རྡོ་རྗེའི་ཚིག་བདུན་གསོལ་འདེབས་ཀྱི་དམིགས་ཁྲིད་ཅུང་ཟད་སྨོས་པ་ཟབ་ལམ་ཡོངས་རྫོགས།

🚧 This website is under continued development. We appreciate your patience!

Previous Text Back to Volume PageNext Text

Wylie title	rdo rje'i tshig bdun gsol 'debs kyi dmigs khrid cung zad smos pa zab lam yongs rdzogs
Location	dil mgo mkhyen brtse bka' 'bum Volume 13, Text 11, Pages 142-146 (Folios 1a to 5a4)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Associated People	པདྨ་འབྱུང་གནས་ (pad+ma 'byung gnas)
Citation	Khyentse, Dilgo. Rdo rje'i tshig bdun gsol 'debs kyi dmigs khrid cung zad smos pa zab lam yongs rdzogs. In Skyabs rje dil mgo mkhyen brtse rin po che'i bka' 'bum, Vol. 13: 142-146. Delhi: Shechen Publications, 1994.
Genre	Contemplative Guide Books and Instructional Manuals - khrid yig
Colophon	།སརྦ་མངྒ་ལཾ། དགེའོ།།
	/sarba mang+ga laM/_dge'o//

Tibetan Text

Wylie

[edit]

༄༅། །རྡོ་རྗེའི་ཚིག་བདུན་གསོལ་འདེབས་ཀྱི་དམིགས་ཁྲིད་ཅུང་ཟད་སྨོས་པ་ཟབ་ལམ་ཡོངས་རྫོགས་བཞུགས། ན་མོ་གུ་ར་ཝེ། སྤྱིར་བདག་ཅག་སྟོན་པ་མཉམ་མེད་ཤཱཀྱའི་རྒྱལ་པོའི་རྗེས་སུ་འཇུག་པ་ཐམས་ཅད་ཀྱི་མཁས་དང་གྲུབ་པ་བརྙེས་པའི་ཕྱག་སྲོལ་དང་གསུང་གི་གསང་བ་ལ་ཆེ་བ་དུ་མ་དང་ལྡན་པ་སྨོས་ཀྱིས་མི་ལྡང་ཀྱང་རང་རེ་སྔ་འགྱུར་རྙིང་མ་བ་རྣམས་ཀྱི་ཆོས་སྤྱོད་ཐམས་ཅད་ཀྱི་ཐོག་མར་གུ་རུ་རིན་པོ་ཆེའི་རྡོ་རྗེའི་གསུང་གསོལ་འདེབས་ཚིག་བདུན་མ་གསུང་པ་འདི་དགོས་པ་མཆོག་ལྡན་དུ་མཐོང་ནས་དེའི་དམིགས་ཁྲིད་མདོ་ཙམ་ཞུ་ན། ཧཱུྃ༔ ཞེས་སྐུ་གསུང་ཐུགས་གཉིས་སུ་མེད་པའི་ཡེ་ཤེས་སྲོག་གི་སྙིང་པོ་འདི་བརྗོད་པས། རང་རེའི་ཆོས་ལུགས་ཀྱི་མཚན་ལས་གསང་སྔགས་རྙིང་མ་བ་ཞེས་གྲགས་པ་བཞིན་སྒེར་གྱི་སྟོན་པ་ཕྱོགས་དུས་སྲས་བཅས་རྒྱལ་བའི་ཡེ་ཤེས་ཀྱི་ཉིན་བྱེད་སྔགས་ཀྱི་སྟོན་པའི་ཚུལ་དུ་བཞེངས་པ་གུ་རུ་རིན་པོ་ཆེའི་རྗེས་འཇུག་གྱུར་པའི་སྐལ་བཟང་གིས་ལྟ་སྒོམ་སྤྱོད་པའི་ཉམས་ལེན་གྱི་གཙོ་བོ་རྡོ་རྗེ་ཐེག་པ་རྣལ་འབྱོར་བླ་མེད་ཀྱི་གཞུང་བསྲངས་ནས་མདོ་སྔགས་ཡོངས་རྫོགས་དེའི་ལམ་སྟེགས་སུ་བཀྲལ་ཏེ་མི་འགལ་བར་ཉམས་སུ་ལེན་དགོས་པའི་གནད་དོན་མཚོན་བྱེད་ཡིན་པ་ཁོང་དུ་ཆུད་པའི་ཆེ་བ་ངོ་ཤེས་པ་དང༌། ཐུགས་སྲོག་རྡོ་རྗེའི་སྔགས་ཀྱི་སྒྲ་གདངས་བརྗོད་མ་ཐག་སྣང་གྲགས་རིག་པ་བསྒྲུབ་བྱའི་དཀྱིལ་འཁོར་དེའི་རྡོ་རྗེ་གསུམ་གྱི་སྣང་ཆ་སད་པའི་མོས་གུས་ཀྱིས་ཨོ་རྒྱན་ཆོས་ཀྱི་རྒྱལ་པོ་ལྷང་གིས་དྲན