ཇོ་བོ་ཆེན་པོ་སྨྲྀ་ཏི་ཛྙཱ་ན་ལ་བསྟོད་པ་ཡེ་ཤེས་རབ་གསལ།

🚧 This website is under continued development. We appreciate your patience!

Previous Text Back to Volume PageNext Text

Wylie title	jo bo chen po smr-i ti dz+nyA na la bstod pa ye shes rab gsal
Location	chos kyi blo gros bka' 'bum Volume 2, Text 57, Pages 543-545 (Folios 1a1 to 2a5)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People	དྲན་པ་ཡེ་ཤེས་གྲགས་པ་ (Smṛtijñānakīrti)
Citation	'jam dbyangs mkhyen brtse chos kyi blo gros. jo bo chen po smr-i ti dz+nyA na la bstod pa ye shes rab gsal. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 2: 543-545. Bir, H.P.: Khyentse Labrang, 2012.
Genre	Verses of Praise - bstod pa
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/smrtijnana-praise
Colophon	།ཅེས་པའང་ས་ཁྱི་ཟླ་ཚེས་ལ་རྨི་ལམ་ཉིང་འཁྲུལ་གྱི་རྐྱེན་ལ་བརྟེན་ནས་དད་པའི་རྦ་རླབས་ལས་བྱུང་བའི་ཚིག་ཕྲེང་འདིས་ཀྱང་ཇོ་བོ་ཆེན་པོའི་བྱིན་རླབས་སྙིང་ལ་སིམ་པའི་རྒྱུར་གྱུར་ཅིག །མངྒ་ལཾ། །ཤུ་བྷཾཾ། །
	ces pa'ang sa khyi zla tshes la rmi lam nying 'khrul gyi rkyen la brten nas dad pa'i rba rlabs las byung ba'i tshig phreng 'dis kyang jo bo chen po'i byin rlabs snying la sim pa'i rgyur gyur cig__/mang+ga laM/____/shu b+haMM/

1 Texts in this Section (sde tshan or chos tshan)

543-545	ཇོ་བོ་ཆེན་པོ་སྨྲྀ་ཏི་ཛྙཱ་ན་ལ་བསྟོད་པ་ཡེ་ཤེས་རབ་གསལ། jo bo chen po smr-i ti dz+nyA na la bstod pa ye shes rab gsal Verses of Praise - bstod pa	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

