JKCL-KABUM-02-KHA-089

From Khyentse Lineage - A Tsadra Foundation Project

‎‎

ཆོས་རྗེ་ཐམས་ཅད་མཁྱེན་པ་བུ་སྟོན་རིན་ཆེན་གྲུབ་ལ་བསྟོད་པ་ཀ་མ་ལའི་ཕྲེང་མཛེས།
Wylie title chos rje thams cad mkhyen pa bu ston rin chen grub la bstod pa ka ma la'i phreng mdzes JKCL-KABUM-02-KHA-089.pdf
Location chos kyi blo gros bka' 'bum
Volume 2, Text 89, Pages 679-684 (Folios 1a1 to 3b5)
Author འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People བུ་སྟོན་རིན་ཆེན་གྲུབ་ (bu ston rin chen grub)
Citation 'jam dbyangs mkhyen brtse chos kyi blo gros. chos rje thams cad mkhyen pa bu ston rin chen grub la bstod pa ka ma la'i phreng mdzes. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 2: 679-684. Bir, H.P.: Khyentse Labrang, 2012.
Genre Verses of Praise - bstod pa
Lotsawa House Link https://www.lotsawahouse.org/tibetan-masters/jamyang-khyentse-chokyi-lodro/buton-rinchen-drup-praise
Colophon

།ཅེས་རྩོད་དུས་ཀྱི་ཐུབ་དབང་གཉིས་པ་བུ་སྟོན་རིན་པོ་ཆེར་བསྟོད་པ་འདི་ཡང་འཇམ་དབྱངས་ཆོས་ཀྱི་བློ་གྲོས་པས་མི་ཕྱེད་དད་ཅིང་གུས་པས་ལྕགས་སྦྲུལ་ཐ་སྐར་ཟླ་བའི་ཚེས་གཅིག་བཟང་པོར་གསོལ་བ་བཏབ་པ་སིདྡྷི་རསྟུ། དགེའོ། །

/ces rtsod dus kyi thub dbang gnyis pa bu ston rin po cher bstod pa 'di yang 'jam dbyangs chos kyi blo gros pas mi phyed dad cing gus pas lcags sbrul tha skar zla ba'i tshes gcig bzang por gsol ba btab pa sid+d+hi rastu/__dge'o/

[edit]
ཆོས་རྗེ་ཐམས་ཅད་མཁྱེན་པ་བུ་སྟོན་རིན་ཆེན་གྲུབ་ལ་བསྟོད་པ་ཀ་མ་ལའི་ཕྲེང་མཛེས་བཞུགས་སོ། །ཨོཾ་སྭསྟི། ཐུབ་པའི་དབང་པོའི་རྒྱལ་ཚབ་ཆོས་ཀྱི་རྗེ། །ས་གསུམ་འགྲོ་བའི་བླ་མ་རིན་ཆེན་གྲུབ། །རྩོད་པའི་དུས་ཀྱི་ཐམས་ཅད་མཁྱེན་གཉིས་པ། །བུ་སྟོན་ལོ་ཙཱའི་ཞབས་ལ་མགོས་ཕྱག་འཚལ། །སྔོན་ཚེ་ཚོང་པར་གྱུར་ཚེ་དེ་བཞིན་གཤེགས། །མཐའ་ཡས་འོད་ལ་ནོར་བུ་ཕུལ་བ་དང་། །དེ་བཞིན་ཆོས་རྒྱལ་བསོད་ནམས་མེ་ཏོག་གི། སྲས་གྱུར་བདེ་གཤེགས་བརྩོན་འགྲུས་བསྙེན་ལ་འདུད། །ཀསྨི་ར་ཡི་ཐུབ་བསྟན་རྩལ་ལག་མཆོག །ཡོངས་སུ་རྫོགས་པའི་ཤཱཀྱ་ཤྲཱི་བྷ་དྲ། །ལ་སོགས་འཕགས་བོད་མཁས་དང་གྲུབ་པ་ཡི། །སྐྱེ་བའི་ཕྲེང་བ་བརྒྱུད་མར་སྟོན་ལ་འདུད། །རིག་འཛིན་བྲག་སྟོན་ཡུམ་མཆོག་བསོད་འབུམ་གྱི། །སྲས་སུ་ཉེ་བར་འབྱུང་ཚེ་ཡི་དམ་ལྷའི། །དཀྱིལ་འཁོར་འཁོར་ལོ་བསྐྱེད་པའི་རྨི་ལམ་དང་། །བདེ་གསལ་ཏིང་འཛིན་མཐའ་ཡས་འཁྲུངས་ལ་འདུད། །ལྕགས་སྟག་ནག་པ་ཉ་བའི་དམར་ཚེས་དགུར། །བདེ་བར་སྐུ་བལྟམས་ཡུམ་གྱི་རྨི་ལམ་དུ། །ཡི་དམ་ལྷ་ཚོགས་སྤྲོ་ཞིང་བསྡུ་བ་དང་། །དངོས་སུ་ཡུལ་གྱི་དགེ་མཚན་རྒྱས་ལ་འདུད། །བྱིས་པའི་དུས་ནས་འདའ་ཀ་ཡེ་ཤེས་དང་། །ས་སྙིང་འཁོར་ལོ་བཅུ་པའི་མདོ་ཀློག་པས། །མ་བསླབ་ཀློག་པར་དབང་འབྱོར་ཡོན་ཏན་རྫོགས། །དམ་པའི་རིགས་མཆོག་ཡོངས་སུ་སད་ལ་འདུད། །ལོ་བདུན་ལོན་ཚེ་ཁྲོ་ཕུ་སེམས་དཔའ་ཆེར། །བྱང་ཆུབ་སེམས་བསྐྱེད་ཞུས་ཤིང་ཐུགས་རྒྱུད་ལ། །བདག་བས་གཞན་གཅེས་ངེས་པར་འཁྲུངས་པ་དང་། །སེམས་ཅན་ཀུན་ལ་མ་ལྟར་བརྩེ་ལ་འདུད། །མེས་པོའི་ཞབས་ལས་སྔ་འགྱུར་ཐེག་པ་ཡི། །དབང་བསྐུར་རྒྱུད་བཤད་མན་ངག་མཐའ་དག་གསན། །བསྐྱེད་རྫོགས་བསྒོམ་པས་ཡི་དམ་ལྷ་ཞལ་གཟིགས། །གྲུབ་པའི་རྟགས་མཚན་མངོན་དུ་གྱུར་ལ་འདུད། །བརྟན་མཁས་ཡོངས་རྫོགས་རིན་ཆེན་སེང་གེ་དང་། །མཁན་ཆེན་གྲགས་པ་གཞོན་ནུ་དཔལ་བཟང་ལས། །རབ་བྱུང་བསྙེན་པར་རྫོགས་ཤིང་བཅས་ཁྲིམས་ལ། །ཉེས་དྲིས་མ་གོས་སྡོམ་བརྩོན་ཆེན་པོར་འདུད། །ཐར་པ་ལོ་ཙཱ་ཀུན་མཁྱེན་འཕགས་འོད་དང་། །དཔལ་ལྡན་སེང་གེ་ལ་སོགས་མཁས་གྲུབ་ཀྱི། །དམ་པའི་ཚོགས་བསྟེན་ཕྱི་ནང་རིག་གནས་དང་། །མདོ་སྔགས་ཐོས་པ་རྒྱ་མཚོའི་མཐར་སོན་འདུད། །མཁས་པའི་གྲགས་པས་ས་སྟེང་ཐམས་ཅད་ཁྱབ། །ལུང་རིགས་སྨྲ་བའི་ལྗགས་བརྐྱངས་རྒོལ་བ་འཇོམས། །ཕྱོགས་ལས་རྣམ་རྒྱལ་འཇམ་དཔལ་དཔའ་བོ་ནི། །བུ་སྟོན་ཁ་ཆེར་གྱུར་ཅེས་བསྔགས་ལ་འདུད་། །དབང་དུས་བླ་མ་རྡོ་རྗེ་རྒྱུད་དུས་གཟིགས། །སྦྱོར་བ་དྲུག་པའི་རྣལ་འབྱོར་མཆོག་གྲུབ་ཅིང་། །བློ་འདས་འོད་གསལ་གདོད་མའི་གནས་ལུགས་རྟོགས། །བསྒོམ་བྱུང་ཤེས་རབ་རྩལ་ཆེན་རྫོགས་ལ་འདུད། །གསང་འདུས་གསན་ཚེ་སངས་རྒྱས་བྱང་སེམས་རྣམས། །ཏིང་འཛིན་རོལ་རྩེད་སྣ་ཚོགས་མཛད་པ་གཟིགས། །ཞིང་སྦྱོང་དཔའ་བར་འགྲོ་བ་ལ་སོགས་པའི། །ཏིང་འཛིན་སྒོ་མཐའ་ཡས་པ་བརྙེས་ལ་འདུད། །ཕྱི་ནང་དཀྱིལ་འཁོར་ལྷ་ཞལ་མངོན་སུམ་གཟིགས། །རིམ་པ་ལྔ་ཡི་དག་སྣང་རྩེ་མོར་ཕྱིན། །རྡོ་རྗེ་མཁའ་འགྲོ་དཔའ་བོ་དཔའ་མོ་དང་། །དགོངས་པ་སྤྱོད་ཡུལ་རོ་གཅིག་གྱུར་ལ་འདུད། །དྲེགས་ལྡན་གཙུག་གི་ནོར་བུས་ལེགས་མཆོད་དེ། །ཞྭ་ལུ་གསེར་ཁང་མཁས་པའི་ཆོས་ཀྱི་ཁྲིར། །ཞབས་བཀོད་མདོ་སྔགས་བཤད་བཀའ་མཐའ་ཡས་པས། །སྐལ་ལྡན་སྨིན་ཅིང་གྲོལ་བར་མཛད་ལ་འདུད། །བཀའ་དང་བསྟན་བཅོས་དགོངས་པ་འགྲེལ་བ་ལ། །ཇི་བཞིན་གཟིགས་པའི་ཐུགས་མཆོག་མངའ་བ་དང་། །བླ་མ་ལྷག་པའི་ལྷ་ཡིས་སྐབས་དབྱེ་བས། །ལེགས་བཤད་གསུང་གི་ཚོགས་ཆེན་སྤེལ་ལ་འདུད། །རི་སྦུག་ཆོས་ཀྱི་ཕོ་བྲང་ཆེན་པོ་རུ། །རིམ་གཉིས་ཟབ་མོའི་དོན་ལ་མཉམ་བཞག་དང་། །སྨིན་གྲོལ་འཆད་རྩོམ་སྤེལ་མར་མཛད་པ་ཡི། །ཐུབ་བསྟན་རིང་དུ་གནས་པར་མཛད་ལ་འདུད། །གུ་རུ་པདྨས་དངོས་སུ་ཞལ་བསྟན་ཅིང་། །གདམས་ཟབ་སྩལ་དང་སངས་རྒྱས་བྱང་སེམས་སོགས། །བླ་མ་ཡི་དམ་ལྷ་ཡི་དགྱེས་ཞལ་མཇལ། །མཐུ་ལྡན་ཆོས་སྐྱོང་བྲན་བཞིན་བཀོལ་ལ་འདུད། །འདུལ་མདོ་དབུ་མ་ཕར་ཕྱིན་གསང་སྔགས་སོགས། །ཐུབ་བསྟན་ཡོངས་སུ་རྫོགས་པའི་བཤེས་གཉེན་མཆོག །མཁས་དང་གྲུབ་པ་ཡོངས་ཀྱི་གཙུག་གི་ནོར། །ཀུན་མཁྱེན་སྨྲ་བའི་སེང་གེ་ཆེན་པོར་འདུད། །དཔྱད་གསུམ་དག་པས་ཆོས་དང་ཆོས་མིན་འབྱེད། །མདོ་སྔགས་ཆོས་བསྒྱུར་སྔ་འགྱུར་ཞུས་དག་དང་། །ཆད་པ་སབ་དང་འཁྲུགས་པ་སྡེབས་ལ་སོགས། །བཀའ་དང་བསྟན་བཅོས་ཆོས་ཀྱི་དག་ཐེར་མཛད། །འཇིག་རྟེན་མིག་གྱུར་ལོ་ཙཱ་ཆེན་པོར་འདུད། །དྲི་མ་མེད་པའི་ཚུལ་ཁྲིམས་སྐུ་བརྗིད་ཅིང་། །ཏིང་འཛིན་ཟད་མི་ཤེས་པས་གཞན་སེམས་མཁྱེན། །ཆོས་རབ་རྣམ་འབྱེད་ཤེས་རབ་འོད་སྟོང་འཕྲོ། །འཕགས་ཆེན་ཡེ་ཤེས་མངོན་སུམ་བརྙེས་ལ་འདུད། །གཟུང་འཛིན་རྒྱུ་བ་དྷུ་ཏིར་རབ་བཅིང་ཞིང་། །འཕོ་བྲལ་འགྱུར་མེད་བདེ་ཆེན་ཐིག་ལེའི་ཆ། །ཡོངས་སུ་རྫོགས་པའི་རྡོ་རྗེ་འཆང་དེར་འདུད། །བླ་ཆེན་བསོད་རྒྱལ་ཆོས་ཀྱི་རྒྱལ་མཚན་དང་། །ཐུགས་སྲས་ལོ་ཙཱ་ཆེ་སོགས་མཁས་གྲུབ་དང་། །གྲགས་རྒྱལ་ཏཱ་སི་ལ་སོགས་སློབ་ཚོགས་ནི། །ཉི་ཟླ་རྒྱུ་སྐར་ཕྲེང་མཛེས་རྒྱས་ལ་འདུད། །རྣལ་འབྱོར་རྒྱུད་གཞུང་ཆེན་པོར་རང་དབང་བསྒྱུར། །གསང་བ་འདུས་པ་བདེ་མཆོག་དུས་འཁོར་ལོ། །གཙོར་གྱུར་རབ་འབྱམས་རྒྱུད་སྡེ་རྒྱ་མཚོ་ཡི། །བསྟན་པའི་ཤིང་རྟ་ཆེན་པོར་གྱུར་ལ་འདུད། །མདོར་ན་ཐོས་བསམ་སྒོམ་དང་འཆད་རྩོད་རྩོམ། །རེ་རེས་སྐུ་ཚེ་རིལ་པོར་འདའ་བ་སྙམ། །སྐྱེ་བོ་ཕལ་པས་རྟོགས་པར་དཀའ་བ་ཡི། །འཕགས་ཆེན་ས་བཅུའི་རྣམ་ཐར་འཆང་ལ་འདུད། །དེང་གི་དུས་ཀྱང་རྡོ་རྗེ་ཐེག་པ་ཡི། །བསྟན་པ་མི་ནུབ་སྨིན་གྲོལ་རྒྱུན་གནས་པ། །དཔལ་ལྡན་རྡོ་རྗེ་འཆང་དབང་ཁྱོད་དྲིན་ལས། །བྱུང་བའི་ཕྲིན་ལས་ཕ་མཐའ་ཡས་ལ་འདུད། །བདེ་གཤེགས་རྟེན་གསུམ་དཀྱིལ་འཁོར་འབྱམས་ཀླས་ཀྱི། །བཀོད་པ་ངོ་མཚར་སྒྱུ་མའི་ཆོ་འཕྲུལ་བཞེངས། །སྒྲུབ་ཅིང་མཆོད་སོགས་ཚོགས་གཉིས་སྤེལ་བ་ཡི། །རླབས་ཆེན་ཐུགས་བསྐྱེད་བསམ་ཡས་སྟོན་ལ་འདུད། །བཅུ་ཕྲག་བདུན་ལ་ལྔ་ཡིས་ལྷག་པ་ན། །ཆུ་སྟོད་ཟླ་བའི་དམར་པོའི་ཕྱོགས་ཆ་ཡི། །དགའ་བ་གཉིས་པའི་ནམ་གྱི་ཆ་སྨད་ལ། །རེ་ཞིག་སྤྲུལ་