JKCL-KABUM-03-GA-019

Previous Text Back to Volume PageNext Text

Wylie title
Location	chos kyi blo gros bka' 'bum Volume 3, Text 19, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 3: . Bir, H.P.: Khyentse Labrang, 2012.
Genre	Supplications - gsol 'debs

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

རྩ་གསུམ་ཀུན་འདུས་ཨོ་རྒྱན་རྡོ་རྗེ་འཆང་ལ་བསྟོད་ཅིང་གསོལ་བ་འདེབས་པ་དུས་མིན་འཆི་བཟློག་ཅེས་བྱ་བ་བཞུགས་སོ། །ན་མོ་གུ་རུ་ཨ་པ་རི་མི་ཏ་པདྨ་ཀ་རཱ་ཡ། འོད་མཚན་སྟོང་འབར་འཆི་མེད་ལྷ་ཡི་ལྷ། །ཆགས་བྲལ་སོར་རྟོག་ཡེ་ཤེས་རང་འོད་ལས། །སིནྡྷཱུའི་དྭངས་མཚོར་པདྨའི་སྡོང་པོའི་རྩེར། །རང་བྱུང་བརྫུས་འཁྲུངས་པདྨ་ཐོད་ཕྲེང་རྒྱལ། །གདོད་ནས་མངོན་འཚངས་རྒྱས་ཀྱང་རྩོད་དུས་འདིར། །ཤཱཀྱའི་བསྟན་ལ་གསང་སྔགས་སྟོན་པ་པོ། །འཛམ་བུའི་གླིང་ན་རིགས་སྔགས་གྲུབ་པའི་གཙོ། །ཨོ་རྒྱན་སློབ་དཔོན་པདྨ་འབྱུང་གནས་འདུད། །སྔོན་བྱོན་སངས་རྒྱས་རྣམས་ཀྱིས་སྤངས་པ་ཡི། །གདོང་དམར་བོད་དང་འགྲོ་ལྡིང་རྔ་ཡབ་རྣམས། །ཐུགས་རྗེའི་ཕྱག་གིས་དམ་པོར་འཛིན་མཛད་པ། །མཁའ་འགྲོའི་མིང་པོ་མཚོ་སྐྱེས་རྡོ་རྗེར་འདུད། །ཁྱད་པར་གངས་རིའི་ཕྲེང་བས་བསྐོར་བའི་ལྗོངས། །མངའ་བདག་ཚངས་པའི་སྨོན་ལམ་ཤིང་རྟས་དྲངས། །བསམ་ཡས་ལྷུན་གྱིས་གྲུབ་པའི་གཙུག་ལག་བཞེངས། །ལྷ་སྲིན་དམ་བཏགས་བསྟན་པ་སྤེལ་ལ་འདུད། །སྐལ་ལྡན་རྗེ་འབངས་འདུས་པའི་ཚོགས་རྣམས་ལ། །གསང་སྔགས་ནང་རྒྱུད་སྨིན་གྲོལ་ཆར་ཆེན་འབེབས། །རིག་འཛིན་གྲུབ་པས་འཛིན་མའི་ཁྱོན་བཀང་མཛད། །རྡོ་རྗེ་ཐེག་པའི་བདག་པོ་ཁྱོད་ལ་འདུད། །ཆེས་ཆེར་སྙིགས་མའི་དུས་ཀྱི་མཐར་སྐྱེས་པའི། །འགྲོ་བ་རྣམས་དང་བསྟན་པའི་རྒུད་པ་རྣམས། །སྐྱོབ་ཕྱིར་བོད་ཁམས་མཐའ་དབུས་ཐམས་ཅད་དུ། །ཟབ་གཏེར་དཔག་མེད་སྦས་པར་མཛད་ལ་འདུད། །འཛམ་གླིང་སྲིན་པོའི་མཆེ་བ་མི་ཟད་པས། །བཏབ་པའི་འཇིགས་པ་ཐམས་ཅད་སྐྱོབ་པའི་ཕྱིར། །སྐུ་དངོས་དཔལ་རི་པདྨ་འོད་དུ་གཤེགས། །སྤྲུལ་པས་འཛམ་གླིང་ཁྱབ་པར་སྟོན་ལ་འདུད། །ལྷུན་གྱིས་གྲུབ་པའི་རིག་འཛིན་སར་གཤེགས་ཤིང་། །ཡེ་ཤེས་སྐུ་ནི་བསམ་བརྗོད་ཡུལ་ལས་འདས། །རྒྱལ་བ་རྣམས་དང་དགོངས་པ་རྣམ་དབྱེར་མེད། །ཡོན་ཏན་ཕྲིན་ལས་ཕ་མཐའ་ཡས་ལ་འདུད། །ཐོད་ཕྲེང་སྡེ་ལྔ་གུ་རུ་མཚན་བརྒྱད་དང་། །རྣམ་འཕྲུལ་བཅུ་གཉིས་ལ་སོགས་སྐུའི་རྣམ་འགྱུར། །ཞི་དང་ཁྲོ་བོ་མ་ངེས་སྟོན་པ་ཡི། །དཀྱིལ་འཁོར་རྒྱ་མཚོའི་བདག་པོ་ཆེན་པོར་འདུད། །བླ་མ་རིག་འཛིན་རྒྱ་མཚོའི་གཙོ་བོ་མཆོག །ཡི་དམ་ཀུན་འདུས་དཔལ་ཆེན་སྒྲུབ་སྡེ་བརྒྱད། །རྣལ་འབྱོར་མ་དང་ཕག་ཁྲོས་སེང་གདོང་སོགས། །རྩ་གསུམ་གཅིག་བསྡུས་པདྨ་རྒྱལ་ལ་འདུད། །མདོར་ན་སྐྱབས་གནས་ཀུན་འདུས་བདག་ཉིད་ཆེ། །རྩ་བའི་བླ་མ་ཨོ་རྒྱན་རྡོ་རྗེ་འཆང་། །སྙིང་གི་ཟེའུ་འབྲུར་བཀོད་ཅིང་གསོལ་བཏབ་མཐུས། །བྱང་ཆུབ་སྒྲུབ་པའི་བར་ཆད་ཞི་མཛད་གསོལ། །དུས་མིན་འཆི་བདག་བདུད་སྡེའི་གཡུལ་འཇོམས་ཞིང་། །ཚེ་བསོད་དཔལ་འབྱོར་ཡེ་ཤེས་ཡོན་ཏན་རྣམས། །ཁབ་ལེན་རྡོ་ཡིས་ལྕགས་ཕྱེ་སྡུད་བ་བཞིན། །རང་དབང་ཉིད་དུ་འདུ་བར་མཛད་དུ་གསོལ། །བདག་དང་བདག་ལ་འབྲེལ་ཐོབ་སེམས་ཅན་ཀུན། །ལས་ཉོན་སྡིག་སྒྲིབ་སྡུག་བསྔལ་ཀུན་བྱང་སྟེ། །རང་སྣང་སྐུ་གསུམ་ཞིང་ཁམས་ཆེན་པོ་རུ། །ཕྱིན་ནས་ཨོ་རྒྱན་རྗེ་དང་དབྱེར་མེད་ཤོག །ཐུབ་པའི་བསྟན་པ་རིན་ཆེན་དར་ཞིང་རྒྱས། །བསྟན་པ་འཛིན་རྣམས་ཞབས་བརྟན་དགེ་འདུན་འཕེལ། །ལྷ་མིན་བདུད་སྡེའི་དཔུང་ཚོགས་གཞོམ་པ་དང་། །འཇིག་རྟེན་རྫོགས་ལྡན་དཔལ་ལ་སྤྱོད་པར་ཤོག །ཅེས་པའང་ཤིང་མོ་ལུག་གི་ལོའི་གནམ་ལོ་གསར་དུ་འཆར་བའི་ཆོ་འཕྲུལ་ཆེན་པོའི་དཀར་ཕྱོགས་ཀྱི་དགའ་བ་དང་པོའི་ཚེས་ལ་ཨོ་རྒྱན་མཁན་པོའི་འབངས་རིགས་སུ་འཁོད་པ་འཇམ་དབྱངས་བློ་གྲོས་རྒྱ་མཚོའམ། པདྨ་ཡེ་ཤེས་རྡོ་རྗེས་སྨྲས་རིམ་བཞིན་སྤྲུལ་པའི་སྐུ་འཇམ་དབྱངས་བསོད་ནམས་དབང་པོས་ཡི་གེར་བཀོད་པ་འདིས་ཀྱང་བདག་གཞན་རྣམས་ཀྱི་རྒྱུད་ལ་ཨོ་རྒྱན་སློབ་དཔོན་ཆེན་པོའི་བྱིན་རླབས་མྱུར་དུ་འཇུག་པའི་རྒྱུར་གྱུར་ཅིག་སརྦ་དཱ་མངྒ་ལཾ།། །།

