སྙན་བརྒྱུད་ཕུར་པའི་གདབ་ཁ་ལ་ཉེ་བར་མཁོ་བའི་ཟུར་འདེབས་ཅུང་ཟད་བཀོད་པ།

🚧 This website is under continued development. We appreciate your patience!

Previous Text Back to Volume PageNext Text

Wylie title	snyan brgyud phur pa'i gdab kha la nye bar mkho ba'i zur 'debs cung zad bkod pa
Location	mkhyen brtse'i bka' babs Volume 20, Text 21, Pages 345-360 (Folios 1a to 8b6)
Author	མཁའ་ཁྱབ་རྡོ་རྗེ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Associated People	པྲ་བྷ་ཧསྟི་ (Prabhahasti)
Citation	Karmapa, 15th. snyan brgyud phur pa'i gdab kha la nye bar mkho ba'i zur 'debs cung zad bkod pa. In Rdzong sar 'jam dbyangs mkhyen brtse'i dbang po'i bka' babs, Vol. 20: 345-360. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Supplemental Instructions - zur 'debs - zur rgyan
Cycle	ཕྲིན་ལས་ཕུར་པའི་གནད་ཏིག་ (phrin las phur pa'i gnad tig)
Deity	rdo rje phur pa
Karchag page	JKW-KABAB-Volume-20-WA-Karchag

Tibetan Text

Wylie

[edit]

༄༅། །སྙན་བརྒྱུད་ཕུར་པའི་གདབ་ཁ་ལ་ཉེ་བར་མཁོ་བའི་ཟུར་འདེབས་ཅུང་ཟད་བཀོད་པ་བཞུགས་སོ།།

༄༅། །བླ་མ་དཔལ་ཆེན་རྡོ་རྗེ་གཞོན་ནུར་འདུད། །སྙད་བརྒྱུད་ཕྲིན་ལས་ཕུར་པའི་གནད་ཏིག་གི་སྨད་ལས་དྲག་པོའི་སྲུང་ཟློག་བསད་པའི་ལས་རིམ་ཁྱེར་བདེར་བཀོད་པ་སྲིད་པ་ཐལ་འབྱིན་རྡོ་རྗེའི་མཚོན་ཆར་གྱི་ཟུར་འདེབས་ཉེ་བར་མཁོ་བའི་ཡན་ལག་ཅུང་ཟད་འགོད་པ་ལ། སྲུང་འཁོར་ནི། དར་རས་དཀར་པོའམ། རྒྱ་ཤོག་ལ་མཚལ་ལམ། རྒྱ་སྣག་ལ་སེལ་མེད་ཀྱི་ཆོས་སྨན་བསྲེས་པས། མུ་ཁྱུད་རིམ་པ་དྲུག་བསྐོར་བའི་ལྟེ་བ་མཐིང་གའི་དབུས་སུ་ཧཱུྃ། དེའི་དབུས་སུ་ཐིག་ལེའི་ཐད་ནས་བརྩམས་ཏེ། ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ། ཞེས་བསྙེན་སྔགས་ཤམ་དུ་བསྲུང་བྱ་འཆང་བ་པོ་ཆེ་གེ་མོའི་ལུས་ངག་ཡིད་གསུམ་ལ་སྲུངས་ཤིག་རཀྵ་རཀྵ༔ འདི་རྣམས་ཕྲེང་གཅིག་གིས་མ་ཤོང་ན་ཡིག་མཇུག་ནང་དུ་རྫོགས་པར་བྲི། དེ་རྒྱབ་མུ་ཁྱུད་སེར་པོ་ལ་མདུན་ནས་བརྩམས་ཏེ། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བྃ་ཧཱུྃ་ཕཊ༔ ཅེས་སྒྲུབ་སྔགས་ཤམ་དུ་འདོད་གསོལ་གོང་ལྟར་སྦྱར་བ་བྲི། དེ་རྒྱབ་མུ་ཁྱུད་ནང་དྲག་འཁོར་སྔོན་པོ་རྩིབས་བཅུའི་དབུས་རྣམས་སུ་ཧཱུྃ་རེ་རེ་དང༌། སོ་སོའི་མཐར་མདུན་ནས་རིམ་པ་བཞིན་ཤར་སྟོད་དུ། ཨོཾ་བཛྲ་ཀྲོ་དྷ་ཧཱུྃ་ཀ་ར་ཧཱུྃ༔ གརྫ་གརྫ་ཧཱུྃ་ཕཊ༔ བསྲུང་བྱ་སོགས་འདོད་གསོལ་གོང་བཞིན་སྦྱར་བ་ཡིག་མགོ་ཕྱིར་བསྟན་གྱིས་གཡས་སུ་བསྐོར། དེ་བཞིན་ཤར་དུ། ཨོཾ་བཛྲ་ཀྲོ་དྷ་བི་ཛ་ཡ་ཧཱུྃ༔ ཧ་ན་ཧ་ན་ཧཱུྃ་ཕཊ༔ འདོད་གསོལ་སྦྱར་བ་ཀུན་ལ་འགྲེས་སོ། ཤར་ལྷོར། ཨོཾ་བཛྲ་ཀྲོ་དྷ་ནཱི་ལ་དཎྜ་ཧཱུྃ༔ ད་ཧ་ད་ཧ་ཧཱུྃ་ཕཊ༔ ལྷོ་རུ། ཨོཾ་བཛྲ་ཀྲོ་དྷ་ཡ་མནྟ་ཀ་ཧཱུྃ༔ པ་ཙ་པ་ཙ་ཧཱུྃ་ཕཊ༔ ལྷོ་ནུབ་ཏུ། ཨོཾ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུྃ༔ བྷནྡྷ་བྷནྡྷ་ཧཱུྃ་ཕཊ༔ ནུབ་ཏུ། ཨོཾ་བཛྲ་ཀྲོ་དྷ་ཧ་ཡ་གྲཱྀ་བ་ཧཱུྃ༔ ཧུ་ལུ་ཧུ་ལུ་ཧཱུྃ་ཕཊཿ ནུབ་སྨད་དུ། ཨོཾ་བཛྲ་ཀྲོ་དྷ་མ་ཧཱ་བ་ལ་ཧཱུྃ༔ སྥོ་ཊ་སྥོ་ཊ་ཧཱུྃ་ཕཊ༔ ནུབ་བྱང་དུ། ཨོཾ་བཛྲ་ཀྲོ་དྷ་ཨ་པ་རཱ་ཛི་ཏ་ཧཱུྃ༔ ཏིཥྛ་ཏིཥྛ་ཧཱུྃ་ཕཊ༔ བྱང་དུ། ཨོཾ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལཱི་ཧཱུྃ༔ ཚིནྡྷ་ཚིནྡྷ་ཧཱུྃ་ཕཊ༔ བྱང་ཤར་དུ། ཨོཾ་བཛྲ་ཀྲོ་དྷ་ཏྲེ་ལོ་ཀྱ་བི་ཛ་ཡ་ཧཱུྃ༔ བིནྡྷ་བིནྡྷ་ཧཱུྃ་ཕཊ༔ རྩིབས་མཆན་དམར་པོ་ལ་རྡོ་རྗེ་བཅུ་བྲི། དེ་རྒྱབ་མུ་ཁྱུད་སེར་པོ་ལ། དབྱངས་ཡིག་བཅུ་དྲུག་ནི། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཱཿ གསལ་བྱེད་སོ་ལྔ་ནི། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ཀྵཿ རྟེན་འབྲེལ་སྙིང་པོ་ནི། ཡེ་དྷརྨ་ཧེ་ཏུ་པྲ་བྷ་ཝ་ཧེ་ཏུནྟེ་ཥནྟ་ཐཱ་ག་ཏོ་ཧྱ་བ་དཏ། ཏེ་ཥཉྩ་ཡོ་ནི་རོ་དྷ་ཨེ་ཝཾ་བ་དཱི་མ་ཧཱ་ཤྲ་མ་ཎཿ དེ་རྒྱབ་མུ་ཁྱུད་ནག་པོ་ལ་རྡོ་ར་སེར་པོ། དེ་རྒྱབ་མུ་ཁྱུད་ལ་མེ་རི་དམར་སེར་གཡས་སུ་འཁོར་བ་བྲི། ཡི་གེ་རྣམས་མགོ་ཕྱིར་བསྟན་བྱ། རྫས་ཤ་ལྔ། བདུད་རྩི་ལྔ། ག་བུར། གླ་རྩི། ཤིང་ཀུན། ཤུ་དག་ནག་པོ། གུར་གུམ། གི་ཝཾ། གུ་གུལ། དྲག་སྔགས་བཟླས་པའི་ཡུངས་དཀར་རྣམས་དྲི་བཟང་སྦྱར་བས་བྱུག་གོ །བཟློག་པའི་འཁོར་ལོ་ནི། དུག་ཤོག་ལ། དུག་ཁྲག་བསྲེས་པའི་སྣག་ཚ་གཙང་མས། མུ་ཁྱུད་རིམ་པ་ལྔ་བསྐོར་བའི་ལྟེ་བར་ཧཱུྃ་གི་མཐར་ཐིག་ལེ་དབུ་ནས། སྒྲུབ་སྔགས་ཀྱི་ཤམ་བུར། བྱད་ཁ་ཕུར་ཁ་རྦད་འདྲེ་རྦོད་གཏོང་མི་ཁ་བྲམ་ཆུ་ལོ་ཟླ་ཞག་ཀག་ཆག་ཆེ་ཉམ་ང་ཐམས་ཅད་དགྲ་བགེགས་བྱད་མའི་སྟེང་དུ་བྷྱོ་བྷྱོ་ཟློག་ཟློག །འདི་རྣམས་ཡིག་ཕྲེང་གཅིག་ལ་མ་ཤོང་ན་ཡིག་མཇུག་ཕྱིར་རྫོགས་པར་བྱ། དེ་རྒྱབ་རྩིབས་བཅུའི་དབུས་རྣམས་སུ་ཧཱུྃ་རེ་རེ་ངོ་ཕྱིར་བསྟན། ཤར་སྟོད་དུ། ཨོཾ་བཛྲ་ཀྲོདྷ་ཧཱུྃ་ཀ་ར་ཧཱུྃ༔ གརྫ་གརྫ་དགྲ་བགེགས་མཱ་ར་ཡ་ཧཱུྃ་ཕཊ༔ ཅེས་སོགས་ཁྲོ་བཅུའི་སྔགས་གོ་རིམ་མ་ལོག་པར་བཀོད་པའི་ཤམ་བུར། བྱད་ཁ་ཕུར་ཁ་སོགས་སོ་སོར་སྦྱར་ལ། རྩིབས་མཆན་ལ་ཕུར་བུ་དབལ་ཕྱིར་བསྟན་བཅུ་བྲི། དེ་རྒྱབ་མུ་ཁྱུད་ལྗང་གུ་ལ། སྒྲུབ་སྔགས་དང་སྤུ་གྲི་སྦྲེལ་བའི་ཤམ་བུར། རྦོད་ཟོར་སརྦ་ཨ་པ་ཀ་ར་བྷྱོ་བྷྱོ་ཟློག་ཟློག་རྦད་ནན༔ ཞེས་པའི་བཟློག་ཤམ་སྦྱར་བ་བྲི། དེ་རྒྱབ་མུ་ཁྱུད་ལ། མེ་རི་གཡོན་སྐོར་དུ་བྲི། རྫས་བོང་ང༌། ཐང་ཕྲོམ། གྲི་ཁྲག །ཐལ་ཆེན། གུ་གུལ་ནག་པོ་རྣམས་སྦྱར་བས་བྱུག །ཡང་སྲུང་འཁོར་འབྲིང་པོ་བྱེད་ན། ལྟེ་བ་དང༌། ཁྲོ་བཅུའི་འདོད་གསོལ། བསྲུང་བྱ་འཆང་བ་པོའི་སོགས་ཀྱི་མལ་དུ། བཛྲ་ཀཱ་ཝ་ཙི་རཀྵ་རཀྵཿ ཞེས་བསྒྱུར། བཟློག་འཁོར་ལ། ཁྲོ་བཅུར་ཧཱུྃ་དོར་ནས་གོང་གསལ་དཔེ་བརྗོད་བཞིན་སྔགས་རྐྱང་པ་འཕྲེད་བྲིས་ཀྱིས། བྱད་ཁ་སོགས་ཀྱི་འདོད་གསོལ་མལ་དུ། རྦོད་ཟོར་སརྦ་སོགས་སྦྱར། གཞན་རྣམས་སྔ་མ་བཞིན་བྲི། ཡང་དེའང་མི་ནུས་ན། གཞི་འབྲིང་པོ་བཞིན་ལ། སྲུང་ཟློག་གཉིས་ཀར་ཁྲོ་བཅུ་ལ་ཧཱུྃ་རྐྱང་པས་འཐུས་པར་བྱ། གང་ལྟར་ཡང༌། གཉིས་ཀར་སྦྱོང་ཁྲུས་སྤྱི་ལྟར་བགྱིས་ནས་གུ་གུལ་གྱིས་བདུག །འཁོར་ལོ་རྣམས་ལྷར་བསྐྱེད་ནས། སྲུང་ཟློག་གམ་རང་སྔགས་བརྒྱ་རྩ་ལས་མི་ཉུང་བ་བཟླ་བ་དང༌། འདོད་གསོལ་བཅས་ཀྱི་མཐར། རྟེན་འབྲེལ་སྙིང་པོས་རབ་ཏུ་གནས་ཤིང་བརྟན་བཞུགས་བྱ། ལྷ་འོད་དུ་ཞུ་ནས་སྲུང་བའི་གུར་ཁང་བདུན་རིམ་དང༌། བཟློག་འཁོར་ཁྲོ་བོའི་དམག་དཔུང་མཚོན་ཆའི་ཕུང་པོར་གྱུར་པར་བསྒོམ། བཟློག་པ་ཚར་སྐབས་སྲུང་འཁོར་མང་པོ་ཡོད་ན་ལྟེ་བ་མ་ཉམས་པར་ལྟེབས་ལ། ཚོན་སྐུད་སྣ་ལྔས་བཅིངས་ཏེ། བསྲུང་བྱ་རྣམས་ཀྱི་མགུལ་དུ་གདགས། གཅིག་ལས་མེད་ན་པུ་རིའི་ལྟེ་བའམ། གནས་ཁང་གི་ཐོག་ཁར་དབུབ་པ་སོགས་བྱ། བཟློག་འཁོར་མེ་ལ་བསྲེག་གོ །ལིངྒ་བཅའ་བ་ནི། དུར་ཁྲོད་ཀྱི་འཇག་མ། གྲོག་མཁར་གྱི་ས། དགྲ་ཡི་ཁང་ས། དྲི་མ་དྲུག་གང་རྙེད་དང་སྦྱར་ལ། རབ་ཁྲུ་གང༌། ཐ་ན་མཐོ་གང་བ་བྱ། དེའི་སྙིང་ཁར་སྲོག་གཅོད་སྤུ་གྲིའི་འཁོར་ལོ་བྱ་བ་ནི། དུག་ཤོག་ལ་དུག་ཁྲག་སྦྱར་བས། དུག་ཤིང་ཚེར་མ་ཅན་ནམ། མི་གསོད་པའི་མདས་མྱུ་གུ་བྱས་ཏེ། ཙཀྲ་རྩིབས་དྲུག་ཡངས་པར་ལག་གཉིས་མགོ་བོ་བཅས་རྩིབས་གསུམ་ལ་གཟུད། རྐང་པ་གཉིས་གསང་བ་བཅས་རྩིབས་གསུམ་ལ་གཟུད། ལིངྒའི་ལྟེ་བར་འཁོར་ལོ་རྩིབས་དགུ་ནང་དུ་བསྟན་པའི་དཀྱིལ་དུ་ནྲྀ་ཏྲིའི་མཐར། ལིངྒའི་མགྲིན་ཕྱོགས་ནས་ཡིག་མགོ་ཕྱི་ལ་བསྟན་ཏེ། གནོད་བྱེད་དགྲ་བགེགས་དམ་སྲི་གདུག་པ་ཅན་རྣམས་ཀྱི་བླ་སྲོག་རྣམ་ཤེས་མཐུ་སྟོབས་ནུས་པ་ཐམས་ཅད་ཁུག་ཛཿཛཿ ཛཿཧཱུྃ་བྃ་ཧོཿ ཞེས་པ་ཙམ་མམ། སྤྲོ་ན་བླ་འགུགས་སྔགས་ཀྱང་བྲི། རྩིབས་དགུ་ལ། ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊཿ ཅེས་འབྲུ་རེ་རེ་བྲི། ལིངྒའི་མགོ་ཕྱོགས་ནས་བརྩམས་ཏེ། གཞུང་གསལ་སྤུ་གྲིའི་སྔགས་དང༌། ཛ་ཁྲམ་ཉེར་བརྒྱད་ཀྱིས་བསྐོར་རོ། །ཡང་དམིགས་བསལ་དམ་སྲི་མནན་པ་ལ། འཁོར་ལོ་མུ་ཁྱུད་གསུམ་བསྐོར་བའི་གཉིས་པར་རྩིབས་དྲུག་པ་བགེགས་ཀྱི་གཟུགས་མི་ལུས་བྱ་མགོ་ཅན་ཚང་བར་བྲིས་ཏེ། ཤར་རྩིབས་ལ་མགོ །ཤར་ལྷོར་ལག་གཡོན། ལྷོ་ནུབ་ཏུ་རྐང་པ་གཡོན་ནུབ་ཏུ་མཚན་མ། བྱང་དུ་རྐང་པ་གཡས། བྱང་ཤར་དུ་ལག་པ་གཡས་རྣམས་རྩིབས་ནང་དུ་ཚུད་པར་བྱ། མགོ་ལ། ཨོཾ་བཛྲ་ཀཱི་ལི་ཀཱི་ལ་ཡ༔ སྙིང་ཁྲག་ཤད་ཛ༔ ཨ་ཛི་ཏེ༔ ཨ་པ་ར་ཛི་ཏེ༔ ལག་གཡས་ལ། མ་རཀྨོ་ཡཀྨོ་ཀཱ་ལ་རཱུ་པ༔ སྙིང་རྩ་ལ་ཡཾ་ཡཾ༔ ཐིབ་ཐིབ༔ ལག་གཡོན་ལ། ཙིཏྟ་སྲོག་ལ་དུང་དུང་༔ སྲོག་ལ་ཡཾ་ཡཾ༔ ཛ་ཡེ་བི་ཛ་ཡེ༔ མྱག་མྱག༔ སོད་སོད༔ ཙཀྲ་སེ་ན་གཏུབས། རྐང་པ་གཡས་ལ། སྙིང་ལ་ཕྲིལ་ཕྲིལ༔ སྲོག་ལ་མྱག་མྱག༔ ཀ་ཏཾ་ཀ་ཏཾ༔ སྙིང་རྩ་ལ་ཡཾ་ཡཾ༔ སྙིང་ཁ་ལ་རག་དུན་ཏྲི༔ རྐང་པ་གཡོན་ལ། མ་མ་པ་ཤཾ་ཀུ་རུ༔ དྷ་དྷི་མ་མ་ཀརྨ༔ ཨི་དན་ཤྲི་ཏྲཾ༔ མ་ཏི་ཉ་ན་ཀ་འ་ཡ༔ ཀ་ར་ཡེ༔ མ་ར་ས་ནི་པྲ་མརྟ་ན་ཡེ་ཧཱུྃ་ཕཊ༔ ཡན་ལག་བཞི་ལ། ཛ་ཧཱུྃ་བྃ་ཧོ༔ སྙིང་གར་ཛཿཁ་སྤྲོད་ཀྱི་བར་དུ་ཏྲིཿསྟེང་དུ་ནན༔ འོག་ཏུ་ཁུག །གསང་གནས་སུ་ཕཊ༔ རྐང་མཐིལ་གཉིས་ལ་ཡཾ། རྣ་བར་འོན། མིག་ལ་ལོང༌། སྣ་ལ་ཞོམ། ཁ་ལ་དུང་དུང་བྱ་བ་བྲི། སྙིང་ཁའི་ཏྲིའི་སྟེང་ནས་བརྩམས་ཏེ། མ་རཀྨོ་ཡཀྨོ་ཀཱ་ལ་རཱུ་པ༔ དམ་སྲི་ཛཿཛ༔ སྙིང་རྩ་ལ་ཡྃ་ཡྃ༔ དམ་སྲི་ཛཿཛཿ སྲོག་རྩ་ལ་ཡྃ་ཡྃ༔ སྙིང་ལ་ཕྲིལ་ཕྲིལ༔ དམ་སྲི་ཛཿཛཿ སྲོག་ལ་ཆུམ་ཆུམ༔ ཙིཏྟ་སྲོག་ལ་དུང་དུང་༔ སྙིང་ཁྲག་སྲོག་ལ་ཤད་ཤད༔ དམ་སྲི་ཛཿཛཿ ཐུཾ་རི་ལི་ལི༔ ཙེག་ཙེག༔ འུར་འུར༔ ཤིག་ཤིག༔ འགུལ་འགུལ༔ མྱག་མྱག༔ དམ་སྲི་ཛཿཛཿ སོད་སོད༔ དྷ་དྷི་མ་མ་ཀརྨ་ཤཱི་གྷྲཾ་ཀ་ར་ཡེ༔ མ་ར་སེ་ན༔ པྲ་མ་ར་ཏ་ན་ཡེ་ཧཱུྃ༔ དམ་སྲི་ཛཿཛཿཁུག༔ ཅེས་འགུགས་སྔགས་བྲིས། མུ་ཁྱུད་ཕྱི་མར་ལིངྒའི་མགོ་ནས་ཡིག་མགོ་ཕྱིར་བསྟན་གྱིས། མ་རཀྨོ་ཡཀྨོ་ཀཱ་ལ་རཱུ་པ༔ གནོད་བྱེད་དམ་སྲི་འབྱུང་ཚོགས་སྟམྦྷ་ཡ་ནན༔ སྙིང་རྩ་ལ་སོགས་ནས། དམ་སྲི་ཛཿཛཿཐམས་ཅད་ཀྱི་མལ་དུ་མནན་སྔགས་བསྒྱུར་ནས་གོང་ལྟར་བྲི། དེ་ཕྱིར་ཛཿཁྲམ་ཉེར་གཅིག་གིས་བསྐོར། ཡང་བསྲེག་ལིང་བྲི་བར་འདོད་ན། གཞི་མནན་ལིང་བཞིན་ལ། དགྲ་བགེགས་སྤྱིར་བྱེད་ན། སྙིང་གར་ཛཿ ཁ་སྤྲོད་ཀྱི་བར་དུ་ནྲི་ཏྲི། དེའི་སྟེང་དུ་ཨེ། གཡོན་དུ་ཧུར། འོག་ཏུ་ཐུཾ། གཡས་སུ་ཛ༔ ཞེས་པའི་འབྲུ་བཞིས་ཕྱོགས་བཞིར་བསྐོར། དེ་རྒྱབ་སྤུ་གྲིའི་སྔགས་ཀྱི། དམ་སྲི་ཛཿཛཿ ཞེས་པ་རྣམས་ཀྱི་མལ་དུ། དགྲ་བགེགས་དམ་སྲི་འབྱུང་ཚོགས་ཁུག་ཛཿ ཞེས་བསྒྱུར་བ་དང༌། ཕྱིའི་སྤུ་གྲིའི་སྔགས་ཀྱི། གནོད་བྱེད་དམ་སྲི་འབྱུང་པོ་ཐམས་ཅད་སྟམ་བྷ་ཡ་ནན། ཞེས་པ་རྣམས་ཀྱི་མལ་དུ། གནོད་བྱེད་དགྲ་བགེགས་འབྱུང་པོ་ཐམས་ཅད་ཛྭ་ལ་རཾ༔ ཞེས་སོ་སོར་བསྒྱུར་བ་ཁྱད་པར་ཙམ་མོ། །དེ་ལྟར་བྲིས་གྲུབ་ནས་ཆུ་ཟན་གཙང་མས་ཤོག་གུའི་ཕྱི་ནང་ཐམས་ཅད་ཀྱི། དེ་ནས་ལིང་ཁྲུས་རྒྱས་པ་ལ་འཇམ་མགོན་རྡོ་རྗེ་འཆང་གི་གསུངས་ནོར་བུ་ཆུ་དྭངས་ལྟར་གྲུབ་ན་ཤིན་ཏུ་ལེགས། མདོར་བསྡུས་ནི། རང་ཉིད་ཐུན་མཚམས་ཀྱི་ལྷའི་ང་རྒྱལ་དང་ལྡན་པས། ལིངྒ་རྣམས་སྐྱེར་སྐམ་གྱི་ཁར་བཏེགས། དཔལ་འབར་གྱི་མེ་ལྕེས་གཞུར་ལ། ངག་ཏུ། རྃ་རྃ་རྃ། ཞེས་བཟླས་པས། རང་གི་ཁ་རླངས་དང༌། དྲི་མ་སོང་བ་རྣམས་བསྲེག་པར་བསམ། རླུང་ཁར་གཡུག་ལ། ཡྃ་ཡྃ་ཡྃ། ཞེས་བཟླས་པས། རང་གི་དྲི་མ་སོང་བ་རྣམས་གཏོར་བར་བསམ། ཆུ་གཙང་གིས་མེ་ལོང་ངོས་ཁྲུས་བྱས་ལ། ཁྃ་ཁྃ་ཁྃ་ཞེས་བཟླས་པས། རང་གི་དྲི་མ་སོང་བ་རྣམས་བཀྲུས་པར་དམིགས་ལ་ཆུ་གཙང་མར་འཕོ། ལས་གཞུང་བསྲང་ནས་འགུགས་བསྟིམས་སོགས་བྱ། དགྲ་ལིང་མཚོན་ལྟེབ་བམ། རོ་ལྟེབ་ཏུ་གྲགས་པ། ཐོག་མར་ཟུར་བཞི་ནང་དུ་བཅག དེ་ནས་མཐའ་ནས་རིམ་པར་བསྡུས་ལ་སྙིང་གའི་ས་བོན་མཐོང་བར་བྱ་བ་དང༌། འདྲེ་བགེགས་ལ་སྙིང་གའི་ས་བོན་བཅག་ཅིང༌། ཁ་དང་གཤང་ལམ་སྤྲད་པ་འདྲེ་ལྟེབ་གང་རུང་བྱས་ལ་བཞག །དམ་སྲི་ལ་མནན་ཐོད་ར་ཁྱི་ཕག་གསུམ་གཙོ་བོར་གསུངས་སོ། །དངོས་གཞིའི་ཐུན་མོང་གི་ཕྲིན་ལས་ཀྱི་ས་བཅད་དྲུག་པ་བཀའ་བསྒོའི་སྐབས། སྤྲོ་ན། ཧཱུྃ༔ ཉོན་ཅིག་བགེགས་དང་ལོག་འདྲེན་ཚོགས༔ ང་ཡི་བཀའ་ལས་འདའ་མ་བྱེད༔ རྡོ་རྗེ་གསང་བའི་བཀའ་ལས་ནི༔ སྡིག་ཅན་གང་ཞིག་འདའ་བྱེད་པ༔ སྟོབས་ཆེན་ཁྲོ་བོ་ཆེན་པོ་བཅུས༔ ཀླད་པ་ཚལ་པ་བརྒྱ་རུ་ཁོས༔ མིང་ཡང་གྲགས་པར་མི་འགྱུར་བས༔ དེ་བས་ད་ལྟ་ཕྱིར་དེངས་ཤིག༔ ཧཱུྃ་ཧཱུྃ་ཧཱུྃ་སརྦ་བིགྷྣཱན་ཨུ་ཙ་ཏ་ཡ་ཕཊ༔ ཧཱུྃ་བཞི་སོགས་ཀྱིས་གཞུང་ལྟར་བསྐྲད། བདུན་པ་མཚམས་གཅོད་སྐབས། སྤྲོ་ན། ཧཱུྃ༔ སྟེང་འོག་ཕྱོགས་མཚམས་ཐམས་ཅད་ཀུན༔ མཚོན་ཆའི་གུར་ཁང་འབར་བའི་མེ༔ རྡོ་རྗེ་ཁྲོ་བོའི་སྤྲིན་འཕྲོ་བས༔ བགེགས་ཀྱི་སྦྱོར་བ་མཚམས་བཅད་དོ༔ ཕྱི་ནང་གཞན་གསུམ་སོགས་གཞུང་ལྟར་སྦྲེལ། ཡང་ཤིན་ཏུ་བསྡུ་སྐབས། བཀའ་བསྒོ་བསྲུང་འཁོར་གཞུང་གསལ་ཤྭ་ལོ་ཀའི་ཕྱེད་གཉིས་ཀ་སྦྲེལ་བས་ཀྱང་འཐུས། གདབ་ལས་དངོས་ཀྱི་སྐབས་འགུགས་པའི་རྗེས་སུ་ཕུར་པ་སྤྱི་ལྟར་ཟབ་གནད་གབ་པའི་ངན་སྔགས་དྲུག་སྦྱར་བར་འདོད་ན། ལས་དྲུག་ཀར་ཏིང་འཛིན། བསྐུལ་བ། འཕྱོང༌། རྫས། སྔགས། ཕྱག་རྒྱ། དམོད་མོ་སྟེ་བདུན་རེ་ཡོད་པ་རྣམས་ས་བཅད་མཛེས་ཁྲིགས་སུུ་མ་བྱས་པར་ལག་ལེན་དཀྱུས་ལ་དོན་ཚང་བར་བྱས་ཏེ་བཀོད་ན་དྲུག་གི་དང་པོ་ལྷ་དབྱེ་ནི། དཀྱིལ་འཁོར་གསུམ་གྱི་ལྷ་ཚོགས་དང༌། རྡོ་རྗེ་ལེགས་པ་འགོང་པོ་འཁོར་བཅས་ཀྱིས་དགྲ་བགེགས་སྲུང་སྐྱོབ་ཐམས་ཅད་དང་ཕྲལ་ནས། བྱ་སྤུ་རླུང་གིས་གཏོར་བ་བཞིན་ཕྱེ་བར་བསམས་ལ། ཧཱུྃ༔ དམ་ཚིག་ཆེན་པོའི་དུས་ལ་བབ༔ ཁྱེད་ཀྱི་དམ་ཚིག་དུས་ལ་བབ༔ མཐུ་རྩལ་དབྱུང་བའི་དུས་ལ་བབ༔ དངོས་གྲུབ་བར་ཆད་བྱེད་པའི་བགེགས༔ གདུག་ཅིང་སྡང་སེམས་ལྡན་པ་རྣམས༔ གཏོགས་ཤིང་གྲོགས་དང་བྲལ་བར་གྱིས༔ སློབ་དཔོན་གྱིས་གཡས་གཡོན་བྱ་རོག་དང༌། འུག་པའི་དོང་རུ་ཐོགས་ལ་ཐལ་མོ་རྒྱབ་བསྣོལ་འབྱེད་པའི་ཕྱག་རྒྱ་བྱ། ལས་རྡོར་གྱི་ཧོམ་རིམ་པ་གཉིས་པ་བར་ཁྲོལ་ཚག་ཅན། སྟེང་ཁ་ཆོད་དམ་པོ་ཅན་གྱི་སྟེང་མར་ལིངྒ་སྐྱེར་སྐམ་གྱིས་བླུགས་ནས་ཁ་ཆོད་དམ་པར་བརྒྱབ་པའི་འོག་ཏུ་མེ་བླུག་པ་ལ། ཚིལ་ཆེན། གུ་གུལ། ལྷྭམ་འབོག །ཁྱི་ལུད། ཡུག་སའི་ཞབས་མ་རྣམས་ཀྱི་དུད་པ་བཏང་བརྒྱབ་ཏུ་ཅུང་ཟད་ཀྱང་མི་འཐུལ་བ་བྱས་ཏེ། སྒྲུབ་སྔགས་དང་སྤུ་གྲི་སྤེལ་མའི་མཐར། དགྲ་བགེགས་ཧ་ས་ཡ་ར་ཧ་ས་ཡ་ར་ཧྲཱིཿདཎྜ་ཧཱུྃ་ཕཊ༔ སྔགས་ཅི་ནུས་བཟླ། དགྲ་བགེགས་འདི་ལྷ་དང་གྲོལ་ཅིག༔ ཉམས་པའི་དགྲ་བགེགས་མགོན་སྐྱབས་དང་བྲལ་བར་གྱུར་ཅིག༔ དེ་ནས་ལིངྒ་ཧོམ་དངོས་ལ་གཞུག །གཉིས་པ་གཟུགས་ལ་དབབ་པ་ནི། དཀྱིལ་འཁོར་གསུམ་གྱི་ལྷ་ཚོགས་ལས་སྤྲུལ་པ་ཡང་སྤྲུལ་ལྕགས་ཀྱུ་ཐོགས་པ་མང་པོ་དང༌། ཀླུ་ཆེན་འཇོག་པོ་འཁོར་བཅས་ཀྱིས་དགྲ་བོའི་རྣམ་ཤེས་བཀུག་ནས་ལིངྒ་ལ་གཉིས་སུ་མེད་པར་བསྟིམ་པར་བསམས་ལ། ཧཱུྃ༔ སྤྲུལ་པ་ཆེན་པོའི་དུས་ལ་བབ༔ མཐུ་རྩལ་དབྱུང་བའི་དུས་ལ་བབ༔ དངོས་གྲུབ་བར་ཆད་བྱེད་པའི་བགེགས༔ གདུག་ཅིང་སྡང་སེམས་ལྡན་པ་རྣམས༔ ཕོབ་ཅིག་རྣམ་པར་གཟིར་བར་གྱིས༔ འབེབས་པའི་རྒྱ་དང་བཅས་ཡུངས་ཀར་བྲབ་ལ། སྒྲུབ་སྔགས་དང་སྤུ་གྲི་སྦྲེལ་མའི་མཐར། དགྲ་བགེགས་ཨཱ་བེ་ཤ་ཡ་ཨཱ་བེ་ཤ་ཡ་ཧཱུྃ་ཕཊ༔ ཅེས་བཟླ། དགྲ་བགེགས་གཟུགས་ལིངྒ་འདི་ལ་ཕོབ་ཅིག༔ དགྲ་བགེགས་ཀྱི་རྣམ་པར་ཤེས་པ་བླ་དང་བཅས་པ་ལིངྒ་འདི་ལ་ཁུག་ནས་ཐིམ་པར་གྱུར་ཅིག༔ གསུམ་པ་བྱད་དུ་གཞུག་པ་ནི། དཀྱིལ་འཁོར་གསུམ་གྱི་ལྷ་ཚོགས་སྤྲུལ་པ་ཡང་སྤྲུལ་དང་བཅས་པ་རྣམས་དང༌། སྲོག་བདག་སྒྲོལ་གིང་འཁོར་བཅས་ལྕགས་ཀྱུ་ཞགས་པ་ལྕགས་སྒྲོག་ཐོགས་པ་རྣམས་ཀྱིས་དགྲ་བགེགས་རི་དྭགས་རྒྱར་ཆུད་པ་ལྟར་བཅིངས་པར་བསམས་ལ། ཧཱུྃ༔ ཕྱག་བརྙན་ཆེན་པོའི་དུས་ལ་བབ༔ མཐུ་རྩལ་དབྱུང་བའི་དུས་ལ་བབ༔ དངོས་གྲུབ་བར་ཆད་བྱེད་པའི་བགེགས༔ གདུག་ཅིང་སྡང་སེམས་ལྡན་པ་རྣམས༔ ཟུང་ཞིག་རྒྱོབ་ཅིག་རྣམ་པར་ཆིངས༔ བལ་ཚོན་སྣ་ལྔ་དང༌། ཤི་སྐྲ་ཡུག་སྐྲའི་སྐུད་པ་ཕྱིར་ཟློག་ཏུ་དཀྲི་ཞིང༌། མ་འབྱོར་ན་སྐུད་པ་སྔོ་དམར་གྱིས་འཆིང༌། མཆན། ཡན་ལག་བཀྱིག་པའི་རྒྱ་བྱས་ལ། སྒྲུབ་སྔགས་དང་སྤུ་གྲི་སྤེལ་མའི་མཐར། དགྲ་བགེགས་ཤི་གྷྲཾ་ཨ་ན་ཡ་ཧཱུྃ་ཕཊ༔ ཅེས་བཟླ། དགྲ་བགེགས་ཀྱི་དབང་པོ་ཡན་ལག་སྡོམས་ཤིག༔ དགྲ་བགེགས་འདི་གྲུ་གུ་ཐུལ་དུ་ཆིངས་ཤིག་སྡོམས་ཤིག༔ བཞི་པ་སྨྱོ་རུ་གཞུག་པ་ནི། དཀྱིལ་འཁོར་གསུམ་ཡང་སྤྲུལ་དང་བཅས་པ་དང༌། གནམ་ཐེལ་འཁོར་བཅས་ཀྱིས་སྨྱོ་དུག་གི་ཆར་ཕབ་ནས། དགྲ་བགེགས་སེམས་མྱོས་ལུས་སྐྲངས། དྲན་མེད་དུ་གྱུར་ནས་མུ་ཅོར་སྨྲ་བར་བསམས་ལ། ཧཱུྃ༔ ཤྭ་ན་མུ་ཁའི་དུས་ལ་བབ༔ མཐུ་རྩལ་དབྱུང་བའི་དུས་ལ་བབ༔ དངོས་གྲུབ་བར་ཆད་བྱེད་པའི་བགེགས༔ གདུག་ཅིང་སྡང་སེམས་ལྡན་པ་རྣམས༔ ཟུངས་ཤིག་རྒྱོབ་ཅིག་རྣམ་པར་ཆིངས༔ དྷ་དུ་ར་དང་དུག་སྣ་ཚོགས་སྦྱར་བའི་སྐྱོ་མ་ཁར་བླུགས་ཤིང་བྱུག་པའི་རྒྱ་བྱས་ལ། སྒྲུབ་སྔགས་དང༌། སྤུ་གྲི་སྦྲེལ་བའི་མཐར། དགྲ་བགེགས་ཛྭ་ལ་པ་ཡ་ཛྭ་ལ་པ་ཡ་ཧཱུྃ་ཕཊ༔ ཅེས་བཟླ། དགྲ་བགེགས་སྨྱོ་རུ་ཆུག་ཅིག༔ སྨྱོ་རུ་ཆུག་འབོགས་སུ་ཆུག༔ དྲན་པ་ཉམས་པར་གྱུར་ཅིག༔ དེ་ལྟར་བཞི་ཀུན་གྱི་མགོ་ལ་གདབ་པ་སྔོན་དུ་འགྲོ་བས། གཅིག་ཁོང་ཁྲ་གཏོངས་ལ། ཕུར་གདབ་དངོས་ཀྱི་རཀྟས་གཟི་བྱིན་བསྐྱེད་པ་ནས། རལ་གྲིས་གཏུབས་ཤིང་ཡུངས་ཐུན་བྲབ་རྗེས། ལྔ་པ་རྡུལ་དུ་བརླག་པ་ནི། དཀྱིལ་འཁོར་གསུམ་གྱི་ལྷ་ཡང་སྤྲུལ་དང་བཅས་པ་དང༌། ལྷ་བདུད་རྣམ་རོལ་འཁོར་དང་བཅས་པས། རྡོ་རྗེ་རི་རབ་ཀྱི་ཐོ་བ་ཐོགས་ནས་དགྲ་བགེགས་ཐུལ་དུ་བརླག་པར་བསམ་ལ། ཧཱུྃ༔ ས་བདག་ཆེན་པོའི་དུས་ལ་བབ༔ མཐུ་རྩལ་དབྱུང་བའི་དུས་ལ་བབ༔ དངོས་གྲུབ་བར་ཆད་བྱེད་པའི་བགེགས༔ གདུག་ཅིང་སྡང་སེམས་ལྡན་པ་རྣམས༔ ལུས་ངག་རྡུལ་ཕྲན་བཞིན་དུ་རློག༔ དཔྱི་མིག་གི་གཏུན་ཁུང་དང༌། གྲུ་སོག་གི་ཐོ་བའམ། ཡང་ན་རྡོ་རྗེའི་ཐོ་བ་དང༌། ཧོམ་གཏུན་གྲུ་གསུམ་གྱི་བར་དུ་བརྡུང་བའི་ཕྱག་རྒྱ་བྱས་ལ། སྒྲུབ་སྔགས་དང༌། སྤུ་གྲི་སྦྲེལ་བའི་མཐར། དགྲ་བགེགས་ཏ་ཐཱ་ཡ་ཏ་ཐཱ་ཡ་ཧཱུྃ་ཕཊ༔ ཅེས་བཟླ། དགྲ་བགེགས་རྡུལ་དུ་བརླག་པར་གྱུར་ཅིག༔ གཅིག་ཀུན་གྱི་གཞུག་ལ་གདབ་པ་ཞལ་བསྟབ་གཞུང་གསལ་ལྟར་གྲུབ་ནས། སྤྲོ་ན་དྲག་པོའི་ཞལ་དུ་སྟོབས་པ་ནི། སླར་ཡང་དཀྱིལ་འཁོར་གསུམ་གྱི་ལྷ་ཚོགས་དམ་ཅན་སྲུང་མ་དང་བཅས་པའི་ཞལ་དུ། རེ་མ་ཏིས་གྲོགས་བྱས་པ་སྟབས་པས་དགྱེས་པའི་རྐན་སྒྲ་དང་བཅས་ཧབ་ཧབ་རོལ་ཞིང་གསོལ་བར་བསམས་ལ། ཧཱུྃ༔ བདག་ཉིད་ཆེན་མོའི་དུས་ལ་བབ༔ མཐུ་རྩལ་དབྱུང་བའི་དུས་ལ་བབ༔ དངོས་གྲུབ་བར་ཆད་བྱེད་པའི་བགེགས༔ གདུག་ཅིང་སྡང་སེམས་ལྡན་པ་རྣམས༔ ང་ཡི་དབང་དུ་གྱུར་ནས་ཀྱང་༔ བསྒོ་བའི་བཀའ་རྣམས་ཉན་པར་གྱིས༔ བྲ་མའི་ཧོམ་ཆག་གང་བ་ཞིག་བརྩིགས་པ་མེ་སྦར་ལ་ཧོམ་གཟར་དུ་ལིང་རོ་སྟོབ་པའི་ཕྱག་རྒྱས་བསྲེག་པའམ། སླར་ཡང་ལིང་རོ་དང༌། སྣོད་ཁྲག་ཆང་གིས་བཤལ་བ་བཟློག་པ། སྲུང་མའི་གཏོར་མ་དང་བཅས་པར་བསྟབས་ལ། སྒྲུབ་སྔགས་སྤུ་གྲི་སྒྲེལ་མའི་ཤམ་དུ། དགྲ་བགེགས་བྷིནྡྷ་ཡ་བྷིནྡྷ་ཡ་ཧཱུྃ་ཕཊ༔ ཅེས་བཟླ། དགྲ་བགེགས་ཀྱི་ཤ་ཁྲག་རུས་པ་དང་བཅས་པ་ལྷག་མ་མེད་པར་རོལ་ཅིག༔ ཅེས་སོ། །ཡང་བཟློག་པའི་སྐབས་སུ་འང་བཟློག་བྱང་གཞུང་གསལ་གྱིས་འཐུས་ཀྱང༌། ཐུན་མིན་རྩ་གཞུང་ལ་མཚོ་རྒྱལ་གྱིས་བསྩལ་བའི་སྙན་བརྒྱུད་ཡང་ཕུར་སྦྲག་མ་ལས་འབྱུང་བས་ཁ་བསྐང་བ་སྦྱར་འདོད་ན། ཧཱུྃ་ཧཱུྃ་ཧཱུྃ༔ བཞེངས་ཤིག་རྡོ་རྗེ་གཞོན་ནུའི་ཚོགས༔ དབྱིངས་ལས་སྐྱེ་བ་མ་མཆིས་ཀྱང་༔ རིག་པ་རང་སྣང་རོལ་པའི་རྩལ༔ དྲག་ཤུལ་ཆེན་པོའི་གཟི་བྱིན་བསྐྱེད༔ དགྲ་བགེགས་ཤ་རུས་ཁྲག་གི་མཚོ༔ དགྱེས་པའི་གད་མོ་དང་བཅས་བཞེས༔ འབར་བ་མཆོག་གི་ཆོ་འཕྲུལ་གྱིས༔ ནག་ཕྱོགས་དགྲ་བགེགས་རྩད་ནས་ཆོད༔ རྣལ་འབྱོར་བདག་ཅག་འཁོར་བཅས་ལ༔ ཕས་རྒོལ་རྦོད་གཏོང་དམོད་པའི་མཚོན༔ བཟློག་གཟིར་ཕྲིན་ལས་འགྲུབ་པར་མཛོད༔ ཧཱུྃ་བྷྱོ༔ ཤིན་ཏུ་རྣམ་དག་ཡེ་ཤེས་ངང་༔ སྙིང་རྗེའི་སྐུ་ཤར་ཧེ་རུ་ཀ༔ བཅོམ་ལྡན་རྡོ་རྗེ་གཞོན་ནུ་ནི༔ ཤེས་རབ་ཡུམ་དང་མཉམས་སྦྱོར་བས༔ ༈ གདོད་མའི་བདེ་གཤེགས་སྙིང་པོ་ལས༔ གློ་བུར་རྟོགས་པས་བཏགས་པ་ཡི༔ འདོད་ཆགས་ཞེ་སྡང་གཏི་མུག་ཚོགས༔ རྣམ་པར་འགྱུར་བས་བྱུང་བ་ཡི༔ ནད་རིགས་བཞི་བརྒྱ་རྩ་བཞི་ཟློག༔ འབར་གཡོ་འཐིབས་པ་ལས་བྱུང་བའི༔ གདོན་རིགས་སུམ་བརྒྱ་དྲུག་ཅུ་ཟློག༔ གཟུང་ཡུལ་ཞེན་པ་ལས་བྱུང་བའི༔ ས་ཆུ་མེ་རླུང་གཡོ་འཁྲུགས་ཟློག༔ འཛིན་པའི་ང་བདག་ལས་བྱུང་བའི༔ རྩ་དང་རླུང་གི་ཆོ་འཕྲུལ་ཟློག༔ གཉིས་མེད་ཡེ་ཤེས་འཁྲུལ་པའི་རྩལ༔ ཀུན་བརྟགས་སེམས་ཀྱི་བག་ཆགས་ཟློག༔ སྣ་ཚོགས་རྟོག་པའི་གཞན་དབང་ཅན༔ སྡེ་བརྒྱད་གདུག་པའི་གཡོ་འཁྲུགས་ཟློག༔ བཟློག་གོ་དམར་ཆེན་གཏོར་མས་ཟློག༔ མི་མཐུན་ཐམས་ཅད་དབྱིངས་སུ་ཟློག༔ བསྒྱུར་རོ་ལྟས་ངན་དགྲ་ལ་སྒྱུར༔ ཡེ་ཤེས་ཆེན་པོ་མཐར་ཕྱིན་མཛོད༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བྃ་ཧཱུྃ་ཕཊ༔ ས་མ་ཡ་བྷྱོ་བྷྱོ་ཟློག་ཟློག༔ ཧཱུྃ་བྷྱོཿ མེ་ལོང་ཡེ་ཤེས་ངང་ཉིད་ལས༔ བཅོམ་ལྡན་བཛྲ་ཀཱི་ལ་ཡ༔ གཙོ་འཁོར་སྤྲུལ་པ་ཡང་སྤྲུལ་བཅས༔ ཐོགས་མེད་ཕྲིན་ལས་རྩལ་ཕྱུང་ལ༔ ཉོན་མོངས་ཞེ་སྡང་ལས་བྱུང་བའི༔ མི་མཐུན་འགལ་རྐྱེན་བར་ཆད་ཟློག༔ གདོད་མའི་བདེ་གཤེགས་སོགས་གོང་གི་འགྲེ། ཧཱུྃ་བྷྱོ༔ མཉམ་ཉིད་ཡེ་ཤེས་ངང་ཉིད་ལས༔ བཅོམ་ལྡན་རཏྣ་ཀཱི་ལ་ཡ༔ གཙོ་འཁོར་སྤྲུལ་པ་ཡང་སྤྲུལ་བཅས༔ ཐོགས་མེད་ཕྲིན་ལས་རྩལ་ཕྱུང་ལ༔ ཉོན་མོངས་ང་རྒྱལ་ལས་བྱུང་བའི༔ མི་མཐུན་འགལ་རྐྱེན་བར་ཆད་ཟློག༔ གདོད་མའི་བདེ་གཤེགས་༴ །ཧཱུྃ་བྷྱོཿ སོར་རྟོག་ཡེ་ཤེས་ངང་ཉིད་ལས༔ བཅོམ་ལྡན་པདྨ་ཀཱི་ལ་ཡ༔ གཙོ་འཁོར་སྤྲུལ་པ་ཡང་སྤྲུལ་བཅས༔ ཐོགས་མེད་ཕྲིན་ལས་རྩལ་ཕྱུང་ལ༔ ཉོན་མོངས་འདོད་ཆགས་ལས་བྱུང་བའི༔ མི་མཐུན་འགལ་རྐྱེན་བར་ཆད་ཟློག༔ གདོད་མའི་༴ ཧཱུྃ་བྷྱོཿ བྱ་གྲུབ་ཡེ་ཤེས་ངང་ཉིད་ལས༔ བཅོམ་ལྡན་ཀརྨ་ཀཱི་ལ་ཡ༔ གཙོ་འཁོར་སྤྲུལ་པ་ཡང་སྤྲུལ་བཅས༔ ཐོགས་མེད་ཕྲིན་ལས་རྩལ་ཕྱུང་ལ༔ ཉོན་མོངས་ཕྲག་དོག་ལས་བྱུང་བའི༔ མི་མཐུན་འགལ་རྐྱེན་བར་ཆད་ཟློག༔ གདོད་མའི་སོགས་འགྲེའོ། །ཧཱུྃ་བྷྱོཿ མི་དགེ་བཅུ་པོ་གནས་དག་ཅིང་༔ དགེ་བ་བཅུ་པོ་གནས་གྱུར་པ༔ ཁྲོ་བཅུ་ཁྲ་ཕྱག་འཁོར་བཅས་ཀྱིས༔ རྒྱུ་འབྲས་འཆོལ་བར་སྤྱོད་པ་ཟློག༔ གདོད་མའི་༴ ཧཱུྃ་བྷྱོཿ རང་བྱུང་ཡེ་ཤེས་གཅིག་ཉིད་ལས༔ དུ་མའི་གར་གྱི་རྣམ་འཕྲུལ་པ༔ སྒོ་མ་སྲུང་མར་བཅས་པ་ཡིས༔ སྣ་ཚོགས་རྟོག་པ་ཐམས་ཅད་ཟློག༔ གདོད་མའི་བདེ་གཤེགས༴ ཡང་བསྡུ་ན། ཧཱུྃ་ཧཱུྃ་ཧཱུྃ༔ བཞེངས་ཤིག་སོགས་རྡོ་རྗེ་མཚོན་ཆར་གཞུང་བཞིན། དྲག་པོའི་ལས་ལ་བཞེངས༔ ཞེས་པའི་འཕྲོས་སུ། འདིར་གསལ། གདོད་མའི་བདེ་གཤེགས་སོགས་སྦྱར་རོ། །བཟློག་པ་གྲངས་གསོག་སྐབས་བཟློག་བྱང་གསུམ་མམ། བདུན་ནམ། དགུ་ལྟ་བུ་གང་རུང་གི་མཚམས། དམིགས་པ་གསལ་གདབ་ཅིང་བཟློག་སྔགས་གསོག་པར་བྱ། ༈ །ཡང་ཚོགས་བརྒྱ་སྟོང་སོགས་གྲངས་གསོག་སྐབས་སྙན་བརྒྱུད་ཡང་དག་ཟབ་ཏིག་ལས་གསུངས་པ་ནི། ཐབས་ཤེས་ཀྱི་ཚོགས་རྫས་ཚོགས་པར་བྱས་ལ། བྱིན་བརླབ་ནི། རྃ་ཡྃ་ཁྃ༔ དབྱིངས་རིག་ཟུང་འཇུག་མེ་རླུང་ཆུས༔ ཚོགས་རྫས་དངོས་འཛིན་བསྲེག་གཏོར་བཀྲུས༔ སྟོང་ཉིད་བྷནྡྷ་བདེ་བ་ཆེ༔ ཚོགས་ཀྱི་འདུ་བ་རྒྱ་མཚོར་གྱུར༔ ཨོཾ་ཨཱཿཧཱུྃ༔ ཚོགས་མགྲོན་སྤྱན་འདྲེན་ནི། ཧཱུྃ་ཧཱུྃ་ཧཱུྃ༔ དག་མཉམ་ཆོས་སྐུའི་ཀློང་ཡངས་ནས༔ ཁ་སྦྱོར་རྩལ་འཆང་ཧེ་རུ་ཀ༔ ཕྲིན་ལས་གྲུབ་པའི་ཐིག་ལེའི་སྐུ༔ ཚུར་གཤེགས་ཚོགས་ཀྱི་འདུ་བར་སྤྱོན༔ ཨེ་ཧྱ་ཧི་བཛྲ་ས་མཱ་ཛཿ ཚོགས་ཕུད་ཚོགས་མཆོད་བཤགས་བསྒྲལ་བསྟབ་དཀྱུས་གཅིག་ཏུ་འབུལ་བ་ནི། ཨོཾ་ཨཱཿཧཱུྃ༔ དངོས་ཡིད་དམ་ཚིག་རྫས་ཀྱིས་མཆོད༔ ཉམས་ཆགས་སྡིག་ལྟུང་སྙིང་ནས་བཤགས༔ གཟུང་འཛིན་འཁྲུལ་པ་བསྒྲལ་བའི་ཚོགས༔ ཁྲག་འཐུང་ཆེན་པོའི་ཞལ་དུ་སྦྱོར༔ ཨོཾ་བཛྲ་ཀཱི་ལི་ཀཱི་ལ་ཡ་སརྦ་དྷརྨ་པཱ་ལ་ས་པ་རི་ཝཱ་ར་ག་ཎ་ཙཀྲ་པཱུ་ཛ་ཁཱ་ཧི༔ སྐོང་བཤགས་བྱེད་པར་སྤྲོ་ན་འདིར་སྦྱར། ལྷག་མ་ནི། ཨོཾ་ཨཱཿཧཱུྃ་ཧོཿས་བརླབ། ཕཻཾ་ཕཻཾ༔ དཔལ་གྱི་བཀའ་སྡོད་ཕོ་ཉའི་ཚོགས༔ ལྷག་མའི་ལོངས་སྤྱོད་འདི་བཞེས་ལ༔ གཟུང་འཛིན་འཁྲུལ་པ་ཞི་བ་དང་༔ རིག་རྩལ་རྒྱས་པའི་ཕྲིན་ལས་མཛོད༔ ཨུཙྪིཥྟ་བ་ལིཾ་ཏ་ཁཱ་ཧི། ཞེས་པ་རྣམས་སླད་ནས་ཁ་སྐོང་དུ་བསྡེབས་པ་དགེ། །།

[edit]

@#/__/snyan brgyud phur pa'i gdab kha la nye bar mkho ba'i zur 'debs cung zad bkod pa bzhugs so//_@#/__/bla ma dpal chen rdo rje gzhon nur 'dud/___/snyad brgyud phrin las phur pa'i gnad tig gi smad las drag po'i srung zlog bsad pa'i las rim khyer bder bkod pa srid pa thal 'byin rdo rje'i mtshon char gyi zur 'debs nye bar mkho ba'i yan lag cung zad 'god pa la/__srung 'khor ni/__dar ras dkar po'am/__rgya shog la mtshal lam/__rgya snag la sel med kyi chos sman bsres pas/__mu khyud rim pa drug bskor ba'i lte ba mthing ga'i dbus su hU~M/__de'i dbus su thig le'i thad nas brtsams te/__oM badz+ra kI li kI la ya hU~M/__zhes bsnyen sngags sham du bsrung bya 'chang ba po che ge mo'i lus ngag yid gsum la srungs shig rak+Sha rak+Sha:__'di rnams phreng gcig gis ma shong na yig mjug nang du rdzogs par bri/__de rgyab mu khyud ser po la mdun nas brtsams te/__oM badz+ra kI li kI la ya sarba big+h+nAn ba~M hU~M phaT:__ces sgrub sngags sham du 'dod gsol gong ltar sbyar ba bri/__de rgyab mu khyud nang drag 'khor sngon po rtsibs bcu'i dbus rnams su hU~M re re dang*/__so so'i mthar mdun nas rim pa bzhin shar stod du/__oM badz+ra kro d+ha hU~M ka ra hU~M:__gardza gardza hU~M phaT:__bsrung bya sogs 'dod gsol gong bzhin sbyar ba yig mgo phyir bstan gyis g.yas su bskor/__de bzhin shar du/__oM badz+ra kro d+ha bi dza ya hU~M:__ha na ha na hU~M phaT:__'dod gsol sbyar ba kun la 'gres so/__shar lhor/__oM badz+ra kro d+ha nI la daN+Da hU~M:__da ha da ha hU~M phaT:__lho ru/__oM badz+ra kro d+ha ya