སྔ་འགྱུར་གྱི་རྒྱུད་དང་སྒྲུབ་སྡེ་སྣ་ཚོགས་ལས་བཏུས་པའི་ལུང་དང་ཟིན་བྲིས་སྣ་ཚོགས།

From Khyentse Lineage - A Tsadra Foundation Project
JKW-KABUM-03-GA-001-020
Previous Text Back to Volume PageNext Text
Wylie title snga 'gyur gyi rgyud dang sgrub sde sna tshogs las btus pa'i lung dang zin bris sna tshogs JKW-KABUM-03-GA-001.pdf
Location mkhyen brtse'i bka' 'bum
Volume 3, sde tshan 1, Text 20, Pages 353-362 (Folios 177a4 to 181b6)
Author འཇམ་དབྱངས་མཁྱེན་བརྩེའི་དབང་པོ་
Less details More details
Citation 'jam dbyangs mkhyen brtse'i dbang po. snga 'gyur gyi rgyud dang sgrub sde sna tshogs las btus pa'i lung dang zin bris sna tshogs. In 'jam dbyangs mkhyen brtse'i dbang po'i bka' 'bum, Vol. 3: 353-362. Khams sde dge rdzong sar dgon: Rdzong sar blo gros phun tshogs, 2020.
Genre Notes - zin bris

1 Texts in this Section (sde tshan or chos tshan)

20
353-362
སྔ་འགྱུར་གྱི་རྒྱུད་དང་སྒྲུབ་སྡེ་སྣ་ཚོགས་ལས་བཏུས་པའི་ལུང་དང་ཟིན་བྲིས་སྣ་ཚོགས།
 snga 'gyur gyi rgyud dang sgrub sde sna tshogs las btus pa'i lung dang zin bris sna tshogs
Notes - zin bris
 Text page
View PDF
འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
[edit]
གཡུང་དྲུང་བོན་གྱི་ལོ་རྒྱུས་ནི། ཞང་ཞུང་འོལ་མོ་ལུང་རིངས་སུ་ཤཱཀྱའི་རྒྱལ་པོ་སྟོན་པ་གཤེན་རབས་ཀྱི་སྐུར་མང་པོ་བཞེངས་ཏེ་མཛད་པ་བཅུ་གཉིས་ཀྱི་སྒོ་ནས་བོན་གྱི་འཁོར་ལོ་དུ་མ་ཞིག་བསྐོར་བ་ལ་བརྟེན་གདུང་འཚོབ་མུ་ཆོ་སྡེ་དྲུག་གིས་རིགས་པས་ཕྱེ། དེ་རྗེས་ཏ་ཟིག་ལ་མཁས་པ་མུ་ཙ་ཏྲ་ཧ་སོ་དང་། ཁྲི་ཐོག་སར་ཙ་མ། གུ་ཧི་ལི་སྤར་ཡ་གསུམ་ལས། རྫུ་འཕྲུལ་གྱི་རྐང་པ་ཐོབ་པའི་ལོ་ཙཱ་རྒྱ་གར་སྔགས་བདག་ལྷ་དྲོ། རྒྱ་ནག་ལེགས་གཏོང་རྨང་པ། ཁྲོམ་གསེར་ནག་པོ་ལྕེ་འབྱམས་གསུམ་གྱིས་རང་གི་ཡུལ་དུ་བསྒྱུར་ཞིང་སྤེལ། དེ་ལ་དང་པོ་མཁས་ལྡེམ་གྱི་ན་ཚ་རྨང་དགེ །མེ་ཉག་ལ་མཁས་པ་ལྕེ་ཚ་གར་བུ། གསུམ་པ་ལ་མཁས་པ་མུ་ཀུངས་གསང་གཏང་། ཞང་ཞུང་ན་མཁས་པ་ཤ་རི་འབུ་ཆེན་ཏེ་མཁས་པ་མི་བཞིས་བསྒྱུར་འཆད་མཛད། ལྷ་བཙད་པོ་ཁྲི་སྲོང་ཡན་དར་རྒྱས་སུ་གྱུར་པ་ལ་བོན་སྔ་དར། སླད་མ་དྲང་རྗེ་བཙུན་པ་གསེར་མིག་གིས་གླིང་གི་ལྷོ་ཐག་སྤྱི་རིང་དང་། དུར་ཁྲོད་ཀྱི་ནང་ནས་རྙེད་པ་རིམ་པར་འཕེལ་བ་ལ་བོན་ཕྱི་དར་ཏེ། གཡུང་དྲུང་གི་ཆོས་ཕུང་སྒོ་བཞི་མཛོད་ལྔའི་ནང་ཚན་ཁམས་ཆེན་པོ་བཅུ་དྲུག་གཏན་ལ་ཕབ་པ་སྟོང་ཕྲག་བརྒྱ་པ། མངོན་རྟོགས་རིག་པའི་རྩེ་མོ་སོགས་སྔ་དར། དྲི་མེད་གཟི་བརྗིད་སོགས་ཕྱི་དར་གྱི་བོན་དང་། ཕྱྭ་གཡང་སེལ་གསུམ་ལ་སོགས་པ་འཇིག་རྟེན་བདེ་ལེགས་སུ་འགྱུར་བའི་བོན་གྱི་རིམ་པ་དཔག་ཏུ་མེད་པ་ཡོད་དོ། ། ༈

བུ་སྟོན་གྱིས། དེ་ཡི་བསྟན་ལ་བདུད་རྩི་ཐོབ་པ་ཡིས། །སློབ་མ་མཆོག་གིས་བསྟན་པ་རིན་ཆེན་ཚོགས། །སྒྲོ་སྐུར་དྲི་མ་སེལ་བའི་བྱི་དོར་གྱིས། །བསྟན་པ་ནོར་བུའི་ཕུང་པོ་བཏུས་པར་གྱུར། །བསྟན་པས་ལུང་བསྟན་མཁས་གྲུབ་དེད་དཔོན་གྱིས། །བརྟག་པ་གསུམ་གྱིས་ལུང་དོན་ནོར་བུ་སྦྱངས། །ལེགས་བཤད་དགོངས་འགྲེལ་རྒྱལ་མཚན་རྩེ་ལ་བཀོད། །མི་ཤེས་མཚན་མོའི་མུན་པ་སྨག་རུམ་བསལ། །ཞེས་པས་སོ། །རྗེ་བཙུན་ཙོང་ཁ་པའི་བཞེད་གཞུང་བྱང་ཆུབ་ལམ་གྱི་རིམ་པ་ཞེས། བསྟན་པ་ཐམས་ཅད་འགལ་མེད་རྟོགས། །གསུང་རབས་མ་ལུས་གདམས་ངག་འཆར། །རྒྱལ་བའི་དགོངས་པ་བདེ་བླག་རྙེད། །ཉེས་སྤྱོད་ཆེན་པོ་རང་འགག་པ། །ཞེས་ཆེ་བ་བཞི་དང་ལྡན་པའོ། །དཱི་པཾ་ཀ་ར་དངོས་བྱོན་ཙོང་ཁ་བ་ཆེན་པོ། འབྲོམ་སྟོན་ཟློས་གར་དགེ་འདུན་གྲུབ་པ། ། ༈ ཙོང་ཁ་པས། ཆོས་རྗེ་དོན་གྲུབ་རིན་ཆེན། དཔའ་བོ་རྡོ་རྗེའམ་བླ་མ་དབུ་མ་པ། རེད་མདའ་གཞོན་ནུ་བློ་གྲོས། ལྷོ་བྲག་ལས་ཀྱི་རྡོ་རྗེ་བཞི་བླ་མར་བསྟེན། དགེ་བའི་བཤེས་གཉེན་དར་ཡུལ་བ་ལས་སྔ་འགྱུར་གསན། སྲས་ཀྱི་གཙོ་བོ་དགེ་འདུན་གྲུབ་པ་དང་། རྒྱལ་ཚབ་དར་མ་རིན་ཆེན་སོགས་སོ། །འཇམ་དཔལ་རྩ་རྒྱུད་ལས་ལུང་དུ་བསྟན་ཅིང་། བཀའ་གཏེར་ཀུན་ནས་འཇམ་དཔལ་གྱི་སྤྲུལ་པར་བསྔགས། རྗེ་དཔའ་བོས། ཁ་ནས་ཆོས་སྐད་མི་སྨྲའི་སྐྱེ་བོ་མེད། །དམ་ཆོས་ལག་ཏུ་ལེན་པའི་མི་གཅིག་མེད། །སག་ཤའི་བྲོ་དང་དམ་ཆོས་ཁྱད་མེད་པའི། །དུས་ངན་འདི་རུ་བདག་གི་བརྩམས་པས་ཅི། །ཞེས་དང་། ངོ་སྤྲོད་ཐེབས་དང་སྤྲུལ་པར་ཁས་ལེན་པས། །ཡུལ་ཀུན་འདམ་བུའི་ཚལ་བཞིན་རབ་གང་ཡང་། །འཇིག་རྟེན་པ་ཡི་ཡང་དག་ལྟ་བ་ཙམ། །སྣར་གཅིག་སྐྱེས་པའང་ཉིན་སྐར་ལས་དཀོན་གྱུར། །ཅེས་དང་། དེང་སང་ཀུན་ཀྱང་བསྟན་བཅོས་རྩོམ་ལ་འཇུག །དར་བ་དང་ནི་ནུབ་པའང་དུས་གཅིག་བྱེད། །སྤར་ཙམ་བསྐོས་ནས་བཞག་ན་དར་བར་རློམས། །འདི་འདྲའི་དར་ཚུལ་ལ་ནི་བདག་མི་སྨོན། །ཞེས་སོ།། །། ༈ གཟུངས་གཞུག་དྲིལ་ལུགས་བུ་སྟོན་གྱིས་མཇུག་ནས་ཡར་དྲིལ་བ་ཀློག་ལུགས་ལྟར་དང་། ས་སྐྱའི་རྗེ་བཙུན་གོང་མ་དང་ངོར་ཆེན་རྗེས་འབྲངས་དང་བཅས་པས་ཨོཾ་ནས་སྤྲུལ་འཁྱིལ་བ་ལྟར་དྲིལ་བར་གསུངས་ཤིང་། ལྔ་པ་རིན་པོ་ཆེ་སོགས་རིས་མེད་ཀུན་ཀྱིས་ཀྱང་ཕྱི་མ་ལྟར་བཞེད་འདུག ། ༈ བཀའ་གདམས་གླེགས་བམ་ལས། བྱང་ཆུབ་སེམས་ལས་རིང་བསྲེལ་འཛག །བསྐྱེད་རིམ་ཅན་ལ་ལྷ་སྐུ་འབྱུང་། །འཁོར་བ་མི་སྤོང་སེམས་དཔའ་ལ། །ཐུགས་དང་ལྗགས་ནི་འབྱུང་བ་ཡིན། །ཞེས་སོ། །སྐུ་གདུང་འབར་བར། དེ་ལ་སྐུ་དང་གདུང་ཤཱ་རཱི་རམ་སོགས། དང་ནི། །དེ་བཞིན་འོད་དང་སྒྲ་དང་ནི། །ས་ནི་གཡོ་བར་འགྱུར་བའོ། །ཞེས་སོ། །དགོངས་པ་ཟངས་ཐལ་བཏགས་གྲོལ་ལས། རྣལ་འབྱོར་ཕྱིར་མི་ལྡོག་པའི་རྟགས༔ རྡོ་རྗེ་རིན་ཆེན་པདྨ་དང་༔ ལས་དང་དེ་བཞིན་གཤེགས་པའི་གདུང་༔ ཞེས་དང་། ཤ་ཁྲག་རུས་དང་ཡན་ལག་དང་༔ འབྱུང་འདུས་ལྔ་རུ་རྟེན་དུ་འབྱུང་༔ ཤཱ་རཱི་རམ་དང་ཆུ་རི་རམ༔ བ་རི་རམ་དང་ཉ་རི་རམ༔ པཉྩ་རམ་དང་ལྔ་ལྡན་གདུང་༔ རིགས་ལྔའི་གདུང་དང་སྐུ་ཡང་འབྱུང་༔ ཆོས་སྐུ་ཐོབ་པའི་རྟགས་ཡིན་ནོ༔ ཞེས་དང་། ཤ་རི་བ་རི་ཆུ་རི་ཡིས༔ སྐྱེ་མེད་ཡོན་ཏན་ལོངས་སྐུ་ཐོབ༔ ཉ་རི་པཉྩ་རམ་གྱིས་ནི༔ སྤྲུལ་པའི་སྐུ་ལྔ་ངེས་པར་ཐོབ༔ ཅེས་སོ། །རང་ཤར་ལས། ཤཱ་རི་རམ་གྱིས་སྐྱེ་མེད་ཐོབ། །ཆུ་རི་རམ་གྱིས་དོན་ཡོད་དོ། །བ་རི་རམ་གྱིས་ལོངས་སྐུ་ཐོབ། །ཉ་རི་རམ་གྱིས་སྤྲུལ་སྐུ་ཐོབ༔ པཉྩ་རམ་གྱིས་རྡོ་རྗེ་ཉིད། །ཅེས་སོ། །སློབ་དཔོན་ངག་དབང་གྲགས་པས། ཨིནྡྲ་ནཱི་ལ་རིན་ཆེན་སོགས། །ནོར་བུ་ཆེན་པོ་གཞན་དག་ཀྱང་། །འཆང་བར་བྱེད་པས་འཆི་བ་ཀུན། །བཟློག་པར་འགྱུར་བ་ཐེ་ཚོམ་མེད། །གང་ཕྱིར་ནོར་བུའི་མཐུ་ལ་ནི། །སོམ་ཉི་བྱ་བར་རིགས་མིན་ཏེ། །ནོར་བུ་བསམ་གྱིས་མི་ཁྱབ་པའི། །མཐུ་དང་ལྡན་པར་ཐམས་ཅད་འདོད། །ཅེས་སོ། །མུ་ཏིག་བཅང་པས་ཚེ་བསྲིང་ཞིང་། །བྱེ་རུའི་ཕྲེང་བས་ཟས་གོས་འཕེལ། །ཕྲ་མེན་གཟའ་ཡི་གནོད་པ་བཟློག །ཤེལ་གྱི་ཕྲེང་བས་ཤེས་རབ་འཕེལ། །ཅེས་སོགས་བསྟན་པ་ལྟར་རོ། །དཔའ་བོ་གཅིག་གྲུབ་ཀྱི་རྒྱུད་ལས། གནོད་སྦྱིན་ཕོ་མོའི་འཁོར་ལོ་བྲིས་ཏེ་ནོར་དང་འབྱོར་པ་བསྒྲུབས་པའི་ཆེད་དུ་མོ་འཁོར་གཉིས་ཁ་སྦྱར་རམ། ཞེས་སོགས་ཀྱིས་བསྟན་པ་ལྟར་རོ། །འཕགས་པ་ཀླུས་གཟུངས་འབུལ་གྱི་རྣམ་གཞག་སྐུ་ཡི་རབ་ཏུ་བྱེད་པ་ལས། གཟུངས་མེད་ལོ་ཟླར་འདས་གྱུར་ན། །ཡི་དྭགས་ཉིད་ཀྱི་གནས་སུ་འགྱུར། །ཞེས་དང་། མཆོད་རྟེན་གཟུངས་རྣམས་མས་ཡར་གཞུག །སྐུ་དང་གདུང་རྟེན་ཡས་མར་གཞུག །ཅེས་དང་། རྒྱལ་རྫོང་བྱས་ན་རྒྱལ་པོ་དམངས་སུ་འབེབས། །མགོ་མཇུག་ལོག་ན་ཆོས་གཞུག་བདུད་ཀྱིས་སྡུད། །ལོག་བཏུས་བྱས་ན་ཚེ་ལ་བར་ཆད་འབྱུང་། །གཟུངས་རྣམས་མ་ཚང་དབུལ་པོར་འགྱུར། །དེ་ཡང་སྐུ་གདུང་རྒྱུད་དག་ལས། །དབུ་ཡི་གཟུངས་རྣམས་མ་ཚང་ན། །དབང་པོ་མི་ཚང་ཆེ་ས་འཆོར། །ཞེས་སོགས་གཙུག་ཏོར་ནས་གདན་ཁྲིའི་བར་གཟུངས་མ་ཚང་བ་སོ་སོར་སྐྱོན་རེ་བཤད་ཅིང་། དེ་བཞིན། ཕོ་གཟུངས་སྨད་དུ་ཤོར་བ་ནི། །བར་ཆད་བགེགས་ཀྱི་གཡབ་མོ་ཡིན། །མོ་གཟུངས་སྟོད་དུ་ཤོར་བ་ནི། །མོ་རྒྱུད་འཕེལ་ཞིང་རིགས་རྒྱུད་ཉམས། །ཞེས་འཁྲུགས་པའི་སྐྱོན་དང་། གནོད་སྦྱིན་གཟུངས་རྣམས་མ་ཚང་ན། །བྱས་པ་དོན་མེད་ཆུད་ཟོས་འགྱུར། །ཚང་ན་ཡོན་ཏན་དེ་ལས་ལྡོག །ཅེས་དང་། རྒྱས་བསྡུས་རྟེན་གྱི་ཚད་དང་སྦྱར། །ཅེས་དང་། སྟོད་གཟུངས་སྨད་དུ་ཤོར་བ་དང་། །སྨད་གཟུངས་སྟོད་དུ་ཤོར་བ་ནི། །ཆེ་ཆུང་གཉིས་ཀྱི་བྱེ་བྲག་ཡིན། །ཅེས་ཐེག་པ་གོང་འོག་རིམ་པ་ལྟར་མ་འཁྲུལ་བར་ཡས་མར་དུ་གཞུག་པ་སོགས་བྱ་ཞིང་། ཡང་སྔ་མ་ལས། སྐྱོན་ལྡོག་པ་ནི་ཡོན་ཏན་ཏེ། །གཞུང་བཞིན་མ་ནོར་འབད་བྱས་ན། །རྟེན་རྣམས་གང་དུ་བཞུགས་ཀྱང་ནི། །ཞལ་བྲོ་བཀྲ་ཤིས་ཡོན་ཏན་འཕེལ། །འཁོར་དང་ལོངས་སྤྱོད་སྤྲིན་བཞིན་འདུ། །བུ་ཚ་རིགས་རྒྱུད་ཤིན་ཏུ་འཕེལ། །སྙན་པའི་གྲགས་པ་མཁའ་ལྟར་ཁྱབ། །བསམ་གཏན་ཏིང་འཛིན་འཕེལ་བ་དང་། །འགྲོ་དོན་མང་པོ་བྱེད་པར་ནུས། །བདེ་གཤེགས་ཉིད་དང་སྤྱོད་ཡུལ་གཅིག །ཡོན་ཏན་བསམ་གྱིས་མི་ཁྱབ་བོ། །ཞེས་སོ། །ཁྲག་འཐུང་གལ་པོ་ལས། གང་ཞིག་སྐུ་གདུང་རིང་བསྲེལ་ནི། །རྣལ་འབྱོར་ཀུན་གྱི་སྒྲུབ་པའི་རྟེན། །དངོས་མེད་མེ་ལ་སྦྱང་བ་ཡིས། །དངོས་ཅན་གདུང་དུ་འབྱུང་བར་འགྱུར། །ཞེས་དང་། ཐལ་བ་བསྡུས་ནས་སྐུ་གདུང་གདབ། །ཆོས་ཉིད་དོན་གྱི་སྐུ་གདུང་ལས། །འབྱུང་བ་རྟགས་ཀྱི་སྐུ་གདུང་ཤར། །ཅེས་སོ། །ཆོས་སྐུའི་རྟེན་བཞེངས་པ་ལ་གཅེས་པ་ཟ་ཧོར་མཁན་པོ་ཤནྟ་རཀྵིའི་ཕྱག་ལེན་ཀུན་མཁྱེན་བུས་གསལ་བར་མཛད་པ་གཙུག་ཏོར་དྲི་མེད་ཀྱི་དཀྱིལ་འཁོར་བུམ་རྟེན་བཞུགས་སུ་གསོལ་བ་དང་། དེ་སྟེང་འོད་ཟེར་དྲི་མེད་ཀྱི་དཀྱིལ་འཁོར་བཞེངས་ཏེ་སྲོག་ཤིང་བརྟན་པའི་ཆོ་ག་བྱ་བ། དེ་དང་རྗེས་འབྲེལ་དུ་དྲི་མེད་ཀྱི་གཟུངས་བཀླག་ཅིང་། སཱཙྪ་དགུ་བཅུ་རྩ་དགུ་གདབ་པའི་སྒོ་རང་གཞན་གྱི་ཚོགས་སྤེལ་ཞིང་། བསྒྲུབ་བྱ་ལ་ཕན་གདགས་པའི་རིམ་པ་སོགས་ཤིན་ཏུ་གཅེས་ཤིང་། སྲོག་ཤིང་ནི་རབ་ཙནྡན་དཀར་པོ། འབྲིང་དམར་པོ། ཐ་མ་ཤུག་པ་སོགས་ཕྱོགས་དང་རྩ་རྩེ་མ་ལོག་པ་རྩེ་མོར་རྣམ་རྒྱལ་མཆོད་རྟེན། འདིར་ཡུངས་འབྲུ་ལྟ་བུའི་རིང་བསྲེལ་བཅུག །རྩ་བར་རྡོ་རྗེ་ཕྱེད་པ་དང་། སྨད་གྲུ་བཞི་པ་ཇེ་ཕྲར་སོང་ཞིང་གདུགས་ཡན་ཟླུམ་པོ་བྱ། གོང་གི་སྲོག་ཤིང་བརྟན་པའི་ཆོ་ག་སོགས་སྔོན་བྲམ་ཟེ་སེར་སྐྱའི་དོན་དུ་བསྩལ་བ་དྲི་མེད་རྣམ་དག་འོད་ཀྱི་གཟུངས་ཞེས་སྣང་ཞིང་། གཟུངས་དེ་ཉིད་སྲོག་ཤིང་ནང་དུ་རིང་བསྲེལ་དང་ལྷན་ཅིག་པར་གཞུག་པས་ཡོན་ཏན་བརྗོད་ལས་འདས་པ་ཐོབ་པའི་ཚུལ་གསུངས་ཤིང་། ཆོས་སྐུའི་རིང་བསྲེལ་ནི་གཟུངས་དང་། ཡོན་ཏན་མཚོན་བྱེད་མཆོད་རྟེན་དང་སཱཙྪ། སྐུ་གདུང་རིང་བསྲེལ་བདེ་གཤེགས་ཉན་རང་སོགས་ཀྱི་གདུང་། སྐུ་བལ་ནི་དེ་དག་གི་དབུ་སྐྲ་དང་ཕྱག་སེན་སོགས། ཡུངས་འབྲུ་ལྟ་བུའི་རིང་བསྲེལ་ནི་བདེ་གཤེགས་ཀྱི་གདུང་ཤཱ་རི་རམ་སྟེ། གདུང་ནི་འཇིག་ལ། རིང་བསྲེལ་ནི་མི་འཇིག་པའི་ཁྱད་པར་ཅན་དུ་གསུངས་ཤིང་། ཆོས་སྐུའི་རིང་བསྲེལ་ལ། འོད་ཟེར་དྲི་མེད་ཀྱི་གཟུངས་དགུ་བཅུ་རྩ་དྲུག་ངོས་གཞིར་གཞུག་པ་དང་། གཟུངས་དེ་ཉིད་ཀྱི་གཞུང་རྫོགས་སྲོག་ཤིང་གི་དབུས་སུ་གཞུག་པ་སོགས་དང་། རྩེ་མོ་ནས་བཟུང་། རྣལ་འབྱོར་བླ་མ། རྣལ་འབྱོར་སྤྱོད་པ། བྱ་བ། མངོན་པ། མདོ་སྡེ། འདུལ་བ་དང་། དེ་དག་གི་དགོངས་འགྲེལ། དེ་ནས་རིག་གནས་ཕྱི་མའི་སྐོར་བཅས་གདན་ཁྲིའི་བར་དུ་གཞུག་པ་ལ་ཆོས་ཀྱི་རིང་བསྲེལ་དུ་བཞེད་ཅིང་། གཟུངས་ཀྱང་རྒྱུད་སྡེ་བཞི་དྲུག་གི་གོ་རིམ་དང་བསྟུན་པར་གཞུག་པ་དང་། རྒྱ་བོད་ཀྱི་ཡི་གེ་གང་རུང་གི་གནས་ཡིག་ཨོཾ་ཨཱཿཧཱུྃ་ཏྲཱྃ་བཞི་རིམ་པར་བྲིས་པ། ཨོཾ་ཐད་བླ་མ་བརྒྱུད་པའི་མཚན་སྔགས། ཨཱཿའི་ཕྱོགས་བཞིར་དབྱངས་གསལ། ཧཱུྃ་ཐད་བླ་མེད་ཀྱི་རྒྱུད་ཀྱི་སྙིང་པོ། ཏྲཱྃ་ཐད་རྣལ་འབྱོར་རྒྱུད་དང་སྤྱོད་རྒྱུད། དེ་འོག་ཏུ་ཁྱད་པར་གྱི་གཟུངས་སྡེ་ལྔ་ཞེས། དྲི་མེད་ཀྱི་གཟུངས་ལྷོ་རིང་ཐུང་ཤར་དུ། ལྷོར་གསང་བ་རིང་ནུབ་བསྲེལ། ནུབ་བྱང་ཆུབ་བྱང་རྒྱན་འབུམ། བྱང་དུ་གཙུག་ཏོར་རྣམ་རྒྱལ། ཤར། ཀུན་ཕྱི་མཐར་རྟེན་འབྲེལ་སྙིང་པོ་འབྲི་བར་གསུངས་སོ། །དེ་ནི་སྲོག་ཤིང་ཁོ་ནའི་གཟུངས་གཞུག་དང་འབྲི་བྱ་སྟེ་དེ་རྒྱབ་གཟུངས་སྤར་རིམ་བཞིན་དུ་དཀྲི་བ་དང་། དེ་རྒྱབ་གླེགས་བམ་སོགས་བརྩེགས་པ་དང་། བར་མཚམས་སྨན་གྱི་ལྡེ་གུས་ཁྱབ་པར་བྱུག་ཅིང་གསེང་མེད་པ་གཅེས་སོ། །དེ་བཞིན་དུ་བང་རིམ་འོག་མ་དང་། གདན་ཁྲི་དང་སྐྱིལ་ཀྲུང་གི་བར་ལ་ཆོས་སྐྱོང་གི་སྐུ། སྲོག་སྔགས། རྟེན་འཁོར་སོགས་དང་། གནོད་སྦྱིན་བང་མཛོད་དམ་གདན་ཁྲིར་ཛཾ་བྷ་ལའི་སྲོག་འཁོར། བུམ་གཏེར། རིན་པོ་ཆེ་འབྲུ་སྨན་དར་ཟབ་གོ་མཚོན་ས་ཆུ་རྡོ་ཤིང་སོགས་ཡོ་བྱད་ཀྱི་རིགས་ཐམས་ཅད་འདུ་བྱ་བ་དང་། དེ་འོག་གོང་དུ་བཞེངས་པའི་ས་གཞིར་དམ་སྲི་མནན་པ་དང་། དེ་སྟེང་ས་བཅུད་གསོ་བའི་བུམ་གཏེར་སྦ་བ་སོགས་བྱ་བར་བཤད་དོ། ། ༈

ཙོང་ཁ་བས། བསྙེན་གནས་དགེ་བསྙེན་ཕ་མ་དང་། །དགེ་ཚུལ་ཕ་མ་དགེ་སློང་མ། །དགེ་སློབ་མ་དང་དགེ་སློང་སྟེ། །སོ་སོར་ཐར་པ་རིགས་བརྒྱད་དོ། །ཞེས་གསུངས་ཤིང་། དེ་ཡང་། ཁྱིམ་པའི་སྡོམ་པ་དང་པོ་གསུམ། །རབ་བྱུང་སྡོམ་པ་ཐ་མ་ལྔ། །ཞེས་པས་བསྙེན་གནས་དང་། དགེ་བསྙེན་ཕ་མ་ཁྱིམ་པ་དང་། ལྷག་མ་རབ་བྱུང་སྟེ། དེ་ལ་ཡང་དགེ་ཚུལ་གྱི་བསླབ་བྱ། ལུང་རྣམ་འབྱེད་ལས། མཐའ་བརྒྱད་དགེ་འདུན་ལྷག་མ་ཉི་ཤུ་དང་། །དེ་བཞིན་སྤང་བ་སུམ་ཅུ་རྩ་གསུམ་དང་། །གཞན་ཡང་ལྟུང་བྱེད་བརྒྱ་དང་བརྒྱད་ཅུ་དང་། །སོ་སོར་བཤགས་པར་བྱ་བ་བཅུ་གཅིག་ནི། །བསླབ་པ་ཡི་ནི་ཕྲེང་བ་ལྷག་པ་སྟེ། །ཞིབ་པར་བྱེད་པ་དགེ་སློང་ཕ་དང་མཐུན། །ཞེས་དང་། དགེ་སློང་ལ། འདུལ་བ་རྒྱ་མཚོའི་སྙིང་པོར། ཕམ་པ་བཞི་དང་ལྷག་མ་ནི། །བཅུ་གསུམ་སྤང་ལྟུང་སུམ་ཅུ་དང་། །ལྟུང་བྱེད་འབའ་ཞིག་དགུ་བཅུ་དང་། །སོར་བཤགས་བཞི་དང་ཉེས་བྱས་ནི། །བརྒྱ་དང་བཅུ་གཉིས་བསྡོམས་པ་ཡིས། །ཉིས་བརྒྱ་ལྔ་བཅུ་རྩ་གསུམ་རྣམས།། སྤོང་བར་བྱེད་པ་དགེ་འདུན་ནོ། །ཞེས་སོ། །དེ་ལྟར་སོ་ཐར་གྱི་བསླབ་པའི་སྟེང་དུ། བྱང་སྡོམ་དང་། སྔགས་ཀྱི་དམ་ཚིག་ལ་ཉེ་བར་གནས་པ་ནི་སུམ་ལྡན་རྡོ་རྗེ་འཛིན་པ་སྟེ་རབ་ཏུ་གནས་པ་སོགས་གསང་སྔགས་ཀྱི་ལས་གང་ལའང་འཇུག་པ་ལ་ཤིན་ཏུ་གཅེས་པར་གསུངས་སོ། ། ༈

Footnotes

Other Information

Retrieved from "https://khyentselineage.tsadra.org/index.php?title=JKW-KABUM-03-GA-001-020&oldid=55863"
Khyentse Lineage
Collected Works of the Masters
A Tsadra Foundation initiative designed to house the writings and revelations of the masters of the Khyentse lineage.
Join the Tsadra Foundation mailing list:

Tsadra Foundation
Translation & Transmission Conference
DharmaCloud Tibetan eBooks
Buddha-Nature
Śāntideva's Life and Works
Rinchen Terdzö Chenmo
Damngak Rinpoche Dzö
Dharma Dictionary

About us
Privacy policy
General disclaimer
Site guide

Project Description

Welcome to the Khyentse Lineage Project, a Tsadra Foundation initiative designed to house the writings and revelations of the masters of the Khyentse lineage in a digital format that allows for open access to these materials in authoritative modern Tibetan editions for the sake of scholars, translators, and practitioners the world over.

About us

© Tsadra Foundation. Please feel free to use this website and its content in accordance with fair use policies for teaching, scholarship, education, and research.
See General disclaimer for more information.