JKW-KABUM-17-TSA-001-013

Previous Text Back to Volume PageNext Text

བཟོ་རིག་པའི་སྤྱི་དོན་འབེལ་བའི་གཏམ་ལས་ལུས་བཟོ་ལྷ་སྐུའི་ཐིག་རྩ་སོགས།

Wylie title	bzo rig pa'i spyi don 'bel ba'i gtam las lus bzo lha sku'i thig rtsa sogs
Location	mkhyen brtse'i bka' 'bum Volume 17, sde tshan 1, Text 13, Pages 87-104 (Folios 44a6 to 52b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. bzo rig pa'i spyi don 'bel ba'i gtam las lus bzo lha sku'i thig rtsa sogs. In 'jam dbyangs mkhyen brtse'i dbang po'i bka' 'bum, Vol. 17: 87-104. Khams sde dge rdzong sar dgon: Rdzong sar blo gros phun tshogs, 2020.
Genre	Crafts - bzo rig pa

Tibetan Text

Wylie

[edit]

༄༅། །ན་མ་སརྦ་ཛྙཱ་ཡ། གང་གི་མཁྱེན་རབ་བདུད་རྩིའི་དོགས་པ་ཡིས། །བརླན་ཆགས་ཚེ་ན་དགོད་པའི་ཨུཏྤལ་ལར། །ཕུན་ཚོགས་ཤིས་དགུའི་ཟིལ་མངར་རྟག་འབབས་པ། །ཡོངས་འཛིན་སྨྲ་བའི་ཉི་མས་དེང་འདིར་སྲུངས། །ཞེས་ཤིས་པར་བརྗོད་པའི་ཚིག་གི་མེ་ཏོག་ཅུང་ཟད་སྔོན་དུ་གཏོར་ནས། འདིར་ལས་སུ་བྱ་བ་ནི། ལུས་ཅན་གང་ཞིག་སྲིད་ལས་ངེས་པར་འབྱུང་བའི་བློས་ཐར་པ་དང་ཐམས་ཅད་མཁྱེན་པའི་གོ་འཕང་དོན་དུ་གཉེར་བ་ལ་ཕྱོགས་པ་དེས་ནི། གདོན་མི་ཟ་བར་ཐོག་མ་ཁོ་ན་ཉིད་དུ་རིག་པའི་གནས་རྣམས་ལ་འཇུག་པར་བྱ་སྟེ། དེ་ཅིའི་ཕྱིར་ཞེ་ན་ཉེ་བའི་རྒྱུ་ཉིད་དུ་གྲུབ་པའི་ཕྱིར་རོ། །དེས་ན་གང་ལ་འཇུག་པའི་ཡུལ་རིག་པའི་གནས་དེའི་རྣམ་པར་དབྱེ་བ་ནི། རེ་ཞིག་བཅུ་ཕྲག་ཏུ་བསྡུས་ཏེ་འཆད་པའི་ཚུལ་གྱི་རྗེས་སུ་འབྲང་ཏེ་སྤྱི་དོན་ཅུང་ཟད་ཙམ་ཞིག་འབེལ་བའི་གཏམ་གྱི་སྒོ་ནས་གཏན་ལ་ཕབ་པ་ལ། ཐོག་མར་བཟོ་རིག་པ་ལའང་གཙོ་བོ་དང་ཕལ་པ་གཉིས། སྔ་མར་ལུས་ངག་ཡིད་གསུམ་གྱི་བསྡུས་པའི་དང་པོ་ནི། མཆོག་ཏུ་གྱུར་པ་དེ་བཞིན་གཤེགས་པའི་སྐུ་གསུང་ཐུགས་ཀྱི་རྟེན་བཞེངས་པ་སྟེ། དེས་ན་སྐུ་རྟེན་བཞེངས་ཚུལ་ལའང་། སྔ་ཕྱིར་བྱུང་ཚུལ་གྱི་ལོ་རྒྱུས། ལོ་རྒྱུས་དེ་ལྡན་གྱི་ཆ་ཚད། དེ་ལྟར་བཞེངས་པའི་ཕན་ཡོན་ནོ། །དང་པོ་ནི། བྲིས་འབུར་གཉིས་ལས་བྲིས་སྐུ་སྔ་བར་བྱུང་སྟེ། དེ་ཡང་དྲང་སྲོང་ཨ་སྟའི་བུས་སྦྱར་བའི་ཚངས་པའི་ཚད་ཡིག་ཅེས་པར། སྔོན་མི་རྣམས་ཚེ་ལོ་འབུམ་ལས་མར་བྲི་བའི་ཚེ་རྒྱལ་པོ་འཇིགས་ཐུལ་ཞེས་བྱ་བ་བྱུང་བའི་དུས་སུ་བྲམ་ཟེའི་བུ་དུས་མིན་གྱིས་འཆི་བ་བྱུང་བ་ལ། རྒྱལ་པོ་དང་གཤིན་རྗེ་འཐབས་པས་ཚངས་པས་ཞལ་ལྕེ་བཅད་དེ། བྲམ་ཟེའི་བུ་རི་མོར་བྲིས་པ་མངོན་སུམ་དུ་བྱིན་གྱིས་བརླབས་ནས་སྩལ་བས་རྒྱལ་པོ་ལ་དང་པོར་བྲི་བ་པོ་ཞེས་མིང་བཏགས་ཅིང་། སླར་རྒྱལ་པོས་ཚངས་པ་ལ་རི་མོ་བྲི་ཚུལ་རྒྱས་པར་ཞུས་པས། རི་ཡི་མཆོག་ནི་རི་རབ་ཡིན། །སྒོ་ང་ལས་སྐྱེས་རྣམས་ཀྱི་ནི། །གཙོ་བོ་ནམ་མཁའ་ལྡིང་ཡིན་ནོ། །མི་ཡི་གཙོ་བོ་ས་བདག་སྟེ། །དེ་བཞིན་རི་མོ་སྒྱུ་རྩལ་གཙོ། །ཞེས་སོགས་སྩལ་བའི་ཚུལ་དང་། ཤཱཀྱའི་རྒྱལ་པོའི་བསྟན་པ་འདིར་ཡང་། རྒྱལ་པོ་གཟུགས་ཅན་སྙིང་པོ་ལ་རྒྱལ་པོ་ཨུ་དྲཱ་ཡ་ཎས་ནོར་བུའི་གོ་ཁྲབ་ཡན་ལག་ལྔ་ལྡན་རིན་ཐང་བྲལ་བ་སྐྱེས་བསྐུར་བའི་སྐྱེས་ལན་དུ། སྟོན་པ་ཆུ་འགྲམ་ལ་བཞུགས་པའི་གཟུགས་བརྙན་ཆུ་ནང་དུ་འཆར་བ་དཔེར་བྱས་ནས་འོག་ཏུ་རྟེན་འབྲེལ་བཅས་བྲིས་པ་དེ་བསྐུར་བས་དད་དེ་བདེན་པ་མཐོང་བར་བྲིས་སྐུ་ཆུ་ལོན་མ་ཞེས་གྲགས་པ་དང་། སིངྒ་ལའི་རྒྱལ་པོའི་བུ་མོ་མུ་ཏིག་འཁྲི་ཤིང་གིས་སྟོན་པར་དད་དེ་ཡི་གེ་གསོལ་བར། རས་ཀྱི་གཞིར་སྐུའི་འོད་ཟེར་བཀྱེ་བ་ལ་རི་མོས་མནན་པ་སྤྲིངས་ཡིག་བཅས་བསྩལ་བས་བདེན་པ་མཐོང་བ་སོགས་རིམ་པར་སྲོལ་བྱུང་བ་དང་། འབུར་སྐུའི་ཐོག་མ་སྟོན་པ་ཡུམ་གྱི་དོན་དུ་ལྷ་ཡུལ་ལ་གཤེགས་པའི་ཤུལ། གྲོང་ཁྱེར་གསལ་ལྡན་གྱི་རྒྱལ་བློན་འཁོར་བཅས་ཀྱི་མཆོད་པའི་རྟེན་དུ་ཙནྡན་ལས་གྲུབ་པའི་སྟོན་པ་དངོས་དང་འདྲ་བའི་སྐུ་བཞེངས་པ་ཉིད། སྟོན་པ་ཕྱིར་ཕེབས་ཚེ་གོམ་བདུན་བསུས་པར་གྲགས་པ་ད་ལྟ་རྒྱ་ནག་གི་ཙནྡན་ཇོ་བོ་སྟེ། ཇི་སྐད་དུ། བཅོམ་ལྡན་ལྷ་ཡུལ་གཤེགས་ཤུལ་གསལ་ལྡན་གྱི། །རྒྱལ་པོ་འཁོར་བཅས་ཕྱག་དང་མཆོད་ཡུལ་དུ། །ཙནྡན་ལས་བྱས་མཚར་སྡུག་དངོས་འདྲ་བ། །ན་བཟའ་སུལ་ཅན་མཐིང་གོས་ཟུང་གིས་མཛེས། །གཙུག་ཏོར་མདུན་དུ་མེ་ཤེལ་འོད་འབར་བས། །ཉི་མ་བརྒྱ་ཡི་སྣང་བ་འགོག་ནུས་ཤིང་། །དྲྭ་བས་འབྲེལ་བའི་ཕྱག་ཞབས་འཁོར་ལོས་མཚན། །འགྲོ་བའི་དོན་ལ་བཞེངས་པའི་སྟབས་སུ་བཞུགས། །བསྐལ་བཟང་ཛམ་གླིང་སྐྱེ་དགུ་གྲུབ་དབང་དྲན། །མཽ་གལ་བུ་ལ་རྫུ་འཕྲུལ་བགྲོད་པ་ཡིས། །རྒྱལ་བ་སྤྱན་འདྲེན་བསྐུལ་ཞིང་དེས་གསོལ་བས། །དགྱེས་ཤིང་རིན་ཆེན་ཐེམ་སྐས་ལས་བབས་ཚེ། །གསལ་ལྡན་གནས་སུ་སྐུ་དེས་གོམ་དྲུག་བསུས། །ཤར་ཕྱོགས་རྒྱ་ནག་ཆེན་པོའི་ཡུལ་དགེ་ཕྱིར། །བཞུད་ཅེས་དེ་བཞིན་གཤེགས་པའི་སོར་རྩེས་བསྐུལ། །ངང་པའི་རྒྱལ་པོ་བཞིན་དུ་མཁའ་ལ་གཤེགས། །ཞེས་གསུངས་པ་ལྟར་དང་། ཕྱིས་སུ་སྐུ་དེ་ལས་བཤུས་པའི་སི་ཐང་སོགས་བྱུང་ཞིང་། བོད་ཡུལ་འདིར་གནའ་ནས་ཆོས་རྒྱལ་མེས་དཔོན་གྱི་བཀའ་དྲིན་ལས་བྲིས་འབུར་གྱི་སྐུ་དར་སྲོལ་ཆེ་བར་བྱུང་ཞིང་། ཁྱད་པར་བྲིས་སྐུ་ནི་སྟོན་པ་དགུང་ལོ་ཉེར་ལྔ་པའི་སྐུ་ཚད་ལ་དཔེར་བྱས་བྲིས་རྒྱུན་རྒྱ་བལ་སོགས་ལ་ཡོད་པའི་རྒྱུན་རྣམས་ཕལ་ཆེར་བལ་པོས་བྲིས་པས་བལ་བྲིས་ཞེས་དར་སྲོལ་ཆེ་ཞིང་། ཕྱི་ནས་མཁས་པ་བཀྲ་ཤིས་རྒྱལ་པོ་ལ། སློབ་མ་རང་ལས་མཁས་པ་ལྷོ་བྲག་སྨན་ཐང་པ་སྨན་བླ་དོན་གྲུབ་ཞེས་སྒྲ་སྙན་སྡེབ་སྦྱོར་ཡིག་རིགས་སོགས་མཐར་སོན་པ་དེ་རང་གི་ཆུང་མས་ཡིད་དབྱུང་ནས་ཡུལ་འཁྱམས་ཏེ་ཐོན་པ་ན། ཡར་འཕྲོག་སྟག་ལུང་དུ་པིར་སྣོད་བྲིས་དཔེ་དང་བཅས་པ་ཞིག་སྙེད་པས་ལྷ་བྲིས་ལ་ཡིད་ཕྱོགས་ཏེ་མཁས་པ་བཀྲ་ཤིས་རྒྱལ་པོར་བསྟན་ཅིང་། སྔོན་གྱི་བག་ཆགས་སད་དེ་ལྡན་ལུགས་ཀྱི་རི་མོ་བྲི་ཚུལ་ཐུགས་ལ་བཀྲ་ལམ་གྱིས་ཤར། དུས་ཀྱི་འཁོར་ལོ་དང་སྡོམ་འབྱུང་རྩ་འགྲེལ་རྗེས་སུ་འབྲངས་ནས་སྐུ་གཟུགས་ཀྱི་ཚད་ཀྱི་རབ་ཏུ་བྱེད་པ་ཡིད་བཞིན་ནོར་བུ་ཞེས་དེ་བཞིན་གཤེགས་པའི་མཚན་དང་དཔེ་བྱད་བཤད་པ། མི་ལྡན་པའི་ཕྱོགས་ཀྱི་གཞུང་དགག་པ། །ཚད་དང་མི་ལྡན་པའི་སྐྱོན་བཤད་པ། །ཚད་ལྡན་གྱི་གཞུང་དགོད་པ། །ཚད་དང་ལྡན་པའི་ཡོན་ཏན་བརྗོད་པ། །ལྷ་བཟོ་དང་སྦྱིན་བདག་གི་མཚན་ཉིད། །ལག་ཏུ་བླང་བའི་རིམ་པ་རྒྱས་