JKCL-KABUM-04-NGA-047

Previous Text Back to Volume PageNext Text

མཁས་དང་གྲུབ་པའི་སློབ་དཔོན་ཆེན་པོ་སེངྒེ་བཟང་པོའི་བླ་རྣམ།

Wylie title	mkhas dang grub pa'i slob dpon chen po seng+ge bzang po'i bla rnam
Location	chos kyi blo gros bka' 'bum Volume 4, Text 47, Pages 331-332 (Folios 1a1 to 1b6)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People	སེངེ་གེ་བཟང་པོ་ (Haribhadra)
Citation	'jam dbyangs mkhyen brtse chos kyi blo gros. mkhas dang grub pa'i slob dpon chen po seng+ge bzang po'i bla rnam. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 4: 331-332. Bir, H.P.: Khyentse Labrang, 2012.
Genre	Guru Yoga Texts - bla ma'i rnal 'byor
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/haribhadra-guru-yoga
Colophon	།དེ་སྐད་ཆོས་ཀྱི་བློ་གྲོས་ལ། །འཁྲུལ་ཉམས་ཤིང་རྟ་ཟླ་༨ཚེས་༢༨ཀྱི། །ཉི་ཤར་ཆ་ལ་རབ་རིབ་ནི། །བྱུང་བས་རྐྱེན་བྱས་ཐ་སྐར་གྱིས། །རྒྱལ་བ་དང་པོའི་ཚེས་༢ལ་བྲིས། །དགེ་བས་བྱང་ཆུབ་ཐོབ་གྱུར་ཅིག །མངྒ་ལཾ།།
	/de skad chos kyi blo gros la/__/'khrul nyams shing rta zla 8tshes 28kyi/__/nyi shar cha la rab rib ni/__/byung bas rkyen byas tha skar gyis/__/rgyal ba dang po'i tshes 2la bris/__/dge bas byang chub thob gyur cig__/mang+ga laM//