་པར་བྱས་ཏེ་གསོལ་བ་འདེབས་པ་ནི་ལམ་གནད་ཆེ་ཤོས་ཡིན་ཏེ། རྡོ་རྗེ་ཐེག་པ་དག་སྣང་ལམ་བྱེད་དུ་གྲགས་པ་བཞིན་སྣང་སྤྱོད་ཐ་མལ་དུ་མ་ཤོར་བ། སྣོད་བཅུད་རྒྱུད་གསུམ་གདན་གསུམ་རྡོ་རྗེའི་གྲོང་ཁྱེར་དུ་ཤེས་པ་མདོ་དང་སྒོ་བསྟུན་པའི་སངས་རྒྱས་ཕལ་པོ་ཆེ་སྤྱོད་ཡུལ་ཡོངས་སུ་དག་པའི་མདོ་སྡེ་ལས་བྱང་ཆུབ་སེམས་དཔས་སངས་རྒྱས་ཀྱི་ཞིང་རྒྱ་མཚོ་སྦྱངས་བའི་ཚུལ་གྱིས་གསུངས་པ་དང༌། དོན་གནད་ཀྱང་ཚང་ཞིང་ཨུ་རྒྱན་ཡུལ་གྱི་སོགས་ནས། མང་པོས་བསྐོར༔ཞེས་ཛམ་གླིང་གདུལ་བྱའི་བསོད་ནམས་ཀྱི་སྐལ་པར་ལྷོ་ནུབ་འོ་མ་ཅན་གྱི་རྒྱ་མཚོར་རྩ་གསུམ་ཀུན་འདུས་གུ་རུ་རིན་པོ་ཆེ་སྐུ་འཁྲུངས་ནས་སྐུ་ཚེ་གཅིག་གི་མཛད་པ་ཐུན་མོང་གི་གདུལ་བྱའི་སྣང་ཆར་རྡོ་རྗེ་ཐེག་པ་གསང་སྔགས་ཀྱི་ལམ་དང་རྗེས་སུ་མཐུན་པ་རིག་འཛིན་རྣམ་བཞིའི་སྤང་རྟོགས་ཡོངས་སུ་རྫོགས་ནས་སྔགས་ཀྱི་རྒྱུད་ལུང་མན་ངག་ལ་རིག་པ་རྩལ་གྱི་བརྟུལ་ཞུགས་ཀྱིས་མངའ་དབང་བསྒྱུར་བའི་ཆེ་རྟགས་སུ་མཁའ་འགྲོའི་འཁོར་དང་བཅས་པའི་ཡོན་ཏན་རྗེས་སུ་དྲན་པར་བྱ་དགོས་ལ། སྤྱིར་སྔགས་ཀྱི་ལྟ་སྤྱོད་ལ་མཁྱེན་རྒྱ་ཆུང་བ་དག་གིས་མཁའ་འགྲོ་ཞེས་བུད་མེད་ཁོ་ན་ལ་ངོས་འཛིན་ནས་འཕྱར་ཀ་སྒྲོགས་ཀྱང་སྙིང་རྗེའི་གནས་ཏེ། མཁའ་ནི་ཆོས་ཉིད་རྣམ་ཀུན་མཆོག་ལྡན་དང༌། འགྲོ་བ་དང་གཤེགས་པ་དོན་གཅིག་པས་དེ་ཉིད་མངོན་དུ་རྟོགས་པའི་གང་ཟག་གི་མཚན་གྱི་སྒྲ་ཡིན་པས། རྡོ་རྗེ་ནམ་མཁའི་དཀྱིལ་ལྟ་བུའི་དོན་སོ་སོ་རང་རིག་པའི་ཡེ་ཤེས་ཀྱིས་མངོན་དུ་བྱས་པའི་གསང་སྔགས་ཀྱི་ལྟ་སྒོམ་སྤྱོད་པ་ཉམས་འོག་ཏུ་ཆུད་པ་མཐའ་དག་ལ་གསུངས་པས་ན་ངེས་པ་ལྔ་ལྡན་གྱི་སྟོན་འཁོར་ཏེ། རྒྱུད་སྡེ་ཐམས་ཅད་ཀྱི་གླེང་གཞི་ཨེ་ཝཾ་གྱིས་སྒྲས་བཤད་དགོས་པ་དང་དགྱེས་པ་རྡོ་རྗེའི་རྒྱུད་དུ་རྡོ་རྗེ་བཙུན་མོའི་བྷ་ག་ལ་བཞུགས་པ་དང་ཚིག་དོན་མཚུངས་པའི་ཕྱིར་རོ། །ཁྱེད་ཀྱི་རྗེས་སུ་བདག་སྒྲུབ་ཀྱིས༔ ཞེས་པ་སྔོན་བྱུང་སྟོན་པའི་རྣམ་ཐར་རྗེས་འཇུག་གདུལ་བྱའི་ཉམས་ལེན་ཞེས་གྲགས་པ་བཞིན་མདོ་སྔགས་ཐུན་མོང་གི་ལུགས། དུས་གསུམ་གྱི་རྒྱལ་བ་སྲས་དང་བཅས་པས་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་བསླབས་པས། རྒྱལ་བའི་སྲས་ཀྱི་ཐུགས་བསྐྱེད་དང་མཛད་པ་སྨོན་ལམ་རྒྱ་མཚོ་ཡོངས་སུ་རྫོགས་པ་དང༌། ཁྱད་པར་རྡོ་རྗེའི་བླ་མ་པདྨ་སཾ་བྷ་ཝ་ཞེས་འཇིག་རྟེན་གསུམ་ན་སྙན་པར་གྲགས་པ་བཞིན་གསང་བ་གསུམ་གྱི་མཛད་སྤྱོད་ཐམས་ཅད་དབང་པོ་རབ་རིན་པོ་ཆེ་ལྟ་བུའི་གང་ཟག་གསང་སྔགས་ཀྱི་ལྟ་སྒོམ་སྤྱོད་པ་ཐམས་ཅད་སྒྲ་ཇི་བཞིན་དུ་ཚུར་མཐོང་གདུལ་བྱའི་སྣང་ངོར་ཡང་མཐར་ཕྱིན་ཏེ། ཁྱབ་བདག་སྤྱི་དཔལ་ཆེན་པོ་ཧེ་རུ་ཀ་དང་དགོངས་སྤྱོད་གཉིས་སུ་མེད་པ་སྐུ་ལྔ་ལྷུན་གྲུབ་ཀྱི་རིག་འཛིན