JKW-KABAB-09-TA-030

Previous Text Back to Volume PageLast text in volume.

བཀའ་བརྒྱད་དྲེགས་པ་ཀུན་འདུལ་ལས། དོན་གྱི་སྨིན་བྱེད་སྙིང་པོ་ཁྲིགས་སུ་བསྡེབས་པ་བདེ་ཆེན་མཆོག་སྟེར།

Wylie title	bka' brgyad dregs pa kun 'dul las don gyi smin byed snying po khrigs su bsdebs pa bde chen mchog ster
Location	mkhyen brtse'i bka' babs Volume 9, Text 30, Pages 623-643 (Folios 1a to 11a5)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	ལོང་པོ་བསམ་གཏན་བདེ་ཆེན་གླིང་པ་, འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po, long po bsam gtan bde chen gling pa)
Citation	Khyentse, Dilgo. bka' brgyad dregs pa kun 'dul las don gyi smin byed snying po khrigs su bsdebs pa bde chen mchog ster. In Rdzong sar 'jam dbyangs mkhyen brtse'i dbang po'i bka' babs, Vol. 9: 623-643. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Empowerment Ritual - dbang chog - dbang skur
Cycle	བཀའ་བརྒྱད་དྲེགས་པ་ཀུན་འདུལ་ (bka' brgyad dregs pa kun 'dul)
Karchag page	JKW-KABAB-Volume-09-TA-Karchag
RTZ	In the Rinchen Terdzö: https://rtz.tsadra.org/index.php/Terdzo-BA-038
Colophon	།ཅེས་ལོང་པོ་བསམ་གཏན་གླིང་པའི་བཀའ་བརྒྱད་དྲེགས་པ་ཀུན་འདུལ་ཀྱི་ལས་བྱང་གཏེར་མཛོད་དཀྱུས་སུ་སྔར་ནས་གཞུགས་ཤིང་འཇམ་མགོན་རིན་པོ་ཆེས་སྒྲུབ་ཆེན་མཛད་པའི་ལོ་རྒྱུས་རྣམ་ཐར་དུ་གསལ་ཡང་དབང་རྒྱུན་མི་བཞུགས་པ་ཕྱིས་སུ་འདི་ཉིད་ཀྱི་དབང་ཆེན་དཔེ་རྙིང་ཁུངས་དག་ཞིག་ཐོབ་པ་ཁྱབ་བདག་འཇམ་པའི་རྡོ་རྗེ་ཆོས་ཀྱི་བློ་གྲོས་རིན་པོ་ཆེར་སྤྱན་འབེབས་ཀྱིས་དབང་སྩལ་གྲུབ་གསོལ་བ་བཏབ་པས་དོན་དབང་འདི་ཉིད་དགྱེས་བཞིན་སྩལ་ཏེ་ཁྱོད་ནས་ཁྲིགས་བསྡེབས་གྱིས་ཞེས་རྡོ་རྗེའི་བཀའ་ལུང་སྩལ་བ་བཞིན། འཕགས་ཡུལ་དུ་གཏེར་མཛོད་སྤར་གསར་བསྐྲུན་སྐབས་རྙིང་སྔགས་རྒན་པོ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་དབང་ཚིག་གཏེར་གཞུང་ལ་བཀླག་ཆོག་ཏུ་ཁྲིགས་བསྡེབས་དང་བཅས་ཁ་སྐོང་དུ་བཞུགས་སུ་གསོལ་བས་གསང་ཆེན་བསྟན་པའི་སྙིང་པོའི་ཞབས་ཏོག་ཏུ་འགྱུར་བར་བླ་མ་དང་ལྷག་པའི་ལྷས་བྱིན་གྱིས་བརླབ་པར་མཛད་དུ་གསོལ།།
	ces long po bsam gtan gling pa'i bka' brgyad dregs pa kun 'dul kyi las byang gter mdzod dkyus su sngar nas gzhugs shing 'jam mgon rin po ches sgrub chen mdzad pa'i lo rgyus rnam thar du gsal yang dbang rgyun mi bzhugs pa phyis su 'di nyid kyi dbang chen dpe rnying khungs dag zhig thob pa khyab bdag 'jam pa'i rdo rje chos kyi blo gros rin po cher spyan 'bebs kyis dbang stsal grub gsol ba btab pas don dbang 'di nyid dgyes bzhin stsal te khyod nas khrigs bsdebs gyis zhes rdo rje'i bka' lung stsal ba bzhin/__'phags yul du gter mdzod spar gsar bskrun skabs rnying sngags rgan po 'gyur med theg mchog bstan pa'i rgyal mtshan gyis dbang tshig gter gzhung la bklag chog tu khrigs bsdebs dang bcas kha skong du bzhugs su gsol bas gsang chen bstan pa'i snying po'i zhabs tog tu 'gyur bar bla ma dang lhag pa'i lhas byin gyis brlab par mdzad du gsol

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །བཀའ་བརྒྱད་དྲེགས་པ་ཀུན་འདུལ་ལས། དོན་གྱི་སྨིན་བྱེད་སྙིང་པོ་ཁྲིགས་སུ་བསྡེབས་པ་བདེ་ཆེན་མཆོག་སྟེར་བཞུགས།། ན་མོ་ཤྲཱི་ཧེ་རུ་ཀ་མཎྜ་ལ་བྷྱཿ བླ་མེད་རྒྱུད་སྡེ་རབ་འབྱམས་ཀྱི། །ཁྱབ་བདག་ཡེ་ཤེས་ཀློང་དགུའི་གཟུགས། །བླ་མ་ཧེ་རུ་ཀ་དཔལ་ལ། །བཏུད་ནས་དབང་གི་ལས་རིམ་འཆད། །འདིར་ལོང་པོ་བསམ་གཏན་གླིང་པའི་ཡང་གཏེར་བཀའ་བརྒྱད་དྲེགས་པ་ཀུན་འདུལ་གྱི་སྙིང་པོ་དོན་གྱི་དབང་བསྐུར་བགྱི་བ་ལ་དང་པོ་ཡོ་བྱད་ཀྱི་ཤོམ་ནི། གཞུང་མཐུན་དཀྱིལ་འཁོར་དང༌། མ་འབྱོར་ན་ཚོམ་བུ་དགུའི་སྟེང་མཉྫི་ལ་བུམ་པ་བཅུད་ལྡན་རྫས་སོ་ལྔ་ཅན། ཤར་དུ་དཔལ་གཏོར་གཙོ་འཁོར་དགུ་དང་སྨན་རག །དཔལ་གྱི་ལྷ་ཙཀ་ལྷོར་དབུ་རྒྱན། ནུབ་ཏུ་རྡོར་དྲིལ། དུར་ཁྲོད་དཔལ་ཆས། བྱང་དུ་ཐོད་ཆང༌། རིག་ཙཀ །ཤེལ་རྡོ་བཅས་བཤམས་ལ་ཉེར་སྤྱོད་མཆོད་པས་བསྐོར། མིག་དར། མེ་ཏོག །ཚོགས་མཆོད། བཀའ་སྲུང་འབུལ་གཏོར། ཆད་བརྟན། དཀར་བགེགས་རྣམས་དང༌། ལས་བུམ་སོགས་དགོས་པའི་ཡོ་བྱད་འདུ་བྱའོ། །གཉིས་པ་སྒྲུབ་པའི་ཐབས་ལ། སྔོན་དངོས་རྗེས་རིམ་ལས་བྱང་བདེ་ཆེན་སྙིང་པོ་ལས་ཇི་ལྟར་གསུང་པ་བཞིན་ཁོག་ཕུབ་པས། དངོས་གཞིའི་སྐབས་སྒྲུབ་གཞི་བདག་དང་མདུན་དུ་བཀོད་པའི་དཀྱིལ་འཁོར་སྒྲུབ་རྫས་དང་བཅས་པ་བདག་མདུན་ཐ་མི་དད་པར་བདེ་ཆེན་ཡེ་ཤེས་གཅིག་གི་རོལ་པར་བལྟ་བས། བསྟོད་པའི་མཐར་ཛབ྄་ཁང་སོ་སོར་ཕྱེས་ལ། བསྙེན་སྒྲུབ་ལས་ཀྱི་བཟླས་པ་ལས་སྒྲུབ་པ་གཙོར་བཏོན་མཐར། བུམ་པ་རང་བྱུང་གི་གཞལ་ཡས་ཁང་དུ་ལྷ་རྣམས་དྭངས་པའི་མཚོ་ལ་གཟའ་སྐར་ཤར་བ་བཞིན་སྐད་ཅིག་གིས་གསལ་བ་ལ། ཐུགས་ཀ་ནས་སྔགས་ཀྱི་ཕྲེང་བ་གཟུངས་ཐག་ལ་འཁྲིལ་བ་མཆོད་པའི་ཚུལ་དུ་སྤྲོས། ལྷ་རྣམས་དགྱེས་པ་བསྐྱེད། བྱང་ཆུབ་སེམས་ཀྱི་རྒྱུན་བབ་པ་བུམ་ཆུ་དང་རོ་གཅིག་ཏུ་འདྲེས་པར་བསམ་ལ། ཨོཾ་བཛྲ་ཀྲོ་དྷཱ་མ་ཧཱ་ཤྲཱི་ཧེ་རུ་ཀ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ༔ ཅིས་ནུས་བཟླ། ལས་བུམ་དུ་ཨོཾ་བཛྲ་ས་ཏྭ་ཨཱཿ བརྗོད་ཅིང་ཅུང་ཟད་བཟླས་པས་བྱིན་གྱིས་རླབས། བཀའ་གཏེར་སྲུང་མའི་གཏོར་བསྔོས་དང༌། ཚོགས་མཆོད་བསྐང་བཤགས་བཏང་ལ། ཚོགས་དྲངས། བདག་འཇུག་གམ་རིག་པའི་མེ་ཏོག་དོར་བས་ནུས་ལྡན་དུ་བྱའོ། །དབང་གི་ལས་རིམ་དངོས་ལ། སྣོད་དུ་གྱུར་པའི་སློབ་མ་ཁྲུས་ནས་དབྱུང༌། བགེགས་གཏོར་བཏང་ཞིང་སྲུང་འཁོར་གྲུབ་པ་དང༌། དེ་ཡང་བདེ་ཆེན་ཡེ་ཤེས་རང་སྣང་འོག་མིན་གསང་བ་ཆེན་པོའི་རང་བཞིན་ལྷུན་གྲུབ་ཀྱི་དཀྱིལ་འཁོར་དུ་རང་བྱུང་དང་པོའི་སངས་རྒྱས་ཀུན་ཏུ་བཟང་པོ་ཉིད་ཞི་ཁྲོ་རབ་འབྱམས་རྒྱལ་བའི་འཁོར་ལོའི་སྤྲིན་དང་བཅས་པས་བདེ་གཤེགས་སྒྲུབ་ཆེན་བཀའ་བརྒྱད་སྤྱི་རྒྱུད་ལྔ་དང༌། བྱེ་བྲག་གི་སྒོས་རྒྱུད་བཅུ། ཡན་ལག་སོ་སོའི་སྒྲུབ་ལུགས་ཀྱི་རྒྱུད་སྡེ་རབ་འབྱམས་ཆོས་ཉིད་ཀྱི་རང་སྒྲས་དུས་གསུམ་རྒྱུན་མི་ཆད་པའི་ཆོས་འཁོར་བསྐོར་བ་ལས། གདུལ་བྱ་འདུལ་བའི་དུས་ལ་བབ་པའི་ཚེ་རིག་འཛིན་གཙོ་བོ་རྡོ་རྗེ་ཆོས་ཀྱིས་བཀའ་ཡི་བསྡུ་བ་དང་དགོངས་འགྲེལ་ལུང་ལྔའང་མཛད་ནས་མཁའ་འགྲོ་ལས་ཀྱི་དབང་མོ་ཆེ་ལ་གཏད། དེ་ཉིད་ཀྱིས་དུར་ཁྲོད་བསིལ་བ་ཚལ་གྱི་མཆོད་རྟེན་བདེ་བྱེད་བརྩེགས་པར་གཏེར་དུ་སྦས་པ་བཀའ་བབ་རིག་འཛིན་བརྒྱད་ཀྱིས་སྒྲུབ་སྡེ་སྒོས་བཀའ་རྣམས་སྤྱན་དྲངས། །སྤྱི་རྒྱུད་རབ་འབྱམས་རྒྱལ་བའི་སྤྱི་གཟུགས་པདྨ་ཐོད་ཕྲེང་རྩལ་ལ་བཀའ་བབ་སྟེ་རྒྱུད་ལུང་མན་ངག་གི་རིམ་པ་རྒྱས་བསྡུས་མཐའ་ཡས་པ་མཛད་ནས་ཆོས་འཁོར་རྒྱ་ཆེན་པོ་བསྐོར། ཁྱད་པར་གྱི་གདུལ་བྱ་བོད་ཡུལ་བསམ་ཡས་མཆིམས་ཕུར་རྗེ་འབངས་སྙིང་གི་བུ་དགུ་ལ་སྒྲུབ་ཆེན་བཀའ་བརྒྱད་ཀྱི་དཀྱིལ་འཁོར་དུ་སྨིན་ཅིང་གྲོལ་བར་མཛད་ཁྱད་པར་མངའ་བདག་ཚངས་པ་ལྷའི་མེ་ཏོག་ལ་བདེ་གཤེགས་སྒྲུབ་པ་བཀའ་བརྒྱད་སྤྱི་དྲིལ་གྱི་བཀའ་བབ་པས་མཚོན་སྒྲུབ་སྡེའི་དཀྱིལ་འཁོར་རྒྱས་བསྡུས་མཐའ་ཡས་པ་བོད་ཡུལ་མཐའ་དབུས་ཀུན་ཏུ་གཏེར་དུ་སྦ་བར་མཛད་ཅིང་སྨོན་ལམ་དུས་སུ་བབ་སྔོན་གྱི་ལས་འཕྲོ་སད་པའི་སྤྲུལ་པའི་གཏེར་སྟོན་རྣམས་ཀྱིས་ཐུན་མོང་གི་གདུལ་བྱའི་སྤྱོད་ཡུལ་དུ་སྣང་བར་མཛད་པའི་བྱེ་བྲག །ལོང་པོ་བསམ་གཏན་གླིང་པའི་ཟབ་གཏེར་བཀའ་བརྒྱད་དྲེགས་པ་ཀུན་འདུལ་གྱི་ཤོག་སེར་སྨུག་ནག་དབང་གི་མཁའ་འགྲོས། མངའ་བདག་ཆོས་ཀྱི་རྒྱལ་པོ་དང་རྒྱལ་སྲས་ལྷ་རྗེ་ཁུ་དབོན་ཟུང་གི་རྣམ་འཕྲུལ་གཏེར་སྟོན་གྲུབ་ཐོབ་ཡོངས་ཀྱི་རྒྱལ་པོ་མཆོག་གི་རིག་འཛིན་ཆེན་པོ་པདྨ་འོད་གསལ་མདོ་སྔགས་གླིང་པ་ལ་མངོན་སུམ་དུ་ཕུལ་ཞིང་གུ་རུ་རིན་པོ་ཆེས་བྱིན་གྱིས་བརླབས་པའི་བརྡ་བསྒྱུར་ནས་སྨིན་གྲོལ་སྩལ་བར་མཛད་ཀྱང༌། དབང་ཆོག་གཏན་ལ་ཕབ་མ་གྲུབ་པ་ལས། སླར་ཡང་རྗེ་ཉིད་ཀྱི་ཡེ་ཤེས་སྒྱུ་འཕྲུལ་དྲྭ་བའི་རོལ་གར་འཇམ་དབྱངས་ཆོས་ཀྱི་བློ་གྲོས་རིན་པོ་ཆེས་ཚུལ་འདིའི་དབང་ཆོག་གཏེར་གཞུང་ཞིག་གི་དཔེ་ཕྱག་ཏུ་སོན་པ་ལས་དོན་དབང་སྙིང་པོའི་བཅུད་དྲིལ་འདི་ཉིད་ཁོལ་དུ་ཕྱུངས་ཏེ་དར་རྒྱས་སུ་མཛད་པའི་སྨིན་བྱེད་གསན་པའི་ཡོན་དུ་མཎྜལ་ཕུལ། ཙཀྵུ་བྷནྡྷ་ཝ་ར་མ་ཎ་ཡེ་སྭཱ་ཧཱ༔ མིག་དར་འཆིང༌། ཨ་ཁཾ་ཝཱི་ར་ཧཱུྃ་གིས་མེ་ཏོག་གཏད། གསོལ་བ་འདེབས་པ་འདིའི་རྗེས་ཟློས་མཛོད། ཧོཿ དཔལ་ཆེན་ཡོངས་རྫོགས་དཀྱིལ་འཁོར་བདག༔ བདེ་གཤེགས་ཀུན་འདུས་དཀྱིལ་འཁོར་འདིར༔ འཇུག་ཅིང་སྨིན་པར་མཛད་ནས་ཀྱང་༔ དབང་དང་བྱིན་རླབས་དངོས་གྲུབ་སྩོལ༔ ལན་གསུམ། སློབ་དཔོན་གྱིས། སྒྲུབ་པ་བཀའ་བརྒྱད་དཀྱིལ་འཁོར་ཆེར༔ འཇུག་ཅིང་སྨིན་པ་སྐལ་བཟང་ཡང་༔ དད་བརྩོན་བརྟུལ་ཞུགས་ལྡན་པ་ལས༔ གཞན་དུ་སྨྲས་ན་ཉམས་ཏ་རེ༔ ཞེས་དྲིས་པའི་ལན་གསོལ་བར་མོས་ལ་འདིའི་རྗེས་ཟློས་མཛོད། བདག་ནི་དངོས་གྲུབ་མཆོག་ལ་དད། ཟབ་མོའི་ལམ་ལ་བརྩོན་པ་དང་༔ རྡོ་རྗེའི་བརྟུལ་ཞུགས་སྤྱོད་ནུས་ཕྱིར༔ ངེས་པར་ཐུགས་རྗེས་བཟུང་བར་འཚལ༔ དམ་ཆུ་སྦྱིན་ལ། དེ་ལྟར་ཡིན་ན་དཔལ་ཆེན་པོའི༔ ཡེ་ཤེས་གསང་བ་ཁྱོད་ལ་སྦྱིན༔ དམ་ཚིག་རྡོ་རྗེའི་ཆུ་འཐུང་ལ༔ འདའ་དཀའི་དམ་ཚིག་འབད་པས་སྲུངས༔ ཨོཾ་བཛྲ་ས་མ་ཡ་ཨུད་ད་ཀ་ཋ༔ དམ་ཚིག་གནང་བཀག་ལས་མི་འདའ་བའི་ཕྱིར་རྡོ་རྗེའི་བྲོ་བོར་འདིའི་རྗེས་ཟློས་མཛོད། ས་མ་ཡ་ཨི་དཾ་ན་ར་ཀན༔ མདུན་བསྐྱེད་དང་དབྱེར་མེད་པའི་དཀོན་མཆོག་རྩ་གསུམ་རབ་འབྱམས་རྒྱ་མཚོ་ཏིལ་གོང་ཁ་ཕྱེ་བ་ལྟ་བུའི་མདུན་མཁའ་ཁྱབ་ཀྱི་འགྲོ་བ་ཐམས་ཅད་རང་དང་ལྷན་ཅིག་གནས་པས་མི་གནས་པའི་མྱང་འདས་ལ་འཁོད་ཕྱིར་སྒོ་གསུམ་རྩེ་གཅིག་གུས་པས་སྐྱབས་སུ་འགྲོ་བ་དང་༔ སྲིད་མཚོར་བྱིང་བའི་མ་རྒན་སེམས་ཅན་གཅིག་ཀྱང་མ་ལུས་པ་ཁྱབ་བདག་ཧེ་རུ་ཀའི་གོ་འཕང་ལ་སྦྱོར་བའི་ཕྱིར་དབང་གིས་རྒྱུད་སྨིན་ཅིང། ལམ་རིམ་པ་གཉིས་ཀྱིས་གྲོལ་བར་བྱས་ནས་གཞན་དོན་རླབས་པོ་ཆེ་ལ་འཇུག་སྙམ་པས་སེམས་བསྐྱེད་པ་འདིའི་རྗེས་ཟློས། བླ་མ་དཔལ་ཆེན་ཡི་དམ་ཞི་ཁྲོའི་ལྷ༔ མཁའ་འགྲོ་ཆོས་སྐྱོང་ཚོགས་ལ་སྐྱབས་སུ་མཆི༔ འགྲོ་ཀུན་དོན་དུ་བྱང་ཆུབ་སེམས་བསྐྱེད་ནས༔ ཧེ་རུ་ཀ་དཔལ་གོ་འཕང་བསྒྲུབ་པར་བགྱི༔ ལན་གསུམ། རྒྱུད་དག་པའི་ཕྱིར་བསགས་སྦྱང་གི་ཚུལ་ཚིགས་རྗེས་སུ་དོན་དྲན་པས་འདིའི་རྗེས་ཟློས་མཛོད། ཆོས་དབྱིངས་ཀློང་ནས་ཡེ་ཤེས་ལྷ་ཚོགས་གཤེགས༔ ཟུང་འཇུག་འདུ་འབྲལ་མེད་པར་བཞུགས་སུ་གསོལ༔ རིག་རྩལ་རོལ་པ་དོན་གྱི་ཕྱག་མཆོད་བཞེས༔ གཟུང་འཛིན་འཁྲུལ་པའི་སྡིག་སྒྲིབ་མཐོལ་ཞིང་བཤགས༔ མ་འཁྲུལ་གནས་ལུགས་རྟོགས་ལ་རྗེས་ཡི་རང་༔ འགག་མེད་རྡོ་རྗེའི་ཆོས་འཁོར་བསྐོར་བཞིན་དུ༔ སྐྱེ་མེད་གཉུག་མའི་དབྱིངས་སུ་བཞུགས་གསོལ་འདེབས༔ དགེ་ཚོགས་འཁོར་གསུམ་དམིགས་མཐའ་བྲལ་བར་བསྔོ༔ རང་བྱུང་གདོད་མའི་གོ་འཕང་མངོན་གྱུར་ཤོག༔ ལན་གསུམ། སྨིན་བྱེད་ཀྱི་སྲོག་རྩ་སྤྱི་དང་རྩ་བར་གྱུར་པ་སྤྱི་དང་ཁྱད་པར་གྱི་སྡོམ་པ་དང་དམ་ཚིག་མཐའ་དག་ལེགས་པར་བླང་ནས་ཚུལ་བཞིན་བསྲུང་སྙམ་པས་འདིའི་རྗེས་ཟློས། མཁའ་ཁྱབ་རྒྱལ་བ་སྲས་བཅས་དགོངས༔ མཐའ་ཀླས་སེམས་ཅན་དོན་གྱི་ཕྱིར༔ སོ་ཐར་བྱང་སེམས་གསང་སྔགས་ཀྱི༔ སྡོམ་པ་མ་ལུས་བཟུང་བར་བགྱི༔ ཁྱད་པར་རྩ་བ་སྐུ་གསུང་ཐུགས༔ ཡན་ལག་དམ་ཚིག་ཉི་ཤུ་ལྔ༔ སྒྲུབ་པ་ལྷག་པའི་དམ་ཚིག་རྣམས༔ ཚུལ་བཞིན་བཟུང་ཞིང་བསྲུང་བར་བགྱི༔ ལན་གསུམ། དེ་ནས་རིགས་དང་སྐལ་པ་བརྟག་པའི་ཕྱིར་ཁྱེད་རང་ལ་སྔར་བྱིན་པའི་མེ་ཏོག་དེ་ཉིད་རང་གི་རིགས་ཀྱི་ལྷ་ལ་ཕོག་པར་ཤོག་སྙམ་པའི་བློས་ཚིག་འདིའི་རྗེས་ཟློས་དང་བཅས་ཏེ་རིགས་ལྔའི་དཀྱིལ་འཁོར་འདིར་དོར་བར་ཞུ། པུཥྤེ་པྲ་ཏིཙྪ་ཧོ༔ མེ་ཏོག་རིགས་ཀྱི་གཙོ་བོས་བཞེས་ཏེ་དབང་རྟགས་སུ་སྤྱི་བོར་བཅིངས་པར་གསང་བའི་མཚན་རྡོ་རྗེ་ཆེ་མཆོག་འདུས་པ་རྩལ་ཞེས་བྱིན་པར་མོས་ཤིག །པྲ་ཏི་གྷྲྀ་ཧ་ན་ཧི་མཾ་ས་ཏྭ་མ་ཧཱ་བཱ་ལ་ཧོཿ མེ་ཏོག་སྤྱི་བོར་བཀོད། མ་རིག་པའི་ལིང་ཏོག་མིག་དར་དང་ལྷན་ཅིག་བསལ་བར་མོས་མཛོད། གསེར་ཐུར་ཐོགས་ལ། ཧཱུྃ༔ མིག་མཁན་རྒྱལ་པོས་མིག་འབྱེད་ལྟར༔ འཁྲུལ་པ་མ་རིག་སྒྲིབ་པའི་མིག༔ ཡེ་ཤེས་ཐུར་མས་ཕྱེས་ནས་ཀྱང་༔ རྒྱལ་བའི་དགོངས་པ་གསལ་བར་བྱ༔ ཙཀྵུ་པྲ་བེ་ཤ་ཡ་ཕཊ༔ ཅེས་མིག་དར་དཀྲོལ། ཡེ་ཤེས་ཀྱི་མིག་གསར་དུ་ཐོབ་པ་ལ་མཐོང་བ་བསྟན་པ་ནི། བུ་ཁྱོད་རྩོལ་སེམས་མ་ཆུང་བར༔ དཀྱིལ་འཁོར་བཟང་པོ་འདི་ལ་ལྟོས༔ ད་ནི་དད་པ་རབ་ཏུ་བསྐྱེད༔ དངོས་གྲུབ་ཐམས་ཅད་ཐོབ་པར་འགྱུར༔ ཞེས་བརྗོད་ནས། འདི་ལྟར་མཚོན་བྱེད་དཔེའི་དཀྱིལ་འཁོར་བསྟན་ནས། མཚོན་བྱ་དོན་གྱི་དཀྱིལ་འཁོར་ཡེ་ཤེས་རང་སྣང་ལས་གྲུབ་པ་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་རང་བཞིན་གྲུ་བཞི་སྒོ་བཞི་པ་རྟ་བབ་དང་བཅས་པའི་ནང་དུ་ཕོ་བྲང་དགུ་ཚོམ་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་དཀྱིལ་འཁོར་དབུས་མའི་ལྟེ་བར་དཔལ་ཆེན་པོ་ཆེ་མཆོག་ཧེ་རུ་ཀ་དང༌། ཕྱོགས་མཚམས་ཀྱི་དཀྱིལ་འཁོར་བརྒྱད་ཀྱི་སྙིང་པོར་དཔལ་ཆེན་ཡང་དག་ལ་སོགས་པ་བརྒྱད་རང་རང་གི་ཡུམ་དང་སོ་སོའི་འཁོར་དང་བཅས་པ། ཕྱིའི་ཁོར་ཡུག་ཏུ་མཁའ་འགྲོ་གིང་ལང་མ་སྲིང་འབར་མ་སོགས་བཀའ་སྡོད་དམ་ཅན་རྒྱ་མཚོའི་ཚོགས་དང་བཅས་པའི་དཀྱིལ་འཁོར་འཁོར་ལོའི་རྣམ་རོལ་ཆོས་ཀྱི་དབྱིངས་ཁྱབ་པར་བརྡལ་བ་ཟག་མེད་བདེ་བ་ཆེན་པོའི་བདག་ཉིད་མངོན་སུམ་པ་བཞིན་མཐོང་བར་གྱུར་སྙམ་པར་གྱིས་ཤིག །དེ་དག་གིས་ལྷ་དང་སྐལ་བ་མཉམ་པའི་ཆེད་དུ་དཀྱིལ་འཁོར་དུ་འཇུག་པའི་ཆོས་རྣམས་ལེགས་པར་སོང་ནས། ཞུགས་པའི་དཀྱིལ་འཁོར་དེ་མངོན་པར་དབང་བསྐུར་བ་ཞུ་བའི་དོན་དུ་མཎྜལ་ཕུལ། མཎྜལ་འབུལ་དུ་གཞུག །དེ་ནས་དངོས་གཞི་དབང་བསྐུར་བ་ལ། སྤྱིར་དབང་གི་ངོ་བོ་ནི། ཐོབ་བྱའི་འབྲས་བུ་མངོན་དུ་བསྐྱེད་ནུས་པའམ་སྐྱེ་ངེས་ཀྱི་ནུས་རུང་དུ་སྨིན་པར་བྱེད་པ། ངེས་ཚིག་ནི། ཨ་བྷི་ཥིཉྩའི་སྒྲ་ལས་དྲངས་ན་མངོན་པར་གཏོར་བའམ་བླུགས་པ་སྟེ། དངོས་སུ་ལུས་ངག་ཡིད་གསུམ་གྱི་དྲི་མ་འཁྲུད་པ་དང༌། བརྒྱུད་ནས་སྐལ་བ་འཇོག་པས་དབང་ངོ༌། །དེ་ཡང་སྤྱིར་སྦྱང་གཞི་ནི་ཐོབ་བྱ་རང་ལ་གནས་པ་ཤིན་ཏུ་ཕྲ་བ་མི་ཤིགས་པའི་བདག་ཉིད་ཅན་སྐུ་གསུང་ཐུགས་ཡེ་ཤེས་རྡོ་རྗེའོ། །སྦྱང་བྱ་ནི་རང་གནས་ཀྱི་ཡེ་ཤེས་དེ་ཉིད་སྒྲིབ་བྱེད་གློ་བུར་གྱི་དྲི་མ་ཕྲ་རགས་རྣམས་སོ། །སྦྱོང་བྱེད་ནི་གདུལ་བྱའི་བློའི་ཐེག་ཚད་དང་སྦྱར་བའི་དབང་བསྐུར་བས་དེ་དང་མཐུན་པའི་ལམ་སྒོམ་རུང་དུ་སྨིན་པར་བྱེད་པ་ཡིན། སྦྱངས་འབྲས་ནི་དབང་ཐོབ་སྟེ་སྐུ་བཞིའི་ས་བོན་ནམ་ནུས་པ་ཁྱད་པར་ཅན་རྒྱུད་ལ་བཞག་པའོ། །བསྐུར་བྱའི་དབང་ལ་དབྱེ་ན། བུམ་གསང་ཤེས་རབ་ཡེ་ཤེས་དེ་ཁོ་ན་ཉིད་དེ་རྩ་བའི་དབང་བཞི་དང༌། མཐའ་རྟེན་སྒྲོལ་དབང་བཅས་ལྔར་མཆིས་པ་ལས། ཐོག་མར་བུམ་པའི་དབང་བསྐུར་བ་དེ་ལའང༌། ཕྱི་དབང་རྫས་ལ་བསྟེན་ཏེ་བསྐུར་བ་དང༌། ནང་ལྷ་ཡི་དབང་གཉིས་ལས། ཐོག་མར་རྫས་དབང་གི་སྔོན་དུ་འགྲོ་བ་གསོལ་བ་གདབ་པ་འདིའི་རྗེས་ཟློས་གནང་བར་ཞུ། བྱང་ཆུབ་རྡོ་རྗེས་སངས་རྒྱས་ལ༔ ཇི་ལྟར་མཆོད་ཅིང་བསྙེན་བཀུར་ལྟར༔ བདག་ཀྱང་སྐྱོབ་པའི་དོན་གྱི་ཕྱིར༔ ནམ་མཁའི་རྡོ་རྗེ་བདག་ལ་སྩོལ༔ ལན་གསུམ། བུམ་པ་རང་བྱུང་ལྷུན་གྲུབ་ཀྱི་གཞལ་ཡས་ཁང་གི་ནང་དུ་རྒྱལ་བ་ཞི་ཁྲོ་བདེ་གཤེགས་སྒྲུབ་པ་བཀའ་བརྒྱད་ཀྱི་ལྷ་ཚོགས་བྱང་སེམས་ཀྱི་བདུད་རྩིར་ཞུ་བ་ཁྱེད་རང་གི་སྤྱི་བོ་ནས་ཞུགས་པས། སྒོ་གསུམ་གྱི་དྲི་མ་སྦྱངས། རྡོ་རྗེ་གསུམ་གྱི་རྟོགས་པ་རྒྱུད་ལ་བཞག་པར་མོས་ཤིག །བུམ་པ་སྤྱི་བོར་བཞག་སྟེ། ཧཱུྃ༔ རིན་ཆེན་བུམ་པ་གཞལ་ཡས་ཁང་༔ བདེ་གཤེགས་ཞི་ཁྲོ་བཀའ་བརྒྱད་བཞུགས༔ བདུད་རྩིར་ཞུ་བས་དབང་བསྐུར་ཏེ༔ སྒོ་གསུམ་རྡོ་རྗེ་གསུམ་འགྲུབ་ཤོག༔ ཨོཾ་བཛྲ་ཀཱ་ལ་ཤ་ཀཱ་ཡ་ཝཱ་ཀ་ཙིཏྟ་ཨ་བྷི་ཥིཉྩ་ཧཱུྃ༔ སུ་ར་ཏ་སྟྭྃཿཨ་ཧྃཿ ཞེས་དབང་བསྐུར་ནས་བུམ་ཆུ་འཐུང་དུ་གཞུག །དབུ་རྒྱན་རིགས་ལྔ་རིན་པོ་ཆེའི་ཁང་བུ་ལྔ་པའི་ནང་དུ་དེ་བཞིན་གཤེགས་པ་རིགས་ལྔ་དྭངས་གསལ་སྒྲིབ་མེད་དུ་བཞུགས་པ་འདི་ཉིད་སྤྱི་བོར་བཞག་པས་རིགས་ལྔའི་དངོས་གྲུབ་ཐོབ་པར་མོས་ཤིག །ཧཱུྃ༔ རིགས་ཀྱི་ཁྱབ་བདག་རྒྱལ་བ་ལྔ༔ རིན་ཆེན་དབུ་རྒྱན་རྣམ་པ་ཡིས༔ སྤྱི་བོར་དབང་བསྐུར་དབུར་བརྒྱན་པས༔ སྐུ་ལྔ་ཡེ་ཤེས་ལྔ་ཐོབ་ཤོག༔ ཨོཾ་ཨཱཿཧཱུྃ་སྭཱ་ཧཱ་བཛྲ་མུ་ཀུ་ཊ་ཨ་བྷི་ཥིཉྩ་ཧཱུྃ༔ སུ་རུ་ཏ་སྟྭྃཿཨ་ཧཾ༔ ཞེས་དབུ་རྒྱན་མགོར་བཀོད། ཡེ་ཤེས་ལྔ་ལྷུན་གྱིས་གྲུབ་ཅིང་ཐབས་དང་ཤེས་རབ་ཟུང་འཇུག་གསང་སྔགས་ཀྱི་བརྡས་འགྲོ་དོན་སྤྱོད་པའི་མཐུ་ཐོབ་པར་མོས་ཤིག །རྡོར་དྲིལ་ལག་གཡས་གཡོན་དུ་གཏད་ལ། ཧཱུྃ༔ ཐབས་མཆོག་ཡེ་ཤེས་ལྔའི་རྡོ་རྗེ༔ སངས་རྒྱས་དབྱངས་ཀྱི་རྗེས་འགྲོ་དྲིལ༔ གཉིས་མེད་བརྡ་ཡིས་དབང་བསྐུར་བས༔ ཟུང་འཇུག་རྡོ་རྗེའི་ལམ་རྫོགས་ཤོག༔ ཨོཾ་ཛྙཱ་ན་བཛྲ་ཧཱུྃ༔ གཎྜེ་ཨ་ཨཱཿ ཨོཾ་ཨ་དྷི་པ་ཏི་སྟྭྃ༔ ཨ་བྷི་ཥིཉྩ་མི༔ ཏིཥྛ་བཛྲ་ས་མ་ཡ༔ ཞེས་བརྗོད་རྡོ་རྗེ་གསོར་ཞིང་དྲིལ་བུ་དཀྲོལ་དུ་གཞུག །དུར་ཁྲོད་ཀྱི་ཆས་བརྒྱད་བཀོན་ནས་དཔལ་ཆེན་པོ་ཧེ་རུ་ཀའི་གནས་ཐོབ་སྟེ་མ་མོ་དང་མཁའ་འགྲོ་ཡོངས་ཀྱི་རྗེ་བོར་དབང་བསྒྱུར་བར་མོས་ཤིག །ཧཱུྃ༔ དཔལ་ཆེན་ལྷ་དང་སྐལ་མཉམ་ཕྱིར༔ དཔལ་དང་དུར་ཁྲོད་རོལ་པའི་ཆས༔ བརྒྱན་པས་ཚོགས་བརྒྱད་རྣམ་དག་ཅིང་༔ སྟོབས་བཅུའི་ཡོན་ཏན་ཡོངས་རྫོགས་ཤོག༔ ཨོཾ་ཤྲཱི་ཧེ་རུ་ཀ་ཨཱ་ལངྐ་ར་ཨ་བྷི་ཥིཉྩ་ས་མ་ཡ་ཤྲཱི་ཧཱུྃ༔ ཞེས་ཆས་རྣམས་ཀྱི་བརྒྱན་ཚུལ་བྱ། དེ་དག་ནི་ཕྱི་དབང་རྫས་ལ་བརྟེན་པའི་དབང་ངོ༌། །གཉིས་པ་ནང་དབང་ལུས་ལ་བསྟེན་ཏེ་བསྐུར་བ་ལ། དཀྱིལ་འཁོར་དགུ་ཡི་ལྷ་ཚོགས་སོ་སོ་ལས་ལྷ་གཉིས་པ་རེ་བྱོན། སློབ་མའི་ལུས་ཀྱི་གནས་སོ་སོར་ཐིམ་པས་ལྷ་དེ་དང་དེ་ཡི་ཡོན་ཏན་དང་ནུས་པ་ཐམས་ཅད་ཐོབ་པར་མོས་ཤིག །ཆེ་མཆོག་གི་སྐུ་སྤྱི་བོར་བཞག་སྟེ། ཧཱུྃ༔ བཅོམ་ལྡན་ཆེ་མཆོག་ཧེ་རུ་ཀ༔ གནམ་ཞལ་ཡུམ་དང་གཉིས་མེད་འཁྲིལ༔ ཡོན་ཏན་ལྷ་ཚོགས་འཁོར་དང་བཅས༔ སྐལ་ལྡན་འདི་ལ་དབང་བསྐུར་བས༔ འབྲས་བུ་ལྷུན་གྱིས་གྲུབ་པར་ཤོག༔ ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་སརྦ་ས་མ་ཡ་ཨ་བྷི་ཥིཉྩ་ཨཱཿ གཤིན་རྗེའི་སྐུ་སྤྱི་བོར་བཞག་ལ། ཧཱུྃ༔ བཅོམ་ལྡན་འཇམ་དཔལ་གཤིན་རྗེ་གཤེད༔ བཻ་ཏ་ཛ་ཊི་གཉིས་མེད་འཁྲིལ༔ གཤིན་རྗེའི་ལྷ་ཚོགས་འཁོར་དང་བཅས༔ སྐལ་ལྡན་འདི་ལ་དབང་བསྐུར་བས༔ སྐུ་ལྔ་ལྷུན་གྱིས་གྲུབ་པར་ཤོག༔ ཨོཾ་ཧྲཱིཥྟི་ཝི་ཀྲི་ཏ་ན་ན་སརྦ་ས་མ་ཡ་ཨ་བྷི་ཥིཉྩ་ཨཱཿ རྟ་མགྲིན་མགྲིན་པར་བཞག་ལ། ཧཱུྃ༔ དཔལ་ཆེན་རྟ་མགྲིན་དབང་གི་ལྷ༔ ཨེ་ཀ་ཛ་ཊི་ཡུམ་དང་འཁྲིལ༔ དབང་ཆེན་ལྷ་ཚོགས་འཁོར་དང་བཅས༔ སྐལ་ལྡན་འདི་ལ་དབང་བསྐུར་བས༔ གསུངས་དབྱངས་ལྷུན་རྫོགས་ཐོབ་པར་ཤོག༔ ཨོཾ་ཧ་ཡ་གྲི་ཝ་ཧུ་ལུ་སརྦ་ས་མ་ཡ་ཨ་བྷི་ཥིཉྩ་ཨཱཿ ཡང་དག་སྙིང་གར་བཞག་སྟེ། ཧཱུྃ༔ བཅོམ་ལྡན་བཛྲ་ཧེ་རུ་ཀ༔ ཀྲོ་དྷཱི་ཤྭ་རི་ཡུམ་དང་འཁྲིལ༔ སྐལ་ལྡན་འདི་ལ་དབང་བསྐུར་བས༔ ཐུགས་མཆོག་ཡེ་ཤེས་ལྔ་རྫོགས་ཤོག༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ སརྦ་ས་མ་ཡ་ཨ་བྷི་ཥིཉྩ་ཨཱཿ ཕུར་པ་ལྟེ་བར་བཞག་ལ། ཧཱུྃ༔ དཔལ་ཆེན་རྡོ་རྗེ་གཞོན་ནུའི་སྐུ༔ འཁོར་ལོ་རྒྱས་འདེབས་གཉིས་མེད་འཁྲིལ༔ སྐལ་ལྡན་འདི་ལ་དབང་བསྐུར་བས༔ ཕྲིན་ལས་ལྷུན་རྫོགས་རང་དབང་ཤོག༔ ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ༔ སརྦ་ས་མ་ཡ་ཨ་བྷི་ཥིཉྩ་ཧྲཱིཿ བླ་མེད་ཧེ་རུ་ཀ་གསང་བར་བཞག་སྟེ། ཧཱུྃ༔ བཅོམ་ལྡན་བླ་མེད་ཧེ་རུ་ཀ༔ ཀུན་བཟང་དབྱིངས་ཕྱུག་གཉིས་མེད་འཁྲིལ༔ སྐལ་ལྡན་འདི་ལ་དབང་བསྐུར་བས༔ མ་མོ་མཁའ་འགྲོའི་དབང་ཐོབ་ཤོག༔ ཨོཾ་ཀྲོ་དྷཱི་ཤྭ་རི་མ་མ་ཡོ་གི་ནི་རུ་ལུ་རུ་ལུ་ཧཱུྃ་བྷྱོ་ཧཱུྃ་སརྦ་ས་མ་ཡ་ཨ་བྷི་ཥིཉྩ་ཨཱཿ རིག་འཛིན་སྤྱི་བོར་བཞག་སྟེ། ཧཱུྃ༔ རིག་འཛིན་ཐོད་པ་རྩལ་ལ་སོགས༔ བརྒྱུད་པ་རྩ་བའི་བླ་མ་རྣམས༔ སྐལ་ལྡན་འདི་ལ་དབང་བསྐུར་བས༔ མཐུ་དང་བྱིན་རླབས་ཕུན་ཚོགས་ཤོག༔ ཨོཾ་བཛྲ་གུ་རུ་སརྦ་ཡོ་གི་ནི་སརྦ་ས་མ་ཡ་ཨ་བྷི་ཥིཉྩ་ཨཱཿ དྲེགས་འདུལ་པུས་མོ་གཡས་པར་བཞག་སྟེ། ཧཱུྃ༔ དཔལ་ཆེན་དྲེགས་པ་ཀུན་འདུལ་ནི༔ ཁམས་གསུམ་སྤྱི་འདུལ་གཉིས་མེད་འཁྲིལ༔ སྐལ་ལྡན་འདི་ལ་དབང་བསྐུར་བས༔ དྲེགས་པ་དབང་དུ་སྡུད་པར་ཤོག༔ སརྦ་རུ་ཏྲ་ཧྲཱིཾ་ཧྲཱིཾ་ཛཿ སརྦ་ས་མ་ཡ་ཨ་བྷི་ཥིཉྩ་ཨཱཿ སྟོབས་ལྡན་པུས་མོ་གཡོན་དུ་བཞག་སྟེ། །ཧཱུྃ༔ བཅོམ་ལྡན་སྟོབས་ལྡན་ནག་པོ་ནི༔ འབྱུང་ལྔའི་བདག་མོ་གཉིས་མེད་འཁྲིལ༔ སྐལ་ལྡན་འདི་ལ་དབང་བསྐུར་བས༔ བསྟན་པའི་དགྲ་བགེགས་སྒྲོལ་བར་ཤོག༔ སརྦ་དུཥྟན་ཨེ་ཛ་བྷྱོ༔ སརྦ་ས་མ་ཡ་ཨ་བྷི་ཥིཉྩ་ཨཱཿ བྱ་ཁྱུང་དཀར་ནག་དཔུང་པ་གཡས་གཡོན་དུ་བཞག་ལ། ཧཱུྃ༔ ཀླུ་འདུལ་བྱ་ཁྱུང་ག་རུ་ཊ༔ ཐབས་ཤེས་དཀར་ནག་རྣམ་པ་གཉིས༔ སྐལ་ལྡན་འདི་ལ་དབང་བསྐུར་བས༔ གདུག་པ་མ་ལུས་འདུལ་བར་ཤོག༔ ཁྲོཾ་ག་རུ་ཌ་ཧཱུྃ་ཕཊཿ སརྦ་ས་མ་ཡ་ཨ་བྷི་ཥིཉྩ་ཨཱཿ དེ་ལྟར་ལྷ་ཚོགས་རྣམས་གནས་སོ་སོར་བསྟིམ་པས་སྒྲུབ་སྡེ་དགུའི་སྐུའི་རྣམ་འགྱུར་གང་དང་གང་གིས་འདུལ་བ་དེ་དང་དེའི་རྣམ་རོལ་འགོག་མེད་སྣང་སྟོང་ཆུ་ཟླའི་གར་བཞིན་སྤྱོད་པའི་མཐུ་ཐོབ་པ་ཡིན་ནོ། །དེའི་རྗེས་འབྲེལ་དུ་བཟླས་ལུང་འབོགས་པ་ནི། བླ་མ་དཔལ་ཆེན་ཧེ་རུ་ཀའི་ཐུགས་ཀ་ནས་སྔགས་ཀྱི་ཕྲེང་བ་རྣམས་སྒྲ་དང་བཅས་པ་འོད་འཕྲོ་བཞིན་པར་བྱུང༌། ཁྱེད་རང་རྣམས་ཀྱི་སྙིང་གའི་ས་བོན་ལ་ཐིམ་པར་མོས་ལ་བསྙེན་སྒྲུབ་ལས་སྦྱོར་གྱི་སྔགས་འདི་རྣམས་ཀྱི་རྗེས་ཟློས་མཛོད། ཨོཾ་ཨཱཿཧཱུྃ་བོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷ་ཏུ་ཨཿ ལན་གསུམ། ཨོཾ་བཛྲ་ཀྲོ་དྷ་མ་ཧཱ་ཤྲཱི་ཧེ་རུ་ཀ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ༔ ལན་གསུམ། ཨོཾ་བཛྲ་མ་ཧཱ་ཀྲོ་དྷ་པདྨ་ཀྲོ་དྷི་ཤྭ་རི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀྵ་ཀཱའ་ལ་རུ་པ་ཀརྨ་རཾ་རཾ་ཛྭ་ལ་རཾ་སརྦ་དུཥྟན་མཱ་ར་ཡ་ཧཱུྃ་ཕཊ༔ ཞེས་ལན་གསུམ། དེ་དག་གིས་དཔལ་ཆེན་པོའི་གསུང་སྔགས་ཀྱི་རྣམ་པ་ཐམས་ཅད་པས་བསྙེན་སྒྲུབ་ལས་སྦྱོར་མཐའ་དག་ལ་དབང་ཞིང༌། གྲགས་སྟོང་བྲག་ཅ་ལྟ་བུར་སྤྱོད་པའི་མཐུ་ཐོབ་པ་ཡིན་ནོ། །དེ་དག་ནི་ནང་ལྷ་ཡི་དབང་ངོ༌། དེ་ལྟར་ཕྱི་མཚན་མའི་དཀྱིལ་འཁོར་དུ་བུམ་པའི་དབང་ཐོབ། ལུས་ཀྱི་དྲི་མ་དག །ཡུལ་སྣང་སྟོང་དུ་དག ལམ་བསྐྱེད་རིམ་བསྒོམ་པ་ལ་དབང༌། སྦྱོར་ལམ་མན་ཆད་ཀྱི་ནུས་པ་རྒྱུད་ལ་བཞག །འབྲས་བུ་སྐུ་རྡོ་རྗེ་སྤྲུལ་པའི་སྐུ་ཐོབ་པའི་སྐལ་བ་ཅན་དུ་བྱས་པ་ཡིན་ནོ། །གཉིས་པ་གསང་དབང་བསྐུར་བ་ནི། བླ་མ་ཧེ་རུ་ཀ་ཡབ་ཡུམ་སྙོམས་པར་ཞུགས་པའི་དགའ་བའི་སྒྲ་དང་འོད་ཟེར་གྱིས་དེ་བཞིན་གཤེགས་པ་ཐམས་ཅད་སྤྱན་དྲངས། སྤྱི་བོ་ནས་ཞུགས་པས་འདོད་ཆགས་ཆེན་པོའི་མེས་བྱང་ཆུབ་ཀྱི་སེམས་ཞུ་བ་མཁའ་གསང་ལས་ཕྱུངས་ཏེ་ཐོད་པའི་ཛ་གད་དང་ལྷན་ཅིག་པར་ལྕེ་ལ་བསྟིམས་པའི་མོས་པ་བརྟན་པོ་མཛོད་ཅིག །ཧཱུྃ༔ བླ་མ་དཀྱིལ་འཁོར་ལྷ་ཚོགས་རྣམས༔ གཉིས་མེད་སྦྱོར་བའི་བྱང་ཆུབ་སེམས༔ སྐལ་ལྡན་ངག་ལ་དབང་བསྐུར་བས༔ བདེ་ཆེན་གསང་བའི་དབང་ཐོབ་ཤོག༔ ཨོཾ་སརྦ་པཉྩ་ཨ་མྲྀ་ཏ་མ་ཧཱ་ཨ་མྲྀ་ཏ་མ་ཧཱ་སཱུ་ཁ་ཨ་བྷི་ཥིཉྩ་ཨ་བཻ་ཤ་ཡ་ཨ་ཨཱཿ ཞེས་བྱིན་པ་དེ་ཉིད་སངས་རྒྱས་ཐམས་ཅད་འདུས་པའི་ཡེ་ཤེས་ཀྱི་ངོ་བོར་མོས་ལ་སྔགས་འདིའི་རྗེས་ཟློས་མཛོད། ཨ་ཧོ་མ་ཧཱ་སཱུ་ཁ༔ ཞེས་མྱོང་བས། ཡེ་ཤེས་ཀྱི་བདུད་རྩི་ཤེལ་ལྟར་དྭངས་ཤིང་བདེ་བ་དང་མི་ཕྱེད་པས་ལུས་ཐམས་ཅད་གང༌། གསལ་སྟོང་ནམ་མཁའ་དང་མཉམ་པའི་ཏིང་ངེ་འཛིན་རྒྱུད་ལ་སྐྱེས་པར་མོས་ཤིག །དེ་ལྟར་བླ་མ་ཡབ་ཡུམ་གྱི་ལུས་ཀྱི་དཀྱིལ་འཁོར་དུ་གསང་བའི་དབང་ཐོབ། ངག་གི་དྲི་མ་དག །སེམས་གསལ་སྟོང་བརྗོད་བྲལ་དུ་རྟོགས། ལམ་རྩ་རླུང་གི་རྣལ་འབྱོར་བསྒོམ་པ་ལ་དབང༌། མཐོང་ལམ་ས་དང་པོའི་ནུས་པ་རྒྱུད་ལ་བཞག །འབྲས་བུ་གསུང་རྡོ་རྗེ་ལོངས་སྤྱོད་རྫོགས་པའི་སྐུ་ཐོབ་པའི་སྐལ་བ་ཅན་དུ་བྱས་པ་ཡིན་ནོ། །གསུམ་པ་ཤེས་རབ་ཡེ་ཤེས་ཀྱི་དབང་བསྐུར་བ་ནི། མཚན་ཉིད་དང་ལྡན་པའི་ལས་ཀྱི་ཕྱག་རྒྱ་གཏད་པར་མོས་ཤིག །ཧཱུྃ༔ རིགས་ཀྱི་མཚན་ཉིད་ཀུན་རྫོགས་པའི༔ ཕྱག་རྒྱ་མཆོག་འདི་བསྟེན་པར་གྱིས༔ འཁོར་ལོ་བཞི་དབྱིངས་དབབ་བཟུང་གི༔ བདེ་ཆེན་དེ་ཉིད་རྟོགས་པར་གྱིས༔ ཨ་ཧོ་སཱུ་ཁ་བྷཉྫ་མོ་ཀྵ་ཧོཿ ཞེས་གཏད་ནས། སློབ་མ་ཆེ་མཆོག་ཧེ་རུ་ཀ་དང་༔ ལས་རྒྱ་གནམ་ཞལ་དབྱིངས་ཕྱུག་མར་གསལ་བའི་མཁའ་གསང་རྡོ་རྗེའི་ལྟེ་བ་དང༌། པདྨའི་ཟེའུ་འབྲུར་ཧཱུྃ་གིས་མཚན་པ་མཉམ་པར་སྦྱོར་བའི་འདོད་ཡོན་ལྔས་སིམ་པ་ལ། ཨོཾ་སརྦ་ཏ་ཐཱ་ག་ཏ་མ་ཧཱ་ཨ་ནུ་ར་ག་བཛྲ་ཛྙཱ་ན་ཨཏྨ་ཀོ྅ཧཾ༔ ཞེས་རོལ་པས་བྱང་སེམས་གཡོས་ཏེ་འཁོར་ལོ་བཞིའི་གནས་སུ་དགའ་བཞིའི་ཡེ་ཤེས་ཉམས་སུ་མྱོང་བ་ལས། སླར་ཡང་ཧཱུྃ་གིས་སྦྱོར་བས་ཡུམ་གྱི་དྭངས་མ་དང་ལྷན་ཅིག་གྱེན་དུ་དྲངས། ལུགས་ལྡོག་གི་དགའ་བཞི་རིམ་གྱིས་སྤྱི་བོར་བརྟན་པ་ལས་སོ་སོ་རང་རིག་བདེ་སྟོང་སྤྲོས་པ་དང་བྲལ་བའི་ངང་ལ་མཉམ་པར་ཞོག་མཛོད། དེ་ལྟར་ཕྱག་རྒྱ་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་དག །རང་རིག་བདེ་སྟོང་བརྗོད་བྲལ་དུ་རྟོགས། ལམ་ཕོ་ཉ་བསྒོམ་པ་ལ་དབང༌། འབྲས་བུ་ཐུགས་རྡོ་རྗེ་ཆོས་ཀྱི་སྐུ་ཐོབ་པའི་སྐལ་བ་ཅན་དུ་བྱས་པ་ཡིན་ནོ། །བཞི་པ་དེ་ཁོ་ན་ཉིད་ཀྱི་དབང་བསྐུར་བ་ནི། དྭངས་གསལ་མན་ཤེལ་གྱི་བརྡ་ལ་བརྟེན་ནས། སྔར་ཤེར་དབང་གི་དུས་སུ་ཉམས་སུ་མྱོང་བའི་བདེ་བ་ཆེན་པོའི་ཡེ་ཤེས་ཀྱི་ངོ་བོ་མཚོན་པར་གྱིས་ལ་སྤྲོས་བྲལ་བདེ་བ་ཆེན་པོའི་ངང་དུ་མཉམ་པར་ཞོག་མཛོད། མན་ཤེལ་ཕྱར་ཏེ། ཧཱུྃ༔ སེམས་ཉིད་གནས་ལུགས་སྤྲོས་དང་བྲལ༔ རིག་སྟོང་ཟུང་འཇུག་ཡེ་ཤེས་ཆེ༔ གཉིས་མེད་འཛིན་བྲལ་ཆོས་ཀྱི་སྐུ༔ ཡང་དག་ངེས་དོན་རྟོགས་པར་གྱིས༔ ཛྙཱ་ན་པཉྩ་དྷརྨ་ཀཱ་ཡ་ཨ་བྷི་ཥིཉྩ་ཨ་ཨཿ ཞེས་པས་སེམས་ཀྱི་གཤིས་གང་དུ་ཡང་མ་གྲུབ་པའི་སྤྲོས་བྲལ་ཀ་ནས་དག་པ་དེ་ཉིད། མདངས་འགག་མེད་བདེ་བ་ཆེན་པོའི་རྣམ་རོལ་སྐུ་དང་ཡེ་ཤེས་ཀྱི་ཡོན་ཏན་ཐམས་ཅད་ཡེ་ནས་ལྷུན་གྲུབ་ཏུ་རྫོགས་པ། སྣང་སྟོང་དབྱེར་མེད་ཟུང་འཇུག་སོ་སོ་རང་རིག་གདོད་མའི་གནས་ལུགས་ནམ་མཁའ་དང་མཉམ་པའི་ཏིང་ངེ་འཛིན་གྱི་ངང་བསྐྱང་བ་ནི་དེ་ཁོ་ན་ཉིད་ཀྱི་དབང་ངོ༌། །དེ་ལྟར་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཐོབ། སྒོ་གསུམ་གྱི་དྲི་མ་བག་ཆགས་དང་བཅས་པ་དག །བསམ་གྱིས་མི་ཁྱབ་པའི་བདེ་བ་ཆེན་པོ་བརྗོད་བྲལ་དུ་རྟོགས། ལམ་རང་བྱུང་གི་ཡེ་ཤེས་བསྒོམ་པ་ལ་དབང༌། མཐར་ལམ་རྒྱུན་མཐའི་ཡེ་ཤེས་ཀྱི་ནུས་པ་རྒྱུད་ལ་བཞག །འབྲས་བུ་ཡེ་ཤེས་རྡོ་རྗེ་ངོ་བོ་ཉིད་སྐུ་ཐོབ་པའི་སྐལ་པ་ཅན་དུ་བྱས་པ་ཡིན་ནོ། །ལྔ་པ་མཐའ་རྟེན་མངོན་སྤྱོད་བསྒྲལ་བ་དྲག་པོ་ཕྲིན་ལས་ཀྱི་དབང་བསྐུར་བ་ནི། དེའང་བསྒྲལ་ལས་ཐམས་ཅད་ཀྱི་མཐར་ཐུག་རྟོགས་པས་བདག་བསྒྲལ་བ་དང༌། ཐུགས་རྗེས་གཞན་སྒྲོལ་བ་གཉིས་སུ་འདུ་བས། དང་པོ་རྟོགས་པས་བདག་བསྒྲལ་བ་ནི། རང་རྒྱུད་ཀྱི་མ་རིག་པ་ངའམ་བདག་ཏུ་འཛིན་པ་འདི་ཁམས་གསུམ་འཁོར་བའི་རྩ་བ་ཡིན་ཞིང༌། བྱང་ཆུབ་ཐོབ་ཏུ་མི་སྟེར་བའི་གེགས་བྱེད་འདི་ཁོ་ན་ཡིན་ལ། འདི་ཉིད་རིག་པ་ཡེ་ཤེས་ཀྱི་ཕུར་བུ་སྐུ་གསུམ་དབྱེར་མེད་ཀྱི་དཔལ་དང་ལྡན་པས་ཆོས་ཉིད་གནས་ལུགས་ཀྱི་ཧོམ་ཁུང་དུ་མ་བཅོས་མཉམ་པ་ཉིད་ཀྱི་ཏིང་ངེ་འཛིན་གྱིས་བསྒྲལ་བས་གཉིས་སྣང་གི་རྟོག་པ་ཟད་པ་འདི་དོན་ཆོས་ཉིད་ཀྱི་བསྒྲལ་ཚུལ་ཡང་ཡིན་པས་བསྒྲལ་ལས་ཐམས་ཅད་ཀྱི་ཐོག་མར་གནད་དུ་ཐེབ་དགོས། དེ་ལ་རང་དབང་ཐོབ་ནས་ཐུགས་རྗེས་གཞན་སྒྲོལ་བ་ལ་སྤྱིར་ཁམས་གསུམ་འཁོར་བའི་སེམས་ཅན། སྒོས་ལོག་རྟོག་གདུག་པ་ཅན་གྱི་གདུལ་བྱ་རྣམས་ལ། ཞེ་སྡང་ཁོང་ཁྲོ་གནོད་སེམས་མ་ཡིན་པར་སྙིང་རྗེ་བྱང་ཆུབ་སེམས་ཀྱིས་ཀུན་ནས་བསླངས་ཏེ། ལྟ་བའི་རྫོང་ལ་གཞི་བཅའ། སྒོམ་པའི་འཕྲང་གིས་གནད་བཟུང༌། སྤྱོད་པའི་སྲོག་གིས་མན་ངག་གཏན་ལ་ཕབ་ནས། ལོག་སྤྱོད་སྐྱེ་འགྲོ་རྣམས་ལས་ངན་གྱི་རྒྱུན་བཅད། ཚོགས་གཉིས་ཀྱི་ས་བོན་བསྐྲུན་ནས་ཐབས་མཁས་ཀྱི་ཆོ་གས་བྱང་ཆུབ་སྙིང་པོར་སྦྱོར་བ་ལ་རྟགས་ཆོ་གས་བསྒྲལ་བ་ཞེས་བྱའོ། །དེ་ལྟ་བུའི་གནད་དོན་ངེས་པའི་ངང་ནས་ལས་ཕུར་འདི་ཉིད་ཁྲོ་ཆེན་འདུས་པའི་སྲས་མཆོག་ཀཱི་ལ་ཡ་སྐུ་སྟོད་སྲིན་པོ་ཁྲོས་པའི་རྣམ་པ་ཅན་མཐིང་ནག་ཕུར་བུ་བསྒྲིལ་བ། ལྟེ་བ་མན་ཆད་ཆུ་སྲིན་གྱི་ཁ་ནས་གནམ་ལྕགས་འབར་བའི་ཕུར་པ་དབལ་གསུམ་དུས་མེའི་ཚྭ་ཚྭ་འཕྲོ་བའི་རང་བཞིན་དུ་གསལ་བ་ལག་ཏུ་གཏད་ཅིང་ཕྱོགས་བཅུར་འདྲིལ་བ་ཙམ་གྱིས། མ་རུངས་གདུག་པའི་དགྲ་བགེགས་ཐམས་ཅད་ཚར་གཅོད་ཅིང་རྣམ་ཤེས་བདེ་ཆེན་དུ་སྐྱེལ་ནུས་པའི་མཐུ་དབང་ཐོབ་པའི་མོས་པ་མཛོད་ཅིག །ལས་ཕུར་གཏད་ལ། ཧཱུྃ༔ ཁྲོ་ཆེན་སྟོབས་འདུལ་ཀཱི་ལ་ཡ༔ དྲག་པོ་ཁྲག་འཐུང་ཐམས་ཅད་རྫོགས༔ དགྲ་བགེགས་སྙིང་ལ་གཟིར་བ་ཡིས༔ ཕྲིན་ལས་མ་ལུས་ལྷུན་གྲུབ་ཤོག༔ ཨོཾ་བཛྲ་མ་ཧཱ་ཀྲོ་དྷཱི་ཤྭ་རི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀྵ་ཀཱ་ལ་རཱུ་པ་ཀརྨ་རཾ་རཾ་ཛྭ་ལ་རཾ་གནོད་བྱེད་དགྲ་བགེགས་འབྱུང་པོ་ཐམས་ཅད་མ་ར་ཡ་ཧཱུྃ་ཕཊཿ སྤྲོ་ན་ལྕགས་ཧོམ་དུ་ལིངྒ་བཀོད་ལ་འགུགས་པ་ཕུར་གདབ་སོགས་སྤྱི་ལྟར་བྱ། དེ་ལྟར་དབང་བསྐུར་བས་ཁམས་གསུམ་གྱི་སེམས་ཅན་དུས་གསུམ་གྱིས་རྒྱུད་དཀྲུགས་པས་ངན་སོང་གསུམ་དུ་འཁྱམས་པ་ཐམས་ཅད་སྙིང་རྗེ་ཆེན་པོ་ཞེ་སྡང་དུ་ཤར་བས་སྐུ་གསུམ་གྱི་དབྱིངས་སུ་སྦྱོར་བ་དྲག་པོ་མངོན་སྤྱོད་ཀྱི་ལས་རབ་འབྱམས་ལ་དབང་བར་བྱས་པ་ཡིན་ནོ། །དེ་ལྟར་ཕྱི་ནང་གསང་བའི་དབང་དེ་དག་ཐོབ་པའི་ཕན་ཡོན་ནི། གཞུང་ལས། བླ་མ་རྒྱལ་བ་མ་ལུས་པའི༔ སྐུ་གསུང་ཐུགས་དང་ཡོན་ཏན་དང་༔ ཕྲིན་ལས་བདག་ཉིད་ཆེན་པོར་འགྱུར༔ ཞེས་གསུངས་པས་དགའ་སྤྲོ་རྒྱ་ཆེན་པོ་བསྐྱེད་པར་མཛོད་ཅིག །ཅེས་སྤྲོ་བ་བསྐྱེད། ཤིས་པ་བརྗོད། དེ་ལྟར་སྒྲུབ་ཆེན་བཀའ་བརྒྱད་དྲེགས་པ་ཀུན་འདུལ་སྨིན་བྱེད་དོན་གྱི་དབང་མཆོག་གྲུབ་པ་ཡིན་པས་དེ་དག་གི་སྐབས་སུ་ཞལ་གྱིས་བཞེས་པའི་རྩ་བ་དང་ཡན་ལག་གི་དམ་ཚིག་རྣམས་སྲུང་བར་ཁས་ལེན་པ་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས། མཎྜལ། ལུས་འབུལ། སྨོན་ལམ་བཅས་བྱས་ལ་སློབ་མ་རྣམས་གྲོལ། ལྷག་མ་ནས་བཟུང་རྗེས་རིམ་སྤྱི་ལྟར་བྱའོ། །ཟབ་གཏེར་གསང་བ་ཀུན་གྱི་སྙིང༌། །བཀའ་བརྒྱད་དྲེགས་པ་ཀུན་འདུལ་གྱི། །སྨིན་ལམ་སྒོ་འཕར་ལེགས་ཕྱེས་པས། །འགྲོ་ཀུན་ཧེ་རུ་ཀ་འགྲུབ་ཤོག །ཅེས་ལོང་པོ་བསམ་གཏན་གླིང་པའི་བཀའ་བརྒྱད་དྲེགས་པ་ཀུན་འདུལ་ཀྱི་ལས་བྱང་གཏེར་མཛོད་དཀྱུས་སུ་སྔར་ནས་གཞུགས་ཤིང་འཇམ་མགོན་རིན་པོ་ཆེས་སྒྲུབ་ཆེན་མཛད་པའི་ལོ་རྒྱུས་རྣམ་ཐར་དུ་གསལ་ཡང་དབང་རྒྱུན་མི་བཞུགས་པ་ཕྱིས་སུ་འདི་ཉིད་ཀྱི་དབང་ཆེན་དཔེ་རྙིང་ཁུངས་དག་ཞིག་ཐོབ་པ་ཁྱབ་བདག་འཇམ་པའི་རྡོ་རྗེ་ཆོས་ཀྱི་བློ་གྲོས་རིན་པོ་ཆེར་སྤྱན་འབེབས་ཀྱིས་དབང་སྩལ་གྲུབ་གསོལ་བ་བཏབ་པས་དོན་དབང་འདི་ཉིད་དགྱེས་བཞིན་སྩལ་ཏེ་ཁྱོད་ནས་ཁྲིགས་བསྡེབས་གྱིས་ཞེས་རྡོ་རྗེའི་བཀའ་ལུང་སྩལ་བ་བཞིན། འཕགས་ཡུལ་དུ་གཏེར་མཛོད་སྤར་གསར་བསྐྲུན་སྐབས་རྙིང་སྔགས་རྒན་པོ་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་དབང་ཚིག་གཏེར་གཞུང་ལ་བཀླག་ཆོག་ཏུ་ཁྲིགས་བསྡེབས་དང་བཅས་ཁ་སྐོང་དུ་བཞུགས་སུ་གསོལ་བས་གསང་ཆེན་བསྟན་པའི་སྙིང་པོའི་ཞབས་ཏོག་ཏུ་འགྱུར་བར་བླ་མ་དང་ལྷག་པའི་ལྷས་བྱིན་གྱིས་བརླབ་པར་མཛད་དུ་གསོལ།། །།

[edit]

@#/__/bka' brgyad dregs pa kun 'dul las/__don gyi smin byed snying po khrigs su bsdebs pa bde chen mchog ster bzhugs//__na mo shrI he ru ka maN+Da la b+h+yaH__bla med rgyud sde rab 'byams kyi/__/khyab bdag ye shes klong dgu'i gzugs/__/bla ma he ru ka dpal la/__/btud nas dbang gi las rim 'chad/__/'dir long po bsam gtan gling pa'i yang gter bka' brgyad dregs pa kun 'dul gyi snying po don gyi dbang bskur bgyi ba la dang po yo byad kyi shom ni/__gzhung mthun dkyil 'khor dang*/__ma 'byor na tshom bu dgu'i steng many+dzi la bum pa bcud ldan rdzas so lnga can/__shar du dpal gtor gtso 'khor dgu dang sman rag__/dpal gyi lha tsaka lhor dbu rgyan/__nub tu rdor dril/__dur khrod dpal chas/__byang du thod chang*/__rig tsaka__/shel rdo bcas bshams la nyer spyod mchod pas bskor/__mig dar/__me tog__/tshogs mchod/__bka' srung 'bul gtor/__chad brtan/__dkar bgegs rnams dang*/__las bum sogs dgos pa'i yo byad 'du bya'o/__/gnyis pa sgrub pa'i thabs la/__sngon dngos rjes rim las byang bde chen snying po las ji ltar gsung pa bzhin khog phub pas/__dngos gzhi'i skabs sgrub gzhi bdag dang mdun du bkod pa'i dkyil 'khor sgrub rdzas dang bcas pa bdag mdun tha mi dad par bde chen ye shes gcig gi rol par blta bas/__bstod pa'i mthar dzaba? khang so sor phyes la/__bsnyen sgrub las kyi bzlas pa las sgrub pa gtsor bton mthar/__bum pa rang byung gi gzhal yas khang du lha rnams dwangs pa'i mtsho la gza' skar shar ba bzhin skad cig gis gsal ba la/__thugs ka nas sngags kyi phreng ba gzungs thag la 'khril ba mchod pa'i tshul du spros/__lha rnams dgyes pa bskyed/__byang chub sems kyi rgyun bab pa bum chu dang ro gcig tu 'dres par bsam la/__oM badz+ra kro d+hA ma hA shrI he ru ka ru lu ru lu hU~M b+h+yo hU~M phaT:__cis nus bzla/__las bum du oM badz+ra sa twa AH__brjod cing cung zad bzlas pas byin gyis rlabs/__bka' gter srung ma'i gtor bsngos dang*/__tshogs mchod bskang bshags btang la/__tshogs drangs/__bdag 'jug gam rig pa'i me tog dor bas nus ldan du bya'o/__/dbang gi las rim dngos la/__snod du gyur pa'i slob ma khrus nas dbyung*/__bgegs gtor btang zhing srung 'khor grub pa dang*/__de yang bde chen ye shes rang snang 'og min gsang ba chen po'i rang bzhin lhun grub kyi dkyil 'khor du rang byung dang po'i sangs rgyas kun tu bzang po nyid zhi khro rab 'byams rgyal ba'i 'khor lo'i sprin dang bcas pas bde gshegs sgrub chen bka' brgyad spyi rgyud lnga dang*/__bye brag gi sgos rgyud bcu/__yan lag so so'i sgrub lugs kyi rgyud sde rab 'byams chos nyid kyi rang sgras dus gsum rgyun mi chad pa'i chos 'khor bskor ba las/__gdul bya 'dul ba'i dus la bab pa'i tshe rig 'dzin gtso bo rdo rje chos kyis bka' yi bsdu ba dang dgongs 'grel lung lnga'ang mdzad nas mkha' 'gro las kyi dbang mo che la gtad/__de nyid kyis dur khrod bsil ba tshal gyi mchod rten bde byed brtsegs par gter du sbas pa bka' bab rig 'dzin brgyad kyis sgrub sde sgos bka' rnams spyan drangs/__/spyi rgyud rab 'byams rgyal ba'i spyi gzugs pad+ma thod phreng rtsal la bka' bab ste rgyud lung man ngag gi rim pa rgyas bsdus mtha' yas pa mdzad nas chos 'khor rgya chen po bskor/__khyad par gyi gdul bya bod yul bsam yas mchims phur rje 'bangs snying gi bu dgu la sgrub chen bka' brgyad kyi dkyil 'khor du smin cing grol bar mdzad khyad par mnga' bdag tshangs pa lha'i me tog la bde gshegs sgrub pa bka' brgyad spyi dril gyi bka' bab pas mtshon sgrub sde'i dkyil 'khor rgyas bsdus mtha' yas pa bod yul mtha' dbus kun tu gter du sba bar mdzad cing smon lam dus su bab sngon gyi las 'phro sad pa'i sprul pa'i gter ston rnams kyis thun mong gi gdul bya'i spyod yul du snang bar mdzad pa'i bye brag__/long po bsam gtan gling pa'i zab gter bka' brgyad dregs pa kun 'dul gyi shog ser smug nag dbang gi mkha' 'gros/__mnga' bdag chos kyi rgyal po dang rgyal sras lha rje khu dbon zung gi rnam 'phrul gter ston grub thob yongs kyi rgyal po mchog gi rig 'dzin chen po pad+ma 'od gsal mdo sngags gling pa la mngon sum du phul zhing gu ru rin po ches byin gyis brlabs pa'i brda bsgyur nas smin grol stsal bar mdzad kyang*/__dbang chog gtan la phab ma grub pa las/__slar yang rje nyid kyi ye shes sgyu 'phrul drwa ba'i rol gar 'jam dbyangs chos kyi blo gros rin po ches tshul 'di'i dbang chog gter gzhung zhig gi dpe phyag tu son pa las don dbang snying po'i bcud dril 'di nyid khol du phyungs te dar rgyas su mdzad pa'i smin byed gsan pa'i yon du maN+Dal phul/__tsak+Shu b+han+d+ha wa ra ma Na ye swA hA:__mig dar 'ching*/__a khaM wI ra hU~M gis me tog gtad/__gsol ba 'debs pa 'di'i rjes zlos mdzod/__hoH__dpal chen yongs rdzogs dkyil 'khor bdag:__bde gshegs kun 'dus dkyil 'khor 'dir:__'jug cing smin par mdzad nas kyang :__dbang dang byin rlabs dngos grub stsol:__lan gsum/__slob dpon gyis/__sgrub pa bka' brgyad dkyil 'khor cher:__'jug cing smin pa skal bzang yang :__dad brtson brtul zhugs ldan pa las:__gzhan du smras na nyams ta re:__zhes dris pa'i lan gsol bar mos la 'di'i rjes zlos mdzod/__bdag ni dngos grub mchog la dad/__zab mo'i lam la brtson pa dang :__rdo rje'i brtul zhugs spyod nus phyir:__nges par thugs rjes bzung bar 'tshal:__dam chu sbyin la/__de ltar yin na dpal chen po'i:__ye shes gsang ba khyod la sbyin:__dam tshig rdo rje'i chu 'thung la:__'da' dka'i dam tshig 'bad pas srungs:__oM badz+ra sa ma ya ud da ka Tha:__dam tshig gnang bkag las mi 'da' ba'i phyir rdo rje'i bro bor 'di'i rjes zlos mdzod/__sa ma ya i daM na ra kan:__mdun bskyed dang dbyer med pa'i dkon mchog rtsa gsum rab 'byams rgya mtsho til gong kha phye ba lta bu'i mdun mkha' khyab kyi 'gro ba thams cad rang dang lhan cig gnas pas mi gnas pa'i myang 'das la 'khod phyir sgo gsum rtse gcig gus pas skyabs su 'gro ba dang :__srid mtshor bying ba'i ma rgan sems can gcig kyang ma lus pa khyab bdag he ru ka'i go 'phang la sbyor ba'i phyir dbang gis rgyud smin cing/__lam rim pa gnyis kyis grol bar byas nas gzhan don rlabs po che la 'jug snyam pas sems bskyed pa 'di'i rjes zlos/__bla ma dpal chen yi dam zhi khro'i lha:__mkha' 'gro chos skyong tshogs la skyabs su mchi:__'gro kun don du byang chub sems bskyed nas:__he ru ka dpal go 'phang bsgrub par bgyi:__lan gsum/__rgyud dag pa'i phyir bsags sbyang gi tshul tshigs rjes su don dran pas 'di'i rjes zlos mdzod/__chos dbyings klong nas ye shes lha tshogs gshegs:__zung 'jug 'du 'bral med par bzhugs su gsol:__rig rtsal rol pa don gyi phyag mchod bzhes:__gzung 'dzin 'khrul pa'i sdig sgrib mthol zhing bshags:__ma 'khrul gnas lugs rtogs la rjes yi rang :__'gag med rdo rje'i chos 'khor bskor bzhin du:__skye med gnyug ma'i dbyings su bzhugs gsol 'debs:__dge tshogs 'khor gsum dmigs mtha' bral bar bsngo:__rang byung gdod ma'i go 'phang mngon gyur shog:__lan gsum/__smin byed kyi srog rtsa spyi dang rtsa bar gyur