བུ་སྟོན་རིན་ཆེན་གྲུབ་ལ་བསྔགས་པ་མཆོག་ཏུ་དད་པའི་བདུད་རྩིའི་དབྱངས་སྙན།

🚧 This website is under continued development. We appreciate your patience!

Previous Text Back to Volume PageNext Text

Wylie title	bu ston rin chen grub la bsngags pa mchog tu dad pa'i bdud rtsi'i dbyangs snyan
Location	mkhyen brtse'i bka' 'bum Volume 1, sde tshan 2, Text 43, Pages 182-184 (Folios 62b3 to 63b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	བུ་སྟོན་རིན་ཆེན་གྲུབ་ (bu ston rin chen grub)
Citation	'jam dbyangs mkhyen brtse'i dbang po. bu ston rin chen grub la bsngags pa mchog tu dad pa'i bdud rtsi'i dbyangs snyan. In 'jam dbyangs mkhyen brtse'i dbang po'i bka' 'bum, Vol. 1: 182-184. Khams sde dge rdzong sar dgon: Rdzong sar blo gros phun tshogs, 2020.
Genre	Verses of Praise - bstod pa
Colophon	།ཅེས་རྩོད་པའི་དུས་ཀྱི་ཐམས་ཅད་མཁྱེན་པ་བུ་སྟོན་ལོ་ཙཱ་བ་ཆེན་པོ་རིན་ཆེན་གྲུབ་ལ་བསྔགས་པའི་ཚིག་རྒྱན་བདུད་རྩིའི་དབྱངས་སྙན་མངོན་པར་སྒྲོག་པའང་། རྗེ་དེ་ཉིད་ཀྱི་རྣམ་ཐར་ལ་ཤེས་ནས་དད་པ་ཐོབ་པ་བྱ་བྲལ་བ་མཁྱེན་བརྩེའི་མིང་གིས་དཔལ་ཞྭ་ལུ་རི་ཕུག་བྱང་ཆུབ་ཤིང་གི་ནགས་ཁྲོད་དུ་གསོལ་བ་བཏབ་པ་སརྦ་དྭ་ཀ་ལྱཱ་ཎཾ་བྷ་བ་ཏུ།།
	ces rtsod pa'i dus kyi thams cad mkhyen pa bu ston lo tsA ba chen po rin chen grub la bsngags pa'i tshig rgyan bdud rtsi'i dbyangs snyan mngon par sgrog pa'ang /__rje de nyid kyi rnam thar la shes nas dad pa thob pa bya bral ba mkhyen brtse'i ming gis dpal zhwa lu ri phug byang chub shing gi nags khrod du gsol ba btab pa sarba dwa ka l+yA NaM b+ha ba tu

