JKCL-KABUM-03-GA-038

From Khyentse Lineage - A Tsadra Foundation Project

‎‎

རྗེ་ཐམས་ཅད་མཁྱེན་པ་ཙོང་ཁ་པ་ཆེན་པོར་གསོལ་བ་འདེབས་པ་མོས་གུས་ཀྱི་དབྱངས་སྙན།
Wylie title rje thams cad mkhyen pa tsong kha pa chen por gsol ba 'debs pa mos gus kyi dbyangs snyan JKCL-KABUM-03-GA-038.pdf
Location chos kyi blo gros bka' 'bum
Volume 3, Text 38, Pages 139-141 (Folios 1a1 to 2a6)
Author འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People ཙོང་ཁ་པ་ (tsong kha pa)
Citation 'jam dbyangs mkhyen brtse chos kyi blo gros. rje thams cad mkhyen pa tsong kha pa chen por gsol ba 'debs pa mos gus kyi dbyangs snyan. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 3: 139-141. Bir, H.P.: Khyentse Labrang, 2012.
Genre Supplications - gsol 'debs
Colophon

།ཅེས་པའང་ལྕགས་ལུག་སྨིན་དྲུག་ཟླ་བའི་དུས་ཀྱི་མཆོད་པ་ལ་ཆོས་ཀྱི་བློ་གྲོས་པས་གསོལ་བ་བཏབ་པ་དགེ་ལེགས་སུ་གྱུར་ཅིག །

/ces pa'ang lcags lug smin drug zla ba'i dus kyi mchod pa la chos kyi blo gros pas gsol ba btab pa dge legs su gyur cig__/