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

མཁས་དང་གྲུབ་པའི་སློབ་དཔོན་ཆེན་པོ་སེངྒེ་བཟང་པོའི་བླ་རྣམ་བཞུགས་སོ། །ཨཱཿ ཆོས་ཀུན་སྐྱེ་མེད་སྟོང་པའི་ངང་། །ཨ་ག་རུ་ཡི་ཁྲི་པད་ཟླར། །སློབ་དཔོན་ཆེན་པོ་སེངྒེ་བཟང་། །དཀར་དམར་མདངས་ལྡན་གཟི་བརྗིད་འབར། །པཎྜི་ཏ་ཡི་ཆ་བྱད་ཅན། །དབུ་ལ་སྡེ་སྣོད་གསུམ་ཞུ་གསོལ། །ཕྱག་གཡས་ཆོས་འཆད་གཡོན་མཉམ་བཞག །གླེགས་བམ་བསྣམས་ཤིང་ཕྱེད་སྐྱིལ་བཞུགས། །ཐུགས་ཀར་ཤེས་རབ་ཕ་རོལ་ཕྱིན། །གསེར་མདོག་ཞལ་གཅིག་ཕྱག་བཞི་མ། །རྩ་ཕྱག་ཆོས་འཆད་མཉམ་བཞག་དང་། །འོག་མས་སྐྱབས་སྦྱིན་རྡོ་རྗེ་དང་། །གླེགས་བམ་འཛིན་ཅིང་ལོངས་སྐུའི་ཆས། །པད་ཟླར་རྡོ་རྗེའི་སྐྱིལ་ཀྲུང་བཞུགས། །གནས་གསུམ་ཡི་གེ་འབྲུ་གསུམ་དང་། །ཐུགས་ཀར་སྐྱེ་མེད་ཨ་ཡིས་མཚན། །དེ་ལས་འོད་འཕྲོས་ཡེ་ཤེས་པ། །སྤྱན་དྲངས་དམ་ཡེ་དབྱེར་མེད་གྱུར། །བཟང་པོ་སྤྱོད་པའི་ཡན་ལག་བདུན། མཎྜལ་འབུལ་ཞིང་གསོལ་འདེབས་ནི། ཨེ་མ་ཧོཿབྱམས་པ་མགོན་པོས་རྗེས་བཟུང་པཎྜི་ཏ། །རྒྱལ་ཡུམ་དགོངས་པ་ཇི་བཞིན་གསལ་མཛད་ཅིང་། །མཁྱེན་རབ་མཐའ་ཡས་སེངྒེ་བཟང་པོ་ལ། །གསོལ་བ་འདེབས་སོ་ཡུམ་དོན་རྟོགས་པར་ཤོག །ཨོཾ་ཨཱཿབཛྲ་གུ་རུ་སེང་ཧ་བྷ་དྲ་པྲཉྫཱ་པཱ་ར་མི་ཏཱ་སརྦ་སིདྡྷི་ཧཱུྃཿ ཞེས་དང་དབྱངས་གསལ་ཨ་ཡིག་བཟླ། བླ་མ་ཡུམ་ཆེན་ཐུགས་ཀ་ནས། །འོད་ཟེར་གསེར་མདོག་གྲངས་མེད་དང་། །དབྱངས་གསལ་ཨ་ཡིག་ཆར་བཞིན་བབས། །རང་གི་ལུས་ལ་སིབ་སིབ་ཐིམ། །མི་ཤེས་མུན་པ་ཀུན་བསལ་ནས། །བློ་མཆོག་སྣང་བ་རྒྱས་པར་མོས། །སྐབས་འགར་ཡུམ་གྱི་དོན་ལ་བཞག །ཐུན་མཐར་བླ་མའི་གནས་གསུམ་ལས། །བདུད་རྩི་དཀར་དམར་མཐིང་གསུམ་པོ། །ཡིག་འབྲུ་སྒྲར་བཅས་བྱུང་ནས་ནི། །རང་གི་གནས་གསུམ་ཐིམ་པ་དང་། །བླ་མ་འོད་ཞུ་ཤེར་ཕྱིན་གྱི། །གླེགས་བམ་འོད་ཀྱི་ཕུང་པོར་གྱུར། །རང་ཐིམ་ཤེར་ཕྱིན་སེར་མོའི་སྐུར། །གྱུར་པའི་ངང་ལ་སྣང་སེམས་བསྲེ། །ཨ་ནི་སྐྱེ་བ་མེད་པའི་སྒོ། །ར་ནི་རྡུལ་དང་བྲལ་བའི་སྒོ། །པ་ནི་ཆགས་པ་མེད་པའི་སྒོ། །ཙ་ནི་ཡེ་ཤེས་རྒྱས་པའི་སྒོ། །ན་ནི་ནམ་མཁའ་མཛོད་ཀྱི་སྒོ། །དྷཱིཿནི་ཡེ་ཤེས་ལྔ་ཡི་སྒོ། །དེ་ཡི་དོན་ལ་མཉམ་པར་བཞག །ཐུགས་ཀར་ཐིག་ལེ་སེར་པོའི་སྟེང་། །དྷཱིཿདང་ཨ་ར་པ་ཙས་བསྐོར། །སེམས་གཏད་སྔགས་ཀྱང་བཟླ་བ་དང་། །ག་ཏེ་ཡང་ནི་ཅུང་ཟད་བཟླ། །ཤེར་ཕྱིན་མདོ་ནི་གང་རུང་བཀླག །དགེ་བ་བསྔོ་ཞིང་སྨོན་ལམ་གདབ། །རྗེས་སྤྱོད་སྟོང་དང་རྟེན་འབྱུང་དང་། །འགྲོ་བའི་དོན་ལ་བརྩོན་བྱས་ན། །ཚེ་འདིར་ཡུམ་གྱི་དགོངས་པ་རྟོགས། །སྐུ་བཞིའི་རྒྱལ་སར་འཛེགས་པར་ངེས། །དེ་སྐད་ཆོས་ཀྱི་བློ་གྲོས་ལ། །འཁྲུལ་ཉམས་ཤིང་རྟ་ཟླ་༨ཚེས་༢༨ཀྱི། །ཉི་ཤར་ཆ་ལ་རབ་རིབ་ནི། །བྱུང་བས་རྐྱེན་བྱས་ཐ་སྐར་གྱིས། །རྒྱལ་བ་དང་པོའི་ཚེས་༢ལ་བྲིས། །དགེ་བས་བྱང་ཆུབ་ཐོབ་གྱུར་ཅིག །མངྒ་ལཾ།། །།