pa spyi dang khyad par gyi sdom pa dang dam tshig mtha' dag legs par blang nas tshul bzhin bsrung snyam pas 'di'i rjes zlos/__mkha' khyab rgyal ba sras bcas dgongs:__mtha' klas sems can don gyi phyir:__so thar byang sems gsang sngags kyi:__sdom pa ma lus bzung bar bgyi:__khyad par rtsa ba sku gsung thugs:__yan lag dam tshig nyi shu lnga:__sgrub pa lhag pa'i dam tshig rnams:__tshul bzhin bzung zhing bsrung bar bgyi:__lan gsum/__de nas rigs dang skal pa brtag pa'i phyir khyed rang la sngar byin pa'i me tog de nyid rang gi rigs kyi lha la phog par shog snyam pa'i blos tshig 'di'i rjes zlos dang bcas te rigs lnga'i dkyil 'khor 'dir dor bar zhu/__puSh+pe pra tits+tsha ho:__me tog rigs kyi gtso bos bzhes te dbang rtags su spyi bor bcings par gsang ba'i mtshan rdo rje che mchog 'dus pa rtsal zhes byin par mos shig__/pra ti g+hr-i ha na hi maM sa twa ma hA bA la hoH__me tog spyi bor bkod/__ma rig pa'i ling tog mig dar dang lhan cig bsal bar mos mdzod/__gser thur thogs la/__hU~M:__mig mkhan rgyal pos mig 'byed ltar:__'khrul pa ma rig sgrib pa'i mig:__ye shes thur mas phyes nas kyang :__rgyal ba'i dgongs pa gsal bar bya:__tsak+Shu pra be sha ya phaT:__ces mig dar dkrol/__ye shes kyi mig gsar du thob pa la mthong ba bstan pa ni/__bu khyod rtsol sems ma chung bar:__dkyil 'khor bzang po 'di la ltos:__da ni dad pa rab tu bskyed:__dngos grub thams cad thob par 'gyur:__zhes brjod nas/__'di ltar mtshon byed dpe'i dkyil 'khor bstan nas/__mtshon bya don gyi dkyil 'khor ye shes rang snang las grub pa byang chub phyogs kyi chos sum cu rtsa bdun gyi rang bzhin gru bzhi sgo bzhi pa rta bab dang bcas pa'i nang du pho brang dgu tshom tshad dang mtshan nyid thams cad yongs su rdzogs pa'i dkyil 'khor dbus ma'i lte bar dpal chen po che mchog he ru ka dang*/__phyogs mtshams kyi dkyil 'khor brgyad kyi snying por dpal chen yang dag la sogs pa brgyad rang rang gi yum dang so so'i 'khor dang bcas pa/__phyi'i khor yug tu mkha' 'gro ging lang ma sring 'bar ma sogs bka' sdod dam can rgya mtsho'i tshogs dang bcas pa'i dkyil 'khor 'khor lo'i rnam rol chos kyi dbyings khyab par brdal ba zag med bde ba chen po'i bdag nyid mngon sum pa bzhin mthong bar gyur snyam par gyis shig__/de dag gis lha dang skal ba mnyam pa'i ched du dkyil 'khor du 'jug pa'i chos rnams legs par song nas/__zhugs pa'i dkyil 'khor de mngon par dbang bskur ba zhu ba'i don du maN+Dal phul/__maN+Dal 'bul du gzhug__/de nas dngos gzhi dbang bskur ba la/__spyir dbang gi ngo bo ni/__thob bya'i 'bras bu mngon du bskyed nus pa'am skye nges kyi nus rung du smin par byed pa/__nges tshig ni/__a b+hi Shiny+tsa'i sgra las drangs na mngon par gtor ba'am blugs pa ste/__dngos su lus ngag yid gsum gyi dri ma 'khrud pa dang*/__brgyud nas skal ba 'jog pas dbang ngo*/__/de yang spyir sbyang gzhi ni thob bya rang la gnas pa shin tu phra ba mi shigs pa'i bdag nyid can sku gsung thugs ye shes rdo rje'o/__/sbyang bya ni rang gnas kyi ye shes de nyid sgrib byed glo bur gyi dri ma phra rags rnams so/__/sbyong byed ni gdul bya'i blo'i theg tshad dang sbyar ba'i dbang bskur bas de dang mthun pa'i lam sgom rung du smin par byed pa yin/__sbyangs 'bras ni dbang thob ste sku bzhi'i sa bon nam nus pa khyad par can rgyud la bzhag pa'o/__/bskur bya'i dbang la dbye na/__bum gsang shes rab ye shes de kho na nyid de rtsa ba'i dbang bzhi dang*/__mtha' rten sgrol dbang bcas lngar mchis pa las/__thog mar bum pa'i dbang bskur ba de la'ang*/__phyi dbang rdzas la bsten te bskur ba dang*/__nang lha yi dbang gnyis las/__thog mar rdzas dbang gi sngon du 'gro ba gsol ba gdab pa 'di'i rjes zlos gnang bar zhu/__byang chub rdo rjes sangs rgyas la:__ji ltar mchod cing bsnyen bkur ltar:__bdag kyang skyob pa'i don gyi phyir:__nam mkha'i rdo rje bdag la stsol:__lan gsum/__bum pa rang byung lhun grub kyi gzhal yas khang gi nang du rgyal ba zhi khro bde gshegs sgrub pa bka' brgyad kyi lha tshogs byang sems kyi bdud rtsir zhu ba khyed rang gi spyi bo nas zhugs pas/__sgo gsum gyi dri ma sbyangs/__rdo rje gsum gyi rtogs pa rgyud la bzhag par mos shig__/bum pa spyi bor bzhag ste/__hU~M:__rin chen bum pa gzhal yas khang :__bde gshegs zhi khro bka' brgyad bzhugs:__bdud rtsir zhu bas dbang bskur te:__sgo gsum rdo rje gsum 'grub shog:__oM badz+ra kA la sha kA ya wA ka tsit+ta a b+hi Shiny+tsa hU~M:__su ra ta s+t+wa~MHa ha~MH__zhes dbang bskur nas bum chu 'thung du gzhug__/dbu rgyan rigs lnga rin po che'i khang bu lnga pa'i nang du de bzhin gshegs pa rigs lnga dwangs gsal sgrib med du bzhugs pa 'di nyid spyi bor bzhag pas rigs lnga'i dngos grub thob par mos shig__/hU~M:__rigs kyi khyab bdag rgyal ba lnga:__rin chen dbu rgyan rnam pa yis:__spyi bor dbang bskur dbur brgyan pas:__sku lnga ye shes lnga thob shog:__oM AHhU~M swA hA badz+ra mu ku Ta a b+hi Shiny+tsa hU~M:__su ru ta s+t+wa~MHa haM:__zhes dbu rgyan mgor bkod/__ye shes lnga lhun gyis grub cing thabs dang shes rab zung 'jug gsang sngags kyi brdas 'gro don spyod pa'i mthu thob par mos shig__/rdor dril lag g.yas g.yon du gtad la/__hU~M:__thabs mchog ye shes lnga'i rdo rje:__sangs rgyas dbyangs kyi rjes 'gro dril:__gnyis med brda yis dbang bskur bas:__zung 'jug rdo rje'i lam rdzogs shog:__oM dz+nyA na badz+ra hU~M:__gaN+De a AH__oM a d+hi pa ti s+t+wa~M:__a b+hi Shiny+tsa mi:__tiSh+Tha badz+ra sa ma ya:__zhes brjod rdo rje gsor zhing dril bu dkrol du gzhug__/dur khrod kyi chas brgyad bkon nas dpal chen po he ru ka'i gnas thob ste ma mo dang mkha' 'gro yongs kyi rje bor dbang bsgyur bar mos shig__/hU~M:__dpal chen lha dang skal mnyam phyir:__dpal dang dur khrod rol pa'i chas:__brgyan pas tshogs brgyad rnam dag cing :__stobs bcu'i yon tan yongs rdzogs shog:__oM shrI he ru ka A lang+ka ra a b+hi Shiny+tsa sa ma ya shrI hU~M:__zhes chas rnams kyi brgyan tshul bya/__de dag ni phyi dbang rdzas la brten pa'i dbang ngo*/__/gnyis pa nang dbang lus la bsten te bskur ba la/__dkyil 'khor dgu yi lha tshogs so so las lha gnyis pa re byon/__slob ma'i lus kyi