JKW-KABUM-03-GA-001-010

Previous Text Back to Volume PageNext Text

ཡང་ཀུན་མཁྱེན་བསོད་ནམས་སེང་གེའི་དྲིས་ལན་ལས་ཁོལ་བཏུས་སོགས།

Wylie title	yang kun mkhyen bsod nams seng ge'i dris lan las khol btus sogs
Location	mkhyen brtse'i bka' 'bum Volume 3, sde tshan 1, Text 10, Pages 213-226 (Folios 107a6 to 113b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. yang kun mkhyen bsod nams seng ge'i dris lan las khol btus sogs. In 'jam dbyangs mkhyen brtse'i dbang po'i bka' 'bum, Vol. 3: 213-226. Khams sde dge rdzong sar dgon: Rdzong sar blo gros phun tshogs, 2020.
Genre	Replies to Questions - dris lan

Tibetan Text

Wylie

[edit]

ཀུན་མཁྱེན་བསོད་ནམས་སེང་གེའི་དྲིས་ལན་ལས་ཁོལ་བཏུས་བཞུགས་སོ། །བླ་མ་ལ་ཕྱག་འཚལ་ལོ། །རང་རྒྱལ་གྱི་གྲུབ་མཐའ་དབུ་མ་པར་སྡུད་པར་རྗེ་བཙུན་རྩེ་མོས་གསུངས། དེ་ལྟར་ན་བླ་མེད་ཀྱི་བསྐྱེད་ཆོག་དང་སྦྱར་དགོས་པར་འགྱུར་རམ་སྙམ་ན། དེའི་དོན། སྤྱིར་སངས་རྒྱས་པའི་གྲུབ་མཐའ་ལ་བརྗོད་དུ་མེད་པའི་གང་ཟག་གི་བདག་ཁས་ལེན་པ་སོགས་བཞི་ལ་རིམ་བཞིན་སྦྱར་བ་ལས། གྲུབ་མཐའ་བཞི་པོ་དེ་ལས་གང་བཤད་པའི་རྣམ་གཞག་ཐམས་ཅད་དང་སྦྱར་བ་མ་ཡིན་ཏེ། དཔེར་ན་མཛོད་ལས་གསུངས་པའི་ཁ་ཆེ་བྱེ་བྲག་ཏུ་སྨྲ་བའི་རྣམ་གཞག་ཐམས་ཅད་སྤྱོད་རྒྱུད་དང་ཇི་ལྟར་འགྲིག ། ༈

དཔུང་སྐུད་གཙོ་བོར་ཁམས་དཀར་དམར་གྱི་བར་ཆད་སྲུང་བྱེད་དུ་བཤད། ། ༈ གསུང་ངག་གི་ཕོ་བྲང་ལྔའམ་དྲུག་ཅེས་པའི་ལྔ་ནི་རིགས་དྲུག་ལ་སྤྱི་ཁྱབ་ཏུ་གཏོང་བའམ། དྲུག་ནི་སོ་སོར་བྱེ་བའི་ཁྱད་དང་། དེའི་ཚེ་སྤྱི་བོའི་ཕོ་བྲང་རྣམ་སྣང་དང་། སྤྱི་གཙུག་གི་ཕོ་བྲང་རྡོར་སེམས་སུ་གསུངས་སོ། ། ༈ བདེ་མཆོག་ལ། རྒྱུད་རྒྱས་པ་ཤློཀ་སུམ་འབུམ། འབྲིང་ཤློཀ་ཉིས་འབུམ། བསྡུས་པ་ཆིག་འབུམ་དང་གསུམ་ཡོད་པ་ལས་ཕྱི་མ་དང་། རྒྱུད་རྒྱས་པ་འབུམ་ཕྲག་གསུམ་པ་དང་། བསྡུས་པ་ད་ལྟའི་བདེ་མཆོག་ཉུང་ངུ་ཡིན་ཞེས་པ་གཉིས་ལས་རང་ལུགས་ཕྱི་མ་འདོད། ། ༈ ཀྱེ་རྡོར་གཙོ་ཆེའི་ཆོས་སྣ་སོ་དགུའི་གྲངས། མུས་ཆེན་པས། །འགྲེལ་བ་ཀུ་མུ་ཏི། དཀྱིལ་ཆོག་བཟང་པོ་ཡོངས་བཟུང་། སྒྲུབ་ཐབས་ཡན་ལག་དྲུག་པ། བདག་མེད་མའི་སྒྲུབ་ཐབས། རྡོ་རྗེ་གུར་གྱི་སྒྲུབ་ཐབས། གཏུམ་མོའི་འགྲེལ་ཆུང་། སྦྱིན་སྲེག །ཕྱག་མཚན་གྱི་དག་པ། གཏོར་མ། སྔགས་དོན་གཅིག །ཡང་སྔགས་དོན་གཅིག །བདུད་རྩི་འོད། ལྷན་ཅིག་སྐྱེས་གྲུབ། ལམ་གྱི་ཡན་ལག་ལ་དེ་ཉིད་བཅུ་པ། ཚོགས་ཀྱི་འཁོར་ལོ། དྲན་པ་གཅིག་པ། དཔའ་མོ་གཅིག་པ། ཡང་དཔའ་མོ་གཅིག་པ། རིན་ཆེན་འབར་བ། མན་ངག་གི་རོ་སྲེག་སྟེ། དེ་རྣམས་ཌོམྦྷིའི་སྐོར་འགྲེལ་པ་པདྨ་ཅན། དཀྱིལ་ཆོག་ནས་གླིང་མ། སྒྲུབ་ཐབས་མཚོ་སྐྱེས། ཚོགས་འཁོར་དམ་ཚིག་ལྔ་པ། བསྟོད་པ། དེ་རྣམས་པདྨའི་སྐོར། འགྲེལ་པ་རྣལ་འབྱོར་རིན་པོ་ཆེ་སྦྱོར་བའི་ཕྲེང་བ། དཀྱིལ་འཁོར་གྱི་ཆོ་ག་གཞུང་འགྲེལ། སྒྲུབ་ཐབས་དེ་ཉིད་གསལ་བ། ཕྱག་བཅུ་དྲུག་པ་དཔའ་གཅིག །ཕྱག་གཉིས་པ་དཔའ་གཅིག །ལམ་གྱི་ཡན་ལག་རབ་ཏུ་གནས་ཚུལ་ཟབ་མོ། སྦྱིན་སྲེག །རོ་སྲེག །ཚོགས་འཁོར། བསྟོད་པ། བདག་མེད་མའི་སྒྲུབ་ཐབས་ཆེ་ཆུང་གཉིས། རྫོགས་རིམ་གྱི་གཞུང་། དེ་རྣམས་ནག་ཆུང་གིས་འགོས་ལུགས་པ་ལ་བརྒྱུད་པའོ། །ཞེས་པ་རྣམས་ལ་སོ་བརྒྱད་དང་། གཅིག་མ་ཚང་བ་ཌོམྦྷིའི་ཚོགས་ཀྱི་འཁོར་ལོའི་བསླབ་བྱ་བསྒྲགས་པ་ཞེས་ཟུར་ན་ཡོད་པ་དེ་ཡིན་ནམ་སྙམ། ཡང་ཁོ་བོའི་རྟོག་པར། ཀྱེ་རྡོར་རྣམ་བཤད་ཀྱི་དགོངས་པ་འགྲེལ་བ་ལུགས་ཀྱི་ཆོས་སྐོར་མི་ཐུབ་ཟླ་བ་ཡན་ཆད་ཀྱི་གཞུང་༡༤། དམའ་བོ་རྡོ་རྗེའི་རིན་ཆེན་འབར་བ་བསྟན་བཅོས་ཀྱི་ངོས་ནས་གཅིག་ཡིན་ཀྱང་ལེའུ་རེ་རེའི་བརྗོད་བྱའི་ངོས་ནས་གཞུང་གཞན་རྣམས་དང་དོན་མཉམ་དུ་ཡོད་པས་དགུར་བགྲང་འདུག་པ༢༣། མཚོ་སྐྱེས་ལུགས་ལ་བདུན། ནག་པོ་ལུགས་ལ་བཅུ་གཉིས་ཏེ་ཞེ་གཉིས་ཡོད་པ་ལས། ཌོམྦྷིའི་ལྷན་ཅིག་སྐྱེས་གྲུབ། མཚོ་སྐྱེས་ལུགས་ཀྱི་སྒྲུབ་ཐབས་དང་། མཚོ་སྐྱེས་དང་། མར་མེའི་རྩེ་མོ་ལྟ་བུའི་རྫོགས་རིམ་སྟེ་གསུམ་མོ། །ལམ་སྐོར་དགུ་ནི་ཁྱད་པར་རོ། །ཞེས་པའི་ཁོངས་སུ་གཏོགས་པས་ལྷག་མ་སོ་དགུ་ཡིན་ནམ་སྙམ། ། ༈ ལྗོན་ཤིང་དུ་ཀུན་བཏུས་མདོ་སྡེའི་མཚན་གཞིར་འཇོག་པ། དེར་བཤད་པའི་ཕུང་ཁམས་ཀྱི་རྣམ་གཞག་ཕལ་ཆེར་དང་། ཕྱི་དོན། ལམ་ལྔ། ས་བཅུ། སྐུ་གསུམ་སོགས་ཕལ་ཆེར་མདོ་སྡེ་པའི་ལུགས་ཡིན་ཅེས་པའི་དོན་ཡིན་གྱི། དེར་བཤད་ཚད་མདོ་སྡེ་པའི་གྲུབ་མཐར་ཞལ་གྱིས་མི་བཞེས་ཏེ། ཐེག་པ་ཐུན་མོང་གི་སྡོམ་ཞེས་པ་དེ་ཚད་མར་མཛད་འདུག་པའི་ཕྱིར། དེས་ན་ཀུན་གཞི་དང་ཉོན་ཡིད་རང་ལུགས་ལ་ཁས་ལེན་པའི་མདོ་སྡེ་པ་ཡོད་མི་དགོས་སོ། ། ༈ སྤྱི་རྣམ་དུ་ཤེས་བྱ་མཁྱེན་ཚུལ་ལ། ཤེས་བྱའི་སྣང་བ་དང་། སངས་རྒྱས་ཀྱི་ཡེ་ཤེས་དང་། གནས་ལུགས་སྟོང་པ་གསུམ་དབྱེར་མེད་མངོན་དུ་གྱུར་པ་ནི་རང་སྣང་གི་ཡེ་ཤེས་ཏེ་ས་བཅུ་གསུམ་པ་ཁོ་ན་དང་། དེ་མངོན་དུ་མ་གྱུར་པའི་གཞན་སྣང་གི་མཁྱེན་ཚུལ་ཏེ། འདི་རྩེ་མོས། སངས་རྒྱས་ཆུང་ངུ་ཉན་ཐོས། འབྲིང་རང་རྒྱལ། ཆེན་པོ་ཕར་ཕྱིན་གྱི་ས་བཅུ་གཅིག་པའམ་བཅུ་གཉིས་པར་བཤད། ། ༈ ཕོ་བྲང་ལྔའི་ལྷ་རྣམས་རྣལ་འབྱོར་པའི་ལུས་ལ་དང་པོ་ནས་གྲུབ་པ་རྡུལ་ཚོན་སོགས་ཀྱིས་མ་བཅོས་པར་བུ་ཚའི་ལུས་གདོད་ནས་གྲུབ་པ་ཙམ་ཉིད་ནས་ལྷའི་ངོ་བོར་གྱུར་པའི་རྩ་ཁམས་གྲུབ་པ་ལ་དགོངས་སོ། ། ༈ བྱང་སེམས་ལ་སྲོལ་གཉིས། དང་པོ་དབུ་མ་ལུགས་ནམ་སྙིང་མདོ་དང་། རྩེ་མོ་ལས་རྩ་ལྟུང་བཅུ་བཞི་གསུངས་ཤིང་། དེ་ཉིད་རྟེན་གྱི་སྒོ་ནས་བཅོ་བརྒྱད་དང་། མཚམས་མེད་ལྔ་སོ་སོར་ཕྱེ་ན་ཉེར་གཉིས་སུ་འགྱུར། སྡོམ་པ་ཉི་ཤུ་པར་རྩ་ལྟུང་བཞི་གསུངས། སྤྱིར་རྩ་ལྟུང་དང་གཏོང་རྒྱུ་ཐ་དད་དེ། བསླབ་པ་ཕུལ་པ་སོགས་གཏོང་རྒྱུ་ཡིན་ཡང་རྩ་ལྟུང་མ་ཡིན་པའི་ཕྱིར། ། ༈ རྣལ་འབྱོར་རྒྱུད་ལ། སྡོམ་གསུམ་དུ་དེ་ནས་རང་ཉིད་ཐ་མལ་འགྱུར་ཞེས་བཤད་པ་ནི། ཡེ་ཤེས་པ་གཤེགས་ནས་དམ་ཚིག་པ་རྐྱང་པ་ཐ་མལ་པའི་མིང་གིས་བཏགས་པ་ཙམ་སྟེ། གཞན་དུ་སྤྱོད་རྒྱུད་ཡན་ཆད་ལ་མི་རུང་བའི་ཕྱིར་རོ། ། ༈ ཕར་ཕྱིན་ཐེག་པར་བཤད་པའི་ས་བཅུ་གཅིག་དང་། རྡོ་རྗེ་ཐེག་པའི་ས་བཅུ་གསུམ་གཉིས་དོན་གཅིག་པར་བླ་མ་བཞེད། འོན་ཀྱང་དེ་ཕར་ཕྱིན་རང་ལམ་གྱིས་ཐོབ་པར་འདོད་ཀྱང་། བླ་མེད་ལུགས་ལ་ཐོབ་པར་མི་འདོད། རྒྱ་གར་དུ་ནཱ་རོ་པས་དོན་དམ་པ་དང་༡༡། བིརཱུ་པ་སོགས་དོན་ལ་༡༣འདོད་པའི་ལུགས་གཉིས་ཡོད། ། ༈ ལྗོན་ཤིང་ལས་ལོག་རྟོག་དགག་པའི་སྐབས། ཕྱོགས་སྔའི་གཙོ་བོ་ནི། རྔོག་གཞུང་པ་ཡིན་ལ། གཞན་ཕྱག་རྒྱ་བ་རབ་ཏུ་མང་པོ་དག་གོ །དབང་བསྐུར་ངན་པའི་ལུགས་ནི། བྱིན་རླབས་སྨིན་བྱེད་དུ་འདོད་པ་དང་། གཡུང་དྲུང་རིས་དང་། ནས་འདྲ་རིས་ཀྱི་དཀྱིལ་འཁོར་དུ་དབང་བསྐུར་བར་འདོད་པ་དང་། ཆོ་ག་མེད་བཞིན་བླ་མའི་ལུས་ལས་དབང་བཞི་ལེན་པར་འདོད་པ་རྣམས་སོ། །ཡང་དག་དབང་བསྐུར་མ་ཡིན་པའི་ལུགས་ནི། མོས་པ་ཆོས་སྒོར་འདོད་པ་དང་། དབང་བསྐུར་མུ་བཞིར་འདོད་པ་རྣམས་ཀྱང་ཡིན་མོད། འདིར་ནི་གོ་རིམ་ལ་ལོག་རྟོག་འདོད་པ་ཞིག་དགོས་ཏེ། རླུང་ལ་དབང་མ་ཐོབ་བཞིན་དུ་གྲོལ་ལམ་ལ་བརྟེན་པ་དབང་བསྐུར་མ་ཡིན་པས། དངོས་དབང་བསྐུར་དགོས་ཞེས་སྨྲ་བ་ཞིག་ལ་འཇོག་པར་སྣང་སྟེ། དབང་པོ་གཉིས་སྦྱོར་སོགས་སོ།། །། ༈ སྤྱི་རྣམ་དུ་གྲུབ་མཐའ་བཞི་དང་བསྟུན་པའི་བསྐྱེད་ཆོག་གསུངས་པ་ཡོངས་གྲགས་ལྟར་མ་ཡིན་ཏེ། དེ་ཡང་རིམ་པར་སོ་སོའི་མཚན་གཞི། ཉན་ཐོས་དམན་པ་གནས་མ་བུ་དང་། འབྲིང་ཉི་འོག་པ་གཉིས། ཉན་ཐོས་མཆོག་ཁ་ཆེ་བ་དང་། མདོ་སྡེ་པ་གཉིས། འཕགས་པ་རང་སངས་རྒྱས། དབུ་སེམས་གཉིས་ཏེ་བཞི་ཡིན་ལ། མཚན་ཉིད་ཀྱང་བརྗོད་དུ་མེད་པའི་བདག་འདོད་པ་སོགས་བཞིའོ། །རང་རྒྱལ་དབུ་མར་བསྡུ་བ་ནི། དབུ་མའི་ལྟ་བ་ཁས་བླངས་ན་གྲུབ་མཐའ་གསུམ་ཆར་དེའི་ནང་དུ་སྡུད་དགོས་པའི་ཕྱིར་རོ། །དེས་གཞན་ལའང་འགྲེ།། །། ༈ ནམ་མཁའ་དང་འགོག་པ་གཉིས་མ་གཏོགས་པའི་ཆོས་ཁམས་ཀྱི་ཕྱོགས་རེ་ཞེས་པ་ནི། དགེ་མི་དགེ་ལུང་མ་བསྟན་གྱི་དེ་བཞིན་ཉིད་གསུམ་དང་། མི་གཡོ་བ་དང་། འདུ་ཤེས་དང་། ཚོར་བ་འགོག་པ་རྣམས་དེ་ཡིན་པའི་ཕྱིར། ། ༈ བདེན་གཉིས་ཟུང་འཇུག་ཇི་ལྟ་བ་སངས་རྒྱས་ཀྱིས་ཐུགས་སུ་ཆུད་ནས་དེ་གཞན་ལ་འདོམས་པ་ལ་བསླུ་མི་བསླུ་བ་ལས་བདེན་གཉིས་ཐ་སྙད་ཙམ་དུ་འཇོག་པར་མཛད་དོ། ། ༈ མཁའ་འགྲོ་རྒྱ་མཚོར། ཇི་ལྟར་བསྐལ་བཟང་རྒྱལ་བ་ནི། །བཞི་ཡིས་དམན་པའི་སྟོང་ཕྲག་གཅིག །ཅེས་སོ། ། ༈ འབྲོག་མི་ལས་སེ་སྟོན་ཀུན་རིག་གིས་མན་ངག་ལུགས་ཀྱི་བཤད་པ་གསན་ཏེ། དེ་ཡང་འབྲོག་མིའི་གཞུང་དང་མན་ངག་གཉིས་ཀ་མི་བཤད་པར་དམ་བཅས་པ་ནི་ཌོམྦྷིའི་ཕྱོགས་ལ་དགོངས། དེ་ཡང་འབྲོག་མི་ཡན་བརྒྱུད་པ་གཉིས་དང་། དེ་མན་བརྒྱུད་པ་བཞིའི་བླ་མ་འབྱུང་བ་སྟེ། ཌོམྦྷི་ལུགས་ཀྱི་བརྒྱུད་འཛིན་རྒྱལ་པོ་དང་། སྙིང་པོ་དང་། སྣང་བའི་མཐའ་ཅན་གསུམ། མན་ངག་ལུགས་ཀྱི་བརྒྱུད་འཛིན་རིག་གི་མཐའ་ཅན་ཏེ་བཞིའོ། །བཞི་ཀའང་བཤད་ཀའི་དབང་དུ་བྱས་པའོ། ། ༈ དེ་བཞིན་གཤེགས་པ་ནི་མེ་ལོང་ལྟ་བུའི་ཡེ་ཤེས་ཏེ་ཆོས་སྐུ། དགྲ་བཅོམ་པ་ནི་མཉམ་ཉིད་ཡེ་ཤེས་ཏེ་ལོངས་སྐུ། ཡང་དག་པར་རྫོགས་པའི་སངས་རྒྱས་ནི་སོར་རྟོག་སྟེ་ལོངས་སྐུ། སངས་རྒྱས་ནི་བྱ་བ་ནན་ཏན་ཏེ་སྤྲུལ་སྐུའོ། །སྐུ་གསུམ་པོ་དེའི་ཕྲིན་ལས་ནི། རྒྱུད་ངན་པ་ལས་ཉོན་གྱི་དབང་གིས་འབྲས་བུ་ཁམས་གསུམ་དུ་སོང་བས་ན་ངན་སོང་སྟེ་འཁོར་བ་ཐམས་ཅད་ཡོངས་སུ་སྦྱོང་བ། ཇི་ལྟར་ན་རྒྱུ་ཏིང་ངེ་འཛིན་གྱིས་ལས་ཉོན་དང་། འབྲས་བུ་འོད་ཟེར་གྱིས་སྡུག་བསྔལ་སྦྱོང་བས་ན་གཟི་བརྗིད། ཅེས་བཤད། ། ༈ བྱང་ཆུབ་སེམས་དཔའ་ནི་སྙིང་རྗེ་དང་། སེམས་དཔའ་ཆེན་པོ་ནི་སྟོང་ཉིད་དེ་དེ་གཉིས་ཟུང་དུ་འཇུག་པའོ། ། ༈ རབ་དབྱེར་པཎ་ཆེན་གྱི་དོགས་གནས་བརྒྱ་རྩ་བརྒྱད་བཀོད་པ་ཀུན་མཁྱེན་གྱི་གཟིགས་ལམ་དུ་ཕེབས་ཚེ། དོགས་པ་ཞུགས་པའི་དྲི་བ་བཞི་འདུག་ཅིང་། དཔྱོད་ལྡན་དག་གིས་དཔྱོད་དགོས་རྒྱུའང་འགའ་ཞིག་སྣང་ལ། ཕལ་ཆེར་ནི་ཚིག་ལ་འཁྲིས་པ་ཙམ་དུ་འདུག་གསུངས་པའི། དང་པོ་ནི། ལས་ཀུན་མི་དགེ་བ་ཡིན་ན། །ཟག་བཅས་དགེ་བ་གཏི་མུག་གི །ཀུན་སློང་དག་ལས་སྐྱེ་དེ་ཅི། །ཞེས་གསུངས། དེའི་ལན། མི་དགེའི་རྩ་བ་གསུམ་གྱི་ནང་ཚན་དུ་གྱུར་པའི་གཏི་མུག་གིས་ཀུན་ནས་བསླངས་ཏེ་བསྐྱེད་པའི་ལས་ཡིན་ན་མི་དགེ་བ་ཡིན་པས་ཁྱབ་པ་གཞུང་གི་དངོས་བསྟན་ཡིན་ལ། སྤྱིར་གཏི་མུག་གིས་ཀུན་ནས་བསླངས་པའི་ལས་ཡིན་ན་མི་དགེ་བ་ཡིན་པས་མ་ཁྱབ་བོ། །གཉིས་པ། ཉན་ཐོས་རྣམས་ཀྱིས་རྫོགས་བྱང་དུ། །བསྔོ་བ་བྱེད་ན་འཕགས་པ་ཡིས། །ཉན་ཐོས་ཐེག་པ་དེ་ལ་ནི། །སྤྱོད་པ་ཡོངས་བསྔོ་མ་བཤད་དེ། །ཞེས་གསུངས་པ་དེ་ཅི་ལ་དགོངས། །ཐམས་ཅད་སྒྲོལ་གྱི་སྐྱེས་རབས་ལས། །བསྔོ་བ་བཤད་དེ་ཉན་ཐོས་ཀྱི། །བསྔོ་བ་ཡིན་པར་བཞེད་དམ་ཅི། །ཞེས་སོ། །ལན། མི་དམིགས་པའི་ཤེས་རབ་ཁྱད་པར་ཅན་གྱི་རྩིས་ཟིན་པའི་བསྔོ་བ་སོགས་མ་བཤད་པས་སངས་རྒྱས་ཐོབ་པར་མི་ནུས་པར་འཆད་ཀྱི། གཏན་མེད་བར་འཆད་པ་མ་ཡིན་པས་མི་འགལ། གསུམ་པ། དགེ་སློང་སྡོམ་པ་མ་ཐོབ་པར། །མཁན་སློབ་བྱས་པས་ཆོག་པ་ཞིག །འདུས་པའི་མདོ་དང་ལུང་དག་ཏུ། །གསལ་བར་བཤད་པ་མ་ཡིན་ནམ། །ལན་ནི། དེ་ལྟ་བུ་གསུངས་སྲིད་ཀྱང་ལག་ཏུ་བླངས་ན་རང་དང་བསྟན་པ་ཀུན་ལ་གནོད་པས་སྤང་བྱའི་འོས་སུ་ཆེ་ཕྱིར་ཕྱག་ལེན་དོགས་ཕྱོགས་ནས་འགགས་བསྡམས་པ་ལགས། །བཞི་པ། རྡུལ་ཚོན་མིན་པར་སྨིན་བྱེད་ཀྱི། །དབང་བསྐུར་དེང་སང་མི་རུང་ན། །འཁོར་ལོ་སྡོམ་པའི་རས་བྲིས་ཀྱི། །དཀྱིལ་འཁོར་དག་ཏུ་དབང་བསྐུར་ནས། །ཕག་མོའི་བྱིན་རླབས་བྱེད་དེ་ཅི། །ཞེས་པའོ། །ལན། འདི་བིར་ལུགས་གཙོ་ཆེ་བས། དེ་ལ་དབང་གི་མངོན་རྟོགས་བདུན་ལྡན་དགོས་པས་དེ་ལྟར་དུ་བཤད་ཀྱི། སྤྱིར་ནི་མ་ཁྱབ་སྟེ། གང་དུ་དབང་བསྐུར་བའི་དཀྱིལ་འཁོར་བརྒྱད་དམ་དྲུག་སོགས་སུའང་རས་བྲིས་བསྟན་པའི་ཕྱིར་རོ། །དབང་བསྐུར་དུ་བཞི་པའི་འདོད་ན་སྔགས་སྡོམ་སེམས་རྗེས་འབྲངས་པས་གནོད་པ་ནི། སྤྱི་ཙམ་དུ་དེ་ལྟར་ཡིན་དུ་ཆུག་ཀྱང་དེང་སང་ནི་དེ་འདྲའི་གདུལ་བྱ་ཉུང་ཞིང་མངོན་ཤེས་ཅན་མ་གཏོགས་རྟོགས་པར་དཀའ་བས་ཕྱག་ལེན་དོགས་ཕྱོགས་ནས་འགགས་བསྡམས་པས་བསྟན་པའི་རྒྱུན་མི་འཆོལ་བའི་ཕྱིར་རོ། །ཉེར་ལྔ་གྲངས་ངེས་དགོས་པ་ནི། དབང་གོང་མ་གསུམ་གྱི་དངོས་གཞི་རེ་རེ་ནས་བསྐུར་བ་སོགས་ཀྱིས་མཚན་མོའི་ནང་དེར་མ་ཚར་དོགས་པ་དང་། དེ་ལྟར་མ་ཚར་བར་མི་ཤེས་པར་བཤད་པས་ཡིན། དུས་འཁོར་དུ་གསུངས་པ་ནི་དབང་པོ་རབ་ལ་དགོངས་ཏེ་ཐུན་མོང་དུ་སྦྱོར་མི་རུང་། རུང་ན་ཀྱེ་རྡོར་པ་རྣམས་ཀྱང་སྤྲུལ་པའི་དཀྱིལ་འཁོར་དུ་ཅིའི་ཕྱིར་དབང་མི་བསྐུར། ཕྲེང་བ་སོགས་ཀྱང་རུང་ན་ལེགས་ཀྱང་བསྟན་རྒྱུན་ལ་བསམ་པས་ཕྱག་ལེན་ཅུང་ཟད་ཡང་དུ་སོང་བ་འདྲ། གང་ལྟར་ཡང་ས་པཎ་གྱིས་དུས་འཁོར་དང་ཕྲེང་བའི་དབང་མ་བསྐུར་བས་ཁྱབ་པ་མེད། ལར་དུས་འཁོར་འགྲོས་བླ་མེད་སྤྱི་ལ་སྦྱར་མི་རུང་སྟེ། དེ་སྔགས་ཀྱི་སྲོལ་འབྱེད་ཤིང་རྟ་ཆེན་པོ་གཞན་ཡིན་པས་མི་མཐུན་པ་ཆེས་ཆེར་མང་བའི་ཕྱིར། དེ་ལས་རྒྱུད་སྡེ་འོག་མ་ཉིད་སྦྱར་བར་རྒྱུད་བརྟག་གཉིས་ལས། མང་དུ་རབ་ཏུ་བརྗོད་པས་ཅི། །ཇི་ལྟར་དེ་ཉིད་འདུས་པ་ཡི། །དཀྱིལ་འཁོར་ཆོ་ག་དེ་བཞིན་བྱ། །ཞེས་དང་། སློབ་དཔོན་ཀང་ཀ་ནས། སློབ་མ་དབང་བསྐུར་ཆོ་ག་ནི། །གང་ནས་གཅིག་གིས་རྫོགས་པ་མིན། །དེ་ཕྱིར་མཁས་པས་ཆོ་ག་ནི། །རྒྱུད་ཀུན་ལས་ནི་བསྡུ་བར་བྱ། །ཞེས་གསུངས་ཀྱི། དུས་འཁོར་གྱིས་རྒྱས་བཀབ་པ་རྒྱུད་དང་གྲུབ་པའི་སློབ་དཔོན་རྣམས་ཀྱིས་མ་བཤད་པའི་ཕྱིར་བོད་ཀྱི་མཁས་པ་རྣམས་ཀྱང་དེ་རྗེས་སུ་འབྲང་བའོ། །ཤུ་བྷཾ།། །། ༈ གསང་བདེའི་སྔགས་བཏུ་སྔར་རྒྱུད་བཤད་ཀྱི་ཁོང་དུ་འབྱུང་བས་ཟུར་དུ་མེད། བདེ་མཆོག་གི་སྔགས་བཏུའི་བརྒྱུད་པ་ལ་དཔྱད་གཞི་ཡོད་གསུངས། དགེ་ལྡན་པའི་མི་འཁྲུགས་བཅུ་གསུམ་མ་བུ་ལུགས་དེ་ཀ་ལ་བྱ་རྒྱུད་ཀྱི་ཆིངས་སྦྱར་བར་བཞེད། གསེར་ཆོས་བཅུ་གསུམ་ཤར་རྩེ་པུ་ཌཱི་གུ་ཎའོ། ། ༈ བླ་ཚེ་ཡར་བ་དགུག་པ་དང་། འབྱུང་བཞིའི་བཅུད་བསྡུ་བ་ལ། འཇིག་རྟེན་དང་འཇིག་རྟེན་ལས་འདས་པའི་བཅུད་བསྡུ་བ་སྟེ་གསུམ་ཙམ་གྱིས་རུང་། རྫོགས་རིམ་ལ་རྦ་རླབས་ལ་བརྟེན་ནས་ཚེ་བསྲིང་བ་ལ། རྩ་འཁོར་ལོ་བཞི་གསལ་བཏབ་པས་རྩ། བུམ་ཅན་བསྒོམས་པ་རླུང་། ཐིག་ལེ་སྙོམས་འཇུག་བསྒོམས་པས་ཐིག་ལེ་སྣེ་གསུམ་ཀར་འབྲེལ་བ་འདི་གཙོ་བོར་བྱ། རྗེས་སྙིང་གར་ཚེའི་ཕུར་པ་གདབ་པ་སོགས་ངེས་པར་དགོས་གསུངས། ། ༈ མངོན་བྱང་ལ་སྦྱིན་སྲེག་ཡོད། བློས་བསླང་ཆ་ཚད་གངས་དཀར་བ་ཕྲིན་ལས་རྣམ་རྒྱལ་གྱི་ཡོད། ། ༈ དམར་ཁྲིད་ཚེམ་བུ་ལུགས་ཀྱི་ཡིག་ཆ་ཕལ་ཆེར་ལས་འབྱུང་། སྨར་ཁྲིད་ཅེས་ཇོ་ལུགས་ཕལ་ཆེར་ལས་འབྱུང་། སོ་སོར་གོ་བ་རེ་ཡོད་པས་མི་འགལ་གསུངས། ། ༈