man+ta ka hU~M:__pa tsa pa tsa hU~M phaT:__lho nub tu/__oM badz+ra kro d+ha Ar+ya a tsa la hU~M:__b+han+d+ha b+han+d+ha hU~M phaT:__nub tu/__oM badz+ra kro d+ha ha ya gr-I ba hU~M:__hu lu hu lu hU~M phaTaH__nub smad du/__oM badz+ra kro d+ha ma hA ba la hU~M:__s+pho Ta s+pho Ta hU~M phaT:__nub byang du/__oM badz+ra kro d+ha a pa rA dzi ta hU~M:__tiSh+Tha tiSh+Tha hU~M phaT:__byang du/__oM badz+ra kro d+ha a mr-i ta kuN+Da lI hU~M:__tshin+d+ha tshin+d+ha hU~M phaT:__byang shar du/__oM badz+ra kro d+ha tre lo kya bi dza ya hU~M:__bin+d+ha bin+d+ha hU~M phaT:__rtsibs mchan dmar po la rdo rje bcu bri/__de rgyab mu khyud ser po la/__dbyangs yig bcu drug ni/__a A/__i I/__u U/__r-i r-I/__l-i l-I/__e ai/__o au/__aM AH__gsal byed so lnga ni/__ka kha ga g+ha nga*/__tsa tsha dza dz+ha nya/__Ta Tha Da D+ha Na/__ta tha da d+ha na/__pa pha ba b+ha ma/__ya ra la wa/__sha Sha sa ha/__k+ShaH__rten 'brel snying po ni/__ye d+harma he tu pra b+ha wa he tun+te Shan+ta thA ga to h+ya ba data/__te Shany+tsa yo ni ro d+ha e waM ba dI ma hA shra ma NaH__de rgyab mu khyud nag po la rdo ra ser po/__de rgyab mu khyud la me ri dmar ser g.yas su 'khor ba bri/__yi ge rnams mgo phyir bstan bya/__rdzas sha lnga/__bdud rtsi lnga/__ga bur/__gla rtsi/__shing kun/__shu dag nag po/__gur gum/__gi waM/__gu gul/__drag sngags bzlas pa'i yungs dkar rnams dri bzang sbyar bas byug go__/bzlog pa'i 'khor lo ni/__dug shog la/__dug khrag bsres pa'i snag tsha gtsang mas/__mu khyud rim pa lnga bskor ba'i lte bar hU~M gi mthar thig le dbu nas/__sgrub sngags kyi sham bur/__byad kha phur kha rbad 'dre rbod gtong mi kha bram chu lo zla zhag kag chag che nyam nga thams cad dgra bgegs byad ma'i steng du b+h+yo b+h+yo zlog zlog__/'di rnams yig phreng gcig la ma shong na yig mjug phyir rdzogs par bya/__de rgyab rtsibs bcu'i dbus rnams su hU~M re re ngo phyir bstan/__shar stod du/__oM badz+ra krod+ha hU~M ka ra hU~M:__gardza gardza dgra bgegs mA ra ya hU~M phaT:__ces sogs khro bcu'i sngags go rim ma log par bkod pa'i sham bur/__byad kha phur kha sogs so sor sbyar la/__rtsibs mchan la phur bu dbal phyir bstan bcu bri/__de rgyab mu khyud ljang gu la/__sgrub sngags dang spu gri sbrel ba'i sham bur/__rbod zor sarba a pa ka ra b+h+yo b+h+yo zlog zlog rbad nan:__zhes pa'i bzlog sham sbyar ba bri/__de rgyab mu khyud la/__me ri g.yon skor du bri/__rdzas bong nga*/__thang phrom/__gri khrag__/thal chen/__gu gul nag po rnams sbyar bas byug__/yang srung 'khor 'bring po byed na/__lte ba dang*/__khro bcu'i 'dod gsol/__bsrung bya 'chang ba po'i sogs kyi mal du/__badz+ra kA wa tsi rak+Sha rak+ShaH__zhes bsgyur/__bzlog 'khor la/__khro bcur hU~M dor nas gong gsal dpe brjod bzhin sngags rkyang pa 'phred bris kyis/__byad kha sogs kyi 'dod gsol mal du/__rbod zor sarba sogs sbyar/__gzhan rnams snga ma bzhin bri/__yang de'ang mi nus na/__gzhi 'bring po bzhin la/__srung zlog gnyis kar khro bcu la hU~M rkyang pas 'thus par bya/__gang ltar yang*/__gnyis kar sbyong khrus spyi ltar bgyis nas gu gul gyis bdug__/'khor lo rnams lhar bskyed nas/__srung zlog gam rang sngags brgya rtsa las mi nyung ba bzla ba dang*/__'dod gsol bcas kyi mthar/__rten 'brel snying pos rab tu gnas shing brtan bzhugs bya/__lha 'od du zhu nas srung ba'i gur khang bdun rim dang*/__bzlog 'khor khro bo'i dmag dpung mtshon cha'i phung por gyur par bsgom/__bzlog pa tshar skabs srung 'khor mang po yod na lte ba ma nyams par ltebs la/__tshon skud sna lngas bcings te/__bsrung bya rnams kyi mgul du gdags/__gcig las med na pu ri'i lte ba'am/__gnas khang gi thog khar dbub pa sogs bya/__bzlog 'khor me la bsreg go__/ling+ga bca' ba ni/__dur khrod kyi 'jag ma/__grog mkhar gyi sa/__dgra yi khang sa/__dri ma drug gang rnyed dang sbyar la/__rab khru gang*/__tha na mtho gang ba bya/__de'i snying khar srog gcod spu gri'i 'khor lo bya ba ni/__dug shog la dug khrag sbyar bas/__dug shing tsher ma can nam/__mi gsod pa'i mdas myu gu byas te/__tsakra rtsibs drug yangs par lag gnyis mgo bo bcas rtsibs gsum la gzud/__rkang pa gnyis gsang ba bcas rtsibs gsum la gzud/__ling+ga'i lte bar 'khor lo rtsibs dgu nang du bstan pa'i dkyil du nr-i tri'i mthar/__ling+ga'i mgrin phyogs nas yig mgo phyi la bstan te/__gnod byed dgra bgegs dam sri gdug pa can rnams kyi bla srog rnam shes mthu stobs nus pa thams cad khug dzaHdzaH__dzaHhU~M ba~M hoH__zhes pa tsam mam/__spro na bla 'gugs sngags kyang bri/__rtsibs dgu la/__oM badz+ra kI li kI la ya hU~M phaTaH__ces 'bru re re bri/__ling+ga'i mgo phyogs nas brtsams te/__gzhung gsal spu gri'i sngags dang*/__dza khram nyer brgyad kyis bskor ro/__/yang dmigs bsal dam sri mnan pa la/__'khor lo mu khyud gsum bskor ba'i gnyis par rtsibs drug pa bgegs kyi gzugs mi lus bya mgo can tshang bar bris te/__shar rtsibs la mgo__/shar lhor lag g.yon/__lho nub tu