རྡོ་རྗེ་སེམས་དཔའ་གསང་བ་དྲི་མེད་ཀྱི་རྒྱུད་ལས་རུ་ཏྲའི་སྨྲེ་བཤགས།

🚧 This website is under continued development. We appreciate your patience!

Previous Text Back to Volume PageNext Text

Wylie title	rdo rje sems dpa' gsang ba dri med kyi rgyud las ru tra'i smre bshags
Location	mkhyen brtse'i bka' babs Volume 17, Text 5, Pages 43-48 (Folios 1a to 3b6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. rdo rje sems dpa' gsang ba dri med kyi rgyud las ru tra'i smre bshags. In Rdzong sar 'jam dbyangs mkhyen brtse'i dbang po'i bka' babs, Vol. 17: 43-48. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Confessions - bshags pa
Cycle	ལྕེ་བཙུན་ཆེན་པོའི་བི་མ་ལའི་ཟབ་ཏིག་ (lce btsun chen po'i bi ma la'i zab tig)
Karchag page	JKW-KABAB-Volume-17-TSA-Karchag

Tibetan Text

Wylie

[edit]

རྡོ་རྗེ་སེམས་དཔའ་གསང་བ་དྲི་མེད་ཀྱི་རྒྱུད་ལས་རུ་ཏྲའི་སྨྲེ་བཤགས་བཞུགས་སོ།

།ཨྃ༔ ཨོཾ༔ ཐུགས་རྗེ་ཆེན་པོ་བཅོམ་ལྡན་རྡོ་རྗེ་སེམས༔ དྲི་མེད་དུང་མདོག་མཆོག་ཏུ་གཟུགས་བཟང་བ༔ རྣམ་དག་འོད་གསལ་ཉི་མ་འབུམ་བརྡལ་ཞིང་༔ དཔའ་བོ་འོད་ཟེར་སྟོང་ཁམས་ལྷམ་མེ་བ༔ སྲིད་པ་གསུམ་གྱི་ས་མཁོན་སྟོན་པར་གྲགས༔ ཁམས་གསུམ་འགྲོ་བ་ཀུན་གྱི་གཉེན་གཅིག་པུ༔ བྱམས་མགོན་ཐུགས་རྗེའི་ལྷ་ཁྱོད་དགོངས་སུ་གསོལ༔ བདག་ནི་ཐོག་མ་མེད་པའི་དུས་དག་ནས༔ ལམ་ལོག་ལམ་སྟོར་སྲིད་པའི་འཁོར་ལོར་འཁྱམས༔ སྔོན་ཚེ་ལས་ལོག་སྡིག་པ་བྱས་པས་ནོངས༔ སྡིག་པའི་ལས་རྣམས་ཅི་སྤྱད་རབ་གནོང་འགྱོད༔ དར་ཞིང་དྲགས་པའི་ལས་དབང་དེ་བཙན་ནས༔ འཁོར་བའི་སྡུག་བསྔལ་བརྒྱ་མཚོར་བདག་བྱིངས་ཏེ༔ ཞེ་སྡང་འབར་བའི་མེས་ནི་རང་རྒྱུད་བསྲེགས༔ གཏི་མུག་མུན་འཐིབས་དག་གི་ཤེས་རབ་ལྡོངས༔ འདོད་ཆགས་རྒྱ་མཚོའི་འགྲམ་དུ་རྣམ་ཤེས་བྱིངས༔ ང་རྒྱལ་དྲག་པོའི་རི་བོས་ངན་འགྲོར་མནན༔ ཕྲག་དོག་རླུང་དམར་འཚུབས་པས་འཁོར་བར་གཡེངས༔ བདག་ཏུ་ལྟ་བའི་མདུད་པ་དམ་པོས་བཅིངས༔ འདོད་པ་མེ་མདག་དོང་འདྲའི་འོབས་སུ་ལྷུང་༔ སྡུག་བསྔལ་དྲག་པོ་མི་བཟད་ཆར་ལྟར་འབབས༔ འདི་འདྲའི་སྡུག་བསྔལ་བདག་གིས་བཟོད་དཀའ་ཞིང་༔ སྡིག་པའི་ལས་དབང་དྲག་པོའི་མེ་འབར་བས༔ རྣམ་ཤེས་དབང་པོའི་མྱུ་གུ་གདུངས་གྱུར་ཏེ༔ ཕུང་པོ་སྒྱུ་མའི་ལུས་ཀྱིས་མི་བཟོད་ན༔ བྱམས་མགོན་ཐུགས་རྗེ་ཅན་གྱིས་བཟོད་ལགས་སམ༔ བདག་ནི་བླུན་རྨོངས་ལས་ངན་སྡིག་པོ་ཆེ༔ ལས་ཀྱི་དབང་གིས་འདོད་ཁམས་རུ་ཏྲར་སྐྱེས༔ སྐྱེས་པས་འགྱོད་དོ་ལས་ལ་ཡི་རེ་ཆད༔ ཡི་ཆད་འགྱོད་ཀྱང་ལས་ལ་བཅོས་སུ་མེད༔ ལས་ཀྱི་ཤུགས་ནི་ཆུ་བོའི་གཞུང་དང་འདྲ༔ ལས་དབང་ཆུ་ཀླུང་འཕྲལ་དུ་ག་ལ་ཟློག༔ རྣམ་སྨིན་ཐམས་ཅད་རང་གི་ལས་ལས་བྱུང༔ བཀའ་ལ་ཞུགས་ཀྱང་བཀའ་བཞིན་རྔོ་མ་ཐོགས༔ ལུས་ངག་ཡིད་གསུམ་སྡིག་པའི་དབང་དུ་སོང་༔ ལས་ཀྱི་རླུང་དམར་དྲག་པོ་དེས་བདས་པས༔ བདག་ནི་དེ་སྔོན་བསྐལ་པ་གྲངས་མེད་དུ༔ འཁོར་བའི་བཙོན་ར་མུན་པར་འཁྱམས་པ་ལ༔ ཉེར་གནས་ཁྱོད་ཀྱི་ཐུགས་རྗེའི་བྱིན་རླབས་ཀྱིས༔ ལས་དང་ཉོན་མོངས་སྒྲིབ་པའི་གནས་སྦྱངས་ནས༔ མ་ལྟར་བྱམས་པའི་ཞབས་དྲུང་ད་ལྟར་འཁོད༔ ཉི་ལྟར་འོད་འབར་ཟླ་ལྟར་མདངས་གསལ་བའི༔ ཐུགས་རྗེའི་ཞལ་ཉིད་ལྟ་བས་མི་ངོམས་པ༔ ཐོག་མ་མེད་ནས་མ་རིག་ལིང་ཏོག་གིས༔ ལྡོངས་པའི་ཆུ་བུར་མིག་གིས་མ་མཐོང་ན༔ འགྲོ་བའི་མགོན་ཁྱོད་ད་ལྟ་གང་ན་བཞུགས༔ ལས་དབང་དྲག་པོ་ཤིན་ཏུ་མི་བཟོད་པས༔ ཤིན་ཏུ་སྐྲག་ཅིང་སྐྱི་གཡའ་རབ་འཇིགས་ན༔ དུང་དུང་གདུང་བའི་སྨྲེ་སྔགས་འདི་འདོན་ཅིང་༔ ཉམ་ཐག་ཕོངས་པའི་ང་རོ་འདོན་ལགས་པས༔ བྱམས་མགོན་ཐུགས་རྗེས་དུས་འདིར་མ་དགོངས་ན༔ ནམ་ཞིག་འཆི་འཕོ་ལུས་སེམས་བྲལ་བའི་ཚེ༔ དགེ་བཤེས་གྲོགས་དང་བྲལ་ནས་གཤིན་རྗེས་ཁྲིད༔ དེ་ཚེ་འཇིག་རྟེན་ཉེ་དུས་མི་སྟོངས་ཏེ༔ ལས་ཀྱི་དབང་གིས་བདག་ཉིད་གཅིག་པུར་ཁྲིད༔ དུས་དེར་བདག་ལ་མགོན་སྐྱབས་མ་མཆིས་ཀྱི༔ གང་གིས་ཕྱི་བཤོལ་དུས་ལས་མ་གཡེལ་བར༔ ད་ལྟ་ཉིད་དུ་བརྟུན་ཏེ་མངོན་སྤྱོད་མཛོད༔ ལས་ཀྱི་མནར་བའི་སྐྱེ་བོ་བདག་འདྲ་བ༔ ཐོག་མ་མེད་པའི་དུས་ནས་ལོག་བརྟགས་པས༔ ཁམས་གསུམ་འཁོར་བའི་གནས་ནས་མ་ཐར་ཏེ༔ བསྐལ་པ་གྲངས་མེད་སྐྱེ་བ་ཇི་སྙེད་དུ༔ གདོས་བཅས་ལུས་བླངས་གྲངས་མེད་ཞིག་གྱུར་ཏེ༔ ཤ་རུས་བསགས་ན་འཇིག་རྟེན་གཏོས་དང་མཉམ༔ རྣག་ཁྲག་བསགས་ན་རྒྱ་མཚོ་ཆེན་པོ་ཙམ༔ ལས་འཕྲོ་བསགས་ན་བསམ་འདས་བརྗོད་མི་ལང་༔ ཁམས་གསུམ་བགྲངས་ཤིང་སྐྱེ་ཤིའི་ཁ་བརྒྱུད་ཀྱང་༔ བྱས་པའི་ལས་རྣམས་དོན་མེད་ཆུད་རེ་ཟོས༔ སྐྱེ་བ་གྲངས་མེད་ཇི་སྙེད་དེ་ཙམ་ལས༔ སྐྱེ་བ་ཚེ་གཅིག་ཁོ་ན་ཙམ་གྱི་ལས༔ བླ་མེད་བྱང་ཆུབ་དོན་དུ་རབ་སྤྱད་ན༔ དེ་ཙམ་བྱས་པའི་ལས་ལ་དོན་ཡོད་པས༔ དོན་གྱི་ཡོང་ཡེ་མྱ་ངན་འདས་ཟིན་ན༔ ལས་ཀྱི་དབང་བཙན་ཉོན་མོངས་སྟོབས་ཆེ་བས༔ ཤ་ཁྲག་དྲྭ་བའི་ལུས་བླངས་འཁོར་བར་འཁྱམས༔ སྡུག་བསྔལ་བཟོད་དཀའ་སྲིད་པའི་བཙོན་རར་ཚུད༔ མི་བཟད་དྲག་པོའི་སྡུག་བསྔལ་འདི་ལྟ་བུ༔ ཉེས་བྱས་ཐམས་ཅད་རང་གི་ལས་ལས་བྱུང་༔ ཐུགས་རྗེ་ཆེན་པོས་ལས་ངན་རྒྱུན་བཅད་དེ༔ ཉོན་མོངས་ལས་ཀྱི་རླུང་འདི་བཟློག་ཏུ་གསོལ༔ མ་རིག་ལོག་པའི་ལས་དེ་དབང་བཙན་ནས༔ མི་ཤེས་མུན་པའི་ནང་དུ་གཏན་འཁྱམས་ན༔ ཡེ་ཤེས་སྒྲོན་མེའི་ཟེར་གྱིས་མི་སྟོངས་སམ༔ ཉེས་བྱས་ལས་ཀྱི་རྣམ་སྨིན་མི་བཟོད་ན༔ ཐུགས་རྗེ་ཆེན་པོས་ཕྲིན་ལས་མི་མཛད་དམ༔ ཕྱིན་ཅི་ལོག་གི་གཡང་སར་ལྷུང་ལགས་ན༔ ཐུགས་རྗེ་མྱུར་མགྱོགས་ཕྱག་གིས་མི་འཛིན་ནམ༔ དུག་གསུམ་བཟོད་དཀའི་ནད་ཀྱིས་གདུངས་ལགས་ན༔ ཐབས་མཁས་ཐུགས་རྗེའི་སྨན་གྱིས་མི་གསོའམ༔ ལས་ཀྱི་རྣམ་སྨིན་སྡུག་བསྔལ་མེ་འབར་ན༔ ཐུགས་རྗེ་བསིལ་བའི་ཆུ་རྒྱུན་མི་འབེབས་སམ༔ སྡུག་བསྔལ་འཁོར་བའི་འདམ་དུ་བྱིངས་གྱུར་ན༔ ཐབས་མཁས་ཐུགས་རྗེའི་ལྕགས་ཀྱུས་མི་འདྲེན་ནམ༔ ཁམས་གསུམ་འཁོར་བའི་གནས་སུ་སྦྱངས་སྦྱངས་ནས༔ ནམ་ཞིག་རང་གིས་འབྲས་བུ་ཐོབ་པའི་ཚེ༔ འཕགས་པའི་ཐུགས་རྗེས་ཅི་འཚལ་དོན་མ་མཆིས༔ བདག་ཉིད་ལས་འཕྲོའི་དབང་གིས་བཞག་ན་ལྟ༔ ཐུགས་རྗེ་ཆེ་ཞེས་སུ་ལ་ཅི་ཞིག་བགྱི༔ དཔའ་བོ་ཁྱོད་ལ་ཐུགས་རྗེའི་སྟོབས་མངའ་ཞིང་༔ སྔོན་བྱུང་འབྲེལ་བའི་ལས་ཀྱི་འཕྲོ་བཙན་ན༔ ཡལ་ཡོལ་བཏང་སྙོམས་ལེ་ལོ་མ་མཛད་པར༔ སྙིང་ནས་ད་གཟིགས་ཐུགས་རྗེ་རྒྱལ་བའི་ལྷ༔ འཁོར་བའི་འདམ་ནས་དྲངས་ཏེ་སྐུ་གསུམ་གྱི༔ གོ་འཕང་མཆོག་ལ་མྱུར་དུ་དྲང་དུ་གསོལ༔ དགེའོ།། །།