གསང་འདུས་རིམ་ལྔའི་ཁྲིད་ཀྱི་སྐབས་སུ། ཐོག་མར་འཕགས་བོད་ཡན་ཆིག་བརྒྱུད་ཅེས་པའི་སྐབས། བུ་སྟོན་རིན་པོ་ཆེས་འཕགས་བོད་ལ་གསན་པའི་ལོ་རྒྱུས་གསུངས། རིན་ཆེན་རྒྱལ་པོས་གསན་ཡུལ་དེས་ལུང་ཁྲིད་མཛད། སྐྱབས་ཡུལ་ནམ་མཁར་སྤྲིན་འཁྲིགས་པ་ལྟར་སེང་ཁྲི་པད་ཟླ་སོགས་ཀྱི་གདན་རྫོགས་སྟེང་བཞུགས་པར་བསྒོམས། མཇུག་ཏུ་སྐྱབས་གསོལ་བསྡུ་བསྟིམ་སོགས་སྤྱི་ལྟར་སྦྱར་ཡང་འགལ་བ་རང་མེད། སེམས་བསྐྱེད་ཀྱི་ཚིག་ཚང་མ་བརྗོད་ཀྱང་རུང་། མ་བདེ་ན། དང་པོ་བརྗོད། འོག་མ་རྣམས་བསམས་ཀྱང་རུང་གསུངས། གཙོ་རྐྱང་གི་མངོན་རྟོགས་སྐད་ཅིག་དྲན་རྫོགས་སུ་བསྐྱེད་པ་དང་། ཆོ་ག་གསུམ་དང་ཡན་ལག་བཞི་རྫོགས་སུ་བྱས་ཀྱང་རུང་། བཟླས་པའང་བྱ་རུང་། བཟླ་བྱ་བཛྲ་དྷྲིཀྲ་ཡིན་གསུངས། བླ་མ་བརྒྱུད་པའི་སྐབས་མངོན་རྟོགས་ལམ་ཙམ་གསུངས། མར་པ་དཀར་ཆག་རང་གི་ཡིན་གསུངས། མཎྜལ་བདག་གཞན་ལུས་ངག་ཡིད་གསུམ་སོགས་ལོ་རྒྱུས་གསུངས། ཇོ་འཚོ་བ་འཕགས་བོད་དེ། ས་ཆའི་མིང་། རྡོར་སེམས་སྒོམ་བཟླས་བུ་སྟོན་རིན་པོ་ཆེའི་ཁྲིད་ཡིག་ལྟར་ལམ་རིམ་ལྔ་ཞེས་འབྲས་བུ་ཟུང་འཇུག་མ་གཏོགས་པ་ཡིན། ལུས་དབེན་སྐབས་གཟུགས་ཀྱི་དགེ་ལྡན་པས་དགག་པ་མཛད། ལུས་དབེན་སོགས་སོ་སོའི་ལམ་རྫོགས་པའི་དབང་དུ་བྱས་པས་འགལ་བ་མེད། བསྒོམ་བྱ་དམིགས་བསལ་མེད་ཀྱང་དེ་དེར་ཤེས་ཤིང་བལྟ་བ་དེ་ཀ་བསྒོམ་པ་ཡིན། དཔེར་ན་བོང་ང་མཐོང་ནས་དུག་ཏུ་ཤེས་པ་དང་འདྲ། དེའང་སྨན་པ་མཁས་པས་སྨན་གྱི་ནགས་ཚལ་དུ་ཕྱིན་པ་ལྟར་ཅིར་སྣང་སྣང་ཙམ་ནས་ལྟར་ཤེས་པ་ཞིག་དགོས་ཀྱི། ཞལ་ཕྱག་སོགས་ཆེད་དུ་གསལ་བཏབ་ན་བསྐྱེད་རིམ་དུ་འགྲོ་མོད། མཁྱེན་བརྩེའི་ཁྲིད་དུ་དེ་ལྟར་བཤད་པ་བསྐྱེད་རིམ་མཐར་མ་ཕྱིན་པའི་ལས་དང་པོ་པར་དགོངས། མཐིང་ཤུན་ནི་མཐིང་གི་བར་ཤུན་ཡིན། རྡོར་བཟླས་སྐབས། ནང་དུ་འཇུག་པ་ཨོཾ་ཞེས་པའི་སྒྲ་ལྷང་ངེ་བར་དམིགས་ཀྱི། ཁ་དོག་དང་དབྱིབས་སོགས་སུ་བསྒོམ་ན་བསྐྱེད་རིམ་གྱི་རྡོར་བཟླས་སུ་འགྱུར་ཞེས་གསུངས། འདི་ཕ་རྒྱུད་ཀྱི་ལུགས་ཡིན། འཇམ་དཔལ་ཞལ་ལུང་དང་གྲོལ་ཐིག་ཏུ་ཡོད་གསུངས། ཧ་འདོན་འདི་ལ་བྱེ་བྲག་པའི་མན་ངག་མང་པོ་ཡོད་ཚུལ་གསུངས། རྟ་རྔ་བརྒྱར་གཤག་ཅེས་ཕྱེད་མར་རྒྱལ་བ་ཡིན་གསུངས། རྒྱུན་གྱི་ཉམས་ལེན་ལ། སྐྱབས་སེམས་རྗེས། རང་ཆོ་ག་གསུམ་མམ་སྐད་ཅིག་དྲན་རྫོགས་གཉིས་གསང་འདུས་སུ་བྱེད། སྤྲོ་ན་བཟླས་བ་བྱས། ཐུགས་ཀའི་འོད་ཀྱིས་སྣོད་བཅུད་སྦྱང་། བླ་མའི་རྣལ་འབྱོར་ནོར་བུ་ལུགས་བསྒོམས། དེ་ནས་ལུས་དབེན་བསྒོམ། ཉམས་ལེན་གྱི་མཐིལ་རྡོར་བཟླས་བྱ། དེ་ནས་སྒྱུ་ལུས་སོགས་ཤར་སྒོམ་གྱི་རྗེས་བསྔོ་སྨོན་བྱ། ལུས་དབེན་ནི་ལྷ་དེ་དང་དེའི་ངོ་བོར་ཤེས། སྒྱུ་ལུས་ནི་ལྷ་སྐུ་སྣང་སྟོང་སྒྱུ་མར་བསྒོམས་ཏེ་ཁྱད་ཡོད་གསུངས། ། ༈

[edit]

yang kun mkhyen bsod nams seng ge'i dris lan las khol btus sogs/ kun mkhyen bsod nams seng ge'i dris lan las khol btus bzhugs so/__/bla ma la phyag 'tshal lo/__/rang rgyal gyi grub mtha' dbu ma par sdud par rje btsun rtse mos gsungs/__de ltar na bla med kyi bskyed chog dang sbyar dgos par 'gyur ram snyam na/__de'i don/__spyir sangs rgyas pa'i grub mtha' la brjod du med pa'i gang zag gi bdag khas len pa sogs bzhi la rim bzhin sbyar ba las/__grub mtha' bzhi po de las gang bshad pa'i rnam gzhag thams cad dang sbyar ba ma yin te/__dper na mdzod las gsungs pa'i kha che bye brag tu smra ba'i rnam gzhag thams cad spyod rgyud dang ji ltar 'grig___/_! dpung skud gtso bor khams dkar dmar gyi bar chad srung byed du bshad/___/__!_ gsung ngag gi pho brang lnga'am drug ces pa'i lnga ni rigs drug la spyi khyab tu gtong ba'am/__drug ni so sor bye ba'i khyad dang /__de'i tshe spyi bo'i pho brang rnam snang dang /__spyi gtsug gi pho brang rdor sems su gsungs so/___/__!