ཇོ་བོ་ཆེན་པོ་སྨྲྀ་ཏི་ཛྙཱ་ན་ལ་བསྟོད་པ་ཡེ་ཤེས་རབ་གསལ་ཞེས་བྱ་བ་བཞུགས་སོ། །ན་མོ་གུ་རུ་ཛྙཱ་ན་ཀཱ་ཡ་ཡེ། ཡེ་ཤེས་སྐུ་མཆོག་ཉིན་མོར་བྱེད་པའི་གཟིས། །ས་གསུམ་རྨོངས་པའི་མུན་པ་ཀུན་སེལ་བ། །བླ་མ་འཇམ་དབྱངས་དྲན་པ་ཡེ་ཤེས་ནི། །མི་འབྲལ་སྤྱི་བོའི་རྒྱན་དུ་རྟག་པར་མཆོད། །འཕགས་པའི་ཡུལ་གྱི་པཎྜི་ཏ་ཆེན་པོ། །ཀུན་གྱི་གཙུག་ན་མངོན་པར་མཐོ་བ་ཡི། །ངོ་མཚར་ཇོ་བོ་ཆེན་པོ་དེ་ཉིད་ནི། །ཕྱོགས་ལས་རྣམ་པར་རྒྱལ་བའི་གྲགས་སྙན་འབར། །ཤིང་རྟ་ཆེན་པོ་བྱམས་ཀླུ་ཐོགས་མེད་དང་། །ཕྱོགས་གླང་ཆོས་གྲགས་ཙནྡྲ་གཽ་མིའི་ཞབས། །ཟླ་བ་གྲགས་པ་ལ་སོགས་འཛམ་གླིང་རྒྱན། །དེ་དག་རྣམས་ཀྱི་བློ་གྲོས་ཁྱོད་ལ་བྱིན། །ཕྱི་ཚུལ་ཉན་ཐོས་སྤྱོད་པ་ཞི་ཞིང་དུལ། །ནང་དུ་བྱང་ཆུབ་སེམས་ཀྱི་དཔག་བསམ་རྒྱས། །གསང་བ་སྔགས་ཀྱི་གྲུབ་པ་ཆེན་པོ་བརྙེས། །མཁས་དང་གྲུབ་པའི་དབང་པོར་བསྟོད་ཕྱག་འཚལ། །མུ་སྟེགས་རི་དྭགས་ཚོགས་རྣམས་སྐྲག་ཅིང་བཅོམ། །ཡང་དག་ལུང་དང་རིགས་པའི་རྒྱལ་རྔ་བརྡུང་། །འཕགས་ཡུལ་ཐུབ་བསྟན་མཛེས་པའི་དར་ཆེན་ནི། །ཕྱོགས་ཀྱི་རི་བོའི་ཁོངས་སུ་རྣམ་པར་བསྒྲེངས། །ལྷག་པའི་ཚུལ་ཁྲིམས་དྲི་ཡིས་ཕྱོགས་བརྒྱར་ཁྱབ། །ཟག་མེད་ཏིང་འཛིན་ཕུང་པོར་སྙོམས་འཇུག་ལྡངས། །ཤེས་རབ་ཟབ་མོ་སྤོབས་པའི་གཏེར་བརྒྱད་གྲོལ། །མཁྱེན་གཉིས་ཡེ་ཤེས་རྒྱ་མཚོར་དབང་འབྱོར་བསྔགས། །བྱང་ཕྱོགས་གངས་ཅན་རི་ཡི་སུལ་དག་ཏུ། །སྐྱེས་བུ་ཆེན་པོ་ཟླ་བ་ལྟར་གསལ་ཞིང་། །ཟབ་པའི་ཐུགས་ནི་རྒྱ་མཚོའི་མཇིང་འདྲ་བ། །སྐལ་ལྡན་རེ་འགའ་ཙམ་གྱི་སྤྱོད་ཡུལ་གྱུར། །ལས་འབྲས་བླང་དོར་གསལ་བར་འདོམས་པའི་ཆེད། །སྐུ་བསྐྱེད་ཉི་ཚེའི་དམྱལ་གནས་འདྲེན་བ་ལ། །རྨོངས་སུ་འཁྱམས་ནས་ལུས་ངན་ཐབས་ཀྱིས་བཏུལ། །མཐོ་རིས་ཞིང་དུ་འདྲེན་པར་མཛད་ལ་བསྔགས། །བསྟོད་པ་གླུར་བླང་རྒྱུད་འགྲེལ་ཆེན་མོ་དང་། །གཞན་ཡང་མདོ་རྒྱུད་རིག་གནས་ལ་སོགས་པ། །རྩོམ་འཆད་བསྒྱུར་བ་ངོ་མཚར་རྨད་དུ་བྱུང་། །དམ་པ་རྣམས་ཀྱིས་རབ་བསྔགས་གླིང་བུ་འཁྲོལ། །མཁྱེན་པའི་ཡེ་ཤེས་ནམ་མཁའི་མཐའ་དང་མཉམ། །བརྩེ་བའི་ཐུགས་རྗེ་དུས་མཐའི་རླུང་ཤུགས་འདྲ། །མཐུ་སྟོབས་ནུས་པ་ལག་ན་རྡོ་རྗེ་བཞིན། །མགོན་པོ་སྲིད་དང་ཞི་བའི་གཙུག་གི་རྒྱན། །སྐུ་གཟུགས་མཆོད་རྟེན་བགྲང་བ་ལས་འདས་པ། །དུས་ཀྱི་མཐར་ཡང་མཁས་བླུན་འགྲོ་རྣམས་ཀྱི། །དང་པའི་རྟེན་བཟང་འདི་ཕྱིའི་འཇིགས་ལས་སྐྱོབ། །སྨྲྀ་ཏི་ཛྙཱ་ན་ཞེས་སུ་ཡོངས་ལ་གྲགས། །ལྡན་གྱི་ཡུལ་དུ་སྤྲུལ་པ་དབྱིངས་སུ་ཡལ། །རྣམ་སྨིན་གཟུགས་སྐུ་ས་ཡི་བཅུད་དུ་འཇོག །ནོར་བུའི་རྒྱལ་པོ་ཆེན་པོ་བརྟན་པར་བཞུགས། །སྐུ་གདུང་གིས་ཀྱང་བསྟན་འགྲོར་ཕན་བདེ་སྤེལ། །ལྷ་ཀླུ་མི་གསུམ་ཕྱག་མཆོད་བྱ་བའི་ཡུལ། །གསོལ་བ་བཏབ་པས་འདོད་དགུ་ཐམས་ཅད་འགྲུབ། །ངོ་མཚར་མཆོད་སྡོང་ཆེན་པོ་ཟླ་མེད་པ། །འཛམ་གླིང་ཕན་བདེའི་གཞི་འཛིན་མཆོག་ཏུ་གསལ། །གང་གི་རྣམ་འཕྲུལ་གྲངས་མེད་བསམ་ཡས་ཀྱིས། །འགྲོ་རྣམས་སྒྲོལ་བའི་ཕྲིན་ལས་རླབས་པོ་ཆེ། །ས་དང་ལྷུན་པོ་ཇི་སྲིད་གནས་བར་དུ། །འབད་མེད་ལྷུན་གྲུབ་ཆེན་པོར་བསྟོད་པར་བགྱི། །དེ་ལྟར་བསྟོད་པའི་དགེ་ཚོགས་གངྒཱའི་རྒྱུན། །འཛད་དུ་མེད་པ་བསྟན་པ་རྒྱས་ཕྱིར་བསྔོ། །བདག་ཀྱང་དེང་ནས་ཚེ་རབས་ཐམས་ཅད་དུ། །དྲན་པ་ཡེ་ཤེས་མཆོག་དང་མི་འབྲལ་ཤོག །ཅེས་པའང་ས་ཁྱི་ཟླ་ཚེས་ལ་རྨི་ལམ་ཉིང་འཁྲུལ་གྱི་རྐྱེན་ལ་བརྟེན་ནས་དད་པའི་རྦ་རླབས་ལས་བྱུང་བའི་ཚིག་ཕྲེང་འདིས་ཀྱང་ཇོ་བོ་ཆེན་པོའི་བྱིན་རླབས་སྙིང་ལ་སིམ་པའི་རྒྱུར་གྱུར་ཅིག །མངྒ་ལཾ། །ཤུ་བྷཾཾ། ། །།