་བདེ་གཤེགས་སྨིན་པ་རྒྱ་མཚོ་ཞེས་གྲགས་པའི་གསང་བ་བསམ་མི་ཁྱབ་པ་ལ་གདུལ་བྱ་རང་རང་གིས་ལྟ་སྒོམ་སྤྱོད་པ་དབང་པོའི་ཆུན་ཚོད་ལྟར་དངོས་དང་བརྒྱུད་ནས་ཡིད་ཆེས་དད་མོས་ཀྱིས་སྒྲུབ་པའམ་སློབ་ཅིང་འདུན་པས། དབང་རབ་ཀྱིས་སྒྲ་ཇི་བཞིན། དབང་འབྲིང་གིས་དངོས་བརྒྱུད་ནས་ལྟ་སྒོམ་སྤྱོད་པ་ཇི་ལྟར་དཔོག་ཚད། ཐ་མས་ཀྱང་སངས་རྒྱས་ཀྱི་མཛད་པ་ལ་མོས་གུས་དང་དང་བས་སྨོན་ལམ་དང་གསོལ་འདེབས་ལ་བརྩོན་ན་མཐར་ཕྱིན་ངེས་པ་ཕྱག་རྒྱ་ཆེན་པོའི་དངོས་གྲུབ་མཆོག་གི་སར་སྦྱོར་ལ། གང་ལྟར་ཡང་བླ་མའི་རྣམ་ཐར་ཡིད་ཡུལ་དུ་བྱས་པས་ཟབ་ལམ་གྱི་སྣོད་ལྡན་དུ་གྱུར་ཏེ་དཀར་པོའི་ཆོས་སྣང་བའི་སྒོ་དད་པའི་ཤུགས་ཀྱིས་བསྐུལ་ཏེ། བྱིན་གྱིས་བརླབ་ཕྱིར་གཤེགས་སུ་གསོལ༔ ཞེས་དོན་ལ་སངས་རྒྱས་རང་ངོར་གཤེགས་བཞུགས་ཀྱི་མཚན་མ་དང་བྲལ་ཀྱང་རྣམ་པ་གདུལ་བྱའི་དད་པའི་སྣང་ངོར་མངོན་སུམ་ལྟ་བུར་བྱོན་པ་གཤེགས་པའམ་གུ་རུ་རིན་པོ་ཆེའི་རྡོ་རྗེ་གསུམ་གྱིས་བྱིན་གྱིས་བརླབ་པའི་འོད་ཟེར་ཆུ་རྒྱུན་གཅིག་མའི་དབང་བཞི་བསྐུར་བས་ལུས་ངག་ཡིད་གསུམ་ཐ་མལ་གྱི་འཁྲུལ་ཤེས་སྦྱངས་ཏེ་སྒྲིབ་པ་བཞི་དག །དབང་བཞིའི་རྟོགས་པ་ཆིག་རྫོགས་སུ་སྐྱེས། ལམ་བཞི་སྒོམ་པའི་སྐལ་ལྡན་དུ་བྱས། སྐུ་བཞིའི་ས་བོན་རྒྱུད་ལ་སྨིན་པས་བསྒྲུབ་བྱ་སྒྲུབ་བྱེད་གཉིས་མེད་དུ་གྱུར་ཕྱིར་དག་པའི་སྐུ་དང་ཡེ་ཤེས་ཀྱི་རོལ་པ་བཀོད་པ་བསམ་གྱིས་མི་ཁྱབ་པའི་སྤྲིན་ཡེ་ཤེས་ཆེན་པོའི་བྱིན་རླབས་འཕོས་ནས་གདོད་ནས་དམ་ཡེ་དབྱེར་མེད་ཀྱི་ཡིན་ལུགས་མངོན་དུ་སད་པར་མཛད་དུ་གསོལ་ཞེས་སྨོན་པ་སྟེ། དེ་ལྟར་དམིགས་པའི་རོལ་པ་མང་དུ་སྤྲོས་པ་ཐམས་ཅད་བླ་མ་སངས་རྒྱས་ཀུན་གྱི་མེས་པོ་གཅིག་ལ་གསོལ་བ་གདབ་པའི་རིམ་པ་ལམ་ཐམས་ཅད་ཀྱི་གནད་དོན་གྱིས་ལྕི་བ་ཡིན་པས་གུྃ་རུྃ། སྤྱིར་བླ་མ་ཐམས་ཅད་ལ་ཡིད་ཆེས་ཀྱི་དད་པས་གསོལ་བ་རྩེ་གཅིག་ཏུ་བཏབ་ན་བླ་མ་ཀུན་གྱི་ཐུགས་རྗེ་བྱིན་རླབས་འཇུག་ངེས་ཤིང་དེ་ཐམས་ཅད་ཀྱང་རྩ་གསུམ་ཀུན་འདུས་པྃདྨྃ་འབྱུང་གནས་གཅིག་གི་ཡེ་ཤེས་ཀྱི་ཆོ་འཕྲུལ་དུ་ངེས་ཤེས་རྩེ་གཅིག་ཏུ་བསྐྱེད་པས། ཐུན་མོང་དང་མཆོག་གི་སིདྡྷི་སྩོལ་ཅིག་ཅེས་ཧཱུྃ་གིས་ཐུགས་སྲོག་ནས་བོས་ཏེ་བསྐུལ་བས་བླ་མ་འཁོར་བཅས་འོད་དུ་ལྟེམས་ཀྱིས་ཞུ་བས་རང་ལ་ཐིམ་པས་ལྕགས་ལ་གསེར་འགྱུར་གྱིས་རྩིས་ཐེབས་པ་བཞིན་གཉིས་སུ་མེད་པར་ཐུགས་ཡིད་གཅིག་ཏུ་འདྲེས་པར་བསམ་པས། སྤྱིར་བླ་མ་སྒྲུབ་ཚུལ་ལ་སྐབས་འདིར་ཕྱི་གསོལ་འདེབས་སུ་སྒྲུབ་པ་གཙོ་བོ་བཤད་པ་ཡིན་ཡང༌། ནང་བླ་མ་སྐུ་གསུམ་དུ་སྒྲུབ་པའང་བསྒྲུབ་གཞིའི་ངོས་ནས་དབྱེ་བས་རྡོ་རྗེའི་ཚིག་རྐང་བདུན་མའི་སྒེར་སྒྲུབ་དུ་གསལ་བ་གང་འདོད་བསྒོམ་ཞིང༌། སྒྲུབ་བྱེད་སྣང་སྲིད་བླ་མའི་དཀྱིལ་འཁོར་དུ་ཤར་བ་བསྐྱེད་རིམ་ལྷ་སྣང་དང་ཆོས་ཉིད་རང་རིག་དབྱེར་མེད་དུ་ཤེས་པ་རྫོགས་རིམ་ཡིན་ཞིང་དེ་དག་ཀྱང་བསྙེན་སྒྲུབ་ལས་གསུམ་ལ་སྦྱར་དུ་རུང་ཞིང༌། མདོར་ན་ཟབ་ལམ་གྱི་གནད་འདི་ཙམ་ཞིག་ཤེས་པས་སེམས་རྒྱུད་ལ་སྦྱར་བའི་ཉམས་ལེན་བྱས་ནས། བཀའ་གདམས་པའི་གསུང་སྒྲོས་བཞིན་སྣོད་བཅུད་སྡིག་པས་གང་བའི་རྩོད་དུས་སུ་སྐྱེས་ཀྱང༌། དལ་འབྱོར་ལན་གཅིག་ཐོབ་པ་འདི་སྐད་ཅིག་ཀྱང་འཕྲོག་བརླག་མི་ཤོར་བའི་ཆེད་དྲན་ཤེས་བག་ཡོད་མ་བྱས་ན། ལྟར་སྣང་གི་ཆོས་དང་ཡིན་རློམས་ཀྱིས་སྣང་བ་མཐོ་ཡང༌། ཉི་མ་གཅིག་ལ་འཆི་བདག་ཞགས་པས་ཐེབས་དུས་བག་མི་ཚ་བའི་གདེང་མི་འོང་བས་སངས་རྒྱས་གཉིས་པ་བཀའ་དྲིན་ཅན་དེའི་གསོལ་འདེབས་ཀུན་གྱི་ངག་ལ་ཡོད་པ་འདི་ཙམ་ཡང་རྡོ་རྗེའི་ཚིག་རྐང་གསང་ཆེན་ངེས་པའི་རྒྱུད་ཀྱི་རྒྱལ་པོ་རྣམས་དང་དབྱེར་མེད་པས་མཚོན། འབྲེལ་ཚད་དོན་ལྡན་གྱི་ཟབ་དོན་ཐང་མར་བརྡལ་བའི་ཕ་ནོར་གྱི་རིན་ཐང་རང་ངོ་ཤེས་པའི་གསལ་འདེབས་ཙམ་དུ་འདུ་འཛིའི་ཞགས་པས་བསྡམས་ཏེ་ལོག་འཚོའི་ལྕིད་ཀྱིས་ནོན་པའི་གྱི་ན་བ་ཨུ་རྒྱན་སྐྱབས་སམ་བཀྲ་ཤིས་དཔལ་འབྱོར་དུ་འབོད་པའི་མདོ་ཁམས་ནས་འཁྱར་བའི་རྒན་ཁོག་གིས་བྲིས་པ་ཟབ་གནད་མང་དུ་འདུས་པའི་ཨུ་པ་དེ་ཤ་ཡིན་པར་རློམས་པས་ཀུན་གྱིས་གཟིགས་ཏེ་གནད་ཆེ་དོན་ལྡན་ཡིན་མིན་ཐུགས་དཔྱད་མཛད་པར་ཞུ་བ་ལགས་སོ། །རྙིང་མར་ཁས་འཆེ་བན་སྔགས་ཐམས་ཅད་ཀྱིས། །འདི་ཙམ་ཉམས་སུ་བླངས་ཀྱང་ཟབ་དོན་དང༌། །འབྲེལ་སྙམ་དད་སྤྲོའི་སྣང་བ་དཀར་དུས་བྲིས། །སེམས་དང་ཆོས་གཉིས་འདྲེས་པའི་གསོལ་འདེབས་ཞུ། །རྡོ་རྗེའི་བླ་མ་པདྨ་སཾ་བྷ་ཝས། །རྡོ་རྗེའི་གསུང་གི་གསང་བ་ཆ་ཙམ་ཡང༌། །རྡོ་རྗེའི་རྒྱུད་དོན་རྫོགས་ལ་གཟིགས་མཛོད་དང༌། །རྡོ་རྗེའི་ལམ་འདི་ཉི་བཞིན་ལྷམ་མེར་གསལ། །རྡོ་རྗེའི་བཅུད་ལྡན་གདོང་ལྔའི་ནུ་ཞོ་ལ། །རྡོ་རྗེའི་ལྟ་སྒོམ་སྤྱོད་པའི་ནུས་ཕྲ་ཡང༌། །རྡོ་རྗེ་རིན་ཆེན་ལྟ་བུའི་དད་སྣོད་ཀྱིས། །རྡོ་རྗེའི་བཅུད་ལ་མྱངས་ན་འཚེངས་བར་རློམས། །ངག་གི་གསོལ་འདེབས་གདོན་བྱ་མ་མང་ཡང༌། །སེམས་ཀྱི་དད་མོས་གསེར་ཞུན་ལྟར་གཙང་བས། །རྡོ་རྗེའི་ཚིག་རྐང་བདུན་མ་ཁོ་ན་ལ། །འདི་ཕྱིའི་བློ་གཏད་ཆོག་སྙམ་བྲིས་པ་ལགས། །རྣམ་དཀར་དགེ་དེས་མ་གྱུར་ཡིད་ཅན་སྣོད། །སངས་རྒྱས་པདྨའི་ཐུགས་བསྐྱེད་ལྕགས་ཀྱུ་ཡིས། །བཟུང་ནས་སྲིད་ཞིར་མི་གནས་གོ་འཕང་ཆེར། །བགྲོད་པའི་སྐལ་བཟང་ཚེ་འདིར་མངོན་བྱེད་ཤོག །སརྦ་མངྒ་ལཾ། དགེའོ།། །།

[edit]