_ bde mchog la/__rgyud rgyas pa sh+loka sum 'bum/__'bring sh+loka nyis 'bum/__bsdus pa chig 'bum dang gsum yod pa las phyi ma dang /__rgyud rgyas pa 'bum phrag gsum pa dang /__bsdus pa da lta'i bde mchog nyung ngu yin zhes pa gnyis las rang lugs phyi ma 'dod/___/__!_ kye rdor gtso che'i chos sna so dgu'i grangs/__mus chen pas/__/'grel ba ku mu ti/__dkyil chog bzang po yongs bzung /__sgrub thabs yan lag drug pa/__bdag med ma'i sgrub thabs/__rdo rje gur gyi sgrub thabs/__gtum mo'i 'grel chung /__sbyin sreg__/phyag mtshan gyi dag pa/__gtor ma/__sngags don gcig__/yang sngags don gcig__/bdud rtsi 'od/__lhan cig skyes grub/__lam gyi yan lag la de nyid bcu pa/__tshogs kyi 'khor lo/__dran pa gcig pa/__dpa' mo gcig pa/__yang dpa' mo gcig pa/__rin chen 'bar ba/__man ngag gi ro sreg ste/__de rnams Dom+b+hi'i skor 'grel pa pad+ma can/__dkyil chog nas gling ma/__sgrub thabs mtsho skyes/__tshogs 'khor dam tshig lnga pa/__bstod pa/__de rnams pad+ma'i skor/__'grel pa rnal 'byor rin po che sbyor ba'i phreng ba/__dkyil 'khor gyi cho ga gzhung 'grel/__sgrub thabs de nyid gsal ba/__phyag bcu drug pa dpa' gcig__/phyag gnyis pa dpa' gcig__/lam gyi yan lag rab tu gnas tshul zab mo/__sbyin sreg__/ro sreg__/tshogs 'khor/__bstod pa/__bdag med ma'i sgrub thabs che chung gnyis/__rdzogs rim gyi gzhung /__de rnams nag chung gis 'gos lugs pa la brgyud pa'o/__/zhes pa rnams la so brgyad dang /__gcig ma tshang ba Dom+b+hi'i tshogs kyi 'khor lo'i bslab bya bsgrags pa zhes zur na yod pa de yin nam snyam/__yang kho bo'i rtog par/__kye rdor rnam bshad kyi dgongs pa 'grel ba lugs kyi chos skor mi thub zla ba yan chad kyi gzhung 14/__dma' bo rdo rje'i rin chen 'bar ba bstan bcos kyi ngos nas gcig yin kyang le'u re re'i brjod bya'i ngos nas gzhung gzhan rnams dang don mnyam du yod pas dgur bgrang 'dug pa23/__mtsho skyes lugs la bdun/__nag po lugs la bcu gnyis te zhe gnyis yod pa las/__Dom+b+hi'i lhan cig skyes grub/__mtsho skyes lugs kyi sgrub thabs dang /__mtsho skyes dang /__mar me'i rtse mo lta bu'i rdzogs rim ste gsum mo/__/lam skor dgu ni khyad par ro/__/zhes pa'i khongs su gtogs pas lhag ma so dgu yin nam snyam/___/__!_ ljon shing du kun btus mdo sde'i mtshan gzhir 'jog pa/__der bshad pa'i phung khams kyi rnam gzhag phal cher dang /__phyi don/__lam lnga/__sa bcu/__sku gsum sogs phal cher mdo sde pa'i lugs yin ces pa'i don yin gyi/__der bshad tshad mdo sde pa'i grub mthar zhal gyis mi bzhes te/__theg pa thun mong gi sdom zhes pa de tshad mar mdzad 'dug pa'i phyir/__des na kun gzhi dang nyon yid rang lugs la khas len pa'i mdo sde pa yod mi dgos so/___/__!_ spyi rnam du shes bya mkhyen tshul la/__shes bya'i snang ba dang /__sangs rgyas kyi ye shes dang /__gnas lugs stong pa gsum dbyer med mngon du gyur pa ni rang snang gi ye shes te sa bcu gsum pa kho na dang /__de mngon du ma gyur pa'i gzhan snang gi mkhyen tshul te/__'di rtse mos/__sangs rgyas chung ngu nyan thos/__'bring rang rgyal/__chen po phar phyin gyi sa bcu gcig pa'am bcu gnyis par bshad/___/__!_ pho brang lnga'i lha rnams rnal 'byor pa'i lus la dang po nas grub pa rdul tshon sogs kyis ma bcos par bu tsha'i lus gdod nas grub pa tsam nyid nas lha'i ngo bor gyur pa'i rtsa khams grub pa la dgongs so/___/_! byang sems la srol gnyis/__dang po dbu ma lugs nam snying mdo dang /__rtse mo las rtsa ltung bcu bzhi gsungs shing /__de nyid rten gyi sgo nas bco brgyad dang /__mtshams med lnga so sor phye na nyer gnyis su 'gyur/__sdom pa nyi shu par rtsa ltung bzhi gsungs/__spyir rtsa ltung dang gtong rgyu tha dad de/__bslab pa phul pa sogs gtong rgyu yin yang rtsa ltung ma yin pa'i phyir/___/__!