སྔ་འགྱུར་ལུགས་ཀྱི་བསྐྱེད་རིམ་ཕལ་ཆེར་བདག་མདུན་དབྱེར་མེད་དུ་སྒྲུབ་པ་སྟེ།

🚧 This website is under continued development. We appreciate your patience!

Previous Text Back to Volume PageNext Text

Wylie title	snga 'gyur lugs kyi bskyed rim phal cher bdag mdun dbyer med du sgrub pa ste
Location	mkhyen brtse'i bka' 'bum Volume 4, sde tshan 1, Text 7, Pages 139-147 (Folios 70a6 to 74a1)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. snga 'gyur lugs kyi bskyed rim phal cher bdag mdun dbyer med du sgrub pa ste. In 'jam dbyangs mkhyen brtse'i dbang po'i bka' 'bum, Vol. 4: 139-147. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris  ·  Generation Stage - bskyed rim

1 Texts in this Section (sde tshan or chos tshan)

7 139-147	སྔ་འགྱུར་ལུགས་ཀྱི་བསྐྱེད་རིམ་ཕལ་ཆེར་བདག་མདུན་དབྱེར་མེད་དུ་སྒྲུབ་པ་སྟེ། snga 'gyur lugs kyi bskyed rim phal cher bdag mdun dbyer med du sgrub pa ste Notes - zin bris   ·   Generation Stage - bskyed rim	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

སྔ་འགྱུར་ལུགས་ཀྱི་བསྐྱེད་རིམ་ཕལ་ཆེར་བདག་མདུན་དབྱེར་མེད་དུ་སྒྲུབ་པ་སྟེ། དེ་ཡང་དངོས་གཞིའི་ཏིང་འཛིན་གསུམ་ནས་བཟུང། རྫས། བསྒྲུབ་གཞི། བསྒྲུབ་བྱ་ཐམས་ཅད་བདག་མདུན་དབྱེར་མེད་དམ་ཚིག་དཀྱིལ་འཁོར་གཅིག་གིས་བསྡུས་པར་བསྒོམ་པ་སྟེ། འདི་ལྟར་འཆི་བ་སྦྱོང་ཞིང་ཆོས་སྐུ་ལམ་བྱེད་རྫོགས་རིམ་གྱི་འོད་གསལ་ཀ་དག་གི་ཡེ་ཤེས་འཆར་བའི་རྒྱུར་ཆོས་ཐམས་ཅད་མདོ་མང་ནས་རང་བཞིན་གྱིས་རྣམ་པར་དག་པའི་སྟོང་ཉིད་སྤྲོས་བྲལ་རང་བྱུང་གི་ཡེ་ཤེས་གནས་ལུགས་མ་བཅོས་པའི་ངང་དུ་བློ་འཇོག་པ་དེ་བཞིན་ཉིད་ཀྱི་ཏིང་འཛིན། བར་དོ་སྦྱོང་ཞིང་ལོངས་སྐུ་ལམ་བྱེད་རྫོགས་རིམ་དུས་སྟོང་ཉིད་ལས་ཟུང་འཇུག་གི་དཀྱིལ་འཁོར་དུ་སད་བྱེད་སྙིང་རྗེ་ཆེན་པོ་རང་བྱུང་དུ་འཆར་བའི་རྒྱུད། དེ་ལྟར་མ་རྟོགས་པའི་སེམས་ཅན་ཀུན་ལ་སྙིང་རྗེ་སྒྱུ་མ་ལྟ་བུ་མཁའ་ཁྱབ་ཏུ་བསྒོམ་པ་ནི་ཀུན་སྣང་གི་ཏིང་འཛིན། སྐྱེ་བ་འཛིན་པར་ཕྱོགས་པའི་དྲི་ཟའི་སེམས་ཀྱི་ནཱ་ད་སྦྱོང་ཞིང་སྤྲུལ་སྐུའི་སྣང་བ་ལམ་བྱེད་རྫོགས་རིམ་འོད་གསལ་ལས་སྙིང་རྗེའི་འཕེན་པས་ཟུང་འཇུག་གི་དཀྱིལ་འཁོར་དུ་འཆར་བའི་རྒྱུར། སྟོང་ཉིད་སྙིང་རྗེ་ཟུང་འཇུག་གི་རིག་གདངས་ཡི་གེའི་རྣམ་པར་བསྒོམ་པ་རྒྱུའི་ཏིང་འཛིན་ཏེ། དེ་ལས་ཐམས་ཅད་ཀྱི་བག་ཆགས་སྦྱོང་ཞིང་། སངས་རྒྱས་ཀྱི་ཚེ་རྣམ་པར་དག་པའི་ཞིང་ཁམས་ལམ་བྱེད། རྫོགས་རིམ་དུ་རྩ་འཁོར་འབྱུང་བའི་ཁམས་དང་བཅས་པ་དྭང་མར་སྒྲུབ་ཕྱིར་རྒྱུ་ཏིང་ངེ་འཛིན་ལས་འབྱུང་ལྔ་རིམ་བརྩེགས་གཞལ་ཡས་ཁང་དང་བཅས་པ་བསྒོམ་པ། སྐྱེ་གནས་སུ་བཞུགས་པ་ནས་ལུས་རྫོགས་པའི་བར་སྦྱོང་ཞིང་། སྤྲུལ་པའི་ལྷུམས་སུ་ཞུགས་པ་ནས་བལྟམས་པའི་བར་ལམ་བྱེད། རྫོགས་རིམ་དུས་བདེ་བ་ཆེན་པོ་ཟུང་འཇུག་གི་ལྷ་སྐུར་ལྡང་བའི་སྨིན་བྱེད་གཙོ་བོ་བསྒོམ་པ། བྱིས་པ་དེ་ཉིད་ལང་ཚོ་རྫོགས་ནས་བུ་ཚ་འཁོར་གཡོགས་སོགས་འདུས་པའི་བག་ཆགས་སྦྱོང་ཞིང། འབྲས་བུ་སྤྲུལ་སྐུའི་འཁོར་སྡུད་པ་ལམ་བྱེད་དང་། རྫོགས་རིམ་ཟུང་འཇུག་གི་ལྷ་སྐུ་རྒྱ་ཆེར་སྤྲོ་བའི་ཕྱིར་འཁོར་བསྒོམ་པ། བྱིས་པ་དེ་སྒོ་གསུམ་གྱི་ནུས་པ་སྟོབས་འཕེལ་བ་སྦྱང་ཞིང་། འབྲས་བུ་རྡོ་རྗེ་གསུམ་ལམ་བྱེད། རྫོགས་རིམ་དུ་ཁུ་རྡུལ་རླུང་གསུམ་གྱི་དྭང་མ་སྟོབས་སུ་བྱ་བའི་ཕྱིར་གནས་གསུམ་བྱིན་བརླབས། ཚོར་འདུ་རྫོགས་པས་རྒན་པ་རྣམས་དང་བློ་གྲོས་མཉམ་པ་སྦྱོང་ཞིང་། འབྲས་བུ་སངས་རྒྱས་ཐམས་ཅད་ཀྱི་ཡེ་ཤེས་མཉམ་པ་ཉིད་དུ་གྱུར་པ་ལམ་བྱེད། རྫོགས་རིམ་སྐབས་འཁོར་འདས་དབྱེར་མེད་ཀྱི་ཡེ་ཤེས་བསྐྱེད་ཕྱིར། ཡེ་ཤེས་པ་སྤྱན་དྲངས་བསྟིམ། བློ་གྲོས་རྫོགས་པས་རིགས་མཐུན་གྱི་ལས་ལ་དབང་བསྒྱུར་བ་སྦྱོང་ཞིང་། འབྲས་བུར་སངས་རྒྱས་ཐམས་ཅད་ཀྱིས་དབང་བསྐུར་བ་དང་། རྫོགས་རིམ་དུ་རླུང་སེམས་གཙུག་ཏོར་དུ་ཐིམ་པའི་ཆེད་དབང་བསྐུར་བ། དབང་པོ་རྒྱས་པས་འདོད་ཡོན་ལོངས་སྤྱོད་པ་སོགས་སྦྱོང་ཞིང་། སངས་རྒྱས་ཀྱི་ཚེ་ཡེ་ཤེས་ཆེན་པོའི་མཆོད་བསྟོད་རྒྱུན་མི་འཆད་པ་དང་། རྫོགས་རིམ་དུ་རིག་པ་བརྟུལ་ཞུགས་ཀྱི་སྤྱད་པ་སྤང་བླང་མེད་པར་སྤྱོད་པའི་ཆེད་མཆོད་བསྟོད་བྱ་བ། དེ་ནས་བསྐྱེད་རིམ་གྱི་གཙོ་བོ་ལྷ་ཡི་སྣང་ཞེན་ལ་བསླབ་པ་སྟེ། སྔགས་ལམ་གྱི་སྤྱད་བྱར་གྱུར་པའི་སྡུག་བསྔལ་ནི་དོན་དུ་ཐ་མལ་གྱི་སྣང་ཞེན་ཉིད་ཡིན་ལ། དེ་ཡང་སྣང་བ་ནི་སེམས་འཁྲུལ་པའི་སྣང་བ་མ་དག་པའི་སྣོད་བཅུད་འདི་ཡིན་ལ། ཞེན་པ་ནི་ཡུལ་སྔ་མ་ལ་ཕྱི་མ་མུ་མཐུད་པའི་རྟོག་པའི་ལུ་གུ་རྒྱུད་དེ་ཡིན་ཅིང་རྟོག་པ་ལ་མཚམས་སྦྱོར་བཅོལ་ནས་དེའི་ངང་ལ་རང་སར་བཞག་པ་ནི་སྣང་ཆ་ལྷར་བསླང་བ་ཡིན་ལ། མཚམས་སྦྱོར་གྱི་རྟོག་པ་དེ་ལ་ནང་གི་ཡིད་བྱེད་ཕྲ་མོ་ཟེར་ཡང་མི་མཐུད་པའི་ཕྱིར་རྟོག་པ་ཕལ་པ་མིན་ནོ། །དེ་ལྟར་ན་མ་དག་པའི་སྣང་བ་ཐམས་ཅད་དེ་ཏིང་གིས་སྟོང་ཉིད་དུ་སྦྱངས་པའི་ངང་ལས་རྩལ་སྙིང་རྗེའི་འཕེན་ཤུགས་ལྷ་སྐུའི་གསལ་སྣང་ལམ་མེ་བར་གསལ་བ་ལ་སེམས་བཟུང་ཞིང་དེ་ལྟར་མི་གསལ་ན་བྱིང་རྒོད་ཀྱི་མཐའ་བརྟག་ནས། བྱིངས་ན་མས་རིམ་དང་རྒོད་ན་ཡས་རིམ་གྱིས་སྐུ་ཡི་ཆ་ཤས་ལ་སེམས་བཟུང་ནས་མཐར་ཅིག་ཅར་དུ་གསལ་བ་ལ་སྦྱངས་པས་དང་པོ་ཡིད་ཀྱི་ཡུལ་དུ་ལྷ་ཡི་རྣམ་པ་ཝལ་ཝལ་འཆར། དེ་ནས་རེག་མཐོང་གི་མཚན་མ་ཡོད་པ་ལྟར་དབང་པོའི་མངོན་སུམ་དུ་གསལ། དེ་ནས་རབ་ལུས་ཀྱིས་མཚོན་པའི་མ་དག་པའི་སྣང་བ་ཐམས་ཅད་ནུབ་ནས་ལྷ་ཡི་གསལ་སྣང་དང་ང་རྒྱལ་ལ་རྩེ་གཅིག་ཏུ་གནས་པ་འབྱུང་། དེ་གསུམ་ལ་ཡིད་ཀྱི་ཡུལ། སྣང་བའི་ཡུལ། ཞེན་པའི་ཡུལ་དུ་གསལ་བ་ཟེར། དེ་ལྟར་ཡུལ་གསུམ་གསལ་ནས་སྐུ་ཡི་ཆ་ཤས་དང་རྒྱན་ཕྲ་མོ་རེ་རེ་ནས་ཀྱང་གསལ་སྣང་འདོན་ཅིང་། ལྷ་སྐུ་ཆེ་ཆུང་མ་ངེས་པ། མང་ཉུང་ཐུན་རིང་ཐུང་སོགས་མ་ངེས་པ་ལ་རྩལ་སྦྱངས་པས་ལྷ་གྱད་དུ་མྱུར་བ་ཞེས་བྱ་སྟེ། ཇི་ལྟར་བསྒོམས་ཀྱང་བདེ་བར་འགྱུར་པའི་ཚུལ་ལ་བསླབ་ཅིང་། ཚུལ་དེས་རྟེན་དང་བརྟེན་པའི་གསལ་སྣང་ཐོན་པ་ནི། སེམས་ཉིད་གདོད་ནས་ལྷར་དག་པ་ལས་གཞན་ནས་བཙལ་དུ་མེད་པ་དང་། སེམས་དང་ལྷ་སྐུ་དབྱེར་མེད་དེ་ཡང་གསལ་སྟོང་འཛིན་མེད་དུ་ཤེས་པ་ནི་གནད་དམ་པའོ། །དེས་སྐྱོ་ན་ཐུགས་དམ་བསྐུལ་བའི་ཕྱིར་བཟླས་པ་བྱ་བ་ནི། ངག་གི་ཞེན་པ་དང་སྒྲ་དོན་འདྲེས་འཛིན་གྱི་རྟོག་པ་སྦྱོང་། འབྲས་དུས་ཆོས་འཁོར་བསྐོར་བ་དང་། རྫོགས་རིམ་དུས་རླུང་དབུ་མར་ཐིམ་པར་བྱེད་པའོ། །ཐུན་མཐར་དཀྱིལ་འཁོར་བསྡུ་བ་ནི། འདུ་བྱེད་ཀྱི་ཐ་མ་འཇིག་པ་སྦྱོང་། འབྲས་དུས་གཟུགས་སྐུ་ཆོས་སྐུར་ཐིམ་པ་དང་རྫོགས་རིམ་དུ་འོད་གསལ་གྱི་ཡེ་ཤེས་འཆར་བའི་རྒྱུའོ། །དེ་ལས་ལྷར་ལྡང་བ་ནི། འཆི་སྲིད་ལས་བར་དོར་ལྡང་བ་སྦྱོང་ཞིང་། ཆོས་སྐུ་ལས་གཟུགས་སྐུར་བཞེངས་པ་དང། རྫོགས་རིམ་སྐབས་འོད་གསལ་ལས་ཟུང་འཇུག་གི་སྐུར་ལྡང་བའི་རྒྱུའོ།། །། ༈

བར་དོའི་རྣམ་བཞག་ལ། ངོ་བོ། སྒྲ་དོན། དབྱེ་བ། སོ་སོའི་ཁྱད་པར་དང་བཞི། དང་པོ་ནི། གཞི་དབྱིངས་ཀ་དག་ལས་གཞན་དུ་སྣང་བ་ཐམས་ཅད་བར་དོའི་གནས་སྐབས་ཡིན་ཏེ། གཞི་སྣང་ཡེ་ཤེས་སུ་ཤར་བ་དག་པ་ཆོས་ཉིད་བར་དོ། །འཁྲུལ་སྣང་འགྲོ་དྲུག་གིས་བསྡུས་སོ་ཅོག་ནི་མ་དག་པ་འཁྲུལ་བའི་བར་དོ་ཡིན་ཏེ། དེ་ཡང་དབྱིངས་ཀ་དག་ལས་ཤར་ཞིང་། འཆར་གཞིའི་དབྱིངས་སུ་མ་རྫོགས་ཀྱི་བར་གྱི་སེམས་པ་ས་བོན་དང་བཅས་པ་ནི་བར་དོའོ། །གཉིས་པ་སྒྲ་དོན་ནི། སྔ་མ་དང་ཕྱི་མ་དག་གི་བར་གྱི་ཆ་ལས་བཏགས་པ་སྟེ་བར་དོ་དང་པོ་གཉིས་ཀྱི་དབང་དུ་བྱས་ན་སྔ་མས་འཕང་ཞིང་ཕྱི་མ་མ་གྲུབ་པའི་བར་གྱི་ཆ་ལས་བར་དོ་དང་། ཕྱི་མ་གཉིས་ཀྱི་དབང་དུ་ན་མཛོད་ལས། འདི་གང་འཆི་དང་སྐྱེ་བ་ཡི། །སྲིད་པའི་བར་དུ་འབྱུང་བའོ། །བགྲོད་པའི་ཡུལ་དུ་མ་ཕྱིན་ཕྱིར། སྲིད་པ་བར་མ། ཞེས་པས་འདི་ནས་ཤི་སྟེ་ཕ་རོལ་ཏུ་སྐྱེ་སྲིད་མ་གྲུབ་དེ་སྲིད་ལ་བར་དོ། །ཞེས་བྱའོ། །དབྱེ་བ་ནི། ཐལ་འགྱུར་ལས། དབྱེ་བ་རྣམ་པ་བཞི་དག་ལས། ཞེས་པའི་དང་པོ་སྐྱེ་ཤི་བར་དོ་ནི། མི་མངལ་དུ་སྐྱེ་བ་གྲུབ་ནས་འཆི་ནད་ཀྱིས་བཏབ་ཚུན་དང་། གཉིས་པ་འཆི་ཁའི་བར་དོ་ནི། འཆི་བ་ལ་ཕྱོགས་ནས་ནང་དབུགས་ཐིམ་ཚུན་ཆད་དང་། གསུམ་པ་ཆོས་ཉིད་ཀྱི་བར་དོ་ནི། ནང་དབུགས་ཆད་ནས་ལྷུན་གྲུབ་གྱི་སྣང་བ་ཐིམ་པ་ཚུན་ཆད་དང་། བཞི་པ་སྲིད་པ་བར་དོ་ནི། ལྷུན་གྲུབ་གྱི་སྣང་བ་ཐིམ་ནས་ཕྱི་མའི་སྐྱེ་སྲིད་གྲུབ་ཚུན་ཆད་དོ། །བཞི་པ་སོ་སོའི་ལམ་ཁྱེར་ནི། དཔེ་དོན་གཉིས་ཀྱིས་སྟོན་ཏེ། དཔེ་སྐྱེ་གནས་ཀྱི་བར་དོ་ལ་སྒྲོ་འདོགས་ཆོད་པ་རྒྱ་ཁྲ་ནང་དུ་འཇུག་པ་ལྟ་བུ་སྟེ། དོན་དམ་བླ་མ་ལ་བརྟེན་ནས། དེས་བསྟན་པའི་གདམས་ངག་ལ་ཐོས་བསམ་སྒོམ་པ་ནན་ཏན་ལྷུར་བྱས་ནས་སྒྲོ་འདོགས་ཆོད་པ་བྱའོ། །དེ་བཞིན་དུ་འཆི་ཁ་བར་དོ་གསལ་གདབ་པ་སྒེག་མོའི་མེ་ལོང་བལྟ་བ་ལྟ་བུ་ནི་སྔར་གོམས་པའི་གདམས