པའི་དཀྱིལ་འཁོར་ཡོངས་བསྡུས་ནས། །དགའ་ལྡན་ཆོས་ཀྱི་མདུན་སར་གཤེགས་ལ་འདུད། །དེ་ཚོ་ངོ་མཚར་ཆོ་འཕྲུལ་ལྟས་ཆེན་དང་། །ལྷ་མིའི་མཆོད་པ་དཔག་ཏུ་མེད་པ་འདུས། །སྐུ་གདུང་རིང་བསྲེལ་རྒྱས་པར་མཛད་པ་ཡི། །གཞན་དོན་འཛད་མེད་ཕ་མཐའ་ཡས་ལ་འདུད། །ནམ་ཞིག་བསྐལ་བཟང་བདུན་པར་འཚང་རྒྱ་ཚེ། །ཆོས་ཀྱི་འཁོར་ལོ་བསྐོར་བའི་སྣོད་ལྡན་དུ། །བདག་ཅག་སྐྱེས་ནས་སངས་རྒྱས་ཞལ་མཐོང་ཞིང་། །ལུང་བསྟན་དབུགས་དབྱུང་བདག་གིས་ཐོབ་གྱུར་ཅིག །བདག་གཞན་དུས་གསུམ་བསགས་པའི་དགེ་བ་རྣམས། །འཇམ་དབྱངས་ཆོས་རྗེའི་ཐུགས་དགོངས་རྫོགས་ཕྱིར་བསྔོ། །མཐའ་ཡས་འགྲོ་རྣམས་གཅིག་ཀྱང་མ་ལུས་པ། །ཀུན་མཁྱེན་རིན་ཆེན་མཆོག་ཏུ་གྲུབ་པར་ཤོག །མདོ་སྔགས་བསྟན་པ་མི་ནུབ་དར་ཞིང་རྒྱས། །ནག་ཕྱོགས་བདུད་སྡེའི་གཡུལ་ངོ་རྩད་ནས་འཇོམས། །ཐུབ་བསྟན་ལྷ་དབང་གྲོང་ཁྱེར་ཕྱོགས་ལས་རྒྱལ། །རབ་བརྟན་རྫོགས་ལྡན་དཔལ་ཡོན་རྒྱས་གྱུར་ཅིག །ཅེས་རྩོད་དུས་ཀྱི་ཐུབ་དབང་གཉིས་པ་བུ་སྟོན་རིན་པོ་ཆེར་བསྟོད་པ་འདི་ཡང་འཇམ་དབྱངས་ཆོས་ཀྱི་བློ་གྲོས་པས་མི་ཕྱེད་དད་ཅིང་གུས་པས་ལྕགས་སྦྲུལ་ཐ་སྐར་ཟླ་བའི་ཚེས་གཅིག་བཟང་པོར་གསོལ་བ་བཏབ་པ་སིདྡྷི་རསྟུ། དགེའོ། ། །།
[edit]

chos rje thams cad mkhyen pa bu ston rin chen grub la bstod pa ka ma la'i phreng mdzes bzhugs so/____/oM swasti/__thub pa'i dbang po'i rgyal tshab chos kyi rje/____/sa gsum 'gro ba'i bla ma rin chen grub/____/rtsod pa'i dus kyi thams cad mkhyen gnyis pa/____/bu ston lo tsA'i zhabs la mgos phyag 'tshal/____/sngon tshe tshong par gyur tshe de bzhin gshegs/____/mtha' yas 'od la nor bu phul ba dang /____/de bzhin chos rgyal bsod nams me tog gi/__sras gyur bde gshegs brtson 'grus bsnyen la 'dud/____/kasmi ra yi thub bstan rtsal lag mchog__/yongs su rdzogs pa'i shAkya shrI b+ha dra/____/la sogs 'phags bod mkhas dang grub pa yi/____/skye ba'i phreng ba brgyud mar ston la 'dud/____/rig 'dzin brag ston yum mchog bsod 'bum gyi/____/sras su nye bar 'byung tshe yi dam lha'i/____/dkyil 'khor 'khor lo bskyed pa'i rmi lam dang /____/bde gsal ting 'dzin mtha' yas 'khrungs la 'dud/____/lcags stag nag pa nya ba'i dmar tshes dgur/____/bde bar sku bltams yum gyi rmi lam du/____/yi dam lha tshogs spro