@#/__/rdo rje'i tshig bdun gsol 'debs kyi dmigs khrid cung zad smos pa zab lam yongs rdzogs bzhugs/_na mo gu ra we/_spyir bdag cag ston pa mnyam med shAkya'i rgyal po'i rjes su 'jug pa thams cad kyi mkhas dang grub pa brnyes pa'i phyag srol dang gsung gi gsang ba la che ba du ma dang ldan pa smos kyis mi ldang kyang rang re snga 'gyur rnying ma ba rnams kyi chos spyod thams cad kyi thog mar gu ru rin po che'i rdo rje'i gsung gsol 'debs tshig bdun ma gsung pa 'di dgos pa mchog ldan du mthong nas de'i dmigs khrid mdo tsam zhu na/_hU~M:_zhes sku gsung thugs gnyis su med pa'i ye shes srog gi snying po 'di brjod pas/_rang re'i chos lugs kyi mtshan las gsang sngags rnying ma ba zhes grags pa bzhin sger gyi ston pa phyogs dus sras bcas rgyal ba'i ye shes kyi nyin byed sngags kyi ston pa'i tshul du bzhengs pa gu ru rin po che'i rjes 'jug gyur pa'i skal bzang gis lta sgom spyod pa'i nyams len gyi gtso bo rdo rje theg pa rnal 'byor bla med kyi gzhung bsrangs nas mdo sngags yongs rdzogs de'i lam stegs su bkral te mi 'gal bar nyams su len dgos pa'i gnad don mtshon byed yin pa khong du chud pa'i che ba ngo shes pa dang*/_thugs srog rdo rje'i sngags kyi sgra gdangs brjod ma thag snang grags rig pa bsgrub bya'i dkyil 'khor de'i rdo rje gsum gyi snang cha sad pa'i mos gus kyis o rgyan chos kyi rgyal po lhang gis dran par byas te gsol ba 'debs pa ni lam gnad che shos yin te/_rdo rje theg pa dag snang lam byed du grags pa bzhin snang spyod tha mal du ma shor ba/_snod bcud rgyud gsum gdan gsum rdo rje'i grong khyer du shes pa mdo dang sgo bstun pa'i sangs rgyas phal po che spyod yul yongs su dag pa'i mdo sde las byang chub sems dpas sangs rgyas kyi zhing rgya mtsho sbyangs ba'i tshul gyis gsungs pa dang*/_don gnad kyang tshang zhing u rgyan yul gyi sogs nas/_mang pos bskor:zhes dzam gling gdul bya'i bsod nams kyi skal par lho nub 'o ma can gyi rgya mtshor rtsa gsum kun 'dus gu ru rin po che sku 'khrungs nas sku tshe gcig gi mdzad pa thun mong gi gdul bya'i snang char rdo rje theg pa gsang sngags kyi lam dang rjes su mthun pa rig 'dzin rnam bzhi'i spang rtogs yongs su rdzogs nas sngags kyi rgyud lung man ngag la rig pa rtsal gyi brtul zhugs kyis mnga' dbang bsgyur ba'i che rtags su mkha' 