JKW-KABUM-01-KA-002-024

Previous Text Back to Volume PageNext Text

ཨོ་རྒྱན་སངས་རྒྱས་གཉིས་པ་ལ་བསྟོད་པ་དད་གསུམ་ཆུ་སྐྱེས་འཛུམ་ཕྲེང་།

Wylie title	o rgyan sangs rgyas gnyis pa la bstod pa dad gsum chu skyes 'dzum phreng
Location	mkhyen brtse'i bka' 'bum Volume 1, sde tshan 2, Text 24, Pages 129-131 (Folios 36a2 to 37a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	པདྨ་འབྱུང་གནས་ (pad+ma 'byung gnas)
Citation	'jam dbyangs mkhyen brtse'i dbang po. o rgyan sangs rgyas gnyis pa la bstod pa dad gsum chu skyes 'dzum phreng. In 'jam dbyangs mkhyen brtse'i dbang po'i bka' 'bum, Vol. 1: 129-131. Khams sde dge rdzong sar dgon: Rdzong sar blo gros phun tshogs, 2020.
Genre	Verses of Praise - bstod pa
Colophon	ཅེས་དུས་གསུམ་ཀུན་མཁྱེན་སངས་རྒྱས་གཉིས་པ་པདྨཱ་ཀར་ལ་གསོལ་བ་འདེབས་པའི་ཚུལ་ཉུང་ངུ་འདིའང་དཀར་ཕྱོགས་ཀྱི་དགའ་བ་གསུམ་པའི་ཚེས་བཅུ་ལ་གང་ཤར་མྱུར་དུ་སྦྱར་བ་ཛ་ཡནྟུ།
	ces dus gsum kun mkhyen sangs rgyas gnyis pa pad+mA kar la gsol ba 'debs pa'i tshul nyung ngu 'di'ang dkar phyogs kyi dga' ba gsum pa'i tshes bcu la gang shar myur du sbyar ba dza yan+tu