པར་བཤད་པ་སྟེ་བདུན་གྱིས་གཏན་ལ་ཕབས་པ་དང་། ཡང་གོང་དཀར་སྒང་སྟོད་ནས་མཁྱེན་བརྩེ་ཆེན་མོ་ཞེས་འབྱུང་བ་དེ་གཉིས་སོ་སོའི་ལུགས་ཅུང་ཟད་མི་འདྲ་བས་མཁྱེན་ལུགས་དང་། ཡང་སྟོད་དུ་སྐུ་འཁྲུངས་པ་ཤོག་དཔེ་དང་བྱད་ཤིང་འབྲལ་མེད་དུ་འཆང་ཞིང་བྲིས་རྒྱུན་ལེགས་པ་དང་བྲིས་དཔེ་ལེགས་པ་འཚོལ་ཕྱིར་ཕྱོགས་ཀུན་ཏུ་ཉུལ་བ་ཞིག་བྱུང་བར་བརྟེན་སྤྲུལ་སྐུ་བྱིའུ་པར་གྲགས་པ་སྟེ། དེ་ནི་སྔ་མ་གཉིས་དང་ཅུང་ཟད་མི་མཐུན་པ་སོགས་དར་རྒྱས་སུ་བྱུང་བར་ཐོས་སོ། །གཉིས་པ་ལ་གཉིས། འཇལ་བྱེད་དང་། གཞལ་བྱའི་ཚད་བསྟན་པའོ། །དང་པོ་ནི། འདིར་སོར་གྱི་བརྒྱད་ཆ་ལ་ནས་དང་ནས་གཉིས་ལ་རྐང་པ། རྐང་པ་བཞི་ལ་སོར་གང་ངམ། ཆ་ཆུང་ངམ། ཆ་ཕྲན་དང་། དེ་ཕྱེད་དང་བཅུ་གསུམ་མམ་བཅུ་གཉིས་སྐབས་སུ་གང་བབས་ཀྱིས་གདོང་ངམ། ཞལ་ལམ། ཐལ་མོའམ་མཐོ་ཞེས་བྱ་སྟེ། འདིས་ནི་ཐམས་ཅད་ལ་ཚད་དུ་འཇལ་བར་བྱེད་དོ། །གཉིས་པ་ནི། མ་ཕམ་པས། སྐུ་ནི་ནྱ་གྲོ་དྷ་ལྟར་ཆུ་ཞེང་གབ། ཅེས་གསུངས་པའི་དོན། འདིར་སྟོན་པ་ཤཱཀྱའི་རྒྱལ་པོ་ལྟ་བུ་དེ་བཞིན་གཤེགས་པ་བཞེངས་སྟབས་སུ་མཛད་པ་ཞིག་གི་དབང་དུ་བྱས་ཏེ་དཔེར་བརྗོད་ན། དབུའི་གཙུག་ཏོར་དང་བཅས་པ་ལ་སོར་མོ་བརྒྱ་ཉེར་ལྔ་པ་ཆུ་ཞེང་གབ་པ་ནི་དུས་འཁོར་ལས། རྒྱལ་བའི་བདག་པོའི་གཙུག་ཏོར་ནས་ནི་མཛོད་སྤུའི་དབུས་སུ་ཕྱེད་དང་བཅས་པའི་ཉི་མའི་སོར་དུ་འགྱུར། །དེ་ནས་མགྲིན་པའི་ཆུ་སྐྱེས་དེ་བཞིན་སྙིང་ག་དང་ནི་དེ་ནས་ལྟེ་གསང་ཆུ་སྐྱེས་དེ་བཞིན་ནོ། །ཞབས་ཀྱི་མཐིལ་དང་རྗེ་ངར་བརླ་དང་དཔྱི་ཡང་མ་ནུ་དེ་ཉིད་རིག་བྱེད་རྣམས་ཀྱིས་ཏེ། །ཀྲོ་བ་བྱེད་ཕྱེད་བཅས་ཉི་མའི་རང་དབང་དཔུང་ལག་རྣམས་ནི་མཁའ་མིག་རྒྱལ་པོ་ཉི་མའི་ཚད་ཀྱིས་སོ། །ཉི་གུང་ལ་ལག་པའི་བརྒྱ་ཕྲག་གང་ཞིག་དུས་དང་དགུ་ཡི་མི་རྣམས་ཀྱི་ནི་འཇིག་རྟེན་ཚད། །རིག་བྱེད་ཕྱེད་དང་བཅས་པའི་བཞི་དང་ཆུ་གཏེར་ཆུ་གཏེར་ཕྱེད་པས་བཅས་པའི་རིག་བྱེད་ཀྱི། །གཙུག་ཏོར་མགོ་བོའི་འོག་ཏུ་འགྱུར་ཏེ་རྒྱལ་བས་བདག་པོ་དཔལ་ལ་དཔལ་བ་དག་དང་ཤངས་དང་ནི། །ཤངས་ཀྱི་འོག་ཏུ་ཀོས་ཀོའི་མཐའ་དང་དེ་ནས་མགྲིན་པ་དག་སྟེ་མགྲིན་པའི་རྩ་བའི་ཆུ་སྐྱེས་དབུས། །དེ་ནས་སྙིང་ག་ལྟེ་བ་གསང་བར་མིའི་བདག་པོ་ཕྱེད་བཅས་ཉི་མ་རྣམས་ཀྱི་རིམ་པས་ས། །གསང་བའི་ཆུ་སྐྱེས་ལྟེ་བའི་རྩ་བར་རྡོ་རྗེ་དག་ཀྱང་ཐུབ་པ་ཡི་ནི་སྟེང་གི་གཙུག་ཏོར་ཉིད། །ཞེས་པའི་དོན་སྐུ་གཟུགས་མཐོ་བཅུ་པར་བྱས་པའི་མཐོ་རེ་ལ་སོར་ཕྱེད་དང་བཅས་པའི་བཅུ་གཉིས་སུ་བྱས་ནས་༡༣འདིར་རགས་པ་ཙམ་བཤད་ན། །དེ་བཞིན་གཤེགས་པའི་དབུའི་གཙུག་ཏོར་གྱི་དཔངས་ལ་སོར་བཞི། དེ་ནས་སྐྲ་མཚམས་བར་སོར་ཕྱེད་དང་ལྔ། དེ་བཞིན་དུ་རིམ་པར་མཛོད་སྤུ་དང་། ཤངས་ལ་རྩེ་སོར་བཞི་རེ། ཀོས་ཀོ་ཕྱེད་ལྔ། མགྲིན་པར་བཞི། ཐུགས་ཀ་དང་ལྟེ་བ་དང་གསང་གནས་རྣམས་སུ་ཞལ་རེ་སྟེ། སྐུའི་ཕྱེད་ཚད་ལ་ཆ་ཕྲན་ཕྱེད་དང་བཅས་པའི་རེ་གཉིས་དང་། དཔྱི་ལ་སོར་བཞི། བརླ་ཞལ་དོ། པུས་མོ་སོར་བཞི། རྗེ་ངར་ཞལ་དོ། ཞབས་དཔངས་སོར་ཕྱེད་དང་ལྔ་སྟེ་ཕྱེད་ཚད་ཕྱེད་བཅས་རེ་གཉིས་རྣམས་བསྒྲིལ་བ་ཆུར་སོར་མོ་བརྒྱ་ཉེར་ལྔ་དང་། ཞེང་ལ་ཚངས་ལོག་ནས་མཆན་ཁུང་བར་ཞལ་གང་། དེ་བཞིན་དུ་དཔུང་ལྷུ་སོར་ཉི་ཤུ། ཕྱག་དར་བཅུ་དྲུག །གུང་མོའི་རྩེའི་མཐར་ཐུག་པའི་ཕྱག་ལ་སོར་བཅུ་གཉིས། གྲུ་མོ་དང་མཁྲིག་མའི་མཚམས་སུ་སོར་རེ་སྟེ་ཕྱེད་ཚད་ལ་སོར་མོ་ཕྱེད་བཅས་ཏེ་གཉིས་རྣམས་དྲིལ་བས་སོར་མོ་བརྒྱ་ཉེར་ལྔར་འབྱུང་ངོ་། །ཡང་རྒྱུད་སྡོམས་པ་འབྱུང་བ་རིམ་པར་ཕྱེ་བ་སུམ་ཅུ་པ་ལས། མཐིལ་ལམ་ཐལ་མོ་བཅུ་གཅིག་པ་ལྷ་ཡི་གཟུགས་ནི་བྲི་བར་བྱ། །ཞེས་དང་། ཟབ་མོ་རྡོ་རྗེ་ཅན་གྱི་ལྷ། །ཤིན་ཏུ་ཡིད་དང་མཐུན་པ་བྲི། །ཞེས་ཆ་བཅུ་གཉིས་སུ་གསུངས་པ་གདན་དང་ཐོར་ཚུགས་ཞལ་རེ་བསྡམས་པའི་ཞལ་བཅུ་གཉིས་སུ་འགྱུར་བ་མ་གཏོགས་པ་སྐུ་ཚད་དངོས་གཞི་ལ་མཐོ་བཅུ་པ་སྲིད་ཞེང་སྔར་དང་མཚུངས་མོད། འདིར་ཞལ་བཅུ་གཉིས་ཆ་ཡིན་ནོ་ཞེས་དང་། དེ་བཞིན་གཤེགས་པ་ལས་གཞན་པའི་ཚད་ལ་སོར་མོ་བརྒྱ་ཉི་ཤུ་པར་གསུངས་པ་དང་། སྤྲུལ་སྐུ་འཕྲང་ཁ་བ་དཔལ་ལྡན་བློ་གྲོས་བཟང་པོས་མཛད་པའི་ཆ་ཚད་ཀྱི་ཡི་གེར་དཀྱུས་ཀྱི་བཤད་པ་སྨན་ལུགས་དང་མི་མཐུན་པ་མེད་ཀྱང་། དེའི་མཆན་བུ་ཞིག་ཏུ་སོར་བརྒྱ་ཉེར་ལྔ་པ་ནི་འབུར་དང་། བརྒྱ་ཉི་ཤུ་པ་བྲིས་སྐུའི་ཁྱད་པར་ཡིན་པའི་ངོས་བཟུང་འདུག་པར་བརྟེན། ཕྱིས་ཀྱི་མཁས་པ་དག་གིས། དུས་འཁོར་འབུར་༡༢༥དང་། སྡོམ་འབྱུང་བྲིས་༡༣༠ཀྱི་དབང་དུ་བྱས་པར་སྒྲོགས་པ་ནི་མ་དག་པ་སྟེ། ཅིའི་ཕྱིར་ན་སྡོམ་འབྱུང་གི་ཊཱི་ཀར་དེ་བཞིན་གཤེགས་པའི་སྐུའི་ཚད་ལ་སོར་མོ་བརྒྱ་ཉེར་ལྔ་པ་ལན་དུ་མར་བསྟན་ཏེ། དེ་ཉིད་དུ། ཞལ་གྱི་ཡང་བཅུ་གཉིས་ཆ་དང་། ཆ་ཆུང་དང་། སོར་དང་། སོར་མོ་ཞེས་པ་དོན་གཅིག་སྟེ། དེ་ཐམས་ཅད་དུ་ཆ་ཆུང་རྣམ་པར་དབྱེ་བར་ཤེས་པར་བྱའོ། །བཅོམ་ལྡན་འདས་ཀྱི་ནི་སངས་རྒྱས་ཀྱི་གཟུགས་ཉིད་ལ་ཕྱེད་དང་བཅས་པའི་ཆ་ཆུང་བཅུ་གཉིས་པའི་ཞལ་བྱའོ། །ཞེས་དང་། བཅུ་གཉིས་ཆ་ཞེས་པ་ནི་སངས་རྒྱས་ལས་གཞན་ཐམས་ཅད་ཐུན་མོང་པ་ཉིད་དུ་གསུངས་པའོ། །ཞེས་དང་། ཡང་ཇི་སྲིད་སྐུ་གཟུགས་བྱེད་པ་དེ་སྲིད་ཀྱི་ཚད་ཀྱི་ཚངས་ཐིག་བཏབ་ནས། དེའི་བཅུ་ཆ་ལ་ཐལ་མོར་རྣམ་པར་བཞག་ཅིང་། སླར་དེ་ཕྱེད་དང་བཅས་པའི་ཆ་ཆུང་བཅུ་གཉིས་སུ་བྱས་ལ་དེའི་ཆ་གཅིག་ནི་ཆ་ཆུང་དུ་ངེས་པར་བྱ་སྟེ། ཞེས་སྐུ་གཟུགས་མཐོ་བཅུ་པ་དང་ཞལ་གྱི་ཚད་ལ་ཕྱེད་བཅས་བཅུ་གཉིས་སུ་བཤད་པའི་ཕྱིར་སོར་མོ་བརྒྱ་ཉེར་ལྔ་འབྱུང་བ་ལས་འོས་ཅི་ཡོད། དེ་བཞིན་དུ་སྔོན་གྱི་མཁས་པ་མང་པོའི་ཆ་ཚད་ཀྱི་ཡི་གེ་རྣམས་ལས་ཀྱང་སངས་རྒྱས་ཀྱི་སྐུ་ལ་སོར་མོ་བརྒྱ་ཉེར་ལྔ་པ་བྲིས་འབུར་ཁྱད་མེད་དུ་དགོས་པར་བཤད་པ་དང་། ཁྱད་པར་སྨན་ཐང་པས་མཛད་པ་ནི་ལུགས་འདིར་རྒྱ་གཞུང་ལྟ་བུར་ཁས་ལེན་དགོས་མོད། དེར་མཆོག་གི་སྤྲུལ་སྐུའི་ཚད་ལ་སོར་མོ་༡༢༦པ་བྲིས་འབུར་ཁྱད་མེད་དུ་ལན་མང་པོར་བཤད་པའི་ཕྱིར། དེ་གཉིས་བྲིས་འབུར་སོ་སོར་དབྱེ་བ་ནི་རང་དགར་བྱས་པར་སེམས་སོ། །འོ་ན་དེའི་ཚད་ཇི་ལྟར་ཡིན་སྙམས་ན་བཤད་པར་བྱ་སྟེ། གཞན་ཐམས་ཅད་དུས་འཁོར་དུ་བཤད་པ་ལྟར། འདིར་མི་འདྲ་བའི་ཁྱད། སྲིད་དུ་དེར་དཔྱི་ལ་སོར་བཞི་ཡོད་པ་འདིར་མི་འབྱུང་ཡང་། བརླ་དང་བྱིན་པའི་མཚམས་སུ་ནི། །སོར་མོ་བཞི་དང་ཡང་དག་ལྡན། །ཞེས་པུས་མོའི་ལྷ་ང་སོར་མོ་གསུམ་པའི་སྟེང་འོག་སྟེ་བྱིན་པའི་མཚམས་སུ་སོར་མོ་གཉིས་གཉིས་ཏེ་བཞི་འབྱུང་བ་དང་། པུས་མོ་ལ་སླར་འགྲེལ་པར་སོར་གཅིག་བསྣན་པ་རྣམས་ཀྱིས་སྲིད་ལ་སོར་མོ་བརྒྱ་ཉེར་ལྔ་འབྱུང་ངོ་། །ཞིང་ལའང་དུས་འཁོར་ལུགས་ལ་དཔུང་ལྷུ་ཉི་ཤུ་དང་ཕྱག་ངར་བཅུ་དྲུག་ཅེས་བགྲང་བའི་དབང་གིས་མཁྲིག་མ་དང་གྲུ་མོའི་མཚམས་སུ་སོར་རེ་བསྣན་ཡང་འདིར་ཕྱག་ནི་ཐལ་མོ་གསུམ་པ་སྟེ། ཐལ་མོ་འདི་ཡིས་ཕྱག་མགོ་གཉིས། ཞེས་མཆན་ཁུང་ནས་མཁྲིག་མའི་བར་ཐལ་མོ་གསུམ་དང་། ཕྱག་མགོའི་ཐལ་མོ་བཅས་པའི་ཕྱེད་པ་རྣམས་བགྲངས་བ་དྲིལ་བས་ཞིང་ལ་སོར་མོ་བརྒྱ་ཉེར་ལྔ་འབྱུང་ངོ་།། །། ༈