'gro'i 'khor dang bcas pa'i yon tan rjes su dran par bya dgos la/_spyir sngags kyi lta spyod la mkhyen rgya chung ba dag gis mkha' 'gro zhes bud med kho na la ngos 'dzin nas 'phyar ka sgrogs kyang snying rje'i gnas te/_mkha' ni chos nyid rnam kun mchog ldan dang*/_'gro ba dang gshegs pa don gcig pas de nyid mngon du rtogs pa'i gang zag gi mtshan gyi sgra yin pas/_rdo rje nam mkha'i dkyil lta bu'i don so so rang rig pa'i ye shes kyis mngon du byas pa'i gsang sngags kyi lta sgom spyod pa nyams 'og tu chud pa mtha' dag la gsungs pas na nges pa lnga ldan gyi ston 'khor te/_rgyud sde thams cad kyi gleng gzhi e waM gyis sgras bshad dgos pa dang dgyes pa rdo rje'i rgyud du rdo rje btsun mo'i b+ha ga la bzhugs pa dang tshig don mtshungs pa'i phyir ro/__/khyed kyi rjes su bdag sgrub kyis:_zhes pa sngon byung ston pa'i rnam thar rjes 'jug gdul bya'i nyams len zhes grags pa bzhin mdo sngags thun mong gi lugs/_dus gsum gyi rgyal ba sras dang bcas pas byang chub sems dpa'i spyod pa rlabs po che la bslabs pas/_rgyal ba'i sras kyi thugs bskyed dang mdzad pa smon lam rgya mtsho yongs su rdzogs pa dang*/_khyad par rdo rje'i bla ma pad+ma saM b+ha wa zhes 'jig rten gsum na snyan par grags pa bzhin gsang ba gsum gyi mdzad spyod thams cad dbang po rab rin po che lta bu'i gang zag gsang sngags kyi lta sgom spyod pa thams cad sgra ji bzhin du tshur mthong gdul bya'i snang ngor yang mthar phyin te/_khyab bdag spyi dpal chen po he ru ka dang dgongs spyod gnyis su med pa sku lnga lhun grub kyi rig 'dzin bde gshegs smin pa rgya mtsho zhes grags pa'i gsang ba bsam mi khyab pa la gdul bya rang rang gis lta sgom spyod pa dbang po'i chun tshod ltar dngos dang brgyud nas yid ches dad mos kyis sgrub pa'am slob cing 'dun pas/_dbang rab kyis sgra ji bzhin/_dbang 'bring gis dngos brgyud nas lta sgom spyod pa ji ltar dpog tshad/_tha mas kyang sangs rgyas kyi mdzad pa la mos gus dang dang bas smon lam dang gsol 'debs la brtson na mthar phyin nges pa phyag rgya chen po'i dngos grub mchog gi sar sbyor la/_gang ltar yang bla ma'i rnam thar yid yul du byas pas zab lam gyi snod ldan du gyur te dkar po'i chos snang ba'i sgo dad pa'i shugs kyis bskul te/_byin gyis brlab phyir gshegs su gsol:_zhes don la sangs rgyas rang ngor gshegs bzhugs kyi mtshan ma dang bral kyang rnam pa gdul bya'i dad pa'i snang ngor mngon sum lta bur byon pa gshegs pa'am gu ru rin po che'i rdo rje gsum gyis byin gyis brlab pa'i 'od zer chu rgyun gcig ma'i dbang bzhi bskur bas lus ngag yid gsum tha mal gyi 'khrul shes sbyangs te sgrib pa bzhi dag_/dbang bzhi'i rtogs pa chig rdzogs su skyes/_lam bzhi sgom pa'i skal ldan du byas/_sku bzhi'i sa bon rgyud la smin pas bsgrub bya sgrub byed gnyis med du gyur phyir dag pa'i sku dang ye shes kyi rol pa bkod pa bsam gyis mi khyab pa'i sprin ye shes chen po'i byin rlabs 'phos nas gdod nas dam ye dbyer med kyi yin lugs mngon du sad par mdzad du gsol zhes smon pa ste/_de ltar dmigs pa'i rol pa mang du spros pa thams cad bla ma sangs rgyas kun gyi mes po gcig la gsol ba gdab pa'i rim pa lam thams cad kyi gnad don gyis lci ba yin pas gu~M ru~M/_spyir bla ma thams cad la yid ches kyi dad pas gsol ba rtse gcig tu btab na bla ma kun gyi thugs rje byin rlabs 'jug nges shing de thams cad kyang rtsa gsum kun 'dus pa~Md+ma~M 'byung gnas gcig gi ye shes kyi cho 'phrul du nges shes rtse gcig tu bskyed pas/_thun mong dang mchog gi sid+d+hi stsol cig ces hU~M gis thugs srog nas bos te bskul bas bla ma 'khor bcas 'od du ltems kyis zhu bas rang la thim pas lcags la gser 'gyur gyis rtsis thebs pa bzhin gnyis su med par thugs yid gcig tu 'dres par bsam pas/_spyir bla ma sgrub tshul la skabs 'dir phyi gsol 'debs su sgrub pa gtso bo bshad pa yin yang*/_nang bla ma sku gsum du sgrub pa'ang bsgrub gzhi'i ngos nas dbye bas rdo rje'i tshig rkang bdun ma'i sger sgrub du gsal ba gang 'dod bsgom zhing*/_sgrub byed snang srid bla ma'i dkyil 'khor du shar ba bskyed rim lha snang dang chos nyid rang rig dbyer med du shes pa rdzogs rim yin zhing de dag kyang bsnyen sgrub las gsum la sbyar du