rkang pa g.yon nub tu mtshan ma/__byang du rkang pa g.yas/__byang shar du lag pa g.yas rnams rtsibs nang du tshud par bya/__mgo la/__oM badz+ra kI li kI la ya:__snying khrag shad dza:__a dzi te:__a pa ra dzi te:__lag g.yas la/__ma rak+mo yak+mo kA la rU pa:__snying rtsa la yaM yaM:__thib thib:__lag g.yon la/__tsit+ta srog la dung dung :__srog la yaM yaM:__dza ye bi dza ye:__myag myag:__sod sod:__tsakra se na gtubs/__rkang pa g.yas la/__snying la phril phril:__srog la myag myag:__ka taM ka taM:__snying rtsa la yaM yaM:__snying kha la rag dun tri:__rkang pa g.yon la/__ma ma pa shaM ku ru:__d+ha d+hi ma ma karma:__i dan shri traM:__ma ti nya na ka 'a ya:__ka ra ye:__ma ra sa ni pra marta na ye hU~M phaT:__yan lag bzhi la/__dza hU~M ba~M ho:__snying gar dzaHkha sprod kyi bar du triHsteng du nan:__'og tu khug__/gsang gnas su phaT:__rkang mthil gnyis la yaM/__rna bar 'on/__mig la long*/__sna la zhom/__kha la dung dung bya ba bri/__snying kha'i tri'i steng nas brtsams te/__ma rak+mo yak+mo kA la rU pa:__dam sri dzaHdza:__snying rtsa la ya~M ya~M:__dam sri dzaHdzaH__srog rtsa la ya~M ya~M:__snying la phril phril:__dam sri dzaHdzaH__srog la chum chum:__tsit+ta srog la dung dung :__snying khrag srog la shad shad:__dam sri dzaHdzaH__thuM ri li li:__tseg tseg:__'ur 'ur:__shig shig:__'gul 'gul:__myag myag:__dam sri dzaHdzaH__sod sod:__d+ha d+hi ma ma karma shI g+h+raM ka ra ye:__ma ra se na:__pra ma ra ta na ye hU~M:__dam sri dzaHdzaHkhug:__ces 'gugs sngags bris/__mu khyud phyi mar ling+ga'i mgo nas yig mgo phyir bstan gyis/__ma rak+mo yak+mo kA la rU pa:__gnod byed dam sri 'byung tshogs stam+b+ha ya nan:__snying rtsa la sogs nas/__dam sri dzaHdzaHthams cad kyi mal du mnan sngags bsgyur nas gong ltar bri/__de phyir dzaHkhram nyer gcig gis bskor/__yang bsreg ling bri bar 'dod na/__gzhi mnan ling bzhin la/__dgra bgegs spyir byed na/__snying gar dzaH__kha sprod kyi bar du n+ri tri/__de'i steng du e/__g.yon du hur/__'og tu thuM/__g.yas su dza:__zhes pa'i 'bru bzhis phyogs bzhir bskor/__de rgyab spu gri'i sngags kyi/__dam sri dzaHdzaH__zhes pa rnams kyi mal du/__dgra bgegs dam sri 'byung tshogs khug dzaH__zhes bsgyur ba dang*/__phyi'i spu gri'i sngags kyi/__gnod byed dam sri 'byung po thams cad stam b+ha ya nan/__zhes pa rnams kyi mal du/__gnod byed dgra bgegs 'byung po thams cad dz+wa la raM:__zhes so sor bsgyur ba khyad par tsam mo/__/de ltar bris grub nas chu zan gtsang mas shog gu'i phyi nang thams cad kyi/__de nas ling khrus rgyas pa la 'jam mgon rdo rje 'chang gi gsungs nor bu chu dwangs ltar grub na shin tu legs/__mdor bsdus ni/__rang nyid thun mtshams kyi lha'i nga rgyal dang ldan pas/__ling+ga rnams skyer skam gyi khar btegs/__dpal 'bar gyi me lces gzhur la/__ngag tu/__ra~M ra~M ra~M/__zhes bzlas pas/__rang gi kha rlangs dang*/__dri ma song ba rnams bsreg par bsam/__rlung khar g.yug la/__ya~M ya~M ya~M/__zhes bzlas pas/__rang gi dri ma song ba rnams gtor bar bsam/__chu gtsang gis me long ngos khrus byas la/__kha~M kha~M kha~M zhes bzlas pas/__rang gi dri ma song ba rnams bkrus par dmigs la chu gtsang mar 'pho/__las gzhung bsrang nas 'gugs bstims sogs bya/__dgra ling mtshon lteb bam/__ro lteb tu grags pa/__thog mar zur bzhi nang du bcag__de nas mtha' nas rim par bsdus la snying ga'i sa bon mthong bar bya ba dang*/__'dre bgegs la snying ga'i sa bon bcag cing*/__kha dang gshang lam sprad pa 'dre lteb gang rung byas la bzhag__/dam sri la mnan thod ra khyi phag gsum gtso bor gsungs so/__/dngos gzhi'i thun mong gi phrin las kyi sa bcad drug pa bka' bsgo'i skabs/__spro na/__hU~M:__nyon cig bgegs dang log 'dren tshogs:__nga yi bka' las 'da' ma byed:__rdo rje gsang ba'i bka' las ni:__sdig can gang zhig 'da' byed pa:__stobs chen khro bo chen po bcus:__klad pa tshal pa brgya ru khos:__ming yang grags par mi 'gyur bas:__de bas da lta phyir dengs shig:__hU~M hU~M hU~M sarba big+h+nAn u tsa ta ya phaT:__hU~M bzhi sogs kyis gzhung ltar bskrad/__bdun pa mtshams gcod skabs/__spro na/__hU~M:__steng 'og phyogs mtshams thams cad kun:__mtshon cha'i gur khang 'bar ba'i me:__rdo rje khro bo'i sprin 'phro bas:__bgegs kyi sbyor ba mtshams bcad do:__phyi nang gzhan gsum sogs gzhung ltar sbrel/__yang shin tu bsdu skabs/__bka' bsgo bsrung 'khor gzhung gsal shwa lo ka'i phyed gnyis ka sbrel bas kyang 'thus/__gdab las dngos kyi skabs 'gugs pa'i rjes su phur pa spyi ltar zab gnad gab pa'i ngan sngags drug sbyar bar 'dod na/__las drug kar ting 'dzin/__bskul ba/__'phyong*/__rdzas/__sngags/__phyag rgya/__dmod mo ste bdun re yod pa rnams sa bcad mdzes khrigs su+u ma byas par lag len dkyus la don tshang bar byas te bkod na drug gi dang po lha dbye ni/__dkyil 'khor gsum gyi lha tshogs dang*/__rdo rje legs pa 'gong po 'khor bcas kyis dgra bgegs srung skyob thams cad dang phral nas/__bya