JKW-KABAB-12-NA-004

From Khyentse Lineage - A Tsadra Foundation Project

‎‎

བླ་མ་བཀའ་བརྒྱད་འདུས་པའི་དོན་དབང་བསྐུར་བའི་ཡི་གེ་རིན་ཆེན་དབྱིག་གི་སྙིང་པོ།
Wylie title bla ma bka' brgyad 'dus pa'i don dbang bskur ba'i yi ge rin chen dbyig gi snying po JKW-KABAB-12-NA-004.pdf
Location mkhyen brtse'i bka' babs
Volume 12, Text 4, Pages 105-119 (Folios 1a to 8a2)
Author འཇམ་མགོན་ཀོང་སྤྲུལ་
Less details More details
Tertön རྡོ་རྗེ་གླིང་པ་, འཇམ་དབྱངས་མཁྱེན་བརྩེའི་དབང་པོ་ (rdo rje gling pa, 'jam dbyangs mkhyen brtse'i dbang po)
Citation 'jam mgon kong sprul. bla ma bka' brgyad 'dus pa'i don dbang bskur ba'i yi ge rin chen dbyig gi snying po. In Rdzong sar 'jam dbyangs mkhyen brtse'i dbang po'i bka' babs, Vol. 12: 105-119. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre Empowerment Ritual - dbang chog - dbang skur
Cycle བླ་མ་བཀའ་བརྒྱད་འདུས་པ་རིན་ཆེན་གཏེར་སྤུངས་ (bla ma bka' brgyad 'dus pa rin chen gter spungs)
Karchag page JKW-KABAB-Volume-12-NA-Karchag
RTZ In the Rinchen Terdzö: https://rtz.tsadra.org/index.php/Terdzo-JA-017
Colophon
  • Author colophon: །ཅེས་པའང་པདྨ་གར་དབང་བློ་གྲོས་མཐའ་ཡས་ཀྱིས་ཟབ་ཆོས་འདི་ཉིད་འཕེལ་ཞིང་རྒྱས་པའི་བཙས་སུ་དམིགས་ཏེ་རྫོང་ཤོད་བདེ་གཤེགས་འདུས་པའི་སྒྲུབ་གནས་སུ་བགྱིས་པ་དགེ་ལེགས་འཕེལ།
  • Editor colophon: །སླར་ཕུན་ཚོགས་རྣམ་རྒྱལ་པས་ནག་འགྲོས་སུ་བཀོད་པ་དགེ་ལེགས་འཕེལ།།
  • Author colophon: ces pa'ang pad+ma gar dbang blo gros mtha' yas kyis zab chos 'di nyid 'phel zhing rgyas pa'i btsas su dmigs te rdzong shod bde gshegs 'dus pa'i sgrub gnas su bgyis pa dge legs 'phel
  • Editor colophon: slar phun tshogs rnam rgyal pas nag 'gros su bkod pa dge legs 'phel
[edit]
༄༅། བླ་མ་བཀའ་བརྒྱད་འདུས་པའི་དོན་དབང་བསྐུར་བའི་ཡི་གེ་རིན་ཆེན་དབྱིག་གི་སྙིང་པོ་ཞེས་བྱ་བ་བཞུགས་སོ།།

ན་མོ་གུ་རུ་ཝེ། །ཁྱབ་བདག་རྡོ་རྗེ་ཐོད་ཕྲེང་དང༌། །དབྱེར་མེད་བླ་མ་ལ་བཏུད་ནས། །བཀའ་རྣམས་འདུས་པའི་དོན་དབང་གི །ལག་ལེན་ཉུང་ངུ་རྣམ་གསལ་བཀོད། འདི་ལ་གཉིས། སྦྱོར་བ་ཡོ་བྱད་ཀྱི་གཤོམ། དངོས་གཞི་སྒྲུབ་ཅིང་དབང་བསྐུར་བའོ། །དང་པོ་ནི། རྟེན་གྱི་སྤྱན་སྔར་སྟེགས་བུ་ལ་དཀྱིལ་འཁོར་གནམ་བབ་མ་རྡུལ་ཚོན་ནམ་རས་བྲིས་གང་རུང་བཀོད་པའི་དབུས་སུ་ཁྲིའུ་ལ་རྣམ་བུམ་མགུལ་ཆིངས་བཅུད་དང་ལྡན་པའི་ཁར་ཐོད་པ་བདུད་རྩི་ཨཱ་མྲྀ་ཏས་བཀང་བ་བཞག་ལ་མེ་ལོང་སིནྡྷཱུ་རའི་ཐིག་ལེ་ལྔ་ཚོམ་གྱིས་བརྒྱན་པས་བཀབ། དེ་སྟེང་ཤེལ་རྡོ་དང་གུ་རུའི་སྐུ་ཙཀ་བཞུགས་སུ་གསོལ། གཤམ་དུ་གཏོར་དབང་སྦྲེལ་བར་སྤྲཽ་ན། མདུན་རྒྱབ་གང་བདེར་གཏོར་མ་རིན་ཆེན་ཟུར་བརྒྱད་སྐུ་ཙཀ་དར་གདུགས་ཀྱིས་བརྒྱན་པ་བཀོད། སྨན་རཀ་གཏོར་གསུམ་དང་ཕྱི་མཆོད་རྣམས་སྤྱི་ལྟར་བཤམ། ལས་བུམ། མིག་དར། གཏོར་ཚོགས་སོགས་ཉེ་བར་མཁོ་བ་རྣམས་ཀྱང་འདུ་བྱའོ། གཉིས་པ་ལ། དང་པོ་སྒྲུབ་མཆོད་ནི། ལས་བྱང་ལེའུ་གསུམ་པའི་སྐྱབས་སེམས་ནས་བཟླས་པ་དང༌། དབང་བླང་བ་ཡན་བཏང༌། ལས་བུམ་རྟ་སྔགས་ཀྱིས་བྱིན་བརླབ། སློབ་མ་གཞུག་པར་གནང་བ་ནོད་དོ། །གཉིས་པ་དབང་བསྐུར་བ་ནི། སློབ་མ་རྣམས་ཁྲུས་ནས་དབྱུང༌། བགེགས་གཏོར་བཏང་ལ་བཀའ་བསྒོ་ཞིང་མཚམས་བཅད། སེམས་བསྐྱེད་གསལ་བཏབ་ལ། འདིར་གསན་པར་བྱ་བ། མདོ་སྔགས་ཀྱི་ཆོས་ཐམས་ཅད་ཀྱི་ཡང་རྩེ་གསང་སྔགས་རྡོ་རྗེ་ཐེག་པའི་བསྐྱེད་རྫོགས་ཇི་སྙེད་པའི་སྲོག་དང་སྙིང་པོར་གྱུར་པ་ལམ་ཟབ་བླ་མ་སྒྲུབ་པའི་ཐབས་མང་དུ་མཆིས་པ་ཐམས་ཅད་ཀྱི་ནང་ནས་བླ་ན་མ་མཆིས་པ། ཕྱོགས་དུས་རྒྱལ་བ་སྲས་དང་བཅས་པའི་གསང་གསུམ་ཕྲིན་ལས་དང་བཅས་པ་གཅིག་ཏུ་བསྡུས་པའི་ཨོ་རྒྱན་གྱི་སློབ་དཔོན་ཆེན་པོ་པདྨ་ཐོད་ཕྲེང་རྩལ་ཉིད་གྱིས་རྡོ་རྗེའི་ཚིག་ཏུ་བསྟན་པའི་ཟབ་པ་དང་རྒྱ་ཆེ་བའི་སྒྲུབ་ཐབས་མཐའ་ཡས་པར་མཆིས་པ་རྣམས་ཀྱིས་ནང་ནས་ངོ་མཚར་རྨད་དུ་བྱུང་བ་བླ་མ་བདེ་གཤེགས་ཡོངས་རྫོགས་བཀའ་འདུས་ཀྱི་ཆོས་སྐོར་རྣམས། སྤྲུལ་པའི་ལོ་ཙཱ་བ་ཆེན་པོ་བེ་རོ་ཙ་ན་ཉིད་རིག་འཛིན་སྔགས་འཆང་ཆེན་པོའི་སྐུར་བསྟན་ནས་གཏེར་སྟོན་རྒྱལ་པོ་ལྔ་ཡི་གསུམ་པར་བྱོན་པ་ཨོ་རྒྱན་རྡོ་རྗེ་གླིང་པས་ངམ་ཤོད་གནམ་ལྕགས་བྲག་ནས་སྤྱན་དྲངས་ཏེ་དངོས་དང་བརྒྱུད་ནས་བསྟན་འགྲོའི་དོན་མཐའ་ཡས་པར་མཛད་པ་འདི་ལ་དབང་གི་ཆོ་ག་རྒྱས་འབྲིང་བསྡུས་པའི་ཚུལ་དུ་བཞུགས་པ་ལས། འདིར་སྨིན་བྱེད་ཐམས་ཅད་ཀྱི་སྙིང་པོ་ཟླུམ་པོ་བཞིའི་བརྡ་ལ་བརྟེན་པའི་དོན་དབང་ཟབ་མོ་སྐུར་བར་བྱེད་པས་སོགས་ཀྱིས་མཚམས་སྦྱར་ལ་མཎྜལ་འབུལ་དུ་གཞུག །མཚམས་སྦྱོར་སྤྱི་མཐུན་བཅས་འབྲུ་གསུམ་གྱིས་མིག་དར་སྦྱིན། ཐལ་མོ་མེ་ཏོག་དང་བཅས་ཏེ་གསོལ་བ་འདེབས་པ་འདིའི་རྗེས་ཟློས། སློབ་དཔོན་བདག་ལ་དགོངས་སུ་གསོལ༔ སྔོན་ཆད་ལམ་ལོག་འཁོར་བར་འཁྱམས༔ སྲིད་པའི་མཚོ་ལས་བསྒྲལ་སླད་དུ༔ བླ་མའི་དཀྱིལ་འཁོར་བསྟན་དུ་གསོལ༔ ལན་གསུམ། བདག་གཞན་སེམས་ཅན་ཐམས་ཅད་བླ་མ་རྩ་གསུམ་ཀུན་འདུས་ལ་བྱང་ཆུབ་སྙིང་པོའི་བར་དུ་སྐྱབས་སུ་མཆིའོ་སྙམ་པའི་བློས་འདིའི་རྗེས་ཟློས༔ ན་མོ༔ བླ་མ་བདེ་གཤེགས་འདུས་པའི་སྐུ༔ དཀོན་མཆོག་གསུམ་གྱི་རང་བཞིན་ལ༔ བདག་དང་འགྲོ་དྲུག་སེམས་ཅན་རྣམས༔ བྱང་ཆུབ་བར་དུ་སྐྱབས་སུ་མཆི༔ ལན་གསུམ། མཁའ་ཁྱབ་ཀྱི་སེམས་ཅན་ཐམས་ཅད་བླ་མ་སངས་རྒྱས་རིན་པོ་ཆེའི་གོ་འཕང་ལ་འགོད་པའི་ཕྱིར་དུ་དཀྱིལ་འཁོར་གཉན་པོར་འཇུག་པར་བགྱིའོ་སྙམ་དུ་སེམས་བསྐྱེད་པ་གསལ་ཐོབ་ལ་འདིའི་རྗེས་ཟློས། ན་མོ༔ སེམས་བསྐྱེད་འགྲོ་བ་ཀུན་དོན་དུ༔ བླ་མེད་སངས་རྒྱས་བསྒྲུབས་ནས་ནི༔ གང་ལ་གང་འདུལ་ཕྲིན་ལས་ཀྱིས༔ འགྲོ་དོན་བྱེད་པར་སེམས་བསྐྱེད་དོ༔ ལན་གསུམ། ཡུལ་མཆོག་དེ་དག་གི་སྤྱན་སྔར་ཚོགས་བསགས་ཡན་ལག་བཅུ་པ་ཚུལ་བཞིན་བྱ་བའི་བློས་འདིའི་རྗེས་ཟློས། བླ་མ་བདེ་གཤེགས་མཁའ་འགྲོ་གནས་འདིར་གཤེགས༔ ཉི་ཟླ་པད་གདན་མཛེས་ལ་དགྱེས་པར་བཞུགས༔ ལུས་ངག་ཡིད་གསུམ་གུས་པས་ཕྱག་མཚལ་ལོ༔ ཕྱི་ནང་གསང་བའི་མཆོད་སྤྲིན་ཀུན་གྱིས་མཆོད༔ སྔོན་ནས་ད་བར་མི་དགེ་ཅི་བསགས་བཤགས༔ དུས་གསུམ་དགེ་སྤྱོད་མཛད་ལ་ཡི་རང་འབུལ༔ བདག་གཞན་ཡོངས་གྲོལ་ཆོས་འཁོར་བསྐོར་དུ་གསོལ༔ འགྲོ་དོན་མྱ་ངན་མི་འདའ་བཞུགས་སུ་གསོལ༔ སྙིང་པོ་མ་གྱུར་སེམས་ཅན་དོན་དུ་བསྔོ༔ གནས་ལུགས་ཡང་དག་རྡོ་རྗེའི་དོན་རྟོགས་ཤོག༔ ལན་གསུམ། དེ་ནས་དབང་གི་གཞི་དགོད་ཅིང་ཡེ་ཤེས་དབབ་པ་ཡིན་པས་ཁྱེད་རང་རྣམས་ལུས་ངག་ཡིད་གསུམ་གྱི་གནད་བཅིང༌། སྒོ་ལྔའི་ཤེས་པ་ནང་དུ་བསྡུས་ལ་ཡིད་རྩེ་གཅིག་པས་མོས་གུས་བསྐྱེད་ཅིང་དམིགས་པ་འདི་ལྟར་སྒོམས་ཤིག །ཁྱེད་རང་རྣམས་ཡེ་ཤེས་ཀྱི་མཁའ་འགྲོ་མར་གསལ་བའི་སྙིང་གར་གཡུང་དྲུང་དམར་པོ་གཡས་སུ་འཁྱིལ་བ། རྭ་བཞི་ལ་ཧ་རི་ནི་སའི་ཡི་གེ་གསལ། སློབ་དཔོན་གྱི་ཐུགས་ཀ་ནས་འཕྲོས་པའི་འོད་ཟེར་གྱིས་བསྐུལ་བས་གཡུང་དྲུང་གཡས་སུ་དྲག་ཏུ་འཁོར། བླ་མ་སྐུ་གསུམ་གྱི་ཞིང་ཁམས་རབ་འབྱམས་དང་དཀྱིལ་འཁོར་ལྷ་ཚོགས་རྣམས་ལས་སྐུ་གསུང་ཐུགས་ཀྱི་བྱིན་རླབས་ཐམས་ཅད་ཕྱག་རྒྱ་སྔགས་དང་ཕྱག་མཚན་འོད་ཟེར་གྱི་རྣམ་པར་ནམ་མཁའ་གང་བ་ཙམ་དུ་བྱོན་ནས་ཁྱེད་རང་རྣམས་ལ་སིབ་སིབ་ཐིམ་པར་མོས་ཤིག །འབེབས་པའི་རྫས་བདུག །དབྱངས་རོལ་བཅས། ཧཱུྃ་ཧྲཱི༔ སྔོན་གྱི་བསྐལ་པ་དང་པོ་ལ༔ ཨཽ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱིས༔ བྱིན་གྱིས་བརླབ་ཕྱིར་གཤེགས་སུ་གསོལ༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་བདག་ལ་དབང་བཞི་སྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱཿཧཱུྃ་གུ་རུ་དྷེ་ཝ་དྷཱ་ཀི་ནཱི་བཛྲ་ས་མ་ཡ་ཨཱ་ཝེ་ཤ་ཡ་ཨ་ཨཱཿ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ བཛྲ་གུ་རུ་པདྨ་ཐོད་ཕྲེང་རྩལ༔ བཛྲ་ས་མ་ཡ་ཛཿ སིདྡྷི་ཕ་ལ་ཧཱུྃ༔ ཧྲཱིཿམ་ཧ་རི་ནི་ས་ར་ཙ་ཧྲི་ཡ༔ཙིཏྟ་ཧྲིང་ཧྲིང་ཛཿཛཿཧཱུྃ་བྃ་ཧོ༔ ཡེ་ཤེས་པའི་བྱིན་རླབས་ཀྱི་རྒྱུན་བརྟན་པར་མོས་ཤིག །ཏིཥྛ་བཛྲ༔ ཞེས་རྡོ་རྗེ་མགོར་བཞག །མ་རིག་པའི་སྒྲིབ་གཡོགས་བསལ་ནས་ཡེ་ཤེས་རང་སྣང་གི་དཀྱིལ་འཁོར་མངོན་ཏུ་མཐོང་བར་མོས་ཤིག །ལེགས་འོངས་བུ་ཁྱོད་སྐལ་བ་བཟང་༔ མ་རིག་ལིང་ཐོག་ང་ཡིས་བསལ༔ རྩ་བ་གསུམ་གྱི་དཀྱིལ་འཁོར་བསྟན༔ དམ་ཚིག་རྩེ་གཅིག་ཐུབ་པར་སྲུངས༔ ཞེས་གདོང་བསལ། ཧཱུྃ༔ སྐུ་གསུང་ཐུགས་ཀྱི་དམ་ཚིག་ནི༔ ད་ལྟ་འདི་རུ་བཅས་པ་བཞིན༔ སྲོག་ལ་བབ་ཀྱང་མ་བཏང་ཅིག༔ ཡན་ལག་རྣམས་ཀྱང་རྟག་ཏུ་སྲུངས༔ ས་མ་ཡ་རཀྵ་ཧཱུྃ༔ ཞེས་དམ་ཆུ་སྦྱིན། ཇི་སྐད་བསྒོས་པའི་དམ་ཚིག་རྣམས་ཚུལ་བཞིན་བསྲུང་བར་བགྱིའོ་སྙམ་པས་འདིའི་རྗེས་ཟློས། ཧཱུྃ༔ རྡོ་རྗེ་སློབ་དཔོན་བཀའ་དྲིན་ཆེ༔ བཀའ་བཞིན་བགྱིད་དོ་དམ་ཚིག་སྲུངས༔ རྟག་ཏུ་ཐུགས་རྗེས་བཟུང་བ་དང་༔ བྱིན་གྱིས་བརླབ་པར་མཛད་དུ་གསོལ༔ ས་མ་ཡ་ན་ར་ཀན༔ ཞེས་བརྗོད་དུ་གཞུག །དེ་ནས་དབང་བསྐུར་དངོས་གཞི་ཞུ་བའི་ཡོན་ཏུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས། འཁོར་བའི་འདམ་རྫབ་རྒྱ་མཚོ་ལས༔ བྱིང་བ་སྐྱབས་མེད་བདག་ལ་སྐྱོབས༔ དབང་བཞིའི་རིམ་པ་རྫོགས་པར་བསྐུར༔ མཆོག་གི་དངོས་གྲུབ་སྩལ་དུ་གསོལ༔ ལན་གསུམ། དབང་དངོས་གཞི་ལ་འདི་ལྟར་བུམ་པ་ལ་སོགས་པའི་དབང་རྣམ་པ་ལྔ་པོ་རེ་རེ་ལའང་ནང་གསེས་ཀྱི་བཞི་བཞིར་དབྱེ་བའི་རྣམ་པ་ཉི་ཤུས་བྱང་ཆུབ་པའི་བདག་ཉིད་ཅན་ཏུ་བསྐུར་བ་ཡིན་པས་སོ་སོའི་སྐབས་སུ་བབས་པའི་ཚིག་དོན་རྣམས་ལ་ཐུགས་རྩེ་གཅིག་ཏུ་གཏོད་ཅིང་ངེས་ཤེས་བསྐྱེད་མཛོད། བུམ་པ་ཐོགས་ལ། ཧཱུྃ༔ བུམ་པ་ཟླུམ་པོ་ཆོས་སྐུ་སྐྱེ་བ་མེད༔ བུམ་རྫས་བྱང་ཆུབ་སེམས་འདི་འགག་པ་མེད༔ སྐྱེ་འགག་གཉིས་མེད་བྱང་ཆུབ་སེམས་ཀྱི་ཆུས༔ གཟུང་འཛིན་འཁྲུལ་པའི་བག་ཆགས་དྲི་མ་འཁྲུས༔ ལས་དང་ཉོན་མོངས་བག་ཆགས་ཀུན་དག་ནས༔ དབང་བཞིའི་ཡེ་ཤེས་རྫོགས་པའི་དབང་ཐོབ་ཤོག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨ་བྷི་ཥིཉྩ་ཨོཾ་ཨཱཿཧཱུྃ་ཧྲཱིཿ ཞེས་བརྗོད་ལ་སྤྱི་བོར་བཞག་ཅིང་བུམ་ཆུ་འཐོར། །ཡང་སྔགས་བརྗོད་ལ་མགྲིན་པར་བཞག་སྟེ་བུམ་ཆུ་བླུད། སྙིང་གར་གཏད་ལ། དེ་ལྟར་བུམ་པ་སྤྱི་བོར་བཞག་ཅིང་ཁྲུས་བྱས་པས་བུམ་དབང༌། མགྲིན་པར་བཞག་ཅིང་བུམ་ཆུ་སྦྱིན་པ་གསང་དབང༌། སྙིང་གར་གཏད་ནས་ཚིག་དོན་ངོ་སྤྲད་པ་ནི་ཆོས་སྐུ་སྐྱེ་མེད་མཚོན་པའི་བུམ་པ་ཟླུམ་པོའི་ནང་དུ་འགག་མེད་བྱང་ཆུབ་སེམས་ཀྱི་ཆུ་རྒྱུན་གྱིས་བཀང་བས་དབང་བསྐུར་བས་གཟུང་འཛིན་འཁྲུལ་པའི་དྲི་མ་དག་པར་ཤེས་རབ་ཡེ་ཤེས་ཀྱི་དབང༌། གཉིས་མེད་ཟུང་འཇུག་རིག་སྟོང་གི་ངོ་བོར་མཉམ་པར་བཞག་པ་དབང་བཞི་པ་སྟེ་བུམ་པ་ལ་བརྟེན་པའི་དང་པོའི་དབང་བཞི་ཡོངས་སུ་རྫོགས་པ་ཐོབ་པ་ཡིན་ནོ། །བྷནྡྷའི་བདུད་རྩི་ཐོགས་ལ། ཨཱཿ ཐོད་པ་ཟླུམ་པོ་ཆོས་དབྱིངས་བདེ་ཆེན་ནང་༔ བདུད་རྩི་ལྔ་ལྡན་འཆི་མེད་བཅུད་ཀྱིས་གཏམས༔ ཉོན་མོངས་དུག་ལྔ་རིགས་ལྔ་སྐུ་ལྔར་གྱུར༔ གཉིས་མེད་ངང་ནས་ཐབས་ཤེས་རོལ་པར་སྦྱོར༔ འཁོར་འདས་གཉིས་མེད་བདུད་ལས་རྣམ་པར་རྒྱལ༔ དབང་བཞི་ཡོངས་སུ་རྫོགས་པའི་དབང་ཐོབ་ཤོག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨ་བྷི་ཥིཉྩ་ཨོཾ་ཨཱཿཧཱུྃ་ཧྲཱིཿ སྤྱི་བོར་བཞག་ཅིང་མཐོར། མགྲིན་པར་བཞག་ཅིང་མྱང་ངུ་གཞུག །བསྙེན་སྒྲུབ་ལས་གསུམ་གྱི་སྔགས་འདི་རྣམས་ཀྱི་རྗེས་ཟློས་མཛད་པར་ཞུ། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ལན་གསུམ། ཨོཾ་ཨཱཿཧཱུྃ༔ བཛྲ་གུ་རུ་པདྨ་ཐོད་ཕྲེང་རྩལ༔ བཛྲ་ས་མ་ཡ་ཛ༔ སིདྡྷི་ཕ་ལ་ཧཱུྃ་ཨཱཿ ལན་གསུམ། ཧྲཱིཿམ་ཧ་རི་ནི་ས༔ ར་ཙ་ཧྲི་ཡ༔ ཙིཏྟ་ཧྲིང་ཧྲིང་ཛཿ་ཛཿསརྦ་སིདྡྷི་ཤཱནྟིཾ་པུཥྟིཾ་བ་ཤཾ་མཱ་ར་ཡ་རྦད༔ ལན་གསུམ། སྙིང་གར་གཏད་ལ། དེ་ལྟར་ཐོད་པ་སྤྱི་བོར་བཞག་པ་བུམ་དབང༌། མགྲིན་པར་བཞག་ཅིང་བཟླས་ལུང་དང་བདུད་རྩི་སྦྱིན་པ་གསང་དབང༌། སྙིང་གར་གཏད་ནས་ཚིག་དོན་ངོ་སྤྲོད་པ་ནི་ཆོས་དབྱིངས་སྤྲོས་བྲལ་མཚོན་པའི་ཐོད་པ་ཟླུམ་པོའི་ནང་དུ། བདེ་ཆེན་ཡེ་ཤེས་གྱི་བདུད་རྩིས་དབང་བསྐུར་བས་ཉོན་མོངས་པ་ལྔ་སྐུ་དང་ཡེ་ཤེས་སུ་གནས་འགྱུར་བར་ཤེས་པ་ཤེས་རབ་ཡེ་ཤེས་ཀྱི་དབང༌། གཉིས་མེད་ཟུང་འཇུག་རིག་སྟོང་གི་ངོ་བོར་མཉམ་པར་བཞག་པ་དབང་བཞི་པ་སྟེ་ཐོད་པ་ལ་བརྟེན་པའི་གསང་བའི་དབང་བཞི་ཡོངས་སུ་རྫོགས་པ་ཐོབ་པ་ཡིན་ནོ། །མེ་ལོང་ཐོགས་ལ། ཧཱུྃ༔ མེ་ལོང་ཟླུམ་པོ་ཆོས་སྐུ་སྐྱེ་བ་མེད༔ ཚོགས་དྲུག་གསལ་ཡང་རྙོགས་མེད་བདེ་སྟོང་ངང་༔ དགའ་བཞིའི་ངོས་ཟིན་ཐིག་ལེ་རང་ས་ཟིན༔ སེམས་ཉིད་གསལ་སྟོང་འཛིན་མེད་ངང་ན་གནས༔ གཟུང་འཛིན་མཚན་མའི་དངོས་པོ་ཀུན་ལས་འདས༔ དབང་བཞི་ཡོངས་སུ་རྫོགས་པའི་དབང་ཐོབ་ཤོག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨ་བྷི་ཥིཉྩ་ཨོཾ་ཨཱཿཧཱུྃ་ཧྲཱིཿ མེ་ལོང་སྤྱི་བོར་བཞག་ལ་དཔྲལ་བར་སིནྡྷཱུ་རའི་ཐིག་ལེ་བཀོད། མགྲིན་པར་བཞག་ཅིང༌། དེར་ཐིག་ལེ་བཀོད་ལ། ཀྱཻ་གསང་མཚན་རྡོ་རྗེ་ཐོད་ཕྲེང་རྩལ་ཞེས་བྱ་བའོ། །ཞེས་གདགས། སྙིང་གར་གཏད་ཅིང་ཐིག་ལེ་བྱས་ལ། དེ་ལྟར་མེ་ལོང་གི་དཀྱིལ་འཁོར་སྤྱི་བོར་བཞག་ཅིང་དཔྲལ་བར་ཐིག་ལེ་བྱས་པ་བུམ་དབང༌། མགྲིན་པར་བཞག་ཅིང་གསང་མཚན་གདགས་ནས་ཐིག་ལེ་བྱས་པ་གསང་དབང༌། སྙིང་གར་གཏད་ནས་ཆིག་དོན་ངོ་སྤྲད་པ་ནི། ཆོས་དབྱིངས་སྐྱེ་བ་མེད་པ་མཚོན་པའི་མེ་ལོང་ཟླུམ་པོ་ལ་རང་བྱུང་བདེ་བ་ཆེན་པོ་སིནྡྷཱུ་རའི་ཐིག་ལེས་བརྒྱན་པས་དབང་བསྐུར་བས་བདེ་སྟོང་ཟུང་འཇུག་དགའ་བཞིའི་ཡེ་ཤེས་རྒྱུད་ལ་སྐྱེས་པར་ཤེས་པ་ཤེས་རབ་ཡེ་ཤེས་ཀྱི་དབང༌། གཉིས་མེད་ཟུང་འཇུག་རིག་སྟོང་གི་ངོ་བོར་མཉམ་པར་བཞག་པ་དབང་བཞི་པ་སྟེ་མེ་ལོང་ལ་བརྟེན་པའི་གསུམ་པའི་དབང་བཞི་ཡོངས་སུ་རྫོགས་པ་ཐོབ་པ་ཡིན་ནོ། །ཤེལ་རྡོ་ཐོགས་ལ། ཧྲཱིཿ ཀུན་གཞིའི་དབྱིངས་ལས་རྟོག་པ་ཅི་ཤར་ཡང་༔ ཤར་ཙམ་ཉིད་ནས་རྟོག་པའི་ངོ་བོ་སྟོང་༔ གསལ་ལ་འཛིན་མེད་ཆུ་ཟླ་འཇའ་ཚོན་འདྲ༔ ཉོན་མོངས་ལྔ་དག་ཡེ་ཤེས་ལྔ་མཐར་ཕྱིན༔ གསལ་སྟོང་འཛིན་མེད་ལྟ་སྒོམ་སྤྱོད་འབྲས་དབང་༔ སྐལ་ལྡན་རིགས་ཀྱི་བུ་ཡིས་ཐོབ་པར་ཤོག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨ་བྷི་ཥིཉྩ་ཨོཾ་ཨཱཿཧཱུྃ་ཧྲཱིཿ ཤེལ་རྡོ་སྤྱི་བོར་དང་མགྲིན་པར་བཞག །སྙིང་གར་གཏད་ལ། དེ་ལྟར་ཤེལ་དཀར་སྤྱི་བོར་བཞག་པ་བུམ་དབང༌། མགྲིན་པར་བཞག་པ་གསང་དབང༌། སྙིང་གར་གཏད་ཅིང་ཚིག་དོན་ངོ་སྤྲད་པ་ནི། ཤེལ་ལ་རྐྱེན་དང་འཕྲད་པས་འོད་ཟེར་སྣ་ཚོགས་སུ་ཤར་ཡང༌། དེ་ཉིད་ཕྱི་ནང་གང་དུའང་མི་གནས་པ་ལྟར་རང་རིག་པའི་ཀློང་དུ་འཁོར་འདས་ཀྱི་སྣང་བ་སྣ་ཚོགས་སུ་སྣང་ཡང་སྐྱེ་འགག་གནས་གསུམ་དང་བྲལ་བར་ཤེས་པ་ཤེས་རབ་ཡེ་ཤེས་ཀྱི་དབང༌། གཉིས་མེད་ཟུང་འཇུག་རིག་སྟོང་གི་ངོ་བོར་མཉམ་པར་བཞག་པ་དབང་བཞི་པ་སྟེ་རྡོ་རྗེ་སེམས་དཔའི་མེ་ལོང་ལ་བརྟེན་པའི་ཀ་དག་གི་དབང་བཞི་ཡོངས་སུ་རྫོགས་པ་ཐོབ་པ་ཡིན་ནོ། །གུ་རུའི་སྐུ་འབགས་དང་ཕྲེང་བ་ཐོགས་ལ། ཧཱུྃ༔ ཆོས་སྐུ་སྐྱེ་མེད་དང་དབྱིངས་ལས་མ་གཡོས་ཀྱང་༔ ལོངས་སྐུ་གསལ་ལ་མ་འདྲེས་རྩ་གསུམ་ལྷ༔ སྤྲུལ་སྐུ་སྣ་ཚོགས་ཐབས་ཀྱིས་འགྲོ་བ་འདུལ༔ སྐུ་གསུམ་ངང་གིས་མཉམ་ཞིང་མ་འདྲེས་གསལ༔ སྔོན་ཚེའི་དུས་ན་ཁྱེད་དང་སྨོན་ལམ་གཅིག༔ ད་ལྟ་རང་དང་སློབ་མའི་སྟངས་ཟུང་ལ༔ སྲོག་གི་ཕྱིར་ཡང་མི་གཏོང་བསྒྲུབ་ལགས་ན༔ ཡེ་ཤེས་དབང་ཆེན་རབ་འབྱམས་ཀུན་རྫོགས་ཤོག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨ་བྷི་ཥིཉྩ་ཨོཾ་ཨཱཿཧཱུྃ་ཧྲཱིཿ སྐུ་འབག་སྤྱི་བོར་བཞག །ཕྲེང་བ་ལག་ཏུ་གཏད་ལ་སྐུ་སྙིང་གར་གཏད་ལ། དེ་ལྟར་སྐུ་འབག་སྤྱི་བོར་བཞག་པ་བུམ་དབང༌། ཕྲེང་བ་ལག་ཏུ་གཏད་པ་གསང་དབང༌། སྐུ་སྙིང་གར་གཏད་ཅིང་ཚིག་དོན་ངོ་སྤྲད་པ་ནི། སེམས་ཉིད་གདོད་ནས་སྤྲོས་པ་དང་བྲལ་ཞིང་འོད་གསལ་བ་གུ་རུའི་ཐུགས་དང་དབྱེར་མེད་རོ་གཅིག་ཏུ་མཉམ་པར་ཤེས་པ་ཤེས་རབ་ཡེ་ཤེས་ཀྱི་དབང༌། གཉིས་མེད་ཟུང་འཇུག་རིག་སྟོང་གི་ངོ་བོར་མཉམ་པར་གཞག་པ་དབང་བཞི་པ་སྟེ་སྐུ་འབག་ལ་བརྟེན་པའི་རིག་པ་རྩལ་གྱི་དབང་བཞི་ཡོངས་སུ་རྫོགས་པ་ཐོབ་པ་ཡིན་ནོ། སྐབས་འདིར་རྩ་དབང་མ་ཐོབ་པ་སོགས་ལ་གཏོར་དབང་བསྐུར་བར་སྤྲོ་ན། དེ་ནས་བྱིན་རླབས་ཡོངས་རྫོགས་གཏོར་མའི་དབང་བསྐུར་བ་ལ་དམིགས་པ་འདི་བཞིན་ཏུ་མཛོད། གཏོར་སྣོད་ཡེ་ཤེས་རིན་ཆེན་འབར་བའི་གཞལ་མེད་ཁང་རྒྱན་དང་བཀོད་པ་ཚད་མེད་པའི་ནང་དུ་གཏོར་མ་ཉིད་བླ་མ་བདེ་གཤེགས་ཡོངས་རྫོགས་འདུས་པའི་དཀྱིལ་འཁོར་ལྷ་ཚོགས་མངོན་སུམ་བཞིན་ཏུ་གསལ་བའི་གནས་གསུམ་ནས་རྡོ་རྗེའི་ཡེ་ཤེས་ཀྱི་ངོ་བོ་འོད་ཟེར་དཀར་དམར་མཐིང་གསུམ་རིམ་དང་གཅིག་ཅར་དུ་འཕྲོས། ཁྱེད་རང་རྣམས་ཀྱི་གནས་གསུམ་དུ་ཐིམ། དབང་བཞི་རྩལ་རྫོགས་སུ་ཐོབ། སྒོ་གསུམ་དང་ཤེས་བྱའི་དྲི་མ་སྦྱངས། སྐུ་གསུང་ཐུགས་ཡེ་ཤེས་རྡོ་རྗེའི་བྱིན་རླབས་དང་དངོས་གྲུབ་མ་ལུས་པ་སྟན་ཐོག་གཅིག་ཏུ་ཐོབ་པར་མོས་ཤིག །གཏོར་ཆེན་ཐོགས་ལ། ཨོཾ༔ སྐུ་ཡི་བྱིན་གྱིས་བརླབ་ཏུ་གསོལ༔ ལུས་ལ་གཟི་བྱིན་བསྐྱེད་དུ་གསོལ༔ ལུས་ཀྱི་སྒྲིབ་པ་སྦྱང་དུ་གསོལ༔ ལྷ་དབང་ལུས་ལ་བསྐུར་དུ་གསོལ༔ སྐུ་མི་འགྱུར་ཚེ་ཡི་དངོས་གྲུབ་སྩོལ༔ ཨཱཿ གསུང་གི་བྱིན་གྱིས་བརླབ་ཏུ་གསོལ༔ ངག་གི་སྒྲིབ་པ་སྦྱང་དུ་གསོལ༔ སྔགས་དབང་ངག་ལ་བསྐུར་དུ་གསོལ༔ གསུང་སྙིང་པོ་ལུང་གི་དངོས་གྲུབ་སྩོལ༔ ངག་ལ་ནུས་པ་དབྱུང་དུ་གསོལ༔ ཧཱུྃ༔ ཐུགས་ཀྱི་བྱིན་གྱིས་བརླབ་ཏུ་གསོལ༔ སེམས་ཀྱི་སྒྲིབ་པ་སྦྱང་དུ་གསོལ༔ ཐུགས་སྐྱེ་མེད་རྡོ་རྗེའི་དངོས་གྲུབ་སྩོལ༔ སེམས་ལ་རྟོགས་པ་བསྐྱེད་དུ་གསོལ༔ སྐུ་གསུང་ཐུགས་ཀྱི་བྱིན་གྱིས་རློབས༔ ཡེ་ཤེས་ལྔ་ཡི་དབང་སྐུར་ཅིག༔ བརྒྱུད་འཛིན་བུ་འདི་བྱིན་གྱིས་རློབས༔ དབང་བཞི་རྫོགས་པར་བབ་གྱུར་ཅིག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ༔ བཛྲ་གུ་རུ་པདྨ་ཐོད་ཕྲེང་རྩལ༔ བཛྲ་ས་མ་ཡ་ཛ༔ སིདྡྷི་ཕ་ལ་ཧཱུྃ་ཨཱཿ ཀཱ་ཡ་ཨ་བྷི་ཥིཉྩ་ཨོཾ༔ ཝཱ་ཀ་ཨ་བྷི་ཥིཉྩ་ཨཱཿ ཙིཏྟ་ཨ་བྷི་ཥིཉྩ་ཧཱུྃ༔ སརྦ་ཨ་བྷི་ཥིཉྩ་ཧྲཱི༔ ཅེས་བརྗོད་ཅིང་གཏོར་མ་གནས་གསུམ་དུ་རེག་མཐར། གཏོར་མའི་ལྷ་ཚོགས་འོད་དུ་ཞུ་སྟེ་ཁྱེད་རང་རྣམས་ལ་ཐིམ་པས་བླ་མ་བདེ་གཤེགས་ཡོངས་རྫོགས་འདུས་པའི་གསང་བ་གསུམ་དང་དབྱེར་མེད་པར་གྱུར། རྡོ་རྗེ་བདུད་རྩིའི་བཅུད་དུ་འཁྱིལ་བ་མགྲིན་པར་མྱང་བས་དངོས་གྲུབ་རྣམ་པ་གཉིས་བདེ་བླག་ཏུ་ཐོབ་པར་མོས་ཤིག །གཏོར་མའི་ཆ་ཤས་དང་བདུད་རྩི་སྦྱིན། དེ་ནས་རྩ་སྔགས་བརྗོད་བཞིན་ཏུ་སློབ་བུ་རྣམས་ལ་མེ་ལོང་འོད་ཁྲུས་བྱ། མེ་ཏོག་དཀར་པོ་ལ་རྟེན་སྙིང་བརྒྱ་རྩ་བརྒྱད་བཟླས་པ་འཐོར་ཞིང༌། ཧོ༔ དབང་བསྐུར་བྱིན་རླབས་བླ་མའི་སྲས༔ ལུས་ངག་ཡིད་གསུམ་སྨིན་གྱུར་ནས༔ འཁོར་འདས་ཆོས་ལ་དབང་བསྒྱུར་བའི༔ དབང་དང་དངོས་གྲུབ་རབ་གནས་ཤོག༔ ཅེས་རྩ་སྔགས་ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔དང༌། ཡེ་དྷརྨ་བཟླས༔ ཧོཿ དབང་ཐིམ་པར་གྱུར་ཅིག༔ གསལ་བར་གྱུར་ཅིག༔ མཆེད་པར་གྱུར་ཅིག༔ འབར་བར་གྱུར་ཅིག༔ རྒྱས་པར་གྱུར་ཅིག༔ དབང་དུ་གྱུར་ཅིག༔ སྨིན་པར་གྱུར་ཅིག༔ སྨིན་འཛོམ་རིག་པ་རྟོགས་པར་གྱུར་ཅིག༔ བརྟན་པར་གྱུར་ཅིག༔ གྲོལ་བར་གྱུར་ཅིག༔ རྟག་ཏུ་གཙོ་བོའི་ལྷ་གང་ཡིན་པ་དང་དབྱེར་མེད་དུ་གྱུར་ཅིག༔ ཅེས་དང་ཤིས་བརྗོད་རྒྱས་པར་སྤེལ་ལ་མེ་ཏོག་འཐོར། དེ་དག་གིས་གཏེར་ཆེན་རྡོ་རྗེ་གླིང་པའི་ཟབ་ཆོས་བླ་མ་བདེ་གཤེགས་ཡོངས་རྫོགས་བཀའ་འདུས་ཀྱི་སྨིན་བྱེད་སྙིང་པོ་བསྡུས་པ་བསྐུར་གྲུབ་པ་ལགས་པས་སོགས་ཀྱིས་མཚམས་སྦྱར་ལ་དམ་ཚིག་ཁས་བླངས། གཏང་རག །ལུས་འབུལ། དགེ་བསྔོ་བཅས་བྱ། སློབ་དཔོན་གྱིས་ཚོགས་ཡོད་ན་ཚོགས་མཆོད། གཏོར་སྐྱོང་སོགས་ལས་བྱང་གི་མཇུག་ཡོངས་རྫོགས་མཐར་དབྱུང༌། ཚོགས་མཆོད་མེད་པའི་སྤྲོས་པ་བསྡུ་ན་མཆོད་བསྟོད་མདོར་བསྡུས། ནོངས་བཤགས། བརྟན་བཞུགས། བསྡུ་ལྡངས། སྨོན་ལམ་ཤིས་བརྗོད། བསྔོ་བའི་བར་དུ་བྱའོ། །དོན་དབང་ཟབ་མོས་རྒྱུད་སྨིན་ནས། །དོན་དམ་རང་རིག་བླ་མ་དང༌། །དབྱེར་མེད་ཐུགས་ཀྱི་ཐིག་ལེར་ཆུབ། །གཞན་དོན་སྲིད་མཐར་རྒྱས་གྱུར་ཅིག །ཅེས་པའང་པདྨ་གར་དབང་བློ་གྲོས་མཐའ་ཡས་ཀྱིས་ཟབ་ཆོས་འདི་ཉིད་འཕེལ་ཞིང་རྒྱས་པའི་བཙས་སུ་དམིགས་ཏེ་རྫོང་ཤོད་བདེ་གཤེགས་འདུས་པའི་སྒྲུབ་གནས་སུ་བགྱིས་པ་དགེ་ལེགས་འཕེལ། །སླར་ཕུན་ཚོགས་རྣམ་རྒྱལ་པས་ནག་འགྲོས་སུ་བཀོད་པ་དགེ་ལེགས་འཕེལ།། །།

[edit]

@#/__bla ma bka' brgyad 'dus pa'i don dbang bskur ba'i yi ge rin chen dbyig gi snying po zhes bya ba bzhugs so//_na mo gu ru we/__/khyab bdag rdo rje thod phreng dang*/__/dbyer med bla ma la btud nas/__/bka' rnams 'dus pa'i don dbang gi__/lag len nyung ngu rnam gsal bkod/__'di la gnyis/__sbyor ba yo byad kyi gshom/__dngos gzhi sgrub cing dbang bskur ba'o/__/dang po ni/__rten gyi spyan sngar stegs bu la dkyil 'khor gnam bab ma rdul tshon nam ras bris gang rung bkod pa'i dbus su khri'u la rnam bum mgul chings bcud dang ldan pa'i khar thod pa bdud rtsi A mr-i tas bkang ba bzhag la me long sin+d+hU ra'i thig le lnga tshom gyis brgyan pas