DKR-KABUM-16-MA-001

First text in volume."MA" is not a number. Back to Volume Page"MA" is not a number.Next Text "MA" is not a number.

Wylie title
Location	dil mgo mkhyen brtse bka' 'bum Volume , Text 1, Pages (Folios to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation
Genre	"MA" is not a number.

<ul><li>"" can not be assigned to a declared number type with value 4.</li> <!--br--><li>"MA" is not a number.</li></ul>

Tibetan Text

Wylie

[edit]

༄༅། །ཡོན་ཏན་རིན་པོ་ཆེའི་མཛོད་ཀྱི་མཆན་འགྲེལ་ཐེག་གསུམ་བདུད་རྩིའི་ཉིང་ཁུ་ཞེས་བྱ་བ་བཞུགས་སོ།། །། ༄༅། །ཆོས་དབྱིངས་ཀློང་ཆེན་རབ་འབྱམས་སྐུ་ལྔའི་སྤྲིན། །མཁྱེན་བརྩེའི་འོད་ཟེར་བརྒྱ་པའི་སྣང་བ་ཡིས། །ཐེག་མཆོག་པདྨོའི་ཚལ་འབྱེད་ཡབ་སྲས་ཟུང༌། །དང་པའི་མཁའ་ལ་འདུ་འབྲལ་མེད་པར་མཆོད། །རྒྱལ་བའི་ཆོས་ཚུལ་མཐའ་དག་གཞུང་གཅིག་གིས། །ལེགས་བསྟན་ཡོན་ཏན་རིན་ཆེན་མཛོད་ཀྱི་དོན། །འབྱེད་ནུས་མཆན་འགྲེལ་ལེགས་བཤད་བདུད་རྩིའི་འོད། །ཚིག་དོན་རབ་གསལ་དགའ་སྟོན་འདིར་དབྱེ་བྱ། །དེ་ལ་འདིར་མདོ་སྔགས་བསྟན་པ་རྒྱ་མཚོའི་སྙིང་པོ། གང་ཟག་གཅིག་འཚང་རྒྱ་བའི་ལམ་ཚང་ལ་མ་ནོར་བ། གནད་བརྒྱ་འགག་གཅིག་གིས་བཀྲོལ་བའི་གཞུང༌། སྔ་འགྱུར་རྡོ་རྗེ་སྙིང་པོའི་ཟབ་ལམ་མཐའ་དག་ཡོངས་སུ་རྫོགས་པ་སྟོན་པའི་བསྟན་བཅོས་ཆེན་པོའི་མཆན་འགྲེལ་འབྲི་བ་ལ། དང་པོ་མཚན་དོན་ལ་ཆིངས་ཆེན་པོ་ལྔའི་སྒོ་ནས་འཆད་ན། དང་པོ་དགོས་པ་ནི། དབང་པོ་རབ་ཀྱིས་མཚན་དོན་ཤེས་པས་གཞུང་ཡོངས་རྫོགས་གཏན་ལ་ཕེབས། འབྲིང་གིས་ཐེག་པ་ཆེ་ཆུང་གང་གི་ཕྱོགས་སུ་གཏོགས་པ་ཤེས། ཐ་མས་མིང་དོན་གྱི་འབྲེལ་བ་ཤེས་ནས་གླེགས་བམ་འཚོལ་སླ་བའི་དགོས་པ་ཡོད། གཉིས་པ་མཚམས་སྦྱོར་ནི། སྤྱིར་ཆོས་གང་འཆད་ཀྱང་ཐོག་མར་ཀླད་དོན་ནས་འཆད་དགོས་ལ། དེ་ཡང་དང་པོར་མཚན་སྨོས་པ་འབྱུང་བས་མཚན་དེ་ཡང་ཆོས་ལ་ཡིད་ཆེས་སྐྱེ། སྐད་ལ་བག་ཆགས་འཇོག །རྒྱུད་ལ་བྱིན་རླབས་འཇུག་པ་སྟེ་དགོས་པ་གསུམ་དང་ལྡན་པའི་ཕྱིར། མཚན་རྒྱ་སྐད་ལྟར་སྨོས་པ་ནི། རྒྱ་གར་སྐད་དུ། གུ་ཎ་ཀོ་ཥ་རཏྣ་པྲ་མོ་ད་པྲིཥྚི་ནཱ་མ། བོད་སྐད་ལྟར་སྨོས་པ་ལ། བོད་སྐད་དུ། ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ། སྐད་གཉིས་ཤན་སྦྱར་བ་ནི། གུ་ཎ་ཡོན་ཏན། ཀོ་ཥ་མཛོད། རཏྣ་རིན་པོ་ཆེ། པྲ་མོ་ད་བྲྀཥྚི་དགའ་བའི་ཆར། ནཱ་མ་ཞེས་བྱ་བའོ། །གསུམ་པ་ཚིག་དོན་ནི། སྐྱེས་བུ་གསུམ་གྱི་ལམ་གྱི་རིམ་པ་ཐམས་ཅད་མ་ནོར་བ་ཉམས་སུ་བླངས་པའི་འབྲས་བུའི་ཡོན་ཏན་ཐམས་ཅད་ཀྱི་འབྱུང་གནས་ཡིན་པས་ན་ཡོན་ཏན། དེ་ཉམས་སུ་བླངས་པས་དོན་གཉིས་ཀྱི་འདོད་པ་ཐམས་ཅད་འབྱུང་བས་ན་རིན་པོ་ཆེ། དེ་ལྟ་བུའི་བརྗོད་བྱ་ཕུན་སུམ་ཚོགས་པས་ཚིག་དང་དོན་གྱི་མཛོད་ཡིན་པས་ན་མཛོད། རང་རྒྱུད་ལ་ལེགས་བྱས་དགེ་བའི་ལོ་ཏོག་བསྐྱེད་པར་འདོད་པའི་སྐལ་བཟང་གང་ཟག་ཐམས་ཅད་དགའ་བར་བྱེད་པའི་ཆར་པ་ལྟ་བུ་ཡིན་པས་ན་དགའ་བའི་ཆར། ཞེས་བྱ་བ་ནི་མིང་སྒྲོགས་པའོ། །བཞི་པ་བསྡུས་དོན་གྱི་དབང་དུ་བྱས་ན། ཡོན་ཏན་རིན་པོ་ཆེའི་མཛོད་ཅེས་བྱ་བ་སྟེ། ལམ་དང་འབྲས་བུའི་ཡོན་ཏན་ཐམས་ཅད་གང་ལས་འབྱུང་བའི་མཛོད་ལྟ་བུར་གྱུར་པའོ། །ལྔ་པ་བརྒལ་ལན་ནི། དེ་ལ་ཁ་གཅིག་ན་རེ། ཆར་ཡིན་ན་དགའ་བས་མི་ཁྱབ་སྟེ། དམྱལ་བར་མེ་མདག །ཀླུ་དང་ཡི་དྭགས་སོགས་ལ་བྱེ་ཚན་གྱི་ཆར་སོགས་འབེབས་པའི་ཕྱིར་རོ་ཞེ་ན། གང་དག་དགའ་བ་བསྐྱེད་པར་བྱེད་པའི་ཕྱིར་མཐོ་རིས་ལྷ་མིའི་ཆར་པ་དག་ལ་དཔེ་བྱས་ཀྱི་ངན་སོང་ལ་དཔེ་མ་བྱས་པའི་ཕྱིར་སྙིང་པོ་མེད་དོ། །འཇིག་རྟེན་གྱི་ཁམས་འདིར་དཀོན་པའི་མཆོག་སངས་རྒྱས་ཆོས་དགེ་འདུན་གསུམ་ཡིན། དེ་ལ་བསྟན་བཅོས་རྩོམ་པ་པོས་འགྲོ་བ་མ་ལུས་ཉེས་ཚོགས་ལས་སྐྱོབ་པའི་ཆེད། དུས་བྱང་ཆུབ་སྙིང་པོའི་བར་དུ་སྒོ་གསུམ་གུས་པས་ཕྱག་འཚལ་ལོ། །ཞེས་གསུངས་པས། དང་པོ་སངས་རྒྱས་ལ། ངོ་བོ། ངེས་ཚིག །དབྱེ་བ། སྒྲ་དོན་ནོ། །དང་པོ་སྤངས་རྟོགས་ཀྱི་ཡོན་ཏན་ཐམས་ཅད་མཐར་ཕྱིན་པ་སངས་རྒྱས་ཀྱི་ངོ་བོ། ངེས་ཚིག་ནི། མ་རིག་པའི་གཉིད་འཐུག་པོ་ལྟ་བུ་སངས་ཤིང་ཤེས་བྱའི་ཆོས་ལ་བློ་གྲོས་པདྨོའི་འདབ་མ་ལྟར་རྒྱས་པས་ན་སངས་རྒྱས་ཞེས་བྱའོ། །དབྱེ་ན་རྟེན་སྐུ། བརྟེན་པ་ཡེ་ཤེས། མཛད་པ་ཕྲིན་ལས་རྣམས་སོ། །སྒྲ་དོན་ནི། བུདྡྷ་ཁོང་དུ་ཆུད་པ་ལའོ་ཞེས་པས། ཤེས་བྱ་ཐམས་ཅད་མཁྱེན་ཅིང་ཁོང་དུ་ཆུད་པས་ན་སངས་རྒྱས་སོ། །གཉིས་པ་ཆོས་ལ་བཞི་ལས། ངོ་བོ་ནི། ཉོན་ཤེས་ཀྱི་སྒྲིབ་པ་གང་རུང་སྤང་བའམ། སྤོང་བྱེད་ཀྱི་ཐབས་སུ་གྱུར་པ་ཆོས་ཀྱི་ངོ་བོ། །ངེས་ཚིག་ནི། ནད་པ་ལ་སྨན་གཏོང་བ་ལྟར་རང་རྒྱུད་ཀྱི་ཉོན་མོངས་པ་འཆོས་པས་ན་ཆོས་སོ། །དབྱེ་ན། ལུང་དང་རྟོགས་པའི་ཆོས་སམ། འགོག་ལམ་གྱི་བདེན་པ་གཉིས་སོ། །སྒྲ་དོན་ནི། དྷརྨ་ཞེས་པའི་སྒྲ་ལས་དྲངས་ན་འཛིན་པ་སྟེ། འཁོར་བ་དང་ངན་སོང་གི་ལམ་དུ་མི་གཏོང་ཞིང་ཡང་དག་པའི་ལམ་དུ་འཛིན་པས་ན་ཆོས་སོ། །གསུམ་པ་དགེ་འདུན་ལ་བཞི་སྟེ། རིག་གྲོལ་གྱི་ཡོན་ཏན་གཉིས་ལྡན་དགེ་འདུན་གྱི་ངོ་བོ། ངེས་ཚིག་ནི་ཡང་དག་པ་དགེ་བའི་ལམ་རང་རྒྱུད་དང་མི་ཕྱེད་པར་འདུན་པས་ན་དགེ་འདུན་ནོ། །དབྱེ་ན། ཐེག་དམན་ཉན་རང་གི་དགེ་འདུན། ཐེག་ཆེན་བྱང་སེམས་ཀྱི་དགེ་འདུན་ནོ། །སྒྲ་དོན་ནི་སངྒ་ཞེས་པའི་སྒྲ་ལས་དྲངས་ན་འདུས་པ་སྟེ། འགྲོ་བ་ལྷ་དང་བཅས་པས་ལམ་ལས་མི་ཕྱེད་པས་ན་དགེ་འདུན་ནོ། །ཕྱག་འཚལ་ལོ་ཞེས་པ་རབ་ལྟ་བ་མཇལ་བ་བརྡ། འབྲིང་སྒོམ་པ་གོམས་པ། ཐ་མ་མོས་གུས་ཀྱི་ཕྱག་སྟེ་གསུམ་ཀ་ཚང་བའི་སྒོ་ནས་ཕྱག་འཚལ་བའོ། །དཀོན་མཆོག་རིན་ཆེན་རྣམ་གསུམ་ཞེས་འཇིག་རྟེན་ན་རྒྱལ་བའི་སྐུ་གསུང་ཐུགས་ཡོན་ཏན་ཕྲིན་ལས་སོགས་ཀྱི་གྲགས་པས་ཁྱབ། དེའི་ཕྱིར་རང་བཞིན་བརྡ་སྤྲོད་པའི་ཆེད་དུ། སྔར་སྟོན་པའི་སྐུ་གཟུགས་དང་ཚིགས་སུ་བཅད་པ་རས་དཀར་ལ་བཀོད་པའི་ཁྱད་པར་སྤྲིང་ཡིག་གི་རྣམ་པ་བསྐུར་བ་མཐོང་བ་ཙམ་གྱིས་ཀྱང་བུ་མོ་མུ་ཏིག་འཁྲི་ཤིང་རྟོག་དཔྱོད་ཀྱིས་དབེན་པ་བསམ་གཏན་དགོངས་པ་གཅིག་པ་ལྟ་བུའི་རབ་ཏུ་དགའ་བ་ཉམས་སུ་མྱོང་ཞིང་དེའི་དོན་བསམ་པར་བྱས་ནས། ཐར་ལམ་ལ་བར་དུ་གཅོད་པའི་མཐོང་སྤང་ཀུན་བཏགས་ཀྱི་རྟོག་པ་བརྒྱ་དང་བཅུ་གཉིས་བདུད་ཀྱི་བུ་མོའི་སླུ་བྱེད་ཀྱི་བཞིན་རས་ཀུནྡའི་ཚལ་ལྟ་བུ་དེ་དག་ཀུན་ཀྱང༌། མཐོང་ལམ་ཡེ་ཤེས་ཀྱི་ཉི་མས་སྐལ་པ་ངན་པར་བྱས་ཏེ་དྲུང་ནས་འབྱིན་པའི་ཚུལ་གྱིས་སྤོང་བར་བགྱིད་ལ། སྒོམ་སྤང་སྤང་བ་ལ་མངོན་པར་ཕྱོགས་པ་ནི་སངས་རྒྱས་ཀྱི་ཐུགས་རྗེའི་མཐུ་ལས་བྱུང་བ་དེའི་ཕྱིར་དཀོན་མཆོག་གསུམ་གྱི་རྒྱུ་འབྲས་མཐའ་དག་དང་འབྲེལ་བའི་ཆོས་ཀྱི་གཏམ་ཡང་དག་པ་ནི་འགྲོ་བ་མཐའ་དག་གིས་མཉན་པར་འོས་ཤིང་སྲིད་པའི་རང་བཞིན་དུ་ཉོན་མོངས་པ་དང་རྣམ་པར་རྟོག་པའི་གཉེན་པོར་ཆེ་བས་ན་དེ་སྐད་དུ་གཟུགས་ཅན་རྒྱན་དུ་བཀོད་པའོ། །ཤེས་བྱ་ཐམས་ཅད་མཁྱེན་པའི་བློ་གྲོས་མཆོག་མངའ་བ་ཐུབ་པ་ཆེན་པོས་ཕུན་སུམ་ཚོགས་པ་ལྔས་བསྟན་པའི་མདོ་སྔགས་ཀྱི་སྡེ་སྣོད་དཔག་ཏུ་མེད་པ་དང་རྗེས་འཇུག་བྱང་འཕགས་རྣམས་ཀྱིས་མཛད་པའི་བཀའ་དང་བསྟན་བཅོས་རྣམས་ཀྱིས་ཆིངས་ཆེན་པོ་ལྔས་འབྲེལ་དགོད། དགོས་འབྲེལ་ཡན་ལག་བཞིས་གཏན་ལ་ཕབ་པའི་བསྟན་བཅོས་ཚིག་དོན་གྱི་ཡོན་ཏན་དུ་མས་བརྒྱན་པ་དག་བྱེད་ཆུའི་གཏེར་ཏེ་རྒྱ་མཚོ་ཆེན་པོ་ལྟ་བུ་རྒྱ་ཆེ་ལ་གཏིང་ཟབ་པ་རྣམས་ལ་བརྟེན་ནས་རྒྱལ་བའི་བསྟན་པ་ཡུན་རིང་དུ་གནས་ཏེ། བྱམས་པས། ཆོས་རྣམས་ཐམས་ཅད་བཀའ་དང་བསྟན་བཅོས་གཉིས། །ལེགས་པར་གསུངས་དང་དེ་ཡི་དགོངས་འགྲེལ་བ། །དེ་ཡི་དབང་གིས་ཤཱཀྱའི་བསྟན་པ་འདི། །འཇིག་རྟེན་ཁམས་འདིར་ཡུན་རིང་གནས་པར་འགྱུར། །ཞེས་པ་ལྟར་གཅིག་ཏུ་བརླིང་ཞིང་ཟབ་ལ་དཔོག་དཀའ་བ་བཀའ་དང་དགོངས་འགྲེལ་མ་ཉམས་པར་མཆིས་པ་ཡིན་ན། རྒྱུ་གསུམ་མ་ཚང་བ་གྱི་ནར་སྨྲ་བ་བདག་གིས་སྤྱི་བརྟོལ་གྱིས་བྱས་པའི་བསྟན་བཅོས་ལ་འཆོས་སྐྱོབ་ཀྱི་ཡོན་ཏན་གཉིས་དང༌། ནང་པའི་ཚུལ་གསུམ་གྱི་ཡོན་ཏན་གྱིས་དབེན་ལ། ཕྱི་རོལ་པའི་ངན་པ་དྲུག་གི་ལྷད་ཀྱང་སྲིད་པས་ནགས་སྟུག་པོའི་གཅོང་རོང་གི་འབབ་ཆུའི་རླབས་ཕྲེང་གི་འུར་སྒྲས་གནོད་པ་བཞིན་དུ་ཅ་ཅོ་སྒྲོགས་པའི་བསྟན་བཅོས་རྩོམ་པ་འདི་མཛེས་པ་མི་ངོམ་པའི་གནས་སུ་མཐོང་ཡང༌། དམ་པའི་ཆོས་ཀྱི་བརྗོད་བྱ་ཡང་དག་པ་ལ་བརྟེན་པའི་སླད་ཀྱིས་མཉན་པར་འོས་སོ། །ཞེས་ཁེངས་པ་བསྐྱུངས་པའི་གསུང་སྟེ། རྩིས་མགོ་ཡན་ལག་ལྔ་ཚང་བའི་ཚུལ་ནི། བསྟན་བཅོས་འདི་དང་པོ་མཛད་པ་པོ་སུས་མཛད་ན། རང་བཞིན་རྫོགས་པ་ཆེན་པོའི་གནས་ལུགས་འཕགས་ལམ་ཆོས་ཉིད་ཀྱི་བདེན་པ་མངོན་སུམ་དུ་གཟིགས་པས་ངོ་བོ་དཀྱིལ་འཁོར་རྒྱ་མཚོའི་ཁྱབ་བདག་ཀུན་བཟང་དང་པོའི་སངས་རྒྱས་དང་རྣམ་དབྱེར་མེད་ཅིང༌། ཚུ་རོལ་གདུལ་བྱའི་སྣང་ཆར་ཡང་རིག་རྩལ་སོ་སོར་རྟོག་པའི་ཡེ་ཤེས་ཀྱི་རྩལ་རྫོགས་པས་རིག་པའི་གནས་ཆེན་ལྔ་སོགས་ཤེས་བྱའི་ཆོས་ཐམས་ཅད་མ་བསླབ་པར་མཁྱེན་གཉིས་ཀློང་བརྡོལ་ཏེ་བསྟན་བཅོས་རྩོམ་པའི་རྒྱུ་གསུམ་ཚང་ཞིང༌། ཁྱད་པར་མཆིམས་ཕུ་ནགས་ཀྱི་དུར་ཁྲོད་དུ་ལོ་གསུམ་སྙིང་པོའི་སྒྲུབ་པ་ལ་གཞོལ་བའི་ཚེ་ཀུན་མཁྱེན་དྲི་མེད་འོད་ཟེར་དཔལ་ངག་གི་དབང་ཕྱུག་གི་ཡེ་ཤེས་སྐུས་ལན་གསུམ་རྗེས་སུ་བཟུང་ནས་སྐུ་གསུང་ཐུགས་ཀྱི་བྱིན་གྱིས་བརླབས་ཏེ་དགོངས་ཀློང་དབྱེར་མེད་དུ་གྱུར་ནས་ཐེག་མཆོག་བསྟན་པའི་མངའ་བདག་ཆེན་པོར་བཞུགས་པ་རིག་འཛིན་འཇིགས་མེད་གླིང་པའམ་པདྨ་དབང་ཆེན་ཡེ་ཤེས་རོལ་པའི་རྡོ་རྗེས་མཛད། ལུང་གང་ལས་བཏུས་ན། སངས་རྒྱས་ཀྱི་ཆོས་གསུང་རབ་སྡེ་སྣོད་གསུམ་རྒྱུད་སྡེ་བཞི་དགོངས་འགྲེལ་དང་བཅས་པ་ལས་བཏུས། ཕྱོགས་གང་དུ་གཏོགས་ན། སྤྱིར་ཐེག་པ་ཆེ་ཆུང་གཉིས་ལས་ཐེག་ཆེན་ཕྱོགས་སུ་གཏོགས། ཐེག་ཆེན་མདོ་སྔགས་གཉིས་ལས་སྔགས། སྔགས་ཕྱི་ནང་གཉིས་ལས་བླ་མེད་ཕྱོགས་སུ་གཏོགས། དབུ་ནས་ཞབས་སུ་བསྡུས་པའི་དོན་གང་ཞེ་ན། སྐྱེས་བུ་གསུམ་གྱི་ལམ་གྱི་རིམ་པ་ཐམས་ཅད་རང་བཞིན་རྫོགས་པ་ཆེན་པོའི་ལམ་སྟེགས་སུ་བཀྲལ་ཏེ་བློ་རབ་འབྲིང་ཐ་མ་གསུམ་མཐར་ཐུག་གི་ལམ་དུ་སྐྱེལ་སོ་མཐུན་པར་བྱས་པའོ། །དགོས་ཆེད་སུ་ཞིག་གི་དོན་དུ་མཛད་ཅེ་ན། སྔར་བཤད་པ་ལྟར་ཀུན་མཁྱེན་ཆོས་རྗེའི་ཞལ་གཟིགས་བར་མའི་ཚེ་དཔེ་ཆ་བམ་པོ་ཞིག་གཏད་དེ། འདིར་ཤིང་རྟ་ཆེན་པོ་ན་གབ་པའི་ཚུལ་དུ་ཡོད་པ་ཐམས་ཅད་གསལ་པོར་ཡོད་པ་ཡིན་ཞེས་བསྟན་བཅོས་རྩོམ་པའི་གནང་བ་བྱིན་པ་བཞིན། ཤིང་རྟ་ཆེན་པོར་རྒྱས་པར་མ་བཀྲལ་བའི་སོ་ཐར་དང་སྔགས་ཐུན་མོང༌། རྫོགས་པ་ཆེན་པོའི་གཞི་ལམ་འབྲས་བུའི་སྐོར་རྣམས་རྩལ་དུ་བཏོན་པས་མཛོད་ཆེན་བདུན་གྱི་ཉིང་ཁུ་ལྟ་བུ་ཡིན་ཏེ། ཕྱི་རབས་རྗེས་འཇུག་གང་ཟག་རྣམས་ཀྱིས་བསྟན་པ་ཐམས་ཅད་འགལ་མེད་དུ་རྟོགས་པ་དང༌། རྒྱལ་བའི་གཞུང་ལམ་ཚང་ལ་མ་ནོར་བ་གང་ཟག་གཅིག་འཚང་རྒྱ་བའི་ལམ་དུ་བསྡུས་ནས་ཉམས་སུ་ལེན་དགོས་པའི་དོན་དུ་མཛད་པ་སྟེ། དེ་ལྟར་རྩིས་མགོ་ཡན་ལག་ལྔ་ཡི་སྒོ་ནས་གཏན་ལ་ཕབ་པས་ཉན་པ་པོ་ཡིད་ཆེས་ཐོབ་ནས་ཆོས་ཀྱི་སྣོད་རུང་དུ་འགྱུར་བའི་དགོས་པ་ཡོད་དོ། །དུས་ཡུན་རིང་པོ་ཐོག་མ་མེད་པ་ནས་བདག་ཏུ་འཛིན་པ་དང་ཉོན་མོངས་པས་བསྐྱེད་པའི་མངལ་ལ་སོགས་པར་སྐྱེ་བ་དང༌། ན་ཚོད་འགྱུར་བའི་རྒ་བ་དང༌། འདུ་བ་འཁྲུགས་པའམ་བསླད་པའི་ན་བ་དང༌། སྲོག་བཏང་བའི་འཆི་བ་ཡི་རིམས་ནད་ཀྱིས་ད་ལྟའི་བར་དུ་བཏབ་པར་སྨན་ཆེན་བདུད་རྩིའི་རོ་ལྟ་བུ། དང་པོ་ཐོས་པའི་དུས་སུ་མི་དད་པ་དད་པར་བྱེད་པ་རྣ་བར་ཚིག་གི་བདུད་རྩི། བར་དུ་བསམ་པའི་དུས་སུ་མི་དགའ་བ་དགའ་བར་བྱེད་ཅིང་བློ་རྣམ་གཡེང་གི་གཉེན་པོར་གྱུར་བ། ཐ་མ་སྒོམ་པའི་དུས་སུ་མ་གྲོལ་བ་གྲོལ་བར་བྱེད་ཅིང་བློ་རྣམ་པར་གྲོལ་བའི་ཤེས་རབ་ཀྱི་ཡེ་ཤེས་སྐྱེད་པར་བྱེད་པའི་དམ་ཆོས་ཐང་མ་བཞིན་བརྡལ་བ་ལག་ཏུ་མཆིས་པའང་ཁྱིའི་དྲུང་དུ་རྩྭ་བཞག་པ་ལྟར་སྤོང་ཞིང༌། སྡིག་པ་བབ་བཅོལ་དུ་བྱེད་པའི་སྐྱེ་བོ་བླུན་པོ་རྣམས་ལ་ཐེག་དགུའི་དོན་ཐམས་ཅད་བསྟན་བཅོས་གཅིག་ཏུ་བསྡུས་པའི་མན་ངག་ཟབ་མོ་འདི་བདག་གིས་ཇི་ལྟར་འདོམས་ཏེ་དོན་དུ་འགྱུར་དཀའ་མོད་ཀྱང་འོན་ཏེ་བརྩེ་བས་གདུལ་བྱ་ལ་རྗེས་སུ་ཆགས་ཤིང་མི་འདོར་བར་བརྩམ་པར་དམ་བཅའ་བར་མཛད་དོ། །འཁོར་བ་འདི་ཉིད་ན་དུས་རིང་པོ་ནས་འགྲོགས་ཤིང་ཉེས་དམིགས་མ་ཤེས་པར་ཕན་པའི་གནས་སུ་བལྟས་ཏེ་བཤེས་པ་འཁོར་བའི་སྡུག་བསྔལ་གྱི་རྒྱུ་འབྲས་འཕེལ་ཞིང་ཐར་པའི་ཡོན་ཏན་འགྲིབ་པའི་འབྲོག་དགོན་པའི་གནས་གང་དུ་སྔར་ལན་གྲངས་དུ་མར་མགོ་དང་ཡན་ལག་བཅད་པ་ལ་སོགས་སྡུག་བསྔལ་གྱི་ཚོར་བར་བསྲེག་པས་ལུས་སེམས་གདུང་བར་བྱས་ཤིང༌། ཕྱིན་ཆད་སྡུག་བསྔལ་གྱིས་གདུང་བར་འགྱུར་བའི་ལས་དུ་མ་ལྐོག་ཏུ་གྱུར་ནས་ཡོད་པ་མི་ཤེས་པ་རྣམས་ལ་མི་སྐྱོ་བར་མ་ཟད། ད་དུང་ཡང་འགྱུར་བའི་རང་བཞིན་གྱི་མཐོ་རིས་ཀྱི་བདེ་བ་སྙིང་པོ་མེད་པ་ལ་སྲེད་ཅིང༌། དགེ་སྡིག་གི་འཇུག་ལྡོག་གང་ཡང་མ་ཤེས་པར་རྨོངས་པའི་དབང་གིས་སྡིག་པའི་ལས་ཐབས་འབའ་ཞིག་གིས་ཚེ་འདའ་བར་བྱེད་པ་རྣམས་ནི་མི་ལུས་ཙམ་བོ་བཞེས་བྱའོ། །དེ་ལྟར་བསམ་སྦྱོར་མི་དགེ་བས་རྒྱུད་བརླག་ཅིང་དལ་འབྱོར་དོན་མེད་དུ་བྱེད་པ་དེ་ནི་མངོན་མཐོའི་གནས་འདི་ནས་སླར་ཡང་གནས་ངན་དུ་ལྟུང་བར་འགྱུར་ལ། གང་དུ་ལྟུང་ཞེ་ན། ངན་སོང་གསུམ་དང་འདུ་ཤེས་མེད་པའི་ལྷ་དང༌། མཐའ་འཁོབ་ཀྱི་གནས་དང་དབང་པོ་མ་ཚང་བ་དང་ལྟ་བ་ལོག་པ་དང༌། སངས་རྒྱས་འབྱུང་བ་མེད་པའི་གནས་དག་ཏུ་འཁྱམས། འདི་ལྟར་ཐང་ཅིག་ཙམ་ངལ་བསོ་བའི་སྐབས་བཙལ་དུ་ཡོད་པ་མ་ཡིན་པར་ལྕགས་བསྲེགས་ཀྱི་ས་གཞིར་རལ་གྲི་དང་ཐོ་བ་ལ་སོགས་པའི་མཚོན་ཆ་དྲག་པོ་ཐོགས་པ་ཅན་གྱི་ཆད་པ་རྩུབ་མོས་ཡང་དང་ཡང་དུ་སྲོག་འཕྲོག་ཀྱི་སྡུག་བསྔལ་དྲག་པོ་གཏད་ཀྱང་སྔོན་ལས་ངན་པའི་རྣམ་སྨིན་མ་ཟད་བར་དུ་འཆི་བར་མི་ནུས་པའི་དམྱལ་བ་པ་རྣམས་ད་དུང་ཡང་བྱེད་པ་རྒྱུ་མཐུན་གྱི་འབྲས་བུ་ཁོང་ཁྲོའི་ལས་ངན་རྙི་ལ་འཐོགས་ཏེ་ཚེ་ཚད་དཔག་ཏུ་མེད་དོ། །སྤྱི་མཐུན་གྱི་སྒྲིབ་པ་ཅན་ཐ་ན་རྣག་ཁྲག་ཕྱི་ས་སོགས་མི་གཙང་བ་ངན་ངོན་ཙམ་དག་ཀྱང་མི་རྙེད་པའི་ཡི་དྭགས་རྣམས་ནི་ཟས་སྐོམ་གྱིས་ཕོངས་པས་བཀྲེས་སྐོམ་གྱི་སྡུག་བསྔལ་བས་ཉམ་ཐག་པ་སྨོས་ཅི་དགོས། དབྱར་ཟླ་བ་དང་དགུན་ཉི་མ་གཉིས་ཚ་གྲང་ཕྱིན་ཅི་ལོག །ཆར་དང་སེར་བ་ཕྱིན་ཅི་ལོག་ཏུ་རྡོ་རྗེའི་ཐོག་སེར་རོ། །ཆུ་རླུང་ཕྱིན་ཅི་ལོག་རྣག་ཁྲག་ཏུ་འགྱུར་བ་སོགས་འབྱུང་ངོ༌། །ཕྱི་ཡི་སྒྲིབ་པ་ཅན་ནི་ཆུ་ཀླུང་དང་ལྗོན་པ་ལོ་ཏོག་དང་ལྡན་པ་རྣམས་ལའང་བལྟས་པའི་མོད་ལ་བསྐམ། ནང་གི་སྒྲིབ་པ་ཅན་ནི་ཁ་ཁབ་མིག་ཙམ་ལྟོ་བ་ཡུལ་ལྗོངས་ཙམ་སོགས་མགོ་ལུས་མ་འཚམས་པ་དང༌། བཟའ་བཏུང་ཁོང་དུ་ཅུང་ཟད་སོང་བ་ན་ནང་ཁྲོལ་འཚིག་པའི་སྡུག་བསྔལ་ཟད་མི་ཤེས། སྔོན་སེར་སྣའི་སྒྲིབ་པའི་མཐུས་བྱས་ཚེ་ཚད་ངེས་པ་མེད། སྤྱིར་མི་ཡི་ཟླ་བ་གཅིག་ལ་ཞག་གཅིག་བྱས་པའི་རང་ལོ་ལྔ་བརྒྱའོ། །རྒྱ་མཚོ་ཆེན་པོའི་ནང་གི་བྱིངས་ན་གནས་པའི་དུད་འགྲོ་ཉ་བོ་ཆེ་དང་ཉ་མིད་དང་ཆུ་སྲིན་སོགས་ཆེ་བས་ཆུང་བ་ཁྱུར་མིད་བྱེད་པ་སོགས་ཕན་ཚུན་གཅིག་ལ་གཅིག་བཟའ་ཞིང༌། ཁ་འཐོར་བདག་ཏུ་མ་བཟུང་བའི་རི་དྭགས་རྣམས། རྒྱ། གོ་ར་སྟེ་ལག་དོང༌། དུག་མདའ། རྙི་ལ་སོགས་པ་ཐབས་དུ་མས་རྔོན་པས་དམ་ལ་བཞག་སྟེ་སྦྱོར་བ་རྩུབ་མོས་སྲོག་འཕྲོག་པ་དང༌། བདག་ཏུ་བཟུང་བ་མི་ལ་བརྟེན་པའི་དུད་འགྲོ་ཐམས་ཅད་ནི་བཀོལ་བའི་ཕྱིར་སྒ་སྲབ་སྣ་ཐག་སོགས་འདུལ་བར་བྱེད་པའི་བདག་པོས་འཛིན་ཅིང་ཞོན་འགེལ་བཏགས་དེད་བྱ་གཅོད་སྤུ་འབྲེག་གསོན་ཁྲག་འབྱིན་པ་སོགས་ཀྱིས་གནོད་པས་ཉམ་ཐག་ཅིང་བླུན་པས་མ་ཎི་རྡོག་གཅིག་འདོན་མི་ཤེས་པའི་གནས་སུ་སྐྱེ་བ་ཐོབ་ན་དེ་དུས་ཅི་ཞིག་བྱར་ཡོད་དེ་མེད་དོ། །ཚེ་ཚད་སྲིན་བུ་སོགས་ནི་ཡུན་ཙམ་ནས་ཀླུ་སོགས་ཁ་གཅིག་བསྐལ་པར་གནས་པར་བཤད་དོ། །སྲོག་འཚོ་བའི་མི་གཡོ་བའི་ལས་ཀྱི་མཐའ་ཤིན་ཏུ་རིང་པོས་བར་བསྐལ་ཉི་ཤུ་བསྲིངས་ཏེ་ཚེ་ཡུན་རིང་བས་འཁོར་བར་ངེས་འབྱུང་གི་སེམས་མི་སྐྱེ་བའམ་སྐྱོ་བའི་གོ་སྐབས་མི་དབྱེ་བའི་གཟུགས་མེད་དང༌། གནས་པའི་ཚེ་ན་ཐོས་བསམ་གྱི་རྟེན་ཤེས་པ་མངོན་གྱུར་འགགས་པ་བསམ་གཏན་བཞི་པའི་གནས་འབྲས་བུ་ཆེ་བའི་ཐད་གྲོང་དང་དགོན་པའི་ཚུལ་དུ་ཡོད། ཆོས་ཀྱི་འདུ་ཤེས་མེད་པའི་ལྷ་ནམ་འཆི་ཁར་རྟོག་པ་མངོན་གྱུར་དུ་ལྡང་བས་ཐར་པའི་ལམ་མེད་པར་འཛིན་པའི་ལོག་པར་ལྟ་བས་ངན་སོང་དུ་ལྟུང་བའི་ཕྱིར་ཁོམ་ལྡན་གྱི་ལུས་མིན་ནོ། །རྣམ་པ་མི་ཡི་གཟུགས་རྐང་པ་གཉིས་པའི་ཁྱོགས་ལ་རབ་ཏུ་བརྟེན་ནས་འགྲོ་ན་ཡང༌། ཆོས་ཀྱི་ཕྱོགས་ལ་ཤིན་ཏུ་རྨོངས་པ་དུད་འགྲོ་ལྟ་བུ་ལ་དེ་ཡི་འདུ་ཤེས་བསོད་ནམས་མ་ཡིན་པས་མི་དགེ་བའི་དམ་ལ་བཞག་སྟེ་དབང་དུ་བྱེད་ཅིང༌། སྡིག་པའི་ལས་ཐབས་སྣ་ཚོགས་པ་ལ་གཞུངས་པའི་སྡེ་ཀླ་ཀློ་རྣམས་དུག་མདའ་སོགས་ཀྱིས་འཚེ་བ་ལ་ཆོས་སུ་སྤྲོ་བའི་དུད་འགྲོ་ལས་ཀྱང་བླང་དོར་ཤིན་ཏུ་འཆོལ་བའི་ནགས་ན་འཁྱམས་ཏེ་ཐར་ལམ་མི་ཤེས་པས་སོ། །འདིར་རབ་བརྟགས་ཀྱི་རྒྱན་དུ་བཀོད་དེ་མིག་ནས་ཡིད་ཀྱི་བར་དབང་པོའི་མིག་གིས་གཟུགས་ལ་བལྟ་བ་སོགས་རང་རང་གི་དམ་བཅའ་ཉམས་པའི་ངག་རང་གི་བྱ་བ་སྨྲ་མི་ཤེས་པས་ཁྱད་པར་དུ་ཡིད་བླུན་པའི་ལྐུགས་པ་རྣམས། འཕགས་པའི་ས་ལ་གནས་པའི་དེད་དཔོན་དགེ་བའི་བཤེས་གཉེན་དག་དང་འཕྲད་ནས་ཆོས་ཐོས་པར་གྱུར་ཀྱང༌། ཉན་པ་པོ་རང་དབང་པོ་ཉམས་པའི་སྐྱོན་གྱིས་འཆད་པ་པོས་སྨྲས་པའི་ཚིག་དེ་ཡང་བྲག་ཅའི་ཆོ་གས་བཟུང་བའི་ཅ་ཅོའི་སྒྲ་བཞིན་དུ་ཚིག་དོན་གྱི་བརྡ་མི་འཕྲོད་པའི་ཕྱིར་བླང་དོར་གྱི་གནད་མི་ཤེས་པས་སྐལ་པ་ཆད་དེ་འཁོར་བའི་འབྲོག་དགོན་ཆེན་པོ་འཇིགས་སུ་རུང་བའི་གནས་དེར་སྡུག་བསྔལ་གྱིས་གདུང་བའོ། །ལས་ཉོན་གྱི་དབང་གིས་འཁོར་བར་སྐྱེ་བའི་གཏིང་མཐའ་ཐུག་པ་མེད་པའི་རྒྱ་མཚོ་ཆེན་པོ་ལྟ་བུ་བརྒལ་ནས་ཐར་པའི་གླིང་དུ་བགྲོད་པའི་གྲུ་བོ་ཆེ་མིའི་ལུས་རྟེན་ཐོབ་ཅིང་དབང་པོ་ཚང་བ། དོན་ཀྱང་ཤེས་པས་རྣམ་རིག་གི་བ་དན་ཐར་པའི་ཕྱོགས་སུ་གཡོ་རུང་བ་ཐོབ་ནས་ཀྱང༌། སླར་ཡང་རྟེན་བཟང་ཆུད་གཟོན་པའི་ལྟ་བ་མ་རུངས་པས་རྒྱུད་དཀྲུགས་ཏེ་སངས་རྒྱས་འཇིག་རྟེན་དུ་འབྱུང་ཞིང་ཡང་དག་པའི་ཆོས་བསྟན་པ་ལ་ཞུགས་ནས་མཉེས་པའི་ཐབས་རྣམ་གྲོལ་གྱི་ལམ་སྒྲུབ་པར་མི་བགྱིད་ཅིང༌། འཇིག་རྟེན་ཕ་རོལ་མེད་དོ་སོགས་ལས་འབྲས་ལ་ཡིད་མི་ཆེས་པའི་ལོག་པར་ལྟ་བ་འཛིན་པ་དེ་ནི་ཐར་ལམ་བར་དུ་གཅོད་པའི་བདུད་ཀྱིས་གཙེས་ཏེ་དབང་དུ་སོང་བ་ཡིན་པས་ཁོམ་ལྡན་མིན་ནོ། །བསྐལ་པ་ཆགས་ནས་ཞིག་གི་བར་ཐུབ་པ་རྣམས་ཀྱིས་སྤངས་པས་བསྟན་པའི་སྣང་བ་མེད་པར་མུན་པའི་བསྐལ་པ་དེ་ཡི་སྐབས་སུ་མི་ལུས་ཐོབ་ཀྱང་མི་ཕན་ཏེ། དཔེར་ན་སྐྱེས་བུ་རྐང་པ་ཆག་པ་ཞིག་གཅོང་རོང་མུན་ནག་འཐིབས་པོར་ལྷུང་བར་གྱུར་ན། དེ་སླར་ཡང་ལྡང་བར་བརྩོན་ཀྱང་ལམ་མི་མཐོང་ཞིང་བགྲོད་བྱེད་ཀྱི་རྐང་པ་མེད་པས་མི་ཐར་བ་ལྟར་རྣམ་པར་གྲོལ་བའི་ལམ་གྱི་སྣང་བ་ཡོད་པ་མིན་ཞིང༌། ཐར་པ་བགྲོད་བྱེད་ཀྱི་བསླབ་གསུམ་དང་བྲལ་བས་མ་རིག་པ་དང་ཉོན་མོངས་པའི་དབང་གིས་ཕྱིན་ཅི་ལོག་གི་ལམ་ལ་རྒྱུན་ཆགས་སུ་ལྡན་པ་དེ་ནི། ཉམ་ངའི་གནས་སུ་ལྷུང་ཞིང་ཐར་བར་མི་འགྱུར་བ་མ་ཟད་ཡི་དྭགས་དུད་འགྲོ་སོགས་ནས་དམྱལ་བའི་བར་འོག་ནས་འོག་ཏུ་འགྲོ་བས་མི་ཁོམ་མོ། །དེ་ལྟར་རྒྱུ་སྡིག་པ་འབྲས་བུ་སྡུག་བསྔལ་སྣ་ཚོགས་པ་བསྐལ་པ་འཐོར་བྱེད་ཀྱི་རླུང་འཁྲུགས་པ་ལྟ་བུའི་གནས་རིགས་རྣམས་སུ་ལུས་སྡུག་བསྔལ་གྱིས་ངལ་ཞིང་སེམས་སྐྲག་པ་དང་བཅས་པའི་རང་བཞིན་ནི། བསོད་ནམས་མི་དགེ་བའི་ངང་ཚུལ་རྙོག་པ་ཅན་དམ་པའི་ཆོས་ལ་རྒྱབ་ཀྱིས་ཕྱོགས་ནས་ཕྲག་པ་དོག་སྟེ་བསྒྲུབ་པའི་གོ་སྐབས་མེད་པའི་མི་ཁོམ་པ་བརྒྱད་དུ་མ་སྐྱེས་པའི་ཚུལ་ལ་ཡང་ཡང་བསམ་ནས་བླ་མ་དང་མན་ངག་ཟབ་མོ་ལ་བསྟེན་ནས་རང་གི་དལ་བ་དོན་ཡོད་པར་བྱ་བའི་ཕྱིར་ཐར་པའི་ལམ་བསྒྲུབ་པ་ལ་བརྩོན་པར་མཛོད་ཅེས་གདམས་པའོ། །ས་ཚིགས་དང་ཆོས་ཚིགས་ཀྱི་ཡུལ་དབུས་ས་གཞི་གཙང་མ་དང་འདྲ་བར་སྐྱེས་པ་དང༌། ལོ་མ་ཡལ་ག་ལྟ་བུའི་ཐོས་བསམ་བསླབ་པའི་རྟེན་དབང་པོ་དང་ཡན་ལག་དང་ཉིང་ལག་ཐམས་ཅད་རབ་ཏུ་རྫོགས་པ་དང༌། དད་པའི་གནས་རྒྱལ་བའི་བསྟན་པ་ལ་དད་པ་ཐོབ་པ་དང༌། སྒོ་གསུམ་གྱི་ལས་མཐའི་མེ་ཏོག་སེར་བས་མ་བཅོམ་པ་སྟེ་སྒོ་གསུམ་མཚམས་མེད་པ་ཆོས་དང་འགལ་བའི་སྡིག་ཏོས་མི་དགེ་བ་བྱེད་པ་དང་དཀོན་མཆོག་ལ་བློ་གཏད་ལོག་པ་སོགས་ཀྱིས་མ་བཅོམ་པའི་ཆོས་ཀྱི་རྟེན་མིར་གྱུར་པ་རྣམ་གྲོལ་གྱི་ཡོན་ཏན་ཐོབ་པའི་རྟེན་དཔག་བསམ་ལྗོན་པ་དང་འདྲ་བར་ཤིན་ཏུ་དཀོན་ཞིང་དོན་ཆེ་བས་རང་རྒྱུད་རྟེན་གྱི་འབྱོར་པ་སྟེ་ལྔ་པོ་ཚང་བ་འདི་ལ་སྙིང་པོ་ལོན་པ་ཞིག་ངེས་པར་གཅེས་སོ། །རྒྱལ་བ་འབྱུང་དཀའ་བ་ཨུ་དུམ་ཝ་ར་ལྟ་བུ་འཇིག་རྟེན་གྱི་ཁམས་འདིར་བྱོན་པ་དང༌། ཆོས་ཀྱི་འཁོར་ལོ་རིམ་པ་གསུམ་གྱི་མེ་ཏོག་ཁ་བྱེ་སྟེ་ཆོས་གསུངས་པ་དང༌། ལུང་རྟོགས་ཀྱི་བསྟན་པའི་ཚུལ་བཤད་པ་དང་སྒྲུབ་པའི་སྒོ་ནས་ནུབ་པ་མེད་པར་ད་ལྟ་ཡང་གནས་པ་དང༌། བསྟན་པ་ལ་ཡང་དག་པར་ཞུགས་ཤིང་དགེ་བའི་བཤེས་གཉེན་ཐར་པའི་ལམ་མཁན་དམ་པའི་གྲིབ་བསིལ་ལ་བསྟེན་པ་སྟེ་གཞན་འབྱོར་ལྔ་ནི་དེ་བས་ཀྱང་ཉུང་ངོ༌། །མྱུར་དུ་ལམ་ལ་བརྩོན་དགོས་པའི་རྒྱུ་མཚན་གང་གི་ཕྱིར་ན་རང་ཉིད་འབྱོར་པ་ལྔ་ཡིས་ཕྱུག་པའི་དཔག་བསམ་གྱི་ལྗོན་པ་ལྟར་དཀོན་པའི་དཔེ་དང༌། གཞན་དབང་རྐྱེན་གྱིས་འབྱོར་པ་ལྔའི་ཡོན་ཏན་ནི་དེ་བས་ཀྱང་དཀོན་ཏེ་ཨུ་དུམ་ཝ་རའི་མེ་ཏོག་དང་འདྲ་བར་གྱུར་པ་དེ་རང་གཞན་གཉིས་ཀའི་ཡོན་ཏན་ཟུང་དུ་ཚོགས་པའི་ཁྱད་ཆོས་འབྱོར་པ་རྣམ་པ་བཅུས། ཁྱད་གཞི་དལ་བ་བརྒྱད་ལ་ཟུང་དུ་འབྲེལ་ནས་འཁྱུད་པ་འདི་ལ་མི་ལུས་རིན་པོ་ཆེ་ཞེས་བརྗོད་དུ་རུང་བས་ད་ལྟ་སྙིང་པོ་ལོན་པར་མ་བྱས་ན་ཕྱིས་ནས་འདི་འདྲ་བའི་དལ་བ་སླར་མི་རྙེད་དོ། །རྙེད་དཀའ་བའི་རྒྱུ་མཚན་ཅིའི་ཕྱིར་སྟོང་གསུམ་རྒྱ་མཚོ་གཅིག་ཏུ་གྱུར་པའི་གཏིང་ན་རུས་སྦལ་ཞར་བ་ལོ་བརྒྱ་ན་ལྡང་བའི་མགྲིན་པ་དང་གཉའ་ཤིང་གི་བུ་ག་འཕྲད་པ་ལས་ཀྱང་དཀོན་པ་དང༌། གྲངས་ནི་མི་དང་དུད་འགྲོ་ཉིན་མཚན་གྱི་སྐར་མས་ཕྱེ་བ་དེ་སྙེད་ཀྱི་དུད་འགྲོ་དང༌། ཡི་དྭགས་དང་དམྱལ་བ་རྣམས་ལ་རིམ་པར་ཤེས་པར་འགྱུར་རོ། །རྙེད་དཀའ་ཞིང་དོན་ཆེ་བ་དེའི་ཕྱིར་རྟེན་དལ་བ་དང་འབྱོར་པའི་གྲུ་ཆེན་རང་དབང་དུ་འཛིན་པའི་དུས་འདིར། འཁོར་བའི་རང་བཞིན་སྡུག་བསྔལ་མཐའ་ཡས་ལ་གཏིང་ཟབ་པ་ཆུ་གཏེར་ལྟ་བུའི་ཕ་མཐའ་ཐར་པའི་སྐམ་སར་མ་བརྒལ་ན། ཆོས་ཀྱི་ལམ་དུ་ཞུགས་པའི་མགྲོན་པོས་རྣམ་གྲོལ་དོན་དུ་གཉེར་ཞིང་ཐོབ་པའི་སྐབས་བཙལ་བའི་ཚེ། འདྲེན་པའི་དེད་དཔོན་བླ་མ་དམ་པའི་གཟིངས་ཀྱི་ཁ་ལོ་བསྒྱུར་བའི་མཉན་པ་དང་འདྲ་བར་ཕྲད་པ་འདི་ཉིད་འབྲས་བུ་མེད་པར་བགྱིད་པ་ལ་མངོན་པར་ཕྱོགས་པ་ཡིན་པས་དེའི་ཚུལ་ལ་བསམ་ནས་འབད་པར་གྱིས་ཤིག་ཅེས་པ་ལྟ་བུའོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། དལ་འབྱོར་གྱི་རྣམ་པར་དབྱེ་བའི་ཚོམས་ཏེ་ཚོམས་ཞེས་པ་ནི་གཞུང་སྐོར་ཚོམས་སུ་བཅད་པའི་དོན་ཏེ་ལེའུ་དང་པོའོ།། །།མདོ་སྡུད་པ་ལས། མཁའ་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན། །དེ་ལ་ས་ཆེན་འདི་བརྟེན་དེ་ལ་འགྲོ་བ་བརྟེན། །ཞེས་པ་ལྟར་འཁྲུལ་ངོར་གྱི་སྲིད་པ་སྟེ་ཁམས་གསུམ་མི་འཕོ་བའི་བརྟན་པ་སྣོད་དང་གཡོ་བ་བཅུད་ཀྱི་སེམས་ཅན་གཉིས་པོ་ཆགས་པ་དང་གནས་པ་དང་འཇིག་པ་དང་སྟོང་པ་སྟེ་བཞི་པོ་རེ་རེ་ལ་བར་བསྐལ་ཉི་ཤུ་རེ་ཡོད་པའི་བར་བསྐལ་བརྒྱད་ཅུའི་ངོ་བོས་བསྐལ་པ་ཆེན་པོ་ཞེས་པའི་ཚད་དུ་བཏགས་ཤིང་གྲགས་པ་དེའང་སྣོད་འཇིག་པའི་རང་བཞིན་ལ་བཅུད་འཁྲུལ་པའི་སེམས་ཅན་གྱི་རྟེན་དུ་གྱུར་པའི་གླིང་བཞི་རི་རབ་འདོད་ལྷ་ཚངས་པའི་འཇིག་རྟེན་དང་བཅས་པ་ལ་གླིང་བཞི་པའི་འཇིག་རྟེན་གྱི་ཁམས་ཞེས་བྱ་ཞིང༌། དེ་སྟོང་ལ་སྤྱི་ཕུད་སྟོང་གི་འཇིག་རྟེན་དང༌། དེ་སྟོང་ལ་བར་མའི་འཇིག་རྟེན་དང༌། དེ་སྟོང་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་ཞེས་པའི་མིང་གིས་སྨ་ཕབ་པའི་དངོས་པོ་འདི་དག་སྐྱེ་བ་ནས་བཟུང་འཆི་བའི་རང་བཞིན་ཏེ་སྣོད་བཅུད་སོགས་ཆགས་གནས་འཇིག་སྟོང་བཞིའི་རྗེས་སུ་ཆད་པ་གཅོད་པ་ལ་མེ་བདུན་དང་ཆུ་གཅིག་གི་རང་བཞིན་འོང་སྟེ། མི་རྟག་པའི་གཏམ་ལས། གང་དུ་ས་རྣམས་འཇིག་འགྱུར་ཏེ། །ལྷུན་པོའང་ཐལ་བར་འཇིག་པ་དང༌། །རྒྱ་མཚོའི་ཆུ་ཡང་སྐམ་གྱུར་ན། །ལུས་ཅན་དེ་དག་སྨོས་ཅི་དགོས། །ཞེས་པ་ལྟར་རོ། །གདུལ་བྱའི་གཙོ་བོ་ལྷ་མིའི་སྟོན་པ་ངོ་བོ་ཆོས་སྐུ་བགྲེས་རྒུད་དང་བྲལ་བ་རྡོ་རྗེའི་སྐུ་མཆོག་མངའ་བའི་རྒྱལ་བ་རྣམས་ཀྱང་འདུས་བྱས་མི་རྟག་ལ་རྟག་པར་ལྟ་བའི་ལོག་རྟོག་ཅན་རྣམས་ལ་གཟིགས་ནས་བཞུགས་པ་དུས་ལས་ཡོལ་བ་ཡི་ཚུལ་གྱིས་གཞོམ་གཞིག་དང་བྲལ་བའི་ཆོས་ཉིད་བཏང་ཕྱིར་སྲི་ཞུ་ལྷོད་པར་གྱུར་ནས་མྱང་འདས་ཞི་བ་ཆོས་ཀྱི་དབྱིངས་ལ་དགྱེས་པའི་མངོན་རྟོགས་ངོམ་ན་ལྦུ་བ་དང་འདྲ་བ་སྐྱེས་བུའི་ཚེ་སྲོག་ནི་མི་རྟག་པ་ལྟ་ཅི་སྨོས། འཇིག་རྟེན་པའི་བསམ་གཏན་བཞི་དང་སྙོམས་འཇུག་རྣམས་གྲུབ་ནས་སྲིད་རྩེའི་བསྐལ་ཆེན་བརྒྱད་ཁྲི་ཐུབ་པ་ནས་རིམ་བཞིན་ཚངས་རིས་ཀྱི་བར་བསྐལ་པར་གནས་པའི་ཁུར་དེ་ཡང་གཏན་བདེའི་དོན་མེད་པར་གྱུར་ཏེ་དཀར་ནག་གི་ལས་འབྲས་ཀྱི་ཕྱི་བཞིན་འབྲངས་ནས་ཐེ་ཚོམ་མེད་པར་འཆི་བའི་གནས་སྐབས་དེ་མཐོང་ནས། ཚངས་པ་དང༌། དབང་ཕྱུག་དང༌། བདེ་འབྱུང་སྟེ་ཁྱབ་འཇུག་སོགས་མངོན་ཤེས་དང་རྫུ་འཕྲུལ་མངའ་བ་འཁོར་ལོས་བསྒྱུར་བ་རྣམས་ཀྱང་བདེ་བས་མ་ངོམས་བཞིན་དུ་འཆི་བདག་གི་བདུད་ལས་གཟུར་བའི་ཐབས་དང་བྲལ་ན་བདག་ལྟ་བུ་འཆི་བ་ལས་ཐར་པའི་ཐབས་མི་བསམ་པ་ལྟ་ཅི་སྨོས། མཐོ་རིས་ཀྱི་བདེ་འབྱོར་ཕུན་སུམ་ཚོགས་པ་དཔེར་ན་དབྱར་ཟླ་གསུམ་ཙམ་དུ་སྨན་ལྗོངས་ཉམས་དགར་འཁྲིགས་པ་ལྟ་བུ་ཡི་བློ་བག་ཕེབས་པའི་སྐྱེས་བུ་རི་དྭགས་ལྟ་བུའི་ཚེ་སྲོག་ཡིད་ལ་ཡང་ནས་ཡང་དུ་བགྱིད་པའི་རི་སུལ་ན་བལྟར་མི་མངོན་པའི་རྔོན་པ་ལྟ་བུ་གཤིན་རྗེའི་ཆོམ་པོ་ལག་ན་བེ་ཅོན་ཅན་དེས་འཆི་བའི་རྒྱར་འཛུད་པའི་སྒོ་ནས། དོན་དུ་གཉེར་བ་དེ་ནི་གཅིག་པུ་འཆི་བ་ཉིད་ལས་བྱ་བ་ཐབས་གཞན་མི་སེམས་ཏེ། རྟ་དབྱངས་ཀྱིས། ས་འམ་འོན་ཏེ་མཐོ་རིས་ན། །སྐྱེས་ནས་ལ་ལ་མ་ཤི་བ། །འགའ་ཞིག་ཁྱོད་ཀྱིས་མཐོང་བའམ། །ཐོས་སམ་འོན་ཏེ་ཐེ་ཚོམ་ཟ། །ཞེས་སོ། །སོས་ཀའི་དུས་སུ་ཉི་ཟེར་གྱི་ཚ་བས་གདུང་བའི་རེག་བྱ་ཙམ་ཡང་མི་བཟོད་པར་སྐྱེ་བོ་དག་གིས་སྟོན་ཟླ་གསལ་བའི་འོད་ཀྱིས་བསིལ་དྲོད་སྙོམས་པའི་དུས་ལ་དགའ་བར་གྱུར་ནས་ཡིད་སྨོན་བྱེད་ན་ཡང་དེའི་བར་དུ་ཉིན་ཞག་བརྒྱ་སྟེ་མང་པོ་ཡིས་རང་གི་ཚེ་ཐལ་ཞིང་འཆི་ལ་ཇེ་ཉེར་སོང་བའི་གནས་ཚུལ་ལ་སེམས་ནས་སྐྲག་པར་གྱུར་བ་མེད་དེ། མི་རྟག་པའི་གཏམ་ལས། ལས་ཀྱི་ལམ་ཞུགས་ཐོབ་པ་ཡིས། །སྣོན་པ་མེད་པའི་སྐྱེ་བོ་གང༌། །ཉེས་པ་མེད་པར་སོང་གྱུར་པ། །དེ་ལ་ཅི་ཞིག་ཡོངས་སུ་གདུང༌། །ཞེས་སོགས་གསུངས་པ་ལྟར་རོ། །འདི་ལྟར་སྐྱེས་བུ་གྱད་སྟོབས་པོ་ཆེའི་སྟོབས་དང་ལྡན་པ་བཞིའི་རྩོལ་བས་རང་རང་གི་གདོང་གི་ཕྱོགས་སུ་མདའ་རེ་འཕངས་པར་བྱས་ལ་ཉག་ཕྲན་བཞི་པོ་དེ་སྐྱེས་བུ་མགྱོགས་པའི་མཐར་ཐུག་པ་གཅིག་གིས་བར་སྣང་ནས་དུས་གཅིག་ཏུ་ས་ལ་མི་རེག་པར་འཛིན་ནུས་པ་ཞིག་ཡོད་ན། དེ་ཤིན་ཏུ་མྱུར་ཡང་དེ་བས་ལས་ཀྱི་རྫུ་འཕྲུལ་གྱིས་འགྲོ་ཞིང་ས་ལ་རྒྱུ་བའི་ཡི་དྭགས་མགྱོགས་ཏེ། དེ་བས་ཀྱང་ནམ་མཁར་རྒྱུ་བའི་ཡི་དྭགས་མགྱོགས་ཤིང༌། དེ་བས་ཀྱང་ཉི་མ་དང་ཟླ་བའི་ཤིང་རྟ་མགྱོགས་ལ། དེ་བས་ཀྱང་བསོད་ནམས་ཀྱི་སྟོབས་ཐོབ་པའི་ལྷ་རྣམས་མགྱོགས་ཤིང༌། དེ་ཀུན་ལས་མགྱོགས་པ་མི་ཡི་ཚེ་འགྲོ་བ་ཡིན་ནོ། །ལང་ཚོ་དར་ལ་བབ་ཚེ་ལུས་བཀྲག་སྟོབས་དང་ལྡན་པ་ཡིན་ཡང་འབྱུང་བ་རྒུད་ནས་རྒ་བའི་ཆད་པས་འཚེ་བས་ཉམ་ཐག་པ་དང༌། འདུ་བ་བཞི་པོ་ཆ་སྙོམས་ཤིང་རྣལ་མར་གནས་པ་ཡང་ན་བས་ལུས་སེམས་སྡུག་བསྔལ་གྱིས་དཀྲུགས་པ་དང༌། འཁོར་དང་ལོངས་སྤྱོད་བསྟོད་གྲགས་ལ་སོགས་པ་ཕུན་སུམ་ཚོགས་པའི་བདེ་སྐྱིད་རྣམས་སྔོན་བསགས་དགེ་བའི་ལས་དང་ད་ལྟའི་རྐྱེན་འགའ་ཞིག་གིས་ལས་རྟེན་ཅིང་འབྲེལ་བར་འབྱུང་བའི་ཚུལ་གྱི་འཕྲལ་སྣང་ཙམ་ཡོད་པའང་འདུས་འབྲལ་བསགས་འཛད་སོགས་ཀྱི་རྒུད་པས་འཇོམས་པ་དང༌། ཚེའི་འཕེན་པ་རྫོགས་པའམ་གློ་བུར་གྱི་རྐྱེན་གྱིས་འཆི་བའི་འཇིགས་པས་འཚེ་བའི་སྲོག་འདི་ལ་རྒོལ་བ་མྱུར་པོར་འོང་ཚུལ་རྒྱལ་པོ་ལ་གདམས་པའི་མདོ་ལས་དཔེ་དང་བཅས་བསྟན་ཏོ། །དུས་གང་ཚེ་གཅེས་འཛིན་གྱི་ཕུང་པོ་འདི་གཤིན་རྗེའི་གཡུལ་ངོར་ཕམ་པ་གང་ཟག་དེ་ལ་ལག་ན་རྡོ་རྗེས་ཀྱང་སྐྱབས་དང་དཔུང་གཉེན་མི་ནུས་པའི་ཕྱིར་སྐྱབས་དང་བྲལ་བའི་སྡུག་བསྔལ་གྱི་གཡང་སར་རྒྱུག་པའི་གནས་སྐབས་ཟས་གོས་སོགས་འཚོ་བའི་མདངས་ལང་ཚོ་ནི་མེ་ཏོག་སད་ཀྱིས་བཏབ་པ་ལྟར་དང༌། དབང་པོ་ལྔ་ཡི་བྱེད་ལས་ནི་རླུང་ནང་མར་མེ་ལྟར་བདས་པས་བྱ་བ་ཐམས་ཅད་རྣམ་པར་སྤངས་ལ། གནད་འཆད་པའི་ཟུག་རྔུ་ལ་སྨན་གྱིས་བཅོས་སུ་མེད་པས་སྨན་དཀར་པོ་ཆིག་ཐུབ་ཡོད་ཀྱང་མི་ཕན་པ་དང༌། སྨན་པ་འཚོ་བྱེད་གཞོན་ནུ་ལྟ་བུ་དག་ཡོད་ཀྱང་མིག་རིག་རིག་པོར་བལྟ་ཞིང་དེ་ལ་འབྲོས་ཤིང་བྱ་ཐབས་ཟད་དོ། །འདེགས་བྱེད་ཀྱི་རླུང་ཉམས་པས་ལུས་ཟུངས་བསྒུལ་བསྐྱོད་བྱེད་པ་ལ་ངལ་བ་ཐོབ་ཅིང་རླུང་གི་གནས་མལ་འཕྱུགས་པས་ཡན་ལག་གཡོབ་པ་དང༌། འབྱུང་འཇུག་དལ་བར་མི་ནུས་པའི་དབུགས་ནི་དབང་མེད་མཐུ་ཡིས་གཡོབ་ཅིང་ངར་ངར་པོར་འགྱུར་རོ། །ཕ་མ་སོགས་ཉེ་དུ་དང་མཛའ་གྲོགས་སོགས་འབྲེལ་བས་མཐའ་ནས་བསྐོར་ཞིང་གདུང་བ་བརྒྱ་ཕྲག་གིས་དབུགས་དབྱུང་ན་ཡང༌། ད་ལྟ་ཆོས་ཕྱོགས་ལ་བཤོལ་འདེབས་ཤིང་ཐེབས་པའི་ལྕགས་ཀྱུ་དང་འདྲ་བའི་བརྟན་པ་དང་བྲལ་བར་འགྱུར་ཞིང༌། དེ་ཡི་དབུགས་ཀྱི་འགྱུ་བ་བརྩེགས་ཤིང་བརྩེགས་ཏེ་ཤིན་ཏུ་ཕྲ་བའི་རྟ་རྔའི་རྩེ་ལྟར་ཇེ་ཕྲར་གྱུར་པ་དེ། སྙིང་རྗེ་མེད་པའི་འཆི་བདག་གི་དགྲ་སྟྭ་རྣོན་པོ་དབལ་ཅན་གྱིས་གཟས་ཤིང་བཀས་པར་གྱུར་པས། དེའི་མོད་ལ་གསོན་དུས་དགའ་བའི་རྣམ་འགྱུར་མཛེས་པ་སྤངས་པའི་གདོང་སྔོ་ཧམ་མེ། སོ་སྐྱ་ཙིག་གེ །མིག་མཆི་མས་གང་ཞིང་མགོ་ལྤགས་ལྟག་པར་བསྡུས་ཏེ་སོ་ཞོ་ངོམ་བཞིན་དུ། ལས་ཀྱི་དབང་གིས་སྲིད་པ་བར་མ་མདོའི་མུན་ནག་སྟུག་པོས་མདུན་བསུས་ཤིང་ལས་ཀྱི་རླུང་དམར་དྲག་པོས་བདས་ཏེ། གནས། རྟེན། སྤྱོད་ལམ། ཟས། སྲོག །རྣམ་ཤེས་ཏེ་མ་ངེས་པའི་རྟགས་དྲུག་འབྱུང་བ་དང༌། ཆགས་སྡང་རྨོངས་གསུམ་གྱི་སྣང་བ་ཡ་ང་བའི་གཡང་ས་གསུམ་སྟེ་སྐྱ་ཐ་ལེ་བ། དམར་ཟང་ངེ་བ། ནག་ངམ་མེ་བ་རྣམས་དང༌། འཇིགས་པའི་སྒྲ་བཞི་འབྱུང་སྟེ་ས་རླུང་ལོག་པས་རི་བོ་ཉིལ་བའི་སྒྲ་དང༌། མེ་རླུང་ལོག་པས་ནགས་ཚལ་ཚིག་པའི་སྒྲ་དང༌། ཆུ་རླུང་ལོག་པས་རྒྱ་མཚོ་འཁྲུགས་པའི་སྒྲ་དང༌། རླུང་གི་རླུང་ལོག་པས་དུས་ཀྱི་རླུང་སྒྲ་དྲག་པོ་ལྟ་བུ་སྟེ་འཁྲུལ་སྣང་འཇིགས་སྐྲག་དུ་མར་འཇུག་དགོས་པར་འགྱུར་ན་ད་ལྟ་ནས་མི་རྟག་པའི་ལྕག་གིས་བསྐུལ་བར་རིགས་སོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། མི་རྟག་པའི་ཚོམས་ཏེ་ལེའུ་གཉིས་པའོ།། །།གང་ཞིག་དེ་ལྟར་འཇིག་རྟེན་ཕ་རོལ་གྱི་གནས་སུ་སོན་པ་དེ་རྣམས་ཕྱི་མ་སྲིད་པ་མཐོ་དམན་གྱི་གོ་འཕང་སྟེ་གང་དུ་སྐྱེ་བའི་གནས་སུ་འཕེན་པར་བྱེད་པའི་ལས་གང་གི་ཐ་གུས་འདོགས་པ་སྟེ་ལྕགས་ཀྱུས་ཟིན་པའི་ཉ་ལྟར་དེ་དང་དེར་གདོན་མི་ཟ་བར་འགྲོ་བའི་ཚུལ་ནི། རྒྱུ་དགེ་བ་སྤྱད་པ་དང་སྡིག་པ་ལ་གོམས་པ་ཁོ་ནས་ཉེ་བར་ལེན་པ་སྟེ། དོན་དམ་ལ་སྐྱེ་བ་མེད་ཀྱང་ཀུན་རྫོབ་བདེན་པ་ཙམ་དུ་ལས་འབྲས་བསླུ་བ་མེད་པ་ཡིན་ལ། དེ་ཉིད་དཔེ་དོན་གྱིས་སྟོན་པའི་ཕྱིར་གང་ཞིག་དཔེར་ན་ཏིག་ཏ་དང་རྒུན་འབྲུམ་སོགས་ཁ་བ་དང་མངར་བའི་ས་བོན་རྣམ་པ་སྣ་ཚོགས་བཏབ་པའི་མཐུ་ཡིས། ཞིང་པ་རྣམས་ཀྱི་ཐོག་སྐྱེ་བ་ན་དེ་ལ་རོ་དེ་དང་དེ་གསལ་ཞིང་མངོན་པ་བཞིན་དུ་སྐྱེ་བ་གཞན་ཏེ་ཚེ་སྔ་མ་རྣམས་སུ་རྣམ་པ་དུ་མར་རྒྱུད་ལ་འདྲིས་ཤིང་གོམས་པར་བྱས་པའི་དགེ་སྡིག་སྣ་ཚོགས་ཀྱི་ལས་ཚུལ་མང་པོས་འགྲོ་བ་འདིའི་གནས་རིགས་བདེ་སྡུག་སྣ་ཚོགས་བྱས་སོ། །དཔེར་ན་ས་བླ་སྟེ་ནམ་མཁའ་མཐོན་པོར་གཤེགས་པའི་མཁའ་ལྡིང་གི་གྲིབ་མ་དེ་ཉིད་རེ་ཞིག་མཐོ་བའི་རྐྱེན་གྱིས་བལྟ་བར་མི་མངོན་ན་ཡང༌། གཟུགས་ཅན་ཉིད་དང་འདུ་འབྲལ་སྤངས་པ་བཞིན་དུ་རྐྱེན་སྲེད་ལེན་ཚོགས་ཤིང་འབྲས་བུ་སྨིན་པའི་དུས་ལ་བབ་ཚེ་འགྲོ་བ་སོ་སོའི་གནས་ལུས་བདེ་སྡུག་སོགས་ལྷག་པར་མངོན་པར་འགྱུར་ཏེ། མདོ་ལས། ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབ་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་སོ། །ཇི་སྲིད་དངོས་འཛིན་མ་ཟད་བར་དུ་བསོད་ནམས་མ་ཡིན་པའི་བྱ་བ་ཕྲ་ཞིང་ཕྲ་བའི་འབྲས་བུ་ཆེན་པོ་འབྱིན་པར་བྱེད་པ་རྟ་གདོང་རྒོད་མ་ཁ་ཡི་མེས་ཏེ་བ་ཚྭ་ཅན་གྱི་རྒྱ་མཚོའི་མཐར་འཁོར་བའི་རྡོ་སོལ་གྱི་ལྕགས་རི་དང་འདྲ་བ་དེས་འགྲོ་བ་རྣམས་དགེ་བའི་ལས་ཀྱིས་མཐོ་རིས་སུ་སྐྱེ་བ་གྲངས་མང་རྒྱ་མཚོའི་རླབས་དང་འདྲ་བ་དག་ཀྱང་སྐེམ་ཞིང་མི་འཕེལ་བར་བྱེད་ནུས་ཤིང༌། རྣམ་མཁྱེན་རིན་ཆེན་གླིང་དུ་བགྲོད་བྱེད་གྲུ་གཟིངས་ལྟ་བུའི་ལུས་བཤིག་ཅིང་མ་རུངས་པར་བྱེད་པའི་དཔེ་དང་དོན་གྱི་རིམ་པ་རྒྱ་ཆེར་དྲན་པ་ཉེར་བཞག་དང༌། ལས་བརྒྱ་པ་དང༌། རྒྱ་ཆེར་རོལ་པ་དང༌། རྣམ་འབྱེད་ལ་སོགས་པས་བསྟན་པ་རྣམས་བལྟ་བར་ཞལ་འཕངས་པའོ། །མི་དགེ་བའི་འབྲས་བུ་སྡུག་བསྔལ་གྱིས་མནར་ལ་ཤིན་ཏུ་བརྟུལ་ཕོད་པ་སྟེ་འཛེམ་མེད་དུ་གནོད་པར་བྱེད་པའི་ངན་སོང་གསུམ་པོ་དག་གིས་བསོད་ནམས་ཆ་མཐུན་དགེ་བ་བཅུའི་འབྲས་བུ་མཐོ་རིས་ཀྱི་དགའ་བདེ་ལ་སྤྱོད་པའི་དཔུང་པ་བཙན་ཞིང་གནོད་པའི་གཡུལ་གྱིས་རྣམ་པར་མི་བརྫི་བའི་དཔའ་བོའི་ཡུལ་ལ་རེ་ཞིག་གཡུལ་གྱི་ཕྲུ་མས་ཏེ་དམག་དཔུང་བསྒྲིགས་པའམ་བཀོད་པ་ལྟ་བུས་བཏབ་སྟེ་འཇོམས་པར་གྱུར་པ་མ་མཆིས་ནའང༌། འོན་ཏེ་དགེ་བའི་དམ་བཅའ་ཉམས་ནས་མི་དགེ་བ་བཅུ་ལ་སྤྱོད་པ་མཐའ་དག་ངན་སོང་གསུམ་པོ་ཁྱོད་ཀྱི་དབང་དུ་སོང་སྟེ་དེའི་ཚུལ་ཡང༌། གང་ཟག་ལ་ལས་གཏན་གྱི་འདུན་མ་ཡང་དག་པའི་ཚུལ་ཁྲིམས་མཁན་སློབ་སོགས་ལས་བླངས་ཀྱང་འདོད་ཆགས་སོགས་ཉོན་མོངས་པའི་རྟོག་ངན་རེ་རེའི་དབང་གིས་ཕམ་པ་སོགས་ལྟུང་བས་ཉམས་པ་དང༌། ལ་ལའི་ནི་ལོངས་སྤྱོད་སོགས་ཀྱི་ཕྱིར་སེམས་ཅན་བསད་ནས་ཚེ་ཐུང་བའི་ལས་གསོག་པ་དང༌། ལ་ལའི་ནི་ཞེ་སྡང་སོགས་ཀྱི་གཡུལ་ངོར་ཞུགས་ཏེ་སྲོག་འདོར་བ་དང༌། ལ་ལའི་ནི་དགེ་ལ་ཕྱོགས་ཕྱིར་ཟས་གོས་ལ་སོགས་པའི་དཀའ་ཐུབ་ལ་ཡུན་རིང་གནས་ནས་སླར་ཡང་འདོད་པའི་ཁྱིམ་ཐབས་སུ་ཞུགས་པ་དང༌། ལ་ལའི་ནི་ཆོས་ཐོས་བསམ་ལ་ཆེ་ཐང་དུ་འབད་ཀྱང་ཆོས་བརྒྱད་ཀྱི་རྟོག་པའི་སྣ་སྐྱིལ་མ་ནུས་ཏེ་འཇིག་རྟེན་གྱིས་གཡེང་བ་དང༌། ལ་ལའི་ནི་ནོར་དཀོན་མཆོག་གི་ཞིང་ལ་མི་གཏོང་བར་གཉེན་ངོ་དང་གྱོད་སོགས་ལ་འཛད་པ་དང༌། ལ་ལའི་ནི་བདག་དང་ཆོས་ཀྱི་དབང་དུ་བྱས་ནས་ཉེས་སྤྱོད་ལ་འཛེམ་པའི་ངོ་ཚ་ཤེས་པ་དང༌། ལ་ལའི་འཇིག་རྟེན་དབང་དུ་བྱས་ནས་ཉེས་སྤྱོད་ལ་འཛེམ་པའི་ཁྲེལ་ཡོད་པ་དེ་རྣམས་ཐོག་མེད་ནས་གོམས་པའི་སྟོབས་ཀྱིས་ཉེས་སྤྱོད་སྣ་ཚོགས་ལ་འཇུག་སྟེ། དགེ་ཕྱོགས་གཡེལ་ནས་སྡིག་པའི་ཆེད་དུ་གཏོང་བ་ཤིན་ཏུ་མང་བས་དེ་རྣམས་ངན་སོང་གི་གནས་སུ་འབབ་ཅིང་གཞོལ་བར་འགྱུར་རོ། །རང་ཉིད་ཀྱིས་བྱས་པའི་སྡིག་པ་རང་གིས་མྱོང་བ་མ་ཟད་གཞན་གང་གི་ཕྱིར་བྱས་པ་ཡང་ཡོན་གནས་མཆོག་གསུམ་དང་ཉེ་དུ་དང་འཁོར་འབངས་དང༌། ཡུལ་ཁམས་བསྲུང་བའི་སླད་དུ་མ་བརྟགས་པའི་ཀུན་སློང་དེ་རང་དོན་ཡིན་ཏེ་གཡུལ་འཁྲུགས་སོགས་མི་དགེ་བའི་ཀུན་སློང་སྟོབས་ཆེན་གྱི་སྡིག་པའི་ལས་ནི་རྣམ་སྨིན་གཏོས་ཆེ་བས་གཉིས་འཐུང་སྟེ་གླང་པོ་ཆེ་ལྟ་བུ་སྤོང་སེམས་ཀྱི་ཐག་པས་དཀྲིས་པ་བཏང་སྟེ་བག་མེད་དུ་སྤྱོད་ནའང༌། དེའི་རྣམ་སྨིན་ནི་གཞན་ལ་བགོ་བཤའ་བྱ་རུ་མེད་པ་ཡིན་ནོ། །ལོངས་སྤྱོད་ཀྱི་རྙེད་པ་ལ་བརྐམ་ཞིང་ལུས་སེམས་བདེ་བ་འབའ་ཞིག་ལ་སྲེད་པ་དང་ལྐོག་ཏུ་སྙན་པ་བརྗོད་པ་ལྷུར་ལེན་པ་དང༌། དངོས་སུ་མངོན་དུ་བསྟོད་ན་སེམས་ཁེངས་པར་འགྱུར་ལ། དེ་བཞི་པོ་གང་ལས་ཅིག་ཤོས་མི་མཐུན་པའི་ཕྱོགས་མ་རྙེད་པ་དང༌། མི་བདེ་བ་དང༌། མི་སྙན་པ་དང༌། སྨད་པ་སྟེ་བཞི་ཡིས་སྨ་ཕབ་སྟེ་ཡིད་མི་བདེ་ཞིང་སེམས་ཁོང་དུ་ཆུད་པའི་བྱིས་པ་སོ་སོའི་སྐྱེ་བོ་འདི་དག་འཇིག་རྟེན་ཆོས་བརྒྱད་ཀྱིས་བསླུས་སོ། །འཇིག་རྟེན་གྱི་ཆོས་བཅུ་གསུམ་ནི། རིགས་༡གཙང་བ་གཟུགས༢་ཆེ་མཛེས་འཁོར་ལོངས་སྤྱོད་སོགས་དབང་ཐང༣་ལ་སོགས་ཏེ་སོགས་ཁོང་དུ་ལུགས་གཉིས་ཀྱི་རྣམ་བཞག་མང་པོ་ཤེས་པའི་ཐོས་པ༤་དང༌། ན་ཚོད་དར་ལ་བབ་པའི་ལང་ཚོ༥་སྟེ་ལྔས་མགོ་འཕང་བསྟོད་ཅིང་དྲེགས་པ་དང༌། བརྩོན་འགྲུས་ཀྱི་མི་མཐུན་ཕྱོགས་སྙོམས་ལས༦་སམ་ལེ་ལོ་འཕྱེ་བོ་ལྟ་བུའི་ཕག་ཏུ་ཡིབ་པ་སྟེ་དབང་དུ་སོང་སྟེ་མི་བརྩོན་པས་དགེ་བ་མི་སྐྱེད་པ་དང༌། ཐོབ་བྱ་མ་ཐོབ་བཞིན་དུ་ཐོབ་སྙམ་པས་མངོན་པའི་ང་རྒྱལ༧་མ་རུངས་པས་ཀུན་ནས་སློང་བས་ཡོན་ཏན་རྒྱུད་ལ་སྐྱེ་བའི་གོ་སྐབས་མེད་པ་རྣམས་དང༌། དཀའ་ཐུབ་དམ་པའི་ཆོས་ཀྱི་དཔལ་ལ་སྡང་བ་སྟེ་སྔར་ཡོད་ཉམས་པ་དང༌། ཕྱིས་མི་སྐྱེ་བར་བྱེད་པའི་སྲིན་པོར་འགྱུར་བའི་ཆགས༨་སྡང༩་གཉིས་དང༌། སྦྱིན་པའི་མི་མཐུན་རང་གི་ཕུན་ཚོགས་ལ་བརྐམ༡༠་པ་དང༌། བདག་དང་ལོངས་སྤྱོད་ལ་སྲེད་པས་ཆགས་སེམས༡༡་ཀྱི་ནུས་པ་བརྟན་པོར་གྱུར་པ་ཡིས་ཟིལ་གྱིས་གནོན་པའི་དབང་གིས་བསམ་པ་རབ་ཏུ་མི་བརྟན་པའི་གྱ་གྱུའི་འདུ་ཤེས་དང་འགྲོགས་པའི་གཡོ་རྒྱུའི་འཁྲི་ཤིང་བཅུ་གསུམ་པོ་དེ་དག་གིས། གཞན་ཕ་རོལ་པོ་དག་རྨོངས་ཤིང་མགོ་བསྐོར་བར་བྱས་ཏེ་ལོངས་སྤྱོད་སོགས་ཀྱིས་བདག་ཉིད་བསྲུང་ནའང་དུག་ལྡན་གྱི་བཟའ་བ་ཁོང་དུ་ཆུད་པ་བཞིན་འདི་ཕྱིའི་གནོད་པ་ཆེན་པོ་དེ་ནི་རང་གི་ཁོང་དུ་ཞུགས་ནས་བརླག་པའི་ཕྱིར་དགྲ་བཞིན་སྤང་བར་བྱའོ། །འཁོར་བར་འདུ་བྱེད་པའི་དཀར་པོ་དགེ་བ་དང་ནག་པོ་མི་དགེ་བའི་ལས་ཀྱི་རྣམ་པར་སྨིན་པའི་འབྲས་བུ་བདེ་སྡུག་གཉིས་ནི་ཕྱི་རོལ་གྱི་རྒྱུ་འབྲས་ལས་ཀྱང་འཕེལ་ཆེ་སྟེ། ས་བོན་ཉུང་ངུ་ལས་ཀྱང་འབྲས་བུའི་གཟུགས། སྦོམ་པོའམ་ཆེན་པོར་བསྐྱེད་པ་མི་དབང་ང་ལས་ནུས་སྔོན་ཁྱེའུར་གྱུར་པའི་ཚེ་སངས་རྒྱས་རྣམ་པར་གཟིགས་ལ་སྲན་མ་སྤར་གང་གཏོར་བས་བཞི་ལྷུང་བཟེད་དུ་སོང༌། གཉིས་ཐུགས་ཀར་ཕོག །གཅིག་ན་བཟར་ཆགས་པ་སྟེ་སྲན་མ་རྡོག་པོ་དེ་བདུན་ལས་གླིང་བཞིར་དབང་བའི་གསེར་གྱི་འཁོར་ལོས་བསྒྱུར་བའི་རྒྱལ་པོར་གྱུར་ཅིང༌། རིམ་པས་རྒྱལ་ཆེན་བཞི་དང་སུམ་ཅུ་རྩ་གསུམ་གྱི་གྱི་གནས་སུ་ལྷའི་དབང་པོ་སོ་གཉིས་དང་སྟན་ཕྱེད་པ་ལ་འདུག་པའི་དབང་ཐང་ཅན་དུ་གྱུར་པ་དང༌། ཤཱ་རིའི་བུས་དགྲ་བཅོམ་ཞིག་ལ་རས་ཡུག་ཕུལ་བས་ཤེས་རབ་ཆེ་བ་སོགས་དང༌། དགེ་སློང་ཞིག་ལ་ཟླ་བོས་མི་གཙང་བ་ཟོ་སྨྲས་པས་མངལ་གྱི་སྲིན་བུ་དང༌། བཤང་ཁང་དུ་སྲིན་བུར་སྐྱེས་པ་ལ་སོགས། ཇི་སྐད་དུ། དགེ་བ་ཆུང་ངུ་དག་ལ་ཡང༌། །མི་ཕན་སྙམ་དུ་བརྙས་མི་བྱ། །ཆུ་ཡི་ཐིགས་པ་བསགས་པས་ཀྱང༌། །སྣོད་ཆེན་རིམ་གྱིས་འགེངས་པར་འགྱུར། །སྡིག་པ་ཆུང་ངུ་མོད་ལ་ཡང༌། །མི་གནོད་སྙམ་དུ་བརྙས་མི་བྱ། །མེ་སྟག་ཕྲ་མོ་ཙམ་གྱིས་ཀྱང༌། །རྩྭ་ཕུང་རི་ཙམ་སྲེག་པར་བྱེད། །ཅེས་དང༌། སྤྱོད་འཇུག་ལས། གང་ཞིག་དེ་འདྲའི་རྒྱལ་སྲས་སྦྱིན་བདག་ལ། །གལ་ཏེ་ངན་སེམས་བསྐྱེད་པར་བྱེད་པ་དེ། །ངན་སེམས་བསྐྱེད་པའི་གྲངས་བཞིན་བསྐལ་པར་ནི། །དམྱལ་བར་གནས་པར་འགྱུར་ཞེས་ཐུབ་པས་གསུངས། །ཞེས་གསུངས་པ་བཞིན་ནོ། །རྒྱུ་མཚན་དེས་ན་གང་ཞིག་ས་བོན་ཆུང་ངུ་ཡུངས་ཀར་འབྲུ་ཙམ་ས་ལ་བཏབ་པའི་ཤིང་ཨ་ཤྭ་ཏ་ཡི་འབྲས་བུ་ལོ་དུས་སུ་སྨིན་པ་ནི། ཡལ་ག་རེ་ལའང་དཔག་ཚད་ཙམ་རེ་ཡོད་པར་འཕེལ་བ་དེས་ཀྱང་ནང་གི་རྒྱུ་འབྲས་དགེ་སྡིག་གཉིས་ཀྱི་གཟུགས་བརྙན་འཕེལ་ཆེ་བའི་དཔེ་ཟླར་མི་ཕོད་པ་ཡིན་ནོ། །སྣོད་བཅུད་ཀྱི་དངོས་པོ་གང་ལ་གཙོ་བོ་དང་དབང་ཕྱུག་སོགས་བྱེད་པ་པོ་འགའ་ཡང་མ་མཆིས་ཤིང་རང་བཞིན་གྲུབ་པའང་མིན་ནོ། །འོ་ན་ཅི་ཞེ་ན། སེམས་དང་སེམས་བྱུང་གི་བསམ་པ་དཀར་ནག་སྣ་ཚོགས་ཀྱི་དབང་གིས་དཔེར་ན་ཚོས་ཀྱིས་བཙོས་པའི་རས་ཡུག་སྣ་ཚོགས་པ་ལྟར་ཀུན་སློང་གིས་དགེ་སྡིག་ཆུང་ངུ་ལས་མ་བྱས་པ་ལྟར་སྣང་ཡང༌། ལས་དེ་དང་དེ་ཡི་འབྲས་བུ་བདེ་བ་དང་སྡུག་བསྔལ་མཐུ་ཆེན་བྱས་པ་དེ་ཡང༌། སྦྱོར་བ་ལས་དེའི་ཆེད་དུ་ཡུན་རིང་དམིགས་ནས་བསགས་པ་མེད་པ་དང༌། རྗེས་འགྱོད་པ་དྲག་པོས་ལས་གང་བྱས་པའི་སེམས་ཟིལ་གྱིས་མནན་ཏེ་ཐོག་མཐའ་གཉིས་པོ་དང་མི་ལྡན་ན་ནུས་པ་ཆུང་བ་ཡིན་ནོ། །དཔེར་ན་རྩ་བ་སྟེ་ས་བོན་སྨན་དུ་མཆིས་ན་མྱུ་གུ་དང་འབྲས་བུ་ལ་སོགས་པའང་སྨན་ཡིན་ལ། རྩ་བ་དུག་ཡིན་ན་མྱུ་གུ་སོགས་དུག་ཡིན་པ་སྨོས་ཅི་དགོས། དཔེ་དེ་བཞིན་ཀུན་སློང་བསམ་པ་དགེ་དང་མི་དགེའི་འཕེན་བྱེད་ཀྱི་དབང་ལས། དགེ་བ་དང་སྡིག་པའི་གཟུགས་བརྙན་ཆེ་ཆུང་གི་རྗེས་སུ་མི་འགྲོ་སྟེ། མདོ་ལས། བསམ་པ་བཟང་པོས་མཆིལ་ལྷྭམ་གཉིས། །ཐུབ་པའི་དབུ་ལ་བཞག་པ་དང༌། །དེ་བཞིན་གཞན་གྱིས་བསལ་གྱུར་པ། །གཉིས་ཀ་རྒྱལ་སྲིད་ཐོབ་པར་གྱུར། །ཞེས་སོ། །འདོད་ཁམས་ན་སྤྱོད་པའི་དགེ་སྡིག་གི་ལྕི་ཡང་ཁྱད་པར་འདི་ལྟར། སྦྱོར་བའི་ཁྱད་པར་བྱེད་འདོད་ཀྱི་བསམ་པ་རྒྱུན་ལྡན་དུ་ཡོད་པས་རྟག་པ་དང༌། བསམ་པ་ཀུན་སློང་དྲག་པོ་དེ་ཁོ་ན་ལས་གཞན་ལ་ཡིད་མི་གཏོད་པས་མངོན་ཞེན་དང༌། གཉེན་པོའི་ཁྱད་པར་མི་མཐུན་པའི་ཕྱོགས་ཀྱི་ཟིལ་གྱིས་མི་ནོན་པས་གཉེན་པོ་མེད་པ་དང༌། གཞིའི་ཁྱད་པར་གཉིས་ཏེ་ཡོན་ཏན་གཙོ་བོ་མཆོག་དང་ལྡན་པ་དཀོན་མཆོག་གསུམ་དང༌། ཕན་འདོགས་པའི་གཞི་ཕ་མ་སོགས་བྱས་པ་དྲིན་དུ་གཟོ་ནས་ཐག་རིང་མགྲོན་པོ་དབུལ་སྤྲང་སོགས་ལས་བྱུང་བའི་ལས་བསགས་ཚུལ་ཏེ་རྣམ་པ་ལྔ་པོ་ལས་ཀུན་སློང་གསུམ་པོ་ཚང་ཞིང་ཡུལ་དེ་དག་གང་རུང་ལ་བརྟེན་ན་དགེ་སྡིག་ལྕི་ཡང་གང་ཟག་གི་རྒྱུད་ལ་ཉེ་བར་ལེན་པའི་རྣམ་པར་རིག་བྱེད་དེ་དེའི་ཚུལ་ཤེས་པའི་རྒྱུར་ལགས་པར་གསུངས་སོ། །ལས་ཀྱི་འཆར་གཞི་བཤད་པ་ལ། སེམས་ཉིད་འདུས་མ་བྱས་པའི་སྒྲིབ་བྱེད་དུ་གྱུར་ཞིང་དབྱེ་བསལ་གང་ཡང་མེད་པ་བག་ཆགས་སྣ་ཚོགས་ཀུན་གྱི་རྟེན་བྱེད་པའི་ཀུན་གཞི་ལུང་དུ་མ་བསྟན་པ་ལྷན་ཅིག་སྐྱེས་པའི་མ་རིག་པའི་ཆར་གནས་པ་དེ་ལས་གསལ་ཞིང་རིག་པའི་ཆ་མེ་ལོང་གི་དྭངས་ལྟར་ཚོགས་བདུན་གྱི་ཤེས་པ་འཕེལ་འགྲིབ་ཅན་གྱི་གོ་འབྱེད་པའི་ཀུན་གཞིའི་རྣམ་ཤེས་ཤར་ཞིང༌། དེ་ལས་ཡུལ་གྱི་ངོ་བོ་ཙམ་འཛིན་པའི་བློ་ཕྲ་བ་མ་ཡིན་པ་ཆེ་ལོང་དུ་ཤར་བའི་ཡིད་ཀྱི་ཤེས་པ་དང༌། ནང་དུ་ངར་འཛིན་པ་དང་ཕྱིར་དགག་སྒྲུབ་ཀྱི་རྣམ་པ་ཅན་གྱི་ཉོན་མོངས་པ་ཅན་གྱི་ཡིད་དང༌། མིག་ལ་བརྟེན་ནས་གཟུགས་མཐོང་བ་ནས། ལུས་ལ་བརྟེན་ནས་རེག་བྱ་མྱོང་བའི་ཆའི་ཡུལ་ལྔའི་ཤེས་པ་ཀུན་གཞི་དེ་ལས་མཆེད་པའམ་ལངས་ནས་ལས་སོགས་པར་འགྱུར་རོ། །དེ་ཡང་ཡིད་ཤེས་དང་སྒོ་ལྔ་ཙམ་གྱིས་ལས་མི་སོགས་ཀྱང༌། ཤེས་པ་ཀུན་ལ་ཁྱབ་བྱེད་དུ་སོང་བའི་བདག་འཛིན་མ་རིག་པ་འཁྲུལ་སྣང་དང་སྡུག་བསྔལ་ཐམས་ཅད་ཀྱི་རྩ་བར་གྱུར་པའི་སོ་སྐྱེའི་གནས་སྐབས་སུ་དུག་གསུམ་གྱི་རྩ་བར་གྱུར་པ་ལྟ་ཡང་ཅི་སྨོས་ཏེ། དེར་མ་ཟད་འཕགས་པའི་ས་ཐོབ་དུས་སུ་ཡང་ཉོན་ཡིད་གནས་མ་གྱུར་གྱི་བར་དུ་ཞིང་དག་པ་ལ་དབང་འབྱོར་བ་དང༌། རྣམ་པར་མི་རྟོག་པའི་ཡེ་ཤེས་རྩོལ་མེད་དུ་སྐྱེ་བ་ལ་སོགས་པ་ཡོན་ཏན་དུ་མ་ལ་བར་དུ་གཅོད་པར་གསུངས་སོ། མཆན། གདོན་ཆེན་གྱིས་ནི་ཉོན་མོངས་པ་དུག་གསུམ་པོ་བཟུང་སྟེ། དེའི་དབང་གིས་མི་དགེ་བའི་ལས་བསགས་པས་ངན་སོང་གསུམ་དང༌། གཏི་མུག་གིས་ས་པས་བསྡུས་པའི་བསོད་ནམས་ཆ་མཐུན་གྱིས་མཐོ་རིས་སུ་འཕེན་ཏེ། དེ་ཡང་ང་རྒྱལ་མཚུངས་ལྡན་གྱིས་ལྷ་མི་གཉིས་དང༌། ཕྲག་དོག་དང་མཚུངས་ལྡན་གྱིས་ལྷ་མིན་ཏེ་འཁོར་བར་གནས་རིགས་མཐོ་དམན་བྱས་ཤིང་གྲུབ་བོ། །དེ་ལྟར་གྲུབ་པ་ལའང་དགེ་སྡིག་གཉིས་ཀྱི་འཕེན་རྫོགས་ཀྱི་ཁྱད་པར་ནི་མུ་བཞི་སྟེ། འཕེན་བྱེད་དགེ་བས་འཕངས་ལ་རྫོགས་བྱེད་དགེ་བས་རྫོགས་པ་ལྷ་མིའི་རྟེན་ལ་རིགས་གཟུགས་དཔལ་འབྱོར་མཐའ་དག་ཕུན་སུམ་ཚོགས་པ་ལྟ་བུའོ། །འཕེན་བྱེད་དགེ་བས་འཕངས་ཀྱང་རྫོགས་བྱེད་མི་དགེ་བས་རྫོགས་ནི་བདེ་འགྲོར་སྐྱེས་ཀྱང་དབང་པོ་དང་ཡན་ལག་མ་ཚང་ཞིང་དབང་ཐང་ཆུང་ངུར་གྱུར་པ་སོགས་སྡུག་བསྔལ་བ་རྣམས་སོ། །འཕེན་བྱེད་མི་དགེ་བས་འཕངས་ལ་རྫོགས་བྱེད་མི་དགེ་བས་རྫོགས་ན་ངན་སོང་གང་རུང་དུ་སྐྱེས་ནས་སྡུག་བསྔལ་གྱིས་མཐའ་གཅིག་ཏུ་མནར་ཞིང་སྤྱོད་པའོ། །འཕེན་བྱེད་མི་དགེ་བས་འཕངས་ཀྱང་རྫོགས་བྱེད་དགེ་བས་རྫོགས་ན་དུད་འགྲོའམ་ཡི་དྭགས་གཟུགས་དང་དཔལ་འབྱོར་ཕུན་སུམ་ཚོགས་པའི་རིགས་ཁ་ཅིག་ལྟ་བུའོ། །དེའང་ལས་གཅིག་གིས་ལུས་གཅིག་ལས་མི་འཕེན་པ་རང་གི་བུ་ལ་སྙིང་རྗེ་སྐྱེས་པའི་བུད་མེད་ཚངས་པར་སྐྱེས་པ་ལྟ་བུ་དང༌། ལས་གཅིག་གིས་ལུས་དུ་མ་འཕེན་པ། འཕགས་པ་མ་འགགས་པས། བདག་ནི་བསོད་ནམས་གཅིག་པུ་དེའི་རྣམ་པར་སྨིན་པས་སུམ་ཅུ་རྩ་གསུམ་གྱི་ལྷར་ལན་བདུན་སྐྱེས་ཤིང༌། ད་ལྟར་ཤཱཀྱ་ཕྱུག་པོར་སྐྱེས་སོ་ཞེས་པ་ལྟ་བུའོ། །ལས་དུ་མས་ལུས་གཅིག་འཕེན་པ་ལྷས་བྱིན་གྱིས་ཚེ་རབས་དུ་མར་བསགས་པའི་ལས་ཀྱིས་དགེ་སློང་གི་གཟུགས་ལ་སྡིག་པའི་ཀུན་ཏུ་སྤྱོད་པ་ཅན་དུ་གྱུར་པ་ལྟ་བུ་དང༌། ལས་དུ་མས་ལུས་དུ་མར་འཕེན་པ་འཕགས་པ་ཉེ་སྡེ་ལས་དུ་མའི་རྐྱེན་གྱིས་གསོས་ནས་ལུས་དུ་མ་གྲུབ་པ་ལྟ་བུ་ནི་མདོ་སྡེ་པ་ཡན་ཆད་ཀྱིས་འདོད་ལ། མཛོད་ལས་ནི། གཅིག་གི་སྐྱེ་བས་གཅིག་འཕེན་ནོ། །ཡོང་རྫོགས་བྱེད་པ་དུ་མ་ཡིན། འཕེན་བྱེད་གཅིག་གིས་སྐྱེ་བས་གཅིག་འཕེན་ཀྱི་དུ་མ་མི་འཕེན། འཕེན་བྱེད་དུ་མས་སྐྱེ་བ་གཅིག་ཁོ་ན་མི་འཕེན་པར་བཤད་དོ། །དེ་དག་ཀྱང་འཕེན་བྱེད་ཀྱི་རྒྱུ་སྟོབས་ཆེ་ཆུང་གི་དབང་གིས་ཏེ། འདི་ལྟར་གནོད་སེམས་ཀྱང་སྐྱེས། གནོད་པ་ཡང་སེམས་ཁེངས་པ་ཙམ་དུ་བྱས་པ་ལྟ་བུ་བྱས་ཤིང་བསགས་པ་དང༌། ཕ་རོལ་གྱི་མངའ་ཐང་འཕྲོག་པ་དང༌། དགྲ་ཟླ་ཉམས་ཉེས་པར་བྱེད་པའི་འདུ་ཤེས་གང་ཡང་མེད་བཞིན་དུ་གཞན་གྱིས་རང་སྲིད་ལ་གཙེས་ནས་སྲོག་བསྲུང་བ་དང༌། སྲིད་སྡེ་ཆོས་བཞིན་སྐྱོང་བ་ལ་གེགས་སུ་གྱུར་པར་དོགས་ནས་སྐྲག་པས་ལས་དེ་མི་འདོད་བཞིན་དུ་འགྱོད་བཞིན་དུ་དབང་མེད་དུ་སྤྱོད་དགོས་པ་ལྟ་བུ་བྱས་ལ་མ་བསགས་པ་དང༌། རྫུན་དུ་སྨྲ་བ་ལ་སོགས་པ་དུས་རིང་མོ་ནས་བློ་ལ་དང་དུ་བླངས་ཀྱང་དོན་ལ་མ་སྨྲས་པ་ལྟ་བུ་བསགས་ལ་མ་བྱས་པ་དང༌། ཀུན་སློང་བཏང་སྙོམས་ལས་རྣམ་པར་སྨིན་པའི་འབྲས་བུ་འབྱིན་མི་ནུས་པ་ལུང་མ་བསྟན་པའི་ལས་ནི་མ་བྱས་ཤིང་མ་བསགས་པ་སྟེ་མུ་བཞིའོ། །དེ་ལྟར་མུ་བཞི་དང༌། གོང་དུ་བཤད་པའི་རྟག་དང་མངོན་ཞེན་སོགས་ལྔ་པོ་དང་ལྡན་མི་ལྡན་ལ་གཞལ་བས་ཀྱང་བྱས་བསགས་ཀྱི་དགེ་སྡིག་ཆེ་ཆུང་དང་དེའི་འབྲས་བུ་ཆེ་ཆུང་གི་ཁྱད་པར་ཤེས་སོ། །དཔེ་ཇི་ལྟར་ན། མེ་ནི་རབ་ཏུ་འབར་ཞིང་ཁང་ཁྱིམ་སོགས་བསྲེག་པར་བྱེད་ན། དེ་ཡི་གཉེན་པོར་ཆས་པ་ནི་ཆུ་ཁོ་ན་ཡིན་པས་ཆུ་དེ་ཉིད་སྣོད་དུ་བསྩལ་ནས་མེས་མིང་ཙམ་ཡང་མེད་པར་བསྐམ་པར་བྱས་ན་དེ་ལས་གཞན་མེ་དེ་གསོད་པའི་གཉེན་པོ་གང་ཡང་བཙལ་དུ་མེད་ན་མེ་དེ་ཇི་ལྟར་ཞི་བར་བྱེད། དེ་བཞིན་དུ་རྒྱལ་བའི་སྐུ་གསུང་ཐུགས་རྟེན་བཤིག་པ་དང༌། སྐུར་ཞིང་བརྙས་པ་བྱས་པ་དང༌། དམ་པའི་ཆོས་སྤངས་པ་དང༌། འཕགས་པའི་དགེ་འདུན་ལ་སྐུར་པ་བཏབ་པ་དང༌། དེ་དག་གི་དཀོར་ལ་འབག་པ་སོགས་དཀོན་མཆོག་གསུམ་པོ་ངན་སེམས་ཀྱིས་བསླུས་ཤིང་སྐྱབས་སུ་མི་བརྟེན་པར་རྒྱབ་ཏུ་སྤངས་པ་ཡི་སྡིག་ཆེན་འདི་ནི་བྱ་བ་གཉེན་པོ་གཞན་གྱིས་གསོ་ཐབས་མེད་པའི་ཕྱིར། དེ་ལ་དོ་ཟླ་འགྲོ་བའི་སྡིག་པའི་ལས་གང་ཡང་རྙེད་པ་མིན་ནོ། །ཇི་སྐད་བཤད་པ་དེ་ལས་གཞན་དུ་འགྲོ་བ་ཕལ་པའི་ཀུན་རྟོག་གཟུང་འཛིན་གྱི་རྣམ་པ་ཅན་ལ་རང་བཞིན་འབྲེལ་བར་གྱུར་པའི་ཚོགས་དྲུག་གི་དབང་པོ་དང་བཅས་པ་ལས་གསོག་པའི་སྒོ་དང༌། དགེ་མི་དགེ་བར་སེམས་པའི་ཡིད་དང༌། བར་མའི་ཡིད་རྣམས་ཀྱིས་དཀར་ནག་གི་ལས་གསོག་པར་བྱས་ཏེ་ཀུན་གཞིའི་སྟེང་དུ་ཚོར་བ་གསུམ་དང་འདུ་ཤེས་གསུམ་ལ་སོགས་པའི་སེམས་བྱུང་རྣམས་གྲོགས་བྱེད་པའི་ཚུལ་གྱིས་དགེ་མི་དགེའི་ལས་དུ་མ་འདུ་བྱེད་པ་ཡིན་ཞིང༌། གཞན་དུ་ན་ཀུན་རྟོག་ཚོགས་ཉོན་མོངས་བརྒྱད་ཁྲི་བཞི་སྟོང་གིས་ལས་ཕྲ་བ་གསོག་པའི་ཚུལ་དང་གྲངས་མཐའ་དག་གཅིག་ཏུ་འདི་ལྟ་བུའོ་ཞེས་བློ་ཡིས་ཐུག་ཅིང་དཔོག་པ་མ་མཆིས་མོད་ཀྱང་ལས་ཁོ་ན་ལས་བྱུང་བར་མངོན་ནོ། །འདིར་ལུས་ངག་ཡིད་ལ་རྟེན་དང་བརྟེན་པ་ཅན་གྱི་སྤང་བྱའི་རྒྱུ་འབྲས་རྣམ་པ་བཅུར་གནས་པའི་ཐོག་མར་ལུས་ཀྱི་གསུམ་པོ་ནི་སྲོག་གཅོད་པ་དང༌། མ་བྱིན་པར་བླངས་པ་དང༌། ལོག་པར་གཡེམ་པ་རྣམས་ལས་དང་པོ་སྲོག་གཅོད་པ་ནི། ཡན་ལག་ལྔས་དངོས་གཞིར་རྫོགས་ཏེ་གཞི་སེམས་ཅན་ཡིན་པ༡་དང༌། དེར་འདུ་ཤེས་མ་འཁྲུལ་བ༢་དང༌། གཞན་གྱི་སྲོག་གཅོད་འདོད་ཀྱི་བསམ་པ་ཡོད་པ༣་དང༌། བསམ་བཞིན་དུ་གཅོད་པའི་ཐབས་ལ་སྦྱོར་བ༤་དང༌། དེའི་ཚེའམ་གཞན་གྱི་ཚེ་ཤི་བའོ༥། །དེའི་ཕྱོགས་མཐུན་གནོད་སེམས་མངོན་གྱུར་མེད་ཀྱང་བརྡེག་བཙོག་ལ་སོགས་པའི་འཚེ་བ་བགྱིད་པའི་རྐྱེན་གྱིས་ཤི་བའོ། །གཉིས་པ་མ་བྱིན་བླང་བ་ནི་ཡན་ལག་བཞིས་རྫོགས་ཏེ། གཞན་ནོར་ཡིན་པ༡་དང༌། ཡིན་པར་ཤེས༢། ཤེས་བཞིན་བརྐུ་བའི་ཐབས་ལ་བརྩོན་པ༣་དང༌། གནས་སྤོས་ཏེ་ཐོབ་པར༤་བྱས་པའོ། །ཕྱོགས་མཐུན་གཡོ་སྟེ་ཚོང་དང་འོས་མིན་གྱི་ཆད་པ་སོགས་ཐབས་ཀྱིས་བསྟེན་པ་དང༌། བྲེ་ལོག་སྲང་ལོག་སོགས་སྒྱུ་ཡི་སྒོ་ནས་ལེན་པ་དང༌། གསུམ་པ་འདོད་པས་ལོག་པར་གཡེམ་པ་ནི། ཡན་ལག་གསུམ་སྟེ་གཞན་གྱིས་བདག་ཏུ་བཟུང་བའི་ཆུང་མའམ་སྨད་འཚོང་མ་ལ་སོགས་པ་གླ་རྔན་ཐོབ་པའམ། རབ་བྱུང་གི་རྟགས་ཡིན་མིན་གང་རུང་གིས་རྟེན་སོགས་ཀྱི་དྲུང་དང༌། དེར་ཡུལ་དུས་གཞན་གྱིས་བསྲུང་བ༡་ལ། དེ་དང་དེར་འདུ་ཤེས་པས་དབང་པོའི་རེག་པ་སྤྲོད་དེ་སྦྱོར་བ༢་དང༌། བདེ་བ་མྱོང་བའོ༣། །ཕྱོགས་མཐུན་ནི་བགྲོད་བྱ་མ་ཡིན་པ་དབང་པོ་ལས་གཞན་སོགས་ལ་འཁྲིག་པའི་ཆོས་བསྟན་པའོ། །ངག་གི་ལས་བཞི་ནི་དང་པོ་རྫུན་ལ་ཡན་ལག་བཞིས་རྫོགས་ཏེ་སྨྲ་བའི་གཞི་མ་ནོར་བ༡་དང༌། གཞན་བསླུ་བའི་བསམ་པ༢་དང༌། སྨྲ་རྒྱུ་དེའི་དོན་ཡིད་ལ་བསམ་ནས་རྫུན་སྨྲས་པ༣་དང༌། དེར་འདུ་ཤེས་བསྒྱུར་ནས་གཞན་དག་གིས་ཀྱང་འཁྲུལ་བཞིན་བཟུང་བའོ༤། །ཕྱོགས་མཐུན་ནི་དོན་རྣལ་མར་གོ་བའི་འདུ་ཤེས་དྲང་པོར་བརྫུ་ཐབས་ཀྱིས་བསླད་ནས་ཇི་བཞིན་མི་སྤྲོད་པར་གཞན་སེམས་བསླུ་བའོ། །གཉིས་པ་ཕྲ་མ་ནི་ཡན་ལག་གསུམ་གྱིས་རྫོགས་ཏེ་དབྱེ་གཞི་ནང་མཐུན་པ་ཡིན་ནམ་བཏང་སྙོམས་སུ་གནས་པ༡་དང༌། དབྱེན་སྦྱོར་གྱི་ཚིག་སྨྲས་པ༢་དང༌། མཐར་ཐ་དད་དུ་འདྲལ་བའམ་དོན་གོ་བའོ༣། །ཕྱོགས་མཐུན་ནི་སྔར་གཞན་གྱིས་སྨྲས་པའི་སྐྱོན་གྱིས་ཚིག་ལ་གཞན་དུས་ཕྱིས་སླར་ཡང་བཟློས་ནས་ཁོན་དུ་འཆོས་པའོ། །གསུམ་པ་ངག་འཁྱལ་ནི་ཡན་ལག་གསུམ་གྱིས་རྫོགས་ཏེ། ཉོན་མོངས་པའི་སེམས་ཀྱིས་བསླང་བ༡་དང༌། ཆོས་དང་མི་ལྡན་པ་ལ་དེར་བསམ་པ༢་དང༌། མཆོད་སྦྱིན་སྙན་ངག་སྲིད་སྲུང་སོགས་དང༌། གླུ་སྒྲུང་དང༌། སྨད་འཚོང་མ་དང་ཆོམ་རྐུན་སོགས་བྲེ་མོའི་གཏམ་སྣ་ཚོགས་སྨྲས་པ་ལས་ཆགས་སྡང་བསྐྱེད་པའོ༣། །ཕྱོགས་མཐུན་ནི་ཆགས་སྡང་མི་བསྐྱེད་ཀྱང་དམག་དང་ཆོམ་རྐུན་སོགས་འབྲེལ་མེད་གཏམ་སྣ་ཚོགས་སྨྲ་བའོ། །བཞི་པ་ཚིག་རྩུབ་ནི་ཡན་ལག་གསུམ་གྱིས་རྫོགས་ཏེ། གང་ཟག་དེ་ལ་ཆེད་དུ་དམིགས་པ༡་དང༌། སྦྱོར་བ་སྐྱོན་མཚང་འབྲུ་བ་དོན་མ་རུང་བ༢་སྨྲས་པ་དང༌། མཐར་ཐུག་ཕ་རོལ་པོའི་སྙིང་ལ༣་འབིགས་པ་སྟེ་ཡིད་མི་དགའ་བར་བྱས་པའོ། །ཕྱོགས་མཐུན་ནི་སྙན་པ་ལྟར་སྨྲས་ཀྱང་གཞན་དེའི་ཡིད་མི་བདེ་བའི་རྐྱེན་དང་སྤྲོད་པའོ། །ཡིད་ཀྱི་ལས་བཤད་པ་ལ་གསུམ་ལས། དང་པོ་བརྣབ་སེམས་ནི་ཡན་ལག་གཉིས་ཀྱིས་རྫོགས་ཏེ། གཞན་གྱི་འབྱོར་པའི་དཔལ་ཡིན་པ༡་དང༌། བསམ་པ་དེ་ལ་བརྔམས་ཤིང་ཆགས་ནས་འཁུ་སེམས་ཀྱིས་བདག་གིར་བྱེད་པའོ། །ཕྱོགས་མཐུན་ནི་ཕ་རོལ་པོའི་རྫས་དང་ཐོས་སོགས་ཀྱི་ཡོན་ཏན་ལ་བརྐམ་ཞིང་བདག་ལ་ཡོད་ན་ཅི་མ་རུང་སྙམ་དུ་ཡང་ཡང་དེའི་རོ་མྱོང་བའོ། །གཉིས་པ་གནོད་སེམས་ཀྱང་ཡན་ལག་གཉིས་ཀྱིས་རྫོགས་ཏེ། གཞན་སེམས་ཅན་ཡིན་པ་དང༌། བསམ་པས་དེ་ལ་ཁོང་འཁྲུག་ཅིང་ལུས་སེམས་ལ་སྡུག་བསྔལ་བྱེད་འདོད་ཀྱི་འཚེ་བ་གཏིང་ནས་སློང་བའོ༢། །དབྱེ་ན་དགུ་སྟེ་བདག་ལ་གནོད་པ་སྔར་བྱས་སོ། །ད་ལྟ་བྱེད་དོ། །མ་འོངས་པར་བྱེད་པར་འགྱུར་རོ་སྙམ་པ་དང༌། བཤེས་ལ་དེ་བཞིན་གསུམ་དང༌། དགྲ་ལ་ཕན་པ་བྱས་སོ། །བྱེད་དོ། །བྱེད་པར་འགྱུར་རོ། །རྗེས་དཔྱོད་སྡང་སེམས། ཁྲོ་སེམས། ང་རྒྱལ། འཁུ་སེམས། གཏི་མུག་སྟེ་ལྔའོ། །ཕྱོགས་མཐུན་ནི་ཚེ་སྲོག་འབྱོར་པ་སོགས་ཕན་པས་འབྲེལ་པ་ལ་མི་དགའ་ཞིང༌། ངན་པ་འདུ་བ་དང་བཟང་པོ་འབྲལ་བར་བསྒོམ་པའོ། །གསུམ་པ་ལོག་ལྟ་ལ་ཡན་ལག་གཉིས་ཏེ། བསླུ་མེད་ཀྱི་རྒྱུ་འབྲས་ལ་མེད་པར་ལྟ་བ་དང༌། བདག་དང་འཇིག་རྟེན་ལ་རྟག་པའམ་ཡང་ན་ཆད་པར་ལྟ་བའོ། །ཕྱོགས་མཐུན་ནི་གང་ཟག་ཁྱད་པར་ཅན་ལ་སྡང་སེམས་སོགས་ཀྱིས་སྐྱོན་མེད་པ་ལ་ཡོད་ཞེས་སྒྲོ་འདོགས་པ་དང༌། ཡོན་ཏན་ཡོད་པ་ལ་མེད་དོ་ཞེས་སྐུར་པ་འདེབས་ཤིང་ཐེ་ཚོམ་བསྐྱེད་པ་སོགས་སོ། །མི་དགེ་བ་བཅུ་པོ་ཀུན་རེ་རེ་ལ་འབྲས་བུ་བཞི་བཞིར་སྨིན་པའི་ཚུལ་ནི། རིམ་པ་བཞིན་རྣམ་སྨིན་རྒྱུ་མཐུན་དབང་དང་བྱེད་པ་སྟེ་བཞི་ལས། དང་པོ་རྣམ་སྨིན་གྱི་འབྲས་བུ་བསྐྱེད་པའི་ཚུལ་ནི། །འདི་ལྟར་དགེ་མི་དགེའི་ལས་དེ་དག་ཀུན་ནས་སློང་བའི་སེམས༡་དང༌། རྗེས་སུ་སྤྱོད་པའི་སྦྱོར་བ༢་དང༌། སྦྱོར་བའི་གཞི་བསམ་པ་དེ་ཉིད༣་དང༌། སྦྱོར་བའི་འབྲས་བུ་དངོས་གཞི་ཉིད་སྤྱད་པ༤་དང༌། མཇུག་རྗེས་སུ་ཡི་རང་བ༥་སྟེ་ཆོས་ལྔ་ལྡན་ནམ་ལྡན་པ་མིན་ཀྱང་རུང་སྟེ། ཀུན་སློང་གསུམ་གྱིས་གཏི་མུག་སྡིག་སེམས་མ་ཤེས་པའི་སྲོག་གཅོད་ལྟ་བུ་ཆུང་ངུས་དུད་འགྲོ་དང༌། ཤ་པགས་རྭ་རུས་མུ་ཏིག་སོགས་ལ་ཆགས་པས་བསད་ན་འབྲིང་འདོད་ཆགས་ཀྱི་དབང་གིས་ཡི་དྭགས་དང༌། ཁྲོས་ནས་དགྲ་གསོད་པ་སོགས་ཞེ་སྡང་ཆེན་པོས་དམྱལ་བར་འཕེན་ནོ། །རྒྱུ་མཐུན་གྱི་འབྲས་བུ་ནི་རྣམ་པ་གཉིས་སུ་གྲུབ་སྟེ། བྱེད་པ་རྒྱུ་མཐུན་ནི་ཚེ་སྔ་མའི་མི་དགེ་བའི་ལས་གོམས་འདྲིས་བྱེད་ཅིང་ཀུན་ཆུབ་བྱས་པས་ཕྱིས་ཀྱང་ལས་དེ་དང་མཐུན་པར་སྐྱེ་ནས་སྤྱོད་ངན་ལ་འཇུག་པར་གསུངས་སོ། །མྱོང་བ་རྒྱུ་མཐུན་གྱི་འབྲས་བུ་སྔོན་གྱི་དགེ་བས་འཕངས་ནས་མཐོ་རིས་ཀྱི་ལུས་རྟེན་ཐོབ་པར་གྱུར་ཀྱང་སྡིག་པ་དེའི་དབང་གིས་རིམ་བཞིན་མི་དགེ་བཅུ་ལ་སྡུག་བསྔལ་གྱི་རྣམ་གྲངས་གཉིས་རེ་གཉིས་རེར་ལྡན་ཏེ་འདི་ལྟར་སྲོག་བཅད་པས་འཚོ་བའི་ཡུན་ཚེ་ཐུང་ལ་ནད་ཀྱང་མི་འདྲ་བའི་རྣམ་གྲངས་མང་པོས་མནར་ཞིང་སྡུག་བསྔལ་བར་འགྱུར་རོ། །མ་བྱིན་པ་བླངས་པས་ཕྱུགས་དང་འབྲུ་གོས་སོགས་ཡོ་བྱད་ཉུང་བས་དབུལ་ཞིང་ལོངས་སྤྱོད་ཅུང་ཟད་ཡོད་ཀྱང་དགྲ་དང་འཁོན་པ་སོགས་ཀྱིས་མི་དབང་བས་ཐུན་མོང་ཅན་དུ་འགྱུར་རོ། །འདོད་ལོག་གིས་ཁྱིམ་ཐབས་མི་མཛེས་ཤིང་ཁྱོ་དང་མི་མཐུན་ཅིང་ལྷོད་པ་དང༌། ཁྱིམ་གྱི་བྱ་བ་དོར་བའི་དགྲ་ཟླར་གྱུར་པ་གང་ཞིག་དང་མཐུན་པས་འབྲེལ་ནས་སྙིང་མི་ཉེ་བ་དང༌། རྫུན་གྱིས་རང་གིས་ཉེས་མ་ཉེས་གང་ལ་ཡང་གཞན་གྱི་སྒོ་ནས་ཁ་སྨྲས་ངན་པའི་སྐུར་པས་རང་སེམས་གདུང་ཞིང་གཞན་སུ་ལ་བློ་གཏད་ཀྱང་དེ་ཀུན་གྱིས་བསླུ་བ་མང་པོས་མགོ་བསྐོར་བ་དང༌། ཕྲ་མ་བྱས་པས་གཉེན་ཉེ་འཁོར་དང་བྲན་གཡོག་ཐམས་ཅད་མཐུ་ནུས་ངན་ཞིང་ནང་ཕན་ཚུན་རྩོད་ཅིང་འདུམ་པར་དཀའ་བ་ལ་སོགས་གནོད་པར་གྱུར་པ་དང༌། ངག་འཁྱལ་གྱིས་རང་གི་ཚིག་སྨྲས་པ་ཐམས་ཅད་གཞན་གྱི་རྣ་བར་མི་འགྲོ་ཞིང་སེམས་ལ་བཟུང་མི་འོས་པས་ཡིད་ཆེས་ཞན་ཅིང་བློ་མི་གཏད་པ་སྟེ་བདེན་དུ་མི་བརྩི་བ་དང༌། ཚིག་རྩུབ་མོ་སྨྲས་པས་དུས་དང་དུས་སུ་མི་འདོད་པའི་གཏམ་ངན་མི་སྙན་པ་མང་པོ་ཐོས་པ་དང༌། གཞན་ལ་ཕན་ཚིག་སྨྲས་ཀྱང་འཐབ་མོའི་ཚིག་ཏུ་འཁྲུལ་ནས་རྩོད་པ་ལ་སོགས་པས་མི་བདེ་བ་དང༌། བརྣབ་སེམས་ཀྱིས་ལོངས་སྤྱོད་ཡོད་པ་དང་ཐོབ་པས་ཆོག་མི་ཤེས་པ་དང༌། ད་དུང་མང་པོ་ཐོབ་ཏུ་རེ་ཞིང་འདོད་པས་མི་འགྲུབ་པའི་དོགས་པ་ལ་སོགས་པས་གདུང་བ་དང༌། གནོད་སེམས་ཀྱིས་ནད་གདོན་དགྲ་ལ་སོགས་པའི་གནོད་པ་མང་པོ་ངང་གིས་འདུ་ཞིང་གཉེན་ལོངས་སྤྱོད་སོགས་ཕན་པ་སྒྲུབ་པའི་རྐྱེན་དང་འབྲལ་བ་དང༌། ལོག་ལྟས་ཆོས་ལ་ཡིད་མི་ཆེས་ཤིང་ཆོས་མིན་གྱི་ལྟ་བ་ངན་པ་རྒྱུད་ལ་སྐྱེ་བ་དང༌། རྟག་ཏུ་བསམ་པ་མི་དྲང་ཞིང་གཡོ་སྒྱུས་རྒྱུད་འཁྲུག་པའོ། །བདག་འབྲས་སམ་དབང་གི་འབྲས་བུ་ནི་ཡུལ་སྡུག་བསྔལ་གྱི་རྐྱེན་དུ་གྱུར་པ་དང་རྟེན་ཅིང་འབྲེལ་བར་འབྱུང་བ་སྟེ། དྲན་པ་ཉེར་བཞག་ལས། སྣ་ཚོགས་ལུས་དང་ལོངས་སྤྱོད་དང༌། །བདེ་སྡུག་ཉིད་དུ་སྣང་བ་ནི། །སེམས་ཀྱིས་སྤྲུལ་ཞིང་སེམས་ཀྱིས་བྱས། །དཔེར་ན་རྨི་ལམ་ཇི་བཞིན་ནོ། །ཞེས་དང༌། སྤྱོད་འཇུག་ལས། ལྕགས་བསྲེག་ས་གཞི་སུ་ཡིས་བྱས། མེ་ཚོགས་དེ་དག་ཅི་ལས་བྱུང༌། །དེ་འདྲ་དེ་དག་ཐམས་ཅད་ཀྱང༌། །སྡིག་སེམས་ཡིན་པར་ཐུབ་པས་གསུངས། །ཞེས་སོ། །སྲོག་གཅོད་ཀྱི་སྡིག་ཏོ་དྲག་པོའི་ཁུར་གྱི་ལྷག་མས་ནོན་ཅིང་མ་བཏང་བ་གང་ཡིན་པ་དེ། གང་དུ་སྐྱེ་བའི་ས་ཕྱོགས་ཉམས་དགའ་དང༌། །བག་ཡངས་ཆུང་ལ་མཐུན་རྐྱེན་སྨན་ཤིང་མེ་ཏོག་ལ་སོགས་པ་ཉུང་ཞིང་རྨོས་པའི་ལོ་མ་དང༌། སྐྱེ་ཤིང་གི་འབྲས་བུ་སོགས་བཟའ་བ་དང༌། བཏུང་བའི་རིགས་ཀྱང་བཀྲེས་སྐོམ་སེལ་བའི་མཐུ་ཉམས་ཤིང༌། རེས་འགའ་འཇུ་དཀའ་ལ་ནད་སྣ་ཚོགས་སྐྱེད་པའི་རྒྱུར་འགྱུར་ཞིང༌། གང་དུ་སོང་དང་སྡོད་ཀྱང་ཆུ་དང་གཡང་ས་དགྲ་གཅན་གཟན་སོགས་ཀྱིས་སྲོག་ལ་གནོད་འཚེའི་ཚོགས་མང་བས་ཡ་ངའི་གནས་སུ་ཕྱིན་ཅིང་གནས་དགོས་པར་འགྱུར་རོ། །མ་བྱིན་བླངས་པས་མྱུ་གུ་སོགས་ལོངས་སྤྱོད་ཀྱི་དངོས་པོ་མེད་པ་དང༌། ཅུང་ཟད་རེ་ཡོད་ཀྱང་འཇོམས་པ་སླ་བ་དང༌། ལོངས་སྤྱད་བྱའི་བཟའ་ཤིང་ཡོད་ཀྱང་རོ་ནུས་ལྡན་པའི་འབྲས་བུ་བཟང་པོས་རྣམ་པར་སྨད་དེ་ཉམས་པར་འགྱུར་རོ། །བ་ལང་དང་འབྲི་སོགས་ཀྱང་འོ་མ་མི་འབྱུང་ཞིང་ལོ་ཐོག་སོགས་ཡོད་པའང་སད་ཀྱིས་གདུང་ཞིང་སེར་བས་རྣམ་པར་འཐག་པར་འགྱུར་བ་དང༌། ཕྱུགས་སོགས་གོད་ཅིང་མུ་གེས་ཉེན་ནས་ཟས་སྐོམ་སྒྲུབ་པའི་རྩོལ་བ་དང་རེ་དོགས་སོགས་ཀྱིས་སྡུག་བསྔལ་སྙིང་ལ་འཕོ་བར་སྐྱེའོ། །འདོད་པས་ལོག་པར་གཡེམ་པས་ཕྱུགས་ལྷས་གྲོང་འདབས་སོགས་སུ་བཤང་བ་དང་གཅི་བའི་འདམ་རྫབ་ཀྱིས་གང་བའི་ཁྲོད་དུ་དྲི་ངའི་ཚོར་བ་རྩུབ་མོས་ལུས་སེམས་གདུང་བས་དབུགས་མི་ཕྱིན་པར། མི་གཙང་ལྗན་ལྗིན་གྱིས་བག་ཡངས་པའི་གོ་སྐབས་མེད་པར་དོག་ཅིང་ཉམས་མི་དགའ་བའི་ཡུལ་དེ་ཉིད་དུ་མི་ཡི་སྐྱེ་བའི་འཁྲི་ཤིང་སྔོན་ལས་ཀྱི་སྟོབས་ཀྱིས་དབང་མེད་དུ་འཛུགས་བཞིན་རྟག་ཏུ་གནས་དགོས་སོ། །རྫུན་གྱིས་ལོངས་སྤྱོད་དབང་ཐང་སོགས་ཀྱི་འབྱོར་པ་འཕྲལ་དུ་གཡོ་ཞིང་འགྱུར་བ་དང༌། ཡུལ་གང་དུ་གནས་ཀྱང་ཡུལ་དེར་མི་མཐུན་པ་དང༌། གཞན་དགྲ་གཉེན་བར་མ་ཀུན་གྱིས་བསླུ་ཞིང་མགོ་བསྐོར་བ་དང༌། དེ་སོགས་རྐྱེན་ངན་སྣ་ཚོགས་པས་འཇིགས་པས་བརྟབས་ཏེ་བག་མི་ཕེབས་ཤིང་སྐྲག་པར་འགྱུར་རོ། །ཕྲ་མས་ནི་གང་དུ་སྐྱེ་བའི་ས་ཕྱོགས་ཐམས་ཅད་བྲག་རི་གཟེངས་མཐོ་བ་སོགས་ངམ་གྲོག་དང་ལྟུང་གནས་གཅོང་རོང་ཅན་དང༌། གྱེན་མཐོན་པོ་དང་ཐུར་གཟར་བས་བགྲོད་དཀའ་བ། མཐོ་དམན་ཅན་གྱི་ཡུལ་ལ་གནས་ཤིང་ཉམས་མི་བདེ་བ་དང༌། བརྗོད་པ་རྩུབ་མོ་སྟེ་ཚིག་རྩུབ་མོས་ཡུལ་ཐམས་ཅད་རྡོ་དང་གསེག་མ་ལ་སོགས་པས་ཁེབས་ཤིང༌། རྩི་ཤིང་ཐམས་ཅད་ཀྱང་ཚེར་མ་ཅན་དང༌། ལྗོན་བཟང་བྲལ་ཞིང་སྡོང་དུམ་གྱིས་གང་བ། འབྲས་བུ་ཐམས་ཅད་ཀྱང་ནུས་པ་མེད་པས་ངན་པ་དང༌། ནད་སྣ་ཚོགས་སྐྱེད་པས་རྩུབ་པ་དང་དེ་སོགས་ཉམས་མི་བདེ་བ་དང༌། ཆུ་རྣམས་ཀུན་ཀྱང་དྭངས་བསིལ་དང་བྲལ་བ་རྙོག་ཅིང་ཚྭ་སྒོ་ཅན་དང༌། ས་གཞི་དག་ཏུ་རྡུལ་མང་བ་སོགས་ཉལ་ཉིལ་གྱིས་གང་བའི་ཁྲོད་དེར་རྒྱུན་དུ་ཡིད་མི་བདེ་བའི་ཚོར་བ་ཉམས་སུ་མྱོང་བར་འགྱུར་རོ། །བཀྱལ་ཀས་ཏེ་ངག་འཁྱལ་གྱིས་སོ་ནམ་ཞིང་རྨོ་སོན་འདེབས་ཕྱུགས་སྐྱོང་ཚོང་སྐྱེད་སོགས་ཀྱང་ངལ་བ་ལ་འབྲས་བུ་མེད་ཅིང༌། དཔྱིད་ཀ་སྣང་ཞིང་སྟོན་དུས་འབྲས་བུ་མེད་པ་དུས་ཀྱི་རྗེས་སུ་མི་འགྲོ་བར་ཉམས་ཤིང་མི་བརྟན་པས་ངན་པར་འགྱུར་རོ། །བརྣབ་སེམས་ཀྱིས་འབྲུ་རྣམས་ལ་སྦུན་དང་འབྲས་བུ་གོ་ལྡོག་ཅིང་སྦུན་མང་ལ་འབྲས་བུ་མེད་པ་དང༌། གང་དུ་སྐྱེ་བའི་གནས་སྔར་བཟང་ཡང་དུས་ཚིགས་ལོག་སྟེ་ངན་ཅིང་གདུག་པས་སྐབས་བཙལ་ཏེ་གནོད་པ་མང་པོ་མཐོང་ཞིང་སྡུག་བསྔལ་བར་འགྱུར་བར་དེར་སྐྱེའོ། །གནོད་སེམས་ཀྱིས་དམག་འཁྲུགས་སོགས་མངའ་འབངས་སྡུག་བསྔལ་ལ་སྦྱོར་བའི་སྡིག་སྤྱོད་རྒྱལ་པོ་དང་འབྲེལ་ནས་ཉམས་ཉེས་འབྱུང་ཞིང་སྡུག་བསྔལ་བ་དང༌། ཆོམ་རྐུན་དང་སྦྲུལ་གདུག་པ་དང་མི་རྒོད་དང་སྟག་གཟིག་སོགས་གཅན་གཟན་སྣ་ཚོགས་པས་བསམ་སྦྱོར་ངན་པས་རྩུབ་ཅིང་འཚེ་བ་དང༌། ལོ་ཏོག་དང་འབྲས་བུ་རྣམས་རོ་ཡང་མི་འདོད་པའི་ཚ་ཞིང་ཁ་བ་དང༌། ལུས་ཟུངས་ངན་པ་དང་གཞན་གྱིས་རང་བཞིན་གནོད་པའི་རྐྱེན་དུ་མས་བཀབ་ཅིང་སྡུག་བསྔལ་བའི་ཡུལ་དུ་སྐྱེའོ། །ལོག་ལྟས་ནི་རིན་པོ་ཆེ་དང་དར་གོས་ལ་སོགས་པ་ཕུན་ཚོགས་ཀྱི་དངོས་པོའི་འབྱོར་པས་དུས་ཀུན་ནས་སྤོང་པས་དབུལ་ཞིང༌། ཡིད་དུ་འོང་བའི་བཟའ་ཤིང་དང་སྨན་ཤིང་སོགས་མེད་པའམ་ཉུང་བ་དང༌། ལོངས་སྤྱད་བྱའི་མེ་ཏོག་དང་འབྲས་བུ་ལ་སོགས་པ་དག་ཀྱང་བཀྲེས་སྐོམ་སེལ་བའི་མཐུ་ཆུང་བས་ལུས་ཟུངས་སུ་མི་འགྲོ་ལ། དགྲ་གདོན་སོགས་ཀྱིས་ཉེན་པས་སྐྱབས་གནས་མེད་པ་དང་སྐྱོབ་པ་དཔུང་གཉེན་སོགས་མེད་པར་རང་གཅིག་པུར་སྐྱེའོ། །སྐྱེས་བུ་བྱེད་པའི་ལས་ཀྱི་འབྲས་བུ་ནི། སྲོག་གཅོད་པ་སོགས་གང་བྱས་པའི་ལས་དེ་དང་དེ་སྲིད་པ་ཕྱི་མར་ཉིང་མཚམས་སྦྱོར་བ་ལ་མི་ལྟོས་པར་སྐད་ཅིག་རེ་རེ་བཞིན་མང་པོར་འཕེལ་བའི་རྒྱུ་ཆུང་ངུ་ལས་ཀྱང་འབྲས་བུ་སྡུག་བསྔལ་མཐའ་དག་སྟེ་མང་པོ་བསྐྱེད་དོ། །སྡིག་པས་འདི་ལྟར་ཐོག་མེད་ནས་ཆོས་ཉིད་ཀྱི་དོན་མ་རིག་པའི་མུན་པ་སྟུག་པོས་ཁེབས་ཤིང་དེ་ལས་ཀྱང་ཐུ་བ་གཏན་མི་མཐོང་བའི་མུན་ནག་གིས་བསླད་པ་ཅན་གྱི་འཁྲུལ་སྣང་བར་མ་ཆད་པར་འཁོར་ཞིང་ཐར་དཀའ་བའི་བཙོན་ར་ཤིན་ཏུ་བརྣག་ཅིང་བསྲན་དཀའ་བར་གཟུགས་སོགས་ཉེར་ལེན་ཕུང་པོ་ལྔའི་སྟེང་དུ་སྡུག་བསྔལ་དྲག་པོ་སྤུ་གྲི་རྣོན་པོ་ལྟ་བུའི་དབལ་གྱིས་བཟོད་དཀའི་ཚོར་བ་ཡུན་རིང་པོར་མྱོང་བའི་གནས་སྐབས་ཐོབ་པར་གྱུར་པ་འདི་ནི། མི་དགེ་བ་བཅུ་དང༌། མཚམས་མེད་ལྔ། མཆོད་རྟེན། བྱང་སེམས། དགྲ་བཅོམ་སོགས་བཅོམ་པའི་སྡིག་པ་སྣ་ཚོགས་པར་བྱས་པས་ཡིན་ནོ། །རྒྱུ་མཚན་དེའི་ཕྱིར་ན་འཁྲུལ་སྣང་ལ་དངོས་པོ་རང་མཚན་དུ་བཟུང་བའི་མཐོ་དམན་དུ་སྣང་བ་མ་དག་གཞན་དབང་གི་གནས་སྐབས་སོ་སྐྱེ་རང་རྒྱུད་པའི་དུས་ན། མཐོ་རིས་འཕེན་བྱེད་ཀྱི་རྒྱུ་ནི་དགེ་བའི་ལས་ལམ་བཅུ་ཡིན་ལ། མི་དགེ་བཅུ་ལས་ཕྱི་རོལ་ཕྱོགས་པ་ཡི་ཞེས་དེ་ལས་ལྡོག་པ་སྲོག་སྐྱོབ་པ་སོགས་དགེ་བའི་ལས་བཅུ་པོ་ལ་ཡང་དག་བསྙེན་པར་མཛོད་ཅིག་ཅེས་གསུངས་ཏེ། རིན་ཆེན་ཕྲེང་བ་ལས། ཆོས་འདིས་དམྱལ་བ་ཡི་དྭགས་དང༌། །དུད་འགྲོ་རྣམས་ལས་རྣམ་གྲོལ་ཞིང༌། །ལྷ་དང་མི་ཡི་ནང་དག་ཏུ། །བདེ་དཔལ་རྒྱལ་སྲིད་རྒྱས་པ་ཐོབ། །བསམ་གཏན་བཞི་དང་གཟུགས་མེད་བཞི། །ཚངས་སོགས་བདེ་བ་མྱོང་བར་བྱེད། །ཅེས་སོ། །དེ་ལྟ་བུའི་དགེ་མི་དགེའི་རྣམ་བཞག་ཇི་ལྟར་བསྟན་པ་བཞིན་ཤེས་ནས་དེ་རྒྱུད་ལ་བསྙེན་པ་ལས། བསོད་ནམས་ཆ་མཐུན་བཅུ་པོ་དེས་རྣམ་སྨིན་བདེ་འགྲོར་འཕེན་ཅིང༌། མི་དགེ་རྣམ་པ་བཅུས་ངན་འགྲོར་འཕེན་པས་དཀར་ནག་རྒྱུ་འབྲས་ལ་བླང་དོར་ཚུལ་བཞིན་བགྱིད་པ་ནི་སྐྱེས་བུ་ཆུང་ངུའི་ལམ་སྟེ་མདོ་ལས། འཇིག་རྟེན་པ་ཡི་ཡང་དག་ལྟ། །ཆེན་པོ་སུ་ལ་ཡོད་གྱུར་པ། །དེ་ནི་ཚེ་རབས་སྟོང་དུ་ཡང༌། །ངན་གྲོར་འགྲོ་བར་མི་འགྱུར་རོ། །ཞེས་སོ། །དེ་ལ་ཐར་པའི་ཆ་དང་མཐུན་པའི་དགེ་བ་ནི། ལས་དང་ཉོན་མོངས་པའི་ཟག་པ་ལྷག་མེད་དུ་དག་པའི་མྱ་ངན་ལས་འདས་པ་དམ་པའི་རྒྱུ་གང་ཟག་གི་བདག་མེད་རྟོགས་པའི་ཤེས་རབ་ཀྱིས་ཟིན་པས་དགེ་བ་བཅུ་དང༌། བསམ་གཏན་བཞི་དང་གཟུགས་མེད་སྙོམས་འཇུག་བཞི་དང༌། སྦྱིན་སོགས་ནས་ཤེས་རབ་བར་དྲུག་པོ་བླང་དོར་བྱེད་པ་ཡིན་ལ། དེ་ཡང་ཚོགས་ལམ་ཐོས་པ་གཙོ་ཆེ་བ་དང༌། སྦྱོར་ལམ་སྒོམ་བྱུང་གཙོ་ཆེ་བ་དང༌། མཐོང་ལམ་བདག་མེད་གཙོ་ཆེ་བ་དང༌། སྒོམ་ལམ་བདག་མེད་དང་ཚུལ་ཁྲིམས་གཙོ་ཆེ་བ་བཅས་བསྒྲུབས་ནས་མི་སློབ་པའི་ལམ་སྟེ་ལྔས་བསྡུས་པའི་ཟག་མེད་ཀྱི་དགེ་ཚོགས་ཡིན་ནོ། །ཉན་རང་བཞིན་དགེ་བཅུ་སོགས་བསྒྲུབ་བྱ་དེ་ཡང་བླང་དོར་དུ་དམིགས་པ་ཅན་མ་ཡིན་པར་ཆོས་དང་གང་ཟག་གིས་བསྡུས་པའི་ཕྱི་ནང་ཐམས་ཅད་བདག་མེད་གཉིས་ཀྱི་རང་བཞིན་སྟོང་ཉིད་ཀྱི་དོན་ཤེས་རབ་ཆེན་པོས་ཚུལ་བཞིན་རྟོགས་ནས། དེ་ལྟར་སྟོང་ཉིད་དེ་སྙིང་རྗེས་ཟིན་པའི་སྦྱིན་སོགས་ཐབས་ཀྱི་ཆ་ཐམས་ཅད་ལ་རྒྱས་ཐེབས་པའི་ཐབས་ཤེས་ཟུང་འབྲེལ་གྱི་དགེ་བ་གསེར་འགྱུར་གྱི་རྩི་ལྟ་བུ་དེས། སྲིད་པ་ལ་དོར་བྱའི་མཚན་མ་དང༌། ཞི་བ་ལ་བླང་བྱའི་མཚན་མར་བཟུང་ནས་དེ་གཉིས་མཉམ་ཉིད་དུ་མ་ཤེས་པར་འགལ་བ་ཅན་དུ་ལྟ་བའི་ལྕགས་ཁམས་ལྟ་བུ་ལ་ཐེབས་པས། སྲིད་ཞི་གཉིས་ཀའི་མཐའ་ལ་མི་གནས་པའི་ཡེ་ཤེས་རྒྱལ་བའི་གཟུགས་སྐུ་ཕྲིན་ལས་རྩོལ་མེད་དུ་འབྱུང་བའི་ཁམས་མཐར་ཐུག་པ་འགྲུབ་པའི་རྒྱུ་ནི། འཇིག་རྟེན་ལས་ཤིན་ཏུ་འདས་པའི་དགེ་བ་ཡིན་ཏེ། སྤྱོད་འཇུག་ལས། ཡན་ལག་འདི་དག་ཐམས་ཅད་ནི། །ཐུབ་པས་ཤེས་རབ་དོན་དུ་གསུངས། །ཞེས་གསུངས་པ་ལྟར་རོ། །དེ་ལྟར་ཐེག་ཆེན་སློབ་པའི་ལམ་བཞི་པོའི་དུས་སུ་སྦྱིན་སོགས་སྒྱུ་མའི་ཚུལ་དུ་དམིགས་པར་བྱས་ནས་རྣམ་པ་དང་བཅས་པ་ཉམས་སུ་ལེན་པའི་བསོད་ནམས་ཀྱི་ཚོགས་དང༌། འཁོར་གསུམ་དམིགས་མེད་ཤེས་རབ་ཀྱིས་ཟིན་པའི་ཆ་ཡེ་ཤེས་ཀྱི་ཚོགས་ཏེ་ཚོགས་གཉིས་ཟུང་འཇུག་གི་ནུས་པ་ཆེར་གོམས་པའི་སྟོབས་ཀྱིས། ཉོན་མོངས་དང་ཤེས་བྱའི་སྒྲིབ་པ་གཉིས་སྦྱངས་ཏེ་འབྲས་བུ་སྐུ་གཉིས་མངོན་དུ་འཐོབ་པར་འགྱུར་ཏེ་རིན་ཆེན་ཕྲེང་བ་ལས། སངས་རྒྱས་རྣམས་ཀྱི་གཟུགས་སྐུ་ནི། །བསོད་ནམས་ཚོགས་ལས་བྱུང་བ་སྟེ། །ཆོས་ཀྱི་སྐུ་ནི་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་སོ། །དེ་ཡང་རང་བཞིན་རྣམ་དག་ཆོས་ཉིད་བདེ་གཤེགས་སྙིང་པོ་སྤྲོས་མཐའ་བྲལ་བའི་དག་པའི་ཚུལ་ལ་རྒྱུ་འབྲས་ཐ་སྙད་དུ་བཏགས་པ་ཙམ་ལས་ཐུན་མོང་གི་ཐེག་པ་ལྟར་བསྐྱེད་བྱ་སྐྱེད་བྱེད་དུ་མ་གྲུབ་པའི་དོན་འདི་ནི་ཕལ་གྱིས་རྟོགས་དཀའ་བའི་དེ་ཁོ་ན་ཉིད་ཟབ་མོའི་རྟེན་ཅིང་འབྲེལ་བར་འབྱུང་བ་ལགས་ཏེ། དགོངས་པ་ངེས་འགྲེལ་ལས། ཟབ་མོ་བྱིས་པའི་སྤྱོད་ཡུལ་མ་ཡིན་པ། །བརྗོད་མེད་གཉིས་མིན་རྒྱལ་བས་བསྟན་མཛད་ཀྱང༌། །བྱིས་པ་གཏི་མུག་རྨོངས་པ་འདི་དག་ནི། །སྨྲ་བའི་སྤྲོས་ལ་དགའ་ཞིང་གཉིས་ལ་གནས། །ཞེས་སོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། ལས་རྒྱུ་འབྲས་ཀྱི་ཚོམས་ཏེ་ལེའུ་གསུམ་པའོ།། །།སྲིད་པའི་གནས་རིས་ན་མངོན་པར་མཐོ་བའི་ལྷ་མིའི་ལུས་རྟེན་འཁོར་བའི་རྒྱ་མཚོ་ལས་སྒྲོལ་བའི་གྲུ་བོ་མཆོག་ལ་བརྟེན་པ་དེ་རྣམས། རེ་ཞིག་ཚེ་འདི་ལ་ངན་སོང་གསུམ་གྱི་ཆུ་སྲིན་གདུག་པའི་ལྕེས་བཏང་བ་སྟེ་དེར་ལྷུང་ཟིན་པ་མ་ཡིན་ཡང༌། ཐར་པ་མྱ་ངན་ལས་འདས་པའི་སྐམ་སར་ཉོན་མོངས་པའི་རླན་དང་བྲལ་བར་མ་ཕྱིན་ཏེ། རྩེ་མོ་ཐོབ་པ་རྩ་མི་འཆད། །བཟོད་ཐོབ་ངན་སོང་ལྷུང་མི་སྲིད། །ཅེས་ཙམ་ཡང་མ་ཐོབ་པས་འཕགས་པའི་བདེན་པ་བཞི་ཡི་དེད་དཔོན་བསྟེན་པར་བྱ་ཞེས་གཟུགས་ཅན་རྒྱན་དུ་སྦྱར་ཏེ། དེ་ཡང་བདག་ཅག་གི་སྟོན་པས་ཝཱ་ར་ཎ་སིར་ལྔ་སྡེ་བཟང་པོ་སོགས་ལ། དགེ་སློང་དག །འདི་ནི་སྡུག་བསྔལ་ལོ། །འདི་ནི་ཀུན་འབྱུང་ངོ༌། །འདི་ནི་འགོག་པའོ། །འདི་ནི་ལམ་མོ། །ཞེས་ངོ་བོའི་སྒོ་ནས་དང༌། ཡང་སྡུག་བསྔལ་ཤེས་བྱ། ཀུན་འབྱུང་སྤང་བྱ། འགོག་པ་མངོན་དུ་ཐོབ་བྱ། ལམ་བསྟེན་བྱའོ། །ཞེས་རྒྱུའི་སྒོ་ནས་དང༌། ཡང་དགེ་སློང་དག་སྡུག་བསྔལ་ཤེས་ཟིན་ཤེས་པར་བྱ་བ་གཞན་མེད། ཀུན་འབྱུང་སྤངས་ཟིན་སྤང་བར་བྱ་བ་གཞན་མེད། འགོག་པ་མངོན་དུ་བྱས་ཟིན་མངོན་དུ་བྱ་བ་གཞན་མེད། ལམ་རྒྱུད་ལ་བསྟེན་ཟིན་བསྟེན་པར་བྱ་བ་གཞན་མེད། ཅེས་འབྲས་བུའི་སྒོ་ནས་བཟླས་ཏེ་ལན་གསུམ་དུ་གསུངས་པ་བཞིན་ཤེས་པར་བྱའོ། །དེ་ལ་སྡུག་བསྔལ་གྱི་རང་བཞིན་ཤེས་པར་བྱ་བ་ནི། འདི་ལྟར་འཁོར་བའི་གནས་རིགས་དྲུག་པོ་དམའ་བ་ངན་སོང་གསུམ་པོའམ་མཐོ་བ་བདེ་འགྲོ་གསུམ་པོ་ཡང་རུང༌། སྡུག་བསྔལ་གྱི་སྡུག་བསྔལ་དང༌། འགྱུར་བའི་སྡུག་བསྔལ་དང༌། ཁྱབ་པ་འདུ་བྱེད་ཀྱི་སྡུག་བསྔལ་ཏེ། སྡུག་བསྔལ་གྱི་སྡུག་བསྔལ་མཛེ་ཐོག་ཏུ་ཕོལ་གྱིས་གཏུགས་པ་ལྟ་བུ། འགྱུར་བའི་སྡུག་བསྔལ་བདེ་བ་སྡུག་བསྔལ་ལ་འགྱུར་བ་སྟེ་སྤྲོ་བསངས་ལ་ཕྱིན་པ་དུག་སྦྲུལ་གྱིས་གཙེས་པའམ་ཁ་ཟས་རོ་བདའ་བ་ཟོས་པས་སྲིན་ཕོ་ལང་དུ་སོང་བ་ལྟ་བུ། ཉོན་མོངས་པས་ལྐོག་ཏུ་བྱས་པའི་ཕྱི་ནང་སྡུག་བསྔལ་གྱི་རང་བཞིན་དུ་མ་རིག་པའི་འདུ་བྱེད་པ་ཁྱབ་པ་འདུ་བྱེད་དེ་སྡུག་བསྔལ་གསུམ་གྱིས་དམ་ལ་མ་བཞག་པ་འཁོར་བའི་གནས་གང་ཡང་ཡོད་པ་མ་ཡིན་ཏེ་ངན་སོང་གསུམ་སྡིག་འབྲས་ཀྱི་སྡུག་བསྔལ། མི་དང་འདོད་ལྷར་མངོན་གྱུར་དང༌། ཁམས་གོང་མར་བསམ་གཏན་གྱི་ཚོར་བ་སོགས་ཡོད་དོ། །འདི་ལྟར་འཕྲལ་ཕུགས་ཀུན་ཏུ་ཕུང་ཀྲོལ་ཏེ་གནོད་པའི་རྒྱུ་འབྲས་བསྐྱེད་པར་བྱེད་ལ། དུག་སྦྲུལ་གདུག་པ་མགོ་འཕང་བསྟོད་པ་ཡི་གནོད་པ་ལྟར། ཤིན་ཏུ་མ་རུངས་པ་ནི་ནང་དུ་སེམས་ཆགས་སྡང་སོགས་ཚུལ་བཞིན་མ་ཡིན་པ་ཡིད་ལ་བྱེད་པའི་འཁྲུལ་སྣང་ལ་མངོན་པར་ཞེན་པ་འདོད་པའི་གདོན་དང༌། ཕྱི་རོལ་གཟུགས་སྒྲ་སོགས་ཡུལ་གྱི་ངོ་བོ་ནམ་མྱོང་བའི་ཚེ་བདེ་བར་སྣང་ཡང་ཕྱིས་གནོད་པས་དུག་དང་འདྲ་སྟེ། དེ་གཉིས་ཕན་ཚུན་ཡུལ་གྱི་རྣམ་པས་སེམས་བསླད་དེ་ལྕགས་བསྲེགས་ཀྱི་དུས་ཀྱི་ཚ་བ་ལྟར་འཛིངས་ཤིང་གཏུགས་ལ། འདོད་པའི་ཉེས་དམིགས་ཤེས་པའི་བློ་གྲོས་ཀྱིས་དབེན་པའི་ཕྱིར་བཙོན་ར་དེ་ཡི་ནང་ནས་ཐར་པའི་གོ་སྐབས་མེད་པར་སྡུག་བསྔལ་གྱིས་གདུངས་ཤིང་ཉམ་ཐག་པའི་རང་ཅག་འཁོར་བར་བསམ་ན་སྙིང་ནས་སྐྱོ་བ་འཕེལ་ལོ། །འཁོར་བའི་སྐྱེ་བོ་བདེ་བ་འདོད་ཅིང་དེ་སྒྲུབ་པ་ལ་མངོན་པར་སྦྱོར་ཞིང་སྒོ་གསུམ་ཚེགས་ཆེན་པོས་བརྩོན་པ་དག་ཀྱང༌། དེའི་རྒྱུ་མི་ཤེས་པས་གཏི་མུག་གི་མཐུས་ནོན་ཏེ་ལོག་གཡེམ་སོགས་སྡུག་བསྔལ་གྱི་རྒྱུ་སྣ་ཚོགས་པ་དེའི་འབྲས་བུ་སྡུག་བསྔལ་གྱི་མཚོན་ཆ་རྣོན་པོའི་དབལ་ལ་བརྟེན་པར་བྱས་པས། འཕྲལ་དང་ཡུན་གྱི་གནོད་པའི་གནས་སུ་རང་གིས་རང་ཉིད་ཡང་དག་སྦྱར་ཏེ། སྤྱོད་འཇུག་ལས། སྡུག་བསྔལ་འདོར་འདོད་སེམས་ཡོད་ཀྱང༌། །སྡུག་བསྔལ་ཉིད་ལ་མངོན་པར་རྒྱུག །བདེ་བ་འདོད་ཀྱང་གཏི་མུག་པས། བདག་གི་བདེ་བ་དགྲ་ལྟར་འཇོམས། །ཞེས་སོ། །ཆགས་པས་འདི་ཕྱིར་སྡུག་བསྔལ་བྱེད་པ་ནི། མར་མེའི་གཟུགས་མཛེས་པ་དང་དེར་ཕྱེ་མ་ལེབ་ཆགས་པས་བསྲེགས་ནས་འཆི་བ་བཞིན་དུ། བསྟོད་སོགས་སྙན་པའི་སྒྲ་ལ་རྣ་ཤེས་དང༌། ཐ་མ་ཁ་སྟེ་སྣ་དུད་སོགས་དྲི། ཤ་སོགས་རོ། བུད་མེད་དང་དར་གོས་སོགས་ལུས་རེག་བྱ་ལ་ཆགས་པར་བྱས་པས་བསླུས་ཏེ་ཐར་པའི་ལམ་གྱི་སྲོག་འཕྲོག་པར་འགྱུར་བ་ནི། རྣ་བ་སྒྲར་ཆགས་པས་པི་ཝཾ་སོགས་ལ་བརྟེན་ནས་རི་དྭགས་དུག་མདས་གསོད། སྣ་དྲི་ལ་ཆགས་པས་བུང་བ་མེ་ཏོག་ཏུ་འཐུམ། ལྕེ་རོ་ལ་ཆགས་པས་ཉ་མོ་ལྕགས་ཀྱུས་འཛིན་པ་དང༌། གླང་པོ་ཆེ་དགའ་མའི་རེག་བྱ་ལ་ཆགས་པས་འདམ་དུ་རང་སྲོག་དང་བྲལ་བ་སོགས་འདོད་པའི་ཡུལ་ལྔ་དག་རེ་རེས་བསླུས་པ་དང་རྟེན་ཅིང་འབྲེལ་ཏེ། དབྱིག་གཉེན་གྱིས། སྐྱེས་བུ་དག་ནི་གཅིག་ལ་ཡང༌། །ལྔ་པོ་འདི་དག་རྟག་ལྡན་ཞིང༌། །ཉིན་མཚན་དུ་ནི་རབ་འཇོམས་ན། །བདེ་བ་ཇི་ལྟར་ཐོབ་པར་འགྱུར། ཞེས་སོ། །སྲིད་པ་འཁོར་བའི་ཡུལ་ལ་སྡུག་བསྔལ་ཐུ་བ་ནི་གང་དང་ཕྲད་པ་ཙམ་གྱིས་ཚར་གཅོད་པར་བྱེད་པ་གཏུམ་པོའི་མེ་ཡིན་ནའང་སྡུག་བསྔ་ལ། བཤེས་མེད་དུ་ཁྲོ་ཞིང་འཚེ་བའི་མངོན་སྤྱོད་རྩུབ་པ་སྟག་དང་སེང་གེ་སོགས་གཅན་གཟན་དང༌། མི་རྒོད་སོགས་ཀྱི་གནོད་པས་གཙེས་པ་དང༌། རྒྱལ་པོའི་ཆད་པས་བཙོན་དོང་དུ་བཅུག་པ་སོགས་ཀྱིས་འཚེ་བ་དང༌། དེ་ལས་ཀྱང་ཤུགས་མྱུར་ཞིང་རྒྱུན་རིང་བའི་སྡུག་བསྔལ་ནི། རྩ་བའི་སྡུག་བསྔལ་གསུམ་དང༌། སྐྱེ་རྒ་ན་འཆི་སོགས་ཡན་ལག་གི་སྡུག་བསྔལ་བརྒྱད་རྣམས་སྔ་ཕྱི་བརྒྱུད་མར་འབྱུང་བས་འགྲོ་བ་འདི་མནར་བ་ཡིན་ནོ། །ཐོག་མེད་ནས་འཁོར་བའི་གནས་འདིར་བདག་ལ་ཕ་མ་སོགས་ཕན་འདོགས་པའི་བཤེས་སམ། མཐུན་མི་མཐུན་གང་ཡང་མིན་པའི་བར་མ་དང༌། ཉེ་བའི་གཉེན་དང༌། འཁོན་པའི་དགྲ་བོ་འདི་ཙམ་ཞེས་བསམ་པར་མི་ནུས་ཏེ། ཅིའི་ཕྱིར་ཞེ་ན། མཐའ་དག་སྟེ་མ་ལུས་པའི་སེམས་ལྡན་གྱི་ནང་ནས་རེ་རེས་ཀྱང་དགྲ་དང་གཉེན་མཛའ་བཤེས་དང་བར་མའི་ཕྱོགས་གསུམ་བཟུང་ནས། ཕ་མ་སོགས་གཉེན་བཤེས་སུ་གྱུར་ན་ཕན་བཏགས་པ་དང༌། དགྲར་གྱུར་པའི་ཚེ་གནོད་པ་སྦྱིན་པ་དང༌། བར་མ་བཏང་སྙོམས་སོགས་བསམ་ལས་འདས་པ་མཆིས་ན་སེམས་ཅན་སྨོས་ཅི་འཚལ་ཏེ། འཕགས་པ་ཀཱཏྱ་ནས་བསོད་སྙོམས་བྱོན་པའི་ཚེ་སྔར་གྱི་ལས་འབྲས་གཟིགས་ཏེ། ཕ་ཤ་ཟ་ཞིང་མ་ལ་བརྡེག །ལས་ངན་དགྲ་བོ་པང་དུ་ཁུར། །ཆུང་མས་ཁྱོ་ཡི་རུས་པ་འཆའ། །འཁོར་བའི་ཆོས་ལ་གད་མོ་བྲོ། །ཞེས་དང༌། བཤེས་སྤྲིངས་ལས། མ་ཡི་ཐུག་མཐའ་རྒྱ་ཤུག་ཚིགས་གུ་ཙམ། །རིལ་བུར་དྲིལ་ཀྱང་ས་ཡིས་ལང་མི་འགྱུར། །ཞེས་སོ། །སྲོག་ཆགས་གྲོག་སྦུར་སོགས་ཤིན་ཏུ་ཕྲ་བ་རྡུལ་ཕྲན་ལྟ་བུའི་སེམས་ཅན་མང་པོའི་ལུས་ཀྱི་རྣམ་གྲངས་མང་པོ་སྨོས་ཅི་དགོས། བདག་གཅིག་པུའི་སྲོག་གི་རྟེན་འོས་པ་ཤིན་ཏུ་ཕྲ་བའི་གཟུགས་སུ་གྱུར་པ་དེ་དང༌། འདོད་པའི་དངོས་པོ་བསྒྲུབ་པའི་ཕྱིར། མགོ་དང་ཡན་ལག་རྣམས་མཚོན་ཆ་སོགས་ཀྱིས་བཅད་གཏུབ་བགྱིས་སོ་ཅོག་སྤུངས་ན་དཔག་ཚད་བརྒྱད་ཁྲི་རི་རབ་ལྷུན་པོའི་ཆེ་ཐང་ཡང་ཉམས་ཏེ་དེ་བས་ཀྱང་ཆེས་ལྷག་པར་འགྱུར་ཞིང༌། ཚ་དམྱལ་གྱི་གནས་སུ་ལན་གྲངས་མང་དུ་ཟངས་ཞུན་ཁོལ་མ་འཐུངས་པ་དང༌། བརྒྱ་ལ་རེས་འགའ་ཡི་དྭགས་ཀྱི་ལུས་སུ་གྱུར་ནས་རྣག་ཁྲག་དང་ཕྱི་ས་སོགས་མི་གཙང་བ་ཟོས་པ་དང༌། འཁོར་བའི་གནས་མཐོ་དམན་ཀུན་ཏུ་ལུས་སེམས་སྡུག་བསྔལ་བའི་རྒྱུ་ལས་མཆི་མ་ཟག་པ་རྣམས་ཀྱང་ཕྱོགས་མཐའ་ལ་གཏུགས་པའི་རྒྱ་མཚོར་འབབ་པའི་ཆུ་ཀླུང་དག་ལས་ཀྱང་མང་ངོ་ཞེས་དྲན་པ་ཉེར་བཞག་སོགས་ལས་གསུངས་སོ། །སྤྱིར་འཁོར་བའི་གནས་ཐམས་ཅད་སྡུག་བསྔལ་གྱི་རང་བཞིན་ལས་མ་འདས་ཀྱང་ཁྱད་པར་ངན་སོང་གསུམ་དང༌། དེའི་ནང་ནས་ཀྱང་དམྱལ་བའི་སྡུག་བསྔལ་ནི་ཚད་མེད་དེ་མཐའ་ཡས་སོ། །འོན་ཏེ་ཕྱོགས་ཙམ་བཤད་ན་ལྕགས་ཀྱི་མདག་མེ་འབར་ཐར་གནས་བཞིན་ཕན་ཚུན་གཅིག་གིས་གཅིག་མཐོང་ན་དགྲ་མི་ཤ་བོ་བཞིན་ཞེ་ལྡང་གི་མཚོན་ཆ་སྣ་ཚོགས་པས་གསོད་ཅིང་ལས་ཀྱིས་སོས་ཞེས་སྒྲ་གྲགས་པའི་མོད་ལ་སླར་ཡང་སོས་པར་འགྱུར་ལ། དེ་ཡང་དྲན་པ་ཉེར་བཞག་ལས། །མི་གང་མི་ནི་གསོད་པ་དང༌། །གཞན་ཡང་བསྐྱེད་ནས་གསོད་བྱེད་པ། །དེ་དག་ངེས་པར་ཡང་སོས་འགྲོ། །ཞེས་སོ། །ཐིག་ནག་ནི་ཐིག་ནག་པོ་བརྒྱད་དང་བཅུ་དྲུག་ནས་གྲངས་མེད་བར་སོག་ལེས་གཤོག་ལ། སླར་ཡང་ལས་ཀྱི་དབང་གིས་འབྱར་ལ་གཤོག་པ་སོགས་སྡུག་བསྔལ་རྒྱུན་མི་འཆད་པར་མྱོང་བར་འགྱུར་ཏེ། དེའི་རྒྱུ་ནི། ཕ་མ་དང་ནི་གྲོགས་དང་གཉེན། །གཉེན་བཤེས་ལ་ནི་འཁུ་བྱེད་དང༌། །ཕྲ་མ་རྫུན་ནི་སྨྲས་པའི་མི། །ཐིག་ནག་ཏུ་ནི་འགྲོ་བར་འགྱུར། །ཞེས་དྲན་པ་ཉེར་བཞག་ལས་གསུངས་སོ། །གསུམ་པ་བསྡུས་འཇོམས་ནི། ད་ལྟ་བསད་པའི་སྲོག་ཆགས་ཀྱི་མགོ་བརྙན་དུ་ཡོད་པའི་བྲག་རི་ཕན་ཚུན་འཐབ་པའི་བར་བཅར་བ་དང༌། གཏུན་དང་ཐོ་བས་འཐག་པར་བྱེད་དེ། རྒྱུ་ནི། ར་དང་ལུག་དང་ཝ་ཕག་དང༌། །རི་བོང་བྱི་བ་རི་དྭགས་སོགས། །གཞན་ཡང་བསྐྱེད་ནས་བསད་བྱས་ན། །ལུས་ཅན་བསྡུས་འཇོམས་འགྲོ་བར་འགྱུར། །ཞེས་དྲན་ཉེར་ལས་སོ། །བཞི་པ་ངུ་འབོད་ནི། ངུ་འབོད་དྲག་པོའི་སྡུག་བསྔལ་གྱིས་གདུང་སྟེ་ལྕགས་ཞུན་བསྐོལ་བར་ལས་ངན་པའི་སེམས་ཅན་མང་པོ་རབ་ཏུ་འཚོད་ཅིང༌། མེ་འབར་བའི་ཐོ་བ་རལ་གྲི་སོགས་ཀྱིས་དབད་ཅིང་སྡུག་བསྔལ་གྱི་ཚོར་བ་ཆེན་པོའི་འོ་དོད་འབོད་པ་སྟེ། རྒྱུ་ནི། འདིར་ནི་ལུས་ཅན་གང་དག་གིས། །ལུས་དང་ངག་ཡིད་ཉོན་མོངས་བྱེད། །གང་དག་ལྷད་འཇུག་གཞན་གཡོ་བྱེད། །མི་དེ་དག་ནི་ངུ་འབོད་འགྲོ། །ཞེས་པ་ལྟར་རོ། །ལྔ་པ་ངུ་འབོད་ཆེན་པོ་ནི། སྔར་གྱི་དེ་ལས་སྡུག་བསྔལ་ཆེ་བས་འབོད་སྒྲོག་ཆེན་པོ་ལྕགས་ཁྱིམ་འབར་བ་ཉིས་རིམ་སོགས་སུ་བཙུད་ནས་བསྲེག་པས་འོ་དོད་འདོན་ཏེ། རྒྱུ་ནི། གང་གིས་ལྷ་དང་བྲམ་ཟེ་དང༌། །བླ་མའི་རྫས་འཕྲོག་སྡུག་བསྔལ་བྱས། །གང་དག་གཏམས་པའི་འཕྲོག་བྱེད་པ། །དེ་དག་ངུ་འབོད་ཆེན་པོར་འགྲོ། །ཞེས་པ་ལྟར་རོ། །དྲུག་པ་ཚ་བ་ནི་ལྕགས་ཀྱི་ས་གཞི་འབར་བར་གན་རྐྱལ་དུ་བརྡུང་ཞིང་བསྲེགས་པས་ཚ་བ་དང༌། ལྕགས་ཀྱི་གསལ་ཤིང་མེ་རབ་ཏུ་འབར་བས་ལུས་ཀུན་ལ་གྱེན་དུ་དྲངས་ཤིང་ཐལ་མར་འབིགས་པའོ། །བདུན་པ་རབ་ཏུ་ཚ་བ་ནི། སྔ་མ་བས་ཀྱང་མེ་མཚོན་སོགས་རབ་ཏུ་ཚ་བའི་སྡུག་བསྔལ་མྱོང་ཏེ། མདུང་ཐུང་རྩེ་གསུམ་པས་ལུས་ཀྱི་གཞུང་འབིགས་ཤིང༌། ཕྱི་ནས་ལྕགས་བསྲེག་ཀྱི་ལེབ་མས་དཀྲི་བ་དང༌། ཡང་ལྕགས་ཟངས་ཀུན་ཏུ་འབར་བའི་ནང་ཁྲོ་ཆུ་ཁོལ་མར་འཚོད་ཅིང་རུས་གོང་དཀར་ནག་སོགས་སྐྱི་གཡའ་བ་དང་བཅས་པའོ། །བརྒྱད་པ་མནར་མེད་པ་ནི། སྡུག་བསྔལ་བར་མཚམས་མེད་ཅིང་དེ་ལས་ལྷག་པར་མནར་དུ་མེད་དོ། །ཕྱོགས་མཚམས་མེད་པར་ཀུན་ཏུ་འབར་བའི་ལྕགས་ཁྱིམ་ཉིས་རིམ་དང་བཞི་རིམ་དུ་ཚུད་ནས་རབ་ཏུ་འབར་བར་སྲེག་བྱེད་ཀྱི་མེ་དང༌། བསྲེག་བྱའི་སེམས་ཅན་གཉིས་མེད་དུ་བསྲེགས་པར་འགྱུར་ཏེ། དམྱལ་བའི་རབས་ལས། ཡོན་ཏན་དག་གི་ཆེ་བ་ལ། ཆོས་སྤངས་ཤིང་སྐུར་པ་བཏབ་པ་སོགས། མཆན། །གནོད་པ་དྲག་པོ་བྱས་པ་ལས། །ཕ་མ་བླ་མ་བསད་བྱས་པ། །ངེས་པར་བསྐལ་པར་མནར་མེད་འཚེད། །ཅེས་སོ། །ཉེ་འཁོར་དུ་དམྱལ་གནས་བརྒྱད་པོའི་སྡུག་བསྔལ་ཉིད་ལས་ཅུང་སྲབ་ནས་དེ་ལས་ཐར་པའི་དབུགས་འབྱིན་པར་སྣང་ནས་བྲོས་པའི་ཀུན་རྟོག་གིས་སོང་བ་ན། སོ་སོའི་ཕྱོགས་བཞི་ན་ཡོད་པ་ཉེ་འཁོར་བཅུ་དྲུག་ཞེས་བྱ་སྟེ་གནས་སྔ་མ་དེ་དག་གི་སྒོ་འཕར་བྱེ་བ་སྣང་ཚེ། ཆུ་ཀླུང་གི་འདུ་ཤེས་ཀྱིས་བསྙེགས་པས་ལྕགས་ཁྱི་རལ་པ་ཅན་གྱིས་དེད་ནས་མདག་མེའི་འོབས་སུ་ཚུད་པ་དང༌། སླར་བསིལ་ཉམས་ཀྱི་བདེ་བར་སེམས་ནས་སོང་བས་རོ་མྱགས་རུལ་བ་དང་ཕྱི་སའི་འདམ་རྫབ་སྟུག་པོར་ལྷུང་ནས་འབུ་རྡོ་རྗེའི་མཆུ་ཅན་གྱིས་ཕུག་པ་དང༌། སླར་ཡིད་དུ་འོང་བའི་ཐང་མཐོང་ནས་སོང་བས་རལ་གྲིའི་ལོ་མའི་ནགས་ཚལ་གྱིས་དུམ་བུར་བཅད་པ་དང༌། སླར་སོང་བས་ཐལ་ཚན་གྱི་ཆུ་བོ་རབ་མེད་དུ་བྱིང་ནས་སྡུག་བསྔལ་གཤིན་རྗེའི་ཁ་བས་ཐུ་བར་འགྱུར་རོ། །འདོད་ལོག་སྤྱད་པས་རོ་མྱགས་འདམ་དུ་སྐྱེ་བ་དང༌། སེམས་ཅན་ལ་མཚོན་ཆས་སྡུག་བསྔལ་བར་བྱས་བར་བྱས་པ་རལ་གྲིའི་ནགས་ཚལ་དང༌། མ་སྨིན་པའི་གཞོན་ནུ་མ་བསྟེན་པ་དང༌། དགེ་འདུན་གྱི་རྫས་ལ་རློམ་སེམས་བྱས་པ་དང༌། ཆུ་གནས་སོགས་བསད་པ་ཆུ་བོ་རབ་མེད་དེ། དམྱལ་གནས་དེ་དག་གི་ཕྱོགས་བཞིར་ཤལ་མ་ལི་ཡི་སྡོང་པོར་མཛའ་ཞིང་ཡིད་བཅུགས་པ་དག་གིས་སྔར་ཆགས་པའི་དམ་བཅའ་དྲན་ནས་དེར་བསྙེགས་པའི་ལམ་དུ་ཁྱི་དང་ལྕེ་སྤྱང་སོགས་ཀྱིས་དེད་ནས། ལྕགས་ཀྱི་ཚེར་མ་རྣོན་པོ་གྱེན་ཐུར་དུ་བསྟན་པས་ཚབས་ཆེན་ཕུག་པའི་ལུས་དེའི་རྩེར་ཐོན་པའི་ཚེ་སྔར་གྱི་འཛའ་གཅུག་དེ་འབར་ཞིང་རྩུབ་པའི་ལྕགས་ཀྱི་བུད་མེད་ཀྱི་ལུས་སུ་གྱུར་ནས། དམ་དུ་བཟུང་ཞིང་འཁྱུད་པས་ལུས་ཚིག་ཅིང་ཤ་ཁྲག་འཐོར་ཀླད་པ་ཆིལ་གྱིས་བྱུང་བ་སོགས་མྱོང་མཐར། ཁྭ་ཏ་རྡོ་རྗེའི་མཆུ་ཅན་དང༌། བྱ་རྒོད་དུར་བྱ་སོགས་ཀྱིས་མིག་ལ་འདྲུ་ཞིང་ལྟོ་འདྲེན་པར་བྱེད་དེ། དྲན་པ་ཉེར་བཞག་ཚིག་ལེའུར་བྱས་པ་ལས། བྱི་ཕོ་བྱེད་པ་ཤལ་མ་ལིར། །འཛེག་ཅིང་ལྕགས་ཀྱི་བུད་མེད་འཚེ། །ཞེས་སོ། །ཚེ་ཚད་ནི་གོང་མར་འདོད་ལྷའི་ཚེ་དང་ཉིན་ཞག་མཉམ། །ཞེས་སོགས་ཤེས་པར་བྱའོ། །གྲང་དམྱལ་ནི། གཅོང་རོང་ཡ་ང་བར་ཁ་ཆར་བུ་ཡུག་གིས་སྦྲེབས་པ་དེས་ལུས་འདར་བའི་ཐག་པ་ལྟ་བུ་ཡིས་བཅིངས་ཏེ་ཕན་ཚུན་འགུལ་བསྐྱོད་བྱེད་པར་མི་ནུས་ཤིང༌། གུམ་གུམ་པོར་འགྱུར་བཞིན་སྡུག་བསྔལ་གྱི་ཚོར་བར་རྣམ་ཤེས་འཐོགས་ནས་གསོན་པའི་སྐབས་ཙམ་དེ་ཡང་ཡོལ་མི་ཐུབ་པར། དཔེས་མཚོན་དུ་མེད་པའི་རླུང་གི་མཚོན་ཆ་རྣོ་ངར་ཅན་གྱིས་རུས་པའི་གཏིང་ཕུག་པའི་སྟོབས་ཀྱིས། གྲང་རེག་གིས་ལུས་ཕྱི་ནང་ཐམས་ཅད་བཏབ་པ་ནི། དཔེར་ན་སོ་ཡི་བར་དུ་ཏིལ་འབྲུ་འཚིར་བ་ལྟར་གྲང་རེག་གིས་གདུང་བར་འགྱུར་རོ། །ཧ་ཅང་གྲང་ཆེ་བས་ལུས་ལ་ཆུ་བུར་བྱུང་བས་ཆུ་བུར་ཅན་དང༌། དེ་བརྡོལ་ནས་རྨར་གྱུར་པས་ཆུ་བུར་བརྡོལ་བ་དང༌། གྲང་ཚོར་མི་བཟོད་པའི་ཨ་ཆུའི་སྨྲེ་སྔགས་ནར་མར་འབྱིན་པ་དང༌། དེ་ཙམ་སྨྲ་མི་ནུས་པས་ཀྱི་ཧུད་ཅེས་ཤུགས་རིང་འདོན་པ་དང༌། དེའང་ཟེར་མ་ནུས་པར་སྐྲ་སྤུ་རྣམས་གཡེང་ནས་ལུས་སེམས་བློང་བློང་པོར་འགྱུར་བས། སོ་འཐམ་འཐམ་པ་ཅན་དང༌། དེ་ནས་ཨུཏྤལ་ལྟར་པགས་པ་སྔོན་པོར་གྱུར་ནས་དྲུག་ཚལ་དུ་གས་པ་དང༌། དེ་གཉིས་རིམ་སོགས་པདྨ་དང་ནི་པདྨ་ཆེན་པོ་གཉིས་ནི་རིམ་པ་ལྟར་བརྒྱད་དང་བཅུ་དྲུག་ནས་གྲངས་མེད་དུ་གས་པའོ། །དེ་ལྟར་གས་པའི་རྨ་ནང་ནས་ཁྲག་ཆུ་སེར་སོགས་འཛག་ཅིང་སྲོག་ཆགས་མཆུ་རྣོན་པོ་ཅན་མང་པོ་སྐྱེས་ཤིང་དེ་ཀུན་གྱིས་འབིགས་ཤིང་བཟའ་བ་སོགས་སྡུག་བསྔལ་བསམ་གྱིས་མི་ཁྱབ་བོ། །ཚེ་ཚད་ནི་ཏིལ་བྲེ་བོ་ཆེ་ཁལ་ཉི་ཤུ་ཤོང་བའི་ཚད་དེ། མངོན་པ་མཛོད་ལས། ཏིལ་སྦྱངས་ནང་ནས་ལོ་བརྒྱ་རེར། །ཏིལ་རེ་ཕྱུང་བས་ཟད་གྱུར་ན། །ཆུ་བུར་ཅན་གྱི་ཚེ་ཡིན་ཏེ། །གཞན་གྱི་ཚེ་ནི་ཉི་ཤུ་འགྱུར། །ཞེས་སོ། །ཡན་ལག་ཉི་ཚེ་བ་ནི། མགལ་དུམ་སོགས་ལ་ལུས་སུ་འདུ་ཤེས་པས་དེ་བཅད་གཤགས་སོགས་བྱས་པས་སྡུག་བསྔལ་བ་དང༌། སྒོ་འཕར་མེད་པ་རྡོ་ཆུང་ངུ་དང༌། ཕ་ཝང་སོགས་རྡོ་ཆེན་པོ་ལ་རྟག་ཏུ་འཐུམས་ནས་སྡུག་བསྔལ་བ་དང༌། དེ་བཞིན་དུ་སྒོ་དང་ཀ་བ་དང་ཐབ་ཀ་དང༌། ཐག་པ་གང་དང་ཆབ་རོམ་ཤིང་ལོར་འཐུམས་པ་དང༌། ནམ་མཁར་གཡོ་བ་སོགས་སྔོན་དགེ་འདུན་གྱི་རྫས་དང་གཙུག་ལག་ཁང་གི་ཆ་རྐྱེན་སོགས་ལ་དབང་ཟོས་ཏེ། མི་དབང་བཞིན་ལོངས་སྤྱད་པ་ལ་སོགས་པ་སྣ་ཚོགས་པའི་མི་དགེ་བའི་ལས་ཀྱིས་མེད་བཞིན་སྤྲུལ་པའི་སྣང་བ་ལ་རང་གཟུགས་འདུ་ཤེས་ནས། དེ་ལ་ཉེ་བར་ལེན་པའི་སྡུག་བསྔལ་ཟད་མི་ཤེས་པ་རྟག་པར་རམ། ཉིན་མཚན་ཕྱེད་མའམ། ཡུད་ཙམ་སོགས་མྱོང་བ་ཡིན་ཏེ། མོངྒལ་གྱི་བུས། སྲིད་པ་ན་ནི་བདེ་བ་མེད། །ཉི་འཚེ་བ་བཞིན་འགྲོ་བ་ཀུན། །སོ་སོའི་སྡུག་བསྔལ་རྣམས་ཀྱིས་གདུངས། །འབར་བའི་ཁྲོད་ན་གནས་པ་འདྲ། །ཞེས་གསུངས་སོ། །དེ་ཡི་ཕྱིར་ན་སྐྱེ་བའི་རང་བཞིན་ཡུལ་ཕྲན་ལ་ཤྭ་འོད་དེ་ཆུ་ལོག་ཆེན་པོ་བརྡོལ་བ་ལྟར་སྡུག་བསྔལ་གྱི་རྦ་རླབས་ཅ་ཅོ་སྒྲོགས་པ་འདི་ཉིད། ད་ལྟ་ཐོས་བསམ་སོགས་ཤེས་རབ་ཀྱིས་མ་བཟློག་ན། ཆོས་སྒྲུབ་པའི་རྟེན་ལྷ་བས་ལྷག་པའི་ལུས་རྟེན་ཆུ་ལོན་ཏེ་ཆུ་བཀག་པའི་ར་བ་ཡང༌། གློ་བུར་དུ་བཤིག་ཅིང་འཚོ་བའི་བརྟན་པ་དང་བྲལ་ཏེ་སྐྱེ་བ་ཕྱི་མར་ཉིང་མཚམས་སྦྱར་བའི་དབང་གིས་མྱ་ངམ་གྱི་ཐང་གནོད་པ་དང་སྡུག་བསྔལ་དུ་མའི་རང་བཞིན་ཅན་སྲིད་པའི་གནས་སུ་ཡང་དང་ཡང་དུ་འཁྱམས་ཤིང་འཁོར་བར་འགྱུར་རོ། །མངོན་མཐོའི་གོ་འཕང་ཐོབ་ཀྱང་མི་ཕན་པར་གདམས་ཏེ། ཁམས་གོང་མའི་གཟུགས་མེད་བཞི་ནི་བདེ་སྡུག་གི་ཚོར་བ་མེད་པའི་བཏང་སྙོམས་ཀྱི་ཏིང་ངེ་འཛིན་ལུང་མ་བསྟན་པའི་འཕེན་བྱེད་ཀྱི་ལས་དང༌། ཏིང་འཛིན་གྱི་ཤུགས་ཟད་ནས་སྔོན་གྱི་ལས་སྲེད་ལེན་གྱིས་གསོས་བཏབ་ནས་སྲིད་པ་ཕྱི་མར་སྐྱེ་བ་འདུ་བྱེད་ཅིང་སྡུག་བསྔལ་སྣ་ཚོགས་མྱོང་དགོས་པ་དང༌། ཚངས་རིས་ནས་འབྲས་བུ་ཆེ་བའི་བར་གཟུགས་ཁམས་ཀྱི་ལྷ་རྣམས་བསམ་གཏན་བཞིའི་བདེ་བ་དེ་དང༌། སྔ་མའི་འཕེན་བྱེད་ཀྱི་ལས་ཟག་བཅས་ཀྱི་བདེ་བ་ཟད་དེ། འོག་མ་དམྱལ་བ་ལ་སོགས་པར་ལྟུང་བར་འགྱུར་བའི་སྡུག་བསྔལ་མྱོང་བར་འགྱུར་རོ། །ཆགས་བྲལ་གྱི་བདེ་བ་ལ་ལོངས་སྤྱོད་པའི་ཚངས་པ་དང༌། འདོད་ཁམས་པའི་ས་གཞིར་བརྟེན་ནོ་ཅོག་གི་དཔལ་འབྱོར་ལོངས་སྤྱོད་ཆེ་བ་ལྷ་དབང་ཀཽ་ཤི་ཀ་དང༌། རིན་པོ་ཆེ་སྣ་བདུན་གྱིས་བདར་ཞིང་གླིང་བཞིར་དབང་བའི་འཁོར་ལོས་བསྒྱུར་བ་ལ་སོགས་པ་ཡང༌། དཔེར་ན་སྤྲིན་བར་ཉི་བཞིན་དཀར་པོའི་ལས་ཀྱི་རྣམ་སྨིན་སྟོབས་ལྡན་གྱིས་སྐབས་བཙལ་ཏེ། བདེ་སྐྱིད་ལ་ལོངས་སྤྱོད་མྱོང་བ་དེ་སྔ་མའི་དགེ་འབྲས་ཟད་ཅིང་སྤངས་པའི་མོད་ལ། དཔེར་ན་མར་མེའི་ལྕེས་རིམ་བཞིན་འཐུང་བའི་ཞུན་མར་ཟད་པ་ན་མར་མེའི་འོད་ཉམས་པ་བཞིན་དུ་བདེ་འབྱོར་ཐམས་ཅད་ཉམས་པར་འགྱུར་ཏེ། བཤེས་སྤྲིང་ལས། བརྒྱ་བྱིན་མཆོད་འོས་ཉིད་དུ་གྱུར་ནས་ནི། །ལས་ཀྱི་དབང་གིས་ཕྱིར་ཡང་ས་སྟེང་ལྷུང༌། །འཁོར་ལོས་བསྒྱུར་རྒྱལ་ཉིད་དུ་གྱུར་ནས་ཀྱང༌། །འཁོར་བ་དག་ན་ཡང་བྲན་ཉིད་དུ་འགྱུར། །ཞེས་སོ། །ཇི་ལྟར་རི་རབ་ཀྱི་སྤོ་ཁ་ཁྱེར་སྟེང་གི་གྲོང་ཁྱེར་ལྟ་ན་སྡུག་གི་ས་གཞི་ལ་རྐང་པས་མནན་ན་ནེམས་ཤིང་བཏེགས་ན་སྤར་བར་བྱེད་པའི་གནས་དང༌། ལྷ་གོས་པན་ཙ་ལི་ཀ་ལ་སོགས་པ་རེག་པ་འཇམ་པོ་དང༌། ཉེ་དབང་དང་རྒྱལ་ཆེན་རིས་བཞིའི་ལྷ་རྣམས་དང༌། ཀླུ་དང༌། མིའམ་ཅིའི་རྒྱལ་པོ་སོགས་ཀྱི་གཙུག་གི་ལ་ཐོད་དང་ནོར་བུ་མརྒད་སོགས་རིན་པོ་ཆེའི་ཐོར་ཚུགས་རྣམས་གཏུགས་པའི་འོད་ཀྱིས་རྐང་པའི་ཆུ་སྐྱེས་དམར་པོར་བྱས་པའི་ལྷའི་དབང་པོ་ཡང་ལས་ཀྱི་འཕེན་པ་ཟད་ནས་དམྱལ་བར་སྐྱེས་པས་ལྕགས་ཀྱི་གསལ་ཤིང་འབར་བའི་རྩེ་མོར་བསྐྱོན་ཏེ་གདུང་བར་འགྱུར་རོ། །འདོད་པའི་ཉེས་དམིགས་འདི་ལྟར་མཐོ་རིས་ལྷའི་བུ་མོའི་ལང་ཚོའི་སྒྱུ་རྩལ་དྲུག་ཅུ་རྩ་བཞི་ལ་མཁས་པའི་ནུ་མ་གསར་པ་ལ་རེག་པའི་བདེ་བའི་འཁྲི་ཤིང་བསྟེན་ཏེ། དཔག་བསམ་ཤིང་སོགས་གོས་རྒྱན་སྣ་ཚོགས་པའི་དགའ་ཚལ་དང༌། རིན་པོ་ཆེའི་གཞལ་མེད་ཁང་མཛེས་ཤིང་ཡིད་དུ་འོང་བའི་མུ་ཏིག་སོགས་རིན་པོ་ཆེའི་དྲྭ་ཕྱེད་དང་དྲིལ་གཡེར་གོས་རྒྱན་སྣ་ཚོགས་པའི་རྒྱན་ཆ་ཅན་དག་ཀྱང་སྤངས་ནས་མེ་མུར་གྱི་འོབས་དང༌། རལ་གྲིའི་ཚལ་སོགས་ཀྱི་ནང་སྤྱིའུ་ཚུགས་སུ་ལྷུང་སྟེ། འཆི་ལ་ཉེ་བའི་སྐབས་སྔ་ལྟས་སུ་གོས་ལ་དྲི་ཆགས་པ་དང༌། རང་གི་མལ་སྟན་དང་མེ་ཏོག་རྙིང་པར་གྱུར་པའི་ཚེ། སྔར་བསྙེན་བཀུར་བྱེད་པའི་ལྷ་མོ་དག་གིས་ཀྱང་དོར་ཏེ། སྔོན་མེད་ཀྱི་རྔུལ་གྱིས་ལྷ་དེའི་ལུས་དང་གདོང་པ་ལ་གོས་པར་གྱུར་ནས་བཀྲུ་བའི་ཟོལ་ཏེ་ཚུལ་དེ་དག་ཞིག་ནས་དྲུང་དུ་མི་ཉེ་བར་གྱུར་པ་ན། འདུ་ཤེས་ནི་འཁྲུགས་ཕྱི་མའི་སྐྱེ་གནས་རྣམས་ལྷའི་མིག་གིས་མཐོང་ཞིང་བསྡངས་ལ་བརྒྱལ་བས། མཛའ་བཤེས་རྣམས་ཀྱིས་རྒྱང་རིང་ནས་བོས་ཏེ་ལྷ་མིར་སྐྱེ་བའི་སྨོན་ལམ་འདེབས་པ་ལས་ཉེ་མི་ནུས་སོ། །དེའི་ཚེ་སྙིང་རྗེའི་སྐད་དུ་ཀྱི་ཧུད་སོགས་ཟེར་བཞིན་ཉེ་དུ་རྣམས་ལ་བལྟ་ཞིང་ངུ་བ་ཡི། གནས་དེར་འཆི་ཞིང་གཞན་དུ་འཕོ་བའི་སྡུག་བསྔལ་ལྷའི་ཞག་བདུན་དུ་མྱོང་བ་ལྟ་བུ་ནི་མི་རྣམས་ལ་གཏན་དུའང་མེད་དོ། །རི་རབ་ཀྱི་ཕྱེད་དུ་སླེབས་པའི་གཉའ་ཤིང་འཛིན་རིའི་ས་བླ་ཡི་སྟེང་དུ་འགེགས་པ་ཡི་རྒྱ་ཁྱོན་དང་ལྡན་པ་གདུགས་ལྟ་བུར་གྱུར་ཅིང་གླིང་བཞིའི་མུན་པ་སེལ་བའི་སྣང་བྱེད་ཆེན་པོ་ཉི་ཟླ་གཉིས་པོའི་རྟེན་དང་གཞལ་མེད་ཁང་གི་འོད་ཡིན་ནའང༌། སླན་ཆད་གླིང་བར་མུན་པའི་སྨག་གི་བཙོན་ར་རུ་ལག་པ་བརྐྱང་བསྐུམ་ཡང་མི་མཐོང་བའི་ལོང་བ་ཆེན་པོའི་གནས་སྐབས་འཐོབ་པར་འགྱུར་རོ། །གསེར་གྱི་ས་གཞིར་བརྟེན་པའི་ལྷ་མ་ཡིན་གྱི་དབང་པོ་ཐག་བཟང་རིས་ཀྱིས་ཁང་བཟང་གདམས་པ་ཅན་དང༌། གྲོང་ཁྱེར་གསེར་ལྡན་འདུན་ས་ནོར་བཟང་སོགས་འབྱོར་པ་དུ་མས་སྙེམས་ནའང་སུམ་ཅུ་རྩ་གསུམ་པའི་ལྷ་ཡི་རྣམ་རྒྱལ་ཁང་བཟང་དང༌། གྲོང་ཁྱེར་ལྟ་ན་སྡུག །འདུན་ས་ཆོས་བཟང་སོགས་ཆེས་ལྷག་པའི་དཔལ་འབྱོར་ལ་སྡང་བའི་ཕྲག་དོག་གི་དགྲ་སྟྭ་མ་རུངས་པས་རང་སྙིང་ཀྱི་ཤེས་རྒྱུད་ཚལ་པར་བཀས་ཏེ་ཉམས་པར་བྱས་ནས་སླར་ལྷ་རྣམས་དང་འཐབ་པའི་ཚེ། ལྷའི་དཔུང་བརྡལ་པ་ནི་ཤིན་ཏུ་གཏུམ་པོའི་མཚོན་ཆ་སྣ་ཚོགས་ཀྱིས་གཡུལ་ངོར་ལྷ་རྣམས་དབུ་བཅད་ན་མ་གཏོགས་ཕམ་པ་དང་བྲལ་ཞིང༌། ལྷ་མ་ཡིན་རྣམས་ནི་མི་བཞིན་དུ་བདག་ཉིད་ཀྱི་གནད་ཆེ་སར་ཕོག་ན་འཆི་བར་འགྱུར་བས། ལྷའི་མཚོན་ཆ་དྲག་པོ་རྣམས་ཀྱིས་མགོ་དང་ཡན་ལག་བཏུབ་པ་ལ་སོགས་པའི་སྡུག་བསྔལ་གྱིས་ལྷ་མིན་མནར་ཏེ། རྒྱུ་ནི། ལྷ་མིན་རབས་ལས། རྟག་ཏུ་གཡོ་དང་སྒྱུ་སྤྱོད་ཅིང༌། སྡིག་པ་དག་ནི་མང་བྱས་ལ། །འཐབ་ལ་དགའ་ཞིང་སྦྱིན་བྱེད་པ། །དེ་ནི་ལྷ་མིན་དབང་ཕྱུག་འགྱུར། །ཞེས་སོ། །མི་རྣམས་སྲོག་གི་འཚོ་བ་སྐད་ཅིག་གིས་མི་རྟག་སྟེ་ཆུའི་ཆུ་བུར་ལྟ་བུར་ད་ལྟ་ཡོད་ཀྱང་ད་ལྟ་ཞིག་ཅིང་གཡོ་བ་ཡི་ཚེ་ཐུང་བའི་འཛམ་བུ་གླིང་པའི་མི་དག །འདོད་དོན་མི་འགྲུབ་པས་ཡིད་མི་བདེ་དང༌། ཕན་ཚུན་འཁྲུགས་པ་སོགས་སྡུག་བསྔལ་སྔ་མས་མ་བཏང་བཞིན་ཕ་ཤི་སྟེང་མ་ཤི་བ་དང༌། མ་ཤི་སྟེང་དགྲས་དེད་པ་ལྟ་བུ་སོགས་ནད་གདོན་སྣ་ཚོགས་པའི་སྡུག་བསྔལ་སྔ་མས་ཕྱི་མ་ཉེ་བར་ལེན་ཏེ། དཔེར་ན་མཛེ་ཅན་ལ་ཕོལ་བྱུང་བའི་སྡུག་བསྔལ་གྱི་ཐོག་ཏུ་རྨས་ཟུག་རྔུ་དེ་དག་གཏུགས་ནས་སྡུག་བསྔལ་བ་བཞིན་ནོ། །མངོན་པར་མཐོ་བའི་གནས་འདི་ནི་ཡུལ་གྱི་ཡོན་ཏན་མཁོ་དགུ་ཐམས་ཅད་རྫོགས་པའི་སྐྱེད་ཚལ་དུ། འདོད་པའི་ཡུལ་ལྔ་པའི་རོ་ལ་གདུང་བས་ལོངས་སྤྱད་པ་ན། འཕྲལ་དུ་བདེ་བ་ལྟར་སྣང་ཡང་དཔེར་ན་སྦྱར་བ་ལས་བྱུང་བའི་དུག་ཅན་གྱི་བཟའ་བ་ཁོང་དུ་སོང་བས། དང་པོ་རོ་བདའ་བ་དང་ལྟོ་འགྲངས་པ་སོགས་བདེ་བར་མངོན་ཀྱང་མཐར་དུག་ནད་ཀྱིས་གཟིར་ནས་རྣམ་པར་སྨ་ཕབ་སྟེ་ལུས་མདངས་ཉམས། མིག་འཕང་སྨད་པ་སོགས་དཀའ་ཐུབ་སྟེ་སྡུག་བསྔལ་བས་ལུས་རིད་ཅིང༌། སྔོན་ལས་དང་འཕྲལ་རྐྱེན་སོགས་ཀྱིས་མིག་འཕྲུལ་ལྟ་བུར་ཐོབ་པའི་བདེ་དཔལ་འདི་སྡུག་བསྔལ་གྱི་རྣམ་པར་འགྱུར་བ་ཅན་ནོ། །ཡུལ་འོད་ལྡན་ཞེས་བྱ་བའི་རྒྱལ་པོ་རབ་གསལ་གྱིས་རྐང་པའི་རེག་པ་ལ་བརྟེན་ནས་ཁུར་དུ་མི་བཟོད་པའི་མངའ་ཐང་གིས། གླང་ཆེན་འདུལ་སྦྱོང་མཁན་ལ་འདུལ་བཅུག་པས་ལྕགས་ཀྱི་ཐོ་ལུམ་སོགས་ཀྱིས་བཏུལ་བའི་མཐར་ཅི་ལྟར་བསྒོ་བ་བཞིན་ཉན་ནུས་པར་ཐུལ་ནས། རྒྱལ་པོས་རྐང་པས་འགྲོ་བ་ནི་ངལ་བ་དང་བཅས་པའོ་སྙམ་པའི་སེམས་ཀྱིས་གླང་པོའི་གཉར་འཛེགས་ནས་བདེ་བ་ལྟར་ཕྱིན་ཀྱང༌། གླང་པོ་དེ་ཡི་བསམ་པ་ཐུབ་མཆོག་གིས་བསྟན་པའི་ཆོས་ཉོན་མོངས་འདུལ་བའི་སྡོམ་པས་མ་བཏུལ་བས། གླང་མོའི་དྲི་སྣོམ་པའི་མོད་ལ་རྩེ་དགས་ཡིད་རབ་ཏུ་རྒོད་པར་གྱུར་ནས། ས་གཞི་ཐམས་ཅད་ཤིང་རྟའི་འཕང་ལོ་བསྐོར་བ་ལྟར་རྒྱུག་པས་གཡང་སར་སྨད་པས་དེ་སྲོག་དང་བྲལ་ཉེ་བའི་སྡུག་བསྔལ་བར་གྱུར་པ་ནི་ཁྱབ་པ་འདུ་བྱེད་ཀྱི་སྡུག་བསྔལ་མཚོན་དཔེའོ། །དེ་ལྟར་རྩ་བའི་སྡུག་བསྔལ་ཆེན་པོའི་བདག་ཉིད་གསུམ་ནི། སེམས་ཅན་རང་གི་ལས་དང་མཐུན་པར་ཁྱབ་ཅིང་ཉམས་མི་དགའ་བར་བྱེད་པས་འབྲོག་དགོན་པ་ལྟ་བུར་གྱུར་པ་ན། མངལ་ནས་སྐྱེ་བ་དང༌། རྒ་བ་དང༌། འདུ་བ་འཁྲུགས་པའི་ན་བ་དང༌། སྲོག་འགགས་པས་འཆི་བའི་ཚོར་བ་དག་གིས་རྟག་ཏུ་དཀྱུ་ཞིང་རྣམ་པར་འཁྱམས་པ་ལྟར་སྐྱེ་རྒ་སོགས་ཀྱིས་སྡུག་བསྔལ་ལོ། །སྨོན་པ་སྟེ་འདུན་པ་མེད་པའི་མི་སྡུག་པའི་དགྲ་དང་གློ་བུར་དུ་འཕྲད་ནས་སྡུག་བསྔལ་བ་དང༌། སྙིང་དུ་སྡུག་པ་མཛའ་བཤེས་ཡིད་ལ་གོམས་པར་བྱས་པ་གནས་མིན་པ་གཞན་དུ་ཕྱོགས་ལ། ཟས་ནོར་ཡོ་བྱད་གཉེན་གྲོགས་མངའ་ཐང་ལོངས་སྤྱོད་ལ་སོགས་པ་འདོད་པའི་རྩོལ་བའི་སྒྲུབ་ཀྱང་ཡུལ་དེ་དག་ལ་འབྱོར་ཞིང་འོང་བ་ཅི་ཡང་མེད་པས་ངོ་ཚར་འགྱུར་བ་བཞིན་བྲོས་ཚུལ་དུ་བྱས་པ་དང༌། ཉེར་ལེན་ཕུང་པོའི་སྟེང་དུ་མི་འདོད་བཞིན་དཀའ་ཐུབ་སྟེ་སྡུག་བསྔལ་སྣ་ཚོགས་འདུས་ཏེ། དེ་ལྟར་རྣམ་པ་བརྒྱད་ཀྱི་སྡུག་བསྔལ་བརྟུལ་ཕོད་པ་སྟེ་སྟོབས་ཆེན་པོའི་གདུང་བ་དག་གིས་མི་ཡི་སྐྱེ་བ་སྡུག་བསྔལ་སྣ་ཚོགས་པའི་འཁྲི་ཤིང་འདི་ཉིད་རྟག་ཏུ་གཙེར་ཏེ་གདུང་བར་འགྱུར་རོ། །ཤིན་ཏུ་དྲི་ང་ཞིང་འདམ་རྫབ་ལྟ་བུ་མི་གཙང་བའི་རྙོག་མ་ཅན་རྒྱ་ཡངས་པར་མི་མངོན་པར་ཀུན་ནས་དོག་པ་སྣང་པའི་གོ་སྐབས་མེད་པ་མུན་ནག་འཐིབས་པོས་སྒྲིབ་པའི་རང་བཞིན་ཅན་གྱི་ཁྲོད། མ་ཡི་མངལ་གནས་ལྕགས་ཁྱིམ་སྒོ་འཕར་སྤངས་པ་ལྟ་བུའི་ནང་དུ་ཚུད་ནས། མ་རིག་པ་དང་མཚུངས་པར་ལྡན་པའི་རྣམ་ཤེས་དེ་ཕ་མའི་ཁུ་ཁྲག་འདྲེས་པའི་དབུས་ན་བརྟེན་པ་ཡིན་ལ། དེ་ཡང་བདུན་ཕྲག་དང་པོར་མེར་མེར་བ་སྟེ་གྱ་གྱུ་བ་དངུལ་ཆུའི་རྣམ་པ་ལྟ་བུ་དང༌། བདུན་ཕྲག་གཉིས་པར་ནུར་ནུར་བ་སྣབས་ཀྱི་རྣམ་པ་ལྟ་བུ་དང༌། བདུན་ཕྲག་གསུམ་པར་མཛུབ་མོའི་རྣམ་པ་ལྟ་བུ་ལྟར་ལྟར་དང༌། བདུན་ཕྲག་བཞི་པར་མཁྲང་གྱུར་སྒོ་ང་ལྟ་བུ། བདུན་ཕྲག་ལྔ་པར་གོར་གོར་ཁུར་བའི་རྣམ་པ་ལྟ་བུ། དྲུག་པར་ཁྱབ་འཇུག་ཉ་ཡི་རྣམ་པ་ལྟ་བུ། བདུན་ཕྲག་བདུན་པར་རུས་སྦལ་བཞིན་མགོ་དང་རྐང་ལག་ཅུང་ཟད་མངོན་པ་ཡིན་ཏེ་དེ་ལྟར་བདུན་ཕྲག་བདུན་སོང་བ་དེ་ནས་བདུན་ཕྲག་ཉི་ཤུ་རྩ་དྲུག་གི་བར་གནས་འགྱུར་ཏེ། མི་གཙང་བའི་སྲིན་བུ་བཞིན་ཡིད་དུ་མི་འོང་བའི་རྣམ་པ་ལ། མིག་ལ་སོགས་པའི་དབང་པོ་ལྔའི་རྟེན་དང༌། ཡན་ལག་རྣམས་དང༌། ཉིང་ལག་མཛུབ་སོར་དག་དང༌། སྙིང་གློ་བ་སོགས་དོན་ལྔ་དང༌། མཆིན་པ། མཚེར་པ། མཁལ་མ། ཕོ་བ་ལོང་ཀ་སོགས་སྣོད་དྲུག་དང༌། རྒྱུ་མ། མཁྲིས་པ། ལྒང་པ། བསམ་སེའུ། རྩ་དང༌། རླུང་དང༌། ཁམས་དྭངས་མ་དང༌། ཁྲག་དང༌། ཆུ་སེར་དང༌། སྐྲ་དང༌། བ་སྤུ་ལ་སོགས་པའི་སྐྱེ་མཆེད་རྫོགས་པར་འགྲུབ་ཅིང༌། དེ་ནས་བདུན་ཕྲག་སུམ་ཅུ་རྩ་བདུན་གྱི་གྲངས་སྙེད་ཚེ། མའི་བཟའ་བཏུང་གི་དྭངས་མ་ལྟེ་ཐག་བརྒྱུད་དེ་ལུས་ཟུངས་ཉམས་བརྟས་པ་དང༌། དེ་ནས་ཆེར་བསྐྱེད་པའི་སྐབས་སུ་འཕར་གཡོ་བྱེད་པས་མ་ལའང་མི་བདེ་བར་འགྱུར་ཞིང༌། དེའི་ཚེ་དོག་ཅིང་སྐྱུག་བྲོ་བ་དང༌། ནག་ཅིང་འཁུམ་པའི་ཚོར་བས་གདུང་ཞིང༌། མ་ཡི་སྤྱོད་ལམ་ལ་བརྟེན་ནས་ཚོར་བ་སྣ་ཚོགས་དང༌། མ་ཉིད་བཀྲེས་ན་གཡང་ལ་ལྷུང་བ་ལྟ་བུ། མ་ཉིད་སྐོམ་ན་ལུས་སྐམ་པ་ལྟ་བུ། ཉི་མ་སོགས་ཀྱིས་དྲོས་ཤིང་ཚ་ན་འཚིག་པ་ལྟ་བུ། གྲང་ན་འཁྱགས་རོམ་ན་རེངས་པ་ལྟ་བུ། འགྲང་ན་རི་ཡིས་མནན་པ་ལྟ་བུ། སྒུལ་བསྐྱོད་བྱས་ན་གཡང་སར་བཟློག་པ་སོགས་བཟའ་བཏུང་གི་རྣམ་འགྱུར་ལས་བྱུང་བའི་སྡུག་བསྔལ་ནི་དཔག་ཏུ་མེད་དོ། །ཟླ་བ་བརྒྱད་དང་ཞག་ཉེར་དྲུག་ནས་བཙའ་བའི་དུས་ཀྱི་རྗེས་འགྲོ་བའི་ཚེ་ལས་རླུང་གིས་དེ་ཡི་ལུས་མགོ་མཇུག་ལྡོག་སྟེ་རུས་བར་བཙིར་ཏེ། བཟོད་དཀའི་བསྡུས་འཇོམས་ཀྱི་རི་ཕན་ཚུན་བཙིར་བའི་སྡུག་བསྔལ་ཁུར་དུ་འཕོས་ཏེ་སྟེང་དུ་བབ་པ་ལྟ་བུའི་སྡུག་བསྔལ་གྱི་ཉེ་བར་སྤྱད་པས་ཐོ་བཙམས་ནས། མ་དང་བུ་གཉིས་ཀ་དེ་ཡི་མོད་ལ་སྲོག་འདོར་རམ་ཡང་ན་གཅིག་ཤོས་འཆི་བའམ་གཉིས་ཀ་ཤི་ལ་ཐུག་ཙམ་གྱི་གནོད་པ་བདོ་བའི་སྡུག་བསྔལ་གྱི་ཁུར་གྱིས་བཙའ་འོ། །དེ་ལྟར་བཙས་པའི་ལུས་དེ་མངལ་གནས་ནས་བྱུང་བའི་ཕྲུ་མ་རློན་པས་དཀྲིས་ཤིང་དྲི་ང་བ་དེ་སྟན་དུ་ལྷུང་བ་ན་ཚེར་དོང་དུ་ལྷུང་བའི་འཇིགས་སྐྲག་དང༌། ཕྲུ་མ་བཤུས་ཚེ་བསྲན་མི་བཟོད་པ་པགས་པ་བཤུས་པ་ལྟ་བུ་དང༌། ཁྲུས་དང་ཚོག་མར་བསྐུ་བ་སོགས་ལ་ཤ་རྨེན་ཏེ་ཤའུ་ཆུང་ཞིག་པ་ལྟ་བུའི་ཚོར་བས་གདུང་ངོ༌། སྔོན་མངལ་གྱི་དྲན་པའི་སྟོབས་རྣམས་ཉམས་ཏེ་བརྒྱལ་ལ་ཁད་བྱས་ཤིང༌། དེ་ལྟར་རེག་པའི་རྣམ་པས་ལུས་གཟིར་འཇིགས་ཤིང་མི་གཙང་བའི་སྡུག་བསྔལ་དང༌། ནད་དང་ཚ་གྲང་བཀྲེས་སྐོམ་སོགས་ཅི་བྱུང་ཡང་སྨྲ་མི་ཤེས་པས་སྡུག་བསྔལ་ལ་སོགས་པ་མྱོང་བར་འགྱུར་རོ། །རྒ་བའི་ཆད་པ་དྲག་པོས་ནོན་པའི་ལང་ཚོ་ལ་དཀར་དམར་གྱི་མདངས་དང༌། ཤ་ཉམས་རྒྱས་པ་སོགས་མཛེས་ཆ་ཇི་སྙེད་ཡོད་པ་ཐམས་ཅད་ཉམས་པ་དང༌། རང་དབང་མེད་ཅིང་གཞན་གྱིས་བརྙས་པ་དང་སུན་འབྱིན་པ་སོགས་ཀྱིས་ཡིད་མི་བདེ་བའི་ཁུར་སྟེང་དུ་བབས་པས། བཤང་གཅི་འདོར་བའི་སར་བསྐྱོད་པའི་མཐུ་ཡང་ཉམས་ཏེ་འཁར་བ་ལ་བརྟེན་ནས་གཡོ་འགུལ་དགོས་པའི་གཞན་དབང་ཅན། ཕར་འགྲོ་ཞིང་ཚུར་ལྡོག་པ་དང༌། འགྲེང་འདུག་སོགས་གཡོ་ཞིང་འགུལ་བའི་ཚེ་ལྷུ་ཚིགས་རྣམ་པར་འགྱུར་ནས་ས་ལ་འགྱེལ་བ་དང༌། དབང་པོ་རྣམས་རྒུད་ནས་མིག་འགྲིབ། རྣ་བ་སྲ། ལྕེ་ལྡིབ། བུད་མེད་སོགས་འདོད་པའི་ཡོན་ཏན་གྱི་བདེ་བར་ལོངས་སྤྱོད་པ་དང༌། གཟུགས་ལ་བལྟ་བ་སོགས་ཡུལ་གྱི་ལོངས་སྤྱོད་ཐམས་ཅད་ལ་མི་དགའ་ཞིང་གལ་ཏེ་ཆགས་ནའང་སྤྲིན་གྱིས་བཀབ་པ་ཡི་ཉི་མའི་ཚ་ཟེར་བཞིན་དུ་ཡུལ་མྱོང་མི་ཤེས་པར་རྨོངས་ཏེ་བདེ་བ་སྤངས་པ་དང༌། ལུས་ཀྱི་མེ་དྲོད་སོགས་མཐུ་ཉམས་པའི་དབང་གིས་བཟའ་བཏུང་འཇུ་དཀའ་ཞིང་ཚ་གྲང་མི་བཟོད་ལ་འདུ་ཤེས་འཁྲུགས་པའི་དབང་གིས་ཉིན་མཚན་གོ་ནོར། རང་གཞན་མི་ངོ་མི་ཤེས་པ་སོགས་མལ་དུ་རྣམ་ཤེས་ཤིན་ཏུ་འཁྱམས་ཞེས་བྱ་ལ། དེས་ན་རྒན་པ་ལ་བཀུར་སྟི་བྱས་པ་ལའང་ཕན་ཡོན་ཆེ་བར་བསྔགས་ཏེ། ཨོ་རྒྱན་ཆེན་པོས། རྒས་པ་ཡི་མུག་མ་འཇུག་བཀུར་སྟིས་སྐྱོང༌། །ཞེས་སོ། །འབྱུང་བ་བཞིས་བསྡུས་པའི་ལུས་ཅན་དག་ལ་རང་བཞིན་རླུང་མཁྲིས་བད་ཀན་སོགས་ཆ་སྙོམས་པ་དང་ལྡན་པའི་འདུ་བའི་རྫིང་བུ་དྭངས་པ་དང་ནི་བྲལ་ཏེ། རྙོག་པ་ཅན་དུ་བགྱིད་ཅིང་ན་བའི་ཚོར་བ་དྲག་པོ་ཡིས་གཟིར་ཞིང༌། ཕུང་པོ་ལྔ་ཡི་རང་བཞིན་ཉེར་ལེན་ནད་ཀྱིས་མནར་བས་དུབ་པར་བྱས་ཏེ། སེམས་འཁྲུགས་ནས་འཚོ་བའི་བརྟན་པ་བྲལ་ནས་འཆི་བའི་དོགས་པས་སྐྲག་ཅིང་ཡིད་མི་བདེ་བ་སོགས་སྡུག་བསྔལ་ལོ། །སྲིད་པ་འདི་ན་དཔལ་འབྱོར་ཡོད་དགུ་ཐམས་ཅད་སྤུངས་ཀྱང་སྲོག་གི་རིན་ཐང་ལ་ཐུག་པ་མེད་པས་གཅེས་ཤིང་ཤིན་ཏུ་ཕངས་ནའང་འཆི་བའི་སྡུག་བསྔལ་གྱིས་བཏང་བ་ནི་སུ་ཡང་མེད་པས་འཆི་བ་ཐོག་ཏུ་བབ་ཅིང་རྣམ་པར་གཏུགས་པའི་ཚེ་ན་ནི། སྐྱེས་བུ་དེ་ནི་མལ་ཐ་མ་རུ་འགྱུར་ཏེ་གཉེན་འདུན་དང༌། ལོངས་སྤྱོད་ཡོད་དགུ་ལས་མར་ལས་སྤུ་བཏོན་པ་ལྟར་ཐལ་ནས་ངེས་པ་མེད་པའི་གནས་སུ་ས་ཚུགས་མེད་པར་འགྲོ་དགོས་སོ། །ཀ་ནི་ཀའི་འཕྲིན་ཡིག་ལས། འཆི་བདག་གིས་ནི་དྲངས་པ་ན། །དགེ་དང་སྡིག་པ་མ་གཏོགས་པ། །འགྲོ་བ་ཐམས་ཅད་ཕྱིར་ལོག་ནས། །དགའ་ཡང་ཁྱོད་རྗེས་མི་འབྲང་བར། །མཁྱེན་པར་མཛོད་ལ་ལེགས་པར་དཔྱོད། །ཅེས་སོ། །མི་སྡུག་པའི་ཡུལ་དགྲ་གདོན་བགེགས་སོགས་དང་ཕྲད་པའི་ཚེ་ན་ལུས་སེམས་སྡུག་བསྔལ་གྱི་ཕོ་ཉས་ཏེ་ཚོར་བས་རྣམ་པར་གཟིར་ཞིང་ཉམས་སྨད་པར་གྱུར་པ་རྣམས། དཔེར་ན་ཁུར་གྱིས་དུབ་པའི་གང་ཟག་ངལ་སོས་པའི་བདེ་བའི་འབབ་སྟེགས་ལ་བསྡད་པ་ན། དེ་ཉིད་ཞིག་སྟེ་ལུས་བསྣད་པའི་སྡུག་བསྔལ་མྱོང་བའི་ངལ་གསོ་བདེ་བ་མེད་པ་ལྟར། བདེ་བའི་དབུགས་འབྱིན་ཐོབ་པ་མེད་པ་མ་ཟད་ཡིད་སྡུག་བསྔལ་ཆེན་པོས་གདུངས་པས་ལྷག་པར་ཉེན་པར་འགྱུར་རོ། །བདག་ཉིད་ལ་བྱམས་ཤིང་སྙིང་དུ་སྡུག་པ་རྣམས་དང་ལྷན་ཅིག་འདུ་ཞིང་འགྲོགས་པའི་འཕྲོ་ལ་གཞན་ཕྱོགས་ཀྱིས་འབྲལ་བའི་ངང་ཚུལ་གསར་པར་བཀོད་པ་ཡི་ཚེ་ན། ཡོན་ཏན་དང་རྣམ་འགྱུར་སོགས་བསམ་ནས་ཤིན་ཏུ་ཡིད་གདུང་བས་ཉམས་པའི་དཀའ་ཐུབ་སྟེ་སྡུག་བསྔལ་གྱི་དངོས་པོ་དེ་དག་གལ་ཏེ་གཟུགས་སུ་གྱུར་བའམ་བལྟ་རྒྱུ་ཡོད་ན། སྔོན་རྒྱལ་པོ་ནོར་ཅན་གྱི་བུ་ནོར་བཟང་ཞེས་བྱ་བ་དེ། དྲི་ཟ་ཡི་བུ་མོ་ཡིད་འཕྲོག་མ་ལ་ཆགས་པ་ཡི་དབང་དུ་གྱུར་ནས་རྗེས་སུ་བསྙེགས་ནས་སོང་བའི་ཚེ། ལམ་འཕྲང་ཐམས་ཅད་གཅན་གཟན་དང་མི་མ་ཡིན་སོགས་ཀྱི་འཚེ་བས་བཀབ་པ་ལ་བགྲོད་ནས་སོང་བ་ལས་ནི་ལས་ཀྱི་མཐའ་རིང་སྟེ་སྔ་ཕྱི་མུ་མཐའ་མེད་པར་མྱོང་དགོས་པའི་ཕྱིར་རོ། །འདོད་པའི་དངོས་པོ་རྩོལ་བས་བསྒྲུབས་ཀྱང་མི་འགྲུབ་པས་ཕོངས་པ་དང༌། རང་ལ་དབང་བའི་ལོངས་སྤྱོད་མེད་པས་དབུལ་བའི་སྐྱེས་བུ་རྣམས་ནི་དུས་ཐམས་ཅད་དུ་བཀྲེས་པ་དང༌། སྐོམ་པས་གདུང་བ་སེལ་བའི་ཐབས་སྣ་ཚོགས་བསྒྲུབས་ཀྱང་དེའི་དོན་མ་གྲུབ་པའི་རེ་དོགས་གཉིས་ཀྱིས་ཚོང་སོགས་སྡིག་ལས་སྣ་ཚོགས་ཀྱི་གཞན་དབང་ཁོ་ནར་སོང་ནས། དམ་ཆོས་སྒྲུབ་པའི་རྟེན་བཟང་ལུས་ངག་ཆུད་གསོན་པའི་ངལ་བ་དང༌། སྡུག་བསྔལ་བར་མ་ཆད་པས་དུས་འདའ་བ་དང༌། རང་ལ་ལོངས་སྤྱོད་ཡོད་པ་རྣམས་ཀྱིས་ཆོག་ཤེས་མེད་པར་ཡོངས་སུ་ཚོལ་བའི་སྡུག་བསྔལ་གྱིས་གདུང་བས་ཟས་སྐོམ་ཁོ་ན་ཡིད་ལ་བཏགས་ཏེ་ལས་དབང་གིས་དལ་ཁོམ་མེད་པར་ས་ལ་རྒྱུ་ཞིང་འགྲོ་བའི་ཡི་དྭགས་དངོས་དང་མཚུངས་སོ། །གཟུགས་རང་བཞིན་དང་བྲལ་བ་ལ་གཟུགས་ཡོད་སྙམ་ཞིང་ཞེན་པས་རྟེན་བཅས་ནས་སྡུག་བསྔལ་གྱི་ཚོར་བས་ཉམས་སུ་མྱོང་བའི་སྒོ་ནས་དེ་ཡི་རང་བཞིན་ཤེས་ཤིང་འདུ་ཤེས་ཀྱིས་དེ་མི་འདོད་པའི་མཚན་མར་བཟུང་ནས་བསལ་བའི་བསམ་པས་ལས་དེ་རྒྱུན་ཆགས་སུ་འཆིང་ཞིང༌། འདུ་བྱེད་ཀྱིས་ཕྱིན་ཆད་སྡུག་བསྔལ་མཐའ་དག་པའི་ས་བོན་ནམ་རྒྱུ་སླར་བསྐྲུན་པ་དང༌། རྣམ་ཤེས་ཀྱིས་འདི་ནི་སྡུག་བསྔལ་ལོ་ཞེས་སྡུག་བསྔལ་བདག་འཛིན་བྱས་ཏེ་ཉམས་སུ་མྱོང་བའི་ཉེ་བར་ལེན་པ་པོ་བྱེད་དོ། །དེས་ན་ཕུང་པོ་ལྔ་པོ་འདི་དག་མ་རིག་པ་དང་མཚུངས་ལྡན་གྱི་ཆ་ནས་སྡུག་བསྔལ་རྣམས་མ་ལུས་ཀུན་གྱི་འབྱུང་གནས་ཡིན་ཞིང༌། ཕུང་པོ་དེ་དག་སྡུག་བསྔལ་ཀུན་གྱི་རྟེན་དང༌། ས་བོན་དང༌། རྣམ་སྨིན་གྱི་ཆ་འཛིན་པས་སྣོད་དང༌། ཕུང་པོ་ཕྱི་མ་ཀུན་གྱི་རྒྱུ་དང་སྔ་མའི་འབྲས་བུ་དང་ད་ལྟའི་བདག་པོར་མཁྱེན་འཚལ་ཏེ་ཤེས་པར་བྱས་ནས་ཡིད་དབྱུང་སྟེ། འཁོར་བའི་སྡུག་བསྔལ་ཀུན་གྱི་འབྱུང་གནས་ལས་དང་ཉོན་མོངས་པ་སྤང་འཚལ་ལོ། །དེ་ལྟར་ཀུན་འབྱུང་གི་རྩ་བ་བདག་དང་བདག་གིར་འཛིན་པའི་མ་རིག་པ་སྤངས་ནས་སྐྱེས་བུ་འབྲིང་སྟེ་གཞན་དོན་མི་གཉེར་བའི་ཉན་རང་གི་ལམ་བདེན་པ་བཞི་ཡི་ཤིང་རྟ་ལ་ཞོན་པ་རྣམས། རྣམ་གྲོལ་གྱི་ལམ་དེ་ལ་བསླབ་པས་མཐོང་སྒོམ་གྱི་སྤང་བྱ་མ་ལུས་པ་ཟད་པའི་འགོག་པ་མངོན་དུ་གྱུར་ནས། ཟད་པ་མི་སྐྱེ་ཤེས་པ་ཡེ་ཤེས་བརྙེས་ནས་ལྷག་བཅས་དང་ལྷག་མེད་གང་རུང་གི་མྱ་ངན་ལས་འདས་ཤིང༌། ཟག་པ་མེད་པའི་ཁམས་ཐར་པ་མཆོག་གི་གོ་འཕང་ཉིད་དུ་འགྲོ་སྟེ། པདྨ་དཀར་པོ་ལས། ཉན་ཐོས་དེ་དག་ཇི་སྲིང་དུ། །སངས་རྒྱས་རྣམས་ཀྱིས་མ་བསྐུལ་བ། །དེ་སྲིད་ཡེ་ཤེས་ལུས་གཅིག་གིས། །ཏིང་འཛིན་མྱོས་པས་བརྒྱལ་ཏེ་གནས། །བསྐུལ་ནས་སྣ་ཚོགས་གཟུགས་ཀྱིས་ནི། །སེམས་ཅན་དོན་ལ་ཆགས་འབྱུང་ཞིང༌། །བསོད་ནམས་ཡེ་ཤེས་ཚོགས་བསགས་ཏེ། །སངས་རྒྱས་བྱང་ཆུབ་ཐོབ་པར་འགྱུར། །ཞེས་པ་དང་མཐུན་པར་ལང་ཀར་གཤེགས་པ་ལས་ཀྱང་གསུངས་སོ། །རྟེན་ཅིང་འབྲེལ་བར་འབྱུང་བ་བཅུ་གཉིས་ནི། སྤྱིར་ལྔ་སྟེ། དང་པོ་དགོས་པ་ནི། འཁོར་འདས་ཀྱི་ཆོས་ཐམས་ཅད་རྟེན་འབྱུང་སྒྱུ་མའི་སྣང་བ་ཙམ་དུ་ཤེས་ན། ལྟ་བ་ངན་པ་ལ་མི་འཇུག་ཅིང་མཐར་ཐུག་མྱང་འདས་ཐོབ་པའི་དགོས་པ་ཡོད་དོ། །དེ་ཡང་མདོ་ལས། འདི་ཡོད་པས་འདི་འབྱུང་འདི་སྐྱེས་པས་འདི་སྐྱེ་སྟེ། འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་སོགས་གསུངས་ཏེ། འདི་འབྱུང་ཞེས་གསུངས་པས་ཆོས་ཐམས་ཅད་ཡོད་པ་ཁོ་ན་ལས་སྐྱེ་བར་བསྟན་པ་ནི། རྒྱུ་མེད་པ་ལས་སྐྱེ་བར་འདོད་པ་རྒྱང་འཕེན་པ་ལྟ་བུ་འགོག་པའོ། །འདི་སྐྱེས་པས་འདི་སྐྱེ་ཞེས་གསུངས་པས། རྒྱུ་དེ་ཡང་རྐྱེན་ལས་སྐྱེ་བར་བསྟན་པས་རྒྱུ་རྟག་པ་ལས་སྐྱེ་བར་འདོད་པ་དག་འགོག་པའོ། །འདི་ལྟ་སྟེ་མ་རིག་པའི་རྐྱེན་གྱིས་འདུ་བྱེད་སོགས་གསུངས་པས། བློ་ཡི་གཡོ་བ་སྔོན་དུ་བཏང་བའི་དབང་ཕྱུག་སོགས་རྒྱུ་ལས་བྱུང་བར་འདོད་པ་དག་འགོག་པའོ། །གཉིས་པ་སོ་སོའི་ངོ་བོ་ནི། མ་རིག་པ་ནི་བདེན་བཞི་དང་ལས་འབྲས་ཀྱི་རང་བཞིན་ལ་རྨོངས་ནས་བདག་ཏུ་འཛིན་པའོ། །འདུ་བྱེད་ནི། དེ་ལྟར་བདག་ཏུ་བཟུང་བས་བདག་ལ་ཆགས་པའི་དབང་གིས་ལས་དགེ་བ་བསོད་ནམས་ཆ་མཐུན་དང༌། མི་དགེ་བ་དང༌། ཁམས་གོང་མར་སྐྱེ་བའི་རྒྱུ་མི་གཡོ་བའི་ལས་དང་གསུམ་གསོག་པའོ། །རྣམ་ཤེས་ནི། ལས་དེས་རྣམ་པར་ཤེས་པ་ཕྱི་མའི་གནས་སུ་འཕེན་པ་སྟེ་འདི་ལ་ལས་གསོག་དུས་ཀྱི་རྣམ་ཤེས་རྒྱུ་དུས་ཀྱི་རྣམ་ཤེས་དང༌། འབྲས་བུ་མྱོང་དུས་ཀྱི་རྣམ་ཤེས་འབྲས་དུས་ཀྱི་རྣམ་ཤེས་ཏེ་གཉིས་ཡོད་དོ། །མིང་གཟུགས་ནི། རྣམ་ཤེས་མ་ཡི་མངལ་སོགས་ལ་ཞུགས་པ་ནས་ཕུང་པོ་རིམ་གྱིས་འགྲུབ་པའི་གནས་སྐབས་ཏེ་ཚོར་བ་འདུ་ཤེས་འདུ་བྱེད་རྣམ་ཤེས་ཏེ་མིང་བཞི་དང་གཟུགས་སོ། ཞག་བདུན་ཕྲག་བདུན་བདུན་སོགས་རིམ་པར་བདུན་དང་པོར་མེར་མེར། དེ་བཞིན་དུ་ནུར་ནུར་པོ་དང༌། ལྟར་ལྟར་དང༌། མཁྲང་གྱུར། གོར་གོར། ཉ། རུས་སྦལ་གྱི་དབྱིབས་སོགས་དང༌། དེ་ནས་རིམ་པར་དབང་པོའི་རྟེན་ཡན་ལག་དང་ཉིང་ལག་སོགས་རིམ་པར་ཞག་བདུན་ཕྲག་ཉི་ཤུ་རྩ་དྲུག་གི་བར་གནས་འགྱུར་ཏེ་གནས་པ་དང༌། དེ་ནས་བདུན་སོ་བདུན་སོགས་ནས་ཚོར་བའི་སྡུག་བསྔལ་དང་བཅས་ཟླ་བ་བརྒྱད་དང་ཞག་ཉེར་དྲུག་བར་རིམ་པར་མིང་གཟུགས་དབྱིབས་རིམ་པར་འགྲུབ་བོ། མཆན། སྐྱེ་མཆེད་ནི། མིག་དང༌། རྣ་བ། སྣ། ལྕེ། ལུས། ཡིད་དེ་ནང་གི་སྐྱེ་མཆེད་དྲུག་གོ །རེག་པ་ནི། ཕྱིའི་ཡུལ་དང༌། ནང་གི་རྣམ་ཤེས། བར་གྱི་དབང་པོ་གསུམ་འདུས་ནས་ཡུལ་གཅོད་པའོ། །ཚོར་བ་ནི། དེ་ལྟར་ཡུལ་དང་དུ་བླངས་པས་ཚོར་བ་བདེ་སྡུག་བར་མ་གསུམ་སྐྱེས་པའོ། །སྲེད་པ་ནི། དེའི་ཚེ་ཚོར་བ་བདེ་བ་དང་ལེན་གྱི་སྲེད་པ་དང༌། སྡུག་བསྔལ་སྤོང་འདོད་ཀྱི་སྲེད་པ་སྐྱེས་པའོ། །ལེན་པ་ནི། སྲེད་པ་སྐྱེས་པས་འདོད་པའི་ཡུལ་དང་དུ་ལེན་པའི་ཕྱིར་རྒྱུག་པའོ། །སྲིད་པ་ནི། སྲེད་ལེན་གྱིས་གསོས་བཏབ་པས་ཚེ་ཕྱི་མ་འགྲུབ་ངེས་ཀྱི་ལས་འགྲུབ་པའོ། །སྐྱེ་བ་ནི། ལས་དེའི་རྒྱུས་ཡང་ཕྱི་མའི་གནས་རིགས་སུ་སྐྱེས་པའོ། །རྒ་ཤི་ནི་སྐྱེས་པའི་གནས་སྐབས་ནས་བརྩམས་ཏེ་འཆི་བའི་བར་རྒ་བ་དང༌། དེ་ནས་འཆི་བ་ནི་ཤི་བའོ། །འདི་གཉིས་ཡན་ལག་གཅིག་ཏུ་བཞག་པ་ནི་མ་རྒས་པར་འཆི་བའང་ཡོད་པས་ཐམས་ཅད་ལ་རིམ་གྱིས་འབྱུང་བར་མ་ངེས་པའོ། །གཞན་ཡང་མི་འདོད་པ་བྱུང་བས་ཡིད་གདུང་བའི་མྱ་ངན་དང༌། མྱ་ངན་དེ་སྐྱེས་པའི་སྨྲེ་སྔགས་དང༌། ལུས་ལ་སྡུག་བསྔལ་བྱུང་བའི་སྡུག་བསྔལ་བ་དང༌། སེམས་ལ་སྡུག་བསྔལ་བྱུང་བའི་ཡིད་མི་བདེ་བ་དང༌། ཕན་ཚུན་མི་མཐུན་པའི་རྩོད་པས་འཁྲུགས་པ་ལ་སོགས་པའང་ཐམས་ཅད་ལ་འབྱུང་བར་མ་ངེས་པའི་ཕྱིར་ཡན་ལག་ཏུ་མ་བཞག་ལ། འཁོར་བར་སྐྱེས་ནས་བཟུང་སྡུག་བསྔལ་ཡིན་པ་ལ་སྐྱོ་བ་བསྐྱེད་པའི་ཕྱིར་རྒ་ཤིའི་འཁོར་དུ་གསུངས་པའོ། །གསུམ་པ་རྣམ་བཞག་ལ་བཞི་ལས། དང་པོ་ནི། སྔོན་གྱི་མཐའ་མི་ཤེས་པ་དང༌། ཕྱི་མའི་མཐའ་མི་ཤེས་པ་དང༌། ད་ལྟར་བྱུང་བ་མི་ཤེས་པ་སྟེ་རྨོངས་པ་གསུམ་བཟློག་པའི་དོན་དུ་རྟེན་འབྲེལ་ཡན་ལག་བཅུ་གཉིས་སུ་བཞག་སྟེ། མ་རིག་པ་འདུ་བྱེད་གཉིས་སྐྱེ་བ་སྔོན་མའི་སྐབས་དང༌། སྐྱེ་བ་རྒ་ཤི་ཕྱི་མའི་སྐབས་དང༌། བར་གྱི་བརྒྱད་ད་ལྟའི་སྐབས་ཏེ་དེ་གསུམ་ལ་རྨོངས་ཤིང་རྟེན་འབྲེལ་གྱི་རང་བཞིན་ཚུལ་བཞིན་མ་ཤེས་པ་བཟློག་གོ །གཉིས་པ་ལམ་གསུམ་དུ་རྣམ་པར་བཞག་པ་ནི། དང་པོ་བརྒྱད་པ་དགུ་ཉོན་མོངས། །གཉིས་པ་བཅུ་པ་ལས་ཡིན་ཏེ། །ལྷག་མ་རྣམས་ནི་སྡུག་བསྔལ་ལོ། །ཞེས་གསུངས་པ་ལྟར་ཉོན་མོངས་པའི་ལམ་གསུམ། ལས་ཀྱི་ལམ་གཉིས། སྡུག་བསྔལ་གྱི་ལམ་བདུན་ནོ། །གསུམ་པ་སྐྱེ་བ་འགྲུབ་པའི་རྒྱུ་འབྲས་ཀྱི་དབང་དུ་བཞག་ན། ལས་གཉིས་ཉོན་མོངས་པ་གསུམ་དང་ལྔ། རྒྱུ་དུས་ཀྱི་རྣམ་ཤེས་དང་དྲུག་ནི་རྒྱུ་ཡིན་ལ། མིང་གཟུགས་སོགས་སྡུག་བསྔལ་དྲུག །འབྲས་དུས་ཀྱི་རྣམ་ཤེས་དང་བདུན་ནི་འབྲས་བུའོ། །ཡང་རྣམ་ཤེས་རྒྱུར་བགྲངས་ནས་རྒྱུ་དྲུག་དང་འབྲས་བུ་དྲུག་ཀྱང་ཟེར་རོ། །འདི་དག་སྔ་མ་སྔ་མ་ལས་ཕྱི་མ་ཕྱི་མ་སྐྱེ་བས་ཐམས་ཅད་ལ་རྒྱུ་འབྲས་གཉིས་ཀའི་ཆ་རེ་རེ་ཡོད་ཀྱང་འདིར་སྐྱེ་བ་འགྲུབ་པའི་རྒྱུ་འབྲས་ཀྱི་དབང་དུ་བྱས་པའོ། །བཞི་པ་འཕེན་བྱེད་ཀྱི་སྒོ་ནས་བཞག་ན། མ་རིག་པ་བདག་འཛིན་མཚུངས་ལྡན་དང་བཅས་པས་ཀུན་ནས་བསླངས་ཏེ་འདུ་བྱེད་ལས་བསགས་པས། སྐྱེ་བ་ཕྱི་མར་འཕེན་པས་ན་འཕེན་བྱེད་ཡིན་ལ། རྣམ་ཤེས་རྒྱུ་དུས་ཀྱི་རྣམ་ཤེས་འཕེན་བྱེད་དང༌། འབྲས་དུས་ཀྱི་རྣམ་ཤེས་འཕངས་པ་ཡིན་ནོ། །འབྲས་དུས་ཀྱི་རྣམ་ཤེས་དེ་དང་བཅས་པ་ཚོར་བ་ཡན་ལག་ལྔ་ལས་དེས་འཕངས་པའི་འབྲས་བུ་ཡིན་པས་འཕངས་པའོ། །སྲེད་ལེན་སྲིད་པ་གསུམ་ནི་སྐྱེ་བ་ཕྱི་མ་འགྲུབ་བྱེད་དང༌། སྐྱེ་བ་རྒ་ཤི་གཉིས་ནི་གྲུབ་པ་སྟེ་འཕེན་བྱེད་གཉིས། འཕངས་པ་ལྔ། འགྲུབ་བྱེད་གསུམ། གྲུབ་པ་གཉིས་སོ། །བཞི་པ་ཚེ་དུ་ལ་རྫོགས་པ་ནི། རིང་བའི་དབང་དུ་བྱས་ན་ཚེ་གསུམ་ལ་རྫོགས་ཏེ། འཕེན་བྱེད་གཉིས་ཚེ་གཅིག །འགྲུབ་བྱེད་གསུམ་ཚེ་གཅིག །འཕངས་པ་ལྔ་དང་གྲུབ་པ་གཉིས་ཚེ་གཅིག་གོ །དེ་ལྟར་ན་སྐྱེ་བ་རེ་རེའི་སྐབས་སུའང་མ་རིག་པའི་སྒོ་ནས་ལས་གསོག་པ་ནི། ཕྱི་མའི་འཕེན་བྱེད་ཡིན་པས་རྟེན་འབྲེལ་གཞན་གྱི་མགོ་ཡིན་ལ། སྔ་མའི་འཕེན་བྱེད་ཀྱིས་ད་ལྟའི་མིང་གཟུགས་སོགས་ལྔ་པོ་འདི་འཕངས་པ་ནི་རྟེན་འབྲེལ་གཞན་གྱི་རྐེད་པ་ཡིན། ཡང་ཚེ་རབས་སྔ་མའི་སྔ་མ་དེའི་ལས་ཀྱིས་སྔ་མ་དེ་འཕངས་ནས། སྐབས་དེའི་འགྲུབ་བྱེད་ཀྱིས་ད་ལྟའི་སྐྱེ་ཤི་འདི་གཉིས་གྲུབ་པ་ནི། རྟེན་འབྲེལ་གཞན་གྱི་མཇུག་ཡིན་པས་དེ་ལྟར་ཐོག་མ་མེད་པ་ནས་འཁོར་རོ། །ཡང་ཉེ་བའི་དབང་དུ་བྱས་ན་ཚེ་གཉིས་ལ་རྫོགས་པར་འདོད་དེ། འཕེན་བྱེད་གཉིས་ཀྱིས་ལས་བསགས་པ་དེ་ཉིད་སྲེད་ལེན་གྱིས་གསོས་བཏབ་པས་སྐྱེ་བ་ཕྱི་མ་འགྲུབ་ངེས་སུ་བྱས་པ་ནི་སྲིད་པ་ཡིན་པས་རྒྱུ་དུས་ཀྱི་རྣམ་ཤེས་དང་བཅས་པ་དྲུག་ཚེ་གཅིག་ལ་རྫོགས་ལ། རྒྱུ་དེས་ཕྱི་མའི་གནས་སུ་སྐྱེས་ནས་མིང་གཟུགས་སོགས་བཞི་རིམ་པར་འགྲུབ་ནས་ཤི་བས་འབྲས་བུ་དྲུག་ཚེ་གཅིག་ལ་རྫོགས་པའོ། །དེ་ཡང་འཕེན་བྱེད་ཀྱི་ལས་ཡོད་ཀྱང་འཆི་ཁ་ཚུན་སྲེད་ལེན་གྱིས་གསོས་མ་བཏབ་ན། སྐྱེ་བ་ཕྱི་མ་མི་འགྲུབ་པས་འཕེན་བྱེད་དང་གྲུབ་བྱེད་ཚེ་གཅིག་ལ་རྫོགས་དགོས་ལ། འཕངས་པ་དེ་ཡང་སྐྱེ་དགོས་པ་དང་དེ་ལ་འཆི་བ་ཡོད་པས་འཕངས་པ་དང་གྲུབ་པ་ཡང་ལྷན་ཅིག་གོ །འཕེན་བྱེད་དང་འགྲུབ་བྱེད་གཉིས་ཀྱི་བར་དུ་ནི་ཚེ་དུ་མས་ཆོད་པ་སྲིད་ལ། འགྲུབ་བྱེད་དང་འགྲུབ་པ་གཉིས་ཀྱི་བར་དུ་ཚེ་རབས་གཞན་གྱིས་ཆོད་པ་མི་སྲིད་དོ། །དེ་ལྟར་ན་ཚེ་གསུམ་གྱིས་མ་རྫོགས་སོ་ཞེ་ན། འཕེན་གྲུབ་ཀྱི་བར་དུ་ཚེ་རབས་དུ་མས་ཆོད་ཀྱང་དེ་དག་རྟེན་འབྲེལ་གཞན་གྱི་ཚེ་ཡིན་པས་སྐྱོན་མེད་དོ། །དེས་ན་ཚེ་གསུམ་དང་གཉིས་ཀྱིས་རྫོགས་པ་གཉིས་ཀ་ཡོད་ལ། དེ་ལས་ལྷག་པ་ནི་མི་སྲིད་དོ། །དེ་དག་ནི་འཕེན་བྱེད་ཀྱི་ལས་གཅིག་གིས་སྐྱེ་བ་གཅིག་འགྲུབ་པའི་དབང་དུ་བྱས་པ་ཡིན་ནོ། །འདི་དག་ལ་ལེགས་པར་དཔྱད་ནས་འཁོར་བ་འགྲུབ་བྱེད་ཀྱི་རྩ་བ་སྲེད་ལེན་ཡིན་པ་དང༌། སྲེད་ལེན་གྱི་རྩ་བ་ཆོད་ན་ལས་ཡོད་ཀྱང་སྐྱེ་བ་མི་ལེན་པ་དགྲ་བཅོམ་པ་ལྟ་བུ་དང༌། དུས་ཐམས་ཅད་དུ་སྡུག་བསྔལ་ཅི་སྐྱེས་སྲེད་ལེན་ཀུན་འབྱུང་གིས་མཚམས་སྦྱར་ནས་ཉམས་སུ་མྱོང་བ་སོགས་ལ་གོ་བའི་གཏིང་རྙེད་པར་བྱའོ། །ལྔ་པ་བསྒོམ་ཚུལ་ནི། ལུགས་འབྱུང་ལུགས་ལྡོག་གི་སྒོ་ནས་སྒོམ་པ་སྟེ། ལུགས་འབྱུང་ལྡོག་འདི་ལ་འཇུག་ཚུལ་གཉིས་ཏེ། འཁོར་བར་སྐྱེ་བའི་རིམ་པ་ལ་ལུགས་འབྱུང༌། འཁོར་བ་འགགས་པའི་རིམ་པ་ལ་ལུགས་ལྡོག་ཏུ་བཞག་པ་ཞིག་དང༌། མ་རིག་པ་ནས་རིམ་པས་བགྲང་ན་སྐྱེ་རིམ་དང༌། འགག་རིམ་གང་ཡིན་ཡང་ལུགས་འབྱུང༌། རྒ་ཤི་ནས་རིམ་མིན་དུ་ཡར་བགྲངས་ན་སྐྱེ་རིམ་དང་འགག་རིམ་གང་ཡིན་ཡང་ལུགས་ལྡོག་ཏུ་བཞེད་པ་སྟེ་ལུགས་གཉིས་སོ། །དང་པོ་ལྟར་ན། མ་རིག་པའི་རྐྱེན་གྱི་ས་འདུ་བྱེད། འདུ་བྱེད་རྐྱེན་གྱིས་རྣམ་ཤེས་ལ་སོགས་པའམ། རྒ་ཤི་ཅི་ལས་བྱུང་ན་སྐྱེ་བ་ལས་བྱུང་སོགས་གང་ལྟར་ཡིན་ཡང་ལུགས་འབྱུང་དུ་བཞེད། མ་རིག་པ་འགགས་པས་འདུ་བྱེད་འགག །འདུ་བྱེད་འགགས་པས་རྣམ་ཤེས་འགག་པ་སོགས་སམ། རྒ་ཤི་གང་གིས་འགག་ན་སྐྱེ་བ་འགགས་པས་འགག་པ་སོགས་གཉིས་ཀ་ལུགས་ལྡོག་ཏུ་བཞེད་དོ། །ཕྱི་མ་ལྟར་ན། མ་རིག་པའི་རྐྱེན་གྱིས་འདུ་བྱེད་སོགས་སམ་མ་རིག་པ་འགགས་པས་འདུ་བྱེད་འགག་པ་སོགས་གང་ཡིན་ཀྱང་ལུགས་འབྱུང་དང༌། རྒ་ཤི་གང་ལས་བྱུང་ན་སྐྱེ་བ་ལས་བྱུང་སོགས་སམ། སྐྱེ་བ་འགགས་པས་རྒ་ཤི་འགག །སྲིད་པ་འགགས་པས་སྐྱེ་བ་འགག་པ་སོགས་གང་ཡིན་ཀྱང་ལུགས་ལྡོག་ཏུ་བཞེད། ལུགས་འབྱུང་ལྡོག་ཕྱི་མ་འདི་ལྟར་ལ་བདེན་བཞི་ཤེས་པའི་གོ་རིམ་དང་སྦྱར་བ་མངོན་པ་ཀུན་བཏུས་ལས་བྱུང་བ་ལྟར་ན། སྐྱེ་རིམ་ལུགས་འབྱུང་དང་སྦྱར་ན་ཀུན་འབྱུང་གི་བདེན་པ་གཏན་ལ་ཕེབས། སྐྱེ་རིམ་ལུགས་ལྡོག་དང་སྦྱར་ན་སྡུག་བདེན་གཏན་ལ་ཕེབས། དེ་བཞིན་དུ་འགག་རིམ་ལུགས་འབྱུང་ལྡོག་གཉིས་ཀྱིས་ལམ་དང་འགོག་པ་གཉིས་གཏན་ལ་ཕེབས་ཏེ། དེའང་ཀུན་འབྱུང་ཉོན་མོངས་པ་ཐམས་ཅད་ཀྱི་རྩ་བ་མ་རིག་པ་ཡིན་ལ། དེ་ལས་འདུ་བྱེད་ཀྱི་ལས་བསགས་པའི་ཕྱིར། དང་པོ་ཀུན་འབྱུང་ལས་ཉོན་གཉིས་ལས་བརྩམས་ཏེ་མ་རིག་པའི་རྐྱེན་གྱིས་འདུ་བྱེད་སོགས་ཤེས་རབ་ཀྱིས་གཏན་ལ་འབེབས་པ་ནི། ཀུན་ནས་ཉོན་མོངས་ཕྱོགས་ཀྱི་རྒྱུ་ཀུན་འབྱུང་གཏན་ལ་འབེབས་པ་ཡིན་ལ། ཡང་འཁོར་བའི་སྡུག་བསྔལ་ཐམས་ཅད་ཀྱི་གཙོ་བོ་རྒ་ཤི་གཉིས་ཡིན་ལ། དེས་ན་རྒ་ཤི་ཅི་ལས་བྱུང་ན་སྐྱེ་བ་ལས་བྱུང་བ་སོགས་ལུགས་ལྡོག་དང་སྦྱར་ནས་ཀུན་ཉོན་ཕྱོགས་ཀྱི་འབྲས་བུ་སྡུག་བདེན་གཏན་ལ་འབེབས། ཡང་ཀུན་འབྱུང་མ་རིག་པའི་རྩ་བ་ལམ་བདེན་གྱི་ངོ་བོ་བདག་མེད་རྟོགས་པའི་ཤེས་རབ་ཀྱིས་བཅད་ནས། མ་རིག་པ་འགགས་པས་རྒ་ཤི་འགག་པ་སོགས་འགག་རིམ་ལུགས་འབྱུང་གཏན་ལ་ཕབ་པས། རྣམ་བྱང་ཕྱོགས་ཀྱི་རྒྱུ་ལམ་བདེན་གཏན་ལ་ཕེབས། ཡང་སྤང་བྱ་འཁོར་བའི་སྡུག་བསྔལ་གྱི་གཙོ་བོ་སྐྱེ་ཤི་གཉིས་འགག་པ་ནི་འགོག་བདེན་ཡིན་ལ། དེས་ན་སྐྱེ་བ་འགགས་པས་རྒ་ཤི་འགག་སོགས། མ་རིག་པ་འགག་གི་བར་དུ་བསམ་པས་རྣམ་བྱང་གི་འབྲས་བུ་འགོག་བདེན་གཏན་ལ་ཕེབས་པ་ཡིན་ནོ། །འདི་དག་ལ་ཞིབ་ཏུ་བརྟག་ནས་འཁོར་བའི་སྡུག་བསྔལ་གྱི་ཕུང་པོ་ཆེན་པོ་འདི་རྩ་བ་བདག་འཛིན་མ་རིག་པ་ལས་བྱུང་བ་དང༌། ལམ་ཐམས་ཅད་ཀྱི་རྩ་བ་བདག་མེད་རྟོགས་པའི་ཤེས་རབ་ཡིན་པ་སོགས་དོན་ཐོས་བྱུང་ལས་འདས་ནས་བསམ་བྱུང་གི་ངེས་པ་རྙེད་པ་ལ་འབད་དགོས་ཏེ། རྟེན་ཅིང་འབྲེལ་བར་འབྱུང་བ་འདི་ནི་རྒྱལ་བ་བདེན་པར་སྨྲ་བའི་གཞུང་གི་མཛོད་ཟབ་མོའི་མ་ཀི་ཉན་ཐོས་ཀྱི་ཐེག་པ་ནས་བཟུང༌། ཡ་ཀི་རང་བཞིན་རྫོགས་པ་ཆེན་པོའི་བར་ཐམས་ཅད་གདུལ་བྱ་ལ་སྟོན་ཚུལ་ཐ་དད་ཙམ་ལས་དོན་རྟེན་འབྲེལ་ཡིན་པ་ལ་ཐ་དད་མེད་པས། མཆན། གཅེས་པ་ཡིན་ནོ། །རྟེན་ཅིང་འབྲེལ་བར་འབྱུང་བའི་ཆོས་འཁོར་འདས་ཀུན་གྱི་རྩ་བ་མ་རིག་པ་དང༌། དེ་ལས་ལྡོག་པ་གཉིས་པོ་འདི་ཁོ་ན་ཡིན་ཏེ། དེ་ལས་འཁོར་བར་འཕེན་བྱེད་ཀྱི་ལས་དགེ་བ། མི་དགེ་བ། མི་གཡོ་བ་སྟེ་གསུམ་པོ་འདུ་བྱེད། དེས་འཕངས་པའི་རྣམ་ཤེས། དེའི་རྐྱེན་གྱིས་མིང་དང་གཟུགས། དེ་འཕེལ་བ་ལས་སྐྱེ་ཞིང་མཆེད་པའི་སྒོ་རྣམ་པ་དྲུག་རྫོགས་ཤིང༌། དེ་ལས་ཡུལ་དབང་ཡིད་བྱེད་གསུམ་འདུས་ཤིང་མངོན་དུ་གྱུར་པའི་རེག་པ་སྟེ་མིག་གིས་ལུས་རེག་པ་སོགས་ཀྱི་རྟེན་ནོ། །རེག་པ་ལས་བདེ་སྡུག་བཏང་སྙོམས་གསུམ་གྱི་ཚོར་བ་གང་རུང་སྐྱེ་བར་འགྱུར་བ་སྟེ། དེ་ལས་བདེ་བར་ལྡན་འདོད་སྡུག་བསྔལ་འབྲལ་འདོད་ཀྱི་སྲེད་པ་འབྱུང་བ་དང༌། སྲེད་པ་ལས་ཁྱད་པར་དུ་ལེན་པ་མངོན་པར་འདོད་པ་དང༌། དེ་ལས་འབྲས་བུ་སྐྱེད་པ་ལ་མངོན་དུ་ཕྱོགས་པའི་སྲིད་པ་ཕུང་པོ་ལྔའོ། །སྲིད་ལས་ཡང་སྲིད་ཕྱི་མར་སྐྱེ་བ་སྟེ། སྐྱེ་བ་ཡོད་ན་འདོད་པས་ལོངས་སྤྱོད་ཀྱིས་ཕོངས་པ་དང༌། སེམས་མྱ་ངན་གྱིས་གདུང་བ་དང༌། འབྱུང་བ་འཁྲུགས་པའི་ན་བ་དང༌། འདུ་བྱེད་རྙིང་པས་རྒ་བ་དང༌། སྲོག་དང་བྲལ་བས་འཆི་བ་སོགས་ཡིད་མི་བདེ་བའི་སྡུག་བསྔལ་གྱི་ཕུང་པོ་ཤིན་ཏུ་ཆེ་བ་འདི་གྲུབ་པའི་ཕྱིར། དེས་ན་སྲིད་པའི་གནས་འདིར་སྐྱེ་བ་རང་མཚན་པ་ལེན་པའི་རྒྱུན་འགགས་པས། སྡུག་བསྔལ་གྱི་ཕུང་པོ་ཐམས་ཅད་འགགས་པར་འགྱུར་བའི་ཕྱིར། རྟེན་ཅིང་འབྲེལ་བར་འབྱུང་བའི་རྒྱུ་འབྲས་མུ་སྟེགས་བྱེད་ལ་སོགས་པས་ཤིན་ཏུ་རྟོགས་དཀའ་བའི་ཟབ་མོ་འདི་ནི། རྒྱལ་བ་བདེན་པར་སྨྲ་བའི་གསུང་རབ་མཐའ་དག་གི་མཛོད་ཡིན་པས་གཅེས་པར་ཟུངས་ཤིག །དེ་ལྟར་རྟེན་འབྲེལ་ཤེས་ནས་བདག་མེད་ཙམ་ཉན་རང་དང་མཚུངས་མོད་ཀྱི། ཉན་རང་རྣམས་སྲིད་པར་འདུ་བྱེད་པའི་རྒྱུ་འཇིག་ཚོགས་ལ་བདག་ཏུ་ལྟ་བའི་དབང་གིས་མཐོ་དམན་དང་བདེ་སྡུག་སྣང་བ་ལས་སུ་ཤེས་པ་དང༌། དཀར་པོ་རྣམ་བྱང་རྒྱུ་འབྲས་ལམ་འགོག་གཉིས་དང༌། ནག་པོ་ཀུན་ཉོན་ཕྱོགས་ཀྱི་རྒྱུ་འབྲས་ཀུན་འབྱུང་དང་སྡུག་བསྔལ་ཏེ། ཆོས་ལ་བླང་དོར་དང་འདུས་བྱས་འདུས་མ་བྱས་སེམས་དང་སེམས་བྱུང་སོགས་ཀུན་ལས་འདས་པ། སྲིད་པ་དང་ཞི་བ་གཉིས་ཀྱི་མཐའ་ལས་འདས་པ་དོན་དམ་པའི་བདེན་པ་མཐར་ཐུག་དངོས་གཞི་ཡིན་ལ། དེ་ནི་སྐྱེ་བ་མེད་པས་གདོད་ནས་སྤྲོས་པ་དང་བྲལ་བ་ཆོས་ཉིད་བློ་འདས་སོ་སོ་རང་རིག་གི་ཡེ་ཤེས་རྟོགས་པ་ལས་འབྱུང་བ་ཡིན་ནོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། །འཁོར་བ་སྡུག་བསྔལ་གྱི་ཚོམས་ཏེ་ལེའུ་བཞི་པའོ།། །།ཐེག་ཆེན་སྐྱེས་བུ་ཆེན་པོ་མཆོག་གི་ལམ་རྣམ་མཁྱེན་གྱི་འཇུག་ངོགས་ཀྱི་ཐོག་མར་ལམ་སྒྲུབ་པོའི་གང་ཟག་དེ་གནས་པའི་ཡུལ་ནི། ཆོས་དང་མཐུན་པར་གྱུར་ཅིང་མཐུན་རྐྱེན་ཚང་བའི་དབེན་པ་དག་ལ་བསྟེན་པ་དང༌། སྡེ་སྣོད་གསུམ་གྱི་དོན་ལ་མཁས་ཤིང་བསླབ་གསུམ་གྱི་ཉམས་ལེན་ལྡན་པའི་སྐྱེས་བུ་དམ་པ་བསྟེན་པ་ལས་རང་རྒྱུད་དམན་པ་དང་ལོག་པའི་ལམ་ལས་བཟློག་ནས་ལུང་རྟོགས་ཀྱི་ཡོན་ཏན་ཅི་རིགས་པའང་འཐོབ་ཅིང༌། དེ་ཡང་དེས་ཇི་སྐད་བསྟན་པ་བཞིན་བདག་ཉིད་ཀྱིས་ལེགས་པར་སྨོན་པའི་དོན་གཉེར་བཅས་བསྒྲུབ་པ་དང༌། ཚེ་རབས་སྔོན་དང་ད་ལྟར་ཡང་བསོད་ནམས་ཀྱི་ཚོགས་བསགས་པའི་སྐྱབས་དམ་པ་ལ་འདུན་པ་སྟེ་བཞི་པོ་དེ་ལ་འཁོར་ལོ་ཆེན་པོ་བཞི་ཞེས་མགོན་པོ་ཀླུ་ཡི་དབང་པོས་བཞེད་དེ། དཔེར་ན་ཕྱུགས་དང་གླང་པོ་སོགས་ཀྱི་ཉིན་མང་པོའི་བཤུལ་ལམ་ཤིང་རྟའི་འཁོར་ལོས་ཡུད་ཙམ་ལ་བགྲོད་པ་ལྟར། བྱང་ཆུབ་སེམས་དཔས་འདི་བཞི་ལ་བརྟེན་ནས་རྣམ་མཁྱེན་མྱུར་དུ་བགྲོད་དེ། བཤེས་སྤྲིངས་ལས། མཐུན་པར་གྱུར་པའི་ཡུལ་ན་གནས་པ་དང༌། །སྐྱེས་བུ་དམ་པ་ལ་ནི་བསྟེན་པ་དང༌། །བདག་ཉིད་ལེགས་སྨོན་སྔོན་ཡང་བསོད་ནམས་བགྱིས། །འཁོར་ལོ་ཆེན་པོ་བཞི་ནི་ཁྱོད་ལ་མངའ། །ཞེས་གསུངས་སོ། །གྲོང་སོགས་ཁྱིམ་པའི་གནས་དང་སྤོང་ཀློག་གི་བྱ་བ་མེད་པའི་དགོན་གནས་ཀྱང་རུང་སྐྱེ་བོ་མང་པོའི་འདུ་ཚོགས་ཀྱི་དབུས་ན་གནས་པའི་ཉེས་དམིགས་ནི། འཕྲལ་དུ་བདེ་ཡང་སྡུག་བསྔལ་གྱི་རྒྱུར་གྱུར་པའི་དུག་ཅན་གྱི་ཟས་ལྟ་བུའི་ཡུལ་དགྲ་གཉེན་འཐབ་རྩོད། སོ་ནམ། ཚོང་དང༌། འདུ་འཛི། རྙེད་བཀུར། འདུ་ཚོགས། རྣམ་གཡེང༌། གསོག་བསྲུང་སྤེལ་བ་སོགས་ཉེ་བར་སྤྱད་པ་དང༌། རྐྱེན་གྱི་རྣམ་འགྱུར་ཤིན་ཏུ་རྒོད་དེ་དད་རྫས་གཤིན་དཀོར་སོགས་ངན་པའི་ཡུལ་དེ་ལས་ཐག་བསྲིངས་ནས། རང་ཉིད་གཅིག་པུར་དབེན་པར་ཞི་བ་མྱང་འདས་ཀྱི་ལམ་ལ་མོས་པར་བྱ་ཞིང༌། དེའི་ཚེ་ནའང་ལོངས་སྤྱོད་ཀྱི་རྙེད་བཀུར་སོགས་ལ་མ་ཆགས་པ་རླུང་ལྟ་བུ་དང༌། གནས་དང་འཚོ་བ་ལ་བདག་ཏུ་འཛིན་པ་མེད་པ་མཁའ་ལ་ལྡིང་བའི་བྱ་བཞིན་དང༌། ས་ཕྱོགས་སྟོང་པར་གནས་པའི་རི་དྭགས་བཞིན་དུ་དབེན་པ་དམ་པར་གནས་པའི་སྐལ་པ་བཟང་པོ་དེ་ནི། མ་བརྟག་པར་བབ་ཅོལ་དུ་རྣམ་གཡེང་དང་ཆོས་མིན་སྤྱོད་པས་འཁྲུག་པར་མི་འགྱུར་བས་དེ་ལ་སྙིང་ནས་སྤྲོ་བའི་བློས་བརྟེན་དགོས་སོ། །གྲོང་དང་དགོན་གནས་སོགས་གཞི་གཅིག་ལ་བརྟེན་ནས་རྟག་ཏུ་དེར་བསྡད་ན་མཛའ་བ་སོགས་གཞན་ངོ་བསྲུང་བ་དང༌། དཔལ་དང་སྙན་གྲགས་སོགས་ཀྱིས་ཕན་ཚུན་ཕྲག་དོག་ལ་རེ་ཞིང་བསྲན་ཐུབ་ཀྱང༌། ནམ་ཞིག་གི་ཚེ་ན་བཟོད་པའི་སྙིང་སྟོབས་ཀྱི་གོ་ཆ་དེ་བྲི་བར་འགྱུར་རོ། །ཡིད་ནི་གསོད་པ་སོགས་སྤྱོད་ངན་ལ་ཕྱོགས་པས་ཤིན་ཏུ་རེངས་ཏེ་གྱོང་ཞིང་རྩུབ་པའི་བདག་ཉིད་ཅན་ཡིན་པ་ནི། དཔེར་ན་བྱི་ལ་ཡང་འགྲོ་འདུག་མི་མངོན་པ་ལྟར་ཞི་ཞིང་སྤྱོད་ལམ་དེས་པ་སེན་མོའང་མེད་པ་ལྟར་བྱེད་ཅིང༌། སྐད་དལ་བུར་སྨྲ་ཞིང་བྱིའུ་བྱི་བ་སོགས་ཀྱི་སྟེང་དུ་རྩལ་གྱིས་མཆོངས་པ་ལྟར། སྡིག་པའི་གྲོགས་ཀྱིས་ཀྱང་གུས་གུས་ལྟར་བྱས་ཤིང་ལོངས་སྤྱོད་སྟེར་བ་སོགས་ཀྱིས་འཕྲལ་བདེ་གཏན་ཕུང་ནི་བརྩེ་ཆུང་ལས་དང་པོ་པས་བག་ཕེབས་བསྟེན་པའི་ཡུལ་སྣང་ལོངས་སྤྱོད་ཕུན་སུམ་ཚོགས་ཀྱང༌། རང་རྒྱུད་དམ་པའི་ཆོས་ལས་འཕྲལ་དུ་ཉམས་པར་འགྱུར་རོ། །དཔེར་ན་བསྐྱོད་པ་ཡང་བའི་ཉི་ཟླ་གླིང་བཞིའི་སྐྱེ་བོ་ཀུན་དང་མཛའ་བ་ལྟར། ཆོས་སྤྱོད་ཀྱང་སྐྱེ་བོ་ཀུན་དང་འདྲིས་ཤིང་བདེ་བ་དང༌། སྡོད་གནས་གཅིག་ཏུ་གཉུག་མར་གནས་པ་དེ་ནི་ལོངས་སྤྱོད་སོགས་ཀྱི་དོན་དུ་ཁྲོ་བས་གདུང་བར་འགྱུར་ལ། གང་དུ་སོང་ཡང་ངོ་ཤེས་ཤིང་འདྲིས་པའི་མོད་ལ་གསར་པ་གསར་པར་ཕྱོགས་ཏེ་བསྐྱོད་པར་གྱུར་པའི་ཡུལ་ཁྲོ་རྩོད་ཀྱིས་དབེན་པས་འཇམ་ཞིང༌། ཕྱོགས་དེའི་སྐྱེ་བོ་ཀུན་ཀྱང་མི་མཐུན་པ་མེད་པའི་བཤེས་པར་འགྱུར་བ་མཐོང་ངོ༌། །དམ་པ་དག་ནི་སེམས་ལྡན་ཏེ་རྣམ་རྟོག་རང་རྒྱུད་པའི་དབང་དུ་སོང་བའི་སོ་སྐྱེ་ལྟ་བུར་ཆགས་སྡང་དང་འདུ་འཛིའི་གཏམ་སོགས་ཅ་ཅོ་སྒྲོགས་པ་སོགས་སུ་འགྱུར་བ་ལྟར་སྣང་ན་ཡང༌། རྐྱེན་བཟང་ངན་རོ་སྙོམས་པས་བརྗོད་པ་བཟང་ངན་ཅི་འདྲ་བྱེད་ཀྱང༌། རྗེས་སུ་གང་ཟག་དེ་ཡི་སེམས་ཞེན་ཅིང་ཆགས་པ་ཁྲོ་ཞིང་སྡང་བའི་རྣམ་པ་ཅན་དུ་འགྲོ་བ་མ་ཡིན་ཏེ། དཔེར་ན་བྲག་ཆ་ལྟ་བུར་བླང་དོར་དང་བྲལ་བ་ཡི་ཀུན་སྤྱོད་ཅན་སེམས་ཅན་དོན་ལ་བརྩོན་པས་དེ་འདྲ་བ་ལ་ཡུལ་གྱི་དམ་བཅའ་འདི་ཞེས་ངེས་པ་དང་བྲལ་བའི་ཐར་པ་དོན་དུ་གཉེར་བའི་ལས་དང་པོ་པས་སྐྱེས་བུ་ཚངས་པ་མཚུངས་པར་གྱུར་པའི་ཚུལ་ཁྲིམས་ཡང་དག་པར་བླངས་ནས་སྤྱོད་པར་འདོད་པ་དང༌། ཡང་དག་པའི་བསམ་གཏན་དོན་ལ་རྩེ་གཅིག་ཏུ་སེམས་འཇོག་པར་འདོད་པ་ཡི། གང་ཟག་བསླབ་གསུམ་གྱི་བརྟུལ་ཞུགས་རང་རྐྱ་ཐུབ་པའི་བརྟན་པར་མ་སོན་པ་གང་དང་གང་ཡིན་ཀྱང་རུང་སྟེ། ཡུལ་དབེན་པ་དང་དགེ་བའི་གྲོགས་ལ་བརྟེན་ནས་བསླབ་གསུམ་གྱི་ཡོན་ཏན་མཐོ་བ་དང༌། འདུ་འཛི་དང་སྡིག་གྲོགས་ལ་བརྟེན་ན་ཇེ་དམན་དུ་བྱེད་པས་སྤང་བླང་རེམ་དགོས་སོ། །སྟོན་པས་རིགས་གཟུགས་ལོངས་སྤྱོད་སོགས་བསྐྱུངས་པའི་སློབ་མར་བསོད་སྙོམས་གནང་བས། སྦྱོར་དངོས་རྗེས་གསུམ་དང་ལྡན་ན་གཞན་སྦྱིན་བདག་ལ་བསོད་ནམས་བསྐྱེད་ལ། བདག་ཉིད་ཀྱང་བྱ་བ་ཉུང་ཞིང་ངོ་བསྲུང་མི་དགོས་པ་དང༌། ཚོང་དང་སོ་ནམ་སོགས་ཀྱིས་དབེན་པས་བསླབ་གསུམ་གྱི་དཀའ་ཐུབ་ཉམས་པར་མི་འགྱུར་ལ། ཟས་གོས་སོགས་ཀྱིས་ཀྱང་མི་ཕོངས་པས་སློང་བ་རྣམས་ཀྱི་ཚུལ་འདི་ནི། ཡིད་བཞིན་ནོར་བུ་ལྟར་ཆོས་དང་མཐུན་པར་གྱུར་པའི་བསོད་སྙོམས་ཁོ་ན་ཡིན་ནོ། །འཚོ་བ་མ་དག་པ་མང་པོ་གསུངས་པ་ལས་དམིགས་བསལ་ཤིན་ཏུ་མ་དག་པ་ནི། འདི་ལྟར་ཡོད་སྦས་མེད་མདོག་སོགས་སྟོན་པའི་སྒོ་ནས་ཐབས་ཀྱིས་བརྐུ་བ་སྟེ་གཞོག་སློང་དང༌། རང་ལ་བྱིན་པ་ལ་བསྔགས་པ་བརྗོད་ནས་འཚོལ་བའམ། ཕར་ཅུང་ཟད་རེ་བཏང་ནས་ཚུར་མང་དུ་སྡུད་པ་རྙེད་པས་རྙེད་པ་འཚོལ་བ་དང༌། རང་གིས་དགེ་བ་སྒྲུབ་པ་སོགས་བྱས་སྐད་ཀྱི་གཡོ་ཟོབ་དང༌། གཞན་ལ་བསྔགས་བརྗོད་ཀྱི་སྒོ་ནས་འཚོལ་བའི་ཁ་གསག་དང༌། བཟང་བརྫུའི་སྤྱོད་པ་ཧྲུལ་པོས་རྙེད་པ་ཚོལ་བ་ཚུལ་འཆོས་དང༌། བདག་ཐོབ་ཐང་ཅན་ལ་འདི་ལྟར་མི་འོས་ཞེས་ཐོབ་ཀྱིས་འཇལ་བའི་འཚོ་བ་སྟེ་ལོག་འཚོ་རྣམ་པ་ལྔས། ཐར་པ་སྒྲུབ་པའི་དགེ་སྦྱོང་དྲང་སྲོང་རྣམས་ཀྱི་བརྟུལ་ཞུགས་ཐམས་ཅད་སྨ་བ་དང་བབ་ཏེ་ཉམས་པར་འགྱུར་ཏེ། ལང་ཀར་གཤེགས་པ་ལས། ཁེ་ཡི་ཕྱིར་ནི་སེམས་ཅན་གསོད། །ཤ་ཡི་ཕྱིར་ནི་ནོར་སྦྱིན་བྱེད། །དེ་དག་གཉིས་ཀ་སྡིག་ལས་ཅན། །འོ་དོད་འབོད་ལ་སོགས་པར་བཙོ། །ཞེས་དང༌། རྣམ་གསུམ་དག་པའི་ཤ་རྣམས་ནི། །མ་བརྟགས་པ་དང་མ་བསླངས་དང༌། །མ་བསྐུལ་བ་ཡང་ཡོངས་མེད་པས། །དེ་བས་ཤ་ནི་མི་བཟའ་འོ། །ཞེས་པས་མི་ཟ་བའམ་ཟ་ནའང་སྙིང་རྗེས་གཟུངས་སྔགས་བསྔོ་སྨོན་སོགས་ཀྱིས་རྗེས་སུ་འཛིན་པར་བྱའོ། །དེ་ཕྱིར་གནས་དབེན་པ་དང༌། མལ་བཟང་རྩྭ་སོགས་སྟན་དང༌། འཚོ་བ་བསོད་སྙོམས་བཟང་པོ་ལ་བརྟེན་པ་དང༌། དགེ་བ་ལ་སྦྱོར་བའི་གྲོགས་བཟང་དང་འགྲོགས་ནས་དད་གུས་སོགས་སྦྱོར་བ་བརྩོན་འགྲུས་བཟང་པོས་ཞི་ལྷག་སོགས་དང༌། ཤེས་རབ་ཇེ་གསལ་དུ་འགྲོ་བའི་ལམ་སྒྲུབ་པར་སྙིང་སྟོབས་གོང་ནས་གོང་དུ་སློང་བར་འགྱུར་རོ། །བསླབ་པ་ཀུན་གྱི་ཡོན་ཏན་མ་སྐྱེས་པ་སྐྱེ་ལ་སྐྱེས་པ་ཡོངས་སུ་རྫོགས་པའི་ཕྱིར། མཚན་ཉིད་ལྡན་ཅིང་བསླབ་གསུམ་གྱི་གནད་མ་ནོར་བར་ཤེས་པའི་སྐྱེས་བུ་དམ་པ་དག་ལ་བསྟེན་པར་བགྱིད་ན་དོན་ཆེ་ལ། ཇི་ལྟར་སྨན་ཚལ་ཆེན་པོ་མ་ལ་ཡ་ཡི་ནགས་ཀླུང་དུ་རྣམ་པར་འཁྱམས་པའི་སྡོང་དུམ་ཕལ་པའང༌། རེ་ཞིག་ཙན་དན་དེའི་ཡལ་འདབ་ཀྱིས་བརླན་པའི་སྟོབས་ཀྱིས་ཙན་དན་གྱི་དྲི་བསུང་སྣང་བ་ལྟར། སྐྱེས་བུ་དམ་པ་གང་ལ་བསྟེན་པ་ན་རིང་པོར་མི་ཐོགས་པར་བསྟེན་བྱ་དེ་ཡི་ཡོན་ཏན་གྱི་རྗེས་སུ་འགྲོའོ། །སྔོན་ཆད་འབྲས་བུའི་བསྟན་པ་སོགས་ཀྱི་དུས་སུ་གདུལ་བྱ་རྒྱུད་དག་པས་འཕགས་པའི་གང་ཟག་དང༌། གྲུབ་པའི་སྐྱེས་བུ་མདོ་རྒྱུད་ནས་ཇི་སྐད་བཤད་པའི་དགེ་བའི་བཤེས་གཉེན་དམ་པའི་ཆོས་ཚུལ་ཏེ་མཚན་ཉིད་མཐའ་དག་རྫོགས་པ་ནི། སྙིགས་མའི་མཐུས་བྱས་ཏེ་རྙེད་པར་དཀའ་ནའང༌། སོ་ཐར་བྱང་སེམས་རིག་འཛིན་སྔགས་ཀྱི་སྡོམ་པ་གསུམ་པོ་སོ་སོའི་གཞུང་ལྟར་གནང་བཀག་གིས་མཚམས་ཤེས་ཤིང་དགག་དགོས་ཚང་བ་དང༌། སྤྱོད་པས་རང་རྒྱུད་གཙང་མའི་ས་གཞི་བཟང་པོ་ལྟ་བུ་ལ། གསུང་རབ་དགོངས་འགྲེལ་དང་བཅས་པའི་ཚིག་དང་དོན་ལ་མཁས་ཤིང་ཐོས་པས་རྒྱུད་གྲོལ་བ་དང༌། གདུལ་བྱ་རྗེས་སུ་འཛིན་པའི་བརྩེ་བའི་སྙིང་རྗེ་ཆེན་པོས་ཐུགས་རྒྱུད་བརླན་ཞིང༌། སྡེ་སྣོད་གསུམ་དང་སྔགས་རྒྱུད་སྡེ་བཞི་སོགས་རྒྱ་མཚོ་ལྟ་བུའི་ཆོ་ག་དང་ལམ་སྒྲུབ་ཚུལ་གྱི་བྱ་བ་ཐམས་ཅད་ལ་མཁས་པ་དང༌། ཚིག་ཙམ་མ་ཡིན་པར་ཉམས་ལེན་གནད་དུ་ཚུད་པས་སྤངས་པ་དང་རྟོགས་པའི་ཡེ་ཤེས་ལ་དྲི་མ་མེད་པའི་འབྲས་བུས་ཐུགས་རྒྱུད་ཡོངས་སུ་གང་བས་ཕྱུག་ཅིང༌། ཟང་ཟིང་ལ་མི་ཆགས་པའི་སྦྱིན་པ་དང༌། ཡིད་མཐུན་པའི་གཏམ་དང༌། རྣམ་གྲོལ་གྱི་དོན་ལ་སྤྱོད་དུ་འཇུག་པ་དང༌། དེ་དང་མཐུན་པར་རང་ཉིད་ཀྱང་འཇུག་པ་སྟེ་བསྡུ་དངོས་བཞི་ཡི་མེ་ཏོག་རྣམ་པར་བཀྲ་བས། ཐར་ལམ་སྒྲུབ་པའི་སྐལ་བཟང་གདམས་ངག་གི་རྩི་བཅུད་ལ་རོལ་པའི་སློབ་མའི་བུང་བ་སྡུད་ནུས་པའི་ཐབས་མཁས་ཅན་དེ་ལ་བསྟེན་དགོས་ཏེ། རྔ་བོ་ཆེའི་མདོ་ལས། མྱ་ངན་མ་བྱེད་ཀུན་དགའ་བོ། །སྨྲེ་སྔགས་མ་འདོན་ཀུན་དགའ་བོ། །ང་ནི་ཕྱི་མའི་དུས་ཀྱི་ཚེ། །དགེ་བའི་བཤེས་གཉེན་ཉིད་སྤྲུལ་ནས། །ཁྱོད་ལ་སོགས་པའི་དོན་བྱེད་འགྱུར། །ཞེས་བླ་མ་སངས་རྒྱས་ཀྱི་སྤྲུལ་པ་དངོས་ཡིན་པར་ཤེས་པར་བྱའོ། །ཁྱད་པར་ངེས་དོན་གསང་སྔགས་རྡོ་རྗེ་ཐེག་པའི་ལམ་གྱི་མན་ངག་སྟོན་པའི་བླ་མའི་མཚན་ཉིད་ནི། རྒྱུད་སྡེ་ཕྱི་ནང་གི་དཀྱིལ་འཁོར་ཐམས་ཅད་ལས་དབང་ཐོབ་པ༡་དང༌། དབང་དོན་རྒྱུད་ལ་གནས་པའི་སྡོམ་པ་དང་དམ་ཚིག་ལ་གནས་པས་སྒོ་གསུམ་ཤིན་ཏུ་ཞི་ཞིང་དུལ་༢བ་དང༌། གཞི་རྒྱུད་བདེ་གཤེགས་སྙིང་པོའི་གནས་ལུགས། ལམ་རྒྱུད་སྤངས་རྟོགས་སྐྱེད་བྱེད་བསྐྱེད་རྫོགས་གཉིས། འབྲས་བུའི་རྒྱུད་སྐུ་དང་ཡེ་ཤེས་ལྷུན་གྲུབ་ཏུ་འབྱུང་ཚུལ་སྤྱི་དང་བྱེ་བྲག་གི་དོན་ཁོང་དུ་ཆུད་པ་༣དང༌། བསྙེན་སྒྲུབ་ལས་སྦྱོར་དང་བཅས་པའི་རྟགས་ཡོངས་སུ་རྫོགས་པ་༤དང༌། འཁོར་འདས་རོ་མཉམ་གྱི་དོན་རྟོགས་པས་ལྟ་བ་ལ་མ་རྨོངས་པ་༥དང༌། ཉམས་མྱོང་གིས་རང་རྒྱུད་གྲོལ་བ་༦དང༌། སྙིང་རྗེ་ཚད་མེད་པས་གདུལ་བྱ་ཐར་པར་འདྲེན་པ་༧དང༌། གཞན་དོན་འབའ་ཞིག་གཉེར་བ་༨སྟེ་བརྒྱད་པོ་འདི་ནི་བི་མ་ལའི་དགོངས་པ་ཡིན་ནོ། །བྱ་བ་ཉུང་ཞིང་སྒོ་གསུམ་གྱིས་ནན་ཏན་ཆོས་ཕྱོགས་ཁོ་ན་ལ་སེམས་པས་འཁོར་བར་སྐྱོ་ཤས་དང༌། ངེས་འབྱུང་གི་བློ་ཆེར་ལྡན་ཞིང༌། གཞན་གདུལ་བྱ་ཡང་སྐུ་དྲུང་དུ་བསྡད་པ་ཙམ་ནས་དེ་ལ་བསྐུལ་ནས་སྣང་བ་བསྒྱུར་འཁོར་བ་ལས་ལྡོག་ནུས་པའི་ཐབས་ཚུལ་དུ་མ་ལ་མཁས་ཤིང༌། བརྒྱུད་པ་ལ་སེལ་མེད་པའི་བྱིན་རླབས་ལྡན་པ་གཉིས་པོ་ཀུན་མཁྱེན་བླ་མའི་བཞེད་པའོ། །དེ་ལྟ་བུ་ལ་བསྟེན་ན་མཆོག་ཐུན་དངོས་གྲུབ་ཚེ་འདི་ཉིད་ལ་མྱུར་དུ་འགྲུབ་པར་འགྱུར་རོ། །བྲམ་ཟེ་བཞིན་དུ་ཁེངས་པའི་སྒོ་ནས་སྐུ་སྐྱེ་རིགས་རུས་སོགས་ཀྱི་ཆོ་རིགས་བསྲུང་བའམ། རང་ཉིད་བསྟི་བའི་གནས་དགོན་སྡེ་བླ་བྲང་སོགས་ཀྱི་སྔར་སྲོལ་ཉམས་པར་དོགས་ནས། ཆོས་སྒྲུབ་པའི་ཟོལ་གྱིས་དཀོར་ལོངས་སྤྱོད་སྒྲུབ་པར་འདོད་པའི་ཀུན་སློང་ངན་པ། དཔེར་ན་མི་གཙང་བའི་རྫིང་བུ་རུ་ཁྲུས་བྱས་ན་སླར་ཡང་དྲི་མས་གོས་པ་དང་འདྲ་སྟེ། ཀུན་སློང་དེས་ཐོས་བསམ་ཆོས་བཤད་རྟེན་བཞེངས་སོགས་བྱས་པ་དེ་ནི་ཆོས་མིན་རྒྱུད་མ་རུངས་པར་བྱེད་པའི་འབྲས་བུ་གནས་མིན་གྱི་ཁྲུས་ལ་ཞུགས་པ་སྟེ་ཡོན་ཏན་ཆེ་རློམ་གྱི་སྟོང་འུར་ཆེ་ཡང་རྒྱུད་མི་ཐུལ་ཏེ། དཔེར་ན་ཡོས་མི་འདུལ་ཤིང་ཕྱེ་མི་འབབ་པ་ཤིང་གི་རང་འཐག་ལྟ་བུའི་ལམ་སྟོན་ལ་ངན་པ་དང༌། ཉོན་མོངས་པས་རྒྱུད་གང་བའི་སོ་སོ་སྐྱེ་བོའི་རང་བཞིན་དང་མ་འགལ་ན་ཡང༌། སྔོན་གྱི་སྦྱིན་འབྲས་ཅུང་ཟད་ལ་བརྟེན་ནས་ད་ལྟ་བླ་མའི་གོ་ས་ཐོབ་པ་དགེ་བའི་བཤེས་གཉེན་གྱི་མཚན་ཉིད་མི་ཤེས་པའི་བླུན་པོ་མང་པོས་སྒྲོ་བཏགས་ཏེ། དད་པས་བབ་ཅོལ་དུ་བདག་ནི་དེ་ལྟ་བུའོ་ཞེས་རློམ་པའི་གནས་ལ་སྦྱར་ནས། ལོངས་སྤྱོད་དང་རྙེད་པ་དང་ཡོ་བྱད་ཀྱི་ཞེ་ས་དང་བཀུར་སྟིའི་མཆོད་པས་ཁེངས་པར་གྱུར་པ་ཁྲོན་པའི་ལག་འགྲོ་སྟེ་གཏམ་རྒྱུད་དུ་སྦལ་པ་ལྟ་བུའི་བཤེས་གཉེན་དང༌། ལུང་གི་ཡོན་ཏན་གྱི་ཐོས་པ་ཉུང་ཞིང་སྡོམ་དང་དམ་ཚིག་ནོད་ཀྱང་གནང་བཀག་མི་ཤེས་པས་ཚུལ་ཁྲིམས་འཆལ། བསླབ་གསུམ་མི་ཤེས་ཤིང་ཉེས་པའི་གཞན་དབང་དུ་གྱུར་པས་རྒྱུད་ཚོད་དམའ་ལ། གདམས་ངག་སོགས་འབོགས་ཁུལ་འོལ་ཚོད་ཀྱིས་ཀུན་སྤྱོད་ནི་ས་བླར་གཤེགས་པ་ལྟར་སོང་ཞིང༌། གདུལ་བྱ་རྗེས་སུ་འཛིན་པའི་བྱམས་དང་སྙིང་རྗེའི་དཔྱང་ཐག་སྟེ་འཇུ་ཐག་ཆད་པ་ཡི་སྨྱོན་པའི་ལམ་མཁན་རྣམས་བརྟེན་པ་ལས། ངན་འགྲོའི་གཡང་ས་སྡིག་པའི་གཅོང་རོང་དུ་ཁྲིད་པས་སྡིག་པ་ལྷག་པར་འཕེལ་ལ། ཁྱད་པར་སློབ་མ་རང་ལས་བླ་མ་ཡོན་ཏན་ལྷག་པ་དང་བཅས་པ་ཞིག་དགོས་ཀྱི། དེ་ལྟར་མིན་པའི་བྱང་ཆུབ་སེམས་དང་བྲལ་བ་དེ་འཇིག་རྟེན་ན་སྐུ་བསོད་ཀྱི་གྲགས་པ་ཆེན་པོ་ཐོབ་པའི་མཐུས་དམ་པར་བཟུང་ནས་བསྟེན་ན་ཤིན་ཏུ་འཁྲུལ་ཏེ། དཔེར་ན་ལོང་བའི་དེད་དཔོན་གྱིས་ལོང་བར་ལམ་སྟོན་མི་ནུས་ལྟར། དེ་འདྲའི་ཤེས་རབ་ཀྱི་མིག་ལྡོང་བ་ལ་སྐྱབས་སུ་འཆའ་ན་གནས་སྐབས་དང་མཐར་ཐུག་ནོར་བ་ཆེན་པོ་སྟེ། སློབ་མས་ཆོས་བཞིན་མི་བྱེད་པ་ལ་མི་སེམས་ཤིང༌། རང་གི་ཞབས་ཏོག་དང་བསྙེན་བཀུར་ལ་དགའ་ནས་སློབ་མ་སྐྱོང་མདོག་རེ་བྱེད་ཅིང༌། སློབ་མས་ཀྱང་དེ་ལ་དགོངས་གཞི་དང༌། དགོས་པ་མེད་བཞིན་ཆོས་བརྒྱད་ཀྱི་གྲོགས་བྱས་ནས་ཞབས་ཏོག་ཡིན་རློམ་ཟོལ་གྱིས་བསྟེན་ཞིང་འགྲོགས་ན་བླང་དོར་གྱི་གནས་མཐོང་བའི་སྐབས་བྲལ་བས་ངན་སོང་མུན་པའི་སྨག་ཏུ་འཁྱམས་པར་འགྱུར་རོ། །རྒྱུ་མཚན་དེ་དག་གི་ཕྱིར་ན་དང་པོར་སྔར་ནས་བླ་མ་དེ་དམ་པ་ཡིན་མིན་ཤིན་ཏུ་བཏང་སྙོམ་གྱི་མ་བརྟགས་པར་བསྟེན་ན། ཆོས་སྒྲུབ་འདོད་ཀྱི་དད་པ་ཅན་གྱི་རྒྱུད་ལ་ཡོད་པ་དང་ཕྱིས་འབྱུང་གི་དགེ་ཚོགས་ལམ་གྱི་ཡོན་ཏན་ཐམས་ཅད་ཆུད་གསན་ཅིང༌། དལ་བ་ཕུན་སུམ་ཚོགས་པའི་རྟེན་བཟང་རིང་མོ་ནས་མ་ལོན་པར་ད་ལྟ་སྐབས་ཙམ་ཤིག་ལ་རྙེད་པ་འདི་དོན་མེད་དུ་འགྱུར་བ་ནི། དཔེར་ན་ཤིང་སྡོང་གི་རྩར་བསིལ་གྲིབ་ལ་རེ་བ་སྦྲུལ་གདུག་དང་ཤིང་གི་གྲིབ་མ་གཉིས་ནོར་ནས་དེ་རུ་སོང་སྟེ་ངལ་གསོས་ན་དུག་གིས་ཉེན་ཏེ་སྡུག་བསྔལ་བ་བཞིན་བསླུ་བར་འགྱུར་ཏེ། རིག་པ་འཛིན་པའི་སྡེ་སྣོད་ལས། ཐོས་ཆུང་དྲིས་ལ་ལན་མི་ཐེབ། །སློབ་དཔོན་མ་བརྟགས་སློབ་མའི་བདུད། །ཅེས་གསུངས་པ་ལྟར་རོ། །གསུང་རབ་དགོངས་འགྲེལ་དང་བཅས་པའི་དོན་ལ་མང་དུ་ཐོས་ཤིང་ཤེས་རབ་ཀྱི་མིག་རྒྱས་ལ། བསླབ་གསུམ་གྱི་རྟོགས་པ་ཁྱད་པར་ཅན་གྱིས་སློབ་མའི་རྒྱུད་གྲོལ་བ་ལ་མཁས་པ་སྟེ། ལུང་དང་རྟོགས་པ་མཐའ་དག་གི་ཡོན་ཏན་རྒྱུད་ལ་འབྱོར་བའི་བླ་མ་དམ་པ་རྣམས་ནི། ཕྱོགས་བཅུའི་སངས་རྒྱས་ཀུན་གྱི་ཆོས་སྐུའི་ཡེ་ཤེས་སྤྲོས་བྲལ་གྱི་ངང་དམིགས་མེད་ཐུགས་རྗེ་ཆེན་པོའི་ཁམས་རང་བྱུང་ལྷུན་གྲུབ་ཡོད་པས། གདུལ་བྱ་མཐའ་ཡས་པའི་ཡུལ་ལ་སྤྲུལ་པའི་རོལ་གར་བསམ་གྱིས་མི་ཁྱབ་པར་སྣང་བ། ད་ལྟ་བདག་ཅག་གི་སྟོན་པའི་བསྟན་པ་རིན་པོ་ཆེའི་ལྷག་ཞབས་སུ་སྐྱེས་པའི་མི་ཡི་འགྲོ་ངོར་སྐྱེས་བུ་དམ་པའི་གཟུགས་ཀྱིས་བྱོན་པ། དེ་ཉིད་མཆོག་དང་ཐུན་མོང་གི་ལམ་གྱི་ཡོན་ཏན་དངོས་གྲུབ་ཀུན་གྱི་རྩ་བ་བླ་ན་མེད་པ་ཡིན་ཏེ། སྤྱི་མདོ་ལས། སློབ་དཔོན་དག་ལ་མ་བསྟེན་པར། །སངས་རྒྱས་ནམ་ཡང་མི་འབྱུང་སྟེ། །འབྱུང་བ་ཡང་དག་ངས་མ་མཐོང༌། །བྱུང་ན་དམ་པའི་ལུང་དང་འགལ། །ཞེས་སོ། །དེའི་མཛད་སྤྱོད་ཐམས་ཅད་གདུལ་བྱ་ཐ་དད་པ་རྣམས་ཐར་ལམ་དུ་དྲང་བ་ཁོ་ནའི་དོན་དུ་འཇིག་རྟེན་པའི་སྤྱོད་པ་ཀུན་དང་ཕྱོགས་མཐུན་པར་སྟོན་ལ། ངེས་པའི་དོན་དུ་ནི་དགྲ་བཏུལ་བ་ལྟར་སྣང་ཡང་སྡང་བ་མེད་པ། དེ་བཞིན་དུ་གཉེན་བསྐྱང་ཡང་ཆགས་པ་མེད་པ། འདུ་འཛིས་བྲེལ་ཡང་རྣམ་པ་མི་གཡེང་བ། ལོངས་སྤྱོད་བསགས་ཀྱང་ཞེན་པ་མེད་པ། ཐོབ་དང་མངའ་ཐང་ཡོད་ཀྱང་མི་ཁེངས་པ། སྣང་བ་ཐམས་ཅད་རྨི་ལམ་དང་སྒྱུ་མ་ལྟར་གཟིགས་ནས་དགོངས་པ་ནམ་མཁའ་དང་མཉམ་པ། འཇིག་རྟེན་པ་ཀུན་དང་རྣམ་བཞག་འགལ་ཞིང་ཁམས་མི་མཐུན་པར་སྣང་བ་ལ་སོགས་པའི་གསུང་བྱོན་པ་དང་མཛད་པ་སྟོན་པ་ལའང་ལོག་པར་མི་ལྟ་སྟེ། དགོངས་གཞི་འགའ་ཞིག་ལ་དགོངས་ནས་འགྲོ་བ་འདྲེན་པ་སོགས་དགོས་པ་ཁྱད་པར་ཅན་དུ་མ་ཡོད་པའི་ཕྱིར། འཇིག་རྟེན་པ་ཀུན་ལས་ཁྱད་པར་འཕགས་ཤིང༌། གཞན་ཡང་གདུལ་བྱའི་ཚིག་དོན་ཉམས་ལེན་གེགས་སེལ་སོགས་ཐེ་ཚོམ་ཐམས་ཅད་གཅོད་མཁས་ཤིང༌། ཕ་རོལ་པོའི་གཤེ་སྐུར་སྤྱོད་ངན་སོགས་ལོག་སྒྲུབ་གང་ལའང་ཐུགས་མི་སྐྱོ་ཞིང་སྒོ་གསུམ་ལ་ངལ་བ་ཅི་བྱུང་ཡང་བཟོད་པར་མཛད་པ་དེ་ནི། སྲིད་པའི་གནས་སྡུག་བསྔལ་གྱི་རྒྱ་མཚོ་ལྟ་བུ་ལས། མན་ངག་ཉམས་སུ་བླང་བས་ཐར་པར་སྒྲོལ་བའི་གྲུ་བོ་ཆེ་ལྟ་བུའོ། །ལམ་སྤྱི་དང་ངེས་དོན་མདོ་རྒྱུད་མཆོག་གི་དོན་འཁྲུལ་བར་མི་འགྱུར་བར་སྟོན་པས་དེད་དཔོན་དངོས་ལྟ་བུ། ཐོག་མེད་ནས་བསགས་པའི་ལས་ཉོན་གྱི་མེ་ཚོགས་དག་གི་ཉེས་པ་ཐམས་ཅད་ཤེས་རབ་གསུམ་གྱིས་འཇོམས་པས་བདུད་རྩིའི་ཆར་ལྟར་བུ། བླང་དོར་གྱི་དོན་ལ་སྒྲིབ་པའི་མ་རིག་པའི་མུན་པ་ཐམས་ཅད་ཤེས་རབ་ཀྱི་ཡེ་ཤེས་ཆེན་པོས་སེལ་བས་ཉི་མ་དང་ཟླ་བ་ལྟ་བུར་མཚུངས་ཤིང༌། རྐྱེན་བཟང་ངན་ཐམས་ཅད་ཀྱིས་མི་བསྒུལ་བ་ཐེག་པ་ཤིན་ཏུ་ཆེ་བས་ས་གཞི་དང་འདྲ་ལ། མངོན་མཐོ་དང་ངེས་ལེགས་ཀྱི་ལམ་སྟོན་པས་མཐར་ཐུག་གི་ཕན་པ་བྱང་ཆུབ་ཀྱི་གོ་འཕང་དང༌། གནས་སྐབས་ཀྱི་བདེ་བ་མཐོ་རིས་ཀྱི་དཔལ་འབྱོར་ལ་ལོངས་སྤྱོད་པའི་འབྱུང་གནས་སུ་གྱུར་པས་དཔག་བསམ་གྱི་ཤིང་ལྟ་བུ། ལུང་གི་ཆོས་མདོ་སྔགས་ཀྱི་ཚིག་དོན་ཐམས་ཅད་ཀྱི་མཛོད་དང་ལྡན་པ་བུམ་པ་བཟང་པོ་ལྟ་བུ་སྟེ། རྟོགས་པའི་ཡོན་ཏན་ཀུན་གྱི་འབྱུང་གནས་ཡིད་བཞིན་ནོར་བུ་ལས་ཀྱང་ལྷག་པ་དང༌། སེམས་ཅན་ཀུན་ལ་ཉེ་རིང་དང་བྲལ་བར་ཐུགས་སྙོམས་པར་བདེ་བ་ཐམས་ཅད་མཁྱེན་པའི་གོ་འཕང་ལ་བཀོད་འདོད་ཀྱི་བྱམས་པས་སྐྱོང་བར་མཛད་པས་ཕ་མ་ལྟ་བུ་ཡིན། སེམས་ཅན་སྡུག་བསྔལ་རྒྱུ་འབྲས་དང་བཅས་པ་བྲལ་འདོད་ཀྱི་བསམ་པ་རྒྱ་ཆེ་ཞིང་མྱུར་བའི་སྙིང་རྗེ་ཆུ་ཀླུང་དང་མཚུངས་ལ། ཕྲག་དོག་སོགས་ཀྱིས་ཀྱང་འཕོ་འགྱུར་མེད་པའི་འཇིག་རྟེན་ཀུན་ལ་དགའ་བ་རི་དབང་ལྟ་བུ་དང་འདྲ། ཆགས་སྡང་གིས་འཁྲུག་པ་མེད་པའི་བཏང་སྙོམས་སེམས་ཅན་ཀུན་གྱི་ཉོན་མོངས་ཞི་ཐབས་ལ་གཟིགས་པ་ཆར་སྤྲིན་བཞིན་ཡིན་ནོ། །དེ་འདྲ་བའི་བླ་མ་ནི་མཚན་དཔེའི་སྐུར་མི་སྣང་ཡང་སངས་རྒྱས་ཀུན་དང་མཉམ་པ་ཡིན་ལ། སྐུ་མཐོང་བ་དང༌། གསུང་ཐོས་པ་དང༌། མཛད་སྤྱོད་དྲན་པ་ཙམ་གྱིས་ཀྱང་དོན་དང་ལྡན་ལ། དེ་ལ་གནོད་པ་བྱས་ཀྱང་འགྱོད་བཤགས་དང་བཅས་ན་ཚེ་འདི་དང་མིན་ཀྱང་མཐར་བདེ་བའི་ལམ་དུ་འབྲེལ་ཏེ་གདུལ་བྱའི་ཡུལ་དུ་གྱུར་ན། གཡོ་སྒྱུ་ཟོལ་ཟོག་མེད་པའི་དད་པ་དང་མོས་གུས་བྱས་པས་ཚུལ་བཞིན་བླ་མ་ཉིད་བསྟེན་པའི་སྐྱེས་བུ་རྣམས་ལ། མངོན་མཐོ་ཚེ་རིང་ནད་མེད་སོགས་དང་ངེས་ལེགས་བྱམས་སྙིང་རྗེ་སོགས་ཡོན་ཏན་ཐམས་ཅད་རྩོལ་མེད་དུ་ཆར་བཞིན་འབབ་པར་འགྱུར་རོ། །བླ་མ་བསྟེན་པའི་ཚུལ་ཡང་འདི་ལྟར། སྡོང་པོ་བཀོད་པའི་མདོ་ལས་བྱུང་བ་ལྟར། བདག་ནི་ཐོག་མེད་ནས་ཉོན་མོངས་པའི་ནད་ཀྱིས་ཐེབས་པས་ནད་པའི་འདུ་ཤེས་དང༌། ཆོས་གདམས་ངག་ལ་སྨན་གྱི་འདུ་ཤེས། དགེ་བའི་བཤེས་གཉེན་ལ་སྨན་པ་མཁས་པའི་འདུ་ཤེས། ནན་ཏན་ཉམས་སུ་ལེན་པ་ལ་ནད་འཚོ་བའི་འདུ་ཤེས་བསྐྱེད་པ་སྟེ་བཞི་པོ་ནི་ནད་པས་སྨན་པ་ལྟ་བུ། མགྲོན་པོས་དགྲ་ལས་སྐྱེལ་མ་ལྟ་བུ་སོགས་བཞི་དང༌། འཇིགས་པའི་གནས་ལས་རམ་ཟླ་དཔའ་བོ་ལྟ་བུ་སོགས་བཞི་དང༌། ཚོང་པས་དེད་དཔོན་ལྟ་བུ་སོགས་འདུ་ཤེས་བཞི་དང༌། གྲུ་པས་མཉན་པ་ལྟ་བུའི་འདུ་ཤེས་བཞི་བཅས་འདུ་ཤེས་ཉི་ཤུ་པོ་ཚིག་ཙམ་མ་ཡིན་པར་རྒྱུད་ལ་ཇི་ལྟ་བ་བཞིན་དུ་སྦྱར་བ། སྐྱེ་ཤི་དང་ཉོན་མོངས་པའི་དགྲ་ཡིས་འཇིགས་པ་ལས་སྐྱོབ་པས། དགེ་བའི་བཤེས་གཉེན་ཚུལ་བཞིན་བསྟེན་པར་བྱའོ། །སློབ་མའི་མཚན་ཉིད་ཀྱང་འདི་ལྟར། བླ་མ་དམ་པ་དེ་ཡི་ཐུགས་རྗེ་བྱིན་རླབས་དེ་ལ་བྱམས་སྡང་མེད་ཀྱང༌། གདམས་ངག་ཉེ་བར་ལེན་པ་སློབ་མ་སྟེ་དེ་ཉིད་ཀྱང་དད་པ་ཤེས་རབ་བརྩོན་འགྲུས་ངེས་འབྱུང་ལ་སོགས་པ་སྣོད་ཀྱི་ཡོན་ཏན་དང་བྲལ་བ་ལ། བཅུད་སེང་གེ་དཀར་མོའི་འོ་མ་སྣོད་ངན་གྱིས་མི་ཐུབ་པ་ལྟར་གདམས་ངག་གི་བཅུད་ཀྱིས་ཕན་མི་ཐོགས་ཞེས་སྤྱིར་བསྟན་ནས། བྱེ་བྲག་ཏུ་ཟབ་དོན་ལ་ཡིད་མི་ཆེས་པས་ནི། གནས་སྐབས་ཟང་ཟིང་ཙམ་གྱིས་ཚིམ་པ་ཐོབ་པར་གྱུར་ནས། དོན་ལ་མེད་པའི་རྐྱེན་བཅོས་མའི་དད་པ་ནི་སྔ་དྲོ་དད་པ་ཡོད་ཀྱང་ཕྱི་དྲོ་བྲལ་བ་དུས་བཞིའི་འགྱུར་ལྡོག་ངོམ་པ་བཞིན་འགྱུར་སླ་བས་དེ་སྤང་བར་བྱའོ། །གང་ཟག་འགའ་ཞིག་དང་པོ་དམ་པའི་ཆོས་ཀྱི་ལམ་དུ་ཐབས་སྣ་ཚོགས་པས་བཙུད་ཀྱང་མི་ཚུད་པ་གཡག་རྒོད་ར་བའི་ནང་མི་ཚུད་པ་བཞིན་དང༌། བར་དུ་ཐོས་བསམ་གྱིས་སུན་ནས་ཆོས་ཕྱོགས་ལ་བརྩོན་པ་དག་ལ་སྡང་ཞིང་ཚེ་འདི་ཁོ་ནར་གཉེར་ལ། ཐ་མར་དམ་ཚིག་དང་སྡོམ་པ་མི་སེམས་ཤིང་སྡིག་པའི་གྲོགས་པོ་རྣམས་ཀྱི་ཕྱོགས་བཟུང་ནས། ལས་མཐའ་ལོག་པ་དེ་ཉིད་བླ་མ་མཆེད་གྲོགས་སོགས་ཀྱི་ཕྱོགས་ལའང་མི་ཉེ་ཞིང་མི་དང་མི་འདྲེ་བའི་ནགས་མཐའི་མི་རྒོད་དང་འདྲའོ། །བླ་མ་དམ་པའི་དྲུང་ན་གནས་ཚེ་སྣ་ཚོགས་ཤར་ཏེ་འདི་བས་ཀྱང་དབེན་པར་དགེ་བའི་ཕྱོགས་སུ་སོང་ན་དགའ་སྙམ་པས་འབྲོས་ལ་རིངས། ཡུལ་གང་དང་གང་དུ་བགྲོད་པར་ཕྱོགས་ནའང་སྡིག་གྲོགས་ཀྱི་གང་བས་རང་ཉིད་ཆོས་ལས་ཉམས་ཏེ་སྡིག་པས་འཛིན་ལ། འོ་ན་ཁྱོད་དབེན་པར་སོང་ལ་སྒྲུབ་ཚུགས་ཟུང་ཞེས་ཆེད་དུ་བསྐུལ་ཏེ་དེར་བསྡད་ན། བླ་མས་བསྟན་པའི་གདམས་ངག་བོར་ནས་ཆོས་ཚུགས་ཞིག་ལ། སྙོམས་ལས་རྣམ་གཡེང་གིས་དུས་འདའ་བ་ཐུན་གཅིག་ཙམ་ཡང་བྲལ་ནས། དཔེར་ན་རླུང་གི་རྗེས་སུ་བསྐྱོད་འགྲོ་བའི་ཀུ་ཤའི་རྩེ་མོ་བཞིན་ནོ། །མི་གཞི་ངན་པའི་ཟོལ་ཟོག་གི་སྦྱོར་བ་ལ་མཁས་ཤིང་ཐོབ་ཐང་གྲགས་པ་སོགས་ཀྱིས་མི་ཕན་ཏེ་བླ་མ་བསླུ་བའི་བསམ་པས་ཐ་གུའི་ལྕེས་ཏེ་གླ་བ་འཛིན་པའི་རྒྱ་བྲེས། བླ་མ་སྤོས་ཀྱི་གླང་པོ་སྟེ་གླ་བ་ལྟར་དབང་ལུང་ཁྲིད་སོགས་ཀྱིས་སྙན་གྲགས་ཟོང་ལྟར་བརྐམས་ཏེ། དྲིན་མི་དྲན་པར་བསྙེན་ནས་དམ་པའི་ཆོས་དེ་ལ་གླ་རྩིའི་རྙེད་པ་ལྟ་བུའི་འདུ་ཤེས་ཀྱིས་ཐོབ་ནས་དམ་སྡོམ་རྒྱབ་ཏུ་བོར་ཏེ། སླར་རྔོན་སོད་ནས་གླ་རྩི་ཚོང་ཐབས་ལ་སེམས་པ་ལྟར་ཆོས་དེས་སྙན་གྲགས་ལ་ཡང་དག་སྤྲོ་བས་མི་སྒྲུབ་པར་བླ་མའི་དམ་ཚིག་རྒྱང་དུ་འཕེན་པའི་སློབ་མ་འདི་ཕྱིར་བཀྲ་མི་ཤིས་སོ། །བློ་སྣ་རང་སེམས་ཉམས་འོག་མ་ཆུད་པ་མཐའ་དག་ནི་བསྐྱེད་རྫོགས་ཀྱི་གདམས་པའི་གནད་འགག་དམར་ཁྲིད་སོགས་ཐམས་ཅད་ཐོབ་ནས་དོན་ཉམས་སུ་ལེན་པ་སླར་བཏང་ནས། ད་དུང་ཡོད་ཚད་ཐོས་དགོས་སྙམ་སྟེ་ཉམས་སུ་མི་ལེན་པར་སྣ་ཚོགས་པའི་ཡིག་སྣ་འཚོལ་བས་དཔེ་གཅོད་ཟིན་བྲིས་མཆན་འདེབས་སོགས་ཀྱིས་བྲེལ་ཞིང་དུབ་པའི་མཐར། གསར་པ་ངེས་གཟུང་བྱེད་རྒྱུ་མ་མཐོང་གོང་སྔོན་མ་ཚིག་དོན་ཅུང་ཟད་ཤེས་པ་མཐའ་དག་ཉམས་པར་འགྱུར་རོ། །ངེས་འབྱུང་དང་བཅས་ཤིང་དོན་གཉེར་ཆེ་ལ་དད་པའི་ཀུན་སློང་གིས་ཡང་དག་དོན་ལ་ཐོས་བསམ་སྒོམ་གསུམ་གཤའ་མས་སྦྱོར་བའི་དད་པ་དང༌། ངེས་འབྱུང་དང་བྲལ་བའི་ལྟར་སྣང་ཚེ་འདིར་ཕན་པའི་རྙེད་བཀུར་འབའ་ཞིག་བསྒྲུབ་པའི་འདོད་པ་ཅན་དུ་སོང་བས། དེ་གཉིས་ཀར་ཕྱོགས་གང་དུའང་ལུང་དུ་མ་བསྟན། བླུན་པོ་ལད་མོ་བྱེད་པ་ངན་གཡོའི་གཟུ་ལུམ་ཅན་ཏེ་བབ་བཅོལ་དུ་དད་འདོད་གང་ཡང་མེད་པར་ཆོས་སྒོར་ཞུགས་ནས་སྤྲེའུའི་མཉམ་བཞག་དང༌། ནེ་ཙོའི་འདོན་པ་བཞིན་ཆོས་ལུགས་བཞིན་བྱེད་ཀྱང་ཕྱི་ནས་ཆོས་དང་འཇིག་རྟེན་གང་ཡང་མེད་པས་ཁྱི་ལྡོམ་བྱེས་སུ་འཁྱམས་པ་ལྟ་བུ་སྟེ། སྤྱིར་གང་ཟག་རིགས་དུ་མ་ཡོད་ཀྱང་གསུམ་པོ་འདི་ཉིད་དུ་གནས་པའི་མཚན་ཉིད་ལེགས་པར་བརྟག་པ་བྱེད་པ་གཅེས་སོ། །དད་པའི་གོ་ཆ་ཆེ་ལ་བདེན་མཐོང་སྐལ་པ་ཅན་ཀླུའི་བྱང་ཆུབ་ལྟ་བུ་བློ་གྲོས་ཤིན་ཏུ་བརྟན་ཅིང༌། བླ་མ་དང་ཆོས་ཀྱི་ཕྱིར་དུ་རང་གི་ལུས་དང་སྲོག་ལ་གནོད་པ་ཅི་བྱུང་ཡང་མི་བལྟ་བ་དཔལ་གྱི་ཡེ་ཤེས་ལྟ་བུ་རིམ་གྲོ་བགྱིད་ཅིང༌། བླ་མས་ཅི་གསུང་བཀར་དཀྲི་ཞིང་བདག་ཉིད་མི་བསྲུང་བའི་རྗེ་བཙུན་མི་ལ་ལྟ་བུ་སྟེ། དེ་དང་འདྲ་བའི་སྐྱེས་བུ་དེ་ནི་མོས་གུས་ཁོ་ནས་གྲོལ་ལོ། །དཀར་ཆོས་ཀྱི་ས་བོན་དད་དང་མི་རྟོག་པའི་ཤེས་རབ་གསལ་ལ། ཆོས་དང་ཆོས་མིན་ཤེས་པའི་ཐོས་པ་དང༌། ཐེག་པ་ཆེན་པོའི་སྙིང་རྗེ་ཆེ་ཞིང༌། སྡོམ་དང་དམ་ཚིག་ལ་གུས་པ། སྒོ་གསུམ་ཞི་ཞིང་དུལ་བ། མཆེད་གྲོགས་དང་ཉེ་འཁོར་ལ་བཤེས་པའི་ཁོང་ཡངས་པ་དང༌། ཞིང་དག་པ་ལ་གཏོང་ཕོད་ཆེ་བ། དག་སྣང་དང་ཁྲེལ་ཡོད་པ་དང་ལྡན་པར་བྱའོ། །བླ་མའི་ཐུགས་ཟིན་པའི་ཐབས་ཀྱིས་བླ་མ་དེའི་ཐུགས་ཤིན་ཏུ་བསྲུང་བས་བུ་མཛངས་པ་ལྟ་བུ་དང༌། དགོས་དབང་གིས་བཀའ་བཀྱོན་དྲག་པོ་ལན་མང་མཛད་ཀྱང་དེ་དག་ལ་མི་ཁྲོ་བ་རྟ་མཆོག་བཞིན་དང༌། བླ་མའི་དགོས་པ་བསྒྲུབ་ཕྱིར་གྲུ་ལྟར་ཉེ་རིང་གང་དུའང་འགྲོ་འོང་ཇི་ལྟར་བྱེད་པའི་གནས་ལ་སྐྱོ་བ་སྤང་བ་དང༌། ཟམ་པ་ལྟ་བུར་བསྟོད་སྨད་སྐྱིད་སྡུག་སོགས་རྐྱེན་བཟང་ངན་ཐམས་ཅད་ཐེག་པ་དང༌། བཟོ་སྟེགས་ཏེ་མགར་བའི་འོག་རྡོའམ་ཏི་ཚ་བཞིན་དུ་དབྱར་དགུན་གྱི་ཚ་གྲང་གང་ཡང་བཟོད་པ་དང༌། བཀའ་ཇི་ལྟར་བསྩལ་བ་བཞིན་ཟུར་མ་ཉམས་པར་ཉན་པ་བྲན་ཁོལ་ལྟ་བུ་དང༌། བླ་མ་དང་མཆེད་ལ་བཀུར་ཞིང་ང་རྒྱལ་སྤངས་པ་བཟང་ངན་ཐམས་ཅད་ཕྱགས་པས་ཕྱག་དར་ལྟ་བུ་དང༌། རང་སྐྱོན་ལ་བསམ་སྟེ་དྲེགས་པ་སྤངས་པ་ཁྱུ་མཆོག་རྭ་ཆད་པ་ལྟ་བུས་ཁྱུ་མང་པོ་དག་གི་གྲལ་མཐར་དམན་ས་བཟུང་ནས་བླ་མ་བསྟེན་ཞེས་བྱང་ཆུབ་སེམས་དཔའི་སྡེ་སྣོད་དག་ལས་གསུངས། རང་ལ་ཟང་ཟིང་གི་འབྱོར་པ་ཡོད་ན་དཀོན་མཆོག་ཀུན་འདུས་ཀྱི་ངོ་བོ་བླ་མ་དམ་པ་ཉིད་ཡིན་པའི་ཕྱིར་དཀོན་མཆོག་བཞི་པ་བླ་མ་ལ་མཆོད་པ་ཤིན་ཏུ་གཅེས་ཏེ། སངས་རྒྱས་མཉམ་སྦྱོར་ལས། སངས་རྒྱས་ཆོས་དང་དགེ་འདུན་དང༌། །བླ་མ་ཡང་ནི་བཞི་པ་ཡིན། །ཞེས་དང༌། གུ་རུ་རིན་པོ་ཆེས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་བླ་ན་མེད། །བླ་མ་དཔལ་ཆེན་ཧེ་རུ་ཀཿ ཞེས་སོ། །བར་དུ་བླ་མར་ཞབས་ཏོག་དང་སྲི་ཞུ་བསྒྲུབ་ཕྱིར་ལུས་ཀྱིས་གནས་ཁང་གི་ལས་གང་དགོས་དང༌། བཟོ་དྲུབས་སོགས་ནས་སྟན་འདིང་བ་དང་ཐལ་མོ་སྦྱར་བའི་བར་གྱི་བྱ་བ་ཐམས་ཅད་དང༌། ངག་གིས་བླ་མའི་གསུང་དོན་བཀའ་བཞིན་ཁུར་བ་སོགས་དང༌། གསུང་གི་ཕྲིན་ལས་ཆོས་བཤད་པ་སོགས་བླ་མའི་ཕྱོགས་སུ་བཀོལ་བའི་ལས་མཐའ་དག་ནམ་ཡང་ཆུད་ཟོས་སུ་འགྱུར་བ་མེད་ལ། ཐ་མ་ཟང་ཟིང༌། འབྲིང་ཞབས་ཏོག །རབ་སྒྲུབ་པ་སྟེ་མཉེས་པ་གསུམ་གྱི་ནང་ནས་སྒྲུབ་པ་ནི་མཆོག་གོ །དགེ་བའི་བཤེས་གཉེན་དམ་པ་རྣམས་ནི་རང་དོན་གྲུབ་ཟིན་ནས་གཞན་དོན་བྱེད་པའི་སྐབས་སུ་བབ་པ་ཡིན་པས། མོས་སྣང་མཛད་སྤྱོད་སྣ་ཚོགས་སྟོན་པ་གང་ལ་ཡང་རྒྱལ་བའི་མཛད་པ་བསམ་གྱིས་མི་ཁྱབ་པར་ཤེས་ནས་ལོག་པར་མི་བལྟ་སྟེ། འཕགས་པའི་ཡུལ་གྱི་དབང་ཕྱུག་ས་ར་ཧ་སོགས་ཕལ་མོ་ཆེ་རྣམས་རིགས་འཆོལ་ཤིང་གཙང་བཙོག་སོགས་གདོལ་སྤྱོད་མཁན་དུ་སྣང་བ་དང༌། གཡུང་པོ་སྟེ་བྲན་གཡོག་ཞོ་ཤས་འཚོ་བ་དང༌། གཞན་ཡང་རྔོན་པ་ཉ་པ་སོགས་སྡིག་སྤྱོད་ཕལ་པའི་ཚུལ་ལྟར། ཉམས་པ་ལས་ཀྱང་ཤིན་ཏུ་ཉམས་པར་སྟོན་པ་ཡོད་ཀྱང༌། དེ་དག་གི་ཐུགས་ལ་འཁྲུལ་པ་མི་མངའ་ན་མཛད་པ་རྣམས་ཀྱང་དོན་ལ་ཕྱིན་ཅི་ལོག་མི་སྲིད་དོ། །གལ་ཏེ་དེ་ལྟར་ཡིན་ཀྱང་རང་གི་ཉེར་ལེན་རྣམས་ཐར་སྒོ་གསུམ་དུ་མ་གྲོལ་ཞིང༌། སྣང་བ་དག་པ་རབ་འབྱམས་སུ་མ་གྲོལ་བས་དབང་དུ་མ་གྱུར་པར་དྷ་དུ་ར་ཟོས་པའི་སྣང་བ་ལྟར་འཁྲུལ་པ་ཆེ་བས་བླ་མ་ལ་སྐྱོན་དུ་བརྟགས་པའི་ཉེས་པ་ནི་ཚད་གཞལ་དུ་མེད་དེ། སྡེ་སྣོད་བཅུ་གཉིས་པོ་ཀུན་བློ་ལ་ཆུབ་པ་ཡི། དགེ་སློང་སྐར་བཟང་ངམ་ལེགས་པའི་སྐར་མ་ལོག་ལྟའི་སྡིག་པའི་མཐུས་བཏབ་ནས། སྐྱོན་ཀུན་ཟད་ཡོན་ཏན་ཀུན་ལྡན་བདག་ཅག་གི་སྟོན་པ་ཤཱཀྱ་ཐུབ་པའི་མཛད་པ་ལའང་གཡོ་སྒྱུར་མཐོང་བའི་ཚུལ་ལ་ལེགས་པར་བསམ་ནས་མ་དད་པ་ཅུང་ཟད་སྐྱེས་པ་ལའང་རང་གིས་རང་ཉིད་འཆོས་ནས་བཤགས་དགོས་ཏེ། འཁོར་ལོ་ཆུབ་པ་རོལ་པ་ལས། གལ་ཏེ་རྨི་ལམ་ནང་དག་ཏུ། །བླ་མའི་སྐྱོན་དག་མཐོང་གྱུར་ན། །སད་མ་ཐག་ཏུ་བཤགས་པ་བྱ། །གལ་ཏེ་བཤགས་པ་མ་བྱས་ན། །འདིར་ཡང་མནར་མེད་རྒྱུ་འཕེལ་འགྱུར། །ཞེས་སོ། །གལ་ཏེ་བླ་མ་ཐུགས་སྡང་བཞེས་པས་བཀའ་བཀྱོན། དྲག་ཤུལ་སོགས་ཀྱིས་གཤེ་བར་མངོན་པར་གྱུར་ན། བདག་རྒྱུད་ལ་རྟོག་པ་ངན་པའམ་སྤྱོད་ངན་གང་རུང་གི་སྐྱོན་གཟིགས་ནས་སྤྱོ་བའི་ཚུལ་གྱིས་འདུལ་བ་ཡི་དུས་ལ་བབ་པར་གྱུར་ཏོ་ཞེས་རིག་ཅིང་ཤེས་པར་བྱས་ནས་བཤགས་སྡོམ་དྲག་པོ་ལ་འབད་པ་ལས་བླ་མའི་སྐྱོན་དུ་བལྟ་བར་མི་བྱའོ། །བླ་མའི་མཛད་པ་ཅང་ཤེས་པའི་སྐྱེས་བུ་དེ་ནི་བདུད་ཀྱི་དབང་དུ་མི་འགྲོའོ། །སྤྱོད་ལམ་གྱིས་ཀྱང་བླ་མ་བཞེངས་པའི་ཚེ་སྟན་ལ་དེ་མ་ཐག་ལྡང་བ་ལས་འདུག་པ་མིན། བཞུགས་པའི་དུས་སུ་བསྙུན་འདྲི་དང་ཐུགས་ལ་འཐད་པའི་ཉེར་སྤྱོད་དབུལ། གཤེགས་པའི་ཚེ་ན་ཕྱག་དར་སོགས་དྲིས་ཆག་ཆག་གདབ་པ་དང༌། དར་ལམ་སོགས་བྱ་བ་དང༌། བཞོན་པ་འབུལ་བ་དང༌། རང་ཞབས་འབྲིང་ལ་འགྲོ་ཚེ་སྔོན་ནས་མིན་ལ། རྒྱབ་བསྟན་མི་རུང་ཞིང༌། རྗེས་ནས་མིན་ལ་ཞབས་རྗེས་འགོམ་པ་དང༌། གཡས་ནས་གྲལ་འགོ་ཡིན་པས་མིན་ལ་གཡོན་ཕྱོགས་ནས་འགྲོ་བར་བྱའོ། །བཞུགས་པའི་སྟན་དང་བཞོན་པ་སོགས་ལ་སྨད་པ་འགོམ་པ་དང་གསུང་ལ་མི་སྙན་སོགས་སྨྲ་བ་རྣམས་དང༌། སྐུ་གྲིབ་འགོམ་པ་སོགས་བསོད་ནམས་ཉམས་པའི་རྒྱུ་ཡིན་ལ། གཞན་ཡང་བཞུགས་པའི་སྒོ་འཕར་དབྱེ་གཅོད་སྐབས་དྲག་ཏུ་བརྡེག་པ་དང༌། རྒྱན་འདོགས་པ་སོགས་སྒེག་ཆོས་ཀྱིས་དྲུང་དུ་འགྲོ་བ་དང༌། ངོ་འཛུམ་གནག་པ་དང༌། རྫུན་དང་བབ་ཅོལ་གྱི་བྱ་བ་དང༌། བཞད་གད་འབྲེལ་མེད་ཀྱི་གཏམ་སྣ་ཚོགས་སྨྲ་བ་སྤངས་ལ། ལུས་གུས་པ་དང་སེམས་འཇིགས་པ་དང་བཅས་པས་མ་ཡིན་པར་ཕལ་པའི་དྲུང་ན་གནས་པ་ལྟར་ཇི་མི་སྙམ་དུ་ལྟ་བ་སྤངས་ལ། དམན་པ་དང་བཅས་སྒོ་གསུམ་ཉེ་བར་ཞི་ཞིང་དུལ་བས་བསྟེན་པར་བྱའོ། །བླ་མ་ལ་ངག་གིས་སྨོད་ཅིང་གཤེ་སྐུར་འདེབས་པ་དང༌། སེམས་སྡང་ཞིང་མི་དགའ་བའི་གང་ཟག་གིས་རང་ལ་ནོར་སྟེར་བ་དང༌། སྙན་སྨྲ་སོགས་ཅི་བྱས་ཀྱང་དེ་ལ་བཤེས་པར་མི་བྱ་སྟེ། བློ་དང་མཐུན་པའི་ཚིག་གིས་བཟློག་པའམ་སྐུ་དགྲ་དངོས་ཡིན་ནི་ནུས་པ་དང་དྲག་ཤུལ་གྱིས་དེ་བཟློག་ཅིང༌། གལ་ཏེ་དེ་འདྲ་མ་ནུས་ཀྱང་བག་ཕེབས་ཏེ་གཏམ་ཙམ་ཡང་མི་སྨྲ་ལ། སྨྲ་ན་བདུད་དང་སྡིག་པའི་གཞན་དབང་ནི་ལྷག་པར་མཐུ་ཆེ་བས་དམ་ཚིག་སྐྱོན་ཅན་བྱེད་དེ་ཟླས་ཉམས་ཞེས་བྱའོ། །དེ་ལྟ་བུ་དང་འགྲོགས་པའི་ཉེས་པ་ནི། བདུད་རྩི་འབྱུང་བའི་རྒྱུད་ལས། རྡོ་རྗེ་སློབ་དཔོན་སྨོད་པ་ན། །ཞི་བའམ་མངོན་སྤྱོད་ལས་ཀྱིས་བཟློག །ནུས་པ་ཡོད་པར་མ་གྱུར་ན། །རྣ་བའམ་རྣ་ཆ་རྟག་ཏུ་དྲན་པ་དང་ལྡན་པས་ལག་པས་དགབ་པར་བྱ། །བསྟེན་པར་མི་བྱ་གཏམ་མི་བྱ། །གལ་ཏེ་དེ་དང་འདྲིས་འགྱུར་ན། །ངན་སོང་དག་ཏུ་འཚེད་པར་འགྱུར། །ཞེས་སོ། །བླ་མའི་ཐུགས་དང་འཁོར་སློབ་སོགས་ལ་ཆགས་སྡང་མི་སློང་ཞིང་ཀུན་གྱི་ཁུར་དུ་མི་འགྲོ་བས་འགྲོགས་པར་བདེ་བ་སྐ་རགས་ལྟ་བུ་དང༌། ཆེ་ཆུང་མཐོ་དམན་ཀུན་གྱི་ཡིད་དང་མཐུན་པར་འཇུག་པ་བདེ་བ་ལན་ཚྭ་ལྟ་བུ་དང༌། སྐྱོ་སུན་དང་ལོག་སྒྲུབ་གང་ལ་ཡང་བཟོད་སྲན་ཆེ་བ་ཀ་བ་ལྟ་བུ་ཡིས། །བླ་མའི་འཁོར་དང་སྦྱིན་བདག་དང་རྡོ་རྗེའི་སྤུན་རྣམས་ལ་བསྙེན་བཀུར་བྱའོ། །མེ་ཏོག་དང་རྩྭ་ལྡུམ་སོགས་ཀྱིས་ཁེབས་པའི་རྫིང་བུ་མཆོག་ལ་བསྟེན་པའི་ངང་པ་རྣམས་སྤྱོད་ལམ་འཇམ་པོས་རྩྭ་ལྡུམ་སོགས་ཀྱི་རོ་མྱང་བ་དང༌། བུང་བས་མེ་ཏོག་གི་ཁ་དོག་དྲི་ལ་མི་གནོད་པར་བཅུད་ལ་རོ་མྱང་བ་བཞིན་དུ་ཆོས་ཀྱི་མཛོད་ལྡན་དགེ་བའི་བཤེས་གཉེན་རྣམས་དང་རྟག་ཏུ་འགྲོགས་ཤིང་བསྟེན་པའི་ཚེ་གོང་དུ་བཤད་པའི་སྤང་བླང་གི་སྤྱོད་པ་ལ་གནས་པ་ནི་ངོ་མཚར་ཅན་ཞེས་སྨོན་པའོ། །སེམས་ལ་སྐྱོ་ཞིང་ལུས་ལ་ངལ་བ་མེད་པའི་སྒོ་ནས་བླ་མའི་ཐུགས་ལ་མི་འཐད་པ་ཅུང་ཟད་མེད་པར་བཟུང་ནས། དེ་ཡང་དད་པའི་ཉེ་བར་ལེན་པ་ཁོ་ནའི་དབང་གིས་ཐུགས་རྒྱུད་རྟོགས་པའི་ཡོན་ཏན་གྱི་རོ་མྱང་བར་བྱའོ། །ཐེག་ཆེན་བཤེས་གཉེན་དེའི་མཛད་པ་ཐམས་ཅད་བྱང་ཆུབ་ཏུ་འཇུག་པའི་སྤྱོད་པ་ཕ་རོལ་ཏུ་ཕྱིན་པ་དྲུག་གི་ངོ་བོར་མ་གྱུར་པ་མེད་པས་ཐབས་ཤེས་ཁྱད་པར་ཅན་གྱི་ལམ་དེ་ལ་ངེས་པར་ཞུགས་པ་ཡི་སྐྱེས་བུ་དམ་པ་མཆོག་གི་བསོད་ནམས་ཀྱི་ཚོགས་མཆོད་སྦྱིན་རྟེན་བཞེངས་འཆད་ཉན་སོགས་ཐབས་ཁྱད་པར་ཅན་གྱིས་ཟིན་པ་དང༌། ཡེ་ཤེས་ཀྱི་ཚོགས་འཁོར་གསུམ་དམིགས་པ་མེད་པའི་ཤེས་རབ་ཀྱི་རྒྱས་ཐེབས་པའི་གནས་ལུགས་ལ་འཇོག་པ་སོགས་ཅི་དང་གང་མཛད་པ་དེ་དག་གི་ཁྲོད་དུ་ལོངས་སྤྱོད་དང༌། ལུས་ངག་གིས་གྲོགས་བྱེད་པ་དང་མཉམ་དུ་སྒོམ་པ་སོགས་གང་བྱེད་ནའང་དོན་མཐུན་གྱི་སྤྱོད་པ་ཡིན་པས་ཚོགས་མཉམ་རྫོགས་སུ་འགྱུར་བ་དང༌། ཐ་ན་མངག་གཞུག་དང་བང་ཆེན་དུ་ཕྱིན་པ་དང༌། གནས་ཁང་གི་ཕྱག་དར་བྱས་པ་ཚུན་ཆོད་ཀྱང་ངལ་བ་དོན་མེད་མིན་ལ། རྣམ་གྲོལ་གྱི་འབྲས་བུ་དང་བཅས་པ་ཚོགས་རྫོགས་ཀྱི་ལམ་མཆོག་ཏུ་གྱུར་པ་ཡིན་ནོ། །དེ་ལྟར་ཡིན་པ་རྒྱུ་མཚན་ཅིའི་ཕྱིར་ཞེ་ན། སྐྱབས་སུ་འགྲོ་ཞིང་སེམས་བསྐྱེད་པ་དང༌། ཚོགས་ཀྱི་ཞིང་ཞི་ཁྲོ་གང་གསལ་བ་ཐམས་ཅད་བླ་མའི་ཐུགས་ཀྱི་རོལ་པར་བལྟས་ཏེ་བསྒྲུབ་པའི་རྣལ་འབྱོར་ཕྱི་ལྟར་བསྒྲུབ་པ་དང༌། རྒྱུད་དག་བྱེད་སྤྱི་བོར་སངས་རྒྱས་ཀུན་འདུས་ཀྱི་བདག་ཉིད་དུ་བསྒོམ་པ་ནང་ལྟར་བསྒྲུབ་པ་སྟེ་གཉིས་དང༌། བྱིན་རླབས་གཅིག་ཆར་དུ་འཇུག་ཕྱིར་སྙིང་ཁར་བསྒོམ་པ་གསང་བ་ལྟར་སྒྲུབ་པ་དང༌། གཉུག་མའི་ཕུང་པོ་སོགས་དང་བླ་མའི་གསང་གསུམ་དབྱེར་མེད་པའི་རོལ་པ་ཡི་དམ་གྱི་རྣམ་རོལ་དུ་བཞེངས་པའི་བསྐྱེད་རིམ་བསྒོམ་པ་ཡང་གསང་བ་ལྟར་བསྒྲུབ་པ་དང༌། དེ་ཐམས་ཅད་ཀྱི་རྗེས་སུ་ཐུགས་ཡིད་བསྲེ་ཞིང་ཡེ་ཤེས་ཆོས་ཉིད་འོད་གསལ་བ་བསམ་གྱིས་མི་ཁྱབ་པའི་དོན་ལ་ནམ་ཡང་འབྲལ་མེད་དུ་འཇོག་ཅིང་བླ་མའི་ཐུགས་སྤྲོས་བྲལ་གནས་ལུགས་ཀྱི་དོན་བསྒོམ་པ་དེ་ཁོ་ན་ཉིད་སྒྲུབ་པ་རྫོགས་རིམ་ཏེ། དེས་ན་བསྒྲུབ་བྱའི་ངོ་བོ་ཐམས་ཅད་བླ་མ་བསྒྲུབ་པ་འདིར་འདུས་པ་ཡིན་པས་ན། ཐེག་ཆེན་མདོ་སྡེ་ཐམས་ཅད་ནས་སྟོན་པའི་འདུ་ཤེས་བསྐྱེད་དགོས་པར་བསྟན་ཅིང༌། རྒྱུད་ཀུན་ནས་ཀྱང་སངས་རྒྱས་ཉིད་དུ་བསྟན་ཏེ། ཕྱག་རྡོར་དབང་བསྐུར་རྒྱུད་ལས། གསང་བའི་བདག་པོ་སློབ་དཔོན་ལ་སློབ་མས་ཇི་ལྟར་བལྟ་བར་བྱ་ཞེ་ན། སངས་རྒྱས་བཅོམ་ལྡན་འདས་ལ་ཇི་ལྟར་བལྟ་བ་དེ་བཞིན་དུའོ། །ཞེས་དང༌། ནམ་མཁའ་ཀློང་ཡངས་ཀྱི་རྒྱུད་ལས། བླ་མ་བསྒོམས་ན་ཆོས་སྐུ་བསྒོམ། །ལྷ་སྐུ་འབུམ་ཕྲག་སྟོང་བསྒོམས་པས། །བསོད་ནམས་ཆར་ཡང་དེ་མི་ཕོད། །དེ་ཕྱིར་དཀར་པོའི་ཆོས་སྤྱོད་རྣམས། །ཉན་བཤད་བསྒོམ་དང་འཛིན་པ་དང༌། །མཆོད་གཏོར་ལ་སོགས་གང་བྱེད་ཀྱང༌། །སྔོན་དུ་འགྲོ་བའི་ལས་ཡིན་པས། །བླ་མ་དུས་གསུམ་སངས་རྒྱས་དཔལ། །ཞེས་སོ། །དེ་ལྟར་མི་ཤེས་པའི་རྨོངས་པ་ཕལ་ཆེར་བླ་མའི་སྐུའི་གཟུགས་བརྙན་འདྲི་ཞིང་བསྒོམ་པ་སོགས་བྱེད་ནའང༌། དངོས་སུ་བཞུགས་པ་ལ་དད་མོས་ལོངས་སྤྱོད་སོགས་ཀྱི་རིམ་གྲོ་བགྱི་བ་མེད་ཅིང༌། གཤེགས་པའི་ཚེ་གྲགས་འདོད་ཀྱིས་ཕྱི་རྟེན་གསེར་དངུལ་སོགས་ལ་བྱེད་པ་ལྟ་སྤྱོད་འཛོལ་བའི་བྱ་བ་དང་གནས་ལུགས་ཟབ་མོ་བསྒོམ་པ་ཡིན་ཟེར་ཞིང༌། བླ་མའི་ཐུགས་ཀྱི་གསང་བ་སྒོམ་ཡེངས་དང་བྲལ་བ་མི་ཤེས་པར་གླེན་སྒོམ་དངོས་ཞེན་ཅན་ལ་བློ་གཏད་འཆའ་བ་རྣམས་ཀྱིས་སྒྲུབ་བྱེད་འཇིག་རྟེན་པའི་བློ་རྟོག་དང༌། བསྒྲུབ་བྱ་བློ་ལས་འདས་པའི་ཡེ་ཤེས་སུ་བསྒྲུབ་པ་ནི་རྒྱུ་འབྲས་འགལ་བ་ཉོན་རེ་མོངས་ཏེ་དག་སྣང་དང་འདུན་པ་མོས་གུས་རྣམས་ད་ལྟ་མེད་བཞིན། ཕྱི་མ་བར་དོར་མཇལ་དུ་རེ་བ་ནི་ཤིན་ཏུ་ངོ་མཚར་བའི་གནས་སོ། །དང་པོ་བསྟེན་པར་འདོད་པའི་བླ་མ་དེ་ཐག་རིང་ནས་རྣམ་ཐར་འདྲི་ཞིང་རྟོག །དེ་ནས་ཉེ་མ་རིང་དུ་མཛད་སྤྱོད་ལ་བརྟགས། དེ་ནས་སྤྱོད་ལམ་བསྲེས་ཤིང་ཤིན་ཏུ་བརྟགས་པ་ལ་མཁས་པ་དང༌། བར་དུ་བླ་མ་དེ་བཟང་ངན་གང་ལྟར་ཡང་རང་གི་རྒྱུད་ལ་བརྟགས་ཤིང་བསྟེན་པ་ལ་མཁས་པ་དང༌། ཐ་མར་གདམས་ངག་རྙེད་ནས་དགོངས་སྤྱོད་ཐོས་བསམ་སྒོམ་གསུམ་སོགས་བསླབ་པ་ལ་མཁས་པ་ཡི། སྐྱེས་བུ་དེ་ནི་གེགས་དང་གོལ་ས་བྲལ་བའི་ཡང་དག་མྱང་འདས་ཀྱི་ལམ་དུ་འགྲོ་བར་འགྱུར་རོ། །ལམ་ཡང་དག་པ་བསྒྲུབ་པའི་དུས་གང་གི་ཚེ་ཞི་བ་མྱང་འདས་ཕྱོགས་ལ་སྡང་བའི་འབྱུང་པོ་བདུད་དང་ལྷ་མིན་གྱི་རིགས་སུ་གཏོགས་པ་ཡི་བསམ་པ་ཅན་རྣམས་སྐྱེས་བུའི་གཟུགས་གྲོགས་མཛའ་བཤེས་བཤེས་གཉེན་སོགས་སྣ་ཚོགས་སུ་འོངས་པ་དག་གིས་སྡིག་ཐབས་བསྒྲུབ་པ་དང༌། གཞན་བསླུ་འདོད་ཀྱི་གཡོ་དང་སྒྱུས་སྤྱོད་ཅིང་གནས་པ་སོགས་ནག་པོའི་ཆོས་ལ་བརྟེན་པ་དང༌། དམ་པ་དམོད་ཅིང་གཤེ་སྐུར་འདེབས་པ་སོགས་དཀར་པོའི་ཆོས་ལ་སྡང་ཞིང་དེ་ལ་ཇི་ཙམ་འགྲོགས་བཞིན་སྡིག་པ་མི་དགེ་བའི་སྤྱོད་པ་སྣ་ཚོགས་པའི་འཐོར་རླུང་འཚུབས་ནས་སྔར་ཡོད་ཐོས་སོགས་དགེ་བའི་ལོ་ཏོག་འཇོམས་ཤིང༌། ཕྱིས་དགེ་བ་མི་སྐྱེ་བར་བྱེད་པའི་སྡིག་གྲོགས་དེ་འདྲ་ལ་བསྟེན་པའི་བློ་གྲོས་བླུན་པོ་དེ། ཕྱི་མའི་གཏན་ཆུས་བརླག་པས་བདུད་སྡེས་བཅོམ་མོ། །རྒྱུ་མཚན་དེའི་ཕྱིར་དགེ་བའི་བཤེས་གཉེན་མཚན་ཉིད་དང་ལྡན་པ་བསྟེན་པ་དང༌། དེའི་ཡན་ལག་དགེ་བའི་གྲོགས་པོ་བསྟེན་པས། ལུས་སེམས་བདེ་ཞིང་ལུང་རྟོགས་ཀྱི་ལེགས་བྱའི་ཡོན་ཏན་ཐམས་ཅད་མཐོང་བའི་ཆོས་ལ་ཟིན་ཅིང༌། དེ་ལ་རྒྱལ་དང་རྒྱལ་སྲས་རྣམས་ཀྱིས་རྟག་ཏུ་དགོངས་པ་དང༌། གནས་སྐབས་དང་མཐར་ཐུག་མངོན་མཐོ་ངེས་ལེགས་ཀྱི་ཡོན་ཏན་ཀུན་གྱིས་འབྱོར་ཞིང༌། ཚོགས་གཉིས་རྫོགས་ལ་སྒྲིབ་གཉིས་དག་ནས་དངོས་གྲུབ་རྣམ་གཉིས་འཐོབ་པ་དང༌། ས་བཅུ་ལམ་ལྔའི་ཡོན་ཏན་ཐམས་ཅད་བླ་ནས་བླར་འགྲོ་བས། དད་མོས་སོགས་སྔོན་དུ་འགྲོ་བའི་བླ་མའི་རྣལ་འབྱོར་སྒོམ་ཞིང་མཆོད་བསྟོད་བཟླས་པ་རྒྱུད་བསྐུལ་དབང་ལེན་སོགས་ཀྱི་སྒོ་ནས་བསྒྲུབ་པ་བསོད་ནམས་ཀྱི་ཚོགས་དང༌། དེ་ཐམས་ཅད་ཀྱི་མཐར་ལས་དང་པོ་པ་རྣམས་ཀྱིས་བླ་མའི་ཐུགས་དང་རང་སེམས་རྒྱུད་གཅིག་ཏུ་བསྲེ་ཞིང་དེའི་ངང་མཉམ་པར་བཞག་སྟེ་ཆོས་ཉིད་ཡེ་ནས་རོ་མཉམ་ཤེས་པའི་ངང་རྟག་ཏུ་སྐྱོང་བ་ཡེ་ཤེས་ཏེ། ཚོགས་གཉིས་པོ་དེ་ནི་འབྲས་བུ་སྐུ་གཉིས་ལམ་དུ་བྱེད་པའི་འཐུས་ཀ་ཡིན་པའི་ཕྱིར། བསྐལ་པ་མང་པོར་རྒྱལ་དང་རྒྱལ་སྲས་མང་པོ་ལ་བསྙེན་བཀུར་བྱས་ཞིང༌། བསྐྱེད་རིམ་རང་རྒྱུད་ལ་བརྒྱ་ཕྲག་བསྒོམ་པ་ལས་ཀྱང༌། བླ་མ་ནི་སྐད་ཅིག་དྲན་པ་མཆོག་ཅེས་རྒྱལ་བས་གསུངས་ཏེ། འཁོར་ལོ་བཅུ་པའི་མདོ་ལས། བླ་མ་བསྙེན་བཀུར་བྱས་ན་ཡོན་ཏན་གྱི་ཆོས་བསམ་གྱིས་མི་ཁྱབ་པ་རྣམས་ཡོངས་སུ་འཛིན་ཏེ། སངས་རྒྱས་ཀྱི་ཡོན་ཏན་དང་རྣམ་པར་འཕྲུལ་པ་ཐམས་ཅད་འདི་ལས་འབྱུང་བར་བལྟའོ། །ཞེས་དང༌། ཡིད་བཞིན་མཆོག་གི་རྒྱུད་ལས། གང་གིས་བླ་མ་འདུན་པའི་ལྷ། །སྤྱི་བོའི་གཙུག་ཏུ་བསྒོམ་པ་ཡིས། །སངས་རྒྱས་དཀྱིལ་འཁོར་སྟོང་ཕྲག་ཉིད། །ལག་མཐིལ་བཞག་ནས་སྟོང་གསུམ་བསྐོར། །སྙིང་གར་ལན་སྟོང་བསྟིམ་བྱས་ན། །བརྒྱ་སྟོང་རྒྱུ་དང་ཆར་མི་ཕོད། །ཅེས་པ་ལ་སོགས་པར་གསུངས་སོ། །དམ་ཆོས་ལུང་རྟོགས་བདུད་རྩིའི་རང་བཞིན་ཟབ་རྒྱས་ཀྱི་ཆུ་ཀླུང་དཔག་ཏུ་མེད་པའི་མཛོད་རྒྱ་མཚོ་ལྟ་བུ་དེ། རང་རྒྱུད་ལ་ཤེས་རབ་གསུམ་གྱི་སྒོ་ནས་འདྲོངས་པར་བྱེད་པའི་དམིགས་པ་བཟང་པོ་རྣམས་མ་འཁྲུལ་བར་སྟོན་པར་མཛད་པའི་བླ་མ་བཟང་པོ་མདོ་རྒྱུད་ཀྱི་དོན་ལ་མཁས་པ་དེར་རྟེན་ཅིང་འབྲེལ་བར་གནས་སོ། །ཐབས་བཟང་བ་སྦྱིན་སོགས་སྣང་བཅས་ཀྱི་རིམ་པ་བཀག་པ་རྒྱུད་ལ་བརྟེན་པ་ལས། འདོད་དོན་བདེ་བླག་ཏུ་ཐོབ་པའི་མན་ངག་བསྐྱེད་རྫོགས་ཟབ་མོའི་ཡེ་ཤེས་འཁྱམས་ཏེ་ཉམས་པར་མི་འགྱུར་རོ། །བསམ་པ་ངེས་འབྱུང་བཟང་པོའི་རིག་སྔགས་ནུས་པ་ཅན་དེ་ཡིས་འཁོར་བར་སྐྱོ་བ་མེད་ཅིང་སྲིད་བདེ་ཞེན་པ་མེད་པའི་གདོན་ཆེན་པོ་དེ་ལ་ཐེབས་ན་གང་སྒྲུབ་པ་ཐམས་ཅད་ཐར་པའི་ལམ་རྣལ་མའམ་ཁོ་ནར་འགྱུར་ཏེ། དེ་ལྟར་བཟང་པོ་བཞི་དང་ལྡན་པ་དམ་བཅས་བཞིན་སྒྲུབ་པའི་ལེགས་སྨོན་ཡིན་ནོ། །དེའི་ལྡོག་ཕྱོགས་ནི་རང་ཉིད་ཀྱིས་མིན་པར་དགེ་བའི་བཤེས་གཉེན་ལ་སོགས་པས་ཆོས་སྒོར་ཞུགས་བཅུག་སྟེ་དབང་མེད་དུ་ངུར་སྨྲིག་སོགས་རྟགས་བླངས་ཀྱང༌། ཐོས་བསམ་ཅུང་ཟད་བཏབ་པའི་མོད་ལ་ཆོས་ཀྱིས་སུན་པ་དང༌། གལ་ཏེ་དེ་ལྟར་མ་གྱུར་ཀྱང་རྙེད་བཀུར་སོགས་ཚེ་འདི་འབའ་ཞིག་སེམས་པའི་ཀུན་སློང་དུག་ཅན་འདྲེས་པའི་སྒོ་ནས་ལྟར་སྣང་དུ་ཐོས་བསམ་སྒོམ་པ་ཇི་ལྟར་བྱས་ཀྱང་འཁོར་བའི་རྒྱུ་འབའ་ཞིག་ལས་ཐར་ལམ་དང་འགལ་ཞིང༌། ཆོས་ལས་བློ་ཉམས་ཤིང་བླ་མ་མཆེད་གྲོགས་སོགས་ཀྱི་བཀའ་གཅོག་མ་ནུས་ནས་བསྲུང་སྡོམ་བཙན་པོའི་འུ་ལག་ལྟར་ཁུར་དུ་སོང་ཞིང༌། ཆོས་བརྒྱད་ཀྱི་རྟོག་པ་ངན་པས་བསླངས་ཏེ་བསྟན་འགྲོའི་དོན་ལྟར་སྣང་བའི་བྱ་བ་ཅི་བྱེད་ཀྱང་དྲང་སྲོང་ནུས་པ་ཅན་གྱི་དམོད་པས་ཆར་གྱི་རྒྱུན་གཅོད་པ་སོགས་དགེ་ལེགས་ཀྱི་སྣང་བ་ཉམས་པར་བྱེད་པ་བཞིན་རང་རྒྱུད་ཀྱི་ཐེག་ཆེན་གྱི་བརྟུལ་ཞུགས་འཁྱམས་ཏེ་ཉམས་པ་ཡིན་ནོ། །དེས་ན་དེ་དག་ནི་ལེགས་སྨོན་དཀའ་ཐུབ་སྟོན་ཟླ་ལྟ་བུ་བཤིག་པའི་རྙོག་པ་སྒྲ་གཅན་གྱི་གདོང་པ་ལྟ་བུ་ཡིན་ནོ། །བདག་ཅག་གི་སྟོན་པས་བློ་རིགས་གསུམ་ལ་དགོངས་ནས་སྐྱེས་བུ་གསུམ་གྱི་ལམ་བསྟན་པ་གང་ཉམས་སུ་བླངས་ཀྱང་རང་རང་གི་ཐད་ཀ་ཐད་ཀའི་ཉོན་མོངས་པའི་དུག་ཆེན་གསུམ་མམ་ལྔའི་གཉེན་པོར་ཆེ་བར་ཡིན་ཏེ། ཉོན་མོངས་པའི་གཉེན་པོར་མི་འགྲོ་བའི་ལམ་དེ་ནི་ནང་པ་སངས་རྒྱས་པའི་ལམ་མ་ཡིན་ནོ། །དེ་ལས་ལྡོག་པ་སྐྱེས་བུ་ཆུང་ངུའི་ལམ་གྱིས་དུག་གསུམ་གྱིས་ཀུན་ནས་བསླངས་པའི་ལས་ཀྱིས་ངན་འགྲོར་འཕེན་པ་ཤེས་ནས་རེ་ཞིག་ཉོན་མོངས་དྲག་པོས་མི་དགེ་བའི་ལས་བསགས་པ་སྤོང་བ་དང༌། འབྲིང་གིས་སྲིད་པའི་སྡུག་བསྔལ་གྱི་རྩ་བ་རྒྱུ་ངར་འཛིན་ཡིན་པ་ཤེས་ནས་དྲུང་ནས་འབྱིན་པའི་ཚུལ་གྱིས་ཉོན་མོངས་སྤོང་བ་དང༌། རབ་ཀྱིས་ཉོན་མོངས་རང་བཞིན་མེད་པར་ཤེས་ནས་སྦྱོང་བའམ་བསྐྱེད་རྫོགས་ཟབ་མོས་ལམ་དུ་ཁྱེར་བའམ་རང་གྲོལ་དུ་གཏོང་བ་སྟེ། དེ་ལྟར་ལམ་རྣམ་པ་གསུམ་གྱི་གང་ཉམས་སུ་བླངས་ཏེ་ཐབས་ཀྱི་ཤིང་རྟར་འཛེགས་ལ་སྔོན་བསགས་ཀྱི་རྗེས་སུ་མི་དཔྱོད། མ་འོངས་པའི་མདུན་མི་བསུ། ད་ལྟའི་རིག་པ་རྐྱེན་ཡུལ་དུ་མ་སོང་བར་བྱ་བ་སྤང་གཉེན་མཉམ་པ་ཉིད་དུ་ལ་བཟླ་བ་སྟེ་དུས་བཞིར་རྟག་ཏུ་སྐྱོ་བ་མེད་པར་ཉམས་སུ་བླངས་པས། ཚོགས་དྲུག་གི་ཡུལ་གྱི་སྣང་བ་མཐའ་དག་ཆོས་ཀྱི་ཚིག་དོན་ལ་སེམས་པ་དང༌། བླ་མས་མན་ངག་བསྟན་པ་ལྟར་མི་རྟག་པ་དང༌། ངེས་འབྱུང༌། སྙིང་རྗེ། མོས་གུས་སོགས་ཀྱི་རྐྱེན་དུ་ཤར་ནས་རྣམ་མཁྱེན་ཡེ་ཤེས་ཀྱི་རྒྱུར་སོང་བ་ནི་ལེགས་སྨོན་གྲུབ་པ་ཡིན་ནོ། །དབྱིག་གཉེན་གྱིས། ཚེ་རིང་དེ་བཞིན་ནད་མེད་དང༌། །གཟུགས་དང་སྐལ་པ་བཟང་དང་རིགས། །ནོར་དང་ཤེས་རབ་དག་དང་བདུན། །ཞེས་གསུངས་པ་ལྟར་མཐོ་རིས་ཡོན་ཏན་བདུན་དང་ལྡན་པའི་དགའ་བ༡་དང༌། མི་ཁོམ་པའི་གནས་བརྒྱད་ལས་དལ་བས་རྟེན་མཆོག་ཡང་དག་མཐོ་བ༢་དང༌། ལུས་ལ་ནད་མེད༣་ཅིང༌། སེམས་ལས་སུ་རུང་བའི་ཏིང་ངེ་འཛིན་༤དང༌། ཚིག་དོན་རྣམ་འབྱེད་ཤེས་རབ༥་སྟེ་ལྔ་པོ་ཚང་བ་ནི། སྔོན་ཆད་བསོད་ནམས་ཆེན་པོ་ལ་གུས་ཤིང་བར་མ་ཆད་པའི་མངོན་རྟགས་ཚེ་འདིར་སྣང་བ་ཡིན་ནོ། །དགེ་སྡིག་གི་བླང་དོར་ཅུང་ཟད་རེ་ཐོས་བསམ་གྱིས་ཤེས་ཀྱང་རང་རྒྱུད་ལ་མ་བསྒོམ་པས་ནི་རིག་པ་དེ་འཇོམས་ཤིང་འོང་བ་དང༌། གཟུགས་རིགས་ཐོས་པ་སོགས་ཀྱིས་ཁེངས་ཤིང་རྒྱགས་པ་རྒྱས་པས་ཐོས་བསམ་དང༌། བསླབ་གསུམ་གྱི་དཔལ་འབྱོར་སོགས་རྒྱུད་ལ་མི་ཆགས་པར་དགེ་ཕྱོགས་ཐམས་ཅད་འཇོམས་ཤིང་འོང་ལ། ཁྱད་པར་དུ་རྣམ་པར་སྡང་བས་ལེགས་ཚོགས་ཐམས་ཅད་འཇོམས་ཤིང་འོང་སྟེ། སྤྱོད་འཇུག་ལས། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཀྱང༌། །ཁོང་ཁྲོ་གཅིག་གིས་འཇོམས་པར་བྱེད། །ཅེས་སོ། །ཆགས་པས་ཚུལ་ཁྲིམས་ཉམས་ནས་ཡང་དག་མཐོ་བ་ལྷ་མིའི་གནས་ཙམ་ཐོབ་པ་ཡང་འཇོམས་ཤིང་འོང་བ་བཤད་དོ། །རྒྱུ་མཚན་གང་གི་ཕྱིར་ལྷ་ཆོས་སོགས་ཀྱི་རྟེན་མི་ལུས་ཐོབ་པ་དེ་ཡང་ལས་དང་ཉོན་མོངས་སྒོ་གསུམ་གྱི་སྡིག་པ་ཡིས་རྒྱུད་རྣམ་པར་དཀྲུགས་པ་མ་ཡིན་པའི་བློ་གྲོས་ཏེ་རང་སེམས་བཟང་པོ་ནི། ད་ལྟ་སྤང་གཉེན་ལ་དཔྱོད་པའི་ཤེས་རབ་ཀྱི་མཐུ་རང་བཞིན་དགེ་བའི་ངང་ཚུལ་དང་དམ་པའི་ཆོས་ཀྱི་སྐལ་པ་ཐོབ་པས་སྒོ་གསུམ་ལས་སུ་རུང་བར་བཀོལ་ཐུབ་པ་ལ་སོགས་པའི་ཡོན་ཏན་ནི། སྔོན་བསོད་ནམས་བསགས་པའི་རྟགས་སུ་མདོ་སྡེ་རྒྱན་ལས་བཤད་དེ། དེ་ཡང་ཇི་སྐད་དུ། དགའ་དང་དལ་བར་སྐྱེ་བ་དང༌། །ནད་མེད་པ་དང་ཏིང་འཛིན་དང༌། །རྣམ་པར་འབྱེད་པའི་བྱེད་རྒྱུ་ནི། །སྔོན་ཆད་བསོད་ནམས་བསགས་པ་ཡིན། །ཞེས་སོ། །ཆོས་ཐམས་ཅད་ལ་དམིགས་ཏེ་སེམས་བསྐྱེད་ཅིང་དམ་བཅས་པའི་གོ་ཆ་སྲོག་ལ་བབ་ཀྱང་མི་གཏོང་བས་རྣམ་པར་སྲ་ཞིང༌། དེ་ཡང་ཟབ་རྒྱས་ཆོས་ཁམས་རྒྱ་མཚོ་ལྟ་བུའི་དོན་རྣམས་ཐོས་བསམ་གྱིས་གཏན་ལ་ཕབ་ནས་སྒོམ་པས་ཉམས་སུ་ལེན་པར་བྱེད་པ་ལ། དཔེར་ན་དབང་པོའི་མཚོན་ཆ་གཞུ་ནི་གྱད་སྟོབས་པོ་ཆེས་ཀྱང་བདུངས་བར་བློ་ཡི་སྤོབས་སམ་མི་སྤོབས་སྙམ་པའི་ཐེ་ཚོམ་མེད་པར་སྙིང་སྟོབས་བསྐྱེད་ན་བདུངས་ནུས་པ་ལྟར། ཆོས་དེ་ཀུན་བདག་གི་ཁོང་དུ་ཆུད་ཅིང་ཤེས་པར་བྱས་ནས་ཉམས་སུ་བླང་བར་བྱ་སྙམ་པའི་སྙིང་སྟོབས་ཀྱི་དམ་བཅའ་རིས་སུ་མ་བོར་ཞིང་མེ་ལ་ཤིང་བསྣན་པ་བཞིན་འགལ་རྐྱེན་ཐམས་ཅད་ཀྱང་གཉེན་པོའི་དབང་དུ་གཏོང་བ་སྟེ། རྐྱེན་ངན་ཇི་ལྟར་བྱུང་ཡང་དམ་བཅའ་ཇེ་བརྟན། ཉོན་མོངས་ཇི་ལྟར་བྱུང་ཡང་གཉེན་པོ་ཇེ་བཙན་བྱེད་པ་རྣམས་ནི། ལམ་སྒྲུབ་པ་རྐྱེན་ཁར་མི་འཆག་ཅིང་བཏང་སྙོམས་སུ་མི་ལུས་པར་སྒོ་གསུམ་གྱི་བྱ་བ་ཐམས་ཅད་ཕྱིན་དྲུག་སྟེང་དུ་སོན་ཏེ་རྣམ་མཁྱེན་གྱི་རྒྱུར་འགྲོའོ། །དེ་ལྟར་བསམ་པའི་གོ་ཆས་ལམ་སྒྲུབ་པ་དེ་ཡི་མཐུན་ཕྱོགས་སྐྱབས་འགྲོ་ཚོགས་བསགས་སོགས་སྒོ་ཐམས་ཅད་གཅིག་ཏུ་བསྡུས་པ་ཡན་ལག་བདུན་པ་བྱ་བ་དང༌། གཞན་ཡང་ཆུ་གཏོར་དང་གསུར་བསྔོ་ལུས་སྦྱིན་ལ་སོགས་དགེ་ཕྱོགས་སུ་ཡུལ་རྣམས་ལ་ཆེན་པོ་ལྟ་ཅི། ཕྲ་བ་ལའང་ཚོགས་བསགས་པ་དང༌། དེ་བཞིན་དུ་ཐ་ན་རྨི་ལམ་ཡན་ཆད་ཉེས་ལྟུང་ཆུང་ངུ་ལའང་གཉེན་པོས་སྦྱངས་པ་མཐའ་དག་བྱ་བ་ཡིན་པས། དེ་ལྟར་བག་ཡོད་དྲན་ཤེས་ཀྱིས་ལག་པ་འདེགས་ཙམ་བྱེད་པ་དང༌། ཚིག་འབྲུ་གཅིག་སྨྲས་པ་དང༌། རྟོག་པ་གཅིག་ཡན་ཆད་ངོས་ཟིན་པའི་ཐབས་ལ་འབད་དེ་སྤང་བླང་བྱས་ན་ལམ་གྱི་མི་མཐུན་ཕྱོགས་ཀྱིས་གང་ཟག་དེ་ལ་མི་བརྫི་ཞིང༌། ཅི་བྱས་ཐམས་ཅད་ཡང་དག་པའི་ལམ་དུ་འགྲོ་བ་བསོད་ནམས་ཀྱི་ཚོགས་བསགས་པ་དག་ལ་བསྟེན་པར་བྱེད་པ་འདི་ཡིན་པས་གནད་དམ་པའོ། །དེ་ལྟར་འཁོར་ལོ་བཞི་ཡི་དོན་དེ་ཚུལ་བཞིན་ཉམས་སུ་ལེན་པ་ནི་སྐྱེས་བུ་ཆེན་པོ་བྱང་ཆུབ་སེམས་དཔའི་ལམ་བགྲོད་པའི་དངོས་གཞིའི་སྟེགས་ཡིན་ནོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། འཁོར་ལོ་ཆེན་པོ་བཞིའི་ཚོམས་ཏེ་ལེའུ་ལྔ་པའོ།། །།འདི་ལྟར་སྲིད་པའི་གནས་སུ་ལས་དབང་གིས་རྒྱུ་བའི་འགྲོ་བ་རྣམས་འཇིགས་པ་དུ་མས་མནར་ཏེ། སྤྱིར་ཉན་རང་གི་ལམ་གྱི་མི་མཐུན་ཕྱོགས་འཁོར་བ་སྡུག་བསྔལ་གྱི་འཇིགས་པ་དང༌། སྒོས་བྱང་སེམས་ཀྱི་ལམ་ཕར་ཕྱིན་གྱི་མི་མཐུན་ཕྱོགས་རང་དོན་ཡིད་བྱེད་ཀྱི་འཇིགས་པ། ཉིང་སྒོས་གསང་སྔགས་ལམ་གྱི་མི་མཐུན་ཕྱོགས་ཐ་མལ་འཁྲུལ་འཛིན་གྱི་འཇིགས་པ་སྟེ། འཇིགས་པ་གསུམ་གྱིས་དཀྲུགས་ཤིང་སྡུག་བསྔལ་གྱིས་རྟག་ཏུ་མནར་བ་ནི། དཔེར་ན་ཆུ་སྲིན་གདུག་པའི་གནས་ཆུ་ཡི་གཏེར་རྒྱ་མཚོ་ཆེན་པོ་རླབས་ཀྱིས་འཁྲུགས་པ་ལྟ་བུར་བྱིང་བ་ལ། དབང་ཕྱུག་སོགས་འཇིག་རྟེན་པའི་ལྷ་འགའ་ཞིག་སྐྱབས་སུ་བཟུང་ནའང༌། སྐྱབས་ཡུལ་དེ་དག་འཇིགས་པ་ལས་མ་གྲོལ་བས་སྐྱབས་ཡུལ་འཁྲུལ་ལ། དེས་ན་གནས་སྐབས་དང་མཐར་ཐུག་སྐྱོབ་ནུས་ཤིང་སྐྱབས་སུ་བསྟེན་པར་འོས་ངེས་པ་གང་ལ་ཡིད་ཆེས་ཀྱི་དད་པས་སྲོག་གམ་བློ་བརྟན་པའི་སྐྱབས་ཡུལ་གཏན་དུ་མི་བསླུ་བ་ནི། དཀོན་མཆོག་གསུམ་ཞེས་མཚན་སྙན་གྱིས་སྲིད་པ་གསུམ་ན་ཡོངས་སུ་གྲགས་པའི་གདུགས་དཀར་པོ་ལྟ་བུ་ལ་སྐྱབས་སུ་བསྟེན་པའི་ཚུལ་ནི། སངས་རྒྱས་ཀྱི་བསྟན་ལ་འཇུག་པའི་ཐོག་མ་ཉིད་དུ་འཛིན་དགོས་ཏེ། སྐྱབས་འགྲོ་བདུན་ཅུ་པ་ལས། སངས་རྒྱས་ཆོས་དང་དགེ་འདུན་ནི། །ཐར་པ་འདོད་པ་རྣམས་ཀྱི་སྐྱབས། །ཞེས་སོ། །ཐར་པ་སྟེ་མྱང་འདས་སུ་འགྲོ་བའི་ལམ་བསླབ་པ་གསུམ་དང༌། སྤངས་རྟོགས་ཀྱི་ཡོན་ཏན་ཀུན་གྱི་རང་བཞིན་བརྟེན་པའི་རྟེན་དང་འཛིན་པའི་སྣོད་དུ་དམ་བཅའ་བར་བྱས་ན་མི་བསླུ་བར་ངེས་པ་ནི་དཀོན་མཆོག་གསུམ་ལ་སྐྱབས་སུ་འགྲོ་བ་ཉིད་དེ། སྐྱབས་སུ་འགྲོ་བ་དེའི་སྔོན་དུ་དད་པ་སྐྱེ་བའི་ཐབས་སྟོན་པ་སངས་རྒྱས་དང༌། དེས་བསྟན་པའི་དམ་ཆོས་དང༌། དེ་འཛིན་པའི་དགེ་འདུན་གྱི་ཡོན་ཏན་ཤེས་པ་ནི་ཤིན་ཏུ་གཅེས་སོ། །སྤྱིར་དཀར་པོའི་ཕྱོགས་ཀྱི་ཆོས་རྣམས་ཀུན་གྱི་རྩ་བ་དད་པ་ཁོ་ན་ཡིན་ཏེ། ཆོས་བཅུ་པ་དང༌། དཀོན་མཆོག་བརྩེགས་པ་རྣམས་ལས་ཕྱོགས་མཐུན་པར། དད་པ་མེད་པའི་མི་རྣམས་ལ། །དཀར་པོའི་ཆོས་རྣམས་མི་འབྱུང་སྟེ། །ས་བོན་མེ་ཡི་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་པ་ལྟར་ཡིན་པས་དད་པ་དེ་ནི་འཕགས་པའི་རིགས་སྐལ་པ་དགེ་བ་ཅན་གྱི་སྐྱེས་བུ་རྣམས་ལ་དང་པོ་ཡོད་ཤས་ཆེ་ཡང༌། །ལས་མ་སད་པའི་སྐྱེ་བོ་ཕལ་པའི་སེམས་ལ་མངོན་གྱུར་ལུང་དུ་མ་བསྟན་པ་ལ། མཐོང་ན་མི་མཐུན་པ་མེད་པ་སྟོན་པ་དངོས་སམ་གཟུགས་བརྙན། དགེ་བའི་བཤེས་གཉེན་སོགས་མཐོང་བ་དང༌། སྡེ་སྣོད་བཀླག་པ་ཡི་མོད་ལ་ལུས་ཀྱི་བ་སྤུའི་འཁྲི་ཤིང་གཡོ་ལ། མིག་མཆི་མ་སློང་བཞིན་དད་པ་མངོན་གྱུར་དུ་ལྡང་བ་སློབ་དཔོན་དཔའ་བོ་ལྟ་བུའོ། །དེ་ལའང་ཡུལ་དམ་པའི་ཡོན་ཏན་དང་གསུང་རབ་ཀྱི་ཚིག་དོན་ལ་སྤྲོ་བ་ནི་དང་བའི་དད་པ་དང་པོ་སྐྱེ་བ་སྟེ། དེ་བཞིན་དུ་ཡོན་ཏན་དེ་རྣམས་ཐོབ་པར་འདོད་པ་བུང་བ་མེ་ཏོག་ལ་གདུང་བ་ལྟ་བུ་དང༌། བླང་དོར་སྟོན་བྱེད་བཤེས་གཉེན་དང་བདེན་བཞི་སོགས་ལ་ཡིད་ཆེས་ཤིང༌། སྲོག་ལ་བབ་ཀྱང་བློ་ཁ་ཕྱིར་མི་ལྡོག་པ་སྟེ་དད་པ་རྣམ་པ་བཞི་པོ་དེ་དག་ལས། སྤྱིར་ཐོས་བསམ་དང་སྒོས་སུ་སྐྱབས་འགྲོའི་གནས་སྐབས་འདིར་སྲོག་ལ་བབ་ཀྱང་དཀོན་མཆོག་གསུམ་ལས་བློ་ཕྱིར་མི་ལྡོག་པའི་དད་པ་དགོས་སོ། །དད་པ་དེ་དག་རྒྱུད་ལ་མ་སྐྱེས་པ་སྐྱེ་བ་དང་སྐྱེས་པ་གོང་དུ་འཕེལ་བའི་རྒྱུ་ནི། མང་དུ་ཡོད་ཀྱང་བསྡུ་ན་བཞི་ཡིན་ཏེ། དམ་པ་མཚན་ཉིད་ལྡན་པ་བསྟེན་པ་དང༌། དམ་པའི་གྲོགས་བཟང་དང་འགྲོགས་པ། དཀོན་མཆོག་གསུམ་གྱི་ཡོན་ཏན་རྗེས་སུ་དྲན་པ་དང༌། འཁོར་བ་ལ་སྙིང་པོ་མེད་པ་འདི་ཕྱི་གཉིས་ཕུང་གི་ཉེས་དམིགས་བསམ་ནས་ངེས་འབྱུང་གིས་དྲངས་པ་ལས་བཅོས་མིན་གྱི་དད་པ་སྐྱེའོ། །ཐུབ་པ་སངས་རྒྱས་བཅོམ་ལྡན་འདས་རྣམས་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཡོན་ཏན་ནི་མཐའ་ཡས་ཏེ། ཏིང་འཛིན་རྒྱལ་པོ་ལས། གལ་ཏེ་བསྐལ་པ་གངྒའི་བྱེ་མ་སྙེད། །དེ་སྲིད་དུ་ནི་ཚེ་ཡི་ཚད་གྱུར་ནས། །ང་ནི་སངས་རྒྱས་ཀྱི་ཡང་ཡེ་ཤེས་ཀྱི། །སྤུ་གཅིག་བསྔགས་པ་བརྗོད་ཀྱང་མཐར་མ་ཕྱིན། །ཞེས་སོ། །མཐོང་སྒོམ་གྱི་སྤངས་པ་ཡེ་ཤེས་གཉིས་ཀྱིས་ཉོན་མོངས་དང་ཤེས་བྱའི་སྒྲིབ་པ་བཅོམ་ཏེ་སྤོང་བའི་ཡོན་ཏན་མཐར་ཕྱིན་པ་ཐོབ་པར་འགྱུར་རོ། །དེ་དག་གི་རྣམ་གྲངས་ཅུང་ཟད་སྤྲོས་ཏེ་འཆད་པ་ལ། མཐོང་སྤང་བརྒྱ་དང་བཅུ་གཉིས་ནི། །ཆགས༡་ཁྲོ༢་ང་རྒྱལ༣་རྨོངས༤་ཐེ་ཚོམ༥། །འཇིག༦་མཐར༧་ལོག་ལྟ༨་ལྟ་མཆོག་འཛིན༩། །ཚུལ་ཁྲིམས་བརྟུལ་ཞུགས་མཆོག་འཛིན༡༠་པ། །ལྟ་མིན་ལྔ་དང་ལྟ་བ་ལྔ། །མཐོང་སྤང་རྩ་བ་བཅུ་ཡིན་ནོ། །དེ་དག་བདེན་པོ་བཞི་པོ་ལ། །འཇིགས་མཐར་ལོག་རྨོངས་ཐེ་ཚོམ་དངོས། །ཁོང་ཁྲོའི་དབང་གིས་ལོག་པར་འཇུག །ལྷག་མ་རྣམས་ནི་བརྒྱུད་ནས་འཇུག །འདོད་པའི་ཁམས་ན་བཅུ་ཀ་སྟེ། །གཟུགས་དང་གཟུགས་མེད་ཁོང་ཁྲོ་མིན། །དེ་ལྟར་བརྒྱ་དང་བཅུ་གཉིས་སོ། །ཞེས་པས་དང་པོ་མཐོང་སྤང་རྩ་བ་བཅུ་སྟེ། འདོད་ཆགས། ཁོང་ཁྲོ། ང་རྒྱལ། མ་རིག་པ། ཐེ་ཚོམ་སྟེ་ལྟ་མིན་ལྔ། འཇིག་ལྟ། མཐར་ལྟ། ལོག་ལྟ། ཚུལ་ཁྲིམས་བརྟུལ་ཞུགས་མཆོག་འཛིན། ལྟ་བ་མཆོག་འཛིན་ཏེ་ལྟ་བ་ལྔ་དང་བཅུའོ། །དེ་དག་བདེན་པ་བཞི་ལ་ལོག་པར་ཞུགས་ཚུལ་གྱིས་བརྒྱ་དང་བཅུ་གཉིས་ཏེ། འདོད་ཁམས་ན་བདེན་བཞི་རེ་རེ་ལ་བཅུ་ཀ་འཇུག་པས་བཞི་བཅུ། གཟུགས་ཁམས་གཟུགས་མེད་ཁམས་གཉིས་ལ་ཁོང་ཁྲོ་མ་གཏོགས་པ་དགུ་རེ་འཇུག་པས་དགུ་བཞི་སུམ་ཅུ་རྩ་དྲུག་པ་གཉིས་ཏེ་བདུན་ཅུ་རྩ་གཉིས། སྔར་གྱི་བཞི་བཅུ་སྟེ་བརྒྱ་དང་བཅུ་གཉིས་སོ། དེ་དག་ཇི་ལྟར་ལོག་པར་འཇུག་ན། ལྟ་བ་གསུམ་དང༌། ལྟ་མིན་གཉིས་ཏེ་ལྔ་ནི་དངོས་སུ་ལོག་པར་འཇུག་སྟེ། བདེན་པ་དེ་དག་ལ་དམིགས་ནས་འཇིག་ལྟས་བདག་དང་བདག་གིར་བལྟ། མཐར་ལྟས་རྟག་ཆད་དུ་བལྟ། ལོག་ལྟས་མེད་པར་བལྟ། མ་རིག་པས་བདེན་པའི་དོན་མི་ཤེས། ཐེ་ཚོམ་གྱིས་བདེན་ནམ་མི་བདེན་སྙམ་དུ་ཐེ་ཚོམ་ཟའོ། །དེ་དག་ནི་བདེན་པ་དང་བར་དུ་གཞན་གྱིས་མ་ཆོད་པར་འཇུག་པས་ན་དངོས་སུ་ལོག་ཞུགས་ཡིན་ནོ། །ལྟ་མིན་གཉིས་དང༌། ལྟ་བ་གཉིས་ཏེ་བཞི་ནི་བརྒྱུད་ནས་ལོག་པར་འཇུག་སྟེ། བདེན་པའི་དོན་ལྟ་བས་ཇི་ལྟར་བཟུང་བའི་ལྟ་ངན་དེ་ལ་འདོད་ཆགས་ཀྱིས་ཆགས། ང་རྒྱལ་གྱིས་ལྟ་ངན་དེའི་སེམས་ཁེངས། ལྟ་བ་མཆོག་འཛིན་གྱིས་ལྟ་ངན་ལ་མཆོག་ཏུ་འཛིན། ཚུལ་ཁྲིམས་དང་བརྟུལ་ཞུགས་མཆོག་འཛིན་གྱིས་ལྟ་ངན་དེ་དང་འབྲེལ་བའི་སྤྱོད་ངན་ལ་དག་གྲོལ་ངེས་འབྱིན་ཏེ་ལྟ་བ་ནོར་བ་དེ་ལ་ཐར་པའི་ཐབས་ཡིན་པར་བལྟ་བའོ། །འདི་དག་ལྟ་བས་བདེན་པ་ལ་དམིགས་ཤིང༌། འདི་དག་གིས་ལྟ་བ་ལ་དམིགས་པས་བདེན་པ་དང༌། བར་དུ་ལྟ་ངན་དེས་ཆོད་པས་བརྒྱུད་ནས་ལོག་པར་ཞུགས་པའོ། །ཁོང་ཁྲོ་ནི་དབང་གིས་ལོག་ཞུགས་ཡིན་ཏེ། ལྟ་ངན་དེ་རྒྱུད་ན་ཡོད་པའི་དབང་གིས་དེ་དང་མི་མཐུན་པའི་ལྟ་བ་གཞན་ལ་ཁོང་ཁྲོ་བ་སྟེ་འདི་ནི་བདེན་པ་དང་རང་གི་ལྟ་བ་གཉིས་ཀ་ལ་མ་དམིགས་པས་དབང་གིས་ལོག་ཞུགས་ཡིན་ནོ། །འདི་དག་འགོག་ལམ་གཉིས་ལ་ཞུགས་ཚུལ་ལ་ཞིབ་ཆ་ཅུང་ཟད་རེ་ཡོད་ལ། འགོག་པར་བདག་ཆད་ལྟ་དང༌། ལམ་ལ་བདག་ཆད་བྱེད་ཀྱི་ལམ་ཡིན་སྙམ་པའི་ཚུལ་རྣམས་ཤེས་པར་བྱའོ། །སྒོམ་སྤང་བཞི་བརྒྱ་དང་བཅུ་བཞི་ནི། འདོད་ཆགས༡་ཁོང་ཁྲོ༢་ང་རྒྱལ༣་རྨོངས༤། །འཇིག་ལྟ་མཐར་ལྟ་སྒོམ་སྤང་དྲུག །འདོད་པར་དྲུག་ཡོད་གཟུགས་གཟུགས་མེད། །ཁོང་ཁྲོ་མ་གཏོགས་ལྔ་རེ་ཡོད། །དེ་ལ་ས་དང་ཆེ་འབྲིང་གིས། །ཕྱེ་བས་བཞི་བརྒྱ་བཅུ་བཞིའོ། །ཞེས་པས་སྒོམ་སྤང་རྩ་བ་དྲུག་སྟེ། འདོད་ཆགས། ཁོང་ཁྲོ། ང་རྒྱལ། མ་རིག་པ། འཇིག་ཚོགས་ལ་ལྟ་བ། མཐར་ལྟ་དང་དྲུག་གོ །དེ་ཡང་འདོད་ཁམས་ན་དྲུག །གཟུགས་ཁམས་གཟུགས་མེད་གཉིས་ན་ལྔ་རེ་སྟེ་ཁམས་ཀྱིས་ཕྱེ་ན་བཅུ་དྲུག་གོ །ཡང་འདོད་ཁམས་ན་དྲུག །བསམ་གཏན་བཞི་རེ་རེ་ན་ལྔ་རེ་སྟེ་ལྔ་བཞི་ཉི་ཤུ། གཟུགས་མེད་བཞི་རེ་རེ་ན་ལྔ་རེ་སྟེ་ལྔ་བཞི་ཉི་ཤུ་བསྡོམས་པས་སའི་སྒོ་ནས་དབྱེ་ན་བཞི་བཅུ་ཞེ་དྲུག་གོ །དེ་དག་ས་ཆེ་འབྲིང་གི་སྒོ་ནས་དབྱེ་ན་བཞི་བརྒྱ་དང་བཅུ་བཞི་སྟེ། སའི་སྒོ་ནས་དབྱེ་བའི་ཞེ་དྲུག་པོ་དེ་རེ་རེ་ལ་དགུ་རེ་ཕྱེ་བས་སམ། ཡང་ན་ཁོང་ཁྲོ་མ་གཏོགས་པའི་ཉོན་མོངས་པ་ལྔ་པོ་ས་དགུ་དང་ཆེ་འབྲིང་ས་དགུས་ཕྱེ་བས་བརྒྱད་ཅུ་རྩ་གཅིག་སྟེ་བརྒྱད་ཅུ་རྩ་གཅིག་ལྔ་བསྡོམས་པས་བཞི་བརྒྱ་དང་ལྔར། འདོད་ཁམས་ཀྱི་ཁོང་ཁྲོ་དགུ་བསྣན་པས་བཞི་བརྒྱ་དང་བཅུ་བཞིའོ། །ཁམས་ནི་གསུམ་སྟེ་འདོད་ཁམས། གཟུགས་ཁམས། གཟུགས་མེད་ཀྱི་ཁམས་སོ། །ས་ནི་དགུ་སྟེ། འདོད་ཁམས། བསམ་གཏན་དང་པོ། །གཉིས་པ། གསུམ་པ། བཞི་པ། ནམ་མཁའ་མཐའ་ཡས། རྣམ་ཤེས་མཐའ་ཡས། ཅི་ཡང་མེད་པ། ཡོད་མིན་མེད་མིན་ཏེ་ཁམས་གསུམ་ས་དགུའོ། །ཆེ་འབྲིང་ནི་འདོད་པའི་འདོད་ཆགས་ལྟ་བུ་ལའང༌། ཆེན་པོའི་ཆེན་པོ། ཆེན་པོའི་འབྲིང་པོ། ཆེན་པོའི་ཆུང་ངུ༌། འབྲིང་པོའི་ཆེན་པོ། འབྲིང་པོའི་འབྲིང་པོ། འབྲིང་པོའི་ཆུང་ངུ༌། ཆུང་ངུའི་ཆེན་པོ། ཆུང་ངུའི་འབྲིང་པོ། ཆུང་ངུའི་ཆུང་ངུ་དང་དགུའོ། །མཐོང་སྒོམ་གྱི་རྟོག་པ་དེ་དག་སྤོང་ཚུལ་ནི། མཐོང་སྤང་ཀུན་བརྟགས་ཡིན་པས་བདེན་བཞི་མཐོང་བ་ཙམ་གྱིས་སྤོང་ལ། སྒོམ་སྤང་རྣམས་ལྷན་སྐྱེས་ཡིན་པས་བདེན་པ་མཐོང་བ་ཙམ་གྱིས་སྤོང་མི་ནུས་ལ། མཐོང་ཟིན་གོམས་པར་བྱེད་པའི་སྒོ་ནས་རིམ་པར་སྤང་དགོས་སོ། །དེ་ཡང་ཐེག་དམན་རྣམས་མཐོང་སྤང་ནི་འདས་ལམ་ཁོ་ནས་སྤང་དགོས་ཀྱང་སྒོམ་སྤང་ནི་འཇིག་རྟེན་པའི་ལམ་གྱིས་ཀྱང་སྤང་ནུས་པས། མཐོང་སྤང་གི་སྔོན་དུ་ཡང་འདོད་པའི་སྒོམ་སྤང་སྤོང་བ་སྲིད་པས་དེ་འདྲ་དེ་ལམ་ཐོད་རྒལ་བ་ཞེས་ཟེར་ཞིང༌། ཕྱིར་འོང་ཞུགས་པ་དང་ཕྱིར་མི་འོང་ཞུགས་པ་གཉིས་ཀ་ཡོད་པར་བཞེད་ལ། རྒྱལ་བ་རྣམས་ནི་ཐབས་མཁས་པའི་དབང་གིས་འཇིག་རྟེན་པའི་ལམ་གྱིས་སྒོམ་ལམ་གྱི་སྤང་བྱ་སྤོང་རྒྱུ་མདོར་བསྟན་པས་ལམ་ལ་བྲོད་པ་སྐྱེ་བའི་དོན་དུ་བསྟན་གྱི། དོན་ལ་འཕགས་ལམ་གྱི་སྤང་བྱ་དྲུངས་ནས་འབྱིན་བའི་གཉེན་པོ་མེད་ཕྱིར། ཐེག་ཆེན་ལྟར་ན་སྒོམ་སྤང་ཡང་འཇིག་རྟེན་པའི་ལམ་གྱིས་སྤང་མི་ནུས་ཏེ་འཇིག་རྟེན་པའི་ལམ་གྱིས་སྤང་བྱ་མགོ་ནོན་པ་ཙམ་ལས། རྩ་བ་དྲུངས་ནས་འབྱིན་མི་ནུས་ཞེས་བཞེད། དེ་ལ་འཇིག་རྟེན་པའི་ལམ་ཞེས་པ་ནི་ཤེས་རབ་ལྷག་མཐོང་དང་མ་འབྲེལ་བའི་བསམ་གཟུགས་ཀྱི་ཏིང་ངེ་འཛིན་རྐྱང་པ་ཡིན་ལ། འཇིག་རྟེན་ལས་འདས་པའི་ལམ་ནི་བདག་མེད་རྟོགས་པའི་ཤེས་རབ་དང་འབྲེལ་བའི་ཞི་ལྷག་ཟུང་འཇུག་གོ །མཐོང་སྤང་སྤོང་ཚུལ་ཡང་ཐེག་དམན་ལྟར་ན། མཐོང་ལམ་སྐད་ཅིག་མ་བཅུ་དྲུག་ཡོད་པ་ལས། དཔེར་ན་སྡུག་བདེན་མཐོང་བའི་མཐོང་ལམ་སྐད་ཅིག་བཞིའི་དང་པོ་སྡུག་བསྔལ་ཆོས་བཟོད་ཀྱི་སྐབས་སུ་འདོད་ཁམས་པའི་སྡུག་བསྔལ་མཐོང་སྤང་བཅུ་སྤངས་བར་ཆད་མེད་ལམ། ཆོས་ཤེས་སྐབས་སུ་གཉེན་པོ་ཡེ་ཤེས་སྐྱེ་རྣམ་གྲོལ་གྱི་ལམ། རྗེས་བཟོད་ཀྱི་སྐབས་སུ་གཟུགས་དང་གཟུགས་མེད་ཀྱི་སྡུག་བསྔལ་མཐོང་སྤང་བཅོ་བརྒྱད་སྤངས། རྗེས་ཤེས་ཀྱི་སྐབས་སུ་གཉེན་པོ་ཡེ་ཤེས་སྐྱེ། དེ་ལྟར་བདེན་པ་གཞན་གསུམ་ལའང་སྦྱར་བའི་ཉི་ཤུ་རྩ་བརྒྱད་པ་ཚན་བཞི་སྤངས་པས་མཐོང་སྤང་བརྒྱ་དང་བཅུ་གཉིས་སོ། །ཐེག་ཆེན་ལྟར་ན་ཁམས་གསུམ་གྱི་མཐོང་སྤང་རྣམས་གཅིག་ཆར་དུ་དྲིལ་ནས་སྤོང་སྟེ། དེ་ཡང་བདེན་པ་རང་རང་གི་ཆོས་ཤེས་བར་ཆད་མེད་ལམ། སྐབས་ཁོ་ནར་སྤང་བར་འདོད་དོ། །དེས་ན་མཐོང་ལམ་སྐད་ཅིག་བཅུ་དྲུག་པོ་འདི་ལ། ཐེག་དམན་ལྟར་ན་ཉན་ཐོས་སྡེ་པ་བཅོ་བརྒྱད་རྣམས་ཀྱང་བཞེད་པ་མི་འདྲ་བ་མང་དུ་ཡོད་པར་གསུངས་ལ། ཐེག་ཆེན་ལའང་སློབ་དཔོན་སེང་གེ་བཟང་པོ་ནི། སྤྱིར་ཁ་ཅིག་སོ་སོར་རྟོག་པའི་སྐད་ཅིག་ལ་ལྟོས་ནས་བཅུ་དྲུག་རིམ་གྱིས་འབྱུང་ཞིང༌། དེ་ཁོ་ན་ཉིད་ཀྱི་སྐད་ཅིག་ལ་ལྟོས་ན་སྐད་ཅིག་གཅིག་ཏུ་བཞེད་པ་དང༌། ཡང་ཁ་ཅིག་སོ་སོར་རྟོག་པའི་སྐད་ཅིག་དང་དེ་ཁོ་ན་ཉིད་ཀྱི་སྐད་ཅིག་གཉིས་ཀར་སྐད་ཅིག་མ་གཅིག་ཏུ་བཞེད་པའི་ལུགས་གཉིས་ཡོད་པར་བཤད་ཅིང༌། རང་ལུགས་ལ་སྐད་ཅིག་མ་བཅུ་དྲུག་རིམ་གྱིས་འབྱུང་བར་བཞེད། དེ་ཡང་སོ་སོར་རྟོག་པའི་སྐད་ཅིག་ཅེས་པ་ནི། གཏན་ལ་དབབ་བྱའི་ཡུལ་ལ་ལྟོས་ན། བདེན་པ་བཞི་ཀ་ལ་གཅིག་ཆར་སྒྲོ་འདོགས་ཆོད་པ་མི་སྲིད་པས། བདེན་བཞི་སོ་སོར་སྒྲོ་འདོགས་རིམ་གྱིས་གཅོད་པ་ལ་ལྟོས་ནས་སྐད་ཅིག་བཅུ་དྲུག་ཡིན་ལ། དེ་ཁོ་ན་ཉིད་ཀྱི་སྐད་ཅིག་ཅེས་པ་རྟོགས་བྱ་ཆོས་ཉིད་ལ་དབྱེ་བ་མེད་པས། བདག་མེད་མངོན་སུམ་མཐོང་བའི་སྐད་ཅིག་གཅིག་ཏུ་འདོད་པ་ཡིན་ནོ། །ཀླུ་སྒྲུབ་ཀྱི་ལུགས་མཉམ་གཞག་གི་སྐབས་སུ་ཡེ་ཤེས་སྐྱེ་ཚུལ་དང༌། ཐོག་མེད་ཀྱི་ལུགས་རྗེས་ཐོབ་ཀྱི་སྐབས་ངེས་པ་འདྲེན་ཚུལ་ཡིན་ལ་མི་འགལ་ཞིང༌། ཐེག་ཆེན་མན་ཆད་འདི་གཉིས་ཀྱི་རྗེས་སུ་འབྲང་དགོས་སོ། མཆན། འཕགས་པ་ཐོགས་མེད་ཀྱི་གཞུང་ལས། བདེན་བཞི་སྐད་ཅིག་བཅུ་དྲུག་འདི་ལྟར་བཞེད་དེ། དང་པོ་སྡུག་བསྔལ་ཆོས་བཟོད་ཀྱི་སྐབས་སུ་མཐོང་སྤང་རྣམས་སྤང༌། ཆོས་ཤེས་ཀྱི་སྐབས་སུ་གཉེན་པོ་ཡེ་ཤེས་སྐྱེ། རྗེས་ཐོབ་ཀྱི་ཆོས་བཟོད་ཆོས་ཤེས་ཀྱི་ཡེ་ཤེས་གཉིས་པོ་དེ་ཡང་འཕགས་པའི་ལམ་གྱི་རྟེན་གཞི་ཡིན་ནོ་སྙམ་དུ་ངེས་པར་བྱེད། རྗེས་ཤེས་ཀྱིས་རྗེས་བཟོད་དེ་ཡང་འཕགས་པའི་ལམ་གྱི་རྟེན་གཞི་ཡིན་ནོ་སྙམ་དུ་ཤེས་པའོ། །དེས་ན་ཆོས་བཟོད་ཆོས་ཤེས་གཉིས་ནི་ཡུལ་བདེན་པ་ལ་དམིགས་པས་བཟུང་བའི་ཡུལ་ཡིན་ལ། རྗེས་བཟོད་རྗེས་ཤེས་གཉིས་ནི་ཡུལ་ཅན་ཡེ་ཤེས་ལ་དམིགས་པས་འཛིན་པའི་ཡུལ་ཅན་ཡིན་ནོ་ཞེས་བཞེད། འདིའི་ལུགས་ཀྱིའང་བཅུ་དྲུག་ཏུ་བཞག་པ་རྗེས་ཐོབ་ལ་ངེས་པ་འདྲེན་ཚུལ་གྱི་དབང་དུ་བྱས་ནས་གཅིག་གིས་གཅིག་ལ་བཤད་པ་སོགས།བསྟན་པ་གནས་པ་སྤྲོས་པ་ལ་དགའ་བའི་ཕྱིར་རྣམ་གྲངས་སུ་བཞག་པ་ཙམ་ཡིན་གྱི་མཉམ་བཞག་རང་ངོ་ལ་ལྟོས་ནས་སྤྲོས་མེད་ཀྱི་དབང་དུ་སྐད་ཅིག་མ་གཅིག་གོ་ཞེས་བཞེད་དོ། །སློབ་དཔོན་ཀླུ་སྒྲུབ་ཀྱི་གཞུང་ལས་ནི། སྐད་ཅིག་བཅུ་དྲུག་ཏུ་བཞག་པ་ནི། བདེན་བཞི་ལ་སྒྲོ་འདོགས་ཆོད་ཚུལ་གྱི་ཆ་ནས་དབྱེ་བ་ཙམ་སྟེ། དེ་ཡང་ཆོས་བཟོད་ཀྱིས་བདེན་བཞིའི་ཆོས་ཉིད་ལ་ཡིད་ཆེས་ནས་མི་སྐྲག་པའི་བཟོད་པ་ཐོབ། ཆོས་ཤེས་ཀྱིས་བདེན་བཞིའི་ཆོས་ཉིད་མངོན་སུམ་དུ་མཐོང༌། རྗེས་བཟོད་ཀྱིས་ལམ་རྗེས་ཐོབ་ཀྱི་ཚེ་ཡང་ཆོས་ཉིད་ལ་མི་སྐྲག་པའི་ནུས་པ་ཐོབ། རྗེས་ཤེས་ཀྱིས་ལམ་རྗེས་ཐོབ་ཀྱི་ཚེ་ན་བདེན་བཞིའི་ཆོས་ཉིད་ཇི་ལྟ་བར་ཤེས་པའི་ནུས་པ་ཐོབ་པ་ལ་ལྟོས་ནས་བཞག་པ་ཡིན་ལ། དོན་དུ་ཤེས་བྱའི་ཆོས་ཐམས་ཅད་སྐྱེ་མེད་སྤྲོས་བྲལ་དུ་མཐོང་བའི་སྐད་ཅིག་མ་ལ་དབྱེ་བ་མེད་དེ། མདོ་ལས། སྐྱེ་བ་མེད་པ་བདེན་པ་གཅིག་ཡིན་ཏེ། །བྱིས་པ་རྣམས་ནི་བདེན་པ་བཞི་ཞེས་སྨྲ། །བྱང་ཆུབ་སྙིང་པོར་བཞུགས་ན་བདེན་གཅིག་ཀྱང༌། །གྲུབ་པ་མེད་ན་བཞི་ལྟ་ག་ལ་ཡོད། །ཅེས་གསུངས་སོ། །དེས་ན་མཉམ་བཞག་དང་རྗེས་ཐོབ་ཀྱི་སྐད་ཅིག་གཅིག་ལ་ལྡོག་ཆས་དབྱེ་བ་ཙམ་དུ་བཞེད་དོ། །སྒོམ་སྤང་རྣམས་ནི་ལམ་གོམས་པའི་སྟོབས་ཀྱིས་གཉེན་པོ་སྒོམ་ལམ་ཆུང་ངུའི་ཆུང་ངུ་ནས་རིམ་གྱིས་སྐྱེས་པས། སྤང་བྱ་ཆེན་པོའི་ས་བོན་ནས་རིམ་གྱིས་སྤང་བར་འདོད། དེ་ཡང་མཐོང་སྤང་ཀུན་བརྟགས་དང༌། སྒོམ་སྤང་ལྷན་སྐྱེས་ཞེས་པའི་དོན་ཀུན་བརྟགས་ནི་བདག་ཏུ་ལྟ་བ་དང༌། རྟག་ཆད་དུ་ལྟ་བ་དང༌། ལོག་པར་ལྟ་བ་སོགས་གྲུབ་མཐའ་ངན་པས་བཏགས་པ་རྣམས་ཡིན། དེ་ཡང་ལམ་ངན་པ་ལ་ཞུགས་པའི་གང་ཟག་རྣམས་ལ་མངོན་གྱུར་དུ་ཡོད་ལ། གྲུབ་མཐས་བློ་མ་བསྒྱུར་བ་རྣམས་ལའང་ས་བོན་ཡོད་དོ། །ལྷན་སྐྱེས་ནི་ཡེ་ནས་རང་རྒྱུད་ལ་ཡོད་པའི་བདག་ལྟ་དང་ཆགས་སོགས་ཉོན་མོངས་པ་རྣམས་ཡིན་ཏེ། ཡུལ་ལ་དམིགས་པའི་ཆགས་པ་སོགས་སོ། །དེ་ནས་མཐོང་སྤང་གྲུབ་མཐའི་དབང་གིས་བཞག་པའི་རྣམ་བྱང་དང༌། ཀུན་ཉོན་ཕྱོགས་ཀྱི་དབྱེ་བས་རྒྱུ་འབྲས་ཀྱི་ཐ་སྙད་ལ་སྒྲོ་བཏགས་པའོ་ནི་བདེན་པའི་ཆོས་ཉིད་ལ་ལོག་པར་ཞུགས་ལ། སྒོམ་སྤང་བདེན་བཞིའི་ནང་མཚན་མིན་པའི་གཟུགས་མེད་ཀྱང་གྲུབ་མཐས་བཞག་པ་ལྟ་བུ་མ་ཡིན་པར་གང་སྣང་བའི་ཡུལ། མཆན། ནི་གཟུགས་སོགས་དབང་པོའི་ཡུལ་ན་ལོག་པར་ཞུགས་པ་ཡིན་ནོ། །དེས་ན་ཡུལ་ལ་དམིགས་པའི་ཞེ་སྡང་དྲག་པོ་ལྟ་བུ་སྒོམ་སྤང་ཡིན་ཡང༌། མཐོང་ལམ་སྐྱེས་པའི་ཡེ་ཤེས་ཉིད་མཐུ་ཆེ་བའི་དབང་གིས་ཉོན་མོངས་དེ་དག་ས་བོན་རུལ་བ་ལྟར་བྱས་པས་འཕགས་པ་ལ་མེད་པས་སྒོམ་སྤང་ཡིན་ཀྱང་འཕགས་ལམ་ཐོབ་པ་ནས་རྒྱུད་ལ་མེད་པར་བཞེད་དོ། །མཐོང་སྤང་ནི་དེ་ལྟར་གྲུབ་མཐས་གསར་དུ་བཏགས་པའི་སྤང་བྱ་ཡིན་པས། མཐོང་ལམ་སྐྱེས་པའི་གང་ཟག་དེ་ནི་སྐྱེ་བ་ཐམས་ཅད་དུ་གཞན་ཕྱི་རོལ་པ་ལ་སོགས་པས་བློ་གཏན་ནས་བསྒྱུར་མི་ཐུབ་པ་ཞིག་དགོས་པ་ཡིན་ནོ། །རྟོགས་པའི་ཡོན་ཏན་ལ། དགེ་བའི་ལས་ཀྱི་རྣམ་པར་སྨིན་པ་ལས་བྱུང་བའི་ཤའི་སྤྱན་སོགས་སྤྱན་ལྔ་དང༌། བསམ་གཏན་གྲུབ་པའི་ཏིང་ངེ་འཛིན་གྱི་སྟོབས་ལས་ཐོབ་པའི་རྫུ་འཕྲུལ་གྱི་མངོན་ཤེས་སོགས་དྲུག་དང༌། རང་གིས་ཇི་ལྟར་འདོད་པ་བཞིན་མཛད་པ་ལ་མཐུ་ཐོགས་པ་མེད་པས་ཚེ་ལ་དབང་བ་སོགས་དབང་བཅུ། དྲན་པ་དང་ཤེས་རབ་ཁྱད་པར་ཅན་གྱི་རང་བཞིན་གཟུངས་ཀྱི་སྒོ་ནི་ཆོས་ཐམས་ཅད་སྐྱེ་མེད་དུ་གཏན་ལ་ཕེབས་པ་བཟོད་པ་ཐོབ་པ་སྒོའི་གཟུངས། ཏིང་ངེ་འཛིན་དང་ཤེས་རབ་ཀྱི་མཐུས་གྲུབ་པའི་སྔགས་ཀྱི་གཟུངས། ཆོས་ཀྱི་ཚིག་དོན་ཐམས་ཅད་མི་བརྗེད་པར་འཛིན་པ་ཚིག་གི་གཟུངས། ཆོས་ཐམས་ཅད་ཀྱི་དོན་མི་བརྗེད་པར་འཛིན་པ་དོན་གྱི་གཟུངས་ཏེ་བཞི་དང༌། ཤེས་བྱ་ཐམས་ཅད་མཁྱེན་པ་ལ་ཐོགས་པ་མེད་པའི་མོས་སོགས་སྟོབས་བཅུ་དང༌། རང་གཞན་གྱི་དོན་དུ་དམ་བཅའ་བ་ལ་ཕས་ཀྱི་རྒོལ་བས་མི་འཇིགས་པ་བཞི་དང༌། གདུལ་བྱའི་དོན་བྱེད་པའི་ཐབས་ཐམས་ཅད་སོ་སོ་ཡང་དག་པར་རིག་པ་བཞི་དང༌། སྐུ་ལ་འཁྲུལ་པ་མེད་པ། གསུང་ཅ་ཅོ་མེད་པ། ཐུགས་དྲན་པ་ཉམས་པ་མི་མངའ་བ། མཉམ་པར་མ་བཞག་པ་མི་མངའ་བ། ཐ་དད་པའི་འདུ་ཤེས་མི་མངའ་བ། སོ་སོར་མ་བརྟག་པའི་བཏང་སྙོམས་མི་མངའ་བ་སྟེ་སྤྱོད་པས་བསྡུས་པ་དྲུག་དང༌། གཞན་དོན་ལ་དགྱེས་པའི་འདུན་པ། འགྲོ་དོན་མི་འདོར་བའི་དྲན་པ། མི་ངལ་བའི་བརྩོན་འགྲུས། ཐམས་ཅད་མཁྱེན་པའི་ཤེས་རབ། རྩེ་གཅིག་པའི་ཏིང་འཛིན། སྒྲིབ་གཉིས་བག་ཆགས་ལས་གྲོལ་བའི་རྣམ་གྲོལ། ཐམས་ཅད་མཁྱེན་པའི་ཡེ་ཤེས་ཏེ་རྟོགས་པ་དྲུག །དུས་གསུམ་ལ་ཆགས་ཐོགས་མེད་པར་གཟིགས་པ་སྟེ་ཡེ་ཤེས་ཀྱི་གསུམ། སྐུ་གསུང་ཐུགས་ཀྱི་ཕྲིན་ལས་ལ་ཡེ་ཤེས་ཀྱི་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བ་གསུམ་སྟེ། ཉན་རང་དགྲ་བཅོམ་པ་རྣམས་དང་ཡང་ཐུན་མོང་དུ་མ་གྱུར་པ་མ་འདྲེས་པའི་ཆོས་བཅོ་བརྒྱད་རྫོགས་པ་ནི་སངས་རྒྱས་ཏེ། སྐྱབས་འགྲོ་བདུན་ཅུ་པ་ལས། མ་རིག་གཉིད་ལས་སངས་ཕྱིར་དང༌། །ཤེས་བྱ་ལ་ཡང་བློ་རྒྱས་པས། །སངས་རྒྱས་པདྨའི་འདབ་ལྟར་རྒྱས། །ཞེས་སོ། །ཡོན་ཏན་གྱི་རྣམ་པ་ཀུན་གྱི་མཆོག་ཟག་མེད་ཆོས་སྡེ་ཚན་ཉེར་གཅིག་གི་ཡེ་ཤེས་དམ་པ་འཁོར་འདས་རོ་གཅིག་པ་དང་ལྡན་པ་ནི་ཆོས་ཀྱི་སྐུའོ། །གཞིའི་གནས་ལུགས་ཀྱི་སྣང་ཆ་སྟོང་གཟུགས་ཀྱི་སྐུར་ས་བཅུའི་དབང་ཕྱུག་ཆེན་པོ་རྣམས་ཀྱི་འཁོར་ལ་སྣང་བའི་ངེས་པ་ལྔ་ལྡན་གྱི་ལོངས་སྤྱོད་རྫོགས་པའི་སྐུ་དང༌། ཐུན་མོང་གདུལ་བྱའི་ངོར་སྟོན་པ་སྤྲུལ་པའི་སྐུའོ། །ཆོས་ནི་བསོད་ནམས་སྦྱིན་སོགས་ཐབས་ཀྱི་ཆ་དང༌། ལམ་ནི་བདག་མེད་རྟོགས་པའི་ཤེས་རབ་ཀྱི་ཆ་དང༌། མྱ་ངན་འདའ་བ་ནི་ལམ་གྱི་མཐུས་སྤང་བྱ་དང་བྲལ་བའི་ཆ་སྟེ་གསུམ་ནི་ལུང་གི་ཆོས་བརྗོད་བྱའི་དོན་ཉིད་དེ། དེ་ལའང་གང་དྲི་མ་བྲལ་བ་འབྲས་བུའི་རང་བཞིན་དང༌། གང་གིས་དྲི་མ་འབྲལ་བྱེད་བྱ་བ་དང་ལྡན་པའི་རང་བཞིན་གཉིས་སུ་གནས་པ་ལ། རྣམ་པར་བྱང་བའི་བདེན་གཉིས་ཞེས་བྱ་སྟེ་འགོག་ལམ་རྣམ་གཉིས་ཡིན་ཞིང༌། བསོད་ནམས་ནི་ལམ་གྱི་གྲོགས་ཡིན་ནོ། །བརྗོད་བྱ་བསླབ་པ་གསུམ། རྗོད་བྱེད་སྡེ་སྣོད་གསུམ་ལ་ལྟོས་ཏེ་ལུང་རྟོགས་ཆོས་གཉིས་སུ་བཞག་ལ། ལུང་གི་ཆོས་ནི་དབྱེ་ན་མདོ་སྡེ་དབྱངས་སྙན་སོགས་གསུང་རབ་ཡན་ལག་བཅུ་གཉིས་དང༌། དུག་གསུམ་གྱི་གཉེན་པོའི་སྒོ་ནས་བསྡུ་ན་འདུལ་བའི་སོགས་སྡེ་སྣོད་གསུམ་དུ་གདུལ་བྱའི་ངོར་དེ་བཞིན་གཤེགས་པའི་བདག་རྐྱེན་ལས་ཤར་བ་ཡིན་ལ། དེ་ལས་ཀྱང་ཐབས་མང་བ་དང་ཟབ་པ་སོགས་ཀྱི་ཆེ་བ་དུ་མ་དང་ལྡན་པ་རིག་འཛིན་སྡེ་སྣོད་ཡིན་ཏེ། ཀུན་བྱེད་ལས། ཉོན་མོངས་འདོད་ཆགས་འདུལ་བའི་གཉེན་པོ་རུ། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་ཞེ་སྡང་འདུལ་བའི་གཉེན་པོ་རུ། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་གཏི་མུག་འདུལ་བའི་གཉེན་པོ་རུ། །མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། །ཞེས་དང༌། ཁྱད་པར་རིག་པ་འཛིན་པའི་སྐབས། །ཐམས་ཅད་འདུལ་བའི་གཉེན་པོར་གསུངས་པ་ནི། །སྡེ་སྣོད་བཞི་པ་ཉི་ཁྲི་ཆིག་སྟོང་གསུངས། །ཞེས་སོ། །སྡེ་སྣོད་དེ་རྣམས་གང་ལས་རྩོམ་པའི་གཞི་ཡི་གེ་དང༌། དེ་འདུས་པ་ལས་མིང་དང༌། མིང་འདུས་པ་ལས་ཚིག་དང༌། ཚིག་འདུས་པ་ལས་ཤྭ་ལོ་ཀ་དང༌། ལེའུ། བམ་པོ་ནས་གླེགས་བམ་རྣམས་གྲུབ་སྟེ་ཡི་གེར་གནས་པ་ནི། སྐྱབས་སུ་འགྲོ་བར་དམ་བཅའ་བའི་དམ་ཚིག་གི་རྟེན་ཡིན་ནོ། །རྟོགས་པའི་ཆོས་ནི་ཚོགས་ལམ་ཆུང་ངུར་དྲན་པ་ཉེར་བཞག་བཞི་ནས་བཟུང༌། འབྲིང་ཡང་དག་སྤོང་བ་བཞི། ཆེན་པོར་རྫུ་འཕྲུལ་གྱི་རྐང་པ་བཞི་དང༌། རིམ་པ་བཞིན་ལམ་ལྔའི་ཡོན་ཏན་མཐའ་དག་དང༌། དེ་ལྟར་འཕགས་རྒྱུད་ཀྱིས་བསྡུས་པའི་སྤངས་པ་དང་རྟོགས་པའི་ཡེ་ཤེས་དེ་རྣམས་སྙིང་པོའི་ཁམས་མངོན་དུ་གྱུར་པ་ལས་ཡིན་གྱི། བསྐྱེད་བྱ་སྐྱེད་བྱེད་ཀྱི་རྒྱུ་འབྲས་ཅན་མིན་ཏེ་སྒྲིབ་པ་བྲལ་སྟོབས་ཀྱིས་ཆོས་ཉིད་མངོན་དུ་གྱུར་པ་ལས་གཞན་མ་ཡིན་ནོ། །དེའི་དྲི་མ་སེལ་བྱེད་ཀྱི་མན་ངག་ཟབ་མོ་སྒོ་གསུམ་གནད་དུ་བསྣུན་ཏེ་ལྷན་སྐྱེས་ཀྱི་ཡེ་ཤེས་འཆར་བྱེད་གདན་གསུམ་ལྷར་བསྒོམ་པའི་མཚན་བཅས་བསྐྱེད་རིམ་དང༌། མཚན་མེད་རྫོགས་རིམ་གྱིས་ཡེ་ཤེས་བསྐྱེད་པ་དང༌། མི་བརྗེད་པའི་གཟུངས་དང༌། ཟད་པར་གྱི་སྐྱེ་མཆེད་བཅུ་དང༌། མཐར་གྱིས་གནས་པའི་སྙོམས་འཇུག་དགུ་ལ་སོགས་པའི་ཡོན་ཏན་ཐམས་ཅད་ཀྱི་ངོ་བོ་ནི་རྟོགས་པའི་ཆོས་ཏེ་དེ་དག་ཀྱང་སློབ་ལམ་ཚོགས་སྦྱོར་མཐོང་སྒོམ་བཞི་དང༌། མི་སློབ་ལམ་གྱི་དངོས་གཞིར་གནས་པའི་གང་ཟག་རྣམས་ཀྱི་རྒྱུད་ལ་ལྡན་པའི་ཡོན་ཏན་གྱི་བྱེ་བྲག་དག་ལ་བྱའོ། །ལམ་དེ་དག་གི་ཡོན་ཏན་གྱི་རྟེན་དུ་གྱུར་པ་རྒྱུ་མཚན་ཉིད་ཀྱི་ཐེག་པ་ཡི་ས་བཅུ། འབྲས་བུ་སྔགས་ཀྱི་ཐེག་པའི་ས་བཅུ་གསུམ་ནི་མདོ་ཡི་ས་བཅུའི་ཐོག་བཅུ་གཅིག་ཀུན་ཏུ་འོད་སྤྲུལ་སྐུའི་ས། བཅུ་གཉིས་མ་ཆགས་པདྨ་ཅན་ལོངས་སྐུའི་ས། བཅུ་གསུམ་འཁོར་ལོ་ཚོགས་ཆེན་ཆོས་སྐུའི་ས་དང༌། འདུན་པ་སེམས་དང༌། རིགས་ཆེན་འབྱིན་པ་ལ་སོགས་པ་རྡོ་རྗེ་ཐེག་པའི་ས་ཡི་རིགས་དབྱེ་རྒྱུད་སྡེ་སོ་སོ་ནས་གསུངས་པ་དཔག་ཏུ་མེད་དོ། །དེ་ལྟ་བུའི་ས་ལམ་གང་གི་གནས་སྐབས་སྤངས་རྟོགས་ཀྱི་ཡེ་ཤེས་རྒྱུད་ལ་བརྟེན་པའོ། །སྤྱིར་དགེ་འདུན་གྱི་ངོ་བོ་ནི། རྟོགས་བྱ་ཡང་དག་པའི་དོན་ཅི་རིགས་པ་རིག་པ་དང༌། སྤང་བྱ་སྒྲིབ་གཉིས་ཀྱི་དྲི་མ་ཅི་རིགས་པ་ལས་གྲོལ་བའི་རིག་གྲོལ་གཉིས་ལྡན་ཏེ། ཉན་རང་ཞུགས་གནས་གཅིག་ཏུ་བྱས་ཏེ་སྐྱེས་བུ་ཟུང་བཞིའམ། རེ་རེ་ལ་ཞུགས་གནས་གཉིས་རེ་སོ་སོར་ཕྱེས་ན་གང་ཟག་ཡ་བརྒྱད་དེ་ཐེག་དམན་བརྒྱད་དོ། །ཐེག་ཆེན་རྒྱལ་སྲས་སར་གནས་པའི་གང་ཟག་མཐའ་དག་པའི་རང་རང་གི་སའི་ཡོན་ཏན་བརྗོད་ཀྱིས་མི་ལང་ཡང༌། མྱང་འདས་སུ་བགྲོད་པའི་ལམ་དང་སྲིད་ཞི་གཉིས་ཀྱི་མཐའ་ལས་སྐྱོབ་པའི་ངོ་བོ་ནི་དམ་པའི་ཆོས་སོ། །ཆོས་ནི་སྟོན་པ་ལས་བྱུང་ཞིང༌། དེ་ཉིད་རང་རྒྱུད་ལ་སྒྲུབ་པར་བྱེད་པའི་གྲོགས་སམ་བསླབ་པ་རིན་པོ་ཆེ་གསུམ་པོའི་རྟེན་གནས་སུ་གྱུར་པ་ནི། དགེ་འདུན་དཀོན་མཆོག་ཡིན་པའི་ཕྱིར། དཀོན་མཆོག་གསུམ་ཞེས་གྲངས་ངེས་པར་ཐར་པ་དོན་དུ་གཉེར་བ་རྣམས་ཀྱི་སྐྱབས་ཀྱི་ཡུལ་དུ་གྲུབ་སྟེ། སྐྱབས་འགྲོ་བདུན་ཅུ་པར། སངས་རྒྱས་ཆོས་དང་དགེ་འདུན་ནི། །ཐར་པ་འདོད་པ་རྣམས་ཀྱི་སྐྱབས། །ཞེས་སོ། །དེ་ལ་བསྟན་བཅོས་འདི་ཉིད་ཀྱི་སྐབས་སུ་ཐེག་ཆེན་སྐྱབས་འགྲོ་ལ་རྒྱུ་མདོ་ཡི་སྐྱབས་འགྲོ་དང༌། གསང་སྔགས་འབྲས་བུའི་སྐྱབས་འགྲོ་ཡི་རྣམ་བཞག་ཁ་ཙམ་མིན་པར་སྙིང་ཐག་པ་ནས་དམ་བཅའ་བ་ཞིག་དགོས་པ་དེ་ལ་གཉིས་ལས། དུས་གཞན་གྲངས་མེད་གསུམ་ལ་སོགས་པའི་མཐར་མཆོག་གསུམ་རང་རྒྱུད་ལ་འགྲུབ་པར་འདོད་ནས་སྒྲུབ་པར་དམ་བཅའ་བ་རྒྱུ་མཚན་ཉིད་ཀྱི་ཐེག་པའི་སྐྱབས་འགྲོ་མཆོག་གསུམ་ཀུན་ཚང་སངས་རྒྱས་ཉག་གཅིག་ཡིན་པས་འབྲས་བུ་དོན་དུ་གཉེར་བྱ་དེ་ཁོ་ན་ཉིད་དུས་མ་འོངས་པར་མི་ལྟོས། འབྲས་བུ་གཞན་ནས་མི་འཚོལ་བར་ད་ལྟར་མཆོག་གསུམ་གྱི་ངོ་བོར་གྲུབ་ཟིན་པ་རང་གི་སེམས་ཉིད་མངོན་དུ་བྱ་བར་དམ་བཅའ་བ་ནི་འབྲས་བུའི་སྐྱབས་འགྲོ་སྟེ། རྡོ་རྗེ་ཐེག་པ་དག་གི་ཁྱད་ཆོས་ཡིན་ཏེ་ལྟ་བའི་དབང་གིས་སོ། །མདོ་སྔགས་གཉིས་ལས་དང་པོ་རྒྱུ་མཚན་ཉིད་ཐེག་ཆེན་པ་ཡི་ཡུལ་ནི། དཀོན་མཆོག་རྣམ་པ་གསུམ་སྟེ་སྐུ་བཞི་ཡེ་ཤེས་ལྔ་ལྡན་གྱི་སངས་རྒྱས། ལུང་རྟོགས་ཀྱི་བདག་ཉིད་དམ་ཆོས། སར་གནས་འཕགས་པའི་དགེ་འདུན་ཏེ་སྟོན་པ་ལམ་གྲོགས་ཀྱི་ཚུལ་དུ་རྒྱུ་ཡི་སྐྱབས་འགྲོ་དང་མ་འོངས་པར་མཆོག་གསུམ་རང་རྒྱུད་ལ་འབྱོན་པར་སྨོན་པ་འབྲས་བུའི་སྐྱབས་འགྲོའོ། །གསང་སྔགས་རྡོ་རྗེ་ཐེག་པའི་སྐབས་སུ་དེ་ཡི་ངོ་བོ་བླ་མར་འདུས་ཏེ་རྩ་བའི་བླ་མ་སངས་རྒྱས་ཀུན་དངོས་དེའི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཏེ་དཀོན་མཆོག་ཀུན་འདུས་སུ་ཤེས་ཤིང་བསྐྱབ་བྱ་དང་སྐྱོབ་བྱེད་ཀྱང་ཐ་དད་དུ་མི་འཛིན་པར་གཉིས་མེད་ཀྱི་ངང་ནས་སྐྱབས་སུ་འགྲོ་བ་ནི་རྒྱུ་ཡི་སྐྱབས་འགྲོ་དང༌། རང་སེམས་འོད་གསལ་བའི་ཡེ་ཤེས་སྐྱོན་ཡེ་ཟད་དུ་གནས་པས་དག་བྱ་དང་བྲལ་ཞིང༌། ཡོན་ཏན་ཡེ་ལྡན་དུ་གནས་པས་གསར་ཐོབ་དང་བྲལ་བ་ནི་སངས་རྒྱས་དང༌། ཡེ་ནས་འགྱུར་བ་མེད་པའི་ཆོས་ཉིད་དྲི་བྲལ་གྱི་ངོ་བོ་ནི་ཆོས། ཡོན་ཏན་དབྱེར་མེད་པར་འདུས་པ་ནི་དགེ་འདུན་ཏེ། ད་ལྟ་ཉིད་ནས་རང་སེམས་དཀོན་མཆོག་གསུམ་གྱི་བདག་ཉིད་དུ་ཤེས་པ་ནི་འབྲས་བུའི་སྐྱབས་འགྲོའོ། །སྐྱབས་སུ་འགྲོ་བ་པོའི་སྐྱེས་བུ་ལའང་བློ་རིགས་གསུམ་སྟེ། རང་དོན་ཉི་ཚེ་བ་བསྒྲུབ་པར་འདོད་པ་དང༌། རང་དོན་མཆོག་བསྒྲུབ་པར་འདོད་པ་དང༌། གཞན་དོན་བསྒྲུབ་པར་འདོད་པ་བླ་ན་མེད་པ་ཡི་ཀུན་སློང་སྟེ་རྣམ་པ་གསུམ་ལས། དང་པོ་སྐྱེས་བུ་ཆུང་ངུ་ནི་ངན་འགྲོ་ལ་འཇིགས་ནས་མངོན་མཐོ་ལྷ་མིའི་བདེ་འབྲས་ཐོབ་ཀྱི་བར་དུ་མཆོག་གསུམ་ལ་སྐྱབས་སུ་འགྲོ། འབྲིང་དུ་གྱུར་པ་ཉན་རང་གཉིས་ཀྱི་སྲིད་པའི་སྡུག་བསྔལ་དེས་འཇིགས་ནས་རང་གཅིག་པུ་ཐར་པ་མྱང་འདས་ཀྱི་གོ་འཕང་དོན་དུ་གཉེར་ནས་གནས་སྐབས་ཇི་སྲིད་འཚོ་ཡི་བར་དང༌། མཐར་ཐུག་ནི་ཉན་རང་དགྲ་བཅོམ་པའི་འབྲས་བུ་ཐོབ་པའི་བར་དུ་མཆོག་གསུམ་ལ་སྐྱབས་སུ་འགྲོ། ཐེག་པ་ཆེན་པོ་ནི་གཞན་དོན་སྤངས་ཏེ་རང་གཅིག་པུ་དོན་དུ་གཉེར་བའི་ཞི་བདེའི་བློ་ཐ་ཆད་པ་དེས་འཇིགས་ཏེ། འཁོར་བ་ན་གནས་པའི་སེམས་ཅན་ཐམས་ཅད་མ་ལུས་པར་དབུགས་འབྱིན་ཆེན་པོས་སངས་རྒྱས་ཀྱི་ས་ལ་བསྒྲལ་བའི་ཕྱིར། བྱང་ཆུབ་ཆེན་པོ་ཐོབ་ཀྱི་བར་སྐྱབས་སུ་འགྲོ་བ་ཡིན་ནོ། །དེ་ཡང་ཁྱད་པར་ངེས་དོན་གྱི་མདོ་སྡེ་དང་སྔགས་ཀྱི་བརྗོད་དོན་ཟབ་མོ་ཁོང་དུ་ཆུད་པ་རྣམས་ཀྱིས། རང་གི་སེམས་ཀྱི་གཤིས་ལུགས་ལ་འཁོར་བའི་སྐྱོན་རང་མཚན་པ་བྲལ་བ་དང༌། མྱང་འདས་ཀྱི་ཡོན་ཏན་རང་མཚན་པ་ཐོབ་པ་དང་བླང་དོར་གྱི་སྒོ་ནས་རྒྱུ་འབྲས་སྔ་ཕྱི་ཅན་དུ་འབྱུང་བའི་ཀུན་རྫོབ་འདུས་བྱས་པ་བསླུ་བ་ཐམས་ཅད་ཡེ་ནས་སྤངས་པ་བདེ་གཤེགས་སྙིང་པོའི་རང་ཞལ་ལྟ་བ་ནི་འབྲས་བུའི་སྐྱབས་འགྲོ་བླ་ན་མེད་པའོ། །རྨི་ལམ་གྱི་ལམ། བག་ཆགས་ཀྱི་ལམ། ལས་ཀྱི་མཐའི་ལམ། འཁྲུལ་འཁོར་མ་ངེས་པའི་ལམ། རྒྱུ་དང་འབྲས་བུ་སོ་སོར་མ་ངེས་པའི་ལམ་སྟེ་ལམ་རྒྱུད་ལྔར་འགྲོ་བ་རྣམས་བརྒྱུད་ཅིང་འཁྱམས་པའི་དུས་སུ། སངས་རྒྱས་བཅོམ་ལྡན་འདས་རྣམས་ཀྱིས་ནི་ཆགས་ཐོགས་མེད་པར་སེམས་ཅན་གྱི་ཁམས་ལ་ཐུགས་རྗེ་དུས་ལས་སྐད་ཅིག་ཙམ་ཡང་ཡོལ་བ་མེད་པའི་ཚུལ་ནི། ལས་བརྒྱ་པ་ལས། རྒྱ་མཚོ་ཆུ་སྲིན་གནས་པའི་རླབས། །དུས་ལས་ཡོལ་བར་འགྱུར་སྲིད་ཀྱི། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་མི་མང་བ། །གསུངས་པ་ལྟར་ལ། ཡོན་ཏན་རྒྱ་ཆེ་བའི་ངོས་ནས་དེ་བཞིན་གཤེགས་པའི་བ་སྤུའི་ཁུང་བུ་གཅིག་གི་ཡོན་ཏན་ཀྱང་ཆ་ཤས་ཙམ་ལས་མཐའ་དག་ནི། སྤོབས་པའི་གཏེར་ཆེན་གྲོལ་བ་བྱང་ཆུབ་སེམས་དཔའ་ས་བཅུའི་དབང་ཕྱུག་ཆེན་པོས་བརྗོད་པར་བྱས་པས་ཀྱང་མཐར་མ་ཐུག་སྟེ། དཔེར་ན་ནམ་མཁའ་ལྡིང་གི་བྱ་ལམ་སྟེ་ནམ་མཁའི་མཐའ་གཞལ་ཕྱིར་ཕྱིན་ཡང་གྲུབ་པ་སྟེ་ཐུག་པའི་མཐའ་མ་གཏུགས་པར་སླར་ས་ལ་འབབ་པ་དང་འདྲ་སྟེ་བརྗོད་མི་ནུས་སོ། །འདི་ན་འཁོར་བའི་རང་བཞིན་ཟོ་ཆུའི་འཁྱུད་མོ་བཞིན་སྲིད་པའི་རྩེ་ནས་མནར་མེད་པར་རྟེན་འབྲེལ་བཅུ་གཉིས་ཀྱི་འཁོར་ལོར་ཡང་ནས་ཡང་དུ་བརྒྱུད་དེ། ཚུལ་མིན་ཡིད་བྱེད་དང་ཉོན་མོངས་དྲག་པོས་ལས་ངན་བསགས་པའི་སྐྱོན་མཚང་ཆེན་པོ་ཅན་རྣམས་ནི། འཇིག་རྟེན་ན་ཆེ་དགུ་འཁོར་ལོས་སྒྱུར་རྒྱལ་དང༌། དབང་ཕྱུག་དང༌། ཚངས་པ་ལ་སོགས་པ་རྣམས་རང་ཉིད་འཁོར་བར་འཁོར་ཞིང་ཆོས་ཉིད་ཀྱི་བདེན་པ་ཡང་དག་མ་མཐོང་བ་གནས་སྐབས་ཙམ་དུའང་ཕན་གནོད་འདྲེས་མར་སྦྱིན་པའི་རང་བཞིན་ཅན་གྱི་སྐྱབས་གཞན་དེ་དག་གང་གིས་ཀྱང་གནས་སྐབས་མཐར་ཐུག་ཀུན་ཏུ་བསླུ་བར་མཐོང་ནས་ནི། སྲིད་པའི་སྡུག་བསྔལ་གྱིས་འཇིགས་པ་དང༌། དཀོན་མཆོག་ལ་དད་པ་དང༌། སྐྱབས་སུ་འགྲོ་མི་ཤེས་པའི་འགྲོ་བ་རྣམས་ལ་སྙིང་རྗེའི་ཀུན་སློང་རྣམ་པ་གསུམ་གྱིས་ཀུན་ནས་བསླངས་ཏེ། རང་དོན་ཡལ་བར་དོར་ནས་གཞན་སེམས་ཅན་གྱི་དོན་དུ་སེམས་བསྐྱེད་པ་སྐྱེས་བུ་ཆེན་པོའི་བློས། དཀོན་མཆོག་གསུམ་གྱི་ཡོན་ཏན་རྗེས་སུ་དྲན་ནས་རང་རྒྱུད་ལ་བསྒྲུབ་པར་འདོད་པས་ཚོགས་ཞིང་སྤྱན་སྔར་ཡན་ལག་བདུན་པ་དང་བཅས་སྐྱབས་སུ་འགྲོའོ། །དཔེ་ཇི་ལྟར་ན་ནམ་མཁའ་ལ་སྟེང་འོག་ཕྱོགས་ཆས་གཞལ་ཏེ་འདི་ཙམ་ཞེས་ཚད་བཟུང་མེད་པ་ལྟར། སྤྱིར་དཀོན་མཆོག་ལ་བརྟེན་པའི་དཀར་པོ་དགེ་བ་དང་ནག་པོ་མི་དགེ་བའི་ལས་གང་ཡིན་ཀྱང་ཡུལ་གཉན་པའི་ཕྱིར་འབྲས་བུ་ཕན་ཡོན་དང་ཉེས་དམིགས་ཀྱི་ཕ་མཐའ་མི་དཔོགས་ལ། བྱེ་བྲག་སྐྱབས་སུ་སོང་བའི་བསོད་ནམས་ནི་ཚད་མེད་དེ། དེ་གཟུགས་སུ་གྱུར་པ་ཞིག་ཡིན་ན། ནམ་མཁའི་ཁམས་ཐམས་ཅད་ཀྱིས་སྣོད་བྱས་ན་དེ་ཉིད་ཀྱིས་ཀྱང་བརྟེན་པར་ནུས་པ་མ་ཡིན་ཏེ། དྲི་མ་མེད་པའི་མདོ་ལས། སྐྱབས་སུ་སོང་བའི་བསོད་ནམས་གང༌། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ནས། །དེ་ནི་དེ་བས་ལྷག་པར་འགྱུར། །ཞེས་སོ། །མདོར་བསྡུ་ན་དེ་ལྟར་སྐྱབས་སུ་སོང་བ་ཙམ་ནས་ནང་པ་སངས་རྒྱས་པའི་ཁྱུར་འགྲོ་ལ་ཕྱི་ནང་གི་ཁྱད་པར་ཕྱེད་ཅིང༌། སོ་བྱང་སྔགས་ཀྱི་སྡོམ་པ་མཐའ་དག་གི་རྟེན། རང་བཞིན་དང་བཅས་པའི་སྡིག་སྒྲིབ་ཐམས་ཅད་ཀྱང་འཛད་ཅིང་དག་པར་འགྱུར་ལ། མི་དང་མི་མ་ཡིན་ལ་སོགས་པའི་གནོད་པའི་ཕྱོགས་ཀྱིས་འཚེ་བ་སྤོང་ལ། ངན་འགྲོའི་གཡང་སར་ལྟུང་བའི་རྒྱུ་ཡོད་ཀྱང་བསྲུང་ཏེ་གང་དུ་སྐྱེས་པའི་ཚེ་རབས་ཐམས་ཅད་དུ་དཀོན་མཆོག་གསུམ་གྱི་སྣང་བ་དང་མི་འབྲལ་ཞིང་བྱིན་གྱིས་བརླབས་པ་དང༌། སྲིད་ཞིའི་ཕུན་སུམ་ཚོགས་པ་ཐམས་ཅད་མཐོང་བའི་ཆོས་ཚེ་འདི་ལ་འོང་བ་དང༌། རྒྱུ་དམིགས་བཅས་བསོད་ནམས་ཀྱི་ཚོགས་རྫོགས་ནས་མཐར་ཐུག་ལོངས་སྐུ་དང་སྤྲུལ་སྐུ་སྟེ་གཟུགས་ཀྱི་སྐུ་གཉིས་འགྲུབ་བོ། །འབྲས་བུ་གཉུག་མའི་ངང་དུ་ངོ་འཕྲོད་པའི་སྐྱབས་འགྲོ་དོན་དམ་བསླུ་བ་མེད་པ་ནི་སེམས་སྣང་གིས་བསྡུས་པའི་ཆོས་ཐམས་ཅད་ངོ་བོ་གང་དུའང་མ་གྲུབ་པས་སྟོང་པ་ཉིད་དང༌། རྩལ་སྣང་མ་འགགས་ཀྱང་ངོས་བཟུང་དང་བྲལ་བས་དག་མ་དག་སོགས་ཀྱི་མཚན་མ་མེད་པ་དང༌། དེས་ན་དགག་སྒྲུབ་བླང་དོར་དང་བྲལ་བས་སྨོན་པ་མེད་པ་སྟེ་རྣམ་ཐར་སྒོ་གསུམ་གྱི་རང་བཞིན་འཁོར་འདས་ཐམས་ཅད་རོ་མཉམ་དུ་རྟོགས་ནས། སྐྱབས་གནས་གཞན་ལ་བརྟེན་ནས་འབྲས་བུ་ཕྱི་དུས་སུ་རེ་ཞིང་སྨོན་པ་མེད་དེ། རང་བཞིན་རྣམ་པར་དག་པའི་དབྱིངས་སེམས་ཀྱི་གནས་ལུགས་གཟུང་འཛིན་གྱི་རྟོག་པས་མི་ཕྱེད་པའི་འོད་གསལ་རྡོ་རྗེ་འདུས་མ་བྱས་པའི་ཡེ་ཤེས་ཀྱི་ངང་དུ་མཉམ་པར་འཇོག་པ་ཡིན་པའི་ཕྱིར་རོ། །དེ་ལྟར་འཁོར་གསུམ་ཞེན་པ་དང་བྲལ་བས་ཡེ་ཤེས་ཀྱི་ཚོགས་རྫོགས། རང་བཞིན་ཡེ་དག་དང་གློ་བུར་འཕྲལ་དག་སྟེ་དག་པ་གཉིས་ལྡན་ཆོས་ཀྱི་སྐུ་ཐོབ་བོ། །བསླབ་བྱ་རྒྱུ་ཡི་བསླབ་བྱ་དང་འབྲས་བུའི་བསླབ་བྱ་གཉིས་ལས། དང་པོ་རྒྱུ་ཡི་སྐྱབས་འགྲོའི་བསླབ་བྱ་ནི། དགོན་སྡེའི་དཔོན་དུ་བསྐོ་བ་ལྟ་བུའི་མངའ་རིས། གསེར་དངུལ་སོགས་སྦྱིན་པའི་བྱ་དགའི་སླད་དུ་མི་གཏོང་བར་སྨོས་ཅི་དགོས་ཏེ། ཁྱད་པར་དུ་གྱུར་པ་སྲོག་གི་ཕྱིར་ཡང་དཀོན་མཆོག་གསུམ་གཏོང་བ་མིན་ནོ། །ཁྱད་པར་དུ་དཀོན་མཆོག་གསུམ་པོ་དེ་ཡི་ངོ་བོ་བླ་མ་ཡིན་པས་དེར་སྐྱབས་སུ་སོང་ནས་རང་གི་བླ་མ་ལ་ལྟ་ཅི་སྨོས། དམ་པ་གཞན་རྣམས་ལའང་མི་སྙན་པ་བརྗོད་པ་སོགས་དང༌། དེའི་ཕྱོགས་མཐུན་ཡིན་པས་བཤེས་གཉེན་དམ་པ་ལ་རྫུན་དང་གཡོ་སྒྱུས་བསླུ་བ་དང༌། ངན་སྨྲས་དང་སྐྱོན་བརྗོད་ཀྱི་མི་སྙན་པ་སྒྲོགས་པ་སྤང་དགོས་སོ། །དེ་བཞིན་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་སོང་ནས་རིམ་པ་བཞིན་དུ་གཞན་སྐྱོབ་པའི་ནུས་པ་མེད་པར་མ་ཟད་བདག་ཉིད་ནི་ལས་ཀྱི་དབང་གིས་འཁོར་བར་དབང་མེད་དུ་འཁྱམས་ཤིང་འཁོར་བའི་ལྷ་ཚངས་པ་ཁྱབ་འཇུག་སོགས་ལའང་ཕྱག་མི་འཚལ་ན་མཁའ་ལ་རྒྱུ་བའི་ཡི་དྭགས་རྫུ་འཕྲུལ་ཅན་སོགས་ལ་སྨོས་ཅི་དགོས། སེམས་ཅན་གཞན་ལ་སྲོག་གཅོད་བརྡུང་བརྡེག་གཞོན་འགེལ་སོགས་ཀྱི་གནོད་པས་མི་འཚེ་ཞིང༌། གྲོགས་མུ་སྟེགས་ཅན་ནམ་དཀོན་མཆོག་ལ་ཡིད་མི་ཆེས་པ་དང་མི་འགྲོགས་ཤིང་དེ་དག་ལ་བློ་ཕྱོགས་པར་མི་བྱའོ། །དཀོན་མཆོག་གསུམ་གྱི་རྟེན་ལ་དཀོན་མཆོག་དངོས་ཀྱི་འདུ་ཤེས་བཞག་ནས་སྐུ་གཟུགས་བྲིས་འབུར་བཟང་ངན་གསར་རྙིང་གང་ཡང་རུང་བ་དང༌། གསུང་རྟེན་ཡིག་འབྲུ་གཅིག་ཡན་ཆད་ཟོང་འཚོང་དུ་གཏའ་མ་སོགས་ལྟ་ཅི་འགོམ་ཡུག་མཇུག་གཏད་དང་ཐ་ན་སོ་དྲེག་བསྐུ་བ་ཙམ་ཡང་སྤང་ལ། དགེ་འདུན་སྤྱི་ཐ་ན་ཚུལ་འཆལ་ཅན་ཡན་ལ་གཤེ་སྐུར་སྤོང་བ་དང༌། ན་བཟའ་ལྷན་པ་དམར་སེར་ཡན་སྤྱི་བོར་གཏུགས་ཤིང་དད་པས་བསྙེན་བཀུར་བྱ་ཞིང༌། ཉིན་མཚན་དུས་དྲུག །གསུམ། ཐ་ན་ཐུན་རེ་ཙམ་དཀོན་མཆོག་གསུམ་གྱི་ཡོན་ཏན་བརྗེད་པ་སྤངས་ནས་རྗེས་སུ་དྲན་བཞིན་རང་སྐྱབས་སུ་འགྲོ་ཞིང་གཞན་དེར་དགོད་པར་བྱའོ། །འབྲས་བུའི་བསླབ་བྱ་སེམས་ཀྱི་ཆོས་ཉིད་ཐུབ་པ་ཆོས་ཀྱི་སྐུ་ཡི་ངོ་བོ་ཡིན་པས། སེམས་དང་སེམས་བྱུང་ཉི་མ་དང་འོད་ཟེར་བཞིན་མཚུངས་པར་འཇུག་པའི་རྩལ་སྣང་ཐམས་ཅད་བྲལ་ཐོབ་སྤངས་པའི་དབྱིངས་ལ་ཐིམ་སྟེ་སྤྲོས་པ་ཐམས་ཅད་ཉེ་བར་ཞི་བའི་ཚེ་བྱང་ཆུབ་པ་ཡིན་པས། མཆོག་གསུམ་ལ་སྐྱོབ་བྱེད་དང་བདག་ལ་བསྐྱབ་བྱར་མི་འཛིན་ཅིང༌། ཆོ་གའི་སྒོ་ནས་བླངས་པ་ལ་སོགས་ཐ་སྙད་ལས་འདས་ཕྱིར་སྡོམ་པ་གཏོང་རྒྱུ་ཞེས་པའང་བཏགས་པ་ཙམ་དུ་ཟད་པ་བླ་དྭགས་ཡིན་ནོ། །རྒྱུ་ཡི་སྐྱབས་འགྲོའི་གཏོང་མཚམས་སྐྱབས་འགྲོ་མཚན་ཉིད་པ་དག །སྐྱབས་སུ་འགྲོ་བའི་ཡུལ་དཀོན་མཆོག་གསུམ་ལ་ཐེ་ཚོམ་དང༌། ལོག་ལྟ་སྐྱེས་པ་དང༌། བསླབ་པ་ཕུལ་བས་གཏོང་ལ། གཞན་སྤང་བསྒྲུབ་ཀྱི་བསླབ་བྱ་རྣམས་ལས་གང་རུང་ཉམས་ན་དམན་པར་འགྱུར་ཞིང་ངན་སོང་དུ་ལྟུང་བའི་ཕྱིར། དཔེར་ན་ལུས་ཀྱི་རྨ་ཡི་བག་བྱེད་པ་བཞིན་བསྒྲིམས་ཏེ་བསླབ་བྱ་ཕྲ་མོ་ཙམ་ཡང་བསྲུང་བར་བྱའོ། །སྔོན་ལས་ཀྱི་རྒྱུ་མཐུན་ད་ལྟ་ཡང་སྟེང་དུ་སླེབས་ནས་ལྕེ་སྤྱང་གདུག་པ་ལྟ་བུའི་སེམས་བཞིན། ཕྱིན་ཅི་ལོག་གི་རྟོག་པ་ངན་པས་སྐབས་བཙལ་བ་རྣམས་ཀྱིས་ཚིག་ཙམ་དུ་སྐྱབས་འགྲོ་སོགས་སྒྲོག་ནའང་དོན་ནི་དེ་དང་འཛོལ་བའི་ཕྱིར་བློ་གཏད་གཅིག་ཏུ་མི་འཁེལ་བས་ཡིད་གཉིས་སུ་གྱུར་པ་དེ་ལ་ནི། མཆོག་གསུམ་གྱི་ཐུགས་རྗེ་དང་བྱིན་རླབས་གང་ཡང་མི་འཇུག་སྟེ། སྣོད་ངན་པ་ཞེས་སེམས་རྒྱུད་དུ་དཀོན་མཆོག་གསུམ་གྱིས་འཕྲལ་ཡུན་དུ་བསླུ་བ་མེད་ཅིང་སྐྱོབ་ངེས་པའི་ཚུལ་ལ་ངེས་ཤེས་བྲི་བའི་རྟགས་སུ། འཇིག་རྟེན་ན་ལྷ་དང་གཞི་བདག་སོགས་ཀྱི་མིང་བཏགས་ཀྱང་དོན་ལ་མཁའ་རྒྱུ་ཡི་དྭགས་ལས་ཀྱི་རྫུ་འཕྲུལ་དང་མངོན་ཤེས་ཐོབ་པ་རྣམས་ལ་བརྟེན་ནས་ཚེ་འདི་ཉིད་ལ་དབང་ཐང་ཉམས་པ། གྲི་ཁར་ཤི་བ་སོགས་ཀྱིས་ཉམས་སོ། །འཇིག་རྟེན་འདི་ན་ས་གཞི་དང་ནམ་མཁའ་རི་རབ་གླིང་བཞི་ལ་སོགས་པ་རྣམས་ཀྱང་ད་ལྟ་ཡན་མན་དུ་གནས་པ་རྣམས་ཀྱང་སྟོང་ཞིང་གནས་འགྱུར་བ་དང༌། གོ་ལ་ཞིག་པའི་ཚེ་ན་ཉི་ཟླ་ཐང་ལ་ལྷུང་བ་སོགས་གོ་ལྡོག་པར་སྲིད་ཀྱི། དཀོན་མཆོག་གསུམ་གྱིས་བསླུ་བ་ནམ་ཡང་མི་སྲིད་པའི་ངེས་ཤེས་བརྟན་པ་འཕྲལ་ཡུན་ཀུན་ཏུ་དོན་ཡོད་པ་ཡིན་ནོ། །རྨི་ལམ་ནའང་ཆུར་ལྷུང་བ་དགྲ་དང་གཅན་གཟན་སོགས་ཀྱིས་དེད་པ་སྣང་ན་དེ་མ་ཐག་ཏུ་རྩེ་གཅིག་པས་དཀོན་མཆོག་མཐོང་བའམ་དྲན་ནས་གསོལ་བ་བཏབ་པ་ཙམ་གྱིས་འཇིགས་པ་དེ་དག་ཞི་བ་དང༌། བག་ཡོད་དྲན་ཞིང་བསླབ་པ་གསུམ་གྱི་ཡོན་ཏན་ཀུན་གྱིས་འབྱོར་བ་དང་ཚེ་རབས་སྔ་མ་རྣམས་སུ་དཀོན་མཆོག་ལ་དད་པ་སོགས་ཀྱི་ཡོན་ཏན་དྲན་ཞིང་བར་དོ་ནའང་སངས་རྒྱས་བྱང་སེམས་སོགས་ཞལ་མཐོང་ཞིང་ཐར་པར་བགྲོད་པར་སླ་བ་དང༌། མཐར་ཐུག་དཀོན་མཆོག་གསུམ་གྱི་ངོ་བོར་བཞུགས་ནས་ལུས་ཅན་འགྲོ་བ་ཀུན་གྱི་ཉེས་ཚོགས་འཇོམས་པའི་དཔུང་དང༌། མངོན་མཐོ་ངེས་ལེགས་ལ་འགོད་པའི་གཉེན་དུ་འགྱུར་རོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། སྐྱབས་སུ་འགྲོ་བའི་ཚོམས་ཏེ་ལེའུ་དྲུག་པའོ།། །།ཞི་བ་ཕྱོགས་གཅིག་པ་བསམ་སྦྱོར་རྒྱ་ཆུང་བས་ཐེག་དམན་འཁྱིལ་ཆུ་རྙོག་མ་ཅན་གྱི་རྫིང་བུ་ལྟ་བུར་བྱང་ཆུབ་སེམས་ཀྱི་ཁམས། ཐེག་པ་ཆེན་པོའི་རིགས་ལས་ཉམས་པའི་ཉན་རང་སྐྱེས་བུའི་སེམས་ཞི་བ་ཕྱོགས་ཅིག་པར་ཞུགས་པ་དེ་ཉིད་མཐར་ཐུག་སངས་རྒྱས་རྣམས་ཀྱིས་བསྐུལ་ནས། སྟོང་ཉིད་ཤེས་པའི་ཤེས་རབ་དང་སེམས་ཅན་ལ་དམིགས་པའི་སྙིང་རྗེའི་དེད་དཔོན་ལྟ་བུ་ལ་སྦྱར་བའི་མཐུས་རིགས་སད་ནས་ཐེག་ཆེན་གྱི་ཆོས་ཟབ་རྒྱས་རྒྱ་མཚོ་ལྟ་བུ་ལ་བསླབ་ནས་ཀུན་མཁྱེན་སངས་རྒྱས་ཀྱི་གོ་འཕང་ནོར་བུའི་གླིང་དུ་འགྲོའོ། །དེ་ཡང་སྦྱིན་སོགས་ཐབས་ཀྱི་ཆ་ཤེས་རབ་ཀྱིས་མ་ཟིན་པ་དེ་སྲིད་དུ་ཕ་རོལ་ཕྱིན་པ་རྣམ་པ་ལྔའི་ངོ་བོ་བྱང་ཆུབ་ཆེན་པོའི་རྒྱུར་ལུང་དུ་མ་བསྟན་པས། དངོས་པོ་དམན་པ་ལྕགས་ཁམས་སུ་ཡོད་པ་ལྟར་དགེ་རྩ་དམན་ཅིང་རྣམ་པར་ཉམས་པ་དེ་ཉིད་ལ། ཐབས་ཤེས་ཟུང་དུ་འབྲེལ་བའི་གསེར་འགྱུར་གྱི་རྩི་ལྟ་བུས་རྒྱས་ཐེབས་པའི་མོད་ལ། རིན་ཐང་ཆེན་པོའི་གསེར་གྱི་དངོས་པོ་ལྟ་བུར་བྱང་ཆུབ་ཆེན་པོའི་རྒྱུར་བསྒྱུར་བར་བྱེད་དོ། །གང་ལའང་མི་གནས་པའི་མྱང་འདས་ཐོབ་པའི་ཕྱིར་དུ་སྙིང་རྗེའི་ཐབས་དང་སྟོང་ཉིད་ཀྱི་ཤེས་རབ་ཟུང་དུ་འཇུག་པའི་བྱང་ཆུབ་ཀྱི་སེམས་དེ་རྒྱུད་ལ་ཇི་ལྟར་སྐྱེ་བའི་རིམ་པ་ནི། སྦྱོར་བ་ཚད་མེད་བཞི་ཡིས་བློ་ཡང་ཡང་སྦྱངས་ན་བསམ་སྦྱོར་ཐམས་ཅད་ཐེག་ཆེན་གྱི་ལམ་དུ་འགྱུར་བས་ན་ས་མཁན་གྱི་ཆོས་དང་མཚུངས་པ་དེས་བློ་སྦྱངས་ནས་སྨོན་འཇུག་གཉིས་དང༌། བསླབ་བྱ་སློབ་པ་ལས་ཐབས་ཤེས་ཟུང་དུ་འཇུག་པའི་བྱང་ཆུབ་ཀྱི་སེམས་དེ་ཚོགས་སྦྱོར་དུ་རྗེས་མཐུན་ཙམ་དང༌། མཐོང་ལམ་དུ་ཇི་བཞིན་པ་སྐྱེ་བ་ཡིན་ནོ། །བྱམས་པའི་ངོ་བོ་གང་ལ་དམིགས་པ་ནི། གཞན་སེམས་ཅན་མངོན་མཐོའི་བདེ་བ་མེད་པས་སྡུག་བསྔལ་བའི་འགྲོ་བ་པ་རྣམས་གནས་སྐབས་དང་མཐར་ཐུག་གི་བདེ་བའི་བར་དང་ལྡན་པར་འདོད་པ་ཡིན་ལ། བྱང་ཆུབ་སེམས་དཔའི་བྱམས་པ་ནི། དཔེར་ན་སྙིང་དུ་སྡུག་པའི་མ་ཡིས་བུ་ལ་བརྩེ་བ་ཇི་བཞིན་དུ། ལུས་དང་ལོངས་སྤྱོད་དུས་གསུམ་གྱི་དགེ་བ་ཀུན་གཅིག་ཏུ་སྤུངས་ནས། གཞན་སེམས་ཅན་དེ་དག་ལ་གནས་སྐབས་དང་མཐར་ཐུག་གི་ཕན་འདོགས་ཤིང༌། སེམས་ཅན་དེ་དག་གིས་གནོད་པ་ཇི་ལྟར་བྱས་ཀྱང་བརྩེ་བས་བཟོད་ཅིང་ཕན་འདོགས་པ་ལ་བསླབ་པ་ཡིན་ནོ། །སྙིང་རྗེའི་ངོ་བོ་ནི་མཐའ་ཡས་པའི་སེམས་ཅན་གཞན་ཐམས་ཅད་ཀུན་གྱི་རང་བཞིན་སྡུག་བསྔལ་གསུམ་མམ་བརྒྱད་ཀྱིས་དམ་ལ་བཞག་པ་རྣམས་ལ། སྙིང་ཁུང་རུས་པའི་གཏིང་ལས་བཟོད་བླག་མེད་པར་རང་གར་འཇོག་མི་ཕོད་པ་དཔེར་ན་བུ་སྡུག་པ་མི་གཙང་དོང་ནང་ལྷུང་ན་ཕ་ཚམ་ཚོམ་མེད་པར་འཇུག་པ་ལྟར་སྡུག་བསྔལ་དེ་ཐམས་ཅད་དང་བྲལ་བར་འདོད་པའི་སེམས་སྟོབས་དྲག་པོ་དང༌། འགྲོ་དྲུག་གི་སེམས་ཅན་མཐའ་དག་སྡུག་བསྔལ་རྒྱུ་བདག་འཛིན་དང༌། འབྲས་བུ་སྡུག་བསྔལ་དངོས་ཀྱི་ཡོ་ལང་ལ་སྤྱོད་ཅིང་དཔེར་ན་རི་དྭགས་མཐའ་ལ་གཅུར་བ་བཞིན་ཐར་པའི་ཐབས་དང་བྲལ་བ་མཐོང་ནས་ཐར་པའི་དུས་མེད་པ་ལ་སྙིང་བརྩེ་བས་མིག་མཆི་མ་སློང་བཞིན་འདོན་པའི་ཐབས་ལ་བརྩོན་པ་ཡིན། དགའ་བའི་ངོ་བོ་ལ་དམིགས་པ་ནི། སེམས་ཅན་གཞན་དག་ཐམས་ཅད་བདེ་སྐྱིད་ཕུན་ཚོགས་དང་ལྡན་པ་ཡིན་ལ། རྣམ་པ་ནི་དེ་ལ་ཕྲག་དོག་དང་འགྲན་སེམས་བྲལ་ཞིང་སྙིང་ནས་སྤྲོ་བའི་སེམས་ཀུན་ཏུ་འཇུག་ཅིང་སེམས་ཅན་ཀུན་ལ་བདེ་འབྱོར་ཕུན་སུམ་ཚོགས་པ་དང་ལྡན་ན་ཅི་མ་རུང་སྙམ་དུ་ལེགས་སྨོན་བསྒོམ་ཞིང་སེམས་ཅན་རང་རང་གི་སྔོན་བསགས་མཐུ་ཡིས་ཐོབ་པ་དེ་ལ་དགའ་བར་བྱེད་ཅིང༌། ཕྱིན་ཆད་ཀྱང་སེམས་ཅན་ཐམས་ཅད་བདེ་སྐྱིད་ཀྱི་དཔལ་དེ་དང་མི་འབྲལ་བར་སྨོན་པ་ཡིན་ནོ། །བཏང་སྙོམས་ཀྱི་ངོ་བོ་ལ་དམིགས་པ་ནི། ཕ་མ་ཉེ་འབྲེལ་མཛའ་གྲོགས་སོགས་བྱམས་ཡུལ་དང༌། རང་ཕྱོགས་ལ་གནོད་པའི་དགྲ་ཡི་ཕྱོགས་སུ་གཏོགས་པ་སྡང་ཡུལ་དང༌། བར་མ་སོགས་ལ་རྣམ་པ་ནི་ཇི་མི་སྙམ་དུ་འཇོག་པའི་སེམས་འབྲལ་བ་སྟེ། དེ་ཡང་རང་ཕྱོགས་དང་གཞན་ཕྱོགས་རིས་སུ་ཆད་པ་སེམས་ཅད་ཐམས་ཅད་མཉམ་པ་ཉིད་ཀྱི་ངོ་བོར་བརྡལ་ཞིང་ཁྱབ་པར་བྱས་ནས། དགྲ་དང༌། གཉེན་དང༌། བར་མའི་འདུ་ཤེས་གསུམ་ཕན་འདོགས་པའི་ཡུལ་ལ་མཉམ་པར་རབ་ཏུ་སྤྱད་དེ། མདོར་ན་ལྡན་འདོད། བྲལ་འདོད། མི་འབྲལ་འདོད། ཞི་བར་འདོད་པ་བཞིའི་སྒོ་ནས་དབྱེ་བས་ཚད་མེད་བཞིའི་རྣམ་པས་བསྒོམ་ཚུལ་དམིགས་པ་དང་བཅས་པ་ཐམས་ཅད་ལ་དམིགས་མེད་འཁོར་གསུམ་དག་པའི་རྩི་ཡིས་སྦྱར་རོ། །ཉེ་དུ་སོགས་མཛའ་བཤེས་ཕྱོགས་ལ་འདོད་ཅིང་ཆགས་པའི་སེམས་ཀྱིས་བདེ་བར་འདོད་པའི་བྱམས་པ། འོག་རྟ་འགེལ་ཁལ་སོགས་པ་སེར་སྣའི་དབང་གིས་བཀོལ་མི་བྲ་བའི་སྙིང་རྗེ་དང༌། རང་ཕྱོགས་ལ་འབྱོར་པ་གཞན་ལས་ལྷག་ན་ང་རྒྱལ་གྱིས་དེ་ལ་དགའ་བ། ཕན་འདོད་གནོད་སྒྲུབ་གང་ཡང་མི་སེམས་པའི་གཏི་མུག །ལུང་མ་བསྟན་བཟང་ངན་མེད་པའི་བཏང་སྙོམས་དང༌། བཞི་པོ་དེ་ནི་ཐར་པ་མྱ་ངན་ལས་འདས་པའི་ལམ་མིན་ལ་ཚངས་པའི་གནས་པ་བཞིའི་ཕྱོགས་དང་ཉེ་བ་བྱམས་སོགས་དེ་འདྲ་ཁམས་གོང་མ་གཉིས་སུ་སྐྱེ་བའི་རྒྱུ་དང༌། དམིགས་པ་རིས་སུ་ཆད་པ་དང༌། མངོན་པར་ཞེན་པ་དང་བཅས་པའི་ཕྱིར་ཐེག་ཆེན་ལམ་གྱི་ཚད་མེད་བཞིའི་གོལ་ས་ཡིན་པས་རྣམ་པར་སྤང་བར་བྱའོ། །ཐེག་ཆེན་གྱི་སྐབས་འདི་ན་མཐའ་གཉིས་ཞི་བའི་ལམ་དང་འབྲེལ་བ་ཡི། ཚད་མེད་བཞིའི་དམིགས་པའི་ཡུལ་ནི་ཕྱོགས་རེ་བ་མ་ཡིན་པས་སེམས་ཅན་ཐམས་ཅད་ཀྱང༌། དོན་ལ་ཡེ་ནས་སྤྲོས་པ་དང་བྲལ་བ་སྣང་ལ་རང་བཞིན་མེད་པའི་ཆོས་ཉིད་ཀྱིས་ཟིན་ནས་ཐབས་ཤེས་ཟུང་དུ་འཇུག་པའི་རྣམ་པའི་སྒོམ་ཚུལ་ཡང་ཡང་གོམས་ནས་སྟོབས་སུ་གྱུར་པ་ལས། ཀུན་རྫོབ་དང་དོན་དམ་པའི་བྱང་ཆུབ་སེམས་གཉིས་སྐྱེ་བའི་རྒྱུར་འགྲོ་བས། འཇིག་རྟེན་པ་དང་ཉན་རང་རྣམས་དང་ཐུན་མོང་མ་ཡིན་པ་ཐབས་ཤེས་གཉིས་ཀའི་ཕྱོགས་ནས་ཁྱད་ཆོས་ལྡན་པའི་ཚད་མེད་བཞི་རུ་འདོད་དོ། །ཚད་མེད་བཞི་པོ་དེ་དག་གི་བསྒོམ་ཚུལ་གོ་རིམ་གྱི་ངེས་པ་ཅན་ནི་དཀྱུས་སུ་བཤད་པ་བཞིན་དང༌། ངེས་པ་མེད་པ་ནི་བཏང་སྙོམས་ཐོག་མར་བསྒོམ་པ་སོགས་སོ། །དེས་ན་དམིགས་པའི་ཡུལ་གང་ལ་ཚད་མེད་པའི་བློ་སྐྱེ་བར་སླ་བ་དེ་ལ་ཐོག་མར་གཏད་ནས་བསྒོམ། འོན་ཀྱང་གོ་རིམ་ལ་ཞེན་པའི་གཉེན་པོར་འདི་ལྟར་ཡིད་འོང་གི་བྱམས་པ་ཡང་ཡང་བསྒོམ་པས་བྱམས་པའི་ཡུལ་དེ་གཉེན་བཤེས་ལྟ་བུའི་རིས་ཅན་དུ་མཐོང་སྟེ་ཆགས་པའི་རྟེན་དུ་གྱུར་ན། ཉེ་རིང་དང་བྲལ་བའི་བཏང་སྙོམས་སྒོམ་པར་སྤོས་པས་ཆགས་པའི་རྣམ་པ་དེ་ཉིད་འགོག་པར་འགྱུར་ལ། བཏང་སྙོམས་བསྒོམ་པའི་བློ་དེ་ཉིད་ཕན་འདོགས་པའི་སེམས་མེད་པར་རྨོངས་ནས་ལུང་མ་བསྟན་དུ་གྱུར་ན། སྙིང་རྗེར་སྤོས་ནས་བསྒོམས་པས་སྡུག་བསྔལ་གྱི་རྒྱུ་ལ་སྤྱོད་ཅིང་འབྲས་བུས་གཟིར་བའི་ཚུལ་ཡང་ཡང་བསམ་པའི་སྟོབས་ཀྱིས་བཏང་སྙོམས་ཐ་ཤལ་བ་དེ་འགོག་གོ །སྙིང་རྗེ་བསྒོམས་པ་ན་སེམས་ཅན་གྱི་སྡུག་བསྔལ་ཤིན་ཏུ་ཆེ་བས་སེམས་སྟོབས་ཞན་ཏེ་ཧ་ཅང་ཞུམ་ནས་རིས་སུ་ཆད་པ་ན། བདེ་ཞིང་འབྱོར་པ་ལྡན་པའི་སེམས་ཅན་ལ་དམིགས་ནས་དགའ་བར་བསྒོམ་པ་སྤོས་པས་ཞུམ་ཞིང་དམན་པའི་སེམས་སྐྱེ་བ་དེ་ཉིད་འགོག་ལ། དགའ་བ་བསྒོམས་པས་སེམས་ཧ་ཅང་རྒོད་དེ་སྤྲོས་པའི་ཡུལ་དུ་གཡེང་བར་གྱུར་ན། བྱམས་པ་སོགས་མཐའ་དབུས་བརྗེས་ནས་བཞི་པོ་སྤེལ་མར་བསྒོམ་པར་བྱའོ། །དེ་ལྟར་ཚད་མེད་བཞི་པོ་བསྒོམས་པས་འབྲས་བུ་བཞི་ཐོབ་པར་འགྱུར་ཏེ། དེ་ལ་རྣམ་པར་སྨིན་པའི་འབྲས་བུ་ནི། སྲིད་པ་ན་མངོན་པར་མཐོ་བའི་གནས་འདོད་པར་ལྷ་དང་མིའི་ལུས་རྟེན་ཕུན་སུམ་ཚོགས་པ་ཐོབ་པ་དང༌། དེས་ཚོགས་གཉིས་རྫོགས་པར་བྱས་ནས་མཐར་ཐུག་ངེས་པར་ལེགས་པའི་འབྲས་བུ་སློབ་པ་དང་མི་སློབ་པའི་ས་མངོན་དུ་བྱེད་པ་སྟེ་གཉིས་དང༌། རྒྱུ་མཐུན་ལ་གཉིས་ལས། བྱེད་པ་རྒྱུ་མཐུན་གྱི་འབྲས་བུ་ཚེ་རབས་ཐམས་ཅད་དུ་དེ་འདྲ་བའི་ཚད་མེད་བཞི་པོའི་བློ་བསྒོམ་པར་འགྱུར་ལ། མྱོང་བ་རྒྱུ་མཐུན་གྱི་འབྲས་བུ་ནི། རང་རང་གི་མི་མཐུན་ཕྱོགས་གནོད་སེམས། རྣམ་པར་འཚེ་བ། ཕྲག་དོག་ཆགས་སྡང་སྟེ་བཞི་དང་བྲལ་ཞིང༌། དེ་དག་མེད་པའི་བདེ་བ་ཕུན་སུམ་ཚོགས་པ་འཐོབ་པ་དང༌། དབང་གི་འབྲས་བུས་ནི། འདི་ལྟར་བྱམས་པས་གནས་གྲོགས་དང་ལོངས་སྤྱོད་སོགས་ཡིད་དུ་འོང་བ་དང་འཕྲད་པ་དང༌། སྙིང་རྗེས་ལུས་སེམས་བདེ་བའི་རྐྱེན་དང་ལྡན་པ་དང༌། དགའ་བས་ས་ཕྱོགས་སྨན་ཤིང་དང་མེ་ཏོག་ལ་སོགས་པས་བརྒྱན་པ་ཡིད་དགའ་བའི་རྒྱུར་འགྱུར་བ་དང༌། བཏང་སྙོམས་ཀྱིས་སྐྱེ་དགུ་མཛའ་ཞིང་མི་མཐུན་པ་མེད་པའི་ཡུལ་ལ་ལོངས་སྤྱོད་པར་འགྱུར་རོ། །སྐྱེས་བུ་བྱེད་པའི་འབྲས་བུ་ནི། ཚད་མེད་པ་བཞི་པོའི་བྱེད་པ་ཆེས་ཆེར་སྟོབས་སུ་གྱུར་པ་དེ་ཡིས་རང་གཞན་དོན་གཉིས་ཕུན་སུམ་ཚོགས་པ་འབྱོར་པའི་ཡོན་ཏན་མཐའ་དག་འཐོབ་པར་འགྱུར་ཏེ། བྱམས་པ་ཚད་མེད་གོམས་ཤིང་འབྱོངས་པས་འགྲོ་བ་ཀུན་ལ་བུ་གཅིག་པའི་མ་ལྟར་བརྩེ་བར་འགྱུར་བས། ཞེ་སྡང་མེད་ཅིང་བྱམས་པའི་མཐུས་སེམས་ཅན་གཞན་གྱི་ཡིད་དུ་འོང་ཞིང་དགའ་བར་འགྱུར་རོ། །བྱམས་པའི་ངོ་བོ་གང་ཡང་མ་གྲུབ་པའི་གཤིས་བཀག་བྱ་དང་བྲལ་བ་སྟོང་ལ་རང་བཞིན་མེད་པ་གོམས་པས། མཐར་ཐུག་མཁྱེན་ཆ་མ་འགག་པ་མེ་ལོང་ཡེ་ཤེས་མངོན་དུ་གྱུར་ནས་མཚན་དཔེ་རྒྱ་མཚོའི་བདག་ཉིད་ལོངས་སྤྱོད་རྫོགས་པ་འཐོབ་སྟེ། ཇི་སྐད་དུ། བྱམས་པས་ཞེ་སྡང་གནས་སུ་དག །མེ་ལོང་ཡེ་ཤེས་ལོངས་སྤྱོད་རྫོགས། །ཞེས་སོ། །དེ་བཞིན་དུ་སྙིང་རྗེ་ཚད་མེད་གོམས་ཤིང་རྒྱུད་ལ་འབྱོངས་པས་གཞན་གྱི་སྡུག་བསྔལ་ཇི་སྙེད་ཡོད་པ་ཐམས་ཅད་ཀྱང༌། བདག་གི་ཁུར་དུ་འགྲོ་བ་སྟེ་བདག་ལ་བབ་པ་བཞིན་མི་བཟོད་པའི་བློས་སྡུག་བསྔལ་ལས་གདོན་པའི་ཐབས་འབའ་ཞིག་སེམས་པ་ལས། གཞན་ལ་འཚེ་བ་སྐད་ཅིག་ཙམ་ཡང་བྲལ་བའི་སེམས་དང༌། གཉེན་བཤེས་ལྟར་སེམས་ཅན་ལ་འདོད་ཅིང་ཆགས་པ་དང་བྲལ་བ། རང་བཞིན་མེད་པའི་སྟོང་ཉིད་ཀྱི་གདངས་སྙིང་རྗེར་ཤར་ཏེ་ཟུང་དུ་འབྲེལ་བས་འཁོར་བའི་ཆོས་ཐམས་ཅད་རྒྱུ་འབྲས་མ་འདྲེས་པར་རྟོགས་ནས་གཞན་རྒྱུད་སོ་སོར་འབྱེད་པས་ཤེས་བྱའི་ཆོས་ཐམས་ཅད་མ་འདྲེས་པར་སོ་སོར་རྟོག་པའི་ཡེ་ཤེས་མངོན་དུ་གྱུར་ནས། དཀར་ཆོས་ཀྱི་ཡོན་ཏན་ཐམས་ཅད་ཀྱི་རང་བཞིན་ཆོས་ཀྱི་སྐུ་རུ་འགྲུབ་སྟེ། སྙིང་རྗེས་འདོད་ཆགས་གནས་སུ་དག །ཀུན་རྟོག་ཡེ་ཤེས་ཆོས་ཀྱི་སྐུ། །ཞེས་སོ། །དགའ་བ་ཚད་མེད་ནི་རྒྱུད་ལ་གོམས་ཤིང་འབྱོངས་པས། གཞན་གྱི་བདེ་འབྱོར་ལ་མི་དགའ་བའི་ཕྲག་དོག་གི་རྩ་བ་ཆོད་ཅིང༌། གཞན་གྱི་བདེ་སྐྱིད་ལ་དགའ་བ་ཁྱད་པར་ཅན་སྐྱེས་པའི་རྒྱུས་རང་གི་ཡོན་ཏན་གྱི་འབྱོར་པ་ཕུན་ཚོགས་ཀུན་བརྟན་ཅིང༌། ཕྲག་དོག་གི་ཟུག་རྔུ་ཞི་བའི་བདེ་བ་རྒྱུན་མི་འཆད་པས་བསམ་གཏན་ལ་ཚེར་མ་མེད་པ་དང༌། དགའ་བའི་ངོ་བོ་གཟུང་འཛིན་དུ་དམིགས་པའི་རྩོལ་བ་མེད་པ་དང་ཆོས་མཐུན་པར་མཐར་ཐུག་གཞན་དོན་རྩོལ་མེད་དུ་མཁྱེན་པའི་བྱ་གྲུབ་ཡེ་ཤེས་མངོན་དུ་གྱུར་ནས་གདུལ་བྱ་ཐམས་ཅད་ཀྱི་དོན་མཛད་པའི་སྤྲུལ་པའི་སྐུ་མཆོག་ཐོབ་སྟེ། དགའ་བས་ཕྲག་དོག་གནས་སུ་དག །བྱ་གྲུབ་ཡེ་ཤེས་སྤྲུལ་པའི་སྐུ། །མཛད་པ་ལྷུན་གྲུབ་དམ་པའོ། །ཞེས་སོ། །བཏང་སྙོམས་ཚད་མེད་འབྱོངས་པས། བདག་གཞན་དགྲ་གཉེན་སོགས་ཕན་འདོགས་ཡུལ་དུ་མཉམ་པས་བདག་གཅེས་པར་འཛིན་པའམ། གཞན་དོན་ལ་རློམས་སེམས་དང༌། བདག་ཉིད་གཟེངས་བསྟོད་པའི་ང་རྒྱལ་མེད་ཅིང༌། དངོས་པོར་འཛིན་པ་དང༌། དངོས་མེད་དུ་ཞེན་པའི་མཐའ་གཉིས་སུ་ལྷུང་ནས་སེམས་ཀྱི་ཆོས་ཉིད་དབུ་མར་མི་སྙོམས་པའང་རང་བཞིན་གྱིས་སྟོང་ཞིང་ཟབ་པ་དང༌། སྤྲོས་པ་ཐམས་ཅད་ཉེ་བར་ཞི་བའི་དབྱིངས་སུ་བཏང་སྙོམས་པའི་རྟོགས་པ་ཁྱད་པར་བ་སྐྱེ་ཞིང༌། བཏང་སྙོམས་ཀྱི་ངོ་བོ་ཐ་དད་དུ་འཛིན་པའི་གཏི་མུག་གི་རང་བཞིན་རྨོངས་པ་མེད་ཅིང་མཐར་འཛིན་ཞི་བ་ཡིན་པས། མཐར་ཐུག་ཆོས་ཐམས་ཅད་དབྱེར་མེད་བླང་དོར་དང་བྲལ་བར་མཁྱེན་པ་ཆོས་དབྱིངས་ཡེ་ཤེས་དང༌། རང་བཞིན་རྣམ་དག་དབྱིངས་སྒྲིབ་པ་ཐམས་ཅད་དང་བྲལ་བ་ངོ་བོ་ཉིད་སྐུ་མངོན་དུ་འཐོབ་པར་འགྱུར་ཏེ། བཏང་སྙོམས་བཏང་སྙོམས་ཆེན་པོ་ཡིས། །ང་རྒྱལ་གཏི་མུག་གནས་སུ་དག །མཉམ་ཉིད་ཆོས་དབྱིངས་ཡེ་ཤེས་དང༌། །བྱང་ཆུབ་རྡོ་རྗེའི་སྐུ་ཉིད་དོ། །ཞེས་པ་རྣམས་པདྨ་རྩེ་མོ་ལས་བཤད་དོ། །དེ་ལྟ་བུའི་ཐེག་ཆེན་ཐུན་མིན་ལམ་གྱི་ཚད་མེད་བཞི་པོ་ཡི་ཡོན་ཏན་ནི། སྐུ་གཉིས་སྐྱེད་བྱེད་དང༌། སྒྲིབ་གཉིས་དག་བྱེད་ཀྱི་རྒྱུ་ཚོགས་གཉིས་དང་ཆོས་ཉིད་གཞིའི་ངང་དུ་གཅིག་པས། དེ་མངོན་དུ་འགྱུར་བྱེད་རྒྱུའམ་ལམ་ཚོགས་གཉིས་དང་ཐབས་ཤེས་གཅིག་ལ། འབྲས་བུ་སྐུ་གཉིས་ཀྱང་ངོ་བོ་ཐ་མི་དད་པས་དེ་ལྟར་གཞི་ལམ་འབྲས་བུ་ཤིན་ཏུ་ཟབ་པའི་དོན་རྟོགས་ནས། ཡོན་ཏན་མཐའ་ཡས་ཤིང་མཐར་ཐུག་པའི་དོན་ལ་བསླུ་བ་མེད་དེ། དཔལ་ཕྲེང་གི་མདོ་ལས། གང་གིས་ཚད་མེད་བཞི་བསྒོམས་པ། །དེ་ནི་བདེ་གཤེགས་ཀུན་གྱིས་དགོངས། །ཀུན་ཏུ་ཡོན་ཏན་ཚད་མེད་དེ། །ནམ་མཁའི་ལམ་ལས་རབ་འདས་པའོ། །ཞེས་སོ། །ཚད་མེད་བཞི་པོ་དེ་དག་དང་མི་ལྡན་པ་ནི་ལམ་ངན་གཞན་ཕྱི་པ་མུ་སྟེགས་པ་རྣམས་ཀྱི་གྲུབ་མཐའ་སྲིད་པ་འཁོར་བའི་རྒྱུ་སྟེ། སའི་སྟོད་འགྲེལ་ལས། ཚད་མེད་བཞི་ནི་ཐར་པར་འགྲོ་བའི་ལམ་སྟེ་གཞན་དུ་ན་ལོག་པའོ། །ཞེས་སོ། །དེས་ན་ཆོས་ཐམས་ཅད་རང་གི་ངོ་བོ་གདོད་ནས་སྟོང་པ་ཉིད་ཤེས་པའི་ཤེས་རབ་དང་སྙིང་རྗེར་ཟུང་དུ་ཚུད་པའི་འགལ་བ་གཞན་ལ་མི་བསྟེན་པར། ཐར་པ་སྒྲིབ་གཉིས་ཀྱི་དྲི་མ་མེད་པ་རྒྱལ་སྲས་དམ་པའི་ལམ་གྱིས་རང་དོན་ཡིད་བྱེད་དང༌། བདེན་ཞེན་གྱི་བློའི་རྙོག་པ་ཞི་བའི་དགེ་བ་ལ་གོ་ཡུལ་ཙམ་དུ་མ་ལུས་པར་གོམས་འཚལ་ལོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། ཚད་མེད་བཞིའི་ཚོམས་ཏེ་ལེའུ་བདུན་པའོ།། །།སྲིད་ཞིའི་ཁམས་ཐམས་ཅད་ན་གོང་ན་མེད་པའི་རྙེད་པ་མཆོག་རྫོགས་བྱང་གང་གི་དོན་ལ་དམིགས་ནས་ལམ་བསྒྲུབ་པ་ལ་དེ་ཐོབ་བྱེད་ཀྱི་རྒྱུའམ་ཡོན་གྱི་མཆོག་གམ་སྙིང་པོ་ནི། ཚད་མེད་རྣམ་བཞི་ལ་ཡང་ཡང་གོམས་པའི་སྟོབས་ཀྱིས་ཐོབ་པ་ལྷག་པའི་བསམ་པ་བྱང་ཆུབ་ཀྱི་སེམས་རིན་པོ་ཆེ་དེ་ཡང༌། དང་པོ་སྨོན་འཇུག་གི་སེམས་གཉིས་བསྐྱེད་ནས་བསླབ་བྱ་ལ་ཚུལ་བཞིན་བསླབ་པས་འདུན་པ་ས་ལྟ་བུ་དང་ལྷག་བསམ་གསེར་ལྟ་བུ་ནས་སེམས་བསྐྱེད་སྟོབས་གོང་དུ་འཕེལ་ནས་བགྲོད་པའི་ཤིང་རྟའི་སྒྱུ་འཕྲུལ་གྱི་ཐབས་ལ་དྲངས་པས། རང་ཉིད་གཅིག་པུ་ཞི་བདེའི་ལྟ་བ་ངན་པ་ཉམས་ཏེ་དོན་གཉིས་ཕུན་སུམ་ཚོགས་པར་བྱེད་དོ། །རྒྱུ་སྡིག་པ་དང་འབྲས་བུ་སྡུག་བསྔལ་གྱི་ཚོགས་མང་པོས་མནར་བའི་འཁོར་བའི་གནས་རྒྱལ་པོའི་བཙོན་ར་ལྟ་བུར་ཚུད་དེ་བཅིངས་པའི་གང་ཟག་ཐ་ཆད་རྣམས་ཀྱང༌། བྱང་ཆུབ་མཆོག་ཏུ་སེམས་བསྐྱེད་པའི་མོད་ལ་མིང་གནས་འགྱུར་ཏེ། རྒྱལ་སྲས་ཀྱི་མིང་གི་ཅོད་པན་ཐོབ་ཅིང༌། དོན་གནས་འགྱུར་ཏེ་ཚུལ་དེ་ལ་རབ་ཏུ་དགའ་ཞིང་དད་པར་གྱུར་ནས། འཇིག་རྟེན་ན་དཀར་ཕྱོགས་པ་རྣམས་ཀྱིས་བསྔགས་ཤིང་མཆོད་ལ་རིགས་དྲུག་གི་གཙོ་བོ་ལྷ་མིར་བཅས་པའི་འགྲོ་བ་མཐའ་དག་གིས་ཀྱང་ཕྱག་མཆོད་བསྟོད་པ་སོགས་བསྟི་སྟང་བྱེད་པར་འགྱུར་རོ། །རང་བཞིན་ཡེ་ནས་དག་ཀྱང་མ་རིག་པས་བསྒྲིབས་པའི་ལས་ཀྱི་ཀུན་ནས་སློང་བའི་ཉོན་མོངས་པ་དཔེར་ན་ཉི་ཟླའི་སྣང་བ་མེད་པའི་མུན་ནག་སྟུག་པོ་འཁྲིགས་པའི་ནམ་མཁའ་ལ་སྤྲིན་བར་ནས་གཏུམ་པོའི་གློག་འོད་འཁྱུགས་པ་ལྟ་བུ་འགྲོ་བའི་དགེ་བ་ལ་བརྟན་པོ་མ་ཡིན་པས། སྐབས་འགར་གོམས་ཤིང་བསགས་པའི་ལས་ནི་བསོད་ནམས་ཙམ་པོ་བ་ཡིན་ཏེ། དཔེར་ན་ཆུ་ཤིང་ཨེ་རན་དྲ་འདམ་བུ་སྨྱིག་མ་བཞིན་དུ་འབྲས་བུ་ལན་གཅིག་སྨིན་ཟིན་ནས་རྩ་བ་སྐམ་པ་ལྟར། ལྷ་མིའི་བདེ་འབྱོར་ལན་གཅིག་སྤྱད་ཟིན་ནས་སླར་ཟད་པས་སྨད་དོ། །བྱང་ཆུབ་སེམས་ཀྱི་ཟིན་པའི་དགེ་བ་ནི་དཔེར་ན་ས་གཞི་བཟང་པོ་འགྲོ་བ་མང་པོས་བསྟེན་པའི་ཞིང་ས་ལ། ས་བོན་ཅི་བཏབ་ཀྱང་དགེ་བའི་ལོ་ཏོག་ཕུན་སུམ་ཚོགས་པ་རྒྱས་ཤིང་འཕེལ་བ་ལྟར། བྱང་ཆུབ་སེམས་ཀྱིས་ཟིན་པའི་དགེ་བའི་ལྗོན་ཤིང་ནི། སྲིད་པ་ན་འབྲས་བུ་ལྷ་མིའི་བདེ་སྐྱིད་ལོངས་སྤྱོད་མང་ཞིང་ཞི་བ་མྱང་འདས་བྱང་ཆུབ་ཆེན་པོའི་བར་དུ་འཕེལ་བར་འགྱུར་རོ། །འདི་ལྟར་ལས་དང་ཉོན་མོངས་པའི་མེ་འོབས་ཆེན་པོས་བསྐོར་ཞིང་འདུ་བྱེད་ཀྱི་སྡུག་བསྔལ་ཆུ་བོ་ཆེན་པོ་ཀུན་གྱི་སྣོད་དུ་གྱུར་པ་འཁོར་བའི་རྒྱ་མཚོ་ཚུལ་བཞིན་མ་ཡིན་པའི་རྣམ་པར་རྟོག་པའི་རྦ་རླབས་དྲག་པོས་ཐར་པའི་གྲུ་གཟིངས་བཤིག་པ་ཅན་འཇིགས་སུ་རུང་བ་དེ། སེམས་ཅན་རྣམས་ཀྱིས་མ་ཤེས་ནས་དགའ་ཞིང་ཞེན་ནས་ཁྱིམ་ལྟར་རབ་ཏུ་བཟུང་ནས་ཐར་པ་དང་བྲལ་བ་རྣམས། དེ་ལས་གདོན་པའི་སྙིང་སྟོབས་ཆེན་པོའི་གོ་ཆ་བགོ་བས་བྱང་ཆུབ་མཆོག་ཏུ་སེམས་བསྐྱེད་པ་ཁོ་ན་ཡིན་ཏེ། སྤྱོད་འཇུག་ལས། སྲིད་པའི་སྡུག་བསྔལ་བརྒྱ་ཕྲག་གཞོམ་འདོད་ཅིང༌། །སེམས་ཅན་མི་བདེ་བསལ་བར་འདོད་པ་དང༌། །བདེ་མང་བརྒྱ་ཕྲག་སྤྱད་པར་འདོད་པས་ཀྱང༌། །བྱང་ཆུབ་སེམས་ཉིད་རྟག་ཏུ་གཏང་མི་བྱ། །ཞེས་གསུངས་པ་ལྟར་རོ། །འདིར་སྐྱེས་བུ་ཆེན་པོ་གང་ལ་ནི་སྐྱེས་བུ་ཆུང་འབྲིང་ལྟ་བུའི་རང་དོན་ཡིད་བྱེད་ཀྱི་སེམས་པ་ཡོད་པ་མ་ཡིན་ཏེ། མཁའ་མཉམ་སེམས་ཅན་ཀུན་ལ་སྙིང་རྗེ་ཆེན་པོ་ནི། དཔེར་ན་བཀྲེས་པ་ཟས་ལ་གདུང་བ་དང་སྐོམ་པ་ཆུར་གདུང་བ་བཞིན། སེམས་ཅན་འབའ་ཞིག་སྡུག་བསྔལ་ལས་བསྒྲལ་བའི་དོན་དུ་སེམས་པ་ནི་སྙིང་རྗེས་གཞན་དོན་ལ་དམིགས་པ་ཡིན་ལ། སེམས་ཅན་ཀུན་རྣམ་མཁྱེན་གྱི་གོ་འཕང་དོན་དུ་གཉེར་བའང་ཤེས་རབ་ཀྱིས་རྫོགས་བྱང་ལ་དམིགས་པ་ཡིན་པས། དེ་ལ་བྱང་ཆུབ་སེམས་ཞེས་གྲགས་ཏེ། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་སོ། །དེའང་འབྲས་བུ་རྫོགས་བྱང་ལ་དམིགས་ནས་དེ་བསྒྲུབ་པར་དམ་འཆའ་བ་ནི། སྨོན་པའི་སེམས་བསྐྱེད་ཡིན་ལ། དེའི་བསླབ་པར་བྱ་བ་ནི། བདག་གཞན་མཉམ་པ་དང༌། བདག་གཞན་བརྗེ་བ་དང༌། བདག་བས་གཞན་གཅེས་པར་འཛིན་པ་སྟེ་གསུམ་དུ་བཞག་པ་དེའང་སྨོན་པ་སེམས་བསྐྱེད་ཀྱི་བསླབ་པའི་གནད་མདོར་བསྡུས་ཡིན་གྱི། སྨོན་སེམས་དེའི་ངོ་བོ་ནི། བྱམས་པ་སོགས་སྙིང་རྗེ། དགའ་བ། བཏང་སྙོམས་ཏེ་ཚད་མེད་བཞི་ལ་ཡང་དག་པར་གནས་ཤིང༌། རྒྱུ་ཕར་ཕྱིན་དྲུག་བསྒྲུབ་པ་ལ་དམ་བཅའ་བ་དང༌། དེ་ལྟར་དམ་བཅས་པ་བཞིན་འཇུག་པ་ནི་འཇུག་པའི་སེམས་བསྐྱེད་ཡིན་ཏེ། དེ་ཡི་བསླབ་བྱ་ནི་ཕ་རོལ་ཏུ་ཕྱིན་པ་དྲུག་ལ་བསླབ་པ་དང༌། འགྲོ་དྲུག་ལ་སོགས་པའི་སྤྱོད་ཡུལ་ལུང་མ་བསྟན་པ་རྣམས་ཀྱང་གཞན་དོན་དུ་སྨོན་ལམ་གྱིས་ཡོངས་སུ་དག་པའི་དགེ་བར་བསྒྱུར་བའི་ཚུལ་རྣམས་ལ་བསྟེན་པར་བྱའོ། །གནས་སྐབས་ཀྱི་དབྱེ་བའི་སྒོ་ནས་གཉིས་ནས་དྲུག་གི་བར་ཏེ། ཚོགས་གཉིས་ལ་ལྟོས་ནས་གཉིས་སམ། བདེན་གཉིས་ལ་ལྟོས་ནས་གཉིས་ཏེ་སོ་སོའི་སྐྱེ་བོའི་ཀུན་རྫོབ་དང༌། འཕགས་པའི་དོན་དམ་སྟེ་སེམས་བསྐྱེད་གཉིས། ཚུལ་ཁྲིམས་ཏིང་འཛིན་ཤེས་རབ་ཏེ་བསླབ་པ་གསུམ་ལ་ལྟོས་ཏེ་གསུམ་དང༌། ཡང་ན་ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་དེ་གསུམ་ལ་ལྟོས་པའི་སེམས་བསྐྱེད་གསུམ་མོ། །ལམ་གྱི་ཁྱད་པར་ཚོགས་སྦྱོར་གྱི་ལམ་ན། ཁམས་ཀྱི་སྒྲིབ་པ་ཕྱོགས་གཅིག་ཀྱང་མ་དག་པས་ཆོས་ཉིད་མངོན་སུམ་མ་མཐོང་བ་དོན་སྤྱིའི་ཚུལ་དུ་འཇལ་བས་མོས་པས་སྤྱོད་པའི་སེམས་བསྐྱེད༡་དང༌། དང་པོའི་ས་ནས་བཟུང་ས་བདུན་པའི་བར་ལ་བདག་གཞན་མཉམ་པ་ཉིད་དུ་རྟོགས་ཤིང༌། ཁམས་ཀྱི་སྒྲིབ་པ་ཕྱོགས་གཅིག་དག་ནས་ཡེ་ཤེས་མངོན་དུ་མཐོང་བས་ལྷག་བསམ་དག་པའི་སེམས་བསྐྱེད༢་དང༌། དག་ས་གསུམ་ན་ཁམས་ཀྱི་སྒྲིབ་པ་སྔར་བས་ཀྱང་དག་སྟེ་ས་བརྒྱད་པར་ཉོན་ཡིད་ལོག་སྟེ་རྣམ་པར་མི་རྟོག་པའི་ཡེ་ཤེས་དང༌། དགུ་པར་ཡིད་ཤེས་དང་སྒོ་ལྔ་ལོག་པས་སོ་སོ་ཡང་དག་རིག་པ་བཞིའི་ཡེ་ཤེས་དང་ཞིང་དག་པ་གཉིས་དང༌། བཅུ་པར་ཡིད་ཤེས་ཀྱི་བྱེད་ལས་དག་ནས་ཕྲིན་ལས་ཕུན་སུམ་ཚོགས་པ་སྟེ་དེ་ལྟར་བཞི་པོ་ལ་དབང་འབྱོར་བས་རྣམ་པར་སྨིན་པའི་སེམས་བསྐྱེད༣་པ་དང༌། ས་བཅུའི་རྒྱུན་མཐར་ཁམས་ཀྱི་སྒྲིབ་པ་སེམས་སེམས་བྱུང་གི་བག་ཆགས་ཀུན་གཞི་དང་བཅས་པ་དག་པས་སངས་རྒྱས་ཀྱི་ས་ན་སྒྲིབ་པ་ཐམས་ཅད་སྤངས་པའི་སེམས་བསྐྱེད༤་པ་སྟེ་བཞིའོ། །དེ་བཞིན་ལམ་ལྔའི་ཁྱད་པར་ལྔ་རུ་དབྱེ་ན། ཚོགས་ལམ་ན་ལས་དང་པོ་པའི་སེམས་བསྐྱེད། སྦྱོར་ལམ་ན་ཡོངས་སུ་སྦྱང་བ་བྱས་པའི་སེམས་བསྐྱེད། མཐོང་ལམ་ན་མཐོང་བའི་སེམས་བསྐྱེད། སྒོམ་ལམ་ན་རྣམ་པར་གྲོལ་བའི་སེམས་བསྐྱེད། མི་སློབ་ལམ་ན་བསམ་གྱིས་མི་ཁྱབ་པའི་སེམས་བསྐྱེད་དེ་ལམ་ལྔའི་རྗེས་འགྲོ་སེམས་བསྐྱེད་ལྔ་དང༌། དེ་བཞིན་ཕ་རོལ་ཕྱིན་པ་དྲུག་ལ་ལྟོས་ཏེ་དེ་སྙེད་ཀྱི་གྲངས་དྲུག་དང༌། ས་བཅུ་པོ་སོ་སོའི་མཚམས་དབྱེ་བ་ཉི་ཤུ་རྩ་གཉིས་ནི། མངོན་རྟོགས་རྒྱན་ལས། དེ་ཡང་ས་གསེར་ཟླ་བ་གསུམ་ཚོགས་ལམ་མེ་སྦྱོར་ལམ། །གཏེར་དང་རིན་ཆེན་འབྱུང་གནས་མཚོ། །རྡོ་རྗེ་རི་སྨན་བཤེས་གཉེན་དང༌། །ཡིད་བཞིན་ནོར་བུ་ཉི་མ་གླུ། །རྒྱལ་པོ་མཛོད་དང་ལམ་པོ་ཆེ། །བཞོན་པ་བཀོད་མའི་ཆུ་དང་ནི། །སྒྲ་སྙན་ཆུ་བོ་སྤྲིན་རྣམས་ཀྱིས། །རྣམ་པ་ཉི་ཤུ་རྩ་གཉིས་སོ། །དེ་ཡང་དང་པོ་གསུམ་ཚོགས་ལམ། །སྦྱོར་བ་མེ་ལྟ་བུ་སྦྱོར་ལམ། །དེ་ནས་ཕར་ཕྱིན་བཅུ་ས་བཅུ། །མངོན་ཤེས་སོགས་ལྔ་དག་ས་གསུམ། །ཆོས་ཀྱི་དགའ་སྟོན་སོགས་གསུམ་ས་བཅུ་པ་ཁོ་ན་ལ་ཡོད་དོ། །དེ་ལ་སོགས་རྒྱལ་བའི་དགོངས་སྤྱོད་ཐམས་ཅད་བསམ་པས་སྨོན་པའི་ཆ་དང༌། འཇུག་པས་ལག་ལེན་ཁྱབ་པར་བྱེད་པ་ལ་ཐམས་ཅད་འདུའོ། །གང་ཟག་གང་ཞིག་རང་ཉིད་ཁོ་ན་མཐོ་རིས་ཀྱི་ལེགས་པའི་ཡོན་ཏན་དོན་དུ་གཉེར་ནས། རྟག་ཏུ་གཅོད་པ་མེད་པའི་སྒོ་འཕར་ཏེ་རྒྱུན་དུ་མི་གཅོད་པའི་ལོངས་སྤྱོད་ཁང་པའི་ནང་ནས་སློང་མོ་བའི་ཡིད་ལ་འཁྲུགས་པ་མི་སྟེར་བ་གང་འདོད་སྟེར་བར་བྱེད་པ་དེ་ལ། གཏན་པ་མེད་པའི་མཆོད་སྦྱིན་བྱས་སོ་ཞེས་བསྔགས་པར་འོས་ཏེ་འདོད་ཁམས་པའི་མངའ་བདག་ཏུ་འགྱུར་ན། མཐའ་དག་པའི་སེམས་ཅན་ཐམས་ཅད་ཀྱི་དོན་དུ་དམིགས་ཏེ་ཕན་པའི་ཕྱིར་བྱང་ཆུབ་ཀྱི་གོ་འཕང་ཐོབ་པར་སྨོན་པའི་སེམས་རྒྱུན་ཆགས་སུ་ཡོད་པ་ལྟ་ཅི། ཐ་ན་ཐང་གཅིག་ཙམ་སྐྱེས་པས་ཀྱང་གནས་སྐབས་ངན་སོང་གི་སྒོ་གཅོད་ཅིང༌། མཐོ་རིས་ལྷ་མིའི་གནས་རིགས་སུ་སྐྱེས་ནས་ཚེ་རིང་ནད་མེད་སོགས་བདེ་བ་བསྟེན་པས། རྒྱུ་མཐུན་གྱི་འབྲས་བུའི་ཡོན་ཏན་ཟད་མི་ཤེས་པ་འབྱུང་ལ། སྨོན་སེམས་དེ་ལས་ཀྱང་ཁྱད་པར་དུ་འཇུག་པའི་སེམས་ཀྱི་ཡོན་ཏན་ནི་མཐའ་ཡས་ཏེ། སྤྱོད་འཇུག་ལས། བྱང་ཆུབ་སྨོན་པའི་སེམས་ལས་ནི། །འཁོར་ཚེ་འབྲས་བུ་ཆེར་འབྱུང་ཡང༌། །ཇི་ལྟར་འཇུག་པའི་སེམས་བཞིན་དུ། །བསོད་ནམས་རྒྱུན་ཆགས་འབྱུང་བ་མིན། །ཞེས་སོ། །གཞན་དོན་དུ་བྱང་ཆུབ་ཐོབ་འདོད་ཀྱིས་དངོས་སུ་སྦྱོར་བས་ཁྱབ་པའི་སེམས་དེ་ཆོ་ག་ལ་བརྟེན་ནས་བླངས་པ་གང་ནས་བཟུང་སྟེ། ཕྱིར་ལྡོག་པ་མེད་པའི་སེམས་ཀྱིས་སངས་རྒྱས་ཀྱི་སར་འགྲོ་བ་སྒྲོལ་བར་དམ་བཅའ་ཤིན་ཏུ་ཡིད་བརྟན་པ་རྒྱུད་ལ་ཐོབ་པའི་སྟོབས་ཀྱིས། དུས་དེ་ནས་བཟུང་སྟེ་བག་མེད་ཀྱིས་རྣམ་པར་གཡེང་བ་དང༌། གཉིད་ལོག་པ་སྤྱོད་ལམ་ལུང་མ་བསྟན་པར་གྱུར་ཀྱང༌། བསོད་ནམས་ཀྱི་ཤུགས་བར་མ་ཆད་པར་རྒྱུན་ཆགས་ཉིད་སེམས་བསྐྱེད་པ་པོ་དེའི་སེམས་རྒྱུད་དུ་འབྲེལ་བར་འགྱུར་བ་ཡིན་ཏེ། བྱང་ཆུབ་སེམས་དཔའི་སྤྱོད་པའི་ས་སྤྱོད་འཇུག་ལས་ཀྱང་འཐད་པ་དང་བཅས་བཤད་དེ། ཇི་སྐད་དུ། གང་ནས་བཟུང་སྟེ་སེམས་ཅན་ཁམས། །མཐའ་ཡས་རབ་ཏུ་བསྒྲལ་བའི་ཕྱིར། །མི་ལྡོག་པ་ཡི་སེམས་ཀྱིས་སུ། །སེམས་དེ་ཡང་དག་བླངས་གྱུར་པ། །དེ་ནས་བཟུང་སྟེ་གཉིད་ལོག་གམ། །བག་མེད་གྱུར་ཀྱང་བསོད་ནམས་ཤུགས། །རྒྱུན་མི་འཆད་པར་དུ་མ་ཞིག །ནམ་མཁའ་མཉམ་པར་རབ་ཏུ་འབྱུང༌། །འདི་ནི་འཐད་པར་དང་བཅས་པར། །ལགས་བཟང་གིས་ནི་ཞུས་པ་ལས། །དམན་མོས་སེམས་ཅན་དོན་གྱི་ཕྱིར། །དེ་བཞིན་གཤེགས་པ་ཉིད་ཀྱིས་གསུངས། །ཞེས་བཤད་དོ། །ཐབས་ཤེས་ཕུན་སུམ་ཚོགས་པ་དང་ལྡན་པའི་སྟོབས་ཀྱིས་དུས་ཐུང་ངུ་ལ་སྤྱོད་པའི་སྒོ་རེ་རེར་བསླབ་པས་ཀྱང༌། ཐབས་ཤེས་དེ་ལྟ་བུ་དང་མི་ལྡན་པ་རྣམས་ཀྱིས་བསྐལ་པ་མང་པོ་ལ་བསྒྲུབ་དགོས་པའི་ཚོགས་ཀྱང་འདུམས་པར་འགྱུར་ལ། དབྱེ་ན། ངེས་པ་དང་མ་ངེས་པ་ལ་འཇུག་པའི་ཕྱག་རྒྱའི་མདོ་ལས། དཔེ་ལྔའི་སྒོ་ནས་བསྟན་པའི་ཚུལ་ནི། ཕྱུགས་དང༌། གླང་པོ་ཆེའི་ཤིང་རྟ་དང༌། ཉི་ཟླ་ལྟ་བུ་དང༌། སོགས་ཀྱིས་ཉན་ཐོས་ཀྱི་རྫུ་འཕྲུལ་དང༌། སངས་རྒྱས་ཀྱི་རྫུ་འཕྲུལ་ཏེ་དེ་དག་གི་བགྲོད་པའི་བརྟུལ་ཞུགས་མྱུར་བུལ་མཐའ་ཡས་པ་ལྟར། གང་ཟག་སོ་སོའི་སེམས་བསྐྱེད་པའི་བློ་སྟོབས་ཆུང་འབྲིང་ཆེན་པོའི་དབྱེ་བའང་གསུམ་སྟེ་འོག་ཏུ་འཆད་དོ། །དེ་ཡང་བློ་སྟོབས་ཆེན་པོས་ཐབས་ལ་མཁས་པ་དང༌། བརྩོན་འགྲུས་ཕུལ་དུ་བྱུང་བ་དང༌། ཤེས་རབ་ཟབ་ཅིང་རྣོ་བའི་སྟོབས་ཀྱིས་མྱུར་བའི་ཚད་གྲངས་མེད་གསུམ་གྱི་སྒྲིབ་གཉིས་ཀྱི་དམ་ལ་བཞག་པ་མཐའ་དག་འཇིག་པའི་ཚུལ་གྱིས་འཚང་རྒྱ་བར་འགྱུར་བ་ཡིན་ནོ། །དཔེ་ཇི་ལྟར་ན་འབྲས་བུ་སྨིན་པ་ལ་ས་བོན་དགོས་ཀྱང༌། ས་བོན་དེ་ས་ལ་ལྷུང་བ་གཙོ་མི་ཆེ་ལ། རྐྱེན་རྣམས་ཚོགས་པ་གཙོ་ཆེ་བ་བཞིན་དུ། བྱང་ཆུབ་ཏུ་སེམས་བསྐྱེད་པ་ལ་དང་པོ་བཅོས་ནས་སྐྱེ་དགོས་ཀྱང༌། བྱང་ཆུབ་ཀྱི་སེམས་མཆོག་དེ་བསྐྱེད་པ་མི་གཙོ་ལ། བཅོས་མིན་སྐྱེས་པ་གཙོ་ཆེ་བ་ཡིན་ནོ། །སྟོབས་གསུམ་ལས་ནི་བྱང་ཆུབ་སེམས་ཡང་དག་རྒྱུད་ལ་སྐྱེ་བར་འགྱུར་བས་ན། དེ་ལྟར་གོམས་པས་སྙིང་རྗེ་ཆེ་བར་གྱུར་པ་ནི་བྱང་ཆུབ་སེམས་ཀྱི་རྩ་བ་དང༌། ཡན་ལག་བདུན་པ་ལ་སོགས་པའི་ཚོགས་བསགས་གནད་དུ་སྨིན་པར་བྱས་ཤིང༌། མཆོག་གསུམ་ལ་སྐྱབས་སུ་འགྲོ་བ་ནི་སྡིག་པ་ཟིལ་གྱིས་གནོན་པས་རྟེན་གྱི་སྟོབས་དང༌། དེ་དག་གོ་རིམ་བཞིན་དུ་སྙིང་རྗེ་བསམ་པའི་སྟོབས་དང༌། ཚོགས་བསགས་སྦྱོར་བའི་སྟོབས་དང༌། སྐྱབས་འགྲོ་རྒྱུ་ཡི་སྟོབས་སུ་བཤད་པ་ཡིན་ནོ། །སེམས་བསྐྱེད་སྐྱེ་བའི་རྟེན་གྱི་གང་ཟག་ནི། སེམས་ཙམ་པའི་ལུགས་དང༌། དབུ་མ་པའི་ལུགས་ཏེ་རྣམ་པ་གཉིས་སུ་བསྟན་ཏེ། དང་པོ་ལྟར་ན་སྨོན་སེམས་ཙམ་ལ་མ་ངེས་ཀྱང་འཇུག་སྡོམ་མ་ཐོབ་པ་ཐོབ་པའི་རྟེན་སོ་ཐར་རིགས་བརྒྱད་ལས། བསྙེན་གནས་ནི་དུས་ཁྲིམས་ཡིན་པས་མི་རུང་ལ། གཞན་དགེ་བསྙེན། དགེ་ཚུལ། དགེ་སློང་གསུམ་རེ་རེར་ཕ་མ་གཉིས་སུ་ཕྱེ་བས་དྲུག་དང༌། དགེ་སློབ་མ་སྟེ་བདུན་གང་རུང་གི་སྡོམ་ལྡན་ནི་ནམ་ཡང་དགོས་ལ། དབུ་མ་པ་ལྟར་ན། དཀོན་མཆོག་ཏཱ་ལར། ཇི་སྐད་དུ། རྒྱལ་དང་རྒྱལ་བའི་ཆོས་ལ་དད་གྱུར་ཅིང༌། །བྱང་ཆུབ་བླ་མེད་ལའང་དད་གྱུར་ནས། །རྒྱལ་སྲས་རྣམས་ཀྱི་སྤྱོད་ལ་དད་བྱེད་ན། །བློ་དང་ལྡན་པ་རྣམས་ཀྱི་སེམས་སྐྱེའོ། །ཞེས་སོགས་བསམ་པའི་རྟེན་གཙོ་བའི་ཚུལ་སྡོང་པོ་བཀོད་པ། བསྐལ་བཟང༌། ནམ་སྙིང་མདོ་སོགས་ལས་གསུངས་པས། དེའི་རྗེས་སུ་ཕྱོགས་ནས་རྟེན་མ་ངེས་པར་བཤད་པ་ཐལ་འགྱུར་དབུ་མའི་ལམ་སྲོལ་ལ། བསམ་པ་ཕུན་སུམ་ཚོགས་པ་རྟེན་གང་རུང་རུང་ལ་འཇུག་པ་སེམས་ཙམ་པའི་ལུགས་ལས་ཀྱང་ཡངས་པ་ཡིན་ནོ། །སྲོལ་གཉིས་ཀ་ལ་ཚོགས་བསགས་པ་ནི་ལྷག་པར་སེམས་བསྐྱེད་སྐྱེ་བའི་ཐབས་སུ་གསུངས་སོ། །སེམས་བསྐྱེད་སྐྱེ་བའི་རྒྱུ་ཐུན་མིན་ནི། སེམས་ཅན་ཀུན་ཀྱང་སེམས་ཀྱི་རང་བཞིན་འོད་གསལ་བ་བདེ་བར་གཤེགས་པའི་ཆོས་ཁམས་རྒྱ་མཚོ་ལྟ་བུ་སྨིན་རུང་གི་ཚུལ་དུ་ཡོད་པ་པས་ས་བོན་ལ་མྱུ་གུ་བཞིན་དེའི་སྙིང་པོ་ཅན་ཏེ། ཟླ་བ་སྒྲོན་མེའི་མདོ་ལས། བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། །སེམས་ནི་རྒྱ་ཆེན་མཆོག་ཏུ་རབ་བསྐྱེད་དེ། །འགྲོ་བ་འདི་དག་མ་ལུས་སངས་རྒྱས་རྒྱུ། །ཞེས་སོ། །སེམས་བསྐྱེད་སྐྱེ་བས་བདག་རྐྱེན་ནི་ཐེག་ཆེན་དགེ་བའི་བཤེས་གཉེན་མཚན་ཉིད་དང་ལྡན་པ་ལ་རབ་ཏུ་བསྟེན་པས། སློབ་མ་ལ་ཇི་ལྟར་རེ་བ་ལྟར་སྦྱིན་ནུས་པས་ཡིད་བཞིན་ནོར་བུ་ལྟ་བུའི་བླ་མ་སྡོམ་ལྡན་ཐེག་ཆེན་གྱི་དོན་ལ་མཁས་པའི་ཡོན་ཏན་མཆོག་མངའ་ཞིང༌། བྱང་ཆུབ་སེམས་ཀྱིས་ཐུགས་རྒྱུད་གང་བ་ནི་ལེན་པའི་ཡུལ་ཏེ། སྡོམ་པ་ཉི་ཤུ་པ་ལས། བླ་མ་སྡོམ་ལ་གནས་ཤིང་མཁས། །ནུས་དང་ལྡན་ལས་བླང་བར་བྱ། །ཞེས་སོ། །དེ་ལྟ་བུའི་བླ་མ་དེས་ཐོག་མར་དགེ་བ་སྲིད་པའི་མཐའ་ལ་སྐྱོ་བ་བསྐྱེད། བར་དུ་དགེ་བ་མྱང་འདས་ཀྱི་མཐའ་ལ་ཞེན་པ་དགག་པ་དང༌། མཐའ་མར་དགེ་བ་མཐའ་གཉིས་ལ་མི་གནས་པའི་སྟོང་ཉིད་སྙིང་རྗེའི་སྙིང་པོ་ཅན་གྱི་བྱང་ཆུབ་ཀྱི་སེམས་ལ་སྤྲོ་བ་བསྐྱེད་པའི་ཆོས་རྣམས་དང༌། གཞན་ཡང་རྒྱན་དང༌། སྡོང་པོ་བཀོད་པ། མ་སྐྱེས་དགྲའི་ལེའུ། འོད་སྲུང་གི་ལེའུ། རིན་པོ་ཆེའི་ཕུང་པོའི་མདོ་སོགས་ལས་ལེགས་པར་གསུངས་པའི་བྱང་ཆུབ་སེམས་ཀྱི་ཡོན་ཏན་དཔག་ཡས་བརྗོད་དོ། །དྲི་བཟང་སྣ་ཚོགས་ཀྱི་ཁུ་བས་སྐྱང་ནུལ་བྱེད་པ་ལ་སོགས་མཛེས་ཤིང་སྙིང་དུ་སྡུག་པ་ངོམ་པའི་སྒོ་ནས་གནས་ཁང་བརྒྱན་པའི་ཚུལ་ཡང༌། དང་པོ་བྱི་དོར་ལེགས་པར་བྱས་ཤིང་གུར་གུམ་དང༌། དྲི་བཟང་པོའི་སྤོས་ཆུ་དང༌། བ་བྱུང་ལ་སོགས་པས་བྲན་ཞིང་ཆག་ཆག་གདབ་པ་དང་བཅས། སྒེག་ཆོས་མ་ཡིན་པར་གུས་པ་བསྐྱེད་ཕྱིར་ཡན་ལག་གདོང་སོགས་ཐམས་ཅད་བཀྲུ་ཞིང༌། གོས་གཙང་མ་བགོས་ལ་གྲགས་འདོད་དང་བྲལ་བར་དཀོན་མཆོག་གསུམ་གྱི་ཡོན་ཏན་འབའ་ཞིག་ཡིད་ལ་སེམས་པ་ཡི། དད་དང་ངེས་ཤེས་དྲག་པོས་འཕན་གདུགས་རྒྱལ་མཚན་བླ་བྲེ་སོགས་དང༌། མཆོད་ཡོན་སོགས་དང༌། རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད། རྫས་བརྒྱད་སོགས་མཆོད་པའི་ཚོགས་མ་ཚང་བ་མེད་པ་མང་པོའི་ཕྲུ་མ་འདེབས་པ་སྟེ་བཀྲམ་པ་ལ་སྙིང་ཐག་པ་ནས་དགའ་ཞིང་དགེ་བ་ཆུད་མི་ཟ་བའི་སྤྲོ་བ་དང་བཅས་པས་དགོད་ཅིང་ཡི་རང་བར་བྱའོ། །མཆོག་གསུམ་ལ་སོགས་པའི་བདེན་པ་བརྗོད་པས་ས་གཞི་ཐམས་ཅད་དག་པའི་ཞིང་ཁམས་ཀྱི་བཀོད་པ་ལྟར། རྒྱ་དཔང་ཚད་ལས་འདས་པར་རྣམ་པར་དག་པའི་དབུས་སུ་གནས་ཁང་དེ་ཉིད་སྟོང་གསུམ་ལས་རྒྱ་ཆེ་བའི་གཞལ་མེད་ཁང་དང༌། རིན་པོ་ཆེ་སྣ་ཚོགས་ལས་གྲུབ་པ་རྒྱན་བཀོད་སོགས་ཕུན་སུམ་ཚོགས་པའི་དབུས་སུ། རིན་པོ་ཆེ་སྣ་ཚོགས་ལས་གྲུབ་པའི་པདྨ་ཉི་ཟླ་དར་ཟབ་ཀྱི་ཁྲི་སོགས་ལྟ་ན་སྡུག་པ་མང་པོས་མཛེས་པར་བསམ་ལ། དམ་ཚིག་གི་རྟེན་རྒྱལ་བ་སྲས་དང་བཅས་པའི་གཟུགས་བརྙན་དང༌། ཐེག་ཆེན་གྱི་གླེགས་བམ་སོགས་སྐུ་གསུང་ཐུགས་རྟེན་རབ་གནས་ཅན་ཇི་སྙེད་ཡོད་པ་མཐའ་དག་གནས་དེར་བོས་ནས་ཏེ། ཟླ་བ་སྒྲོན་མའི་མདོ་ལས་བྱུང་བ། བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། །སོགས་དང༌། རིག་པ་མཆོག་གི་རྒྱུད་ལས་བྱུང་བ། མ་ལུས་སེམས་ཅན་ཀུན་གྱི་མགོན་གྱུར་ལ་སོགས་པའི་ཚིག་གིས་སྤོས་རོལ་དང་བཅས་དབྱིངས་ནས་ཡེ་ཤེས་སེམས་དཔའ་རྒྱལ་བ་སྲས་དང་བཅས་པ་ཐམས་ཅད་དགུག་ཅིང་དྲངས་ནས་དམ་ཚིག་གི་རྟེན་རྣམས་ལ་གཉིས་མེད་དུ་གཞུག་པའི་ཆོ་ག་ནི། མས་བུ་གཅིག་པུ་སྟོར་ཚེ་རྒྱུག་པ་ལྟར་རམ་མཛའ་ཕོ་མོ་གཅུགས་དུས་བཏབ་པའི་དམ་བཅའ་དྲན་པ་ལས་ཀྱང་མྱུར་བས་རྒྱལ་རྣམས་ཕྱོགས་བཅུའི་ཞིང་ཁམས་གཞན་དུ་གཟིགས་པ་ཡོལ་བ་སྟེ་དེ་མ་ཐག་ཏུ་འདི་ཁོ་ནར་བྱོན་པའི་ཐ་སྙད་བཏགས་པའོ། །དཀོན་བརྩེགས་ལས། གང་ཞིག་རྒྱལ་བ་ཡིད་བྱེད་པ། །དེ་ཡི་མདུན་ན་དེ་བཞུགས་ཏེ། །རྟག་པར་བྱིན་གྱིས་རློབ་པར་བྱེད། །ཉེས་པ་ཀུན་ལས་རྣམ་པར་གྲོལ། །ཞེས་སོ། །འདིར་སྤྱན་འདྲེན་པའི་ཚིག་ནི། གང་ཞིག་འཁོར་བ་ན་གནས་པའི་གདུལ་བྱ་མ་ལུས་ཤིང་ལུས་པ་མེད་པའི་སེམས་ཅན་ཀུན་གྱི་སྡུག་བསྔལ་ལས་སྐྱོབ་པའི་མགོན་དང་ཕན་གདགས་པའི་དཔུང་གཉེན་མཆོག་ཏུ་གྱུར་ཀྱང་བདུད་ཀྱི་སྡེ་དཔུང་དང་བཅས་པའི་ཚོགས་མ་ལུས་པ་འཇོམས་པར་མཛད་པའི་དགྲ་རུ་གྱུར་ཅིང༌། ཇི་ལྟ་བ་ཆོས་རྣམས་ཀྱི་ཆོས་ཉིད་དང༌། ཇི་སྙེད་པ་ཆོས་ཅན་ཤེས་བྱ་མཐའ་དག་ཆགས་ཐོགས་མེད་པར་མཁྱེན་ཅིང་གཟིགས་པ་ཡི་ཕྱོགས་བཅུའི་བཅོམ་ལྡན་འདས་རྒྱལ་བ་སྲས་དང་བཅས་པ་ཐམས་ཅད་བདག་གི་སྡུམ་པར་ཏེ་གནས་ཁང་འདིར་ཚོགས་བསགས་པའི་ཞིང་དང༌། སྐྱབས་ཡུལ་དུ་མཆིས་ཏེ་གཤེགས་སུ་གསོལ། བསྙེན་བཀུར་གྱི་ཁྲུས་གསོལ་བ་ནི། དང་པོ་འདི་ལྟར་འཇིག་རྟེན་ཕལ་པའི་ལས་ཀྱི་སྤྲུལ་པ་དངོས་པོ་བཅོས་མ་མ་ཡིན་པར་ལྷ་ཚོགས་རྣམས་འབྱོན་པའི་ཤུལ་ཏེ་ལམ་དུ་ཁྲུས་གསོལ་བའི་གནས་ཀྱི་ཁང་བུ་བརྩེགས་པ་རིན་པོ་ཆེ་ལས་གྲུབ་པ་དྲི་བསུང་ཞིམ་པོས་ཕྱོགས་མཐར་ཁྱབ་པའི་རང་བཞིན་ཅན། ཤེལ་དང་ནོར་བུ་སོགས་རིན་པོ་ཆེ་སྣ་ཚོགས་ལས་གྲུབ་པའི་ས་གཞི་ཁོད་སྙོམས་ཞིང་མིག་མང་རིས་སུ་བྲིས་ཤིང་བཀྲ་བ་དང༌། རིན་པོ་ཆེ་འོད་འབར་བའི་ཀ་བ་ཡིད་དུ་འོང་བར་ལྡན་ཞིང༌། གཡུ་དམར་དང་མུ་ཏིག་རིན་པོ་ཆེ་འོད་ཆགས་པའི་བླ་བྲེ་སོགས་རྒྱན་གྱི་རྣམ་པ་མང་པོ་དཔྱངས་ཤིང་མཛེས་པར་བྱས་པ་དེར། བདེ་བར་གཤེགས་པ་སངས་རྒྱས་རྣམས་དང༌། རིགས་ཀྱི་བུ་མཆོག་སྲས་བྱང་ཆུབ་སེམས་དཔའི་ཚོགས་དང་བཅས་པ་ཐམས་ཅད་བྱོན་ནས་བཞུགས་པ་ལ། སྤོས་འདག་ཆལ་གྱི་ཆུས་སུམ་ཉིས་གང་བའི་བཻ་ཌཱུརྻ་ལ་སོགས་པའི་ནོར་བུ་རིན་པོ་ཆེའི་བུམ་པ་ནས། ཁྲུས་ཀྱི་རིམ་གྲོ་བགྱིད་པའི་ཕྱིར་རང་ལས་སྤྲུལ་པའི་སྨིན་ལེགས་མ་སྟེ་མཆོད་པའི་ལྷ་མོ་རྣམས་ཀྱིས་བསྟོད་པའི་གླུ་དང་གར་སོགས་མཛེས་པ་དང་སྙན་པའི་རོལ་མོའི་རྣམ་པར་འགྱུར་བ་དཔག་ཏུ་མེད་པས་ཕན་ཚུན་གཅིག་གིས་གཅིག་ལ་འགྲན་པ་ལྟ་བུར་ཁྲུས་ཀྱི་བྱ་བ་ལ་བརྩོན་བཞིན་སྐུ་ཕྱི་བ་དང༌། ན་བཟའ་དང༌། རྒྱན་གསོལ་བ་སོགས་ཉེ་རེག་གི་ཆོ་ག་སྟེ་བྱ་བ་རྣམས་གུས་པའི་རྣམ་འགྱུར་གྱིས་བྱེད་པ་ལ་མཁས་པའི་རི་དྭགས་མིག་ཏེ་མཆོད་པའི་ལྷ་མོ་རྣམས་ཀྱིས་དྲི་བཟང་གི་ཕྱེ་མ་དར་གོས་སྣ་ཚོགས་པས་ཐུམ་པོར་དྲིལ་བ་མང་པོས་ཁྲུས་གསོལ་བའི་རླན་གྱི་ཆ་ཐམས་ཅད་ཕྱིས། བསྐུ་མཉེའི་རྫས་སྣ་ཚོགས་པས་སྲི་ཞུའི་ལས་བྱེད་པས་གཡེང་ཞིང་གོས་རྒྱན་སོགས་འབུལ་བ་ཡང༌། འདི་ལྟར་ཁ་དོག་གཅིག་ཏུ་མི་གནས་པ་དབང་པོའི་མཚོན་ཏེ་འཇའ་ཚོན་ལྟ་བུ་ལ་ཕལ་པའི་ལས་ཀྱིས་ཐགས་སུ་བཏགས་པ་མེད་པའི་ཡོན་ཏན་བསོད་ནམས་ཀྱི་སྟོབས་ལས་བྱུང་བའི་ལྷ་རྫས་ཀྱི་གོས་རང་སྣང་དགེ་བའི་རིན་གྱིས་ཉོ་བ་དང་འདྲ་ལ། འབད་རྩོལ་མེད་པར་དགོས་འདོད་ཐམས་ཅད་འབྱུང་བའི་ཡོན་ཏན་ནི་དཔག་བསམ་ལྗོན་པ་ལས་བྱུང་བས་བཙོང་པ་ལྟ་བུའི་གོས་པཉྩ་ལི་སྟེ་ཁ་དོག་ལྔ་པ། དབྱིབས་ནི་དར་གྱི་ཆས་གོས་ལྔ་དང༌། གཞན་ཡང་ཆགས་བྲལ་གྱི་ཚུལ་མཛད་པ་རྣམས་ལ་ཆོས་གོས་རྣམ་གསུམ་སོགས་དང༌། གོས་དེ་དག་ཀྱང་ལྕིད་ཀྱིས་ནོན་པ་སྤངས་ཤིང་ཤ་མི་སྒྲིབ་པས་སྲབ་ལ་རེག་བྱ་འཇམ་ཞིང་ལྗིད་མེད་པས་ཡང་བའི་གོས་ཏེ་བྱང་གླིང་པའི་གོས་སྲང་གཅིག་ལ། རྒྱལ་ཆེན་རིགས་བཞིའི་སྲང་ཕྱེད་ཡིན་པ་ནས། འཕྲུལ་དགའི་གོས་སྲང་གཅིག་གི་དྲུག་ཅུ་རྩ་བཞིའི་ཆ་གཅིག་ལས་མེད་པའི་བར་ཇེ་ཡང་དུ་སོང་བ་དང༌། ཚངས་རིས་ཀྱི་གོས་ལ་སྲང་གིས་ཚད་གཞལ་དུ་མེད་དོ། །དེ་ལྟ་བུའི་གོས་བཟང་པོ་དེ་དག་དྲི་བཟང་སྣ་ཚོགས་དང༌། སྤོས་ཀྱི་ཆུས་བགོས་ཤིང་བྱུགས་པ་ལོངས་སྤྲུལ་གྱི་རྣམ་པ་ཅན་སོ་སོ་ལ་འོས་ཤིང་འཚམས་པ། རྣམ་གྲངས་རེ་རེ་ལ་ཆ་ཤིན་ཏུ་མང་པོ་དང༌། རིན་ཐང་གི་ཚད་བརྗོད་པ་བྲལ་ལ་བརྗོད་ན་ཁྲེལ་བའི་གནས་སུ་གྱུར་པ་ལྟ་བུའི་རིན་ཆེན་རྒྱན་གྱི་བྱེ་བྲག་གདུ་བུ། དཔུང་རྒྱན། སྙན་ཆ། ཅོད་པན་སོགས་རིན་པོ་ཆེའི་རྒྱན་བརྒྱད་པོ་རེ་རེའང་གྲངས་ཚད་བརྗོད་པ་དང་བྲལ་བ། དེ་རྣམས་འབུལ་བའི་ཡུལ་འདོད་པའི་ཡོན་ཏན་ལ་འཛིན་ཞེན་གྱི་བག་ཆགས་ཕྲ་བའང་སྤངས་ཤིང་སྤངས་པ་དང་རྟོགས་པའི་ཡོན་ཏན་མཐའ་དག་མངའ་བའི་ཐུབ་དབང་སངས་རྒྱས་རྣམས་ལ་དགོས་པ་བྲལ་ཡང༌། བདག་གིས་ཚེ་རབས་དུ་མར་བསོད་ནམས་ཀྱི་ཚོགས་མ་བསགས་པས་དབུལ་ཞིང་བཀྲེན་པ་དང་ལྡན་པས་བདག་ཏུ་བཟུང་བའི་ལོངས་སྤྱོད་མེད་པས་ན་བསོད་ནམས་ཀྱི་ཚོགས་རྫོགས་པའི་སླད་དུ་ཡིད་ཀྱིས་སྤྲུལ་པའི་མཆོད་པ་འདི་རྣམས་བདག་གིར་བཞེས་པར་མཛོད་ཅིག་ཅེས་མཁའ་ཁྱབ་ཏུ་ཕུལ་བས་རང་གཞན་སེམས་ཅན་ཐམས་ཅད་ཀྱི་བསོད་ནམས་ཀྱི་ཚོགས་རྫོགས་ཤིང༌། ཉེས་སྤྱོད་ཀྱིས་གདུང་བ་ལས་སྐྱོབ་པའི་ངོ་ཚ་ཤེས་ཤིང་ཁྲེལ་ཡོད་ཀྱི་གོས་དང༌། གཟུངས་སྤོབས་ཏིང་འཛིན་མཚན་དཔེ་སོགས་ཡོན་ཏན་གྱི་རྒྱན་ཕུན་སུམ་ཚོགས་པ་ཐོབ་པར་གྱུར་ཅིག་སྙམ་པ་དང༌། དེ་བཞིན་དུ་འཇིག་རྟེན་དབང་ཕྱུག་ལ་སོགས་ཉེ་བའི་སྲས་བརྒྱད་དང༌། ངན་སོང་ཀུན་འདྲེན་ལ་སོགས་ཏེ་བྱམས་པ། མཐོང་བ་དོན་ཡོད། མྱ་ངན་མུན་འཇོམས། སྤོས་ཀྱི་གླང་པོ། དཔའ་བར་འགྲོ་བ། ནམ་མཁའ་མཛོད། ཡེ་ཤེས་ཏོག །འོད་དཔག་མེད། ཟླ་འོད། བཟང་སྐྱོང༌། དྲྭ་བ་ཅན་གྱི་འོད། རྡོ་རྗེའི་སྙིང་པོ། བློ་གྲོས་མི་ཟད་པ། སྤོབས་པ་བརྩེགས་པ། ཀུན་ཏུ་བཟང་པོ་སྟེ་བསྐལ་བཟང་གི་སེམས་དཔའ་བཅུ་དྲུག་དང་ནི་ཁྱིམ་པའི་ཚུལ་བྱང་ཆུབ་སེམས་དཔའ་ཆོས་འཕགས། རྟག་ཏུ་ངུ་དང༌། ལི་ཙ་བཱི་དྲི་མ་མེད་པར་གྲགས་པ་སོགས་བྱང་ཆུབ་སེམས་དཔའ་ཐམས་ཅད་ལའང་དབུལ་བར་བགྱིའོ། །གཞན་ཡང་གླིང་བཞིར་རི་རབ་ཚངས་པ་དང་བཅས་པ་སྟོང་ལ་སྟོང་དང་པོ་སྤྱི་ཕུད་ཀྱི་འཇིག་རྟེན། དེ་སྟོང་ལ་སྟོང་གཉིས་པ་བར་མའི་འཇིག་རྟེན། དེ་སྟོང་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཏེ་དེ་ཐམས་ཅད་གཅིག་ཅར་ཁྱབ་པའི་དྲིའི་བཞོན་པར་འཁྱུད་པ་སྟེ་རླུང་དང་འགྲོགས་པའི་ཙནྡན་སོགས་སྤོས་ཀྱི་བསུང་ཞིམ་པོའི་དྲིས་ནི། བསོད་ནམས་བྱེ་བ་སྟེ་དཔག་མེད་བསྐྲུན་པའི་འབྱུང་གནས་མཚན་དང་དཔེའི་བྱད་བཟང་པོས་བརྒྱན་པའི་གསེར་སྦྱངས་པ་རབ་ཏུ་མཛེས་པའི་བརྟན་པ་འཕྲོག་སྟེ་མོག་མོག་པོར་བྱེད་པའི་སྐུ་འོད་ལ་བྱུག་པར་བགྱིའོ། །དཔེར་ན་དག་པའི་ཞིང་ཁམས་ཀྱི་བཀོད་པ་ནི། སངས་རྒྱས་དེའི་སྨོན་ལམ་དང༌། བྱང་ཆུབ་སེམས་དཔའ་རྣམས་ཀྱི་བསོད་ནམས་ཀྱི་རང་སྣང་ལས་གཞན་མ་ཡིན་པ་ལྟར། ཚད་མེད་བཞིའི་ཐུགས་དང་ལྡན་པའི་དེ་བཞིན་གཤེགས་པ་རྣམས་ཀྱི་ཡེ་ཤེས་ཀྱི་རང་སྣང་དང་མཐུན་པར་ཚད་མེད་བཞིས་བློ་སྦྱངས་པའི་གང་ཟག་ཚོགས་གསོག་པ་པོའི་ཡིད་ངོར་དམིགས་ཤིང་སྣང་བ་ནི། དམིགས་པ་རྒྱ་ཆེ་ཤིང་ཉེ་འཁོན་མེད་པའི་བཏང་སྙོམས་ཀྱི་རང་བཞིན་ཤིན་ཏུ་རྒྱ་ཁྱོན་ཡངས་པའི་ཤེལ་གྱི་ས་གཞི་ལ། ཕན་པའི་རླན་དང་ལྡན་པའི་ཡིད་འོང་གི་བྱམས་པའི་རང་བཞིན་པདྨོ་གེ་སར་དང་བཅས་པའི་འདབ་མ་སྟོང་བརྡལ་བའི་སྟེང་དེར། འགྲོ་བའི་སྡུག་བསྔལ་གྱི་གདུང་བ་ཞི་བའི་བསིལ་ཟེར་ཅན་སྙིང་རྗེ་དང༌། རྨོངས་པའི་མུན་པ་སེལ་བའི་ཤེས་རབ་ཟུང་དུ་འཇུག་པའི་རང་བཞིན་ཉི་ཟླ་བཀྲག་ཏུ་འཚེར་བ་བསྟར་ལེགས་པའི་གདན་ལ། ཟག་པ་མེད་པའི་དགའ་བ་ཆེན་པོའི་རང་བཞིན་བཅོམ་ལྡན་འདས་འཁོར་བྱང་ཆུབ་སེམས་དཔའི་ཚོགས་དང་བཅས། བསྐལ་པ་རྒྱ་མཚོ་ལྟ་བུའི་བར་བཞུགས་ནས་རྗེས་སུ་བཟུང་དུ་གསོལ། རང་བཞིན་དུ་ལུས་ཀྱི་རྣམ་འགྱུར་ལས་སེམས་ཀྱི་མངོན་རྟོགས་གསལ་ཕྱིར་སེམས་ལ་དད་གུས་གང་ཡང་མེད་བཞིན་གྲགས་འདོད་དང་ཚུལ་འཆོས་སམ་བབ་ཅོལ་གོམས་པ་ལུང་མ་བསྟན་གྱི་བྱ་བ་ལ་འཇུག་པའི་ཚུལ་མིན་པས་ལུས་བཏུད་པའི་རྟགས་ཀྱི་རྣམ་འགྱུར་སྙིང་ཁར་ཐལ་མོ་སྦྱར་ལ་དད་ཅིང་གུས་པ་དང༌། འཇིགས་ཤིང་བག་ཡོད་ཁྲེལ་དང་ངོ་ཚ་ཤེས་པ་དང་བཅས་པའི་སེམས་ཀྱི་མངོན་རྟོགས་ངོམ་པ་ལ་མེ་ཏོག་གི་དོག་པས་རབ་ཏུ་བཟུང་བ་སྟེ་གང་བའི་སྙིམ་པའི་སྣོད་ནི་པདྨ་ཁ་འབུས་པའམ་གའུ་ཆུང་གི་བརྟུལ་ཞུགས་འཛིན་པ་ཡི་དབྱིབས་ལྟ་བུ་དགོས་པ་ཡིན་ནོ། །ཤེས་རབ་ཀྱིས་ཆོས་ཐམས་ཅད་ཀྱི་གནས་ལུགས་གཟིགས་པས་སྤྱན་ལྟ་བུ་རིག་པ་དང༌། སྙིང་རྗེས་གཞན་དོན་ལ་གཤེགས་པས་ཞབས་སུ་ལྡན་པ་སོགས་གཞན་ཡང་ལམ་བདེ་བ་བྱང་ཆུབ་སེམས་དཔའི་ཐེག་པ་ནས་འབྲས་བུ་བདེ་བ་སངས་རྒྱས་ཀྱི་སར་གཤེགས་པས་ན་བདེ་གཤེགས་ཀྱི་ཡོན་ཏན་དང༌། གཞན་ཡང་དམ་པའི་ཆོས་དང༌། འཕགས་པའི་དགེ་འདུན་རྣམས་ཀྱི་ཡོན་ཏན་མཐའ་དག་གནས་ཀྱིས་ཐག་རིང་པོར་བསྐལ་པ་བཞིན་འཕགས་ས་མ་ཐོབ་བར་མངོན་དུ་མི་མཐོང་ཡང༌། དད་པ་དང་མཚུངས་པར་ལྡན་པའི་ཡིད་ཀྱི་སྐྱེད་མོས་ཚལ་དུ་མགྲོན་དུ་ཁུག་པ་ལྟར་འོངས་པའི་མོད་ལ། འཇིགས་སྐྲག་དང་སྐྱོ་བ་ལ་སོགས་པའི་ཤུགས་ཀྱིས་མིན་པར། དད་པའི་གདུང་ཤུགས་དྲག་པོས་བ་སྤུ་གཅིག་ཏུ་ཟིང་པའོ། །དེ་ལྟར་དད་པས་མདུན་བསུས་ཏེ་ཡན་ལག་བདུན་པ་འབུལ་བའི་ཚུལ་ཡང༌། དཔེར་ན་སྤྲིན་བྲལ་གྱི་སྟོན་ཟླ་གཞོན་ནུ་ཁྲུས་ལ་འཇུག་པ་དང་འདྲ་བར་གཟུགས་བརྙན་འཛིན་ནུས་པ་ཤིན་ཏུ་དྭངས་པའི་རྫིང་བུའི་ནང་དུ་གཟུགས་བརྙན་ཅི་ཤར་ཡང་ཤིན་ཏུ་གསལ་བས་ན། དེའི་ཁར་རྨ་བྱའི་བུ་མོ་ཡིད་འཇོ་ཞིང་སྒེག་པའི་གཟུགས་ཅན་གྱིས་ཟློས་གར་རྩེད་འཇོ་ལ་རོལ་ན། རྫིང་བུ་དྭངས་པ་དེའི་ནང་དུ་དེ་དག་གི་གཟུགས་བརྙན་ཤར་བ་དེ་དང་གཟུགས་དངོས་གཉིས་ཤིན་ཏུ་འབྱེད་དཀའ་བར་སྣང་ལ། དེ་ལྟ་བུའི་རང་གི་ལང་ཚོའི་གྲངས་མེད་པར་སྤྲུལ་པའི་རྣམ་གྲངས་ཇི་སྙེད་པ་ནི་ས་ཆེན་པོའི་རྡུལ་གྱི་རྣམ་གྲངས་དང་སོ་སོར་མི་འབྱེད་པ་ཤིན་ཏུ་འཁྲུལ་པ་བསྐྱེད་པར་བྱེད་པ་དཔག་ཏུ་མེད་པར་སྤྲུལ་ཏེ་ཕྱག་གི་ལས་ཁོ་ན་ལ་སྒོ་གསུམ་ཆིག་དྲིལ་དུ་འཇུག་པའི་བྱ་བས་བྲེལ་ལོ། །སྤྱིར་བྱང་ཆུབ་སེམས་དཔའ་རྣམས་ཀྱིས་བདོག་རྒུའི་དངོས་པོ་ཐམས་ཅད་གཏོང་བ་སྦྱིན་སོགས་ཕར་ཕྱིན་དྲུག་གི་ཆགས་བདུན་སྤོང་བ་དང་ཁྱད་ཆོས་བཞི་ལྡན་ཡིན་མོད། སྐབས་འདིར་ལས་དང་པོ་པའི་སེམས་བསྐྱེད་དང་རྗེས་མཐུན་བསམ་པ༡། དངོས་པོ༢། མཆོད་རྫས༣་བཅས་མཆོག་གསུམ་ལ་དམིགས་ཏེ། དག་པ་གསུམ་དང་ལྡན་པས་གཏོང་བའི་ཡན་ལག་ཁྱད་ཆོས་བཞི་ལྡན་རྫོགས་པའི་དངོས་འབྱོར་དང༌། དེས་ཀྱང་མཚོན་པར་མི་ནུས་པས་དཔེ་ཟླར་རུང་བ་མེད་པ་ཡིད་ཀྱིས་མཆོད་རྫས་མ་ཚང་བ་མེད་པར་སྤྲུལ་ཏེ་རྒྱ་དཔང་ཚད་གྲངས་བླ་ན་གཞལ་བྱ་མཆིས་པ་མ་ཡིན་པས། མཆོད་པའི་སྤྲིན་རབ་འབྱམས་སུ་སྤྲོ་བར་བྱེད་པ་སྟེ། དཀོན་མཆོག་ཏཱ་ལར། མེ་ཏོག་ཕལ་ཆེར་མེ་ཏོག་བླ་བྲེ་དང༌། །མེ་ཏོག་བཀོད་པའི་འོད་ཟེ་རབ་བཀྱེ་སྟེ། །མེ་ཏོག་སྣ་ཚོགས་ཀུན་ཏུ་བཀྲམ་བྱས་ནས། །བདག་ཉིད་ཆེན་པོ་རྒྱལ་བ་སྲས་བཅས་མཆོད། །ལག་པའི་མཐིལ་ན་ཡོད་པ་བསམ་ཡས་རྣམས། །རྒྱལ་བ་གཅིག་ལ་མཆོད་པ་བྱེད་པ་ལྟར། །རྒྱལ་བ་མ་ལུས་ཀུན་ལའང་དེ་བཞིན་ཏེ། །དྲང་སྲོང་ཏིང་འཛིན་རྣམ་འཕྲུལ་དེ་འདྲའོ། །ཞེས་པ་ལྟར། འཕགས་པ་ཀུན་ཏུ་བཟང་པོའི་ཏིང་ངེ་འཛིན་གྱི་རྣམ་འཕྲུལ་བསམ་གྱིས་མི་ཁྱབ་པའི་མཆོད་པའི་ཡོན་གྱིས་རྒྱལ་བ་རྣམས་ལ་མཆོད་པ་དེ་ལ་དོ་ཟླར་སྤོབས་པ་ཙམ་དུ་འབུལ་བར་ཕྲག་དོག་བགྱིད་པའི་ཐ་སྙད་བཏགས་པའོ། །ངག་གི་སྒོ་ནས་མུ་ཅོར་ཏེ་ཚིག་འཆལ་ཅི་རུང་རུང་སྨྲ་བ་མི་དགེ་བའི་ལས་དང༌། ལུས་ངག་གི་བདུན་པོའི་སོགས་དང༌། བག་ཆགས་སོགས་སྒོ་ཀུན་ནས་ཉེས་ཚོགས་སྡིག་པ་ཐམས་ཅད་ཀུན། དགེ་འབྲས་ཀྱིས་ཟིལ་གྱིས་མནན་ཏེ་དེ་ལ་འཇིགས་ཤིང་སྐྲག་ནས་གཞན་དུ་བྲོས་པའི་ཚུལ་གྱིས་སྡིག་པའི་རང་གཟུགས་ངན་སོང་དུ་མྱོང་དགོས་པ་ཡིན་ཀྱང༌། གཏན་མེད་མིན་ཏེ། སྲིད་པའི་རྩ་བ་གནས་ལུགས་ཀྱི་དོན་ལ་སྒྲིབ་པའི་མུན་ནག་སྟུག་པོར་ཀུན་གཞིའི་ཁམས་ལ་འཆབ་པ་སྟེ་བག་ཉལ་གྱི་ཚུལ་དུ་ཡོད་པ་ཀུན། སྦྱོང་བྱེད་ཐབས་གཉེན་པོ་སྔར་བྱས་ལ་འགྱོད་པ། ཕྱིན་ཆད་མི་བྱེད་པའི་སྡོམ་སེམས། གཉེན་པོ་དགེ་ལ་འབད་པ། ཡུལ་མཆོག་གསུམ་སྟེ་སྟོབས་བཞི་དང་ལྡན་པའི་ཉིན་བྱེད་འབར་བས་དྲུང་ནས་སྦྱངས་ཤིང་བཤགས་སོ། །སྒོ་གསུམ་དགེ་ལ་སྦྱོར་བ་གང་གིས་བདག་ཉིད་མ་འཁྲུགས་བཞིན་དུ། བསམ་པ་བཟང་པོའི་ཁྱད་པར་གཅིག་གིས་གཞན་སངས་རྒྱས་བྱང་སེམས་ཉན་རང་དག་པའི་རྣམ་དཀར་ཡུད་ཙམ་ལ་འཕྲོག་པའི་ཆོམ་རྐུན་གྱི་བརྟུལ་ཞུགས་ཏེ་ཚུལ་ནི་རྗེས་སུ་ཡི་རང་བ་ཁོ་ནས་བྱས་སོ། །དམན་པ་ལ་དགག་སྒྲ་སྦྱར་ཏེ་ཐར་མེད་འཁོར་བའི་སེམས་ཅན་རྣམས་ཀྱི་ཉེས་ཚོགས་སྤྱོད་པ་ནི་གཉེན་པོས་མ་དུལ་བ་རང་བཞིན་དུ་མ་ཞི་ཞིང་གཡོ་སྒྱུས་བསླད་པ། ཆོས་ཕྱོགས་སུ་ཡོ་བྱད་གཏོང་བའི་དོན་དུ་ལྕགས་ཀྱི་ཕ་གུ་བཞིན་རྣམ་པར་སྲ་བ། ལས་ངན་བག་ཆགས་ལ་གོམས་པ་ནི་རྡོ་རྗེའི་འདག་པ་ལྟར་མཁྲེགས་པ། ངེས་འབྱུང་གི་རླན་དང་བྲལ་ཞིང་དད་སོགས་དགེ་བའི་ལོ་ཏོག་གང་ཡང་སྐྱེ་མི་བཏུབ་པས་ཐ་བ་ལྟར་གྱུར་པ། དམ་པའི་ཆོས་མ་ཡིན་པ་གཞན་གང་གིས་ཀྱང་འདུལ་ཐབས་བརྟན་པ་དང་བྲལ་བ་གང་ཡིན་པ་དེ་ལ་དགོངས་ནས། དུག་གསུམ་སོགས་འདུལ་བའི་གཉེན་པོ་དྲང་ངེས་ཀྱིས་དོན་རྗོད་བྱེད་སྡེ་སྣོད་གསུམ་དང་བརྗོད་བྱ་བསླབ་པ་གསུམ་གྱི་ངོ་བོ་ཆོས་འཁོར་གྱི་རིམ་པ་གསུམ་དུ་བསྡུ་བའི་རྩིབས་རྣོན་པོས། བདག་དང་བདག་གིར་འཛིན་ཞེན་སྒྲིབ་གཉིས་བག་ཆགས་དང་བཅས་པ་གཅོད་པར་བྱེད་ཅིང་མངོན་མཐོ་དང་ངེས་ལེགས་ཀྱི་མུ་ཁྱུད་ལས་འདའ་བ་མེད་པར་འཛིན་པ་དེ་བདག་གཞན་སེམས་ཅན་གྱི་མོས་པ་དང་འཚམས་པར་བསྐོར་བར་མཛད་དུ་གསོལ་ཞེས་བསྐུལ་ལོ། །ཕྱོགས་བཅུའི་འཇིག་རྟེན་གྱི་ཁམས་མུ་མེད་པ་ན་བཞུགས་པའི་རྒྱལ་བ་རྣམས་དང༌། དེ་ཡི་ཐུགས་སྲས་ཁྱེད་རྣམས་མྱ་ངན་ལས་འདས་ན། རྣམ་པར་གྲོལ་བའི་ཐབས་ཀྱིས་སྤངས་པར་གྱུར་པའི་འགྲོ་བ་འདི་ཐམས་ཅད་ཀྱིས་ཆོས་དང་ཆོས་མིན་ལམ་དང་ལམ་མིན་མི་ཤེས་པས། སྡུག་བསྔལ་རྒྱུ་འབྲས་ཀྱི་གནས་སྐབས་བསྟེན་པ་ལས་ཐར་པའི་དུས་མེད་པའི་ཚུལ་འདི་ལྟ་བུ་མཐོང་ནས། བསྐལ་པ་རྒྱ་མཚོའི་བར་དུ་མྱ་ངན་ལས་འདའ་བ་མིན་པའི་ཞབས་པད་རྡོ་རྗེའི་གདན་ཁྲི་ལ་བཞུགས་པར་མཛད་སླད། ལུས་དང་ལོངས་སྤྱོད་དགེ་བའི་དངོས་པོ་ཀུན་གྱི་རིན་ཐང་ཐམས་ཅད་གཅིག་ཏུ་བསྡུས་ཏེ་སྤུངས་ནས་ཕུལ་བ་ཡིན་པས་བཞུགས་པར་མཛད་དུ་གསོལ། །ཞེས་གསོལ་བ་གདབ་བོ། །འདི་ལྟར་བདག་ཏུ་བལྟ་བ་དང་བཅས་པས་སྲིད་པའི་བདེ་འབྲས་ལ་དམིགས་པའི་དགེ་བ་ནི་བསོད་ནམས་ཆ་མཐུན་ཏེ་ཐབས་ཤེས་ཁྱད་པར་ཅན་གྱིས་མ་ཟིན་པས་ཁོང་ཁྲོ་སོགས་ཀྱིས་ཟད་པར་འགྱུར་བས་འདར་བའི་རང་བཞིན་ཏེ། གལ་ཏེ་རྐྱེན་གྱིས་མ་ཟད་དུ་ཟིན་ཀྱང༌། དེ་འདྲ་བའི་རྣམ་པར་དཀར་བའི་འབྲས་བུ་ཡང༌། སྲིད་པར་ལན་གཅིག་ཙམ་མངོན་པར་མཐོ་བའི་ལྷ་མིའི་གནས་ཐོབ་ཀྱང༌། དེ་མྱོང་སྟོབས་ཀྱིས་ཟད་ནས་སྲིད་པ་ཕྱི་མར་ལྷུང་བའི་སྡུག་བསྔལ་དང་ཆོ་ངེ་སྟེ་སྨྲེ་ངག་འདོན་པ་དང་བཅས་པའི་རང་བཞིན་ལས་མ་འདས་ལ། ཆེད་དུ་དམིགས་ནས་དུས་གསུམ་གྱིས་བསྡུས་པའི་དགེ་རྩ་བསགས་དང་བྱེད་འགྱུར་ཐམས་ཅད་འགྲོ་ཀུན་རྫོགས་པའི་བྱང་ཆུབ་འབའ་ཞིག་ཐོབ་པའི་ཆེད་དུ་བསྔོ་བ་དམིགས་མེད་སྒྱུ་མ་ལྟ་བུའི་ཚུལ་དུ། ངོ་བོ་ལྕགས་ཁམས་ལ་གསེར་འགྱུར་གྱི་རྩིས་ཐེབས་པ་བཞིན། དགེ་རྩ་བྱང་ཆུབ་ཏུ་བསྔོ་བའི་འདུན་པས་སྦྱོར་བ་འདི་ནི། སངས་རྒྱས་རྣམས་ཐབས་ལ་མཁས་པའི་ཁྱད་ཆོས་ལས་སྟོན་པ་གཞན་གྱི་ལུགས་ཕྱི་རོལ་པ་ལ་གྲགས་པ་མེད་དོ། །དེ་ཡང་བློ་གྲོས་རྒྱ་མཚོས་ཞུས་པའི་མདོ་ལས། ཇི་ལྟར་རྒྱ་མཚོ་ཆེ་ནང་ཆུ་ཐིགས་ལྷུང༌། །རྒྱ་མཚོ་མ་སྐམ་བར་དུ་དེ་མི་ཟད། །དེ་བཞིན་བྱང་ཆུབ་ཡོངས་བསྔོས་དགེ་བ་གང༌། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་སོ། །སྤྱིར་ལོངས་སྤྱོད་རང་ལ་ཡོད་པ་དེས་ཆོག་ཤེས་པར་བྱེད་པ་བརྐམ་ཆགས་ཀྱི་གདུང་བ་ཞི་བའི་བདུད་རྩིའི་བཏུང་བ་ལྟ་བུ་ཡིན་པས་དེ་དང་ལྡན་ན་བདག་ཏུ་བཟུང་བའི་དངོས་རྫས་རྒྱ་ཆེ་བ་མཆོད་རྒྱུ་མེད་ནའང༌། ཅུང་ཟད་ཙམ་དམིགས་པའི་རྟེན་བྱས་ཏེ་བདག་པོས་མ་བཟུང་བ་དང་ཡིད་ཀྱིས་སྤྲུལ་པས་མཆོད་ན་རང་གི་ལོངས་སྤྱོད་མཆོད་པ་དང་འདྲ་བར་ཚོགས་རྫོགས་པར་འགྱུར་གྱི། དགོས་པའི་ཡོ་བྱད་ཅུང་ཟད་ཙམ་གྱིས་མ་ངོམས་པར་ནོར་ལོངས་སྤྱོད་སྣ་ཚོགས་པ་གསོག་བསྐྲུན་བྱེད་པ་ལ་འབད་ཅིང་མང་པོ་ཡོད་བཞིན་དུ་སེར་སྣས་བཅིངས་ནས་འབུལ་མི་ནུས་ན། སྐྱེས་བུའི་ཡིད་ལ་མ་བཟུང་བའི་ལྷ་ཀླུ་མི་ཡི་ཡུལ་ན་ཡོད་པའི་མཆོད་པའི་སྤྲིན་ཏེ་མང་པོ་ཡང་གཏོང་བའི་དངོས་པོ་དང་འབྲེལ་ཆད་པས། ཚིག་ཙམ་དག་གི་ཕ་མཐར་འཁྱམས་ནས་མཆོད་ཡུལ་རྫུན་གྱིས་བསླུ་བའི་ཉེས་པ་དེ་ལ་སྐྲག་པར་གྱུར་ནས། བདག་གི་ལུས་མཆོད་ཡུལ་རྣམས་ཀྱི་སྟན་དུ་དབུལ་བ་དང༌། དུས་གཏན་དུ་རྒྱལ་བ་སྲས་དང་བཅས་པར་བདག་ལུས་དབུལ་བ་ལའང་བརྩོན་འགྲུས་ཆེན་པོས་དོ་གལ་བགྱིད་དེ། དེའི་དགོས་པ་ནི་དཀོན་མཆོག་གསུམ་གྱི་བྲན་དང་འབངས་སུ་དམ་བཅས་པའི་གང་ཟག་དེ་དཀོན་མཆོག་གསུམ་གྱི་ཐུགས་རྗེའི་གྲིབ་བསིལ་ལ་བརྟེན་ནས། དཔེར་ན་སོ་ཀའི་དུས་སུ་ཚ་བས་གདུང་བ་ན་ལྗོན་ཤིང་མེ་ཏོག་གིས་བརྒྱན་པ་ལོ་འདབ་རྒྱས་པའི་འཇོ་སྒེག་ཅན་གྱི་གྲིབ་མར་བསྡད་པས་དབུགས་འབྱིན་ཐོབ་པ་ལྟར། ཚེ་འདིར་སྡུག་བསྔལ་ལས་སྐྱོབ་ཅིང་ལེགས་དགུའི་དངོས་པོ་འབྱུང་བར་མ་ཟད་འཆི་བའི་ཚེ་ནའང་རྒྱལ་བ་སྲས་དང་བཅས་པས་དག་ཞིང་དུ་འཁྲིད་པར་མཛད་ཅིང༌། གལ་ཏེ་ཚུལ་འཆལ་སོགས་ལས་ངན་གོམས་པའི་དབང་གིས་རྣམ་པ་ཀུན་ཏུ་སྡང་ཞིང་འཁྲུགས་པའི་ཁྲོ་གཏུམ་ཅན་གཤིན་རྗེའི་ཕོ་ཉའི་མདུན་སར་སོན་ན་ཡང༌། དཀོན་མཆོག་དྲན་པའི་མོད་ལ་དེ་དག་གི་ཁྲོ་གཉེར་རྩུབ་མོས་འཇིགས་པས་སྡུག་བསྔལ་བ་ལས་ཐར་པའི་བསོད་ནམས་ཀྱི་རིན་ཐང་ངམ་དོན་ཆེན་པོ་ཟད་མི་ཤེས་སོ། །དེ་ལྟར་སེམས་སྦྱངས་ཤིང་ཚོགས་བསགས་པ་དེས་ནི་གཏི་མུག་གི་མཐུས་ནོན་ཏེ་དེ་ཁོ་ན་ཉིད་ཀྱི་དོན་ལ་རྨོངས་ཤིང་ལས་འབྲས་མ་ཤེས་ནས་སྡིག་པའི་ལས་དུ་མ་གོམས་ཤིང་བསགས་པའི་སྒྲིབ་པ་དང་ལྡན་པ་བདག་གི་རྒྱུད་ཀྱི་སྒྲིབ་པའི་དྲི་མ་སེམས་ཅན་གྱི་དོན་དུ་སྦྱང་བའམ། བྱི་དོར་ཤིན་ཏུ་བསྟེན་པའི་དྭངས་ཤེལ་ལ་གཟུགས་བརྙན་འཆར་རུང་བ་ལྟར། བསོད་ནམས་མ་ཡིན་པའི་རྒྱུད་རྙོག་པ་ཅན་དེ་ཉིད་དྭངས་ཤིང་གཙང་ལ་དག་པའི་སེམས་ཀྱི་ནང་དུ། རགས་པ་བརྡ་ལས་བྱུང་བའི་སེམས་བསྐྱེད་ཆོ་གའི་སྒོ་ནས་བླངས་པ་ཇི་བཞིན་ཐོབ་པས་བླ་ན་མེད་པའི་སྡོམ་པ་དེའི་གཟུགས་བརྙན་དངོམ་པ་ཡིན་ནོ། །བདག་ཅག་རྣམས་ལས་ངན་པའི་དབང་དུ་གྱུར་པའི་སྟེང་འདོད་ལྷ་བདུད་སྡིག་ཅན་དང་ཆུང་མ་དང་པདྨའི་ཕྲེང་བ་བཅས་ཀྱི་སྤྱི་བོ་ན་མེ་ཏོག་གི་མདའ་ལྔ་ཡོད་པ་འདི་ལྟ་སྟེ། ཐར་ལམ་བསྒྲུབ་པའི་བར་ཆད་དུ་ཆོས་དང་འཇིག་རྟེན་གྱིས་ཁེངས་ཤིང་དྲེགས་པར་བྱེད་པ༡་དང༌། བླང་དོར་གྱི་ཕྱོགས་ལ་རྨོངས་པར་བྱེད་པ༢་དང༌། ཕྱིན་ཅི་ལོག་ལྟ་བས་ཀུན་ནས་རྨོངས་པར་བྱེད་པ༣་དང༌། བརྗེད་ངས་ཀྱིས་དྲན་པ་ཉམས་པས་བརྒྱལ་བར་བྱེད་པ༤་དང༌། འཇིག་རྟེན་ཆོས་བརྒྱད་ཀྱིས་གཡེང་བར་བྱེད་པ༥་སྟེ་མེ་ཏོག་གི་མདའ་བསྣུན་པས་ཉོན་མོངས་པ་ལྔ་གང་ཤས་ཆེ་བ་དེ་ལ་ཕོགས་པས་དེ་རབ་ཏུ་འབར་བར་གྱུར་ཏེ་དེའི་དབང་དུ་སོང་ན་ཐར་པ་དང་མངོན་མཐོ་ལས་ཉམས་པར་གྱུར་པའི་ཉེས་པ་བརྒྱ་ཕྲག་མང་པོའི་གཡང་སར་ཐར་དཀའ་བའི་གནས་སུ་ལྷུང་བ་ཡི་རྒྱུད་ལ་རིམས་ནད་ཀྱི་རྣམ་གྲངས་མི་འདྲ་བ་མང་པོས་དུས་རིང་པོ་ནས་ཤིན་ཏུ་བཏབ་པའི་ནད་དེ་རྩ་ཉོན་ཉེ་ཉོན་ལ་སོགས་པ་རྣམས་ནད་ཀྱི་རྣམ་གྲངས་དེ་དག་གསོ་བའི་ཐབས་ཀྱང་འདུ་བའི་ནད་ལ་དཔྱད་བྱེད་པའི་གསོ་དཔྱད་ཕལ་པ་རྣམས་ཀྱིས་ཇི་ལྟར་བཟང་ཡང་དེའི་མདུན་སར་ནད་བཞི་བརྒྱ་རྩ་བཞི་རྣམས་ལས་འཚོ་བའི་ཐབས་མི་ཤེས་པ་ལྟར་གཞན་གྱི་ཉོན་མོངས་པའི་ནད་ལས་གྲོལ་བའི་དབུགས་མི་ཕྱིན་ཏེ། འོ་ན་སུས་ཕྱིན་ཅེ་ན། སྨན་པ་མཆོག་སངས་རྒྱས་བཅོམ་ལྡན་འདས་ལ་སྐྱབས་སུ་ལྷག་པར་དོང་བས་མྱང་འདས་སུ་གྲོལ་བར་འགྱུར་རོ། །བདག་གི་མོས་པ་བརྟན་པོས་གསོལ་བ་བཏབ་པ་གང་གིས་སླད་དུ་སེམས་བསྐྱེད་ལེན་པའི་གནས་འདིར་གཤེགས་ནས། མཐའ་ཡས་པའི་སེམས་ཅན་གྱི་ཁམས་ཐམས་ཅད་ལ་རྟག་ཏུ་སྒྲིབ་མེད་དུ་གཟིགས་ཤིང་མཁྱེན་བརྩེའི་ཡེ་ཤེས་ཀྱིས་ཆགས་ཐོགས་མེད་པར་དགོངས་པའི་སྟོན་མཆོག་སངས་རྒྱས་རྣམས་ནི། ཐེག་པ་ཆེན་པོའི་ལམ་ལས་ཕྱིར་མི་ལྡོག་པའི་སར་གནས་པའི་སྐྱེས་བུ་བྱང་སེམས་འབའ་ཞིག་པའི་ཚོགས་ཀྱི་དབུས་ན་ཟླ་བ་རྒྱུ་སྐར་གྱི་དབུས་ནའམ་རི་རྒྱལ་རི་ཕྲན་གྱི་དབུས་ན་འཕགས་པ་ལྟར་སྐུ་གསུང་ཐུགས་ཀྱི་གཟི་བྱིན་མཆོག་ཏུ་འབར་ཞིང་མཐོང་ན་མི་མཐུན་པ་མེད་པར་ལྷམ་མེར་མཛེས་པར་བཞུགས་པ་ལ། དད་གུས་ཀྱི་གདུང་ཤུགས་དྲག་པོས་དཔང་པོར་གསོལ་བ་གདབ་པར་བྱའོ། །ཆོ་ག་དངོས་ལ། སྤྱིར་རྒྱ་ཆེན་སྤྱོད་པའི་སྲོལ་ལ་སྨོན་འཇུག་གི་སྡོམ་པ་འབོགས་ཆོག་སོ་སོར་ཡོད་ལ། ཟབ་མོ་ལྟ་བའི་ལུགས་སློབ་དཔོན་ཆེན་པོ་ཀྲིཥྞ་པའི་སྤྱོད་འཇུག་དཀའ་འགྲེལ་ལྟར་སྨོན་འཇུག་གི་སྡོམ་པ་ལེན་ཚུལ་དབྱེ་ན། སྨོན་སེམས་ལ་ཇི་ལྟར་སྔོན་གྱི་སོགས་ཤླཽ་ཀ་གཅིག་པོ་ལན་གསུམ་དང༌། འཇུག་སྡོམ་ནི་དཀྱུས་སུ་བསྟན་པ་བཞིན་ནོ། །གང་ལྟར་ཡང་སྐྱབས་འགྲོ་བདུན་ཅུ་པར། །སྡོམ་པ་ཀུན་ལ་ཡོད་མོད་ཀྱི། །སྐྱབས་སུ་མ་སོང་བ་ལ་མེད། །ཅེས་པ་ལྟར་སོ་ཐར་སོགས་ཀྱི་སྡོམ་པ་གང་བླངས་ཀྱང་སྐྱབས་འགྲོ་དངོས་གཞིའི་རྟེན་དུ་དགོས་ལ། ཁྱད་པར་བྱང་སྡོམ་སྔོན་དུ་ཐེག་ཆེན་ཐུན་མིན་ཚུལ་གྱིས་སྐྱབས་སུ་འགྲོ་བ་ལ་ལན་གསུམ་གྱིས་སྒོ་ནས་སྐྱབས་སུ་འགྲོ་བར་བྱས་པས་གཞི་བཅས་ལ། སྐབས་འདིར་སྨོན་འཇུག་སྟབས་གཅིག་ལེན་པ་ལ། བླ་མ་ལས་ལེན་ན་བློ་བཅོས་པ་སྔར་བཤད་པ་ལྟར་བླ་མ་ཉིད་ཀྱིས་བྱས་ལ་བླ་མ་མེད་ན་རང་གི་བློས་སེམས་ལ་ངེས་པར་བྱས་ཏེ་ཕྱག་འཚལ་མཎྜལ་ཕུལ། པུས་བཙུགས་ཐལ་མོ་སྦྱར་ཏེ། ཕྱོགས་བཅུ་ན་བཞུགས་པའི་སངས་རྒྱས་བཅོམ་ལྡན་འདས་རྣམས་དང༌། ས་བཅུ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང༌། བླ་མ་རྡོ་རྗེ་འཛིན་པ་ཆེན་པོ་རྣམས་དགོངས་སུ་གསོལ། ཞེས་དགོངས་སུ་གསོལ་བ་གསུམ་གྱིས་ཆོས་དབྱིངས་སྤྲོས་པ་དང་བྲལ་བའི་ངང་ལ་མཉམ་པར་བཞག་པ་ལས་འཛིན་མེད་སྒྱུ་མ་ལྟ་བུའི་སྙིང་རྗེ་ཆེན་པོའི་ངོ་བོར་སད་པར་བྱས་ནས། སྐབས་འདིར་རྒྱལ་བ་སྲས་དང་བཅས་པའི་ཚོགས་ཀྱིས་གཞན་དོན་དུ་བྱང་ཆུབ་མཆོག་ཏུ་ཐུགས་བསྐྱེད་པ་དང༌། དེ་རྣམས་ཀྱིས་ལམ་བསླབ་པ་གསུམ་གྱིས་བསྡུས་པའི་ཕྱིན་དྲུག་དང༌། བསྡུ་དངོས་བཞིའི་དོན་ལ་རིམ་པ་བཞིན་དུ་བསླབ་པར་མཛད་པའི་བརྟུལ་ཞུགས་ལ་གནས་པ་དེ་བཞིན་དུ། བདག་གིས་ཀྱང་མཐའ་དག་བསྒྲུབ་པར་བྱ་སྙམ་པས་བླང་བ་ཡིན་ནོ་ཞེས་སྤྱིར་དམ་བཅས་ནས། བྱེ་བྲག་ཏུ་ཐར་པ་ལ་སྒྲིབ་པའི་ཉོན་སྒྲིབ་ཟུག་རྔུའི་དུམ་བུ་གང་ཟག་གི་བདག་མེད་རྟོགས་པའི་སྟོབས་ཀྱིས་བཅད་པར་གྱུར་ཀྱང༌། ཐམས་ཅད་མཁྱེན་པ་ལ་སྒྲིབ་པའི་ཤེས་སྒྲིབ་ནི་ཆོས་ཀྱི་བདག་མེད་ཡོངས་རྫོགས་མ་རྟོགས་ཤིང་གོམས་པ་མེད་པས་འཁོར་འདས་བླང་དོར་དུ་བལྟ་བ་སོགས་ཡུལ་གྱི་རོ་ལ་བཅགས་པ་ཡི་གཉེན་པོས་དྲུངས་ནས་འབྱིན་མ་ནུས་པས། ཉན་རང་དགྲ་བཅོམ་རྣམས་ཤེས་སྒྲིབ་དུམ་བུ་ལས་མ་བསྒྲལ་བ་དེ་ལས་བསྒྲལ་བར་བྱ་སྙམ་པ་དང༌། སྒྲིབ་པ་གཉིས་ཀའི་འཆིང་བས་ཀུན་ནས་དཀྲིས་པ་ཡི་སྟེང་དུ་ལྟ་བ་མ་རུངས་པ་ཚངས་པ་ལ་སོགས་ཕྱིན་ཅི་ལོག་པ་མུ་སྟེགས་བྱེད་རྣམས་དང༌། གྲུབ་མཐར་མ་ཞུགས་པ་ཕལ་པ་སོ་སོའི་སྐྱེ་བོ་ནས། སློབ་པ་འཕགས་པ་ས་བཅུ་པའི་བར་ལ་གནས་པ་ཡི་སེམས་ཅན་སྒྲིབ་པ་དེ་དག་ལས་མ་གྲོལ་བ་རྣམས་དགྲོལ་བར་བྱ་སྙམ་པ་དང༌། ཤིན་ཏུ་སྡུག་བསྔལ་དྲག་པོའི་ཤུགས་ཀྱིས་གཟིར་བས་བཟོད་དཀའ་ཞིང་ཡུན་རིང་བ་ལས། དབུགས་འབྱིན་ཐོབ་པ་མེད་པའི་ངན་སོང་གསུམ་ན་གནས་པའི་སེམས་ཅན་རྣམས། དབུགས་འབྱིན་ཆེན་པོའི་གནས་ཏེ་གནས་སྐབས་མངོན་མཐོ་དང༌། མཐར་ཐུག་ཐར་པ་མཆོག་གི་གོ་འཕང་ལ་སྦྱར་བ་དང༌། མདོར་ན་སྲིད་པའི་རྟེན་ཅིང་འབྲེལ་འབྱུང་བཅུ་གཉིས་ཀྱི་རང་བཞིན་བར་མ་ཆད་པར་འཁོར་བའི་འཁོར་ལོའི་རྒྱར་ལས་ཀྱིས་དབང་མེད་དུ་ཆུད་པའི་སྡུག་བསྔལ་དངོས་སུ་མྱོང་བའི་སེམས་ཅན་ཕལ་པ་ནས། ལས་ཀྱི་དབང་གིས་མི་འཁོར་ཡང་རྟེན་འབྲེལ་བག་ཆགས་གཉིས་སྣང་འཁོར་བའི་ཆོས་སུ་ཤར་བ་ཙམ་དབྱིངས་སུ་མ་ལྡོག་པའི་ས་བཅུའི་བྱང་ཆུབ་སེམས་དཔའི་བར་སེམས་ཅན་ཡོད་དོ་ཅོག་ཐམས་ཅད་མཐའ་གཉིས་ལ་མི་གནས་པའི་ཡེ་ཤེས་མྱ་ངན་ལས་འདས་པའི་གྲོང་ཁྱེར་ཆེན་པོར་བདག་ཁོ་ནས་དགོད་པར་བྱེད་དོ་ཞེས་སྙིང་ཐག་པ་ནས་དམ་བཅའོ། །སྨོན་འཇུག་སྟབས་ཅིག་ལེན་ཚུལ་ཆོ་གས་ཇི་ལྟར་བཟུང་བའི་མཚན་ཉིད་བརྗོད་པ་ནི། སྔོན་བྱོན་དྲང་སྲོང་ཀླུ་སྒྲུབ་ཡབ་སྲས་རྗེས་འབྲངས་དང་བཅས་པ་རྣམས་ཀྱི་ལུགས་ལ་བརྟེན་ཞེས་ཐེག་ཆེན་དབུ་མའི་ལུང་འབོགས་ཆོ་ག་རྒྱས་བསྡུས་གང་རུང་ལ་བརྟེན་པར་གསུངས་ལ་གཞུང་ཚིག་ལན་གསུམ་བརྗོད་པས་ཀྱང་རུང་ངོ༌། །དང་པོ་བླངས་ནས་བཟུང་དུས་རྟག་ཏུ་ཉིན་དང་མཚན་མོ་ལན་གསུམ་དུ། སྤྱོད་འཇུག་ལྟར་བྱང་སྡོམ་ལེན་ཆོག་གི་སྒོ་ནས་སྨོན་འཇུག་བྱང་ཆུབ་ཀྱི་སེམས་གཉིས་ལེན་ཞིང༌། དེ་ཡང་ཁ་ཁྲལ་ལྟར་མ་ཡིན་པར་སེམས་རྣམ་པ་དེ་གཉིས་ཀྱི་ངོ་བོར་བསྐྱེད་ཅིང་གོམས་པར་བྱ་བ་ལ་ནན་ཏན་བྱའོ། །ཆོས་རྣམས་ཐམས་ཅད་རྐྱེན་བཞིན་ཏེ། །འདུན་པའི་རྩེ་ལ་རབ་ཏུ་གནས། །ཞེས་པས་རྐྱེན་ལ་རག་ལས་ཤིང་ཁྱད་པར་རང་གི་འདུན་པ་གང་ལ་བཞག་པའི་རྩེ་ལ་སྒོ་གསུམ་གྱི་བྱ་བའི་ཆོས་རྣམས་དགེ་མི་དགེ་གང་དུ་འགྱུར་བའི་རྐྱེན་ཆགས་པས། སྐབས་འདིར་སེམས་གཉིས་སྟབས་གཅིག་ལེན་པའི་ཆོ་ག་ལན་གསུམ་དུ་སྟེ་བརྗོད་པ་དང་པོས་སྨོན་པ་དང༌། གཉིས་པས་འཇུག་པ་དང༌། གསུམ་པས་སྨོན་འཇུག་གཉིས་ཀ་ཆེས་བརྟན་པར་ཐོབ་པ་ནི། སློབ་དཔོན་རྒྱ་མཚོའི་སྤྲིན་གྱི་བཞེད་པ་བླ་ན་མེད་པའོ། །བདག་སོགས་འཁོར་བའི་སེམས་ཅན་ཕལ་པ་རྣམས་ཀྱིས་སྔོན་ཆད་སྐྱེ་བ་དུ་མར་ཕ་མ་དང་དྲང་སྲོང་ཚངས་པ་སོགས་གྱུར་པའི་ཚེའང་སེམས་ཅན་གཞན་གྱི་དོན་ལ་ལྟ་ཅི་སྨོས། རང་དོན་ཉིད་ཀྱི་དོན་དུ་མངོན་སུམ་དུ་མི་སྐྱེ་བ་མ་ཟད་རྨི་ལམ་དུ་རྨི་བའང་མ་མྱོང་བའི་རིན་པོ་ཆེ་ཐམས་ཅད་ཀྱི་ནང་ནས་རིན་ཆེན་དབང་གི་རྒྱལ་པོ་རིན་ཆེ་བ་ལྟར། དགེ་བའི་སེམས་ཀྱི་ཁྱད་པར་གསར་པ་འདིས་བདག་གི་མི་ཡི་སྲིད་པ་འདིར་དོན་ཆེན་འབྲས་བུ་རྙེད་པས་རིན་ཐང་གཞལ་དུ་མེད་པར་བྱས་སོ། །དཔེ་ཇི་ལྟར་ན། རྒྱལ་བུ་དྭའུ་རྒྱལ་རིགས་ལས་ཉམས་ནས་གདོལ་པ་དང༌། དམངས་རིགས་སུ་འཁྱམས་ཏེ་དེ་དག་གི་བྱ་བ་ཡང་བྱས་པ་གང་ཞིག །ཕྱིས་རྒྱལ་བུ་ཡིན་པ་ངོ་ཤེས་ནས་ཆོ་རིགས་ཀྱི་ལྷག་པར་བཙུན་པ་རང་གི་ཕའི་རྒྱལ་སྲིད་ཀྱི་གནས་གསར་དུ་ཐོབ་པ་ཇི་བཞིན་དུ། སེམས་ཀྱི་རང་བཞིན་ཆོས་སྐུའི་གདུང་ངམ་དེ་བཞིན་གཤེགས་པའི་རིགས་སུ་ངོ་ཤེས་ནས། རྒྱལ་བའི་མཛད་པ་བསྒྲུབ་པ་ལ་ཞུགས་པས་རྒྱལ་བ་ཀུན་གྱི་སྲས་སུ་དེང་གྱུར་པས། ཐེག་ཆེན་གྱི་རྒྱལ་སྲིད་ལ་དབང་བའི་བྱང་ཆུབ་སེམས་དཔའི་མིང་གི་ཅོད་པན་ཐོབ་བོ། །ས་འོག་ས་སྟེང་ས་བླ་སྟེ་སྲིད་གསུམ་བདག་པོ་གཞན་འཕྲུལ་དབང་བྱེད་ཀྱི་རྒྱལ་པོ་དང༌། ཚངས་པ་ལ་སོགས་པ་དང༌། འཇིག་རྟེན་གསུམ་པོ་རང་རང་གི་གནས་ན་ཆེ་བའི་ལྷ་ཀླུའི་མིའི་རྒྱལ་པོ་བྱས་ཏེ། འཇིག་རྟེན་ན་ང་ལས་ཆེ་བ་མེད་དོ་སྙམ་པ་དང༌། ཆེ་བར་རློམ་པ་དེ་ཉིད་ཀྱིས་འཇིག་རྟེན་རྨོངས་པའི་དབང་གིས་མཆོག་ཏུ་འཛིན་པའི་རྒྱལ་ཕྲན་དང༌། བློན་པོ་སོགས་འཐོབ་དང་མངའ་ཐང་གི་བླ་དྭགས་དཔྱངས་ཏེ་མིང་བཏགས་པ་དེ་དག་ནི་འཁོར་བའི་རང་བཞིན་ལ་མཐོ་དམན་ངེས་པ་མེད་པའི་འཕྲལ་སྣང་ཉམས་དགའ་བ་ཙམ་ལས། རྟག་པ་མེད་པ་དེ་ཙམ་ལའང་རང་ཉིད་དྲེགས་ཤིང་གཞན་དག་དགའ་བར་བྱེད་པའི་གནས་སུ་ལྟ་ན། དེ་འདྲ་ལན་བརྒྱ་ཕྲག་དུ་མར་བྱས་ཀྱང་སྙིང་པོ་མེད་ལ། ད་རེས་ཐེག་ཆེན་གྱི་རྒྱལ་སྲིད་དང་བྱང་ཆུབ་སེམས་དཔའི་མིང་གི་གནས་ཐོབ་སྟེ་འགྲོ་བའི་མགོན་དུ་གྱུར་པ་ནི་དེ་རིང་ཙམ་ཡིན་ལ། རྒྱུ་དེ་ལས་སེམས་ཅན་གྱི་ཁམས་མཐའ་ཡས་པ་དག་ཀྱང་དབུགས་དབྱུང་བའི་སེམས་མི་འདོར་ཞིང༌། ཕན་སེམས་ཁོ་ནས་བདེ་བའི་ལོངས་སྤྱོད་ལ་མགྲོན་དུ་བོས་ནས་ཚིམ་པར་བྱས་ནུས་པ་ཡིན་པས་དགའ་བའི་འཁྲི་ཤིང་སློང་བ་ལ་ལྷ་ཡང་སྟེ་ཡང་གི་སྒྲས་ལྷ་མིན་ལ་སོགས་པ་དག་ཀྱང་ཕྱོགས་ཤིག་ཅེས་གཞན་གྱི་སེམས་གཟེངས་བསྟོད་དོ། །བྱང་ཆུབ་སེམས་དཔའ་བསོད་ནམས་ཆེན་པོ་དང་ལྡན་པ་ཡིན་པས་དེ་ལ་གནས་སྐབས་དུས་མ་ཡིན་པའི་འཆི་བ་དང༌། འཕགས་ས་ཐོབ་ན་སྐྱེ་འཆི་རང་མཚན་པ་བྲལ་ཞིང་མཐར་ཐུག་བསམ་གྱིས་མི་ཁྱབ་པའི་འཆི་བདག་གི་བདུད་ཀྱི་རྒྱུ་བ་རྩད་ནས་འཇོམས་ཤིང༌། མི་གནས་པའི་མྱང་འདས་ཐོབ་པའི་ཕྱིར་བདུད་རྩི་དང་ཚོགས་གཉིས་ཀྱི་མཛོད་དང་ལྡན་ཞིང་ཟང་ཟིང་གི་ལོངས་སྤྱོད་མི་ཟད་པའི་གཏེར་དུ་གྱུར་པས་འགྲོ་བ་རྣམས་ཀྱི་བཀྲེན་པ་མཐའ་དག་གི་དབུལ་བ་སེལ་བའི་ཡིད་བཞིན་གྱི་ནོར་བུ་དང༌། ཉོན་མོངས་པ་དང་དེས་སྐྱེད་པའི་འདུ་བའི་ནད་ཐམས་ཅད་ཞི་བའི་སྨན་མཆོག་དང༌། འགྲོ་ཀུན་ཕན་བདེའི་གནས་སུ་གྱུར་བས་སྲིད་པའི་ལམ་དུ་སྡུག་བསྔལ་སྣ་ཚོགས་ཀྱིས་དུབ་ཅིང་བདེ་བ་དོན་དུ་གཉེར་བར་བྱེད་པའི་མགྲོན་པོའི་སེམས་ཅན་རྣམས་ལ་དབུགས་འབྱིན་སྟེར་བའི་ངལ་སྟེགས་སོགས་ཡིན་པའི་ཕྱིར། བདག་ནི་དེང་གི་དུས་འདི་ནས་བཟུང་སྟེ་འཁོར་བ་མ་སྟོངས་ཀྱི་བར་དུ་འགྲོ་བའི་ཉེར་འཚོར་གྱུར་པ་ཡིན་ནོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། བྱང་ཆུབ་ཀྱི་སེམས་ཡོངས་སུ་བཟུང་བའི་ཚོམས་ཏེ་ལེའུ་བརྒྱད་པའོ།། །།འཇིག་རྟེན་གྱི་བྱ་བ་འགའ་ཞིག་དོན་དུ་གཉེར་བ་རྣམས་ཀྱིས་ཀྱང༌། སྔོན་ཆད་བྱ་བ་དེ་བསྒྲུབ་དཀའ་སླ་དང༌། ལེགས་ཉེས་ཅི་ཡོད་སོགས་ལེགས་པར་ཏེ་ཞིབ་ཏུ་མ་བརྟགས་པར་བབ་ཅོལ་གྱི་སྒོ་ནས། བདག་གིས་འདི་བྱའོ་ཞེས་དམ་བཅའ་བཟུང་ནས་བྱ་དཀའ་བ་སོགས་མཐོང་ན། དེ་སླར་གཏོང་བ་ལའང་ཡིད་གཉིས་སུ་གྱུར་ཏེ་གཞན་གྱིས་ཁྲེལ་བ་ལ་སོགས་པའི་གནས་མཆི་ན། རྒྱལ་བ་སངས་རྒྱས་རྣམས་དང་དེ་སྲས་བྱང་སེམས་རྣམས་ཀྱི་ཐོས་བསམ་སྒོམ་པའི་ཤེས་རབ་ཆེན་པོའི་མཐུས། བསྐལ་པ་གྲངས་མེད་པ་མང་པོར་གདོན་མི་ཟ་བར་བརྟགས་པ་ཡིད་ཆེས་ཤིང་དོན་དང་ལྡན་པའི་བླང་དོར་ཚུལ་བཞིན་བྱེད་པའི་གནས་དམ་བཅས་ཏེ་སླར་བཏང་ན་བདག་གིས་སེམས་ཅན་ཀུན་བསླུས་པས། ཕྱི་མར་བདེ་འགྲོ་དང་བྲལ་བའི་གནས་མུ་མཐའ་མེད་པའི་ངན་འགྲོར་འཁྱམས་པར་འགྱུར་ཏེ། སྤྱོད་འཇུག་ལས། བླ་ན་མེད་པའི་བདེ་བ་ལ། །བསམ་པ་ཐག་པས་མགྲོན་གཉེར་ནས། །འགྲོ་བ་ཐམས་ཅད་བསླུས་བྱས་ན། །བདེ་འགྲོར་ཇི་ག་འགྲོ་འགྱུར་རམ། །ཞེས་སོ། །རྒྱུ་མཚན་དེའི་ཕྱིར་ན་ཉེས་པའི་ཚོགས་ཆེན་པོ་ལྟ་ཅི། སེམས་ཅན་གཅིག་གི་སྲོག་འཚོའི་བདེ་བའམ་ལོངས་སྤྱོད་སོགས་ཀྱི་བདེ་བའང༌། གསོད་པ་དང་ལོངས་སྤྱོད་འཕྲོག་པ་སོགས་བདེ་བ་བཤིག་ན། ལས་དེས་བདག་ཉིད་བདེ་འགྲོ་ལས་ཉམས་ཏེ་ངན་འགྲོར་འཕེན་པའི་ཕྱིར་དང་ཐ་ན་སེམས་ཅན་གཅིག་ལ་གནོད་པ་ཆུང་ངུའི་ལས་དེ་ཙམ་ཡང་མི་བགྱིད་དོ། །བྱང་སྡོམ་འདི་སོར་སྡོམ་ལྟ་བུ་མ་ཡིན་པས་སླར་གསོ་རུང་ཞེ་ན། དེ་ལྟར་ལྟུང་བ་སྟོབས་དང་ལྡན་པ་དང་བྱང་ཆུབ་སེམས་སྟོབས་གཉིས་ཀར་ལྡན་ནའང༌། ཕན་ཚུན་འཁོར་བར་རེས་མོས་ཀྱིས་འདྲེ་བར་བྱེད་པ་གང་ཡིན་པ་མོས་སྤྱོད་ཀྱི་ས་ཐོབ་པ་ལ་ཡང་ཡུན་རིང་པོར་འཐོགས་པར་འགྱུར་ན་རབ་དགའ་སོགས་ལ་སྨོས་ཅི་དགོས། དེས་ན་ཤེས་བཞིན་དུ་བླང་དོར་གྱི་བསླབ་བྱ་རྣམས་གཏོང་བར་བྱེད་པའི་སྐྱེས་བུ་ནི། རང་ཉིད་རླག་པར་བྱེད་པའི་སྐྱེས་བུ་སྨྱོན་པ་བཞིན་ཡིན་པས་བསྲུང་བར་བྱའོ། །ཉོན་མོངས་པ་ལ་འཁོན་དུ་བཟུང་བའི་ཚུལ་འཇིག་རྟེན་འདི་ན་གང་ཟག་གང་ཞིག །གནོད་པའི་རྒྱུ་མངའ་ཐང་དང་ལོངས་སྤྱོད་འཕྲོག་པ་ཙམ་ལ་གནོད་པར་བྱེད་པ་དང༌། དེའི་འབྲས་བུ་ཟས་གོས་ལོངས་སྤྱོད་ཆུང་དུ་ལའང་ཁྲོས་པའི་དབང་གིས་བདག་རྒྱལ་བར་འདོད་པའི་ང་རྒྱལ་ཤིན་ཏུ་བདོ་བ་རྣམས་ལ། ཕ་རོལ་པོས་མདའ་མདུང་ལ་སོགས་པའི་མཚོན་གྱིས་རང་ལ་ཆད་པ་རྩུབ་མོ་ཅི་བྱུང་ཡང་བཟོད་པར་བྱས་ནས། རང་གི་བསམ་རྒྱུའི་དོན་མ་གྲུབ་བར་ཁ་ཕྱིར་ཕྱོགས་ཏེ་འབྱེར་བར་མི་བྱེད་ན། ཡུན་རིང་ཐོག་མ་མེད་པ་ནས་རྣམ་པ་ཀུན་ཏུ་ཕན་མི་འདོགས་ཤིང་བཏང་སྙོམས་ཙམ་ཡང་མི་གནས་པར་བདག་ལ་དགྲར་གྱུར་པའི་ཉོན་མོངས་སྟོབས་ཆེན་གྱི་ཚོགས་འདི་དང་གཡུལ་སྤྲད་ནས་གཉེན་པོ་བསྟེན་པའི་ཚེ་ན། བསླབ་པ་གསུམ་ལས་ཚུལ་ཁྲིམས་ཀྱིས་སུན་འབྱིན། ཏིང་ངེ་འཛིན་གྱིས་མགོ་གནོན། ཤེས་རབ་ཀྱིས་དྲུངས་ནས་ཕྱུང་སྟེ་འཁོན་དུ་བཟུང་བའི་ཆོ་ག་ཉོན་མོངས་སྤོངས་བའི་ཕྱོགས་ལ་ཆེད་དུ་བརྩོན་པའི་གཉེན་པོའི་སྒོ་ནས་བྱ་བ་མ་ཞིག་པ་དགོས་ལ། འཕགས་ས་མ་ཐོབ་ཀྱི་བར་དུ་བསླབ་པ་བསྲུང་བའི་བརྟུལ་ཞུགས་སུ་ཞིག་གིས་གཏོང་སྟེ། སྤྱོད་འཇུག་ལས། བསླབ་པ་བསྲུང་བར་འདོད་པ་ཡིས། །རབ་ཏུ་བསྒྲིམས་ནས་སེམས་བསྲུང་སྟེ། །སེམས་འདི་བསྲུང་བར་མ་བྱས་ན། །བསླབ་པ་བསྲུང་བར་ཡོངས་མི་ནུས། །ཞེས་སོ། དེ་ཡང་འཁྲུལ་སྣང་གི་བག་ཆགས་ཤིན་ཏུ་བརྟན་པའི་སྐབས་འདི་ན་ཉོན་མོངས་པའི་བཙོན་རར་བདག་ཏུ་འཛིན་པའི་འཆིང་བ་དམ་པོས་བསྡམས་པ་ཡི་རང་བཞིན། བདག་གི་རྒྱུད་ཀྱི་ཉོན་མོངས་སྤོང་བར་བྱེད་པའི་ཚོད་ཀྱང་རིག་པར་མི་འགྱུར་ན། མཐའ་དག་པའི་འགྲོ་བ་ཐམས་ཅད་ཉོན་མོངས་པ་བག་ཆགས་དང་བཅས་པ་དེ་ལས་དབུགས་འབྱིན་ཞིང་སངས་རྒྱས་ཀྱི་སར་སྒྲོལ་བའི་ཕྱིར་དམ་བཅའ་བརྟན་པ་མི་ཉམས་པ་ག་ལ་ཞིག་སྟེ། དེའི་ཕྱིར་ན་གཞན་སེམས་ཅན་ཐམས་ཅད་ཀྱི་ཉོན་མོངས་བསལ་བའི་དོན་དུ་དང་པོ་རང་གི་ཉོན་མོངས་སྤོང་བྱེད་ཀྱི་ཐབས་འཇུག་ལྡོག་གི་གནས་ལ་གཟོབ་པ་ལྷུར་ལེན་པ་བག་ཡོད་དང༌། བསླབ་པའི་གནས་མི་བརྗེད་པའི་དྲན་པ་དང༌། སྒོ་གསུམ་གྱི་སྤྱོད་ལམ་ཐམས་ཅད་ལ་བརྟགས་པ་ཤེས་བཞིན་ཏེ་འདི་གསུམ་དང་ལྡན་པའི་གང་ཟག་གི་རྒྱུད་ས་གཞི་གཤིན་པ་དང་འདྲ་བ་ལ། བྱང་ཆུབ་སེམས་ཀྱི་ས་བོན་བཞག་པ་ཙམ་མ་ཡིན་པར་ལྷག་བསམ་དག་པའི་མྱུ་གུ་བསྐྱེད་སླ་བས། འདི་དག་ནི་ཤིན་ཏུ་གནད་གལ་པོ་ཆེ་ཡིན་པས་དབྱེ་འབྱེད་སེམས་ཐོག་ནས་ཤེས་པར་བྱའོ། །དེ་ལྟར་སེམས་བསྐྱེད་དང་བྱང་སེམས་བསླབ་པ་མི་ཉམས་པར་བཟུང་ཞིང་འདི་མ་བཏང་བ་ཙམ་གྱིས་མི་ཆོག་སྟེ། མི་མཐུན་ཕྱོགས་ལྟུང་བའི་དྲི་མ་སྦྱོང་བ་དང༌། མཐུན་ཕྱོགས་སེམས་བསྐྱེད་དང་བསླབ་པ་སྤེལ་བའི་ཐབས་ཐོས་བསམ་སོགས་དགེ་བའི་བཤེས་གཉེན་བསྟེན་པ་དང༌། ཚོགས་བསགས་སྒྲིབ་སྦྱོང་སོགས་ཐེག་ཆེན་བསླབ་བྱ་ལ་ནན་ཏན་བགྱིད་འཚལ་ལོ། །དེ་ལ་ལྟུང་བའི་རབ་དབྱེ་སྡེ་སྣོད་རྣམས་ལས་དུ་མ་གསུངས་པ་བསྡུ་ན། ནམ་སྙིང་མདོ་ཡི་བཅོ་བརྒྱད། གསང་ཆེན་ཐབས་ལ་མཁས་པའི་མདོ་དང༌། དཀོན་བརྩེགས་ལས་གསུངས་པ་རེ་རེ་སྟེ་ཉི་ཤུ་ནི། དཀོན་མཆོག་དཀོར་འཕྲོག་ལ་སོགས་རྒྱལ་པོའི་ལྔ་དང༌། གྲོང་དང་གྲོང་བརྡལ་འཇོམས་པར་བྱེད་པ་ལ་སོགས་བློན་པོའི་ལྔ་སྟེ་བཅུ། བློ་མ་སྦྱངས་པ་ལ་སྟོང་ཉིད་སྟོན་པ་སོགས་ཕལ་པའི་བརྒྱད་དེ་བཅོ་བརྒྱད་དང༌། ཉན་རང་ཡིད་བྱེད་ཀྱིས་སྨོན་པ་དང༌། སྦྱིན་སོགས་དམ་བཅའ་ཉམས་པས་འཇུག་སེམས་གཏོང་བ་སྟེ་ཉི་ཤུ་པོ་རྣམས་སྤང་དགོས་སོ། །མདོར་ན་རྨི་ལམ་དུ་ལྟུང་བ་འབྱིན་པ་སོགས་སྡིག་པ་བྱས་པ་མཐོང་ན་ཡང༌། སད་དུས་བག་ཆགས་ཀྱི་མཐུས་ཡིན་པས་ཕྱི་བཤོལ་མེད་པར་དེ་མ་ཐག་ཏུ་ཕྱག་འཚལ་བ་དང༌། བཤགས་པ་དང༌། བསྔོ་བ་སྟེ་ཕུང་པོ་གསུམ་པ་ཚང་བའི་མདོ་འདོན་པ་ལ་སོགས་པས་བཤགས་པ་བྱ་དགོས་ན། སད་དུས་ཀྱི་ཉེས་ལྟུང་བསམ་བཞིན་བྱས་པ་ལ་ལྟ་ཅི་སྨོས། བྱང་སེམས་ཀྱི་བསླབ་པ་དང་ཡོན་ཏན་ཐམས་ཅད་ཀྱི་རྟེན་གཞི་ཐ་ན་སེམས་ཅན་གཅིག་ཙམ་བློས་བཏང་ནས་སྨོན་སེམས་ཤོར་བ་དང༌། འགལ་ཟླ་མི་མཐུན་ཕྱོགས་རྩ་ལྟུང་གང་རུང་བྱུང་བ་དང༌། སྡོམ་པ་རྩ་བ་ནས་སྤོང་བའི་རྐྱེན་བསླབ་པ་ཕུལ་བ་གསུམ་པོ་དག་ལས། ཉིན་མཚན་སོ་སོའི་ཆ་ཐུན་གསུམ་གསུམ་དུ་བཅད་པའི་སྔ་དྲོ་ལྟ་བུ་དྲུག་ཆའི་དང་པོ་ནས་ལྟུང་བ་བྱུང་ནས་གཉིས་པའི་ཐུན་ཚོད་བཤགས་ཚད་དེ་ལས་ཉམས་ཤོར་ན། གཏུགས་པ་ཞེས་ཕྱིར་བཅོས་ཀྱིས་སོར་ཆུད་པ་མ་ཡིན་པས་འགྱོད་སེམས་ཀྱིས་སྐྱ་རེངས་འཆར་དུ་ཉེ་བ་ན། གཙང་སྦྲ་དང་བཅས་ཁ་ཤར་དུ་ཕྱོགས་ནས་པུས་མོ་བཙུགས་ཏེ་མདུན་དུ་ནམ་མཁའི་སྙིང་པོ་ཡིད་ལ་བོས་ནས་ཡན་ལག་བདུན་པ་འབུལ་བའམ་ཡང་ན། ཡི་དམ་གྱི་ལྷ་ཡི་མདུན་དུ་ཐུན་མིན་གྱི་ཡན་ལག་བདུན་པ་བྱས་ལ་བཤགས་པས་ལྟུང་བ་ལས་ལྡང་ངོ༌། །དབང་པོ་རབ་ཏུ་གྱུར་པས་ལྟུང་བ་བཤགས་པའི་ཚུལ། ཐར་པ་ཆེན་པོའི་མདོ་ལས། གང་ཞིག་འགྱོད་ཚངས་བྱེད་འདོད་ན། །དྲང་པོར་འདུག་ལ་ཡང་དག་ལྟོས། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །འདི་ནི་འགྱོད་ཚངས་མཆོག་ཡིན་ནོ། །ཞེས་པ་ལྟར་རོ། །བདག་གི་བདེ་བ་དང་ཡོན་ཏན་ཐམས་ཅད་དབུགས་དང་ལྷན་ཅིག་ཏུ་གཞན་སེམས་ཅན་རྣམས་ལ་ཡང་དག་པར་སྨིན་པར་བསམ་ནས་སྤོ་བ་དང༌། དབུགས་ནང་དུ་རྔུབ་པའི་ཚེ་གཞན་སེམས་ཅན་གྱི་སྡུག་བསྔལ་དང་སྐྱོན་ཐམས་ཅད་བྲལ་ནས་བདག་གི་རྒྱུད་ལ་སྨིན་པའི་ཁུར་དང་དུ་བླང་ནས་སེམས་ཅན་ཐམས་ཅད་ཀྱི་སྡུག་བསྔལ་མ་ལུས་པ་རྣམས་བདག་ཁོ་ནས་བཟོད་པར་བྱའོ་སྙམ་པའི་གོ་ཆ་བགོས་ཏེ་དེ་ལྟར་གཏོང་ལེན་སྙིང་སྟོབས་རྨད་དུ་བྱུང་བ་རང་རྒྱུད་ལ་འདུ་བྱེད་ཅིང༌། ཇི་སྲིད་བྱང་ཆུབ་ཀྱི་གོ་འཕང་མ་ཐོབ་བར་དུ་སེམས་ཅན་ཐམས་ཅད་སྡུག་བསྔལ་དང་བྲལ་ཏེ་བདེ་བ་དེ་དག་དང་མི་འབྲལ་བ་ཕྱི་ཕྱིར་ཏེ་ཡང་ཡང་སྨོན་ནོ། །དེ་ལྟར་སྨོན་བའི་བསླབ་བྱ་ནི་བསམ་པ་བཟང་པོའི་ཚད་མེད་བཞི་པོའང་བདག་གཞན་མཉམ་བརྗེ་བསྟན་པ་དེ་ལ་བློ་ལེགས་པར་སྦྱང་བ་དང༌། སེམས་ཅན་འདི་རྣམས་ཐོག་མེད་ནས་ཕ་མ་བྱས་ཏེ་དྲིན་ཆེན་པོས་བསྐྱངས་པའི་སྒོ་ནས་ཕན་འདོགས་པར་བྱས་པ་དེ་དྲན་ནས། དྲིན་དུ་གཟོ་བར་འདོད་པ་ལས་བྱམས་པ་སྐྱེ་ཞིང༌། བྱམས་པ་ལས་སྙིང་རྗེ་དང༌། སྙིང་རྗེ་དེ་ལས་བྱང་ཆུབ་ཀྱི་སེམས་སྐྱེ་བ་ཐེག་ཆེན་པོའི་སྡེ་སྣོད་རྣམས་ལས་གསུངས་པའི་དོན་བྷཾ་ག་ལའི་པཎྜི་ཏས་རྒྱུ་འབྲས་མན་ངག་བདུན་ལྡན་དུ་བཞེད་པས་ན་ཚད་མའི་ལུང་གིས་ཡང་དག་པར་གྲུབ་སྟེ། རྒྱུ་འབྲས་མན་ངག་བདུན་ནི། མར་ཤེས་པ་དང༌། དྲིན་དྲན་དང༌། དྲིན་གཟོ་བ་དང༌། ཡིད་འོང་གི་བྱམས་པ་དང༌། བརྩེ་བའི་སྙིང་རྗེ་དང༌། ལྷག་བསམ་རྣམ་དག་དང༌། རང་འབྲས་བླ་ན་མེད་པའོ། །དང་པོ་མར་ཤེས་པ་ནི། མར་མ་གྱུར་པ་སེམས་ཅན་གཅིག་ཀྱང་མེད་ལ། མགོན་པོ་ཀླུས། མ་ཡི་ཐུག་མཐའ་རྒྱ་ཤུག་ཚིག་གུ་ཙམ། །རིལ་བུར་དྲིལ་ཀྱང་ས་ཡིས་ལང་མི་འགྱུར། །ཞེས་སོ། །གཉིས་པ་དྲིན་དྲན་པ་ནི། བཙས་མ་ཐག་པའི་སྐྱེས་བུ་མི་གཙང་བའི་སྲིན་བུ་དང་འདྲ་བ་བཞིན་ངན་ལ་གདོན་དང༌། གྲུལ་བུམ་གྱི་བྱད་དང་འདྲ་བ་དེ། མ་ཡི་ཚམ་ཚོམ་མེད་པར་པང་པར་བླངས་ནས་ནི་ཁྲུས་ཁང་ལྟར་བྱས་ཏེ། དེ་ནས་མི་གཙང་བ་མཐའ་དག་གོས་ལ་སོགས་པས་རྩུབ་ཀྱི་དོགས་ནས་ལག་པས་ཉེ་རེག་བྱས་ཏེ་ཕྱི་བར་བྱེད་དོ། །ཁ་ཟས་ལ་བརྟེན་མི་ནུས་པས་ནུ་ཞོས་བསྙེན་བཀུར་ལུས་ཀྱི་རེག་བྱ་འཇམ་པོས་གཡོགས་ཏེ་མི་སྐྱོ་བར་བྱས། ཆེ་སྟེ་ཤི་ཡི་དོགས། འབྲིང་སྟེ་ན་ཡི་དོགས། ཆུང་སྟེ་ལྟོགས་ཀྱི་དོགས། སྐོམ་གྱི་དོགས། འཁྱགས་ཀྱི་དོགས་ནས་མི་མཐུན་པའི་ཕྱོགས་སྤང་ལ་བརྩོན་པ། བུ་ཆུང་ཅུང་ཟད་ན་བ་ལས་བདག་ཉིད་འཆི་བར་འདམ་ཤིང༌། བུ་དེའི་དོན་དུ་གཞན་ལ་ཁོང་ཁྲོ་བ་སོགས་སྡིག་དང་དཀའ་ཚེགས་ཚ་གྲང་སོགས་སྡུག་བསྔལ་དང༌། གཏམ་ངན་མཐའ་དག་བསྲན་ཅིང་བཟོད་ནུས་པའི་མ་དེའི་དྲིན་དང་རིམ་གྲོ་དེ་ཙམ་བྱས་པ་ལ་ཅི་ཡང་མི་སེམས་པར་ཁྱད་དུ་གསོད་པར་བྱེད་ན། དེ་ལས་ཆོ་ག་སྟེ་བྱ་བ་འཁྲུགས་པའམ་ངན་པ་བསམ་སྦྱོར་ཉམས་པ་སུ་ཞིག་ཡོད་དེ་མེད་དོ། །དེས་ན་ས་འདིའི་རི་རབ་དང་རྒྱ་མཚོ་ནས་ལྕགས་རིར་བཅས་པ་བདག་གིས་ཁུར་ན་ཡང་ཁུར་ཆེན་པོ་མ་ཡིན་ཏེ། བྱས་པ་དྲིན་དུ་མི་གཟོ་བའི་སྡུག་བསྔལ་གྱི་ཁུར་ཆེན་པོ་ཤིན་ཏུ་བཟོད་དཀའ་བ་ཟད་མཐར་ཐུག་པ་མེད་པ་ནི། དབྱིག་དུག་གྱུར་དུག་ལ་ནུས་པ་ཆེས་ཆེར་བྱེད་པའི་བཙན་དུག་བསྲེས་པ་ལྟ་བུ་དུག་ལྡན་གྱི་བཟའ་བ་ཁོང་དུ་ཆུད་པའི་སྐྱེ་བོ་བཞིན་ཉམས་པར་མི་འགྱུར་སྙམ་ཡང་ཉམས་པར་འགྱུར་ཏེ། ལུང་རྣམ་འབྱེད་ལས། ས་རྣམས་དང་ནི་རི་རྣམས་དང༌། །རྒྱ་མཚོ་བདག་གི་ཁུར་མིན་ཏེ། །བྱས་པ་མི་གཟོ་གང་ཡིན་པ། །དེ་ནི་བདག་གི་ཁུར་ཆེན་ཡིན། །ཞེས་སོ། །རྒྱུ་མཚན་དེའི་ཕྱིར་གྲངས་ཕ་མཐའ་ཡས་པའི་སེམས་ཅན་མ་ལུས་པ་ཀུན། མ་རུ་ལན་མང་དུ་གྱུར་ནས་ཕན་ཆེན་པོ་བཏགས་པ་དེ་ལྟ་བུ་ནི་གཞན་སུས་ཀྱང་མི་ནུས་པས་དམ་པ་མཆོག་ཏུ་གྱུར་པའི་དྲིན་ཆེན་དེ་ཡང་ཡང་དྲན་པས་སུ་མཐོང་དྲིན་ཅན་དུ་ཤེས་པར་བྱའོ། །གསུམ་པ་དྲིན་གཟོ་བ་ནི། འདི་དག་ལ་དྲིན་ལན་དུ་ཕན་གདགས་དགོས་པས་ཕན་ཆེན་པོ་ཇི་ལྟར་གདགས་སྙམ་ནས་ཐབས་ལ་བརྩོན་པའོ། །བཞི་པ་ཡིད་འོང་གི་བྱམས་པ་ནི། དེ་ལྟར་གོམས་པས་སེམས་ཅན་གྱིས་རང་ལ་དགྲ་བྱེད་པ་མཐོང་ནའང༌། མས་བུ་ལ་བརྩེ་བ་ལྟར་དེ་ལ་ཁོང་མི་ཁྲོ་བར་མ་ཟད་སྙིང་ནས་བརྩེ་ཞིང་ཡིད་དུ་འོང་བའི་སྒོ་ནས་བདེ་བ་དམ་པ་དང་འཕྲད་པའི་ཐབས་ལ་སྦྱོར་བར་འདོད་པའོ། །ལྔ་པ་བརྩེ་བའི་སྙིང་རྗེ་ནི། བྱམས་སེམས་དེ་ལས་སྙིང་རྗེ་སོགས་ཚད་མེད་ལ་བློ་ངང་གིས་འབྱོང་ཏེ་བྱམས་ཡུལ་དེ་རྣམས་ཀྱི་སྡུག་བསྔལ་རྒྱུ་འབྲས་དང་བཅས་པ་བྱུང་བ་དེ་ལ་མི་བཟོད་པར་སྤང་འདོད་པའོ། །དེའི་ཚེ་སེམས་ཅན་གྱིས་བདེ་སྐྱིད་མྱོང་ན་རང་ལ་བྱུང་བ་ལས་ཀྱང་བླ་ལྷག་ཏུ་སྤྲོ་ཞིང་དགའ་བ་དེ་ཡང་ཉེ་རིང་ཆགས་སྡང་དང་བྲལ་བ་མཉམ་པར་ལྟ་བའི་ཚད་མེད་བཞི་པོ་གོང་དུ་འཕེལ་ཞིང་རྒྱས་པར་འགྱུར་རོ། །དྲུག་པ་ལྷག་བསམ་དག་པ་ནི། དེ་ལྟར་ཚད་མེད་བཞི་པོ་རྒྱུད་ལ་གོམས་པས། སྙིང་རྗེའི་སར་བཞག་པ་ཡིད་འོང་གི་སེམས་ཅན་འདི་དག་གཏན་བདེ་རྣམ་གྲོལ་དུ་དགོད་པའི་ཁུར་ལེན་གཏིང་ནས་སྐྱེ་བའོ། །བདུན་པ་རང་འབྲས་བླ་མེད་ནི། དེ་ལྟར་བྱས་པ་ཤེས་པ་དང་དྲིན་དུ་གཟོ་བ་སོགས་བསམ་པ་དང་ལྡན་པ་ཡི་སྐྱེས་བུ་གང་ཡིན་པ་དེ་ལ། དད་སོགས་འཕགས་པའི་ནོར་བདུན་གྱིས་བསྙེན་པར་འགྱུར་བ་ཆོས་ཉིད་ཡིན་ནོ། །བྱང་ཆུབ་སྨོན་པའི་སེམས་སེམས་ཅན་གྱི་ཁམས་ཡིན་ནོ་ཅོག་ཡལ་བར་མི་འདོར་བའི་བསམ་པ་བཟང་པོ་སྟོན་ཀའི་ཟླ་བ་གསར་པ་དང་འདྲ་བའི་སེམས་བསྐྱེད་པ་དེ་ལ། སྒྲིབ་བྱེད་སྒྲ་གཅན་གྱི་གདོང་བས་ཀྱང་ཐུ་བའི་མི་མཐུན་ཕྱོགས་ནི། ནག་པོའི་ཆོས་བཞི་པོ་ཡིན་པས་གཉེན་པོའི་སྟོབས་ཀྱིས་རིང་དུ་བསྐྲད་པར་བྱའོ། །དེ་ཡང་བླ་མ། སློབ་དཔོན། མཁན་པོ། སྦྱིན་གནས་ཡོན་ཏན་དང་ལྡན་པ་སྟེ་མཆོད་འོས་བསླུ་བ་དང༌། གང་ཟག་གཞན་བསོད་ནམས་ཆ་མཐུན་ཐེག་གསུམ་གང་རུང་ལ་ཞུགས་ཏེ་ཐར་པ་ཆ་མཐུན་གྱི་བསོད་ནམས་བསགས་པ་ལ། ཐེ་ཚོམ་བསྐྱེད་དེ་ཁྱོད་ཀྱིས་སྡོམ་པ་མ་ཐོབ་ཞེས་སོགས་བརྗོད་ནས་འགྱོད་པའི་གནས་ལ་སྦྱར་བ་དང༌། ཡུལ་དམ་པ་བྱང་ཆུབ་ཏུ་སེམས་བསྐྱེད་པའི་གང་ཟག་རྣམས་ལ་དངོས་སུ་སྐུར་ཞིང་ལྐོག་ཏུ་མི་སྙན་པ་སྒྲོག་པ་དང༌། རང་གི་ཉེས་པ་ཐབས་ཀྱིས་མི་མངོན་པར་བྱེད་པའི་གཡོ་དང༌། ཡོན་ཏན་མེད་ཀྱང་ཡོད་བརྫུའི་སྒྱུས་བྲེ་སྲང་སོགས་ཀྱི་སྒྱུ་ཐབས་ཀྱི་སྤྱོད་པ་སྣ་ཚོགས་པས་གཞན་དག་མགོ་བོ་བསྐོར་བ་སྟེ་ཆོས་བཞི་པོ་དེ་གང་རུང་ཉམས་སུ་མྱོང་ཚེ་སྨོན་སེམས་ཤོར་བ་ཡིན་ལ། ལྟུང་བ་བྱུང་བའི་ཐུན་དེའི་ཐོག་མཐའ་བར་གསུམ་གང་རུང་དུ་འགྱོད་པ་དྲག་པོ་དང་གཉེན་པོའི་བཤགས་པ་མ་སླེབས་པར་ཐུན་ཚོད་ལས་འདས་ན། དེ་ཡི་མོད་ལ་སེམས་བསྐྱེད་འཆོར་བའི་རྒྱུ་བྱེད་པ་ཡིན་ནོ། །དེ་དག་གི་གཉེན་པོར་ཆེ་བ་དཀར་པོའི་ཆོས་བཞི་ནི། སྲོག་ལ་བབ་ཀྱང་བརྡ་འཕྲོད་པ་ཐམས་ཅད་ལ་བསམ་བཞིན་རྫུན་མི་སྨྲ་བ་དང༌། རྒྱལ་སྲས་རྣམས་ལ་སྟོན་པ་དང་མཚུངས་པར་གུས་ཤིང་བསྔགས་པ་བརྗོད་པ་དང༌། གཡོ་སྒྱུ་མེད་པར་ལྷག་བསམ་དག་པས་སེམས་ཅན་ཐམས་ཅད་ལ་ཕན་པའི་བསམ་སྦྱོར་དོན་དུ་གཉེར་བ་དང༌། རང་གིས་སྨིན་ནུས་པའི་སེམས་ཅན་མཐའ་དག་ལ་སྨོན་སེམས་བསྐྱེད་བཅུག་ཅིང་རིམ་པར་རྫོགས་པའི་བྱང་ཆུབ་ཀྱི་ལམ་ལ་སྙིང་ཐག་པ་ནས་དཀྲི་བའོ། །སེམས་བསྐྱེད་མི་ཉམས་ཤིང་བརྟན་པར་བྱ་བའི་སྒོ་ནས་བསྲུང་བའི་འདུ་ཤེས་བཞི་སྟེ། ཐེག་ཆེན་དགེ་བའི་བཤེས་གཉེན་བདག་ལ་ལམ་མ་ནོར་བར་སྟོན་པ་དེ་ལ་སངས་རྒྱས་དངོས་ཀྱི་འདུ་ཤེས་དང༌། དེས་བསྟན་པའི་ཟབ་རྒྱས་ཀྱི་ཆོས་ལ་ལམ་གྱི་འདུ་ཤེས་དང༌། དེ་སྒྲུབ་པའི་བྱང་སེམས་གཞན་ལྟ་སྤྱོད་མཐུན་པ་རྣམས་ལ་གྲོགས་ཀྱི་འདུ་ཤེས་དང༌། མཐའ་ཡས་བའི་སེམས་ཅན་ཀུན་ཐམས་ཅད་ལ་བུ་གཅིག་པོའི་འདུ་ཤེས་ཏེ་འདི་དག་ཏིང་ངེ་འཛིན་རྒྱལ་པོ་ལས་བཤད་དོ། །བདེ་སྡུག་གཏོང་ལེན་ནས་འདུ་ཤེས་བཞིའི་བར་འདི་དག་སྨོན་པའི་བསླབ་བྱ་ཐེག་ཆེན་གྱི་སྡེ་སྣོད་རྣམས་ལས་བཏུས་པ་ཡང་དག་གོ །འཇུག་པའི་སྡོམ་པ་བླངས་པ་དེའི་བསླབ་བྱ་ཕ་རོལ་ཏུ་ཕྱིན་པ་དྲུག་ལས། དང་པོ་སྦྱིན་པ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན་སྟེ་ལྔ་ནི་བསོད་ནམས་དམ་པའི་ཚོགས་དང༌། ཕྱི་མ་གཅིག་པོ་ཤེས་རབ་ཕ་རོལ་ཕྱིན་པ་ནི་ཡེ་ཤེས་ཀྱི་ཚོགས་ཆེན་ཏེ། ཚོགས་གཉིས་ཐབས་ཤེས་ཟུང་འབྲེལ་འདི་གཉིས་ལ་མ་བརྟེན་པའི་སངས་རྒྱས་འགྲུབ་བྱེད་ཀྱི་ཐབས་གཞན་ཡོད་པ་མ་ཡིན་ལ། དེའི་སྟེང་དུ་སྦྱིན་སོགས་དེ་དག་གཞན་དོན་བྱང་ཆུབ་ཆེན་པོར་བསྔོ་བས་མི་ཟད་པར་བྱེད་པའི་ཐབས་དང༌། མི་མཐུན་པའི་ཕྱོགས་ཐམས་ཅད་ཟིལ་གྱི་གནོན་པའི་སྟོབས་ཀྱིས་དགེ་བ་བྱང་ཆུབ་ཏུ་ངེས་པར་བྱེད་པའི་སྟོབས་དང༌། འདུན་པས་སྐྱེ་བ་ཐམས་ཅད་དུ་སྦྱིན་སོགས་ཀྱི་ཡོན་ཏན་རྒྱུན་མི་འཆད་པར་འབྱུང་བའི་སྒོ་ནས་དགེ་བ་ལ་རྟག་ཏུ་འཇུག་པར་བྱེད་པའི་སྨོན་ལམ་དང༌། སྦྱིན་སོགས་ཀྱི་ཆོས་རྣམས་ལ་ལོངས་སྤྱོད་ཅིང་སེམས་ཅན་རྣམས་སྨིན་པར་བྱེད་པའི་ཡེ་ཤེས་སྟེ་བཞི་བསྣན་པས་བཅུ་སྟེ་རྒྱལ་སྲས་རྣམས་ཀྱི་སྤྱི་ནོར་ཡིན་ནོ། །གང་ཟག་གི་བློ་སྟོབས་ཀྱི་མཐུ་ཡིས་ལམ་དེ་སྒྲུབ་པར་བྱེད་པོ་རྒྱལ་སྲས་གསུམ་སྟེ། དབང་རྟུལ་རྣམས་ཐོག་མར་རང་ཉིད་འཚང་རྒྱ་བའི་དོན་དུ་ཚོགས་གཉིས་མཐར་ཕྱིན་པའི་བྱ་བ་སྔོན་དུ་བྱས་ནས། རྗེས་ལ་འགྲོ་བ་རྣམས་སྒྲོལ་བར་འདོད་པ་རྒྱལ་པོ་ལྟ་བུའི་འདོད་ཆེན་སེམས་བསྐྱེད་འཕགས་པ་བྱམས་པ་ལྟ་བུ་དང༌། དབང་འབྲིང་རང་དང་འགྲོ་བ་སྔ་ཕྱི་མེད་པར་སྟབས་ཅིག་སྒྲོལ་འདོད་པ་གྲུ་པ་ལྟ་བུ་ཡེ་ཤེས་དམ་པའི་སེམས་བསྐྱེད་དང༌། དབང་རྣོན་རྣམས་ཀྱིས་འགྲོ་བ་སྔོན་དུ་བསྒྲལ་ཞིང་རང་ཉིད་ས་བཅུར་གནས་ཏེ་རྗེས་ལ་ཞི་བ་མྱང་འདས་མངོན་དུ་བྱེད་འདོད་པ། སྐྱོང་བྱེད་ལྟ་བུ་དཔེ་མེད་པའི་སེམས་བསྐྱེད་དེ་འཇམ་དབྱངས་དང་སྤྱན་རས་གཟིགས་ལྟ་བུའོ། །དེ་རྣམས་ལས་དབང་པོ་རྟུལ་པོས་ཚོགས་སྦྱོར་ལ་བསྐལ་པ་གྲངས་མེད་གསུམ་དང༌། ས་བཅུ་པོ་རེ་རེ་ལ་གསུམ་རེ་སྟེ་སུམ་ཅུ་རྩ་གསུམ་གྱིས་ལམ་མཐར་ཕྱིན་ཏེ་འཚང་རྒྱ་བ་དང༌། འབྲིང་པོས་ཚོགས་སྦྱོར་ལ་བཞི་སྟེ། མཐོང་ལམ་ལ་གཅིག །མ་དག་ས་བདུན་ལ་གཅིག །དག་ས་གསུམ་ལ་གཅིག་སྟེ་བདུན་དུ་འཚང་རྒྱ་བ་དང༌། རྣོན་པོས་ཚོགས་སྦྱོར་ལ་གཅིག །མ་དག་ས་བདུན་ལ་གཅིག །དག་པ་ས་གསུམ་ན་གཅིག་སྟེ་གྲངས་མེད་གསུམ་ན་མྱང་འདས་སུ་གྲོལ་བར་དཀོན་མཆོག་བརྩེགས་པ་ལས་གསུངས་པ་ལྟར་རོ། །སྦྱིན་པའི་ངོ་བོ་བདོག་རྒུའི་དངོས་པོ་ཐམས་ཅད་ལ་ཆགས་པ་མེད་ཅིང་ཐམས་ཅད་གཞན་ལ་གཏོང་བའི་སེམས་པ་དང་བཅས་པ་སྟེ། དབྱེ་ན་དམ་པའི་ཆོས་ཀྱི་སྦྱིན་པ་དང༌། ཟང་ཟིང་ལོངས་སྤྱོད་ཀྱི་སྦྱིན་པ་དང༌། མི་འཇིགས་པ་སྲོག་གི་སྐྱབས་སྦྱིན་ཏེ་གསུམ་ལས་ཟང་ཟིང་ལའང་རྣམ་པ་གསུམ་ཡིན་ཏེ། བློ་སྟོབས་ཆུང་བའི་དུས་སུ་གཏོང་བ་དང༌། དེ་ལ་གོམས་ནས་གཏོང་བ་ཆེ་བ་དང༌། གཏོང་སེམས་གོམས་པ་ཕུལ་དུ་བྱུང་ནས་ཤིན་ཏུ་གཏོང་བ་ལ་བསླབ་ནུས་སོ། །དེ་ཡང་གཏོང་བ་ཞེས་བྱ་བ་ནི། བློ་སྟོབས་ཀྱིས་རིམ་པར་ཁ་ཟས་དང༌། གོས་དང༌། ཤིང་རྟ་དང༌། གླང་པོ་དང༌། ཡུལ་ཁམས་སོགས་གཞན་ལ་སྦྱིན་པའོ། །གཏོང་བ་ཆེན་པོ་ནི། ཤིན་ཏུ་ཕོངས་པ་ལ་རང་གི་བུ་དང༌། བུ་མོ་དང༌། ཁྱིམ་ཐབ་རྣམས་གཏོང་བ་ཡིན་ནོ། །ཤིན་ཏུ་གཏོང་བ་ནི། བྱ་དཀའ་བའི་གནས་ཏེ་མགོ་དང༌། དབང་པོ་དང༌། ཡན་ལག་ཐམས་ཅད་ཕངས་མེད་དུ་གཏོང་བ་རྒྱལ་པོ་ཟླ་འོད་ལ་སོགས་པ་ལྟར་རོ། །དེ་ཡང་བྱང་ཆུབ་སེམས་དཔའི་སྤྱོད་པ་སྤྱི་དང་ཁྱད་པར་སྦྱིན་པ་ལ་བསླབ་པའི་སྐབས་འདི་ན་ཐོག་མར་གཏོང་སེམས་ལ་གོམས་སུ་འཇུག་པའི་ལས་དང་པོ་པ་རྣམས། སེར་སྣའི་འཆིང་བ་དམ་པོས་བསྡམས་པའི་སྟོབས་ཀྱིས་ཁ་ཟས་ཙམ་ཡང་སྦྱིན་མི་ནུས་པའི་ཚེ་ན། སྐྱེས་བུའི་ལག་པ་ནི་གཅིག་གིས་དངོས་པོས་ངན་ངོན་ཙམ་བཟུང་ནས། གཅིག་ཤོས་ལ་སྦྱིན་པར་བསམ་པའི་སེམས་ཀྱིས་ཡང་ཡང་སྤོས་ཏེ་སྦྱིན་པའི་ཚུལ་ལ་བསླབ་ཏུ་བཅུག་པས་མཐར་སྦྱིན་པ་ཆེན་པོ་གཏོང་ནུས་པ་བཞིན་དུ། རང་ཅག་གིས་ཀྱང་དང་པོ་ཚོད་མ་ལ་སོགས་དངོས་པོ་ཕྲ་མོ་ཙམ་གཏོང་བ་ལ་ཡང་ཡང་གོམས་པར་བྱས་ཏེ་རིམ་གྱིས་ལོངས་སྤྱོད་ལ་བརྐམ་ཞིང་ཆགས་པའི་སེམས་འཇིག་པར་བྱེད་ཅིང་གཏོང་སེམས་སྟོབས་སུ་གྱུར་ཏུ་ཤིན་ཏུ་གཏོང་བའི་བར་ལ་བསླབ་བོ། །མི་འཇིགས་པའི་སྦྱིན་པ་ནི། གཞན་སེམས་ཅན་རྒྱལ་པོའི་ཁྲི་མུན་དུ་ཆུད་པ་དང༌། ཆད་པས་མནར་བ། རི་དྭགས་རྔོན་པས་བདས་པ། ཕྱུགས་ལུག་བཤས་རར་ཁྲིད་པ། ནད་གདོན་གྱིས་གཙེས་པ་སོགས་ཀུན་གྱི་སྲོག་བསྲུང་བ་དང༌། བདག་གིས་སེམས་ཅན་ཐམས་ཅད་གནས་སྐབས་དང་མཐར་ཐུག་ཀུན་ཏུ་འཇིགས་པའི་ཡུལ་ཆེན་པོའི་འཁོར་བའི་སྡུག་བསྔལ་མཐའ་ཡས་པ་ལས་བསྒྲལ་ཏེ་དབུགས་འབྱིན་ཆེན་པོ་མྱ་ངན་ལས་འདས་པའི་གནས་ལ་དགོད་པར་བྱ་སྙམ་དུ་བློ་སྦྱང་བར་བྱའོ། །ལས་དང་པོ་པ་རྣམས་ཀྱིས་རང་གི་ནུས་ཚོད་སྦྱིན་པར་བྱ་ཡི། གཞན་བྱ་དཀའ་བ་རྣམས་མི་ནུས་བཞིན་དུ་མ་བརྟགས་པར་བབ་ཅོལ་ཆོ་ག་སྟེ་བྱ་བ་ཡིས་རྣམ་པར་སྦྱར་བའི་མཐར་འགྱོད་པ་སྐྱེ་བར་འགྱུར་བའི་ཕྱིར་དང༌། ཉན་རང་སོགས་སུ་སེམས་བསྐྱེད་ཉེན་ཡོད་པས་དེ་འདྲའི་སྦྱིན་པའང་སྨད་པའི་གནས་ཏེ། དཔེར་ན། སྨན་ཤིང་ལྗོན་པ་བལྟ་ན་སྡུག་པ་ཡི། །རྩ་བ་ལ་སོགས་སྤྱད་འོས་ས་བོན་ནི། །འབྱིན་པ་དུས་མིན་སྤྱོད་ལས་བསྲུང་བར་བྱ། །རྫོགས་སངས་རྒྱས་ཀྱི་སྨན་ཤིང་དེ་བཞིན་ནོ། །ཞེས་པ་ལྟར་གནོད་སེམས་དང་ཕྲག་དོག་སོགས་སྙིང་རྗེའི་བསམ་པ་ཤིན་ཏུ་མ་དག་པར། ལུས་དང་སྲོག་གཏོང་བ་བསླབ་བཏུས་ཉིད་ལས་བཀག་པ་ནི་གོང་དུ་ལུང་དྲངས་མ་ཐག་པའོ། །གནོད་སེམས་དང༌། ཕྲག་དོག་དང༌། ངོམ་ཆོས་སོགས་བསམ་པ་དང༌། གཞན་ལ་གནོད་པ་བྱས་ནས་གཏོང་བ་སོགས་སྦྱོར་བ་དང༌། དུག་མཚོན་སོགས་དངོས་པོ་དང༌། ཤན་པ་ལ་མཚོན། བག་མེད་ལ་ཆང༌། གཉེན་ལ་ཞེན་པས་ནོར་གཏོང་བ་སོགས་མ་དག་པའི་བསམ་སྦྱོར་སོགས་ཁ་ན་མ་ཐོ་བས་བསྐྲུན་པའི་སྦྱིན་པ་ཡང༌། བྱང་ཆུབ་སེམས་དཔས་སྤྱད་བྱའི་གནས་མིན་པར་སྨད་པའི་གནས་ཏེ། དེས་ན་སེམས་ཀྱི་ཆ་ནས་གནས་ལུས་ལོངས་སྤྱོད་དགེ་རྩ་བཅས་བདོག་པ་ཐམས་ཅད་ལ་སེར་སྣར་ལྟ་བའི་ཞེན་པ་བཏང་བ་ནི་སྦྱིན་པའི་ཚད་དུ་བཞེད་དོ། །མཆོག་ཏུ་གྱུར་པ་ཆོས་ཀྱི་སྦྱིན་པ་ལའང་རྣམ་པ་གསུམ་སྟེ། འཕགས་པ་འཇིག་རྟེན་འཛིན་གྱིས་དྲིས་པ་ལས། དེ་ལ་ཆོས་ཀྱི་སྦྱིན་པ་གང་ཞེ་ན། སྨྱུག་གུ་དང༌། སྣག་ཚ་དང༌། གླེགས་བམ་སྦྱིན་པ་ནི་ཆུང་དུའོ། །སྐལ་པ་ཇི་ལྟ་བ་བཞིན་དུ་ཉན་ཐོས་དང༌། རང་སངས་རྒྱས་དང༌། བླ་ན་མེད་པའི་ཆོས་སྟོན་པ་ནི་ཆེན་པོའོ། །བླ་ན་མེད་པའི་བྱང་ཆུབ་འཛིན་དུ་འཇུག་ཅིང་ནམ་མཁའ་ལྟར་བསམ་གྱིས་མི་ཁྱབ་པའི་ཆོས་སྟོན་པ་ནི་ཤིན་ཏུ་ཆེན་པོའོ། །ཞེས་སོ། །དེ་ལས་ཆོས་ཀྱི་སྦྱིན་པ་དངོས་ནི། གཞན་ལ་བློ་རིམ་བཞིན་དུ་གདམས་པར་བྱེད་པ་ཡིན་ནའང༌། མོས་པས་སྤྱོད་པ་རྣམས་རང་རྒྱུད་ལ་ཆོས་ཀྱི་ཚིག་དོན་གཉིས་ཆར་ནུས་པ་གསལ་བ་མེད་པས་ཇི་བཞིན་འདོམས་པར་དཀའ་ལ། གཞན་ཕན་གྱི་བསམ་པ་གཙོ་བོར་བཟུང་སྟེ་དགེ་བའི་བཤེས་གཉེན་གྱི་གདམས་ངག་གིས་རང་གི་རྒྱུད་ཀྱི་ཉོན་མོངས་པ་བསལ་བའི་ཆོ་ག་སྟེ་ཐབས་ལ་དྲན་པ་དང༌། སེམས་ཅན་ལ་བྱམས་པ་དང༌། སྙིང་རྗེ་ལྡན་པས་དེ་བཞིན་གཤེགས་པའི་གསུང་རབ་སྤྱི་དང་ཁྱད་པར་ཐེག་ཆེན་གྱི་མདོ་སྡེ་རྣམས་བཀླག་པ་ཡིས། ཚེ་རབས་མང་པོའི་སྡིག་སྒྲིབ་འདག་ཅིང་གཞན་ཕན་གྱི་བསམ་པ་ངང་གིས་འབྱུང་བ་སོགས་ཡོན་ཏན་མཐའ་ཡས་པ་ཡོད་པ་དང༌། དཀར་པོའི་ཕྱོགས་ཀྱི་ལྷ་ཀླུ་རྣམས་དངོས་སུ་ཆོས་ཉན་པ་ལ་འོང་བ་ཡིན་པས་དེ་དག་གི་རྒྱུད་ལས་ཉོན་སོགས་ལས་གྲོལ་ནས་རྒྱལ་བའི་བསྟན་པ་བསྲུང་བ་ལ་བརྩོན་པ་སོགས་མདོར་ན་སེམས་ཅན་ཐམས་ཅད་ཐེག་ཆེན་ཆོས་ཀྱི་སྣོད་དུ་གྱུར་ཅིང༌། བླ་མེད་ཀྱི་གོ་འཕང་ལ་གཞོལ་བའི་སྨོན་ལམ་གདབ་པ་འདི་གལ་ཆེའོ། །རང་རྒྱུད་གྲོལ་ནས་འདུ་འཛི་རྣམ་གཡེང་སོགས་ཡུལ་རྐྱེན་ཆོས་བརྒྱད་ཀྱིས་མི་གནོད་པར་གྱུར་ན། འགྲོ་བའི་ཁམས་དབང་མོས་པའི་སྐལ་བ་དང་རང་བཞིན་འཚམས་པར་ལས་འབྲས་ནས་བཟུང་མཐར་རྫོགས་ཆེན་བར་གཞན་དོན་ལ་ཆོས་སྟོན་པ་སོགས་གཙོ་བོར་བྱའོ། །ཚུལ་ཁྲིམས་ཀྱི་ངོ་བོ་ནི། བསླབ་པའི་མི་མཐུན་ཕྱོགས་སྡོམ་པའི་སྒོ་ནས་གཞན་གནོད་གཞིར་བཅས་ལ་སྤོང་སེམས་གོམས་ཤིང་བརྟན་པ་ཡིན་ནོ། །དབྱེ་ན་ཉེས་སྤྱོད་སྡོམ་པ་དང༌། དགེ་བ་ཆོས་སྡུད་དང༌། སེམས་ཅན་དོན་བྱེད་དེ་རྣམ་པ་གསུམ་དུ་བཤད་དོ། །དེ་ཡང་སྒོ་གསུམ་མི་དགེ་བའི་ཕྱོགས་ཐམས་ཅད་སྡོམ་པ་ནི་ཉེས་སྤྱོད་སྡོམ་པའི་ཚུལ་ཁྲིམས། ཕ་རོལ་ཏུ་ཕྱིན་པ་དྲུག་དང་ལྡན་པ་ནི་དགེ་བ་ཆོས་སྡུད་ཀྱི་ཚུལ་ཁྲིམས། དངོས་དང་བརྒྱུད་ནས་གཞན་ལ་བསྡུ་བ་རྣམ་བཞིའི་སྒོ་ནས་ཕན་གདགས་པ་ནི་སེམས་ཅན་དོན་བྱེད་ཀྱི་ཚུལ་ཁྲིམས་ཡིན་ནོ། །དེ་ལ་སྤྱིར་ཐེག་པ་དམན་མཆོག་གི་སྒོར་ཞུགས་བའི་གང་ཟག་རྣམས་ཀྱིས་ཉེས་སྤྱོད་སྡོམ་ཞིང་དགེ་ཆོས་ལ་གཞོལ་བ་ཙམ་འདྲ་ནའང༌། ནང་གསེས་ཐེག་དམན་གྱི་སོ་སོ་ཐར་པའི་ཚུལ་ཁྲིམས་ལས། བྱང་ཆུབ་སེམས་དཔའི་ཚུལ་ཁྲིམས་ལ་ཁྱད་ཆོས་གཉིས་ཏེ་ཁྱད་གཞི་དང་བཅས་ན་ཁྱད་པར་བཞི་ཡི་སྒོ་ནས་འཕགས་པ་སྟེ། འདི་ལྟར་སོ་ཐར་ནི་རང་རྒྱུད་ལ་ཉེས་སྤྱོད་སྡོམ་པས་གཞན་གནོད་གཞི་བཅས་ལྡོག་པ་ཙམ། བྱང་སེམས་ནི་མི་འཚེ་བ་དེ་ཡི་སྟེང་དུ་སེམས་ཅན་ལ་ཕན་འདོགས་པ་སྣོན་ཏེ་ཉེས་སྡོམ། དགེ་སྡུད། དོན་བྱེད་གསུམ་དང་ལྡན་པའོ། །སོ་ཐར་ནི་རིགས་བདུན་པོ་གང་ཡིན་ཀྱང་ལྟུང་མཚམས་ལུས་ཀྱི་གསུམ། ངག་གི་བཞི་སྟེ་སྤང་བ་བདུན་བསྡུས་ལུས་ངག་གཙོ་ཆེ་ལ། བྱང་སེམས་ནི་མི་དགེ་བ་སྤང་བ་བཅུ་ཀ་གཙོ་བོར་བྱེད་དོ། །ཁྱད་པར་བསླབ་པའི་གནས་ནི་སོ་ཐར་སྐབས། རྟེན་གྱི་གང་ཟག་རང་དོན་བསྒྲུབ་པ་དང༌། དངོས་པོར་མངོན་ཞེན་ཅན་ལ་དགོངས་ནས་གཞན་གྱི་དོན་དུ་འགྱུར་ཡང་བྱེད་པར་མ་གནང་བས་ཇི་ལྟར་བཅས་པ་དེ་ལས་མི་འབྲལ་ལ། བྱང་ཆུབ་སེམས་དཔའ་ནི་གཞན་གྱི་དོན་དུ་འགྱུར་ན། ལུས་ངག་གཉིས་ཀྱི་མི་དགེ་བ་རྣམ་པ་བདུན་གཞན་དོན་དུ་འགྱུར་བ་དང༌། འགྱུར་བར་ཤེས་པ་དང༌། རང་གི་དགེ་ཚོགས་དེ་ལ་མི་སྒྲིབ་པའི་སྟེང་སེམས་ཀྱི་འཕེན་སྟོབས་ཀྱིས་འཕེལ་བར་འགྱུར་བ་ཡི་གནས་སྐབས་གསུམ་པོ་དེ་ལ་བརྟགས་ནས་གསུམ་པོ་ཚང་ན། མི་དགེ་བ་ལྟར་སྣང་བ་དེ་བྱེད་པར་གནང་བའི་སྐབས་ཡོད་དེ། ཇི་ལྟར་ཞེ་ན། འདི་ལྟར་དེད་དཔོན་སེམས་སྟོབས་ཆེན་པོས་སྡིག་ཅན་རྣམ་སྨིན་ལས་ཐར་ཕྱིར་མི་ནག་མདུང་ཐུང་ཅན་བསད་པས་བསྐལ་པ་བརྒྱད་ཁྲིའི་ཚོགས་རྫོགས་པ་དང༌། བྲམ་ཟེའི་ཁྱེའུ་སྐར་མ་ལ་དགའ་བས་ལོ་བཞི་ཁྲི་ཉིས་སྟོང་ལ་ནགས་ཁྲོད་དུ་ཚངས་པར་སྤྱད་པའི་མཐར་བསོད་སྙོམས་ལ་བྱོན་དུས་ཚོང་དཔོན་གྱི་བུ་མོ་དེ་ལ་ཆགས་པའི་དབང་གིས་འཆི་བར་བརྩམས་པ་ལས་ལྡོག་པའི་ཕྱིར་ཚངས་སྤྱོད་བཏང་བས་བསྐལ་པ་བརྒྱད་ཁྲིའི་ཚོགས་རྫོགས་པ་ལྟ་བུར་རྐུ་སོགས་ཀྱང་དེས་དཔེར་མཚོན་ནས། ངག་གི་བཞི་ལ་ཡང་དེ་ལྟར་དོན་དང་ལྡན་ན་གཟུགས་བརྙན་གྱི་རྣམ་པའི་ཉེས་པའང་དོན་ལ་དགེ་བ་ཡིན་པའི་ཕྱིར་དེ་འདྲ་བའི་བྱང་སེམས་ལ་གནང་བ། དེ་བས་ན་རྒྱུ་འབྲས་མཐུ་ཅན་དུ་བསམ་པའི་བྱེ་བྲག་གིས་བྱས་པའི་ཕྱིར། ཡིད་ཀྱི་མི་དགེ་བ་གསུམ་ལ་ནི་གནང་བའི་སྐབས་མེད་དོ། །ཐེག་ཆེན་ལ་གནང་བ་དེ་ལྟ་བུ་ཡིན་ནའང་རྒྱལ་སྲས་སྡོམ་པ་ལ་གནས་པའི་ལས་དང་པོ་པ་རྣམས་ཀྱིས་རང་དོན་ཞི་བདེ་ཙམ་གཉེར་ནས་དེ་ཉིད་བཟློག་པ་དང་བྱ་དཀའ་བ་རྣམས་སྤང་བ་དང༌། དངོས་བརྒྱུད་གང་རུང་དུ་གཞན་ཕྱིར་ཕན་པ་མི་བསྒྲུབ་པ་གང་དང་གང་ཡིན་ཀྱང༌། ལྟུང་བའི་རྒྱུ་རུ་ཐམས་ཅད་གཅིག་པ་ཡིན་པར་གསུངས་པ་ཡིན་ནོ། །དང་པོའི་ལས་ཅན་བྱང་ཆུབ་སེམས་དཔའ་རྣམས་ཀྱི་བློ་ནི་རང་རྒྱུད་འདུལ་བའི་དུས་ཡིན་པས། ངེས་འབྱུང་དད་སོགས་ཡོན་ཏན་གྱི་ཚོགས་གོང་ནས་གོང་དུ་འཕེལ་བ་ལ་བསླབ་ཅིང་སྤྱོད་པ་གཙོ་ཆེ་བས་ཞག་སྐྱེད་ཟླ་སྐྱེད་སོགས་རྒྱུད་འདུལ་བ་ལ་བསླབ་དགོས་སོ། །དེ་བས་ན་བྱང་ཆུབ་སེམས་དཔའི་སྡོམ་པ་རྣམ་གསུམ་ལས་ཐོག་མར་ཉེས་སྤྱོད་སྡོམ་པའི་ཚུལ་ཁྲིམས་ཀྱིས་རང་རྒྱུད་མ་དག་པར། གཞན་དགེ་བ་ཆོས་སྡུད་དང་སེམས་ཅན་དོན་བྱེད་གཉིས་གཙོ་བོར་གཉེར་ན་བསླབ་གསུམ་ལ་བར་ཆད་མང་ངོ༌། །རབ་ཏུ་བྱུང་བའི་སྡོམ་པ་དང་ལྡན་པའི་བྱང་ཆུབ་སེམས་དཔའ་ནི། ཁྱིམ་པ་བྱང་ཆུབ་སེམས་དཔའ་ལས་ཁྱད་པར་ཅན་དུ་མདོ་སྡེ་རྒྱན་ལས་བཤད་དེ། རབ་ཏུ་བྱུང་བའི་ཕྱོགས་དག་ནི། །ཡོན་ཏན་ཚད་མེད་རྣམས་དང་ལྡན། །དེ་ལྟའི་སྡོམ་བརྩོན་ཁྱིམ་པ་ཡི། །བྱང་སེམས་རྣམས་ལས་མཆོག་ཏུ་བཤད། །ཅེས་སོ། །འོན་ཀྱང་བྱང་ཆུབ་སེམས་དཔའ་རང་སའི་ཐུན་མིན་གྱི་སྡོམ་པ་ཙམ་ལྷ་ཀླུ་སོགས་ལ་སྐྱེ་བར་གསུངས་པས། སོ་ཐར་མཚན་ཉིད་པའི་ཆོ་གས་སོར་སྡོམ་ལེན་དགོས་ཚུལ་ཐེག་ཆེན་མདོ་སྡེ་དག་ལས་གསལ་བ་མེད་དོ། །ཚོགས་གཉིས་ཀྱི་སྦྱངས་པ་སྔོན་དུ་སོང་ཞིང༌། ཟབ་རྒྱས་ཀྱི་དོན་ཉམས་འོག་ཏུ་ཆུད་ནུས་པའི་སེམས་སྟོབས་ཆེན་པོ་ནི། ལུས་རྟེན་ཁྱིམ་པ་དང་རབ་བྱུང་གང་ཡིན་ཀྱང་བསམ་པའི་རྟེན་གཙོ་ཆེ་སྟེ་ཨོ་རྒྱན་རྒྱལ་པོ་ཨིནྡྲ་བྷུ་ཏི་བཞིན་དབང་དོན་ནོད་པ་ཙམ་གྱིས་སྡོམ་གསུམ་གཅིག་ཆར་ཉམས་འོག་ཏུ་ཆུད་པ་ཡིན་ནོ། །གང་ཞིག་ཁྱིམ་པའི་ཕྱོགས་ལ་བསྟེན་པ་རྣམས་ནི། དགེ་བསྙེན་གྱི་སྡོམ་པ་འཆད་པར་འགྱུར་བ་གང་རུང་དང་ནི་ཡང་ན་བསྙེན་གནས་སྡོམ་པའི་གཏན་ཁྲིམས་དང་དུས་ཁྲིམས་གང་རུང་སྟེང་དུ་སྨོན་འཇུག་བྱང་ཆུབ་སེམས་གཉིས་རྟག་ཏུ་བསྲུང་བ་ལ་དགེ་བསྙེན་བྱང་སེམས་སུ་གྲགས་ཤིང༌། རབ་ཏུ་བྱུང་བའི་ཕྱོགས་རྣམས་ལ་དགེ་སློང་དང༌། དགེ་ཚུལ་དང༌། དགེ་སློབ་མ་ཡི་སྡོམ་པ་གང་རུང་ཚུལ་བཞིན་བསྲུང་བ་དང་ལྡན་པ་དེའི་སྟེང་དུ་སྨོན་འཇུག་གཉིས་བསྲུང་བ་བྱང་ཆུབ་སེམས་དཔའི་རང་སའི་ཉེས་སྤྱོད་སྡོམ་པའི་ཚུལ་ཁྲིམས་ཡིན་ནོ། །དབྱེ་ན་ཡོངས་རྫོགས་བསྲུང་བ་དང༌། །ཚངས་པར་སྤྱོད་པའི་དགེ་བསྙེན་རྣམ་པ་གཉིས་ཡིན་ཏེ། སྣ་གཅིག་ནི་ཕམ་པ་བཞི་ལས་གང་རུང་བསྲུང་བ་སྟེ། སྲོག་གཅོད་ལྟ་བུ་ཁོ་ན་སྤང་བ་དང༌། དེ་སྟེང་མ་བྱིན་ལེན་སྤོང་བ་ཕྱོགས་གཅིག་ལྡན་པའམ་སྣ་འགའ་བསྲུང་བ་དང༌། དེ་སྟེང་རྫུན་སྨྲ་བ་སྤང་བ་ཕལ་ཆེར་བསྲུང་བའོ། །དེའི་སྟེང་དུ་འདོད་ལོག་སྤང་བ་བསྣན་ཏེ་ཕྱེད་བཞི་དང༌། ཆང་དང་བཅས་པ་སྤང་ན་ཡོངས་རྫོགས་སྲུང་བའི་དགེ་བསྙེན་དག་ཏུ་འདོད་དེ་ཡན་ལག་ཆང་མ་སྤང་ན་བསླབ་བ་གཞན་བསྲུང་མི་ནུས་པའི་ཕྱིར་རོ། །ཕྱེད་ཞེས་པ་མི་ཚངས་པ་སྤྱོད་པ་དངོས་མ་སྤང་བའོ། །སྲོག་གཅོད་མ་བྱིན་ལེན་རྫུན་དང་མི་ཚངས་སྤྱོད་དང་བཅས་རྩ་བཞི་ཆང་དང་ལྔ་ཀ་སྤང་བ་ལ། ཚངས་པར་སྤྱོད་པའི་དགེ་བསྙེན་ཞེས་སུ་གྲགས་པ་ཡིན་ནོ། །རབ་ཏུ་བྱུང་བའི་བསླབ་པའི་གནས་རགས་པ་བཅུར་དྲིལ་ནས་བསྟན་པ་ལས། གསེར་དངུལ་ལེན་པ་ནི་ཁྱིམ་པ་ལ་མི་དགག་སྟེ་བུ་སྨད་སོགས་གསོ་ཕྱིར་གནང་ལ། གར་སོགས་རྩེད་མོའི་རིགས་བྱེད་དང༌། ཕྲེང་སོགས་རྒྱན་གྱི་རིགས་བྱེད་གཉིས་པོ་སྐྱོན་ནམ་མཚང་ཆུང་བས་གཅིག་ཏུ་བགྲང་བ་ས་སྡེ་ལས་བཤད། དོན་དུ་གསེར་དངུལ་ལེན་པ་ལས་གཞན་དགུ་པོ་བསྙེན་གནས་པས་སྤང་དགོས་ཀྱང་ཐ་སྙད་དུ་ཡན་ལག་བརྒྱད་པའི་ཁྲིམས་ཞེས་གྲགས་པ་གང་ཞིག །ཉིན་ཞག་ལྟ་བུའི་བསྲུང་མཚམས་མེད་པར་དུས་རྟག་ཏུ་བསྲུང་བ་དེ་ཉིད་ཙནྡྲ་གོ་མི་ལྟ་བུའི་དགེ་བསྙེན་ཞེས་བརྗོད་པ་ཡིན་ནོ། །དགེ་ཚུལ་རྣམས་ཀྱིས་མིའམ་མིར་ཆགས་པ་སྲོག་གཅོད་ཡན་ལག་ཚང་བ་དང༌། །གཞན་གྱི་ནོར་རིན་ཐང་ཚང་བ་བརྐུ་ཞིང་འཕྲོག་པ་དང༌། རྨ་ཡི་སྒོ་གསུམ་གང་རུང་ལ་མི་ཚངས་པ་སྤྱོད་པ་དང༌། སྨྲ་ཤེས་པ་དང༌། དོན་གོ་བ་དང༌། ཤེས་པ་རང་བཞིན་དུ་གནས་པ་དང༌། མ་ནིང་དང་མཚན་གཉིས་པ་མ་ཡིན་པ་སྟེ་ཐ་སྙད་ལྔ་དང་ལྡན་པའི་མི་ལ་རྫུན་སྨྲ་བ་སྟེ་རྩ་བ་བཞི་པོ་ལ་གཞི་བསམ་སྦྱོར་མཐར་ཐུག་བཞི་ཚང་ན་ཚུལ་འཆལ་དུ་འགྱུར་ལ། སླར་གསོ་རུང་མི་རུང་གི་རྣམ་དབྱེ་ས་མཚམས་འཆབ་སེམས་མེད་པ་དང༌། ཡོད་པའི་དབང་གིས་ཏེ་དགེ་སློང་བཞིན་ནོ། །བཤགས་བྱ་ཡན་ལག་གི་ཉེས་བྱས་དྲུག་ལས། བག་ཡོད་ཀྱི་ཡན་ལག་བཅོས་པའི་ཆང་ལ་སོགས་མྱོས་འགྱུར་གྱི་རིགས་དང༌། གར་ནི་གླུ་རོལ་བརྡུང་དཀྲོལ་རིགས་སོགས། ཕྲེང་བ་ནི་མཛེས་ཆོས་ཀྱི་རྒྱན་དང༌། དྲི་དང་བྱུག་པ། དྲེགས་པའི་རྒྱུ་སོགས། རིན་པོ་ཆེ་སོགས་ལས་བཟོས་པའམ་དེས་སྤྲས་པའི་ཁྲི་ལྟ་བུ་མལ་སྟན་རིན་ཐང་ཆེན་པོ་ཅན་དང༌། ཤིང་སོགས་ཕལ་པ་ཡིན་ཀྱང་ཁྲུ་གང་ལས་མཐོ་བ་དང༌། སྐྱ་རེངས་ཤར་ནས་ཉི་མ་ཕྱེད་ཀྱི་བར་ལས་དུས་མིན་ཕྱི་དྲོའི་ཁ་ཟས་ཟ་བ་དང༌། གསེར་དང་དངུལ་སོགས་རིན་པོ་ཆེའི་རིགས་ལེན་པ་ནོར་གྱི་འདུ་ཤེས་བཅས་འཆང་བ་རྣམས་སྤོང་བ་སྟེ། བྲྀ་ཛིའི་བུ་རྣམས་བཞིན་དུ་བསླབ་པའི་གནས་མང་པོ་ལ་ཞུམ་པ་སྤང་ཕྱིར་རགས་པ་བཅུ་པོ་འདིར་དྲིལ་ནས་འཛིན་དུ་འཇུག་པ་ནི་སྔ་མ་ལས་ཁྱད་པར་དུ་འཕགས་པ་ཡིན་ལ། ཞིབ་ཏུ་ཕྱེ་ན་བླང་འདས་སོ་གསུམ་སྟེ། རྩ་བཞི་གསོད་གསུམ་དུད་འགྲོའི་ཆར་གཏོགས་གསོད་པ་སྲོག་ཆགས་དང་བཅས་ཆུར་འདེབས་པ། ལོངས་སྤྱོད་པ་སྟེ་གསུམ་གཞི་མེད་ནས། བག་ཙམ། དབྱེ་ན། དེའི་རྗེས་ཕྱོགས། ཁྱིམ་པ། །སུན་འབྱིན་པར་ལྔ་ཤེས་བཞིན་རྫུན་བཤེས། །འཕྱ་དང་ཞལ་ཏ་བ། ཟས་ཅུང་ཆོས་སྟོན་པ་ལྷག་མས་སྐུར། ཉེར་འཇོག་བསླབ་པ་ཁྱད་གསོད་འབྲས་ཆེན་ལྷག་པོ་ལེན་ཕྱིར་འགེབས་དང་ཆང༌། །གར་སོགས་ཕྲེང་སོགས་མལ་ཆེ་མཐོ། དུས་མིན་ཕྱི་དྲོའི་ཁ་ཟས་རིན་ཆེན་བར་མ་གསུམ། ཁྱིམ་པའི་རྟགས་ལེན་པ། རབ་བྱུང་གི་རྟགས་ཉམས་པ། མཁན་པོར་གསོལ་འདེབས་ཉམས་པ་སྟེ་ཉམས་པ་གསུམ་བཅས། དེ་ལྟར་བླངས་འདས་སོ་གསུམ་མོ། །ཞེས་སོ། །དགེ་སློབ་མ་ནི་རགས་པ་བཅུ་པོ་དེའི་སྟེང་སྐྱེས་པ་ལ་རེག་པ་སོགས་རྩ་བའི་ཆོས་དྲུག རིན་པོ་ཆེ་ལ་རེག་པ་ལ་སོགས་རྗེས་མཐུན་དྲུག་སྟེ་སྤང་བྱ་བཅུ་གཉིས་ཀྱི་གཉེན་པོ་དང་བཅས། བུད་མེད་ཉོན་མོངས་པས་གདུང་བས་ལོ་གཉིས་ལ་སོགས་ཐུབ་བམ་མི་ཐུབ་བརྟགས་ནས་རིམ་གྱིས་བསྙེན་པར་རྫོགས་པར་གསུངས། དགེ་སློང་ལ་ལྟུང་བ་སྡེ་ལྔ་ལས། དང་པོ་རྩ་བའི་ཕམ་པ་བཞི་དག་ཡན་ལག་ཚང་བ་དང༌། ཁུ་བ་འབྱིན་པ་སོགས་ལྷག་མ་བཅུ་གསུམ་དང༌། འཆང་འབྲལ་སོགས་སྤང་ལྟུང་སུམ་ཅུ་དང༌། རྫུན་སྐྱོན་ཕྲ་མ་སྐྱོ་སྔོགས་སོགས་ལྟུང་བྱེད་འབའ་ཞིག་དགུ་བཅུ་ཐམ་པ་དང༌། སོར་བཤགས་སྡེ་བཞི། ཉེས་བྱས་བརྒྱ་དང་བཅུ་གཉིས་ཏེ་བསྡོམས་པས་ཉིས་བརྒྱ་ལྔ་བཅུ་རྩ་གསུམ་གྱི་རྣམ་གྲངས་དང་བཅས་པའོ། །དགེ་སློང་མ་ལ་སུམ་བརྒྱ་དྲུག་ཅུ་རྩ་བཞི་ཡོད་དེ། སོ་སོའི་རྩ་བ་བཞིའི་སྟེང་སྐྱེས་རེག །ལུས་བཀན། འཆབ་དང༌། བཟློག་པ་སྟེ་བརྒྱད་པོ་ཕམ་པ་དང༌། སྨྱན་བྱེད་སོགས་ལྷག་མ་ཉི་ཤུ། སྤང་ལྟུང་སོ་གསུམ། ལྟུང་བྱེད་བརྒྱ་དང་བརྒྱད་ཅུ། སོར་བཤགས་བཅུ་གཅིག་ཉེས་བྱས་བརྒྱ་དང་བཅུ་གཉིས་ཏེ་བསྡོམས་པས་སུམ་བརྒྱ་དྲུག་ཅུ་རྩ་བཞི་པོ་དེ་དག་གི་ཡན་ལག་མ་ཚང་བ་དང༌། དེ་དག་ལ་བརྟེན་པའི་ཉེས་བྱས་སྦོམ་པོ་ལ་སོགས་པའི་ཕྱོགས་མཐུན་ཁྱད་པར་དུ་མ་ཡོད་དོ། །ཕམ་པ་བཞིའམ་བརྒྱད་པོས་སྡོམ་པ་རྩ་བ་ནས་གཏོང་བ་ཡིན་པས། ཕྱིན་ཆད་ཕྱིར་བཅོས་ཀྱིས་སོར་ཆུད་རུང་དང་མི་རུང་གི་མཚམས་ནི། འདུལ་བ་རང་གཞུང་ལས་འཆབ་སེམས་སྐྱེས་དང་མ་སྐྱེས་པ་དག་ལ་རག་ལས་པར་གསུངས་སོ། །དེ་ལྟར་ལྟུང་བ་སྡེ་ལྔ་སོགས་བསྲུང་བྱའི་རྣམ་གྲངས་ཙམ་ཡང་མི་ཤེས་པར་དགེ་སློང་དགེ་ཚུལ་སོགས་བདག་གིས་ཚུལ་བཞིན་བསྲུང་བར་རློམ་པ་མཚར་ཞེས་ཁྲེལ་བའི་གནས་ཏེ་ཆུ་མེད་སར་ཁྲོན་པར་རློམ་པ་བཞིན་ནོ། །མ་བསྲུང་ན་ཤེས་པས་ཅི་བྱེད་སྙམ་ན། དེ་ལྟར་ཡིན་ཡང་མི་ཤེས་པས་ལན་ཏེ། ལྟུང་བ་དང་བཅོས་ཚུལ་ཤེས་པ་ཙམ་གྱིས་ཉམས་པ་གསོ་ཞིང་ལྟུང་བ་སྦྱོང་སླ་བ་ཡིན་པའི་ཕྱིར། ལྟུང་བ་འབྱུང་བའི་སྒོ་བཞིའི་དང་པོའང་མི་ཤེས་པ་ཡིན་ནོ་ཞེས་ཐོགས་མེད་ཀྱིས་བཞེད་པ་ཡིན་ནོ། །བསྒྲུབ་པའི་བསླབ་བྱ་གསོ་སྦྱོང༌། དབྱར་གནས། དགག་དབྱེ་སྟེ་གཞི་གསུམ་ཆོ་ག་དང་བཅས་བསླབ་པ་གསུམ་གྱི་རྟེན་གཞིར་གྱུར་པའི་གཞི་བཅུ་བདུན་གྱི་བསླབ་བྱ་རྣམས་གསུངས་ཏེ། ལུང་གཞི་ལས། རབ་བྱུང་གསོ་སྦྱོང་གཞི་དང་ནི། །དགག་དབྱེ་དབྱར་གནས་ཀོ་ལྤགས་གཞི། སྨན་དང་གོས་དང་སྲ་བརྐྱང་དང༌། །ཀཽ་ཤམྦཱི་དང་ཕྱེ་བའི་ལས་ཞི་བྱེད་ཀྱི་གཞི། །དམར་སེར་ཅན་དང་གང་ཟག་དང༌། །སྤོ་དང་གསོ་སྦྱོང་གཞག་པ་དང༌། གནས་མལ་དང་ནི་རྩོད་པ་དང༌། །དགེ་འདུན་དབྱེ་ན་རྣམས་བསྡུས་པ་ཡིན། །ཞེས་པས་དེ་དག་ལ་བསླབ་པ་ནི་འཇུག་པའི་ཚུལ་ཁྲིམས་སོ། །བསླབ་པ་ལ་གཅེས་སྤྲས་བྱེད་པའི་གནས་སྐབས་འདི་ན་ཕམ་པ་བཞི་ལྷག་མ་བཅུ་གསུམ་སྟེ་བཅུ་བདུན་དང་དེ་ལས་གཞན་དུད་འགྲོ་གསོད་པ་སོགས་རང་བཞིན་ཁ་ན་མ་ཐོ་བ་དང་བཅས་པ་གཉིས་མ་གཏོགས་པའི་མི་རུང་བར་གསུངས་པ་རྣམས་ལོངས་སྤྱོད་དགོས་པ་བྱུང་ན་བྱིན་གྱིས་རློབ་པ་ནི། འདི་ལྟར་དུས་མ་ཡིན་པར་ཁ་ཟས་ལ་སྤྱོད་དགོས་པར་གྱུར་ན། སྤྱིར་རང་བཞིན་གྱི་ཚུལ་ཁྲིམས་དང༌། ཆོས་ཉིད་ཀྱི་བདེན་པ་མཐོང་བ་དང༌། སྡོམ་པ་དང༌། སྤོང་བ་བསམ་གཏན་བསྒོམ་པའི་ཚུལ་ཁྲིམས་རྣམ་པ་བཞི་ལས། བྱང་སྒྲ་མི་སྙན་པའི་མི་རྣམས་རང་བཞིན་གྱི་ཚུལ་ཁྲིམས་ཅན་ཡིན་པས། རང་ཉིད་གླིང་དེ་ཉིད་དུ་མོས་ནས་ལོངས་སྤྱོད་དུ་རུང་བར་གནང་བ་ནི། གཞུང་དམ་པ་ལས། མཉན་དུ་ཡོད་པ་ན། ཚོང་པ་མང་པོ་དག་གིས། སངས་རྒྱས་དང༌། དགེ་སློང་གི་དགེ་འདུན་རྣམས་བཤོས་ལ་སྤྱན་དྲངས་སོ། །དེ་དག་གིས་བཤོས་སྦྱར་ཏེ་བྲིན་པའི་སར་བསྐྱལ་ནས་མ་དྲངས་ཀྱི་བར་དེར། ཚོང་ཁང་མེ་ཤོར་ཏེ། དེ་དག་མེ་གསོད་དུ་སོང་བ་དང༌། གདུགས་ཚོད་ཡོལ་ལ་ཐུག་ནས་དགེ་སློང་དག་གིས་ཇི་ལྟར་གྱུར་པ་བཅོམ་ལྡན་འདས་ལ་གསོལ་བ་དང༌། བཅོམ་ལྡན་འདས་ཀྱིས་བཀའ་བསྩལ་པ། དེའི་སེམས་ཀྱིས་ཡོངས་སུ་བཏང་བས་ན། དགེ་སློང་དག་དེ་ལ་ཐེ་ཚོམ་མ་བྱེད་པར་བཟའ་བར་བྱའོ། །ཟོས་ནས་ཀྱང་བྱང་གི་སྒྲ་མི་སྙན་པའི་དུས་སུ་བྱིན་གྱིས་རློབས་ཤིག །ཅེས་གསུངས་པ་དང༌། དེ་བཞིན་ནད་ལ་ཕན་ཕྱིར་ཟླ་ཕྱེད་སོགས་མ་སོང་ཡང་ཁྲུས་བྱེད་དགོས་པ་ལ་བདག་ནི་ནད་པའི་འདུ་ཤེས་པ་དང༌། གོས་ལྷག་གམ་ཁ་དོག་གིས་རུང་བ་མ་ཡིན་པ་བགོ་བ་དཀར་པོ་དང༌། ཀོ་པགས་སོགས་ལོངས་སྤྱོད་དགོས་པ་ན་དེ་ལ་སེམས་ཀྱི་འདུ་ཤེས་དབུལ་ཞིང་ཕོངས་པས་ཕྱིས་མི་རྙེད་པས་ཉམས་ཐག་པར་གྱུར་ཏེ། དགེ་སྦྱོར་དང་སྲོག་གི་བར་ཆད་བསྲུང་བའི་སླད་དུ་གནང་བ་ཡིན་སྙམ་པ་དང༌། རིན་པོ་ཆེར་རེག་པ་དང་བདག་གིར་བྱ་དགོས་ན། དཀོན་མཆོག་མཆོད་པ་དང༌། སེམས་ཅན་གསོ་བའི་སླད་དུ་གནང་བར་བསྒོམ་དགོས་སོ། །དེ་དག་ལས་གཞན་དངོས་སུ་གནང་བ་མེད་ལ་བཀག་པའང་མེད་པ་རྣམས་ལ། སྤང་བླང་ཇི་ལྟར་བྱ་བ་ནི་གནང་བཀག་ཕྱོགས་གཉིས་པོའི་རྗེས་སུ་མཐུན་པར་བརྩིའོ། །རྒྱལ་རིགས་སྒྲ་གཅན་འཛིན་གྱི་བརྒྱུད་པ་ཐམས་ཅད་ཡོད་པར་སྨྲ་བ་ལས་གྱེས་པ་བདུན། བྲམ་ཟེ་འོད་སྲུང་ཆེན་པོའི་བརྒྱུད་པ་ཕལ་ཆེན་སྡེ་པ་ལས་གྱེས་པ་ལྔ་དང༌། སྨྱིག་མ་མཁན་ཀཱཏྱ་ཡ་ནའི་བརྒྱུད་པ་གནས་བརྟན་སྡེ་པ་ལས་གྱེས་པ་གསུམ་དང༌། འབྲེག་མཁན་ཉེ་འཁོར་གྱི་བརྒྱུད་པ་མང་པོས་བཀུར་བ་ལས་གྱེས་པ་གསུམ་སྟེ་དྲིལ་བས་སྡེ་པ་བཅོ་བརྒྱད་དོ། །རྩ་བའི་སྡེ་པ་བཞི་ལས་བོད་འདིར་དར་ཆེ་བ་ཡོད་སྨྲ་ཡིན་ལ། སྡེ་པ་བཞི་ཀའི་བསླབ་པ་ཐམས་ཅད་ལ་མི་མཐུན་པ་ཅུང་ཟད་རེ་ཡོད་ཀྱང་རྒྱལ་པོ་ཀྲྀ་ཀའི་རྨི་ལྟས་དང་མཐུན་པར་བཀར་བསྡུས་ཤིང་རབ་བྱུང་སྡེ་ལྔའི་སྤྱོད་པ་དང་འབྲེལ་བའི་ཕྱིར་ན། སྟོན་པའི་གནང་བཀག་གི་བཅས་པས་མ་ཁྱབ་པ་མི་སྲིད་པས། དེས་ན་རང་རང་གི་སྡེ་པར་གཏོགས་པའི་བསླབ་བྱ་རྣམས་ཚུལ་བཞིན་དུ་གནས་ན་བསླབ་པ་ཀུན་ལ་དབང་ཐོབ་པར་བྱེད་པ་ཡིན་པས་ན་ཀུན་ལ་ནན་ཏན་དུ་བསྲུང་བ་གལ་ཆེའོ། །མྱ་ངན་ཞེས་འཁོར་བའི་སྡུག་བསྔལ་ལས་ཉོན་རྒྱུ་འབྲས་དང་བཅས་པ་ཡིན་ལ་དེ་ལས་འདའ་བ་ནི་སྡུག་ཀུན་གྱི་རྒྱུན་འགོག་པའི་ཞི་བ་དམ་པའི་གོ་འཕང་ཉན་རང་གི་བྱང་ཆུབ་དེར་བསྔོ་བའི་ཆེད་དུ་བླངས་པ་ཡིན་པས། མངོན་མཐོ་དོན་གཉེར་གྱིས་བསྲུང་པ་ལས་ལྷག་པའི་སོ་ཐར་གྱི་ཚུལ་ཁྲིམས་མཚན་ཉིད་པ་དང༌། དེའི་སྟེང་སེམས་ཅན་གཞན་ལ་ཕན་པ་རྒྱ་ཆེན་པོ་བསྒྲུབ་པའི་ཕྱིར། རྫོགས་བྱང་ཐོབ་འདོད་ཀྱིས་སྲོལ་གཉིས་གང་རུང་གི་ཆོ་ག་ལ་བརྟེན་ནས་སྨོན་འཇུག་གི་སྡོམ་པ་བླངས་ཏེ་སེམས་ཅན་ཕན་འདོགས་པ་བྱང་སྡོམ་ཡིན་ལ། དེའི་སྟེང་གཞན་ཕན་གྱི་ཀུན་སློང་བཟང་པོས་རྒྱུད་སྡེ་ཆེན་པོའི་དགོངས་པ་མ་ནོར་བ་སྔགས་ཀྱི་ཆོ་གས་དབང་བསྐུར་ནོད་དེ། ཟབ་མོ་བསྐྱེད་རྫོགས་ཀྱི་རྟེན་རིག་འཛིན་སྔགས་ཀྱི་སྡོམ་པ་རྣལ་མ་ཞིག་ཐོབ་ན་སྔགས་སྡོམ་མཚན་ཉིད་པ་སྟེ། དེ་ལྟར་སྡོམ་པ་གསུམ་པོ་གང་ཟག་གཅིག་གི་རྒྱུད་ལ་རྫོགས་པའི་ཚེ་སྤང་བླང་གི་བསླབ་བྱ་ཡང་རང་རང་སྐབས་ནས་བཤད་པ་བཞིན་བསྲུངས་པས་ལམ་དང་འབྲས་བུའི་ཡོན་ཏན་མཐའ་དག་ཐོབ་པར་འགྱུར་ཕྱིར་ཤིན་ཏུ་མང་ངོ༌། །བར་དུ་ཇི་ལྟར་གནས་ཞེ་ན། ངོ་བོ་གནས་འགྱུར་བའི་ཚུལ་གྱིས་གཅིག་ཏུ་གྱུར་པས་རྫས་ཐ་དད་མེད་ལ། ལྡོག་པ་ཐོབ་ལ་མ་ཉམས་པའི་ཚུལ་དུ་ཡོད་པས་མ་འདྲེས་པར་ཐ་དད་དུ་གང་ཟག་གཅིག་གི་རྒྱུད་ལ་རང་རང་གི་གཏོང་རྒྱུ་མ་བྱུང་གི་བར་དུ་གནས་པ་ཡིན་ནོ། །དེ་ལྟར་ལྡོག་པ་ཐ་དད་པར་ཡོད་པའི་གནད་ཀྱིས་སོ་སོར་མ་འདྲེས་པར་བསྲུང་དགོས་ཤིང༌། གལ་ཏེ་སོ་ཐར་དུ་མི་གསོད་པ་ལྟ་བུ་དེ་བྱང་སེམས་ལ་རྗེས་སུ་གནང་བ་ཡོད་པར་གསུངས་པ་དང༌། སྔགས་བླ་མེད་ཀྱི་སྐབས། རྡོ་རྗེ་རིགས་ཀྱི་དམ་ཚིག་ཏུ་དང་དུ་བླང་བྱར་བཤད་པ་ལྟ་བུ་ནང་འགལ་བ་ཅན་དུ་བྱུང་བ་རྣམས་ཇི་ལྟར་བྱ་སྙམ་ན། གཞན་ཕན་གྱི་བསམ་པ་ཁྱད་པར་ཅན་འབྱོངས་པ་དང༌། བསྐྱེད་རྫོགས་ཀྱི་གདིང་དང་ལྡན་པ་དག་ལ་དགོངས་ནས་གོང་མ་བྱང་སེམས་དང་སྔགས་ལུགས་གཙོར་བཏོན་དགོས་པའི་ཚུལ། སྔོན་བྱོན་མཁས་གྲུབ་རྣམས་ཀྱི་ལུགས་ལ་གྲགས་པ་ཡིན་ལ། དེའི་གནད་ཀྱང་འདི་ཡིན་ཏེ་འོག་མ་སོ་སོ་ཐར་པའི་སྐབས་བསླབ་པའི་རྣམ་པ་དང་འགལ་བ་སྲོག་གཅོད་ལ་སོགས་པ་ལྟར་སྣང་ཡང༌། སོ་ཐར་སྐབས་སྲོག་ལ་མི་འཚེ་བ་ལ་སོགས་པ་ཙམ་གྱིས་ཕ་རོལ་པོ་ལ་གནོན་པ་སྤོང་ཞིང་ཕན་འདོགས་ཀྱི་དགོས་པ་བསྒྲུབ་ལ། བྱང་ཆུབ་སེམས་དཔས་སྡིག་ཅན་གང་དག་བསད་པར་བྱས་ན། དེའི་ལས་ངན་རྒྱུན་ཆད་ནས་སྡུག་བསྔལ་ཡུན་ཐུང་བར་འགྱུར་ཏེ། དེས་ན་གནོད་པ་སྤོང་བ་དང༌། བདེ་འགྲོར་འགོད་པ་དང༌། ཐར་པའི་ས་བོན་འཇོག་པ་སོགས་ཕན་ཆེན་པོ་འདོགས་པ་ལ་དགོས་པ་མཐུན་ནོ། །འདིར་གང་ཞིག་སོགས་ཀྱི་ཚིག་རྐང་གཉིས་པོ་ཀུན་མཁྱེན་རྩོམ་གཞིར་གཏན་ནས་མི་སྣང་གསུངས། གང་ལྟར་སྟོན་པ་ཐབས་མཁས་པས་ཁམས་དབང་སྣ་ཚོགས་དང་མཐུན་པར་གསུངས་པའི་བསླབ་པའི་གཞི་གང་ཞིག །དོན་གྱི་ངོས་ནས་འགལ་ན་གནང་བར་མི་སྲིད་ལ། མི་དགེ་བ་ལྟར་སྣང་བའི་སྤྱོད་པ་རྣམས་གང་ཞིག་གནང་བ་ཡིན་ན། དོན་ལ་འགལ་བ་མི་སྲིད་དེ། ཐམས་ཅད་མཁྱེན་པ་སངས་རྒྱས་ཀྱིས་དྲང་ངེས་ཀྱི་ཆོས་སྣ་ཚོགས་བསྟན་པ་ཐམས་ཅད་དོན་གྱི་དགོངས་གནད་གཅིག་ཏུ་འབབ་ཅིང་གཞོལ་བའི་ཆོས་ཅན་དུ་བསྟན་པ་ཡིན་ནོ། །ཁྱད་པར་དུ་གསང་སྔགས་ཀྱི་ལྟ་སྒོམ་རྨད་དུ་བྱུང་བ་དང་འབྲེལ་བའི་སྤྱོད་པ་ནི། འདི་ལྟར་གང་ཞིག་བཏུང་ན་ཉན་ཐོས་པ་ལ་ལྟུང་བ་ཕོག་བྱེད་ཀྱི་རྒྱུ་དང༌། བྱང་ཆུབ་སེམས་དཔར་དེ་དང་ཕྱོགས་མཐུན་ཉེས་བྱས་སུ་འགྱུར་བའི་མྱོས་བྱེད་ཆང་གི་ངོ་བོ་དེ། སྔགས་ཀྱི་དམ་རྫས་སུ་མེད་དུ་མི་རུང་བར་བཤད་དོ། །གསང་རྒྱུད་ལས། མ་ཧཱ་མཾ་ས་བདུད་རྩིར་བཅས། །མེད་དུ་མི་རུང་དངོས་གྲུབ་རྫས། །བཟའ་བཏུང་བཅུད་དང་ཤིང་འབྲས་དང༌། །འདོད་པའི་ཡོན་ཏན་ཐམས་ཅད་དོ། །ཞེས་དང༌། ཁྱད་པར་ཤ་ཆང་མེད་མི་རུང༌། །ཞེས་སོ། །དེ་ལ་ལོངས་སྤྱོད་པར་བྱེད་པའི་སྐྱེས་བུའི་བསྐྱེད་རྫོགས་ཀྱི་ཐབས་ཀྱིས་རྟོག་ཚོགས་ཐམས་ཅད་ལྷར་ཤར་བས་མཚན་མའི་རྟོག་བ་ཟིལ་གྱིས་གནོན་ནུས་པར་གསུངས་ཏེ། དེ་ཡང་སྤྱིར་ཚོགས་ལམ་ན་མོས་པའི་ལྷ་སྐུ། སྦྱོར་ལམ་ན་རླུང་སེམས་ཀྱི་ལྷ་སྐུ། མཐོང་ལམ་ན་འོད་གསལ་གྱི་ལྷ་སྐུ། སྒོམ་ལམ་ན་ཡེ་ཤེས་ཀྱི་རང་མདངས་སློབ་པའི་ཟུང་འཇུག་གི་ལྷ་སྐུ། མི་སློབ་ལམ་ན་ཆོས་སྐུ་དང་གཟུགས་སྐུ་ཟུང་འཇུག་གི་ལྷ་སྐུ་ཞེས་བྱའོ། །ཁྱད་པར་གསང་སྔགས་ནང་རྒྱུད་པས་དག་མཉམ་གྱི་ལྟ་དགོངས་ཐམས་ཅད་ཀྱི་གྲོགས་སུ་གཟུང་འཛིན་ལ་དོར་བའི་སྤྱོད་པར། བསྐྱེད་པའི་ཐབས་ཆ་ཕུང་ཁམས་སྣོད་བཅུད་སོགས་ལྷ་སྔགས་ཕྱག་རྒྱའི་རོལ་པར་ཤར་བས། ཚོགས་རྫས་རྣམས་དམ་ཚིག་གི་བདུད་རྩིར་བྱིན་གྱིས་བརླབས་ཏེ་སྤྱོད་པའི་ཚེ་ན་གཞི་ཆང་དང་བསམ་པ་ཆགས་སྲེད་གཉིས་ཀ་རང་མཚན་དུ་མི་འཛིན་པར། གཞན་ལྷ་དང་བདུད་རྩིའི་རང་བཞིན་དུ་དག་མཉམ་ཆེན་པོར་འདུ་ཤེས་གནས་འགྱུར་བ་དེ་དང་འདྲ་བའི་རྣལ་འབྱོར་པ་དེ་ལ་ནི། རང་དོན་དུ་སྤང་བླང་ལ་དངོས་པོར་ཞེན་ནས་བདག་དགེ་སློང་ཡིན་སྙམ་པ་ཡང་ཡོད་པ་མ་ཡིན་ལ། གཞན་གྱི་དོན་དུ་སྦྱིན་སོགས་ཀྱི་སྤྱོད་པ་ལ་ཐ་སྙད་དུ་མཚན་མར་བལྟས་ཏེ་བདག་བྱང་ཆུབ་སེམས་དཔའ་ཡིན་སྙམ་པའི་མངོན་ཞེན་ཡོད་པའང་མིན་ཞིང༌། དེ་ནི་ཉོན་མོངས་འདོད་ཡོན་ལམ་དུ་བྱེད་པའི་ཐབས་དང་བྲལ་ནས་ཆགས་ཤིང་སྲེད་པ་སྤོང་བར་བྱེད་པའི་ཉན་ཐོས་ལྟ་བུ་དང༌། ཉོན་མོངས་པའི་མཐུས་ནོན་ཏེ་འཁོར་བར་འཕེན་བྱེད་ཀྱི་ལས་གསོག་པའི་སོ་སྐྱེ་ཕལ་པ་ལྟ་བུའང་མིན་པར་བསྐྱེད་རྫོགས་ཟབ་མོའི་རྣལ་འབྱོར་གྱིས་གང་སྣང་བ་མཐའ་དག་ལྷ་དང་དཀྱིལ་འཁོར་གྱི་འཁོར་ར་ལོར་འབྱམས་ཀླས་པ་དང༌། སྤྱད་བྱའི་དམ་རྫས་ཆང་ལ་སོགས་པའང་བདུད་རྩིའི་རང་བཞིན་དུ་འདུ་ཤེས་གནས་འགྱུར་བ་ཡིན་པས། དེ་ལྟ་བུའི་གང་ཟག་གང་ལ་གནང་བ་ཡིན་ཏེ་ཉེས་པས་མ་གོས་པར་མ་ཟད་བསོད་ནམས་འགྱུར་ཆེ་བ་ཡང༌། སོ་སོ་ཐར་པའི་ཚུལ་ཁྲིམས་ལ་གནས་པ་དང༌། དག་མཉམ་མ་རྟོགས་པར་གཞན་དོན་ལ་བརྩོན་པའི་བྱང་ཆུབ་སེམས་དཔའ་ཡི་ཉན་ཐོས་ཀྱི་དགེ་སློང་དང་ནི། བྱང་སེམས་ཀྱི་དགེ་འདུན་ལ་བྱིན་པ་ལས། རྣལ་འབྱོར་པ་རང་གིས་དམ་རྫས་བརྟེན་ན་དཀོན་མཆོག་གསུམ་དང༌། ཡི་དམ་ལ་དངོས་སུ་ཕུལ་བ་ཡིན་པས་ཚོགས་རྫོགས་པ་སོགས་ཡོན་ཏན་ཐམས་ཅད་ཀྱང་ཡར་ལྡན་དུ་འགྱུར་བ་ཡིན་པའི་ཕྱིར། ཉོན་མོངས་དང་འདོད་ཡོན་ལམ་དུ་བྱེད་པའི་བསླབ་པའི་ཆ་ཤས་གཞན་ཕྲ་རགས་ཐམས་ཅད་ལའང་དེ་ཡིས་རིགས་འགྲེ་སྟེ་ཤེས་པར་བྱོས་ཤིག །འོན་ཀྱང་སྡོམ་པ་གསུམ་ཀ་ཐོབ་པའི་གང་ཟག་ལས་དང་པོ་པ་རྣམས་ཀྱིས་ཀྱང་གསུམ་ཀའི་བསླབ་པ་ཅི་ནུས་སུ་བསྲུང་དགོས་པ་དེའི་ཕྱིར་རང་ལུགས་ཆོས་དྲུག་གི་རྣམ་པར་བཞག་པའི་ཚུལ་ནི་ངེས་པར་བྱ་དགོས་ཏེ། དེ་ལ་དང་པོ་རང་ལྡོག་མ་འདྲེས་པ་ནི། སྡོམ་པ་གསུམ་པོ་གང་ལས་བླང་བའི་ཡུལ། གང་གིས་ལེན་པའི་བསམ་པ། ཇི་ལྟར་ལེན་པའི་ཆོ་ག །རང་རང་གི་ལྡོག་པ་མ་འདྲེས་པའི་སྒོ་ནས་ཇི་སྲིད་བླངས་པའི་དུས་ཀྱང་ཐ་དད་དུ་ངེས་པ་ཁོ་ན་ཡིན་པས་ཕྱིར་ལྡོག་པ་ལ་གཞི་མཐུན་པ་མི་སྲིད་ཅིང༌། ལྡོག་པའི་མཚན་ཉིད་སོ་སོར་འཛིན་པས་རང་རང་གི་ལྡོག་པ་ནས་བསྲུང་ཞིང༌། ཉེས་པ་བྱུང་ན་ཡང་སོ་སོར་བཅོས་པའི་ཐབས་ཡོད་པ་ཡིན་ནོ། །དགག་དགོས་ཚང་བ་ནི། དགག་བྱ་ཉོན་མོངས་པའི་གཉེན་པོར་འགྲོ་བ་དང༌། དགོས་པ་རང་རྒྱུད་མི་འཆིང་བ་གཉིས་རང་ལམ་སོ་སོར་ཚང་བ་ལ་གཅིག་སྟེ། དཔེར་ན་སྐྱེད་མོས་ཚལ་ཞིག་ཏུ་ཧ་ལའི་སྡོང་པོ་སྐྱེས་པ་ན། བདག་པོ་ཐབས་ལ་མི་མཁས་པས་དེ་བཅད་ནས་རྒྱང་རིང་པོར་དོར་བ་དང༌། སྨན་པ་ཞིག་གིས་ལྡེ་གུར་སྦྱར་བས་ནད་ཐམས་ཅད་ལ་ཕན་པ་དང༌། སྔགས་ལ་མཁས་པ་ཞིག་གིས་སྔགས་ཀྱི་ནུས་པ་བགོས་པ་ཙམ་གྱིས་དེ་བས་ཀྱང་ཕན་པ་ཆེན་པོར་གྱུར་པ་ཞིག་བྱུང་ནས། དུག་གི་མི་གནོད་པ་ལ་འདྲ་ཡང་སྔ་མ་ལས་ཕྱི་མ་ཐབས་སླ་ཞིང་ཆོད་ཆེ་བ་ལྟར། ཉན་ཐོས་རྣམས་ཀུན་རྫོབ་མ་ཟད་དོན་དམ་དུ་ཡང་ཉོན་མོངས་པ་ལ་རྫས་ཡོད་དུ་བལྟས་ནས་གཙོ་བོ་ལུས་ངག་གི་ཀུན་སྤྱོད་དབང་པོའི་སྒོ་སྡོམ་པ་ལ་སོགས་པའི་ཐབས་སོ་ཐར་གྱི་སྡོམ་པས་རྒྱུད་བསྡམས་ནས་སྤོང་བ་སྟེ། སོ་ཐར་གྱི་མདོ་ལས། རྟག་ཏུ་འབད་པས་འདའ་བ་ཡི། །སེམས་རྟ་ཁ་གླན་དཀའ་བ་ལ། །མཐུན་པའི་གཟེར་རྣོན་རྒྱབ་པ་ཡི། །སྲབ་ནི་སོ་སོ་ཐར་འདི་ཡིན། །ཞེས་སོ། །བྱང་ཆུབ་སེམས་དཔས་ཉོན་མོངས་དོན་དམ་པར་མ་གྲུབ་ཀྱང་ཐ་སྙད་ཀུན་རྫོབ་ཙམ་དུ་འཆིང་བྱེད་ཡིན་པར་བལྟས་ནས། ཆོས་ཉིད་དུ་སྦྱར་ཞིང་བསྒྱུར་བའི་ཐབས་ལྷུར་བྱེད་པ་སྟེ། དེ་སྐད་དུ། བྱང་ཆུབ་སེམས་དཔའི་སོ་སོ་ཐར་པ་ལས། ཤཱ་རིའི་བུ། གཞན་ཡང་བྱང་ཆུབ་སེམས་དཔའ་འདི་ལ་འདོད་ཆགས་སྐྱེ་བ་ཡང་དག་པར་རྗེས་སུ་མཐོང་ན། འདོད་ཆགས་དེ་གཞི་གང་ལས་བྱུང་བ་འཚོལ་བར་བྱེད་དེ། ཡོངས་སུ་བཙལ་བ་ན་དེ་དག་གི་གཞི་མི་དམིགས་སོ། །གང་ལས་འདོད་ཆགས་དེ་སྐྱེ་བ་དང༌། གང་གིས་འདོད་ཆགས་དེ་སྐྱེ་བ་དང༌། ཇི་ལྟར་འདོད་ཆགས་དེ་སྐྱེ་བ་དེ་ལྟར་ཉོན་མོངས་གང་གིས་ཀྱང་སྐྱེ་བ་དེ་མི་དམིགས་སོ། །གང་ལ་སྐྱེ་བ་དེ་མི་དམིགས། ཇི་ལྟར་སྐྱེ་བ་དེ་མི་དམིགས་ཏེ་འདོད་ཆགས་དེ་མི་དམིགས་པ་ནི། འདོད་ཆགས་ཀྱི་རྒྱུས་སྡིག་པའི་ལས་མི་བྱེད་ལ། དེའི་ཐབས་ཀྱིས་ཟིན་པར་བྱས་ན། མཆན། དཀར་པོའི་ཆོས་རྣམས་འཕེལ་བར་འགྱུར་ཞིང༌། དེ་མ་སྨད་ཅིང་བསྔགས་པར་འགྱུར་ཏེ་ཞེས་རྒྱ་ཆེར་བསྟན་ཏོ། །རྡོ་རྗེ་ཐེག་པ་ནི། སྤྱིར་ཀུན་རྫོབ་དུ་ཡང་ཉོན་མོངས་པ་ལ་སྐྱོན་དུ་མི་ལྟ་བར། ལྷ་དང་ཡེ་ཤེས་ཀྱི་རང་བཞིན་དུ་ཆབ་རོམ་ཆུར་ཞུ་བ་ལྟར་ལམ་དུ་བྱས་ནས་འབྲས་བུ་ལ་མྱུར་དུ་སྦྱོར་ཏེ། རྒྱ་མཚོ་ལས། ཉོན་མོངས་ལམ་ནི་དག་པ་ཡི། །ཐབས་ཀྱི་འདོད་ཡོན་རྒྱན་གྱི་མཆོག །ཉོན་མོངས་དང་འདོད་ཡོན། ཐམས་ཅད་ཐམས་ཅད་རོལ་པ་ཡིས། །མྱུར་དུ་ཧེ་རུ་ཀ་དཔལ་འགྱུར། །ཞེས་སོ། །ཁྱད་པར་ཆོས་ཉིད་རྣལ་མའི་དོན་མཐོང་བ་དག་ལ་ནི། ཡེ་ཤེས་ཀྱི་རྒྱན་དུ་ལྷག་པར་ཆེ་སྟེ། ཀུན་བྱེད་ལས། འདོད་ཆགས་ཞེ་སྡང་གཏི་མུག་ཀྱང༌། །བྱང་ཆུབ་ཆེན་པོའི་ལམ་ལས་བྱུང༌། །ཀུན་སྤྱོད་ཡོན་ཏན་རྣམ་ལྔ་ཡང༌། །ཆོས་ཉིད་དབྱིངས་ཀྱི་རྒྱན་དུ་ཆེ། །ཞེས་སོ། །དེ་ཡང་དཔེར་ན་རྨ་བྱས་དུག་གི་མེ་ཏོག་སོགས་བླང་དོར་མེད་པར་ཟོས་པས་ལང་ཚོ་རྒྱས་ཤིང་འདབ་མ་ལྟ་ན་སྡུག་པ་བཞིན་ནོ། །དེས་ན་ཚངས་སྤྱོད་ལ་གནས་པའི་དགེ་སློང་གིས་ནུས་པ་ཡོད་བཞིན་དུ་མི་སྤྱོད་པས་འདོད་པའི་དྲིས་མ་གོས་པ་དང༌། དབང་གསུམ་པའི་ལམ་གྱི་རྣལ་འབྱོར་པས་སྤྱད་བཞིན་དྲི་མས་མ་གོས་པ་སྟེ། དེ་གཉིས་ཀའང་ཉོན་མོངས་དེ་ཉིད་ལ་བརྟེན་ནས་སྡོམ་པ་རྫོགས་པར་བྱེད་པས་དགག་དགོས་གནད་གཅིག་ཏུ་ཚང་བ་ཡིན་ནོ། །དེ་ལྟར་ནའང་དུག་སྡོང་གང་དུ་སྐྱེ་བའི་ས་གཞི་དེ་ལ་ནི་ཕན་གནོད་ཀྱི་བསམ་པ་གང་ཡང་མེད་པ་ལྟར། རང་བཞིན་རྫོགས་པ་ཆེན་པོའི་དགོངས་དོན་ལ་རྣལ་དུ་འབྱོར་པ་རྣམས་ལ་ནི་ཉོན་མོངས་པས་གནོད་པར་མི་འགྱུར་ཞིང༌། སྤོང་བསྒྱུར། ལམ་བྱེད་སོགས་ཀྱི་དགག་སྒྲུབ་དང་རྩོལ་བ་གང་ཡང་མེད་དེ། ཀུན་བྱེད་ལས། ཇི་ལྟར་སྣང་བ་དེ་བཞིན་ཉིད་དུ་གཅིག །འདི་ལ་སུ་ཡང་འཆོས་པར་མ་བྱེད་ཅིག །མ་བཅོས་མཉམ་པའི་རྒྱལ་པོ་དེ་ལ་ནི། །མི་རྟོགས་ཆོས་སྐུའི་དགོངས་པ་ལྷུན་གྱིས་གྲུབ། །ཅེས་སོ། །ངོ་བོ་གནས་འགྱུར་ནི། བསམ་གཏན་ངལ་གསོར། གསང་བ་ཅོད་པན་ལས། །དཔེར་ན་རྡོ་ལས་ཟངས་སུ་འགྱུར། །ཟངས་ལས་གསེར་གྱི་རྣམ་པ་སྟེ། །ཟངས་ཀྱི་དུས་ན་རྡོ་མེད་ཅིང༌། །གསེར་དུ་གྱུར་པར་ཟངས་མི་སྣང༌། །རིག་འཛིན་ནང་གི་དགེ་སློང་ལ། །སོ་སོ་ཐར་དང་བྱང་ཆུབ་སེམས། །གཉིས་པོ་གནས་པ་ཉིད་དུ་ནི། །སངས་རྒྱས་རྣམས་ཀྱིས་མ་གསུངས་སོ། །ཞེས་རིག་འཛིན་སྔགས་ཀྱི་དུས་ན་སོ་ཐར་བྱང་སེམས་ཞེས་རྫས་ཐ་དད་པ་མེད་དེ། སྔགས་ཀྱི་སྡོམ་རྫས་སུ་ངོ་བོ་གནས་འགྱུར་བའི་ཕྱིར་ཞེས་དང༌། དེས་ན་གསང་སྔགས་སུ་རྫས་གཅིག་ཏུ་གཞན་གཉིས་གནས་འགྱུར་བ་ཡིན་ལ། ལྡོག་ཆ་སོ་སོར་མ་འདྲེས་ཏེ་ཁས་བླང་བའི་ཆ་ལས་ཉམས་རྐྱེན་མ་བྱུང་བར་སོ་སོར་གནས་པའི་ཕྱིར་རོ། །ཞེས་གསུངས། གནས་འགྱུར་གྱི་དོན་འདི་ལ་འགའ་ཞིག །རིག་འཛིན་ནང་གི་དགེ་སློང་ལ། །ཞེས་དང༌། གཞུང་འདིར་འོག་ཏུ། གནས་འགྱུར་ངོ་བོ་ཡེ་ཤེས་མཐུས་བྱེད་པས། ཞེས་པའི་ཚིག་གི་ནུས་པས་དཔེ་དོན་གང་རུང་གི་ཡེ་ཤེས་ཁྱད་པར་ཅན་ཞིག་མ་སྐྱེས་པར་གནས་འགྱུར་གྱི་ཐ་སྙད་ཙམ་ཡང་བཞག་ཏུ་མེད་པར་རྟོགས་ཤིང༌། བླ་མའི་ཞལ་རྒྱུན་ལས་ཀྱང་དགོས་པའི་དབང་གིས་དེ་ལྟར་བྱུང་ལ། ཡང་གཞན་དག་གི་དབང་བསྐུར་ནོད་པ་ཙམ་ཞིག་གིས་གནས་འགྱུར་དངོས་ཐོབ་པ་ཡིན་སྙམ་དུ་རྟོག་པར་འདུག་པ་འདྲ་ཡང༌། ཁོ་བོ་ནི་འདི་ལྟར་སེམས་ཏེ། གནས་འགྱུར་ཞེས་པ་དེ་རྣམ་པ་ཐམས་ཅད་དུ་འདུས་མ་བྱས་པའི་གནས་སྐབས་སེམས་ཀྱི་ལྷད་ཡོད་མེད་ཙམ་ལས། རང་བཞིན་དང་རྣམ་པ་གཉིས་ཀ་དཔེ་དོན་གྱི་ཡེ་ཤེས་མཚུངས་པས་དེ་དག་གང་རུང་གི་ཡེ་ཤེས་མཆན། ཡེ་ཤེས་ཁྱད་པར་ཅན་ལྟ་བུ་སྐྱེས་པ་ཞིག་མ་གཏོགས་ཐ་སྙད་འདོགས་མི་རུང་བའང་མ་ཡིན་ལ། དབང་གྲལ་དུ་བསྡད་ནས་དབང་རྫས་གནས་གསུམ་དུ་གཏུགས་ཤིང་ཁར་མྱོང་བ་ཙམ་གྱིས་གནས་འགྱུར་ཐོབ་པའང་མིན་ཏེ། ཞིབ་ཏུ་དཔྱད་ན་སོར་སྡོམ་གྱི་ངོ་བོ་ངེས་འབྱུང༌། བྱང་སྡོམ་གྱི་ངོ་བོ་གཞན་ཕན། སྔགས་སྡོམ་གྱི་ངོ་བོ་དག་སྣང་དུ་འཇོག་དགོས་པ་སྤྱིར་བཏང་ཡིན་ལ། དེ་ཡང་ངེས་འབྱུང་ཙམ་དང༌། གཞན་ཕན་ཙམ་དང༌། དག་སྣང་ཙམ་ཞིག་ཡོད་པས་དེ་དང་དེ་ཡི་སྡོམ་པ་མཚན་ཉིད་པར་མི་འགྱུར་ན་ཡང༌། བསམ་པ་དེ་དག་གིས་ངེས་པར་ཟིན་པ་ཞིག་དགོས་པས་དེ་སྐད་དུ་བྱའོ། །དེས་ན་སོ་ཐར་གྱི་སྡོམ་པའི་མཚན་ཉིད་ནི། ངེས་འབྱུང་གི་བསམ་པས་ཟིན་པའི་ཉེས་སྤྱོད་སྡོམ་པའི་ཚུལ་ཁྲིམས་གང་ཞིག །འདོད་པའི་སས་བསྡུས་ཏེ། མདོ་རྩར། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་ཞེས་དང༌། རྟེན་གྱི་བྱེ་བྲག་མཛོད་ལས། ཟ་མ་མ་ནིང་སྒྲ་མི་སྙན། །མཚན་གཉིས་མ་གཏོགས་མི་རྣམས་ལ། །སྡོམ་མིན་སྡོམ་པའང་དེ་བཞིན་ལ། །ཞེས་དང༌། རབ་དབྱེར། གླིང་གསུམ་སྐྱེས་པ་བུད་མེད་ལས། །འགྲོ་བ་གཞན་ལ་སྡོམ་པ་བཀག །ཅེས་སོ། །བྱང་སྡོམ་གྱི་མཚན་ཉིད་ནི། གཞན་དོན་དུ་བླ་ན་མེད་པའི་བྱང་ཆུབ་ཐོབ་འདོད་ཀྱིས་ཟིན་པའི་ཕྱིན་དྲུག་གི་ངོ་བོ་གྱུར་པའི་སྒྲུབ་པ་ཁྱད་པར་བ་སྟེ། དེའི་མི་མཐུན་པའི་ཕྱོགས་སྒོ་གསུམ་གྱི་ཉེས་པ་མ་ལུས་སྤོང་བའི་སེམས་པ་དང་མཚུངས་ལྡན་དུ་གྱུར་པ་ཡིན་ཏེ། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་དང༌། སྤྱོད་འཇུག་ལས། སྤོང་བའི་སེམས་ནི་ཐོབ་པ་ལས། །ཚུལ་ཁྲིམས་ཕ་རོལ་ཕྱིན་པར་བཤད། །ཅེས་སོ། །སྔགས་སྡོམ་གྱི་མཚན་ཉིད་ནི། ཐབས་ཤེས་ཁྱད་པར་ཅན་གྱིས་ཟིན་པའི་ཡེ་ཤེས་ཀྱི་མཚན་འཛིན་གྱི་རྟོག་པ་དང༌། དེས་བསྐྱེད་པའི་སྒོ་གསུམ་གྱི་ཉེས་པ་སྡོམ་པར་བྱེད་པའི་སེམས་པ་དང་མཚུངས་ལྡན་དུ་གྱུར་པའི་སེམས་ཏེ། འོད་ཕྲེང་ལས། ནམ་མཁའ་ཇི་སྲིད་གནས་བར་དུ། །ལྷན་སྐྱེས་ཡེ་ཤེས་བརྡ་དོན་སྤྲོད། རང་ལ་ཡེ་ནས་གནས་པ་དེ་བླ་མས་དབང་དུས་སུ་བརྡ་དོན་རྟགས་གསུམ་གྱི་ཚུལ་དུ་ངོ་སྤྲད་པའི་ཤེས་བྱ་ལ། ཐ་མལ་བ་ལྟ་བའི། མཆན། །རྣམ་རྟོག་དྲི་མ་ཀུན་ལས་སྡོམ། །རིག་འཛིན་སྔགས་ཀྱི་སྡོམ་པའོ། །ཞེས་དང༌། རྒྱུད་ཕྱི་མ་ལས། གང་ཞིག་ནན་ཏན་ལ་མི་འགོང༌། རྨི་ལམ་དུ་ཡང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ཅེས་སོ། །དེ་དག་ཀྱང་རང་རང་གི་ཐོབ་བྱེད་ཀྱི་ཆོ་ག་ལ་བརྟེན་ནས་ཐོབ་དགོས་སོ། །དེས་ན་སོ་ཐར་གྱི་སྡོམ་པའི་སྐབས་སུ་ཡང་རང་སྡོམ་ཐོབ་བྱེད་ཀྱི་ཆོ་ག་རྣམ་པར་དག་པ་ལས་བླངས་པའི་ཁྱིམ་པའམ་རབ་བྱུང་གི་སྡོམ་པ་གང་ཡིན་ཀྱང་སྡོམ་པ་ཙམ་ཞིག་ཐོབ་པ་ཡིན་ནའང་ཀུན་སློང་གི་བྱེ་བྲག་ལས། འཇིགས་སྐྱོབ་དང༌། ལེགས་སྨོན་གྱི་ཚུལ་ཁྲིམས་སུ་སོང་ན། དེ་ནམ་ངེས་འབྱུང་གི་བསམ་པ་རྒྱུད་ལ་སྐྱེས་ཚེ་སོར་སྡོམ་མཚན་ཉིད་པར་གནས་འགྱུར་བ་འདུ་ཤེས་ན་འཕར་བའི་དབང་གིས་ཏེ་གཅུང་དགའ་བོ་ལྟར་དང༌། དེ་ཡང་བསམ་པ་རྒྱ་ཆེ་རུ་སོང་ནས་འདུ་ཤེས་གནས་འགྱུར་བ་ཡིན་ཀྱང་ཉེས་སྤྱོད་གང་སྤོང་དམ་བཅས་པ་དེ་མེད་དུ་སོང་བ་ནི་མིན་ནོ། །དེ་ལྟར་སོ་ཐར་གྱི་བསླབ་ཚིག་གསུམ་པོ་རིམ་གྱིས་ནོད་ན་སྤང་བྱ་སྤོང་བར་དམ་བཅས་པའི་བསམ་པ་གོང་འཕེལ་དུ་སོང་ཡང་འོག་མའི་ལྡོག་པའི་ཆ་མེད་པ་མིན་ཏེ། ཕྱིས་བསླབ་པ་གོང་མ་ཕུལ་ན་རིམ་པར་འོག་མ་དགེ་ཚུལ་སོགས་སུ་བབས་པར་བཤད་ལ། དེའང་བསླབ་ཚིག་གོང་མ་ཐོབ་དུས་འོག་མ་གཉིས་སྡོམ་རྫས་ཐ་དད་དུ་དེར་ཡོད་པ་མིན་ཏེ། གལ་ཏེ་ཡིན་ན་བསྙེན་རྫོགས་ཀྱི་སྡོམ་པའི་རྟེན་རབ་བྱུང་གང་ཞིག་དེ་ཁྱིམ་བའང་ཡིན་དགོས་ཏེ། དགེ་བསྙེན་གྱི་སྡོམ་རྟེན་ཡང་དེ་ཡིན་དགོས་པའི་ཕྱིར་ཏེ་དེ་དུས་དགེ་བསྙེན་གྱི་སྡོམ་པའི་ངོ་བོའི་རྫས་ཐ་དད་དུ་ཡོད་པའི་ཕྱིར་རོ། །དེ་བཞིན་སོར་སྡོམ་སྟེང་གཞན་ཕན་དོན་གཉེར་གྱི་བྱང་སྡོམ་བླང་ན་སོར་སྡོམ་གྱི་ལྡོག་པ་དེ་ལ་འདྲེས་པ་ཡོད་ཀྱང་རང་ཉིད་གཅིག་པུ་ཐར་འདོད་ཀྱི་ངེས་འབྱུང་གི་བློ་དེ་གནས་འགྱུར་ནས་དོན་གཉིས་ལྡན་པའི་བྱང་སེམས་ཀྱི་ངོ་བོར་ཐ་མི་དད་པར་ཡོད་དེ། དེ་ཡང་དཔེར་ན་ཟངས་རྡོ་ཞུ་བ་ལས་ཟངས་སུ་འགྱུར་བའི་གནས་སྐབས་ན་སྔར་གྱི་རྡོ་དེ་ལས་གཞན་པའི་རྫས་ཤིག་ཡོད་པ་མ་ཡིན་ཀྱང་དེ་དུས་རྡོའི་ཁམས་དམན་པ་དེ་ད་དུང་ཡོད་པ་ཡིན་ན། རྡོ་ཡང་ཡིན་ལ་ཟངས་ཀྱང་ཡིན་པ་ཞིག་དགོས་ན་དེ་ནི་མི་སྲིད་པ་བཞིན་དུ་ངེས་འབྱུང་གི་བསམ་པ་དེ་ཉིད་ཇེ་བཟང་དུ་སོང་བས། དེ་ལས་གཞན་པའི་བློ་རྫས་ཤིག་མེད་ཀྱང༌། དེའི་དུས་སྔར་གྱི་བློ་དམན་དེ་ཡོད་ན་རང་དོན་ཡིད་བྱེད་ཀྱང་ཡིན་ལ་གཞན་ཕན་དོན་གཉེར་ཀྱང་ཡིན་པ་དེ་ནི་མི་སྲིད་དོ། །ཚུལ་དེས་མཚོན་ནས་བྱང་སྡོམ་སྟེང་སྔགས་སྡོམ་ཐོབ་ཚེ་དབང་དོན་གྱིས་ཡེ་ཤེས་བསྐྱེད་རྫོགས་རང་རང་གི་ལམ་གྱི་གཞི་དབང་བཞི་རང་རང་གི་སྐབས་སུ་བཤད་པ་རྣམས་དངོས་སུ་སྐྱེས་ན་ལྟ་ཅི། སྤྱིར་དག་མཉམ་ཙམ་ཞིག་ལ་གོ་བའི་ངེས་ཤེས་སྐྱེས་པའི་སྟོབས་ཀྱིས་གཞན་ཕན་བློ་དེ་ན་འཕར་ཚེ། གཞན་ཕན་གྱི་བསམ་པ་དེ་ཇེ་བཟང་དུ་སོང་ནས་སྔགས་སྡོམ་གྱི་ངོ་བོར་གྱུར་ནས་རྫས་གཞན་ཞིག་མེད་ཀྱང་ཀུན་རྫོབ་ཙམ་དུ་འཁོར་འདས་བླང་དོར་འཛིན་པ་དང་བྲལ་ཞིང༌། རང་རེ་ལས་དང་པོ་པས་སྡོམ་པ་གསུམ་རྒྱུད་ལ་གནས་ཚུལ་ལ་བསམ་གཞིག་བཏང་བ་ཡིན་པས། སྔགས་སྡོམ་གྱི་ངོ་བོ་དག་སྣང་ཐོས་བསམ་གྱི་ལྟ་བ་ན་འཕར་སྟོབས་ཀྱིས་འདུ་ཤེས་གནས་འགྱུར་བ་ཙམ་ལ་བྱ་ཡི། བསྒོམས་སྟོབས་ཀྱིས་ཡེ་ཤེས་སྐྱེས་པ་ལྟ་བུ་མིན་ནོ། །སྒོམ་སྟོབས་ཀྱིས་དཔེའི་ཡེ་ཤེས་སམ་ཁྱད་པར་དོན་གྱི་ཡེ་ཤེས་མངོན་དུ་གྱུར་ཚེ་སེམས་ཡེ་ཤེས་སུ་གནས་འགྱུར་བའི་ཆོས་ཉིད་ཀུན་ཏུ་འགྲོ་བ་ལ་དབང་ཐོབ་ནས་འདོད་ཡོན་ཉོན་མོངས་ཐམས་ཅད་ཆོས་ཉིད་ཀྱི་ལྟ་བས་དབང་དུ་བསྒྱུར་ནུས་པས་ཇི་ལྟར་སྤྱད་ཀྱང་ལྟུང་བ་རང་མཚན་པས་གོས་མི་སྲིད་པས། གཞན་ངོར་དོན་མཐུན་གྱི་སྤྱོད་པ་མ་གཏོགས་རང་ངོས་ནས་སྡོམ་པ་འོག་མའི་མཚན་འཛིན་མེད་པས་ཆེད་དུ་སྤང་བླང་དང་བྲལ་ན། ངོ་བོ་གནས་འགྱུར་ཐོབ་ནས་ཐ་དད་མེད་པ་སྨོས་ཅི་དགོས་ཏེ་རང་བྱུང་དོན་གྱི་དགེ་སློང་ཡིན་པའི་ཕྱིར། དེ་སྐད་དུ་གསང་སྙིང་ལས། བླ་མེད་མཆོག་གི་དམ་ཚིག་ཏུ། །འདུལ་བའི་དབང་གིས་ཚུལ་ཁྲིམས་དང༌། །ཇི་སྙེད་སྡོམ་པ་བསམ་ཡས་ཀུན། །མ་ལུས་ཀུན་འདུས་རྣམ་པར་དག །ཅེས་དང༌། ས་ར་ཧས། སྨྱིག་མ་མཁན་གྱི་བུ་མོ་ཕྱག་རྒྱར་བརྟེན་པའི་རྗེས་ལ། ཁ་སང་ཡན་ཆད་བྲམ་ཟེ་ཡིན། །ཁ་སང་ཡན་ཆད་དགེ་སློང་མིན། །དེ་རིང་ཚུན་ཆད་དགེ་སློང་ཡིན། །ཧེ་རུ་ཀ་དཔལ་དགེ་སློང་མཆོག །ཅེས་གསུངས་ནས་དེའི་རྗེས་ལ་ཀླུ་སྒྲུབ་ཀྱི་མཁན་པོ་མཛད་པ་ལྟ་བུའོ། །མདོར་བསྡུ་ན་འདུ་ཤེས་གནས་འགྱུར་སེམས་ཡེ་ཤེས་སུའམ་ཟག་བཅས་ཟག་མེད་དུ་གནས་འགྱུར་ཁྱད་པར་བ་གཉིས་སུ་ཡོད་པར་བལྟ་དགོས་པ་ཡིན་ནོ། །འོ་ན་སྔགས་བྱང་གཉིས་ཆོ་ག་ལ་བརྟེན་ནས་ནོད་པའི་ཚེ་གནས་འགྱུར་མ་ཐོབ་ན། ངོ་བོ་ཐ་དད་དུ་ཡོད་བར་མི་འཐད་པར་བཤད་པས་སྡོམ་པ་གཏན་ནས་མི་ཐོབ་སྙམ་ན། ཁམས་རང་བཞིན་རྣམ་དག་བདེ་གཤེགས་སྙིང་པོ་ལ་ལམ་དང་འབྲས་བུའི་ཡོན་ཏན་ཐམས་ཅད་མངོན་དུ་འགྱུར་རུང་ཡོད་པས་སད་བྱེད་ཀྱི་རྐྱེན་ལ་བརྟེན་ནས་ནུས་པ་བཞག་པ་ཙམ་ལས་ཀྱང་རང་རང་གི་ལམ་གྱི་ངོ་བོ་མངོན་དུ་འགྱུར་རུང་བའི་རྟེན་འབྲེལ་ནུས་མཐུ་བསམ་མི་ཁྱབ་འདི་ནི་རྟོག་གེའི་རིག་པས་དགག་པར་མི་བྱ་སྟེ་ཕྲིན་ལས་རྨད་དུ་བྱུང་བའོ། །དེ་ལྟར་རྟེན་འབྲེལ་གྱི་རྣམ་བཞག་པ་དེ་ཙམ་ངོ་བོ་གཅིག་གམ་ཐ་དད་ཅེས་བརྟག་བྱ་མིན་ཏེ། སྤྱིར་དགེ་མི་དགེའི་བྱེ་བྲག་བག་ཆགས་བསམ་གྱིས་མི་ཁྱབ་ཅིང༌། ཁྱད་པར་ལམ་པ་རྣམས་ཀྱི་རྒྱུད་ཀྱི་དགེ་བ་ལ་ཡང་ཟག་བཅས་དང་ཟག་མེད་སོགས་དུ་མ་ཞིག་ཡོད་ན་དེ་དག་གི་བག་ཆགས་ངོ་བོ་གཅིག་ན་དགེ་མི་དགེ་གཅིག་ཏུ་འགྱུར་བ་དང༌། ཐ་དད་དུ་འདོད་ན་གཅིག་གི་རྒྱུད་དུ་མ་འགྱུར་བའམ། ཡང་ན་རྒྱུད་ལས་ཐ་དད་པའི་དགེ་མི་དགེ་ཡོད་དགོས་ན་དེ་ནི་མི་འཐད་དོ། །དེ་ཡང༌། རྟོག་གེ་བརྟེན་ཅིང་མ་ངེས་ལ། །མ་ཁྱབ་ཀུན་རྫོབ་སྐྱོ་བ་ཅན། །བྱིས་པ་ལ་ནི་བརྟེན་པར་འདོད། །ཅེས་པ་ལྟར་རང་ལུགས་འཛིན་པ་རྣམས་ཀྱིས་དཔྱད་དེ་ངེས་ཤེས་གཏིང་ནས་རྙེད་པ་གལ་ཆེའོ། །ཡོན་ཏན་ཡར་ལྡན་ནི། སོ་ཐར་རང་ལམ་ནས་ཐབས་ཤེས་ཕྱོགས་གཅིག་གིས་བཟུང་ནས་ཉེས་སྤྱོད་སྡོམ་པ་དེ་རང་ཉིད་འཁོར་བ་ལས་ཐར་བའི་ཐབས་སུ་གྱུར་པའི་ཡོན་ཏན་ཉི་ཚེ་བ་ཙམ་ཞིག་ཐོབ་པ་དེ་བྱང་སྡོམ་གྱི་ངོ་བོར་བསྲུང་ན་ཐབས་ཤེས་རྒྱ་ཆེན་པོས་ཟིན་པས་བླ་ན་མེད་པའི་བྱང་ཆུབ་ཀྱི་རྒྱུར་འགྲོ་བས་བྱང་སྡོམ་མ་བླངས་པའི་དུས་སུ་བསྲུང་བ་ལས་ཆེས་ཕན་ཡོན་མཆོག་ཏུ་འཕགས་པ་དེ་གཉིས་ཀ་སྔགས་སྡོམ་གྱི་ངོ་བོ་བསྲུང་ན། ཐབས་ཤེས་ཤིན་ཏུ་མྱུར་ལམ་ཟབ་ཅིང་རྒྱ་ཆེ་བས་མྱུར་དུ་ཚེགས་མེད་པར་བླ་ན་མེད་པའི་བྱང་ཆུབ་ལ་རེག་པའི་རྒྱུ་ཡིན་པའི་ཕྱིར་དེ་བས་ཀྱང་ཡོན་ཏན་ལྷག་པར་ཆེའོ། །གནད་ཀྱི་མི་འགལ་བ་ནི། ལས་དང་པོ་པའི་དུས་སུ་གཞན་ཕན་གྱི་སྤྱོད་པ་རྒྱ་ཆེན་པོ་དང་བརྟུལ་ཞུགས་ཀྱི་སྤྱོད་པ་རླབས་པོ་ཆེ་དངོས་སུ་བསྒྲུབ་པའི་ནུས་པ་མ་ཐོན་པའི་གནས་སྐབས་ན་ལུས་ངག་གི་ཀུན་སྤྱོད་ཕལ་ཆེར་འོག་མ་སོ་ཐར་གྱི་ལུགས་བཞིན་བསྲུངས་ནས་བསམ་པ་དང་ལྟ་སྒོམ་གོང་མའི་ལུགས་བཞིན་རྒྱུད་ལ་ཅི་ལོན་བྱས་ན། བྱང་སྔགས་ཀྱི་སྤྱོད་པ་ཐུན་མིན་ལ་མ་བསླབ་པས་འགལ་བ་ལྟར་སྣང་བ་དག་གིས་ཉེས་པ་མི་བསྐྱེད་ཅིང༌། རང་དོན་ཡིད་བྱེད་ཀྱི་བློ་གཏན་ནས་མེད་པའམ་ཆུང་ངུར་གྱུར་ནས་གཙོ་བོར་གཞན་དོན་སེམས་པ་དང༌། སྔགས་ཀྱི་ལྟ་སྒོམ་ནར་སོན་ནས་ཆགས་པ་རང་རྒྱུད་པ་དག་པའི་ཚེ་ན་གཞན་དོན་དུ་དངོས་གྲུབ་རྣམ་གཉིས་ཐོབ་པ་ལ་སོགས་པའི་ཕྱིར་སྦྱོར་སྒྲོལ་ལ་སོགས་པ་འོག་མའི་བསླབ་པ་དང་འགལ་བ་ལྟར་སྣང་བ་ཅི་བྱས་ཀྱང་སོ་ཐར་གྱི་སྐབས་སུ་དངོས་ཞེན་དང་བཅས་པ་ལ། ཇི་སྐད་བཤད་པའི་ལྟུང་བའི་ཡན་ལག་ཚང་བ་མི་སྲིད་པས་རྨ་བྱས་དུག་ལ་བྱ་བ་བཞིན་ཉེས་པས་མི་གོས་པའི་སྟེང་ཡེ་ཤེས་ཀྱི་གྲོགས་སུ་འགྱུར་བའི་ཕྱིར་གནད་ཀྱིས་མི་འགལ་ཏེ། ཨཱརྻ་དེ་ཝས། ཀུན་ནས་ཉོན་མོངས་སྤང་འདོད་པས། །དམ་པའི་དོན་ནི་འཚོལ་བར་བྱ། །ཞེས་སོ། །དུས་སྐབས་གང་གཙོར་སྤྱད་པ་ནི། སྤྱིར་ལས་དང་པོ་པ་ནས་རྣལ་འབྱོར་གྱི་དབང་ཕྱུག་གི་བར་རང་ཉམས་དང་དཔག་པའི་སྤྱོད་པ་དུས་ཚོད་དང་འབྲེལ་བ་ཉིད་དེ། ཚོགས་ཀྱི་དབུས་ན་ནི། ཁ་ན་མ་ཐོ་བ་མེད་པ་ཀུན་ཏུ་བཟང་པོའི་སྤྱོད་པ་ལྔ་ལ་ཁྲེལ་བག་ཡོད་པར་བྱ་བ་ཉིད་དོ། །དེ་ཡང་གནས་དག་པ་དགོན་པ་དང་བས་མཐའ་འོ། །འཚོ་བ་དག་པ་ལོག་འཚོ་དང་མ་འདྲེས་པའི་ཆོས་དང་མཐུན་པའོ། །སྡོམ་པ་དག་པ་ལས་དང་པོ་སོ་ཐར་གཙོར་གྱུར་པ་ལས་རིམ་གྱིས་སྙིང་རྗེ་ཆེན་པོ་དང༌། ཐབས་མཁས་པ་དང༌། དོན་དམ་པར་ཤིན་ཏུ་མ་སྐྱེས་པ་དང༌། དངོས་པོ་མེད་པའི་བློ་ནུས་ནར་སོན་པ་དང་བསྟུན་གོང་མ་གོང་མའི་དགོས་པ་གཙོ་བོར་བསྒྲུབ་ཅིང་སོ་ཐར་བྱང་སེམས་རིག་འཛིན་གསུམ་ལ་ཉེས་པས་མི་གོས་པའོ། །གྲོགས་དག་པ་ཚངས་པ་མཚུངས་པར་ལྡན་པའོ། །ཆོས་དག་པ་སྟོང་ཉིད་སྙིང་རྗེའི་རྩིས་ཟིན་པའོ། །དེ་སྐད་དུ་ཡང་གསང་བ་འདུས་པ་ལས། ཕྱི་རུ་ཉན་ཐོས་སྤྱོད་པ་སྐྱོང༌། །ནང་དུ་འདུས་པའི་དོན་ལ་དགའ། །ཞེས་པ་དང་མཐུན་པར་རྫོགས་པའི་སངས་རྒྱས་པདྨ་སྐྱེས་ཀྱང་བཞེད་དོ། །གསང་སྤྱོད་ཀྱི་དུས་ན་ལྟུང་བ་ནང་མ་འདོམས་པ་རྣམས་ནི་འདྲེས་པ་མེད་ཅིང་མཐའ་དག་རྫོགས་པར་བསྲུང་ལ། འདོམ་པའམ་བརྟུལ་ཞུགས་ལ་སློབ་པའི་ཚེ་སྔགས་གཙོ་བོར་བྱས་ནས་འོག་མ་ཁྱད་དུ་གསོད་པ་མ་ཡིན་ཀྱང་གོང་མའི་ཐབས་ཤེས་ཀྱིས་ཟིན་པས་ཉེས་པ་མི་འབྱུང་ངོ༌། །དེ་ལྟ་ནའང་འཇིག་རྟེན་མ་དད་པར་གྱུར་པའི་ཆ་སྡོམ་པ་གཉིས་སུ་མཐུན་པ་རྣམས་དེ་ཉིད་ལྟར་བསྲུང་བར་བྱ་སྟེ། སྤྱོད་འཇུག་ལས། འཇིག་རྟེན་མ་དད་གྱུར་པ་ཀུན། །མཐོང་དང་དྲིས་ཏེ་སྤང་བར་བྱ། །ཞེས་དང༌། རབ་དབྱེ་ལས། འདི་ལ་སྡིག་ཏོ་མི་དགེའི་ཕྱོགས། །ཕལ་ཆེར་ཉན་ཐོས་ལུགས་བཞིན་བསྲུང༌། །འདོད་པས་དབེན་པའི་ལྟུང་བ་འགའ། །བྱང་ཆུབ་སེམས་པའི་ལུགས་བཞིན་བསྲུང༌། །འཇིག་རྟེན་མ་དད་གྱུར་པའི་ཆ། །གཉིས་ཀ་མཐུན་རྣམས་འབད་པས་བསྲུང༌། །ཞེས་སོ། །མདོར་ན། ལས་དང་པོ་པ་དང༌། ལམ་རྣལ་འབྱོར་པ་དང༌། གྲུབ་པ་ཐོབ་པ་དང༌། ཐམས་ཅད་མཁྱེན་པའི་གནས་སྐབས་དེ་དང་དེ་དག་གི་སྤྱོད་པ་མ་འདྲེས་པ་བླང་དོར་བྱ་བར་དུས་འཁོར་འགྲེལ་ཆེན་ལས་གསུངས་སོ། །གཉིས་པ་བཞེད་སྲོལ་གཞན་གྱི་གནད་བསྡུ་བ་ནི། དེ་ལྟར་དེ་བཞིན་གཤེགས་པའི་ཆོས་ཚུལ་རྒྱ་མཚོའི་ཉམས་ལེན་ཐམས་ཅད་སྡོམ་གསུམ་དུ་བསྡུས་ནས་གང་ཟག་གཅིག་གིས་ཉམས་སུ་ལེན་ཚུལ་བཤད་པ་ན། སྡོམ་གསུམ་རྒྱུད་གཅིག་ཏུ་ཇི་ལྟར་རྫོགས་ཤིང་གྲུབ་པའི་ཚུལ་གྱི་མཐའ་ལ་དཔྱད་པ་ཞུགས་པ་རྣམས་ཀྱི་བཞེད་པ་མི་འདྲ་བ་དྲུག་ཡོད་ལ། དེ་དག་ཀྱང་ངོ་བོ་གཅིག་ཏུ་འདོད་པ་དང་ཐ་དད་པར་འདོད་པའི་ལུགས་གཉིས་སུ་འདུའོ། །དྲུག་པོ་གང་ཞེ་ན་འདི་ལྟར། དང་པོ་ནི་རྒྱུད་ལས། བླ་མེད་ཐེག་ཆེན་རབ་ངེས་ན། །ཉོན་མོངས་ལས་རྣམས་གང་སྤྱད་ཀྱང༌། །བྱས་ལ་མི་སོགས་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་པའི་སྟེང་དུ་སླེབ་ཚེ་འཕགས་བོད་ཀྱི་སྐྱེས་ཆེན་ཕལ་མོ་ཆེའི་མཛད་པ་ལྟ་བུ་སྟེ། སྡོམ་པ་ཡིན་མིན་དངོས་པོར་བལྟ་བ་ལས་བྱུང་བ་ཡིན་ན། དེ་དག་ལ་ནི་མངོན་ཞེན་མི་མངའ་སྟེ། ཀུན་རྟོག་ཐམས་ཅད་ཡེ་ཤེས་སུ་གནས་འགྱུར་ཟིན་ནས་ལྡོག་པའི་ངོ་བོ་ཞེས་ཐ་སྙད་ལས་འདས་སོ། །འོན་ཀྱང་སྔོན་བོད་འདིར་ཨ་ཙ་ར་དམར་པོ་ཞེས་བྱ་བ་ཞིག་བྱུང་བ་དེས། དབང་བསྐུར་ཐོབ་ནས་སྔགས་ཁོ་ན་བསྲུང་བས་ཆོག་པར་བཤད་པའི་རྗེས་སུ་འབྲངས་ནས་ཁ་ཅིག་ངོ་བོ་དང་ལྡོག་པ་གཉིས་ཀ་གནས་འགྱུར་བས་གོང་མ་ཐོབ་ཚེ་འོག་མ་བསྲུང་མི་དགོས་པར་སྔགས་སྡོམ་གྱི་ངོ་བོ་གཅིག་ཏུ་ཡོད་ཅེས་འདོད་པའང་གོང་དུ་བཤད་པ་དེ་དང་ཚུལ་མཐུན་པར་སྣང་ཡང༌། དེ་ནི་མཉམ་ཉིད་རྟོགས་གྲོལ་ཆེན་པོའི་རྣལ་འབྱོར་པར་འཐད་ཀྱང༌། ལས་དང་པོ་པས་དེ་ལྟར་བྱས་ན་འོག་མ་ཁྱད་དུ་བསད་པའི་ལྟུང་བ་ཆར་བཞིན་འབབ་བོ། །གཉིས་པ་ནི། སོ་བྱང་གི་སྡོམ་པའི་ངོ་བོ་སྔགས་སུ་གནས་འགྱུར་ཚེ་ངོ་བོ་སྔགས་སྡོམ་གཅིག་པུ་ལ་ལྡོག་པ་གཞི་མི་མཐུན་པར་ཐ་དད་དུ་འདོད་པ་ནི་རང་ལུགས་ཏེ། འདི་སྔ་འགྱུར་གྱི་རྒྱུད་སྒྱུ་འཕྲུལ་དྲྭ་བ་སོགས་ལས་གསལ་བར་བསྟན་པ་ལྟར་འཕགས་བོད་ཀྱི་སྐྱེས་ཆེན་ཚད་མ་རྣམས་ཀྱི་བཞེད་པ་སྟེ། འོད་ཕྲེང་ལས། གཞན་ཡང་ཁ་ཅིག་སྡོམ་པ་གསུམ། །རྟེན་ས་རྟེན་འབྲེལ་ཆུ་གྲུ་འདྲ་གཞི་རྟེན་དུ། །འདོད་ཅེས་སྒྲོག་པ་འཁྲུལ་གནས་ཡིན། །བདག་ཉིད་ཆེན་པོ་རྟ་དབྱངས་དང༌། །སློབ་དཔོན་སྒེག་པའི་རྡོ་རྗེ་སོགས། །དོན་འདི་ལྡོག་པ་དུ་མས་འབྱེད། །ཅེས་དང༌། བོད་ཀྱི་རོང་ཟོམ་ཆོས་ཀྱི་བཟང་པོ་དང༌། ཟུར་ལུགས་ཀྱི་བླ་མ་ཕལ་ཆེ་བ་དང༌། ཁྱད་པར་ཀུན་མཁྱེན་གཉིས་པ་དྲི་མེད་འོད་ཟེར་དང་གཏེར་ཆེན་འགྱུར་མེད་རྡོ་རྗེ་སོགས་རྙིང་མའི་མཁས་གྲུབ་རྣམས་དང༌། གསར་མའི་ལོ་ཆེན་རིན་བཟང༌། འཇམ་དབྱངས་ས་པཎ་རྗེས་འབྲང་དང་བཅས་པ་སྟེ་གསར་རྙིང་གི་མཁས་གྲུབ་རྣམས་ཀྱི་དགོངས་པ་རྨ་མེད་པ་ཡིན་ནོ། །གནས་འགྱུར་གྱི་ཚུལ་ནི་བཤད་ཟིན་ཏོ། །དེ་ཡང་ངོ་བོ་གཅིག་ཏུ་འདོད་ན་ཤི་བའི་ཚེ་བྱང་སྔགས་གཏོང་བའམ། ཡང་ན་སོ་ཐར་ཀྱང་མྱང་འདས་བར་མི་གཏོང་བའི་སྐྱོན་དུ་འགྱུར་རོ། །གསུམ་པ་ནི། སྡོམ་གསུམ་གྱི་རྣམ་བཞག་དཔེར་ན་སྣོད་གཙང་མར་ཆུ་དྭངས་པ་བླུགས་པའི་ནང་རིན་པོ་ཆེ་ཨིནྡྲ་ནཱི་ལ་བཞག་ན། སྣོད་ཆུ་གཉིས་ཨིནྡྲ་ནཱི་ལའི་ཁ་དོག་ཏུ་འགྱུར་ཡང་དེ་གསུམ་རྫས་ཐ་དད་པ་ལྟར་སོ་བྱང་སྔགས་གསུམ་ཀ་རྒྱུད་གཅིག་ལ་རྫོགས་པའི་ཚེ་སོ་སོའི་རྫས་ཐ་དད་དུ་ཡོད་པས་འགལ་ཡང༌། ཡོན་ཏན་གྱི་ངོས་ནས་གོང་འཕེལ་གྱི་དབང་གིས་སོ་བྱང་གཉིས་སྔགས་སྡོམ་གྱི་ཡན་ལག་ཏུ་འདོད་པ་ཡིན་ཞིང༌། དེ་ཡང་རྟེན་དང་བརྟེན་པའི་ཚུལ་དུ་འདོད་དོ། །དེ་ཡང་གོང་མའི་ཐབས་ཤེས་ཀྱིས་འོག་མ་ཟིལ་གྱིས་གནོན་པར་མི་ནུས་པའི་བློ་ངོ་ན་ལྡོག་པ་ཐ་དད་དུ་ཡོད་པ་མི་འགལ་ཡང༌། རྟེན་བརྟེན་པ་ཐམས་ཅད་ལ་ཁྱབ་མཉམ་དུ་འདོད་ན་རྟེན་སོ་ཐར་གཏོང་ཚེ་བརྟེན་པ་སྔགས་བྱང་གཉིས་ཀྱང་གཏོང་བར་འགྱུར་བས་མི་འཐད་དོ། །བཞི་པ་ནི། སྤྱིར་བཀའ་བརྒྱུད་པ་རྣམས་ཀྱིས་སྡོམ་པ་གསུམ་གཏོང་རྒྱུ་དང་གཏོང་མཚམས་དུས་ཐ་དད་པ་དང༌། ཐོབ་བྱེད་ཀྱི་ཆོ་ག་ཐ་དད་པས་ངོ་བོ་ཐ་དད་ཡིན་ཞེས་སོ་སོའི་གཏོང་མཚམས་ཐོབ་མཚམས་ཐ་དད་པས་ངོ་བོ་ཐ་དད་པའི་རྣམ་དབྱེ་བྱེད་འདུག་པས་དེ་ལ་བཤད་ཆོག་པར་སྣང་ཡང༌། བཀའ་བརྒྱུད་པ་ལས་གཞན་ཡང་དངོས་དོན་ནི་འོག་མའི་སྡོམ་པ་གཏོང་བའི་མཚམས་གོང་མ་ཐོབ་པའི་ཚེ་ཡིན་ནོ་ཞེས་གཏོང་ཐོབ་ཀྱི་མཚམས་ནས་རྣམ་པར་དབྱེ་བ་ནི། བློ་ཆུང་དག་གྲོལ་དུ་འཛིན་པའི་གང་ཟག་ལ་དགོངས་ནས། དམ་པ་དང་པོ་ལས་དྲང་སྲོང་ཉི་མའི་ཤིང་རྟ་ལྟ་བུ་བློ་ཆུང་གསང་སྔགས་ཐོས་ན་ལོག་ལྟས་སྤངས་ཤིང་ངན་སོང་དུ་ལྟུང་བ་དེ་ལས་བསྲུང་ཕྱིར་རེ་ཞིག་གསང་སྔགས་ཐོབ་པར་མི་བྱེད་པ།ཞིང་དོན་ཟབ་མོ་རིང་དུ་སྤང་བར་འགྱུར་བ་རྣམས་ལ་རྗེས་སུ་གཟུང་ཕྱིར་ཐོག་མར་དེ་སྐད་དུ་བརྗོད་པས་གདོད་སྔགས་ལ་འཇུག་པའི་རྒྱུར་གསུངས་པ་ལྟ་བུ་དང༌། དགོས་དབང་གཞན་ཡང་རབ་བྱུང་སྤྱོད་པ་ལྷོད་པ་རྣམས་གོང་མའི་ཐབས་བསྐྱེད་རྫོགས་ཤེས་ཁྱད་པར་ཅན་གང་ཡང་མེད་པར་རབ་བྱུང་གི་ཕྱོགས་ཀྱི་བསླབ་ཁྲིམས་ཡལ་བ་འདོར་བ་ལ་དགོངས་ནས། ལམ་སྒྲོན་དུ། གསང་བ་ཤེས་རབ་དབང་བསྐུར་ནི། ཚངས་པར་སྤྱོད་པས་བླང་མི་བྱ། །ཞེས་པ་ལྟ་བུ་ཡིན་ན་ནི་འཐད་རུང་ལ། རྣམ་པ་ཐམས་ཅད་དུ་དེ་ལྟར་འདོད་ན་སུམ་ལྡན་རྡོ་རྗེ་འཛིན་པ་མི་སྲིད་པ་དང༌། དབང་བཞི་མ་རྫོགས་ན་སངས་རྒྱས་མི་ཐོབ་པ་དང་ཡང་འགལ་ལོ། །ལྔ་པ་ནི། ཨ་བྷ་ཡཱ་ཀ་རའི་ཐུབ་དབང་དགོངས་རྒྱན་ལས་བྱུང་བ་སྟེ། གསེར་གྱི་རྒྱན་གསེར་དུ་རིགས་གཅིག་ཀྱང་མགོ་རྒྱན་རྐང་རྒྱན་ལག་གདུབ་སོགས་ཐ་དད་པ་བཞིན་དུ་སྡོམ་པ་གསུམ་པོ་སྤོང་བའི་སེམས་སུ་རིགས་གཅིག་ཀྱང་རྫས་ཐ་དད་དུ་བཤད་པ་དང༌། དོང་རྩེ་བརྩེགས་པ་ནས་སོ་སོར་མ་འདྲེས་པར་ཡོད་པ་བཞིན་སྡོམ་པ་གསུམ་སོ་སོར་མ་འདྲེས་པར་རྒྱུད་གཅིག་ལ་ཡོད་པ་ཡང་འདོད་པ་ཡང་དེ་དང་གཅིག་གོ །དེ་ཡང་སྡོམ་པའི་རང་ལྡོག་མ་འདྲེས་པའི་ངོས་ནས་ཐ་དད་དུ་ཡོད་པ་འཐད་ཀྱང༌། ངོ་བོ་ལ་དེ་ལྟར་འདོད་ན་སྲོག་གཅོད་སྤོང་སེམས་ལྟ་བུའི་སེམས་བྱུང་རིགས་མཐུན་གསུམ་གང་ཟག་གཅིག་གི་རྒྱུད་ལ་གནས་པ་མི་འཐད་དོ། །དྲུག་པ་ནི། ཤཱཀྱ་ཤྲཱིའི་སློབ་མ་བི་བྷུ་ཏིཙནྡྲའི་ལུགས་འོད་ཕྲེང་ལས་བྱུང་བ་སྟེ། དཔེར་ན་ཉི་ཟླ་སྐར་གསུམ་པོ་རིམ་ཅན་དུ་ཚོགས་པ་ལྟར་ཏེ། ཟླ་བ་ཤར་བ་ན་སྐར་འོད་ཟིལ་གྱིས་མནན་ནས་བག་ལ་ཞ་བར་གྱུར་ཀྱང་རང་རང་གི་འོད་དང་བཅས་པ་མ་ཉམས་པ་སྟེ་གཏན་མེད་དུ་སོང་བ་མ་ཡིན་པར་ཐ་དད་དུ་ཡོད་པ་བཞིན། སྡོམ་པ་གསུམ་པོ་ཡང་གོང་མ་གོང་མ་ཐོབ་པས་འོག་མ་འོག་མ་ཟིལ་གྱིས་མནན་ཏེ་བག་ལ་ཞ་བར་གྱུར་པ་ནི་ནུས་པའི་ཁྱད་ཞུགས་པ་ཙམ་ཡིན་གྱི་ངོ་བོ་ཐ་དད་པར་ཡོད་དོ་ཞེས་འདོད་དོ། །དེ་ཡང་ཤེས་བྱ་གཟུང་འཛིན་ཤེས་བྱེད་ཀྱི་བློ་དང་བྲལ་ནས་གོང་མ་གཉིས་ཐབས་དང་ཤེས་རབ་ཀྱི་ངོས་ནས་ནུས་པ་ཆེ་བར་སོང་བའི་ཚེ་འོག་མ་རྣམས་སུན་འབྱིན་པ་མེད་ཀྱང་རང་བཞིན་གྱི་ཚུལ་ཁྲིམས་གང་ཡིན་པའི་རིགས་སད་ནས་འོག་མའི་ཆ་བག་ལ་ཞར་འཐད་དུ་རུང་སྟེ། སློབ་དཔོན་ཆེན་པོ་བི་མ་ལས་སེམས་ཅན་གང་གིས་ལས་དེ་བྱ་བའི་སེམས་དེ་ལ་ངོ་བོ་ཉིད་མེད་པར་སོ་སོར་རྟོག་པའི་ཕྱིར་རམ་ཆོས་ཐམས་ཅད་རང་བཞིན་མེད་པར་བསྒོམ་ན་དེའི་ཚུལ་ཁྲིམས་རྣམ་པར་དག་པ་ཁོ་ན་ཡིན་པར་རིག་པར་བྱའོ། །ཞེས་གསུངས་པ་ལྟར་རོ། །གཞན་དུ་ན་སྡོམ་གསུམ་མཚན་ཉིད་སོ་སོར་འཛིན་བཞིན་བག་ལ་ཞ་བར་མི་འཐད་དེ། བླང་འདས་སོ་སོར་བསྲུང་དགོས་ན་ནི་བག་ལ་མ་ཞ་ལ། མི་དགོས་ན་སོ་སོར་ཡོད་པ་མི་རུང་བས་མི་འཐད་དོ། །དེ་ལ་སོགས་སྡོམ་གསུམ་གང་ཟག་གཅིག་གི་རྒྱུད་ལ་ཡོན་ཏན་ཡར་ལྡན་ལྡོག་པས་བཏགས་པ་ཙམ་དུ་གནས་ཚུལ་དཔྱད་པ་བཏང་ཚེ་བློའི་རང་བཞིན་ནི་རྟོག་དཔྱོད་ཀྱི་རྗེས་སུ་འབྲང་ཞིང༌། ཚིག་ནི་དཔེ་དོན་དང་མཚུངས་པར་འཇུག་པས་རྣམ་པའི་ཁས་བླངས་མཐའ་ཡས་པ་ཞིག་ཡོད་ནའང༌། དེ་བཞིན་གཤེགས་པའི་བསྟན་པ་ནི་རྟོན་པ་བཞི་དང་ལྡན་པ་ཡིན་པས། དེ་དག་ཐམས་ཅད་ཀྱང་གནད་བསྡུ་ན་འདི་ལྟར་སྡོམ་པས་རྒྱུད་བསྡམས་པ་མེད་ན་བསོད་ནམས་ཁྱད་པར་ཅན་དང་ལྟུང་བ་གཉིས་ཀ་མེད་ཅིང༌། དགེ་བ་བྱས་ན་ཡང་བར་མའི་དགེ་བ་ཞེས་བྱ་སྟེ་སྲིད་པ་ལས་མི་འདའ་བས། ཞིང་ཡོད་པ་རྣམས་ཐན་པ་དང་སེར་བས་འཇིགས་དགོས་པ་ལྟར་རྣམ་གྲོལ་དོན་དུ་གཉེར་བའི་སྡོམ་པ་ཐོབ་དགོས་ཤིང༌། སྡོམ་པ་ཡོད་པ་རྣམས་ཀྱིས་ཉེས་པས་འཇིགས་ནས་ཚུལ་བཞིན་བསྲུང་དགོས་པའི་ཕྱིར་སྡོམ་གསུམ་རང་གི་ཐོབ་བྱེད་ཆོ་གའི་དུས་སུ་ཇི་སྐད་བཤད་པ་ལྟར་བཏགས་ཡོད་ཀྱི་ཆ་ནས་རང་རང་གི་ལྡོག་པ་མ་འདྲེས་པར་ཡོད་པ་དེ་བཞིན་དུ་བསྲུང་བར་བྱ་བ་དང༌། གསུམ་ཀའི་བསྲུང་མཚམས་ནང་འདོམ་པའི་དུས་ན་དགག་དགོས་གང་དུ་ཚང་བ་དེ་ལྟར་བྱས་ན་འགལ་བ་མེད་དེ་དགེ་སྡིག་རྣམ་རྟོག་གི་གཟུགས་བརྙན་ཡིན་པའི་ཕྱིར་དང༌། འདུས་བྱས་ཀྱི་སྡོམ་པ་རྣམ་པར་རྟོག་པའི་སྤྱོད་ཡུལ་ཅན་དེ་དག་འདུས་མ་བྱས་པའི་ཚུལ་ཁྲིམས་སུ་གནས་འགྱུར་བའི་ངོ་བོ་ནི་ཚོགས་བརྒྱད་ཀྱི་རྟོག་པ་ཐམས་ཅད་ཆོས་ཉིད་ངོ་བོ་ཉིད་མེད་པའི་དོན་དང་འདྲེས་ཏེ་སྡོམ་སྡོམ་མིན་དུ་འཛིན་པའི་ཀུན་རྟོག་ཐམས་ཅད་དང་བྲལ་བའི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པའི་མཐུས་བྱེད་པ་ཡིན་ཏེ་མདོ་ལས་བཤད་པ་ལྟར་རོ། །དེ་ལྟར་ལྡོག་པ་མ་འདྲེས་པ་ལ་སོགས་པའི་ཆོས་དྲུག་བརྩི་བ་སྤྱིར་བཏང་ཡིན་ལ། དམིགས་བསལ་ནི་སྡོམ་པ་ནོད་ཙམ་གྱིས་ངེས་འབྱུང་སོགས་འདུ་ཤེས་ཁྱད་པར་ཅན་མ་སྐྱེས་ན་རང་རང་གི་སྡོམ་པ་མཚན་ཉིད་པར་མི་འགྱུར་བས། ངེས་འབྱུང་སོགས་ལ་སེམས་རྒྱུད་ཇེ་བཟང་དུ་འགྲོ་བའི་ཐབས་ལ་བརྩོན་པ་དང༌། འདུ་ཤེས་གནས་འགྱུར་ཙམ་ཐོབ་ཀྱང་ལྡོག་པ་སོ་སོར་བསྲུང་དགོས་པ་དང༌། ཡེ་ཤེས་ཁྱད་པར་ཅན་དོན་གྱི་འོད་གསལ་ཇི་བཞིན་སྐྱེས་པའི་ཚེ་ན་ནི་ལྡོག་པའི་བསྲུང་བྱ་ཙམ་ཡང་ཐ་དད་དུ་མི་དམིགས་པས་ཇི་ལྟར་བྱས་ཀྱང་ཉེས་པར་མི་འགྱུར་བའི་དབྱེ་བ་ཕྱེད་པ་ཁྱད་པར་རྣམས་ཤེས་དགོས་པ་ཡིན་ནོ། །དེ་སྐད་དུ། རིན་ཆེན་ཕྲེང་བར། སྤྱིར་བཏང་བ་ལ་དམིགས་ཀྱིས་བསལ། །བསྟན་བཅོས་ཀུན་ལ་རབ་ཏུ་བསྔགས། ཞེས་སོ། །དེས་ན་ཆུ་ཕྲན་ཐམས་ཅད་རྒྱ་མཚོར་ཕྱིན་ཚེ་བ་ཚྭ་ཅན་དུ་འགྱུར་བ་ཡིན་གྱི། ལམ་དུ་སོ་སོར་མ་འདྲེས་པ་ལྟར་ལས་བྱེད་པ་པོ་དགེ་མི་དགེའི་སེམས་ལས་བདེ་སྡུག་ཐམས་ཅད་འབྱུང་བའོ། །སྡོམ་པ་སོ་སོའི་སྤང་བླང་གི་མཚམས་གླེང་བར་བྱེད་པའི་གཞི་ལྡོག་པའི་སྟེང་ནས་འཇོག་དགོས་པས་ན། ལྡོག་པ་ཡང་དང་པོ་ནས་གནས་འགྱུར་བར་འདོད་པ་དེའི་ལུགས་ལ་ནི། ལྟུང་བ་འོག་མ་ཕྱིར་བཅོས་པའི་ཐབས་མེད་དེ། དཔེར་ན་སོ་ཐར་ངོས་ནས་བྱུང་བའི་ཆོས་གོས་འབྲལ་བ་ལྟ་བུའི་ལྟུང་བ་གཅིག །སོ་ཐར་རང་ངོས་ནས་སྤང་བྲལ་སྔོན་དུ་གཏོང་བ་ལྟ་བུའི་སྒོ་ནས་འཆོས་ན། སོ་ཐར་གྱི་ལྡོག་པ་ཙམ་ཡང་གནས་འགྱུར་ཟིན་ཏེ་མེད་པས་འགལ་ལ། གོང་མ་བྱང་སྔགས་ལྟ་བུའི་ངོས་ནས་འཆོས་ན་གོང་མ་དེ་ཉིད་ལ་ལྟུང་བ་མ་བྱུང་བས་ན་ཕྱིར་བཅོས་མི་དགོས་པ་དེ་བཅོས་པའི་ཐབས་ཀྱང་མ་བཤད་དོ་ཞེས་བསྙོན་ཏེ་དེ་སྐད་བརྗོད་པར་བྱའོ། །རྒྱུད་ཚོད་དང་སྦྱར་ནས་ཉམས་སུ་ལེན་ཚུལ་བསྡུ་ན། དེ་ལ་བྱེ་བྲག་སྨྲ་བས་ལུས་ངག་གི་རྣམ་པ་རིག་བྱེད་ལས་སྐྱེས་པ་ཡིན་ཕྱིར་སྡོམ་པའི་ངོ་བོ་རྣམ་པ་རིག་བྱེད་མ་ཡིན་པའི་གཟུགས་ཅན་དུ་འདོད། མདོ་སྡེ་པ་ནི། རྒྱུད་གཞན་དང་གཞན་དུ་སྐྱེ་བ་ཅན་ནམ་གོང་འོག་ཁྱིམ་པ་ནས་བཟུང་ཡོངས་སུ་འགྱུར་བ་ཅན་དུ་འདོད། སེམས་ཙམ་པ་ནི་སྤོང་བའི་སེམས་པ་རྒྱུན་ཆགས་ས་བོན་དང་བཅས་པ་ལ་འདོད་དེ། དེ་དག་ནི་དངོས་པོ་བདེན་ཞེན་དང་ལྡན་པ་ཡིན་ལ། དབུ་མ་པ་ནི། སྟོང་ཉིད་སྙིང་རྗེ་ཐབས་མཁས་ཀྱིས་ལམ་གྱི་གྲོགས་སུ་བསྒྱུར་ནུས་པ་དང༌། གསང་སྔགས་ཀྱི་ལམ་དུ་འཁྱེར་བའི་ཐབས་ཁྱད་པར་ཅན་གྱིས་མ་ཟིན་པར་ཐེག་ཆེན་ལམ་དུ་ཞུགས་པ་ཙམ་དང༌། དབང་བསྐུར་ནོད་ཙམ་རེ་བྱས་ནས་དེ་དང་དེའི་ལམ་སློབ་པར་བྱེད་ནའང༌། གནས་འགྱུར་ཁྱད་པར་བ་ཐོབ་པའི་རྡོ་རྗེ་འཛིན་པ་ད་རུང་མིན་ཏེ། སྔགས་མེད་དུག་གིས་འཆི་བ་ལྟར་ཉོན་མོངས་ཀྱིས་བར་དུ་གཅོད་པའི་ཕྱིར་རོ། །དེས་ན་སྡོམ་པ་རྣམ་པར་དག་ཅིང་མཚན་ཉིད་པར་བྱེད་པ་ནི་འདུ་ཤེས་ཏེ་འཁོར་བ་ལས་ངེས་པར་འབྱུང་བའི་འདུ་ཤེས་ཀྱིས་སོ་ཐར་དང་གཞན་དོན་རྫོགས་བྱང་བསྒྲུབ་པའི་འདུ་ཤེས་ཀྱིས་བྱང་སྡོམ་མཚན་ཉིད་པར་འགྱུར་བ་དང༌། འདུ་ཤེས་གཉིས་པོ་དེའང་ཕུང་སོགས་ཆོས་ལ་མ་དག་པའི་མཚན་མར་བལྟ་བ་བཅས་བླང་དོར་ལ་བརྩོན་པ་ཡིན་པས་དག་བྱེད་ནི་གདན་གསུམ་ལྷ་ཡི་དཀྱིལ་འཁོར་དུ་ཤེས་ནས་བསྐྱེད་རིམ་གྱི་རྣལ་འབྱོར་ལ་རང་བྱན་ཆུབ་དགོས་པ་ཡིན་ཞིང༌། བསྐྱེད་རིམ་གྱི་ལྷ་དེ་ཉིད་གྱ་ནོམ་དུ་བལྟ་བའི་ཞེན་པ་ཡོད་ན། དེ་དག་བྱེད་རྫོགས་རིམ་ངོ་བོ་ཞེན་རྟོག་དང་བྲལ་བའི་ཡེ་ཤེས་ལ་གོམས་པ་ཚད་དུ་འཁྱོལ་ན་ནམ་མཁའ་ལ་རྡུལ་གྱིས་མི་གོས་པ་བཞིན་དུ་སྔར་གྱི་ཉོན་མོངས་རང་རྒྱུད་པས་བསྐྱེད་པའི་བཅས་པའི་ལྟུང་བ་ཆོས་ཅན་ཀུན་རྫོབ་ཀྱི་རང་བཞིན་སྐྱེ་འཇིག་ཅན་དེས་གནོད་པའི་རང་མཚན་མི་འཛིན་ཏེ། ཉོན་མོངས་དང་ལས་རང་རྒྱུད་པ་མེད་ཕྱིར་དེ་འདྲའི་གང་ཟག་དེ་ལ་རྟོགས་པ་བཟང་པོས་ཕན་བཏགས་ཏེ་ཡོན་ཏན་ཐོབ་པ་དང༌། ངན་པས་གནོད་པ་བསྐྱལ་ཏེ་གཉེན་པོའི་ཕྱོགས་ཤོར་བ་སྟེ་ཉམས་པར་གྱུར་པ་གཉིས་ཀ་མེད་དོ། །དེ་ཡང་འདི་ལྟར་ཐེག་པ་ལ་རིམ་ཞུགས་ཀྱི་གང་ཟག་རྣམས་ལ་དགོངས་ནས་སྟོན་པས་སྡོམ་པ་གསུམ་གྱི་བཅས་མཚམས་རྣམ་བཞག་གི་ཚུལ་ལས་དང་པོ་པའི་གནས་སྐབས་ན་ཐར་པའི་གེགས་སུ་གྱུར་པའི་ཉོན་མོངས་དང༌། དེས་བསྐྱེད་པའི་སྒོ་གསུམ་གྱི་ཁ་ན་མ་ཐོ་སྡོམ་པའི་ཕྱིར། ཐོག་མར་སོ་ཐར་གྱི་བསླབ་ཁྲིམས་གཞན་ཕན་གྱི་གེགས་རང་དོན་ཡིད་བྱེད་དང༌། དེས་བསྐྱེད་པའི་སྒོ་གསུམ་གྱི་ལས་རྣམས་སྡོམ་བྱེད་ཀྱི་ཐབས་སུ་བར་དུ་བྱང་སེམས་ཀྱི་བསླབ་ཚུལ་བསྟན་ཅིང༌། དེ་གོམས་ནས་བསམ་སྦྱོར་གཞན་དོན་དུ་འགྱུར་བའི་ཚེ་གཞན་དོན་འབད་མེད་མྱུར་དུ་བསྒྲུབ་ནུས་པའི་གེགས་རྐྱེན་སྒོ་གསུམ་ཐ་མལ་དུ་བཟུང་ནས་འཁོར་བར་འཁྲུལ་འཛིན་སྡོམ་ཕྱིར་མཐའ་མར་རིག་འཛིན་སྔགས་སྡོམ་སྟེ། ནད་པ་ལ་སྨན་ལྟར་རིམ་གྱིས་ཐོག་མཐའ་བར་དུ་འགལ་བར་མི་གནས་པའི་སྡོམ་པ་གསུམ་གྱི་ངོ་བོ་ནི་རྟེན་ཅིང་འབྲེལ་བར་འབྱུང་བ་ཀུན་རྫོབ་པའི་རང་བཞིན་སེམས་དང་སེམས་བྱུང་གི་ངང་ཚུལ་ཡིན་པས་གནས་སྐབས་འདུ་ཤེས་ཇེ་བཟང་དུ་སོང་བའི་གནས་འགྱུར་ཙམ་དང༌། མཐར་འདུས་བྱས་སེམས་སྣང་གི་ཆ་ཐམས་ཅད་འདུས་མ་བྱས་པའི་ཡེ་ཤེས་སུ་གནས་འགྱུར་བ་ནི་གྲུབ་པ་ཡིན་ནོ། །ད་ལྟའི་གང་ཟག་ཕལ་མོ་ཆེ་ནི་ཐོས་བསམ་སྒོམ་པ་ལེགས་པར་མི་འབྱོངས་བས་གཞི་རང་ཉིད་སོགས་ལ་དང༌། བསམ་པ་ཆང་སྲེད་སོགས་རང་རྒྱུད་ལ་ཡོད་པའི་གནང་བཀག་གི་ཕྱོགས་གཉིས་ཀ་ལ་བདེན་ཞེན་མངོན་གྱུར་དུ་ལྡན་པའི་ཕྱིར་ལྷར་སྣང་ཐབས་ཤེས་ཟུང་འབྲེལ་གྱི་ཉམས་ལེན་ལ་མོས་པ་ལམ་བྱེད་ཀྱི་སྒོ་ནས་སྤྱོད་པའི་སྡོམ་པ་གསུམ་ལྡན་གྱི་གང་ཟག་དེ་ལ། སྡོམ་པ་གསུམ་པོ་ཉམས་རྐྱེན་དང་གཏོང་རྒྱུ་མ་བྱུང་བར་སོ་སོར་གནས་པའི་ཚེ་ན། ལྡོག་པ་བྱེ་བྲག་པ་སོ་སོ་ཡོད་ལ། བསྲུང་ནའང་གསུམ་པོའི་སྤང་བླང་གནས་ཐམས་ཅད་མཉམ་དུ་བསྲེས་ནས་འཆོལ་བར་བསྲུང་དགོས་ཤིང༌། དེ་ལྟར་བསྲུང་བའི་སྒོ་ནས་སྐྱོན་མེད་པར་ལྡན་ན་འོག་མ་རང་རང་ས་ནས་བསྲུང་བས་གོང་མའི་ངོ་བོ་ཡར་ལྡན་དུ་གྲུབ་ལ། འཆོས་དགོས་ན་སྡོམ་པ་གསུམ་པོ་རང་ས་ནས་ཉམས་པའི་ལྟུང་བ་དེ་ཁོལ་བུར་ཕྱུང་བའི་རང་རང་གི་ས་ནས་ཇི་སྐད་བཤད་པའི་སྒོ་ནས་ཕྱིར་བཅོས་ན་རྣམ་པར་དག་པ་འགྲུབ་བོ། །ཅིའི་ཕྱིར་ཞེ་ན། ཉེས་པ་བསྐྱེད་ན་གཟུགས་བརྙན་སོགས་ལ་ཆགས་སྲེད་ཀྱིས་ཆང་འཐུང་ལྟ་བུ་སྐྱོན་དང༌། ཕྲག་དོག་གི་ཆོས་འཆད་པ་སོགས་ཡོན་ཏན་གང་ལྟར་སྣང་ཡང་འགོག་གོ །རྒྱུ་དགེ་བ་དང་འབྲས་བུ་ཡོན་ཏན་བསྐྱེད་པར་བྱེད་ན་གཟུགས་བརྙན་ཕན་སེམས་ཀྱིས་བརྡུང་བརྡེག་བྱེད་བ་སོགས་སྐྱོན་ལྟར་སྣང་བ་དང༌། ཕན་སེམས་ཀྱིས་སྦྱིན་སོགས་གཏོང་བ་ལྟ་བུ་གང་ཡིན་ཀྱང་སྤྱོད་པར་གནང་བའི་ཕྱིར། གནང་བཀག་གི་བྱེ་བྲག་འཚམས་པར་བྱེད་ཀྱི་ཚིག་གི་ཕྱོགས་གཅིག་ཁོ་ནའི་ལམ་ན་གནས་པ་མིན་ཏེ་གང་ཟག་རྒྱུད་མཐོ་དམན་གྱི་བྱེ་བྲག་དང་འབྲེལ་ནས་གནང་བཀག་གི་མཚམས་ལེགས་པར་གྲུབ་པའོ། །གང་ཟག་གཅིག་འཚང་རྒྱ་བའི་ཐབས་ཚང་ལ་མ་ནོར་བ་ནི། ཕ་རོལ་ཕྱིན་པ་དྲུག་དང་ཚོགས་གཉིས་ཀྱི་ཤེས་རབ་ཏེ་དམིགས་རྣམ་དང་བཅས་བསྒྲུབ་པའི་ཆ་བསོད་ནམས་དང༌། རང་རང་གི་འཁོར་གསུམ་ལ་བདེན་ཞེན་གྱི་རྟོག་པ་མེད་པའི་ཡེ་ཤེས་ཀྱི་ཚོགས་སོགས་ཉན་རང་དང་ཐུན་མིན་ཡོན་ཏན་རང་རྒྱུད་ལ་སྔར་མ་སྐྱེས་པ་ཐབས་དང་རྟེན་འབྲེལ་དུ་མས་བསྐྱེད་པར་བྱེད་པ་ནི་གལ་ཆེ་སྟེ། བྱང་སྡོམ་ལེན་སྐབས། རིམ་པ་བཞིན་དུ་བསླབ་པར་བགྱི། །ཞེས་པ་ལྟར་དང༌། སྔར་སྐྱེས་པ་སླར་གོང་འཕེལ་དུ་སྤེལ་བ་ལ་དགེ་བ་ཆོས་སྡུད་ཀྱི་ཚུལ་ཁྲིམས་ཞེས་བྱ་ལ། བསླབ་པ་གསུམ་གྱི་ནང་ནས་སེམས་ཀྱི་བསླབ་པས་བསྡུས་ཏེ། གཏོང་བ་སོགས་ཕྱིན་དྲུག་རང་རང་གི་ངོ་བོ་གྱུར་བའི་དགེ་སེམས་རྩེ་གཅིག་པ་ཡིན་པའི་ཕྱིར་རོ། །བྱམས་དང་སྙིང་རྗེས་ཟིན་པའི་སྦྱིན་གཏོང་དང་ཐོས་བསམ་ལ་སོགས་པའི་དགེ་བ་གཅིག་ལ་ནི་དྲུག་ཀ་ཚང་བ་ཡིན་ཏེ། གནས་སྐབས་གང་དུ་སེམས་ཅན་ཐམས་ཅད་ཀྱི་དོན་ལ་དམིགས་ནས་བྱེད་པ་དེ་ནི་སྦྱིན་པ་ཡིན་ཏེ་འབྲས་བུ་ལ་བདག་འཛིན་དང་བྲལ་བའི་ཕྱིར་རོ། །དེ་ལ་རང་དོན་ཡིད་བྱེད་ཀྱི་འདོད་བློ་མེད་པ་ཚུལ་ཁྲིམས་ཡིན་ལ། གཞན་དོན་གང་ལའང་སྐྱོ་ངལ་དང་འཁྲུགས་པ་མེད་པ་བཟོད་པའོ། །བསྒྲུབ་བྱ་དེའི་ཡོན་ཏན་མཐོང་ནས་ལྷག་པར་སྤྲོ་ཞིང་འཇུག་པ་བརྩོན་འགྲུས་ཡིན་ཏེ་དགེ་ལ་སྤྲོ་ཕྱིར་རོ། །སེམས་ཅན་དོན་ལ་དམིགས་པ་རྩེ་གཅིག་པ་ནི་བསམ་གཏན་ཡིན་ཏེ་གཞན་དུ་མ་གཡེང་བ་དང༌། འཁོར་གསུམ་གྱི་དངོས་པོ་བདེན་འཛིན་གྱི་མཚན་མར་ཞེན་པ་སྤངས་པ་ཤེས་རབ་སྟེ། རྟེན་འབྲེལ་གྱི་ཆོས་ལ་ཁྱད་དུ་མི་གསོད་པ་བླང་དོར་ཞེན་འཛིན་བྲལ་བའི་ཕྱིར་རོ། །དེས་ན་བསྒྲུབ་བྱའི་དགེ་བ་དེའི་ངོ་བོར་ཕ་རོལ་ཏུ་ཕྱིན་པ་དྲུག་ཀ་ཚང་བ་དེ་བཞིན་དུ་རྟག་པར་ཐབས་ཤེས་དེ་ལྟ་བུས་ཟིན་ན་སྒོ་གསུམ་དགེ་ཚོགས་ཀྱི་བྱ་བ་ཐམས་ཅད་ཕྱིན་དྲུག་དང་ནམ་ཡང་འདུ་འབྲལ་མེད་ཅིང་བྱང་ཆུབ་བསྒྲུབ་པ་ལ་ཚེགས་མེད་པའོ། །དེར་མ་ཟད་བྱང་ཆུབ་སེམས་དཔའ་རྣམས་ཟ་ཉལ་འགྲོ་འདུག་གི་སྤྱོད་ལམ་ལུང་མ་བསྟན་པ་རྣམ་པ་བཞི་ཀུན་ལ་དྲན་ཤེས་དང་ལྡན་པས། སྤྱོད་ཡུལ་གང་ལ་འཇུག་ཀྱང་དེ་དང་རིགས་མཐུན་སྨོན་ལམ་འདེབས་པའི་སྒོ་ནས་ཡོངས་སུ་དག་པའི་དགེ་ཚོགས་ཀྱི་ནུས་པ་བརྟན་པར་གྱུར་ཚེ་ཐ་ན་གོམ་པའི་འདེགས་འཇོག་ཚུན་ཆད་སྒོ་གསུམ་གྱི་བྱ་བ་ཅི་བྱས་པ་དག་ཀྱང་ཕྱིན་དྲུག་གི་ལམ་ལ་ཆེད་དུ་རྩོལ་མེད་འཇུག་ཅིང་ཐབས་མཁས་པ་དང་ལྡན་པས་ཚོགས་རྫོགས་ཤིན་ཏུ་མྱུར་བ་ཡིན་ནོ། །དེ་དག་གི་བསླབ་ཚུལ་གཙོ་ཆེ་བའི་དབང་དུ་ནི་ལས་དང་པོ་པས་བསྲུང་བ། མོས་སྤྱོད་པས་དག་པ། མ་དག་ས་བདུན་ལ་གནས་པས་བཏང་བ། དག་ས་ལ་གནས་པས་སྤེལ་བའི་ཚུལ་ལ་བསླབ་པར་གསུངས་སོ། །རྒྱལ་སྲས་ཐབས་ལ་མཁས་ཤིང་རྫོགས་སྨིན་སྦྱངས་གསུམ་ཚད་ཕྱིན་པས་དངོས་སུ་སློང་མོ་བ་ལ་སྦྱིན་པ་གཏོང་བ་སོགས་སམ། བརྒྱུད་མ་ནས་ཆོས་བཤད་སྦྱིན་གཏོང་དགེ་བ་ལ་བསྐུལ་བ་སོགས་སེམས་ཅན་ཀུན་ལ་གནས་སྐབས་དང་མཐར་ཐུག་གི་ཕན་པ་ལྷུར་བྱེད་ཅིང༌། ཟང་ཟིང་སྦྱིན་པ་དང༌། བློ་རིམ་དང་འཚམས་པར་ཆོས་སྙན་པར་སྨྲ་བ་དང༌། དོན་ནམ་མངོན་རྟོགས་ལ་སྤྱོད་དུ་འཇུག་པ་དང༌། རང་ཡང་དོན་མཐུན་པར་སྤྱོད་པ་སྟེ་བསྡུ་དངོས་བཞི་དང༌། དེའི་གྲོགས་རང་རྒྱུད་ལ་དགེ་བའི་ཆོས་མཐའ་དག་ཡོངས་སུ་སྡུད་པའི་ཚུལ་ཁྲིམས་ཀྱིས་ཕྱུག་ན་གཏན་པ་མེད་པའི་མཆོད་སྦྱིན་གྱི་སྒོ་འཕར་ཕྱེས་པ་ལྟར་གཞན་དོན་གོ་སྐབས་ཡངས་པ་ཡིན་ནོ། །གཞན་ལ་ཕན་པའི་གཞི་གང་ལ་བརྟག་པ་དྲུག་ཏུ་གསུངས་པ་སྟེ། བདག་དང༌། གཞན་དང༌། ཟང་ཟིང་གིས་ཕོངས་པ་དང༌། ཟང་ཟིང་གིས་འབྱོར་པ་དང༌། ཆོས་ཀྱི་ཕོངས་པ་དང༌། ཆོས་ཀྱིས་འབྱོར་པ་སྟེ་གནས་དྲུག་པོ་དེའང་བདག་གཞན་ནི་ཆོས་དང་ཟང་ཟིང་གིས་འབྱོར་རྒུད་ཀྱི་གཞི་ཡིན་པས་གཞན་བཞི་པོ་ཡང་དེའི་ཁོངས་སུ་འདུ་ལ། གཉིས་པོའང་རང་གི་ཆོས་ལ་འབྱོར་པ་དང་རྒུད་པ་བརྟག་པར་འདུ་སྟེ། རང་ཉིད་ལུང་རྟོགས་ཀྱི་ཡོན་ཏན་ཡོད་ཅིང་འདུ་འཛི་དང་རྣམ་གཡེང་སོགས་ཀྱིས་རང་ཆོས་ལམ་ལས་མ་ཉམས་པར་འགྱུར་བ་ཤེས་ན་གཞན་དོན་གཙོ་བོར་བྱ་དགོས་ལ། གཞན་དོན་བྱས་ཀྱང་གཟུགས་བརྙན་ཙམ་དུ་སོང་ནས་གཞན་ལ་ཕན་མི་ཐོགས་པའི་སྟེང་རང་དོན་བསླབ་གསུམ་གྱི་ཡོན་ཏན་ཉམས་ཏེ་ཚུལ་ཁྲིམས་འཆལ། ཏིང་འཛིན་གཡེལ། ཤེས་རབ་རྨོངས་པ་ལ་སོགས་པའི་ཉེས་པས་གནོད་པར་འགྱུར་བས། སོ་སྐྱེ་ལས་དང་པོ་པས་རང་གི་འཁྲུལ་པའི་ཀུན་རྟོག་ཉོན་མོངས་ལ་དྲན་ཤེས་ཀྱིས་བརྟགས་ནས་ཉོན་མོངས་དེ་དག་སྤོང་བྱེད་ཀྱི་གཉེན་པོའི་སྟོབས་གོང་དུ་བསྐྱེད་པའི་ཐབས་ལ་གཙོ་བོར་བསླབ་ན་གཞན་ཕན་ཐབས་ཀྱང་དོན་གྱིས་བྱས་པ་ཡིན་ནོ། །གཞན་བསྟན་འགྲོ་ལ་ཕན་པ་རླབས་ཆེན་འགྲུབ་སྲིད་ན་ནི། རང་དོན་ཙམ་དང་གཞན་དོན་ཉི་ཚེ་བ་ཙམ་ལས་མེད་པའི་འོག་མའི་བསླབ་སྡོམ་ལྟ་བུ་བཅས་པ་ཆུང་ངུ་རྣམས་བག་ཡངས་སུ་འཇོག་པར་གནང་བའི་སྐབས་ཡོད་དོ། །དཔེར་ན་ཆེན་པོ་གྲོང་ཁྱེར་གྱི་ཕྱིར་ན་ཆུང་ངུ་གྲོང་བརྡལ་ལྟ་བུ་དང༌། བདག་གི་ལུས་སྲོག་གི་ཕྱིར་སྡོད་གནས་ཀྱི་ས་གཞན་ལ་གཏོང་བ་དང༌། ལུང་རྟོགས་ཀྱི་ཆོས་རྒྱ་ཆེར་དར་ཕྱིར་བདག་ཀྱང་གཏོང་བ་སོགས་གནང་བ་ཡིན་ནོ། །བསླབ་ཁྲིམས་ལ་གནས་པའི་སྐབས་འདི་ན་གྲོགས་སམ་འཁོར་ནི་འདི་ཡིན་ཏེ། མི་མཇེད་པ་སྟེ་སྡུག་བསྔལ་སོགས་རྐྱེན་ཐམས་ཅད་ཐེག་པས་བཟོད་པའི་ངོ་བོ་ནི་ས་གཞི་བཟང་པོ་ལྟ་བུ་ལ། ཚུལ་ཁྲིམས་གསུམ་གྱི་རང་བཞིན་ཆོས་ཀྱི་མེ་ཏོག་གི་ཚལ་ལ་ཡོན་ཏན་གྱི་དྲི་བཟང་པོ་ཀུན་ནས་རྒྱས་པ་རབ་ཏུ་བསྲུང་བའི་ར་བ་ལྟ་བུ། རང་གཞན་དོན་གཉིས་གང་ཡིན་ཀྱང་དཀའ་སྤྱད་དང་སྡུག་བསྔལ་གྱི་ཁུར་ཆེན་པོ་ཅི་བྱུང་བ་དེ་ཉིད་དང་དུ་ལེན་ཤིང་བཟོད་པ་དང༌། ཕ་རོལ་པོས་གནོད་འཚེ་ཅི་བྱས་ཀྱང་ཇི་མི་སྙམ་པའི་བཟོད་པ་དང༌། སྟོང་ཉིད་སོགས་ཟབ་མོའི་དོན་ལ་མི་སྐྲག་པ་སྟེ་རྣམ་པ་གསུམ་མོ། །ཡིད་ནི་ཤིན་ཏུ་རེངས་པ་སྟེ་གྱོང་ཤིང་མ་རུངས་པར་བྱ་བའི་ཞེ་སྡང་གི་སྡིག་པའི་མངོན་རྟོགས་ནི་དགའ་བདེ་སྒྲིབ་པའི་མུན་པ་ལྟ་བུ་དང༌། གསོད་པ་དང་བརྡུང་བརྡེག་སོགས་ཉེས་པ་སྣ་ཚོགས་པའི་འཁྲི་ཤིང་ཅན་ཡིན་ལ། དེས་ནི་ཐར་དུ་མེད་པའི་དམྱལ་བར་འཕེན་ཞིང་དེར་འཛུལ་བ་ལ་སྐྲག་པ་རྣམས། ནམ་ཡང་ཁྲོ་བའི་རྣམ་རྟོག་སེམས་ལ་སྐྱེ་བའི་གོ་སྐབས་དབྱེ་བར་མི་བགྱིད་དེ། སྤྱོད་འཇུག་ལས། ཞེ་སྡང་ལྟ་བུའི་སྡིག་པ་མེད། །བཟོད་པ་ལྟ་བུའི་དཀའ་ཐུབ་མེད། །དེ་བས་བཟོད་ལ་ནན་ཏན་ཏུ། །སྣ་ཚོགས་ཚུལ་གྱིས་བསྒོམ་པར་བྱ། ཞེས་སོ། །གནོད་པའི་ཡུལ་ནི་དཔག་ཏུ་མེད་དེ། དཔེར་ན་ནགས་ཀྱི་ཚེར་མ་བསལ་གྱིས་མི་ལང་ལ་དེར་མ་ཕྱིན་ན་མི་གནོད་པ་བཞིན། གནོད་པའི་ཡུལ་དེ་དག་ཐམས་ཅད་འདུལ་གྱིས་མི་ལང་སྟེ་སླར་ཡང་ཀུན་ནས་འཕེལ་བ་ཅན་དུ་ཟད་དེ། དེ་བས་ཕན་ཚུན་མི་འདོད་པའི་བསམ་པས་འཁོན་དང༌། དེའི་དབང་གིས་ཁྲོ་བའི་ཀུན་ཀུན་རྟོག་བཟོད་པར་དཀའ་བས་རང་གཞན་ཀུན་གྱི་རྒྱུད་མ་རུངས་པར་བྱེད་པ་པོ་ནི། ཐོག་མར་ཡུལ་ལ་མི་འདོད་པའི་རྣམ་པར་བཟུང་ནས་ཉེ་བར་ལེན་པའི་སེམས་ཡིད་མི་བདེ་བ་དེ་ཉིད་གཅིག་པུ་ཤེད་མ་རྒྱས་གོང་དུ་ཕག་སྣ་གཏུན་བརྡུང་དང་ཀོང་བུ་དྲོ་ཕྱིས་ཞེས་པའི་དཔེ་ལྟར་བཏུལ་བར་བྱས་ན། བཟོད་པའི་དཀའ་ཐུབ་ཅེས་མི་ཐུབ་ཁུར་ཆེན་པོ་དེ་ཡང་བདག་ལ་མཛའ་བར་འགྱུར་རོ། །ཕ་རོལ་པོས་སྐྱོན་མཚང་སྨྲས་ན། ཚིག་དེ་དང༌། རང་གི་རྣ་བའི་དབང་པོ་དང༌། ཤེས་པ་སྟེ་གསུམ་པོ་ཕྲད་ཅིང་རེག་པའི་ཚོར་བ་ཤིན་ཏུ་རྩུབ་པའི་རང་བཞིན་དུ་ཚིག་གི་རྣམ་པ་དེ་ཤར་ནས། དཔེར་ན་མདས་སྐྱེས་བུའི་གནད་ལ་བསྣུན་པ་ལྟར་སྙིང་ཚལ་པར་འགས་པ་ཙམ་དུ་སྡུག་བསྔལ་ནས་མི་བཟོད་པ་དྲག་པོ་སྐྱེ་ནའང༌། བརྟག་ནས་ཚིག་དེ་བྲག་ཅ་བཞིན་ཡིན་པས་སྙིང་ལ་ཟུག་པ་ལྟར་སྣང་བ་དེ་ལ་དངོས་སུ་ཟུག་རྔུ་ཞིག་ཅང་མཆིའམ་སྟེ་ཅང་མེད་དོ། །འོ་ན་ཅི་ཞེ་ན། ཚིག་དེ་ཉིད་རང་ལ་གནོད་པའི་ངོ་བོར་དང་དུ་བླང་བའི་ཉེར་ལེན་སྒྲ་དོན་འདྲེས་འཛིན་གྱི་རྟོག་པས་ཡང་ཡང་མྱངས་བས་ཕན་ཚུན་གནོད་བྱ་དང་གནོད་བྱེད་རྟེན་དང་བརྟེན་པར་གྱུར་ནས་ཁོང་འཁྲུགས་བཞིན་དེས་བསྐྱེད་པའི་སྡུག་བསྔལ་གྱིས་མནར་བར་འགྱུར་བས་ན། སྲིད་པའི་གནས་འདི་ན་གནོད་པའི་རྒྱུ་ལྟར་སྣང་བའི་བརྡུང་བརྡེག་འཕྲོག་བཅོམ་ངན་སྨྲས་སོགས་སྤྱིའི་འབྲས་བུ་ལུས་སེམས་སྡུག་བསྔལ་མཐའ་ཡས་སུ་སྣང་བ་ཇི་སྙེད་ཐམས་ཅད་བདག་ཉིད་ལས་བྱུང་བ་ཡིན་ཏེ། དཔེར་ན་ཅ་ཅོའི་སྒྲ་བསྒྲགས་པ་དང་བྲག་ཅ་འབྱུང་བ་བཞིན་ཡིན་ཏེ། སྤྱིར་བདག་ཉིད་མ་བྱུང་སྟེ་གཏན་ནས་མེད་ན་ཕ་རོལ་པོས་གནོད་པ་བྱ་བའི་ཡུལ་མེད་པས། རང་གིས་སྔོན་བྱས་རྐྱེན་གྱིས་བོས་ལ་ལྟོས་ཤིག །བཟོད་པ་གནོད་བྱེད་ཀྱི་རྐྱེན་ལས་གྲུབ་ཕྱིར་བརྟགས་ན་གནོད་བྱེད་འདི་ནི་གནོད་པ་ཆེན་པོ་མ་ཡིན་ལ་ཕན་ཆེན་པོ་ཡིན་ཏེ། གནོད་བྱེད་དགྲ་བོ་གང་ལ་བརྟེན་ནས་ཐེག་ཆེན་རྒྱ་མཚོར་བགྲོད་པའི་བཟོད་པའི་གྲུ་གཟིངས་དང༌། དེ་ལ་བརྟེན་ནས་བྱང་ཆུབ་སེམས་ཀྱི་ནོར་བུ་རིན་པོ་ཆེ་རང་གཞན་འཕྲལ་ཡུན་གྱི་ཕན་བདེ་དམ་པའི་རྒྱུ་འཐོབ་པར་འགྱུར་བས་ན། བཟོད་པའི་རྒྱུ་དེ་དང་འདྲ་བའི་གནོད་པ་བྱེད་པའི་དགྲ་དེ་བཟོད་པའི་ཞིང་དུ་བསམ་ནས་དམ་པའི་ཆོས་ལྟར་མཆོད་པར་འོས་སོ། །ཆོས་ལ་ངེས་སེམས་ཀྱི་བཟོད་པ་བརྟགས་ཚུལ་ནི། ཤིན་ཏུ་བརྟགས་ཤིང་དཔྱད་ན་རང་ལ་གནོད་པའི་ངོ་བོ་དེ་གནོད་བྱེད་ཡུལ་གྱི་སྟེང་ན་འདུག་གམ། དེས་བྱས་པའི་ལས་ཀྱི་སྟེང་ན་འདུག་གམ། གནོད་བྱ་རང་གི་སྟེང་ན་འདུག་གམ་ཞེས་བརྟགས་ན་གཞན་གང་ནའང་མི་འདུག་སྟེ། སྔར་བཤད་པ་བཞིན་རྐྱེན་སྣ་ཚོགས་ཚོགས་པ་ན་རང་གི་ཉེར་ལེན་སེམས་ཀྱིས་གློ་བུར་དུ་བཟོས་པ་ཙམ་ཡིན་ལ། སེམས་དེ་ཡང་བརྟགས་ན་མཚན་ཉིད་རྒྱུན་ཆགས་སུ་འཛིན་པའི་ནུས་པ་མེད་དེ། དཔེར་ན་ཆུ་ཡི་རི་མོ་ནི་མོད་ལ་བྱུང་ཡང་མོད་ལ་མེད་པ་བཞིན། རྣམ་པར་རྟོག་པ་དང་བཅས་པའི་ཁྲོ་གཉེར་རྩུབ་མོ་རང་རྐྱ་མ་ཐུབ་པར་ཞིག་པའི་མོད་ལ་སེམས་ནམ་མཁའ་བཞིན་དུ་རྣམ་པར་དག་པ་རྣམ་རྟོག་ཐམས་ཅད་དང་བྲལ་བ་ཡེ་སྟོང་ཆེན་པོར་གནས་པ་ལ་ཐོབ་ཤོར་རམ་བླང་དོར་གང་ཡང་མེད་པ་དེའི་ངང་བསྐྱངས་ཏེ་རྐྱེན་དབང་དུ་མ་སོང་བར་བྱ་བ་འདི་ཡང་ཟབ་མོ་དབུ་མའི་ལམ་གྱིས་ཉོན་མོངས་ཆོས་ཉིད་དུ་སྦྱང་ཞེས་པ་དེ་ཡིན་ནོ། །གང་གི་ཕྱིར་ན་བཟོད་པའི་དཀའ་ཐུབ་ལ་གསུམ་སྟེ། ལས་དཀའ་བ་ལ་དང་ལེན་དང༌། གནོད་བྱེད་ལ་ཇི་མི་སྙམ་པ་དང༌། ཆོས་ཉིད་ལ་ངེས་པར་སེམས་པ་སྟེ་འོག་མ་འདི་མེད་ན་གོང་མ་གཉིས་ཡོད་ཀྱང་ལམ་ཙམ་ལས་འཕགས་མི་ནུས་པས་དེ་རྣམས་ཉམས་ཤིང་མེད་ན་སྦྱིན་སོགས་ཕ་རོལ་ཕྱིན་པ་གཞན་ལྔ་ཡང༌། དཔེར་ན་ཕྱི་མཐའ་ཐམས་ཅད་དགྲ་རྐུན་གཅན་གཟན་དུ་མ་ཡིས་བསྐོར་བའི་བཤུལ་ལམ་ལ་དཔུང་གཉེན་མེད་པར་ཞུགས་ཏེ་སོང་ན་རང་འདོད་པའི་སར་ཕྱིན་དཀའ་བ་དེ་བཞིན་དུ་སྦྱིན་སོགས་ལ་བརྟེན་ནས་ལམ་དང་འབྲས་བུའི་ཡོན་ཏན་ཐམས་ཅད་བསྒྲུབ་པར་འདོད་ཀྱང་ཇི་ལྟར་འདོད་པའི་དོན་དེ་ཐོབ་པའི་གནས་སུ་ཕྱིན་དཀའ་བས། རང་བསྐུལ་རང་ལ་གདབ་ནས་བློ་སྟོབས་བསྐྱེད་དེ་བསྒོམ་པར་བྱའོ། །དུས་སྐད་ཅིག་ཙམ་ཡང་ཐོས་བསམ་དང་བསླབ་གསུམ་གྱི་ཉམས་ལེན་དེ་ལས་གཡོལ་བ་མེད་པའི་བརྩོན་འགྲུས་ཀྱིས་རང་དབང་ཉིད་དུ་བསྒྲུབ་བྱ་དགེ་བའི་ཆོས་མཐའ་དག །དཔེར་ན་སྐྱེད་མོས་ཚལ་དུ་སྒོ་ང་ལ་ཡིད་གདུང་བའི་ངང་པ་ཁྱོ་ཤུག་བུའི་ནུས་པ་རྫོགས་ཚེ་ཕྱི་བཤོལ་མེད་པར་འགྲོ་བ་བཞིན་དུ། ལེ་ལོ་གསུམ་པོའི་གཡང་ས་ལ་དགེ་བའི་ཕྱོགས་བསྐྱུད་པ་སྟེ་བརྗེད་ནས་ལུས་པ་མེད་པར་འཇུག་པ་གལ་ཆེའོ། །བྱ་བ་ངན་པ་ནི་འཇིག་རྟེན་གྱི་བྱ་བཞག་སྣ་ཚོགས་ལ་ཞེན་ཅིང་སྐྱེ་བོ་མང་པོའི་འདུ་ལོང་དང་འཛི་བ་ནི་འཛིངས་པ་སྟེ། གཉེན་ལ་ཆགས་པས་འབྲེལ། དགྲ་ལ་སྡང་བས་འབྲེལ། ལོངས་སྤྱོད་གསོག་བསྲུང་སྤེལ་བའི་ལས་ཀྱིས་འབྲེལ་ཏེ་དེ་དག་གི་གསེབ་ནས་མི་ཐར་བ་ནི། དཔེར་ན་སྲིན་བུའི་ཁ་ཆུའི་ཐག་པས་རང་ཉིད་དཀྲིས་པ་ལྟ་བུ་དང༌། དཀའ་བ་ལ་སྒྱིད་ལུག་པའི་ལེ་ལོའི་མཐུས་ནོན་ཏེ་དགེ་བ་ལ་སྦྱོར་བའི་ནུས་པའང་བཏང་སྟེ་ཕྱི་བཤོལ་དུ་ལུས་པ་དང༌། བདག་ལྟ་བུས་ག་ལ་ནུས་སྙམ་ནས་བདག་ཉིད་བརྙས་ནས་སེམས་ཞུམ་པའི་བརྟུལ་ཞུགས་དང་དུ་བླངས་པ་དེས་ནི་རང་གི་ཆོས་སྐལ་རང་གིས་བཅད་པ་ཡིན་ནོ། །དེས་ན་དེ་འདྲའི་གང་ཟག་ལེ་ལོ་གསུམ་གྱི་ཉེས་པའི་རྒྱ་མཚོ་བྱིང་བ་ལས་ཐར་པའི་གོ་སྐབས་མེད་དེ། དཔེར་ན་ལྕགས་གཟེར་ཞིག་པའི་གཟིངས་ལ་ཞོན་ན་ཆུ་ངོགས་སུ་མི་ཕྱིན་པ་བཞིན་ནོ། །ཐེག་པ་ཆེན་པོའི་ལམ་གྱི་གེགས་སུ་གྱུར་པའི་བདུད་བཞི་ཡི་དཔུང་ཐམས་ཅད་འཇོམས་པར་བྱེད་པ་དཔའོ་གཡུལ་ལས་རྒྱལ་བར་བྱེད་པ་བློ་སྙིང་སྟོབས་ཀྱི་གོ་ཆ་རྐྱེན་གང་གིས་ཀྱང་མི་ཤིགས་པའི་བརྩོན་འགྲུས་དང༌། ས་བཅུའི་ངོ་བོ་མཐར་ཕྱིན་པར་བྱེད་པ་སློབ་ལམ་བཞི་པོའི་འགྲོས་ཀྱིས་ཚུལ་ཁྲིམས་གསུམ་ལ་རིམ་གྱིས་སྦྱོར་བའི་སྒོ་ནས་ལམ་ལྔ་མཐར་ཕྱིན་པར་བྱེད་པའི་བརྩོན་འགྲུས་དང༌། །སྔར་དམ་བཅས་ནས་བརྩོན་པའི་བསམ་སྦྱོར་གཉིས་པོ་དེ་སླར་ཇེ་ཞན་དུ་སོང་ནས་མི་འགོང་བ་དང༌། རྐྱེན་གང་གིས་ཀྱང་བར་མ་དོར་མི་ལྡོག་ཅིང༌། ལམ་གྱི་ཡོན་ཏན་གང་བྱུང་ཡང་ཆོག་ཤེས་མེད་པ་ཡི་བརྩོན་འགྲུས་ཅན་གྱིས་ནི། གནས་སྐབས་དང་མཐར་ཐུག་གི་སྨོན་པའི་དོན་ཀུན་འགྲུབ་པ་ཐེ་ཚོམ་མེད་དོ། །བདག་གི་ཚེ་འདི་ལ་ནི་ཉིན་མོའི་སྣང་བ་བཞིན་ད་ལྟ་གཉེན་བཤེས་ལོངས་སྤྱོད་ཕུན་སུམ་ཚོགས་ཀྱང༌། ཚེ་ཟད་ཚུལ་ནི་ཉི་མ་ནུབ་རིར་ཕྱོགས་པ་ལྟར་སྐད་ཅིག་སྐད་ཅིག་གིས་མཐར་གྱུར་ཏེ། མྱུར་བ་མྱུར་བར་གྲིབ་སོ་ལྟར་འཆི་བའི་མུན་ནག་གིས་ཚུར་ཚུར་གཏུགས་ཏེ་འཆི་བའི་ཚེ་ན། ལོངས་སྤྱོད་འདི་དག་གིས་འདི་བྱའོ་ཞེས་གཉེན་གྲོགས་རྣམས་ཀྱིས་ཡོ་བྱད་བགོ་བཤའ་བྱེད་ཚུལ་ཡད་ཡུད་ཙམ་མཐོང་བའི་འཁོར་བའི་བྱ་བཞག་འཇིག་རྟེན་གྱི་སྤྱོད་པ་མཚན་མོའི་རྒྱུ་སྐར་ལས་རྣམ་གྲངས་མང་བ་རྣམས་ཀྱིས་རང་ལ་སྔར་བསགས་མེད་ན། ཤུལ་མི་རྣམས་ཀྱིས་དགེ་ཚོགས་ཅི་བྱས་ཀྱང་དེ་ཡིས་བར་དོའི་འཇིགས་སྐྲག་སོགས་ལས་དབུགས་མི་ཕྱིན་ཏེ། སྤྱོད་འཇུག་ལས། གཤིན་རྗེའི་ཕོ་ཉས་ཟིན་པ་ལ། །གཉེན་གྱིས་ཅི་ཕན་བཤེས་ཅི་ཕན། །ཞེས་སོ། །ལེ་ལོའི་སྐྱོན་གྱིས་འདམ་ཆུ་ལྟ་བུའི་རྙོག་པ་དྭངས་བར་བྱེད་པའི་བརྩོན་འགྲུས་ཀྱི་གྲོགས་དང་བཅས་ནས། ལམ་གྱི་བགྲོད་ཚུལ་དལ་འབབ་སྟེ་ཁ་བབས་ཆུ་བོ་བཞི་ལྟ་བུ་ནི་ཆུ་ཕྲན་ཕྱོགས་སུ་ལྷུང་ནས་སྐམ་པའམ་འཁྱིལ་བར་སྟོན་པ་ལྟ་བུ་མ་ཡིན་པར་རྒྱ་མཚོ་ཆེན་པོར་ངང་གིས་འབབ་པ་བཞིན། རྣམ་པ་ཐམས་ཅད་ཀུན་མཁྱེན་པའི་ཡེ་ཤེས་རྒྱ་མཚོ་ཆེན་པོར་ཕྱིན་པ་དེ་སྲིད་དུ་རྟག་པར་ཐང་ལྷོད་མེད་པའི་གུས་སྦྱོར་དང་རྟག་སྦྱོར་གྱི་བརྩོན་འགྲུས་དྲག་པོས་འབྲས་བུའི་སར་གཡོ་ཞིང་མྱུར་བའི་སྒོ་ནས་བགྲོད་པའི་བརྟུལ་ཞུགས་ཉམས་པར་མི་བགྱིད་དོ། །གང་དུ་གཞི་ཐམས་ཅད་རྩྭ་ལྗང་དང་ལྡུམ་བུའི་རིགས་སྣ་ཚོགས་ཀྱིས་བཀབ་པ་ལ་རྨ་བྱའི་མགྲིན་པ་ལྟ་བུའི་ཁ་དོག་ཤིན་ཏུ་ལེགས་པའི་ནགས་ཚལ་ཡལ་འདབ་མེ་ཏོག་སྣ་ཚོགས་པས་མཛེས་པར་སྤུད་ཅིང་ཉམས་དགའ་བར་འཁྲིགས་པའི་གནས་སུ་རླུང་བསིལ་བུའི་རྐྱེན་གྱིས་དྲི་བཟང་པོའི་ངད་ཕྱོགས་ཀུན་ཏུ་ལྡང་པའི་སྨན་ལྗོངས་དེར་ནི། འབབ་ཆུ་བསིལ་བའི་སྒྲ་ཧ་ཅང་མི་རྩུབ་པ་སྙན་པར་འབབ་ཅིང༌། མཚམས་མཚམས་སུ་མཚོ་ལྟེང་ཀ་ནེ་སེང་སོགས་མུ་ཁྱུད་ཅན་ལ་ངང་པ་དང༌། དུར་པ་ལ་སོགས་པས་སྐད་སྙན་སྒྲོག་ཅིང་སྤྱོད་ལམ་ཤིན་ཏུ་ཞི་བ་མང་པོས་བསྟེན་པར་བྱས་ཤིང༌། རི་ཡི་ངོས་རྣམས་སུ་ལྟ་ན་སྡུག་པ་བྲག་རིའི་ངོས་འཇམ་ཞིང་ཁ་དོག་སྣུམ་པའི་དཀྱིལ་ན་རང་བྱུང་གི་ཕུག་པ་དང༌། སྟེང་འོག་རྣམས་སུ་བྲག་ཐེམ་དང་རི་མོ་བཀྲ་ཞིང་ཁ་དོག་ཕྱེད་པའི་དབྱིབས་ལྟ་བུའི་ཕ་གུ་དང༌། རྟ་བབས་ཀྱི་རྣམ་པ་ཅན་གྱིས་མཛེས་པའི་སྤོ་ན་བྱ་དང༌། ངོས་དང་གཤམ་རྣམས་སུ་རི་དྭགས་གཞོན་ནུ་འགྲོགས་ན་བདེ་བས་མཛེས་པ་ཡོད་དོ། །རང་བཞིན་སྙིང་ལ་དགའ་བ་བསྐྱེད་པའི་ནགས་ཚལ་ལྷ་མོ་ལྟ་བུ་གཟུགས་མཛེས་པའི་རྐེད་ཆིངས་ནི། ཤིང་བལ་གཞོན་ནུས་ལུ་གུ་རྒྱུད་དུ་སྤྲེལ་བའི་དྲྭ་ཕྱེད་གཡོ་བ་ན། འཚེ་བ་ལ་དོགས་པས་སྐྲག་པ་མིན་པའི་ཁུ་བྱུག་གི་ཚོགས་རྣམས། འཁོར་བར་སྐྱོ་བའི་གཏམ་གྱི་སྤྲིང་ཡིག་གསར་པའི་སྐད་སྙན་འགྲེམས་པར་བྱེད་དོ། །དེ་ལྟ་བུའི་ཆོས་མཐུན་གྱི་དགའ་བའི་ལོངས་སྤྱོད་མང་པོས་བརྒྱན་པའི་དབེན་གནས་དེ་རུ་གཤེགས་ཤིག་སུ་ཞིག་ན་བསམ་གཏན་བསྒོམ་པར་འདོད་པ་རྣམས་སོ། །ཅིའི་ཕྱིར་ན། འཇིག་རྟེན་གྱི་ལོངས་སྤྱོད་གློ་བུར་བ་མི་རྟག་ཅིང་སྤྲིན་གྱི་བླ་རེ་ལྟ་བུའི་ནང་ཤེད་ན། སྐྱེས་བུ་རྣམས་ཀྱི་ཚེ་བརྟན་ཅིང་སྲོག་འཚོ་བའི་རྐྱེན་དུ་ཕན་པར་རློམ་ནས་རོལ་ཞིང་སྤྱོད་ནའང༌། སྣང་བ་ཙམ་ལས་མེད་པའི་གློག་གི་འགྱུར་བ་ནི་སྐད་ཅིག་གིས་གཡོ་ཞིང་འདར་ནས་ཟད་པར་འགྱུར་བ་ལས་ཡུད་ཙམ་སྡོད་ལོང་མེད་པའི་གནས་སྐབས་ལྟ་བུ་འགྱུར་བའི་སྡུག་བསྔལ་དང༌། སྡུག་བསྔལ་གྱི་སྡུག་བསྔལ་དང༌། ཁྱབ་པ་འདུ་བྱེད་ཀྱི་སྡུག་བསྔལ་ཏེ་གསུམ་གྱི་ཆོམ་རྐུན་ལྟ་བུ་དཀྱུ་ཞིང་འགྲོ་བས་མནར་བར་བྱེད་ཅིང༌། ཁྱད་པར་འདི་ཕྱི་གཉིས་ཀར་ཕུང་ཀྲོལ་དུ་མ་སྐྱེད་པར་བྱེད་པ་ནི་དཔེར་ན་རྦ་རླབས་འཁྲུགས་པའི་ཆུ་ཀླུང་ཅ་ཅོ་ཅན་བཟློག་ཏུ་མེད་པར་རྒྱ་མཚོར་འགྲོ་བ་ལྟར། སྐྱེ་བོ་རྣམས་ལོངས་སྤྱོད་གསོག་པ་དང༌། སྲུང་བ་དང༌། སྤེལ་བ་གསུམ་གྱི་ངལ་དུབ་སོགས་སྡུག་བསྔལ་དྲག་པོས་གདུང་བའི་ངང་ལ་འདོད་པས་ཆོག་མི་ཤེས་པའི་རྣམ་རྟོག་ངན་པས་རྒྱུད་འཁྲུགས་པ་དང༌། ལོངས་སྤྱོད་འབྱོར་པ་ཅུང་ཡོད་པས་ཁེངས་ཤིང་ཕ་རོལ་ཁྱད་དུ་གསོད་པ་དང༌། དེ་ནས་ཁ་བྲི་ཡི་དོགས་ནས་འཇུངས་པ་དང༌། རང་གི་ཁ་ཟས་རྒྱན་གོས་ཙམ་ཡང་སྤྱོད་མི་བྲ་བའི་སེར་སྣས་བདས་བཞིན་ཚེ་ཡི་མཐར་གཏུགས་ནས་རྒྱུ་དེས་འབྲས་བུ་ངན་འགྲོའི་ཆུ་གཏེར་མུ་མཐའ་མེད་པར་འཁྱམས་སོ། །རྒྱུད་མི་དྲང་བའི་བསམ་པ་གྱ་གྱུ་བའི་གཡོ་དང༌། གཞན་བསླུ་སེམས་ཀྱི་སྒྱུའི་རང་བཞིན་དཔེར་ན་དབྱར་དུས་ཀྱི་ཆར་སྤྲིན་ལྟ་བུ་བརྣག་པའི་མི་དགེ་བའི་བསམ་སྦྱོར་གྱིས་རིན་ཐང་ཅན་གྱི་ལོངས་སྤྱོད་ཀྱི་དངོས་པོ་ནོར་ནི་ཇི་ཙམ་འབྱོར་བཞིན་འདི་ཕྱི་ཀུན་ཏུ་སྡུག་བསྔལ་དཔག་ཏུ་མེད་པའི་རྒྱུ་ཡིན་ནོ། །དེས་ན་ཡོ་བྱད་བསྙུངས་བ་རྣམས་ལ་དགྲ་རྐུན་འཚེ་བས་སྤང་ཞིང༌། ཆོག་ཤེས་ཐོབ་པ་ནི་འབྱོར་པའི་རྩེ་མོར་འགྲོ་བ་ཡིན་ནོ། །སོ་སོའི་སྐྱེ་བོའི་ནང་ནས་ཕལ་བ་བླུན་པོའི་རང་བཞིན་ནི་བྱིས་པ་མ་རབས་ཞིག་སྟེ། འདི་ལྟར་བྱིས་པ་རྣམས་ཀྱི་རྒྱུད་ནི་བསམ་སྦྱོར་ཕྱི་ན་ཅི་ལོག་གི་ཉེས་པའི་སྤྲིན་གྱིས་འཁྲིགས་པ་ཡིན་ཏེ། བདག་ཉིད་བསྟོད་ཅིང་གཞན་ལ་མི་སྙན་པར་སྒྲོག་པ་དང༌། ཉོན་མོངས་པའི་དུག་གིས་ཁོག་པ་གང་ཞིང་བསམ་སྦྱོར་སྦྲུལ་གདུག་གི་ལྕེ་བཞིན་བསམ་སྦྱོར་རྩུབ་མོའི་ཉམས་བག་ལ་རྟག་ཏུ་བསྟེན་ནས་སྡིག་པ་མི་དགེ་བ་འཕེལ་བའི་འཇིག་རྟེན་པའི་དཔལ་འབྱོར་གཡོ་བ་སྙིང་པོ་མེད་པ་གང་ལའང་རྟག་པར་སེམས་ནས། དགེ་བའི་བཤེས་གཉེན་སོགས་ཀྱིས་ཕན་པ་ཅི་བྱས་པ་ལ་ཡང་དྲིན་དུ་མི་གཟོ་ཞིང༌། ཆོས་མཐུན་གྱི་བསམ་སྦྱོར་བཟང་པོ་ཅི་བྱས་ཀྱང་མགུ་བའི་གཟུགས་བརྙན་ཕྱིན་ཅི་ལོག་ཏུ་འཁྱོག་སྟེ་ཁྲོ་ནས་མི་དགའ་བའི་རྣམ་འགྱུར་སྟོན་ཏོ། །འཁོན་གྱི་ཟུག་རྔུ་མེ་ལྕེ་ལྟ་བུ་ཅུང་ཟད་ཡོད་པའང་ཕྲ་མའི་ངག་སྦྱོར་རླུང་ཆེན་དག་གིས་བསྐྱོད་དེ་འཐབ་པར་བྱེད་པ་དང༌། རང་བཞིན་མི་བརྟན་ཅིང་སྤྲེའུ་བཞིན་དུ་སྤྱོད་པ་ཐམས་ཅད་ཆོས་དང་འགལ་བས་གནོད་པའི་རྒྱུ་མི་དགེ་བ་སྣ་ཚོགས་པ་སྟེར་བ། ཆུ་སྲིན་ཁ་གདངས་པའི་ནང་སྲོག་ཆགས་སྣ་ཚོགས་རྔུབ་སྟེ་ལྟོ་བར་ཆུད་པ་བཞིན་དུ་སྡིག་པའི་ལས་སྣ་ཚོགས་བསྒྲུབ་པའི་སེམས་ཀྱི་ལྟོ་བ་ཡངས་པ། དུག་རླངས་འཐུལ་བའི་སྦྲུལ་གདུག་བཞིན་དུ་སུ་དང་ཕྲད་པ་འཇོམས་ཤིང༌། ཁོང་ཁྲོ་ལ་སོགས་པའི་དབང་གིས་མེ་ཆེན་པོ་བཞིན་དུ་རང་བཞིན་དུ་རང་གཞན་གྱི་རྒྱུད་ཀྱི་དགེ་བའི་ལྗོན་ཤིང་བཟང་པོ་ཐམས་ཅད་སྐད་ཅིག་ཡུད་ཙམ་ལ་སྲེག་པར་འགྱུར་བའི་ཕྱིར་ན། ཐ་ཆད་ཀྱི་བྱིས་པའི་གྲོགས་པོ་ངན་པ་ལས་རིང་དུ་བསྲིང་བར་བྱའོ། །འདོད་པའི་ཡུལ་གཟུགས་སོགས་དྲུག་ལ་དབང་པོ་དྲུག་གཡོ་ཞིང་སྤྱོད་པ་ནི། རྣོ་མྱུར་དུག་ལས་ཐུ་སྟེ་དུག་གིས་སྲོག་གཅིག་ཁོ་ནར་ཉེན་ཆེ་ཞིང་སྔགས་སྨན་རྣམས་ཀྱིས་མ་ཟིན་ན་འདོར་ལ། འདིས་ནི་ཚེ་རབས་སུ་ངན་འགྲོར་མནར་བའི་རྣམ་སྨིན་ཤིན་ཏུ་རྩུབ་སྟེ། དུག་ནི་སྤྱད་པའི་མོད་ལ་བདའ་བའི་རོ་མངར་བ་སོགས་བྲོ་ཞིང་མྱོང་ཟིན་ཚེ་སྡུག་བསྔལ་ན་ཡང་སྔགས་སྨན་སོགས་ཀྱིས་གསོ་རུང་ཞིང༌། ཡུལ་ལ་སྤྱད་པའི་ཉེས་པས་ནི་ཚེ་རབས་གཅིག་མིན་ལ་སྐྱེ་བ་མང་པོའི་དུས་ཐམས་ཅད་དུ་སྡུག་བསྔལ་ཞིང༌། ཉེས་པ་དེ་ནི་གསང་སྔགས་མཆོག་དང་བཞི་བརྒྱ་རྩ་བཞི་སེལ་བའི་སྨན་གྱིས་ཀྱང་གསོར་མི་རུང་བས། སོ་སྐྱེ་གང་ཞིག་ཡུལ་གྱི་འདོད་ཡོན་དུག་གིས་མྱོས་པའི་སེམས་ཀྱི་གླང་པོ་ཆེ་ལྷག་མཐོང་གིས་མ་དུལ་བར་དུ། སླུ་བར་བྱེད་པའི་ཡུལ་གྱི་ཉེས་དམིགས་མངོན་དུ་མི་མཐོང་བས་ཡོན་ཏན་དུ་བརྫུ་ཞིང་བསླུ་ཐབས་སྣ་ཚོགས་ཀྱི་རྫུ་འཕྲུལ་ལ་ཡུལ་ལས་ཆེ་བ་མེད་དེ། ནམ་ཞིག་གཟུགས་ཀྱི་ཕུང་པོའི་འདུ་བྱེད་ཞིག་སྟེ་ཤི་བས་ཁྱོགས་ལ་བཞག་ནས་མི་བཞིས་བཏེགས་པའམ། ཕྱུགས་སོགས་ལ་བཀལ་ཏེ་དུར་ཁྲོད་དུ་མ་བསྐྱལ་གྱི་བར་དེ་སྲིད་དུ་འདུ་འཛིའི་རྣམ་གཡེངས་ཞི་བའི་ནགས་མཐོང་སོགས་དབེན་གནས་དག་ལ་བསྙེན་པར་མཛོད་ཅེས་གདམས་པའོ། །རྒྱང་གྲགས་ཕྱེད་དམ་གྲོང་ཟད་པའི་མཚམས་བས་མཐའ་དང༌། གྲོང་ལས་རྒྱང་གྲགས་ཡན་ཆད་འཕགས་པའི་འབྲོག་དགོན་ནི། སེམས་བརྩེ་བ་མེད་པས་ཡིད་དུ་འོང་ཞིང་སྐྱོ་ཤས་འཕེལ་བ། ཚོང་དང་ཞིང་ལས་ལ་སོགས་སོ་ནམ་དང་བསམ་སྦྱོར་ངན་པའི་སྡིག་པའི་གྲོགས་ལ་སོགས་རྣམས་ཀྱིས་སྤངས་ཏེ་མེད་པ་དང༌། དཔྱ་འབེབས་པ་སྟེ་འུ་ལག་ཏུ་འདེད་པ་དང༌། ཁྲལ་འཇལ་བ་དང༌། བྲན་གཡོག་སོགས་གཞན་གྱི་ནུས་པ་ལ་བརྟེན་ནས་འཚོ་དགོས་པ་ཞོ་ཤས་འཚོ་བ་ལ་སོགས་པའི་བྲེལ་བས་མི་གདུང་ཞིང༌། དེ་ན་འཁོད་པའི་བྱ་དང་རི་དྭགས་རྣམས་ནི་བག་ཕེབས་པ་ལས་མི་སྙན་པ་སྒྲོག་པ་མེད་ལ། ཆུ་གཙང་དང་འབྲས་བུ་དང་རྩ་བ་སྡོང་བུ་མྱུ་གུ་ལོ་མ་ཡལ་འདབ་ལ་སོགས་པ་འཕགས་པ་དགྱེས་པའི་ཉེར་སྤྱོད་རྒྱ་ཆེ་ལ། རང་བྱུང་གི་བྲག་རིའི་ཕུག་དང༌། ལོ་མའི་སྤྱིལ་བུའི་ཁང་བཟང་སྤྱོད་ལམ་བཞི་ཤོང་བས་ཡངས་པ་དང༌། ལྗོན་པའི་ཤིང་གི་གྲིབ་བསིལ་སོགས་ཉམས་དགའ་ཞིང་འགྲོགས་ན་བདེ་བ་དེ་དང་མཐུན་པར་ནམ་ཞིག་བདག་ནི་ལྷན་ཅིག་གནས་པར་འགྱུར་ན་ཅི་མ་རུང་བསམ་མོ། །ཕུན་སུམ་ཚོགས་པའི་གནས་དེ་རུ་བསྡད་ན་ཕྱི་ནམ་ཟླ་དུས་བཞིའི་འགྱུར་ལྡོག་ནི། དཔེར་ན་མགྲོན་པོ་སྔ་མ་སྔ་མའི་རྗེས་ལ་ཕྱི་མ་ཕྱི་མ་གསར་དུ་སླེབས་ཏེ་བརྗེས་པ་ལྟ་བུ་ཡིས་ཤིང་རྣམས་མདོག་རིམ་གྱིས་དུས་སུ་འཕོ་འགྱུར་མངོན་རྟོགས་ངོམ་པའི་ནགས་ཚལ་རྣམས་ཀྱིས། རང་ཉིད་ཉོན་མོངས་པའི་རྐྱེན་མ་ཡིན་པར་རྒྱལ་བའི་བཀའ་ལ་གཏན་ཚིགས་སུ་བྱས་ཏེ། གོམ་བདུན་ཕྱོགས་པའི་བསོད་ནམས་ཚད་མེད་དོ་ཞེས་སྒྲོག་པ་ལ་ལྟོས་ཤིག་ཅེས་རབ་བཏགས་ཀྱི་རྒྱན་དུ་སྦྱར་ནས་བསྔགས་ཏེ། ཏིང་འཛིན་རྒྱལ་པོ་ལས། གང་ལ་ལ་ཞིག་གིས་སངས་རྒྱས་ཐམས་ཅད་ལ་བསྐལ་པའི་བར་དུ་མེ་ཏོག་དང༌། བདུག་སྤོས་དང་ཞལ་ཟས་དང་བདེ་བར་སྦྱར་བའི་ཡོ་བྱད་ཐམས་ཅད་ཀྱིས་བསྐལ་པར་མཆོད་པ་བས། རབ་ཏུ་སྐྱོ་བའི་སེམས་ཀྱིས་དགོན་པར་ཕྱོགས་ཏེ་གོམ་བདུན་ཙམ་བོར་ན། འདི་དེ་བས་ཀྱང་ཆེས་བསོད་ནམས་ཀྱི་ཕུང་པོ་དཔག་ཏུ་མེད་དེ། ལུས་དང་སྲོག་ལ་བལྟ་བ་རབ་སྤོངས་ལ། །སྟོང་པ་ཞི་བ་མཆོག་ཏུ་གོམས་པར་གྱིས། །⁽1498⁾བརྩོན་ཞིང་རབ་ཏུ་བརྩོན་པའི་ཡིད་ཀྱིས་ཀྱང༌། །རི་དྭགས་བཞིན་དུ་དགོན་པར་གནས་པར་གྱིས། །ཞེས་སོ། །དབེན་གནས་གང་དུ་བསམ་གཏན་ལ་མཉམ་པར་འཇོག་པ་ཤིན་ཏུ་སྟེ་སྐད་ཅིག་ཀྱང་མི་ཡེངས་པར་བསྟེན་པ་ནི། ལྷག་པ་སེམས་ཀྱི་བསླབ་པའི་མཚན་ཉིད་དེ། རྟེན་འབྲེལ་ལུས་ལ་བསྒྲིགས་ནས་འདུག་ཚུལ་ལེགས་ན་རྩ་དང་རླུང་དྲང་བའི་གནད་ཀྱི་རྟེན་ཅིང་འབྲེལ་འབྱུང་ལས་རྟོགས་པ་སེམས་ལ་འཆར་བར་འགྱུར་བས་ལུས་ཀྱི་ཆོ་ག་སྟེ་འདུག་ཚུལ་གྱི་བྱ་བ་ནི། སྟན་བདེ་བ་ལ་རྣམ་སྣང་ཆོས་བདུན་གྱིས་འདུག་པར་བྱ་སྟེ། རྐང་པ་སྐྱིལ་ཀྲུང་ངམ་སྐྱིལ་ཀྲུང་ཕྱེད་པ་བཅའ། མིག་འབྱེད་འཛུམ་རན་པར་སྣ་རྩེར་གཏད། ལུས་དགྱེ་སྒུར་དང་གཡས་གཡོན་རྣམས་སུ་མ་ཡོ་བར་དྲང་པོར་བསྲང༌། ཕྲག་པ་མཐོ་དམན་མེད་པ་ཉིད་དུ་མཉམ་པར་བཞག །མགྲིན་པ་ཅུང་ཟད་བཀུག་ལ་སྣ་དང་ལྟེ་བ་དྲང་པོར་བསྟུན། ལྕེ་ཡང་སོ་ཡི་དྲུང་དུ་བཞག །དབུགས་འབྱིན་འཇུག་རང་བབས་སུ་དལ་བར་བྱ་བ་སྟེ། དེ་ནི་སེམས་ཀྱི་སྲོག་ཤིང་ཅན་ཞེས་སྲོག་ཤིང་བཙུགས་པ་བཞིན་གཞན་དུ་མི་འཕྲོ་བའི་ཐབས་སོ། །དམིགས་ཡུལ་གང་ལ་སེམས་འཛིན་པ་དེ་གཅིག་པུ་ལས་མི་དགེ་བ་དང་ལུང་མ་བསྟན་ལྟ་ཅི་དགེ་བའི་དམིགས་པ་གཉིས་པ་ལའང་གཏད་པ་མ་ཡིན་པར་དམིགས་ཡུལ་དེ་ཁོ་ན་ལ་སེམས་ཆ་མཉམ་པར་བཞག་པ་ལ་བརྩོན་དགོས་ཏེ། དེ་ཡང་འདི་ལྟར་གཟུགས་ཅན་ནམ་གཟུགས་ཅན་མ་ཡིན་པའི་དམིགས་པ་གང་ཡང་རུང་བའི་དོན་ལ་རྩེ་གཅིག་ཏུ་འཛིན་པ་དང༌། སྐབས་སྐབས་སུ་དཔྱད་པའི་སྟོབས་ཀྱིས་ཡིད་ནི་དགེ་བའི་དོན་ལ་རྣམ་པར་བཅིང་ཞིང་དཔྱད་འཇོག་སྤེལ་མར་བྱ་སྟེ། ལས་དང་པོ་པས་རྟེན་སྐུ་གཟུགས་སོགས་ལ་བློ་གཏད་ཅིང་འདས་འོང་སོགས་མཚན་ཉིད་གཞིག་ལ། དེ་ནས་རིམ་པར་ཡུན་བསྲིངས་ཏེ་བསྒོམས་པས་མཐར་རྣམ་པར་རྟོག་པའི་འཛིན་སྟངས་ཀྱི་སྤྲོས་པའི་སྣང་བ་ཐམས་ཅད་ཆོས་ཉིད་སྟོང་པའི་རང་བཞིན་གཅིག་ཏུ་ནུབ་ཅིང༌། དེ་ཡང་སྣང་ཆ་འགག་པས་ཕྱང་ཆད་དུ་མ་ཡིན་པར་ཡུལ་སྣང་གཟུགས་སོགས་མ་འགགས་ཀྱང་དངོས་པོ་མེད་པའི་ལྟ་བ་མཚན་ཉིད་མ་གྲུབ་པ་ལྟར་དཀའ་བའི་ཕྱིར་དེར་འཛིན་མེད་པ་ཡིན་ནོ། །དེ་ལྟ་བུའི་ངང་ལ་བྱིང་རྒོད་སྐྱོན་གྱིས་མི་འཕྲོག་པའི་ཤེས་པ་ཡུལ་ལ་མི་རྟོག་པར་རྩེ་གཅིག་ཏུ་གནས་པའི་ཆ་མཉམ་བཞག་གམ་ཞི་གནས་ཡིན་ལ། དེ་དང་ངོ་བོ་གཅིག་པའི་ཡེ་ཤེས་རང་བཞིན་ཡོངས་སུ་ཤེས་པའམ། ནང་སེམས་ཉིད་ཙམ་ལའང་མ་ཞེན་པའི་ཆ་ནི་རྗེས་ཐོབ་བམ་ལྷག་མཐོང་སྟེ། དཀོན་མཆོག་སྤྲིན་ལས། ཞི་གནས་ནི་སེམས་རྩེ་གཅིག་པའོ། །ལྷག་མཐོང་ནི་ཡང་དག་པར་སོ་སོར་རྟོག་པའོ། །ཞེས་པའོ། །དེ་ལ་ནང་གསེས་ཀྱིས་དབྱེ་ན། བྱིས་པ་སོ་སོའི་སྐྱེ་བོ་རྣམས་ལམ་ལ་ཉེ་བར་སྤྱོད་པའི་བསམ་གཏན་དང༌། དོན་རབ་ཏུ་རྣམ་པར་འབྱེད་པ་མཐོང་ལམ་གྱི་རྒྱུར་གྱུར་པའི་ལམ་ཞུགས་འཇིག་རྟེན་པའི་རྒྱུད་ཀྱི་བསམ་གཏན་དང༌། འཕགས་པའི་ལམ་ལ་ཞུགས་པའི་རྒྱུད་ཀྱི་དེ་བཞིན་གཤེགས་དགེའི་བསམ་གཏན་སྟེ་རྣམ་པ་གསུམ་དང༌། ཡང་རྟོག་པ་དང་དཔྱོད་པ་དགའ་བདེ་རྣམས་ཡོད་མེད་ཀྱི་མུ་བཞིའི་དབྱེ་བས་བསམ་གཏན་དང་པོ་སོགས་བཞི། དེ་བཞིན་ནམ་མཁའ་མཐའ་ཡས་སོགས་གཟུགས་མེད་བཞི་སྟེ་རྣམ་པའི་གྲངས་སྙོམས་འཇུག་བརྒྱད་རྣམས་ཡོད་པ་ཡིན་ནོ། །ཐེག་གསུམ་གང་རུང་གི་ལམ་ལ་མ་ཞུགས་པའི་རྒྱུད་ཀྱི་ཏིང་ངེ་འཛིན་ནི་བསམ་གཏན་བཞི་དང༌། གཟུགས་མེད་བཞི་སྟེ་བརྒྱད་པོ་ནི་བྱིས་པ་ཉེར་སྤྱོད་ཀྱི་བསམ་གཏན་ཞེས་བྱ་བ་ཡིན་ནོ། །བསམ་གཏན་བཞི་པོ་འདི་དག་གི་དོན་ཅུང་ཟད་ཕྲལ་ཏེ་བཤད་ན། བསམ་གཏན་བཞི་དང༌། གཟུགས་མེད་བཞི་ལས། དང་པོ་བསམ་གཏན་ལ་ཉེར་བསྡོགས་དང་དངོས་གཞི་གཉིས་ལས། དང་པོ་ཉེར་བསྡོགས་ལ་བསྒོམ་ཚུལ་མང་ཡང༌། འཇིག་རྟེན་པའི་ལམ་རྐྱང་པ་ལ་ཞི་རགས་ཀྱི་རྣམ་པ་ཅན་དུ་བསྒོམ་པ་ཤས་ཆེ་བས་དེ་ལྟར་ན། དང་པོ་འདོད་པའི་སེམས་ནི་རགས་པ་དང༌། མ་ཞི་བ་དང༌། མཚན་མར་དམན་པར་བལྟས་ནས་བསམ་གཏན་དང་པོ་ནི། དེ་བས་ལྷག་པར་ཡང་ཞི་བ་དང༌། བདེ་བ་གྱ་ནོམ་པའོ་སྙམ་ནས་ཐོས་བསམ་འདྲེས་མའི་ཚུལ་གྱིས་ཡང་དང་དང་དུ་ཡིད་ལ་བྱས་པས་ནམ་ཞིག་ཐོས་བསམ་ལས་འདས་ནས་སྒོམ་བྱུང་དུ་སོང་སྟེ། འདོད་པའི་ཉོན་མོངས་ཆེ་འབྲིང་དྲུག་སྤངས་པའི་བར་ནི་བསམ་གཏན་གྱི་ཉེར་བསྡོགས་སོ། །དེ་ནས་འདོད་པའི་ཉོན་མོངས་པ་ཆུང་ངུ་གསུམ་སྤངས་པའི་ཚེ་ན་བསམ་གཏན་དངོས་གཞིའི་སེམས་ཐོབ་པའོ། །བསམ་གཏན་དང་པོ་ལ་ཡན་ལག་ལྔ་སྟེ། རྟོག་པ་དང༌། དཔྱོད་པ་དང༌། དགའ་བ་དང༌། བདེ་བ་དང༌། ཏིང་ངེ་འཛིན་དང་ལྔའོ། །རྟོག་དཔྱོད་གཉིས་ནི་མཛོད་ལས། རྟོག་དང་དཔྱོད་པ་རྩིང་ཞིབ་ཉིད། །ཅེས་པ་ལྟར་སེམས་ཏིང་ངེ་འཛིན་སྐྱོན་མེད་དུ་གནས་མི་གནས་རགས་པར་རྟོག་པ་དང༌། ཞིབ་པར་དཔྱོད་པ་དང༌། སེམས་ཏིང་ངེ་འཛིན་ལ་གནས་པས་ཡིད་ཤེས་བདེ་བས་ཁྱབ་པ་དགའ་བ་དང༌། དེའི་སྟོབས་ཀྱིས་ལུས་ལ་ཤིན་སྦྱང་གི་བདེ་བ་སྐྱེས་པ་བདེ་བ་དང༌། སེམས་རྩེ་གཅིག་པའི་ཏིང་ངེ་འཛིན་ལ་གནས་པ་ཏིང་ངེ་འཛིན་ནོ། ༈ བསམ་གཏན་གཉིས་པ་ལ་ཡན་ལག་བཞི་སྟེ། རབ་དྭངས་དང༌། དགའ་བ་དང༌། བདེ་བ་དང༌། ཏིང་ངེ་འཛིན་ནོ། །དྲན་པ་དང་ཤེས་བཞིན་དང་བཏང་སྙོམས་ཀྱི་ངོ་བོ་ཡིན་ཡང་འདིར་དགའ་བའི་གཡོ་བ་དང་མ་བྲལ་བའི་ཕྱིར་རབ་དྭངས་གི་སྒྲས་བསྟན་ཏོ། །ལྷག་མ་གསུམ་ནི་སྔར་བཞིན་ནོ། ༈ བསམ་གཏན་གསུམ་པ་ལ་ཡན་ལག་ལྔ་སྟེ། བད་ེ་བ་དང༌། བཏང་སྙོམས་དང༌། དྲན་པ་དང༌། ཤེས་བཞིན་དང༌། ཏིང་ངེ་འཛིན་དང་ལྔའོ། །བདེ་བ་ནི་སྔར་དང་འདྲ་ལ། བཏང་སྙོམས་ནི་སེམས་བྱིངས་རྒོད་མེད་པར་གནས་པའི་ཚེ་རང་བབས་སུ་འཇོག་པའོ། །དྲན་པ་ནི་ཏིང་ངེ་འཛིན་མི་བརྗེད་པའོ། །ཤེས་བཞིན་ནི་བྱིང་རྒོད་ལ་སོགས་བྱུང་མ་བྱུང་རྟོག་པའོ། །ཏིང་ངེ་འཛིན་ནི་སྔར་ལྟར་རོ། ༈ བསམ་གཏན་བཞི་པ་ལ་ཡན་ལག་བཞི་སྟེ། དྲན་པ་དང༌། ཚོར་བ་བཏང་སྙོམས་དང༌། འདུ་བྱེད་བཏང་སྙོམས་དང༌། ཏིང་ངེ་འཛིན་ནོ། །དྲན་པ་དང་ཏིང་ངེ་འཛིན་སྔར་དང་འདྲ་ལ། །ཚོར་བ་བཏང་སྙོམས་ནི་ལུང་མ་བསྟན་ནོ། །འདུ་བྱེད་བཏང་སྙོམས་ནི་སྔར་དང་འདྲའོ། །དེ་ཡང་རྟོག་དཔྱོད་ལ་སོགས་ཡན་ལག་ལྔ་དང་ལྡན་པ་ནི་བསམ་གཏན་དང་པོའི་དངོས་གཞི་ཙམ་པོ་བ་ཡིན་ལ། དེ་ལས་རྟོག་པ་མེད་ལ་དཔྱོད་པ་དང་བཅས་པ་ནི་དངོས་གཞི་ཁྱད་པར་ཅན་ནོ། །རྟོག་དཔྱོད་གཉིས་ཀ་སྤངས་པ་ནི་བསམ་གཏན་གཉིས་པའོ། །རྟོག་དཔྱོད་དགའ་བ་གསུམ་སྤངས་པ་ནི་བསམ་གཏན་གསུམ་པའོ། །དེ་གསུམ་བདེ་བ་དང་བཞི་སྤངས་པ་ནི་བསམ་གཏན་བཞི་པའོ། །བསམ་གཏན་དངོས་གཞི་མ་ཐོབ་ཀྱང་བསམ་གཏན་དང་པོའི་ཉེར་བསྡོགས་ཡང་དག་པ་དེས་ཀྱང་ལྷག་མཐོང་གི་རྟེན་བྱས་པས་ན་ཉེར་བསྡོགས་མི་ལྕོགས་མེད་ཅེས་བྱ་ལ། ཉེར་བསྡོགས་དེ་དང༌། དང་པོའི་དངོས་གཞི་ལ་ཙམ་ཁྱད་གཉིས། ལྷག་མ་གསུམ་དང༌། དྲུག་ལ་བསམ་གཏན་ས་དྲུག་ཞེས་བྱའོ། །གཉིས་པ་གཟུགས་མེད་རྣམས་ནི་ཡན་ལག་གི་དབྱེ་བ་མེད་པས་དམིགས་རྣམ་གྱིས་འབྱེད་དེ། བསམ་གཏན་བཞི་པ་ཐོབ་པ་དེས་གྲུ་བཞི་ཟླུམ་པོ་ལ་སོགས་པ་དབྱིབས་ཀྱི་འདུ་ཤེས་དང༌། དཀར་སེར་དམར་ལྗང་སོགས་ཁ་དོག་གི་འདུ་ཤེས་དང༌། རི་དང་ཁང་ཁྱིམ་ལ་སོགས་ཐོགས་རེག་གི་འདུ་ཤེས་གསུམ་ཀ་བཀག་ནས་ཆོས་ཐམས་ཅད་ནམ་མཁའ་ལྟར་བསྒོམས་པ་གཟུགས་ཀྱི་འདུ་ཤེས་ཐམས་ཅད་ལས་འདས་ནས་ནམ་མཁའ་ལྟ་བུའི་ངང་དུ་གནས་པ་ནི་ནམ་མཁའ་མཐའ་ཡས། ནམ་མཁའ་ཙམ་དུའང་འཛིན་པ་སྤངས་ནས་ནམ་མཁའོ་སྙམ་བྱེད་རྣམ་ཤེས་ཙམ་གྱི་ངང་དུ་གནས་པ་ནི་རྣམ་ཤེས་མཐའ་ཡས། རྣམ་ཤེས་ཙམ་དུའང་འཛིན་པ་སྤངས་ནས་ཅི་ཡང་མེད་དོ་སྙམ་དུ་གནས་པ་ནི་ཅི་ཡང་མེད་པ། ཅི་ཡང་མེད་དོ་སྙམ་དུ་འཛིན་པ་ཡང་སྤངས་ནས་ཅི་ཡང་མེད་དོ་སྙམ་མཁན་གྱི་འདུ་ཤེས་བརྟགས་ནས། འདུ་ཤེས་ཀྱི་འགྱུ་བ་རགས་པ་ཐམས་ཅད་བཀག་ནས། འདུ་ཤེས་ཕྲ་མོ་ཙམ་ལ་གནས་པ་ནི་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་དོ། །འདི་ལ་ཡོད་མིན་མེད་མིན་ཡང་ཟེར་རོ། །ཐེག་གསུམ་གང་རུང་གི་ལམ་ལ་ཞུགས་པའི་གང་ཟག་ཚོགས་ལམ་དང་སྦྱོར་བའི་ལམ་དུ་ལྷག་མཐོང་དང་འབྲེལ་བར་བསྒོམ་པའི་ཏིང་འཛིན་གྱིས། ཐར་པ་མཐོང་ལམ་མངོན་དུ་བྱེད་པ་དོན་རབ་འབྱེད་པའི་བསམ་གཏན་ཞེས་རྒྱུ་ལས་འབྲས་མིང་དུ་བཏགས་པར་གྲགས་སོ། །བྱང་ཆུབ་སེམས་དཔའི་འཕགས་ལམ་གྱི་ཡེ་ཤེས་དང་པོའི་ས་རབ་ཏུ་དགའ་བ་ཡན་ཆད་འཕགས་པའི་ཏིང་འཛིན་ཏེ། དེ་དག་གི་རང་བཞིན་ཟག་པ་མེད་པའི་ཡེ་ཤེས་ཡིན་པས་ཕྱི་མ་ནི་དེ་བཞིན་གཤེགས་པའི་ཡེ་ཤེས་ཞི་ལྷག་མཐར་ཕྱིན་པས་ཟག་མེད་ཀྱི་དགེ་བ་ཡིན་ནོ། །བསམ་གཏན་དེ་དག་ཀུན་ཀྱང་ངོ་བོ་ནི་ཕྱི་རོལ་དུ་མི་གཡེང་བར་ནང་དུ་སེམས་རྩེ་གཅིག་ཏུ་འཛིན་པ་ཡིན་ལ། དེ་འགྲུབ་པ་དང་མཐར་ཕྱིན་པའི་རྒྱུ་ནི་དམིགས་རྣམ་མི་བརྗེད་པའི་དྲན་པ་རྒྱུན་ཆགས་པ་དང་སྤྲོ་བའི་བརྩོན་འགྲུས་ཀྱི་རྐྱེན་ལ་ལྟོས་པ་ཅན་ཡིན་ནོ། །རྩེ་གཅིག་པའི་དྲན་པ་ཉམས་ནས་ཕྱི་རོལ་དུ་རྣམ་པར་གཡེངས་པར་གྱུར་ན། དེ་མ་ཐག་ཤེས་བཞིན་གྱིས་ཟིན་པར་བྱས་ཏེ་བརྩོན་འགྲུས་ཀྱིས་སླར་ཡང་དམིགས་པ་དེ་ལ་བསླན་ནས་བསྒོམ་པར་བྱའོ། །དེས་ན་ཐུན་མོང་གི་བསམ་གཏན་བསྒྲུབ་པར་བྱས་ན་དེའི་བྱེད་ལས་ནི། ལུས་དང་སེམས་ལ་ཤིན་ཏུ་སྦྱངས་པའི་བདེ་བ་བསྐྱེད་ཅིང་རྫུ་འཕྲུལ་སྣ་ཚོགས་འགྲུབ་པའི་རྟེན་བྱེད་ལ། བསམ་གཏན་དེ་འགྲུབ་ཚེ་འབྲས་བུ་སྔོན་གནས་རྗེས་དྲན་སོགས་མངོན་ཤེས་དང་ཟིལ་གནོན་ལ་སོགས་པ་ཉན་ཐོས་དང་ཐུན་མོང་གི་ཡོན་ཏན་ཐོབ་པ་ཡིན་ནོ། །དེ་དག་གི་ཚེ་བསམ་གཏན་དང་པོའི་ཉེར་བསྡོགས་ཡིད་བྱེད་དྲུག་གི་ཚེ་རགས་པར་རྟོག་ཅིང་ཞིབ་པར་དཔྱོད་པ་ཙམ་དང༌། དང་པོའི་དངོས་གཞིའི་སྐབས་སུ་རྟོག་པ་མེད་ལ་དཔྱོད་པ་ཙམ་དང༌། ལྷག་མ་བསམ་གཏན་གཉིས་པ་སོགས་གསུམ་པོར་རྟོག་དཔྱོད་གཉིས་ཀ་མེད་པ་ཡིན་ལ། བསམ་གཏན་དང་པོས་གཉིས་པའི་ཉེར་བསྡོགས་བྱེད་པ་སོགས་རིམ་གྱིས་སྔ་མ་སྔ་མས་ཕྱི་མ་ཕྱི་མའི་ཉེར་བསྡོགས་བྱེད་ཅིང༌། དེ་བཞིན་དུ་བསམ་གཏན་བཞི་པས་ནམ་མཁའ་མཐའ་ཡས་སྐྱེ་མཆེད་ཀྱི་སྙོམས་འཇུག་གི་ཉེར་བསྡོགས་སོགས་ཕྱི་མ་གསུམ་པོའང་རིམ་པར་བྱེད་དོ། །དེས་ན་སྙོམས་འཇུག་དགུ་བོ་དེ་ལ་འཕགས་པ་གསུམ་ཀའི་མཐོང་སྒོམ་གྱི་ལམ་གྱི་རྟེན་གཞི་ཞེས་སུ་གྲགས་སོ། །ཐེག་གསུམ་གྱི་ལམ་དང་འབྲས་བུའི་ཡོན་ཏན་ཇི་སྙེད་ཡོད་པ་ཐམས་ཅད་བསྐྱེད་པའི་རྒྱུ་ཞི་ལྷག་དང༌། ཁྱད་པར་ཐེག་ཆེན་ལམ་དང་འབྲས་བུའི་ཡོན་ཏན་ཀུན་གྱི་རྒྱུར་གྱུར་པའི་བསམ་གཏན་ནི། སེམས་ཅན་ལ་དམིགས་པའི་སྙིང་རྗེ་དང་ནི་སྤྲོས་པ་དང་བྲལ་བའི་ཡེ་ཤེས་དམ་པས་ཟིན་པ་དེ་ལ་གོམས་སྟོབས་སུ་གྱུར་པ་ལས་རང་དང་ངོ་བོ་གཅིག་བའི་ཏིང་འཛིན་གྱི་སྒོ་མང་པོ་དང་ལྡན་ཏེ། ཐེག་ཆེན་ཐུན་མིན་ས་ལམ་གྱི་ཡོན་ཏན་ཇི་སྙེད་པའི་རྣམ་པ་ཐམས་ཅད་འགྲུབ་པར་བྱེད་ཅིང༌། དེ་དག་གིས་སྒྲིབ་པ་སྤོང་ཚུལ་ཡང༌། མཉམ་རྗེས་ལ་ཕྱེ་ཚུལ་གཉིས་ལས། མཉམ་རྗེས་ངོ་བོ་གཅིག་པའི་དབང་དུ་བྱས་ན་སེམས་རྩེ་གཅིག་ཏུ་མཉམ་པར་བཞག་པའི་ཚེ་སེམས་དང་སེམས་བྱུང་གི་འགྱུ་བ་རགས་པ་ཐམས་ཅད་ནུབ་ནས་སེམས་རྟོག་མེད་དུ་གནས་པ་ནི་མཉམ་བཞག་ཡིན་ལ། དེའི་ཚེ་དབང་ཤེས་མ་འགགས་པ་ལ་ཡུལ་སྣང་ཐམས་ཅད་སྣང་ལ་འཛིན་པ་མེད་པ་གསལ་བའི་ཆ་ནི་རྗེས་ཐོབ་ཡིན་པས་བློའམ་རིག་པ་རྫས་གཅིག་པའི་མཉམ་བཞག་དང་རྗེས་ཐོབ་དེ་ཡིས་གཟུང་འཛིན་གྱི་རྟོག་པ་རིམ་གྱིས་སྤོང་བར་བྱེད་ལ། ཡུལ་གྱི་རང་བཞིན་མེད་བཞིན་སྣང་བ་ནི་གཟུང་བ་དང༌། དེར་འཛིན་སྐྱེས་པ་ནི་འཛིན་པའམ། དོན་ཚོགས་བརྒྱད་ཡུལ་གཟུགས་སོགས་ལ་དེ་དང་དེར་འཛིན་པ་གཟུང་རྟོག །ཡུལ་ཅན་ཚོགས་བརྒྱད་ཀྱི་རྟོག་པ་ལ་དེ་དང་དེར་འཛིན་པ་འཛིན་རྟོག་ཞེས་བྱ་ལ། དེ་ཡང་གཟུང་འཛིན་སྤོང་བ་དང༌། གཟུང་འཛིན་གྱི་རྟོག་པ་སྤོང་པ་ན་གཟུང་འཛིན་ཀྱང་སྤང་བ་ཡིན་པའི་ཕྱིར་རོ་སྙམ་སྟེ་བློ་གསལ་དག་གིས་དཔྱོད་ཅིག །ཡང་མཉམ་རྗེས་ཐ་དད་པ་ནི། སེམས་རྩེ་གཅིག་ཏུ་མཉམ་པར་བཞག་པའི་ཚེ་ན་མཉམ་བཞག་ཡིན་ལ། དེ་ལས་ལངས་ནས་ཟ་ཉལ་ལ་སོགས་སྤྱོད་ལམ་གྱི་ཚེ་སྒྱུ་མ་ལྟ་བུའི་དྲན་རྩི་དང་མ་བྲལ་བ་ནི་རྗེས་ཐོབ་བོ། །འགྲོ་འདུག་སོགས་ཀྱི་དུས་སུ་ཚོགས་དྲུག་གི་ཤེས་པ་ཕྱི་རོལ་དུ་སོང་བ་ལ་རྒྱ་ཡན་པ་ཞེས་བྱ་སྟེ། ས་བདུན་ཚུན་ཆད་ཀྱི་འཕགས་པ་དེ་རྣམས་ལའང་སྐབས་རེར་དེ་འདྲ་བ་ཀུན་ན་ཡོད་པ་ཡིན་ཞེས་གསུངས་སོ། །བསླབ་པ་གསུམ་གྱི་ནང་ཚན་ལྷག་པ་ཤེས་རབ་ཀྱི་བསླབ་པའི་ངོ་བོ་དང་དབྱེ་བ་ལ་སོགས་པའི་དོན་ངེས་པར་འབྱེད་ཅིང་གསལ་བར་བསྟན་པ་ནི། སྒོམ་བྱུང་གི་ཤེས་རབ་ཁོ་ནའི་དབང་དུ་བྱས་ཏེ་ཏིང་ངེ་འཛིན་གྱི་སྦྱོར་བ་ཉེར་བསྡོགས་ལ་གོམས་པ་ལས་དེའི་ངོ་བོར་སྐྱེ་བ་དང་སེམས་ལས་སུ་རུང་ཞིང༌། སྒྲིབ་རྙོག་དྭངས་པའི་བསམ་གཏན་དངོས་གཞིའི་ངོ་བོ་སྐྱེས་པ་དང༌། རྗེས་ཐོབ་དེའི་སྟོབས་ལས་ཆོས་རྣམས་རང་བཞིན་མེད་པར་ཤེས་པའི་ཤེས་རབ་ངང་གིས་བྱུང་བའི་རྣམ་པ་གསུམ་གྱི་དབྱེ་བས་ཤེས་རབ་བམ། ཡང་ཐོས་པ་དང༌། བསམ་པ་དང༌། སྒོམ་པ་ལས་བྱུང་བའི་ཤེས་རབ་གསུམ་ལ་རིམ་གྱིས་བསླབ་པས་ལྷག་མཐོང་རྣམ་པར་མི་རྟོག་པའི་ཡེ་ཤེས་ཡང་དག་པར་འགྲུབ་པར་འགྱུར་རོ། །བྱེད་ལས་ནི་ཐར་པ་ལ་བར་དུ་གཅོད་པའི་ཉོན་མོངས་པའི་ཚོགས་དང༌། རྣམ་མཁྱེན་ལ་བར་དུ་གཅོད་པ་ཤེས་སྒྲིབ་འཇོམས་པར་བྱེད་ཅིང༌། ཆོས་ཉིད་ཟབ་མོའི་གནས་ལུགས་དང༌། ཆོས་ཅན་འཁྲུལ་ངོར་སྣང་བ་མཐའ་དག་གི་དོན་མ་ནོར་བར་ཤེས་པའོ། །དེ་ལྟར་ཤེས་པས་སྲིད་པའི་གྲོང་ཁྱེར་ལས་ཉོན་ཤིན་ཏུ་བརྒལ་དཀའ་བ་འདི་ལས་མྱུར་དུ་སྡུག་བསྔལ་མཐའ་དག་ལས་བརྒལ་ཏེ་མྱ་ངན་ལས་ཚེགས་མེད་པར་འདའ་འོ། །སྦྱིན་སོགས་རྣམ་པ་དྲུག་པོའང་དམན་མཆོག་དང་རགས་ཕྲའི་དབང་གིས་གོང་ནས་གོང་དུ་སྔ་མ་སྔ་མ་ལས་ཕྱི་མ་ཕྱི་མ་འཕགས་ཏེ། ཁྱད་ཞུགས་པའི་ཚུལ་དེ་དག་ཀུན་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བསྟེན་ནས་ཕ་རོལ་ཏུ་ཕྱིན་པའི་མིང་འཐོབ་བོ། །དེ་ཡང་ལམ་དུ་ཞུགས་པའི་སྐབས་འདི་ན་སོ་སོ་སྐྱེ་བོའི་སར། ཐོས་པ་ལས་བྱུང་བའི་ཤེས་རབ་ལ་མ་བརྟེན་ན། བསམ་པ་དང་སྒོམ་པའི་ཡོན་ཏན་གྱི་རྒྱགས་དྲེགས་དེ་ནི་གནས་མིན་འཁྱམས་ཏེ། ཏིང་འཛིན་རྒྱལ་པོ་ལས། གལ་ཏེ་ཚུལ་ཁྲིམས་གྲགས་པས་དེ་རྒྱགས་ཤིང༌། །མང་དུ་ཐོས་ལ་བརྩོན་པར་མི་བྱེད་ན། །ཚུལ་ཁྲིམས་འབྲས་བུ་སླར་ཡང་ཟད་ནས་ནི། །ཕྱིར་ཡང་སྡུག་བསྔལ་རབ་ཏུ་མྱོང་པར་འགྱུར། །ཞེས་སོ། །ཐོས་པའི་ཤེས་རབ་ནི་བསམ་པ་དང་སྒོམ་པ་ཀུན་གྱི་རྒྱུ་རུ་གསུངས་ཏེ། སློབ་དཔོན་དཔའ་བོས། ཐོས་ཉུང་དམུས་ལོང་བསྒོམ་པའི་ཚུལ་མི་ཤེས། །དེ་མེད་དེ་ཀོ་ཅི་ཞིག་བསམ་པར་བྱ། །དེ་བས་ཐོས་ལ་བརྩོན་བྱ་དེ་རྒྱུད་ལ། །བསམ་བཞིན་བསྒོམ་པས་ཤེས་རབ་ཡངས་པ་འབྱུང༌། །ཞེས་སོ། །གཞལ་བྱའི་ཆོས་བདེན་གཉིས་ཀྱི་དོན་སྟོན་པའི་གསུང་རབ་ཡན་ལག་བཅུ་གཉིས་ལ། འཇལ་བྱེད་ཐོས་པའི་ཤེས་རབ་ཀྱིས། འཇལ་ཚུལ་དྲང་དོན་དང་ངེས་དོན་གཉིས་དང་དགོངས་པ་བཞི་དང་ལྡེམ་དགོངས་རྣམ་པ་བཞིར་གཞལ་བ་ཡིན་ནོ། །དེ་ཡང་དོན་ནི་རྟོན་པ་བཞིའི་སྒོ་ནས་རྟོགས་པར་བྱ་བ་ཁོ་ནའོ། །འཁོར་འདས་ལམ་གསུམ་གྱི་བསྡུས་པའི་ཆོས་རྣམས་ཀུན་གྱི་ངོ་བོའམ་གཤིས་ཀྱི་གནས་ཚུལ་དེ་བཞིན་ཉིད་རང་བཞིན་གྱིས་རྣམ་པར་དག་པ་སེམས་ཉིད་འོད་གསལ་བའི་དགོངས་པ་ནི། སྐྱེ་འགགས་གནས་གསུམ་ལས་འདས་པ་སྟོང་པ་ཉིད་མཚན་མ་མེད་པ་སྨོན་པ་མེད་པ་སྟེ་རྣམ་ཐར་གསུམ་གྱི་རང་བཞིན་དུ་གནས་པ་ངེས་དོན་ཡིན་ལ། ཆོས་ཅན་ཀུན་རྫོབ་ཀྱི་རང་བཞིན་འཁྲུལ་ངོར་སྣང་ཚོད་ཙམ་འདི་ལ་བརྟེན་ནས་ལམ་ལ་རིམ་གྱིས་འཇུག་པའི་ཕྱིར། གཤིས་ལ་མ་གྲུབ་བཞིན་རིག་པས་གཞལ་ནས་སྒྲོ་བཏགས་ཏེ་གཞི་ཕུང་ཁམས་སྐྱེ་མཆེད་སོགས་དང༌། ལམ་ཐེག་པ་གསུམ་གྱིས་བསྡུས་པའི་རྣམ་བཞག་ཐམས་ཅད་དང༌། འབྲས་བུའི་རྣམ་བཞག་མྱང་འདས་གསུམ་གྱི་རང་བཞིན་དུ་བསྟན་པ་ཐམས་ཅད་ནི་དྲང་བའི་ལམ་ཡིན་ལ། དེ་སྟོན་པའི་གསུང་རབ་རྣམས་ནི་དྲང་དོན་གྱི་སྡེ་སྣོད། དེའི་དགོངས་པ་འགྲེལ་བ་ནི་དྲང་དོན་གྱི་དགོངས་འགྲེལ་བསྟན་བཅོས་སོ། །དེ་ལྟར་དྲང་ངེས་ཀྱི་མདོ་སྡེ་གཉིས་པོས་བརྗོད་བྱའི་དོན་ཇི་ལྟར་ཡིན་ཤེས་པས་དྲང་ངེས་གང་ལ་ཡིད་རྟོན་པ་དང་མི་རྟོན་བའི་ཚུལ་སྔར་བཤད་པ་ལྟར་ཤེས་པ་དེ། གསུང་རབ་ཀྱི་བརྗོད་བྱ་སྣ་ཚོགས་དང་ལྡན་པའི་མཛོད་ཁང་ལྟ་བུ་དེ་དག་སོ་སོར་འབྱེད་ཅིང་བལྟ་བར་བྱ་བའི་ལྡེའུ་མིག་དང་པོ་ལྟ་བུ་ཡིན་ནོ། །དྲང་ངེས་དེ་དག་གི་རང་བཞིན་ཐ་དད་པར་གསལ་བར་བྱས་ནས་དྲང་དོན་གྱི་དགོངས་པ་ཅན་གྱི་གསུང་འདི་ལྟ་བུའོ་ཞེས་སྟོན་པ་དང༌། དྲང་དོན་གྱི་མདོའི་དགོངས་གཞི་དང་དགོངས་པ་ལ་བརྟགས་ནས་མཐར་ངེས་དོན་གྱི་དགོངས་པ་ཇི་ལྟ་བ་བཞིན་རྟོགས་པར་བྱ་བའི་ཕྱིར། དགོངས་པ་བཞི་དང་ལྡེམ་དགོངས་བཞི་སྟེ་གཉིས་བཤད་པ་ལས། དང་པོ་དགོངས་པ་བཞི་ནི། རང་རང་གི་དགོངས་གཞིའི་དོན་དེ་ལ་ཅུང་ཟད་སྒྲོ་བཏགས་ནས་བཤད་དུ་ཡང་ཡོད་ལ། གདུལ་བར་བྱ་བའི་ཡུལ་གྱི་གང་ཟག་རྣམས་རེ་ཞིག་ཚིག་ཙམ་གྱིས་དགོངས་གཞིའི་དོན་རྟོགས་པ་ལ་ཁ་དྲང་བ་གཅིག་བུའི་སླད་དུ་བསྟན་པ་ལྡེམ་དགོངས་ལྟ་བུའང་མ་ཡིན་པར། དེ་ལས་གཞན་ཡང་དགོས་ཆེད་དང་བཅས་ནས་དགོངས་པ་རྣམ་བཞིར་སྟོན་པ་སྟེ། སྤྱིར་ཆོས་ཐམས་ཅད་ཀྱི་གནས་ལུགས་ལ་བཟང་ངན་དང་ཐ་དད་མེད་པས། དེ་བཞིན་གཤེགས་པ་ཐམས་ཅད་ཀྱང་ཆོས་སྐུའི་ཀློང་དུ་མཉམ་ཞིང་གཅིག་པ་ཉིད་ལ་དགོངས་ནས་ང་ཉིད་དེ་ཡི་ཚེ་ན་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་སུ་གྱུར་ཏོ་ཞེས་པ་ལྟར། སྔ་ཕྱི་ཐ་དད་དུ་སྣང་བ་དང༌། བླང་དོར། འཁོར་འདས། བཟང་ངན་སོགས་སྣང་བ་ཤིན་ཏུ་འགལ་བ་ལྟ་བུ་ཡིན་ནའང༌། གཅིག་ཏུ་བསྟན་པས་སྐུ་ཚེ་ཐུང་བ་དང༌། སྐུ་བོང་ཆུང་བ་སོགས་སུ་བལྟ་བའི་བརྙས་པ་ལྡོག་པའོ། །དོན་གཞན་ངོ་བོ་ཉིད་མེད་པ་ཀུན་བརྟགས་ལ་སོགས་པ་གསུམ་ལ་དགོངས་ནས་གཟུགས་ནས་རྣམ་མཁྱེན་གྱིས་བསྡུས་པའི་ཆོས་ཐམས་ཅད་ལ་དཔྱད་ན་གང་ཡང་མ་གྲུབ་པར་བསྟན་པས་དཔྱད་པ་ལ་སོགས་པ་ལ་བརྟེན་ནས་བདེན་ཞེན་ལྡོག་པའོ། །དུས་གཞན་མ་འོངས་པ་ཞིག་ལ་འཚང་རྒྱ་བའི་རྒྱུའམ་ས་བོན་ཙམ་ཞིག་ཐེབས་པ་ལ་དགོངས་ནས་གཟུངས་སྔགས་འགའ་ཞིག་ལན་གཅིག་བརྗོད་པ་ཙམ་མམ། དེ་བཞིན་གཤེགས་པ་དྲི་མེད་ཟླ་འོད་ཀྱི་མཚན་བཟུང་བ་ཙམ་གྱིས་འབད་མེད་འཚང་རྒྱ་བར་བསྟན་པ་ལྟ་བུའི་ལེ་ལོ་ཅན་རྣམས་དགེ་སྦྱོར་ལ་འཇུག་པའོ། །གང་ཟག་ལ་ལ་སྦྱིན་པ་ལ་མངོན་པར་རློམ་པ་དང༌། འགའ་ཞིག་ཚུལ་ཁྲིམས་མཆོག་འཛིན་སོགས་ནི་བདུད་ལས་མིན་ཀྱང་ཐར་པའི་གེགས་ཡིན་པ་ལ་དགོངས་ནས། སྦྱིན་པ་ནི་བདུད་ཀྱི་ལས་སོ་ཞེས་སྨད་ནས་ཚུལ་ཁྲིམས་སོགས་བསྔགས་པའམ། ཚུལ་ཁྲིམས་ནི་བདུད་ཀྱི་ལས་སོ་ཞེས་སྨད་ནས་སྦྱིན་པ་སོགས་གཞན་ལ་བསྟོད་པ་ལྟ་བུ་གང་དང་གང་ལ་མཆོག་ཏུ་འཛིན་པ་དེ་དང་དེ་ཡི་མཆོག་འཛིན་སྨད་ནས་མངོན་རློམ་ཞི་བར་བྱེད་པའོ། །ལྡེམ་པོར་དགོངས་པ་ཞེས་པ་ནི་དོན་ཇི་བཞིན་མིན་པའི་ངག་གིས་དོན་དེ་ཉིད་བསྟན་པ་སྟེ། དེའི་ཚུལ་ནི་གདུལ་བྱ་བློ་དམན་གང་ཞིག་ལ། བདེན་གཉིས་དབྱེར་མེད་དང་སངས་རྒྱས་བྱང་སེམས་ཀྱི་ཐུན་མིན་གྱི་ཡོན་ཏན་ཇི་ལྟ་བ་བཞིན་གསལ་པོར་བརྗོད་པའི་ཚིག་གིས་བསྟན་ན། དེ་དག་གི་བློ་ལ་མི་ཆུད་པར་ཡིད་གཉིས་ཀྱི་གནས་ཐོབ་སྟེ་དོན་ལ་འཇུག་མི་ནུས་པའི་རིགས་རྣམས་ལ། རེ་ཞིག་དེ་ཉིད་ཀྱི་བློར་ཆུད་ཅིང་དགའ་བར་འགྱུར་བའི་མིང་དང་ཆ་ལྡན་ཅུང་ཟད་ཡོད་པའི་རྒྱུ་མཚན་གྱིས། དེ་ལས་རྣམ་པར་བསྐྱོགས་ནས་ཡང་དག་པའི་དགོངས་གཞི་དེ་བསྒྲུབ་པའི་ལམ་ལ་གཟུད་པའི་ཕྱིར། ཚིག་ནི་ཉན་པོ་དེའི་བློ་དང་མཐུན་པ་སྟེ་འཚམས་པ་ཞིག་ཡིན་ཡང་དོན་མི་མཐུན་པར་བཤད་པར་བྱ་སྟེ། དབྱེ་ན་མདོ་སྡེ་རྒྱན་ལས། ཞུགས་པ་ལྡེམ་པོར་དགོངས་པ་དང༌། །མཚན་ཉིད་ལྡེམ་པོར་དགོངས་པ་གཞན། །གཉེན་པོ་ལྡེམ་པོར་དགོངས་པ་དང༌། །བསྒྱུར་བ་ལྡེམ་པོར་དགོངས་པ་སྟེ། །ཞེས་པ་ལྟར་ཞུགས་པ་དང༌། །མཚན་ཉིད་དང༌། གཉེན་པོ་དང༌། བསྒྱུར་བ་ལྡེམ་པོར་དགོངས་པ་སྟེ་བཞི་ཡོད་དོ། །དང་པོ་ཞུགས་པ་ལྡེམ་པོར་དགོངས་པ་ནི། གང་ཞིག་རིགས་དང་མོས་པ་སོགས་དམན་པ་ཉན་ཐོས་དག་ལ། ཆོས་ཀྱི་བདག་མེད་ཡོངས་རྫོགས་སྟོན་པའི་གཞུང་ཡུམ་མདོ་ལྟ་བུ་དང་པོར་བསྟན་ན། དེས་རྟེན་འབྱུང་གི་དོན་མི་གོ་བར་ཐ་སྙད་ཀྱིས་སྟོང་པས་ཆད་ལྟ་ལྟ་བུར་གོ་ནས་བརྗོད་བྱའི་དོན་དང་རྗོད་བྱེད་ཚིག་གཉིས་ཀ་ལ་སྐྲག་ནས་ཐེག་ཆེན་གྱི་ལམ་དང་བཀའ་གཉིས་ཀ་སྤོང་བ་དེ་རྣམས་ལ། མདོ་ལས། རབ་འབྱོར་གཟུགས་ནི་མཚན་མའོ། །སྒྲ་ནི་མཚན་མའོ། །ཞེས་གསུངས་པ་ལྟར་གཟུགས་ལ་སོགས་ཆོས་རྣམས་ཡོད་དོ་ཞེས་སྨོས་པས། ཉན་པོ་སྐྲག་པ་མི་སྐྱེ་ཞིང་དོན་ལ་གྲུབ་པར་གོ་ནས་ལམ་ལ་རིམ་གྱིས་འཇུག་པ་ནི་དགོས་ཆེད་ཡིན་ལ། དགོངས་གཞི་ནི་འཁྲུལ་ངོར་སྣང་ཚོད་རྨི་ལམ་ལྟ་བུར་དགོངས་པའོ། །གཉིས་པ་མཚན་ཉིད་ལྡེམ་པོར་དགོངས་པ་ནི། ཆོས་ཀྱི་གནས་ལུགས་ངོ་བོ་ཉིད་མེད་པར་བསྟན་པ་དེ་གཏན་མེད་ལྟ་བུ་མ་ཡིན་པར། རྣམ་ཐར་སྒོ་གསུམ་གྱི་རང་བཞིན་དུ་གནས་པའི་དོན་དེ་ཤེས་པའི་དོན་དུ་རིམ་པ་བཞིན་བྱིས་པས་བདེན་པར་སྒྲོ་བཏགས་པའི་ཀུན་བརྟགས་དང༌། རྟེན་འབྲེལ་གྱི་ངོ་བོར་སྣང་ཙམ་པའི་གཞན་དབང་དང༌། རང་བཞིན་སྤྲོས་པ་དང་བྲལ་བའི་ཡོངས་གྲུབ་སྟེ་རྣམ་པ་གསུམ་པོ་དག་ལས། དང་པོ་ངོ་བོ་ཉིད་མེད་པའི་ཚུལ་ནི། ཀུན་བརྟགས་ལ་མཚན་ཉིད་ངོ་བོ་ཉིད་མེད་དེ། བྱིས་པའི་ལོག་ཤེས་ཀྱི་ཡུལ་དེ་དོན་དུ་ངེས་པར་མ་གྲུབ་པའི་ཕྱིར། དཔེར་ན་ཐག་ཁྲ་ལ་སྦྲུལ་དུ་འཁྲུལ་པ་བཞིན་དང༌། གཉིས་པར་ངོ་བོ་ཉིད་མེད་པའི་ཚུལ་ནི། གཞན་དབང་ལ་སྐྱེ་བ་ངོ་བོ་ཉིད་མེད་དེ། སྐྱེ་བ་ལྟར་སྣང་ཡང་དཔྱད་ན་མུ་བཞི་ལས་སྐྱེ་བ་མ་གྲུབ་པའི་ཕྱིར། དཔེར་ན་སྒྱུ་མ་བཞིན་དང༌། གསུམ་པར་ངོ་བོ་ཉིད་མེད་པའི་ཚུལ་ལ། དོན་དམ་ངོ་བོ་ཉིད་མེད་པའི་ཚུལ་ནི། ཡོངས་གྲུབ་ལ་དོན་དམ་ངོ་བོ་ཉིད་མེད་དེ། དོན་དམ་པ་ཡིན་ཞིང་བདག་ཉིད་ལ་མ་དག་པ་ལ་སོགས་སྤྲོས་པའི་ངོ་བོ་ཉིད་མེད་པའི་ཕྱིར། དཔེར་ན་ནམ་མཁའི་ངོ་བོ་ལ་སྤྲིན་གྱིས་མ་གོས་པ་བཞིན་ཡིན་པས། དོན་དེ་རྣམས་ལ་དགོངས་ནས་གཟུགས་ནས་རྣམ་མཁྱེན་བར་གྱི་ཆོས་རྣམས་ངོ་བོ་ཉིད་མེད་པ། མ་སྐྱེས་པ་ཞེས་པ་ལ་སོགས་པའི་བརྗོད་པ་ཟབ་པ་གཏིང་དཔོག་པར་དཀའ་བ་དག་ཏུ་སྟོན་ཏེ། མཚན་ཉིད་ལྡེམ་དགོངས་འདི་ཡོངས་གྲགས་ལ། ཀུན་བརྟགས་རྫས་སུ་དང༌། གཞན་དབང་རང་སྐྱེ་བའི་དང༌། ཡོངས་གྲུབ་གཞན་དབང་ལས་ལོགས་སུ་མེད་པའི་ཕྱིར་ངོ་བོ་མེད་པ་སྟེ། དེ་གསུམ་ལ་དགོངས་ནས་ངོ་བོ་ཉིད་མེད་པར་སྟོན་པ་དྲང་དོན་ནོ་ཞེས་སེམས་ཙམ་པ་ཁོ་ནའི་འདོད་པར་བཤད་པ་དང་འདིའི་བཤད་ཚུལ་མི་གཅིག་གོ །གསུམ་པ་གཉེན་པོ་ལྡེམ་པོར་དགོངས་པ་ནི། བློ་དམན་པ་གཞན་གྱིས་འདི་སྙམ་དུ། བསྐལ་པ་བཟང་པོའི་མདོ་སྡེ་ལས། སངས་རྒྱས་སྟོང་རྩ་བྱོན་པའི་ཚེ་དེ་དག་གི་ནང་ནས་ཤཱཀྱ་ཐུབ་པ་ནི་སྐུ་བོང་ཆུང་ཞིང༌། འོད་ཀྱང་འདོམ་གང༌། འདུས་པ་ཉུང་བ། སྐུ་ཚེ་ཡང་ཐུང་བས་གཞན་ལས་དམན་ནོ་སྙམ་དུ་ལོག་པར་རྟོག་པ་དེ་ལྡོག་པའི་ཆེད་དུ། འཆད་པ་པོའི་སྐུ་ཚེ་དང་རིགས་དང་སྐུ་བོང་ཚད་ཀྱིས་འཇལ་བ་མིན་ཏེ། སངས་རྒྱས་ཐམས་ཅད་གཟུགས་སྐུ་གདུལ་བྱའི་ངོར་སྣང་ཙམ་དང༌། ཆོས་སྐུ་སྐྱེ་བ་མེད་པར་མཉམ་པ་དང༌། ཚོགས་གཉིས་ཀྱི་བྱ་བ་ཡོངས་སུ་རྫོགས་པ་དང༌། གདུལ་བྱའི་ཡུལ་ལའང་ཕྲིན་ལས་རྩོལ་མེད་དུ་འཇུག་པ་ལ་མཉམ་པ་ལྟ་བུར་དགོངས་སོ། །དེས་མཚོན་ནས་གཉིས་པ་ལུང་གི་ཆོས་ལ་བརྙས་པའི་གཉེན་པོར་གངྒའི་ཀླུང་གི་བྱེ་མ་སྙེད་དང་མཉམ་པའི་སངས་རྒྱས་ལ་བསྙེན་བཀུར་བྱས་ན། གཟོད་ཐེག་ཆེན་གྱི་རྟོགས་པ་སྐྱེའོ། །ཞེས་གསུངས་པ་ལྟ་བུའོ། །དེའི་དོན་ཐེག་ཆེན་གྱི་དོན་ལ་དགོངས་ནས་གསུངས་པར་བཤད་དོ། །བཞི་པ་བསྒྱུར་བ་ལྡེམ་དགོངས་ནི། དགེ་སྦྱོང་གཽ་ཏ་མ་མ་བསྐུལ་ནའང་ཆོས་འཆད་དོ་ཞེས་འཕྱ་བ་བསལ་བ་དང༌། ལོ་དྲུག་ཏུ་དཀའ་སྤྱད་དེས་ཁྱད་པར་ཐོབ་ན་ཆོས་དེ་ཡང་གཏིང་དཔོག་སླའོ་ཞེས་པ་བསལ་ཕྱིར། ཟབ་ཞི་སྤྲོས་བྲལ་སོགས་གསུངས་ནས་ཆོས་མི་གསུང་བའི་ཚུལ་བསྟན་པ་ལྟ་བུ་དང༌། ཁྱད་པར་དོན་ཟབ་མོ་འདྲེན་པ་འདི་ལྟར་བསད་བྱ་མ་ཡིན་པའི་ཕ་དང་མ་གསོད་པར་བསྟན་པ་དང༌། དེ་བཞིན་དུ་བཅོམ་བྱ་མིན་པའི་རྒྱལ་པོ་དང་ནི། བྲམ་ཟེ་དང་དགེ་སྦྱོང་སྟེ་གཙང་སྦྲ་ཅན་གཉིས་དང༌། ཡུལ་འཁོར་སྐོར་དང་བཅས་པ་རྣམས་བཅོམ་ན། མི་དེ་དག་པ་ཉིད་དུ་གསུངས་པ་དེ་དག་གི་དགོངས་གཞི་ནི་སྲེད་ལེན་ཀུན་གཞི་ལ་སོགས་ཏེ། ཆེད་དུ་བརྗོད་པའི་ཚོམས་ལས། ཕ་སྲེད་པ་དང་མ་ལེན་པ་ནི་བསད་བྱ་ཞིང༌། རྒྱལ་པོ་ཀུན་གཞི་གཙང་སྦྲ་ཅན་བྲམ་ཟེ་ནི་འཇིག་ཚོགས་ལ་བལྟ་བ་དང༌། དགེ་སྦྱོང་ནི་ཚུལ་ཁྲིམས་མཆོག་འཛིན་ཏེ་གཉིས་དང༌། །ཡུལ་འཁོར་སྐོར་བཅས་ནང་གི་སྐྱེ་མཆེད་གཟུང་འཛིན་དང་བཅས་པའི་རྣམ་ཤེས་ཚོགས་བརྒྱད་རབ་བཅོམ་ན། །མི་དེ་དག་པ་ཉིད་དུ་འགྱུར། །ཞེས་སོ། །དེ་ལྟར་བཏགས་པའི་དོན་རྣམས་རྣལ་མར་བཟུང་ན་ནོར་བ་ཆེན་པོ་ཡིན་པ་ལྟ་བུའོ། །མདོར་བསྡུ་ན་དགོངས་པ་བཞི་དང༌། ལྡེམ་པོར་དགོངས་པ་བཞི་སྟེ་གཉིས་པོའི་ཁྱད་པར་ནི། རང་བཞིན་ཅི་རིགས་པར་ངོ་བོ་གཅིག་ལ་བྱེ་བྲག་ཐ་དད་པར་ཡོད་དེ། དགོངས་པ་སྒྲས་ཟིན་ཚོད་དེ་ཚིག་དེའི་དགོངས་པ་མིན་པར་ལོགས་སུ་བཤད་ནས། འདི་ལ་དགོངས་ནས་གསུངས་སོ་ཞེས་སྨྲ་བ་པོས་ཡིད་ལ་རྣམ་པར་བཞག་པའི་བསམ་པ་ཙམ་སྟོན་པའི་ཆ་ནས་བཞག་པ་ཡིན་གྱི། ཕ་རོལ་པོ་རྗེས་སུ་བཟུང་བ་ལ་ལྟོས་པ་མིན་ཞེས་དེའི་ཆ་ནས་བཞག་པ་མིན་ནོ། །ལྡེམ་པོར་དགོངས་པ་ནི་ཐད་དཀར་མི་སྟོན་པར་འཁྱོག་པོའི་ངག་གིས་བསྟན་པའི་དགོས་པ་འདིའི་ཞེས་ཕ་རོལ་རྗེས་སུ་བཟུང་བ་ལ་ལྟོས་པ་སྟེ་དགོས་པ་སྟོན་པའི་ཆ་ནས་བཞག་པའི་སྒྲ་དོན་ཚིག་དགོས་ཆེད་རྣམས་དུ་མ་ཡོད་པ་དེ་ཚུལ་བཞིན་དུ་རྣམ་པར་འབྱེད་ཤེས་པའི་ཤེས་རབ་ནི་གསུང་རབ་མདོ་རྒྱུད་རྣམས་ལ་ལྟ་བར་བྱེད་པའི་ལྡེ་མིག་གཉིས་པ་ཡིན་ནོ། །གཞལ་བྱའི་ངོས་ནས་རྒྱལ་བ་ཐབས་མཁས་ལ་ཐུགས་རྗེ་ལྡན་པས་དུག་གསུམ་ཆ་དང་མཉམ་སྟེ་ཉོན་མོངས་བརྒྱད་ཁྲི་བཞི་སྟོང་འདུལ་བའི་གཉེན་པོར་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་པ་མཐའ་དག་པའི་བརྗོད་བྱ་དོན་གྱི་དབྱེ་བ་བསམ་གྱིས་མི་ཁྱབ་པ་ཞིག་བསྟན་ནའང་བསྡུ་ན་གཉིས་སུ་འདུ་སྟེ། འཇིག་རྟེན་འཁོར་བའི་ཆོས་སེམས་དང་སེམས་བྱུང་ཡུལ་གྱི་རྣམ་པ་སྣང་བ་དང་བཅས་པ་ཐམས་ཅད་ཀུན་རྫོབ་བདེན་པའི་ངོ་བོ་དང༌། འཇིག་རྟེན་ལས་འདས་པའི་ཡེ་ཤེས་སོ་སོ་རང་རིག་པ་ཆོས་དབྱིངས་དང་རོ་གཅིག་པ་ནི་དོན་དམ་བདེན་པའི་ངོ་བོ་སྟེ། དེས་ན་ཆོས་ཐམས་ཅད་གཏན་ལ་འབེབས་པར་བྱེད་པ་ལ་བདེན་པ་གཉིས་པོ་དེ་ལས་གཞན་ཕུང་གསུམ་པ་ཞིག་མ་མཆིས་སོ། །ཀུན་རྫོབ་པ་དེ་ལའང་འཁྲུལ་མ་འཁྲུལ་གྱི་སྣང་ལུགས་བདེན་རྫུན་གྱི་རྣམ་པ་གཉིས་སུ་ཕྱེ་སྟེ། དུས་དེའི་འཁྲུལ་ཤེས་ཀྱི་ངོ་ལ་མེ་ཆུ་སོགས་དང༌། ཟླ་བ་གཅིག་ལ་སོགས་སྣང་བ་ཇི་སྙེད་པ་དེ་སྙེད་ཀྱི་རང་རང་གིས་མེས་བཙོ་བསྲེགས་དང༌། ཆུས་རླན་སྡུད་དང༌། ཟླ་བས་མུན་པ་སེལ་བ་སོགས་སྣང་ཚོད་དེ་ཉིད་དང་མཐུན་པར་དོན་བྱེད་པ་རྣམས། རང་རང་གི་ཤེས་པ་དང་བཅས་པས་བསྡུས་པ་ལ་ཡང་དག་པའི་ཀུན་རྫོབ་ཉིད་དུ་བཤད་དེ། མཐུན་པར་སྣང་བ་རྒྱུ་ལས་སྐྱེས་པ་བཏགས་པས་དབེན་པའི་ཕྱིར་དེ་སྐད་བརྗོད་དོ། །འཁྲུལ་ངོར་སྣང་ནའང་སྨིག་རྒྱུ་ལ་ཆུ་དང༌། ཐག་ཁྲ་ལ་སྦྲུལ། ཟླ་བ་གཉིས་སྣང་ལྟ་བུས་རིམ་བར་བརླན་པའི་བྱ་བ་དང༌། དུག་གིས་གནོད་པ་དང༌། མུན་པ་སེལ་བའི་དོན་མི་བྱེད་པ་ལ་སོགས་པ་དེ་དག་གི་ཤེས་པ་དང་བཅས་པ་ལ་ལོག་པའི་ཀུན་རྫོབ་དང༌། ཐ་སྙད་དུ་རང་གི་མཚན་ཉིད་ཀྱིས་གྲུབ་མ་གྲུབ་ཡོད་པའི་དབང་གིས་ཡང་དག་དང་ལོག་པའི་ཀུན་རྫོབ་སྟེ་གཉིས་སུ་གྲགས་སོ། །དོན་དམ་པའི་བདེན་པ་ནི་གཤིས་ཀྱི་བཞུགས་ཚུལ་ལམ་གནས་ཚུལ་འཁོར་འདས་རོ་གཅིག་པའི་ཡེ་ཤེས་ཏེ། དེའི་ངོ་བོ་ནི། འཁོར་བ་དང་ནི་མྱ་ངན་ལས་འདས་པའི་ཆོས་ཐམས་ཅད་གཟོད་མ་ནས་ངོ་བོ་ཉིད་མེད་པས་གཉིས་སུ་མེད་ཅིང་གདོད་ནས་སྤྲོས་པ་ཐམས་ཅད་དང་བྲལ་བས། སྙམ་བྱེད་ཀྱི་བློས་བསམ་པ་དང་སྒྲ་ཚིག་གིས་བརྗོད་པ་ལས་འདས་པས་ན། རྟོགས་པའི་བློ་ཡིས་དོན་དམ་ཡིན་པ་དང༌། མ་རྟོགས་པའི་བློ་ཡིས་མ་ཡིན་པར་མ་བཞག་སྟེ་རྟོགས་ཀྱང་རུང་མ་རྟོགས་ཀྱང་རུང་ཆོས་རྣམས་ཀྱི་གཤིས་འཕོ་འགྱུར་བྲལ་བ་ཞིག་གོ །དེ་ཡང་རྒྱལ་ཚབ་བྱམས་པས། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་སོ། །དེ་ལྟར་བདེན་གཉིས་མ་ཧེའི་རྭ་ལྟར་ཐ་དད་མེད་པའི་ཚུལ་ནི་འདི་ལྟར། བདེན་པ་གཉིས་པོ་ཡེ་ནས་རོ་གཅིག་ཏུ་འདྲེས་ཤིང་དབྱེར་མེད་པའི་སྣང་སྟོང་ཟུང་འཇུག་ནི། དཔེར་ན་རྫིང་བུ་དྭངས་བར་ཞུགས་པ་སྟེ་ཤར་བའི་ཟླ་བའི་སྐྱེ་མཆེད་བཞིན་རྟེན་ཅིང་འབྲེལ་འབྱུང་གི་ཆོས་འདི་དག་གཏན་མེད་རི་བོང་གི་རྭ་ལྟར་མ་ཡི་ན་པར། སྣང་ཙམ་པའི་ཆ་ནས་ཀུན་རྫོབ་ཀྱི་བདེན་པ་དང༌། སྣང་དུས་ཉིད་ནས་རང་བཞིན་གང་ཡང་མ་གྲུབ་པའི་ཆ་ནས་དོན་དམ་པའི་བདེན་པའོ་ཞེས་གཉིས་སུ་དབྱེ་ཡང་རང་བཞིན་མེད་པར་ངོ་བོ་གཅིག་གོ །རེ་ཞིག་མོས་སྤྱོད་པའི་ལམ་ལ་སྣང་བའི་ཆོས་གཟུགས་སྒྲ་སོགས་འདོད་པའི་ཡུལ་དབང་པོ་སྒོ་ལྔའི་ཤེས་པའི་ངོ་ལ་ཚོན་རིས་ཀྱི་ཁ་དོག་མ་འདྲེས་པ་ལྟ་བུས་སོ་སོར་སྣང་བ་ན། གཟུགས་སོགས་ཡུལ་ལྔ་པོ་སྣང་ཙམ་པ་དེས་མི་འཆིང་མོད། དེ་དག་ལ་གཟུང་འཛིན་དུ་སྐྱེས་ནས་འདོད་པའི་ལོངས་སྤྱོད་དུ་ཉེ་བར་ལེན་པའི་ཆ་བཟུང་བ་ནི། དེ་དང་དེ་ལ་འདི་ནི་གཟུགས་སོ་ཞེས་སོགས་དེར་འཛིན་གྱི་སྒོ་ནས་མི་འདོད་པ་ལ་དགག་པ་དང༌། འདོད་པ་ལ་སྒྲུབ་པའི་བློ་སེམས་དང་རྟོག་པ་སེམས་བྱུང་གི་འཁྲུལ་སྣང་བར་མ་ཆད་པ་སྣང་བ་དེ་ཐམས་ཅད་རང་བཞིན་མ་གྲུབ་ཅིང་སྤྲོས་པའི་མཐའ་བརྒྱད་དང་བྲལ་བའི་ཚུལ། སྐྱེ་བ་མེད་པ་རྨི་ལམ་ལྟ་བུ། འགག་པ་མེད་པ་སྒྱུ་མ་ལྟ་བུ། རྟག་པ་མེད་པ་སྨིག་རྒྱུ་ལྟ་བུ། ཆད་པ་མེད་པ་ཆུ་ཟླ་ལྟ་བུ། འོང་བ་མེད་པ་མིག་ཡོར་ལྟ་བུ། འགྲོ་བ་མེད་པ་བྲག་ཆ་ལྟ་བུ། ཐ་དད་མ་ཡིན་པ་དྲི་ཟའི་གྲོང་ཁྱེར་ལྟ་བུ། དོན་གཅིག་མ་ཡིན་པ་སྤྲུལ་པ་ལྟ་བུ་སྟེ་སྒྱུ་མའི་དཔེ་བརྒྱད་ཉིད་དུ་བརྟགས་ནས་སྣང་སྟོང་དབྱེར་མེད་ལ་ངེས་ཤེས་བསྐྱེད་ནས་རྩེ་གཅིག་ཏུ་འཇོག་པར་བྱའོ། །དེར་མ་ཟད་བདེན་གཉིས་དབྱེར་མེད་སྒྱུ་མའི་དཔེ་ཡིས་རང་བཞིན་མེད་པར་ཤེས་ཤིང་བསྒོམས་པ་དེ་ཡང་མཐར་ཐུག་ཆོས་ཀྱི་གནས་ལུགས་མ་ཡིན་ཏེ། ཅིའི་ཕྱིར་ཞེ་ན། བློ་ཡིས་རྣམ་པར་དཔྱད་བཟོད་དེ་ཡུལ་དུ་བྱ་རུང་བ་ཞིག་ཡོད་ན། དེ་ནི་དོན་དམ་མ་ཡིན་ཏེ་དོན་དམ་པ་ནི་རྣམ་པར་མི་རྟོག་པའི་ཡེ་ཤེས་ཀྱིས་ཡུལ་དང་ཡུལ་ཅན་གཉིས་སུ་མེད་པའི་ཚུལ་གྱིས་རྟོགས་པར་བྱ་བ་ཡིན་ལ། བློ་ནི་གཉིས་མེད་ཀྱི་དོན་ལ་སྒྲིབ་པའི་ཀུན་རྫོབ་ཡིན་པའི་ཕྱིར། གཅིག་དང་དུ་མ་དང་ཡོད་མེད་སོགས་སྤྲོས་པ་དང་རྣམ་པར་འགལ་བའི་སྤྲོས་བྲལ་དང༌། ཆོས་ཉིད་དང༌། ཡེ་ཤེས་ལ་སོགས་པའི་མཚན་ཉིད་རྣམས་ནི། བློ་ཡི་ཡུལ་ན་ནམ་དུ་ཡང་གནས་མ་མྱོང་སྟེ། དོན་དམ་བློ་ཡི་སྤྱོད་ཡུལ་མིན། །ཞེས་སོ། །སྤྱིར་བདེན་གཉིས་ཀྱི་རང་བཞིན་དེ་ལྟར་ཡིན་ལ། རེ་ཞིག་ནང་པ་སངས་རྒྱས་པའི་གྲུབ་པའི་མཐའ་སྨྲ་བ་སོ་སོ་ཡིས་བཀའི་དགོངས་པ་ལེན་ཚུལ་ཐ་དད་པའི་དབང་གིས་རང་རང་གི་གཞི་ལམ་འབྲས་བུའི་དོན་རྣམ་པར་བཞག་པའི་ཚུལ་ནི། ཚོགས་དྲུག་གི་ཤེས་པ་རགས་པའི་དོན་དམ་བློ་ཡིས་ཇི་ལྟར་དཔྱད་ཀྱང་དུས་གསུམ་དུ་བགོ་རུ་མེད་པའི་ཤེས་པ་སྐད་ཅིག་ཆ་མེད་དང༌། བེམ་པོ་དངོས་པོའི་ཆོས་ཀུན་རྡུལ་ཕྲན་ཆ་ཤས་བསགས་པའི་རགས་པར་སྣང་བ་འདི་ཡང་ཡོད་མི་རུང་བས་དེ་དག་དོན་དམ་པར་ནི། གཉེན་པོ་ཐོ་བ་ལ་སོགས་པས་བཅོམ་པའམ་གཞིག་ཀྱང་ཆ་ཤས་ཕྱེ་རུ་མེད་པ་ཡི་རྡུལ་ཕྲན་ཕྱོགས་ཀྱི་ཆ་མེད་ཞིག་ཡོད་དོ་ཞེས་འདོད་པ་ཉན་ཐོས་སྡེ་པ་བྱེ་བྲག་སྨྲ་བའི་ལུགས་སོ། །མདོ་སྡེ་པས་ཆོས་རྣམས་བདེན་གཉིས་སུ་གཏན་ལ་ཕབ་ཚུལ་ནི། ཆུ་སྐྱོར་གྱི་དོན་བྱེད་པའི་བུམ་པ་དང༌། གདུང་མ་འདེགས་པའི་དོན་བྱེད་ནུས་པ་ཡོད་པ་ཀ་བ་ལྟ་བུ་དངོས་པོ་གང་ཡིན་པ་དེ། འདི་པའི་གྲུབ་མཐའི་སྐབས་འདིར་ནི། དོན་དམ་པར་ཡོད་པ་མིན་ཏེ་རྫས་སུ་ཡོད་པའི་རྡུལ་ཕྲན་དུ་མ་འདུས་པ་ལས་མ་འདས་པའི་ཕྱིར་རོ། །དེས་ན་བེམ་ཤེས་ཆ་མེད་གཉིས་འདོད་པ་བྱེ་སྨྲར་མཚུངས་ཀྱང་དུས་གསུམ་རྫས་གྲུབ་དང་ནམ་མཁའ་རྟག་དངོས་སོགས་མི་འདོད་དོ། །དེ་ལས་གཞན་ཡིད་རྟོག་པའི་སྣང་ཡུལ་ལ་ཤར་བའི་ཆུ་སྐྱོར་བ་ལ་སོགས་པའི་དོན་བྱེད་མི་ནུས་པའི་ཀ་བུམ་སོགས་ལྟ་བུ་ནི་དོན་རང་མཚན་པའི་གནས་ལུགས་མཐོང་བ་ལ་སྒྲིབ་པའི་ཕྱིར་ཀུན་རྫོབ་ཡིན་ལ། དེ་ཡང་འཁྲུལ་སྣང་གི་བློ་ངོར་སྣང་ཙམ་དུ་ཡོད་པ་ལས་རང་བཞིན་གྲུབ་པ་མེད་དོ། །དེ་དག་ལ་རིམ་པ་ལྟར་རང་མཚན་དང་སྤྱིའི་མཚན་ཉིད་ཀྱིས་བཤད་པ་མདོ་སྡེ་པའི་ལུགས་ངོ་བོ་རྟོག་གེར་ཏེ་ཚད་མ་དང་མཐུན་ནོ། །བག་ཆགས་ཀྱི་དབང་གིས་གཟུང་བ་དང་འཛིན་པ་གཉིས་སུ་མེད་བཞིན་སྣང་བའི་ཡུལ་གཟུགས་སོགས་དང༌། ཡུལ་ཅན་འཛིན་པའི་སེམས་སོགས་ཀུན་བཏགས་ནི་གཟུང་འཛིན་གཉིས་སུ་མེད་བཞིན་དེར་བདེན་པར་སྒྲོ་བཏགས་པ་ཡིན་པས་ཀུན་རྫོབ་བདེན་པ་ཉིད་དེ། གང་ཀུན་བརྟགས་ལས་གཞན་སྣང་གཞི་གཞན་དབང་གི་ངོ་བོ་གཟུང་འཛིན་གཉིས་མེད་ཀྱི་ཤེས་པ་རང་རིག་དང༌། དེའི་སྟེང་ན་ཀུན་བརྟགས་ཀྱིས་སྟོང་པའི་ཆ་ཡོངས་གྲུབ་གཉིས་ནི་དོན་དམ་པའི་བདེན་པ་རུ་འདོད་པ་སྟེ་སྔ་མ་ཆོས་ཅན་དོན་དམ་དང༌། ཕྱི་མ་ཆོས་ཉིད་དོན་དམ་དུ་འདོད་པ་སེམས་ཙམ་པ་ཡི་གྲུབ་པའི་མཐའ་འཛིན་པ་རྣམས་ཀྱི་ལུགས་སོ། །ཚོགས་དྲུག་གི་ཡུལ་གཟུགས་ལ་སོགས་པའི་ཆོས་ཇི་ལྟར་སྣང་བ་ཐམས་ཅད་ཀུན་རྫོབ་ཏུ་རང་གི་མཚན་ཉིད་ཀྱིས་གྲུབ་པ་སྟེ། ཐ་སྙད་དཔྱོད་བྱེད་ཀྱི་ངོར་གྲུབ་པའི་ཕྱིར་ཞེས་བཞེད་དེ། དེས་ན་བདེན་གྲུབ་སོགས་མེད་ཀྱང་རང་ངོས་ནས་གྲུབ་པ་དང༌། རང་བཞིན་གྱིས་གྲུབ་པ་དང༌། རང་གི་མཚན་ཉིད་ཀྱིས་གྲུབ་པ་དང༌། རྫས་སུ་གྲུབ་པ་རྣམས་ནི་དོན་གཅིག་ཅིང་དེ་དོན་དམ་དཔྱོད་བྱེད་ཀྱི་རྟགས་ཀྱི་དགག་བྱར་མི་འདོད་དོ། །དེས་ན་བུ་མའི་གཞུང་ལུགས་ལས་རང་བཞིན་མ་གྲུབ་པར་གསུངས་པ་འགའ་ཞིག་སྣང་བ་ལ་དོན་དམ་གྱི་ཁྱད་པར་སྦྱར་དགོས་ཞེས་བཞེད་པར་སྣང་སྙམ་མོ། །དེ་ཡང་རྒྱུ་རྐྱེན་རྟེན་འབྲེལ་ཙམ་ལས་སྣང་བའི་སྒྱུ་མ་ལྟ་བུའི་མཚན་ཉིད་དུ་གྲུབ་པ་དེ་ལ། ལས་འབྲས་སོགས་ཆོས་རྣམས་མ་འདྲེས་པར་རྣམ་པར་འཇོག་ཏུ་ཡོད་ནའང༌། དོན་དམ་དཔྱོད་བྱེད་ཀྱི་རིག་ཤེས་ཀྱིས་ཡུལ་རང་གི་གྲུབ་ཚུལ་ལ་དཔྱད་ན་གང་དུའང་གྲུབ་པ་མེད་པ་ནམ་མཁའ་ལྟར་རྣམ་པར་དག་པ་སྟེ། དེས་ན་བདེན་གྲུབ་དང༌། རང་བཞིན་གྲུབ་པ་དང༌། ཡང་དག་པར་གྲུབ་པ་དང༌། དེ་ཁོ་ན་ཉིད་དུ་གྲུབ་པ་རྣམས་དོན་གཅིག་པས་དོན་དམ་ལ་དཔྱོད་བྱེད་ཀྱི་རྟགས་ཀྱིས་དགག་བྱ་མཐར་ཐུག་པའོ། །ཆོས་ཀྱི་བདག་དང་གང་ཟག་གི་བདག་དགག་བྱར་འདོད་པ་དེ་དག་ནི་དབུ་མ་རང་རྒྱུད་པ་སྤྱིའི་ལུགས་སོ། །འདི་ལྟར་སྣང་ཞིང་སྲིད་པའི་ཆོས་མཆིས་སོ་ཅོག་ཐམས་ཅད་རྟེན་ཅིང་འབྲེལ་བར་འབྱུང་བ་སྒྱུ་མ་དང་རྨི་ལམ་ལྟ་བུའི་ཚུལ་དུ་སྣང་བ་ཙམ་འདི་ཉིད་གྲུབ་མ་གྲུབ་སོགས་སུ་མ་དཔྱད་པར་དོན་དམ་པའི་བདེན་པ་ལ་ནི་འཇུག་པའི་ཐབས་སུ་ཀུན་རྫོབ་དང༌། ཆོས་ཅན་རང་བཞིན་མེད་པ་ཆོས་ཉིད་སྟོང་པ་ཉིད་དུ་གདོད་ནས་གནས་པ་དོན་དམ་པའོ་ཞེས་བྱ་བར་ཐ་སྙད་ཀྱི་སྒོ་ནས་བཏགས་པ་ཙམ་ཡིན་གྱི། དོན་ལ་དེ་གཉིས་ཀ་སྣང་བ་དང་སྟོང་པ་གང་གི་ཡང་ཕྱོགས་སུ་མ་ལྷུང་བར་ཆོས་རྣམས་རང་གི་ངོ་བོ་གཞི་མེད་རྩ་བ་ལས་འདས་པ། སྤྲོས་པའི་མཐའ་ཐམས་ཅད་དང་བྲལ་ཞིང༌། གཟུགས་སོགས་ཆོས་འདི་དག་ཚོགས་དྲུག་གི་ཡུལ་ལ་སྐྱེ་འགག་སོགས་ཀྱི་རྣམ་པར་སྣང་དུས་ཉིད་ནས་གཟུགས་བརྙན་དང་སྨིག་རྒྱུ་བཞིན་སྐྱེ་བ་དང༌། འགག་པ་དང༌། འགྲོ་བ་དང༌། འོང་བ་སོགས་ཆོས་ཐམས་ཅད་རང་གི་ངོ་བོ་ན་མེད་དེ། སྐྱེ་སོགས་སུ་སྣང་བའི་ངོ་བོ་ཡང་གྲུབ་མ་མྱོང་བའི་ཕྱིར་རོ། །སེམས་ཙམ་པས་གཞན་དབང་གི་ཤེས་པ་རང་གསལ་གྱི་ངོ་བོ་མི་སྟོང་པར་འདོད་པ་དང༌། རང་རྒྱུད་པས་གཟུགས་སོགས་རྒྱུ་རྐྱེན་གཞན་དབང་ཅན་གྱི་དངོས་པོ་འདི་དག་ཐ་སྙད་དུ་གྲུབ་པར་འདོད་པ་ལྟ་བུའི་སྒོ་ནས་ནི། ཀུན་རྫོབ་ཀྱི་ཆོས་རྣམས་ཀྱང་ཐལ་འགྱུར་བ་དེ་ཡི་གྲུབ་པའི་མཐའ་རུ་ཁས་མ་བླངས་ན་དོན་དམ་པར་ལྟ་ཅི་སྨོས། དེ་ནི་ཐལ་གྱུར་ཤིང་རྟའི་སྲོལ་འབྱེད་ཆེན་པོ་ལུང་ཟིན་གྱི་སྐྱེས་བུ་དམ་པ་དཔལ་ལྡན་ཀླུ་ཡི་དབང་པོས་དགོངས་འགྲེལ་གཞན་ལ་མ་ལྟོས་པར་རང་སྟོབས་ཀྱིས་བཀྲལ་ཏེ་དབུ་མ་རིགས་པའི་ཚོགས་རྣམས་མཛད་ནས་ད་ལྟའི་བར་དུ་དར་བ་ཡིན་ཏེ། དེའི་ཚུལ་ནི། ལང་ཀར་གཤེགས་པ་ལས། ལྷོ་ཕྱོགས་བྷེ་ཏའི་ཡུལ་དུ་ནི། །དགེ་སློང་དཔལ་ལྡན་ཆེར་གྲགས་པ། །དེ་མིང་ཀླུ་ཞེས་འབོད་པ་སྟེ། །ཡོད་དང་མེད་པའི་ཕྱོགས་འཇིག་པ། །ང་ཡི་བསྟན་པ་འཇིག་རྟེན་དུ། །བླ་མེད་ཐེག་ཆེན་རབ་བཤད་ནས། །རབ་ཏུ་དགའ་བའི་ས་བསྒྲུབས་ཏེ། །བདེ་བ་ཅན་དུ་དེ་འགྲོའོ། །ཞེས་དང༌། འཇམ་དཔལ་རྩ་རྒྱུད་ལས། དེ་བཞིན་གཤེགས་པ་ང་འདས་ནས། །ལོ་ནི་བཞི་བརྒྱ་ལོན་པ་ན། །དགེ་སློང་ཀླུ་ཞེས་དེ་འབོད་འབྱུང༌། བསྟན་པ་ལ་ནི་དད་ཅིང་ཕན། །རབ་ཏུ་དགའ་བའི་ས་ཐོབ་པ། །ལོ་ནི་དྲུག་བརྒྱ་དག་ཏུ་འཚོ། །རིག་པ་རྨ་བྱ་ཆེན་མོ་ནི། །བདག་ཉིད་ཆེན་མོ་དེས་ཀྱང་འགྲུབ། །བསྟན་བཅོས་སྣ་ཚོགས་དོན་དང་ནི། །དངོས་པོ་མེད་པའི་དོན་དེ་རིག །གང་ཚེ་ལུས་དེ་བོར་བ་ན། །བདེ་བ་ཅན་དུ་སྐྱེ་བར་འགྱུར། །དེ་ནི་མཐར་གྱི་སངས་རྒྱས་ཉིད། །ངེས་པ་ཁོ་ནར་ཡང་དག་འཐོབ། །ཅེས་གསུངས་པ་ལྟར་རོ། །དེ་ཉིད་ཀྱི་གཞུང་རིགས་ཚོགས་དང་བཅས་པའི་དོན་འགྲེལ་བ་པོ་སློབ་དཔོན་ཨཱརྻ་དེ་ཝ་དང༌། སངས་རྒྱས་བསྐྱང༌། ལེགས་ལྡན་འབྱེད། ཟླ་གྲགས་ལ་སོགས་པ་སྟེ་དེ་དག་ལས་ཁྱད་པར་མི་འཕྲོག་པའི་མཁྱེན་རབ་དང་ལྡན་པ་དཔལ་ལྡན་ཟླ་བ་གྲགས་པས་ནི་སློབ་དཔོན་ཀླུའི་དགོངས་པ་མ་ནོར་བར་རྩ་བའི་དོན་འགྲེལ་དབུ་མ་འཇུག་པ་དང༌། ཚིག་འགྲེལ་ཚིག་གསལ་རྣམས་མཛད་དེ་རྒྱལ་བའི་དགོངས་པ་མཐར་ཐུག་པའི་དོན་ཇི་བཞིན་པར་བཀྲལ། ཐལ་འགྱུར་བའི་གྲུབ་པའི་མཐའི་ཉི་མ་འཛམ་གླིང་དུ་ཤར་བར་མཛད་པས་ལྟ་ངན་གྱི་མུན་པ་མཐའ་དག་གསལ་བར་བྱས་པའི་ཁྱད་ཆོས་དང་ལྡན་པ་ཡིན་པས་འདིར་ནི་གྲུབ་མཐའ་སྨྲ་བ་འོག་མ་གསུམ་པོའི་རང་རང་གི་བློ་ཡིས་ཆོས་རྣམས་ཀྱི་མཚན་ཉིད་ལ་བཏགས་ཤིང༌། ཤེས་རབ་ཀྱི་ཡུལ་བདག་མེད་དང༌། སྐྱེ་མེད་དང༌། སྟོང་ཉིད་དང༌། མཐའ་བྲལ་སོགས་སུ་དཔྱད་ནས་སྤྲོས་པ་ཕྱོགས་རེ་ཙམ་བཅད་ཀྱང་དངོས་ཞེན་གྱི་རྣམ་པ་དང་བཅས་པ་མ་ཟད། རང་རྒྱུད་པས་ཐ་སྙད་དུ་གྲུབ་པར་ཁས་ལེན་པ་ལ་སོགས་པ་ཐམས་ཅད་ལའང་བརྩད་ཅིང་བརྟགས་པས་མཐར་འཛིན་གྱི་ཞེན་པ་རེ་རེ་ནས་ཀྱང་ཐལ་འགྱུར་ཆེན་པོས་སུན་ཕྱུང་སྟེ་འདི་ལ་རྒོལ་ནུས་པ་སུ་ཡང་མེད་པས་གྲུབ་མཐའ་ཐམས་ཅད་ཀྱི་ནང་ནས་གོང་མའམ་རྩེ་མོ་ཡིན་པ་འདི་སུ་ལའང་ནོར་འཁྲུལ་མི་འགྱུར་རོ། །རྒྱ་གར་དུ་ཕྱི་ནང་གི་གྲུབ་མཐའི་དབྱེ་བ་མང་ཞིང་བོད་འདིར་ཡང་རང་རང་གི་འདོད་ཞེན་གྱིས་སྦྱར་བའི་གྲུབ་མཐའ་སྣ་ཚོགས་བྱུང་ཞིང་དབུ་མ་གསང་སྔགས་སོགས་ཀྱི་སྲོལ་འཛིན་དགོངས་པ་ལེན་ཚུལ་མང་ནའང༌། རང་རང་གི་ངོར་ལྟོས་ཏེ་རང་རང་གི་བློས་བཞག་པའི་ཚུལ་དེ་མཐར་ཐུག་གི་དོན་དུ་གྲུབ་པར་འདོད་ཀྱི། ཞིབ་ཏུ་དཔྱད་ཏེ་གྲུབ་པའི་མཐའ་ཡི་རྣམ་བཞག་ཐམས་ཅད་ཀྱི་མཚན་ཉིད་ཐོས་པའི་ཤེས་རབ་ཀྱིས་ཉམས་འོག་ཆུད་པར་བྱས་ནས། གྲུབ་མཐའ་བཞི་པོ་དེ་ལས་བླང་བྱ་དངོས་ཐལ་འགྱུར་པ་དང༌། དངོས་འདྲ་རང་རྒྱུད་པ་དང༌། དངོས་མིན་བྱེ་མདོ་སེམས་གསུམ་གྱི་མཚན་ཉིད་ཐམས་ཅད་མ་འདྲེས་པར་སོ་སོར་ལེགས་པར་ཕྱེད་པའི་ཚིག་ཙམ་ལ་མ་ལྟོས་པར་ནང་དུ་ངེས་པ་ཡང་དག་རྙེད་པ་ནི་བསམ་པའི་ཤེས་རབ་ཡིན་ཀྱང༌། དེ་ཉིད་ནི་ཐོས་པ་དྲི་མ་མེད་པའི་ཤེས་རབ་ལ་བརྟེན་ནས་འབྱུང་ཞིང༌། དེ་ཡིས་རྙེད་པའི་དོན་ལ་གོམས་པར་བྱས་ཤིང་ཆོས་རབ་ཏུ་རྣམ་པར་འབྱེད་པའི་ཤེས་རབ་ཡང་དག་པ་དེས་ནང་དུ་ཉོན་མོངས་དང་མངོན་ཞེན་གྱི་རྟོག་པ་ཐམས་ཅད་བཅིལ་ཏེ་རྒྱུད་ལ་མི་གནས་པར་བྱེད་ཅིང༌། མངོན་ཞེན་དང་ཉོན་མོངས་མེད་པ་ལ་ནི་བདུད་དང་རྒོལ་བ་ངན་པ་གང་ལའང་འཇིགས་པ་མེད་པའི་སྤོབས་པ་རྒྱ་ཆེན་པོ་དེ་རྣམས་ཐོབ་པས་བདུད་ཕྱོགས་ཀྱིས་གླགས་མི་རྙེད་ཅིང་བརྫི་མི་ནུས་སོ། །དེ་དག་གི་ནང་ནས་འདིར་མཐར་ཐུག་གི་ཉམས་ལེན་གང་བཟུང་ཞེ་ན། ཐལ་འགྱུར་གྱི་ཤིང་རྟའི་སྲོལ་འབྱེད་ཆེན་པོ་རྣམས་ཀྱིས་ཇི་ལྟར་བསྟན་པའི་དོན་ཆོས་རྣམས་ཀྱི་གཤིས་ཀྱི་བཞུགས་ཚུལ་ཆོས་དབྱིངས་རང་བཞིན་གྱིས་སྤྲོས་པ་དང་བྲལ་བ་ལ། ངག་གི་སྨྲ་བ་དང༌། བློས་བསམ་པ་དང༌། ཚིག་གིས་བརྗོད་དུ་མེད་པ་སྤྲོས་བྲལ་ཞི་བ་དེ་ནི་དོན་དམ་བདེན་པ་མཐར་ཐུག་པ་ཡིན་ནོ། །དེ་ལྟར་རྩལ་སྣང་འགག་པ་མེད་པ་རྟེན་འབྲེལ་གྱི་སྣང་ཆ་འདི་ལ་བློ་སྟེ་སེམས་སེམས་བྱུང་གི་རྟོག་པ་ཡི་ཆ་ནས་སྨྲ་བསམ་བརྗོད་པ་རུ་བཏགས་ཤིང༌། བཏགས་པ་ཇི་ལྟ་བར་སྣང་བའི་ཆ་འགག་མེད་དུ་འཆར་བ་ཀུན་རྫོབ་བདེན་པའི་ཆར་བཞག་ནས། མཉམ་བཞག་ཏུ་རྣམ་པར་མི་རྟོག་པའི་ཡེ་ཤེས་ནམ་མཁའ་ལྟ་བུའི་ངང་ལ་འཇོག་ཅིང༌། རྗེས་ཐོབ་ཏུ་སྒྱུ་མ་ལྟ་བུའི་དྲན་འདུན་གྱིས་བསོད་ནམས་ཀྱི་ཚོགས་མི་འགོག་པར་བསྒྲུབ་ནའང་བདེན་གཉིས་སོ་སོའི་ཕྱོགས་སུ་ལྷུང་བ་མ་ཡིན་པར་རྗེས་ཐོབ་སྣང་བཅས་ཀྱི་གནས་སྐབས་སུའང་རང་བཞིན་གཤིས་ཀྱི་བཞུགས་ཚུལ་ལས་གཡོ་མི་སྲིད་ལ། མཉམ་བཞག་སྤྲོས་པ་དང་བྲལ་བ་ལ་གནས་པའི་ཚེ་ནའང་ཆད་སྟོང་ཅི་ཡང་མེད་པར་འགྱུར་མི་སྲིད་པས་དུས་ནམ་དུ་ཡང་གཉིས་པོ་ཟུང་དུ་འཇུག་ཅིང་འདུ་འབྲལ་མེད་པའི་དོན་དེ་ནི་ཆོས་ཀྱི་དབྱིངས་ཀྱི་རང་བཞིན་ཡིན་པས། དེའི་ངོ་བོ་རྟོགས་བྱ་ཡུལ་དང་རྟོགས་བྱེད་བློའམ་ཤེས་པ་སོགས་བློས་བཏགས་པའི་གཉིས་ཆོས་ཐམས་ཅད་ལས་འདས་པ་ཡིན་པས། གང་ཟག་སུས་ཀྱང་ཤེས་བྱ་ཤེས་བྱེད་ཀྱི་ཚུལ་གྱིས་མངོན་དུ་བྱར་མེད་ལ། དམིགས་རྣམ་ཅན་གྱི་ལྟ་བས་བལྟར་མེད་ཅིང༌། རྩོལ་བ་དང་བཅས་ལམ་བསྒྲུབས་པས་སྔར་མེད་གསར་དུ་ཐོབ་པ་དང་མཐར་ཕྱིན་རྒྱུ་ཡང་རྡུལ་ཙམ་མེད་ལ། ལམ་མ་བསྒྲུབས་པར་རང་གར་ཐ་མལ་དུ་བསྡད་ཀྱང་མ་ཐོབ་པ་སྟེ་ཐོབ་ཤོར་གང་ཡང་མེད་ལ། ཆོས་ཉིད་རྣལ་མའི་ངོས་ན་དེ་གཉིས་ཀ་བཟང་ངན་མེད་པར་མཉམ་པ་ཉིད་ཀྱི་ཕྱིར་རོ། །ཆོས་ཉིད་སྟོང་པ་ཉིད་དུ་གནས་པ་ལ་དེ་དང་ངེས་པར་རྗེས་སུ་མཐུན་པའི་བློ་མཐར་འཛིན་གྱི་དྲི་མ་ཐམས་ཅད་ཟད་ཅིང༌། །ཡུལ་ཡུལ་ཅན་རོ་གཅིག་པའི་ཚུལ་དུ་སྐྱེས་པ་སྟེ། ལན་ཚྭ་ཆུར་ཞུ་བ་ལྟར་ཆོས་ཉིད་དང་ཐ་དད་མེད་པར་གྱུར་པ་ལ། སྟོང་ཉིད་རྟོགས་པ་དང་འབྲས་བུ་ཐོབ་པ་ལ་སོགས་པའི་བླ་དྭགས་ཏེ་མིང་གི་ཐ་སྙད་དུ་བཏགས་སོ། །གཞི་ལམ་འབྲས་བུས་བསྡུས་པའི་ཆོས་གང་ཞིག་རྟེན་ཅིང་འབྲེལ་བར་འབྱུང་བའི་རང་བཞིན་དུ་གནས་པའི་དོན་འདི་ནི་གསུང་རབ་ཀྱི་ཆོས་རྣམས་མ་ལུས་པ་ཀུན་གྱི་བརྗོད་བྱར་གནས་པས་མཛོད་དུ་གྱུར་པའོ། །གང་ཞིག་རྟེན་འབྱུང་གི་དོན་དེ་ལྟ་བུ་ཐོས་པས་གཏན་ལ་ཕབས་པའི་རྗེས་སུ། གནད་དོན་གཅིག་ཏུ་བསྡུས་ཏེ་བསམ་པའི་ཤེས་རབ་ཀྱིས་མཐར་འཛིན་གྱི་ཕྱོགས་ཞེན་དྲི་མས་མ་བསླད་པར་ཡང་དག་པར་འཇུག་པ་ནི་གསུང་རབ་ཀྱི་བརྗོད་དོན་ཟབ་མོའི་སྒོ་འཕར་འབྱེད་པའི་ལྡེ་མིག་ལྟ་བུ་ཡིན་ནོ། །འདི་ལྟར་སྣང་བ་ནི་བསླུ་ཞིང་རྫུན་པ་སྲིད་པ་ནི་གཡོ་ཞིང་འདུ་བྱེད་པ། འཁོར་བ་ནི་ཀུན་འབྱུང་རང་རྒྱུད་ལྡན། འདས་པ་ནི་མྱང་འདས་རང་བཞིན་ཆོས་ཉིད་ལ་མིང་དུ་གདགས་པ་སྟེ་དེ་ལྟར་ཆོས་རྣམས་ཐམས་ཅད་ཀུན། དང་པོ་གང་ནས་ཀྱང་ནི་མ་འོངས་ལ། ཐ་མར་གང་དུའང་མ་སོང༌། བར་དུ་གང་ནའང་མི་གནས་པ་སྟེ་ཆོས་རྣམས་ཡེ་ནས་དུས་གསུམ་མཉམ་པ་ཉིད་ཀྱི་རང་བཞིན་དུ་གནས་པ་ནི། གཤིས་ལ་གནས་པའི་རྟེན་ཅིང་འབྲེལ་བར་འབྱུང་བ་ཡིན་ཏེ། ཡབ་སྲས་མཇལ་བ་ལས། ཆོས་འདི་དག་ཐམས་ཅད་ནི་དུས་གསུམ་དུ་མཉམ་པ་ཉིད་ཀྱིས་མཉམ་པ་དག་སྟེ། སོགས་གསུངས་པ་ལྟར་རོ། །ཡང་འདི་ལྟར་ཆོས་ཅན་སྣ་ཚོགས་སུ་སྣང་བ་ཉིད་ཀྱང་སྐྱེ་འགག་ལ་སོགས་པ་ལྟར་སྣང་ཡང༌། སྣང་དུས་དེ་ཉིད་ནས་ངོ་བོ་རང་བཞིན་མ་གྲུབ་པས། རང་གི་རང་བཞིན་སྟོང་བཞིན་དུ་སྣང་བ་མ་འགག་པར་ཤར་བས་ཡོད་མེད་སོགས་སྤྲོས་པའི་མཐའ་གང་ལའང་མི་གནས་པའི་དོན་ལ་ཤེས་རབ་ཀྱིས་ངེས་པ་གཏིང་ནས་རྙེད་ཅིང༌། ཆོས་ཅན་མཐུན་སྣང་དུ་གྲུབ་པ་མེད་པའི་སྟོང་ཉིད་ལ་བརྟེན་ནས་གདགས་པ་ཙམ་དུ་ཤེས་པའི་ལམ་དེ་ནི། མཐའ་བྲལ་དབུ་མའི་ལམ་གྱི་རང་བཞིན་ཉིད་དུ་བསྟན་ནོ། །དེ་ཡང་གཤིས་རྣལ་མའི་ངོ་བོ་ལ་དག་པ་དང་མ་དག་པ་གཉིས་ཀ་མེད་ཀྱང་སེམས་རྟོག་གློ་བུར་བ་ལངས་པའི་བག་ཆགས་ཀྱི་དབང་གིས་དོན་ལ་མེད་པ་ཡིན་ཀྱང་མེད་བཞིན་དུ་ཕྱི་ནང་གི་སྣང་བ་སྣ་ཚོགས་འདི་དག་སྣང་ཞིང༌། སྣང་བ་དེ་ལ་འདི་ཡུལ་ལོ། འདི་ནི་ཡུལ་ཅན་ནོ་ཞེས་སོགས་གཟུང་འཛིན་གྱི་རྣམ་པར་ཀུན་ཏུ་སྒྲོ་བཏགས་ཏེ་བླང་དོར་དགག་སྒྲུབ་ཏུ་ཞེན་པས་ཉེ་བར་ལེན་པའི་སྒོ་ནས་འཁྲུལ་སྣང་དང་འཁྲུལ་རྟོག་ལུ་གུ་རྒྱུད་དུ་བར་མ་ཆད་པར་འཁོར་བ་ཡིན་ལ། ཡང་གཤིས་ཀྱི་གནས་ལུགས་ཚོལ་བར་འདོད་པའི་ཕྱི་ནང་གི་གྲུབ་མཐའ་སྨྲ་བ་པོ་དག་གིས་ཚུལ་དེ་ལ་རྟོག་ཅིང་ཡང་ཡང་དཔྱད་པས། མཐའ་བྲལ་ཇི་བཞིན་བློར་མ་ཆུད་ནས་སྒྲོ་སྐུར་གྱི་མཐའ་བཞི་བྱུང་བ་ཡིན་ཏེ། གང་ཞེ་ན། རང་སྡེ་རྣམས་ཀྱིས་ཕྱི་དོན་ནང་རིག་ལ་སོགས་པ་ཡོད་པར་ལྟ་བ་དང༌། དངོས་པོ་རང་ས་དང་གཟུང་འཛིན་ལ་སོགས་བཀག་པའི་མེད་པ་མེད་དགག་སྟོང་རྐྱང་ཙམ་དུ་འདོད་པ་དང༌། ཕྱི་རོལ་པ་དག་གཙོ་བོ་བདག་ལ་སོགས་པ་རྟག་པར་འདོད་པ་དང༌། ད་ལྟའི་སྣང་བ་འདི་ཙམ་གློ་བུར་དུ་བྱུང་བ་ལས་སྔ་ཕྱིའི་རྒྱུན་སོགས་ཆད་པར་ལྟ་བ་སོགས་དང༌། མཐའ་དང་བྲལ་བའི་དབུས་ཞེས་བློས་བཟོས་ཏེ་མཆོག་འཛིན་དེ་ལ་གནས་པར་བྱེད་པའང་ཆོས་ཉིད་ཀྱི་དོན་ལ་མཁས་པ་མིན་ཏེ་འཆིང་བྱེད་གང་རུང་མཚུངས་ཏེ། ཇི་ལྟར་དར་གྱི་སྲིན་བུ་ཞེས་སྡོམ་སྲིན་གྱི་ཁ་ཆུས་ཐག་རྒྱ་བྲན་ཏེ་དེས་རང་གི་རྐང་ལག་བཅིངས་ནས་མི་ཐར་བ་བཞིན་དུ། རང་རང་གི་འདོད་པའི་གྲུབ་མཐས་རང་ཉིད་བཅིངས་པ་དེས་བག་ཆགས་ཀྱི་མཐུ་བརྟས་པའི་སྐབས་འདི་ན། བློ་ཡིས་སྒྲོ་བཏགས་ཤིང་སྣང་ཙམ་པའི་ཆོས་འདི་དག་ཐམས་ཅད་ཀྱི་རང་བཞིན་སྐྱེ་མེད་གཤིས་ལུགས་ཡིན་ལ། དང་པོ་སྐྱེ་བ་༡དང༌། མཐར་འགག་པ་༢དང༌། བར་དུ་གནས་པ་༣དང༌། ཕར་འགྲོ་བ་ཚུར་འོང་བ་མིན་ཏེ། ཅིའི་ཕྱིར་ན། དོན་གཅིག་པ་མ་ཡིན་ལ། རང་གཞན་ཐ་དད་པའང་མིན། འཕོ་འགྱུར་མེད་པ་རྟག་པ་མ་ཡིན་ལ། དང་པོ་ཡོད་ནས་མཐར་ཆད་པའང་མིན་ཏེ་དེ་ལྟར་མེད་པ་དྲུག་དང་མ་ཡིན་པ་གཉིས་ཏེ་སྤྲོས་པའི་མཐའ་བརྒྱད་པོ་དག་ཉེ་བར་ཞི་བའི་རང་བཞིན་ཡིན་ཏེ། མགོན་པོ་ཀླུའི་དབང་པོ་ཞལ་ནས། གང་གིས་རྟེན་ཅིང་འབྲེལ་བར་འབྱུང༌། །འགག་པ་མེད་པ་སྐྱེ་མེད་པ། །་ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་སྟོན་པ། །ཞེས་སོ། །དེས་ན་དེ་ལྟ་བུའི་གཤིས་ཐོག་ཉིད་དུ་བློ་ཕེབས་ཤིང་ཇི་བཞིན་པའི་གནས་ལུགས་ཤེས་པ་ནི། བསམ་བྱུང་ཤེས་རབ་ཀྱི་ངོ་བོ་མ་ནོར་བ་ཡིན་ནོ། །ཐ་སྙད་འཁྲུལ་ངོར་སྣང་ཡུལ་ས་ཆུ་མེ་རླུང་སྟེ་འབྱུང་བཞི་དང༌། གོ་འབྱེད་ནམ་མཁའ་ཡང་སྣང་ཞིང༌། བྱེ་བྲག་རི་དང་ནགས་ཚལ་དང༌། ཁང་བུ་བརྩེགས་པ་དང༌། བུམ་པ་དང༌། སྣམ་བུ། རེ་ལྡེ། ས་མྱུག་སོགས་འདུས་བྱས་ཀྱི་དངོས་པོ་ཐམས་ཅད་རང་རང་གི་རྒྱུ་ལས་ཐམས་ཅད་སྐྱེས་ཏེ། རྩ་བ། སྡོང་བུ། ཡལ་ག་ལོ་མ། མེ་ཏོག །འབྲས་བུ་སྟེ་རྒྱུ་དང་འབྲེལ་བ་དྲུག་འབྱུང་བ་ལྔ་དང་དུས་ཀྱི་འགྱུར་བ་སྟེ་དྲུག་པོ་ལ་རྐྱེན་དང་འབྲེལ་བ་དྲུག་ཅེས་བྱ་སྟེ་དེ་ལྟ་བུའི་རང་བཞིན་དུ་ཕྱི་དོན་གྱི་བག་ཆགས་མ་ཟད་པ་དེ་སྲིད་དུ་འཁོར་བ་ཕྱི་ཡི་རྟེན་ཅིང་འབྲེལ་འབྱུང་བཅུ་གཉིས་ཡིན་ནོ། །ཡང་མ་རིག་པ་ལས་འདུ་བྱེད་དེ། དེ་བཞིན་དུ་རྣམ་ཤེས་སོགས་གཅིག་ལ་གཅིག་བརྟེན་གྱིས་རྒ་ཤིའི་བར་དུ་མ་ཆད་པར་འབྲེལ་ཏེ་ཐོག་མེད་ནས་འཁོར་བ་ནི་ནང་གི་སེམས་དང་ལུས་ཀྱི་བག་ཆགས་མ་ཟད་ཀྱི་བར་དུ་འབྱུང་བ་ནང་གི་རྟེན་ཅིང་འབྲེལ་བར་འབྱུང་བ་བཅུ་གཉིས་སུ་གསུངས་སོ། །མྱང་འདས་ཀྱི་རྟེན་ཅིང་འབྲེལ་འབྱུང་ནི། སློབ་པའི་ལམ་བཞིའི་གནས་སྐབས་དང༌། འབྲས་བུ་མི་སློབ་པའི་གནས་སྐབས་གཉིས་སུ་གནས་པ་ཡིན་ལ། དེ་ཡང་སློབ་པའི་ལམ་གྱི་དུས་སུ་ནི། འཁོར་བའི་རྟེན་ཅིང་འབྲེལ་བར་འབྱུང་བ་མ་རིག་པ་ནས་རྒ་ཤིའི་བར་ལུགས་སུ་འཇུག་པ་བཅུ་གཉིས་ཀྱི་རྩ་བ། བདེན་གཉིས་ཀྱི་དོན་དེ་ཁོ་ན་ཉིད་ལ་རྨོངས་པའི་མ་རིག་པ་ཆེན་པོ་ནི། ཚོགས་ལམ་དུ་ཐོས་བསམ་གྱིས་དེའི་གཉེན་པོ་བདག་མེད་པའི་དོན་རིག་པའི་ཡེ་ཤེས་ཇི་ལྟ་བ་བཞིན་གཏན་ལ་ཕབ་སྟེ་སྦྱོར་ལམ་དུ་དད་སོགས་ལྔའི་སྒོ་ནས་དོན་སྤྱིའི་ཚུལ་དུ་བསྒོམས་ཏེ་མ་རིག་པ་ཉམས་སྨད་པར་བྱས་ནས། མཐོང་ལམ་དུ་རིག་པའི་ཡེ་ཤེས་དེ་ཇི་ལྟ་བ་བཞིན་མངོན་སུམ་དུ་མཐོང་སྟེ་མ་རིག་པའི་སྒོ་ནས་སྲིད་པར་འཕེན་བྱེད་ཀྱི་ལས་མི་གསོག་ཅིང༌། སྒོམ་ལམ་ས་དགུ་པོར་ཡེ་ཤེས་དེའི་རྒྱུན་གོམས་ཤིང་གོང་དུ་འཕེལ་སྟོབས་ཀྱིས་མ་རིག་པའི་བག་ཆགས་རིམ་གྱིས་ལྡོག་པས་འདུ་བྱེད་ལ་སོགས་པའི་ཡན་ལག་གཞན་རྣམས་ཀྱི་བག་ཆགས་ཀྱང་ལུགས་ལྡོག་ཏུ་འགགས་ནས་རྒྱུན་མཐའི་རྡོར་ཏིང་གིས་སྲིད་པའི་རྩ་བ་མ་རིག་པའི་བག་ཆགས་ཤིན་ཏུ་ཕྲ་བ་གཉིས་སྣང་དང་བཅས་པ་སྤངས་པས་རྒྱུན་ཆད་དེ་འབྲས་བུ་ཆོས་སྐུའི་ཡེ་ཤེས་མངོན་དུ་གྱུར་ཏེ་འགག་མེད་ཐུགས་རྗེའི་རོལ་པ་ཅིར་ཡང་འཆར་བར་འགྱུར་བ་ནི་འབྲས་བུའི་རྟེན་འབྲེལ་ཡིན་ནོ། །དེ་ལྟར་གཞི་ལམ་འབྲས་བུའི་ཆོས་ཐམས་ཅད་རྟེན་ཅིང་འབྲེལ་འབྱུང་གི་ཚུལ་དུ་སྣང་ཙམ་ལས་ངོ་བོས་མ་གྲུབ་པའི་མཚན་ཉིད་མ་ནོར་བར་མཐོང་བའི་སྐྱེས་བུ་དེ་ཡིས་སྡུག་བསྔལ་གྱི་བདེན་པ་སྣང་ཙམ་ལས་རང་བཞིན་མེད་པར་ཤེས་ཤིང༌། དེའི་རྒྱུ་ཀུན་འབྱུང་ཉོན་མོངས་ཀྱི་རྩ་བ་མ་རིག་པ་སྤོང་བའི་རྟེན་འབྲེལ་གྱིས་འགོག་པ་མྱང་འདས་དམ་པ་མངོན་དུ་གྱུར་པར་ཤེས་ནས་ལམ་བདེན་བདག་མེད་རྟོགས་པའི་ཤེས་རབ་མཆོག་གི་དོན་བསྒོམ་པས་མངོན་དུ་མཐོང་ངོ༌། །གོང་དུ་ཇི་སྐད་བཤད་པ་དེ་ལྟར་འཁོར་འདས་ལམ་གསུམ་གྱི་སྣང་བ་ཐམས་ཅད་སྐྱེ་བ་མེད་པའི་རང་བཞིན་དུ་བསམ་པ་ལས་བྱུང་བའི་ཤེས་རབ་རྣམ་པར་དག་པས་གཏན་ལ་ཕབ་པ་དེའི་ཚེ་གནས་ལུགས་ཀྱི་རང་བཞིན་མ་ནོར་ཤེས་པའི་ཆོས་ཉིད་དེའི་ངང་ལ་གཟུང་འཛིན་གྱི་རྟོག་པས་མ་བསླད་པར་འཇོག་པ་ནི། སྒོམ་པའི་ཤེས་རབ་ཅེས་སུ་ཐུན་མིན་མདོ་དང༌། དགོངས་འགྲེལ་རྣམས་སུ་དང༌། ཚད་མའི་སྐྱེས་བུ་རྣམས་ལ་གྲགས་སོ། །འདི་ལྟར་ནམ་མཁའ་ནི་གཟུང་དུ་མེད་པ། བསྟན་དུ་མེད་པ། གཟུགས་ཅན་མ་ཡིན་པ། མཐའ་དབུས་མེད་པ་དེ་བཞིན་དུ་སེམས་ཀྱི་རང་བཞིན་ཡེ་ནས་རྣམ་པར་དག་པའི་ཆོས་ཀྱི་དབྱིངས་སུ་མཉམ་པར་བཞག་ནས་བསྒོམ་པའི་དོན་ཆོས་ཉིད་དང་ཡུལ་ཅན་ཡེ་ཤེས་རོ་གཅིག་ཏུ་གྱུར་པའི་སེམས་ཀྱི་གཤིས་ལུགས་དེ་ལ། དངོས་པོའི་མཚན་མ་མེད་པས་གཟུགས་སོགས་ཕུང་པོ་ལྔ་དང༌། འདུས་མ་བྱས་པ་ཡིན་པས་རྣམ་ཤེས་ཚོགས་བརྒྱད་ཀུན་ཀྱང་ཡོད་པ་མ་ཡིན་ནོ་ཞེས་མཐའ་བཞིའི་སྐྱེ་བ་འགོག་པའི་དམ་བཅའ་སྟོན་པ་ཉིད་དབུ་མ་ཐལ་འགྱུར་བའི་བཞེད་པ་ཡིན་ཀྱང༌། མེད་ཅེས་ཡོད་མཐའ་བློ་ཡིས་བཀག་ནས་མེད་པ་ཞིག་གློ་བུར་དུ་བསྒོམ་པར་བྱར་མེད་དེ་མེད་པ་གཤིས་ལ་མི་གནས་པའི་ཕྱིར་ན། གཤིས་ཀྱི་གནས་ཚུལ་ཤེས་པའི་ཤེས་རབ་ཉིད་དང་ལྷག་པར་ཡང་འགལ་བ་ཡིན་ཏེ། སེམས་ཀྱི་རང་བཞིན་རྣམ་ཐར་སྒོ་གསུམ་དུ་གནས་པ་འདི་ནི་ཅང་མེད་ཕྱང་ཆད་པ་ཉིད་མ་ཡིན་པར་དེ་བཞིན་གཤེགས་པ་རྣམས་ཀྱི་སྐུ་དང་ཡེ་ཤེས་ཀུན་གྱི་འབྱུང་གནས་ཡིན་པས་མཛོད་ལྟ་བུའོ། །དེས་ན་གནས་ལུགས་ཇི་བཞིན་མངོན་སུམ་མཐོང་བ་ནི་འཕགས་པ་ཁོ་ན་ཡིན་མོད་སོ་སྐྱེའི་དུས་ནའང་ཆོས་རྣམས་ཀྱི་རང་བཞིན་ཆོས་ཉིད་དུ་རྣམ་པར་དག་ཟིན་པའི་ཡང་དག་པའི་དོན་ཉིད་ལ། བཅོས་མའི་བློ་ཡིས་མ་བསླད་པར་ཡང་དག་ལྟ་བར་བྱེད་པ་ནི། དམུས་ལོང་ལྟར་རྐྱེན་མ་ཚོགས་པའམ་གཉིད་ལོག་པ་ལྟ་བུའམ་འདུ་ཤེས་མེད་པའི་སྙོམས་འཇུག་ལྟར་མིན་ལ། ལྷག་མཐོང་གི་ཡེ་ཤེས་དང་ལྷན་ཅིག་པ་ཡིན་ནོ། །བལྟ་ཞེས་བྱ་བ་དེའང་ཀུན་རྫོབ་ཙམ་དུ་བརྡ་སྤྲོད་པའི་མིང་སྟེ། རང་བཞིན་མ་བཅོས་པའི་ངང་དེ་ལས་གཞན་དུ་མ་ཡེངས་ཤིང་མི་བསྒོམ་པའི་ཚུལ་གྱིས་མ་གཡོས་ན། གནས་ལུགས་ཇི་བཞིན་བསྒོམ་པའི་ཕྱིར་གཞན་ལས་མཆོག་གོ །དེ་ལྟར་མཉམ་པར་བཞག་པའི་ཡེ་ཤེས་དེ་ཡི་མདུན་ཏེ་ཡུལ་ན་བློ་ཞེས་གཙོ་སེམས་དང་ནི། ཡིད་བྱེད་སོགས་སེམས་བྱུང་གིས་བསྡུས་པའི་རྟོག་ཚོགས་ཡུལ་བཅས་གཟུང་འཛིན་གྱི་རྣམ་པ་ཐམས་ཅད་གནས་པ་མིན་ཏེ་སོ་སོར་རྟོག་པའི་ཤེས་རབ་བོ། །ཤེས་རབ་དེ་འདྲ་བར་བློ་འབྱོང་ཞིང་ཆོས་ཐམས་ཅད་སྒྲོ་སྐུར་དང་བྲལ་བ་ཡོངས་སུ་ཤེས་ན། སེམས་བསྐྱེད་དང་སྦྱིན་སོགས་ཀྱི་ཐབས་ཀྱིས་རྣམ་པར་གྲོལ་བར་འགྱུར་རོ། །ཤེས་རབ་དེ་མེད་པར་མངོན་ཞེན་དང་བཅས་བའི་ཐབས་ཀྱིས་ནི། མུ་སྟེགས་ཅན་གྱི་ལམ་བཞིན་དུ་སྲིད་པའི་གནས་སུ་རང་རྒྱུད་བཅིངས་པ་ཉིད་ལས་གྲོལ་བ་མེད་དོ། །ལམ་གང་དུ་མཉམ་བཞག་ཏུ་སྟོང་ཉིད་དང་རྗེས་ཐོབ་ཏུ་སྙིང་རྗེ་ཆེན་པོའི་སྒོ་ནས་ཚོགས་བསགས་པ་སྟེ་རྣམ་པ་གཉིས་དང་པོར་རྒྱུད་ལ་བསྟེན་ནས་རིམ་གྱིས་གོམས་པར་བྱེད་པ་ཚོགས་ལམ་ཆུང་འབྲིང་ཆེ་གསུམ་ཡིན་ནོ། །མཐོང་ལམ་ལ་མྱུར་དུ་སྦྱོར་བའི་ལམ་དེ་ལ་དྲོད། རྩེ་མོ། བཟོད་པ། ཆོས་མཆོག་སྟེ་བཞི་ཡོད་པས་ཆོས་མཆོག་མན་ཆད་བཞི་པོའི་གནས་སྐབས་ཐམས་ཅད་དུ་མཉམ་རྗེས་གནས་སྐབས་རིམ་བཞིན་སྟོང་པ་དང་སྙིང་རྗེ་ངང་གིས་འཆར་རོ། །དེ་ནས་མཐོང་ལམ་ཐོབ་ནས་སྟོང་ཉིད་སྙིང་རྗེ་གཉིས་པོ་ནི་ཟུང་དུ་འཇུག་ཅིང༌། མཉམ་གཞག་སྟོང་ཉིད་རྗེས་ཐོབ་སྙིང་རྗེ་ཞེས་ཐ་མི་དད་ལ་ལྷན་ཅིག་སྟོང་ཉིད་སྙིང་རྗེ་ངོ་བོ་ཉིད་ལ་འདུ་འབྲལ་མེད་དེ། སྟོང་ཉིད་ལ་མཉམ་པར་བཞག་པ་ན་སྙིང་རྗེ་ཆེན་པོའི་རྩི་དང་མི་འབྲལ་ཞིང༌། རྗེས་ཐོབ་སྦྱིན་སོགས་སྤྱོད་པ་ལ་བསླབ་པ་ན། འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པར་བསྒྲུབ་པས་སོ། །རབ་ཏུ་དགའ་བ་དང་པོའི་སར་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་པ་ཐོབ་པས་ཆོས་ཉིད་ཀྱི་བདེན་པ་མངོན་སུམ་དུ་མཐོང་བར་འགྱུར་རོ། །དེ་ནས་འཕགས་པའི་སྒོམ་ལམ་ལ་མ་དག་ས་བདུན་དུ་ཐབས་ཤེས་ཟུང་དུ་འབྲེལ་ཀྱང་མཉམ་རྗེས་ཀྱི་ཉམས་ལེན་ཐ་དད་དུ་ཡོད་ལ། དག་ས་ཐོབ་ནས་རྣམ་ཀུན་མཆོག་ལྡན་གྱི་སྟོང་པ་ཉིད་ཀྱི་ཏིང་ངེ་འཛིན་ལ་བརྟེན་ནས་ཟག་མེད་ཀྱི་དབྱིངས་སུ་དེ་བཞིན་གཤེགས་པའི་ཡོན་ཏན་གྱི་རྣམ་པ་བསམ་གྱིས་མི་ཁྱབ་པ་རྣམས་རིམ་གྱིས་ཐོབ་པས་མཚན་མེད་འབད་རྩོལ་བྲལ་བའི་ལམ་ལ་བརྟེན་ནས་རང་གཞན་གྱི་དོན་གཉིས་ལྷུན་གྱིས་གྲུབ་པས་མཉམ་རྗེས་ཀྱི་ཉམས་ལེན་དབྱེར་མེད་དུ་འགྱུར་རོ། །དེ་ལྟར་སྒོམ་ལམ་མཐར་ཕྱིན་ཏེ་ས་བཅུ་རྒྱུན་གྱི་མཐའ་མ་ལ། གཉེན་པོ་རྡོ་རྗེ་ལྟ་བུའི་ཏིང་ངེ་འཛིན་གྱིས། ཤེས་སྒྲིབ་ཕྲ་བའང་ལྷག་མེད་དུ་བཅོམ་ནས་མི་སློབ་པའི་ལམ་དུ་མངོན་པར་རྫོགས་པའི་བྱང་ཆུབ་བརྙེས་སོ། །འདིའི་སྐབས་སུ་མཉམ་པར་མ་བཞག་པའི་དུས་མེད་པ་སོགས་རྒྱལ་བའི་མ་འདྲེས་པའི་ཆོས་བཅོ་བརྒྱད་དང༌། གཞན་ཡང་སྟོབས་བཅུ་དང་ནི། མི་འཇིག་པ་བཞི་སོགས་མཁྱེན་པའི་ཡེ་ཤེས་ཟག་མེད་ཀྱི་ཆོས་སྡེ་ཚན་ཉེར་གཅིག་པོ་མཐའ་དག་མངོན་དུ་གྱུར་ནས་སངས་རྒྱས་པ་ཡིན་ནོ། །འདི་ལྟར་ཕ་རོལ་ཕྱིན་པ་དྲུག་སྟོན་པའི་སྡེ་སྣོད་རྣམས་དང༌། དེ་དག་གི་བརྗོད་བྱའི་དོན་རྣམས་ནི། དུས་གསུམ་དུ་བྱོན་བཞུགས་འབྱོན་འགྱུར་གྱི་རྒྱལ་བ་ཀུན་སློབ་པ་ལམ་གྱི་གནས་སྐབས་ན་ཐོས་བསམ་བྱེད་པའི་གཞུང་དང་ཉམས་སུ་ལེན་པའི་ལམ་སྟེ། མཐར་འཛིན་དང་བྲལ་བའི་ལྟ་བས་ལམ་བསྒྲུབ་ཚུལ་ལ་མ་རྨོངས་ཤིང༌། སྤྱོད་པ་ཕར་ཕྱིན་དྲུག་གི་དོན་སྤྱོད་པ་ལའང་ཤིན་ཏུ་རྣམ་པར་དག་པས་ཚོགས་གཉིས་མཐར་ཕྱིན་ཏེ། ངེས་པ་ལྔ་ལྡན་འོག་མིན་དུ་འགྲོ་བ་སྟེ་དེར་མངོན་པར་སངས་རྒྱས་ཏེ་སྐུ་གཉིས་མངོན་པར་འགྲུབ་བོ། །དེ་ཡན་རྒྱུ་མཚན་ཉིད་ཀྱི་ཐེག་པ་བསྟན་ཏེ་ཟབ་མོ་ལྟ་བ་དང༌། རྒྱ་ཆེན་སྤྱོད་པའི་ཚུལ་གཏན་ལ་ཕབ་པའོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། སྨོན་འཇུག་གི་བསླབ་བྱ་བསྟན་པའི་ཚོམས་ཏེ་ལེའུ་དགུ་པའོ།། །།ད་ནི་ལམ་གྱི་སྦས་དོན་གསང་སྔགས་རྡོ་རྗེ་ཐེག་པ་ལྟར་བསྟན་པ་ལ། ཐོག་མར་ལོ་རྒྱུས་མདོ་ཙམ་བརྗོད་དེ། ཉི་ཟླ་ཁ་སྦྱོར་ལས། ལོ་རྒྱུས་དོན་གྱིས་མ་བཤད་ན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །ཞེས་དང༌། རྣ་རྒྱུད་ལུང་གི་ཕྲེང་བ་ལས། རྒྱལ་བ་རྣམས་ནི་འཇིག་རྟེན་བྱོན་པའི་ཚེ། །དེ་ཡིས་གསུངས་པའི་ལུང་ཆེན་རྣམས་ལ་ནི། །ཕྱི་རོལ་རྒོལ་བ་ངན་པ་འབྱུང་སྲིད་ཀྱི། །དང་པོར་སྲིད་པ་ཆོས་ཀྱི་ལོ་རྒྱུས་སྨོས། །ཞེས་གསུངས་པ་ལྟར་ནང་རྒྱུད་ཡོ་ག་གསུམ་གཙོར་གྱུར་པའི་རྒྱུད་སྡེ་བྱུང་ཚུལ་ནི། སྤྱིར་སྔ་འགྱུར་བཀའ་མ་ཐམས་ཅད་ལ་བརྒྱུད་པ་གསུམ་ལྡན་དང༌། གཏེར་མ་རྣམས་ལ་བརྒྱུད་ཚུལ་དྲུག་དང་བདུན་དང་དགུ་རྣམས་སུ་ངེས་པ་ལས། དང་པོ་ནི། རྒྱལ་བ་དགོངས་པའི་བརྒྱུད་པ། ཆོས་སྐུ། རྟོགས་པས་རྒྱུད་དོན་ཚུལ་བཞིན་རིག་པ། རིག་འཛིན་བརྡ་ཡི་བརྒྱུད་པ། རིགས་ལྔ་ལོངས་སྐུ། གང་ཟག་སྙན་ཁུང་བརྒྱུད་པ་སྤྲུལ་སྐུ་སྟེ་གསུམ་མོ། །གཉིས་པ་ནི། བརྒྱུད་པ་གོང་མ་གསུམ་གྱི་སྟེང་དུ། མཁའ་འགྲོ་གཏད་རྒྱའི་བརྒྱུད་པ། བཀའ་གཏེར་སྲུང་མས་ལས་ཅན་ལ་གདམས་པ་གཏད། སྨོན་ལམ་དབང་བསྐུར་གྱི་བརྒྱུད་པ། གཏེར་སྟོན་སྐྱེས་ཆེན་ལ་གདམས་པ། ཤོག་སེར་ཚིག་གི་བརྒྱུད་པ་གཏེར་ཆོས་ཤོག་སེར་ལ་བཏབ་སྟེ་གཏེར་དུ་རྒྱས་བཏབ་པ་བྱིན་རླབས་ཆེ་བར་གསུངས་སྟེ་དྲུག་གོ །གསུམ་པ་ནི། ཤོག་སེར་བརྒྱུད་པ་དོར་ཏེ་སྔ་མ་ལྔའི་སྟེང་དུ། བཀའ་བབ་ལུང་བསྟན་གྱི་བརྒྱུད་པ་ཆོས་བདག་ལ་འགྲོ་དོན་ལུང་བསྟན་པ་དང༌། ཉམས་ལེན་བྱིན་རླབས་ཀྱི་བརྒྱུད་པ་བསྐྱེད་རྫོགས་བསྙེན་སྒྲུབ་ལྷན་སྐྱེས་ཡེ་ཤེས་གཉིས་བསྣན་པས་བདུན་ནོ། །བཞི་པ་ནི། དེ་བདུན་གྱི་སྟེང་སྙན་བརྒྱུད་དམར་ཁྲིད་ཀྱི་བརྒྱུད་པ་དང༌། ཕྲིན་ལས་ཕྱག་བཞེས་ཀྱི་བརྒྱུད་པ་སྟེ་དགུའོ། །དེ་སོགས་ལས་བྱུང་བའི་རྒྱུད་སྡེ་རྣམས་ཀྱི་ལོ་རྒྱུས་རྒྱ་ཆེར་གསུངས་ཀྱང་མདོ་བརྒྱུད་པའི་ལོ་རྒྱུས་ཙམ་མོ། །དེ་ལྟར་བརྒྱུད་པ་དེ་རྣམས་ནི་རིམ་བཞིན་བདག་ཅག་གི་བླ་མ་རྣམས་ཀྱི་བར་དུ་བརྒྱུད་པ་ཡིན་ལ་ཁྱད་པར་དུ་བསྟན་བཅོས་འདི་ཉིད་མཛད་པ་པོ་རིག་འཛིན་འཇིགས་མེད་གླིང་པ་ཞེས། འཕགས་པ་སེམས་ཉིད་ངལ་གསོ་ཉིད་དངོས་སུ་དགེ་བའི་བཤེས་གཉེན་གྱི་ཚུལ་དུ་བཟུང་ནས། པདྨ་སམྦྷ་དང༌། བི་མ་མི་ཏྲ། ཀུན་མཁྱེན་ཀློང་ཆེན་རབ་འབྱམས་སོགས་ལས་དགོངས་པའི་ཕ་ཕོག་ཐོབ་སྟེ་ཐུགས་དགོངས་དབྱེར་མེད་དུ་གྱུར་པ་༡དང༌། དེ་དག་གི་བརྡ་ཐབས་རྟེན་འབྲེལ་གྱི་རྣམ་འཕྲུལ་བསྟན་པ་ཐམས་ཅད་དང་དབུགས་དབྱུང་ཞལ་བཞེས་རྗེས་གནང་སོགས་རིག་འཛིན་བརྡ་བརྒྱུད་༢དང༌། དགོངས་གཏེར་མཐའ་དག་ཐུགས་ལ་བཀྲ་ལམ་མེར་ཤར་བ་སྟེ་དགོངས་བརྡ་སྙན་བརྒྱུད་ཀྱི་བརྒྱུད་གསུམ་ཆིག་རྫོགས་སུ་བླངས་ཏེ། ལས་དང་སྐལ་པར་ལྡན་པ་ལ་བསྟན་པ་ཡོངས་རྫོགས་ཀྱི་ཆོས་ཀྱི་འཁོར་ལོ་ཆེན་པོ་བསྐོར་ཞིང་མངོན་པར་རྫོགས་པའི་སངས་རྒྱས་སུ་བཞུགས་པ་ཡིན་ཏེ། ཇི་སྐད་དུ། ལུས་ནི་གང་ཟག་ལྷ་མི་ཡང༌། །དགོངས་པ་དམ་པ་སངས་རྒྱས་དངོས། །ཞེས་པ་ལྟར་རོ། །དེ་ཡང་མན་ངག་གི་བསྟན་བཅོས་ཀྱི་གཞུང་འདི་ཉིད་དམ་པ་དེ་ཉིད་ལས། འཇིགས་མེད་ཕྲིན་ལས་འོད་ཟེར་གྱིས་གསན། དེ་ལས་རྒྱས་སྲས་གཞན་ཕན་མཐའ་ཡས། དེ་ལས་ཨོ་རྒྱན་འཇིགས་མེད་ཆོས་ཀྱི་དབང་པོ། དེ་ལས་བཀའ་དྲིན་མཚུངས་མེད་ཨོ་རྒྱན་བསྟན་འཛིན་ནོར་བུས་གསན། དེ་ལས་ཡོན་ཏན་རྒྱ་མཚོ། དེ་གསུམ་ལས་མཁན་ཆེན་བསམ་གཏན་རྒྱ་མཚོ། དེ་ལས་ཙནྡྲརསྨིའམ་མཁན་པོ་ཟླ་འོད། དེ་ལས་ཆིག་རྫོགས་སུ་ནོད་པའོ། །དེ་ཡང་སྔགས་ཀྱི་སྐབས་སུ་སྤྱིར་རྒྱལ་བས་སེམས་ཅན་རྣམས་ཀྱི་དོན་དུ་བློ་དང་འདུ་ཤེས་ཀྱི་རྗེས་སུ་འགྲོ་བའི་ཐེག་པའི་རྣམ་དབྱེ་བསམ་གྱི་མི་ཁྱབ་པ་ཞིག་གསུངས་པ་མཐའ་དག་བསྡུ་ན་གཉིས་སུ་འདུ་བ་ཡིན་ཏེ། ཐེག་དམན་དང༌། ཐེག་ཆེན་ནོ། །ཐེག་ཆེན་ལའང་རྣམ་པ་གཉིས་ཡོད་དེ། ཐེག་ཆེན་ཚུལ་སྒྲུབ་ལས། ཐེག་པ་ཆེན་པོ་རྣམ་གཉིས་ཏེ། །ཕ་རོལ་ཕྱིན་དང་གསང་སྔགས་སོ། །ཞེས་སོ། །དེའི་རྒྱུ་མཚན་ཐེག་ཆེན་གྱི་གདུལ་བྱ་བྱང་ཆུབ་སེམས་དཔའ་དེ་ལའང་དབང་པོ་རྣོན་པོ་དང༌། ཤིན་ཏུ་རྣོན་པོའི་རིགས་ཅན་གཉིས་ཡོད་པའི་གཉིས་ཀའང་སྙིང་རྗེའི་གཞན་དབང་གིས་བླ་ན་མེད་པའི་བྱང་ཆུབ་སྒྲུབ་པར་མཚུངས་ཀྱང༌། སྒྲུབ་ཚུལ་མཚན་ཉིད་ཐེག་པ་ལས་བདེ་གཤེགས་སྙིང་པོའི་ས་བོན་ཡོད་པ་ཙམ། ཚོགས་གཉིས་ཀྱི་རྐྱེན་ལས་གོང་འཕེལ་དུ་སོང་ནས་སངས་རྒྱས་ཐོབ་པར་འདོད་ཅིང༌། རྒྱུ་འབྲས་སྔ་ཕྱི་འབྲེལ་བས་རྒྱུ་ཡི་ཐེག་པ་ཞེས་བྱ་ལ། སྔགས་སུ་སྙིང་པོ་དེ་སེམས་ཅན་ཀུན་ལ་རང་ཆས་སུ་ཡོད་པ་ལ་ཡོན་ཏན་ཐམས་ཅད་ལྷུན་གྱིས་གྲུབ་པའི་སྦྱང་གཞི་ཉི་མ་ལྟ་བུ་དེ་ཉིད་ལ། སྦྱང་བྱ་འཁོར་བའི་རང་བཞིན་ཚོགས་བརྒྱད་ཀུན་གཞི་དང་བཅས་པའི་འདུས་བྱས་ཀྱི་སེམས་གློ་བུར་བ་སྤྲིན་དང་འདྲ་བའི་སྒྲིབ་པ་ཉིད། སྦྱོང་བྱེད་དབང་དང་བསྐྱེད་རྫོགས་ཀྱིས་སྦྱངས་པས། སྦྱངས་འབྲས་རང་ངོའི་ཡོན་ཏན་ཇི་བཞིན་མངོན་དུ་འགྱུར་བར་འདོད་པ་སྟེ། དེས་ན་སྔགས་ཀྱི་ཐེག་པ་ཞེས་པའི་དོན་ནི། མ་ན་ཡིད་དང༌། ཏྲ་ཡ་སྐྱོབ་པའི་སྒྲ་བསྡུས་པ་མནྟྲ་ཞེས་བྱ་སྟེ། གང་སྐྱོབ་ན། ཡིད་ཤེས་ཏེ་དེ་ཡང་རིག་པ་ལ་བརྗོད་དེ། འབྲས་བུའི་གནས་སྐབས་སུའང་རིག་པའི་ཡེ་ཤེས་ཞེས་བརྗོད་པའི་ཚུལ། གསང་སྙིང་ལས། བཅོམ་ལྡན་འདས་བྱེད་པ་པོ་རྡོ་རྗེ་ཡིད་ཀུན་ཏུ་བཟང་པོའོ། །ཞེས་སོ། །གང་ལས་སྐྱོབ་ན། གཟུང་འཛིན་དང་བཅས་པའི་ཚོགས་བརྒྱད་ལས། ཇི་ལྟར་སྐྱོབ་ན། བདེ་མྱུར་གྱི་ཚུལ་དུ་སྐྱོབ་པས་ན་དེ་སྐད་ཅེས་བྱའོ། །དེ་ལ་འབྲས་བུའི་ཐེག་པ་ཞེས་ཀྱང་བྱ་སྟེ། དེའི་དོན་ནི་གཞི་གཏན་ལ་ཕབ་པའི་དུས་སུ་མཐར་ཐུག་གི་སངས་རྒྱས་ཀྱི་སྐུ་དང་ཡེ་ཤེས་སོགས་ཆོས་ཁམས་རྒྱ་མཚོ་ལྟ་བུ། སེམས་ཉིད་བདེ་གཤེགས་སྙིང་པོའི་རང་རྩལ་དུ་རྫོགས་པས་འབྲས་བུ་གཞི་ལ་གནས་པར་འདོད་པ་དང༌། ལམ་ཉམས་སུ་ལེན་པའི་དུས་སུ་འབྲས་བུ་སྐུ་དང་ཡེ་ཤེས་ཀྱི་བཞུགས་ཚུལ་དང་མཐུན་པའི་ལམ་བསྒོམས་པས་འབྲས་བུ་ལམ་དུ་བྱེད་པ་དང༌། འབྲས་བུ་མངོན་དུ་བྱེད་པའི་དུས་སུ་ཚེ་ལུས་གཅིག་གིས་འབྲས་བུ་མངོན་དུ་བྱེད་པས་འབྲས་བུའི་ཐུས་ཀ་སྟེ། དཔེར་ན་སྨན་ཐམས་ཅད་ཀྱི་ནུས་པ་ཕྱོགས་གཅིག་ཏུ་བསྡུས་པ་ལྟ་བུ་ལམ་གྱི་མན་ངག་གི་ནུས་པ་ཐམས་ཅད་གཅིག་ཏུ་འདུས་པའི་དོན་གྱིས་ན་དེ་སྐད་ཅེས་བྱ་བའམ། ཡང་ན་ནི་མཚོན་བྱེད་དཔེའི་རྡོ་རྗེ་དང་རྗེས་སུ་མཐུན་པའི་ཆོས་ཉིད་དོན་དམ་པའི་རྡོ་རྗེ་བདེ་གཤེགས་སྙིང་པོའི་ཡིན་ལུགས་བླ་མས་ངོ་སྤྲད་པ་དེ་ཉིད། ཕར་མཚན་མའི་རྣམ་རྟོག་ཐམས་ཅད་འཇོམས་པ་ལ་ཐོགས་པ་མེད་པ་དང༌། ཚུར་མཚན་མའི་རྣམ་རྟོག་ཐམས་ཅད་ཀྱིས་གླགས་མི་རྙེད་པས་ན་རྡོ་རྗེ་སྟེ། དེ་ཉིད་བརྗོད་བྱའི་གཙོ་བོར་བསྟན་པས་ན་རྡོ་རྗེའི་ཐེག་པ་ཞེས་བརྗོད་པ་དང༌། ཡང་སྦྱིན་པ་ལྟ་བུ་སྤྱོད་པའི་སྒོ་རེ་རེ་ཡང་ཐབས་དུ་མའི་སྒོ་ནས་སྒྲུབ་པས་ཐབས་མང་བ་དང༌། ཉོན་མོངས་ལྔ་ཡང་ལམ་དུ་བྱེད་པས་ཐབས་མཁས་པ་དང༌། འདོད་ཡོན་ལྔ་ཡང་སྤང་མི་དགོས་པར་ལམ་དུ་བྱེད་པས་ཐབས་བདེ་བ་དང༌། སྐལ་པ་དང་ལྡན་པའི་གང་ཟག་ཤིན་ཏུ་རྣོན་པོ་ཞིག་མ་གཏོགས་ཁོང་དུ་མི་ཆུད་པས་ཐབས་ཟབ་པ་དང༌། ཚེ་གཅིག་གིས་ཀྱང་འབྲས་བུ་འགྲུབ་པས་ཐབས་མྱུར་བའི་ཕྱིར་ཐབས་ཀྱི་ཐེག་པ་ཞེས་བྱ་ལ། རིག་པ་བདེ་གཤེགས་སྙིང་པོའི་ཆོས་ཉིད་བླ་མས་ངོ་སྤྲད་པ་དེ་ཉིད་མི་འབྲལ་བར་འཛིན་པའི་རིག་འཛིན་ནི། གསང་སྔགས་ཉམས་སུ་ལེན་པའི་གང་ཟག་ཡིན་ལ། དེ་དག་གིས་ཉམས་སུ་བླང་བྱའི་སྡེ་སྣོད་ཡིན་པས་ན་རིག་པ་འཛིན་པ་ཡི་སྡེ་སྣོད་ཅེས་གྲགས་ཤིང༌། སྤྱིར་སྡེ་སྣོད་ཅེས་པའི་དོན། ཚིག་དང་དོན་གྱི་སྡེ་ཚན་དུ་མའི་སྣོད་ཡིན་པས་ན་སྡེ་སྣོད་ཅེས་བརྗོད་པ་ཡིན་ནོ། །རྒྱུ་མཚན་དེ་རྣམས་ཀྱི་ཕྱིར་རྒྱུ་མཚན་ཉིད་ཀྱི་ཐེག་པ་ལས་ཁྱད་པར་འཕགས་པ་ཡིན་ཏེ། ཚུལ་གསུམ་སྒྲོན་མེ་ལས། དོན་གཅིག་ནའང་མ་རྨོངས་དང༌། །ཐབས་མང་དཀའ་བ་མེད་པ་དང༌། །དབང་པོ་རྣོན་པོའི་དབང་བྱས་ཕྱིར། །སྔགས་ཀྱི་ཐེག་པ་ཁྱད་པར་འཕགས། །ཞེས་པ་ལྟར་འབྲས་བུ་སངས་རྒྱས་སྒྲུབ་པར་དོན་གཅིག་ནའང༌། སྒྲུབ་ཚུལ་ལ་རྨོངས་མ་རྨོངས་ཀྱི་ཁྱད་པར་ཡོད་དེ། མཚན་ཉིད་ཐེག་པ་ལས་ཕྱི་སྣང་བའི་བདེན་ཞེན་ལྡོག་པ་ལ། སྒྱུ་མ་ལྟ་བུར་བསྒོམ་པ་ལ་སོགས་པས་འབྱུང་བའི་རིག་པ་ལ་རྨོངས། ནང་ཕུང་པོ་ལྔ་ལྷར་མ་ཤེས་པས་གནས་པའི་དོན་ལ་རྨོངས། གསང་བ་རྟོག་ཚོགས་དང་ཉོན་མོངས་པ་ཡེ་ཤེས་སུ་མ་ཤེས་པས་ལམ་གྱི་རྣམ་པ་ལ་རྨོངས། ཐམས་ཅད་དག་མཉམ་ཆེན་པོ་བདེན་པ་དབྱེར་མེད་དུ་མ་ཤེས་པས་རྟོགས་པའི་ལྟ་བ་ལ་རྨོངས་པ་ཉིད། སྔགས་སུ་ཕྱི་འབྱུང་བར་སྣང་བ་ཡུམ་ལྔ། ནང་ཕུང་པོར་སྣང་བ་ཡབ་ལྔ། གསང་བ་རྟོག་ཚོགས་ཀུན་བྱང་ཆུབ་སེམས་དཔའ་སེམས་མ་ཡེ་ཤེས་ལྔ་ཡི་རང་བཞིན། ཐམས་ཅད་དག་མཉམ་བདེན་པ་དབྱེར་མེད་ཆོས་སྐུ་ཆེན་པོར་གཏན་ལ་ཕབ་ནས་བསྒོམ་ཞིང༌། བླང་དོར་དང་འཛིན་པ་མེད་པའི་ཐབས་མཁས་ཀྱི་སྤྱོད་པ་གོང་དུ་བཤད་པ་ལྟ་བུའི་སྒོ་ནས་འབྲས་བུ་ལ་མྱུར་དུ་སྦྱོར་བའི་དབང་པོ་ཤིན་ཏུ་རྣོན་པོའི་དབང་དུ་བྱས་པ་ཡིན་ནོ། །ཡང་རྒྱུན་ཆགས་པ་སྟེ་སངས་རྒྱས་སེམས་ཅན་གྱི་ངོས་ན་ཡོད་པའི་དོན་གྱི་ངོས་ནས་བཤད་ན། ཏནྟྲ་ཞེས་པའི་སྒྲ་ལས་དྲངས་ན་རྒྱུད་དེ། དེ་ཡང་རྒྱུད་ཕྱི་མ་ལས། རྒྱུད་ནི་རྒྱུན་ཆགས་ལ་བཤད་དེ། །ལམ་ཐབས་དང་གཞི་རྒྱུ་ལས་འབྲས་བུའོ། །ཞེས་རྒྱུད་ཅེས་པ་ནི་རྒྱུན་ཆགས་པའི་དོན་ཏེ། གང་ཞིག་རྟོགས་པར་བྱ་བ་གཞིའམ་རྒྱུའི་རྒྱུད་དང༌། གང་གིས་རྟོགས་ཤིང་བགྲོད་པ་ཐབས་སམ་ལམ་གྱི་རྒྱུད་དང༌། གང་དུ་མཐར་ཕྱིན་པ་འབྲས་བུའི་རྒྱུད་དོ། །དེ་ལ་དང་པོ་གཞིའི་རྒྱུད་ནི། སེམས་ཉིད་བདེ་བར་གཤེགས་པའི་སྙིང་པོ་གནས་ལུགས་དོན་དམ་པའི་ཡེ་ཤེས་རིག་པ་བྱང་ཆུབ་ཀྱི་སེམས་ལྷག་པའི་བདེན་པ་དབྱེར་མེད་བློ་ཡི་སྤྱོད་ཡུལ་དང་བྲལ་བའི་རང་བཞིན་འཆིང་གྲོལ་མེད་པར་སེམས་ཅན་ཐམས་ཅད་ལ་ཡེ་ནས་གནས་པའི་དོན་ལ་བྱ་སྟེ། གསང་སྙིང་ལས། བཅིང་མེད་རྣམ་པར་གྲོལ་མེད་པས། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་དང༌། རྒྱས་པ་ལས། ཐམས་ཅད་རང་རིག་བྱང་ཆུབ་སེམས། །དེ་ནི་ལུང་གི་ཚད་མར་བཤད། །ཅེས་སོ། །དེ་ལ་ཅིའི་ཕྱིར་གཞིའམ་རྒྱུའི་རྒྱུད་ཅེས་བྱ་ཞེ་ན། དེ་ཉིད་ཐབས་ཀྱི་རྐྱེན་གྱིས་མ་ཟིན་ན་འཁོར་བ་དང༌། ཟིན་ན་མྱང་འདས་སུ་སྣང་བས་དེ་གཉིས་ཀའི་འབྱུང་གཞིའམ་རྒྱུ་ལྟ་བུར་གྱུར་པས་དེ་སྐད་ཅེས་བྱའོ། །དེ་ཡང་རིམ་གསུམ་ལས། ཐ་སྙད་གཉིས་ཀྱི་ཆོས་རྣམས་ཀུན། །མ་ལུས་འབྱུང་ཕྱིར་གཞི་ཞེས་བྱ། །ཞེས་དང༌། མ་ཕམ་པས། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་གསུངས་པ་ལྟར་རོ། །དེ་ཡང་ཐ་སྙད་ཙམ་དུ་དབྱེ་ན། སེམས་ཀྱི་ཆོས་ཉིད་བདེ་གཤེགས་སྙིང་པོ་ནི་སྦྱང་གཞི་ནོར་བུ་ལྟ་བུ་ཡིན་པས་གནས་ལུགས་ངོ་བོ་ཉིད་ཀྱི་གཞི་ཞེས་བྱ་ལ། ལོག་པའི་ཞེན་སྣང་ཡུལ་དང་བཅས་པ་ནི་སྦྱང་བྱ་འདམ་རྫབ་ལྟ་བུ་སྟེ། མེད་སྣང་གློ་བུར་བ་ཡིན་པས་འཁྲུལ་པ་བརྟགས་པའི་གཞི་ཞེས་གསུངས་ཏེ། འདི་མེད་སྣང་འབྲས་བུའི་ཉེར་ལེན་གྱི་རྒྱུ་དང་རྒྱུད་མཚན་ཉིད་པ་མ་ཡིན་ནོ། །གཉིས་པ་ལམ་གྱི་རྒྱུད་ནི། གཞི་དེ་ཉིད་གློ་བུར་གྱི་དྲི་མ་དང་བྲལ་བར་བྱེད་པའི་ཐབས་གནས་ལུགས་ཇི་ལྟ་བ་བཞིན་ཤེས་པའི་ལྟ་བ་དང༌། རང་བཞིན་ཡོངས་ཤེས་ཀྱི་དོན་བསྒོམ་པའི་ཏིང་ངེ་འཛིན། གྲོགས་སྤྱོད་པ་དམ་ཚིག་དང་བཅས་པ་ལ་བྱ་སྟེ། རྒྱུད་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་ནས་ཤེས་རབ་ཉིད། །དེ་ལྟ་བུ་ཡི་ངང་དུ་འབྱུང༌། །ཞེས་སོ། །དེ་ལ་ཅིའི་ཕྱིར་ཐབས་སམ་ལམ་གྱི་རྒྱུད་ཅེས་བྱ་ཞེ་ན། འཐོབ་བྱ་འབྲས་རྒྱུད་ཉིད་མངོན་དུ་བྱེད་པའི་ལྷན་ཅིག་བྱེད་རྐྱེན་ཡིན་པས་ཐབས་དང༌། གང་གིས་གང་དུ་བགྲོད་པའི་རྟེན་ཡིན་པས་ན་ལམ་སྟེ། མདོ་ཡི་དོན་བསྡུས་ལས། བགྲོད་ལམ་དང་དེ་ཆོས་ཡོན་ཏན་ལྡན་པ་དང༌། །ཞེས་པ་ལ་སོགས་པ་ལྟར་རོ། །དེ་ཡང་རྣལ་འབྱོར་བླ་ན་མེད་པ་ཁྱད་པར་གྱི་ལམ་འདི་འབྲས་བུ་ལ་ཉེ་བའི་ལམ་རྒྱུད་ཡིན་ལ། ཕྱི་རྒྱུད་རྣམས་ནི་རིང་བའི་ལམ་རྒྱུད་དོ། ནང་རྒྱུད་ལ་ལྟོས་ན་རིང་བའི་ལམ་རྒྱུད་དང༌། མཚན་ཉིད་ཐེག་པ་ལས་ཉེ་ལམ། །ལམ་དེ་ལ་རྒྱུད་ཅེས་སྨོས་པའི་དོན་ནི། གཞི་ཤེས་བྱ་དང་ལམ་ཤེས་བྱེད་དུ་དང༌། འབྲས་བུ་འཐོབ་བྱ་དང་ལམ་འཐོབ་བྱེད་དུ་འབྲེལ་བའི་ཕྱིར་དང༌། ལམ་དང་པོ་བསྒྲུབ་པ་ནས་འབྲས་བུའི་བར་དུ་མ་ཆད་པར་རྒྱུན་ཆགས་སུ་འབྱུང་བས་ན་དེ་སྐད་ཅེས་བྱའོ། །གསུམ་པ་འབྲས་བུའི་རྒྱུད་ནི། གཞི་ཡི་གནས་ལུགས་ལ་སྒྲིབ་པར་བྱེད་པའི་དྲི་མ་ལམ་གྱིས་ཡང་དག་པར་སྦྱངས་ནས། གཞི་ཇི་ལྟ་བ་བཞིན་མངོན་དུ་གྱུར་པ་ལ་བྱ་སྟེ། སྒྱུ་འཕྲུལ་བྱེ་བྲག་བསྟན་པ་ལས། ཐུབ་པའི་བསྐྱེད་རྫོགས་རྣལ་འབྱོར་འབྲས་བུ་ལྷུན་གྲུབ་ཀྱི་རྣལ་འབྱོར་ཆེ། །འབྲས་བུ་ལྷུན་གྲུབ་ཇི་བཞིན་མངོན་བྱས་པའང༌། །བཏགས་པ་ཙམ་སྟེ་གཞི་འབྲས་ལ་ཐ་དད་གཉིས་པ་མེད། །དེ་ཕྱིར་དེ་ལ་དེ་བརྗོད་དོ། །ཞེས་སོ། །དེ་ཡང་གཉིས་པ་མེད་ཅེས་པ་གཞི་འབྲས་ངོ་བོ་བདག་གཅིག་གིས་འབྲེལ་བས་གཞི་ལས་ཐ་དད་པའི་འབྲས་བུ་མེད་པའི་དོན་ནོ། །དེ་ལ་ཅིའི་ཕྱིར་འབྲས་བུའི་རྒྱུད་ཅེས་བྱ་ཞེ་ན། བླ་ན་མེད་པ་མཆོག་གི་འབྲས་བུ་མཐར་ཐུག་པ་དོན་དུ་གཉེར་བ་རྣམས་ཀྱི་བསམ་པ་ཡོངས་སུ་རྫོགས་པའི་འབྲས་བུ་དང་ནམ་ཡང་རྒྱུན་མི་འཆད་པས་རྒྱུད་དུ་བཞག་པ་ཡིན་ནོ། །དེ་ལ་སྤྱིར་རྒྱུད་གསུམ་གྱི་རྣམ་བཞག་དེ་ལྟར་ཡིན་པའི་གནད་ཀྱིས་བྱེ་བྲག་ལམ་རྒྱུད་ཀྱི་དངོས་པོ་རྣམས་ཀྱང༌། མཚན་ཉིད་ཐེག་པ་ལས་འཕགས་ཆོས་དུ་མ་དང་ལྡན་པ་ཡིན་ལ། དེའང་ནང་གསེས་ཀྱི་དབྱེ་བ་བྱས་ན། རྗོད་བྱེད་སྒྲ་ཡི་རྒྱུད་དང༌། བརྗོད་བྱ་དོན་གྱི་རྒྱུད། སྔ་མ་ལའང་ལས་ཕྲ་མོ་སྒྲུབ་པའི་ཆ་ལག་དང༌། ཐུན་མོང་གི་དངོས་གྲུབ་བརྒྱད་སྒྲུབ་པའི་དང༌། མཆོག་དངོས་མཐོང་སྒོམ་གཉིས་ཀྱི་ཡེ་ཤེས་སྒྲུབ་པའི་ཐབས་སྟོན་པའི་སྒོ་ནས་དབྱེ་བ་དང༌། རྩ་བའི་རྒྱུད་དང༌། ཡན་ལག་གི་རྒྱུད་ཀྱི་དབྱེ་བ་དང༌། ཕྱི་ནང་གི་དབྱེ་བ་སོགས་མང་ནའང༌། བསྡུ་ན། དེ་བཞིན་གཤེགས་པ་རྣམས་ཀྱི་ཡེ་ཤེས་ལ་དང༌། གདུལ་བྱ་རྣམས་ཀྱི་སེམས་ལ་སྣང་བ་སྒྲར་སྣང་བའི་རྒྱུད་དང༌། སྔར་གསང་བའི་བདག་པོས་གསུངས་པ་སོགས་ནས་སྨྲ་བ་པོས་དངོས་སུ་བརྗོད་པ་སྒྲར་གྲགས་པའི་རྒྱུད་དང༌། བློ་གྲོས་ཐབས་ལྡན་གྱིས་རྒྱུད་རྣམས་ཡི་གེར་བཏབ་པ་སོགས་ནས་རྒྱ་བོད་སོགས་ཀྱི་ཡི་གེའི་གཟུགས་སུ་བཀོད་དེ་གླེགས་བམ་གྱི་བར་དུ་ཡོད་པ་སོགས་ལ་བརྡར་གྱུར་པའི་རྒྱུད་ཅེས་བརྗོད་པ་ཡིན་ནོ། །ཕྱི་མ་བརྗོད་བྱ་དོན་གྱི་རྒྱུད་སྡེ་ལའང་དབྱེ་བ་མང་དུ་སྣང་མོད། དོན་གྱི་སྙིང་པོ་གཞིའི་གནས་ལུགས་ལྟ་བས་གཏན་ལ་འབེབས་ཚུལ་གྱིས་རྒྱུའི་ཐེག་པ་ལས་ཁྱད་དུ་འཕགས་པའི་སྟོབས་ཀྱིས་ལམ་ཉམས་སུ་ལེན་ཚུལ་ཡང༌། སྤྱིར་ཐེག་ཆེན་ཐམས་ཅད་བསོད་ནམས་དང་ཡེ་ཤེས་ཀྱི་ཚོགས་གཉིས་ལ་བརྟེན་ནས་ཐབས་ཤེས་ཟུང་འབྲེལ་དུ་བསྒྲུབ་པ་ཙམ་དུ་མདོ་སྔགས་མཚུངས་ནའང༌། གསང་བ་སྔགས་ཀྱི་སྐབས་སུ་ནི་བསོད་ནམས་ཀྱི་ཚོགས་བསགས་པའང༌། ཕུང་སོགས་ཀུན་རྫོབ་ཀྱི་ཆོས་རྣམས་ལ་མ་དག་པའི་མཚན་མར་བལྟས་ཏེ་སྦྱིན་སོགས་ལ་སློབ་པ་ལྟ་བུ་མ་ཡིན་པར། རང་བཞིན་ཡེ་ནས་དག་པའི་རྣམ་པ་ལྷར་གསལ་བའི་བསྐྱེད་རིམ་གྱི་ངང་ནས་དཀྱིལ་འཁོར་མཆོད་པ་ལ་སོགས་པའི་སྦྱིན་པ་དང༌། མཚན་འཛིན་སྡོམ་པ་ལ་སོགས་པའི་ཚུལ་ཁྲིམས་ཀྱིས་མཚོན་སྔགས་ཀྱི་ཕྱིན་དྲུག་གི་སྤྱོད་པ་དང་འབྲེལ་བའི་སྒོ་ནས་སྒྲུབ་པ་དང༌། ཡེ་ཤེས་ཀྱི་ཚོགས་ཀྱང་རྗེས་སུ་དཔག་པའི་ཤེས་རབ་ཀྱིས་སྤྲོས་བྲལ་སོགས་སུ་ལྟ་བ་ཙམ་མ་ཡིན་པར། བླ་མའི་མན་ངག་གི་ཐབས་ཀྱིས་ངོ་སྤྲད་པའི་རང་གནས་ཀྱི་ཡེ་ཤེས་ལ་མཉམ་པར་འཇོག་པའི་རྫོགས་རིམ་གྱི་སྒོ་ནས་སྒྲུབ་པ་སྟེ། ཚུལ་དེ་གཉིས་ལ་བརྟེན་ནས་ཐབས་དང་ཤེས་རབ་ཁྱད་པར་ཟུང་དུ་འབྲེལ་ནས་ཉམས་སུ་ལེན་པ་ལ། མཚན་ཉིད་ཐེག་པ་ལྟར་ཐབས་ལ་མི་མཁས་པས་མགོ་དང་ཡན་ལག་གཏོང་བ་སོགས་དཀའ་ཐུབ་མཐུ་ཡིས་ཡུན་རིང་པོར་མི་གདུང་བར་འཁོར་བའི་རྒྱུ་འབྲས་ཐམས་ཅད་གང་ཡང་སྤང་མི་དགོས་པར་ཉོན་མོངས་དང་འདོད་ཡོན་སོགས་ལམ་དུ་བྱེད་ཅིང༌། མཚོན་རྟུལ་པོས་མ་ཆོད་པའི་དངོས་པོ་གང་ཞིག །རྣོན་པོས་ཡུད་ཙམ་གྱིས་གཅོད་ནུས་པ་བཞིན། ཐབས་དམན་པ་འོག་མའི་ལམ་གྱིས་གདུལ་མ་ནུས་པའི་གང་ཟག་སྡིག་པ་དང༌། སྒྲིབ་པ་སྟོབས་ཆེན་པོས་ནོན་པ་ཡང་ལམ་འདིར་འཇུག་རྒྱུ་ཡོད་པས་སྒོ་ཡངས་ཤིང༌། གང་ཟག་དབང་པོ་ཤིན་ཏུ་རྣོན་པོའི་ཉམས་སུ་ལེན་པའི་དབང་དུ་བྱས་པའི་ལམ་ཡིན་པས། ཤེས་རབ་ཟབ་མོས་སྔགས་ཀྱི་ལྟ་སྒོམ་སྤྱོད་གསུམ་ཡ་མ་བྲལ་བར་གསང་སྔགས་རང་གི་སྐབས་སུ་བཤད་པ་སྒྲ་ཇི་བཞིན་པར་ཉམས་སུ་བླངས་ན། དེ་ལྟ་བུའི་སྡིག་པ་ཅན་ཡིན་ཡང་མི་གོས་པར་ཟུང་འཇུག་གི་འབྲས་བུ་མཐར་ཐུག་པ་ཚེ་གཅིག་ལ་སོགས་པ་ལས་མི་འགོར་བར་སྦྱོར་བས་ན། ལམ་བགྲོད་པའི་བརྟུལ་ཞུགས་ཏེ་ཚུལ་གཞན་ལས་མྱུར་བ་ཡིན་ནོ། ༈ དབྱེ་བ་ལ་དང་པོ་ཕྱི་རྒྱུད་སྡེ་བཞིར་དབྱེ་བ་ནི། དེ་ཡང་འདི་ལྟར་གང་གིས་སྟོན་པ་ལོངས་སྐུ། གང་བསྟན་པ་གསང་སྔགས་ཀྱི་ཆོས་ནི་ཇི་ལྟར་ན་སྒྲ་ཚིག་བརྗོད་བྲལ་ལོངས་སྐུའི་བསྟན་པ་ཡིན་པས། རྒྱལ་བ་ཀུན་གྱི་སྤྱི་གཟུགས་རྡོ་རྗེ་འཆང་ཆེན་པོས། དུས་ཐོག་མ་མེད་པ་ནས་འཁོར་ཚད་མེད་པའི་ནང་དུ་གསུངས་པའི་ཕྱིར། བདེ་གཤེགས་སྙིང་པོ་ཀུན་ལ་ཡོད་ཀྱང་དུས་བབ་ཀྱི་གདུལ་བྱའི་ངོར་སེམས་ཅན་མཐའ་ཡས་པའི་བློ་དང་ཆོས་ཀྱི་དབྱིངས་འབྱམས་ཀླས་པས་སངས་རྒྱས་ཀྱི་ཆོས་ཀྱང་དེའི་རྗེས་སུ་འགྲོ་བས་ན། གདུལ་བྱ་བྱེ་བྲག་པའི་ངོར་མཆོག་གི་སྤྲུལ་པའི་སྐུའི་བསྟན་པའི་རྒྱུད་གསང་འདུས་ལ་སོགས་པ་ལྟར། བསྟན་པའི་གནས་ཚད་དང༌། དར་ཚད། བྱང་ཆུབ་སོགས་དུས་ཀྱི་ཐོག་མཐའི་ཚད་དང༌། རྩ་རླུང་གི་བྱེད་པ་སྡོམ་བྱེད་ཀྱི་གཉེན་པོ། རང་གནས་ཡེ་ཤེས་ལམ་བྱེད་ཀྱི་ཐེག་པ་དང༌། རྒྱུད་སྡེའི་གྲངས་ལ་སོགས་པ་མཐའ་གཅིག་ངེས་གཟུང་བྱ་རྒྱུ་མེད་དེ། རྡོ་རྗེ་སྙིང་པོ་རྒྱན་གྱི་རྒྱུད་ལས། གསང་དང་གསང་ཆེན་ཤིན་ཏུ་གསང༌། །རྣལ་འབྱོར་རྣལ་འབྱོར་ཆེན་པོ་དང༌། །རྗེས་སུ་རྣལ་འབྱོར་ཆེན་པོ་དང༌། །ཞེས་དང༌། གསང་སྔགས་གསང་ཆེན་ཤིན་ཏུ་གསང༌། །རྒྱུད་རྣམས་ཀུན་གྱི་སྤྱི་བོ་སྟེ། །ཞེས་པས་ཤིན་ཏུ་རྣལ་འབྱོར་དང་རྗེས་སུ་རྣལ་འབྱོར་སོགས་གསལ་བར་བསྟན་ལ། དེ་བཞིན་དུ་དཔུང་བཟང་ལས། ལྷ་དང་ལྷ་མིན་མི་ལ་ཕན་གདགས་ཕྱིར། །གསང་སྔགས་རིག་སྔགས་རྣམ་པ་སྣ་ཚོགས་དག །བྱེ་བ་ཕྲག་གསུམ་དང་ནི་འབུམ་ཕྲག་ལྔ། །རིག་འཛིན་སྡེ་སྣོད་གསལ་བར་རྒྱལ་བས་གསུངས། །ཞེས་སོ། །དེ་དག་ཀྱང་སྡེ་ཚན་དུ་སྣང་བའི་ཚུལ་སྐྱེ་འགྲོའི་ལུས་ལ་རྩ་སྟོང་ཕྲག་བདུན་ཅུ་རྩ་གཉིས་ཀྱི་རིམ་པས་དེར་འབབ་པའི་ཁུ་རྡུལ་གཉིས་དང༌། རླུང་གི་འདུ་བ་ལས་ཆོས་ཀྱི་རྣམ་གྲངས་དེ་སྙེད་ཅིག་གདུལ་བྱའི་བློ་ལ་བདེ་བར་གཤེགས་པའི་བདག་རྐྱེན་ལས་རང་བཞིན་འཆར་བའི་ཚུལ། བཤད་རྒྱུད་རྡོ་རྗེའི་ཕྲེང་བ་ལས། སྟོང་ཕྲག་ཉི་ཤུ་རྩ་བཞི་ནི། །ཁྲག་འབབ་པ་ནི་ཤེས་པར་བྱ། །སྟོང་ཕྲག་ཉི་ཤུ་རྩ་བཞི་ནི། །བྱང་ཆུབ་སེམས་ནི་རབ་ཏུ་འབབ། །སྟོང་ཕྲག་ཉི་ཤུ་རྩ་བཞི་ནི། །རླུང་རྒྱུ་བར་ནི་ཤེས་པར་བྱ། །ཞེས་པ་དང་མཐུན་པར་རྒྱུད་སྡེའི་གྲངས། ཀླུ་སྒྲུབ་ཞབས་ཀྱི་རིམ་ལྔའི་འགྲེལ་པ་ལས། གསང་སྔགས་ཀྱི་དབྱེ་བ་ནི་སྟོང་ཕྲག་བདུན་ཅུ་རྩ་གཉིས་སོ། །ཞེས་གསུངས་སོ། །དེ་ལྟ་བུའི་སྔགས་ཀྱི་རྒྱུད་སྡེ་ཡོད་དོ་ཅོག་ཐམས་ཅད་འདོད་ཡོན་དང་ཉོན་མོངས་ལམ་དུ་བྱེད་ཚུལ་དང༌། གདུལ་བྱའི་བློ་རིམ་སོགས་ཀྱིས་བསྒྲུབ་ཚུལ་གྱི་རྣམ་གྲངས་དང༌། སྡེ་ཚན་གྱི་གྲངས་འཛིན་སླ་བའི་ཕྱིར་ཆིངས་ཆེན་པོ་ལྔ་ཡིས་བཅིངས་ཏེ་སྟོན་པ་ནི། གསང་བ་གྲུབ་པ་ལས། གདུལ་བྱ་དུས་དང་འདུལ་བྱེད་ཀྱི། །སྐལ་པ་ཅན་རྣམས་དོན་གྱི་ཕྱིར། །གསང་སྔགས་ཚུལ་ཆེན་རྣམ་པ་བཞི། །འཇིག་རྟེན་ཁམས་སུ་བསྒྲགས་པ་ཡིན། །ཞེས་སོ། །དེ་ཡང་དུས་དང་རིགས་དང་དབང་པོ་སོགས་ལ་དགོངས་ཏེ་གསུངས་པས། དུས་ལ་དགོངས་པ་ནི། འཛམ་བུ་གླིང་པ་རྣམས་ལ་སྦྱང་གཞི་འདོད་ཆགས་ཀྱི་འཇུག་ཚུལ་བཞི་རིམ་པར་བྱུང་སྟེ། ཚེ་ལོ་ས་ཡ་དྲུག་འབུམ་ཡན་ཆད་དུ་ཉོན་མོངས་མངོན་གྱུར་མེད་ཅིང༌། ཚེ་ལོ་དཔག་མེད་ཐུབ་པ་དང༌། ལུས་ཀྱི་འོད་དང༌། རྫུ་འཕྲུལ་དང༌། བདུད་རྩིའི་ཟས་ཏེ་ཡོན་ཏན་རྣམ་པ་བཞི་པོ་ཐམས་ཅད་རྫོགས་པར་ཡོད་པས་རྫོགས་ལྡན་ཏེ། འདིའི་དུས་ན་ཉོན་མོངས་འདོད་ཆགས་ཅུང་ཟད་ལངས་ཀྱང་ཤས་ཆུང་བས་གཅིག་ལ་གཅིག་བལྟས་པ་ཙམ་གྱིས་ཚིམ་པ་དང༌། རིམ་པར་ཡོན་ཏན་དེ་དག་ལས་གཅིག་ཉམས་ཏེ་གསུམ་ལྡན་གྱི་དུས་ན་བགད་པས་ཚིམ་པ་དང༌། ཡང་གཅིག་ཉམས་པས་གཉིས་ལྡན་གྱི་དུས་ན་ཕན་ཚུན་རེག་པ་དང་བཅངས་པ་ཙམ་གྱིས་ཚིམ་པའི་འདོད་ཆགས་དང་ནི། ཡོན་ཏན་ཐམས་ཅད་ནུབ་སྟེ་ཕན་ཚུན་རྩོད་པར་བྱེད་ཅིང་འཁྱུད་སྦྱོར་གྱི་འདོད་ཆགས་དང་ལྡན་པ་སྟེ་བཞི་ཡི་གཉེན་པོར་གསུངས་པ་ཡང༌། བསྡུས་རྒྱུད་ལས། རྫོགས་ལྡན་དང་པོ་བྱ་བའི་རྒྱུད། །གསུམ་ལྡན་གཉིས་པ་སྤྱོད་པའི་རྒྱུད། །གཉིས་ལྡན་གསུམ་པ་རྣལ་འབྱོར་རྒྱུད། །རྩོད་ལྡན་བཞི་པ་བླ་མེད་དོ། །དུས་བཞི་ལ་ནི་དགོངས་ནས་ཀྱང༌། །རྒྱུད་སྡེ་རྣམ་པ་བཞིར་བཤད་དོ། །ཞེས་སོ། །རིགས་ལ་དགོངས་པ་ནི་སྤྱོད་པའི་སྒོ་ནས་དབྱེ་སྟེ། འདི་ལྟར་བྲམ་ཟེ་རྣམས་གཙང་སྦྲ་དང་དཀའ་ཐུབ་ལ་སྤྱོད་པ་དང༌། རྗེའུ་རིགས་རྣམས་ནི་སྒོ་གསུམ་ཆ་མཉམ་ལ་སྤྱོད་པ་གཟོ་བ་དང༌། རྒྱལ་པོའི་རིགས་རྣམས་རྒྱ་ཆེན་པོ་ལ་མོས་ཤིང་སེམས་ཀྱི་ལས་གཙོ་བོར་སྤྱོད་པ་དང་ནི། དམངས་རིགས་སམ་གདོལ་པ་རྣམས་ནི་གཙང་སྦྲ་ཆུང་ཞིང་ཉོན་མོངས་པའི་བརྟུལ་ཞུགས་ཤས་ཆེ་བ་དེ་རྣམས་དང་མཐུན་པར་བསྟན་པ་སྟེ་བཞིའོ། །དེ་ཡང་བདེ་མཆོག་རོལ་པའི་རྒྱུད་ལས། བྱ་བ་བྲམ་ཟེ་གཙང་སྦྲ་བསྟུན། །སྤྱོད་པ་རྗེ་རིགས་རང་དོན་དུ་སེམས་ཀྱི་ཡང་དཔྱོད། ལུས་ཀྱི་ཡང་དམངས་རྣམས་སྐྱོང་ཕྱིར་ཐབས་བྱེད། ངག་གི་ཡང་སྨྲ་བ་སྟེ་སྒོ་གསུམ་ཆ་མཉམ་པར་གཟོ་བ་དེ་བས་ལྷག །རྣལ་འབྱོར་རྒྱལ་པོ་འཁོར་ཚོགས་མང༌། །གཞི་རྨོངས་དམངས་ཕལ་པ་གདོལ་རིགས་རྣམས་ལ་གདོད་ནས་གྲོལ་བ་སྟེ། །གཞན་དུ་སུ་ལའང་མ་བསྟན་པར། །མཛེས་མ་ཁྱོད་ལ་བསྟན་པ་ཡིན། །ཞེས་སོ། །དབང་པོ་བཞིར་དགོངས་པ་ནི། དབང་པོ་རྟུལ་པོ་རྣམས་ཀྱིས་སེམས་ཀྱི་ཀུན་ཏུ་བརྩམ་པ་ཆེན་པོ་ཉམས་འོག་ཏུ་མི་ཆུད་པས་ལུས་ངག་གི་བྱ་བ་ཆེ་ཐང་དུ་མཐོང་བ་དང༌། འབྲིང་གིས་སེམས་ཀྱི་བརྩམ་པ་ཆེན་པོ་ཡང་རྟོགས་སུ་རུང་ལ་ལུས་ངག་གི་བྱ་བ་དང་སེམས་ཀྱི་བརྩམ་པ་ཆ་མཉམ་པར་བལྟ་བ་དང༌། རྣོན་པོས་སེམས་ཀྱི་བརྩམ་པ་གཙོ་བོར་བལྟ་ཞིང་ལུས་ངག་གི་སྤྱོད་པ་གྲོགས་ཙམ་དུ་བརྟེན་པ་དང༌། དབང་པོ་མཆོག་གིས་སྒོ་གསུམ་གྱི་བྱ་བ་ཐམས་ཅད་མཚན་མ་དང་བླང་དོར་དུ་མི་བལྟ་བར་ཟུང་དུ་ཚུད་པར་ཤེས་པས་དེ་དག་གི་ཕྱིར་གསུངས་ཏེ། རྡོ་རྗེ་གུར་ལས། དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་འབྱོར་དེ་ལྟག་ལ། །སེམས་ཅན་མཆོག་ལ་རྣལ་འབྱོར་རྒྱུད། །རྣལ་འབྱོར་བླ་མེད་དེ་ལྟག་ལའོ། །ཞེས་སོ། །དེ་དག་འདུལ་བྱེད་གསང་སྔགས་ཀྱི་ཆོས་ནི་རིམ་པ་བཞིན་དུ་གདུལ་བྱ་དེ་རྣམས་དང་མཐུན་པར་སྟོན་པ་སྟེ། བྱ་བའི་རྒྱུད་དུ་འདོད་ཆགས་ལམ་དུ་བྱེད་པའི་ཐབས་ལྷ་བྲི་ཞིང་བསྒོམ་པའི་ཚུལ་ཡང་སེམས་ཉིད་སྟོང་གསལ་གྱི་རང་བཞིན་གང་དུའང་འཆར་རུང་བས་ཕྱག་ན་རྡོ་རྗེ་མངོན་པར་དབང་བསྐུར་བའི་རྒྱུད་ལས། དབུས་སུ་ནི་བཅོམ་ལྡན་འདས་སྤྱན་རས་གཟིགས་དབང་བྲི། དེ་ཡི་གཡོན་དུ་ན་བཟའ་དཀར་མོ་བཅོམ་ལྡན་འདས་ལ་བལྟ་བ་བྲིའོ། །ཞེས་དང༌། རྡོ་རྗེ་གཙུག་ཏོར་ལས། དཀྱིལ་འཁོར་གྱི་ནི་ལྷ་ཚོགས་རྣམས། །ཕོ་ཡང་མོ་ལ་བལྟ་བ་དང༌། །མོ་ཡང་ཕོ་ལ་བལྟ་བ་བྲི། །ཞེས་སོ། །སྤྱོད་པ་ཡང་ཁྲུས་དང་གཙང་སྦྲ་དང༌། དཀར་གསུམ་ཟ་བ་དང༌། གོས་གསུམ་བརྗེ་བ་སོགས་བྱ་བ་གཙོར་ལྷུར་ལེན་པ་དང༌། སེམས་ཀྱི་བསྒོམ་པ་ཡང་མེད་པ་མིན་ཀྱང་ལུས་ངག་གི་བྱ་བར་ཆེ་ཐང་དུ་བརྩོན་ནོ། །སྤྱོད་པའི་རྒྱུད་དུ་ཆགས་པ་ལམ་དུ་བྱེད་པའི་ལྷ་བྲི་ཞིང་བསྒོམ་པའི་ཚུལ་ནི། རྣམ་སྣང་མངོན་བྱང་ལས། རྣམ་པར་སྣང་མཛད་རྒྱལ་པོ་ཆེ། །ཡིད་ཙམ་འཛུམ་པའི་ཞལ་དུ་བྲི། །ཞེས་དང༌། དེ་ཡི་གཡས་སུ་ལྷ་མོ་ནི། །སངས་རྒྱས་སྤྱན་ཞེས་བྱ་བ་སྟེ། །ལྷ་མོ་ཅུང་ཟད་འཛུམ་པའི་ཞལ། །ཞེས་སོགས་གསུངས་པ་ལྟར་རོ། །སྤྱོད་པ་ཡང་སྒོ་གསུམ་གྱི་བྱ་བ་ཆ་མཉམ་པར་བྱེད་ལ། བསྒོམ་པ་ཡང་སེམས་ཀྱི་བརྩམ་པ་ཆེན་པོ་བྱེད་ནུས་པའི་དབང་གིས་ཀུན་སྤྱོད་གཙོ་བོར་མི་འདོན་ནོ། །རྣལ་འབྱོར་རྒྱུད་དུ་འདོད་ཆགས་ལམ་དུ་བྱེད་པའི་ཐབས་སུ་ལྷ་བྲི་ཞིང་བསྒོམ་པ་ནི། དཔལ་མཆོག་དང་པོ་ལས། དཀྱིལ་འཁོར་གྱི་ནི་ལྷ་ཚོགས་རྣམས། །དཔུང་པ་ཡིད་ཙམ་དམ་པར་བཞག །ཅེས་དང༌། དེ་ཡི་ལོགས་ལ་རྡོ་རྗེ་ཆེ། །མདའ་ནི་གསོར་བ་ལ་བརྩོན་པ། །སྙེམས་པའི་ཕྱག་གིས་ཡོངས་འཁྱུད་པའི། །ཆུ་སྲིན་རྒྱལ་མཚན་སྒྲེང་དང་བཅས། །ཞེས་སོགས་གསུངས་པས་ལྷ་ཐམས་ཅད་ཕྱག་རྒྱ་སྦྲེལ་བར་འབྱུང་ངོ༌། །སྤྱོད་པ་ཡང་ལུས་ངག་གི་བྱ་བ་མི་དགོས་པ་མིན་ཡང་གཙོ་བོར་མི་སྟོན་པ་གྲོགས་ཙམ་དུ་སྟོན་ལ། བསྒོམ་པ་ནི་མཚན་བཅས་ལྷའི་རྣལ་འབྱོར་དང་མཚན་མ་མེད་པའི་དོན་བསྒོམ་པ་ལྷུར་ལེན་པ་གཙོར་བྱེད་དོ། །བླ་ན་མེད་པའི་རྒྱུད་སྡེ་རྣམས་ལས་ནི། ཆགས་པ་ལམ་དུ་བྱེད་པའི་ལྷ་རྣམས་ཐབས་ཤེས་ཟུང་འབྲེལ་ཏེ། གསང་འདུས་ལས། དབང་པོ་གཉིས་ཀྱི་སྦྱོར་བ་ཡི། །འདི་སྣང་གི་དངོས་པོ་ཐམས་ཅད་ལམ་དུ་བྱེད་པས་བརྟགས་པར་བྱ། །ཞེས་དང༌། གསང་སྙིང་ལས། རང་གི་ལག་ཆ་སྣ་ཚོགས་ཏེ། །བཙུན་མོ་འཇིགས་པའི་ཚོགས་དང་འཁྲིལ། །ཞེས་སོགས་སོ། །སྤྱོད་པ་ཡང་གཙང་སྨེ་དང་ཉོན་མོངས་སོགས་ལ་བླང་དོར་མེད་པར་སྤྱོད་ཅིང༌། བསྒོམ་པ་ནི་མཉམ་ཉིད་བླང་དོར་དང་བྲལ་ཞིང་ཐབས་ཤེས་ཟུང་དུ་འཇུག་པའི་དོན་ལ་མཉམ་པར་འཇོག་པར་བྱེད་ནུས་པའོ། །གཞན་ཡང་ལྷ་བཞིའི་རྗེས་སུ་ཞུགས་པའི་ཕྱིན་ཅི་ལོག་བཞི་དང༌། ནང་པའི་གྲུབ་མཐའ་སྨྲ་བ་བཞི་རྗེས་སུ་བཟུང་བའི་ཕྱིར་རྒྱུད་སྡེ་བཞིར་ཕྱེ་བའང༌། མདོ་སྔགས་གཉིས་མཐར་ཐུག་དགོངས་པ་གཅིག་ཏུ་འབབ་པ་དང༌། སངས་རྒྱས་རྣམས་ནི་ཐབས་ལ་མཁས་ཤིང་ཐུགས་རྗེ་དང་ལྡན་པས་གདུལ་བྱར་མ་གྱུར་པའང་མེད་ལ། འདུལ་ཚུལ་ཡང་རང་རང་གི་མོས་པ་དང་མཐུན་པར་སྟོན་པས་མི་འཐད་པ་མེད་དོ། །རྒྱལ་བའི་ཕྲིན་ལས་སུ་ཤར་བའི་ལྷ་བཞི་ནི། བྱ་རྒྱུད་ལ་གཙང་སྦྲ་སོགས་གཏི་མུག་ཅན་ཚངས་པ་གཙང་སྦྲ་ཆོས་སུ་སྨྲ་བ་དང༌། སྤྱོད་རྒྱུད་ཞེ་སྡང་ཅན་ཁྱབ་འཇུག་འཚེ་བ་ཆོས་སུ་སྨྲ་བ་དང༌། ང་རྒྱལ་ཅན་ལྷ་ཡི་ང་རྒྱལ་རྣལ་འབྱོར་བརྒྱ་བྱིན་རིགས་དང་འབྱོར་པས་རྒྱགས་པ་དང༌། ཆགས་པ་ཅན་བླ་མེད་ཆགས་པ་ལམ་བྱེད་དབང་ཕྱུག་འདོད་ཆགས་ཆོས་སུ་སྨྲ་བ་རྣམས་སོ། ༈ ཕྱི་རྒྱུད་སྡེ་གསུམ་སྤྱིར་བཤད་པ་ནི། དེ་ལྟར་གསང་སྔགས་རྒྱུད་སྡེ་བཞི་པོ་དེ་དག་གི་ནང་ནས་དང་པོ་བྱ་སྤྱོད་རྣལ་འབྱོར་གྱི་རྒྱུད་གསུམ་ལ་ནི་གསང་སྔགས་ཕྱི་པ་ཞེས་བྱ་སྟེ། ཐུབ་པ་ཆགས་བྲལ་གྱི་རྣམ་པས་དངོས་སུ་གསུངས་པའི་མཚན་ཉིད་ཐེག་པ་དང༌། གཙང་སྦྲ་བྱེད་པ་དང༌། ཉེས་སྤྱོད་སྡོམ་པའི་ཚུལ་ཁྲིམས་ཀྱི་ཀུན་ཏུ་སྤྱོད་པ་ཕལ་ཆེར་མཚུངས་པའི་ཕྱིར། དཀའ་ཐུབ་རིག་བྱེད་ཀྱི་ཐེག་པའམ་ཐུབ་པ་རྒྱུད་ཀྱི་ཐེག་པ་ཞེས་ཀྱང་བྱའོ། །དེས་ན་འདི་དག་ཉམས་ལེན་ཐབས་ཤེས་གཉིས་ཀའི་སྒོ་ནས་མཚན་ཉིད་ཐེག་པ་ལས་ཁྱད་པར་དུ་འཕགས་ནའང༌། སྤྱིར་ཐེག་ཆེན་མདོ་སྔགས་ཀྱི་ཉམས་སུ་བླང་བྱ་ཐམས་ཅད་སྙིང་རྗེ་དང་སྟོང་ཉིད་ཟུང་འཇུག་ལམ་དུ་གཅིག་ཅིང༌། ཉོན་མོངས་པ་དང་ཁ་ན་མ་ཐོ་བས་མི་གོས་པར་བྱེད་པར་མཚུངས་པས། ཐུན་མོང་ཐེག་པའི་ཉམས་ལེན་དང་སྡོམ་པས་རྒྱུད་སྦྱང་ཞིང་བྱམས་སྙིང་རྗེས་གཞི་བཟུང་བ་ཞིག་དགོས་ཀྱི། རང་གར་སྔགས་ལམ་དུ་ཞུགས་པ་ཙམ་གྱིས་ལམ་གོང་མའི་ཁྱད་ཆོས་རྒྱུད་ལ་མི་འབྱོང་བ་མ་ཟད་རྒྱུད་ཆུད་ཟོས་སུ་འགྱུར་རོ། །སྔགས་ཕྱི་པ་འདི་དག་གིས་ནི་སྔར་བཤད་པ་ལྟར་རྩོད་པའི་དུས་ཀྱི་དབང་པོ་གཉིས་སྦྱོར་དང་འགལ་བའི་བལྟས་བགད་ལག་བཅངས་ཀྱིས་ཚིམ་པའི་འདོད་ཆགས་ཀྱི་ཀུན་སྤྱོད་ལམ་དུ་བྱེད་པས་ན། ལྷ་ཡང་དེ་དང་མཐུན་པར་བྲི་བ་དང་བསྒོམ་པའི་ཚུལ་སྟོན་གྱི། ཡབ་ཡུམ་ཟུང་འབྲེལ་གྱི་ཚུལ་སྟོན་པ་མིན་ལ། དཀར་གསུམ་གྱི་ཟས་དང༌། རས་གོས་སོགས་གཙང་ཞིང་གསར་པར་གྱུར་པའི་གོས་དང་ལོངས་སྤྱོད་རྣམས་བསྟེན་པར་བྱ་བ་ལས་ཤ་ལྔ་དང་བདུད་རྩི་ལྔ་དང༌། ཞིང་ལྤགས་རུས་རྒྱན་སོགས་ལ་ལོངས་མི་སྤྱོད་དོ། ༈ བྱེ་བྲག་ཏུ་བཤད་པ་ལ་དང་པོ་བྱ་སྤྱོད་ཀྱི་ཁྱད་པར་བཤད་པ་ནི། དེ་ལ་སྤྱིར་སྔགས་ཀྱི་དབྱེ་བ་བྱས་ན་ནི། རིགས་སྔགས་དང༌། གཟུངས་སྔགས། གསང་སྔགས་ཞེས་ཐབས་དང༌། ཤེས་རབ་དང༌། གཉིས་སུ་མེད་པའི་ངོ་བོ་གསུམ་དུ་གནས་པའི་ཚུལ། དགོངས་པ་གྲུབ་པའི་རྒྱུད་ལས། གསང་སྔགས་ཀུན་གྱི་དབྱེ་བ་ནི། །རྣམ་པ་གསུམ་དུ་ཤེས་བྱ་སྟེ། །རིག་སྔགས་ཐབས་ཀྱི་ངོ་བོ་ཡིན། །གཟུངས་སྔགས་ཤེས་རབ་ངོ་བོ་ཡིན། །གསང་སྔགས་གཉིས་མེད་ཡེ་ཤེས་སོ། །ཞེས་པས་དེའང་བྱ་བ་དང་ནི་སྤྱོད་པའི་རྒྱུད་དུ་ནི། ཐབས་ཀྱི་ལྷར་ཤར་བ་སེམས་དཔའ་དང༌། ཤེས་རབ་ཀྱི་ལྷར་ཤར་བ་སེམས་མ་དང༌། འཇམ་དབྱངས་དང་དབྱངས་ཅན་མ་ལྟ་བུ་གནས་ལུགས་ཤེས་པའི་ཤེས་རབ་དང་ཡེ་ཤེས་འབྲེལ་བའི་ངོ་བོ་ལྷར་ཤར་བ་རིག་སྔགས་ཀྱི་ལྷ་དང༌། ཤེས་རབ་དང་དྲན་པ་འབྲེལ་བའི་ངོ་བོ་ལྷར་ཤར་བ་གཟུངས་སྔགས་ཀྱི་ལྷ་སྟེ་སྒྲུབ་ཚུལ་བྱ་བའི་རྒྱུད་ལས་ལྷ་ཡེ་ཤེས་པ་རྗེ་བོ་དང་བདག་ཁོལ་པོའི་ཚུལ་གྱིས་དང༌། སྤྱོད་པའི་རྒྱུད་ལ། ལྷ་ཡེ་ཤེས་པ་དང་བདག་དམ་ཚིག་པ་གཉིས་མཆོག་དམན་མེད་པར་སྤུན་དང་གྲོགས་པོའི་ཚུལ་དུ་བལྟས་ཏེ་སྒྲུབ་པར་བྱེད་དོ། །དེ་ལ་བྱ་རྒྱུད་ཀྱི་ལམ་ནི་དཔུང་བཟང་གི་འགྲེལ་པར་སྤྱོད་པའི་སྒོ་བཞིར་བསྡུས་ཏེ། འཇུག་པའི་སྤྱོད་པ་དབང་གིས་སྣོད་རུང་དུ་བྱེད་པ། སྦྱོར་བའི་སྤྱོད་པ་རིགས་གསུམ་གྱི་ལྷ་བསྙེན་པ། སྒྲུབ་པའི་སྤྱོད་པ་རྫས་དང་ཆ་རྐྱེན་འཛོམས་པས་བཟླས་བརྗོད་ལ་བརྩོན་པ། གྲུབ་པའི་སྤྱོད་པ་ལྷ་དང་སྐལ་མཉམ་རིག་འཛིན་མཁའ་སྤྱོད་གྲུབ་ནས་མཐར་འབྲས་ལ་སྦྱོར་བར་བཤད་པའི་སྤྱོད་པ་བཞི་ལས། དང་པོ་འཇུག་དབང་ནི་འོག་ཏུ་འཆད་ལ། གཉིས་པ་སྦྱོར་བའི་སྤྱོད་པ་རིགས་གསུམ་གྱི་ལྷ་བསྙེན་པ་ནི། བྱ་བས་རྗེ་བོ་དང་ཁོལ་པོའི་རྣམ་པར་བསྒྲུབ་པ་ཡིན་པར་བཤད་པ་དེ་ལའང༌། བདག་ལྷར་བསྐྱེད་པ་མེད་པས་རང་ཉིད་དམན་པར་བལྟས་ཏེ་ཐ་མལ་པའི་ཚུལ་དུ་བཞག་པ་ལ་ནི་བྱ་རྒྱུད་ཙམ་པོ་པའམ་རང་རྒྱུད་པ་ཞེས་བྱ་ལ། བྱ་རྒྱུད་ལ་ལར་བདག་ལྷར་བསྐྱེད་པ་ཡོད་དེ། དེ་ལ་ནི་བྱ་རྒྱུད་ཁྱད་པར་བ་ཞེས་ཟེར་ཞིང༌། འོན་ཀྱང་གཙོ་བོར་མདུན་བསྐྱེད་བྱས་ནས་དེ་ལ་དངོས་གྲུབ་ཞུ་བའི་ཚུལ་དུ་སྟོན་ཏོ། །དེ་ཡང་བདག་ཉིད་ལྷར་བསྐྱེད་པའི་ཚུལ་ནི་དེ་ཁོ་ན་ཉིད་བཞིའི་སྒོ་ནས་ཏེ། དེ་ལ་དང་པོ་བདག་གི་དེ་ཁོ་ན་ཉིད་ནི་རྒྱུད་འདིའི་ལྟ་བའི་ངང་ལ་འཇོག་པ་སྟེ། ཆོས་ཉིད་དག་པའི་ལྷ་ཞེས་སེམས་ཉིད་དོན་དམ་སྟོང་གསལ་གྱི་ཡེ་ཤེས་ཡོད་མེད་སྣང་སྟོང་གི་མཐའ་བཞི་དང་བྲལ་བའི་ཆོས་ཉིད་རྟོགས་ནས་ཀུན་རྫོབ་ཀྱི་ཆོས་ཐམས་ཅད་ལྷར་བསྒོམ་ན། སྟོང་ཉིད་ཡིན་པའི་གནད་ཀྱིས་ལྕགས་ཁམས་ལ་གསེར་འགྱུར་གྱི་རྩིས་ཐེབས་པ་བཞིན། རྟེན་འབྲེལ་སྣང་ཆ་ཐམས་ཅད་མཐར་ཐུག་པ་སངས་རྒྱས་ཚེ་ལྷར་ཡོངས་སུ་དག་པར་འདོད་དོ། །གཉིས་པ་ལྷ་ཡི་དེ་ཁོ་ན་ཉིད་ནི། སངས་རྒྱས་གསང་བས། སྟོང་པ་དེ་ཁོ་ན་ཉིད་ཡི་གེ་ཟླ་དཀྱིལ་སྒྲ་བཟླ་བྱའི་སྔགས་གཟུགས་སྤྲོ་བསྡུའི་ལྷར་གསལ་བ་དང༌། ཕྱག་རྒྱ་ལྷ་གང་ཡིན་དམ་རྒྱ་ མཚན་མ་ལྷ་དྲུག་གོ སྤྱོད་ལམ་ཀུན་ཏུ་དེའི་མཚན་མ་དང་མི་འབྲལ་བའོ། །ཞེས་པ་ལྟར་རོ། །དེ་ནས་རང་མདུན་གཞལ་ཡས་ཁང་ཞིང་ཁམས་དང་བཅས་གསལ་ལ་ཡེ་ཤེས་པ་སྤྱན་དྲངས། བསྟིམ། བཞུགས་གསོལ་བྱ་བ་རྗེ་དང་རང་ཉིད་ལྷར་བསྐྱེད་པ་བྲན་གྱི་ཚུལ་དུ་བྱས་ནས་མཆོད་བསྟོད་རྒྱུན་བཤགས་བྱའོ། །གསུམ་པ་སྒྲུབ་པའི་སྤྱོད་པ་ནི། དེ་ཁོ་ན་ཉིད་ཕྱི་མ་གཉིས་པོ་ཡིན་ཏེ། བསམ་གཏན་ཕྱི་མ་ལས། སྒྲ་དང་སེམས་དང་གཞི་ལ་གཞོལ། །ཞེས་པས་གཞི་ནི་བདག་མདུན་ལྷར་བསམ་པ། སེམས་ནི་དེ་དག་གི་ཐུགས་ཀར་ཟླ་དཀྱིལ་བསམ་པ། སྒྲ་ནི་དེ་སྟེང་སྔགས་ཕྲེང་རང་སྒྲ་སྒྲོགས་པར་བསམ་ལ་བཟླས་པ་ཚུལ་བཞིན་བྱ་བའོ། །བཞི་གྲུབ་པ་པ་བསམ་གཏན་གྱི་དེ་ཁོ་ན་ཉིད་ནི། དེ་ཉིད་བསམ་གཏན་ཕྱི་མ་ལས། གསང་སྔགས་མེར་གནས་དངོས་གྲུབ་སྟེར། །སྒྲར་གནས་རྣལ་འབྱོར་སྟེར་བར་དྲན། །སྒྲ་མཐས་ཐར་པ་སྟེར་བར་བྱེད། །ཅེས་པས་རང་ཉིད་ལྷར་གསལ་སྙིང་གར་མེ་འབར་བའི་ནང་དུ། ཟླ་བར་སྔགས་ཕྲེང་བཀོད་ནས། སྲོག་བསྡམ་པའི་སྦྱོར་བས་བསྒོམ་པ་ལས་བཞི་འགྲུབ་པའི་གཞིའོ། །སྒྲར་གནས་ནི་སྔགས་འབྲུ་རྣམས་རང་སྒྲ་དྲིལ་བུའི་སྒྲ་ལྟར་བསམ་པའོ། །རྣམ་འབྱོར་ནི་ཞི་གནས་སྐྱེ་བའི་རྟེན་ཡིན་ནོ། །སྒྲ་མཐས་ཐར་པ་སྟེར་བ་ནི། སྒྲ་ཡི་རྒྱུན་ཇེ་ཕྲར་སོང་ནས་མི་དམིགས་པར་འཇོག་པ་སྟེ། ལྷག་མཐོང་ཁྱད་པར་ཅན་རྒྱུད་ལ་སྐྱེ་བར་བྱེད་པའོ། །དེ་ལྟར་ནང་གི་སྒོམ་པ་དང་ཕྱི་ཡི་བྱ་བ་ཁྲུས་དང་གཙང་སྦྲ་ལ་གཙོ་བོར་བསྟེན་པས་བདག་མདུན་མཆོག་དམན་གྱི་ཚུལ་དུ་བསྒྲུབ་པའོ། །བཞི་པ་གྲུབ་པའི་སྤྱོད་པ་མཁའ་སྤྱོད་རིག་འཛིན་གྲུབ་སྟེ། རྟེན་དེ་ལ་སྔགས་ཀྱི་ཕྱིན་དྲུག་གི་སྤྱོད་པ་སྤྱད་ནས་མཐར་ཐུག་གི་འབྲས་བུ་མཆོག་གི་དངོས་གྲུབ་ལྷའི་སྐུ་གསུང་ཐུགས་དང་མཉམ་པར་སྦྱོར་བའི་རིགས་གསུམ་རྡོ་རྗེ་འཛིན་པའི་གོ་འཕང་མངོན་དུ་བྱེད་པར་འདོད་པ་སྟེ། ཧེ་རུ་ཀ་གལ་པོ་ལས། མི་ཚེ་བདུན་ན་སངས་རྒྱས་པ། །རིགས་གསུམ་མགོན་པོས་འགྲོ་བ་འདུལ། །ཞེས་སོ། ༈ སྤྱོད་རྒྱུད་ནི། བྱ་བའི་རྒྱུད་ལས་བཤད་པའི་ཁྲུས་དང་གཙང་སྦྲ་སོགས་ཐབས་དང༌། ནང་གི་ལྟ་བ་དང༌། བསྒོམ་པའི་རྣལ་འབྱོར་ཡོ་གའི་རྒྱུད་ལྟར་བྱས་ནས་དེ་གཉིས་ལ་ཆ་མཉམ་པར་སྤྱོད་པས་སྤྱོད་པའི་རྒྱུད་དུ་གྲགས་པ་ཡིན་ཏེ། རང་ཤར་ལས། ཨུ་པ་ཡ་ནི་འདི་ལྟ་སྟེ། །ལྟ་བ་ཡོ་གར་ལྟ་བ་དང༌། །སྤྱོད་པ་ཀྲི་ཡར་སྤྱོད་པ་སྟེ། །དེ་ཕྱིར་གཉིས་ཀའི་རྒྱུད་དུ་གྲགས། །ཞེས་སོ། །དེ་ལ་དང་པོ་རང་ཉིད་དམ་ཚིག་སེམས་དཔའི་ལྷར་བསྐྱེད་པ་ལ། སྔགས་དང་ཕྱག་རྒྱ་ལ་སོགས་པས་བྱིན་གྱིས་བརླབ། དེ་ནས་གཉིས་པ་རང་གི་མདུན་དུ་བསྐྱེད་ཅིང་བཞུགས་པའི་ཡེ་ཤེས་ཀྱི་ལྷའི་ཐུགས་ཀའི་ཟླ་དཀྱིལ་ལ་སྔགས་ཕྲེང་བཀོད་ནས། སྲོག་བསྡམ་ཞིང་རྩེ་གཅིག་པའི་སྦྱོར་བས་ཏིང་ངེ་འཛིན་བརྟན་པར་བྱེད་དེ། དེ་ཡང་བདེན་པ་དབྱེར་མེད་ཀྱི་དོན་ལ་ཇེ་བཟང་དུ་སོང་བས་དམ་ཡེ་གཉིས་ལ་དམན་མཆོག་མེད་པར། སྤུན་དང་གྲོགས་ལྟར་བལྟས་ཏེ་དངོས་གྲུབ་ལེན་པར་བྱེད་པ་ཡིན་ནོ། །དེ་ལྟར་མཚན་བཅས་དང༌། མཚན་མེད་ཏིང་ངེ་འཛིན་གྱི་རིམ་པ་སོགས་ཀྱིས་འབྲས་བུ་དངོས་གྲུབ་ཐུན་མོང་དང༌། ཁྱད་པར་མི་ཚེ་ལྔའམ་རིང་མཐའ་བསྐལ་པ་གསུམ་མམ་གཅིག་གིས་སྐུ་གསུང་ཐུགས་ཀྱི་རིགས་གསུམ་དང་རིན་ཆེན་རིགས་ཏེ་རིགས་བཞི་རྡོ་རྗེ་འཛིན་པའི་ས་མངོན་དུ་བྱེད་པར་འདོད་དོ། ༈ རྣལ་འབྱོར་ནི། རྣལ་འབྱོར་གྱི་རྒྱུད་ཀྱི་ལྷའི་རྣལ་འབྱོར་དཀྱིལ་འཁོར་བསྒོམ་པའི་སྐབས་སུ་གཞལ་ཡས་ཁང་གི་གྲུ་ཆད་མན་ཆད་ཀྱི་ཁྱམས་དང༌། ཕྱི་རོལ་གྱི་སྲུང་བའི་བར་ཕལ་ཆེར་ལ། བཀོད་པ་ཆེན་པོ་རང་སྣང་ལོངས་སྤྱོད་རྫོགས་པའི་ཞིང་དང་གཞལ་ཡས་ཁང་ལྟར་བསྟན་ན་ཡང༌། ནང་གི་ལྷ་གདན་འཁོར་ལོ་སོགས་དང༌། གཞལ་ཡས་ཁང་གི་དབུས་ཕྱུར་བུའི་རྣམ་པ་དང༌། རྩེ་མོ་དང༌། རྒྱན་གྱི་རྣམ་གྲངས་ལ་མི་འདྲ་བ་མང་དུ་ཡོད་ལ། ལྷ་རྣམས་ཀྱང་སྔར་བཤད་པ་ལྟར་ཡབ་ཡུམ་ཟུང་འབྲེལ་མ་ཡིན་ལ། ལྷ་བསྐྱེད་ནས་དེ་ལ་སེམས་གཏད་པ་དང༌། རྫོགས་རིམ་མི་རྟོག་པ་བསྒོམ་པའི་ཐབས་ཀྱི་རྣལ་འབྱོར་དང༌། ཤེས་རབ་ཀྱི་རྣལ་འབྱོར་གཉིས་རིམ་ཅན་དུ་བསྒོམ་པས་སོ་སོ་བ་ཡིན་ཏེ། ལམ་རིམ་ལས། ལྷུན་གྲུབ་མཉམ་པར་མ་རྟོགས་པས། །ཆོས་ཀུན་རྣམ་དག་ཡེ་ཤེས་ཀྱི། །ཐབས་ཤེས་རིམ་ཅན་དུ་བསྒོམ་པས། །བསྐྱེད་རྫོགས་སོ་སོ་བ་ཉིད་དོ། །ཅེས་སོ། །བྱང་སེམས་དང་ལྡན་ཅིང་ཐེ་ཚོམ་དང་ཡིད་གཉིས་བྲལ་བའི་གང་ཟག་དེས། ཇི་ལྟར་བསྒྲུབས་པའི་ཚུལ་ཡང༌། ནང་གི་རྣལ་འབྱོར་བསྒོམ་པ་གཙོར་སྤྱོད་ཅིང༌། ཁྲུས་དང་གཙང་སྦྲ་སོགས་ལུས་ངག་གི་བྱ་བ་རྣམས་གྲོགས་སུ་སྟོན་པ་ཡིན་ལ། དེ་ཡང་ཐབས་ཀྱི་མངོན་བྱང་ལྔ་ནི། གལ་པོ་ལས། མི་རྟོག་ཟླ་བ་གསུང་རྡོ་རྗེ། །སྤྲོ་བསྡུ་བསྒོམས་པས་སྐུ་རུ་གསལ། །ཞེས་པ་ལྟར་རྒྱུད་སྡེ་འོག་མ་གསུམ་གྱི་ལུགས་མིན་ཀྱང་རྣམ་བྱང་དང་བསྟུན་མངོན་བྱང་ལྔ་དང༌། ཆོ་འཕྲུལ་བཞི་སྟེ། གལ་པོ་ལས། ཏིང་འཛིན་གཙོ་འཁོར་བསྐྱེད་བྱིན་རླབས་དབང་བསྐུར་མཆོད། །ཅེས་པས་ཆོ་འཕྲུལ་བཞི་དང་ལྡན་པའོ། །དེ་ལྟར་བདག་ལྷར་བསྐྱེད་ལ་དབྱིངས་ནས་ཡེ་ཤེས་པ་དགུག་ཅིང་བདག་དང་ལྷ་དོན་ལ་མཉམ་པའི་ངེས་ཤེས་ཀྱིས་ཆུ་ལ་ཆུ་བཞག་པ་ལྟར་དབྱེར་མེད་དུ་བསྟིམས་ནས། སྐུ་ཡི་རྣམ་པ་ཕྱག་རྒྱ་ཆེན་པོ། གསུང་གི་རྣམ་པ་ཆོས་ཀྱི་ཕྱག་རྒྱ། ཐུགས་ཀྱི་རྣམ་པ་དམ་ཚིག་གི་ཕྱག་རྒྱ། འོད་ཟེར་སྤྲོ་བསྡུ་ལ་སོགས་པས་སྒྲུབ་པ་ལས་ཀྱི་ཕྱག་རྒྱ་སྟེ་བཞི་ཡིས་རང་གི་སྒོ་གསུམ་བྱ་བ་དང་བཅས་པ་ལྷའི་སྐུ་གསུང་ཐུགས་ཕྲིན་ལས་དང་བཅས་པའི་ངོ་བོར་རྒྱས་བཏབ་སྟེ་དབྱེར་མེད་དུ་བཅིང་ཞིང༌། དམ་ཚིག་པ་དང་ཡེ་ཤེས་པ་གཉིས་རོ་གཅིག་པའི་ངང་ནས་བཟླས་པ་ལ་བརྩོན་ཞིང༌། དངོས་གྲུབ་རྣམ་པ་གཉིས་ལེན་པ་ཡིན་ནོ། །དེ་ལྟར་བསྒྲུབ་ཅིང་དངོས་གྲུབ་བླང་བའི་བཟླས་བརྗོད་བྱས་པའི་མཐའ་ལ་གཤེགས་གསོལ་བྱ་བ་སྟེ་བསྐྱེད་རྫོགས་ཀྱི་རིམ་པ་བྱ་བའོ། །དེ་ལྟར་བསྒྲུབས་པས་འབྲས་བུ་ཐུན་མོང་གི་དངོས་གྲུབ་མཁའ་སྤྱོད་ཀྱི་རིག་འཛིན་དང༌། མཆོག་གི་དངོས་གྲུབ་མི་ཚེ་གསུམ་ན་རིགས་བཞིའི་སྟེང་ལས་ཀྱི་རིགས་ཏེ་རིགས་ལྔ་སྟུག་པོ་བཀོད་པར་མངོན་བྱང་ལྔའི་ཐབས་ཀྱིས་ཡེ་ཤེས་ལྔའི་ངོ་བོར་འཚང་རྒྱ་བ་ཡིན་ནོ། །དེ་སྐད་དུ་གལ་པོ་ལས། ཡོ་ག་སྟུག་པོ་བཀོད་འདོད་པས། །མི་ཚེ་གསུམ་ན་གྲོལ་བར་འདོད། །ཅེས་སོ། ༈ ནང་རྒྱུད་ཀྱི་སྡེ་སྤྱིར་བསྟན་པ་ནི། ལྟ་སྒོམ་སྤྱོད་གསུམ་ཕྱི་རྒྱུད་ལས་ཁྱད་པར་འཕགས་ཤིང༌། འདི་དག་གི་གོང་ན་རྒྱུད་སྡེ་གཞན་མེད་པས་བླ་ན་མེད་པ། །ཐབས་ཤེས་སམ་བསྐྱེད་རྫོགས་དབྱེར་མེད་དུ་ཉམས་སུ་ལེན་པའི་ཕྱིར་གསང་སྔགས་ནང་པ་ཞེས་བྱ་ལ། ནང་རྒྱུད་སྡེ་གསུམ་པོ་འདིར་ནི་བསྐྱེད་རྫོགས་གཉིས་མེད་ཀྱི་ལམ་སྟོན་ཡང༌། གཙོ་ཆེ་ཆུང་ཙམ་དུ་བསྐྱེད་པའི་རིམ་པ་རྒྱ་ཆེར་སྟོན་ཞིང་ལྷ་ཡི་རྣམ་པ་ཕོ་ཤས་ཆེ་ལ། དར་དང་རིན་པོ་ཆེའི་རྒྱན་སོགས་མང་བ་དང༌། རྫོགས་པའི་རིམ་པ་མཚན་བཅས་མཚན་མེད་ཐམས་ཅད་ཚང་བར་སྟོན་ཞིང༌། ལྷ་ཡི་རྣམ་པ་མོ་ཤས་ཆེ་ལ། གཅེར་བུ་རུས་རྒྱན་གཡང་གཞི་ཐལ་བྱུག་སོགས་མང་བ་དང༌། ཡང་ཐབས་ཤེས་ཟུང་དུ་འཇུག་པ་འོད་གསལ་བའི་ཡེ་ཤེས་གཙོ་བོར་གསལ་བར་སྟོན་པ་སྟེ། དེ་གསུམ་གྱི་དབང་ལས་ཐ་སྙད་ཀྱི་དབྱེ་བ་ཕ་རྒྱུད་དང༌། མ་རྒྱུད་དང༌། གཉིས་མེད་རྒྱུད་དེ་གསུམ་དུ་བཞག་ལ། ཕ་མ་གཉིས་པོའི་རྒྱུད་འདི་མཐའ་གཅིག་ཏུའང་མ་ངེས་ལ། གཙོ་བོ་གོ་འཕོ་ལ་གཙོ་མོ་གོ་མི་འཕོ་བ་ཐབས་ཕ་ཡི་རྒྱུད། གཙོ་མོ་གོ་འཕོ་ལ་གཙོ་བོ་མི་འཕོ་བ་ཤེས་རབ་མའི་རྒྱུད་དེ། གོ་འཕོ་དགོས་པ་ནི། དབང་དུས་སུ་མེ་ཏོག་གང་ལ་ཕོག་པའི་རིགས་དེ་གཙོར་བྱས་ན་མྱུར་དུ་འགྲུབ་ཅིང༌། དེ་གཙོ་བོར་བྱེད་དགོས་པས་རིགས་ཀྱི་ཡབ་དེའི་གཙོ་བོར་བརྗེ་ཞིང་ཡུམ་རང་གི་གོ་ས་ནས་མི་འཕོ་བ་དང༌། དེ་ལས་ལྡོག་པ་ཁྱད་པར་རོ། །ནང་རྒྱུད་ཀྱི་ལྷ་ཐམས་ཅད་ནི་ཐབས་ཤེས་གཉིས་སུ་མེད་པའི་ཡེ་ཤེས་ཀྱི་རྣམ་པ་ཡབ་ཡུམ་འཁྲིལ་སྦྱོར་གྱི་ཚུལ་དང༌། དམ་ཚིག་གི་རྫས་ཀྱང་འོག་མས་བསྟེན་དུ་མི་ནུས་པའི་ཁྱད་པར་ཅན་ཤ་ལྔ་དང་བདུད་རྩི་ལྔ་ལ་སོགས་པར་ལོངས་སྤྱོད་ནུས་ཤིང༌། དེ་ཡང་ལྟ་བ་དག་མཉམ་ཆེན་པོར་རྟོགས་པའི་གནད་ཀྱིས་གཙང་བ་བཙོག་པ་སོགས་གཉིས་ཆོས་ཐམས་ཅད་ལ་བཟང་ངན་གཉིས་འཛིན་སོགས་མེད་པར་འགའ་ཞིག་སྤོང་བ་དང༌། འགའ་ཞིག་དང་དུ་ལེན་པ་མེད་པར་རོ་མཉམ་དུ་བལྟ་ཞིང་སྤྱོད་པའི་རང་བཞིན་ཅན་ནོ། །དེ་ཡང་སྤྱིར་མདོ་སྔགས་ཀྱི་ཁྱད་པར་འོག་མ་བྱ་རྒྱུད་ཀྱང་དབུ་མ་ལས་ཁྱད་པར་དུ་འཕགས་ཤིང༌། ཕྱོགས་མཐུན་ཙམ་དུ་གྲུབ་མཐའ་སྨྲ་བ་བཞི་དང༌། རྒྱུད་སྡེ་གོང་འོག་གི་ལྟ་སྤྱོད་འདྲ་རེ་སྣང་ཡང་གོང་འོག་གི་ཁྱད་པར་དབྱེ་ཤེས་པ་དེ་ལྟར་རོ། ༈ བྱེ་བྲག་ཏུ་སྤྲོས་པ་རྒྱ་ཆེན་པོའི་སྒོ་ནས་སྒོམ་པར་བྱེད་པའི་རྣལ་འབྱོར་ཆེན་པོ་ཕ་ཡི་རྒྱུད་དེ། འདིས་ནི་ཐབས་བདེ་བ་ཆེན་པོ་ཡེ་ཤེས་ཀྱི་རང་རྩལ་ལ་གཟུང་འཛིན་གློ་བུར་བ་རྟོག་པའི་དབང་གིས་ཕུང་སོགས་ཀྱི་ཆོས་སྣོད་བཅུད་ཀྱི་རྣམ་པར་སྣང་ཞིང༌། དེར་སྒྲོ་བཏགས་པའི་ཀུན་བརྟགས་ཀྱི་ཆ་སྦྱང་བའི་ཕྱིར། རང་བཞིན་ཡོངས་ཤེས་ཀྱི་ལྟ་བའི་ངང་ནས་སྣོད་བཅུད་ཐམས་ཅད་ཞིང་དང༌། གཞལ་ཡས་ཁང་དང༌། ལྷ་དང༌། ལྷ་མོར་གསལ་བའི་ལམ་བསྐྱེད་པའི་རིམ་པ་གཙོར་བྱས་ནས་བསྒོམ་ཞིང༌། རྫོགས་རིམ་ནི་གསལ་སྟོང་རྣམ་པར་མི་རྟོག་པའི་ཡེ་ཤེས་བསྐྱེད་པའི་ཕྱིར། འབྱུང་བའི་དྭངས་མ་རླུང་ལྔ་དབུ་མའི་དབྱིངས་སུ་དག་པར་བྱེད་པ་ལ་སོགས་པའི་སྒོ་ནས་དངོས་གྲུབ་རྣམ་པ་གཉིས་སུ་སྒྲུབ་པར་བྱེད་དོ། །བསྐྱེད་རིམ་ལ་གོམས་པ་བརྟན་པའི་རྗེས་སུ་སྒོམ་པར་བྱེད་པས་སམ་རྗེས་ཆགས་ཡེ་ཤེས་བསྐྱེད་པ་གཙོ་བོར་འདོན་པའི་ཕྱིར་རྗེས་སུ་རྣལ་འབྱོར་མ་རྒྱུད་དེ། འདིས་ནི་རྡོ་རྗེའི་ལུས་ཀྱི་རྩ་རླུང་ཐིག་ལེ་ལ་ཡང་དངོས་སུ་གནད་དུ་བསྣུན་ནས་གཞན་དབང་གི་ངོ་བོ་སེམས་དང་སེམས་བྱུང་གི་རྟོག་ཚོགས་ཐམས་ཅད། དབྱིངས་ཀྱི་རང་བཞིན་ཤེས་རབ་སྟོང་པ་ཉིད་ཀྱི་ངང་དུ་དག་པའི་སྟོབས་ཀྱིས། བདེ་སྟོང་ལྷན་ཅིག་སྐྱེས་པའི་ཡེ་ཤེས་དངོས་སུ་བསྐྱེད་པའི་ལམ་རང་ལུས་ཐབས་ལྡན་སྔོན་དུ་སོང་ནས། གཞན་ལུས་ཕྱག་རྒྱ་བསྟེན་པའི་རྫོགས་རིམ་གཙོ་བོར་བྱེད་ཅིང༌། ཁམས་ལས་སུ་རུང་ཞིང་ཞུ་བ་ལས་དགའ་བཞི་བདེ་བ་ཆེན་པོའི་ཡེ་ཤེས་བསྐྱེད་པ་སོགས་དངོས་གྲུབ་རྣམ་པ་གཉིས་དམིགས་པ་གོམས་པ་ཁོ་ན་ལ་མི་ལྟོས་པར། རྩ་ཐིག་རླུང་གསུམ་ལས་སུ་རུང་བ་ལས་སྒྲུབ་པར་བྱེད་དོ། །ཤིན་ཏུ་ཉམས་མྱོང་དགའ་བའི་རང་བཞིན་ཡེ་ཤེས་ཇི་བཞིན་རྗེན་པར་བསྒོམ་པས་ཤིན་ཏུ་རྣལ་འབྱོར་ཏེ། འདིས་ནི་བསྐྱེད་རྫོགས་སམ་ཐབས་ཤེས་གཉིས་གཙོ་ཆེ་ཆུང་མེད་པར། ཡོངས་གྲུབ་ཟུང་འཇུག་གི་ཡེ་ཤེས་མངོན་དུ་བྱེད་པའི་ལམ་ལ་གོམས་པས་གཅིག་དང་དུ་མའི་རང་བཞིན་མཐའ་དང་བྲལ་བའི་ཆོས་ཉིད་འོད་གསལ་ལྷུན་གྲུབ་ཆེན་པོར་སྦྱོར་ཞིང༌། ཕུང་པོའི་སྙིགས་མ་དྭངས་མའི་འཇའ་འོད་དུ་དྭངས་པར་བྱེད་དོ། ༈ བླ་མེད་ཀྱི་རྒྱུད་སྡེ་ཀུན་གྱི་ནང་ནས་བཤད་པའི་ཐབས་བསྐྱེད་པའི་རིམ་པ་དང༌། ཤེས་རབ་རྫོགས་པའི་རིམ་པས་གནད་དུ་བསྣུན་པའི་གཞི་ནི། གང་ཞེ་ན། གསང་སྔགས་ཉམས་སུ་ལེན་པའི་རྟེན་འབྱུང་བ་ལྔ་རྣམ་ཤེས་དང་བཅས་པའི་ཁམས་དྲུག་པོ་རགས་པ་མངོན་གྱུར་དང་ལྡན་པའི་ལུས་འདོད་ཁམས་པ་དང༌། ཁྱད་པར་མི་ཡི་འགྲོ་བ་ཡིན་པར་བཤད་དོ། །དེ་ལྟར་ཡིན་པའི་རྒྱུ་མཚན་ཡང༌། ཕུང་པོ་ལྔ་དང༌། ཁམས་བཅོ་བརྒྱད་དང༌། སྐྱེ་མཆེད་བཅུ་གཉིས་པོ་ཐམས་ཅད་སྣང་བའི་གཞི་རགས་པའི་རྩ་ཐིག་རླུང་གསུམ་དང་རོ་གཅིག་པའི་གཉུག་མའི་ཁམས་དྲི་མ་དང་བཅས་པ་རྣམས་ནི། ཟུང་འཇུག་ཨེ་ཝཾ་གྱི་རང་བཞིན་སྟོང་པ་བཞི་དང༌། སྣང་བ་བཞིའི་ཡེ་ཤེས་དང་གཉིས་སུ་མེད་པའི་སྐུ་གསུང་ཐུགས་རྡོ་རྗེའི་ངོ་བོར་ཡེ་ནས་གནས་པ་ཡིན་ཏེ། དམ་པ་དང་པོའི་རྒྱུད་ལས། ཐིག་ལེ་སྙིང་སྟོབས་ཟླ་བ་ཞེ་སྡང་ཁུ་བ་ལུས་སྐུ། །རྣམ་པར་ཨེ་ཝཾ་གྱིས་བཅད་བྱ་འདོད་ཆགས་རྡུལ་དམར་ཆ་ཉི་ངག་གསུང༌། །ཨ་ཡིག་སྲོག་རླུང་མུན་གཏི་མུག་ཅན་སེམས་ཐུགས་རབ་བརྗོད། །ནམ་མཁའ་ཨེ་ལ་རྣམ་པར་གནས། །ཞེས་སོ། །དེས་ན་རྟེན་ལུས་ལ་གནད་དུ་བསྣུན་པས་བརྟེན་པ་ལས་སུ་རུང་བ་ལས། བསྐྱེད་རིམ་གྱིས་རྩ་དག་པ་མཚན་དཔེས་ལུས་བརྒྱན་པའི་སྐུ། རྫོགས་རིམ་གྱིས་རླུང་དག་པ་ཡན་ལག་དྲུག་ཅུའི་གསུང༌། ཟུང་འཇུག་གིས་ཐིག་ལེ་དག་པ་ཡེ་ཤེས་ལྔའི་རང་བཞིན་ཐུགས་རྡོ་རྗེ་གསུམ་གྱི་ཡོན་ཏན་མ་ལུས་པ་ཀུན་མྱུར་དུ་སྐྱེད་པར་བྱེད་པ་ནི། རྡོ་རྗེ་ཐེག་པའི་ལམ་ཡིན་པའི་ཕྱིར་གཞན་ལས་ཁྱད་པར་དུ་འཕགས་སོ། ༈ འདི་ལྟར་རྡོ་རྗེ་ཐེག་པའི་ཉེ་ལམ་ཟབ་མོས་ཉམས་སུ་བླང་བྱའི་ངོ་བོ་ཆོས་ཐམས་ཅད་ཀྱི་རང་བཞིན་སེམས་ཉིད་བདེ་གཤེགས་སྙིང་པོ་རིག་པ་རང་བྱུང་གི་ཡེ་ཤེས་ཉིད་སྐུ་དང་ཡེ་ཤེས་ཡེ་ནས་ལྷུན་གྱིས་གྲུབ་པའི་དཀྱིལ་འཁོར་ཆེན་པོ་རུ་གནས་པ་ཡིན་ཏེ། དེ་ཉིད་ཉམས་སུ་མྱོང་བ་ནི། མོས་གུས་ཀྱི་ཕ་ཕོག་ཐོབ་པའམ། དབང་དུས་སུ་ངོ་འཕྲོད་པའམ། བསྐྱེད་རྫོགས་སོགས་ཀྱི་སྒོ་ནས་གཞིའི་རང་བཞིན་ནམ་གནས་ལུགས་དེ་ཉིད་དང་པོ་ཐོས་བསམ་གྱི་ལྟ་བས་ཐག་བཅད་ལ། ཆོས་ཉིད་ཀྱི་དོན་ཕྱིན་ཅི་མ་ལོག་པ་བློས་བྱ་རྩོལ་བྲལ་བའི་ལྟ་བ་དེའི་ངང་ནས་བསྒོམ་པས་ཉམས་སུ་བླང་བ་ནི། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་གདན་གསུམ་ཚང་བའི་དཀྱིལ་འཁོར་ཆེན་པོར་ཡེ་ནས་གནས་པའི་གསལ་སྣང་བསྐྱེད་རྫོགས་ལ་འདུ་འབྲལ་མེད་པར་དབྱེར་མེད་དུ་ཉམས་སུ་ལེན་པ་ཡིན་ནོ། །དེ་ལྟར་ཉམས་སུ་ལེན་པའི་ཚེ་གྲོགས་སྤྱོད་པས་གཟུང་འཛིན་གྱི་ལ་དོར་བར་བྱེད་པ་ནི། ཕྱི་ནང་གི་སྣང་བ་དང་བློའི་འགྲོ་ལྡོག་བཟང་ངན་ཐམས་ཅད་ཐ་མལ་གྱི་སྣང་བས་མི་དཔྱད་ཅིང༌། འདོད་ཡོན་ལ་རང་གར་ཞེན་པས་དུག་ལྔ་རང་རྒྱུད་དུ་མ་ཤོར་བ་ཐབས་ཀྱིས་ཟིན་པའི་མཉམ་རྫོགས་ཆེན་པོའི་རོལ་པ་སྟེ། ལྟ་བའི་རྫོང་ཟིན་ཅིང༌། སྒོམ་པའི་འཕྲང་ལས་གྲོལ་བ། སྤྱོད་པའི་སྲོག་མཁར་ཚུགས་པ་ཞིག་ལ་སྔགས་ཀྱི་རྣལ་འབྱོར་པ་ཞེས་བྱའོ། །དེ་ཡང་ཇི་སྐད་དུ། ལྟ་བ་ནི་སྟོང་ཉིད་བཅོ་བརྒྱད་ཡིན། །ཐེ་ཚོམ་དང་བྲལ་བའི་རྫོང་ཞིག་དགོས། །སྒོམ་པ་ནི་ཕྱོགས་ཆོས་སོ་བདུན་ཡིན། །བྱིང་རྒོད་ཀྱི་འཕྲང་ལས་འདའ་བ་དགོས། །སྤྱོད་པ་ནི་ཕ་རོལ་ཕྱིན་དྲུག་ཡིན། རང་འདོད་དང་བྲལ་བའི་སྲོག་ཚུགས་དགོས། །ཞེས་གོང་མ་དག་གིས་གསུངས་པ་ལྟར་དང༌། གཞན་ཡང༌། བདག་ཉིད་ལྷ་ཡི་རྣལ་འབྱོར་དུ་གསལ་ཐེབས་པ་བསྐྱེད་རིམ་གྱི་རྫོང༌། སྣང་སྟོང་ཟུང་དུ་འཇུག་པའི་གནས་ལུགས་འདུས་མ་བྱས་པའི་ཆོས་ཉིད་ཀྱི་ངང་ལ་འཇོག་པ་ནི་རྫོགས་རིམ་གྱི་སྲོག །བྱིང་རྒོད་དང་དམན་པའི་སེམས་སོགས་གཉིས་ཀའི་འཕྲང་རྣམས་ལས་གྲོལ་བ་ནི། ཀུན་ཏུ་བཟང་པོའི་སྤྱོད་པ་ཞེས་བཞེད་དོ། །ཞེས་པ་འདི་དག་གི་དོན་ངེས་པར་བྱས་ནས། ལྟ་སྒོམ་སྤྱོད་གསུམ་ཟུང་དུ་ཆུད་པར་བྱའོ། །དེ་ལྟར་ལྟ་བས་གཏན་ལ་ཕབ་པའི་དོན་རྫོགས་རིམ་གྱི་འབྲས་བུ་རང་དོན་ཆོས་སྐུ་དང༌། བསྐྱེད་རིམ་གྱི་འབྲས་བུ་གཞན་དོན་གཟུགས་སྐུའི་བཀོད་པ་རྩོལ་མེད་དུ་སྣང་ཞིང༌། སྤྱོད་པ་མཐའ་ཕྱིན་པས་འཁོར་བ་མ་སྟོངས་ཀྱི་བར་དུ་རྟག་ཁྱབ་ལྷུན་གྲུབ་ཆེན་པོའི་ཕྲིན་ལས་ཀྱིས་འགྲོ་དོན་མཛད་པ་སྟེ། དེ་ལྟར་དོན་གཉིས་ཕུན་སུམ་ཚོགས་པའི་ཡོན་ཏན་ཐམས་ཅད་ཚེགས་མེད་དུ་འགྲུབ་པ་ཡིན་ནོ། །དེ་ཡང་གཞི་རང་བཞིན་ལྷུན་གྲུབ་ཆེན་པོའི་དཀྱིལ་འཁོར་ལྟ་བས་གཏན་ལ་ཕབ། ལམ་བསྐྱེད་རྫོགས་ཟུང་འཇུག་གི་དོན་སྒོམ་པས་ཉམས་སུ་བླང་ཞིང༌། སྤྱོད་པས་གྲོགས་བྱས་པས་འབྲས་བུ་སྐུ་དང་ཡེ་ཤེས་ཀྱི་དཀྱིལ་འཁོར་མངོན་དུ་སྣང་བར་འགྱུར་བས་དེ་གསུམ་ཀ་རྒྱུད་ལ་ཡང་དག་པར་བརྟེན་པ་ཡིན་ནོ། ༈ འདི་ལྟར་འཇུག་པའི་སྒོ་ནི། སྐུ་གསུང་ཐུགས་ཡེ་ཤེས་རྡོ་རྗེ་བཞིའི་ངོ་བོར་མ་སྨིན་པ་སྨིན་པར་བྱེད་པའི་དབང་ཡིན་ཏེ། ཁོག་གཞུང་ལས། རྣོ་ལ་ངར་བཏགས་ནུས་པ་བཞིན། །ནུས་པ་སྐྱེས་པ་ཐོབ་པའི་ཚད། །ཅེས་སོ། །རང་ལ་གནས་པའི་ཡེ་ཤེས་སྒྲིབ་གཉིས་བག་ཆགས་དང་བཅས་པ་ལས་གྲོལ་བར་བྱེད་པའི་ཐབས་ནི། བསྐྱེད་རིམ་དང་རྫོགས་རིམ་རྣམ་པ་གཉིས་ཡིན་པས་ཡང་ཡང་བསྒོམ་དགོས་སོ། །ལམ་དེ་དང་ཚུལ་མཐུན་པའི་གྲོགས་སུ་སྔགས་ཀྱི་གཞུང་ནས་ཇི་སྐད་བཤད་པའི་དམ་ཚིག་གི་རིམ་པ་ཡང་དག་པར་བསྲུང་བའི་སྤྱོད་པ་དང་གསུམ་པོ་ཚང་ན། གསང་སྔགས་ཀྱི་ལམ་ཕར་ཕྱིན་གྱི་ཐེག་པ་ལས་ཁྱད་པར་དུ་འཕགས་པ་མཆོག་མ་ནོར་བ་ཡིན་པས་རྣལ་མར་ངེས་པ་ཡིན་གྱི། དེ་ལས་གཞན་མ་སྨིན་བཞིན་བསྐྱེད་རྫོགས་ཕྲིན་ལས་སོགས་གང་ལའང་ལྟར་སྣང་ཙམ་ལས་དོན་མེད་དོ། །གསང་སྔགས་ལམ་གྱི་འཇུག་སྒོ་དང་པོ་དབང་བསྐུར་ཐོབ་དགོས་པ་ཅིའི་ཕྱིར་ཞེ་ན། དབང་མ་ཐོབ་བཞིན་སྔགས་ལམ་ལ་ཅི་ལྟར་བརྩོན་ཀྱང་དངོས་གྲུབ་ཐོབ་པ་མེད་དེ། དཔེར་ན་བྱེ་མ་བཙིར་བའི་བྱ་བར་ཇི་ལྟར་འབད་ཀྱང༌། དེ་ལས་ཞུན་མར་འབྱུང་བ་མེད་པས་འདོད་པའི་དོན་མི་ཐོབ་པ་བཞིན་ཏེ། རྣམ་སྣང་མངོན་བྱང་ལས། དབང་མེད་པ་ལ་དངོས་གྲུབ་མེད། །བྱེ་མ་བཙིར་ལས་མར་མི་འབྱུང༌། །མཁའ་ལ་ཁུ་ཚུར་བརྡེག་པ་དང༌། །སྨིག་སྒྱུའི་ཆུ་ནི་འཐུང་དང་མཚུངས། །ཞེས་སོ། །དངོས་གྲུབ་མེད་པ་མ་ཟད་གསང་སྔགས་ཀྱི་ཆོས་ལ་དབང་ཟོས་པ་དང༌། གསང་སྔགས་ཀྱི་རྒྱུད་དང་གདམས་ངག་གཞན་ལ་འཆད་པ་དང༌། རང་གིས་ཉན་པ་དང༌། བསྐྱེད་རྫོགས་ཀྱི་ལམ་བསྒོམ་པ་དང༌། བླང་དོར་མེད་པའི་སྤྱོད་པ་ལ་བརྩོན་ཀྱང་གསང་སྒྲོགས་ཀྱི་ཉེས་པས། ཕྱི་མ་དམྱལ་བའི་གནས་སུ་ངེས་པར་འགྲོ་སྟེ། དུས་འཁོར་ལས། དབང་བསྐུར་མེད་པར་རྒྱུད་འཆད་དང༌། །ཟབ་མོའི་དེ་ཉིད་སྒོམ་བྱེད་པས། །དེ་དོན་ལེགས་པར་ཤེས་ནའང༌། །དམྱལ་བར་འགྱུར་གྱི་གྲོལ་བ་མེད། །ཅེས་སོགས་གསང་སྙིང་ལས་ཀྱང་རྒྱ་ཆེར་གསུངས་སོ། །དབང་ཐོབ་པའི་ཕན་ཡོན་ནི། དབང་གི་སྔོན་རྡོ་རྗེའི་རྣལ་འབྱོར་དུ་སེམས་བསྐྱེད་པ་དང་ལྡན་པའི་སྐྱེས་བུ་དེ་དཔེར་ན་རྒྱལ་བུ་རྒྱལ་སྲིད་ལ་མངའ་གསོལ་བ་བཞིན། ཐེག་ཆེན་རྒྱལ་སྲས་དེ་ལ་རྒྱལ་བ་རྣམས་ཀྱིས་ཉེ་བའི་སྲས་སུ་དགོངས་པར་འགྱུར་ཏེ། གསང་སྙིང་ལས། དུས་འདི་ཕྱིན་ཆད་རྒྱལ་བའི་སྲས། །ངན་སོང་ཐམས་ཅད་མེད་པ་དང༌། །ཚེ་རིང་བདེ་བ་ཕུན་སུམ་ཚོགས། །མཐོ་རིས་ཐར་པའི་བདག་པོར་འགྱུར། །ཞེས་སོ། །དེར་མ་ཟད་དཀྱིལ་འཁོར་མཐོང་བ་ཙམ་གྱིས་ཀྱང་མཚམས་མེད་ལྔ་སོགས་སྡིག་པ་ཐམས་ཅད་ལས་རྣམ་པར་གྲོལ་ཏེ། གདན་བཞིའི་རྒྱུད་ལས། མཚམས་མེད་ལྔ་ཡི་ལས་ཅན་ཡང༌། །ཚོན་རྩི་མཐོང་བས་གྲོལ་བར་འགྱུར། །ཞེས་སོ། །དབང་བསྐུར་ཐོབ་ནས་དམ་ཚིག་རྣམ་དག་བསྲུང་ན། གང་དུ་སྐྱེས་ཀྱང་སྡིག་པ་དང༌། ཕྱིན་ཅི་ལོག་གིས་མ་བསླད་པར་གཙང་མའི་རིགས་སུ་སྐྱེས་ནས་གསང་སྔགས་ཀྱི་ཆོས་དང་འཕྲད་པ་དང༌། ཡོན་ཏན་གྱིས་སྐྱེ་བ་བདུན་ཕན་མི་འགྱང་བར་སྐྱེ་བ་དེ་དག་གི་ཚེ་ན་ལམ་གྱི་མཐུས་མ་བསྒྲུབས་བཞིན་བསྐྱེད་རྫོགས་ཀྱི་ཡོན་ཏན་ངེས་པར་འགྲུབ་ཅིང་འཕགས་པའི་ས་བཅུ་པོ་བགྲོད་ནས་སངས་རྒྱས་ཀྱི་ས་འཐོབ་པར་བཤད་དེ། གསང་མཛོད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡི་སྐྱེ་བ་བདུན་ན་ནི། །མ་བསྒྲུབས་པར་ཡང་འགྲུབ་པར་འགྱུར། །ཞེས་དང༌། གསང་འདུས་ལས། དབང་བསྐུར་བས་ནི་ས་བཅུ་ནོན། །ཞེས་སོ། །དེ་ཡང་གསང་སྔགས་ཀྱི་དངོས་གྲུབ་རྩ་བ་ནི་བླ་མ་ལ་རག་ལས་པས། དེ་ཡིས་དབང་བསྐུར་ཏེ་སྐུ་བཞིའི་ས་བོན་རྒྱུད་ལ་འཇོག་ནུས་དགོས་ན། སློབ་དཔོན་ངན་པ་བསྐྱེད་རྫོགས་རིམ་པ་གཉིས་ཀྱི་དོན་མ་ཆུད་ཅིང༌། ཉམས་ལེན་གྱི་གདེང་དང་བྲལ་བས་རིགས་རུས་ཆོ་འབྲང་སོགས་ཀྱིས་བརྒྱགས་ནས། རང་གི་འདུག་སའི་གནས་ཏེ་བསྟི་གནས་དགོན་སྡེ་བླ་བྲང་སོགས་ཀྱི་མགོ་འཛིན་གྱིས་གཡེངས་ཤིང༌། གཙུག་ལག་ཁང་དང་དགེ་འདུན་གྱི་དཀོར་རྫས་ལ་བྱུང་རྒྱལ་དུ་སྤྱོད་པ། སྡོམ་པ་གསུམ་གྱིས་སྒོ་གསུམ་མ་བསྡམས་ཤིང༌། ཚུལ་འཆལ་ལས་འབྲས་ཁྱད་དུ་གསོད་པའི་ཞེན་སྲེད་ཅན། སྦྱིན་བདག་སོགས་ཀྱི་ཁྱིམ་ལ་ཆགས་ཤིང་གསོན་གཤིན་གྱི་ལོངས་སྤྱོད་སྡུད་པ་དང༌། གདུག་རྩུབ་ཆེ་ཞིང་སྙིང་རྗེ་ཆུང་བ་དང༌། རྒྱུད་དང་སྡེ་སྣོད་རྣམས་ལ་ཤེས་རབ་ཀྱི་མིག་ཟུམ་པས་ལྟར་སྣང་རྟོག་གེ་ཟོལ་མས་ཟིལ་གྱིས་ནོན་ནས། གང་ལའང་ཕོད་པ་ཆེ་བ་དེས་ནི་དབང་བསྐུར་བར་བྱས་ཀྱང༌། དཔེར་ན་བེའུ་སྦྲེལ་གཡང་སར་ལྷུང་བ་ལྟར་གཉིས་ཀ་ངན་སོང་དུ་ལྟུང་བར་འགྱུར་ཏེ། ཡེ་ཤེས་འཁོར་ལོའི་རྒྱུད་ལས། དད་ལྡན་གཅིག་བསླུས་སེམས་ཅན་བརྒྱ་བསད་བས། །སྡིག་པ་ཤིན་ཏུ་ཆེ་བ་རྒྱལ་བས་གསུངས། །དེ་ཕྱིར་རང་འདོད་བསླུ་བའི་ཆོས་མི་བཤད། །ཅེས་སོ། །བསྟེན་བྱའི་སློབ་དཔོན་ནི། ཕྱི་ཡི་དེ་ཉིད་བཅུ་ནི། །རྡོ་རྗེ་སྙིང་པོ་རྒྱན་གྱི་རྒྱུད་ལས། །དཀྱིལ་འཁོར་ཕྱི་རྒྱུད་སྡེ་ཀུན་གྱི་ཏིང་འཛིན་བསྐྱེད་རྫོགས་ཕྱག་རྒྱ་ལག་གིདང༌། །རྐང་པའི་སྟང་སྟབས་ལས་བཞིའི་འདུག་སྟངས་སྙིང་པོ་བཟླས་བརྗོད་དང༌། །ལས་བཞི་སྦྱིན་སྲེག་མཆོད་པ་ཕྱི་ནང་གསང་ལས་སྦྱོར་མཆོག་ཐུན་གྱི་དང༌། །སླར་སྡུད་པ་ཡི་རྣམ་པ་བསྐྱེད་རྫོགས་མཉམ་བཞག་ནི། །ཕྱི་ཡི་དེ་ཉིད་བཅུ་ཡིན་ནོ། །ཞེས་སོ། །ནང་གི་དེ་ཉིད་བཅུ་ནི། དཀྱིལ་འཁོར་འབྲི་བ་སོགས་ནང་རྒྱུད་ལ་བསྟུན་པའོ། །གསང་བའི་དེ་ཉིད་རྣམ་པ་བཅུ་ནི། རྒྱུད་དེ་ཉིད་ལས། ཏིང་ངེ་འཛིན་དང་ ཕྱིར་ཟློག་རྫས་ཀྱི་སྲུང་འཁོར་གཉིས་ཀྱི་ཆོ་ག་དང༌། །གསང་དང་ཤེས་རབ་ཡེ་ཤེས་དབང་བསྐུར་གཉིས་དང༌། །ཁ་སྦྱོར་འབྱེད་པའི་ཆོ་ག་སྒྲོལ་བ་དང༌། །གཏོར་མ་སྦྱངས་རྟོགས་སྦར་གསུམ་རྡོ་རྗེའི་བཟླས་པ་དང༌། །དྲག་ཤུལ་མ་གྲུབ་པ་བཙན་ཐབས་སྤོགས་པའི་རྩུབ་མོའི་ཆོ་ག་དང༌། །རབ་ཏུ་གནས་དང་དཀྱིལ་ཆོག་སྒྲུབ། །གསང་བའི་དེ་ཉིད་བཅུ་ཡིན་ནོ། །ཞེས་སོ། །དེ་ལྟར་ཚུལ་དེ་རྣམས་ཇི་ལྟ་བ་བཞིན་རིག་ཅིང༌། གཟུགས་བརྙན་ཙམ་ཤེས་པས་མི་ཆོག་སྟེ། གསང་སྔགས་ལྟ་སྒོམ་གྱིས་རང་ཉིད་ཀྱི་རྒྱུད་གྲོལ་བའི་བླ་མ་ཞིག་བསྟེན་པ་གཅེས་ཏེ། སཾཱབྷུ་ཊི་ལས། སློབ་དཔོན་སྨིན་པའི་ལས་ཀྱིས་ནི། །སློབ་མ་ཡོངས་སུ་སྨིན་པར་བྱ། །ཞེས་སོ། །དེ་ལྟ་བུའི་བླ་མ་དེ་ཡིས། སློབ་མ་སྔར་བསྟན་བཞིན་དད་གུས་དང་ལྡན་ཅིང་ཁྲེལ་དང་ངོ་ཚ་ཤེས་པའི་སྣོད་ཀྱི་ཡོན་ཏན་སློབ་མའི་རྒྱུད་ལ་ལྡན་ནམ་མི་ལྡན་བརྟགས་ཤིང་ལོ་བཅུ་གཉིས་སོགས་ལ་བརྟགས་པར་གསུངས་དཔྱད་ལ། སྣོད་དང་ལྡན་ན་བུམ་དབང་ནས་བཟུང་དབང་བཞི་པོ་བསྐུར་ཏེ་རིམ་པ་བཞིན་མ་ནོར་བས་སྦྱིན་པར་བྱའོ། །དེ་སྐད་དུ་གསང་སྙིང་ལས། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང༌། །རིམ་པ་བཞིན་དུ་སྦྱིན་པར་བྱ། །སྙིང་རྗེས་ཆུད་མ་ཟོས་པར་ཟུངས། །ཞེས་སོ། །ཐོག་མར་སློབ་དཔོན་རང་གི་རྒྱུད་དག་པར་བྱེད་པ་བསྙེན་པ་བྱ་བ་དང་ནི། བདག་པོའི་གཞི་ལ་དབང་མི་ཟ་ཞིང་ས་དང་སར་འཛིན་གྱི་རྟོགས་པ་དབྱིངས་སུ་མཉམ་པར་བྱ་བའི་ས་ཡི་ཆོ་ག་དང༌། དཀྱིལ་འཁོར་དང་སློབ་མའི་ལས་ལ་ཐོད་རྒལ་དུ་མི་འཇུག་པ་སྟ་གོན་གྱི་རིམ་པ་དང་ནི། སློབ་མའི་རྒྱུད་རིམ་གྱིས་དག་ཅིང་སྨིན་པར་བྱ་བའི་ཕྱིར་དུ་དཀྱིལ་འཁོར་དུ་འཇུག་པ་སྔོན་དུ་བྱེད་ཅིང༌། ཞུགས་པ་དེ་ལ་སྨིན་པར་བྱེད་པའི་དབང་དངོས་བསྐུར་དགོས་ཏེ། ཆོ་གའི་མངོན་རྟོགས་བཞི་པོ་དེ་རེ་རེ་ཉིད་ལའང༌། ཡན་ལག་བཞི་བཞིར་ཡོངས་སུ་ཚང་ཞིང་རྫོགས་དགོས་པའི་ཕྱིར། གསང་སྙིང་ལས། བསྙེན་པ་དང་ནི་ཉེ་བསྙེན་དང༌། །སྒྲུབ་པ་དང་ནི་སྒྲུབ་ཆེན་པོ། །ཞེས་བསྙེན་པའི་ཡན་ལག་བཞི་དང༌། ས་གཞི་མཉམ་པ་དང༌། ས་བསླང་བ་དང༌། དབང་དུ་བྱ་བ། སྦྱང་བ་སྟེ་ས་ཆོག་ཡན་ལག་བཞི་དང༌། ས་ལྷ། དཀྱིལ་འཁོར་པའི་ལྷ། བུམ་པ། སློབ་མ་སྟ་གོན་ཡན་ལག་བཞི་དང༌། རང་ཉིད་འཇུག་པ་དང༌། སློབ་མ་འཇུག་པར་གནང་བ་ནོད་པ། དཀྱིལ་འཁོར་དུ་གཞུག་པ། ཞུགས་པ་ལ་དབང་བསྐུར་བ་སྟེ་འཇུག་ཅིང་སྨིན་པའི་ཡན་ལག་བཞི་སྟེ། ཆོ་གའི་ཡན་ལག་བཅུ་དྲུག་པོ་ལས་གང་རུང་མ་ཚང་ན། སོ་སོ་སྐྱེ་བོའི་སློབ་དཔོན་ལ་ནི། ཆོ་གའི་ཡན་ལག་ཕྲ་མོ་ཉམས་པས། བྱིན་རླབས་དངོས་གྲུབ་ལ་སྒྲིབ་པར་འགྱུར་བས་སློབ་མའི་རྒྱུད་སྨིན་པར་བྱེད་ནུས་པ་མ་ཡིན་ནོ། །རྒྱུད་སྡེ་བཞི་པོ་སོ་སོར་འཇུག་སྒོ་དབང་གི་རིགས་དབྱེ་མང་དུ་མཆིས་ལ། བསྡུ་ན་བྱ་བའི་རྒྱུད་ལ་འཇིག་རྟེན་འདས་པའི་རིགས་གསུམ་གང་རུང་གི་དཀྱིལ་འཁོར་དུ་གཟུངས་བཅས་བུམ་པའི་ཆུ་ཡི་དབང་དང༌། རིགས་གང་ཡིན་གྱི་དམ་ཚིག་གི་ཕྱག་རྒྱ་ཅོད་པན་གྱི་དབང་སྟེ་གཉིས་ཀྱི་དངོས་གཞི་དང༌། མཐའ་རྟེན་བཟླས་ལུང༌། བྱབ་བཀྲུ་བསྲུང་གསུམ་རྫས་ཀྱང་སྦྱིན་པ་རྣམས་སོ། །སྤྱོད་པའི་རྒྱུད་ལ་སྔ་མ་གཉིས་པོ་དེ་ཡི་སྟེང་རྡོ་རྗེ་མིང་སྟེ། མི་བསྐྱོད་པའམ་རྣམ་སྣང་གི་དབང་བསྣན་པར་གསུངས་ལ། ཡང་རྡོ་རྗེ། དྲིལ་བུ། མིང་དབང་རྣམས་དང༌། མེ་ལོང༌། ཐུར་མ། ཆོས་འཆད་ཀྱི་རྗེས་གནང་སོགས་བསྐུར་བ་མང་ཉུང་སློབ་དཔོན་སོ་སོའི་གཞུང་ལྟར་རོ། །རྣལ་འབྱོར་རྒྱུད་དུ་སློབ་མའི་དབང་ལ། བུམ་པ། ཆུ། ཅོད་པན། རྡོ་རྗེ། དེ་རྣམས་ཀྱིས་མཚན་པའི་དྲིལ་བུ་མིང་སྟེ་རིག་པའི་དབང་ལྔ་དང༌། དེ་ནས་སློབ་དཔོན་གྱི་དབང༌། ཕྱིར་མི་ལྡོག་པའི་དམ་ཚིག་གསུམ་བཟུང་བ། གསང་དཀྱིལ་དུ་གསང་བའི་འཇུག་པས་ཞུགས་ཤིང་མཐོང་བ་ལྷ་དང༌། དཀྱིལ་འཁོར་གྱི་དེ་ཉིད་སྟོན་པ་བཀའ་ཡི་དབང་ཞེས་ཡོ་ག་རང་གི་ཐུན་མིན་གྱི་ཆོས་འཆད་རྗེས་གནང་དང༌། ལུང་བསྟན་དབུགས་དབྱུང་གཟེངས་བསྟོད་དེ་སློབ་དཔོན་གྱི་དབང་དྲུག་དང་བཅས་བཅུ་གཅིག་པོ་མཐའ་རྟེན་དང་བཅས་རྫོགས་པར་བསྐུར་རོ། །རྣལ་འབྱོར་བླ་མེད་ལ། རིག་པའི་དབང་ལྔ་དང༌། དྲུག་པ་རྡོ་རྗེ་འཆང་གི་དབང་སྟེ་དྲུག་གི་སྟེང་རྡོ་རྗེ་སློབ་དཔོན་གྱི་དབང་དང་བཅས་པས་བུམ་དབང་དང༌། གསང་དབང་དང༌། ཤེས་རབ་ཡེ་ཤེས་ཀྱི་དབང༌། ཚིག་དབང་རིན་པོ་ཆེ་སྟེ་བཞི་པོ་ནང་གསེས་ཀྱི་དབྱེ་བས་བཅུ་བཞི་ནི། བཤད་རྒྱུད་རྡོར་ཕྲེང་ལས། དང་པོའི་དབང་ནི་གཙོ་བོ་སྟེ། །གཉིས་པ་གསང་བའི་མིང་ཅན་ནོ། །གསུམ་པ་ཀུན་ནས་སྦྱོར་བ་སྟེ། །བཞི་པ་དོན་ནི་དམ་པའོ། །གཙོ་བོའི་དབྱེ་བ་བཅུ་གཅིག་སྟེ། །བཅུ་གཉིས་པ་ནི་གསང་བའོ། །བཅུ་གསུམ་པ་ནི་ཡང་དག་སྦྱོར། །བཅུ་བཞི་པ་ནི་དོན་དམ་སྟེ། །དབང་བསྐུར་རེ་རེ་ས་རོལ། །རྣམ་པ་གསུམ་ནི་རྒྱུ་ཡི་དབང༌། །བཞི་པ་འབྲས་བུར་ཤེས་པར་བྱ། །ཞེས་སོ། །ཡེ་ཤེས་ཐིག་ལེ་ལས་ཀྱང༌། །རྣལ་འབྱོར་བླ་མ་ཡི་ནི་མཚན། །གསང་བ་ཡི་ནི་དབང་རྒྱལ་བཤད། །ཤེས་རབ་ཡེ་ཤེས་བླ་ན་མེད། །བཞི་པ་ཡང་ནི་དེ་བཞིན་ནོ། །ཞེས་སོ། །སྤྱིར་རྒྱུད་སྡེ་དང་སྒྲུབ་སྡེ་སོ་སོའི་དབང་གི་གྲངས་ནི་མ་ངེས་པ་སྣ་ཚོགས་ཏེ། དུས་འཁོར་ལས། བྱིས་པ་འཇུག་པའི་དབང་བདུན་དང༌། གོང་མ་ལ་འཇིག་རྟེན་པ་གསུམ་དང༌། འཇིག་རྟེན་ལས་འདས་པའི་བཞི་པ་སྟེ་བཅུ་གཅིག་ཏུ་གསུངས་པ་སོགས་རྩ་རྒྱུད་ལས། ཆུ་དང་ཅོད་པན་དག་དང་ནི། །རྡོ་རྗེ་དྲིལ་བུ་བརྟུལ་ཞུགས་དང༌། །མིང་རྒྱལ་དབང་གི་རྣམ་པ་བདུན། །བྱིས་པ་རྣམས་ནི་གཟུང་ཕྱིར་དང༌། །གསུམ་པ་འཇིག་རྟེན་ཀུན་རྫོབ་དང༌། །བཞི་པ་དོན་གྱི་དམ་པའོ། །བུམ་པ་གསང་བའི་དབང་དང་ནི། །ཤེས་རབ་ཡེ་ཤེས་ཞེས་བྱ་དང༌། །དེ་ནས་ཤེས་རབ་ཆེན་པོ་ཡི་དོན་གྱི་དབང༌། །ཡེ་ཤེས་ཞེས་བྱ་རྫོགས་པ་དང༌། །བྱིས་པ་འཇིག་རྟེན་པ་འགྱུར་དང་འཇིག་རྟེན་འདས་པ་མི་འགྱུར་བར་ཆད་ཅན། །བར་ཆད་མེད་པ་དེ་ལས་གཞན། །ཞེས་བཅུ་བདུན་དང༌། སྔ་འགྱུར་ཐུན་མིན་ལུགས་ལ་རྒྱུད་ལུང་མན་ངག་སྒྲུབ་སྡེ་བཞི་ལས། སྒྱུ་འཕྲུལ་དྲྭ་བ་ལྟར་ན། ཕྱི་ཕན་པའི་དབང་བཅུ་ནི། སྙིང་པོ་ལྔ་དང་དབུ་རྒྱན་དང༌། བུམ་པ་ཅོད་པན་ཕྲེང་བ་སྟེ། །གོ་ཆ་རྒྱལ་མཚན་གདུགས་ཕྱག་རྒྱ། །བཟའ་བཏུང་དབང་རྣམས་རིམ་བཞིན་བསྐུར། །ཞེས་པ་རྣམས་སོ། ནང་དོན་གཉིས་ནུས་པ་ལ་དབང་བས་ནུས་པའི་དབང་ལྔ། རང་དོན་ནུས་པའི་བརྩོན་འགྲུས་ཅན་ལ་ཉན་དབང་དང་སྒོམ་དབང་གཉིས། གཞན་དོན་ནུས་པའི་བརྩོན་འགྲུས་ཅན་ལ་འཆད་དབང་དང་ཕྲིན་ལས་དབང་གཉིས། གཉིས་ཀའི་དོན་ནུས་པ་ལ་རྡོ་རྗེ་རྒྱལ་པོར་མངའ་གསོལ་བ་བཀའ་རབ་འབྱམས་ཀྱི་དབང་སྟེ་ལྔའོ། །གསང་བ་ཟབ་མོའི་དབང་གསུམ་རྫོགས་རིམ་མཐར་ཐུག་ཡིན་པས་གསང་ཤེར་བདེ་བ་ཆེན་པོའི་དབང་སྟེ་གསུམ་མོ་སྟེ་དབང་མཆོག་བཅོ་བརྒྱད་དང༌། ལུང་ཨ་ནུ་ཡོ་ག་ལ། ཀུན་འདུས་རིག་པའི་མདོར། ཕྱི་དངོས་བསྟན་གྱི་དབང་རྒྱུད་ཀྱི་ཆུ་བོ་བཅུ། བཀའ་རྟགས་རིགས་ལྔའི་སྐུ། རྟགས་ཀྱི་མཚན་མ་རྡོ་རྗེ་སོགས། རིག་ཙཀ་གམ་དྲིལ་བུ། བུམ་པ། རྫས་བརྒྱད། སྣ་བདུན། རིན་ཆེན་པདྨ་སེང་ཁྲི་སོགས། ཅོད་པན་སོགས་རྒྱན་བརྒྱད། མིང་དབང༌། འཁོར་ལོའོ། ནང་དབང་མ་དག་པའི་འབྱུང་ལྔའི་སྙིགས་མ་ལུས་ལྷར་སྨིན་པ་འབྱུང་བའི་ཆུ་བོ་བཅུ་གཅིག །ཉན་པ་དང་སློབ་མའི་དབང་རྫས་གླེགས་བམ། ཕྲིན་དབང་སྣ་ཚོགས་རྡོ་རྗེ། འཆད་པའི་དབང་འཁོར་ལོ། །རྡོ་རྗེ་རྒྱལ་པོའི་དབང་རྡོ་རྗེ་རྩེ་དགུ། གདན་ཁྲི། ཐུན་མིན་གྱི་རིན་ཆེན་སྣ་བདུན། ཕྱག་རྒྱའི་དབང་ལྷ་ཙཀ་ཡོངས་རྫོགས། ཐོད་རྒྱན། སྐུ་གསུང་ཐུགས་ཀྱི་ལྷ་ཙཀ །བདུད་འདུལ་རྫས་རྟགས་བརྒྱད། །མིང་དབང་ངོ༌། སྒྲུབ་དབང་དུ་ཨ་ནུ་རང་ལུགས་ལ་གྲགས་པ་གྲགས་པའི་ཆུ་བོ་བཅུ་གསུམ་ཤེས་རབ་རིག་པའི་དབང་སྒྲོན་མེ། སྙིང་རྗེ་རྟགས་ཀྱི་དབང་ཉི་ཟླ། ཧཱུྃ་ལས་བྱུང་བའི་ཐོང་གཤོལ། དུག་གསུམ་དཀྲུགས་པའི་མདུང་དམར། སྲིད་གསུམ་སྒྲོལ་བའི་མཚོན་ཆ། སྐྱོན་གྱིས་མ་གོས་པདྨ། ལས་བཞི་རྫོགས་པའི་བམ་དབྱུག །གཉིས་མེད་འཁྲིལ་བའི་སྦྲུལ་ཆུན། །གསང་བ་སྦྱོར་བའི་རིག་མ། འདོད་ཡོན་ལ་ལོངས་སྤྱོད་པའི་འདོད་ཡོན། སྒྲུབ་དབང་ཞི་ཁྲོའི་གཙོ་ཙཀ །སྒྲུབ་རྫས་ཕྱི་ནང་གསང་གསུམ། རྟགས་ཀྱི་མིང་དབང་ངོ༌། །མཆན། གསང་དབང་རྫོགས་པའི་ཆུ་བོ་གཉིས་ནི། བདུད་རྩིའམ་གསང་བའི་དཀྱིལ་འཁོར་མཚོན་བྱེད་ཆོས་འབྱུང༌། རིག་པའི་རྩ་ལ་དབང་ངོ༌། །མཆན། སུམ་ཅུ་རྩ་དྲུག་གི་དབྱེ་བ་སོགས་དང༌། དྲང་ངེས་དང་ས་ཟིན་འཇོག་མཚམས་ནི་ཡོན་གཞུང་ལྟར་རོ། །ཐེག་པའི་རྩེ་མོ་མན་ངག་ཨ་ཏི་ཡོ་གའི་དབང་གི་རིམ་པ་མན་ངག་སྡེ་ལྟར་ན། དབང་བཞི་བྱེ་བྲག་ཏུ་དབྱེ་བ་བྱས་པ། སྤྲོས་བཅས་བུམ་དབང་དང༌། སྤྲོས་མེད་གསང་བའི་དབང་དང༌། ཤིན་ཏུ་སྤྲོས་མེད་ཤེས་རབ་ཡེ་ཤེས་ཀྱི་དབང་དང༌། རབ་ཏུ་སྤྲོས་མེད་ཚིག་དབང་ངོ༌། །ཟབ་ཁྱད་སྒྲུབ་དབང་སོགས་སྤྱིར་ན་རྒྱུད་སྡེ་སོ་སོའི་དབང་གི་དབྱེ་བསྡུ་མཐའ་ཡས་པ་ཞིག་ཡོད་ཀྱང༌། དེ་དག་གི་ཚུལ་ཇོ་བོའི་དམ་ཚིག་བསྡུས་པ་ལས། བླ་མའི་ཞལ་ལས་བྱུང་བའི་དབང་དང༌། ཡི་དམ་གྱི་ལྷས་བྱིན་གྱིས་བརླབས་པའི་དབང་དང༌། རྡོ་རྗེ་མཁའ་འགྲོ་མས་ལུང་བསྟན་པའི་དབང་དང༌། རང་གི་སེམས་ཉིད་ཀྱི་རྩལ་ལས་ཐོབ་པའི་དབང་དང་བཞིའོ། །ཞེས་པ་ལྟར། དང་པོ་ནི། དབང་གི་ཆོ་གའི་སྒྲ་ལ་ཇི་ལྟ་བ་བཞིན་དེ་ལ་ལྟོས་པ་དག་དང༌། གཉིས་པ་ནི་རྒྱལ་པོ་ཛའི་ཁང་སྟེང་གླེགས་བམ་བབས་པ་སོགས་ལྷར་དང༌། གསུམ་པ་ནི་སློབ་དཔོན་ཀླུ་སྒྲུབ་དང༌། འགྲོ་བཟང་གིས་ཨོ་རྒྱན་དྷ་རྨཱ་གཉྫོ་ཆོས་ཀྱི་གཙུག་ལག་ཁང་ནས་བརྟག་གཉིས་དང༌། མ་ཧཱ་མ་ཡཱ་གཉིས་མ་བྱིན་པར་བླང་བས་བདག་གིར་བྱས་པ་ན། མཁའ་འགྲོ་མས་བསྙགས་ཏེ་རྗེས་ཟིན་པའི་ཚེ། ཆོས་དེའི་བདག་པོ་གྱིས་ལ་ཤོད་ཅེས་རྗེས་སུ་གདམས་པ་ལྟ་བུ་དང༌། བཞི་པ་ནི་ཆོས་ཉིད་ལྟ་བས་ཐོབ་པ་རིག་པའི་རྩལ་དབང་སྟེ། དེ་ལ་བརྟེན་ནས་བསྐུར་བྱའི་སློབ་མས་དངོས་གྲུབ་ཐོབ་པ་ནི་དབང་གི་འབྲས་བུ་ཡིན་པས། ཐ་སྙད་ཕྱོགས་གཅིག་པ་ལ་ཞེན་ནས། དབང་གི་གྲངས་དང༌། བསྐུར་ཚུལ་དང༌། ཐོབ་ཚུལ་ཐ་དད་པ་དག་ལ་མི་འཐད་པར་མི་སེམས་པར་ཀུན་ལ་དག་སྣང་བྱེད་པ་གལ་ཆེའོ། །དེས་ན་བླ་མེད་ཀྱི་དབང་གིས་རྣམ་གྲངས་ཇི་སྙེད་ཅིག་ཡོད་པ་ཐམས་ཅད་གང་ལས་དབྱེ་བ་དང༌། གང་དུ་བསྡུ་བའི་གཞིར་གྱུར་པའི་གྲངས་ངེས་པའི་ས་ཟིན་འཇོག་མཚམས་བུམ་གསང་ཤེར་དང་ཚིག་དབང་སྟེ་རྣམ་པ་བཞི་པོ་ཡིན་ནོ། །དེ་ལ་གསང་སྔགས་ཀྱི་ཐེག་པ་བླ་ན་མེད་པའི་དབང་དུ་ནི་གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཆེན་པོར་ཕུང་པོ་དང༌། ཁམས་དང་སྐྱེ་མཆེད་ཐམས་ཅད་ཀྱི་འཆར་གཞི་བདེ་གཤེགས་སྙིང་པོའི་རང་བཞིན་གཉུག་མའི་སྒོ་གསུམ་ཡེ་ཤེས་དང༌། བུམ་དབང་སོགས་དབང་གི་ངོ་བོར་ཡེ་ནས་གནས་པས་གཞིའི་དབང་དང༌། དེ་ཉིད་དབང་བཞི་བསྐུར་བའི་ཐབས་ལ་བརྟེན་ནས་སྨིན་རུང་དུ་བྱེད་པ་དང༌། ལམ་དབང་གིས་བོགས་འདོན་པར་བྱེད་པར་ནི་ལམ་གྱི་དབང་དང༌། འབྲས་བུ་སྐུ་བཞིའི་ངོ་བོར་མཐར་ཕྱིན་པ་འབྲས་བུའི་དབང་བཞི་སྟེ། དེ་དག་ཀྱང་གནས་སྐབས་གསུམ་དུ་བཞག་པ་ཙམ་ལས་རང་བཞིན་ཆོས་ཉིད་གཅིག་གི་ངོ་བོར་དབྱེར་མེད་པ་རུ་སེམས་ཅན་ཐམས་ཅད་ལ་གདོད་ནས་གྲུབ་པ་ཡིན་ཏེ། དབང་མཆོག་རྒྱལ་པོའི་རྒྱུད་ལས། དབང་མཆོག་རང་ལ་མེད་གྱུར་ན། །བསྐུར་བས་ཐོབ་པར་ག་ལ་འགྱུར། །བྲ་སྲན་འབྲས་སུ་དབང་བསྐུར་ཡང༌། །དེ་ལ་འབྲས་ཀྱི་དངོས་སྣང་མེད། །ཅེས་སོ། །སེམས་ཅན་ཐམས་ཅད་སངས་རྒྱས་སམ་ཞེ་ན། དེ་ལྟར་སེམས་ཅན་ཐམས་ཅད་བདེ་གཤེགས་སྙིང་པོའི་རང་བཞིན་ཡིན་པས་མཐར་ཐུག་འཚང་མི་རྒྱ་བ་མེད་ཅིང༌། གསང་སྔགས་ཀྱི་སྣོད་རུང་ཡིན་པར་ལུང་དང་རིག་པས་གྲུབ་མོད། །གནས་སྐབས་དབང་གི་རྟེན་དུ་རུང་བ་ནི། བུམ་དབང་གི་རྟེན་རྩ་དང༌། གསང་དབང་རྟེན་རླུང་དང༌། ཤེར་དབང་ཁམས་དཀར་དམར་ཐིག་ལེའི་ཆ་དང༌། ཚིག་དབང་ངོ་བོ་སེམས་རྟོག་རགས་པ་སྟེ། རྟེན་དེ་རྣམས་མངོན་གྱུར་དུ་ཡོད་པའི་རྟེན་ཁམས་དྲུག་དང༌། བརྟེན་པ་བདེ་གཤེགས་སྙིང་པོ་གཉིས་ཀ་རང་ཆས་སུ་ཡོད་པ་དེ་ཉིད་དེ་དེ་ལྟར་སློབ་མའི་རྒྱུད་ལ་མཚུངས་པར་ལྡན་པའི་རྒྱུད་དང་ལྡན་པ་དང༌། དེ་སྨིན་པར་འགྱུར་བའི་ལྷན་ཅིག་བྱེད་པའི་རྒྱུ་ནི། རྡོ་རྗེ་སློབ་དཔོན་གྱིས་ལྷ་སྔགས་ཏིང་ངེ་འཛིན་གྱི་བྱིན་གྱིས་བརླབས་པའི་དབང་དང༌། རིག་མ་རྣམས་ཏེ་རྒྱུ་རྣམ་པ་གཉིས་ཡིན་ལ། དེ་སྟེང་དད་པ་སོགས་སྣོད་དུ་རུང་བའི་སློབ་བུ་རྒྱུ་ཡི་རྐྱེན་ཡིན་ལ། ལྟ་བ་རྟོགས་ཤིང་བདག་གི་དེ་ཁོ་ན་ཉིད་དང༌། ལྷའི་དེ་ཁོ་ན་ཉིད་དང༌། གསང་སྔགས་ཀྱི་དེ་ཉིད་དང༌། བཟླས་བརྗོད་ཀྱི་དེ་ཉིད་དང༌། འཕྲོ་འདུའི་དེ་ཁོ་ན་ཉིད་དེ་སྔགས་ཀྱི་ཡན་ལག་ལྔའི་དགོངས་པ་དང་ལྡན་པའི་རྡོ་རྗེ་སློབ་དཔོན་ནི་བདག་པོའི་རྐྱེན་ཡིན་ཏེ། ལྟ་དགོངས་བྲལ་ན་རྡོ་ཡི་ས་བོན་བཞིན་ནོ། །མན་ངག་ཇི་བཞིན་སློབ་མའི་རྒྱུད་སྨིན་ནུས་པའི་ཆོ་ག་མཁྱེན་པ་དམིགས་པའི་རྐྱེན་ཡིན་ཏེ། དེ་མི་ལྡན་ན་བྱིས་པའི་རྩེད་མོས་དབང་མི་ཐོབ་པ་བཞིན་ནོ། །དཀྱིལ་འཁོར་དུ་ཞུགས་ནས་བུམ་དབང་བསྐུར་ཏེ་དེ་ལ་གསང་དབང་སོགས་སྔ་མ་སྔ་མའི་རྟེན་ཅིང་འབྲེལ་འབྱུང་གིས་གོ་ཕྱེས་ནས། ཕྱི་མ་ཕྱི་མ་རྣམས་རྒྱུད་ལ་ཐོབ་པ་དེ་མ་ཐག་པའི་རྐྱེན་ཡིན་ཏེ། སྔ་མ་མ་ཐོབ་ན་ཕྱི་མ་མི་འབྱུང་སྟེ་གྱང་མེད་ན་རི་མོ་མེད་པ་བཞིན་ནོ། །མཚུངས་ལྡན་དང་ལྷན་ཅིག་བྱེད་པའི་རྒྱུ་གཉིས་དང༌། རྒྱུ་དང་བདག་པོ་དམིགས་པ་དེ་མ་ཐག་སྟེ་རྐྱེན་བཞི་ཚོགས་ལས་དབང་བསྐུར་འགྲུབ་སྟེ། ཐུགས་ཐིག་ལས། རྒྱུ་གཉིས་རྐྱེན་བཞིས་ཡང་དག་རྙེད། །དྲུག་ལ་གནས་པའི་ཐོབ་བྱ་དེ། །ངོ་བོ་ཉིད་ཅེས་རྣམ་པར་བཤད། །ཅེས་སོ། །དེ་ལ་གཉེན་པོ་ཐབས་ཚུལ་དཔག་མེད་ཡོད་ཀྱང་གྲངས་ངེས་སྒོ་ནས་བསྡུས་ཏེ་བཞག་པ་ནི། སྤྱིར་རིགས་དྲུག་དང་ཁྱད་པར་མཐོ་རིས་ཀྱི་རྟེན་ཁམས་དྲུག་ལྡན་རྣམས་དང༌། བྱེ་བྲག་མིའི་འགྲོ་བ་མངལ་ནས་སྐྱེས་པ་རྣམས་ཐོག་མར་ལྟེ་བའི་རྩ་མདུད་ནས་རིམ་པར་ལུས་ཆགས་ཤིང༌། དེའི་དབང་གིས་ཕྱིའི་ལུས་སྣོད། བར་གྱི་ལུས་འགྲོ་བ་གཞན་ལུས་རྣམས་ཀྱང་སྣང་བས། ལུས་ཀྱི་དག་བྱའི་གཙོ་བོར་གྱུར་པ་རྩ་ཡིན་ཏེ། དེ་དག་བྱེད་བུམ་དབང་ཕྱི་ནང་གསང་གསུམ་བསྟན་ལ། རྩའི་རྣམ་པ་རིག་དྲུག་གི་དག་བྱ་དང༌། དག་བྱེད་སྐུ་གསུང་ཐུགས་དང་ཐབས་ཤེས་སོགས་ཡི་གེའི་གཟུགས་སུ་ཨ་སོགས་གནས་པ་དེ་ལ་གཡོ་བྱེད་ཀྱི་རླུང་བརྟེན་ནས། ད་ལྟ་འཁྲུལ་པའི་གནས་སྐབས་སུ་བྱེད་ལས་སྣ་ཚོགས་སུ་ཤར་ཞིང༌། འཁོར་བའི་སྒྲ་ཚིག་རང་རྒྱུད་པར་སྣང་བའི་ཕྱིར། ངག་གི་དག་བྱ་གཙོ་བོ་རླུང་ཡིན་པས། དེ་དག་བྱེད་གསང་དབང་བསྐུར་ནས་རང་ལུས་ཐབས་ལྡན་གྱི་རྫོགས་རིམ་བསྟན་ལ། རླུང་དེ་ཡིས་རྩ་ཁམས་ཐམས་ཅད་ལ་བཀོད་པ་བྱང་ཆུབ་ཀྱི་སེམས་ཁམས་དཀར་དམར་དྭངས་མ་ཆེན་པོ་རྣམས་འགྲོ་འོང་ཅན་དུ་ཁྲིད་ཅིང་གནས་པའི་སྒོ་ནས་བརྟེན་པ་དེའི་སེམས་ཀྱི་རྟེན་བྱེད་པས། སེམས་དག་པ་ལ་རྩ་ཁམས་གནད་དུ་བསྣུན་དགོས། དེ་དག་བྱེད་ཤེར་དབང་བསྐུར་ནས་རྟེན་ལས་སུ་རུང་བར་བྱེད་པ་གཞན་ལུས་ཐབས་ལྡན་གྱི་རྫོགས་རིམ་བསྟན་པ་དང༌། ཁམས་དེ་ལ་སེམས་ཀྱི་རང་བཞིན་ཆོས་ཉིད་དོན་དམ་བྱང་ཆུབ་ཀྱི་སེམས་སམ་དྲི་བཅས་ཡེ་ཤེས་ཀྱི་ཁམས་བརྟེན་པའི་ཚུལ་དུ་ཡོད་པས། དེ་མངོན་དུ་འགྱུར་བ་ལ། སེམས་ཀྱི་བག་ཆགས་སྒྲིབ་བྱེད་ཀྱི་རྣམ་པར་ཡོད་པ་ཉིད་དག་དགོས་པས། དེ་དག་བྱེད་ཚིག་དབང་རིན་པོ་ཆེ་བསྐུར་ནས་ཟུང་འཇུག་གི་རྫོགས་རིམ་འོད་གསལ་བའི་ཡེ་ཤེས་བསྒོམ་པར་བསྟན་པས་དབང་བཞི་ལམ་དང་བཅས་པའི་ཉམས་ལེན་དེར་འདུ་བ་ཡིན་ནོ། །གསང་སྔགས་ནི་ཉོན་མོངས་དང་འདོད་ཡོན་ལམ་བྱེད་ཐབས་མཁས་ཡིན་པས་འདོད་པའི་ཁམས་ཀྱི་གང་ཟག་འཕགས་པའི་སྤྲུལ་སྐུ་ལྟ་བུ་མ་ཡིན་པའི་རང་རྒྱུད་པ་ཀུན་ལ་བལྟས་དགོད་ལག་བཅངས་གཉིས་སྦྱོར་ཏེ། འདོད་ཆགས་རྣམ་བཞིར་གནས་པ་སོགས་དག་བྱ། དག་བྱེད་བུམ་པ་སོགས་དབང་བཞི་ལམ་དང་བཅས་པ་ལ་བརྟེན་ནས་གྲངས་ངེས་པ་ཅན་དུ་ཡང་འཇོག་པ་ཡིན་ནོ། །དང་པོ་འདི་ལ་ངག་གི་གཉེན་པོར་ཆེ་བ་ཕོ་མོ་ཕན་ཚུན་བལྟས་པས་ཚིམ་པའི་འདོད་ཆགས་ནི། གཞན་འཕྲུལ་དབང་བྱེད་པ་ལ་གནས་པ་སྟེ། དཀྱིལ་འཁོར་གང་ལ་བརྟེན་ན་རྡུལ་ཚོན་གྱི་དཀྱིལ་འཁོར་ལ་བརྟེན་ནས་དབང་བསྐུར་བ་བུམ་པའི་དབང་སྟེ། ལྷ་དང་གཞལ་ཡས་ཁང་དང་སློབ་དཔོན་གྱི་དེ་ཁོ་ན་ཉིད་བསྟན་པ་སོགས་བུམ་པའི་དབང་དངོས་གཞི་ཡན་ལག་དང་བཅས་པ་བསྐུར་བས། སྒྲིབ་པ་གང་འདག་ན་གཙོ་བོར་ལུས་ཀྱི་སྒྲིབ་པ་དང༌། ལས་ཀྱི་སྒྲིབ་པ་དང༌། གནས་སྐབས་བཞི་ལས་སད་པའི་སྣང་བ་རགས་པ་དང་བཅས་པ་དང༌། ལུས་ཀྱི་ཐིག་ལེའི་སྒྲིབ་པ་འདག །ཕུང་པོའི་བདུད་འཇོམས་པའོ། །ལམ་གང་བསྒོམ་པ་ལ་དབང་ན་སྣོད་བཅུད་བརྟན་པ་དང་གཡོ་བའི་རང་བཞིན་དུ་སྣང་བས་བསྡུས་པའི་ཕུང་པོ་ལྔ་དང༌། ཁམས་ལྔ་དང༌། སྐྱེ་མཆེད་བཅུ་གཉིས་ཀུན་ཕུང་ཁམས་གཤེགས་པ་གཤེགས་མའི་གདན། ཕྱི་ནང་སྐྱེ་མཆེད་སེམས་དཔའ་སེམས་མའི་གདན། ཡན་ལག་གམ་ལུས་ཀྱི་དབང་ཡུལ་རེག་བྱ་ཁྲོ་བོ་ཁྲོ་མོའི་གདན་ཏེ། གདན་གསུམ་ཚང་བའི་དཀྱིལ་འཁོར་གཅིག་ཏུ་གཟུགས་སྣང་སྟོང༌། སྒྲ་གྲགས་སྟོང༌། སེམས་རིག་སྟོང་ཟུང་འཇུག་གི་རྣམ་རོལ་དུ་ཤར་ཏེ་བསྐྱེད་རིམ་བསྒོམ་པ་ལ་དབང་བ་ཡིན་ནོ། །ལྟ་བ་གང་རྟོགས་ན་སྣང་བ་ལྷའི་དཀྱིལ་འཁོར་དུ་གསལ་བ་བསྐྱེད་རིམ་དང༌། རང་བཞིན་ཞེན་སྣང་དང་བྲལ་བ་སྟོང་པའི་ངོ་བོ་རྫོགས་རིམ་དང༌། དེ་གཉིས་ལ་ཆེད་དུ་རྩོལ་མི་དགོས་པར་ལྷུན་གྲུབ་བསྐྱེད་རྫོགས་ཟུང་འཇུག་སྟེ་ངོ་བོ་ཉིད་གསུམ་གྱི་རང་བཞིན་དུ་རྟོགས་པའོ། །གྲུབ་མཐའ་གང་གི་རྗེས་སྙོགས་ན་འཁོར་འདས་ཀྱི་ཆོས་ཐམས་ཅད་སྐྱེ་བ་མེད་པའི་རང་བཞིན་གཉིས་མེད་མཉམ་པ་ཆེན་པོའི་ངང་དུ་རྟོགས་པ་ཡིན་ལ། སྐབས་འདིར་གྲུབ་མཐའ་མ་སྙོགས་ཚེ་འདའ་ཀ་མའི་མན་ངག་གང་ཡིན་ན་རྣམ་ཤེས་འོད་ཀྱི་ཐིག་ལེར་དམིགས་ནས་འཕོ་བ་སྟེ་གོང་བུ་ཕཊ་དང་ཧིཀ་སོགས་སྒྲ་ཡིས་འཕོ་ལ། འབྲས་བུ་གང་ཐོབ་ན་རྩ་ཡི་མ་དག་པའི་འགྲོས་བར་མ་ཆད་པར་ཡོད་པ་དེ་ཉིད་དག་པ་ཡེ་ཤེས་ཀྱི་ངང་དུ་ཐིམ་སྟེ་དག་ནས་བསྐྱེད་རིམ་གྱི་འབྲས་བུ་སྔར་ཇི་ལྟར་གོམས་པ་དེའི་སྤྲུལ་པའི་སྐུ་ཡི་རྣམ་རོལ་ནམ་མཁའ་ཁྱབ་པར་སྣང་ཡང༌། སྐུ་ཡི་ངོ་བོ་རྡོ་རྗེ་ལྟར་འཕོ་འགྱུར་བྲལ་བའི་འདུས་མ་བྱས་མངོན་དུ་གྱུར་པའོ། །བྷ་གའི་དཀྱིལ་འཁོར་ལ་བརྟེན་ནས་དབང་གང་བསྐུར་ན་གསང་དབང་བསྐུར། གང་གི་གཉེན་པོར་ཆེ་ན་དགོད་པས་ཚིམ་ལ་འཕྲུལ་དགའི་འདོད་ཆགས་ཀྱི་གཉེན་པོ་དང༌། སྒྲིབ་པ་གང་དག་ན་རྫུན་སོགས་ངག་གི་སྒྲིབ་པ་སྦྱངས། ཉོན་མོངས་པའི་སྒྲིབ་པ་དང༌། གནས་སྐབས་བཞི་ལས་རྨི་ལམ་དང༌། དེའི་སྣང་བ་ཕྲ་བ་དང་བཅས་པ་དང༌། བརྗོད་འདོད་ཀྱི་རྩ་བ་ངག་གི་ཐིག་ལེའི་སྒྲིབ་པ་འདག །ཉོན་མོངས་པའི་བདུད་འཇོམས་པའོ། །ལམ་གང་བསྒོམ་པ་ལ་དབང་ན། བདག་ཉིད་རྩོལ་བས་རྩ་ཐིག་རླུང་གསུམ་ལས་སུ་རུང་ཞིང་ཡེ་ཤེས་ཁྱད་པར་ཅན་གྱི་ངོ་བོར་བྱིན་རློབས་པའི་ལམ་གཏུམ་མོའི་མན་ངག་གིས་རྩ་རླུང་གི་བྱེད་པ་བཅིང་བ་དང་འབར་འཛག་གི་དམིགས་པ་སོགས་ལ་བརྟེན་ནས་གཟུང་འཛིན་གྱི་རླུང་རོ་རྐྱང་གི་ལམ་བརྒྱུད་ནས་དབུ་མར་འཛུད་པའི་ཐབས་རྒྱུད་དང་མན་ངག་སོ་སོ་ལྟར་རོ། །ལྟ་བ་གང་རྟོགས་ན་རང་བྱུང་ཡེ་ཤེས་རྟོགས་པ། ཉོན་མོངས་སྔར་བས་རགས་པ་ཉོན་མོངས་རྩ་འཁོར་དུ་ཆུད་པ་ཉོན་མོངས་རང་བྱུང་ཡེ་ཤེས། རླུང་སེམས་དབུ་མར་ཚུད་པའི་རྣམ་རྟོག་རགས་པ་ནི་རྣམ་རྟོག་རང་བྱུང་ཡེ་ཤེས། རྩ་འཁོར་དུ་རླུང་ཚུད་པ་སྔར་བས་རྨོངས་པ་སྣྲེལ་ཞི་རང་བྱུང་ཡེ་ཤེས། རིག་པ་གསལ་དྭངས་སྔར་བས་ཆེ་བ་ཡངས་པ་རང་བྱུང་ཡེ་ཤེས་སོ། །གྲུབ་མཐའ་གང་སྙོགས་ན། ངག་དག་པ་ཨཱ་ལི་ཀཱ་ལི་ལ་རང་དབང་ཐོབ་ནས་འགྲོ་དྲུག་གི་སྒྲ་སྐད་ཆེ་ཆུང་བཟང་ངན་ཐམས་ཅད་མ་འདྲེས་པར་སངས་རྒྱས་ཀྱི་གསུང་རྣམ་པར་དག་པའི་རང་བཞིན་དུ་ཡོངས་སུ་རྫོགས་ཤིང་རྟོགས་པའོ། །འདའ་ཀ་མའི་མན་ངག་ནི། ཚེ་འདིར་གྲུབ་མཐའ་མ་སྙོགས་ན་འཆི་ཁའི་སྡུད་རིམ་གྱི་རྐྱེན་གྱིས་རླུང་ཐམས་ཅད་དབུ་མར་ཐིམ་པ་ལ་ཕྱོགས་པ་ན། སྔར་གྱི་ལྟ་བ་དེའི་ངང་མ་ཤོར་བར་མི་རྟོག་པའི་ཏིང་འཛིན་དཔེ་ཡི་འོད་གསལ་ཆེན་པོའི་ངང་དུ་འཕོ་བའོ། །འབྲས་བུ་གང་ཐོབ་ན། རྩ་ཁམས་ཀྱི་ཡི་གེ་རླུང་གིས་བསྐྱོད་ནས་རྣམ་རྟོག་ཡི་གེའི་རྣམ་པར་སྐྱེ་ཞིང་བརྗོད་པའི་སྒྲ་དང་སྣང་བ་དང༌། མ་དག་པའི་འགྲོས་འདུས་བྱས་པ་ཐམས་ཅད་སྐྱེ་བ་མེད་པའི་དབྱིངས་སུ་ཐིམ་ནས། འདུས་མ་བྱས་པའི་རང་གདངས་འགག་པ་མེད་པ་ལོངས་སྤྱོད་རྫོགས་པའི་སྐུ་དང་གསུང་དབྱངས་ཡན་ལག་དྲུག་ཅུ་ལ་སོགས་པ་གསུང་གི་ཡོན་ཏན་ཐམས་ཅད་རིག་པའི་ངོ་བོར་ལྷུན་གྱིས་གྲུབ་ཅིང་ཡོངས་སུ་རྫོགས་པའི་གསུང་རྡོ་རྗེ་མངོན་དུ་གྱུར་པ་ཡིན་ནོ། །ཕུང་ཁམས་སོགས་གདན་གསུམ་ལྷ་ཡི་མངོན་རྟོགས་ཇི་བཞིན་ངོམ་ཞིང༌། རྒྱུད་ནས་གསུངས་པའི་མཚན་ཉིད་དང་ལྡན་པའི་མཛེས་མ་ཡི། གསང་བའི་དཀྱིལ་འཁོར་ལ་བརྟེན་ནས་དབང་གང་བསྐུར་ན། ཤེར་དབང་གིས་བསྐུར། གཉེན་པོ་གང་ལ་ཞེ་ན། ལག་བཅངས་ཚིམ་པ་དགའ་ལྡན་འདོད་ཆགས་སོགས་དག །སྒྲིབ་པ་གང་འདག་ན་ཡིད་ཀྱི་སྒྲིབ་པ་སྦྱངས་ཞིང༌། ཤེས་སྒྲིབ་རགས་པ་དང༌། གནས་སྐབས་བཞི་ལས་ཚོགས་དྲུག་སྣང་བ་དང་བཅས་པ་འགགས་པའི་གཉིད་འཐུག་གི་གནས་སྐབས་དང༌། ཡིད་འཛིན་པའི་ཐིག་ལེ་འདག །འཆི་བདག་གི་བདུད་བཅོམ། ལམ་གང་བསྒོམ་པ་ལ་དབང་ན། གཞན་ལུས་ཕོ་ཉ་ལ་བརྟེན་ནས་བྱང་སེམས་ཡས་འབབ་མས་བརྟན་གྱི་མཐར། ཐབས་སྣང་བའི་ཡེ་ཤེས་དང༌། ཤེས་རབ་མཆེད་པའི་ཡེ་ཤེས་དང༌། ཟུང་འཇུག་ཉེར་ཐོབ་ཀྱི་ཡེ་ཤེས་གསུམ་གྱིས་དྲངས་པའི་ལྷན་ཅིག་སྐྱེས་པའི་ཡེ་ཤེས་བསྒོམ་པ་ལ་དབང་བ་དང༌། ལྟ་བ་གང་རྟོགས་ན་བདེ་སྟོང་དགའ་བཞིའི་ཡེ་ཤེས་ཀྱི་ཁམས་ཀུན་རྫོབ་བྱང་ཆུབ་སེམས་ཀྱི་ཞུ་བདེའི་ཐབས་ལ་བརྟེན་ནས་འགྲུབ་པ་ཡིན་ནོ། །གྲུབ་མཐའ་གང་སྙོགས་ན། བདེ་སྟོང་དབྱེར་མེད་པའི་ལྟ་བ་དེའི་ངང་ལ་ཕྱག་རྒྱ་མ་བརྟེན་པའི་ཚེ་ནའང་རྟག་ཏུ་གནས་ཤིང་ཉམས་སུ་མྱོང་བ་དང༌། འདའ་ཀའི་མན་ངག་ནི། ཚེ་འདིར་གྲུབ་མཐའ་མ་སྙོགས་ནའང་འཆི་ཁའི་སྡུད་རིམ་གྱིས་རྐྱེན་བྱས་ནས་དོན་དམ་བྱང་ཆུབ་སེམས་ཀྱི་རྟེན་ཁམས་ཀྱི་ཐིག་ལེ་ཀུན་རྫོབ་པ་རྣམས་ལྷན་ཅིག་ཏུ་ཚོགས་ཤིང་དབུ་མར་ཅུང་ཟད་ཞུགས་པའི་གནས་སྐབས་དེར། སྣང་ལ་མ་གྲུབ་པའི་ཡེ་ཤེས་རྡོ་རྗེ་སྟོང་པ་དང༌། སེམས་བདེ་བ་སྟེ་བདེ་སྟོང་གཞི་དུས་ཀྱི་འོད་གསལ་ངོ་འཕྲོད་ནས་གྲོལ་བ་སྟེ། དེ་ཡང་སྙིང་གའི་རྩ་མདུད་གྲོལ་བའི་སྟོབས་ཀྱིས་དཔེའི་ཡེ་ཤེས་ཤར་བ་དེ་ཉིད་གཞིའི་འོད་གསལ་དང་མ་བུ་འདྲེས་ནས་གྲོལ་བ་ཡིན་ནོ། །འབྲས་བུ་གང་ཐོབ་ན། མཐར་ཐུག་གྲོལ་བའི་ཚེ་རྩ་ཁམས་ཀྱི་དྭངས་མའི་ཐིག་ལེ་རླུང་གིས་འཕོ་བའི་འགྲོས་དབྱིངས་སམ་ཟུང་འཇུག་ངང་དུ་ཐིམ་སྟེ་ཆོས་ཀྱི་དབྱིངས་དང་ནམ་མཁའི་མཐར་ཁྱབ་ཚད་ལས་འདས་ཤིང༌། བསམ་གྱིས་མི་ཁྱབ་པའི་ཡེ་ཤེས་ཟུང་འཇུག་ཐུགས་ཀྱི་རྡོ་རྗེ་སེམས་སེམས་བྱུང་གི་རྙོག་པ་ཞི་བའི་དྭངས་མ་ཡེ་ཤེས་ཀྱི་སྐུ་མངོན་དུ་འགྱུར་རོ། །དཔེའི་འོད་གསལ་དེ་ནི་དོན་དམ་དུ་བྱང་ཆུབ་སེམས་ཀྱི་མྱུ་གུ་ལྟ་བུ་དེ་ལ་སློབ་བུ་རྣམས་མཉམ་པར་བཞག་པའི་དཀྱིལ་འཁོར་ལ་བརྟེན་ནས། ཡས་འབབ་མས་བརྟན་གྱི་བདེ་སྟོང་དགའ་བཞིའི་ཡེ་ཤེས་དབང་དོན་གསུམ་པའི་ངོ་བོ་ཉམས་སུ་མྱོང་ཞིང་རྫོགས་པ་ཆེན་པོའི་ངོ་བོར་སློབ་དཔོན་གྱིས་ཚིག་གིས་མཚོན་པའི་ངོ་སྤྲད་བདེ་བ་ཆེན་པོའི་དབང་ངམ་དབང་གི་དམ་ཚིག་གི་བཞི་པ་ཡིན་ལ། གཉེན་པོ་འཐབ་བྲལ་མན་ཆད་འཁྱུད་སྦྱོར་འདོད་ཆགས་དང༌། སྒྲིབ་པ་སྒོ་གསུམ་ཕྲ་བའི་སྒྲིབ་པ་དག་སྟེ་དེ་ཡང་སྒོ་གསུམ་ཐ་དད་དུ་འཛིན་པ་སྤྱོང་ཞིང་ཤེས་སྒྲིབ་ཆེས་ཕྲ་བ་འཕོ་བའི་བག་ཆགས་ཆ་དང་བཅས་པ་དང༌། གནས་སྐབས་བཞི་ལས་སྙོམས་འཇུག་གི་གནས་སྐབས་དང༌། སྒོ་གསུམ་ཕྲ་བའི་བག་ཆགས་འཛིན་པའི་ཐིག་ལེའི་སྒྲིབ་པ་རྣམས་འདག །ལྷའི་བུའི་བདུད་འཇོམས་པའོ། །ལྟ་བ་སྤྲོས་པ་དང་བྲལ་བའི་སྟོང་པའི་ཐིག་ལེ་རང་བཞིན་གསལ་བ་རིག་པའི་གདངས་མ་འགགས་པ་ལས། ཐུགས་རྗེའི་རོལ་པ་སྐུ་དང་ཡེ་ཤེས་སུ་འཆར་བའི་སྙིང་པོ་ཅན་རྣམ་ཐར་སྒོ་གསུམ་གྱི་རང་བཞིན་རྟོགས་སོ། །ལམ་གང་བསྒོམ་པ་ལ་དབང་ན། འོད་གསལ་ཕྱག་རྒྱ་ཆེན་པོའམ་རིག་སྟོང་རྫོགས་པ་ཆེན་པོ་ལ་དབང༌། དེ་ཡང་ནང་རྒྱུད་ཐུན་མོང་ལྟར་ན་རྫོགས་རིམ་བསྒོམ་པའི་སྐལ་ལྡན་དུ་བྱས། ཐེག་རྩེའི་བྱེ་བྲག་ཐོབ་ན་ཀ་དག་ཁྲེགས་ཆོད་དང༌། ལྷུན་གྲུབ་ཐོད་རྒལ་གྱི་ལམ་ཐུན་མིན་ལ་དབང་བ་ཡིན་ནོ། །གྲུབ་མཐའ་གང་སྙོགས་ན། བསམ་གྱིས་མི་ཁྱབ་པའི་ཡེ་ཤེས་བདེ་སྟོང་ཕྱག་རྒྱ་ཆེན་པོ་རྟོགས་པ་ཡིན་ཏེ་བླང་དོར་མེད་པའི་རྟོགས་པའོ། །འདའ་ཀའི་མན་ངག་ནི། གསང་ཆེན་ཕྱག་རྒྱ་ཆེན་པོ་སྔར་གྱི་ལྟ་བ་དེའི་ངང་འཕོ་བ་ཡིན་ལ། འབྲས་བུ་གང་ཐོབ་ན། སྙིང་པོ་ཡེ་ཤེས་རླུང་གི་འགྲོས་ཐིམ་ཞེས་ཡེ་ཤེས་ཀྱི་རླུང༌། ལས་རླུང་གིས་བསླད་པའི་ཆ་ཤིན་ཏུ་ཕྲ་བ་དང་བཅས་པ་ཐམས་ཅད་དག་ནས་མངོན་དུ་གྱུར་ཏེ་ཡེ་ཤེས་རྡོ་རྗེ་མཁའ་ཁྱབ་དབྱིངས་ཀྱི་རང་བཞིན་ཟུང་དུ་འཇུག་པའི་ངོ་བོ་ཉིད་སྐུ་ཐོབ་པའོ། །དབང་ཞེས་པའི་སྐད་དོད་སྒྲ་དོན་དང་སྦྱར་ན། དྲི་མ་འཁྲུད་པ་དང་ནུས་པ་འཇོག་པ་གཉིས་ལ་འཇུག་སྟེ་ཨ་བྷི་ཥིཉྩ་ཞེས་པའི་སྒྲས་ཡེ་ཤེས་ལ་སྒྲིབ་པའི་གློ་བུར་བའི་དྲི་མ་ཐམས་ཅད། དབང་ཐོབ་པ་ཙམ་གྱིས་སྐལ་བ་དང་ལྡན་པར་བྱེད་དེ་གཏོར་བའི་དོན་སྟོན་པ་དང༌། ཥེ་ཀ་ཏ་ཞེས་པའི་སྒྲས། སྐལ་བ་བླུགས་པ་སྟེ་ཆོས་ཉིད་ལ་སྐུ་བཞིའི་ཡོན་ཏན་རང་ཆས་སུ་ཡོད་པ་དེ། དབང་རང་རང་གི་ལམ་གྱིས་སྒྲིབ་པ་བསལ་ནས་ལམ་བསྒོམ་རུང་དང་ཡོན་ཏན་སྐྱེ་རུང༌། རྒྱུ་སྒྲིབ་པ་སྤང་བར་དབང་བ་དང༌། ཡོན་ཏན་ཐམས་ཅད་ཐོབ་པར་དབང་བ་སྟེ་དེ་ལྟར་རྣམ་པ་གཉིས་སུ་གྲུབ་བོ། །དབང་བཞིའི་ངོ་བོ་མཆོག་གི་ཡོན་ཏན་སྐུ་གསུང་ཐུགས་ཡེ་ཤེས་རྡོ་རྗེའི་རང་བཞིན་རང་ལ་ལྷན་སྐྱེས་སྨན་གྱི་རོ་ནུས་དང་དྲི་དང་ཞུ་རྗེས་ལྟར་གནས་པ་ཡིན་ཏེ། དེ་ཡང་ཁམས་དྲུག་གི་ནང་ནས་སེམས་ནི་མིང་བཞིའི་ཕུང་པོ་ཅན་ཡེ་ཤེས་ཀྱི་རྟེན་དང༌། ཕུང་པོ་ལྔའི་རྟེན་འབྱུང་ལྔ། འབྱུང་བའི་རྟེན་རྩ་དང༌། རྩའི་བརྟེན་པ་སྲོག་གི་རླུང༌། རླུང་གི་བརྟེན་པ་བྱང་སེམས་ཡིན་པས་དབང་བཞིའི་མཚུངས་ལྡན་རྩ་རླུང་ཐིག་ལེ་སེམས་དང་བཅས་པ་རང་ལ་ལྡན་ཞིང༌། དེ་ཐམས་ཅད་ཀྱི་རང་བཞིན་བདེ་གཤེགས་སྙིང་པོ་དབང་བཞིའི་ཡོན་ཏན་འབྱོར་པ་དེ་ནི། རྒྱུ་ཡི་དབང་ཞེས་བྱ་བ་ཡིན་ཏེ། དེ་ལྟར་རྒྱུ་དབང་རང་ལ་གནས་པ་དེ་ཉིད་མངོན་དུ་བྱེད་པའི་ཐབས་སུ། སློབ་དཔོན་མཚན་ཉིད་དང་ལྡན་པ་ཉིད་ཀྱིས་སྦྱོར་དངོས་རྗེས་གསུམ་གྱི་ཆོ་གས་བསྐུར་བ་དང༌། དེ་ལས་གཞན་བདག་འཇུག་བླ་མའི་རྣལ་འབྱོར་ཟབ་མོའི་དབང་བཞི་དང༌། བྱིན་རླབས་འཕོ་བའི་རྒྱུན་ལ་རང་གི་དམིགས་པས་ཡང་ཡང་འདྲིས་ཤིང་གོམས་པར་བྱེད་པ་ལམ་གྱི་དབང༌། རྒྱུ་མཚན་ཉིད་ཐེག་པའི་སྐབས་སུ་སློབ་ལམ་མཐར་ཕྱིན་ནས་ས་བཅུའི་རྒྱུན་མཐའི་དུས་སུ་འོད་ཟེར་ཆེན་པོའི་དབང་ཐོབ་པར་བཤད་པ་བཞིན་དུ། རང་སེམས་ལ་ཡེ་ནས་ལྡན་པའི་དབང་དེའི་གློ་བུར་དྲི་མ་རྣམས་ལམ་དུས་ཀྱི་དབང་དང་བསྐྱེད་རྫོགས་རྣམས་ཀྱིས་སྦྱངས་ནས་སྐུ་བཞིར་མངོན་དུ་སྨིན་པ་ནི་འབྲས་བུའི་དབང་ཞེས་བྱའོ། །དེ་ལྟར་དབང་བཞི་མཐའ་བརྟེན་བཅས་རྫོགས་ཚེ་རིག་འཛིན་སྡོམ་པ་ཡང་མཉམ་དུ་ཐོབ་པ་ཡིན་ནོ། །ཐོབ་པའི་ཕན་ཡོན་ནི། དབང་ཐོབ་པའི་སྐྱེས་བུའི་རྒྱུད་ནི་དཔེར་ན་ཞིང་ས་ལ་གཤོལ་སོགས་ཀྱིས་ཐ་བའི་སྐྱོན་སྦྱངས་པའི་ཞིང་སར་ས་བོན་བཞག་པ་ཇི་བཞིན་དུ། སྔར་གྱི་ཡོན་ཏན་སྐྱེ་མི་རུང་བ་ལེགས་པར་སྦྱངས་ཏེ་སྐུ་བཞི་སྨིན་རུང་དུ་བྱས་པའི་དབང་སོ་སོའི་བསྐྱེད་རྫོགས་ལ་གཞོལ་བའི་རྐྱེན་དང་འཛོམ་ན་སྐད་ཅིག་རེ་རེ་བཞིན་སྒོ་གསུམ་དང་ཐ་དད་དུ་འཛིན་པ་སྟེ་བཞི་དང༌། ལས་དང་ཉོན་མོངས་ཤེས་བྱ་བག་ཆགས་ཏེ་གནས་སྐབས་ཀྱི་སྒྲིབ་པ་བཞི་རིམ་གྱིས་དག་སྟེ་སློབ་བཞིའི་བྱང་ཕྱོགས་སོ་བདུན། ཕར་ཕྱིན་བཅུ་ཚོགས་གཉིས་སོགས་རིམ་གྱིས་གོང་དུ་འཕེལ་ཏེ་རྡོ་རྗེ་བཞི་དང༌། སྤྲུལ་སྐུ། ལོངས་སྐུ། ཆོས་སྐུ། ངོ་བོ་ཉིད་སྐུ་སྟེ་སྐུ་བཞི་མངོན་དུ་བྱེད་དོ། །གཉིས་པ་རང་བཞིན་ཡེ་ནས་དག་པའི་ལམ་ལ་བསྐྱེད་རྫོགས་རྣམ་པ་གཉིས་ལས། དང་པོ་བསྐྱེད་རིམ་ལམ་དུ་བྱེད་ཐབས་ཡིན་པས་མི་དང་དུད་འགྲོ་ལ་སྐྱེ་གནས་བཞི་ཀ་སྲིད་ཅིང༌། བྱང་སེམས་དང་ལྷ་དང་དམྱལ་བ་བར་དོ་རྣམས་རྫུས་སྐྱེས། ཡི་དྭགས་ལ་མངལ་རྫུས་གཉིས་ཏེ་སྐྱེ་གནས་རྣམ་པ་བཞིའི་བག་ཆགས་སྦྱང་ཕྱིར། མངལ་སྐྱེས། རྫུས་སྐྱེས། སྒོང་སྐྱེས། དྲོད་སྐྱེས་ཏེ་སྐྱེ་གནས་བཞི་པོ་དེ་དང་མཐུན་པར་བསྐྱེད་རིམ་རྣམ་པ་བཞི་སྟོན་པ་ཡིན་ནོ། །ཇི་ལྟར་བསྐྱེད་ཚུལ་འཆི་སྲིད་དང་མཚུངས་པའི་སྟོང་ཉིད། བར་སྲིད་དང་མཚུངས་པའི་སྙིང་རྗེ། དྲི་ཟ་ཉེ་བར་ལེན་པའི་ཤེས་པ་དང་མཚུངས་པའི་ས་བོན་དབང་པོ་ཡོངས་སུ་རྫོགས་ནས་སྐྱེ་བ་སོགས་དང་མཚུངས་པའི་ལྷ་ཡོངས་རྫོགས་བསྒོམ་པ་དང༌། དེ་ཡང་སྐྱེ་གནས་བཞི་པོ་རང་རང་སྦྱོང་བྱེད་ཀྱི་གཉེན་པོ་བསྒོམ་པ་སོགས་འཁོར་བའི་སྐྱེ་འཆི་བར་དོ་གསུམ་དང༌། སྐྱེ་གནས་བཞི་སོགས་རྣམ་པ་དང་མཐུན་པར་བསྒོམ་པས། བསྐྱེད་ཚུལ་བཞི་པོ་རེ་རེ་ལའང་སྒོ་གསུམ་གྱི་འཇུག་པའི་སྒོ་ཡི་སྣང་ཞེན་དང༌། རིགས་དྲུག་གི་སྐྱེ་གནས་ཀྱི་བག་ཆགས་ཀུན་སྦྱོང་བྱེད་དུ་འགྱུར་བས། ལུས་སྣང་བ་འདོད་སྲིད། ངག་ཕྱེད་སྣང་གཟུགས་ཀྱི་སྲིད་པ། ཡིད་མི་སྣང་བ་གཟུགས་མེད་པའི་སྲིད་པ་སྟེ་སྲིད་པ་གསུམ་གྱི་སྒོ་གསུམ་པོའི་བག་ཆགས་ཕྱི་རོལ་དུ་སྣང་བའི་ཁམས་གསུམ་པོའི་སྣང་ཞེན་མ་ལུས་པ་སྦྱང་ཞིང་དག་པར་འགྱུར་བ་དང༌། ཡང་མྱ་ངན་ལས་འདས་པ་དང་བཞུགས་ཚུལ་མཐུན་པ་ཡི། ཏིང་ངེ་འཛིན་རྣམ་གསུམ་པོ་སྐུ་གསུམ་དང་འདྲ་བ་ལམ་དུ་བྱེད་པ་དང༌། ཞིང་དང་གཞལ་ཡས་ཁང་མཚན་དཔེ་འོད་ཟེར་སོགས་ལྷ་ཡི་རྣམ་པ་ལམ་དུ་བྱས་ཤིང་བསྒོམ་པས་འབྲས་བུ་སྐུ་གསུམ་གྱི་ཡོན་ཏན་ཐམས་ཅད་གཞི་ལ་ཡེ་ནས་གནས་པ་ཡོངས་སུ་རྫོགས་ཤིང༌། མངོན་དུ་སད་རུང་གི་ནུས་པ་ཁྱད་པར་ཅན་གསོས་ཐེབས་པ་དང༌། དེ་ལྟར་དག་རྫོགས་གཉིས་ཀ་ཚང་བ་དེའང་རྡོ་རྗེའི་ལུས་ཀྱི་རྩ་ཐིག་རླུང་གསུམ་ལ་བརྒྱུད་ནས་གནད་དུ་བསྣུན་པའི་ཐབས་ཡིན་པ་དང༌། སེམས་ཀྱི་ཆོས་ཉིད་བདེ་གཤེགས་སྙིང་པོའི་གནས་ལུགས་དང་མཐུན་པར་བསྒོམ་པ་ཡིན་པས། དེ་ལྟ་བུའི་བསྐྱེད་རིམ་བརྟན་ནས་རྫོགས་པའི་རིམ་པ་རྣམས་བསྒོམ་ན། དེའི་ཡེ་ཤེས་དཔེ་དང་དོན་གྱི་འོད་གསལ་སྐྱེ་མ་རག་པར་འགྱུར་བས་རིམ་པ་གཉིས་པའི་སྨིན་བྱེད་དུ་འགྲོ་བའི་ཕྱིར་ན། དག་རྫོགས་སྨིན་གསུམ་འདི་ནང་རྒྱུད་བསྐྱེད་རིམ་སྤྱི་ལ་གཅེས་པའི་གལ་པོ་ཆེ་ཡིན་ནོ། །འཁོར་བའི་རྣམ་པ་གྲུབ་ཚུལ་ཇི་ལྟར་ན་སྤྲོས་པ་ཅན་སྒོང་སྐྱེས་བྱ་མ་དང་སྒོ་ང་སྟེ་ལན་གཉིས་སྐྱེ་བ་ལྟར། བདག་སྲས་དང་གཞན་སྲས་རྣམ་པ་གཉིས་སུ་བསྐྱེད་ཚུལ་འདི་གཉིས་ལས་དང་པོ་པར་བསྔགས་སོ། །བདག་གི་སེམས་ཉིད་བདེ་གཤེགས་སྙིང་པོ་ནི་འཁོར་འདས་ཀྱི་ཆོས་ཐམས་ཅད་ཀྱི་འཕྲོ་གཞིར་གནས་པ་དེ་གཙོ་བོ་ཡབ་ཡུམ་དུ་བསྐྱེད་ནས། དེའི་སྲས་སུ་གཞན་དེ་བཞིན་གཤེགས་པ་རྣམས་བསྐྲུན་ཏེ་འཁོར་དུ་བཀོད་པར་བྱ་བའི་དོན་གྱིས་ཡིན་ཏེ། འདི་ལ་ལྔ་སྟེ། རྣམ་སྨིན་གྱི་རང་ལུས་སོགས་ཆོས་ཐམས་ཅད་སྟོང་ཉིད་དུ་སྦྱང་བ་སོགས་ཏིང་ངེ་འཛིན་གསུམ་གྱི་མན་ངག་ལ་བརྟེན་ནས་རང་གི་རིག་པའི་ངོ་བོ་ས་བོན་ཡིག་འབྲུའི་རྣམ་པར་བསྒོམས་པ་ལས་བྱུང་བའི་ས་བོན་རྣམས་སྤྲོས་ཏེ་འབྱུང་བ་རིམ་བརྩེགས་བསྒོམ། བྷྲཱུྃ་ཡིག་ཁ་དོག་ལྔ་ལྡན་འཕྲོས་པ་ལས་གཞལ་ཡས་ཁང་གདན་དང་བཅས་པ་བསྒོམ་ནས། དབུས་ཀྱི་གདན་སྟེང་དུ་ས་བོན་གྱི་ཡི་གེ་བབས་པ་ཡོངས་སུ་གྱུར་པ་ལས་ནི། རྒྱུ་ཡི་ཧེ་རུ་ཀ་ཞལ་གཅིག་སྐུ་མདོག་སོགས་གཙོ་བོ་བསྐྱེད་པ་དང༌། ཡབ་ཡུམ་མཉམ་པར་སྦྱོར་བའི་ཡེ་ཤེས་ཀྱི་འོད་ཟེར་གྱིས་ཕྱོགས་བཅུའི་སངས་རྒྱས་ཐམས་ཅད་བཀུག་ནས་ཡབ་ཀྱི་སྤྱི་བོ་ནས་ཞུགས། ཡུམ་གྱི་མཁར་བསྟིམ་པ་དང༌། ཡང་འོད་ཟེར་གྱིས་སེམས་ཅན་བཀུག་ནས་སྒྲིབ་པ་སྦྱོང་ཞིང་མཁར་བསྟིམ་པར་བྱ་བ་དང༌། དེ་ནས་འཁོར་འདས་ཀུན་གྱི་སྤྱི་དཔལ་གཉིས་སུ་མེད་པའི་བདག་ཉིད་ཆེན་པོ་ལ་ཆེ་བའི་ང་རྒྱལ་བསྐྱེད་པ་དང༌། ལྷ་ཚོགས་ཐམས་ཅད་མཁའ་གསང་ནས་བཏོན་ནས་སོ་སོའི་གདན་ལ་འགོད་པར་བྱེད་པའོ། །གཞན་གྱི་སྲས་སུ་བདག་བྱ་བ་ཞེས་པ་འདིའི་དོན་བདག་སྲས་ཀྱི་སྐབས་སུ་གཞན་དེ་བཞིན་གཤེགས་པ་ཐམས་ཅད་རང་ལ་བསྟིམ་ནས། མངལ་འབྱིན་གྱི་སྒོ་ནས་སྲས་ཀྱི་རྣམ་པར་འཁོར་དུ་བཀོད་པ་དེ་རྣམས་གཙོ་བོའི་ཐུགས་སུ་གྱུར་ནས་བདག་གི་རྟོག་ཚོགས་ཡི་གེའི་རྣམ་པར་ཡོད་པ་མཁའ་རུ་ཕབ་སྟེ། སྲས་སུ་བསྐྲུན་ནས་འཁོར་དུ་བཀོད་པའི་དོན་འདི་ལ་རྣམ་པ་བརྒྱད་ཡོད་དེ་དཔེར་ན་སྒོང་སྐྱེས་དང་པོ་སྒོ་ང་སྨིན་པ་དེ་དང༌། དེ་ནས་སྒོང་ཁྱིམ་བརྡོལ་ནས་དབང་པོ་ཡན་ལག་ཡོངས་སུ་རྫོགས་པ་དེར་འགྱུར་བ་བཞིན་དུ། གཙོ་བོ་ཡབ་ཡུམ་འོད་དུ་ཞུ་ནས་ཐིག་ལེའི་གོང་བུ་ས་བོན་ཕྱག་མཚན་གྱིས་མཚན་པར་གྱུར་པ་དང༌། དེ་ཉིད་ཡོངས་སུ་གྱུར་པ་ལས། འབྲས་བུ་ཧེ་རུ་ཀ་ཡབ་ཡུམ་དབུ་དགུ་ཕྱག་བཅོ་བརྒྱད་སོགས་གང་རུང་སྐྱེ་མཆེད་རྫོགས་པ་བསྐྱེད་པ་དང༌། དེའི་ཚེ་ཡབ་ཀྱི་རྟོག་པ་ཐམས་ཅད་ཡི་གེའི་ངོ་བོར་གྱུར་ནས་སྲས་འདོན་གྱི་ནུས་པ་མེད་པར་བསམ་པ་དང༌། ཡུམ་ལས་འོད་ཟེར་འཕྲོས་པས་བསྐུལ་ཏེ་འཁོར་གྱི་ལྷ་ཚོགས་རྣམས་ལ་སྲས་བསྐྱེད་པའི་དོན་དུ་གསོལ་བ་གདབ་པ་དང༌། དེ་ནས་འཁོར་གྱི་རྟོགས་པ་མངོན་གྱུར་གྱི་བདེ་གཤེགས་ལྷ་ཚོགས་ཀུན་ཀྱང་རང་ཉིད་གཙོ་བོར་ཡོད་པ་དེའི་ཐུགས་ཀར་བསྟིམ་སྟེ་ཐུགས་སུ་གྱུར་ནས་དཀྱིལ་འཁོར་ཀུན་གྱི་ཁྱབ་བདག་ཡེ་ཤེས་ཆེན་པོའི་བདག་ཉིད་ངའོ་ཞེས་ང་རྒྱལ་བཟུང་བ་དང༌། དེ་ནས་གསང་བ་བྱིན་གྱིས་བརླབས་ཏེ་ཕྱག་རྒྱ་བཞིས་སྙོམས་པར་ཞུགས་ནས་མཁའ་རུ་བྱང་ཆུབ་སེམས་ཀྱི་འོད་ཟེར་ལན་གསུམ་ཕབ་པའི་དང་པོས་ཐིག་གདབ། གཉིས་པས་རྟེན་གྱི་དཀྱིལ་འཁོར་གཞས་ཡས་ཁང་བཅས་པ་བསྐྱེད་པ་དང༌། གསུམ་པས་རྟོག་པ་ཞེ་གཉིས་ཡི་གེའི་ངོ་བོར་ཡོད་པ་རྣམས་ཡོངས་སུ་གྱུར་པས་གཙོ་འཁོར་ལྷ་ཚོགས་ཡོངས་སུ་རྫོགས་པར་གསལ་ཏེ་མཁའ་གསང་ནས་ཕྱིར་གདོན་པ་དང༌། བདག་གི་ཐུགས་ཀ་ནས་ཕྱག་རྒྱའི་ལྷ་མོ་བཞི་སྤྲོས་ཏེ་ལྕགས་ཀྱུ་མས་དབྱིངས་ནས་ཡེ་ཤེས་ཀྱི་དཀྱིལ་འཁོར་གྱི་རྟེན་ལ་རེག་ཙམ་གྱིས་བསྐུལ་ཏེ། ཞགས་པ་མས་གནས་ནས་བསྐྱོད་ལ་སྤྱན་དྲངས་ནས། ལྕགས་སྒྲོག་མས་དཀྱིལ་འཁོར་དུ་བསྟིམ་ལ། དྲིལ་བུས་དགྱེས་པ་བསྐྱེད་པ་ཡི་སྒོ་ནས་དམ་ཡེ་དབྱེར་མེད་དུ་བརྟན་པར་བཅིངས་པ་དང༌། གནས་གསུམ་རྡོ་རྗེ་གསུམ་གྱིས་རྒྱས་གདབ་པར་བྱས་ཏེ་འཁོར་རྣམས་སོ་སོའི་གདན་དུ་འཁོད། གཙོ་བོ་འབྲས་བུའི་ཧེ་རུ་ཀ་ལ་བསྟིམ། གཞལ་ཡས་ཁང་གཞལ་ཡས་ཁང་ལ། གདན་རྣམས་སོ་སོ་ལ་བསྟིམ་པའོ། །སྒོང་སྐྱེས་ལན་གཉིས་སྐྱེ་བ་ལྟར་བསྡུ་ན་ཐོག་མར་རང་ཉིད་གཉུག་མའི་ལྷར་གསལ་བས། མདུན་གྱི་ནམ་མཁར་གང་བསྒོམ་པའི་དཀྱིལ་འཁོར་གྱི་ལྷ་ཚོགས་རྟེན་བརྟེན་པ་ཐམས་ཅད་གསལ་གདབ་པ་དང༌། རང་གི་ཐུགས་ཀ་ནས་དཀྱིལ་འཁོར་སྤྲོ་བ་དང༌། དབྱིངས་ནས་སྤྱན་དྲངས་ཤིང་མདུན་མཁར་བཞུགས་པར་དམིགས་པ་སྟེ་གསུམ་གང་རུང་གི་མདུན་དུ་རྒྱུན་བཤགས་ཡན་ལག་བདུན་པའམ་བརྒྱད་པ་བཅུ་པ་གང་རུང་བྱ། མཐར་བདག་དང་ཚོགས་ཞིང་གཉིས་ཀ་མི་དམིགས་པའི་ངང་ནས་སླར་ཡང་ལྷ་སོ་སོའི་དཀྱིལ་འཁོར་མངོན་རྟོགས་སྐྱེ་གནས་གང་སྦྱོང་བའི་ཆོ་ག་ཡིན་ཀྱང་དེ་ཇི་ལྟ་བ་བཞིན་སྒོམ་པར་བྱེད་པའོ། །སྤྱིར་བསྐྱེད་ཚུལ་གཅིག་གིས་སྐྱེ་གནས་བཞི་ཀ་སྦྱོང་མོད་ཀྱང༌། གཙོ་ཆེར་རང་རང་གི་བག་ཆགས་སྦྱོང་བས་ན་མངལ་སྐྱེས་ཀྱི་བག་ཆགས་སྦྱོང་ཕྱིར་དེ་དང་མཐུན་པར་མངོན་བྱང་བཞི་ཡི་སྒོ་ནས་བསྐྱེད་པའམ། རྡོ་རྗེའི་ཆོ་ག་གསུམ་བསྐྱེད་དམ། མངོན་བྱང་ལྔ་བསྐྱེད་དེ་གསུམ་ལས། དང་པོ་བཞི་བསྐྱེད་ནི་ཁྲག་འཐུང་གལ་པོའི་དགོངས་པ་ལྟར་བཤད་པ་སྟེ། གལ་པོ་ལས། དང་པོ་སྟོང་པ་བྱང་ཆུབ་སེམས། །གཉིས་པ་ས་བོན་འབྱུང་བ་སྟེ། །གསུམ་པ་ལ་ནི་གཟུགས་རྫོགས་པ། །བཞི་པ་ལ་ནི་ཡི་གེར་འགོད། །ཅེས་པས། དང་པོ་སྦྱང་བྱའམ་དག་བྱ་རང་བཞིན་བརྒྱད་ཅུའི་རྟོག་ཚོགས་ཐམས་ཅད་འཁྲུལ་སྟོབས་ཀྱིས་ནུབ་པའི་འཆི་སྲིད་དང༌། སླར་ཡང་ལས་རླུང་མཆེད་པའི་སྟོབས་ཀྱིས་བར་དོར་སྣང་བ་ཡད་ཡུད་དུ་འབྱུང་བ་དང་བཅས་པ་དག་པའི་ཕྱིར། སྤྲོས་བྲལ་སྟོང་ཉིད་ཀྱི་ངང་སྙིང་རྗེ་སྒྱུ་མ་ལྟ་བུའི་བྱང་ཆུབ་ཀྱི་སེམས་གཉིས་བསྒོམས་པས་ཆོས་སྐུ་དང་ལོངས་སྐུ་གཉིས་གཞི་ལ་རྫོགས། འོད་གསལ་དང་སྒྱུ་ལུས་གཉིས་ཀྱིས་སྨིན་བྱེད་དུ་འགྱུར་རོ། །དྲི་ཟ་ཉེ་བར་ལེན་པ་བར་དོའི་རྣམ་ཤེས་དེ་ཕ་མའི་ཁུ་ཁྲག་གི་དབུས་སུ་ཞུགས་ཏེ་འདྲེས་པའི་ཆ་ནི། སྟོང་ཉིད་སྙིང་རྗེ་ཟུང་འཇུག་གི་ཡེ་ཤེས་ལྷ་ཡི་ས་བོན་ཧཱུྃ་ལ་སོགས་པ་ལམ་གྱིས་གསལ་བས་སྦྱང་ཞིང་དག །སྤྲུལ་སྐུ་གཞི་ལ་རྫོགས། དཔེའི་འོད་གསལ་ལས་སྒྱུ་ལུས་ཀྱི་ལྷ་སྐུར་ལྡང་བའི་སྨིན་བྱེད་དུ་འགྱུར་རོ། །གསུང་རྡོ་རྗེའི་ས་བོན་གྱིས་སྦྱོང་ཚུལ་ནི། རྣམ་ཤེས་དེ་ཉིད་ཀྱང་ཁུ་བ་དང༌། རྡུལ་ཏེ་ཁྲག་དང༌། རླུང་དང་གསུམ་འདྲེས་པའི་ཆ་དེ་རླུང་གི་བྱེད་ལས་ཀྱིས་མེར་མེར་དང༌། ནུར་ནུར་གྱི་གནས་སྐབས་སུ་གྱུར་པ་དེ་ས་བོན་གྱི་ཡི་གེ་ཉིད་ལས་ཐུགས་རྡོ་རྗེ་ཕྱག་མཚན་སོགས་སུ་གྱུར་པས་སྦྱོང་ལ། དེ་ལས་ལྟར་ལྟར་དང་མཁྲང་གྱུར་དུ་སོང་བའི་གནས་སྐབས་ནི། ཡེ་ཤེས་རྡོ་རྗེ་ཕྱག་མཚན་དེ་འོད་གོང་དུ་གྱུར་པས་སྦྱོང་ཞིང༌། དེ་ནས་རིམ་གྱིས་བརྟས་ཏེ་ཁྱབ་འཇུག་ཉ་དང་རུས་སྦལ་གྱི་རྣམ་པ་དང༌། མིག་ལ་སོགས་པ་དབང་པོ་དང་ཡན་ལག་ཡོངས་སུ་རྫོགས་པའི་གནས་སྐབས་ནི། སྐུ་རྡོ་རྗེ་ལྷ་ཡི་རྣམ་པར་གྱུར་ནས་སྦྱོང་བའོ། །དེ་ལྟར་བསྒོམ་པས་ཟུང་འཇུག་ངོ་བོ་ཉིད་སྐུ་གཞི་ལ་རྫོགས། དོན་གྱི་འོད་གསལ་ཟུང་འཇུག་གི་ལྷ་སྐུར་ལྡང་བའི་སྨིན་བྱེད་དུ་འགྱུར་རོ། །མངོན་བྱང་བཞི་པ་ནི། སྦྱང་བྱ་བཙས་ནས་དབང་པོ་ཡུལ་ལ་སད་དེ་སྣ་ཚོགས་སུ་འཛིན་པའི་དངོས་པོ་ལ་ལོངས་སྤྱོད་པའི་ཞེན་པ་དག །སྦྱོང་བྱེད་ལྷ་མངལ་འབྱིན་གྱི་ས་བོན་སྤྲོ་བའམ་གནས་གསུམ་ལ་སོགས་པར་ཡི་གེ་བཀོད་དེ་རྒྱས་གདབ་པ་ལའང་སྦྱར་དུ་རུང་བར་གསུངས་ལ། འདིས་ལྷུན་གྱིས་གྲུབ་པའི་ཕྲིན་ལས་གཞི་ལ་རྫོགས། རྫོགས་རིམ་ཟུང་འཇུག་གི་ལྷ་སྐུར་ལྡང་ནས་འདོད་ཡོན་སྣང་བ་ཞེན་མེད་དུ་རོལ་པས་རིག་པའི་རྒྱན་དུ་འཆར་བའི་སྨིན་བྱེད་དུ་འགྱུར་རོ། །དེ་ནས་འཁོར་གྱི་ལྷ་ཚོགས་སྤྲོ་བ་སོགས་དངོས་གཞིའི་རིམ་པ་ལྷག་མ་དང་རྗེས་རྣམས་རང་རང་གི་གཞུང་ལྟར་རོ། །དེ་ལ་ལྷ་སྐུ་ཕྱག་རྒྱ་ཆེན་པོ་གསལ་བ་ནི། དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེའི་ངོ་བོ་ཡིན་ལ། ས་བོན་ཡིག་འབྲུ་བསྒོམ་པ་གསུང་རྡོ་རྗེ་དང༌། ཐུགས་རྡོ་རྗེའི་ངོ་བོ་ཉིད་ནི། ཕྱག་མཚན་ཡིག་འབྲུས་མཚན་པ་ཉིད་དུ་སྦྱོར་བ་ལ་བཤད་དོ། །འདིའི་བསྒོམ་ཚུལ་ནི་ཏིང་འཛིན་གསུམ་ཡན་སྔོན་དུ་སོང་ནས། སྣང་སྟོང་གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་རྡོ་རྗེ་སོགས་བསྒོམས་པས། མངལ་དུ་ཁམས་དཀར་དམར་ཚོགས་པ་ལ་དྲི་ཟའི་རྣམ་ཤེས་ཞུགས་པ་སྦྱོང༌། ཕྱག་མཚན་ཡི་གེར་གནས་འགྱུར་བའི་གསུང་ཨཱཿསོགས་ཡིག་འབྲུ་བསྒོམས་པས་ཁུ་ཁྲག་སེམས་གསུམ་འདྲེས་པའི་གནས་སྐབས་ལྔ་སྦྱོང༌། དེ་སྤྲོ་བསྡུས་སྐུ་ཡོངས་རྫོགས་བསྒོམ། དབང་པོ་དང་ཡན་ལག་ཐམས་ཅད་རྫོགས་པའི་གནས་སྐབས་སྦྱོང་བ་སྟེ། འདི་ལ་རྡོ་རྗེའི་ཆོ་ག་གསུམ་ཞེས་ཕ་རྒྱུད་སྤྱིའི་ལུགས་སོ། །དེ་ལ་མངལ་ཞུགས་ཀྱི་རིམ་པ་དང་ལམ་དང་འབྲས་བུའི་ཆོས་མཐུན་ཚུལ་བར་དོར་ལོངས་སྐུར་མི་ལྡང་བའམ་གཞན་དོན་སྤྲུལ་སྐུ་ལམ་འཁྱེར་བར་མ་དོ་ནས་སེམས་བསྐྱེད་དང་ལྡན་པས་ལུས་རྟེན་འཚོལ་བ་ཚོགས་ཀྱི་ལམ་དང༌། ཆོས་ལྡན་ལུས་རྟེན་ཐོབ་པའི་མངལ་སྒོ་བདམས་ནས་མའི་མངལ་དུ་རྣམ་ཤེས་ཧཱུྃ་ཡིག་ལ་སོགས་པར་འཇུག་པ་སྦྱོར་ལམ་སྟེ། ལྷུམས་སུ་ཞུགས་དུས་ཀྱི་ཁུ་བ་རྡུལ་རླུང་སེམས་འདྲེས་པའི་ཆ་སྟེ་བྱང་ཆུབ་ལྔ་པོ་མེར་ནུར་སོགས་གནས་སྐབས་ལྔའི་རིམ་པས་བྱེད་ལས་རང་རྒྱུད་པ་རྣམས་སྦྱོང་བ་མཐོང་སྒོམ་གྱི་ལམ་དང༌། དེའི་ཚེ་ཟླ་བ་བཅུའི་ཡུན་ནི་ས་བཅུ་དང་རབ་སྦྱར་ནས། བཙའ་བ་ན་ལྷག་པའི་ལྷ་གང་ཡིན་པ་ལྟར་བཞེངས་པ་མི་སློབ་པའི་ལམ་གྱུར་ནས། ཟུང་འཇུག་སྐྱེ་བ་སྤྲུལ་པའི་སྐུ་འགྲུབ་ཚུལ་ཀློང་གསལ་ལས། མངལ་ཞུགས་བྱང་ཆུབ་རྣམ་ལྔ་སྟེ། །ཟླ་བ་བཅུ་ནི་ས་བཅུའི་ཚུལ། །སྐྱེ་བ་རང་བཞིན་སྤྲུལ་པའི་སྐུ། །ལྷུན་གྲུབ་སྐུ་གསུམ་བདག་ཉིད་དོ། །ཞེས་སོ། །དེ་ཡང་བར་དོར་ལུས་རྟེན་ཚོལ་བ་དང༌། ཚོགས་ལམ་དུ་ཐོས་བསམ་གྱིས་ལམ་ཡང་དག་ཚོལ་བ་གཉིས་མཚུངས་ཤིང༌། རྣམ་ཤེས་མངལ་ནས་ཕྱིར་མི་ལྡོག་པ་སྦྱོར་ལམ་རིགས་ངེས་པ་ཐོབ་པ་དང་མཚུངས། རྣམ་ཤེས་ཁུ་ཁྲག་སོགས་འདྲེས་པའི་མིང་གཟུགས་ཕུང་ལྔ་ཚོགས་པ་ཚང་བ་ནི། བདག་མེད་རྟོགས་པ་ཚང་བར་རྙེད་པ་དང་མཚུངས་པའོ། །མེར་ནུར་སོགས་གནས་སྐབས་ལྔའི་རིམ་པས་ཟླ་བཅུ་གོང་དུ་འཕེལ་བ་ནི། སྒོམ་ལམ་དུ་རྟོགས་པ་གོང་འཕེལ་གྱིས་རིམ་པས་ས་བཅུ་བགྲོད་པ་དང་མཚུངས། ལུས་ཡོངས་སུ་རྫོགས་ཏེ་བཙས་ནས་དབང་ཡུལ་ཚོགས་དྲུག་ལ་དབང་བསྒྱུར་བ་མི་སློབ་ལམ་དུ་རྟོགས་པ་ཡོངས་སུ་རྫོགས་ཏེ། ཤེས་བྱ་ཐམས་ཅད་མཁྱེན་པའི་ཡེ་ཤེས་སད་དེ་གདུལ་བྱ་འགྲོ་དྲུག་གི་དོན་ལ་མངའ་དབང་བསྒྱུར་བ་དང་ཆོས་མཚུངས་པ་ཡིན་ནོ། །མངོན་བྱང་དང་པོ་རྣམ་སྣང་གི་ས་བོན་ཨཱ་ལི་སོགས་ཟླ་བའི་དཀྱིལ་འཁོར་དུ་མེ་ལོང་གི་གཟུགས་བརྙན་ལྟར་བསྒོམ་པ་ནི་རྣམ་པ་ལམ་བྱེད། མེ་ལོང་ཡེ་ཤེས་སུ་མོས་པ་ནི་མོས་པ། འབྲས་བུ་ཆོས་སྐུ། ཚོགས་གཉིས་བྱིན་རླབས་ལམ་བྱེད། སྦྱང་བྱ་གཟུགས་ཕུང༌། ས་ཁམས། ལུས། ཀུན་གཞིའི་རྣམ་ཤེས། གཏི་མུག །མངལ་སྐྱེས་ཀྱི་ཁུ་བ་སྦྱོང༌། དྲོད་གཤེར་སྐྱེས་ཀྱི་གཤེར་ཏེ་རླན་གྱི་ཆ་སྦྱོང༌། སྒོང་སྐྱེས་ཀྱི་ཕ་དང༌། རྫུས་སྐྱེས་ཀྱི་སྟོང་པའི་ཆ་རྣམས་སྦྱོང་བའོ། །དེ་བཞིན་དུ་མངོན་བྱང་གཉིས་པ་རིན་འབྱུང་གི་ངོ་བོ་ཀཱ་ལི་ལས་བྱུང་བའི་ཉི་མའི་དཀྱིལ་འཁོར་དུ་བསྒོམ་པ་ཡང་རྣམ་པ་ལམ་བྱེད། མངོན་བྱང་དང་པོ་འདི་གཉིས་སྐབས་སུ་མཚན་བཟང་ས་བོན་ཨཱ་ལི་དང༌། དཔེ་བྱད་ཀྱི་ས་བོན་ཀཱ་ལིའི་ཕྲེང་བ་ཉིས་རིམ་རེ་ཟླ་ཉི་སོ་སོའི་ཁོང་སེང་དུ་བསྒོམ་པར་གསུངས། ཆོས་རྣམས་མཉམ་ཉིད་དུ་རྟོགས་པའི་ཡེ་ཤེས་སུ་མོས་པ་ནི་རྒྱུ་མོས་པ་ལམ་བྱེད། སེམས་ཅན་དང་སངས་རྒྱས་རོ་གཅིག་ཏུ་ཐུགས་སུ་ཆུད་པའི་ཡེ་ཤེས་སྒྲིབ་མེད་དུ་གསལ་བ་ནི་འབྲས་བུ་ལམ་བྱེད་དོ། །སྦྱང་བྱ་ཚོར་ཕུང་མེ་ཁམས་ངག་ཉོན་ཡིད་ང་རྒྱལ་མངལ་སྐྱེས་ཀྱི་རྡུལ་དང༌། དྲོད་གཤེར་སྐྱེས་ཀྱི་དྲོད། སྒོང་སྐྱེས་ཀྱི་མ་དང༌། རྫུས་སྐྱེས་ཀྱི་གསལ་བའི་ཆ་རྣམས་སྦྱོང་ངོ༌། །མངོན་བྱང་གསུམ་པ་འོད་དཔག་མེད་ཀྱི་ས་བོན་ཕྱག་མཚན་དང་བཅས་བསྒོམ་པ་རྣམ་པ་ལ་མ་བྱེད། ཆོས་ཀུན་མ་འདྲེས་པར་རྟོགས་པ་མོས་པ་ལམ་བྱེད། ཆོས་ཀུན་མ་བསྒྲིབས་པར་གསལ་མཁྱེན་སོ་སོར་རྟོགས་པ་འབྲས་བུ་ལམ་བྱེད་དོ། །སྦྱང་བྱ་འདུ་ཤེས་ཕུང་པོ། ཆུ་ཁམས། ཡིད། ཡིད་ཤེས། འདོད་ཆགས། མངལ་སྐྱེས་ཀྱི་ཁུ་རྡུལ་གཉིས་བར་རྣམ་ཤེས་ཞུགས་པ་དང༌། སྐྱེ་གནས་བཞི་པོའི་བར་དོའི་རྣམ་ཤེས་སྐྱེ་གནས་སུ་ཞུགས་པ་སྦྱོང་བའོ། །མངོན་བྱང་བཞི་པ་དོན་གྲུབ་ཀྱི་ངོ་བོ་ཟླ་ཉི་ཕྱག་མཚན་ཏེ་རྣམ་པ་གསུམ་པོ་གཅིག་ཏུ་འདྲེས་པར་བསྒོམ་པ་ནི་རྣམ་པ། དེའི་ངོ་བོ་ཡེ་ཤེས་སུ་མོས་པ། འབྲས་བུ་བྱ་གྲུབ་ཡེ་ཤེས། སྦྱང་བྱ་འདུ་བྱེད་ཕུང་པོ། །རླུང་ཁམས། སྒོ་གསུམ་གྱི་བྱ་བ་སྒོ་ལྔའི་རྣམ་ཤེས། ཕྲག་དོག་མངལ་སྐྱེས་དང་སྒོང་སྐྱེས་མཚོན་ཁུ་རྡུལ་སེམས་གསུམ་རོ་གཅིག་འདྲེས་པ་དང༌། དྲོད་གཤེར་སྐྱེས་ཀྱི་དྲོད་གཤེར་གཉིས་དང་རྣམ་ཤེས་དང༌། རྫུས་སྐྱེས་ཀྱི་གསལ་ལ་སྟོང་པའི་ཆ་ཙམ་དང༌། བར་སྲིད་རྣམ་ཤེས་འདྲེས་པའི་ཆ་རྣམས་སྦྱོང་བ་ཡིན་ནོ། །མངོན་བྱང་ལྔ་པ་མི་བསྐྱོད་པའི་ངོ་བོ་ཧེ་རུ་ཀ་ཡབ་ཡུམ་གྱི་སྐུ་རུ་བསྐྱེད་ཅིང་གྲུབ་པ་ནི་རྣམ་པ་ལམ་བྱེད་དང༌། ཡོན་ཏན་ཐམས་ཅད་ཆོས་དབྱིངས་སུ་མོས་པ། འབྲས་བུ་ཆོས་དབྱིངས་ཡེ་ཤེས། སྦྱང་བྱ་རྣམ་ཤེས་ཕུང་པོ་དང༌། མཁའ་ཁམས་དང༌། སྒོ་གསུམ་ཆ་མཉམ་བག་ཆགས་དང༌། ཚོགས་བརྒྱད་དུ་འཛིན་པའི་ཆ་དང༌། ཞེ་སྡང་དང༌། སྐྱེ་གནས་བཞི་པོའི་རང་རང་གི་ཡན་ལག་དང༌། ཉིང་ལག་དང༌། སྐྱེ་མཆེད་ཐམས་ཅད་ཡོངས་སུ་རྫོགས་ནས། རེག་པའི་ཡུལ་གཟུགས་སོགས་ལ་དབང་པོ་མངོན་སུམ་དུ་སད་པ་ཡི་འཁོར་བའི་འཁྲུལ་སྣང་གི་རྣམ་པ་ཆ་དང་བཅས་པ་སྦྱོང་བ་ཡིན་ནོ། །དེ་ལྟར་ཁམས་ལྔ་དང༌། ཕུང་པོ་ལྔ་དང༌། རྣམ་པར་ཤེས་པའི་ཚོགས་བརྒྱད་ཉོན་མོངས་དང་བཅས་པའི་ཚོགས་སྦྱང་ཞིང༌། གནས་སུ་དག་པ་གདན་གསུམ་ཚང་བའི་ལྷ་རུ་རྫོགས་པ་ནི། མཚན་དཔེའི་རང་བཞིན་ཕན་པ་རྒྱ་ཆེར་འགྲུབ་པའི་མྱ་ངན་ལས་འདས་པ་དང༌། ཡོན་ཏན་དང་ཡེ་ཤེས་མཐར་ཕྱིན་པའི་བཞུགས་ཚུལ་མཐུན་པ་ལམ་དུ་བྱེད་པའི་ཚུལ་ནི། རྒྱུ་རྡོ་རྗེ་འཛིན་པ་ཡབ་ཡུམ་འོད་དུ་ཞུ་ནས་ཐིག་ལེར་གྱུར་པ་ལས། འཁོར་གྱི་ལྷ་མོས་ཞུ་བ་གླུས་བསྐུལ་ཏེ་སྒྲ་ཡི་རྐྱེན་གྱིས་འབྲས་བུའི་ཧེ་རུ་ཀར་བཞེངས་པ་དང༌། དོན་གཉིས་སྒྲུབ་པའི་ཕྲིན་ལས་སོགས་འཇུག་པ་ཉིད་དོ། །སྦྱང་བྱ་སྲིད་པའི་རང་བཞིན་ཁུ་རྡུལ་རླུང་གསུམ་སེམས་དང་བཅས་པའི་ཆ་རྣམ་པར་དག་པ་རྒྱལ་བའི་བཞུགས་ཚུལ་དང་མཐུན་པའི་མོས་པ་ལམ་བྱེད་བསྒོམས་པས། འབྲས་བུ་སྐུ་གསུང་ཐུགས་ཡོན་ཏན་ཕྲིན་ལས་ཏེ་འབྲས་ཆོས་ལྔ་དང༌། ཡེ་ཤེས་ལྔའི་ཡོན་ཏན་ཐམས་ཅད་གཞི་ལ་རྫོགས། དག་རྫོགས་དེ་གཉིས་ཀ་སྣང་བ་དང༌། མཆེད་པ་དང༌། ཉེར་ཐོབ་དང༌། འོད་གསལ་དང༌། ཟུང་འཇུག་ལ་སོགས་པས་རྫོགས་རིམ་སྨིན་བྱེད་དུ་འགྱུར་བ་ཡིན་ནོ། །ལམ་བྱེད་ཀྱི་མཚན་དཔེ་སོགས། དྲོད་གཤེར་སྐྱེས་ནི་དེ་གཉིས་པོ་ལྷན་དུ་འདུས་པ་ལ་བར་དོའི་རྣམ་ཤེས་ཞུགས་པའི་མོད་ལ། མངལ་སྐྱེས་ལྟར་ཡུན་རིང་མ་དགོས་པར་གཟུགས་འགྲུབ་པ་བཞིན། ལྷ་ཡི་སྙིང་པོ་བརྗོད་པས་མཚན་དང་མངོན་རྟོགས་ཀྱི་རྣམ་པ་དྲན་ཙམ་ལས། ཤེས་རབ་ཀྱི་དབྱིངས་སྟོང་ཉིད་ཀུན་ཏུ་བཟང་མོའི་ཀློང་ལས་ཀུན་རྫོབ་བདེན་པའི་ཆ་རྟེན་དང་བརྟེན་པའི་ལྷའི་ཕྱག་རྒྱ་ཡོངས་སུ་རྫོགས་པའི་བསྐྱེད་རིམ་ཚང་བར་བསྒོམ་པ་ནི་སྣང་བ་བདེན་མེད་སྒྱུ་མའི་བསྐྱེད་རིམ་ཞེས་བྱའོ། །འདི་ལྟར་སེམས་ཅན་བརྫུས་ཏེ་སྐྱེ་བ་རྣམས་ནི་གསལ་སྟོང་གི་ཆ་ལ་རྣམ་ཤེས་ཞུགས་པ་ཙམ་གྱིས་ལུས་ཡོངས་རྫོགས་གྲུབ་པ་ནི་དྲོད་གཤེར་སྐྱེས་ལས་ཀྱང་མྱུར་བ་ལྟར། སྐད་ཅིག་གིས་ལྟ་བ་གོམས་པའི་ངང་ལས་སྙིང་པོ་ཙམ་དྲན་པའི་མོད་ལ་དཀྱིལ་འཁོར་ཡོངས་སུ་རྫོགས་ཏེ། མིང་ངམ་སྙིང་པོ་བརྗོད་པ་དང་ལྷའི་གཟུགས་ཀྱི་རྣམ་པ་ལ། རིམ་གྱིས་སེམས་གཏད་པ་སོགས་ཀྱི་སྤྲོས་པ་ལ་མ་བརྟེན་པར་ཆུ་ལས་ཉ་འཕར་བ་བཞིན་རྟེན་དང་བརྟེན་པར་བཅས་པ་ཐམས་ཅད་ཝལ་གྱིས་གསལ། དཔེར་ན་གང་ཟག་གཅིག་ལའང་བྱིས་པ། དར་མ། རྒན་པོའི་གནས་སྐབས་གསུམ་བཞིན་བསྐྱེད་རིམ་གྱི་བསྒོམ་ཚུལ་སྐྱེ་གནས་བཞི་སྦྱོང་བྱེད་དུ་བསྟན་པ་བཞི་པོའང་དང་པོའི་ལས་ཅན་གསར་དུ་བསྐྱེད་རིམ་ལ་གོམས་སུ་འཇུག་པ་རྣམས་ཀྱིས། སྒོང་སྐྱེས་སྦྱོང་བའི་བསྐྱེད་རིམ་གཙོ་བོར་བསྒོམ་པ་དང༌། རིམ་བཞིན་གོམས་པ་བརྟན་པ་ཡུད་ཙམ་ལ་རགས་པའི་དཀྱིལ་འཁོར་དུ་བྱེད་ནུས་པའི་བར། མངལ་སྐྱེས་སྦྱོང་བའི་བསྐྱེད་རིམ་དང༌། བརྟན་པ་ཆེ་བའི་དུས་སྤྱན་དཀར་ནག་ཚུན་ཆོད་གསལ་སྣང་ཐོབ་པ་ལ་དྲོད་སྐྱེས་སྦྱོང་བྱེད། ཤིན་ཏུ་བརྟན་ཏེ་དཀྱིལ་འཁོར་ཡོངས་རྫོགས་ཡུད་ཙམ་ལ་རྫོགས་ཚེ་རྫུས་སྐྱེས་སྦྱོང་བྱེད་བསྒོམ་པའི་གོམས་ཆ་ཆེ་ཆུང་གི་ཏིང་འཛིན་གྱི་མཐུ་དང་མཐུན་པར་སློབ་བོ། །གསང་སྔགས་ནང་པའི་བསྐྱེད་རིམ་ཀུན་ཀྱང་ཏིང་འཛིན་རྣམ་གསུམ་དགོས་པས་དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི། ཟབ་མོ་སྟོང་ཉིད་ཀྱི་གནས་ལུགས་སྤྲོས་པའི་མཐའ་ཀུན་དང་བྲལ་བའི་རང་བཞིན་ཤེས་པའི་ཤེས་རབ་ཀྱི་དོན་ལ་མཉམ་པར་འཇོག་པ་ཡིན་པས། ཐོག་མར་གཞི་རང་བཞིན་ལྷུན་གྲུབ་ཀྱི་གནས་ལུགས་དེ་བླ་མའི་མན་ངག་དབང་དུས་སུ་ངོ་འཕྲོད་དེ་བྱིན་རླབས་འཕོ་བ་སོགས་སྟོབས་ཀྱིས་ཤེས་ན་སྨོས་ཅི་དགོས། གཞན་ཐོས་བསམ་ལ་བརྟེན་པའི་ངེས་ཤེས་རྙེད་པས་ཆོས་རྣམས་བསམ་བྲལ་དེ་ཁོ་ན་ཉིད་གཟུགས་བརྙན་ཙམ་སྣང་བ་དེ་བཞིན་ཉིད་དེའི་གདངས། ཀུན་ཏུ་སྣང་བའི་ཏིང་ངེ་འཛིན་ཀུན་སྣང་སྙིང་རྗེ་ཆེན་པོར་ཤར་བའི་འཕེན་པས་རྒྱུའི་ཏིང་ངེ་འཛིན་གདན་གསུམ་ལྷའི་དཀྱིལ་འཁོར་དུ་བསྒོམ་པའི་བསྐྱེད་རིམ་སྐྱོན་མེད་དུ་ཤར་བ་ཐབས་ཀྱི་ལམ་ཐམས་ཅད་ཀྱི་ནང་ནས་མཆོག་ཏུ་གྱུར་པའི་སྔགས་ཀྱི་ཐབས་མ་ནོར་བ་ཡིན་ཞིང༌། དཀྱིལ་འཁོར་གང་རུང་སྒྱུ་མ་ལྟར་གསལ་ཏེ། དཀྱིལ་འཁོར་གྱི་ལྷ་ཚོགས་རྒྱན་ཆ་ཐམས་ཅད་ཡོངས་རྫོགས་མ་འདྲེས་པར་གསལ་ཡང་སྣང་དུས་ཉིད་ནས་རང་བཞིན་མ་གྲུབ་པ་ཟུང་འཇུག་ཆེན་པོར་ལམ་གྱིས་གསལ་བཏབ་པ་ཏིང་ངེ་འཛིན་གྱི་གཟེར་ནི། སྐྱེ་གནས་བཞི་གང་རུང་གི་བག་ཆགས་སྦྱོང་བ་དང་འབྲེལ་བའི་ཕྱི་སྣོད་གཞལ་ཡས་ཁང་དང༌། ནང་བཅུད་ལྷ་དང་ལྷ་མོ་སྒྱུ་མ་ལྟ་བུར་གསལ་ཏེ། སྣང་ཆ་ནས་དབུས་ཀྱི་གཙོ་བོ་ནས་མེ་རིའི་བར་ཐམས་ཅད་མ་འདྲེས་པར་དེ་དག་གི་རི་མོ་ཡན་ཆད་ཡོངས་རྫོགས་གསལ་ཡང༌། སྣང་དུས་ཉིད་ནས་རང་བཞིན་མ་གྲུབ་པ་ཟུང་འཇུག་ཆེན་པོར་ལམ་གྱིས་གསལ་བཏབ་ལ། ཡེ་ཤེས་ལྔའི་དབང་བསྐུར་ཞིང་སྐུ་གསུང་ཐུགས་ཀྱི་རྒྱས་གདབ་པ་སོགས་ཡན་ལག་ཚང་བར་བྱེད་པ་ཡིན་ཏེ། དེ་ཡང་ཞི་བ་ཡིན་ན་ཚུལ་དགུ་དང༌། ཁྲོ་བོ་ཡིན་ན་གར་གྱི་ཉམས་དགུ་དང་ལྡན་པ་སྟེ། ཞི་ཚུལ་དགུ་ནི། སྐུ་དང་ཞལ་ཕྱག་སོགས་གྱོང་ཁེངས་ཀྱི་རྣམ་པ་ཤིང་ལ་སོགས་པ་ལྟ་བུ་མ་ཡིན་པས་མཉེན་པ། ཕྲ་སྦོམ་སོགས་རིམ་པར་སྐབས་ཕྱེད་པས་ལྕུག་པ། སྐུ་ཤ་ལྷོད་པོར་མ་གྱུར་པས་འཁྲིལ་བག་ཆགས་པ། ཚིགས་མཚམས་སོགས་འཕྲུལ་ལྡེམ་དང་ལྡན་པས་ལྡེམ་པ། སྐུ་ཤ་རྒྱས་ཤིང་པགས་པ་སྲབ་པས་གཞོན་ཚུལ་ཅན། རྒྱན་དང་སྐུ་མདོག་མཚན་སོགས་ཁ་དོག་མ་འདྲེས་པས་གསལ་བ། དེ་དག་ཀྱང་མུ་མེད་པའི་འོད་ཟེར་འཕྲོ་བ་དང་ལྡན་པས་འཚེར་བ། སྐུ་སྐྱེས་བུ་ཆེན་པོའི་མཚན་དང་ལྡན་པས་བརྗིད་བག་གི་མཛེས་པས་ལྷུན་སྡུག་པ། ཐམས་ཅད་ཟིལ་གྱིས་གནོན་པ་གཟི་བྱིན་དང་ལྡན་པ་སྟེ་དགུའོ། ༈ གར་གྱི་ཉམས་དགུ་ནི། འགྲོ་ལ་སྙིང་རྗེས་ཆགས་ཉམས་ཀྱིས་སྒེག་མཛེས་པ་པ། ཁྲོ་ཉམས་ཀྱི་དཔའ་ཟིལ་ཆེ་བ་བ། རྨོངས་ཉམས་ཀྱི་མི་སྡུག་པ་སྟེ་སྐུའི་ཉམས་གསུམ། ཧ་ཧ་ཧཱུྃ་ཧཱུྃ་སོགས་བཞད་པའི་གད་མོ་འབྱིན་པས་དགོད་པ། བསྡིག་པའི་ང་རོ་སྒྲོག་པས་གཤེ་བ། སྒྲ་གདངས་ཆེ་ཞིང་བཟོད་པར་དཀའ་བས་དྲག་ཤུལ་ཏེ་གསུང་གི་ཉམས་གསུམ་དང༌། རྨོངས་པའི་འགྲོ་ཁམས་རྗེས་སུ་འཛིན་པའི་སྙིང་རྗེ། མ་རུངས་པའི་སེམས་ཅན་ཁྲོ་བས་འདུལ་བའི་རྔམ་བུ་གཡང་སར་ལྷུང་བ་ལ་མས་ནན་གྱིས་ལྡོག་པ་ལྟར་པ། བཟང་ངན་ཐམས་ཅད་ཆོས་ཉིད་དུ་རོ་མཉམ་པའི་ཞི་བ་སྟེ་ཐུགས་ཀྱི་ཉམས་གསུམ་དང་བཅས་དགུའོ། །དེ་ལྟ་བུ་ལྷ་ཞི་བ་ལ་ལོངས་སྤྱོད་རྫོགས་སྐུའི་རྒྱན་ཆས་དར་མཐིང་ཁྲའི་ཟི་ལྡིར། སྣ་ལྔའི་ཅོད་པན། གར་གྱི་ཕུ་དུང༌། དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས། ཚིགས་གུའི་སྨད་དཀྲིས་ཏེ་ཆས་གོས་ལྔ་དང༌། རིན་པོ་ཆེའི་དབུ་རྒྱན། སྙན་རྒྱན། མགུལ་རྒྱན། དཔུང་རྒྱན། དོ་ཤལ། སེ་མོ་དོ། ཕྱག་གདུབ། ཞབས་གདུབ་སྟེ་རྒྱན་བརྒྱད་དང་བཅས་པས་བཅུ་གསུམ་དང༌། སྤྲུལ་སྐུ་རྣམས་ལ་ཆོས་གོས་རྣམ་པ་གསུམ་ལ་སོགས་བརྒྱན་པ་དང༌། ༈ ཁྲོ་བོ་རྣམས་ལ། མི་ལྤགས་ཀྱི་གཡང་གཞི། གླང་ཆེན་གྱི་སྟོད་གཡོགས། སྟག་ལྤགས་ཀྱི་ཤམ་ཐབས་རྣམས་ཏེ་བགོ་བའི་གོས་གསུམ་དང༌། འདོགས་པའི་རྒྱན་གཉིས་ཏེ། ཐོད་སྐམ་ལྔའི་དབུ་རྒྱན། རྙིད་པའི་སེ་རལ་ཁ་ཞེས་པའང་སྣང༌། རློན་པ་ཁྲག་འཛག་པ་ལྔ་བཅུའི་དོ་ཤལ། ཐོད་ཚལ་གྱི་དཔུང་རྒྱན། ཕྱག་ཞབས་ཀྱི་གདུ་བུ་སོགས་སོ། །ཀླུ་རྒྱལ་རིགས་དཀར་པོའི་སྐྲ་ཆིངས། རྗེ་རིགས་སེར་པོའི་སྙན་ཆ། བྲམ་ཟེའི་རིགས་དམར་པོའི་མགུལ་ཆུ། དམངས་རིགས་ལྗང་ཁུའི་ཕྱག་ཞབས་ཀྱི་གདུ་བུ། གདོལ་པའི་རིགས་ནག་པོའི་དོ་ཤལ་ཏེ་ཐམས་ཅད་དུག་ལྔ་གནས་སུ་དག་པའི་གདུག་པ་སྦྲུལ་གྱི་རྣམ་པ་ཅན་གྱི་ཆུན་པོ་ལྔའོ། །དེ་ལྟར་ཐོད་སྦྲུལ་གདགས་པའི་རྒྱན་གཉིས་དང༌། ཐལ་ཆེན་གྱི་ཚོམ་བུ། རཀྟའི་ཐིག་ལེ། ཞག་གི་ཟོ་རིས་ཏེ་བྱུགས་པའི་རྩི་གསུམ་མོ། །དེ་ལྟར་བགོ་བའི་གོས་གསུམ། འདོགས་པའི་རྒྱན་གཉིས། བྱུགས་པའི་རྩི་གསུམ་སྟེ་དུར་ཁྲོད་ཀྱི་ཆས་བརྒྱད་དུ་གྲགས་སོ། །གཞན་ཡང་གཞལ་ཡས་ཁང་གི་སྟེང་རྒྱན་ལོགས་རྒྱན་སོགས་བཀོད་པའི་རྣམ་པ་ཐམས་ཅད་དང་བཅས་པ་གསལ་བརྟན་ཚད་བརྒྱད་དང་ལྡན་པར་བསྒོམ་སྟེ། གསལ་བའི་ཚད་བཞི་ནི། སྤྱན་དཀར་ནག་ཚུན་ཆད་མ་འདྲེས་པར་གསལ་བས་སལ་ལེ། རིག་པའི་གསལ་ངར་བྲལ་བའི་བྱིང་ཉམས་ཅན་མ་ཡིན་པར་གསལ་སྟོང་སེང་བག་དང་བཅས་པའི་རིག་པའི་ངར་དང་ལྡན་པས་སེང་ངེ༌། སེམས་མེད་བེམ་པོའི་རྣམ་པ་འཇའ་ཚོན་ལྟ་བུ་མ་ཡིན་པར་བ་སྤུའི་ཁུང་བུ་དང་སྐྲའི་ཉག་མ་ཚུན་ཆད་རྣམས་ཐམས་ཅད་མཁྱེན་པའི་ཡེ་ཤེས་ཀྱིས་ཟིན་པས་དབང་ཤེས་དྭངས་པའི་ཡོན་ཏན་བརྒྱ་ཕྲག་ཏུ་འཆར་ཞིང་བཀྲ་ཧྲིག་གེར་བཞུགས་པས་ལྷག་གེ །དེ་ལྟ་བུའི་སྐུ་དེ་ཡང་དེ་ལྟར་ཡིན་ནོ་དང༌། ཡོད་དོ་ཙམ་གྱི་རྗེས་དཔག་གི་བློ་རྟོག་མ་ཡིན་པར་ཡིད་ངོར་མངོན་སུམ་ལྟ་བུར་འཆར་བས་ལྷང་ངེ་བ་སྟེ་བཞིའོ། །བརྟན་པའི་ཚད་བཞི་ནི། ལེ་ལོ་དང་བརྗེད་ངས་སོགས་ཀྱིས་མི་གཡོ། རབ་རིབ་དང་མོག་མོག་པོར་གྱུར་པ་སོགས་ཀྱིས་མི་འགྱུར། ཡུན་རིང་དུ་མཉམ་པར་བཞག་ཀྱང་རྣམ་རྟོག་ཕྲས་མོས་ཀྱང་མི་བརྫི་བས་མངོན་པར་མི་འགྱུར། སྐུ་མདོག་དང་ཞལ་ཕྱག་དང༌། བྱོན་བཞུགས་དང་འོད་ཟེར་གྱི་སྤྲོ་བསྡུ་སོགས་ཇི་ལྟར་བསྒོམ་པ་དེ་ལྟར་འབྱུང་བ་སྟེ་བཞིའོ། །དེ་ཡང་རྣམ་པར་གསལ་བ་ཞེས་ཀྱང་བཤད་དོ། །དེ་ལྟར་ཡང་ཡང་གོམས་པས་ཉམས་ལྔ་མཐར་ཕྱིན་ཏེ་ཡུལ་གསུམ་གྱད་དུ་གྱུར་པ་ན་གྲུབ་པ་ཡིན་ནོ། །དེ་ལ་ཡུལ་གསུམ་གང་ཞེ་ན། དཔལ་ཆེན་ཞལ་ལུང་ལས། ཡེ་ཤེས་ལྔ་ཡི་ཕྱག་རྒྱ་ཀུན། །དང་པོ་ཡིད་ཀྱི་ཡུལ་དུ་གསལ། །སེམས་ཉིད་ཤིན་ཏུ་སྦྱངས་པའི་མཐར། །རང་བཞིན་དབང་པོའི་ཡུལ་དུ་གསལ། །མཐར་ནི་བདེན་གཉིས་དབྱེར་མེད་ཀྱི། །ལུས་སེམས་ཤིན་སྦྱངས་ཐོབ་པའི་ལྷ། །ལུས་ཀྱི་ཡུལ་དུ་མངོན་པར་གསལ། །ཞེས་པ་ལྟར་རོ། །དག་དྲན་སྦྱར་བ་སོགས་ཀྱང་ཤེས་པར་བྱའོ། །སྔགས་ཀྱི་གཟེར་ནི་དེ་བཞིན་གཤེགས་པ་ཐམས་ཅད་ཀྱི་གསུང་གི་གསང་བ་ཟབ་མོའི་སྙིང་པོ་བཟླས་པས་སྣང་ཡང་བརྗོད་བྲལ་སྟོང་པའི་རང་སྔགས་སྒྲ་གདངས་བཅས་པ་དང༌། རྡོར་བཟླས་ལམ་དུ་འབྱོང་བར་བྱེད་པ་དང༌། དགོངས་པའི་གཟེར་ནི་ཐབས་སྣང་ཆ་ལྷ་སྔགས་ཀྱི་རང་བཞིན་ཤེས་རབ་ཁྱད་པར་ཅན་དང༌། འཕྲོ་འདུའི་གཟེར་ལྷ་སྔགས་ཆོས་ཉིད་གསུམ་དང་འབྲེལ་བའི་ལམ་དག་པའོ། །དེ་ལས་འགལ་བའི་དམིགས་བཅས་བསྐྱེད་རིམ་ནི། མུ་སྟེགས་བྱེད་དང་གདོན་གྱི་རིགས་མཁའ་རྒྱུ་སོགས་ལའང་ཡོད་པར་བཤད་དེ། རྒྱུད་ལས། དགོངས་པ་མི་འགྱུར་གཟེར་མེད་ན། །དཔལ་ཆེན་འགྲུབ་ཀྱང་ཐུན་མོང་ལས། །མཆོག་མི་འགྲུབ་ཅིང་རུ་ཏྲར་གོལ། །ཞེས་སོ། །སྔགས་སུ་ཞུགས་པའི་གང་ཟག་དེས་བྱང་ཆུབ་སེམས་དཔའི་ལམ་མཚན་ཉིད་ཐེག་པ་ལས་བཤད་པའི་མཐོང་ལམ་རྣམ་པར་མི་རྟོག་པའི་ཡེ་ཤེས་དེ་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཅེས་གསར་རྙིང་གི་རྒྱུད་སྡེ་ཐམས་ཅད་ན་ཤིན་ཏུ་གྲགས་པ་དེ་ཉིད་མྱུར་དུ་མངོན་དུ་བྱེད་པའི་ཐབས་མ་ནོར་བ་ཡིན་ཏེ། གསང་སྔགས་ཀྱི་ལམ་ནི་ཐབས་མང་དཀའ་བ་མེད་པའི་ལམ། མཚན་ཉིད་ཐེག་པའི་ལམ་དཀའ་བ་སོགས་ལས་ཁྱད་པར་དུ་འཕགས་ལ། དེ་ཡང་བསྐྱེད་རིམ་གང་བསྒོམ་ཡང༌། ཕོ་བྲང་རྣམ་སྣང༌། རྗེས་ཆགས་རྡོ་རྗེ་འཆང༌། དབང་བསྐུར་མི་བསྐྱོད་པ། མཆོད་པ་དོན་གྲུབ། བསྟོད་པ་རིན་འབྱུང༌། བདུད་རྩི་མྱོང་བ་འོད་དཔག་མེད་དེ་ཡན་ལག་དྲུག་རྫོགས་སོགས་སྣང་ཆ་ཐམས་ཅད་ལྷ་སྐུར་གསལ་བའི་སྒོ་ནས་གཟུགས་སྐུ་ཕྲིན་ལས་དང་བཅས་ལམ་དུ་བྱས་པས་བསོད་ནམས་ཀྱི་ཚོགས་དང༌། དེ་ལ་རང་བཞིན་མ་གྲུབ་པར་ཤེས་པའི་སྒོ་ནས་ཆོས་སྐུ་ལམ་དུ་བྱས་པས་དམིགས་མེད་ཡེ་ཤེས་ཀྱི་ཚོགས་ཏེ། ཚོགས་གཉིས་ཉེ་རྒྱུར་བསྟེན་པའི་སྒོ་ནས་སམ་དབང་རྣོན་དག་དང༌། རྒྱུའི་ཐེག་པ་ལམ་ལྔ་དང་འབྲེལ་བའི་བསྐྱེད་པའི་རིམ་པ་ལ་གསལ་དག་བརྟན་པ་ཐོབ་སྟེ་འབྱུང་བའི་སྙིགས་མ་སྦྱང་བས་བོགས་ཐོན་ནས་ཚོགས་སྦྱོར་གྱི་ལམ་དུ་དྲོད་རྩེ་བཟོད་གསུམ་གྱི་ལམ་སྟེགས་མངོན་དུ་བྱས་ཏེ་ཆོས་མཆོག་ཆེན་པོར་རྣམ་སྨིན་རིག་འཛིན་མངོན་དུ་བྱས་པ་ནི་བསྙེན་པ། རྟེན་དེས་མཐོང་ལམ་དུ་ཐོག་མར་སློབ་པའི་ཟུང་འཇུག་གི་སྐུ་མངོན་དུ་བྱས་པ་ཚེ་དབང་རིག་འཛིན་བརྙེས་པ་ཉེ་བསྙེན། སྒོམ་ལམ་དུ་ཡི་དམ་ལྷ་དང་འདྲ་བའི་ཕྱག་རྒྱ་ཆེན་པོའི་རིག་འཛིན་མངོན་དུ་བྱས་ཏེ་དོན་གཉིས་མཉམ་དུ་སྒྲུབ་པ་ནི་སྒྲུབ་པ། མཐར་རང་དོན་རྩོལ་བ་ཆད་དེ་རྗེས་ཐོབ་དུ་དེ་བཞིན་གཤེགས་པ་དང་ཕྲིན་ལས་མཉམ་སྟེ། སྐུ་ལྔ་ལྷུན་གྲུབ་རྡོ་རྗེ་འཆང་གི་ཆ་ལུགས་འཛིན་ཏེ་སྤངས་རྟོགས་མཐར་ཕྱིན་པ་སྒྲུབ་པ་ཆེན་པོ་ལྷུན་གྲུབ་རིག་འཛིན་ཏེ། རིག་འཛིན་རྣམ་པ་བཞིའི་དག་མཉམ་རྫོགས་པའི་ཡོན་ཏན་གོང་ནས་གོང་དུ་ཐེམ་སྐས་བགྲོད་བཞིན་འཕེལ་བ་ཉིད་ལས་ངེས་པ་ལྔ་ལྡན་སོགས་སྐུ་ལྔའི་ཡོན་ཏན་ཐམས་ཅད་མཐར་ཕྱིན་ཏེ་འོག་མིན་ཞིང་དུ་རིང་པོར་མི་ཐོགས་པར་ཐབས་ཤེས་ཁྱད་པར་ཅན་གྱི་སྟོབས་ཀྱིས་མིག་འཕྲུལ་ལྟ་བུར་འགྲོ་བ་ཡིན་ནོ། །གཉིས་པ་ཤེས་རབ་གཙོ་ཆེ་བ་རྫོགས་པའི་རིམ་པ་ཉིད་བཤད་པ་ལའང༌། ཕ་རྒྱུད་གཤིན་རྗེ་གསང་འདུས་རྣམ་འབྱོར་ཆེན་པོའི་རྒྱུད་རྣམས་ལས་འབྱུང་བ་ལྔ་ཡི་རླུང་དབུ་མར་ཞུགས་ཏེ་རྣམ་པར་དག་པས། ཟབ་གསལ་ལམ་གསལ་སྟོང་རྣམ་པར་མི་རྟོག་པའི་ཡེ་ཤེས་བསྐྱེད་པར་བྱེད་དོ། །མ་རྒྱུད་ཡང་དག་ཕུར་པ། ཀུན་འདུས་རིག་པ། འཁོར་ལོ་སྡོམ་པ། དགྱེས་རྡོར་སོགས་རྣལ་འབྱོར་གྱི་རྒྱུད་རྣམས་ལས་ཁམས་བྱང་སེམས་ཐིག་ལེ་ལ་གཙོ་བོར་གནད་དུ་བསྣུན་ཏེ་ཞུ་བདེ་ཡི་ཡེ་ཤེས་བསྐྱེད་པའི་ཕྱིར། གཏུམ་མོ་འབར་འཛག་གི་སྦྱོར་བ་སོགས་རང་ལུས་ཐབས་ལྡན་དང༌། གཞན་ལུས་ཕྱག་རྒྱ་ལ་བསྟེན་ནས་དགའ་བཞིའི་ཡེ་ཤེས་བསྐྱེད་པ་གཞན་ལུས་ཐབས་ལྡན་གཉིས་ཀ་སྟོན། གཉིས་མེད་རྒྱུད་རྡོར་སེམས་སྒྱུ་འཕྲུལ་དྲྭ་བ། དུས་འཁོར། སངས་རྒྱས་མཉམ་སྦྱོར་སོགས་ལས་གསལ་དང་མི་རྟོག་པ་དང༌། བསམ་གྱིས་མི་ཁྱབ་པའི་ཡེ་ཤེས་གཅིག་དང་དུ་བྲལ་གྱི་ཐིག་ལེ་ཆེན་པོའི་འོད་གསལ་གཙོར་སྒོམ་པར་བྱེད་པ་ལས་ཟག་མེད་ཀྱི་ཏིང་འཛིན་སྐྱེའོ། །དེ་གསུམ་ལས་སྔ་མ་གཉིས་ནི་རླུང་དང་ཐིག་ལེའི་རྫོགས་རིམ་གཙོར་སྟོན་པ་སྣང་བཅས་དམིགས་པའི་ལམ། ཕྱི་མ་གཅིག་ནི་ཟུང་འཇུག་གི་ཡེ་ཤེས་གཙོ་བོར་སྟོན་པའི་རྫོགས་རིམ་སྣང་མེད་འོད་གསལ་ཏེ། དང་པོ་སྣང་བཅས་ཕྱོགས་ལ་ལྷ་ཡི་བདག་ཉིད་དུ་གཡོ་བ་མེད་པར་གནས་པས་ན་གནས་པ་རྩ་དང་ནི། ཁམས་གསུམ་ཐམས་ཅད་འདུ་བྱེད་པས་ན་གཡོ་བ་རླུང་ཞེས་བྱ་ལ། དེ་གཉིས་ཀའི་བརྟེན་པ་ལྟ་བུར་གྱུར་ཅིང་རླུང་གིས་གང་དུ་བཀོད་པའི་གནས་སུ་འགྲོ་འོང་བྱེད་པས་ན། བཀོད་པ་རང་བཞིན་དྲི་མ་དང་བྲལ་ཞིང་ཡོན་ཏན་ལྷུན་གྱིས་གྲུབ་པའི་བྱང་ཆུབ་སེམས། རྩ་རླུང་ཐིག་ལེ་རགས་པའི་རྣམ་པ་གསུམ་དུ་གནས་པ་ནི་རྟེན་ཁྱད་པར་ཅན་ཏེ། རྡོ་རྗེ་ཞེས་བྱ་བ་ནི་མི་ཕྱེད་པའི་དོན་ཏེ་སྐུ་གསུང་ཐུགས་གསུམ་མམ་སྐུ་གསུམ་གྱི་རང་བཞིན་དབྱེར་མི་ཕྱེད་པའོ། །ཕུང་པོ་ནི་དུ་མ་སྤུངས་པའི་དོན་ཏེ་རང་བཞིན་རྣམ་པར་དག་པའི་རྩལ་སྣང་གཟུགས་ལ་སོགས་པ་དུ་མ་འདུས་པའི་དོན་ནོ། །དེ་དག་རང་བྱུང་རིག་པའི་ཡེ་ཤེས་ཀྱི་བཞུགས་གནས་ཡིན་པས་གྲོང་ཞེས་བྱའོ། །དེས་ན་རྟེན་དེ་དག་ལ་གནད་དུ་བསྣུན་ན་བརྟེན་པ་སྐུ་གསུམ་གྱི་དགོངས་པ་ཚེ་འདི་ལ་མངོན་དུ་འགྱུར་བའི་ཐབས་རྨད་དུ་བྱུང་བའོ། །གླིང་གསུམ་དུ་སྐྱེས་པའི་མིའི་ལུས་རྟེན་ཐོབ་པ་རྣམས་བར་དོའི་རྣམ་ཤེས་དེ་མའི་མངལ་གནས་སུ་ཁུ་ཁྲག་གི་དབུས་སུ་ཞུགས་ཏེ། དེ་ཉིད་རྟེན་དུ་འཛིན་པའི་ཐོག་མ་རུ། རྩ་ཁམས་གྲུབ་པའི་ཚུལ་མིག་གཉིས་དང་ནི། ལྟེ་བའི་རྩ་མདུད་དེ་གསུམ་པོ་སྒྲོག་མདོ་ལྟར་ཆགས་ཤིང༌། དེ་ལས་སྣོད་ཀྱི་འཇིག་རྟེན་ཆགས་པའི་དུས་དྭངས་མ་རྣམས་དབུས་རི་རྒྱལ་ལྷུན་པོར་སོང་ནས་རིམ་གྱིས་གསེར་གྱི་རི་དང༌། སྙིགས་མ་རྣམས་གླིང་དང་ཁོར་ཡུག་སོགས་སུ་གྱུར་པ་དང་ཚུལ་མཐུན་པར། རིམ་པ་བཞིན་དུ་ལུས་བསྐྱེད་པའི་ཚུལ་ནི། དྭངས་མར་གྱུར་པ་ཡི་རྩ་དབུ་རྐྱང་རོ་གསུམ་ལུས་ཀྱི་དབུས་ན་ཀ་བ་ལྟ་བུར་གནས་པའི་ནང་ན་ཕྱི་རུ་ལུས་ངག་ཡིད་གསུམ། ནང་དུ་ཉོན་མོངས་དུག་གསུམ། གསང་བར་སྐུ་གསུང་ཐུགས་གསུམ་གནས་པ་དང༌། སྣང་བ་སོགས་ཀྱི་རྟེན་བྱེད་པའི་ཡི་གེ་གསུམ་གཙོ་འཁོར་ལྟ་བུར་གནས་ཏེ། དེ་ཡང་སོ་སོར་གནས་པའི་ཚུལ་རྒྱུད་དང་མན་ངག་རྣམས་ལ་མི་འདྲ་བ་སྣང་ན་ཡང༌། རྩ་གསུམ་པོའི་བྱེད་ལས་ཀྱིས་མཚོན་ན། རོ་མར་ཨོཾ། རྐྱང་མར་ཨཱཿ དབུ་མར་ཧཱུྃ་ཡིག་རྣམས་གནས་པར་བཤད་ཀྱང་ཆོག་པར་སྣང་ངོ༌། །དེ་ལ་དབུ་མ་ཞེས་པའི་དོན་གནས་ཚུལ་གྱི་དབང་དུ་བྱས་ན་དེ་ཉིད་དབུས་ན་ཡོད་པའི་ཕྱིར་དང༌། ཆོས་ཉིད་ཀྱི་དབང་དུ་བྱས་ན་ཡོད་མེད་གཉིས་ཀའི་མཐའ་དང་བྲལ་བས་དེ་སྐད་དོ། །རྩ་དེའི་ཡར་སྣ་ན། ཕ་ལས་ཐོབ་པའི་ཐིག་ལེ་དཀར་ཆ་ཐབས་ཀྱི་རང་བཞིན་ཧཾ་ཡིག་གི་རྣམ་པར་གནས་པ་དང༌། མར་སྣ་ན། མ་ལས་ཐོབ་པའི་ཐིག་ལེ་དམར་ཆ་ཤེས་རབ་ཀྱི་རང་བཞིན་ཨ་ཐུང་གི་རྣམ་པར་གནས་པ་གཉིས་པོ་རིམ་པ་བཞིན་སྤྱི་བོ་ཚངས་པའི་སྒོ་དང༌། གསང་བའི་གནས་གཉིས་ལ་ཟུག་པའི་བར་ན་གཉིས་མེད་ཀྱི་རང་བཞིན་ཀུན་གཞིའི་རྟེན་སྲོག་རླུང་གི་རྣམ་པར་གནས་ཏེ་ནམ་མཁའ་བཞིན་ནོ། །དེའི་གཡས་དང་གཡོན་ན་རིམ་བཞིན་རོ་མ་ཞེས་པ་རང་བཞིན་དུ་བཞག་ན་དོན་བྱེད་མི་ནུས་པས་རོ་དང་འདྲ་ཞིང་གནད་དུ་བསྣུན་ན་བདེ་བའི་རོ་མྱོང་བར་བྱེད་པའི་རྩ་དང༌། རྐྱང་མ་ཞེས་པ་རང་བཞིན་བཞག་ན་གཞན་དང་མི་འབྲེལ་བར་རེང་བུ་ལྟར་གནས་པ་དང༌། གཅུད་པའི་མན་ངག་ལས་ཆོས་ཉིད་རྟོག་བྲལ་གྱི་ཉམས་སྐྱེ་བས་རྟོག་པའི་ཡན་ལག་དང་མི་ལྡན་པར་བྱེད་པའི་རྩ་གཉིས་གནས་པའི་ཁ་དོག་ནི། རིམ་པར་དཀར་བ་དང་དམར་བ་ཉིད་དོ། །བུད་མེད་ཉིད་ལ་ཐབས་ཤེས་རྟེན་འབྲེལ་ལས་རོ་རྐྱང་དེ་གཉིས་གོ་ལྡོག་དུ་གནས་པས་རྐྱང་མ་གཡས་སུ་ཡོད་དོ། །དེ་གསུམ་ནི་རྩ་ཐམས་ཅད་ཀྱི་ཕྱི་མོ་ཡིན་པས་མ་སྒྲ་ཞུགས་པའོ། །དབུ་མ་དེའི་མདོག་ནི་སྔོ་སྐྱར་ཡོད་དོ། །དེར་རོ་རྐྱང་དེ་གཉིས་པོས་ལྟེ་བ་ནས་གྱེས་མཁལ་མར་གཅེར་བ་སོགས་སྤྱི་བོའི་བར་ལུག་རྒྱུད་དུ་ཕན་ཚུན་བསྣོལ་ཞིང་གཅུ་བའི་ཚུལ་གྱིས་མདུད་པ་ཉི་ཤུ་རྩ་གཅིག་གི་ཚུལ་དུ་བྱས་པ་ལ། རིམ་བཞིན་སྦྱང་བྱ་དུག་གསུམ་དང༌། སྒོ་གསུམ་གྱི་སྒྲིབ་པ་དང་སྦྱངས་འབྲས་སྐུ་གསུང་ཐུགས་གསུམ་གྱི་ཡོན་ཏན་མངོན་དུ་བྱེད་པའི་ཕྱིར་སྦྱོང་བྱེད་ལྟེ་བ་མགྲིན་པ་སྙིང་གའི་འཁོར་ལོ་གསུམ་བསྒོམ་པར་གསུངས་པའི་གྲངས་སམ། དེ་བཞིན་དུ་སྦྱང་བྱ་སྒོ་གསུམ་བྱ་བ་དང་བཅས། སྦྱངས་འབྲས་སྐུ་བཞིའམ་སྐུ་གསུང་ཐུགས་ཡོན་ཏན་ཕྲིན་ལས་ཏེ་ལྔ་ཐོབ་ཕྱིར། སྦྱོང་བྱེད་དེའི་སྟེང་སྤྱི་བོའི་འཁོར་ལོ་དང་བཞིའོ། །ཡང་སྦྱང་བྱ་དུག་ལྔ་དང་ཕུང་ལྔ། སྦྱངས་འབྲས་སྐུ་ལྔ་དང་ཡེ་ཤེས་ལྔ་ཐོབ་ཕྱིར་དེ་སྟེང་གསང་གནས་ཀྱི་འཁོར་ལོ་བསྣན་པ་དང༌། ཡང་སྦྱང་བྱ་དུག་ལྔ་དང་སེར་སྣ་བཅས་དྲུག་དང༌། ཕུང་ལྔ་བག་ཆགས་བཅས་སྦྱངས་ནས། སྦྱངས་འབྲས་ཡེ་ཤེས་ལྔ་དང་རང་བྱུང་གི་ཡེ་ཤེས་ཏེ་དྲུག་གམ། ཕྱིན་དྲུག་གམ། སྐུ་ལྔ་དང་བདེ་བ་ཆེན་པོའི་སྐུ་སྟེ་དྲུག་ཐོབ་ཕྱིར་གཙུག་ཏོར་ནམ་མཁའི་འཁོར་ལོ་སྟེ་གྲངས་ཀྱི་འཁོར་ལོའི་རྩ་འདབ་རྣམས་ཕྲི་སྟེ་གསུམ་དུ་བྱས་པ་ནས་དྲུག་གི་བར་དུ་བསྣན་པར་གྱུར་པ་དང༌། ཡི་གེར་འགོད་པ་སོགས་སྦྱང་གཞི་སེམས་ཅན་གྱི་རྒྱུད་ཀྱི་ཉོན་མོངས་པ་དང༌། རྩ་དབང་པོ་སོགས་དང༌། སྦྱོང་བྱེད་ཀྱི་མན་ངག་བསྒོམ་ཚུལ་ཐ་དད་ཀྱང་འབྲས་བུ་ཐ་དད་མེད་དོ། །ལྟེ་བ་སྤྲུལ་པའི་འཁོར་ལོར་རྩ་འདབ་དྲུག་ཅུ་རྩ་བཞི། མགྲིན་པ་ལོངས་སྤྱོད་ཀྱི་འཁོར་ལོ་ལ་རྩ་འདབ་བརྒྱད་ཚན་གཉིས་སྟེ་བཅུ་དྲུག་དང༌། སྙིང་གར་ཆོས་ཀྱི་འཁོར་ལོ་རྩ་འདབ་བརྒྱད། སྤྱི་བོར་ཧྃ་གནས་བདེ་ཆེན་གྱི་འཁོར་ལོ་རྩ་འདབ་སུམ་ཅུ་རྩ་གཉིས། གསང་གནས་བདེ་སྐྱོང་འཁོར་ལོ་ན་རྩ་འདབ་བདུན་ཅུ་རྩ་གཉིས། དེ་བཞིན་དུ་གཙུག་ཏོར་ནམ་མཁའི་འཁོར་ལོ་ལ་ནམ་མཁའ་ལྟར་དྭངས་པའམ་རགས་པའི་རྩ་མ་ཡིན་པས་རྩ་འདབ་གྲངས་མེད་པས་ནམ་མཁའ་ལྟ་བུའི་ཁམས་ཀྱི་འཁོར་ལོ་ཞེས་སུ་གྲགས་སོ། །གཞན་ཡང་རྩ་འཁོར་ལོ་དྲུག་པོ་རེ་རེའི་ལྟེ་བ་དང་སོ་སོའི་བར་མཚམས་རྣམས་སུ། རླུང་གི་འཕོ་བ་བཅུ་གཉིས་ཀྱིས་རྩ་གནས་རྣམས་སུ་དཀར་དམར་གྱི་དྭངས་མ་ཁྲིད་ཅིང་བཀོད་པའི་རྟེན་འབྲེལ་ལས་ཕྱི་རོལ་དུ་གོ་ལའི་རླུང་གི་སྟེང་དུ་ཉི་ཟླ་གཉིས་རང་འགྲོས་ཀྱིས་བགྲོད་པའི་གནས་དུས་སྦྱོར་ཏེ་ཁྱིམ་བཅུ་གཉིས་དང༌། དེ་བཞིན་དུ་ནང་གི་སེམས་ཅན་རྣམས་ལས་ཉོན་གྱིས་འཁོར་བར་བགྲོད་ཅིང་འཁོར་བ་ནའང་རྟེན་ཅིང་འབྲེལ་འབྱུང་བཅུ་གཉིས་ཁ་བརྒྱུད་དེ་འཁོར་བར་སྣང་བའི་གཞིའམ་རྩ་བར་གྱུར་པས་ན་གནས་ཞེས་བྱའོ། །དེས་ན་རྣལ་འབྱོར་པས་རྩ་རླུང་གི་བྱེད་པ་བཅིངས་ནས་ཁམས་ལ་གནད་དུ་བསྣུན་ཏེ་མ་དག་པའི་རྩ་གནས་སུ་འཕོ་བ་དེ་སྤངས་པའི་ཐབས་ཀྱིས་རོ་རྐྱང་ལམ་ནས་བརྒྱུད་དེ་དབུ་མའི་མར་སྣ་ནས་ཡར་ལུགས་ལྡོག་གི་འགྲོས་ཀྱིས། གསང་གནས་ཡེ་ཤེས་ཀྱི་འཁོར་ལོར་ཕྱིན་པ་དང་མཉམ་དུ་རླུང་གི་འཕོ་བ་གཅིག་དང་རྟེན་འབྲེལ་གཅིག་འགགས་ནས་དང་པོའི་ས་ཡི་རྟོགས་པ་དང་ཡོན་ཏན་རྣམས་འཆར་ཞིང༌། དེ་ལྟར་རིམ་པ་བཞིན་གཙུག་ཏོར་ནམ་མཁའི་ཁམས་ཀྱི་འཁོར་ལོའི་བར་དུ་འཁོར་ལོ་རེ་དང་བར་མཚམས་རེར་རླུང་གི་འཕོ་བ་དང་རྟེན་འབྲེལ་རེ་རེའི་ཆ་ལྡོག་པས། ས་ནི་གཉིས་པ་སོགས་བཅུ་གཉིས་རབ་ཏུ་རྫོགས་པའི་མཐར། རླུང་སེམས་ཐིག་ལེ་དང་བཅས་པ་ནམ་མཁའི་ཁམས་དང་འདྲེས་པའི་ཚེ། འཁོར་བའི་རྟེན་ཅིང་འབྲེལ་འབྱུང་ཕྱི་ནང་ཐམས་ཅད་རྒྱུན་ཆད་ནས་མི་འགྱུར་བདེ་བ་ཆེན་པོར་མངོན་པར་འཚང་རྒྱ་བར་འགྱུར་བ་ནི་དང་པོའི་སངས་རྒྱས་དུས་ཀྱི་འཁོར་ལོའི་ལུགས་ཡིན་ནོ། །རྒྱུད་སྡེ་ཐ་དད་པའི་རྫོགས་རིམ་ཤེས་ཕྱིར་སྒྱུ་འཕྲུལ་དྲྭ་བ་ལྟར་ན་གོང་དུ་བཤད་པ་དེ་དང་རྣམ་གྲངས་དྲུག་ཏུ་མཐུན་པའི་རྩ་འདབ་ལ། ལམ་གྱི་སྦྱང་གཞིར་གནས་ཤིང་སོ་སོར་བག་ཆགས་འཛིན་པའི་རིགས་དྲུག་ས་བོན་མ་རིག་པ་གཉིས་ལས་བྱུང་བའི་མ་དག་པའི་རླུང་ཐིག་ལེ་དང་ཡིག་འབྲུའི་རྣམ་པར་གནས་པ་རྣམས། སྦྱོང་བྱེད་རིག་པའི་རང་བཞིན་དག་པ་ཡེ་ཤེས་ཀྱི་རླུང་དང་ཐིག་ལེ་ལ་གནད་དུ་བསྣུན་པས་རིགས་དྲུག་གི་བག་ཆགས་ཐམས་ཅད་ཐུལ་བས་ཐུབ་པའམ་སྐྱེས་བུ་རྣམ་དྲུག་དང༌། དེར་གནད་དུ་བསྣུན་པས་སེར་སྣ་སོགས་དག་ཅིང་ཕྱིན་དྲུག་གི་ཡོན་ཏན་རང་བཞིན་གྱིས་རྫོགས་པར་འགྱུར་བས་འཁོར་ལོ་དྲུག་གི་དག་པའི་རླུང་ཐིག་དང༌། དེ་བསྒོམ་པའི་མན་ངག་རྣམས་ལ་ཕ་རོལ་ཕྱིན་པ་དྲུག་ཅེས་བྱ་སྟེ་དེ་དག་གིས་སྦྱངས་པར་བྱས་པ་ལས། སྦྱངས་འབྲས་མེ་ལོང་ལྟ་བུ་སོགས་ཐ་དད་པ་ཡི་ཡེ་ཤེས་རྣམ་པ་ལྔ་དང༌། དེ་ཐམས་ཅད་ཀྱི་རང་བཞིན་བསམ་གྱིས་མི་ཁྱབ་པ་རང་བྱུང་གི་ཡེ་ཤེས་གཅིག་དང་དྲུག་ཅེས་སངས་རྒྱས་ཀྱི་ས་ཡི་ཡོན་ཏན་ཐམས་ཅད་རྫོགས་པར་འཐོབ་བོ། །དེ་བཞིན་སྒྱུ་འཕྲུལ་རྩ་རྒྱུད་ཀྱི་རང་ལུགས་འདི་བཞིན་ཏེ། སྙིང་ག་རང་བྱུང་གི་ཡེ་ཤེས་ལྔའི་རང་རྩལ་འགག་པ་མེད་པ་ལས་རྟོག་ཚོགས་ཐམས་ཅད་ལྷར་དག་པའི་རྟེན་གྱི་རྩ་དང་ཐིག་ལེ་གནས་པས་ཞི་བའི་འཁོར་ལོ་དང༌། སྤྱི་གཙུག་ཞི་བའི་གཏིང་མདངས་འཆར་བའི་གཞིའི་རྩ་ཐིག་གནས་པས་ཁྲོ་བོའི་འཁོར་ལོ་སྟེ་རྣམ་པ་གཉིས་པོ་དེ་ལ། ཞི་ཁྲོའི་ལྷ་དང་རྣམ་གྲངས་མཉམ་པའི་སྙིང་ཁར་རྩ་འདབ་ཞེ་གཉིས་དང༌། དུང་ཁང་ན་ལྔ་བཅུ་རྩ་བརྒྱད་དེ་དམ་པ་རིགས་བརྒྱའི་གྲངས་དང་མཉམ་པར་གནས་སོ། །ཕྲ་བ་ནི་བསམ་གྱིས་མི་ཁྱབ་ཀྱང་ཁམས་དང་རླུང་འབབ་ཀྱི་རྩ་སྟོང་ཕྲག་བདུན་ཅུ་རྩ་གཉིས་སོགས་སོ། །རྒྱུད་དང་གདམས་ངག་ལྟར་བཤད་པའི་དབང་དུ་བྱས་ནས་ཐབས་ལམ་དང་གྲོལ་ལམ་གཉིས་བསྒོམ་པའི་མན་ངག་བཀྲལ་བ་ནི། གྲོལ་ལམ་བསྐྱེད་རིམ་གཙོ་བོར་སྟོན་པ་ཞི་ཁྲོ་སོ་སོའི་སྒྲུབ་ཐབས་ལྟར་ཡིན་ལ། ཐབས་ལམ་ལ་སྟེང་སྒོ་རྣམ་གྲོལ་གྱི་ལམ་དང༌། འོག་སྒོ་ཁམས་གསུམ་རོལ་པའི་ལམ་གྱི་སྒོ་གཉིས་ཀྱི་ཐབས་ལ་བརྟེན་ནས་འོད་གསལ་གྱི་དགོངས་པ་དུས་གཅིག་མངོན་དུ་གྱུར་པར་འདོད་པ་རྒྱུད་ཐམས་ཅད་ཀྱི་འཕྲོ་གཞི་མན་ངག་ཐམས་ཅད་ཀྱི་རྒྱལ་པོ་རྡོར་སེམས་སྒྱུ་འཕྲུལ་དྲྭ་བའི་ལུགས་སོ། །གཡོ་བ་རླུང་ལ་འབྱུང་བ་ས་ཆུ་མེ་རླུང་གི་རླུང་ཆེ་བ་དང༌། ཆུང་བ་གཉིས། ཆེ་བ་ནི་སྐྱེས་བུ་དར་མ་ནད་ཀྱི་སྐྱོན་དང་བྲལ་བ་ཞིག་ལ་ཉིན་ཞག་ཕྲུགས་གཅིག་དག་ལ་ནི། ཉི་ཁྲི་ཆིག་སྟོང་དྲུག་བརྒྱའི་གྲངས་སུ་འགྱུ་སྟེ། ཐལ་འགྱུར་ལས། རྩ་ལ་བརྟེན་པའི་རླུང་དག་ནི། །ཉི་ཁྲི་དང་ནི་སྟོང་ཕྲག་གཅིག །དྲུག་བརྒྱ་དག་ཏུ་འགྱུ་བ་ནི། །འགྱུ་བ་ཆེན་པོ་དག་ཏུ་འདོད། །ཅེས་སོ། །དེ་ལ་རྒས་པ་རྣམས་ལ་ནི་འབྱུང་བའི་གྲྭ་ཉམས་པས་ལྔ་བཅུ་རྩ་བརྒྱད་ཀྱིས་མ་ཚང་ལ། འབྱུང་བ་མ་རྒྱས་པའི་གཞོན་ནུ་རྣམས་ལ་ནི་སུམ་ཅུ་རྩ་གཉིས་ཀྱིས་མ་ཚང་ངོ༌། །འབྱུང་བ་ཆུང་བའི་རླུང་ནི་ཀུན་ཏུ་རྟོག་པ་ཅན་གཙོ་ཆེར་ཉོན་མོངས་པ་བརྒྱད་ཁྲི་བཞི་སྟོང་གི་གྲངས་དང་མཉམ་པའི་རྟོག་པ་དེ་དག་གི་བཞོན་པ་ལྟ་བུར་རྒྱུན་མི་འཆད་པར་གནས་ཏེ། སྒྱུ་འཕྲུལ་ལས། གཞན་ནི་བཞི་སྟོང་བརྒྱད་ཁྲིའོ། །ཞེས་སོ། །དེ་ཡང་ཁ་སྣ་ནས་འགྱུ་བ་མ་གཏོགས་པ་རྩའི་ནང་ན་རྟོག་པ་དང་ཡེ་ཤེས་ཀྱི་རྟེན་དུ་འགྱུ་བའི་རླུང་ལོངས་སྤྱོད་འཁོར་ལོ་ལས་གྱེས་པའི་འཕར་རྩ་ནས་འགྱུ་བ་རྣམས་བསྡོམས་པས་ཆིག་འབུམ་ཉི་ཁྲི་དྲུག་སྟོང་དྲུག་བརྒྱ་ནང་དུ་འགྱུ་བར་གསུངས། འབྱུང་བ་ཆེ་ཆུང་ཐམས་ཅད་ཀྱི་རྩ་བར་གྱུར་པའི་རླུང་ནི་སྲོག་འཛིན་གྱི་རླུང་དང༌། མེ་མཉམ་གྱི་རླུང་དང༌། ཁྱབ་བྱེད་ཀྱི་རླུང་དང༌། གྱེན་རྒྱུའི་རླུང་དང༌། ཐུར་སེལ་གྱི་རླུང་སྟེ་ལྔར་གནས་པའི། བྱེད་ལས་རིམ་བཞིན་སྲོག་འཛིན་སྙིང་ན་གནས་ཏེ་སྲོག་བརྟེན་པར་བྱེད་དོ། །མེ་མཉམ་ནི་ལྟོ་བར་གནས་ཏེ་མེ་དྲོད་བསྐྱེད་པར་བྱེད་དོ། །ཁྱབ་བྱེད་ནི་ལུས་བྱིངས་ན་གནས་ཏེ་ལུས་ཉམས་བརྟས་པར་བྱེད་པ་དང༌། གྱེན་རྒྱུས་དབུགས་ཀྱི་འགྲོ་འོང་གི་བྱ་བ་བྱེད་པ་དང༌། ཐུར་སེལ་གྱིས་འགྲོ་འདུག་དང་བཤང་གཅི་འཕེན་པའི་བྱ་བ་བྱེད་ལ། དེའང་ཕོ་རླུང་གྱེན་རྒྱུ་ནི་སྟོད་ན་གནས། མོ་རླུང་ཐུར་སེལ་ནི་སྨད་ན་གནས་པ་དང༌། མ་ནིང་གི་རླུང་གཞན་གསུམ་ནི་སྟོད་སྨད་མཉམ་པར་གནས་པ་ཡིན་ལ། སྣ་ནས་རྒྱུ་བའི་གནས་སྐབས་ན། གཡས་ནས་ཕོ་རླུང་ཐབས་ཀྱི་ཆ། གཡོན་ནས་མོ་རླུང་ཤེས་རབ་ཀྱི་ཆ། མ་ནིང་མཉམ་པར་རྒྱུ་ཞིང་ཕྱི་རླུང་རགས་པའོ། །སྔ་མ་དེ་དག་ལས་ཀྱང་ཕྲ་ཞིང་ནང་གི་བྱེད་པ་གཙོ་ཆེ་བའི་རླུང་ནི་ས་རླུང་སེར་པོ། ཆུ་རླུང་དཀར་པོ། མེ་རླུང་དམར་པོ། རླུང་གི་རླུང་ལྗང་ཁུ། ནམ་མཁའི་རླུང་མཐིང་ཁ་སྟེ་འབྱུང་ལྔའི་ཁ་དོག་ཅན། དབྱིབས་ཀྱང་རིམ་པར་ས་རླུང་གྲུ་བཞི། ཆུ་རླུང་ཟླ་གམ། མེ་རླུང་གྲུ་གསུམ། རླུང་གི་རླུང་གཞུ་བདུངས་པ་ལྟ་བུ། ནམ་མཁའི་རླུང་ཟླུམ་པོ་རྣམས་སོ། །བྱེད་ལས་ནི་ཕུང་པོ་ཁམས་དང་སྐྱེ་མཆེད་ཐམས་ཅད་རླུང་དེ་དག་ལས་རླུང་གི་རང་བཞིན་དུ་གནས་ཤིང་མ་ཐིམ་པ་དེ་སྲིད་དུ་སྣང་ཞིང་གནས་པའི་རྟེན་བྱེད་དེ། འཁོར་བ་ཇི་སྲིད་བར་འཁྲུལ་སྣང་གི་རྟེན་བྱེད་དོ། །སེམས་དང་ཡེ་ཤེས་ཀྱི་རྟེན་བྱེད་ཚུལ་བྱེ་བྲག་ཏུ་བཤད་ན། འདི་ལྟར་མ་དག་པ་སེམས་ཀྱི་གནས་སྐབས་ན་རླུང་ལྔ་པོ་དེའི་ཉོན་མོངས་པ་དུག་ལྔ་རང་རང་གི་རྐྱེན་ཉེ་བར་གནས་པའི་ཚེ་རྩོལ་བ་མེད་པར་མཆེད་པར་འགྱུར་བའི་རྟེན་དང་ནི། དག་པ་ཡེ་ཤེས་ཀྱི་དུས་ཇི་ལྟ་བ་དང་ཇི་སྙེད་པའི་ཤེས་བྱ་ཐམས་ཅད་ལ་མངོན་སུམ་པའི་ཡེ་ཤེས་རྣམ་པ་ལྔ་པོ་སྣང་བའི་གཞི་ཡིན་པས་ན། རླུང་ལྔ་རྒྱུ་ལྟ་བུ་ལས་སེམས་དང་ཡེ་ཤེས་འབྲས་བུ་ལྟ་བུར་མཆེད་པའི་རྟེན་བྱེད་དོ། །ཁྱད་པར་དུ་འབྱུང་བ་དྭངས་མའི་རླུང་ལྔ་པོ་རླུང་སེམས་གཅིག་ཏུ་བཅིངས་པའི་ཐབས་ཀྱིས་དྷུ་ཏིར་ཏེ་དབུ་མར་ཆུད་པ་ན། རླུང་ལྔ་ལས་སུ་རུང་སྟེ་གཡས་རླུང་དབུ་མར་ཆུད་པས་དུ་བ་ལྟ་བུ་དང༌། གཡོན་རླུང་ཆུད་པས་སྨིག་སྒྱུ་ལྟ་བུ། མེ་རླུང་ལས་འོད་འབར་བ། ཆུ་རླུང་ལས་སྤྲིན་དང་མཐོངས་ཁུང་གི་ཟླ་འོད་ལྟ་བུ། ས་རླུང་ལས་གསེར་མདོག་དང་གློག་འོད་ལྟ་བུ། མཁའ་རླུང་ལས་མཐིང་ཁ་དང་འོད་ལྔའི་ཐིག་ལེ་དང་ཐམས་ཅད་ཆུད་པས་འོད་ལྔ་གཞའ་ཚོན་ཐིག་ལེ་ལྷ་སྐུ་སོགས་སྣང་བ་དུ་མར་འཆར་རོ། །ཁྱད་པར་ཟད་པར་ས་ཆུ་མེ་རླུང་ནམ་མཁའ་ཡི་ཏིང་ངེ་འཛིན་གྲུབ་ནས་དངོས་པོ་ཐམས་ཅད་ས་ལ་སོགས་པར་སྤྲུལ་བསྒྱུར་སྣ་ཚོགས་པའི་རྫུ་འཕྲུལ་གྱི་བཀོད་པ་སྟོན་ནུས་པ་དང༌། ཉོན་མོངས་ལྔ་དག་པ་དང༌། ཉམས་སྣང་འོད་ལྔ་གསལ་བ་དང༌། ཞིང་ཁམས་ལྔར་བགྲོད་པ་དང༌། ཡེ་ཤེས་ལྔ་མངོན་དུ་འགྱུར་བ་ལ་སོགས་པའི་ཡོན་ཏན་དང༌། རྫུ་འཕྲུལ་སྣ་ཚོགས་པར་འགྲུབ་ཏེ། སྒྱུ་འཕྲུལ་དྲྭ་བ་ལས། རླུང་ལྔའི་དྭངས་མ་སྟོབས་གྱུར་ན། །འོད་ལྡན་ནང་གི་ཡེ་ཤེས་ལྔ། །སྐུ་ལྔ་བགྲོད་པའི་ཞིང་ཁམས་ལྔ། །ཟད་པར་ལྔ་སོགས་འཐོབ་པར་འགྱུར། །ཞེས་སོ། །ཤིན་ཏུ་རྟོགས་དཀའ་བའི་གསང་བའི་རླུང་ནི་ཆོས་ཉིད་དོན་གྱི་ཡེ་ཤེས་རྣམ་པ་ལྔ་ཡི་རང་བཞིན་ཡིན་པས་ཕྱིར་དབྱིབས་དང་ཁ་དོག་ལ་སོགས་པའི་རགས་པའི་ཆོས་དང་རྣམ་པར་འགལ་བ་ཡིན་པའི་ཡོན་ཏན་གོང་དུ་བཤད་པ་རྣམས་དང༌། ལྷག་མཐོང་མི་རྟོག་པའི་རང་བཞིན་འོད་གསལ་གྱི་དགོངས་པ་མཐར་ཕྱིན་པར་འགྱུར་རོ། །གསུམ་པ་རྣམ་ཤེས་ཀྱི་རྟེན་ཁམས་དྭངས་མ་ཁུ་རྡུལ་གཉིས་རླུང་གིས་རྩ་གནས་སུ་བཀོད་པ་བྱང་ཆུབ་སེམས་ཀྱི་ཁམས་ཇི་ལྟར་འབབ་པའི་ཚུལ་ནི། རོ་མའི་ཡར་སྣ་ལས་ནི་སྤྱི་བོའི་ཧྃ་ཡིག་གི་རྒྱུན་ཟླ་བའི་བདུད་རྩི་སྟེ་དཀར་ཆ་འབབ་སྟེ་ལུས་ཐམས་ཅད་ཁྱབ་པ་དང༌། རྐྱང་མའི་མར་སྣ་ལས་ནི་གསང་གནས་ཀྱི་ཨ་ཤད་ལས་ཉི་མའི་རྡུལ་ཏེ་དམར་ཆ་མཆེད་དེ་རྩ་གནས་ཐམས་ཅད་དུ་འབབ་ཅིང་ཁྱབ་པར་འགྱུར་ལ། ཐབས་ཤེས་ཀྱི་རྟེན་འབྲེལ་གྱིས་ཕོ་ཡི་ཤེས་རབ་ཀྱི་རྩ་རྐྱང་མ་དང་མོ་ཡི་ཐབས་ཀྱི་ཆ་རོ་མའི་སྣ་མདུད་པར་གྱུར་པས་ཕོ་རྣམས་ལ་ཁམས་དམར་པོ་དང་མོ་ལ་དཀར་པོ་སྟེ་གཉིས་འཛག་པ་བསྲུང་སྟེ་མི་འཕོའོ། །རོ་རྐྱང་རྒྱུ་བ་དེ་ལས་གཞན་དུ་དེ་གཉིས་པོ་ལས་མཆེད་པའི། འཁོར་ལོ་སོ་སོའི་རྩ་འདབ་སོགས་རྩ་མདུད་ཡི་གེའི་རྣམ་པར་ཡོད་པའི་ཡུལ་ཉེར་བཞིའི་རང་བཞིན་དུ་བརྗོད་པ་ལ་སོགས་ཀུན་ན་ཁམས་ཀྱི་དྭངས་མ་དཀར་ཆ་ཐབས་དང༌། དམར་ཆ་ཤེས་རབ་ཀྱི་ངོ་བོར་གནས་པ་གཉིས། དཔའ་བོ་ཡབ་དང་ནི་དེའི་ཡུམ་རྣལ་འབྱོར་མའི་ཚུལ་དུ་སྣང་སྟོང་གཉིས་སུ་མེད་པའི་སེམས་ཀྱི་རྩལ་མདངས་ཐབས་ཤེས་དབྱེར་མེད་ཀྱི་ངོ་བོར་བཞུགས་ནས་ཡབ་ཡུམ་ཕན་ཚུན་འཁྲིལ་ཞིང་སྦྱོར་བས་ཞུ་བདེའི་རྣལ་འབྱོར་བསྒོམ་པའི་རྣལ་འབྱོར་པ་རྣམས་ལས་བདེ་སྟོང་གཉིས་སུ་མེད་པའི་མཆོད་པ་ལེན་པས་ཚོགས་གཉིས་མྱུར་དུ་རྫོགས་པར་འགྱུར་རོ། །མདོར་ན་ལུས་ཀྱི་རྟེན་གནས་པ་རྩ་ནི་ཆུ་འདྲེན་པའི་ལམ་ཡུར་བ་དང་འདྲ། ངག་གི་རྟེན་གཡོ་བ་རླུང་ནི་འཁོར་འདས་གཉིས་ཁར་འགྲོ་བ་དང༌། འོང་བའི་ཁ་ལོ་བ་ལྟ་བུ། ཡིད་ཀྱི་རྟེན་བྱང་ཆུབ་སེམས་ཀྱི་ཐིག་ལེ་ནི་རླུང་གི་གནད་ལ་བརྟེན་ནས་ཆུ་དང་འདྲ་བར་ཁྲིད་སར་འདུའོ། །དེ་ཡང་འཁོར་ལོ་དྲུག་པོ་སྟེང་འོག་ཏུ་བརྩེགས་པའི་སྲོག་ཤིང་ལྟ་བུ་དབུ་མ་སྟེ། དེ་ལ་ཆོས་ཉིད་དབུ་མ་ནི་ཡོད་ལ་རྫས་སུ་མ་གྲུབ་པས་སྒྲ་གཅན་ཏེ། ཕྱིར་སྣང་བའི་སྒྲ་གཅན་གྱི་གདོང་མཇུག་གཉིས་ཀྱིས་ཉི་ཟླ་ཟ་བ་ལྟར། ནང་དུ་དཀར་དམར་གྱི་རང་བཞིན་ཨ་ཧྃ་གཉིས་དབུ་མའི་ཡར་མར་གྱི་རྩེ་སྣར་གནས་པའི་འབར་འཛག་གི་ཏིང་ངེ་འཛིན་གོམས་པ་ལས། དབུ་མར་རླུང་ཞུགས་གནས་ཐིམ་གསུམ་གྱི་བྱ་བ་བྱེད་ཅིང༌། ཉི་མ་དང་ཟླ་བའི་རང་བཞིན་ཁམས་དཀར་དམར་གཉིས་རྒྱུན་མི་འཆད་དུ་དབུ་མའི་དབྱིངས་སུ་འབབ་པར་བསྒོམ་པའི་བྱེད་བཅིང་ལ་ནུས་པ་ཐོབ་ན། ཕྱི་རོལ་ཉི་ཟླ་གཟས་འཛིན་པར་མི་ནུས་ཤིང་རྟོད་ལ་གནོན་པ་སོགས་ནུས་པའོ། །དེ་ཡང་རྟ་གདོང་གི་མེས་རྒྱ་མཚོ་ཟ་བ་ལྟར། ཨ་ཤད་ལས་བྱུང་བའི་མེས་ཕུང་ཁམས་མ་ལུས་པ་ཟ་བར་བྱེད་པའི་ཕྱིར་ན་གཏུམ་མོ་ཞེས་བྱ་སྟེ། དེའི་མན་ངག་ནི་དབུ་མ་སྒྲ་གཅན་དབྱིངས་སུ་སྲོག་ཅེས་པ་རླུང་དང༌། རྩོལ་བ་ནི་སེམས་ཏེ་དེ་གཉིས་དབྱེར་མེད་དུ་བཅིང་བའི་ཤིང་རྟས་འཁོར་ལོ་སོ་སོའི་གནས་སུ་རྒྱུ་བའི་རླུང་རིམ་གྱིས་དྲངས་པ་ལས། རླུང་སེམས་འབྱོངས་ནས་རིམ་གྱིས་དབུ་མའི་མདུད་པ་གཉིས་གཉིས་གྲོལ་བ་དང༌། རླུང་དང་ཁམས་ཀྱི་དྭངས་མ་རྣམ་པ་གཉིས་རེ་སྒྲ་གཅན་ལྟོར་ཞུགས་པ་དང་མཉམ་དུ་དང་པོའི་སའི་རྟོག་པ་དང༌། ཡོན་ཏན་ཐམས་ཅད་མངོན་དུ་གྱུར་པ་ནས་བཟུང་ས་བཅུའི་ཡོན་ཏན་ཐམས་ཅད་གོང་ནས་གོང་དུ་འཕེལ་ཏེ་ཐམས་ཅད་ཀྱི་ཐ་མ་རྩ་མདུད་ཉེར་གཅིག་པ་གྲོལ་བའི་ཚེ། རླུང་སེམས་ཀྱི་དྭངས་མ་ཐིག་ལེ་དང་བཅས་པ་གཙུག་ཏོར་དུ་འགྲོ་ཞིང་རྡོ་རྗེ་འཆང་འགྲུབ་བོ། །ཁྱད་པར་སྔ་འགྱུར་རྒྱུད་སྡེ་ཐམས་ཅད་ཀྱི་རྒྱལ་པོ་སྒྱུ་འཕྲུལ་དྲྭ་བ་སློབ་དཔོན་ཆེན་པོ་བི་མ་ལའི་གསང་ཐིག་གིས་བཀྲལ་བའི་ལུགས། ཕྱི་ནང་སྣོད་བཅུད་ཀྱི་རང་བཞིན་རང་གི་ལུས་སེམས་ལ་རྫོགས་པ་རྡོ་རྗེ་ཕུང་པོའི་གྲོང་ཁྱེར་གྱི་དབུས་ནི་རང་བཞིན་རྣམ་པར་དག་པ་ཆོས་སྐུའི་བཞུགས་གནས་ཏེ་ཇི་ལྟར་ཞེ་ན། འདས་པ་དང་མ་འོངས་པ་དང་ད་ལྟ་བ་སྟེ་དུས་གསུམ་ཆར་དུ་ལུང་དུ་མ་བསྟན་པའི་སེམས་ཀྱི་ཆོས་ཉིད་ནི་བདེ་གཤེགས་སྙིང་པོ་སྟེ། མཚན་བརྗོད་ལས། དུས་གསུམ་དུས་མེད་རྟོག་པ་པོ། །ཞེས་སོ། །གནས་ལུགས་མངོན་དུ་གྱུར་པ་ཁོ་ནས་དུས་གསུམ་གྱི་སངས་རྒྱས་མཐའ་དག་མངོན་སངས་རྒྱས་ཤིང་འཚང་རྒྱ་བར་འགྱུར་བ་ཡིན་ལ། དེ་ཉིད་མངོན་དུ་བྱེད་པའི་ཐབས་སྒྱུ་འཕྲུལ་དྲྭ་བ་ཆེན་པོའི་ལུགས་འདིར་འཁོར་འདས་སྐྱེད་སྡུད་ཀྱི་ས་བོན་སྙིང་ཁ་ན་གནས་པ་ལ་གནད་དུ་བསྣུན་པའི་རྫོགས་རིམ་འཆད་དོ། །དེ་ཡང་མི་ཕྱེད་པའམ་མི་འགྱུར་བའི་དོན་གྱིས་རྡོ་རྗེའི་གདན་དང༌། དབྱིངས་ཟབ་པས་སྙིང་ཁ་ཆོས་ཀྱི་འཁོར་ལོ་ལ་དཔལ་གྱི་བེའུ་ཞེས་སྨོས་ནས་དེའི་ཁོང་སེང་ན། འཁྲུལ་སྣང་དང་ཡེ་ཤེས་སྐྱེད་བྱེད་རྩ་ཡི་དྭངས་མ་བརྒྱད་དུ་གནས་པ་ཡི་དབུས་ན་སྦྱང་གཞི་སྦྱོང་བྱེད་ལྟར་གནས་པའི་ས་བོན་དུ་གནད་དུ་བསྣུན་པའི་ཚུལ་བི་མའི་གསང་ཐིག་ལས། གང་ལ་ཡོད་པ་རྣམ་པ་བརྒྱད་དུ་ཤེས། །ཞེས་དང༌། དེའི་འགྲེལ་པར། གང་ལ་ཡོད་ན་སྙིང་ཁོང་སྟོང་གི་དཀྱིལ་ན་རྩ་ཡི་དྭངས་མ་རྩ་ཕྲན་རྒྱུས་པ་བལྡད་པ་འདྲ་བ་བརྒྱད་ཡོད་པ་ལས། གསུམ་ཆོས་ཉིད་ཀྱི་རྩ། གཅིག་ཡེ་ཤེས་ཀྱི་རྩ། གསུམ་རང་རྒྱུད་ཀྱི་རྩ། གཅིག་ཡོན་ཏན་གྱི་རྩ་སྟེ་བརྒྱད་དུ་ཤེས་པར་བྱའོ། །ཞེས་སོ། །དེ་དག་རྣམས་ལས་དབུས་མ་གསུམ་ནི་སྐུ་གསུམ་དང་ཆོས་ཉིད་མི་འགྱུར་བའི་རྟེན་ཡིན་ལ། དེའི་མདུན་མ་ན་གཅིག་ཡོད་པ་ནི་ཡེ་ཤེས་བཞི་འཆར་བར་འགྱུར་བའི་རྟེན་གྱི་རྩ་ཡིན་ཞིང༌། རྒྱབ་ན་ནི་ཡོན་ཏན་གྱི་རྩ་གནས་པ་ལས་ཞིང་ཁམས་དང་གཞལ་ཡས་ཁང་ལ་སོགས་པ་དག་པའི་སྣང་བ་མུ་མེད་པར་འཆར་རོ། །གཡོན་ན་རང་རྒྱུད་པའི་རྩ་གསུམ་ནི་ཁམས་གསུམ་དང་དུག་གསུམ་རང་མཚན་པའི་འཁྲུལ་སྣང་མཐའ་དག་འཆར་བའི་རྟེན། རྩ་བཞི་པོ་སོ་སོའི་དབུས་ན་འཁོར་བ་དང་མྱང་འདས་ཀྱི་ཡིག་འབྲུ་རྣམ་ཤེས་ཚོགས་བརྒྱད་དང་བཅས་པ་ནི། སྦྱང་གཞི་དང་སྦྱོང་བྱེད་ཀྱི་ཚུལ་དུ་གནས་པ་ཡིན་ཏེ། འདི་ལྟར་ཆོས་ཉིད་ཀྱི་རྩ་འོད་སྣང་སེར་ལ་ཟླུམ་པའི་རྣམ་པ་ཅན་གྱི་དཀྱིལ་ན་ལྷ་མིན་དང་བྱོལ་སོང་གི་ས་བོན་སུ་དང་ཏྲིའི་སྟེང་དུ་སྐུ་རྡོ་རྗེའི་སྙིང་པོ་ཨོཾ་རང་འོད་ཟ་འོག་གུར་ལྟར་གསལ་བ་དང་ཀུན་གཞིའི་རྣམ་ཤེས་གནས་སོ། །ཡེ་ཤེས་ཀྱི་རྩ་མཐིང་ག་གྲུ་བཞིའི་སྦུབས་ན་ལྷ་དང་མིའི་ས་བོན་ཨ་ནྲྀ་དཀར་དམར་གྱི་སྟེང་ན་ཐུགས་རྡོ་རྗེའི་རང་བཞིན་ཧཱུྃ་མཐིང་ཁ་དང་ཡིད་ཀྱི་རྣམ་ཤེས་གནས་སོ། །རང་རྒྱུད་པའི་རྩ་དམར་པོ་ཟླ་གམ་གྱི་དཀྱིལ་ན་དམྱལ་བ་དང་ཡི་དྭགས་ཀྱི་ས་བོན་པྲེ་དང་དུའི་སྟེང་དུ་གསུང་རྡོ་རྗེའི་རང་བཞིན་ཨཱཿཡིག་པདྨ་རཱ་ག་ལྟར་འཚེར་བ་དང་ཉོན་ཡིད་གནས་སོ། །ཡོན་ཏན་གྱི་རྩ་དམར་ནག་གྲུ་གསུམ་གྱི་དབུས་ན་སྒོ་ལྔའི་རྣམ་ཤེས་གནས་སོ། །དེས་ན་འཁོར་བའི་གནས་རིགས་དྲུག་པོར་འཕེན་པའི་བག་ཆགས་ནི་སྦྱང་བྱ་ཡིག་འབྲུ་དྲུག་པོའི་སྟེང་དུ་བསགས་ནས་དེའི་འཁྲུལ་སྣང་བསྐྱེད་ལ། ཐར་པའི་འབྲས་བུ་འཐོབ་བྱེད་སྒོ་གསུམ་གྱི་དགེ་བ་སྤྱི་དང༌། བྱེ་བྲག་རྡོ་རྗེ་གསུམ་གྱི་ལམ་བྱེད་རྣམས་ཡི་གེའི་སྟེང་དུ་བཞག་ནས་ལམ་འབྲས་ཀྱི་ཡོན་ཏན་སྣང་བར་འགྱུར་ཞིང༌། ཁྱད་པར་སྦྱང་གཞི་དང་སྦྱོང་བྱེད་ཀྱི་ཡིག་འབྲུ་རྣམས་དངོས་སུ་གསལ་བཏབ་ནས་དེ་ལ་གནད་དུ་བསྣུན་པའི་རྫོགས་རིམ་དང་འབྲུ་གསུམ་གྱི་བཟླས་པ་སོགས་བྱས་པས་སྐུ་གསུང་ཐུགས་ཀྱི་ཡི་གེ་རྣམས་སྟོབས་འཕེལ་བས་འཁོར་བའི་ས་བོན་གྱི་ཡི་གེ་དང༌། དེས་བཟུང་བའི་བག་ཆགས་ཐམས་ཅད་དག་སྟེ་རྡོ་རྗེ་གསུམ་གྱི་དངོས་གྲུབ་འཐོབ་པར་བྱེད་པའོ། །སྙིང་ཁའི་རྩ་འདབ་ཀུན་གྱི་དབུས་ན་དྭངས་མ་ལྔ་འདུས་ཀྱི་ཐིག་ལེ་ཡོད་དེ། རྩ་འདབ་བརྒྱད་པོའི་དབུས་མ་ནི་རྒྱུད་སྡེ་གཞན་ལྟར་ན། ཡང་དག་པའི་དབུ་མ་ཡིན་ལ་དབུ་མའི་རླུང་དྭངས་མ་ཡང་ཡེ་ཤེས་ཀྱི་རྩ་ལ་འཇུག་དགོས་པས་དྭངས་མའི་འོད་རྩ་དཀར་པོ་ཤེལ་གྱི་སྐུད་པ་ལྟ་བུ་ཕྲ་བའི་ཆ་ནས་རྟ་རྔའི་བཅུ་ཆ་ཙམ་དུ་ཕྲ་བའི་ནང་ན། རྡུལ་ཏེ་ཁྲག་དང་དབུགས་ཀྱི་དྭངས་མ་འདྲེས་པ་ལ་བརྟེན་པའི་རླུང་སེམས་ཤིན་ཏུ་ཕྲ་བའི་སྣང་ཆ་མ་འགག་པའི་གདངས་འོད་ཀྱི་ཐིག་ལེ་ཡེ་ཤེས་ཀྱི་རང་འོད་ཁ་དོག་ལྔ་པ་ཤིན་ཏུ་ཕྲ་བ་ཉིད་ཡོད་ལ། དེ་ཡང༌། འབྱུང་བ་ལྔ་ཀའི་དྭངས་མ་ཡིན་ཏེ་ས་ཡི་དྭངས་མ་ནི་དར་དཀར་གྱི་སྐུད་པ་ལྟ་བུའོ། །ཆུ་ཡི་དྭངས་མ་ནི་ཁྲག་གི་རང་བཞིན་རྒྱ་མཚལ་གྱི་ཁུ་བ་ལྟ་བུའོ། །མེའི་དྭངས་མ་ནི་མེ་ལོང་ཉི་མ་ལ་བཞག་པའི་ངད་ལྟ་བུའི་དྲོད་དོ། །རླུང་གི་དྭངས་མ་ནི་གསེར་ས་འོག་ན་ཡོད་པའི་རླངས་ལྟ་བུའོ། །ནམ་མཁའི་དྭངས་མ་ནི་གོ་འབྱེད་པའི་ཆ་ཙམ་མོ། །དེ་རྣམས་ནི་རྣམ་པར་ཤེས་པའི་ཆོས་ཉིད་རང་བཞིན་གྱིས་འོད་གསལ་ཞིང་འདུས་མ་བྱས་པའི་བྱང་ཆུབ་སེམས་ཀྱི་རྟེན་ཡིན་ལ། རྒྱུ་མཚན་དེས་ན་སྙིང་ཁ་ཆོས་ཀྱི་འཁོར་ལོ་ནི། རིག་པའི་ཡེ་ཤེས་སྣང་སྟོང་གཉིས་སུ་མེད་པ་ཀུན་བཟང་ཡབ་ཡུམ་དང༌། དེའི་གདངས་ཡེ་ཤེས་ལྔའི་ངོ་བོར་མ་འགག་པ་ནི་རིགས་ལྔ་སྟེ་བསམ་གྱིས་མི་ཁྱབ་པའི་ཆོས་ཉིད་དེ་ལ་རང་གི་ངོ་བོའི་རྟེན་དང་བརྟེན་པ་མེད་ནའང་ཐ་སྙད་དུ་དེ་ལ་བརྟེན་པ་ལྟར་ཡོད་པས་བཞུགས་པའི་གཞལ་མེད་ཁང་ཞེས་བྱ་ལ། སྙིང་ཁ་ཆོས་ཀྱི་འཁོར་ལོའི་དབུས་གང་དུ་རླུང་སེམས་ཀྱི་དྭངས་མ་རྣམས་འདུས་པའི་ཚེ་ན། མྱ་ངན་ལས་འདས་པའི་ཡེ་ཤེས་ཀྱི་རང་གདངས་ཞིང་དང༌། གཞལ་ཡས་ཁང་སྐུ་དང་འོད་ཟེར་དང༌། ཡེ་ཤེས་ཀྱི་སྣང་བ་མཐའ་དག་ལམ་དུས་སུའང་འཆར་ལ། མཐར་ཐུག་སྣང་ཆའི་འོད་ལྔ་པོའི་རྩལ། ལས་རླུང་གིས་བསླད་དེ་ཕུང་ཁམས་སྐྱེ་མཆེད་མ་དག་པའི་ཆོས་སུ་སྣང་བའི་ཆ་ཐམས་ཅད་དང་བྲལ་བ་ན། རང་བཞིན་སྤྲོས་པ་དང་བྲལ་བ་སྟོང་པ་ཉིད་ཀྱི་ཆའི་ཆོས་སྐུ་མངོན་དུ་གྱུར་ཏེ། དེ་གཉིས་དོན་ལ་དབྱེར་མེད་པས་གཅིག་ཏུ་འདྲེ་བ་མེད་ཀྱང་འཁྲུལ་པའི་སྣང་བ་བག་ཆགས་དང་བཅས་པ་ཐམས་ཅད་དབྱིངས་སུ་ལྡོག་ནས་སྣང་སྟོང་རོ་གཅིག་ཏུ་འདྲེས་པས་ལམ་གྱི་ཚོགས་གཉིས་འབད་མེད་དུ་རྫོགས་པར་འཚང་རྒྱའོ། །འཚང་རྒྱ་བའི་གནས་འོག་མིན་རྣམ་དག་ཚད་དང་བཀོད་པ་མཐའ་ཡས་པས་བརྒྱན་པའི་ཞིང་ཁམས་སྟུག་པོ་བཀོད་པ་ཞེས་ཁམས་གསུམ་གྱི་གནས་འདི་ལས་སམ་རང་གི་སེམས་ཉིད་ལས་གཞན་དུ་རང་མཚན་པ་ཞིག་མི་གནས་ཏེ། དབྱིངས་ལ་སྒྲིབ་པར་བྱེད་པའི་དྲི་མ་རླུང་སེམས་མ་དག་པའི་ཆ་མཐའ་དག་པ་སྟེ་ཐམས་ཅད་ནམ་ཞིག་སྤངས་པར་གྱུར་པའི་དུས་དེར་ཡེ་ཤེས་ཀྱི་རང་སྣང་ལྷུན་གྱིས་གྲུབ་པ་ཡིན་ནོ། །དེ་ཡི་ཕྱིར་ལུས་ནི་རིག་པའི་ཡེ་ཤེས་འཁོར་འདས་ལམ་གསུམ་གྱིས་བསྡུས་པའི་ཆོས་ཐམས་ཅད་ཀྱི་ཆོས་ཉིད་ཁྱབ་གདལ་ཆེན་པོའི་རྟེན་ཡིན་ནོ། །དེ་ལྟར་འཁོར་བ་འཁྲུལ་པའི་དུས་ཉིད་ནའང་སེམས་ཉིད་རང་གི་ངོ་བོའི་བཞུགས་ཚུལ་རང་བཞིན་གྱིས་རྣམ་པར་དག་ཅིང་སྐུ་དང་ཡེ་ཤེས་ཀྱི་ཆོས་ཐམས་ཅད་མ་ཚང་བ་མེད་པར་ལྷུན་གྱིས་གྲུབ་པ་ལ་ཉམས་པ་སྟེ་གྲངས་ཉུང་ཞིང་འབྲས་བུའི་ཆོས་མ་ཚང་བ་དང༌། དམན་པའམ་ཞན་པར་གྱུར་པ་གཉིས་ཀ་མེད་དེ། དཔེར་ན་དངུལ་ཆུ་ཐལ་གསེབ་ཏུ་ལྷུང་ཡང་མི་འདྲེ་བ་བཞིན་ནོ། །དེ་ལྟ་བུའི་འགྱུར་བ་མེད་པའི་ཆོས་ཉིད་དོན་དམ་བྱང་ཆུབ་ཀྱི་སེམས་བདེ་གཤེགས་སྙིང་པོ་ནི་འཇག་མའི་སྲིན་བུ་ཡན་སེམས་རྒྱུད་ཀྱིས་བསྡུས་སོ་འཚལ་ཐམས་ཅད་ལ་མ་ཁྱབ་པ་མེད་དེ། དཔེར་ན་ཏིལ་ཡིན་ནོ་ཅོག་ཐམས་ཅད་ལ་མར་གྱིས་ཁྱབ་པ་ལྟར་གནས་ཞེས་རྒྱུད་ལུང་མན་ངག་ཐམས་ཅད་ལས་གསལ་བ་ཇི་བཞིན་ནོ། །འདི་ལྟར་རྟེན་རྡོ་རྗེའི་ལུས་ཀྱི་རྩ་རླུང་ཐིག་ལེ་ལ་སོགས་པའི་གནས་ལུགས་དང༌། བརྟེན་པ་སེམས་ཀྱི་རང་བཞིན་གདོད་མ་ནས་གནས་པའི་ཆོས་ཉིད་གཞི་ཡི་བཞུགས་ཚུལ་དག་ཤེས་པར་བྱས་ནས། རྫོགས་རིམ་མན་ངག་གསར་རྙིང་གི་རྒྱུད་སྡེ་ཐམས་ཅད་ལས་གསུངས་པའི་ཆོས་དྲུག་པོ་འདིར་མ་འདུས་པ་མེད་དོ། །རྫོགས་རིམ་གྱི་ལམ་ཐམས་ཅད་ཀྱི་རྩ་བ་གཏུམ་མོ་ཡིན་ཏེ། ཐབས་ཀྱི་ཆ་ཐམས་ཅད་ཤེས་རབ་སྐྱེ་བ་མེད་པའི་ངང་དུ་དག་དགོས་པ་དང༌། ལམ་གྱི་གཞི་མ་ནི་སྒྱུ་ལུས་ཡིན་ཏེ། དག་མ་དག་གི་ཆོས་ཐམས་ཅད་རང་བཞིན་མེད་པ་སྒྱུ་མ་ལྟ་བུར་གོམས་དགོས་ཀྱི། དངོས་ཞེན་གྱི་ལམ་ནས་གྲོལ་མི་ནུས་པའི་ཕྱིར་རོ། །ལམ་གྱི་དྲོད་ཚད་ནི་ཉིང་འཁྲུལ་རྨི་ལམ་གྱི་ལམ་ནས་སྦྱང་བ་ཡིན་ཏེ། ཚེ་འདིའམ་འཆི་སྲིད་དམ་བར་དོ་སོགས་འོད་གསལ་དུ་བསྡུ་བ་ལ་བསླབ་དགོས་པའི་ཕྱིར་རོ། །ལམ་གྱི་སྙིང་པོ་ནི་འོད་གསལ་ཡིན་ཏེ། བསྒོམ་བྱ་དོན་དུ་གཉེར་བའི་དོན་པོ་ཡིན་པའི་ཕྱིར་རོ། ལམ་གྱི་མུན་ནང་ནི་བར་དོ་ཡིན་ཏེ་ཉམས་ལེན་འབྲས་བུར་སྦྱོར་བའི་མཚམས་སྦྱོར་གྱི་རྐྱེན་ཡིན་པའི་ཕྱིར་རོ། །ལམ་གྱི་བློ་ཆོད་ནི་འཕོ་བ་ཡིན་ཏེ་ཚེ་འདིར་མཐར་མ་ཕྱིན་ན་མན་ངག་གིས་རྣམ་ཤེས་དག་ཞིང་དུ་བཙན་ཐབས་སུ་འཕོ་དགོས་པ་ཡིན་ནོ། །དེ་ལྟར་ཆོས་དང་ནི་ལམ་གྱི་གཞི་མ་སྔར་སྒྱུ་ལུས་ཀྱི་སྐབས་སུ་སྒྱུ་མ་ལྟ་བུའི་ལྷ་སྐུ་དེ་ཡང་བསྡུ་རིམ་གྱིས་འོད་གསལ་དུ་བསྡུ་བ་དང༌། གཏུམ་མོ་གཞན་ལུས་ཕྱག་རྒྱའི་ལམ་གང་རུང་ལ་བརྟེན་ནས་དགའ་བཞི་ལྷན་ཅིག་སྐྱེས་པའི་ཡེ་ཤེས་སོགས་ལ་གོམས་པ་ལས། སྟོང་པ་བཞིའམ་དགའ་བ་བཞིས་དྲངས་པའི་འོད་གསལ་རྒྱུད་ལ་སྐྱེ་བར་འགྱུར་རོ། །དེ་ཡང་སྟོང་པ་བཞི་ནི། དང་པོ་རྣམ་ཤེས་སྣང་བ་ལ་ཐིམ་པའི་སྐབས་སུ་ཞེ་སྡང་གི་རྟོག་པ་སོ་གསུམ་འགགས། ཕྱི་རྟགས་སུ་སྟོན་གནམ་ཉི་ཟླ་འོད་ཀྱིས་བསླད་པ་ལྟར་དཀར་ལམ་པའི་སྣང་བ་དང༌། ནང་རྟགས་སུ་གསལ་བའི་ཉམས་མཐའ་དབུས་མེད་པར་འཆར་ཏེ་སྟོང་པ་ཞེས་བྱའོ། །དེ་ནས་སྣང་བ་མཆེད་པ་ལ་ཐིམ་པས་འདོད་ཆགས་ཀྱི་རྟོག་པ་བཞི་བཅུ་འགགས། ཕྱི་རྟགས་སུ་སྟོན་གནམ་ཉི་འོད་ཀྱིས་བསླད་པ་ལྟ་བུ་དམར་ལམ་པ་དང༌། ནང་རྟགས་སུ་བདེ་བ་མུ་མཐའ་མེད་པར་འཆར་ཏེ་སྟོང་པ་ཆེན་པོ་ཞེས་བྱའོ། །དེ་ནས་མཆེད་པ་ཉེར་ཐོབ་ལ་ཐིམ་པས་གཏི་མུག་གི་རྟོག་པ་བདུན་འགགས། ཕྱི་རྟགས་སུ་སྟོན་གནམ་སྨག་གིས་བསླད་པ་ལྟ་བུའི་ནག་ལམ་པ་དང༌། ནང་རྟགས་སུ་རྣམ་པར་མི་རྟོག་པའི་ཉམས་མཐའ་དབུས་མེད་པར་འཆར་ཏེ་ཤིན་ཏུ་སྟོང་པ་ཞེས་བྱའོ། །དེ་ནས་ཉེར་ཐོབ་འོད་གསལ་ལ་ཐིམ་པ་ཞེས་ཟེར་བ་ཡང༌། དོན་དུ་སྔར་ཉེར་ཐོབ་ཀྱི་སྐབས་ཀྱི་མི་རྟོག་པ་དེ་ཉིད་ཅུང་ཟད་སད་ནས་རང་བཞིན་གཞིར་གནས་ཀྱི་འོད་གསལ་དོན་དམ་ལྷན་ཅིག་སྐྱེས་པའི་ཡེ་ཤེས་བཅོས་མིན་དུ་ཤར་བ་ནི། སྟོན་གྱི་དུས་སུ་ཐོ་རངས་ཀྱི་ནམ་མཁའ་བསླད་བྱེད་ཀྱི་རྐྱེན་གསུམ་དང་བྲལ་བ་ལྟ་བུ་སྟེ་ཐམས་ཅད་སྟོང་པའི་འོད་གསལ་ཞེས་བྱའོ། ༈ ཞེ་སྡང་གི་རྟོག་པ་སོ་གསུམ་ནི། ཡུལ་མི་འདོད་པའི་རྣམ་པ་ཅན་ལ་ཤས་ཆུང་ངུ༌། འདོད་ཆགས་དང་བྲལ་བ་དང༌། འབྲིང་འདོད་ཆགས་དང་བྲལ་བ་བར་མ་དང༌། ཆེན་པོ་ཤིན་ཏུ་འདོད་ཆགས་དང་བྲལ་བ་དང༌། གང་ཡིད་ཀྱི་འོང་བ་དག་དང་ཡུལ་མི་སྙིང་དམར་བ་མངའ་ཐང་ལོངས་སྤྱོད་སོགས་ལ་སྤྲོ་སེམས་ཡོད་པའི་ཡིད་ནང་གི་ཡུལ་ལ་ཚུར་འཇུག་པ། ཡིད་ཀྱིས་འགྲོ་བ་དང་སྤྱིར་ཕྱི་ཡི་ཡུལ་ལ་ཕར་འགྲོ་བ། སོང་བ་དང་ཡུལ་གྱི་རྗེས་སུ་བྱེ་བྲག མྱ་ངན་དང་ཡུལ་ཡིད་དུ་འོང་བ་དང་བྲལ་བའི་སེམས་ཀྱི་གདུང་བ་ཆུང་ངུ༌། མྱ་ངན་བར་མ་དང་འབྲིང༌། ཤིན་ཏུ་མྱ་ངན་དང་ཆེན་པོ། སེམས་ཉེ་བར་གནས་པའམ་ཡང་ན་སེམས་རྣལ་དུ་འདུག་པའི་དལ་བ་ཞི་བ་དང༌། རྒོད་པར་གནས་པའམ་ཡང་ན་སེམས་རྩིང་པར་རྟོག་པ་རྣམ་པར་མི་རྟོག་པ་དང༌། ཡུལ་ཡིད་དུ་མི་འོང་བ་དང་ཕྲད་ནས་སེམས་སྐྲག་པ་ཆུང་ངུ་འཇིགས་པ་དང༌། འབྲིང་འཇིགས་པ་བར་མ་དང༌། ཆེན་པོ་ཤིན་ཏུ་འཇིགས་པ་དང༌། ཡུལ་ལ་ཞེན་པ་ཐ་མ་སྲེད་པ་དང༌། འབྲིང་སྲེད་པ་བར་མ་དང༌། རབ་ཤིན་ཏུ་སྲེད་པ་དང༌། དམག་གྱོད་སོགས་ཀྱིས་རྫས་སུ་འདོད་ཡོན་གྱི་ཡུལ་རྣམས་ཀུན་ཏུ་འཛིན་པ། ཉེ་བར་ལེན་པ་དང༌། དགེ་བའི་ལས་ལ་ཡིད་གཉིས་ཟ་བའམ་ཡང་ན་རང་གི་སེམས་མི་གསོད་པ་མི་དགེ་བ་དང༌། ཟས་འདོད་པ་བཀྲེས་པ་དང༌། བཏུང་བ་འདོད་པ་སྐོམ་པ་དང༌། སྡུག་ན་བདེ། བདེ་ན་སྡུག །ཅི་ཡང་མ་ཐུབ་པའི་བཏང་སྙོམས་གསུམ་ལ་ཡུལ་གྱི་སྒོ་ནས་ཆུང་ངུ་ཚོར་བ་དང༌། འབྲིང་ཚོར་བ་བར་མ་དང༌། ཆེན་པོ་ཤིན་ཏུ་ཚོར་བ་དང༌། རིག་པ་དང༌། རིག་པ་པོ་རང་དང༌། རིག་པར་བྱེད་པ་ཡིད་དང༌། རིག་བྱའི་ཡུལ་ལས་ཏེ་གསུམ་ལ་རྟོག་པ་གསུམ་དུ་གསུངས་པ་ལྟར་ན། གོང་གི་སོང་བ་ཞེས་པ་མི་བགྲང༌། ཡང་ན། རིག་པ་དང་རིག་བྱ་གཉིས་ལ་རྟོག་པ་གཉིས་སུ་བྱས་ནས་སོང་བ་བགྲང་བའང་ཡོད་ལ། རིག་པ་འཛིན་པའི་གཞི་དང༌། སོ་སོར་རྟོག་པ་རིག་པ་དང་མི་རིག་པར་དཔྱོད་པ་དང༌། རང་ངམ། ཆོས་རྒྱུ་མཚན་དུ་བྱས་ནས་སམ་བདག་གིས་ཕ་རོལ་པོ་འདི་མ་ཐུབ་ན་གཞན་གྱིས་ཁྲེལ་དོག་སྟེ་ཁ་ན་མ་ཐོ་བ་ལ་འཛེམ་པ་ངོ་ཚ་ཤེས་པ་དང༌། སྡུག་བསྔལ་དང་བྲལ་བར་འདོད་པ་སྙིང་རྗེ་བ་དང༌། དམིགས་བྱ་ཡོངས་སུ་བསྲུང་བ་དང་སྡུག་པ་དང་ཕྲད་འདོད་པ་སྟེ་གསུམ་ལ་བརྩེ་བ་དང༌། བརྩེ་བ་བར་མ་དང༌། ཤིན་ཏུ་བརྩེ་བ་དང༌། ཕ་རོལ་པོའི་ཅི་བྱེད་ཡང་ཡང་སྙམ་པའི་ཡིད་འཕྲིག་ཟོས་ཟེར་བའི་འཕྲིག་པ་དེ་ཡིན་པའི་སེམས་ངེས་པར་མི་གནས་པ་དོགས་པ་དང་བཅས་པ་དང༌། གཞན་གྱི་ཡོ་བྱད་གཞན་གནོད་པའི་ཆེད་དུ་རང་གིས་སྡུད་པའི་སེམས་ཀྱིས་སྡུད་པ་དང་འདི་ལ་བསགས་ཞེས་པའང་སྣང་སྟེ་འདྲའོ། །ཡོ་བྱད་ཀུན་ཏུ་འཛིན་པའི་སེམས་སེར་སྣ་རྣམས་སོ། འདི་ལ་ཕྲག་དོག་ཅེས་འབྱུང་བ་ལྟར་ན་གཞན་གྱི་ཕུན་ཚོགས་ལ་སེམས་འཁྲུགས་པའོ། ༈ འདོད་ཆགས་ཀྱི་རྟོག་པ་བཞི་བཅུ་ནི། འདི་ལ་ཞེན་པ་ཞེས་དམིགས་ཡུལ་རང་གི་ཐོབ་པའི་ཡུལ་ལ་ཡིད་ཆགས་པར་གསུངས་པ་འདོད་ཆགས་དང༌། མ་ཐོབ་པའི་ཡུལ་ལ་ཡིད་ཆགས་པ་དང༌། ཡིད་དུ་འོང་བ་མཐོང་ནས་སེམས་དགའ་བ་ཆུང་བ་དང༌། འབྲིང་དགའ་བ་བར་མ་དང༌། ཆེན་པོ་ཤིན་ཏུ་དགའ་བ་དང༌། འདོད་དོན་གྲུབ་པའི་བདེ་བའི་སེམས་པ་རངས་པ་དང༌། དེའི་རྣམ་པ་སེམས་ཀྱི་ཡང་དང་ཡང་དུ་མྱོང་བ་རབ་ཏུ་མགུ་བ་དང༌། གཏམ་སྣ་ཚོགས་པས་འདི་ཅི་ཡིན་ནམ་སྙམ་དུ་ཐེ་ཚོམ་ཟ་བའམ་ཡང་ན་སྔར་མ་བྱུང་བའི་དོན་ལ་སེམས་པ་མཐོང་བ་ངོ་མཚར་བ་དང༌། ཡིད་དུ་འོང་བ་མཐོང་ནས་སེམས་གཡེང་བ་རྒོད་པ་དང༌། བདེ་བའི་རྣམ་པ་མྱོང་བའམ་ཡང་ན་ཡུལ་དེས་ངོམས་པའི་རྟོག་པ་ཚིམ་པ་དང༌། འཁྱུད་པ་དང༌། འོ་བྱེད་པ་དང༌། འཇིབ་པ་སྟེ་དེ་རྣམས་བྱ་བར་འདོད་པའི་སེམས་གསུམ་དང༌། རྒྱུད་དབེན་པའི་ཡུལ་དེ་ལས་མི་འགྱུར་བའི་སེམས་བརྟན་པ་དང༌། དགེ་བ་ལ་གཞོལ་བ་བརྩོན་པ་དང༌། མཐོ་བར་སེམས་པ་ཁེངས་པ་དང༌། བྱ་བ་རྫོགས་པར་བྱེད་པ་དང༌། ནོར་འཕྲོག་པར་འདོད་པ་འཕྲོག་པ་དང༌། གཞན་དཔུང་འཇོམས་པར་འདོད་པ་སྟོབས་དང༌། དགེ་བའི་ལམ་ལ་སེམས་གོམ་པར་བྱེད་པའི་སེམས་སྤྲོ་བ་དང༌། དྲེགས་པའི་དབང་གིས་མི་དགེ་བར་སྤྱོད་པའམ་ཡང་ན་ཡུལ་ལ་འབད་པས་སྦྱོར་བ་ཆུང་ངུ་ཚམ་ཚོམ་མེད་པ་དང༌། འབྲིང་ཚམ་ཚོམ་མེད་པ་བར་མ་དང༌། ཆེན་པོ་ཤིན་ཏུ་ཚམ་ཚོམ་མེད་པ་དང༌། རྒྱུ་མཚན་མེད་པར་ཡང་དམ་པ་རྣམས་དང་རྩོད་འདོད་པ་དྲེགས་པ་དང༌། ཡིད་འོང་མཐོང་བས་འགྱིང་བའམ་རྩེ་བར་འདོད་པ་རྣམ་པར་སྒེག་པ་དང༌། འཁོན་དུ་འཛིན་པའི་སེམས་ཞེ་འགྲས་པ་དང༌། དགེ་བའི་ལས་ལ་རྩོལ་བར་འདོད་པ་དགེ་བ་དང༌། གཞན་གྱི་གོ་བར་སྨྲ་འདོད་པ་ཚིག་གསལ་བ་དང༌། འདུ་ཤེས་མ་བསྒྱུར་བར་སྨྲ་འདོད་པ་བདེན་པ་དང༌། འདུ་ཤེས་བསྒྱུར་བར་སྨྲ་འདོད་པ་མི་བདེན་པ་དང༌། ཡི་དམ་ཤིན་ཏུ་བརྟན་པ་ངེས་པ་དང༌། ཡུལ་ཡོངས་སུ་མི་འཛིན་པར་འདོད་པ་ཉེ་བར་མི་ལེན་པ། བདོག་པ་ཐམས་ཅད་གཏོང་བར་འདོད་པ་སྦྱིན་པ་པོ་ཉིད་དང༌། གཞན་ལེ་ལོ་ཅན་བསྐུལ་བར་འདོད་པ་བཏུལ་བ་དང༌། ཉོན་མོངས་སོགས་ཀྱི་དགྲ་ལས་རྒྱལ་བར་འདོད་པ་དཔའ་བ་དང༌། བདག་གམ་ཆོས་ཀྱི་དབང་དུ་བྱས་ནས་མི་འཛེམ་པར་མི་དགེ་བ་བཅུ་ལ་འཇུག་པ་ངོ་ཚ་མེད་པ་དང༌། བཅོས་མས་གཞན་བསླུས་གཡོ་ཅན་དང་འདི་ལ་སྒྱུ་ཞེས་པའང་ཟེར། ལྟ་བ་ངན་པ་ལ་བྱང་བ་གདུག་པ་ཅན་དང༌། གཞན་ལ་མཐོ་མཚམས་པ་མི་བསྲུན་པ་དང༌། རྒྱུད་མི་དྲང་བ་གྱ་གྱུ་ཆེ་བ་རྣམས་སོ། ༈ གཏི་མུག་གི་རྟོག་པ་བདུན་ནི། དོན་དུ་གཉེར་བྱའི་ངོ་བོ་ཇི་བཞིན་དུ་མི་ཤེས་འདོད་ཆགས་བར་མ་དང༌། དྲན་པ་ཉམས་པ་བརྗེད་ངས་དང༌། སྨིག་སྒྱུ་ལ་ཆུར་འཛིན་པ་སོགས་འཁྲུལ་པ་དང༌། སྨྲ་སྙིང་མི་འདོད་པ་མི་སྨྲ་བ་དང༌། ཡིད་སྲུན་པ་སྐྱེ་བ་སྐྱོ་བ་དང༌། དགེ་བ་ལ་མི་སྤྲོ་བ་ལེ་ལོ་དང༌། བདེན་པ་རྣམས་ལ་ཡིད་གཉིས་ཟ་བའམ་ཡང་ན་ལས་འབྲས་དང་ཆོས་ཉིད་ལ་ཡིད་གཉིས་ཟ་བ་ཐེ་ཚོམ་རྣམས་སོ། །དེ་ལྟར་སྣང་གསུམ་མམ་ཡང་ན་དགའ་བཞིས་དྲངས་པའི་འོད་གསལ་གང་ཡིན་ཀྱང་འདྲ་སྟེ་དེ་ལ་འོད་གསལ་ཙམ་དུ་འདྲ་ཡང༌། དཔེ་དོན་གྱི་འོད་གསལ་དུ་མ་དང༌། དཔེའི་འོད་གསལ་ལ་ཡང་མཆོག་དམན་གྱི་རིམ་པ་དུ་མ་ཡོད་ཀྱང༌། དེས་ན་མཐོང་ལམ་སྐྱེས་ཚུན་དཔེའི་འོད་གསལ་ཡིན་ནོ། །མཐོང་ལམ་གྱི་བདེན་པ་མཐོང་བ་ནི་དོན་གྱི་འོད་གསལ་ཡིན་ཏེ། དེ་ཕྱིན་ཆད་དོན་གྱི་འོད་གསལ་ལ་འགྱུར་བ་མེད་དོ། །འཆི་དུས་ཀྱི་ཐིམ་རིམ་རྫོགས་པའི་མཐའ་དང༌། གཉིད་དུས་སོགས་འོད་གསལ་ཤར་བ་ནི་གཞིའི་འོད་གསལ་ཡིན་ལ། རྣལ་འབྱོར་པའི་ལམ་གོམས་པའི་སྟོབས་ཀྱིས་དེ་ཉིད་ངོ་ཤེས་པར་བྱས་ནས་དཔེ་དོན་གྱི་འོད་གསལ་གང་རུང་སྦྱོར་རོ། །ལམ་གྱི་བསུན་མ་ནི་བར་དོ་ཡིན་ཏེ། ཉམས་ལེན་འབྲས་བུར་སྦྱོར་བའི་མཚམས་སྦྱོར་གྱི་རྐྱེན་ཡིན་པའི་ཕྱིར་རོ། །ལམ་གྱི་བློ་ཆོད་ནི་འཕོ་བ་ཡིན་ཏེ། ཚེ་འདིར་མཐར་མ་ཕྱིན་ན་མན་ངག་གིས་རྣམ་ཤེས་དག་ཞིང་དུ་བཙན་ཐབས་སུ་འཕོ་དགོས་པ་ཡིན་ནོ། །དེ་ལྟར་ཆོས་རྣམ་པ་དྲུག་སྐྱེས་བུ་གང་གིས་ལམ་བསྒོམ་པའི་རྩོལ་བ་དང་བཅས་པས་རང་ལུས་རྩ་རླུང་ཐིག་ལེ་གནད་དུ་བསྣུན་པས་འགྲུབ་ཀྱིས་གཞན་ཕྱག་རྒྱའི་རྐྱེན་ལ་རག་མ་ལུས་ཕྱིར། རང་ལུས་ཐབས་ལྡན་ནམ་སྟེང་སྒོ་རྣམ་གྲོལ་གྱི་ལམ་ཞེས་བྱའོ། །རང་ལུས་ཐབས་ལྡན་ལ་བརྟེན་ནས་རྩ་དྲང་ཐིག་ལེ་གནས་སུ་འཆུན། རླུང་བྱང་སྟེ་གསུམ་ཀ་ལ་གནད་དུ་སོང་ནས་ལས་སུ་རུང་བར་གྱུར་པ་ན། སླར་ཡང་བདེ་སྟོང་ལྷན་ཅིག་སྐྱེས་པའི་ཡེ་ཤེས་གཅིག་ཆར་དུ་ངོ་འཕྲོད་ནས་འཕགས་པའི་ལམ་དུ་སྦྱོར་བར་བྱེད་པ་གཞན་ལུས་ཐབས་ལྡན་འོག་སྒོ་ཁམས་གསུམ་རོལ་པའི་ལམ་ཕྱག་རྒྱ་ལ་བརྟེན་པ་ཡིན་ཏེ། འཁོར་བའི་ཆོས་སུ་སྣང་བ་ཀུན་གྱི་གཞི་རྩ་རླུང་ཐིག་ལེ་ཐམས་ཅད་ཀྱང་འོད་གསལ་ཆེན་པོར་གྲོལ་བའི་ལམ་དུ་འགྲོ་བའི་ཐབས་རྨད་དུ་བྱུང་བ་ནི་ཐབས་ཀྱི་ལམ་གཅིག་ཆར་བའམ་གཞན་ལུས་ཕྱག་རྒྱ་ཆེན་པོ་ཡིན་ནོ། །ཡང་ན་བསྐྱེད་རྫོགས་ཀུན་ཀྱང་ཡང་དག་པའི་ལམ་དུ་འགྲོ་བས་ན་ཐབས་ཀྱི་ལམ་ཁྱད་པར་བ་ཡིན་ནོ། །གཉིས་པ་སྤྲོས་བྲལ་སྣང་བ་མེད་པའི་རྫོགས་རིམ་དུ་དག་དགོས་པས་དེའི་ཚུལ་ནི། མཚན་མ་ཞལ་ཕྱག་ལ་སོགས་པའི་རྣམ་པར་གྱུར་པའི་བསྐྱེད་རིམ་དང༌། རྫོགས་རིམ་གྱི་ལྷ་གང་ཡིན་ཡང༌། མཐར་མི་དམིགས་པར་འཇོག་པ་སྟེ་དེ་ཡང་མ་དག་པའི་དངོས་ཞེན་སྦྱངས་ཏེ་དག་པར་བསྒོམས་པའི་སྣོད་བཅུད་ཀྱི་དངོས་པོ་ཐམས་ཅད་ཞིང་དང་གཞལ་ཡས་ཁང་ལྷ་དང་ལྷ་མོ་སོགས་རང་བཞིན་གྱི་བརྟན་གཡོར་སྣང་བ་ཀུན། འོད་དུ་ཞུ་ཞིང་གཞལ་ཡས་ཁང་ནས་རིམ་བཞིན་འཁོར། གཙོ་བོ། ཡེ་ཤེས་སེམས་དཔའ། དེ་སྙིང་གའི་ས་བོན་གྱི་བར་རྣམས་ལ་ཐིམ་ཞིང༌། ས་བོན་ཧཱུྃ་ཡིག་ལྟ་བུ་ཡིན་ན་ཞབས་ཀྱུ་ནས་ཐིག་ལེར་ཐིམ་པ་དེའང་མས་རིམ་ནས། ནཱ་དའི་བར་དུ་ཐིམ་ནས་སྤྲོས་བྲལ་ངང་དུ་བཞག་པས་ནམ་མཁའ་དྭངས་པ་བཞིན་སྟོང་པར་གྱུར་པ་ནམ་མཁའི་ངོ་བོ་ཉིད། ཀུན་རྟོག་གི་སྤྲོས་པ་བྲལ་ཞིང་སོ་སོ་རང་རིག་པའི་ཡེ་ཤེས་ཆེན་པོའི་སྤྱོད་ཡུལ་ཉིད་ལ་བཞག་པར་བྱའོ། །བྱེད་ལས་བསྐྱེད་རིམ་གྱིས་ནི་གནས་དོན་ལུས་ཀྱི་བག་ཆགས་སམ་སྒོ་གསུམ་དུ་སྣང་བའི་བདེན་ཞེན་འགོག་ཅིང༌། རྫོགས་རིམ་གྱིས་ནི་གྱ་ནོམ་ལྷར་ཞེན་ཏེ། སྣང་སྤྱོད་ཐམས་ཅད་སྒྱུ་མ་ལྟ་བུའི་ལྷར་གསལ་བས་ཞེན་རྟོག་སྤོང༌། ཐིག་ལེ་ལ་བརྟེན་ནས་བདེ་བ་དང༌། རླུང་ལ་བརྟེན་ནས་གསལ་བ་དང༌། རྩ་ལ་བརྟེན་ནས་མི་རྟོག་པ་དང་ལྷན་ཅིག་སྐྱེས་པའི་ཡེ་ཤེས་འདུས་མ་བྱས་པ་རྣམས་འཆར་རོ། །དེ་ལྟར་ཤིན་ཏུ་ཟབ་པའི་རྫོགས་རིམ་རྩ་ཐིག་རླུང་གསུམ་གནད་དུ་བསྣུན་ཏེ་ལྷན་སྐྱེས་ཀྱི་ཡེ་ཤེས་བླ་ན་མེད་པ་རྣམས་ནི། བླ་མེད་རྒྱུད་སྡེ་རྣམས་ལས་འོག་མར་གྱུར་པ་ཕྱི་རྒྱུད་སྡེ་གསུམ་ལས་བསྡུ་བ་ཙམ་དང༌། མི་རྟོག་པ་བསྒོམ་པ་ཙམ་ལས་གསུངས་པ་མེད་དོ། །དེས་ན་དབང་རྣོན་བརྩོན་འགྲུས་དང་ལྡན་པ་ཚེ་གཅིག་ལ་རྡོ་རྗེ་འཆང་གི་སར་འགྲོ་བའི་ཉེ་ལམ། སྣོད་མིན་ལ་སྦས་ཤིང་སྐལ་མེད་ཀྱི་སྤྱོད་ཡུལ་དུ་མ་གྱུར་པ་ཤིན་ཏུ་ཟབ་མོ་ཡིན་ནོ། །གསུམ་པ་དེའི་མཐུན་པའི་རྐྱེན་བསྐྱེད་རྫོགས་རྣམ་པ་གཉིས་ལམ་དུ་འགྲོ་ཞིང་དངོས་གྲུབ་གཉིས་འགྲུབ་པའི་གྲོགས་སུ་གྱུར་པ་དམ་ཚིག་ཡིན་ལ། དེ་བསྲུང་ཚུལ་ནི། དང་པོ་གསང་སྔགས་ལ་ཞུགས་ཤིང་དབང་ཐོབ་པའི་དུས་སུ་ཇི་ལྟར་ཁས་བླངས་པའི་སྔགས་ཀྱི་བརྟུལ་ཞུགས་སྤང་བླང་གི་གནད་ཐམས་ཅད་མི་ཉམས་པར་བསྲུང་དགོས་ལ། དེ་ཡང་གསང་སྔགས་ནི་ཉོན་མོངས་དང་འདོད་ཡོན་ཐམས་ཅད་ལམ་དུ་བྱེད་པའི་ཐབས་ཁྱད་པར་བ་ཡིན་པས། ཐེག་པ་འོག་མ་ལྟར་སྤང་བླང་ལ་དོན་དམ་པར་རྫས་སུ་མི་ལྟ་བར་མ་ཟད། ཐ་སྙད་ཙམ་དུའང་མཚན་མར་མ་ཞེན་པའི་སྒོ་ནས་སྔགས་ལམ་གྱི་ཁྱད་ཆོས་དང་ལྡན་པས་གང་ཟག་རང་རང་གི་རྒྱུད་ཚོད་དང་བསྟུན་པའི་ལྟ་སྒོམ་གྱིས་ཟིན་ནས་ལམ་དུ་བྱེད་པས་ཉོན་མོངས་རང་མཚན་པ་ཀུན་གྱི་གཉེན་པོར་འགྲོ་བའི་རྟེན་འབྲེལ་མི་འཆོལ་བར་བྱ་སྟེ། དཔེར་ན་རྨ་བྱའི་མགྲིན་པར་གཞན་དག་འཆི་བར་འགྱུར་བའི་བཙན་དུག་ཞུགས་ན་བཅུད་ལེན་དུ་གྱུར་ནས་འདབ་མ་ལྟ་ན་སྡུག་པ་ལྟར། རང་གི་གྲོགས་སུ་གྱུར་ཅིང་ལྟ་སྒོམ་གྱི་བོགས་འདོན་དུ་སྤྱད་དགོས་སོ། །དེ་ལ་དམ་ཚིག་དང་ནི་སྡོམ་པ་ཞེས་ཐ་སྙད་འདོགས་པའི་ཚུལ་གྱི་ཁྱད་པར་ནི། ས་མ་ཡ་ཞེས་པའི་སྒྲ་ལས་དྲངས་ན་དམ་ཚིག་སྟེ། དེ་ཡང་མི་ཉམས་པར་བསྲུང་ན་ཕན་ཡོན་ཐོབ་པས་དམ་ཚིག་ཏུ་བཤད་དེ། རྡོ་རྗེ་གུར་ལས། དམ་པ་རྣམས་ཀྱི་དགོངས་པ་ལ། །དབང་དང་བྱིན་རླབས་ཐོབ་པ་ཡིན། །དམ་པའི་ཚུལ་བཞིན་དེ་སྤྱད་ན། །མི་མཐུན་ཕྱོགས་རྣམས་འཚིག་པར་འགྱུར། །ཞེས་སོ། །དམ་ཚིག་དེ་ལས་འདའ་བར་བྱ་བ་མ་ཡིན་ལ། སྡོམ་པ་ནི་གནང་བཀག་གི་མཚམས་ལ་དཔྱད་དེ་བླང་བྱ་སྒོ་གསུམ་དཀྱིལ་འཁོར་གྱི་ངོ་བོར་སྡོམ་པར་བྱ་བ་དང༌། བླང་བར་མི་བྱ་བའི་དངོས་པོ་མཚན་རྟོག་དང་བཅས་པ་ལས་ཀྱང་སྡོམ་པའི་མཚམས་ངེས་པར་བྱེད་པ་སྟེ། དེས་དེ་གཉིས་སྔགས་སྡོམ་ངོ་བོ་གཅིག་པུ་ལའང་ལྡོག་ཆས་དབྱེ་བའོ། །འདིར་ཚིག་རྐང་གཉིས་ཀུན་མཁྱེན་རྩོམ་གཞིར་བྲི་བསུབ་བྱས་འདུག་པས་མི་དགོས་གསུངས་སོ། སྔགས་ཀྱི་བསླབ་པ་ཀུན་གྱི་སྤྱི་དོན་ཏེ་རྟེན་གཞི་ནི་སྔགས་སྡོམ་ཡིན་ལ། དེ་མ་ཐོབ་པ་དང༌། ཀུན་དཀྲིས་ཚང་སྟེ་ལྟུང་ཉམས་དང༌། བསླབ་པ་ཕུལ་བ་ལ་སོགས་པས་བཏང་བ་དང༌། ལྟུང་བའི་ས་མཚམས་མི་ཤེས་པའི་སྨྱོ་བ་ལ་སོགས་འདུ་ཤེས་རང་བཞིན་དུ་མི་གནས་པ་ལ། ལྟུང་བ་དང་དངོས་གྲུབ་མེད་དེ་རྟེན་མིན་པའི་ཕྱིར་རོ། །དེ་ལྟ་བས་ན་སྔགས་སྡོམ་ལྡན་ཞིང་མ་ཉམས་པ་དང༌། བསླབ་པ་མ་བཏང་ལ། ཤེས་པ་རང་བཞིན་རྣལ་དུ་གནས་ཏེ་ལྟུང་ལྟུང་མིན་གྱི་ས་མཚམས་ཤེས་ཤིང་དྲན་ནུས་པ་དེ། ལྟུང་བ་དང་ནི་དངོས་གྲུབ་གཉིས་ཀ་འབྱུང་བའི་སྣོད་ལྟ་བུ་ཡིན་ནོ། །རྩ་ལྟུང་ལྔ་པ་བྱང་ཆུབ་ཀྱི་སེམས་བཏང་བ་ནི་ཕམ་པ་དངོས་ཡིན་ལ། དེ་ལས་གཞན་པའི་རྩ་ལྟུང་བཅུ་གསུམ་མམ་བཅུ་གཉིས་པོ་ལ། རྩ་ལྟུང་གི་དངོས་གཞིར་གྲུབ་བྱེད་ཀྱི་ཀུན་དཀྲིས་ཞེས་བྱ་བའི་ཡན་ལག་བརྩི་ཚུལ་ནི། སློབ་དཔོན་ལ་སྨོད་པ་ལྟ་བུའི་ཉེས་པ་ཞིག་བྱེད་བཞིན་པ་ན། ད་དུང་བྱ་བ་དེ་བྱེད་འདོད་མ་ལོག་པ་དང༌། བྱ་བ་དེ་ལ་ཉེས་དམིགས་སུ་བལྟས་ནས་འགྱོད་པ་མེད་པ་དང༌། རང་ངོར་ལྟོས་པའི་གསང་སྔགས་ཀྱི་སྡོམ་འགལ་གྱི་ཉེས་པ་བྱུང་བ་ཤིན་ཏུ་གནོང་སྙམ་པས་ངོ་ཚ་མི་ཤེས་པ་དང༌། གཞན་ངོར་ལྟོས་པའི་ཁྲེལ་ཡོད་མེད་པ་སྟེ། ཆོས་གསུམ་མམ་དེ་སྟེང་ཉེས་པ་དེ་དག་ལ་དགའ་ཞིང་མགུ་བ་བསྣན་པ་སྟེ་བཞིར་བྱེད་པའང་ཡོད་ལ། དེ་དག་ཀུན་གང་ལྟར་ཚང་བའི་ཀུན་སློང་ངན་པ་དེ་སྐྱེས་པའི་སྐད་ཅིག་གཉིས་པ་ནས་བྱ་བ་དེ་ཡོངས་སུ་རྫོགས་པའི་མཐར་གཏུགས་པ་དེ་སྲིད་དུ་རྒྱུན་ཆགས་བར་མ་ཆད་པར་ཡོད་པར་གྱུར་ན། ཀུན་དཀྲིས་ཚང་བའི་ལྟུང་བ་ཆེན་པོ་བསྐྱེད་པས་མཐུན་ཕྱོགས་སྡོམ་པ་གཅོད་ཅིང༌། གཉེན་པོའི་ཕྱོགས་ཕམ་པར་འགྱུར་བ་ཡིན་ནོ། །གལ་ཏེ་རྩ་ལྟུང་བསྐྱེད་པའི་ཀུན་སློང་སྐྱེས་པ་ནས་དངོས་གཞི་མ་རྫོགས་པའི་བར་དེར་དུས་ཀྱི་བར་ཆད་ནས་རྒྱུན་ཆགས་སུ་མེད་པའམ། འདི་ལ་ཉེས་པ་འདི་ལྟ་བུ་ཡོད་དོ་སྙམ་ནས་སྤྱོད་འདོད་ལོག་པ་དང༌། ངོ་ཚ་ཁྲེལ་ཡོད་ཀྱི་བློ་སྐྱེས་པ་དང༌། དགའ་མགུ་ལོག་པའི་ཡིད་ཅུང་ཟད་སྐྱེས་པ་སྟེ་ཆོས་གསུམ་གང་ལས་གཅིག་ཤོས་མ་ཚང་ན། དངོས་གཞི་བསྐྱེད་པར་བྱ་བའི་ཡན་ལག་ཐམས་ཅད་མ་ཚོགས་པས་ཕམ་པའམ་རྩ་ལྟུང་དངོས་མིན་ཡང་ཉེས་པ་སྦོམ་པོར་འགྱུར་རོ། །ཀུན་དཀྲིས་བརྩི་ཚུལ་དེ་ཡིས་ལྟུང་བའི་མཚམས་ལེགས་པར་ངེས་ཤིང་ཤེས་པར་བྱས་ནས། རྩ་བ་དང་ཡན་ལག་གི་དམ་ཚིག་མཐའ་དག་ཀུན། རྩ་ལྟུང་བཅུ་བཞི་ཡན་ལག་གི་སྦོམ་པོ་བརྒྱད་ལྟ་བུའི་ནང་དུ་གནད་བསྡུས་ཏེ་ཡིད་ཀྱིས་བསྲུང་སེམས་མི་སྤོང་ལུས་ངག་གཉིས་ཀྱིས་དོར་བར་མི་བྱ་སྟེ། དགྲ་ལ་སོ་འཛུགས་པ་ལྟར་བསྲུང་བྱ་ཐམས་ཅད་མི་བརྗེད་པའི་དྲན་པས་ཉིན་ཐུན་གསུམ་དང༌། མཚན་མོ་ཐུན་གསུམ་སྟེ་ཆ་དྲུག་བགོས་པ་ལ། ཆ་རེའི་ནང་དུ་རྩ་ལྟུང་བཅུ་བཞི་པོའི་ཉེས་པ་བྱུང་ངམ་མ་བྱུང་བརྟག་དཔྱད་ཞིབ་ཏུ་བཏང་ནས་བསྔོ་བགྲང་བྱ། དེ་ལྟར་བྱས་ཚེ་གང་རུང་གི་ཉེས་སྐྱོན་གྱིས་གོས་པར་གྱུར་ན། བཏང་སྙོམས་མི་བྱ་བར་འགྱོད་པ་བསྐྱེད་ཅིང་ཕྱི་བཤོལ་མེད་པར་དེ་མ་ཐག་ཕྱིར་འཆོས་པའི་ཐབས་ལ་སེམས་ཤིང་བཤགས་པར་བྱའོ། །ཉེས་པ་གང་གིས་ཀྱང་གོས་པ་མིན་ན་དགའ་བ་བསྒོམ་ཞིང་དགེ་རྩ་གཞན་དོན་དུ་བསྔོ། །དེང་སྔོན་ཆད་ལྟུང་བས་གོས་སམ་མ་གོས་གང་ཡིན་ཀྱང༌། ད་ཕྱིན་ཆད་སྲོག་ལ་བབ་ཀྱང་རྩ་ལྟུང་གི་ཉེས་བྱས་ཀྱི་ལས་ཕྱོགས་མཐུན་སྦོམ་པོ་ཙམ་གྱིས་ཀྱང་གོས་པར་མི་བྱ་བའི་སྡོམ་སེམས་ཤིན་ཏུ་བརྟན་པར་བྱའོ། །གང་ཚེ་ཉིན་མཚན་ཆ་དྲུག་གང་ཡང་རུང་བའི་ནང་དུ་བསྔོ་བགྲང་བྱེད་པའི་འདུ་ཤེས་རྨོངས་ཏེ་བརྗེད་པར་གྱུར་ན། དྲན་ཤེས་ཀྱི་སྒོ་ནས་བསྔོ་བགྲང་བྱེད་པ་ལས་འདས་ཏེ་ཁ་ན་མ་ཐོ་བའི་སྦོམ་པོ་ཞེས་པ་འབྱུང་ཞིང༌། སྔོ་བགྲང་དྲན་ཤེས་མ་བྱུང་བར་ཐུན་ཚོད་ཀྱི་ཆ་དྲུག་ཀའང་འདས་ན་སྦོམ་པོ་དྲུག་ཏུ་འཕེལ་བར་འགྱུར་ལ། དེ་ལྟར་འཕེལ་བའི་ཉིན་ཞག་དེའི་ཁོངས་སུ་དྲན་ཤེས་མ་སླེབས་ཏེ་ཕྱིར་བཅོས་པའི་ཐབས་མ་གྲུབ་ན། ཞག་ཕྱི་མའི་སྐྱ་རེངས་དང་པོ་འཆར་བ་དང༌། ཉེས་པ་སྦོམ་པོ་བཅུ་གཉིས་དག་ཏུ་འགྱུར་བར་བཤད་པས་ཉིན་ཞག་རེ་བཞིན་འཕེལ་འགྱུར་ལ་གཞིག་སྟེ་གཟབ་པར་བྱའོ། །ཡན་ལག་གི་དམ་ཚིག་ལའང་དེ་ཡིས་འགྲེ་ཤེས་པར་བྱའོ། །ཐོག་མར་དུས་འཁོར། གཤེད་དམར། དགྲ་ནག་སོགས་བླ་མེད་རྒྱུད་སྡེ་སྤྱིའི་ཉམས་ལེན་ལ་གཅེས་པའི་ཆིངས་ཆེན་པོ་ཡིན་པས། རྩ་ལྟུང་བཅུ་བཞིའི་རབ་དབྱེ་ལ་འདི་ལྟར་བརྟགས་པར་བྱའོ། །ཡུལ་ཁྱད་པར་གྱི་དབང་དུ་བྱས་ན་རང་གི་དང་པོ་དབང་ཐོབ་སློབ་དཔོན་སྨོས་ཅི་དགོས། སྔགས་རྒྱུད་ཚིག་བཅད་གཅིག་པ་ཡན་ཆད་ཀྱི་དོན་ཕན་སེམས་ཀྱིས་མ་ནོར་བར་བཀྲལ་ནས་བསླབ་པ་དང༌། སྒོམ་བྱུང་གི་གནད་རྡོ་རྗེ་ཐེག་པའི་ལམ་གྱི་མན་ངག་ཟབ་མོའི་ཁྲིད་ཚུལ་བཞིན་དུ་སྟོན་པ་སྟེ་གསུམ་ལ། བྱང་ཆུབ་སྙིང་པོའི་བར་དུ་ཆོས་ཀྱི་ལམ་སྟོན་དུ་འབྲེལ་བའི་ཕྱིར་ཞབས་ཏོག་རྣམ་པ་གསུམ་གྱི་སྒོ་ནས་གཡོ་ཟོལ་མེད་པར་བསྙེན་བཀུར་དགོས་པ་དེའི་ཁུར་བོར་བ་དང༌། ཞེ་སྡང་ཕྲག་དོག་ཀུན་སློང་ངན་པ་སོགས་ཀྱིས་བརྙས་ཤིང་སྨོད་པར་བྱེད་པ་ནི། མཚམས་མེད་ལྔ་བས་ཀྱང་ཐུ་བ་ཡིན་ལ། བཤགས་སྡོམ་གྱིས་སོར་ཆུད་པར་མི་བྱེད་པ་དེ་ལ། སྔགས་ཀྱི་དངོས་གྲུབ་ལྟ་ཅི་ཐར་པ་ཡོད་པ་མ་ཡིན་ཏེ་མར་གྱི་ཟང་ཐལ་དུ་འགྲོ་བ་ཡིན་ནོ། །གཉིས་པ་སོ་བྱང་སྔགས་ཀྱི་སྡོམ་པ་གསུམ་པོ་སྤྱི་དང༌། བྱེ་བྲག་ཏུ་བསླབ་པའི་གནས་རྣམས་བདེ་བར་གཤེགས་པའི་གནང་བཀག་མཚམས་ལས་འདས་པ་དང༌། དེ་བཞིན་མཚན་ཉིད་ལྡན་པའི་བླ་མ་ཡི་གདུལ་བར་བྱ་བའི་ཡུལ། འདུལ་བའི་དུས་ཚོད་དང༌། དབང་པོ་དང༌། སྐལ་པའི་རིམ་པ་སོགས་ལ་དགོངས་ཏེ་སྔ་ཕྱི་འགལ་བ་ལྟ་བུ་དང༌། གནས་སྐབས་མི་འཚམས་པ་ལྟ་བུ་དང༌། ཆོས་དང་ཆོས་མི་མཐུན་པ་འདྲ་བ་ཅི་བྱུང་ཡང་དགོངས་གཞི་དང་དགོས་པ་ཁྱད་པར་ཅན་ཡོད་དོ་སྙམ་དུ་གསུང་སྣ་ཁྲིད་ན་ཕྱིས་དེའི་དགོས་པ་ཤེས་ཤིང་དོན་དང་ལྡན་པར་འགྱུར་ལ། དེ་ལྟར་མིན་ན་མི་རུང་སྙམ་པའི་སྒོ་ནས་བཀའ་ལ་ཁྱད་དུ་བསད་མི་རུང་ལ། དེ་ཁྱད་དུ་བསད་ན་གཉིས་པ་ཉམས་པ་ཡིན་ནོ། །གསུམ་པ་ཡུལ་ནི་དབང་གྲལ་གཅིག་ཏུ་ཕ་མ་གཅིག་པའི་སྤུན་བཞིན་འདྲེས་པའི་མཆེད་ལ་ཀུ་རེ་ཡན་ཆད་ཞེ་སྡང་ཕྲག་དོག་འཁོན་འཛིན་གྱི་བསམ་པས་སྐུར་པ་འདེབས་པ་དང༌། མི་བཀུར་ཞིང་བརྙས་པ་བྱས་པ་ལ་སོགས་པ་ཀུན་དཀྲིས་ཚང་ན་དེ་ལྟུང་བ་འགྱུར་ཚུལ། སངས་རྒྱས་ཡེ་ཤེས་ཞབས་ཀྱི་རིམ་པ་རྣམ་པར་བཞག་པ་ལས། དཀྱིལ་འཁོར་སློབ་དཔོན་རིག་མ་གཅིག །དབང་བཞི་དག་གི་བྱེ་བྲག་གིས། །ཉེ་དང་ཁྱད་པར་བྱེ་བྲག་གོ །ཞེས་དང༌། ཤཱནྟི་པས་ཀྱང༌། སྤུན་ཞེས་བྱ་བ་ནི་གང་དང་སློབ་དཔོན་གཅིག་ལ་དཀྱིལ་འཁོར་དུ་དབང་ཐོབ་པ་སྟེ། དེ་ལ་ཕྲག་དོག་གི་དབང་སོགས་ཀྱི་རྒྱུས་སྐྱོན་རྣམས་བརྗོད་པར་མི་བྱའོ། །ཞེས་སོགས་སྔ་ཕྱིར་བྱོན་བཞུགས་རྣམས་ཀྱི་དབྱེ་སྲོལ་མཁས་པ་རྣམས་ཀྱིས་དམིགས་ཀྱིས་བསལ་བར་མཛད་ན་ཡང༌། དེ་ཤིན་ཏུ་གཉན་པ་ཙམ་ལས་གཞན་བསྲུང་དགོས་ཏེ། དེ་ཡང་མཐའ་ཡས་པའི་སེམས་ཅན་ཐམས་ཅད་བདེ་གཤེགས་སྙིང་པོའི་རིགས་གཅིག་གིས་བསྡུས་པའི་སྤུན་ཡིན་པའི་ཕྱིར་སྤྱིའི་མཆེད་དང༌། བསྟན་སྒོར་ཞུགས་སོ་འཚལ་ཆོས་བརྒྱུད་གཅིག་པ་རིང་བའི་མཆེད་དང༌། གསང་སྔགས་སྡོམ་པར་དམ་ཚིག་གཅིག་པ་ཉེ་བའི་མཆེད་ཡིན་པས། དེ་རྣམས་ཀུན་ལའང་བསྲུང་དགོས་པ་མཚུངས་ཏེ། གསལ་བཀྲ་ལས། མཐའ་ཡས་སེམས་ཅན་རང་རིག་ཕྱིར། །གང་དག་བདག་ལས་གཞན་མེད་ཅིང༌། །བདེ་གཤེགས་སྙིང་པོའི་སྤུན་ཡིན་ཕྱིར། །མ་འོངས་སངས་རྒྱས་རང་བཞིན་ན། །སྤྱི་ཡི་མཆེད་དེ་ཕ་ཚན་བཞིན། །སངས་རྒྱས་ཆོས་ཞུགས་རིང་བ་དང༌། །ལྟ་སྤྱོད་མཐུན་པ་ཉེ་བར་བཤད། །ཕ་གཅིག་དམ་ཚིག་ནང་འདྲེས་པ། །ཞེས་སོ། །བཞི་པ་བསམ་པ་ངན་ཞིང་སྦྱོར་བ་རྩུབ་པས་ཀུན་ལ་གནོད་འཚེ་བྱེད་པའི་སེམས་ཅན་ཞིག་མཐོང་བའི་ཆོས་ཚེ་འདི་རང་གི་སྔོན་ལས་ཀྱིས་ལུས་སེམས་སྡུག་བསྔལ་གྱིས་མནར་བར་གྱུར་པ་དེ་ལ་དགའ་བ་བསྒོམས་ནས་སེམས་ཅན་གཅིག་ལའང་བྱམས་པའི་སེམས་གཏོང་བ་དེ་ནི། བྱང་ཆུབ་སེམས་དཔར་ཉེས་པ་རབ་ཏུ་ལྕི་བ་ཡིན་ན། སེམས་ཅན་གཞན་བདེ་བ་དང་བྲལ་བར་འདོད་པ་དེ་ལ་གསང་སྔགས་ཀྱི་རྩ་ལྟུང་འབྱུང་བ་སྨོས་ཅི་དགོས། ལྔ་པ་གཞན་དོན་དུ་བྱང་ཆུབ་དོན་དུ་གཉེར་བའི་དམ་བཅའི་བསམ་པ་དང་འགལ་བའི་བྱང་ཆུབ་སེམས་ཟུར་གཉིས་གང་རུང་ཉམས་ཏེ་སྤངས་པའི་བློ་སྐྱེས་པའི་མོད་ལ་སྨོན་སེམས་རྩ་བ་ནས་གཏོང་བའི་ཕྱིར། ཐེག་ཆེན་མདོ་སྔགས་ཀྱི་ལམ་གྱི་རྩ་བ་བྱང་སེམས་ཡིན་པས་དེ་བཏང་བ་ཙམ་གྱིས་ཀུན་དཀྲིས་ཚང་བའི་ཕམ་པར་འགྱུར་བ་ཡིན་ལ། ཡན་ལག་གཞན་ཚང་མི་དགོས་སོ། །གནང་བའི་སྐབས་བདུན་ནི། གསང་བའི་དབང་དང་གསུམ་པ་དང༌། །རོ་མཉམ་པ་དང་ལྷ་མཆོད་དང༌། །རིགས་རྒྱུད་སྤེལ་དང་རིལ་བུ་དང༌། །འཆི་ལྟས་བརྟགས་པའི་དུས་ཡིན་ནོ། །ཞེས་བདུན་པོའི་སྐབས་མ་གཏོགས་པར་ཆགས་སེམས་ཀྱི་ཀུན་སློང་གིས་ཁུ་བ་གཏན་ནས་ཉམས་རུང་བ་མིན་པ་ལ། དེར་ཁུ་བ་ཕྱུང་ན་ཕམ་ལྟུང་ངོ༌། །དྲུག་པ་ནི་སྤྱིར་ཐེག་པ་ཕྱི་ནང་གི་ཕྱོགས་ལ་ལྟ་ཅི། མུ་སྟེགས་པའང་མི་སྨོད་པར་གསུངས་ན་ཉན་རང་བྱང་སེམས་ཏེ་ཐེག་པ་གསུམ་གང་རུང་ལ་ལྟོས་པའི་རྒྱལ་བའི་བཀའ་མདོ་སྔགས་ཀྱི་ཚུལ་མཐའ་དག་དང༌། སྟོན་པ་པོའི་སློབ་དཔོན་སོགས་ལ་འཕྱ་སྨོད་ཀྱིས་དཔྱས་ཏེ་བརྙས་ཤིང༌། འདི་འདྲ་བ་ནི་སྟོན་པས་མ་གསུངས། བཀའ་མིན། ལམ་རྣམ་དག་མིན་ནོ་ཞེས་སྨྲ་བ་དང༌། གཞན་ཡང་ལས་ཕྲན་ཚེགས་དང༌། ལས་བཞི་དང༌། དངོས་གྲུབ་གཉིས་ཀྱི་རྒྱུར་རུང་བའི་དག་སྣང་དང༌། བཀའ་གཏེར་གྱི་ཕྱོགས་སུ་གཏོགས་པའི་སྔགས་ཆོག་དང༌། མན་ངག་དང༌། ཁྲིད་སོགས་དང༌། མདོ་སྔགས་ཀྱི་དགོངས་འགྲེལ་བསྟན་བཅོས་རྒྱ་བོད་ཀྱི་མཁས་གྲུབ་རྣམས་ཀྱིས་གསུངས་པ་གཞན་ཐམས་ཅད་རྒྱལ་བའི་བཀའ་དང་དགོངས་པ་མཐུན་ཞིང་རྗེས་སུ་གནང་བའི་བཀའ་དང༌། སྐུ་གསུང་ཐུགས་ཡོན་ཏན་ཕྲིན་ལས་སོགས་ཀྱི་བྱིན་གྱིས་བརླབས་པའི་བཀའ་དང་དབྱེར་མེད་ཀྱང་བཀའ་རུ་མ་བལྟས་ཏེ་བརྙས་ནའོ། །བདུན་པ་གསང་སྒྲོག་ནི། དབང་གི་ཆོ་ག་མ་བྱས་པ། རྗེས་གནང་ཙམ་ཡང་མ་ཐོབ་པ་ལ་བསྐྱེད་རྫོགས་སྟོན་པ་དང༌། ཆོ་ག་མ་རྫོགས་ཏེ་དབང་གོང་མ་མ་ཐོབ་པ་ལ་རྫོགས་རིམ་སྟོན་པ་དང༌། ཉམས་ཏེ་རྩ་ལྟུང་ཕྱིར་མི་འཆོས་ཤིང་ཁེ་ཉེན་ལ་ཡིད་མི་ཆེས་པ་དང༌། སྣོད་ངན་ཏེ་དབང་ཐོབ་ཀྱང་གསང་སྔགས་ཟབ་མོའི་ལྟ་སྤྱོད་ལ་སྐྲག་པའི་རིགས་དང༌། སྔགས་ཀྱིས་འདུལ་བའི་དུས་ཀྱིས་བསྐལ་ཏེ་ཟབ་མོ་སྟོན་པའི་སྐབས་སུ་མ་བབ་པ་དང༌། གནས་ཀྱིས་བསྐལ་ཏེ་དགག་བྱ་དམིགས་བསལ་ཡོད་པ་ལ། གསང་སྔགས་རྡོ་རྗེ་ཐེག་པའི་ཐུན་མིན་ཟབ་མོའི་དོན་དང༌། ཉམས་ལེན་གྱི་དགོངས་པ་དང༌། སྤྱོད་པ་རྨད་དུ་བྱུང་བ་འདི་ཞེས་ཁྲིད་ཀྱི་སྒོ་ནས་གསང་བ་བསྒྲགས་པ་ནི་དམིགས་བསལ་ཏེ་རྩ་ལྟུང་དངོས་གཞི་ཡིན་གྱི། གཞན་དུ་རིག་གཏད་དང་རྗེས་གནང་བཟླས་ལུང་ཙམ་གྱིས་ཀྱང༌། གསང་སྒྲོགས་དུ་འགྱུར་བར་ངོས་འཛིན་ཡོད་ནའང་འདིར་ནི་སྣོད་ལ་བརྟག་པར་གཅེས་ཏེ་རྩ་ལྟུང་དུ་འགྱུར་བའི་ཕྱིར་རོ། །བརྒྱད་པ་གཟུགས་སོགས་ཕུང་པོ་ལྔ་ནི་རྣམ་སྣང་ལ་སོགས་རྒྱལ་བ་རིགས་ལྔ་དང༌། འབྱུང་ལྔ་ཡུམ་ལྔ་དང༌། དེ་བཞིན་དུ་སྐྱེ་མཆེད་རྣམས་སེམས་དཔའ་སེམས་མ་སོགས་ལྷ་སྐུར་ཡེ་ནས་གནས་པ་མི་ཤེས་པར། ཀུན་འབྱུང་གིས་བསྐྱེད་པའི་སྡུག་བསྔལ་གྱི་བདེན་པའི་རང་བཞིན་དུ་མངོན་པར་སྒྲུབ་པར་བྱེད་པའི་ཐེག་པ་འོག་མའི་རྟོག་གེའི་བློས་གཞལ་ཏེ། བརྙས་སེམས་ཀྱིས་ཡན་ལག་གཏུབ་པ་དང༌། དུག་དང་གཡང་སར་མཆོང་བ་སོགས་དང༌། སྨྱུང་གནས་སོགས་དཀའ་ཐུབ་མཐུ་ཡིས་ལྷག་པར་གདུང་བར་བྱེད་ཅིང་འདུ་ཤེས་ལོག་སྟེ་བརྙས་སེམས་མཐར་ཐུག་སྐྱེས་ཏེ་ཀུན་དཀྲིས་ཚང་ནའོ། །དགུ་པ་ཆོས་རྣམས་རང་བཞིན་གདོད་ནས་དག་ཅིང་བསམ་གྱིས་མི་ཁྱབ་པའི་སྟོང་ཉིད་ཟུང་འཇུག་གི་དོན་སྒྲིབ་པ་ཐམས་ཅད་དང་བྲལ་བའི་སངས་རྒྱས་ཁོ་ནའི་སྤྱོད་ཡུལ་ཉིད་ཡིན་གྱི། དེ་ལས་གཞན་སེམས་ཅན་གྱི་ཁམས་བདེ་གཤེགས་སྙིང་པོ་དང་འབྲེལ་བར་བཞུགས་པས་གློ་བུར་གྱི་དྲི་མ་དག་མ་དག་ཙམ་ལས་སངས་རྒྱས་སེམས་ཅན་དབྱེར་མེད་པའི་དོན་གསུངས་པ་ལ། བྱིས་པ་རྣམས་སྐྲག་པ་སྤངས་ཏེ་ལམ་ལ་སྤྲོ་བ་བསྐྱེད་ཕྱིར་རང་བཞིན་མེད་པ་ཙམ་ལ་དགོངས་ནས་གསུངས་པའི་ཕྱིར་ལྡེམ་དགོངས་སུ་བཟུང་སྟེ་ཐེ་ཚོམ་ཟོས་ནས། ཡང་དག་པའི་ལམ་དེ་ལ་དཀྲི་བར་སྤངས་བའི་བློ་སྐྱེས་ན་ཀུན་དཀྲིས་ཚང་བའོ། །བཅུ་པ་གདུག་པ་ཅན་མི་བསྒྲལ་བའི་ལྟུང་བ་དེ་ལ་སྤྱིར་དཀོན་མཆོག་གསུམ་དང༌། བྱེ་བྲག་རང་གི་བླ་མར་སྨོད་པ་དང༌། ཐབས་སྣ་ཚོགས་ཀྱིས་ལུང་རྟོགས་ཀྱི་བསྟན་པ་འཇིག་པར་བྱེད་པ་སོགས་ཁོངས་ནས་དམ་ཚིག་ཉམས་ཀྱང་མི་གསོ་ཞིང་ཉམས་པའི་སྤྱོད་པ་མི་གཏོང་བ་དང༌། སྔགས་ཀྱི་ཐེག་པར་ཞུགས་པ་ལས་སླར་ལོག་སྟེ་ཁྱད་གསོད་བྱེད་པ་དང༌། གསང་སྔགས་ཀྱི་ཆོས་ལ་འཁུ་བ་དང༌། སྔགས་སྤྱོད་ལ་འདུ་བར་མི་དབང་ཡང་རྐུ་ཐབས་སམ་ཤེད་སྤྱོད་ཀྱིས་འོང་བ་དང༌། སེམས་ཅན་ཡོངས་ལ་འཚེ་བ་དང༌། དམ་ཚིག་ཅན་ལ་དགྲ་བྱེད་པ་དང༌། མི་དགེ་བ་ཁོ་ནར་སྤྱོད་ཅིང་འཇུག་པ་ངན་པའི་ངང་ཚུལ་ཅན་ཏེ་སྡུག་བསྔལ་གྱི་རྒྱུ་ལ་སྤྱོད་པ་དང༌། འབྲས་བུ་ངན་སོང་གསུམ་གཅིག་ཏུ་བརྩི་བ་སྟེ། གསལ་བཀྲ་ལས། དཀོན་མཆོག སངས་རྒྱས་སྐུ་གཟུགས་ཡན་ཆད། ཆོས་ལུང་རྟོགས། དགེ་འདུན་སེར་གོས་བྱོན་པ་ཡན་ཆད་དམ། སློབ་དཔོན་སྐུ་དགྲ་སློབ་དཔོན་ལ་འཚེ་བ་ནི། རྒྱལ་བསྟན་ཡོངས་རྫོགས་ཀྱི་མངའ་བདག་སློབ་དཔོན་ཡིན་ཕྱིར་གཉིས། །དམ་ཉམས་ལོག་དང་འཁུ་བ་དང༌། །འདུ་བར་འོང་དང་ཡོངས་ལ་གནོད། །དམ་དགྲ་ངན་པའི་ངང་ཚུལ་ཅན། །ངན་སོང་གསུམ་དང་བཅུ་པོ་ནི། །རྣལ་འབྱོར་ཀུན་གྱིས་དང་དུ་བླང༌། །ཞེས་ནུས་པ་ཐོབ་པའི་རྣལ་འབྱོར་པས་དྲག་ཤུལ་གྱི་ཆོ་ག་ཡི་སྒོ་ནས་སྒྲོལ་བའི་ལས་མངོན་དུ་སྤྱོད་པའི་ཡུལ་ཏེ། དེ་རྣམས་ནི་མི་བསྒྲལ་ལ་བསྲན་ཅིང་བཟོད་ནས་དེ་ལ་ཡི་རང་བའི་སེམས་ཀྱིས་སྤྱོད་ལམ་འདྲིས་ཤིང༌། ཕན་འདོགས་པའི་བཤེས་སུ་སྦྲེལ་ནས་ལུས་ངག་གིས་བྱམས་པར་བྱས་པའོ། །བཅུ་གཅིག་པ་ནི། མིང་ཆོས་ཀྱི་དབྱིངས་ཞེས་འདྲ་དཔེ་མཚོན་བརྡ་སོགས་དང་བྲལ་ཞིང༌། ཐ་སྙད་ལས་འདས་ཀྱང་ཆོས་ཉིད་དེ་ཁོ་ན་ཉིད་ལ་ཐ་སྙད་པའི་བློ་ཚད་མས་སྟོང་དང་བདག་མེད་སོགས་གཞལ་ཀྱང༌། ཆོས་ཀྱི་བདག་མེད་ནི་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་ལས་ཐ་སྙད་པའི་བློའམ་ཤེས་པ་དང་རྫས་འགལ་བ་ཡིན་བཞིན། རྟོག་དཔྱོད་ཀྱི་རིག་པ་རྣོན་པོས་ཕུང་སོགས་ཆོས་རྣམས་སྟོང་པ་ཉི་ཚེ་བར་གནས་ལུགས་སུ་རློམ་ཞིང་ལྟ་བ་མཆོག་ཏུ་འཛིན་པའི་བློས། སྐྱེ་བ་མེད་པའི་གྲུབ་མཐའ་ཆོས་ཉིད་བསམ་གྱིས་མི་ཁྱབ་པའི་དོན་རྟོག་པ་རང་མཚན་པས་རློམ་སྟེ་འཇལ་བའོ། །བཅུ་གཉིས་པ་ནི་སྔགས་ཀྱི་སྣོད་རུང་མན་ངག་འཛིན་པ་ལ་དབང་བའི་གདུལ་བྱའམ། མིན་ཀྱང་རང་བཞིན་དུ་ཆོས་ལ་དད་པ་དང༌། འདུན་པ་དང༌། ཡིད་ཆེས་ཏེ་དད་པ་གསུམ་དང་ལྡན་པ་ལ། དེས་དོན་དུ་གཉེར་བའི་ཆོས་དེ་སྟོན་ནུས་བཞིན་དུ་ལེ་ལོ་སོགས་ཀྱི་དབང་གིས་མི་སྟོན་པ་ཙམ་མ་ཡིན་པར། གཡོ་སྒྱུ་སོགས་ཀྱི་ཀུན་སློང་ངན་པས་གཞན་དེའི་དོན་དུ་གཉེར་བྱ་དེ་ལ་འགལ་ཚིག་སྨྲས་ཏེ་སེམས་སུན་ཕྱུང་ནས། དད་པ་དང༌། འདུན་པ་ཕྱིན་ཅི་ལོག་ཏུ་སྐྱོགས་པས་ཆོས་དེ་ལ་དད་འདུན་ལོག་ཅིང་ཀུན་དཀྲིས་ཚང་བར་གྱུར་པའོ། །བཅུ་གསུམ་པ་དུས་ཚོད་འབྲེལ་བའི་སྤྱད་བྱའི་དམ་རྫས་གསང་སྔགས་དང་འབྲེལ་བའི་རིགས་ཤ་ལྔ་དང༌། བདུད་རྩི་ལྔ་སོགས་ལ་རང་རྒྱུད་དུ་བལྟས་ནས། དྲི་ང་ཞིང༌། རོ་མི་ཞིམ་པ་སོགས་ལ་ལ་སྤོང་ཞིང༌། དེ་ལས་ལྡོག་པ་ལ་ལ་དག་ནི་སྲེད་ཞེན་གྱིས་བསྟེན་པ་དང༌། ཆོས་ཉིད་མཉམ་པ་ཉིད་ཀྱི་དོན་རྟོགས་པས་ཡེ་ཤེས་ཀྱི་རྒྱན་དུ་བླང་དོར་མེད་པར་རོལ་པའི་སྔགས་ཀྱི་བརྟུལ་ཞུགས་ཇི་ལྟ་བ་བཞིན། ལྟ་སྒོམ་གྱི་སྟོབས་ཀྱིས་ཉམས་འོག་ཏུ་མ་ཆུད་པར་ཉན་ཐོས་ཀྱི་སྤྱོད་པ་ཕྱོགས་གཅིག་པར་ཞེན་པའི་མཆོག་འཛིན་གྱིས་མི་བསྟེན་པའམ། ལྟ་དགོངས་ཀྱི་གདེང་མེད་བཞིན་བབ་ཅོལ་དུ་སྤྱོད་པ་སྟེ་མཐའ་གཉིས་མལ་དུ་འཁྱམས་པ་དང་ཀུན་དཀྲིས་ཚང་བའོ། །བཅུ་བཞི་པ་ནི་རྣལ་འབྱོར་མ་སོགས་འཇིག་རྟེན་ལས་འདས་པའི་ཡེ་ཤེས་ཀྱི་མཁའ་འགྲོ་མ་དག་ལ་སྨད་ན། ཡོ་ག་དང་བླ་མེད་གཉིས་ཀའི་རྩ་ལྟུང་དུ་གསུངས་ལ། མ་མོ་མཁའ་འགྲོ་ལ་སོགས་འཇིག་རྟེན་གྱི་ཚུལ་བཟུང་ནས་ལེགས་ཉེས་ཀྱི་སྟངས་འཛིན་ཅིང་དམ་ཚིག་གི་རྗེས་གཅོད་པའི་སྔགས་ཀྱི་རྣལ་འབྱོར་མ་རྣམས་ནི་འཁོར་འདས་ཀྱི་སོ་མཚམས་འཛིན་པ་གནས་དང་ཞིང་ལས་སྐྱེས་པའི་ཡེ་ཤེས་དང་འཇིག་རྟེན་གྱི་མཁའ་འགྲོ་མ་རྣམས་ལ་སྨོད་པ་དང༌། འབྱུང་བ་ལྔ་ཡི་ཁམས་ལ་ཡུམ་ལྔ་ཡི་རང་བཞིན་དུ་མ་ཤེས་ནས་རང་རྒྱུད་པར་བལྟས་ཏེ་སྙིང་ནས་སྨོད་པར་བྱེད་པ་དང༌། སྤྱིར་བུད་མེད་ཐམས་ཅད་ཤེས་རབ་ཀྱི་རང་བཞིན་དང༌། ཁྱད་པར་དུ་བདེ་ཆེན་ལྷན་སྐྱེས་ཡེ་ཤེས་སྐྱེད་པའི་ཟབ་མོའི་དབང་གི་རྟེན་གྱུར་བུད་མེད་སྨོད་ཅིང་ཀུན་དཀྲིས་ཚང་བའོ། །རྩ་ལྟུང་བཅུ་བཞིའི་ཡན་ལག་སྡོམ་པ་གཏོང་བྱེད་ཀྱི་ཕམ་པ་མིན་ཡང༌། དངོས་གྲུབ་ཐོབ་པ་ལ་གེགས་སུ་ཆེ་བའི་སྦོམ་པོ་བརྒྱད་ཡོད་དེ། དབང་གིས་རྒྱུད་མ་སྨིན་པ་དང༌། དམ་ཚིག་སྡོམ་པས་རྒྱུད་མ་སྦྱངས་པའི་ཐ་མལ་དུ་གནས་པའི་བུད་མེད་རིག་མར་བརྟེན་པ་དང༌། རྒྱུད་ལས་གསུངས་པའི་མཚན་ཉིད་མ་ཚང་ཞིང་བསྟེན་བྱར་འགལ་བའི་དྲན་པའི་ཁྲོན་པ་སྟེ་མཁའ་གསང་ནས། བདེ་སྟོང་གི་ཡེ་ཤེས་བསྐྱེད་པའི་ཆོ་ག་ཇི་ལྟ་བ་མ་ཡིན་བཞིན་པས་རིལ་བུའམ་བདེ་བ་སྐྱེད་པའི་རྒྱུར་བདུད་རྩི་སྟེ་དམར་ཆ་རླུང་སྟོབས་ཀྱིས་ལེན་པའོ། །དབང་མ་ཐོབ་པ་དང༌། ལྷག་པར་གསང་སྔགས་ཀྱི་ཆོས་ལ་དད་པ་མེད་པའི་རིགས་ལ། ཡི་དམ་ལྷ་ཡི་སྐུ་གཟུགས་དང༌། རྒྱུད་ལུང་མན་ངག་གི་སྒྲུབ་ཐབས་གླེགས་བམ། རྡོར་དྲིལ་སོགས་ཕྱག་མཚན། བཅའ་བའི་ཕྱག་རྒྱ་པད་ཀོར་སོགས་དགོས་མེད་དུ་སྟོན་པ་དང༌། ཚོགས་ཀྱི་འཁོར་ལོ་སོགས་གསང་སྔགས་ཀྱི་ཆོ་གའི་ཚོགས་གྲལ་དུ་འདུས་པའི་དུས་ན། བླ་མའམ་རྡོ་རྗེ་སྤུན་ལ་འཐབ་རྩོད་དང༌། བབ་ཅོལ་དུ་དྲན་ཤེས་མ་བསྟེན་པར་མཚར་གཏམ་སོགས་ཀྱལ་ཀས་བསམ་གཏན་གྱི་བརྟུལ་ཞུགས་ཐ་མལ་དུ་སྦྱར་ནས་གཡེང་བར་བྱེད་པའོ། །སྣོད་རུང་དད་པ་དང་ལྡན་པས་དམ་ཆོས་འདྲིལ་བ་ལ། དེའི་དོན་ཤེས་བཞིན་དུ་དེ་ལས་འགལ་བའི་སྙོན་དོར་ཏེ། དེ་ལས་གཞན་དོན་མེད་པ་ཞིག་ལན་དུ་ལྡོན་པའམ་སྨྲ་བའོ། །སྔགས་ཀྱི་ལྟ་སྤྱོད་ལ་སྐུར་ཞིང་ཉམས་སད་པ་སྟེ་ཚོད་ལྟ་བའི་ཉན་ཐོས་དངོས་སམ་རྟོག་གེ་པའི་ནང་དུ་ཞག་བདུན་ལོངས་པར་བསྡད་པ་དང༌། སྔགས་ཀྱི་རྒྱུད་སྡེའི་དོན་དང༌། ཕྱི་ནང་གསང་བའི་དེ་ཁོ་ན་ཉིད་ཀྱི་ཆོ་ག་མི་ཤེས་བཞིན་དུ། བདག་རྡོ་རྗེ་འཛིན་པར་རློམ་ནས་ང་རྒྱལ་གྱིས་གཞན་མགོ་སྐོར་བའི་རྫུན་དང་འགྲོགས་པའོ། །དབང་བསྐུར་ཙམ་ཐོབ་ཀྱང་སྔགས་ཀྱི་ལྟ་དགོངས་ཟབ་མོ་ལ་ཧ་ཅང་མི་དད་པའི་ཐེ་ཚོམ་ཅན་ཚོགས་བཤད་ཙམ་བསྟན་བྱའི་ཡུལ་དེ་ལ་སླར་ཡང་གསང་བའི་དོན་མན་ངག་སློབ་བཤད་དུ་འཆད་པ་སྟེ་གྲངས་བརྒྱད་པོ་འདི་ནི། ཀླུ་སྒྲུབ་ཀྱིས་བསྡུས་པ་དེ་བཞིན་དུ་ཆ་མཐུན་སློབ་དཔོན་དཔའ་བོ་དང༌། རྣལ་འབྱོར་མ་ལཀྵྨཱི་ཀ་ར་ཏེ་ཕུན་ཚོགས་འབྱུང་གནས་ཀྱིས་སྦོམ་པོ་བརྒྱད་འདྲ་བ་ལས་བདུད་རྩི་ལེན་པ་དང་སྔགས་པར་རློམ་པ་གཉིས་པོ་དེ་ལས་དོན་གཞན་པ། གྲངས་དུས་མཚན་མའི་བསྙེན་པ་གང་རུང་གིས་ལྷའི་རྣལ་འབྱོར་དག་པར་མ་བྱས་བཞིན་དུ་དབང་བསྐུར་བ་དང༌། རབ་གནས་སྦྱིན་སྲེག་སོགས་དཀྱིལ་འཁོར་གྱི་བྱ་བ་ལ་ཞུགས་ནས་སློབ་མ་འཁོར་དུ་བསྡུ་བར་རིངས་པ་སྟེ་སྔས་པ་དང༌། ཚོགས་འཁོར་གྱི་དུས་ལས་གཞན་དུ་ཡང་ཕྱི་དྲོའི་ཁ་ཟས་སོགས་སོ་བྱང་སྐབས་ཀྱི་བཅས་པ་ལ་དགོས་པ་ཆེན་པོ་ཡོད་པ་མི་ཤེས་པར་ཁྱད་གསོད་མེད་ཀྱང༌། ཇི་མི་སྙམ་དུ་འདའ་བ་ཡི་སྦོམ་པོ་རྣམས་ཀྱིས་ཀྱང་བདག་ཉིད་ཀྱི་བསླབ་པ་སུན་འབྱིན་ཏེ་སྐྱོན་ཅན་དུ་འགྱུར་ན། དངོས་གྲུབ་འཕྲོག་སྟེ་གེགས་བྱེད་པའི་རྒྱུར་འགྱུར་བར་གསུངས་པའི་སྦོམ་པོ་དེ་རྣམས་ལའང་བརྟག་པར་བྱ་བར་རིགས་སོ། །འདི་ལྟར་རྣལ་འབྱོར་བླ་མེད་རྒྱུད་སྡེ་ཐུན་མོང་གི །རྩ་ལྟུང་བཅུ་བཞིར་བྷ་ཝི་ལྷ་སྟེ་སློབ་དཔོན་དཔའ་བོས་བསྡུས་པ། བླ་མེད་ཀྱི་རྒྱུད་སྡེ་ཀུན་ལ་ཁྱབ་ཅིང་གསར་རྙིང་ཐམས་ཅད་ལ་ཡོངས་སུ་གྲགས་པ་སྟེ། གཞན་དུ་བྱ་སྤྱོད་རྣལ་འབྱོར་གྱི་རྒྱུད་སྡེ་བཞི་པོ་སོ་སོའི་རང་ལུགས་ཀྱི་རྩ་ལྟུང་བཅུ་བཞིའི་གྲངས་ངེས་པ་ཡོད་དེ། འདི་ལྟར་དུས་ཀྱི་འཁོར་ལོ་དང༌། གསང་བ་སྤྱི་རྒྱུད། རྣམ་སྣང་མངོན་བྱང༌། དེ་ཉིད་སྣང་ཆེན་སོགས་ལས་གསལ་པོར་གསུངས་པ་རྣམས་ཀྱང་ངེས་པར་བྱའོ། །རྣལ་འབྱོར་ལ་བརྩོན་པ་དང་ལྡན་པ་རྣམས་ནི་འཆི་བའི་རྐྱེན་ལ་བབ་པའམ་སྲོག་གཏོང་དགོས་ཀྱང་སླ་སྟེ། དུས་རྟག་ཏུ་དམ་ཚིག་མངོན་ལྐོག་ཐུབ་པ་ཞིག་བསྲུང་བར་མ་བྱས་ན། སྔགས་ལམ་ལ་ཞུགས་ཤིང་སྤྱོད་པའི་སྐྱེས་བུ་དམ་ཚིག་ཉམས་ཤིང་ཕྱིར་མ་བཅོས་ན་སྦྲུལ་སྨྱུག་དོང་དུ་བཅུག་པ་བཞིན་དུ་ངན་སོང་དམྱལ་གནས་སུ་འགྲོ་བ་དང༌། དམ་ཚིག་རྣམ་པར་དག་ན་རིང་མཐའ་སྐྱེ་བ་བཅུ་དྲུག་གམ་ཉེ་བ་ཚེ་གཅིག་ནས་སངས་རྒྱས་འགྲུབ་པ་དང༌། གཉིས་པོ་དེ་ལས་འགྲོ་ས་གསུམ་པ་མེད་དོ། །རྒྱུ་མཚན་དེ་ཉིད་ཀྱི་ཕྱིར་ན་ལྟུང་བ་བྱུང་ན་བདག་ཉིད་འགྱོད་པ་དྲག་པོས་སུན་ཕྱུང་སྟེ་བསམ་སྦྱོར་གཉིས་ཀའི་ཉེས་ལྟུང་ལ་སྨད་ནས། ཕྱིར་བཅོས་ཐབས་ལ་བཤོལ་མེད་པར་དེ་མ་ཐག་ཏུ་འབད་པར་བྱའོ། །ཁྱད་པར་རྩ་ལྟུང་དང་པོ་སློབ་དཔོན་ལ་སྨོད་པ་ནི་ཉེས་པ་ཤིན་ཏུ་ལྕི་སྟེ། སྒྱུ་འཕྲུལ་དྲྭ་བའི་རྒྱུད་ལས། བླ་མ་ལ་ནི་སྨོད་པ་དང༌། །ཐུགས་དཀྲུགས་པ་ཡི་ཉེས་པ་ནི། །ཕྱི་ཡི་རྒྱ་མཚོ་ཆེན་པོ་ལས། །ཆུ་དེ་སྐྲ་ཡིས་གཏོར་གྱུར་པ། །དེ་ཡི་ཚད་དུ་སྡུག་བསྔལ་མྱོང༌། །རྡོ་རྗེའི་དམྱལ་བར་གྲགས་པ་ཡིན། །ཞེས་སོ། །གལ་ཏེ་ལྟུང་བ་བྱུང་བར་གྱུར་ན། སྙིང་ནས་འགྱོད་པ་དྲག་པོའི་སྒོ་ནས་བླ་མ་ལ་དད་མོས་ཀྱིས་བསྙེན་བཀུར་བ་དང༌། འཁོར་གསུམ་ཡོངས་དག་སྟེ་ཡོད་དགུ་ཐམས་ཅད་འབུལ་ནས་ཐུགས་ཟིན་པར་བྱ་ཞིང༌། དེའི་རྗེས་སུ་དབང་བསྐུར་བསྐྱར་ནས་ཞུས་ཏེ་སྡོམ་པ་གསོར་གཞུག་ཅིང༌། བླ་མ་མི་བཞུགས་པའམ་ཕྱོགས་སུ་ཉེ་བར་རང་མི་གནས་པ་དང༌། ལམ་འཕྲང་གི་འཚེ་བས་བཀག་པ་ལྟ་བུས་མི་ནུས་ན། བླ་མ་དཀྱིལ་འཁོར་གྱི་ཁྱབ་བདག་ཏུ་ཤེས་པས་གསལ་གདབ་ལ་བདག་འཇུག་ལན་གྲངས་མང་དུ་བླངས་ནས་སོར་ཆུད་པར་བྱའོ། །དེ་བཞིན་དུ་གཞན་སྦོམ་པོ་གཙོར་གྱུར་པའི་ཉེས་ལྟུང་རྣམས་ལ་ཁྲེལ་ཡོད་དང་ངོ་ཚའི་རྟེན་དུ་གལ་ཏེ་བླ་མ་མེད་པར་གྱུར་ན་སྔགས་ཀྱི་སྡོམ་པ་ཡང་དག་དང་ལྡན་པའི་མདུན་བཤགས་པར་བྱ་སྟེ། སྙིང་པོ་རྒྱན་ལས། ལྟུང་སོགས་ཉེས་པའི་རིམ་པ་ལས། །དང་པོ་བདག་སེམས་སུན་ཕྱུང་སྟེ། །ཡུལ་མདུན་སྙན་གསན་དབབ་ནས་ཀྱང༌། །གསུམ་བླང་གསུམ་འགལ་བཤགས་པ་དང༌། །ཞེས་སོ། །དེ་ཡང་དཔའ་བོའི་སྟོན་མོ་སོགས་ཀྱི་རྗེས་ཕྱག་དང་སྤྱོད་ལམ་དུལ་བས། རྒྱལ་སྲས་རིག་པ་འཛིན་པ་ཆེན་པོར་མཁྱེན་པར་གསོལ་ནས། རང་གི་གསང་བའི་མིང་སྨོས་ནས། བདག་མ་རིག་པ་དང༌། ཉོན་མོངས་པའི་དབང་དུ་གྱུར་པས་རིག་པ་འཛིན་པའི་སྡེ་སྣོད་ཆེན་པོའི་ཚུལ་ཁྲིམས་ཀྱི་བསླབ་པའི་གཞི་ལས་རྡོ་རྗེ་ཐེག་པའི་འདུལ་བ་དང༌། འགལ་བའི་ནོངས་པ་བླ་མ་ལ་སྨོད་པ་ལ་སོགས་པ་རྩ་བའི་ལྟུང་བ་བཅུ་བཞི་དང༌། ཡན་ལག་སྦོམ་པོའི་རྣམ་གྲངས་བརྒྱད་ལས་འདི་དང་འདི་བྱུང་བས། རྒྱལ་བ་སྲས་དང་བཅས་པ་རྣམས་དང༌། རིག་པ་འཛིན་པ་ཆེན་པོའི་སྤྱན་སྔར་འཆབ་སྟེ་སྦེད་ཅིང་གསང་ན་ནི། བདག་ཉིད་ཉེས་ལྟུང་དང་བྲལ་བའི་བདེ་བ་ལ་རེག་པའི་གནས་སྐབས་འབྱུང་བར་མི་འགྱུར་བས། འཆབ་པ་མེད་པར་སྙིང་ནས་བཤགས་ཤིང་ཕྱིན་ཆད་ལེགས་པར་སྡོམ་པར་བགྱིའོ། །ཞེས་གསོལ་ནས། བཤགས་ཡུལ་གྱིས། དེ་ལ་ཁྱོད་ཀྱི་ཉེས་ལྟུང་འདི་རྣམས་ལ་ཉེས་པར་མཐོང་ངམ་ཞེས་དྲིས་པ་ན། རང་གིས་མཐོང་ལགས་བརྗོད། བཤགས་ཡུལ་གྱིས་ཕྱིན་ཆད་ལེགས་པར་སྡོམ་པར་བྱེད་དམ་དྲི་བ་ན། རང་གིས་ཀྱང་སེམས་བརྟན་པའི་དམ་བཅའ་དང་བཅས་ཆོས་བཞིན་འདུལ་བ་བཞིན་དུ་སྤྱི་བོས་ནོད། ཅེས་མཐོང་སྡོམ་དྲི་བ་དང་བཅས་པ་ལན་གསུམ་བརྗོད་ལ། རྗེས་སུ་བཤགས་ཡུལ་གྱིས་ཐབས་ཡིན་ནོ། །ཞེས་ཉེས་ལྟུང་དག་པའི་ཐབས་ཡིན་པར་བསྟན་པས། རང་གིས་ལེགས་སོ་ཞེས་ངེས་ཤེས་བསྐྱེད་པར་བྱའོ། །གལ་ཏེ་དེ་ལྟ་བུའི་ཕྱིར་བཅོས་འགྱངས་ན། ཞག་རེ་རེ་བཞིན་དུ་ཉེས་ལྟུང་གོང་འཕེལ་དུ་འགྲོ་བར་འགྱུར་ཏེ། སྙིང་པོ་རྒྱན་གྱི་རྒྱུད་ལས། རྟག་ཏུ་བག་མེད་པར་གནས་དང༌། །ཉེས་པ་ཆུང་ངུ་ཕྲ་མོ་ཡང༌། །སྦྲུལ་གྱི་མཆེ་བས་བཏབ་བཞིན་དུ། །ལུས་ངག་སེམས་ནི་ཉམས་པར་བྱེད། །ཅེས་སོ། །དེ་ལྟར་འཕེལ་བར་འགྱུར་བ་དེ་ཡི་གཉེན་པོ་རུ་དམིགས་ནས་ཉིན་མཚན་དྲུག་གམ་གསུམ་སོགས་སུ་གསང་ཆེན་རིགས་གཅིག་གི་རྡོར་སེམས་སྤྱི་བོར་བསྒོམ་སྟེ་སྟོབས་བཞི་ཚང་བའི་ངང་ནས། ཡིག་བརྒྱ་ཉེར་གཅིག་བརྒྱ་སྟོང་སོགས་མ་ཡེངས་པར་བཟླས་པས་རྟག་ཏུ་བཤགས་ཤིང་རྩ་ལྟུང་བཅུ་བཞིའི་བསྔོ་བགྲང་བརྗོད་པའི་བཤགས་ཚིག་བྷ་ཝི་ལྷས་མཛད་པ་སོགས་ཀྱང་གདོན་པར་བྱའོ། །དེ་ཡང་ཡི་གེ་བརྒྱ་པ་འདོན་ཚུལ་ནི། སྦོམ་པོའི་འགྲེལ་བ་ལས། དེའི་མེའི་སར་མིང་སྤེལ་བར་བྱའོ་ཞེས་པས། སརྦ་སིདྡྷི་མེ་ཆེ་གེ་མོ་པྲ་ཡཙྪ་ཞེས་གདོན་པས་ལྟུང་བ་འཕེལ་བར་མི་འགྱུར་བ་སྙིང་པོ་རྒྱན་ལས་གསུངས་ཏེ། རྡོ་རྗེ་སེམས་དཔའ་ལ་དམིགས་ཏེ། །ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་གཅིག་རེ་རེ་བཟླས། །ལྟུང་སོགས་བྱིན་གྱིས་བརླབས་གྱུར་པས། །འཕེལ་བ་རུ་ནི་མི་འགྱུར་ཞེས། །གྲུབ་པ་མཆོག་རྣམས་ཀྱིས་བཤད་པས། །ཐུན་མཚམས་སུ་ནི་སྦྱང་བར་བྱ། །འབུམ་ཕྲག་དུ་ནི་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་སོ། །གསར་རྒྱུད་རྣམས་དང་ཐུན་མོང་དུ་མ་གྱུར་པའི་ཁྱད་པར་མདོ་དགོངས་པ་འདུས་པ་དང༌། རྒྱུད་སྒྱུ་འཕྲུལ་དྲྭ་བ་དང༌། སེམས་སྡེ་རྫོགས་པ་ཆེན་པོ་སྟེ་སྔ་འགྱུར་རྒྱུད་སྡེ་གསུམ་པོའི་རིང་ལུགས་ཀྱི་བསྲུང་བྱ་དམ་ཚིག་གི་རིམ་པ་ནི། ཞེས་པའོ། །དང་པོ་སྤྱི་མདོ་དགོངས་འདུས་ཀྱི་ལུགས་ནི། སྤྱི་མདོ་དགོངས་པ་འདུས་པར། སྐུ་དང་གསུང་ཐུགས་རྡོ་རྗེ་ཡི། །བསྲུང་དང་སྤྱད་དང་ཡིད་འོང་དང༌། །མི་འདོར་ཤེས་བྱ་བསྒྲུབ་པ་དང༌། །ཞེས་པས་རྩ་བའི་དམ་ཚིག་གསུམ་ནི། བསྲུང་བའི་ཡུལ་ལྷ་དང་བླ་མ་གཉིས་སུ་མེད་པ་གཙོ་བོ་ཡིན་ལ། སྲུང་ཚུལ་ཕན་འདོགས་པ་དང༌། གནོད་པ་སྤང་བའི་གཞིའི་གཙོ་བོ་ལུས་ཡིན་པས། སྐུ་ཡི་དམ་ཚིག་དུ་བླ་མ་དང་ལྷ་ལ་གུས་པར་བལྟ་ཞིང༌། མཆེད་དང་ལྕམ་དྲལ་གྱིས་མཚོན་པའི་འགྲོ་བ་ཐམས་ཅད་བླ་མའི་སྐུ་ཡི་གདུལ་བྱ་ཡིན་པས་གནོད་པ་སྤང་བ་དང༌། རྣམ་པར་སྨིན་པའི་ལུས་ཀྱི་སྣང་ཞེན་བསྐྱེད་རིམ་གྱིས་སྦྱོང་བར་བྱེད་པའོ། །དགེ་མི་དགེའི་རྣམ་འགྱུར་ཐམས་ཅད་ངག་ལ་བརྟེན་ནས་བསྐྱེད་པས། གསུང་གི་དམ་ཚིག་ཏུ་སྔགས་དང་ཕྱག་རྒྱ་རྒྱུན་མི་གཅོད་པ་དང༌། ངག་གི་ཉེས་པ་སྤང་ཕྱིར་བླ་མས་ཅི་གསུང་བསྒྲུབ་པ་དང༌། མཆེད་ལྕམ་གྱི་ངག་མི་གཅོག་པ་དང་བཅས་པའོ། །འཁོར་བར་བསྐྱེད་པའི་རྒྱུའི་གཙོ་བོ་ཡིད་ཡིན་པས། ཐུགས་རྡོ་རྗེ་ཡི་དམ་ཚིག་ཏུ་ཡིད་ཀྱི་ཉེས་པ་སྤང་ཞིང་གསང་བ་གཞན་ལ་མི་སྤེལ་བ་དང༌། བྱང་ཆུབ་ཀྱི་སེམས་རྣམ་པ་གཉིས་བསྐྱེད་ཅིང་བླ་མ་དང་ཐུགས་ཡིད་བསྲེ་བ་དང༌། ཏིང་ངེ་འཛིན་གྱི་སྒོ་དུ་མ་ལ་སྤྱོད་པ་སྟེ། གསལ་བཀྲ་ལས། རང་ལུས་རྒྱལ་བའི་ཕྱག་རྒྱ་ཆེ། །སེམས་ཅན་ཁམས་ཀྱང་དེར་ཤེས་ཤིང༌། །སྣང་སྟོང་གཉིས་མེད་རྡོ་རྗེའི་སྐུ། །བྱས་མཐོང་ཐོས་པ་ཐམས་ཅད་ཀྱང༌། །སེམས་ཕྱིར་གང་ཡང་བྱས་སྣང་མེད། །དྲན་དང་ཤེས་བཞིན་སྔོན་བཏང་ལ། །དུས་གསུམ་རྒྱུན་དུ་མ་དྲན་ན། །ཐེག་ཆེན་སྔགས་པར་ཅི་ཡིས་ཆུད། །ཅེས་སོ། །དེ་ལྟར་རྩ་བའི་བསྲུང་བྱ་གསུམ་དང༌། ཡན་ལག་གི་དམ་ཚིག་ཐབས་ལྡན་དུ་སྤྱད་པར་བྱ་བ་ཏ་ན་སྒྲོལ། ག་ན་སྦྱོར་མ་བྱིན་པ་རྫུན་ངག་འཁྱལ་ཏེ་ལྔ་དང༌། ཡིད་འོང་སྟེ་སྤང་བྱར་མི་བལྟ་བ་ལམ་དུ་བྱེད་པ་ཉོན་མོངས་ལྔ་དང༌། སྨེ་བར་བལྟས་ནས་མི་འདོར་བ་དྲི་ཆེན་ དྲི་ཆུ་ མཾ་ས་ རཀྟ་ ཟིལ་པ་སྟེ་བདུད་རྩི་ལྔ་དང༌། ལྟ་བས་ལྷར་ཤེས་པར་བྱ་བ་ཕུང་ལྔ་རིགས་ལྔ། འབྱུང་ལྔ་ཡུམ་ལྔ། ཡུལ་ལྔ་སེམས་མ་ལྔ། དབང་ལྔ་སེམས་དཔའ་ལྔ། ཁ་དོག་ལྔ་ཡེ་ཤེས་ལྔ་ཕུང་པོ་འབྱུང་ཡུལ་སོགས་ལྔ་དང༌། བསྒོམས་པས་དབྱེར་མེད་དུ་སྒྲུབ་པར་བྱེད་པ་དེ་བཞིན་གཤེགས་པའི་རིགས། རྡོ་རྗེ། རིན་ཆེན། པདྨ། ལས་ཀྱི་རིགས་ཏེ་ལྔའི་དབྱེ་བས་ཉི་ཤུ་རྩ་ལྔ་དང༌། རྩ་བའི་གསུམ་སྟེ་ཉེར་བརྒྱད་དོ། །རྒྱུད་སྡེ་སྒྱུ་འཕྲུལ་གྱི་ལུགས་རྩ་བའི་དམ་ཚིག་རྣམ་པ་ལྔ་གསུངས་ཏེ། གསང་སྙིང་ལས། བླ་མེད་མི་སྤོང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །གྲུབ་དང་བསྒྲུབ་པའི་དམ་ཚིག་མཆོག །ཅེས་དང༌། ཡན་ལག་གི་དམ་ཚིག་རྣམ་པ་བཅུར་བཤད་དེ། གཏི་མུག་ཆགས་དང་ཞེ་སྡང་དང༌། །ང་རྒྱལ་ཕྲག་དོག་མི་སྤོང་ངོ༌། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་དོར་རོ། །ཞེས་སོ། །དང་པོ་རྩ་བའི་དམ་ཚིག་གི་ཕྱོགས་བཤད་པ་ལ་ནི། གསལ་བཀྲ་ལས། བྱང་སེམས་རྣམ་གཉིས་སློབ་དཔོན་དྲུག །མཆེད་བཞི་སྔགས་གསུམ་ཕྱག་རྒྱ་བཞི། །གསང་བཅུ་རྩ་བར་ཤེས་པར་བྱ། །ཞེས་པས། དང་པོ་བླ་མེད་མི་སྤང་ངོ༌། །ཞེས་བྱང་ཆུབ་ཀྱི་སེམས་གཉིས་ཏེ། དོན་དམ་བྱང་ཆུབ་ཀྱི་སེམས་ལྷག་པའི་བདེན་པ་དབྱེར་མེད་ཆོས་སྐུ་ཆེན་པོའི་ངང་དུ་འཇོག་པའོ། །ཀུན་རྫོབ་བྱང་སེམས་དེ་ལྟར་མ་རྟོགས་པའི་སེམས་ཅན་སྒྲོལ་འདོད་ཀྱི་ལྷག་པའི་བསམ་པ་སྟེ། ཡི་དམ་གྱི་ལྷ་བསྒོམ་པ་ཉིད་ལ་འདུ་བའི་དབང་དུ་མཛད་དེ་ལོགས་སུ་མ་གསུངས་སོ། །དེ་ཡང་ཐེག་ཆེན་སྤྱིའི་ལུགས་ཀྱི་བྱང་སེམས་མི་གཏོང་བ་དང༌། དཀོན་མཆོག་ལ་བསྙེན་བཀུར་མི་འདོར་བ་དང༌། སྔགས་ཕྱི་པས་དེའི་སྟེང་དུ་རང་གི་ལྷག་པའི་ལྷ་མཆོད་ཅིང་བསྒོམ་པར་བསྟན་པ་དེ་དག་ཀྱང་འདིར་སྟོང་ཉིད་དང་སྙིང་རྗེ་ཟུང་དུ་འཇུག་པའི་ངང་ལས་རྟགས་ཀྱི་ལྷ་སྐུ་ཕྱག་རྒྱ་བསྒོམ་པ་ལ་འདུ་སྟེ། སངས་རྒྱས་དང་དགེ་འདུན་ནི་ཐབས་ཤེས་གཉིས་སུ་མེད་པའི་བྱང་ཆུབ་སེམས་ཀྱི་བྱེ་བྲག་ཡིན་ལ། ཆོས་ནི་དེའི་ཆོས་ཉིད་ཡིན་པས། བྱང་ཆུབ་ཀྱི་སེམས་རིན་པོ་ཆེ་དང་ཆོས་ཉིད་ནི་ཀུན་རྫོབ་ཙམ་དུ་ཆོས་ཅན་བདག་ཉིད་གཅིག་པ་དང༌། དོན་དམ་སྤྲོས་པ་ཉེར་ཞིའི་རང་བཞིན་ཡིན་པས། ཟུང་འཇུག་ཡེ་ཤེས་དེ་ཡི་རྟགས་ཀྱི་ཕྱག་རྒྱ་ལྷ་སྐུ་ཡིན་ཏེ། དཀོན་མཆོག་འགྲེལ་ལས། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། །དེ་སྩོལ་བའི་བླ་མ་དེ་རྟགས་ཀྱི་ཕྱག་རྒྱ་རྒྱ་ལྷག་པའི་ལྷ། །ཞེས་གསུངས། དེ་ལྟར་འདུ་བའི་ཚུལ་ཤེས་པར་བྱས་ནས་བཤད་བྱ་བཞི་སྟེ། དེ་ཡང༌། བླ་མ་ལ་བཀུར་བའི་ཡུལ་སློབ་དཔོན་དྲུག་སྟེ། གསལ་བཀྲ་ལས། སྤྱི་དང་འདྲེན་དང་དམ་ཚིག་དབང༌། །ཉམས་ཆག་སྐོང་དང་ཤེས་རྒྱུད་འགྲོལ། མན་ངག་ལུང་གི་སློབ་དཔོན་དྲུག །ཅེས་པས། ཀུན་གྱི་བཀུར་གནས་སུ་གྱུར་ཅིང༌། རང་གིས་ཀྱང་ཆོས་འབྲེལ་ཅུང་ཟད་ཐོབ་པ་སྤྱིའི་སློབ་དཔོན་དང༌། རབ་བྱུང་གི་མཁན་པོ་ལྟ་བུ་ཆོས་སྒོར་འདྲེན་པའི་སློབ་དཔོན། དབང་བསྐུར་བ་པོ་དམ་ཚིག་དབང་གི་སློབ་དཔོན། ལྟུང་བ་བཤགས་པའི་ཡུལ་ཉམས་ཆག་སྐོང་བའི་སློབ་དཔོན། རྒྱུད་སོགས་འཆད་པ་པོ་ཤེས་རྒྱུད་འགྲོལ་བའི་སློབ་དཔོན། ཁྲིད་འཆད་པ་པ་ོ་མན་ངག་ལུང་གི་སློབ་དཔོན་ཏེ་དྲུག་ཡིན་ཞིང༌། དེ་དག་ལས་གསང་སྔགས་ཀྱི་ཆོས་བཀའ་དྲིན་ཐོབ་པ་ནི་རྡོ་རྗེ་སློབ་དཔོན་དུ་གྱུར་པས་གཉན་ལ། ཁྱད་པར་དབང་བསྐུར་རྒྱུད་བཤད་མན་ངག་སྟོན་པ་གསུམ་ཤིན་ཏུ་གཉན་པས་དེ་རྣམས་མི་སྤོང་ཞིང་བཀུར་སྟིས་ཇི་ལྟར་བསྙེན་པའི་ཚུལ་ནི། བཀའ་དྲིན་ཐོབ་ཚུལ་གྱི་དཔེ་དང་སྦྱར་ནས་རིམ་པར། གསལ་བཀྲ་ལས། ཡུལ་ལ་དབང་བའི་རྒྱལ་པོ་བཀུར་འོས་དང༌། །ལམ་འཛུད་ཁུ་བོ་དབང་ནོད་ཕ་དང་བཤགས་ཡུལ་མ་དང་རྒྱུད་འཆད་མིག །མན་ངག་སྟོན་པ་བས་སྙིང་ལྷག་པའི་ཚུལ་བལྟས་ཏེ། །ཞེས་སོ། སྔགས་རྒྱ་རྒྱུན་མི་བཅད་པའི་ཡུལ་ནི། གསལ་བཀྲ་ལས། རྩ་བ་ཧཱུྃ་སོགས། རྒྱུ་མ་ནོར་བ་དང་སྐྱེད་པ་རྐྱེན་དང་བཟླས་པ་ལས་སྔགས་དང༌། །དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །ཞེས་པས་སྔགས་གསུམ་དང་ཕྱག་རྒྱ་བཞི་པོ་རབ་ཆུ་བོའི་རྒྱུན་བཞིན་ཉིན་མཚན་ཐུན་ལ་གནས་པ། འབྲིང་ཟླ་རེར་དུས་དྲུག་གམ་བཞི་སོགས་དང༌། ཐ་མས་ཀྱང་ལོ་ཟླ་དུས་མཆོད་ཀྱི་རྒྱུན་མི་གཅད་པ་དང༌། མཆེད་ལ་བྱམས་ཡུལ་ནི་སྔར་སྤྱི་ཡི་མཆེད་སོགས།བཞི་པོ་ཡིན་ལ། དེ་རྣམས་ལས་ཀྱང༌། ཡང་དག་པའི་ལམ་དུ་ཞུགས་པའི་མཆེད་ཕྱི་མ་གསུམ་དང་དེའི་ནང་ནས་ཀྱང་འདྲེས་པའི་མཆེད་ལྷག་པར་གཉན་པར་ཤེས་པས། རིམ་པས་དེ་རྣམས་ལ་རྟག་ཏུ་མི་འབྲལ་ཞིང་ཕན་འདོགས་པའི་ལྷག་བསམ་གྱིས་བརྩེ་ཞིང་གདུང་བས་བྱམས་པར་བྱེད་པ་སྟེ། རྔམ་གློག་ལས། རྡོ་རྗེའི་སྤུན་ལ་གདུང་སེམས་ཀྱང༌། །འདྲེས་དང་མ་འདྲེས་ཡོངས་ཀྱི་སྤུན། །ཡང་དག་ལམ་དུ་ཞུགས་པ་ལ། །རྔན་སྐྱོན་དང་བཅས་པའི་སེམས་ཙམ་ཡང༌། །རྟག་ཏུ་སྤང་བར་བྱ་བ་ཡིན། །བརྩེ་ཞིང་གདུང་བའི་ཤུགས་ཕྱུང་ལ། །གཅིག་ལ་གཅིག་ནི་མིག་བཞིན་བལྟ། །མདོར་ན་སྲོག་ལའང་མི་ཆགས་པར། །སྤུན་དང་མིང་སྲིང་དགོས་པ་སྒྲུབ། ཅི་ཕྱིར་རྡོ་རྗེའི་སྤུན་རྣམས་ནི། །འདི་ནས་བྱང་ཆུབ་བར་དག་ཏུ། །མི་འབྲལ་འགྲོགས་པའི་གྲོགས་མཆོག་སྟེ། །མེ་མར་འོད་དང་སྡོང་བུ་འདྲ། །ཞེས་སོ། །གསང་བ་མི་སྨྲ་བའི་ཡུལ་ནི། ཕྲ་རྒྱས་ལས། དམ་ཉམས་དེ་ལས་ལོག་པ་དང༌། །དམ་མེད་དཀྱིལ་འཁོར་མ་མཐོང་དང༌། འདྲེས་དང་མ་འདྲེས་ཐམས་ཅད་ལ། །ཞེས་ལྟ་བ་ཟབ་མོ་ནི་ཐེག་དམན་སོགས་བློ་འཕང་དམའ་བ་ཐམས་ཅད་ལ་གསང་ཞིང་སྤྱོད་པ་ནི་མ་འདྲེས་པ་ཐམས་ཅད་ལ་གསང་ངོ༌། ལྷ་ཡི་མིང་གཟུགས་སོགས་མ་འདྲེས་པ་ལ་བསྟན་ན་དམ་ཚིག་ཉམས་ཤིང༌། འདྲེས་པ་ལ་ཡང་སྒྲུབ་པ་མཐར་མ་ཕྱིན་བར་བསྟན་ནའང་དངོས་གྲུབ་ཉམས་པར་གསུངས་པས་གསང་ངོ༌། །གང་ཞིག་གསང་བར་བྱ་བའི་དོན་ནི། །ཕྲ་རྒྱས་ལས། སྤྱི་དང་བར་གསང་བཞི་བཞི་དང༌། །འོས་དང་གཉེར་གཏད་རྣམ་པ་བཅུ། །ཞེས་གསང་བ་བཅུ་པོ་དེ་རྣམས་རང་རང་གི་ཡུལ་དང་དུས་ཀྱི་དམིགས་ངེས་པས་གཞན་ལ་མི་བསྒྲགས་པའོ། །དེ་ལ་སྤྱི་གསང་བཞི་ནི། གསལ་བཀྲ་ལས། ལྟ་ཟབ་སྤྱོད་པ་བརླང་པོ་དང༌། །ལྷ་ཡི་མིང་གཟུགས་གྲུབ་རྟགས་རྣམས། །སྤྱི་གསང་རྣམ་པ་བཞི་ཡིན་ནོ། །ཞེས་སོ། །བར་གསང་བཞི་ནི། དེ་ལས། སྒྲུབ་པའི་གནས་དུས་གྲོགས་དང་རྫས། །བར་དུ་གསང་ལ་བསྒྲུབ་པར་བྱ། །ཞེས་སོ། །གསང་བར་འོས་པ་ནི། ཐུན་མོང་མ་ཡིན་པའི་སྔགས་ཀྱི་སྤྱོད་པ་དང༌། དམ་ཚིག་གི་རྫས། མཆེད་ཀྱི་ངན་སྤྱོད་སོགས་མཐོང་ཐོས་སུ་མི་རུང་བ་རྣམས་དང༌། གསང་བར་གཉེར་གཏད་ནི། བླ་མ་དང་མཆེད་ལྕམ་གྱིས་གསང་བར་བཀའ་རྒྱས་བཏབ་པ་རྣམས་སོ། །རྩ་བའི་དམ་ཚིག་འདི་རྣམས་ལ་སྲུང་ཚུལ་དང་སྒྲུབ་ཚུལ་མི་འདྲ་བ་ཅུང་ཟད་རེ་སྣང་ཡང༌། བྱང་སེམས་དང་སྔགས་རྒྱ་གཉིས་བསྒྲུབ་པའི་དམ་ཚིག་གཞན་རྣམས་བསྲུང་བའི་དམ་ཚིག་ཡིན་ལ། དེ་ཡང་སྐུ་གསུང་ཐུགས་ཀྱི་དམ་ཚིག་གི་དབང་དུ་བྱས་ན། བླ་མ་དང་མཆེད་བསྲུང་བ་སྐུའི་དམ་ཚིག །སྔགས་རྒྱ་གསང་གི་དམ་ཚིག །གསང་བཅུ་ཐུགས་ཀྱི་དམ་ཚིག་ཡིན་ཞིང༌། བྱང་སེམས་ཀྱང་དེར་བསྡུ་སྟེ། བདེ་འདུས་ཞི་རྒྱུད་ལས། བྱང་ཆུབ་སེམས་གསུམ་བསྒོམ་པ་ནི། །རྡོ་རྗེ་ཐུགས་ཀྱི་དམ་ཚིག་གོ །ཞེས་གསུངས་སོ། །རྩ་བའི་དམ་ཚིག་དེ་དག་ལ་དབྱེ་ན། བརྒྱ་དང་དྲུག་ཅུར་དབྱེ་བའང་ཡོད་དོ། །རྩ་བ་སྲུང་བྱེད་ཀྱི་ཐབས་སུ་གྱུར་པའི་ཡན་ལག་གི་དམ་ཚིག་ནི། མི་སྤང་བ་དང༌། མི་དོར་བའི་སྡེ་ཚན་གཉིས་སུ་བསྡུ་བར་བྱ་ཞིང༌། དང་པོའི་ཕྱོགས་ལ་ནི། གཏི་མུག །འདོད་ཆགས། ཞེ་སྡང་ང་རྒྱལ་ཕྲག་དོག་སྟེ་ཉོན་མོངས་པ་ལྔ་མི་སྤོང་བ་ཡིན་ནོ། །དེ་ཡང་ལོག་པའི་དུག་ལྔ་དང༌། སྦས་དོན་ཡང་དག་པའི་དུག་ལྔ་སྟེ་གཉིས་སུ་ཡོད། དེ་ལས་ལོག་པའི་དུག་ལྔ་ནི་ཉོན་མོངས་དངོས་ཡིན་ཞིང༌། དེ་མི་སྤོང་བའི་ཚུལ་ནི། ཆགས་སོགས་ཀྱི་རང་བཞིན་ཤེས་པས་ཉོན་མོངས་པའི་དེ་བཞིན་ཉིད་དམ་རང་གི་ངོ་བོ་ནི་ངོ་བོ་མེད་པ་ཡིན་ལ། དཔེར་ན་སྨིག་སྒྱུའི་ཆུ་ལ་ཆུ་རགས་མི་དགོས་པ་བཞིན། སྤོང་བྱེད་ཀྱི་གཉེན་པོ་མི་དགོས་ལ། ཐབས་ཀྱིས་ཟིན་ན་རྣ་བར་ཆུ་ཞུགས་པ་ཆུས་འགུགས་པའམ། རྨ་བྱས་དུག་ཟོས་པ་དང་འདྲ་བར་ཡེ་ཤེས་ཀྱི་གྲོགས་སུ་འགྱུར་བས་རང་གི་གཉེན་པོར་རང་ཆེ་བས་མི་སྤང་བ་སྟེ། རྒྱ་མཚོ་ལས། ཉོན་མོངས་ལམ་ནི་དག་པ་སྟེ། །ཐབས་ཀྱི་འདོད་ཡོན་རྒྱན་གྱི་མཆོག །ཐམས་ཅད་ཐམས་ཅད་རོལ་པ་ཡིས། །མྱུར་དུ་ཧེ་རུ་ཀ་དཔལ་འགྱུར། །དཀོན་མཆོག་བརྩེགས་པ་ལས། ཇི་ལྟར་གྲོང་ཁྱེར་སེར་སྐྱའི་མི་གཙང་ལུད། །དེ་ནི་བུ་རམ་ཤིང་པའི་ཞིང་ལ་ཕན། །དེ་བཞིན་བྱང་ཆུབ་སེམས་དཔའི་ཉོན་མོངས་ལུད། །དེ་ནི་རྒྱལ་བའི་ཆོས་ཀྱི་ཞིང་ལ་ཕན། །ཞེས་དང༌། ཐེག་བསྡུས་ལས། ཐབས་ཆེན་རྣམས་དང་ལྡན་པ་ལ། །ཉོན་མོངས་བྱང་ཆུབ་ཡན་ལག་འགྱུར། །ཞེས་སོ། །དེ་ལྟར་ཡིན་པའི་རྒྱུ་མཚན་ནི། ཡེ་ནས་རིགས་ལྔར་གནས་པའི་ཚུལ་ཤེས་ནས་ལམ་དུ་བྱེད་པས། རྨོངས་པའི་སྒྲིབ་པ་དག་ནས་ཡེ་ཤེས་ལྔར་འགྱུར་ཏེ། །དཔེར་ན་སྣུམ་འདོད་པས་ཏིལ་མར་སྒྲུབ་པ་ལྟ་བུའོ། །དེ་སྐད་དུ་དམ་ཚིག་ཉེར་བརྒྱད་པ་ལས། ཕྲག་དོག་ལ་སོགས་ཉོན་མོངས་ལྔ་རྣམས་ནི། །ཡེ་ནས་རིགས་ལྔའི་རང་བཞིན་ཡིན་པའི་ཕྱིར། །ཞེས་སོ། །དེ་ཡང༌། གཏི་མུག་རྣམ་པར་སྣང་མཛད་ཀྱི་དམ་ཚིག་སྟེ་ཆོས་དབྱིངས་ཡེ་ཤེས་འདོད་ཆགས་སྣང་བ་མཐའ་ཡས་ཀྱི་དམ་ཚིག་སྟེ་སོར་རྟོག་ཡེ་ཤེས། ཞེ་སྡང་མི་བསྐྱོད་པའི་དམ་ཚིག་མེ་ལོང་ཡེ་ཤེས། ང་རྒྱལ་རིན་འབྱུང་གི་དམ་ཚིག་མཉམ་ཉིད་ཡེ་ཤེས། ཕྲག་དོག་དོན་གྲུབ་ཀྱི་དམ་ཚིག་བྱ་གྲུབ་ཡེ་ཤེས་སོ། །སྦས་དོན་ཡང་དག་པའི་དུག་ལྔ་ནི། །འཁོར་འདས་མཉམ་པ་ཉིད་དུ་རྟོགས་ནས་ལྟ་བ་ལ་ཕྱོགས་རིས་སྤྱོད་པ་ལ་བླང་དོར་གྱིས་འབྱེད་པ་མེད་པ་གཏི་མུག །དེ་ལྟར་མ་རྟོགས་པའི་སེམས་ཅན་ལ་ཐུགས་རྗེས་ཆགས་པ་འདོད་ཆགས། ལོག་རྟོག་རྣམས་སྒྲོལ་བ་ཞེ་སྡང༌། མཉམ་ཉིད་རྟོགས་པས་ལྟ་བ་གཤོངས་སུ་མི་འབེབས་པ་ང་རྒྱལ། གཉིས་འཛིན་གྱི་ལྟ་སྤྱོད་ཆོས་ཉིད་ཀྱི་ཀློང་དུ་མི་ཤོང་བ་ཕྲག་དོག་སྟེ་འདི་རྣམས་ལྟ་བའི་ངང་སྐྱོང་བ་ལ་ཚང་བས་རྟག་ཏུ་ཉམས་ལེན་བྱའོ། །གཉིས་པ་མི་འདོར་བའི་ཕྱོགས་ནི། རྡོ་རྗེ་ཟིལ་པ། རཀྟ། དྲི་ཆེན། མཾ་ས། དྲི་ཆུ་སྟེ་བདུད་རྩི་ཆེན་པོ་ལྔ་ཡིན་ལ། དེ་དག་ཀྱང་དང་དུ་བླང་བྱར་ངེས་པ་སྟེ། གྲུབ་པ་བཞི་དང༌། ཡིན་པ་གསུམ། གྲུབ་པ་བཞི་ནི། ཆོས་ཉིད་ངོ་བོས་གྲུབ་པ་བདུད་རྩི་ལྔ་པོ་ཆོས་ཉིད་ཀྱི་ངོས་ན་གཙང་རྨེ་གང་དུའང་མ་གྲུབ་པའི་ཆོས་ཉིད་སྤྲོས་པ་དང་བྲལ་བའི་ངོ་བོར་གྱུར་པས། དེ་ཉིད་རྟོགས་པའི་ཡེ་ཤེས་ཀྱི་རོལ་པར་དང་དུ་བླང་བར་བྱ་བ་དང༌། ཆོས་ཅན་རང་བཞིན་གྱིས་གྲུབ་པ་དེ་དག་ཆོས་ཅན་ལྟར་སྣང་བའང་རང་བཞིན་རྣམ་པར་དག་པ་རིགས་ལྔའི་རང་བཞིན་ཉིད་དུ་གྲུབ་པས་དེ་ལྟར་ཤེས་པའི་སྒོ་ནས་བླང་བྱ་དང༌། ནུས་པའི་མཐུས་གྲུབ་པ་དེ་དག་ལ་བརྟེན་ནས་མཆོག་དང་ཐུན་མོང་གི་དངོས་གྲུབ་ཐམས་ཅད་བསྒྲུབ་ན་འགྲུབ་པའི་ནུས་པ་དང་ལྡན་པའི་དམ་རྫས་ཡིན་པས་བླང་བྱ་དང༌། བྱིན་གྱིས་རླབས་ཀྱིས་གྲུབ་པ་དམ་ཚིག་གི་རྫས་དེ་རྣམས་སྔོན་དཔལ་ཆེན་པོ་སོགས་ཀྱིས་དམ་ཚིག་གི་རྫས་སུ་བྱིན་གྱིས་བརླབས་པའི་དབང་གིས་ཚུལ་བཞིན་དུ་བསྟེན་པའི་སྒྲུབ་པོ་དེ་ལ་མ་མོ་མཁའ་འགྲོ་ཐམས་ཅད་འདུ་ཞིང་སྒྲུབ་པའི་གྲོགས་བྱེད་ཅིང༌། དངོས་གྲུབ་ཐོབ་པ་ལ་ཉེ་བས་དང་དུ་བླང་བར་བྱའོ། །ཡིན་པ་གསུམ་ནི། ནད་སེལ་བའི་སྨན་ཡིན་ཏེ། དྲི་ཆེན་གྱིས་དུག་ནད། དྲི་ཆུས་གག་པ། མཱྃ་སས་མཛེ་ནད། རཀྟས་གྲང་བ། བྱང་སེམས་དཀར་པོས་ཚ་བ་རྣམས་སེལ་ལོ། །ཐུན་མོང་གི་དངོས་གྲུབ་བསྒྲུབ་པའི་རྟེན་ཡིན་ཏེ། དྲི་ཆེན་གྱིས་མཐུ་ཆེ། དྲི་ཆུས་སྐད་སྙན། མཱཾ་སས་ཚེ་རིང༌། རཀྟས་བཀྲག་མདངས་གསལ། བྱང་སེམས་དཀར་པོས་མི་བརྗེད་པའི་གཟུངས་ཐོབ་པའོ། །རིགས་ལྔ་ཡེ་ཤེས་ལྔའི་རྟེན་ཏེ། དྲི་ཆེན་བུདྡྷའི་རིགས་ཆོས་དབྱིངས་ཡེ་ཤེས། དྲི་ཆུ་ལས་ཀྱི་རིགས་བྱ་གྲུབ་ཡེ་ཤེས། མཱཾ་ས་རིན་ཆེན་རིགས་མཉམ་ཉིད་ཡེ་ཤེས། རཀྟ་པདྨའི་རིགས་སོར་རྟོག་ཡེ་ཤེས། བྱང་སེམས་དཀར་པོ་རྡོ་རྗེའི་རིགས་མེ་ལོང་ལྟ་བུའི་ཡེ་ཤེས་སོ། །དེ་དག་གིས་མཚོན་ནས་ཆོས་ཐམས་ཅད་དག་མཉམ་གྱི་ངོ་བོར་རྟོགས་ནས་བླང་དོར་མེད་པའི་སྤྱོད་པ་ནི། སངས་རྒྱས་ཀུན་གྱི་བརྟུལ་ཞུགས་ཏེ་ཚུལ་ཡིན་པས་དེ་བཞིན་དང་དུ་བླང་ནས་སྤྱོད་པར་བྱའོ། །དེ་ལ་དབྱེ་ན། ཡན་ལག་བཅུ་པོ་མི་སྤང་བ་ལྔ་དང༌། མི་དོར་བ་ལྔ། དེ་རེ་རེ་ལ་ཐབས་ཀྱིས་ཟིན་པའི་ཆ་དང༌། ཤེས་རབ་དང་མ་བྲལ་བའི་ཆ་གཉིས་རེར་ཕྱེ་བས་བཅུ། དེ་ལ་སྐུ་གསུང་ཐུགས་ཡོན་ཏན་ཕྲིན་ལས་དབྱེ་བས་ལྔ་བཅུ་རེ་སྟེ་བརྒྱ། དེ་རེ་རེ་ལའང་ཤེས་རབ་ཐབས་སུ་ལྡན་པ་དང༌། ཐབས་ཉིད་ཤེས་རབ་དང་ལྡན་པའི་ཆ་ཤས་ཀྱིས་དབྱེ་བ་བྱས་ན་ཉིས་བརྒྱའི་གྲངས་སུ་ངེས་པ་ནི། རྩ་བའི་དབྱེ་གཞི་བཅུ་པོ་ཐབས་ཤེས་ཀྱིས་ཕྱེ་བས་ཉི་ཤུར་བསྡུ་བ་ནི། ཀུན་གཟིགས་རོང་པའི་ལུགས་ཏེ་རོང་ཟོམ་ཆོས་ཀྱི་བཟང་པོའི་དཀོན་མཆོག་འགྲེལ་དུ་གསུངས་སོ། །དེ་ལྟར་དབྱེ་བའི་ཁུངས་ནི། རྩ་རྒྱུད་ལས། རྩ་བའི་དམ་ཚིག་ལྔ་ལ་ནི། །གཅིག་ལའང་གཉིས་དང་བཅུ་ཕྲག་གསུམ། །ཡན་ལག་དམ་ཚིག་ལྔ་གཉིས་ལ། །གཅིག་ལའང་བཅུ་ཕྲག་གཉིས་སུ་དབྱེ། །ཞེས་སོ། །གསུམ་པ་ལ་གཉིས། དང་པོ་བསྲུང་དུ་ཡོད་པའི་དམ་ཚིག་ནི། སེམས་ཀྱི་རང་བཞིན་ཇི་བཞིན་ངོ་འཕྲོད་ཅིང་ངང་སྐྱོང་ནུས་པའི་ཕྱོགས་ལ་ནི། ཕྱི་སྣང་བ་རྟེན་མེད་དུ་གོ །ནང་རིག་པ་ཡུལ་མེད་དུ་གོ་བའི་དུས་ན་རིག་པའི་གཤིས་ལ་སྤང་བྱ་གཞི་ལ་མ་གྲུབ་པས། བླང་དོར་གྱི་དགག་སྒྲུབ་གང་ཡང་མེད་པར་འཇོག་པ་ནི། མེད་པའི་དམ་ཚིག་སྟེ། ཐིག་ལེ་ཀུན་གསལ་ལས། རང་རིག་ཡེ་ཤེས་ཆེན་པོ་ལ། །བསྲུང་དང་སྲུང་བྱེད་གཉིས་མེད་པས། །ཉམས་དང་མ་ཉམས་གཉིས་སུ་མེད། །ཐེག་བརྒྱད་བཅོས་མའི་ཚིག་གི་གྲངས། །ངས་མི་བསྲུང་བས་མེད་ཅེས་བྱ། །ཞེས་པ་ལྟར་དང༌། སྡོམ་པ་དང་སྡོམ་མིན། དངོས་དངོས་མེད། སྐྱེ་འགག་སོགས་གཉིས་ཆོས་དང༌། རྟོག་རློམ་ཐམས་ཅད་ཆོས་ཉིད་གཅིག་ཏུ་གྱུར། བལྟས་པས་མ་མཐོང་བས་རང་བཞིན་གཅིག །ཚིག་གིས་མི་མཚོན་པས་ཡེ་ཤེས་གཅིག་གི་ངང་བསལ་བཞག་མེད་པར་གནས་པའི་ཆ་ནས་ཐ་སྙད་བཏགས་ན་གཅིག་པུའི་དམ་ཚིག་ཞེས་བྱ་སྟེ། དེ་ཉིད་ལས། བསྲུང་དུ་མེད་པའི་དམ་ཚིག་ལས། །འདའ་མི་སྲིད་པའི་བསྲུང་ཐབས་ནི། །རང་རིག་ཡེ་ཤེས་གཅིག་པུ་ལ། །གཅིག་པུ་ཞེས་སུ་བཏགས་པ་ཡིན། །ཞེས་པ་དང་ནི། ཡང་དེ་ལྟར་ཕྱི་ནང་ཡུལ་མེད་དུ་རྟོགས་པ་དེ་གཅིག་པུའི་ངང་ལ་འཇོག་པའི་ཚེ་སྒོ་ལྔ་རང་ཡན་གྱི་རིག་པ་ལ་སྙེམ་བྱེད་ཀྱི་བློ་ཞེན་མི་འཇུག་པར་ཆོས་ཐམས་ཅད་ཆོས་ཉིད་ཡངས་པར་ལ་བཟླ་བ་ནི་ཕྱལ་བ་ཞེས་བྱ་སྟེ། ཀུན་བྱེད་ལས། དངོས་པོ་མི་སྤྱོད་ཡེ་ཤེས་མ་འགགས་པ། །དེ་ལ་ཕྱལ་བ་ཞེས་སུ་བཏགས་པ་ཡིན། །ཞེས་དང་ནི། གཞན་ཡང་དེ་ལྟ་བུའི་ཆོས་ཉིད་ཀྱི་རིག་པ་ཀ་དག་གི་གདངས་ལ་མཁྱེན་ཆ་ཡོན་ཏན་གྱི་ཆོས་རང་བཞིན་ལྷུན་གྲུབ་ཏུ་གནས་པ་ཆོས་ཅན་སྣང་བཞིའི་ཉམས་ལེན་དང་མི་འབྲལ་བ་ལ་ལྷུན་གྲུབ་ཀྱི་དམ་ཚིག་ཡིན་ནོ་ཞེས་བྱ་བར་གྲགས་པ་སྟེ་དོན་ལ་ཐོད་རྒལ་སྣང་བཞིའི་ཉམས་ལེན་མིན་ཀྱང་ཀ་དག་གི་རིག་པ་སྐྱེ་འགག་དང་བྲལ་བའི་སྣང་བ་ཐམས་ཅད་ཡེ་ཤེས་ཀྱི་ངོ་བོར་ལྷུན་གྱིས་གྲུབ་ཕྱིར་གཞན་ལས་བཙལ་དུ་མེད་ཕྱིར་དེ་སྐད་ཅེས་བྱ་སྟེ། ཀུན་བྱེད་ལས། ཇི་ལྟར་སྣང་བའི་ཆོས་རྣམས་མ་ལུས་ཀུན། །ཡིད་ཆོས་བྱང་ཆུབ་སེམས་སུ་རྫོགས་པའི་ཕྱིར། །ལྷུན་གྱིས་གྲུབ་པ་ཞེས་སུ་ང་ཡིས་བཤད། །ཅེས་སོ། །དེ་ལྟར་རྣམ་གྲངས་བཞིར་གསུངས་པ་ཡང་རིག་པ་ཀ་དག་གི་ངང་ཡེངས་བསྒོམ་དང་བྲལ་བར་བཞག་པ་ལ་ལྡོག་པས་དབྱེ་བ་ཙམ་ལས་ངོ་བོ་ཐ་དད་པ་མ་ཡིན་ནོ། །དེས་ན་ཆོས་ཉིད་བསམ་གྱིས་མི་ཁྱབ་པ་ནམ་མཁའ་ལྟ་བུའི་ངང་ནས་སྤང་བླང་གཉིས་ཀ་བྲལ་བས་བསྲུང་མཚམས་དང་བྲལ་བའི་ཆོས་ཉིད་དེ་ལ་རྟག་ཏུ་གནས་པ་རྣམས་ལ་འདའ་བར་བྱ་བའི་ཆོས་རྡུལ་ཙམ་མི་དམིགས་པས། རིག་པའི་ངོ་བོའི་བཞུགས་ཚུལ་ལ་རྟོགས་བྱ་དམ་ཚིག་ཆེན་པོ་བཞིའི་ཆིངས་ཀྱིས་བཅིངས་ནས། གནས་ལུགས་ཀྱི་གཤིས་དེ་ལས་གཞན་དུ་མི་གཡོ་བའི་དོན་དུ་བསྟན་པ་སྟེ། རིན་པོ་ཆེ་སྤུངས་པ་ལས། དེ་དུས་བསྲུང་བའི་མཚམས་འདས་པའི། །དམ་ཚིག་ལྷུན་གྲུབ་ཆེན་པོའི་ངང༌། །མེད་དང་གཅིག་པུ་ཕྱལ་བ་ཡིས། །རྫོགས་ཆེན་ཉམས་ལེན་དེ་ཡི་གྲོགས་སུ་དེ་འགྱུར་རོ། །ཞེས་སོ། །ཚུལ་དེ་ནི་ཡེ་ནས་ཉམས་པ་མེད་པ་གཟུང་འཛིན་གྱིས་མི་ཕྱེད་པའི་གནས་ལུགས་དོན་གྱི་རྡོ་རྗེའི་ངང་ལ་གནས་པས་སྣང་སེམས་ཐམས་ཅད་ལ་ཆོས་སྐུའི་ཡེ་ཤེས་ཀྱིས་དབང་བསྒྱུར་བའི་ཕྱིར་རྒྱལ་པོའི་ལུགས་ཞེས་བྱ་ལ། འོག་མ་ཁྱད་དུ་གསོད་པའི་ཚིག་ཏུ་འཁྲུལ་པར་མི་བྱ་སྟེ། སློབ་དཔོན་ཆེན་པོ་སངས་རྒྱས་གཉིས་པས། རྒྱལ་པོ་ཆེན་པོ་ང་ཡི་གསང་སྔགས་འདི། །ལྟ་བ་ཆོས་སྐུ་དང་བསྟུན། སྤྱོད་པ་བྱང་ཆུབ་ཀྱི་ཕྱོགས་དང་བསྟུན་ནས། ལྟ་བའི་ཕྱོགས་ལ་སྤྱོད་པ་མ་ཤོར་བར་མཛོད། ཤོར་ན་དགེ་མེད་སྡིག་མེད་དུ་སོང་ནས་ཕྱིས་གསོར་མི་རུང༌། སྤྱོད་པའི་གྲོགས་སུ་ལྟ་བ་འབྲང་ན་དངོས་པོ་མཚན་མས་བཅིངས་ནས་གྲོལ་བར་མི་འགྱུར་རོ། །ང་ཡི་སྔགས་སེམས་ཕྱོགས་འདི་ལྟ་བ་ཤས་ཆེ། མ་འོངས་པ་ན་ཚིག་གི་གདེང་ནི་ཤེས་ཏེ་ལྟ་བའི་གདེང་མ་རྙེད་པ་མང་པོ་ཞིག་ངན་འགྲོར་འགྲོའོ། །ཞེས་གསུངས་སོ། །དེའི་ཕྱིར་ཉམས་ལེན་ལ་བརྟན་པ་མ་ཐོབ་ནས། རྫོགས་ཆེན་གྱི་ཆོས་སྐད་མཐོན་པོ་འབའ་ཞིག་གིས་དགེ་སྡིག་རྒྱུ་འབྲས་མེད། འདུ་འཛི་དང་ཡུལ་རྐྱེན་གྱིས་མི་གནོད། བསྒོམ་བྱ་དང་སྒོམ་བྱེད་མེད་ཟེར་ནས་ཐ་མལ་དུ་ལུས་པ་ནི་བསྟན་པའི་བླ་བཙོང་ཞིང་རང་གི་ཆོས་སྐལ་ཆད་པ་ཡིན་པས། སྒོ་གསུམ་ཆོས་དང་བསྟུན་པའི་སྒོ་ནས་ཉམས་ལེན་ལ་རྒྱུན་དུ་འབད་པ་ནི་ཤིན་ཏུ་གནད་ཆེའོ། །གཉིས་པ་བསྲུང་དུ་ཡོད་པ་ནི། གོང་དུ་བཤད་པ་ལྟ་བུའི་སྒོ་གསུམ་གྱི་སྤྱོད་པ་ལ་བླང་དོར་བྱེད་པའི་བྱ་བ་ལ་ཆེད་དུ་མ་བརྩོན་ཡང༌། ཡེ་བསྲུང་ཆེན་པོའི་དམ་ཚིག་ལ་གནས་པའི་སྟོབས་ཀྱིས་ཁ་ན་མ་ཐོའི་ཉེས་པ་ཐམས་ཅད་ཟིལ་གྱིས་མནན་ནས། ནམ་མཁའ་ལ་རྡུལ་གྱིས་མི་གོས་པ་བཞིན་ཉེས་པ་གང་གིས་ཀྱང་མི་གོས་པའི་རིགས་རྣམས་ལ་དེ་ལྟར་ཆོག་མོད། འོན་ཀྱང་རང་བཞིན་རྫོགས་པ་ཆེན་པོའི་ལམ་ལ་གསར་དུ་ཞུགས་པའི་ལས་དང་པོ་པ་རྣམས་ཀྱིས་རང་རྒྱུད་ཉེས་པས་མི་གོས་ཤིང༌། ཉམས་ལེན་རྣམ་པར་དག་པར་བྱ་བའི་ཕྱིར། བླ་མའི་བཀའ་བཞིན་བསྒྲུབ་ཅིང་སྤང་གཉེན་གང་ལའང་མ་ཞེན་པའི་སྒོ་ནས་ཉེས་པ་གང་གིས་ཀྱང་མི་གོས་པའི་ཐབས་ལ་དྲན་ཤེས་བག་ཡོད་དང་བཅས་པས་བརྩོན་ཞིང༌། གལ་ཏེ་ཉམས་པར་གྱུར་ན་ཡང་ཕྱིར་བཅོས་པའི་ཐབས་ཡོད་དེ། དཔེར་ན་རིན་ཆེན་གྱི་བུམ་པ་བཟང་པོ་ཞོམ་ཡང་བཅོས་སླ་བ་བཞིན། བླ་མའི་བཀའ་བཞིན་ཕྱིར་བཅོས་ན་སོར་ཆུད་ས་ཕྱིར་འབད་པས་བསྲུང་བ་གལ་ཆེ་སྟེ། འཇམ་དཔལ་བཤད་རྒྱུད་ལས། དབང་རྣམས་འཛིན་པའི་རྟེན་དག་ནི། །དམ་ཚིག་ཡིན་ཏེ་ཉམས་ན་ཡལ། །དཔེར་ན་གྱང་དང་རི་མོ་བཞིན། །ཞེས་པ་ལྟར་གཞི་དམ་ཚིག་མ་དག་ན་རྟོགས་པ་བཟང་པོ་རྒྱུད་ལ་སྐྱེ་བ་ནི་གནས་མེད་དོ། །དབྱེ་བའི་དབང་དུ་བྱས་ན། རང་ཤར་ལས། འབུམ་སྡེར་གསུངས་པའི་དམ་ཚིག་རྣམས། །མདོར་བསྟན་ལེགས་པར་ཡིད་ལ་ཟུངས། །དེ་ཡང་མདོར་བསྟན་འདི་ལྟ་སྟེ། །རྟོགས་བྱ་ལྟ་བའི་དམ་ཚིག་དང༌། །སྤྱོད་པ་རྒྱུན་གྱི་དམ་ཚིག་དང༌། །བསྒྲུབ་པ་སྤྱི་ཡི་དམ་ཚིག་དང༌། །ཐུན་མོང་སྤྱི་ཡི་དམ་ཚིག་དང༌། །སྐུ་གསུང་ཐུགས་ཀྱི་དམ་ཚིག་དང༌། །ཡན་ལག་གྲངས་ཀྱི་དམ་ཚིག་དང༌། །གལ་མདོ་ངེས་པའི་དམ་ཚིག་གོ །ཅེས་བདུན་དུ་གསུངས་པ་དེ་རྣམས་ཀྱང་བསྡུ་ན་གསུམ་དུ་འདུས་ཏེ། ཞི་རྒྱུད་ལས། སོ་སོར་ཐར་དང་བྱང་ཆུབ་སེམས། །བྱ་སྤྱོད་རྣལ་འབྱོར་རྒྱུད་རྣམས་ལས། །བསྲུང་བར་བྱ་བ་གང་གསུངས་པ། །ཐུན་མོང་སྤྱི་ཡི་དམ་ཚིག་ཡིན། །ཞེས་སོ། །གཉིས་པ་ཁྱད་པར་གྱི་དམ་ཚིག་ལ་སེམས་ཕྱོགས་འདིར་སྤྱི་མདོ་དང་ཕྱོགས་མཐུན་སྐུ་གསུང་ཐུགས་གསུམ་དབྱེ་བའི་སྒོ་ནས། དམ་ཚིག་རྣམ་པར་བཀོད་པ་ལས། སྐུ་དང་གསུང་དང་ཐུགས་དག་ལས། །རེ་རེ་ལའང་དགུ་དགུ་སྟེ། །འཇུག་དང་ལས་ཀྱི་རྣམ་པས་བཤད། །ཅེས་པའི་གྲུབ་མཐའ་སྟེ་ཚུལ་ཉི་ཤུ་རྩ་བདུན་དུ་དབྱེ་བར་བྱ་སྟེ། དེ་ཡང་རང་བཞིན་རྫོགས་པ་ཆེན་པོའི་ལྟ་སྒོམ་ཕྱིན་ཅི་མ་ལོག་པར་སྐྱེ་བ་ནི་བླ་མ་ལ་རག་ལས་ཏེ་དང་པོ་རྟོགས་པ་ངོ་སྤྲད། བར་དུ་གེགས་སེལ་བོགས་འདོན། ཐ་མ་ཆོས་ཉིད་ཟད་སར་སྐྱེལ་བར་བྱེད་ཕྱིར། བླ་མ་ནི་དུས་གསུམ་རྒྱལ་བ་ཀུན་འདུས་རིགས་དང་དཀྱིལ་འཁོར་རྒྱ་མཚོའི་ཁྱབ་བདག་རྡོ་རྗེ་གསུམ་གྱི་ངོ་བོར་བཞུགས་ཕྱིར། བསྲུང་བྱའི་རྩ་བ་ནི་བླ་མའི་སྐུ་གསུང་ཐུགས་གསུམ་ཡིན་ལ། གསུམ་པོ་རེ་རེ་ལའང་ཕྱི་ནང་གསང་གསུམ་རེ་སྟེ་ཕྱེ་བས་གསང་གསུམ་གྱི་དམ་ཚིག་གསུམ་ཚན་གསུམ་གྱི་དབྱེ་བས་ཉེར་བདུན་ནོ། །དང་པོ་སྐུའི་ཕྱི་ཡི་གསང་བའི་དམ་ཚིག་ལ། སེམས་ཅན་ཡིན་ནོ་ཅོག་སྲོག་གཅོད་སྤང་བ་དང༌། ཕྱི་ཡི་ནང་ལ་མི་ཚངས་པ་སྤྱོད་པ་སྤང་བ་དང༌། ཕྱི་ཡི་ཕྱི་ལ་བརྐུ་བ་སྤང་བ་རྣམས་སོ། །དེ་བཞིན་སྐུ་ཡི་ནང་གི་ཕྱི་ལ་ཕ་མ་སྤུན་སྲིང་རང་ལུས་རྣམས་ལ་སྨོད་པ་དང༌། ནང་གི་ནང་ལ་ཐེག་པ་ཆེ་ཆུང་གི་ཆོས་རྣམས་ལ་འཇུག་པར་འདོད་པ་དང༌། ཞུགས་པ་དང༌། ཞུགས་ཏེ་གཟུགས་བརྙན་འཛིན་པའི་གང་ཟག་རྣམས་ལ་སྨོད་པ་དང༌། ནང་གི་གསང་བར། རང་ལུས་ལྷ་ཡི་དཀྱིལ་འཁོར་དུག་མཚོན་སོགས་ཀྱིས་གནོད་པ་བྱེད་པ་རྣམས་སྤང་བའོ། །འདི་ཡང་རྩ་བའི་དམ་ཚིག་རང་ལུས་ཞེས་པས་བསྡུ་དགོས་པར་སྣང་ངོ༌། །སྐུ་ཡི་གསང་བའི་གསང་བར་བླ་མའི་གྲིབ་མ་འགོམ་པ་དང༌། སྤྱན་སྔར་མཚོན་ཆ་འཛིན་པ་དང༌། རྐང་ལག་རྐྱོང་བ་དང༌། སྒེག་ཆོས་བྱེད་པ་སོགས་མ་གུས་པའི་བྱ་བ་བྱེད་པ་དང༌། གསང་བའི་ནང་ལ་བླ་མའི་ཡུམ་ལ་གཙེས་བ་དང༌། གསང་བའི་ཕྱི་ལ་རྡོ་རྗེའི་སྤུན་དང་སྲིང་མོ་རྣམས་ཀྱི་ལུས་དང་རྒྱན་སོགས་ལ་སྨད་པ་དང༌། དེ་དག་ལ་བརྡེག་གམ་བརྡེག་པར་བརྩམ་པའམ། བརྡེག་ཏུ་བཅུག་ཀྱང་རུང་སྟེ་དེ་རྣམས་སྤང་བའོ། །གསུང་གི་ཕྱི་ནང་གསང་གསུམ་ལ། དང་པོ་གསུང་གི་ཕྱི་ལ་རང་འདོད་ཀྱིས་འགྲོ་བ་ཕལ་ལའང་རྫུན་སྨྲ་བ་དང༌། ཕྱི་ཡི་ནང་ལ་ཕ་རོལ་དབྱེ་བའི་ཚིག་ཕྲ་མ་སྨྲ་བ་དང༌། ཕྱི་ཡི་གསང་བར་གཞན་གྱི་ཞེ་གཅོད་པའི་ཚིག་རྩུབ་མོ་རྣམས་སྤང་བའོ། །གསུང་གི་ནང་གི་ཕྱི་ལ་ཆོས་སྨྲ་བ་རྣམས་དང༌། ནང་གི་ནང་ལ་དོན་སེམས་ཤིང་སྒྲུབ་པ་རྣམས་དང༌། ནང་གི་གསང་བ་ལ་གནས་ལུགས་ཟབ་མོའི་དོན་བསྒོམ་པ་རྣམས་ལ་གཤེ་ཞིང་སྐུར་པ་འདེབས་པ་རྣམས་དང༌། མི་བཀུར་ཞིང་བརྙས་པ་རྣམས་སྤང་བའོ། །གསུང་གི་གསང་བའི་གསང་བ་ལ། བླ་མ་དང༌། གསང་བའི་ནང་ལ་བླ་མའི་ཡུམ་དང༌། གསང་བའི་ཕྱི་ལ་རྡོ་རྗེའི་སྤུན་སྲིང་སྟེ་དེ་རྣམས་ལ་སྨོད་པ་དང་འདི་གྱིས་ཤིག་ཅེས་པ་ལ་སོགས་པའི་ཚིག་རྣམས་དང་དུ་མི་ལེན་ཅིང་ཁྱད་དུ་གསོད་པ་རྣམས་སྤང་སྟེ་མི་བརྙས་པའོ། །ཐུགས་ཀྱི་ཕྱི་ནང་གསང་བའི་དམ་ཚིག་གསུམ་ལ། དང་པོ་ཕྱིའི་ཕྱི་ལ་བརྣབ་སེམས། ཕྱི་ཡི་ནང་ལ་འགྲོ་བ་ཕལ་པ་ཡན་ཆད་ལ་གནོད་སེམས། ཕྱི་ཡི་གསང་བར་གྲུབ་པའི་མཐའ་རྣམས་ལ་ལོག་ལྟ་སྟེ་ཡིད་ཀྱི་རྣམ་པ་གསུམ་སྤང་བ་དང༌། ནང་གི་ཕྱི་ལ་སྤྱོད་པ་ལོག་པ་བག་མེད་པ་དང་ཐོ་ཅོ་དང༌། ནང་གི་ནང་ལ་སྒོམ་པ་ལོག་པ་བྱིང་རྒོད་དང་གོལ་སྒྲིབ་དང༌། ནང་གི་གསང་བ་ལ། ལྟ་བ་ལོག་པ་རྟག་ཆད་དང་མཐར་འཛིན་རྣམས་སྤང་བའོ། །གསང་བའི་གསང་བ་ལ་བླ་མ་ལ་མོས་གུས་དང༌། གསང་བའི་ནང་ལ་ཡི་དམ་གྱི་ལྷ་དང་རྡོ་རྗེའི་མཆེད་སྤུན་སོགས་དང༌། གསང་བའི་ཕྱི་ལ། རྫོགས་པ་ཆེན་པོའི་ལྟ་སྒོམ་སྤྱོད་པ་གསུམ་སྟེ། དེ་རྣམས་ཉིན་མཚན་ཐུན་དྲུག་ལ་སོགས་པ་དུས་ཀུན་ཏུ་མི་སེམས་པ་རྣམས་སྤངས་ནས་སེམས་ཤིང་དྲན་པར་བྱ་བའོ། །འདི་དག་གི་དོན་ནི་རྒྱུད་ཀྱི་གནས་ཇི་ལྟ་བ་བཞིན་ནོ། །དེ་དག་ཀྱང་མདོར་བསྡུ་ན་ད་རེས་རང་རེ་རྣམས་འཁོར་བ་ལས་སྒྲོལ་བའི་ལམ་མཁན་བླ་མ་ཡིན་པས་དེའི་སྐུ་གསུང་ཐུགས་དང་འགལ་བར་མི་སྤྱོད་པའི་དོན་དུ་འདུས་པ་ཡིན་ཏེ། དམ་ཚིག་མཆོག་གི་རྒྱུད་ལས། ལུས་དང་ངག་དང་ཡིད་སྟོབས་ཀྱིས། །ཅི་ནུས་པ་ཡིས་བླ་མ་ལ། །བསྙེན་བཀུར་སྲི་ཞུ་སུས་བྱས་པ། །འདི་ལ་མཐུ་དང་ནུས་པའི་ཚོགས། །བྱིན་རླབས་ཐོགས་པ་མེད་པར་འབྱུང༌། །ཞེས་སོ། །སྔགས་བླ་མེད་ཀྱི་རྣལ་འབྱོར་པ་རྣམས་ཀྱིས་ཆོས་རྣམས་དཀྱིལ་འཁོར་གསུམ་གྱི་རང་བཞིན་དུ་རྟོགས་ནས་སྣང་སྤྱོད་ཐམས་ཅད་ལ་ཀུན་ཏུ་བཟང་པོའི་ཕྱག་རྒྱས་བཏབ་པ་ལས་མི་འདའ་བར་སྤྱད་ན་ཕལ་པ་རྣམས་འཁོར་བར་འཆིང་བྱེད་ཀྱི་ལས་དང་ཉོན་མོངས་གང་གིས་ཀྱང་དེ་ལ་མི་གོས་པར་མ་ཟད། རང་གི་ཚོགས་རྫོགས་ཤིང་ཕན་པ་རླབས་པོ་ཆེ་སྒྲུབ་པར་བྱེད་པས། དེ་ལྟ་བུའི་ཐབས་ཀྱི་ཁྱད་པར་རྨད་དུ་བྱུང་བའི་དབང་དུ་གྱུར་པ་ཡན་ལག་གི་དམ་ཚིག་ཉི་ཤུ་ལྔ། ཏ་ན་སྒྲོལ་བ། ག་ན་སྦྱོར་བ། མ་བྱིན་ལེན་པ་དང༌། རྫུན་དང༌། ཀྱལ་པའི་ཚིག་ངག་འཁྱལ། དེ་དག་ནི་ལུས་ངག་གིས་སྤྱད་བྱ་ལྔ་པོ་སྟེ་དེ་ནི་རྟོགས་གོམས་ཀྱི་གདིང་དང་ལྡན་པ་དང༌། གཞན་དོན་འགྱུར་ངེས་སུ་གནང་བ་དང་བཀག་པའི་ས་མཚམས་ཇི་ལྟར་བཤད་པ་བཞིན་དུ་ཤེས་པས་སྤྱོད་པར་བྱེད་དོ། །འདོད་ཆགས་ཞེ་སྡང་ལ་སོགས་ཉོན་མོངས་ལྔ་ནི། མི་སྤང་བ་ལྔ་ཡིན་པས་དེ་ནི་འཆིང་བྱེད་རང་རྒྱུད་པ་དང་བྲལ་བར་སྤྱོད་པ་དང༌། དྲི་ཆེན་དྲི་ཆུ་མཾ་ས་རཀྟ་ཟིལ་པ་སྟེ་དཀར་ཆ་རྣམས་དང་ལེན་ལྔ་ལ་གཙང་སྨེའི་གཉིས་རྟོག་འབྲལ་བར་སྤྱོད་པ་དང༌། ཕུང་པོ་ལྔ་རིགས་ལྔ། འབྱུང་བ་ལྔ་ཡུམ་ལྔ། ཡུལ་རྣམས་སེམས་མ་ལྔ། དབང་པོ་ལྔ་སེམས་དཔའ་ལྔ། ཁ་དོག་ཡེ་ཤེས་ལྔའི་ལྷར་ཤེས་པར་བྱ་བ་ལྔ་ནི་དག་མཉམ་རྟོགས་པའི་ཤེས་རབ་སྟོབས་ཀྱིས་སྤྱོད་དོ། །རྡོ་རྗེ་རིན་ཆེན་པདྨ་ལས་དེ་བཞིན་གཤེགས་པའི་རིགས་ཏེ། བསྒྲུབ་བྱ་ལྔ་ནི་རྟོགས་པའི་དོན་དེ་ཉིད་ཆོ་ག་ལྔ་དང༌། ཏིང་འཛིན་སོགས་དག་མཉམ་དུ་གོམས་པའི་མཐུ་ཡིས་བསྒྲུབ་པར་བྱའོ། །དེ་ལྟར་ལྔ་ཚན་ལྔར་བཤད་པ་འདི་དག་དམ་ཚིག་གསལ་བཀྲའི་དགོངས་པ་སྟེ། དེ་ཉིད་ལས། སྤྱད་པ་ལྔ་དང་མི་སྤོང་ལྔ། །དང་དུ་བླང་དང་སྒྲུབ་དེ་བཞིན། །ཤེས་བྱ་ལྔ་རྣམས་ཐུན་མིན་བཤད། །ཅེས་སོ། །ལྷག་པའི་དམ་ཚིག་ནི། ཕུར་པ་མྱང་འདས་ཆེན་པོའི་རྒྱུད་ལས། གཅན་གཟན་རྒྱལ་བླ་མར་མི་བརྙས་པོ་སེངྒེ་བསད་མི་བྱ། ཟ་མ་ཏོག་བླ་མའི་ཡུམ་ལ་མི་གཙེ་ཏུ་ངན་པའི་དུག་མི་སྤྱོ། རིན་པོ་ཆེ་ཡི་ལྕུག་དད་པ་ཅན་གྱི་ཚོགས་མི་བཅད་མ་རྩར་མི་བཅད། །གངས་ཀྱི་ཞུན་ཆུ་ཁོལ་དཀོར་ལ་མི་འབག་ཅིང་ཕུང་ཁྲོལ་གྱི་སྨྱོ་ཆུ་མི་འཐུང་མ་ཡོངས་མི་བཏུང༌། །པདྨ་རྒྱས་པའི་ཟེའུ་ཁ་མི་མཆེད་ཀྱི་རིག་མར་མི་སྤྱད་དབྱེ། །བུག་རྡོལ་ཅན་མཚན་ངན་མི་བསྟེན་གྱི་སྣོད་དུ་བཅུད་མི་བླུག །མ་བརྟགས་པ་ཡི་འདྲེ་ཅན་དང་རྩོད་ཅན་གྱི་ནོར་མི་བསྟེན་ཞིང་ནོར་དང་ཟས་མི་འབྲེལ་བྱིན་གྱིས་མ་བརླབས་པའི་ཟས་མི་ཟ། །ཤེལ་གོང་དཀར་པོ་རྫབ་ཏུ་བསྣུབ་སེམས་བསྐྱེད་ཉམས་མི་འཇུག་ མི་བྱ། །སྣོད་སྣོད་མིན་ལ་གདམས་པ་མི་སྟོན་ངན་ནང་དུ་སེངྒེའི་ཞོ་མི་བཞོ། །ཡིད་བཞིན་ནོར་བུ་ཐབ་སྣོད་ལྡན་གྱི་སློབ་མ་མི་སྤོང་ཏུ་བསྲེག་མི་བྱ། །བྱ་ཡི་རྒྱལ་པོ་ཁྱུང་གི་གཤོག་ཡུམ་མི་འབྲལ་བའི་དོན་བདེ་སྟོང་ལ་སྦྱོར་མི་བཅག །གནམ་ལྕག་སྡེར་མོ་ས་ལ་མཆེད་ལྕམ་ནང་འཐབ་མི་བྱེད་བརྡབ་མི་བྱ། །སྟག་གཟིག་རོལ་གཞན་གྱིས་འབགས་ལྷག་མི་སྤྱོད་པའི་ཟས་མི་བཟའ། །རྡོ་རྗེས་བླ་མའི་གདན་ས་ལ་མི་བརླམ་གཏམས་པའི་བྲག་རྣམས་ཡོངས་མི་བཤིག །རྡོ་རྗེ་ར་བས་བསྐོར་རང་དང་གཞན་དག་གི་མཚམས་རྒྱ་མི་དབྲལ་བའི་གོ་མི་ཧྲལ། །མུན་པ་སེལ་ཏིང་འཛིན་དང་ལྷག་མཐོང་མི་འབྲལ་བའི་སྒྲོན་མེ་ཡོངས་མི་གསོད། །རྡོ་རྗེའི་ཆུ་བཟླས་བརྗོད་དང་ཆོ་གའི་རྒྱུན་མི་ཚིག་གི་བར་མི་གཅོད་པ་བོ་འོལ་ཀ་བཅད་མི་བྱ། རྒྱལ་པོའི་རྟགས་ཀྱི་ཕྱག་རྒྱ་སྦྱིན་མི་བྱ་དབང་རྟགས་ཀྱི་ཕྱག་རྒྱ་ལས་མི་འདའ་ཞིང་རྒྱུད་ནས་གསུངས་པའི་བརྡ་གཞན་ལ་མི་བརྗོད། །རྡོ་རྗེའི་མཁར་རྫོང་གཏམས་པའི་རྨིང་མི་བཟློག །རྣལ་འབྱོར་པའི་དཀྱིལ་འཁོར་མི་དཀྲུག་ཅིང་སྐྱེ་བོའི་མཐུ་ལྡོག་མི་བྱེད་པ་དང༌། །རྒྱལ་མཚན་རྩེར་བཏགས་ནོར་བུ་རིན་པོ་ཆེ་རིགས་ཀྱི་བདག་པོ་བླ་མ་མི་སྤོང་བའོ། །འདོད་པར་གྱུར་པའི་མཚན་མས་དཔག་མི་བྱ། །ཞེས་ལྡེམ་དགོངས་ཀྱི་སྒྲས། སྤྱི་དང་ཁྱད་པར་དམ་ཚིག་ལ་གནས་ནས་ཚོགས་ཆེན་གྱི་སྒྲུབ་པ་ལ་སོགས་པའི་གནས་སྐབས་སུ་བསྲུང་ན་ལྷག་པར་བསྟན་པའི་དམ་ཚིག་ཉི་ཤུའོ། །གསལ་བཀྲ་ལས་ལྔ་ཚན་ལྔར་བསྟན་པ་དེ་དང་མཚུངས་པའི་རྣམ་གྲངས་སམ། དེ་བཞིན་དུ་དུས་ཀྱི་འཁོར་ལོ་ལས། བསླབ་པའི་གཞི་སྡིག་པ་ལྔ། ཉེ་བའི་སྡིག་པ་ལྔ། གསོད་པ་ལྔ། འཁུ་བ་ལྔ། ཆགས་པ་ལྔ་སྟེ་བརྟུལ་ཞུགས་ཉི་ཤུ་ལྔ་ལས། དང་པོ་སྡིག་པ་ལྔ་སྤོང་བ་ནི། སྲོག་ཆགས་ཕྲ་མོ་ཡན་ཆད་ཀྱི་སྲོག་འཚེ་ལྟ་ཅི། མནར་སེམས་དང་བཅས་པ། བསླུ་སེམས་ཀྱིས་རྫུན། དུད་འགྲོ་ཡན་ཆད་ཀྱིས་བདག་གིར་བྱས་པ་རྐུ་བ། འདོད་པའི་ལོག་གཡེམ། ཕུང་ཁྲོལ་གྱི་འབྱུང་གནས་མྱོས་ཆུ་བཏུང་བ་མྱོས་བྱེད་དང་ལྔ་ནི། འཁོར་བར་འཆིང་བྱེད་ཀྱི་ཞགས་པ་དང་མཚུངས་ལ། མ་བསྲུངས་ན་བརྟུལ་ཞུགས་ལྷག་མ་རྣམས་ཀྱང་མི་སྦྱིན་པས་བསླབ་པའི་གཞི་ལྔ་ཞེས་བྱའོ། །གཉིས་པ་ཉེ་བའི་སྡིག་པ་ལྔ་ནི། ཆོ་ལོ་མིག་མང་སོགས་རྒྱན་འགྱེད་པ་དང༌། བཟའ་བ་དང་རིན་གྱི་དོན་དུ་བསད་པའི་ཤ་སོགས་ཁ་ན་མ་ཐོ་བའི་ཟས་དང༌། དམག་འཁྲུག་ཚོང་གཏམ་སོགས་ངག་འཁྱལ་རིགས་དང༌། ཕ་མྱེས་ཀྱི་མཚུན་གསོལ་ནད་པའི་དོན་དུ་ནོར་ཕྱུགས་སོགས་ཀྱི་མཆོད་སྦྱིན་བྱེད་པ་འབྱུང་པོའི་ཆོས་ལུགས་ལ་དགའ་བ་དང༌། རང་གིས་བསད་པའི་ཤ་སོགས་ལས་གཞན་མི་བཟའ་ཞིང༌། གོས་དཀར་པོ་དང༌། བྱ་གག་གི་བཏུང་བ་འབའ་ཞིག་བསྟེན་པ་སོགས་ལྷ་མིན་གྱི་འཇུག་པ་ཅན་ཀླ་ཀློའི་ཆོས་ལུགས་ལ་སྤྱོད་པ་སྟེ་ལྔ་ནི་ཉེ་བའི་སྡིག་པ་ཡིན་པས་སྤང་ངོ༌། །གསུམ་པ་གསོད་པ་ལྔ་ནི། མཐོ་རིས་འདོད་པས་མཆོད་སྦྱིན་ལ་དམིགས་ནས་བ་ལང་གསོད་པ་དང༌། མ་མོ་མཆོད་པ་ལ་བྱིས་པ་གསོད་པ་དང༌། སྐྱེས་པའི་དོན་དུ་སྐྱེས་པ་གསོད་པ་དང༌། བུད་མེད་ཀྱི་དོན་དུ་བུད་མེད་གསོད་པ་སྟེ་མིའི་མཆོད་སྦྱིན་གཉིས། ལྷ་མིའི་བླ་མ་གསོད་པ་ཞེས་བྱ་བ་རྒྱལ་བ་སྲས་དང་བཅས་པའི་སྐུ་གཟུགས་དང་བཀའི་གླེགས་བམ་དང་མཆོད་རྟེན་རྣམས་བསྣུན་ཏེ་བཤིག་པ་ལ་གསོད་པའི་སྒྲས་བཏགས་ཏེ། འཚེ་བ་ཆོས་སུ་སྨྲ་བ་ཀླ་ཀློའི་ཆོས་ལུགས་སྡིག་ལས་རྔམ་ཆེན་དགེ་བར་འདོད་པའི་སྐབས་ཡོད་པས་ལོགས་སུ་དགར་ནས་དེ་ལས་ལྡོག་པའི་དོན་དུ་བཤད་པ་སྟེ། དེས་ན་དཀོན་མཆོག་ལ་བསྙེན་བཀུར་ལ་བསྙད་ནས། ཁལ་གཡག་ཕྱུགས་ལུག་གསོད་པ་ཡང་ཀླ་ཀློའི་གྲུབ་མཐའ་མ་ཤེས་ཀྱང་སྤྱོད་པ་ལ་མཚུངས་ལྡན་དུ་སློབ་པ་ཡིན་ནོ། །བཞི་པ་འཁུ་བ་ལྔ་ནི། དགེ་བའི་གྲོགས་པོ་དང༌། རྗེ་བོ་རྒན་རབས་དང་སངས་རྒྱས་དང་དགེ་འདུན་དང་བླ་མ་དང་མཁན་སློབ་སྟེ་ཡུལ་ལྔ་པོ་དེ་དག་ལ་ཁོང་ཁྲོ་ཞིང་འཁུ་བ་སྟེ་ལྔ་ཚན་བཞི་པོ་ཡིད་ཀྱིས་སྡོམ་ཞིང་སྤྱོད་ལམ་གྱི་སྒོ་ནས་སྤང་བར་བྱ་བའོ། །ལྔ་པ་ཆགས་པ་ལྔ་ནི། ཐེག་ཆེན་སྡེ་སྣོད་ཐམས་ཅད་ནས། མིག་གི་འདུས་ཏེ་རེག་པའི་རྐྱེན་གྱིས་ཚོར་བ་དང་ཞེས་པ་ནས། །ལུས་ཀྱི་འདུས་ཏེ་རེག་པའི་རྐྱེན་གྱི་ཚོར་བའི་བར་ཏེ། དབང་ཤེས་ཕན་ཚུན་རྟེན་དང་བརྟེན་པར་འབྲེལ་བ་ལས་ཡུལ་ལྔ་ལ་ཞེན་ཅིང་ཆགས་ནས་ཡང་སྲིད་འཕེན་ནུས་ཀྱི་ལས་སུ་རྫོགས་པ་དེ་དག་སྤང་བར་བྱ་སྟེ། སྤོང་ཚུལ་ནི་བསྐྱེད་རིམ་གྱི་སྒོ་ནས་དབང་ཡུལ་དང་རེག་བྱ་རེག་ཤེས་སོགས་ལྷ་སྐུར་སྦྱང་ཞིང་རྫོགས་རིམ་སོ་སོར་སྡུད་པའི་རྣལ་འབྱོར་གྱིས་དབང་པོ་ལྔ་ཡུལ་ལྔ་ལ་འཇུག་པའི་རྒྱུན་གཅོད་པའོ། །དེ་ཡང་རྡོ་རྗེ་སེམས་དཔའི་བརྟུལ་ཞུགས་ཉེར་ལྔ་ཞེས་རྒྱུད་འགྲེལ་ལས་གསུངས་པའི་དོན་ཏེ། དེ་དག་ལས་འདའ་བར་བྱ་བ་མ་ཡིན་པས་དམ་ཚིག་དང༌། སྒོ་གསུམ་དེའི་ངོ་བོར་སོན་པ་ཉིད་ཀྱིས་ན་བརྟུལ་ཞུགས་ཞེས་གྲགས་སོ། །གསང་འདུས་སངས་རྒྱས་མཉམ་སྦྱོར་ཟླ་གསང་སོགས་ཚིག་རྐང་གཅིག་འདི་མཆན་དཀྱུས་སུ་སོང་བ་འདྲ་སྟེ་རྣམ་མཁྱེན་ཤིང་རྟར་མི་འདུག་གོ་ བཻ་རོ་སྐ་ཅོག་སོགས་ནས་རིན་བཟང་ལ་ཐུག་གི་བར་སྔ་འགྱུར་ཏེ་སྔོན་དང༌། རིན་བཟང་ཕྱིན་ཆད་འགྱུར་བའི་རྒྱུད་སྡེ་ཡི་སྤྱི་དོན་དུ་གྱུར་པ་ཐུན་མོང་རིགས་ལྔའི་སྡོམ་པ་ལ། དང་པོ་སངས་རྒྱས་རྣལ་འབྱོར་ཏེ་དེ་བཞིན་གཤེགས་པའི་རིགས་ལ། སྨོན་འཇུག་སེམས་བསྐྱེད་ཀྱི་ཁྱད་པར་བདག་རྡོ་རྗེ་སེམས་དཔར་གྱུར་ནས། སེམས་ཅན་ཐམས་ཅད་ཀྱང་དེའི་གོ་འཕང་ལ་དགོད་པར་བྱའོ་སྙམ་པའི་སྨོན་སེམས་བླངས་ནས། འཇུག་སྡོམ་ནི་ཚུལ་ཁྲིམས་གསུམ་བརྟན་པོར་བཟུང་བས་ཤུགས་ལ་བླང་བར་གྱུར་ལ། དེ་ཡང་ཚུལ་ཁྲིམས་གསུམ་གྱི་ཁྱད་པར། ཐ་མལ་སྣང་ཞེན་ལས་ལྡོག་པའི་ཉེས་སྤྱོད་སྡོམ་པ། འབྱུང་ལྔ་ཡེ་ཤེས་སུ་སྡུད་པ་དགེ་བ་ཆོས་སྡུད། ལས་བཞིའི་ཕྲིན་ལས་ལ་འཇུག་པའི་སེམས་ཅན་དོན་བྱེད་དོ། །མི་བསྐྱོད་པའི་རིགས་ལ་རྡོ་རྗེ་དང་དྲིལ་བུ་དང་ལྷའི་ཕྱག་རྒྱ་དང་བླ་མ་གཟུང་བ་རྣམས་སོ། །རིན་འབྱུང་གི་རིགས་ལ་ཆོས་དང་ནོར་དང་མི་འཇིགས་པ་དང༌། བྱམས་པ་རྣམས་སྦྱིན་པར་བྱའོ། །སྣང་མཐའི་རིགས་ལ། སོ་བྱང་སྔགས་ཀྱི་ཐེག་པ་གསུམ་འཛིན་ཅིང་ཆོས་རྣམས་བཤད་པའོ། །དོན་གྲུབ་ཀྱི་རིགས་ལ། སྲས་བཅས་རྒྱལ་བར་མཆོད་བསྟོད་སྦྱིན་སྲེག་སོགས་ཕྲིན་ལས་ཀྱི་རིགས་ཀུན་ལ་གུས་པར་བྱའོ། །རྟེན་གང་ཟག་ཁྱད་པར་བ་རྣལ་འབྱོར་བླ་མེད་ཀྱི་ལྟ་སྒོམ་སྤྱོད་པའི་གནས་གང་ཡིན་པ་གདེངས་སུ་གྱུར་ཅིང་རིགས་ལྔའི་སྡོམ་པ་ནི། དང་པོ་རྡོ་རྗེའི་རིགས་གྱུར་སྲོག་ལ་འཚེ་བ་སྟེ་སྲོག་གཅོད་པར་གསུངས་པ་ཡང༌། ཕྱི་ཞིང་བཅུ་ཚང་བའམ་ཉམས་པ་བདུན་ལྡན་བསྒྲལ་བ་དང༌། ནང་དེ་ལས་གཞན་དབུ་མར་རླུང་རྟོག་གསོད་པ་དང༌། གསང་བར་རྟོག་པ་སྐྱེ་མེད་དུ་གསོད་པའོ། །གཉིས་པ་རིན་ཆེན་རིགས་ལ་མ་བྱིན་བླང་བྱ་ནི། ནང་ལྟར་མཚན་ལྡན་གྱི་གཟུངས་མ་ཐབས་ཀྱིས་དབང་དུ་བྱ་བ་དང༌། སྐལ་མེད་སྐྱེ་བོའི་ནོར་འཕྲོགས་ཏེ་དགེ་བར་འཁྲིས་མེད་དུ་གཏོང་བ། གསང་བ་ལྟར་ན་རྫོགས་པའི་བྱང་ཆུབ་ཀྱི་ཡོན་ཏན་ཐམས་ཅད་སུས་ཀྱང་མ་བྱིན་པ་རང་སྟོབས་མཐུ་ཡིས་བླང་ངོ༌། །གསུམ་པ་པདྨའི་རིགས་ལ་རི་དྭགས་མིག་ཅན་མཆོད་པའམ་བསྟེན་པར་གསུངས་པས། གསང་བ་ལྟར་ན་ཤེས་རབ་ཀྱི་རང་བཞིན་སྟོང་པ་ཉིད་ཀྱི་བུད་མེད་རྣམ་ཀུན་མཆོག་ལྡན་མ། རིག་པའི་ཡེ་ཤེས་ཀྱི་ཕྱག་རྒྱར་ཀུན་ཏུ་སྤྱོད་པ་དང༌། ནང་ལྟར་ན་ཡིད་རིག་ཆོས་ཀྱི་ཕྱག་རྒྱ། གཏུམ་མོ་དམ་ཚིག་གི་ཕྱག་རྒྱ་གཉིས་བསྒོམ་པ་དང༌། ཕྱི་ལྟར་ན་དངོས་རིག་ལས་ཀྱི་ཕྱག་རྒྱ་དང༌། ཆོས་དང་དམ་ཚིག་དང༌། ཕྱག་རྒྱ་ཆེན་པོ་རྣམས་རང་བཞིན་གསུམ་དུ་བསྟེན་པ་ལ་འདུ་སྟེ། རིམ་པ་བཞིན་འདུ་ཤེས་གསུམ་ལྡན་གྱི་ལྷ་བསྒོམ་པ། ཐབས་ཟིན་གྱི་སྤྱོད་པ་རྟོགས་གོམས་ལྡན་པའི་ཕྱག་རྒྱ་གསུམ་དང་མཚུངས་ལྡན་བརྟེན་ནས་ཞུ་བདེས་དྲངས་པའི་དཔེའི་ཡེ་ཤེས་ལ་བརྟེན། དོན་དམ་ལྷན་ཅིག་སྐྱེས་པའི་ཡེ་ཤེས་འགྱུར་བ་མེད་པ་མངོན་དུ་བྱེད་པའོ། །བཞི་པ་ལས་ཀྱི་རིགས་ལ། ཕྱི་བླ་མ་དང༌། སེམས་ཅན་གྱི་སྲོག་དང༌། རང་གི་དམ་ཚིག་སོགས་ཀྱི་ཆེད་དུ་རྫུན་ཚིག་སྒྱུ་མ་ལྟ་བུར་སྒྲོག །ནང་ལྟར་ངག་གི་རྩ་བ་སྲོག་རླུང་སྙིང་ཁར་ཐིམ་ནས་ཆོས་ཀུན་ཚད་མེད་པར་འཆར་བ་དང༌། གཞན་ལའང་རང་རང་མཐུན་པའི་ཆོས་སྒྱུ་མ་ལྟ་བུར་སྟོན་པ་དང༌། གསང་བ་ལྟར་སེམས་ཅན་ཐམས་ཅད་མེད་སྣང་འཁོར་བ་ལས་སྒྲོལ་བའི་རྫུན་ཚིག་སྒྱུ་མ་ལྟ་བུར་སྒྲོགས་པའོ། །ལྔ་པ་འཁོར་ལོའི་རིགས་ལ། ཕྱི་ལྟར་ན་བདུད་རྩི་ལྔ་དང་ཤ་ལྔ་སོགས་རྫས་རྣམས་དང༌། གཟུགས་སོགས་ཡུལ་རྣམས་ཀྱི་འདོད་པའི་ཡོན་ཏན་ལྔ་སོགས་ལ་ཞེན་མེད་སྒྱུ་མ་ལྟ་བུར་སྤྱོད་དོ། །ནང་ལྟར་ན་དབང་ལྔའི་དྭངས་མ་སོགས་གཞིལ་ཏེ་མི་རྟོག་པའི་ཆོས་ཉིད་བཟའ་བ་དང༌། ཆང་བཏུང་བ་སྟེ་རྩ་རླུང་གི་ཞུ་བ་དེ་ཡས་བབ་མས་བརྟན་སོགས་ལྷན་སྐྱེས་ཀྱི་ཡེ་ཤེས་ལ་བཟུང་བ་དང༌། གསང་བར་སྣང་སེམས་དག་མཉམ་ཆེན་པོར་སྒྲུབ་མེད་དུ་དག་པར་བྱེད་པའོ། །སྨོན་འཇུག་གི་སྡོམ་བཟུང་དེ་ཡི་རྗེས་སུ་རིགས་ལྔའི་སྡོམ་བཟུང་གི་ཡན་ལག་སེམས་བསྐྱེད་དེའི་དམིགས་རྣམས་སོ་སོར་ཕྱེ་བ་ཚིག་གིས་གབ་པ་ནི། ཉན་རང་སོགས་མ་བསྒྲལ་བསྒྲལ་དང༌། མ་གྲོལ་དགྲོལ། དབུགས་མ་དབྱུང་རྣམས་དབྱུང་བ་སོགས་བྱང་ས་དང་ཐུན་མོང་པ་རྣམས་ནི་ལེའུ་བརྒྱད་པའི་སྐབས་ལྟར་རོ། །ལྷ་དང་ལྷ་མིན་གསང་བ་པ་རྣམས་ལའང་མི་བརྙས་པ་དང༌། ཕྱག་རྒྱ་བཞོན་པ་མཚོན་ཆ་མཚན་མ་ལ་སྨད་པར་མི་བྱ་ཞེས། ལྷ་ལྷ་མིན་གཉིས་ནི་དངོས་བསྟན་ཏེ་མི་སྨོད་པ་དང༌། གསང་བ་པ་ནི་གནོད་སྦྱིན་ཏེ་སྟོན་པའི་བསྟན་པ་སྐྱོང་བ་རྣམས་དང༌། ཕྱག་རྒྱ་ནི་བཞི་ཀ་ལ་མི་སྨོད་པ་དང༌། ཁྱད་པར་ཡི་དམ་སོགས་སྐུ་གཟུགས་ཡོངས་རྫོགས་ལ་མི་སྨོད་པ་དང༌། བཞོན་པ་ནི་བླ་མའི་ཁྲི་སྟེན་དང་ཆིབས་པ་དང་དེ་ལ་སོགས་པའི་ཡོ་བྱད་རྣམས་སོ། །མཚོན་ཆ་ནི་རལ་གྲི་གཏུན་ཤིང་སོགས་ལྷ་ཡི་ཕྱག་མཚན་གྱི་ཆེད་དུ་བྱས་པའི་རིགས་རྣམས་ལ་མི་སྨོད་པ་དང༌། མཚན་མ་སྟེ་རིགས་ལྔའི་ཕྱག་མཚན་རྣམས་ལ་མི་སྨོད་པ་དང༌། གཞན་ཡང་ལྷའི་སྐུ་གཟུགས་དང༌། བླ་མ་དང༌། མཆོད་རྟེན་ལ་སོགས་པའི་སྐུ་གསུང་ཐུགས་རྟེན་ཐམས་ཅད་ཀྱི་གྲིབ་མ་འགོམ་ལ་སྨད་པའི་སྒྲ་ཡིས་བཀག་པ་ཡིན་པས། གལ་ཏེ་ཐབས་མེད་བྱུང་ན་བཛྲ་བེ་གཱ་ཨ་ཀྲ་མ་ཧཱུྃ་ཞེས་རྡོ་རྗེའི་ཤུགས་ཀྱི་སྔགས་རྒྱས་མཁར་བཏེགས་ཏེ་འགྲོ་བར་བྱའོ། །དེ་བཞིན་དུ་ལྷ་ལ་ཕུལ་བའི་མཆོད་རྫས་རྙིངས་པ་ལ་དམན་མར་གྲགས་ཏེ་མི་འགོང་མི་བཟའ་འགོམ་སར་ཁྱབ་གདལ་དུ་མི་དོར། མར་ཟན་སོགས་ཀྱིས་ལྷའི་ཕྱག་མཚན་གྱི་རྣམ་པར་བྱས་པའང་བཟའ་བར་བཀག་པ་ཡིན་པས་མི་བཟའོ། །ཁྱད་པར་དུ་རྡོ་རྗེ་ཐེག་པའི་རིགས་ལྔའི་དམ་ཚིག་ལས་གསོད་པ་དང༌། མ་བྱིན་ལེན་པ་དང་སོགས་ཁོངས་ནས་མི་ཚངས་སྤྱོད་དང༌། རྫུན་དང་ཕྲ་མ་ཚིག་རྩུབ་ངག་ཀྱལ་རྣམས་ཏེ་དངོས་བསྟན་ཉིད་དང༌། དགོངས་པ་ལུང་སྟོན་གྱི་ཚུལ་དུ་ཡོད་པའི་རླུང་རྟོག་དབུ་མར་གསོད་པ་དང༌། ཐེག་ཆེན་གྱི་དོན་དེ་ཁོ་ན་ཉིད་མ་བྱིན་པ་ལེན་པ་སོགས་ལྡེམ་དགོངས་ཀྱི་རྣམ་དབྱེ་མ་ཕྱེ་ན། སྔགས་པ་ཐུར་ལ་མནར་མེད་སོགས་ཀྱི་གནས་སུ་ལྷུང་བས་ན་བག་ཡོད་བྱེད་པ་གལ་ཆེའོ། །མདོར་བསྡུས་ཏེ་བཤད་ན། རང་ལ་ཡེ་ནས་གནས་པའི་སེམས་ཉིད་ཀྱི་གནས་ལུགས་ཉིད་མཁྲིས་ནད་ཅན་ལ་དུང་གི་དཀར་སྣང་གབ་པ་བཞིན་ཐོག་མེད་ནས་ཚོགས་བརྒྱད་ཀྱི་རྟོག་པས་བསྒྲིབས་ཏེ་མ་མཐོང་ཞིང་གབ་པའི་ཚུལ་དུ་ཡོད་པ་ལ། གསང་བ་ཞེས་བྱ་སྟེ། གསང་སྙིང་ལས། ཨེ་མ་ཧོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང༌། །ངོ་བོ་ཉིད་ཀྱིས་རབ་ཏུ་གསང༌། །གཞན་དུ་མིན་ལས་ཤིན་ཏུ་གསང༌། །ཞེས་ཚུལ་བཞིའི་སྒོ་ནས་མངོན་སུམ་དུ་དེ་ཉིད་ཟབ་མོ་མ་རྟོགས་པར་དེ་སྲིད་སྐལ་དམན་རྣམས་ལ་བརྡ་ལ་སོགས་པའི་སྒོ་ནས། སྦས་པའི་གསང་བ་སྦྱོར་སྒྲོལ་སོགས་སྤྱོད་མི་ནུས་པའི་ཆ་ཐམས་ཅད་མངོན་པར་འཆལ་ཏེ་སྤྱོད་པར་མི་བྱེད་པར་དེ་འདྲའི་རིགས་ཀུན་ལ་གཟུར་ནས་དུས་ཚོད་དང་བསྟུན་ནས་གདམས་པར་བྱའོ། །སྡོམ་པའི་རྟེན་ནི་ཉིན་རེ་བཞིན་དུ་བྲམ་ཟེ་གསོད་པ་དང༌། ཕ་མ་གསོད་པ་སོགས་མཚམས་མེད་ཀྱི་ལས་ལ་སྤྱོད་པ་ལྟ་བུའི་སྡིག་ཅན་ཡིན་ཀྱང༌། སྔགས་སྡོམ་སྐྱེ་བའི་རྟེན་དུ་རུང་བས་ན། ཐེག་པ་འོག་མ་ལས་ཀྱང་གསང་སྔགས་རྡོ་རྗེ་ཐེག་པ་ཐབས་ཀྱིས་ཆེ་ཞིང་ཁྱད་པར་དུ་འགྱུར་བ་སྨོས་ཅི་དགོས། ལྟུང་བ་སོ་སོའི་བླང་དོར་གྱི་མཚམས་མི་ཤེས་པ་དང༌། དེའི་གནད་འདོམས་པའི་བླ་མར་མི་གུས་པ་དང༌། བསླབ་པའི་གནས་ལ་གཟོབ་པར་མ་བྱས་ན་བག་མེད་པ་ལ་གོམས་པས་ཉེས་པ་འདོད་རྒྱལ་དུ་བྱེད་པ་དང་གསུམ། གལ་ཏེ་བག་ཡོད་བྱས་ཀྱང་ཉོན་མོངས་པ་ཤུགས་དྲག་ལ་མཐུ་ཆེ་བས་གཉེན་པོས་མགོ་མི་ནོན་པ་སྟེ། དེ་བཞི་པོ་ནི་ལྟུང་བ་འབྱུང་བའི་སྒོ་བཞི་ཡིན་ལ། དེའི་སྟེང་དུ་ལྟུང་བ་ལེགས་པར་ཤེས་ཀྱང་བརྗེད་ངས་ཆེ་བ་དང༌། དྲན་པ་མི་གསལ་བ་སྟེ་ལྟུང་བ་བྱུང་མིན་བརྟགས་པའི་ཤེས་བཞིན་ལྷོད་པ་གཉིས་བསྣན་པས་དམ་ཚིག་ཉམས་པའི་རྒྱུ་དྲུག་ཡིན་ནོ། །དེ་བས་ན་གཉེན་པོ་དྲན་པ་དང་ཤེས་བཞིན་གྱིས་ཉོན་མོངས་གང་ཆེ་དེའི་གཉེན་པོ་བསྐྱེད་པ་ཡིས། དཔེར་ན་ལོང་བ་དེ་ལ་སྨན་པ་མཁས་པས་ཐུར་དཔྱད་ཀྱིས་དབྱེ་བའི་གནས་སྐབས་ཐོབ་པ་ན། དེའི་ཤིན་ཏུ་བསྒྲིམས་ཏེ་བག་ཟོན་དང་བཅས་པས་བསྲུང་བ་ཇི་ལྟ་བ་དེ་བཞིན་དུ་སྔར་བཤད་པ་ལྟར་ཉིན་མཚན་ཐུན་དྲུག་ཏུ། སྤང་བླང་གནད་ལ་བསྒྲིམས་ཤིང་བསྒྲིམས་ཤིང་ལྷོད་པ་མེད་པར་བརྟགས་ལ་དཔྱད་པར་རིགས་སོ། །ཉམས་ན་གསོ་བའང་འོག་མ་ལས་འཕགས་ཏེ། ཉན་ཐོས་སྡོམ་ཁྲིམས་ཉམས་པ་སྟེ་ཕམ་པ་བཞི་གང་རུང་བྱུང་ནས་འཆབ་སེམས་མ་སྐྱེས་ན། བསླབ་པ་སྦྱིན་པས་ལན་བདུན་གསོར་ཡོད་ལ། སྤྱིར་ཕམ་པ་འཆབ་མེད་ཅན་བསླབ་སྦྱིན་བྱས་པ་དེ་ཡིས་བསླབ་པ་ཕུལ་ཏེ་དགེ་སློང་གི་སྡོམ་པ་བླང་དུ་ཡོད་པར་གསུངས་ཏེ། ཀརྨ་ཤ་ཏཾ་གྱི་འགྲེལ་པར་སྐྱེས་པ་ནི་རབ་ཏུ་བྱུང་བ་ལན་བདུན་ལེན་དུ་སྣང་བའི་ཕྱིར་ཞེས་བྱུང་བ་ལ་སོགས་པའོ། །འཆབ་པ་དང་བཅས་པ་ནི་ལན་གཅིག་ཀྱང༌། གསོ་བའི་ཡུལ་མེད་དེ་དཔེར་ན་རྫ་བེའུ་ཆག་པ་བཞིན་ནོ། །བྱང་སྡོམ་ནི་དཔེར་ན་རིན་ཆེན་ཉེར་སྤྱད་ཆག་པ་དང་འདྲ་སྟེ་མགར་མཁས་པས་བཅོས་སུ་ཡོད་པ་དང་མཚུངས་ལ། གཞན་རྐྱེན་དགེ་བའི་བཤེས་གཉེན་ལ་བསྟེན་ནས་གསོ་བ་ཡིན་ལ། གསང་སྔགས་ཀྱི་སྡོམ་པ་ཉམས་པ་ནི། རིན་ཆེན་གྱི་སྣོད་ཅུང་ཟད་ཞོམ་པ་ལྟར། གཞན་རྐྱེན་ལ་མ་ལྟོས་པར་རང་སྟོབས་བསྐྱེད་རྫོགས་སོགས་ཀྱི་མཐུ་ཡིས་གསོ་རུ་བྱར་ཡོད་པས་ཁྱད་པར་དུ་འཕགས་ཏེ། དེ་ཡང་བླ་མ་རྡོ་རྗེ་སློབ་དཔོན། རྡོ་རྗེའི་སྤུན་རྣམས་ལ་རྨི་ལམ་ཚུན་བརྙས་ཐབས་ཤོར་ན། འཕྲལ་དུ་སྒོ་གསུམ་གྱིས་གུས་ཤིང་བཀུར་ཏེ་ཚོགས་དང་ཡོ་བྱད་སོགས་ཀྱི་ཐུགས་མཉེས་པར་བྱས་ལ་ཉམས་པ་སྐོང་བའི་རྒྱུ་མཚན། བཀོད་པ་ཆེན་པོ་ལས། བླ་མ་དང་ནི་ཉེ་བའི་འཁོར། །རྡོ་རྗེའི་སྤུན་དང་སྲིང་མོ་ལ། །ངན་སྨྲས་ཚིག་གི་ཟུར་ཙམ་ཡང༌། །བརྡའམ་དངོས་སུ་བརྗོད་མི་བྱ། །གལ་ཏེ་རྨི་ལམ་དག་ཏུ་ཡང༌། །བྱུང་ན་ཡིད་ཀྱིས་བཤགས་པར་བྱ། །དངོས་དང་ཞེ་ཡིས་བྱས་པ་དང༌། །གལ་ཏེ་དྲན་པས་མ་ཟིན་ནས། །ཐལ་བར་གྱུར་ཀྱང་མ་བཤགས་ན། །ཐུར་དུ་བལྟས་ཏེ་དམྱལ་བར་འགྲོ། །ཞེས་སོ། །དེ་རྣམས་ཀྱི་གསུང་གི་ཐ་ཚིག་ལས་ཉམས་ཤོར་ན་རྩ་བའི་བླ་མ་དེ་ཉིད་དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེའི་ངོ་བོ་སངས་རྒྱས་རྡོ་རྗེ་ཆོས་སྐུ་མདོག་དམར་པོ་ཅན་སྤྱི་བོར་རམ། ཡང་ན་བདག་དང་དབྱེར་མེད་དུ་བསྒོམ་ལ་སྙིང་པོ་པདྨ་སཏྭའམ་དེའི་ཡིག་བརྒྱ་འབུམ་ཐེར་འདོན་པ་དང༌། བླ་མའི་ཡོན་ཏན་བརྗོད་པ་འབའ་ཞིག་ལ་དོན་དུ་གཉེར་བར་བྱའོ། །གནོད་སེམས་དང་གསང་བ་བསྒྲགས་པ་སོགས་ཐུགས་ཀྱི་དམ་ཚིག་ལས་ཉམས་ཤོར་ན། བདག་ཉིད་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེའི་ངོ་བོ་རྡོར་སེམས་སུ་གསལ་བའི་སྤྱི་བོར་བླ་མ་བསྒོམ་ལ། ཡན་ལག་བདུན་པ་ཕུལ་ནས་དབང་བཞི་བླངས་རྗེས་བླ་མ་རང་ལ་བསྟིམས་སྟེ་ལོ་གསུམ་སྨྲ་བ་བཅད་ལ་ཐུགས་ཡིད་དབྱེར་མེད་དུ་བསྲེས་པའི་ངང་ལ་རྩེ་གཅིག་ཏུ་མཉམ་པར་བཞག་པ་ནི་གསོ་བའི་ཐབས་སུ་བཤད་དོ། །དུས་ལ་ལྟོས་པའི་ཉིན་མཚན་ཐུན་དྲུག་ཏུ་བཅད་པའི་ཆ་གང་རུང་ཞིག་གི་ནང་དུ་ལྟུང་བ་ལ་སྦྱོར་བའི་བྱ་བ་བརྩམས་ནས་ཐུན་དེའི་ནང་དུ་གཉེན་པོས་མ་སླེབ་པར་དུས་ཚོད་ལས་ཐལ་ཏེ། ཐུན་ཚོད་འདའ་བའི་མཚམས་ལ་ཐུན་གྱི་ལྟུང་བ་ཞེས་བརྗོད་པ་ཡིན་ལ། དེ་བཞིན་དུ་འགལ་བ་དང༌། ཉམས་པ་དང༌། འདས་པ་དང༌། རལ་བ་ཞེས་བཞི་པོའང་ཞག་དང་ཟླ་བ་དང༌། ལོ་གཅིག་དང༌། ལོ་གཉིས་སམ་གསུམ་ཚུན་ཆོད་འདས་ཏེ་ཐུན་ཚོད་ལ་བཤགས་པ་བྱས་ན་གསོ་བར་རུང་སྟེ། སྔ་མ་ལས་ཀྱང་ཕྱི་མ་ཕྱི་མར་ལྕི་ཞིང༌། ལོ་གསུམ་འདས་ན་བཤགས་པ་བྱས་ཀྱང་གསོ་བར་རུང་བ་མ་ཡིན་ལ། དེ་དག་ལས་དང་པོ་འགལ་ན། ཚོགས་ཀྱི་འཁོར་ལོ་སྔོན་དུ་འགྲོ་བར་བྱ་བ་དང༌། ཉམས་ན་བླ་མ་དང་ལྷ་ལ་བདོག་དགུ་སྤོང་དག་ཕུལ་ནས་བསྐང་ཞིང༌། འདས་ན་དེ་ལས་ཀྱང་ཕངས་པའི་བུ་དང་ཆུང་མ་ནོར་གྱི་དབྱིག་སོགས་རིན་པོ་ཆེ་གང་བཟང་ཕུལ་ནས་བསྐང༌། རལ་ན་རང་གི་སྲོག་ལའང་མི་ལྟ་བར་བརྩོན་འགྲུས་དྲག་པོ་དག་གིས་གསོ་བའི་རྣམ་བཞག་རྣམས་ནི། རྡོ་རྗེ་ཉི་མ་རྣམ་པར་བཀོད་པའི་རྒྱུད་སྡེ་ཉིད་ལས་གསུངས་སོ། །བསྡུས་ཏེ་དོན་གོང་དུ་བཤད་པ་དེ་ལས་གཞན་ཡང་འདི་ལྟར་བླ་མ་ལས། དབང་བཞི་པོ་བསྐྱར་ནས་བླང་བ་དང༌། རང་གི་དམིགས་པས་བདག་འཇུག་བླང༌། དབེན་པར་བསྐྱེད་རྫོགས་བསྒོམ་པ་དང༌། ལས་ཀྱི་བསྐང་བ་ནི་སྦྱིན་སྲེག་གཏོར་མ་བཟླས་བརྗོད་ལ་བརྟེན་པ་རྣམས་ཏེ། དེ་ཡང་ཀུན་ཏུ་ཉམས་པ་ལ་ཚིག་འབུམ་སུམ་ཁྲི། རྩ་བ་ཉམས་ན་ལྔ་ཁྲི་སུམ་སྟོང༌། ཡན་ལག་ཉམས་ན་ལྔ་སྟོང་སུམ་བརྒྱ། ཟླས་ཉམས་ཏེ་ཉམས་པ་དང་འགྲོགས་པ་ལ་བརྒྱ་ཕྲག་གསུམ། རང་གི་ཆེད་དུ་མིན་ཀྱང་གཞན་གྱི་ངོ་དགར་སོགས་ཞར་ཉམས་ལ་ལྔ་བཅུ་རྩ་གསུམ་མོ། །དེ་ཡང་རྫས་ཀྱིས་བསྐང་བ་དང༌། འདུན་པས་བསྐང་བ་དང༌། ཏིང་ངེ་འཛིན་གྱིས་བསྐང་བ་སོགས་བྱ་ལ། འཕོ་མེད་ཀྱི་ཚུལ་ཁྲིམས་རྫོགས་རིམ་རང་ལུས་ཐབས་ལྡན་སོགས་སྤྱི་དང༌། ཐིག་ལེའི་རྣལ་འབྱོར་འབར་འཛག་བསྒོམ་པ་དང༌། ཞི་བའི་སྦྱིན་སྲེག་དང༌། འཁོར་འདས་ལྷར་གསལ་བ་ལ་གཏོར་མ་གཏོང་བ་དང༌། ཡོ་ག་ནས་བཤད་པའི་དྲལ་བའི་སྔགས་རྒྱ་ལྟུང་བ་སློང་བའི་ཕྱག་རྒྱ་དང༌། དེའི་སྔགས་ཀྱི་རིམ་པ་ལ་བརྟེན་ནས་ངན་འགྲོ་དགུག་དྲལ་དང༌། དེ་བཞིན་དུ་རྡོ་རྗེ་ཡང་ཏོག་གི་རྒྱུད་ལས། ཡིག་འབྲུ་སྔགས་ཀྱི་སྦྱང་བ་ནི། །རྐང་མཐིལ་གཉིས་སུ་ཡཾ་གཉིས་བསམ། །གསང་བའི་སྒོ་རུ་རཾ་བསམ་མོ། །ལྟེ་བར་རིགས་དྲུག་ཡིག་འབྲུ་བསམ། །སྙིང་ཁར་ཕཊཿཀྱི་གདན་དག་ལ། །སྐུ་གསུང་ཐུགས་ཀྱི་སྙིང་པོ་བསམ། །ཡཾ་ལས་ཡེ་ཤེས་རླུང་བྱུང་སྟེ། །རཾ་ལས་ཡེ་ཤེས་མེ་སྦར་ནས། །རིགས་དྲུག་བག་ཆགས་ཐམས་ཅད་བསྲེག །སྒོ་གསུམ་སྐུ་གསུང་ཐུགས་སུ་གྱུར། །ཕཊཿཀྱིས་ཆོས་ཀྱི་དབྱིངས་སུ་འཕང༌། །ཞེས་པའང་མན་ངག་ཤིན་ཏུ་ཟབ་ལ། རྣམ་འཇོམས་སྨེ་བརྩེགས་སོགས་གཟུངས་ཀྱིས་བསྒྲུབས་པའི་བུམ་ཆུས་བཀྲུ་བ་དང༌། མཁའ་དབྱིངས་སུ་ཤར་བའི་དབང་ལྷ་ལས་རིགས་པའི་དབང་ལྔ་བླངས་ནས་བཀྲུ་བའི་འདུན་པ་དང༌། ཆུ་ཀླུང་སོགས་བཾ་ལས་མཱ་མ་ཀཱིའི་བདག་ཉིད་དུ་མོས་ནས་བརྟུལ་ཞུགས་ཀྱིས་ལུས་བཀྲུ་བ་སོགས་བཀྲུ་བའི་རིམ་པ་དང༌། གཏུམ་མོའི་མེས་ལྟེ་བར་ཀཾ་ཡིག་དང་སྙིང་ཁར་ཤ་ཟའི་གཟུགས་ཀྱི་སྡིག་པ་བསྲེག་པ་དང༌། རླུང་ལ་བརྟེན་ནས་སྦྱང་བ་ཡང་གཙུག་ལག་ཁང་སོགས་སུ་འཕན་དར་སོགས་བསྒྲེངས་པ་དང༌། ཚོགས་མང་དབུས་སམ་རྟེན་བྱིན་ཅན་གྱི་དྲུང་དུ་ཉེས་པ་བསྒྲག་པ་དང༌། ཚོགས་འཁོར་སོགས་དང༌། སྲོག་བསླུ་གསུང་རབ་སྤྱི་དང༌། ཐར་མདོ་དྲི་མེད་བཤགས་རྒྱུད་སོགས་བཀླག་པ་དང༌། གཟུངས་སྔགས་སྤྱི་དང་ཁྱད་པར་དེ་བཞིན་གཤེགས་པའི་ཡིག་བརྒྱ་བཟླ་བ་དང༌། མཎྜལ་འབུལ་བ་དང༌། ཡན་ལག་བདུན་པ་འབུལ་བ་དང༌། དེ་བཞིན་གཤེགས་པའི་སྤངས་རྟོགས་ཀྱི་གཟུགས་བརྙན་མཆོད་རྟེན་བཞེངས་པ་དང༌། མི་ནུས་པ་ཡིན་ནའང་སཱཙྪ་གདབ་པ་ལ་སོགས་ཉམས་ཆག་སྦྱོང་བའི་ཐབས་ཀྱིས་གཉེན་པོའི་རིམ་པ་ཟད་ཅིང་གཏུགས་སྲིད་པ་མ་ཡིན་ལ། དེ་དག་ནི་སྦྱོང་ཚུལ་སྤྱི་དང༌། ཁྱད་པར་སྤྱི་ཁྲུས་ན་རག་དོང་སྤྲུགས་བཤགས་པས་མི་འདག་པ་མེད་དེ། ཇི་སྐད་དུ། གང་གིས་སྒྱུ་འཕྲུལ་ཞི་ཁྲོ་ཡི། །དཀྱིལ་འཁོར་ལྷ་ལ་ཕྱག་འཚལ་ན། །ཉམས་ཆག་ཐམས་ཅད་བྱང་འགྱུར་ཏེ། །མཚམས་མེད་ལྔ་ཡི་སྡིག་ཀྱང་འབྱང༌། །ན་རག་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །ཞེས་སོ། །དེ་ལྟར་དམིགས་བཅས་ཀྱི་བཤགས་པ་ཀུན་ལ་འགྱོད་སེམས་བསྐྱེད་པ་ནི་ལྷག་པར་གཅེས་སོ། །མ་བཤགས་ན་ཚེ་འདིར་སྒྲུབ་པ་ཐམས་ཅད་ཕྱིན་ཅི་ལོག་ཏུ་འགྱུར་ཞིང༌། བདེ་ལེགས་ཀྱི་ཡོན་ཏན་ཐམས་ཅད་འགྲིབ་པ་དང༌། ཚེ་ཐུང་ནད་མང་སོགས་དང༌། ཕྱི་མ་དམྱལ་བ་གང་གིས་ཀྱང་དོ་ཟླ་མེད་པའི་རྡོ་རྗེའི་དམྱལ་བར་ལྟུང་བར་འགྱུར་རོ། །དམ་ཚིག་དང་ལྡན་པ་ནི། སྐྱེ་བ་བཅུ་དྲུག་གམ། མྱུར་ན་ཚེ་འདིའམ་འཆི་ཁའི་བར་མ་དོར་སོགས་གང་རུང་བའི་དུས་དེར་གྲུབ་པ་བརྒྱད་སོགས་ཡོན་ཏན་འཐོབ་སྟེ། ཇི་སྐད་དུ། མཁའ་སྤྱོད། ཕ་རོལ་ལས་རྒྱལ་བྱེད་རལ་གྲི་གང་སྒྲུབ་ལག་ཏུ་ཐོགས་པའི་ལུས་མི་སྣང་རིལ་བུ་དང༌། །ཡུད་ཙམ་རྒྱ་མཚོའི་མཐའ་ཡང་འཁོར་བ་རྐང་མགྱོགས། མི་ཟད་པའི་གཏེར་གྱི་བུམ་པ་གནོད་སྦྱིན་སྡེ་བརྒྱད་བྲན་དུ་ཁོལ། །བཅུད་ལེན་དང་ནི་མིག་ལ་བྱུག་ན་གཏེར་སོགས་མཐོང་མིག་སྨན་ནོ། །ཞེས་དང༌། དབང་བཅུ་ནི། མདོ་ལམ་དུ་བཤད་པ་དེ་རྣམས་མ་དག་ས་བདུན་ན་ཕྱི་དང༌། དག་པ་གསུམ་ན་ནང་དུ་བཞག་པ་དང་གཉིས་ཡོད་དེ། དབང་བཅུ་ཤིན་ཏུ་རྣམ་དག་ནི་སངས་རྒྱས་ཀྱི་ས་ན་ཡོད་དོ། །དབང་ཕྱུག་བརྒྱད་ནི། ཕྲ་ཆོས་རྣམས་སྤྲོས་བྲལ་དུ་མཐོང་ཞིང་ཡང་འཇིག་རྟེན་ཁམས་རྣམས་སུ་འགྲོ་བ་ལ་ཕྲ་རབ་གཉིས་སྣང་ནུབ་པ་ནུས་པ་དང༌། །སྤྱོད་འདོད་ཡོན་ལྔ་ཆོས་ཉིད་ལ་རོལ་པར་ནུས་དང་བདག་མཐུ་སྟོབས་ཀྱི་བདག་པོར་གྱུར་པ་ཉིད་ཆེན་པོ་དང༌། །དགའ་འགྲོ་རྣམས་ཅི་འདོད་མགུར་བྱེད་དང་སེམས་ཅན་ཐམས་ཅད་ཚོགས་གཉིས་ཀྱི་དབང་དུ་འགྱུར། རྫུ་འཕྲུལ་གྱིས་ཅི་འདོད་བྱེད་དང་དབང་ཕྱུག་དོན་བརྒྱད་དོ། །ཅེས་དེ་དག་གང་ལ་མངའ་བའི་གནས་སྐབས་རིག་འཛིན་རྣམ་པ་བཞི་སྔར་བཤད་པ་ལྟར་དང༌། སྐུ་རྣམ་པ་ཐམས་ཅད་དུ་ཤེས་བྱའི་གཟུགས་བརྙན་ཡོད་རྒུར་འཆར་བའི་ཁ་སྦྱོར། །གསུང་སྒྲ་ཚིག་གི་སྒྲིབ་བྲལ་ལོངས་སྤྱོད་རྫོགས། ཐུགས་གཟུང་འཛིན་གྱི་རྟོག་པ་ལས་གྲོལ་བའི་འགྱུར་མེད་བདེ་ཆེན་ལ་རོལ། །དཔྱད་མཐའ་ལས་གྲོལ་བའི་སོ་སོ་རང་རིག་པའི་མཚན་ཉིད་ཅན་ཏེ་བཞི་ནི་རང་དོན་ཕུན་ཚོགས་དང༌། སྙིང་རྗེས་གཞན་དོན་འབད་མེད་དུ་འབྱུང་བ་དམིགས་མེད་ཐུགས་རྗེ་ཆེན་པོ་དང༌། དེ་ཉིད་རྒྱུན་ཆད་མེད་པས་རྟག་པ། གདུལ་བྱའི་མོས་ངོར་སྐལ་པ་འཚམས་པའི་གཟུགས་སྐུ་སྣང་ཞིང་ཆོས་སྒོ་མཐའ་ཡས་འགོག་མེད་དུ་འཆར་བ་གཞན་དོན་ཕུན་ཚོགས་ཏེ་མཆོག་གི་དངོས་གྲུབ་ཁ་སྦྱོར་ཡན་ལག་བདུན་ཤུགས་ལ་འགྲུབ་པས། སྐུ་ལྔའི་ཡོན་ཏན་ཐམས་ཅད་ཡོངས་སུ་རྫོགས་ཏེ་འོག་མིན་གྱི་ཞིང་དུ་འགྲོ་ཞིང་དོན་གཉིས་ལྷུན་གྱིས་གྲུབ་པ་ལ་སངས་རྒྱས་ཞེས་བྱའོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། རིག་པ་འཛིན་པའི་སྡེ་སྣོད་བསྟན་པའི་ཚོམས་ཏེ་ལེའུ་བཅུ་པའོ།། །།ཐབས་མཁས་ཐུགས་རྗེ་ཅན་རྒྱལ་བས་ལས་དང་པོ་པར་འཁོར་ལོ་དང་པོར་བདེན་བཞི་མི་རྟག་བཅུ་དྲུག་སོགས་དང༌། དབང་པོ་འབྲིང་ལ་འཁོར་ལོ་བར་པར་རྒྱུ་མཚན་མ་མེད་པ། འབྲས་བུ་སྨོན་པ་མེད་པ། ངོ་བོ་སྟོང་པ་ཉིད་དེ་རྣམ་ཐར་གསུམ། བསྟན་བྱའི་ངོ་བོ་ཉམས་སུ་ལེན་བྱ་སོ་སོ་རང་རིག་པའི་ཡེ་ཤེས་ཆེན་པོ་ཉིད་བཀའ་ཐ་མས་སྟོན། བར་པའི་བསྟན་བྱ་སེམས་ཅན་ཐམས་ཅད་ཀྱི་ཁམས་ལ་བདེ་གཤེགས་སྙིང་པོ་རུ། རང་བཞིན་གྱིས་བཞུགས་པར་གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ་དང༌། མྱ་ངན་ལས་འདས་པ་ཆེན་པོའི་མདོ་སྡེ་རྣམས་ལས་རྒྱ་ཆེར་གསུངས་ཤིང༌། དབང་རྣོན་ངོར་ཤེས་བྱའི་གཤིས་ཇི་ལྟར་གནས་པའི་ཚུལ་ཐ་མས་སྟོན་ཏེ། དེ་ལྟར་བར་ཐ་གཉིས་ཀྱིས་བསྟན་བྱའི་སྙིང་པོ་ཆོས་ཐམས་ཅད་ཀྱི་གནས་ལུགས་ཟབ་པ་ཞི་བ་རང་བཞིན་སྤྲོས་པ་དང་བྲལ་ཞིང༌། འོད་གསལ་བའི་ཆོས་ཉིད་དེ་སེམས་དང་ཡེ་ཤེས་ལོགས་སུ་ཕྱེ་ནས། ཡེ་ཤེས་རང་གི་ངོ་བོ་རྗེན་པར་སྟོན་པ་ལ་རྫོགས་པ་ཆེན་པོ་ཞེས་བྱ་བར་གྲགས་པ་ཡིན་པས་ན། སྟོན་ཚུལ་ཙམ་ལས་མཐར་ཐུག་པའི་དོན་དུ་ནི་ཟུང་འཇུག་དབུ་མ་ ཕྲ་བ་ནང་གི་དབུ་མ་ ཆེན་པོ་དང་ཡང་དོན་གཅིག་གོ །དེ་ཡང་རང་རིག་པའི་ངོ་བོ་ལ་འཁོར་འདས་ཀྱི་ཆོས་ཐམས་ཅད་རྫོགས་པས་ན་རྫོགས་པ་སྲིད་ཞི་ཀུན་ཁྱབ་ཀྱི་ཡེ་ཤེས་ཡིན་པས་ཆེན་པོའོ། །གཞི་ལམ་འབྲས་བུའི་རྫོགས་པ་ཆེན་པོ་རྣམས་གདུལ་བྱའི་ཁམས་གང་དུ། མོས་པ་དང་འཚམས་པའི་ཆོས་ཀྱི་རྣམ་གྲངས་རྒྱ་ཆེ་ཞིང་གྲངས་མང་བའི་ལམ་བཟང་པོ་མྱང་འདས་སུ་དཀྲི་བར་བྱེད་པས། དམ་པའི་དོན་ཉན་ཐོས་ནས་ཨ་ནུའི་བར་མཐའ་དག་བློ་ཡི་དྲི་མ་བྱི་དོར་བྱེད་པ་ཁོ་ནའི་ཕྱིར་གསུངས་པས། ཐེག་པ་དེ་དག་གི་ཉམས་ལེན་སྡོམ་པ་གསུམ་དང༌། ཕ་རོལ་ཏུ་ཕྱིན་པ་དྲུག་དང༌། གསང་སྔགས་ཐུན་མོང་བའི་ལམ་གྱི་བསྐྱེད་པ་དང་རྫོགས་པའི་རིམ་པ་སོགས་ཇི་སྙེད་པ་དེ་ཀུན་ཀྱང་རྫོགས་པ་ཆེན་པོའི་ལམ་སྟེགས་ཡིན་ནོ། །འཁོར་འདས་དབྱེར་མེད་རང་བཞིན་རྫོགས་པ་ཆེན་པོ་གཏན་ལ་ཕབ་པའི་སྐབས་འདིར་ནི་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་དབྱིངས་ལས་མ་གཡོས་པའི་ཕྱིར། གནས་ལུགས་མ་རྟོགས་པའི་འཁྲུལ་སྣང་འདི་བྱུང་ཡང་རིག་པའི་རང་བཞིན་རྣམ་པར་དག་པ་ལས་གཞན་དུ་འགྱུར་བ་མེད་དེ། རི་རྭ་བཞིན་ངོ་བོ་ཅི་ཡང་མེད་དོ། །དེས་ན་འཁོར་འདས་གཉིས་ཀ་མ་གྲུབ་བཞིན་དུ་འཁོར་འདས་སུ་སྣང་བའི་གཞི་རིག་པ་ཡི་ཆོས་ཉིད་ཀྱང༌། ངོ་བོ་དག་པ་ཆོས་སྐུ། རང་བཞིན་གསལ་བ་ལོངས་སྐུ། ཐུགས་རྗེ་རིག་པའི་སྙིང་པོ་ཅན་སྤྲུལ་སྐུ་སྟེ་སྐུ་གསུམ་དུ་ཡེ་ནས་རྫོགས་པ་གཞི་དེ་ཉིད་ཀྱི་ངང་ལས་གཞི་སྣང་ཤར་བའི་དུས་ན། ཚོགས་བརྒྱད་ཀྱི་ཉེར་ལེན་སྤྲིན་དང་འདྲ་བ་རྣམས་རང་སར་དེངས་པས་སྐུ་དང་ཡེ་ཤེས་ཀྱི་སྣང་བ་རྣམ་པར་དག་པའི་སངས་རྒྱས་དང༌། གཞི་སྣང་དེ་ཉིད་ལྷན་སྐྱེས་མ་རིག་པས་བསྒྲིབས་ཏེ་ཀུན་ཏུ་བརྟགས་པ་ཅན་གྱི་མ་རིག་པས་རང་སྣང་ལ་ཡུལ་དུ་བཟུང་བས་གཟུང་འཛིན་གཉིས་སུ་མཆེད་དེ། མ་དག་འཁོར་བའི་རང་བཞིན་རྨི་ལམ་ལྟ་བུར་སྣང་བས་སེམས་ཅན་ཏེ་འཁོར་འདས་གཉིས་ཀྱི་ཆ་རུ་སྣང་ན་ཡང༌། གཉིད་ཀྱི་ངང་ན་རྨི་ལམ་གྱི་སྣང་བ་བཟང་ངན་ཅི་ཤར་ཡང་གཉིད་དེ་ལས་གཞན་དུ་མི་གཡོ་བ་བཞིན། གཞན་ལས་གསར་བྱུང་མིན་པས་གང་ནས་ཀྱང་མ་འོངས་ལ་གཞི་ལས་གཡོས་པ་མེད་པས་གཞན་དུ་འཕོ་བའང་མེད་དོ། །རེ་ཞིག་རྫོགས་པ་ཆེན་པོའི་ལམ་ལ་ཞུགས་པ་རྣམས་ཀྱིས། གཞི་དེ་ཡི་བཞུགས་ཚུལ་ཡིན་ལུགས་ལ་དཔྱད་པ་བཏང་སྟེ་རང་རང་གིས་ཇི་ལྟར་འདོད་པའི་ཕྱོགས་བཟུང་ནས། གྲུབ་པའི་མཐའ་སྨྲ་བ་རྣམས་ཀྱི་ལུགས་ལ་རྣམ་པ་བདུན་ཏེ། ལ་ལས་ཀ་དག །ལ་ལས་ལྷུན་གྲུབ། ལ་ལས་མ་ངེས་པ་དང༌། ལ་ལས་ངེས་པ་དོན། ལ་ལས་ཅིར་ཡང་བཏུབ་པ་དང༌། ལ་ལས་ཅིར་ཡང་ཁས་བླང་དུ་བཏུབ་པ་དང༌། ལ་ལས་སྣ་ཚོགས་སུ་འཆར་བར་འདོད་པའི་གཞི་བདུན་པོ་ཐམས་ཅད་ཀྱང་གཏན་ལ་དབབ་བྱའི་ངོ་བོ་ནི། ཀ་དག་དང་ལྷུན་གྲུབ་ཟུང་དུ་འཇུག་པའི་གཞིའི་རང་བཞིན་གཅིག་པུའི་ཕྱོགས་རེ་རེ་ལ། སོ་སོར་འདི་ཁོ་ན་གནས་ལུགས་སོ་སྙམ་ནས་བློས་བཏགས་པའི་རང་རང་གི་གཞུང་འཛིན་པ་གཞན་རྣམས་ཀྱང་གཞིའི་ཕྱོགས་རེ་ཙམ་ལ་མ་རྨོངས་ཏེ་ཤེས་ནའང༌། རང་བཞིན་ཇི་བཞིན་མ་རྟོགས་པའི་སྐྱོན་ནི་དཔེར་ན། ཡེ་ཤེས་སྙིང་པོའི་མདོ་ལས། སྔོན་རྒྱལ་པོས་དམུས་ལོང་དུ་མ་བསགས་ཏེ་གླང་པོ་ཆེ་བསྟན་ནས། གླང་པོ་ཆེ་འདིའི་མཚན་ཉིད་སོ་སོར་སྨྲོས་ཤིག་ཅེས་བསྒོས་པས། སྣ་ལ་རེག་པ་རྣམས་ནི་ལྕགས་ཀྱུ་དང་འདྲའོ་ཞེས་ཟེར་རོ། །མིག་ལ་རེག་པ་རྣམས་ཀྱིས་ཕོར་པ་དང་འདྲའོ་ཞེས་ཟེར་རོ། །རྣ་བ་ལ་རེག་པ་རྣམས་ཀྱིས་ཞིབ་མ་དང་འདྲའོ་ཞེས་ཟེར་རོ། །རྒྱབ་ལ་རེག་པ་རྣམས་ཀྱིས་ཁྱོགས་དང་འདྲའོ་ཞེས་ཟེར་རོ། །མཇུག་མ་ལ་རེག་པ་རྣམས་ཀྱིས་ཐ་གུ་དང་འདྲའོ་ཞེས་ཟེར་རོ། །ལོང་བས་གླང་པོ་ཆེ་ལས་གཞན་སྨྲས་པ་མ་ཡིན་ཀྱང་ཐམས་ཅད་དུ་རྟོགས་པ་ནི་མ་ཡིན་ནོ། །དེ་བཞིན་དུ་སངས་རྒྱས་ཀྱི་རང་བཞིན་ཡང་སྟོང་པ་ཉིད་དང༌། སྒྱུ་མ་ལྟ་བུ་དང༌། འོད་གསལ་བ་སོགས་ཐ་དད་སྨྲས་ཀྱང་ཐམས་ཅད་དུ་རྟོགས་པ་ནི་མ་ཡིན་ནོ། །ཞེས་དང༌། ཉན་རང་བྱང་སེམས་གསུམ་གྱིས་སངས་རྒྱས་ཀྱི་སྙིང་པོ་ཇི་བཞིན་མི་མཐོང་བའི་དཔེ། དམུས་ལོང་ཞིག་གིས་གཞན་ཞིག་ལ་མར་གྱི་ཁ་དོག་དྲིས་པས་ཁ་བ་དང་འདྲའོ་ཞེས་སྨྲས་པ་དང༌། དེས་ཁ་བ་ལ་རེག་པས་མར་གྱི་ཁ་དོག་གྲང་མོར་འཛིན་ཏོ། །དྲིས་པ། ཁ་བའི་ཁ་དོག་ཅི་འདྲ། སྨྲས་པ། ངང་པའི་གཤོག་པ་དང་འདྲའོ། །ངང་པའི་གཤོག་སྒྲ་ཐོས་པས་ ཁ་དོག་འུར་འུར་པོར་འཛིན་ཏོ། །དྲིས་པ། གཤོག་པའི་ཁ་དོག་ཅི་འདྲ། དུང་དང་འདྲའོ། །དུང་ལ་རེག་པས་འཇམ་པོར་འདུག་ན། །དེ་ཡང་འཇམ་པོར་འཛིན་ནོ། །དེ་ལྟར་ཁོང་ལོང་བ་བདུན་གྱིས་གླང་པོའི་སྐྱེ་མཆེད་དང༌། ངང་པའི་ཁ་དོག་བརྗོད་པ་ཇི་བཞིན་ནོ། །འདིར་ནི་རིག་པའི་ངོ་བོ་སྤྲོས་བྲལ་ཀ་ནས་དག་པ་ལ། རང་གསལ་མ་འགག་པའི་རང་གདངས་སྐུ་དང་ཡེ་ཤེས་ཀྱི་བདག་ཉིད་ཉི་མ་དང་ཟེར་ལྟ་བུ། ཡོན་ཏན་གྱི་ཆ་ཡེ་ནས་ལྷུན་གྱིས་གྲུབ་ཀྱང་སྣང་སྟོང་གི་ལྡོག་པ་ཐ་དད་པས་གཅིག་པ་མ་ཡིན་པ་དང༌། ངོ་བོ་གཅིག་ལས་མེད་པས་བུམ་པ་དང་དེའི་སྟོང་པ་དབྱེར་མེད་པ་ལྟར་རྫས་ཐ་དད་པ་མིན་ཏེ། དཔེར་ན་ཆུ་དང་རླན་བཞིན་ལ། འདི་ལྟར་སྟོང་པའི་ངོས་ནས་དབྱིབས་དང་ཁ་དོག་སོགས་ངོ་བོ་འདི་ལྟ་བུའོ་ཞེས་ངོས་གཟུང་རྒྱུའི་དངོས་པོ་མཚན་མའི་སྤྲོས་པ་ཐམས་ཅད་དང་བྲལ་བས་རྣམ་གཅོད་ཀྱི་སྒོ་ནས་སྤྲོས་པ་ཐམས་ཅད་གཅོད་པ་ལས། རང་རང་གི་ངོ་བོ་ལ་ཡོངས་གཅོད་ཀྱི་སྒོ་ནས་འདི་ལྟར་ཞེས་བརྗོད་དུ་མེད་པས་ཀ་དག་ཅེས་བརྗོད་པ་ཡིན་ལ། དེ་ཡང་ནམ་མཁའ་བཞིན་ཅང་མེད་པ་མིན་ལ། སྣང་བའི་ངོས་ནས་གཏིང་གསལ་གྱི་ཆ་རང་གདངས་འགག་པ་མེད་པ་ཐུགས་རྗེའི་རྩལ་ཅིར་ཡང་འཆར་རུང་དུ་ཡོད་པས་ལྷུན་གྲུབ་བོ་ཞེས་བརྗོད་པ་ཡིན་ཏེ། མུ་ཏིག་ཕྲེང་བ་ལས། ངོ་བོ་ཀ་དག་བརྗོད་གཞི་བྲལ། །རང་བཞིན་ལྷུན་གྲུབ་ཅིར་སྣང་རྫོགས། །ཞེས་གསུངས་བ་ལྟར་རྟག་ཆད་ཞོར་ལ་སྤངས་པ་ཡིན་ནོ། །འོ་ན་ཁྱེད་ཀྱིས་ཀ་དག་དང་ལྷུན་གྲུབ་སོ་སོ་བའི་གནས་སྐབས་དེ་སྐྱོན་ཅན་དུ་བསྒྲུབ་ན། འདིར་ཡང་གཉིས་ཡིན་དུ་བཤད་པའི་སྐྱོན་དེ་མི་འདུའམ་ཞེ་ན། འདིར་ནི་གཞི་སེམས་ཀྱི་ཆོས་ཉིད་ངོ་བོ་གཅིག་ལ་ཡོད་མེད་དམ། སྣང་ཕྱོགས་ནས་ལྷུན་གྲུབ། སྟོང་ཕྱོགས་ནས་ཀ་དག་གཉིས་ལྡོག་པའི་དབྱེ་བ་ཙམ་ལས་རྫས་སུ་ཐ་དད་མེད་པས་འགལ་བ་གཉིས་འདུ་བའང་མ་ཡིན་ཏེ། དཔེར་ན་གཉིད་དུ་ཕྱོགས་པ་ན་རགས་ཕྲའི་རྟོག་པ་ཐམས་ཅད་རིམ་གྱིས་འགགས་ཏེ་གཉིད་འཐུག་ཏུ་འགྱུར་སྐབས་རང་བཞིན་བརྒྱད་ཅུའི་རྟོག་པ་འགགས་པའི་ཤེས་པའི་ངོ་ལ་རྨི་ལམ་མེད་པ་དང༌། མཆེད་པའི་མདངས་རླུང་གི་ཆས་ཁུར་བའི་ཤེས་ངོ་ལ་རྨི་ལམ་དུ་སྣང་བའི་གཉིད་དུས་ཀྱི་ཤེས་པ་གཉིས། གཉིད་གཅིག་གི་ངོ་བོ་ལས་མ་གཡོས་པ་ལྟར། ངོ་བོ་ཀ་དག་གི་ཆ་ལ་འཁྲུལ་པ་གཞི་ལ་མ་གྲུབ་པ་ཡིན་པས་འཁོར་བར་འཁོར་སྔར་ཡང་མ་མྱོང༌། ད་ལྟ་མི་མྱོང༌། མྱོང་བར་མི་འགྱུར་ནའང་རང་བཞིན་ལྷུན་གྲུབ་ཀྱི་རྩལ་ལམ་གདངས་འགགས་པ་མེད་པ་ལས་རོལ་པ་སྣ་ཚོགས་པ་འཁོར་འདས་ཅིར་ཡང་སྣང་རུང་བ་ཡིན་ནོ། །དཔེ་ཇི་ལྟར་ན། ནོར་བུ་བཻཌཱུརྻ་ཡི་རང་འོད་དང༌། འཇའ་ཤེལ་གཙང་མ་འཇའ་ལྡན་རྣམས་ཀྱི་རང་འོད་ནི། ནང་དུ་གཏིང་གསལ་གྱི་རང་བཞིན་ཡོད་ཀྱང་ཉི་འོད་སོགས་ཀྱི་རྐྱེན་གྱིས་མ་བསྐྱེད་པར་རང་འོད་ཕྱིར་མི་སྣང་བ་མངོན་སུམ་དུ་ཤེས་རུང་སྟེ། གཞི་དང་གཞི་སྣང་གི་དཔེ་དེ་བཞིན་དུ་འཆི་སྲིད་སོགས་གཞིའི་འོད་གསལ་ལ་གནས་ཚེ། ཀ་དག་གི་རིག་པ་སྟོན་གནམ་གཡའ་དག་པ་ལྟ་བུ་རྐྱེན་གང་ཡང་མེད་པའི་གནས་སྐབས་ན། གཟུགས་ལ་སོགས་པ་ཡུལ་དང་དེ་དག་འཛིན་བྱེད་ཀྱི་ཚོགས་དྲུག་སོགས་མ་དག་པའི་སྣང་བ་དང༌། སྐུ་དང་འོད་ཟེར་སོགས་དག་པའི་སྣང་བ་སྟེ། མདོར་ན་དངོས་པོ་མཚན་མར་སྣང་བའི་ཆ་ཐམས་ཅད་སྤངས་པ་སྟེ་དུས་དེར་མེད་ཀྱང༌། རང་བཞིན་ལྷུན་གྱིས་གྲུབ་པའི་རང་གདངས་ནང་གསལ་གྱི་ཚུལ་དུ་ཡོད་པ་ལྷུན་གྲུབ་ཀྱི་སྣང་བ་ཕྱི་ཤར་དུ་མཆེད་པའི་རྐྱེན་དང་མ་འཕྲད་པས་རྒྱ་མ་རལ་ཏེ་ཕྱིར་མ་ཤར་བ་གཞོན་ནུ་བུམ་པའི་སྐུ། ངོ་བོ་རྣམ་རྟོག་ཕྲ་རགས་ཐམས་ཅད་ཀྱིས་བསམ་བརྗོད་དང་བྲལ་བས་སྐྱེ་མེད་དུ་སྟོང་ལ། རང་གདངས་ལྷུན་གྲུབ་ཀྱི་ཆ་ལས་སྐུ་གསུམ་གྱི་སྣང་བ་མ་འགགས་པར་འཆར་རུང་དུ་ཡོད་པས། འཁོར་འདས་ཀྱི་སྣང་བ་ཀུན་གྱི་འཆར་གཞིར་གཞིའི་རིག་པ་དེ་ཉིད་དུ་བཞུགས་པ་ཡིན་ཀྱང༌། ཀ་དག་དང་ལྷུན་གྲུབ་ངོ་བོ་གཅིག་པས་སྟོང་པའི་འོད་གསལ་གཞི་ལས་གཞི་སྣང་གཡོས་པ་མེད་པའི་གནས་ལུགས་དེ་ལ་ནི་ཕུང་པོ་ལྔའི་དྲི་མས་གདོད་ནས་གོས་མ་མྱོང་བས་གཞི་སྣང་ཡེ་ནས་དག་པས་བྱང་ལ། སྐུ་གསུམ་གྱི་ཡོན་ཏན་རང་ཆས་སུ་ཡོད་པས་ཆུབ་ཅིང་འཆར་ཚུལ་ཅིང་ཡང་མ་འགགས་པས་སེམས་ཞེས་བྱ་ལ་དེ་ལྟ་བུའི་བྱང་ཆུབ་ཀྱི་སེམས། ཕྲ་བའི་ཡེ་ཤེས་ནང་གསལ་གྱི་ཚུལ་དུ་གནས་པ་དེའི་ཚེ་ན་ཁ་དོག་དང་བདག་གཞན་སོགས་མཚན་མ་དག་མ་དག་གི་འཁོར་འདས་འཁྲུལ་གྲོལ་གྱི་རྣམ་པ་ཅན་རིས་སུ་ཆད་པ་ཅན་དུ་ཕྱིར་མི་གསལ་བ་ཡིན་ནོ། །གནས་ལུགས་འཁོར་འདས་ཀྱི་སྤྱི་གཞི་དེ་ནི་ཀ་དག་གི་ངོས་ནས་སྐུ་དང་ཡེ་ཤེས་སུ་རང་བཞིན་གྱིས་གྲུབ་པ་མེད་པས་སངས་རྒྱས་མ་ཡིན། ཕུང་ཁམས་སྐྱེ་མཆེད་སོགས་མེད་པས་སེམས་ཅན་མིན་ནོ། །ཐིག་ལེ་ཉག་གཅིག་ཏུ་བརྗོད་ཀྱང་གཅིག་རྒྱུའི་དངོས་པོ་མེད་པ་དང༌། སྐུ་གསུམ་སོགས་བཏགས་ཀྱང་དབྱིངས་གཅིག་ལ་ཐ་དད་དུ་གྲུབ་པ་མ་ཡིན་ལ། སྤྲོས་པ་དང་བྲལ་བས་མཐའ་དབུས་སུ་བཞག་ཏུ་ཡོད་པ་མིན་ལ། རང་བཞིན་ལྷུན་གྲུབ་ཀྱི་ཆ་ནས་གཞལ་ན་སྟོང་པ་ཕྱང་ཆད་མ་ཡིན་པར་སྐུ་དང་ཡེ་ཤེས་ཀྱི་འཆར་གཞི་ཡིན་ཀྱང་དངོས་པོ་རྡོས་བཅས་སུ་གྲུབ་པ་མིན་ནོ། །འཁྲུལ་གྲོལ་གྱི་རྐྱེན་གང་ཡང་མེད་པའི་གནས་སྐབས་དེ་ནི། ངོ་བོ་ལ་ཡོད་མེད་སོགས་སྤྲོས་པའི་མཐའ་ཐམས་ཅད་དང་བྲལ་བའི་ཆོས་ཉིད་གང་དུའང་མ་གྲུབ་པའམ་མ་ཕྱེ་བའི་ཀ་དག །རང་བཞིན་འགག་པ་མེད་པས་སྐུ་དང་ཡེ་ཤེས་འདུ་འབྲལ་མེད་པའི་ལྷུན་གྲུབ། ཐུགས་རྗེ་གོ་མ་འགགས་པས་མཛད་པ་ཕྲིན་ལས་འཁོར་འདས་ཀྱི་སྤྱོད་ཡུལ་ཀུན་ལ་ཁྱབ་པའི་སྣང་བ་གསུམ་དང་ཐབས་གཅིག་གི་རང་བཞིན་ལས་འདུ་འབྲལ་མེད་པའི་བདག་ཉིད་དུ་བཞུགས་པ་གཞི་རྐྱང་པའི་རྣམ་བཞག་གོ །གཞིའི་གནས་ལུགས་བུམ་སྐུའི་རང་གདངས་དེ་ཉིད་ཀྱི་ངང་ལས་གཞི་སྣང་ལྷུན་གྱིས་གྲུབ་པའི་ཆ་ཐམས་ཅད་འཆར་བར་འགྱུར་བ་ཡིན་ལ། གཞི་ཟུང་འཇུག་གི་འོད་གསལ་དེ་ལ་སྟོང་པའི་འོད་གསལ་ཟེར། དེའི་ངང་ལས་སྣང་སྟོང་ཟུང་འཇུག་རིག་པའི་ཡེ་ཤེས་ཕྱོགས་ལྷུང་དང་བྲལ་བ་སྲོག་གམ་སྙིང་པོའི་བདག་ཉིད་ཅན་དུ་བཞུགས་པ་ལ། གྱེན་རྒྱུ་རང་ངོ་ཤེས་པས་ཤེས་རབ་ཀྱི་རྟ་དང༌། ཐུར་སེལ་ཡུལ་སྣང་སད་པ་ཤེས་རབ་ཀྱི་ཟེར་མདངས་འོད་དང༌། མེ་དང་མཉམ་པ་སྨིན་པར་བྱེད་པའམ་འབར་བར་བྱེད་པས་སྟོབས་ཅན་དང༌། ཁྱབ་བྱེད་ཡོངས་སུ་གྲུབ་ཅིང་རྫོགས་པར་བྱེད་པའི་སྟོབས་ཅན་ཏེ་བཞི་པོ་ཡན་ལག་ཏུ་ཡོད་པའི་རླུང་ལྔའི་རང་བཞིན་ལྷུན་གྲུབ་ཀྱི་སྣང་བ་ཐམས་ཅད་འཆར་བའི་གཞིའམ་སྙིང་པོའི་ཚུལ་དུ་གདངས་འགག་མེད་རླུང་ལྔའི་སྟོབས་ཀྱིས་ཕྱིར་འཕགས་ཏེ་སྐྱོད་པར་བརྩམས་པས་ནང་འོད་གསལ་གྱི་སྐུ་ཡེ་ཤེས་ཐུགས་རྗེ་རྣམས་རླུང་ལྔ་དང་དབྱེར་མེད་རོ་གཅིག་ཏུ་གནས་པ་དངོས་སུ་གྲུབ་པ་མེད་པ། གཞོན་ནུ་བུམ་པའི་སྐུ་ཡི་ཚུལ་དུ་ཡོད་པ་དེའི་ཕྱི་རྒྱ་རལ་ནས། དུས་གཅིག་ལ་ཕྱིར་གསལ་དུ་གདོད་མའི་གཞི་ཀ་དག་གི་ངང་ལས་གཡོས་པ་མེད་བཞིན་དུ་ཡེ་ཤེས་འོད་ཀྱི་སྦུབས་སམ་གཞིའི་སྣང་བ་ཤར་བ་ནི། རང་བཞིན་ལྷུན་གྲུབ་ཀྱི་སྣང་བ་ཞེས་བྱའོ། །ལྷུན་གྲུབ་ཀྱི་སྣང་བ་ཤར་བ་གང་ཚེ་ངོ་བོའི་གདངས་ནམ་མཁའ་ལྟར་གོ་ཕྱེ་བའི་ཚུལ་དུ་རང་བཞིན་གྱི་གདངས་འོད་ལྔའི་རྣམ་པར་ཤར་བ་ན། ཐུགས་རྗེའི་རིག་གདངས་རྣམ་པའི་ཡུལ་དེ་ཉིད་ལ་དཔྱོད་པར་བྱེད་པའི་ཤེས་པར་ཤར་ཚེ་ཀ་དག་གི་ངོ་བོ་ནམ་མཁའ་སྤྲིན་བྲལ་བཞིན། མ་རིག་པ་ཞེས་བྱ་བ་གཞི་ལ་མ་གྲུབ་ཀྱང་ཐུགས་རྗེའི་གདངས་རིག་པར་ཤར་བ་ལ་ལྟོས་ཏེ་རང་སྣང་ངོ་མ་ཤེས་པའི་མ་རིག་ཅན་གྱི་ཆ་བཟུང་བས། དཔེར་ན་སྤྲིན་བྲལ་ནམ་མཁའ་ཇི་བཞིན་དྭངས་པའི་ཀ་དག་ལས། ལྷུན་གྲུབ་ཀྱི་སྣང་བ་ཕྱིར་གསལ་དུ་གཡོ་བ་ལ་འཆར་བའི་ཚུལ་དྲུག་སྒོ་གཉིས་ཏེ་བརྒྱད་དུ་ཤར་ཏེ། ལྷུན་གྲུབ་ལྟར་ཤར་ཏེ་ཐུགས་རྗེ་ལྟར་འཆར་བའི་སེམས་ཅན་གྱི་དོན་བྱུང༌། ཡང་ན་ལྷུན་གྲུབ་ཤར་བ་དེ་མི་བགྲང་བར་འོད་ལྟར་འཆར་བས་འོད་ཟེར་ཁྱབ་པར་སྣང༌། ཡེ་ཤེས་ལྟར་ཤར་བའི་ལོངས་སྤྱོད་མ་འགགས་པས། ཡེ་ཤེས་ཀྱི་རང་འོད་ཞིང་ཁམས་དག་པ་མངོན་སུམ་དུ་གསལ། ལྷ་སྐུ་ལྟར་འཆར་བའི་ངོ་བོ་མ་འགགས་པས་རིག་པ་སྐུ་རུ་སྨིན་ཏེ་སྣང་བ་ཐམས་ཅད་རིགས་ལྔའི་ཚོམ་བུར་སྣང༌། གཉིས་ཆོས་ཀྱི་འཛིན་པ་ཐམས་ཅད་དང་བྲལ། གཉིས་མེད་ལྟར་འཆར་བའི་ལྟ་བ་མ་ངེས་པ་གཅིག་དང་དུ་མ་ལས་གྲོལ་བའི་མི་རྟོག་པའི་ཏིང་ངེ་འཛིན་ལ་གནས། མཐའ་གྲོལ་ལྟར་འཆར་བའི་ཐབས་མ་འགགས་པས་འཁྲུལ་སྣང་རང་རྒྱུད་པར་མི་གནས་ཏེ་ཆོས་ཉིད་ལ་དར་གཅིག་གནས་པའོ། །སྒོ་གཉིས་ནི་དེ་ལྟར་རང་སྣང་གི་ཡེ་ཤེས་སུ་སྣང་བ་དེ་རང་སྣང་ཡིན་པར་རིག་ན་གདོད་མའི་གཞི་ལ་ཀུན་ཏུ་བཟང་པོར་མངོན་པར་བྱང་ཆུབ་པའི་སྒོ་དང༌། མ་རིག་ན་སེམས་ཅན་འཁྲུལ་པའི་སྒོ་སྟེ་གཉིས་སོ། །འདི་ལ་སྣང་བ་འདིའི་ཡར་འཁྲུལ་མར་འཁྲུལ་ལས་ཀུན་ཏུ་བཟང་པོའི་གྲོལ་གཞི་ཤེས་པར་བྱའོ། །ཞེས་གསུངས་སོ། །གཞིའི་གནས་སྐབས་ན་སྣང་བ་ཐམས་ཅད་འཁྲུལ་སྟོབས་ཀྱིས་ཐིམ་སྟེ་སྣང་བ་ནང་གསལ་དུ་གནས་པ་དང༌། ལམ་གྱི་གནས་སྐབས་ན་གཞི་སྣང་སྣང་གཞི་སོགས་ནི་འཁྲུལ་གྲོལ་གཉིས་ཀ་འདྲེས་པ་དང༌། འབྲས་བུའི་གནས་སྐབས་ན་གཞི་སྣང་རང་སྣང་དུ་གྲོལ་སྟོབས་ཀྱིས་ཐིམ་སྟེ་སངས་རྒྱས་ཀྱི་ཆོས་ཁམས་རྒྱ་མཚོ་ལྟ་བུའི་འཆར་གཞི་སྟེ་གཞི་ལམ་འབྲས་བུའི་ལྷུན་གྲུབ་གསུམ་མོ། །འཆར་ཚུལ་བརྒྱད་དམ་ལྷུན་གྲུབ་ཀྱི་སྦུབས་གསུམ་པོ་འདི་ནི་འཁོར་འདས་གཉིས་ཀ་ཕྱོགས་སུ་མ་ཆད་པར་འབྲེལ་བའི་སྒོ་འཕར་ཏེ། ཐེག་པ་ཐམས་ཅད་ཀྱི་རྩེ་མོར་གྱུར་པ་ཤིན་ཏུ་རྣལ་འབྱོར་ཨ་ཏི་ཡོ་གའི་རྒྱུད་སྡེ་རྣམས་དང༌། དེའི་དགོངས་འགྲེལ་འཕགས་ཡུལ་རིག་འཛིན་དག་གི་མན་ངག་རྣམས་ཀྱི་ལྡེ་མིག་ལྟ་བུ་ནི། བོད་གངས་ལྡན་རི་ཡི་ལྗོངས་འདིར་ཡེ་ཤེས་དྲི་མ་མེད་པ་མཁྱེན་པའི་འོད་ཟེར་བློ་གྲོས་ཀྱི་སྣང་བ་སྟོང་དང་ལྡན་པའམ་འགྲོ་བའི་མིག་གཅིག་ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་བཟང་པོ་གང་གིས་ཐེག་མཆོག་རིན་པོ་ཆེའི་མཛོད་དུ་ལེགས་པར་ཕྱེས་པ་ཡིན་ནོ། །གཞིའི་འོད་གསལ་ཀ་དག་གི་རང་གདངས་ཤར་བ་དེའི་ཚེ་གཞི་སྣང་རང་ངོ་མཐོང་བའི་སྐད་ཅིག་མར་ཁྱད་ཆོས་དྲུག་གི་ཚུལ་དུ་གྲོལ་ཏེ། སངས་རྒྱས་ཐམས་ཅད་ཀྱི་སྔ་རོལ་དུ་བཞུགས་པའི་དང་པོའི་དུས་ནས་རང་གི་སེམས་ཉིད་རང་བྱུང་གི་ཡེ་ཤེས་དེ་ཉིད་ངོ་ཤེས་པ་དེ་ནི་ཐོག་མའི་སངས་རྒྱས་གཟུང་འཛིན་བདེན་ཞེན་གྱི་ཉེས་པ་ཐམས་ཅད་ལས་གྲོལ་བ་སྤྱོད་ཡུལ་ཡོངས་སུ་དག་པའི་ཀུན་ཏུ་བཟང་པོ་དེས། ཇི་ལྟར་མཐོང་ཞིང་གྲོལ་བའི་ཁྱད་ཆོས་དྲུག་ནི་འདི་ལྟར་རང་ངོར་སྣང་བ། གཞི་ལས་འཕགས་པ། བྱེ་བྲག་ཕྱེད་པ། ཕྱེད་ཐོག་ཏུ་གྲོལ་བ། གཞན་ལས་མ་བྱུང་བ། རང་སར་གནས་པ་སྟེ། རིམ་པ་བཞིན་གཞི་སྣང་ཤར་བ་དེ་ལ་ཤེས་པ་ཁ་ཕྱིར་བལྟས་ཀྱིས་ཞེན་ནས་འཁྲུལ་པ་རྒྱུན་ཆགས་པར་མ་མཆེད་དེ། རང་རིག་པའི་ངོར་སྣང་བ་དང༌། རང་སྣང་དུ་རིག་པས་གྲོལ་འཁྲུལ་གང་དུའང་ལུང་མ་བསྟན་པའི་རང་བཞིན་གྱི་གཞི་དང༌། གཞི་སྣང་ལྷུན་གྲུབ་ཀྱི་ཆ་དེ་གཉིས་རང་བཞིན་དེ་ལས་འཕགས་ཏེ། གྲོལ་གཞི་རུ་སོང་བས་ཕྱིས་འཁྲུལ་གཞི་མི་བྱེད་པ་དང༌། སྔར་མེད་གསར་བྱུང་མེད་པས་གཞི་སྣང་གི་རིག་པ་ཉིད་རང་ངོ་ཤེས་ནས་འབྲས་བུ་ཡེ་ཤེས་སུ་སྨིན་པ་ཞེས། སྒྲིབ་བྱེད་དྲི་མ་བྲལ་བའི་ཤེས་རབ་བམ་ཡེ་ཤེས་ཀྱིས་ངོ་བོ་ཤེས་པས། སྐད་ཅིག་གཅིག་པོ་དེ་ཉིད་ལ་དབྱིངས་ལ་ཡོན་ཏན་རང་ཆས་སུ་ལྡན་པ་རང་སྣང་དུ་བག་ཆགས་སྣ་ཚོགས་པའི་ཀུན་གཞིའི་སྒྲིབ་པ་ཡེ་ནས་སངས་ཏེ་ཉི་མ་སྤྲིན་ལས་གྲོལ་བ་ལྟར་འཁོར་བའི་གཞི་ལས་ཁྱད་པར་དུ་འཕགས་པའི་བྱེ་བྲག་རབ་ཏུ་ཕྱེད་པ་དང༌། བྱེ་བྲག་ཕྱེད་པའི་ཐོག་གམ་དེ་མ་ཐག་ཏུ་ཤེས་རབ་ཉིད་ཀྱང་ངོ་བོ་ཉིད་སྐུར་སྨིན་ནས། ཡེ་ཤེས་ཆོས་ཀྱི་སྐུ་དང་དབྱེར་མེད་པར་ཀ་དག་གདོད་མའི་གཞི་ལ་བཙན་ས་ཟིན་ཏེ་རྟག་ཏུ་འཕོ་འགྱུར་མེད་པར་གནས་པ་དང༌། རང་རིག་མངོན་སུམ་དེ་གཞན་གྱིས་བསྟན་པ་སོགས་ལས་བྱུང་བའི་རྐྱེན་ལ་མ་ལྟོས་པར་རང་གི་ངོ་བོ་རང་སྟོབས་ཀྱིས་རིག་ནས་སངས་རྒྱས་པ་དང༌། གྲོལ་གཞི་གདོད་མའི་ངང་དུ་རང་སར་གནས་ཏེ་འཁྲུལ་པའི་རྐྱེན་མི་འཇུག་པའི་ཕྱིར་རོ། །དེ་ལྟར་ཁྱད་ཆོས་དྲུག་གིས་སྐུ་དང་ཡེ་ཤེས་བསམ་གྱིས་མི་ཁྱབ་པ་རྒྱ་མཚོའི་འབྲས་བུ་བུམ་སྐུའི་བདག་ཉིད་དུ། གཞི་སྣང་མཐོང་བའི་ཚོགས་ཡེ་རྫོགས། སྒྲིབ་པ་ཡེ་དག་གིས་སྐད་ཅིག་གཅིག་ལ་མངོན་པར་བྱང་ཆུབ་པ་ནི་ཐོག་མའི་སངས་རྒྱས་སོ། །འདི་ལྟར་གང་ཚེ་དབྱིངས་དག་མཉམ་སྤྲོས་བྲལ་ཀ་དག་གདོད་མའི་གཞི་ཆོས་སྐུའི་དབྱིངས་ལས་མ་གཡོས་བཞིན། སྒྲིབ་བྱེད་བག་ཆགས་ལས་རྣམ་པར་གྲོལ་བའི་དབྱིངས་ཀྱི་ཡོན་ཏན་ནང་གསལ་དུ་རྒྱས་པའི་ལྷུན་གྲུབ་ཀྱི་སྒོ་ལས་རང་ཤར་ཏེ། རང་སྣང་ལོངས་སྤྱོད་རྫོགས་པའི་ཞིང་ཁམས་དང་རིགས་ལྔའི་སྐུ་རུ་སྣང་བར་བྱས་ནས། རིགས་ལྔ་དེ་ཡི་སོ་སོའི་རྩལ་ལས་རིགས་ལྔ་གངས་ཆེན་མཚོའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ལ་བརྟེན་པའི་ཞིང་ཁམས་རབ་འབྱམས་བསམ་ལས་འདས་པ་ཚངས་ཆེན་བསྐལ་པ་ནམ་མཁའ་དང་མཉམ་པར་བཀོད་པ་མཛད་དོ། །སྒྲིབ་པ་ཕལ་ཆེར་དག་པ་བྱང་སེམས་རྣམས་ལ་རང་བཞིན་སྤྲུལ་སྐུའི་ཞིང་ཁམས་དང་སྟོན་པར་སྣང་བ་དང༌། མ་དག་པ་འཁོར་བའི་སྒོ་ལས་ཤར་བའི་སེམས་ཅན་རྣམས་ལ་ཇི་ལྟར་སྣང་བ་ནི། ཁམས་དང་མོས་པའི་བྱེ་བྲག་སྣ་ཚོགས་པ་ཅན་གྱི་སོ་སོའི་སྣང་བ་ཉིད་དང་མཐུན་པའི་མཆོག་གི་སྤྲུལ་སྐུ་ནས་སྣ་ཚོགས་སྤྲུལ་བའི་བར་སྟོན་པ་ཡིས། འཁོར་བའི་འཁྲུལ་སྣང་ཐམས་ཅད་སྟོངས་པར་མཛད་པའི་ཕྲིན་ལས་ཀྱི་འཇུག་པ་ཇི་སྲིད་ནམ་མཁའི་སྲིད་མཐའ་མ་ཟད་པ་དེ་སྲིད་དུ་ཟད་མི་ཤེས་པར་སྣང་བ་ཡིན་ནོ། །ཡེ་ནས་རང་བཞིན་དག་པའི་ཆོས་དབྱིངས་སམ་ཟག་པ་མེད་པའི་ཡེ་ཤེས་བདེ་གཤེགས་སྙིང་པོ་རང་ངོ་ཤེས་པའི་སྟོབས་ཀྱིས་གློ་བུར་གྱི་སྒྲིབ་པ་བག་ཆགས་དང་བཅས་པ་དག་ནས་དག་པ་གཉིས་ལྡན་ཀྱི་འབྲས་བུ་མངོན་དུ་གྱུར་ཏེ་རྩོལ་བས་མ་བསྒྲུབས་ཀྱང་རང་བཞིན་ཡོངས་ཤེས་ཀྱི་ཤེས་རབ་ཀྱིས་ཡེ་ཤེས་ཀྱི་ཚོགས་དང༌། དབྱིངས་ན་ལྷུན་གྲུབ་ཏུ་ཡོད་པ་ཡོན་ཏན་ཐམས་ཅད་མངོན་དུ་གྱུར་པས་བསོད་ནམས་ཀྱི་ཚོགས་ཏེ་དགེ་བའི་ཚོགས་གཉིས་ཀྱི་ཡོན་ཏན་ལ་མངའ་དབང་རྫོགས་པའི་ལོངས་སྤྱོད་རྫོགས་སྐུའི་སྟོན་པ་ཆེན་པོ་དེའི་ཞིང་ཁམས་ཀྱི་བཀོད་པ་དང༌། གཞན་དོན་མཛད་པ་ཕྲིན་ལས་ཀྱི་རོལ་པ་སེམས་ཅན་རེ་རེའི་གྲངས་ལྟར་ཆོས་ཀྱི་དབྱིངས་དང་མཉམ་པར་སྣང་བས། སངས་རྒྱས་ཉིད་ཀྱི་ཡེ་ཤེས་ཀྱི་སྣང་བ་དེ་ཙམ་དུ་ཚད་ལས་འདས་ཏེ། རྒྱལ་སྲས་བྱང་སེམས་ཀྱིས་ཀྱང་དཔོགས་མཐའ་དང་བྲལ་ན་ཕལ་གྱི་བློར་བྱར་མི་བསམ་མོ། །སངས་རྒྱས་དེ་ལ་སེ་མས་དང་སེམས་བྱུང་གི་བག་ཆགས་ཟད་པས་ན་གཉིས་སུ་འཛིན་པ་ཡོད་པ་མིན་པས། གདུལ་བྱ་སེམས་ཅན་འདི་དང་འདི་ལ་འདུལ་བྱེད་ཀྱི་སྐུ་དང་མཛད་པ་འདི་ལྟར་སྟོན་ཞེས་རྣམ་པར་མི་རྟོག་ཀྱང༌། དགོས་འདོད་འབྱུང་བའི་ནོར་བུ་མཆོག་དང༌། དཔག་བསམ་གྱི་ཤིང་ཆེན་པོ་ལྟར། རྩོལ་བ་མེད་བཞིན་དུ་མཛད་པའི་ཕྲིན་ལས་ཆོས་སྐུ་སྤྲོས་པ་དང་བྲལ་བའི་ངང་ནས་ཐུགས་རྗེ་ཆེན་པོའི་གདངས་མ་འགགས་པར་གཞན་ངོར་སྣང་བ་ཡིན་ཏེ། ཐེག་མཆོག་རིན་པོ་ཆེའི་མཛོད་ལས། དབུ་མ་ཐལ་འགྱུར་བ་དག །སངས་རྒྱས་དངོས་ནི་ཆོས་སྐུ་རྣམ་དག་སྟོང་པ་དེ་ལ་འདོད་ལ། རང་ངོར་ཡོད་མེད་ཀྱི་སྤྲོས་པ་ཞི་བའི་སྐུ་དང་ཡེ་ཤེས་ཙམ་ཡང་མ་གྲུབ་ཅིང༌། གཞན་སྣང་ལ་སངས་རྒྱས་ཀྱི་ཐུགས་རྗེ་དང༌། གདུལ་བྱའི་སྨོན་ལམ་ལས་གཟུགས་སྐུའི་ཕྲིན་ལས་དང་བཅས་པ་སྣང་བ་ནི། ནམ་མཁའ་ལྡིང་གི་མཆོད་སྡོང་དང༌། ནོར་བུ་དང༌། དཔག་བསམ་གྱི་ཤིང་ལྟར་འདོད་དེ། འཇུག་པ་ལས། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང༌། །ཡིད་བཞིན་ནོར་བུ་ཇི་བཞིན་རྣམ་མི་རྟོག །འགྲོ་གྲོལ་བར་དུ་འཇིག་རྟེན་འབྱོར་སླད་རྟག །འདི་ནི་སྤྲོས་དང་བྲལ་ལ་སྣང་བར་འགྱུར། །ཞེས་སོ། །གཞི་སྣང་ལྷུན་གྲུབ་རིན་པོ་ཆེའི་སྦུབས་ཤར་བ་དེ་ཉིད་རང་སྣང་ཡིན་པར་མ་རིག་པས། ཞི་གནས་རྩེ་གཅིག་པའི་གཞི་ལས་འཁྲུལ་སྣང་མཆེད་ཚུལ་ལམ། སྤང་གཉེན་གྱི་གོམས་ཚུལ་ཏེ་གང་རུང་སེམས་མིང་བཞིའི་ཕུང་པོ་ལ་བརྟེན་པ་ཅན་གཟུགས་མེད་ཁམས་དང༌། ཡང་དག་པའི་ལྷག་མཐོང་དང་བྲལ་བའི་བསམ་གཏན་གྱི་སེམས་དྭངས་མ་འོད་ཀྱི་ལུས་ལ་བརྟེན་པ་ཅན་གཟུགས་ཁམས། སྣ་ཚོགས་སུ་སྣང་བ་འགྱུ་བའི་རྟོག་པ་རགས་པའི་སེམས་གདོས་བཅས་ཀྱི་ཤ་ཁྲག་གི་ལུས་ལ་བརྟེན་པ་ཅན་འདོད་ཁམས་སྟེ་ཁམས་གསུམ་སེམས་ཅན་དེ་རྣམས་སུ་སྣང་བ་ནི། ཐོག་མའི་གཞི་ཀ་དག་ལྷུན་གྲུབ་ཀྱི་ངོ་བོ་དེ་ལ། འཁྲུལ་པའི་སྣང་བ་རྒྱུ་དང་བཅས་པ་མ་མཆིས་ཀྱང་ཞེས་རྒྱུ་མེད་ཅེས་པའི་གཞི་ལ་མ་རིག་པ་མེད་པའི་དོན་ཡིན་གྱི། གཞི་སྣང་འཆར་རུང་དུ་ཡོད་པའི་གདངས་ཙམ་མེད་པར་བཤད་པ་མིན་ནོ། །འོ་ན་འཁྲུལ་པའི་གཞི་ཅི་ལས་བྱུང་ཞེ་ན། གཞི་ཡི་གདངས་རང་སྣང་དུ་སྒོ་བརྒྱད་པོ་ཤར་བའི་རྣམ་པ་རང་སྣང་ཡིན་པ་མ་ཤེས་པའམ་མ་རིག་པའི་ཆ་དེ་གཞི་ལའང་མེད། ཕྱིས་གཞི་ཐོག་ཏུ་གྲོལ་དུས་ནའང་མེད་པས་ན་གློ་བུར་གྱི་རྐྱེན་དེ་ནི། རིག་པའི་རང་རྩལ་སྒྲིབ་བྱེད་དུ་སོང་བས་ན་མ་རིག་པ་དང་བདག་ཉིད་གཅིག་པའི་མ་རིག་པ་ཞེས་བྱ་སྟེ། དེ་ཉིད་ནུས་པ་ཇེ་ཐུར་སོང་ནས་དཔྱོད་བྱེད་ཀྱི་ཤེས་པའི་ནུས་པ་ཕྲ་མོ་ལང་བ་ལྷན་ཅིག་སྐྱེས་པའི་མ་རིག་པ་ཡིན་ལ། དེ་རང་གདངས་ཡིན་པ་མ་ཤེས་ནས་མྱུ་གུ་ལྟ་བུ་སོགས་མིང་དང་དོན་དང་བདག་ཏུ་རྟོག་པ་རགས་པ་མ་ཤར་ཀྱང་འཆར་རུང་དུ་སོང་བའི་ལྡོག་པ་ནི་ཀུན་ཏུ་བརྟགས་པ་ཡི་མ་རིག་པ་སྟེ་གསུམ་པོ་དེ་ལས་འཁྲུལ་པའི་རྐྱེན་བཞི་མཆེད་དེ། ཇི་ལྟར་མཆེད་ཚུལ་ནི། གཞི་ལ་ངོ་བོ་རང་བཞིན་ཐུགས་རྗེ་གསུམ་ཡོད་པ་ལས། ངོ་བོའི་གདངས་ནམ་མཁའ་ལྟར་གོ་འབྱེད་ཀྱི་ཆར་སོང་བ་ལ་རང་བཞིན་གྱི་གདངས་ཉིད་འོད་ཁྱིམ་གྱི་རྣམ་པ་ལྟར་ཤར་ཞིང་གནས་པ་འཁྲུལ་པའི་ཡུལ་ཅན་སྐྱེད་པའི་རྒྱུ་ཡི་རྐྱེན་སྐྱེས་བུ་གཟུགས་དང་ཡན་ལག་རང་ཆས་ལྟར་རོ། །རྒྱུ་རྐྱེན་དུ་སྣང་བ་དེ་ལ་ཐུགས་རྗེ་རིག་པའི་གདངས་རྟོག་དཔྱོད་ཀྱི་རྣམ་པ་ཕྲ་བ་ཤར་བ་དེའི་དབང་གིས་འཁྲུལ་པ་ཕྱི་མ་རྣམས་འབྱུང་བ་བདག་པོའི་རྐྱེན་བྱད་མེ་ལོང་དུ་འཛིན་པ་ལྟ་བུའི་ཆའོ། །དེ་ཉིད་ལྷན་དུ་ཚོགས་པ་ལས་ཕྱི་ཡུལ་དང༌། ནང་ཡུལ་ཅན་མེད་བཞིན་ཐ་དད་དུ་དམིགས་པའི་ཡུལ་དུ་སོང་བ་ནི་གཟུང་འཛིན་གཉིས་ཀྱི་དམིགས་པའི་རྐྱེན་ཏེ། མེ་ལོང་གཟུགས་བརྙན་ཐ་དད་མེད་ཀྱང་ཐ་དད་དུ་འཛིན་པ་ལྟར་རོ། །རྐྱེན་དེ་གསུམ་པོ་དུས་གཅིག་ཏུ་མཚུངས་པར་ལྡན་པ་ལས་འཁྲུལ་པ་རྒྱུན་མི་འཆད་པར་འབྱུང་བའི་རྐྱེན་བྱེད་པས་དེ་མ་ཐག་པའི་རྐྱེན་ཏེ། དེ་བཞི་པོ་ལས་རྒྱུ་དང་འབྲས་བུ་དང༌། མིང་དང་སྣང་བ་སྣ་ཚོགས་འཁྲུལ་ཚུལ་ཡང༌། བཀྲ་ཤིས་མཛེས་ལྡན་ལས། དེ་ཡང་རྐྱེན་བཞི་ཡིས་འཁྲུལ་ཏེ། ཐ་མ་རྐྱེན་བཞི་ལ་ཐུག་གོ །རྒྱུ་དམིགས་པ་ཅན་དུ་འཛིན་པའི་རྐྱེན་ལས་འབྲས་བུ་སྣ་ཚོགས་པའི་རྒྱུར་འཁྲུལ། བདག་པོ་ཡུལ་ཅན་དུ་འཛིན་པའི་རྐྱེན་ལས་མིང་སྣ་ཚོགས་སུ་འཁྲུལ། དམིགས་པ་བློ་ཅན་དུ་འཛིན་པའི་རྐྱེན་ལས་འབྲས་བུ་ཐུག་པ་མེད་པར་འཁྲུལ་ལོ། །དེ་མ་ཐག་འཛིན་པ་ཅན་གྱི་རྐྱེན་ལས་སྣང་བ་སྣ་ཚོགས་སུ་འཁྲུལ་ལོ། །ཞེས་གསུངས་པ་ལྟར་འཁྲུལ་ཡང་དེ་ལྟར་འཁྲུལ་ལ། ངོས་ཟིན་ན་དེ་དག་རང་ཐོག་ནས་གྲོལ་བའོ། །དེ་ལྟར་མ་གྲོལ་བ་རྣམས་ནི་རྒྱུ་རྐྱེན་ཚོགས་པ་ལས་རིམ་བཞིན་འཁྲུལ་པའི་སྣང་བ་འཁྲུལ་འཛིན་དང་བཅས་པ་གོམས་པ་སྟོབས་སུ་གྱུར་ནས་ཚུལ་མིན་ཡིད་བྱེད་ཀྱི་རྟོག་པ་དང༌། ཉོན་མོངས་པའི་ཚོགས་གནས་དོན་ལུས་ཀྱི་བག་ཆགས་འཕེལ་བའི་དབང་གིས། འཁོར་བའི་གནས་མཐོ་དམན་དང་རིགས་སྣ་ཚོགས་པ་འདི་གྲུབ་པ་ལྟར་སྣང་བ་ཡིན་ཏེ། དེ་ལྟར་འཁོར་བའི་གནས་སྐབས་ན་མ་རིག་པ་ནས་བཟུང་རྟེན་འབྲེལ་བཅུ་གཉིས་ཤིང་རྟའི་འཕང་ལོ་བཞིན་ནོ། །དེ་ཡང་ཐུགས་རྗེའི་རང་འོད་ངོ་མ་ཤེས་པའི་མ་རིག་པ་གསུམ་ནི་མ་རིག་པའོ། །དེ་ལས་རྐྱེན་བཞི་ནི་འཁོར་བར་འདུ་བྱེད་དོ། །དེ་ལས་ཤེས་པ་རགས་པ་འཕེལ་བས་ཡུལ་གྱི་རྣམ་པ་ལ་དཔྱོད་པ་ནི་རྣམ་ཤེས་སོ། །དེ་ལས་ཐ་དད་པའི་མིང་དང་གཟུགས་སུ་འབྱུང་བ་ནི་མིང་གཟུགས་སོ། །དེའི་ཁྱད་པར་འབྱུང་བ་སོ་སོའི་ཆ་དང་ཁ་དོག་གྲུབ་པ་ནི་སྐྱེ་མཆེད་དོ། །དེ་ལས་ཡུལ་ལ་ལོངས་སྤྱོད་པ་ནི་རེག་པའོ། །དེ་ལས་དགའ་གདུང་བར་གསུམ་སྐྱེ་བ་ནི་ཚོར་བའོ། །དེ་ལས་བདེ་བ་ལ་སྲེད་ཅིང་སྡུག་བསྔལ་མི་འདོད་པའི་ཤེས་པ་ནི་སྲེད་པའོ། །དེ་ལས་ཡུལ་དང་དུ་ལེན་པ་ནི་ལེན་པའོ། །དེ་ལས་ལས་དང་ཉོན་མོངས་རྒྱས་ཏེ་ཕྱི་མའི་སྐྱེ་བར་འཕེན་པ་ནི་སྲིད་པའོ། །དེ་ལས་འགྲོ་བ་ཐ་དད་དུ་སྐྱེ་བ་ནི་སྐྱེ་བའོ། །དེ་ལས་བྱིས་གཞོན་གྱི་གནས་སྐབས་མྱོང་ནས་རྒས་པ་དང་ཤི་བ་ནི་རྒ་ཤིའོ། །ཚེ་འདི་ལྟ་བུ་ལ་མཚོན་ན་སྔ་མའི་འཆི་སྲིད་གཞིའི་འོད་གསལ་ནུབ་སྟེ། སྲིད་པ་བར་དོ་སྣང་རུང་གི་སྐད་ཅིག་དང་པོ་ངོ་མ་ཤེས་པ་ནི་མ་རིག་པ་སྟེ། དེ་ནས་བཟུང་ཕྱིས་འཆི་བའི་དུས་ལ་བབ་ཚེ་ཕྱི་དབུགས་ཆད་དུས་ཤི་བ་སྟེ་ལུགས་འབྱུང་བཅུ་གཉིས་ཡིན་ལ། དེ་ཕན་ཆད་ཀྱི་ཐིམ་རིམ་རྣམས་རྫོགས་ནས་གཞིའི་འོད་གསལ་སྟེང་དུ་སླེབ་པ་ནི་ལུགས་ལྡོག་སྟེ། དེ་ཡང་གཞི་དང་གཞི་སྣང་ལ་མ་རིག་པ་མེད་པ་དེ་ངོ་མ་ཤེས་ན་འཁོར་བ་ཡིན་ལ། ཤེས་ན་གྲོལ་བས་འཁོར་བ་མྱང་འདས་སུ་གྲོལ་བ་ཞེས་བྱའོ། །འདི་ལྟར་གཞི་སྣང་ལ་བདག་འཛིན་ཏུ་བརྟས་པའི་དབང་གིས་འཁོར་བ་སྣོད་བཅུད་ཀྱི་ཆོས་དཔག་ཏུ་མེད་པ་ཐམས་ཅད་བསྡུ་ན། མཐོ་རིས་གསུམ་དང་ངན་སོང་གསུམ་སྟེ་རིགས་དྲུག་དང༌། སྐྱེ་གནས་རྣམ་པ་བཞི་པོའང་མེད་བཞིན་དུ་རབ་རིབ་མཐུས་སྐྲ་ཤད་ལྟར་སྣང་བ་ལ། སྒྱུ་མའི་རང་གཟུགས་བཞིན་རང་གི་ངོ་བོ་ལ་རྡུལ་ཕྲན་ཙམ་ཡང་མ་གྲུབ་པ་སྣང་དུས་ཉིད་ནས་རང་བཞིན་མེད་པ། ཡོད་མ་མྱོང་བའི་སྟོང་གཟུགས་ཉག་གཅིག་ལ་བརྟེན་ནས་ད་ལྟའི་འཁྲུལ་སྐབས་འདིའི་ཐོག་མ་ལ་མ་རིག་པ་དང༌། མ་རིག་པའི་རོལ་པ་ལས་སེམས། སེམས་ཀྱི་རྒྱན་འཛིན་པ་ལས་ཡིད། ཡིད་ལས་ཉོན་མོངས་སུ་ཤར་བས་འཁྲུལ་ལོ། །དཔྱོད་བྱེད་ཡིད་དྲུག་ནི། མ་རིག་པ་དང་མཚུངས་ལྡན་གྱི་ཡིད་ལྷན་ཅིག་སྐྱེས་པའི་བདག་ཏེ་ངའོ་སྙམ་པ་དང༌། ཡིད་ཀྱི་རྣམ་པར་ཤེས་པའི་ཡིད་ཀུན་ཏུ་བརྟགས་པའི་བདག་སོགས་དང༌། གཏན་བཟང་ངན་ལ་འབེབས་པའི་ཡིད་དང༌། ཀུན་ཏུ་ཚོལ་བའི་ བདེ་སྡུག་དང༌། རྣམ་པར་རགས་པའི་ཡིད་སྲོག་གཅོད་སོགས་དང་དུ་ལེན་པ་དང༌། ངེས་པར་འཇོག་སེམས་ལ་ཡང་ཡང་ངེས་པར་བྱེད་པའི་མི་བརྗེད་པའི་ཡིད་དོ། །དེ་ལྟར་ཡིད་དྲུག་པོ་ལངས་ཏེ་དེ་ནས་ཚོགས་དྲུག་གི་རྟོག་པ་ཤིན་ཏུ་རགས་པ་རྣམས་ཤར། དེ་ལྟར་མེད་པ་ལ་ཡོད་པར་འཛིན་པའི་རྣམ་པར་རྟོག་པའི་དབང་གིས་ཆོས་རྣམས་བཏགས་པ་བ་དེ་ལ། བདག་ཏུ་འཛིན་པའི་འཆིང་བ་དམ་པོ་དེ་ནི་རབ་ཏུ་མཐུ་ཆེ། སེམས་ཉིད་ནམ་མཁའི་ཁམས་ལྟ་བུ་ངོ་བོ་ཉིད་མེད་སྤྲོས་བྲལ་འཆིང་གྲོལ་གྱིས་དབེན་པ་འདི་ཡང༌། གཉིས་འཛིན་གྱིས་རབ་ཏུ་བཅིངས་ནས་ཆོས་དང་ཟག་གི་བདག་གཉིས་སུ་བདེན་པར་སྣང་ཞིང་མེད་པ་ལ་ཡོད་པར་བཟུང་ནས་དེ་ལ་ཞེན་པས་མགལ་མེའི་འཁོར་ལོ་བཞིན་ཏེ། ཡུལ་འཁོར་སྐྱོང་གིས་ཞུས་པའི་མདོ་ལས། ཆོས་རྣམས་གང་ལའང་རང་བཞིན་འགའ་མེད་དེ། །སྒྱུ་མ་སྨིག་སྒྱུ་ཆུ་ཡི་ཟླ་བ་འདྲ། །མི་མཁས་བདེན་པར་ཞེན་པས་འཆིང་འགྱུར་ཏེ། །རྟག་ཏུ་རྫ་མཁན་འཁོར་ལོ་བཞིན་དུ་བསྐོར། །ཞེས་པ་ལྟར་ཕྱི་དོན་དུ་རང་བཞིན་མ་གྲུབ་ཅིང་ནང་སེམས་ཀྱི་བག་ཆགས་ཀྱི་རྣམ་སྨིན་ཡིན་པའི་རྒྱུ་མཚན་སྲིད་པ་འཁོར་བའི་གནས་ན། ཉི་མ་གཅིག་པུ་ལ་མི་སོགས་ལ་ལའི་སྣང་བ་གསལ་བྱེད་དང༌། འུག་པ་སོགས་ལ་ལའི་ངོར་མུན་པ་ལྟར་འགྱུར་ཞིང༌། དེ་བཞིན་དུ་ཆུ་བོ་གཅིག་པུ་འདི་ལ་ལྷ་སོགས་ལ་ལའི་བདུད་རྩི། མི་སོགས་ལ་ལའི་ཆུ་དང༌། དམྱལ་བ་པ་རྣམས་ལ་མེ་ལྟར་སྣང་བ་སྟེ་བདེ་སྡུག་བྱེད་ལས་སྣ་ཚོགས་པ་དང༌། དེ་སོགས་ཕན་ཚུན་ཀུན་ནས་རྣམ་པར་འགལ་བའི་འདུ་ཤེས་རྣམས། བག་ཆགས་གོམས་ཚུལ་གྱི་རྗེས་སུ་འགྲོ་བ་ལས། ཡུལ་གྱི་ངོས་ནས་ངེས་པ་འགའ་ཡང་མེད་དེ། ཡིད་བཞིན་རིན་པོ་ཆེའི་མཛོད་ལས། སེམས་ཀྱིས་འདུ་བྱེད་སེམས་ཀྱིས་ལས་ཀུན་བྱེད། །སེམས་ལ་སྣང་ཞིང་སེམས་ཀྱིས་བརྟགས་པས་ན། །འཁྲུལ་པའི་སེམས་གདུལ་སླད་དུ་འབད་པར་མཛོད། །ཅེས་གསུངས་སོ། །སེམས་ཀྱི་བག་ཆགས་སྨིན་པ་ལས་གཞན་ཡུལ་མེད་པ་དེ་ལྟ་ནའང་སྣང་ཡུལ་འདི་དག་སེམས་དངོས་མ་ཡིན་ཏེ། དཔེར་ན་བཞིན་གྱི་གཟུགས་བརྙན་མེ་ལོང་ནང་ཞུགས་ཀྱང༌། རྟེན་ཅིང་འབྲེལ་བར་འབྱུང་བའི་རྐྱེན་ཙམ་ལས་བཞིན་དང་མེ་ལོང་ནམ་ཡང་འདྲེས་མ་མྱོང་སྟེ། ཏིང་འཛིན་རྒྱལ་པོ་ལས། མེ་ལོང་ངོས་སམ་འབྲུ་མར་སྣོད་དག་ཏུ། བུད་མེད་ཁ་བཞིན་བརྒྱན་པས་བལྟས་པ་ན། །དེ་ན་བཞིན་གྱི་དཀྱིལ་འཁོར་ཀུན་སྣང་ཡང༌། །ཡོད་པ་མ་ཡིན་མེད་པའང་མ་ཡིན་ལྟར། །ཆོས་རྣམས་ཐམས་ཅད་དེ་བཞིན་ཤེས་པར་བྱ། །ཞེས་སོ། །བག་ཆགས་ཀྱི་དབང་གིས་མེད་བཞིན་སྣང་བའི་ཆོས་ཐམས་ཅད་ལ་དེར་འཛིན་འཁྲུལ་པའི་སེམས་རྟོག་གློ་བུར་བ། དཔེར་ན་ཡུལ་གཟུགས་ལྟ་བུ་ལ་མཚོན་ན་ཐག་ཁྲ་མཐོང་བའི་ཚེ། མིག་བསླད་པའི་རྐྱེན་གྱིས་སྦྲུལ་དུ་འཛིན་བྱེད་ཀྱི་ཤེས་པ་རྟོག་མེད་ཚོར་ཕུང་གིས་བསྐྱེད་པའི་སེམས་ཀྱི་སྐད་ཅིག་མ་ཞེས་པ་དང་པོ་དེ་ནི་གཟུང་བའི་ཆོས་གཟུགས་སོགས་ཡིན་ལ། མདོ་སྡེ་པ་ལྟ་བུར་ཡུལ་གྱི་རྣམ་པར་ཤར་བ་དང༌། གཟུང་འཛིན་གཉིས་ཡུལ་དང་ཡུལ་ཅན་གྱི་སྒོ་ནས་མིན་ནོ། །དེའི་རྗེས་ལ་སེམས་བྱུང་གིས་རྟོག་དཔྱོད་ཞུགས་ཏེ་སྦྲུལ་དུ་ཤེས་པ་འཛིན་པ་ལ་སེམས་ཞེས་པའོ། །གལ་ཏེ་ཕྱི་རོལ་གྱི་སྣང་ཡུལ་སྦྲུལ་དངོས་ལ་སྦྲུལ་དུ་སྣང་བ་ཙམ་གཟུང་བ་ཡིན་ལ། འཛིན་པ་ནི་བདག་པོའི་ཞེས་གང་ལ་སྣང་བའི་གང་ཟག་དེའི་ཤེས་པ་ཙམ་ཞིག་ཡིན་པར་སྨྲ་བར་བྱེད་ན། གཟུང་འཛིན་ལས་གྲོལ་བའི་འཕགས་པ་རྣམས་ལ་སྒྱུ་མ་ལྟ་བུའི་སྣང་བ་མེད་པར་འགྱུར་བ་དང༌། སངས་རྒྱས་ཀྱི་ཇི་སྙེད་མཁྱེན་པའི་ཡེ་ཤེས་ཀྱིས་ཕུང་པོ་སོགས་ཤེས་བྱ་ཐམས་ཅད་མཁྱེན་པ་ཡང་མི་རུང་བ་སོགས་སྐྱོན་དུ་མ་ཡོད་ལ། ཁྱད་པར་དུ་སྣང་བའི་སེམས་དང་སྣང་ཡུལ་སོ་སོར་མ་ཕྱེད་པར་སྣང་བ་ཐམས་ཅད་སེམས་ཡིན་ནོ་ཞེས་འདོད་པ་ནི་སྐྱོན་ཆེ་སྟེ། ཡིད་བཞིན་མཛོད་ལས། མི་ཤེས་པ་དེ་ཐམས་ཅད་སེམས་ཡིན་ལོ། །སྣང་བ་རྣམ་གསུམ་དོན་ལ་ཤིན་ཏུ་རྨོངས། སྐྱོན་མང་ཕན་ཚུན་འཆོལ་ཞིང་ཧ་ཅང་ཐལ། །སྐྱོང་བྱེད་དག་གི་ལུགས་ངན་དེ་སྤོངས་ཤིག །ཅེས་པ་ལྟར་སྐྱོན་དུ་མ་འབྱུང་བ་དང༌། སྐྱེས་བུ་གཅིག་སངས་རྒྱས་ཚེ་ཐམས་ཅད་སངས་རྒྱས་དང༌། དངོས་པོ་ཡོད་ཚེ་སེམས་དེ་ཡང་སྣང་བ་ཉིད་དང་ལྷན་ཅིག་ཡོད་པར་འགྱུར་ཞིང༌། དངོས་པོ་མེད་པའི་ཚེའང་དེ་དང་ལྷན་ཅིག་འགྲོ་ལྡོག་བྱེད་པ་དང༌། རང་ཤི་ཚེ་ཡུལ་ཐམས་ཅད་མེད་པར་འགྱུར་བ་སོགས་སྐྱོན་དུ་འགྱུར་རོ། །དེ་ལྟར་གཟུང་འཛིན་དུ་གོལ་བའི་རྩ་བ་སྟོང་ན་མྱ་ངན་ལས་འདའ་ཚུལ་འདི་ལྟར། ཆོས་ཉིད་གང་དུའང་མ་གྲུབ་པའི་མ་རིག་པའི་དབང་གིས་གཟུང་འཛིན་སྒྲོ་བཏགས་གློ་བུར་བའི་རྐྱེན་ངར་འཛིན་ལྷན་སྐྱེས་བྱུང་ལ། སྲིད་པའི་རྩ་བར་འགྱུར་པའི་བདག་པོ་ནི་ང་སྙམ་པ་དང་ང་ཡི་བར་འཛིན་པ་ཉིད་ཡིན་ཏེ། འཇུག་པ་ལས། དང་པོ་ང་ཞེས་བདག་ལ་ཞེན་གྱུར་ཅིང༌། །བདག་གི་འདི་ཞེས་དངོས་ལ་ཆགས་བསྐྱེད་པ། །ཟོ་ཆུན་འཕྱན་ལྟར་རང་དབང་མེད་པ་ཡི། །འགྲོ་ལ་སྙིང་རྗེར་གྱུར་གང་དེ་ལ་འདུད། །ཅེས་སོ། །དེས་ན་དོན་ལ་ཡོད་པར་བཟུང་ནས་མེད་བཞིན་པ་ལ་འཁོར་བར་འཁྲུལ་པའི་གཞི་གཟུང་འཛིན་རྩ་བ་སྟོངས་ཏེ་རྒྱུན་ཆད་པར་གྱུར་ན། ཀུན་བྱེད་རྒྱལ་པོ་ཞེས་རིག་པ་ལ་སྨོས་ཏེ་འཁོར་བའི་ཆོས་གློ་བུར་གྱི་དྲི་མ་ཐམས་ཅད་རྒྱ་མཚོ་ལས་རླབས་ལྟར་སྔར་རིག་པའི་དབྱིངས་རང་ལས་བྱུང་ཞིང་ཕྱིས་སུ་ཡང་རང་ལ་ཐིམ་སྟེ་འཚང་རྒྱའོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། །གཞིའི་བཞུགས་ཚུལ་བསྟན་པའི་ཚོམས་ཏེ་ལེའུ་བཅུ་གཅིག་པའོ།། །།སྐལ་པ་དང་ལྡན་པའི་གང་ཟག་གང་ཞིག་འབྲས་བུའི་མཐར་ཐུག་སློབ་པ་མིན་པའི་གཞི་ཉིད་མངོན་དུ་གྱུར་པ་ཆོས་སྐུ་དང་གཟུགས་སྐུ་ཟུང་འཇུག་གི་གོ་འཕང་ལ། དཀྲི་ཞིང་སྦྱོར་བའི་དུས་གསུམ་རྒྱལ་བ་ཀུན་གྱི་མདོ་སྔགས་ཀྱི་གཞུང་ལམ་ཆེན་པོ་ཕྱིན་དྲུག་གི་ཡོན་ཏན་ཏེ་གནས་སྐབས་ལམ་གྱི་ཚོགས་གཉིས་རྫོགས་པ་དང༌། མཐར་ཐུག་འབྲས་བུ་སྐུ་གཉིས་འཐོབ་པར་བྱེད་པའི་ནུས་པ་ནི་རྣམ་པ་ཀུན་ཏུ་ཆོས་རྣམས་ཀྱི་གནས་ལུགས་སེམས་ཉིད་སྤྲོས་པ་དང་བྲལ་ཞིང༌། རང་བཞིན་གྱི་འོད་གསལ་བའི་དོན་མ་ནོར་བར་རྟོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཡང་དག་པར་བསྟེན་པ་ཡིན་ཏེ། སྡུད་པ་ལས། དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་རྣམས། །ལམ་ཡང་མི་ཤེས་གྲོང་ཁྱེར་འཇུག་པ་ག་ལ་འགྱུར། །ཤེས་རབ་མེད་ན་མིག་མེད་ཕ་རོལ་ཕྱིན་ལྔ་ཡང༌། །དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། །གང་ཚེ་ཤེས་རབ་ཀྱིས་ནི་རབ་ཏུ་ཟིན་གྱུར་པ། །དེ་ཚེ་མིག་རྙེད་གྱུར་ཅིང་འདི་ཡི་མིང་འཐོབ་བོ། །ཞེས་སོ། །ཐབས་ཤེས་ཟུང་དུ་འཇུག་པའི་ཆོས་ཉིད་ཀྱི་དོན་ཇི་བཞིན་མཐོང་བའི་ལམ་དེ་ནམ་ཡང་སྲིད་བ་དང་ཉན་རང་སོགས་གཞན་གྱི་རྒྱུར་མི་འགྱུར་རོ། །འོ་ན་དབུ་མ་པ་དང་མཚུངས་སམ་ཞེ་ན། འདི་ལྟར་ཡེ་ནས་རྫོགས་པའི་སེམས་ཉིད་རྫོགས་པ་ཆེན་པོའམ་བདེ་གཤེགས་སྙིང་པོ་ཡོན་ཏན་ཡེ་རྫོགས་སུ་བཞུགས་པའི་གཞི་ཉིད་ཡེ་ནས་རང་ལ་ཡོད་ཀྱང་ངོ་མ་ཤེས་པ་ཡེ་གསང་ཐབས་ཀྱིས་ཆོད་པ་གཞན་གྱིས་རྟོགས་པར་དཀའ་བ་སངས་རྒྱས་ཀུན་གྱི་ཐུགས་ཀྱི་གསང་བ་རྫོགས་རིམ་མཐར་ཐུག་པའི་ངོ་བོ་སྟོང་པ་ཉིད་ཀྱི་གནས་ལུགས་དོན་དམ་པའི་བདེན་པ་དེ་ལ། དག་མ་དག་སོགས་ཀྱི་མཚན་ཉིད་མི་གནས་ཤིང༌། སྤྲོས་པའི་མཐའ་ཐམས་ཅད་དང་བྲལ་བའི་དོན་ལ་བློའི་འཇུག་པ་དབྱིངས་སུ་ཞི་ནས་དབུ་མར་བཟུང་བའང་མེད་ཅིང་མི་དམིགས་པས། རང་གི་ངོ་བོ་ཉིད་སྤངས་པ་སྟེ་སྟོང་ལ། ལྷུན་གྲུབ་ཀྱི་ཆ་ནས་དྭངས་གསལ་གཡོ་བ་མེད་པའི་འོད་གསལ་ཡེ་ཤེས་ཀྱི་སྒྱུ་མ་མི་འགགས་པ་ནི་རྫོགས་པ་ཆེན་པོར་གྲུབ་པ་ཡིན་ནོ། །རང་ཕྱོགས་སྒྲུབ་ཅིང་གཞན་ཕྱོགས་རྒོལ་བའི་རྩོད་པ་མངོན་པར་འཕེལ་བའི་བསམ་བྱུང་གིས་བསྐྱེད་པའི་རྟོག་གེའི་རིག་པ་རྣོན་པོས་ནི། ཇི་ལྟར་བརྟགས་ཤིང་དཔྱད་ཀྱང་ཟབ་མོའི་དོན་ལ་སྐུར་འདེབས་ཚུལ་གྱིས་རྗེས་སུ་དཔག་པའི་དོན་དམ་ལས་འདས་ཏེ། ཀུན་རྟོག་གི་འཐོར་རླུང་གཡོ་བའི་ཕྱི་བཞིན་འབྲང་བས་ན། དོན་དམ་ཡེ་ཤེས་ཀྱི་སྤྱོད་ཡུལ་ནི་བསམ་ཡུལ་ལས་འདས་པའི་ཆོས་ཉིད་དེ་དང་འགལ་བ་ཅན་ཏེ། སྤྱོད་འཇུག་ལས། དོན་དམ་བློ་ཡི་སྤྱོད་ཡུལ་མིན། །བློད་ནི་ཀུན་རྫོབ་ཡིན་པར་བརྗོད། །ཅེས་དང༌། ལང་གཤེགས་ལས། བྱིས་པ་ངན་པ་རྟོག་གེ་པ། །རོ་དང་འདྲ་བས་འདི་ལྟར་བརྟགས། །ཞེས་སོ། །དེ་ཁོ་ན་ཉིད་ནི་འཕགས་པའི་མཉམ་གཞག་གི་ཚེ་ནའང་སོ་སོ་རང་རིག་གི་ཡེ་ཤེས་སྤྲོས་བྲལ་ནི་ཡོངས་གཅོད་དུ་བསམ་ཞིང་བརྗོད་པའི་ཡུལ་ལས་འདས་པའི་ཕྱིར་རོ། །སེམས་ཙམ་མན་ཆད་ཀྱིས་གནས་ལུགས་ཇི་བཞིན་མ་རྟོགས་པས་དངོས་པོར་སྨྲ་བ་གྲུབ་མཐའི་རྟོག་གེ་དང༌། རང་རྒྱུད་འཛིན་པ་དང་བཅས་པ་ས་མཚམས་དམན་པ་སྦྱོར་ལམ་མན་ཆད་ཀྱི་སོ་སྐྱེའི་རྟོག་གེ་ཡི་རྟོག་དཔྱོད་ལས་འདས་པ་རྒྱལ་བའི་ཡེ་ཤེས་རང་བྱུང་གི་དགོངས་པ་ནི། གདོད་ནས་གྲོལ་བའི་ཆོས་ཉིད་ཡིན་པས། ད་གཟོད་གྲོལ་བྱེད་ཀྱི་རྐྱེན་ལ་མི་འཇུག་ཀྱང་རང་བཞིན་རྫོགས་པ་ཆེན་པོའི་ལམ་དུ་རིག་པའམ་ཆོས་ཉིད་ཤེས་བྱ་གཞིའི་བཞུགས་ཚུལ་སྣང་ཕྱོགས་སུ་ཡོད་མཐར་མ་ལྷུང་བ། སྣང་བས་མ་བཅིངས་པ། སྟོང་པའི་རང་བཞིན་དངོས་པོའི་གཞི་ཐོག་ཏུ་ཕེབས་པ། སྟོང་ཕྱོགས་མེད་མཐར་མ་ལྷུང་བ། སྟོང་པ་དེ་ཡང་རང་བཞིན་འོད་གསལ་བའི་སྙིང་པོ་ཅན་ཏེ་ཟུང་དུ་འཇུག་པའི་འོད་གསལ་འགག་མེད་ནི། རིག་པ་རང་བྱུང་གི་ཡེ་ཤེས་བཅིངས་གྲོལ་དང་བྲལ་བ། སངས་རྒྱས་ཆོས་སྐུའི་དགོངས་པར་བཞུགས་པའི་ཆོས་ཉིད་ཀྱི་རང་རྩལ་སྐུ་དང་ཡེ་ཤེས་ཆོས་ཁམས་རྒྱ་མཚོ་ལྟ་བུར་ཡེ་ནས་འདུ་འབྲལ་མེད་པ་ནི། ཉི་མའི་སྙིང་པོ་ལ་འོད་ཟེར་འདུ་འབྲལ་མེད་པ་བཞིན་ཏེ། དེའི་ཚེ་ན་གཟུགས་སོགས་སྣང་ཡུལ་མ་འགགས་པར་ཤར་ཡང༌། དེ་ཡི་རྣམ་པས་རིག་པ་དེ་ལ་མ་གོས་པས་སྟོང་ལ། རིག་པ་ཡུལ་ཐོག་ཏུ་མ་ཤོར་བར་རང་སོ་ཟིན་པས་སྣང་ཡུལ་ལ་བློ་ཡིས་མ་གོས་པའམ་འཛིན་པས་སྟོང་སྟེ། ངོ་བོ་གང་དུའང་མ་གྲུབ་པའི་ཕྱིར་ན་སྟོང་པ་ཀ་དག་དང༌། ལྷུན་གྲུབ་ཀྱི་རྩལ་འགག་པ་མེད་པ་དེ་གཉིས་ཟུང་འཇུག་གཏད་མེད་ཀྱི་རིག་པ་བར་མེད་ཧར་སང་དུ་སོང་བ་ནི། བསལ་བཞག་དང་བྲི་གང་མེད་པའི་ཆོས་ཉིད་ཕྱམ་གཅིག་ཏུ་གནས་པ་སྟེ། ནམ་མཁའ་ཀློང་ཡངས་ལས། གང་ཡང་མ་སྤངས་ཀུན་ལས་འདས་པའི་དོན། །ཕྱོགས་བྲལ་རིག་པ་གཏད་མེད་རང་ཡན་ཏེ། །འདི་ཞེས་མི་མཚོན་བསམ་པ་ཀུན་དང་བྲལ། །གཉིས་མེད་ཡངས་པ་ཆེན་པོར་ཕྱམ་གཅིག་གོ །ཞེས་སོ། །ཆོས་ཉིད་བྱ་རྩོལ་དང་བྲལ་བ་བློ་འདས་རྫོགས་པ་ཆེན་པོའི་གནས་ལུགས་གང་ལ། ངོ་བོར་དབྱེ་བ་དང་བཟང་ངན་མ་གྲུབ་ཀྱང་དབང་པོ་དང་བློ་ཡི་རིམ་པས་འཇལ་ལུགས་རྣམ་པ་གསུམ་དུ་གསུངས་པ་ཡིན་ཏེ། ཨ་ཏི་བཀོད་པ་ཆེན་པོ་ལས། ཡིད་ཅན་རྣམས་ལ་སེམས་ཀྱི་སྡེ། །ནམ་མཁའ་ཅན་ལ་ཀློང་གི་སྡེ། །རིམ་རྩོལ་བྲལ་ལ་མན་ངག་གོ །ཞེས་པ་ལྟར་རང་གི་སེམས་ཉིད་ལས་གཞན་དུ་གྱུར་པའི་ཆོས་གང་ཡང་སྤང་བྱ་ལས་གྲོལ་བར་གནས་པ་སེམས་ཀྱི་སྡེ་ནི། ཆོས་ཀུན་རིག་པའི་རོལ་པ་སྣ་ཚོགས་པའི་གསལ་ཤས་ཆེ་བ་རྩལ་དུ་མེ་ལོང་དྭངས་མའི་མདངས་ལྟར་གསལ་ལ་འགག་པ་མེད་པར་ཤར་ཏེ། ཀུན་བྱེད་ལས། སྣང་སྲིད་སྣོད་བཅུད་སངས་རྒྱས་སེམས་ཅན་ཀུན། །སེམས་ཀྱིས་བྱས་ཤིང་སེམས་ཀྱི་ངང་དུ་གཅིག །ཅེས་སོ། །ཀློང་གི་སྡེ་ནི་ཡིན་མིན་ཕྱོགས་བྲལ་རང་སྣང་བཀོད་པའི་རྒྱན་སྟོང་ཤས་ཆེ་བ་ལས་སེམས་སྡེ་ལྟར་རང་རྩལ་མི་འདོད་དེ་ཕྱོགས་བྲལ་ཡེ་སྟོང་ཀློང་འབྱམས་ཆེན་པོའོ། །སེམས་སྡེ་ནི་རྩལ་ཏེ་ཉེ་བར་འཕྲོས་པ་ལྟ་བུ། ཀློང་སྡེ་རྒྱན་ཏེ་ཚུར་རིག་པ་ལྟ་བུའོ། །མན་ངག་གི་སྡེ་ནི་ཆོས་ཐམས་ཅད་མེད་བཞིན་སྣང་བས་ཡིན་ལུགས་གཤིས་ཐོག་ཏུ་ཕེབས་པས་སྤང་གཉེན་གཉིས་ཀའི་མཐའ་ལས་གྲོལ་བའི་སྟོང་པའི་གཟུགས་བརྙན་ཉག་གཅིག་ཡིན་ལ་རྣམ་རྟོག་གྲོལ་བ་དང་ངང་ལ་འཇོག་པ་གང་ཡང་མེད་པས་ཁྱད་པར་དུ་འཕགས་སོ། །ཀུན་ཀྱང་ཐོག་མཐའ་སྐྱེ་འགག་མེད་པས་གྲོལ་བར་བྱ་བའི་གཞི་སེམས་ཀྱི་ཆོས་ཉིད་ཡེ་ནས་གྲུབ་མ་མྱོང་བའི་སྨིག་སྒྱུ་ལ་ཆུ་རགས་མི་དགོས་པ་ལྟ་བུ་གཞི་གང་ཡང་མེད་པའི་བྱང་ཆུབ་སེམས། གང་གིས་སྒྲིབ་པ། གང་ཞིག་དགྲོལ་བར་བྱ་བ། ཐབས་གཞན་ཡང་སྤངས་པའི་ཡུལ་སྣང་མ་འགགས་པ་རང་གསལ་གྱི་གདངས་འགགས་མེད་དུ་དེ་ཡང་ཕྱང་ཆད་ལྟ་བུ་མ་ཡིན་པར་ཡེ་ནས་འགགས་མ་མྱོང་བས་སྟོང་བར་མཐོང་དགོས་ཀྱང་དེ་ལ་སྟོང་གཞི་དང་གནས་བྱེད་ཀྱི་རྩ་བ་མེད་པའི་རིག་པ་རང་གདངས་ཀ་དག་གི་ཀློང་ན་རང་གསལ་བ་ནི་གྲོལ་བ་ལྔའི་ཁྱད་ཆོས་དང་ལྡན་པ་ཡིན་ཏེ། ཡེ་གྲོལ་ནི། ཚོགས་བརྒྱད་སྤྲིན་ལྟ་བུའི་དབུས་ན་རིག་པ་ནམ་མཁའ་ལྟར་སྲིད་པའི་སྐྱོན་གྱིས་མ་གོས་ཤིང་སྤྲོས་པ་དང་བྲལ་བས་ན། ཕྱི་ནས་རྐྱེན་གྱིས་རྣམ་རྟོག་གང་ཤར་ཡང་བྱས་ཤིང་བཅོས་པ་མེད་པས། དང་པོ་ནས་ཡེ་གྲོལ་དུ་ཡོད་པ་ཡིན་ནོ། །རང་གྲོལ་ནི། བླ་མས་ངོ་རང་ཐོག་ཏུ་སྤྲད་པ་དེ་ཉིད་རང་བབས་སུ་འཇོག་པ་ལས་མེད། འོན་ཀྱང་རྣམ་རྟོག་རགས་པ་རྒྱུན་མཐུད་པ་གཉེན་པོ་ཅུང་ཟད་བརྟེན་དགོས་པའི་ཆོས་ཐམས་ཅད་རིག་པ་རང་གིས་རང་གྲོལ་བ། དཔེར་ན་ཆུ་འབབ་པ་ལ་དེད་མི་དགོས་པ་ལྟར་རྐྱེན་ལ་རག་མ་ལུས་སོ། །གཅེར་གྲོལ་ནི། རྣམ་རྟོག་འཁྲུལ་འབྱམས་སུ་སོང་ན་རིག་ངོ་ལ་བལྟས་པས་གྲོལ་བ། དཔེར་ན་ཁྱི་ལ་རྡོ་འཕངས་བས་རྡོ་དེད་པ་ལྟར། རྣམ་རྟོག་གི་རྗེས་བསྙེག་པ་མ་ཡིན་ལ། སེངྒེ་ལ་རྡོ་འཕངས་ན་གང་ཟག་ལ་བསྙེག་པ་ལྟར་རིག་ངོ་ལ་གཅེར་གྱིས་བལྟས་པས་གྲོལ་བ་ཡིན་པས་གཉིས་པོར་ལྟོས་པ་དང་ལྟོས་གཞི་ཀུན་དང་བྲལ་བའོ། །མཐའ་གྲོལ་ནི། རིག་པའི་ངོ་བོ་སྐྱེ་མེད་ཀྱི་ཆ་ནས་ཡོད་མཐའ་ལས་གྲོལ་ཀྱང༌། འགག་མེད་ཀྱི་ཆ་ནས་མེད་མཐའ་ལ་མི་གནས། རྒྱུན་མི་འཆད་པས་མེད་མཐའ་ལས་གྲོལ་ཀྱང༌། རྟག་དངོས་མིན་པས་ཡོད་མཐའ་ལ་མི་གནས། རྩལ་སྣང་སྣ་ཚོགས་སུ་འཆར་བས་གཅིག་པུར་མ་གྲུབ་པ་དང༌། སྤྲོས་པ་དང་བྲལ་བས་དུ་མར་གདགས་པའི་མཐའ་ལས་གྲོལ་བའི་ཀུན་ཏུ་བཟང་པོའོ། །གཅིག་གྲོལ་ནི། བདེན་པ་དབྱེར་མེད་ཀྱི་རིག་པ་སྤྲོས་བྲལ་ལ། གཅིག་དང་དུ་མ་མ་གྲུབ་ཀྱང༌། ཐ་སྙད་དུ་ཆོས་སྐུ་ཐིག་ལེ་ཉག་གཅིག་ཅེས་བྱ་བར་བཏགས་པའི་ཟང་ཐལ་གྱི་ཡེ་ཤེས་གཅིག་པོ་རྣམ་རྟོག་ཐམས་ཅད་རིག་པའི་ཀློང་དེར་གྲོལ་བས་ཆོས་གང་ཡང་མེད་པ་ནམ་མཁའ་དྭངས་པ་ལྟར་མཚན་ཉིད་མེད་དོ། །གང་དག་འོག་ཏུ་འཆད་པའི་རྟོགས་མ་རྟོགས་ཀྱི་ཆ་མ་རིག་པ་ཚོགས་དང་བཅས་པའི་སེམས་ལས་འདས་པའི་གཞི་གནས་ཀྱི་རིག་པ་རྗེན་ཅེར་དུ་ངོ་སྤྲད་པ་ནི། རང་བཞིན་རྫོགས་པ་ཆེན་པོའི་ཐུན་མོང་མ་ཡིན་པའི་ཁྱད་ཆོས་ཡིན་ཏེ། རིག་པའི་ཆོས་ཉིད་ཚུལ་བཞིན་དུ་རྟོགས་པ་རྣམས་ནི་གཞི་ལས་གཞི་སྣང་ངོ་ཤེས་ནས་རིག་པ་རང་བཞིན་མེད་པའི་ངང་དེར་གྲོལ་ཏེ། ཆོས་ཉིད་ཟད་སར་ཐུག་པ་ན་ཀུན་ཏུ་བཟང་པོའི་ཞིང་དུ་ཕྱིན་ཏེ་ཆོས་སྐུའི་རྒྱལ་ས་ཟིན་པའོ། །རིག་པའི་ཆོས་ཉིད་མ་རྟོགས་པའི་སེམས་ཅན་གཟུང་འཛིན་གཉིས་སུ་སྣང་སྟེ་རིག་པའི་དབྱིངས་དེ་ཉིད་ལས་མ་གཡོས་བཞིན་ཀུན་གཞིའི་ངང་དུ་འཁྲུལ་སྣང་འཁོར་བའོ། །མདོར་ན་སེམས་རིག་གཉིས་པོ་དེ་དཔེ་ཡི་རྣམ་པས་དབྱེ་ན། རིག་པ་ནི་ཚོགས་བརྒྱད་རླབས་ལྟ་བུས་མ་དཀྲུགས་པ་རྣལ་དུ་གནས་པ་རླབས་བྲལ་གྱི་རྒྱ་མཚོའི་ཆུ་ལྟ་བུ་དང༌། སེམས་ནི་རྣམ་རྟོག་གིས་དཀྲུགས་པ་ཆུ་བུར་བཞིན་ནོ། །རྟོག་མེད་གནས་པ་ཙམ་ནི་རིག་པ་མིན་ཏེ། མཉམ་བཞག་གི་སྐབས་འགྱུ་བ་མངོན་གྱུར་བ་འགགས་ནས་རྩེ་གཅིག་ཏུ་ཟིན་པ་སེམས་རྟོག་མེད་རིག་པ་ཡུལ་མེད་དུ་ཟིན་པ་རྟོག་མེད་གཉིས་གནས་པ་ཙམ་དུ་སེམས་རིག་མཚུངས་ནའང༌། འབྱེད་ཆོས་ནི་རིག་པ་རང་བཞིན་མེད་པའི་ཆོས་ཉིད་ཡོངས་ཤེས་ཀྱི་ངོ་བོར་བདེན་འཛིན་མཐའ་དག་དང་བྲལ་བ་ཟང་ཐལ་གྱིས་གསལ་ལ། སེམས་ནི་ལྟེང་ཀ་སྟེ་ཁྲོན་པ་ལྟ་བུར་འཁྱིལ་ཞིང་མ་རིག་པ་དང་མཚུངས་ལྡན་གྱིས་རིག་པ་རང་བྱུང་གི་སྒྲོན་མེ་སྒྲིབ་ནས་རྨོངས་ལ། རིག་པ་ནི་ཡིད་ཡུལ་དུ་མི་འཇུག་པ་སོ་སོ་རང་རིག་གི་ཡེ་ཤེས་ཏེ། དཔེར་ན་གནམ་སྟོང་ཟླ་བ་རང་འོད་ཕྱིར་མི་གསལ་ལ་གཏིང་གསལ་དང་འདྲ་བར་ཡེ་ཤེས་ལྔ་པོ་ལྷུན་གྲུབ་ཏུ་ཡོད་ཀྱང་ཡུལ་གྱི་རང་བཞིན་ལ་མི་རྟོག་གོ །སེམས་ནི་གནས་པ་ཙམ་ཡོད་ཀྱང་ཡུལ་སྣ་ཚོགས་པའི་རྗེས་སུ་འགྱུ་བས་བཅོ་ལྔའི་ཟླ་བ་རང་འོད་ཕྱིར་འཕྲོས་ཏེ་ཡུལ་ཐམས་ཅད་ལ་འདྲེས་པ་དང་མཚུངས་སོ། །ལྷག་མཐོང་གསལ་བའི་ཆ་ལ་མ་རིག་པའི་རྙོག་པ་མེད་པས་དྭངས་ལ། ཡུལ་གྱི་རྣམ་པས་གོས་པ་མེད་ལ་སྣང་སྟོང་ཟུང་དུ་འཇུག་པ་ནི་རིག་པའི་ཡོན་ཏན་ཡིན་ཏེ། དེ་ལས་གཞན་པའི་མྱང་འདས་གུད་དུ་མེད་ལ་ཚོགས་དྲུག་གི་ཡུལ་དང་ཀུན་ནས་འདྲེས་པ་ནི་སེམས་ཀྱི་ཁྱད་དེ། ཀུན་བྱེད་ལས། རང་བྱུང་ཡེ་ཤེས་ཡུལ་ལ་མི་རྟོག་པས། །རྣམ་པར་རྟོག་པའི་བག་ཆགས་གོས་མི་འགྱུར། །ཞེས་སོ། །དེ་བཞིན་རིག་པ་ཟང་ཐལ་དུ་ངོས་ཟིན་པའི་ངང་ལ་གནས་ན་དེ་ནི་ཆོས་ཉིད་རང་གི་གཤིས་ལུགས་ལ་ཡེ་ནས་གནས་པའི་ཤེས་རབ་བམ་ལྷག་མཐོང་སྟེ། ངོ་བོ་བསལ་བཞག་དང་བྲལ་བ། བསམ་གཏན་ནི་ཐབས་གཞན་ལ་མ་ལྟོས་པར་རང་གསལ་ངར་དང་ལྡན་པས་བྱིང་རྒོད་དང་བྲལ་བ་ཡིན་ཞིང༌། སེམས་ལམ་དུ་བྱེད་པའི་བསམ་གཏན་ནི། དམིགས་པའི་ཡུལ་ལྷ་སྐུ་སོགས་ལ་འཛིན་སྟངས་དང་བཅས་པས་རྩེ་གཅིག་ཏུ་འཇོག་པ་ཡིན་པས་བསྒོམ་པའི་ཏིང་ངེ་འཛིན་དང་སྔར་གཏན་ལ་ཕབ་པའི་ལྟ་བའི་དོན་དེ་གཉིས་ཡུལ་བསྒོམ་བྱ་ལྟ་བའི་རང་བཞིན་རྟེན་དང་ཡུལ་ཅན་སྒོམ་བྱེད་ཏིང་ངེ་འཛིན་བརྟེན་པར་ཟུང་དུ་འབྲེལ་བས་ན། གཟུང་འཛིན་དང་བྲལ་བའི་རིག་པའི་སྒྲིབ་བྱེད་དུ་སོང་ནས་གནས་སྐབས་རྣམ་རྟོག་ངལ་གསོ་བའི་བསྟི་གནས་ཙམ་ལས་ཆོད་ཆུང་བ་ཉིད་དེ། རྫོགས་ཆེན་ཡེ་ཤེས་ནམ་མཁའ་དང་མཉམ་པའི་རྒྱུད་ལས། བསམ་གཏན་ཤེས་གཞི་བྱར་མེད་དང༌། །རྫོགས་ཆེན་ལྷག་མཐོང་རིག་པ་གཉིས། །འདྲ་དང་ནོར་བས་གོལ་ཏེ་འགྲོ། །ཞེས་སོ། །རིག་པ་ཡུལ་ལ་ཤར་བ་སྟེ་ཐུགས་རྗེའི་རྩལ་མདངས་མ་འགགས་པར་སྣང་བ་ཡིན་ཀྱང༌། རང་ངོ་དང་རྩལ་ཤར་བ་གཉིས་ཐ་དད་དུ་གྱེས་ཏེ་ཡུལ་གྱི་རྗེས་སུ་རྟོག་པ་མཐུད་ནས་རྩ་བ་ཆོད་པ་མིན་ཕྱིར་ཕྱི་ཚོགས་དྲུག་གི་ཡུལ་དུ་མ་དཔྱད། ནང་སེམས་སུ་མ་བརྟགས། བར་དུ་ཆོས་ཉིད་སྐྱེ་མེད་ལ་གཞག་བྱ་འཛིན་སྟངས་དང་བྲལ་བའི་ཆོས་ཉིད་བློ་འདས་ཀྱི་རིག་པ་རྗེན་པར་བུད་པས་གཞན་དུ་མི་འགྱུར་བའི་ཕྱིར། སྣང་བ་ཡི་ཟིལ་གྱིས་མི་ནོན་པ་དཔེར་ན་དངུལ་ཆུ་སར་ལྷུང་ན་རྡུལ་དང་མི་འདྲེ་བ་དང་འདྲ་ལ། སེམས་ནི་གཟུང་བའི་ཡུལ་ལ་རང་ངོ་མ་ཤེས་པ་འཛིན་པའི་ཆ་དང་བཅས་པ་ཡི། རྣམ་རྟོག་སྣ་ཚོགས་པ་ཉེ་བར་ལེན་པའི་ཕྱོགས་དང་འདྲེས་ནས་ལས་སོགས་པར་འགྱུར་ཏེ། ཀློང་དྲུག་ལས། རང་རིག་བསམ་པ་བྲལ་བ་དང༌། །སེམས་ཀྱི་བྱུང་ཚོར་སྣ་ཚོགས་གཉིས། །འདྲའོ་འདྲའོ་ནོར་ར་རེ། །ཤེས་རབ་རང་རྩལ་རྫོགས་པ་དང༌། །ཡིད་ཀྱི་དྲན་བསམ་སྣ་ཚོགས་གཉིས། །འདྲའོ་འདྲའོ་ནོར་ར་རེ། །ཞེས་སོ། །དེ་ཡང་ངོ་བོ་རིག་པ་ལ་བཞག་དུས་སེམས་གང་དགར་རང་སངས་ལ་བསྐྱུར་བ་ཡིན་ནོ། །རང་བཞག་གནད་འདི་དོ་གལ་ཤིན་ཏུ་ཆེ་བ་ཡིན་གསུངས། རིག་པ་ནི་སེམས་ཀྱི་ཆོས་ཉིད་ཡིན་པས་ན། སེམས་ཅན་གྱི་དུས་ན་སེམས་དེ་ཉིད་གཞན་དུ་མ་སྤངས་བར་དེའི་ཁྱབ་བྱེད་དུ་ཡོད་ཀྱང༌། སེམས་དང་རིག་པ་གཉིས་སྣང་མུན་བཞིན་ལྷན་ཅིག་མི་འདུ་བས། རིག་པ་ངོ་འཕྲོད་དེ་རང་བབས་སུ་གནས་སུ་རྒྱུན་བསྲིང་ན་བཟུང་བའི་ཡུལ་དང༌། དེ་འཛིན་པར་བྱེད་པའི་རྣམ་པར་ཤེས་པ་མ་རིག་པ་དང་མཚུངས་ལྡན་གྱི་ཤེས་སྒྲིབ་ཅན་རང་དང་རྫས་གཅིག་པའི་ཆགས་སོགས་ཉོན་མོངས་རྣམས་ཀྱང༌། ཡུལ་དང་ཡུལ་ཅན་གྱི་གཟུང་འཛིན་དེ་དང་ལྷན་ཅིག་སྦྲན་ནས་ཏེ་གཅིག་གིས་གཅིག་ལ་སྐད་བཏང་བ་བཞིན་རིག་པ་ལ་བྲོས་ནས་ནམ་མཁར་སྤྲིན་དེངས་པ་བཞིན་རང་དེངས་ལ་འགྲོ་བ་ཡིན་ནོ། །དེ་ལྟར་བྲོས་ཤིང་འགགས་པས་གཟུང་འཛིན་གྱི་རྣམ་པར་རྟོག་པ་དང་ཉོན་མོངས་པའི་བཙོན་ར་ཤིན་ཏུ་བརྒལ་དཀའ་བ་དེ་ལས། ཚེགས་མེད་དུ་ཐར་པ་ངེས་པར་འབྱིན་པར་བྱེད་པ་ཡི་མན་ངག་སྡེ་པ་ཡི་ཁྱད་པར་གྱི་ཆོས་ཡིན་ཏེ། ལམ་འདི་ལས་གཞན་དུ་གྱུར་པ་རྣམས་ལ་མན་ངག་འདི་དང་མི་ལྡན་པའི་ཕྱིར་ཏེ། འདི་ལྟར་ཉོན་མོངས་པའི་ཚོགས་ཐམས་ཅད་ཉན་ཐོས་དང་རང་རྒྱལ་རྣམས་ཀྱིས་སྤོང་ཞིང༌། བྱང་སེམས་ཀྱིས་སྟོང་ཉིད་སོགས་གཉེན་པོས་འདུལ་བ་དང༌། ཨ་ནུ་མན་ཆད་ཀྱི་སྔགས་སྤྱིར་ཉོན་མོངས་ལམ་དུ་བྱེད་པའི་ཐབས་གཏུམ་མོ་སོགས་ལ་བརྟེན་ནས་བདེ་སྟོང་དགའ་བཞིའི་ཡེ་ཤེས་བསྐྱེད་པའི་ལམ་ལ་གཏོང་ཀྱང༌། སྤང་གཉེན་གཉིས་མཉམ་དུ་མི་འབྱུང་བའི་ཕྱིར། མི་མཉམ་ན་ལམ་བྱེད་ཀྱང་མི་རིགས་སོ། །སེམས་སྡེར་རྟོག་པ་གང་སྐྱེས་ཐམས་ཅད་ངོས་ཟིན་ནས་གཤིས་ཐོག་ཏུ་གྲོལ་བར་འདོད་ཀྱང་ངོས་ཟིན་མཁན་དེ་སེམས་ཡིན་དགོས་ན། སེམས་རང་གིས་རང་མི་མཐོང་བས་མི་གྲོལ། ཀློང་སྡེར་སྣང་སེམས་ཐམས་ཅད་རིག་པའི་རྒྱན་དུ་བལྟས་ནས་ཆོས་ཉིད་གཅིག་ཏུ་མཉམ་པར་བཞག་ནས་དག་པར་འདོད་ཀྱང་རིག་པ་ནི་ཡེ་ཤེས་ངོ་བོ་ཡིན་པས་དེའི་ངང་ལ་སེམས་མེད་པའི་ཕྱིར། ཡེ་ཤེས་ཀྱིས་སེམས་མི་མཐོང་བས་དེ་ལྟར་དབྱིངས་ཀྱི་ངང་དུ་འཇོག་པ་སོགས་དག་བྱེད་ཀྱི་རྩོལ་བ་གང་ཡང་མི་དགོས་པ། རིག་པའི་ཆོས་ཉིད་ཀྱི་ཀློང་ན་ཆོས་ཅན་རང་ངོས་ནས་སྟོང་པ་དང༌། ཆོས་ཉིད་གཞན་ངོས་ནས་སྟོང་པའི་འདོད་ཞེན་གྲུབ་མཐའ་ཐམས་ཅད་རང་ཚུགས་ཞིག་སྟེ། སྤང་གཉེན་གང་ཡིན་ཀྱང་རང་གྲོལ་རྗེས་མེད་དུ་གྱུར་པ་ཤིན་ཏུ་ངོ་མཚར་བ་གཞན་ལས་ཁྱད་པར་དུ་འཕགས་པའོ། །དེ་བཞིན་མ་དག་པའི་རྟེན་ཀུན་གཞི་དང་ནི། ཡེ་ཤེས་ཀྱི་རྟེན་ཆོས་སྐུ་གཉིས་ཀ་དག་སྟོང་པའི་དབྱིངས་སུ་གཅིག་ཀྱང༌། ཆོས་སྐུ་ནི་རྒྱ་ཆེ་ལ་གཏིང་ཟབ་པ་རླབས་བྲལ་གྱི་རྒྱ་མཚོ་དང་འདྲ་ལ། ཀུན་གཞིའི་རྣམ་ཤེས་ནི་རིག་པ་དེ་ཡི་སྒྲིབ་ཆ་སྟེ། ཀུན་གཞི་ཞེས་དགེ་བའི་བག་ཆགས་ཀྱི་རྟེན་མི་དགེ་བའི་བག་ཆགས་རང་ཉིད་དག་བྱེད་ལྕགས་ཀྱི་བཙའ་ལྟ་བུ་དང༌། མི་དགེ་བའི་བག་ཆགས་ནི་ཆོས་སྐུའི་སྒྲིབ་བྱེད་ཙམ་ལས་ཀུན་གཞི་གཞན་ན་མེད་དོ། །གྲུ་པ་བཞིན་དུ་དགེ་མི་དགེའི་ལས་ལ་བརྟེན་ནས་འཁོར་འདས་གཉིས་ཀར་ལྡིང་ངོ༌། །གཞིའི་གནས་ལུགས་འོད་གསལ་དེ་ཉིད་ནས་ངོ་མ་ཤེས་ན་འཁྲུལ་པ་ཡིན་ལ། ངོ་ཤེས་ན་གྲོལ་བའི་ཆོས་དེ་ཉིད་ཀྱི་མཚན་ཉིད་ཀྱང༌། དཔེར་ན་རྨི་ལམ་སྣ་ཚོགས་ཀྱི་རྟེན་གཉིད་དུ་སོང་བ་དང༌། རྨི་ལམ་རྒྱུན་ཆད་ནས་དེ་ལས་སད་པ་བཞིན་ཏེ། འདི་ལྟར་ཀུན་གཞིའི་ངང་དུ་འཁྲུལ་པ་ན་ཡེ་ཤེས་ཀྱི་མཁྱེན་ཆ་མ་རིག་པས་སྒྲིབ་པ་ནི་སྒོ་ལྔའི་དབང་པོ་ནང་དུ་སྡུད་དེ་ཉམས་པའི་གཉིད་སྟུག་གི་གནས་སྐབས་ལྟར་ལ་མེད་སྣང་སྣ་ཚོགས་ལ་སྤྱོད་པ་ནི་དཔེར་ན་རྨི་ལམ་བཞིན་ནོ། །སྒྲིབ་པ་ལས་གྲོལ་ཏེ་ཆོས་སྐུའི་རང་ཞལ་མངོན་དུ་མཇལ་པ་ནི། གཉིད་དེ་ལས་སད་པའི་ཚེ་སྒོ་ལྔའི་ཡུལ་མངོན་སུམ་དུ་མཐོང་བའི་གནས་སྐབས་དང་འདྲའོ། །ཐོག་མའི་འཁོར་འདས་གང་དུའང་མ་ཕྱེ་བའི་གྲོལ་འཁྲུལ་གང་གིའང་རྒྱུར་ངེས་པ་མེད་པ་གཞི་ཡི་རིག་པ་ཀ་དག་གི་ངང་ནས་ལྷུན་གྲུབ་ཀྱི་གདངས་འགགས་མེད་དེ་དང༌། ལམ་མཐར་ཕྱིན་ཚེ་དག་པ་གཉིས་ལྡན་གྱི་གྲོལ་སའི་ཀ་དག་གློ་བུར་གྱི་དྲི་མ་བྲལ་བ་གཉིས་པོ་ནི། ངོ་བོ་རང་བཞིན་ཐུགས་རྗེ་གསུམ་ལྡན་གྱི་དབྱིངས་ཀྱི་ངོ་བོ་ལ་འཕོ་འགྱུར་མེད་པས་རྫས་སུ་གཅིག་ཀྱང༌། སླད་ཀྱི་འཁྲུལ་པའི་གཞི་བྱེད་དང་མི་བྱེད་ཁྱད་པར་ནི། ཐོག་མའི་གཞི་ལྷུན་གྲུབ་ནི་མ་རིག་པ་ཆ་དང་བཅས་པའི་འཁོར་འདས་གཉིས་ཀའི་འཆར་གཞི་ཡིན་པས་འཁྲུལ་གཞི་བྱེད་ལ། གྲོལ་གཞི་ལ་མ་རིག་པ་མེད་པས་འཁྲུལ་གཞི་མི་བྱེད་པས་དེ་གཉིས་ཀྱི་ཁྱད་པར་ཤེས་པ་གཅེས་སོ། །ཚུལ་དེ་བཞིན་དབྱིངས་ཀྱི་ཡོན་ཏན་མཐར་ཕྱིན་པས་གྲོལ་ས་ཀ་དག་ནང་གསལ་གྱི་ཡེ་ཤེས་དེ་དང༌། ད་ལྟའི་རྣལ་འབྱོར་པའི་མཉམ་གཞག་གི་ངོ་བོ་བརྗོད་མེད་ཀྱི་རྟོགས་པ་ལམ་གྱི་རིག་པ་ཀ་དག་ངང་ལ་མཉམ་པར་བཞག་པ་གཉིས་ཀྱང་གཉིས་སྣང་དབྱིངས་སུ་ནུབ་སྟེ་རང་བཞིན་སྤྲོས་པ་དང་བྲལ་བས་རྒྱ་གར་ཡང་མ་ཆད་ཅིང་སྣང་སྟོང་ལ་སོགས་པའི་ཕྱོགས་སུ་ལྷུང་བ་མེད་པར་མཉམ་པ་ཙམ་ཡིན་ནའང་གྲོལ་ས་ཀ་དག་གི་དབྱིངས་ཉིད་ནི་མ་དག་པའི་རླུང་སེམས་བག་ཆགས་ཀྱི་ཆ་དང་བཅས་པ་རྣམ་པར་བྱང་ཞིང་ལམ་བསྒོམ་སྟོབས་ཀྱིས་དག་པར་འགྱུར་བའི་ཕྱིར་འཁོར་བའི་འཁྲུལ་སྣང་མེད་པར་མ་ཟད་ཡེ་ཤེས་ཀྱི་གསལ་ཆའང་དབྱིངས་སུ་ཐིམ་ནས་མྱ་ངན་ལས་འདས་པའི་སྣང་བ་ཡང་མེད་པར་ཀ་དག་གི་རིག་པ་ཆོས་སྐུའི་ངང་ལས་མི་གཡོ་སྟེ་འཁོར་འདས་གང་དུའང་མི་གནས་སོ། །ལམ་དུས་སུ་རླུང་སེམས་མ་དག་པའི་ཆ་གཏན་ཟད་དུ་མ་སོང་བས་རྐྱེན་དབང་གཟུང་འཛིན་དང་འགྲོགས་ཤིང༌། གཉུག་མའི་རིག་པ་སྒྲིབ་བྱེད་སེམས་དང་སེམས་བྱུང་དྲི་མའི་ཆས་རིག་རྩལ་བསླད་ཅིང་ཁུར་བས་རིག་པ་ཀ་དག་གི་དབྱིངས་ལ་གཉིས་སྣང་ནུབ་པའི་ཚུལ་གྱིས་དངོས་སུ་གནས་པ་ནི་རེས་འགའ་ཙམ་མོ། །དེ་ལྟ་ནའང་སེམས་རང་བབས་སུ་འཇོག་པར་བསླབ་ན་ནམ་ཞིག་གི་ཚེ་ན་འཛིན་སྟངས་དང་བྲལ་བའི་རིག་པ་རྟོགས་ནུས་སོ། །དེ་བཞིན་དུ་ད་ལྟ་ལམ་འདིར་ཞུགས་ནས་ཉམས་ལེན་ལ་བརྩོན་ཞིང་ཁྱད་པར་ལྷུན་གྲུབ་ཐོད་རྒལ་གྱི་ཉམས་ལེན་ལ་གོམས་པ་བརྟན་པོ་རྣམས་བར་དོ་དང་པོར་མ་གྲོལ་ཀྱང་ཆོས་ཉིད་བར་དོའི་སྐབས་གཞི་ལ་ལྷུན་གྲུབ་ཏུ་ཡོད་པའི་རིག་གདངས་ལྷུན་གྲུབ་ཆེན་པོའི་ལྷ་སྐུ་ཞིང་ཁམས་སོགས་སྣང་བ་རྣམས་བསམ་གཏན་གྱི་ཞག་གྲངས་སུ་རིམ་གྱིས་འཆར་བ་དང༌། ད་ལྟའི་རྟོག་བཅས་བསྐྱེད་རྫོགས་བསྲེ་འཕོ་ལ་གོམས་པའི་སྟོབས་ཀྱིས་སྲིད་པ་བར་དོར་ལྷ་ཡི་སྐུ་སྒྱུ་མ་ལྟ་བུར་ལྡང་ནུས་པའི་སྒྱུ་ལུས་གཉིས་པོ་བར་དོར་ལྷ་སྐུར་སྣང་བ་ཙམ་དུ་མཚུངས་ཀྱང༌། སྣང་བ་ཞིང་ཁམས་སུ་ཤར་བ་དེ་གཉིས་སྔ་མ་ནི་འདུས་མ་བྱས་ཀྱི་རང་གདངས་རྩོལ་མེད་དུ་ཤར་བ་ཡིན་པས་རྒྱ་ཆེ་ཞིང་རང་སྣང་དུ་ངོ་ཤེས་པ་ཙམ་གྱིས་ནང་དབྱིངས་ཐོག་ཏུ་གྲོལ་བར་འགྱུར་བ་དང༌། ཕྱི་མ་ནི་བག་ཆགས་བཟང་གོམས་རླུང་སེམས་རྩལ་ལས་སྣང་བ་ཡིན་པས་གོང་མར་ལྟོས་ན་རྒྱ་ཆུང་ཞིང༌། ད་དུང་ལམ་གྱི་ལྷག་མ་བགྲོད་དགོས་པས་མི་གྲོལ་བའི་ཁྱད་པར་ཡོད་པ་ཤེས་དགོས་སོ། དེ་ལ་ལས་དང་པོ་པས་རྟོགས་པ་བླ་མའི་ཐུགས་རྗེས་ངོ་སྤྲོད་པ་དེ་ས་དང་པོའི་རྟོགས་པ་ཡིན་ལུགས་དཔེར་ན་ཤེལ་གདུང་དུ་བལྟས་པའི་ཚེ་རྒྱང་རིང་པོ་ན་ཡོད་པ་རྣམས་དྲུང་ན་ཡོད་པ་ལྟར་སྣང་བ་ལྟ་བུ་ཡིན་ཏེ་རང་སྟོབས་ཀྱི་ཚོགས་བསགས་པ་དང་སྒྲིབ་པ་དག་པ་ཏེ་རླུང་སེམས་སོགས་ཀྱི་ཁྱད་པར་དུ་རྫོགས་པ་ཆེན་པོའི་ལམ་འདིར་ཞུགས་པའི་ཉམས་ལེན་གྱི་གནད་གོམས་མཐར་ཕྱིན་པས་དམ་ཚིག་རྣམ་དག་བསྲུང་བའི་སྐལ་པ་ཅན་ཞིག་ཡིན་ན། ས་བཅུའི་བར་གྱི་རང་རང་གི་སྣང་བས་བསྡུས་པའི་བྱང་སེམས་རྣམས་ལ་སངས་རྒྱས་ལོངས་སྐུ་དེ་མཐོང་བ་ལ་ཡུན་རིང་འཐོགས་པ་མ་ཡིན་ཏེ། ལོངས་སྐུ་དེ་ཡི་དཔེ་བྱད་ནི་མེ་ལོང་དུ་ཤར་བ་ལྟར་རང་སྣང་ལྷུན་གྲུབ་ཀྱི་སྒོ་ལས་སངས་རྒྱས་ཀྱི་ཐུགས་རྗེས་རང་བཞིན་སྤྲུལ་པའི་ཞིང་ཁམས་ལྷག་པར་བཀོད་པ་ལ་ཚེ་འདི་བརྗེས་མ་ཐག་ཏུ་སྲིད་པ་བར་དོར་ཆོས་ཉིད་བདེན་པའི་བྱིན་རླབས་ཀྱི་མཐུས་ལམ་གྱི་ལྷག་མ་བགྲོད་ནས་མྱུར་དུ་གདོད་མའི་དབྱིངས་སུ་རྨི་ལམ་སད་པ་ལྟར་འགྲོའོ། །ཀོད་པ་ཆེན་པོ་ལས། སྙིགས་མ་ལྔ་བརྒྱ་དུས་ཀྱི་ཐ་མ་ལ། །གསང་བའི་སྙིང་པོ་འདི་ནི་མི་ཡུལ་སྣང༌། །དེ་རྗེས་འཛིན་པའི་གང་ཟག་སྐལ་པ་ཅན། །སྙིང་པོ་འདི་ནི་སུ་ལ་སྣང་གྱུར་པ། །དེ་དག་རྣམས་ནི་མི་འགྱུར་ས་ལ་འདའ། །གལ་ཏེ་སྙིགས་མ་ཚེ་ཐུང་ནད་མང་བས། །སྙིང་པོའི་དོན་འདི་གདིང་དུ་མ་གྱུར་ཀྱང༌། །འདི་ཉིད་མཐོང་བས་དབུགས་ཆེན་ཉིད་འབྱིན་པ། །བཅུ་གཅིག་ཀུན་ཏུ་འོད་དེ་སྤྲུལ་པའི་ཞིང༌། རྫུས་སྐྱེས་དག་པས་མངལ་གྱི་རྒྱ་ལས་གྲོལ། །ཞེས་སོ། །ཁྱད་ཆོས་དང་ལྡན་པ་དེ་ཡི་ཕྱིར་ན་རང་བཞིན་རྫོགས་པ་ཆེན་པོའི་ལམ་འདི་ནི་གསང་སྔགས་རྡོ་རྗེ་ཐེག་པའི་ལམ་ཐམས་ཅད་ལས་ཉེ་ལམ་མཆོག་ཏུ་གྱུར་པ་སྟེ། གློ་བུར་གྱི་དྲི་མ་གཤིས་ལ་མ་ཞུགས་པས་གཞི་ལ་འཆིང་གྲོལ་མེད་པ་གདོད་ནས་སྤྲོས་པ་ཐམས་ཅད་ལས་གྲོལ་བའི་རིག་པ་ཀ་དག་དེའི་ངོ་བོ་ནི། རྣམ་ཐར་སྒོ་གསུམ་གྱི་རང་བཞིན་ཏེ་ཡེ་ནས་སྟོང་པ་སྤྲོས་བྲལ་ངོ་བོ་སྟོང་པ་ཉིད་ལ་ཡོད་པ་ལྟ་ཅི་མེད་པའང་བྲལ་བ་བསམ་བརྗོད་ཡུལ་ལས་འདས་པའོ། །ཚད་དབྱིབས་གཉིས་ཆོས་སོགས་ལས་འདས་པས་ན་མཚན་ཉིད་བློ་ཡི་བརྗོད་པའི་ཡུལ་ལས་འདས་པས་བློ་རེག་གི་ཐུག་པ་སྤངས་པ། འབྲས་བུའི་ཆོས་སྐུ་དང་ཡེ་ཤེས་སོགས་ཉི་མ་ལ་ཟེར་ལྟར་རང་ཆས་ཡོད་པས་བླང་དོར་བྱ་རྩོལ་གྱི་འབྲས་བུ་ལ་སྨོན་པ་མེད་པ་རང་བབས་སུ་བཞག་པ་ལ་རིག་པའི་ཡོན་ཏན་ཐམས་ཅད་རྫོགས་པའོ། །རིག་པའང་ཤེས་བྱའི་ཡུལ་གཟུང་འཛིན་ལམ་ལ་མི་གནས་པས་ཕྱིར་ན། ང་དང་ང་ཡིར་འཛིན་པའི་དངོས་འཛིན་གྱི་ཆོས་ཡོད་མེད་ཀྱི་མཐའ་དང་བྲལ་བའོ། །དེ་ལྟར་ངོ་འཕྲོད་པའི་ལྟ་བ་དེའི་ངང་ལ་འཇོག་པ་ལས་གཞན་སྒོམ་པ་པོ་དང་བསྒོམ་པར་བྱ་བ་ཞེས་ལྟ་བ་ཐ་དད་པའང་མེད་དེ། ཤེས་པ་འདི་ཀའི་ངང་ལ་མ་བཅོས་རྣལ་མར་རང་བབས་སུ་བཞག་ན། ཟང་ཐལ་དུ་རིག་པའི་གནས་ལུགས་རྗེན་པར་མཐོང་ངོ༌། །མཐོང་བ་དེ་ཡི་རང་གི་ངོ་བོ་རྣམ་རྟོག་བཟང་ངན་ལས་གྲོལ་ཏེ་རྐྱེན་གྱིས་གཞན་དུ་མི་འགྱུར་ན། མ་རིག་རྣམ་རྟོག་གི་འཛིན་པས་སྲིད་པར་འཁྲིད་པའི་ལས་གསོག་པར་མི་ནུས་སོ། །འདི་ལྟར་ཕྱི་རོལ་ཡུལ་གཟུགས་སོགས་དང༌། དེར་འཛིན་གྱི་བློས་བདག་ཏུ་ཞེན་པའི་མ་རིག་པ་དང༌། དེ་ལས་བྱུང་བའི་རྟོག་ཚོགས་རྣམས། དབང་ཕྱུག་སོགས་གཞན་བྱེད་པ་པོས་མ་བྱས་ཏེ་གློ་བུར་དུ་སྐྱེས་པའི་སེམས་རྟོག་གིས་རྒན་མོས་སྟག་བསྒོམ་པ་ལྟ་བུ་དེ་ཉིད་ལ་ཞེན་པ་དང་རྟོག་གེའི་བག་ཆགས་མཐུ་བརྟས་པ་ལས་གྲུབ་པའི་ཕྱིར། །རྟེན་པར་བྱེད་པའི་སྣང་བ་འདི་དག་ཐམས་ཅད་གཞི་སེམས་ཉིད་ནམ་མཁའ་ལྟར་ཅིར་ཡང་མ་གྲུབ་པའི་ངང་ལས་རང་གདངས་འགག་མེད་ཀྱི་སྟོང་གཟུགས་ཅིར་ཡང་ཤར་བ་དང༌། རྩ་བ་སེམས་ཉིད་རང་གི་ངོ་བོ་གྲུབ་པ་མེད་བཞིན་མ་རིག་པས་བསླད་པ་ལས་འཁོར་འདས་ཀྱི་ཆོས་ཐམས་ཅད་སྐྱེས་པ་ལྟར་སྣང་ཡང་སྐྱེས་ཙམ་ཉིད་ལས་རིག་པའི་ཆོས་ཉིད་སྐྱེ་བ་མེད་པར་རྫོགས་ཏེ། མུ་ཏིག་ཕྲེང་བ་ལས། ཆོས་སྐུ་ནམ་མཁའ་ལྟ་བུ་ལ། །གློ་བུར་རྣམ་རྟོག་སྤྲིན་གྱིས་བསྒྲིབས། །མ་འཁྲུལ་བ་ཡི་ཆོས་ཉིད་ཀྱང༌། །བློ་ལ་འཁྲུལ་པའི་ཚུལ་དུ་སྣང༌། །ཞེས་སོ། །དེ་ལྟར་ལྟ་སྒོམ་སྤྱོད་གསུམ་ཟུང་འཇུག་ངང་ལ་གོམས་སུ་འཇུག་པ་ལས་གཞན་པའི་རྟོགས་པར་བྱ་བའི་འབྲས་བུ་ཞེས་པ་ཡོད་པ་མ་ཡིན་པས་བསྒྲུབ་མི་དགོས་ཏེ་དེ་ཉིད་ཀློང་དུ་ཕེབས་ཙ་ན། ཕྱི་ཡུལ་མེད་དུ་རྟོགས་པས་གཟུང་བའི་ཆོས་དག །ནང་ཡུལ་ཅན་དུ་མི་གནས་པས་འཛིན་པ་གཞི་མེད་རྩ་བྲལ་དུ་སོང༌། རྟེན་གཞི་མེད་པའི་རིག་པ་ལ་བློས་མཚོན་དུ་མེད་པས་ནམ་ཡང་འཁྲུལ་མི་ཤེས་པའི་ཚེ་ན་གསུང་རབ་ཀློག་པ་དང༌། ཚིག་དོན་བློ་ལ་འཛིན་པ་དང༌། དམིགས་པ་ལ་རྩེ་གཅིག་ཏུ་ཏིང་ངེ་འཛིན་བསྒོམ་པ་དང༌། བསྟན་བཅོས་སོགས་ཀྱི་དོན་ལ་སེམས་ཤིང་བརྟགས་པ་ལ་སོགས་པ་མཐའ་དག་ཀུན་རྟོག་གི་བློ་ཡི་གྲུབ་མཐའ་ཐ་སྙད་བཅོས་མའི་ཆོས་ལ་ལྟོས་མི་དགོས་པས། ཐུན་དང་ཐུན་མཚམས་ཀྱི་དབྱེ་བ་མེད་པར་ལྟ་སྒོམ་སྤྱོད་པའི་ཁྲིགས་ཞིག །དྲན་པ་ཆོས་ཉིད་དུ་སངས་པས་ཆེད་དུ་བསྒོམ་པས་གཉེན་པོའི་ཆོས་ཟད། རིག་པ་ཆོས་སྐུར་ཤེས་པས་སངས་རྒྱས་དང་སེམས་ཅན་དུ་ཡེ་ནས་མ་གྲུབ་པའི་གདེང་རྙེད་པར་གྱུར་པ་ན། རང་རིག་གཟུང་འཛིན་དང་བྲལ་བ་དེ་ལས་གཞན་ན་ཡིད་སྨོན་གུད་ན་ཚོལ་དུ་མེད་པའི་ཆོས་ཉིད་ལ་དུས་གསུམ་གྱི་སངས་རྒྱས་ཐམས་ཅད་ཀྱི་དགོངས་པ་རྫོགས་པར་འགྱུར་བས་ན་འབྲས་བུ་ནི་རང་གི་རིག་པ་དེ་ཉིད་དོ། །ཁྲེགས་ཆོད་ལས་ཀྱང་ཁྱད་པར་བ་བླ་ན་མེད་པའི་ཐོད་རྒལ་གྱི་ལམ་ནི། བསྒོམ་དུས་ཁྲེགས་ཆོད་ཀྱི་ལྟ་བ་དེ་ལ་ངེས་པ་རྙེད་ནས་བཞུགས་སྟངས་དང་ནམ་མཁར་གཟིགས་སྟངས་སོགས་ཀྱིས་གནད་གཅུན་བས་རྣམ་རྟོག་རགས་པ་འགགས་ཤིང་ཕྲ་བ་རང་ཡལ་དུ་སོང་སྟེ། ཐོག་མ་ནས་དབྱིངས་ཀྱི་སྣང་བ་འོད་ལྔ་དང་རིག་གདངས་རྡོ་རྗེ་ལུ་གུ་རྒྱུད་ནས་ལྷ་སྐུའི་བར་དབང་པོའི་མངོན་སུམ་དུ་མཐོང་བས་སྐུ་ཐིག་ལེ་ལ་སོགས་སྣང་བ་ལ་མ་ཞེན་ན་གོལ་བའི་གདངས་བྲལ་ནས་གཞན་སྟོང་ཉིད་གཤིས་ཤོར་གྱི་གོལ་ས་ཉུང་ཞིང༌། ཕྱི་འབྱུང་ས་རྡོ་རི་བྲག་སོགས་ཐ་མལ་གྱི་ཡུལ་སྣང་གི་བག་ཆགས་ཐོག་མེད་ནས་བཞག་པའི་རྡོས་བཅས་དྲི་མ་ངང་གིས་ཟད་པའི་དངོས་པོ་ཕྱི་ནང་ཐམས་ཅད་ལ་ཐོགས་མེད་ཟང་ཐལ་དུ་ཐར་བ་སོགས་འབྱུང་ཆེན་གྱི་ཡུལ་ཐམས་ཅད་ཡེ་ཤེས་འོད་གསལ་ཆེན་པོར་དྭངས་པར་བྱེད་པའི་ལམ་སྣང་བར་རྫོགས་ཤིང་མངོན་དུ་བྱེད་པ་ཡིན་པས། ནང་རང་གི་ཕུང་པོས་བསྡུས་པའི་འབྱུང་བ་རྣམས་ཁྲེགས་ཆོད་ཚད་དུ་ཕྱིན་པའི་སྟོབས་ཀྱིས། རྡུལ་ཕྲན་ཉིད་དུ་འགྲོ་བ་ཙམ་ལས་འོད་ལུས་སུ་དྭངས་པར་མ་ནུས་པའི་ཕྱིར་འཕོ་བ་ཆེན་པོའི་སྐུ་མི་འཐོབ་པའང༌། འཕོ་བ་ཆེན་པོ་ཟུང་འཇུག་གི་ཡེ་ཤེས་སྐྱེ་འཆི་བགྲེས་རྒུད་དང་བྲལ་བ་རྡོ་རྗེའི་སྐུར་སྙིགས་མའི་དྭངས་མ་ལུས་ངག་ཡིད་གསུམ་སྐུ་གསུང་ཐུགས་སུ་སྨིན་ནས་རྟེན་དེས་གཞན་དོན་འཁོར་བ་མ་སྟོངས་བར་དུ་མཛད་པ་ནི། རྒྱལ་དབང་པདྨ་བི་མ་ལ་ཛྙཱ་ན་སཱུ་ཏྲ་རྣམས་ལྟ་བུའོ། །རྒྱུ་མཚན་དེའི་ཕྱིར་ན་ཐེག་པ་འོག་མར་རང་གི་སྡེ་པས་ཡིད་དཔྱོད་ཀྱི་ལམ་ལས་འདས་པ་སེམས་ཀློང་སོགས་ལྟ་བ་སེམས་ཉིད་མཐའ་བྲལ་དུ་གཏན་ལ་ཕབ་པས། སྒོམ་པ་དེའི་ངང་དུ་མ་བཅོས་པར་འཇོག་པ་ལས་ལྷ་བསྒོམ་སོགས་མི་དགོས་ལ། སྒོམ་པ་གང་ཤར་རང་གྲོལ་དུ་འགྲོ་བས་དགག་སྒྲུབ་མི་དགོས་པར་སྤྱོད་པ། འབྲས་བུ་གཞན་དུ་མི་རེ་བས་ཡེ་ནས་འབྲས་ཆོས་སྐུ་དང་ཡེ་ཤེས་རང་རྩལ་དུ་རྫོགས་པས་འོག་མ་ཀུན་དང་ཁྱད་ཞུགས་པའི་ཁྱད་ཆོས་ཀྱི་མཚན་ཉིད་གནད་རྣམ་པ་བདུན་ཏེ། བརྩོན་འགྲུས་ཆེ་ཆུང་དབང་པོ་རྣོ་᪔ᝋམེད་པའི་གནད་དང༌། དེ་བཞིན་མངོན་སུམ་བལྟར་ཡོད་པས་ཡིད་དཔྱོད་ལ་མི་ལྟོས་པ་དང༌། དོན་ཇི་བཞིན་མཐོང་བས་ཚིག་ལ་མི་ལྟོས་པ་དང༌། རང་གསལ་མངོན་དུ་གྱུར་པས་གཞི་ལམ་འབྲས་བུ་དུས་ལ་མི་ལྟོས་པ་དང༌། རྒྱུ་འབྲས་བཟང་ངན་ལ་མི་ལྟོས་པས་འབད་རྩོལ་བླང་དོར་མེད་པ་དང༌། རང་བྱུང་གི་འོད་གསལ་ཁོང་ནས་འཆར་བས་ན་སོ་ལ་རྒན་གཞོན་མེད་པ་དང༌། སྐུ་གསུམ་ལམ་སྣང་དུ་རྫོགས་ནས་ཀ་དག་གི་ཀློང་དུ་ལྷུན་གྲུབ་རིག་པའི་གཏན་སྲིད་ཟིན་པའི་གནད་བདུན་ལེགས་པར་ཕྱེད་པ་མན་ངག་འདི་ལྟ་བུ་དང་འཕྲད་པའི་དོན་ཡིན་པས་འབད་པར་གདམས་སོ། །དེ་ལྟ་ཡིན་མོད་ཀྱི་འོན་ཀྱང་བདག་དང་བདག་གིར་འཛིན་པ་དང་བཅས་པའི་ཚོགས་བརྒྱད་གློ་བུར་བ་ནང་གི་འཁྲུལ་པའི་རྐྱེན། ཆོས་དབྱིངས་ཀ་ནས་དག་པའི་ཀློང་དུ་མ་ནུབ་པར་ཏེ་ནུབ་པར་བྱེད་མི་ནུས་པའི་སྣང་བ་ཡུལ་གྱི་བློ་ཅན་རྣམས་ལ་རིག་ངོ་ཅུང་ཟད་རེ་འཕྲོད་ཀྱང་གློ་བུར་བ་ཕྱི་ཡུལ་རྐྱེན་བཟང་ངན་ཏེ་ནད་གདོན་དང་ཐོབ་མངའ་ཐང་སོགས་རྐྱེན་གྱིས་བསླུ་བར་འགྱུར་བའི་ཕྱིར་ན། རྟོག་ཚོགས་ཐམས་ཅད་གཟུང་འཛིན་གྱི་ཆོས་སུ་སྣང་ཞིང་བསླད་པ་འདི་འདུལ་ཐབས་ལ་བརྩོན་དགོས་ཏེ། ཐ་མལ་པ་དེ་ཉིད་རང་ལུགས་འཁོར་བའི་གནས་སུ་འཕེན་པའི་ཚུལ་ལས་གཞན་དུ་མ་འགྱུར་པའི་སྲིད་པའི་རྩ་བར་གྱུར་པས་བདག་པོ་སྟེ་གཟུང་འཛིན་དེ་ཡིས། དང་པོའི་ལས་ཅན་རྣམས་ཀྱི་རིག་པའི་ངོ་བོ་ལ་སྒྲིབ་པའི་ཕྱིར་ན་ཐུན་མོང་པ་དང་མཐུན་པའི་སེམས་གནས་བསྒྲུབ་ཚུལ་ཡང༌། དེའི་གཉེན་པོ་ཞི་གནས་དང་ལྷག་མཐོང་ངོ་བོ་གཅིག་པ་ཡི་ཁྲིད་ཚུལ་དང༌། ཞི་ལྷག་སོ་སོ་བ་ཡི་འཁྲིད་ཚུལ་ཏེ་རྣམ་པ་གཉིས་ལས་འདིར་དང་པོ་ཞི་ལྷག་ངོ་བོ་གཅིག་པའི་ཕྱོགས་འཕགས་པ་འདའ་ཀ་ཡེ་ཤེས་ཀྱི་མདོའི་དགོངས་པ་ལྟར། དམིགས་རྟེན་གང་རུང་ལ་སེམས་གཏད་ནས་དྲན་པ་ལ་བརྟེན་ནས་བསྒོམ་པའི་ཚེ་དེ་ལ་གནས་ཆའི་སེམས་རྩེ་གཅིག་པའི་བསམ་གཏན་དང༌། རང་བཞིན་མེད་པར་གསལ་ཆའི་སོ་སོར་རྟོག་པའི་ཤེས་རབ་ནི། ཞི་ལྷག་ཟུང་དུ་འབྲེལ་བ་ལས་ཐ་དད་པ་གཟུང་འཛིན་གཉིས་སུ་འཛིན་པ་མིན་པས་མཐའ་བྲལ་ཆོས་ཉིད་ཀྱི་དོན་ལ་མཉམ་པར་བཞག་པ་སྟེ། མཉམ་གཞག་ཚེ་སྟོང་ཉིད་དང༌། རྗེས་ཐོབ་ཚེ་སྙིང་རྗེ་ཟུང་དུ་འབྲེལ་བའོ། །བསྒོམ་པའི་མདོ་ཐམས་ཅད་འདིར་བསྡུས་སོ། །གཉིས་པ་ཞི་ལྷག་སོ་སོ་བའི་ཕྱོགས་ལའང་དབྱེ་བ་གཉིས་སུ་གྲུབ་སྟེ། གཙོ་བོ་ཐོས་བསམ་གྱི་ཤེས་རབ་ལས་བྱུང་བ་དང༌། བསྒོམ་ཐབས་ཀྱི་གདམས་ངག་ལས་བྱུང་བ་སྟེ་གཉིས་ཡོད་པར་མདོ་ལས་ཀྱང་འབྱུང་ངོ༌། ཤེས་རབ་ལས་བྱུང་བ་ནི་སྒྲ་ཡི་རྗེས་སུ་མཐུན་པ་གཞུང་གང་རུང་ལ་ཐོས་བསམ་གྱིས་སྒྲོ་འདོགས་བཅད་དེ་དེའི་ངང་རང་བཞིན་མེད་པར་ངེས་ཤེས་བཅས་དཔྱད་འཇོག་དབུ་མ་དང་མཚུངས་སོ། །དང་པོ་ཐོས་པ་དང་བསམ་པའི་དོན་ལ་སེམས་གནས་པའི་ཐབས་དགུ་ལ་སོགས་པས་རྩེ་གཅིག་པར་རྣམ་རྟོག་ཞི་བ་དང༌། དེ་ལས་བདག་མེད་དང་སྤྲོས་བྲལ་གྱི་དོན་རྟོགས་ཏེ་དམིགས་པའི་འཛིན་སྟངས་དང་བྲལ་བ་ལྷག་མཐོང་མཚན་ཉིད་པ་ཡིན་པས་འབད་པས་སྒྲུབ་པ་ཉིད་དོ། །མན་ངག་ལས་བྱུང་བ་ནི་སྒྲ་ཚིག་རྟོག་དཔྱོད་ལ་མི་ལྟོས་པར་དོན་གྱི་རྗེས་སུ་འགྲོ་བ་སྟེ་ཞི་ལྷག་སྒྲུབ་པའི་ཐབས་བླ་མས་མན་ངག་བསྟན་པའི་དོན་ལ་མཉམ་པར་འཇོག་པ་སྟེ། དེ་ཡང་ཕྱིའི་དམིགས་པ་སྐུ་གཟུགས་ས་བོན་ལ་གཏད་ནས་བསྒོམ་པའམ། ནང་དམིགས་རླུང་ཐིག་སོགས་ལ་སེམས་འཛིན་པ་དང༌། ལུས་གནད་རྩ་རླུང་སོགས་གནད་དུ་གཅུན་པས་བདེ་གསལ་མི་རྟོག་པ་སྐྱེ་བ་སོགས་དམིགས་པ་དེ་དག་གི་ངང་ལ་སེམས་ནི་རྣམ་རྟོག་གིས་གཡོ་བ་མེད་པར་རྩེ་གཅིག་ཏུ་གནས་པ་ཞི་གནས་ལ། གང་སྣང་བ་དེ་ཡི་རང་བཞིན་གདོད་ནས་སྤྲོས་བྲལ་འོད་གསལ་བའི་བདག་ཉིད་ཅན་དུ་ཤེས་ནས་གང་དུའང་འཛིན་པ་མེད་པ་ནི་ལྷག་མཐོང་མཚན་ཉིད་པ་སྟེ། མདོར་ན་རྟོགས་པ་ཀློང་དུ་རྡོལ་བའི་གང་ཟག་རབ་ཀྱིས་ངན་རྟོག་ཐམས་ཅད་ཤར་དུས་དེ་ཉིད་ན་རྗེས་མཐུད་མེད་པར་གྲོལ་ན་གང་ཤར་ཀུན་ཆོས་སྐུར་ལྷོངས་པས། རྣམ་རྟོག་བཟང་ངན་གང་སྐྱེས་ཀྱང་མགོ་མཉམ་པར་གྱུར་པ་ན་གཉེན་པོ་གཞན་བསྟེན་མི་དགོས་ཏེ། ཉལ་འདུག་དཀྱིལ་འཁོར་གྱི་རོལ་པ། རྐང་རྗེས་རྡུལ་ཚོན་གྱི་ཐིག་ལེ། སྒུལ་སྐྱོད་ཐམས་ཅད་ཕྱག་རྒྱའི་རོལ་པ་ཡིན་ནོ། །འབྲིང་གིས་སྔར་གཏན་ལ་ཕབ་པའི་ལྟ་བའི་ངང་དྭངས་ཞི་ལྷག་ཟུང་འབྲེལ་གྱི་ལམ་ལ་གོམས་པས། བཟང་ངན་རྟོག་པ་མཐའ་དག་ནམ་མཁའི་དབྱིངས་སུ་སྤྲིན་དེངས་པ་བཞིན་ཀ་དག་གི་དབྱིངས་སུ་ནུབ་བོ། །ཐ་མས་མདོ་ཕྱོགས་ལྟར་ཐོག་མར་ཞི་གནས་འབའ་ཞིག་བཙལ་ཏེ། ལྷ་སྐུ་ས་བོན་གྲུ་ཆད་སོགས་གང་དམིགས་ཀྱང་གཏན་ཚུགས་ཀྱི་བརྟན་པ་ཐོབ་ནས། ལྷག་མཐོང་གི་ཡེ་ཤེས་སོ་སོར་རྟོག་པ་བསྐྱེད་དེ་ཞི་ལྷག་ཟུང་འབྲེལ་ལ་གོམས་པར་བྱེད་ན། རིམ་གྱིས་མཐར་གྱིས་རྣམ་རྟོག་རང་སར་གྲོལ་བའི་དུས་ཞེས་བྱ་བ་དཔེར་ན་གསེར་གླིང་ནས་ས་རྡོ་མི་རྙེད་པ་བཞིན། སེམས་དང་སེམས་བྱུང་རྟོག་པ་གང་སྐྱེས་ཀྱང༌། སྣང་སེམས་དབྱེར་མེད་རོ་གཅིག་ཏུ་འདྲེས་ཚེ་གྲུབ་རྟགས་ཟང་ཐལ་སོགས་ཕལ་ཆེར་སྟོན་ནུས་ཤིང༌། གཞི་གྲོལ་ཀློང་ཡངས་ཆེན་པོར་འཆར་རོ། །རྣམ་རྟོག་དག་པར་བྱེད་པའི་ཐབས་ཀྱི་ལམ་མཆོག་ཏུ་བཟང་ངན་གྱི་རྟོག་པ་གང་ཤར་ཡང༌། དགག་པར་མི་བྱ་བསྒྲུབ་པར་བྱ་བ་མེད་ལ། ཐ་མལ་པ་ལྟར་རྗེས་སུ་མི་འབྲང༌། འཛིན་སྟངས་ཅི་ཙམ་ཡོད་ཀྱང་དང་པོ་དྲན་པ་བསྟེན་ཏེ་དྲན་པའི་ངང་མ་བོར་བ་གལ་ཆེ། དེ་ལ་གོམས་པ་ན་རིམ་གྱིས་སེམས་གནས་ཆ་ཐོབ་ཚེ་གཉིས་སྣང་ནུབ་བོ་སྙམ་པ་ལྟ་བུའི་ཉམས་དང༌། མངོན་ཤེས་སོགས་འཆར་ཡང་དེ་དག་བདེན་པར་མི་ཞེན་པ་གལ་ཆེ་སྟེ། ཉམས་སྣང་ལ་ནམ་ཞེན་བདུད་ཀྱིས་བར་དུ་གཅོད་པས་གང་དུ་ཡང་རོ་སྙོམས་ཀྱིས་སྐྱོང་བ་ཤིན་ཏུ་གལ་གནད་དོ། །གང་གི་ཡང་རྗེས་སུ་མི་འབྲང་རོ་སྙོམས་ཏེ་གོལ་ས་དང་བྲལ་ནས། སྐྱེ་མེད་དུ་རྟོགས་པའི་རིག་པ་རྣལ་མའི་ངང་དེ་ལས་མ་གཡོས་ཙམ་དུ་རང་སར་གནས་ཏེ་དབང་པོའི་སྒོ་མི་དགག་པར་ཚོགས་དྲུག་ཏུ་ལྷུག་པར་བཞག་ན། ཤ་ཡི་མིག་དང༌། ལྷ་ཡི་མིག་དང༌། ཤེས་རབ་ཀྱི་མིག་སོགས་སྤྱན་ལྔ་དང༌། སྔོན་གནས་རྗེས་དྲན་སོགས་མངོན་བར་ཤེས་པ་དྲུག་སོགས་པ་ཡུལ་སྣང་མ་འགགས་པར་འཆར་བའི་དབང་པོ་དང་ཤེས་པ་རང་བཞིན་དྭངས་པའི་ལམ་གྱི་ཡོན་ཏན་མཐའ་དག་རྩོལ་སྒྲུབ་མི་དགོས་པར་འཐོབ་པར་འགྱུར་ཏེ། གསང་སྙིང་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་འོང་ཡོད་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། དེ་ལྟ་བུ་ཡི་ངང་དུ་འབྱུང༌། །ཞེས་སོ། །རྣམ་རྟོག་དང་པོ་སྐྱེ་དུས་ཐ་མལ་པ་དང་སྐྱེ་ཚུལ་མཚུངས་ཀྱང་སྐད་ཅིག་གི་རྟོག་པ་ཙམ་གྱིས་ལས་མི་གསོག་ཀྱང་རྣམ་རྟོག་རྒྱུན་མཐུད་དེ་ཞེན་པས་འཆིང་བའོ། །རྟོག་པ་ཚོགས་དྲུག་གི་ཡུལ་དང་འབྲེལ་ན་ཐ་མལ་པ་འཁོར་བར་འཕེན་བྱེད་ལས་མི་འདའ་སྟེ། དེ་ལྟར་མ་ཡིན་པར་མེ་ལོང་གཡའ་དག་པ་ལྟ་བུར་དྭངས་པའི་ཤེས་པ་ལ། སྣང་ཡུལ་གཟུགས་སོགས་གཟུགས་བརྙན་ལྟར་མ་འགགས་པར་རྒྱ་མཚོ་ལ་གཟའ་སྐར་བཞིན་སྣ་ཚོགས་རོལ་པའི་ཆ་དེ་དབང་པོའི་གདངས་མ་འགགས་པའི་ཡོན་ཏན་དུ་བཀྲ་ཡང༌། སྣང་དུས་ཉིད་རང་གི་ངོ་བོས་སྟོང་སྟེ་ཡུལ་ལ་དེར་འཛིན་གྱི་རྗེས་དཔྱོད་བྱས་ཏེ་ཤེས་པ་སྣང་ཐོག་ཏུ་མ་ཤོར་ན། རྣམ་པར་འཛིན་པའི་བློ་ཡིས་གོས་པར་མ་གྱུར་ཏེ་འཛིན་མེད་དུ་འགྲོ་བ་དེས་ན། གཟུང་བའི་ཡུལ་དང་འཛིན་པའི་སེམས་གཉིས་ཕན་ཚུན་ཡུལ་ཡུལ་ཅན་གྱི་འབྲེལ་བ་ཡུལ་མེད་ཀྱི་རིག་པའི་ངང་དུ་ཆད་པས། སོ་སོ་རང་རིག་པའི་ཡེ་ཤེས་རྣམ་པར་མི་རྟོག་པའི་ངང་ལ་ཤུགས་འབྱུང་གི་དྲན་པ་བསྐྱངས་པས་ཕྱི་ནང་གི་འབྱུང་བའི་སྙིགས་མ་རང་དག་ཏུ་སོང་ནས་ཆོས་ཉིད་ཟད་སར་བསྐྱལ་ཏེ་རྒྱལ་ཀུན་གཤེགས་ཤུལ་ཡེ་ཤེས་བླ་མའི་ས་ལ་ཚེ་རབས་མང་པོ་དང་ཡུན་རིང་པོའི་མཐར་ལྟོས་མི་དགོས་པར་ད་ལྟ་ཉིད་དུ་ཕྱིན་པར་འགྱུར་རོ། །མདོར་ན་རང་བཞིན་རྣམ་དག་གི་དབྱིངས་ཀྱི་ལམ་ནི་ཆོས་ཐམས་ཅད་གཞི་ཀ་དག་གི་ངོ་བོར་ཆོས་ཉིད་གཅིག་ཏུ་དབྱིངས་དེ་མ་བོར་བར་རྟོགས་པ། རིག་པའི་ལམ་ནི་ཤེས་རབ་ཁྱད་པར་ཅན་འདི་གཉིས་དོན་ལ་དབྱིངས་རིག་ཟུང་འཇུག་གོ །འོད་གསལ་གྱི་ལམ་ནི། འཁོར་འདས་ཀྱི་སྣང་ཆ་འཛིན་པའི་རྒྱང་ཞགས་ཆུ་ཡི་སྒྲོན་མ། སྙིང་ནས་མིག་ཏུ་འབྲེལ་བའི་རྩ། ཀ་དག་གི་གདངས་ཐིག་ལེ་ཟླུམ་གོར་དུ་ཤར་བས་ཐིག་ལེ་སྟོང་པའི་སྒྲོན་མ་དེ་རྣམ་པ་གཉིས་པོ་ལ་བརྟེན་ནས་འོད་གསལ་གྱི་སྣང་བ་འཆར་ཞིང་འཕེལ་བར་བྱེད་དོ། །ཕྱི་དབྱིངས་ནམ་མཁའ་ཆེས་དྭངས་པ་ལྟར་རྐྱེན་བྲལ་ནང་དབྱིངས་རྩལ་སྒོམ་བྱུང་གི་ཤེས་རབ་རིག་གདངས་ལུ་གུ་རྒྱུད་རིག་པ་སྐྱེ་མེད་དུ་འཕོ་འགྱུར་བྲལ་བའོ། ཁྲེགས་ཆོད་ལམ་ནི་རྟོག་ཚོགས་ཐམས་ཅད་ཀ་དག་ཏུ་ཐག་བཅད་པས་གཞི་མེད་ཡུལ་མེད་རྟེན་མེད་མིང་མེད་དུ་སོང་ནས་ཤར་གྲོལ་དུས་མཉམ་སྟེ། འདས་རྗེས་ལས། སྣང་སྲིད་ཐམས་ཅད་ཆོས་སྐུའི་ཞིང་དུ་ཤར། །ཤར་བ་དེ་ཉིད་རང་གི་ཐོག་ཏུ་གྲོལ། །ཞེས་སོ། །ཐོད་རྒལ་ལམ་གྱི་ངོ་བོ་ནི། དབྱིངས་དང་རིག་པ་གཉིས་པོ་སྒྲོན་མ་གཉིས་པོའི་ལམ་དུ་སྣང་ཞིང་ཤེས་རབ་རང་བྱུང་གི་སྒྲོན་མེའི་རྩལ་དང་གདངས་ཀྱི་ཡོན་ཏན་གསུམ་ལྡན་དུ་འཆར་བ་ཡིན་ནོ། །འདི་དག་རང་བཞིན་རྫོགས་པ་ཆེན་པོ་ཡི་ཐུན་མོང་མ་ཡིན་པའི་ལམ་མཆོག་ལྔར་སྐུ་གསུམ་ལམ་སྣང་དུ་རྫོགས་ནས་ཚེ་ལུས་གཅིག་ལ་འབྲས་བུ་ཁྱད་ཆོས་དྲུག་ལྡན་གཞི་ཐོག་ཏུ་ཕྱིན་པ་དང༌། འབྲིང་དང་ཐ་མའང་བར་དོར་གྲོལ་བ་མཁྱེན་འཚལ་ནས་མེད་སྣང་གློ་བུར་བ་ཡིན་པས་མ་རིག་པའི་གྲོགས་དང་འཁྲུལ་པའི་བསླུ་བྲིད་ཀྱིས། མུ་མཐའ་མེད་པ་འཁོར་བའི་འབྲོག་དགོན་འཇིགས་སུ་རུང་བར། འཆིང་བྱེད་ཀྱི་ལས་དང་དེ་ཀུན་ནས་སློང་བྱེད་ཀྱི་ཉོན་མོངས་པའི་འདུ་བྱེད་ལྕགས་སྒྲོག་ལྟ་བུ་དག་གིས། དེ་རིང་ཕན་ཆད་དེ་ད་ལྟར་ཡན་ཆད་ལ་བཅིངས་པ་དེ་ལ་སྐྱོ་བའི་སེམས་བསྐྱེད་ནས་ཞི་བ་དམ་པ་སྐུ་གསུམ་ལྷུན་གྱིས་གྲུབ་པའི་གྲོང་ཁྱེར་ག་ལ་བ་དེར་མྱུར་དུ་མྱ་ངན་ལས་འདའ་ཞིང༌། གདོད་མའི་ས་ལ་གཏན་སྲིད་ཟིན་ནས་འགྲོ་དོན་རྩོལ་མེད་དུ་འབྱུང་བའི་ཁྲེགས་ཆོད་ཐོད་རྒལ་གྱི་ལམ་སོགས་ལམ་མཆོག་ལྔ་པོ་མྱུར་དུ་བསྙེན་པར་མཛོད་ཅིག །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། རང་བཞིན་རྫོགས་པ་ཆེན་པོའི་ལམ་ཐུན་མོང་མ་ཡིན་པ་བསྟན་པའི་ཚོམས་ཏེ་ལེའུ་བཅུ་གཉིས་པའོ།། །།སྔར་བཤད་པའི་སྐབས་སུ་གཞི་སྣང་རང་ངོ་ཤེས་ནས་གྲོལ་བ་ཀུན་ཏུ་བཟང་པོའི་ཁྱད་ཆོས་དྲུག་གིས་འཕགས་ཏེ། སངས་རྒྱས་ལོངས་སྐུའི་ཞིང་ཁམས་ཀྱི་བཀོད་པ་ལའང་གདུལ་བྱ་ལ་སྣང་ཚུལ་མདོ་ཙམ་བསྟན་པ་དེ་ཉིད་རྒྱས་པར་བཤད་པ་ལས་འབྲས་བུ་གཞན་བཤད་པ་མེད་པས། དེ་ལྟར་རང་བཞིན་རྫོགས་པ་ཆེན་པོའི་གཞི་ཡི་གནས་ལུགས་གཏན་ལ་ཕབ་ནས་ལམ་ཐུན་མིན་བྱ་རྩོལ་མེད་པའི་མཚན་ཉིད་ལེགས་པར་རྟོགས་ནས་གོམ་པས། གདོད་མའི་གཞི་ཇི་བཞིན་མཐར་ཕྱིན་ཏེ་འབྲས་བུ་རྟེན་སྐུ་དང་བརྟེན་པ་ཡེ་ཤེས་གཉིས་ནི། སྔར་གཞི་ལ་མེད་པ་ཞིག་ལམ་བསྒོམས་པས་ཀྱང་གསར་དུ་ནི་གཞན་ལས་མ་བྱུང་སྟེ། རིག་པའི་ཡེ་ཤེས་ལ་སྒྲིབ་བྱེད་ཀྱི་དྲི་མ་གློ་བུར་བ་འཁོར་བའི་བག་ཆགས་ཐམས་ཅད་འཛིན་པའི་རྟེན་མཚན་ཉིད་ཐེག་པར་ཀུན་གཞི་གནས་འགྱུར་དང༌། སྔགས་ནང་རྒྱུད་མ་ཧཱ་ལྟར་ན་དེ་ཉིད་ལྷར་སྣང་དང༌། དོན་ལ་ནི་གཞི་སྣང་ངོ་མ་ཤེས་པ་ཡིན་པས་ཀུན་གཞིའི་རྙོག་པ་དྭངས་པ་ན། དེ་ལ་བརྟེན་པའི་སེམས་དང་སེམས་བྱུང་ཡུལ་དང་བཅས་པའང་ཆོས་ཀྱི་དབྱིངས་སུ་ཞི་བ་ཡིན་ཏེ། རྒྱུད་བླ་མ་ལས། ཉེས་པ་གློ་བུར་དང་ལྡན་དང༌། །ཡོན་ཏན་རང་བཞིན་ཉིད་ལྡན་ཕྱིར། །ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་སོ། །དེ་ཡང་དཔེར་ན་ཉི་མ་སྤྲིན་གྱིས་བསྒྲིབས་པ་ཡང་རྩ་བ་ནི་ཉི་མའི་རང་རྩལ་ལ་ཐུག་སྟེ། ཉི་ཟེར་གྱི་རྩལ་རྒྱ་མཚོར་ཕོག་པས་དྲོད་རླངས་ན་བུན་མཁར་འཁྲིགས་པས་སྤྲིན་དུ་སོང་སྟེ་ན་བུན་ལོང་ལོང་པོ་དེས་ཉི་མ་ཉིད་བསྒྲིབས་པ་ལྟར། ཚེ་རབས་ཐོག་མེད་ནས་འཁྲུལ་པའི་དབང་གིས་དུས་གང་དུ་གཞི་ཡི་རིག་པ་སྐུ་གསུམ་གྱི་རང་བཞིན་ཅན་དེ་ལས་གཞི་ལྷུན་གྲུབ་ཀྱི་རྩལ་སྣང་གཡོས་པ་ཡི་ཚེ་ན་རང་སྣང་དུ་ངོ་མ་ཤེས་པར། བདག་དང་གཞན་དུ་འཛིན་པའི་བག་ཆགས་གོམས་པ་དེའི་རོལ་པ་ཤེས་བྱའི་ཡུལ་སྣོད་བཅུད་འཁྲུལ་ཆོས་སུ་ཤར་བའི་ཆ་དང་བཅས་པ་འཛིན་པའི་ཡུལ་ཅན་ཚོགས་བརྒྱད་ཀྱི་རྟོག་པ་སྲིད་པ་ཉེར་ལེན་གྱི་རང་བཞིན་ཅན་རིག་པའི་ཡེ་ཤེས་སྒྲིབ་བྱེད་གློ་བུར་གྱི་སྤྲིན་དང་འདྲ་བ་རྣམས། ཆོས་དབྱིངས་སུ་རྣམ་པར་དག་པའི་ཚེ་རང་བྱུང་གི་ཡེ་ཤེས་མངོན་དུ་འགྱུར་ཚུལ་དཔེར་ན། ཉི་མ་ལྟར་ལྷུན་གྱིས་གྲུབ་པ་ནི། ཤེས་བྱ་ཐམས་ཅད་ལ་ཆགས་ཐོགས་ཀྱི་སྒྲིབ་པ་མེད་པ་ཆོས་དབྱིངས་ནམ་མཁའ་ལྟ་བུའི་ངང་དུ་རང་བཞིན་གྱིས་འོད་དུ་གསལ་བ་ཡིན་ནོ། །སྟོང་ཉིད་ཆོས་སྐུའི་ངོ་བོ་སྐུ་གསུམ་དབྱེར་མེད་རྡོ་རྗེའི་སྒྲས་བསྟན་པ་ཆོས་དབྱིངས་དག་པ་གཉིས་ལྡན་གྱི་ཆ་ནས་མི་འགྱུར་རྡོ་རྗེ། ཡོན་ཏན་གྱི་སྣང་ཆ་སོ་སོར་མ་འདྲེས་པའི་ཆ་ནས་མངོན་པར་བྱང་ཆུབ་སྣང་སྟོང་ཟུང་འཇུག་གི་རང་གདངས་འགགས་མེད་ལ། གཉིས་སྣང་གི་འཇུག་པ་ཐམས་ཅད་དང་བྲལ་བ་ཆོས་དབྱིངས་ཡེ་ཤེས་ཏེ། ནང་གསལ་སྐུ་གསུམ་པོ་འདི་ལ་ཡེ་ཤེས་གཅིག་གིས་དབྱེ་ན། ཡེ་དོན་གྱི་ཀུན་གཞི་ཆོས་དབྱིངས་སྒྲིབ་བྲལ་རིག་པའི་ངོ་བོ་ལ་སྒྲིབ་བྱེད་བག་ཆགས་སྣ་ཚོགས་པའི་རྟེན་ཀུན་གཞི་སྒྲིབ་གཉིས་བག་ཆགས་མཐའ་དག་ཚོགས་གཉིས་ཀྱིས་བསལ་ལ། ངོ་བོ་ཡེ་དག་ཉིད་ལ་གློ་བུར་དྲི་མ་གཉིས་པོ་ཆ་དང་བཅས་སྤངས་པ་གློ་བུར་བྲལ་དག་སྟེ། དག་པ་གཉིས་དང་ལྡན་པ་མཐར་ཐུག་གི་འབྲས་བུ་བྱང་ཆུབ་མཆོག་གི་དངོས་གཞི་སྐུ་དང་ཡེ་ཤེས་རྒྱ་མཚོའི་བདག་ཉིད། གདོད་མའི་དབྱིངས་ཀྱི་ཆོས་ཉིད་མངོན་དུ་གྱུར་པས་སངས་རྒྱས་དག་མཉམ་ཆེན་པོར་སྨོན་པ་མེད་པའི་དབྱིངས་ལ། དཔེར་ན་ཉ་རྒྱས་ཟླ་བ་འོད་སྣང་གི་སྤྲོས་པ་ཕྱིར་གསལ་བ་ཅན་དེ་ཉིད་གནམ་སྟོང་གི་ཆ་ལ་དབྱིངས་སུ་ནུབ་ཏེ་འོད་སྣང་མི་མངོན་པ་ལྟར། ཡུལ་ཡུལ་ཅན་རྣམ་པ་ཀུན་ཏུ་མི་རྟོག་པའི་ཆོས་ཉིད་འཕོ་འགྱུར་དང་བྲལ་བ་རང་བཞིན་མེད་པ། སྐུ་དང་ཡེ་ཤེས་ཐམས་ཅད་ཀྱི་དབྱིངས་ཀྱི་ཆར་ངོ་བོ་རྟག་པ་འདུས་མ་བྱས་ཡེ་ཤེས་ཀྱི་སྙིང་པོ་ཅན་མི་འགྱུར་རྡོ་རྗེའི་སྐུའོ། །ཡོན་ཏན་གྱི་རྣམ་པ་ཀུན་གྱི་མཆོག་ལྡན་འཕགས་པའི་མཉམ་བཞག་གི་སྟོང་ཉིད་སྣང་སྟོང་ཟུང་འཇུག་གི་ཆ་སྤྲོས་པ་མཐའ་དག་ཞི་བའི་དབྱིངས་སུ་གློ་བུར་གྱི་དྲི་མ་རང་སར་དག་པའི་སྟོབས་བཅུ་ལ་སོགས་ཡོན་ཏན་གྱི་ཆོས་ཚུལ་རྒྱ་མཚོ་ལྟ་བུ་ཀུན་སངས་རྒྱས་པའི་སྐད་ཅིག་མ་དེར་བྱང་ཆུབ་ཀྱང༌། སྐུ་དང་ཡོན་ཏན་གྱི་སྣང་ཆ་རང་རང་ངོ་བོར་མ་འདྲེས་པའི་ཚུལ་དུ་ཡོད་པས་ན། སྟོབས་བཅུ། མི་འཇིགས་པ་བཞི། མ་འདྲེས་པ་བཅོ་བརྒྱད་ཐུགས་རྗེ་ཆེན་པོ། བྱང་ཆུབ་ཕྱོགས་ཆོས་སུམ་ཅུ་རྩ་བདུན་སོགས་སངས་རྒྱས་ཀྱི་ཡོན་ཏན་སྤངས་རྟོགས་ཀྱི་ཆ་ནས་གཞལ་བ་ལ་ནི། མངོན་པར་བྱང་ཆུབ་པའི་སྐུའི་མཁྱེན་ཆ་མ་འགགས་པ་མེ་ལོང་ཡེ་ཤེས་སོ། །ཕྱི་ཤེས་བྱའི་ཡུལ་གཟུགས་སོགས་ལ་ཡུལ་ཅན་བློ་ཡི་འཇུག་པ་ཞི་བས། ནང་ཤེས་བྱེད་ཀྱི་བློ་ལ་མཚན་མར་འཛིན་པའི་བདེན་ཞེན་མཐའ་དག་དབྱིངས་སུ་ནུབ་པའི་ཀུན་རྫོབ་ཆ་དང་བཅས་པ་སྤངས་ནས། དེ་ཁོ་ན་ཉིད་གཞི་གནས་སོ་སོ་རང་རིག་མཐའ་བྲལ་གྱི་དོན་རྟག་ཆད་གང་གིའང་མཐར་མ་ལྷུང་བ་ཡེ་ཤེས་ཀྱི་གསལ་ཆ་དབྱིངས་སུ་ཐིམ་སྟེ་ཞི་བ་ལ་གནས་ཀྱང་མ་རྨུགས་པ་ཞེས་མཁྱེན་ཆ་གཏན་མེད་དུ་སོང་བ་མ་ཡིན་པར་ཤིན་ཏུ་ཕྲ་བའི་ནང་གསལ་གྱི་ཡེ་ཤེས་ནི་མཁྱེན་ཆ་འགག་པ་མེད་པ། སྐུ་དང་ཡེ་ཤེས་རྒྱ་མཚོའི་རྟེན་ནི་སངས་རྒྱས་ཁོ་ནའི་སྤྱོད་ཡུལ་ཤིན་ཏུ་མཉམ་པར་བཞག་པ་དང་མ་བཞག་པ་མི་མངའ་བ་སངས་རྒྱས་རྣམས་ཀྱིས་མཐོང་གི་གཞན་གྱིས་ནི་མིན་ནོ། །རྟེན་ནམ་འཆར་གཞིའི་ལྡོག་པ་གང་ཡིན་པ་དེ་ལ་ཞི་བ་ཆོས་ཀྱི་སྐུ་ཞེས་བརྗོད་དོ། །སོ་སོ་རང་གིས་རིག་བྱར་གནས་པ་ནང་གསལ་སྐུ་གསུམ་རྒྱལ་བའི་ཁམས་ཞེས་པ་སྟེ། དོན་ལ་གཅིག་དང་དུ་མར་གྲུབ་པ་མ་ཡིན་པས་དངོས་པོ་ཅན་མ་ཡིན་པ་དང༌། ཇི་སྙེད་མཁྱེན་ཆ་ནང་དུ་གསལ་བས་དངོས་མེད་ལས་ཀྱང་འདས་ལ། རང་བཞིན་རྣམ་པར་དག་པས་ནམ་མཁའ་ལྟར་སྐུ་དང་ཡེ་ཤེས་སོགས་རྣམ་པར་མི་རྟོག་ལ། མ་དག་པའི་མཚན་མས་གོས་པ་མེད་ཅིང་རྣམ་འགྱུར་གྱི་སྤྲོས་པ་ཕྱི་གསལ་དབྱིངས་སུ་ཞི་ལ། དེའི་རང་བཞིན་ནི་ངག་གི་ཡུལ་ལས་འདས་ཏེ་ཆོས་ཉིད་དོན་དམ་བདེན་པས་བསྡུས་པའི་ཕྱིར་ན། རྟོག་དཔྱོད་དང་ཐ་སྙད་ཀྱི་དཔེ་དང་གཏན་ཚིགས་སྒྲ་སོགས་ཀྱིས་ཀྱང་མི་མཚོན། བློ་སྟེ་སེམས་དང་སྙམ་བྱེད་དེ་སེམས་བྱུང་དང་དཔེ་སོགས་དང་འགལ་བའི་ཕྱིར། རྒྱལ་བའི་ཡོན་ཏན་མཐའ་དག་ས་བཅུའི་དབང་ཕྱུག་གིས་ཀྱང་སྤྱོད་ཡུལ་མིན་ནོ། །འདྲེན་པ་སངས་རྒྱས་རྣམས་ཁོ་ན་ལ་མངོན་སུམ་དུ་གྱུར་པའི་གནས་ནི། ཆོས་ཀྱི་དབྱིངས་སྟོང་ཉིད་སྤྲོས་པ་དང་བྲལ་བ་སྟེ་དེ་ནི་བསམ་གྱིས་མི་ཁྱབ་པས་ཟབ་པ། སེམས་དང་སེམས་བྱུང་གི་རྣམ་རྟོག་ཐམས་ཅད་རང་བཞིན་གྱིས་རྣམ་པར་དག་པས་ཞི་བ། ཟུང་འཇུག་གི་སྤྲོས་པ་ཐམས་ཅད་དང་བྲལ་བས་རང་བཞིན་དེའི་མཁྱེན་ཆ་འགག་པ་མེད་པའམ་འཕོ་འགྱུར་དང་བྲལ་བས་གཞོན་ནུ། ཕྱི་གསལ་ལོངས་སྐུར་མ་སྤྲོས་པའི་ནང་གསལ་དུ་བཞུགས་པའམ། སངས་རྒྱས་ཀྱི་ཆོས་ཁམས་རྒྱ་མཚོ་ལྟ་བུ་འཆར་བའི་གདངས་མ་འགགས་པས་བུམ་པའི་ཁང་མཛེས་ནང་ཞེས་ཐ་སྙད་བཏགས་ཏེ། རྒྱུད་ལས། ཕྱི་དང་ནང་མེད་པ། ཀུན་ཏུ་ཡང་ནང་དུ་གྱུར་པ་ན། ཞེས་སོ། །དེ་ལྟ་བུའི་ཀློང་ན་དུས་གསུམ་སངས་རྒྱས་རྣམས་ནི་དགོངས་པ་མཉམ་པར་རྟག་ཏུ་བཞུགས་ཀྱང༌། རང་སྣང་དབྱིངས་སུ་ཐིམ་པའི་རྣམ་པའི་ཆ་ནས་གཞལ་ཏེ་སངས་རྒྱས་གཅིག་གིས་གཅིག་མི་གཟིགས་ཏེ། རྨད་བྱུང་རྒྱལ་པོ་ལས། ཆོས་ཀྱི་དབྱིངས་ཀྱི་ཕོ་བྲང་ན་དུས་གསུམ་གྱི་སངས་རྒྱས་ཐམས་ཅད་གཅིག་གིས་གཅིག་མི་གཟིགས་པའི་ཚུལ་གྱིས་བཞུགས་ཏེ། ཞེས་སོ། །དེ་ཡང་ཆོས་རྣམས་ཀྱི་རང་བཞིན་ནི་གཅིག་དང་དུ་མའི་སྤྲོས་པ་བྲལ་བའི་བདག་ཉིད་ཅན་དུ་གནས་ལ། དབྱིངས་དེའི་རང་བཞིན་དུ་རྟོགས་པ་མཐར་ཕྱིན་པ་ནི་དེ་བཞིན་གཤེགས་པ་རྣམས་ཏེ། དེའི་ཕྱིར་ཆོས་ཉིད་ཀྱི་ངོས་ན་སངས་རྒྱས་ཐམས་ཅད་དགོངས་ཀློང་རོ་གཅིག་ཏུ་གྱུར་ནས་གཟིགས་བྱ་གཟིགས་བྱེད་མེད་པས་དཔེར་ན་བཻཌཱུརྻའི་ནམ་མཁའ་ལ་རང་གི་ངོ་བོ་འདི་ལྟར་ཡོད་ཅེས་སྨྲ་མི་ཤེས་པ་ལྟར་མི་གཟིགས་སོ། །ཐོག་མར་ཡང་གཞི་ལས་གཞི་སྣང་ཤར་བའི་ངོ་མ་ཤེས་པ་ཙམ་གྱིས་འཁོར་བར་སྣང་ལ་མཐར་གྲོལ་ན་ཡང་ཞི་དབྱིངས་སུ་རོ་གཅིག་ཏུ་གྱུར་པས་ན་རང་བྱུང་རང་ལ་ཐིམ་ཞེས་པའོ། །ནང་དབྱིངས་སྤྲོས་བྲལ་གྱི་ངང་ལས་མི་གཡོ་ཡང་འོད་གསལ་གྱི་མཁྱེན་ཆ་འགག་པ་མེད་པའི་ཡེ་ཤེས་ཀྱི་རང་གདངས་ལས་ལྷུན་གྲུབ་ཀྱི་སྒོ་བརྒྱད། ཐུགས་རྗེ་ཕྱིར་གསལ་ཐེག་ཆེན་ཆོས་ལ་ལོངས་སྤྱོད་རྫོགས་པའི་སྐུ་རུ་སྣང་བ་ནི། གནས་འོད་གསལ་སྟུག་པོ་བཀོད་པ་དང༌། དུས་གཞིར་རྫོགས་བསམ་མི་ཁྱབ་པ་དང༌། སྟོན་པ་རིགས་ལྔའི་སངས་རྒྱས་དང༌། ཆོས་རང་བཞིན་རྫོགས་པ་ཆེན་པོ་དང༌། འཁོར་ཉིད་ལས་མི་གཞན་པ་སྟེ། ངེས་པ་ལྔ་དང་ལྡན་པར་ཤར་ཞིང༌། དེ་ཡང་གཙོ་བོ་འཁོར་སོགས་སོ་སོར་མ་འདྲེས་པར་གསལ་བ་སྐུ་དང་ཞིང་ཁམས་དང༌། མཚན་དཔེ་སོགས་ཡོན་ཏན་རྒྱ་མཚོའི་བདག་ཉིད་ཅན་རྣམས་བཞུགས་པའོ། །དང་པོ་གནས་ནི་རིག་པའི་ཡེ་ཤེས་ཀྱི་རང་རྩལ་རྩོལ་སྒྲུབ་བྲལ་བས་ལྷུན་རྫོགས་རང་སྣང་གང་གིའང་འོག་ཏུ་མ་གྱུར་པས་འོག་མིན་གྱི་ཞིང་ཡེ་ཤེས་རང་སྣང་གི་བཀོད་པ་ཕུན་སུམ་ཚོགས་པས་བརྒྱན་པའི་ཕྱིར་ན་སྟུག་པོ་བཀོད་པ་སྟེ། དེ་ན་ཡེ་ཤེས་ལྔ་ཡི་རང་རྩལ་འགག་མེད་དུ་ཤར་བའི་འོད་ཟེར་གསལ་འཚེར་འབར་བས་མཁའ་དབྱིངས་ཐམས་ཅད་དབང་པོའི་མཚོན་ཆས་ཏེ་འཇའ་ཚོན་གྱིས་བཀབ་པ་བཞིན་དུ་ཁྱབ་ཅིང༌། སྟོང་ཉིད་སྙིང་རྗེའི་བརྡར་གཞི་རིན་པོ་ཆེ་ལས་གྲུབ་པའི་རང་བཞི་ན་མནན་ན་ནེམ་ཞིང་བཏེགས་ན་འཕར་བ་ལ་སོགས་པ་དེ་ལྟ་བུའི་བཀོད་པ་ཕུན་ཚོགས་པའི་ཡོན་ཏན་བསམ་གྱིས་མི་ཁྱབ་པ་ཟུང་འཇུག་ཡེ་ཤེས་ལྔའི་རང་བཞིན། ཆེ་བའི་ཡོན་ཏན་ཐམས་ཅད་རྒྱས་པའི་རྟགས་གཞལ་མེད་ཁང་གྲུ་བཞིའི་རྣམ་པར་མཛེས་པ་སྒོ་འཕར་རྣམ་བཞིར་ལྡན་པ་ནི་རྣམ་ཐར་སྒོ་གསུམ་དང༌། འདུས་མ་བྱས་ཤིང་འོད་གསལ་བ་སྟེ་བཞི་དང༌། ཚད་མེད་བཞིར་མཚོན་པའི་བརྡའོ། །རྣམ་ཐར་བརྒྱད་མཚོན་ཕྱིར་པདྨ།༡ སྒྲོམ་བུ།༢ རྟ་རྐང༌།༣ ཟར་ཚག༤ ཤར་བུ།༥ ཆུན་འཕྱང༌།༦ རིན་པོ་ཆེའམ་རྡོ་རྗེའི་ཁྱུང་མགོ་སྟེ་རྟ་རྐང་ངམ་རྟ་བབས་བརྒྱད་ལྡན། ཡེ་ཤེས་ལྔར་སྣང་བས་དགོས་འདོད་ཀྱི་རེ་བ་སྐོང་བའི་བརྡར་རྩིག་པ་ཕྱི་ནང་རིམ་པ་ལྔ་གློ་འབུར་བཞི་དང་བཅས་པ། ཆོས་ཉིད་མི་འགྱུར་བའི་བརྡར་ཕ་གུ་སེར་པོ་དང༌། རིན་པོ་ཆེའི་དྲྭ་ཕྱེད་འཕྱང་བ་ཉི་ཟླའི་རླུང་བསྐྱོད་དང་བཅས་པ། འགྲོ་རྣམས་ཐུགས་རྗེས་སྐྱོབ་པའི་བརྡར་མདའ་ཡབ། ཆོས་ཉིད་བསམ་མི་ཁྱབ་པའི་བརྡར་པུ་ཤུ་མཆོད་རྟེན་སུམ་བསྒྲིགས་ཅན། འདོད་ཡོན་མ་སྤངས་ཡེ་ཤེས་ཀྱི་རང་སྣང་རྒྱན་དུ་རོལ་པའི་བརྡར་སྣམ་བུར་འདོད་པའི་ཡོན་ཏན་མིག་ཡངས་མ་སྟེ་མཆོད་པའི་ལྷ་མོ་གཟུགས་རྡོ་རྗེ་མ་སོགས་བདེ་སྟོང་མཆོད་སྤྲིན་རྩེ་ཞིང་དགའ་བའི་རྣམ་འགྱུར་གར་སྟབས་སྣ་ཚོགས་པའི་གཡོ་བ་ཅན། ཡོན་ཏན་ཕྲིན་ལས་སྣ་ཚོགས་པའི་བརྡར་སྟེང་ཕྱོགས་རྔ་ཡབ་འཕན་གདུགས་རྒྱལ་མཚན་དགོས་འདོད་འབྱུང་བའི་ནོར་བུའི་ཏོག །རིན་པོ་ཆེའི་རིགས་སོགས་དར་ཟབ་སྣ་ཚོགས་པའི་བླ་བྲེ། པདྨ་ལ་གནས་པའི་ཆོས་འཁོར་རིན་པོ་ཆེ་བཅུ་གསུམ་གྱི་ཟར་ཚགས་དང་བཅས་པའི་གཙང་ཁང་ཕྱུར་བུར་མཛེས་ཤིང༌། ཆོས་དབྱིངས་རྒྱ་ཚད་དང་བྲལ་བའི་རྟགས་སུ་ཆུ་ཞེང་དང་མཐོ་དམན་སྲིད་ཚད་དུ་མི་མངོན་པར་གང་བལྟས་གང་དུ་གྱུར་པ་ཡེ་ཤེས་འོད་ལྔ་དྭངས་པའི་གཞལ་ཡས་ཁང་ལས་མི་འདའ་བར་སྣང་ཞིང༌། ཡོན་ཏན་ཚད་བཟུང་མེད་པའི་བརྡར་གཞལ་ཡས་ཁང་གི་ཚད་གྲངས་ཀྱིས་མཐའ་མི་གཏུགས་པ་མཁའ་དབྱིངས་ཐམས་ཅད་སྣོད་གྱུར་བཞིན་གསལ་བར་སྣང་བའོ། །དེ་ལྟ་བུའི་རྟེན་གཞི་གཞལ་མེད་ཁང་མཁའ་དབྱིངས་ཁྱབ་པ་རེ་རེའི་ནང་ན། བརྟེན་པའི་གཙོ་བོ་རིགས་ལྔ་ཡི་གདན་ཁྲི་ནི། ཐུགས་མི་འཇིགས་པ་མཚོན་ཅིང་བདུད་བཞི་འཇོམས་པའི་བརྡར་འཕྲོག་བྱེད་དེ་སེངྒེའི་ཁྲི། མི་དགེ་བ་བཅུ་འདུལ་བའི་བརྡར་གཉིས་འཐུང་སྟེ་གླང་པོའི་ཁྲི། རྫུ་འཕྲུལ་ལ་མངའ་བརྙེས་པའི་བརྡར་ཅང་ཤེས་ཏེ་རྟ་མཆོག་གི་ཁྲི། དབང་བཅུ་མཐར་ཕྱིན་པའི་བརྡར་ཟློས་གར་ཅན་ཏེ་རྨ་བྱའི་ཁྲི། ཕྲིན་ལས་བཞི་སྒྲུབ་པའི་བརྡར་ཤང་ཤང་ཏེའུ། འཁོར་བའི་སྐྱོན་གྱིས་མ་གོས་པའི་བརྡར་ཆུ་སྐྱེས། ཐབས་ཤེས་ཟུང་འཇུག་གི་བརྡར་ཉི་ཟླའི་སྟེང་དུ་བཞུགས་པའོ། །དུས་གསུམ་སོགས་ལས་འདས་ཏེ་ཆོས་ཉིད་འཕོ་མེད་གཞིར་རྫོགས་ཀུན་ཏུ་བཟང་པོ་འདུས་མ་བྱས་པའི་དུས་ན། སྐྱེ་འཆི་བགྲེས་རྒུད་དང་བྲལ་བ་རྟག་བརྟན་ལྷུན་གྲུབ་ཆེན་པོར་ངོ་བོ་ཆོས་ཉིད་ལས་གཡོ་བ་མེད་པས་འཕོ་འགྱུར་བྲལ་བའི་ཡེ་ཤེས་ཀྱི་སྐུ་མཚན་བཟང་སོ་གཉིས། དཔེ་བྱད་བརྒྱད་ཅུ་སོགས་ཡོངས་སུ་རྫོགས་པའི་དགོངས་བརྒྱུད་སྟོན་པ་ལྔ་སྣང་སྟེ། ཀུན་རིག་རྣམ་སྣང་མཐིང་ཀ་ཆོས་དབྱིངས་ཡེ་ཤེས། མི་བསྐྱོད་རྡོ་རྗེ་དཀར་པོ་མེ་ལོང་ཡེ་ཤེས། རིན་ཆེན་འབྱུང་ལྡན་སེར་པོ་མཉམ་ཉིད་ཡེ་ཤེས། གསུང་པདྨའི་རིགས་འོད་མཚན་སྟོང་འབར་ལེ་བརྒན་ཏེ་དམར་པོ་སོར་རྟོག་ཡེ་ཤེས། ཕྲིན་ལས་དོན་ཡོད་གྲུབ་པ་ལྗང་གུ་བྱ་གྲུབ་ཡེ་ཤེས་ཏེ་ཡབ་ལྔ་ནི་ཞལ་གསུམ་ཕྱག་དྲུག་གོ །ཕྱག་མཚན་ནི། རྡོ་རྗེ་མེ་ལོང་ལས། གཡས་ནས་རིམ་པར །རྡོ་རྗེ་འཁོར་ལོ་རལ་གྲི་འབར། །གཡོན་ནས་དྲིལ་བུ་པདྨ་རིན་པོ་ཆེ། །གཞན་གང་འཁོར་ལོའི་གནས་སུ་རྡོ་རྗེ་ཤེས། །དང་པོ་ཐུགས་དང་གཡོན་འཁྱུད་པའོ། །ཞེས་སོ། །ཐབས་ཤེས་དབྱེར་མེད་པས་རང་རང་རིགས་ཀྱི་ཡུམ་དབྱིངས་ཕྱུག་མ། སྤྱན་མ། མ་མ་ཀཱི། གོས་དཀར་མོ། དམ་ཚིག་སྒྲོལ་མ་རྣམས་ཡབ་མདོག་ཞལ་གཅིག་ཕྱག་གཉིས་གཡས་རང་རྟགས། གཡོན་དྲིལ་བུ་དང་བཅས་པ་རྣམས་ཡོན་ཏན་ཐམས་ཅད་རྫོགས་པ། ཁ་སྦྱོར་ཡན་ལག་བདུན་གྱི་བདག་ཉིད་ཆེན་པོར་བཞུགས་པའོ། །སྟོན་པའི་ཐུགས་ཡེ་ཤེས་ཆེན་པོ་འཁོར་གྱི་ཚུལ་དུ་སྣང་བ་རང་ལས་མི་གཞན་པའི་སེམས་དཔའ་བརྒྱད་དང་སེམས་མ་བརྒྱད་ལ་སོགས་པའི་འཁོར། སྒོ་བ་བཞི་དང༌། དེ་བཞིན་སོ་སོའི་ཡུམ་སྒོ་མ་བཞི་དང་བཅས་པའོ། །སྨྲ་བསམ་བརྗོད་འདས་ཀྱི་རང་བཞིན་རྫོགས་པ་ཆེན་པོའི་ཆོས་འཁོར་ནི། སེམས་ཉིད་རང་བཞིན་གྱིས་འོད་གསལ་བ་སྣང་སྟོང་ཟུང་འཇུག་དེ་ཉིད་སྒྲིབ་གཉིས་མཐའ་དག་དང་བྲལ་བ་རྟོགས་པའི་འོད་གསལ་དེའི་ངང་ལས་མི་གཡོ་ཙམ་ལས་གཞན་མེད་ཀྱང་དེ་ཆོས་འཁོར་གྱི་སྒྲས་སྨོས་སོ། །གྲགས་པའི་སྒྲ་བརྗོད་པའི་ཚིག་མཚན་མའི་ཡུལ་ལས་འདས་པར་འཁོར་རྣམས་ལ་སྣང་བར་བསྐོར་བ་ནི། མདོ་ལས། རྒྱལ་བའི་སྲས་པོ་ཅང་མི་གསུང༌། །མ་གསུངས་པ་ཉིད་རྒྱ་ཆེར་གསུངས། །ཞེས་སོ། །སྟེང་ཁང་ཞི་བ་བྱང་ཆུབ་སྙིང་ཁ་མི་ཤིག་ཐིག་ལེ་ཡེ་ཤེས་ལྔའི་རང་འོད་ལྷ་ཚོགས་བཞི་བཅུ་རྩ་གཉིས་གསལ་བའི་བདག་ཉིད་ཅན་དུ་ཡོད་པ་ལ་སྙིང་པོའི་གནས་རང་སྣང་འོག་མིན་གྱི་ཞིང་ན་དབང་མཛད་ཞི་བ་བཞི་བཅུ་རྩ་གཉིས་སུ་བཞུགས་ཡོད་པ་ལས། དབྱིངས་ཡེ་ཟུང་འཇུག་ལ་དམ་པའི་སྟངས་དཔྱལ་སྣང་སྟོང་ངམ་ཐབས་ཤེས་དུ་སྨོས་པ་ཀུན་བཟང་ཡབ་ཡུམ་གཉིས་ནི་ལོངས་སྤྲུལ་གཉིས་ཀྱི་སྤྲུལ་གཞི་སྟེ། གཙོ་འཁོར་ཀུན་ལ་ཁྱབ་བྱེད་དུ་ཡོད་པའི་ཐུགས་ཀྱི་རང་བཞིན་ལ་ཞལ་ཕྱག་སོགས་མེད་པར་བརྡལ་བ་ཆོས་ཀྱི་སྐུ་ཡིན་པས་དཀྱིལ་འཁོར་དུ་མ་བཀོད་པ་ཡིན། ལྷ་ལ་སོགས་པའི་འགྲོ་དྲུག་སོ་སོའི་གནས་སུ་དོན་མཛད་པའི་རིག་པའི་སྐྱེས་བུ་ཐུབ་པ་དྲུག་ནི་གཞན་གདུལ་བྱའི་ངོར་སྤྲུལ་པར་ཤར་རོ། །རང་སྣང་དོན་གྱི་འོག་མིན་གྱི་གནས་ལོངས་སྐུའི་ཞིང་ན་བཞུགས་པའི་གཟུགས་སྐུ་དངོས་སྣང་ནི་རྒྱལ་བ་སུམ་ཅུ་རྩ་བཞི་སྟེ། གཙོ་བོ་རིགས་ལྔ་ཡབ་ཡུམ་བཅུ་ལ་ཕྱི་ནང་གི་སེམས་དཔའ་ཡབ་ཡུམ་བཅུ་དྲུག་དང་སྒོ་སྐྱོང་ཡབ་ཡུམ་བརྒྱད་དེ་ཉེར་བཞི་འཁོར་གྱི་ཚུལ་དུ་བཞུགས་སོ། །རྒྱུད་སྡེ་འོག་མའི་ལུགས་ལྟར་ཕུང་ཁམས་གནས་སུ་དག་པའམ། དཔལ་རྡོར་སེམས་སྒྱུ་འཕྲུལ་དྲྭ་བའི་ལུགས་ཆོས་ཉིད་སྟོང་པ་ཉིད་དང་ཆོས་ཅན་སྣང་བ་ཉིད་ནི་རང་བཞིན་གྱི་རྡོ་རྗེ་ཕུང་པོ། །དེའི་ཡན་ལག་ཏུ་ཕུང་ལྔ་ཡབ་ལྔ་ཁམས་ལྔ་ཡུམ་ལྔ། ཕྱི་ནང་གི་སྐྱེ་མཆེད་བཅུ་གཉིས་དང༌། དེ་དག་གི་ཁམས་བཅུ་གཉིས་དང༌། རྣམ་པར་ཤེས་པའི་ཁམས་དྲུག་སྟེ་བཅོ་བརྒྱད་པོ་སེམས་དཔའ་དང་སེམས་མ་སྒོ་སྐྱོང་ཁྲོ་བོ་ཁྲོ་མོའི་རང་བཞིན་དུ་ཡེ་ནས་གནས་པའི་ཕྱིར་སྲིད་གསུམ་ཐམས་ཅད་སངས་རྒྱས་ཀྱི་ཞིང་ཁམས་སུ་གདོད་ནས་རྣམ་པར་དག་པའི་ལྷ་གདན་གསུམ་ཚང་བའི་དཀྱིལ་འཁོར་ཆེན་པོར་གནས་པ་ཡིན་ནོ། །ཚུལ་འདི་དག་སྒྱུ་འཕྲུལ་དྲྭ་བ་སངས་རྒྱས་མཉམ་སྦྱོར་གསང་འདུས་རྒྱུད་སྔ་ཕྱི་གཉིས་སོགས་བླ་མེད་རྒྱུད་སྡེ་ཕལ་མོ་ཆེ་ལས་ལུས་གྲུབ་ཀྱི་དཀྱིལ་འཁོར་ནི། ཇི་སྙེད་བསྟན་པ་རྣམས་རང་སྣང་གིས་བསྡུས་པའི་ཞིང་ཁམས་ཡིན་པས་དེ་རྣམས་དང་རྣམ་དག་ཚུལ་ཀྱང་མཚུངས་པ་ཡིན་ནོ། །སྤྱིར་གཞི་དུས་ཀྱི་རང་སྣང་ནི་ལོངས་སྤྱོད་རྫོགས་སྐུ་ལ་ཁྲོ་བོ་མེད་པར་འདོད་པའང་ཡོད་ཀྱང༌། དོན་གྱི་དུས་ན་ཐབས་ཤེས་ནམ་ཡང་འདུ་འབྲལ་མེད་པས་ཤེས་རབ་ཀྱི་རིག་གདངས་ལས་ཁྲོ་བོའི་དཀྱིལ་འཁོར་སྣང་བ་ཡིན་པས་འདིར་རང་སྣང་ཁྲོ་བོའི་དཀྱིལ་འཁོར་འདི་ནི་འབྲས་དུས་ཁོ་ན་ལ་བཤད་པ་ཡིན་པས་གཞི་དུས་རྟོག་དཔྱོད་ཚོགས་ཀྱི་དག་དྲན་མེད་པར་བཞེད་དོ། །ཞི་བའི་གཞལ་ཡས་ཁང་གི་འོག་ན་རང་བྱུང་གི་ཁང་པ་ཚོགས་ཆེན་འདུས་པའི་ཕོ་བྲང་ལྷུན་གྲུབ་ཏུ་སྣང་བ་ནི། ཡུམ་ལྔའི་མཁའ་ཀློང་རྣམ་པར་དག་པའི་རང་བཞིན་འབྱུང་བ་རིམ་བརྩེགས་རུས་པའི་རི་རབ་དང་བཅས་པའི་ཁར་རིན་པོ་ཆེའི་བྲག་ཆེན་གཏམས་པའི་སྟེང་ཡེ་ཤེས་ཀྱི་རང་འོད་མེའི་ཕུང་པོ་རབ་ཏུ་འབར་བའི་ཀློང་ན་གཞལ་ཡས་ཁང་ཐོད་མཁར་ཕྱི་ནང་རིམ་པ་དགུ་རྔམ་ཞིང་འཇིགས་སུ་རུང་བ། སྒོ་ཁྱམས་རིམ་པ་དགུ་པའི་བར་ཁྱམས་དགུ་པོ་ནང་རིམ་པར་དང་པོ་གསུམ་སེར་དཀར་དམར་བ། དེ་ནས་གསུམ་སེར་དམར་དཀར་བ། དེ་ནས་གསུམ་ནག་པོ་དང་ཕྱོགས་མདོག་དཀར་སེར་དམར་ལྗང་ཁུའོ། །སྒོ་ཕྱི་མར་རྒྱུ་འབྲས་ཀྱི་རྟ་བབ་གཉིས་ལས་དང་པོ་སྟེགས་བབས་ཞོན་གྱི་ཚུལ་དུ་ཡོད་ཅིང༌། གཉིས་པ་སྒོ་ཁང་གི་སྟེང་ན་རྒྱན་གྱི་རྣམ་པར་ལྡན་པ། ཕོ་བྲང་དབུས་མའི་ནང་དུ་གྲུ་ཆད་བཞི་པོ་གྲུ་ཆད་ལས་ཆ་ཕྲན་ཕྱེད་མཐོ་བའི་ཕྱོགས་མདོག་གློ་འབུར་གྱིས་མཛེས་པའི་སྟེང་ན་འཁོར་ལོ་རྩིབས་བརྒྱད་པའི་ལྟེ་བར་རིན་པོ་ཆེའི་བྲག་དང༌། རྡོ་རྗེའི་རྩེ་གསུམ་རྩེ་ལྔ་སོགས་བྲག་ཆེན་གཏམས་པའི་སྟེང་པདྨ་དཀར་པོ་འདབ་མ་སྟོང་བརྡལ་བ་ལ། ཐབས་ཤེས་ཀྱི་རང་བཞིན་ཉི་མ་ཉེར་བཞི་དང་ཟླ་བ་ཉེར་བཞི་ཁ་སྦྱོར་དུ་བཀོད་པའི་སྟེང་དབང་ཕྱུག་ཁྱོ་ཤུག་ནི། ཉི་ཤུ་རྩ་བཞི་བྱི་ཆིངས་སུ་བསྣོལ་བའི་སྟེང་དུ་དཔའ་གཏུམ་སྟག་དང༌། འཇིགས་བྱེད་སེངྒེ་དང༌། གདུག་པ་གཟིག་དང་ནི། གཏུམ་པ་དོམ་དང༌། སྟོབས་ཆེན་གླང་པོ་དང༌། བརྗིད་པའི་མ་ཧེ་དང༌། འཛིན་པའི་ཆུ་སྲིན་དང༌། ཞེ་སྡང་ལྟོ་འགྲོ་སྟེ་བྱོལ་སོང་གི་གཙོ་བོ་བརྒྱད་པོ་རེ་རེས། དྲེགས་པ་ཕོ་རྣམས་ཁ་སྦུབ་ཏུ་ཡོད་པའི་སོག་ཕྲག་དང་མོ་རྣམས་གན་རྐྱལ་དུ་ཡོད་པས་ནུ་ཕྲག་ཏུ་བཟུང་ཞིང་བརྫིས་པའི་སྟེང་ན། འཁོར་འདས་ཀུན་གྱི་སྤྱི་དཔལ་ཆེན་པོ་བཅོམ་ལྡན་འདས། འཇིག་རྟེན་གསུམ་ན་ཆེ་བའི་ལྷ་ཆེན་པོ་སོགས་ལས་ཀྱང་མཆོག་ཏུ་གྱུར་པས་སམ། དཀྱིལ་འཁོར་གྱི་ལྷ་ཚོགས་ཐམས་ཅད་ཀྱི་ཡོན་ཏན་གཅིག་ཏུ་རྫོགས་པས་ཆེ་བའི་ཆེ་མཆོག་སྐུ་མདོག་ཨིནྡྲ་ནཱི་ལའི་མདངས་ཅན། ཉི་མ་བྱེ་བའི་འོད་ལྟར་འབར་བའི་གཟི་བྱིན་དང་ལྡན་པ། ཞལ་བདུན་གསུམ་ཉེར་གཅིག་གི་རྩ་ཞལ་སྐུ་མདོག་དང་མཚུངས་པ། གཡས་ཞལ་གསུམ་སེར་དམར་ལྗང་བ། གཡོན་ཞལ་གསུམ་དམར་སྔོ་ལྗང་བ། དེ་སྟེང་དབུས་ཞལ་སེར་པོ། གཡས་གཉིས་དམར་པོ་དང་ལྗང་གུ། གཡོན་གཉིས་མཐིང་དང་དཀར་པོ། དེ་སྟེང་དབུས་ཞལ་མཐིང་ག །གཡས་གཉིས་སེར་ལྗང༌། གཡོན་གཉིས་དཀར་དམར། དེའི་སྟེང་དབུས་སྨུག །གཡས་དཀར། གཡོན་ལྗང༌། ཀུན་གྱི་སྟེང་ཞལ་དམར་པོ་རྟ་སྐད་འཚེར་བའོ། །ཞབས་བརྒྱད་བགྲད་པ་ཕྱག་ནི་བཞི་བཅུ་རྩ་གཉིས་ཀྱིས་དང་པོ་གཉིས་ན་ཀུན་བཟང་ཡབ་ཡུམ་དང༌། ལྷག་མ་གཡས་ཀྱི་ཉི་ཤུ་ན་རིགས་ལྔ་སེམས་དཔའ་བརྒྱད་ཁྲོ་བོ་བཞི་མཐོ་རིས་ཀྱི་ཐུབ་པ་གསུམ་དང༌། གཡོན་ཉི་ཤུ་ན་ཡུམ་ལྔ་སེམས་མ་བརྒྱད་ཁྲོ་མོ་བཞི་ངན་སོང་གི་ཐུབ་པ་གསུམ་སྟེ་ཞི་བའི་ལྷ་ཚོགས་བཞི་བཅུ་རྩ་གཉིས་བསྣམས་པ། རུས་པའི་ཕྱག་རྒྱ་དྲུག་དང༌། དུར་ཁྲོད་ཀྱི་ཆས་བརྒྱད་དང༌། དཔལ་གྱི་ཆས་བརྒྱད་ཀྱིས་བརྒྱན་པ། དབུ་རེ་རེ་ལ་སངས་རྒྱས་ཀྱི་སྐུ་རེ། དེའི་དབུར་རིན་ཆེན་བདུན་གྱི་མཆོད་རྟེན་རྩེ་མོ་ཏོག་སྟོང་གི་འོད་ཟེར་འབར་བ། གནམ་ཞལ་ཡུམ་མཆོག་དབྱིངས་ཕྱུག་མ་སྔོན་མོ་དབུ་དགུ་ཕྱག་བཅོ་བརྒྱད། ཞབས་བརྒྱད་བགྲད་པ། རྩ་བའི་ཕྱག་གཉིས་རྡོ་རྗེ་དང་དུང་ཁྲག་འཛིན་པ། ལྷག་མ་གཡས་བརྒྱད་ན་གནས་ཀྱི་མ་མོ་དང༌། གཡོན་བརྒྱད་ན་ཡུལ་གྱི་ཕྲ་མེན་བསྣམས་པ། ཡབ་ཡུམ་ཁྲོ་མཁར་ཏེ་སྨན་སྒྲུབ་སྐབས་ལྟ་བུར་དཀྱིལ་འཁོར་གྱི་དབུས་སུ་དབང་མཆོག་ཧེ་རུ་ཀ་དང༌། དེའི་དབུ་ཐོག་ཏུ་དབྱིངས་ཕྱུག་མ། དེའི་དབུ་ཐོག་ཏུ་ཆེ་མཆོག་རྣམས་ཐོ་བརྩེགས་ཀྱི་ཚུལ་ལམ། ཡང་ན་དབང་མཆོག་གི་ཕྲག་པ་གཉིས་ཡུམ་གྱིས་བརྫིས་ནས་ཡུམ་གྱི་མཁར་ཡབ་ཀྱི་དབུ་ཕྱེད་ནུབ་པ་སོགས་དབུ་སྦྱོར་དང༌། གནམ་ཞལ་མའི་དབུ་བརྒྱད་ཆེ་མཆོག་གི་ཞབས་བརྒྱད་ཀྱིས་བརྫིས་པས་ཡུམ་གྱི་ཞལ་དབུས་མའི་སྤྱན་དང༌། ཡབ་ཀྱི་གསང་བ་སྦྱོར་བའོ། །དེ་སོགས་མཉམ་པར་སྦྱོར་བའི་ཚུལ་དུ་བཞུགས་པ། སྲིད་པ་ཁམས་གསུམ་དང་ཞི་བ་ཐེག་དགུའི་ལམ་དང་འབྲས་བུའི་ཆོས་ཁམས་མ་ལུས་པ་ཀུན་བཅོམ་ལྡན་འདས་དཔལ་ཆེན་ཉིད་ཀྱི་ཞབས་ཀྱི་གདན་ཁྲི་ནས། སྟེང་གི་དབུ་རྒྱན་འཁོར་ལོའི་བར་ལ་རང་བཞིན་གྱིས་རྫོགས་པར་སྣང་སྟེ་འདོད་ཁམས་ཁྲག་གི་རྒྱ་མཚོར་རྫོགས། གཟུགས་ཁམས་ཞིང་ཆེན་གྱི་ས་གཞི་ལ་རྫོགས། གཟུགས་མེད་ཀེང་རུས་ཀྱི་རི་རབ་ལ་རྫོགས། ཉན་རང་བྱང་སེམས་གསུམ་རིན་པོ་ཆེའི་བྲག་ཆེན་ལ་རྫོགས། ཕྱི་རྒྱུད་གསུམ་རྡོ་རྗེའི་བྲག་ཆེན་ལ་རྫོགས། བསྐྱེད་པའི་རྣལ་འབྱོར་པདྨ་དཀར་པོ་ལ་རྫོགས་པ་དང༌། རྫོགས་པའི་རྣལ་འབྱོར་དབུ་རྒྱན་གྱི་སངས་རྒྱས་དང་རྒྱལ་མཚན་བཅུ་ལ་རྫོགས། རྫོགས་པ་ཆེན་པོའི་རྣལ་འབྱོར་ཏོག་སྟོང་འོད་འཕྲོ་བ་ལ་རྫོགས་པ་སོགས་སོ། །མ་ཧཱ་མན་ཆད་གདན། ཨ་ནུ་སྐུ་ལུས། ཨ་ཏི་དབུ་ཐོག་རྒྱལ་མཚན་ཏོག་ལ་རྫོགས་པའོ། །གཙོ་བོ་དཔལ་ཆེན་པོའི་མདུན་དུ་དབང་མཆོག་ཧེ་རུ་ཀ་སྐུ་མདོག་མཐིང་ནག་དབུ་དགུ་ཕྱག་བཅོ་བརྒྱད་ཞབས་བཞི་པ་ཡུམ་ཁྲོ་མོ་དབྱིངས་ཕྱུག་མ་དང་ནི་མཉམ་པར་སྦྱོར་བའི་ཚུལ་གྱིས་བཞུགས་པ། སྒོ་གསུམ་ལ་བདག་ཏུ་འཛིན་པ་དང་ཁམས་གསུམ་ས་དགུ་དག་པའི་ཧེ་རུ་ཀ་དཔལ་དགུ་ལས། དབང་མཆོག་གི་མདུན་དུ་བཛྲ་ཧེ་རུ་ཀ་དང་འཁོར་ལོའི་རྩིབས་བརྒྱད་ཀྱི་ཕྱོགས་བཞིར་བུདྡྷསོགས་བཞི་དང༌། མཚམས་བཞིར་རཀྴ་སོགས་བཞི་སྟེ་དཔལ་དགུ་པོ་ཐམས་ཅད་ཞལ་གསུམ་ཕྱག་དྲུག་ཡབ་ཡུམ་མཉམ་པར་སྦྱོར་བའི་ཚུལ་དུ་བཞུགས་སོ། །གློ་འབུར་བཞི་དང་གྲུ་ཆད་རྣམ་བཞི་སྟེ་བརྒྱད་ལ་རྣམ་ཤེས་ཚོགས་བརྒྱད་དག་པ་ཀཽ་རཱི་མ་ལ་སོགས་བརྒྱད། དཀྱིལ་འཁོར་དང་པོའི་ཁྱམས་ལ་ཡུལ་བརྒྱད་དག་པའི་རང་བཞིན་སེང་གདོང་སོགས་ཕྲ་མེན་བརྒྱད། གཉིས་པའི་ཁྱམས་ལ་ཕྱོགས་མཚམས་ཀྱི་དངོས་པོ་གནས་སུ་དག་པ་ཉི་ཟེར་ཅན་ལ་སོགས་སྤོར་མ་རྣམ་པ་བརྒྱད། སྒོ་བཞིར་འབྱུང་བ་བཞི་དག་པ་རྒྱས་འདེབས་མ་སོགས་སྒོ་མ་བཞི་དང༌། གསུམ་པའི་ཁྱམས་ལ་སྒལ་ཚིགས་ཉེར་བརྒྱད་དག་པས་དབང་མོ་ཉི་ཤུ་བརྒྱད། ཀུན་ལ་རང་རང་གི་སྒོ་མ་བཞི་བཞིར་ལྡན་ཅིང་ལྷ་ཚོགས་དེ་དག་ཐམས་ཅད་ཀྱང་སྐུ་མཚན་དཔེའི་དཔལ་དང༌། གསུང་རྔམས་པའི་གདངས་ཀྱི་དཔལ་དང༌། ཐུགས་སྙིང་རྗེའི་དཔལ་དུ་འབར་བའི་རྣམ་རོལ་གར་དགུའི་ཉམས་ཀྱིས་བརྗིད་དོ། །ཁྱམས་གསུམ་པོ་ཡན་ཆད་འདི་དག་སངས་རྒྱས་རང་སྣང་ལོངས་སྐུའི་དཀྱིལ་འཁོར་ཏེ། གཞི་ཀ་དག་ཕྱི་གསལ་གྱི་སྣང་ཆ་ཡེ་ནས་ལྷུན་གྲུབ་གཞི་སྣང་ཐབས་ཀྱི་ཆ་ནས་ཞི་བ་དང༌། ཤེས་རབ་ཀྱི་ཆ་ལས་ཁྲོ་བོར་ཤར་བ་ཡིན་པས་རང་ལུགས་སུ་ཁྲོ་བོ་ལ་རང་སྣང་ལོངས་སྐུར་འདོད་པ་ཡིན་ཞེས་པའང་ཡོད་ལ། ལྷུན་གྲུབ་དོན་གྱི་འོག་མིན་ཡིན་ནོ། །བཞི་པའི་ཁྱམས་ལ་ཤར་དུ་མཁའ་འགྲོ་དགའ་བྱེད་མ་སོགས་བདུན་དང༌། ལྷོར་འཇོམས་བྱེད་མ་སོགས་བདུན་དང༌། ནུབ་ཏུ་གནོད་སྦྱིན་མ་སོགས་བདུན། བྱང་དུ་ཕག་གདོང་མ་སོགས་བདུན། སྒོ་བཞིར་མཁའ་འགྲོ་བུམ་སྣ་མ་ལ་སོགས་པ་བཞི་སྟེ་མཁའ་འགྲོ་སུམ་ཅུ་གཉིས། ལྔ་པའི་ཁྱམས་ལ་རྡོ་རྗེ་ཀུན་གྲགས་སོགས་མ་མོ་བདུན། སྒོ་བཞིར་གླིང་བཞིའི་མགྱོགས་མ་སོགས་སྲིང་མོ་བཞི་རྣམས་སོ། །དྲུག་པའི་ཁྱམས་ལ་ཕྱོགས་རེར་གསུམ་རེ་དང༌། སྒོ་བཞིར་རེ་རེ། ཤར་ནུབ་གཉིས་སུ་བཀའ་ནོད་པ་རེ་རེ་སྟེ་གིང་ཆེན་རྡོ་རྗེ་འབྱུང་པོ་སོགས་དྲུག་ཚན་གསུམ་སྟེ་བཅོ་བརྒྱད་དོ། །བདུན་པར་རྣམ་རྒྱལ་དང་སྙེམས་མ་སོགས་ཁྲོ་བོ་ཡབ་ཡུམ་བཅུ་ཕྲག་དྲུག་ཕྱོགས་མཚམས་བརྒྱད་དུ་གསུམ་གསུམ་དང༌། ཤར་ནུབ་ཀྱི་ནང་དང་སྒོ་བཞིར་རེ་རེའོ། །བརྒྱད་པའི་ཕྱོགས་བཞིར་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཕོ་ཉ་དྲུག་ཅུ་རེ་གནས་པས་ཉིས་བརྒྱ་བཞི་བཅུ་སྟེ་ཕྱོགས་མདོག་ཏུ་སྣང་ངོ༌། །དགུ་པའི་ཁྱམས་ལ་ཕོ་ཉ་མ་མོ་དྲུག་ཅུ་རྣམས་ཕྱོགས་བཞི་པོ་རེ་རེར་བཅོ་ལྔ་བཅོ་ལྔའོ། །ཁྱམས་བཞི་པ་ནས་དགུ་པའི་བར་དུ་འཁོད་པ་འདི་རྣམས་ལོག་འདྲེན་མ་རུངས་པ་རྣམས་འདུལ་ཕྱིར་གཞན་སྣང་སྤྲུལ་པས་བསྡུས་པའི་ཕྱིར། རིགས་དྲུག་ངོར་ཐུབ་དྲུག་ལྟ་བུར་བགེགས་སོགས་གདུལ་བྱ་སོ་སོའི་རང་ངོར་སྣང་བ་ཡིན་པ་དེ་ཕྱིར་རང་སྣང་འོག་མིན་གྱི་དཀྱིལ་འཁོར་མིན་ནོ། །དེ་དག་རང་སྣང་དུ་བཞུགས་པའི་ཚུལ་ཆོས་སྐུའི་ཡེ་ཤེས་འདུས་མ་བྱས་པ་ངོ་བོ་ཉིད་ཀྱིས་རྟག་པའི་ངང་ལས་ཕྱི་རུ་གསལ་བར་སྣང་བའི་རང་གདངས། ཕུན་སུམ་ཚོགས་པ་ལྔ་ལྡན་ལོངས་སྐུར་རྫོགས་པའི་གནས་རྒྱུན་ཀྱི་རྟག་པའི་ཞིང་ཁམས་སུ་ལྷུན་གྱིས་གྲུབ་ནས་སྤྲུལ་པ་རྒྱུན་མི་འཆད་པར་རྟག་པའི་འཆར་གཞིར་བཞུགས་པ་ནི། སློབ་པའི་ལམ་མཐར་ཕྱིན་པའི་དུས་གང་དུ་ཁམས་ལ་སྒྲིབ་པར་བྱེད་པ་དྲི་མ་མཐའ་དག་སྤངས་པར་གྱུར་པའི་སངས་རྒྱས་ཁོ་ནའི་རྒྱུད་ཀྱི་བསྡུས་པ་ཡི་ཡེ་ཤེས་ཀྱི་རོལ་པ་གནས་དང་སྟོན་འཁོར་སོགས་སྣང་བ་ཉིད་ཀྱི་ཕྱིར། རྟེན་ཞིང་ཁམས་དང་གཞལ་ཡས། བརྟེན་པ་གཙོ་འཁོར་དུ་སྣང་ཡང་ཕྱི་ནང་མཆོག་དམན་མེད་དེ་ཐམས་ཅད་ཀུན་ཏུ་བཟང་པོ་རང་བྱུང་གི་ཡེ་ཤེས་གཅིག་གི་རྣམ་རོལ་དུ་མཉམ་པ་ཡིན་ནོ། །དེ་ལྟར་རང་སྣང་ལོངས་སྐུ་ཀུན་གྱི་ཐུགས་ཀྱང་ཆོས་སྐུའི་ངང་ལས་མ་གཡོས་པས་རྣམ་པར་མི་རྟོག་ཅིང་གསུང་ནི་སྒྲ་ཚིག་གི་མཚན་མ་ལས་འདས་པས་བརྗོད་པ་དང་བྲལ་ལ། སྐུ་ནི་གཟི་བརྗིད་ཆེན་པོར་སྣང་བས་མཚན་དང་དཔེར་གསལ་བར་རྫོགས་ཤིང༌། རང་སྣང་ཆོས་ཐམས་ཅད་ཡེ་ཤེས་མཐོང་བ་དག་པའི་སྤྱན་གྱིས་གཟུགས་སྐུ་ཕན་ཚུན་གཅིག་གིས་གཅིག་གཟིགས་པ་ལ་དུས་ནམ་དུ་ཡང་སྒྲིབ་པ་མེད་དོ། །དེ་ལྟར་དུས་གསུམ་རྒྱལ་བ་རྣམས་ཀྱི་ཁམས་དང་ཡོན་ཏན་གྱི་སྤྱོད་ཡུལ་ནི་ནམ་མཁའ་ལྟར་བསམ་གྱིས་མི་ཁྱབ་པས། བླ་ན་སྟེ་གོང་ན་མེད་ཕྱིར་རྟག་ཆད་ཀྱི་མཐར་མ་ལྷུང་ལ། སྲིད་ཞིའི་ཕྱོགས་ཀྱིས་མ་བསྡུས་པའི་ཕྱིར་ས་དང་པོ་ནས་བཅུ་པའི་བར་གྱི་དག་པའི་སེམས་ཅན་ཆེན་པོ་བྱང་སེམས་འཕགས་པ་རྣམས་ཀྱིས་ཀྱང་མཐོང་བར་མི་ནུས་ཏེ་རྒྱལ་བའི་ཇི་ལྟ་ཇི་སྙེད་མཁྱེན་པའི་ཡེ་ཤེས་བསམ་གྱིས་མི་ཁྱབ་པ་དེ་དང་འགལ་བའི་ཁམས་ཀྱི་སྒྲིབ་པའི་ཆ་ད་དུང་མ་སྤངས་ཕྱིར། འདས་དང་མ་འོངས་པ་དང་ད་ལྟ་སྟེ་འདུས་བྱས་ཀྱི་དུས་གསུམ་ཀུན་རྫོབ་པ་ཀུན་གྱི་ངེས་པ་ལས་འདས་པའི་རང་སྣང་དོན་གྱི་འོག་མིན་ཆེན་པོ་ན། རྟག་པ་རྒྱུན་གྱི་འཁོར་ལོར་བཞུགས་པའི་སངས་རྒྱས་བསམ་གྱིས་མི་ཁྱབ་པའི་དུས་བཞིའི་བདག་ཉིད་ཅན་གཙོ་འཁོར་དགོངས་པ་མཉམ་ཕྱིར་ངོ་བོ་ལ་བཟང་ངན་ཐ་དད་མེད་པས་གཅིག་ཏུ་མཐུན་པའི་རང་སྣང་ངོ༌། །རང་སྣང་ལོངས་སྐུ་དེ་ཉིད་ངང་ལས་དག་མ་དག་གི་གདུལ་བྱ་སེམས་ཅན་རྣམས་འདུལ་བའི་ཕྱིར། སྟོན་པའི་ཐུགས་རྗེ་ལས་འདུལ་བྱེད་སྟོན་པ་གསུམ་དུ་རྩོལ་མེད་བཞིན་བཀོད་པ་ནི། ལོངས་སྐུ་དང་ཚུལ་མཐུན་པར་རང་བཞིན་སྤྲུལ་པ་དང༌། འགྲོ་དྲུག་གི་སྟོན་པར་སྣང་བ་འགྲོ་འདུལ་སྤྲུལ་པ་དང༌། སེམས་ལྡན་དང་བེམ་པོ་སོགས་སུ་སྣང་བ་སྣ་ཚོགས་སུ་སྤྲུལ་པ་སྟེ་གསུམ་ལས། དང་པོ་རང་བཞིན་སྤྲུལ་སྐུ་ནི། རྒྱལ་བ་ཆོས་ཀྱི་སྐུའི་ཡེ་ཤེས་ཕྱིར་གསལ་དུ་སྣང་བ་འོག་མིན་གྱི་ཞིང་ན་དབྱིངས་སྣང་ལོངས་སྐུའི་རྣམ་པར་བཞུགས་པའི་དཔེ་བྱད་ནི་དྭངས་ཤེལ་ནང་འཕོས་པ་སྟེ་ཤར་བ་ལྟ་བུའི་རྒྱལ་སྲས་འཕགས་པ་གདུལ་བྱ་མཆོག་རྣམས་ལ་སྣང་བའི་གཟུགས་བརྙན་ནི་རང་སྣང་གི་སྟོན་པ་དང་ཆ་འདྲ་བས་ལོངས་སྐུར་ཡང་བགྲངས་ལ། གདུལ་བྱའི་སྣང་བས་བསྡུས་པས་སྤྲུལ་པའི་ཕྱོགས་སུ་ཡང་བགྲངས་པས་ཕྱེད་སྤྲུལ་ལོངས་སྐུའི་གནས་ཏེ། དཔེར་ན་སྟོན་ཟླ་དྭངས་མཁར་ཤར་ཚེ་ཆུ་སྣོད་དྭངས་རྙོག་དང་མཐུན་པར་གདུལ་བྱའི་ངོར་སྣང་ངོ༌། །དབུས་ན་སྐུ་ཆོས་དབྱིངས་ཡེ་ཤེས་ཀྱི་རང་རྩལ་ལས་དབང་ཕྱུག་ཆེན་པོའི་འོག་མིན་གྱི་ཞིང་དང༌། ཤར་ན་ཐུགས་མེ་ལོང་ཡེ་ཤེས་ཀྱི་རྩལ་ལས་མངོན་པར་དགའ་བའི་ཞིང་དང༌། ལྷོ་ན་ཡོན་ཏན་མཉམ་ཉིད་ཡེ་ཤེས་ཀྱི་རྩལ་ལས་དཔལ་དང་ལྡན་པའི་ཞིང་དང༌། ནུབ་ན་སོར་རྟོག་ཡེ་ཤེས་ཀྱི་རྩལ་ལས་པདྨ་བརྩེགས་པའི་ཞིང་དང༌། བྱང་ན་ཕྲིན་ལས་བྱ་གྲུབ་ཡེ་ཤེས་ཀྱི་རྩལ་ལས་ལས་རབ་གྲུབ་པའི་ཞིང་དང་རྣམ་པ་ལྔར་སྣང་བ་ཡིན་ནོ། །ཞིང་ཁམས་ལྔ་པོ་དེར་རིམ་པ་བཞིན་གཟུགས་ཀྱི་རྒྱལ་པོ་རྣམ་པར་སྣང་མཛད་དང༌། ལ་སོགས་པའི་སོགས་ཁོང་ནས་རྣམ་པར་ཤེས་པའི་རྒྱལ་པོ་མི་བསྐྱོད་པ། ཚོར་བའི་རྒྱལ་པོ་རིན་ཆེན་འབྱུང་ལྡན། འདུ་ཤེས་ཀྱི་རྒྱལ་པོ་སྣང་བ་མཐའ་ཡས། འདུ་བྱེད་ཀྱི་རྒྱལ་པོ་དོན་ཡོད་གྲུབ་པ་སྟེ། སྟོན་པ་མཆོག་ལྔ་པོ་མཚན་དང་དཔེ་བྱད་སོགས་ཡོན་ཏན་རྒྱ་མཚོའི་བདག་ཉིད་ཅན། གདུལ་བྱའི་དབང་གིས་ཞི་དང་ཁྲོ་བོའི་རྣམ་འགྱུར་རང་སྣང་ལོངས་སྐུ་དང་ཆ་འདྲ་བར་མཐུན་སྣང་དཔག་ཏུ་མེད་ཅིང་མཐའ་ཡས་པར་སྣང་ངོ༌། །དེ་ལྟར་ཞིང་ཁམས་ལྔ་པོར་སྟོན་པ་ལྔ་སོ་སོར་སྣང་ཡང་རྒྱུད་ཐ་དད་པ་མ་ཡིན་པར་སངས་རྒྱས་ཀྱི་ཡེ་ཤེས་གཅིག་གི་རྣམ་རོལ་དུ་ཤར་བའི་རིགས་ལྔའི་ཐུགས་ཡེ་ཤེས་རྣམ་པ་ལྔ་པོ་རེ་རེ་ལའང༌། འདི་ལྟར་རྣམ་སྣང་གི་ཐུགས་ཆོས་དབྱིངས་ཡེ་ཤེས་ལ་ཆོས་དབྱིངས་ཡེ་ཤེས་ཀྱི་མེ་ལོང་ལྟ་བུའི་ཡེ་ཤེས་སོགས་བཞི་ཡོད་པ་ལྟར། གཞན་མེ་ལོང་ལྟ་བུའི་ཡེ་ཤེས་ལའང་མེ་ལོང་ལྟ་བུའི་ཡེ་ཤེས་ཀྱི་ཆོས་དབྱིངས་ཡེ་ཤེས་སོགས་བཞི་དང་ལྡན་པས་མཚོན་ལྷག་མ་རྣམས་ལ་ཡང་བཞི་བཞིའི་འཁོར་དང་བཅས་པའི་ཡེ་ཤེས་ཉི་ཤུ་རྩ་ལྔ་ལས། དང་པོ་ཆོས་དབྱིངས་ཡེ་ཤེས་ཆོས་ཐམས་ཅད་ཆོས་ཉིད་ལ་ཐ་དད་མེད་པ་ལྟར་མཚན་འཛིན་གང་གིས་ཀྱང་གཡོ་བ་མེད་པ་ནི་སྣོད་བཅུད་ཐམས་ཅད་ལ་ཁྱབ་ཅིང་ངོ་བོ་བརྗོད་མི་ནུས་ཏེ། དཔེར་ན་ནམ་མཁའི་གཟུགས་སྨྲ་བརྗོད་ལས་འདས་པ་བཞིན་ཆོས་ཐམས་ཅད་ལ་ཁྱབ་ཅིང་བརྗོད་པ་དང་བྲལ་བ་མཁྱེན་ཡང༌། ཤེས་བྱའི་མཐའ་ལས་འདས་པས་ཆོས་དབྱིངས་སུ་རོ་གཅིག་གོ །གཉིས་པ་མེ་ལོང་ཡེ་ཤེས་ནི། དཔེར་ན་མེ་ལོང་ངོས་ནི་གཟུགས་བརྙན་འཆར་རུང་དུ་དྭངས་ཀྱང༌། རྩོལ་སྒྲུབ་དང་བྲལ་བ་བཞིན་མཁྱེན་ཆ་འགག་པ་མེད་པའི་ཡེ་ཤེས་གཟུང་འཛིན་གྱི་རྡུལ་དང་བྲལ་བ་ནི། མངོན་པར་འདུ་བྱེད་པའི་གཡོ་རྩོལ་མེད་བཞིན་མཆེད་པའི་ཤེས་བྱ་མཁྱེན་ཚུལ་ལྡོག་པའི་དབྱེ་བས་ཡེ་ཤེས་ཕྱི་མ་གསུམ་འཆར་བའི་གཞི་ལྟ་བུར་གྱུར་པའོ། །གསུམ་པ་འཁོར་འདས་ཀྱི་ཆོས་ཐམས་ཅད་བཟང་ངན་མེད་པར་རོ་མཉམ་པ་མཉམ་ཉིད་ཀྱི་རང་བཞིན་ཡིན་ལ། དེ་མཁྱེན་པའི་ཡེ་ཤེས་ཀྱིས་ཀྱང་ཆོས་ཀུན་བཟང་ངན་བླང་དོར་སོགས་མཚན་ཉིད་མེད་པར་སྲིད་ཞི་དབྱེར་མེད་སྤྲོས་པ་ཐམས་ཅད་ཞི་བའི་དབྱིངས་སུ་ཐུགས་ཞུགས་པའི་ཚུལ་དུ་མཁྱེན་པའོ། །བཞི་པ་རྟེན་འབྱུང་གི་ཆོས་ཐམས་ཅད་རྒྱུ་འབྲས་མ་འདྲེས་པར་སྣང་བ་ནི་སོ་སོར་རྟོག་པ་ཡིན་ལ། དེ་མཁྱེན་པའི་ཡེ་ཤེས་ཀྱིས་ཀྱང་ཆོས་ཉིད་ཇི་ལྟ་བ་བདག་མེད་པ་དང༌། ཆོས་ཅན་ཤེས་བྱ་ཕུང་སོགས་ནས་རྣམ་མཁྱེན་གྱི་བར་ཆོས་ཇི་སྙེད་པ་ཐམས་ཅད་རྟག་ཐོགས་མེད་པར་མཁྱེན་པའོ། །ཡེ་ཤེས་ལྔ་པ་བྱ་བ་ནི་གཞན་དོན་གྱི་མཛད་པ་ཡིན་ལ་དེ་རྩོལ་མེད་དུ་གྲུབ་ཅིང་མཁྱེན་པའི་ཡེ་ཤེས་ཀྱིས་སྐུ་གསུང་ཐུགས་ཀྱི་ཕྲིན་ལས་གཞན་ཕན་རླབས་ཆེན་སྒྲུབ་པའི་ཚུལ་ཅན་ལ་སྒྲིབ་བྱེད་ཀྱི་ཆ་ཆགས་ཐོགས་སྤངས་པའི་མཛད་པ་འཁོར་བ་མ་སྟོངས་བར་ལྷུན་གྱིས་གྲུབ་པའོ། །ཡེ་ཤེས་དེ་རྣམས་བསྡུ་ན། ཆོས་དབྱིངས་ཡེ་ཤེས་ཇི་ལྟ་མཁྱེན་པའི་ཡེ་ཤེས། གཞན་བཞི་ཇི་སྙེད་མཁྱེན་པའི་ཡེ་ཤེས་སོ། །སྟོན་པ་རང་ལས་རྒྱུད་གཞན་པའི་ཚུལ་གྱི་འཁོར་ནི་ས་དང་པོ་ནས་བཟུང་ས་བཅུའི་བར་གྱི་བྱང་སེམས་འབའ་ཞིག་དང་ཐབས་གཅིག་ཏུ་བཞུགས་པ་ལ། ཆོས་ཕུན་སུམ་ཚོགས་པ་སྐུ་ཡིས་ཐེག་པ་ཆེན་པོའི་ཆོས་རྣམས་གདུལ་བྱའི་བློ་ལ་འཇལ་བའི་ཐབས་ཀྱི་འོད་ཟེར་བཀྱེ་བས། རང་རང་གི་བྱད་ཀྱི་དྲི་མ་རང་གིས་མི་མཐོང་བ་དེ་མེ་ལོང་གི་ནང་དུ་གསལ་ནས་ཁྲུས་སོགས་ཀྱིས་སྦྱོང་བ་ལྟར། སར་གནས་བྱང་སེམས་དེས་སྤྲུལ་པའི་ལོངས་སྐུ་ལ་བལྟས་པས་རང་སྒྲིབ་ཡོད་པ་ངོས་ཟིན་པས་ད་དུང་བྱང་སེམས་བདག་དང་སྟོན་པ་ལོངས་སྐུའི་ཁྱད་པར་ཇི་ལྟར་ཡིན་པ་མཐོང་ནས། བྱང་ཆུབ་ཆེན་པོའི་འབྲས་བུ་ལ་སྒྲིབ་པའི་དྲི་མ་གཏིང་དཔག་དཀའ་བ་སྟེ་ཤེས་སྒྲིབ་ཀྱི་ཆ་ཤིན་ཏུ་ཕྲ་བ་ངོས་ཟིན་དཀའ་བ་དག །ཡོངས་སྦྱོངས་ཀྱིས་རིམ་གྱིས་སྦྱངས་ཏེ་ཡང་ས་དང་པོ་ལ་སེར་སྣ། གཉིས་པར་ཚུལ་འཆལ། གསུམ་པར་ཁོང་ཁྲོ། བཞི་པར་ལེ་ལོ། ལྔ་པར་རྣམ་གཡེང༌། དྲུག་པར་ཤེས་འཆལ། བདུན་པར་ཐབས་ལ་མི་མཁས་པ། བརྒྱད་པར་གཞན་དོན་གྱི་སྙིང་སྟོབས་ལ་སྒྲིབ་པ། དགུ་པར་སྨོན་པའི་དོན་ལ་གཡེལ་བ། བཅུ་པར་ཤེས་སྒྲིབ་ཕྲ་མོ་དང་བཅས་པ་དག་ནས་བཅུ་གཅིག་ཀུན་ཏུ་འོད་ལ་འགྲོ་སྟེ་བྱང་ཆུབ་པའི་ཚུལ་གསང་སྙིང་ལས། འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། །བྱང་ཆུབ་སེམས་དཔའི་འཁོར་རྣམས་ལ། །དེ་བཞིན་གསུང་མཆོག་མི་སྨྲ་སྟེ། །སྐུ་ཡིས་ཆོས་རྣམས་འཇལ་བར་སྟོན། །མེ་ལོང་བསྟན་པའི་ཚུལ་བཞིན་དུ། །དངོས་ཀྱི་མདོག་ངན་ཐམས་ཅད་སེལ། །འཁོར་གྱིས་དེ་བཞིན་སྐུ་བལྟས་ན། །བྱང་ཆུབ་སྒྲིབ་པ་གཏིང་དཔག་མེད། །མེ་ལོང་བཞིན་དུ་སྐུ་ལ་སྣང༌། །དེ་ནས་ས་བཅུ་རིམ་གྱིས་འབྱང༌། །བླ་མེད་བྱང་ཆུབ་ཡང་དག་འཐོབ། །ཅེས་སོ། །གཟུགས་བརྙན་ལོངས་སྐུའི་སྟོན་པ་དེ་ཇི་ཙམ་སྣང་བའི་དུས་ནི་ས་བཅུའི་དབང་ཕྱུག་ཆེན་པོ་རྣམས། འཇིག་རྟེན་མགོན་པོ་ཆོས་སྐུ་ངོ་བོ་ཉིད་མེད་པའི་དབྱིངས་མི་ཟད་རྒྱན་གྱི་འཁོར་ལོ་སྐུ་གསུང་ཐུགས་ཀྱི་ངང་དུ་སྟོན་འཁོར་དགོངས་པ་གཅིག་ཏུ་མ་གྱུར་གྱི་བར་དུ་མྱ་ངན་ལས་འདའ་ཚུལ་མི་སྟོན་པས། འཆི་བའི་བདུད་བཅོམ་ཞིང་དག་པའི་འཇིག་རྟེན་བྱང་སེམས་རྣམས་ལ་ཐེག་ཆེན་ཡོན་ཏན་གྱི་འབྱོར་པ་ཁྱད་པར་ཅན་བསྒྲུབ་པའི་སླད་རྟག་པ་རྒྱུན་གྱི་འཁོར་ལོར་བཞུགས་པའོ། །གདུལ་བྱའི་གཏི་མུག་ལ་སོགས་སྦྱང་བྱའི་དྲི་མ་ཉོན་མོངས་པ་བག་ཉལ་ལྔ་པོ་གང་གི་གཉེན་པོར་ཆེ་བའི་འོག་མིན་སོགས་ཞིང་ཁམས་ལྔ་དང༌། ཞིང་དེར་སྟོན་པར་བསྟན་པའི་སྐུ་རྣམ་སྣང་སོགས་ལྔ་ཡིས་ཆོས་དབྱིངས་ཡེ་ཤེས་སོགས་ཐ་སྙད་ལས་འདས་པའི་ཆོས་རབ་ལྔ་བསྟན་པས་གཏི་མུག་གནས་འགྱུར་བ་ཆོས་དབྱིངས་ཡེ་ཤེས་སོག་ཡེ་ཤེས་རྣམ་པ་ལྔ་པོ་ཐོབ་པའི་ཚུལ་ཡང༌། སྒྱུ་འཕྲུལ་བརྒྱད་ཅུ་པར། འདོད་ཆགས་ལ་སོགས་ཉོན་མོངས་ལྔ། །རྣམ་དག་ཡེ་ཤེས་ལྔར་བཤད་དོ། །ཞེས་པ་གཏི་མུག་གི་དྲི་མ་སྦྱོང་དུས་བཅོམ་ལྡན་འདས་གཟུགས་ཀྱི་རྒྱལ་པོ་ལས་ཆོས་དབྱིངས་ཡེ་ཤེས། དེ་བཞིན་ཞེ་སྡང་ལ་རྣམ་པར་ཤེས་པའི་རྒྱལ་པོ་ལས་མེ་ལོང་ཡེ་ཤེས། ང་རྒྱལ་ལ་ཆོར་བའི་རྒྱལ་པོ་ལས་མཉམ་ཉིད་ཡེ་ཤེས། འདོད་ཆགས་ལ་འདུ་ཤེས་ཀྱི་རྒྱལ་པོ་ལས་སོར་རྟོག་ཡེ་ཤེས། ཕྲག་དོག་ལ་འདུ་བྱེད་ཀྱི་རྒྱལ་པོ་ལས་བྱ་གྲུབ་ཡེ་ཤེས་ཏེ་ཡེ་ཤེས་ཀྱི་ཆོས་ལྔ་བསྟན་པས་གནས་འགྱུར་ཐོབ་པ་ཡིན་པར་གསུངས་སོ། །དེ་ལྟར་ལྔ་ཚན་ལྔ་ཡང་ས་བཅུ་དང་སྦྱར་ན། མཐོང་ལམ་གྱི་དུས་སུ་ཀུན་བརྟགས་ལས་གྱུར་པའི་གཏི་མུག་གནས་གྱུར། ཀུན་གཞི་དབྱིངས་སུ་ནུབ་པ་ཆོས་དབྱིངས་ཡེ་ཤེས་ཀྱི་ངོ་བོ་ས་དང་པོ་རབ་ཏུ་དགའ་བ་ཐོབ། རྣམ་སྣང་མཐོང༌། དེ་ནས་རིམ་པར་སྒོམ་ལམ་ཆུང་ངུ་གསུམ་དུ་ང་རྒྱལ་གནས་གྱུར། ཡིད་ཀྱི་རྣམ་ཤེས་དབྱིངས་སུ་ནུབ། མཉམ་ཉིད་ཡེ་ཤེས་བརྙེས། དྲི་མེད་འོད་བྱེད་འོད་འཕྲོ་གསུམ་ཐོབ། རིན་འབྱུང་མཐོང༌། འབྲིང་གསུམ་དུ་ཆགས་རྟོག་གནས་གྱུར། ཉོན་ཡིད་དབྱིངས་སུ་ནུབ། སོར་རྟོག་ཡེ་ཤེས་ཐོབ། སྦྱང་དཀའ་མངོན་གྱུར་རིང་སོང་གསུམ་ཐོབ། སྣང་མཐའ་མཐོང༌། ཆེན་པོ་གསུམ་ལ་ཞེ་སྡང་གི་རྟོག་པ་ནུབ། ཀུན་གཞིའི་རྣམ་ཤེས་གནས་གྱུར། མེ་ལོང་ཡེ་ཤེས་བརྙེས། ས་བརྒྱད་པ་ཐོབ། མི་བསྐྱོད་པ་མཐོང༌། ས་དགུ་དང་བཅུ་པར་ཕྲག་དོག་གི་ས་བོན་དག །སྒོ་ལྔའི་ཤེས་པ་དབྱིངས་སུ་ནུབ། སོ་སོ་ཡང་དག་རིག་པ་བཞི་ཐོབ། བྱ་གྲུབ་ཡེ་ཤེས་བརྙེས། དོན་གྲུབ་མཐོང༌། དེ་ལྟར་མཐོང་ལམ་ནས་བཟུང་ས་བཅུ་རྒྱུན་མཐའི་བར་སྒོམ་ལམ་ས་དགུ་རིམ་གྱིས་རྫོགས་ནས་ས་བཅུའི་མཐར་འོད་ཟེར་ཆེན་པོའི་དབང་ཐོབ་ནས་རྫོགས་པའི་བྱང་ཆུབ་སྙིང་པོར་འགྲོ་བའོ། །ཕྱེད་སྤྲུལ་དུ་གདགས་པའི་འཐད་པ་ཞིང་ལྔ་པོ་འདི་ས་བཅུའི་བྱང་ཆུབ་སེམས་དཔའ་ཁོ་ན་ལས། ཉན་རང་སོགས་གདུལ་བྱ་གཞན་གྱི་སྤྱོད་པའི་ཡུལ་དུ་དངོས་སུ་སྣང་བ་མིན་ཞིང༌། དེ་བཞིན་སྟོན་པ་ལྔ་པོ་ལོངས་སྤྱོད་རྫོགས་སྐུར་སྣང་ན་ཡང༌། འཁོར་དང་ཞིང་ཁམས་སོགས་རང་སྣང་ཐུན་མོང་མ་ཡིན་པ་ཁོ་ན་མིན་ཏེ་རྒྱུད་གཞན་པ་བྱང་སེམས་སར་གནས་རྣམས་ཀྱི་སེམས་དག་པའི་སྣང་བས་བསྡུས་པ་ཡིན་པའི་ཕྱིར། ཕྱེད་སྣང་ལོངས་སྐུའི་རང་བཞིན་སྤྲུལ་པའི་ཞིང་ཁམས་ཞེས་ཉི་ཟླ་ཁ་སྦྱོར་ཆེན་པོའི་རྒྱུད་ཀྱིས་བསྟན་པ་ཡིན་ནོ། །ཁྱད་པར་ཐུན་མོང་མ་ཡིན་པའི་ལམ་རང་བཞིན་རྫོགས་པ་ཆེན་པོ་ཡི་གདམས་ངག་དང་འཕྲད་པའི་གང་ཟག་དེ་ནི་དབང་པོ་ཐ་མ་ཡིན་ཡང་ས་ཐོབ་པའི་ངེས་པ་སོགས་ལ་སྤྱིར་ལམ་ཐུན་མོང་པར་ས་ལམ་རིམ་གྱིས་བགྲོད་དགོས་ཀྱང་འདིར་ས་ལམ་གཅིག་ཆོད་ཡིན་པས་གཞན་ལ་ལྟོས་མི་དགོས་པར། ད་ལྟ་སྙིང་གར་ཡོད་པའི་རིག་གདངས་རང་སྣང་ཡེ་ཤེས་ཀྱི་དཀྱིལ་འཁོར་དམ་པ་མངོན་སུམ་དུ་སྣང་བ་ཡིད་དཔྱོད་ལས་འདས་པ་དེ་རུ། བཞུགས་སྟངས་གསུམ་དང་གཟིགས་སྟངས་གསུམ་སོགས་ཀྱི་ཐབས་ཁྱད་པར་བའི་གནད་ཀྱིས་གཅུན་ནས་གནས་ལུགས་མཆོག་གི་དོན་གཟིགས་པའི་བླ་མ་དམ་པས་ཐོད་རྒལ་རིག་པའི་རྩལ་དབང་བསྐུར་ཏེ་ངོ་སྤྲད་ནས་བྱིན་གྱིས་བརླབས་པ་དང༌། དེའི་སྲོག་དམ་ཚིག་དག་ཅིང་མ་ཉམས་ལ། ཉིན་དུས་བཞུགས་སྟངས་དང་གཟིགས་སྟངས་ཀྱི་རང་སྣང་མངོན་སུམ་ཟེར་གདངས་ཀྱི་འོད་གསལ་ངང་དང༌། མཚན་མོ་སྙིང་ཁའི་འོད་གདངས་ཤེས་བྱ་བུམ་འཇུག་གི་མན་ངག་ལ་གོམས་པ་རྣམས་ཀྱིས་དེ་ལྟར་ཉམས་སུ་བླ་ངས་ཀྱང་སྣང་བ་ཆེར་ཡང་མ་འཕེལ། རྟོགས་པས་ཆོས་ཟད་ཀ་དག་གི་དགོངས་པ་ངོ་མ་འཕྲོད་པས་རྟོགས་པའི་རང་བཞིན་ཚད་དུ་མ་ཕྱིན་ཏེ་ཚེ་འདིར་མ་གྲོལ་ཡང༌། མི་དགེ་བའི་འཇུག་པ་སྲབ་སྟེ་རྨི་ལམ་དགེ་བར་འགྱུར་བའི་སྐལ་ལྡན་དེ། སྔོན་གོམས་དང་ཆོས་རྣམས་ཀྱི་ཆོས་ཉིད་བདེན་པ་དང་བླ་མའི་བྱིན་རླབས་ཀྱིས། ལུས་རྟེན་གྱི་རྒྱ་རལ་བའི་ཚེ་ན་སྲིད་པ་བར་དོར་བག་ཆགས་ཟད་ནས་ས་ཐོབ་རྣམས་དང་རང་བཞིན་སྤྲུལ་པའི་ཞིང་དེར་སྐལ་པ་མཚུངས་པར་གྱུར་ནས། རང་ལ་ཡོད་པའི་གཞི་སྣང་ལྷུན་གྲུབ་ཀྱི་སྒོར་སངས་རྒྱས་ཐུགས་རྗེས་འོད་ཟེར་བཀོད་པའི་ཕྱོགས་བཅུ་སྤྲུལ་པའི་ཞིང་དག་པར་འགྲོ་བའོ། །སྤྱིར་ཞིང་བཅུ་མེ་རི་འབར་བ་དང༌། བཅུ་གཅིག་ཡོད་ཀྱང་ཁྱད་པར་སྲིད་ཞི་ལས་རྣམ་པར་གྲོལ་ཞིང་གདོད་མའི་ས་ལ་དབུགས་ཆེན་འབྱིན་བར་བྱེད་པ་ཞིང་ཁམས་ལྔ་པོར་བསྡུས་ཏེ་བསྟན་པ་ནི། ཤར་ནས་རིམ་བཞིན་ཤར་ན་མངོན་དགའི་ཞིང་གཞི་དང་གཞལ་ཡས་སོགས་ཤེལ་ལས་གྲུབ་པ་དང༌། ལྷོར་དཔལ་དང་ལྡན་པའི་ཞིང་སུ་ཝརྞ་སྟེ་གསེར་ལས་གྲུབ་པ་དང༌། ནུབ་པདྨ་བརྩེགས་པའི་ཞིང་པདྨ་རཱ་ག་ལས་གྲུབ་པ་དང༌། བྱང་ན་རིན་ཆེན་རྣམ་པར་བཀོད་པའམ་ལས་རབ་གྲུབ་པའི་ཞིང་རིན་པོ་ཆེ་ཨིནྡྲ་ནཱི་ལའི་ས་གཞི་དང་གཞལ་མེད་ཁང་སྟེ་དེ་རྣམས་ཀྱང༌། སྒོ་ཁྱམས་བཞི་དང་ལྡན་པའི་སྟེང་རྟ་བབས་ཀྱིས་བརྒྱན་པ་ཕྱོགས་བཞིར་སྣང་བྱེད་བ་གླང་མིག་ལྟ་བུ་ལས་ཉི་མ་ཤར་བ་ན་ནང་དུ་འོད་ལྔ་དང་བྱང་དུ་འོད་ལྗང་འཆར་བ། ཟུར་བཞིར་མུ་ཏིག་ལས་གྲུབ་པའི་མཆོད་རྟེན་བཞི་དང༌། དེའི་བར་དྲིལ་བུ་དང་གཡེར་ཁས་སྦྲེལ་བའི་དཔྱངས་ཐག་རླུང་གིས་བསྐྱོད་པའི་སྒྲ་ལས། རྣམ་ཐར་སྒོ་གསུམ་དང་ལྡན་པའི་ཆོས་ཀྱི་སྒྲ་དབྱངས་དར་དིར་དུ་སྒྲོག་པ། ཕྱོགས་བཞིར་རླུང་གིས་བསྐྱོད་པའི་དྲི་ཞིམ་པོ་སྣ་ཚོགས་འབྱུང་བས་སྤོས་སྤྲིན་གཡོ་བའི་དར་སྣ་ཚོགས་པའི་བ་དན་བཞི་ཡོད་པ། གཞལ་ཡས་ཁང་གི་ཕྱི་རིམ་ཡན་ལག་བརྒྱད་དང་ལྡན་པའི་རྫིང་བུའི་འགྲམ་ན། ཏཱ་ལའི་ལྗོན་པ་དྲི་བཟང་གི་ངད་དང་ལྡན་པ་ལོ་མ་དང་ཡལ་ག་རྣམས་རིན་པོ་ཆེ་སྣ་ཚོགས་ཀྱི་དྲྭ་ཕྱེད་འཕྱང་འཕྲུལ་གཡོ་བ་ཅན་མང་པོས་བརྒྱན་པ། དེ་འི་ཕྱི་རོལ་ན་མཚེའུ་བརྒྱད་ཡོད་པ། དེར་བྱ་རིགས་འདི་ལྟ་སྟེ། མཐིང་རིལ་དང༌། ཤང་ཤང་ཏེའུ་དང༌། རྨ་བྱ་དང༌། ཀ་ཏ་རི་དང༌། ནེ་ཙོ་མི་སྐད་འབྱིན་པ་དང༌། ངང་པ་གཞོན་ནུ་དང༌། རི་*no sa?སྐེགས་དང༌། ཟེར་མོ་དང༌། སྦབ་དང༌། ཀངྐ་རི་དང༌། ལྷའི་བྱ་དྲིལ་བུའི་སྒྲ་ཅན་དང༌། ཁུ་བྱུག་དང༌། གསེར་གྱི་རྡོ་རྗེའི་གཟུགས་ཅན་ཀྲི་ཏི་པ་ལ་སོགས་པ་སྟེ། གཡུ་ལྟར་སྡོ་བ་དང༌། བྱེ་རུ་ལྟར་དམར་བ་དང༌། ཨིནྡྲ་ནཱི་ལ་ལྟར་ལྗང་བ་དང༌། དུང་ལྟར་དཀར་བ་སོགས་ཁ་དོག་སོ་སོར་ཕྱེད་པའི་བྱ་རིགས་སྣ་ཚོགས་པ་རྣམས་ཀྱིས་སྐད་སྙན་ཡིད་དུ་འོང་བ་སྒྲོག་ཅིང༌། མགྲིན་པའི་རྒྱུད་མང་ཕྱོགས་མཐར་དུས་ཀུན་ཏུ་འཁྲོལ་བས་དགའ་བར་བྱས་པ་དང༌། ཞིང་དེ་ན་བཞུགས་པའི་བྱང་ཆུབ་སེམས་དཔའ་རྣམས་སྐྱེ་བ་གཅིག་གིས་ཐོགས་པ་ཤ་སྟག་ལ། ཟས་དང་སྐོམ་ཡང་ཡིད་ལ་དྲན་པ་ཙམ་གྱིས་ཚིམ་ཞིང༌། ཉོན་མོངས་པའི་གནོད་པ་མེད་པས་མཆོག་ཏུ་བདེ་ལ། བྱུང་སྲིད་ནའང་རང་བཞིན་ཞི་བའི་ནུས་པ་དང་ལྡན་པའི་ཆུ་ཀླུང་ལ་ཁྲུས་བྱས་པ་དང༌། ལོངས་སྤྱད་པ་ཙམ་གྱིས་སེལ་ཞིང་ཕྱིས་འདུ་བའི་ནད་དག་མི་འབྱུང་བ་དང༌། གཞན་ཡང་གོས་རྒྱན་སོགས་ཡིད་ལ་ཅི་དང་ཅི་བསམ་ཐམས་ཅད་དྲན་པའི་མོད་ལ་འབྱུང་ཞིང༌། མདོར་ན་ཞིང་སྔ་མ་གསུམ་སུམ་ཅུ་རྩ་གསུམ་པའི་ལྷ་དང་ལོངས་སྤྱོད་མཉམ་ཞིང༌། ལས་རབ་གྲུབ་པ་ནི་གཟུགས་ཁམས་ཀྱི་ལྷ་དང་མཉམ་མོ། །ཕྱི་རིམ་ན་རིན་ཆེན་སྣ་བདུན་ལས་གྲུབ་པའི་ལྕགས་རི་ཕ་གུ་ཅན་ཡོད་དོ། །དེ་རྣམས་ཀྱི་དབུས་ན་རིན་པོ་ཆེ་སྣ་ཚོགས་ལས་བྱས་པའི་ཆོས་ཁྲི་དང་ལྡན་པ་ཡོད་དོ། །ཞིང་མཆོག་དེ་ན་རིགས་བཞིའི་སྟོན་པ་རྡོར་སེམས་རིན་འབྱུང་སྣང་མཐའ་དོན་གྲུབ་སྟེ་བཞི་པོ་ཡིས། ཉིན་མཚན་གྱི་དུས་བཞིར་དམ་པའི་ཆོས་ཀྱི་སྒྲ་སྒྲོག་པ་རྒྱུན་མི་འཆད་དེ། དེ་ཡང་རྡོ་རྗེ་སེམས་དཔའ་སོགས་སྟོན་པ་གསུམ་གྱིས་སྲོད་ལ་རྒྱུ་མཚན་ཉིད་ཀྱི་ཐེག་པའི་ཆོས། ནམ་ཕྱེད་ན་སྔགས་ཕྱི་པའི་ཆོས། ཐོ་རངས་ན་སྔགས་ནང་པའི་ཆོས། ཉིན་ཕྱེད་ན་རྫོགས་པ་ཆེན་པོ་འབྲས་བུ་བླ་ན་མེད་པའི་ཆོས་འཆད་དོ། །དོན་ཡོད་གྲུབ་པས་སྲོད་ལ་གདམས་ངག་གི་ཁྲིད་ཆོས། ཐོ་རངས་སྤྱོད་པའི་ཆོས། ནམ་ཕྱེད་ན་དབང་བསྐུར་བའི་ཆོས། ཉིན་ཕྱེད་ན་ལྟ་སྒོམ་གྱི་ཆོས་སྟོན་ཏོ། །ཞིང་ཁམས་དེ་དག་ཀུན་གྱི་དབུས་ཀྱི་བར་སྣང་ན་ཧེ་རུ་ཀ་དཔལ་ཆེན་པོའི་ཞིང་དུར་ཁྲོད་ཆེན་པོ་མེ་རི་འབར་བ་ཞེས་བྱ་བ་ཡོད་དེ། དེ་ན་གཞལ་ཡས་ཁང་འདི་ལྟ་བུ་སྟེ། ཐོད་མཁར་གྲུ་བཞི་པ། ཐོད་པ་སྐམ་པོས་འབྲས་བུ་བྱས་པ། ཤ་ར་རི་ཡོད་པས་རྩིག་པ་བྱས་པ། བྷནྡྷ་ལྕང་ལོ་ཅན་གྱིས་ཁ་བད་བྱས་པ། རྒྱ་དཔང་ཚད་ལས་འདས་པ་གནམ་ལྕགས་ཀྱི་གཟེར་གྱིས་བཏབ་པ། རཀྟའི་ཞམ་ཆུ་འབབ་པ། ཉི་ཟླའི་ཀ་གདན། ཆུ་སྲིན་ཁའི་ཀ་གཞུ། ལྷ་ཆེན་བརྒྱད་ཀྱི་གདུང་དུ་བྲེས་པ། མཆོག་ཆེན་པོས་གྲབ་བཏང་བ། ཉིན་མོ་རླུང་འཚུབས་པ། མཚན་མོ་མེ་འབར་བ། གྲུ་བཞི་ན་ཞིང་ཆེན་གྱི་གདུགས་ཕུབ་པ། ལྷ་མོ་ལྔ་གར་བྱེད་པ། ས་གཞི་ཐམས་ཅད་རཀྟའི་རྦ་ཀློང་འཁྲུགས་པའོ། །གཞལ་ཡས་ཁང་དེ་ན་སྟོན་པ་སྤྲུལ་པའི་སྐུ་ཕྱི་ལྟར་རྒྱལ་བ་ཤཱཀྱ་ཐུབ་པ་དང༌། ནང་ལྟར་རྡོ་རྗེ་འཆང་དུ་སྣང་བ། གསང་བ་ལྟར་གཞོན་ནུ་དཔའ་བོ་སྟོབས་ལྡན་ཞེས་བྱ་བའི་བཅོམ་ལྡན་འདས་ཐུགས་ཞི་བའི་ངང་ལས་མ་གཡོས་ཀྱང༌། ཁྲོ་བོའི་ཆ་བྱད་དུ་བསྟན་པ་ལག་ན་རྡོ་རྗེ་ལ་སོགས་དཔའ་བོ་དང༌། མཁའ་འགྲོ་པུརྞ་ཉེ་བར་ཞི་དང༌། ཚངས་པ་དུང་མགྲིན་ཅན་དང༌། དྲང་སྲོང་ཟླ་འོད་གཞོན་ནུ་དང༌། ཡང་འཁོར་མཁའ་འགྲོ་ཨེ་ཀ་ཙ་ཏི་སྤུན་དྲུག་དང༌། དེའི་བྲན་མོ་བཅུ་བཞི་དང༌། གཡོག་མོ་ལྔ་བཅུ་རྩ་བརྒྱད་དང༌། ཡང་གཡོག་འབུམ་ཁྲི་འབུམ་སྟོང་ལ་སོགས་པ་མཁའ་འགྲོའི་སྤྲིན་ཕུང་དཔག་ཏུ་མེད་པ་འཕྲོ་བ་དང༌། དགའ་རབ་རྡོ་རྗེ་ལ་སོགས་མིའི་འཁོར་དཔག་ཏུ་མེད་པས་བསྐོར་བའི་དབུས་ཉིད་ན། འབྲས་བུ་གསང་སྔགས་བླ་ན་མེད་པའི་ཆོས་འཁོར་བསྐོར་ནས་འཁོར་གྱི་རྒྱུད་གྲོལ་བར་མཛད་དོ། །ཞིང་དེ་རྣམས་ལ་པདྨ་ལས་རྫུས་ཏེ་སྐྱེས་པའི་རྒྱལ་སྲས་དཔག་ཏུ་མེད་པ་ཐམས་ཅད་ཀུན་ཀྱང་ལྷ་དང་ལྷ་མོ་དང་ཁྱེའུ་དང༌། བུ་མོའི་རྣམ་པ་གསང་སྔགས་བླ་མེད་ཀྱི་བརྟུལ་ཞུགས་མཐར་སོན་པའི་དྲང་སྲོང་དངོས་གྲུབ་རྣམ་པ་གཉིས་བརྙེས་པའི་བདག་ཉིད་ཅན་ནོ། །དེ་རྣམས་ལ་གཟུང་འཛིན་གྱི་རྣམ་པར་རྟོག་པ་མེད་ཅིང་བག་ཆགས་འཛིན་པའི་ཀུན་གཞི་དང༌། ཉོན་མོངས་ཅན་གྱི་ཡིད་དང༌། དེ་དང་ལྡན་པའི་སྒོ་ལྔའི་འཇུག་པ་སྟེ་སེམས་གསུམ་ཀྱང་མེད་ལ། འཁྲུལ་པ་སྐྱེད་བྱེད་དཔྱོད་པར་བྱེད་པའི་ཡིད་དྲུག་དང་ནི་རྩ་བའི་ཉོན་མོངས་པ་དྲུག་ཀྱང་མེད་ཅིང༌། མ་རིག་པ་གསུམ་ཀྱང་མེད་ལ་རྐྱེན་བཞི་ཡོད་མ་ཡིན། དེ་དང་མཚུངས་པར་ལྡན་པ་སེམས་སེམས་བྱུང་རྣམས་ཀྱང་མེད་དོ། །ཞིང་དེ་དག་ནི་སྟོན་པ་བཅོམ་ལྡན་འདས་རྡོ་རྗེ་འཆང་གི་བྱིན་རླབས་ལས། རང་བཞིན་ཉིད་དུ་བཀོད་པ་ཡིན་པའི་ཕྱིར་རང་བཞིན་ནི་སྤྲུལ་པའི་ཞིང་ཞེས་རྒྱལ་སྲས་རིག་པ་འཛིན་པ་རྣམས་ལ་གྲགས་སོ། །ཞིང་ལྔ་པོ་དེ་དག་སྣང་བའི་རྒྱུ་ནི་སྙིང་ག་ན་མེ་ལོང་ལྟ་བུ་ལ་སོགས་པ་ཡེ་ཤེས་རིན་པོ་ཆེ་ནང་གསལ་བའི་རང་གདངས་དང༌། དུང་ཁང་ན་ཁྲོ་བོའི་དཀྱིལ་འཁོར་དུ་ཡེ་ནས་བཞུགས་པའི་སྣང་བ་ལས་ཤར་བ་ཡིན་པས་ན་རང་བཞིན་རྫོགས་པ་ཆེན་པོའི་མངོན་སུམ་འོད་གསལ་ལ་གོམས་པའི་གསང་ལམ་དུ་སྣང་བ་ཡིན་པ་རིག་པ་རང་ཤར་ཆེན་པོའི་རྒྱུད་ལས་བསྟན་ཏོ། །གཞན་དུ་དེ་མཐུན་གནས་ཐུན་མོང་དུ་གྲགས་པ་ཟངས་མ་དོག་དཔལ་རི། ཤམྦྷ་ལ། ལྕང་ལོ་ཅན་ལ་སོགས་པ་ལྟ་བུ་བདེ་ཆེན་སྔགས་ལ་སྤྱོད་པ་རྣམས་ཀྱི་རང་སྣང་དག་ཞིང་སྟེ། དེ་ཡང་ཡུལ་ཉེར་བཞི་ལྟ་བུའི་གནས་ཀྱིས་མཚོན་ན་ནམ་མཁའ་ནས་འོང་བའི་ལྷ་དང་དྲི་ཟ་ལ་སོགས་པས་བཟུང་བའི་གནས་བརྒྱད་ལ་མཁའ་ལ་སྤྱོད་པ་ཞེས་གྲགས་པ་དང༌། ས་སྟེང་ནས་འོང་བའི་གནོད་སྤྱིན་སྲིན་པོའི་འཁོར་སོགས་ཀྱིས་བཟུང་པའི་གནས་བརྒྱད་ལ་ས་སྤྱོད་ཟེར། ཡང་ཀླུ་དང་རི་རབ་ཁོང་སེང་ནས་འོང་བའི་ལྷ་མིན་སོགས་ཀྱིས་བཟུང་བའི་གནས་བརྒྱད་ལ་ནི་ས་འོག་ལ་སྤྱོད་པ་ཞེས་གྲགས་སོ། །དེ་ལྟ་བུའི་ཞིང་དེ་རྣམས་སུ་དོན་གྱི་འོད་གསལ་ལ་དབང་ཐོབ་པའི་ལྷན་ཅིག་སྐྱེས་མའི་ཡེ་ཤེས་ཀྱི་ཌཱཀི་མ་དང༌། དང་པོ་ནས་ཡུལ་ཆེན་ཉེར་བཞིར་སྤྱོད་པའི་ཞིང་སྐྱེས་མ་དང༌། སྔགས་ཀྱི་སྒོམ་སྤྱོད་གོམས་པའི་སྟོབས་ཀྱིས་གནས་དེ་དག་ཏུ་བགྲོད་ནུས་པའི་སྔགས་སྐྱེས་མ་ལ་སོགས་པ་རིག་འཛིན་དཔའ་བོ་དང་རྣལ་འབྱོར་མ། རྡོ་རྗེ་ཐེག་པའི་ལམ་གྱི་བསོད་ནམས་དང་ཡེ་ཤེས་ཀྱི་ཚོགས་ཀྱིས་སྟོབས་ནུས་མཐུན་པར་སད་པའི་དབང་གིས་རྗེ་བཙུན་མ་ཧཱ་གུ་རུ་དང༌། གསང་བདག་ལག་ན་རྡོ་རྗེ་ལ་སོགས་པའི་ཚོམ་བུའི་འཁོར་དང་ལྷན་ཅིག་ཏུ་ཚོགས་པ་རྣམས་དང་སྐལ་པ་མཉམ་པའི་རིག་འཛིན་གྱི་གྲལ་གང་ཡིན་པ་དེ་ཐམས་ཅད་དུ་སོང་ནས། བསྐྱེད་རྫོགས་ཀྱི་ལམ་གྱི་འཕྲོ་སྦྱོང་སྟེ་རང་རང་གི་ལམ་སྟོན་དུ་གྱུར་པའི་རིག་པ་འཛིན་པ་ཡི་རྡོ་རྗེའི་བླ་མ་རྣམས་ནི་གནས་འདི་དང་ཞིང་འདིར་བཞུགས་འདིར་མི་བཞུགས་ཞེས་མེད་དེ་མོས་གུས་དག་པའི་སྣང་ངོར་རང་ཉིད་གང་དུ་སོང་བའི་ཞིང་དེར་མངོན་སུམ་རབ་ཏུ་བཞུགས་པའི་དྲུང་ནས། སྔགས་ཀྱི་ལྟ་བ་ཟབ་མོའི་བོགས་འདོན་དང༌། དེ་ལ་བརྟེན་ནས་བརྟུལ་ཞུགས་ཀྱི་སྤྱོད་པ་རླབས་པོ་ཆེ་ལ་སྤྱོད་ནུས་དེ། རིག་འཛིན་བླ་མའི་ཕྲིན་ལས་སྣ་ཚོགས་པས་འཇིག་རྟེན་གྱི་ཁམས་སྣ་ཚོགས་པར་དད་ལྡན་རྗེས་སུ་བཟུང་བ་དང༌། སྣོད་མིན་ཚར་གཅོད་པ་སོགས་མོས་པ་དང་འཚམས་པར་དོན་བྱེད་པའོ། །ཞིང་འདི་དག་རང་གི་མོས་གུས་དང་དག་སྣང་སོགས་དགེ་བའི་ས་བོན་མཐུ་བརྟས་པ་དང༌། བསྐྱེད་རིམ་གྱིས་རང་སྣང་དག་པར་ཤར་བ་དང༌། རྫོགས་རིམ་གྱིས་རྩ་ཐིག་རླུང་སེམས་ལས་སུ་རུང་བ་སོགས་ཟབ་མོའི་བརྟུལ་ཞུགས་མཐར་སོན་པའི་གསང་སྔགས་ཀྱི་ནུས་མཐུ་རང་དབང་དུ་སོན་ཏེ་གྲུབ་པ་ཐོབ་པ་རྣམས་ལ་སྣང་བ་དེ་ལས་གཞན་མ་དག་པའི་རྟོག་དཔྱོད་རང་རྒྱུད་པས་འདོད་པ་ཅན་གྱི་སྒོ་ནས་སོང་ན་ཕྱིན་དུ་ཡོད་པ་ཡི་གནས་རིས་སུ་ཆད་པ་ཅན་མཐུན་སྣང་དུ་གྲུབ་པར་བསམ་པར་མི་བྱ་ལ་རང་སྣང་དག་པ་ཁོ་ན་ལ་སྣང་བར་ཤེས་པར་བྱའོ། །ཆོས་སྐུ་སྤྲོས་བྲལ་དེ་ཉིད་ཀྱི་ངང་ལས་སྣང་བའི་ལོངས་སྤྱོད་རྫོགས་པ་ཡི། སངས་རྒྱས་ཀྱི་སྐུ་ཡི་གནས་དྲུག་ལས་ཡི་གེའི་སྤྲིན་གྱི་ཕྲེང་བའི་འོད་ཟེར་རབ་ཏུ་འཕྲོས་པས་རིགས་དྲུག་གི་འཇིག་རྟེན་རྣམས་སུ་འགྲོ་བ་འདུལ་བར་བྱེད་པའི་སྤྲུལ་པའི་སྐུ་མཆོག་སྣང་བ་ནི། མཁའ་འགྲོ་སྙིང་ཐིག་ལས། ལོངས་སྐུ་ཡབ་ཡུམ་གྱི་ལྗགས་ལས། འ་ཆོས་ཉིད་སྤྲོས་དང་བྲལ་བའི་སྒྲ། ཨ་གཟུང་འཛིན་གཉིས་སྣང་དག་པའི་སྒྲ། ཧ་ཆོས་ཉིད་རང་བྱུང་གི་སྒྲ། ཤ་ཤེས་རབ་འགག་པ་མེད་པའི་སྒྲ། ས་ཆོས་ཉིད་རང་བྱུང་གི་སྒྲ། མ་ཆོས་ཉིད་མཉམ་པ་ཉིད་ཀྱི་སྒྲ་སྟེ། ཡི་གེ་དྲུག་པའི་འཁོར་ལོས་འཛམ་བུའི་གླིང་བྱེ་བ་ཕྲག་བརྒྱ་ལ་སོགས་འཇིག་རྟེན་དྲུག་གི་ཕྱོགས་མཚམས་ཀུན་ཏུ་འབྲེལ་བས་ཕྱེད་སྤྲུལ་ཏེ། ལོངས་སྐུའི་དཀྱིལ་འཁོར་ལ་སྣང་བ་རང་བཞིན་སྤྲུལ་པའི་སྐུ་དང༌། ཐུབ་པ་དྲུག་སྟེ་འགྲོ་འདུལ་སྤྲུལ་སྐུ་དང༌། སོ་སོའི་སྣང་བ་དང་མཚུངས་པར་བཟོ་དང་སྐྱེ་བ་ལ་སོགས་པ་མ་དག་པ་སྤྲུལ་པའི་སྐུ་དཔག་ཏུ་མེད་པ་འཕྲོས་ནས་འགྲོ་བའི་དོན་མཛད་ཅེས་པ་ལྟར་མཐོ་རིས་གསུམ་དང་ངན་སོང་གསུམ་སྟེ། གནས་རིགས་དྲུག་གི་གདུལ་བྱ་སོ་སོའི་སྣང་བ་ལ་དེ་དང་འཚམ་པའི་སྤྲུལ་པ་བསྟན་ཏེ་འགྲོ་བ་དྲུག་པོར་རང་རང་གི་རྒྱལ་པོ་སོགས་མིང་གི་མངོན་བརྗོད་ལྷ་དབང་བརྒྱ་བྱིན་ལ་སོགས་པ་ལྟ་བུ་སྐལ་པ་དང་འཚམས་པར་རྗེས་སུ་འགྲོ་བའི། འདུལ་བྱེད་རིག་པའི་གསང་སྔགས་གྲུབ་པ་རྣམས་མཚན་དཔེ་ཅན་མེ་ཆུ་ཐོགས་པ་ཞིག་དམྱལ་གནས་སུ་མེད་མོད་རང་གི་སྣང་ཚུལ་གྱི་དབང་ལས་ཆོས་རྒྱལ་ལ་སོགས་པར་སྣང་ནས། དེ་དག་གིས་སྡུག་བསྔལ་གཏད་པའང་སྡུག་བསྔལ་ཟད་པའི་ཕྱིར་སངས་རྒྱས་ཀྱི་ཕྲིན་ལས་འཇུག་པ་ནི་ངེས་པའོ། །ཞེས་འགྲེལ་པར་གསུངས་སོ། །དེ་ཡང་རང་གི་མོས་པ་དང་འཚམས་པར་ལྷའི་རྔ་བོ་ཆེ་སོགས་སྣང་ཚུལ་མཚོན་པའི་སྐྱེས་བུ་ཐུབ་པ་དྲུག་སོགས་གདུལ་བྱའི་བྱེ་བྲག་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པའི་སྟོང་གསུམ་གྱི་སྟོང་ཆེན་པོ་ཡན་མན་དུ་རྒྱ་ཐེམ་བརྩེགས་པ་ལྟ་བུ་དང༌། ཕན་ཚུན་ཟ་འོག་ཁ་ཕྱེ་བ་ལྟ་བུ་ཚད་མེད་དུ་སྣང་བ་དེ་སྙེད་དང་མཉམ་པར་རབ་ཏུ་སྤྲུལ་ནས། གདུལ་བ་བཞི་ཡི་ཚུལ་གྱིས་འཁོར་བ་མ་སྟོང་གི་བར་དུ་འགྲོ་དོན་བསམ་མི་ཁྱབ་པར་མཛད་དོ། །དེ་ཡང་དང་པོ་སྐུ་བསོད་ནམས་ཆེན་པོས་འདུལ་བ་ནི། དགའ་ལྡན་གནས་ནས་འཕོ་བ་སོགས་མཆོག་གི་སྤྲུལ་སྐུ་ཡི་མཛད་པ་ཆེན་པོ་བཅུ་གཉིས་སོགས་སུ་སྟོན་ནས་འགྲོ་དོན་མཛད་པ་ཡིན་ནོ། །གཉིས་པ་གསུང་གི་མཛད་པ་གདུལ་བྱའི་རྣ་བར་ཚིག་གི་སྡེབ་སྦྱོར་ལེགས་པ་དང༌། ཚངས་དབྱངས་དྲུག་ཅུ་དང་ལྡན་པའི་གསུང་གིས་བསྟན་པའི་ཐེག་པའི་རྣམ་གྲངས་ཉན་རང་བྱང་སེམས་སྟེ་ཐེག་པ་གསུམ་མམ་བླ་མེད་ཀྱི་ཐེག་པ་གཅིག་རྣམས་སྟོན་པར་མཛད་ལ་ཆོས་སྒོ་གང་ཡང་གདུལ་བྱའི་སེམས་ཅན་རང་རང་གི་འདུ་ཤེས་སྣ་ཚོགས་པའི་རྗེས་སུ་འགྲོ་བ་ཡིན་ཏེ། སེམས་ཅན་གྱི་རྒྱུད་ཀྱི་ཉོན་མོངས་དུག་གསུམ་ཆ་མཉམ་དང་བཅས་པ་རེ་རེ་ལའང་ཉི་ཁྲི་ཆིག་སྟོང་རེ་ཕྱེ་བའི་གྲངས་ཀྱི་གཉེན་པོར་དགོངས་ཏེ་གསུངས་པ་ལ་སྡེ་སྣོད་གསུམ་སྔགས་དང་བཅས་པ་བཞི་པོ་རེ་རེ་ལའང་ཉི་ཁྲི་ཆིག་སྟོང་རེ་ཕྱེ་བས་ཆོས་ཀྱི་སྒོ་འཕར་བརྒྱད་ཁྲི་བཞི་སྟོང་གྲངས་སུ་གསུངས་པ་ལྟར་སྣང་ཡང༌། རྣམ་པར་རྟོག་པའི་ཀུན་སློང་གིས་བསྐྱེད་ཅིང་ལྕེ་མཆུའི་རྩོལ་བས་སྒྲ་ཚིག་རང་མཚན་པ་མ་ཡིན་པར་གདུལ་བྱའི་སེམས་ཅན་གྱི་ཁམས་ལ་རྒྱལ་བའི་ཐུགས་རྗེའི་བྱིན་རླབས་ཀྱི་མཐུས་སྣང་བ་ཡིན་ཏེ། ངས་ནི་ཅི་ཡང་མ་བསྟན་ཏེ། །སེམས་ཅན་རྣམས་ལ་ཁྱབ་གདལ་སྣང༌། །ཞེས་པ་ལྟར་གསུང་གཅིག་གིས་ཀྱང་གདུལ་བྱའི་བློ་ཡི་ཁྱད་པར་སྣ་ཚོགས་པའི་ངོར་སོ་སོའི་རྣམ་པར་རིག་པ་དེ་ཉིད་དང་མཐུན་པར་ཐ་དད་པར་ཤར་བ་ཡིན་ནོ། །གསུམ་པ་ཐུགས་ཀྱིས་གདུལ་བ་ནི་གདུལ་བའི་དུས་འདུལ་བྱེད་ཀྱི་ཐབས་སྣ་ཚོགས་པར་དུས་གསུམ་ཆགས་ཐོགས་མེད་པར་མཁྱེན་ཅིང་གཟིགས་པ་སྔོན་གནས་རྗེས་དྲན་གྱི་མངོན་པར་ཤེས་པ་དང༌། དེ་ལྟར་དུས་གསུམ་གྱི་དངོས་པོ་ཐམས་ཅད་མ་འདྲེས་པར་གཟིགས་ཀྱང་འདི་ནི་དུས་སོ་ཞེས་མཚན་མ་ཅན་དུ་སོ་སོར་མི་རྟོག་སྟེ་དུས་གསུམ་སྐྱེ་མེད་ཀྱི་དབྱིངས་སུ་བག་ཆགས་རང་ཟད་གྱུར་པའི་དུས་བཞི་མཉམ་པ་ཉིད་ཀྱི། རང་བཞིན་གདོད་མའི་གནས་སྐབས་ཀུན་ཏུ་བཟང་པོའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་ཡོངས་སུ་རྫོགས་པར་མཁྱེན་པ་ཟག་ཟད་མཁྱེན་པའི་མངོན་ཤེས་དང༌། གཞན་སེམས་ཅན་གྱི་དགེ་མི་དགེ་ལུང་མ་བསྟན་སོགས་སེམས་རྒྱུད་སྣ་ཚོགས་པ་མཁྱེན་པ་སྟེ་གཞན་སེམས་ཤེས་པའི་མངོན་ཤེས་དང༌། དེ་བཞིན་དུ་སེམས་ཅན་གྱི་མོས་པ་དང་མཐུན་པའི་དོན་སྤྱོད་པ་རྫུ་འཕྲུལ་ཆེན་པོའི་མངོན་ཤེས་དང༌། གཟིགས་པ་ལྷའི་སྤྱན་གྱིས་འཇིག་རྟེན་ཀུན་གྱི་སེམས་ཅན་རྣམས་འདི་ནས་འཆི་འཕོ་ཞིང་འདིར་སྐྱེའོ་ཞེས་སོགས་མཁྱེན་པ་ལྷ་ཡི་མིག་གི་མངོན་ཤེས་དང༌། གསན་པ་སྙན་གྱི་མངོན་ཤེས་ཀྱིས་འཇིག་རྟེན་ཐམས་ཅད་ཀྱི་སྒྲ་གསན་པ་སོགས་ལྷའི་རྣ་བའི་མངོན་ཤེས་ཏེ་དྲུག་དང༌། གཞན་ཡང་མཁྱེན་པའི་སྟོབས་བཅུ་ལ་སོགས་སྐུ་གསུང་ཐུགས་ཀྱི་ཡོན་ཏན་དཔག་ཏུ་མེད་པའང༌། མདོར་བསྡུ་ན་མངོན་ཤེས་དྲུག་པོ་དེ་རྣམས་ཐུགས་ཀྱི་རྗེས་སུ་འགྲོ་བས་གདུལ་བྱ་དུས་ལས་སྐད་ཅིག་ཀྱང་ཡོལ་བ་མེད་པར་དོན་མཛད་དོ། །བཞི་པ་ཕྲིན་ལས་བསམ་གྱིས་མི་ཁྱབ་པས་གདུལ་བར་བྱ་བ་ཀུན་ཏུ་འགྲོ་བའི་བློ་དང་མཐུན་པར་སྐུ་དང་ཞིང་ཁམས་ཉི་ཤུ་རྩ་ལྔ་སོགས་སྣ་ཚོགས་པ་དང༌། ཀུན་ཏུ་ཐུགས་སྤངས་རྟོགས་བསམ་གྱིས་མི་ཁྱབ་པ་དང༌། དེ་བཞིན་ཀུན་ཏུ་ཞལ་ཞི་བ་དང་ཁྲོ་བོ་སོགས་དང༌། དུས་ཀུན་ཏུ་གསུང་གི་གསང་བ་བསམ་མི་ཁྱབ་པ་ཡན་ལག་རྒྱ་མཚོའི་བརྡ་ཐབས་ཀྱིས་ཆོས་སྟོན་པའོ། །དེ་ལྟར་འདུལ་བཞི་པོས་འགྲོ་དོན་མཛད་པ་ན་སྐུ་གསུང་ཐུགས་གསུམ་གྱིས་ནི་དངོས་སུ་དོན་མཛད་ལ། ཕྲིན་ལས་ཀྱིས་ནི་དངོས་བརྒྱུད་གཉིས་ཀར་མཛད་ལ། མདོར་ན་ཀུན་དུ་མཛད་པ་ལྷུན་གྲུབ་རྒྱུན་མི་འཆད་དོ། །དེ་ལྟར་ཆོས་སྐུའི་དབྱིངས་ལས་ལོངས་སྐུ་དང་དེ་ལས་སྤྲུལ་པའི་སྐུ་མཆོག་རྣམས་ཀྱིས་མཁྱེན་ཆ་ཆོས་ཉིད་ལ་ལྟོས་ཇི་ལྟའི་ཡེ་ཤེས་ཀྱིས་ཟབ་མོ་དོན་དམ་བདེན་པ་དང༌། ཆོས་ཅན་གཟིགས་པ་ལ་ལྟོས་ཇི་སྙེད་མཁྱེན་པ་ཡི་ཡེ་ཤེས་ཀྱིས་ཀུན་རྫོབ་བདེན་པ་ཡི་ཆོས་ཐམས་ཅད་མ་འདྲེས་པར་སོ་སོར་མཁྱེན་པའི་ཡེ་ཤེས་གཉིས་པོ་དེ་ཉིད་ཀྱིས་གདུལ་བྱའི་རྒྱུད་འགྲོལ་ཞིང༌། དེ་ཡང་བརྗོད་བྱ་དོན་དང་ལྡན་པ་དང༌། རྗོད་བྱེད་ངག་ཚིག་དྲི་མ་མེད་པ་དང༌། བྱེད་ལས་ཉོན་མོངས་ཉེ་བར་སྤོང་བ་དང༌། འབྲས་བུ་ཞི་བའི་ཕན་ཡོན་སྟོན་པ་སྟེ་ཁྱད་པར་བཞི་དང་ལྡན་པས་ཕྱི་རོལ་པ་ལ་སོགས་པས་བསྟན་པ་དང་མ་འདྲེས་ཤིང་ཐུན་མོང་དུ་མ་གྱུར་པའི་ཆོས་ཚུལ་མཐའ་ཡས་པར་སྟོན་པའོ། །དེ་ལས་ཡང་སྤྲུལ་རྣམ་པ་བརྗོད་མི་ལང་སྟེ་འགྲོ་བ་བསམ་གྱིས་མི་ཁྱབ་པར་དེ་སྙེད་སྤྲུལ་པའང་བསམ་གྱིས་མི་ཁྱབ་བོ། །འོན་ཀྱང་འགྲོ་བ་དྲུག་གི་གནས་རིགས་དེ་སྙེད་དུ། ལྷ་རྣམས་འདུལ་བྱེད་ཚངས་པ་དང༌། ལྷ་ཡི་དབང་པོ་བརྒྱ་བྱིན་དང༌། བདེ་འབྱུང་སྟེ་ཁྱབ་འཇུག་སོགས་གནས་རིགས་སོ་སོའི་གཙོ་བོས་འཁོར་རྣམས་ཀྱི་སྡུག་བསྔལ་སེལ་བར་བྱེད་ལ། དེ་བཞིན་དུ་མི་ལ་ཡང་ཐེག་པ་སོ་སོའི་རིགས་དང་མཐུན་པར་ཉན་རང་བྱང་སེམས་རྣམས་དང༌། དགེ་བཅུས་ཁྲིམས་ཀྱིས་འདུལ་བར་འོས་པའི་དུས་སུ་འཁོར་ལོས་སྒྱུར་བའི་རྒྱལ་པོ་དང༌། རྒྱལ་ཕྲན་བློན་པོ་སོགས་དང༌། དེ་བཞིན་ལྷ་མ་ཡིན་ལ་ཐག་བཟང་རིས་ལ་སོགས་དང༌། བྱ་རྣམས་ལ་ཤིང་རྟ་མོ་དང༌། རྨ་བྱའི་རྒྱལ་པོ་གསེར་ལྡན་དང༌། སྲེག་པ་ལ་སོགས་པ་དང༌། རི་དྭགས་རྣམས་ཀྱི་ཕྱིར་དུ་སེངྒེའི་རྒྱལ་པོ་ཡི་དམ་བརྟན་པ་དང༌། ཤ་ར་བྷ་དང༌། ཀུནྡ་ལ་སོགས་པ་སྤྲུལ་པའི་རྣམ་རོལ་རྡོ་ཤིང་ཡན་ཆད་བསམ་གྱིས་མི་ཁྱབ་བོ། །མདོར་ན་དམྱལ་བ་ཡི་དྭགས་ཀྱི་འགྲོ་བ་སོགས་སེམས་ཅན་རྣམས་གང་དང་གང༌། འདུལ་བྱེད་དེ་དང་དེ་འདྲའི་གཟུགས་སྤྲུལ་ནས། སེམས་ཅན་དོན་ལ་སྙོམས་ལས་དང་གཞན་དབང་སོགས་དུས་ནམ་ཡང་གཡེལ་བ་མེད་པར་སྤྲུལ་པའི་རྣམ་པར་རོལ་པའི་གྲངས་འདི་ནི་ཕྱོགས་བཅུའི་འཇིག་རྟེན་དྲུག་གི་ཞིང་རབ་འབྱམས་རྣམས་སུ་སྣང་བ་ཡིན་ལ། འཇིག་རྟེན་དྲུག་ནི། གསང་སྙིང་ལས། ལས་ཀྱི་དབང་གིས་སྣྲེལ་གཞི་དང་ཡན་མན་གྱི་འཇིག་རྟེན་དྲུག་གི །ཞེས་སྣྲེལ་གཞི་དང་ཡན་མན་གྱི་སེམས་ཅན་གནས་པའི་སྣོད་ཀྱི་བྱེ་བྲག་གྲུ་བཞི་དང༌། ཟླུམ་པོ་དང༌། ཟླ་གམ་དང༌། གྲུ་གསུམ་དང༌། གཞི་ཕྱལ་པ་དང༌། སྟེང་གཡོགས་མེད་པ་སྟེ་དྲུག་གོ །སྣྲེལ་གཞི་ཞེས་པ་སོགས་ནི་ཕལ་པོ་ཆེ་ལས། ལས་ཀྱི་བྱེ་བྲག་བསམ་མི་ཁྱབ། །དམྱལ་བའི་འཇིག་རྟེན་ཐུར་འཕྱང་ཞིང༌། །གཤིན་རྗེའི་འཇིག་རྟེན་སྣྲེལ་གཞི་སྟེ། །བྱོལ་སོང་ལྷ་མི་གྱེན་དུ་འགྲོ། །ཞེས་པ་ལྟར་རོ། །དེ་ལྟར་འཇིག་རྟེན་དྲུག་གི་འགྲོ་བ་དེ་དག་རང་རང་གིས་ལས་བསགས་ཚུལ་དང༌། ལས་དེས་བག་ཆགས་དགེ་བ་དང་སྡིག་པ་དང་འདྲེས་མ་དག་བྱས་པའི་རྒྱུ་ལས་ནི་འབྲས་བུའི་དུས་ཀྱི་གནས་རིགས་ལྷའི་བདེ་བ་དང༌། དམྱལ་བའི་སྡུག་བསྔལ་ཁོ་ནར་སྤྱོད་པ་དང༌། མི་སོགས་འགའ་ལ་འདྲེས་མ་དང༌། ལྷ་མི་སོགས་སྟེང་དང༌། ངན་འགྲོ་འོག་སྟེ་མཐོ་དམན་ལྟར་འཁྲུལ་ངོར་སྣང་བའི་གནས་སྐབས་རྒྱལ་བའི་ཐུགས་རྗེས་རྣམ་པར་འཕྲུལ་པ་ཡང་ཚད་མེད་པར་འགྲོ་བ་རང་རང་གི་སྣང་བ་དང་མཐུན་པའི་སྟོན་པས་དོན་སོ་སོར་མཛད་ཅིང༌། ཆོས་ཀྱང་མ་ངེས་པ་སྣ་ཚོགས་སུ་གདུལ་བྱའི་བློ་རྟོག་ལྟར་སྣང་སྟེ། སྤྱིར་རྒྱལ་བའི་བཀའ་ལ་ཞལ་ནས་གསུངས་པ་དང༌། བྱིན་གྱིས་བརླབས་པ་དང༌། རྗེས་སུ་གནང་བའི་བཀའ་གསུམ་དུ་ཡོད་ཅིང༌། བྱིན་གྱིས་བརླབས་པ་ལའང་གསུམ་ལས་སྐུ་གསུང་ཐུགས་ཀྱི་བྱིན་གྱིས་བརླབས་པ་གསུམ་དུ་ཡོད་པར་གསུངས་པས་མཚོན་སྟོན་པ་པོའང་མ་ངེས་ཏེ། བཤད་སྦྱར་ལས། སྟོན་པ་འདི་ཡི་བྱིན་རླབས་ཀྱིས། །བྱའམ་ཤིང་བུ་རྡེའུ་དང༌། །པདྨོ་དག་དང་དཔག་བསམ་ཤིང༌། །རྔ་བོ་ཆེ་ལས་བྱུང་བ་ཡང༌། །རྒྱལ་བས་བྱིན་གྱིས་བརླབས་པའི་ཕྱིར། །དེ་དག་བཀའ་ཞེས་བྱ་བར་འདོད། །ཅེས་དང༌། སྡུད་པ་ལས། རྒྱལ་བའི་ཉན་ཐོས་གང་དག་ཇི་སྙེད་ཆོས་སྟོན་དང༌། །འཆད་དང་རིགས་པ་དག་དང་ལྡན་པར་བརྗོད་པ་དང༌། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཅིའི་ཕྱིར་ཞེ་ན་རྒྱལ་བས་ཆོས་ཚུལ་གང་བསྟན་པ། །དེ་ལ་མི་མཆོག་སློབ་མར་གྱུར་པས་མངོན་བསླབས་ཤིང༌། །མངོན་སུམ་བྱས་ནས་བསླབ་པ་ཇི་བཞིན་སྟོན་བྱེད་པ། །སངས་རྒྱས་མཐུས་བྱེད་རང་གི་སྟོབས་ཀྱི་མཐུས་མ་ཡིན། །ཞེས་པ་ལྟར་རོ། །སྟོན་ཚུལ་ཡང་བསམ་གྱིས་མི་ཁྱབ་སྟེ། དཔེར་ན་སྤོས་ཀྱི་ཡོངས་སུ་བརྩེགས་པའི་ཞིང་ཁམས་ན། བྱང་ཆུབ་སེམས་དཔའ་སྤོས་ཀྱི་ཤིང་ཆེན་པོའི་དྲུང་ན་གནས་པ་ན། ཤིང་དེའི་དྲི་ཚོར་བ་ཙམ་གྱིས་རྒྱུད་ལ་རྣམ་པར་ཐར་པའི་ཏིང་ངེ་འཛིན་སྐྱེ་བར་འགྱུར་བ་དེ་བཞིན་དུ་འཇིག་རྟེན་གྱི་ཁམས་ན་ལ་ལ་ཁ་ཟས་ཟོས་པས། ལ་ལ་ཆོས་གོས་གྱོན་པས། ལ་ལ་སྐུ་ལ་བལྟས་པས། ལ་ལ་རྨི་ལམ་ལ་སོགས་པས་སངས་རྒྱས་ཀྱི་མཛད་པ་ཉེ་བར་བསྒྲུབ་པའང་ཡོད་དེ་བསམ་གྱིས་མི་ཁྱབ་བོ། །ཞེས་སྒྲ་ཚིགས་མ་ངེས་པར་སྣང་ཚུལ་དཀོན་མཆོག་བརྩེགས་པ་ལས་བྱུང་བ་བཞིན་ནོ། །དོན་མཛད་པའི་དུས་ཀྱང་མ་ངེས་པར་གདུལ་བྱ་རང་རང་གི་སྐལ་བ་དེའི་རྗེས་སུ་འགྲོ་བ་ཡིན་ལ། མ་དག་ཞིང་གི་འགྲོ་བ་མཐའ་དག་ལ་དེ་ལྟར་སྣང་བ་ཡིན་ནོ། །གདུལ་བྱའི་འགྲོ་བ་གང་ཞིག་ལ་འདུལ་བྱེད་ཀྱི་སྤྲུལ་པ་སྣ་ཚོགས་སྣང་བ་ཡང་དྲི་བྲལ་རང་བཞིན་ཤེས་པའི་སངས་རྒྱས་ཀྱི་བྱིན་གྱིས་བརླབས་པ་དང༌། སེམས་ཅན་སོ་སོའི་སྨོན་ལམ་དང་དགེ་བའི་ལས་སྣང་འཛོམ་པ་ལས། ནང་གསལ་དབྱིངས་ཀྱི་སྐུ་གསུམ་པའི་ཐུགས་རྗེ་ཕྱིར་གསལ་དུ་ཤར་བའི་ཡེ་ཤེས་དང་ཕྲིན་ལས་དག་པའི་གཟུགས་སྐུ་གཉིས་དང༌། ཁྱད་པར་སོ་སྐྱེའི་ངོར་མཆོག་སྤྲུལ་ཤཱཀྱ་སེངྒེ་སོགས་འགའ་ཞིག་སྣང་བ་ནི་གཉིད་དུ་སོང་བའི་རྨི་ལམ་གྱི་ནང་དུ་སངས་རྒྱས་མཐོང་བ་ལྟར་རང་གི་སེམས་སྣང་ཙམ་ཡིན་ལ། རྨི་ལམ་ལྟ་བུར་སྤྲུལ་པའི་ཆོས་བསྟན་པ་དེ་གཉིས་པོ་ལ་ཡང་ངོ་བོ་ཉིད་མེད་ཀྱང་སངས་རྒྱས་ཞེས་རང་བཞིན་གཉིས་པ་ཞིག་མ་གྲུབ་ལ། གང་ལ་སྣང་བའི་སེམས་དེ་ཡང་བདག་མེད་ཅིང་འོད་གསལ་བ་དང༌། གང་ཞིག་སྣང་བའི་སངས་རྒྱས་དེ་ཡང་སྟོང་པ་ཉིད་རང་བཞིན་མེད་པས་གསོག་ཏུ་རིག་པར་བྱའོ་ཞེས་ཟབ་མོའི་མདོ་སྡེ་དག་ལས་གསུངས་ཏེ། དཀོན་མཆོག་བརྩེགས་པ་ལས། ངས་ནི་རྨི་ལམ་ལྟ་བུའི་འགྲོ་བ་ལ། །རྨི་ལམ་ལྟ་བུར་སྤྲུལ་ནས་ཆོས་བསྟན་ཡང༌། ངོ་བོ་མེད་དེ་རང་བཞིན་གཉིས་སུ་མེད། །བདག་མེད་སྟོང་པ་གསོབ་ཏུ་རིག་པར་བྱ། །ཞེས་སོ། །རྒྱུ་མཚན་དེ་བས་ན་འཁོར་འདས་ཀྱི་ཆོས་ཐམས་ཅད་རྨི་ལམ་ལྟ་བུའི་རོལ་པ་ལ་ཡིན་པའི་ཕྱིར་དང༌། གདུལ་བྱའི་སྣང་བའི་སྤྲུལ་པའི་སངས་རྒྱས་ཀྱང་ངོ་བོ་ཡེ་ནས་དག་པ་གཉིས་ལྡན་ཆོས་ཀྱི་སྐུ་ལས་མ་གཡོས་ན་ཡང་སྤྲུལ་པའི་གཟུགས་བརྙན་གདུལ་བྱ་ཉིད་དང་མཐུན་པར་སྡུག་བསྔལ་གྱི་བདེན་པས་བསྡུས་པ་ལྟར་སྣང་བའི་ཕྱིར། རང་བཞིན་མེད་པ་འཁོར་འདས་ཐམས་ཅད་སྒྱུ་མ་དང་རྨི་ལམ་ལྟ་བུར་མ་དག་པའི་འགྲོ་ངོར་ཐུགས་རྗེས་རོལ་པའི་སྤྲུལ་པ་སྣང་བ་ཡང༌། ཇི་སྲིད་འཁོར་བ་མ་སྟོངས་པ་དེ་སྲིད་དུ་གདུལ་བྱ་དེའི་རྗེས་སུ་འགྲོ་བའི་དོན་རྒྱུན་མི་འཆད་པར་སྣང་ལ། དེ་ལྟར་གདུལ་བྱ་འདུལ་བྱེད་གཉིས་ཀྱང་དབྱིངས་གཅིག་ལས་མ་གཡོས་བཞིན་དྲི་བཅས་གནས་སྐབས་ན་འཁོར་བ་དང༌། དྲི་མ་ལས་གྲོལ་བའི་ཚེ་མྱང་འདས་རྣམ་འགྱུར་དུ་ཤར་བའི་གནས་ལུགས་གཤིས་ཐོག་ཏུ་ཕེབས་པ་ལ་དེ་ཁོ་ན་ཉིད་མཐོང་བའི་སྐྱེས་བུ་ཞེས་བྱ་སྟེ། ཆོས་ཐམས་ཅད་འབྱུང་བ་མེད་པའི་མདོ་ལས། སངས་རྒྱས་མེད་ཅིང་ཆོས་དང་དགེ་འདུན་མེད། །དེ་ལྟར་སུས་ཤེས་དེ་ནི་མཁས་པ་ཡིན། །སེམས་ཅན་རང་བཞིན་བྱང་ཆུབ་ཉིད་དུ་གསུངས། །བྱང་ཆུབ་རང་བཞིན་སེམས་ཅན་ཐམས་ཅད་དེ། །སེམས་ཅན་རྣམས་དང་བྱང་ཆུབ་གཉིས་མ་ཡིན། །དེ་ལྟར་སུས་ཤེས་སྐྱེས་བུ་མཆོག་ཏུ་འགྱུར། །ཞེས་སོ། །འདིར་བཤད་པའི་རང་བཞིན་སྤྲུལ་སྐུ་འདི་མདོ་ཕྱོགས་སུ་ལོངས་སྐུ་ཡིན་པས་དེ་ཉིད་ངང་ནས་ངོ་བོ་ཐ་མི་དད་ཀྱང་ཐུབ་དྲུག་སོགས་སེམས་ལྡན་དང་བེམ་པོ་སོགས་སྣ་ཚོགས་སུ་སྤྲུལ་པ་ནི། ཡིད་ཀྱི་བྱེད་པ་པོ་དང་ཆོས་སུ་བྱ་བ་མེད་བཞིན་དུ་རི་བྲག་ཡུལ་ལྗོངས་ལ་སོགས་པར་སྐུ་གསུང་ཐུགས་རྟེན་རྣམས་རང་བཞིན་དུ་བྱོན་པར་སྣང་བ་དང༌། ཡུལ་ཉེར་བཞི་ལ་སོགས་པའི་བཀོད་པ་དང༌། མགར་བ་ལྷ་བཟོ་སོགས་ཀྱི་འདུ་བྱེད་ལས་བྱུང་བ་ཡི་དེ་བཞིན་གཤེགས་པའི་སྐུ་གསུང་ཐུགས་ཀྱི་སྣང་བརྙན་འབུར་དུ་བྱས་པ་དང་རིས་སུ་བྲིས་པ་དང༌། ཐགས་སུ་བཏགས་པ་སོགས་རྒྱལ་བའི་ཕྲིན་ལས་ཡིན་ཏེ། མདོ་ལས། སྐུ་གཟུགས་རྣམ་པ་མང་པོ་དེར་སྤྲུལ་ཏེ། །འགྲོ་བ་དགེ་ལ་སྤྱོད་པའི་དོན་བྱེད་དོ། །ཞེས་དང༌། ཁྱད་པར་སྟོན་པ་ཐུགས་རྗེ་ཅན་གྱི་ཞལ་ནས། ལྔ་བརྒྱའི་ཐ་མར་གྱུར་པ་ན། །ང་ནི་ཡི་གེའི་གཟུགས་སུ་སྣང༌། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པ་གྱིས། །ཞེས་པ་ལྟར་ཁྱད་པར་ཅུང་ཟད་ཙམ་ཡོད་པ་མ་ཡིན་ནོ། །གཞན་ཡང་གནྡྷོ་ལ་སྟེ་གཙུག་ལག་ཁང་དང༌། ཁང་བཟང་དང༌། སྐྱེད་མོས་ཚལ་དང༌། གནས་ཁང་ཉེར་སྤྱད་གང་ཡང་མེད་པའི་མྱ་ངམ་ཐང་དུ་འཁྱམས་པ་རྣམས་ལ་སྤྲུལ་པའི་གྲོང་ཁྱེར་དུ་སྣང་བ་དང༌། མེ་ཏོག་སྣ་ཚོགས་པའི་པདྨའི་ཚལ་དང༌། དགོས་འདོད་འབྱུང་བའི་དཔག་བསམ་ཤིང་དང༌། ཡིད་བཞིན་གྱི་ནོར་བུ་རིན་པོ་ཆེ་དང༌། ཆུ་བོ་རྣམས་ལ་གྲུ་དང༌། གཟིངས་དང༌། ཟམ་པ་དང༌། དེ་བཞིན་དུ་བགྲོད་པར་བྱེད་པའི་ཤིང་རྟ་དང༌། ཟས་གོས་ལ་སོགས་པ་གང་ལ་གང་འདུལ་གྱིས་སེམས་མེད་བེམ་པོའི་ཚུལ་དུ་སྣང་བ་རྣམས་རང་གི་སྒྲིབ་པའི་མཐུས་དངོས་སུ་མི་སྣང་ཡང༌། སྡུག་བསྔལ་ལས་ཐར་བ་དང་བདེ་བ་ལྡན་པའི་གཞིར་གྱུར་པའི་ཐབས་དང་བཅས་པ་རྣམས་སོ། །སྐྱེ་བ་སྤྲུལ་སྐུ་ནི་དངོས་སམ་བརྒྱུད་ནས་ཕན་འདོགས་པར་བྱེད་པ་སྟེ། མུ་གེའི་ཚེ་ན་ཉ་ཡི་རྒྱལ་པོ་པདྨ་སྐྱེས་ཏེ་ཉ་བོ་ཆེ་རུ་སྤྲུལ་ནས་རང་གི་ཤ་ཡིས་ཚིམ་པར་བྱེད་པ་དང༌། སྨན་གྱི་གསོར་མི་རུང་བའི་ནད་ཀྱིས་གདུངས་བའི་སྐྱེ་བོ་རྣམས་ལ་སྲོག་ཆགས་དེས་པ་རུ་སྤྲུལ་ནས་རང་གི་ཤ་ཟ་རུ་བཅུག་ནས་ནད་སེལ་བར་བྱེད་པ་དང༌། མི་མང་པོ་སྲིན་མོའི་གླིང་དུ་སྲོག་གི་འཇིགས་པས་མནར་བ་ལ་ཅང་ཤེས་བ་ལ་ཧ་རུ་སྤྲུལ་ནས་བསྒྲལ་བ་དང༌། མི་གཙང་བའི་འདམ་དུ་སྐྱེས་པའི་སྲིན་བུའི་རིགས་རྣམས་ལ་གསེར་གྱི་བུང་བ་ལ་སྤྲུལ་ནས་སྒྲས་བུང་བུང་ཞེས་བསྒྲགས་པས་ཚེ་འཕོས་ཏེ་ཐམས་ཅད་བདེ་བ་ཅན་དུ་བྱང་ཆུབ་སེམས་དཔའ་ཁ་ན་སྤོས་ཀྱི་དྲི་ངད་ལྡང་བ་ཞེས་བྱ་བ་ཤ་སྟག་ཏུ་གྱུར་པ་སོགས། སྤྲུལ་པ་སྣ་ཚོགས་སུ་རྣམ་པར་སྣང་བ་ཀུན་གནས་སྐབས་དང་མཐར་ཐུག་ཕན་པ་དང་བདེ་བའི་གཞིར་གྱུར་ན་ཡང༌། འདི་ལྟར་དོན་བྱེད་སྙམ་པའི་རྟོག་པ་མེད་ཅིང༌། བྱེད་རྩོལ་གྱི་གཡོ་བ་མེད་བཞིན་དུ་ཇི་སྐད་བཤད་པ་དེ་ལྟ་བུའི་སྤྲུལ་པས་འགྲོ་བའི་དོན་ཆེན་གྱིས་ནི་དངོས་དང་བརྒྱུད་ནས་ཕན་བདེའི་དཔལ་དུ་ཉེ་བར་གནས་ཏེ། ལས་བརྒྱ་པ་ལས། རྒྱ་མཚོ་ཆུ་སྲིན་གནས་ཀྱི་རླབས། །དུས་ལས་ཡོལ་བར་འགྱུར་སྲིད་ཀྱི། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་མི་མངའ། །ཞེས་སོ། །དེ་ལྟ་བུའི་ཕྲིན་ལས་དེ་དང་པོར་ཡང་དབྱིངས་ལས་བྱུང་ཞིང་མཐར་ཡང་དབྱིངས་སུ་སྤྲོས་པ་ཉེ་བར་ཞི་ཚུལ། གལ་ཏེ་སྐུ་དངོས་ཀྱིས་གདུལ་བར་བྱ་བའི་དུས་ཡོལ་ཏེ་དོན་མཛད་ཟིན་ནས་གདུལ་བྱ་སྤྱི་དང་བྱེ་བྲག་གང་ཡང་མེད་པའི་གནས་སྐབས་ན། དེ་འདུལ་བྱེད་ཀྱི་གཟུགས་སྐུ་དབྱིངས་སུ་ནུབ་པར་གྱུར་པའི་ཚུལ་དེ་མཚོན་པར་བྱེད་པའི་དཔེ་ནི། ཇི་ལྟར་ན་ས་སྟེང་གི་ཆུ་སྣོད་གང་ཡང་རུང་བ་དེ་མེད་ཚེ་དེར་ཤར་བའི་ཆུ་ཟླའི་གཟུགས་བརྙན་དེ་ཡང༌། སྤྲུལ་གཞི་ནམ་མཁའི་ཟླ་བ་ཉིད་ལ་ཐིམ་པ་ཞེས་གཅིག་ལ་གཅིག་འདྲེས་པ་ལྟ་བུ་མིན་ཀྱང་གར་སོང་ཆ་མེད་དུ་ཡལ་བ་ལྟར། དག་མ་དག་གི་གདུལ་བྱའི་སྣང་བས་བསྡུས་པའི་སྤྲུལ་པ་ནས་རང་བཞིན་སྤྲུལ་པའི་བར་དུ་སྣང་བ་རྣམས། རང་སྣང་དོན་གྱི་འོག་མིན་ལོངས་སྤྱོད་རྫོགས་པའི་དབྱིངས་སུ་ཐིམ་ནས་དབྱེར་མེད་དུ་གྱུར་ཏེ་སྣང་ཆ་མི་མངོན་ནོ། །རང་སྣང་ལོངས་སྐུ་དེ་ཡང་ཆོས་སྐུར་ཐིམ་ཚུལ་དཔེར་ན་ཚེས་བཅུ་དྲུག་ནས་གནམ་སྟོང་གི་བར་དུ་ཟླ་བ་གཅིག་ཤོས་ནས་གཅིག་ཏུ་ཐིམ་པའམ་གཏན་མེད་དུ་སོང་བ་མེད་ཀྱང་ཕྱིར་གསལ་གདངས་ནང་དབྱིངས་འོད་སྣང་ཕྱིར་སྤྲོས་པ་མེད་པའི་གཏིང་གསལ་གྱི་ངང་ཐིམ་པ་ལྟར། ལོངས་སྤྱོད་རྫོགས་པའི་སྐུ་དང་ཞིང་ཁམས་རང་སྣང་དུ་ཤར་བ་དེ་ཡང་ནང་དབྱིངས་སྤྲོས་པ་མེད་པའི་ཆོས་ཀྱི་སྐུའི་ཡེ་ཤེས་ཆེན་པོར་འཁྱིལ་བ་སྟེ། སྒྲོན་མ་སྣང་བྱེད་ལས། ཆོས་སྐུའི་ཡེ་ཤེས་གཞི་གནས་ཏེ། །ཤེས་པའི་ཆ་ནས་གསལ་བྱེད་ལ། །འཛིན་པ་རགས་པའི་རྟོག་པ་མེད། །ངང་ངམ་ཤུགས་ཀྱི་ཐུགས་རྗེ་འོ། །གསལ་ཞིང་ཤེས་པ་རིག་དང་བཅས། །ཆ་ལ་འདྲེས་པ་མེད་པར་གནས། །ཞེས་སོ། །དེ་ལྟ་བུའི་སྐུ་གསུམ་གྱི་དགོངས་པ་རོ་གཅིག་ཏུ་གྱུར་པའི་གནས་སྐབས་དེ་ཉིད་ལ། དབུ་མ་ཐལ་འགྱུར་བ་རྣམས་ནི་སེམས་དང་སེམས་བྱུང་གི་འཇུག་པ་གཉིས་སྣང་ཤིན་ཏུ་ཕྲ་བའང་སྤྲོས་པ་ཐམས་ཅད་དང་བྲལ་བ་ཆོས་ཀྱི་དབྱིངས་སུ་བུད་ཤིང་ཟད་པའི་མེ་བཞིན་ཞི་བའི་ཚེ། ཐེག་དམན་གྱི་དགྲ་བཅོམ་ལྟ་བུ་བག་ཆགས་ཕྲ་བའང་མ་ཟད་པའི་འགོག་པ་ཉི་ཚེ་བ་ཙམ་མ་ཡིན་པར་རྒྱལ་བའི་འགོག་པ་མཐར་ཐུག་དམ་པ་ཞེས་འདོད་ལ། འཇུག་པ་ལས། ཤེས་བྱའི་བུད་ཤིང་སྐམ་པོ་མ་ལུས་པ། །བསྲེགས་པས་ཞི་དེ་རྒྱལ་རྣམས་ཆོས་སྐུ་སྟེ། །དེ་ཚེ་སྐྱེ་བ་མེད་ཅིང་འགག་པ་མེད། །སེམས་འགག་པ་དེ་སྐུ་ཡིས་མངོན་སུམ་མཛད། །ཅེས་སོ། །ཆོས་སྐུ་དབྱིངས་སུ་འཁྱིལ་ཚུལ་འདིར་རང་བཞིན་རྫོགས་པ་ཆེན་པོའི་ལུགས་སུ་ནི། གློ་བུར་གྱི་དྲི་མ་ཚོགས་བརྒྱད་དང་བཅས་པའི་ཁམས་གསུམ་གྱིས་བསྡུས་པའི་སེམས་དང་སེམས་བྱུང་ཐམས་ཅད་འགགས་ཀྱང་སོ་སོ་རང་རིག་ཡེ་ཤེས་ཉིད་ནི་འགག་པ་མ་ཡིན་ཏེ། ཡོན་ཏན་མཐའ་དག་ཉི་མ་དང་ཟེར་བཞིན་རྒྱུན་མི་འཆད་པ་ལྐོག་གྱུར་དུ་ཡོད་ཚུལ། ཀུན་གསལ་ལས། གནམ་སྟོང་ནུབ་མོ་ཟླ་བ་རྫོགས་གྱུར་ཀྱང༌། །ཉི་མའི་སྟོབས་ཀྱིས་མངོན་དུ་མི་སྣང་བས། །ཚེས་གཅིག་གོང་ནས་བཅོ་ལྔར་རྫོགས་གྱུར་ཏེ། །དེ་ནས་ཟླ་བ་བསྐྱེད་དུ་མེད་པ་ལྟར། །རིན་ཆེན་སྦུབས་ལ་འདུ་འབྲལ་མེད་ཀྱིས་ཀྱང༌། །འཁྲུལ་པའི་སྟོབས་ཀྱིས་མངོན་དུ་གསལ་མ་ནུས། །ཞེས་པ་ལྟར་སློབ་ལམ་པས་སྒྲིབ་པ་རིམ་གྱིས་བསལ་ནས་སངས་རྒྱས་པའི་ཚེ་ན་ཕྲ་ཞིང་རྟོགས་དཀའ་བའི་ཡེ་ཤེས་ནང་གསལ་ཆོས་ཀྱི་དབྱིངས་དང་དབྱེར་མེད་དུ་གཟུགས་སྐུ་ཕྱིར་གསལ་གྱི་ཆ་ཐིམ་ལ་གདངས་འགག་པ་མེད་ཅིང་ཐམས་ཅད་མཁྱེན་པའི་ཡེ་ཤེས་དང་ལྡན་པའི་ཕྱིར་ན་རང་བཞིན་མ་རྨུགས་པ་གཞོན་ནུ་བུམ་པའི་སྐུ་ནང་གསལ་མངོན་དུ་གྱུར་ཏེ་ཟླ་བ་ཉ་གང་བ་ལྟར་སྤངས་རྟོགས་ཀྱི་ཡོན་ཏན་ཐམས་ཅད་མཐར་ཕྱིན་ནས་དེ་ལས་གོང་དུ་བགྲོད་པ་མེད་ལ། ཐུགས་རྗེའི་ཟེར་རམ་གདངས་དེ་ཡང་གནས་དུས་གང་དུ་གདུལ་བྱའི་ཡུལ་འགྲོ་བ་སྣང་བ་དེའི་མོད་ཉིད་ལ། འགག་པ་མེད་པ་ཐུགས་རྗེའི་གདངས་ལས་ཡེ་ཤེས་ཕྱིར་གསལ་སྐུ་དང་ཕྲིན་ལས་རྒྱུན་མི་འཆད་པར་རྩོལ་མེད་དུ་མཆེད་པའི་གཞི་རུ་གྱུར་པ་སྟེ། དེ་ལྟ་བུའི་བསམ་གྱིས་མི་ཁྱབ་ཅིང་ཤིན་ཏུ་མཉམ་པར་བཞག་པ་གཉིས་སྣང་མཐའ་དག་དབྱིངས་སུ་ནུབ་པའི་ཆོས་ཉིད་ནི། འབྲས་བུ་སངས་རྒྱས་ཁོ་ནའི་མ་འདྲེས་པའི་ཆོས་མཉམ་པར་མ་བཞག་པ་མེད་པའི་ཡོན་ཏན་ལྷུན་གྲུབ་ཆེན་པོའི་གོ་འཕང་ཡིན་ལ། དེ་ཡང་དབྱིངས་སྐྱེ་བ་མེད་པ་ནམ་མཁའ་ལྟ་བུའི་ངང་ན། ཉི་མ་དང་ཟེར་བཞིན་སྐུ་དང་ཡེ་ཤེས་བྲི་གང་འཕོ་འགྱུར་མེད་པར་ལྷུན་གྲུབ་ཏུ་བཞུགས་ཏེ། ཀུན་མཁྱེན་ཆེན་པོའི་གསང་འགྲེལ་ལས། རྒྱུད་ཀྱི་མཛད་པ་རྫོགས་ནས་དགོངས་པ་ཆོས་ཉིད་དུ་བཞུགས་པའི་ཚུལ་བརྗོད་པའི་སྐབས་སུ། རྒྱུད་ཀྱི་དོན་དེ་སྐད་ཅེས་བརྗོད་པས་རང་སྣང་འོད་གསལ་དུ་བཀོད་པའི་དེ་བཞིན་གཤེགས་པ་རིགས་ལྔ་ཏིལ་གྱི་གོང་བུ་ལྟར་ཇི་སྙེད་ཀྱིས་ནམ་མཁའི་དབྱིངས་ཀྱི་མཐའ་དབུས་ཁྱབ་པ་དེ་དག་ཐམས་ཅད་གཉིས་སུ་མི་དམིགས་ཤིང༌། ངོ་བོ་དབྱེར་མེད་པར་དགྱེས་ནས་དུས་གསུམ་འཕོ་འགྱུར་མེད་པའི་ངང༌། གཞི་རྫོགས་ལྷུན་གྱིས་གྲུབ་པའི་རང་བཞིན། དུས་བཞི་ཆོས་ཉིད་འཁོར་ལོ་མཉམ་པ་ཉིད་ཀྱི་དབྱིངས་སུ་མཐའ་དབུས་མེད་པའི་ཞིང་ཁམས་སྣང་ཞིང་བཀོད་པ་ཐམས་ཅད་སྟོན་པ་ཉིད་ཀྱི་སྐུ་དང་གསུང་དང་ཐུགས་མི་ཟད་པ་རྒྱན་གྱི་འཁོར་ལོའི་རང་བཞིན་ལས་ལྷུན་སྟ?་པོ་བཀོད་པའི་རྒྱན་ཉིད་དུ་སྔོན་ཇི་ལྟ་བར་ཕྱིས་ཀྱང་དེ་བཞིན་ཉིད་དེ། ནམ་མཁའ་བཞིན་དུ་རང་བཞིན་འཕོ་འགྱུར་དང་འཕེལ་འགྲིབ་མེད་པའི་ཚུལ་གྱིས་བཞུགས་སོ། །ཞེས་སོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ་ལས། མཐར་ཕྱིན་འབྲས་བུ་སྐུ་དང་ཡེ་ཤེས་བསྟན་པའི་ཚོམས་ཏེ་ལེའུ་བཅུ་གསུམ་པས་གཞུང་དོན་ཡོངས་སུ་རྫོགས་སོ།། །།སྤྱིར་བསྟན་བཅོས་རྩོམ་པ་དང་དགོངས་འགྲེལ་སོགས་རང་སྟོབས་ཀྱི་ཤེས་རབ་ཀྱིས་འགྲེལ་བ་རྒྱུ་གསུམ་ཚང་དགོས་ཚུལ་ནི། གཞུང་འདི་རྩོམ་པ་པོ་བདག་རྒྱུད་མཚན་ཉིད་འཕགས་པ་ས་ཐོབ་ལ་སོགས་པའི་སྣོད་ཀྱི་དཔྱད་པ་ཐམས་ཅད་ཡོངས་སུ་རྫོགས་ཏེ་མ་ཚང་བ་མེད་པར་གྱུར་པ་ནི། འཕགས་བོད་ཀྱི་མཁས་གྲུབ་རྒྱལ་སྲས་སློབ་མར་གྱུར་པའི་བསྟན་བཅོས་བྱེད་པ་པོ་རྣམས་ཡོན་ཏན་ལེགས་པར་ཚང་ནས་རྒྱལ་ཚབ་ཏུ་གྱུར་པའི་བསྟན་པའི་ཆོས་མཛོད་འཛིན་པས་བཀའ་དང་དགོངས་འགྲེལ་གྱི་བསྟན་བཅོས་སོགས་མཛད་པ་བཞིན་འདིར་ཡང་ཆུ་དྭངས་པར་གཟུགས་བརྙན་འཆར་བ་ལྟར་བསམ་ཡས་མཆིམས་ཕུར་སྒྲུབ་པར་གཞོལ་བའི་ཚེ། བདེ་གཤེགས་རི་རབ་མར་མེ་རྒྱལ་མཚན་དུ་འགྱུར་བའི་འཇིག་རྟེན་གསུམ་གྱི་མགོན་པོ་ཀུན་མཁྱེན་དྲི་མེད་འོད་ཟེར་གྱི་སྐུས་བྱིན་གྱིས་བརླབས་ཏེ་ཡེ་ཤེས་ཀྱི་སྐུའི་ཞལ་མངོན་སུམ་དུ་མཐོང༌། གསུང་གིས་བྱིན་གྱིས་བརླབས་ཏེ་བསྟན་བཅོས་རྩོམ་པའི་གནང་བ་བྱིན། ཐུགས་ཀྱིས་བྱིན་གྱིས་བརླབས་ཏེ་ཐུགས་ཡིད་དབྱེར་མེད་དུ་འདྲེས་ཏེ་དེ་ལྟར་སྐུ་གསུང་ཐུགས་ཀྱིས་བྱིན་གྱིས་བརླབས་ནས། ཐུགས་རྗེས་དབུགས་འབྱིན་པར་མཛད་པས་བསྟན་བཅོས་རྩོམ་པའི་སྤོབས་པ་སྐྱེས་པ་ཡིན་གྱི། གལ་ཏེ་དེ་ལྟ་བུའི་ཡོན་ཏན་ཁྱད་པར་ཅན་མ་ཐོབ་ན། རྣམ་གྲོལ་གྱི་ལམ་མིན་ལས་སྣ་ཚོགས་པའི་འཁོར་བའི་གཡང་སར་རྟག་ཏུ་འཕྱན་པར་འགྱུར་བས་ན་དལ་བའི་རྟེན་བཟང་སྟོང་ལོག་བྱས་པར་ཟད་དོ། །རྒྱུ་མཚན་དེ་ཕྱིར་ན་གཞུང་འདི་ལ་བསྟན་བཅོས་རྩོམ་པའི་རྒྱུ་གསུམ་ལེགས་པར་ཚང་བས་བཤད་པའི་ཆ་སྐྱོན་མེད་རྣམ་དག་མཆིས་པ་ནི། བླ་མའི་བྱིན་རླབས་དང་རང་གིས་བསྒོམས་བྱུང་གི་སྟོབས་ཀྱིས་ཆོས་ཉིད་བདེན་པ་མངོན་སུམ་དུ་མཐོང་ཞིང༌། དེ་ལྟར་མཐོང་བ་དེ་ཡང་ཡི་དམ་ལྷ་དང་འདུ་འབྲལ་མེད་ཅིང་མངོན་སུམ་ལ་ཤེས་བྱ་བདེན་གཉིས་ཀྱི་རྣམ་བཞག་སོ་སོར་འབྱེད་པའི་ཤེས་རབ་ངང་གིས་སྐྱེས་ཏེ་རྒྱུ་དེ་རྣམས་ཚང་བ་ལས་བརྩམས་པ་ཡིན་གྱི་མངོན་སུ་མ་མཐོང་བཞིན་རྗེས་དཔག་ཐོས་བསམ་གྱི་རྟོག་གེའི་རིག་པས་མཆོག་འཛིན་སོགས་མ་བསྐྱེད་པས་ན། ཉེས་འགལ་མེད་ཀྱང་གྲུབ་མཐའ་འཛིན་པ་པོ་རྣམས་རང་རང་གིས་འདོད་པའི་གཞུང་གི་ཕྱོགས་དང་འགལ་ན་འཆགས་ལ་བཟོད་པར་མཛོད་ཅེས་པའོ། །རྒྱལ་བས་དྲང་ངེས་ཀྱི་ཆོས་ཚུལ་རྒྱ་མཚོ་ལྟ་བུ་རྒྱ་ཆེ་ཞིང་གཏིང་དཔག་དཀའ་བའི་དོན་ནི། ཆོས་ཉིད་ཀྱི་དོན་ལ་མཉམ་པར་བཞག་པ་ཁོ་ནའི་ཁྱད་ཆོས་ཉིད་ལས། །དེ་ཁོ་ན་ཉིད་ཇི་ལྟ་བ་བཞིན་རྟོགས་ཤིང༌། རྗེས་ཐོབ་ལ་ཇི་སྙེད་པའི་ཆོས་ཐམས་ཅད་མ་ནོར་མ་འདྲེས་པར་སོ་སོར་མཁྱེན་པའི་ཡེ་ཤེས་ཀྱིས་རྟོགས་པའི་གནས་ཡིན་གྱི། དེ་ལས་གཞན་དུ་ཕྱོགས་ཙམ་ལས་ཇི་བཞིན་མི་རྟོགས་ལ། ཁོ་བོས་ནི་མཁྱེན་གཉིས་ཡེ་ཤེས་མངོན་དུ་གྱུར་ནས་གསུང་རབ་ཀྱི་དགོངས་དོན་ཟབ་མོ་ཡང་དག་བར་མཐོང་ནས་བརྩམས་པ་འདི་ལ། ཤེས་རབ་གསུམ་གྱིས་ཞུགས་ཏེ་ཉམས་སུ་བླང་ན་ནམ་ཡང་བསླུ་བ་མེད་དོ་ཞེས་གདམས་པར་མཛད་དོ། །དེ་ལྟར་ལེགས་པར་བརྩམས་པའི་དགེ་བ་འདི་ཡི་མཐུ་ལ་བརྟེན་ནས་བདག་དང་མཐའ་ཡས་པའི་སེམས་ཅན་རྣམས། རྒྱལ་བའི་རིང་ལུགས་ནོར་བ་མེད་པའི་ཐེག་ཆེན་མདོ་སྔགས་ཀྱི་ལམ་བཟང་པོ་སྒྲིབ་པ་གཉིས་ཀྱི་རྙོགས་པ་དྭངས་པའི་སྟེ་སྐྱོན་གྱིས་མི་བརྫི་བར་གཟིངས་ཆེན་པོར་ཞུགས་ནས། འབྲས་བུ་མཐར་ཐུག་བྱང་ཆུབ་ཆེན་པོའི་གོ་འཕང་མཐའ་གཉིས་ཀྱི་དྲི་མ་ཉེ་བར་ཞི་བ་ཆོས་དང་གཟུགས་སྐུའི་ཡོན་ཏན་རིན་ཆེན་གླིང་དམ་པ་དེར་མྱུར་དུ་ཕྱིན་པར་ཤོག་ཅིག །དེ་ལྟར་མ་ཐོབ་ཀྱི་བར་དུ་ནགས་མཐོང་ཉམས་དགའ་བ་རི་དྭགས་སྣ་ཚོགས་ཕན་ཚུན་དཀྱུ་ཞིང་རྩེ་བའི་སྨན་ལྗོངས་ཡིད་དུ་འོང་བ་ན། དུས་བཞིའི་མངོན་རྟོགས་གསར་དུ་ངོམ་པའི་ལྗོན་པ་རྣམས་ཀྱིས་ནི། དེར་གནས་པའི་དྲང་སྲོང་རྣལ་འབྱོར་པ་རྣམས་ལ་མི་སྙན་པའི་གཏམ་སྒྲོག་པར་མི་བྱེད་ལ། སྙིང་ལ་འབབ་ཅིང་ཡིད་དུ་འོང་བའི་སྒྲ་སྣ་ཚོགས་པར་སྨྲ་པའི་བྱ་ཡི་ཚོགས་དག་གིས་ཀྱང༌། དུག་སྦྲུལ་གདུག་པ་འཁྲི་ཞིང་འཁྱིལ་བའི་ཤིང་གི་དྲུང་ན་འདུག་པ་ལྟ་བུའི་འཁོར་བ་འདིར་སྙིང་ནས་སྐྱོ་བའི་ངེས་འབྱུང་གི་ཤིང་རྟས་རྣལ་འབྱོར་པའི་ཡིད་ཐར་པར་འདྲེན་པའི་སྐད་སྙན་གྱི་ཅ་ཅོ་ཤིན་ཏུ་ཞི་བ་སྒྲོག་པའི་སྒྲ་ཐོས་པ་སོགས་ནགས་ཀྱི་ཡོན་ཏན་ལ་བརྟེན་ནས། དབང་པོ་རྣམ་གཡེང་ཉེ་བར་ཞི་བའི་བསམ་གཏན་ཞི་ལྷག་ཟུང་འཇུག་གི་དཔལ་ཕུན་སུམ་ཚོགས་པ་ཐོབ་པར་ཤོག་ཅིག །མདོར་ན་གནས་ལུགས་རྟོགས་པའི་ལྟ་བ་ནི་རྟོག་གེའི་ཡིད་བྱེད་མཐར་འཛིན་གྱི་རླུང་གིས་མ་དཀྲུགས་པ་སེངྒེ་ལྟ་བུ་ལ། སྒོ་གསུམ་གྱི་སྤྱོད་པ་ཝ་ལྟ་བུ་ཐམས་ཅད་རྒྱལ་བའི་ཐུགས་ཀྱི་སྲས་དམ་པ་བྱང་སེམས་འཇིག་རྟེན་དབང་ཕྱུག་ལ་སོགས་པའི་འགྲོ་བའི་མགོན་པོ་རྣམས་ཀྱི་རྗེས་སུ་འགྲོ་བས། སྐྱེ་བ་འདི་ནས་བཟུང་ཚེ་རབས་ནམ་ཡང་སེམས་ཅན་གཞན་གྱི་བ་སྤུའི་ཁུང་བུ་གཅིག་ཙམ་ལའང་གནོད་པའི་ཁུར་དུ་མི་འགྲོ་ཞིང༌། ཐབས་ལ་མཁས་ཤིང་རླབས་ཆེན་པོའི་ཕྲིན་ལས་ཀྱིས་དངོས་དང་བརྒྱུད་གང་རུང་གིས་མཐའ་ཡས་པའི་འགྲོ་བ་མ་ལུས་པའི་ཕན་བདེའི་དཔལ་དུ་འགྱུར་བར་ཤོག་ཅིག་ཅེས་པའོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ། གཙང་ལ་སྟོད་པ་ཆོས་རྗེ་བྲག་ཕུག་པས་བསྐུལ་བའི་ངོར། དཔལ་ཨོ་རྒྱན་གྱི་སློབ་དཔོན་ཆེན་པོ་སངས་རྒྱས་གཉིས་པ་པདྨ་སཾ་བྷ་ཝའི་ཞབས་རྡུལ་ལ་སྤྱི་བོས་རེག་པའི་རྫོགས་ཆེན་པ་ཆོས་སྐུའི་དགོངས་པ་རང་བྱུང་དོན་གྱི་རྡོ་རྗེ་ཡི་གནས་ལུགས་ནམ་མཁའ་ལྟར་མངོན་དུ་གྱུར་ནས་ལོངས་སྐུའི་ཡེ་ཤེས་མཁྱེན་བརྩེའི་དཀྱིལ་འཁོར་མཆོག་ཏུ་རྒྱས་ཤིང་སྤྲུལ་སྐུ་འི་མཛད་པ་གང་འདུལ་ཕྲིན་ལས་ཀྱི་འོད་ཟེར་སྟོང་འཕྲོ་བ་ཡིད་ཅན་ཀུན་གྱི་ལམ་སྟོན་དུ་གྱུར་པ། མཚན་གཞན་འཇིགས་མེད་གླིང་པ་ཞེས་གྲགས་པའི་རིག་སྔགས་འཆང་བ་ཀློང་ཆེན་ནམ་མཁའི་རྣལ་འབྱོར་གྱིས། ཆེ་རིང་ལྗོངས་ཀྱི་དབེན་གནས་འོད་གསལ་གཉུག་མའི་ཕོ་བྲང་དཔལ་ལྡན་པདྨ་འོད་གླིང་དུ་སྦྱར་བའོ།། །།སྨྲས་པ། ཀ་དག་རང་བྱུང་རྡོ་རྗེ་དབྱིངས་ཆེན་པོར། །ལྷུན་གྲུབ་འོད་གསལ་ཡོན་ཏན་པདྨའི་ཚལ། །དབང་ཆེན་ཡེ་ཤེས་རོལ་པའི་རིག་རྩལ་འཆང༌། །སྐུ་གསུམ་དབྱེར་མེད་འཇིགས་བྲལ་གླིང་པས་སྐྱོངས། །ཐུགས་རྗེའི་ཕྲིན་ལས་རྟོགས་པ་ཆོས་ཀྱི་སྐུའི། །འདྲ་འབག་ཡོངས་རྫོགས་བསྟན་པའི་མཆོད་སྡོང་ཆེ། ཡོན་ཏན་རིན་ཆེན་མཛོད་ཀྱི་ཤིང་རྟའི་ལམ། །གསལ་བྱེད་སྐལ་བཟང་ཀུན་དགའི་དཔལ་དུ་སྤེལ། །འཁྲུལ་པའི་བློ་རྒྱུད་ཆོས་བཟང་ཚལ་ཞུགས་ནས། ཐེག་གསུམ་འགལ་མེད་ཆོས་ཀྱི་ལམ་བགྲོད་གཉེན། །མ་འཁྲུལ་བདེ་མྱུར་ཡེ་ཤེས་མཆོག་གི་སར། །སྦྱོར་བྱེད་ལེགས་བཤད་ལྟ་བུའི་ལང་ཚོའི་གསོས། །མཚན་དོན་གསལ་བྱེད་ནོར་བུའི་མེ་ལོང་འདི། །རང་ཉིད་ཐོས་བསམ་སྒོམ་པའི་ལག་རྗེས་དང༌། །དོན་མཐུན་ཆོས་གྲོགས་དགྱེས་སྟོན་འགྱུར་སྙམ་གྱིས། །འགྲོ་ཀུན་རྣམ་གྲོལ་བགྲོད་པའི་མིག་གྱུར་ཅིག །ཐེག་མཆོག་བསྟན་པའི་བཤད་སྒྲུབ་ལས་གསུམ་འཕེལ། །སྙིགས་མའི་སྐྱེ་དགུ་ཕན་བདེའི་དཔལ་གྱིས་འབྱོར། བདག་གཞན་ཡང་དག་གཞུང་བཟང་འདི་ལྟ་བུ། །འཆད་ཉན་སྒོམ་པས་དོན་གཉིས་འགྲུབ་གྱུར་ཅིག །ཅེས་མཁས་གྲུབ་བཟང་པོའི་སྤང་རྟོགས་ཀྱི་ཡོན་ཏན་ཕུལ་དུ་ཕྱིན་པའི་རྡོ་རྗེ་སློབ་དཔོན་ངག་དབང་གྲགས་པ་བསྟན་འཛིན་ཀློང་ཆེན་ཡེ་ཤེས་རྡོ་རྗེའི་ཡོན་ཏན་མཛོད་མཆན་འགྲེལ་གཞུང་ཟུར་དུ་མ་ཕྱག་བྲིས་དངོས་ལས་ཞལ་བཤུས་ཀྱིས་གཞུང་གཅིག་ཏུ་སྡེབས་ནས་ཞུ་དག་གི་སྲི་ཞུ་སྐབས་བར་མཚམས་རྣམས་སུ་རང་ཚིག་གིས་ཞལ་སྐོང་ཅི་རིག་པར་བགྱིས་ཤིང་སླད་ནས་འཕྲུལ་སྤར་དུ་སྤེལ་འགྲེམ་སྐབས་དབུ་གཤམ་གྱི་ཚིགས་བཅད་འདི་ལྟར་བྲིས་ཞེས་རྗེ་དེའི་སྐུ་གསུང་ཐུགས་ཀྱི་སྲས་ལྕམ་དྲལ་དང༌། དད་སློབ་དཀོན་མཆོག་བསྟན་འཛིན་ནས་ཡང་ཡང་བསྐུལ་བ་བཞིན་སློབ་གྲལ་དུ་གཏོགས་པ་མངྒ་ལ་ཤྲཱི་བྷཱུ་ཏིས་རྡོར་གླིང་ཀུན་བཟང་ཆོས་འཁོར་གླིང་ནས་བྲིས་པ་ཐེག་པ་མཆོག་གི་ལམ་སྲོལ་ལ་བྱ་བ་བྱེད་པར་གྱུར་ཅིག། །།

[edit]

@#/_/yon tan rin po che'i mdzod kyi mchan 'grel theg gsum bdud rtsi'i nying khu zhes bya ba bzhugs so//_// @#/_/chos dbyings klong chen rab 'byams sku lnga'i sprin/_/mkhyen brtse'i 'od zer brgya pa'i snang ba yis/_/theg mchog pad+mo'i tshal 'byed yab sras zung*/_/dang pa'i mkha' la 'du 'bral med par mchod/_/rgyal ba'i chos tshul mtha' dag gzhung gcig gis/_/legs bstan yon tan rin chen mdzod kyi don/_/'byed nus mchan 'grel legs bshad bdud rtsi'i 'od/_/tshig don rab gsal dga' ston 'dir dbye bya/_/de la 'dir mdo sngags bstan pa rgya mtsho'i snying po/_gang zag gcig 'tshang rgya ba'i lam tshang la ma nor ba/_gnad brgya 'gag gcig gis bkrol ba'i gzhung*/_snga 'gyur rdo rje snying po'i zab lam mtha' dag yongs su rdzogs pa ston pa'i bstan bcos chen po'i mchan 'grel 'bri ba la/_dang po mtshan don la chings chen po lnga'i sgo nas 'chad na/_dang po dgos pa ni/_dbang po rab kyis mtshan don shes pas gzhung yongs rdzogs gtan la phebs/_'bring gis theg pa che chung gang gi phyogs su gtogs pa shes/_tha mas ming don gyi 'brel ba shes nas glegs bam 'tshol sla ba'i dgos pa yod/__gnyis pa mtshams sbyor ni/_spyir chos gang 'chad kyang thog mar klad don nas 'chad dgos la/_de yang dang por mtshan smos pa 'byung bas mtshan de yang chos la yid ches skye/_skad la bag chags 'jog_/rgyud la byin rlabs 'jug pa ste dgos pa gsum dang ldan pa'i phyir/_mtshan rgya skad ltar smos pa ni/_rgya gar skad du/_gu Na ko Sha rat+na pra mo da priSh+Ti nA ma/_bod skad ltar smos pa la/_bod skad du/_yon tan rin po che'i mdzod dga' ba'i char zhes bya ba/_skad gnyis shan sbyar ba ni/_gu Na yon tan/_ko Sha mdzod/_rat+na rin po che/_pra mo da br-iSh+Ti dga' ba'i char/_nA ma zhes bya ba'o/__/gsum pa tshig don ni/_skyes bu gsum gyi lam gyi rim pa thams cad ma nor ba nyams su blangs pa'i 'bras bu'i yon tan thams cad kyi 'byung gnas yin pas na yon tan/_de nyams su blangs pas don gnyis kyi 'dod pa thams cad 'byung bas na rin po che/_de lta bu'i brjod bya phun sum tshogs pas tshig dang don gyi mdzod yin pas na mdzod/_rang rgyud la legs byas dge ba'i lo tog bskyed par 'dod pa'i skal bzang gang zag thams cad dga' bar byed pa'i char pa lta bu yin pas na dga' ba'i char/_zhes bya ba ni ming sgrogs pa'o/__/bzhi pa bsdus don gyi dbang du byas na/_yon tan rin po che'i mdzod ces bya ba ste/_lam dang 'bras bu'i yon tan thams cad gang las 'byung ba'i mdzod lta bur gyur pa'o/__/lnga pa brgal lan ni/_de la kha gcig na re/_char yin na dga' bas mi khyab ste/_dmyal bar me mdag_/klu dang yi dwags sogs la bye tshan gyi char sogs 'bebs pa'i phyir ro zhe na/_gang dag dga' ba bskyed par byed pa'i phyir mtho ris lha mi'i char pa dag la dpe byas kyi ngan song la dpe ma byas pa'i phyir snying po med do/__/'jig rten gyi khams 'dir dkon pa'i mchog sangs rgyas chos dge 'dun gsum yin/_de la bstan bcos rtsom pa pos 'gro ba ma lus nyes tshogs las skyob pa'i ched/_dus byang chub snying po'i bar du sgo gsum gus pas phyag 'tshal lo/_/zhes gsungs pas/_dang po sangs rgyas la/_ngo bo/_nges tshig_/dbye ba/_sgra don no/__/dang po spangs rtogs kyi yon tan thams cad mthar phyin pa sangs rgyas kyi ngo bo/_nges tshig ni/_ma rig pa'i gnyid 'thug po lta bu sangs shing shes bya'i chos la blo gros pad+mo'i 'dab ma ltar rgyas pas na sangs rgyas zhes bya'o/__/dbye na rten sku/_brten pa ye shes/_mdzad pa phrin las rnams so/__/sgra don ni/_bud+d+ha khong du chud pa la'o zhes pas/_shes bya thams cad mkhyen cing khong du chud pas na sangs rgyas so/__/gnyis pa chos la bzhi las/_ngo bo ni/_nyon shes kyi sgrib pa gang rung spang ba'am/_spong byed kyi thabs su gyur pa chos kyi ngo bo/__/nges tshig ni/_nad pa la sman gtong ba ltar rang rgyud kyi nyon mongs pa 'chos pas na chos so/__/dbye na/_lung dang rtogs pa'i chos sam/_'gog lam gyi bden pa gnyis so/__/sgra don ni/_d+harma zhes pa'i sgra las drangs na 'dzin pa ste/_'khor ba dang ngan song gi lam du mi gtong zhing yang dag pa'i lam du 'dzin pas na chos so/__/gsum pa dge 'dun la bzhi ste/_rig grol gyi yon tan gnyis ldan dge 'dun gyi ngo bo/_nges tshig ni yang dag pa dge ba'i lam rang rgyud dang mi phyed par 'dun pas na dge 'dun no/__/dbye na/_theg dman nyan rang gi dge 'dun/_theg chen byang sems kyi dge 'dun no/__/sgra don ni sang+ga zhes pa'i sgra las drangs na 'dus pa ste/_'gro ba lha dang bcas pas lam las mi phyed pas na dge 'dun no/__/phyag 'tshal lo zhes pa rab lta ba mjal ba brda/_'bring sgom pa goms pa/_tha ma mos gus kyi phyag ste gsum ka tshang ba'i sgo nas phyag 'tshal ba'o/__/dkon mchog rin chen rnam gsum zhes 'jig rten na rgyal ba'i sku gsung thugs yon tan phrin las sogs kyi grags pas khyab/_de'i phyir rang bzhin brda sprod pa'i ched du/_sngar ston pa'i sku gzugs dang tshigs su bcad pa ras dkar la bkod pa'i khyad par spring yig gi rnam pa bskur ba mthong ba tsam gyis kyang bu mo mu tig 'khri shing rtog dpyod kyis dben pa bsam gtan dgongs pa gcig pa lta bu'i rab tu dga' ba nyams su myong zhing de'i don bsam par byas nas/_thar lam la bar du gcod pa'i mthong spang kun btags kyi rtog pa brgya dang bcu gnyis bdud kyi bu mo'i slu byed kyi bzhin ras kun+da'i tshal lta bu de dag kun kyang*/_mthong lam ye shes kyi nyi mas skal pa ngan par byas te drung nas 'byin pa'i tshul gyis spong bar bgyid la/_sgom spang spang ba la mngon par phyogs pa ni sangs rgyas kyi thugs rje'i mthu las byung ba de'i phyir dkon mchog gsum gyi rgyu 'bras mtha' dag dang 'brel ba'i chos kyi gtam yang dag pa ni 'gro ba mtha' dag gis mnyan par 'os shing srid pa'i rang bzhin du nyon mongs pa dang rnam par rtog pa'i gnyen por che bas na de skad du gzugs can rgyan du bkod pa'o/__/shes bya thams cad mkhyen pa'i blo gros mchog mnga' ba thub pa chen pos phun sum tshogs pa lngas bstan pa'i mdo sngags kyi sde snod dpag tu med pa dang rjes 'jug byang 'phags rnams kyis mdzad pa'i bka' dang bstan bcos rnams kyis chings chen po lngas 'brel dgod/_dgos 'brel yan lag bzhis gtan la phab pa'i bstan bcos tshig don gyi yon tan du mas brgyan pa dag byed chu'i gter te rgya mtsho chen po lta bu rgya che la gting zab pa rnams la brten nas rgyal ba'i bstan pa yun ring du gnas te/_byams pas/_chos rnams thams cad bka' dang bstan bcos gnyis/_/legs par gsungs dang de yi dgongs 'grel ba/_/de yi dbang gis shAkya'i bstan pa 'di/_/'jig rten khams 'dir yun ring gnas par 'gyur/_/zhes pa ltar gcig tu brling zhing zab la dpog dka' ba bka' dang dgongs 'grel ma nyams par mchis pa yin na/_rgyu gsum ma tshang ba gyi nar smra ba bdag gis spyi brtol gyis byas pa'i bstan bcos la 'chos skyob kyi yon tan gnyis dang*/_nang pa'i tshul gsum gyi yon tan gyis dben la/_phyi rol pa'i ngan pa drug gi lhad kyang srid pas nags stug po'i gcong rong gi 'bab chu'i rlabs phreng gi 'ur sgras gnod pa bzhin du ca co sgrogs pa'i bstan bcos rtsom pa 'di mdzes pa mi ngom pa'i gnas su mthong yang*/_dam pa'i chos kyi brjod bya yang dag pa la brten pa'i slad kyis mnyan par 'os so/_/zhes khengs pa bskyungs pa'i gsung ste/_rtsis mgo yan lag lnga tshang ba'i tshul ni/_bstan bcos 'di dang po mdzad pa po sus mdzad na/_rang bzhin rdzogs pa chen po'i gnas lugs 'phags lam chos nyid kyi bden pa mngon sum du gzigs pas ngo bo dkyil 'khor rgya mtsho'i khyab bdag kun bzang dang po'i sangs rgyas dang rnam dbyer med cing*/_tshu rol gdul bya'i snang char yang rig rtsal so sor rtog pa'i ye shes kyi rtsal rdzogs pas rig pa'i gnas chen lnga sogs shes bya'i chos thams cad ma bslab par mkhyen gnyis klong brdol te bstan bcos rtsom pa'i rgyu gsum tshang zhing*/_khyad par mchims phu nags kyi dur khrod du lo gsum snying po'i sgrub pa la gzhol ba'i tshe kun mkhyen dri med 'od zer dpal ngag gi dbang phyug gi ye shes skus lan gsum rjes su bzung nas sku gsung thugs kyi byin gyis brlabs te dgongs klong dbyer med du gyur nas theg mchog bstan pa'i mnga' bdag chen por bzhugs pa rig 'dzin 'jigs med gling pa'am pad+ma dbang chen ye shes rol pa'i rdo rjes mdzad/_lung gang las btus na/_sangs rgyas kyi chos gsung rab sde snod gsum rgyud sde bzhi dgongs 'grel dang bcas pa las btus/_phyogs gang du gtogs na/_spyir theg pa che chung gnyis las theg chen phyogs su gtogs/_theg chen mdo sngags gnyis las sngags/_sngags phyi nang gnyis las bla med phyogs su gtogs/_dbu nas zhabs su bsdus pa'i don gang zhe na/_skyes bu gsum gyi lam gyi rim pa thams cad rang bzhin rdzogs pa chen po'i lam stegs su bkral te blo rab 'bring tha ma gsum mthar thug gi lam du skyel so mthun par byas pa'o/__/dgos ched su zhig gi don du mdzad ce na/_sngar bshad pa ltar kun mkhyen chos rje'i zhal gzigs bar ma'i tshe dpe cha bam po zhig gtad de/_'dir shing rta chen po na gab pa'i tshul du yod pa thams cad gsal por yod pa yin zhes bstan bcos rtsom pa'i gnang ba byin pa bzhin/_shing rta chen por rgyas par ma bkral ba'i so thar dang sngags thun mong*/_rdzogs pa chen po'i gzhi lam 'bras bu'i skor rnams rtsal du bton pas mdzod chen bdun gyi nying khu lta bu yin te/_phyi rabs rjes 'jug gang zag rnams kyis bstan pa thams cad 'gal med du rtogs pa dang*/_rgyal ba'i gzhung lam tshang la ma nor ba gang zag gcig 'tshang rgya ba'i lam du bsdus nas nyams su len dgos pa'i don du mdzad pa ste/_de ltar rtsis mgo yan lag lnga yi sgo nas gtan la phab pas nyan pa po yid ches thob nas chos kyi snod rung du 'gyur ba'i dgos pa yod do/__/dus yun ring po thog ma med pa nas bdag tu 'dzin pa dang nyon mongs pas bskyed pa'i mngal la sogs par skye ba dang*/_na tshod 'gyur ba'i rga ba dang*/_'du ba 'khrugs pa'am bslad pa'i na ba dang*/_srog btang ba'i 'chi ba yi rims nad kyis da lta'i bar du btab par sman chen bdud rtsi'i ro lta bu/_dang po thos pa'i dus su mi dad pa dad par byed pa rna bar tshig gi bdud rtsi/_bar du bsam pa'i dus su mi dga' ba dga' bar byed cing blo rnam g.yeng gi gnyen por gyur ba/_tha ma sgom pa'i dus su ma grol ba grol bar byed cing blo rnam par grol ba'i shes rab kyi ye shes skyed par byed pa'i dam chos thang ma bzhin brdal ba lag tu mchis pa'ang khyi'i drung du rtswa bzhag pa ltar spong zhing*/_sdig pa bab bcol du byed pa'i skye bo blun po rnams la theg dgu'i don thams cad bstan bcos gcig tu bsdus pa'i man ngag zab mo 'di bdag gis ji ltar 'doms te don du 'gyur dka' mod kyang 'on te brtse bas gdul bya la rjes su chags shing mi 'dor bar brtsam par dam bca' bar mdzad do/__/'khor ba 'di nyid na dus ring po nas 'grogs shing nyes dmigs ma shes par phan pa'i gnas su bltas te bshes pa 'khor ba'i sdug bsngal gyi rgyu 'bras 'phel zhing thar pa'i yon tan 'grib pa'i 'brog dgon pa'i gnas gang du sngar lan grangs du mar mgo dang yan lag bcad pa la sogs sdug bsngal gyi tshor bar bsreg pas lus sems gdung bar byas shing*/_phyin chad sdug bsngal gyis gdung bar 'gyur ba'i las du ma lkog tu gyur nas yod pa mi shes pa rnams la mi skyo bar ma zad/_da dung yang 'gyur ba'i rang bzhin gyi mtho ris kyi bde ba snying po med pa la sred cing*/_dge sdig gi 'jug ldog gang yang ma shes par rmongs pa'i dbang gis sdig pa'i las thabs 'ba' zhig gis tshe 'da' bar byed pa rnams ni mi lus tsam bo bzhes bya'o/__/de ltar bsam sbyor mi dge bas rgyud brlag cing dal 'byor don med du byed pa de ni mngon mtho'i gnas 'di nas slar yang gnas ngan du ltung bar 'gyur la/_gang du ltung zhe na/_ngan song gsum dang 'du shes med pa'i lha dang*/_mtha' 'khob kyi gnas dang dbang po ma tshang ba dang lta ba log pa dang*/_sangs rgyas 'byung ba med pa'i gnas dag tu 'khyams/_'di ltar thang cig tsam ngal bso ba'i skabs btsal du yod pa ma yin par lcags bsregs kyi sa gzhir ral gri dang tho ba la sogs pa'i mtshon cha drag po thogs pa can gyi chad pa rtsub mos yang dang yang du srog 'phrog kyi sdug bsngal drag po gtad kyang sngon las ngan pa'i rnam smin ma zad bar du 'chi bar mi nus pa'i dmyal ba pa rnams da dung yang byed pa rgyu mthun gyi 'bras bu khong khro'i las ngan rnyi la 'thogs te tshe tshad dpag tu med do/__/spyi mthun gyi sgrib pa can tha na rnag khrag phyi sa sogs mi gtsang ba ngan ngon tsam dag kyang mi rnyed pa'i yi dwags rnams ni zas skom gyis phongs pas bkres skom gyi sdug bsngal bas nyam thag pa smos ci dgos/_dbyar zla ba dang dgun nyi ma gnyis tsha grang phyin ci log_/char dang ser ba phyin ci log tu rdo rje'i thog ser ro/__/chu rlung phyin ci log rnag khrag tu 'gyur ba sogs 'byung ngo*/__/phyi yi sgrib pa can ni chu klung dang ljon pa lo tog dang ldan pa rnams la'ang bltas pa'i mod la bskam/_nang gi sgrib pa can ni kha khab mig tsam lto ba yul ljongs tsam sogs mgo lus ma 'tshams pa dang*/_bza' btung khong du cung zad song ba na nang khrol 'tshig pa'i sdug bsngal zad mi shes/_sngon ser sna'i sgrib pa'i mthus byas tshe tshad nges pa med/_spyir mi yi zla ba gcig la zhag gcig byas pa'i rang lo lnga brgya'o/__/rgya mtsho chen po'i nang gi byings na gnas pa'i dud 'gro nya bo che dang nya mid dang chu srin sogs che bas chung ba khyur mid byed pa sogs phan tshun gcig la gcig bza' zhing*/_kha 'thor bdag tu ma bzung ba'i ri dwags rnams/_rgya/_go ra ste lag dong*/_dug mda'/_rnyi la sogs pa thabs du mas rngon pas dam la bzhag ste sbyor ba rtsub mos srog 'phrog pa dang*/_bdag tu bzung ba mi la brten pa'i dud 'gro thams cad ni bkol ba'i phyir sga srab sna thag sogs 'dul bar byed pa'i bdag pos 'dzin cing zhon 'gel btags ded bya gcod spu 'breg gson khrag 'byin pa sogs kyis gnod pas nyam thag cing blun pas ma Ni rdog gcig 'don mi shes pa'i gnas su skye ba thob na de dus ci zhig byar yod de med do/__/tshe tshad srin bu sogs ni yun tsam nas klu sogs kha gcig bskal par gnas par bshad do/__/srog 'tsho ba'i mi g.yo ba'i las kyi mtha' shin tu ring pos bar bskal nyi shu bsrings te tshe yun ring bas 'khor bar nges 'byung gi sems mi skye ba'am skyo ba'i go skabs mi dbye ba'i gzugs med dang*/_gnas pa'i tshe na thos bsam gyi rten shes pa mngon gyur 'gags pa bsam gtan bzhi pa'i gnas 'bras bu che ba'i thad grong dang dgon pa'i tshul du yod/_chos kyi 'du shes med pa'i lha nam 'chi khar rtog pa mngon gyur du ldang bas thar pa'i lam med par 'dzin pa'i log par lta bas ngan song du ltung ba'i phyir khom ldan gyi lus min no/__/rnam pa mi yi gzugs rkang pa gnyis pa'i khyogs la rab tu brten nas 'gro na yang*/_chos kyi phyogs la shin tu rmongs pa dud 'gro lta bu la de yi 'du shes bsod nams ma yin pas mi dge ba'i dam la bzhag ste dbang du byed cing*/_sdig pa'i las thabs sna tshogs pa la gzhungs pa'i sde kla klo rnams dug mda' sogs kyis 'tshe ba la chos su spro ba'i dud 'gro las kyang blang dor shin tu 'chol ba'i nags na 'khyams te thar lam mi shes pas so/__/'dir rab brtags kyi rgyan du bkod de mig nas yid kyi bar dbang po'i mig gis gzugs la blta ba sogs rang rang gi dam bca' nyams pa'i ngag rang gi bya ba smra mi shes pas khyad par du yid blun pa'i lkugs pa rnams/_'phags pa'i sa la gnas pa'i ded dpon dge ba'i bshes gnyen dag dang 'phrad nas chos thos par gyur kyang*/_nyan pa po rang dbang po nyams pa'i skyon gyis 'chad pa pos smras pa'i tshig de yang brag ca'i cho gas bzung ba'i ca co'i sgra bzhin du tshig don gyi brda mi 'phrod pa'i phyir blang dor gyi gnad mi shes pas skal pa chad de 'khor ba'i 'brog dgon chen po 'jigs su rung ba'i gnas der sdug bsngal gyis gdung ba'o/__/las nyon gyi dbang gis 'khor bar skye ba'i gting mtha' thug pa med pa'i rgya mtsho chen po lta bu brgal nas thar pa'i gling du bgrod pa'i gru bo che mi'i lus rten thob cing dbang po tshang ba/_don kyang shes pas rnam rig gi ba dan thar pa'i phyogs su g.yo rung ba thob nas kyang*/_slar yang rten bzang chud gzon pa'i lta ba ma rungs pas rgyud dkrugs te sangs rgyas 'jig rten du 'byung zhing yang dag pa'i chos bstan pa la zhugs nas mnyes pa'i thabs rnam grol gyi lam sgrub par mi bgyid cing*/_'jig rten pha rol med do sogs las 'bras la yid mi ches pa'i log par lta ba 'dzin pa de ni thar lam bar du gcod pa'i bdud kyis gtses te dbang du song ba yin pas khom ldan min no/__/bskal pa chags nas zhig gi bar thub pa rnams kyis spangs pas bstan pa'i snang ba med par mun pa'i bskal pa de yi skabs su mi lus thob kyang mi phan te/_dper na skyes bu rkang pa chag pa zhig gcong rong mun nag 'thibs por lhung bar gyur na/_de slar yang ldang bar brtson kyang lam mi mthong zhing bgrod byed kyi rkang pa med pas mi thar ba ltar rnam par grol ba'i lam gyi snang ba yod pa min zhing*/_thar pa bgrod byed kyi bslab gsum dang bral bas ma rig pa dang nyon mongs pa'i dbang gis phyin ci log gi lam la rgyun chags su ldan pa de ni/_nyam nga'i gnas su lhung zhing thar bar mi 'gyur ba ma zad yi dwags dud 'gro sogs nas dmyal ba'i bar 'og nas 'og tu 'gro bas mi khom mo/__/de ltar rgyu sdig pa 'bras bu sdug bsngal sna tshogs pa bskal pa 'thor byed kyi rlung 'khrugs pa lta bu'i gnas rigs rnams su lus sdug bsngal gyis ngal zhing sems skrag pa dang bcas pa'i rang bzhin ni/_bsod nams mi dge ba'i ngang tshul rnyog pa can dam pa'i chos la rgyab kyis phyogs nas phrag pa dog ste bsgrub pa'i go skabs med pa'i mi khom pa brgyad du ma skyes pa'i tshul la yang yang bsam nas bla ma dang man ngag zab mo la bsten nas rang gi dal ba don yod par bya ba'i phyir thar pa'i lam bsgrub pa la brtson par mdzod ces gdams pa'o/__/sa tshigs dang chos tshigs kyi yul dbus sa gzhi gtsang ma dang 'dra bar skyes pa dang*/_lo ma yal ga lta bu'i thos bsam bslab pa'i rten dbang po dang yan lag dang nying lag thams cad rab tu rdzogs pa dang*/_dad pa'i gnas rgyal ba'i bstan pa la dad pa thob pa dang*/_sgo gsum gyi las mtha'i me tog ser bas ma bcom pa ste sgo gsum mtshams med pa chos dang 'gal ba'i sdig tos mi dge ba byed pa dang dkon mchog la blo gtad log pa sogs kyis ma bcom pa'i chos kyi rten mir gyur pa rnam grol gyi yon tan thob pa'i rten dpag bsam ljon pa dang 'dra bar shin tu dkon zhing don che bas rang rgyud rten gyi 'byor pa ste lnga po tshang ba 'di la snying po lon pa zhig nges par gces so/__/rgyal ba 'byung dka' ba u dum wa ra lta bu 'jig rten gyi khams 'dir byon pa dang*/_chos kyi 'khor lo rim pa gsum gyi me tog kha bye ste chos gsungs pa dang*/_lung rtogs kyi bstan pa'i tshul bshad pa dang sgrub pa'i sgo nas nub pa med par da lta yang gnas pa dang*/_bstan pa la yang dag par zhugs shing dge ba'i bshes gnyen thar pa'i lam mkhan dam pa'i grib bsil la bsten pa ste gzhan 'byor lnga ni de bas kyang nyung ngo*/_/myur du lam la brtson dgos pa'i rgyu mtshan gang gi phyir na rang nyid 'byor pa lnga yis phyug pa'i dpag bsam gyi ljon pa ltar dkon pa'i dpe dang*/_gzhan dbang rkyen gyis 'byor pa lnga'i yon tan ni de bas kyang dkon te u dum wa ra'i me tog dang 'dra bar gyur pa de rang gzhan gnyis ka'i yon tan zung du tshogs pa'i khyad chos 'byor pa rnam pa bcus/_khyad gzhi dal ba brgyad la zung du 'brel nas 'khyud pa 'di la mi lus rin po che zhes brjod du rung bas da lta snying po lon par ma byas na phyis nas 'di 'dra ba'i dal ba slar mi rnyed do/__/rnyed dka' ba'i rgyu mtshan ci'i phyir stong gsum rgya mtsho gcig tu gyur pa'i gting na rus sbal zhar ba lo brgya na ldang ba'i mgrin pa dang gnya' shing gi bu ga 'phrad pa las kyang dkon pa dang*/_grangs ni mi dang dud 'gro nyin mtshan gyi skar mas phye ba de snyed kyi dud 'gro dang*/_yi dwags dang dmyal ba rnams la rim par shes par 'gyur ro/__/rnyed dka' zhing don che ba de'i phyir rten dal ba dang 'byor pa'i gru chen rang dbang du 'dzin pa'i dus 'dir/_'khor ba'i rang bzhin sdug bsngal mtha' yas la gting zab pa chu gter lta bu'i pha mtha' thar pa'i skam sar ma brgal na/_chos kyi lam du zhugs pa'i mgron pos rnam grol don du gnyer zhing thob pa'i skabs btsal ba'i tshe/_'dren pa'i ded dpon bla ma dam pa'i gzings kyi kha lo bsgyur ba'i mnyan pa dang 'dra bar phrad pa 'di nyid 'bras bu med par bgyid pa la mngon par phyogs pa yin pas de'i tshul la bsam nas 'bad par gyis shig ces pa lta bu'o/__/yon tan rin po che'i mdzod dga' ba'i char zhes bya ba las/_dal 'byor gyi rnam par dbye ba'i tshoms te tshoms zhes pa ni gzhung skor tshoms su bcad pa'i don te le'u dang po'o//___//mdo sdud pa las/_mkha' la rlung brten de la chu yi phung po brten/_/de la sa chen 'di brten de la 'gro ba brten/_/zhes pa ltar 'khrul ngor gyi srid pa ste khams gsum mi 'pho ba'i brtan pa snod dang g.yo ba bcud kyi sems can gnyis po chags pa dang gnas pa dang 'jig pa dang stong pa ste bzhi po re re la bar bskal nyi shu re yod pa'i bar bskal brgyad cu'i ngo bos bskal pa chen po zhes pa'i tshad du btags shing grags pa de'ang snod 'jig pa'i rang bzhin la bcud 'khrul pa'i sems can gyi rten du gyur pa'i gling bzhi ri rab 'dod lha tshangs pa'i 'jig rten dang bcas pa la gling bzhi pa'i 'jig rten gyi khams zhes bya zhing*/_de stong la spyi phud stong gi 'jig rten dang*/_de stong la bar ma'i 'jig rten dang*/_de stong la stong gsum gyi stong chen po'i 'jig rten zhes pa'i ming gis sma phab pa'i dngos po 'di dag skye ba nas bzung 'chi ba'i rang bzhin te snod bcud sogs chags gnas 'jig stong bzhi'i rjes su chad pa gcod pa la me bdun dang chu gcig gi rang bzhin 'ong ste/_mi rtag pa'i gtam las/_gang du sa rnams 'jig 'gyur te/_/lhun po'ang thal bar 'jig pa dang*/_/rgya mtsho'i chu yang skam gyur na/_/lus can de dag smos ci dgos/_/zhes pa ltar ro/_/gdul bya'i gtso bo lha mi'i ston pa ngo bo chos sku bgres rgud dang bral ba rdo rje'i sku mchog mnga' ba'i rgyal ba rnams kyang 'dus byas mi rtag la rtag par lta ba'i log rtog can rnams la gzigs nas bzhugs pa dus las yol ba yi tshul gyis gzhom gzhig dang bral ba'i chos nyid btang phyir sri zhu lhod par gyur nas myang 'das zhi ba chos kyi dbyings la dgyes pa'i mngon rtogs ngom na lbu ba dang 'dra ba skyes bu'i tshe srog ni mi rtag pa lta ci smos/_'jig rten pa'i bsam gtan bzhi dang snyoms 'jug rnams grub nas srid rtse'i bskal chen brgyad khri thub pa nas rim bzhin tshangs ris kyi bar bskal par gnas pa'i khur de yang gtan bde'i don med par gyur te dkar nag gi las 'bras kyi phyi bzhin 'brangs nas the tshom med par 'chi ba'i gnas skabs de mthong nas/_tshangs pa dang*/_dbang phyug dang*/_bde 'byung ste khyab 'jug sogs mngon shes dang rdzu 'phrul mnga' ba 'khor los bsgyur ba rnams kyang bde bas ma ngoms bzhin du 'chi bdag gi bdud las gzur ba'i thabs dang bral na bdag lta bu 'chi ba las thar pa'i thabs mi bsam pa lta ci smos/__mtho ris kyi bde 'byor phun sum tshogs pa dper na dbyar zla gsum tsam du sman ljongs nyams dgar 'khrigs pa lta bu yi blo bag phebs pa'i skyes bu ri dwags lta bu'i tshe srog yid la yang nas yang du bgyid pa'i ri sul na bltar mi mngon pa'i rngon pa lta bu gshin rje'i chom po lag na be con can des 'chi ba'i rgyar 'dzud pa'i sgo nas/_don du gnyer ba de ni gcig pu 'chi ba nyid las bya ba thabs gzhan mi sems te/_rta dbyangs kyis/_sa 'am 'on te mtho ris na/_/skyes nas la la ma shi ba/_/'ga' zhig khyod kyis mthong ba'am/_/thos sam 'on te the tshom za/_/zhes so/__/sos ka'i dus su nyi zer gyi tsha bas gdung ba'i reg bya tsam yang mi bzod par skye bo dag gis ston zla gsal ba'i 'od kyis bsil drod snyoms pa'i dus la dga' bar gyur nas yid smon byed na yang de'i bar du nyin zhag brgya ste mang po yis rang gi tshe thal zhing 'chi la je nyer song ba'i gnas tshul la sems nas skrag par gyur ba med de/_mi rtag pa'i gtam las/_las kyi lam zhugs thob pa yis/_/snon pa med pa'i skye bo gang*/_/nyes pa med par song gyur pa/_/de la ci zhig yongs su gdung*/_/zhes sogs gsungs pa ltar ro/__/'di ltar skyes bu gyad stobs po che'i stobs dang ldan pa bzhi'i rtsol bas rang rang gi gdong gi phyogs su mda' re 'phangs par byas la nyag phran bzhi po de skyes bu mgyogs pa'i mthar thug pa gcig gis bar snang nas dus gcig tu sa la mi reg par 'dzin nus pa zhig yod na/_de shin tu myur yang de bas las kyi rdzu 'phrul gyis 'gro zhing sa la rgyu ba'i yi dwags mgyogs te/_de bas kyang nam mkhar rgyu ba'i yi dwags mgyogs shing*/_de bas kyang nyi ma dang zla ba'i shing rta mgyogs la/_de bas kyang bsod nams kyi stobs thob pa'i lha rnams mgyogs shing*/_de kun las mgyogs pa mi yi tshe 'gro ba yin no/__/lang tsho dar la bab tshe lus bkrag stobs dang ldan pa yin yang 'byung ba rgud nas rga ba'i chad pas 'tshe bas nyam thag pa dang*/_'du ba bzhi po cha snyoms shing rnal mar gnas pa yang na bas lus sems sdug bsngal gyis dkrugs pa dang*/_'khor dang longs spyod bstod grags la sogs pa phun sum tshogs pa'i bde skyid rnams sngon bsags dge ba'i las dang da lta'i rkyen 'ga' zhig gis las rten cing 'brel bar 'byung ba'i tshul gyi 'phral snang tsam yod pa'ang 'dus 'bral bsags 'dzad sogs kyi rgud pas 'joms pa dang*/_tshe'i 'phen pa rdzogs pa'am glo bur gyi rkyen gyis 'chi ba'i 'jigs pas 'tshe ba'i srog 'di la rgol ba myur por 'ong tshul rgyal po la gdams pa'i mdo las dpe dang bcas bstan to/__/dus gang tshe gces 'dzin gyi phung po 'di gshin rje'i g.yul ngor pham pa gang zag de la lag na rdo rjes kyang skyabs dang dpung gnyen mi nus pa'i phyir skyabs dang bral ba'i sdug bsngal gyi g.yang sar rgyug pa'i gnas skabs zas gos sogs 'tsho ba'i mdangs lang tsho ni me tog sad kyis btab pa ltar dang*/_dbang po lnga yi byed las ni rlung nang mar me ltar bdas pas bya ba thams cad rnam par spangs la/_gnad 'chad pa'i zug rngu la sman gyis bcos su med pas sman dkar po chig thub yod kyang mi phan pa dang*/_sman pa 'tsho byed gzhon nu lta bu dag yod kyang mig rig rig por blta zhing de la 'bros shing bya thabs zad do/__/'degs byed kyi rlung nyams pas lus zungs bsgul bskyod byed pa la ngal ba thob cing rlung gi gnas mal 'phyugs pas yan lag g.yob pa dang*/_'byung 'jug dal bar mi nus pa'i dbugs ni dbang med mthu yis g.yob cing ngar ngar por 'gyur ro/__/pha ma sogs nye du dang mdza' grogs sogs 'brel bas mtha' nas bskor zhing gdung ba brgya phrag gis dbugs dbyung na yang*/_da lta chos phyogs la bshol 'debs shing thebs pa'i lcags kyu dang 'dra ba'i brtan pa dang bral bar 'gyur zhing*/_de yi dbugs kyi 'gyu ba brtsegs shing brtsegs te shin tu phra ba'i rta rnga'i rtse ltar je phrar gyur pa de/_snying rje med pa'i 'chi bdag gi dgra s+t+wa rnon po dbal can gyis gzas shing bkas par gyur pas/_de'i mod la gson dus dga' ba'i rnam 'gyur mdzes pa spangs pa'i gdong sngo ham me/_so skya tsig ge_/mig mchi mas gang zhing mgo lpags ltag par bsdus te so zho ngom bzhin du/_las kyi dbang gis srid pa bar ma mdo'i mun nag stug pos mdun bsus shing las kyi rlung dmar drag pos bdas te/_gnas/_rten/_spyod lam/_zas/_srog_/rnam shes te ma nges pa'i rtags drug 'byung ba dang*/_chags sdang rmongs gsum gyi snang ba ya nga ba'i g.yang sa gsum ste skya tha le ba/_dmar zang nge ba/_nag ngam me ba rnams dang*/_'jigs pa'i sgra bzhi 'byung ste sa rlung log pas ri bo nyil ba'i sgra dang*/_me rlung log pas nags tshal tshig pa'i sgra dang*/_chu rlung log pas rgya mtsho 'khrugs pa'i sgra dang*/_rlung gi rlung log pas dus kyi rlung sgra drag po lta bu ste 'khrul snang 'jigs skrag du mar 'jug dgos par 'gyur na da lta nas mi rtag pa'i lcag gis bskul bar rigs so/__/yon tan rin po che'i mdzod dga' ba'i char zhes bya ba las/_mi rtag pa'i tshoms te le'u gnyis pa'o//__//gang zhig de ltar 'jig rten pha rol gyi gnas su son pa de rnams phyi ma srid pa mtho dman gyi go 'phang ste gang du skye ba'i gnas su 'phen par byed pa'i las gang gi tha gus 'dogs pa ste lcags kyus zin pa'i nya ltar de dang der gdon mi za bar 'gro ba'i tshul ni/_rgyu dge ba spyad pa dang sdig pa la goms pa kho nas nye bar len pa ste/_don dam la skye ba med kyang kun rdzob bden pa tsam du las 'bras bslu ba med pa yin la/_de nyid dpe don gyis ston pa'i phyir gang zhig dper na tig ta dang rgun 'brum sogs kha ba dang mngar ba'i sa bon rnam pa sna tshogs btab pa'i mthu yis/_zhing pa rnams kyi thog skye ba na de la ro de dang de gsal zhing mngon pa bzhin du skye ba gzhan te tshe snga ma rnams su rnam pa du mar rgyud la 'dris shing goms par byas pa'i dge sdig sna tshogs kyi las tshul mang pos 'gro ba 'di'i gnas rigs bde sdug sna tshogs byas so/__/dper na sa bla ste nam mkha' mthon por gshegs pa'i mkha' lding gi grib ma de nyid re zhig mtho ba'i rkyen gyis blta bar mi mngon na yang*/_gzugs can nyid dang 'du 'bral spangs pa bzhin du rkyen sred len tshogs shing 'bras bu smin pa'i dus la bab tshe 'gro ba so so'i gnas lus bde sdug sogs lhag par mngon par 'gyur te/_mdo las/_lus can dag gi las rnams ni/_/bskal pa brgyar yang chud mi za/_/tshogs shing dus la bab pa na/_/'bras bu nyid du smin par 'gyur/_/zhes so/__/ji srid dngos 'dzin ma zad bar du bsod nams ma yin pa'i bya ba phra zhing phra ba'i 'bras bu chen po 'byin par byed pa rta gdong rgod ma kha yi mes te ba tshwa can gyi rgya mtsho'i mthar 'khor ba'i rdo sol gyi lcags ri dang 'dra ba des 'gro ba rnams dge ba'i las kyis mtho ris su skye ba grangs mang rgya mtsho'i rlabs dang 'dra ba dag kyang skem zhing mi 'phel bar byed nus shing*/_rnam mkhyen rin chen gling du bgrod byed gru gzings lta bu'i lus bshig cing ma rungs par byed pa'i dpe dang don gyi rim pa rgya cher dran pa nyer bzhag dang*/_las brgya pa dang*/_rgya cher rol pa dang*/_rnam 'byed la sogs pas bstan pa rnams blta bar zhal 'phangs pa'o/__/mi dge ba'i 'bras bu sdug bsngal gyis mnar la shin tu brtul phod pa ste 'dzem med du gnod par byed pa'i ngan song gsum po dag gis bsod nams cha mthun dge ba bcu'i 'bras bu mtho ris kyi dga' bde la spyod pa'i dpung pa btsan zhing gnod pa'i g.yul gyis rnam par mi brdzi ba'i dpa' bo'i yul la re zhig g.yul gyi phru mas te dmag dpung bsgrigs pa'am bkod pa lta bus btab ste 'joms par gyur pa ma mchis na'ang*/_'on te dge ba'i dam bca' nyams nas mi dge ba bcu la spyod pa mtha' dag ngan song gsum po khyod kyi dbang du song ste de'i tshul yang*/_gang zag la las gtan gyi 'dun ma yang dag pa'i tshul khrims mkhan slob sogs las blangs kyang 'dod chags sogs nyon mongs pa'i rtog ngan re re'i dbang gis pham pa sogs ltung bas nyams pa dang*/_la la'i ni longs spyod sogs kyi phyir sems can bsad nas tshe thung ba'i las gsog pa dang*/_la la'i ni zhe sdang sogs kyi g.yul ngor zhugs te srog 'dor ba dang*/_la la'i ni dge la phyogs phyir zas gos la sogs pa'i dka' thub la yun ring gnas nas slar yang 'dod pa'i khyim thabs su zhugs pa dang*/_la la'i ni chos thos bsam la che thang du 'bad kyang chos brgyad kyi rtog pa'i sna skyil ma nus te 'jig rten gyis g.yeng ba dang*/_la la'i ni nor dkon mchog gi zhing la mi gtong bar gnyen ngo dang gyod sogs la 'dzad pa dang*/_la la'i ni bdag dang chos kyi dbang du byas nas nyes spyod la 'dzem pa'i ngo tsha shes pa dang*/_la la'i 'jig rten dbang du byas nas nyes spyod la 'dzem pa'i khrel yod pa de rnams thog med nas goms pa'i stobs kyis nyes spyod sna tshogs la 'jug ste/_dge phyogs g.yel nas sdig pa'i ched du gtong ba shin tu mang bas de rnams ngan song gi gnas su 'bab cing gzhol bar 'gyur ro/__/rang nyid kyis byas pa'i sdig pa rang gis myong ba ma zad gzhan gang gi phyir byas pa yang yon gnas mchog gsum dang nye du dang 'khor 'bangs dang*/_yul khams bsrung ba'i slad du ma brtags pa'i kun slong de rang don yin te g.yul 'khrugs sogs mi dge ba'i kun slong stobs chen gyi sdig pa'i las ni rnam smin gtos che bas gnyis 'thung ste glang po che lta bu spong sems kyi thag pas dkris pa btang ste bag med du spyod na'ang*/_de'i rnam smin ni gzhan la bgo bsha' bya ru med pa yin no/__/longs spyod kyi rnyed pa la brkam zhing lus sems bde ba 'ba' zhig la sred pa dang lkog tu snyan pa brjod pa lhur len pa dang*/_dngos su mngon du bstod na sems khengs par 'gyur la/_de bzhi po gang las cig shos mi mthun pa'i phyogs ma rnyed pa dang*/_mi bde ba dang*/_mi snyan pa dang*/_smad pa ste bzhi yis sma phab ste yid mi bde zhing sems khong du chud pa'i byis pa so so'i skye bo 'di dag 'jig rten chos brgyad kyis bslus so/__/'jig rten gyi chos bcu gsum ni/_rigs 1gtsang ba gzugs2 che mdzes 'khor longs spyod sogs dbang thang3 la sogs te sogs khong du lugs gnyis kyi rnam bzhag mang po shes pa'i thos pa4 dang*/_na tshod dar la bab pa'i lang tsho5 ste lngas mgo 'phang bstod cing dregs pa dang*/_brtson 'grus kyi mi mthun phyogs snyoms las6 sam le lo 'phye bo lta bu'i phag tu yib pa ste dbang du song ste mi brtson pas dge ba mi skyed pa dang*/_thob bya ma thob bzhin du thob snyam pas mngon pa'i nga rgyal7 ma rungs pas kun nas slong bas yon tan rgyud la skye ba'i go skabs med pa rnams dang*/_dka' thub dam pa'i chos kyi dpal la sdang ba ste sngar yod nyams pa dang*/_phyis mi skye bar byed pa'i srin por 'gyur ba'i chags8 sdang9 gnyis dang*/_sbyin pa'i mi mthun rang gi phun tshogs la brkam10 pa dang*/_bdag dang longs spyod la sred pas chags sems11 kyi nus pa brtan por gyur pa yis zil gyis gnon pa'i dbang gis bsam pa rab tu mi brtan pa'i gya gyu'i 'du shes dang 'grogs pa'i g.yo rgyu'i 'khri shing bcu gsum po de dag gis/_gzhan pha rol po dag rmongs shing mgo bskor bar byas te longs spyod sogs kyis bdag nyid bsrung na'ang dug ldan gyi bza' ba khong du chud pa bzhin 'di phyi'i gnod pa chen po de ni rang gi khong du zhugs nas brlag pa'i phyir dgra bzhin spang bar bya'o/__/'khor bar 'du byed pa'i dkar po dge ba dang nag po mi dge ba'i las kyi rnam par smin pa'i 'bras bu bde sdug gnyis ni phyi rol gyi rgyu 'bras las kyang 'phel che ste/_sa bon nyung ngu las kyang 'bras bu'i gzugs/_sbom po'am chen por bskyed pa mi dbang nga las nus sngon khye'ur gyur pa'i tshe sangs rgyas rnam par gzigs la sran ma spar gang gtor bas bzhi lhung bzed du song*/_gnyis thugs kar phog_/gcig na bzar chags pa ste sran ma rdog po de bdun las gling bzhir dbang ba'i gser gyi 'khor los bsgyur ba'i rgyal por gyur cing*/_rim pas rgyal chen bzhi dang sum cu rtsa gsum gyi gyi gnas su lha'i dbang po so gnyis dang stan phyed pa la 'dug pa'i dbang thang can du gyur pa dang*/_shA ri'i bus dgra bcom zhig la ras yug phul bas shes rab che ba sogs dang*/_dge slong zhig la zla bos mi gtsang ba zo smras pas mngal gyi srin bu dang*/_bshang khang du srin bur skyes pa la sogs/_ji skad du/_dge ba chung ngu dag la yang*/_/mi phan snyam du brnyas mi bya/_/chu yi thigs pa bsags pas kyang*/_/snod chen rim gyis 'gengs par 'gyur/_/sdig pa chung ngu mod la yang*/_/mi gnod snyam du brnyas mi bya/_/me stag phra mo tsam gyis kyang*/_/rtswa phung ri tsam sreg par byed/_/ces dang*/_spyod 'jug las/_gang zhig de 'dra'i rgyal sras sbyin bdag la/_/gal te ngan sems bskyed par byed pa de/_/ngan sems bskyed pa'i grangs bzhin bskal par ni/_/dmyal bar gnas par 'gyur zhes thub pas gsungs/_/zhes gsungs pa bzhin no/__/rgyu mtshan des na gang zhig sa bon chung ngu yungs kar 'bru tsam sa la btab pa'i shing a shwa ta yi 'bras bu lo dus su smin pa ni/_yal ga re la'ang dpag tshad tsam re yod par 'phel ba des kyang nang gi rgyu 'bras dge sdig gnyis kyi gzugs brnyan 'phel che ba'i dpe zlar mi phod pa yin no/__/snod bcud kyi dngos po gang la gtso bo dang dbang phyug sogs byed pa po 'ga' yang ma mchis shing rang bzhin grub pa'ang min no/__/'o na ci zhe na/_sems dang sems byung gi bsam pa dkar nag sna tshogs kyi dbang gis dper na tshos kyis btsos pa'i ras yug sna tshogs pa ltar kun slong gis dge sdig chung ngu las ma byas pa ltar snang yang*/_las de dang de yi 'bras bu bde ba dang sdug bsngal mthu chen byas pa de yang*/_sbyor ba las de'i ched du yun ring dmigs nas bsags pa med pa dang*/_rjes 'gyod pa drag pos las gang byas pa'i sems zil gyis mnan te thog mtha' gnyis po dang mi ldan na nus pa chung ba yin no/__/dper na rtsa ba ste sa bon sman du mchis na myu gu dang 'bras bu la sogs pa'ang sman yin la/_rtsa ba dug yin na myu gu sogs dug yin pa smos ci dgos/_dpe de bzhin kun slong bsam pa dge dang mi dge'i 'phen byed kyi dbang las/_dge ba dang sdig pa'i gzugs brnyan che chung gi rjes su mi 'gro ste/_mdo las/_bsam pa bzang pos mchil l+h+wam gnyis/_/thub pa'i dbu la bzhag pa dang*/_/de bzhin gzhan gyis bsal gyur pa/_/gnyis ka rgyal srid thob par gyur/_/zhes so/__/'dod khams na spyod pa'i dge sdig gi lci yang khyad par 'di ltar/_sbyor ba'i khyad par byed 'dod kyi bsam pa rgyun ldan du yod pas rtag pa dang*/_bsam pa kun slong drag po de kho na las gzhan la yid mi gtod pas mngon zhen dang*/_gnyen po'i khyad par mi mthun pa'i phyogs kyi zil gyis mi non pas gnyen po med pa dang*/_gzhi'i khyad par gnyis te yon tan gtso bo mchog dang ldan pa dkon mchog gsum dang*/_phan 'dogs pa'i gzhi pha ma sogs byas pa drin du gzo nas thag ring mgron po dbul sprang sogs las byung ba'i las bsags tshul te rnam pa lnga po las kun slong gsum po tshang zhing yul de dag gang rung la brten na dge sdig lci yang gang zag gi rgyud la nye bar len pa'i rnam par rig byed de de'i tshul shes pa'i rgyur lags par gsungs so/__/las kyi 'char gzhi bshad pa la/_sems nyid 'dus ma byas pa'i sgrib byed du gyur zhing dbye bsal gang yang med pa bag chags sna tshogs kun gyi rten byed pa'i kun gzhi lung du ma bstan pa lhan cig skyes pa'i ma rig pa'i char gnas pa de las gsal zhing rig pa'i cha me long gi dwangs ltar tshogs bdun gyi shes pa 'phel 'grib can gyi go 'byed pa'i kun gzhi'i rnam shes shar zhing*/_de las yul gyi ngo bo tsam 'dzin pa'i blo phra ba ma yin pa che long du shar ba'i yid kyi shes pa dang*/_nang du ngar 'dzin pa dang phyir dgag sgrub kyi rnam pa can gyi nyon mongs pa can gyi yid dang*/_mig la brten nas gzugs mthong ba nas/_lus la brten nas reg bya myong ba'i cha'i yul lnga'i shes pa kun gzhi de las mched pa'am langs nas las sogs par 'gyur ro/__/de yang yid shes dang sgo lnga tsam gyis las mi sogs kyang*/_shes pa kun la khyab byed du song ba'i bdag 'dzin ma rig pa 'khrul snang dang sdug bsngal thams cad kyi rtsa bar gyur pa'i so skye'i gnas skabs su dug gsum gyi rtsa bar gyur pa lta yang ci smos te/_der ma zad 'phags pa'i sa thob dus su yang nyon yid gnas ma gyur gyi bar du zhing dag pa la dbang 'byor ba dang*/_rnam par mi rtog pa'i ye shes rtsol med du skye ba la sogs pa yon tan du ma la bar du gcod par gsungs so/_mchan/_gdon chen gyis ni nyon mongs pa dug gsum po bzung ste/_de'i dbang gis mi dge ba'i las bsags pas ngan song gsum dang*/_gti mug gis sa pas bsdus pa'i bsod nams cha mthun gyis mtho ris su 'phen te/_de yang nga rgyal mtshungs ldan gyis lha mi gnyis dang*/_phrag dog dang mtshungs ldan gyis lha min te 'khor bar gnas rigs mtho dman byas shing grub bo/__/de ltar grub pa la'ang dge sdig gnyis kyi 'phen rdzogs kyi khyad par ni mu bzhi ste/_'phen byed dge bas 'phangs la rdzogs byed dge bas rdzogs pa lha mi'i rten la rigs gzugs dpal 'byor mtha' dag phun sum tshogs pa lta bu'o/__/'phen byed dge bas 'phangs kyang rdzogs byed mi dge bas rdzogs ni bde 'gror skyes kyang dbang po dang yan lag ma tshang zhing dbang thang chung ngur gyur pa sogs sdug bsngal ba rnams so/__/'phen byed mi dge bas 'phangs la rdzogs byed mi dge bas rdzogs na ngan song gang rung du skyes nas sdug bsngal gyis mtha' gcig tu mnar zhing spyod pa'o/__/'phen byed mi dge bas 'phangs kyang rdzogs byed dge bas rdzogs na dud 'gro'am yi dwags gzugs dang dpal 'byor phun sum tshogs pa'i rigs kha cig lta bu'o/__/de'ang las gcig gis lus gcig las mi 'phen pa rang gi bu la snying rje skyes pa'i bud med tshangs par skyes pa lta bu dang*/_las gcig gis lus du ma 'phen pa/_'phags pa ma 'gags pas/_bdag ni bsod nams gcig pu de'i rnam par smin pas sum cu rtsa gsum gyi lhar lan bdun skyes shing*/_da ltar shAkya phyug por skyes so zhes pa lta bu'o/__/las du mas lus gcig 'phen pa lhas byin gyis tshe rabs du mar bsags pa'i las kyis dge slong gi gzugs la sdig pa'i kun tu spyod pa can du gyur pa lta bu dang*/_las du mas lus du mar 'phen pa 'phags pa nye sde las du ma'i rkyen gyis gsos nas lus du ma grub pa lta bu ni mdo sde pa yan chad kyis 'dod la/_mdzod las ni/_gcig gi skye bas gcig 'phen no/__/yong rdzogs byed pa du ma yin/_'phen byed gcig gis skye bas gcig 'phen kyi du ma mi 'phen/_'phen byed du mas skye ba gcig kho na mi 'phen par bshad do/__/de dag kyang 'phen byed kyi rgyu stobs che chung gi dbang gis te/_'di ltar gnod sems kyang skyes/_gnod pa yang sems khengs pa tsam du byas pa lta bu byas shing bsags pa dang*/_pha rol gyi mnga' thang 'phrog pa dang*/_dgra zla nyams nyes par byed pa'i 'du shes gang yang med bzhin du gzhan gyis rang srid la gtses nas srog bsrung ba dang*/_srid sde chos bzhin skyong ba la gegs su gyur par dogs nas skrag pas las de mi 'dod bzhin du 'gyod bzhin du dbang med du spyod dgos pa lta bu byas la ma bsags pa dang*/_rdzun du smra ba la sogs pa dus ring mo nas blo la dang du blangs kyang don la ma smras pa lta bu bsags la ma byas pa dang*/_kun slong btang snyoms las rnam par smin pa'i 'bras bu 'byin mi nus pa lung ma bstan pa'i las ni ma byas shing ma bsags pa ste mu bzhi'o/__/de ltar mu bzhi dang*/_gong du bshad pa'i rtag dang mngon zhen sogs lnga po dang ldan mi ldan la gzhal bas kyang byas bsags kyi dge sdig che chung dang de'i 'bras bu che chung gi khyad par shes so/__/dpe ji ltar na/_me ni rab tu 'bar zhing khang khyim sogs bsreg par byed na/_de yi gnyen por chas pa ni chu kho na yin pas chu de nyid snod du bstsal nas mes ming tsam yang med par bskam par byas na de las gzhan me de gsod pa'i gnyen po gang yang btsal du med na me de ji ltar zhi bar byed/_de bzhin du rgyal ba'i sku gsung thugs rten bshig pa dang*/_skur zhing brnyas pa byas pa dang*/_dam pa'i chos spangs pa dang*/_'phags pa'i dge 'dun la skur pa btab pa dang*/_de dag gi dkor la 'bag pa sogs dkon mchog gsum po ngan sems kyis bslus shing skyabs su mi brten par rgyab tu spangs pa yi sdig chen 'di ni bya ba gnyen po gzhan gyis gso thabs med pa'i phyir/_de la do zla 'gro ba'i sdig pa'i las gang yang rnyed pa min no/__/ji skad bshad pa de las gzhan du 'gro ba phal pa'i kun rtog gzung 'dzin gyi rnam pa can la rang bzhin 'brel bar gyur pa'i tshogs drug gi dbang po dang bcas pa las gsog pa'i sgo dang*/_dge mi dge bar sems pa'i yid dang*/_bar ma'i yid rnams kyis dkar nag gi las gsog par byas te kun gzhi'i steng du tshor ba gsum dang 'du shes gsum la sogs pa'i sems byung rnams grogs byed pa'i tshul gyis dge mi dge'i las du ma 'du byed pa yin zhing*/_gzhan du na kun rtog tshogs nyon mongs brgyad khri bzhi stong gis las phra ba gsog pa'i tshul dang grangs mtha' dag gcig tu 'di lta bu'o zhes blo yis thug cing dpog pa ma mchis mod kyang las kho na las byung bar mngon no/__/'dir lus ngag yid la rten dang brten pa can gyi spang bya'i rgyu 'bras rnam pa bcur gnas pa'i thog mar lus kyi gsum po ni srog gcod pa dang*/_ma byin par blangs pa dang*/_log par g.yem pa rnams las dang po srog gcod pa ni/_yan lag lngas dngos gzhir rdzogs te gzhi sems can yin pa1 dang*/_der 'du shes ma 'khrul ba2 dang*/_gzhan gyi srog gcod 'dod kyi bsam pa yod pa3 dang*/_bsam bzhin du gcod pa'i thabs la sbyor ba4 dang*/_de'i tshe'am gzhan gyi tshe shi ba'o5/__/de'i phyogs mthun gnod sems mngon gyur med kyang brdeg btsog la sogs pa'i 'tshe ba bgyid pa'i rkyen gyis shi ba'o/__/gnyis pa ma byin blang ba ni yan lag bzhis rdzogs te/_gzhan nor yin pa1 dang*/_yin par shes2/_shes bzhin brku ba'i thabs la brtson pa3 dang*/_gnas spos te thob par4 byas pa'o/__/phyogs mthun g.yo ste tshong dang 'os min gyi chad pa sogs thabs kyis bsten pa dang*/_bre log srang log sogs sgyu yi sgo nas len pa dang*/__gsum pa 'dod pas log par g.yem pa ni/_yan lag gsum ste gzhan gyis bdag tu bzung ba'i chung ma'am smad 'tshong ma la sogs pa gla rngan thob pa'am/_rab byung gi rtags yin min gang rung gis rten sogs kyi drung dang*/_der yul dus gzhan gyis bsrung ba1 la/_de dang der 'du shes pas dbang po'i reg pa sprod de sbyor ba2 dang*/_bde ba myong ba'o3/__/phyogs mthun ni bgrod bya ma yin pa dbang po las gzhan sogs la 'khrig pa'i chos bstan pa'o/__/ngag gi las bzhi ni dang po rdzun la yan lag bzhis rdzogs te smra ba'i gzhi ma nor ba1 dang*/_gzhan bslu ba'i bsam pa2 dang*/_smra rgyu de'i don yid la bsam nas rdzun smras pa3 dang*/_der 'du shes bsgyur nas gzhan dag gis kyang 'khrul bzhin bzung ba'o4/__/phyogs mthun ni don rnal mar go ba'i 'du shes drang por brdzu thabs kyis bslad nas ji bzhin mi sprod par gzhan sems bslu ba'o/__/gnyis pa phra ma ni yan lag gsum gyis rdzogs te dbye gzhi nang mthun pa yin nam btang snyoms su gnas pa1 dang*/_dbyen sbyor gyi tshig smras pa2 dang*/_mthar tha dad du 'dral ba'am don go ba'o3/__/phyogs mthun ni sngar gzhan gyis smras pa'i skyon gyis tshig la gzhan dus phyis slar yang bzlos nas khon du 'chos pa'o/__/gsum pa ngag 'khyal ni yan lag gsum gyis rdzogs te/_nyon mongs pa'i sems kyis bslang ba1 dang*/_chos dang mi ldan pa la der bsam pa2 dang*/_mchod sbyin snyan ngag srid srung sogs dang*/_glu sgrung dang*/_smad 'tshong ma dang chom rkun sogs bre mo'i gtam sna tshogs smras pa las chags sdang bskyed pa'o3/__/phyogs mthun ni chags sdang mi bskyed kyang dmag dang chom rkun sogs 'brel med gtam sna tshogs smra ba'o/__/bzhi pa tshig rtsub ni yan lag gsum gyis rdzogs te/_gang zag de la ched du dmigs pa1 dang*/_sbyor ba skyon mtshang 'bru ba don ma rung ba2 smras pa dang*/_mthar thug pha rol po'i snying la3 'bigs pa ste yid mi dga' bar byas pa'o/__/phyogs mthun ni snyan pa ltar smras kyang gzhan de'i yid mi bde ba'i rkyen dang sprod pa'o/__/yid kyi las bshad pa la gsum las/_dang po brnab sems ni yan lag gnyis kyis rdzogs te/_gzhan gyi 'byor pa'i dpal yin pa1 dang*/_bsam pa de la brngams shing chags nas 'khu sems kyis bdag gir byed pa'o/__/phyogs mthun ni pha rol po'i rdzas dang thos sogs kyi yon tan la brkam zhing bdag la yod na ci ma rung snyam du yang yang de'i ro myong ba'o/__/gnyis pa gnod sems kyang yan lag gnyis kyis rdzogs te/_gzhan sems can yin pa dang*/_bsam pas de la khong 'khrug cing lus sems la sdug bsngal byed 'dod kyi 'tshe ba gting nas slong ba'o2/__/dbye na dgu ste bdag la gnod pa sngar byas so/_/da lta byed do/_/ma 'ongs par byed par 'gyur ro snyam pa dang*/_bshes la de bzhin gsum dang*/_dgra la phan pa byas so/_/byed do/_/byed par 'gyur ro/_/rjes dpyod sdang sems/_khro sems/_nga rgyal/_'khu sems/_gti mug ste lnga'o/__/phyogs mthun ni tshe srog 'byor pa sogs phan pas 'brel pa la mi dga' zhing*/_ngan pa 'du ba dang bzang po 'bral bar bsgom pa'o/__/gsum pa log lta la yan lag gnyis te/_bslu med kyi rgyu 'bras la med par lta ba dang*/_bdag dang 'jig rten la rtag pa'am yang na chad par lta ba'o/__/phyogs mthun ni gang zag khyad par can la sdang sems sogs kyis skyon med pa la yod zhes sgro 'dogs pa dang*/_yon tan yod pa la med do zhes skur pa 'debs shing the tshom bskyed pa sogs so/__/mi dge ba bcu po kun re re la 'bras bu bzhi bzhir smin pa'i tshul ni/_rim pa bzhin rnam smin rgyu mthun dbang dang byed pa ste bzhi las/_dang po rnam smin gyi 'bras bu bskyed pa'i tshul ni/_/'di ltar dge mi dge'i las de dag kun nas slong ba'i sems1 dang*/_rjes su spyod pa'i sbyor ba2 dang*/_sbyor ba'i gzhi bsam pa de nyid3 dang*/_sbyor ba'i 'bras bu dngos gzhi nyid spyad pa4 dang*/_mjug rjes su yi rang ba5 ste chos lnga ldan nam ldan pa min kyang rung ste/_kun slong gsum gyis gti mug sdig sems ma shes pa'i srog gcod lta bu chung ngus dud 'gro dang*/_sha pags rwa rus mu tig sogs la chags pas bsad na 'bring 'dod chags kyi dbang gis yi dwags dang*/_khros nas dgra gsod pa sogs zhe sdang chen pos dmyal bar 'phen no/__/rgyu mthun gyi 'bras bu ni rnam pa gnyis su grub ste/_byed pa rgyu mthun ni tshe snga ma'i mi dge ba'i las goms 'dris byed cing kun chub byas pas phyis kyang las de dang mthun par skye nas spyod ngan la 'jug par gsungs so/__/myong ba rgyu mthun gyi 'bras bu sngon gyi dge bas 'phangs nas mtho ris kyi lus rten thob par gyur kyang sdig pa de'i dbang gis rim bzhin mi dge bcu la sdug bsngal gyi rnam grangs gnyis re gnyis rer ldan te 'di ltar srog bcad pas 'tsho ba'i yun tshe thung la nad kyang mi 'dra ba'i rnam grangs mang pos mnar zhing sdug bsngal bar 'gyur ro/__/ma byin pa blangs pas phyugs dang 'bru gos sogs yo byad nyung bas dbul zhing longs spyod cung zad yod kyang dgra dang 'khon pa sogs kyis mi dbang bas thun mong can du 'gyur ro/__/'dod log gis khyim thabs mi mdzes shing khyo dang mi mthun cing lhod pa dang*/_khyim gyi bya ba dor ba'i dgra zlar gyur pa gang zhig dang mthun pas 'brel nas snying mi nye ba dang*/_rdzun gyis rang gis nyes ma nyes gang la yang gzhan gyi sgo nas kha smras ngan pa'i skur pas rang sems gdung zhing gzhan su la blo gtad kyang de kun gyis bslu ba mang pos mgo bskor ba dang*/_phra ma byas pas gnyen nye 'khor dang bran g.yog thams cad mthu nus ngan zhing nang phan tshun rtsod cing 'dum par dka' ba la sogs gnod par gyur pa dang*/_ngag 'khyal gyis rang gi tshig smras pa thams cad gzhan gyi rna bar mi 'gro zhing sems la bzung mi 'os pas yid ches zhan cing blo mi gtad pa ste bden du mi brtsi ba dang*/_tshig rtsub mo smras pas dus dang dus su mi 'dod pa'i gtam ngan mi snyan pa mang po thos pa dang*/_gzhan la phan tshig smras kyang 'thab mo'i tshig tu 'khrul nas rtsod pa la sogs pas mi bde ba dang*/_brnab sems kyis longs spyod yod pa dang thob pas chog mi shes pa dang*/_da dung mang po thob tu re zhing 'dod pas mi 'grub pa'i dogs pa la sogs pas gdung ba dang*/_gnod sems kyis nad gdon dgra la sogs pa'i gnod pa mang po ngang gis 'du zhing gnyen longs spyod sogs phan pa sgrub pa'i rkyen dang 'bral ba dang*/_log ltas chos la yid mi ches shing chos min gyi lta ba ngan pa rgyud la skye ba dang*/_rtag tu bsam pa mi drang zhing g.yo sgyus rgyud 'khrug pa'o/__/bdag 'bras sam dbang gi 'bras bu ni yul sdug bsngal gyi rkyen du gyur pa dang rten cing 'brel bar 'byung ba ste/_dran pa nyer bzhag las/_sna tshogs lus dang longs spyod dang*/_/bde sdug nyid du snang ba ni/_/sems kyis sprul zhing sems kyis byas/_/dper na rmi lam ji bzhin no/_/zhes dang*/_spyod 'jug las/_lcags bsreg sa gzhi su yis byas/_me tshogs de dag ci las byung*/_/de 'dra de dag thams cad kyang*/_/sdig sems yin par thub pas gsungs/_/zhes so/__/srog gcod kyi sdig to drag po'i khur gyi lhag mas non cing ma btang ba gang yin pa de/_gang du skye ba'i sa phyogs nyams dga' dang*/_/bag yangs chung la mthun rkyen sman shing me tog la sogs pa nyung zhing rmos pa'i lo ma dang*/_skye shing gi 'bras bu sogs bza' ba dang*/_btung ba'i rigs kyang bkres skom sel ba'i mthu nyams shing*/_res 'ga' 'ju dka' la nad sna tshogs skyed pa'i rgyur 'gyur zhing*/_gang du song dang sdod kyang chu dang g.yang sa dgra gcan gzan sogs kyis srog la gnod 'tshe'i tshogs mang bas ya nga'i gnas su phyin cing gnas dgos par 'gyur ro/__/ma byin blangs pas myu gu sogs longs spyod kyi dngos po med pa dang*/_cung zad re yod kyang 'joms pa sla ba dang*/_longs spyad bya'i bza' shing yod kyang ro nus ldan pa'i 'bras bu bzang pos rnam par smad de nyams par 'gyur ro/__/ba lang dang 'bri sogs kyang 'o ma mi 'byung zhing lo thog sogs yod pa'ang sad kyis gdung zhing ser bas rnam par 'thag par 'gyur ba dang*/_phyugs sogs god cing mu ges nyen nas zas skom sgrub pa'i rtsol ba dang re dogs sogs kyis sdug bsngal snying la 'pho bar skye'o/__/'dod pas log par g.yem pas phyugs lhas grong 'dabs sogs su bshang ba dang gci ba'i 'dam rdzab kyis gang ba'i khrod du dri nga'i tshor ba rtsub mos lus sems gdung bas dbugs mi phyin par/_mi gtsang ljan ljin gyis bag yangs pa'i go skabs med par dog cing nyams mi dga' ba'i yul de nyid du mi yi skye ba'i 'khri shing sngon las kyi stobs kyis dbang med du 'dzugs bzhin rtag tu gnas dgos so/__/rdzun gyis longs spyod dbang thang sogs kyi 'byor pa 'phral du g.yo zhing 'gyur ba dang*/_yul gang du gnas kyang yul der mi mthun pa dang*/_gzhan dgra gnyen bar ma kun gyis bslu zhing mgo bskor ba dang*/_de sogs rkyen ngan sna tshogs pas 'jigs pas brtabs te bag mi phebs shing skrag par 'gyur ro/__/phra mas ni gang du skye ba'i sa phyogs thams cad brag ri gzengs mtho ba sogs ngam grog dang ltung gnas gcong rong can dang*/_gyen mthon po dang thur gzar bas bgrod dka' ba/_mtho dman can gyi yul la gnas shing nyams mi bde ba dang*/_brjod pa rtsub mo ste tshig rtsub mos yul thams cad rdo dang gseg ma la sogs pas khebs shing*/_rtsi shing thams cad kyang tsher ma can dang*/_ljon bzang bral zhing sdong dum gyis gang ba/_'bras bu thams cad kyang nus pa med pas ngan pa dang*/_nad sna tshogs skyed pas rtsub pa dang de sogs nyams mi bde ba dang*/_chu rnams kun kyang dwangs bsil dang bral ba rnyog cing tshwa sgo can dang*/_sa gzhi dag tu rdul mang ba sogs nyal nyil gyis gang ba'i khrod der rgyun du yid mi bde ba'i tshor ba nyams su myong bar 'gyur ro/__/bkyal kas te ngag 'khyal gyis so nam zhing rmo son 'debs phyugs skyong tshong skyed sogs kyang ngal ba la 'bras bu med cing*/_dpyid ka snang zhing ston dus 'bras bu med pa dus kyi rjes su mi 'gro bar nyams shing mi brtan pas ngan par 'gyur ro/__/brnab sems kyis 'bru rnams la sbun dang 'bras bu go ldog cing sbun mang la 'bras bu med pa dang*/_gang du skye ba'i gnas sngar bzang yang dus tshigs log ste ngan cing gdug pas skabs btsal te gnod pa mang po mthong zhing sdug bsngal bar 'gyur bar der skye'o/__/gnod sems kyis dmag 'khrugs sogs mnga' 'bangs sdug bsngal la sbyor ba'i sdig spyod rgyal po dang 'brel nas nyams nyes 'byung zhing sdug bsngal ba dang*/_chom rkun dang sbrul gdug pa dang mi rgod dang stag gzig sogs gcan gzan sna tshogs pas bsam sbyor ngan pas rtsub cing 'tshe ba dang*/_lo tog dang 'bras bu rnams ro yang mi 'dod pa'i tsha zhing kha ba dang*/_lus zungs ngan pa dang gzhan gyis rang bzhin gnod pa'i rkyen du mas bkab cing sdug bsngal ba'i yul du skye'o/__/log ltas ni rin po che dang dar gos la sogs pa phun tshogs kyi dngos po'i 'byor pas dus kun nas spong pas dbul zhing*/_yid du 'ong ba'i bza' shing dang sman shing sogs med pa'am nyung ba dang*/_longs spyad bya'i me tog dang 'bras bu la sogs pa dag kyang bkres skom sel ba'i mthu chung bas lus zungs su mi 'gro la/_dgra gdon sogs kyis nyen pas skyabs gnas med pa dang skyob pa dpung gnyen sogs med par rang gcig pur skye'o/__/skyes bu byed pa'i las kyi 'bras bu ni/_srog gcod pa sogs gang byas pa'i las de dang de srid pa phyi mar nying mtshams sbyor ba la mi ltos par skad cig re re bzhin mang por 'phel ba'i rgyu chung ngu las kyang 'bras bu sdug bsngal mtha' dag ste mang po bskyed do/__/sdig pas 'di ltar thog med nas chos nyid kyi don ma rig pa'i mun pa stug pos khebs shing de las kyang thu ba gtan mi mthong ba'i mun nag gis bslad pa can gyi 'khrul snang bar ma chad par 'khor zhing thar dka' ba'i btson ra shin tu brnag cing bsran dka' bar gzugs sogs nyer len phung po lnga'i steng du sdug bsngal drag po spu gri rnon po lta bu'i dbal gyis bzod dka'i tshor ba yun ring por myong ba'i gnas skabs thob par gyur pa 'di ni/_mi dge ba bcu dang*/_mtshams med lnga/_mchod rten/_byang sems/_dgra bcom sogs bcom pa'i sdig pa sna tshogs par byas pas yin no/__/rgyu mtshan de'i phyir na 'khrul snang la dngos po rang mtshan du bzung ba'i mtho dman du snang ba ma dag gzhan dbang gi gnas skabs so skye rang rgyud pa'i dus na/_mtho ris 'phen byed kyi rgyu ni dge ba'i las lam bcu yin la/_mi dge bcu las phyi rol phyogs pa yi zhes de las ldog pa srog skyob pa sogs dge ba'i las bcu po la yang dag bsnyen par mdzod cig ces gsungs te/_rin chen phreng ba las/_chos 'dis dmyal ba yi dwags dang*/_/dud 'gro rnams las rnam grol zhing*/_/lha dang mi yi nang dag tu/_/bde dpal rgyal srid rgyas pa thob/_/bsam gtan bzhi dang gzugs med bzhi/_/tshangs sogs bde ba myong bar byed/_/ces so/__/de lta bu'i dge mi dge'i rnam bzhag ji ltar bstan pa bzhin shes nas de rgyud la bsnyen pa las/_bsod nams cha mthun bcu po des rnam smin bde 'gror 'phen cing*/_mi dge rnam pa bcus ngan 'gror 'phen pas dkar nag rgyu 'bras la blang dor tshul bzhin bgyid pa ni skyes bu chung ngu'i lam ste mdo las/_'jig rten pa yi yang dag lta/_/chen po su la yod gyur pa/_/de ni tshe rabs stong du yang*/_/ngan gror 'gro bar mi 'gyur ro/_/zhes so/__/de la thar pa'i cha dang mthun pa'i dge ba ni/_las dang nyon mongs pa'i zag pa lhag med du dag pa'i mya ngan las 'das pa dam pa'i rgyu gang zag gi bdag med rtogs pa'i shes rab kyis zin pas dge ba bcu dang*/_bsam gtan bzhi dang gzugs med snyoms 'jug bzhi dang*/_sbyin sogs nas shes rab bar drug po blang dor byed pa yin la/_de yang tshogs lam thos pa gtso che ba dang*/_sbyor lam sgom byung gtso che ba dang*/_mthong lam bdag med gtso che ba dang*/_sgom lam bdag med dang tshul khrims gtso che ba bcas bsgrubs nas mi slob pa'i lam ste lngas bsdus pa'i zag med kyi dge tshogs yin no/__/nyan rang bzhin dge bcu sogs bsgrub bya de yang blang dor du dmigs pa can ma yin par chos dang gang zag gis bsdus pa'i phyi nang thams cad bdag med gnyis kyi rang bzhin stong nyid kyi don shes rab chen pos tshul bzhin rtogs nas/_de ltar stong nyid de snying rjes zin pa'i sbyin sogs thabs kyi cha thams cad la rgyas thebs pa'i thabs shes zung 'brel gyi dge ba gser 'gyur gyi rtsi lta bu des/_srid pa la dor bya'i mtshan ma dang*/_zhi ba la blang bya'i mtshan mar bzung nas de gnyis mnyam nyid du ma shes par 'gal ba can du lta ba'i lcags khams lta bu la thebs pas/_srid zhi gnyis ka'i mtha' la mi gnas pa'i ye shes rgyal ba'i gzugs sku phrin las rtsol med du 'byung ba'i khams mthar thug pa 'grub pa'i rgyu ni/_'jig rten las shin tu 'das pa'i dge ba yin te/_spyod 'jug las/_yan lag 'di dag thams cad ni/_/thub pas shes rab don du gsungs/_/zhes gsungs pa ltar ro/__/de ltar theg chen slob pa'i lam bzhi po'i dus su sbyin sogs sgyu ma'i tshul du dmigs par byas nas rnam pa dang bcas pa nyams su len pa'i bsod nams kyi tshogs dang*/_'khor gsum dmigs med shes rab kyis zin pa'i cha ye shes kyi tshogs te tshogs gnyis zung 'jug gi nus pa cher goms pa'i stobs kyis/_nyon mongs dang shes bya'i sgrib pa gnyis sbyangs te 'bras bu sku gnyis mngon du 'thob par 'gyur te rin chen phreng ba las/_sangs rgyas rnams kyi gzugs sku ni/_/bsod nams tshogs las byung ba ste/_/chos kyi sku ni mdor bsdu na/_/rgyal po ye shes tshogs las 'khrungs/_/zhes so/__/de yang rang bzhin rnam dag chos nyid bde gshegs snying po spros mtha' bral ba'i dag pa'i tshul la rgyu 'bras tha snyad du btags pa tsam las thun mong gi theg pa ltar bskyed bya skyed byed du ma grub pa'i don 'di ni phal gyis rtogs dka' ba'i de kho na nyid zab mo'i rten cing 'brel bar 'byung ba lags te/_dgongs pa nges 'grel las/_zab mo byis pa'i spyod yul ma yin pa/_/brjod med gnyis min rgyal bas bstan mdzad kyang*/_/byis pa gti mug rmongs pa 'di dag ni/_/smra ba'i spros la dga' zhing gnyis la gnas/_/zhes so/__/yon tan rin po che'i mdzod dga' ba'i char zhes bya ba las/_las rgyu 'bras kyi tshoms te le'u gsum pa'o//___//srid pa'i gnas ris na mngon par mtho ba'i lha mi'i lus rten 'khor ba'i rgya mtsho las sgrol ba'i gru bo mchog la brten pa de rnams/_re zhig tshe 'di la ngan song gsum gyi chu srin gdug pa'i lces btang ba ste der lhung zin pa ma yin yang*/_thar pa mya ngan las 'das pa'i skam sar nyon mongs pa'i rlan dang bral bar ma phyin te/_rtse mo thob pa rtsa mi 'chad/_/bzod thob ngan song lhung mi srid/_/ces tsam yang ma thob pas 'phags pa'i bden pa bzhi yi ded dpon bsten par bya zhes gzugs can rgyan du sbyar te/_de yang bdag cag gi ston pas wA ra Na sir lnga sde bzang po sogs la/_dge slong dag_/'di ni sdug bsngal lo/_/'di ni kun 'byung ngo*/_/'di ni 'gog pa'o/_/'di ni lam mo/_/zhes ngo bo'i sgo nas dang*/_yang sdug bsngal shes bya/_kun 'byung spang bya/_'gog pa mngon du thob bya/_lam bsten bya'o/_/zhes rgyu'i sgo nas dang*/_yang dge slong dag sdug bsngal shes zin shes par bya ba gzhan med/_kun 'byung spangs zin spang bar bya ba gzhan med/_'gog pa mngon du byas zin mngon du bya ba gzhan med/_lam rgyud la bsten zin bsten par bya ba gzhan med/_ces 'bras bu'i sgo nas bzlas te lan gsum du gsungs pa bzhin shes par bya'o/__/de la sdug bsngal gyi rang bzhin shes par bya ba ni/_'di ltar 'khor ba'i gnas rigs drug po dma' ba ngan song gsum po'am mtho ba bde 'gro gsum po yang rung*/_sdug bsngal gyi sdug bsngal dang*/_'gyur ba'i sdug bsngal dang*/_khyab pa 'du byed kyi sdug bsngal te/_sdug bsngal gyi sdug bsngal mdze thog tu phol gyis gtugs pa lta bu/_'gyur ba'i sdug bsngal bde ba sdug bsngal la 'gyur ba ste spro bsangs la phyin pa dug sbrul gyis gtses pa'am kha zas ro bda' ba zos pas srin pho lang du song ba lta bu/_nyon mongs pas lkog tu byas pa'i phyi nang sdug bsngal gyi rang bzhin du ma rig pa'i 'du byed pa khyab pa 'du byed de sdug bsngal gsum gyis dam la ma bzhag pa 'khor ba'i gnas gang yang yod pa ma yin te ngan song gsum sdig 'bras kyi sdug bsngal/_mi dang 'dod lhar mngon gyur dang*/_khams gong mar bsam gtan gyi tshor ba sogs yod do/__/'di ltar 'phral phugs kun tu phung krol te gnod pa'i rgyu 'bras bskyed par byed la/_dug sbrul gdug pa mgo 'phang bstod pa yi gnod pa ltar/_shin tu ma rungs pa ni nang du sems chags sdang sogs tshul bzhin ma yin pa yid la byed pa'i 'khrul snang la mngon par zhen pa 'dod pa'i gdon dang*/_phyi rol gzugs sgra sogs yul gyi ngo bo nam myong ba'i tshe bde bar snang yang phyis gnod pas dug dang 'dra ste/_de gnyis phan tshun yul gyi rnam pas sems bslad de lcags bsregs kyi dus kyi tsha ba ltar 'dzings shing gtugs la/_'dod pa'i nyes dmigs shes pa'i blo gros kyis dben pa'i phyir btson ra de yi nang nas thar pa'i go skabs med par sdug bsngal gyis gdungs shing nyam thag pa'i rang cag 'khor bar bsam na snying nas skyo ba 'phel lo/__/'khor ba'i skye bo bde ba 'dod cing de sgrub pa la mngon par sbyor zhing sgo gsum tshegs chen pos brtson pa dag kyang*/_de'i rgyu mi shes pas gti mug gi mthus non te log g.yem sogs sdug bsngal gyi rgyu sna tshogs pa de'i 'bras bu sdug bsngal gyi mtshon cha rnon po'i dbal la brten par byas pas/_'phral dang