JKW-KABUM-03-GA-001-019

From Khyentse Lineage - A Tsadra Foundation Project

གསེར་གདུང་འཛམ་གླིང་རྒྱན་གཅིག་གི་དཀར་ཆག་མི་དབང་སངས་རྒྱས་རྒྱ་མཚོས་མཛད་པ་ལས་ཁོལ་བཏུས།
Wylie title gser gdung 'dzam gling rgyan gcig gi dkar chag mi dbang sangs rgyas rgya mtshos mdzad pa las khol btus JKW-KABUM-03-GA-001.pdf
Location mkhyen brtse'i bka' 'bum
Volume 3, sde tshan 1, Text 19, Pages 347-353 (Folios 174a1 to 177a4)
Author འཇམ་དབྱངས་མཁྱེན་བརྩེའི་དབང་པོ་
Less details More details
Citation 'jam dbyangs mkhyen brtse'i dbang po. gser gdung 'dzam gling rgyan gcig gi dkar chag mi dbang sangs rgyas rgya mtshos mdzad pa las khol btus. In 'jam dbyangs mkhyen brtse'i dbang po'i bka' 'bum, Vol. 3: 347-353. Khams sde dge rdzong sar dgon: Rdzong sar blo gros phun tshogs, 2020.
Genre Catalogue of Contents - dkar chag
[edit]
གསེར་གདུང་འཛམ་གླིང་རྒྱན་གཅིག་དཀར་ཆག་ལས་ཁོལ་བཏུས་བཞུགས། །བླ་མ་དང་རྗེ་བཙུན་འཇམ་དབྱངས་ཐ་མི་དད་པའི་ཞབས་ལ་ཕྱག་འཚལ་ལོ། །ཇི་སྐད་དུ། སྡོམ་འབྱུང་ལས། དུལ་ཞིང་བཟོ་རྣམས་ཀུན་ཤེས་ལ། །ཆོ་ག་མཐོང་ཞིང་མཉམ་གཞག་པ། །ཞེས་སོ། །འཕྲོད་ཁ་བ་དཔལ་ལྡན་བློ་གྲོས་བཟང་པོས། གཉིས་པ་གང་གིས་འབྲི་བའི་རི་མོ་མཁན། །ཐོས་མང་བརྩོན་ཅིང་དམ་ཚིག་སྡོམ་གནས་ཤིང་། །མཆོད་དང་སྦྱིན་མོས་བྱང་ཆུབ་སེམས་ལྡན་པ། །བློ་དང་བཟོ་ཡི་གནས་ལ་མཁས་ཤིང་དུལ། །རང་དབང་ཡོད་ཅིང་མཆོད་ཅིང་བཀུར་འོས་པ། །སྔགས་རིག་ལས་ཀུན་ཤེས་ཤིང་འགྲོགས་ན་བདེ། །རྒན་མིན་ནད་ཀྱིས་གདུང་མིན་བར་ཆད་མིན། །ལུས་བཟང་གཞན་གྱི་དགེ་བའི་གྲོགས་བྱེད་པ། །དངོས་གྲུབ་འདོད་ཅིང་སངས་རྒྱས་ཡིད་ལ་བྱེད། །མཁས་པའི་རྗེས་འཇུག་རང་བཟོ་སྤངས་བས་སོ། །ཞེས་སོ། །ཆོས་སྐུའི་རྟེན་ནི། དུས་འཁོར་ལས། གསང་བའི་ཆུ་སྐྱེས་མཛོད་སྤུ་མཐའ་ཡི་ཆ་ཡིས་མཆོག་གི་རྒྱལ་བའི་བདག་པོའི་མཆོད་རྟེན་གྱི་ནི་དཔངས་ཀྱི་ཚད། །ཅེས་སོགས་ཀྱིས་བསྟན་པའི་ཚོགས་དང་། ཀྲྀ་ཡ་ས་མུ་ཙྪའི་དཀྱིལ་ཆོག་ཞེ་བརྒྱད་པ་སོགས་ལས་ཐ་དད་དུ་གསུངས་ལ། ལོངས་སྤྲུལ་གྱི་རྟེན། དུས་འཁོར་ཡེ་ཤེས་ལེའུར། རྒྱལ་བའི་བདག་པོ་གཙུག་ཏོར་ནས་ནི་མཛོད་སྤུའི་དབུས་སུ་ཕྱེད་དང་བཅས་པ་ཉི་མའི་སོར་དུ་འགྱུར། །ཞེས་སོགས་དང་། འགྲེལ་བ་དྲི་མེད་འོད་བཅས་ཀྱིས་བསྟན་པའི་སོར་མོ་བརྒྱ་ཉེར་ལྔ་པ་དང་། མ་རྒྱུད་སྡོམ་འབྱུང་༢༠ལས། རི་མོའི་ལྷ་ཡི་གཟུགས་རྣམས་ཀྱི། །སྐུ་ཡི་ཚད་ཀྱི་མཚན་ཉིད་ནི། །གསང་བ་པོ་ཡི་བདག་པོ་ཉོན། །ཞེས་སོགས་དང་། དེའི་རྒྱ་འགྲེལ་པདྨ་ཅན་སོགས་ཀྱིས་བསྟན་པའི་སངས་རྒྱས་ནས་སོ་སྐྱེའི་བར་གྱི་ཚད་རྣམས་ཏེ། གཞན་ཡང་རྡོ་རྗེ་གདན་བཞིར་ཁྲོ་བོའི་ལུས་ཀྱི་མཚན་ཉིད་བཤད་པ་དང་། ཀྲི་ཡ་ས་མུཙྪ་ལས། སྐུ་གཟུགས་མཚན་ཉིད་ཐམས་ཅད་ནི། །རབ་རྫོགས་བདེ་བ་སྟེར་བའོ། །གང་ཚེ་དེ་ཉིད་རྣམས་ཉམས་འགྱུར། །དེ་ཚེ་སྡུག་བསྔལ་འབྱིན་བར་བྱེད། །ཅེས་སོ། །མདོར་ན་དེ་བཞིན་གཤེགས་པའི་སྐུ་དུས་འཁོར་དང་ཀྲྀ་ཡ་མཐུན་པར་སོར་མོ་བརྒྱ་ཉེར་ལྔ། སྡོམ་འབྱུང་ལས་བརྒྱ་ཉི་ཤུ་པ་གཉིས་གཙོ་བོར་མཐོང་སྟེ། འོན་ཀྱང་རྒྱ་འགྲེལ་པདྨ་ཅན་དང་དུས་འཁོར་དང་ཡང་མཐུན་པས་སོར་མོ་བརྒྱ་ཉེར་ལྔ་པ་ཉིད་འབུར་དང་། སྡོམ་འབྱུང་རྩ་བར་རགས་པར་གསུངས་པའི་སོར་མོ་བརྒྱ་ཉི་ཤུ་པ་བྲིས་ཆར་བྱས་ན་མཛེས་པར་མངོན་ཏེ། ཅིའི་ཕྱིར་མཛེས་པ་དགོས་ཞེ་ན། དྲང་སྲོང་ཨསྟྲའི་བུས། ལུས་ལ་མཛེས་པར་མ་ཚང་ན། །ཚད་དག་གིས་ནི་ཅི་ཞིག་བྱ། །ཞེས་སོ། །ཐིག་ཆེན་གཉིས་བདེ་ཀྱཻ་སོགས་ཐལ་མོ་བཅུ་པ་སྡོམ་འབྱུང་ལས། མཐིལ་ལམ་ཐལ་མོ་བཅུ་གཅིག་གི །ལྷ་ཡི་གཟུགས་ནི་བྲི་བར་བྱ། །ཟབ་མོ་རྡོ་རྗེ་ཅན་གྱི་ལྷ། །ཆ་ནི་བཅུ་གཉིས་མཚན་ཉིད་དོ། །ཞེས་སོ། །གསུམ་པ་ནི། རྡོ་རྗེ་སློབ་དཔོན་གྱི་བྱ་བ་ཡང་དག་བསྡུས་པ་ཞེས་པཎྜི་ཏ་འགྲོ་བའི་མེ་ལོང་གིས་མཛད་པ་ལས། བྱང་ཆུབ་སེམས་དཔའ་ཉེ་སྲས་སོགས། རྣམས་ཀྱིས་ཡང་སོར་བཅུ་གཉིས་པའི་མཐོ་བཅུ་པ་ཉིད་དོ། །ཞེས་སོ། །བཞི་པ་ནི། སྡོམ་འབྱུང་ལས། ཡིད་དུ་འོང་བའི་གཟུགས་ཀྱིས་ནི། །ཐལ་མོ་དགུ་པ་མངོན་པར་བྲི། །ཞེས་སྤྱན་སོགས་ལྷ་མོ་རྣམས་སོར་བརྒྱ་དང་བརྒྱད་པའོ། །ལྔ་པ་ནི། ཀྲྀ་ཡ་ལས། ཁོ་བོ་རྣམས་ཀྱི་ཡང་མཐོ་བརྒྱད་པ་སྟེ་སོར་དགུ་བཅུ་རྩ་དྲུག་གོ །ཞེས་ཕུར་འཇིགས་གཤིན་རྗེ་སོགས་ཐལ་མོ་བརྒྱད་པའོ། །དྲུག་པ་ནི། ཀྲྀ་ཡ་ལས། བཱ་དུ་དང་མིའུ་ཐུང་དང་ཚོགས་བདག་རྣམས་ནི་མཐོ་ལྔ་པ་བྱའོ། །ཞེས་མགོན་པོ་སོགས་རྟོགས་པར་བྱའོ། །བདུན་པ་ནི། དྲི་མེད་འོད་ལས། དེ་ཉིད་སེམས་ཅན་རྣམས་ཀྱི་ཁྲུ་བཞི་སྟེ་མི་རྣམས་ཀྱི་སོར་ཉི་ཤུ་རྩ་དྲུག་གོ །སྟེང་དང་འོག་ཏུ་བརྒྱད་ཅུ་རྩ་བཞི་སྟེ། དེ་ལྟར་མི་རྣམས་མཚན་དང་མི་ལྡན་པའོ། །ཞེས་ཉན་རང་སོགས་སོར་མོ་གོ་དྲུག་པ་འབྲི་བས་ཀྱང་བསྟན་ཏོ། །བརྒྱད་པ་རྣམ་འགྱུར་ནི། བཞུགས་སྟངས་དང་། གཟིགས་སྟངས་དང་། ཞི་བ་ལ་རྩ་བའི་རྒྱན་བརྒྱད་དམ་བཅུ་གསུམ། ཁྲོ་བོ་ལ་དཔལ་དང་དུར་ཁྲོད་ཀྱི་ཆས་སོ་སོ། གཞན་ཡང་སྤྱི་དང་བྱེ་བྲག་གི་རྒྱན་