JKCL-KABUM-07-JA-034

From Khyentse Lineage - A Tsadra Foundation Project

‎‎

རྫོང་སར་བཀྲ་ཤིས་ལྷ་རྩེའི་ས་ཟླའི་བུམ་སྒྲུབ་ཀྱི་ཐུགས་ཆེན་རྗེས་གནང་ལ་རིལ་བུའི་དབང་བསྐུར།
Wylie title rdzong sar bkra shis lha rtse'i sa zla'i bum sgrub kyi thugs chen rjes gnang la ril bu'i dbang bskur JKCL-KABUM-07-JA-034.pdf
Location chos kyi blo gros bka' 'bum
Volume 7, Text 34, Pages 575-580 (Folios 1a1 to 3b2)
Author འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation 'jam dbyangs mkhyen brtse chos kyi blo gros. rdzong sar bkra shis lha rtse'i sa zla'i bum sgrub kyi thugs chen rjes gnang la ril bu'i dbang bskur. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 7: 575-580. Bir, H.P.: Khyentse Labrang, 2012.
Genre Empowerment Ritual - dbang chog - dbang skur  ·  Medicinal Pills - Making and Activating Practices - sman sgrub
Deity thugs rje chen po
Colophon

ཅེས་པའང་ཆོས་རྗེ་ཕན་བདེས་གསུངས་ངོར་ཆོས་ཀྱི་བློ་གྲོས་པས་སོ། །མངྒ་ལཾ།།

ces pa'ang chos rje phan bdes gsungs ngor chos kyi blo gros pas so/__/mang+ga laM//

[edit]
རྫོང་སར་བཀྲ་ཤིས་ལྷ་རྩེའི་ས་ཟླའི་བུམ་སྒྲུབ་ཀྱི་ཐུགས་ཆེན་རྗེས་གནང་ལ་རིལ་བུའི་དབང་བསྐུར་ན། །ཐུགས་ཀྱི་རྗེས་གནང་གྲུབ་མཚམས་སུ། རིལ་བུམ་དར་ལྕིབས་དང་བཅས་བཏེགས་ལ། མཐའ་རྟེན་དུ་མྱུང་གྲོལ་རིལ་བུའི་རྗེས་སུ་གནང་བ་སྦྱིན་པ་ལ་དམིགས་པ་འདི་བཞིན་མཛོད། པདྨ་དང་ཟླ་བའི་སྟེང་དུ་བུམ་པ་ཡངས་ཤིང་རྒྱ་ཆེ་བ་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་ཉ་གང་བ་རེ་རེའི་སྟེང་དུ་རིལ་བུ་རྣམས་རེ་རེ་བཞིན་ཧྲཱིཿདཀར་པོ་ལས་པདྨ་དཀར་པོ་ཧྲཱིཿས་མཚན་པ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཧྲཱིཿལ་ཐིམ། དེ་ཡོངས་སུ་གྱུར་པ་ལས་འཕགས་པ་ཐུགས་རྗེ་ཆེན་པོ་སོགས་སྒྲུབ་ཐབས་ལྟར་རིགས་བདག་དང་བཅས་པ་སྐྱེད། ལྷ་དེ་ཐམས་ཅད་ཀྱི་དཔྲལ་བར་ཨོཾ་དཀར་པོ་རྣམ་སྣང་གི་རང་བཞིན། མགྲིན་པར་ཧྲཱིཿདམར་པོ་སྣང་མཐའི་ངོ་བོ། ཐུགས་ཀར་ཧཱུྃ་སྔོན་པོ་མི་བསྐྱོད་པའི་བདག་ཉིད། ལྟེ་བར་ཏྲཱྃ་སེར་པོ་རིན་འབྱུང་གི་རང་བཞིན། གསང་བར་ཨཱཿལྗང་གུ་དོན་གྲུབ་ཀྱི་ངོ་བོར་གསལ་བ་དང་། ཁྱེད་རང་རྣམས་ཀྱི་གནས་ལྔར་ཡང་ཐུགས་རྗེ་ཆེན་པོ་རིགས་ལྔའི་ངོ་བོ་ཨོཾ་ཧྲཱིཿཧཱུྃ་ཏྲཱྃ་ཨཱཿརྣམས་གསལ་བ་དང་། སློབ་དཔོན་དང་། རིལ་བུའི་ལྷ་ཚོགས་རྣམས་ལ་མོས་གུས་གདུང་ཤུག་དྲག་པོས་གསོལ་བ་འདེབས་པ་