་ངག་རྣམས་སྐབས་འདིར་བློ་ལ་གསལ་ཐེབས་པའོ། །ཆོས་ཉིད་ཀྱི་བར་དོར་རང་སྣང་ལ་ཡིད་ཆེས་པ་མ་པང་དུ་བུ་འཇུག་པ་ལྟ་བུ་ནི་གདམས་ངག་གི་དོན་ཉམས་འོག་ཏུ་ཆུད་པས་ཆོས་ཉིད་ཀྱི་སྣང་ཆ་ཇི་ལྟར་ཤར་ཡང་འཇིགས་པ་མེད་པར་རང་སྣང་ཡེ་ཤེས་ཀྱི་རོལ་པར་གདེང་ཚུད་པའོ། །སྲིད་པ་བར་དོར་ལས་ཀྱི་འཕྲོ་མཐུད་པ་ཡུར་བ་རྐང་ཆག་ལ་ཝ་འཛུགས་པ་ལྟ་བུ་ནི་འཁྲུལ་སྣང་འཇིགས་སྐྲག་ཤར་ཡང་སྔར་གོམས་པ་དང་གཞན་རྐྱེན་གྱི་གསལ་འདེབས་ལ་བརྟེན་དག་པའི་སྐྱེ་སྲིད་ཀྱི་ལམ་དུ་འཇུག་པའོ།། །། ༈ གཅོད་ཡུལ་ཟེར་བ་འདི་ལ་གོ་བ་ལེན་ཚུལ་མང་ནའང་། ཤིང་གཅོད་པའི་ཡུལ་ས་གཞི་ཡིན་པ་ལྟར། བཅད་བྱ་གཟུང་འཛིན་གྱི་རྟོག་པ་གཅོད་པའི་ཡུལ་སྟོང་ཉིད་སྤྲོས་པ་དང་བྲལ་བའི་ཡེ་ཤེས་ཏེ། དོན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བཞིར་ཕྱེ་བའི་གཞི་ཤེར་ཕྱིན་གང་ཡིན་པ་སྟེ། དེའི་ནང་དུ་བྱེད་པའི་གཞུང་ལའང་དེ་ཡི་སྒྲས་སྨོས་པའོ། །ཞེས་བཞེད་དོ།། །། ༈ སློབ་དཔོན་རིན་པོ་ཆེ་འཁྲུངས་ཡུལ་ཨོ་རྒྱན་གྱི་ཡུལ་གྱི་ནུབ་བྱང་མཚམས་ཞེས་པ་སྲིན་པོའི་ཡུལ་དུ་བཞེད་པའང་ཡོད་དེ། དེའི་ཡུལ་གླིང་དགུ་བཤད་པ་ན། ལྷོ་ནུབ་མཚམས་ན་སྲིན་པོའི་གླིང་ཞེས་ཡོད། ཅེས་གསུངས་པ་ལ་དགོངས། དེ་ལྟར་ན། ལྷོ་ནུབ་སྲིན་པོའི་ཡུལ་ཞེས་པ་ལ་རྩོད་པ་མི་འབྱུང་བ་ཡིན། སྔོན་གྱི་བསྐལ་པ་དང་པོ་ལ། ཞེས་པའི་སྤྱིར་བཏང་དུས་བཞིའི་ཟླས་ཕྱེ་བ་ལྟ་བུ་མ་ཡིན་པར། དང་པོ་སྐུ་འཁྲུངས་བའི་དུས་དེ་ཙམ་ལ་སྔོན་གྱི་བསྐལ་པ་ཞེས་རྣམ་པར་བཞག་སྟེ། འདི་ལྟ་བུ་མང་ངོ་།། །། ༈ སྡེ་གསུམ་པོའང་ཆོས་སྐད་མི་མཐུན་པ་ཙམ་མང་མོད། མཐར་ཐུག་གི་ལྟ་བ་ལ་ཁྱད་པར་མེད་ཅིང་། ཐབས་ཀྱིས་ཁྱད་པར་འཕགས་པ་ཙམ་དུ་ཁས་བླངས་ན་བདེ་ཞིང་། སྤྱིར་སེམས་སྡེས་ཟབ་པའམ་སྟོང་ཉིད། ཀློང་སྡེས་གསལ་བའམ་འོད་གསལ། མན་ངག་སྡེས་ཟབ་གསལ་དབྱེར་མེད་ཙམ་དུ་བཏོན་ནས་འཆད་པ་དང་། དེ་དང་དེའི་ཐབས་ཀྱང་། གཉུག་མ་རང་སར་འཇོག་པ་ཙམ་དང་། རླུང་དང་ལྟ་སྟངས་ཀྱིས་བོགས་འདོན་པ་དང་། ཐོད་རྒལ་གྱིས་རླུང་སེམས་དབྱིངས་སུ་འཇུག་པའི་ཐབས་ཁྱད་པར་ཅན་གྱིས་འབྲས་བུ་ལ་སྦྱོར་བའི་ཚུལ་ལའང་མྱུར་དུ་བྱུང་བར་བཞེད་དོ།། །། ༈

སློབ་དཔོན་བི་མ་ལས་གཡུའི་ཐང་མ་གྲས་དགུ་ལས། །བྱ་བྱེད་ཀྲི་ཡི་དོན་དམ་དུ། །ཀུན་ཀྱང་དག་པ་ཆོས་ཉིད་ལ། །མཐའ་ཡི་དྲི་མ་ཡེ་ནས་མེད། །ཀུན་རྫོབ་རང་བཞིན་རིགས་གསུམ་སྐུ། །ཀུན་ཀྱང་དག་ཕྱིར་དུག་གསུམ་གསུམ། །ལྷ་ཡི་དཀྱིལ་འཁོར་ཡིན་པར་འདོད། །ཅེས་སོ།། །། ༈

[edit]

snga 'gyur lugs kyi bskyed rim phal cher bdag mdun dbyer med du sgrub pa ste/ snga 'gyur lugs kyi bskyed rim phal cher bdag mdun dbyer med du sgrub pa ste/_de yang dngos gzhi'i ting 'dzin gsum nas bzung/__rdzas/__bsgrub gzhi/__bsgrub bya thams cad bdag mdun dbyer med dam tshig dkyil 'khor gcig gis bsdus par bsgom pa ste/__'di ltar 