yun gyi gnod pa'i gnas su rang gis rang nyid yang dag sbyar te/_spyod 'jug las/_sdug bsngal 'dor 'dod sems yod kyang*/_/sdug bsngal nyid la mngon par rgyug_/bde ba 'dod kyang gti mug pas/_bdag gi bde ba dgra ltar 'joms/_/zhes so/__/chags pas 'di phyir sdug bsngal byed pa ni/_mar me'i gzugs mdzes pa dang der phye ma leb chags pas bsregs nas 'chi ba bzhin du/_bstod sogs snyan pa'i sgra la rna shes dang*/_tha ma kha ste sna dud sogs dri/_sha sogs ro/_bud med dang dar gos sogs lus reg bya la chags par byas pas bslus te thar pa'i lam gyi srog 'phrog par 'gyur ba ni/_rna ba sgrar chags pas pi waM sogs la brten nas ri dwags dug mdas gsod/_sna dri la chags pas bung ba me tog tu 'thum/_lce ro la chags pas nya mo lcags kyus 'dzin pa dang*/_glang po che dga' ma'i reg bya la chags pas 'dam du rang srog dang bral ba sogs 'dod pa'i yul lnga dag re res bslus pa dang rten cing 'brel te/_dbyig gnyen gyis/_skyes bu dag ni gcig la yang*/_/lnga po 'di dag rtag ldan zhing*/_/nyin mtshan du ni rab 'joms na/_/bde ba ji ltar thob par 'gyur/_zhes so/__/srid pa 'khor ba'i yul la sdug bsngal thu ba ni gang dang phrad pa tsam gyis tshar gcod par byed pa gtum po'i me yin na'ang sdug bsnga la/_bshes med du khro zhing 'tshe ba'i mngon spyod rtsub pa stag dang seng ge sogs gcan gzan dang*/_mi rgod sogs kyi gnod pas gtses pa dang*/_rgyal po'i chad pas btson dong du bcug pa sogs kyis 'tshe ba dang*/_de las kyang shugs myur zhing rgyun ring ba'i sdug bsngal ni/_rtsa ba'i sdug bsngal gsum dang*/_skye rga na 'chi sogs yan lag gi sdug bsngal brgyad rnams snga phyi brgyud mar 'byung bas 'gro ba 'di mnar ba yin no/__/thog med nas 'khor ba'i gnas 'dir bdag la pha ma sogs phan 'dogs pa'i bshes sam/_mthun mi mthun gang yang min pa'i bar ma dang*/_nye ba'i gnyen dang*/_'khon pa'i dgra bo 'di tsam zhes bsam par mi nus te/_ci'i phyir zhe na/_mtha' dag ste ma lus pa'i sems ldan gyi nang nas re res kyang dgra dang gnyen mdza' bshes dang bar ma'i phyogs gsum bzung nas/_pha ma sogs gnyen bshes su gyur na phan btags pa dang*/_dgrar gyur pa'i tshe gnod pa sbyin pa dang*/_bar ma btang snyoms sogs bsam las 'das pa mchis na sems can smos ci 'tshal te/_'phags pa kAt+ya nas bsod snyoms byon pa'i tshe sngar gyi las 'bras gzigs te/_pha sha za zhing ma la brdeg_/las ngan dgra bo pang du khur/_/chung mas khyo yi rus pa 'cha'/_/'khor ba'i chos la gad mo bro/_/zhes dang*/_bshes springs las/_ma yi thug mtha' rgya shug tshigs gu tsam/_/ril bur dril kyang sa yis lang mi 'gyur/_/zhes so/__/srog chags grog sbur sogs shin tu phra ba rdul phran lta bu'i sems can mang po'i lus kyi rnam grangs mang po smos ci dgos/_bdag gcig pu'i srog gi rten 'os pa shin tu phra ba'i gzugs su gyur pa de dang*/_'dod pa'i dngos po bsgrub pa'i phyir/_mgo dang yan lag rnams mtshon cha sogs kyis bcad gtub bgyis so cog spungs na dpag tshad brgyad khri ri rab lhun po'i che thang yang nyams te de bas kyang ches lhag par 'gyur zhing*/_tsha dmyal gyi gnas su lan grangs mang du zangs zhun khol ma 'thungs pa dang*/_brgya la res 'ga' yi dwags kyi lus su gyur nas rnag khrag dang phyi sa sogs mi gtsang ba zos pa dang*/_'khor ba'i gnas mtho dman kun tu lus sems sdug bsngal ba'i rgyu las mchi ma zag pa rnams kyang phyogs mtha' la gtugs pa'i rgya mtshor 'bab pa'i chu klung dag las kyang mang ngo zhes dran pa nyer bzhag sogs las gsungs so/__/spyir 'khor ba'i gnas thams cad sdug bsngal gyi rang bzhin las ma 'das kyang khyad par ngan song gsum dang*/_de'i nang nas kyang dmyal ba'i sdug bsngal ni tshad med de mtha' yas so/__/'on te phyogs tsam bshad na lcags kyi mdag me 'bar thar gnas bzhin phan tshun gcig gis gcig mthong na dgra mi sha bo bzhin zhe ldang gi mtshon cha sna tshogs pas gsod cing las kyis sos zhes sgra grags pa'i mod la slar yang sos par 'gyur la/_de yang dran pa nyer bzhag las/_/mi gang mi ni gsod pa dang*/_/gzhan yang bskyed nas gsod byed pa/_/de dag nges par yang sos 'gro/_/zhes so/__/thig nag ni thig nag po brgyad dang bcu drug nas grangs med bar sog les gshog la/_slar yang las kyi dbang gis 'byar la gshog pa sogs sdug bsngal rgyun mi 'chad par myong bar 'gyur te/_de'i rgyu ni/_pha ma dang ni grogs dang gnyen/_/gnyen bshes la ni 'khu byed dang*/_/phra ma rdzun ni smras pa'i mi/_/thig nag tu ni 'gro bar 'gyur/_/zhes dran pa nyer bzhag las gsungs so/__/gsum pa bsdus 'joms ni/_da lta bsad pa'i srog chags kyi mgo brnyan du yod pa'i brag ri phan tshun 'thab pa'i bar bcar ba dang*/_gtun dang tho bas 'thag par byed de/_rgyu ni/_ra dang lug dang wa phag dang*/_/ri bong byi ba ri dwags sogs/_/gzhan yang bskyed nas bsad byas na/_/lus can bsdus 'joms 'gro bar 'gyur/_/zhes dran nyer las so/__/bzhi pa ngu 'bod ni/_ngu 'bod drag po'i sdug bsngal gyis gdung ste lcags zhun bskol bar las ngan pa'i sems can mang po rab tu 'tshod cing*/_me 'bar ba'i tho ba ral gri sogs kyis dbad cing sdug bsngal gyi tshor ba chen po'i 'o dod 'bod pa ste/_rgyu ni/_'dir ni lus can gang dag gis/_/lus dang ngag yid nyon mongs byed/_/gang dag lhad 'jug gzhan g.yo byed/_/mi de dag ni ngu 'bod 'gro/_/zhes pa ltar ro/__/lnga pa ngu 'bod chen po ni/_sngar gyi de las sdug bsngal che bas 'bod sgrog chen po lcags khyim 'bar ba nyis rim sogs su btsud nas bsreg pas 'o dod 'don te/_rgyu ni/_gang gis lha dang bram ze dang*/_/bla ma'i rdzas 'phrog sdug bsngal byas/_/gang dag gtams pa'i 'phrog byed pa/_/de dag ngu 'bod chen por 'gro/_/zhes pa ltar ro/__/drug pa tsha ba ni lcags kyi sa gzhi 'bar bar gan rkyal du brdung zhing bsregs pas tsha ba dang*/_lcags kyi gsal shing me rab tu 'bar bas lus kun la gyen du drangs shing thal mar 'bigs pa'o/__/bdun pa rab tu tsha ba ni/_snga ma bas kyang me mtshon sogs rab tu tsha ba'i sdug bsngal myong te/_mdung thung rtse gsum pas lus kyi gzhung 'bigs shing*/_phyi nas lcags bsreg kyi leb mas dkri ba dang*/_yang lcags zangs kun tu 'bar ba'i nang khro chu khol mar 'tshod cing rus gong dkar nag sogs skyi g.ya' ba dang bcas pa'o/__/brgyad pa mnar med pa ni/_sdug bsngal bar mtshams med cing de las lhag par mnar du med do/__/phyogs mtshams med par kun tu 'bar ba'i lcags khyim nyis rim dang bzhi rim du tshud nas rab tu 'bar bar sreg byed kyi me dang*/_bsreg bya'i sems can gnyis med du bsregs par 'gyur te/_dmyal ba'i rabs las/_yon tan dag gi che ba la/_chos spangs shing skur pa btab pa sogs/_mchan/__/gnod pa drag po byas pa las/_/pha ma bla ma bsad byas pa/_/nges par bskal par mnar med 'tshed/_/ces so/__/nye 'khor du dmyal gnas brgyad po'i sdug bsngal nyid las cung srab nas de las thar pa'i dbugs 'byin par snang nas bros pa'i kun rtog gis song ba na/_so so'i phyogs bzhi na yod pa nye 'khor bcu drug zhes bya ste gnas snga ma de dag gi sgo 'phar bye ba snang tshe/_chu klung gi 'du shes kyis bsnyegs pas lcags khyi ral pa can gyis ded nas mdag me'i 'obs su tshud pa dang*/_slar bsil nyams kyi bde bar sems nas song bas ro myags rul ba dang phyi sa'i 'dam rdzab stug por lhung nas 'bu rdo rje'i mchu can gyis phug pa dang*/_slar yid du 'ong ba'i thang mthong nas song bas ral gri'i lo ma'i nags tshal gyis dum bur bcad pa dang*/_slar song bas thal tshan gyi chu bo rab med du bying nas sdug bsngal gshin rje'i kha bas thu bar 'gyur ro/__/'dod log spyad pas ro myags 'dam du skye ba dang*/_sems can la mtshon chas sdug bsngal bar byas bar byas pa ral gri'i nags tshal dang*/_ma smin pa'i gzhon nu ma bsten pa dang*/_dge 'dun gyi rdzas la rlom sems byas pa dang*/_chu gnas sogs bsad pa chu bo rab med de/_dmyal gnas de dag gi phyogs bzhir shal ma li yi sdong por mdza' zhing yid bcugs pa dag gis sngar chags pa'i dam bca' dran nas der bsnyegs pa'i lam du khyi dang lce spyang sogs kyis ded nas/_lcags kyi tsher ma rnon po gyen thur du bstan pas tshabs chen phug pa'i lus de'i rtser thon pa'i tshe sngar gyi 'dza' gcug de 'bar zhing rtsub pa'i lcags kyi bud med kyi lus su gyur nas/_dam du bzung zhing 'khyud pas lus tshig cing sha khrag 'thor klad pa chil gyis byung ba sogs myong mthar/_khwa ta rdo rje'i mchu can dang*/_bya rgod dur bya sogs kyis mig la 'dru zhing lto 'dren par byed de/_dran pa nyer bzhag tshig le'ur byas pa las/_byi pho byed pa shal ma lir/_/'dzeg cing lcags kyi bud med 'tshe/_/zhes so/__/tshe tshad ni gong mar 'dod lha'i tshe dang nyin zhag mnyam/_/zhes sogs shes par bya'o/__/grang dmyal ni/_gcong rong ya nga bar kha char bu yug gis sbrebs pa des lus 'dar ba'i thag pa lta bu yis bcings te phan tshun 'gul bskyod byed par mi nus shing*/_gum gum por 'gyur bzhin sdug bsngal gyi tshor bar rnam shes 'thogs nas gson pa'i skabs tsam de yang yol mi thub par/_dpes mtshon du med pa'i rlung gi mtshon cha rno ngar can gyis rus pa'i gting phug pa'i stobs kyis/_grang reg gis lus phyi nang thams cad btab pa ni/_dper na so yi bar du til 'bru 'tshir ba ltar grang reg gis gdung bar 'gyur ro/__/ha cang grang che bas lus la chu bur byung bas chu bur can dang*/_de brdol nas rmar gyur pas chu bur brdol ba dang*/_grang tshor mi bzod pa'i a chu'i smre sngags nar mar 'byin pa dang*/_de tsam smra mi nus pas kyi hud ces shugs ring 'don pa dang*/_de'ang zer ma nus par skra spu rnams g.yeng nas lus sems blong blong por 'gyur bas/_so 'tham 'tham pa can dang*/_de nas ut+pal ltar pags pa sngon por gyur nas drug tshal du gas pa dang*/_de gnyis rim sogs pad+ma dang ni pad+ma chen po gnyis ni rim pa ltar brgyad dang bcu drug nas grangs med du gas pa'o/__/de ltar gas pa'i rma nang nas khrag chu ser sogs 'dzag cing srog chags mchu rnon po can mang po skyes shing de kun gyis 'bigs shing bza' ba sogs sdug bsngal bsam gyis mi khyab bo/__/tshe tshad ni til bre bo che khal nyi shu shong ba'i tshad de/_mngon pa mdzod las/_til sbyangs nang nas lo brgya rer/_/til re phyung bas zad gyur na/_/chu bur can gyi tshe yin te/_/gzhan gyi tshe ni nyi shu 'gyur/_/zhes so/__/yan lag nyi tshe ba ni/_mgal dum sogs la lus su 'du shes pas de bcad gshags sogs byas pas sdug bsngal ba dang*/_sgo 'phar med pa rdo chung ngu dang*/_pha wang sogs rdo chen po la rtag tu 'thums nas sdug bsngal ba dang*/_de bzhin du sgo dang ka ba dang thab ka dang*/_thag pa gang dang chab rom shing lor 'thums pa dang*/_nam mkhar g.yo ba sogs sngon dge 'dun gyi rdzas dang gtsug lag khang gi cha rkyen sogs la dbang zos te/_mi dbang bzhin longs spyad pa la sogs pa sna tshogs pa'i mi dge ba'i las kyis med bzhin sprul pa'i snang ba la rang gzugs 'du shes nas/_de la nye bar len pa'i sdug bsngal zad mi shes pa rtag par ram/_nyin mtshan phyed ma'am/_yud tsam sogs myong ba yin te/_mong+gal gyi bus/_srid pa na ni bde ba med/_/nyi 'tshe ba bzhin 'gro ba kun/_/so so'i sdug bsngal rnams kyis gdungs/_/'bar ba'i khrod na gnas pa 'dra/_/zhes gsungs so/__/de yi phyir na skye ba'i rang bzhin yul phran la shwa 'od de chu log chen po brdol ba ltar sdug bsngal gyi rba rlabs ca co sgrogs pa 'di nyid/_da lta thos bsam sogs shes rab kyis ma bzlog na/_chos sgrub pa'i rten lha bas lhag pa'i lus rten chu lon te chu bkag pa'i ra ba yang*/_glo bur du bshig cing 'tsho ba'i brtan pa dang bral te skye ba phyi mar nying mtshams sbyar ba'i dbang gis mya ngam gyi thang gnod pa dang sdug bsngal du ma'i rang bzhin can srid pa'i gnas su yang dang yang du 'khyams shing 'khor bar 'gyur ro/__/mngon mtho'i go 'phang thob kyang mi phan par gdams te/_khams gong ma'i gzugs med bzhi ni bde sdug gi tshor ba med pa'i btang snyoms kyi ting nge 'dzin lung ma bstan pa'i 'phen byed kyi las dang*/_ting 'dzin gyi shugs zad nas sngon gyi las sred len gyis gsos btab nas srid pa phyi mar skye ba 'du byed cing sdug bsngal sna tshogs myong dgos pa dang*/_tshangs ris nas 'bras bu che ba'i bar gzugs khams kyi lha rnams bsam gtan bzhi'i bde ba de dang*/_snga ma'i 'phen byed kyi las zag bcas kyi bde ba zad de/_'og ma dmyal ba la sogs par ltung bar 'gyur ba'i sdug bsngal myong bar 'gyur ro/__/chags bral gyi bde ba la longs spyod pa'i tshangs pa dang*/_'dod khams pa'i sa gzhir brten no cog gi dpal 'byor longs spyod che ba lha dbang kau shi ka dang*/_rin po che sna bdun gyis bdar zhing gling bzhir dbang ba'i 'khor los bsgyur ba la sogs pa yang*/_dper na sprin bar nyi bzhin dkar po'i las kyi rnam smin stobs ldan gyis skabs btsal te/_bde skyid la longs spyod myong ba de snga ma'i dge 'bras zad cing spangs pa'i mod la/_dper na mar me'i lces rim bzhin 'thung ba'i zhun mar zad pa na mar me'i 'od nyams pa bzhin du bde 'byor thams cad nyams par 'gyur te/_bshes spring las/_brgya byin mchod 'os nyid du gyur nas ni/_/las kyi dbang gis phyir yang sa steng lhung*/_/'khor los bsgyur rgyal nyid du gyur nas kyang*/_/'khor ba dag na yang bran nyid du 'gyur/_/zhes so/__/ji ltar ri rab kyi spo kha khyer steng gi grong khyer lta na sdug gi sa gzhi la rkang pas mnan na nems shing btegs na spar bar byed pa'i gnas dang*/_lha gos pan tsa li ka la sogs pa reg pa 'jam po dang*/_nye dbang dang rgyal chen ris bzhi'i lha rnams dang*/_klu dang*/_mi'am ci'i rgyal po sogs kyi gtsug gi la thod dang nor bu margad sogs rin po che'i thor tshugs rnams gtugs pa'i 'od kyis rkang pa'i chu skyes dmar por byas pa'i lha'i dbang po yang las kyi 'phen pa zad nas dmyal bar skyes pas lcags kyi gsal shing 'bar ba'i rtse mor bskyon te gdung bar 'gyur ro/__/'dod pa'i nyes dmigs 'di ltar mtho ris lha'i bu mo'i lang tsho'i sgyu rtsal drug cu rtsa bzhi la mkhas pa'i nu ma gsar pa la reg pa'i bde ba'i 'khri shing bsten te/_dpag bsam shing sogs gos rgyan sna tshogs pa'i dga' tshal dang*/_rin po che'i gzhal med khang mdzes shing yid du 'ong ba'i mu tig sogs rin po che'i drwa phyed dang dril g.yer gos rgyan sna tshogs pa'i rgyan cha can dag kyang spangs nas me mur gyi 'obs dang*/_ral gri'i tshal sogs kyi nang spyi'u tshugs su lhung ste/_'chi la nye ba'i skabs snga ltas su gos la dri chags pa dang*/_rang gi mal stan dang me tog rnying par gyur pa'i tshe/_sngar bsnyen bkur byed pa'i lha mo dag gis kyang dor te/_sngon med kyi rngul gyis lha de'i lus dang gdong pa la gos par gyur nas bkru ba'i zol te tshul de dag zhig nas drung du mi nye bar gyur pa na/_'du shes ni 'khrugs phyi ma'i skye gnas rnams lha'i mig gis mthong zhing bsdangs la brgyal bas/_mdza' bshes rnams kyis rgyang ring nas bos te lha mir skye ba'i smon lam 'debs pa las nye mi nus so/__/de'i tshe snying rje'i skad du kyi hud sogs zer bzhin nye du rnams la blta zhing ngu ba yi/_gnas der 'chi zhing gzhan du 'pho ba'i sdug bsngal lha'i zhag bdun du myong ba lta bu ni mi rnams la gtan du'ang med do/__/ri rab kyi phyed du slebs pa'i gnya' shing 'dzin ri'i sa bla yi steng du 'gegs pa yi rgya khyon dang ldan pa gdugs lta bur gyur cing gling bzhi'i mun pa sel ba'i snang byed chen po nyi zla gnyis po'i rten dang gzhal med khang gi 'od yin na'ang*/_slan chad gling bar mun pa'i smag gi btson ra ru lag pa brkyang bskum yang mi mthong ba'i long ba chen po'i gnas skabs 'thob par 'gyur ro/__/gser gyi sa gzhir brten pa'i lha ma yin gyi dbang po thag bzang ris kyis khang bzang gdams pa can dang*/_grong khyer gser ldan 'dun sa nor bzang sogs 'byor pa du mas snyems na'ang sum cu rtsa gsum pa'i lha yi rnam rgyal khang bzang dang*/_grong khyer lta na sdug_/'dun sa chos bzang sogs ches lhag pa'i dpal 'byor la sdang ba'i phrag dog gi dgra s+t+wa ma rungs pas rang snying kyi shes rgyud tshal par bkas te nyams par byas nas slar lha rnams dang 'thab pa'i tshe/_lha'i dpung brdal pa ni shin tu gtum po'i mtshon cha sna tshogs kyis g.yul ngor lha rnams dbu bcad na ma gtogs pham pa dang bral zhing*/_lha ma yin rnams ni mi bzhin du bdag nyid kyi gnad che sar phog na 'chi bar 'gyur bas/_lha'i mtshon cha drag po rnams kyis mgo dang yan lag btub pa la sogs pa'i sdug bsngal gyis lha min mnar te/_rgyu ni/_lha min rabs las/_rtag tu g.yo dang sgyu spyod cing*/_sdig pa dag ni mang byas la/_/'thab la dga' zhing sbyin byed pa/_/de ni lha min dbang phyug 'gyur/_/zhes so/__/mi rnams srog gi 'tsho ba skad cig gis mi rtag ste chu'i chu bur lta bur da lta yod kyang da lta zhig cing g.yo ba yi tshe thung ba'i 'dzam bu gling pa'i mi dag_/'dod don mi 'grub pas yid mi bde dang*/_phan tshun 'khrugs pa sogs sdug bsngal snga mas ma btang bzhin pha shi steng ma shi ba dang*/_ma shi steng dgras ded pa lta bu sogs nad gdon sna tshogs pa'i sdug bsngal snga mas phyi ma nye bar len te/_dper na mdze can la phol byung ba'i sdug bsngal gyi thog tu rmas zug rngu de dag gtugs nas sdug bsngal ba bzhin no/__/mngon par mtho ba'i gnas 'di ni yul gyi yon tan mkho dgu thams cad rdzogs pa'i skyed tshal du/_'dod pa'i yul lnga pa'i ro la gdung bas longs spyad pa na/_'phral du bde ba ltar snang yang dper na sbyar ba las byung ba'i dug can gyi bza' ba khong du song bas/_dang po ro bda' ba dang lto 'grangs pa sogs bde bar mngon kyang mthar dug nad kyis gzir nas rnam par sma phab ste lus mdangs nyams/_mig 'phang smad pa sogs dka' thub ste sdug bsngal bas lus rid cing*/_sngon las dang 'phral rkyen sogs kyis mig 'phrul lta bur thob pa'i bde dpal 'di sdug bsngal gyi rnam par 'gyur ba can no/__/yul 'od ldan zhes bya ba'i rgyal po rab gsal gyis rkang pa'i reg pa la brten nas khur du mi bzod pa'i mnga' thang gis/_glang chen 'dul sbyong mkhan la 'dul bcug pas lcags kyi tho lum sogs kyis btul ba'i mthar ci ltar bsgo ba bzhin nyan nus par thul nas/_rgyal pos rkang pas 'gro ba ni ngal ba dang bcas pa'o snyam pa'i sems kyis glang po'i gnyar 'dzegs nas bde ba ltar phyin kyang*/_glang po de yi bsam pa thub mchog gis bstan pa'i chos nyon mongs 'dul ba'i sdom pas ma btul bas/_glang mo'i dri snom pa'i mod la rtse dgas yid rab tu rgod par gyur nas/_sa gzhi thams cad shing rta'i 'phang lo bskor ba ltar rgyug pas g.yang sar smad pas de srog dang bral nye ba'i sdug bsngal bar gyur pa ni khyab pa 'du byed kyi sdug bsngal mtshon dpe'o/__/de ltar rtsa ba'i sdug bsngal chen po'i bdag nyid gsum ni/_sems can rang gi las dang mthun par khyab cing nyams mi dga' bar byed pas 'brog dgon pa lta bur gyur pa na/_mngal nas skye ba dang*/_rga ba dang*/_'du ba 'khrugs pa'i na ba dang*/_srog 'gags pas 'chi ba'i tshor ba dag gis rtag tu dkyu zhing rnam par 'khyams pa ltar skye rga sogs kyis sdug bsngal lo/__/smon pa ste 'dun pa med pa'i mi sdug pa'i dgra dang glo bur du 'phrad nas sdug bsngal ba dang*/_snying du sdug pa mdza' bshes yid la goms par byas pa gnas min pa gzhan du phyogs la/_zas nor yo byad gnyen grogs mnga' thang longs spyod la sogs pa 'dod pa'i rtsol ba'i sgrub kyang yul de dag la 'byor zhing 'ong ba ci yang med pas ngo tshar 'gyur ba bzhin bros tshul du byas pa dang*/_nyer len phung po'i steng du mi 'dod bzhin dka' thub ste sdug bsngal sna tshogs 'dus te/_de ltar rnam pa brgyad kyi sdug bsngal brtul phod pa ste stobs chen po'i gdung ba dag gis mi yi skye ba sdug bsngal sna tshogs pa'i 'khri shing 'di nyid rtag tu gtser te gdung bar 'gyur ro/__/shin tu dri nga zhing 'dam rdzab lta bu mi gtsang ba'i rnyog ma can rgya yangs par mi mngon par kun nas dog pa snang pa'i go skabs med pa mun nag 'thibs pos sgrib pa'i rang bzhin can gyi khrod/_ma yi mngal gnas lcags khyim sgo 'phar spangs pa lta bu'i nang du tshud nas/_ma rig pa dang mtshungs par ldan pa'i rnam shes de pha ma'i khu khrag 'dres pa'i dbus na brten pa yin la/_de yang bdun phrag dang por mer mer ba ste gya gyu ba dngul chu'i rnam pa lta bu dang*/_bdun phrag gnyis par nur nur ba snabs kyi rnam pa lta bu dang*/_bdun phrag gsum par mdzub mo'i rnam pa lta bu ltar ltar dang*/_bdun phrag bzhi par mkhrang gyur sgo nga lta bu/_bdun phrag lnga par gor gor khur ba'i rnam pa lta bu/_drug par khyab 'jug nya yi rnam pa lta bu/_bdun phrag bdun par rus sbal bzhin mgo dang rkang lag cung zad mngon pa yin te de ltar bdun phrag bdun song ba de nas bdun phrag nyi shu rtsa drug gi bar gnas 'gyur te/_mi gtsang ba'i srin bu bzhin yid du mi 'ong ba'i rnam pa la/_mig la sogs pa'i dbang po lnga'i rten dang*/_yan lag rnams dang*/_nying lag mdzub sor dag dang*/_snying glo ba sogs don lnga dang*/_mchin pa/_mtsher pa/_mkhal ma/_pho ba long ka sogs snod drug dang*/_rgyu ma/_mkhris pa/_lgang pa/_bsam se'u/_rtsa dang*/_rlung dang*/_khams dwangs ma dang*/_khrag dang*/_chu ser dang*/_skra dang*/_ba spu la sogs pa'i skye mched rdzogs par 'grub cing*/_de nas bdun phrag sum cu rtsa bdun gyi grangs snyed tshe/_ma'i bza' btung gi dwangs ma lte thag brgyud de lus zungs nyams brtas pa dang*/_de nas cher bskyed pa'i skabs su 'phar g.yo byed pas ma la'ang mi bde bar 'gyur zhing*/_de'i tshe dog cing skyug bro ba dang*/_nag cing 'khum pa'i tshor bas gdung zhing*/_ma yi spyod lam la brten nas tshor ba sna tshogs dang*/_ma nyid bkres na g.yang la lhung ba lta bu/_ma nyid skom na lus skam pa lta bu/_nyi ma sogs kyis dros shing tsha na 'tshig pa lta bu/_grang na 'khyags rom na rengs pa lta bu/_'grang na ri yis mnan pa lta bu/_sgul bskyod byas na g.yang sar bzlog pa sogs bza' btung gi rnam 'gyur las byung ba'i sdug bsngal ni dpag tu med do/__/zla ba brgyad dang zhag nyer drug nas btsa' ba'i dus kyi rjes 'gro ba'i tshe las rlung gis de yi lus mgo mjug ldog ste rus bar btsir te/_bzod dka'i bsdus 'joms kyi ri phan tshun btsir ba'i sdug bsngal khur du 'phos te steng du bab pa lta bu'i sdug bsngal gyi nye bar spyad pas tho btsams nas/_ma dang bu gnyis ka de yi mod la srog 'dor ram yang na gcig shos 'chi ba'am gnyis ka shi la thug tsam gyi gnod pa bdo ba'i sdug bsngal gyi khur gyis btsa' 'o/__/de ltar btsas pa'i lus de mngal gnas nas byung ba'i phru ma rlon pas dkris shing dri nga ba de stan du lhung ba na tsher dong du lhung ba'i 'jigs skrag dang*/_phru ma bshus tshe bsran mi bzod pa pags pa bshus pa lta bu dang*/_khrus dang tshog mar bsku ba sogs la sha rmen te sha'u chung zhig pa lta bu'i tshor bas gdung ngo*/_sngon mngal gyi dran pa'i stobs rnams nyams te brgyal la khad byas shing*/_de ltar reg pa'i rnam pas lus gzir 'jigs shing mi gtsang ba'i sdug bsngal dang*/_nad dang tsha grang bkres skom sogs ci byung yang smra mi shes pas sdug bsngal la sogs pa myong bar 'gyur ro/__/rga ba'i chad pa drag pos non pa'i lang tsho la dkar dmar gyi mdangs dang*/_sha nyams rgyas pa sogs mdzes cha ji snyed yod pa thams cad nyams pa dang*/_rang dbang med cing gzhan gyis brnyas pa dang sun 'byin pa sogs kyis yid mi bde ba'i khur steng du babs pas/_bshang gci 'dor ba'i sar bskyod pa'i mthu yang nyams te 'khar ba la brten nas g.yo 'gul dgos pa'i gzhan dbang can/_phar 'gro zhing tshur ldog pa dang*/_'greng 'dug sogs g.yo zhing 'gul ba'i tshe lhu tshigs rnam par 'gyur nas sa la 'gyel ba dang*/_dbang po rnams rgud nas mig 'grib/_rna ba sra/_lce ldib/_bud med sogs 'dod pa'i yon tan gyi bde bar longs spyod pa dang*/_gzugs la blta ba sogs yul gyi longs spyod thams cad la mi dga' zhing gal te chags na'ang sprin gyis bkab pa yi nyi ma'i tsha zer bzhin du yul myong mi shes par rmongs te bde ba spangs pa dang*/_lus kyi me drod sogs mthu nyams pa'i dbang gis bza' btung 'ju dka' zhing tsha grang mi bzod la 'du shes 'khrugs pa'i dbang gis nyin mtshan go nor/_rang gzhan mi ngo mi shes pa sogs mal du rnam shes shin tu 'khyams zhes bya la/_des na rgan pa la bkur sti byas pa la'ang phan yon che bar bsngags te/_o rgyan chen pos/_rgas pa yi mug ma 'jug bkur stis skyong*/_/zhes so/__/'byung ba bzhis bsdus pa'i lus can dag la rang bzhin rlung mkhris bad kan sogs cha snyoms pa dang ldan pa'i 'du ba'i rdzing bu dwangs pa dang ni bral te/_rnyog pa can du bgyid cing na ba'i tshor ba drag po yis gzir zhing*/_phung po lnga yi rang bzhin nyer len nad kyis mnar bas dub par byas te/_sems 'khrugs nas 'tsho ba'i brtan pa bral nas 'chi ba'i dogs pas skrag cing yid mi bde ba sogs sdug bsngal lo/__/srid pa 'di na dpal 'byor yod dgu thams cad spungs kyang srog gi rin thang la thug pa med pas gces shing shin tu phangs na'ang 'chi ba'i sdug bsngal gyis btang ba ni su yang med pas 'chi ba thog tu bab cing rnam par gtugs pa'i tshe na ni/_skyes bu de ni mal tha ma ru 'gyur te gnyen 'dun dang*/_longs spyod yod dgu las mar las spu bton pa ltar thal nas nges pa med pa'i gnas su sa tshugs med par 'gro dgos so/__/ka ni ka'i 'phrin yig las/_'chi bdag gis ni drangs pa na/_/dge dang sdig pa ma gtogs pa/_/'gro ba thams cad phyir log nas/_/dga' yang khyod rjes mi 'brang bar/_/mkhyen par mdzod la legs par dpyod/_/ces so/__/mi sdug pa'i yul dgra gdon bgegs sogs dang phrad pa'i tshe na lus sems sdug bsngal gyi pho nyas te tshor bas rnam par gzir zhing nyams smad par gyur pa rnams/_dper na khur gyis dub pa'i gang zag ngal sos pa'i bde ba'i 'bab stegs la bsdad pa na/_de nyid zhig ste lus bsnad pa'i sdug bsngal myong ba'i ngal gso bde ba med pa ltar/_bde ba'i dbugs 'byin thob pa med pa ma zad yid sdug bsngal chen pos gdungs pas lhag par nyen par 'gyur ro/__/bdag nyid la byams shing snying du sdug pa rnams dang lhan cig 'du zhing 'grogs pa'i 'phro la gzhan phyogs kyis 'bral ba'i ngang tshul gsar par bkod pa yi tshe na/_yon tan dang rnam 'gyur sogs bsam nas shin tu yid gdung bas nyams pa'i dka' thub ste sdug bsngal gyi dngos po de dag gal te gzugs su gyur ba'am blta rgyu yod na/_sngon rgyal po nor can gyi bu nor bzang zhes bya ba de/_dri za yi bu mo yid 'phrog ma la chags pa yi dbang du gyur nas rjes su bsnyegs nas song ba'i tshe/_lam 'phrang thams cad gcan gzan dang mi ma yin sogs kyi 'tshe bas bkab pa la bgrod nas song ba las ni las kyi mtha' ring ste snga phyi mu mtha' med par myong dgos pa'i phyir ro/__/'dod pa'i dngos po rtsol bas bsgrubs kyang mi 'grub pas phongs pa dang*/_rang la dbang ba'i longs spyod med pas dbul ba'i skyes bu rnams ni dus thams cad du bkres pa dang*/_skom pas gdung ba sel ba'i thabs sna tshogs bsgrubs kyang de'i don ma grub pa'i re dogs gnyis kyis tshong sogs sdig las sna tshogs kyi gzhan dbang kho nar song nas/_dam chos sgrub pa'i rten bzang lus ngag chud gson pa'i ngal ba dang*/_sdug bsngal bar ma chad pas dus 'da' ba dang*/_rang la longs spyod yod pa rnams kyis chog shes med par yongs su tshol ba'i sdug bsngal gyis gdung bas zas skom kho na yid la btags te las dbang gis dal khom med par sa la rgyu zhing 'gro ba'i yi dwags dngos dang mtshungs so/__/gzugs rang bzhin dang bral ba la gzugs yod snyam zhing zhen pas rten bcas nas sdug bsngal gyi tshor bas nyams su myong ba'i sgo nas de yi rang bzhin shes shing 'du shes kyis de mi 'dod pa'i mtshan mar bzung nas bsal ba'i bsam pas las de rgyun chags su 'ching zhing*/_'du byed kyis phyin chad sdug bsngal mtha' dag pa'i sa bon nam rgyu slar bskrun pa dang*/_rnam shes kyis 'di ni sdug bsngal lo zhes sdug bsngal bdag 'dzin byas te nyams su myong ba'i nye bar len pa po byed do/__/des na phung po lnga po 'di dag ma rig pa dang mtshungs ldan gyi cha nas sdug bsngal rnams ma lus kun gyi 'byung gnas yin zhing*/_phung po de dag sdug bsngal kun gyi rten dang*/_sa bon dang*/_rnam smin gyi cha 'dzin pas snod dang*/_phung po phyi ma kun gyi rgyu dang snga ma'i 'bras bu dang da lta'i bdag por mkhyen 'tshal te shes par byas nas yid dbyung ste/_'khor ba'i sdug bsngal kun gyi 'byung gnas las dang nyon mongs pa spang 'tshal lo/__/de ltar kun 'byung gi rtsa ba bdag dang bdag gir 'dzin pa'i ma rig pa spangs nas skyes bu 'bring ste gzhan don mi gnyer ba'i nyan rang gi lam bden pa bzhi yi shing rta la zhon pa rnams/_rnam grol gyi lam de la bslab pas mthong sgom gyi spang bya ma lus pa zad pa'i 'gog pa mngon du gyur nas/_zad pa mi skye shes pa ye shes brnyes nas lhag bcas dang lhag med gang rung gi mya ngan las 'das shing*/_zag pa med pa'i khams thar pa mchog gi go 'phang nyid du 'gro ste/_pad+ma dkar po las/_nyan thos de dag ji sring du/_/sangs rgyas rnams kyis ma bskul ba/_/de srid ye shes lus gcig gis/_/ting 'dzin myos pas brgyal te gnas/_/bskul nas sna tshogs gzugs kyis ni/_/sems can don la chags 'byung zhing*/_/bsod nams ye shes tshogs bsags te/_/sangs rgyas byang chub thob par 'gyur/_/zhes pa dang mthun par lang kar gshegs pa las kyang gsungs so/__/rten cing 'brel bar 'byung ba bcu gnyis ni/_spyir lnga ste/_dang po dgos pa ni/_'khor 'das kyi chos thams cad rten 'byung sgyu ma'i snang ba tsam du shes na/_lta ba ngan pa la mi 'jug cing mthar thug myang 'das thob pa'i dgos pa yod do/__/de yang mdo las/_'di yod pas 'di 'byung 'di skyes pas 'di skye ste/_'di lta ste/_ma rig pa'i rkyen gyis 'du byed sogs gsungs te/_'di 'byung zhes gsungs pas chos thams cad yod pa kho na las skye bar bstan pa ni/_rgyu med pa las skye bar 'dod pa rgyang 'phen pa lta bu 'gog pa'o/__/'di skyes pas 'di skye zhes gsungs pas/_rgyu de yang rkyen las skye bar bstan pas rgyu rtag pa las skye bar 'dod pa dag 'gog pa'o/__/'di lta ste ma rig pa'i rkyen gyis 'du byed sogs gsungs pas/_blo yi g.yo ba sngon du btang ba'i dbang phyug sogs rgyu las byung bar 'dod pa dag 'gog pa'o/__/gnyis pa so so'i ngo bo ni/_ma rig pa ni bden bzhi dang las 'bras kyi rang bzhin la rmongs nas bdag tu 'dzin pa'o/__/'du byed ni/_de ltar bdag tu bzung bas bdag la chags pa'i dbang gis las dge ba bsod nams cha mthun dang*/_mi dge ba dang*/_khams gong mar skye ba'i rgyu mi g.yo ba'i las dang gsum gsog pa'o/__/rnam shes ni/_las des rnam par shes pa phyi ma'i gnas su 'phen pa ste 'di la las gsog dus kyi rnam shes rgyu dus kyi rnam shes dang*/_'bras bu myong dus kyi rnam shes 'bras dus kyi rnam shes te gnyis yod do/__/ming gzugs ni/_rnam shes ma yi mngal sogs la zhugs pa nas phung po rim gyis 'grub pa'i gnas skabs te tshor ba 'du shes 'du byed rnam shes te ming bzhi dang gzugs so/__zhag bdun phrag bdun bdun sogs rim par bdun dang por mer mer/_de bzhin du nur nur po dang*/_ltar ltar dang*/_mkhrang gyur/_gor gor/_nya/_rus sbal gyi dbyibs sogs dang*/_de nas rim par dbang po'i rten yan lag dang nying lag sogs rim par zhag bdun phrag nyi shu rtsa drug gi bar gnas 'gyur te gnas pa dang*/_de nas bdun so bdun sogs nas tshor ba'i sdug bsngal dang bcas zla ba brgyad dang zhag nyer drug bar rim par ming gzugs dbyibs rim par 'grub bo/__mchan/_skye mched ni/_mig dang*/_rna ba/_sna/_lce/_lus/_yid de nang gi skye mched drug go__/reg pa ni/_phyi'i yul dang*/_nang gi rnam shes/_bar gyi dbang po gsum 'dus nas yul gcod pa'o/__/tshor ba ni/_de ltar yul dang du blangs pas tshor ba bde sdug bar ma gsum skyes pa'o/__/sred pa ni/_de'i tshe tshor ba bde ba dang len gyi sred pa dang*/_sdug bsngal spong 'dod kyi sred pa skyes pa'o/__/len pa ni/_sred pa skyes pas 'dod pa'i yul dang du len pa'i phyir rgyug pa'o/__/srid pa ni/_sred len gyis gsos btab pas tshe phyi ma 'grub nges kyi las 'grub pa'o/__/skye ba ni/_las de'i rgyus yang phyi ma'i gnas rigs su skyes pa'o/__/rga shi ni skyes pa'i gnas skabs nas brtsams te 'chi ba'i bar rga ba dang*/_de nas 'chi ba ni shi ba'o/__/'di gnyis yan lag gcig tu bzhag pa ni ma rgas par 'chi ba'ang yod pas thams cad la rim gyis 'byung bar ma nges pa'o/__/gzhan yang mi 'dod pa byung bas yid gdung ba'i mya ngan dang*/_mya ngan de skyes pa'i smre sngags dang*/_lus la sdug bsngal byung ba'i sdug bsngal ba dang*/_sems la sdug bsngal byung ba'i yid mi bde ba dang*/_phan tshun mi mthun pa'i rtsod pas 'khrugs pa la sogs pa'ang thams cad la 'byung bar ma nges pa'i phyir yan lag tu ma bzhag la/_'khor bar skyes nas bzung sdug bsngal yin pa la skyo ba bskyed pa'i phyir rga shi'i 'khor du gsungs pa'o/__/gsum pa rnam bzhag la bzhi las/_dang po ni/_sngon gyi mtha' mi shes pa dang*/_phyi ma'i mtha' mi shes pa dang*/_da ltar byung ba mi shes pa ste rmongs pa gsum bzlog pa'i don du rten 'brel yan lag bcu gnyis su bzhag ste/_ma rig pa 'du byed gnyis skye ba sngon ma'i skabs dang*/_skye ba rga shi phyi ma'i skabs dang*/_bar gyi brgyad da lta'i skabs te de gsum la rmongs shing rten 'brel gyi rang bzhin tshul bzhin ma shes pa bzlog go__/gnyis pa lam gsum du rnam par bzhag pa ni/_dang po brgyad pa dgu nyon mongs/_/gnyis pa bcu pa las yin te/_/lhag ma rnams ni sdug bsngal lo/_/zhes gsungs pa ltar nyon mongs pa'i lam gsum/_las kyi lam gnyis/_sdug bsngal gyi lam bdun no/__/gsum pa skye ba 'grub pa'i rgyu 'bras kyi dbang du bzhag na/_las gnyis nyon mongs pa gsum dang lnga/_rgyu dus kyi rnam shes dang drug ni rgyu yin la/_ming gzugs sogs sdug bsngal drug_/'bras dus kyi rnam shes dang bdun ni 'bras bu'o/__/yang rnam shes rgyur bgrangs nas rgyu drug dang 'bras bu drug kyang zer ro/__/'di dag snga ma snga ma las phyi ma phyi ma skye bas thams cad la rgyu 'bras gnyis ka'i cha re re yod kyang 'dir skye ba 'grub pa'i rgyu 'bras kyi dbang du byas pa'o/__/bzhi pa 'phen byed kyi sgo nas bzhag na/_ma rig pa bdag 'dzin mtshungs ldan dang bcas pas kun nas bslangs te 'du byed las bsags pas/_skye ba phyi mar 'phen pas na 'phen byed yin la/_rnam shes rgyu dus kyi rnam shes 'phen byed dang*/_'bras dus kyi rnam shes 'phangs pa yin no/__/'bras dus kyi rnam shes de dang bcas pa tshor ba yan lag lnga las des 'phangs pa'i 'bras bu yin pas 'phangs pa'o/__/sred len srid pa gsum ni skye ba phyi ma 'grub byed dang*/_skye ba rga shi gnyis ni grub pa ste 'phen byed gnyis/_'phangs pa lnga/_'grub byed gsum/_grub pa gnyis so/__/bzhi pa tshe du la rdzogs pa ni/_ring ba'i dbang du byas na tshe gsum la rdzogs te/_'phen byed gnyis tshe gcig_/'grub byed gsum tshe gcig_/'phangs pa lnga dang grub pa gnyis tshe gcig go_/de ltar na skye ba re re'i skabs su'ang ma rig pa'i sgo nas las gsog pa ni/_phyi ma'i 'phen byed yin pas rten 'brel gzhan gyi mgo yin la/_snga ma'i 'phen byed kyis da lta'i ming gzugs sogs lnga po 'di 'phangs pa ni rten 'brel gzhan gyi rked pa yin/_yang tshe rabs snga ma'i snga ma de'i las kyis snga ma de 'phangs nas/_skabs de'i 'grub byed kyis da lta'i skye shi 'di gnyis grub pa ni/_rten 'brel gzhan gyi mjug yin pas de ltar thog ma med pa nas 'khor ro/_/yang nye ba'i dbang du byas na tshe gnyis la rdzogs par 'dod de/_'phen byed gnyis kyis las bsags pa de nyid sred len gyis gsos btab pas skye ba phyi ma 'grub nges su byas pa ni srid pa yin pas rgyu dus kyi rnam shes dang bcas pa drug tshe gcig la rdzogs la/_rgyu des phyi ma'i gnas su skyes nas ming gzugs sogs bzhi rim par 'grub nas shi bas 'bras bu drug tshe gcig la rdzogs pa'o/__/de yang 'phen byed kyi las yod kyang 'chi kha tshun sred len gyis gsos ma btab na/_skye ba phyi ma mi 'grub pas 'phen byed dang grub byed tshe gcig la rdzogs dgos la/_'phangs pa de yang skye dgos pa dang de la 'chi ba yod pas 'phangs pa dang grub pa yang lhan cig go__/'phen byed dang 'grub byed gnyis kyi bar du ni tshe du mas chod pa srid la/_'grub byed dang 'grub pa gnyis kyi bar du tshe rabs gzhan gyis chod pa mi srid do/__/de ltar na tshe gsum gyis ma rdzogs so zhe na/_'phen grub kyi bar du tshe rabs du mas chod kyang de dag rten 'brel gzhan gyi tshe yin pas skyon med do/__/des na tshe gsum dang gnyis kyis rdzogs pa gnyis ka yod la/_de las lhag pa ni mi srid do/__/de dag ni 'phen byed kyi las gcig gis skye ba gcig 'grub pa'i dbang du byas pa yin no/__/'di dag la legs par dpyad nas 'khor ba 'grub byed kyi rtsa ba sred len yin pa dang*/_sred len gyi rtsa ba chod na las yod kyang skye ba mi len pa dgra bcom pa lta bu dang*/_dus thams cad du sdug bsngal ci skyes sred len kun 'byung gis mtshams sbyar nas nyams su myong ba sogs la go ba'i gting rnyed par bya'o/__/lnga pa bsgom tshul ni/_lugs 'byung lugs ldog gi sgo nas sgom pa ste/_lugs 'byung ldog 'di la 'jug tshul gnyis te/_'khor bar skye ba'i rim pa la lugs 'byung*/_'khor ba 'gags pa'i rim pa la lugs ldog tu bzhag pa zhig dang*/_ma rig pa nas rim pas bgrang na skye rim dang*/_'gag rim gang yin yang lugs 'byung*/_rga shi nas rim min du yar bgrangs na skye rim dang 'gag rim gang yin yang lugs ldog tu bzhed pa ste lugs gnyis so/__/dang po ltar na/_ma rig pa'i rkyen gyi sa 'du byed/_'du byed rkyen gyis rnam shes la sogs pa'am/_rga shi ci las byung na skye ba las byung sogs gang ltar yin yang lugs 'byung du bzhed/_ma rig pa 'gags pas 'du byed 'gag_/'du byed 'gags pas rnam shes 'gag pa sogs sam/_rga shi gang gis 'gag na skye ba 'gags pas 'gag pa sogs gnyis ka lugs ldog tu bzhed do/__/phyi ma ltar na/_ma rig pa'i rkyen gyis 'du byed sogs sam ma rig pa 'gags pas 'du byed 'gag pa sogs gang yin kyang lugs 'byung dang*/_rga shi gang las byung na skye ba las byung sogs sam/_skye ba 'gags pas rga shi 'gag_/srid pa 'gags pas skye ba 'gag pa sogs gang yin kyang lugs ldog tu bzhed/_lugs 'byung ldog phyi ma 'di ltar la bden bzhi shes pa'i go rim dang sbyar ba mngon pa kun btus las byung ba ltar na/_skye rim lugs 'byung dang sbyar na kun 'byung gi bden pa gtan la phebs/_skye rim lugs ldog dang sbyar na sdug bden gtan la phebs/_de bzhin du 'gag rim lugs 'byung ldog gnyis kyis lam dang 'gog pa gnyis gtan la phebs te/_de'ang kun 'byung nyon mongs pa thams cad kyi rtsa ba ma rig pa yin la/_de las 'du byed kyi las bsags pa'i phyir/_dang po kun 'byung las nyon gnyis las brtsams te ma rig pa'i rkyen gyis 'du byed sogs shes rab kyis gtan la 'bebs pa ni/_kun nas nyon mongs phyogs kyi rgyu kun 'byung gtan la 'bebs pa yin la/_yang 'khor ba'i sdug bsngal thams cad kyi gtso bo rga shi gnyis yin la/_des na rga shi ci las byung na skye ba las byung ba sogs lugs ldog dang sbyar nas kun nyon phyogs kyi 'bras bu sdug bden gtan la 'bebs/_yang kun 'byung ma rig pa'i rtsa ba lam bden gyi ngo bo bdag med rtogs pa'i shes rab kyis bcad nas/_ma rig pa 'gags pas rga shi 'gag pa sogs 'gag rim lugs 'byung gtan la phab pas/_rnam byang phyogs kyi rgyu lam bden gtan la phebs/_yang spang bya 'khor ba'i sdug bsngal gyi gtso bo skye shi gnyis 'gag pa ni 'gog bden yin la/_des na skye ba 'gags pas rga shi 'gag sogs/_ma rig pa 'gag gi bar du bsam pas rnam byang gi 'bras bu 'gog bden gtan la phebs pa yin no/__/'di dag la zhib tu brtag nas 'khor ba'i sdug bsngal gyi phung po chen po 'di rtsa ba bdag 'dzin ma rig pa las byung ba dang*/_lam thams cad kyi rtsa ba bdag med rtogs pa'i shes rab yin pa sogs don thos byung las 'das nas bsam byung gi nges pa rnyed pa la 'bad dgos te/_rten cing 'brel bar 'byung ba 'di ni rgyal ba bden par smra ba'i gzhung gi mdzod zab mo'i ma ki nyan thos kyi theg pa nas bzung*/_ya ki rang bzhin rdzogs pa chen po'i bar thams cad gdul bya la ston tshul tha dad tsam las don rten 'brel yin pa la tha dad med pas/_mchan/_gces pa yin no/__/rten cing 'brel bar 'byung ba'i chos 'khor 'das kun gyi rtsa ba ma rig pa dang*/_de las ldog pa gnyis po 'di kho na yin te/_de las 'khor bar 'phen byed kyi las dge ba/_mi dge ba/_mi g.yo ba ste gsum po 'du byed/_des 'phangs pa'i rnam shes/_de'i rkyen gyis ming dang gzugs/_de 'phel ba las skye zhing mched pa'i sgo rnam pa drug rdzogs shing*/_de las yul dbang yid byed gsum 'dus shing mngon du gyur pa'i reg pa ste mig gis lus reg pa sogs kyi rten no/__/reg pa las bde sdug btang snyoms gsum gyi tshor ba gang rung skye bar 'gyur ba ste/_de las bde bar ldan 'dod sdug bsngal 'bral 'dod kyi sred pa 'byung ba dang*/_sred pa las khyad par du len pa mngon par 'dod pa dang*/_de las 'bras bu skyed pa la mngon du phyogs pa'i srid pa phung po lnga'o/__/srid las yang srid phyi mar skye ba ste/_skye ba yod na 'dod pas longs spyod kyis phongs pa dang*/_sems mya ngan gyis gdung ba dang*/_'byung ba 'khrugs pa'i na ba dang*/_'du byed rnying pas rga ba dang*/_srog dang bral bas 'chi ba sogs yid mi bde ba'i sdug bsngal gyi phung po shin tu che ba 'di grub pa'i phyir/_des na srid pa'i gnas 'dir skye ba rang mtshan pa len pa'i rgyun 'gags pas/_sdug bsngal gyi phung po thams cad 'gags par 'gyur ba'i phyir/_rten cing 'brel bar 'byung ba'i rgyu 'bras mu stegs byed la sogs pas shin tu rtogs dka' ba'i zab mo 'di ni/_rgyal ba bden par smra ba'i gsung rab mtha' dag gi mdzod yin pas gces par zungs shig_/de ltar rten 'brel shes nas bdag med tsam nyan rang dang mtshungs mod kyi/_nyan rang rnams srid par 'du byed pa'i rgyu 'jig tshogs la bdag tu lta ba'i dbang gis mtho dman dang bde sdug snang ba las su shes pa dang*/_dkar po rnam byang rgyu 'bras lam 'gog gnyis dang*/_nag po kun nyon phyogs kyi rgyu 'bras kun 'byung dang sdug bsngal te/_chos la blang dor dang 'dus byas 'dus ma byas sems dang sems byung sogs kun las 'das pa/_srid pa dang zhi ba gnyis kyi mtha' las 'das pa don dam pa'i bden pa mthar thug dngos gzhi yin la/_de ni skye ba med pas gdod nas spros pa dang bral ba chos nyid blo 'das so so rang rig gi ye shes rtogs pa las 'byung ba yin no/__/yon tan rin po che'i mdzod dga' ba'i char zhes bya ba las/_/'khor ba sdug bsngal gyi tshoms te le'u bzhi pa'o//__//theg chen skyes bu chen po mchog gi lam rnam mkhyen gyi 'jug ngogs kyi thog mar lam sgrub po'i gang zag de gnas pa'i yul ni/_chos dang mthun par gyur cing mthun rkyen tshang ba'i dben pa dag la bsten pa dang*/_sde snod gsum gyi don la mkhas shing bslab gsum gyi nyams len ldan pa'i skyes bu dam pa bsten pa las rang rgyud dman pa dang log pa'i lam las bzlog nas lung rtogs kyi yon tan ci rigs pa'ang 'thob cing*/_de yang des ji skad bstan pa bzhin bdag nyid kyis legs par smon pa'i don gnyer bcas bsgrub pa dang*/_tshe rabs sngon dang da ltar yang bsod nams kyi tshogs bsags pa'i skyabs dam pa la 'dun pa ste bzhi po de la 'khor lo chen po bzhi zhes mgon po klu yi dbang pos bzhed de/_dper na phyugs dang glang po sogs kyi nyin mang po'i bshul lam shing rta'i 'khor los yud tsam la bgrod pa ltar/_byang chub sems dpas 'di bzhi la brten nas rnam mkhyen myur du bgrod de/_bshes springs las/_mthun par gyur pa'i yul na gnas pa dang*/_/skyes bu dam pa la ni bsten pa dang*/_/bdag nyid legs smon sngon yang bsod nams bgyis/_/'khor lo chen po bzhi ni khyod la mnga'/_/zhes gsungs so/__/grong sogs khyim pa'i gnas dang spong klog gi bya ba med pa'i dgon gnas kyang rung skye bo mang po'i 'du tshogs kyi dbus na gnas pa'i nyes dmigs ni/_'phral du bde yang sdug bsngal gyi rgyur gyur pa'i dug can gyi zas lta bu'i yul dgra gnyen 'thab rtsod/_so nam/_tshong dang*/_'du 'dzi/_rnyed bkur/_'du tshogs/_rnam g.yeng*/_gsog bsrung spel ba sogs nye bar spyad pa dang*/_rkyen gyi rnam 'gyur shin tu rgod de dad rdzas gshin dkor sogs ngan pa'i yul de las thag bsrings nas/_rang nyid gcig pur dben par zhi ba myang 'das kyi lam la mos par bya zhing*/_de'i tshe na'ang longs spyod kyi rnyed bkur sogs la ma chags pa rlung lta bu dang*/_gnas dang 'tsho ba la bdag tu 'dzin pa med pa mkha' la lding ba'i bya bzhin dang*/_sa phyogs stong par gnas pa'i ri dwags bzhin du dben pa dam par gnas pa'i skal pa bzang po de ni/_ma brtag par bab col du rnam g.yeng dang chos min spyod pas 'khrug par mi 'gyur bas de la snying nas spro ba'i blos brten dgos so/__/grong dang dgon gnas sogs gzhi gcig la brten nas rtag tu der bsdad na mdza' ba sogs gzhan ngo bsrung ba dang*/_dpal dang snyan grags sogs kyis phan tshun phrag dog la re zhing bsran thub kyang*/_nam zhig gi tshe na bzod pa'i snying stobs kyi go cha de bri bar 'gyur ro/__/yid ni gsod pa sogs spyod ngan la phyogs pas shin tu rengs te gyong zhing rtsub pa'i bdag nyid can yin pa ni/_dper na byi la yang 'gro 'dug mi mngon pa ltar zhi zhing spyod lam des pa sen mo'ang med pa ltar byed cing*/_skad dal bur smra zhing byi'u byi ba sogs kyi steng du rtsal gyis mchongs pa ltar/_sdig pa'i grogs kyis kyang gus gus ltar byas shing longs spyod ster ba sogs kyis 'phral bde gtan phung ni brtse chung las dang po pas bag phebs bsten pa'i yul snang longs spyod phun sum tshogs kyang*/_rang rgyud dam pa'i chos las 'phral du nyams par 'gyur ro/__/dper na bskyod pa yang ba'i nyi zla gling bzhi'i skye bo kun dang mdza' ba ltar/_chos spyod kyang skye bo kun dang 'dris shing bde ba dang*/_sdod gnas gcig tu gnyug mar gnas pa de ni longs spyod sogs kyi don du khro bas gdung bar 'gyur la/_gang du song yang ngo shes shing 'dris pa'i mod la gsar pa gsar par phyogs te bskyod par gyur pa'i yul khro rtsod kyis dben pas 'jam zhing*/_phyogs de'i skye bo kun kyang mi mthun pa med pa'i bshes par 'gyur ba mthong ngo*/__/dam pa dag ni sems ldan te rnam rtog rang rgyud pa'i dbang du song ba'i so skye lta bur chags sdang dang 'du 'dzi'i gtam sogs ca co sgrogs pa sogs su 'gyur ba ltar snang na yang*/_rkyen bzang ngan ro snyoms pas brjod pa bzang ngan ci 'dra byed kyang*/_rjes su gang zag de yi sems zhen cing chags pa khro zhing sdang ba'i rnam pa can du 'gro ba ma yin te/_dper na brag cha lta bur blang dor dang bral ba yi kun spyod can sems can don la brtson pas de 'dra ba la yul gyi dam bca' 'di zhes nges pa dang bral ba'i thar pa don du gnyer ba'i las dang po pas skyes bu tshangs pa mtshungs par gyur pa'i tshul khrims yang dag par blangs nas spyod par 'dod pa dang*/_yang dag pa'i bsam gtan don la rtse gcig tu sems 'jog par 'dod pa yi/_gang zag bslab gsum gyi brtul zhugs rang rkya thub pa'i brtan par ma son pa gang dang gang yin kyang rung ste/_yul dben pa dang dge ba'i grogs la brten nas bslab gsum gyi yon tan mtho ba dang*/_'du 'dzi dang sdig grogs la brten na je dman du byed pas spang blang rem dgos so/__/ston pas rigs gzugs longs spyod sogs bskyungs pa'i slob mar bsod snyoms gnang bas/_sbyor dngos rjes gsum dang ldan na gzhan sbyin bdag la bsod nams bskyed la/_bdag nyid kyang bya ba nyung zhing ngo bsrung mi dgos pa dang*/_tshong dang so nam sogs kyis dben pas bslab gsum gyi dka' thub nyams par mi 'gyur la/_zas gos sogs kyis kyang mi phongs pas slong ba rnams kyi tshul 'di ni/_yid bzhin nor bu ltar chos dang mthun par gyur pa'i bsod snyoms kho na yin no/__/'tsho ba ma dag pa mang po gsungs pa las dmigs bsal shin tu ma dag pa ni/_'di ltar yod sbas med mdog sogs ston pa'i sgo nas thabs kyis brku ba ste gzhog slong dang*/_rang la byin pa la bsngags pa brjod nas 'tshol ba'am/_phar cung zad re btang nas tshur mang du sdud pa rnyed pas rnyed pa 'tshol ba dang*/_rang gis dge ba sgrub pa sogs byas skad kyi g.yo zob dang*/_gzhan la bsngags brjod kyi sgo nas 'tshol ba'i kha gsag dang*/_bzang brdzu'i spyod pa hrul pos rnyed pa tshol ba tshul 'chos dang*/_bdag thob thang can la 'di ltar mi 'os zhes thob kyis 'jal ba'i 'tsho ba ste log 'tsho rnam pa lngas/_thar pa sgrub pa'i dge sbyong drang srong rnams kyi brtul zhugs thams cad sma ba dang bab te nyams par 'gyur te/_lang kar gshegs pa las/_khe yi phyir ni sems can gsod/_/sha yi phyir ni nor sbyin byed/_/de dag gnyis ka sdig las can/_/'o dod 'bod la sogs par btso/_/zhes dang*/_rnam gsum dag pa'i sha rnams ni/_/ma brtags pa dang ma bslangs dang*/_/ma bskul ba yang yongs med pas/_/de bas sha ni mi bza' 'o/__/zhes pas mi za ba'am za na'ang snying rjes gzungs sngags bsngo smon sogs kyis rjes su 'dzin par bya'o/__/de phyir gnas dben pa dang*/_mal bzang rtswa sogs stan dang*/_'tsho ba bsod snyoms bzang po la brten pa dang*/_dge ba la sbyor ba'i grogs bzang dang 'grogs nas dad gus sogs sbyor ba brtson 'grus bzang pos zhi lhag sogs dang*/_shes rab je gsal du 'gro ba'i lam sgrub par snying stobs gong nas gong du slong bar 'gyur ro/__/bslab pa kun gyi yon tan ma skyes pa skye la skyes pa yongs su rdzogs pa'i phyir/_mtshan nyid ldan cing bslab gsum gyi gnad ma nor bar shes pa'i skyes bu dam pa dag la bsten par bgyid na don che la/_ji ltar sman tshal chen po ma la ya yi nags klung du rnam par 'khyams pa'i sdong dum phal pa'ang*/_re zhig tsan dan de'i yal 'dab kyis brlan pa'i stobs kyis tsan dan gyi dri bsung snang ba ltar/_skyes bu dam pa gang la bsten pa na ring por mi thogs par bsten bya de yi yon tan gyi rjes su 'gro'o/__/sngon chad 'bras bu'i bstan pa sogs kyi dus su gdul bya rgyud dag pas 'phags pa'i gang zag dang*/_grub pa'i skyes bu mdo rgyud nas ji skad bshad pa'i dge ba'i bshes gnyen dam pa'i chos tshul te mtshan nyid mtha' dag rdzogs pa ni/_snyigs ma'i mthus byas te rnyed par dka' na'ang*/_so thar byang sems rig 'dzin sngags kyi sdom pa gsum po so so'i gzhung ltar gnang bkag gis mtshams shes shing dgag dgos tshang ba dang*/_spyod pas rang rgyud gtsang ma'i sa gzhi bzang po lta bu la/_gsung rab dgongs 'grel dang bcas pa'i tshig dang don la mkhas shing thos pas rgyud grol ba dang*/_gdul bya rjes su 'dzin pa'i brtse ba'i snying rje chen pos thugs rgyud brlan zhing*/_sde snod gsum dang sngags rgyud sde bzhi sogs rgya mtsho lta bu'i cho ga dang lam sgrub tshul gyi bya ba thams cad la mkhas pa dang*/_tshig tsam ma yin par nyams len gnad du tshud pas spangs pa dang rtogs pa'i ye shes la dri ma med pa'i 'bras bus thugs rgyud yongs su gang bas phyug cing*/_zang zing la mi chags pa'i sbyin pa dang*/_yid mthun pa'i gtam dang*/_rnam grol gyi don la spyod du 'jug pa dang*/_de dang mthun par rang nyid kyang 'jug pa ste bsdu dngos bzhi yi me tog rnam par bkra bas/_thar lam sgrub pa'i skal bzang gdams ngag gi rtsi bcud la rol pa'i slob ma'i bung ba sdud nus pa'i thabs mkhas can de la bsten dgos te/_rnga bo che'i mdo las/_mya ngan ma byed kun dga' bo/__/smre sngags ma 'don kun dga' bo/__/nga ni phyi ma'i dus kyi tshe/_/dge ba'i bshes gnyen nyid sprul nas/_/khyod la sogs pa'i don byed 'gyur/_/zhes bla ma sangs rgyas kyi sprul pa dngos yin par shes par bya'o/__/khyad par nges don gsang sngags rdo rje theg pa'i lam gyi man ngag ston pa'i bla ma'i mtshan nyid ni/_rgyud sde phyi nang gi dkyil 'khor thams cad las dbang thob pa1 dang*/_dbang don rgyud la gnas pa'i sdom pa dang dam tshig la gnas pas sgo gsum shin tu zhi zhing dul 2ba dang*/_gzhi rgyud bde gshegs snying po'i gnas lugs/_lam rgyud spangs rtogs skyed byed bskyed rdzogs gnyis/_'bras bu'i rgyud sku dang ye shes lhun grub tu 'byung tshul spyi dang bye brag gi don khong du chud pa 3dang*/_bsnyen sgrub las sbyor dang bcas pa'i rtags yongs su rdzogs pa 4dang*/_'khor 'das ro mnyam gyi don rtogs pas lta ba la ma rmongs pa 5dang*/_nyams myong gis rang rgyud grol ba 6dang*/_snying rje tshad med pas gdul bya thar par 'dren pa 7dang*/_gzhan don 'ba' zhig gnyer ba 8ste brgyad po 'di ni bi ma la'i dgongs pa yin no/__/bya ba nyung zhing sgo gsum gyis nan tan chos phyogs kho na la sems pas 'khor bar skyo shas dang*/_nges 'byung gi blo cher ldan zhing*/_gzhan gdul bya yang sku drung du bsdad pa tsam nas de la bskul nas snang ba bsgyur 'khor ba las ldog nus pa'i thabs tshul du ma la mkhas shing*/_brgyud pa la sel med pa'i byin rlabs ldan pa gnyis po kun mkhyen bla ma'i bzhed pa'o/__/de lta bu la bsten na mchog thun dngos grub tshe 'di nyid la myur du 'grub par 'gyur ro/__/bram ze bzhin du khengs pa'i sgo nas sku skye rigs rus sogs kyi cho rigs bsrung ba'am/_rang nyid bsti ba'i gnas dgon sde bla brang sogs kyi sngar srol nyams par dogs nas/_chos sgrub pa'i zol gyis dkor longs spyod sgrub par 'dod pa'i kun slong ngan pa/_dper na mi gtsang ba'i rdzing bu ru khrus byas na slar yang dri mas gos pa dang 'dra ste/_kun slong des thos bsam chos bshad rten bzhengs sogs byas pa de ni chos min rgyud ma rungs par byed pa'i 'bras bu gnas min gyi khrus la zhugs pa ste yon tan che rlom gyi stong 'ur che yang rgyud mi thul te/_dper na yos mi 'dul shing phye mi 'bab pa shing gi rang 'thag lta bu'i lam ston la ngan pa dang*/_nyon mongs pas rgyud gang ba'i so so skye bo'i rang bzhin dang ma 'gal na yang*/_sngon gyi sbyin 'bras cung zad la brten nas da lta bla ma'i go sa thob pa dge ba'i bshes gnyen gyi mtshan nyid mi shes pa'i blun po mang pos sgro btags te/_dad pas bab col du bdag ni de lta bu'o zhes rlom pa'i gnas la sbyar nas/_longs spyod dang rnyed pa dang yo byad kyi zhe sa dang bkur sti'i mchod pas khengs par gyur pa khron pa'i lag 'gro ste gtam rgyud du sbal pa lta bu'i bshes gnyen dang*/_lung gi yon tan gyi thos pa nyung zhing sdom dang dam tshig nod kyang gnang bkag mi shes pas tshul khrims 'chal/_bslab gsum mi shes shing nyes pa'i gzhan dbang du gyur pas rgyud tshod dma' la/_gdams ngag sogs 'bogs khul 'ol tshod kyis kun spyod ni sa blar gshegs pa ltar song zhing*/_gdul bya rjes su 'dzin pa'i byams dang snying rje'i dpyang thag ste 'ju thag chad pa yi smyon pa'i lam mkhan rnams brten pa las/_ngan 'gro'i g.yang sa sdig pa'i gcong rong du khrid pas sdig pa lhag par 'phel la/_khyad par slob ma rang las bla ma yon tan lhag pa dang bcas pa zhig dgos kyi/_de ltar min pa'i byang chub sems dang bral ba de 'jig rten na sku bsod kyi grags pa chen po thob pa'i mthus dam par bzung nas bsten na shin tu 'khrul te/_dper na long ba'i ded dpon gyis long bar lam ston mi nus ltar/_de 'dra'i shes rab kyi mig ldong ba la skyabs su 'cha' na gnas skabs dang mthar thug nor ba chen po ste/_slob mas chos bzhin mi byed pa la mi sems shing*/_rang gi zhabs tog dang bsnyen bkur la dga' nas slob ma skyong mdog re byed cing*/_slob mas kyang de la dgongs gzhi dang*/_dgos pa med bzhin chos brgyad kyi grogs byas nas zhabs tog yin rlom zol gyis bsten zhing 'grogs na blang dor gyi gnas mthong ba'i skabs bral bas ngan song mun pa'i smag tu 'khyams par 'gyur ro/__/rgyu mtshan de dag gi phyir na dang por sngar nas bla ma de dam pa yin min shin tu btang snyom gyi ma brtags par bsten na/_chos sgrub 'dod kyi dad pa can gyi rgyud la yod pa dang phyis 'byung gi dge tshogs lam gyi yon tan thams cad chud gsan cing*/_dal ba phun sum tshogs pa'i rten bzang ring mo nas ma lon par da lta skabs tsam shig la rnyed pa 'di don med du 'gyur ba ni/_dper na shing sdong gi rtsar bsil grib la re ba sbrul gdug dang shing gi grib ma gnyis nor nas de ru song ste ngal gsos na dug gis nyen te sdug bsngal ba bzhin bslu bar 'gyur te/_rig pa 'dzin pa'i sde snod las/_thos chung dris la lan mi theb/_/slob dpon ma brtags slob ma'i bdud/_/ces gsungs pa ltar ro/__/gsung rab dgongs 'grel dang bcas pa'i don la mang du thos shing shes rab kyi mig rgyas la/_bslab gsum gyi rtogs pa khyad par can gyis slob ma'i rgyud grol ba la mkhas pa ste/_lung dang rtogs pa mtha' dag gi yon tan rgyud la 'byor ba'i bla ma dam pa rnams ni/_phyogs bcu'i sangs rgyas kun gyi chos sku'i ye shes spros bral gyi ngang dmigs med thugs rje chen po'i khams rang byung lhun grub yod pas/_gdul bya mtha' yas pa'i yul la sprul pa'i rol gar bsam gyis mi khyab par snang ba/_da lta bdag cag gi ston pa'i bstan pa rin po che'i lhag zhabs su skyes pa'i mi yi 'gro ngor skyes bu dam pa'i gzugs kyis byon pa/_de nyid mchog dang thun mong gi lam gyi yon tan dngos grub kun gyi rtsa ba bla na med pa yin te/_spyi mdo las/_slob dpon dag la ma bsten par/_/sangs rgyas nam yang mi 'byung ste/_/'byung ba yang dag ngas ma mthong*/_/byung na dam pa'i lung dang 'gal/_/zhes so/__/de'i mdzad spyod thams cad gdul bya tha dad pa rnams thar lam du drang ba kho na'i don du 'jig rten pa'i spyod pa kun dang phyogs mthun par ston la/_nges pa'i don du ni dgra btul ba ltar snang yang sdang ba med pa/_de bzhin du gnyen bskyang yang chags pa med pa/_'du 'dzis brel yang rnam pa mi g.yeng ba/_longs spyod bsags kyang zhen pa med pa/_thob dang mnga' thang yod kyang mi khengs pa/_snang ba thams cad rmi lam dang sgyu ma ltar gzigs nas dgongs pa nam mkha' dang mnyam pa/_'jig rten pa kun dang rnam bzhag 'gal zhing khams mi mthun par snang ba la sogs pa'i gsung byon pa dang mdzad pa ston pa la'ang log par mi lta ste/_dgongs gzhi 'ga' zhig la dgongs nas 'gro ba 'dren pa sogs dgos pa khyad par can du ma yod pa'i phyir/_'jig rten pa kun las khyad par 'phags shing*/_gzhan yang gdul bya'i tshig don nyams len gegs sel sogs the tshom thams cad gcod mkhas shing*/_pha rol po'i gshe skur spyod ngan sogs log sgrub gang la'ang thugs mi skyo zhing sgo gsum la ngal ba ci byung yang bzod par mdzad pa de ni/_srid pa'i gnas sdug bsngal gyi rgya mtsho lta bu las/_man ngag nyams su blang bas thar par sgrol ba'i gru bo che lta bu'o/__/lam spyi dang nges don mdo rgyud mchog gi don 'khrul bar mi 'gyur bar ston pas ded dpon dngos lta bu/_thog med nas bsags pa'i las nyon gyi me tshogs dag gi nyes pa thams cad shes rab gsum gyis 'joms pas bdud rtsi'i char ltar bu/_blang dor gyi don la sgrib pa'i ma rig pa'i mun pa thams cad shes rab kyi ye shes chen pos sel bas nyi ma dang zla ba lta bur mtshungs shing*/_rkyen bzang ngan thams cad kyis mi bsgul ba theg pa shin tu che bas sa gzhi dang 'dra la/_mngon mtho dang nges legs kyi lam ston pas mthar thug gi phan pa byang chub kyi go 'phang dang*/_gnas skabs kyi bde ba mtho ris kyi dpal 'byor la longs spyod pa'i 'byung gnas su gyur pas dpag bsam gyi shing lta bu/_lung gi chos mdo sngags kyi tshig don thams cad kyi mdzod dang ldan pa bum pa bzang po lta bu ste/_rtogs pa'i yon tan kun gyi 'byung gnas yid bzhin nor bu las kyang lhag pa dang*/_sems can kun la nye ring dang bral bar thugs snyoms par bde ba thams cad mkhyen pa'i go 'phang la bkod 'dod kyi byams pas skyong bar mdzad pas pha ma lta bu yin/_sems can sdug bsngal rgyu 'bras dang bcas pa bral 'dod kyi bsam pa rgya che zhing myur ba'i snying rje chu klung dang mtshungs la/_phrag dog sogs kyis kyang 'pho 'gyur med pa'i 'jig rten kun la dga' ba ri dbang lta bu dang 'dra/_chags sdang gis 'khrug pa med pa'i btang snyoms sems can kun gyi nyon mongs zhi thabs la gzigs pa char sprin bzhin yin no/__/de 'dra ba'i bla ma ni mtshan dpe'i skur mi snang yang sangs rgyas kun dang mnyam pa yin la/_sku mthong ba dang*/_gsung thos pa dang*/_mdzad spyod dran pa tsam gyis kyang don dang ldan la/_de la gnod pa byas kyang 'gyod bshags dang bcas na tshe 'di dang min kyang mthar bde ba'i lam du 'brel te gdul bya'i yul du gyur na/_g.yo sgyu zol zog med pa'i dad pa dang mos gus byas pas tshul bzhin bla ma nyid bsten pa'i skyes bu rnams la/_mngon mtho tshe ring nad med sogs dang nges legs byams snying rje sogs yon tan thams cad rtsol med du char bzhin 'bab par 'gyur ro/__/bla ma bsten pa'i tshul yang 'di ltar/_sdong po bkod pa'i mdo las byung ba ltar/_bdag ni thog med nas nyon mongs pa'i nad kyis thebs pas nad pa'i 'du shes dang*/_chos gdams ngag la sman gyi 'du shes/_dge ba'i bshes gnyen la sman pa mkhas pa'i 'du shes/_nan tan nyams su len pa la nad 'tsho ba'i 'du shes bskyed pa ste bzhi po ni nad pas sman pa lta bu/_mgron pos dgra las skyel ma lta bu sogs bzhi dang*/_'jigs pa'i gnas las ram zla dpa' bo lta bu sogs bzhi dang*/_tshong pas ded dpon lta bu sogs 'du shes bzhi dang*/_gru pas mnyan pa lta bu'i 'du shes bzhi bcas 'du shes nyi shu po tshig tsam ma yin par rgyud la ji lta ba bzhin du sbyar ba/_skye shi dang nyon mongs pa'i dgra yis 'jigs pa las skyob pas/_dge ba'i bshes gnyen tshul bzhin bsten par bya'o/__/slob ma'i mtshan nyid kyang 'di ltar/_bla ma dam pa de yi thugs rje byin rlabs de la byams sdang med kyang*/_gdams ngag nye bar len pa slob ma ste de nyid kyang dad pa shes rab brtson 'grus nges 'byung la sogs pa snod kyi yon tan dang bral ba la/_bcud seng ge dkar mo'i 'o ma snod ngan gyis mi thub pa ltar gdams ngag gi bcud kyis phan mi thogs zhes spyir bstan nas/_bye brag tu zab don la yid mi ches pas ni/_gnas skabs zang zing tsam gyis tshim pa thob par gyur nas/_don la med pa'i rkyen bcos ma'i dad pa ni snga dro dad pa yod kyang phyi dro bral ba dus bzhi'i 'gyur ldog ngom pa bzhin 'gyur sla bas de spang bar bya'o/__/gang zag 'ga' zhig dang po dam pa'i chos kyi lam du thabs sna tshogs pas btsud kyang mi tshud pa g.yag rgod ra ba'i nang mi tshud pa bzhin dang*/_bar du thos bsam gyis sun nas chos phyogs la brtson pa dag la sdang zhing tshe 'di kho nar gnyer la/_tha mar dam tshig dang sdom pa mi sems shing sdig pa'i grogs po rnams kyi phyogs bzung nas/_las mtha' log pa de nyid bla ma mched grogs sogs kyi phyogs la'ang mi nye zhing mi dang mi 'dre ba'i nags mtha'i mi rgod dang 'dra'o/__/bla ma dam pa'i drung na gnas tshe sna tshogs shar te 'di bas kyang dben par dge ba'i phyogs su song na dga' snyam pas 'bros la rings/_yul gang dang gang du bgrod par phyogs na'ang sdig grogs kyi gang bas rang nyid chos las nyams te sdig pas 'dzin la/_'o na khyod dben par song la sgrub tshugs zung zhes ched du bskul te der bsdad na/_bla mas bstan pa'i gdams ngag bor nas chos tshugs zhig la/_snyoms las rnam g.yeng gis dus 'da' ba thun gcig tsam yang bral nas/_dper na rlung gi rjes su bskyod 'gro ba'i ku sha'i rtse mo bzhin no/__/mi gzhi ngan pa'i zol zog gi sbyor ba la mkhas shing thob thang grags pa sogs kyis mi phan te bla ma bslu ba'i bsam pas tha gu'i lces te gla ba 'dzin pa'i rgya bres/_bla ma spos kyi glang po ste gla ba ltar dbang lung khrid sogs kyis snyan grags zong ltar brkams te/_drin mi dran par bsnyen nas dam pa'i chos de la gla rtsi'i rnyed pa lta bu'i 'du shes kyis thob nas dam sdom rgyab tu bor te/_slar rngon sod nas gla rtsi tshong thabs la sems pa ltar chos des snyan grags la yang dag spro bas mi sgrub par bla ma'i dam tshig rgyang du 'phen pa'i slob ma 'di phyir bkra mi shis so/__/blo sna rang sems nyams 'og ma chud pa mtha' dag ni bskyed rdzogs kyi gdams pa'i gnad 'gag dmar khrid sogs thams cad thob nas don nyams su len pa slar btang nas/_da dung yod tshad thos dgos snyam ste nyams su mi len par sna tshogs pa'i yig sna 'tshol bas dpe gcod zin bris mchan 'debs sogs kyis brel zhing dub pa'i mthar/_gsar pa nges gzung byed rgyu ma mthong gong sngon ma tshig don cung zad shes pa mtha' dag nyams par 'gyur ro/__/nges 'byung dang bcas shing don gnyer che la dad pa'i kun slong gis yang dag don la thos bsam sgom gsum gsha' mas sbyor ba'i dad pa dang*/_nges 'byung dang bral ba'i ltar snang tshe 'dir phan pa'i rnyed bkur 'ba' zhig bsgrub pa'i 'dod pa can du song bas/_de gnyis kar phyogs gang du'ang lung du ma bstan/_blun po lad mo byed pa ngan g.yo'i gzu lum can te bab bcol du dad 'dod gang yang med par chos sgor zhugs nas spre'u'i mnyam bzhag dang*/_ne tso'i 'don pa bzhin chos lugs bzhin byed kyang phyi nas chos dang 'jig rten gang yang med pas khyi ldom byes su 'khyams pa lta bu ste/_spyir gang zag rigs du ma yod kyang gsum po 'di nyid du gnas pa'i mtshan nyid legs par brtag pa byed pa gces so/__/dad pa'i go cha che la bden mthong skal pa can klu'i byang chub lta bu blo gros shin tu brtan cing*/_bla ma dang chos kyi phyir du rang gi lus dang srog la gnod pa ci byung yang mi blta ba dpal gyi ye shes lta bu rim gro bgyid cing*/_bla mas ci gsung bkar dkri zhing bdag nyid mi bsrung ba'i rje btsun mi la lta bu ste/_de dang 'dra ba'i skyes bu de ni mos gus kho nas grol lo/__/dkar chos kyi sa bon dad dang mi rtog pa'i shes rab gsal la/_chos dang chos min shes pa'i thos pa dang*/_theg pa chen po'i snying rje che zhing*/_sdom dang dam tshig la gus pa/_sgo gsum zhi zhing dul ba/_mched grogs dang nye 'khor la bshes pa'i khong yangs pa dang*/_zhing dag pa la gtong phod che ba/_dag snang dang khrel yod pa dang ldan par bya'o/__/bla ma'i thugs zin pa'i thabs kyis bla ma de'i thugs shin tu bsrung bas bu mdzangs pa lta bu dang*/_dgos dbang gis bka' bkyon drag po lan mang mdzad kyang de dag la mi khro ba rta mchog bzhin dang*/_bla ma'i dgos pa bsgrub phyir gru ltar nye ring gang du'ang 'gro 'ong ji ltar byed pa'i gnas la skyo ba spang ba dang*/_zam pa lta bur bstod smad skyid sdug sogs rkyen bzang ngan thams cad theg pa dang*/_bzo stegs te mgar ba'i 'og rdo'am ti tsha bzhin du dbyar dgun gyi tsha grang gang yang bzod pa dang*/_bka' ji ltar bstsal ba bzhin zur ma nyams par nyan pa bran khol lta bu dang*/_bla ma dang mched la bkur zhing nga rgyal spangs pa bzang ngan thams cad phyags pas phyag dar lta bu dang*/_rang skyon la bsam ste dregs pa spangs pa khyu mchog rwa chad pa lta bus khyu mang po dag gi gral mthar dman sa bzung nas bla ma bsten zhes byang chub sems dpa'i sde snod dag las gsungs/_rang la zang zing gi 'byor pa yod na dkon mchog kun 'dus kyi ngo bo bla ma dam pa nyid yin pa'i phyir dkon mchog bzhi pa bla ma la mchod pa shin tu gces te/_sangs rgyas mnyam sbyor las/_sangs rgyas chos dang dge 'dun dang*/_/bla ma yang ni bzhi pa yin/_/zhes dang*/_gu ru rin po ches/_bla ma sangs rgyas bla ma chos/_/de bzhin bla ma dge 'dun te/_/kun gyi byed po bla na med/_/bla ma dpal chen he ru kaH_zhes so/__/bar du bla mar zhabs tog dang sri zhu bsgrub phyir lus kyis gnas khang gi las gang dgos dang*/_bzo drubs sogs nas stan 'ding ba dang thal mo sbyar ba'i bar gyi bya ba thams cad dang*/_ngag gis bla ma'i gsung don bka' bzhin khur ba sogs dang*/_gsung gi phrin las chos bshad pa sogs bla ma'i phyogs su bkol ba'i las mtha' dag nam yang chud zos su 'gyur ba med la/_tha ma zang zing*/_'bring zhabs tog_/rab sgrub pa ste mnyes pa gsum gyi nang nas sgrub pa ni mchog go_/dge ba'i bshes gnyen dam pa rnams ni rang don grub zin nas gzhan don byed pa'i skabs su bab pa yin pas/_mos snang mdzad spyod sna tshogs ston pa gang la yang rgyal ba'i mdzad pa bsam gyis mi khyab par shes nas log par mi blta ste/_'phags pa'i yul gyi dbang phyug sa ra ha sogs phal mo che rnams rigs 'chol shing gtsang btsog sogs gdol spyod mkhan du snang ba dang*/_g.yung po ste bran g.yog zho shas 'tsho ba dang*/_gzhan yang rngon pa nya pa sogs sdig spyod phal pa'i tshul ltar/_nyams pa las kyang shin tu nyams par ston pa yod kyang*/_de dag gi thugs la 'khrul pa mi mnga' na mdzad pa rnams kyang don la phyin ci log mi srid do/__/gal te de ltar yin kyang rang gi nyer len rnams thar sgo gsum du ma grol zhing*/_snang ba dag pa rab 'byams su ma grol bas dbang du ma gyur par d+ha du ra zos pa'i snang ba ltar 'khrul pa che bas bla ma la skyon du brtags pa'i nyes pa ni tshad gzhal du med de/_sde snod bcu gnyis po kun blo la chub pa yi/_dge slong skar bzang ngam legs pa'i skar ma log lta'i sdig pa'i mthus btab nas/_skyon kun zad yon tan kun ldan bdag cag gi ston pa shAkya thub pa'i mdzad pa la'ang g.yo sgyur mthong ba'i tshul la legs par bsam nas ma dad pa cung zad skyes pa la'ang rang gis rang nyid 'chos nas bshags dgos te/_'khor lo chub pa rol pa las/_gal te rmi lam nang dag tu/_/bla ma'i skyon dag mthong gyur na/_/sad ma thag tu bshags pa bya/_/gal te bshags pa ma byas na/_/'dir yang mnar med rgyu 'phel 'gyur/_/zhes so/__/gal te bla ma thugs sdang bzhes pas bka' bkyon/_drag shul sogs kyis gshe bar mngon par gyur na/_bdag rgyud la rtog pa ngan pa'am spyod ngan gang rung gi skyon gzigs nas spyo ba'i tshul gyis 'dul ba yi dus la bab par gyur to zhes rig cing shes par byas nas bshags sdom drag po la 'bad pa las bla ma'i skyon du blta bar mi bya'o/__/bla ma'i mdzad pa cang shes pa'i skyes bu de ni bdud kyi dbang du mi 'gro'o/__/spyod lam gyis kyang bla ma bzhengs pa'i tshe stan la de ma thag ldang ba las 'dug pa min/_bzhugs pa'i dus su bsnyun 'dri dang thugs la 'thad pa'i nyer spyod dbul/_gshegs pa'i tshe na phyag dar sogs dris chag chag gdab pa dang*/_dar lam sogs bya ba dang*/_bzhon pa 'bul ba dang*/_rang zhabs 'bring la 'gro tshe sngon nas min la/_rgyab bstan mi rung zhing*/_rjes nas min la zhabs rjes 'gom pa dang*/_g.yas nas gral 'go yin pas min la g.yon phyogs nas 'gro bar bya'o/__/bzhugs pa'i stan dang bzhon pa sogs la smad pa 'gom pa dang gsung la mi snyan sogs smra ba rnams dang*/_sku grib 'gom pa sogs bsod nams nyams pa'i rgyu yin la/_gzhan yang bzhugs pa'i sgo 'phar dbye gcod skabs drag tu brdeg pa dang*/_rgyan 'dogs pa sogs sgeg chos kyis drung du 'gro ba dang*/_ngo 'dzum gnag pa dang*/_rdzun dang bab col gyi bya ba dang*/_bzhad gad 'brel med kyi gtam sna tshogs smra ba spangs la/_lus gus pa dang sems 'jigs pa dang bcas pas ma yin par phal pa'i drung na gnas pa ltar ji mi snyam du lta ba spangs la/_dman pa dang bcas sgo gsum nye bar zhi zhing dul bas bsten par bya'o/__/bla ma la ngag gis smod cing gshe skur 'debs pa dang*/_sems sdang zhing mi dga' ba'i gang zag gis rang la nor ster ba dang*/_snyan smra sogs ci byas kyang de la bshes par mi bya ste/_blo dang mthun pa'i tshig gis bzlog pa'am sku dgra dngos yin ni nus pa dang drag shul gyis de bzlog cing*/_gal te de 'dra ma nus kyang bag phebs te gtam tsam yang mi smra la/_smra na bdud dang sdig pa'i gzhan dbang ni lhag par mthu che bas dam tshig skyon can byed de zlas nyams zhes bya'o/__/de lta bu dang 'grogs pa'i nyes pa ni/_bdud rtsi 'byung ba'i rgyud las/_rdo rje slob dpon smod pa na/_/zhi ba'am mngon spyod las kyis bzlog_/nus pa yod par ma gyur na/_/rna ba'am rna cha rtag tu dran pa dang ldan pas lag pas dgab par bya/_/bsten par mi bya gtam mi bya/_/gal te de dang 'dris 'gyur na/_/ngan song dag tu 'tshed par 'gyur/_/zhes so/_/bla ma'i thugs dang 'khor slob sogs la chags sdang mi slong zhing kun gyi khur du mi 'gro bas 'grogs par bde ba ska rags lta bu dang*/_che chung mtho dman kun gyi yid dang mthun par 'jug pa bde ba lan tshwa lta bu dang*/_skyo sun dang log sgrub gang la yang bzod sran che ba ka ba lta bu yis/_/bla ma'i 'khor dang sbyin bdag dang rdo rje'i spun rnams la bsnyen bkur bya'o/__/me tog dang rtswa ldum sogs kyis khebs pa'i rdzing bu mchog la bsten pa'i ngang pa rnams spyod lam 'jam pos rtswa ldum sogs kyi ro myang ba dang*/_bung bas me tog gi kha dog dri la mi gnod par bcud la ro myang ba bzhin du chos kyi mdzod ldan dge ba'i bshes gnyen rnams dang rtag tu 'grogs shing bsten pa'i tshe gong du bshad pa'i spang blang gi spyod pa la gnas pa ni ngo mtshar can zhes smon pa'o/__/sems la skyo zhing lus la ngal ba med pa'i sgo nas bla ma'i thugs la mi 'thad pa cung zad med par bzung nas/_de yang dad pa'i nye bar len pa kho na'i dbang gis thugs rgyud rtogs pa'i yon tan gyi ro myang bar bya'o/__/theg chen bshes gnyen de'i mdzad pa thams cad byang chub tu 'jug pa'i spyod pa pha rol tu phyin pa drug gi ngo bor ma gyur pa med pas thabs shes khyad par can gyi lam de la nges par zhugs pa yi skyes bu dam pa mchog gi bsod nams kyi tshogs mchod sbyin rten bzhengs 'chad nyan sogs thabs khyad par can gyis zin pa dang*/_ye shes kyi tshogs 'khor gsum dmigs pa med pa'i shes rab kyi rgyas thebs pa'i gnas lugs la 'jog pa sogs ci dang gang mdzad pa de dag gi khrod du longs spyod dang*/_lus ngag gis grogs byed pa dang mnyam du sgom pa sogs gang byed na'ang don mthun gyi spyod pa yin pas tshogs mnyam rdzogs su 'gyur ba dang*/_tha na mngag gzhug dang bang chen du phyin pa dang*/_gnas khang gi phyag dar byas pa tshun chod kyang ngal ba don med min la/_rnam grol gyi 'bras bu dang bcas pa tshogs rdzogs kyi lam mchog tu gyur pa yin no/__/de ltar yin pa rgyu mtshan ci'i phyir zhe na/_skyabs su 'gro zhing sems bskyed pa dang*/_tshogs kyi zhing zhi khro gang gsal ba thams cad bla ma'i thugs kyi rol par bltas te bsgrub pa'i rnal 'byor phyi ltar bsgrub pa dang*/_rgyud dag byed spyi bor sangs rgyas kun 'dus kyi bdag nyid du bsgom pa nang ltar bsgrub pa ste gnyis dang*/_byin rlabs gcig char du 'jug phyir snying khar bsgom pa gsang ba ltar sgrub pa dang*/_gnyug ma'i phung po sogs dang bla ma'i gsang gsum dbyer med pa'i rol pa yi dam gyi rnam rol du bzhengs pa'i bskyed rim bsgom pa yang gsang ba ltar bsgrub pa dang*/_de thams cad kyi rjes su thugs yid bsre zhing ye shes chos nyid 'od gsal ba bsam gyis mi khyab pa'i don la nam yang 'bral med du 'jog cing bla ma'i thugs spros bral gnas lugs kyi don bsgom pa de kho na nyid sgrub pa rdzogs rim te/_des na bsgrub bya'i ngo bo thams cad bla ma bsgrub pa 'dir 'dus pa yin pas na/_theg chen mdo sde thams cad nas ston pa'i 'du shes bskyed dgos par bstan cing*/_rgyud kun nas kyang sangs rgyas nyid du bstan te/_phyag rdor dbang bskur rgyud las/_gsang ba'i bdag po slob dpon la slob mas ji ltar blta bar bya zhe na/_sangs rgyas bcom ldan 'das la ji ltar blta ba de bzhin du'o/__/zhes dang*/_nam mkha' klong yangs kyi rgyud las/_bla ma bsgoms na chos sku bsgom/_/lha sku 'bum phrag stong bsgoms pas/_/bsod nams char yang de mi phod/_/de phyir dkar po'i chos spyod rnams/_/nyan bshad bsgom dang 'dzin pa dang*/_/mchod gtor la sogs gang byed kyang*/_/sngon du 'gro ba'i las yin pas/_/bla ma dus gsum sangs rgyas dpal/_/zhes so/__/de ltar mi shes pa'i rmongs pa phal cher bla ma'i sku'i gzugs brnyan 'dri zhing bsgom pa sogs byed na'ang*/_dngos su bzhugs pa la dad mos longs spyod sogs kyi rim gro bgyi ba med cing*/_gshegs pa'i tshe grags 'dod kyis phyi rten gser dngul sogs la byed pa lta spyod 'dzol ba'i bya ba dang gnas lugs zab mo bsgom pa yin zer zhing*/_bla ma'i thugs kyi gsang ba sgom yengs dang bral ba mi shes par glen sgom dngos zhen can la blo gtad 'cha' ba rnams kyis sgrub byed 'jig rten pa'i blo rtog dang*/_bsgrub bya blo las 'das pa'i ye shes su bsgrub pa ni rgyu 'bras 'gal ba nyon re mongs te dag snang dang 'dun pa mos gus rnams da lta med bzhin/_phyi ma bar dor mjal du re ba ni shin tu ngo mtshar ba'i gnas so/__/dang po bsten par 'dod pa'i bla ma de thag ring nas rnam thar 'dri zhing rtog_/de nas nye ma ring du mdzad spyod la brtags/_de nas spyod lam bsres shing shin tu brtags pa la mkhas pa dang*/_bar du bla ma de bzang ngan gang ltar yang rang gi rgyud la brtags shing bsten pa la mkhas pa dang*/_tha mar gdams ngag rnyed nas dgongs spyod thos bsam sgom gsum sogs bslab pa la mkhas pa yi/_skyes bu de ni gegs dang gol sa bral ba'i yang dag myang 'das kyi lam du 'gro bar 'gyur ro/__/lam yang dag pa bsgrub pa'i dus gang gi tshe zhi ba myang 'das phyogs la sdang ba'i 'byung po bdud dang lha min gyi rigs su gtogs pa yi bsam pa can rnams skyes bu'i gzugs grogs mdza' bshes bshes gnyen sogs sna tshogs su 'ongs pa dag gis sdig thabs bsgrub pa dang*/_gzhan bslu 'dod kyi g.yo dang sgyus spyod cing gnas pa sogs nag po'i chos la brten pa dang*/_dam pa dmod cing gshe skur 'debs pa sogs dkar po'i chos la sdang zhing de la ji tsam 'grogs bzhin sdig pa mi dge ba'i spyod pa sna tshogs pa'i 'thor rlung 'tshubs nas sngar yod thos sogs dge ba'i lo tog 'joms shing*/_phyis dge ba mi skye bar byed pa'i sdig grogs de 'dra la bsten pa'i blo gros blun po de/_phyi ma'i gtan chus brlag pas bdud sdes bcom mo/__/rgyu mtshan de'i phyir dge ba'i bshes gnyen mtshan nyid dang ldan pa bsten pa dang*/_de'i yan lag dge ba'i grogs po bsten pas/_lus sems bde zhing lung rtogs kyi legs bya'i yon tan thams cad mthong ba'i chos la zin cing*/_de la rgyal dang rgyal sras rnams kyis rtag tu dgongs pa dang*/_gnas skabs dang mthar thug mngon mtho nges legs kyi yon tan kun gyis 'byor zhing*/_tshogs gnyis rdzogs la sgrib gnyis dag nas dngos grub rnam gnyis 'thob pa dang*/_sa bcu lam lnga'i yon tan thams cad bla nas blar 'gro bas/_dad mos sogs sngon du 'gro ba'i bla ma'i rnal 'byor sgom zhing mchod bstod bzlas pa rgyud bskul dbang len sogs kyi sgo nas bsgrub pa bsod nams kyi tshogs dang*/_de thams cad kyi mthar las dang po pa rnams kyis bla ma'i thugs dang rang sems rgyud gcig tu bsre zhing de'i ngang mnyam par bzhag ste chos nyid ye nas ro mnyam shes pa'i ngang rtag tu skyong ba ye shes te/_tshogs gnyis po de ni 'bras bu sku gnyis lam du byed pa'i 'thus ka yin pa'i phyir/_bskal pa mang por rgyal dang rgyal sras mang po la bsnyen bkur byas zhing*/_bskyed rim rang rgyud la brgya phrag bsgom pa las kyang*/_bla ma ni skad cig dran pa mchog ces rgyal bas gsungs te/_'khor lo bcu pa'i mdo las/_bla ma bsnyen bkur byas na yon tan gyi chos bsam gyis mi khyab pa rnams yongs su 'dzin te/_sangs rgyas kyi yon tan dang rnam par 'phrul pa thams cad 'di las 'byung bar blta'o/_/zhes dang*/_yid bzhin mchog gi rgyud las/_gang gis bla ma 'dun pa'i lha/_/spyi bo'i gtsug tu bsgom pa yis/_/sangs rgyas dkyil 'khor stong phrag nyid/_/lag mthil bzhag nas stong gsum bskor/_/snying gar lan stong bstim byas na/_/brgya stong rgyu dang char mi phod/_/ces pa la sogs par gsungs so/__/dam chos lung rtogs bdud rtsi'i rang bzhin zab rgyas kyi chu klung dpag tu med pa'i mdzod rgya mtsho lta bu de/_rang rgyud la shes rab gsum gyi sgo nas 'drongs par byed pa'i dmigs pa bzang po rnams ma 'khrul bar ston par mdzad pa'i bla ma bzang po mdo rgyud kyi don la mkhas pa der rten cing 'brel bar gnas so/__/thabs bzang ba sbyin sogs snang bcas kyi rim pa bkag pa rgyud la brten pa las/_'dod don bde blag tu thob pa'i man ngag bskyed rdzogs zab mo'i ye shes 'khyams te nyams par mi 'gyur ro/__/bsam pa nges 'byung bzang po'i rig sngags nus pa can de yis 'khor bar skyo ba med cing srid bde zhen pa med pa'i gdon chen po de la thebs na gang sgrub pa thams cad thar pa'i lam rnal ma'am kho nar 'gyur te/_de ltar bzang po bzhi dang ldan pa dam bcas bzhin sgrub pa'i legs smon yin no/__/de'i ldog phyogs ni rang nyid kyis min par dge ba'i bshes gnyen la sogs pas chos sgor zhugs bcug ste dbang med du ngur smrig sogs rtags blangs kyang*/_thos bsam cung zad btab pa'i mod la chos kyis sun pa dang*/_gal te de ltar ma gyur kyang rnyed bkur sogs tshe 'di 'ba' zhig sems pa'i kun slong dug can 'dres pa'i sgo nas ltar snang du thos bsam sgom pa ji ltar byas kyang 'khor ba'i rgyu 'ba' zhig las thar lam dang 'gal zhing*/_chos las blo nyams shing bla ma mched grogs sogs kyi bka' gcog ma nus nas bsrung sdom btsan po'i 'u lag ltar khur du song zhing*/_chos brgyad kyi rtog pa ngan pas bslangs te bstan 'gro'i don ltar snang ba'i bya ba ci byed kyang drang srong nus pa can gyi dmod pas char gyi rgyun gcod pa sogs dge legs kyi snang ba nyams par byed pa bzhin rang rgyud kyi theg chen gyi brtul zhugs 'khyams te nyams pa yin no/__/des na de dag ni legs smon dka' thub ston zla lta bu bshig pa'i rnyog pa sgra gcan gyi gdong pa lta bu yin no/__/bdag cag gi ston pas blo rigs gsum la dgongs nas skyes bu gsum gyi lam bstan pa gang nyams su blangs kyang rang rang gi thad ka thad ka'i nyon mongs pa'i dug chen gsum mam lnga'i gnyen por che bar yin te/_nyon mongs pa'i gnyen por mi 'gro ba'i lam de ni nang pa sangs rgyas pa'i lam ma yin no/__/de las ldog pa skyes bu chung ngu'i lam gyis dug gsum gyis kun nas bslangs pa'i las kyis ngan 'gror 'phen pa shes nas re zhig nyon mongs drag pos mi dge ba'i las bsags pa spong ba dang*/_'bring gis srid pa'i sdug bsngal gyi rtsa ba rgyu ngar 'dzin yin pa shes nas drung nas 'byin pa'i tshul gyis nyon mongs spong ba dang*/_rab kyis nyon mongs rang bzhin med par shes nas sbyong ba'am bskyed rdzogs zab mos lam du khyer ba'am rang grol du gtong ba ste/_de ltar lam rnam pa gsum gyi gang nyams su blangs te thabs kyi shing rtar 'dzegs la sngon bsags kyi rjes su mi dpyod/_ma 'ongs pa'i mdun mi bsu/_da lta'i rig pa rkyen yul du ma song bar bya ba spang gnyen mnyam pa nyid du la bzla ba ste dus bzhir rtag tu skyo ba med par nyams su blangs pas/_tshogs drug gi yul gyi snang ba mtha' dag chos kyi tshig don la sems pa dang*/_bla mas man ngag bstan pa ltar mi rtag pa dang*/_nges 'byung*/_snying rje/_mos gus sogs kyi rkyen du shar nas rnam mkhyen ye shes kyi rgyur song ba ni legs smon grub pa yin no/__/dbyig gnyen gyis/_tshe ring de bzhin nad med dang*/_/gzugs dang skal pa bzang dang rigs/_/nor dang shes rab dag dang bdun/_/zhes gsungs pa ltar mtho ris yon tan bdun dang ldan pa'i dga' ba1 dang*/_mi khom pa'i gnas brgyad las dal bas rten mchog yang dag mtho ba2 dang*/_lus la nad med3 cing*/_sems las su rung ba'i ting nge 'dzin 4dang*/_tshig don rnam 'byed shes rab5 ste lnga po tshang ba ni/_sngon chad bsod nams chen po la gus shing bar ma chad pa'i mngon rtags tshe 'dir snang ba yin no/__/dge sdig gi blang dor cung zad re thos bsam gyis shes kyang rang rgyud la ma bsgom pas ni rig pa de 'joms shing 'ong ba dang*/_gzugs rigs thos pa sogs kyis khengs shing rgyags pa rgyas pas thos bsam dang*/_bslab gsum gyi dpal 'byor sogs rgyud la mi chags par dge phyogs thams cad 'joms shing 'ong la/_khyad par du rnam par sdang bas legs tshogs thams cad 'joms shing 'ong ste/_spyod 'jug las/_bskal pa stong du bsags pa yi/_/sbyin dang bde gshegs mchod la sogs/_/legs spyad gang yin de kun kyang*/_/khong khro gcig gis 'joms par byed/_/ces so/__/chags pas tshul khrims nyams nas yang dag mtho ba lha mi'i gnas tsam thob pa yang 'joms shing 'ong ba bshad do/__/rgyu mtshan gang gi phyir lha chos sogs kyi rten mi lus thob pa de yang las dang nyon mongs sgo gsum gyi sdig pa yis rgyud rnam par dkrugs pa ma yin pa'i blo gros te rang sems bzang po ni/_da lta spang gnyen la dpyod pa'i shes rab kyi mthu rang bzhin dge ba'i ngang tshul dang dam pa'i chos kyi skal pa thob pas sgo gsum las su rung bar bkol thub pa la sogs pa'i yon tan ni/_sngon bsod nams bsags pa'i rtags su mdo sde rgyan las bshad de/_de yang ji skad du/_dga' dang dal bar skye ba dang*/_/nad med pa dang ting 'dzin dang*/_/rnam par 'byed pa'i byed rgyu ni/_/sngon chad bsod nams bsags pa yin/_/zhes so/__/chos thams cad la dmigs te sems bskyed cing dam bcas pa'i go cha srog la bab kyang mi gtong bas rnam par sra zhing*/_de yang zab rgyas chos khams rgya mtsho lta bu'i don rnams thos bsam gyis gtan la phab nas sgom pas nyams su len par byed pa la/_dper na dbang po'i mtshon cha gzhu ni gyad stobs po ches kyang bdungs bar blo yi spobs sam mi spobs snyam pa'i the tshom med par snying stobs bskyed na bdungs nus pa ltar/_chos de kun bdag gi khong du chud cing shes par byas nas nyams su blang bar bya snyam pa'i snying stobs kyi dam bca' ris su ma bor zhing me la shing bsnan pa bzhin 'gal rkyen thams cad kyang gnyen po'i dbang du gtong ba ste/_rkyen ngan ji ltar byung yang dam bca' je brtan/_nyon mongs ji ltar byung yang gnyen po je btsan byed pa rnams ni/_lam sgrub pa rkyen khar mi 'chag cing btang snyoms su mi lus par sgo gsum gyi bya ba thams cad phyin drug steng du son te rnam mkhyen gyi rgyur 'gro'o/__/de ltar bsam pa'i go chas lam sgrub pa de yi mthun phyogs skyabs 'gro tshogs bsags sogs sgo thams cad gcig tu bsdus pa yan lag bdun pa bya ba dang*/_gzhan yang chu gtor dang gsur bsngo lus sbyin la sogs dge phyogs su yul rnams la chen po lta ci/_phra ba la'ang tshogs bsags pa dang*/_de bzhin du tha na rmi lam yan chad nyes ltung chung ngu la'ang gnyen pos sbyangs pa mtha' dag bya ba yin pas/_de ltar bag yod dran shes kyis lag pa 'degs tsam byed pa dang*/_tshig 'bru gcig smras pa dang*/_rtog pa gcig yan chad ngos zin pa'i thabs la 'bad de spang blang byas na lam gyi mi mthun phyogs kyis gang zag de la mi brdzi zhing*/_ci byas thams cad yang dag pa'i lam du 'gro ba bsod nams kyi tshogs bsags pa dag la bsten par byed pa 'di yin pas gnad dam pa'o/__/de ltar 'khor lo bzhi yi don de tshul bzhin nyams su len pa ni skyes bu chen po byang chub sems dpa'i lam bgrod pa'i dngos gzhi'i stegs yin no/__/yon tan rin po che'i mdzod dga' ba'i char zhes bya ba las/_'khor lo chen po bzhi'i tshoms te le'u lnga pa'o//___//'di ltar srid pa'i gnas su las dbang gis rgyu ba'i 'gro ba rnams 'jigs pa du mas mnar te/_spyir nyan rang gi lam gyi mi mthun phyogs 'khor ba sdug bsngal gyi 'jigs pa dang*/_sgos byang sems kyi lam phar phyin gyi mi mthun phyogs rang don yid byed kyi 'jigs pa/_nying sgos gsang sngags lam gyi mi mthun phyogs tha mal 'khrul 'dzin gyi 'jigs pa ste/_'jigs pa gsum gyis dkrugs shing sdug bsngal gyis rtag tu mnar ba ni/_dper na chu srin gdug pa'i gnas chu yi gter rgya mtsho chen po rlabs kyis 'khrugs pa lta bur bying ba la/_dbang phyug sogs 'jig rten pa'i lha 'ga' zhig skyabs su bzung na'ang*/_skyabs yul de dag 'jigs pa las ma grol bas skyabs yul 'khrul la/_des na gnas skabs dang mthar thug skyob nus shing skyabs su bsten par 'os nges pa gang la yid ches kyi dad pas srog gam blo brtan pa'i skyabs yul gtan du mi bslu ba ni/_dkon mchog gsum zhes mtshan snyan gyis srid pa gsum na yongs su grags pa'i gdugs dkar po lta bu la skyabs su bsten pa'i tshul ni/_sangs rgyas kyi bstan la 'jug pa'i thog ma nyid du 'dzin dgos te/_skyabs 'gro bdun cu pa las/_sangs rgyas chos dang dge 'dun ni/_/thar pa 'dod pa rnams kyi skyabs/_/zhes so/_/thar pa ste myang 'das su 'gro ba'i lam bslab pa gsum dang*/_spangs rtogs kyi yon tan kun gyi rang bzhin brten pa'i rten dang 'dzin pa'i snod du dam bca' bar byas na mi bslu bar nges pa ni dkon mchog gsum la skyabs su 'gro ba nyid de/_skyabs su 'gro ba de'i sngon du dad pa skye ba'i thabs ston pa sangs rgyas dang*/_des bstan pa'i dam chos dang*/_de 'dzin pa'i dge 'dun gyi yon tan shes pa ni shin tu gces so/__/spyir dkar po'i phyogs kyi chos rnams kun gyi rtsa ba dad pa kho na yin te/_chos bcu pa dang*/_dkon mchog brtsegs pa rnams las phyogs mthun par/_dad pa med pa'i mi rnams la/_/dkar po'i chos rnams mi 'byung ste/_/sa bon me yi tshig pa la/_/myu gu sngon po ji bzhin no/_/zhes pa ltar yin pas dad pa de ni 'phags pa'i rigs skal pa dge ba can gyi skyes bu rnams la dang po yod shas che yang*/_/las ma sad pa'i skye bo phal pa'i sems la mngon gyur lung du ma bstan pa la/_mthong na mi mthun pa med pa ston pa dngos sam gzugs brnyan/_dge ba'i bshes gnyen sogs mthong ba dang*/_sde snod bklag pa yi mod la lus kyi ba spu'i 'khri shing g.yo la/_mig mchi ma slong bzhin dad pa mngon gyur du ldang ba slob dpon dpa' bo lta bu'o/__/de la'ang yul dam pa'i yon tan dang gsung rab kyi tshig don la spro ba ni dang ba'i dad pa dang po skye ba ste/_de bzhin du yon tan de rnams thob par 'dod pa bung ba me tog la gdung ba lta bu dang*/_blang dor ston byed bshes gnyen dang bden bzhi sogs la yid ches shing*/_srog la bab kyang blo kha phyir mi ldog pa ste dad pa rnam pa bzhi po de dag las/_spyir thos bsam dang sgos su skyabs 'gro'i gnas skabs 'dir srog la bab kyang dkon mchog gsum las blo phyir mi ldog pa'i dad pa dgos so/__/dad pa de dag rgyud la ma skyes pa skye ba dang skyes pa gong du 'phel ba'i rgyu ni/_mang du yod kyang bsdu na bzhi yin te/_dam pa mtshan nyid ldan pa bsten pa dang*/_dam pa'i grogs bzang dang 'grogs pa/_dkon mchog gsum gyi yon tan rjes su dran pa dang*/_'khor ba la snying po med pa 'di phyi gnyis phung gi nyes dmigs bsam nas nges 'byung gis drangs pa las bcos min gyi dad pa skye'o/__/thub pa sangs rgyas bcom ldan 'das rnams kyi sku gsung thugs mi zad pa rgyan gyi 'khor lo'i yon tan ni mtha' yas te/_ting 'dzin rgyal po las/_gal te bskal pa gang+ga'i bye ma snyed/_/de srid du ni tshe yi tshad gyur nas/_/nga ni sangs rgyas kyi yang ye shes kyi/_/spu gcig bsngags pa brjod kyang mthar ma phyin/_/zhes so/__/mthong sgom gyi spangs pa ye shes gnyis kyis nyon mongs dang shes bya'i sgrib pa bcom te spong ba'i yon tan mthar phyin pa thob par 'gyur ro/__/de dag gi rnam grangs cung zad spros te 'chad pa la/_mthong spang brgya dang bcu gnyis ni/_/chags1 khro2 nga rgyal3 rmongs4 the tshom5/_/'jig6 mthar7 log lta8 lta mchog 'dzin9/_/tshul khrims brtul zhugs mchog 'dzin10 pa/_/lta min lnga dang lta ba lnga/_/mthong spang rtsa ba bcu yin no/__/de dag bden po bzhi po la/_/'jigs mthar log rmongs the tshom dngos/_/khong khro'i dbang gis log par 'jug_/lhag ma rnams ni brgyud nas 'jug_/'dod pa'i khams na bcu ka ste/_/gzugs dang gzugs med khong khro min/_/de ltar brgya dang bcu gnyis so/_/zhes pas dang po mthong spang rtsa ba bcu ste/_'dod chags/_khong khro/_nga rgyal/_ma rig pa/_the tshom ste lta min lnga/_'jig lta/_mthar lta/_log lta/_tshul khrims brtul zhugs mchog 'dzin/_lta ba mchog 'dzin te lta ba lnga dang bcu'o/__/de dag bden pa bzhi la log par zhugs tshul gyis brgya dang bcu gnyis te/_'dod khams na bden bzhi re re la bcu ka 'jug pas bzhi bcu/_gzugs khams gzugs med khams gnyis la khong khro ma gtogs pa dgu re 'jug pas dgu bzhi sum cu rtsa drug pa gnyis te bdun cu rtsa gnyis/_sngar gyi bzhi bcu ste brgya dang bcu gnyis so/__de dag ji ltar log par 'jug na/_lta ba gsum dang*/_lta min gnyis te lnga ni dngos su log par 'jug ste/_bden pa de dag la dmigs nas 'jig ltas bdag dang bdag gir blta/_mthar ltas rtag chad du blta/_log ltas med par blta/_ma rig pas bden pa'i don mi shes/_the tshom gyis bden nam mi bden snyam du the tshom za'o/__/de dag ni bden pa dang bar du gzhan gyis ma chod par 'jug pas na dngos su log zhugs yin no/__/lta min gnyis dang*/_lta ba gnyis te bzhi ni brgyud nas log par 'jug ste/_bden pa'i don lta bas ji ltar bzung ba'i lta ngan de la 'dod chags kyis chags/_nga rgyal gyis lta ngan de'i sems khengs/_lta ba mchog 'dzin gyis lta ngan la mchog tu 'dzin/_tshul khrims dang brtul zhugs mchog 'dzin gyis lta ngan de dang 'brel ba'i spyod ngan la dag grol nges 'byin te lta ba nor ba de la thar pa'i thabs yin par blta ba'o/__/'di dag lta bas bden pa la dmigs shing*/_'di dag gis lta ba la dmigs pas bden pa dang*/_bar du lta ngan des chod pas brgyud nas log par zhugs pa'o/__/khong khro ni dbang gis log zhugs yin te/_lta ngan de rgyud na yod pa'i dbang gis de dang mi mthun pa'i lta ba gzhan la khong khro ba ste 'di ni bden pa dang rang gi lta ba gnyis ka la ma dmigs pas dbang gis log zhugs yin no/__/'di dag 'gog lam gnyis la zhugs tshul la zhib cha cung zad re yod la/_'gog par bdag chad lta dang*/_lam la bdag chad byed kyi lam yin snyam pa'i tshul rnams shes par bya'o/__/sgom spang bzhi brgya dang bcu bzhi ni/_'dod chags1 khong khro2 nga rgyal3 rmongs4/_/'jig lta mthar lta sgom spang drug_/'dod par drug yod gzugs gzugs med/_/khong khro ma gtogs lnga re yod/_/de la sa dang che 'bring gis/_/phye bas bzhi brgya bcu bzhi'o/__/zhes pas sgom spang rtsa ba drug ste/_'dod chags/_khong khro/_nga rgyal/_ma rig pa/_'jig tshogs la lta ba/_mthar lta dang drug go__/de yang 'dod khams na drug_/gzugs khams gzugs med gnyis na lnga re ste khams kyis phye na bcu drug go_/yang 'dod khams na drug_/bsam gtan bzhi re re na lnga re ste lnga bzhi nyi shu/_gzugs med bzhi re re na lnga re ste lnga bzhi nyi shu bsdoms pas sa'i sgo nas dbye na bzhi bcu zhe drug go_/de dag sa che 'bring gi sgo nas dbye na bzhi brgya dang bcu bzhi ste/_sa'i sgo nas dbye ba'i zhe drug po de re re la dgu re phye bas sam/_yang na khong khro ma gtogs pa'i nyon mongs pa lnga po sa dgu dang che 'bring sa dgus phye bas brgyad cu rtsa gcig ste brgyad cu rtsa gcig lnga bsdoms pas bzhi brgya dang lngar/_'dod khams kyi khong khro dgu bsnan pas bzhi brgya dang bcu bzhi'o/__/khams ni gsum ste 'dod khams/_gzugs khams/_gzugs med kyi khams so/__/sa ni dgu ste/_'dod khams/_bsam gtan dang po/__/gnyis pa/_gsum pa/_bzhi pa/_nam mkha' mtha' yas/_rnam shes mtha' yas/_ci yang med pa/_yod min med min te khams gsum sa dgu'o/__/che 'bring ni 'dod pa'i 'dod chags lta bu la'ang*/_chen po'i chen po/_chen po'i 'bring po/_chen po'i chung ngu*/_'bring po'i chen po/_'bring po'i 'bring po/_'bring po'i chung ngu*/_chung ngu'i chen po/_chung ngu'i 'bring po/_chung ngu'i chung ngu dang dgu'o/__/mthong sgom gyi rtog pa de dag spong tshul ni/_mthong spang kun brtags yin pas bden bzhi mthong ba tsam gyis spong la/_sgom spang rnams lhan skyes yin pas bden pa mthong ba tsam gyis spong mi nus la/_mthong zin goms par byed pa'i sgo nas rim par spang dgos so/__/de yang theg dman rnams mthong spang ni 'das lam kho nas spang dgos kyang sgom spang ni 'jig rten pa'i lam gyis kyang spang nus pas/_mthong spang gi sngon du yang 'dod pa'i sgom spang spong ba srid pas de 'dra de lam thod rgal ba zhes zer zhing*/_phyir 'ong zhugs pa dang phyir mi 'ong zhugs pa gnyis ka yod par bzhed la/_rgyal ba rnams ni thabs mkhas pa'i dbang gis 'jig rten pa'i lam gyis sgom lam gyi spang bya spong rgyu mdor bstan pas lam la brod pa skye ba'i don du bstan gyi/_don la 'phags lam gyi spang bya drungs nas 'byin ba'i gnyen po med phyir/_theg chen ltar na sgom spang yang 'jig rten pa'i lam gyis spang mi nus te 'jig rten pa'i lam gyis spang bya mgo non pa tsam las/_rtsa ba drungs nas 'byin mi nus zhes bzhed/_de la 'jig rten pa'i lam zhes pa ni shes rab lhag mthong dang ma 'brel ba'i bsam gzugs kyi ting nge 'dzin rkyang pa yin la/_'jig rten las 'das pa'i lam ni bdag med rtogs pa'i shes rab dang 'brel ba'i zhi lhag zung 'jug go__/mthong spang spong tshul yang theg dman ltar na/_mthong lam skad cig ma bcu drug yod pa las/_dper na sdug bden mthong ba'i mthong lam skad cig bzhi'i dang po sdug bsngal chos bzod kyi skabs su 'dod khams pa'i sdug bsngal mthong spang bcu spangs bar chad med lam/_chos shes skabs su gnyen po ye shes skye rnam grol gyi lam/_rjes bzod kyi skabs su gzugs dang gzugs med kyi sdug bsngal mthong spang bco brgyad spangs/_rjes shes kyi skabs su gnyen po ye shes skye/_de ltar bden pa gzhan gsum la'ang sbyar ba'i nyi shu rtsa brgyad pa tshan bzhi spangs pas mthong spang brgya dang bcu gnyis so/__/theg chen ltar na khams gsum gyi mthong spang rnams gcig char du dril nas spong ste/_de yang bden pa rang rang gi chos shes bar chad med lam/_skabs kho nar spang bar 'dod do/__/des na mthong lam skad cig bcu drug po 'di la/_theg dman ltar na nyan thos sde pa bco brgyad rnams kyang bzhed pa mi 'dra ba mang du yod par gsungs la/_theg chen la'ang slob dpon seng ge bzang po ni/_spyir kha cig so sor rtog pa'i skad cig la ltos nas bcu drug rim gyis 'byung zhing*/_de kho na nyid kyi skad cig la ltos na skad cig gcig tu bzhed pa dang*/_yang kha cig so sor rtog pa'i skad cig dang de kho na nyid kyi skad cig gnyis kar skad cig ma gcig tu bzhed pa'i lugs gnyis yod par bshad cing*/_rang lugs la skad cig ma bcu drug rim gyis 'byung bar bzhed/_de yang so sor rtog pa'i skad cig ces pa ni/_gtan la dbab bya'i yul la ltos na/_bden pa bzhi ka la gcig char sgro 'dogs chod pa mi srid pas/_bden bzhi so sor sgro 'dogs rim gyis gcod pa la ltos nas skad cig bcu drug yin la/_de kho na nyid kyi skad cig ces pa rtogs bya chos nyid la dbye ba med pas/_bdag med mngon sum mthong ba'i skad cig gcig tu 'dod pa yin no/__/klu sgrub kyi lugs mnyam gzhag gi skabs su ye shes skye tshul dang*/_thog med kyi lugs rjes thob kyi skabs nges pa 'dren tshul yin la mi 'gal zhing*/_theg chen man chad 'di gnyis kyi rjes su 'brang dgos so/_mchan/_'phags pa thogs med kyi gzhung las/_bden bzhi skad cig bcu drug 'di ltar bzhed de/_dang po sdug bsngal chos bzod kyi skabs su mthong spang rnams spang*/_chos shes kyi skabs su gnyen po ye shes skye/_rjes thob kyi chos bzod chos shes kyi ye shes gnyis po de yang 'phags pa'i lam gyi rten gzhi yin no snyam du nges par byed/_rjes shes kyis rjes bzod de yang 'phags pa'i lam gyi rten gzhi yin no snyam du shes pa'o/__/des na chos bzod chos shes gnyis ni yul bden pa la dmigs pas bzung ba'i yul yin la/_rjes bzod rjes shes gnyis ni yul can ye shes la dmigs pas 'dzin pa'i yul can yin no zhes bzhed/_'di'i lugs kyi'ang bcu drug tu bzhag pa rjes thob la nges pa 'dren tshul gyi dbang du byas nas gcig gis gcig la bshad pa sogs/bstan pa gnas pa spros pa la dga' ba'i phyir rnam grangs su bzhag pa tsam yin gyi mnyam bzhag rang ngo la ltos nas spros med kyi dbang du skad cig ma gcig go zhes bzhed do/__/slob dpon klu sgrub kyi gzhung las ni/_skad cig bcu drug tu bzhag pa ni/_bden bzhi la sgro 'dogs chod tshul gyi cha nas dbye ba tsam ste/_de yang chos bzod kyis bden bzhi'i chos nyid la yid ches nas mi skrag pa'i bzod pa thob/_chos shes kyis bden bzhi'i chos nyid mngon sum du mthong*/_rjes bzod kyis lam rjes thob kyi tshe yang chos nyid la mi skrag pa'i nus pa thob/_rjes shes kyis lam rjes thob kyi tshe na bden bzhi'i chos nyid ji lta bar shes pa'i nus pa thob pa la ltos nas bzhag pa yin la/_don du shes bya'i chos thams cad skye med spros bral du mthong ba'i skad cig ma la dbye ba med de/_mdo las/_skye ba med pa bden pa gcig yin te/_/byis pa rnams ni bden pa bzhi zhes smra/_/byang chub snying por bzhugs na bden gcig kyang*/_/grub pa med na bzhi lta ga la yod/_/ces gsungs so/__/des na mnyam bzhag dang rjes thob kyi skad cig gcig la ldog chas dbye ba tsam du bzhed do/__/sgom spang rnams ni lam goms pa'i stobs kyis gnyen po sgom lam chung ngu'i chung ngu nas rim gyis skyes pas/_spang bya chen po'i sa bon nas rim gyis spang bar 'dod/_de yang mthong spang kun brtags dang*/_sgom spang lhan skyes zhes pa'i don kun brtags ni bdag tu lta ba dang*/_rtag chad du lta ba dang*/_log par lta ba sogs grub mtha' ngan pas btags pa rnams yin/_de yang lam ngan pa la zhugs pa'i gang zag rnams la mngon gyur du yod la/_grub mthas blo ma bsgyur ba rnams la'ang sa bon yod do/__/lhan skyes ni ye nas rang rgyud la yod pa'i bdag lta dang chags sogs nyon mongs pa rnams yin te/_yul la dmigs pa'i chags pa sogs so/__/de nas mthong spang grub mtha'i dbang gis bzhag pa'i rnam byang dang*/_kun nyon phyogs kyi dbye bas rgyu 'bras kyi tha snyad la sgro btags pa'o ni bden pa'i chos nyid la log par zhugs la/_sgom spang bden bzhi'i nang mtshan min pa'i gzugs med kyang grub mthas bzhag pa lta bu ma yin par gang snang ba'i yul/_mchan/_ni gzugs sogs dbang po'i yul na log par zhugs pa yin no/__/des na yul la dmigs pa'i zhe sdang drag po lta bu sgom spang yin yang*/_mthong lam skyes pa'i ye shes nyid mthu che ba'i dbang gis nyon mongs de dag sa bon rul ba ltar byas pas 'phags pa la med pas sgom spang yin kyang 'phags lam thob pa nas rgyud la med par bzhed do/__/mthong spang ni de ltar grub mthas gsar du btags pa'i spang bya yin pas/_mthong lam skyes pa'i gang zag de ni skye ba thams cad du gzhan phyi rol pa la sogs pas blo gtan nas bsgyur mi thub pa zhig dgos pa yin no/__/rtogs pa'i yon tan la/_dge ba'i las kyi rnam par smin pa las byung ba'i sha'i spyan sogs spyan lnga dang*/_bsam gtan grub pa'i ting nge 'dzin gyi stobs las thob pa'i rdzu 'phrul gyi mngon shes sogs drug dang*/_rang gis ji ltar 'dod pa bzhin mdzad pa la mthu thogs pa med pas tshe la dbang ba sogs dbang bcu/_dran pa dang shes rab khyad par can gyi rang bzhin gzungs kyi sgo ni chos thams cad skye med du gtan la phebs pa bzod pa thob pa sgo'i gzungs/_ting nge 'dzin dang shes rab kyi mthus grub pa'i sngags kyi gzungs/_chos kyi tshig don thams cad mi brjed par 'dzin pa tshig gi gzungs/_chos thams cad kyi don mi brjed par 'dzin pa don gyi gzungs te bzhi dang*/_shes bya thams cad mkhyen pa la thogs pa med pa'i mos sogs stobs bcu dang*/_rang gzhan gyi don du dam bca' ba la phas kyi rgol bas mi 'jigs pa bzhi dang*/_gdul bya'i don byed pa'i thabs thams cad so so yang dag par rig pa bzhi dang*/_sku la 'khrul pa med pa/_gsung ca co med pa/_thugs dran pa nyams pa mi mnga' ba/_mnyam par ma bzhag pa mi mnga' ba/_tha dad pa'i 'du shes mi mnga' ba/_so sor ma brtag pa'i btang snyoms mi mnga' ba ste spyod pas bsdus pa drug dang*/_gzhan don la dgyes pa'i 'dun pa/_'gro don mi 'dor ba'i dran pa/_mi ngal ba'i brtson 'grus/_thams cad mkhyen pa'i shes rab/_rtse gcig pa'i ting 'dzin/_sgrib gnyis bag chags las grol ba'i rnam grol/_thams cad mkhyen pa'i ye shes te rtogs pa drug_/dus gsum la chags thogs med par gzigs pa ste ye shes kyi gsum/_sku gsung thugs kyi phrin las la ye shes kyi sngon du 'gro zhing ye shes kyi rjes su 'brang ba gsum ste/_nyan rang dgra bcom pa rnams dang yang thun mong du ma gyur pa ma 'dres pa'i chos bco brgyad rdzogs pa ni sangs rgyas te/_skyabs 'gro bdun cu pa las/_ma rig gnyid las sangs phyir dang*/_/shes bya la yang blo rgyas pas/_/sangs rgyas pad+ma'i 'dab ltar rgyas/_/zhes so/__/yon tan gyi rnam pa kun gyi mchog zag med chos sde tshan nyer gcig gi ye shes dam pa 'khor 'das ro gcig pa dang ldan pa ni chos kyi sku'o/__/gzhi'i gnas lugs kyi snang cha stong gzugs kyi skur sa bcu'i dbang phyug chen po rnams kyi 'khor la snang ba'i nges pa lnga ldan gyi longs spyod rdzogs pa'i sku dang*/_thun mong gdul bya'i ngor ston pa sprul pa'i sku'o/__/chos ni bsod nams sbyin sogs thabs kyi cha dang*/_lam ni bdag med rtogs pa'i shes rab kyi cha dang*/_mya ngan 'da' ba ni lam gyi mthus spang bya dang bral ba'i cha ste gsum ni lung gi chos brjod bya'i don nyid de/_de la'ang gang dri ma bral ba 'bras bu'i rang bzhin dang*/_gang gis dri ma 'bral byed bya ba dang ldan pa'i rang bzhin gnyis su gnas pa la/_rnam par byang ba'i bden gnyis zhes bya ste 'gog lam rnam gnyis yin zhing*/_bsod nams ni lam gyi grogs yin no/__/brjod bya bslab pa gsum/_rjod byed sde snod gsum la ltos te lung rtogs chos gnyis su bzhag la/_lung gi chos ni dbye na mdo sde dbyangs snyan sogs gsung rab yan lag bcu gnyis dang*/_dug gsum gyi gnyen po'i sgo nas bsdu na 'dul ba'i sogs sde snod gsum du gdul bya'i ngor de bzhin gshegs pa'i bdag rkyen las shar ba yin la/_de las kyang thabs mang ba dang zab pa sogs kyi che ba du ma dang ldan pa rig 'dzin sde snod yin te/_kun byed las/_nyon mongs 'dod chags 'dul ba'i gnyen po ru/_/'dul ba'i sde snod nyi khri chig stong gsungs/_/nyon mongs zhe sdang 'dul ba'i gnyen po ru/_/mdo sde'i sde snod nyi khri chig stong gsungs/_/nyon mongs gti mug 'dul ba'i gnyen po ru/_/mngon pa'i sde snod nyi khri chig stong gsungs/_/zhes dang*/_khyad par rig pa 'dzin pa'i skabs/_/thams cad 'dul ba'i gnyen por gsungs pa ni/_/sde snod bzhi pa nyi khri chig stong gsungs/_/zhes so/__/sde snod de rnams gang las rtsom pa'i gzhi yi ge dang*/_de 'dus pa las ming dang*/_ming 'dus pa las tshig dang*/_tshig 'dus pa las shwa lo ka dang*/_le'u/_bam po nas glegs bam rnams grub ste yi ger gnas pa ni/_skyabs su 'gro bar dam bca' ba'i dam tshig gi rten yin no/__/rtogs pa'i chos ni tshogs lam chung ngur dran pa nyer bzhag bzhi nas bzung*/_'bring yang dag spong ba bzhi/_chen por rdzu 'phrul gyi rkang pa bzhi dang*/_rim pa bzhin lam lnga'i yon tan mtha' dag dang*/_de ltar 'phags rgyud kyis bsdus pa'i spangs pa dang rtogs pa'i ye shes de rnams snying po'i khams mngon du gyur pa las yin gyi/_bskyed bya skyed byed kyi rgyu 'bras can min te sgrib pa bral stobs kyis chos nyid mngon du gyur pa las gzhan ma yin no/__/de'i dri ma sel byed kyi man ngag zab mo sgo gsum gnad du bsnun te lhan skyes kyi ye shes 'char byed gdan gsum lhar bsgom pa'i mtshan bcas bskyed rim dang*/_mtshan med rdzogs rim gyis ye shes bskyed pa dang*/_mi brjed pa'i gzungs dang*/_zad par gyi skye mched bcu dang*/_mthar gyis gnas pa'i snyoms 'jug dgu la sogs pa'i yon tan thams cad kyi ngo bo ni rtogs pa'i chos te de dag kyang slob lam tshogs sbyor mthong sgom bzhi dang*/_mi slob lam gyi dngos gzhir gnas pa'i gang zag rnams kyi rgyud la ldan pa'i yon tan gyi bye brag dag la bya'o/__/lam de dag gi yon tan gyi rten du gyur pa rgyu mtshan nyid kyi theg pa yi sa bcu/_'bras bu sngags kyi theg pa'i sa bcu gsum ni mdo yi sa bcu'i thog bcu gcig kun tu 'od sprul sku'i sa/_bcu gnyis ma chags pad+ma can longs sku'i sa/_bcu gsum 'khor lo tshogs chen chos sku'i sa dang*/_'dun pa sems dang*/_rigs chen 'byin pa la sogs pa rdo rje theg pa'i sa yi rigs dbye rgyud sde so so nas gsungs pa dpag tu med do/__/de lta bu'i sa lam gang gi gnas skabs spangs rtogs kyi ye shes rgyud la brten pa'o/__/spyir dge 'dun gyi ngo bo ni/_rtogs bya yang dag pa'i don ci rigs pa rig pa dang*/_spang bya sgrib gnyis kyi dri ma ci rigs pa las grol ba'i rig grol gnyis ldan te/_nyan rang zhugs gnas gcig tu byas te skyes bu zung bzhi'am/_re re la zhugs gnas gnyis re so sor phyes na gang zag ya brgyad de theg dman brgyad do/__/theg chen rgyal sras sar gnas pa'i gang zag mtha' dag pa'i rang rang gi sa'i yon tan brjod kyis mi lang yang*/_myang 'das su bgrod pa'i lam dang srid zhi gnyis kyi mtha' las skyob pa'i ngo bo ni dam pa'i chos so/__/chos ni ston pa las byung zhing*/_de nyid rang rgyud la sgrub par byed pa'i grogs sam bslab pa rin po che gsum po'i rten gnas su gyur pa ni/_dge 'dun dkon mchog yin pa'i phyir/_dkon mchog gsum zhes grangs nges par thar pa don du gnyer ba rnams kyi skyabs kyi yul du grub ste/_skyabs 'gro bdun cu par/_sangs rgyas chos dang dge 'dun ni/_/thar pa 'dod pa rnams kyi skyabs/_/zhes so/__/de la bstan bcos 'di nyid kyi skabs su theg chen skyabs 'gro la rgyu mdo yi skyabs 'gro dang*/_gsang sngags 'bras bu'i skyabs 'gro yi rnam bzhag kha tsam min par snying thag pa nas dam bca' ba zhig dgos pa de la gnyis las/_dus gzhan grangs med gsum la sogs pa'i mthar mchog gsum rang rgyud la 'grub par 'dod nas sgrub par dam bca' ba rgyu mtshan nyid kyi theg pa'i skyabs 'gro mchog gsum kun tshang sangs rgyas nyag gcig yin pas 'bras bu don du gnyer bya de kho na nyid dus ma 'ongs par mi ltos/_'bras bu gzhan nas mi 'tshol bar da ltar mchog gsum gyi ngo bor grub zin pa rang gi sems nyid mngon du bya bar dam bca' ba ni 'bras bu'i skyabs 'gro ste/_rdo rje theg pa dag gi khyad chos yin te lta ba'i dbang gis so/__/mdo sngags gnyis las dang po rgyu mtshan nyid theg chen pa yi yul ni/_dkon mchog rnam pa gsum ste sku bzhi ye shes lnga ldan gyi sangs rgyas/_lung rtogs kyi bdag nyid dam chos/_sar gnas 'phags pa'i dge 'dun te ston pa lam grogs kyi tshul du rgyu yi skyabs 'gro dang ma 'ongs par mchog gsum rang rgyud la 'byon par smon pa 'bras bu'i skyabs 'gro'o/__/gsang sngags rdo rje theg pa'i skabs su de yi ngo bo bla mar 'dus te rtsa ba'i bla ma sangs rgyas kun dngos de'i sku dge 'dun/_gsung dam chos/_thugs sangs rgyas te dkon mchog kun 'dus su shes shing bskyab bya dang skyob byed kyang tha dad du mi 'dzin par gnyis med kyi ngang nas skyabs su 'gro ba ni rgyu yi skyabs 'gro dang*/_rang sems 'od gsal ba'i ye shes skyon ye zad du gnas pas dag bya dang bral zhing*/_yon tan ye ldan du gnas pas gsar thob dang bral ba ni sangs rgyas dang*/_ye nas 'gyur ba med pa'i chos nyid dri bral gyi ngo bo ni chos/_yon tan dbyer med par 'dus pa ni dge 'dun te/_da lta nyid nas rang sems dkon mchog gsum gyi bdag nyid du shes pa ni 'bras bu'i skyabs 'gro'o/__/skyabs su 'gro ba po'i skyes bu la'ang blo rigs gsum ste/_rang don nyi tshe ba bsgrub par 'dod pa dang*/_rang don mchog bsgrub par 'dod pa dang*/_gzhan don bsgrub par 'dod pa bla na med pa yi kun slong ste rnam pa gsum las/_dang po skyes bu chung ngu ni ngan 'gro la 'jigs nas mngon mtho lha mi'i bde 'bras thob kyi bar du mchog gsum la skyabs su 'gro/_'bring du gyur pa nyan rang gnyis kyi srid pa'i sdug bsngal des 'jigs nas rang gcig pu thar pa myang 'das kyi go 'phang don du gnyer nas gnas skabs ji srid 'tsho yi bar dang*/_mthar thug ni nyan rang dgra bcom pa'i 'bras bu thob pa'i bar du mchog gsum la skyabs su 'gro/_theg pa chen po ni gzhan don spangs te rang gcig pu don du gnyer ba'i zhi bde'i blo tha chad pa des 'jigs te/_'khor ba na gnas pa'i sems can thams cad ma lus par dbugs 'byin chen pos sangs rgyas kyi sa la bsgral ba'i phyir/_byang chub chen po thob kyi bar skyabs su 'gro ba yin no/__/de yang khyad par nges don gyi mdo sde dang sngags kyi brjod don zab mo khong du chud pa rnams kyis/_rang gi sems kyi gshis lugs la 'khor ba'i skyon rang mtshan pa bral ba dang*/_myang 'das kyi yon tan rang mtshan pa thob pa dang blang dor gyi sgo nas rgyu 'bras snga phyi can du 'byung ba'i kun rdzob 'dus byas pa bslu ba thams cad ye nas spangs pa bde gshegs snying po'i rang zhal lta ba ni 'bras bu'i skyabs 'gro bla na med pa'o/__/rmi lam gyi lam/_bag chags kyi lam/_las kyi mtha'i lam/_'khrul 'khor ma nges pa'i lam/_rgyu dang 'bras bu so sor ma nges pa'i lam ste lam rgyud lngar 'gro ba rnams brgyud cing 'khyams pa'i dus su/_sangs rgyas bcom ldan 'das rnams kyis ni chags thogs med par sems can gyi khams la thugs rje dus las skad cig tsam yang yol ba med pa'i tshul ni/_las brgya pa las/_rgya mtsho chu srin gnas pa'i rlabs/_/dus las yol bar 'gyur srid kyi/_/gdul bar bya ba'i sras rnams la/_/sangs rgyas dus las yol mi mang ba/_/gsungs pa ltar la/_yon tan rgya che ba'i ngos nas de bzhin gshegs pa'i ba spu'i khung bu gcig gi yon tan kyang cha shas tsam las mtha' dag ni/_spobs pa'i gter chen grol ba byang chub sems dpa' sa bcu'i dbang phyug chen pos brjod par byas pas kyang mthar ma thug ste/_dper na nam mkha' lding gi bya lam ste nam mkha'i mtha' gzhal phyir phyin yang grub pa ste thug pa'i mtha' ma gtugs par slar sa la 'bab pa dang 'dra ste brjod mi nus so/__/'di na 'khor ba'i rang bzhin zo chu'i 'khyud mo bzhin srid pa'i rtse nas mnar med par rten 'brel bcu gnyis kyi 'khor lor yang nas yang du brgyud de/_tshul min yid byed dang nyon mongs drag pos las ngan bsags pa'i skyon mtshang chen po can rnams ni/_'jig rten na che dgu 'khor