[edit]
རྗེ་ཐམས་ཅད་མཁྱེན་པ་ཙོང་ཁ་པ་ཆེན་པོར་གསོལ་བ་འདེབས་པ་མོས་གུས་ཀྱི་དབྱངས་སྙན་བཞུགས་སོ། །ན་མོ་གུ་རུ་བྷཊྚ་རཱ་ཀཱ་ཡ། སྲས་བཅས་རྒྱལ་བ་རྒྱ་མཚོ་ཐམས་ཅད་ཀྱི། །མཁྱེན་བརྩེ་ནུས་པ་གཅིག་ཏུ་བསྡུས་པའི་སྐུ། །རྗེ་བཙུན་བླ་མ་བློ་བཟང་གྲགས་པ་ཡི། །གསང་གསུམ་རྣམ་ཐར་དྲན་བཞིན་གསོལ་བ་འདེབས། །འཇམ་དཔལ་དཔའ་བོ་མི་ཡི་གཟུགས་འཛིན་པ། །ཐ་མལ་སྣང་ངོར་དགེ་བའི་བཤེས་སུ་སྟོན། །ཁྲིམས་ལྡན་ངུར་སྨྲིག་འཛིན་པ་ཀུན་གྱི་རྒྱན། །བློ་བཟང་རྒྱལ་བ་གཉིས་པར་གསོལ་བ་འདེབས། །ཉེས་པའི་དྲི་མ་དག་ཅིང་གཙང་བའི་སྐུ། །ཚུལ་ཁྲིམས་ཕུང་པོ་ཡོངས་སུ་རྫོགས་པ་ལས། །རྨད་བྱུང་རྒྱལ་བ་དགྱེས་བའི་དྲི་བསུང་འཐུལ། །དགྲ་བཅོམ་ཆེན་པོའི་ཞབས་ལ༴ །ཐོག་མེད་དུས་ནས་བརྩེ་བའི་ཤུགས་ཀྱིས་དྲངས། །གཞན་ལ་ཕན་པ་ཁོ་ནའི་ཐུགས་མངའ་བ། །བྱམས་དང་སྙིང་རྗེ་དྲི་མེད་ཟླ་འདྲས་བརྒྱན། །བློ་ལྡན་ཐུགས་རྗེའི་བདག་པོར༴ །ཁྲོ་བའི་ཀུན་རྟོག་བག་ཆགས་དང་བཅས་འབྱིན། །འགྲོ་མང་ནམ་མཁའི་མཐའ་དང་མཉམ་པ་ཀུན། །བྱང་ཆུབ་ཁང་བཟང་དམ་པར་བཀྲི་བ་ལ། །ཞུམ་མེད་སྙིང་སྟོབས་ཆེན་པོར༴ །བདག་བས་གཞན་གཅེས་བྱང་ཆུབ་ཐུགས་འབྱོངས་ཤིང་། །སྙིགས་དུས་སྐྱེ་བོའི་ལོག་སྒྲུབ་ཐམས་ཅད་བཟོད། །ཕ་རོལ་ཕྱིན་དྲུག་གོ་ཆ་བཙན་པོ་བགོས། །རྒྱལ་སྲས་སེམས་དཔའ་ཆེན་པོར༴ །མདོ་སྔགས་གཞུང་ལུགས་ཀུན་གྱི་དེ་ཉིད་རིག །འཆད་རྩོད་རྩོམ་ལ་ཆགས་ཐོགས་དྲི་མ་བྲལ། །ཕྲིན་ལས་བཟང་པོས་སྲིད་ཞིའི་ཁྱོན་ཀུན་ཁྱབ། །གངས་ཅན་བསྟན་འཛིན་མཚུངས་མེད༴ །ཕྱི་རུ་སོ་སོར་ཐར་པས་རྒྱུད་བསྡམས་ཤིང་། །ནང་དུ་བྱང་ཆུབ་སེམས་ཀྱི་གཏེར་ལ་དབང་། །གསང་བ་ཟུང་འཇུག་ཡེ་ཤེས་གྲུབ་པའི་གཙོ། །སུམ་ལྡན་རྡོ་རྗེ་འཛིན་པར༴ །མཐའ་བྲལ་དབུ་མའི་ལམ་སྲོལ་རིག་པས་ཕྱེས། །འཇམ་པའི་དབྱངས་ལས་ཟབ་དོན་བདུད་རྩི་བརྙེས། །དབྱངས་ཅན་མགྲིན་པར་རོལ་པའི་སྤོབས་པ་ལྡན། །ཀླུ་སྒྲུབ་གཉིས་པར་སྣང་དེར༴ །ཁྱད་པར་རྡོ་རྗེ་འཆང་གི་གསང་བའི་མཛོད། །དཔལ་ལྡན་འདུས་པ་སྒྱུ་མ་བདེ་མཆོག་དང་། །དུས་ཀྱི་འཁོར་ལོ་ལ་སོགས་སྔགས་རྒྱུད་ཀྱི། །བདག་པོ་གསང་འཛིན་དབང་པོར༴ །རིམ་གཉིས་ལམ་གྱི་ཤིང་རྟའི་བགྲོད་པ་ཡི། །ལམ་བཟང་འཁྲུལ་མེད་ལེགས་པར་བསྙེན་པ་ལས། །སྐུ་བཞིའི་གོ་འཕང་དཀའ་བ་མེད་པར་རྙེད། །ཁྱབ་བདག་རྡོ་རྗེ་འཆང་ལ༴ །མདོར་ན་ཐུབ་པའི་བསྟན་པ་མ་ལུས་ཀུན། །འགལ་མེད་གདམས་པ་ཐུགས་སུ་ཆུད་པ་ལས། །བསྟན་པའི་བདག་པོ་འགྲན་ཟླ་ཀུན་སྤངས་པ། །རྗེ་བཙུན་ཐམས་ཅད་མཁྱེན་པར༴ །ཤཱཀྱ་སེང་གེའི་བསྟན་པའི་སྲོག་ཤིང་ནི། །ཁྱོད་ལས་གཞན་དུ་ནམ་ཡང་མ་དམིགས་པས། །ཁྱོད་འདྲ་འཇིག་རྟེན་གསུམ་ན་དཀོན་པའི་མཆོག །ཐུབ་དབང་གཉིས་པའི་ཞབས་ལ༴ །མཛད་པའི་རྣམ་ཐར་ཆ་ཤས་ཙམ་རེ་ཡང་། །ལྷ་དང་བཅས་པས་ཉིན་བཞིན་སྒྲོགས་ལ་བྲེལ། །བསྔགས་འོས་བསྔགས་པ་ཀུན་གྱི་གཞིར་གྱུར་པ། །རྗེ་བཙུན་བླ་མའི་ཞབས་ལ༴ །ད་ལྟ་བྱམས་ཆེན་རྒྱལ་ཚབ་ཆེན་པོའི་དྲུང་། །འཇམ་དཔལ་སྙིང་པོའི་མཚན་གྱི་མེ་ཏོག་བརྗིད། །ཐེག་ཆེན་ཆོས་ལ་རྟག་ཏུ་ལོངས་སྤྱོད་པ། །རྗེ་བཙུན་བླ་མའི་ཞབས་ལ་གསོལ་བ་འདེབས། །བདག་ནི་དེང་ནས་ཚེ་རབས་ཐམས་ཅད་དུ། །འཇམ་དབྱངས་བླ་མའི་ཞབས་པད་གཙུག་ཏུ་བཀུར། །ལེགས་གསུང་གདམས་པའི་བདུད་རྩིས་བདག་རྒྱུད་གྲོལ། །བཀའ་གདམས་རྣམ་ཐར་གཙང་མ་འཛིན་པར་ཤོག །རྗེ་བཙུན་བླ་མའི་ཐུགས་བསྐྱེད་སྨོན་ལམ་དང་། །མཛད་པ་ཕྲིན་ལས་མཁྱེན་བརྩེ་ནུས་མཐུ་རྣམས། །མ་ལུས་འགྲོ་བའི་རྒྱུད་ལ་ཡོངས་སུ་རྫོགས། །བསྟན་འགྲོའི་དོན་རྣམས་སྒྲུབ་ལ་མཐུ་ལྡན་ཤོག །ཅེས་པའང་ལྕགས་ལུག་སྨིན་དྲུག་ཟླ་བའི་དུས་ཀྱི་མཆོད་པ་ལ་ཆོས་ཀྱི་བློ་གྲོས་པས་གསོལ་བ་བཏབ་པ་དགེ་ལེགས་སུ་གྱུར་ཅིག ། །།
[edit]