[edit]

rdo rje sems dpa' gsang ba dri med kyi rgyud las ru tra'i smre bshags bzhugs so/__/a~M:__oM:__thugs rje chen po bcom ldan rdo rje sems:__dri med dung mdog mchog tu gzugs bzang ba:__rnam dag 'od gsal nyi ma 'bum brdal zhing :__dpa' bo 'od zer stong khams lham me ba:__srid pa gsum gyi sa mkhon ston par grags:__khams gsum 'gro ba kun gyi gnyen gcig pu:__byams mgon thugs rje'i lha khyod dgongs su gsol:__bdag ni thog ma med pa'i dus dag nas:__lam log lam stor srid pa'i 'khor lor 'khyams:__sngon tshe las log sdig pa byas pas nongs:__sdig pa'i las rnams ci spyad rab gnong 'gyod:__dar zhing drags pa'i las dbang de btsan nas:__'khor ba'i sdug bsngal brgya mtshor bdag byings te:__zhe sdang 'bar ba'i mes ni rang rgyud bsregs:__gti mug mun 'thibs dag gi shes rab ldongs:__'dod chags rgya mtsho'i 'gram du rnam shes byings:__nga rgyal drag po'i ri bos ngan 'gror mnan:__phrag dog rlung dmar 'tshubs pas 'khor bar g.yengs:__bdag tu lta ba'i mdud pa dam pos bcings:__'dod pa me mdag dong 'dra'i 'obs su lhung :__sdug bsngal drag po mi bzad char ltar 'babs:__'di 'dra'i sdug bsngal bdag gis bzod dka' zhing :__sdig pa'i las dbang drag po'i me 'bar bas:__rnam shes dbang po'i myu gu gdungs gyur te:__phung po sgyu ma'i lus kyis mi bzod na:__byams mgon thugs rje can gyis bzod lags sam:__bdag ni blun rmongs las ngan sdig po che:__las kyi dbang gis 'dod khams ru trar skyes:__skyes pas 'gyod do las la yi re chad:__yi chad 'gyod kyang las la bcos su med:__las kyi shugs ni chu bo'i gzhung dang 'dra:__las dbang chu klung 'phral du ga la zlog:__rnam smin thams cad rang gi las las byung:__bka' la zhugs kyang bka' bzhin rngo ma thogs:__lus ngag yid gsum sdig pa'i dbang du song :__las kyi rlung dmar drag po des bdas pas:__bdag ni de sngon bskal pa grangs med du:__'khor ba'i btson ra mun par 'khyams pa la:__nyer gnas khyod kyi thugs rje'i byin rlabs kyis:__las dang nyon mongs sgrib pa'i gnas sbyangs nas:__ma ltar byams pa'i zhabs drung da ltar 'khod:__nyi ltar 'od 'bar zla ltar mdangs gsal ba'i:__thugs rje'i zhal nyid lta bas mi ngoms pa:__thog ma med nas ma rig ling tog gis:__ldongs pa'i chu bur mig gis ma mthong na:__'gro ba'i mgon khyod da lta gang na bzhugs:__las dbang drag po shin tu mi bzod pas:__shin tu skrag cing skyi g.ya' rab 'jigs na:__dung dung gdung ba'i smre sngags 'di 'don cing :__nyam thag phongs pa'i nga ro 'don lags pas:__byams mgon thugs rjes dus 'dir ma dgongs