gnas so sor thim pas lha de dang de yi yon tan dang nus pa thams cad thob par mos shig__/che mchog gi sku spyi bor bzhag ste/__hU~M:__bcom ldan che mchog he ru ka:__gnam zhal yum dang gnyis med 'khril:__yon tan lha tshogs 'khor dang bcas:__skal ldan 'di la dbang bskur bas:__'bras bu lhun gyis grub par shog:__oM badz+ra kro d+ha ma hA shrI he ru ka sarba sa ma ya a b+hi Shiny+tsa AH__gshin rje'i sku spyi bor bzhag la/__hU~M:__bcom ldan 'jam dpal gshin rje gshed:__bai ta dza Ti gnyis med 'khril:__gshin rje'i lha tshogs 'khor dang bcas:__skal ldan 'di la dbang bskur bas:__sku lnga lhun gyis grub par shog:__oM hrISh+ti wi kri ta na na sarba sa ma ya a b+hi Shiny+tsa AH__rta mgrin mgrin par bzhag la/__hU~M:__dpal chen rta mgrin dbang gi lha:__e ka dza Ti yum dang 'khril:__dbang chen lha tshogs 'khor dang bcas:__skal ldan 'di la dbang bskur bas:__gsungs dbyangs lhun rdzogs thob par shog:__oM ha ya gri wa hu lu sarba sa ma ya a b+hi Shiny+tsa AH__yang dag snying gar bzhag ste/__hU~M:__bcom ldan badz+ra he ru ka:__kro d+hI shwa ri yum dang 'khril:__skal ldan 'di la dbang bskur bas:__thugs mchog ye shes lnga rdzogs shog:__oM ru lu ru lu hU~M b+h+yo hU~M:__sarba sa ma ya a b+hi Shiny+tsa AH__phur pa lte bar bzhag la/__hU~M:__dpal chen rdo rje gzhon nu'i sku:__'khor lo rgyas 'debs gnyis med 'khril:__skal ldan 'di la dbang bskur bas:__phrin las lhun rdzogs rang dbang shog:__oM badz+ra kI li kI la ya hU~M phaT:__sarba sa ma ya a b+hi Shiny+tsa hrIH__bla med he ru ka gsang bar bzhag ste/__hU~M:__bcom ldan bla med he ru ka:__kun bzang dbyings phyug gnyis med 'khril:__skal ldan 'di la dbang bskur bas:__ma mo mkha' 'gro'i dbang thob shog:__oM kro d+hI shwa ri ma ma yo gi ni ru lu ru lu hU~M b+h+yo hU~M sarba sa ma ya a b+hi Shiny+tsa AH__rig 'dzin spyi bor bzhag ste/__hU~M:__rig 'dzin thod pa rtsal la sogs:__brgyud pa rtsa ba'i bla ma rnams:__skal ldan 'di la dbang bskur bas:__mthu dang byin rlabs phun tshogs shog:__oM badz+ra gu ru sarba yo gi ni sarba sa ma ya a b+hi Shiny+tsa AH__dregs 'dul pus mo g.yas par bzhag ste/__hU~M:__dpal chen dregs pa kun 'dul ni:__khams gsum spyi 'dul gnyis med 'khril:__skal ldan 'di la dbang bskur bas:__dregs pa dbang du sdud par shog:__sarba ru tra hrIM hrIM dzaH__sarba sa ma ya a b+hi Shiny+tsa AH__stobs ldan pus mo g.yon du bzhag ste/__/hU~M:__bcom ldan stobs ldan nag po ni:__'byung lnga'i bdag mo gnyis med 'khril:__skal ldan 'di la dbang bskur bas:__bstan pa'i dgra bgegs sgrol bar shog:__sarba duSh+tan e dza b+h+yo:__sarba sa ma ya a b+hi Shiny+tsa AH__bya khyung dkar nag dpung pa g.yas g.yon du bzhag la/__hU~M:__klu 'dul bya khyung ga ru Ta:__thabs shes dkar nag rnam pa gnyis:__skal ldan 'di la dbang bskur bas:__gdug pa ma lus 'dul bar shog:__khroM ga ru Da hU~M phaTaH__sarba sa ma ya a b+hi Shiny+tsa AH__de ltar lha tshogs rnams gnas so sor bstim pas sgrub sde dgu'i sku'i rnam 'gyur gang dang gang gis 'dul ba de dang de'i rnam rol 'gog med snang stong chu zla'i gar bzhin spyod pa'i mthu thob pa yin no/__/de'i rjes 'brel du bzlas lung 'bogs pa ni/__bla ma dpal chen he ru ka'i thugs ka nas sngags kyi phreng ba rnams sgra dang bcas pa 'od 'phro bzhin par byung*/__khyed rang rnams kyi snying ga'i sa bon la thim par mos la bsnyen sgrub las sbyor gyi sngags 'di rnams kyi rjes zlos mdzod/__oM AHhU~M bo d+hi tsit+ta ma hA su kha dz+nyA na d+ha tu aH__lan gsum/__oM badz+ra kro d+ha ma hA shrI he ru ka ru lu ru lu hU~M b+h+yo hU~M phaT:__lan gsum/__oM badz+ra ma hA kro d+ha pad+ma kro d+hi shwa ri badz+ra kI li kI la ya ma hA yak+Sha kA' la ru pa karma raM raM dz+wa la raM sarba duSh+tan mA ra ya hU~M phaT:__zhes lan gsum/__de dag gis dpal chen po'i gsung sngags kyi rnam pa thams cad pas bsnyen sgrub las sbyor mtha' dag la dbang zhing*/__grags stong brag ca lta bur spyod pa'i mthu thob pa yin no/__/de dag ni nang lha yi dbang ngo*/__de ltar phyi mtshan ma'i dkyil 'khor du bum pa'i dbang thob/__lus kyi dri ma dag__/yul snang stong du dag__lam bskyed rim bsgom pa la dbang*/__sbyor lam man chad kyi nus pa rgyud la bzhag__/'bras bu sku rdo rje sprul pa'i sku thob pa'i skal ba can du byas pa yin no/__/gnyis pa gsang dbang bskur ba ni/__bla ma he ru ka yab yum snyoms par zhugs pa'i dga' ba'i sgra dang 'od zer gyis de bzhin gshegs pa thams cad spyan drangs/__spyi bo nas zhugs pas 'dod chags chen po'i mes byang chub kyi sems zhu ba mkha' gsang las phyungs te thod pa'i dza gad dang lhan cig par lce la bstims pa'i mos pa brtan po mdzod cig__/hU~M:__bla ma dkyil 'khor lha tshogs rnams:__gnyis med sbyor ba'i byang chub sems:__skal ldan ngag la dbang bskur bas:__bde chen gsang ba'i dbang thob shog:__oM sarba pany+tsa a mr-i ta ma hA a mr-i ta ma hA sU kha a b+hi Shiny+tsa a bai sha ya a AH__zhes byin pa de nyid sangs rgyas thams cad 'dus pa'i ye shes kyi ngo bor mos la sngags 'di'i rjes zlos mdzod/__a ho ma hA sU kha:__zhes myong bas/__ye shes kyi bdud rtsi shel ltar dwangs shing bde ba dang mi phyed pas lus thams cad gang*/__gsal stong nam mkha' dang mnyam pa'i ting nge 'dzin rgyud la skyes par mos shig__/de ltar bla ma yab yum gyi lus kyi dkyil 'khor du gsang ba'i dbang thob/__ngag gi dri ma dag__/sems gsal stong brjod bral du rtogs/__lam rtsa rlung gi rnal 'byor bsgom pa la dbang*/__mthong lam sa dang po'i nus pa rgyud la bzhag__/'bras bu gsung rdo rje longs spyod rdzogs pa'i sku thob pa'i skal ba can du byas pa yin no/__/gsum pa shes rab ye shes kyi dbang bskur ba ni/__mtshan nyid dang ldan pa'i las kyi phyag rgya gtad par mos shig__/hU~M:__rigs kyi mtshan nyid kun rdzogs pa'i:__phyag rgya mchog 'di bsten par gyis:__'khor lo bzhi dbyings dbab bzung gi:__bde chen de nyid rtogs par gyis:__a ho sU kha b+hany+dza mo k+Sha hoH__zhes gtad nas/__slob ma che mchog he ru ka dang :__las rgya gnam zhal dbyings phyug mar gsal ba'i mkha' gsang rdo rje'i lte ba dang*/__pad+ma'i ze'u 'brur hU~M gis mtshan pa mnyam par sbyor ba'i 'dod yon lngas sim pa la/__oM sarba ta thA ga