'chi ba sbyong zhing chos sku lam byed rdzogs rim gyi 'od gsal ka dag gi ye shes 'char ba'i rgyur chos thams cad mdo mang nas rang bzhin gyis rnam par dag pa'i stong nyid spros bral rang byung gi ye shes gnas lugs ma bcos pa'i ngang du blo 'jog pa de bzhin nyid kyi ting 'dzin/__bar do sbyong zhing longs sku lam byed rdzogs rim dus stong nyid las zung 'jug gi dkyil 'khor du sad byed snying rje chen po rang byung du 'char ba'i rgyud/__de ltar ma rtogs pa'i sems can kun la snying rje sgyu ma lta bu mkha' khyab tu bsgom pa ni kun snang gi ting 'dzin/__skye ba 'dzin par phyogs pa'i dri za'i sems kyi nA da sbyong zhing sprul sku'i snang ba lam byed rdzogs rim 'od gsal las snying rje'i 'phen pas zung 'jug gi dkyil 'khor du 'char ba'i rgyur/__stong nyid snying rje zung 'jug gi rig gdangs yi ge'i rnam par bsgom pa rgyu'i ting 'dzin te/__de las thams cad kyi bag chags sbyong zhing /__sangs rgyas kyi tshe rnam par dag pa'i zhing khams lam byed/__rdzogs rim du rtsa 'khor 'byung ba'i khams dang bcas pa dwang mar sgrub phyir rgyu ting nge 'dzin las 'byung lnga rim brtsegs gzhal yas khang dang bcas pa bsgom pa/__skye gnas su bzhugs pa nas lus rdzogs pa'i bar sbyong zhing /__sprul pa'i lhums su zhugs pa nas bltams pa'i bar lam byed/__rdzogs rim dus bde ba chen po zung 'jug gi lha skur ldang ba'i smin byed gtso bo bsgom pa/__byis pa de nyid lang tsho rdzogs nas bu tsha 'khor g.yogs sogs 'dus pa'i bag chags sbyong zhing/__'bras bu sprul sku'i 'khor sdud pa lam byed dang /__rdzogs rim zung 'jug gi lha sku rgya cher spro ba'i phyir 'khor bsgom pa/__byis pa de sgo gsum gyi nus pa stobs 'phel ba sbyang zhing /__'bras bu rdo rje gsum lam byed/__rdzogs rim du khu rdul rlung gsum gyi dwang ma stobs su bya ba'i phyir gnas gsum byin brlabs/__tshor 'du rdzogs pas rgan pa rnams dang blo gros mnyam pa sbyong zhing /__'bras bu sangs rgyas thams cad kyi ye shes mnyam pa nyid du gyur pa lam byed/__rdzogs rim skabs 'khor 'das dbyer med kyi ye shes bskyed phyir/__ye shes pa spyan drangs bstim/__blo gros rdzogs pas rigs mthun gyi las la dbang bsgyur ba sbyong zhing /__'bras bur sangs rgyas thams cad kyis dbang bskur ba dang /__rdzogs rim du rlung sems gtsug tor du thim pa'i ched dbang bskur ba/__dbang po rgyas pas 'dod yon longs spyod pa sogs sbyong zhing /__sangs rgyas kyi tshe ye shes chen po'i mchod bstod rgyun mi 'chad pa dang /__rdzogs rim du rig pa brtul zhugs kyi spyad pa spang blang med par spyod pa'i ched mchod bstod bya ba/__de nas bskyed rim gyi gtso bo lha yi snang zhen la bslab pa ste/__sngags lam gyi spyad byar gyur pa'i sdug bsngal ni don du tha mal gyi snang zhen nyid yin la/__de yang snang ba ni sems 'khrul pa'i snang ba ma dag pa'i snod bcud 'di yin la/__zhen pa ni yul snga ma la phyi ma mu mthud pa'i rtog pa'i lu gu rgyud de yin cing rtog pa la mtshams sbyor bcol nas de'i ngang la rang sar bzhag pa ni snang cha lhar bslang ba yin la/__mtshams sbyor gyi rtog pa de la nang gi yid byed phra mo zer yang mi mthud pa'i phyir rtog pa phal pa min no/__/de ltar na ma dag pa'i snang ba thams cad de ting gis stong nyid du sbyangs pa'i ngang las rtsal snying rje'i 'phen shugs lha sku'i gsal snang lam me bar gsal ba la sems bzung zhing de ltar mi gsal na bying rgod kyi mtha' brtag nas/__byings na mas rim dang rgod na yas rim gyis sku yi cha shas la sems bzung nas mthar cig car du gsal ba la sbyangs pas dang po yid kyi yul du lha yi rnam pa wal wal 'char/__de nas reg mthong gi mtshan ma yod pa ltar dbang po'i mngon sum du gsal/__de nas rab lus kyis mtshon pa'i ma dag pa'i snang ba thams cad nub nas lha yi gsal snang dang nga rgyal la rtse gcig tu gnas pa 'byung /__de gsum la yid kyi yul/__snang ba'i yul/__zhen pa'i yul du gsal ba zer/__de ltar yul gsum gsal nas sku yi cha shas dang rgyan phra mo re re nas kyang gsal snang 'don cing /__lha sku che chung ma nges pa/__mang nyung thun ring thung sogs ma nges pa la rtsal sbyangs pas lha gyad du myur ba zhes bya ste/__ji ltar bsgoms kyang bde bar 'gyur pa'i tshul la bslab cing /__tshul des rten dang brten pa'i gsal snang thon pa ni/__sems nyid gdod nas lhar dag pa las gzhan nas btsal du med pa dang /__sems dang lha sku dbyer med de yang gsal stong 'dzin med du shes pa ni gnad dam pa'o/__/des skyo na thugs dam bskul ba'i phyir bzlas pa bya ba ni/__ngag gi zhen pa dang sgra don 'dres 'dzin gyi rtog pa sbyong /__'bras dus chos 'khor bskor ba dang /__rdzogs rim