JKCL-KABUM-02-KHA-106

Previous Text Back to Volume PageNext Text

མ་གཅིག་ལབ་སྒྲོན་ལ་བསྟོད་པ་བདུད་བཞི་དབྱིངས་གཅོད།

Wylie title	ma gcig lab sgron la bstod pa bdud bzhi dbyings gcod
Location	chos kyi blo gros bka' 'bum Volume 2, Text 106, Pages 743-746 (Folios 1a1 to 2b4)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People	མ་གཅིག་ལབ་སྒྲོན་ (ma gcig lab sgron)
Citation	'jam dbyangs mkhyen brtse chos kyi blo gros. ma gcig lab sgron la bstod pa bdud bzhi dbyings gcod. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 2: 743-746. Bir, H.P.: Khyentse Labrang, 2012.
Genre	Verses of Praise - bstod pa
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/praise-of-machik-labdron
Colophon	།ཅེས་པའང་མེ་སྤྲེལ་ས་ག་ཟླ་བའི་དཀར་ཕྱོགས་ཀྱི་རྫོགས་པ་གཉིས་པར་ཡེ་ཤེས་ཌཱ་ཀི་དགྱེས་པའི་དགའ་ཚལ་ཟངས་རི་མཁར་དམར་གྱི་འདྲ་ཞལ་རིན་པོ་ཆེའི་མདུན་དུ་གཅོད་ཡུལ་མོས་པ་ལམ་དུ་བྱེད་པོ་འཇམ་དབྱངས་ཆོས་ཀྱི་བློ་གྲོས་སམ། པདྨ་ཡེ་ཤེས་རྡོ་རྗེས་གསོལ་བ་བཏབ་པ་འདིས་ཀྱང་ཡུམ་ཆེན་ཤེར་ཕྱིན་གྱི་དགོངས་དོན་མངོན་སུམ་རྟོགས་པའི་རྒྱུར་བྱིན་གྱིས་བརླབ་ཏུ་གསོལ། སརྦ་དཱ་མངྒ་ལཾ། །
	ces pa'ang me sprel sa ga zla ba'i dkar phyogs kyi rdzogs pa gnyis par ye shes DA ki dgyes pa'i dga' tshal zangs ri mkhar dmar gyi 'dra zhal rin po che'i mdun du gcod yul mos pa lam du byed po 'jam dbyangs chos kyi blo gros sam/__pad+ma ye shes rdo rjes gsol ba btab pa 'dis kyang yum chen sher phyin gyi dgongs don mngon sum rtogs pa'i rgyur byin gyis brlab tu gsol/__sarba dA mang+ga laM/

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

མ་གཅིག་ལབ་སྒྲོན་ལ་བསྟོད་པ་བདུད་བཞི་དབྱིངས་གཅོད་ཅེས་བྱ་བ་བཞུགས་སོ། །ན་མོ་ཛྙཱ་ན་པཱ་ར་མི་ཏ་ཡེ། དུས་གསུམ་རྒྱལ་བ་ཐམས་ཅད་བསྐྱེད་པའི་ཡུམ། །ཤེས་རབ་ཕ་རོལ་ཕྱིན་མ་གཟུགས་ཀྱི་སྐུར། །བསྟན་ནས་འགྲོ་བ་ཀུན་གྱི་དོན་མཛད་མ། །ཨ་མ་ལབ་ཀྱི་སྒྲོན་མར་ཕྱག་འཚལ་ལོ། །བྱང་ཕྱོགས་ཁ་བ་ཅན་གྱི་རྒྱལ་ཁམས་འདིར། །གཟུགས་ཅན་མི་དང་གཟུགས་མེད་ལྷ་འདྲེ་བཏུལ། །ཡུམ་ཆེན་ཐུགས་ལས་སྤྲུལ་པའི་འགྲོ་སྒྲོལ་མ། །ས་བཅུའི་དབང་ཕྱུག་ཆེན་མོ་ཁྱོད་ལ་བསྟོད། །གཞོན་ནུའི་དུས་ནས་རིགས་ཀྱི་མྱུ་གུ་རྒྱས། །ཡོངས་འཛིན་དམ་པ་མང་པོའི་ཞབས་ལ་བཏུད། །ཟབ་རྒྱས་ཆོས་ཀྱི་གདམས་ངག་རྒྱ་མཚོའི་གཏེར། །རྗེ་བཙུན་འཕགས་མ་ཆེན་མོ་ཁྱོད་ལ་བསྟོད། །ཤེས་རབ་ཕ་རོལ་ཕྱིན་ཡུམ་དགོངས་པའི་དོན། །རང་གི་རིག་པས་མངོན་སུམ་རྟོགས་པ་དང་། །མདོ་སྔགས་ཟུང་འཇུག་ཟབ་དོན་བདུད་གཅོད་ཀྱི། །ཐུགས་གཏེར་ཆེན་པོའི་སྒོ་བརྒྱ་འབྱེད་ལ་བསྟོད། །སྤྲུལ་པའི་སྐུ་མཆོག་དམ་པ་སངས་རྒྱས་ཀྱིས། །རྟོགས་པའི་བོགས་འདོན་རྒྱལ་ཁམས་ཕྱོགས་མེད་འགྲིམ། །རོ་སྙོམས་བརྟུལ་ཞུགས་སྤྱོད་པ་མཐར་ཕྱིན་ནས། །སྲིད་པ་གསུམ་ལས་རྣམ་པར་རྒྱལ་ལ་བསྟོད། །ཁྱོད་ནི་སངས་རྒྱས་ཀུན་གྱི་སྤྲུལ་པ་སྟེ། །རིག་འཛིན་གྲུབ་ཐོབ་རྣམས་དང་དགོངས་པ་གཅིག །དབྱིངས་ཕྱུག་རྡོ་རྗེ་ཕག་མོའི་རྣམ་འཕྲུལ་ཏེ། །རྣལ་འབྱོར་དབང་ཕྱུག་གྲུབ་པའི་རྒྱལ་མོར་བསྟོད། །སྟོང་པར་གནས་དང་སེམས་ཅན་ཡོངས་མི་གཏོང་། །སྨྲས་བཞིན་བྱེད་དང་བདེ་གཤེགས་བྱིན་གྱིས་རློབས། །རྣམ་བཞིའི་དགོངས་དོན་ཟབ་མོ་བདུད་གཅོད་ཀྱི། །བཀའ་བབས་ཤིང་རྟ་ཆེན་པོ་ཁྱོད་ལ་བསྟོད། །སྒྱུ་མ་ལྟ་བུའི་ཏིང་ངེ་འཛིན་མཆོག་དང་། །དཔའ་བར་འགྲོ་དང་རྡོ་རྗེ་ལྟ་བུ་ཡི། །ཏིང་འཛིན་བསམ་མི་ཁྱབ་ལ་སྙོམས་འཇུག་ལྡངས། །ཡེ་ཤེས་ཌཱ་ཀིའི་གཙོ་མཆོག་ཆེན་མོར་བསྟོད། །སྟོང་པ་ཉིད་དང་མཚན་མ་མེད་པ་དང་། །སྨོན་པ་མེད་པ་རྣམ་ཐར་སྒོ་གསུམ་གྱི། །ཆོས་དབྱིངས་ཟག་མེད་ཡེ་ཤེས་མངའ་དབང་འབྱོར། །རྗེ་བཙུན་བཅོམ་ལྡན་འདས་མ་ཁྱོད་ལ་བསྟོད། །ཐོགས་བཅས་ཐོགས་མེད་དགའ་བྲོད་སྙེམས་བྱེད་དང་། །ཕུང་པོ་ཉོན་མོངས་འཆི་བདག་ལྷ་བུའི་བདུད། །དབྱིངས་སུ་བཅོམ་ནས་དེ་བཞིན་ཉིད་དུ་གཤེགས། །ཡང་དག་སྤངས་རྟོགས་མཐར་ཕྱིན་མ་ལ་བསྟོད། །མ་གཅིག་དྲིན་མོ་ཆེ་ཡི་གདམས་ངག་ནི། །གནད་ཐོག་མེ་བཙས་ཉོན་མོངས་རྩད་ནས་འབྱིན། །བདག་འཛིན་དྲུང་ཕྱུངས་ཡེ་ཤེས་མངོན་སུམ་སྟོན། །འགྲོ་སྒྲོལ་མྱུར་མ་དཔའ་མོ་ཁྱོད་ལ་བསྟོད། །མཐའ་བརྒྱད་སྤྲོས་བྲལ་ཆོས་ཉིད་ནམ་མཁའ་ལྟར། །མཚན་མཚོན་བརྗོད་པ་ལས་འདས་རྣམ་མེད་དབྱིངས། །རྣམ་བཅས་ཐ་མལ་བུད་མེད་གཟུགས་བསྒྱུར་ཡང་། །ངོ་བོ་མཐའ་བྲལ་དབུ་མ་ཆེན་པོར་བསྟོད། །རིག་སྟོང་འོད་གསལ་ཐབས་ཤེས་དབྱེར་མེད་པ། །འཕོ་ཆགས་འགྱུར་བདེའི་ཆོས་ལས་རབ་འདས་ཤིང་། །གཟུང་འཛིན་ཀུན་ཏུ་རྟོག་པའི་སྒྲིབ་པ་སྤངས། །འོད་གསལ་ཕྱག་རྒྱ་ཆེན་པོར་གྲུབ་ལ་བསྟོད། །འཁོར་འདས་ཆོས་ཀུན་ཀ་ནས་དག་པའི་དབྱིངས། །