na:__nam zhig 'chi 'pho lus sems bral ba'i tshe:__dge bshes grogs dang bral nas gshin rjes khrid:__de tshe 'jig rten nye dus mi stongs te:__las kyi dbang gis bdag nyid gcig pur khrid:__dus der bdag la mgon skyabs ma mchis kyi:__gang gis phyi bshol dus las ma g.yel bar:__da lta nyid du brtun te mngon spyod mdzod:__las kyi mnar ba'i skye bo bdag 'dra ba:__thog ma med pa'i dus nas log brtags pas:__khams gsum 'khor ba'i gnas nas ma thar te:__bskal pa grangs med skye ba ji snyed du:__gdos bcas lus blangs grangs med zhig gyur te:__sha rus bsags na 'jig rten gtos dang mnyam:__rnag khrag bsags na rgya mtsho chen po tsam:__las 'phro bsags na bsam 'das brjod mi lang :__khams gsum bgrangs shing skye shi'i kha brgyud kyang :__byas pa'i las rnams don med chud re zos:__skye ba grangs med ji snyed de tsam las:__skye ba tshe gcig kho na tsam gyi las:__bla med byang chub don du rab spyad na:__de tsam byas pa'i las la don yod pas:__don gyi yong ye mya ngan 'das zin na:__las kyi dbang btsan nyon mongs stobs che bas:__sha khrag drwa ba'i lus blangs 'khor bar 'khyams:__sdug bsngal bzod dka' srid pa'i btson rar tshud:__mi bzad drag po'i sdug bsngal 'di lta bu:__nyes byas thams cad rang gi las las byung :__thugs rje chen pos las ngan rgyun bcad de:__nyon mongs las kyi rlung 'di bzlog tu gsol:__ma rig log pa'i las de dbang btsan nas:__mi shes mun pa'i nang du gtan 'khyams na:__ye shes sgron me'i zer gyis mi stongs sam:__nyes byas las kyi rnam smin mi bzod na:__thugs rje chen pos phrin las mi mdzad dam:__phyin ci log gi g.yang sar lhung lags na:__thugs rje myur mgyogs phyag gis mi 'dzin nam:__dug gsum bzod dka'i nad kyis gdungs lags na:__thabs mkhas thugs rje'i sman gyis mi gso'am:__las kyi rnam smin sdug bsngal me 'bar na:__thugs rje bsil ba'i chu rgyun mi 'bebs sam:__sdug bsngal 'khor ba'i 'dam du byings gyur na:__thabs mkhas thugs rje'i lcags kyus mi 'dren nam:__khams gsum 'khor ba'i gnas su sbyangs sbyangs nas:_nam zhig rang gis 'bras bu thob pa'i tshe:__'phags pa'i thugs rjes ci 'tshal don ma mchis:__bdag nyid las 'phro'i dbang gis bzhag na lta:__thugs rje che zhes su la ci zhig bgyi:__dpa' bo khyod la thugs rje'i stobs mnga' zhing :__sngon byung 'brel ba'i las kyi 'phro btsan na:__yal yol btang snyoms le lo ma mdzad par:__snying nas da gzigs thugs rje rgyal ba'i lha:__'khor ba'i 'dam nas drangs te sku gsum gyi:__go 'phang mchog la myur du drang du gsol:__dge'o//__//