_ rnal 'byor rgyud la/__sdom gsum du de nas rang nyid tha mal 'gyur zhes bshad pa ni/__ye shes pa gshegs nas dam tshig pa rkyang pa tha mal pa'i ming gis btags pa tsam ste/__gzhan du spyod rgyud yan chad la mi rung ba'i phyir ro/___/__!_ phar phyin theg par bshad pa'i sa bcu gcig dang /__rdo rje theg pa'i sa bcu gsum gnyis don gcig par bla ma bzhed/__'on kyang de phar phyin rang lam gyis thob par 'dod kyang /__bla med lugs la thob par mi 'dod/__rgya gar du nA ro pas don dam pa dang 11/__birU pa sogs don la 13'dod pa'i lugs gnyis yod/___/__!_ ljon shing las log rtog dgag pa'i skabs/__phyogs snga'i gtso bo ni/__rngog gzhung pa yin la/__gzhan phyag rgya ba rab tu mang po dag go__/dbang bskur ngan pa'i lugs ni/__byin rlabs smin byed du 'dod pa dang /__g.yung drung ris dang /__nas 'dra ris kyi dkyil 'khor du dbang bskur bar 'dod pa dang /__cho ga med bzhin bla ma'i lus las dbang bzhi len par 'dod pa rnams so/__/yang dag dbang bskur ma yin pa'i lugs ni/__mos pa chos sgor 'dod pa dang /__dbang bskur mu bzhir 'dod pa rnams kyang yin mod/__'dir ni go rim la log rtog 'dod pa zhig dgos te/__rlung la dbang ma thob bzhin du grol lam la brten pa dbang bskur ma yin pas/__dngos dbang bskur dgos zhes smra ba zhig la 'jog par snang ste/__dbang po gnyis sbyor sogs so//___//__!_ spyi rnam du grub mtha' bzhi dang bstun pa'i bskyed chog gsungs pa yongs grags ltar ma yin te/__de yang rim par so so'i mtshan gzhi/__nyan thos dman pa gnas ma bu dang /__'bring nyi 'og pa gnyis/__nyan thos mchog kha che ba dang /__mdo sde pa gnyis/__'phags pa rang sangs rgyas/__dbu sems gnyis te bzhi yin la/__mtshan nyid kyang brjod du med pa'i bdag 'dod pa sogs bzhi'o/__/rang rgyal dbu mar bsdu ba ni/__dbu ma'i lta ba khas blangs na grub mtha' gsum char de'i nang du sdud dgos pa'i phyir ro/__/des gzhan la'ang 'gre//___//_! nam mkha' dang 'gog pa gnyis ma gtogs pa'i chos khams kyi phyogs re zhes pa ni/___dge mi dge lung ma bstan gyi de bzhin nyid gsum dang /__mi g.yo ba dang /__'du shes dang /___tshor ba 'gog pa rnams de yin pa'i phyir/__/_! bden gnyis zung 'jug ji lta ba sangs rgyas kyis thugs su chud nas de gzhan la 'doms pa la bslu mi bslu ba las bden gnyis tha snyad tsam du 'jog par mdzad do/___/__!_ mkha' 'gro rgya mtshor/__ji ltar bskal bzang rgyal ba ni/__/bzhi yis dman pa'i stong phrag gcig__/ces so/___/__!_ 'brog mi las se ston kun rig gis man ngag lugs kyi bshad pa gsan te/__de yang 'brog mi'i gzhung dang man ngag gnyis ka mi bshad par dam bcas pa ni Dom+b+hi'i phyogs la dgongs/__de yang 'brog mi yan brgyud pa gnyis dang /__de man brgyud pa bzhi'i bla ma 'byung ba ste/__Dom+b+hi lugs kyi brgyud 'dzin rgyal po dang /__snying po dang /__snang ba'i mtha' can gsum/__man ngag lugs kyi brgyud 'dzin rig gi mtha' can te bzhi'o/__/bzhi ka'ang bshad ka'i dbang du byas pa'o/__/_! de bzhin gshegs pa ni me long lta bu'i ye shes te chos sku/__dgra bcom pa ni mnyam nyid ye shes te longs sku/__yang dag par rdzogs pa'i sangs rgyas ni sor rtog ste longs sku/__sangs rgyas ni bya ba nan tan te sprul sku'o/__/sku gsum po de'i phrin las ni/__rgyud ngan pa las nyon gyi dbang gis 'bras bu khams gsum du song bas na ngan song ste 'khor ba thams cad yongs su sbyong ba/__ji ltar na rgyu ting nge 'dzin gyis las nyon dang /__'bras bu 'od zer gyis sdug bsngal sbyong bas na gzi brjid/__ces bshad/___/__!