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་བླ་མ་རིན་པོ་ཆེ་དང་འཕགས་པ་ཐུགས་རྗེ་ཆེན་པོའི་ལྷ་ཚོགས་རྣམས་ཀྱི་བདག་གི་སྒོ་གསུམ་བྱ་བྱེད་དང་བཅས་པར་བྱིན་གྱིས་བརླབས་པར་མཛད་དུ་གསོལ། ལན་གསུམ། དེ་ལྟར་གསོལ་བ་བཏབ་པས་རིལ་བུའི་ལྷ་རྣམས་ཀྱིས་དཔྲལ་བའི་ཨོཾ་དཀར་པོ་ལས་འོད་ཟེར་དཀར་པོ་ཟླ་བ་སྟོང་དུས་གཅིག་ལ་ཤར་བ་ལྟ་བུ་འཕྲོས། ཁྱེད་རང་རྣམས་ཀྱི་དཔྲལ་བ་དང་སྣོད་བཅུད་ཐམས་ཅད་ལ་ཁྱབ་པས་ནད་གདོན་སྡིག་སྒྲིབ་འགལ་རྐྱེན་བར་གཅོད་དང་། སྣོད་བཅུད་ཉམས་པ་ཐམས་ཅད་ཞི་བར་བྱས། སེམས་ཅན་ཐམས་ཅད་རྣམ་སྣང་ཐུགས་རྗེ་ཆེན་པོའི་གོ་འཕང་ལ་བཀོད། ཚུར་འདུས་ཁྱོད་རང་རྣམས་ཀྱི་དཔྲལ་བའི་ཨོཾ་ལ་ཐིམ་པར་མོས། དེ་བཞིན་དུ་རིལ་བུའི་ལྷ་རྣམས་ཀྱིས་མགྲིན་པའི་ཧྲཱིཿདམར་པོ་ལས་འོད་ཟེར་དམར་པོ་པདྨ་རཱ་གའི་མདོག་ལྟར་དམར་བ་འཕྲོས། ཁྱེད་རང་གི་མགྲིན་པ་དང་སྣོད་བཅུད་ཐམས་ཅད་ལ་ཁྱབ་པས་སྣོད་བཅུད་ཐམས་ཅད་འོད་དམར་པོའི་རྣམ་པས་དབང་དུ་བསྡུས་ཤིང་འདུན་པར་བྱས། སེམས་ཅན་ཐམས་ཅད་སྣང་མཐའ་ཐུགས་རྗེ་ཆེན་པོའི་གོ་འཕང་ལ་བཀོད། ཚུར་འདུས་ཁྱེད་རང་རྣམས་ཀྱི་མགྲིན་པའི་ཧྲཱིཿལ་ཐིམ་པར་མོས། ཡང་རིལ་བུའི་ལྷ་རྣམས་ཀྱིས་ཐུགས་ཀའི་ཧཱུྃ་སྔོན་པོ་ལས་འོད་ཟེར་བཻཌཱུཪྻའི་མདོག་ལྟར་སྔོ་ལ་དྭངས་བ་འཕྲོས། ཁྱེད་རང་རྣམས་ཀྱི་སྙིང་ག་དང་སྣོད་བཅུད་ཐམས་ཅད་ལ་ཁྱབ་པས་ཉོན་མོངས་པའི་རྟོག་པ་ཐམས་ཅད་ཡེ་ཤེས་སུ་གནས་འགྱུར། སེམས་ཅན་ཐམས་ཅད་མི་བསྐྱོད་ཐུགས་རྗེ་ཆེན་པོའི་གོ་འཕང་ལ་བཀོད། ཚུར་འདུས་ཁྱེད་རང་རྣམས་ཀྱི་ཐུགས་ཀའི་ཧཱུྃ་ལ་ཐིམ་པར་མོས། ཡང་རིལ་བུའི་ལྷ་རྣམས་ཀྱི་ལྟེ་བའི་ཏྲཱྃ་སེར་པོ་ལས་འོད་ཟེར་སེར་པོ་ཉི་མ་བྱེ་བའི་གཟི་བརྗིད་ལྟར་འབར་བ་འཕྲོས། ཁྱེད་རང་རྣམས་ཀྱི་ལྟེ་བ་དང་སྣོད་བཅུད་ཐམས་ཅད་ལ་ཁྱབ་པས་ཚེ་བསོད་དཔལ་འབྱོར་ཡེ་ཤེས་ཡོན་ཏན་སོགས་ལུང་དང་མངོན་པར་རྟོགས་པའི་ཆོས་ཐམས་ཅད་རྒྱས་པར་བྱས། སེམས་ཅན་ཐམས་ཅད་རིན་འབྱུང་ཐུགས་རྗེ་ཆེན་པོའི་གོ་འཕང་ལ་བཀོད། ཚུར་འདུས་ཁྱེད་རང་རྣམས་ཀྱི་ལྟེ་བའི་ཏྲཱྃ་ལ་ཐིམ་པར་མོས། སླར་ཡང་རིལ་བུའི་ལྷ་ཚོགས་རྣམས་ཀྱིས་གསང་གནས་ཀྱི་ཨཱཿལྗང་གུ་ལས་འོད་ཟེར་མར་གད་ཞུན་མའི་མདོག་ལྟ་བུ་འཕྲོས། ཁྱེད་རང་རྣམས་ཀྱི་གསང་བ་དང་། སྣོད་བཅུད་ཐམས་ཅད་ལ་ཁྱབ་པས་སྒོ་གསུམ་བྱ་བྱེད་དང་བཅས་པའི་བག་ཆགས་ངན་པ་ཐམས་ཅད་ཞི་བར་བྱས། སེམས་ཅན་ཐམས་ཅད་དོན་གྲུབ་ཐུགས་རྗེ་ཆེན་པོའི་གོ་འཕང་ལ་བཀོད། ཚུར་འདུས་ཁྱེད་རང་རྣམས་ཀྱི་གསང་གནས་ཀྱི་ཨཱཿལ་ཐིམ་པར་མོས། དེ་ལྟར་བྱས་པས་ཁྱེད་རང་རྣམས་ཀྱི་ལུས་ངག་ཡིད་གསུམ་བྱ་བྱེད་དང་བཅས་པ་འཕགས་པ་ཐུགས་རྗེ་ཆེན་པོ་རིགས་ལྔའི་ངོ་བོར་བྱིན་གྱིས་བརླབས་ཤིང་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་དབང་འབྱོར་བའི་མོས་པ་མཛོད། དྲིལ་བསིལ་སྤོས་རོལ་དང་བཅས་ཡིག་དྲུག་དང་། ཞལ་བཅུ་གཅིག་པའི་གཟུངས་རིང་མཐར། ཀཱ་ཡ་སིདྡྷི་ཨོཾ། ཝཱཀ་སིདྡྷི་ཨཱཿཙིཏྟ་སིདྡྷི་ཧཱུྃ། གུ་ཎ་སིདྡྷི་ཧྲཱིཿསརྦ་སིདྡྷི་ཨཱཿཞེས་རིལ་བུམ་གནས་ལྔར་བཞག་པའམ། མདོ་ལི་ལ་དྲངས་ནས་སྤྱི་བོར་འཇོག །རིལ་བུ་སྦྱིན། དེ་ལྟ་རིལ་བུ་བྱིན་པ་དེ་ཉིད་ཁྱེད་རང་རྣམས་ཐུགས་རྗེ་ཆེན་པོའི་གསལ་སྣང་དང་མ་བྲལ་བའི་རྡོ་རྗེའི་ལྕེ་ཐོག་ཏུ་བཞག་ཅིང་གྱུར་མིད་དུ་བྱས་པ་དང་། རིལ་བུ་བླ་མ་ཐུགས་རྗེ་ཆེན་པོ་རིགས་བདག་འོད་དཔག་མེད་དང་བཅས་པ་དངོས་སུ་གསལ་བ་མགྲིན་པའི་ལམ་ནས་བརྒྱུད། སྙིང་པདྨ་འདབ་བརྒྱད་ཀྱི་སྟེང་དུ་ཟླ་བའི་གདན་ལ་དགྱེས་ཡེ་རེ་བྱང་ཆུབ་སྙིང་པོའི་བར་དུ་འབྲལ་བ་མེད་པ་བཞུགས་པའི་མོས་པ་མཛོད། །མྱོང་གྲོལ་རིལ་བུའི་ཕན་ཡོན་ཀྱང་། འཕགས་པ་སྤྱན་རས་གཟིགས་དོན་ཡོད་ཞགས་པའི་རྟོགས་པ་ཆེན་མོ་ལས། རིལ་བུ་ཟོས་པ་ཙམ་གྱིས་ནི། ནད་རྣམས་ཐམས་ཅད་རྣམ་པར་འཇིག །གང་ཞིག་རིལ་བུ་དེ་དག་བསྟེན། །རིལ་བུ་ཐིག་ལེ་རྟག་བྱེད་ལ། །དེ་བཞིན་གཤེགས་ཀུན་དགོངས་པར་མཛད། །འཕགས་པ་སྤྱན་རས་གཟིགས་ཀྱི་དབང་། །དེ་ཉིད་རིགས་ལ་རྟག་ཏུ་ནི། །མཆོག་སྦྱིན་དུས་ཀུན་གཟིགས་པར་མཛད། །བསོད་ནམས་ཕུང་པོ་སྟོང་དག་ནི། །ཉི་མ་རེ་རེར་གསོག་པར་བྱེད། །འཇིག་རྟེན་པ་ཡི་བདེ་སྤྱད་ཅིང་། །འཇིག་རྟེན་ཕ་རོལ་ཤིན་ཏུ་བདེ། །ཚེ་བརྗེ་བ་ནི་འཕོས་ནས་སུ། །བདེ་བ་ཅན་དུ་མོད་ལ་འགྲོ། །གང་དང་གང་དུ་སྐྱེ་བ་དེར། །ཚེ་རབས་རྟག་ཏུ་ཚེ་རབས་དྲན། །ལག་ན་རྡོ་རྗེ་གནོད་སྦྱིན་ཆེ། །གནོད་སྦྱིན་བྱེ་བས་ཡོངས་སྐོར་ཅིང་། །གཡེལ་བ་མེད་པ་ཉིན་མཚན་དུ། །དུས་ཀུན་དུ་ནི་སྲུང་བ་དང་། །སྐྱོབ་དང་སྤེད་དང་སྲུང་བར་བྱེད། །ཅེས་དང་། རིལ་བུ་གང་ལ་ཡོད་པ་ནི། །ཕྱིར་མི་ལྡོག་པར་ལུང་བསྟན་ཅིང་། །མགོན་པོ་ས་བཅུ་དག་ལ་གནས། །རྟག་ཏུ་མཆོད་རྟེན་གྱུར་པ་སྟེ། །སྐུ་གདུང་སྙིང་པོའི་བདག་ཉིད་ཅན། །རྟག་ཏུ་སངས་རྒྱས་བདག་ཉིད་འགྱུར། །ཅེས་དང་། རིལ་བུ་མཐོང་བ་ཙམ་གྱིས་ནི། །སྡུག་བསྔལ་ཀུན་ལས་རབ་ཏུ་གྲོལ། །སྡིག་པ་ཐམས་ཅད་རྣམ་པར་འཚེད། །སྒྲིབ་པ་ཐམས་ཅད་རྣམ་པར་དག །དེ་ནི་ངན་འགྲོར་འགྲོ་མི་འགྱུར། །ཕྱིར་ཞིང་གནས་མཆོག་ཞི་བ་ཐོབ། །ཅེས་སོགས་རྒྱུད་སྡེ་རིན་པོ་ཆེ་རྣམས་ནས་རྒྱ་ཆེར་བསྔགས་པ་ལ། སྐལ་བཟང་རྣམས་ཀྱི་སེམས་དགའ་བ་དང་སྤྲོ་བ་རྒྱ་ཆེན་པོ་བསྐྱེད་འཚལ། དེ་རྣམས་ཀྱིས་འཕགས་པ་ཐུགས་རྗེ་ཆེན་པོའི་རྗེས་གནང་མཐའ་རྟེན་བཅས་ལེགས་པར་གྲུབ་པ་ཡིན་པས། སོགས་སྤྱི་ལྟར་དམ་ཚིག་ཁས་བླངས་ལ་འཇུག་གོ། ཅེས་པའང་ཆོས་རྗེ་ཕན་བདེས་གསུངས་ངོར་ཆོས་ཀྱི་བློ་གྲོས་པས་སོ། །མངྒ་ལཾ།། །།
[edit]