zhing bsdu ba dang /____/dngos su yul gyi dge mtshan rgyas la 'dud/____/byis pa'i dus nas 'da' ka ye shes dang /____/sa snying 'khor lo bcu pa'i mdo klog pas/____/ma bslab klog par dbang 'byor yon tan rdzogs/____/dam pa'i rigs mchog yongs su sad la 'dud/____/lo bdun lon tshe khro phu sems dpa' cher/____/byang chub sems bskyed zhus shing thugs rgyud la/____/bdag bas gzhan gces nges par 'khrungs pa dang /____/sems can kun la ma ltar brtse la 'dud/____/mes po'i zhabs las snga 'gyur theg pa yi/____/dbang bskur rgyud bshad man ngag mtha' dag gsan/____/bskyed rdzogs bsgom pas yi dam lha zhal gzigs/____/grub pa'i rtags mtshan mngon du gyur la 'dud/____/brtan mkhas yongs rdzogs rin chen seng ge dang /____/mkhan chen grags pa gzhon nu dpal bzang las/____/rab byung bsnyen par rdzogs shing bcas khrims la/____/nyes dris ma gos sdom brtson chen por 'dud/____/thar pa lo tsA kun mkhyen 'phags 'od dang /____/dpal ldan seng ge la sogs mkhas grub kyi/____/dam pa'i tshogs bsten phyi nang rig gnas dang /____/mdo sngags thos pa rgya mtsho'i mthar son 'dud/____/mkhas pa'i grags pas sa steng thams cad khyab/____/lung rigs smra ba'i ljags brkyangs rgol ba 'joms/____/phyogs las rnam rgyal 'jam dpal dpa' bo ni/____/bu ston kha cher gyur ces bsngags la 'dud /____/dbang dus bla ma rdo rje rgyud dus gzigs/____/sbyor ba drug pa'i rnal 'byor mchog grub cing /____/blo 'das 'od gsal gdod ma'i gnas lugs rtogs/____/bsgom byung shes rab rtsal chen rdzogs la 'dud/____/gsang 'dus gsan tshe sangs rgyas byang sems rnams/____/ting 'dzin rol rtsed sna tshogs mdzad pa gzigs/____/zhing sbyong dpa' bar 'gro ba la sogs pa'i/____/ting 'dzin sgo mtha' yas pa brnyes la 'dud/____/phyi nang dkyil 'khor lha zhal mngon sum gzigs/____/rim pa lnga yi dag snang rtse mor phyin/____/rdo rje mkha' 'gro dpa' bo dpa' mo dang /____/dgongs pa spyod yul ro gcig gyur la 'dud/____/dregs ldan gtsug gi nor bus legs mchod de/____/zhwa