ཚེ་གཡང་འགུག་པ་ལ་སྦྱར་རྒྱུའི་བསང་མཆོད་འདོད་རྒུའི་སྤྲིན་ཕུང་།

🚧 This website is under continued development. We appreciate your patience!

Previous Text Back to Volume PageNext Text

Wylie title	tshe g.yang 'gug pa la sbyar rgyu'i bsang mchod 'dod rgu'i sprin phung
Location	chos kyi blo gros bka' 'bum Volume 11, Text 68, Pages 357-359 (Folios 1a1 to 2a4)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. tshe g.yang 'gug pa la sbyar rgyu'i bsang mchod 'dod rgu'i sprin phung. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 11: 357-359. Bir, H.P.: Khyentse Labrang, 2012.
Genre	Smoke Offerings - bsangs mchod - lha bsang
Colophon	།ཆོས་ཀྱི་བློ་གྲོས་པས་སོ།།
	/chos kyi blo gros pas so//

1 Texts in this Section (sde tshan or chos tshan)

357-359	ཚེ་གཡང་འགུག་པ་ལ་སྦྱར་རྒྱུའི་བསང་མཆོད་འདོད་རྒུའི་སྤྲིན་ཕུང་། tshe g.yang 'gug pa la sbyar rgyu'i bsang mchod 'dod rgu'i sprin phung Smoke Offerings - bsangs mchod - lha bsang	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