_ byang chub sems dpa' ni snying rje dang /__sems dpa' chen po ni stong nyid de de gnyis zung du 'jug pa'o/___/__!_ rab dbyer paN chen gyi dogs gnas brgya rtsa brgyad bkod pa kun mkhyen gyi gzigs lam du phebs tshe/__dogs pa zhugs pa'i dri ba bzhi 'dug cing /__dpyod ldan dag gis dpyod dgos rgyu'ang 'ga' zhig snang la/__phal cher ni tshig la 'khris pa tsam du 'dug gsungs pa'i/__dang po ni/__las kun mi dge ba yin na/__/zag bcas dge ba gti mug gi__/kun slong dag las skye de ci/__/zhes gsungs/__de'i lan/__mi dge'i rtsa ba gsum gyi nang tshan du gyur pa'i gti mug gis kun nas bslangs te bskyed pa'i las yin na mi dge ba yin pas khyab pa gzhung gi dngos bstan yin la/__spyir gti mug gis kun nas bslangs pa'i las yin na mi dge ba yin pas ma khyab bo/__/gnyis pa/__nyan thos rnams kyis rdzogs byang du/__/bsngo ba byed na 'phags pa yis/__/nyan thos theg pa de la ni/__/spyod pa yongs bsngo ma bshad de/__/zhes gsungs pa de ci la dgongs/__/thams cad sgrol gyi skyes rabs las/__/bsngo ba bshad de nyan thos kyi/__/bsngo ba yin par bzhed dam ci/__/zhes so/__/lan/__mi dmigs pa'i shes rab khyad par can gyi rtsis zin pa'i bsngo ba sogs ma bshad pas sangs rgyas thob par mi nus par 'chad kyi/__gtan med bar 'chad pa ma yin pas mi 'gal/__gsum pa/__dge slong sdom pa ma thob par/__/mkhan slob byas pas chog pa zhig__/'dus pa'i mdo dang lung dag tu/__/gsal bar bshad pa ma yin nam/__/lan ni/__de lta bu gsungs srid kyang lag tu blangs na rang dang bstan pa kun la gnod pas spang bya'i 'os su che phyir phyag len dogs phyogs nas 'gags bsdams pa lags/__/bzhi pa/__rdul tshon min par smin byed kyi/__/dbang bskur deng sang mi rung na/__/'khor lo sdom pa'i ras bris kyi/__/dkyil 'khor dag tu dbang bskur nas/__/phag mo'i byin rlabs byed de ci/__/zhes pa'o/__/lan/__'di bir lugs gtso che bas/__de la dbang gi mngon rtogs bdun ldan dgos pas de ltar du bshad kyi/__spyir ni ma khyab ste/__gang du dbang bskur ba'i dkyil 'khor brgyad dam drug sogs su'ang ras bris bstan pa'i phyir ro/__/dbang bskur du bzhi pa'i 'dod na sngags sdom sems rjes 'brangs pas gnod pa ni/__spyi tsam du de ltar yin du chug kyang deng sang ni de 'dra'i gdul bya nyung zhing mngon shes can ma gtogs rtogs par dka' bas phyag len dogs phyogs nas 'gags bsdams pas bstan pa'i rgyun mi 'chol ba'i phyir ro/__/nyer lnga grangs nges dgos pa ni/__dbang gong ma gsum gyi dngos gzhi re re nas bskur ba sogs kyis mtshan mo'i nang der ma tshar dogs pa dang /__de ltar ma tshar bar mi shes par bshad pas yin/__dus 'khor du gsungs pa ni dbang po rab la dgongs te thun mong du sbyor mi rung /__rung na kye rdor pa rnams kyang sprul pa'i dkyil 'khor du ci'i phyir dbang mi bskur/__phreng ba sogs kyang rung na legs kyang bstan rgyun la bsam pas phyag len cung zad yang du song ba 'dra/__gang ltar yang sa paN gyis dus 'khor dang phreng ba'i dbang ma bskur bas khyab pa med/__lar dus 'khor 'gros bla med spyi la sbyar mi rung ste/__de sngags kyi srol 'byed shing rta chen po gzhan yin pas mi mthun pa ches cher mang ba'i phyir/__de las rgyud sde 'og ma nyid sbyar bar rgyud brtag gnyis las/__mang du rab tu brjod pas ci/__/ji ltar de nyid 'dus pa yi/__/dkyil 'khor cho ga de bzhin bya/__/zhes dang /__slob dpon kang ka nas/__slob ma dbang bskur cho ga ni/__/gang nas gcig gis rdzogs pa min/__/de phyir mkhas pas cho ga ni/__/rgyud kun las ni bsdu bar bya/__/zhes gsungs kyi/__dus 'khor gyis rgyas bkab pa rgyud dang grub pa'i slob dpon rnams kyis ma bshad pa'i phyir bod kyi mkhas pa rnams kyang de rjes su 'brang ba'o/__/shu b+haM//___//_! gsang bde'i sngags btu sngar rgyud bshad kyi khong du 'byung bas zur du med/__bde mchog gi sngags btu'i brgyud pa la dpyad gzhi yod gsungs/__dge ldan pa'i mi 'khrugs bcu gsum ma bu lugs de ka la bya rgyud kyi chings sbyar bar bzhed/__gser chos bcu gsum shar rtse pu DI gu Na'o/___/__!