མཉམ་མེད་ཇོ་བོ་ཆེན་པོའི་བླ་མའི་རྣལ་འབྱོར་བྱིན་རླབས་མཆོག་སྩོལ།

🚧 This website is under continued development. We appreciate your patience!

Previous Text Back to Volume PageNext Text

Wylie title	mnyam med jo bo chen po'i bla ma'i rnal 'byor byin rlabs mchog stsol
Location	chos kyi blo gros bka' 'bum Volume 4, Text 23, Pages 121-127 (Folios 1a to 4a6)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People	ཇོ་བོ་རྗེ་ཨ་ཏི་ཤ་ (Atiśa)
Citation	'jam dbyangs mkhyen brtse chos kyi blo gros. mnyam med jo bo chen po'i bla ma'i rnal 'byor byin rlabs mchog stsol. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 4: 121-127. Bir, H.P.: Khyentse Labrang, 2012.
Genre	Guru Yoga Texts - bla ma'i rnal 'byor
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/atisha-guru-yoga
Colophon	།ཅེས་པའང་ས་ཁྱི་རྒྱལ་ཟླའི་ཚེས་ལ་རང་གི་དད་མོས་ཀྱི་རྟེན་དུ་བཀའ་གདམས་རིང་ལུགས་གཙང་མར་དད་པ་བརྟན་པོ་དང་ལྡན་པ་འཇམ་དབྱངས་ཆོས་ཀྱི་བློ་གྲོས་པས་བྲིས་པ་མཉམ་མེད་ཇོ་བོ་ཆེན་པོའི་བྱིན་རླབས་སྙིང་ལ་སིམ་པའི་རྒྱུར་གྱུར་ཅིག །མངྒ་ལཾ།།
	/ces pa'ang sa khyi rgyal zla'i tshes la rang gi dad mos kyi rten du bka' gdams ring lugs gtsang mar dad pa brtan po dang ldan pa 'jam dbyangs chos kyi blo gros pas bris pa mnyam med jo bo chen po'i byin rlabs snying la sim pa'i rgyur gyur cig__/mang+ga laM//

1 Texts in this Section (sde tshan or chos tshan)

121-127	མཉམ་མེད་ཇོ་བོ་ཆེན་པོའི་བླ་མའི་རྣལ་འབྱོར་བྱིན་རླབས་མཆོག་སྩོལ། mnyam med jo bo chen po'i bla ma'i rnal 'byor byin rlabs mchog stsol Guru Yoga Texts - bla ma'i rnal 'byor	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༄༅། །མཉམ་མེད་ཇོ་བོ་ཆེན་པོའི་བླ་མའི་རྣལ་འབྱོར་བྱིན་རླབས་མཆོག་སྩོལ་བཞུགས་སོ། ། ན་མོ་གུ་རུ་དཱི་པཾ་ཀཱ་ར་ཡེ། །བྱང་ཆུབ་སེམས་དཔའ་སེམས་དཔའ་ཆེ། །མཚན་ཐོས་ཙམ་གྱིས་འཇིགས་ལས་སྒྲོལ། །བླ་མ་ནམ་མཁའ་དྲི་མ་མེད། །ཡིད་བཞིན་ནོར་བུར་གསོལ་བཏབ་ཚུལ། །ཉུང་ངུ་སྙིང་པོར་དྲིལ་བྱས་ཏེ། །རང་དང་སྐལ་བ་མཉམ་པ་ལ། །ཕན་ཕྱིར་འབྲི་ལ་སྐབས་དབྱེའོ། །དེ་ལ་འདིར་བྱང་ཆུབ་ཀྱི་སེམས་གཉིས་རྒྱུད་ལ་བསྐྱེད་པའི་ཕྱིར་མཉམ་མེད་ཇོ་བོ་ཆེན་པོའི་རྣལ་འབྱོར་བསྒོམ་པར་འདོད་པས། གནས་ཁང་ཕྱག་བདར་བྱ། དཀོན་མཆོག་གི་རྟེན་བཀྲམ། མཆོད་པ་རྣམས་གཡོ་བ་མེད་པར་བཤམས། མཎྜལ་དྲིའི་ཆུ་དང་བཅས་པ་འདུ་བྱ། བདེ་བའི་སྟན་ལ་འཁོད་དེ་རླུང་དུག་བསལ། ཐོག་མར་སྔོན་འགྲོ་ངེས་འབྱུང་གི་བློ་བཅོས། སྙིང་རྗེ་ཆེན་པོས་ཡིད་རབ་ཏུ་དྲངས་ཏེ་སྐྱབས་ཡུལ་བླ་མ་རྒྱལ་བ་སྲས་བཅས་མངོན་སུམ་བཞུགས་པར་མོས་ལ། སངས་རྒྱས་ཆོས་ཚོགས་ལན་ཅི་ནུས་དང་། སེམས་ཅན་ཐམས་ཅད་བདེ་བ་དང་སོགས་ཚད་མེད་བཞིར་བློ་སྦྱངས། མཆོག་གསུམ་རྒྱལ་བ་སྲས་བཅས་བདེན་བྱིན་མཐུས། །སྣོད་བཅུད་དག་པའི་ཞིང་ཁམས་འབྱམས་ཀླས་པར། །ལྷ་མིའི་མཆོད་རྫས་ཀུན་ཏུ་བཟང་པོ་ཡི། །རྣམ་པར་འཕྲུལ་པའི་སྤྲིན་བཞིན་འཁྲིགས་པར་གྱུར། །ན་མོ་བྷ་ག་ཝ་ཏེ་བཛྲ་ས་ར་པྲ་མརྡྷ་ནི་སོགས་མཆོད་པའི་སྤྲིན་གཟུངས་ལན་གསུམ་བརྗོད། དངོས་གཞི་ལ་དམིགས་རྟེན་གསལ་གདབ་པ་ནི། མདུན་མཁར་སེང་ཁྲི་པདྨ་ཟླ་བའི་སྟེང་། །རྩ་བའི་བླ་མ་དཔལ་ལྡན་ཨ་ཏི་ཤ། དཀར་གསལ་མཛེས་འཛུམ་ཆོས་གོས་རྣམ་གསུམ་གསོལ། །དབུ་ལ་པཎ་ཞྭ་ཕྱག་གཉིས་ཆོས་འཆད་མཛད། །སྐུ་གཡས་པདྨའི་སྡོང་རྩེར་མཆོད་སྡོང་ཆེ། །གསེར་གདུགས་ཅན་དང་གཡོན་གྱི་པད་སྡོང་རྩེར། །དངུལ་གདུགས་ཅན་དང་བསིལ་བྱེད་ལྷུང་བཟེད་སོགས། །མཛེས་པར་བསྟར་ཞིང་མཚན་དཔེ་དཔལ་དུ་འབར། །མཐོང་ན་མི་མཐུན་མེད་པའི་སྐུ་ཅན་གྱི། །ཐུགས་ཀར་འོད་ལྔའི་གོང་བུའི་སྦུབས་སུ་ནི། །ཆོས་སྐུ་མཐིང་སྐྱ་མཉམ་བཞག་སྐྱིལ་ཀྲུང་ཅན། །དེ་ཡི་ཐུགས་ཀར་བྱང་སེམས་ཐིག་ལེ་ནི། །གསེར་མདོག་ཡུངས་འབྲུ་ཙམ་པ་ཕྲ་གསལ་འཚེར། །བླ་མའི་གནས་གསུམ་ཨོཾ་ཨཱཿཧཱུྃ་གིས་མཚན། །དེ་ལས་འོད་འཕྲོས་ཡེ་ཤེས་སེམས་དཔའི་ཚོགས། །དཔག་མེད་བྱོན་ནས་སྤྱི་བོའི་བླ་མར་ཐིམ། །སྐྱབས་གནས་ཀུན་འདུས་ངོ་བོར་བཞུགས་པར་བསམ། །འཕགས་པ་བཟང་པོ་སྤྱོད་པ་ནས་འབྱུང་བའི་ཡན་ལག་བདུན་པ་དང་། མཎྜལ་ཅི་ནུས་དབུལ་བར་བྱ། སླར་ཡང་དོན་དམ་ཡན་ལག་བདུན། ཕྱག་དང་ཕྱག་ཡུལ་གཉིས་སྟོང་པའི། །རྣམ་དག་སྐུ་ལ་ཡེ་ཕྱག་འཚལ། །སྐྱེ་གནས་འཇིགས་པས་མ་གོས་པའི། །དྲི་མེད་མཆོད་ཚོགས་འབུལ་ལོ་ལྷ། །སྒོ་གསུམ་སྐྱེ་གནས་འཇིགས་བྲལ་བའི། །ཉེས་པའི་གཡང་ས་མཐོལ་ལོ་བཤགས། །སྟོང་ཡང་སྣ་ཚོགས་སྐུར་སྟོན་པའི། །གྲངས་མེད་འདྲེན་ལ་རྗེས་ཡི་རངས། །སྨོན་དང་མཚན་མས་སྟོང་པ་ཡི། །འཁོར་ལོ་དབྱིངས་སུ་བསྐོར་དུ་གསོལ། །སྐྱེ་བས་སྟོང་པའི་ཆོས་སྐུ་ཁྱེད། །ལྷུན་གྲུབ་གནས་པའི་རང་བཞིན་ལས། །གང་དུའང་འདའ་བར་མ་མཛད་ཅིག །དགེ་བ་འདི་ཡིས་འཁོར་བ་རྣམས། །འདི་འདྲར་རྟོགས་ཏེ་འདི་འདྲ་བའི། །གཞལ་མེད་ཁང་དུ་འདྲོངས་གྱུར་ཅིག །ཅེས་བརྗོད་བྱང་ཆུབ་སེམས་སྡོམ་བླངས། །གཏོང་ལེན་དམིགས་པ་ཡང་ཡང་བསྒོམ། །མོས་གུས་གདུང་ཤུགས་དྲག་པོ་ཡིས། །གསོལ་བ་སྙིང་གི་དཀྱིལ་ནས་འདེབས། རྒྱལ་བའི་མདུན་ན་རྒྱལ་སྲས་བཟང་པོ་སྐྱོང་། །ཁ་བ་ཅན་ན་དཔལ་ལྡན་མར་མེ་མཛད། །དགའ་ལྡན་གནས་ན་ནམ་མཁའ་དྲི་མ་མེད། །ཡིད་བཞིན་ནོར་བུ་ལྟ་བུར་གཞན་དོན་མཛད། །དཔལ་ལྡན་ཨ་ཏི་ཤ་ལ་གསོལ་བ་འདེབས། །ཞེས་གྲངས་གསོགས། གཞན་ཡང་རྣམ་ཐར་གསོལ་འདེབས་དང་། ཤིན་ཏུ་ལེགས་པ་ངོ་མཚར་རྒྱ་མཚོའི་དཔལ། །ཀུན་ལ་བྱང་སེམས་འབྱོང་བར་བྱིན་གྱིས་རློབས། །རྒྱལ་རིགས་རིག་པའི་གནས་ལྔ་ཀུན་ལ་མཁས། །སྒྲོལ་མས་ལུང་བསྟན་གངས་ཅན་དཔལ་དུ་བྱོན། །བདག་བས་གཞན་གཅེས་འབྱོང་ནས་གཞན་དོན་མཛད། །མཚུངས་མེད་ཨ་ཏི་ཤ་ལ་གསོལ་བ་འདེབས། །ད་ལྟ་ཉིད་དུ་བྱིན་གྱིས་བརླབ་ཏུ་གསོལ། །སྐྱེ་དགུའི་སྡུག་བསྔལ་འཕྲལ་དུ་བསལ་དུ་གསོལ། །འགྲོ་ཀུན་བྱང་ཆུབ་ལམ་ལ་དྲང་དུ་གསོལ། །ཕན་བདེ་ཀུན་གྱི་འབྱུང་གནས་སྩལ་དུ་གསོལ། །སྐྱིད་འགོ་ད་ལྟ་ཉིད་དུ་འཛུག་ཏུ་གསོལ། །སྲིད་པའི་སྡུག་བསྔལ་ཐམས་ཅད་གཞོམ་དུ་གསོལ། །ཆོས་ཀྱི་བར་ཆད་ཐམས་ཅད་བཟློག་ཏུ་གསོལ། །བྱ་རྒྱུ་ཆོས་ལས་མེད་པར་བྱིན་གྱིས་རློབས། །ཅེས་རྒྱལ་བ་འབྲོམ་གྱི་གསུང་བྱིན་རླབས་ཅན་དང་། གདོད་ནས་རྣམ་དག་སྣང་སྟོང་དག་པའི་གཤིས། །བཞིན་ལེགས་མཚན་དཔེའི་འཇའ་ཚོན་རྣམ་བཀྲ་བ། །འགྱུར་མེད་ཆོས་སྐུ་གསལ་སྟོང་རླུང་སེམས་ཟུང་། །ཆེས་ཕྲ་ཐིག་ལེའི་རྣམ་པར་ཤར་ལ་བསྟོད། །ལྷ་ཆོས་བདུན་གྱི་ཉིང་ཁུ་ཐིག་ལེའི་ཆོས། །ཉམས་སུ་བསྟར་བས་ཚེ་འདིར་ཟུང་འཇུག་སྐུ། །མངོན་དུ་བྱས་ཏེ་དོན་གཉིས་མ་ལུས་པ། །འབད་མེད་ལྷུན་གྱིས་འགྲུབ་པར་བྱིན་གྱིས་རློབས། །ཅེས་གསོལ་བ་བཏབ། མཚན་སྔགས་བཟླ་ན། ཨོཾ་མ་ཧཱ་གུ་རུ་དཱི་པཾ་ཀཱ་ར་ཨ་ཏི་ཤ་སྭཱ་ཧཱ། ཞེས་དང་། ཨོཾ་དྷརྨ་ཀཱ་ཡ་སིདྡྷི་ཧཱུྃ། ཞེས་ཆོས་སྐུའི་མཚན་སྔགས་དང་། ཨོཾ་ཨཱཿཧཱུྃ་ཅི་ནུས་བཟླའོ། །དེ་ཚེ་བླ་མའི་སྐུ་ཉིད་ལས། འོད་འཕྲོས་རྒྱལ་བ་སྲས་བཅས་ཀྱི། །བྱིན་རླབས་བསྡུས་ནས་སླར་འོད་འཕྲོས། །སྣོད་བཅུད་སྒྲིབ་སྦྱངས་དག་པ་ཡི། །རྟེན་དང་བརྟེན་པར་བསྒྱུར་བ་དང་། །སྐུ་ལས་བདུད་རྩིའི་རྒྱུན་བབས་པས། །རང་གི་ལུས་གང་སྒྲིབ་དག་ཅིང་། །གསང་གསུམ་བྱིན་རླབས་ཐོབ་པར་བསམ། །བླ་མ་དགྱེས་པ་ཆེན་པོ་ཡིས། །འོད་ཞུ་ཆོས་ཀྱི་སྐུ་ལ་ཐིམ། །ཆོས་སྐུ་གཉུག་མའི་ཐིག་ལེར་བསྡུ། །ཐིག་ལེ་དེ་ཡང་སྤྱི་གཙུག་ནས། །ཞུགས་ཏེ་རང་གི་སྙིང་གར་ཐིམ། །དེ་དང་རང་སེམས་དབྱེར་མེད་ངང་། །ཅི་ཙམ་གནས་ཀྱི་བར་དུ་བཞག །དེ་ཚེ་སྤྲོ་ཞིང་བསྡུ་བ་ཡི། །འོད་གསལ་རྣལ་འབྱོར་ཆེན་པོའི་ངང་། །འཁོར་འདས་བརྟན་གཡོ་ཀུན་ལ་ཁྱབ། །རང་བྱུང་ཡེ་ཤེས་བདག་ཉིད་དོ། །དེ་ལས་ལྡང་བ་ན། དགེ་བ་བསྔོ་བ་དང་། འདིས་མཚོན་དུས་གསུམ་དགེ་ཚོགས་བསྡོམས་པའི་མཐུས། །བདག་དང་མཁའ་མཉམ་འགྲོ་བ་མ་ལུས་པ། །བརྒྱུད་པ་གསུམ་ལྡན་བླ་མ་དམ་པ་ཡིས། །ཚེ་རབས་ཀུན་ཏུ་འབྲལ་མེད་རྗེས་བཟུང་སྟེ། །བཀའ་གདམས་རྣམ་ཐར་གཙང་མ་མཐར་ཕྱིན་ཤོག །གློ་བུར་འདི་ཡང་ཆོས་དབྱིངས་ལས། །ཐ་དད་ཅི་ཡང་ཡོད་མ་མཆིས། །ཐ་དད་མེད་པར་ཕུན་ཚོགས་པའི། །བཀྲ་ཤིས་ཕུན་སུམ་ཚོགས་པར་ཤོག །གཙང་མ་རིགས་ཀྱི་བཀྲ་ཤིས་ཤོག །ཐོག་མཐའ་བར་གསུམ་གཙང་མ་ལས། །གཡོས་པ་མེད་པའི་བཀྲ་ཤིས་ཤོག །ཅེས་བརྗོད་ལ་རྗེས་ཐོབ་ཀུན་ཏུ་དྲན་ཤེས་བག་ཡོད་དང་ལྡན་པའི་སྙིང་རྗེ་སྒྱུ་མའི་ལམ་ཁྱེར་དང་། བླ་མའི་སྣང་བ་དང་མི་འབྲལ་བ་ལ་བསླབ་པར་བྱའོ། །ཤིན་ཏུ་ཟབ་པ་བཀའ་གདམས་ཀྱི། །མན་ངག་ཐིག་ལེའི་ཉིང་ཁུའི་བཅུད། །རང་གི་མོས་པས་སྦྱར་བ་འདིས། །འགྲོ་ཀུན་བྱང་ཆུབ་སེམས་འབྱོངས་ཤོག །ཅེས་པའང་ས་ཁྱི་རྒྱལ་ཟླའི་ཚེས་ལ་རང་གི་དད་མོས་ཀྱི་རྟེན་དུ་བཀའ་གདམས་རིང་ལུགས་གཙང་མར་དད་པ་བརྟན་པོ་དང་ལྡན་པ་འཇམ་དབྱངས་ཆོས་ཀྱི་བློ་གྲོས་པས་བྲིས་པ་མཉམ་མེད་ཇོ་བོ་ཆེན་པོའི་བྱིན་རླབས་སྙིང་ལ་སིམ་པའི་རྒྱུར་གྱུར་ཅིག །མངྒ་ལཾ།། །།

[edit]

@#/__/mnyam med jo bo chen po'i bla ma'i rnal 'byor byin rlabs mchog stsol bzhugs so/__/ na mo gu ru dI paM kA ra ye/__/byang chub sems dpa' sems dpa' che/__/mtshan thos tsam gyis 'jigs las sgrol/__/bla ma nam mkha' dri ma med/__/yid bzhin nor bur gsol btab tshul/__/nyung ngu snying por dril byas te/__/rang dang skal ba mnyam pa la/__/phan phyir 'bri la skabs dbye'o/__/de la 'dir byang chub kyi sems gnyis rgyud la bskyed pa'i phyir mnyam med jo bo chen po'i rnal 'byor bsgom par 'dod pas/__gnas khang phyag bdar bya/__dkon mchog gi rten bkram/__mchod pa rnams g.yo ba med par bshams/__maN+Dal dri'i chu dang bcas pa 'du bya/__bde ba'i stan la 'khod de rlung dug bsal/__thog mar sngon 'gro nges 'byung gi blo