rung zhing*/_mdor na zab lam gyi gnad 'di tsam zhig shes pas sems rgyud la sbyar ba'i nyams len byas nas/_bka' gdams pa'i gsung sgros bzhin snod bcud sdig pas gang ba'i rtsod dus su skyes kyang*/_dal 'byor lan gcig thob pa 'di skad cig kyang 'phrog brlag mi shor ba'i ched dran shes bag yod ma byas na/_ltar snang gi chos dang yin rloms kyis snang ba mtho yang*/_nyi ma gcig la 'chi bdag zhags pas thebs dus bag mi tsha ba'i gdeng mi 'ong bas sangs rgyas gnyis pa bka' drin can de'i gsol 'debs kun gyi ngag la yod pa 'di tsam yang rdo rje'i tshig rkang gsang chen nges pa'i rgyud kyi rgyal po rnams dang dbyer med pas mtshon/_'brel tshad don ldan gyi zab don thang mar brdal ba'i pha nor gyi rin thang rang ngo shes pa'i gsal 'debs tsam du 'du 'dzi'i zhags pas bsdams te log 'tsho'i lcid kyis non pa'i gyi na ba u rgyan skyabs sam bkra shis dpal 'byor du 'bod pa'i mdo khams nas 'khyar ba'i rgan khog gis bris pa zab gnad mang du 'dus pa'i u pa de sha yin par rloms pas kun gyis gzigs te gnad che don ldan yin min thugs dpyad mdzad par zhu ba lags so/__/rnying mar khas 'che ban sngags thams cad kyis/_/'di tsam nyams su blangs kyang zab don dang*/_/'brel snyam dad spro'i snang ba dkar dus bris/_/sems dang chos gnyis 'dres pa'i gsol 'debs zhu/_/rdo rje'i bla ma pad+ma saM b+ha was/_/rdo rje'i gsung gi gsang ba cha tsam yang*/_/rdo rje'i rgyud don rdzogs la gzigs mdzod dang*/_/rdo rje'i lam 'di nyi bzhin lham mer gsal/_/rdo rje'i bcud ldan gdong lnga'i nu zho la/_/rdo rje'i lta sgom spyod pa'i nus phra yang*/_/rdo rje rin chen lta bu'i dad snod kyis/_/rdo rje'i bcud la myangs na 'tshengs bar rloms/_/ngag gi gsol 'debs gdon bya ma mang yang*/_/sems kyi dad mos gser zhun ltar gtsang bas/_/rdo rje'i tshig rkang bdun ma kho na la/_/'di phyi'i blo gtad chog snyam bris pa lags/_/rnam dkar dge des ma gyur yid can snod/_/sangs rgyas pad+ma'i thugs bskyed lcags kyu yis/_/bzung nas srid zhir mi gnas go 'phang cher/_/bgrod pa'i skal bzang tshe 'dir mngon byed shog_/sarba mang+ga laM/_dge'o//__//