dus rlung dbu mar thim par byed pa'o/__/thun mthar dkyil 'khor bsdu ba ni/__'du byed kyi tha ma 'jig pa sbyong /__'bras dus gzugs sku chos skur thim pa dang rdzogs rim du 'od gsal gyi ye shes 'char ba'i rgyu'o/__/de las lhar ldang ba ni/__'chi srid las bar dor ldang ba sbyong zhing /__chos sku las gzugs skur bzhengs pa dang/__rdzogs rim skabs 'od gsal las zung 'jug gi skur ldang ba'i rgyu'o//____//__! bar do'i rnam bzhag la/__ngo bo/__sgra don/__dbye ba/__so so'i khyad par dang bzhi/__dang po ni/__gzhi dbyings ka dag las gzhan du snang ba thams cad bar do'i gnas skabs yin te/__gzhi snang ye shes su shar ba dag pa chos nyid bar do/__/'khrul snang 'gro drug gis bsdus so cog ni ma dag pa 'khrul ba'i bar do yin te/__de yang dbyings ka dag las shar zhing /__'char gzhi'i dbyings su ma rdzogs kyi bar gyi sems pa sa bon dang bcas pa ni bar do'o/_/gnyis pa sgra don ni/__snga ma dang phyi ma dag gi bar gyi cha las btags pa ste bar do dang po gnyis kyi dbang du byas na snga mas 'phang zhing phyi ma ma grub pa'i bar gyi cha las bar do dang /__phyi ma gnyis kyi dbang du na mdzod las/__'di gang 'chi dang skye ba yi/__/srid pa'i bar du 'byung ba'o/__/bgrod pa'i yul du ma phyin phyir/__srid pa bar ma/__zhes pas 'di nas shi ste pha rol tu skye srid ma grub de srid la bar do/__/zhes bya'o/__/dbye ba ni/__thal 'gyur las/__dbye ba rnam pa bzhi dag las/__zhes pa'i dang po skye shi bar do ni/__mi mngal du skye ba grub nas 'chi nad kyis btab tshun dang /__gnyis pa 'chi kha'i bar do ni/__'chi ba la phyogs nas nang dbugs thim tshun chad dang /__gsum pa chos nyid kyi bar do ni/__nang dbugs chad nas lhun grub gyi snang ba thim pa tshun chad dang /__bzhi pa srid pa bar do ni/__lhun grub gyi snang ba thim nas phyi ma'i skye srid grub tshun chad do/__/bzhi pa so so'i lam khyer ni/__dpe don gnyis kyis ston te/__dpe skye gnas kyi bar do la sgro 'dogs chod pa rgya khra nang du 'jug pa lta bu ste/__don dam bla ma la brten nas/__des bstan pa'i gdams ngag la thos bsam sgom pa nan tan lhur byas nas sgro 'dogs chod pa bya'o/__/de bzhin du 'chi kha bar do gsal gdab pa sgeg mo'i me long blta ba lta bu ni sngar goms pa'i gdams ngag rnams skabs 'dir blo la gsal thebs pa'o/__/chos