ཐིག་ཆེན་གཉིས་པ་དེ་ལས་གཞན་བྱང་ཆུབ་སེམས་དཔའ་སོགས་ཞི་བ་ཐུན་མོང་པ་འཁོར་ལོས་སྒྱུར་བའི་ཆ་བྱད་ཅན་རྣམས་ནི། སྡོམ་འབྱུང་ཊཱི་ཀར། མཚམས་དང་མཚམས་ལ་སོ་སོར་ཆ་ཆུང་གཉིས་གཉིས་ཆད་པར་འགྱུར་ཏེ། དེས་ན་བྱང་ཆུབ་སེམས་དཔའ་ལ་སོགས་ཞི་བའི་ལྷ་རྣམས་ལ་སྐུའི་སྟོད་དང་སྨད་དག་གི་ཆ་ཆུང་ཕྱེད་དང་བཅས་པ་གཉིས་གཉིས་བྲི་བ་ལས་ཆ་ཆུང་ཉི་ཤུ་ལྷག་པ་བརྒྱའི་ཚད་ཀྱི་སྐུར་འགྱུར་རོ། །ཞེས་དགོངས་པའོ། །ཞེས་དང་། ཡང་སངས་རྒྱས་ཀྱི་ཚད་བསྟན་པའི་རྗེས་ཐོག་ཏུ། འདི་དག་ནི་རེ་ཞིག་སངས་རྒྱས་བཅོམ་ལྡན་འདས་དང་དཔལ་བདེ་མཆོག་གི་མཚན་ཉིད་དེ། བྱང་ཆུབ་སེམས་དཔའ་དཔའ་བོ་རྣམས་ཀྱིའང་འདི་དག་ཁོ་ནའོ། །འོན་ཀྱང་ཐལ་མོ་བཅུ་པ་རྣམས་ལའང་ཐལ་མོ་སོ་སོར་ཆ་ཆུང་ཕྱེད་ཕྱེད་དོར་ནས་ཆ་ཆུང་བཅུ་གཉིས་བའི་ཐལ་མོས་ཐལ་མོ་བཅུའི་རྣམ་བཞག་བྱའོ། །ཞེས་དང་། བསླབ་བཏུས་ལས་ཀྱང་། བྱང་ཆུབ་སེམས་དཔའ་རྣམས་ཀྱི་ཡང་སོར་བཅུ་གཉིས་པའི་མཐོ་བཅུ་པ་ཉིད་དོ། །ཞེས་སོགས་ཀྱི་དོན་ནི། དེ་བཞིན་གཤེགས་པའི་སྐུའི་ཚད་ཇི་ལྟ་བ་བཞིན་ལས་ཁྱད་པར་ནི། ཆ་ཆུང་བཅུ་གཉིས་པའི་ཞལ་ཚད་ཀྱིས་གཞལ་བས་སོར་མོ་བརྒྱ་ཉི་ཤུ་པ་འབྱུང་སྟེ་གོ་བར་སླའོ།། །། ༈ ཐིག་ཆེན་གསུམ་པ་རྒྱལ་ཡུམ་ཡིད་འཕྲོག་པའི་གཟུགས་ཅན་རྣམས་ནི། སྡོམ་འབྱུང་ལས། ཡིད་དུ་འོང་བའི་རང་གཟུགས་ནི། །ཐལ་མོ་དགུ་པ་མངོན་པར་འབྲི། །ཞེས་ཡིད་འཕྲོག་པའི་གཟུགས་ཉིད་དེ་འཕགས་མ་སྒྲོལ་མ་ལ་སོགས་པ་དཀྱིལ་འཁོར་པའི་ལྷ་མོ་རྣམས་ཀྱི་སྲིད་ཞེང་ལ་ཐལ་མོ་དགུ་པ་སྟེ། དེ་ཡང་ཐལ་མོའི་ཚད་དང་འགྲོས་ནི་སོར་མོ་༡༢༠པའི་ཕྱོགས་དང་འདྲ་བར། ཁྱད་ཆོས། ཐོད་དཔངས་དང་མགྲིན་པ་ནས་ཆ་ཆུང་རེ་རེ་དོར་བས་གསང་གནས་ནས་སྤྱི་བོའི་མཐར་ཐུག་པར་མཐོར་ཕྱེད་ལྔ་དང་། སྐུ་སྨད་ལ་བརླ་དང་བྱིན་པའི་མཚམས་ཀྱི་སོར་མོ་བཞི་དང་། པུས་མོ་ཞོལ་ནས་སོར་རེ་རེ་དོར་བས་གསང་བའི་གནས་ནས་ཞབས་ཀྱི་མཐར་ཐུག་པར་མཐོ་ཕྱེད་ལྔ་སྟེ་དྲིལ་བས་སོར་མོ་བརྒྱད་ཀྱིས་ལྷག་པའི་བརྒྱ་འབྱུང་བས་སྲིད་ཀྱི་ཚད་རྟོགས་ཤིང་། མཆན་ཁུང་དང་། དཔུང་ལྷུ་དང་། ཕྱག་ངར་རྣམས་ནས་སོར་མོ་དོ་རེ་དབྲི་བས་དེ་དང་མཉམ་པའི་ཞེང་གི་ཚད་ཀྱང་རྟོགས་སོ། །རྒྱུད་ འགྲེལ་དུ་འདི་ནས་འོག་གི་མཐོ་བརྒྱད་པའི་སྐབས་མརསྦྲེལ་བ་ལྟར་འབྱུང་བ་ནི། །འགྱུར་བྱེད་ཀྱིས་བཅད་མ་ལེགས་པ་ཡིན་གྱི། ཐིག་ཁོངས་འདིར་ལྷའི་བུད་མེད་རྣམས་དང་དབང་པོ་དང་ཉེ་དབང་དང་ཆུ་ལྷ་དང་དབང་ཕྱུག་དང་རླུངས་དང་ཚངས་པ་དང་གཟའ་ཞི་བ་དང་ཀླུ་རྣམས་ཀྱིའོ། །ཞེས་དེ་ཐམས་ཅད་ཀྱང་འདིར་འདུ་བར་ཤེས་པར་བྱའོ།། །། ༈ ཐིག་ཆེན་བཞི་པ་སྦོམ་ཐུང་གཏུམ་དྲག་ཅན་རྣམས་ནི། སྔ་མར། ཁྲོ་བོ་ཁྲོ་མོ་དབང་ཕྱུག་མ། །བྲན་ཕོ་བྲན་མོ་ཅི་བགྱི་མ། །དྲག་ཅིང་འཇིགས་པའི་གཟུགས་རྣམས་ནི། །ཐལ་མོ་བརྒྱད་པ་རྣམ་པར་འབྲི། །ཞེས་འབྱུང་ཞིང་འགྲེལ་བར་གདན་གྱི་མཐའ་ནས་སྐྲའི་ཞགས་ཀྱི་བར་དུ་ཤེས་པར་བྱའོ། །ཞེས་དང་། ཡང་། ཐུང་ཞིང་གསུས་པ་འཕྱང་བའི་ཁྲོ་བོ་གཤིན་རྗེ་མཐར་བྱེད་ལ་སོགས་པ་ནི་ཐལ་མོ་བརྒྱད་ཅེས་གསུངས་པ་དང་། བྲིས་རྒྱུན་དང་བཅས། ཚན་དྲག་ཅན་ལ་སྐུའི་ངོ་བོ་ལ་ཞལ་ཚད་དྲུག་དང་། གདན་དང་སྐྲ་ཞལ་རེ་བཅས་ཐལ་མོ་བརྒྱད་པ་བཤད་ཅིང་། ཞིབ་པར་གཤིན་རྗེ་གཤེད་ནག་པོའི་རྒྱུད་རིམ་པར་ཕྱེ་བ་བཅུ་བཞི་པ་ལས་འབྱུང་བའི་དོན་ནི། ཞབས་དཔངས་སོར་བཞི། འགྱིང་སྟབས་མེད་པའི་ཐད་ཀར་བརྒྱངས་བའི་རྗེ་ངར་སོར་བཅོ་བརྒྱད་ལ་འགྱིང་སྟབས་ཀྱི་མཐོ་གང་། པུས་མོ་སོར་བཞི་དང་བརླ་སོར་བཅོ་བརྒྱད་དུ་བཤད་ནའང་འགྱིངས་སྟབས་ཀྱི་ལྟོ་བར་གབ་པའི་གསང་གནས་མགྲིན་པ་མན་ལ་མཐོ་གསུམ། མགྲིན་པ་སོར་བཞི། ཞལ་རས་དང་སྐྲ་ལ་མཐོ་རེ་སྟེ་སྲིད་ཀྱི་ཚད་དང་། བྲང་ཞིང་ཕྱེད་ལ་ཆ་ཕྲན་ནམ་སོར་བཅུ། དཔུང་ལྷུ་སོར་བཅུ་བཞི་ཕྱག་ངར་དང་ཕྱག་མགོ་ཞལ་ཚད་རེ་སྟེ་སྲིད་ཞིང་མཉམ་པ་གོ་དྲུག་བཤད་ཀྱང་འགྱིང་སྟབས་ཀྱི་དབང་གིས་ངེས་པ་མེད་པར་མཁས་པས་ཉམས་དང་སྦྱར་ཤེས་དགོས་ཏེ། ཐིག་ཁོང་འདིར་གཤིན་རྗེ་གཤེད་སོགས་ཁྲོ་བོ་རྣམས་དང་། ཐག་བཟང་རིས་དང་ལུས་ངན་དང་བདེན་བྲལ་དང་གཤིན་རྗེ་དང་ས་ལྷ་དང་གཟའ་དྲག་པོ་རྣམས་འདུའོ། ། ༈ ཐིག་ཆེན་ལྔ་པ་མིའུ་ཐུང་ལྟར་ཁྲོས་པ་རྣམས་ནི། ཀྲྀ་ཡ་ས་མུ་ཙྪར། རཱ་མ་ཎ་དང་མིའུ་ཐུང་དང་ཚོགས་ཀྱི་བདག་པོ་རྣམས་ནི་མཐོ་ལྔ་པར་བྱའོ། །ཞེས་དང་། གྲུབ་ཆེན་ནག་པོ་པས། མིའུ་ཐུང་ལ་ཆུ་སོ་གསུམ་གྱིས་པུས་མོ་ཡན་ཆད་ཁྱབ་པར་གནས་སོ། །ཞེས་གསུངས་པའི་དོན་ལག་ཏུ་བླང་བྱར། ཞལ་དང་། ཐུགས་ཀ་དང་། ལྟེ་བ་དང་། ཆུ་སོ་རྣམས་མཐོ་རེ་དང་བརླ་ནི་ཞལ་དང་ལྟེ་བར་གབ་པ་དང་། བྱིན་ལ་ཞལ་གང་དང་། ཐོད་དཔངས་དང་། མགྲིན་པ་དང་། པུས་ཚིགས་དང་རྟིང་པ་རྣམས་སོར་གསུམ་རེ་བསྡམས་པས་སྲིད་དུ་སོར་མོ་བདུན་ཅུ་རྩ་གཉིས་དང་། བྲང་ཞིང་ཞལ་གང་། དཔུང་ལྷུ་སོར་དྲུག །ཕྱག་ངར་དང་ཕྱག་མགོ་ཞལ་ཚད་རེ་སྟེ་ཐིག་ཁོངས་འདིར་གུར་མགོན་དང་ཚོགས་ཀྱི་བདག་པོ་སོགས་འདུ་བར་ཤེས་པར་བྱའོ། ། ༈ དྲུག་པ་ཉན་ཐོས་དང་རང་སངས་རྒྱས་སོགས་མི་རྣམས་ཀྱི་ཚད་ནི། དྲི་མེད་འོད་ལས། དེ་ཉིད་སེམས་ཅན་རྣམས་ཀྱི་ཁྲུ་བཞི་སྟེ། །མི་རྣམས་ཀྱི་སོར་དགུ་བཅུ་རྩ་དྲུག་གོ །སྟེང་དང་འོག་ཏུ་ནི་སོར་བརྒྱད་ཅུ་རྩ་བཞི་སྟེ། དེ་ལྟར་མི་རྣམས་ནི་མཚན་དང་མི་ལྡན་པའོ། །ཞེས་པ་སྟེ། དེའང་ཉན་ཐོས་རྣམས་ནི་བྱང་ཆུབ་སེམས་དཔའི་ཚད་ལྟར་སྐབས་རེར་བཤད་པའང་ཡོད་ཅིང་། ལག་ལེན་དུའང་བྲིས་ཐང་ཚད་ལྡན་རྣམས་སུ་དེ་ལྟར་བྱས་པ་མཐོང་ལ། རང་རྒྱལ་ལ་སོགས་པ་ནི་མིའི་ཚད་འདི་བྱེད་པ་ལ། དེའང་སྲིད་དུ་ཁྲུ་ཕྱེད་བཞི་དང་། ཞེང་དུ་ཁྲུ་བཞི་བར་བཤད་པ་དང་། གསོ་རིག་ཏུ་ཁྲུ་བཞིར་བཤད་པ་མིའི་ཚད་ལ་བཏབ་ཏུ་བཏུབས་ཏེ་ལུས་འདོམས་གང་གྲུ་བཞི་ཡོད་པར་ཁྲུ་རེ་ནི་རང་གི་མཐོ་གཉིས་རེ་རགས་པར་ཡིན་ལ། དེའང་རང་སངས་རྒྱས་ནི་གཙུག་ཏོར་ཅུང་ཟད་འཕགས་པ་ལྷག་པའི་ཆར་ཉེ་བ་ཅན་ཏེ། སྐྲའི་དཔངས་སོར་བཞི། གདོང་ལ་མཐོ་གང་། མགྲིན་པར་སོར་དོ། །སྙིང་ག་ལྟེ་བ་གསང་བའི་བར་རྣམས་མཐོ་རེ། བརླ་དང་རྗེ་ངར་ཞལ་ཕྱེད་དོ་རེ་དང་། །པུས་མོ་ནས་ཞབས་དཔངས་སོར་གསུམ་རེ་བྱས་པ་སྲིད་ཀྱི་ཚད་དོ། །མདོར་ན་ཐིག་ཆེན་དང་པོ་ལ་སྲིད་དང་ཞེང་གཉི་གར་སོར་མོ་བརྒྱ་ཉེར་ལྔ། གཉིས་པར་སོར་མོ་བརྒྱ་ཉི་ཤུ། །གསུམ་པར་སོར་བརྒྱ་དང་བརྒྱད། །བཞི་བར་སོར་མོ་གོ་དྲུག །ལྔ་པར་སོར་མོ་དོན་གཉིས། །དྲུག་པར་སྲིད་དུ་ཁྲུ་ཕྱེད་བཞི་དང་། །ཞེང་དུ་ཁྲུ་བཞི་པ་རྣམས་སོ། ། ༈

