ཞབས་བརྟན་གསོལ་འདེབས་ཕྱོགས་བསྡུས།

From Khyentse Lineage - A Tsadra Foundation Project
DKR-KABUM-03-GA-012
Previous Text Back to Volume PageNext Text
Wylie title zhabs brtan gsol 'debs phyogs bsdus DKR-KABUM-03-GA-012.pdf
Location dil mgo mkhyen brtse bka' 'bum
Volume 3, Text 12, Pages 129-165 (Folios 1a1 to 37b2)
Author དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation Khyentse, Dilgo. Zhabs brtan gsol 'debs phyogs bsdus. In Skyabs rje dil mgo mkhyen brtse rin po che'i bka' 'bum, Vol. 3: 129-165. Delhi: Shechen Publications, 1994.
Genre Prayers for Long Life - zhabs brtan gsol 'debs - brtan bzhugs
[edit]
༄༅། །གོང་ས་ལྷ་མིའི་རྣམ་འདྲེན་ཆེན་པོ་རྒྱལ་དབང་ཡིད་བཞིན་ནོར་བུའི་ཞབས་བརྟན་དགེ་ལེགས་དོན་ཀུན་གྲུབ་པའི་དབྱངས་སྙན་ཞེས་བྱ་བ་བཞུགས། ཨོཾ་སྭ་སྟི་ཤྲཱི་བི་ཛ་ཡནྟུ། འོད་གསལ་སྲིད་ཞི་ཀུན་ཁྱབ་ཆོས་ཀྱི་དབྱིངས། །ངག༵་ཚིག་སྤྲོས་པའི་འཇུག་པ་ཉེར་ཞིའི་རྩལ། །དབ༵ང་བཅུ་གཟུངས་སྤོབས་མཁྱེན་བརྩེའི་བློ༵་བཟ༵ང་གིས། །རབ་མཛེས་འཇམ་མགོན་བླ་མ་ཞབས་བརྟན་གསོལ། །ཐུབ་བསྟན༵་ཡོངས་རྫོགས་གསེར་གྱི་ས་འཛི༵ན་ངོགས། །ཟག་མེད་ཡོན་ཏན་རྒྱ༵་མ༵ཚོ་ཀུན་ནས་འཁྱིལ། །དགེ་ལེགས་ནོར་བུའི་ལྷུན་པོ་པད་དཀར་འཆང༌། །སྲིད་ཞིའི་གཙུག་རྒྱན་ཆེན་པོ་ཞབས་བརྟན་གསོལ། །སྲིད༵་གསུམ༵་གདུལ་བྱ་ཐུགས་རྗེའི་རང་དབ༵ང་བསྒྱུར༵། །ཕྱོགས་ལས་རྣམ་རྒྱལ་ཐེག་མཆོག་རྒྱལ་སྲིད་སྐྱོང༌། །མཐུ་སྟོབས་ཕྲིན་ལས་མཚུང༵ས་པ༵་མེད༵་པའི༵་སྡེ༵། །རྒྱལ་ཀུན་གསང་མཛོད་མངའ་བདག་ཞབས་བརྟན་གསོལ། །མགོན་ཁྱོད་ཐུགས་བསྐྱེད་སྐྱ་རེང་གིས་བསུས་པའི། །ཐུབ་བསྟན་ཉིན་བྱེད་སླར་ཡང་གསར་དུ་འཆར། །མཁས་གྲུབ་པདྨའི་དགའ་ཚལ་དར་བབ་པས། །ཉི་མའི་གཉེན་གྱི་རྒྱལ་ཚབ་ཞབས་བརྟན་གསོལ། །གསང་གསུམ་མི་ཤིགས་རྡོ་རྗེའི་ཁམས་སུ་བརྟན། །ངོ་མཚར་མཛད་བཟང་གངས་ཅན་དཔལ་དུ་སྤྱོད། །རྫོགས་ལྡན་དགའ་སྟོན་མྱུར་དུ་བསྩལ་བ་ཡིས། །བཀྲ་ཤིས་སྣང་བ་ཀུན་ཏུ་རྒྱས་གྱུར་ཅིག །ཅེས་པའང་རྒྱལ་དབང་མཚོ་སྐྱེས་རྡོ་རྗེའི་ཞབས་སེན་གྱི་མེ་ཏོག་ཚངས་གནས་སུ་མཆོད་པའི་སྐལ་བཟང་ཅན་འཇིགས་མེད་མཁྱེན་བརྩེའི་འོད་ཟེར་བཀྲ་ཤིས་དཔལ་འབྱོར་གྱིས་གུས་ཤིང་དད་པའི་ཀུན་སློང་གིས་རྩེ་གཅིག་ཏུ་གསོལ་བ་བཏབ་པ་དགེ་ལེགས་འཕེལ། ༈ སྤྱི་ནོར་གོང་ས་ཆེན་པོའི་ཞབས་བརྟན་འཆི་མེད་རྡོ་རྗེའི་དབྱངས་སྙན་ཞེས་བྱ་བ་བཞུགས་སོ། གངས་ཅན་མགོན་པོ་རྒྱལ་མཆོག་པད་དཀར་འཆང༌། །ངག༵་གི་དབ༵ང་ཕྱུག་རྩོད་དུས་འགྲོ་བའི་མགོན། །མཚུངས་མེད་བློ༵་བཟ༵ང་བསྟན༵་འ༵ཛིན་རྒྱ༵་མ༵ཚོ་མཆོག །ཞབས་པད་རྟག་བརྟན་བཞེད་དོན་ལྷུན་གྲུབ་ཤོག །རྡོ་རྗེའི་གནས་མཆོག་འཆི་བ་མཐར་བྱེད་དུ། །འཆི་མེད་ཚེ་ལྷ་རིགས་ལྔའི་བསྙེན་སྒྲུབ་ཀྱིས། །ཇི་ལྟར་གསོལ་བ་བཏབ་པའི་དོན་བཞིན་དུ། །འཆི་མེད་རྡོ་རྗེའི་གསང་གསུམ་རྟག་བརྟན་ཤོག །མཉམ་མེད་ཐུབ་པ་ཆེན་པོའི་ལུང་བསྟན་བཞིན། །འཇིག་རྟེན་དབང་ཕྱུག་ཕྱག་མཚན་དུ་བཞེས་པའི། །ཐུགས་བསྐྱེད་དམ་བཅའ་ནམ་ཡང་མི་ལྷོད་པས། །གངས་ཅན་གདུལ་བྱའི་མགོན་དུ་རྟག་བཞུགས་གསོལ། །གངས་རིའི་ཁྲོད་ཀྱི་ཆོས་སྲིད་ལེགས་དགུའི་དཔལ། །ཁྱོད་ཀྱི་ཕྲིན་ལས་ཉིན་བྱེད་ཀྱིས་སྤེལ་ནས། །ཕན་བདེའི་པད་ཚལ་དར་ཞིང་རྒྱས་པ་ཡི། །དཔལ་ཡོན་མི་ཉམས་ཡར་ཟླ་ལྟར་རྒྱས་ཤོག །སྲོང་བཙན་སྒམ་པོས་རྒྱལ་བསྟན་ལམ་སྲོལ་ཕྱེ། །མཁན་སློབ་ཆོས་གསུམ་ལོ་པཎ་བཅས་པ་ཡིས། །རྒྱལ་བསྟན་ཤིང་རྟས་དྲངས་པ་ནམ་དུ་ཡང༌། །མི་ཉམས་རྩོད་དུས་མགོན་ཁྱོད་ཞབས་བརྟན་གསོལ། །བློ་བཟང་རྒྱ་མཚོས་གངས་ཅན་བདེ་ལ་བཀོད། །སྐལ་བཟང་རྒྱ་མཚོས་འབྲེལ་ཚད་ཐར་པར་སྦྱོར། །ཐུབ་བསྟན་རྒྱ་མཚོས་ཕྱོགས་ལས་རྣམ་པར་རྒྱལ། །ཀུན་འདུས་བསྟན་འཛིན་རྒྱ་མཚོ་ཞབས་བརྟན་གསོལ། །འཕགས་མཆོག་དགྱེས་པས་བོད་ཡུལ་བསྟན་འགྲོ་སྐྱོང༌། །མ་ལུས་གདུལ་བྱའི་དད་དམ་རྣམ་པར་དག །ཐུབ་བསྟན་དར་རྒྱས་ཕན་བདེའི་དགའ་སྟོན་རྒྱས། །བཀྲ་ཤིས་སྣང་བས་ཕྱོགས་དུས་ཀུན་ཁྱབ་ཤོག །ཅེས་པའང་ཤིང་གླང་ནག་ཟླའི་འཕེལ་ཚེས་ལ་འཆི་མེད་གྲུབ་པའི་གནས་མཆོག་མཱ་ར་ཏི་ཀ་རང་བྱུང་ལྷུན་གྲུབ་རྟེན་འབྲེལ་གྱིས་གཏེར་ཆེན་མཆོག་གྱུར་གླིང་པའི་ཟབ་གཏེར་འཆི་མེད་ཚེ་དཀར་གསུམ་དྲིལ་གྱི་སྒྲུབ་ཆེན་རིག་འཛིན་འདུས་པ་རྣམས་ནས་སྒྲུབ་པའི་ཚེ་ཐུགས་རྗེའི་དབང་ཕྱུག་དགྱེས་པའི་འབངས་བཀྲ་ཤིས་དཔལ་འབྱོར་གྱིས་ལྷག་བསམ་ཟོལ་མེད་ཀྱིས་གསོལ་བ་བཏབ་པ་བཞིན་འགྲུབ་པར་གྱུར་ཅིག ༈ གོང་ས་ཆེན་པོའི་ཞབས་བརྟན་བདེན་སྨོན་འཆི་མེད་ཚངས་པའི་རྔ་སྒྲ་བཞུགས། རབ་འབྱམས་སྲས་བཅས་རྒྱལ་བའི་ཐུགས་རྗེའི་སྤྲིན། །མཁའ་ཁྱབ་ཞིང་དང་སྐུ་ཡི་བཀོད་པའི་ཆར། །མི་ཟད་ཕན་བདེའི་དཔྱིད་ཀྱི་འབྲུག་སྒྲ་ཅན། །པད་དཀར་འཆང་དངོས་བསྟན་འཛིན་རྒྱ་མཚོ་རྒྱལ། །ཐུབ་དབང་གཉིས་པ་བློ་བཟང་རྒྱ་མཚོ་བཞིན། །དྲི་མེད་སྡོམ་གསུམ་གསེར་གྱི་དྲ་བ་ཡིས། །གསང་གསུམ་ལེགས་མཛེས་བརྟན་མཁས་ཡོན་ཏན་མཛོད། །སྙིགས་དུས་འགྲོ་བའི་འདྲེན་མཆོག་ཞབས་བརྟན་གསོལ། །མང་ཐོས་མཛོད་འཛིན་ངག༵་དབ༵ང་སྨྲ་བའི་སེང༌། །བློ༵་གྲོས་སྤོབས་པ་མཐའ་ཡས་རྒྱལ་བའི་སྲས། །རྫོགས་སྨིན་སྦྱངས་པ་མཐར་སོན་ས་བཅུའི་དབང༌། །ཀུན་བཟ༵ང་སྤྱོད་པས་རབ་མཛེས་ཞབས་བརྟན་གསོལ། །རྒྱུད་སྡེ་རྒྱ་མཚོའི་དབང་གིས་ཐུགས་རྒྱུད་སྨིན། །བསྐྱེད་དང་རྫོགས་པའི་མཆོག་གི་དངོས་གྲུབ་བརྙེས། །ཟུང་འཇུག་མངོན་གྱུར་རིགས་བརྒྱའི་ཁྱབ་བདག་ཆེ། །ངེས་དོན་བསྟན༵་འཛི༵ན་དབང་པོ་ཞབས་བརྟན་གསོལ། །གདོད་ནས་དག་པའི་རིགས་ཁམས་དབང་གིས་གསོས། །རིག་འཛིན་རྣམ་བཞིའི་གསེང་ལམ་འབད་མེད་བགྲོད། །བཀའ་གཏེར་རྒྱ༵་མཚོ༵འི་ཆོས་ལ་རང་དབང་བསྒྱུར། །ཁྱབ་བདག་དང་པོའི་སངས་རྒྱས་ཞབས་བརྟན་གསོལ། །ཆོས་དབྱིངས་བསམ་མི་ཁྱབ་པའི་བདེན་པ་དང༌། །བདག་སོགས་གདུལ་བྱའི་དད་མོས་རྟེན་འབྱུང་གིས། །རྗེ་བཙུན་བླ་མ་གངས་ཅན་མགོན་གཅིག་པུ། །འཆི་མེད་རྡོ་རྗེའི་གསང་གསུམ་འགྲུབ་གྱུར་ཅིག །ཅེས་པའང་བསྐལ་མང་གོམས་པའི་ཐུགས་བསྐྱེད་ཀྱི་ཞགས་པས་རྗེས་སུ་བཟུང་བ་ལ་སྲས་དང་བཅས་པའི་རྒྱལ་བའི་བདེན་གསུང་གིས་བསྔགས་པ་དོན་ལྡན་བོད་ཡུལ་གདུལ་བྱའི་མགོན་གཅིག་མཆོག་གི་ཞབས་བརྟན་བདེན་སྨོན་འདིའང་འཛམ་གླིང་རྟེན་མཆོག་གཙོ་བོ་བལ་ཡུལ་མཆོད་རྟེན་རྣམ་གསུམ་གྱི་ཡ་གྱལ་བྱ་རུང་ཁ་ཤོར་མདུན་སྙིགས་དུས་བསྟན་འགྲོའི་དཔལ་མགོན་ཞྭ་དེའུའི་འཁྲུལ་ཞིག་མཆོག་སྤྲུལ་ངག་དབང་བློ་བཟང་མདོ་སྔགས་བསྟན་འཛིན་ནས་བསྟན་འགྲོར་ཕན་པའི་ཐུགས་བསྐྱེད་རྨད་དུ་བྱུང་བས་རྒྱལ་བའི་བཀའ་འགྱུར་རིན་པོ་ཆེའི་ཆོས་སྦྱིན་སྤེལ་ཚེ་ཕུན་ཚོགས་ལྔ་དང་ལྡན་པའི་རྟེན་འབྱུང་གི་སླད་འདི་ལྟར་དུ་འབྲི་བར་འོས་ཞེས་རིན་ཆེན་གཉིས་པའི་གནང་སྐྱེས་ལྷ་རྫས་ཀྱིས་བཏེགས་ཏེ་གསུང་བསྐུལ་བཞིན་གངས་ཅན་མགོན་པོའི་ཐུགས་རྗེའི་གྲིབ་བསིལ་ལ་ངལ་འཚོ་ཐོབ་པའི་འཇམ་མགོན་མཁྱེན་བརྩེའི་སྤྲུལ་མིང་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་དད་གུས་བསམ་སྦྱོར་གཙང་མས་སྙིང་ནས་གསོལ་བ་བཏབ་བཞིན་ཡོངས་སུ་འགྲུབ་པའི་རྒྱུར་གྱུར་ཅིག ༈ པད་དཀར་འཆང་བའི་ཐུགས་བསྐྱེད་ཞགས་པ་ཡིས། །ཡང་ཡང་བཟུང་བའི་གངས་ཅན་གདུལ་བྱའི་མགོན། །སྙིགས་དུས་འགྲོ་བའི་རྣམ་འདྲེན་ས་གསུམ་མགོན། །བསྟན་འཛིན་རྒྱ་མཚོའི་ཞབས་པད་བརྟན་གྱུར་ཅིག །དུས་ཀྱི་ཐ་མ་བསིལ་ལྡན་ལྗོངས་ཀྱི་འགྲོ། །ནད་མུག་མཚོན་གྱི་བསྐལ་བས་ཉམས་ཐག་ཚེ། །བསམ་བཞིན་བྱོན་པའི་མགོན་པོ་མཚུངས་པ་མེད། །གསང་གསུམ་མི་གཡོ་རྟག་པར་བཞུགས་གསོལ་འདེབས། །ཇི་ལྟར་མགོན་པོ་ཁྱོད་ཀྱི་དམ་བཅས་བཞིན། །གངས་ཅན་བསྟན་འགྲོའི་ཕན་དང་བདེ་བའི་དཔལ། །ཡར་ངོའི་ཟླ་བཞིན་འཕེལ་ཞིང་རྒྱས་པའི་མཐུས། །རྫོགས་ལྡན་དགའ་སྟོན་མྱུར་དུ་འཆར་བར་ཤོག །ཆོས་སྲིད་ཟུང་འཇུག་དགའ་བ་བརྒྱ་ལྡན་ལྗོངས། །མདོ་སྔགས་ཟུང་འཇུག་རིས་མེད་ཐུབ་པའི་བསྟན། །ཚོགས་གཉིས་ཟུང་འཇུག་རྣམ་དཀར་བདེན་སྨོན་དང༌། །བཤད་སྒྲུབ་ཟུང་འཇུག་ལས་ཀྱིས་འཕེལ་གྱུར་ཅིག །ཕྱོགས་བཅུའི་རྒྱལ་བས་དབང་བསྐུར་ལུང་བསྟན་ཅིང༌། །སྤྱན་རས་གཟིགས་ཀྱི་ཐུགས་བསྐྱེད་མཐུ་བཙན་པས། །ཆོས་རྒྱལ་མེས་དབོན་གསུམ་གྱི་ཐུགས་བསྐྱེད་བཞིན། །གངས་ཅན་ཐུབ་བསྟན་ཡུན་གནས་འཕེལ་རྒྱས་ཤོག །ཅེས་པའང་འཛམ་གླིང་གནས་ཆེན་ཀུན་གྱི་གཙོ་བོ་མཁན་སློབ་ཆོས་གསུམ་གྱིས་གངས་ཅན་དཔལ་མགོན་དུ་ཐུགས་བསྐྱེད་ཀྱི་རང་གཟུགས་མཆོད་རྟེན་བྱ་རུང་ཁ་ཤོར་མདུན་རྒྱལ་བའི་བཀའ་འགྱུར་རིན་པོ་ཆེའི་ལུང་བཀླག་པའི་སྐབས་བོད་ཡུལ་བསྟན་འགྲོ་སྤྱིའི་ཞབས་བརྟན་དུ་དམིགས་པའི་སྨོན་ཚིག་འདིའང་ལྷག་བསམ་དག་པའི་རྒྱལ་ཁམས་པ་བཀྲ་ཤིས་དཔལ་འབྱོར་གྱིས་སྦྱར་བ་དོན་དང་ལྡན་པར་གྱུར་ཅིག ༈ ཨོཾ་སྭསྟི། རྒྱལ་ཀུན་མཁྱེན་གཉིས་གཏེར་གཅིག་ངག༵་གི་དབ༵ང༌། །པད་དཀར་འཆང་དངོས་བློ༵་བཟ༵ང་བསྟན༵་འཛི༵ན་ཚུལ། །མཚུངས་མེད་མཐུ་སྟོབས་རྒྱ༵་མཚོ༵ས་སྙིགས་འགྲོ་འདུལ། །གངས་ལྗོངས་ལྷ་མིའི་འདྲེན་པ་ཞབས་བརྟན་གསོལ། །ནག་ཕྱོགས་བདུད༵་བཞིའི་དཔུང་འཇོམ༵ས་གཏེར་ཆེན་རྗེ། །འཇིགས་བྲལ་མཁས་དང་གྲུབ་བརྒྱའི་དེད་དཔོན་མཆོག །མཁྱེན་བརྩེའི་ནུས་པའི་ཡེ༵་ཤེས༵་རྡོ༵་རྗེ༵འི་དཔྱིད། །ངེས་གསང་བསྟན་པའི་མངའ་བདག་འཚོ་བཞེས་གསོལ། །སྔ་འགྱུར༵་བཀའ་གཏེར་བདུད་རྩིའི་རྒྱ་མཚོ་ཆེར། །འཁྲུལ་མེད༵་ཐོས་བསམ་སྒོམ་པའི་ཡོན་ཏན་གཏེར། །ཆོས༵་ཀྱི༵་བློ༵་གྲོས༵་སྤོབས་པའི་མཐུ་ཐོབ་པ། །གནས་བརྟན་རྡོ་རྗེ་འཛིན་དབང་ཞབས་བརྟན་གསོལ། །འགྱུར༵་མེད༵་རྡོ་རྗེའི་ཐེག༵་མཆོ༵ག་སྒོ་རུ་ཞུགས། །ལྷག་བསམ་གོ་ཆས་བསྟན༵་པའི༵་རྒྱལ༵་མཚ༵ན་འཛིན། །འཇམ་མགོན་བླ་མས་རྗེས་བཟུང་བྱིན་བརླབས་པ། །འཆི་མེད་རྡོ་རྗེའི་སྲོག་རྩ་བརྟན་གྱུར་ཅིག །མཚུངས་མེད་རྣམ་འདྲེན་རྒྱ་མཚོ་ཞབས་པད་བརྟན། །བསྟན་འགྲོའི་བདེ་སྐྱིད་དཔལ་ཡོན་མཆོག་ཏུ་དར། །སྐྱེ་ཀུན་བླ་མ་མཆོག་དང་མི་འབྲལ་བར། །ཐེག་མཆོག་ལམ་མཐར་སོན་པར་བྱིན་གྱིས་རློབས། །ཅེས་པའང་དད་བརྩོན་མཚུངས་མེད་འཇིགས་མེད་ཨོ་རྒྱན་བསྟན་འཛིན་ནས་ཆེད་བསྐུལ་བཞིན་རྒྱལ་ཁམས་པ་བཀྲ་ཤིས་དཔལ་འབྱོར་གྱིས་ནེ་པལ་གྱི་རྒྱལ་ཁབ་ནས་བྲིས་པ་དགེ་ལེགས་འཕེལ། ༈ འཇིག༵ས་བྲལ༵་མཚོ་སྐྱེས་རྒྱལ་བའི་ཞལ་སྐྱིན་མཆོག །མཚུངས་མེད་མཁྱེན་བརྩེ་ནུས་པའི་ཡེ༵་ཤེས༵་ཀྱིས། །བཀའ་གཏེར་རྡོ༵་རྗེ༵་སྙིང་པོའི་སྲོག་འཛིན་མགོན། །གསང་གསུམ་མི་ཤིགས་བརྟན་ཅིང་བཞུགས་གསོལ་འདེབས། །འཕོ་འགྱུར༵་མཚན་མེད༵་ཚེ་ལྷ་རབ་འབྱམས་ཀྱིས། །ཐུབ་བསྟན་ལུང་རྟོགས་ཆོས༵་ཀྱི༵་དཔལ་འཛིན་པའི། །ཐུགས་བསྐྱེད་བློ༵་གྲོ༵ས་མཚུངས་མེད་རྣམ་འདྲེན་མཆོག །བསྟན་འགྲོའི་མགོན་དུ་རྟག་པར་བཞུགས་གསོལ་འདེབས། །ཚེ་ཡི་གནས་མཆོག་མཱ་ར་ཏི་ཀ་རུ། །ཚེ་ལྷ་རབ་འབྱམས་བསྙེན་སྒྲུབ་གསོལ་བཏབ་པས། ཚེ་སོགས་དབང་བཅུའི་དཀྱིལ་འཁོར་རྫོགས་པ་ཡིས། །ཚེ་དབང་རབ༵་གས༵ལ་ཟླ༵་བ༵་རྟག་བརྟན་ཤོག །ཅེས་པའང་གནས་འཛིན་ཀུ་ལུང་བླ་མ་ངག་དབང་ཆོས་དཔལ་གྱིས་བསྐུལ་བ་བཞིན་སྨྲས་པ་ཨཱ་ཡུ་ཏིཥྛནྟུ། ༈ ཨོཾ་སྭསྟི། འཇིག༵ས་བྲལ༵་སྟོབས་བཅུས་བདུད་འཇོམས་མཚོ་སྐྱེས་རྗེའི། །མཁྱེན་བརྩེ་ནུས་པ་ཡེ༵་ཤེས༵་རྡོ༵་རྗེ༵འི་ཉི། །སྔ་འགྱུར་བཀའ་གཏེར་པདྨོའི་གཉེན་ཆེན་པོར། །འཆི་མེད་ཚེ་མཐའ་ཡས་བཞིན་རྟག་བཞུགས་གསོལ། །འགྱུར༵་མེད༵་བདེ་ཆེན་ཀུན་ཁྱབ་རྡོ་རྗེ་སེམས། །ཀུན༵་བཟ༵ང་ཡེ་ཤེས་སྒྱུ་འཕྲུལ་འཁོར་ལོའི་མགོན། །དགེ་ལེགས་ཕན་བདེའི་འདོད་འཇོ་དབ༵ང་གི་རྒྱལ༵། །གསང་གསུམ་རྟག་པ་དམ་པར་བཞུགས་གསོལ་འདེབས། །ཐུབ༵་བསྟན༵་ཡོངས་རྫོགས་ཀུན་མཁྱེན་ཡབ་སྲས་ཀྱི། །རིང་ལུགས་སྨིན་གྲོལ་ཆུ་གཏེར་ཆེན་པོ་བཞི། །སྤེལ་མཛད་རྨད་བྱུང་ཕྲིན༵་ལས༵་དཔ༵ལ་འབ༵ར་རྗེ། །བསྐལ་བརྒྱར་ཞབས་བརྟན་མཛད་ཕྲིན་མཐར་ཕྱིན་ཤོག །འཇིག༵ས་མེད༵་ཐུགས་བསྐྱེད་གོ་ཆ་ཆེན་པོ་ཡིས། །ཐུབ༵་བསྟན༵་སྙིང་པོའི་བཤ༵ད་སྒྲུབ༵་ལས་གསུམ་དཔལ། །སྤེལ་མཛད་ཆོས༵་ཀྱི༵་སེང་གེའི་སྒྲ༵་དབྱང༵ས་ཅན། །གཞོམ་བྲལ་རྡོ་རྗེའི་སྐུ་རུ་བཞུགས་གསོལ་འདེབས། །གདོད་མའི་སང༵ས་རྒྱས༵་ཀུན་བཟང་ཐུགས་ཀྱི་བསྟན། །གསལ་མཛད་ཐེག་མཆོག་རྡོ༵་རྗེ༵་སྙིང་པོའི་ལམ། །མཐར་ཕྱིན་རྣལ་འབྱོར་གྲུབ་པའི་དབང་ཕྱུག་ཆེ། །གསང་གསུམ་རྡོ་རྗེའི་སྐུ་རུ་བཞུགས་གསོལ་འདེབས། །འགྱུར༵་མེད༵་འོད་གསལ་རྡོ་རྗེ་སྙིང་པོའི་སྲོག །ཐེག༵་མཆོ༵ག་གདམས་པའི་གསང་མཛོད་སྐལ་བཟང་དཔལ། །བསྟན༵་པ༵འི་རྒྱལ༵་མཚ༵ན་འཛིན་པའི་ལྷག་བསམ་ཅན། །ཚེ་དང་ཡེ་ཤེས་སྣང་བ་རྒྱས་གྱུར་ཅིག །ཕན་བདེའི་འབྱུང་གནས་མཉམ་མེད་ཐུབ་པའི་བསྟན། །ཁྱད་པར་སྔ་འགྱུར་གསང་ཆེན་རྡོ་རྗེའི་ཐེག །བཤད་སྒྲུབ་སྣང་བས་ས་གསུམ་འཇིག་རྟེན་དུ། །ཁྱབ་པའི་དགེ་མཚན་འཕེལ་རྒྱས་རྟག་བརྟན་ཤོག །ཅེས་འཕགས་ཡུལ་ཝཱ་ར་ཎ་སིར་བོད་ཀྱི་མཐོ་སློབ་རིག་གནས་སློབ་དཔོན་ཨོ་རྒྱན་བསྟན་འཛིན་ནས་རྟེན་བཅས་བསྐུལ་ངོར་རྣམ་འདྲེན་བླ་མ་དགྱེས་པའི་འབངས་དིལ་མཁྱེན་རྒན་པོས་བསམ་སྦྱོར་དག་པས་འདུན་སྨོན་དུ་གསོལ་བ་བཏབ་པ་བཞིན་འགྲུབ་པར་གྱུར་ཅིག ༈ ཨོཾ་སྭསྟི་ཤྲཱི་བིཛ་ཡནྟུ། ཆོས་དབྱིངས་ཀུན་ཁྱབ་རངྃ་བྱུངྃ་ཐུགས་རྗེའི་གཏེར། །རྒྱལ་བའི་ཡབ་གཅིག་འཕགས་མཆོག་སྤྱན་རས་གཟིགས། །བསམ་བཞིན་མཆོག་གི་སྤྲུལ་སྐུ་རྨད་བྱུང་བ། །རིགྃ་པའིྃ་སྐྱེས་བུ་རྡོྃ་རྗེྃའི་སློབ་དཔོན་རྒྱལ། །གྲངས་མེད་བསྐལ་པའི་གོ་ཆ་ལྷུར་བཞེས་པ། །སངས་རྒྱས་ཀུན་གྱི་སྤྱི་གཟུགས་ཀརྨ་ཀཿ །སྙིགས་དུས་བསྟན་འགྲོའི་ཕན་བདེའི་ཉིན་མོར་བྱེད། །ཐུབ་པའི་རྒྱལ་ཚབ་ཆེན་པོར་ཞབས་བརྟན་གསོལ། །གདོད་ནས་སྐྱེ་འཆི་འཕོ་འགྱུར་ལས་འདས་ཀྱང༌། །གདུལ་བྱའི་དད་བསོད་ལྷ་ལམ་ཡངས་པ་རུ། །གསང་གསུམ་ཟླ་ཤེལ་ཚེ་མཐའ་ཡས་པ་བཞིན། །བཞུགས་ནས་མཁའ་མཉམ་འགྲོ་ཀུན་དབྱིངས་སྒྲོལ་ཤོག །ཅེས་བཤད་སྒྲུབ་ཆོས་འཁོར་སྒང་གི་དགེ་འདུན་འདུས་པའི་སྡེའི་གསུང་བསྐུལ་བཞིན་མཆོག་གི་སློབ་གྲལ་འཇིགས་མེད་མཁྱེན་བརྩེའི་སྣང་བ་རྒྱས་པའི་སྡེར་འབོད་པས་དད་མོས་ལྷག་བསམ་དག་པས་གསོལ་བ་བཏབ་པ་བཞིན་འགྲུབ་པར་གྱུར་ཅིག ༈ འཇིག་རྟེན་དབང་ཕྱུག་དཔལ་ཀརྨ་པ་བཅུ་དྲུག་པ་ཆེན་པོ་ལ་ཞབས་བརྟན་དུ་གསོལ་བ་འཆི་མེད་ཚངས་པའི་རྒྱུད་མང་ཞེས་བྱ་བ་སླར་གསོལ་འདེབས་སུ་ཞལ་བསྒྱུར་ཞུས་པ་བཞུགས་སོ། ཨོཾ་སྭ་སྟི། དུས་གསུམ་རྒྱལ་བ་རྒྱ་མཚོ་ཐམས་ཅད་ཀྱི། །ཡེ་ཤེས་གཅིག་ཏུ་བསྡུས་པའི་རང་གཟུགས་མཆོག །འཇིག་རྟེན་དབང་ཕྱུག་དཔལ་ལྡན་ཀརྨ་པ། །རང་བྱུང་རིག་པའི་རྡོ་རྗེར་གསོལ་བ་འདེབས། །ངོ་མཚར་སྐྱེ་བའི་ཕྲེང་བ་གསེར་གྱི་རི། །ཚར་དུ་དངར་བས་ཛམ་གླིང་མཐའ་དག་གི །ཕན་དང་བདེ་བའི་མཆོད་སྡོང་ཆེན་པོ་ཡི། །བྱིན་རླབས་བཀྲ་ཤིས་སྣང་བས་དགེ་ལེགས་སྩོལ། །ཁྱད་པར་བྱང་ཕྱོགས་ཁ་བ་ཅན་གྱི་རི། །རྒྱལ་བ་མཆོག་དབྱངས་དབང་ཆེན་གྲུབ་མཆོག་བརྙེས། །དུས་གསུམ་ཀུན་མཁྱེན་རིམ་པར་བྱོན་པ་ཡི། །ཁམས་གསུམ་འགྲོ་བའི་བླ་མར་གསོལ་བ་འདེབས། །དཀར་པོའི་ཕྱོགས་ཀྱི་རི་དབང་འཛིན་པ་འདི། །ཆ་ཤས་ཡོངས་སུ་འཕེལ་བའི་མཐར་ཐུག་བཞིན། །དགའ་བའི་ཡེ་ཤེས་བཅུ་དྲུག་རྩེར་སོན་པ། །ཁྱབ་བདག་རྡོ་རྗེ་འཆང་དབང་གསོལ་བ་འདེབས། །རིགས་ཀུན་ཁྱབ་བདག་མི་བསྐྱོད་རྡོ་རྗེ་སེམས། །གནམ་སྔོན་ཞུན་མ་འཁྱིལ་བའི་ཅོད་པན་ཆེ། །གདོད་ནས་འདུ་འབྲལ་སྤངས་བའི་དབང་རྟགས་འཛིན། །དཀྱིལ་འཁོར་རྒྱ་མཚོའི་བདག་པོར་གསོལ་བ་འདེབས། །ཕྱི་ལྟར་སྡོམ་བརྩོན་ངུར་སྨྲིག་འཆང་བའི་གཙོ། །ནང་དུ་བྱང་ཆུབ་སེམས་ཀྱི་བདུད་རྩིས་གཏམ། །གསང་བ་བདེ་ཆེན་ཡེ་ཤེས་རོ་མྱོས་པ། །སུམ་ལྡན་རྡོ་རྗེ་འཛིན་རྒྱལ་གསོལ་བ་འདེབས། །མཁྱེན་རབ་ཉི་མའི་དཀྱིལ་འཁོར་འོད་ཟེར་འཛུམ། །བརྩེ་བས་གདུལ་བྱའི་བློ་གྲོས་པདྨོ་འབྱེད། །མཐུ་སྟོབས་ནུས་པས་འབྱུང་པོའི་མིག་ལྡོངས་ཤིང༌། །རིགས་གསུམ་སེམས་དཔའི་དབང་ཕྱུག་གསོལ་བ་འདེབས། །ཟག་བཅས་ཆོས་ཁམས་ཟག་མེད་དབྱིངས་སུ་འཆིངས། །འཕོ་བྲལ་འཕོ་མེད་རྡོ་རྗེའི་སྐུ་མཆོག་བརྙེས། །སྲིད་པ་ཇི་སྲིད་ཕྲིན་ལས་འཛད་མེད་པ། །ཟླ་མེད་མཆོག་གི་སྤྲུལ་སྐུ་གསོལ་བ་འདེབས། །ཛམ་གླིང་འདི་ན་པད་དཀར་ལྟར་འཕགས་ཤིང༌། །ངོ་མཚར་གཏམ་མང་མངའ་བའི་སྤྲུལ་བའི་སྐུ། །སྲིད་གསུམ་འགྲན་ཟླ་བྲལ་བའི་ཆོས་ཀྱི་རྗེ། །ཆོས་ཀྱི་རྒྱལ་པོ་ཁྱེད་དང་མི་འབྲལ་ཤོག །རྩོད་དུས་བསྟན་འགྲོ་ཡོངས་ཀྱི་སྐྱབས་གཅིག་པུ། །སེངྒེའི་ང་རོར་འཚང་རྒྱ་ཀརྨ་ཀཿ ས་དང་ལྷུན་པོ་རྒྱ་མཚོ་གནས་ཀྱི་བར། །རྣམ་འཕྲུལ་རྒྱུན་མི་འཆད་པས་རྗེས་འཛིན་མཛོད། །དེ་ལྟར་གསོལ་བཏབ་བདེན་པའི་ཚིག་འདི་དག །བླ་མ་རྩ་གསུམ་ཆོས་སྐྱོང་སྲུང་མ་ཡིས། །ཇི་ལྟར་སྨོན་པ་བཞིན་དུ་གེགས་མེད་པར། །མྱུར་དུ་འགྲུབ་པའི་བྱིན་རླབས་བདེན་པ་སྩོལ། །རྒྱལ་བསྟན་རིན་ཆེན་དར་ཞིང་རྒྱས་པ་དང༌། །དགེ་འདུན་འདུས་པའི་སྡེ་ཚོགས་རབ་འཕེལ་ཞིང༌། །ཆོས་དང་སྲིད་ཀྱི་ཕུན་ཚོགས་དཔལ་ཡོན་རྒྱས། །འཇིག་རྟེན་ཀུན་ཏུ་དགེ་བའི་བཀྲ་ཤིས་ཤོག །ཁྱད་པར་ངེས་དོན་སྒྲུབ་བརྒྱུད་རིན་པོ་ཆེ། །བཤད་དང་སྒྲུབ་པ་ཛམ་གླིང་ཀུན་ཏུ་ཁྱབ། །ས་ཆེན་མཁས་དང་གྲུབ་པའི་ཚོགས་ཀྱིས་ཁེངས། །དགེ་ལེགས་བཀྲ་ཤིས་སྣང་བ་རྒྱས་པར་ཤོག །ཅེས་པའང་འཇིག་རྟེན་གསུམ་གྱི་སྒྲོན་མེ་རྒྱལ་མཆོག་ཀརྨ་པ་བཅུ་དྲུག་པ་ཆེན་པོའི་ཞབས་བརྟན་དུ་གསོལ་བའི་སྨོན་ཚིག་འདི་འཇམ་དབྱངས་མཁྱེན་བརྩེའི་དབང་པོའི་ཕྲིན་གྱི་བྱེད་པོར་དབུགས་དབྱུང་ཐོབ་ཅིང་མགོན་པོ་མཆོག་གི་བཀའ་འབངས་འཇམ་དབྱངས་ཆོས་ཀྱི་བློ་གྲོས་རིས་མེད་བསྟན་པའི་རྒྱལ་མཚན་དུ་འབོད་པས་མཚུར་མདོ་བོ་ལུང་གི་གཞལ་མེད་ཁང་ཆེན་པོར་མེ་སྤྲེལ་གནམ་ལོ་གསར་འཆར་གྱི་དུས་ཚེས་དགེ་བར་གསོལ་བ་བཏབ་པ་བཞིན་བྲིས་ཏེ་ཕུལ་བས་རྗེ་བཙུན་བླ་མའི་ཞབས་པད་བསྐལ་བརྒྱར་བཞུགས་པའི་རྒྱུར་འགྱུར་བ་བླ་མ་རྒྱལ་བ་སྲས་བཅས་ཀྱི་བྱིན་གྱིས་བརླབ་ཏུ་གསོལ་ཞེས་པར་མངྒ་ལས་གསོལ་འདེབས་སུ་ཞལ་བསྒྱུར་བའོ། །སརྦ་མངྒ་ལཾ། དགེའོ། ༈ ངགྃ་གི་དབྃང་ཕྱུག་ལྷ་རིགས་རྡོ་རྗེ་འཛིན། །ཀུན་དགའི་རིང་ལུགས་སྤེལ་བའི་ཐུགས་བསྐྱེད་དང༌། །བསོད་ནམས་ཡེ་ཤེས་རྒྱ་མཚོའི་དཔལ་མངའ་བ། །གསང་གསུམ་མི་ཤིགས་རྡོ་རྗེ་ལྟར་བརྟན་ཤོག །འཇྃམ་དབྱངྃས་འཁོན་གྱི་གདུང་འཛིན་རྒྱལ་བའི་སྲས། །རྨད་བྱུང་ཐུགས་བསྐྱེད་སྨོན་ལམ་དུས་སྨིན་ཏེ། །བརྩེ་ཆེན་སྙིང་པོའི་ལུང་རྟོགས་བསྟན་པའི་དཔལ། །འཇིག་རྟེན་གསུམ་དུ་ཁྱབ་པར་མཛད་དུ་གསོལ། །ཞེས་གངས་ཅན་རྡོ་རྗེ་འཛིན་རྒྱལ་དཔལ་ས་སྐྱ་ཕུན་ཚོགས་ཕོ་བྲང་གི་འཁོན་སྟོན་ཡབ་སྲས་ཀྱི་ཞབས་བརྟན་དུ་འཁོན་ཡུམ་འཇམ་དབྱངས་དཔལ་མོ་ནས་བཀའ་ཕེབས་བཞིན་རྗེ་བཙུན་བླ་མ་དེ་དག་གི་ཞབས་པད་གཙུག་ཏུ་མཆོད་པའི་བཀའ་འབངས་དིལ་མགོ་མཁྱེན་བརྩེ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ས་སྦྲུལ་ཆོ་འཕྲུལ་ཟླ་བའི་དཀར་ཕྱོགས་ཀྱི་ཡར་ཚེས༡༥་རྗེ་བཙུན་ཡིད་བཞིན་འཁོར་ལོའི་ཚེ་ཆོག་དང་འབྲེལ་བར་བདེན་སྨོན་དུ་སྒོ་གསུམ་དངོས་པོ་ཀུན་གྱིས་བཏུད་དེ་སྨོན་པ་བཞིན་འགྲུབ་པར་གྱུར་ཅིག ༈ དཔལ་ལྡན་བླ་མའི་ཞབས་བརྟན་འཆི་མེད་རྡོ་རྗེའི་རྒྱུད་མང་ཞེས་བྱ་བ་བཞུགས་སོ། ཨོཾ་སྭསྟི་པྲཛྙཱ་བྷྱཿ ཆོས་ཀུན་སྙིང་པོ་འོད་གསལ་རྡོ་རྗེ་དབྱིངས། །སྲིད་ཞི་ཡོངས་ཁྱབ་གང་ལའང་མི་གནས་པའི། །ཡེ་ཤེས་རྡོ་རྗེ་ནམ་མཁའི་དཀྱིལ་ལྟ་བུ། །ངེས་དོན་དཔལ་ལྡན་བླ་མ་རྒྱལ་གྱུར་ཅིག ༡ །ཁྱོད་ནི་སྐྱེ་འཆིའི་མཚན་མ་གདོད་ནས་དག །རང་རིག་ཡེ་ཤེས་འོད་མཚན་སྟོང་དུ་འབར། །གཉུག་མ་རྡོ་རྗེ་ལྟ་བུའི་ཡེ་ཤེས་སྐུ། །གདོད་ནས་འཕོ་འགྱུར་མེད་པའི་དཔལ་དུ་བཞུགས། ༢ །ཐུགས་རྗེའི་རིག་རྩལ་ཡེ་ཤེས་སྒྱུ་མ་རོལ། །མཐའ་ཀླས་བསྟན་འགྲོའི་དཔལ་མགོན་བླ་མ་རྗེ། །བཀྲྃ་ཤིསྃ་ཡོན་ཏན་དུ་མའི་དཔྃལ་འབྱོྃར་གྱིས། །འཇམ་མགོན་མི་ཕམ་རིན་པོ་ཆེས་ཐོག་མར་བསྩལ་བའི་མིང༌། མཛེས་པའི་གསང་གསུམ་རྡོ་རྗེ་ལྟར་བརྟན་ཤོག ༣ །ངོར་དཔོན་སློབ་བློ་གཏེར་དབང་པོས་བསྩལ་བའི་མིང༌། འཇྃམ་དཔལ་དབྱངྃས་དངོས་མཁྱེན་བརྩེའི་དབང་པོ་ཡི། །གསང་གསུམ་བྱིན་རླབས་བདུད་རྩིས་རེག་པ་ལས། །ཐོས་བསམ་སྒོམ་པའི་བློྃ་གྲོསྃ་ལང་ཚོའི་དཔལ། །རབྃ་རྒྱས་ལེགས་སྨོན་གྲུབ་ཁྱོད་ཞབས་བརྟན་ཤོག ༤ །ཨ་འཛོམ་འབྲུག་པ་རིན་པོ་ཆེས་སྐྱབས་སྡོམ་བསྩལ་སྐབས་མིང༌། ཨོྃ་རྒྱྃན་སངས་རྒྱས་གཉིས་པའི་རྒྱལ་ཚབ་ཆེས། །རྗེས་བཟུང་ཐེག་མཆོག་བདུད་རྩི་སྨིན་གྲོལ་གྱིས། །རིགས་ཁམས་ནུས་པ་གསོས་པས་ལམ་ངན་གྱི། །གཡང་ལས་སྐྱབྃས་ཁྱོད་འཕོ་མེད་ཞབས་བརྟན་གསོལ། ༥ །སྟོད་འདུལ་དགེ་ཚུལ་གྱི་སྡོམ་པ་གཞན་དགའ་རིན་པོ་ཆེ་ལས་ཐོབ་པའི་མིང༌། འཇིྃགས་མེདྃ་བཀའ་གཏེར་མདོ་སྔགས་རིག་པའི་གནས། །མང་ཐོས་རྣམ་དཀར་ལས་ཀྱི་ཆ་ཤས་རྫོགས། །བློ་གྲོས་དྲི་མེད་རབྃ་གསྃལ་ཟླྃ་བྃའི་མདངས། །ཐུབ་བསྟན་མཁའ་ལ་རྩེན་བཞིན་ཞབས་བརྟན་གསོལ། ༦ །རྒྱལ་ཚབ་རིན་པོ་ཆེ་ལས་སྨད་འདུལ་སྡོམ་རྒྱུན་ལྟར་དགེ་ཚུལ་ཐོབ་པའི་མིང༌། འགྱུརྃ་མེདྃ་སྡོམ་གསུམ་བདུད་རྩིས་རེག་པ་ལས། །བསླབྃ་གསུྃམ་ཁོ་ལག་རྫོགས་པའི་དཔག་བསམ་དབང༌། །ངེས་གསང་རྒྱྃལ་མཚྃན་མཛེས་པའི་མེ་འབྲས་ཀྱིས། །ཐུགས་རྒྱུད་དགའ་ཚལ་མཛེས་བཞིན་ཞབས་བརྟན་གསོལ། ༧ །རྒྱལ་ཚབ་རིན་པོ་ཆེ་ལས་བྱང་ཆུབ་སེམས་སྡོམ་ཐོབ་པའི་མིང༌། གཞྃན་ཕནྃ་སེམས་ཀྱི་ཡོན་ཏན་ཆེས་དར་ཏེ། །ཐེག་མཆོག་ཆོསྃ་ཀྱིྃ་སྤྱོད་པ་ཕལ་མོ་ཆེས། །སྒོ་གསུམ་རབ་དུལ་རྣམ་གྲོལ་མྱུྃ་གུྃ་ཡིས། །སྡོམ་གསུམ་རྫོགས་པར་མནོས་ཁྱོད་ཞབས་བརྟན་གསོལ། ༨ །ཁྱད་པར་མདོ་སྒྱུ་སེམས་ཀློང་མན་ངག་སྡེའི། །རྒྱལ་ཚབ་རིན་པོ་ཆེ་ལས་སྒྱུ་འཕྲུལ་ཞི་ཁྲོའི་དབང་ཐོབ་སྐབས་གསང་མིང༌། རྡོྃ་རྗེྃའི་སྨིན་གྲོལ་ནོར་བུའི་གསང་མཛོད་ཀྱིས། །ཐུགྃས་མཆོྃག་དཔལ་བེར་གཏམས་པས་རིག་འཛིན་བཞིར། །བགྲོད་པའི་རྩལྃ་ཆེན་རྫོགས་བཞིན་ཞབས་བརྟན་གསོལ། ༩ །མཁྱེན་བརྩེ་རིན་པོ་ཆེ་ལས་འཕགས་མའི་སྙིང་ཐིག་གི་དབང་ཆེན་སྐབས་ཀྱི་མིང༌། མཚོ་སྐྱེས་པྃདྨྃའི་རིང་ལུགས་བཀའ་བབ་བདུན། །ཐུགས་བསྐྱེད་དོན་ཡོད་ཞགས་པས་དབྃང་མཛད་པའི། །དཔའ་ཆེནྃ་འཇམ་མགོན་དགྱེྃས་པའིྃ་བྱིན་རླབས་ཀྱིས། །ཌཱ་ཀིའི་གསང་མཛོད་དབང་བསྒྱུར་ཞབས་བརྟན་གསོལ། ༡༠ །རྒྱལ་ཚབ་རིན་པོ་ཆེ་ལས་བླ་མ་ཡང་ཏིག་དབང་གི་གསང་མིང༌། སྣྃ་ཚོགྃས་ནུས་པ་འཛིན་པའི་སེམས་ཀྱི་གཤིས། །འོད་གསལ་རིག་པའི་ཀློང་དུ་རངྃ་གྲོྃལ་ནས། །གཞི་ལམ་འབྲས་བུའི་རྫོགས་ཆེན་ལྟ་སྒོམ་སྤྱོད། །རང་བྱན་ཚུད་པས་རྟག་ཏུ་ཞབས་བརྟན་གསོལ། ༡༡ །མཁྱེན་བརྩེ་རིན་པོ་ཆེས་ཞབས་བརྟན་ཞིག་གི་སྐབས་གནང༌། འཇིྃགས་མེྃད་བཀའ་གཏེར་བཤད་སྒྲུབ་ཕྲིན་ལས་ཚལ། །མཁྱེྃན་བརྩེྃའི་སྣང་བས་སྐྱེས་པའི་བཤད་སྒྲུབ་ཀྱི། །ཨུཏྤལ་དར་བས་སྐལ་བཟང་གདུང་སེལ་བའི། །ཐུགས་བསྐྱེད་འོྃད་ཟེྃར་འབར་བཞིན་ཞབས་བརྟན་གསོལ། ༡༢ །འཇྃམ་དཔྃལ་དབྱངས་ཀྱི་ཐུགས་རྗེའི་བྱིན་རླབས་ལས། །མཁས་ཀུན་དགྃའ་བའིྃ་བཅུ་ཕྲག་རིག་གཞུང་རྣམས། །ཐོས་ཤིང་བཤེྃས་གཉེནྃ་ཀུན་གྱིས་དབུགས་དབྱུང་ཐོབ། །མང་ཐོས་མཛད་ལ་མངའ་ཁྱོད་ཞབས་བརྟན་གསོལ། ༡༣ །བརྡ་སྤྲོད་བཏགས་མིང་རྒྱལ་ཚབ་རིན་པོ་ཆེས་བསྩལ། །མཚུངས་མེད་གྲུབ་པའི་སྲོལ་འབྱེད་ཕྱག་རྒྱ་ཆེ། །རྒྱལ་དབང་ཀརྨ་པས་གནང༌། ཀྃརྨྃ་བཀའ་བརྒྱུད་ལ་སོགས་ངེས་དོན་གྱི། །ལམ་བཟང་གསལ་མཛད་ཆོསྃ་ཀྱིྃ་ཉིྃ་མྃ་ཆེ། །རྡོ་རྗེ་ལང་ཚོའི་དཔྱིད་གྲུབ་ཞབས་བརྟན་གསོལ། ༡༤ །མཁྱེན་བརྩེ་རིན་པོ་ཆེས་རྒྱ་ཆེན་སྤྱོད་རྒྱུད་སེམས་སྡོམ་གྱི་མིང༌། བློྃ་གྲོྃས་སྤོབས་པ་མཚུངས་མེད་མི་ཕམ་རྗེ། །རིང་ལུགས་དྲིྃ་མེྃད་ལེགས་བཤད་སྤྲིན་མཛེས་ཀྱི། །རྒྱུན་བཟང་སྤེལ་བའི་ངོ་མཚར་གཟིྃ་བརྗིྃད་གློག །སྐལ་བཟང་རབ་དགའ་མཛད་བཞིན་ཞབས་བརྟན་གསོལ། ༡༥ །རྒྱལ་ཚབ་རིན་པོ་ཆེས་མཁྱེན་བརྩེའི་སྤྲུལ་སྐུར་མངའ་གསོལ་གནང་སྐབས་མིང༌། འཕོ་འགྱུརྃ་མཚན་མེྃད་ཆོས་དབྱིངས་བུམ་པ་སྐུར། །ཐེགྃ་མཆོྃག་ལམ་མཐར་སོན་པས་ཟག་པ་ཟད། །རིས་མེད་བསྟནྃ་པའིྃ་རྒྱལྃ་མཚྃན་མཁའ་ཁྱབ་ཏུ། །སྒྲེང་བཞིན་རྡོ་རྗེའི་སྐུར་གྲུབ་ཞབས་བརྟན་གསོལ། ༡༦ །གཏེར་སྟོན་གྱི་མིང༌། པྃདྨྃའི་རྒྱལ་ཚབ་འོད་གསལ་ཡེ་ཤེས་གཏེར། །མདོྃ་སྔགྃས་ཤིང་རྟ་ཆེན་པོ་འཇམ་མགོན་གསུམ། །ཡབ་སྲས་བརྒྱུད་པས་བྱིན་བརླབས་དབང་སྐུར་བའི། །ཕྲིན་ལས་གླིངྃ་བཞིར་བརྡལ་བཞིན་ཞབས་བརྟན་གསོལ། ༡༧ །འཆི་མེད་རྡོ་རྗེ་ལྟ་བུའི་གསང་བ་གསུམ། །པད་འབྱུང་བི་མ་ཐང་སྟོང་རྒྱལ་བཞིན་དུ། །སྐྱེ་འཆིའི་ཉེས་བྲལ་འཕོ་ཆེན་རྡོ་རྗེའི་སྐུར། །ནམ་མཁའ་ཇི་སྲིད་བཞུགས་པར་གསོལ་བ་འདེབས། ༡༨ །བླ་མའི་ཐུགས་བསྐྱེད་སྨོན་ལམ་ཉི་ཟླའི་འགྲོས། །སློབ་མའི་དད་དམ་ལྟ་སྤྱོད་དག་པའི་མཁར། །ནམ་ཡང་མི་འབྲལ་ཕྲིན་ལས་སྣང་བ་ཡིས། །རྒྱལ་བསྟན་ཉིན་མོར་བྱེད་བཞིན་ཞབས་བརྟན་གསོལ། ༡༩ །ཚེ་མཐའ་ཡས་པས་རྡོ་རྗེའི་སྲོག་རྩ་གྲུབ། །རྣམ་པར་རྒྱལ་མས་བདུད་བཞིའི་དཔུང་ལས་རྒྱལ། །ཡིད་བཞིན་འཁོར་ལོས་འགལ་རྐྱེན་ཀུན་སྲུང་བཞིན། །ཚེ་དང་ཡེ་ཤེས་རྒྱས་པས་ཞབས་བརྟན་གསོལ། ༢༠ །འཆི་མེད་ཌཱ་ཀིའི་དབང་ཕྱུག་ཙཎྜ་ལཱི། །མནྡཱ་ར་བ་མ་གཅིག་གྲུབ་པའི་རྒྱལ། །མཁར་ཆེན་མཚོ་རྒྱལ་ལ་སོགས་ཚེ་སྦྱིན་མས། །འཕོ་མེད་བདེ་སྟོང་སྲོག་སྟེར་ཞབས་བརྟན་གསོལ། ༢༡ །རྡོ་རྗེའི་ཆོས་སྲུང་ལེགས་ལྡན་ཕྱག་བཞི་ཞལ། །མ་ནིང་ལྕམ་དྲལ་དབྱིངས་ཕྱུག་ཨེ་ཀ་ཛ། །བཀྲ་ཤིས་ཚེ་རིང་མཆེད་ལྔ་གཡུ་སྒྲོན་སོགས། །རྒྱུད་གསུམ་མེལ་ཚེས་རྟག་པར་ཞབས་བརྟན་གསོལ། ༢༢ །རབ་འབྱམས་སྐྱབས་གནས་རྒྱ་མཚོའི་བྱིན་མཐུ་དང༌། །དད་ལྡན་སློབ་མས་བདེན་ཚིག་གིས་བསྐུལ་བའི། །རྟེན་འབྱུང་ལེགས་ཚོགས་དཀར་ཕྱོགས་ཚེས་བཟང་གིས། །སྐུ་ཚེ་ཡར་ཟླ་ལྟར་འཕེལ་ཞབས་བརྟན་གསོལ། ༢༣ །རིགས་ཀུན་ཁྱབ་བདག་རྡོ་རྗེ་སེམས་དཔའི་ཚེ། །བདག་གིར་མཛད་པས་ནམ་མཁའ་ཇི་སྲིད་བར། །སྐུ་གསུང་ཐུགས་མཆོག་གཡོ་མེད་སེང་གེའི་ཁྲིར། །ཞིང་འདིའི་དཔལ་དུ་རྟག་པར་བཞུགས་གྱུར་ཅིག ༢༤ །ཅེས་པའང་སྔ་འགྱུར་རྒྱུད་འབུམ་རིན་པོ་ཆེས་གཙོས་ཟབ་རྒྱས་གདམས་པ་དུ་མའི་བཀའ་དྲིན་གྱིས་རྗེས་སུ་བསྐྱངས་པའི་གྲུབ་རིག་འཛིན་པའི་ཚོགས་རྗེ་ཀློང་ཆེན་ཡེ་ཤེས་རྡོ་རྗེའི་སྐུ་གསུང་ཐུགས་སྲས་མཁྱེན་ཡོན་རྨད་དུ་བྱུང་བའི་མཆོག་སྤྲུལ་པདྨ་དབང་རྒྱལ་ནས་ནན་ཏན་ཆེན་པོས་རང་མིང་ཐམས་ཅད་ཚང་བའི་ཞབས་བརྟན་དགོས་པར་གསུང་བསྐུལ་བཞིན། རྣམ་འདྲེན་བླ་མ་རྣམས་ཀྱིས་སྙན་པར་དྲིལ་བསྒྲགས་པའི་ཚིག་དང་མཐུན་པར་ལྷོ་ལྗོངས་ཆོས་ཀྱི་རྒྱལ་ཁབ་ནས། ཚེ་སྒྲུབ་གསང་བ་འདུས་པའི་རྡོ་རྗེའི་ཚེ་སྒྲུབ་པའི་རྣལ་འབྱོར་ལ་ཡིད་གཞོལ་བའི་སྐབས་ཚིགས་སུ་བཅད་པ་ཆོས་གཟུགས་ཀྱི་སྐུ་གཉིས་ལ་ཟག་མེད་སྡེ་ཚན་ཉེར་གཅིག་གིས་བརྒྱན་པའི་གྲངས་ལྡན་དུ་བྲིས་པ་འདིས་ཀྱང་བསྟན་འགྲོའི་དཔལ་དུ་གྱུར་པའི་སྐྱེས་བུ་དམ་པ་དང༌། བསྟན་པའི་སྦྱིན་བདག་རྣམས་ཀྱི་ཞབས་པད་བསྐལ་པ་རྒྱ་མཚོར་བརྟན་པའི་དགེ་མཚན་དུ་གྱུར་ཅིག །ཤྲཱི་བི་ཛ་ཡནྟུ། དགེའོ། ༈ ཀུན་ཁྱབ་འགྱུརྃ་མེདྃ་རང་བྱུང་རྡོ་རྗེ་སེམས། །གནས་ལུགས་སྟོན་མཛད་ཐེགྃ་མཆོྃག་རྫོགས་པ་ཆེའི། །རྩ་བ་ཡན་ལག་བསྟནྃ་པའིྃ་རྒྱལྃ་མཚྃན་མཆོག །སྒྲེང་མཛད་དཔལ་ལྡན་བླ་མར་གསོལ་བ་འདེབས། །ཞེས་པའང་རྒྱལ་དབང་པདྨའི་ཕྲིན་ལས་པ་ཟབ་གཏེར་སྤྱོད་པ་པད་རྒྱལ་གླིང་པས་ཆེད་དུ་བསྐུལ་བཞིན་རང་ཉིད་ཀྱི་བརྗོད་པ་དོན་དང་ལྡན་པར་གྱུར་ཅིག ༈ འགྱུརྃ་མེདྃ་བདེན་དོན་མངོན་གཟིགས་མཚོ་སྐྱེས་རྗེའི། །རིང་ལུགས་དྲི་མེད་ཐེགྃ་མཆོྃག་རྫོགས་པ་ཆེའི། །བསྟནྃ་པའིྃ་རྒྱལྃ་མཚྃན་སྲིད་མཐར་སྒྲེང་བཞིན་དུ། །ཞབས་པད་བརྟན་ཅིང་ཕྲིན་ལས་རྒྱས་གྱུར་ཅིག །རྒྱལ་ཀུན་ཡབ་གཅིག་འཇམ་དབྱངས་མཁྱེན་བརྩེའི་དབང༌། །རྡོ་རྗེ་གསུམ་གྱི་བྱིན་རླབས་བདུད་རྩི་ཡིས། །དབུགས་དབྱུང་རིས་མེད་བསྟན་འགྲོར་ལྷག་བསམ་ཅན། །འཇིགས་མེད་མཁྱེན་བརྩེའི་འོད་ཟེར་གསོལ་བ་འདེབས། །སངས་རྒྱས་ཀུན་གྱི་ཡེ་ཤེས་སྙིགས་འགྲོའི་ངོར། །དགེ་བའི་བཤེས་སྤྲུལ་རྟག་པར་དོན་མཛད་ཕྱིར། །མོས་གུས་རྒྱུན་མི་ཆད་པས་གསོལ་བཏབ་ན། །མངོན་སུམ་བྱིན་གྱིས་བརླབ་པར་མཛད་དུ་གསོལ། །ཚེ་རབས་ཀུན་ཏུ་མཚན་ལྡན་བླ་མ་ཡིས། །རྗེས་བཟུང་ཐེག་མཆོག་ལམ་གྱི་ཡོན་ཏན་གྱིས། །རྒྱུད་ཕྱུག་དོན་གཉིས་འབད་མེད་ལྷུན་གྲུབ་ནས། །དཔལ་མགོན་བླ་མའི་གོ་འཕང་མངོན་གྱུར་ཤོག །ཅེས་པའང་དགེ་སློང་བཟང་པོ་ནས་བསྐུལ་བའི་ངོར་འཕགས་ཡུལ་རྡོ་རྗེ་གདན་གྱི་གཙུག་ལག་ཁང་ཆེན་པོའི་ཞོལ་དུ་གནས་པའི་སྐབས་རྒྱལ་ཁམས་པ་འཇིགས་མེད་མཁྱེན་བརྩེའི་འོད་ཟེར་དུ་འབོད་པ་རྒན་པོས་བྲིས་པ་དགེ་ལེགས་འཕེལ། ༈ ཞབས་བརྟན་བདེན་ཚིག་གྲུབ་པའི་དབྱངས་སྙན་བཞུགས། ཨོཾ་སྭསྟི། རྩ་གསུམ་ཀུན་འདུས་པྃདྨྃ་འབྱུང་གནས་ཀྱི། །ཐུགས་རྗེའི་རང་གཟུགས་གརྃ་དབྃང་སྤྱན་རས་གཟིགས། །འཇམ་དཔལ་གཞོན་ནུའི་འོདྃ་གསྃལ་ཡེ་ཤེས་གཟུགས། །གསང་བདག་མདོྃ་སྔགསྃ་གླིངྃ་པྃ་ཞབས་བརྟན་གསོལ། །འགྱུརྃ་མེདྃ་གདོད་མའི་གཞི་ལས་མ་གཡོས་པར། །གང་འདུལ་ཕྲིན་ལས་བསམ་ཡས་རོལ་རྩེད་ཀྱིས། །ཐེགྃ་མཆོྃག་བསྟནྃ་པའིྃ་རྒྱལྃ་མཚྃན་སྒྲེང་བཞིན་དུ། །ཞབས་བརྟན་ཕྲིན་ལས་དར་རྒྱས་ཡུན་གནས་ཤོག །སྐྱེ་འཆིའི་འཇིགས་མེད་རྟག་བརྟན་རྡོ་རྗེའི་སྐུ། །མཁྱེནྃ་བརྩེྃའི་ནུས་ལྡན་ཆོས་སྒྲ་སྒྲོགས་པའི་གསུང༌། །ཀུན་བཟང་ཐུགས་ཀྱི་འོདྃ་ཟེརྃ་རབ་གསལ་མགོན། །ཞབས་བརྟན་སྔ་འགྱུར་བསྟན་མཆོག་འཕེལ་རྒྱས་ཤོག །ཅེས་པའང་རང་བྱུང་པདྨའི་ཞབས་ཀྱིས་གདོད་ནས་གྲུབ་པའི་རྡོ་རྗེའི་གནས་དང་གཉིས་སུ་མེད་པར་བསྔགས་པའི་སྦས་ཡུལ་འབྲས་ལྗོངས་བྲག་དཀར་བཀྲ་ཤིས་ལྡིངས་སུ་བླ་མ་དགོངས་པ་འདུས་པའི་ཚོགས་སྒྲུབ་དབང་དང་བཅས་པའི་གནས་འབྲེལ་གྱི་སྐབས་གསང་ཆེན་པདྨ་ཡང་རྩེའི་རྡོར་སློབ་མཁའ་སྤྱོད་སྤྲུལ་པའི་སྐུ་དང་སྒྲུབ་སྲས་རིན་པོ་ཆེ་སྐུ་མཆེད་ཀྱིས་མཎཌལ་རྟེན་བཅས་ཆེད་དུ་གསུང་བསྐུལ་བཞིན་བླ་མ་རྩ་གསུམ་ལ་གསོལ་བ་བཏབ་སྟེ་རང་ཉིད་ཀྱིས་བྲིས་པ་དོན་དང་ལྡན་པར་གྱུར་ཅིག ༈ ཇིགས་མེད་མཁྱེན་བརྩེའི་འོད་ཟེར་དཔག་ཡས་གཏེར། །ཀུན་མཁྱེན་རྒྱལ་བ་གཉིས་པའི་རིང་ལུགས་ཀྱི། །རྗེས་ཞུགས་ཐེག་མཆོག་བསྟན་པའི་རྒྱལ་མཚན་འཛིན། །བཀྲ་ཤིས་དཔལ་འབྱོར་ཞབས་པད་བརྟན་གྱུར་ཅིག །གསང་གསུམ་དྲི་མེད་བདུད་རྩིའི་དཔལ་ལྟར་བརྟན། །གསང་སྔགས་ལམ་གྱི་སྨིན་གྲོལ་དགའ་སྟོན་འཁོར། །གསང་ཆེན་ཆོས་ཀྱིས་འགྲོ་ཀུན་རྣམ་གྲོལ་བའི། །གསང་བ་མི་ཟད་དབྱིངས་སུ་བྱང་ཆུབ་ཤོག །ཅེས་འབྲུག་པ་རིན་ཆེན་རྡོ་རྗེའི་བསྐུལ་ངོར་སྨྲས་པའོ། ༈ ཞབས་བརྟན་གསོལ་འདེབས་རྡོ་རྗེའི་བདེན་ཚིག་བཞུགས། ཨོཾ་ཨ་མཱ་ར་ཎི་ཨཱ་ཡུ་ཏིཥྛནྟུ། ཚེ་མཐའ་ཡས་དང་གར་དབང་སྤྱན་རས་གཟིགས། །རྟ་མཆོག་རོལ་པ་གསང་བ་ཡེ་ཤེས་རྩལ། །རབ་འབྱམས་སྐྱབས་ཀུན་འདུས་ཞལ་མཚོ་སྐྱེས་རྗེའི། །བྱིན་རླབས་དགེ་མཚན་མེ་ཏོག་ཆར་དུ་བསྙིལ། །དཔལ་ལྡན་བླ་མའི་འགྱུརྃ་མེདྃ་གསང་གསུམ་ཁམས། །ཚེ་སྦྱིན་ཡིད་བཞིན་འཁོར་ལོས་བྱིན་བརླབས་ནས། །བར་ཆད་བདུད་སྡེའི་གཡུལ་ལས་རྣམ་རྒྱལ་ཏེ། །མདོྃ་སྔགསྃ་རྒྱལ་བསྟནྃ་རིན་ཆེན་འཛིྃན་གྱུར་ཅིག །པདྨ་དྲག་པོ་བདེ་ཆེན་བཞད་པའི་གཟིས། །མཐའ་དམག་རྒྱལ་འགོང་བར་ཆད་དབྱིངས་སུ་ཞི། །རྡོ་རྗེ་གཞོན་ནུའི་འབར་བའི་ཕུར་བུ་ཡིས། །དམ་སྲི་ཡིད་སྲུབ་ཕམ་ནས་སྲུང་མཛད་གསོལ། །རླབས་ཆེན་རྒྱལྃ་སྲསྃ་སྤྱོད་པའི་གོ་ཆ་བརྟན། །ལུང་རྟོགས་ཆོསྃ་སྒོ་འཆད་རྩོད་རྩོམ་ནུས་ཀྱིྃ། །བློྃ་གྲོྃས་སྤོབས་པའི་སྣང་བས་མཛེས་བཞིན་དུ། །ནམ་མཁའ་ཇི་སྲིད་རྡོ་རྗེའི་སྐུར་བཞུགས་གསོལ། །འཁོར་ལོའི་མགོན་ཁྱོད་ཞབས་པད་བསྐལ་རྒྱར་བརྟན། །དད་སྦྱིན་སློབ་མའི་ལྟ་སྤྱོད་རྣམ་པར་དག །ཐེག་མཆོག་ཆོས་རྔ་རྒྱུན་མི་ཆད་པ་ཡིས། །སྨིན་གྲོལ་ཐུབ་བསྟན་ཆོས་འཁོར་གླིང་མཛེས་ཤོག །ཅེས་པའང་མཚོ་སྐྱེས་རྒྱལ་བའི་གདུང་འཛིན་སྔགས་བན་རྒན་པོ་པདྨ་གར་དབང་འོད་གསལ་མདོ་སྔགས་གླིང་པས་རྩེ་གཅིག་གུས་པས་ཇི་ལྟར་སྨོན་པ་བཞིན་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། ༈ འགྱུརྃ་མེདྃ་གནས་ལུགས་མངོན་གཟིགས་རིག་པ་འཛིན། །ཀུནྃ་བཟྃང་ཐུགས་ཀྱི་བསྟན་པའི་བཤད་སྒྲུབ་དཔལ། །ཕྲིན་ལས་དབྃང་གི་རྒྱལྃ་པོས་སྤེལ་བཞིན་དུ། །ཞབས་པད་བརྟན་ཅིང་བཞེད་དོན་ལྷུན་གྲུབ་ཤོག །ཅེས་སྔ་འགྱུར་རྙིང་མའི་གདན་ས་དང་པོ་ཀ་སྤུངས་ཟངས་མདོག་དཔལ་རིའི་གྲྭ་ཚང་གི་རྒྱུན་གསུང་དུ་གསུང་བསྐུལ་བཞིན་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་གསོལ་བ་བཏབ་པའོ། ༈ ཞབས་བརྟན་འཆི་མེད་རྟག་པའི་དབྱངས་སྙན་བཞུགས། ཨོཾ་སྭསྟི། དཀོྃན་མཆོྃག་རྩ་གསུམ་བདེན་པའི་ཉི་འོད་ཀྱིས། །ངེས་དོན་བསྟནྃ་འཛིྃན་པདྨོ་ལ་རེག་པས། །ཀུནྃ་བཟྃང་སྤྱོད་པ་རྒྱ་མཚོའི་འདབ་སྟོང་འཛུམ། །ཕན་བདེའི་ཕྲིནྃ་ལསྃ་ཉི་མ་འབར་གྱུར་ཅིག །ཐུགས་བསྐྱེད་དུས་བབ་ངོ་མཚར་ཟླ་གཞོན་ལས། །སྙིགས་བའི་སྨག་རུམ་སེལ་བའི་འོད་དཀར་གྱིས། །དོན་གཉིས་ལྷུནྃ་གྱིས་གྲུབྃ་པའི་རླབས་ཕྲེང་བརྒྱས། །སྒྲུབ་བརྒྱུད་བསྟན་པའི་མངའ་ཐང་རྒྱས་མཛད་གསོལ། །དཔལ་ལྡན་བླ་མའི་ཞབས་པད་བསྐལ་བརྒྱར་བརྟན། །དད་ལྡན་སློབ་མའི་ཆོས་མཐུན་མཛད་བཟང་དར། །དོན་ལྡན་བཤད་སྒྲུབ་ལས་ཀྱི་དགའ་སྟོན་གྱིས། །རྫོགས་ལྡན་གསར་པའི་དཔལ་ཡོན་དར་གྱུར་ཅིག །ཅེས་པའང་བསླབ་ལྡན་འབྲི་གུང་མཁན་པོ་དཀོན་མཆོག་རྟོགས་གྲོལ་ནས་ལྷ་རྫས་ཀྱི་རྟེན་བཅས་གསུང་བསྐུལ་བཞིན་སྔགས་རིག་འཆང་བ་མངྒ་ལ་ཤྲཱི་བྷཱུ་ཏིས་ནག་ཟླའི་དཀར་ཕྱོགས་ཀྱི་ཚེས་བཅུ་ལ་གསོལ་བ་བཏབ་བཞིན་དོན་ལྡན་དུ་གྱུར་ཅིག ༈ ཞབས་བརྟན་གསོལ་འདེབས་འཆི་མེད་རྡོ་རྗེའི་དབྱངས་སྙན་བཞུགས། འཆི་མེད་ཡེ་ཤེས་རྡོ་རྗེའི་སྒྱུ་འཕྲུལ་གར། །འཆི་མེད་ཕྱོགས་དུས་སྐྱབས་གནས་རྒྱ་མཚོ་ཡི། །འཆི་མེད་ཚེ་དང་ཡེ་ཤེས་མཐུ་བྱིན་གྱིས། །འཆི་མེད་རྡོ་རྗེའི་བདེན་ཚིག་འགྲུབ་གྱུར་ཅིག །འཇྃམ་དཔལ་དབྱངྃས་སོགས་སྲས་བཅས་རྒྱལ་ཀུན་གྱི། །མཁྱེན་བརྩེའི་ཡེ་ཤེས་རིས་མེད་ཐུབྃ་བསྟནྃ་སྲོག །ཟབ་རྒྱས་ཆོསྃ་ཀྱིྃ་ཤིང་རྟ་ཆེན་པོ་ཉིད། །ཕྲིན་ལས་རྒྱྃ་མཚོྃའི་མཐར་ཁྱབ་ཞབས་བརྟན་གསོལ། །གསན་བསམ་སྒོམ་པའི་ཡོན་ཏན་མཐའ་དག་རྫོགས། །ཡོངས་རྫོགས་རྒྱལ་བསྟན་འཛིན་སྐྱོང་སྤེལ་མཛད་ཅིང༌། །མཐའ་ཀླས་གདུལ་བྱའི་རེ་བ་ཆོས་བཞིན་སྐོང༌། །འཛམ་གླིང་མཛེས་པའི་རྒྱན་དུ་རྟག་བཞུགས་གསོལ། །ཞེས་འཇམ་དབྱངས་བླ་མ་དགྱེས་པའི་འབངས་མཚོ་སྐྱེས་རྒྱལ་བའི་གདུང་འཚོབ་པདྨ་གར་དབང་མདོ་སྔགས་གླིང་པའམ་ཡོངས་སུ་གྲགས་པའི་མིང་བཀྲ་ཤིས་དཔལ་འབྱོར་དུ་འབོད་པས་ས་སྐྱ་བདག་ཁྲི་རིན་པོ་ཆེའི་མཚན་གསོལ་དང་མཐུན་པར་ཞབས་བརྟན་དུ་དབང་ཆེན་སྤྲེལ་ལོ་སྤྲེལ་ཟླའི་ཚེས་བཅུར་སྐུ་ཚབ་ཡིད་བཞིན་ནོར་བུ་དངོས་གྲུབ་དཔལ་འབར་མདུན་གསོལ་སྨོན་རྩེ་གཅིག་པས་བྲིས་པ་བཞིན་འགྲུབ་པར་གྱུར་ཅིག ༈ ཨོཾ་སྭསྟི། འཇྃམ་དབྱངྃས་མཁྱེན་པའི་ཆུ་གཏེར་ལས་འཁྲུངས་ཤིང༌། །ཆོསྃ་ཀྱིྃ་རྒྱྃ་མཚོྃའི་མངའ་བདག་རྡོ་རྗེ་ཅན། །རིགས་གསུམ་དབྱེར་མེད་མཆོག་གི་སྤྲུལ་པའི་སྐུ། །གསང་གསུམ་འཕོ་མེད་རྟག་པར་བཞུགས་གསོལ་འདེབས། །སྡོམ་གསུམ་ཚུལ་ཁྲིམས་རྣམ་དག་གསེར་གྱི་གཞིར། །མཐའ་ཀླས་གསན་བསམ་སྒོམ་པའི་ཡོན་ཏན་གཏེར། །མཐར་སོན་ནོར་བུའི་མཛོད་ལྡན་རོལ་མཚོས་མཛེས། །མཆོག་གི་སྤྲུལ་སྐུའི་གསང་གསུམ་རྟག་བརྟན་ཤོག །བཤད་རྒྱུད་ཀ་ཆེན་བཅུ་ཡི་རིང་ལུགས་སྤེལ། །སྒྲུབ་བརྒྱུད་ཤིང་རྟའི་སྨིན་གྲོལ་རྒྱུན་མི་ཆད། །མཁས་བཙུན་གྲུབ་པའི་འདུས་ཚོགས་རྟག་སྐྱོང་མཛོད། །ངོ་མཚར་སྣང་བ་རྟག་ཏུ་རྒྱལ་གྱུར་ཅིག །ཅེས་མཆོག་གི་སྤྲུལ་པའི་སྐུའི་ཞབས་བརྟན་དུ་འབྲུག་བཙུན་ཤེས་རབ་རྒྱལ་མཚན་ནས་རྟེན་བཅས་བསྐུལ་བ་བཞིན་རྗེ་བཙུན་འཇམ་མགོན་ཡབ་སྲས་དགྱེས་པའི་འབངས་ཐེག་མཆོག་བསྟན་པའི་རྒྱལ་མཚན་གྱིས་བྲིས་ཏེ་སྨོན་པ་བཞིན་འགྲུབ་པར་གྱུར་ཅིག ༈ ཨོཾ་སྭསྟི། ཐུབ་བསྟན་སྙིང་པོ་ལུང་རྟོགས་ཆོསྃ་ཀྱིྃ་མཛོད། །ཡང་དག་ཐོས་བསམ་སྒོམ་པས་འཛིན་སྤེལ་མཐུས། །བཤད་སྒྲུབ་ལས་ཀྱི་ཕྲིན་ལས་རྒྱྃ་མཚོྃའི་མཐར། །ཁྱབ་པས་འགྲོ་ཀུན་ཕན་བདེའི་དཔལ་སྟེར་ཤོག །ཅེས་པའང་མི་ཉག་སྐྱིད་དགོན་སེར་སྐྱ་ཡོངས་ནས་འཕྲིན་ཡིག་གི་བསྐུལ་མ་གནང་བ་བཞིན་རིས་མེད་པའི་བསྟན་འགྲོ་ལ་དད་དང་ལྷག་བསམ་དཀར་བ་ཕྱོགས་མེད་ཀྱི་བྱ་བྲལ་བ་དིལ་མགོ་མཁྱེན་བརྩེ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ཆེད་དུ་བརྗོད་པ་དཔལ་ལྡན་བླ་མའི་ཞབས་པད་བརྟན་ཅིང་མཛད་ཕྲིན་ཕྱོགས་མཐར་ཀུན་ཏུ་ཁྱབ་པའི་རྒྱུར་གྱུར་ཅིག ༈ ཨོཾ་སྭསྟི། ཐུབྃ་བསྟནྃ་ཡོངས་རྫོགས་མངའ་བདག་མཁྱེན་བརྩེའི་གར། །ཟབ་རྒྱས་ལུང་རྟོགས་ཆོསྃ་ཀྱིྃ་རྒྱྃ་མཚོྃ་ཆེ། །གསན་བསམ་སྒོམ་པས་དབང་བསྒྱུར་མཆོག་སྤྲུལ་གྱི། །ཐུགས་བསྐྱེད་སྐུ་ཚེ་ཕྲིན་ལས་མཐར་ཕྱིན་ཤོག །ཅེས་པའང་ལྷོ་འབྲུག་བུམ་ཐང་སྐུ་རྗེས་རྡོ་རྗེ་བརྩེགས་པའི་ཀེའུ་ཚང་དུ་སྔ་འགྱུར་བཀའ་མའི་ཆོས་ཀྱི་མཆོད་སྤྲིན་འབུལ་བའི་ཚེ་གུས་སློབ་མངྒ་ལ་ཤྲཱི་བྷཱུ་ཏིས་གསོལ་བ་བཏབ་པའོ། ༈ འཇམ་མགོན་མཆོག་གི་སྤྲུལ་སྐུ་རིན་པོ་ཆེའི་ཞབས་བརྟན་གསོལ་འདེབས་བཀྲ་ཤིས་གྲུབ་པའི་དབྱངས་སྙན་ཞེས་བྱ་བ་བཞུགས་སོ། ཨོཾ་སྭསྟི་ཤྲཱི་བི་ཛ་ཡནྟུ། རྒྱལ་ཀུན་ཡེ་ཤེས་སྐུ་གཅིག་འཇྃམ་དཔལ་དབྱངྃས། །ཐུབྃ་བསྟནྃ་ཡོངས་རྫོགས་འཛིན་པའི་ཤིང་རྟ་ཆེ། །ཆོསྃ་ཀྱིྃ་རྒྱྃ་མཚོྃ་གསན་བསམ་སྒོམ་པ་ཡིས། །ཐུགས་ཀྱི་དཔལ་བེར་བསྐྱིལ་ལ་གསོལ་བ་འདེབས། །འཆི་མེད་རྩ་གསུམ་ལྷ་ཡིས་རྗེས་སུ་བཟུང༌། །འཆི་མེད་གསང་གསུམ་འཕོ་མེད་རྡོ་རྗེའི་སྐུ། །འཆི་མེད་བི་མ་མི་ཏྲ་ཐང་རྒྱལ་བཞིན། །འཆི་མེད་རྡོ་རྗེའི་སྐུ་རུ་རྟག་བཞུགས་གསོལ། །མཚུངས་མེད་མཁྱེན་བརྩེ་ནུས་པའི་ཉིན་བྱེད་ཀྱིས། །བཤད་སྒྲུབ་ལས་ཀྱི་པདྨོའི་དགའ་ཚལ་བཞད། །མཐའ་ཀླས་གདུལ་བྱའི་བུང་བ་རྟག་རྩེན་པས། །རིས་མེད་རྒྱལ་བསྟན་དགའ་ཚལ་རྒྱས་མཛད་གསོལ། །ཞེས་གངས་ཅན་མཁས་གྲུབ་ཡོངས་ཀྱི་རྒྱལ་པོ་འཇམ་མགོན་མཁྱེན་བརྩེ་དབང་པོ་དངོས་བྱོན་ཁྱབ་བདག་རྡོ་རྗེ་སེམས་དཔའ་འཇམ་དབྱངས་ཆོས་ཀྱི་བློ་གྲོས་རིན་པོ་ཆེའི་མཆོག་སྤྲུལ་མདོ་ཁམས་ཤར་ཕྱོགས་སུ་ཞབས་ཀྱི་པདྨོ་བཀོད་པའི་ཚེ་རྒྱལ་བསྟན་སྤྱི་དང་དཔལ་ལྡན་ས་ངོར་ཚར་གསུམ་གྱི་རིང་ལུགས་འཛིན་མཛད་ཆོས་རྒྱལ་སྡེ་དགེའི་རྒྱལ་ས་ལྟེ་བ་ལྷུན་གྲུབ་སྟེང་གི་རྡོར་འཛིན་རྣམས་དང༌། རྫོང་སར་བཀྲ་ཤིས་ལྷ་རྩེའི་མཁན་པོ་རྡོར་འཛིན་རྣམས་ཀྱི་གསུང་གིས་དངོས་བརྒྱུད་ནས་བསྐུལ་བ་དང༌། རང་ཉིད་ཀྱང་དད་སྤྲོ་རྣམ་པར་འཕེལ་བས་བྲིས་པ། སླར་ཡང་ཁ་བཞི་ལྷོ་ཡི་སྨན་ལྗོངས་ཀྱི་རྒྱལ་ཁབ་ཀྱི་བྱེ་བྲག་བསམ་འགྲུབ་ཆོས་རྫོང་ནས་མཚོ་སྐྱེས་རྒྱལ་བའི་ཞལ་སྐྱིན་ཡབ་མེས་འཇིགས་བྲལ་ཡེ་ཤེས་རྡོ་རྗེ་འགྲོ་འདུལ་གླིང་པའི་ཟབ་གཏེར་གྱི་སྨིན་གྲོལ་རྒྱ་མཚོའི་ཆོས་སྒོ་ཕྱེ་པའི་སྐབས་ལྷོ་མོན་གྱིས་དད་སློབ་ཡོངས་ནས་བསྐུལ་བའི་ཚེ་རྗེ་བཙུན་བླ་མ་སྐུ་གོང་འོག་གི་དགྱེས་པར་བསྐྱངས་པའི་འབངས་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ལྷ་རྫས་ནང་མཛོད། སྐུ་གསུང་ཐུགས་རྟེན་དང་བཅས་ས་སྦྲུལ་སྨིན་ཟླའི་འཕེལ་ཚེས་བཞི་ཟླ་བ་གྲོ་བཞིན་གྱི་གྲུབ་པའི་སྦྱོར་བ་ཉིན་ཕུལ་ནས་སྨོན་པ་བཞིན་འགྲུབ་སྟེ་སྐུ་ཚེ་དང་ཕྲིན་ལས་མཐར་ཕྱིན་པའི་རྟེན་འབྱུང་དུ་འགྱུར་བར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། ༈ གྲུབ་དབང་རིན་པོ་ཆེའི་ཞབས་བརྟན་འཆི་མེད་རྡོ་རྗེའི་དབྱངས་སྙན་ཞེས་བྱ་བ་བཞུགས་སོ། ཨོཾ་སྭ་སྟི། འཇིགྃས་མེདྃ་རྒྱལ་བའི་སྤྱི་གཟུགས་མཚོ་སྐྱེས་རྗེ། །རབ་འབྱམས་སྒྱུ་འཕྲུལ་རྡོ་རྗེ་ཚེ་ཡི་ལྷ། །བདེ་ཆེན་གནས་གསུམ་ཌཱ་ཀི་ཆོས་སྲུང་གིས། །རྣམ་དག་སྨོན་པའི་བདེན་ཚིག་གྲུབ་པར་མཛོད། །ཐུབ་བསྟན་བཀའ་གཏེར་ཡོངས་རྫོགས་སྔ་འགྱུར་ཆོས། །བཤདྃ་སྒྲུབྃ་ལས་ཀྱི་འཁོར་ལོས་སྤེལ་མཛད་དེ། སྨིན་གྲོལ་ཆོསྃ་ཀྱིྃ་སྒྲྃ་དབྱངྃས་རྒྱུན་མི་འཆད། །བསྟན་འགྲོའི་དཔྃལ་གྱུར་བཟྃང་པོརྃ་ཞབས་བརྟན་གསོལ། །ཕྱི་ནང་བར་ཆད་གཡུལ་ལས་རྣམ་པར་རྒྱལ། །དཀར་ཕྱོགས་ལྷ་མིའི་ལེགས་ཚོགས་སྤེལ་ཞིང་སྲུང༌། །དོན་གཉིས་གྲུབ་པའི་དགེ་མཚན་རབ་རྒྱས་པའི། །བཀྲ་ཤིས་ཕྱོགས་ལས་རྣམ་པར་རྒྱལ་གྱུར་ཅིག །ཅེས་ས་རྟ་སྨིན་ཟླ་༡༠དུས་ཚེས༢༥་དགེ་བར་འཕགས་མའི་སྙིང་ཐིག་གི་བརྟན་བཞུགས་སྐབས་འཆི་མེད་སྐུ་གསུང་ཐུགས་རྡོ་རྗེའི་རྟེན་དང་བཅས་ཏེ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ལྷག་བསམ་དག་པས་སྨོན་པ་བཞིན་འགྲུབ་པར་གྱུར་ཅིག ༈ རབ་འབྱམས་སྤྲུལ་པའི་སྐུའི་ཡུན་འཚོའི་བདེན་ཚིག་འཆི་མེད་ཡེ་ཤེས་གྲུབ་པའི་དབྱངས་སྙན་ཞེས་བྱ་བ་བཞུགས། ཨོཾ་སྭ་སྟི་ཤྲཱི་བི་ཛ་ཡནྟུ། གདོད་ནས་འགྱུར་མེད་ཀུན་ཁྱབ་གཉུག་མའི་ཚེ། །མངོན་གྱུར་བདེ་ཆེན་རྟག་པའི་ལང་ཚོའི་དཔྱིད། །འཆི་མེད་གྲུབ་པའི་ཚོགས་རྗེ་སྲིད་ཞིའི་བདག །མཚོ་སྐྱེས་བླ་མས་བདེན་ཚིག་གྲུབ་པར་མཛོད། །ཕུལ་བྱུང་ཐུགས་བསྐྱེད་བདུད་རྩིའི་སྤྲིན་དཀར་ལས། །ཉམ་ངའི་གདུང་སྐྱོབ་ཐུགས་རྗེའི་འདོད་དགུའི་ཆར། །བདེ་གཤེགས་མྱ་ངན་མེད་ཀྱི་སྤྲུལ་པའི་སྐུ །བསྟན་འགྲོའི་དབྱར་གྱི་དཔལ་དུ་ཞབས་བརྟན་གསོལ། །མཁྱེན་བཟང་རྡོ་རྗེ་རྣོན་པོའི་ཡེ་ཤེས་གཏེར། །བརྩེ་ཆེན་ཐུགས་རྗེ་སྔ་འགྱུར་བསྟན་པའི་མགོན། །སྟོབས་བཅུའི་ནུས་པས་བདུད་སྡེ་མཐར་མཛད་པའི། །མཁས་གྲུབ་རིག་འཛིན་དབང་པོ་ཞབས་བརྟན་གསོལ། །མཐའ་ཀླས་ཆོས་ཚུལ་རྒྱ་མཚོར་ཐོས་བསམ་མཛད། །ཕུལ་བྱུང་འཆད་རྩོད་རྩོམ་པས་ཕས་རྒོལ་འཇོམས། །ཐ་སྙད་རིག་པའི་སྒོ་འབྱེད་མཚུངས་ཟླ་བྲལ། །རབ་འབྱམས་སྨྲ་བའི་སེང་གེ་ཞབས་བརྟན་གསོལ། །ཁྱད་པར་སྔ་འགྱུར་བཀའ་གཏེར་རིང་ལུགས་ལ། །ཕྲིན་ལས་དཔུང་བཞིས་སྲུང་བའི་གོ་ཆ་ཅན། །མདོ་སྔགས་བསྟན་གཉིས་ཉི་ཟླའི་སྣང་བ་བརྒྱས། །སྐྱོང་བའི་རིག་འཛིན་ཆེན་པོར་ཞབས་བརྟན་གསོལ། །བཀྲ་ཤིས་མཚན་གྱི་དབྱངས་སྙན་གཡས་འཁྱིལ་དུང༌། །རིང་འཚོའི་ཚེ་དང་ལེགས་བྱས་དཔལ་ཡོན་སྒྲས། །རྟག་མཛེས་མངའ་ཐང་ས་འདིར་འཕོས་པའི་མོད། །རྒྱལ་བསྟན་ཕྱོགས་མཐར་སྤེལ་བཞིན་ཞབས་བརྟན་གསོལ། །དུས་གསུམ་ཀུན་མཁྱེན་རྒྱལ་དབང་ཀྃརྨྃ་པས། །སྒྲིབ་བྲལ་ཡེ་ཤེས་གཟིགས་པའི་རྡོ་རྗེའི་བཀས། །མཆོག་སྤྲུལ་མཚན་གྱི་དྲིལ་ཆེན་སྙན་བསྒྲགས་པ། །བཤདྃ་སྒྲུབྃ་ཆོསྃ་ཀྱིྃ་སེངྃ་གེྃ་ཞབས་བརྟན་གསོལ། །བཀའ་གཏེར་བསྟན་པའི་མངའ་བདག་གནས་བརྟན་ཆེ། །ངགྃ་གི་དབྃང་ཕྱུག་འཇིག་རྟེན་མིག་གཅིག་པུའི། །ཤིང་རྟའི་ལམ་སྲོལ་ཆོསྃ་འདུལ་བདུད་རྩིའི་དཔྃལ། །སྒོ་གསུམ་དཔྱིད་དུ་ཐོབ་བཞིན་ཞབས་བརྟན་གསོལ། །སྲས་བཅས་རྒྱལ་བའི་བགྲོད་པ་གཅིག་པུའི་ལམ། །གཞན་ཕན་འདོད་འབྱུང་ཡིད་བཞིན་དབང་གི་རྒྱལ། །སྐལ་བཟང་ལྷ་དབང་གཙུག་གི་རྒྱན་ཐོབ་པས། །ཟབ་རྒྱས་སྤྱོད་པས་མཛེས་བཞིན་ཞབས་བརྟན་གསོལ། །རྡོ་རྗེའི་རིག་འཛིན་མཁས་གྲུབ་དུ་མ་ཡིས། །རྡོ་རྗེའི་དབང་གི་བྱིན་རླབས་ཉིན་བྱེད་ཀྱིས། །རྡོ་རྗེ་བཞི་ཡི་དཀྱིལ་འཁོར་སྨིན་བྱས་པས། །རྡོ་རྗེའི་རིག་འཛིན་མཆོག་ཏུ་ཞབས་བརྟན་གསོལ། །ཁྱད་པར་འཕགས་པའི་རྣམ་ཐར་ཉིན་མོར་བྱེད། །ངོ་མཚར་སྣང་བའི་གཟི་བྱིན་མ་ཉམས་པས། །བསྟན་འགྲོའི་དགེ་མཚན་ཨུཏྤལ་རབ་རྒྱས་པ། །དོན་གཉིས་སྦྲང་རྩིས་ལྕི་བཞིན་ཞབས་བརྟན་གསོལ། །བླ་མའི་ཐུགས་བསྐྱེད་དབྱར་གྱི་དཔལ་འབར་བས། །སློབ་མའི་དད་དམ་རྣམ་བཀྲའི་མེ་ཏོག་ཚལ། །ཕུན་སུམ་ཚོགས་པའི་རྟེན་འབྲེལ་རྨད་བྱུང་བས། །ཕན་བདེའི་དགའ་སྟོན་ནུབ་མེད་རྟག་བརྟན་ཤོག །རྒྱལ་བསྟན་སྙིང་པོ་བཤད་སྒྲུབ་ལས་ཀྱིས་འཛིན། །བཟང་པོའི་ཕྲིན་ལས་སྐབས་གསུམ་ཀླུང་བཞིན་རྒྱས། །ཕྲིན་ལས་མཁའ་དང་མཉམ་བཞིན་གསང་བ་གསུམ། །རྡོ་རྗེའི་ཆོས་བདུན་ངོ་བོར་རྟག་བརྟན་ཤོག །ཅེས་པའང་སྔ་འགྱུར་བཀའ་གཏེར་གྱི་རིང་ལུགས་ལ་རྒྱུ་མཚན་ཤེས་ཤིང་དམ་པའི་ཡོན་ཏན་རྒྱན་གྱིས་སྤ་བ་གྲུབ་སྲས་ཨོ་རྒྱན་སྟོབས་རྒྱལ་ནས་འཇམ་མགོན་བླ་མ་རིན་པོ་ཆེའི་ཕྱག་བསྟར་རིན་ཆེན་སྨན་གྱི་ནོར་བུའི་རྟེན་དང་བཅས་བྲིས་གཞིའི་ཤོག་དཀར་བསྩལ་བ་བཞིན་སྐུ་ཕྲེང་གོང་མ་རྣམས་ཀྱི་རྣམ་ཐར་རྗེས་སུ་སློབ་པར་གདམས་པའི་བརྗོད་བྱ་བྱས་ཏེ་འཇམ་མགོན་ཆོས་ཀྱི་རྒྱལ་པོ་རྣམ་པ་གསུམ་གྱི་ཕྲིན་ལས་གདུགས་དཀར་པོའི་གྲིབ་བསིལ་ལ་ངལ་འཚོ་ཐོབ་པའི་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་རྒྱལ་ཟླའི་དཀར་ཕྱོགས་ཀྱི་འཕེལ་ཚེས་བཅུར་དཔལ་ཆེན་འདུས་པའི་ཚོགས་སྒྲུབ་སྐབས་སུ་བྲིས་པ་སྔ་འགྱུར་བཀའ་གཏེར་གྱི་བསྟན་པ་ཕྱོགས་དུས་ཀུན་ཏུ་འཕེལ་རྒྱས་བརྟན་པའི་རྟེན་འབྱུང་དུ་གྱུར་ཅིག ༈ རྩེ་སྤྲུལ་རིན་པོ་ཆེའི་ཞབས་བརྟན་འཆི་མེད་གྲུབ་པའི་དབྱངས་སྙན་ཞེས་བྱ་བ་བཞུགས་སོ། ཨོཾ་སྭསྟི། །འཆི་མེད་ཡེ་ཤེས་སྣང་བའི་གཏེར་ཆེན་གཟིས། །འཆི་མེད་མཆོག་གྲུབ་པདྨའི་མཚར་སྡུག་དཔྱིད། །འཆི་བདག་གདུང་སེལ་དགེ་ལེགས་སྦྲང་རྩིའི་གཏེར། །འཆི་མེད་རྩ་གསུམ་ལྷ་ཡི་ཤིས་པ་སྩོལ། །རྒྱལ་བསྟན་སྙིང་པོ་སྔ་འགྱུར་བཀའ་གཏེར་གྱིས། །བཤྃད་སྒྲུབྃ་དགའ་སྟོན་སྤེལ་མཛད་ཉིནྃ་བྱེདྃ་དབང༌། །སྙིགས་མའི་མུན་པ་སེལ་མཛད་དགེ་བའི་བཤེས། །ཞབས་པད་རྟག་བརྟན་རྡོ་རྗེའི་ཚེ་འགྲུབ་ཤོག །ངེས་དོན་སྙིང་པོའི་སྨིན་གྲོལ་བདུད་རྩིའི་ཆར། །སྐལ་བཟང་དཔྱིད་ཀྱི་དགའ་སྟོན་རྟག་སྤེལ་མཛོད། །ངོ་མཚར་ཕྲིྃན་ལསྃ་དཔྃལ་གྱིས་ས་གསུམ་འགྲོ། །དབུག་འབྱིན་བཟྃང་པོའི་ཡོན་ཏན་རྟག་འཕེལ་ཤོག །ཅེས་མཁས་བཙུན་བཟང་སོགས་དམ་པའི་ཡོན་ཏན་མཆོག་གི་དཔལ་མངའ་རྩེ་སྤྲུལ་རིན་པོ་ཆེའི་མདུན་ནས་རྫོགས་ཆེན་དགོངས་པ་ཟང་ཐལ་གྱི་སྨིན་གྲོལ་ཡོངས་སུ་རྫོགས་པ་བཀའ་དྲིན་དུ་ཐོབ་ཅིང༌། མཆོག་གི་སྤྲུལ་སྐུ་རྣམ་གསུམ་གྱི་ཡ་གྱལ། རིག་འཛིན་ཆེན་པོ་རྒོད་ཀྱི་ལྡེམ་འཕྲུའི་ཟབ་གཏེར་གྱི་སྨིན་གྲོལ་ཞེ་ཆེན་བསྟན་གཉིས་དར་རྒྱས་གླིང་དུ་གསུང་བ་དད་མོས་ཀྱིས་འཆི་མེད་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྟེན་གཙོ་དངོས་འབུལ་ཉུང་ཟད། གུས་འགྱུར་མེད་ཐེག་མཆོག་བསྟན་པའི་རྒྱལ་མཚན་མིང་ཅན་དང༌། རབ་འབྱམས་སྤྲུལ་མིང་ཆོས་ཀྱི་སེང་གེ་འདུས་ཚོགས་བཅས་པས་བདེན་སྨོན་དུ་ཞུས་པ་བཞིན་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་རླབས་པར་མཛད་དུ་གསོལ། ༈ འགྱུརྃ་མེདྃ་གདོད་མའི་དབྱིངས་ལས་ཐུགས་རྗེའི་རྩལ། །མཆོག་གི་སྤྲུལ་སྐུའི་ངོ་མཚར་མཛད་བཟང་གིས། །བཤྃད་སྒྲུབྃ་ཆོསྃ་ཀྱིྃ་དབྱར་རྔ་རྟག་སྒྲོགས་པའི། །རབ་འབྱམས་སྨྲ་བའི་སེངྃ་གེྃའི་ཞབས་བརྟན་གསོལ། །ཞེས་པའང་པདྨའི་ཕྲིན་ལས་ཟབ་གཏེར་སྤྱོད་པ་པད་རྒྱལ་གླིང་པས་བསྐུལ་ངོར་མངྒ་ལ་ཤྲཱི་བྷཱུ་ཏིས་ཆེད་དུ་བརྗོད་པ་དོན་དང་ལྡན་པར་གྱུར་ཅིག ༈ གཏེར་ཆེན་མཆོག་གླིང་སྐུ་ཕྲེང་བཞི་པའི་ཞབས་བརྟན་འཆི་མེད་རྡོ་རྗེའི་རྒྱུད་མང་བཞུགས་སོ། ཨོཾ་སྭསྟི། རིག་འཛིན་གྲུབ་བརྒྱའི་སྤྱི་མེས་པྃདྨྃ་འབྱུང༌། །བདེ་ཆེན་འགྱུརྃ་མེདྃ་སྒྱུ་འཕྲུལ་ཡི་དམ་ལྷ། །རྡོྃ་རྗེའིྃ་ཆོས་སྲུང་མཁའ་འགྲོའི་ཚོགས་བཅས་ཀྱི། །བདེན་བྱིན་རྨད་བྱུང་ནུས་མཐུའི་ཤིས་པ་སྩོལ། །སྔ་འགྱུར་བཀའ་གཏེར་ཐེགྃ་མཆོྃག་སྨིན་གྲོལ་གྱི། །བསྟནྃ་འཛིྃན་མཁས་གྲུབ་དབང་པོའི་སྐུ་ཚེ་དང༌། །ཐུགས་བསྐྱེད་ཕྲིན་ལས་དཀར་པོའི་ཟླ་གཞོན་བཞིན། །འཆར་བས་ཕྱོགས་ལས་རྣམ་པར་རྒྱལ་གྱུར་ཅིག །བཀའ་བབ་བདུན་ལྡན་གཏེར་ཆེན་ཆོས་ཀྱི་རྗེའི། །རིང་ལུགས་སྲིད་མཐར་རྫོགས་ལྡན་དུས་སྟོན་བཞིན། །དགེ་མཚན་རྨད་བྱུང་ཤིས་པའི་མེ་ཏོག་གིས། །འཇིག་རྟེན་གསུམ་ན་རྟག་ཏུ་མཛེས་གྱུར་ཅིག །ཅེས་དུས་གསུམ་རྒྱལ་བའི་སྤྱི་གཟུགས་རྒྱལ་དབང་ཀརྨ་པ་བཅུ་དྲུག་པས་བསྩལ་བའི་མཚན་དང་མཐུན་པའི་ཞབས་བརྟན་འབུལ་དགོས་ཞེས་གྲུབ་སྲས་སྐུ་མཆེད་རྟེན་མཆོག་འགྱུར་མེད་གླིང་གི་འདུས་པའི་སྡེས་གསུང་བསྐུལ་བཞིན་འཇམ་མགོན་མཁྱེན་བརྩེའི་བྱིན་རླབས་ཀྱི་བདུད་རྩིས་རེག་པའི་སྔགས་བཙུན་མངྒ་ལ་ཤྲཱི་བྷུ་ཏིས་སྐུ་ཚབ་ཡིད་བཞིན་ནོར་བུ་དངོས་གྲུབ་དཔལ་འབར་གྱི་སྤྱན་སྔར་བྲིས་ཤིང་སྨོས་པ་བཞིན་འགྲུབ་པར་གྱུར་ཅིག །དགེ་ལེགས་འཕེལ། ༈ བཀའ་གཏེར་ཟུང་འཇུག་པྃདྨྃའི་རིང་ལུགས་ཆེ། །ཐོས་བསམ་བསྒོམ་པའི་བློ་གྲོས་དབྃང་གི་རྒྱལྃ། །དོན་གཉིས་ཕན་བདེའི་འདོད་རྒུ་འཇོ་བཞིན་དུ། །ཐུགས་བསྐྱེད་ཕྲིན་ལས་མཐའ་རུ་ཕྱིན་པར་ཤོག །ཅེས་པའང་ཀུན་བཟང་འོད་གསལ་གླིང་གི་དད་སློབ་རྣམས་ཀྱིས་བསྐུལ་བ་བཞིན་རྒན་པོ་མངྒ་ལས་སྙིང་ནས་སྨོན་པ་ཤིན་ཏུ་དགེ་བར་གྱུར་ཅིག ༈ ངགྃ་གི་དབྃང་ཕྱུག་རྗེ་བཙུན་འཇྃམ་དཔྃལ་དབྱངས། །མཁྱེན་བརྩེའི་དབང་པོའི་ཡེ་ཤེས་སྒྱུ་འཕྲུལ་གར། །ཐོས་བསམ་སྒོམ་པའི་བློྃ་གྲོསྃ་ཉིན་བྱེད་ཀྱིས། །རྒྱལ་བསྟན་པདྨོའི་གཉེན་མཆོག་ཞབས་བརྟན་གསོལ། །འཇིགྃས་མེདྃ་ཐུགས་བསྐྱེད་སྨོན་ལམ་རྨད་བྱུང་བའི། །མཁས་བཙུན་བཟང་པོའི་རྣམ་ཐར་ནུསྃ་སྟོབས་ཀྱིས། །སྙིགས་མའི་གདུང་སེལ་བཤད་སྒྲུབ་རྩལ་ལྡནྃ་པས། །རྡོྃ་རྗེྃའི་ཚེ་དང་ཡེ་ཤེས་རྒྱས་གྱུར་ཅིག །རབ་འབྱམས་རྩ་གསུམ་དཀོན་མཆོག་བདེན་པའི་མཐུས། །ཕྱི་ནང་བར་ཆད་བདུད་སྡེའི་མི་བརྫི་བར། །དོན་གཉིས་ལྷུན་གྲུབ་དགེ་ལེགས་འོད་སྟོང་གིས། །རབ་མཛེས་ཕན་བདེའི་དཔལ་འབྱོར་རྒྱས་གྱུར་ཅིག །ཅེས་ཐེག་མཆོག་རྡོ་རྗེ་སྙིང་པོའི་རྣལ་འབྱོར་པ་ཀློང་ཆེན་ཡེ་ཤེས་རྡོ་རྗེ་ཡབ་སྲས་ཀྱི་དད་སློབ་ངག་དབང་ཀུན་བཟང་ཕྲིན་ལས་གཙོས་སྒྲུབ་སྡེ་བ་རྣམས་ནས་བསྐུལ་བ་བཞིན་ལྷག་པའི་བསམ་སྦྱོར་གཙང་མས་རྗེ་དེའི་འབངས་འགྱུར་མེད་ཐེག་མཆོག་བསྟན་པའི་རྒྱལ་མཚན་ནས་བྲིས་ཏེ་སྨོན་བ་བཞིན་འགྲུབ་པར་གྱུར་ཅིག ༈ ཞབས་བརྟན་གསོལ་འདེབས་འཆི་མེད་རྡོ་རྗེའི་སྒྲ་དབྱངས་ཞེས་བྱ་བ་བཞུགས། འཆི་མེད་རྩ་གསུམ་རྒྱལ་བའི་བྱིན་རླབས་ཀྱིས། །འཆི་མེད་གྲུབ་པའི་སློབ་དཔོན་ནམ་མཁའི་སྙིང༌། །འཆི་མེད་ཡེ་ཤེས་སྒྱུ་འཕྲུལ་རྡོ་རྗེའི་གར། །འཆི་མེད་གསང་གསུམ་རྟག་པའི་མཆོག་གྲུབ་མཛོད། །འཇིྃགས་མེདྃ་སྣང་སྲིད་ཟིལ་གནོན་པྃདྨྃ་ཡི། །རིང་ལུགས་སྔ་འགྱུར་རྒྱུད་དང་སྒྲུབ་སྡེའི་སྲོལ། །དབང་བསྒྱུར་གསན་བསམ་སྒོམ་པའི་ཕྲིནྃ་ལསྃ་དཔལ། །ཕྱོགས་ལས་རྣམྃ་རྒྱལྃ་ཞབས་པད་བརྟན་གྱུར་ཅིག །སྨིན་གྲོལ་བདུད་རྩིའི་ངགྃ་ལ་དབྃང་ཐོབ་བཞིན། །བསླབྃ་གསུམྃ་ཡོན་ཏན་ནོར་བུའི་དཔལ་ལ་སྤྱོད། །དོན་གཉིས་མཐར་ཕྱིན་སྐུ་ཚེ་རབྃ་བརྟྃན་པས། །སྲིད་ཞིའི་དགེ་མཚན་དཔལ་ཡོན་རྒྱས་གྱུར་ཅིག །རྒྱལྃ་སྲསྃ་དཔའ་བོའི་ཐུགས་བསྐྱེད་གོ་ཆ་མཁྲེགས། །གཟུངས་སྤོབས་བློྃ་གྲོསྃ་ནམ་མཁྃའ་ལྟར་ཁྱབྃ་པས། །ལྔ་བདོ་སྙིགས་མའི་སྲིད་ཞིའི་གདུང་སེལ་བའི། །ཕན་བདེའི་དགའ་སྟོན་སྤྲོ་བཞིན་རྟག་བཞུགས་གསོལ། །རྨད་བྱུང་འོད་གསལ་སྙིང་པོའི་གསེང་ལམ་ཆེ། །རྡོྃ་རྗེྃ་ཐེག་པའི་རིག་འཛིན་མཆོག་བརྙེས་ནས། །བདེྃ་གཤེྃགས་ཀུནྃ་འྃདུས་པདྨའི་ཕྲིན་ལས་རྩལ། །རྟག་ཁྱབ་ལྷུན་གྲུབ་བཀྲ་ཤིས་དཔལ་འབར་ཤོག །ཅེས་མཁར་ཆུ་བདུད་འཇོམས་སྨིན་གྲོལ་དགའ་ལྡན་བཤད་སྒྲུབ་གླིང་གི་འདུས་སྡེའི་གསུང་བསྐུལ་བཞིན་སྔ་འགྱུར་རྡོ་རྗེ་སྙིང་པོའི་བསྟན་ཞབས་སུ་སྐྱེས་པ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ཆེད་དུ་གསོལ་བ་བཏབ་པ་བཞིན་འགྲུབ་པར་གྱུར་ཅིག ༈ ཨོཾ་སྭསྟི། རྒྱལ་ཀུན་ཕྲིནྃ་ལསྃ་ཤིང་རྟ་མཚོ་སྐྱེས་རྗེའི། །རྣམ་འཕྲུལ་པདྨའི་གདུང་འཚོབ་ཆེན་པོ་ཡི། །སྐུ་གསུང་ཐུགས་སྲས་བཀའ་གཏེར་བསྟན་པའི་དཔལ། །ཐུགས་བསྐྱེད་ནོརྃ་བུསྃ་མཛེས་གང་ཞབས་བརྟན་གསོལ། །བདུད་དཔུང་མཐར་བྱེད་བསྟན་པའི་ཤིང་རྟ་ཡི། །ལྔ་བདོའི་རྒུད་ཞི་བཤད་སྒྲུབ་དགའ་སྟོན་རྒྱས། །རིག་འཛིན་འདུས་པས་ནོར་འཛིན་མཛེས་པ་ཡིས། །བཀྲ་ཤིས་དགེ་མཚན་དཔལ་མགོན་རྟག་བརྟན་ཤོག །ཅེས་སྔ་འགྱུར་བསྟན་པའི་མཛེས་རྒྱན་སྔགས་རིགས་འཛིན་པ་མཁས་བཙུན་བཟང་པོ་སྟོན་འཁོར་དང་བསོད་ནམས་ཚེ་རིང་ཅན་ནས་ལྷ་རྫས་ཀྱི་རྟེན་དང་བཅས་གསུང་བསྐུལ་བཞིན་བཀྲ་ཤིས་དཔལ་འབྱོར་གྱིས་སྤྲོ་ཞིང་དྭངས་བའི་བློས་ཤིང་བྱི་གནམ་ལོ་གསར་ཚེས་ལ་བྲིས་ཤིང་སྙིང་ནས་སྨོན་པ་དོན་དང་ལྡན་པར་གྱུར་ཅིག ༈ བསྐལྃ་བཟྃང་རྣམ་འདྲེན་སངས་རྒྱས་འཁོར་བ་འཇིག །དོནྃ་བརྒྱུདྃ་བསྟན་པའི་པད་ཚལ་འགྱེད་པའི་ཕྱིར། །ཐུགས་བསྐྱེད་ཉིྃ་མྃ་ཚོགས་གཉིས་ཡོངས་རྫོགས་མགོན། །རིགས་བརྒྱའི་ཁྱབ་བདག་ཆེན་པོར་གསོལ་བ་འདེབས། །འགྱུརྃ་མེདྃ་སྐུ་བཞིའི་མཆོག་བརྙེས་བི་མ་ལའི། །མཁྱེན་བརྩེའི་ཉིན་བྱེད་དབང་པོའི་རྒྱལ་བའི་བསྟན། །གསལ་མཛད་ཐུགས་རྗེའི་སྒྱུ་འཕྲུལ་བཀོད་པའི་དཔལ། །ཐེགྃ་མཆོྃག་བསྟནྃ་པའིྃ་རྒྱལྃ་མཚྃན་གསོལ་བ་འདེབས། །དད་དང་མོས་གུས་གསོལ་འདེབས་ཁ་ལོ་པ། །ལེགས་དྲངས་དཔལ་ལྡན་བླ་མའི་གསང་གསུམ་བྱིན། །བདག་བློར་འཕོས་པས་དགོངས་རྒྱུད་ཡེ་ཤེས་དབྱིངས། །ཐུགས་ཡིད་གཅིག་ཏུ་འདྲེས་པར་བྱིན་གྱིས་རློབས། །ཞེས་པའང་སྒྲུབ་བརྩོན་ཚེ་དབང་རིག་འཛིན་ནས་བསྐུལ་ངོར་མངྒ་ལ་ཤྲཱི་བྷཱུ་ཏིས་བྲིས་པ་ཡེ་ཤེས་དགོངས་པའི་རྩལ་ཆེན་རྫོགས་པའི་རྒྱུར་གྱུར་ཅིག ༈ མཆོག་སྤྲུལ་རིན་པོ་ཆེ་དཔལ་ལྡན་ངེས་དོན་བཤད་སྒྲུབ་ཉི་མ་འཇིགས་མེད་ཕྱོགས་ལས་རྣམ་པར་རྒྱལ་བའི་སྡེ་མཆོག་གི་ཞབས་བརྟན་གསོལ་འདེབས་འཆི་མེད་རྡོ་རྗེའི་རྔ་སྒྲ་བཞུགས། ཨོཾ་སྭ་སྟི་སིདྡྷཾ། བསྐལ་བཟང་རྣམ་འདྲེན་དང་པོ་འཁོར་བ་འཇིག །རྩ་གསུམ་རྒྱལ་བའི་སྤྱི་གཟུགས་པདྨ་འབྱུང༌། །རབ་འབྱམས་སྲས་བཅས་རྒྱལ་བའི་བྱིན་རླབས་ཀྱིས། །དཔལ་ལྡན་བླ་མ་བསྐལ་བརྒྱར་ཞབས་བརྟན་གསོལ། །མཁྱེན་གསུམ་གཟིགས་པས་སྦྱོར་བཞིའི་ཕ་མཐར་སོན། །འབྲས་བུ་མཐར་ཐུག་ཆོས་སྐུའི་དབྱིངས་ཆེན་པོར། །རྟག་བརྟན་མི་གཡོའི་དགོངས་པ་མངོན་གྱུར་མགོན། །དཔྃལ་ལྡནྃ་ངེསྃ་དོནྃ་ཤིང་རྟ་ཞབས་བརྟན་གསོལ། །མངོན་སུམ་རྗེས་དཔག་ཚད་མའི་ཉིན་བྱེད་ཀྱིས། །ཆོས་ཀུན་ཡང་དག་གཟིགས་པའི་འདབ་སྟོང་འབྱེད། །ལུང་རྟོགས་སྦྲང་རྩིའི་ཟིལ་མངར་འབུམ་སྤྲོའི་གཉེན། །བཤྃད་སྒྲུབྃ་ཉིྃ་མྃ་འགྲིབ་མེད་ཞབས་བརྟན་གསོལ། །སྟོང་དང་རྟེན་འབྱུང་མི་འབྱེད་སེང་གེའི་སྒྲས། །ལོག་སྨྲའི་རི་དྭགས་ཀླད་པ་འགེམས་བྱེད་ཅིང༌། །མཐའ་བྲལ་དབུ་མའི་སྲོལ་འབྱེད་ཐམས་ཅད་མཁྱེན། །འཇིགས་མེདྃ་ཕྱོགྃས་ལསྃ་རྣམྃ་རྒྱལྃ་ཞབས་བརྟན་གསོལ། །གཉུག་མའི་ལུས་སེམས་དངོས་པོའི་གནས་ལུགས་ལ། །ཐབས་གྲོལ་རྡོ་རྗེའི་ལམ་གྱི་མཐར་སོན་ཏེ། །འཕོ་མེད་བདེ་ཆེན་རྡོ་རྗེའི་སྲོག་གྲུབ་པས། །སྐྱེ་འཆིའི་མཚན་རྟོག་སྤང་བས་ཞབས་བརྟན་གསོལ། །གཞི་རྒྱུད་དག་མཉམ་བདེན་པ་ཆོས་སྐུར་སྦྱངས། །ལམ་རྒྱུད་རིག་འཛིན་རྣམ་བཞིའི་བདེ་ཆེན་གྲུབ། །འབྲས་རྒྱུད་སྐུ་དང་ཡེ་ཤེས་མངོན་གྱུར་པའི། །གྲུབ་བརྙེས་རྡོ་རྗེའི་བླ་མར་ཞབས་བརྟན་གསོལ། །ཕུལ་བྱུང་ཐོས་བསམ་སྒོམ་པའི་རྣམ་ཐར་གྱིས། །ཡོངས་རྫོགས་ཐུབ་བསྟན་འཛིན་སྤེལ་སྐྱོང་མཛད་སྡེྃ། །བསྟན་འགྲོའི་དོན་གཉིས་མཐའ་རུ་ཕྱིན་པ་ཡིས། །བཀྲ་ཤིས་དགེ་མཚན་སྣང་བས་ཁྱབ་གྱུར་ཅིག །ཅེས་ཐུབ་བསྟན་རིས་སུ་མ་ཆད་པའི་ལུང་རྟོགས་ཀྱི་སྣང་བྱེད་ཆེན་པོ་སྐྱབས་རྗེ་མདོ་ཁམས་པ་སྐལ་བཟང་དོན་བརྒྱུད་ཉི་མ་མཆོག་གི་སྤྲུལ་པའི་སྐུ་ཆེན་པོ་དུས་གསུམ་ཀུན་མཁྱེན་རྒྱལ་བ་ཀརྨ་པ་རང་བྱུང་རིག་པའི་རྡོ་རྗེའི་སྒྲིབ་བྲལ་ཡེ་ཤེས་ཀྱི་གཟིགས་པས་ལུང་བསྟན་པ་བཞིན་དྭགས་རྙིང་བསྟན་པའི་ཆུ་མགོ་དཔལ་ཕུན་ཚོགས་ཆོས་འཁོར་གླིང་གཉིས་པར་འཇིགས་མེད་གདོང་ལྔས་བཏེགས་པའི་གསེར་གྱི་ཁྲི་ལ་མངའ་གསོལ་ཞིང་མཚན་གྱི་དྲིལ་བསྒྲགས་པའི་ཚེ་རྩེ་གཅིག་གུས་པས་ཡིད་ཀྱིས་ཞབས་བརྟན་དུ་གསོལ་བ་འདེབས་པའི་ཕྱིར་བཀྲ་ཤིས་པའི་ལྷ་རྫས་སྲིད་དུ་རིང་བ་འཆི་མེད་སྐུ་གསུང་ཐུགས་རྡོ་རྗེའི་སྣང་བརྙན་དང་རིན་ཆེན་གཉིས་པའི་ཟླ་བ་ཏོ་ལ་གཅིག །ཧིན་སྒོར་ཆིག་སྟོང༌། བཟང་གོས་ཁ་དོག་བཞི། གྲུམ་གདན་གཉིས། འབྲས་དཀར་སྒམ་གཉིས། གསོལ་མར་སྒམ་གཅིག །མཐའ་རྟེན་རས་དཀར་ཡུག་གཅིག་བཅས་འཇམ་མགོན་མཁྱེན་བརྩེའི་སྤྲུལ་སྐུའི་མཚན་འཛིན་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ཆུ་ཕག་གནམ་ལོའི་གསར་འཆར་གྱི་དུས་ཚེས་དགེ་བར་བསམ་པ་དག་ཅིང་སྦྱོར་བ་གུས་པས་འབུལ་ལམ་ཞུས་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། ༈ ཀུན་གཟིགས་ཏཱ་ཡི་སི་ཏུ་པདྨ་དོན་ཡོད་གྲུབ་པའི་ཞབས་བརྟན་གསོལ་འདེབས་འཆི་མེད་རྡོ་རྗེའི་དབྱངས་སྙན་ཞེས་བྱ་བ་བཞུགས། ཨོཾ་སྭསྟི། གསེར་བཟང་འོད་ཀྱི་རྒྱལ་ལས་ཐུགས་བསྐྱེད་ནས། །བདེ་གཤེགས་རིན་ཆེན་གདུགས་ཀྱི་བསྟན་པ་ལ། །སློབ་དང་མི་སློབ་ལམ་ཀུན་བྱམས་ཆེན་གྱི། །བདུད་རྩིའི་སིམ་པ་སྟེར་མཛད་ཞབས་བརྟན་གསོལ། །འཕགས་ཡུལ་གྲུབ་ཆེན་ཌོམྦྷི་ཧེ་རུ་ཀ །གངས་ཅན་སྒྲུབ་བརྒྱུད་བསྟན་པའི་སྤྱི་མེས་ཆེ། །དགྱེས་མཛད་རྡོ་རྗེ་མར་སྟོན་ཆོས་བློ་གྲོས། །མཁས་གྲུབ་དུ་མར་བྱོན་མཛད་ཞབས་བརྟན་གསོལ། ཁྱད་པར་བསིལ་ལྡན་མཁས་གྲུབ་ཀུན་གྱི་ཕུལ། །ཏཱ་ཡི་སི་ཏུའི་མཚན་སྙན་བ་དན་ཅན། །ལུང་རྟོགས་ཆོསྃ་ཀྱིྃ་འབྱུངྃ་གནྃས་ལ་སོགས་པས། །ཕན་བདེའི་སྣང་བ་རྒྱས་མཛད་ཞབས་བརྟན་གསོལ། །ཨོ་རྒྱན་དུས་གསུམ་མཁྱེན་པའི་རྡོ་རྗེའི་བཀས། །ཆོས་ཀྱི་སྤྱན་ལྡན་གསུམ་དང་པདྨའི་ལྗགས། །བཞི་པའི་ལུང་བཞིན་དོན་དང་མཐུན་པའི་མཚན། །ཐུགས་བསྐྱེད་འགྲན་བྲལ་སྐྱེས་བུ་ཞབས་བརྟན་གསོལ། །པྃདྨྃ་ལྟར་མཛེས་རྨད་བྱུང་རྣམ་ཐར་གསལ། །མཛད་པ་དོནྃ་ཡོདྃ་ནོར་བུའི་ཞགས་པ་ཡིས། །བསྟན་འགྲོའི་དགེ་མཚན་དཔྱིད་ཀུན་དབང་བྱེད་པའི། །ངོ་མཚར་རྨད་དུ་བྱུང་གང་ཞབས་བརྟན་གསོལ། །སྐྱོན་བྲལ་སྡོམ་གསུམ་ཁྲིམས་གཙང་གསེར་གྱི་གཞིར། །གསན་བསམ་སྒོམ་པའི་རི་གླིང་བཀོད་ལེགས་པས། །སྒྲུབ་བརྒྱུད་མཁས་གྲུབ་ཀུན་གྱི་ཉེར་འཚོའི་གནས། །མཚུངས་མེད་བསྟན་འགྲོའི་དཔལ་དུ་ཞབས་བརྟན་གསོལ། །ཐུགས་བསྐྱེད་རིན་ཐང་བྲལ་བའི་ཆེ་བ་ཡི། །ཐུབ་དབང་གདུལ་བྱ་མཐའ་དག་རྗེས་བསྐྱངས་ཏེ། །ཚུལ་ཁྲིམས་དག་ཅིང་གཟུངས་དང་སྤོབས་པའི་གཏེར། །སྩོལ་བཞིན་བསྐལ་པ་རྒྱ་མཚོར་ཞབས་བརྟན་གསོལ། །ནམ་ཞིག་རྡོ་རྗེ་གདན་གྱི་གནྡྷོ་ལར། །བཅུ་གཉིས་མཛད་པའི་འོད་ཁྱིམ་དམར་པོའི་དབུས། །བྱམས་མགོན་ཉིན་བྱེད་དབང་པོ་འཆར་བའི་ཚེ། །བདག་ཀྱང་འཁོར་གྱི་ཐོག་མར་སྐྱེ་བར་ཤོག །ཅེས་པའང་དཔལ་སྤུངས་གདན་ས་གཉིས་པ་ཤེས་རབ་གླིང་གི་འདུས་སྤྱིའི་མཎྜལ་སྐུ་གསུང་ཐུགས་རྟེན་བཅས་བཀའ་བསྩལ་གུས་པའི་གཙུག་གིས་མཆོད་ཅིང་དད་སྤྲོའི་སེམས་ཀྱིས་བྱམས་མགོན་བླ་མ་དགྱེས་པའི་བཀའ་འབངས་ཀརྨ་བཤད་སྒྲུབ་ཆོས་ཀྱི་ཉི་མ་བཀྲ་ཤིས་དཔལ་འབྱོར་གྱིས་བསམ་སྦྱོར་དག་པས་བྲིས་ཤིང་སྨོན་པ་བཞིན་བསྟན་འགྲོའི་དོན་ཆེན་འགྲུབ་པའི་རྒྱུ་ཁོ་ནར་གྱུར་ཅིག ༈ ཨོཾ་སྭསྟི། སྟོབས་བཅུས་བདུདྃ་འཇོམྃས་ཨོ་རྒྱན་ཆོས་ཀྱི་མཛོད། །སྨིནྃ་གྲོལྃ་དགྃའ་བ་བརྒྱ་ལྡནྃ་བཤྃད་སྒྲུབྃ་ཀྱི། །སྒོ་འཕར་འབྱེད་པའི་ཕྲིན་ལས་ཉིན་བྱེད་ཀྱིས། །སྣང་བས་འཛམ་གླིངྃ་ཐ་གྲུར་ཁྱབ་གྱུར་ཅིག །ཅེས་ནམ་སྙིང་སྐུ་ཕྲེང་བདུན་པའི་གདན་ས་གསར་བཏབ་ཀྱི་མཚན་འབུལ་དུ་བཀྲ་ཤིས་དཔལ་འབྱོར་གྱིས་ཆེད་དུ་བརྗོད་པ་སིདྡྷི་རསྟུ། ༈ ངག་གི་དབང་ཕྱུག་བསྟན་འཛིན་ནོར་བུ་ཆེའི། །ཐུགས་བསྐྱེད་རང་གཟུགས་མཆོག་གི་སྤྲུལ་པའི་སྐུའི། །གསང་གསུམ་འཇིགས་བྲལ་རིན་ཆེན་ལྷུན་པོ་བཞིན། །རྟག་བརྟན་དམ་པའི་ཡོན་ཏན་ལྷུན་རྫོགས་ཤོག །ཅེས་པའང་མཁྱེན་ལྡན་པདྨ་འགྱུར་མེད་ནས་བསྐུལ་ངོར་མངྒ་ལ་ཤྲཱི་བྷུ་ཏིས་བྲིས་པ་སིདྡྷི་རསྟུ། ༈ ཨོཾ་སྭསྟི། འཇྃམ་པའི་དབྱངྃས་སོགས་ཕྱོགས་དུས་རྒྱལ་ཀུན་གྱི། །མཁྱེན་བརྩེ་ནུས་པའི་བདེན་སྟོབས་རྨད་བྱུང་བས། །མཆོག་གི་སྤྲུལ་སྐུ་ཚུལ་གནས་ཐོས་བསམ་སྒོ། །ཡོནྃ་ཏནྃ་རྒྱ་མཚོའི་དཔྃལ་ལ་དབང་འབྱོརྃ་ཤོག །གསང་གསུམ་མི་འགྱུར་ཚེ་དབང་པདྨ་རྩལ། །བར་ཆད་བདུད་ཀྱི་གཡུལ་ལས་རྣམ་པར་རྒྱལ། །ངེས་གསང་རྡོ་རྗེ་སྙིང་པོའི་རིང་ལུགས་ཀྱི། །བཤད་སྒྲུབ་སྣང་བ་སྤེལ་ཞིང་ཞབས་བརྟན་གསོལ། །དཀོན་མཆོག་རྩ་གསུམ་བདེན་པའི་བྱིན་རླབས་ཀྱིས། །ཇི་ལྟར་སྨོན་པའི་གནས་ཀུན་ཡིད་བཞིན་དུ། །གྲུབ་ནས་མཐའ་ཀླས་བསྟན་འགྲོ་མ་ལུས་པ། །བཀྲ་ཤིས་བདེ་ལེགས་སྣང་བ་རྒྱས་གྱུར་ཅིག །ཅེས་པའང་ན་ཀྲ་དགོན་གྱི་ཚོགས་པ་དང་རྗེ་གོང་མའི་སློབ་འབངས་ཡོངས་ཀྱི་གསུང་བསྐུལ་བཞིན་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་རྒྱལ་ཟླའི་དཀར་ཕྱོགས་སུ་བསམ་སྦྱོར་དག་པས་ཆེད་དུ་སྨོན་པ་བཞིན་འགྲུབ་པར་གྱུར་ཅིག ༈ ཞབས་བརྟན་གསོལ་འདེབས་འཆི་མེད་རྡོ་རྗེའི་དབྱངས་སྙན་བཞུགས། ཨོཾ་སྭསྟི། རྒྱལ་ཀུན་ཡབ་གཅིག་ཀྃརྨྃའི་ཐུགས་ཀྱི་སྲས། །ཨོྃ་རྒྱནྃ་དངོས་བྱོན་གཏེར་ཆེན་མཆོག་གླིང་གི །བཀའ་བབ་བདུན་གྱི་རིང་ལུགས་སྲོག་འཛིན་མཛད། །མཆོག་གི་རྡོ་རྗེ་སློབ་དཔོན་ཞབས་བརྟན་གསོལ། །ངེས་དོན་ཆོས་ཉིད་དགོངས་ཀློང་ཚད་ལ་ཕེབས། །ཟབ་དོན་སྒྲུབ་པས་དོན་གཉིས་ལྷུན་གྱིས་གྲུབ། །སྨིན་གྲོལ་བདུད་རྩིའི་སྐལ་བཟང་སྐྱོང་བཞིན་དུ། །ཚེྃ་དབྃང་མཆོྃག་གྲུབྃ་དཔྃལ་འབྃར་ཞབས་བརྟན་གསོལ། །མཚོ་སྐྱེས་བླ་མ་ཡབ་སྲས་ཐུགས་བསྐྱེད་དང༌། །བདག་ཅག་དད་མོས་རྟེན་འབྱུང་བདེན་པ་ཡིས། །དཔལ་ལྡན་བླ་མ་བསྐལ་བརྒྱར་ཞབས་བརྟན་ཅིང༌། །བཀའ་གཏེར་བསྟན་པའི་མངའ་ཐང་རྒྱས་གྱུར་ཅིག །ཅེས་འཆི་མེད་གྲུབ་པའི་རྡོ་རྗེའི་གནས་མཆོག་མཱ་ར་ཏི་ཀར་སྒྱུ་འཕྲུལ་ཚེ་དཀར་གྱི་ཚོགས་སྒྲུབ་ཚུགས་པའི་སྐབས་རང་ཉིད་ཀྱིས་བྲི་འདུན་སྐྱེས་པ་དང༌། མཐའ་ཡི་རྒྱལ་ཁབ་ཀྱི་སློབ་འབངས་ཨེ་རིག་པདྨ་ཀུན་བཟང་དང་འོད་གསལ་རྡོ་རྗེ་གཙོས་པའི་དད་སློབ་དུ་མས་རྟེན་བཅས་བསྐུལ་བ་ལས་གུས་སློབ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་བྲིས་ཤིང་གསོལ་བ་བཏབ་པ་བཞིན་འགྲུབ་པར་གྱུར་ཅིག ༈ འཇིགས་མེད་མཚོ་སྐྱེས་རྒྱལ་བས་བྱིན་བརླབས་ཤིང༌། །མཁྱེན་བརྩེའི་ནུས་གཏེར་བི་མའི་རྣམ་པར་འཕྲུལ། །མཛད་བཟང་འོད་ཟེར་བསྟན་འགྲོའི་པདྨའི་གཉེན། །དཔལ་ལྡན་བླ་མའི་ཞབས་བརྟན་རྗེས་འཛིན་ཤོག །ཅེས་གྲུབ་སྲས་རིག་འཛིན་ཆོས་སྒྲོན་གསུང་བསྐུལ་བཞིན་རང་ཉིད་ཀྱི་ཞབས་བརྟན་ལ་དཔལ་མགོན་བླ་མ་རྣམས་ཀྱི་བྱིན་རླབས་འཕོ་བའི་རྒྱུར་གྱུར་ཅིག ༈ འགྱུརྃ་མེདྃ་རྡོ་རྗེ་སྙིང་པོའི་རིང་ལུགས་ཆེ། །མདོྃ་རྒྱུདྃ་སྨིན་གྲོལ་བཤད་སྒྲུབ་རྒྱྃ་མཚོྃའི་དཔལ། །ཕྱོགས་དུས་ཀུན་ཏུ་སྤེལ་བའི་ཐུགས་བསྐྱེད་མཐུ། །སྐུ་ཚེ་ཕྲིན་ལས་རྟག་བརྟན་ལྷུན་གྲུབ་ཤོག །ཅེས་པའང་ལུང་རྟོགས་དཔལ་གྱིས་མངོན་མཐོ་དྭགས་པོ་འགྲོ་འདུལ་གླིང་པའི་མཆོག་སྤྲུལ་འགྱུར་མེད་ཨོ་རྒྱན་བསྟན་འཛིན་ཉི་མ་ནས་ལྷ་རྫས་ཀྱི་རྟེན་བཅས་གསུང་བསྐུལ་བཞིན་མེ་ཡོས་སྤྲེལ་ཟླའི་༦ ཚེས་༡༠ ལ་འབྲུག་བུམ་ཐང་སྐུ་རྗེས་གཙུག་ལག་ཁང་ནས་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ལྷག་བསམ་བདེན་བསྐུལ་བཅས་སྨོན་པ་བཞིན་འགྲུབ་པར་གྱུར་ཅིག ༈ ཨོཾ་སྭསྟི། འགྱུརྃ་མེདྃ་རྡོ་རྗེའི་རིང་ལུགས་སྔ་འགྱུར་གྱི། །མདོྃ་རྒྱུདྃ་སྨིན་གྲོལ་རྒྱྃ་མཚོྃའི་མཛོད་འཛིན་མཛད། །མཆོག་གི་སྤྲུལ་སྐུའི་སྐུ་ཚེ་མཛད་བཟང་དཔལ། །རྟག་བརྟན་འཆི་མེད་རྡོ་རྗེའི་སྲོག་འགྲུབ་ཤོག །ཅེས་པའང་མཁས་བཙུན་བཟང་པོའི་ཕྲིན་ལས་རྨད་དུ་བྱུང་བ་སྨིན་གླིང་མཁན་ཆེན་ངག་དབང་མཁྱེན་བརྩེ་ནོར་བུའི་མཆོག་སྤྲུལ་རིན་པོ་ཆེ་འགྱུར་མེད་རྣམ་རྒྱལ་རིན་པོ་ཆེས་བཀའ་ཕེབས་བཞིན་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ལྷག་པའི་བསམ་སྦྱོར་གཙང་མས་བྲིས་པ་བཞིན་འགྲུབ་པར་གྱུར་ཅིག ༈ ཨོཾ་སྭསྟི། གདོད་ནས་འགྱུརྃ་མེདྃ་འོད་གསལ་ཆོས་ཉིད་དོན། །ལེགས་སྟོན་ཐེགྃ་མཆོྃག་རྡོྃ་རྗེྃ་སྙིང་པོ་ཡི། །ཤིང་རྟ་ཆེན་པོའི་ཡེ་ཤེས་སྒྱུ་འཕྲུལ་གར། །མཆོག་གི་སྤྲུལ་སྐུ་འཚོ་གཞེས་རྟག་བཞུགས་གསོལ། །ཅེས་སྣང་བཞི་མཐར་སོན་རང་བཞིན་རྫོགས་པ་ཆེན་པོའི་རྣལ་འབྱོར་ཆེན་པོ་གྲུབ་དབང་སྣ་ཚོགས་རང་གྲོལ་གྱི་སྐུ་གསུང་ཐུགས་ཀྱི་སྲས་ཆོས་རྒྱལ་གཏེར་བདག་གླིང་པའི་རྣམ་འཕྲུལ་གྱི་སྤྲུལ་སྐུ་རྗེ་གོང་མའི་ལུང་བསྟན་ལྟར་ངེས་པ་རྙེད་དེ་ལྕགས་རྟ་ཆོ་འཕྲུལ་ཟླ་བའི་འཕེལ་ཚེས་བལ་ཡུལ་ཞེ་ཆེན་བསྟན་གཉིས་དར་རྒྱས་གླིང་དུ་ངོས་འཛིན་ཁྲིར་བཀོད་སྐབས་རྒྱལ་དབང་པདྨའི་གདུང་འཛིན་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ཆེད་དུ་བརྗོད་པ་ཤྲཱི་ཛ་ཡནྟུ། ༈ ཤྲཱི་བི་ཛ་ཡནྟུ། ཀུན་ཁྱབ་འགྱུརྃ་མེདྃ་རྡོ་རྗེ་སྙིང་པོའི་ལམ། །སྨིན་གྲོལ་བདུད་རྩིས་ངེསྃ་དོནྃ་ཆོསྃ་ཀྱི་དབྃང༌། །གསལ་མཛད་མཆོག་གི་སྤྲུལ་སྐུ་ཞབས་པད་བརྟན། །རྨད་བྱུང་དམ་པའི་རྣམ་ཐར་ཡོངས་འཛིན་ཤོག །ཅེས་པའང་དམ་པའི་སྐྱེ་སྲིད་དུ་ཚད་མའི་སྐྱེས་བུ་དུ་མས་བསྔགས་པ་ལྟར་ལྕགས་རྟ་ཆོ་འཕྲུལ་ཟླ་བའི་དུས་ཚེས་དགེ་བར་བལ་ཡུལ་ཞེ་ཆེན་བསྟན་གཉིས་དར་རྒྱས་གླིང་དུ་མཚན་འབུལ་ཁྲི་སྟོན་སྐབས་རིག་འཛིན་གྱི་བཙུན་པ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་བྲིས་པ་བཞིན་འགྲུབ་པར་གྱུར་ཅིག ༈ འགྱུརྃ་མེདྃ་བཀའ་གཏེར་ཆོས་ཀྱི་རྒྱ་མཚོ་ལས། །ལེགས་འཁྲུངས་གཟུངས་སྤོབས་བློྃ་གྲོསྃ་སྣང་བའི་གཏེར། །རབྃ་གསྃལ་ཡེ་ཤེས་སྒྱུ་འཕྲུལ་རྨད་བྱུང་གི །ངོ་མཚར་རྣམ་ཐར་དགེ་མཚན་རྒྱས་གྱུར་ཅིག །ཅེས་རྒྱལ་བ་ཞེ་ཆེན་པའི་བཀའ་འབངས་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་མཚན་འབུལ་མངའ་གསོལ་དང་ཆབས་ཅིག་བདེན་སྨོན་དུ་བྲིས་པ་བཞིན་འགྲུབ་པར་མཉམ་མེད་བླ་མ་མཆོག་གིས་བྱིན་གྱིས་བརླབ་ཏུ་གསོལ། ༈ ཨོཾ་སྭསྟི། དབྃང་ཆེནྃ་གྲུབ་པའི་མཆོག་གི་སྤྲུལ་སྐུའི་ཚུལ། །བཀའ་གཏེར་ཟུང་འཇུག་པྃདྨྃའི་བསྟནྃ་པ་མཆོག །དམ་པའི་རྣམ་ཐར་བཟང་པོས་འཛིྃན་བཞིན་དུ། །སྐུ་ཚེ་ཕྲིན་ལས་མཐར་རུ་ཕྱིན་པར་ཤོག །ཅེས་ཆོས་ཀྱི་རྒྱལ་པོ་འཇམ་མགོན་རྣམ་གསུམ་གྱི་ཐུགས་སྲས་ཁྱུང་སྤྲུལ་པདྨ་དབང་ཆེན་གྱི་མཆོག་སྤྲུལ་ངོས་འཛིན་ཁྲི་སྟོན་སྐབས་དིལ་མཁྱེན་བཀྲ་ཤིས་དཔལ་འབྱོར་གྱིས་ཆེད་དུ་བརྗོད་པ་དགེ་ལེགས་འཕེལ། ༈ ཨོཾ་སྭསྟི། རྒྱལ་བའི་བསྟནྃ་འཛིྃན་ཀུན་གྱི་རྣམ་ཐར་བཞིན། །ཚུལ་གནས་གསན་བསམ་སྒོམ་པའི་ཡོན་ཏན་གྱིས། ཀུནྃ་མཁྱེནྃ་ཐུབ་པའི་ཉིན་བྱེད་མཆོག་སྤྲུལ་གྱི། །ཐུགས་བསྐྱེད་མཛད་པས་འཇིག་རྟེན་གསུམ་མཛེས་ཤོག །ཅེས་གོང་ས་ཐམས་ཅད་མཁྱེན་པས་ལྕགས་ཕུག་སྤྲུལ་སྐུའི་སྐྱེ་སྲིད་དུ་མཚན་གསོལ་ངོས་འཛིན་གནང་བ་བཞིན་བལ་ཡུལ་ཞེ་ཆེན་བསྟན་གཉིས་དར་རྒྱས་གླིང་དགོན་དུ་ཁྲི་སྟོན་སྐབས་དིལ་མགོ་མཁྱེན་བརྩེས་འདུན་སྨོན་དུ་བྲིས་པ་མངྒ་ལཾ། ༈ ཨོཾ་སྭསྟི། ཁྱད་པར་དྲུག་ལྡན་སྔ་འགྱུར་བཀའ་གཏེར་གྱིས། །ལུང་རྟོགས་ཆོས་ཀྱི་སྙིང་པོ་བཤད་སྒྲུབ་དཔལ། །ཐོས་བསམ་སྒོམ་པས་འཛིན་པའི་གྲགས་སྙན་ཅན། །མཁན་ཆེན་རྡོ་རྗེ་འཛིན་པ་ཞབས་བརྟན་གསོལ། །སྙིག་དུས་ནད་མུག་མཚོན་གྱི་བསྐལ་ངན་ཞི། །ཚེ་དཔལ་རྣམ་དཀར་དད་མོས་སྙིང་རྗེ་རྒྱས། །བྱང་ཆུབ་སེམས་ལྡན་བསྟན་འགྲོའི་དཔལ་ཡོན་དར། །མཚུངས་མེད་བླ་མའི་སྐུ་ཚེ་མཐར་ཕྱིན་ཤོག །ཅེས་དད་ལྡན་དགེ་ཚུལ་དཀོན་མཆོག་འབྱུང་གནས་ཀྱི་བསྐུལ་བ་ལྟར་ལྷག་བསམ་རྣམ་པར་དཀར་བའི་བདེན་སྨོན་དུ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་བྲིས་པས་དཔལ་ལྡན་བླ་མའི་ཞབས་པད་བརྟན་པའི་རྒྱུར་གྱུར་ཅིག །ཨཱ་ཡུ་ཏིཥྛནྟུ། ༈ འཇིྃགས་མེདྃ་ཐེག་མཆོག་བསྟན་པའི་ཤིང་རྟ་ཆེ། །ཀུན་བཟང་པྃདྨྃའི་ཐུགས་སྲས་བཻ་རོ་དངོས། །ཚེ་དབང་རིག་འཛིན་བརྙེས་པས་བཤད་སྒྲུབ་ལས། །གཞྃན་ཕནྃ་ཕྲིན་ལས་མཐྃའ་ཡསྃ་ཞབས་བརྟན་གསོལ། །ཞེས་པའང་འགྱུར་མེད་ཐེག་མཆོག་བསྟན་པའི་རྒྱལ་མཚན་ནས་ཆེད་དུ་གསོལ་བ་བཏབ་པ་བཞིན་འགྲུབ་པར་གྱུར་ཅིག ༈ སྨན་གྱི་བླ་མ་ཡེ་ཤེས་སྒྱུ་འཕྲུལ་གར། །བསྟན་འགྲོ་ཀུནྃ་དགྃའི་མཛད་པ་རྨད་བྱུང་བ། །སྟག་ཤམ་མཆོག་གི་ཕྲིན་ལས་རང་གཟུགས་ཆེ། །འཆི་མེད་ཚེ་ཡི་རིང་འཚོ་དཔལ་དང་ལྡན། །འགྲོ་ཀུན་སྐྱོབས་པའི་མཛད་པ་རྨད་བྱུང་བས། །སྙིགས་མའི་རྒུད་ཞི་ངེས་གསང་བསྟན་རྒྱས་ཤོག །ཅེས་པའང་དད་སློབ་ཡེ་ཤེས་རྒྱ་མཚོས་བསྐུལ་ངོར་མངྒ་ལས་བྲིས་པའོ། ༈ ཨོཾ་སྭསྟི། འཆི་མེད་ཚེ་དང་ཡེ་ཤེས་བདུད་རྩིའི་གཏེར། །དཔག་ཡས་མཁྱེན་བརྩེ་ནུས་པའི་དཀྱིལ་འཁོར་རྫོགས། །རབ་འབྱམས་རྩ་གསུམ་བྱིན་རླབས་རྨད་བྱུང་བས། །མཆོག་གི་སྤྲུལ་སྐུའི་ཞབས་པད་བརྟན་གྱུར་ཅིག །ཐུབྃ་བསྟནྃ་སྙིང་པོ་སྔ་འགྱུར་ལུང་རྟོགས་ཆོས། །གསན་བསམ་སྒོམ་པའི་ཡོན་ཏན་མཐར་ཕྱིན་ཞིང༌། །དྲི་མེད་སྡོམ་གསུམ་ནོར་བུའི་རྒྱན་གྱིས་མཛེས། །སྤང་རྟོགས་ཡོན་ཏན་རྫོགས་བཞིན་ཞབས་བརྟན་གསོལ། །གཞན་ཕན་ཐུགས་བསྐྱེད་རླབས་ཆེན་གོ་ཆ་ཡིས། །ཐེག་མཆོག་བཤྃད་སྒྲུབྃ་ཆོས་ཀྱི་རྒྱལ་ཐབས་སྐྱོང༌། །འབྲེལ་ཚད་དོན་ལྡན་ཕྲིནྃ་ལསྃ་ཀུནྃ་ཁྱབྃ་པའི། །དགེ་ལེགས་དཔལ་གྱིས་ས་གསུམ་མཛེས་གྱུར་ཅིག །ཅེས་པའང་དད་མོས་བསླབ་ལྡན་དགེ་སྦྱོང་ཡོན་ཏན་རྒྱ་མཚོས་ལྷ་རྫས་རྟེན་བཅས་བསྐུལ་ངོར་ཆོ་འཕྲུལ་ཟླ་བའི་དཀར་ཕྱོགས་ཀྱི་ཚེས་བཅུར་བཀྲ་ཤིས་དཔལ་འབྱོར་གྱིས་ལྷག་པའི་བསམ་པས་འདུན་སྨོན་དུ་བྲིས་པ་ཀུན་ཏུ་དགེ་ཞིང་ཤིས་པར་གྱུར་ཅིག ༈ རྩ་གསུམ་ལྷ་ཚོགས་བདེན་པའི་མཐུ་བྱིན་གྱིས། །ཐུབྃ་བསྟནྃ་མཛེས་བྱེད་མཆོག་གི་སྤྲུལ་པའི་སྐུ། །གསང་གསུམ་རྟག་བརྟན་ཚུལྃ་ཁྲིམྃས་རྣམ་པར་དག །དམ་པའི་རྣམ་ཐར་ནོརྃ་བུའིྃ་འོདྃ་ཟེརྃ་གྱིས། །རྒྱལ་བསྟན་སྤྱི་དང་ཁྱད་པར་སྔ་འགྱུར་གྱི། །ལུང་རྟོགས་བསྟན་པ་སྤེལ་དང་ཕན་བདེ་ཡི། །ཕྲིན་ལས་སྣང་བ་ཡར་ཟླ་ལྟར་འཕེལ་བའི། །དགེ་མཚན་འཇིག་རྟེན་ཀུནྃ་ཏུ་ཁྱབྃ་གྱུར་ཅིག །ཅེས་བསླབ་ལྡན་ཐུབ་བསྟན་རིག་པའི་གོ་ཆས་རྟེན་བཅས་བསྐུལ་ངོར་མངྒ་ལས་བྲིས་ཤིང་སྨོན་པ་སིདྡྷི་རསྟུ། ༈ ཨོྃ་རྒྱནྃ་བླ་མའི་རིང་ལུགས་ངེས་གསང་གི །བཤད་སྒྲུབ་བསྟནྃ་པྃའི་འབྱུངྃ་གནྃས་ངོ་མཚར་གྱི། །རྣམ་ཐར་རྫོགས་ལྡན་གསར་པའི་དགའ་སྟོན་གྱིས། །རབ་མཛེས་ཞབས་པད་བསྐལ་བརྒྱར་བརྟན་གྱུར་ཅིག །ཅེས་བསླབ་ལྡན་ཐུབ་བསྟན་རིག་པའི་གོ་ཆས་རྟེན་བཅས་བསྐུལ་ངོར་མངྒ་ལས་བྲིས་ཤིང་སྨོན་པ་སིདྡྷི་རསྟུ། ༈ ཨོཾ་སྭསྟི། ངགྃ་དབྃང་འཇམ་མགོན་དགྱེས་པའི་འཛུམ་དཀར་ལས། །ས་གསུམ་ཀུནྃ་དགྃའི་རྡོ་རྗེ་འཛིན་པའི་རྗེ། །བཀྲྃ་ཤིསྃ་ལུང་རྟོགས་ཆོསྃ་ཀྱིྃ་ཉིནྃ་མོར་བྱེདྃ། །བསྟན་འགྲོའི་པདྨའི་གཉེན་དུ་ཞབས་བརྟན་གསོལ། །ཞེས་པའང་ཤྲཱི་ལཀྵྨཱི་དྷིནཿའི་འཁོན་གདུང་མ་ཏི་རིན་པོ་ཆེ་མཆོག་ལ་མཚན་དང་མཐུན་པའི་ཞབས་བརྟན་དུ་དིལ་མཁྱེན་རྒན་བུ་མངྒ་ལའི་མིང་གིས་རྫས་ཨཱ་ཡུ་ཥེ་མཎྜལ་རྟེན་དོད་བཅས་ཆོས་སྲིད་དགའ་བ་བརྒྱ་ལྡན་ལྷོ་འབྲུག་རྒྱལ་ཁབ་ཆེན་པོའི་བདེ་ཆེན་ཆོས་གླིང་ཕོ་བྲང་ནས་དད་དང་ལྷག་བསམ་གྱིས་ཕུལ་བས་དགེ་ལེགས་རྣམ་པར་རྒྱལ་བར་གྱུར་ཅིག ༈ ཨོཾ་སྭསྟི། ཐུབྃ་བསྟནྃ་སྙིང་པོ་རྒྱལ་བ་སྟག་ལུང་པའི། །རིང་ལུགས་སྤེལ་ལ་ཟླ་མེད་བྱངྃ་ཆུབྃ་སེམས། །ལུང་རྟོགས་ཆོསྃ་ཀྱིྃ་ཉིྃ་མྃ་རྡོ་རྗེ་འཛིན། །གསང་གསུམ་འཆི་མེད་རྟག་པར་བཞུགས་གསོལ་འདེབས། །རྒྱལ་ཀུན་གཞྃན་ཕནྃ་ཐུགས་རྗེའི་རོལ་གར་གྱིས། །རྒྱལ་བསྟན་ཆོསྃ་ཀྱིྃ་དགའ་སྟོན་སྤེལ་བའི་གཉེན། །རྒྱལ་སྲས་གཞོན་ནུའི་གསན་བསམ་སྒོམ་མཐར་ཕྱིན། །རྒྱལ་ཀུན་གདུང་འཚོབ་ཕྲིན་ལས་གོྃ་ཆྃ་བརྟན། །དཔལ་ལྡན་བླ་མ་ཡབ་སྲས་སྐུ་ཚེ་དང༌། །ཕྲིན་ལས་རྨད་བྱུང་བོད་ཡུལ་ཕན་བདེ་སྤེལ། །བཤད་སྒྲུབ་དགའ་སྟོན་དབྱར་མཚོ་ལྟར་རྒྱས་པའི། །བཀྲ་ཤིས་སྣང་བས་ས་གསུམ་མཛེས་གྱུར་ཅིག །ཅེས་པའང་ལུང་རྟོགས་འཕགས་པའི་ཡོན་ཏན་གྱི་མངའ་བདག་ཞབས་དྲུང་རིན་པོ་ཆེ་ནས་སྟག་ལུང་གྲུབ་པའི་ལམ་སྲོལ་གྱི་སྨིན་གྲོལ་རྒྱ་ཆེར་བཀའ་དྲིན་དུ་ཐོབ་པས་རང་ཉིད་ཀྱིས་བྲི་བར་འདུན་པ་དང་དད་མཁྱེན་ལྷག་བསམ་རྨད་བྱུང་བསོད་ནམས་སྟོབས་རྒྱལ་ནས་བཀྲ་ཤིས་པའི་ལྷ་རེག་བཅས་ཆེད་བསྐུལ་བཞིན་སྨིན་ཟླའི་ཚེས་རྒྱལ་ཕུར་གྲུབ་སྦྱོར་ཉིན་གུས་སློབ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་བྲིས་ཤིང་སྨོན་པ་བཞིན་དོན་ལྡན་དུ་འགྱུར་བ་རྒྱལ་བ་སྲས་དང་བཅས་པས་བྱིན་གྱིས་བརླབ་པར་མཛད་དུ་གསོལ། ༈ རྡོ་རྫོང་མཆོག་སྤྲུལ་རིན་པོ་ཆེའི་ཞབས་བརྟན་སྨོན་ཚིག་འཆི་མེད་རྡོ་རྗེའི་གླུ་དབྱངས་ཞེས་བྱ་བ་བཞུགས་སོ། འཆི་མེད་ཡེ་ཤེས་རྡོ་རྗེའི་ལང་ཚོ་ཅན། །འཆི་མེད་དཀོན་མཆོག་རྩ་གསུམ་ཚེ་ཡི་ལྷ། །འཆི་མེད་རྟག་པ་དམ་པའི་དགེ་མཚན་གྱིས། །འཆི་མེད་ཚེ་མཆོག་རྡོ་རྗེའི་དངོས་གྲུབ་སྩོལ། །དཔྃལ་ལྡནྃ་སྲས་བཅས་རྒྱལ་བས་ལེགས་གསུང་གི །ཉིང་ཁུ་ངེས་དོན་བདུད་རྩིའི་ཆུ་ཀླུང་ཆེ། །དོནྃ་བྃརྒྱུད་རྟོགས་པས་ས་འདིར་འདྲེན་མཛད་མགོན། །བསྟནྃ་འཛིྃན་ཀུན་གྱི་རྒྱལ་པོ་ཞབས་བརྟན་གསོལ། །མྃཐུ་སྟོབསྃ་དབང་ཕྱུག་གསང་བ་ཀུན་གྱི་བདག །ཀུན་དགའ་བོ་དང་བཻ་རོ་དཔལ་རྡོ་རྗེ། །ཟུང་འཇུག་གྲུབྃ་པའིྃ་རྒྱལ་པོ་རས་ཆུང་པ། །དངོས་གཅིག་དུ་མའི་གར་སྟོན་ཞབས་བརྟན་གསོལ། གདོད་ནས་རྡོྃ་རྗེྃའི་ས་མཆོག་མངོན་གྱུར་ཀྱང༌། མཐའ་ཀླས་འགྲོ་ལ་རྗེས་བརྩེའི་ཡེ་ཤེས་གར། །ངགྃ་གི་དབྃང་ཕྱུག་མཆོག་གི་སྤྲུལ་སྐུའི་ཚུལ། །རྒྱལ་སྲས་སེམས་དཔའ་ཆེན་པོ་ཞབས་བརྟན་གསོལ། །མཐའ་ཀླས་ལུང་རྟོགས་ཆོསྃ་ལ་གསན་བསམ་མཛད། །ཟབ་དོན་སྒོམ་པའི་རྩལ་ཆེན་ཡོངས་སུ་རྫོགས། །ཕྲིན་ལས་སྟོབས་ཀྱིྃ་ཉིྃ་མྃ་གཞོན་ནུ་ཡིས། །ཕན་བདེའི་པད་ཚལ་བཞད་མཛད་ཞབས་བརྟན་གསོལ། །མི་མཐུན་བདུད་སྡེའི་ཕྱོགྃས་ལསྃ་རྣམྃ་པར་རྒྱལྃ། །ཐུགས་བསྐྱེད་བཞེད་པའི་དོན་ཀུན་ལྷུན་གྱིས་འགྲུབ། །མཁས་བཙུན་བཟང་པོའི་རྣམ་ཐར་རྨད་བྱུང་བས། །སྙིགས་དུས་བསྟན་འགྲོའི་རྒུད་སེལ་ཞབས་བརྟན་གསོལ། །བཀྲ་ཤིས་ཀུན་ཏུ་དགེ་བའི་དབྱངས་སྙན་གྱིས། །རྗེ་བཙུན་བླ་མ་མཆོག་གི་སྐུ་ཚེ་དང༌། །ཕྲིན་ལས་རྒྱུན་མི་ཆད་པས་ལེགས་མཛེས་ཏེ། །དོན་གཉིས་འབད་མེད་ལྷུན་གྱིས་འགྲུབ་གྱུར་ཅིག །བདག་ཀྱང་འདི་ནས་བྱང་ཆུབ་སྙིང་པོའི་བར། །དཔལ་ལྡན་བླ་མས་དགྱེས་བཞིན་རྗེས་སུ་བཟུང༌། །མཉེས་པ་གསུམ་གྱི་ཞབས་ཏོག་མཐར་སོན་པས། །ཐུགས་ཡིད་དབྱེར་མེད་གཅིག་ཏུ་འདྲེས་པར་ཤོག །ཅེས་པའང་ཟབ་དོན་སྙིང་པོའི་ལམ་ལ་རྟག་པར་གཞོལ་བའི་དགེ་སྦྱོང་པྲཛྙཱ་རསྨིས་ལྷ་རྫས་ཀྱི་མེ་ཏོག་དང་བཅས་ཏེ་གསུང་གིས་བསྐུལ་ངོར་ཀུ་སཱ་ལི་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་འཕགས་ཡུལ་རྡོ་རྗེ་གདན་བྱང་ཆུབ་ཤིང་གི་དྲུང་དུ་མགོ་ཟླའི་འཕེལ་ཚེས་གྲུབ་པའི་སྦྱོར་བ་དང་ལྡན་པའི་ཉིན་དད་དང་ལྷག་བསམ་དཀར་པོས་བྲིས་ཤིང་སྨོན་པ་བཞིན་འགྲུབ་པར་གྱུར་ཅིག ༈ ཨོཾ་སྭསྟི། ཀུནྃ་བཟྃང་གདོད་མའི་མགོན་པོའི་ཐུགས་རྗེའི་རྩལ། །མཁྱེན་བརྩེའི་ཡེ་ཤེས་རོལ་པས་འགྲོྃ་ཀུན་འདུལྃ། །ལུངྃ་རྟོགྃས་བསྟནྃ་པའིྃ་ཤིངྃ་རྟྃ་ཆེར་གྱུར་ནས། །ཕྲིནྃ་ལསྃ་ས་གསུམ་ཀུནྃ་ཁྱབྃ་ཞབས་བརྟན་གསོལ། །ཅེས་བྱམས་མགོན་ཏཱ་ཡི་སི་ཏུ་པདྨ་དོན་ཡོད་དབང་པོས་མཚན་གསོལ་གྱི་ཞབས་བརྟན་དུ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱི་བདེན་སྨོན་དུ་ཕུལ་བ་དགེ་ལེགས་འཕེལ། ༈ བདུད་དཔུང་མཐར་བྱེད་པདྨའི་རིང་ལུགས་ཀྱི། །བཀའ་གཏེར་སྨིན་གྲོལ་རྒྱ་མཚོའི་ཤིང་རྟ་ཆེ། །འཇིགས་བྲལ་ཡེ་ཤེས་རྡོ་རྗེའི་བྱིན་བརླབས་པའི། །དཔལ་ལྡན་བླ་མ་ཞབས་པད་རྟག་བརྟན་ཤོག །ཅེས་པའང་རྗེ་དེའི་སློབ་ཚོགས་རྣམས་ཀྱིས་བསྐུལ་བ་བཞིན་དིལ་མཁྱེན་རྒན་པོ་མངྒ་ལས་སྨྲས་པ་ཨཱ་ཡུ་ཏིཥྛནྟུ། ༈ ཞབས་བརྟན་བདེན་སྨོན་འཆི་མེད་རྡོ་རྗེའི་དབྱངས་སྙན་ཞེས་བྱ་བ་བཞུགས། ཨོཾ་སྭསྟི། འཆི་མེད་རྡོ་རྗེའི་སྐུ་བརྙེས་མཚོ་སྐྱེས་རྒྱལ། །རབ་འབྱམས་ཡི་དམ་དཀྱིལ་འཁོར་རྒྱ་མཚོ་དང༌། །མཁའ་འགྲོ་དམ་ཅན་མཆོག་གསུམ་བདེན་མཐུ་ཡིས། །ཇི་ལྟར་སྨོན་པའི་དོན་ཀུན་མྱུར་འགྲུབ་མཛོད། །རྒྱལ་ཀུན་ཡེ་ཤེས་སྐུ་ཅན་འཇམ་དཔལ་དབྱངས། །མཚུངས་མེད་མཁྱེན་བརྩེའི་རང་གཟུགས་ཆོསྃ་ཀྱིྃ་རྗེའི། །ཡེ་ཤེས་སྒྱུ་འཕྲུལ་རྣམ་འདྲེན་དབྃང་པོྃ་ཡི། །སྐུ་ཚེ་མི་ཤིགས་རྡོ་རྗེ་ལྟར་བརྟན་གསོལ། ངོ་མཚར་ཐུགས་བསྐྱེད་ཆུ་གཏེར་ལས་འཁྲུངས་པའི། །བསྟན་འགྲོའི་པདྨོའི་གཉེན་གྱི་ཕྲིན་ལས་འོད། །ཕྱོགས་བརྒྱར་འབར་བའི་དགེ་མཚན་རྨད་བྱུང་བས། །ས་གསུམ་འཇིག་རྟེན་ཀུན་ཏུ་མཛེས་གྱུར་ཅིག །ཅེས་རབ་བྱུང་བཅུ་བདུན་པའི་ས་འབྲུག་རྒྱལ་གྱི་ཟླ་བར་ཞི་ཁྲོ་དགོངས་པ་རང་གྲོལ་གྱི་ཚོགས་སྒྲུབ་དང་འབྲེལ་བའི་བདུད་རྩི་སྨན་གྱི་དཀྱིལ་འཁོར་ཞལ་ཕྱེ་བའི་ཚེ་རྙིང་མའི་སྔགས་བཙུན་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་དུས་ཚེས་དགེ་བར་གསོལ་བ་བཏབ་པ་བཞིན་འགྲུབ་པར་གྱུར་ཅིག ༈ ཞབས་བརྟན་བདེན་བརྗོད་འཆི་མེད་རྡོ་རྗེའི་དབྱངས་སྙན་བཞུགས། ཡེ་ཤེས་དབྱིངས་སུ་བྱིན་རླབས་གཟིྃ་བརྗིྃད་འབར། །བརྒྱུད་གསུམ་བླ་མ་ཚེ་ཡི་རིག་འཛིན་གྱིས། །མཆོག་གི་གསང་གསུམ་རྡོ་རྗེའི་དཀྱིལ་འཁོར་དུ། །སྨིན་པས་འཆི་མེད་རབྃ་དགྃའི་དཔལ་ཀུན་སྩོལ། །ཆོས་ཉིད་ངང་ལས་འོདྃ་གསྃལ་སྒྱུ་འཕྲུལ་གར། །ཞི་ཁྲོ་རྒྱལ་བ་རྡོ་རྗེ་ཚེ་ཡི་ལྷ། །མཁྱེན་བརྩེ་ནུས་པའི་ཐུགསྃ་མཆོྃག་མི་ཟད་པས། །སྐྱེ་འཆི་གཞོམ་གཞིག་བྲལ་བའི་རྩལྃ་རྫོགས་མཛོད། །བདེ་སྟོང་རོལ་པའི་རྣལ་འབྱོར་རྗེས་སྐྱོང་མཐུ། །པྃདྨྃ་དབྃང་ཆེནྃ་གནས་ཡུལ་དཔའ་བོ་དང༌། །ཌཱ་ཀི་རྒྱ་མཚོ་དགྱེསྃ་པའིྃ་རང་རྩལྃ་གྱིས། །འཆི་མེད་ཡེ་ཤེས་ཚེ་ཡི་དངོས་གྲུབ་སྩོལ། །ཆོས་ཉིད་མི་ཤིགས་རྡོ་རྗེར་རྟག་བརྟན་ཅིང༌། །ཆོས་ཅན་རྩ་གསུམ་རྒྱལ་བའི་ཐུགས་རྗེའི་མཐུ། །དད་མོས་གདུང་བས་བསྐུལ་ཞིང་གསོལ་བཏབ་བཞིན། །འགྲུབ་ནས་བསྟན་འགྲོའི་དགེ་མཚན་རྒྱས་གྱུར་ཅིག །ཅེས་དད་སློབ་ངག་དབང་རྣམ་རྒྱལ་ནས་ལྷ་རྫས་བཅས་སྤར་དུ་སྒྲུབ་འོས་ཞབས་བརྟན་ཆེད་དུ་བསྐུལ་བ་བཞིན་ས་བྱ་གསར་ཚེས་ཀྱི་ཆོ་འཕྲུལ་ཟླ་བའི་ཚེས་བཅོ་ལྔ་ལ་བྲིས་པ་དོན་ལྡན་དུ་གྱུར་ཅིག ༈ ཨོཾ་སྭསྟི། ལྷར་བཅས་འགྲོ་ཀུནྃ་རབ་དྃགའི་བསླབ་གསུམ་གྱིས། །བརྩེ་ཆེན་སྙིང་པོའི་བསྟནྃ་པའིྃ་ཨུཏྤལ་ཚལ། །རྒྱས་མཛད་སྨྲ་བའི་ཉིྃ་མྃ་ཞབས་བརྟན་ཅིང༌། །ལུང་རྟོགས་ཕྲིན་ལས་ཀུན་ཏུ་ཁྱབ་པར་ཤོག །སྤྲུལ་པའི་སྐུ་མཆོག་རབ་གསལ་ཟླ་བས་མཛད་པའོ། ༈ ཨོཾ་སྭསྟི། ཕུལ་བྱུང་བསོྃད་ནམྃས་ཡེ་ཤེས་ཚོགས་གཉིས་དཔལ། །བསྟན་འགྲོར་སྨན་པའི་ཐུགས་བསྐྱེད་བཟྃང་པོའིྃ་འབྲས། །མཆོག་གི་སྤྲུལྃ་སྐུའིྃ་དམ་པའི་རྣམ་ཐར་གྱིས། །དགེ་མཚན་སྣང་བ་རྒྱས་ཤིང་བརྟན་གྱུར་ཅིག །ཅེས་དིལ་མཁྱེན་རྒན་བུས་ཆོ་འཕྲུལ་ཟླ་བའི་ཚེས་ཉེར་གཅིག་ཀུན་གཟིགས་མཁྱེན་བརྩེའི་དབང་པོའི་དུས་ཆེན་ཉིན་མཚན་འབུལ་ཞུས་པ་དགེ་ལེགས་འཕེལ། ༈ ཞབས་བརྟན་བདེ་ཆེན་རྡོ་རྗེའི་དབྱངས་སྙན་ཞེས་བྱ་བ་བཞུགས། རྒྱལ་ཀུན་ཡུམ་གྱུར་ཀུནྃ་བཟྃང་བདེ་ཆེན་རྒྱལ། །འཆིྃ་མེདྃ་ཌཱ་ཀིའི་སྒྱུ་འཕྲུལ་རོལ་པ་ཡིས། །བསྟན་འགྲོའི་དཔལ་སྤེལ་སྒྲོལྃ་མ་དཀྃར་མོ་དང༌། །གཉིས་སུ་མེད་པར་ཞབས་པད་རྟག་བརྟན་ཤོག །ཅེས་པའང་རིག་པ་འཛིན་པའི་གཟུགས་བརྙན་པདྨ་གར་དབང་མདོ་སྔགས་གླིང་པས་ས་བྱ་གནམ་ལོ་གསར་ཚེས་ཀྱི་སྐབས་སུ་བལ་ཡུལ་མཆོད་རྟེན་ཆེན་པོའི་དྲུང་ནས་གུས་པས་སྨོན་ཚིག་ཏུ་བགྱིས་པ་སིདྡྷི་རསྟུ། ༈ ཨོཾ་སྭསྟི། ཟླ་མེད་མཚོ་སྐྱེས་རྒྱལ་བའི་རིང་ལུགས་མཆོག །བཀའ་གཏེར་སྨིན་གྲོལ་མན་ངག་བསམ་མི་ཁྱབ། །སྤེལ་མཛད་འཆིྃ་བ་མེདྃ་པའི་རིགྃ་འཛིྃན་རྗེ། །ཞབས་བརྟན་མཛད་ཕྲིན་རྟག་ཁྱབ་ལྷུན་གྲུབ་ཤོག །ཅེས་པའང་ཞལ་སློབ་ཕ་རན་སི་ཨི་ཏི་ཨན་ཧུག་ནས་བསྐུལ་ངོར་དིལ་མཁྱེན་མངྒ་ལས་བྲིས་པ་དགེ། ༈ འཇིག་རྟེན་གསུམ་གྱི་མགོན་པོ་ཚེ་དཔག་མེད། །འཆི་མེད་གྲུབ་པའི་སྐུར་བཞེངས་མཚོ་སྐྱེས་རྗེའི། །མཁྱེན་བརྩེ་ནུས་པའི་རྩལ་གྱིས་ནད་གདོན་སོལ། །རྡོ་རྗེའི་སྲོག་བརྟན་ཕྲིན་ལས་མཐར་ཕྱིན་ཤོག །ཅེས་དད་སློབ་རྣམས་ནས་རྟེན་བཅས་བསྐུལ་ངོར་དིལ་མཁྱེན་མངྒ་ལས་བྲིས་པ་དགེ ༈ རྩ་གསུམ་ཀུན་འདུས་མ་ཧཱ་གུྃ་རུྃ་ཡིས། །མཁྱེན་བརྩེའི་ཡེ་ཤེས་སྙིགས་མར་ཆེས་སྣང་བས། །སྐྱབྃས་གནས་རྒྱ་མཚོའི་ཐུགས་དམ་རྩལ་སྤྲུགས་ལ། །མཆོག་གི་རིག་འཛིན་ཞབས་པད་བརྟན་གྱུར་ཅིག །ཀྃརྨྃ་བཀའ་བརྒྱུད་དཔལ་ལྡན་འབྲུག་པ་དང༌། །སྔ་འགྱུར་བཀའ་གཏེར་སྨིན་གྲོལ་བཤད་སྒྲུབ་ཀྱི། །བསྟནྃ་པའི་སྲོག་འཛིྃན་ཕན་བདེའི་ཕྲིནྃ་ལསྃ་དཔལ། །འཇིག་རྟེན་ཀུནྃ་ཏུ་ཁྱབྃ་བཞིན་ཞབས་བརྟན་གསོལ། །འཆི་མེད་རྡོ་རྗེའི་ལང་ཚོ་རྣམ་པར་རྒྱས། །ཐུགས་བསྐྱེད་དཔུང་པས་ནག་ཕྱོགས་གཡུལ་ལས་རྒྱལ། །བཀྲ་ཤིས་དགེ་མཚན་བྱེ་བའི་སྣང་བ་ཡིས། །ཕྱོགས་དུས་ཀུན་ཏུ་ཁྱབ་ཅིང་རྟག་བརྟན་ཤོག །ཅེས་པའང་ཀུན་ཕན་སྲོག་གི་ཟུངས་སྟེར་འཚོ་མཛད་འཇམ་དབྱངས་ལུང་རྟོགས་ནས་རིན་ཆེན་དང་པོའི་སྐྱེས་བཅས་བསྐུར་ངོར་པདྨ་དགྱེས་པའི་འབངས་གར་དབང་མདོ་སྔགས་གླིང་པས་མཁའ་འགྲོ་གསང་བ་ཀུན་འདུས་ཀྱི་སྒྲུབ་མཆོད་སྐབས་བྲིས་ཤིང་རྩེ་གཅིག་ཏུ་སྨོན་པ་དགེ་ལེགས་འཕེལ། ༈ ལུང་རྟོགས་ཡོན་ཏན་བདུད་རྩིའི་དཔལ་མངའ་ཞིང༌། །རྡོྃ་རྗེྃ་སྙིང་པོའི་གནས་ལུགས་མངོན་སུམ་གཟིགས། །མཚུངས་མེད་དཔལ་ལྡན་བླ་མའི་གསང་བ་གསུམ། །རྟག་བརྟན་ཕྲིན་ལས་རྒྱལྃ་མཚྃན་བརྟན་གྱུར་ཅིག །ཅེས་པའང་དཔལ་ལྡན་འབྲུག་པའི་རིང་ལུགས་འཛིན་པ་ཆོས་རྩེའི་གནས་བརྟན་བགྲེས་པ་རྡོ་རྗེ་རྒྱལ་མཚན་གྱི་ཞབས་བརྟན་དུ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་བྲིས་པ་དགེ ༈ ཞབས་བརྟན་བདེན་སྨོན་འཆི་མེད་རྟག་པའི་དབྱངས་སྙན་ཞེས་བྱ་བ་བཞུགས། རྒྱལ་བའི་ཕྲིནྃ་ལསྃ་སྙིང་པོ་ལུང་རྟོགས་ཆོས། །བསླབ་གསུམ་རྣམ་དག་རྒྱལ་མཚན་རྩེར་མཆོད་ན། །ཐུགས་བསྐྱེད་དབྃང་གི་རྒྱལྃ་པོའི་ཕུན་ཚོགས་དཔལ། །ལེགས་སྩོལ་མཚུངས་མེད་རྣམ་འདྲེན་ཞབས་བརྟན་གསོལ། །བརྒྱུད་གསུམ་རིགྃ་འཛིྃན་བླ་མའི་ཐུགས་ཀྱི་བཅུད། །སྔ་འགྱུར་བསྟན་མཆོག་ནོར་བུ་དབྃང་གི་རྒྱལྃ། །བཤད་སྒྲུབ་རྒྱལ་མཚན་རྩེ་མོར་ལེགས་མཆོད་པའི། །མཁན་ཆེན་རྡོ་རྗེ་འཛིན་དབང་ཞབས་བརྟན་གསོལ། །རྒྱལ་དབང་པྃདྨྃའི་བཀའ་གཏེར་བསྟན་པའི་སྲོལ། །འཁོར་ལོ་གསུམ་གྱིས་སྤེལ་བའི་ཐུགས་བསྐྱེད་དང༌། །ལུང་རྟོགས་དབྃང་གི་རྒྱལྃ་པོའི་རྒྱན་མཛེས་དཔལ། །གསང་གསུམ་རྡོ་རྗེའི་ཁམས་སུ་བརྟན་གྱུར་ཅིག །ཅེས་སྔ་འགྱུར་བསྟན་པའི་ཤིང་རྟ་རྒྱལ་སྲས་གཞན་ཕན་མཐའ་ཡས་ཁུ་དབོན་གྱི་གདན་ས་དགེ་མང་དགོན་ལྷུན་གྲུབ་བདེ་ཆེན་གླིང་གི་མཁན་པོ་རྣམས་ཀྱི་ཞབས་བརྟན་འདིའང་བཙུན་པ་དོན་གྲུབ་ཉི་མ་ནས་བསྐུལ་བ་བཞིན་རང་ཉིད་ཀྱང་དད་སྤྲོའི་སེམས་ཀྱིས་སྔ་འགྱུར་བསྟན་ཞབས་སུ་སྐྱེས་པའི་འབངས་མངྒ་ལ་ཤྲཱི་བྷཱུ་ཏིས་བྲིས་པས་དམ་པ་དེ་དག་གི་སྐུ་ཚེ་དང་མཛད་ཕྲིན་མཐར་ཕྱིན་པའི་རྟེན་འབྱུང་མཆོག་ཏུ་གྱུར་ཅིག ༈ ཞབས་བརྟན་འཆི་མེད་རྡོ་རྗེའི་དབྱངས་སྙན་བཞུགས། ཨོཾ་སྭསྟི། ངེས་དོན་སྙིང་པོ་དཔལ་ལྡན་འབྲུག་པ་ཆེའི། །སྙན་བརྒྱུད་གདམས་ངག་སྨིན་གྲོལ་རྒྱ་མཚོའི་མཛོད། །ངགྃ་གི་དབྃང་ཕྱུག་པདྨ་དཀར་པོ་ཡི། །རིང་ལུགས་འཛིན་པའི་མཆོག་སྤྲུལ་ཞབས་བརྟན་གསོལ། །འགྱུརྃ་མེདྃ་ཐུགས་བསྐྱེད་རྩ་བ་རབ་ཏུ་བརྟན། །ལུང་རྟོགས་ཆོསྃ་ལ་ཐོས་བསམ་སྒོམ་གསུམ་གྱིསྃ། །དབེན་པར་སྒྲུབ་པའི་རྒྱྃལ་མཚྃན་ལེགས་འཛིན་པས། །བསྟན་པའི་རྒྱན་དུ་མཛེས་གང་ཞབས་བརྟན་གསོལ། །རྩ་གསུམ་རྒྱལ་བའི་མཁྱེན་བརྩེའི་བྱིན་རླབས་དང༌། །དད་ལྡན་སྐལ་བཟང་སློབ་མའི་ལྷག་བསམ་གྱིས། །ཇི་ལྟར་སྨོན་པ་ཡིད་བཞིན་འགྲུབ་པ་ཡི། །དགེ་ལེགས་སྣང་བས་ས་གསུམ་ཁྱབ་གྱུར་ཅིག །ཅེས་པའང་གྲུབ་དབང་ཤཱཀྱ་ཤྲཱིའི་ཐུགས་སྲས་ཁྲིད་དཔོན་པདྨ་ཆོས་རྒྱལ་ཡབ་སྲས་ཀྱི་ཞལ་སློབ་ཚེ་མཚམས་སྤོང་བ་པ་རིན་ཆེན་གྱི་ནེ་སྒོར་ཆིག་སྟོང་གི་རྟེན་བཅས་གསུང་བསྐུལ་བཞིན་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་དད་ཅིང་རྗེས་སུ་ཡི་རང་གིས་བྲིས་ཏེ་སྨོན་པ་བཞིན་འགྲུབ་པར་གྱུར་ཅིག ༈ ཨོ་རྒྱན་སངས་རྒྱས་གཉིས་དངོས་རིག་པ་འཛིན། །འཇིགས་བྲལ་ཡེ་ཤེས་རྡོ་རྗེའི་བྱིན་བརླབས་པས། །ཕྱོགས་ལས་རྣམ་རྒྱལ་སྔ་འགྱུར་བསྟན་པའི་དཔལ། །འཛིན་མཛད་མཆོག་གི་སྤྲུལ་སྐུ་ཞབས་བརྟན་གསོལ། །ཨོ་རྒྱན་མཚོ་སྐྱེས་རྒྱལ་བའི་རིང་ལུགས་ཆེ། །ཕྱོགས་བརྒྱར་སྤེལ་བས་འཇིགས་མེད་རྣམ་ཐར་གྱི། །མཐུ་སྟོབས་ངོ་མཚར་རྨད་དུ་བྱུང་བ་ཡིས། །གསང་གསུམ་འཆི་མེད་རྡོ་རྗེ་ལྟར་བརྟན་ཤོག །ཅེས་པའང་མཚོ་སྐྱེས་རྒྱལ་བའི་རྒྱལ་ཚབ་སྐྱབས་རྗེ་འགྲོ་འདུལ་གླིང་པས་ངོས་འཛིན་མཚན་གསོལ་གནང་བ་བཞིན་ཁྲི་སྟོན་མངའ་གསོལ་སྐབས་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་བདེན་སྨོན་དུ་བྲིས་པས་དགེ་ལེགས་འཕེལ། ༈ ཨོཾ་སྭསྟི་ཤྲཱི་བི་ཛ་ཡནྟུ། ཆོས་དབྱིངས་ཀུན་ཁྱབ་མཁྱེན་བརྩེ་ནོར་བུའི་སྤྲིན། །མཐའ་ཀླས་གདུལ་བྱའི་ཁམས་ལ་སྙོམས་འཇུག་པའི། །ཕན་བདེའི་ཆར་གྱིས་ཀུན་ཏུ་རབ་དགའི་དཔལ། །སྟེར་མཛད་སངས་རྒྱས་རྣམས་ཀྱི་རང་བཞིན་ཕྱིར། །རིག་སྟོང་གཉུག་མ་ཆོསྃ་ཀྱིྃ་སྒྲོམ་བུ་ལས། །ཚིག་དོན་ངོ་མཚར་རྨད་བྱུང་རང་བརྡོལ་བའི། །སྙིགས་དུས་རྒུད་པ་གསོ་བའི་རྒྱྃ་མཚོྃ་ཆེ། །དོན་དང་ལྡན་ཞེས་བསྔགས་པའི་མེ་ཏོག་འཐོར། །གཟུང་འཛིན་དགྲྃ་བོ་འདུལྃ་བྱེད་ཡེ་ཤེས་ཀྱི། །རྡོྃ་རྗེྃས་བཏུལ་ནས་བསྟན་འགྲོར་སྨན་པའི་མཐུ། །ཕྱོགས་ལས་རྣམྃ་རྒྱལྃ་ལུང་རྟོགས་རྒྱལ་རྔ་ཆེ། །སྲིད་མཐའི་བར་དུ་ཡང་ཡང་སྒྲོག་པར་སྨོན། །དེ་སྐད་མཚོ་སྐྱེས་བླ་མའི་ཕྲིན་ལས་ཀྱི། །གྲིབ་བསིལ་ངལ་གསོ་ཐོབ་པའི་མངྒ་ལས། །དད་དང་ལྷག་བསམ་ཡིད་ཆེས་སོར་མོ་ཡིས། །ཕུལ་འདིས་ཞབས་བརྟན་ཕྲིན་ལས་རྒྱས་གྱུར་ཅིག །ཅེས་པའང་པདྨ་གར་དབང་བདེ་ཆེན་འོད་གསལ་མདོ་སྔགས་གླིང་པས་ཆེད་དུ་བརྗོད་པ་དགེ་ལེགས་འཕེལ། ༈ ཨོཾ་སྭསྟི་ཤྲཱི་བི་ཛ་ཡནྟུ། ཕྱོགས་དུས་རྩ་གསུམ་རྒྱལ་བའི་མཁྱེན་བརྩེ་ནུས། །གཅིག་འདུས་ཨོ་རྒྱན་སློབ་དཔོན་པདྨ་རྒྱལ། །སྙིགས་མའི་འགྲོ་ལ་དགོངས་པའི་རྡོ་རྗེའི་གསུང༌། །དེང་འདིར་བདག་གིས་བསྐུལ་ལ་མྱུར་དུ་གཟིགས། །ལྔ་བརྒྱ་ཐ་མའི་ལྷོ་ལྗོངས་འགྲོ་བ་རྣམས། །སྡུག་བསྔལ་ཉམས་ཐག་གྱུར་པ་ཁྱོད་གཅིག་གིས། །སྐྱོབ་པའི་ཞལ་བཞེས་དགོངས་པའི་དུས་ལ་བབ། །མྱུར་དུ་ཐུགས་རྗེས་གཟིགས་ཤིག་མ་ཧཱ་གུ་རུ། །རྡོ་རྗེའི་སྐུ་ཚབ་མཐོང་བ་དོན་ལྡན་དུ། །བྱིན་གྱིས་བརླབས་ནས་ཡེ་ཤེས་གཟི་བྱིན་གྱིས། །ལྷོ་ལྗོངས་ཆོས་ཀྱི་རྒྱལ་ཁབ་ཆེན་པོ་རུ། །ནག་ཕྱོགས་ཟིལ་གནོན་དཀར་ཕྱོགས་དབུ་འཕང་བསྟོད། །ནད་མུག་མཚོན་གྱིས་བསྐལ་ངན་བཟློག་ཅིང་ཞི། །སྣོད་བཅུད་རྫོགས་ལྡན་དུས་ཀྱི་དགའ་སྟོན་རྒྱས། །ཁྱད་པར་རྒྱལ་བའི་བསྟན་པ་རིན་པོ་ཆེ། །བཤད་སྒྲུབ་ལས་ཀྱི་འཁོར་ལོ་འཕེལ་རྒྱས་བརྟན། །ལྷ་སྲས་འཇིགས་མེད་སེང་གེ་དབང་ཕྱུག་དང༌། །ཆོས་རྒྱལ་འཇིགས་མེད་རྡོ་རྗེ་ཡབ་སྲས་དང༌། །ལཀྵྨཱིཾ་དཱི་པཾ་སྐལ་བཟང་ལྷའི་སྲས་མོ། །རྒྱལ་བློན་འཁོར་བཅས་ཡེ་ཤེས་རྡོ་རྗེའི་གུར། །འདུ་འབྲལ་མེད་པར་སྲུང་སྐྱོབ་བྱིན་གྱིས་རློབས། །སྐུ་ཚེ་བསོད་ནམས་དཔལ་འབྱོར་སྙན་གྲགས་སྟོབས། །དམ་པའི་ཡོན་ཏན་ཡར་ངོའི་ཟླ་བཞིན་འཕེལ། །ཕས་རྒོལ་ནག་ཕྱོགས་དགྲ་གདོན་ཟིལ་གྱིས་གནོན། །ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད། །ལྷ་སྲས་རྗེ་འདིའི་མངའ་ཐང་སྙན་གྲགས་འཕེལ། །མངའ་རིས་ཆོས་བཞིན་སྐྱོང་བའི་མཛད་ཕྲིན་སྟོབས། །ཆོས་ཀྱི་རྒྱལ་པོ་མེས་དབོན་རྣམ་གསུམ་དང༌། །དབྱེར་མེད་བསྟན་འགྲོའི་དཔལ་ཀུན་རྒྱས་བརྟན་ཤོག །ཕྱི་སྣོད་འབྲུ་བཅུད་རྩི་ཤིང་ལོ་འབྲས་འཕེལ། །ནང་བཅུད་ཆོས་སྤྱོད་ཚེ་དཔལ་བསོད་ནམས་རྒྱས། །དགེ་འདུན་སྡེ་རྒྱས་ཐུགས་མཐུན་བཤད་སྒྲུབ་དར། །ནད་མུག་མཚོན་གྱི་བསྐལ་པ་ཞི་གྱུར་ཅིག །དཀར་ཕྱོགས་ལྷ་མིས་དུས་ཀུན་བཀྲ་ཤིས་སྤེལ། །ནག་ཕྱོགས་རྒྱལ་འགོང་དམ་སྲིའི་རྒྱུ་འགྲུལ་ཞི། །རྒྱལ་བློན་ཐུགས་མཐུན་དཔལ་འཕེལ་རྫོགས་ལྡན་གྱི། །དགའ་སྟོན་མི་ཉམས་གོང་འཕེལ་རྟག་བརྟན་ཤོག །མདོར་ན་སློབ་དཔོན་སངས་རྒྱས་གཉིས་པ་ཆེ། །ལོ་པཎ་རྗེ་འབངས་སྤྲུལ་པར་བཅས་པ་ཡིས། །བོད་ཡུལ་ཆོས་ལ་བཀོད་པའི་རྣམ་ཐར་བཞིན། །ཞིང་འདིར་ནུབ་མེད་རྟག་ཏུ་འཆར་གྱུར་ཅིག །ཅེས་པའང་ཕུན་སུམ་ཚོགས་པའི་རྟེན་འབྱུང་གིས་རིག་རྩལ་དུ་ཤར་བ་བཞིན་མཚོ་སྐྱེས་ཀུན་ཏུ་འཆང་དགྱེས་པའི་འབངས་པདྨ་གར་དབང་འོད་གསལ་མདོ་སྔགས་གླིང་པས་ལྷག་བསམ་རྩེ་གཅིག་པས་ཇི་ལྟར་སྨོན་པ་བཞིན་འགྲུབ་པ་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། ༈ ཨོཾ་སྭསྟི། མཁྱེན་གཉིས་ཡེ་ཤེས་རྒྱལ་བའི་མེ་ལོང་ངོགས། །ཐོས་བསམ་སྒོམ་པའི་གཟུགས་སྟོང་རྣམ་བཀྲ་བས། །ངགྃ་གི་དབྃང་ཕྱུག་ཟུར་ཕུད་ལྔ་པ་བཞིན། །རྒྱལ་བསྟན་མཛེས་པའི་རྒྱན་དུ་ཞབས་བརྟན་གསོལ། །དྲི་མེད་ཚུལ་ཁྲིམས་གཙང་མའི་གསེར་གྱི་གཞིར། །འཕགས་པའི་ཏིང་འཛིན་རི་གླིང་བཀོད་པས་མཛེས། །ཆོས་རབ་རྣམ་འབྱེད་བསླབྃ་གསུམྃ་ཉི་ཟླའི་འོད། །ཕྱོགས་དུས་ཞིང་ཀུན་ཁྱབ་བཞིན་ཞབས་བརྟན་གསོལ། །གཟོད་ནས་བྲི་གང་བྲལ་བའི་བདེ་གཤེགས་སྙིང༌། །ཟག་མེད་ཡོན་ཏན་རབྃ་བཀྲ་མངོན་གྱུར་ནས། །འོད་གསལ་རྡོ་རྗེ་སྙིང་པོའི་ཤིང་རྟ་ཆེ། །གསང་གསུམ་རྟག་བརྟནྃ་ཚེ་མཐའ་ཡས་བཞིན་ཤོག །ཅེས་པའང་ཨོ་སི་ཌ་ལི་ཡའི་བཙུན་མ་བསྟན་འཛིན་དབང་མོས་བསྐུལ་ངོར་མངྒ་ལ་ཤྲཱི་བྷཱུ་ཏིས་བྲིས་པས་དགེ་ཞིང་བཀྲ་ཤིས་པར་གྱུར་ཅིག ༈ དཔྃལ་ལྡནྃ་གྲུབ་དབང་མཻ་ཏྲིའི་ཡེ་ཤེས་གར། །ངེས་དོན་ཕྱག་རྒྱ་ཆེན་པོའི་རིང་ལུགས་ཆེ། །སྨིན་གྲོལ་ཆོསྃ་ཀྱིྃ་དབྃང་ཕྱུགྃ་བླ་མ་རྗེ། །གསང་གསུམ་མི་མཐུན་གཡུལ་ལས་རྣམ་རྒྱལ་ཞིང༌། །སྐུ་ཚེ་འཆི་མེད་ཚེ་མཆོག་གྲུབ་པ་རུ། །མཆོག་གསུམ་རྣམ་པར་རྒྱལ་མ་ཚེ་དཔག་མེད། །ཡིད་བཞིན་འཁོར་ལོ་མཚོ་སྐྱེས་རྡོ་རྗེ་འཆང༌། །རྩ་གསུམ་རྒྱལ་བ་རྒྱ་མཚོས་བྱིན་གྱིས་རློབས། །ཅེས་པའང་དད་སྦྱིན་ཚེས་བཅུ་སྤྱི་ཚོགས་ནས་རྟེན་བཅས་བསྐུལ་བ་བཞིན་བཀྲ་ཤིས་དཔལ་འབྱོར་གྱིས་རྒྱལ་ཟླའི་དགའ་བ་དང་པོར་བྲིས་ཤིང་སྨོན་པ་བཞིན་འགྲུབ་པར་གྱུར་ཅིག ༈ ཞབས་བརྟན་བདེན་སྨོན་འཆི་མེད་རྟག་པའི་རྒྱལ་རྔ་ཞེས་བྱ་བ་བཞུགས། ཨོཾ་སྭསྟི། སྲིད་ཞིའི་དགེ་ལེགས་འབྱུང་གནས་རིན་ཆེན་གསུམ། །ཕུལ་བྱུང་མཁྱེན་བརྩེ་ནུས་པས་རྗེས་དགོངས་ཏེ། །བསྟན་འགྲོའི་དཔུང་གཉེན་བླ་མ་དགེ་བའི་བཤེས། །སྐུ་ཚེ་རིང་ཞིང་བརྟན་པར་མཛད་དུ་གསོལ། །ཕན་བདེའི་འདོད་འབྱུང་རྒྱལ་བསྟན་ནོརྃ་བུྃའི་དབྱིག །ཚུལ་གནས་ཐོས་བསམ་སྒོམ་པའི་རྒྱལ་མཚན་རྩེར། །ལེགས་མཆོད་སྡེ་སྣོད་སྨྲ་བའི་དབྃང་ཕྱུགྃ་གི །སྐུ་ཚེ་རིང་ཞིང་བརྟན་པར་མཛད་དུ་གསོལ། །པྃདྨྃའི་རིང་ལུགས་བཀའ་གཏེར་སྨིན་གྲོལ་གྱིས། །བདུད་རྩིའི་ཐུགས་རྒྱུད་ལེགས་པར་གཏམས་པ་ལས། །དོན་གཉིས་སྒྲུབ་པའི་ཕྲིན་ལས་རྣམྃ་པར་རྒྱལྃ། །སྐུ་ཚེ་རིང་ཞིང་བརྟན་པར་མཛད་དུ་གསོལ། །དེ་ལྟར་སྨོན་པའི་དོན་ཀུན་མྱུར་འགྲུབ་ནས། །དཔལ་ལྡན་བླ་མའི་སྐུ་ཚེའི་ལྷུན་པོ་བརྟན། །དད་ལྡན་སློབ་མའི་བསམ་དོན་ཆོས་བཞིན་འགྲུབ། །ཐུབ་བསྟན་རིན་ཆེན་དབུ་འཕང་དགུང་ལས་མཐོ། །ངོ་མཚར་ཕྲིན་ལས་རྟག་ཅིང་བརྟན་པར་མཛོད། །ཅེས་ཆོས་རྩེའི་སློབ་དཔོན་རིན་ཆེན་ནས་ཆེད་དུ་གསོལ་བ་བཏབ་པ་བཞིན་བཀྲ་ཤིས་དཔལ་འབྱོར་དོན་ཐམས་ཅད་གྲུབ་པའི་སྡེས་ཚེ་སྒྲུབ་གསང་བ་འདུས་པའི་སྒྲུབ་ཆེན་གྱི་སྐབས་སུ་འདུན་སྨོན་དུ་གསོལ་བ་བཞིན་འགྲུབ་པར་གྱུར་ཅིག ༈ ཨོཾ་སྭསྟི་ཤྲཱི་བི་ཛ་ཡནྟུ། འཇིགས་མེད་སྟོབས་བཅུའི་བདུད་འཇོམས་མཚོ་སྐྱེས་རྗེའི། །མཁྱེན་བརྩེ་ནུས་པའི་ཡེ་ཤེས་ཉིན་མོར་བྱེད། །མཆོག་གི་རྡོ་རྗེའི་རིག་འཛིན་བླ་མ་རྗེར། །ཇི་ལྟར་གསོལ་བ་བཏབ་བཞིན་འགྲུབ་གྱུར་ཅིག །བཀའ་གཏེར་ཟུང་འཇུག་སྔ་འགྱུར་ཆུ་གཏེར་ཆེ། །གཞན་ཕན་ཟླ་བ་ནོར་བུའི་བསིལ་ཟེར་གྱིས། །ཕྱོགས་བརྒྱར་སྤེལ་བའི་སྐུ་ཚེ་ཕྲིན་ལས་དཔལ། །རྟག་ཁྱབ་ལྷུན་གྱིས་གྲུབ་པར་བཞུགས་གསོལ་འདེབས། །གུ་རུའི་ཐུགས་ཀྱི་གསང་མཛོད་མངའ་བསྒྱུར་མཛོད། །དབྱངས་ཅན་སྤྲུལ་པ་མཁར་ཆེན་མཚོ་རྒྱལ་འཕྲུལ། །ཌཱ་ཀིའི་དབང་ཕྱུག་རིག་འཛིན་དབང་མོ་མཆོག །སྐུ་ཚེ་ཕྲིན་ལས་རྟག་ཁྱབ་ལྷུན་གྲུབ་ཤོག །རྩོད་ལྡན་དུས་ཀྱི་རྒུད་པ་སེལ་བ་ལ། །ལས་འཕྲོ་གཏེར་གྱིས་ཕྲིན་ལས་སྣང་བའི་དཔལ། །ཆེར་འབར་ངོ་མཚར་སྲིད་ཞིའི་བླར་མཛེས་པས། །དགེ་ལེགས་དཔལ་གྱིས་ས་གསུམ་ཁྱབ་གྱུར་ཅིག །ཅེས་པའང་མངྒ་ལས་འདུན་སྨོན་དུ་སྤེལ་བའོ། ༈ ཨོཾ་སྭ་སྟི། འཇིགྃས་མེདྃ་མཚོ་སྐྱེས་རྒྱལ་བའི་རིང་ལུགས་ཆེ། །བཀའ་གཏེར་སྨིན་གྲོལ་བཤད་དང་སྒྲུབ་པ་ཡིས། །འཛིན་མཛད་ཐུགས་བསྐྱེད་ནོརྃ་བུྃའི་འོད་སྣང་གིས། །འཛིན་རྟེན་གསུམ་ན་ལེགས་མཛེས་རྒྱལ་གྱུར་ཅིག །ཅེས་སྐྱབས་རྗེ་བདུད་འཇོམས་རིན་པོ་ཆེ་སོགས་དམ་པའི་སྐྱེས་ཆེན་དུ་མས་དཔལ་རིའི་སྐྱབས་མགོན་མཆོག་གི་སྤྲུལ་པའི་སྐུར་ངོས་འཛིན་གནང་བ་བཞིན་སྔ་འགྱུར་རྣམ་གྲོལ་བཤད་སྒྲུབ་གླིང་དུ་ཁྲི་སྟོན་སྐབས་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་དར་ཨཱ་ཡུ་ཥེ། སྐུ་གསུང་ཐུགས་རྡོ་རྗེའི་རྟེན་དོད་ཧིན་སྒོར་བརྒྱ་ཕྲག་བཅས་ཕུལ་ཞིང་སྨོན་པ་བཞིན་འགྲུབ་པར་གྱུར་ཅིག ༈ འཆི་མེད་རྩ་གསུམ་རྒྱལ་བའི་བྱིན་རླབས་ཀྱིས། །ཟབ་གསང་ཆོས་ཉིད་དོན་སྟོན་སྔ་འགྱུར་བའི། །བསྟན་ལ་ཐོས་བསམ་སྒོམ་པའི་སྤང་རྟོགས་ཀྱིས། །ཕྲིན་ལས་དོན་གཉིས་མཐར་ཕྱིན་ལྷུན་གྲུབ་ཤོག །ཅེས་པའང་དད་ལྡན་ཕུན་ཚོགས་དར་རྒྱས་ནས་བསྐུལ་ངོར་དིལ་མཁྱེན་མངྒ་ལས་སྨོན་པའོ། ༈ སྔ་འགྱུར་བསྟནྃ་འཛིྃན་སྐྱེས་བུའི་ཁྱུ་མཆོག་ཆེ། །འགྲོ་འདུལ་པདྨ་གར་དབང་ཐུགྃས་རྗེྃའི་གཟུགས། །མཆོག་གི་སྤྲུལ་སྐུའི་སྐུ་ཚེ་ཐོས་བསམ་སྒོམ། །མཐར་ཕྱིན་མཁས་གྲུབ་དབྃང་ཕྱུགྃ་ཉིད་གྱུར་ཅིག །ཅེས་པའང་ཁང་སྤྲུལ་མཆོག་གི་སྲས་རྒྱལ་དབང་ཐམས་ཅད་མཁྱེན་པས་མཚན་གནང་བ་དང་མཐུན་པའི་ཞབས་བརྟན་དིལ་མཁྱེན་རྒད་པོ་འགྱུར་མེད་ཐེག་མཆོག་བསྟན་པའི་རྒྱལ་མཚན་ནས་བྲིས་ཤིང་སྨོན་པ་བཞིན་འགྲུབ་པར་གྱུར་ཅིག ༈ ཕུལ་བྱུང་དམ་ཆོས་ཉི་ཟླའི་སྣང་བའི་གཏེར། །ལུངྃ་རྟོགྃས་འོད་ཟེར་སྟོང་གི་དྲྭ་བ་ཡི། །ཐུབ་བསྟན་རྒྱྃ་མཚོྃའི་པདྨོ་བཞད་པའི་གཉེན། །རྣམ་འདྲེན་མཚུངས་མེད་བསྐལ་བརྒྱར་ཞབས་བརྟན་གསོལ། །དགེྃ་ལེགྃས་ཕན་བདེའི་འབྱུང་གནས་རྒྱལ་བའི་བསྟན། །ཆོསྃ་བཞིན་སྤྱོད་པའི་ཐོས་བསམ་སྒོམ་པ་ཡིས། །ངེས་དོན་བཤད་སྒྲུབ་བསྟན་པ་འཕེྃལ་མཛད་པའི། །ལེགས་བཤད་སྨྲ་བའི་ཉི་མ་ཞབས་བརྟན་གསོལ། །ཞེས་པའང་ངེས་གསང་སྙིང་པོའི་བསྟན་པའི་སྣང་བྱེད་གཟན་དཀར་མཆོག་སྤྲུལ་ཐུབ་བསྟན་ཉི་མའི་གསུང་བསྐུལ་བཞིན་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་སྙིང་ནས་སྨོན་པ་བཞིན་དགེ་ལེགས་འཕེལ། ༈ སྲིད་ཞིའི་ཡོན་ཏན་ཆེ་མཆོག་དཔལ་ཆེན་པོའི། །རང་བྱུང་ཐུགས་རྗེའི་དགྱེས་པའི་སྒྱུ་འཕྲུལ་གར། །སྐུ་ཚེ་མཐར་ཕྱིན་ཕྲིན་ལས་མཁའ་ཁྱབ་པས། །གངས་ཅན་བསྟན་འགྲོའི་དཔལ་དུ་རྟག་བརྟན་ཤོག །ཅེས་ས་གསུམ་ལྷ་མིའི་མཆོད་སྡོང་སྲིད་ཞིའི་སྤྱི་ནོར་པད་དཀར་འཆང་བ་བཅུ་བཞི་པར་བཀའ་བརྒྱད་རྣམ་གསུམ་གྱི་སྨིན་གྲོལ་མཆོད་སྤྲིན་དུ་ཕུལ་བའི་ཚེ་གུས་སློབ་བཀྲ་ཤིས་དཔལ་འབྱོར་གྱིས་ཞབས་བརྟན་སྨོན་ཚིག་ཏུ་གསོལ་བ་བཏབ་པའོ། ༈ ཐུབྃ་བསྟནྃ་ཡོངས་རྫོགས་སྔ་འགྱུར་རིང་ལུགས་ཀྱི། །རྒྱན་དུ་བཞེས་ནས་བཤད་སྒྲུབ་ལས་གསུམ་གྱི། །ཆོསྃ་ཀྱིྃ་རྒྱལྃ་མཚྃན་གསན་བསམ་སྒོམ་པ་ཡི། །ཕྲིན་ལས་མཁའ་ཁྱབ་བརྡལ་བཞིན་འཚོ་བཞེས་གསོལ། །ཞེས་ལྕགས་རྟ་དབོ་ཟླའི་འཕེལ་ཚེས་རྒྱལ་དང་ཕུར་བུའི་འགྲུབ་སྦྱོར་ལ་སྔགས་བཙུན་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་བྲིས་པ་སིདྡྷི་རསྟུ། ༈ འཕགས་བོད་ལེགྃས་བཤྃད་ཉིྃ་ཟླའིྃ་དཀྱིལ་འཁོར་ལ། །ཐོས་བསམ་སྒོམ་པའི་འོད་སྟོང་གིས་འཁྱུད་དེ། །འཆད་རྩོད་རྩོམ་པའི་སྣངྃ་བྃ་མི་ཟད་པས། །རྒྱལ་བསྟན་འདབ་སྟོང་རྒྱས་ཤིང་བརྟན་གྱུར་ཅིག །ཅེས་པའང་གངས་ཁྲོད་སྨྲ་བའི་སེང་གེ་མི་ཕམ་འཇམ་དཔལ་རྣམ་རྒྱལ་རྒྱ་མཚོ་དང་མཁས་གྲུབ་དབང་ཕྱུག་པདྨ་བི་ཛ་ཡ་དགྱེས་པའི་འབངས་བཀྲ་ཤིས་དཔལ་འབྱོར་དོན་ཐམས་ཅད་གྲུབ་པའི་སྡེས་ཞེ་ཆེན་བཤད་གྲྭ་ཉམས་གསོའི་སྐབས་སྨོན་པ་བཞིན་འགྲུབ་པར་གྱུར་ཅིག ༈ ཨོཾ་སྭ་སྟི། ཀུནྃ་བཟྃང་པྃདྨྃའི་རིང་ལུགས་བཀའ་གཏེར་གྱི། །བཤྃད་སྒྲུབྃ་ལས་ཀྱི་འཁོར་ལོ་དཔལ་འཛིན་པའི། །ཐུགས་བསྐྱེད་ཕྲིནྃ་ལསྃ་ཕྱོགས་དུས་ཀུནྃ་ཁྱབྃ་པ། །རབ་འབྱམས་རྩ་གསུམ་རྒྱལ་བའི་བྱིན་གྱིས་རློབས། །ཅེས་པའང་རྒྱལ་ཟླའི་དཀར་ཕྱོགས་ཀྱི་ཚེས་བཅུ་ལ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་ཆེད་དུ་བརྗོད་པ་དགེ ༈ རིང་འཚོའི་གསོལ་འདེབས་འཆི་མེད་རྡོ་རྗེའི་བདེན་ཚིག་བཞུགས། ཨོཾ་སྭ་སྟི་ཨཱ་ཡུ་ཝརྡྷ་ནཾ། བདེ་ཆེན་རྡོ་རྗེའི་སྐུ་བརྙེས་པདྨ་འབྱུང༌། །རྒྱལ་ཀུན་དགྱེས་བསྐྱེད་ཡུམ་མཁར་ཆེན་བཟའ། །འཆི་མེད་ཚེ་ཡི་རིག་འཛིན་དྲང་སྲོང་གིས། །དཔལ་ལྡན་བླ་མར་སྐུ་ཚེའི་དངོས་གྲུབ་སྩོལ། །གར་གྱི་དབང་ཕྱུག་འོད་མཚན་སྟོང་འབར་དང༌། །ལྷན་སྐྱེས་ཌཱ་ཀིའི་རྒྱལ་མོ་ཡབ་ཡུམ་སོགས། །འཆི་མེད་ཚེ་ཡི་དམ་ལྷ་ཚོགས་ཀྱིས། །དཔལ་ལྡན་བླ་མར་སྐུ་ཚེའི་དངོས་གྲུབ་སྩོལ། །རྒྱལ་ཡུམ་འཕགས་མ་ཚེ་སྦྱིན་ཙཎྜ་ལི། །མན་དྷ་ར་བ་གྲུབ་པའི་རྒྱལ་མོ་སོགས། །འཆི་མེད་ཚེ་ཡི་མཁའ་འགྲོའི་ཚོགས་རྣམས་ཀྱིས། །དཔལ་ལྡན་བླ་མར་སྐུ་ཚེའི་དངོས་གྲུབ་སྩོལ། །རྡོ་རྗེའི་ཚེ་སྟེར་ཡེ་ཤེས་མགོན་པོ་དཀར། །ཚེ་རིང་མཆེད་ལྔ་གནས་ཡུལ་དུར་ཁྲོད་བདག། །འཆི་མེད་ཚེ་ཡི་བཀའ་སྲུང་ཐམས་ཅད་ཀྱིས། །དཔལ་ལྡན་བླ་མར་སྐུ་ཚེའི་དངོས་གྲུབ་སྩོལ། །ཐབས་ཤེས་རྡོ་རྗེ་སྡོམ་པའི་རྟེན་འབྱུང་གིས། །གཉུག་མ་ཡོངས་གྲུབ་རྡོ་རྗེའི་ཚེ་གྲུབ་ནས། །སྐྱེ་འཆི་བགྲེས་རྒུད་བྲལ་བའི་སྲོག་ཐོབ་ནས། །དཔལ་ལྡན་བླ་མར་སྐུ་ཚེའི་དངོས་གྲུབ་སྩོལ། །ཉི་ཁྲི་ཆིག་སྟོང་དྲུག་བརྒྱའི་རླུང་ཐམས་ཅད། །གཞོམ་མེད་རྡོ་རྗེ་ནཱ་དའི་དབྱིངས་བསྐྱིལ་ནས། །ཟབ་རྒྱས་ཆོས་འཁོར་རྒྱུན་མི་ཆད་སྒྲོགས་པས། །དཔལ་ལྡན་བླ་མར་སྐུ་ཚེའི་དངོས་གྲུབ་སྩོལ། །ཨ་ཧཾ་འབར་ཞུ་བདེ་གསལ་མི་རྟོག་པའི། །ཨེ་ཝཾ་ཕྱག་རྒྱའི་སྦྱོར་བས་མི་འགྱུར་དབྱིངས། །རྡོ་རྗེ་རྟག་པ་ཐུགས་ཀྱི་ཏིང་འཛིན་གྱིས། །དཔལ་ལྡན་བླ་མར་སྐུ་ཚེའི་དངོས་གྲུབ་སྩོལ། །རྡོ་རྗེ་གསུམ་དབྱིངས་མི་ཕྱེད་ཆོས་ཉིད་ཀློང༌། །འཇིགས་བྲལ་བརྡ་རྟགས་འཕོ་མེད་གཉུག་མའི་ངང༌། །ནམ་མཁའ་ཇི་སྲིད་འགྲོ་དོན་རྒྱུན་མི་ཆད། །དཔལ་ལྡན་བླ་མར་སྐུ་ཚེའི་དངོས་གྲུབ་སྩོལ། །སྐྱེ་འཆིའི་འཇིགས་ཀུན་པ་ཀུན་གྲོལ་དབང་བཅུ་ཐོབ། །ཕྱི་ནང་གསང་བ་རྨད་བྱུང་རྟེན་འགྲེལ་གྱིས། །ཟག་པ་རང་ཟད་བི་མ་མི་ཏྲ་བཞིན། །དཔལ་ལྡན་བླ་མར་སྐུ་ཚེའི་དངོས་གྲུབ་སྩོལ། །མཚན་ལྡན་བླ་མའི་སྐུ་ཚེ་བསྐལ་བརྒྱར་བརྟན། །དད་ལྡན་སློབ་མའི་བསམ་དོན་ཆོས་བཞིན་འགྲུབ། །སྐལ་ལྡན་རིགས་ཁམས་དགེ་བའི་ཕན་ཡོན་གྱིས། །དོན་ལྡན་སྨོན་པའི་འབྲས་བུ་སྒྲུབ་གྱུར་ཅིག །ཅེས་འདི་དྷརྨ་དྷཱ་ཏུ་ཡིས། །ཡིད་ཆེས་མོས་གུས་ཀྱིས་བསྐུལ་བས། །ཡོ་གའི་མངྒ་ལ་ཉིད་ཀྱིས། །དུས་ཚོད་དགེ་བར་བྲིས་པ་དགེ །སརྦ་མངྒ་ལཾ། དགེའོ། ༈ འཆི་མེད་རྡོ་རྗེའི་སྐུ་བརྙེས་པད་འབྱུང་གིས། །འཆི་མེད་གྲུབ་པའི་གནས་སུ་བྱིན་བརླབ་པས། །འཆི་མེད་བདེ་ཆེན་ཞིང་འདིར་སོན་པ་ཡིས། །འཆི་མེད་ལང་ཚོ་འགྲུབ་པར་བྱིན་གྱིས་རློབས། །འཆི་མེད་སྲས་བཅས་རྒྱལ་བའི་ཡེ་ཤེས་སྐུ། །འཆི་མེད་ཚེ་དབང་རིག་འཛིན་པད་འབྱུང་བཞིན། །འཆི་མེད་རྡོ་རྗེའི་སྲོག་ལ་དབང་ཐོབ་པ། །འཆི་མེད་ལྷ་དང་ཌཱ་ཀིའི་བྱིན་གྱིས་རློབས། །འཆི་མེད་རྡོ་རྗེ་བཙུན་མོའི་ཡེ་ཤེས་གཟུགས། །འཆི་མེད་བདེ་ཆེན་དགྱེས་མ་མནྡཱ་རས། །འཆི་མེད་ཚེ་དང་ཡེ་ཤེས་དཔག་མེད་པའི། །འཆི་མེད་རྡོ་རྗེའི་གོ་འཕང་མངོན་གྱུར་མཛོད། །འཆི་མེད་མཚོ་སྐྱེས་བླ་མའི་ཐུགས་ཀྱི་བཅུད། །འཆི་མེད་རྩ་གསུམ་སྒྱུ་འཕྲུལ་དཀྱིལ་འཁོར་ལྷས། །འཆི་མེད་མགོན་པོའི་གོ་འཕང་མངོན་གྱུར་ནས། །འཆི་མེད་འཇའ་ལུས་རྡོ་རྗེའི་ས་ཐོབ་མཛོད། །འཆི་མེད་གྲུབ་པ་རྒྱ་མཚོའི་རྗེས་བཟུང་བའི། །འཆི་མེད་རིག་འཛིན་འདུས་པའི་བདེན་བྱིན་གྱིས། །འཆི་མེད་འཕོ་ཆེན་རྡོ་རྗེའི་ས་བརྙེས་ཏེ། །འཆི་མེད་དོན་གཉིས་འགྲུབ་པར་མཛད་དུ་གསོལ། །ཞེས་པའང་གསང་གྲོགས་དེ་ཝིའི་ཆེད་བསྐུལ་བཞིན་མངྒ་ལ་ཤྲཱི་བྷཱུ་ཏིས་འདུན་སྨོན་བགྱིས་པ་དོན་དང་ལྡན་པར་གྱུར་ཅིག། །།

Footnotes

Other Information

Retrieved from "https://khyentselineage.tsadra.org/index.php?title=DKR-KABUM-03-GA-012&oldid=53153"
Khyentse Lineage
Collected Works of the Masters
A Tsadra Foundation initiative designed to house the writings and revelations of the masters of the Khyentse lineage.
Join the Tsadra Foundation mailing list:

Tsadra Foundation
Translation & Transmission Conference
DharmaCloud Tibetan eBooks
Buddha-Nature
Śāntideva's Life and Works
Rinchen Terdzö Chenmo
Damngak Rinpoche Dzö
Dharma Dictionary

About us
Privacy policy
General disclaimer
Site guide

Project Description

Welcome to the Khyentse Lineage Project, a Tsadra Foundation initiative designed to house the writings and revelations of the masters of the Khyentse lineage in a digital format that allows for open access to these materials in authoritative modern Tibetan editions for the sake of scholars, translators, and practitioners the world over.

About us

© Tsadra Foundation. Please feel free to use this website and its content in accordance with fair use policies for teaching, scholarship, education, and research.
See General disclaimer for more information.