1 Texts in this Section (sde tshan or chos tshan)

43 182-184	བུ་སྟོན་རིན་ཆེན་གྲུབ་ལ་བསྔགས་པ་མཆོག་ཏུ་དད་པའི་བདུད་རྩིའི་དབྱངས་སྙན། bu ston rin chen grub la bsngags pa mchog tu dad pa'i bdud rtsi'i dbyangs snyan Verses of Praise - bstod pa	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །རྩོད་པའི་དུས་ཀྱི་ཐམས་ཅད་མཁྱེན་པ་བུ་སྟོན་རིན་ཆེན་གྲུབ་ལ་བསྔགས་པ་མཆོག་ཏུ་དད་པའི་བདུད་རྩིའི་དབྱངས་སྙན་ཞེས་བྱ་བ་བཞུགས་སོ། །ན་མཿསརྦ་ཛྙཱ་རཏྣ་སིདྡྷཱ་ཡ། ཐམས་ཅད་མཁྱེད་པའི་ཆོས་ཀྱི་རྒྱལ་ཐབས་ལ། དབང་མཛད་ཡོན་ཏན་རིན་ཆེན་རྣམ་བདུན་གྱིས། །རབ་མཛེས་གྲུབ་པའི་འཁོར་ལོས་སྒྱུར་བ་ཁྱོད། །བསྔགས་པའི་ཡི་གེ་སྟོབས་བཅུ་མངའ་བས་བྱིན། ༡ །སྣ་ཚོགས་ལས་པའི་ཁེངས་པ་སྙིལ་བྱེད་པ། །སྒོ་གསུམ་འདོད་རྒུར་བསྒྱུར་བ་བཟོ་རིག་གི །ཉམས་ལྡན་ནོར་བུའི་དོ་ཤལ་གཅིག་ཁོ་ནས། །ལྷར་བཅས་ཡི་ག་དབང་མེད་འཕྲོག་པར་བྱེད། ༢ །འཚོ་ཐབས་བདུད་རྩིས་གཏམས་པའི་རྣམ་དཔྱོད་ཟླ། །གང་དུ་སྣང་བས་སྡེ་བཞིའི་ཆུ་གཏེར་དང་། །གྲགས་པའི་རྦ་རླབས་ལྷན་ཅིག་དགོད་པ་ཡིས། །དཔལ་ལྡན་དཔའ་བོའི་སྙན་པ་ཅི་ཡང་བཟུང་། ༣ །སྒྲ་རིག་རྒྱ་མཚོའི་འཇུག་པ་དུས་གཅིག་ཏུ། །འཐུང་བཟོད་བུམ་པ་སྐྱེས་ཀྱི་ངང་ཚུལ་ཅན། །ཁྱོད་མཐོང་སརྦ་ཛྙཱ་ཞེས་སྙེམས་འཆང་བ། །འཆི་མེད་དགའ་བའི་ཚལ་དུ་རིངས་པར་ཞུགས། ༤། གཞལ་བྱ་མངོན་ལྐོག་ཤིན་ཏུ་ལྐོག་གྱུར་པ། །འཇལ་བྱེད་ཚད་མ་གསུམ་གྱིས་གཞལ་བའི་མོད། །ཕྱོགས་ལས་རྣམ་པར་རྒྱལ་བའི་དགེ་མཚན་ཅན། །ཆོས་ཀྱི་གྲགས་པ་སླར་ཡང་ས་འདིར་སྣང་། ༥ །ཁྱད་པར་སྡེ་སྣོད་གསུམ་གྱི་ངེས་གསང་ཀུན། །ཇི་བཞིན་འཆད་དང་སྒྲུབ་ལ་མཚུངས་མེད་པས། །རྩོད་དུས་ཀུན་མཁྱེན་གཉིས་པ་འདིའོ་ཞེས། །འཇིག་རྟེན་དགེ་ལེགས་འགུགས་པའི་ངོ་མཚར་དར། ༦ །མཆོག་ཏུ་རྒྱུད་སྡེ་རྣམ་བཞིའི་ནོར་བུའི་ཆར། །གངས་ཅན་རི་བོའི་ལྗོངས་སུ་འབེབས་མཁས་པས། །གྲུབ་གཉིས་རྫོགས་ལྡན་འབྱོར་པའི་དགའ་སྟོན་མཁན། །གསང་བདག་ངུར་སྨྲིག་གར་རོལ་ཁྱོད་ཁོ་ན། ༧ །དེ་སླད་གཞུང་མང་འཆད་པའི་གྲྭར་ཞུགས་ཚེ། །ས་བཅུའི་དབང་ཕྱུག་འཕགས་མཆོག་མ་ཕམ་པ། །དགའ་ལྡན་ཆོས་ཀྱི་འདུན་ས་བཏང་ནས་སླར། །བསིལ་ལྗོངས་བསོད་ནམས་མགྲོན་དུ་སྣང་བ་བཞིན། ༨ །རྩོད་ངག་སེང་གེའི་སྒྲ་ཆེན་བསྒྲགས་པའི་མོད། །ཕས་རྒོལ་ལག་ལྡན་མྱོས་པའི་ཚོགས་རྣམས་ཀུན། །འདར་བཅས་ཐོར་ཚུགས་འཛིན་མར་བསྙིལ་བ་དང་། །མི་སྨྲ་བརྟུལ་ཞུགས་བཟུང་བའི་དམ་བཅའ་སྦྱིན། ༩ །འཇམ་མགོན་སྨྲ་བའི་ཉི་མའི་ཡེ་ཤེས་སྐུ། །རྟག་ཏུ་མགྲིན་པའི་པདྨོར་ངལ་གསོས་པས། །སྡེབ་ལེགས་རྩོམ་པའི་ཟིལ་དངར་ད་དུང་ཡང་། །བློ་ལྡན་བུང་བའི་ཉེར་འཚོར་ཤིན་ཏུ་མཐོ། ༡༠ །གསང་ཆེན་སྨིན་གྲོལ་ལམ་གྱི་ཐེམ་སྐས་ལ། །འཛེགས་ཏེ་ཟུང་འཇུག་གྲུབ་པའི་མཚན་སྙན་གྱིས། །ཡིད་སྲུབས་དཔུང་བཅས་མུན་པར་བཀོད་ནས་སླར། །ས་གསུམ་བཀྲ་ཤིས་སྣང་བས་མཛེས་པར་བྱས། ༡༡ །མདོར་ན་འཁོར་ལོ་གསུམ་གྱི་མཛད་བཟང་ལས། །བརྩམས་ཏེ་མཚོ་བྱུང་དགྱེས་པའི་ཏམྦུ་རས། །བསྐལ་པར་བརྗོད་ཀྱང་ཕ་མཐས་གཏུགས་མིན་པའི། །རྣམ་ཐར་ཐམས་ཅད་གཟིགས་པའི་སྤྱོད་ཡུལ་ཉིད། ༡༢ །དེ་སླད་མི་ཕྱེད་དད་གསུམ་དཔྱིད་ཀ་ཡིས། །བཟུང་བའི་རྣམ་དཔྱོད་གཞན་གསོས་གཞོན་ནུའི་མགྲིན། །བསྔགས་བརྗོད་བདུད་རྩིའི་དབྱངས་ཀྱིས་དགེ་བྱས་པས། །ཕན་བདེའི་དགའ་ཚལ་མཆོག་ཏུ་རྒྱས་གྱུར་ཅིག ༡༣ །ཅེས་རྩོད་པའི་དུས་ཀྱི་ཐམས་ཅད་མཁྱེན་པ་བུ་སྟོན་ལོ་ཙཱ་བ་ཆེན་པོ་རིན་ཆེན་གྲུབ་ལ་བསྔགས་པའི་ཚིག་རྒྱན་བདུད་རྩིའི་དབྱངས་སྙན་མངོན་པར་སྒྲོག་པའང་། རྗེ་དེ་ཉིད་ཀྱི་རྣམ་ཐར་ལ་ཤེས་ནས་དད་པ་ཐོབ་པ་བྱ་བྲལ་བ་མཁྱེན་བརྩེའི་མིང་གིས་དཔལ་ཞྭ་ལུ་རི་ཕུག་བྱང་ཆུབ་ཤིང་གི་ནགས་ཁྲོད་དུ་གསོལ་བ་བཏབ་པ་སརྦ་དྭ་ཀ་ལྱཱ་ཎཾ་བྷ་བ་ཏུ།། ༈ ། །