ཐིག་ཆེན་བརྒྱད་པ་སྐུའི་རྣམ་འགྱུར་རྡོ་རྗེ་སྐྱིལ་ཀྲུང་དང་། པདྨའི་སྐྱིལ་ཀྲུང་དང་། །སེམས་དཔའི་སྐྱིལ་ཀྲུང་དང་། །དཔའ་བོའི་འདུག་སྟངས་དང་། །བཟང་པོའི་འདུག་སྟངས་དང་། །ཙོག་པུ་དང་། གཡོན་རོལ་དང་། གཡས་རོལ་དང་། བདེ་ལུགས་ཅན་དང་། གཡས་བརྐྱང་དང་། གཡོན་བརྐྱང་དང་། ས་ག་དང་། ཟླུམ་པོ་དང་། མཉམ་པའི་སྟབས་ཏེ་བཞུགས་སྟངས་ཀྱི་ཁྱད་པར་རྣམས་དང་། བྱང་ཆུབ་མཆོག་གི་ཕྱག་རྒྱ་སོགས་པ་ཕྱག་རྒྱ་མི་འདྲ་བའི་ཁྱད་པར་རྣམས་དང་། རབ་ཏུ་བྱུང་བའི་ཆ་བྱད་ཀྱི་ཆོས་གོས་གསུམ་དང་། མཁར་བསིལ་དང་ལྷུང་བཟེད་སོགས་ཀྱི་ཚད་དབྱིབས་རབ་འབྲིང་སོགས་དང་། ཞི་དྲག་སོ་སོའི་རྒྱན་ཆའི་བྱེ་བྲག་མང་པོ་དང་། གདན་ཁྲི་དང་རྒྱབ་ཡོལ་རྒྱས་འབྲིང་བསྡུས་པ་རྣམས་ཀྱི་ཚད་དང་། དབྱིབས་དང་། རྒྱུད་སྡེ་རྣམས་ནས་བསྟན་པའི་དཀྱིལ་འཁོར་སོ་སོའི་ཐིག་དང་། ལས་སོ་སོའི་ཐབས་ཀྱི་ཚད་དང་མཚན་ཉིད་ལ་སོགས་པ་རྣམས་ནི་དྲི་མ་མེད་པའི་བཀའ་དང་བསྟན་བཅོས་ཚད་མའི་རྗེས་སུ་འབྲང་ནས་བསྒྲུབ་པར་རིགས་ཏེ། ཚད་དང་ལྡན་མི་ལྡན་ལས་ཡོན་ཏན་དང་སྐྱོན་གྱི་རྣམ་པ་ཐ་དད་པར་འགྱུར་པའི་ཕྱིར་རོ། །གསུམ་པ་ནི། བསླབས་བཏུས་ལས། མི་མཇེད་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལ་འདོད་ཡོན་ལྔའི་སྦྱིན་པ་བྱིན་པ་བས། དགེ་བསྙེན་རྣམ་དག་གཅིག་ལ་བསྙེན་བསྐུར་བ་བསོད་ནམས་ཆེས་ཁྱད་པར་འཕགས་སོ། །དེ་ཐམས་ཅད་ལས་ནི་དགེ་ཚུལ་གཅིག་ལའོ། །དེ་ཐམས་ཅད་ལས་ནི་རྡོ་རྗེ་འཛིན་པ་གཅིག་ལའོ། །དེ་ཐམས་ཅད་ལ་བསྙེན་བསྐུར་བ་ལས་ནི་སྐུ་གཟུགས་མཚན་ཉིད་དང་ལྡན་པ་མཚོན་གང་བ་གཅིག་བཞེངས་པ་བསོད་ནམས་ཆེས་ཁྱད་པར་འཕགས་སོ། །ཞེས་དང་། སྡོམ་འབྱུང་ལས། སྔགས་པ་ལས་ནི་དང་པོ་པས། །གཟུགས་བརྙན་ལ་སོགས་བྱ་བ་སྟེ། །བྲིས་སྐུ་བསྒྲུབས་ན་མྱུར་བར་ནི། །དངོས་གྲུབ་རྒྱ་ཆེན་འཐོབ་པར་འགྱུར། །ཞེས་དང་། འགྲེལ་པར། ཇི་ལྟར་གསུངས་པའི་དེ་ཁོ་ན་ཉིད་བསྒོམས་པའི་ནུས་པ་མེད་པས། བསྐྱེད་པའི་རིམ་པ་བསྒོམ་པས་ལྷའི་རྣམ་པར་སྒོམ་པར་བྱའོ། །དེའང་གཟུགས་བརྙན་མ་མཐོང་བ་ལས་མི་ནུས་སོ་ཞེས་པའི་དོན་གྱིས་འཕངས་པའི་ཐང་སྐུ་དང་སྐུ་གཟུགས་མཚན་ཉིད་དང་ལྡན་པ་ཁོ་ན་བསོད་ནམས་དང་ཡེ་ཤེས་ཀྱི་ཚོགས་ཀྱི་རྒྱུ་ཡིན་ལ། ཞེས་སོགས་ཐུན་མོང་དང་ཁྱད་པར་གྱི་དགོས་པ་མཐའ་ཀླས་ཏེ་མདོ་རྒྱུད་དག་ལས་རྒྱ་ཆེར་ཤེས་པར་བྱའོ། །གཞན་ཡང་འདུལ་བ་ལུང་ལས། །ཀུན་དགའ་ར་བ་གཙུག་ལག་ཁང་། །མལ་སྟན་འཚོ་བ་ནར་མ་དང་། །གློ་བུར་ནད་པའི་ནད་གཡོགས་དང་། །ཡུལ་ངན་ཚེ་ན་སྦྱིན་པ་ནི། །རྫས་ལས་བྱུང་བའི་བསོད་ནམས་བདུན། །ཞེས་སོགས་གསུངས་པ་ལས་བརྩམས་ཏེ། བཅོམ་ལྡན་འདས་ཀྱིས་རྗེས་སུ་གནང་སྟེ་ཁྱིམ་བདག་དགེ་བཟང་གིས་བརྩེགས་པའི་དགེ་བཟང་གི་གཙུག་ལག་ཁང་ནི་ཀུན་གྱི་སྔ་བ་ཡིན་ལ། དེ་ནས་གཟུགས་ཅན་སྙིང་པོས་བྱ་ཀ་ལནྟ་ཀའི་ཚལ་དང་། མགོན་མེད་ཟས་སྦྱིན་གྱིས་རྒྱལ་བུ་རྒྱལ་བྱེད་ཀྱིི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་སོགས་རིམ་པར་བྱུང་ཞིང་། ཇི་ལྟར་བྱ་བའི་ཚུལ་ཡང་འདུལ་བ་གནས་མལ་གྱི་གཞི་སོགས་ལས་ཤིན་ཏུ་ཞིབ་པར་འབྱུང་བ་བཞིན་ནང་པ་སངས་རྒྱས་པའི་བསོད་ནམས་ཀྱི་ཞིང་དགེ་འདུན་འདུ་བའི་ཁྱད་པར་གྱི་ཆོས་ཏེ། གཅེར་བུ་ཀུན་དགའ་ར་བ་སོགས། །བརྩིགས་པ་སྡིག་སྲོག་ཆགས་འཆི་བས། པའི་རྒྱུ་ཞེས་ཟེར། །ཐམས་ཅད་མཁྱེན་པ་ཁྱོད་ཉིད་ཀྱིས། །དེ་ཉིད་བསོད་ནམས་རྒྱུ་ཞེས་གསུངས། །ཞེས་བསྔགས་པ་བཞིན་ནོ། ། ༈

[edit]

bzo rig pa'i spyi don 'bel ba'i gtam las lus bzo lha sku'i thig rtsa sogs/ @#/_/na ma sarba dz+nyA ya/__gang gi mkhyen rab bdud rtsi'i dogs pa yis/__/brlan chags tshe na dgod pa'i ut+pal lar/__/phun tshogs shis dgu'i zil mngar rtag 'babs pa/__/yongs 'dzin smra ba'i nyi mas deng 'dir srungs/__/zhes shis par brjod pa'i tshig gi me tog cung zad sngon du gtor nas/__'dir las su bya ba ni/__lus can gang zhig srid las nges par 'byung ba'i blos thar pa dang thams cad mkhyen pa'i go 'phang don du gnyer ba la phyogs pa des ni/__gdon mi za bar thog ma kho na nyid du rig pa'i gnas rnams la 'jug par bya ste/__de ci'i phyir zhe na nye ba'i rgyu nyid du grub pa'i phyir ro/__/des na gang la 'jug pa'i yul rig pa'i gnas de'i rnam par dbye ba ni/__re zhig bcu phrag tu bsdus te 'chad pa'i tshul gyi rjes su 'brang te spyi don cung zad tsam zhig 'bel ba'i gtam gyi sgo nas gtan la phab pa la/__thog mar bzo rig pa la'ang gtso bo dang phal pa gnyis/__snga mar lus ngag yid gsum gyi bsdus pa'i dang po ni/__mchog tu gyur pa de bzhin gshegs pa'i sku gsung thugs kyi rten bzhengs pa ste/__des na sku rten bzhengs tshul la'ang /__snga phyir byung tshul gyi lo rgyus/__lo rgyus de ldan gyi cha tshad/__de ltar bzhengs pa'i phan yon no/__/dang po ni/__bris 'bur gnyis las bris sku snga bar byung ste/__de yang drang srong a sta'i bus sbyar ba'i tshangs pa'i tshad yig ces par/__sngon mi rnams tshe lo 'bum las mar bri ba'i tshe rgyal po 'jigs thul zhes bya ba byung ba'i dus su bram ze'i bu dus min gyis 'chi ba byung ba la/__rgyal po dang gshin rje 'thabs pas tshangs pas zhal lce bcad de/__bram ze'i bu ri mor bris pa mngon