JKW-KABAB-02-KHA-019

From Khyentse Lineage - A Tsadra Foundation Project

‎‎

ཐེག་པ་ཆེན་པོའི་ལམ་གྱི་རིམ་པའི་སྨོན་ལམ་རྣམ་གྲོལ་དགའ་སྟོན།
Wylie title theg pa chen po'i lam gyi rim pa'i smon lam rnam grol dga' ston JKW-KABAB-02-KHA-019.pdf
Location mkhyen brtse'i bka' babs
Volume 2, Text 19, Pages 113-116 (Folios 1a1 to 2b3)
Author འཇམ་དབྱངས་མཁྱེན་བརྩེའི་དབང་པོ་
Less details More details
Citation 'jam dbyangs mkhyen brtse'i dbang po. theg pa chen po'i lam gyi rim pa'i smon lam rnam grol dga' ston. In Rdzong sar 'jam dbyangs mkhyen brtse'i dbang po'i bka' babs, Vol. 2: 113-116. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre Prayers - smon lam  ·  Stages of the Path - lam rim
Karchag page JKW-KABAB-Volume-02-KHA-Karchag
Colophon

།ཅེས་པའང་སྨིན་ཟླའི་དཀར་ཕྱོགས་ཀྱི་རྒྱལ་བ་གཉིས་པར་འོག་མིན་ཆེན་པོ་དཔལ་གྱི་བསམ་ཡས་དབུ་རྩེའི་འོག་ཁང་བྱང་ཆུབ་ཆེན་པོའི་སྤྱན་སྔར་མཆོད་པའི་སྤྲིན་གྱིས་བསྙེན་བསྐུར་ཅུང་ཟད་བགྱིས་པའི་ཚེ་བཅོས་མིན་གྱི་མོས་པ་བརྟན་པོས་གསོལ་བ་བཏབ་པའི་སྨོན་ལམ་གྱི་ཚིགས་སུ་བཅད་པ་འདིའང་རྒྱལ་ཁམས་ཀྱི་དཱ་རི་དྲཱ་གཙུག་ལག་སྨྲ་བའི་ཉི་མས་སོ། །སརྦ་དཱ་མངྒ་ལཾ།།

ces pa'ang smin zla'i dkar phyogs kyi rgyal ba gnyis par 'og min chen po dpal gyi bsam yas dbu rtse'i 'og khang byang chub chen po'i spyan sngar mchod pa'i sprin gyis bsnyen bskur cung zad bgyis pa'i tshe bcos min gyi mos pa brtan pos gsol ba btab pa'i smon lam gyi tshigs su bcad pa 'di'ang rgyal khams kyi dA ri drA gtsug lag smra ba'i nyi mas so/__/sarba dA mang+ga laM//

[edit]
༄༅། །ཐེག་པ་ཆེན་པོའི་ལམ་གྱི་རིམ་པའི་སྨོན་ལམ་རྣམ་གྲོལ་དགའ་སྟོན་ཞེས་བྱ་བ་བཞུགས་སོ། །ན་མོ་གུ་རུ་བྷྱཿ མཁའ་ཁྱབ་རྒྱལ་བ་ཀུན་གྱི་སྐུ་ཡེ་ཤེས། །གཅིག་བསྡུས་དཔལ་ལྡན་རྡོ་རྗེ་སེམས་དཔའ་དང༌། །དབྱེར་མེད་ཁྱབ་བདག་དྲིན་ཆེན་བླ་མ་ལ། །སྙིང་ནས་གསོལ་བ་འདེབས་སོ་བྱིན་གྱིས་རློབས། །བདག་གཞན་སྐྱེ་ཞིང་སྐྱེ་བ་ཐམས་ཅད་དུ། །དལ་འབྱོར་མཆོག་ཐོབ་འཁྲུལ་མེད་བསྟན་ལ་ཞུགས། །མཚན་ལྡན་དགེ་བའི་བཤེས་ཀྱིས་རྗེས་བཟུང་ནས། །ཐོས་བསམ་སྒོམ་པའི་ཕ་རོལ་ཕྱིན་པར་ཤོག །རྣམ་དག་ངེས་འབྱུང་བདུད་རྩིའི་དོ་ཤལ་གྱིས། །སོ་ཐར་ཁྲིམས་ཀྱི་པདྨོ་བསྐྱེད་བསྲིངས་ནས། །བདེན་བཞིའི་ལམ་གྱི་མཚར་སྡུག་ཡོངས་རྫོགས་པས། །སྲིད་པའི་ཚ་གདུང་མཐའ་དག་འཇིལ་གྱུར་ཅིག །མཁའ་ཁྱབ་འགྲོ་ཀུན་མར་ཤེས་དྲིན་དྲན་ནས། །དྲིན་བཟོའི་སླད་དུ་བདེ་བ་ཀུན་ཐོབ་ཅིང༌། །སྡུག་བསྔལ་བྲལ་ཕྱིར་བྱམས་དང་སྙིང་རྗེའི་བློ། །ཟུང་འཇུག་ལྷག་བསམ་མཆོག་ཏུ་འབྱོང་བར་ཤོག །དེ་ལ་བརྟེན་ནས་གཞན་ཕྱིར་བླ་མེད་པའི། །ཡང་དག་རྫོགས་པའི་བྱང་ཆུབ་དོན་གཉེར་བས། །སྔོན་ཆད་རྨི་ལམ་དུ་ཡང་མ་མྱོང་བའི། །སྨོན་འཇུག་བྱང་ཆུབ་སེམས་མཆོག་བཟུང་བར་ཤོག །འགྲོ་རྣམས་གནས་སྐབས་མཐར་ཐུག་ཕན་བདེའི་ལམ། །འགོད་ཕྱིར་ཟང་ཟིང་མི་འཇིགས་དམ་ཆོས་ཀྱི། །གཏོང་ལ་གོམས་པའི་ནོར་བུའི་སྤྲིན་ཆེན་ལས། །འདོད་དགུའི་གྲུ་ཆར་རྟག་ཏུ་འབེབས་པར་ཤོག །ཉེས་སྤྱོད་མཐའ་དག་སྡོམ་པའི་པད་དཀར་ནི། །དགེ་ཆོས་ཡོངས་སུ་སྡུད་པའི་དྲི་བསུང་དང༌། །གཞན་ཕན་ཟེའུ་འབྲུའི་མཛེས་པ་དར་བབས་པའི། །ཚུལ་གནས་ཁྲིམས་ཀྱི་དགའ་ཚལ་རྒྱས་པར་ཤོག །ཡུལ་ལས་སྐྱེས་པའི་ཁྲོ་བ་དབྱིངས་སུ་ཞི། །ཆོས་ཕྱིར་དཀའ་བ་སྤྱད་ལ་ལྷག་པར་བཟོད། །ཟབ་མོའི་དོན་ལ་འཇིགས་མེད་སྤོབས་པའི་མཐུ། །འཇམ་དཔལ་གཞོན་ནུའི་རྗེས་སུ་སློབ་པར་ཤོག །བསམ་པ་གོ་ཆའི་བརྩོན་འགྲུས་རབ་ཏུ་བརྟན། །སྦྱོར་བ་རྒྱལ་སྲས་སྤྱོད་ལས་མི་གཡེལ་ཞིང༌། །སེམས་ཅན་དོན་ལ་ངལ་བ་མི་བསྟེན་པར། །སྲིད་པ་མཐར་བྱས་བར་དུ་འཇུག་པར་ཤོག །ལུས་སེམས་ཤིན་སྦྱངས་མཐོང་ཆོས་བདེ་བར་གནས། །སོ་སོར་རྟོག་པའི་ཡེ་ཤེས་དབང་དུ་འབྱོར། །འཕགས་པའི་ལམ་གྱི་དེ་ཉིད་མངོན་གྱུར་པའི། །བསམ་གཏན་ཏིང་འཛིན་རྒྱ་མཚོར་འཇུག་པར་ཤོག །དང་པོ་ཐོས་པས་དོན་སྤྱིའི་གནས་ལུགས་གོ། །བར་དུ་བསམ་པས་དྲང་ངེས་སྒྲོ་འདོགས་ཆོད། །ཐ་མར་བསྒོམས་པས་བདེན་གཉིས་ཟུང་འཇུག་པའི། །ཤེས་རབ་ཟབ་མོའི་སྣང་བ་རྒྱས་པར་ཤོག །ཐབས་ལ་མཁས་པས་དམན་ལམ་ཟིལ་གནོན་ཞིང༌། །སྙིང་རྗེའི་སྟོབས་ཀྱིས་འཁོར་བ་མི་བཏང་བར། །སྨོན་ལམ་རྒྱ་མཚོ་ཡོངས་སུ་རྫོགས་པ་ལས། །ཡེ་ཤེས་དམ་པའི་ཕ་རོལ་ཕྱིན་པར་ཤོག །ཕྱོགས་དུས་རྒྱལ་བ་སྲས་དང་བཅས་པ་ཀུན། །རྨད་བྱུང་མཆོད་པའི་སྤྲིན་གྱིས་མཉེས་བྱས་ཏེ། །དེ་དག་རྣམས་ཀྱི་དམ་ཆོས་འཛིན་པ་དང༌། །ཀུན་གྱི་འདུན་སར་རྟག་ཏུ་བསྙེན་པར་ཤོག །དེ་བཞིན་འགྲོ་དོན་རྒྱ་ཆེན་བསྒྲུབ་པ་དང༌། །སེམས་ཅན་ཡོངས་སྨིན་འཇིག་རྟེན་ཁམས་ཀུན་འཇུག །ཞིང་ཀུན་ཡོངས་སྦྱངས་ཐེག་ཆེན་ལམ་འཇུག་དང༌། །སྤྱོད་ཀུན་དོན་ཡོད་ཐེག་ཆེན་བསྒྲུབ་པར་ཤོག །ཁྱད་པར་ཚེ་གཅིག་ཟུང་འཇུག་གོ་འཕང་ལ། །སྦྱོར་བའི་ཁྱད་པར་བླ་མེད་རྡོ་རྗེའི་ཐེག །ཇི་བཞིན་སྟོན་མཁས་ཁྱབ་བདག་བླ་མ་ལས། །རྣམ་དག་དབང་བཞིའི་སྒོ་གསུམ་སྨིན་པར་ཤོག །གནས་སྐབས་གྲུབ་ཆེན་བརྒྱད་དང་ཕྲིན་ལས་བཞིའི། །ཕྱི་ནང་དབང་བཅུའི་ཡོན་ཏན་མཐར་ཕྱིན་ནས། །བརྟུལ་ཞུགས་སྤྱོད་པ་གསུམ་གྱིས་མཚམས་སྦྱར་ནས། །སློབ་པའྀ་ཟུང་འཇུག་མྱུར་དུ་ཐོབ་པར་ཤོག །མཐར་ཐུག་ཕྱག་རྒྱའི་ཉེ་རྒྱུ་ལ་བརྟེན་ནས། །སློབ་པ་མིན་པའི་ཟུང་འཇུག་རྡོ་རྗེའི་གར། །སྐུ་དང་ཡེ་ཤེས་ཕྲིན་ལས་རབ་འབྱམས་ཀྱིས། །རང་གཞན་ཕན་པ་མཐའ་ཀླས་འགྲུབ་པར་ཤོག །གཞན་ཡང་བཤད་སྒྲུབ་བསྟན་པ་དར་ཞིང་རྒྱས། །བསྟན་འཛིན་མཆོག་རྣམས་ཞབས་པད་བསྐལ་བརྒྱར་བརྟན། །འགྲོ་རྣམས་དགེ་བཅུའི་སྤྱོད་པས་འཇིག་རྟེན་ན། །རྫོགས་ལྡན་གསར་པའི་དགའ་སྟོན་ལོངས་སྤྱོད་ཤོག །དེ་ལྟར་བདག་གི་ལྷག་པའི་བསམ་པ་ཡིས། །རྩེ་གཅིག་སྨོན་པའི་གནས་སྐབས་ཐམས་ཅད་ཀུན། །གེགས་མེད་མྱུར་བ་ཉིད་དུ་འགྲུབ་པ་ཡྀ། །བཀྲ་ཤིས་སྣང་བས་རྟག་ཏུ་མཛེས་གྱུར་ཅིག །ཅེས་པའང་སྨིན་ཟླའི་དཀར་ཕྱོགས་ཀྱི་རྒྱལ་བ་གཉིས་པར་འོག་མིན་ཆེན་པོ་དཔལ་གྱི་བསམ་ཡས་དབུ་རྩེའི་འོག་ཁང་བྱང་ཆུབ་ཆེན་པོའི་སྤྱན་སྔར་མཆོད་པའི་སྤྲིན་གྱིས་བསྙེན་བསྐུར་ཅུང་ཟད་བགྱིས་པའི་ཚེ་བཅོས་མིན་གྱི་མོས་པ་བརྟན་པོས་གསོལ་བ་བཏབ་པའི་སྨོན་ལམ་གྱི་ཚིགས་སུ་བཅད་པ་འདིའང་རྒྱལ་ཁམས་ཀྱི་དཱ་རི་དྲཱ་གཙུག་ལག་སྨྲ་བའི་ཉི་མས་སོ། །སརྦ་དཱ་མངྒ་ལཾ།། །།
[edit]