_ bla tshe yar ba dgug pa dang /__'byung bzhi'i bcud bsdu ba la/__'jig rten dang 'jig rten las 'das pa'i bcud bsdu ba ste gsum tsam gyis rung /__rdzogs rim la rba rlabs la brten nas tshe bsring ba la/__rtsa 'khor lo bzhi gsal btab pas rtsa/__bum can bsgoms pa rlung /__thig le snyoms 'jug bsgoms pas thig le sne gsum kar 'brel ba 'di gtso bor bya/_rjes snying gar tshe'i phur pa gdab pa sogs nges par dgos gsungs/___/__!_ mngon byang la sbyin sreg yod/__blos bslang cha tshad gangs dkar ba phrin las rnam rgyal gyi yod/___/_! dmar khrid tshem bu lugs kyi yig cha phal cher las 'byung /__smar khrid ces jo lugs phal cher las 'byung /__so sor go ba re yod pas mi 'gal gsungs/___/__!_ gsang 'dus rim lnga'i khrid kyi skabs su/__thog mar 'phags bod yan chig brgyud ces pa'i skabs/__bu ston rin po ches 'phags bod la gsan pa'i lo rgyus gsungs/__rin chen rgyal pos gsan yul des lung khrid mdzad/__skyabs yul nam mkhar sprin 'khrigs pa ltar seng khri pad zla sogs kyi gdan rdzogs steng bzhugs par bsgoms/__mjug tu skyabs gsol bsdu bstim sogs spyi ltar sbyar yang 'gal ba rang med/__sems bskyed kyi tshig tshang ma brjod kyang rung /__ma bde na/__dang po brjod/__'og ma rnams bsams kyang rung gsungs/__gtso rkyang gi mngon rtogs skad cig dran rdzogs su bskyed pa dang /__cho ga gsum dang yan lag bzhi rdzogs su byas kyang rung /__bzlas pa'ang bya rung /__bzla bya badz+ra d+h+rikra yin gsungs/__bla ma brgyud pa'i skabs mngon rtogs lam tsam gsungs/__mar pa dkar chag rang gi yin gsungs/__maN+Dal bdag gzhan lus ngag yid gsum sogs lo rgyus gsungs/__jo 'tsho ba 'phags bod de/__sa cha'i ming /__rdor sems sgom bzlas bu ston rin po che'i khrid yig ltar lam rim lnga zhes 'bras bu zung 'jug ma gtogs pa yin/__lus dben skabs gzugs kyi dge ldan pas dgag pa mdzad/__lus dben sogs so so'i lam rdzogs pa'i dbang du byas pas 'gal ba med/__bsgom bya dmigs bsal med kyang de der shes shing blta ba de ka bsgom pa yin/__dper na bong nga mthong nas dug tu shes pa dang 'dra/__de'ang sman pa mkhas pas sman gyi nags tshal du phyin pa ltar cir snang snang tsam nas ltar shes pa zhig dgos kyi/__zhal phyag sogs ched du gsal btab na bskyed rim du 'gro mod/__mkhyen brtse'i khrid du de ltar bshad pa bskyed rim mthar ma phyin pa'i las dang po par dgongs/__mthing shun ni mthing gi bar shun yin/__rdor bzlas skabs/__nang du 'jug pa oM zhes pa'i sgra lhang nge bar dmigs kyi/__kha dog dang dbyibs sogs su bsgom na bskyed rim gyi rdor bzlas su 'gyur zhes gsungs/__'di pha rgyud kyi lugs yin/__'jam dpal zhal lung dang grol thig tu yod gsungs/__ha 'don 'di la bye brag pa'i man ngag mang po yod tshul gsungs/__rta rnga brgyar gshag ces phyed mar rgyal ba yin gsungs/__rgyun gyi nyams len la/__skyabs sems rjes/__rang cho ga gsum mam skad cig dran rdzogs gnyis gsang 'dus su byed/__spro na bzlas ba byas/__thugs ka'i 'od kyis snod bcud sbyang /__bla ma'i rnal 'byor nor bu lugs bsgoms/__de nas lus dben bsgom/__nyams len gyi mthil rdor bzlas bya/__de nas sgyu lus sogs shar sgom gyi rjes bsngo smon bya/__lus dben ni lha de dang de'i ngo bor shes/__sgyu lus ni lha sku snang stong sgyu mar bsgoms te khyad yod gsungs/__/_!