མཐའ་ཀླས་སོ། །གཞན་ཡང་ཁྲི་ལ། ཁྲི་གདན། ཁྲི་གདོང་། ཁྲི་རྐང་། ཁྲི་རྨང་གཉིས། བ་གམ། ལན་ཀན་ནམ་པུ་ཤུ། འདེགས་བྱེད་ལྔ། ནོར་བུ་ཉི་ཟླ་པད་གདན་དང་། རྒྱབ་ཡོལ་ལ་རྒྱན་དྲུག་ཅེས། ཀླུ་ཕྱག་དྲུག་ཏ་ར་ན་སྦྱིན་པ། རི་དྭགས་ཤར་ན་ཚུལ་ཁྲིམས། གླང་པོ་གུ་རུ་ན་བཟོད་པ། དགེ་སྡིག་བྱར་བ་བརྩོན་འགྲུས། ཆུ་སྲིན་བི་ར་ན་བསམ་གཏན། བྱ་ཁྱུང་ག་རུ་ཊ་ཤེས་རབ་བོ། །དེ་ལྟར་ལེགས་པར་གྲུབ་པས་སྡོམ་འབྱུང་ལས། །ལས་དང་པོ་ཡི་སྔགས་པ་ཡིས། །གཟུགས་བརྙན་ལ་སོགས་བྱ་བ་སྟེ། །ཐང་སྐུ་བསྒྲུབ་བྱ་རྒྱ་ཆེན་གྱིས། །དངོས་གྲུབ་མྱུར་དུ་ཐོབ་པར་འགྱུར། ཞེས་སོ། །དུས་འཁོར་ཡེ་ལེར། །དྲིལ་བུ་དག་ཀྱང་དེ་བཞིན་ཆ་གསུམ་སྟེང་ན་རྡོ་རྗེ་དང་མཚུངས་བ་ལང་ཁ་དང་པདྨའི་གཟུགས། །ཁྱོད་ནི་སུམ་ཆ་དེ་ཡི་ཞལ་དང་བཅས་པའི་ལྟེ་བ་འདབ་མ་དག་ཀྱང་དེ་ཡི་སུམ་ཆ་ལས། །རྭ་ནི་ཁྱོན་དང་མཚུངས་པ་ཕྱོགས་དང་ཕྱོགས་བྲལ་དུ་སྟེ་རྭ་ཡི་ཟླུམ་པོ་དག་ནི་བཞི་ཆའོ། །ཕྱི་རོལ་རྭ་ཡི་སུམ་ཆ་འོག་སྟེ་སྟེང་དུ་བཱ་ད་ར་ཡི་ཚེར་མའི་རྣམ་པར་སྦྱོར་བའོ། །ཞེས་སོ། །ཡང་སྔ་མའི་དབང་གི་ལེའུར། ཤེལ་དང་མུ་ཏིག་དང་ནི་མི་དང་བོང་བུའི་སོའམ་རུས་པ་དག་དང་བོ་དྷི་ཙི་དང་ནི། །པདྨ་ཞེས་བྱ་དབང་མིག་ལུང་ཐང་བདེ་གཤེགས་རིགས་ཀྱི་དབང་གི་སྔགས་བཟླས་པ་ལས་ཕྲེང་བར་འགྱུར། དྲི་ཞིམ་མེ་ཏོག་དཀར་པོ་དང་ནི་ཚ་བ་དང་བཅས་ནག་པོ་དང་ནི་དམར་ངང་སེར་པོའི་ཆོད། །ཅེས་སོ། །ཡེ་ཤེས་ལེའུར། ནོར་བུ་གཙུག་ཏོར་དཔྲལ་བ་མགྲིན་པ་སྙིང་ག་གསང་བ་ལ་ཡང་རྡོ་རྗེ་ནི། །གཅིག་གཉིས་ཆུ་གཏེར་མདའ་དང་ཀླུ་ཡི་དབང་པོ་དགུ་བཅས་ཉིན་བྱེད་སོར་ནི་རིམ་པས་སོ། །དབུས་དང་སྟེང་འོག་གསུམ་གྱི་ཆ་སྟེ་ཟུམ་པ་དང་ནི་རྣམ་པར་དགྱེས་པ་ཞི་དང་དྲག་པོ་ལ། །ཞེས་སོ། །མྱང་འདས་ལས། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། རྟེན་ཅིང་འབྲེལ་ཏེ་འབྱུང་བའི་ཆོས་ཤིན་ཏུ་ཟབ་མོ་རྟོགས་ཏེ། སྲིད་པ་ཐམས་ཅད་ལའང་རྣམ་པར་གྲོལ་ཏེ། ཉེས་པའི་སྐྱོན་ཐམས་ཅད་དབྲལ་ནས། ལྷ་དང་མིའི་བསོད་ནམས་ཀྱི་ཞིང་དུ་འགྱུར་ཏེ། དེ་བས་ན་མཆོད་རྟེན་ཞེས་བྱ་སྟེ་མཆོད་ན་བསོད་ནམས་མཆོག་ཐོབ་པར་འགྱུར་རོ། །ཞེས་སོ། །འདུས་པར། མཆོད་རྟེན་སངས་རྒྱས་ཐམས་ཅད་ཀྱི། །བཞུགས་གནས་ཕོ་བྲང་ཡིན་པར་བཤད། །ཅེས་དང་། གཞལ་ཡས་ཁང་ལ་མཆོད་རྟེན་དུ་བཤད་དོ། །མངོན་རྟོགས་རྒྱན་ལས། ཉན་ཐོས་ཞི་བ་ཚོལ་རྣམས་ཀུན་ཤེས་ཉིད་ཀྱིས་ཉེར་ཞིར་ཁྲིད་མཛད་གང་ཡིན་དང་། །འགྲོ་ལ་ཕན་པར་བྱེད་རྣམས་ལམ་ཤེས་ཉིད་ཀྱིས་འཇིག་རྟེན་དོན་སྒྲུབ་མཛད་པ་གང་། །གང་དག་ཡང་དག་ལྡན་པས་ཐུབ་རྣམས་རྣམ་པ་ཀུན་ལྡན་སྣ་ཚོགས་འདི་གསུངས་པ། །ཉན་ཐོས་བྱང་ཆུབ་སེམས་དཔའི་ཚོགས་བཅས་སངས་རྒྱས་ཀྱི་ནི་ཡུམ་དེ་ལ་ཕྱག་འཚལ། །ཞེས་སོ། །རྗེ་ཙོང་ཁ་པས་མདུན་ལེགས་མར། དེ་ནས་གདུལ་བྱའི་བློ་མུན་སེལ་བའི་མཆོག །འཇམ་པའི་དབྱངས་ལ་ཤུགས་དྲག་རྒྱུན་རིང་གིས། །དད་པ་བརྟན་པས་གཞུང་ལུགས་དམ་པ་རུ། །འཆར་ཕྱིར་གསོལ་བཏབ་རྒྱུ་ཚོགས་ཀུན་ལ་འབད། །ཚུལ་འདི་བསམས་བཞིན་འདུན་མ་ལེགས་ནས་གདའ། །བཀའ་དྲིན་ཆེའོ་རྗེ་བཙུན་མཁྱེན་པའི་གཏེར། །དེ་ལྟར་འདྲེན་པས་ཀླུ་སྒྲུབ་ཐོགས་མེད་ལས། །རིམ་བཞིན་བརྒྱུད་པའི་བྱང་ཆུབ་ལམ་རིམ་ལས། །ཐུན་མོང་མིན་པའི་ངེས་པ་རྙེད་གྱུར་ནས། །ཟབ་མོའི་གཞུང་མཆོག་ཕར་ཕྱིན་གདམས་པར་ཤར། །ཅེས་སོ། །ཀུན་མཁྱེན་ལྔ་པས། ཨེ་དབྱིངས་སྟོང་པའི་རང་མདངས་མནྡཱ་རས། །བདེ་ཆེན་ཝཾ་ཡིག་ཟུང་འཇུག་རྡོ་རྗེ་ཅན། །པདྨ་འབྱུང་གནས་ཞི་དང་ཁྲོ་བོ་ཡིས། །དཀྱིལ་འཁོར་རྒྱ་མཚོའི་གཙོ་བོར་ལྷུན་གྱིས་གྲུབ། །ཅེས་སོ། །ཕྱག་ན་རྡོ་རྗེས། བློ་བཟང་གྲགས་པ་འདི་ཉིད་ནི། །སངས་རྒྱས་ཀུན་གྱི་སྤྲུལ་པ་སྟེ། །པཎ་ཆེན་རྐྱང་གི་ལུས་བཟུང་ནས། །མདོ་དང་སྔགས་ཀྱི་དོན་བཤད་ཅིང་། །ངེས་པར་ཁོ་ན་འཚང་རྒྱའོ། །ཞེས་སོ། །གྲུབ་ཆེན་ལས་ཀྱི་རྡོ་རྗེས། སྙིགས་དུས་མཐའ་འཁོབ་ཡུལ་དུ་སྐྱེས་པ་ཡི། །སྙོམས་ལས་དགེ་སློང་ནམ་མཁའ་རྒྱལ་མཚན་གྱིས། །སྙིང་ནས་ལྷ་ཆོས་ཚུལ་བཞིན་མ་ནུས་པས། །ཡི་གེར་འབྲི་འོས་རྣམ་ཐར་བདག་ལ་མེད། །ཅེས་དང་། ཙོང་ཁ་པས། རང་གི་དགེ་བ་རྒྱ་ཆེན་སྤེལ་ཕྱིར་དང་། །རྣམ་དཔྱོད་ལྡན་པའི་སྐལ་བཟང་མང་པོ་ལ། །འཇུག་སྒོ་མ་ནོར་ཚུལ་བཞིན་བསྟན་པའི་ཕྱིར། །རང་གི་རྟོགས་པ་བརྗོད་པ་འདི་བྱས་སོ། །ཞེས་སོ། །དུར་ཁྲོད་རྒྱན་གྱི་རྒྱུད་ལས། གཞན་ཡང་ང་ཡིས་གསུངས་པའི་བཀའ། །གསུང་གཅིག་ཉིད་དུ་གསུང་གྱུར་ཀྱང་། །དུ་མ་ཉིད་དུ་སོ་སོར་སྣང་། །ཆོས་ཚུལ་དུ་མའི་བྱེ་བྲག་དང་། །མོས་པ་དུ་མའི་བྱེ་བྲག་དང་། །འདུ་ཤེས་དུ་མའི་བྱེ་བྲག་གིས། །ཐེག་པའི་མཐའ་ལ་ཐུག་པ་མེད། །ཅེས་སོ། ། ༈
[edit]

gser gdung 'dzam gling rgyan gcig gi dkar chag mi dbang sangs rgyas rgya mtshos mdzad pa las khol btus/__ gser gdung 'dzam gling rgyan gcig dkar chag las khol btus bzhugs/__/bla ma dang rje btsun 'jam dbyangs tha mi dad pa'i zhabs la phyag 'tshal lo/__/ji skad du/__sdom 'byung las/__dul zhing bzo rnams kun shes la/__/cho ga mthong zhing mnyam gzhag pa/__/zhes so/__/'phrod kha ba dpal