nyid kyi bar dor rang snang la yid ches pa ma pang du bu 'jug pa lta bu ni gdams ngag gi don nyams 'og tu chud pas chos nyid kyi snang cha ji ltar shar yang 'jigs pa med par rang snang ye shes kyi rol par gdeng tshud pa'o/__/srid pa bar dor las kyi 'phro mthud pa yur ba rkang chag la wa 'dzugs pa lta bu ni 'khrul snang 'jigs skrag shar yang sngar goms pa dang gzhan rkyen gyi gsal 'debs la brten dag pa'i skye srid kyi lam du 'jug pa'o//____//__! gcod yul zer ba 'di la go ba len tshul mang na'ang /__shing gcod pa'i yul sa gzhi yin pa ltar/__bcad bya gzung 'dzin gyi rtog pa gcod pa'i yul stong nyid spros pa dang bral ba'i ye shes te/__don du shes rab kyi pha rol tu phyin pa la bzhir phye ba'i gzhi sher phyin gang yin pa ste/__de'i nang du byed pa'i gzhung la'ang de yi sgras smos pa'o/__/zhes bzhed do//____//__! slob dpon rin po che 'khrungs yul o rgyan gyi yul gyi nub byang mtshams zhes pa srin po'i yul du bzhed pa'ang yod de/__de'i yul gling dgu bshad pa na/__lho nub mtshams na srin po'i gling zhes yod/__ces gsungs pa la dgongs/__de ltar na/__lho nub srin po'i yul zhes pa la rtsod pa mi 'byung ba yin/__sngon gyi bskal pa dang po la/__zhes pa'i spyir btang dus bzhi'i zlas phye ba lta bu ma yin par/__dang po sku 'khrungs ba'i dus de tsam la sngon gyi bskal pa zhes rnam par bzhag ste/__'di lta bu mang ngo //____//__! sde gsum po'ang chos skad mi mthun pa tsam mang mod/__mthar thug gi lta ba la khyad par med cing /__thabs kyis khyad par 'phags pa tsam du khas blangs na bde zhing /__spyir sems sdes zab pa'am stong nyid/__klong sdes gsal ba'am 'od gsal/__man ngag sdes zab gsal dbyer med tsam du bton nas 'chad pa dang /__de dang de'i thabs kyang /__gnyug ma rang sar 'jog pa tsam dang /__rlung dang lta stangs kyis bogs 'don pa dang /__thod rgal gyis rlung sems dbyings su 'jug pa'i thabs khyad par can gyis 'bras bu la sbyor ba'i tshul la'ang myur du byung bar bzhed do//____//__! slob dpon bi ma las g.yu'i thang ma gras dgu las/__/bya byed kri yi don dam du/__/kun kyang dag pa chos nyid la/_/mtha' yi dri ma ye nas med/__/kun rdzob rang bzhin rigs gsum sku/__/kun kyang dag phyir dug gsum gsum/__/lha yi dkyil 'khor yin par 'dod/__/ces so//____//__!