rje thams cad mkhyen pa tsong kha pa chen por gsol ba 'debs pa mos gus kyi dbyangs snyan bzhugs so/____/na mo gu ru b+haT+Ta rA kA ya/__sras bcas rgyal ba rgya mtsho thams cad kyi/____/mkhyen brtse nus pa gcig tu bsdus pa'i sku/____/rje btsun bla ma blo bzang grags pa yi/____/gsang gsum rnam thar dran bzhin gsol ba 'debs/____/'jam dpal dpa' bo mi yi gzugs 'dzin pa/____/tha mal snang ngor dge ba'i bshes su ston/____/khrims ldan ngur smrig 'dzin pa kun gyi rgyan/____/blo bzang rgyal ba gnyis par gsol ba 'debs/____/nyes pa'i dri ma dag cing gtsang ba'i sku/____/tshul khrims phung po yongs su rdzogs pa las/____/rmad byung rgyal ba dgyes ba'i dri bsung 'thul/____/dgra bcom chen po'i zhabs la=____/thog med dus nas brtse ba'i shugs kyis drangs/____/gzhan la phan pa kho na'i thugs mnga' ba/____/byams dang snying rje dri med zla 'dras brgyan/____/blo ldan thugs rje'i bdag por=____/khro ba'i kun rtog bag chags dang bcas 'byin/____/'gro mang nam mkha'i mtha' dang mnyam pa kun/____/byang chub khang bzang dam par bkri ba la/____/zhum med snying stobs chen por=____/bdag bas gzhan gces byang chub thugs 'byongs shing /____/snyigs dus skye bo'i log sgrub thams cad bzod/____/pha rol phyin drug go cha btsan po bgos/____/rgyal sras sems dpa' chen por=____/mdo sngags gzhung lugs kun gyi de nyid rig__/'chad rtsod rtsom la chags thogs dri ma bral/____/phrin las bzang pos srid zhi'i khyon kun khyab/____/gangs can bstan 'dzin mtshungs med=____/phyi ru so sor thar pas rgyud bsdams shing /____/nang du byang chub sems kyi gter la dbang /____/gsang ba zung 'jug ye shes grub pa'i gtso/____/sum ldan rdo rje 'dzin par=____/mtha' bral dbu ma'i lam srol rig pas phyes/____/'jam pa'i dbyangs las zab don bdud rtsi brnyes/____/dbyangs can mgrin par rol pa'i spobs pa ldan/____/klu sgrub gnyis par snang der=____/khyad par rdo rje 'chang gi gsang ba'i mdzod/____/dpal ldan 'dus pa sgyu ma bde mchog dang /____/dus kyi 'khor lo la sogs sngags rgyud kyi/____/bdag po gsang 'dzin dbang por=____/rim gnyis lam gyi shing rta'i bgrod pa yi/____/lam bzang 'khrul med legs par bsnyen pa las/____/sku bzhi'i go 'phang dka' ba med par rnyed/____/khyab bdag rdo rje 'chang la=____/mdor na thub pa'i bstan pa ma lus kun/____/'gal med gdams pa thugs su chud pa las/____/bstan pa'i bdag po 'gran zla kun spangs pa/____/rje btsun thams cad mkhyen par=____/shAkya seng ge'i bstan pa'i srog shing ni/____/khyod las gzhan du nam yang ma dmigs pas/____/khyod 'dra 'jig rten gsum na dkon pa'i mchog__/thub dbang gnyis pa'i zhabs la=____/mdzad pa'i rnam thar cha shas tsam re yang /____/lha dang bcas pas nyin bzhin sgrogs la brel/____/bsngags 'os bsngags pa kun gyi gzhir gyur pa/____/rje btsun bla ma'i zhabs la=____/da lta byams chen rgyal tshab chen po'i drung /____/'jam dpal snying po'i mtshan gyi me tog brjid/____/theg chen chos la rtag tu longs spyod pa/____/rje btsun bla ma'i zhabs la gsol ba 'debs/____/bdag ni deng nas tshe rabs thams cad du/____/'jam dbyangs bla ma'i zhabs pad gtsug tu bkur/____/legs gsung gdams pa'i bdud rtsis bdag rgyud grol/____/bka' gdams rnam thar gtsang ma 'dzin par shog__/rje btsun bla ma'i thugs bskyed smon lam dang /____/mdzad pa phrin las mkhyen brtse nus mthu rnams/____/ma lus 'gro ba'i rgyud la yongs su rdzogs/____/bstan 'gro'i don rnams sgrub la mthu ldan shog__/ces pa'ang lcags lug smin drug zla ba'i dus kyi mchod pa la chos kyi blo gros pas gsol ba btab pa dge legs su gyur cig__/__//

Footnotes

Other Information