རྗེ་བཙུན་རྡོ་རྗེ་འཆང་ཀུན་དགའ་བཟང་པོ་ལ་གསོལ་བ་འདེབས་པ་བྱིན་རླབས་མྱུར་འཇུག།

🚧 This website is under continued development. We appreciate your patience!

Previous Text Back to Volume PageNext Text

Wylie title	rje btsun rdo rje 'chang kun dga' bzang po la gsol ba 'debs pa byin rlabs myur 'jug
Location	chos kyi blo gros bka' 'bum Volume 3, Text 41, Pages 153-157 (Folios 1a1 to 3a1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People	ངོར་ཆེན་ཀུན་དགའ་བཟང་པོ་ (Ngor mkhan chen, 1st)
Citation	'jam dbyangs mkhyen brtse chos kyi blo gros. rje btsun rdo rje 'chang kun dga' bzang po la gsol ba 'debs pa byin rlabs myur 'jug. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 3: 153-157. Bir, H.P.: Khyentse Labrang, 2012.
Genre	Supplications - gsol 'debs
Colophon	།ཅེས་པའང་མི་ཕྱེད་པའི་དད་མོས་རྩེ་གཅིག་པས་ཆུ་མོ་ལུག་གི་ལོ་སྦྲུལ་ཟླ་བའི་དཀར་ཕྱོགས་ཀྱི་བཟང་པོ་དང་པོར་ཀུན་དགའ་ཕྲིན་ལས་རྒྱ་མཚོའམ། འཇམ་དབྱངས་ཆོས་ཀྱི་བློ་གྲོས་པས་གསོལ་བ་བཏབ་བ་སིདྡྷི་བྷ་བ་ཏུ།།
	/ces pa'ang mi phyed pa'i dad mos rtse gcig pas chu mo lug gi lo sbrul zla ba'i dkar phyogs kyi bzang po dang por kun dga' phrin las rgya mtsho'am/__'jam dbyangs chos kyi blo gros pas gsol ba btab ba sid+d+hi b+ha ba tu//

1 Texts in this Section (sde tshan or chos tshan)

153-157	རྗེ་བཙུན་རྡོ་རྗེ་འཆང་ཀུན་དགའ་བཟང་པོ་ལ་གསོལ་བ་འདེབས་པ་བྱིན་རླབས་མྱུར་འཇུག། rje btsun rdo rje 'chang kun dga' bzang po la gsol ba 'debs pa byin rlabs myur 'jug Supplications - gsol 'debs	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

རྗེ་བཙུན་རྡོ་རྗེ་འཆང་ཀུན་དགའ་བཟང་པོ་ལ་གསོལ་བ་འདེབས་པ་བྱིན་རླབས་མྱུར་འཇུག་བཞུགས་སོ། །དཔལ་ལྡན་བླ་མ་རྡོ་རྗེ་འཆང་ལ་ཕྱག་འཚལ་ལོ། །ཁྱབ་བདག་སྲས་བཅས་རྒྱལ་བའི་ཡེ་ཤེས་སྐུ། །འཇམ་དཔལ་དབྱངས་དང་སྤྱན་རས་གཟིགས་དབང་ཕྱུག །གསང་བའི་བདག་པོ་ལག་ན་རྡོ་རྗེ་འཆང་། །རིགས་གསུམ་གཅིག་བསྡུས་བླ་མར་གསོལ་བ་འདེབས། །བསྐལ་མང་གོང་ནས་བྱང་ཆུབ་མངོན་མཛད་ཀྱང་། །ཞིང་འདིར་མཁས་དང་གྲུབ་པའི་ཟློས་གར་གྱི། །སྐྱེ་བའི་ཕྲེང་བ་ངོ་མཚར་བགྲང་ཡས་པ། །བརྒྱུད་མར་བྱོན་པར་མཛད་ལ་གསོལ༴ །རྒྱལ་བའི་མདུན་ན་དྲི་མ་མེད་དཔལ་དང་། །དགའ་ལྡན་གནས་སུ་དུལ་བའི་དབང་པོ་སྟེ། །གངས་རིའི་ལྗོངས་འདིར་རྗེ་བཙུན་གྲགས་པའི་མཚན། །ཀུན་དགའ་བཟང་པོར་སྟོན་ལ༴ །རྒྱལ་བས་མདོ་སྡེ་མང་པོར་ལུང་བསྟན་ཅིང་། །སྙིགས་མའི་དུས་འདིར་ཐུབ་པའི་དབང་པོ་ཉིད། །དངོས་སུ་འབྱོན་དང་རྣམ་དབྱེར་མེད་པ་ཡི། །ཐམས་ཅད་མཁྱེན་གཟིགས་ཆེན་པོར༴ །བཅུ་ཕྲག་གཅིག་གིས་ལྷག་པའི་ཡོངས་འཛིན་གྱི། །ཞབས་པད་གཙུག་ཏུ་བསྟེན་ནས་ཕྱི་ནང་གི། ཤེས་བྱ་རྒྱ་མཚོའི་ཕ་མཐར་སོན་པ་དང་། །གསང་སྔགས་བདག་པོ་ཆེན་པོར༴ །སྡོམ་པ་གསུམ་ལ་ཉེས་འགལ་ཕྲ་མོས་ཀྱང་། །མ་གོས་གཞན་ལ་ཕན་པའི་ཐུགས་མངའ་ཞིང་། །འཕགས་པའི་ཚུལ་ཁྲིམས་དྲི་ཡིས་ཕྱོགས་ཀུན་ཁྱབ། །མཁས་བཙུན་བཟང་པོའི་ཞབས་ལ༴ །བསྐྱེད་དང་རྫོགས་པའི་ཏིང་འཛིན་བསྒོམས་པ་ལས། །སྒོ་གསུམ་རྡོ་རྗེ་གསུམ་དུ་རབ་སྒྲུབ་ཅིང་། །རྩ་རླུང་ཐིག་ལེའི་འགྲོས་རྣམས་དབུ་མར་ཐིམ། །བདེ་ཆེན་ཡེ་ཤེས་བརྙེས་ལ༴ །མདོ་དང་སྔགས་ཀྱི་ཟབ་གནད་ཇི་བཞིན་རྟོགས། །མ་འདྲེས་སོ་སོར་འཆད་ལ་ཞུམ་པ་བྲལ། །རྩོད་པས་ལོག་པར་རྟོག་པའི་མགོ་བོ་འགེམས། །འཛམ་གླིང་མཁས་པ་ཆེན་པོར༴ །ཟབ་དང་རྒྱ་ཆེའི་དོན་རྣམས་འདོམས་པ་ལ། །སྡེབས་ལེགས་ངོ་མཚར་རྩོམ་པའི་རྒྱན་ཕྲེང་གིས། །ཐུབ་བསྟན་སྲིད་མཐའི་བར་དུ་གསལ་མཛད་པའི། །གཞན་ཕན་ཕ་མཐའ་ཡས་ལ༴ །བླ་མ་ལྷག་པའི་ལྷ་ཡི་དགྱེས་ཞལ་གཟིགས། །རྡོ་རྗེའི་ཆོས་སྲུང་ཅི་བཅོལ་བཀའ་བཞིན་སྒྲུབ། །ས་སྟེང་མཁས་གྲུབ་རྒྱ་མཚོའི་གཙུག་ཏོར་རྩེར། །ཞབས་རྟེན་པདྨོ་བཀོད་ལ༴ །བསྡུ་བ་རྣམ་བཞིས་འགྲོ་བ་རབ་སྨིན་ཅིང་། །ཕ་རོལ་ཕྱིན་དྲུག་རླབས་ཆེན་སྤྱོད་པ་ལས། །ནམ་ཡང་མི་འདའ་ཚོགས་གཉིས་རྒྱ་ཆེར་སྒྲུབ། །རྒྱལ་སྲས་སེམས་དཔའ་ཆེན་པོར༴ །ཆོས་ཉིད་དོན་ལ་རྟག་ཏུ་སྙོམས་པར་འཇུག །གཟུངས་དང་ཏིང་འཛིན་སྒོ་འཕར་བརྒྱ་ཕྲག་འབྱེད། །ལྐོག་གྱུར་ཆོས་རྣམས་མ་འདྲེས་མངོན་དུ་གཟིགས། །ས་བཅུའི་དབང་ཕྱུག་ཆེན་པོར༴ །བསྟན་པའི་གཞི་མ་གཙུག་ལག་ཁང་ཆེན་བསྐྲུན། །དགེ་འདུན་སྡེ་བཙུག་བསླབ་པ་གསུམ་ལ་བཀོད། །བཤད་དང་སྒྲུབ་པ་ཆེས་ཆེར་རྒྱས་མཛད་པའི། །ཕྲིན་ལས་བསམ་མི་ཁྱབ་ལ༴ །རྡོ་རྗེ་འཆང་གི་གསང་སྔགས་ཟབ་མོའི་མཛོད། །སྨིན་གྲོལ་གདམས་པ་ལྔ་བརྒྱ་ཐ་མར་ཡང་། །མི་ནུབ་ཁ་འབབ་རྣམ་བཞིའི་རྒྱུན་བཟང་པོའི། །འབྱུང་གནས་མ་དྲོས་བདག་པོར༴ །ཁྱད་པར་བིཪྺའི་གསུང་ངག་ཞལ་གྱི་ལུང་། །སྙན་བརྒྱུད་ཚད་མ་རྣམ་བཞིའི་གདམས་པ་ཡིས། །ཐར་འདོད་གྲུབ་པའི་རྒྱལ་སར་རབ་འགོད་པའི། །རྣལ་འབྱོར་དབང་ཕྱུག་ཆེན་པོར༴ །བརྒྱུད་འཛིན་བུ་སློབ་གསེར་རིའི་ཕྲེང་བ་ལྟར། །ཉོན་མོངས་དྲི་བྲལ་ཤིན་ཏུ་གཙང་ཞིང་མཛེས། །མང་ཐོས་ཏིང་འཛིན་ཤེས་རབ་གཏེར་འཆང་བའི། །སློབ་ཚོགས་གྲངས་མེད་བསྐྲུན་ལ༴ །ཀུན་དགའི་རྟེན་དེར་མི་སློབ་ཟུང་འཇུག་གི། རྟོགས་པའི་རྩེར་སོན་བདེ་ཆེན་ཞིང་དུ་གཤེགས། །བྱེ་བ་ཕྲག་བརྒྱ་རྣམ་འཕྲུལ་བསམ་ཡས་པས། །བསྟན་འགྲོའི་དོན་ཆེན་བསྒྲུབ་ལ༴ །ཀུན་དགའ་བཟང་པོ་རྒྱལ་བའི་ཆོས་འཛིན་པ། །བདེ་གཤེགས་བྱེ་བ་དྲུག་ཅུ་མཆོད་བྱས་ནས། །རྒྱ་མཚོ་བློ་འཛིན་ཞེས་བྱར་མངོན་འཚང་རྒྱ། །དེ་བཞིན་གཤེགས་པའི་དབང་པོར༴ །མདོར་ན་རྗེ་བཙུན་བླ་མ་རྡོ་རྗེ་འཆང་། །ཁྱོད་འདྲ་དུས་གསུམ་ཀུན་ཏུ་འབྱོན་དཀའ་ཞིང་། །མཛད་པའི་རྣམ་ཐར་བསམ་གྱིས་མི་ཁྱབ་པ། །འཕགས་པའི་སྤྱོད་ཡུལ་གྱུར་ལ༴ །རྡོ་རྗེ་འཆང་དངོས་དགེ་སློང་སྐུར་སྟོན་པ། །བླ་མ་མཆོག་ལ་གསོལ་བ་བཏབ་པའི་མཐུས། །བདག་ནི་སྐྱེ་ཞིང་སྐྱེ་བ་ཐམས་ཅད་དུ། །རྒྱལ་བ་གཉིས་པས་རྗེས་སུ་འཛིན་པར་ཤོག །དལ་འབྱོར་རྟེན་ཐོབ་ཚུལ་ཁྲིམས་རྣམ་པར་དག །ཐོས་པས་རྒྱུད་གྲོལ་བསམ་པས་སྒྲོ་འདོགས་ཆོད། །སྒོམ་པས་གནས་ལུགས་ཇི་བཞིན་མངོན་གྱུར་ཏེ། །མཁྱེན་བརྩེ་ནུས་པ་རྒྱ་མཚོར་དབང་འབྱོར་ཤོག །མགོན་པོ་ཁྱེད་ཀྱི་ཐུགས་བཞེད་བསྒྲུབ་པ་ལ། །བདག་ནི་མཐུ་སྟོབས་ནུས་པར་ལྡན་གྱུར་ནས། །ཀུན་དགའི་ཕྲིན་ལས་ཕྱོགས་བརྒྱར་སྤེལ་བ་ལ། །འགྲན་ཟླ་མེད་པའི་དབང་པོ་ཉིད་གྱུར་ཅིག །འཇམ་པའི་དབྱངས་དངོས་རྗེ་བཙུན་ས་སྐྱ་པའི། །བསྟན་པ་དྲི་མེད་ཡུན་དུ་གནས་པ་དང་། །བསྟན་འཛིན་ཚོགས་རྣམས་དར་རྒྱས་དབུ་འཕང་མཐོ། །ཕྱོགས་ལས་རྣམ་རྒྱལ་དགེ་ལེགས་བཀྲ་ཤིས་ཤོག །རྡོ་རྗེ་ཐེག་པའི་རྒྱུད་ཀུན་འབྱུང་བའི་ངོར། །ཨེ་ཝྃ་ཟུང་འཇུག་མཚན་གྱིས་སྤྲས་པ་ཡི། །ཡོན་ཏན་རིན་ཆེན་དམ་པའི་ཆོས་ལྡན་གྱི། །བསྟན་པ་མི་ནུབ་དར་ཞིང་རྒྱས་གྱུར་ཅིག །ཅེས་པའང་མི་ཕྱེད་པའི་དད་མོས་རྩེ་གཅིག་པས་ཆུ་མོ་ལུག་གི་ལོ་སྦྲུལ་ཟླ་བའི་དཀར་ཕྱོགས་ཀྱི་བཟང་པོ་དང་པོར་ཀུན་དགའ་ཕྲིན་ལས་རྒྱ་མཚོའམ། འཇམ་དབྱངས་ཆོས་ཀྱི་བློ་གྲོས་པས་གསོལ་བ་བཏབ་བ་སིདྡྷི་བྷ་བ་ཏུ།། །།

[edit]

rje btsun rdo rje 'chang kun dga' bzang po la gsol ba 'debs pa byin rlabs myur 'jug bzhugs so/____/dpal ldan bla ma rdo rje 'chang la phyag 'tshal lo/____/khyab bdag sras bcas rgyal ba'i ye shes sku/____/'jam dpal dbyangs dang spyan ras gzigs dbang phyug__/gsang ba'i bdag po lag na rdo rje 'chang /____/rigs gsum gcig bsdus bla mar gsol ba 'debs/____/bskal mang gong nas byang chub mngon mdzad kyang /____/zhing 'dir mkhas dang grub pa'i zlos gar gyi/____/skye ba'i phreng ba ngo mtshar bgrang yas pa/____/brgyud mar byon par mdzad la gsol=____/rgyal ba'i mdun na dri ma med dpal dang /____/dga' ldan gnas su dul ba'i dbang po ste/____/gangs ri'i ljongs 'dir rje btsun grags pa'i mtshan/____/kun dga' bzang por ston la=____/rgyal bas mdo sde mang por lung bstan cing /____/snyigs