ldan blo gros bzang pos/__gnyis pa gang gis 'bri ba'i ri mo mkhan/__/thos mang brtson cing dam tshig sdom gnas shing /__/mchod dang sbyin mos byang chub sems ldan pa/__/blo dang bzo yi gnas la mkhas shing dul/__/rang dbang yod cing mchod cing bkur 'os pa/__/sngags rig las kun shes shing 'grogs na bde/__/rgan min nad kyis gdung min bar chad min/__/lus bzang gzhan gyi dge ba'i grogs byed pa/__/dngos grub 'dod cing sangs rgyas yid la byed/__/mkhas pa'i rjes 'jug rang bzo spangs bas so/__/zhes so/__/chos sku'i rten ni/__dus 'khor las/__gsang ba'i chu skyes mdzod spu mtha' yi cha yis mchog gi rgyal ba'i bdag po'i mchod rten gyi ni dpangs kyi tshad/__/ces sogs kyis bstan pa'i tshogs dang /__kr-i ya sa mu ts+tsha'i dkyil chog zhe brgyad pa sogs las tha dad du gsungs la/__longs sprul gyi rten/__dus 'khor ye shes le'ur/__rgyal ba'i bdag po gtsug tor nas ni mdzod spu'i dbus su phyed dang bcas pa nyi ma'i sor du 'gyur/__/zhes sogs dang /__'grel ba dri med 'od bcas kyis bstan pa'i sor mo brgya nyer lnga pa dang /__ma rgyud sdom 'byung 20las/__ri mo'i lha yi gzugs rnams kyi/__/sku yi tshad kyi mtshan nyid ni/__/gsang ba po yi bdag po nyon/__/zhes sogs dang /__de'i rgya 'grel pad+ma can sogs kyis bstan pa'i sangs rgyas nas so skye'i bar gyi tshad rnams te/__gzhan yang rdo rje gdan bzhir khro bo'i lus kyi mtshan nyid bshad pa dang /__kri ya sa muts+tsha las/__sku gzugs mtshan nyid thams cad ni/__/rab rdzogs bde ba ster ba'o/__/gang tshe de nyid rnams nyams 'gyur/__/de tshe sdug bsngal 'byin bar byed/__/ces so/__/mdor na de bzhin gshegs pa'i sku dus 'khor dang kr-i ya mthun par sor mo brgya nyer lnga/__sdom 'byung las brgya nyi shu pa gnyis gtso bor mthong ste/__'on kyang rgya 'grel pad+ma can dang dus 'khor dang yang mthun pas sor mo brgya nyer lnga pa nyid 'bur dang /__sdom 'byung rtsa bar rags par gsungs pa'i sor mo brgya nyi shu pa bris char byas na mdzes par mngon