རང་བྱུང་ལྷུན་གྱིས་གྲུབ་པའི་གདངས་ཤར་བས། །ཡེ་ཤེས་འདུས་མ་བྱས་པའི་རྩེ་མོར་གཤེགས། །གཞིར་རྫོགས་རིག་པ་སྐུར་སྨིན་ཁྱོད་ལ་བསྟོད། །ལྷན་སྐྱེས་ཡེ་ཤེས་རྡོ་རྗེ་རྣལ་འབྱོར་མ། །བདེ་སྟོང་རྡོ་རྗེ་བཙུན་མོའི་མཁའ་ཀློང་ནས། །རྒྱལ་བ་སྲས་བཅས་སྤྲོ་དང་སྡུད་མཛད་མ། །དཀྱིལ་འཁོར་རྒྱ་མཚོའི་བདག་མོ་ཁྱོད་ལ་བསྟོད། །དེ་ལྟར་བསྟོད་ཅིང་གསོལ་བ་བཏབ་པའི་མཐུས། །བདག་ཅག་བྱང་ཆུབ་སྒྲུབ་ལ་བར་གཅོད་པའི། །ཕྱི་ནང་གསང་བའི་དགྲ་གསུམ་དབྱིངས་སུ་བསད། །འཕྲང་གསུམ་བརྒལ་ནས་བརྟུལ་ཞུགས་ལམ་ལྷོངས་ཤོག །བྱམས་དང་སྙིང་རྗེས་འགྲོ་རྣམས་རྗེས་སུ་འཛིན། །ཕྲིན་ལས་རྣམ་པ་བཞི་ལ་ཐོགས་པ་མེད། །ཡུམ་ཆེན་ཆོས་སྐུའི་དགོངས་པ་རྩལ་རྫོགས་ཏེ། །ལབ་ཀྱི་སྒྲོལ་མ་ཁྱེད་དང་དབྱེར་མེད་ཤོག །ཐུབ་པའི་བསྟན་པ་རིས་མེད་དར་ཞིང་རྒྱས། །བསྟན་འཛིན་སྐྱེས་རྣམས་ཞབས་པད་ཡུན་དུ་བརྟན། །དགེ་འདུན་སྡེ་འཕེལ་འཇིག་རྟེན་ཁམས་ཀུན་བདེ། །ལྟ་ལོག་ལྷ་མིན་ཀླ་ཀློ་འཇོམས་གྱུར་ཅིག །སྲིད་པའི་རྩ་བ་བདག་འཛིན་ཐད་ཀར་གཅོད། །ཐབས་ཤེས་དབྱེར་མེད་ཕཊ་ཀྱི་དགོངས་པ་ལ། །རང་རིག་དུས་གསུམ་རྒྱུན་ཆད་མེད་པར་གནས། །སྲིད་གསུམ་དབྱིངས་སྒྲོལ་འཁོར་བ་དོང་སྤྲུགས་ཤོག །ཅེས་པའང་མེ་སྤྲེལ་ས་ག་ཟླ་བའི་དཀར་ཕྱོགས་ཀྱི་རྫོགས་པ་གཉིས་པར་ཡེ་ཤེས་ཌཱ་ཀི་དགྱེས་པའི་དགའ་ཚལ་ཟངས་རི་མཁར་དམར་གྱི་འདྲ་ཞལ་རིན་པོ་ཆེའི་མདུན་དུ་གཅོད་ཡུལ་མོས་པ་ལམ་དུ་བྱེད་པོ་འཇམ་དབྱངས་ཆོས་ཀྱི་བློ་གྲོས་སམ། པདྨ་ཡེ་ཤེས་རྡོ་རྗེས་གསོལ་བ་བཏབ་པ་འདིས་ཀྱང་ཡུམ་ཆེན་ཤེར་ཕྱིན་གྱི་དགོངས་དོན་མངོན་སུམ་རྟོགས་པའི་རྒྱུར་བྱིན་གྱིས་བརླབ་ཏུ་གསོལ། སརྦ་དཱ་མངྒ་ལཾ། ། །།

[edit]

ma gcig lab sgron la bstod pa bdud bzhi dbyings gcod ces bya ba bzhugs so/____/na mo dz+nyA na pA ra mi ta ye/__dus gsum rgyal ba thams cad bskyed pa'i yum/____/shes rab pha rol phyin ma gzugs kyi skur/____/bstan nas 'gro ba kun gyi don mdzad ma/____/a ma lab kyi sgron mar phyag 'tshal lo/____/byang phyogs kha ba can gyi rgyal khams 'dir/____/gzugs can mi dang gzugs med lha 'dre btul/____/yum chen thugs las sprul pa'i 'gro sgrol ma/____/sa bcu'i dbang phyug chen mo khyod la bstod/____/gzhon nu'i dus nas rigs kyi myu gu rgyas/____/yongs 'dzin dam pa mang po'i zhabs la