ta ma hA a nu ra ga badz+ra dz+nyA na at+ma ko\u0f85haM:__zhes rol pas byang sems g.yos te 'khor lo bzhi'i gnas su dga' bzhi'i ye shes nyams su myong ba las/__slar yang hU~M gis sbyor bas yum gyi dwangs ma dang lhan cig gyen du drangs/__lugs ldog gi dga' bzhi rim gyis spyi bor brtan pa las so so rang rig bde stong spros pa dang bral ba'i ngang la mnyam par zhog mdzod/__de ltar phyag rgya b+ha ga'i dkyil 'khor du shes rab ye shes kyi dbang thob/__yid kyi dri ma dag__/rang rig bde stong brjod bral du rtogs/__lam pho nya bsgom pa la dbang*/__'bras bu thugs rdo rje chos kyi sku thob pa'i skal ba can du byas pa yin no/__/bzhi pa de kho na nyid kyi dbang bskur ba ni/__dwangs gsal man shel gyi brda la brten nas/__sngar sher dbang gi dus su nyams su myong ba'i bde ba chen po'i ye shes kyi ngo bo mtshon par gyis la spros bral bde ba chen po'i ngang du mnyam par zhog mdzod/__man shel phyar te/__hU~M:__sems nyid gnas lugs spros dang bral:__rig stong zung 'jug ye shes che:__gnyis med 'dzin bral chos kyi sku:__yang dag nges don rtogs par gyis:__dz+nyA na pany+tsa d+harma kA ya a b+hi Shiny+tsa a aH__zhes pas sems kyi gshis gang du yang ma grub pa'i spros bral ka nas dag pa de nyid/__mdangs 'gag med bde ba chen po'i rnam rol sku dang ye shes kyi yon tan thams cad ye nas lhun grub tu rdzogs pa/__snang stong dbyer med zung 'jug so so rang rig gdod ma'i gnas lugs nam mkha' dang mnyam pa'i ting nge 'dzin gyi ngang bskyang ba ni de kho na nyid kyi dbang ngo*/__/de ltar don dam byang chub sems kyi dkyil 'khor du dbang bzhi pa thob/__sgo gsum gyi dri ma bag chags dang bcas pa dag__/bsam gyis mi khyab pa'i bde ba chen po brjod bral du rtogs/__lam rang byung gi ye shes bsgom pa la dbang*/__mthar lam rgyun mtha'i ye shes kyi nus pa rgyud la bzhag__/'bras bu ye shes rdo rje ngo bo nyid sku thob pa'i skal pa can du byas pa yin no/__/lnga pa mtha' rten mngon spyod bsgral ba drag po phrin las kyi dbang bskur ba ni/__de'ang bsgral las thams cad kyi mthar thug rtogs pas bdag bsgral ba dang*/__thugs rjes gzhan sgrol ba gnyis su 'du bas/__dang po rtogs pas bdag bsgral ba ni/__rang rgyud kyi ma rig pa nga'am bdag tu 'dzin pa 'di khams gsum 'khor ba'i rtsa ba yin zhing*/__byang chub thob tu mi ster ba'i gegs byed 'di kho na yin la/__'di nyid rig pa ye shes kyi phur bu sku gsum dbyer med kyi dpal dang ldan pas chos nyid gnas lugs kyi hom khung du ma bcos mnyam pa nyid kyi ting nge 'dzin gyis bsgral bas gnyis snang gi rtog pa zad pa 'di don chos nyid kyi bsgral tshul yang yin pas bsgral las thams cad kyi thog mar gnad du theb dgos/__de la rang dbang thob nas thugs rjes gzhan sgrol ba la spyir khams gsum 'khor ba'i sems can/__sgos log rtog gdug pa can gyi gdul bya rnams la/__zhe sdang khong khro gnod sems ma yin par snying rje byang chub sems kyis kun nas bslangs te/__lta ba'i rdzong la gzhi bca'/__sgom pa'i 'phrang gis gnad bzung*/__spyod pa'i srog gis man ngag gtan la phab nas/__log spyod skye 'gro rnams las ngan gyi rgyun bcad/__tshogs gnyis kyi sa bon bskrun nas thabs mkhas kyi cho gas byang chub snying por sbyor ba la rtags cho gas bsgral ba zhes bya'o/__/de lta bu'i gnad don nges pa'i ngang nas las phur 'di nyid khro chen 'dus pa'i sras mchog kI la ya sku stod srin po khros pa'i rnam pa can mthing nag phur bu bsgril ba/__lte ba man chad chu srin gyi kha nas gnam lcags 'bar ba'i phur pa dbal gsum dus me'i tshwa tshwa 'phro ba'i rang bzhin du gsal ba lag tu gtad cing phyogs bcur 'dril ba tsam gyis/__ma rungs gdug pa'i dgra bgegs thams cad tshar gcod cing rnam shes bde chen du skyel nus pa'i mthu dbang thob pa'i mos pa mdzod cig__/las phur gtad la/__hU~M:__khro chen stobs 'dul kI la ya:__drag po khrag 'thung thams cad rdzogs:__dgra bgegs snying la gzir ba yis:__phrin las ma lus lhun grub shog:__oM badz+ra ma hA kro d+hI shwa ri badz+ra kI li kI la ya ma hA yak+Sha kA la rU pa karma raM raM dz+wa la raM gnod byed dgra bgegs 'byung po thams cad ma ra ya hU~M phaTaH__spro na lcags hom du ling+ga bkod la 'gugs pa phur gdab sogs spyi ltar bya/___de ltar dbang bskur bas khams gsum gyi sems can dus gsum gyis rgyud dkrugs pas ngan song gsum du 'khyams pa thams cad snying rje chen po zhe sdang du shar bas sku gsum gyi dbyings su sbyor ba drag po mngon spyod kyi las rab 'byams la dbang bar byas pa yin no/__/de ltar phyi nang gsang ba'i dbang de dag thob pa'i phan yon ni/__gzhung las/__bla ma rgyal ba ma lus pa'i:__sku gsung thugs dang yon tan dang :__phrin las bdag nyid chen por 'gyur:__zhes gsungs pas dga' spro rgya chen po bskyed par mdzod cig__/ces spro ba bskyed/__shis pa brjod/__de ltar sgrub chen bka' brgyad dregs pa kun 'dul smin byed don gyi dbang mchog grub pa yin pas de dag gi skabs su zhal gyis bzhes pa'i rtsa ba dang yan lag gi dam tshig rnams srung bar khas len pa 'di'i rjes zlos mdzod/__gtso bos ji ltar sogs/__maN+Dal/__lus 'bul/__smon lam bcas byas la slob ma rnams grol/__lhag ma nas bzung rjes rim spyi ltar bya'o/__/zab gter gsang ba kun gyi snying*/__/bka' brgyad dregs pa kun 'dul gyi/__/smin lam sgo 'phar legs phyes pas/__/'gro kun he ru ka 'grub shog__/ces long po bsam gtan gling pa'i bka' brgyad dregs pa kun 'dul kyi las byang gter mdzod dkyus su sngar nas gzhugs shing 'jam mgon rin po ches sgrub chen mdzad pa'i lo rgyus rnam thar du gsal yang dbang rgyun mi bzhugs pa phyis su 'di nyid kyi dbang chen dpe rnying khungs dag zhig thob pa khyab bdag 'jam pa'i rdo rje chos kyi blo gros rin po cher spyan 'bebs kyis dbang stsal grub gsol ba btab pas don dbang 'di nyid dgyes bzhin stsal te khyod nas khrigs bsdebs gyis zhes rdo rje'i bka' lung stsal ba bzhin/__'phags yul du gter mdzod spar gsar bskrun skabs rnying sngags rgan po 'gyur med theg mchog bstan pa'i rgyal mtshan gyis dbang tshig gter gzhung la bklag chog tu khrigs bsdebs dang bcas kha skong du bzhugs su gsol bas gsang chen bstan pa'i snying po'i zhabs tog tu 'gyur bar bla ma dang lhag pa'i lhas byin gyis brlab par mdzad du gsol//__//