sum du byin gyis brlabs nas stsal bas rgyal po la dang por bri ba po zhes ming btags cing /__slar rgyal pos tshangs pa la ri mo bri tshul rgyas par zhus pas/__ri yi mchog ni ri rab yin/__/sgo nga las skyes rnams kyi ni/__/gtso bo nam mkha' lding yin no/__/mi yi gtso bo sa bdag ste/__/de bzhin ri mo sgyu rtsal gtso/__/zhes sogs stsal ba'i tshul dang /__shAkya'i rgyal po'i bstan pa 'dir yang /__rgyal po gzugs can snying po la rgyal po u drA ya Nas nor bu'i go khrab yan lag lnga ldan rin thang bral ba skyes bskur ba'i skyes lan du/__ston pa chu 'gram la bzhugs pa'i gzugs brnyan chu nang du 'char ba dper byas nas 'og tu rten 'brel bcas bris pa de bskur bas dad de bden pa mthong bar bris sku chu lon ma zhes grags pa dang /__sing+ga la'i rgyal po'i bu mo mu tig 'khri shing gis ston par dad de yi ge gsol bar/__ras kyi gzhir sku'i 'od zer bkye ba la ri mos mnan pa springs yig bcas bstsal bas bden pa mthong ba sogs rim par srol byung ba dang /__'bur sku'i thog ma ston pa yum gyi don du lha yul la gshegs pa'i shul/__grong khyer gsal ldan gyi rgyal blon 'khor bcas kyi mchod pa'i rten du tsan+dan las grub pa'i ston pa dngos dang 'dra ba'i sku bzhengs pa nyid/__ston pa phyir phebs tshe gom bdun bsus par grags pa da lta rgya nag gi tsan+dan jo bo ste/__ji skad du/__bcom ldan lha yul gshegs shul gsal ldan gyi/__/rgyal po 'khor bcas phyag dang mchod yul du/__/tsan+dan las byas mtshar sdug dngos 'dra ba/__/na bza' sul can mthing gos zung gis mdzes/__/gtsug tor mdun du me shel 'od 'bar bas/__/nyi ma brgya yi snang ba 'gog nus shing /__/drwa bas 'brel ba'i phyag zhabs 'khor los mtshan/__/'gro ba'i don la bzhengs pa'i stabs su bzhugs/__/bskal bzang dzam gling skye dgu grub dbang dran/__/mau gal bu la rdzu 'phrul bgrod pa yis/__/rgyal ba spyan 'dren bskul zhing des gsol bas/__/dgyes shing rin chen them skas las babs tshe/__/gsal ldan gnas su sku des gom drug bsus/__/shar phyogs rgya nag chen po'i yul dge phyir/__/bzhud ces de bzhin gshegs pa'i sor rtses bskul/__/ngang pa'i rgyal po bzhin du mkha' la gshegs/__/zhes gsungs pa ltar dang /__phyis su sku de las bshus pa'i si thang sogs byung zhing /__bod yul 'dir gna' nas chos rgyal mes dpon gyi bka' drin las bris 'bur gyi sku dar srol che bar byung zhing /__khyad par bris sku ni ston pa dgung lo nyer lnga pa'i sku tshad la dper byas bris rgyun rgya bal sogs la yod pa'i rgyun rnams phal cher bal pos bris pas bal bris zhes dar srol che zhing /__phyi nas mkhas pa bkra shis rgyal po la/__slob ma rang las mkhas pa lho brag sman thang pa sman bla don grub zhes sgra snyan sdeb sbyor yig rigs sogs mthar son pa de rang gi chung mas yid dbyung nas yul 'khyams te thon pa na/__yar 'phrog stag lung du pir snod bris dpe dang bcas pa zhig snyed pas lha bris la yid phyogs te mkhas pa bkra shis rgyal por bstan cing /__sngon gyi bag chags sad de ldan lugs kyi ri mo bri tshul thugs la bkra lam gyis shar/__dus kyi 'khor lo dang sdom 'byung rtsa 'grel rjes su 'brangs nas sku gzugs kyi tshad kyi rab tu byed pa yid bzhin nor bu zhes de bzhin gshegs pa'i mtshan dang dpe byad bshad pa/__mi ldan pa'i phyogs kyi gzhung dgag pa/__/tshad dang mi ldan pa'i skyon bshad pa/__/tshad ldan gyi gzhung dgod pa/__/tshad dang ldan pa'i yon tan brjod pa/__/lha bzo dang sbyin bdag gi mtshan nyid/__/lag tu blang ba'i rim pa rgyas par bshad pa ste bdun gyis gtan la phabs pa dang /__yang gong dkar sgang stod nas mkhyen brtse chen mo zhes 'byung ba de gnyis so so'i lugs cung zad mi 'dra bas mkhyen lugs dang /__yang stod du sku 'khrungs pa shog dpe dang byad shing 'bral med du 'chang zhing bris rgyun legs pa dang bris dpe legs pa 'tshol phyir phyogs kun tu nyul ba zhig byung bar brten sprul sku byi'u par grags pa ste/__de ni snga ma gnyis dang cung zad mi mthun pa sogs dar rgyas su byung bar thos so/__/gnyis pa la gnyis/__'jal byed dang /__gzhal bya'i tshad bstan pa'o/__/dang po ni/__'dir sor gyi brgyad cha la nas dang nas gnyis la rkang pa/__rkang pa bzhi la sor gang ngam/__cha chung ngam/__cha phran dang /__de phyed dang bcu gsum mam bcu gnyis skabs su gang babs kyis gdong ngam/__zhal lam/__thal mo'am mtho zhes bya ste/__'dis ni thams cad la tshad du 'jal bar byed do/__/gnyis pa ni/__ma pham pas/__sku ni n+ya gro d+ha ltar chu zheng gab/__ces gsungs pa'i don/__'dir ston pa shAkya'i rgyal po lta bu de bzhin gshegs pa bzhengs stabs su mdzad pa zhig gi dbang du byas te dper brjod na/__dbu'i gtsug tor dang bcas pa la sor mo brgya nyer lnga pa chu zheng gab pa ni dus 'khor las/__rgyal ba'i bdag po'i gtsug tor nas ni mdzod spu'i dbus su phyed dang bcas pa'i nyi ma'i sor du 'gyur/__/de nas mgrin pa'i chu skyes de bzhin snying ga dang ni de nas