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

ཨོ་རྒྱན་སངས་རྒྱས་གཉིས་པ་ལ་བསྟོད་པ་དད་གསུམ་ཆུ་སྐྱེས་འཛུམ་ཕྲེང་། ཨོ་རྒྱན་སངས་རྒྱས་གཉིས་པ་ལ་བསྟོད་པ་དད་གསུམ་ཆུ་སྐྱེས་འཛུམ་ཕྲེང་ཞེས་བྱ་བ། ན་མཿཔདྨཱ་ཀ་རཱ་ཡ། རྒྱལ་བ་སྲས་བཅས་སྤངས་རྟོགས་ནོར་བུའི་མཛོད། །གང་སྐུའི་ཟ་མ་ཏོག་ཏུ་རོ་གཅིག་པས། །བྲལ་སྨིན་ཡོན་ཏན་བྱེ་བའི་འཁྲི་ཤིང་གིས། །གདུལ་བྱའི་རེ་བའི་ཤིང་རྟ་འགེངས་ལ་འདུད། ༡ །ཁྱོད་སྐུ་བདེ་ཆེན་པདྨའི་ཁང་བཟང་དབུས། །མཚན་དཔེའི་གཟི་འོད་འབར་བའི་ཡེ་ཤེས་ཀྱིས། །མཐོང་ན་མི་མཐུན་མེད་པའི་དཔལ་སྦྱིན་ཕྱིར། །སྲིད་ཞི་ཡོངས་ཀྱིས་བསྔགས་པའི་རོལ་མོ་འཁྲོལ། ༢ །གང་གསུང་སྲིད་པའི་རླུང་བཅུའི་རྟེན་འབྲེལ་ཀུན། །འཕོ་མེད་ཞུ་བདེའི་དབྱིངས་སུ་རོལ་པ་ལས། །བདེ་སྟོང་འབར་འཛག་དགའ་བཞིའི་ཏམྦུ་རས། །སྒྲ་ཚིག་ལས་འདས་ཟབ་མོའི་དོན་མཆོག་སྟོན། ༣ །ཤེས་དང་ཤེས་བྱའི་ཆོས་རྣམས་མ་ལུས་ཀུན། །གཉུག་མའི་ལང་ཚོའི་ཕྱག་རྒྱར་རོ་གཅིག་པས། །འོད་གསལ་རྣམ་ཀུན་མཆོག་ལྡན་ཐུགས་རྗེའི་གཟུགས། །ལྷུན་གྲུབ་རིག་འཛིན་དབྱིངས་སུ་ངལ་བསོ་བསྟེན། ༤ །གཟུང་འཛིན་ཉི་ཟླའི་འགྲོས་ཀྱི་རྟོག་ཚོགས་ཀུན། །དབུ་མ་སྒྲ་ཅན་མཁའ་རུ་རོལ་པའི་མོད། །ལྷན་སྐྱེས་བདེ་མཆོག་རྟག་པའི་བདུད་རྩི་ཡིས། །འཆི་མེད་འཇའ་ལུས་རྡོ་རྗེའི་སྐུ་རུ་གྱུར། ༥ །བྱིན་རླབས་མཆོག་སྟེར་འཁོར་ལོའི་མགོན་པོ་སྟེ། །དངོས་གྲུབ་འདོད་རྒུའི་སྒྱུ་འཕྲུལ་ཧེ་རུ་ཀ །བདེ་སྟོང་ཕྲིན་ལས་དཔལ་སྦྱིན་ཌཱཀྐི་རུ། །གྱུར་ཕྱིར་རྩ་གསུམ་ཀུན་འདུས་ཡེ་ཤེས་སྐུ། ༦ །མདོར་ན་སྲས་བཅས་རྒྱལ་བའི་མཁྱེན་ནུས་བརྩེའི། །བྲལ་སྨིན་ཡོངས་སུ་རྫོགས་པའི་འཛུམ་དཀར་གྱིས། །སྐལ་བཟང་འགྲོ་ཀུན་རྗེས་སུ་བཟུང་ནས་སླར། །སྨིན་གྲོལ་གདམས་པའི་བདུད་རྩིས་ངལ་བསོ་སྟེར། ༧ །དེ་ཕྱིར་རྨི་ལམ་ཙམ་དུའང་ཁྱོད་ཞབས་ལ། །བསྟོད་བསྔགས་མེ་ཏོག་ཆལ་ཆིལ་བསྙིལ་བའི་མཐུས། །སྐྱེ་ཀུན་གང་གི་ཐུགས་རྗེའི་གྲིབ་བསིལ་དུ། །དབུགས་འབྱིན་མཛད་པའི་དགའ་སྟོན་རོལ་པར་ཤོག ༨ །ཐབས་དང་ཤེས་རབ་མི་ཕྱེད་མཉམ་རོལ་པའི། །སྒྱུ་འཕྲུལ་དྲྭ་བའི་དངུལ་ཆུས་ཀུན་བརྟགས་ཁམས། །བསྡམས་པའི་གྲུབ་གཉིས་རྣལ་འབྱོར་སུ་ཝ་རྞས། །རང་གཞན་ཕན་བདེའི་དཔལ་གྱིས་འཚོ་བར་ཤོག ༩ །རྡོ་རྗེ་ལུས་ཀྱི་གནས་ཡུལ་ཉེར་བཞིའི་གྲོང་། །དཀར་དམར་རིག་འཛིན་ཌཱ་ཀིས་འཁྱུད་པ་ལས། །བདེ་ཆེན་དགའ་བཞིས་མྱོས་པའི་ལང་ཚོ་ཡིས། །ཀུན་བརྟགས་འཁྲུལ་པའི་ཚོགས་ཀུན་འཆིང་གྱུར་ཅིག ༡༠ །ཤིན་ཏུ་དག་པ་གཟོད་པའི་ཡེ་ཤེས་ནི། །རྣམ་ཐར་སྒོ་གསུམ་འདུ་འབྲལ་མེད་པའི་ཞལ། །རང་རིག་གཉུག་མའི་ངང་དུ་མཉམ་རོལ་པས། །འགྱུར་མེད་རྣམ་ཀུན་མཆོག་ལྡན་འགྲུབ་པར་ཤོག ༡༡ །ཁྱད་པར་ག་བུར་རྡུལ་བརྩེགས་ས་འཛིན་ཁྲོད། །སྡུག་བསྔལ་ཞགས་པས་བཅིངས་པའི་ལུས་ཅན་ཀུན། །ཐུགས་རྗེའི་ཕྱག་གིས་བཀྲོལ་ནས་ཕན་དང་བདེའི། །ཐེམ་སྐས་ཡིད་འོང་མཆོག་ལ་འཛེགས་གྱུར་ཅིག ༡༢ །འདི་ནས་བཟུང་སྟེ་ཇི་སྲིད་ལས་འབྲས་ཀྱིས། །སྐྱེ་བའི་འཁྲི་ཤིང་འཛིན་པ་ཐམས་ཅད་དུ། །གང་གི་མཁྱེན་བརྩེའི་ཟེར་གྱིས་རབ་བསྐྱངས་པས། །དོན་གཉིས་ཨུཏྤལ་འདབ་བརྒྱ་བཞད་པར་ཤོག ༡༣ །ནམ་ཞིག་འཕོས་ཚེ་དྡྷུ་ཏིའི་གྲོང་ཁྱེར་དབུས། །ཚོགས་བརྒྱད་རྣམ་དག་ཟངས་མདོག་དཔལ་རི་རུ། །རིག་སྟོང་མཚོ་སྐྱེས་རྡོ་རྗེའི་ཞལ་མཐོང་ནས། །གློ་བུར་འཁྲུལ་རྟོག་གཡོ་མེད་སྡོམ་གྱུར་ཅིག ༡༤ །རྟག་ཏུ་གུས་པའི་དྲི་བཞོན་གཡོ་བ་ཡིས། །ཐུགས་རྗེའི་སྤྲིན་དཀར་འཇོ་སྒེག་ལ་རོལ་པས། །རྗེས་སུ་བརྩེ་བའི་བདུད་རྩིའི་ཐིག་ཕྲེང་གིས། །བྱང་ཆུབ་མཆོག་གི་ཆུ་སྐྱེས་བཞད་པར་ཤོག །ཅེས་དུས་གསུམ་ཀུན་མཁྱེན་སངས་རྒྱས་གཉིས་པ་པདྨཱ་ཀར་ལ་གསོལ་བ་འདེབས་པའི་ཚུལ་ཉུང་ངུ་འདིའང་དཀར་ཕྱོགས་ཀྱི་དགའ་བ་གསུམ་པའི་ཚེས་བཅུ་ལ་གང་ཤར་མྱུར་དུ་སྦྱར་བ་ཛ་ཡནྟུ། །