te/__ci'i phyir mdzes pa dgos zhe na/__drang srong as+t+ra'i bus/__lus la mdzes par ma tshang na/__/tshad dag gis ni ci zhig bya/__/zhes so/__/thig chen gnyis bde kyai sogs thal mo bcu pa sdom 'byung las/__mthil lam thal mo bcu gcig gi__/lha yi gzugs ni bri bar bya/__/zab mo rdo rje can gyi lha/__/cha ni bcu gnyis mtshan nyid do/__/zhes so/__/gsum pa ni/__rdo rje slob dpon gyi bya ba yang dag bsdus pa zhes paN+Di ta 'gro ba'i me long gis mdzad pa las/__byang chub sems dpa' nye sras sogs/__rnams kyis yang sor bcu gnyis pa'i mtho bcu pa nyid do/__/zhes so/__/bzhi pa ni/__sdom 'byung las/__yid du 'ong ba'i gzugs kyis ni/__/thal mo dgu pa mngon par bri/__/zhes spyan sogs lha mo rnams sor brgya dang brgyad pa'o/__/lnga pa ni/__kr-i ya las/__kho bo rnams kyi yang mtho brgyad pa ste sor dgu bcu rtsa drug go_/zhes phur 'jigs gshin rje sogs thal mo brgyad pa'o/__/drug pa ni/__kr-i ya las/__bA du dang mi'u thung dang tshogs bdag rnams ni mtho lnga pa bya'o/__/zhes mgon po sogs rtogs par bya'o/__/bdun pa ni/__dri med 'od las/__de nyid sems can rnams kyi khru bzhi ste mi rnams kyi sor nyi shu rtsa drug go__/steng dang 'og tu brgyad cu rtsa bzhi ste/__de ltar mi rnams mtshan dang mi ldan pa'o/__/zhes nyan rang sogs sor mo go drug pa 'bri bas kyang bstan to/__/brgyad pa rnam 'gyur ni/__bzhugs stangs dang /__gzigs stangs dang /__zhi ba la rtsa ba'i rgyan brgyad dam bcu gsum/__khro bo la dpal dang dur khrod kyi chas so so/__gzhan yang spyi dang bye brag gi rgyan mtha' klas so/__/gzhan yang khri la/__khri gdan/__khri gdong /__khri rkang /__khri rmang gnyis/__ba gam/__lan kan nam pu shu/__'degs byed lnga/__nor bu nyi zla pad gdan dang /__rgyab yol la rgyan drug ces/__klu phyag drug ta ra na sbyin pa/__ri dwags shar na tshul khrims/__glang po gu ru na bzod pa/__dge sdig byar ba brtson 'grus/__chu srin bi ra na bsam gtan/__bya khyung ga ru Ta shes rab bo/__/de ltar legs