[edit]

mkhas dang grub pa'i slob dpon chen po seng+ge bzang po'i bla rnam bzhugs so/__/AHchos kun skye med stong pa'i ngang /__/a ga ru yi khri pad zlar/__/slob dpon chen po seng+ge bzang /__/dkar dmar mdangs ldan gzi brjid 'bar/__/paN+Di ta yi cha byad can/__/dbu la sde snod gsum zhu gsol/__/phyag g.yas chos 'chad g.yon mnyam bzhag__/glegs bam bsnams shing phyed skyil bzhugs/__/thugs kar shes rab pha rol phyin/__/gser mdog zhal gcig phyag bzhi ma/__/rtsa phyag chos 'chad mnyam bzhag dang /__/'og mas skyabs sbyin rdo rje dang /__/glegs bam 'dzin cing longs sku'i chas/__/pad zlar rdo rje'i skyil krung bzhugs/__/gnas gsum yi ge 'bru gsum dang /__/thugs kar skye med a yis mtshan/__/de las 'od 'phros ye shes pa/__/spyan drangs dam ye dbyer med gyur/__/bzang po spyod pa'i yan lag bdun/__maN+Dal 'bul zhing gsol 'debs ni/__e ma hoHbyams pa mgon pos rjes bzung paN+Di ta/__/rgyal yum dgongs pa ji bzhin gsal mdzad cing /__/mkhyen rab mtha' yas seng+ge bzang po la/__/gsol ba 'debs so yum don rtogs par shog__/oM AHbadz+ra gu ru seng ha b+ha dra prany+dzA pA ra mi tA sarba sid+d+hi hU~MHzhes dang dbyangs gsal a yig bzla/__bla ma yum chen thugs ka nas/__/'od zer gser mdog grangs med dang /__/dbyangs gsal a yig char bzhin babs/__/rang gi lus la sib sib thim/__/mi shes mun pa kun bsal nas/__/blo mchog snang ba rgyas par mos/__/skabs 'gar yum gyi don la bzhag__/thun mthar bla ma'i gnas gsum las/__/bdud rtsi dkar dmar mthing gsum po/__/yig 'bru sgrar bcas byung nas ni/__/rang gi gnas gsum thim pa dang /__/bla ma 'od zhu sher phyin gyi/__/glegs bam 'od kyi phung por gyur/__/rang thim sher phyin ser mo'i skur/__/gyur pa'i ngang la snang sems bsre/__/a ni skye ba med pa'i sgo/__/ra ni rdul dang bral ba'i sgo/__/pa ni chags pa med pa'i sgo/__/tsa ni ye shes rgyas pa'i sgo/__/na ni nam mkha' mdzod kyi sgo/__/d+hIHni ye shes lnga yi sgo/__/de yi don la mnyam par bzhag__/thugs kar thig le ser po'i steng /__/d+hIHdang a ra pa tsas bskor/__/sems gtad sngags kyang bzla ba dang /__/ga te yang ni cung zad bzla/__/sher phyin mdo ni gang rung bklag__/dge ba bsngo zhing smon lam gdab/__/rjes spyod stong dang rten 'byung dang /__/'gro ba'i don la brtson byas na/__/tshe 'dir yum gyi dgongs pa rtogs/__/sku bzhi'i rgyal sar 'dzegs par nges/__/de skad chos kyi blo gros la/__/'khrul nyams shing rta zla 8tshes 28kyi/__/nyi shar cha la rab rib ni/__/byung bas rkyen byas tha skar gyis/__/rgyal ba dang po'i tshes 2la bris/__/dge bas byang chub thob gyur cig__/mang+ga laM//____//