lte gsang chu skyes de bzhin no/__/zhabs kyi mthil dang rje ngar brla dang dpyi yang ma nu de nyid rig byed rnams kyis te/__/kro ba byed phyed bcas nyi ma'i rang dbang dpung lag rnams ni mkha' mig rgyal po nyi ma'i tshad kyis so/__/nyi gung la lag pa'i brgya phrag gang zhig dus dang dgu yi mi rnams kyi ni 'jig rten tshad/__/rig byed phyed dang bcas pa'i bzhi dang chu gter chu gter phyed pas bcas pa'i rig byed kyi/__/gtsug tor mgo bo'i 'og tu 'gyur te rgyal bas bdag po dpal la dpal ba dag dang shangs dang ni/__/shangs kyi 'og tu kos ko'i mtha' dang de nas mgrin pa dag ste mgrin pa'i rtsa ba'i chu skyes dbus/__/de nas snying ga lte ba gsang bar mi'i bdag po phyed bcas nyi ma rnams kyi rim pas sa/__/gsang ba'i chu skyes lte ba'i rtsa bar rdo rje dag kyang thub pa yi ni steng gi gtsug tor nyid/__/zhes pa'i don sku gzugs mtho bcu par byas pa'i mtho re la sor phyed dang bcas pa'i bcu gnyis su byas nas 13'dir rags pa tsam bshad na/__/de bzhin gshegs pa'i dbu'i gtsug tor gyi dpangs la sor bzhi/__de nas skra mtshams bar sor phyed dang lnga/__de bzhin du rim par mdzod spu dang /__shangs la rtse sor bzhi re/__kos ko phyed lnga/__mgrin par bzhi/__thugs ka dang lte ba dang gsang gnas rnams su zhal re ste/__sku'i phyed tshad la cha phran phyed dang bcas pa'i re gnyis dang /__dpyi la sor bzhi/__brla zhal do/__pus mo sor bzhi/__rje ngar zhal do/__zhabs dpangs sor phyed dang lnga ste phyed tshad phyed bcas re gnyis rnams bsgril ba chur sor mo brgya nyer lnga dang /__zheng la tshangs log nas mchan khung bar zhal gang /__de bzhin du dpung lhu sor nyi shu/__phyag dar bcu drug__/gung mo'i rtse'i mthar thug pa'i phyag la sor bcu gnyis/__gru mo dang mkhrig ma'i mtshams su sor re ste phyed tshad la sor mo phyed bcas te gnyis rnams dril bas sor mo brgya nyer lngar 'byung ngo /__/yang rgyud sdoms pa 'byung ba rim par phye ba sum cu pa las/__mthil lam thal mo bcu gcig pa lha yi gzugs ni bri bar bya/__/zhes dang /__zab mo rdo rje can gyi lha/__/shin tu yid dang mthun pa bri/__/zhes cha bcu gnyis su gsungs pa gdan dang thor tshugs zhal re bsdams pa'i zhal bcu gnyis su 'gyur ba ma gtogs pa sku tshad dngos gzhi la mtho bcu pa srid zheng sngar dang mtshungs mod/__'dir zhal bcu gnyis cha yin no zhes dang /__de bzhin gshegs pa las gzhan pa'i tshad la sor mo brgya nyi shu par gsungs pa dang /__sprul sku 'phrang kha ba dpal ldan blo gros bzang pos mdzad pa'i cha tshad kyi yi ger dkyus kyi bshad pa sman lugs dang mi mthun pa med kyang /__de'i mchan bu zhig tu sor brgya nyer lnga pa ni 'bur dang /__brgya nyi shu pa bris sku'i khyad par yin pa'i ngos bzung 'dug par brten/__phyis kyi mkhas pa dag gis/__dus 'khor 'bur 125dang /__sdom 'byung bris 130kyi dbang du byas par sgrogs pa ni ma dag pa ste/__ci'i phyir na sdom 'byung gi TI kar de bzhin gshegs pa'i sku'i tshad la sor mo brgya nyer lnga pa lan du mar bstan te/__de nyid du/__zhal gyi yang bcu gnyis cha dang /__cha chung dang /__sor dang /__sor mo zhes pa don gcig ste/__de thams cad du cha chung rnam par dbye bar shes par bya'o/__/bcom ldan 'das kyi ni sangs rgyas kyi gzugs nyid la phyed dang bcas pa'i cha chung bcu gnyis pa'i zhal bya'o/__/zhes dang /__bcu gnyis cha zhes pa ni sangs rgyas las gzhan thams cad thun mong pa nyid du gsungs pa'o/__/zhes dang /__yang ji srid sku gzugs byed pa de srid kyi tshad kyi tshangs thig btab nas/__de'i bcu cha la thal mor rnam par bzhag cing /__slar de phyed dang bcas pa'i cha chung bcu gnyis su byas la de'i cha gcig ni cha chung du nges par bya ste/__zhes sku gzugs mtho bcu pa dang zhal gyi tshad la phyed bcas bcu gnyis su bshad pa'i phyir sor mo brgya nyer lnga 'byung ba las 'os ci yod/__de bzhin du sngon gyi mkhas pa mang po'i cha tshad kyi yi ge rnams las kyang sangs rgyas kyi sku la sor mo brgya nyer lnga pa bris 'bur khyad med du dgos par bshad pa dang /__khyad par sman thang pas mdzad pa ni lugs 'dir rgya gzhung lta bur khas len dgos mod/__der mchog gi sprul sku'i tshad la sor mo 126pa bris 'bur khyad med du lan mang por bshad pa'i phyir/__de gnyis bris 'bur so sor dbye ba ni rang dgar byas par sems so/__/'o na de'i tshad ji ltar yin snyams na bshad par bya ste/__gzhan thams cad dus 'khor du bshad pa ltar/__'dir mi 'dra ba'i khyad/__srid du der dpyi la sor bzhi yod pa 'dir mi 'byung yang /__brla dang byin pa'i mtshams su ni/__/sor mo bzhi dang yang dag ldan/__/zhes pus mo'i lha nga sor mo gsum pa'i steng 'og ste byin pa'i mtshams su sor mo gnyis gnyis te bzhi 'byung ba dang /__pus mo la slar 'grel par sor gcig bsnan pa rnams kyis srid la sor mo brgya nyer lnga 'byung ngo /__/zhing la'ang dus 'khor lugs la dpung lhu nyi shu dang phyag ngar bcu drug ces bgrang ba'i dbang gis mkhrig ma dang gru mo'i mtshams su sor re bsnan yang 'dir phyag ni thal mo gsum pa ste/__thal mo 'di yis phyag mgo gnyis/__zhes mchan khung nas mkhrig ma'i bar thal mo gsum dang /__phyag mgo'i thal mo bcas pa'i phyed pa rnams bgrangs ba dril bas zhing la sor mo brgya nyer lnga 'byung ngo //____//__!