par grub pas sdom 'byung las/__/las dang po yi sngags pa yis/__/gzugs brnyan la sogs bya ba ste/__/thang sku bsgrub bya rgya chen gyis/__/dngos grub myur du thob par 'gyur/__zhes so/__/dus 'khor ye ler/__/dril bu dag kyang de bzhin cha gsum steng na rdo rje dang mtshungs ba lang kha dang pad+ma'i gzugs/__/khyod ni sum cha de yi zhal dang bcas pa'i lte ba 'dab ma dag kyang de yi sum cha las/__/rwa ni khyon dang mtshungs pa phyogs dang phyogs bral du ste rwa yi zlum po dag ni bzhi cha'o/__/phyi rol rwa yi sum cha 'og ste steng du bA da ra yi tsher ma'i rnam par sbyor ba'o/__/zhes so/__/yang snga ma'i dbang gi le'ur/__shel dang mu tig dang ni mi dang bong bu'i so'am rus pa dag dang bo d+hi tsi dang ni/__/pad+ma zhes bya dbang mig lung thang bde gshegs rigs kyi dbang gi sngags bzlas pa las phreng bar 'gyur/__dri zhim me tog dkar po dang ni tsha ba dang bcas nag po dang ni dmar ngang ser po'i chod/__/ces so/__/ye shes le'ur/__nor bu gtsug tor dpral ba mgrin pa snying ga gsang ba la yang rdo rje ni/__/gcig gnyis chu gter mda' dang klu yi dbang po dgu bcas nyin byed sor ni rim pas so/__/dbus dang steng 'og gsum gyi cha ste zum pa dang ni rnam par dgyes pa zhi dang drag po la/__/zhes so/__/myang 'das las/__bcom ldan 'das kyis kun dga' bo la bka' stsal pa/__rten cing 'brel te 'byung ba'i chos shin tu zab mo rtogs te/__srid pa thams cad la'ang rnam par grol te/__nyes pa'i skyon thams cad dbral nas/__lha dang mi'i bsod nams kyi zhing du 'gyur te/__de bas na mchod rten zhes bya ste mchod na bsod nams mchog thob par 'gyur ro/__/zhes so/__/'dus par/__mchod rten sangs rgyas thams cad kyi/__/bzhugs gnas pho brang yin par bshad/__/ces dang /__gzhal yas khang la mchod rten du bshad do/__/mngon rtogs rgyan las/__nyan thos zhi ba tshol rnams kun shes nyid kyis nyer zhir khrid mdzad gang yin dang /__/'gro la phan par byed rnams lam shes nyid kyis 'jig rten don sgrub mdzad