bkab/__de steng shel rdo dang gu ru'i sku tsaka bzhugs su gsol/__gsham du gtor dbang sbrel bar sprau na/__mdun rgyab gang bder gtor ma rin chen zur brgyad sku tsaka dar gdugs kyis brgyan pa bkod/__sman raka gtor gsum dang phyi mchod rnams spyi ltar bsham/__las bum/__mig dar/__gtor tshogs sogs nye bar mkho ba rnams kyang 'du bya'o/__gnyis pa la/__dang po sgrub mchod ni/__las byang le'u gsum pa'i skyabs sems nas bzlas pa dang*/__dbang blang ba yan btang*/__las bum rta sngags kyis byin brlab/__slob ma gzhug par gnang ba nod do/__/gnyis pa dbang bskur ba ni/__slob ma rnams khrus nas dbyung*/__bgegs gtor btang la bka' bsgo zhing mtshams bcad/__sems bskyed gsal btab la/__'dir gsan par bya ba/__mdo sngags kyi chos thams cad kyi yang rtse gsang sngags rdo rje theg pa'i bskyed rdzogs ji snyed pa'i srog dang snying por gyur pa lam zab bla ma sgrub pa'i thabs mang du mchis pa thams cad kyi nang nas bla na ma mchis pa/__phyogs dus rgyal ba sras dang bcas pa'i gsang gsum phrin las dang bcas pa gcig tu bsdus pa'i o rgyan gyi slob dpon chen po pad+ma thod phreng rtsal nyid gyis rdo rje'i tshig tu bstan pa'i zab pa dang rgya che ba'i sgrub thabs mtha' yas par mchis pa rnams kyis nang nas ngo mtshar rmad du byung ba bla ma bde gshegs yongs rdzogs bka' 'dus kyi chos skor rnams/__sprul pa'i lo tsA ba chen po be ro tsa na nyid rig 'dzin sngags 'chang chen po'i skur bstan nas gter ston rgyal po lnga yi gsum par byon pa o rgyan rdo rje gling pas ngam shod gnam lcags brag nas spyan drangs te dngos dang brgyud nas bstan 'gro'i don mtha' yas par mdzad pa 'di la dbang gi cho ga rgyas 'bring bsdus pa'i tshul du bzhugs pa las/__'dir smin byed thams cad kyi snying po zlum po bzhi'i brda la brten pa'i don dbang zab mo skur bar byed pas sogs kyis mtshams sbyar la maN+Dal 'bul du gzhug__/mtshams sbyor spyi mthun bcas 'bru gsum gyis mig dar sbyin/__thal mo me tog dang bcas te gsol ba 'debs pa 'di'i rjes zlos/__slob dpon bdag la dgongs su gsol:__sngon chad lam log 'khor bar 'khyams:__srid pa'i mtsho las bsgral slad du:__bla ma'i dkyil 'khor bstan du gsol:__lan gsum/__bdag gzhan sems can thams cad bla ma rtsa gsum kun 'dus la byang chub snying po'i bar du skyabs su mchi'o snyam pa'i blos 'di'i rjes zlos:__na mo:__bla ma bde gshegs 'dus pa'i sku:__dkon mchog gsum gyi rang bzhin la:__bdag dang 'gro drug sems can rnams:__byang chub bar du skyabs su mchi:__lan gsum/__mkha' khyab kyi sems can thams cad bla ma sangs rgyas rin po che'i go 'phang la 'god pa'i phyir du dkyil 'khor gnyan por 'jug par bgyi'o snyam du sems bskyed pa gsal thob la 'di'i rjes zlos/__na mo:__sems bskyed 'gro ba kun don du:__bla med sangs rgyas bsgrubs nas ni:__gang la gang 'dul phrin las kyis:__'gro don byed par sems bskyed do:__lan gsum/__yul mchog de dag gi spyan sngar tshogs bsags yan lag bcu pa tshul bzhin bya ba'i blos 'di'i rjes zlos/__bla ma bde gshegs mkha' 'gro gnas 'dir gshegs:__nyi zla pad gdan mdzes la dgyes par bzhugs:__lus ngag yid gsum gus pas phyag mtshal lo:__phyi nang gsang ba'i mchod sprin kun gyis mchod:__sngon nas da bar mi dge ci bsags bshags:__dus gsum dge spyod mdzad la yi rang 'bul:__bdag gzhan yongs grol chos 'khor bskor du gsol:__'gro don mya ngan mi 'da' bzhugs su gsol:__snying po ma gyur sems can don du bsngo:__gnas lugs yang dag rdo rje'i don rtogs shog:__lan gsum/__de nas dbang gi gzhi dgod cing ye shes dbab pa yin pas khyed rang rnams lus ngag yid gsum gyi gnad bcing*/__sgo lnga'i shes pa nang du bsdus la yid rtse gcig pas mos gus bskyed cing dmigs pa 'di ltar sgoms shig__/khyed rang rnams ye shes kyi mkha' 'gro mar gsal ba'i snying gar g.yung drung dmar po g.yas su 'khyil ba/__rwa bzhi la ha ri ni sa'i yi ge gsal/__slob dpon gyi thugs ka nas 'phros pa'i 'od zer gyis bskul bas g.yung drung g.yas su drag tu 'khor/__bla ma sku gsum gyi zhing khams rab 'byams dang dkyil 'khor lha tshogs rnams las sku gsung thugs kyi byin rlabs thams cad phyag rgya sngags dang phyag mtshan 'od zer gyi rnam par nam mkha' gang ba tsam du byon nas khyed rang rnams la sib sib thim par mos shig__/'bebs pa'i rdzas bdug__/dbyangs rol bcas/__hU~M hrI:__sngon gyi bskal pa dang po la:__au rgyan yul gyi nub byang mtshams:__pad+ma ge sar sdong po la:__ya mtshan mchog gi dngos grub brnyes:__pad+ma 'byung gnas zhes su grags:__'khor du mkha' 'gro mang pos bskor:__khyed kyi rjes su bdag sgrub kyis:__byin gyis brlab phyir gshegs su gsol:__gnas mchog 'di ru byin phob la:__sgrub mchog bdag la dbang bzhi skur:__bgegs dang log 'dren bar chad sol:__mchog dang thun mong dngos grub stsol:__oM AHhU~M gu ru d+he wa d+hA ki nI badz+ra sa ma ya A we sha ya a AH__oM AHhU~M badz+ra gu ru pad+ma sid+d+hi hU~M:__badz+ra gu ru pad+ma thod phreng rtsal:__badz+ra sa ma ya dzaH__sid+d+hi pha la hU~M:__hrIHma ha ri ni sa ra tsa hri ya:tsit+ta hring hring dzaHdzaHhU~M ba~M ho:__ye shes pa'i byin rlabs kyi rgyun brtan par mos shig__/tiSh+Tha badz+ra:__zhes rdo rje mgor bzhag__/ma rig pa'i sgrib g.yogs bsal nas ye shes rang snang gi dkyil 'khor mngon tu mthong bar mos shig__/legs 'ongs bu khyod skal ba bzang :__ma rig ling thog nga yis bsal:__rtsa ba gsum gyi dkyil 'khor bstan:__dam tshig rtse gcig thub par srungs:__zhes gdong bsal/__hU~M:__sku gsung thugs kyi dam tshig ni:__da lta 'di ru bcas pa bzhin:__srog la bab kyang ma btang cig:__yan lag rnams kyang rtag tu srungs:__sa ma ya rak+Sha hU~M:__zhes dam chu sbyin/__ji skad bsgos pa'i dam tshig rnams tshul bzhin bsrung bar bgyi'o snyam pas 'di'i rjes zlos/__hU~M:__rdo rje slob dpon bka' drin che:__bka' bzhin bgyid do dam tshig srungs:__rtag tu thugs rjes bzung ba dang :__byin gyis brlab par mdzad du gsol:__sa ma ya na ra kan:__zhes brjod du gzhug__/de nas dbang bskur dngos gzhi zhu ba'i yon tu maN+Dal phul/__gsol ba 'debs pa 'di'i rjes zlos/__'khor ba'i 'dam rdzab rgya mtsho las:__bying ba skyabs med bdag la skyobs:__dbang bzhi'i rim pa rdzogs par bskur:__mchog gi dngos grub stsal du gsol:__lan gsum/__dbang dngos gzhi la 'di ltar bum pa la sogs pa'i dbang rnam pa lnga po re re la'ang nang gses kyi bzhi bzhir dbye ba'i rnam pa nyi shus byang chub pa'i bdag nyid can tu bskur ba yin pas so so'i skabs su babs pa'i tshig don rnams la thugs rtse gcig tu gtod cing nges shes bskyed mdzod/__bum pa thogs la/__hU~M:__bum pa zlum po chos sku skye ba med:__bum rdzas byang chub sems 'di 'gag pa med:__skye 'gag gnyis med byang chub sems kyi chus:__gzung 'dzin 'khrul pa'i bag chags dri ma 'khrus:__las dang nyon mongs bag chags kun dag nas:__dbang bzhi'i ye shes rdzogs pa'i dbang thob shog:__oM AHhU~M badz+ra gu ru pad+ma sid+d+hi hU~M:__a b+hi Shiny+tsa oM AHhU~M hrIH__zhes brjod la spyi bor bzhag cing bum chu 'thor/__/yang sngags brjod la mgrin par bzhag ste bum chu blud/__snying gar gtad la/__de ltar bum pa spyi bor bzhag cing khrus byas pas bum dbang*/__mgrin par bzhag cing bum chu sbyin pa gsang dbang*/__snying gar gtad nas tshig don ngo sprad pa ni chos sku skye med mtshon pa'i bum pa zlum po'i nang du 'gag med byang chub sems kyi chu rgyun gyis bkang bas dbang bskur bas gzung 'dzin 'khrul pa'i dri ma dag par shes rab ye shes kyi dbang*/__gnyis med zung 'jug rig stong gi ngo bor mnyam par bzhag pa dbang bzhi pa ste bum pa la brten pa'i dang po'i dbang bzhi yongs su rdzogs pa thob pa yin no/__/b+han+d+ha'i bdud rtsi thogs la/__AH__thod pa zlum po chos dbyings bde chen nang :__bdud rtsi lnga ldan 'chi med bcud kyis gtams:__nyon mongs dug lnga rigs lnga sku lngar gyur:__gnyis med ngang nas thabs shes rol par sbyor:__'khor 'das gnyis med bdud las rnam par rgyal:__dbang bzhi yongs su rdzogs pa'i dbang thob shog:__oM AHhU~M badz+ra gu ru pad+ma sid+d+hi hU~M:__a b+hi Shiny+tsa oM AHhU~M hrIH__spyi bor bzhag cing mthor/__mgrin par bzhag cing myang ngu gzhug__/bsnyen sgrub las gsum gyi sngags 'di rnams kyi rjes zlos mdzad par zhu/__oM AHhU~M badz+ra gu ru pad+ma