_ thig chen gnyis pa de las gzhan byang chub sems dpa' sogs zhi ba thun mong pa 'khor los sgyur ba'i cha byad can rnams ni/__sdom 'byung TI kar/__mtshams dang mtshams la so sor cha chung gnyis gnyis chad par 'gyur te/__des na byang chub sems dpa' la sogs zhi ba'i lha rnams la sku'i stod dang smad dag gi cha chung phyed dang bcas pa gnyis gnyis bri ba las cha chung nyi shu lhag pa brgya'i tshad kyi skur 'gyur ro/__/zhes dgongs pa'o/__/zhes dang /__yang sangs rgyas kyi tshad bstan pa'i rjes thog tu/__'di dag ni re zhig sangs rgyas bcom ldan 'das dang dpal bde mchog gi mtshan nyid de/__byang chub sems dpa' dpa' bo rnams kyi'ang 'di dag kho na'o/__/'on kyang thal mo bcu pa rnams la'ang thal mo so sor cha chung phyed phyed dor nas cha chung bcu gnyis ba'i thal mos thal mo bcu'i rnam bzhag bya'o/__/zhes dang /__bslab btus las kyang /__byang chub sems dpa' rnams kyi yang sor bcu gnyis pa'i mtho bcu pa nyid do/__/zhes sogs kyi don ni/__de bzhin gshegs pa'i sku'i tshad ji lta ba bzhin las khyad par ni/__cha chung bcu gnyis pa'i zhal tshad kyis gzhal bas sor mo brgya nyi shu pa 'byung ste go bar sla'o//____//__! thig chen gsum pa rgyal yum yid 'phrog pa'i gzugs can rnams ni/__sdom 'byung las/__yid du 'ong ba'i rang gzugs ni/__/thal mo dgu pa mngon par 'bri/__/zhes yid 'phrog pa'i gzugs nyid de 'phags ma sgrol ma la sogs pa dkyil 'khor pa'i lha mo rnams kyi srid zheng la thal mo dgu pa ste/__de yang thal mo'i tshad dang 'gros ni sor mo 120pa'i phyogs dang 'dra bar/__khyad chos/__thod dpangs dang mgrin pa nas cha chung re re dor bas gsang gnas nas spyi bo'i mthar thug par mthor phyed lnga dang /__sku smad la brla dang byin pa'i mtshams kyi sor mo bzhi dang /__pus mo zhol nas sor re re dor bas gsang ba'i gnas nas zhabs kyi mthar thug par mtho phyed lnga ste dril bas sor mo brgyad kyis lhag pa'i brgya 'byung bas srid kyi tshad rtogs shing /__mchan khung dang /__dpung lhu dang /__phyag ngar rnams nas sor mo do re dbri bas de dang mnyam pa'i zheng gi tshad kyang rtogs so/__/rgyud _'grel du 'di nas 'og gi mtho brgyad pa'i skabs marasbrel ba ltar 'byung ba ni/__/'gyur byed kyis bcad ma legs pa yin gyi/__thig khongs 'dir lha'i bud med rnams dang dbang po dang nye dbang dang chu lha dang dbang phyug dang rlungs dang tshangs pa dang gza' zhi ba dang klu rnams kyi'o/__/zhes de thams cad kyang 'dir 'du bar shes par bya'o//____//__!_ thig chen bzhi pa sbom thung gtum drag can rnams ni/__snga mar/__khro bo khro mo dbang phyug ma/__/bran pho bran mo ci bgyi ma/__/drag cing 'jigs pa'i gzugs rnams ni/__/thal mo brgyad pa rnam par 'bri/__/zhes 'byung zhing 'grel bar gdan gyi mtha' nas skra'i zhags kyi bar du shes par bya'o/__/zhes dang /__yang /__thung zhing gsus pa 'phyang ba'i khro bo gshin rje mthar byed la sogs pa ni thal mo brgyad ces gsungs pa dang /__bris rgyun dang bcas/__tshan drag can la sku'i ngo bo la zhal tshad drug dang /__gdan dang skra zhal re bcas thal mo brgyad pa bshad cing /__zhib par gshin rje gshed nag po'i rgyud rim par phye ba bcu bzhi pa las 'byung ba'i don ni/__zhabs dpangs sor bzhi/__'gying stabs med pa'i thad kar brgyangs ba'i rje ngar sor bco brgyad la 'gying stabs kyi mtho gang /__pus mo sor bzhi dang brla sor bco brgyad du bshad na'ang 'gyings stabs kyi lto bar gab pa'i gsang gnas mgrin pa man la mtho gsum/__mgrin pa sor bzhi/__zhal ras dang skra la mtho re ste srid kyi tshad dang /__brang zhing phyed la cha phran nam sor bcu/__dpung lhu sor bcu bzhi phyag ngar dang phyag mgo zhal tshad re ste srid zhing mnyam pa go drug bshad kyang 'gying stabs kyi dbang gis nges pa med par mkhas pas nyams dang sbyar shes dgos te/__thig khong 'dir gshin rje gshed sogs khro bo rnams dang /__thag bzang ris dang lus ngan dang bden bral dang gshin rje dang sa lha dang gza' drag po rnams 'du'o/____/_!_ thig chen lnga pa mi'u thung ltar khros pa rnams ni/__kr-i ya sa mu ts+tshar/__rA ma Na dang mi'u thung dang tshogs kyi bdag po rnams ni mtho lnga par bya'o/__/zhes dang /__grub chen nag po pas/__mi'u thung la chu so gsum gyis pus mo yan chad khyab par gnas so/__/zhes gsungs pa'i don lag tu blang byar/__zhal dang /__thugs ka dang /__lte ba dang /__chu so rnams mtho re dang brla ni zhal dang lte bar gab pa dang /__byin la zhal gang dang /__thod dpangs dang /__mgrin pa dang /__pus tshigs dang rting pa rnams sor gsum re bsdams pas srid du sor mo bdun cu rtsa gnyis dang /__brang zhing zhal gang /__dpung lhu sor drug__/phyag ngar dang phyag mgo zhal tshad re ste thig khongs 'dir gur mgon dang tshogs kyi bdag po sogs 'du bar shes par bya'o/____/_!