ma'i dus 'dir thub pa'i dbang po nyid/____/dngos su 'byon dang rnam dbyer med pa yi/____/thams cad mkhyen gzigs chen por=____/bcu phrag gcig gis lhag pa'i yongs 'dzin gyi/____/zhabs pad gtsug tu bsten nas phyi nang gi/__shes bya rgya mtsho'i pha mthar son pa dang /____/gsang sngags bdag po chen por=____/sdom pa gsum la nyes 'gal phra mos kyang /____/ma gos gzhan la phan pa'i thugs mnga' zhing /____/'phags pa'i tshul khrims dri yis phyogs kun khyab/____/mkhas btsun bzang po'i zhabs la=____/bskyed dang rdzogs pa'i ting 'dzin bsgoms pa las/____/sgo gsum rdo rje gsum du rab sgrub cing /____/rtsa rlung thig le'i 'gros rnams dbu mar thim/____/bde chen ye shes brnyes la=____/mdo dang sngags kyi zab gnad ji bzhin rtogs/____/ma 'dres so sor 'chad la zhum pa bral/____/rtsod pas log par rtog pa'i mgo bo 'gems/____/'dzam gling mkhas pa chen por=____/zab dang rgya che'i don rnams 'doms pa la/____/sdebs legs ngo mtshar rtsom pa'i rgyan phreng gis/____/thub bstan srid mtha'i bar du gsal mdzad pa'i/____/gzhan phan pha mtha' yas la=____/bla ma lhag pa'i lha yi dgyes zhal gzigs/____/rdo rje'i chos srung ci bcol bka' bzhin sgrub/____/sa steng mkhas grub rgya mtsho'i gtsug tor rtser/____/zhabs rten pad+mo bkod la=____/bsdu ba rnam bzhis 'gro ba rab smin cing /____/pha rol phyin drug rlabs chen spyod pa las/____/nam yang mi 'da' tshogs gnyis rgya cher sgrub/____/rgyal sras sems dpa' chen por=____/chos nyid don la rtag tu snyoms par 'jug__/gzungs dang ting 'dzin sgo 'phar brgya phrag 'byed/____/lkog gyur chos rnams ma 'dres mngon du gzigs/____/sa bcu'i dbang phyug chen por=____/bstan pa'i gzhi ma gtsug lag khang chen bskrun/____/dge 'dun sde btsug bslab pa gsum la bkod/____/bshad dang sgrub pa ches cher rgyas mdzad pa'i/____/phrin las bsam mi khyab la=____/rdo rje 'chang gi gsang sngags zab mo'i mdzod/____/smin grol gdams pa lnga brgya tha mar yang /____/mi nub kha 'bab rnam bzhi'i rgyun bzang po'i/____/'byung gnas ma dros bdag por=____/khyad par biR+Wa'i gsung ngag zhal gyi lung /____/snyan brgyud tshad ma rnam