[edit]

jo bo chen po smr-i ti dz+nyA na la bstod pa ye shes rab gsal zhes bya ba bzhugs so/____/na mo gu ru dz+nyA na kA ya ye/__ye shes sku mchog nyin mor byed pa'i gzis/____/sa gsum rmongs pa'i mun pa kun sel ba/____/bla ma 'jam dbyangs dran pa ye shes ni/____/mi 'bral spyi bo'i rgyan du rtag par mchod/____/'phags pa'i yul gyi paN+Di ta chen po/____/kun gyi gtsug na mngon par mtho ba yi/____/ngo mtshar jo bo chen po de nyid ni/____/phyogs las rnam par rgyal ba'i grags snyan 'bar/____/shing rta chen po byams klu thogs med dang /____/phyogs glang chos grags tsan+d+ra gau mi'i zhabs/____/zla ba grags pa la sogs 'dzam gling rgyan/____/de dag rnams kyi blo gros khyod la byin/____/phyi tshul nyan thos spyod pa zhi zhing dul/____/nang du byang chub sems kyi dpag bsam rgyas/____/gsang ba sngags kyi grub pa chen po brnyes/____/mkhas dang grub pa'i dbang por bstod phyag 'tshal/____/mu stegs ri dwags tshogs rnams skrag cing bcom/____/yang dag lung dang rigs pa'i rgyal rnga brdung /____/'phags yul thub bstan mdzes pa'i dar chen ni/____/phyogs kyi ri bo'i khongs su rnam par bsgrengs/____/lhag pa'i tshul khrims dri yis phyogs brgyar khyab/____/zag med ting 'dzin phung por snyoms 'jug ldangs/____/shes rab zab mo spobs pa'i gter brgyad grol/____/mkhyen gnyis ye shes rgya mtshor dbang 'byor bsngags/____/byang phyogs gangs can ri yi sul dag tu/____/skyes bu chen po zla ba ltar gsal zhing /____/zab pa'i thugs ni rgya mtsho'i mjing 'dra ba/____/skal ldan re 'ga' tsam gyi spyod yul gyur/____/las 'bras blang dor gsal bar 'doms pa'i ched/____/sku bskyed nyi tshe'i dmyal gnas 'dren ba la/____/rmongs su 'khyams nas lus ngan thabs kyis btul/____/mtho ris zhing du 'dren par mdzad la bsngags/____/bstod pa glur blang rgyud 'grel chen mo dang /____/gzhan yang mdo rgyud rig gnas la sogs pa/____/rtsom 'chad bsgyur ba ngo mtshar rmad du byung /____/dam pa rnams kyis rab bsngags gling bu 'khrol/____/mkhyen pa'i ye shes nam mkha'i mtha' dang mnyam/____/brtse ba'i thugs rje dus mtha'i rlung shugs 'dra/____/mthu stobs nus pa lag na rdo rje bzhin/____/mgon po srid dang zhi ba'i gtsug gi rgyan/____/sku gzugs mchod rten bgrang ba las 'das pa/____/dus kyi mthar yang mkhas blun 'gro rnams kyi/____/dang pa'i rten bzang 'di phyi'i 'jigs las skyob/____/smr-i ti dz+nyA na zhes su yongs la grags/____/ldan gyi yul du sprul pa dbyings su yal/____/rnam smin gzugs sku sa yi bcud du 'jog__/nor bu'i rgyal po chen po brtan par bzhugs/____/sku gdung gis kyang bstan 'gror phan bde spel/____/lha klu mi gsum phyag mchod bya ba'i yul/____/gsol ba btab pas 'dod dgu thams cad 'grub/____/ngo mtshar mchod sdong chen po zla med pa/____/'dzam gling phan bde'i gzhi 'dzin mchog tu gsal/____/gang gi rnam 'phrul grangs med bsam yas kyis/____/'gro rnams sgrol ba'i phrin las rlabs po che/____/sa dang lhun po ji srid gnas bar du/____/'bad med lhun grub chen por bstod par bgyi/____/de ltar bstod pa'i dge tshogs gang+gA'i rgyun/____/'dzad du med pa bstan pa rgyas phyir bsngo/____/bdag kyang deng nas tshe rabs thams cad du/____/dran pa ye shes mchog dang mi 'bral shog__/ces pa'ang sa khyi zla tshes la rmi lam nying 'khrul gyi rkyen la brten nas dad pa'i rba rlabs las byung ba'i tshig phreng 'dis kyang jo bo chen po'i byin rlabs snying la sim pa'i rgyur gyur cig__/mang+ga laM/____/shu b+haMM/__/____//_