[edit]

bu ston rin chen grub la bsngags pa mchog tu dad pa'i bdud rtsi'i dbyangs snyan/ @#/__/rtsod pa'i dus kyi thams cad mkhyen pa bu ston rin chen grub la bsngags pa mchog tu dad pa'i bdud rtsi'i dbyangs snyan zhes bya ba bzhugs so/__/na maHsarba dz+nyA rat+na sid+d+hA ya/__thams cad mkhyed pa'i chos kyi rgyal thabs la/__dbang mdzad yon tan rin chen rnam bdun gyis/__/rab mdzes grub pa'i 'khor los sgyur ba khyod/__/bsngags pa'i yi ge stobs bcu mnga' bas byin/__1__/sna tshogs las pa'i khengs pa snyil byed pa/__/sgo gsum 'dod rgur bsgyur ba bzo rig gi__/nyams ldan nor bu'i do shal gcig kho nas/__/lhar bcas yi ga dbang med 'phrog par byed/__2__/'tsho thabs bdud rtsis gtams pa'i rnam dpyod zla/__/gang du snang bas sde bzhi'i chu gter dang /__/grags pa'i rba rlabs lhan cig dgod pa yis/__/dpal ldan dpa' bo'i snyan pa ci yang bzung /__3_/sgra rig rgya mtsho'i 'jug pa dus gcig tu/__/'thung bzod bum pa skyes kyi ngang tshul can/__/khyod mthong sarba dz+nyA zhes snyems 'chang ba/__/'chi med dga' ba'i tshal du rings par zhugs/__4/_gzhal bya mngon lkog shin tu lkog gyur pa/__/'jal byed tshad ma gsum gyis gzhal ba'i mod/__/phyogs las rnam par rgyal ba'i dge mtshan can/__/chos kyi grags pa slar yang sa 'dir snang /__5__/khyad par sde snod gsum gyi nges gsang kun/__/ji bzhin 'chad dang sgrub la mtshungs med pas/__/rtsod dus kun mkhyen gnyis pa 'di'o zhes/__/'jig rten dge legs 'gugs pa'i ngo mtshar dar/__6__/mchog tu rgyud sde rnam bzhi'i nor bu'i char/__/gangs can ri bo'i ljongs su 'bebs mkhas pas/__/grub gnyis rdzogs ldan 'byor pa'i dga' ston mkhan/__/gsang bdag ngur smrig gar rol khyod kho na/__7__/de slad gzhung mang 'chad pa'i grwar zhugs tshe/__/sa bcu'i dbang phyug 'phags mchog ma pham pa/__/dga' ldan chos kyi 'dun sa btang nas slar/__/bsil ljongs bsod nams mgron du snang ba bzhin/__8__/rtsod ngag seng ge'i sgra chen bsgrags pa'i mod/__/phas rgol lag ldan myos pa'i tshogs rnams kun/__/'dar bcas thor tshugs 'dzin mar bsnyil ba dang /__/mi smra brtul zhugs bzung ba'i dam bca' sbyin/__9__/'jam mgon smra ba'i nyi ma'i ye shes sku/__/rtag tu mgrin pa'i pad+mor ngal gsos pas/__/sdeb legs rtsom pa'i zil dngar da dung yang /__/blo ldan bung ba'i nyer 'tshor shin tu mtho/__10__/gsang chen smin grol lam gyi them skas la/__/'dzegs te zung 'jug grub pa'i mtshan snyan gyis/__/yid srubs dpung bcas mun par bkod nas slar/__/sa gsum bkra shis snang bas mdzes par byas/__11__/mdor na 'khor lo gsum gyi mdzad bzang las/__/brtsams te mtsho byung dgyes pa'i tam+bu ras/__/bskal par brjod kyang pha mthas gtugs min pa'i/__/rnam thar thams cad gzigs pa'i spyod yul nyid/__12__/de slad mi phyed dad gsum dpyid ka yis/__/bzung ba'i rnam dpyod gzhan gsos gzhon nu'i mgrin/__/bsngags brjod bdud rtsi'i dbyangs kyis dge byas pas/__/phan bde'i dga' tshal mchog tu rgyas gyur cig__13__/ces rtsod pa'i dus kyi thams cad mkhyen pa bu ston lo tsA ba chen po rin chen grub la bsngags pa'i tshig rgyan bdud rtsi'i dbyangs snyan mngon par sgrog pa'ang /__rje de nyid kyi rnam thar la shes nas dad pa thob pa bya bral ba mkhyen brtse'i ming gis dpal zhwa lu ri phug byang chub shing gi nags khrod du gsol ba btab pa sarba dwa ka l+yA NaM b+ha ba tu//__!_/_/