btud/____/zab rgyas chos kyi gdams ngag rgya mtsho'i gter/____/rje btsun 'phags ma chen mo khyod la bstod/____/shes rab pha rol phyin yum dgongs pa'i don/____/rang gi rig pas mngon sum rtogs pa dang /____/mdo sngags zung 'jug zab don bdud gcod kyi/____/thugs gter chen po'i sgo brgya 'byed la bstod/____/sprul pa'i sku mchog dam pa sangs rgyas kyis/____/rtogs pa'i bogs 'don rgyal khams phyogs med 'grim/____/ro snyoms brtul zhugs spyod pa mthar phyin nas/____/srid pa gsum las rnam par rgyal la bstod/____/khyod ni sangs rgyas kun gyi sprul pa ste/____/rig 'dzin grub thob rnams dang dgongs pa gcig__/dbyings phyug rdo rje phag mo'i rnam 'phrul te/____/rnal 'byor dbang phyug grub pa'i rgyal mor bstod/____/stong par gnas dang sems can yongs mi gtong /____/smras bzhin byed dang bde gshegs byin gyis rlobs/____/rnam bzhi'i dgongs don zab mo bdud gcod kyi/____/bka' babs shing rta chen po khyod la bstod/____/sgyu ma lta bu'i ting nge 'dzin mchog dang /____/dpa' bar 'gro dang rdo rje lta bu yi/____/ting 'dzin bsam mi khyab la snyoms 'jug ldangs/____/ye shes DA ki'i gtso mchog chen mor bstod/____/stong pa nyid dang mtshan ma med pa dang /____/smon pa med pa rnam thar sgo gsum gyi/____/chos dbyings zag med ye shes mnga' dbang 'byor/____/rje btsun bcom ldan 'das ma khyod la bstod/____/thogs bcas thogs med dga' brod snyems byed dang /____/phung po nyon mongs 'chi bdag lha bu'i bdud/____/dbyings su bcom nas de bzhin nyid du gshegs/____/yang dag spangs rtogs mthar phyin ma la bstod/____/ma gcig drin mo che yi gdams ngag ni/____/gnad thog me btsas nyon mongs rtsad nas 'byin/____/bdag 'dzin drung phyungs ye shes mngon sum ston/____/'gro sgrol myur ma dpa' mo khyod la bstod/____/mtha' brgyad spros bral chos nyid nam mkha' ltar/____/mtshan mtshon brjod pa las 'das rnam med dbyings/____/rnam bcas tha mal bud med gzugs bsgyur