rdzong sar bkra shis lha rtse'i sa zla'i bum sgrub kyi thugs chen rjes gnang la ril bu'i dbang bskur na/__/thugs kyi rjes gnang grub mtshams su/__ril bum dar lcibs dang bcas btegs la/__mtha' rten du myung grol ril bu'i rjes su gnang ba sbyin pa la dmigs pa 'di bzhin mdzod/__pad+ma dang zla ba'i steng du bum pa yangs shing rgya che ba tshad dang mtshan nyid thams cad yongs su rdzogs pa'i nang du pa~M las pad+ma dang a las zla ba'i dkyil 'khor nya gang ba re re'i steng du ril bu rnams re re bzhin hrIHdkar po las pad+ma dkar po hrIHsa mtshan pa/__de las 'od zer 'phros/__'phags pa mchod/__sems can gyi don byas/__tshur 'dus hrIHla thim/__de yongs su gyur pa las 'phags pa thugs rje chen po sogs sgrub thabs ltar rigs bdag dang bcas pa skyed/__lha de thams cad kyi dpral bar oM dkar po rnam snang gi rang bzhin/__mgrin par hrIHdmar po snang mtha'i ngo bo/__thugs kar hU~M sngon po mi bskyod pa'i bdag nyid/__lte bar trA~M ser po rin 'byung gi rang bzhin/__gsang bar AHljang gu don grub kyi ngo bor gsal ba dang /__khyed rang rnams kyi gnas lngar yang thugs rje chen po rigs lnga'i ngo bo oM hrIHhU~M trA~M AHrnams gsal ba dang /__slob dpon dang /__ril bu'i lha tshogs rnams la mos gus gdung shug drag pos gsol ba 'debs pa 'di'i rjes zlos mdzod/__dus gsum sangs rgyas thams cad 'dus pa'i ngo bo bla ma rin po che dang 'phags pa thugs rje chen po'i lha tshogs rnams kyi bdag gi sgo gsum bya byed dang bcas par byin gyis brlabs par mdzad du gsol/__lan gsum/__de ltar gsol ba btab pas ril bu'i lha rnams kyis dpral ba'i oM dkar po las 'od zer dkar po zla ba stong dus gcig la shar ba lta bu 'phros/__khyed rang rnams kyi dpral ba dang snod bcud thams cad la khyab pas nad gdon sdig sgrib 'gal rkyen bar gcod dang /__snod bcud nyams pa thams cad zhi bar byas/__sems can thams cad rnam snang thugs rje chen po'i go 'phang la bkod/__tshur 'dus khyod rang rnams kyi dpral ba'i oM la thim par mos/__de bzhin du ril bu'i lha rnams kyis mgrin pa'i hrIHdmar po las 'od zer dmar po pad+ma rA ga'i mdog ltar dmar ba 'phros/__khyed rang gi mgrin pa dang snod bcud thams cad la