spu rlung gis gtor ba bzhin phye bar bsams la/__hU~M:__dam tshig chen po'i dus la bab:__khyed kyi dam tshig dus la bab:__mthu rtsal dbyung ba'i dus la bab:__dngos grub bar chad byed pa'i bgegs:__gdug cing sdang sems ldan pa rnams:__gtogs shing grogs dang bral bar gyis:__slob dpon gyis g.yas g.yon bya rog dang*/__'ug pa'i dong ru thogs la thal mo rgyab bsnol 'byed pa'i phyag rgya bya/__las rdor gyi hom rim pa gnyis pa bar khrol tshag can/__steng kha chod dam po can gyi steng mar ling+ga skyer skam gyis blugs nas kha chod dam par brgyab pa'i 'og tu me blug pa la/__tshil chen/__gu gul/__l+h+wam 'bog__/khyi lud/__yug sa'i zhabs ma rnams kyi dud pa btang brgyab tu cung zad kyang mi 'thul ba byas te/__sgrub sngags dang spu gri spel ma'i mthar/__dgra bgegs ha sa ya ra ha sa ya ra hrIHdaN+Da hU~M phaT:__sngags ci nus bzla/__dgra bgegs 'di lha dang grol cig:__nyams pa'i dgra bgegs mgon skyabs dang bral bar gyur cig:__de nas ling+ga hom dngos la gzhug__/gnyis pa gzugs la dbab pa ni/__dkyil 'khor gsum gyi lha tshogs las sprul pa yang sprul lcags kyu thogs pa mang po dang*/__klu chen 'jog po 'khor bcas kyis dgra bo'i rnam shes bkug nas ling+ga la gnyis su med par bstim par bsams la/__hU~M:__sprul pa chen po'i dus la bab:__mthu rtsal dbyung ba'i dus la bab:__dngos grub bar chad byed pa'i bgegs:__gdug cing sdang sems ldan pa rnams:__phob cig rnam par gzir bar gyis:__'bebs pa'i rgya dang bcas yungs kar brab la/__sgrub sngags dang spu gri sbrel ma'i mthar/__dgra bgegs A be sha ya A be sha ya hU~M phaT:__ces bzla/__dgra bgegs gzugs ling+ga 'di la phob cig:__dgra bgegs kyi rnam par shes pa bla dang bcas pa ling+ga 'di la khug nas thim par gyur cig:__gsum pa byad du gzhug pa ni/__dkyil 'khor gsum gyi lha tshogs sprul pa yang sprul dang bcas pa rnams dang*/__srog bdag sgrol ging 'khor bcas lcags kyu zhags pa lcags sgrog thogs pa rnams kyis dgra bgegs ri dwags rgyar chud pa ltar bcings par bsams la/__hU~M:__phyag brnyan chen po'i dus la bab:__mthu rtsal dbyung ba'i dus la bab:__dngos grub bar chad byed pa'i bgegs:__gdug cing sdang sems ldan pa rnams:__zung zhig rgyob cig rnam par chings:__bal tshon sna lnga dang*/__shi skra yug skra'i skud pa phyir zlog tu dkri zhing*/__ma 'byor na skud pa sngo dmar gyis 'ching*/__mchan/__yan lag bkyig pa'i rgya byas la/__sgrub sngags dang spu gri spel ma'i mthar/__dgra bgegs shi g+h+raM a na ya hU~M phaT:__ces bzla/__dgra bgegs kyi dbang po yan lag sdoms shig:__dgra bgegs 'di gru gu thul du chings shig sdoms shig:__bzhi pa smyo ru gzhug pa ni/__dkyil 'khor gsum yang sprul dang bcas pa dang*/__gnam thel 'khor bcas kyis smyo dug gi char phab nas/__dgra bgegs sems myos lus skrangs/__dran med du gyur nas mu cor smra bar bsams la/__hU~M:__shwa na mu kha'i dus la bab:__mthu rtsal dbyung ba'i dus la bab:__dngos grub bar chad byed pa'i bgegs:__gdug cing sdang sems ldan pa rnams:__zungs shig rgyob cig rnam par chings:__d+ha du ra dang dug sna tshogs sbyar ba'i skyo ma khar blugs shing byug pa'i rgya byas la/__sgrub sngags dang*/__spu gri sbrel ba'i mthar/__dgra bgegs dz+wa la pa ya dz+wa la pa ya hU~M phaT:__ces bzla/__dgra bgegs smyo ru chug cig:__smyo ru chug 'bogs su chug:__dran pa nyams par gyur cig:__de ltar bzhi kun gyi mgo la gdab pa sngon du 'gro bas/__gcig khong khra gtongs la/__phur gdab dngos kyi rak+tas gzi byin bskyed pa nas/__ral gris gtubs shing yungs thun brab rjes/__lnga pa rdul du brlag pa ni/__dkyil 'khor gsum gyi lha yang sprul dang bcas pa dang*/__lha bdud rnam rol 'khor dang bcas pas/__rdo rje ri rab kyi tho ba thogs nas dgra bgegs thul du brlag par bsam la/__hU~M:__sa bdag chen po'i dus la bab:__mthu rtsal dbyung ba'i dus la bab:__dngos grub bar chad byed pa'i bgegs:__gdug cing sdang sems ldan pa rnams:__lus ngag rdul phran bzhin du rlog:__dpyi mig gi gtun khung dang*/__gru sog gi tho ba'am/__yang na rdo rje'i tho ba dang*/__hom gtun gru gsum gyi bar du brdung ba'i phyag rgya byas la/__sgrub sngags dang*/__spu gri sbrel ba'i mthar/__dgra bgegs ta thA ya ta thA ya hU~M phaT:__ces bzla/__dgra bgegs rdul du brlag par gyur cig:__gcig kun gyi gzhug la gdab pa zhal bstab gzhung gsal ltar grub nas/__spro na drag po'i zhal du stobs pa ni/__slar yang dkyil 'khor gsum gyi lha tshogs dam can srung ma dang bcas pa'i zhal du/__re ma tis grogs byas pa stabs pas dgyes pa'i rkan sgra dang bcas hab hab rol zhing gsol bar bsams la/__hU~M:__bdag nyid chen mo'i dus la bab:__mthu rtsal dbyung ba'i dus la bab:__dngos grub bar chad byed pa'i bgegs:__gdug cing sdang sems ldan pa rnams:__nga yi dbang du gyur nas kyang :__bsgo ba'i bka' rnams nyan par gyis:__bra ma'i hom chag gang ba zhig brtsigs pa me sbar la hom gzar du ling ro stob pa'i phyag rgyas bsreg pa'am/__slar yang ling ro dang*/__snod khrag chang gis bshal ba bzlog