འཇམ་དཔལ་རྡོ་རྗེ་ལ་བསྟོད་སྨོན་བློ་གྲོས་དཔལ་སྦྱིན་ནོར་བུའི་འཁྲི་ཤིང་།

🚧 This website is under continued development. We appreciate your patience!

Previous Text Back to Volume PageNext Text

Wylie title	'jam dpal rdo rje la bstod smon blo gros dpal sbyin nor bu'i 'khri shing
Location	mkhyen brtse'i bka' 'bum Volume 1, sde tshan 2, Text 5, Pages 69-73 (Folios 6a1 to 8a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. 'jam dpal rdo rje la bstod smon blo gros dpal sbyin nor bu'i 'khri shing. In 'jam dbyangs mkhyen brtse'i dbang po'i bka' 'bum, Vol. 1: 69-73. Khams sde dge rdzong sar dgon: Rdzong sar blo gros phun tshogs, 2020.
Genre	Verses of Praise - bstod pa
Deity	'jam dpal rdo rje
Colophon	།དེ་ལྟར་བཅོམ་ལྡན་འདས་མགོན་པོ་འཇམ་པའི་དབྱངས་ལ་བསྟོད་པའི་རབ་བྱེད་ཡན་ལག་བདུན་པ་དང་འབྲེལ་བའི་ཚིགས་སུ་བཅད་པ་ཉུང་ངུ་འདི་ཡང་གཞོན་ནུ་ཨ་བྷཱ་ཡས་རང་ལོ་བཅུ་དྲུག་པར་གསོལ་བ་བཏབ་པ་དེ་ཁོ་ན་ཉིད་དུ་འགྲུབ་པར་གྱུར་ཅིག།
	de ltar bcom ldan 'das mgon po 'jam pa'i dbyangs la bstod pa'i rab byed yan lag bdun pa dang 'brel ba'i tshigs su bcad pa nyung ngu 'di yang gzhon nu a b+hA yas rang lo bcu drug par gsol ba btab pa de kho na nyid du 'grub par gyur cig

1 Texts in this Section (sde tshan or chos tshan)

5 69-73	འཇམ་དཔལ་རྡོ་རྗེ་ལ་བསྟོད་སྨོན་བློ་གྲོས་དཔལ་སྦྱིན་ནོར་བུའི་འཁྲི་ཤིང་། 'jam dpal rdo rje la bstod smon blo gros dpal sbyin nor bu'i 'khri shing Verses of Praise - bstod pa	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

འཇམ་དཔལ་རྡོ་རྗེ་ལ་བསྟོད་ཅིང་སྨོན་ལམ་གདབ་པའི་རིམ་པ་བློ་གྲོས་དཔལ་སྦྱིན་ནོར་བུའི་འཁྲི་ཤིང་ཞེས་བྱ་བ། ན་མ་མཉྫུ་ཤྲི་ཡེ། སྣང་དང་མི་སྣང་ཕྱེད་སྣང་སྤྲུལ་པའི་གྲོང་ཁྱེར་ཀུན་ཏུ་ཁྱོད་གཅིག་ཐོར་ཚུགས་རྒྱན་དུ་རོལ་པས་ཅི་ཞིག་སྟེ། །སྲས་བཅས་འདྲེན་པ་ཡོངས་ཀྱི་ཡབ་ཏུ་གཟོད་ནས་རྣམ་པར་རོལ་པའི་འཁོར་ལོར་ཡོངས་སུ་བསྒྱུར་བ་དེ་ལྟ་ནའང་། །དེང་འདིར་བཅུ་དྲུག་ལང་ཚོ་འབར་བས་མིག་དང་སྙིང་ལ་སིམ་པ་ཇི་སྙེད་བགྲང་བར་མི་ནུས་སྟེར་བའི་བྱེད་པོར་གཅིག་གྱུར་པས། །སྲིད་ཞི་གཉིས་ཀྱི་མཐའ་རུ་མ་ལྷུང་ཟུང་འཇུག་རྣམ་ཀུན་མཆོག་ལྡན་འཇོ་སྒེག་སྟུག་པོར་རོལ་དེར་དྭང་བས་འདུད། ༡ །མི་ཤིགས་སྟོང་པ་ཉིད་ཀྱི་ཐིག་ལེ་ནི། །བརྩེ་ཆེན་སྙིང་རྗེའི་དཔྱིད་དང་རོ་གཅིག་པས། །རྣམ་པ་ཀུན་ཏུ་སྐུ་གསུང་ཐུགས་རྡོ་རྗེ། །གང་འདུལ་སྒྱུ་མའི་རོལ་པར་ཡོངས་སུ་བཞེངས། ༢ །ཁྱོད་སྐུ་ཉི་གཞོན་བཅུད་འཐུང་གུར་གུམ་དང་། །རྣམ་པར་མཚུངས་ཀྱང་ལྟ་ན་ལྷུན་སྡུག་པའི། །འོད་ཟེར་དྲྭ་བས་གཏམས་པའི་སྣང་བ་ཡིས། །ཆོས་ཉིད་དོན་ལ་མི་གནས་སྒྲིབ་མུན་འཇིལ། ༣ །ཤེས་རབ་རལ་གྲིའི་གདེངས་ཀས་མཚན་པའི་ཕྱག །རྨོངས་པའི་དྲྭ་བ་བཀྲལ་དང་ཆབ་གཅིག་པར། །བློ་མཆོག་སྤོབས་པའི་གཏེར་མཛོད་གྲོལ་བའི་ཕྱིར། །ལམ་འདི་གཅིག་ཏུ་འཛིན་བཟོད་ཕུལ་བྱུང་གཏམ། ༤ །རྒྱལ་ཀུན་གསུང་གི་གསང་བ་གླེགས་བམ་གཟུགས། །པདྨ་གཞོན་ནུའི་སྲོག་ཏུ་རོ་གཅིག་པས། །ལུང་རྟོགས་དམ་ཆོས་བདུད་རྩིའི་བགོ་བཤར་ནི། །སྐལ་བཟང་འགྲོ་བའི་དཔྱིད་དུ་ལྷགས་པ་བཞིན། ༥ །མཆུ་སྒྲོས་པུཎྜ་རཱི་ཀའི་འཛུམ་དཀར་ལས། །ལེགས་འོངས་ལམ་བདེན་སྦྲང་རྩིའི་དྲི་བསུང་གིས། །འཕགས་དང་སོ་སྐྱེའི་རཿཡིག་གཉིས་པའི་སྤྲིན། །དབང་མེད་འགུགས་དེ་གསུང་གི་གསང་བར་རྫོགས། ༦ །གཟོད་ནས་རྡུལ་བྲལ་དག་པའི་ཡེ་ཤེས་ནི། །སྤྲོས་པའི་མཐའ་དང་མཛའ་བ་མ་ཡིན་ཀྱང་། །ཇི་ལྟ་ཇི་སྙེད་མཁྱེན་གཉིས་རོལ་སྒེག་གིས། །སོ་སོར་ཡང་དག་རིག་པའི་མངོན་རྟོགས་ངོམས། ༧ །དེས་ན་དཔག་ཡས་རྣམ་པར་ཀུན་གསལ་ཁམས། །ཚངས་དང་ཕུར་བུའི་བློས་ཀྱང་གཞལ་ནུས་ཀྱི། །སྤོབས་པ་བྲལ་ཕྱིར་གནག་སྣུམ་རལ་པའི་རྩེའི། །ཞབས་མཐིལ་པདྨོར་བསྟི་སྟང་བསྟབས་པ་བཞིན། ༨ །ཁྱོད་སྐུ་དངོས་སུ་མཐོང་བའི་སྐལ་བཟང་གིས། །ལུང་རྟོགས་སྤོབས་པ་གྲོལ་ལ་ངོ་མཚར་ཅི། །མཚན་གྱི་ནོར་བུ་སྤྱི་བོར་ལྷུང་ཙམ་གྱིས། །སྐྱེ་ཀུན་ཤེས་བྱའི་འབྱོར་པས་ཕྱུག་མིན་ནམ། ༩ །ཚུལ་དེའི་ཕྱིར་ན་བདག་ཡིད་རབ་དད་པའི། །ཆར་གྱིས་བརླན་གྱུར་ཐལ་མོའི་སྟེང་འཐུང་དཀར། །སྤྱི་ཏོལ་རྩེ་མོར་བཀོད་པའི་བསྟི་སྟང་གིས། །གང་ཞབས་ཤར་གྱི་ཐིག་ལེར་རྟག་ཏུ་བསྙེན། ༡༠ །བླ་ན་ཡོད་དང་མེད་པའི་མཆོད་སྤྲིན་ཀྱང་། །ཏིང་འཛིན་བྱེད་པོས་གཅིག་ཏུ་བཟླུམས་བྱས་ཏེ། །ཡོན་གནས་ཐུགས་རྗེ་མཆོག་གི་མངའ་བདག་ལ། །གུས་པས་སྟོབ་པའི་རྫུ་འཕྲུལ་ཅིར་ཡང་གཡོ། ༡༡ །ཐོག་མ་མེད་ནས་བསགས་པའི་སྒྲིབ་གཉིས་མུན། །སྟོབས་བཞིའི་ཟླ་ཤེལ་གཞོན་ནུའི་འཛུམ་ཟེར་གྱིས། །རེག་པའི་མོད་ལ་ཡོངས་སུ་གཞིལ་བྱས་ཏེ། །མགོན་པོ་དགྱེས་པའི་དམ་བཅའ་སླར་ཡང་བཟུང་། ༡༢ །སློབ་དང་མི་སློབ་ཉན་རང་སོ་སྐྱེ་ཡི། །ལེགས་བྱས་འོད་སྣང་སྤྲོ་བའི་པདྨོའི་བཤེས། །ཕན་བདེའི་སྣང་བ་སྟེར་བའི་བྱེད་པོ་དེར། །ཡི་རང་ཨུཏྤལ་འདབ་བརྒྱ་སྙིང་དབུས་གྲོལ། ༡༣ །སྲིད་པའི་སྡུག་བསྔལ་ཁོང་བུར་འཁྱམས་པའི་འགྲོ། །བདེན་པ་གཉིས་ཀྱི་ཐེམ་སྐས་ལ་འཛེགས་ཏེ། །རྣམ་མཁྱེན་ཁང་བཟང་དམ་པར་དབུགས་འབྱིན་ཕྱིར། །རྟག་ཏུ་ལུང་གི་ཆོས་འཁོར་བསྐོར་བར་བསྐུལ། ༡༤ །གང་དག་ཕྱོགས་བཅུའི་ཞིང་བཞུགས་བདེར་གཤེགས་རྣམས། །མྱ་ངན་འདས་ལ་དགྱེས་པའི་སྐབས་དབྱེ་ཚེ། །སྙིང་རྗེའི་སྲིད་པར་དགའ་བའི་ཏམྦུ་རས། །རྟག་ཏུ་བཞུགས་པའི་གསོལ་འདེབས་དབྱངས་སུ་ལེན། ༡༥ །དེ་ལྟར་བསགས་པའི་དགེ་ཚོགས་གངྒཱའི་རྒྱུན། །རྣམ་པ་ཐམས་ཅད་མཁྱེན་པའི་ཆུ་གཏེར་ཆེར། །རོ་གཅིག་ཉིད་དུ་བསྔོས་པའི་མཐུ་དཔལ་གྱིས། །དོན་གཉིས་གདེངས་ཅན་ཚོགས་རྣམས་འཕེལ་གྱུར་ཅིག ༡༦ །གནས་སྐབས་སུ་ཡང་སྣོད་བཅུད་བནྫུ་ལ། །ལེགས་སྤྱོད་མཛེས་མའི་སོར་རྩེས་བསྣུན་པ་ལས། །རྫོགས་ལྡན་གསར་དུ་འགུགས་པའི་འཛུམ་དཀར་གྱིས། །ལྷར་བཅས་འགྲོ་ཀུན་དགའ་བས་རྩེན་གྱུར་ཅིག ༡༧ །གཟུགས་སྣང་འཇམ་དཔལ་གཞོན་ནུར་མངོན་གྱུར་ཅིང་། །སྒྲ་གྲགས་གསང་སྔགས་འཁོར་ལོ་ཡོངས་སུ་སྨིན། །རྟོག་ཚོགས་བདེ་སྟོང་དྲ་བར་བསྡམས་པ་ཡིས། །སྐུ་གསུང་ཐུགས་དང་དབྱེར་མེད་འགྲུབ་པར་ཤོག ༡༨ །འཆི་འཕོས་ཚེ་ན་བཅོམ་ལྡན་འཇམ་དཔལ་དབྱངས། །རྒྱལ་བའི་སྲས་ཀྱིས་བསྐོར་བ་དེ་མཐོང་ཞིང་། །བདེ་བ་ཅན་སོགས་དག་པའི་ཞིང་མཆོག་ཏུ། །ཁྲིད་ནས་ལུང་བསྟན་དབུགས་དབྱུང་མཆོག་བརྙེས་ཤོག ༡༩ །མཐར་ཐུག་སྟོབས་བཅུ་མི་འཇིགས་རྣམ་པ་བཞི། །མ་འདྲེས་བཅོ་བརྒྱད་ལ་སོགས་སྤངས་རྟོགས་ཀྱི། །ཆ་ཤས་ཡོངས་སུ་རྫོགས་པའི་རི་དྭགས་མཚན། །ཆོས་དབྱིངས་དག་པའི་མཁའ་ལ་རོལ་གྱུར་ཅིག ༢༠ །དེ་ལས་སླར་ཡང་སྤྲུལ་པའི་ཟློས་གར་ནི། །རྙོག་བྲལ་མོས་པའི་ཆུ་གཏེར་ལ་འཆར་བས། །གྲངས་མེད་སྲིད་ལས་སྒྲོལ་བའི་ཐུགས་བསྐྱེད་མཐུ། །མགོན་པོ་གང་དང་དབྱེར་མེད་འགྲུབ་པར་ཤོག ༢༡ །དེ་ལྟར་བཅོམ་ལྡན་འདས་མགོན་པོ་འཇམ་པའི་དབྱངས་ལ་བསྟོད་པའི་རབ་བྱེད་ཡན་ལག་བདུན་པ་དང་འབྲེལ་བའི་ཚིགས་སུ་བཅད་པ་ཉུང་ངུ་འདི་ཡང་གཞོན་ནུ་ཨ་བྷཱ་ཡས་རང་ལོ་བཅུ་དྲུག་པར་གསོལ་བ་བཏབ་པ་དེ་ཁོ་ན་ཉིད་དུ་འགྲུབ་པར་གྱུར་ཅིག། །། ༈

[edit]

'jam dpal rdo rje la bstod smon blo gros dpal sbyin nor bu'i 'khri shing / 'jam dpal rdo rje la bstod cing smon lam gdab pa'i rim pa blo gros dpal sbyin nor bu'i 'khri shing zhes bya ba/__na ma many+dzu shri ye/__snang dang mi snang phyed snang sprul pa'i grong khyer kun tu khyod gcig thor tshugs rgyan du rol pas ci zhig ste/__/sras bcas 'dren pa yongs kyi yab tu gzod nas rnam par rol pa'i 'khor lor yongs su bsgyur ba de lta na'ang /__/deng 'dir bcu drug lang tsho 'bar bas mig dang snying la sim pa ji snyed bgrang bar mi nus ster ba'i byed por gcig gyur pas/__/srid zhi gnyis kyi mtha' ru ma lhung zung 'jug rnam kun mchog ldan 'jo sgeg stug por rol der dwang bas 'dud/__1__/mi shigs stong pa nyid kyi thig le ni/__/brtse chen snying rje'i dpyid dang ro gcig pas/__/rnam pa kun tu sku gsung thugs rdo rje/__/gang 'dul sgyu ma'i rol par yongs su bzhengs/__2__/khyod sku nyi gzhon bcud 'thung gur gum dang /__/rnam par mtshungs kyang lta na lhun sdug pa'i/__/'od zer drwa bas gtams pa'i snang ba yis/__/chos nyid don la mi gnas sgrib mun 'jil/__3__/shes rab ral gri'i gdengs kas mtshan pa'i phyag__/rmongs pa'i drwa ba bkral dang chab gcig par/__/blo mchog spobs pa'i gter mdzod grol ba'i phyir/__/lam 'di gcig tu 'dzin bzod phul byung gtam/__4__/rgyal kun gsung gi gsang ba glegs bam gzugs/__/pad+ma gzhon nu'i srog tu ro gcig pas/__/lung rtogs dam chos bdud rtsi'i bgo bshar ni/__/skal bzang 'gro ba'i dpyid du lhags pa bzhin/__5_/mchu sgros puN+Da rI ka'i 'dzum dkar las/__/legs 'ongs lam bden sbrang rtsi'i dri bsung gis/__/'phags dang so skye'i raHyig gnyis pa'i sprin/__/dbang med 'gugs de gsung gi gsang bar rdzogs/__6__/gzod nas rdul bral dag pa'i ye shes ni/__/spros pa'i mtha' dang mdza' ba ma yin kyang /__/ji lta ji snyed mkhyen gnyis rol sgeg gis/__/so sor yang dag rig pa'i mngon rtogs ngoms/__7__/des na dpag yas rnam par kun gsal khams/__/tshangs dang phur bu'i blos kyang gzhal nus kyi/__/spobs pa bral phyir gnag snum ral pa'i rtse'i/__/zhabs mthil pad+mor bsti stang bstabs pa bzhin/__8_/khyod sku dngos su mthong ba'i skal bzang gis/__/lung rtogs spobs pa grol la ngo mtshar ci/__/mtshan gyi nor bu spyi bor lhung tsam gyis/__/skye kun shes bya'i 'byor pas phyug min nam/__9__/tshul de'i phyir na bdag yid rab dad pa'i/__/char gyis brlan gyur thal mo'i steng 'thung dkar/__/spyi tol rtse mor bkod pa'i bsti stang gis/__/gang zhabs shar gyi thig ler rtag tu bsnyen/__10_/bla na yod dang med pa'i mchod sprin kyang /__/ting 'dzin byed pos gcig tu bzlums byas te/__/yon gnas thugs rje mchog gi mnga' bdag la/__/gus pas stob pa'i rdzu 'phrul cir yang g.yo/__11__/thog ma med nas bsags pa'i sgrib gnyis mun/__/stobs bzhi'i zla shel gzhon nu'i 'dzum zer gyis/__/reg pa'i mod la yongs su gzhil byas te/__/mgon po dgyes pa'i dam bca' slar yang bzung /__12__/slob dang mi slob nyan rang so skye yi/__/legs byas 'od snang spro ba'i pad+mo'i bshes/__/phan bde'i snang ba ster ba'i byed po der/_/yi rang ut+pal 'dab brgya snying dbus grol/__13__/srid pa'i sdug bsngal khong bur 'khyams pa'i 'gro/__/bden pa gnyis kyi them skas la 'dzegs te/__/rnam mkhyen khang bzang dam par dbugs 'byin phyir/__/rtag tu lung gi chos 'khor bskor bar bskul/__14__/gang dag phyogs bcu'i zhing bzhugs bder gshegs rnams/__/mya ngan 'das la dgyes pa'i skabs dbye tshe/__/snying rje'i srid par dga' ba'i tam+bu ras/__/rtag tu bzhugs pa'i gsol 'debs dbyangs su len/__15_/de ltar bsags pa'i dge tshogs gang+gA'i rgyun/__/rnam pa thams cad mkhyen pa'i chu gter cher/__/ro gcig nyid du bsngos pa'i mthu dpal gyis/__/don gnyis gdengs can tshogs rnams 'phel gyur cig__16__/gnas skabs su yang snod bcud ban+dzu la/__/legs spyod mdzes ma'i sor rtses bsnun pa las/__/rdzogs ldan gsar du 'gugs pa'i 'dzum dkar gyis/__/lhar bcas 'gro kun dga' bas rtsen gyur cig__17_/gzugs snang 'jam dpal gzhon nur mngon gyur cing /__/sgra grags gsang sngags 'khor lo yongs su smin/__/rtog tshogs bde stong dra bar bsdams pa yis/__/sku gsung thugs dang dbyer med 'grub par shog__18_/'chi 'phos tshe na bcom ldan 'jam dpal dbyangs/__/rgyal ba'i sras kyis bskor ba de mthong zhing /__/bde ba can sogs dag pa'i zhing mchog tu/__/khrid nas lung bstan dbugs dbyung mchog brnyes shog__19__/mthar thug stobs bcu mi 'jigs rnam pa bzhi/__/ma 'dres bco brgyad la sogs spangs rtogs kyi/__/cha shas yongs su rdzogs pa'i ri dwags mtshan/__/chos dbyings dag pa'i mkha' la rol gyur cig_20_/de las slar yang sprul pa'i zlos gar ni/__/rnyog bral mos pa'i chu gter la 'char bas/__/grangs med srid las sgrol ba'i thugs bskyed mthu/__/mgon po gang dang dbyer med 'grub par shog_21__/de ltar bcom ldan 'das mgon po 'jam pa'i dbyangs la bstod pa'i rab byed yan lag bdun pa dang 'brel ba'i tshigs su bcad pa nyung ngu 'di yang gzhon nu a b+hA yas rang lo bcu drug par gsol ba btab pa de kho na nyid du 'grub par gyur cig/__//_!