khyab pas snod bcud thams cad 'od dmar po'i rnam pas dbang du bsdus shing 'dun par byas/__sems can thams cad snang mtha' thugs rje chen po'i go 'phang la bkod/__tshur 'dus khyed rang rnams kyi mgrin pa'i hrIHla thim par mos/__yang ril bu'i lha rnams kyis thugs ka'i hU~M sngon po las 'od zer baiDUR+Ya'i mdog ltar sngo la dwangs ba 'phros/__khyed rang rnams kyi snying ga dang snod bcud thams cad la khyab pas nyon mongs pa'i rtog pa thams cad ye shes su gnas 'gyur/__sems can thams cad mi bskyod thugs rje chen po'i go 'phang la bkod/__tshur 'dus khyed rang rnams kyi thugs ka'i hU~M la thim par mos/__yang ril bu'i lha rnams kyi lte ba'i trA~M ser po las 'od zer ser po nyi ma bye ba'i gzi brjid ltar 'bar ba 'phros/__khyed rang rnams kyi lte ba dang snod bcud thams cad la khyab pas tshe bsod dpal 'byor ye shes yon tan sogs lung dang mngon par rtogs pa'i chos thams cad rgyas par byas/__sems can thams cad rin 'byung thugs rje chen po'i go 'phang la bkod/__tshur 'dus khyed rang rnams kyi lte ba'i trA~M la thim par mos/__slar yang ril bu'i lha tshogs rnams kyis gsang gnas kyi AHljang gu las 'od zer mar gad zhun ma'i mdog lta bu 'phros/__khyed rang rnams kyi gsang ba dang /__snod bcud thams cad la khyab pas sgo gsum bya byed dang bcas pa'i bag chags ngan pa thams cad zhi bar byas/__sems can thams cad don grub thugs rje chen po'i go 'phang la bkod/__tshur 'dus khyed rang rnams kyi gsang gnas kyi AHla thim par mos/__de ltar byas pas khyed rang rnams kyi lus ngag yid gsum bya byed dang bcas pa 'phags pa thugs rje chen po rigs lnga'i ngo bor byin gyis brlabs shing sku gsung thugs yon tan phrin las mi zad pa rgyan gyi 'khor lo dbang 'byor ba'i mos pa mdzod/__dril bsil spos rol dang bcas yig drug dang /__zhal bcu gcig pa'i gzungs ring mthar/__kA ya sid+d+hi oM/__wAka sid+d+hi AHtsit+ta sid+d+hi hU~M/__gu Na sid+d+hi hrIHsarba sid+d+hi AHzhes ril bum gnas lngar bzhag pa'am/__mdo li la drangs nas spyi bor 'jog__/ril bu sbyin/__de lta ril bu byin pa de nyid khyed rang rnams thugs rje chen po'i gsal