yang /____/ngo bo mtha' bral dbu ma chen por bstod/____/rig stong 'od gsal thabs shes dbyer med pa/____/'pho chags 'gyur bde'i chos las rab 'das shing /____/gzung 'dzin kun tu rtog pa'i sgrib pa spangs/____/'od gsal phyag rgya chen por grub la bstod/____/'khor 'das chos kun ka nas dag pa'i dbyings/____/rang byung lhun gyis grub pa'i gdangs shar bas/____/ye shes 'dus ma byas pa'i rtse mor gshegs/____/gzhir rdzogs rig pa skur smin khyod la bstod/____/lhan skyes ye shes rdo rje rnal 'byor ma/____/bde stong rdo rje btsun mo'i mkha' klong nas/____/rgyal ba sras bcas spro dang sdud mdzad ma/____/dkyil 'khor rgya mtsho'i bdag mo khyod la bstod/____/de ltar bstod cing gsol ba btab pa'i mthus/____/bdag cag byang chub sgrub la bar gcod pa'i/____/phyi nang gsang ba'i dgra gsum dbyings su bsad/____/'phrang gsum brgal nas brtul zhugs lam lhongs shog__/byams dang snying rjes 'gro rnams rjes su 'dzin/____/phrin las rnam pa bzhi la thogs pa med/____/yum chen chos sku'i dgongs pa rtsal rdzogs te/____/lab kyi sgrol ma khyed dang dbyer med shog__/thub pa'i bstan pa ris med dar zhing rgyas/____/bstan 'dzin skyes rnams zhabs pad yun du brtan/____/dge 'dun sde 'phel 'jig rten khams kun bde/____/lta log lha min kla klo 'joms gyur cig__/srid pa'i rtsa ba bdag 'dzin thad kar gcod/____/thabs shes dbyer med phaT kyi dgongs pa la/____/rang rig dus gsum rgyun chad med par gnas/____/srid gsum dbyings sgrol 'khor ba dong sprugs shog__/ces pa'ang me sprel sa ga zla ba'i dkar phyogs kyi rdzogs pa gnyis par ye shes DA ki dgyes pa'i dga' tshal zangs ri mkhar dmar gyi 'dra zhal rin po che'i mdun du gcod yul mos pa lam du byed po 'jam dbyangs chos kyi blo gros sam/__pad+ma ye shes rdo rjes gsol ba btab pa 'dis kyang yum chen sher phyin gyi dgongs don mngon sum rtogs pa'i rgyur byin gyis brlab tu gsol/__sarba dA mang+ga laM/__/____//_