pa gang /__/gang dag yang dag ldan pas thub rnams rnam pa kun ldan sna tshogs 'di gsungs pa/__/nyan thos byang chub sems dpa'i tshogs bcas sangs rgyas kyi ni yum de la phyag 'tshal/__/zhes so/__/rje tsong kha pas mdun legs mar/__de nas gdul bya'i blo mun sel ba'i mchog__/'jam pa'i dbyangs la shugs drag rgyun ring gis/__/dad pa brtan pas gzhung lugs dam pa ru/__/'char phyir gsol btab rgyu tshogs kun la 'bad/__/tshul 'di bsams bzhin 'dun ma legs nas gda'/__/bka' drin che'o rje btsun mkhyen pa'i gter/__/de ltar 'dren pas klu sgrub thogs med las/__/rim bzhin brgyud pa'i byang chub lam rim las/__/thun mong min pa'i nges pa rnyed gyur nas/__/zab mo'i gzhung mchog phar phyin gdams par shar/__/ces so/__/kun mkhyen lnga pas/__e dbyings stong pa'i rang mdangs man+dA ras/__/bde chen waM yig zung 'jug rdo rje can/__/pad+ma 'byung gnas zhi dang khro bo yis/__/dkyil 'khor rgya mtsho'i gtso bor lhun gyis grub/__/ces so/__/phyag na rdo rjes/__blo bzang grags pa 'di nyid ni/__/sangs rgyas kun gyi sprul pa ste/__/paN chen rkyang gi lus bzung nas/__/mdo dang sngags kyi don bshad cing /__/nges par kho na 'tshang rgya'o/__/zhes so/__/grub chen las kyi rdo rjes/__snyigs dus mtha' 'khob yul du skyes pa yi/__/snyoms las dge slong nam mkha' rgyal mtshan gyis/__/snying nas lha chos tshul bzhin ma nus pas/__/yi ger 'bri 'os rnam thar bdag la med/__/ces dang /__tsong kha pas/__rang gi dge ba rgya chen spel phyir dang /__/rnam dpyod ldan pa'i skal bzang mang po la/__/'jug sgo ma nor tshul bzhin bstan pa'i phyir/__/rang gi rtogs pa brjod pa 'di byas so/__/zhes so/__/dur khrod rgyan gyi rgyud las/__gzhan yang nga yis gsungs pa'i bka'/__/gsung gcig nyid du gsung gyur kyang /__/du ma nyid du so sor snang /__/chos tshul du ma'i bye brag dang /__/mos pa du ma'i bye brag dang /__/'du shes du ma'i bye brag gis/__/theg pa'i mtha' la thug pa med/__/ces so/___/__!_

Footnotes

Other Information