_ drug pa nyan thos dang rang sangs rgyas sogs mi rnams kyi tshad ni/__dri med 'od las/__de nyid sems can rnams kyi khru bzhi ste/__/mi rnams kyi sor dgu bcu rtsa drug go__/steng dang 'og tu ni sor brgyad cu rtsa bzhi ste/__de ltar mi rnams ni mtshan dang mi ldan pa'o/__/zhes pa ste/__de'ang nyan thos rnams ni byang chub sems dpa'i tshad ltar skabs rer bshad pa'ang yod cing /__lag len du'ang bris thang tshad ldan rnams su de ltar byas pa mthong la/__rang rgyal la sogs pa ni mi'i tshad 'di byed pa la/__de'ang srid du khru phyed bzhi dang /__zheng du khru bzhi bar bshad pa dang /__gso rig tu khru bzhir bshad pa mi'i tshad la btab tu btubs te lus 'doms gang gru bzhi yod par khru re ni rang gi mtho gnyis re rags par yin la/__ de'ang rang sangs rgyas ni gtsug tor cung zad 'phags pa lhag pa'i char nye ba can te/__skra'i dpangs sor bzhi/__gdong la mtho gang /__mgrin par sor do/__/snying ga lte ba gsang ba'i bar rnams mtho re/__brla dang rje ngar zhal phyed do re dang /__/pus mo nas zhabs dpangs sor gsum re byas pa srid kyi tshad do/__/mdor na thig chen dang po la srid dang zheng gnyi gar sor mo brgya nyer lnga/__gnyis par sor mo brgya nyi shu/__/gsum par sor brgya dang brgyad/__/bzhi bar sor mo go drug__/lnga par sor mo don gnyis/__/drug par srid du khru phyed bzhi dang /__/zheng du khru bzhi pa rnams so/_/_!__ thig chen brgyad pa sku'i rnam 'gyur rdo rje skyil krung dang /__pad+ma'i skyil krung dang /__/sems dpa'i skyil krung dang /__/dpa' bo'i 'dug stangs dang /__/bzang po'i 'dug stangs dang /__/tsog pu dang /__g.yon rol dang /__g.yas rol dang /__bde lugs can dang /__g.yas brkyang dang /__g.yon brkyang dang /__sa ga dang /__zlum po dang /__mnyam pa'i stabs te bzhugs stangs kyi khyad par rnams dang /__byang chub mchog gi phyag rgya sogs pa phyag rgya mi 'dra ba'i khyad par rnams dang /__rab tu byung ba'i cha byad kyi chos gos gsum dang /__mkhar bsil dang lhung bzed sogs kyi tshad dbyibs rab 'bring sogs dang /__zhi drag so so'i rgyan cha'i bye brag mang po dang /__gdan khri dang rgyab yol rgyas 'bring bsdus pa rnams kyi tshad dang /__dbyibs dang /__rgyud sde rnams nas bstan pa'i dkyil 'khor so so'i thig dang /__las so so'i thabs kyi tshad dang mtshan nyid la sogs pa rnams ni dri ma med pa'i bka' dang bstan bcos tshad ma'i rjes su 'brang nas bsgrub par rigs te/__tshad dang ldan mi ldan las yon tan dang skyon gyi rnam pa tha dad par 'gyur pa'i phyir ro/__/gsum pa ni/__bslabs btus las/__mi mjed 'jig rten gyi khams kyi sems can thams cad la 'dod yon lnga'i sbyin pa byin pa bas/__dge bsnyen rnam dag gcig la bsnyen bskur ba bsod nams ches khyad par 'phags so/__/de thams cad las ni dge tshul gcig la'o/__/de thams cad las ni rdo rje 'dzin pa gcig la'o/__/de thams cad la bsnyen bskur ba las ni sku gzugs mtshan nyid dang ldan pa mtshon gang ba gcig bzhengs pa bsod nams ches khyad par 'phags so/__/zhes dang /__sdom 'byung las/__sngags pa las ni dang po pas/__/gzugs brnyan la sogs bya ba ste/__/bris sku bsgrubs na myur bar ni/__/dngos grub rgya chen 'thob par 'gyur/__/zhes dang /__'grel par/__ji ltar gsungs pa'i de kho na nyid bsgoms pa'i nus pa med pas/__bskyed pa'i rim pa bsgom pas lha'i rnam par sgom par bya'o/__/de'ang gzugs brnyan ma mthong ba las mi nus so zhes pa'i don gyis 'phangs pa'i thang sku dang sku gzugs mtshan nyid dang ldan pa kho na bsod nams dang ye shes kyi tshogs kyi rgyu yin la/__zhes sogs thun mong dang khyad par gyi dgos pa mtha' klas te mdo rgyud dag las rgya cher shes par bya'o/__/gzhan yang 'dul ba lung las/__/kun dga' ra ba gtsug lag khang /__/mal stan 'tsho ba nar ma dang /__/glo bur nad pa'i nad g.yogs dang /__/yul ngan tshe na sbyin pa ni/__/rdzas las byung ba'i bsod nams bdun/__/zhes sogs gsungs pa las brtsams te/__bcom ldan 'das kyis rjes su gnang ste khyim bdag dge bzang gis brtsegs pa'i dge bzang gi gtsug lag khang ni kun gyi snga ba yin la/__de nas gzugs can snying pos bya ka lan+ta ka'i tshal dang /__mgon med zas sbyin gyis rgyal bu rgyal byed kyi+i tshal mgon med zas sbyin gyi kun dga' ra ba sogs rim par byung zhing /__ji ltar bya ba'i tshul yang 'dul ba gnas mal gyi gzhi sogs las shin tu zhib par 'byung ba bzhin nang pa sangs rgyas pa'i bsod nams kyi zhing dge 'dun 'du ba'i khyad par gyi chos te/__gcer bu kun dga' ra ba sogs/__/brtsigs pa sdig srog chags 'chi bas/__pa'i rgyu zhes zer/__/thams cad mkhyen pa khyod nyid kyis/__/de nyid bsod nams rgyu zhes gsungs/__/zhes bsngags pa bzhin no/____/_!_