[edit]

o rgyan sangs rgyas gnyis pa la bstod pa dad gsum chu skyes 'dzum phreng /__ o rgyan sangs rgyas gnyis pa la bstod pa dad gsum chu skyes 'dzum phreng zhes bya ba/__na maHpad+mA ka rA ya/__rgyal ba sras bcas spangs rtogs nor bu'i mdzod/__/gang sku'i za ma tog tu ro gcig pas/__/bral smin yon tan bye ba'i 'khri shing gis/__/gdul bya'i re ba'i shing rta 'gengs la 'dud/__1__/khyod sku bde chen pad+ma'i khang bzang dbus/__/mtshan dpe'i gzi 'od 'bar ba'i ye shes kyis/__/mthong na mi mthun med pa'i dpal sbyin phyir/__/srid zhi yongs kyis bsngags pa'i rol mo 'khrol/__2__/gang gsung srid pa'i rlung bcu'i rten 'brel kun/__/'pho med zhu bde'i dbyings su rol pa las/__/bde stong 'bar 'dzag dga' bzhi'i tam+bu ras/__/sgra tshig las 'das zab mo'i don mchog ston/__3_/shes dang shes bya'i chos rnams ma lus kun/__/gnyug ma'i lang tsho'i phyag rgyar ro gcig pas/__/'od gsal rnam kun mchog ldan thugs rje'i gzugs/__/lhun grub rig 'dzin dbyings su ngal bso bsten/__4_/gzung 'dzin nyi zla'i 'gros kyi rtog tshogs kun/__/dbu ma sgra can mkha' ru rol pa'i mod/__/lhan skyes bde mchog rtag pa'i bdud rtsi yis/__/'chi med 'ja' lus rdo rje'i sku ru gyur/__5_/byin rlabs mchog ster 'khor lo'i mgon po ste/__/dngos grub 'dod rgu'i sgyu 'phrul he ru ka__/bde stong phrin las dpal sbyin DAk+ki ru/__/gyur phyir rtsa gsum kun 'dus ye shes sku/__6__/mdor na sras bcas rgyal ba'i mkhyen nus brtse'i/__/bral smin yongs su rdzogs pa'i 'dzum dkar gyis/__/skal bzang 'gro kun rjes su bzung nas slar/__/smin grol gdams pa'i bdud rtsis ngal bso ster/__7_/de phyir rmi lam tsam du'ang khyod zhabs la/__/bstod bsngags me tog chal chil bsnyil ba'i mthus/__/skye kun gang gi thugs rje'i grib bsil du/__/dbugs 'byin mdzad pa'i dga' ston rol par shog__8__/thabs dang shes rab mi phyed mnyam rol pa'i/__/sgyu 'phrul drwa ba'i dngul chus kun brtags khams/__/bsdams pa'i grub gnyis rnal 'byor su wa r+Nas/__/rang gzhan phan bde'i dpal gyis 'tsho bar shog__9__/rdo rje lus kyi gnas yul nyer bzhi'i grong /__/dkar dmar rig 'dzin DA kis 'khyud pa las/__/bde chen dga' bzhis myos pa'i lang tsho yis/__/kun brtags 'khrul pa'i tshogs kun 'ching gyur cig__10__/shin tu dag pa gzod pa'i ye shes ni/__/rnam thar sgo gsum 'du 'bral med pa'i zhal/__/rang rig gnyug ma'i ngang du mnyam rol pas/___/'gyur med rnam kun mchog ldan 'grub par shog__11__/khyad par ga bur rdul brtsegs sa 'dzin khrod/__/sdug bsngal zhags pas bcings pa'i lus can kun/__/thugs rje'i phyag gis bkrol nas phan dang bde'i/__/them skas yid 'ong mchog la 'dzegs gyur cig__12__/'di nas bzung ste ji srid las 'bras kyis/__/skye ba'i 'khri shing 'dzin pa thams cad du/__/gang gi mkhyen brtse'i zer gyis rab bskyangs pas/__/don gnyis ut+pal 'dab brgya bzhad par shog_13_/nam zhig 'phos tshe d+d+hu ti'i grong khyer dbus/__/tshogs brgyad rnam dag zangs mdog dpal ri ru/__/rig stong mtsho skyes rdo rje'i zhal mthong nas/__/glo bur 'khrul rtog g.yo med sdom gyur cig__14__/rtag tu gus pa'i dri bzhon g.yo ba yis/__/thugs rje'i sprin dkar 'jo sgeg la rol pas/__/rjes su brtse ba'i bdud rtsi'i thig phreng gis/__/byang chub mchog gi chu skyes bzhad par shog__/ces dus gsum kun mkhyen sangs rgyas gnyis pa pad+mA kar la gsol ba 'debs pa'i tshul nyung ngu 'di'ang dkar phyogs kyi dga' ba gsum pa'i tshes bcu la gang shar myur du sbyar ba dza yan+tu/_/