pa/__srung ma'i gtor ma dang bcas par bstabs la/__sgrub sngags spu gri sgrel ma'i sham du/__dgra bgegs b+hin+d+ha ya b+hin+d+ha ya hU~M phaT:__ces bzla/__dgra bgegs kyi sha khrag rus pa dang bcas pa lhag ma med par rol cig:__ces so/__/yang bzlog pa'i skabs su 'ang bzlog byang gzhung gsal gyis 'thus kyang*/__thun min rtsa gzhung la mtsho rgyal gyis bstsal ba'i snyan brgyud yang phur sbrag ma las 'byung bas kha bskang ba sbyar 'dod na/__hU~M hU~M hU~M:__bzhengs shig rdo rje gzhon nu'i tshogs:__dbyings las skye ba ma mchis kyang :__rig pa rang snang rol pa'i rtsal:__drag shul chen po'i gzi byin bskyed:__dgra bgegs sha rus khrag gi mtsho:__dgyes pa'i gad mo dang bcas bzhes:__'bar ba mchog gi cho 'phrul gyis:__nag phyogs dgra bgegs rtsad nas chod:__rnal 'byor bdag cag 'khor bcas la:__phas rgol rbod gtong dmod pa'i mtshon:__bzlog gzir phrin las 'grub par mdzod:__hU~M b+h+yo:__shin tu rnam dag ye shes ngang :__snying rje'i sku shar he ru ka:__bcom ldan rdo rje gzhon nu ni:__shes rab yum dang mnyams sbyor bas:__!__gdod ma'i bde gshegs snying po las:__glo bur rtogs pas btags pa yi:__'dod chags zhe sdang gti mug tshogs:__rnam par 'gyur bas byung ba yi:__nad rigs bzhi brgya rtsa bzhi zlog:__'bar g.yo 'thibs pa las byung ba'i:__gdon rigs sum brgya drug cu zlog:__gzung yul zhen pa las byung ba'i:__sa chu me rlung g.yo 'khrugs zlog:__'dzin pa'i nga bdag las byung ba'i:__rtsa dang rlung gi cho 'phrul zlog:__gnyis med ye shes 'khrul pa'i rtsal:__kun brtags sems kyi bag chags zlog:__sna tshogs rtog pa'i gzhan dbang can:__sde brgyad gdug pa'i g.yo 'khrugs zlog:__bzlog go dmar chen gtor mas zlog:__mi mthun thams cad dbyings su zlog:__bsgyur ro ltas ngan dgra la sgyur:__ye shes chen po mthar phyin mdzod:__oM badz+ra kI li kI la ya sarba big+h+nAn ba~M hU~M phaT:__sa ma ya b+h+yo b+h+yo zlog zlog:__hU~M b+h+yoH__me long ye shes ngang nyid las:__bcom ldan badz+ra kI la ya:__gtso 'khor sprul pa yang sprul bcas:__thogs med phrin las rtsal phyung la:__nyon mongs zhe sdang las byung ba'i:__mi mthun 'gal rkyen bar chad zlog:__gdod ma'i bde gshegs sogs gong gi 'gre/__hU~M b+h+yo:__mnyam nyid ye shes ngang nyid las:__bcom ldan rat+na kI la ya:__gtso 'khor sprul pa yang sprul bcas:__thogs med phrin las rtsal phyung la:__nyon mongs nga rgyal las byung ba'i:__mi mthun 'gal rkyen bar chad zlog:__gdod ma'i bde gshegs =__/hU~M b+h+yoH__sor rtog ye shes ngang nyid las:__bcom ldan pad+ma kI la ya:__gtso 'khor sprul pa yang sprul bcas:__thogs med phrin las rtsal phyung la:__nyon mongs 'dod chags las byung ba'i:__mi mthun 'gal rkyen bar chad zlog:__gdod ma'i =__hU~M b+h+yoH__bya grub ye shes ngang nyid las:__bcom ldan karma kI la ya:__gtso 'khor sprul pa yang sprul bcas:__thogs med phrin las rtsal phyung la:__nyon mongs phrag dog las byung ba'i:__mi mthun 'gal rkyen bar chad zlog:__gdod ma'i sogs 'gre'o/__/hU~M b+h+yoH__mi dge bcu po gnas dag cing :__dge ba bcu po gnas gyur pa:__khro bcu khra phyag 'khor bcas kyis:__rgyu 'bras 'chol bar spyod pa zlog:__gdod ma'i =__hU~M b+h+yoH__rang byung ye shes gcig nyid las:__du ma'i gar gyi rnam 'phrul pa:__sgo ma srung mar bcas pa yis:__sna tshogs rtog pa thams cad zlog:__gdod ma'i bde gshegs=__yang bsdu na/__hU~M hU~M hU~M:__bzhengs shig sogs rdo rje mtshon char gzhung bzhin/__drag po'i las la bzhengs:__zhes pa'i 'phros su/__'dir gsal/__gdod ma'i bde gshegs sogs sbyar ro/__/bzlog pa grangs gsog skabs bzlog byang gsum mam/__bdun nam/__dgu lta bu gang rung gi mtshams/__dmigs pa gsal gdab cing bzlog sngags gsog par bya/__!__/yang tshogs brgya stong sogs grangs gsog skabs snyan brgyud yang dag zab tig las gsungs pa ni/__thabs shes kyi tshogs rdzas tshogs par byas la/__byin brlab ni/__ra~M ya~M kha~M:__dbyings rig zung 'jug me rlung chus:__tshogs rdzas dngos 'dzin bsreg gtor bkrus:__stong nyid b+han+d+ha bde ba che:__tshogs kyi 'du ba rgya mtshor gyur:__oM AHhU~M:__tshogs mgron spyan 'dren ni/__hU~M hU~M hU~M:__dag mnyam chos sku'i klong yangs nas:__kha sbyor rtsal 'chang he ru ka:__phrin las grub pa'i thig le'i sku:__tshur gshegs tshogs kyi 'du bar spyon:__e h+ya hi badz+ra sa mA dzaH__tshogs phud tshogs mchod bshags bsgral bstab dkyus gcig tu 'bul ba ni/__oM AHhU~M:__dngos yid dam tshig rdzas kyis mchod:__nyams chags sdig ltung snying nas bshags:__gzung 'dzin 'khrul pa bsgral ba'i tshogs:__khrag 'thung chen po'i zhal du sbyor:__oM badz+ra kI li kI la ya sarba d+harma pA la sa pa ri wA ra ga Na tsakra pU dza khA hi:__skong bshags byed par spro na 'dir sbyar/__lhag ma ni/__oM AHhU~M hoHsa brlab/__phaiM phaiM:__dpal gyi bka' sdod pho nya'i tshogs:__lhag ma'i longs spyod 'di bzhes la:__gzung 'dzin 'khrul pa zhi ba dang :__rig rtsal rgyas pa'i phrin las mdzod:__uts+tshiSh+ta ba liM ta khA hi/__zhes pa rnams slad nas kha skong du bsdebs pa dge/__//