@#/__/theg pa chen po'i lam gyi rim pa'i smon lam rnam grol dga' ston zhes bya ba bzhugs so/__/na mo gu ru b+h+yaH__mkha' khyab rgyal ba kun gyi sku ye shes/__/gcig bsdus dpal ldan rdo rje sems dpa' dang*/__/dbyer med khyab bdag drin chen bla ma la/__/snying nas gsol ba 'debs so byin gyis rlobs/__/bdag gzhan skye zhing skye ba thams cad du/__/dal 'byor mchog thob 'khrul med bstan la zhugs/__/mtshan ldan dge ba'i bshes kyis rjes bzung nas/__/thos bsam sgom pa'i pha rol phyin par shog__/rnam dag nges 'byung bdud rtsi'i do shal gyis/__/so thar khrims kyi pad+mo bskyed bsrings nas/__/bden bzhi'i lam gyi mtshar sdug yongs rdzogs pas/__/srid pa'i tsha gdung mtha' dag 'jil gyur cig__/mkha' khyab 'gro kun mar shes drin dran nas/__/drin bzo'i slad du bde ba kun thob cing*/__/sdug bsngal bral phyir byams dang snying rje'i blo/__/zung 'jug lhag bsam mchog tu 'byong bar shog__/de la brten nas gzhan phyir bla med pa'i/__/yang dag rdzogs pa'i byang chub don gnyer bas/__/sngon chad rmi lam du yang ma myong ba'i/__/smon 'jug byang chub sems mchog bzung bar shog__/'gro rnams gnas skabs mthar thug phan bde'i lam/__/'god phyir zang zing mi 'jigs dam chos kyi/__/gtong la goms pa'i nor bu'i sprin chen las/__/'dod dgu'i gru char rtag tu 'bebs par shog__/nyes spyod mtha' dag sdom pa'i pad dkar ni/__/dge chos yongs su sdud pa'i dri bsung dang*/__/gzhan phan ze'u 'bru'i mdzes pa dar babs pa'i/__/tshul gnas khrims kyi dga' tshal rgyas par shog__/yul las skyes pa'i khro ba dbyings su zhi/__/chos phyir dka' ba spyad la lhag par bzod/__/zab mo'i don la 'jigs med spobs pa'i mthu/__/'jam dpal gzhon nu'i rjes su slob par shog__/bsam pa go cha'i brtson 'grus rab tu brtan/__/sbyor ba rgyal sras spyod las mi g.yel zhing*/__/sems can don la ngal ba mi bsten par/__/srid pa mthar byas bar du 'jug par shog__/lus sems shin sbyangs mthong chos bde bar gnas/__/so sor rtog pa'i ye shes dbang du 'byor/__/'phags pa'i lam gyi de nyid mngon gyur pa'i/__/bsam gtan ting 'dzin rgya mtshor 'jug par shog__/dang po thos pas don spyi'i gnas lugs go/__/bar du bsam pas drang nges sgro 'dogs chod/__/tha mar bsgoms pas bden gnyis zung 'jug pa'i/__/shes rab zab mo'i snang ba rgyas par shog__/thabs la mkhas pas dman lam zil gnon zhing*/__/snying rje'i stobs kyis 'khor ba mi btang bar/__/smon lam rgya mtsho yongs su rdzogs pa las/__/ye shes dam pa'i pha rol phyin par shog__/phyogs dus rgyal ba sras dang bcas pa kun/__/rmad byung mchod pa'i sprin gyis mnyes byas te/__/de dag rnams kyi dam chos 'dzin pa dang*/__/kun gyi 'dun sar rtag tu bsnyen par shog__/de bzhin 'gro don rgya chen bsgrub pa dang*/__/sems can yongs smin 'jig rten khams kun 'jug__/zhing kun yongs sbyangs theg chen lam 'jug dang*/__/spyod kun don yod theg chen bsgrub par shog__/khyad par tshe gcig zung 'jug go 'phang la/__/sbyor ba'i khyad par bla med rdo rje'i theg__/ji bzhin ston mkhas khyab bdag bla ma las/__/rnam dag dbang bzhi'i sgo gsum smin par shog__/gnas skabs grub chen brgyad dang phrin las bzhi'i/__/phyi nang dbang bcu'i yon tan mthar phyin nas/__/brtul zhugs spyod pa gsum gyis mtshams sbyar nas/__/slob pa'-i zung 'jug myur du thob par shog__/mthar thug phyag rgya'i nye rgyu la brten nas/__/slob pa min pa'i zung 'jug rdo rje'i gar/__/sku dang ye shes phrin las rab 'byams kyis/__/rang gzhan phan pa mtha' klas 'grub par shog__/gzhan yang bshad sgrub bstan pa dar zhing rgyas/__/bstan 'dzin mchog rnams zhabs pad bskal brgyar brtan/__/'gro rnams dge bcu'i spyod pas 'jig rten na/__/rdzogs ldan gsar pa'i dga' ston longs spyod shog__/de ltar bdag gi lhag pa'i bsam pa yis/__/rtse gcig smon pa'i gnas skabs thams cad kun/__/gegs med myur ba nyid du 'grub pa y-i/__/bkra shis snang bas rtag tu mdzes gyur cig__/ces pa'ang smin zla'i dkar phyogs kyi rgyal ba gnyis par 'og min chen po dpal gyi bsam yas dbu rtse'i 'og khang byang chub chen po'i spyan sngar mchod pa'i sprin gyis bsnyen bskur cung zad bgyis pa'i tshe bcos min gyi mos pa brtan pos gsol ba btab pa'i smon lam gyi tshigs su bcad pa 'di'ang rgyal khams kyi dA ri drA gtsug lag smra ba'i nyi mas so/__/sarba dA mang+ga laM//__//

Footnotes

Other Information