste/__/nub tu l-i yig dgra s+t+war btags/__/byang du o yig thig ler bri/__/a la l-i byin mgo bor 'gyur/__/e byin g.yon phyogs e nyid de/__/r-i byin zla chos o byin pas/__/klad kor du 'gyur stong chen gyi/__/yi ge lnga 'dus e wa~M grub/__/de skad du yang rtsa rgyud las/__/yi ge e dbus yi ge wa~M/__/sangs rgyas kun gyi bde ba'i gnas/__/sku gsung thugs kyi sbyor ba yis/__/nam mkha'i khams su rdo rje sems/__/zla ba sa bon yi ge lus/__/nyi ma rdul dang tshegs drag dang /__/sems kyi rnam pa yi ge las/__/e wa~M nam mkha'i khams su gnas/__/zhes gsungs gsum pa thabs shes dang /__rdo rje dril bu zhal sbyor sogs/__/chos rnams bde stong mtshon byed pa'o/__/bzhi pa bde stong zung 'jug phyi/__/lhan cig skyes pa'i ye shes las/__/de nyid rab tu brjod pa yin/__/rgyas par kA la tsakra dang /__/sdom 'byung sogs las rtogs par byos/__/mdor bsdus 'di bris dge ba yis/__/snod bcud thabs shes 'khor lor dang /__/rlung sngags e wa~M thig ler rdzogs/__/bde stong thugs su smin gyur cig__/ces pa'ang mkhyen brtse'i dbang pos so/__/sarba mang+ga laM/____/_! bla ma sa skya pa chen pos/__/bskyed rim rtog pa yin mod kyi/__/rtog pa'i ngo bo sems yin te/__/sems kyi mtshan nyid gsal rig nyid/__/gsal rig rang bzhin stong pa yin/__/stong pa gdod nas chos kyi dbyings/__/'khrul pa chos kyi dbyings nyid du/__/shes pas rtog pa thams cad kyang /__/ji ltar bsgoms kyang mi rtog nyid/__/btsal yang 'khrul pa ga la srid/_/ces dang /__de ltar chos kyi dbyings go na/__/mtshan bcas dge sbyor mi srid de/__/de yis bskyed rim bsgoms na yang /__/mtshan ma med pa'i dge sbyor yin/__/ces so//____//__!

Footnotes

Other Information