snang dang ma bral ba'i rdo rje'i lce thog tu bzhag cing gyur mid du byas pa dang /__ril bu bla ma thugs rje chen po rigs bdag 'od dpag med dang bcas pa dngos su gsal ba mgrin pa'i lam nas brgyud/__snying pad+ma 'dab brgyad kyi steng du zla ba'i gdan la dgyes ye re byang chub snying po'i bar du 'bral ba med pa bzhugs pa'i mos pa mdzod/__/myong grol ril bu'i phan yon kyang /__'phags pa spyan ras gzigs don yod zhags pa'i rtogs pa chen mo las/__ril bu zos pa tsam gyis ni/__nad rnams thams cad rnam par 'jig__/gang zhig ril bu de dag bsten/__/ril bu thig le rtag byed la/__/de bzhin gshegs kun dgongs par mdzad/__/'phags pa spyan ras gzigs kyi dbang /__/de nyid rigs la rtag tu ni/__/mchog sbyin dus kun gzigs par mdzad/__/bsod nams phung po stong dag ni/__/nyi ma re rer gsog par byed/__/'jig rten pa yi bde spyad cing /__/'jig rten pha rol shin tu bde/__/tshe brje ba ni 'phos nas su/__/bde ba can du mod la 'gro/__/gang dang gang du skye ba der/__/tshe rabs rtag tu tshe rabs dran/__/lag na rdo rje gnod sbyin che/__/gnod sbyin bye bas yongs skor cing /__/g.yel ba med pa nyin mtshan du/__/dus kun du ni srung ba dang /__/skyob dang sped dang srung bar byed/__/ces dang /__ril bu gang la yod pa ni/__/phyir mi ldog par lung bstan cing /__/mgon po sa bcu dag la gnas/__/rtag tu mchod rten gyur pa ste/__/sku gdung snying po'i bdag nyid can/__/rtag tu sangs rgyas bdag nyid 'gyur/__/ces dang /__ril bu mthong ba tsam gyis ni/__/sdug bsngal kun las rab tu grol/__/sdig pa thams cad rnam par 'tshed/__/sgrib pa thams cad rnam par dag__/de ni ngan 'gror 'gro mi 'gyur/__/phyir zhing gnas mchog zhi ba thob/__/ces sogs rgyud sde rin po che rnams nas rgya cher bsngags pa la/__skal bzang rnams kyi sems dga' ba dang spro ba rgya chen po bskyed 'tshal/__de rnams kyis 'phags pa thugs rje chen po'i rjes gnang mtha' rten bcas legs par grub pa yin pas/__sogs spyi ltar dam tshig khas blangs la 'jug go/__ces pa'ang chos rje phan bdes gsungs ngor chos kyi blo gros pas so/__/mang+ga laM//___//

Footnotes

Other Information