bcos/__snying rje chen pos yid rab tu drangs te skyabs yul bla ma rgyal ba sras bcas mngon sum bzhugs par mos la/__sangs rgyas chos tshogs lan ci nus dang /__sems can thams cad bde ba dang sogs tshad med bzhir blo sbyangs/__mchog gsum rgyal ba sras bcas bden byin mthus/__/snod bcud dag pa'i zhing khams 'byams klas par/__/lha mi'i mchod rdzas kun tu bzang po yi/__/rnam par 'phrul pa'i sprin bzhin 'khrigs par gyur/__/na mo b+ha ga wa te badz+ra sa ra pra mar+d+ha ni sogs mchod pa'i sprin gzungs lan gsum brjod/__dngos gzhi la dmigs rten gsal gdab pa ni/__mdun mkhar seng khri pad+ma zla ba'i steng /__/rtsa ba'i bla ma dpal ldan a ti sha/__dkar gsal mdzes 'dzum chos gos rnam gsum gsol/__/dbu la paN zhwa phyag gnyis chos 'chad mdzad/__/sku g.yas pad+ma'i sdong rtser mchod sdong che/__/gser gdugs can dang g.yon gyi pad sdong rtser/__/dngul gdugs can dang bsil byed lhung bzed sogs/__/mdzes par bstar zhing mtshan dpe dpal du 'bar/__/mthong na mi mthun med pa'i sku can gyi/__/thugs kar 'od lnga'i gong bu'i sbubs su ni/__/chos sku mthing skya mnyam bzhag skyil krung can/__/de yi thugs kar byang sems thig le ni/__/gser mdog yungs 'bru tsam pa phra gsal 'tsher/__/bla ma'i gnas gsum oM AHhU~M gis mtshan/__/de las 'od 'phros ye shes sems dpa'i tshogs/__/dpag med byon nas spyi bo'i bla mar thim/__/skyabs gnas kun 'dus ngo bor bzhugs par bsam/__/'phags pa bzang po spyod pa nas 'byung ba'i yan lag bdun pa dang /__maN+Dal ci nus dbul bar bya/__slar yang don dam yan lag bdun/__phyag dang phyag yul gnyis stong pa'i/__/rnam dag sku la ye phyag 'tshal/__/skye gnas 'jigs pas ma gos pa'i/__/dri med mchod tshogs 'bul lo lha/__/sgo gsum skye gnas 'jigs bral ba'i/__/nyes pa'i g.yang sa mthol lo bshags/__/stong yang sna tshogs skur ston pa'i/__/grangs med 'dren la rjes yi rangs/__/smon dang mtshan mas stong pa yi/__/'khor lo dbyings su bskor du