གསོལ་མཆོད་འདོད་དགུ་ལྷུན་གྲུབཿ

🚧 This website is under continued development. We appreciate your patience!

Previous Text Back to Volume PageNext Text

Wylie title	gsol mchod 'dod dgu lhun grub
Location	mdo mkhyen brtse bka' 'bum Volume 7, Text 65, Pages (Folios to )
Author	མདོ་མཁྱེན་བརྩེ་
Less details More details
Tertön	མདོ་མཁྱེན་བརྩེ་ (Mdo mkhyen brtse)
Citation
Genre	Protector Rituals - gsol mchod
Colophon	བསྟན་སྲུང་ཆེན་པོ་མེ་འབར་འཁོར་བཅས་ཀྱིཿ གསོལ་མཆོད་འདོད་དགུ་ལྷུན་གྲུབ་ཅེས་བྱ་བཿ རིག་འཛིན་ཆེན་པོ་བདུད་འདུལ་རྡོ་རྗེས་གསུངསཿ ཁ་སྐོང་ཁྲིགས་བསྡེབས་ཁྲག་འཐུང་དཔའ་བོ་ཡིསཿ བསྟན་སྲུང་རང་གིས་བསྐུལ་མ་བྱུང་ལྟར་བཀོདཿ བསྟན་དགྲ་ལས་ངན་གདུག་པ་འདུལ་བའི་གཤེདཿ དྲག་རྩལ་རྣོ་མྱུར་གནམ་ལྕགས་ཐོག་དང་འདྲཿ རང་ལ་སྙིང་ཉེ་ཕྲག་ཡངས་བཀྲ་ཤིས་སོཿ དགེ་ལེགས་འཕེལ།
	bstan srung chen po me 'bar 'khor bcas kyi: gsol mchod 'dod dgu lhun grub ces bya ba: rig 'dzin chen po bdud 'dul rdo rjes gsungs: kha skong khrigs bsdebs khrag 'thung dpa' bo yis: bstan srung rang gi bskul ma byung ltar bkod: bstan dgra las ngan gdug pa 'dul ba'i gshed: drag rtsal rno myur gnam lcags thog dang 'dra: rang la snying nye phrag yangs bkra shis so: dge legs 'phel/

Tibetan Text

[edit]

༁ྃ༔ ཁྲག་འཐུང་ཧེ་ཀུར་ཀ་ལ་འདུདཿ ཚེ་རབས་ཀུན་ཏུ་བསྒྲུབས་པའི་ལྷཿ བསྟན་སྐྱོང་མེ་འབར་ཡབ་ཡུམ་གྱིཿ མཆོད་སྒྲུབ་འདོད་དགུ་ལྷུན་གྲུབ་བསྟནཿ རཾ་ཡཾ་ཁཾཿ ལན་གསུམཿ མ་དག་པའི་ཉེས་སྐྱོན་བསྲེགས་གཏོར་སྦྱངས་ཏེ་སྟོང་པར་གྱུརཿ སྟོང་པའི་ངང་ལས་བྷྲཱུཾཿལས་རིན་པོ་ཆེའི་སྣོད་དུ་གཏོར་མ་གསེར་སྐྱེམས་འདོདཔའི་ཡོན་ཏན་ལྔ་དང་ལྡན་ཞིང་ཀུན་དགའ་གཞོན་ནུ་ཡབ་ཡུམ་སྲས་འཁོར་དགྱེས་སྐོང་གི་མཆོད་པའི་བྱེ་བྲག་བསམ་གྱིས་མི་ཁྱབ་པ་འཕྲོ་བར་གྱུརཿ ཨོཾ་ཨཱཿཧཱུཾ་ཧ་ཧོ་ཧྲཱིཿ ཧཱུཾ་བྷྱོཿ ཕོ་བྲང་མཁའ་སྤྱོད་ཙ་རིའི་གཞལ་ཡས་སོགསཿ གར་བཞུགས་དམར་ནག་མེ་རླུང་འཁྲུགས་དབུས་ནསཿ བསྟན་སྲུང་ཆེན་པོ་ཞིང་སྐྱོང་ཀུན་ཀྱི་གཙོཿ དཔལ་མགོན་ལྕམ་དྲན་སྲས་འཁོར་སྐུར་བཞེངས་ཤིགཿ བསྟན་སྲུང་ནག་པོ་ཆེན་པོ་བསྟན་དགྲའི་གཤེདཿ ལེགས་གྲུབ་རྡོ་རྗེ་ཡུམ་སྲས་འཁོར་བཅས་གཤེགསཿབཛྲ་ས་མ་ཡཱ་ཛཿ དུར་ཁྲོད་རབ་ཏུ་འཇིགས་པའི་གཞལ་ཡས་འདིརཿ ཤ་ཁྲག་རྒྱ་མཚོ་འཁྱིལ་བའི་ཀློང་དཀྱིལ་དུཿ སྒྲུབ་མཆོག་རྣལ་འབྱོར་སྐྱོང་ཕྱིར་བཞུགས་སུ་གསོལཿ གཉིས་མེད་གུས་པའི་ཚུལ་གྱིས་ཕྱག་འཚལ་ལོཿ ཤ་ཁྲག་དམར་གྱིས་བརྒྱན་པའི་གཏོར་མ་དངཿ བདུད་རྩི་གསེར་སྐྱེམས་ཁྲག་སྐྱེམས་སྤྱན་གཟིགས་ཚོགསཿ ཆོས་སྐྱོང་ཀུན་གཙོ་འགྲན་བྲལ་གར་གྱི་དབངཿ འཁོར་དང་བཅས་ལ་མཆོད་འབུལ་ཐུགས་དམ་བསྐངསཿ ལུས་ངག་ཡིད་གསུམ་རབ་གུས་གདུང་བ་ཡིསཿ ཕྱི་ནང་གསང་བའི་དམ་རྫས་མ་ལུས་དང༌། དགྲ་བོའི་ཁ་རྗེ་དབང་ཐང་སྲོག་དབུགས་བཅསཿ དགྱེས་པ་ཆེན་པོས་རོལ་ལ་ཕྲིན་ལས་སྒྲུབསཿ རང་ལ་བརྩེ་གདུང་ཕ་རོལ་ཐོག་ལྟར་མྱུརཿ བཟློག་པའི་མི་བཟློག་སྔགས་བཟློག་མཁན་གྱི་གཤེདཿ དམ་ཚིག་སྲོག་ལྟར་སྲུང་བའི་རྫུ་འཕྲུལ་ཅནཿ བདུད་མགོན་ཡབ་ཡུམ་འཁོར་དང་བཅས་ལ་བསྟོདཿ བདག་ལ་སྡང་ཞིང་གནག་པའི་སེམས་ལྡན་དགྲཿ སྲོག་དབུགས་ཤ་ཁྲག་རུས་གསོལ་མྱུར་དུ་སྒྲོལཿ སྒྲུབ་པོར་འབྲལ་མེད་འགྲོགས་ལ་སྡོང་གྲོགས་མཛོདཿ ཕྲིན་ལས་ཀུན་སྒྲུབས་མཆོག་ཐུན་དངོས་གྲུབ་རྩོལཿ ཨོཾ་ཤྲྀ་བཛྲ་མ་ཧཱ་ཀཱ་ལ་སེང་ཧ་མུ་ཁ་དྷཀྐི་ནི་སི་ན་ར་མ་བཛྲ་ས་མ་ཡ་ཛཿ དུང་དུང་སིདྡྷི་ཕ་ལ་ཧཱུཾཿ དྷྲི་ཏྲི། ཡ་མ་རཱ་ཙ་དུ་ཏྲི་ཕུ་ཏྲི་ཨ་ཡ་མ་དུ་རུ་ཙ་ཤ་ན་ཏྲི་ཧྲཱིཾ་ཛ་ཛཿ ཨོཾ་མ་ཧཱ་བཱ་ལིང་ཏ་པཉྩ་ཨ་མྲྀ་ཏ་ཁཱ་རམ་ཁ་ཧིཿ དམ་ཉམས་དགྲ་བགེགས་བྱད་མའི་ཙིཏྟ་མཾ་ས་རཀྟ་གོ་རོ་ཙ་ན་བ་སུ་ཏ་ཀིཾ་ནི་རི་ཏི་ལ་ཁ་རམ་ཁཱ་ཧིཿ བཞེས་ཤིག་རོལ་ཞིག་ལྷག་མ་མེད་པར་མཛོད་ཅིགཿ ཀྱཻ་རྒྱལ་བའི་ཞིང་ཁམས་ཀུན་ལ་དབང་སྒྱུར་བའིཿ ཕ་ལྟར་སྐྱོང་མཛད་ཀུན་དགའ་གཞོན་ནུ་མཆོདཿ མ་ལྟར་བྱམས་པའི་སི་ན་ར་མ་མཆོདཿ སྤུན་ལྟར་བརྩེ་བའི་བམ་རོ་ཕོ་མོ་མཆོདཿ བྲན་ལྟར་བཀུར་བའི་ལྷ་སྲིན་སྡེ་བརྒྱད་མཆོདཿ འཁོར་ལྟར་གུས་པའི་གཙང་རིས་དཔལ་མགོན་མཆོདཿ གསོལ་ལོ་མཆོད་དོ་བརྟེན་པའི་ཡོན་ཏན་གྱིསཿ ཁ་འཛིན་རྒྱབ་བརྟེན་སྡོང་གྲོགས་བསམ་དོན་སྒྲུབསཿ མི་མཐུན་རྐྱེན་ངན་སོལ་ལ་དགྲ་བགེགས་སོདཿ ཚེ་དབང་ལོངས་སྤྱོད་བསོད་་ནམས་འཕེལ་བ་དངཿ གང་བཅོལ་ཕྲིན་ལས་མྱུར་དུ་འགྲུབ་པར་མཛོདཿ བསྟན་སྲུང་ཞལ་དྲོ་བཀྲ་ཤིས་བདེ་ལེགས་ཤོགཿ བསྟན་སྲུང་ཆེན་པོ་མེ་འབར་འཁོར་བཅས་ཀྱིཿ གསོལ་མཆོད་འདོད་དགུ་ལྷུན་གྲུབ་ཅེས་བྱ་བཿ རིག་འཛིན་ཆེན་པོ་བདུད་འདུལ་རྡོ་རྗེས་གསུངསཿ ཁ་སྐོང་ཁྲིགས་བསྡེབས་ཁྲག་འཐུང་དཔའ་བོ་ཡིསཿ བསྟན་སྲུང་རང་གིས་བསྐུལ་མ་བྱུང་ལྟར་བཀོདཿ བསྟན་དགྲ་ལས་ངན་གདུག་པ་འདུལ་བའི་གཤེདཿ དྲག་རྩལ་རྣོ་མྱུར་གནམ་ལྕགས་ཐོག་དང་འདྲཿ རང་ལ་སྙིང་ཉེ་ཕྲག་ཡངས་བཀྲ་ཤིས་སོཿ དགེ་ལེགས་འཕེལ།