[edit]

rtsa gsum kun 'dus o rgyan rdo rje 'chang la bstod cing gsol ba 'debs pa dus min 'chi bzlog ces bya ba bzhugs so/____/na mo gu ru a pa ri mi ta pad+ma ka rA ya/__'od mtshan stong 'bar 'chi med lha yi lha/____/chags bral sor rtog ye shes rang 'od las/____/sin+d+hU'i dwangs mtshor pad+ma'i sdong po'i rtser/____/rang byung brdzus 'khrungs pad+ma thod phreng rgyal/____/gdod nas mngon 'tshangs rgyas kyang rtsod dus 'dir/____/shAkya'i bstan la gsang sngags ston pa po/____/'dzam bu'i gling na rigs sngags grub pa'i gtso/____/o rgyan slob dpon pad+ma 'byung gnas 'dud/____/sngon byon sangs rgyas rnams kyis spangs pa yi/____/gdong dmar bod dang 'gro lding rnga yab rnams/____/thugs rje'i phyag gis dam por 'dzin mdzad pa/____/mkha' 'gro'i ming po mtsho skyes rdo rjer 'dud/____/khyad par gangs ri'i phreng bas bskor ba'i ljongs/____/mnga' bdag tshangs pa'i smon lam shing rtas drangs/____/bsam yas lhun gyis grub pa'i gtsug lag bzhengs/____/lha srin dam btags bstan pa spel la 'dud/____/skal ldan rje 'bangs 'dus pa'i tshogs rnams la/____/gsang sngags nang rgyud smin grol char chen 'bebs/____/rig 'dzin grub pas 'dzin ma'i khyon bkang mdzad/____/rdo rje theg pa'i bdag po khyod la 'dud/____/ches cher snyigs ma'i dus kyi mthar skyes pa'i/____/'gro ba rnams dang bstan pa'i rgud pa rnams/____/skyob phyir bod khams mtha' dbus thams cad du/____/zab gter dpag med sbas par mdzad la 'dud/____/'dzam gling srin po'i mche ba mi zad pas/____/btab pa'i 'jigs pa thams cad skyob pa'i phyir/____/sku dngos dpal ri pad+ma 'od du gshegs/____/sprul pas 'dzam gling khyab par ston la 'dud/____/lhun gyis grub pa'i rig 'dzin sar gshegs shing /____/ye shes sku ni bsam brjod yul las 'das/____/rgyal ba rnams dang dgongs pa rnam dbyer med/____/yon tan phrin las pha mtha' yas la 'dud/____/thod phreng sde lnga gu ru mtshan brgyad dang /____/rnam 'phrul bcu gnyis la sogs sku'i rnam 'gyur/____/zhi dang khro bo ma nges ston pa yi/____/dkyil 'khor rgya mtsho'i bdag po chen por 'dud/____/bla ma rig 'dzin rgya mtsho'i gtso bo mchog__/yi dam kun 'dus dpal chen sgrub sde brgyad/____/rnal 'byor ma dang phag khros seng gdong sogs/____/rtsa gsum gcig bsdus pad+ma rgyal la 'dud/____/mdor na skyabs gnas kun 'dus bdag nyid che/____/rtsa ba'i bla ma o rgyan rdo rje 'chang /____/snying gi ze'u 'brur bkod cing gsol btab mthus/____/byang chub sgrub pa'i bar chad zhi mdzad gsol/____/dus min 'chi bdag bdud sde'i g.yul 'joms zhing /____/tshe bsod dpal 'byor ye shes yon tan rnams/____/khab len rdo yis lcags phye sdud ba bzhin/____/rang dbang nyid du 'du bar mdzad du gsol/____/bdag dang bdag la 'brel thob sems can kun/____/las nyon sdig sgrib sdug bsngal kun byang ste/____/rang snang sku gsum zhing khams chen po ru/____/phyin nas o rgyan rje dang dbyer med shog__/thub pa'i bstan pa rin chen dar zhing rgyas/____/bstan pa 'dzin rnams zhabs brtan dge 'dun 'phel/____/lha min bdud sde'i dpung tshogs gzhom pa dang /____/'jig rten rdzogs ldan dpal la spyod par shog__/ces pa'ang shing mo lug gi lo'i gnam lo gsar du 'char ba'i cho 'phrul chen po'i dkar phyogs kyi dga' ba dang po'i tshes la o rgyan mkhan po'i 'bangs rigs su 'khod pa 'jam dbyangs blo gros rgya mtsho'am/__pad+ma ye shes rdo rjes smras rim bzhin sprul pa'i sku 'jam dbyangs bsod nams dbang pos yi ger bkod pa 'dis kyang bdag gzhan rnams kyi rgyud la o rgyan slob dpon chen po'i byin rlabs myur du 'jug pa'i rgyur gyur cig sarba dA mang+ga laM//____//_