bzhi'i gdams pa yis/____/thar 'dod grub pa'i rgyal sar rab 'god pa'i/____/rnal 'byor dbang phyug chen por=____/brgyud 'dzin bu slob gser ri'i phreng ba ltar/____/nyon mongs dri bral shin tu gtsang zhing mdzes/____/mang thos ting 'dzin shes rab gter 'chang ba'i/____/slob tshogs grangs med bskrun la=____/kun dga'i rten der mi slob zung 'jug gi/__rtogs pa'i rtser son bde chen zhing du gshegs/____/bye ba phrag brgya rnam 'phrul bsam yas pas/____/bstan 'gro'i don chen bsgrub la=____/kun dga' bzang po rgyal ba'i chos 'dzin pa/____/bde gshegs bye ba drug cu mchod byas nas/____/rgya mtsho blo 'dzin zhes byar mngon 'tshang rgya/____/de bzhin gshegs pa'i dbang por=____/mdor na rje btsun bla ma rdo rje 'chang /____/khyod 'dra dus gsum kun tu 'byon dka' zhing /____/mdzad pa'i rnam thar bsam gyis mi khyab pa/____/'phags pa'i spyod yul gyur la=____/rdo rje 'chang dngos dge slong skur ston pa/____/bla ma mchog la gsol ba btab pa'i mthus/____/bdag ni skye zhing skye ba thams cad du/____/rgyal ba gnyis pas rjes su 'dzin par shog__/dal 'byor rten thob tshul khrims rnam par dag__/thos pas rgyud grol bsam pas sgro 'dogs chod/____/sgom pas gnas lugs ji bzhin mngon gyur te/____/mkhyen brtse nus pa rgya mtshor dbang 'byor shog__/mgon po khyed kyi thugs bzhed bsgrub pa la/____/bdag ni mthu stobs nus par ldan gyur nas/____/kun dga'i phrin las phyogs brgyar spel ba la/____/'gran zla med pa'i dbang po nyid gyur cig__/'jam pa'i dbyangs dngos rje btsun sa skya pa'i/____/bstan pa dri med yun du gnas pa dang /____/bstan 'dzin tshogs rnams dar rgyas dbu 'phang mtho/____/phyogs las rnam rgyal dge legs bkra shis shog__/rdo rje theg pa'i rgyud kun 'byung ba'i ngor/____/e wa~M zung 'jug mtshan gyis spras pa yi/____/yon tan rin chen dam pa'i chos ldan gyi/____/bstan pa mi nub dar zhing rgyas gyur cig__/ces pa'ang mi phyed pa'i dad mos rtse gcig pas chu mo lug gi lo sbrul zla ba'i dkar phyogs kyi bzang po dang por kun dga' phrin las rgya mtsho'am/__'jam dbyangs chos kyi blo gros pas gsol ba btab ba sid+d+hi b+ha ba tu//____//_