gsol/__/skye bas stong pa'i chos sku khyed/__/lhun grub gnas pa'i rang bzhin las/__/gang du'ang 'da' bar ma mdzad cig__/dge ba 'di yis 'khor ba rnams/__/'di 'drar rtogs te 'di 'dra ba'i/__/gzhal med khang du 'drongs gyur cig__/ces brjod byang chub sems sdom blangs/__/gtong len dmigs pa yang yang bsgom/__/mos gus gdung shugs drag po yis/__/gsol ba snying gi dkyil nas 'debs/__rgyal ba'i mdun na rgyal sras bzang po skyong /__/kha ba can na dpal ldan mar me mdzad/__/dga' ldan gnas na nam mkha' dri ma med/__/yid bzhin nor bu lta bur gzhan don mdzad/__/dpal ldan a ti sha la gsol ba 'debs/__/zhes grangs gsogs/__gzhan yang rnam thar gsol 'debs dang /__shin tu legs pa ngo mtshar rgya mtsho'i dpal/__/kun la byang sems 'byong bar byin gyis rlobs/__/rgyal rigs rig pa'i gnas lnga kun la mkhas/__/sgrol mas lung bstan gangs can dpal du byon/__/bdag bas gzhan gces 'byong nas gzhan don mdzad/__/mtshungs med a ti sha la gsol ba 'debs/__/da lta nyid du byin gyis brlab tu gsol/__/skye dgu'i sdug bsngal 'phral du bsal du gsol/__/'gro kun byang chub lam la drang du gsol/__/phan bde kun gyi 'byung gnas stsal du gsol/__/skyid 'go da lta nyid du 'dzug tu gsol/__/srid pa'i sdug bsngal thams cad gzhom du gsol/__/chos kyi bar chad thams cad bzlog tu gsol/__/bya rgyu chos las med par byin gyis rlobs/__/ces rgyal ba 'brom gyi gsung byin rlabs can dang /__gdod nas rnam dag snang stong dag pa'i gshis/__/bzhin legs mtshan dpe'i 'ja' tshon rnam bkra ba/__/'gyur med chos sku gsal stong rlung sems zung /__/ches phra thig le'i rnam par shar la bstod/__/lha chos bdun gyi nying khu thig le'i chos/__/nyams su bstar bas tshe 'dir zung 'jug sku/__/mngon du byas te don gnyis ma lus pa/__/'bad med lhun gyis 'grub par byin gyis rlobs/__/ces gsol ba btab/__mtshan sngags bzla na/__oM ma hA gu ru dI paM kA ra a ti sha swA hA/__zhes dang /__oM d+harma kA ya sid+d+hi