lu gser khang mkhas pa'i chos kyi khrir/____/zhabs bkod mdo sngags bshad bka' mtha' yas pas/____/skal ldan smin cing grol bar mdzad la 'dud/____/bka' dang bstan bcos dgongs pa 'grel ba la/____/ji bzhin gzigs pa'i thugs mchog mnga' ba dang /____/bla ma lhag pa'i lha yis skabs dbye bas/____/legs bshad gsung gi tshogs chen spel la 'dud/____/ri sbug chos kyi pho brang chen po ru/____/rim gnyis zab mo'i don la mnyam bzhag dang /____/smin grol 'chad rtsom spel mar mdzad pa yi/____/thub bstan ring du gnas par mdzad la 'dud/____/gu ru pad+mas dngos su zhal bstan cing /____/gdams zab stsal dang sangs rgyas byang sems sogs/____/bla ma yi dam lha yi dgyes zhal mjal/____/mthu ldan chos skyong bran bzhin bkol la 'dud/____/'dul mdo dbu ma phar phyin gsang sngags sogs/____/thub bstan yongs su rdzogs pa'i bshes gnyen mchog__/mkhas dang grub pa yongs kyi gtsug gi nor/____/kun mkhyen smra ba'i seng ge chen por 'dud/____/dpyad gsum dag pas chos dang chos min 'byed/____/mdo sngags chos bsgyur snga 'gyur zhus dag dang /____/chad pa sab dang 'khrugs pa sdebs la sogs/____/bka' dang bstan bcos chos kyi dag ther mdzad/____/'jig rten mig gyur lo tsA chen por 'dud/____/dri ma med pa'i tshul khrims sku brjid cing /____/ting 'dzin zad mi shes pas gzhan sems mkhyen/____/chos rab rnam 'byed shes rab 'od stong 'phro/____/'phags chen ye shes mngon sum brnyes la 'dud/____/gzung 'dzin rgyu ba d+hu tir rab bcing zhing /____/'pho bral 'gyur med bde chen thig le'i cha/____/yongs su rdzogs pa'i rdo rje 'chang der 'dud/____/bla chen bsod rgyal chos kyi rgyal mtshan dang /____/thugs sras lo tsA che sogs mkhas grub dang /____/grags rgyal tA si la sogs slob tshogs ni/____/nyi zla rgyu skar phreng mdzes rgyas la 'dud/____/rnal 'byor rgyud gzhung chen por rang dbang bsgyur/____/gsang ba 'dus pa bde mchog dus 'khor lo/____/gtsor gyur rab 'byams rgyud sde rgya mtsho yi/____/bstan pa'i shing rta chen por gyur