sid+d+hi hU~M:__lan gsum/__oM AHhU~M:__badz+ra gu ru pad+ma thod phreng rtsal:__badz+ra sa ma ya dza:__sid+d+hi pha la hU~M AH__lan gsum/___hrIHma ha ri ni sa:__ra tsa hri ya:__tsit+ta hring hring dzaH dzaHsarba sid+d+hi shAn+tiM puSh+tiM ba shaM mA ra ya rbad:__lan gsum/__snying gar gtad la/__de ltar thod pa spyi bor bzhag pa bum dbang*/__mgrin par bzhag cing bzlas lung dang bdud rtsi sbyin pa gsang dbang*/__snying gar gtad nas tshig don ngo sprod pa ni chos dbyings spros bral mtshon pa'i thod pa zlum po'i nang du/__bde chen ye shes gyi bdud rtsis dbang bskur bas nyon mongs pa lnga sku dang ye shes su gnas 'gyur bar shes pa shes rab ye shes kyi dbang*/__gnyis med zung 'jug rig stong gi ngo bor mnyam par bzhag pa dbang bzhi pa ste thod pa la brten pa'i gsang ba'i dbang bzhi yongs su rdzogs pa thob pa yin no/__/me long thogs la/__hU~M:__me long zlum po chos sku skye ba med:__tshogs drug gsal yang rnyogs med bde stong ngang :__dga' bzhi'i ngos zin thig le rang sa zin:__sems nyid gsal stong 'dzin med ngang na gnas:__gzung 'dzin mtshan ma'i dngos po kun las 'das:__dbang bzhi yongs su rdzogs pa'i dbang thob shog:__oM AHhU~M badz+ra gu ru pad+ma sid+d+hi hU~M:__a b+hi Shiny+tsa oM AHhU~M hrIH__me long spyi bor bzhag la dpral bar sin+d+hU ra'i thig le bkod/__mgrin par bzhag cing*/__der thig le bkod la/__kyai gsang mtshan rdo rje thod phreng rtsal zhes bya ba'o/__/zhes gdags/__snying gar gtad cing thig le byas la/__de ltar me long gi dkyil 'khor spyi bor bzhag cing dpral bar thig le byas pa bum dbang*/__mgrin par bzhag cing gsang mtshan gdags nas thig le byas pa gsang dbang*/__snying gar gtad nas chig don ngo sprad pa ni/__chos dbyings skye ba med pa mtshon pa'i me long zlum po la rang byung bde ba chen po sin+d+hU ra'i thig les brgyan pas dbang bskur bas bde stong zung 'jug dga' bzhi'i ye shes rgyud la skyes par shes pa shes rab ye shes kyi dbang*/__gnyis med zung 'jug rig stong gi ngo bor mnyam par bzhag pa dbang bzhi pa ste me long la brten pa'i gsum pa'i dbang bzhi yongs su rdzogs pa thob pa yin no/__/shel rdo thogs la/__hrIH__kun gzhi'i dbyings las rtog pa ci shar yang :__shar tsam nyid nas rtog pa'i ngo bo stong :__gsal la 'dzin med chu zla 'ja' tshon 'dra:__nyon mongs lnga dag ye shes lnga mthar phyin:__gsal stong 'dzin med lta sgom spyod 'bras dbang :__skal ldan rigs kyi bu yis thob par shog:__oM AHhU~M badz+ra gu ru pad+ma sid+d+hi hU~M:__a b+hi Shiny+tsa oM AHhU~M hrIH__shel rdo spyi bor dang mgrin par bzhag__/snying gar gtad la/__de ltar shel dkar spyi bor bzhag pa bum dbang*/__mgrin par bzhag pa gsang dbang*/__snying gar gtad cing tshig don ngo sprad pa ni/__shel la rkyen dang 'phrad pas 'od zer sna tshogs su shar yang*/__de nyid phyi nang gang du'ang mi gnas pa ltar rang rig pa'i klong du 'khor 'das kyi snang ba sna tshogs su snang yang skye 'gag gnas gsum dang bral bar shes pa shes rab ye shes kyi dbang*/__gnyis med zung 'jug rig stong gi ngo bor mnyam par bzhag pa dbang bzhi pa ste rdo rje sems dpa'i me long la brten pa'i ka dag gi dbang bzhi yongs su rdzogs pa thob pa yin no/__/gu ru'i sku 'bags dang phreng ba thogs la/__hU~M:__chos sku skye med dang dbyings las ma g.yos kyang :__longs sku gsal la ma 'dres rtsa gsum lha:__sprul sku sna tshogs thabs kyis 'gro ba 'dul:__sku gsum ngang gis mnyam zhing ma 'dres gsal:__sngon tshe'i dus na khyed dang smon lam gcig:__da lta rang dang slob ma'i stangs zung la:__srog gi phyir yang mi gtong bsgrub lags na:__ye shes dbang chen rab 'byams kun rdzogs shog:__oM AHhU~M badz+ra gu ru pad+ma sid+d+hi hU~M:_a b+hi Shiny+tsa oM AHhU~M hrIH__sku 'bag spyi bor bzhag__/phreng ba lag tu gtad la sku snying gar gtad la/__de ltar sku 'bag spyi bor bzhag pa bum dbang*/__phreng ba lag tu gtad pa gsang dbang*/__sku snying gar gtad cing tshig don ngo sprad pa ni/__sems nyid gdod nas spros pa dang bral zhing 'od gsal ba gu ru'i thugs dang dbyer med ro gcig tu mnyam par