hU~M/__zhes chos sku'i mtshan sngags dang /__oM AHhU~M ci nus bzla'o/__/de tshe bla ma'i sku nyid las/__'od 'phros rgyal ba sras bcas kyi/__/byin rlabs bsdus nas slar 'od 'phros/__/snod bcud sgrib sbyangs dag pa yi/__/rten dang brten par bsgyur ba dang /__/sku las bdud rtsi'i rgyun babs pas/__/rang gi lus gang sgrib dag cing /__/gsang gsum byin rlabs thob par bsam/__/bla ma dgyes pa chen po yis/__/'od zhu chos kyi sku la thim/__/chos sku gnyug ma'i thig ler bsdu/__/thig le de yang spyi gtsug nas/__/zhugs te rang gi snying gar thim/__/de dang rang sems dbyer med ngang /__/ci tsam gnas kyi bar du bzhag__/de tshe spro zhing bsdu ba yi/__/'od gsal rnal 'byor chen po'i ngang /__/'khor 'das brtan g.yo kun la khyab/__/rang byung ye shes bdag nyid do/__/de las ldang ba na/__dge ba bsngo ba dang /__'dis mtshon dus gsum dge tshogs bsdoms pa'i mthus/__/bdag dang mkha' mnyam 'gro ba ma lus pa/__/brgyud pa gsum ldan bla ma dam pa yis/__/tshe rabs kun tu 'bral med rjes bzung ste/__/bka' gdams rnam thar gtsang ma mthar phyin shog__/glo bur 'di yang chos dbyings las/__/tha dad ci yang yod ma mchis/__/tha dad med par phun tshogs pa'i/__/bkra shis phun sum tshogs par shog__/gtsang ma rigs kyi bkra shis shog__/thog mtha' bar gsum gtsang ma las/__/g.yos pa med pa'i bkra shis shog__/ces brjod la rjes thob kun tu dran shes bag yod dang ldan pa'i snying rje sgyu ma'i lam khyer dang /__bla ma'i snang ba dang mi 'bral ba la bslab par bya'o/__/shin tu zab pa bka' gdams kyi/__/man ngag thig le'i nying khu'i bcud/__/rang gi mos pas sbyar ba 'dis/__/'gro kun byang chub sems 'byongs shog__/ces pa'ang sa khyi rgyal zla'i tshes la rang gi dad mos kyi rten du bka' gdams ring lugs gtsang mar dad pa brtan po dang ldan pa 'jam dbyangs chos kyi blo gros pas bris pa mnyam med jo bo chen po'i byin rlabs snying la sim pa'i rgyur gyur cig__/mang+ga laM//____//