la 'dud/____/mdor na thos bsam sgom dang 'chad rtsod rtsom/____/re res sku tshe ril por 'da' ba snyam/____/skye bo phal pas rtogs par dka' ba yi/____/'phags chen sa bcu'i rnam thar 'chang la 'dud/____/deng gi dus kyang rdo rje theg pa yi/____/bstan pa mi nub smin grol rgyun gnas pa/____/dpal ldan rdo rje 'chang dbang khyod drin las/____/byung ba'i phrin las pha mtha' yas la 'dud/____/bde gshegs rten gsum dkyil 'khor 'byams klas kyi/____/bkod pa ngo mtshar sgyu ma'i cho 'phrul bzhengs/____/sgrub cing mchod sogs tshogs gnyis spel ba yi/____/rlabs chen thugs bskyed bsam yas ston la 'dud/____/bcu phrag bdun la lnga yis lhag pa na/____/chu stod zla ba'i dmar po'i phyogs cha yi/____/dga' ba gnyis pa'i nam gyi cha smad la/____/re zhig sprul pa'i dkyil 'khor yongs bsdus nas/____/dga' ldan chos kyi mdun sar gshegs la 'dud/____/de tsho ngo mtshar cho 'phrul ltas chen dang /____/lha mi'i mchod pa dpag tu med pa 'dus/____/sku gdung ring bsrel rgyas par mdzad pa yi/____/gzhan don 'dzad med pha mtha' yas la 'dud/____/nam zhig bskal bzang bdun par 'tshang rgya tshe/____/chos kyi 'khor lo bskor ba'i snod ldan du/____/bdag cag skyes nas sangs rgyas zhal mthong zhing /____/lung bstan dbugs dbyung bdag gis thob gyur cig__/bdag gzhan dus gsum bsags pa'i dge ba rnams/____/'jam dbyangs chos rje'i thugs dgongs rdzogs phyir bsngo/____/mtha' yas 'gro rnams gcig kyang ma lus pa/____/kun mkhyen rin chen mchog tu grub par shog__/mdo sngags bstan pa mi nub dar zhing rgyas/____/nag phyogs bdud sde'i g.yul ngo rtsad nas 'joms/____/thub bstan lha dbang grong khyer phyogs las rgyal/____/rab brtan rdzogs ldan dpal yon rgyas gyur cig__/ces rtsod dus kyi thub dbang gnyis pa bu ston rin po cher bstod pa 'di yang 'jam dbyangs chos kyi blo gros pas mi phyed dad cing gus pas lcags sbrul tha skar zla ba'i tshes gcig bzang por gsol ba btab pa sid+d+hi rastu/__dge'o/__/____//

Footnotes

Other Information