ཚེ་གཡང་འགུག་པ་ལ་སྦྱར་རྒྱུའི་བསང་མཆོད་འདོད་རྒུའི་སྤྲིན་ཕུང་ཅེས་བྱ་བ་བཞུགས་སོ། བླ་མ་ནོར་ལྷའི་ཚོགས་ལ་བསང་མཆོད་འབུལ་བར་འདོད་པས་བསང་རྫས་མཆོད་གཏོར་རྣམས། རྃ་ཡྃ་ཁྃ། ཨོཾ་ཨཱཿཧཱུྃ། ལན་གསུམ་གྱིས་བྱིན་གྱིས་བརླབ། དབྱངས་རོལ་དང་བཅས། ཀྱཻ། ཆོས་དབྱིངས་ཞིང་ཀུན་རྒྱས་པར་གང་བ་ཡི། །བླ་མ་རྩ་གསུམ་ནོར་ལྷ་རྒྱ་མཚོའི་ཚོགས། །འདིར་གཤེགས་ཉི་ཟླ་པདྨའི་གདན་ལ་བཞུགས། །ཟག་མེད་བསང་མཆོད་བདུད་རྩིའི་སྤྲིན་ཕུང་བཞེས། ཀྱཻ། སྔོན་གྱི་དྲང་སྲོང་ཆེན་པོའི་ལུགས་བཞིན་དུ། །གོས་དཀར་འབར་བ་ཆེན་པོའི་མེ་ཡི་ཀློང་། །བཟང་ཤིང་སྣ་ཚོགས་སྦྱར་བའི་དུད་སྤྲིན་འཐིབས། །ཕྱེ་མར་གངས་རི་ལྟར་སྤུངས་ཇ་ཆང་དང་། །བདུད་རྩི་འོ་མའི་གསེར་སྐྱེམས་མཚོ་ལྟར་བསྐྱིལ། །རྣམ་མང་སྲིད་དང་ཞི་བའི་འབྱོར་པ་དང་། །ཕུན་ཚོགས་དཔལ་ཀུན་དབང་དུ་བྱེད་པ་ཡི། །བཀྲ་ཤིས་རྫས་རྟགས་རིན་ཆེན་སྣ་བདུན་དང་། །ཉེ་བའི་རིན་ཆེན་བདུན་དང་འདོད་འཇོའི་བ། །དཔག་བསམ་ཤིང་དང་ཁྲུས་རྫིང་སྐྱེད་ཚལ་དང་། །རིན་ཆེན་སྣ་ཚོགས་རི་བོས་ཁོར་ཡུག་བརྗིད། །ལྷ་དང་ཀླུ་དབང་གྲུབ་པ་རིག་འཛིན་དང་། །དྲང་སྲོང་ཚོགས་ཀྱིས་ཉེ་བར་བསྟེན་པ་ཡི། །བྲག་རིའི་བ་གམ་བཀོད་ལེགས་སྨན་ཤིང་གི །ནགས་ཚལ་ཉམས་དགའ་ལྷ་མིའི་མེ་ཏོག་དང་། །བྱ་དང་རི་དྭགས་སྤུ་སྡུག་ཡིད་དུ་འོང་། །རྟ་གཡག་མ་ཧེ་གནག་ལུག་ལ་སོགས་པ། །མདོར་ན་སྲིད་པ་གསུམ་གྱི་འབྱོར་པའི་ཚོགས། །གཅིག་ཏུ་སྤུངས་པའི་མཆོད་སྤྲིན་ཆེན་པོ་དང་། །འདོད་པའི་ཡོན་ཏན་རྣམ་མང་འཕྲུལ་པ་ཡིས། །སྔོ་སང་དུ་བའི་ལྷ་མོ་ཡིད་འཕྲོག་མས། །ཟག་མེད་བདེ་བའི་དབང་པོ་དགྱེས་བསྐྱེད་པའི། །འདོད་ཡོན་དྲུག་གི་མཆོད་པའི་རོལ་མོ་ནི། །ཀུན་ཏུ་བཟང་པོ་ཏིང་ངེ་འཛིན་གྱི་སྒོ། །ནམ་མཁའ་མཛོད་ཀྱི་སྒྱུ་འཕྲུལ་བསམ་ལས་འདས། །འཛད་མེད་དཔག་པར་དཀའ་བའི་དགྱེས་སྤྲིན་འདིས། །མ་ཧཱ་གུ་རུ་ཨོ་རྒྱན་ཚེ་དཔག་མེད། །རྒྱས་མཛད་རཏྣ་ཐོད་ཕྲེང་ཡབ་ཡུམ་དང་། །གནོད་སྦྱིན་གཏེར་འཆང་རྒྱ་མཚོའི་སྡེ་དཔོན་ནི། །རིན་ཆེན་མང་སྤྲུལ་རྒྱལ་ཆེན་རྣམ་ཐོས་སྲས། །ལྷ་མོ་དཔལ་དང་རྟ་བདག་བརྒྱད་ལ་སོགས། །འཁོར་ཚོགས་སྤྲུལ་པར་བཅས་པ་ཐམས་ཅད་དང་། །བྱང་ཆུབ་སེམས་མ་ནོར་གྱི་རྒྱུན་སྟེར་མ། །རྨུག་འཛིན་དབང་པོ་ལ་སོགས་ནོར་གྱི་ལྷ། །བྱེ་བ་བསམ་མི་ཁྱབ་པ་ཐམས་ཅད་ལ། །བདུད་རྩི་བསང་གི་མཆོད་པ་འདི་འབུལ་ལོ། །དགྱེས་པའི་ཞལ་བཟང་ཉི་ཟླ་ལྟར་གསལ་ཞིང་། །ཕུན་ཚོགས་དགེ་ལེགས་ནོར་བུའི་དངོས་གྲུབ་སྟེར། །དབུལ་བའི་གདུང་སེལ་འདོད་རྒུའི་འབྱོར་པ་ཡིས། །སྲིད་ཞིའི་ལེགས་ཚོགས་དཔག་བསམ་ཤིང་ལྟར་རྒྱས། །སྙན་གྲགས་ལྷ་ཡི་རོལ་མོ་ཕྱོགས་བཅུར་ཁྱབ། །ཕུན་ཚོགས་སྡེ་བཞི་དབང་དུ་བསྡུ་བ་དང་། །སྦྱིན་པའི་ཕར་ཕྱིན་རྫོགས་པའི་བཀྲ་ཤིས་སྩོལ། །ཅེས་ཕྱེ་མར་གསེར་སྐྱེམས་མཆོད་དོ། །ཅེས་པའང་རྡོར་འཛིན་བླ་མ་ཆོས་གྲགས་ཀྱིས་སྐྱེས་དང་བཅས་བསྐུལ་བའི་བཞེད་སྐོང་དུ་འཇམ་དབྱངས་བློ་གྲོས་རྒྱ་མཚོས་ཀཿཐོག་རྡོ་རྗེ་གདན་དུ་བྲིས་པ་དགེ་ལེགས་སུ་གྱུར་ཅིག །མངྒ་ལཾ།། །།ཀྱཻ། བྱང་ཆུབ་སེམས་མ་དཔལ་ཆེན་མོ། །གྲོགས་མོ་ལྷ་མོ་བརྒྱད་པོ་དང་། །ནོར་ལྷ་གཏེར་བདག་འཁོར་བཅས་དང་། །ཚོགས་བདག་མི་མགོན་དཀར་པོ་དང་། །སྤོམ་ར་ལ་སོགས་འཁོར་བཅས་རྣམས། །འདིར་གཤེགས་བསང་མཆོད་དམ་པ་བཞེས། །འཁོར་འདས་ཕྱྭ་གཡང་གནས་འདིར་བསྡུས། །སྲིན་རྐུན་བསེ་རག་གནོད་པ་སྲུངས། །ཚེ་གཡང་དཔལ་འབྱོར་རྒྱས་པ་དང་། །བཀྲ་ཤིས་བདེ་ལེགས་ཕུན་ཚོགས་ཤོག །ཆོས་ཀྱི་བློ་གྲོས་པས་སོ།། །།