shes pa shes rab ye shes kyi dbang*/__gnyis med zung 'jug rig stong gi ngo bor mnyam par gzhag pa dbang bzhi pa ste sku 'bag la brten pa'i rig pa rtsal gyi dbang bzhi yongs su rdzogs pa thob pa yin no/__skabs 'dir rtsa dbang ma thob pa sogs la gtor dbang bskur bar spro na/__de nas byin rlabs yongs rdzogs gtor ma'i dbang bskur ba la dmigs pa 'di bzhin tu mdzod/__gtor snod ye shes rin chen 'bar ba'i gzhal med khang rgyan dang bkod pa tshad med pa'i nang du gtor ma nyid bla ma bde gshegs yongs rdzogs 'dus pa'i dkyil 'khor lha tshogs mngon sum bzhin tu gsal ba'i gnas gsum nas rdo rje'i ye shes kyi ngo bo 'od zer dkar dmar mthing gsum rim dang gcig car du 'phros/__khyed rang rnams kyi gnas gsum du thim/__dbang bzhi rtsal rdzogs su thob/__sgo gsum dang shes bya'i dri ma sbyangs/__sku gsung thugs ye shes rdo rje'i byin rlabs dang dngos grub ma lus pa stan thog gcig tu thob par mos shig__/gtor chen thogs la/__oM:__sku yi byin gyis brlab tu gsol:__lus la gzi byin bskyed du gsol:__lus kyi sgrib pa sbyang du gsol:__lha dbang lus la bskur du gsol:__sku mi 'gyur tshe yi dngos grub stsol:__AH__gsung gi byin gyis brlab tu gsol:__ngag gi sgrib pa sbyang du gsol:__sngags dbang ngag la bskur du gsol:__gsung snying po lung gi dngos grub stsol:__ngag la nus pa dbyung du gsol:__hU~M:__thugs kyi byin gyis brlab tu gsol:__sems kyi sgrib pa sbyang du gsol:__thugs skye med rdo rje'i dngos grub stsol:__sems la rtogs pa bskyed du gsol:__sku gsung thugs kyi byin gyis rlobs:__ye shes lnga yi dbang skur cig:__brgyud 'dzin bu 'di byin gyis rlobs:__dbang bzhi rdzogs par bab gyur cig:__oM AHhU~M badz+ra gu ru pad+ma sid+d+hi hU~M:__oM AHhU~M:__badz+ra gu ru pad+ma thod phreng rtsal:__badz+ra sa ma ya dza:__sid+d+hi pha la hU~M AH__kA ya a b+hi Shiny+tsa oM:__wA ka a b+hi Shiny+tsa AH__tsit+ta a b+hi Shiny+tsa hU~M:__sarba a b+hi Shiny+tsa hrI:__ces brjod cing gtor ma gnas gsum du reg mthar/__gtor ma'i lha tshogs 'od du zhu ste khyed rang rnams la thim pas bla ma bde gshegs yongs rdzogs 'dus pa'i gsang ba gsum dang dbyer med par gyur/__rdo rje bdud rtsi'i bcud du 'khyil ba mgrin par myang bas dngos grub rnam pa gnyis bde blag tu thob par mos shig__/gtor ma'i cha shas dang bdud rtsi sbyin/__de nas rtsa sngags brjod bzhin tu slob bu rnams la me long 'od khrus bya/__me tog dkar po la rten snying brgya rtsa brgyad bzlas pa 'thor zhing*/__ho:__dbang bskur byin rlabs bla ma'i sras:__lus ngag yid gsum smin gyur nas:__'khor 'das chos la dbang bsgyur ba'i:__dbang dang dngos grub rab gnas shog:__ces rtsa sngags oM AHhU~M badz+ra gu ru pad+ma sid+d+hi hU~M:dang*/__ye d+harma bzlas:__hoH__dbang thim par gyur cig:__gsal bar gyur cig:__mched par gyur cig:__'bar bar gyur cig:__rgyas par gyur cig:__dbang du gyur cig:__smin par gyur cig:__smin 'dzom rig pa rtogs par gyur cig:__brtan par gyur cig:__grol bar gyur cig:__rtag tu gtso bo'i lha gang yin pa dang dbyer med du gyur cig:__ces dang shis brjod rgyas par spel la me tog 'thor/__de dag gis gter chen rdo rje gling pa'i zab chos bla ma bde gshegs yongs rdzogs bka' 'dus kyi smin byed snying po bsdus pa bskur grub pa lags pas sogs kyis mtshams sbyar la dam tshig khas blangs/__gtang rag__/lus 'bul/__dge bsngo bcas bya/__slob dpon gyis tshogs yod na tshogs mchod/__gtor skyong sogs las byang gi mjug yongs rdzogs mthar dbyung*/__tshogs mchod med pa'i spros pa bsdu na mchod bstod mdor bsdus/__nongs bshags/__brtan bzhugs/__bsdu ldangs/__smon lam shis brjod/__bsngo ba'i bar du bya'o/__/don dbang zab mos rgyud smin nas/__/don dam rang rig bla ma dang*/__/dbyer med thugs kyi thig ler chub/__/gzhan don srid mthar rgyas gyur cig__/ces pa'ang pad+ma gar dbang blo gros mtha' yas kyis zab chos 'di nyid 'phel zhing rgyas pa'i btsas su dmigs te rdzong shod bde gshegs 'dus pa'i sgrub gnas su bgyis pa dge legs 'phel/__/slar phun tshogs rnam rgyal pas nag 'gros su bkod pa dge legs 'phel//__//__

Footnotes

Other Information