[edit]

tshe g.yang 'gug pa la sbyar rgyu'i bsang mchod 'dod rgu'i sprin phung ces bya ba bzhugs so/__bla ma nor lha'i tshogs la bsang mchod 'bul bar 'dod pas bsang rdzas mchod gtor rnams/__ra~M ya~M kha~M/__oM AHhU~M/__lan gsum gyis byin gyis brlab/__dbyangs rol dang bcas/__kyai/__chos dbyings zhing kun rgyas par gang ba yi/__/bla ma rtsa gsum nor lha rgya mtsho'i tshogs/__/'dir gshegs nyi zla pad+ma'i gdan la bzhugs/__/zag med bsang mchod bdud rtsi'i sprin phung bzhes/__kyai/__sngon gyi drang srong chen po'i lugs bzhin du/__/gos dkar 'bar ba chen po'i me yi klong /__/bzang shing sna tshogs sbyar ba'i dud sprin 'thibs/__/phye mar gangs ri ltar spungs ja chang dang /__/bdud rtsi 'o ma'i gser skyems mtsho ltar bskyil/__/rnam mang srid dang zhi ba'i 'byor pa dang /__/phun tshogs dpal kun dbang du byed pa yi/__/bkra shis rdzas rtags rin chen sna bdun dang /__/nye ba'i rin chen bdun dang 'dod 'jo'i ba/__/dpag bsam shing dang khrus rdzing skyed tshal dang /__/rin chen sna tshogs ri bos khor yug brjid/__/lha dang klu dbang grub pa rig 'dzin dang /__/drang srong tshogs kyis nye bar bsten pa yi/__/brag ri'i ba gam bkod legs sman shing gi__/nags tshal nyams dga' lha mi'i me tog dang /__/bya dang ri dwags spu sdug yid du 'ong /__/rta g.yag ma he gnag lug la sogs pa/__/mdor na srid pa gsum gyi 'byor pa'i tshogs/__/gcig tu spungs pa'i mchod sprin chen po dang /__/'dod pa'i yon tan rnam mang 'phrul pa yis/__/sngo sang du ba'i lha mo yid 'phrog mas/__/zag med bde ba'i dbang po dgyes bskyed pa'i/__/'dod yon drug gi mchod pa'i rol mo ni/__/kun tu bzang po ting nge 'dzin gyi sgo/__/nam mkha' mdzod kyi sgyu 'phrul bsam las 'das/__/'dzad med dpag par dka' ba'i dgyes sprin 'dis/__/ma hA gu ru o rgyan tshe dpag med/__/rgyas mdzad rat+na thod phreng yab yum dang /__/gnod sbyin gter 'chang rgya mtsho'i sde dpon ni/__/rin chen mang sprul rgyal chen rnam thos sras/__/lha mo dpal dang rta bdag brgyad la sogs/__/'khor tshogs sprul par bcas pa thams cad dang /__/byang chub sems ma nor gyi rgyun ster ma/__/rmug 'dzin dbang po la sogs nor gyi lha/__/bye ba bsam mi khyab pa thams cad la/__/bdud rtsi bsang gi mchod pa 'di 'bul lo/__/dgyes pa'i zhal bzang nyi zla ltar gsal zhing /__/phun tshogs dge legs nor bu'i dngos grub ster/__/dbul ba'i gdung sel 'dod rgu'i 'byor pa yis/__/srid zhi'i legs tshogs dpag bsam shing ltar rgyas/__/snyan grags lha yi rol mo phyogs bcur khyab/__/phun tshogs sde bzhi dbang du bsdu ba dang /__/sbyin pa'i phar phyin rdzogs pa'i bkra shis stsol/__/ces phye mar gser skyems mchod do/__/ces pa'ang rdor 'dzin bla ma chos grags kyis skyes dang bcas bskul ba'i bzhed skong du 'jam dbyangs blo gros rgya mtshos kaHthog rdo rje gdan du bris pa dge legs su gyur cig__/mang+ga laM//__//kyai/__byang chub sems ma dpal chen mo/__/grogs mo lha mo brgyad po dang /__/nor lha gter bdag 'khor bcas dang /__/tshogs bdag mi mgon dkar po dang /__/spom ra la sogs 'khor bcas rnams/__/'dir gshegs bsang mchod dam pa bzhes/__/'khor 'das phywa g.yang gnas 'dir bsdus/__/srin rkun bse rag gnod pa srungs/__/tshe g.yang dpal 'byor rgyas pa dang /__/bkra shis bde legs phun tshogs shog__/chos kyi blo gros pas so//__//