los sgyur rgyal dang*/_dbang phyug dang*/_tshangs pa la sogs pa rnams rang nyid 'khor bar 'khor zhing chos nyid kyi bden pa yang dag ma mthong ba gnas skabs tsam du'ang phan gnod 'dres mar sbyin pa'i rang bzhin can gyi skyabs gzhan de dag gang gis kyang gnas skabs mthar thug kun tu bslu bar mthong nas ni/_srid pa'i sdug bsngal gyis 'jigs pa dang*/_dkon mchog la dad pa dang*/_skyabs su 'gro mi shes pa'i 'gro ba rnams la snying rje'i kun slong rnam pa gsum gyis kun nas bslangs te/_rang don yal bar dor nas gzhan sems can gyi don du sems bskyed pa skyes bu chen po'i blos/_dkon mchog gsum gyi yon tan rjes su dran nas rang rgyud la bsgrub par 'dod pas tshogs zhing spyan sngar yan lag bdun pa dang bcas skyabs su 'gro'o/__/dpe ji ltar na nam mkha' la steng 'og phyogs chas gzhal te 'di tsam zhes tshad bzung med pa ltar/_spyir dkon mchog la brten pa'i dkar po dge ba dang nag po mi dge ba'i las gang yin kyang yul gnyan pa'i phyir 'bras bu phan yon dang nyes dmigs kyi pha mtha' mi dpogs la/_bye brag skyabs su song ba'i bsod nams ni tshad med de/_de gzugs su gyur pa zhig yin na/_nam mkha'i khams thams cad kyis snod byas na de nyid kyis kyang brten par nus pa ma yin te/_dri ma med pa'i mdo las/_skyabs su song ba'i bsod nams gang*/_/gal te de la gzugs mchis na/_/nam mkha'i khams ni kun bkang nas/_/de ni de bas lhag par 'gyur/_/zhes so/__/mdor bsdu na de ltar skyabs su song ba tsam nas nang pa sangs rgyas pa'i khyur 'gro la phyi nang gi khyad par phyed cing*/_so byang sngags kyi sdom pa mtha' dag gi rten/_rang bzhin dang bcas pa'i sdig sgrib thams cad kyang 'dzad cing dag par 'gyur la/_mi dang mi ma yin la sogs pa'i gnod pa'i phyogs kyis 'tshe ba spong la/_ngan 'gro'i g.yang sar ltung ba'i rgyu yod kyang bsrung te gang du skyes pa'i tshe rabs thams cad du dkon mchog gsum gyi snang ba dang mi 'bral zhing byin gyis brlabs pa dang*/_srid zhi'i phun sum tshogs pa thams cad mthong ba'i chos tshe 'di la 'ong ba dang*/_rgyu dmigs bcas bsod nams kyi tshogs rdzogs nas mthar thug longs sku dang sprul sku ste gzugs kyi sku gnyis 'grub bo/__/'bras bu gnyug ma'i ngang du ngo 'phrod pa'i skyabs 'gro don dam bslu ba med pa ni sems snang gis bsdus pa'i chos thams cad ngo bo gang du'ang ma grub pas stong pa nyid dang*/_rtsal snang ma 'gags kyang ngos bzung dang bral bas dag ma dag sogs kyi mtshan ma med pa dang*/_des na dgag sgrub blang dor dang bral bas smon pa med pa ste rnam thar sgo gsum gyi rang bzhin 'khor 'das thams cad ro mnyam du rtogs nas/_skyabs gnas gzhan la brten nas 'bras bu phyi dus su re zhing smon pa med de/_rang bzhin rnam par dag pa'i dbyings sems kyi gnas lugs gzung 'dzin gyi rtog pas mi phyed pa'i 'od gsal rdo rje 'dus ma byas pa'i ye shes kyi ngang du mnyam par 'jog pa yin pa'i phyir ro/__/de ltar 'khor gsum zhen pa dang bral bas ye shes kyi tshogs rdzogs/_rang bzhin ye dag dang glo bur 'phral dag ste dag pa gnyis ldan chos kyi sku thob bo/__/bslab bya rgyu yi bslab bya dang 'bras bu'i bslab bya gnyis las/_dang po rgyu yi skyabs 'gro'i bslab bya ni/_dgon sde'i dpon du bsko ba lta bu'i mnga' ris/_gser dngul sogs sbyin pa'i bya dga'i slad du mi gtong bar smos ci dgos te/_khyad par du gyur pa srog gi phyir yang dkon mchog gsum gtong ba min no/__/khyad par du dkon mchog gsum po de yi ngo bo bla ma yin pas der skyabs su song nas rang gi bla ma la lta ci smos/_dam pa gzhan rnams la'ang mi snyan pa brjod pa sogs dang*/_de'i phyogs mthun yin pas bshes gnyen dam pa la rdzun dang g.yo sgyus bslu ba dang*/_ngan smras dang skyon brjod kyi mi snyan pa sgrogs pa spang dgos so/__/de bzhin sangs rgyas dang chos dang dge 'dun la skyabs su song nas rim pa bzhin du gzhan skyob pa'i nus pa med par ma zad bdag nyid ni las kyi dbang gis 'khor bar dbang med du 'khyams shing 'khor ba'i lha tshangs pa khyab 'jug sogs la'ang phyag mi 'tshal na mkha' la rgyu ba'i yi dwags rdzu 'phrul can sogs la smos ci dgos/_sems can gzhan la srog gcod brdung brdeg gzhon 'gel sogs kyi gnod pas mi 'tshe zhing*/_grogs mu stegs can nam dkon mchog la yid mi ches pa dang mi 'grogs shing de dag la blo phyogs par mi bya'o/__/dkon mchog gsum gyi rten la dkon mchog dngos kyi 'du shes bzhag nas sku gzugs bris 'bur bzang ngan gsar rnying gang yang rung ba dang*/_gsung rten yig 'bru gcig yan chad zong 'tshong du gta' ma sogs lta ci 'gom yug mjug gtad dang tha na so dreg bsku ba tsam yang spang la/_dge 'dun spyi tha na tshul 'chal can yan la gshe skur spong ba dang*/_na bza' lhan pa dmar ser yan spyi bor gtugs shing dad pas bsnyen bkur bya zhing*/_nyin mtshan dus drug_/gsum/_tha na thun re tsam dkon mchog gsum gyi yon tan brjed pa spangs nas rjes su dran bzhin rang skyabs su 'gro zhing gzhan der dgod par bya'o/__/'bras bu'i bslab bya sems kyi chos nyid thub pa chos kyi sku yi ngo bo yin pas/_sems dang sems byung nyi ma dang 'od zer bzhin mtshungs par 'jug pa'i rtsal snang thams cad bral thob spangs pa'i dbyings la thim ste spros pa thams cad nye bar zhi ba'i tshe byang chub pa yin pas/_mchog gsum la skyob byed dang bdag la bskyab byar mi 'dzin cing*/_cho ga'i sgo nas blangs pa la sogs tha snyad las 'das phyir sdom pa gtong rgyu zhes pa'ang btags pa tsam du zad pa bla dwags yin no/__/rgyu yi skyabs 'gro'i gtong mtshams skyabs 'gro mtshan nyid pa dag_/skyabs su 'gro ba'i yul dkon mchog gsum la the tshom dang*/_log lta skyes pa dang*/_bslab pa phul bas gtong la/_gzhan spang bsgrub kyi bslab bya rnams las gang rung nyams na dman par 'gyur zhing ngan song du ltung ba'i phyir/_dper na lus kyi rma yi bag byed pa bzhin bsgrims te bslab bya phra mo tsam yang bsrung bar bya'o/__/sngon las kyi rgyu mthun da lta yang steng du slebs nas lce spyang gdug pa lta bu'i sems bzhin/_phyin ci log gi rtog pa ngan pas skabs btsal ba rnams kyis tshig tsam du skyabs 'gro sogs sgrog na'ang don ni de dang 'dzol ba'i phyir blo gtad gcig tu mi 'khel bas yid gnyis su gyur pa de la ni/_mchog gsum gyi thugs rje dang byin rlabs gang yang mi 'jug ste/_snod ngan pa zhes sems rgyud du dkon mchog gsum gyis 'phral yun du bslu ba med cing skyob nges pa'i tshul la nges shes bri ba'i rtags su/_'jig rten na lha dang gzhi bdag sogs kyi ming btags kyang don la mkha' rgyu yi dwags las kyi rdzu 'phrul dang mngon shes thob pa rnams la brten nas tshe 'di nyid la dbang thang nyams pa/_gri khar shi ba sogs kyis nyams so/__/'jig rten 'di na sa gzhi dang nam mkha' ri rab gling bzhi la sogs pa rnams kyang da lta yan man du gnas pa rnams kyang stong zhing gnas 'gyur ba dang*/_go la zhig pa'i tshe na nyi zla thang la lhung ba sogs go ldog par srid kyi/_dkon mchog gsum gyis bslu ba nam yang mi srid pa'i nges shes brtan pa 'phral yun kun tu don yod pa yin no/__/rmi lam na'ang chur lhung ba dgra dang gcan gzan sogs kyis ded pa snang na de ma thag tu rtse gcig pas dkon mchog mthong ba'am dran nas gsol ba btab pa tsam gyis 'jigs pa de dag zhi ba dang*/_bag yod dran zhing bslab pa gsum gyi yon tan kun gyis 'byor ba dang tshe rabs snga ma rnams su dkon mchog la dad pa sogs kyi yon tan dran zhing bar do na'ang sangs rgyas byang sems sogs zhal mthong zhing thar par bgrod par sla ba dang*/_mthar thug dkon mchog gsum gyi ngo bor bzhugs nas lus can 'gro ba kun gyi nyes tshogs 'joms pa'i dpung dang*/_mngon mtho nges legs la 'god pa'i gnyen du 'gyur ro/__/yon tan rin po che'i mdzod dga' ba'i char zhes bya ba las/_skyabs su 'gro ba'i tshoms te le'u drug pa'o//___//zhi ba phyogs gcig pa bsam sbyor rgya chung bas theg dman 'khyil chu rnyog ma can gyi rdzing bu lta bur byang chub sems kyi khams/_theg pa chen po'i rigs las nyams pa'i nyan rang skyes bu'i sems zhi ba phyogs cig par zhugs pa de nyid mthar thug sangs rgyas rnams kyis bskul nas/_stong nyid shes pa'i shes rab dang sems can la dmigs pa'i snying rje'i ded dpon lta bu la sbyar ba'i mthus rigs sad nas theg chen gyi chos zab rgyas rgya mtsho lta bu la bslab nas kun mkhyen sangs rgyas kyi go 'phang nor bu'i gling du 'gro'o/__/de yang sbyin sogs thabs kyi cha shes rab kyis ma zin pa de srid du pha rol phyin pa rnam pa lnga'i ngo bo byang chub chen po'i rgyur lung du ma bstan pas/_dngos po dman pa lcags khams su yod pa ltar dge rtsa dman cing rnam par nyams pa de nyid la/_thabs shes zung du 'brel ba'i gser 'gyur gyi rtsi lta bus rgyas thebs pa'i mod la/_rin thang chen po'i gser gyi dngos po lta bur byang chub chen po'i rgyur bsgyur bar byed do/__/gang la'ang mi gnas pa'i myang 'das thob pa'i phyir du snying rje'i thabs dang stong nyid kyi shes rab zung du 'jug pa'i byang chub kyi sems de rgyud la ji ltar skye ba'i rim pa ni/_sbyor ba tshad med bzhi yis blo yang yang sbyangs na bsam sbyor thams cad theg chen gyi lam du 'gyur bas na sa mkhan gyi chos dang mtshungs pa des blo sbyangs nas smon 'jug gnyis dang*/_bslab bya slob pa las thabs shes zung du 'jug pa'i byang chub kyi sems de tshogs sbyor du rjes mthun tsam dang*/_mthong lam du ji bzhin pa skye ba yin no/__/byams pa'i ngo bo gang la dmigs pa ni/_gzhan sems can mngon mtho'i bde ba med pas sdug bsngal ba'i 'gro ba pa rnams gnas skabs dang mthar thug gi bde ba'i bar dang ldan par 'dod pa yin la/_byang chub sems dpa'i byams pa ni/_dper na snying du sdug pa'i ma yis bu la brtse ba ji bzhin du/_lus dang longs spyod dus gsum gyi dge ba kun gcig tu spungs nas/_gzhan sems can de dag la gnas skabs dang mthar thug gi phan 'dogs shing*/_sems can de dag gis gnod pa ji ltar byas kyang brtse bas bzod cing phan 'dogs pa la bslab pa yin no/__/snying rje'i ngo bo ni mtha' yas pa'i sems can gzhan thams cad kun gyi rang bzhin sdug bsngal gsum mam brgyad kyis dam la bzhag pa rnams la/_snying khung rus pa'i gting las bzod blag med par rang gar 'jog mi phod pa dper na bu sdug pa mi gtsang dong nang lhung na pha tsham tshom med par 'jug pa ltar sdug bsngal de thams cad dang bral bar 'dod pa'i sems stobs drag po dang*/_'gro drug gi sems can mtha' dag sdug bsngal rgyu bdag 'dzin dang*/_'bras bu sdug bsngal dngos kyi yo lang la spyod cing dper na ri dwags mtha' la gcur ba bzhin thar pa'i thabs dang bral ba mthong nas thar pa'i dus med pa la snying brtse bas mig mchi ma slong bzhin 'don pa'i thabs la brtson pa yin/_dga' ba'i ngo bo la dmigs pa ni/_sems can gzhan dag thams cad bde skyid phun tshogs dang ldan pa yin la/_rnam pa ni de la phrag dog dang 'gran sems bral zhing snying nas spro ba'i sems kun tu 'jug cing sems can kun la bde 'byor phun sum tshogs pa dang ldan na ci ma rung snyam du legs smon bsgom zhing sems can rang rang gi sngon bsags mthu yis thob pa de la dga' bar byed cing*/_phyin chad kyang sems can thams cad bde skyid kyi dpal de dang mi 'bral bar smon pa yin no/__/btang snyoms kyi ngo bo la dmigs pa ni/_pha ma nye 'brel mdza' grogs sogs byams yul dang*/_rang phyogs la gnod pa'i dgra yi phyogs su gtogs pa sdang yul dang*/_bar ma sogs la rnam pa ni ji mi snyam du 'jog pa'i sems 'bral ba ste/_de yang rang phyogs dang gzhan phyogs ris su chad pa sems cad thams cad mnyam pa nyid kyi ngo bor brdal zhing khyab par byas nas/_dgra dang*/_gnyen dang*/_bar ma'i 'du shes gsum phan 'dogs pa'i yul la mnyam par rab tu spyad de/_mdor na ldan 'dod/_bral 'dod/_mi 'bral 'dod/_zhi bar 'dod pa bzhi'i sgo nas dbye bas tshad med bzhi'i rnam pas bsgom tshul dmigs pa dang bcas pa thams cad la dmigs med 'khor gsum dag pa'i rtsi yis sbyar ro/__/nye du sogs mdza' bshes phyogs la 'dod cing chags pa'i sems kyis bde bar 'dod pa'i byams pa/_'og rta 'gel khal sogs pa ser sna'i dbang gis bkol mi bra ba'i snying rje dang*/_rang phyogs la 'byor pa gzhan las lhag na nga rgyal gyis de la dga' ba/_phan 'dod gnod sgrub gang yang mi sems pa'i gti mug_/lung ma bstan bzang ngan med pa'i btang snyoms dang*/_bzhi po de ni thar pa mya ngan las 'das pa'i lam min la tshangs pa'i gnas pa bzhi'i phyogs dang nye ba byams sogs de 'dra khams gong ma gnyis su skye ba'i rgyu dang*/_dmigs pa ris su chad pa dang*/_mngon par zhen pa dang bcas pa'i phyir theg chen lam gyi tshad med bzhi'i gol sa yin pas rnam par spang bar bya'o/__/theg chen gyi skabs 'di na mtha' gnyis zhi ba'i lam dang 'brel ba yi/_tshad med bzhi'i dmigs pa'i yul ni phyogs re ba ma yin pas sems can thams cad kyang*/_don la ye nas spros pa dang bral ba snang la rang bzhin med pa'i chos nyid kyis zin nas thabs shes zung du 'jug pa'i rnam pa'i sgom tshul yang yang goms nas stobs su gyur pa las/_kun rdzob dang don dam pa'i byang chub sems gnyis skye ba'i rgyur 'gro bas/_'jig rten pa dang nyan rang rnams dang thun mong ma yin pa thabs shes gnyis ka'i phyogs nas khyad chos ldan pa'i tshad med bzhi ru 'dod do/__/tshad med bzhi po de dag gi bsgom tshul go rim gyi nges pa can ni dkyus su bshad pa bzhin dang*/_nges pa med pa ni btang snyoms thog mar bsgom pa sogs so/__/des na dmigs pa'i yul gang la tshad med pa'i blo skye bar sla ba de la thog mar gtad nas bsgom/_'on kyang go rim la zhen pa'i gnyen por 'di ltar yid 'ong gi byams pa yang yang bsgom pas byams pa'i yul de gnyen bshes lta bu'i ris can du mthong ste chags pa'i rten du gyur na/_nye ring dang bral ba'i btang snyoms sgom par spos pas chags pa'i rnam pa de nyid 'gog par 'gyur la/_btang snyoms bsgom pa'i blo de nyid phan 'dogs pa'i sems med par rmongs nas lung ma bstan du gyur na/_snying rjer spos nas bsgoms pas sdug bsngal gyi rgyu la spyod cing 'bras bus gzir ba'i tshul yang yang bsam pa'i stobs kyis btang snyoms tha shal ba de 'gog go__/snying rje bsgoms pa na sems can gyi sdug bsngal shin tu che bas sems stobs zhan te ha cang zhum nas ris su chad pa na/_bde zhing 'byor pa ldan pa'i sems can la dmigs nas dga' bar bsgom pa spos pas zhum zhing dman pa'i sems skye ba de nyid 'gog la/_dga' ba bsgoms pas sems ha cang rgod de spros pa'i yul du g.yeng bar gyur na/_byams pa sogs mtha' dbus brjes nas bzhi po spel mar bsgom par bya'o/__/de ltar tshad med bzhi po bsgoms pas 'bras bu bzhi thob par 'gyur te/_de la rnam par smin pa'i 'bras bu ni/_srid pa na mngon par mtho ba'i gnas 'dod par lha dang mi'i lus rten phun sum tshogs pa thob pa dang*/_des tshogs gnyis rdzogs par byas nas mthar thug nges par legs pa'i 'bras bu slob pa dang mi slob pa'i sa mngon du byed pa ste gnyis dang*/_rgyu mthun la gnyis las/_byed pa rgyu mthun gyi 'bras bu tshe rabs thams cad du de 'dra ba'i tshad med bzhi po'i blo bsgom par 'gyur la/_myong ba rgyu mthun gyi 'bras bu ni/_rang rang gi mi mthun phyogs gnod sems/_rnam par 'tshe ba/_phrag dog chags sdang ste bzhi dang bral zhing*/_de dag med pa'i bde ba phun sum tshogs pa 'thob pa dang*/_dbang gi 'bras bus ni/_'di ltar byams pas gnas grogs dang longs spyod sogs yid du 'ong ba dang 'phrad pa dang*/_snying rjes lus sems bde ba'i rkyen dang ldan pa dang*/_dga' bas sa phyogs sman shing dang me tog la sogs pas brgyan pa yid dga' ba'i rgyur 'gyur ba dang*/_btang snyoms kyis skye dgu mdza' zhing mi mthun pa med pa'i yul la longs spyod par 'gyur ro/__/skyes bu byed pa'i 'bras bu ni/_tshad med pa bzhi po'i byed pa ches cher stobs su gyur pa de yis rang gzhan don gnyis phun sum tshogs pa 'byor pa'i yon tan mtha' dag 'thob par 'gyur te/_byams pa tshad med goms shing 'byongs pas 'gro ba kun la bu gcig pa'i ma ltar brtse bar 'gyur bas/_zhe sdang med cing byams pa'i mthus sems can gzhan gyi yid du 'ong zhing dga' bar 'gyur ro/__/byams pa'i ngo bo gang yang ma grub pa'i gshis bkag bya dang bral ba stong la rang bzhin med pa goms pas/_mthar thug mkhyen cha ma 'gag pa me long ye shes mngon du gyur nas mtshan dpe rgya mtsho'i bdag nyid longs spyod rdzogs pa 'thob ste/_ji skad du/_byams pas zhe sdang gnas su dag_/me long ye shes longs spyod rdzogs/_/zhes so/__/de bzhin du snying rje tshad med goms shing rgyud la 'byongs pas gzhan gyi sdug bsngal ji snyed yod pa thams cad kyang*/_bdag gi khur du 'gro ba ste bdag la bab pa bzhin mi bzod pa'i blos sdug bsngal las gdon pa'i thabs 'ba' zhig sems pa las/_gzhan la 'tshe ba skad cig tsam yang bral ba'i sems dang*/_gnyen bshes ltar sems can la 'dod cing chags pa dang bral ba/_rang bzhin med pa'i stong nyid kyi gdangs snying rjer shar te zung du 'brel bas 'khor ba'i chos thams cad rgyu 'bras ma 'dres par rtogs nas gzhan rgyud so sor 'byed pas shes bya'i chos thams cad ma 'dres par so sor rtog pa'i ye shes mngon du gyur nas/_dkar chos kyi yon tan thams cad kyi rang bzhin chos kyi sku ru 'grub ste/_snying rjes 'dod chags gnas su dag_/kun rtog ye shes chos kyi sku/_/zhes so/__/dga' ba tshad med ni rgyud la goms shing 'byongs pas/_gzhan gyi bde 'byor la mi dga' ba'i phrag dog gi rtsa ba chod cing*/_gzhan gyi bde skyid la dga' ba khyad par can skyes pa'i rgyus rang gi yon tan gyi 'byor pa phun tshogs kun brtan cing*/_phrag dog gi zug rngu zhi ba'i bde ba rgyun mi 'chad pas bsam gtan la tsher ma med pa dang*/_dga' ba'i ngo bo gzung 'dzin du dmigs pa'i rtsol ba med pa dang chos mthun par mthar thug gzhan don rtsol med du mkhyen pa'i bya grub ye shes mngon du gyur nas gdul bya thams cad kyi don mdzad pa'i sprul pa'i sku mchog thob ste/_dga' bas phrag dog gnas su dag_/bya grub ye shes sprul pa'i sku/_/mdzad pa lhun grub dam pa'o/_/zhes so/__/btang snyoms tshad med 'byongs pas/_bdag gzhan dgra gnyen sogs phan 'dogs yul du mnyam pas bdag gces par 'dzin pa'am/_gzhan don la rloms sems dang*/_bdag nyid gzengs bstod pa'i nga rgyal med cing*/_dngos por 'dzin pa dang*/_dngos med du zhen pa'i mtha' gnyis su lhung nas sems kyi chos nyid dbu mar mi snyoms pa'ang rang bzhin gyis stong zhing zab pa dang*/_spros pa thams cad nye bar zhi ba'i dbyings su btang snyoms pa'i rtogs pa khyad par ba skye zhing*/_btang snyoms kyi ngo bo tha dad du 'dzin pa'i gti mug gi rang bzhin rmongs pa med cing mthar 'dzin zhi ba yin pas/_mthar thug chos thams cad dbyer med blang dor dang bral bar mkhyen pa chos dbyings ye shes dang*/_rang bzhin rnam dag dbyings sgrib pa thams cad dang bral ba ngo bo nyid sku mngon du 'thob par 'gyur te/_btang snyoms btang snyoms chen po yis/_/nga rgyal gti mug gnas su dag_/mnyam nyid chos dbyings ye shes dang*/_/byang chub rdo rje'i sku nyid do/__/zhes pa rnams pad+ma rtse mo las bshad do/__/de lta bu'i theg chen thun min lam gyi tshad med bzhi po yi yon tan ni/_sku gnyis skyed byed dang*/_sgrib gnyis dag byed kyi rgyu tshogs gnyis dang chos nyid gzhi'i ngang du gcig pas/_de mngon du 'gyur byed rgyu'am lam tshogs gnyis dang thabs shes gcig la/_'bras bu sku gnyis kyang ngo bo tha mi dad pas de ltar gzhi lam 'bras bu shin tu zab pa'i don rtogs nas/_yon tan mtha' yas shing mthar thug pa'i don la bslu ba med de/_dpal phreng gi mdo las/_gang gis tshad med bzhi bsgoms pa/_/de ni bde gshegs kun gyis dgongs/_/kun tu yon tan tshad med de/_/nam mkha'i lam las rab 'das pa'o/__/zhes so/__/tshad med bzhi po de dag dang mi ldan pa ni lam ngan gzhan phyi pa mu stegs pa rnams kyi grub mtha' srid pa 'khor ba'i rgyu ste/_sa'i stod 'grel las/_tshad med bzhi ni thar par 'gro ba'i lam ste gzhan du na log pa'o/_/zhes so/__/des na chos thams cad rang gi ngo bo gdod nas stong pa nyid shes pa'i shes rab dang snying rjer zung du tshud pa'i 'gal ba gzhan la mi bsten par/_thar pa sgrib gnyis kyi dri ma med pa rgyal sras dam pa'i lam gyis rang don yid byed dang*/_bden zhen gyi blo'i rnyog pa zhi ba'i dge ba la go yul tsam du ma lus par goms 'tshal lo/__/yon tan rin po che'i mdzod dga' ba'i char zhes bya ba las/_tshad med bzhi'i tshoms te le'u bdun pa'o//____//srid zhi'i khams thams cad na gong na med pa'i rnyed pa mchog rdzogs byang gang gi don la dmigs nas lam bsgrub pa la de thob byed kyi rgyu'am yon gyi mchog gam snying po ni/_tshad med rnam bzhi la yang yang goms pa'i stobs kyis thob pa lhag pa'i bsam pa byang chub kyi sems rin po che de yang*/_dang po smon 'jug gi sems gnyis bskyed nas bslab bya la tshul bzhin bslab pas 'dun pa sa lta bu dang lhag bsam gser lta bu nas sems bskyed stobs gong du 'phel nas bgrod pa'i shing rta'i sgyu 'phrul gyi thabs la drangs pas/_rang nyid gcig pu zhi bde'i lta ba ngan pa nyams te don gnyis phun sum tshogs par byed do/__/rgyu sdig pa dang 'bras bu sdug bsngal gyi tshogs mang pos mnar ba'i 'khor ba'i gnas rgyal po'i btson ra lta bur tshud de bcings pa'i gang zag tha chad rnams kyang*/_byang chub mchog tu sems bskyed pa'i mod la ming gnas 'gyur te/_rgyal sras kyi ming gi cod pan thob cing*/_don gnas 'gyur te tshul de la rab tu dga' zhing dad par gyur nas/_'jig rten na dkar phyogs pa rnams kyis bsngags shing mchod la rigs drug gi gtso bo lha mir bcas pa'i 'gro ba mtha' dag gis kyang phyag mchod bstod pa sogs bsti stang byed par 'gyur ro/__/rang bzhin ye nas dag kyang ma rig pas bsgribs pa'i las kyi kun nas slong ba'i nyon mongs pa dper na nyi zla'i snang ba med pa'i mun nag stug po 'khrigs pa'i nam mkha' la sprin bar nas gtum po'i glog 'od 'khyugs pa lta bu 'gro ba'i dge ba la brtan po ma yin pas/_skabs 'gar goms shing bsags pa'i las ni bsod nams tsam po ba yin te/_dper na chu shing e ran dra 'dam bu smyig ma bzhin du 'bras bu lan gcig smin zin nas rtsa ba skam pa ltar/_lha mi'i bde 'byor lan gcig spyad zin nas slar zad pas smad do/__/byang chub sems kyi zin pa'i dge ba ni dper na sa gzhi bzang po 'gro ba mang pos bsten pa'i zhing sa la/_sa bon ci btab kyang dge ba'i lo tog phun sum tshogs pa rgyas shing 'phel ba ltar/_byang chub sems kyis zin pa'i dge ba'i ljon shing ni/_srid pa na 'bras bu lha mi'i bde skyid longs spyod mang zhing zhi ba myang 'das byang chub chen po'i bar du 'phel bar 'gyur ro/__/'di ltar las dang nyon mongs pa'i me 'obs chen pos bskor zhing 'du byed kyi sdug bsngal chu bo chen po kun gyi snod du gyur pa 'khor ba'i rgya mtsho tshul bzhin ma yin pa'i rnam par rtog pa'i rba rlabs drag pos thar pa'i gru gzings bshig pa can 'jigs su rung ba de/_sems can rnams kyis ma shes nas dga' zhing zhen nas khyim ltar rab tu bzung nas thar pa dang bral ba rnams/_de las gdon pa'i snying stobs chen po'i go cha bgo bas byang chub mchog tu sems bskyed pa kho na yin te/_spyod 'jug las/_srid pa'i sdug bsngal brgya phrag gzhom 'dod cing*/_/sems can mi bde bsal bar 'dod pa dang*/_/bde mang brgya phrag spyad par 'dod pas kyang*/_/byang chub sems nyid rtag tu gtang mi bya/_/zhes gsungs pa ltar ro/__/'dir skyes bu chen po gang la ni skyes bu chung 'bring lta bu'i rang don yid byed kyi sems pa yod pa ma yin te/_mkha' mnyam sems can kun la snying rje chen po ni/_dper na bkres pa zas la gdung ba dang skom pa chur gdung ba bzhin/_sems can 'ba' zhig sdug bsngal las bsgral ba'i don du sems pa ni snying rjes gzhan don la dmigs pa yin la/_sems can kun rnam mkhyen gyi go 'phang don du gnyer ba'ang shes rab kyis rdzogs byang la dmigs pa yin pas/_de la byang chub sems zhes grags te/_mngon rtogs rgyan las/_sems bskyed pa ni gzhan don phyir/_/yang dag rdzogs pa'i byang chub 'dod/_/ces so/__/de'ang 'bras bu rdzogs byang la dmigs nas de bsgrub par dam 'cha' ba ni/_smon pa'i sems bskyed yin la/_de'i bslab par bya ba ni/_bdag gzhan mnyam pa dang*/_bdag gzhan brje ba dang*/_bdag bas gzhan gces par 'dzin pa ste gsum du bzhag pa de'ang smon pa sems bskyed kyi bslab pa'i gnad mdor bsdus yin gyi/_smon sems de'i ngo bo ni/_byams pa sogs snying rje/_dga' ba/_btang snyoms te tshad med bzhi la yang dag par gnas shing*/_rgyu phar phyin drug bsgrub pa la dam bca' ba dang*/_de ltar dam bcas pa bzhin 'jug pa ni 'jug pa'i sems bskyed yin te/_de yi bslab bya ni pha rol tu phyin pa drug la bslab pa dang*/_'gro drug la sogs pa'i spyod yul lung ma bstan pa rnams kyang gzhan don du smon lam gyis yongs su dag pa'i dge bar bsgyur ba'i tshul rnams la bsten par bya'o/__/gnas skabs kyi dbye ba'i sgo nas gnyis nas drug gi bar te/_tshogs gnyis la ltos nas gnyis sam/_bden gnyis la ltos nas gnyis te so so'i skye bo'i kun rdzob dang*/_'phags pa'i don dam ste sems bskyed gnyis/_tshul khrims ting 'dzin shes rab te bslab pa gsum la ltos te gsum dang*/_yang na nyes spyod sdom pa/_dge ba chos sdud/_sems can don byed de gsum la ltos pa'i sems bskyed gsum mo/__/lam gyi khyad par tshogs sbyor gyi lam na/_khams kyi sgrib pa phyogs gcig kyang ma dag pas chos nyid mngon sum ma mthong ba don spyi'i tshul du 'jal bas mos pas spyod pa'i sems bskyed1 dang*/_dang po'i sa nas bzung sa bdun pa'i bar la bdag gzhan mnyam pa nyid du rtogs shing*/_khams kyi sgrib pa phyogs gcig dag nas ye shes mngon du mthong bas lhag bsam dag pa'i sems bskyed2 dang*/_dag sa gsum na khams kyi sgrib pa sngar bas kyang dag ste sa brgyad par nyon yid log ste rnam par mi rtog pa'i ye shes dang*/_dgu par yid shes dang sgo lnga log pas so so yang dag rig pa bzhi'i ye shes dang zhing dag pa gnyis dang*/_bcu par yid shes kyi byed las dag nas phrin las phun sum tshogs pa ste de ltar bzhi po la dbang 'byor bas rnam par smin pa'i sems bskyed3 pa dang*/_sa bcu'i rgyun mthar khams kyi sgrib pa sems sems byung gi bag chags kun gzhi dang bcas pa dag pas sangs rgyas kyi sa na sgrib pa thams cad spangs pa'i sems bskyed4 pa ste bzhi'o/__/de bzhin lam lnga'i khyad par lnga ru dbye na/_tshogs lam na las dang po pa'i sems bskyed/_sbyor lam na yongs su sbyang ba byas pa'i sems bskyed/_mthong lam na mthong ba'i sems bskyed/_sgom lam na rnam par grol ba'i sems bskyed/_mi slob lam na bsam gyis mi khyab pa'i sems bskyed de lam lnga'i rjes 'gro sems bskyed lnga dang*/_de bzhin pha rol phyin pa drug la ltos te de snyed kyi grangs drug dang*/_sa bcu po so so'i mtshams dbye ba nyi shu rtsa gnyis ni/_mngon rtogs rgyan las/_de yang sa gser zla ba gsum tshogs lam me sbyor lam/_/gter dang rin chen 'byung gnas mtsho/_/rdo rje ri sman bshes gnyen dang*/_/yid bzhin nor bu nyi ma glu/_/rgyal po mdzod dang lam po che/_/bzhon pa bkod ma'i chu dang ni/_/sgra snyan chu bo sprin rnams kyis/_/rnam pa nyi shu rtsa gnyis so/__/de yang dang po gsum tshogs lam/_/sbyor ba me lta bu sbyor lam/_/de nas phar phyin bcu sa bcu/_/mngon shes sogs lnga dag sa gsum/_/chos kyi dga' ston sogs gsum sa bcu pa kho na la yod do/__/de la sogs rgyal ba'i dgongs spyod thams cad bsam pas smon pa'i cha dang*/_'jug pas lag len khyab par byed pa la thams cad 'du'o/__/gang zag gang zhig rang nyid kho na mtho ris kyi legs pa'i yon tan don du gnyer nas/_rtag tu gcod pa med pa'i sgo 'phar te rgyun du mi gcod pa'i longs spyod khang pa'i nang nas slong mo ba'i yid la 'khrugs pa mi ster ba gang 'dod ster bar byed pa de la/_gtan pa med pa'i mchod sbyin byas so zhes bsngags par 'os te 'dod khams pa'i mnga' bdag tu 'gyur na/_mtha' dag pa'i sems can thams cad kyi don du dmigs te phan pa'i phyir byang chub kyi go 'phang thob par smon pa'i sems rgyun chags su yod pa lta ci/_tha na thang gcig tsam skyes pas kyang gnas skabs ngan song gi sgo gcod cing*/_mtho ris lha mi'i gnas rigs su skyes nas tshe ring nad med sogs bde ba bsten pas/_rgyu mthun gyi 'bras bu'i yon tan zad mi shes pa 'byung la/_smon sems de las kyang khyad par du 'jug pa'i sems kyi yon tan ni mtha' yas te/_spyod 'jug las/_byang chub smon pa'i sems las ni/_/'khor tshe 'bras bu cher 'byung yang*/_/ji ltar 'jug pa'i sems bzhin du/_/bsod nams rgyun chags 'byung ba min/_/zhes so/__/gzhan don du byang chub thob 'dod kyis dngos su sbyor bas khyab pa'i sems de cho ga la brten nas blangs pa gang nas bzung ste/_phyir ldog pa med pa'i sems kyis sangs rgyas kyi sar 'gro ba sgrol bar dam bca' shin tu yid brtan pa rgyud la thob pa'i stobs kyis/_dus de nas bzung ste bag med kyis rnam par g.yeng ba dang*/_gnyid log pa spyod lam lung ma bstan par gyur kyang*/_bsod nams kyi shugs bar ma chad par rgyun chags nyid sems bskyed pa po de'i sems rgyud du 'brel bar 'gyur ba yin te/_byang chub sems dpa'i spyod pa'i sa spyod 'jug las kyang 'thad pa dang bcas bshad de/_ji skad du/_gang nas bzung ste sems can khams/_/mtha' yas rab tu bsgral ba'i phyir/_/mi ldog pa yi sems kyis su/_/sems de yang dag blangs gyur pa/_/de nas bzung ste gnyid log gam/_/bag med gyur kyang bsod nams shugs/_/rgyun mi 'chad par du ma zhig_/nam mkha' mnyam par rab tu 'byung*/_/'di ni 'thad par dang bcas par/_/lags bzang gis ni zhus pa las/_/dman mos sems can don gyi phyir/_/de bzhin gshegs pa nyid kyis gsungs/_/zhes bshad do/__/thabs shes phun sum tshogs pa dang ldan pa'i stobs kyis dus thung ngu la spyod pa'i sgo re rer bslab pas kyang*/_thabs shes de lta bu dang mi ldan pa rnams kyis bskal pa mang po la bsgrub dgos pa'i tshogs kyang 'dums par 'gyur la/_dbye na/_nges pa dang ma nges pa la 'jug pa'i phyag rgya'i mdo las/_dpe lnga'i sgo nas bstan pa'i tshul ni/_phyugs dang*/_glang po che'i shing rta dang*/_nyi zla lta bu dang*/_sogs kyis nyan thos kyi rdzu 'phrul dang*/_sangs rgyas kyi rdzu 'phrul te de dag gi bgrod pa'i brtul zhugs myur bul mtha' yas pa ltar/_gang zag so so'i sems bskyed pa'i blo stobs chung 'bring chen po'i dbye ba'ang gsum ste 'og tu 'chad do/__/de yang blo stobs chen pos thabs la mkhas pa dang*/_brtson 'grus phul du byung ba dang*/_shes rab zab cing rno ba'i stobs kyis myur ba'i tshad grangs med gsum gyi sgrib gnyis kyi dam la bzhag pa mtha' dag 'jig pa'i tshul gyis 'tshang rgya bar 'gyur ba yin no/__/dpe ji ltar na 'bras bu smin pa la sa bon dgos kyang*/_sa bon de sa la lhung ba gtso mi che la/_rkyen rnams tshogs pa gtso che ba bzhin du/_byang chub tu sems bskyed pa la dang po bcos nas skye dgos kyang*/_byang chub kyi sems mchog de bskyed pa mi gtso la/_bcos min skyes pa gtso che ba yin no/__/stobs gsum las ni byang chub sems yang dag rgyud la skye bar 'gyur bas na/_de ltar goms pas snying rje che bar gyur pa ni byang chub sems kyi rtsa ba dang*/_yan lag bdun pa la sogs pa'i tshogs bsags gnad du smin par byas shing*/_mchog gsum la skyabs su 'gro ba ni sdig pa zil gyis gnon pas rten gyi stobs dang*/_de dag go rim bzhin du snying rje bsam pa'i stobs dang*/_tshogs bsags sbyor ba'i stobs dang*/_skyabs 'gro rgyu yi stobs su bshad pa yin no/__/sems bskyed skye ba'i rten gyi gang zag ni/_sems tsam pa'i lugs dang*/_dbu ma pa'i lugs te rnam pa gnyis su bstan te/_dang po ltar na smon sems tsam la ma nges kyang 'jug sdom ma thob pa thob pa'i rten so thar rigs brgyad las/_bsnyen gnas ni dus khrims yin pas mi rung la/_gzhan dge bsnyen/_dge tshul/_dge slong gsum re rer pha ma gnyis su phye bas drug dang*/_dge slob ma ste bdun gang rung gi sdom ldan ni nam yang dgos la/_dbu ma pa ltar na/_dkon mchog tA lar/_ji skad du/_rgyal dang rgyal ba'i chos la dad gyur cing*/_/byang chub bla med la'ang dad gyur nas/_/rgyal sras rnams kyi spyod la dad byed na/_/blo dang ldan pa rnams kyi sems skye'o/_/zhes sogs bsam pa'i rten gtso ba'i tshul sdong po bkod pa/_bskal bzang*/_nam snying mdo sogs las gsungs pas/_de'i rjes su phyogs nas rten ma nges par bshad pa thal 'gyur dbu ma'i lam srol la/_bsam pa phun sum tshogs pa rten gang rung rung la 'jug pa sems tsam pa'i lugs las kyang yangs pa yin no/__/srol gnyis ka la tshogs bsags pa ni lhag par sems bskyed skye ba'i thabs su gsungs so/__/sems bskyed skye ba'i rgyu thun min ni/_sems can kun kyang sems kyi rang bzhin 'od gsal ba bde bar gshegs pa'i chos khams rgya mtsho lta bu smin rung gi tshul du yod pa pas sa bon la myu gu bzhin de'i snying po can te/_zla ba sgron me'i mdo las/_bde gshegs snying pos 'gro ba yongs la khyab/_/sems ni rgya chen mchog tu rab bskyed de/_/'gro ba 'di dag ma lus sangs rgyas rgyu/_/zhes so/__/sems bskyed skye bas bdag rkyen ni theg chen dge ba'i bshes gnyen mtshan nyid dang ldan pa la rab tu bsten pas/_slob ma la ji ltar re ba ltar sbyin nus pas yid bzhin nor bu lta bu'i bla ma sdom ldan theg chen gyi don la mkhas pa'i yon tan mchog mnga' zhing*/_byang chub sems kyis thugs rgyud gang ba ni len pa'i yul te/_sdom pa nyi shu pa las/_bla ma sdom la gnas shing mkhas/_/nus dang ldan las blang bar bya/_/zhes so/__/de lta bu'i bla ma des thog mar dge ba srid pa'i mtha' la skyo ba bskyed/_bar du dge ba myang 'das kyi mtha' la zhen pa dgag pa dang*/_mtha' mar dge ba mtha' gnyis la mi gnas pa'i stong nyid snying rje'i snying po can gyi byang chub kyi sems la spro ba bskyed pa'i chos rnams dang*/_gzhan yang rgyan dang*/_sdong po bkod pa/_ma skyes dgra'i le'u/_'od srung gi le'u/_rin po che'i phung po'i mdo sogs las legs par gsungs pa'i byang chub sems kyi yon tan dpag yas brjod do/__/dri bzang sna tshogs kyi khu bas skyang nul byed pa la sogs mdzes shing snying du sdug pa ngom pa'i sgo nas gnas khang brgyan pa'i tshul yang*/_dang po byi dor legs par byas shing gur gum dang*/_dri bzang po'i spos chu dang*/_ba byung la sogs pas bran zhing chag chag gdab pa dang bcas/_sgeg chos ma yin par gus pa bskyed phyir yan lag gdong sogs thams cad bkru zhing*/_gos gtsang ma bgos la grags 'dod dang bral bar dkon mchog gsum gyi yon tan 'ba' zhig yid la sems pa yi/_dad dang nges shes drag pos 'phan gdugs rgyal mtshan bla bre sogs dang*/_mchod yon sogs dang*/_rgyal srid sna bdun/_bkra shis rtags brgyad/_rdzas brgyad sogs mchod pa'i tshogs ma tshang ba med pa mang po'i phru ma 'debs pa ste bkram pa la snying thag pa nas dga' zhing dge ba chud mi za ba'i spro ba dang bcas pas dgod cing yi rang bar bya'o/__/mchog gsum la sogs pa'i bden pa brjod pas sa gzhi thams cad dag pa'i zhing khams kyi bkod pa ltar/_rgya dpang tshad las 'das par rnam par dag pa'i dbus su gnas khang de nyid stong gsum las rgya che ba'i gzhal med khang dang*/_rin po che sna tshogs las grub pa rgyan bkod sogs phun sum tshogs pa'i dbus su/_rin po che sna tshogs las grub pa'i pad+ma nyi zla dar zab kyi khri sogs lta na sdug pa mang pos mdzes par bsam la/_dam tshig gi rten rgyal ba sras dang bcas pa'i gzugs brnyan dang*/_theg chen gyi glegs bam sogs sku gsung thugs rten rab gnas can ji snyed yod pa mtha' dag gnas der bos nas te/_zla ba sgron ma'i mdo las byung ba/_bzhengs shig bzhengs shig stobs bcu mnga' ba'i lha/_/sogs dang*/_rig pa mchog gi rgyud las byung ba/_ma lus sems can kun gyi mgon gyur la sogs pa'i tshig gis spos rol dang bcas dbyings nas ye shes sems dpa' rgyal ba sras dang bcas pa thams cad dgug cing drangs nas dam tshig gi rten rnams la gnyis med du gzhug pa'i cho ga ni/_mas bu gcig pu stor tshe rgyug pa ltar ram mdza' pho mo gcugs dus btab pa'i dam bca' dran pa las kyang myur bas rgyal rnams phyogs bcu'i zhing khams gzhan du gzigs pa yol ba ste de ma thag tu 'di kho nar byon pa'i tha snyad btags pa'o/__/dkon brtsegs las/_gang zhig rgyal ba yid byed pa/_/de yi mdun na de bzhugs te/_/rtag par byin gyis rlob par byed/_/nyes pa kun las rnam par grol/_/zhes so/__/'dir spyan 'dren pa'i tshig ni/_gang zhig 'khor ba na gnas pa'i gdul bya ma lus shing lus pa med pa'i sems can kun gyi sdug bsngal las skyob pa'i mgon dang phan gdags pa'i dpung gnyen mchog tu gyur kyang bdud kyi sde dpung dang bcas pa'i tshogs ma lus pa 'joms par mdzad pa'i dgra ru gyur cing*/_ji lta ba chos rnams kyi chos nyid dang*/_ji snyed pa chos can shes bya mtha' dag chags thogs med par mkhyen cing gzigs pa yi phyogs bcu'i bcom ldan 'das rgyal ba sras dang bcas pa thams cad bdag gi sdum par te gnas khang 'dir tshogs bsags pa'i zhing dang*/_skyabs yul du mchis te gshegs su gsol/_bsnyen bkur gyi khrus gsol ba ni/_dang po 'di ltar 'jig rten phal pa'i las kyi sprul pa dngos po bcos ma ma yin par lha tshogs rnams 'byon pa'i shul te lam du khrus gsol ba'i gnas kyi khang bu brtsegs pa rin po che las grub pa dri bsung zhim pos phyogs mthar khyab pa'i rang bzhin can/_shel dang nor bu sogs rin po che sna tshogs las grub pa'i sa gzhi khod snyoms zhing mig mang ris su bris shing bkra ba dang*/_rin po che 'od 'bar ba'i ka ba yid du 'ong bar ldan zhing*/_g.yu dmar dang mu tig rin po che 'od chags pa'i bla bre sogs rgyan gyi rnam pa mang po dpyangs shing mdzes par byas pa der/_bde bar gshegs pa sangs rgyas rnams dang*/_rigs kyi bu mchog sras byang chub sems dpa'i tshogs dang bcas pa thams cad byon nas bzhugs pa la/_spos 'dag chal gyi chus sum nyis gang ba'i bai DUr+Ya la sogs pa'i nor bu rin po che'i bum pa nas/_khrus kyi rim gro bgyid pa'i phyir rang las sprul pa'i smin legs ma ste mchod pa'i lha mo rnams kyis bstod pa'i glu dang gar sogs mdzes pa dang snyan pa'i rol mo'i rnam par 'gyur ba dpag tu med pas phan tshun gcig gis gcig la 'gran pa lta bur khrus kyi bya ba la brtson bzhin sku phyi ba dang*/_na bza' dang*/_rgyan gsol ba sogs nye reg gi cho ga ste bya ba rnams gus pa'i rnam 'gyur gyis byed pa la mkhas pa'i ri dwags mig te mchod pa'i lha mo rnams kyis dri bzang gi phye ma dar gos sna tshogs pas thum por dril ba mang pos khrus gsol ba'i rlan gyi cha thams cad phyis/_bsku mnye'i rdzas sna tshogs pas sri zhu'i las byed pas g.yeng zhing gos rgyan sogs 'bul ba yang*/_'di ltar kha dog gcig tu mi gnas pa dbang po'i mtshon te 'ja' tshon lta bu la phal pa'i las kyis thags su btags pa med pa'i yon tan bsod nams kyi stobs las byung ba'i lha rdzas kyi gos rang snang dge ba'i rin gyis nyo ba dang 'dra la/_'bad rtsol med par dgos 'dod thams cad 'byung ba'i yon tan ni dpag bsam ljon pa las byung bas btsong pa lta bu'i gos pany+tsa li ste kha dog lnga pa/_dbyibs ni dar gyi chas gos lnga dang*/_gzhan yang chags bral gyi tshul mdzad pa rnams la chos gos rnam gsum sogs dang*/_gos de dag kyang lcid kyis non pa spangs shing sha mi sgrib pas srab la reg bya 'jam zhing ljid med pas yang ba'i gos te byang gling pa'i gos srang gcig la/_rgyal chen rigs bzhi'i srang phyed yin pa nas/_'phrul dga'i gos srang gcig gi drug cu rtsa bzhi'i cha gcig las med pa'i bar je yang du song ba dang*/_tshangs ris kyi gos la srang gis tshad gzhal du med do/__/de lta bu'i gos bzang po de dag dri bzang sna tshogs dang*/_spos kyi chus bgos shing byugs pa longs sprul gyi rnam pa can so so la 'os shing 'tshams pa/_rnam grangs re re la cha shin tu mang po dang*/_rin thang gi tshad brjod pa bral la brjod na khrel ba'i gnas su gyur pa lta bu'i rin chen rgyan gyi bye brag gdu bu/_dpung rgyan/_snyan cha/_cod pan sogs rin po che'i rgyan brgyad po re re'ang grangs tshad brjod pa dang bral ba/_de rnams 'bul ba'i yul 'dod pa'i yon tan la 'dzin zhen gyi bag chags phra ba'ang spangs shing spangs pa dang rtogs pa'i yon tan mtha' dag mnga' ba'i thub dbang sangs rgyas rnams la dgos pa bral yang*/_bdag gis tshe rabs du mar bsod nams kyi tshogs ma bsags pas dbul zhing bkren pa dang ldan pas bdag tu bzung ba'i longs spyod med pas na bsod nams kyi tshogs rdzogs pa'i slad du yid kyis sprul pa'i mchod pa 'di rnams bdag gir bzhes par mdzod cig ces mkha' khyab tu phul bas rang gzhan sems can thams cad kyi bsod nams kyi tshogs rdzogs shing*/_nyes spyod kyis gdung ba las skyob pa'i ngo tsha shes shing khrel yod kyi gos dang*/_gzungs spobs ting 'dzin mtshan dpe sogs yon tan gyi rgyan phun sum tshogs pa thob par gyur cig snyam pa dang*/_de bzhin du 'jig rten dbang phyug la sogs nye ba'i sras brgyad dang*/_ngan song kun 'dren la sogs te byams pa/_mthong ba don yod/_mya ngan mun 'joms/_spos kyi glang po/_dpa' bar 'gro ba/_nam mkha' mdzod/_ye shes tog_/'od dpag med/_zla 'od/_bzang skyong*/_drwa ba can gyi 'od/_rdo rje'i snying po/_blo gros mi zad pa/_spobs pa brtsegs pa/_kun tu bzang po ste bskal bzang gi sems dpa' bcu drug dang ni khyim pa'i tshul byang chub sems dpa' chos 'phags/_rtag tu ngu dang*/_li tsa bI dri ma med par grags pa sogs byang chub sems dpa' thams cad la'ang dbul bar bgyi'o/__/gzhan yang gling bzhir ri rab tshangs pa dang bcas pa stong la stong dang po spyi phud kyi 'jig rten/_de stong la stong gnyis pa bar ma'i 'jig rten/_de stong la stong gsum gyi stong chen po'i 'jig rten gyi khams te de thams cad gcig car khyab pa'i dri'i bzhon par 'khyud pa ste rlung dang 'grogs pa'i tsan+dan sogs spos kyi bsung zhim po'i dris ni/_bsod nams bye ba ste dpag med bskrun pa'i 'byung gnas mtshan dang dpe'i byad bzang pos brgyan pa'i gser sbyangs pa rab tu mdzes pa'i brtan pa 'phrog ste mog mog por byed pa'i sku 'od la byug par bgyi'o/__/dper na dag pa'i zhing khams kyi bkod pa ni/_sangs rgyas de'i smon lam dang*/_byang chub sems dpa' rnams kyi bsod nams kyi rang snang las gzhan ma yin pa ltar/_tshad med bzhi'i thugs dang ldan pa'i de bzhin gshegs pa rnams kyi ye shes kyi rang snang dang mthun par tshad med bzhis blo sbyangs pa'i gang zag tshogs gsog pa po'i yid ngor dmigs shing snang ba ni/_dmigs pa rgya che shing nye 'khon med pa'i btang snyoms kyi rang bzhin shin tu rgya khyon yangs pa'i shel gyi sa gzhi la/_phan pa'i rlan dang ldan pa'i yid 'ong gi byams pa'i rang bzhin pad+mo ge sar dang bcas pa'i 'dab ma stong brdal ba'i steng der/_'gro ba'i sdug bsngal gyi gdung ba zhi ba'i bsil zer can snying rje dang*/_rmongs pa'i mun pa sel ba'i shes rab zung du 'jug pa'i rang bzhin nyi zla bkrag tu 'tsher ba bstar legs pa'i gdan la/_zag pa med pa'i dga' ba chen po'i rang bzhin bcom ldan 'das 'khor byang chub sems dpa'i tshogs dang bcas/_bskal pa rgya mtsho lta bu'i bar bzhugs nas rjes su bzung du gsol/_rang bzhin du lus kyi rnam 'gyur las sems kyi mngon rtogs gsal phyir sems la dad gus gang yang med bzhin grags 'dod dang tshul 'chos sam bab col goms pa lung ma bstan gyi bya ba la 'jug pa'i tshul min pas lus btud pa'i rtags kyi rnam 'gyur snying khar thal mo sbyar la dad cing gus pa dang*/_'jigs shing bag yod khrel dang ngo tsha shes pa dang bcas pa'i sems kyi mngon rtogs ngom pa la me tog gi dog pas rab tu bzung ba ste gang ba'i snyim pa'i snod ni pad+ma kha 'bus pa'am ga'u chung gi brtul zhugs 'dzin pa yi dbyibs lta bu dgos pa yin no/__/shes rab kyis chos thams cad kyi gnas lugs gzigs pas spyan lta bu rig pa dang*/_snying rjes gzhan don la gshegs pas zhabs su ldan pa sogs gzhan yang lam bde ba byang chub sems dpa'i theg pa nas 'bras bu bde ba sangs rgyas kyi sar gshegs pas na bde gshegs kyi yon tan dang*/_gzhan yang dam pa'i chos dang*/_'phags pa'i dge 'dun rnams kyi yon tan mtha' dag gnas kyis thag ring por bskal pa bzhin 'phags sa ma thob bar mngon du mi mthong yang*/_dad pa dang mtshungs par ldan pa'i yid kyi skyed mos tshal du mgron du khug pa ltar 'ongs pa'i mod la/_'jigs skrag dang skyo ba la sogs pa'i shugs kyis min par/_dad pa'i gdung shugs drag pos ba spu gcig tu zing pa'o/__/de ltar dad pas mdun bsus te yan lag bdun pa 'bul ba'i tshul yang*/_dper na sprin bral gyi ston zla gzhon nu khrus la 'jug pa dang 'dra bar gzugs brnyan 'dzin nus pa shin tu dwangs pa'i rdzing bu'i nang du gzugs brnyan ci shar yang shin tu gsal bas na/_de'i khar rma bya'i bu mo yid 'jo zhing sgeg pa'i gzugs can gyis zlos gar rtsed 'jo la rol na/_rdzing bu dwangs pa de'i nang du de dag gi gzugs brnyan shar ba de dang gzugs dngos gnyis shin tu 'byed dka' bar snang la/_de lta bu'i rang gi lang tsho'i grangs med par sprul pa'i rnam grangs ji snyed pa ni sa chen po'i rdul gyi rnam grangs dang so sor mi 'byed pa shin tu 'khrul pa bskyed par byed pa dpag tu med par sprul te phyag gi las kho na la sgo gsum chig dril du 'jug pa'i bya bas brel lo/__/spyir byang chub sems dpa' rnams kyis bdog rgu'i dngos po thams cad gtong ba sbyin sogs phar phyin drug gi chags bdun spong ba dang khyad chos bzhi ldan yin mod/_skabs 'dir las dang po pa'i sems bskyed dang rjes mthun bsam pa1/_dngos po2/_mchod rdzas3 bcas mchog gsum la dmigs te/_dag pa gsum dang ldan pas gtong ba'i yan lag khyad chos bzhi ldan rdzogs pa'i dngos 'byor dang*/_des kyang mtshon par mi nus pas dpe zlar rung ba med pa yid kyis mchod rdzas ma tshang ba med par sprul te rgya dpang tshad grangs bla na gzhal bya mchis pa ma yin pas/_mchod pa'i sprin rab 'byams su spro bar byed pa ste/_dkon mchog tA lar/_me tog phal cher me tog bla bre dang*/_/me tog bkod pa'i 'od ze rab bkye ste/_/me tog sna tshogs kun tu bkram byas nas/_/bdag nyid chen po rgyal ba sras bcas mchod/_/lag pa'i mthil na yod pa bsam yas rnams/_/rgyal ba gcig la mchod pa byed pa ltar/_/rgyal ba ma lus kun la'ang de bzhin te/_/drang srong ting 'dzin rnam 'phrul de 'dra'o/_/zhes pa ltar/_'phags pa kun tu bzang po'i ting nge 'dzin gyi rnam 'phrul bsam gyis mi khyab pa'i mchod pa'i yon gyis rgyal ba rnams la mchod pa de la do zlar spobs pa tsam du 'bul bar phrag dog bgyid pa'i tha snyad btags pa'o/__/ngag gi sgo nas mu cor te tshig 'chal ci rung rung smra ba mi dge ba'i las dang*/_lus ngag gi bdun po'i sogs dang*/_bag chags sogs sgo kun nas nyes tshogs sdig pa thams cad kun/_dge 'bras kyis zil gyis mnan te de la 'jigs shing skrag nas gzhan du bros pa'i tshul gyis sdig pa'i rang gzugs ngan song du myong dgos pa yin kyang*/_gtan med min te/_srid pa'i rtsa ba gnas lugs kyi don la sgrib pa'i mun nag stug por kun gzhi'i khams la 'chab pa ste bag nyal gyi tshul du yod pa kun/_sbyong byed thabs gnyen po sngar byas la 'gyod pa/_phyin chad mi byed pa'i sdom sems/_gnyen po dge la 'bad pa/_yul mchog gsum ste stobs bzhi dang ldan pa'i nyin byed 'bar bas drung nas sbyangs shing bshags so/__/sgo gsum dge la sbyor ba gang gis bdag nyid ma 'khrugs bzhin du/_bsam pa bzang po'i khyad par gcig gis gzhan sangs rgyas byang sems nyan rang dag pa'i rnam dkar yud tsam la 'phrog pa'i chom rkun gyi brtul zhugs te tshul ni rjes su yi rang ba kho nas byas so/__/dman pa la dgag sgra sbyar te thar med 'khor ba'i sems can rnams kyi nyes tshogs spyod pa ni gnyen pos ma dul ba rang bzhin du ma zhi zhing g.yo sgyus bslad pa/_chos phyogs su yo byad gtong ba'i don du lcags kyi pha gu bzhin rnam par sra ba/_las ngan bag chags la goms pa ni rdo rje'i 'dag pa ltar mkhregs pa/_nges 'byung gi rlan dang bral zhing dad sogs dge ba'i lo tog gang yang skye mi btub pas tha ba ltar gyur pa/_dam pa'i chos ma yin pa gzhan gang gis kyang 'dul thabs brtan pa dang bral ba gang yin pa de la dgongs nas/_dug gsum sogs 'dul ba'i gnyen po drang nges kyis don rjod byed sde snod gsum dang brjod bya bslab pa gsum gyi ngo bo chos 'khor gyi rim pa gsum du bsdu ba'i rtsibs rnon pos/_bdag dang bdag gir 'dzin zhen sgrib gnyis bag chags dang bcas pa gcod par byed cing mngon mtho dang nges legs kyi mu khyud las 'da' ba med par 'dzin pa de bdag gzhan sems can gyi mos pa dang 'tshams par bskor bar mdzad du gsol zhes bskul lo/__/phyogs bcu'i 'jig rten gyi khams mu med pa na bzhugs pa'i rgyal ba rnams dang*/_de yi thugs sras khyed rnams mya ngan las 'das na/_rnam par grol ba'i thabs kyis spangs par gyur pa'i 'gro ba 'di thams cad kyis chos dang chos min lam dang lam min mi shes pas/_sdug bsngal rgyu 'bras kyi gnas skabs bsten pa las thar pa'i dus med pa'i tshul 'di lta bu mthong nas/_bskal pa rgya mtsho'i bar du mya ngan las 'da' ba min pa'i zhabs pad rdo rje'i gdan khri la bzhugs par mdzad slad/_lus dang longs spyod dge ba'i dngos po kun gyi rin thang thams cad gcig tu bsdus te spungs nas phul ba yin pas bzhugs par mdzad du gsol/_/zhes gsol ba gdab bo/__/'di ltar bdag tu blta ba dang bcas pas srid pa'i bde 'bras la dmigs pa'i dge ba ni bsod nams cha mthun te thabs shes khyad par can gyis ma zin pas khong khro sogs kyis zad par 'gyur bas 'dar ba'i rang bzhin te/_gal te rkyen gyis ma zad du zin kyang*/_de 'dra ba'i rnam par dkar ba'i 'bras bu yang*/_srid par lan gcig tsam mngon par mtho ba'i lha mi'i gnas thob kyang*/_de myong stobs kyis zad nas srid pa phyi mar lhung ba'i sdug bsngal dang cho nge ste smre ngag 'don pa dang bcas pa'i rang bzhin las ma 'das la/_ched du dmigs nas dus gsum gyis bsdus pa'i dge rtsa bsags dang byed 'gyur thams cad 'gro kun rdzogs pa'i byang chub 'ba' zhig thob pa'i ched du bsngo ba dmigs med sgyu ma lta bu'i tshul du/_ngo bo lcags khams la gser 'gyur gyi rtsis thebs pa bzhin/_dge rtsa byang chub tu bsngo ba'i 'dun pas sbyor ba 'di ni/_sangs rgyas rnams thabs la mkhas pa'i khyad chos las ston pa gzhan gyi lugs phyi rol pa la grags pa med do/__/de yang blo gros rgya mtshos zhus pa'i mdo las/_ji ltar rgya mtsho che nang chu thigs lhung*/_/rgya mtsho ma skam bar du de mi zad/_/de bzhin byang chub yongs bsngos dge ba gang*/_/byang chub ma thob bar du de mi 'dzad/_/ces so/__/spyir longs spyod rang la yod pa des chog shes par byed pa brkam chags kyi gdung ba zhi ba'i bdud rtsi'i btung ba lta bu yin pas de dang ldan na bdag tu bzung ba'i dngos rdzas rgya che ba mchod rgyu med na'ang*/_cung zad tsam dmigs pa'i rten byas te bdag pos ma bzung ba dang yid kyis sprul pas mchod na rang gi longs spyod mchod pa dang 'dra bar tshogs rdzogs par 'gyur gyi/_dgos pa'i yo byad cung zad tsam gyis ma ngoms par nor longs spyod sna tshogs pa gsog bskrun byed pa la 'bad cing mang po yod bzhin du ser snas bcings nas 'bul mi nus na/_skyes bu'i yid la ma bzung ba'i lha klu mi yi yul na yod pa'i mchod pa'i sprin te mang po yang gtong ba'i dngos po dang 'brel chad pas/_tshig tsam dag gi pha mthar 'khyams nas mchod yul rdzun gyis bslu ba'i nyes pa de la skrag par gyur nas/_bdag gi lus mchod yul rnams kyi stan du dbul ba dang*/_dus gtan du rgyal ba sras dang bcas par bdag lus dbul ba la'ang brtson 'grus chen pos do gal bgyid de/_de'i dgos pa ni dkon mchog gsum gyi bran dang 'bangs su dam bcas pa'i gang zag de dkon mchog gsum gyi thugs rje'i grib bsil la brten nas/_dper na so ka'i dus su tsha bas gdung ba na ljon shing me tog gis brgyan pa lo 'dab rgyas pa'i 'jo sgeg can gyi grib mar bsdad pas dbugs 'byin thob pa ltar/_tshe 'dir sdug bsngal las skyob cing legs dgu'i dngos po 'byung bar ma zad 'chi ba'i tshe na'ang rgyal ba sras dang bcas pas dag zhing du 'khrid par mdzad cing*/_gal te tshul 'chal sogs las ngan goms pa'i dbang gis rnam pa kun tu sdang zhing 'khrugs pa'i khro gtum can gshin rje'i pho nya'i mdun sar son na yang*/_dkon mchog dran pa'i mod la de dag gi khro gnyer rtsub mos 'jigs pas sdug bsngal ba las thar pa'i bsod nams kyi rin thang ngam don chen po zad mi shes so/__/de ltar sems sbyangs shing tshogs bsags pa des ni gti mug gi mthus non te de kho na nyid kyi don la rmongs shing las 'bras ma shes nas sdig pa'i las du ma goms shing bsags pa'i sgrib pa dang ldan pa bdag gi rgyud kyi sgrib pa'i dri ma sems can gyi don du sbyang ba'am/_byi dor shin tu bsten pa'i dwangs shel la gzugs brnyan 'char rung ba ltar/_bsod nams ma yin pa'i rgyud rnyog pa can de nyid dwangs shing gtsang la dag pa'i sems kyi nang du/_rags pa brda las byung ba'i sems bskyed cho ga'i sgo nas blangs pa ji bzhin thob pas bla na med pa'i sdom pa de'i gzugs brnyan dngom pa yin no/__/bdag cag rnams las ngan pa'i dbang du gyur pa'i steng 'dod lha bdud sdig can dang chung ma dang pad+ma'i phreng ba bcas kyi spyi bo na me tog gi mda' lnga yod pa 'di lta ste/_thar lam bsgrub pa'i bar chad du chos dang 'jig rten gyis khengs shing dregs par byed pa1 dang*/_blang dor gyi phyogs la rmongs par byed pa2 dang*/_phyin ci log lta bas kun nas rmongs par byed pa3 dang*/_brjed ngas kyis dran pa nyams pas brgyal bar byed pa4 dang*/_'jig rten chos brgyad kyis g.yeng bar byed pa5 ste me tog gi mda' bsnun pas nyon mongs pa lnga gang shas che ba de la phogs pas de rab tu 'bar bar gyur te de'i dbang du song na thar pa dang mngon mtho las nyams par gyur pa'i nyes pa brgya phrag mang po'i g.yang sar thar dka' ba'i gnas su lhung ba yi rgyud la rims nad kyi rnam grangs mi 'dra ba mang pos dus ring po nas shin tu btab pa'i nad de rtsa nyon nye nyon la sogs pa rnams nad kyi rnam grangs de dag gso ba'i thabs kyang 'du ba'i nad la dpyad byed pa'i gso dpyad phal pa rnams kyis ji ltar bzang yang de'i mdun sar nad bzhi brgya rtsa bzhi rnams las 'tsho ba'i thabs mi shes pa ltar gzhan gyi nyon mongs pa'i nad las grol ba'i dbugs mi phyin te/_'o na sus phyin ce na/_sman pa mchog sangs rgyas bcom ldan 'das la skyabs su lhag par dong bas myang 'das su grol bar 'gyur ro/__/bdag gi mos pa brtan pos gsol ba btab pa gang gis slad du sems bskyed len pa'i gnas 'dir gshegs nas/_mtha' yas pa'i sems can gyi khams thams cad la rtag tu sgrib med du gzigs shing mkhyen brtse'i ye shes kyis chags thogs med par dgongs pa'i ston mchog sangs rgyas rnams ni/_theg pa chen po'i lam las phyir mi ldog pa'i sar gnas pa'i skyes bu byang sems 'ba' zhig pa'i tshogs kyi dbus na zla ba rgyu skar gyi dbus na'am ri rgyal ri phran gyi dbus na 'phags pa ltar sku gsung thugs kyi gzi byin mchog tu 'bar zhing mthong na mi mthun pa med par lham mer mdzes par bzhugs pa la/_dad gus kyi gdung shugs drag pos dpang por gsol ba gdab par bya'o/__/cho ga dngos la/_spyir rgya chen spyod pa'i srol la smon 'jug gi sdom pa 'bogs chog so sor yod la/_zab mo lta ba'i lugs slob dpon chen po kriSh+Na pa'i spyod 'jug dka' 'grel ltar smon 'jug gi sdom pa len tshul dbye na/_smon sems la ji ltar sngon gyi sogs sh+lau ka gcig po lan gsum dang*/_'jug sdom ni dkyus su bstan pa bzhin no/__/gang ltar yang skyabs 'gro bdun cu par/_/sdom pa kun la yod mod kyi/_/skyabs su ma song ba la med/_/ces pa ltar so thar sogs kyi sdom pa gang blangs kyang skyabs 'gro dngos gzhi'i rten du dgos la/_khyad par byang sdom sngon du theg chen thun min tshul gyis skyabs su 'gro ba la lan gsum gyis sgo nas skyabs su 'gro bar byas pas gzhi bcas la/_skabs 'dir smon 'jug stabs gcig len pa la/_bla ma las len na blo bcos pa sngar bshad pa ltar bla ma nyid kyis byas la bla ma med na rang gi blos sems la nges par byas te phyag 'tshal maN+Dal phul/_pus btsugs thal mo sbyar te/_phyogs bcu na bzhugs pa'i sangs rgyas bcom ldan 'das rnams dang*/_sa bcu la gnas pa'i byang chub sems dpa' sems dpa' chen po rnams dang*/_bla ma rdo rje 'dzin pa chen po rnams dgongs su gsol/_zhes dgongs su gsol ba gsum gyis chos dbyings spros pa dang bral ba'i ngang la mnyam par bzhag pa las 'dzin med sgyu ma lta bu'i snying rje chen po'i ngo bor sad par byas nas/_skabs 'dir rgyal ba sras dang bcas pa'i tshogs kyis gzhan don du byang chub mchog tu thugs bskyed pa dang*/_de rnams kyis lam bslab pa gsum gyis bsdus pa'i phyin drug dang*/_bsdu dngos bzhi'i don la rim pa bzhin du bslab par mdzad pa'i brtul zhugs la gnas pa de bzhin du/_bdag gis kyang mtha' dag bsgrub par bya snyam pas blang ba yin no zhes spyir dam bcas nas/_bye brag tu thar pa la sgrib pa'i nyon sgrib zug rngu'i dum bu gang zag gi bdag med rtogs pa'i stobs kyis bcad par gyur kyang*/_thams cad mkhyen pa la sgrib pa'i shes sgrib ni chos kyi bdag med yongs rdzogs ma rtogs shing goms pa med pas 'khor 'das blang dor du blta ba sogs yul gyi ro la bcags pa yi gnyen pos drungs nas 'byin ma nus pas/_nyan rang dgra bcom rnams shes sgrib dum bu las ma bsgral ba de las bsgral bar bya snyam pa dang*/_sgrib pa gnyis ka'i 'ching bas kun nas dkris pa yi steng du lta ba ma rungs pa tshangs pa la sogs phyin ci log pa mu stegs byed rnams dang*/_grub mthar ma zhugs pa phal pa so so'i skye bo nas/_slob pa 'phags pa sa bcu pa'i bar la gnas pa yi sems can sgrib pa de dag las ma grol ba rnams dgrol bar bya snyam pa dang*/_shin tu sdug bsngal drag po'i shugs kyis gzir bas bzod dka' zhing yun ring ba las/_dbugs 'byin thob pa med pa'i ngan song gsum na gnas pa'i sems can rnams/_dbugs 'byin chen po'i gnas te gnas skabs mngon mtho dang*/_mthar thug thar pa mchog gi go 'phang la sbyar ba dang*/_mdor na srid pa'i rten cing 'brel 'byung bcu gnyis kyi rang bzhin bar ma chad par 'khor ba'i 'khor lo'i rgyar las kyis dbang med du chud pa'i sdug bsngal dngos su myong ba'i sems can phal pa nas/_las kyi dbang gis mi 'khor yang rten 'brel bag chags gnyis snang 'khor ba'i chos su shar ba tsam dbyings su ma ldog pa'i sa bcu'i byang chub sems dpa'i bar sems can yod do cog thams cad mtha' gnyis la mi gnas pa'i ye shes mya ngan las 'das pa'i grong khyer chen por bdag kho nas dgod par byed do zhes snying thag pa nas dam bca'o/__/smon 'jug stabs cig len tshul cho gas ji ltar bzung ba'i mtshan nyid brjod pa ni/_sngon byon drang srong klu sgrub yab sras rjes 'brangs dang bcas pa rnams kyi lugs la brten zhes theg chen dbu ma'i lung 'bogs cho ga rgyas bsdus gang rung la brten par gsungs la gzhung tshig lan gsum brjod pas kyang rung ngo*/__/dang po blangs nas bzung dus rtag tu nyin dang mtshan mo lan gsum du/_spyod 'jug ltar byang sdom len chog gi sgo nas smon 'jug byang chub kyi sems gnyis len zhing*/_de yang kha khral ltar ma yin par sems rnam pa de gnyis kyi ngo bor bskyed cing goms par bya ba la nan tan bya'o/__/chos rnams thams cad rkyen bzhin te/_/'dun pa'i rtse la rab tu gnas/_/zhes pas rkyen la rag las shing khyad par rang gi 'dun pa gang la bzhag pa'i rtse la sgo gsum gyi bya ba'i chos rnams dge mi dge gang du 'gyur ba'i rkyen chags pas/_skabs 'dir sems gnyis stabs gcig len pa'i cho ga lan gsum du ste brjod pa dang pos smon pa dang*/_gnyis pas 'jug pa dang*/_gsum pas smon 'jug gnyis ka ches brtan par thob pa ni/_slob dpon rgya mtsho'i sprin gyi bzhed pa bla na med pa'o/__/bdag sogs 'khor ba'i sems can phal pa rnams kyis sngon chad skye ba du mar pha ma dang drang srong tshangs pa sogs gyur pa'i tshe'ang sems can gzhan gyi don la lta ci smos/_rang don nyid kyi don du mngon sum du mi skye ba ma zad rmi lam du rmi ba'ang ma myong ba'i rin po che thams cad kyi nang nas rin chen dbang gi rgyal po rin che ba ltar/_dge ba'i sems kyi khyad par gsar pa 'dis bdag gi mi yi srid pa 'dir don chen 'bras bu rnyed pas rin thang gzhal du med par byas so/__/dpe ji ltar na/_rgyal bu dwa'u rgyal rigs las nyams nas gdol pa dang*/_dmangs rigs su 'khyams te de dag gi bya ba yang byas pa gang zhig_/phyis rgyal bu yin pa ngo shes nas cho rigs kyi lhag par btsun pa rang gi pha'i rgyal srid kyi gnas gsar du thob pa ji bzhin du/_sems kyi rang bzhin chos sku'i gdung ngam de bzhin gshegs pa'i rigs su ngo shes nas/_rgyal ba'i mdzad pa bsgrub pa la zhugs pas rgyal ba kun gyi sras su deng gyur pas/_theg chen gyi rgyal srid la dbang ba'i byang chub sems dpa'i ming gi cod pan thob bo/__/sa 'og sa steng sa bla ste srid gsum bdag po gzhan 'phrul dbang byed kyi rgyal po dang*/_tshangs pa la sogs pa dang*/_'jig rten gsum po rang rang gi gnas na che ba'i lha klu'i mi'i rgyal po byas te/_'jig rten na nga las che ba med do snyam pa dang*/_che bar rlom pa de nyid kyis 'jig rten rmongs pa'i dbang gis mchog tu 'dzin pa'i rgyal phran dang*/_blon po sogs 'thob dang mnga' thang gi bla dwags dpyangs te ming btags pa de dag ni 'khor ba'i rang bzhin la mtho dman nges pa med pa'i 'phral snang nyams dga' ba tsam las/_rtag pa med pa de tsam la'ang rang nyid dregs shing gzhan dag dga' bar byed pa'i gnas su lta na/_de 'dra lan brgya phrag du mar byas kyang snying po med la/_da res theg chen gyi rgyal srid dang byang chub sems dpa'i ming gi gnas thob ste 'gro ba'i mgon du gyur pa ni de ring tsam yin la/_rgyu de las sems can gyi khams mtha' yas pa dag kyang dbugs dbyung ba'i sems mi 'dor zhing*/_phan sems kho nas bde ba'i longs spyod la mgron du bos nas tshim par byas nus pa yin pas dga' ba'i 'khri shing slong ba la lha yang ste yang gi sgras lha min la sogs pa dag kyang phyogs shig ces gzhan gyi sems gzengs bstod do/__/byang chub sems dpa' bsod nams chen po dang ldan pa yin pas de la gnas skabs dus ma yin pa'i 'chi ba dang*/_'phags sa thob na skye 'chi rang mtshan pa bral zhing mthar thug bsam gyis mi khyab pa'i 'chi bdag gi bdud kyi rgyu ba rtsad nas 'joms shing*/_mi gnas pa'i myang 'das thob pa'i phyir bdud rtsi dang tshogs gnyis kyi mdzod dang ldan zhing zang zing gi longs spyod mi zad pa'i gter du gyur pas 'gro ba rnams kyi bkren pa mtha' dag gi dbul ba sel ba'i yid bzhin gyi nor bu dang*/_nyon mongs pa dang des skyed pa'i 'du ba'i nad thams cad zhi ba'i sman mchog dang*/_'gro kun phan bde'i gnas su gyur bas srid pa'i lam du sdug bsngal sna tshogs kyis dub cing bde ba don du gnyer bar byed pa'i mgron po'i sems can rnams la dbugs 'byin ster ba'i ngal stegs sogs yin pa'i phyir/_bdag ni deng gi dus 'di nas bzung ste 'khor ba ma stongs kyi bar du 'gro ba'i nyer 'tshor gyur pa yin no/__/yon tan rin po che'i mdzod dga' ba'i char zhes bya ba las/_byang chub kyi sems yongs su bzung ba'i tshoms te le'u brgyad pa'o//___//'jig rten gyi bya ba 'ga' zhig don du gnyer ba rnams kyis kyang*/_sngon chad bya ba de bsgrub dka' sla dang*/_legs nyes ci yod sogs legs par te zhib tu ma brtags par bab col gyi sgo nas/_bdag gis 'di bya'o zhes dam bca' bzung nas bya dka' ba sogs mthong na/_de slar gtong ba la'ang yid gnyis su gyur te gzhan gyis khrel ba la sogs pa'i gnas mchi na/_rgyal ba sangs rgyas rnams dang de sras byang sems rnams kyi thos bsam sgom pa'i shes rab chen po'i mthus/_bskal pa grangs med pa mang por gdon mi za bar brtags pa yid ches shing don dang ldan pa'i blang dor tshul bzhin byed pa'i gnas dam bcas te slar btang na bdag gis sems can kun bslus pas/_phyi mar bde 'gro dang bral ba'i gnas mu mtha' med pa'i ngan 'gror 'khyams par 'gyur te/_spyod 'jug las/_bla na med pa'i bde ba la/_/bsam pa thag pas mgron gnyer nas/_/'gro ba thams cad bslus byas na/_/bde 'gror ji ga 'gro 'gyur ram/_/zhes so/__/rgyu mtshan de'i phyir na nyes pa'i tshogs chen po lta ci/_sems can gcig gi srog 'tsho'i bde ba'am longs spyod sogs kyi bde ba'ang*/_gsod pa dang longs spyod 'phrog pa sogs bde ba bshig na/_las des bdag nyid bde 'gro las nyams te ngan 'gror 'phen pa'i phyir dang tha na sems can gcig la gnod pa chung ngu'i las de tsam yang mi bgyid do/__/byang sdom 'di sor sdom lta bu ma yin pas slar gso rung zhe na/_de ltar ltung ba stobs dang ldan pa dang byang chub sems stobs gnyis kar ldan na'ang*/_phan tshun 'khor bar res mos kyis 'dre bar byed pa gang yin pa mos spyod kyi sa thob pa la yang yun ring por 'thogs par 'gyur na rab dga' sogs la smos ci dgos/_des na shes bzhin du blang dor gyi bslab bya rnams gtong bar byed pa'i skyes bu ni/_rang nyid rlag par byed pa'i skyes bu smyon pa bzhin yin pas bsrung bar bya'o/__/nyon mongs pa la 'khon du bzung ba'i tshul 'jig rten 'di na gang zag gang zhig_/gnod pa'i rgyu mnga' thang dang longs spyod 'phrog pa tsam la gnod par byed pa dang*/_de'i 'bras bu zas gos longs spyod chung du la'ang khros pa'i dbang gis bdag rgyal bar 'dod pa'i nga rgyal shin tu bdo ba rnams la/_pha rol pos mda' mdung la sogs pa'i mtshon gyis rang la chad pa rtsub mo ci byung yang bzod par byas nas/_rang gi bsam rgyu'i don ma grub bar kha phyir phyogs te 'byer bar mi byed na/_yun ring thog ma med pa nas rnam pa kun tu phan mi 'dogs shing btang snyoms tsam yang mi gnas par bdag la dgrar gyur pa'i nyon mongs stobs chen gyi tshogs 'di dang g.yul sprad nas gnyen po bsten pa'i tshe na/_bslab pa gsum las tshul khrims kyis sun 'byin/_ting nge 'dzin gyis mgo gnon/_shes rab kyis drungs nas phyung ste 'khon du bzung ba'i cho ga nyon mongs spongs ba'i phyogs la ched du brtson pa'i gnyen po'i sgo nas bya ba ma zhig pa dgos la/_'phags sa ma thob kyi bar du bslab pa bsrung ba'i brtul zhugs su zhig gis gtong ste/_spyod 'jug las/_bslab pa bsrung bar 'dod pa yis/_/rab tu bsgrims nas sems bsrung ste/_/sems 'di bsrung bar ma byas na/_/bslab pa bsrung bar yongs mi nus/_/zhes so/_de yang 'khrul snang gi bag chags shin tu brtan pa'i skabs 'di na nyon mongs pa'i btson rar bdag tu 'dzin pa'i 'ching ba dam pos bsdams pa yi rang bzhin/_bdag gi rgyud kyi nyon mongs spong bar byed pa'i tshod kyang rig par mi 'gyur na/_mtha' dag pa'i 'gro ba thams cad nyon mongs pa bag chags dang bcas pa de las dbugs 'byin zhing sangs rgyas kyi sar sgrol ba'i phyir dam bca' brtan pa mi nyams pa ga la zhig ste/_de'i phyir na gzhan sems can thams cad kyi nyon mongs bsal ba'i don du dang po rang gi nyon mongs spong byed kyi thabs 'jug ldog gi gnas la gzob pa lhur len pa bag yod dang*/_bslab pa'i gnas mi brjed pa'i dran pa dang*/_sgo gsum gyi spyod lam thams cad la brtags pa shes bzhin te 'di gsum dang ldan pa'i gang zag gi rgyud sa gzhi gshin pa dang 'dra ba la/_byang chub sems kyi sa bon bzhag pa tsam ma yin par lhag bsam dag pa'i myu gu bskyed sla bas/_'di dag ni shin tu gnad gal po che yin pas dbye 'byed sems thog nas shes par bya'o/_/de ltar sems bskyed dang byang sems bslab pa mi nyams par bzung zhing 'di ma btang ba tsam gyis mi chog ste/_mi mthun phyogs ltung ba'i dri ma sbyong ba dang*/_mthun phyogs sems bskyed dang bslab pa spel ba'i thabs thos bsam sogs dge ba'i bshes gnyen bsten pa dang*/_tshogs bsags sgrib sbyong sogs theg chen bslab bya la nan tan bgyid 'tshal lo/__/de la ltung ba'i rab dbye sde snod rnams las du ma gsungs pa bsdu na/_nam snying mdo yi bco brgyad/_gsang chen thabs la mkhas pa'i mdo dang*/_dkon brtsegs las gsungs pa re re ste nyi shu ni/_dkon mchog dkor 'phrog la sogs rgyal po'i lnga dang*/_grong dang grong brdal 'joms par byed pa la sogs blon po'i lnga ste bcu/_blo ma sbyangs pa la stong nyid ston pa sogs phal pa'i brgyad de bco brgyad dang*/_nyan rang yid byed kyis smon pa dang*/_sbyin sogs dam bca' nyams pas 'jug sems gtong ba ste nyi shu po rnams spang dgos so/__/mdor na rmi lam du ltung ba 'byin pa sogs sdig pa byas pa mthong na yang*/_sad dus bag chags kyi mthus yin pas phyi bshol med par de ma thag tu phyag 'tshal ba dang*/_bshags pa dang*/_bsngo ba ste phung po gsum pa tshang ba'i mdo 'don pa la sogs pas bshags pa bya dgos na/_sad dus kyi nyes ltung bsam bzhin byas pa la lta ci smos/_byang sems kyi bslab pa dang yon tan thams cad kyi rten gzhi tha na sems can gcig tsam blos btang nas smon sems shor ba dang*/_'gal zla mi mthun phyogs rtsa ltung gang rung byung ba dang*/_sdom pa rtsa ba nas spong ba'i rkyen bslab pa phul ba gsum po dag las/_nyin mtshan so so'i cha thun gsum gsum du bcad pa'i snga dro lta bu drug cha'i dang po nas ltung ba byung nas gnyis pa'i thun tshod bshags tshad de las nyams shor na/_gtugs pa zhes phyir bcos kyis sor chud pa ma yin pas 'gyod sems kyis skya rengs 'char du nye ba na/_gtsang sbra dang bcas kha shar du phyogs nas pus mo btsugs te mdun du nam mkha'i snying po yid la bos nas yan lag bdun pa 'bul ba'am yang na/_yi dam gyi lha yi mdun du thun min gyi yan lag bdun pa byas la bshags pas ltung ba las ldang ngo*/_/dbang po rab tu gyur pas ltung ba bshags pa'i tshul/_thar pa chen po'i mdo las/_gang zhig 'gyod tshangs byed 'dod na/_/drang por 'dug la yang dag ltos/_/yang dag nyid la yang dag blta/_/yang dag mthong na rnam par grol/_/'di ni 'gyod tshangs mchog yin no/_/zhes pa ltar ro/__/bdag gi bde ba dang yon tan thams cad dbugs dang lhan cig tu gzhan sems can rnams la yang dag par smin par bsam nas spo ba dang*/_dbugs nang du rngub pa'i tshe gzhan sems can gyi sdug bsngal dang skyon thams cad bral nas bdag gi rgyud la smin pa'i khur dang du blang nas sems can thams cad kyi sdug bsngal ma lus pa rnams bdag kho nas bzod par bya'o snyam pa'i go cha bgos te de ltar gtong len snying stobs rmad du byung ba rang rgyud la 'du byed cing*/_ji srid byang chub kyi go 'phang ma thob bar du sems can thams cad sdug bsngal dang bral te bde ba de dag dang mi 'bral ba phyi phyir te yang yang smon no/__/de ltar smon ba'i bslab bya ni bsam pa bzang po'i tshad med bzhi po'ang bdag gzhan mnyam brje bstan pa de la blo legs par sbyang ba dang*/_sems can 'di rnams thog med nas pha ma byas te drin chen pos bskyangs pa'i sgo nas phan 'dogs par byas pa de dran nas/_drin du gzo bar 'dod pa las byams pa skye zhing*/_byams pa las snying rje dang*/_snying rje de las byang chub kyi sems skye ba theg chen po'i sde snod rnams las gsungs pa'i don b+haM ga la'i paN+Di tas rgyu 'bras man ngag bdun ldan du bzhed pas na tshad ma'i lung gis yang dag par grub ste/_rgyu 'bras man ngag bdun ni/_mar shes pa dang*/_drin dran dang*/_drin gzo ba dang*/_yid 'ong gi byams pa dang*/_brtse ba'i snying rje dang*/_lhag bsam rnam dag dang*/_rang 'bras bla na med pa'o/__/dang po mar shes pa ni/_mar ma gyur pa sems can gcig kyang med la/_mgon po klus/_ma yi thug mtha' rgya shug tshig gu tsam/_/ril bur dril kyang sa yis lang mi 'gyur/_/zhes so/__/gnyis pa drin dran pa ni/_btsas ma thag pa'i skyes bu mi gtsang ba'i srin bu dang 'dra ba bzhin ngan la gdon dang*/_grul bum gyi byad dang 'dra ba de/_ma yi tsham tshom med par pang par blangs nas ni khrus khang ltar byas te/_de nas mi gtsang ba mtha' dag gos la sogs pas rtsub kyi dogs nas lag pas nye reg byas te phyi bar byed do/__/kha zas la brten mi nus pas nu zhos bsnyen bkur lus kyi reg bya 'jam pos g.yogs te mi skyo bar byas/_che ste shi yi dogs/_'bring ste na yi dogs/_chung ste ltogs kyi dogs/_skom gyi dogs/_'khyags kyi dogs nas mi mthun pa'i phyogs spang la brtson pa/_bu chung cung zad na ba las bdag nyid 'chi bar 'dam shing*/_bu de'i don du gzhan la khong khro ba sogs sdig dang dka' tshegs tsha grang sogs sdug bsngal dang*/_gtam ngan mtha' dag bsran cing bzod nus pa'i ma de'i drin dang rim gro de tsam byas pa la ci yang mi sems par khyad du gsod par byed na/_de las cho ga ste bya ba 'khrugs pa'am ngan pa bsam sbyor nyams pa su zhig yod de med do/__/des na sa 'di'i ri rab dang rgya mtsho nas lcags rir bcas pa bdag gis khur na yang khur chen po ma yin te/_byas pa drin du mi gzo ba'i sdug bsngal gyi khur chen po shin tu bzod dka' ba zad mthar thug pa med pa ni/_dbyig dug gyur dug la nus pa ches cher byed pa'i btsan dug bsres pa lta bu dug ldan gyi bza' ba khong du chud pa'i skye bo bzhin nyams par mi 'gyur snyam yang nyams par 'gyur te/_lung rnam 'byed las/_sa rnams dang ni ri rnams dang*/_/rgya mtsho bdag gi khur min te/_/byas pa mi gzo gang yin pa/_/de ni bdag gi khur chen yin/_/zhes so/__/rgyu mtshan de'i phyir grangs pha mtha' yas pa'i sems can ma lus pa kun/_ma ru lan mang du gyur nas phan chen po btags pa de lta bu ni gzhan sus kyang mi nus pas dam pa mchog tu gyur pa'i drin chen de yang yang dran pas su mthong drin can du shes par bya'o/__/gsum pa drin gzo ba ni/_'di dag la drin lan du phan gdags dgos pas phan chen po ji ltar gdags snyam nas thabs la brtson pa'o/__/bzhi pa yid 'ong gi byams pa ni/_de ltar goms pas sems can gyis rang la dgra byed pa mthong na'ang*/_mas bu la brtse ba ltar de la khong mi khro bar ma zad snying nas brtse zhing yid du 'ong ba'i sgo nas bde ba dam pa dang 'phrad pa'i thabs la sbyor bar 'dod pa'o/__/lnga pa brtse ba'i snying rje ni/_byams sems de las snying rje sogs tshad med la blo ngang gis 'byong te byams yul de rnams kyi sdug bsngal rgyu 'bras dang bcas pa byung ba de la mi bzod par spang 'dod pa'o/__/de'i tshe sems can gyis bde skyid myong na rang la byung ba las kyang bla lhag tu spro zhing dga' ba de yang nye ring chags sdang dang bral ba mnyam par lta ba'i tshad med bzhi po gong du 'phel zhing rgyas par 'gyur ro/__/drug pa lhag bsam dag pa ni/_de ltar tshad med bzhi po rgyud la goms pas/_snying rje'i sar bzhag pa yid 'ong gi sems can 'di dag gtan bde rnam grol du dgod pa'i khur len gting nas skye ba'o/__/bdun pa rang 'bras bla med ni/_de ltar byas pa shes pa dang drin du gzo ba sogs bsam pa dang ldan pa yi skyes bu gang yin pa de la/_dad sogs 'phags pa'i nor bdun gyis bsnyen par 'gyur ba chos nyid yin no/__/byang chub smon pa'i sems sems can gyi khams yin no cog yal bar mi 'dor ba'i bsam pa bzang po ston ka'i zla ba gsar pa dang 'dra ba'i sems bskyed pa de la/_sgrib byed sgra gcan gyi gdong bas kyang thu ba'i mi mthun phyogs ni/_nag po'i chos bzhi po yin pas gnyen po'i stobs kyis ring du bskrad par bya'o/__/de yang bla ma/_slob dpon/_mkhan po/_sbyin gnas yon tan dang ldan pa ste mchod 'os bslu ba dang*/_gang zag gzhan bsod nams cha mthun theg gsum gang rung la zhugs te thar pa cha mthun gyi bsod nams bsags pa la/_the tshom bskyed de khyod kyis sdom pa ma thob zhes sogs brjod nas 'gyod pa'i gnas la sbyar ba dang*/_yul dam pa byang chub tu sems bskyed pa'i gang zag rnams la dngos su skur zhing lkog tu mi snyan pa sgrog pa dang*/_rang gi nyes pa thabs kyis mi mngon par byed pa'i g.yo dang*/_yon tan med kyang yod brdzu'i sgyus bre srang sogs kyi sgyu thabs kyi spyod pa sna tshogs pas gzhan dag mgo bo bskor ba ste chos bzhi po de gang rung nyams su myong tshe smon sems shor ba yin la/_ltung ba byung ba'i thun de'i thog mtha' bar gsum gang rung du 'gyod pa drag po dang gnyen po'i bshags pa ma slebs par thun tshod las 'das na/_de yi mod la sems bskyed 'chor ba'i rgyu byed pa yin no/__/de dag gi gnyen por che ba dkar po'i chos bzhi ni/_srog la bab kyang brda 'phrod pa thams cad la bsam bzhin rdzun mi smra ba dang*/_rgyal sras rnams la ston pa dang mtshungs par gus shing bsngags pa brjod pa dang*/_g.yo sgyu med par lhag bsam dag pas sems can thams cad la phan pa'i bsam sbyor don du gnyer ba dang*/_rang gis smin nus pa'i sems can mtha' dag la smon sems bskyed bcug cing rim par rdzogs pa'i byang chub kyi lam la snying thag pa nas dkri ba'o/__/sems bskyed mi nyams shing brtan par bya ba'i sgo nas bsrung ba'i 'du shes bzhi ste/_theg chen dge ba'i bshes gnyen bdag la lam ma nor bar ston pa de la sangs rgyas dngos kyi 'du shes dang*/_des bstan pa'i zab rgyas kyi chos la lam gyi 'du shes dang*/_de sgrub pa'i byang sems gzhan lta spyod mthun pa rnams la grogs kyi 'du shes dang*/_mtha' yas ba'i sems can kun thams cad la bu gcig po'i 'du shes te 'di dag ting nge 'dzin rgyal po las bshad do/__/bde sdug gtong len nas 'du shes bzhi'i bar 'di dag smon pa'i bslab bya theg chen gyi sde snod rnams las btus pa yang dag go_/'jug pa'i sdom pa blangs pa de'i bslab bya pha rol tu phyin pa drug las/_dang po sbyin pa/_tshul khrims/_bzod pa/_brtson 'grus/_bsam gtan ste lnga ni bsod nams dam pa'i tshogs dang*/_phyi ma gcig po shes rab pha rol phyin pa ni ye shes kyi tshogs chen te/_tshogs gnyis thabs shes zung 'brel 'di gnyis la ma brten pa'i sangs rgyas 'grub byed kyi thabs gzhan yod pa ma yin la/_de'i steng du sbyin sogs de dag gzhan don byang chub chen por bsngo bas mi zad par byed pa'i thabs dang*/_mi mthun pa'i phyogs thams cad zil gyi gnon pa'i stobs kyis dge ba byang chub tu nges par byed pa'i stobs dang*/_'dun pas skye ba thams cad du sbyin sogs kyi yon tan rgyun mi 'chad par 'byung ba'i sgo nas dge ba la rtag tu 'jug par byed pa'i smon lam dang*/_sbyin sogs kyi chos rnams la longs spyod cing sems can rnams smin par byed pa'i ye shes ste bzhi bsnan pas bcu ste rgyal sras rnams kyi spyi nor yin no/__/gang zag gi blo stobs kyi mthu yis lam de sgrub par byed po rgyal sras gsum ste/_dbang rtul rnams thog mar rang nyid 'tshang rgya ba'i don du tshogs gnyis mthar phyin pa'i bya ba sngon du byas nas/_rjes la 'gro ba rnams sgrol bar 'dod pa rgyal po lta bu'i 'dod chen sems bskyed 'phags pa byams pa lta bu dang*/_dbang 'bring rang dang 'gro ba snga phyi med par stabs cig sgrol 'dod pa gru pa lta bu ye shes dam pa'i sems bskyed dang*/_dbang rnon rnams kyis 'gro ba sngon du bsgral zhing rang nyid sa bcur gnas te rjes la zhi ba myang 'das mngon du byed 'dod pa/_skyong byed lta bu dpe med pa'i sems bskyed de 'jam dbyangs dang spyan ras gzigs lta bu'o/__/de rnams las dbang po rtul pos tshogs sbyor la bskal pa grangs med gsum dang*/_sa bcu po re re la gsum re ste sum cu rtsa gsum gyis lam mthar phyin te 'tshang rgya ba dang*/_'bring pos tshogs sbyor la bzhi ste/_mthong lam la gcig_/ma dag sa bdun la gcig_/dag sa gsum la gcig ste bdun du 'tshang rgya ba dang*/_rnon pos tshogs sbyor la gcig_/ma dag sa bdun la gcig_/dag pa sa gsum na gcig ste grangs med gsum na myang 'das su grol bar dkon mchog brtsegs pa las gsungs pa ltar ro/__/sbyin pa'i ngo bo bdog rgu'i dngos po thams cad la chags pa med cing thams cad gzhan la gtong ba'i sems pa dang bcas pa ste/_dbye na dam pa'i chos kyi sbyin pa dang*/_zang zing longs spyod kyi sbyin pa dang*/_mi 'jigs pa srog gi skyabs sbyin te gsum las zang zing la'ang rnam pa gsum yin te/_blo stobs chung ba'i dus su gtong ba dang*/_de la goms nas gtong ba che ba dang*/_gtong sems goms pa phul du byung nas shin tu gtong ba la bslab nus so/__/de yang gtong ba zhes bya ba ni/_blo stobs kyis rim par kha zas dang*/_gos dang*/_shing rta dang*/_glang po dang*/_yul khams sogs gzhan la sbyin pa'o/__/gtong ba chen po ni/_shin tu phongs pa la rang gi bu dang*/_bu mo dang*/_khyim thab rnams gtong ba yin no/__/shin tu gtong ba ni/_bya dka' ba'i gnas te mgo dang*/_dbang po dang*/_yan lag thams cad phangs med du gtong ba rgyal po zla 'od la sogs pa ltar ro/__/de yang byang chub sems dpa'i spyod pa spyi dang khyad par sbyin pa la bslab pa'i skabs 'di na thog mar gtong sems la goms su 'jug pa'i las dang po pa rnams/_ser sna'i 'ching ba dam pos bsdams pa'i stobs kyis kha zas tsam yang sbyin mi nus pa'i tshe na/_skyes bu'i lag pa ni gcig gis dngos pos ngan ngon tsam bzung nas/_gcig shos la sbyin par bsam pa'i sems kyis yang yang spos te sbyin pa'i tshul la bslab tu bcug pas mthar sbyin pa chen po gtong nus pa bzhin du/_rang cag gis kyang dang po tshod ma la sogs dngos po phra mo tsam gtong ba la yang yang goms par byas te rim gyis longs spyod la brkam zhing chags pa'i sems 'jig par byed cing gtong sems stobs su gyur tu shin tu gtong ba'i bar la bslab bo/__/mi 'jigs pa'i sbyin pa ni/_gzhan sems can rgyal po'i khri mun du chud pa dang*/_chad pas mnar ba/_ri dwags rngon pas bdas pa/_phyugs lug bshas rar khrid pa/_nad gdon gyis gtses pa sogs kun gyi srog bsrung ba dang*/_bdag gis sems can thams cad gnas skabs dang mthar thug kun tu 'jigs pa'i yul chen po'i 'khor ba'i sdug bsngal mtha' yas pa las bsgral te dbugs 'byin chen po mya ngan las 'das pa'i gnas la dgod par bya snyam du blo sbyang bar bya'o/__/las dang po pa rnams kyis rang gi nus tshod sbyin par bya yi/_gzhan bya dka' ba rnams mi nus bzhin du ma brtags par bab col cho ga ste bya ba yis rnam par sbyar ba'i mthar 'gyod pa skye bar 'gyur ba'i phyir dang*/_nyan rang sogs su sems bskyed nyen yod pas de 'dra'i sbyin pa'ang smad pa'i gnas te/_dper na/_sman shing ljon pa blta na sdug pa yi/_/rtsa ba la sogs spyad 'os sa bon ni/_/'byin pa dus min spyod las bsrung bar bya/_/rdzogs sangs rgyas kyi sman shing de bzhin no/__/zhes pa ltar gnod sems dang phrag dog sogs snying rje'i bsam pa shin tu ma dag par/_lus dang srog gtong ba bslab btus nyid las bkag pa ni gong du lung drangs ma thag pa'o/__/gnod sems dang*/_phrag dog dang*/_ngom chos sogs bsam pa dang*/_gzhan la gnod pa byas nas gtong ba sogs sbyor ba dang*/_dug mtshon sogs dngos po dang*/_shan pa la mtshon/_bag med la chang*/_gnyen la zhen pas nor gtong ba sogs ma dag pa'i bsam sbyor sogs kha na ma tho bas bskrun pa'i sbyin pa yang*/_byang chub sems dpas spyad bya'i gnas min par smad pa'i gnas te/_des na sems kyi cha nas gnas lus longs spyod dge rtsa bcas bdog pa thams cad la ser snar lta ba'i zhen pa btang ba ni sbyin pa'i tshad du bzhed do/__/mchog tu gyur pa chos kyi sbyin pa la'ang rnam pa gsum ste/_'phags pa 'jig rten 'dzin gyis dris pa las/_de la chos kyi sbyin pa gang zhe na/_smyug gu dang*/_snag tsha dang*/_glegs bam sbyin pa ni chung du'o/__/skal pa ji lta ba bzhin du nyan thos dang*/_rang sangs rgyas dang*/_bla na med pa'i chos ston pa ni chen po'o/_/bla na med pa'i byang chub 'dzin du 'jug cing nam mkha' ltar bsam gyis mi khyab pa'i chos ston pa ni shin tu chen po'o/_/zhes so/__/de las chos kyi sbyin pa dngos ni/_gzhan la blo rim bzhin du gdams par byed pa yin na'ang*/_mos pas spyod pa rnams rang rgyud la chos kyi tshig don gnyis char nus pa gsal ba med pas ji bzhin 'doms par dka' la/_gzhan phan gyi bsam pa gtso bor bzung ste dge ba'i bshes gnyen gyi gdams ngag gis rang gi rgyud kyi nyon mongs pa bsal ba'i cho ga ste thabs la dran pa dang*/_sems can la byams pa dang*/_snying rje ldan pas de bzhin gshegs pa'i gsung rab spyi dang khyad par theg chen gyi mdo sde rnams bklag pa yis/_tshe rabs mang po'i sdig sgrib 'dag cing gzhan phan gyi bsam pa ngang gis 'byung ba sogs yon tan mtha' yas pa yod pa dang*/_dkar po'i phyogs kyi lha klu rnams dngos su chos nyan pa la 'ong ba yin pas de dag gi rgyud las nyon sogs las grol nas rgyal ba'i bstan pa bsrung ba la brtson pa sogs mdor na sems can thams cad theg chen chos kyi snod du gyur cing*/_bla med kyi go 'phang la gzhol ba'i smon lam gdab pa 'di gal che'o/__/rang rgyud grol nas 'du 'dzi rnam g.yeng sogs yul rkyen chos brgyad kyis mi gnod par gyur na/_'gro ba'i khams dbang mos pa'i skal ba dang rang bzhin 'tshams par las 'bras nas bzung mthar rdzogs chen bar gzhan don la chos ston pa sogs gtso bor bya'o/__/tshul khrims kyi ngo bo ni/_bslab pa'i mi mthun phyogs sdom pa'i sgo nas gzhan gnod gzhir bcas la spong sems goms shing brtan pa yin no/__/dbye na nyes spyod sdom pa dang*/_dge ba chos sdud dang*/_sems can don byed de rnam pa gsum du bshad do/__/de yang sgo gsum mi dge ba'i phyogs thams cad sdom pa ni nyes spyod sdom pa'i tshul khrims/_pha rol tu phyin pa drug dang ldan pa ni dge ba chos sdud kyi tshul khrims/_dngos dang brgyud nas gzhan la bsdu ba rnam bzhi'i sgo nas phan gdags pa ni sems can don byed kyi tshul khrims yin no/__/de la spyir theg pa dman mchog gi sgor zhugs ba'i gang zag rnams kyis nyes spyod sdom zhing dge chos la gzhol ba tsam 'dra na'ang*/_nang gses theg dman gyi so so thar pa'i tshul khrims las/_byang chub sems dpa'i tshul khrims la khyad chos gnyis te khyad gzhi dang bcas na khyad par bzhi yi sgo nas 'phags pa ste/_'di ltar so thar ni rang rgyud la nyes spyod sdom pas gzhan gnod gzhi bcas ldog pa tsam/_byang sems ni mi 'tshe ba de yi steng du sems can la phan 'dogs pa snon te nyes sdom/_dge sdud/_don byed gsum dang ldan pa'o/__/so thar ni rigs bdun po gang yin kyang ltung mtshams lus kyi gsum/_ngag gi bzhi ste spang ba bdun bsdus lus ngag gtso che la/_byang sems ni mi dge ba spang ba bcu ka gtso bor byed do/__/khyad par bslab pa'i gnas ni so thar skabs/_rten gyi gang zag rang don bsgrub pa dang*/_dngos por mngon zhen can la dgongs nas gzhan gyi don du 'gyur yang byed par ma gnang bas ji ltar bcas pa de las mi 'bral la/_byang chub sems dpa' ni gzhan gyi don du 'gyur na/_lus ngag gnyis kyi mi dge ba rnam pa bdun gzhan don du 'gyur ba dang*/_'gyur bar shes pa dang*/_rang gi dge tshogs de la mi sgrib pa'i steng sems kyi 'phen stobs kyis 'phel bar 'gyur ba yi gnas skabs gsum po de la brtags nas gsum po tshang na/_mi dge ba ltar snang ba de byed par gnang ba'i skabs yod de/_ji ltar zhe na/_'di ltar ded dpon sems stobs chen pos sdig can rnam smin las thar phyir mi nag mdung thung can bsad pas bskal pa brgyad khri'i tshogs rdzogs pa dang*/_bram ze'i khye'u skar ma la dga' bas lo bzhi khri nyis stong la nags khrod du tshangs par spyad pa'i mthar bsod snyoms la byon dus tshong dpon gyi bu mo de la chags pa'i dbang gis 'chi bar brtsams pa las ldog pa'i phyir tshangs spyod btang bas bskal pa brgyad khri'i tshogs rdzogs pa lta bur rku sogs kyang des dper mtshon nas/_ngag gi bzhi la yang de ltar don dang ldan na gzugs brnyan gyi rnam pa'i nyes pa'ang don la dge ba yin pa'i phyir de 'dra ba'i byang sems la gnang ba/_de bas na rgyu 'bras mthu can du bsam pa'i bye brag gis byas pa'i phyir/_yid kyi mi dge ba gsum la ni gnang ba'i skabs med do/__/theg chen la gnang ba de lta bu yin na'ang rgyal sras sdom pa la gnas pa'i las dang po pa rnams kyis rang don zhi bde tsam gnyer nas de nyid bzlog pa dang bya dka' ba rnams spang ba dang*/_dngos brgyud gang rung du gzhan phyir phan pa mi bsgrub pa gang dang gang yin kyang*/_ltung ba'i rgyu ru thams cad gcig pa yin par gsungs pa yin no/__/dang po'i las can byang chub sems dpa' rnams kyi blo ni rang rgyud 'dul ba'i dus yin pas/_nges 'byung dad sogs yon tan gyi tshogs gong nas gong du 'phel ba la bslab cing spyod pa gtso che bas zhag skyed zla skyed sogs rgyud 'dul ba la bslab dgos so/__/de bas na byang chub sems dpa'i sdom pa rnam gsum las thog mar nyes spyod sdom pa'i tshul khrims kyis rang rgyud ma dag par/_gzhan dge ba chos sdud dang sems can don byed gnyis gtso bor gnyer na bslab gsum la bar chad mang ngo*/_/rab tu byung ba'i sdom pa dang ldan pa'i byang chub sems dpa' ni/_khyim pa byang chub sems dpa' las khyad par can du mdo sde rgyan las bshad de/_rab tu byung ba'i phyogs dag ni/_/yon tan tshad med rnams dang ldan/_/de lta'i sdom brtson khyim pa yi/_/byang sems rnams las mchog tu bshad/_/ces so/__/'on kyang byang chub sems dpa' rang sa'i thun min gyi sdom pa tsam lha klu sogs la skye bar gsungs pas/_so thar mtshan nyid pa'i cho gas sor sdom len dgos tshul theg chen mdo sde dag las gsal ba med do/__/tshogs gnyis kyi sbyangs pa sngon du song zhing*/_zab rgyas kyi don nyams 'og tu chud nus pa'i sems stobs chen po ni/_lus rten khyim pa dang rab byung gang yin kyang bsam pa'i rten gtso che ste o rgyan rgyal po in+d+ra b+hu ti bzhin dbang don nod pa tsam gyis sdom gsum gcig char nyams 'og tu chud pa yin no/__/gang zhig khyim pa'i phyogs la bsten pa rnams ni/_dge bsnyen gyi sdom pa 'chad par 'gyur ba gang rung dang ni yang na bsnyen gnas sdom pa'i gtan khrims dang dus khrims gang rung steng du smon 'jug byang chub sems gnyis rtag tu bsrung ba la dge bsnyen byang sems su grags shing*/_rab tu byung ba'i phyogs rnams la dge slong dang*/_dge tshul dang*/_dge slob ma yi sdom pa gang rung tshul bzhin bsrung ba dang ldan pa de'i steng du smon 'jug gnyis bsrung ba byang chub sems dpa'i rang sa'i nyes spyod sdom pa'i tshul khrims yin no/__/dbye na yongs rdzogs bsrung ba dang*/_/tshangs par spyod pa'i dge bsnyen rnam pa gnyis yin te/_sna gcig ni pham pa bzhi las gang rung bsrung ba ste/_srog gcod lta bu kho na spang ba dang*/_de steng ma byin len spong ba phyogs gcig ldan pa'am sna 'ga' bsrung ba dang*/_de steng rdzun smra ba spang ba phal cher bsrung ba'o/__/de'i steng du 'dod log spang ba bsnan te phyed bzhi dang*/_chang dang bcas pa spang na yongs rdzogs srung ba'i dge bsnyen dag tu 'dod de yan lag chang ma spang na bslab ba gzhan bsrung mi nus pa'i phyir ro/__/phyed zhes pa mi tshangs pa spyod pa dngos ma spang ba'o/__/srog gcod ma byin len rdzun dang mi tshangs spyod dang bcas rtsa bzhi chang dang lnga ka spang ba la/_tshangs par spyod pa'i dge bsnyen zhes su grags pa yin no/__/rab tu byung ba'i bslab pa'i gnas rags pa bcur dril nas bstan pa las/_gser dngul len pa ni khyim pa la mi dgag ste bu smad sogs gso phyir gnang la/_gar sogs rtsed mo'i rigs byed dang*/_phreng sogs rgyan gyi rigs byed gnyis po skyon nam mtshang chung bas gcig tu bgrang ba sa sde las bshad/_don du gser dngul len pa las gzhan dgu po bsnyen gnas pas spang dgos kyang tha snyad du yan lag brgyad pa'i khrims zhes grags pa gang zhig_/nyin zhag lta bu'i bsrung mtshams med par dus rtag tu bsrung ba de nyid tsan+d+ra go mi lta bu'i dge bsnyen zhes brjod pa yin no/__/dge tshul rnams kyis mi'am mir chags pa srog gcod yan lag tshang ba dang*/_/gzhan gyi nor rin thang tshang ba brku zhing 'phrog pa dang*/_rma yi sgo gsum gang rung la mi tshangs pa spyod pa dang*/_smra shes pa dang*/_don go ba dang*/_shes pa rang bzhin du gnas pa dang*/_ma ning dang mtshan gnyis pa ma yin pa ste tha snyad lnga dang ldan pa'i mi la rdzun smra ba ste rtsa ba bzhi po la gzhi bsam sbyor mthar thug bzhi tshang na tshul 'chal du 'gyur la/_slar gso rung mi rung gi rnam dbye sa mtshams 'chab sems med pa dang*/_yod pa'i dbang gis te dge slong bzhin no/__/bshags bya yan lag gi nyes byas drug las/_bag yod kyi yan lag bcos pa'i chang la sogs myos 'gyur gyi rigs dang*/_gar ni glu rol brdung dkrol rigs sogs/_phreng ba ni mdzes chos kyi rgyan dang*/_dri dang byug pa/_dregs pa'i rgyu sogs/_rin po che sogs las bzos pa'am des spras pa'i khri lta bu mal stan rin thang chen po can dang*/_shing sogs phal pa yin kyang khru gang las mtho ba dang*/_skya rengs shar nas nyi ma phyed kyi bar las dus min phyi dro'i kha zas za ba dang*/_gser dang dngul sogs rin po che'i rigs len pa nor gyi 'du shes bcas 'chang ba rnams spong ba ste/_br-i dzi'i bu rnams bzhin du bslab pa'i gnas mang po la zhum pa spang phyir rags pa bcu po 'dir dril nas 'dzin du 'jug pa ni snga ma las khyad par du 'phags pa yin la/_zhib tu phye na blang 'das so gsum ste/_rtsa bzhi gsod gsum dud 'gro'i char gtogs gsod pa srog chags dang bcas chur 'debs pa/_longs spyod pa ste gsum gzhi med nas/_bag tsam/_dbye na/_de'i rjes phyogs/_khyim pa/_/sun 'byin par lnga shes bzhin rdzun bshes/_/'phya dang zhal ta ba/_zas cung chos ston pa lhag mas skur/__nyer 'jog bslab pa khyad gsod 'bras chen lhag po len phyir 'gebs dang chang*/_/gar sogs phreng sogs mal che mtho/_dus min phyi dro'i kha zas rin chen bar ma gsum/_khyim pa'i rtags len pa/_rab byung gi rtags nyams pa/_mkhan por gsol 'debs nyams pa ste nyams pa gsum bcas/_de ltar blangs 'das so gsum mo/_/zhes so/__/dge slob ma ni rags pa bcu po de'i steng skyes pa la reg pa sogs rtsa ba'i chos drug__rin po che la reg pa la sogs rjes mthun drug ste spang bya bcu gnyis kyi gnyen po dang bcas/_bud med nyon mongs pas gdung bas lo gnyis la sogs thub bam mi thub brtags nas rim gyis bsnyen par rdzogs par gsungs/_dge slong la ltung ba sde lnga las/_dang po rtsa ba'i pham pa bzhi dag yan lag tshang ba dang*/_khu ba 'byin pa sogs lhag ma bcu gsum dang*/_'chang 'bral sogs spang ltung sum cu dang*/_rdzun skyon phra ma skyo sngogs sogs ltung byed 'ba' zhig dgu bcu tham pa dang*/_sor bshags sde bzhi/_nyes byas brgya dang bcu gnyis te bsdoms pas nyis brgya lnga bcu rtsa gsum gyi rnam grangs dang bcas pa'o/__/dge slong ma la sum brgya drug cu rtsa bzhi yod de/_so so'i rtsa ba bzhi'i steng skyes reg_/lus bkan/_'chab dang*/_bzlog pa ste brgyad po pham pa dang*/_smyan byed sogs lhag ma nyi shu/_spang ltung so gsum/_ltung byed brgya dang brgyad cu/_sor bshags bcu gcig nyes byas brgya dang bcu gnyis te bsdoms pas sum brgya drug cu rtsa bzhi po de dag gi yan lag ma tshang ba dang*/_de dag la brten pa'i nyes byas sbom po la sogs pa'i phyogs mthun khyad par du ma yod do/__/pham pa bzhi'am brgyad pos sdom pa rtsa ba nas gtong ba yin pas/_phyin chad phyir bcos kyis sor chud rung dang mi rung gi mtshams ni/_'dul ba rang gzhung las 'chab sems skyes dang ma skyes pa dag la rag las par gsungs so/__/de ltar ltung ba sde lnga sogs bsrung bya'i rnam grangs tsam yang mi shes par dge slong dge tshul sogs bdag gis tshul bzhin bsrung bar rlom pa mtshar zhes khrel ba'i gnas te chu med sar khron par rlom pa bzhin no/__/ma bsrung na shes pas ci byed snyam na/_de ltar yin yang mi shes pas lan te/_ltung ba dang bcos tshul shes pa tsam gyis nyams pa gso zhing ltung ba sbyong sla ba yin pa'i phyir/_ltung ba 'byung ba'i sgo bzhi'i dang po'ang mi shes pa yin no zhes thogs med kyis bzhed pa yin no/__/bsgrub pa'i bslab bya gso sbyong*/_dbyar gnas/_dgag dbye ste gzhi gsum cho ga dang bcas bslab pa gsum gyi rten gzhir gyur pa'i gzhi bcu bdun gyi bslab bya rnams gsungs te/_lung gzhi las/_rab byung gso sbyong gzhi dang ni/_/dgag dbye dbyar gnas ko lpags gzhi/_sman dang gos dang sra brkyang dang*/_/kau sham+bI dang phye ba'i las zhi byed kyi gzhi/_/dmar ser can dang gang zag dang*/_/spo dang gso sbyong gzhag pa dang*/_gnas mal dang ni rtsod pa dang*/_/dge 'dun dbye na rnams bsdus pa yin/_/zhes pas de dag la bslab pa ni 'jug pa'i tshul khrims so/__/bslab pa la gces spras byed pa'i gnas skabs 'di na pham pa bzhi lhag ma bcu gsum ste bcu bdun dang de las gzhan dud 'gro gsod pa sogs rang bzhin kha na ma tho ba dang bcas pa gnyis ma gtogs pa'i mi rung bar gsungs pa rnams longs spyod dgos pa byung na byin gyis rlob pa ni/_'di ltar dus ma yin par kha zas la spyod dgos par gyur na/_spyir rang bzhin gyi tshul khrims dang*/_chos nyid kyi bden pa mthong ba dang*/_sdom pa dang*/_spong ba bsam gtan bsgom pa'i tshul khrims rnam pa bzhi las/_byang sgra mi snyan pa'i mi rnams rang bzhin gyi tshul khrims can yin pas/_rang nyid gling de nyid du mos nas longs spyod du rung bar gnang ba ni/_gzhung dam pa las/_mnyan du yod pa na/_tshong pa mang po dag gis/_sangs rgyas dang*/_dge slong gi dge 'dun rnams bshos la spyan drangs so/__/de dag gis bshos sbyar te brin pa'i sar bskyal nas ma drangs kyi bar der/_tshong khang me shor te/_de dag me gsod du song ba dang*/_gdugs tshod yol la thug nas dge slong dag gis ji ltar gyur pa bcom ldan 'das la gsol ba dang*/_bcom ldan 'das kyis bka' bstsal pa/_de'i sems kyis yongs su btang bas na/_dge slong dag de la the tshom ma byed par bza' bar bya'o/__/zos nas kyang byang gi sgra mi snyan pa'i dus su byin gyis rlobs shig_/ces gsungs pa dang*/_de bzhin nad la phan phyir zla phyed sogs ma song yang khrus byed dgos pa la bdag ni nad pa'i 'du shes pa dang*/_gos lhag gam kha dog gis rung ba ma yin pa bgo ba dkar po dang*/_ko pags sogs longs spyod dgos pa na de la sems kyi 'du shes dbul zhing phongs pas phyis mi rnyed pas nyams thag par gyur te/_dge sbyor dang srog gi bar chad bsrung ba'i slad du gnang ba yin snyam pa dang*/_rin po cher reg pa dang bdag gir bya dgos na/_dkon mchog mchod pa dang*/_sems can gso ba'i slad du gnang bar bsgom dgos so/__/de dag las gzhan dngos su gnang ba med la bkag pa'ang med pa rnams la/_spang blang ji ltar bya ba ni gnang bkag phyogs gnyis po'i rjes su mthun par brtsi'o/__/rgyal rigs sgra gcan 'dzin gyi brgyud pa thams cad yod par smra ba las gyes pa bdun/_bram ze 'od srung chen po'i brgyud pa phal chen sde pa las gyes pa lnga dang*/_smyig ma mkhan kAt+ya ya na'i brgyud pa gnas brtan sde pa las gyes pa gsum dang*/_'breg mkhan nye 'khor gyi brgyud pa mang pos bkur ba las gyes pa gsum ste dril bas sde pa bco brgyad do/__/rtsa ba'i sde pa bzhi las bod 'dir dar che ba yod smra yin la/_sde pa bzhi ka'i bslab pa thams cad la mi mthun pa cung zad re yod kyang rgyal po kr-i ka'i rmi ltas dang mthun par bkar bsdus shing rab byung sde lnga'i spyod pa dang 'brel ba'i phyir na/_ston pa'i gnang bkag gi bcas pas ma khyab pa mi srid pas/_des na rang rang gi sde par gtogs pa'i bslab bya rnams tshul bzhin du gnas na bslab pa kun la dbang thob par byed pa yin pas na kun la nan tan du bsrung ba gal che'o/__/mya ngan zhes 'khor ba'i sdug bsngal las nyon rgyu 'bras dang bcas pa yin la de las 'da' ba ni sdug kun gyi rgyun 'gog pa'i zhi ba dam pa'i go 'phang nyan rang gi byang chub der bsngo ba'i ched du blangs pa yin pas/_mngon mtho don gnyer gyis bsrung pa las lhag pa'i so thar gyi tshul khrims mtshan nyid pa dang*/_de'i steng sems can gzhan la phan pa rgya chen po bsgrub pa'i phyir/_rdzogs byang thob 'dod kyis srol gnyis gang rung gi cho ga la brten nas smon 'jug gi sdom pa blangs te sems can phan 'dogs pa byang sdom yin la/_de'i steng gzhan phan gyi kun slong bzang pos rgyud sde chen po'i dgongs pa ma nor ba sngags kyi cho gas dbang bskur nod de/_zab mo bskyed rdzogs kyi rten rig 'dzin sngags kyi sdom pa rnal ma zhig thob na sngags sdom mtshan nyid pa ste/_de ltar sdom pa gsum po gang zag gcig gi rgyud la rdzogs pa'i tshe spang blang gi bslab bya yang rang rang skabs nas bshad pa bzhin bsrungs pas lam dang 'bras bu'i yon tan mtha' dag thob par 'gyur phyir shin tu mang ngo*/__/bar du ji ltar gnas zhe na/_ngo bo gnas 'gyur ba'i tshul gyis gcig tu gyur pas rdzas tha dad med la/_ldog pa thob la ma nyams pa'i tshul du yod pas ma 'dres par tha dad du gang zag gcig gi rgyud la rang rang gi gtong rgyu ma byung gi bar du gnas pa yin no/__/de ltar ldog pa tha dad par yod pa'i gnad kyis so sor ma 'dres par bsrung dgos shing*/_gal te so thar du mi gsod pa lta bu de byang sems la rjes su gnang ba yod par gsungs pa dang*/_sngags bla med kyi skabs/_rdo rje rigs kyi dam tshig tu dang du blang byar bshad pa lta bu nang 'gal ba can du byung ba rnams ji ltar bya snyam na/_gzhan phan gyi bsam pa khyad par can 'byongs pa dang*/_bskyed rdzogs kyi gding dang ldan pa dag la dgongs nas gong ma byang sems dang sngags lugs gtsor bton dgos pa'i tshul/_sngon byon mkhas grub rnams kyi lugs la grags pa yin la/_de'i gnad kyang 'di yin te 'og ma so so thar pa'i skabs bslab pa'i rnam pa dang 'gal ba srog gcod la sogs pa ltar snang yang*/_so thar skabs srog la mi 'tshe ba la sogs pa tsam gyis pha rol po la gnon pa spong zhing phan 'dogs kyi dgos pa bsgrub la/_byang chub sems dpas sdig can gang dag bsad par byas na/_de'i las ngan rgyun chad nas sdug bsngal yun thung bar 'gyur te/_des na gnod pa spong ba dang*/_bde 'gror 'god pa dang*/_thar pa'i sa bon 'jog pa sogs phan chen po 'dogs pa la dgos pa mthun no/__/'dir gang zhig sogs kyi tshig rkang gnyis po kun mkhyen rtsom gzhir gtan nas mi snang gsungs/_gang ltar ston pa thabs mkhas pas khams dbang sna tshogs dang mthun par gsungs pa'i bslab pa'i gzhi gang zhig_/don gyi ngos nas 'gal na gnang bar mi srid la/_mi dge ba ltar snang ba'i spyod pa rnams gang zhig gnang ba yin na/_don la 'gal ba mi srid de/_thams cad mkhyen pa sangs rgyas kyis drang nges kyi chos sna tshogs bstan pa thams cad don gyi dgongs gnad gcig tu 'bab cing gzhol ba'i chos can du bstan pa yin no/__/khyad par du gsang sngags kyi lta sgom rmad du byung ba dang 'brel ba'i spyod pa ni/_'di ltar gang zhig btung na nyan thos pa la ltung ba phog byed kyi rgyu dang*/_byang chub sems dpar de dang phyogs mthun nyes byas su 'gyur ba'i myos byed chang gi ngo bo de/_sngags kyi dam rdzas su med du mi rung bar bshad do/__/gsang rgyud las/_ma hA maM sa bdud rtsir bcas/_/med du mi rung dngos grub rdzas/_/bza' btung bcud dang shing 'bras dang*/_/'dod pa'i yon tan thams cad do/__/zhes dang*/_khyad par sha chang med mi rung*/_/zhes so/__/de la longs spyod par byed pa'i skyes bu'i bskyed rdzogs kyi thabs kyis rtog tshogs thams cad lhar shar bas mtshan ma'i rtog ba zil gyis gnon nus par gsungs te/_de yang spyir tshogs lam na mos pa'i lha sku/_sbyor lam na rlung sems kyi lha sku/_mthong lam na 'od gsal gyi lha sku/_sgom lam na ye shes kyi rang mdangs slob pa'i zung 'jug gi lha sku/_mi slob lam na chos sku dang gzugs sku zung 'jug gi lha sku zhes bya'o/__/khyad par gsang sngags nang rgyud pas dag mnyam gyi lta dgongs thams cad kyi grogs su gzung 'dzin la dor ba'i spyod par/_bskyed pa'i thabs cha phung khams snod bcud sogs lha sngags phyag rgya'i rol par shar bas/_tshogs rdzas rnams dam tshig gi bdud rtsir byin gyis brlabs te spyod pa'i tshe na gzhi chang dang bsam pa chags sred gnyis ka rang mtshan du mi 'dzin par/_gzhan lha dang bdud rtsi'i rang bzhin du dag mnyam chen por 'du shes gnas 'gyur ba de dang 'dra ba'i rnal 'byor pa de la ni/_rang don du spang blang la dngos por zhen nas bdag dge slong yin snyam pa yang yod pa ma yin la/_gzhan gyi don du sbyin sogs kyi spyod pa la tha snyad du mtshan mar bltas te bdag byang chub sems dpa' yin snyam pa'i mngon zhen yod pa'ang min zhing*/_de ni nyon mongs 'dod yon lam du byed pa'i thabs dang bral nas chags shing sred pa spong bar byed pa'i nyan thos lta bu dang*/_nyon mongs pa'i mthus non te 'khor bar 'phen byed kyi las gsog pa'i so skye phal pa lta bu'ang min par bskyed rdzogs zab mo'i rnal 'byor gyis gang snang ba mtha' dag lha dang dkyil 'khor gyi 'khor ra lor 'byams klas pa dang*/_spyad bya'i dam rdzas chang la sogs pa'ang bdud rtsi'i rang bzhin du 'du shes gnas 'gyur ba yin pas/_de lta bu'i gang zag gang la gnang ba yin te nyes pas ma gos par ma zad bsod nams 'gyur che ba yang*/_so so thar pa'i tshul khrims la gnas pa dang*/_dag mnyam ma rtogs par gzhan don la brtson pa'i byang chub sems dpa' yi nyan thos kyi dge slong dang ni/_byang sems kyi dge 'dun la byin pa las/_rnal 'byor pa rang gis dam rdzas brten na dkon mchog gsum dang*/_yi dam la dngos su phul ba yin pas tshogs rdzogs pa sogs yon tan thams cad kyang yar ldan du 'gyur ba yin pa'i phyir/_nyon mongs dang 'dod yon lam du byed pa'i bslab pa'i cha shas gzhan phra rags thams cad la'ang de yis rigs 'gre ste shes par byos shig_/'on kyang sdom pa gsum ka thob pa'i gang zag las dang po pa rnams kyis kyang gsum ka'i bslab pa ci nus su bsrung dgos pa de'i phyir rang lugs chos drug gi rnam par bzhag pa'i tshul ni nges par bya dgos te/_de la dang po rang ldog ma 'dres pa ni/_sdom pa gsum po gang las blang ba'i yul/_gang gis len pa'i bsam pa/_ji ltar len pa'i cho ga_/rang rang gi ldog pa ma 'dres pa'i sgo nas ji srid blangs pa'i dus kyang tha dad du nges pa kho na yin pas phyir ldog pa la gzhi mthun pa mi srid cing*/_ldog pa'i mtshan nyid so sor 'dzin pas rang rang gi ldog pa nas bsrung zhing*/_nyes pa byung na yang so sor bcos pa'i thabs yod pa yin no/__/dgag dgos tshang ba ni/_dgag bya nyon mongs pa'i gnyen por 'gro ba dang*/_dgos pa rang rgyud mi 'ching ba gnyis rang lam so sor tshang ba la gcig ste/_dper na skyed mos tshal zhig tu ha la'i sdong po skyes pa na/_bdag po thabs la mi mkhas pas de bcad nas rgyang ring por dor ba dang*/_sman pa zhig gis lde gur sbyar bas nad thams cad la phan pa dang*/_sngags la mkhas pa zhig gis sngags kyi nus pa bgos pa tsam gyis de bas kyang phan pa chen por gyur pa zhig byung nas/_dug gi mi gnod pa la 'dra yang snga ma las phyi ma thabs sla zhing chod che ba ltar/_nyan thos rnams kun rdzob ma zad don dam du yang nyon mongs pa la rdzas yod du bltas nas gtso bo lus ngag gi kun spyod dbang po'i sgo sdom pa la sogs pa'i thabs so thar gyi sdom pas rgyud bsdams nas spong ba ste/_so thar gyi mdo las/_rtag tu 'bad pas 'da' ba yi/_/sems rta kha glan dka' ba la/_/mthun pa'i gzer rnon rgyab pa yi/_/srab ni so so thar 'di yin/_/zhes so/__/byang chub sems dpas nyon mongs don dam par ma grub kyang tha snyad kun rdzob tsam du 'ching byed yin par bltas nas/_chos nyid du sbyar zhing bsgyur ba'i thabs lhur byed pa ste/_de skad du/_byang chub sems dpa'i so so thar pa las/_shA ri'i bu/_gzhan yang byang chub sems dpa' 'di la 'dod chags skye ba yang dag par rjes su mthong na/_'dod chags de gzhi gang las byung ba 'tshol bar byed de/_yongs su btsal ba na de dag gi gzhi mi dmigs so/__/gang las 'dod chags de skye ba dang*/_gang gis 'dod chags de skye ba dang*/_ji ltar 'dod chags de skye ba de ltar nyon mongs gang gis kyang skye ba de mi dmigs so/__/gang la skye ba de mi dmigs/_ji ltar skye ba de mi dmigs te 'dod chags de mi dmigs pa ni/_'dod chags kyi rgyus sdig pa'i las mi byed la/_de'i thabs kyis zin par byas na/_mchan/_dkar po'i chos rnams 'phel bar 'gyur zhing*/_de ma smad cing bsngags par 'gyur te zhes rgya cher bstan to/__/rdo rje theg pa ni/_spyir kun rdzob du yang nyon mongs pa la skyon du mi lta bar/_lha dang ye shes kyi rang bzhin du chab rom chur zhu ba ltar lam du byas nas 'bras bu la myur du sbyor te/_rgya mtsho las/_nyon mongs lam ni dag pa yi/_/thabs kyi 'dod yon rgyan gyi mchog_/nyon mongs dang 'dod yon/_thams cad thams cad rol pa yis/_/myur du he ru ka dpal 'gyur/_/zhes so/__/khyad par chos nyid rnal ma'i don mthong ba dag la ni/_ye shes kyi rgyan du lhag par che ste/_kun byed las/_'dod chags zhe sdang gti mug kyang*/_/byang chub chen po'i lam las byung*/_/kun spyod yon tan rnam lnga yang*/_/chos nyid dbyings kyi rgyan du che/_/zhes so/__/de yang dper na rma byas dug gi me tog sogs blang dor med par zos pas lang tsho rgyas shing 'dab ma lta na sdug pa bzhin no/__/des na tshangs spyod la gnas pa'i dge slong gis nus pa yod bzhin du mi spyod pas 'dod pa'i dris ma gos pa dang*/_dbang gsum pa'i lam gyi rnal 'byor pas spyad bzhin dri mas ma gos pa ste/_de gnyis ka'ang nyon mongs de nyid la brten nas sdom pa rdzogs par byed pas dgag dgos gnad gcig tu tshang ba yin no/__/de ltar na'ang dug sdong gang du skye ba'i sa gzhi de la ni phan gnod kyi bsam pa gang yang med pa ltar/_rang bzhin rdzogs pa chen po'i dgongs don la rnal du 'byor pa rnams la ni nyon mongs pas gnod par mi 'gyur zhing*/_spong bsgyur/_lam byed sogs kyi dgag sgrub dang rtsol ba gang yang med de/_kun byed las/_ji ltar snang ba de bzhin nyid du gcig_/'di la su yang 'chos par ma byed cig_/ma bcos mnyam pa'i rgyal po de la ni/_/mi rtogs chos sku'i dgongs pa lhun gyis grub/_/ces so/__/ngo bo gnas 'gyur ni/_bsam gtan ngal gsor/_gsang ba cod pan las/_/dper na rdo las zangs su 'gyur/_/zangs las gser gyi rnam pa ste/_/zangs kyi dus na rdo med cing*/_/gser du gyur par zangs mi snang*/_/rig 'dzin nang gi dge slong la/_/so so thar dang byang chub sems/_/gnyis po gnas pa nyid du ni/_/sangs rgyas rnams kyis ma gsungs so/__/zhes rig 'dzin sngags kyi dus na so thar byang sems zhes rdzas tha dad pa med de/_sngags kyi sdom rdzas su ngo bo gnas 'gyur ba'i phyir zhes dang*/_des na gsang sngags su rdzas gcig tu gzhan gnyis gnas 'gyur ba yin la/_ldog cha so sor ma 'dres te khas blang ba'i cha las nyams rkyen ma byung bar so sor gnas pa'i phyir ro/__/zhes gsungs/_gnas 'gyur gyi don 'di la 'ga' zhig_/rig 'dzin nang gi dge slong la/_/zhes dang*/_gzhung 'dir 'og tu/_gnas 'gyur ngo bo ye shes mthus byed pas/_zhes pa'i tshig gi nus pas dpe don gang rung gi ye shes khyad par can zhig ma skyes par gnas 'gyur gyi tha snyad tsam yang bzhag tu med par rtogs shing*/_bla ma'i zhal rgyun las kyang dgos pa'i dbang gis de ltar byung la/_yang gzhan dag gi dbang bskur nod pa tsam zhig gis gnas 'gyur dngos thob pa yin snyam du rtog par 'dug pa 'dra yang*/_kho bo ni 'di ltar sems te/_gnas 'gyur zhes pa de rnam pa thams cad du 'dus ma byas pa'i gnas skabs sems kyi lhad yod med tsam las/_rang bzhin dang rnam pa gnyis ka dpe don gyi ye shes mtshungs pas de dag gang rung gi ye shes mchan/_ye shes khyad par can lta bu skyes pa zhig ma gtogs tha snyad 'dogs mi rung ba'ang ma yin la/_dbang gral du bsdad nas dbang rdzas gnas gsum du gtugs shing khar myong ba tsam gyis gnas 'gyur thob pa'ang min te/_zhib tu dpyad na sor sdom gyi ngo bo nges 'byung*/_byang sdom gyi ngo bo gzhan phan/_sngags sdom gyi ngo bo dag snang du 'jog dgos pa spyir btang yin la/_de yang nges 'byung tsam dang*/_gzhan phan tsam dang*/_dag snang tsam zhig yod pas de dang de yi sdom pa mtshan nyid par mi 'gyur na yang*/_bsam pa de dag gis nges par zin pa zhig dgos pas de skad du bya'o/__/des na so thar gyi sdom pa'i mtshan nyid ni/_nges 'byung gi bsam pas zin pa'i nyes spyod sdom pa'i tshul khrims gang zhig_/'dod pa'i sas bsdus te/_mdo rtsar/_nges par 'byung ba'i tshul khrims kyi dbang du byas te zhes dang*/_rten gyi bye brag mdzod las/_za ma ma ning sgra mi snyan/_/mtshan gnyis ma gtogs mi rnams la/_/sdom min sdom pa'ang de bzhin la/_/zhes dang*/_rab dbyer/_gling gsum skyes pa bud med las/_/'gro ba gzhan la sdom pa bkag_/ces so/__/byang sdom gyi mtshan nyid ni/_gzhan don du bla na med pa'i byang chub thob 'dod kyis zin pa'i phyin drug gi ngo bo gyur pa'i sgrub pa khyad par ba ste/_de'i mi mthun pa'i phyogs sgo gsum gyi nyes pa ma lus spong ba'i sems pa dang mtshungs ldan du gyur pa yin te/_mngon rtogs rgyan las/_sems bskyed pa ni gzhan don phyir/_/yang dag rdzogs pa'i byang chub 'dod/_/ces dang*/_spyod 'jug las/_spong ba'i sems ni thob pa las/_/tshul khrims pha rol phyin par bshad/_/ces so/__/sngags sdom gyi mtshan nyid ni/_thabs shes khyad par can gyis zin pa'i ye shes kyi mtshan 'dzin gyi rtog pa dang*/_des bskyed pa'i sgo gsum gyi nyes pa sdom par byed pa'i sems pa dang mtshungs ldan du gyur pa'i sems te/_'od phreng las/_nam mkha' ji srid gnas bar du/_/lhan skyes ye shes brda don sprod/_rang la ye nas gnas pa de bla mas dbang dus su brda don rtags gsum gyi tshul du ngo sprad pa'i shes bya la/_tha mal ba lta ba'i/_mchan/_/rnam rtog dri ma kun las sdom/_/rig 'dzin sngags kyi sdom pa'o/__/zhes dang*/_rgyud phyi ma las/_gang zhig nan tan la mi 'gong*/_rmi lam du yang dam tshig brjod/_/dam bca' ba ni sdom par 'dod/_/ces so/__/de dag kyang rang rang gi thob byed kyi cho ga la brten nas thob dgos so/__/des na so thar gyi sdom pa'i skabs su yang rang sdom thob byed kyi cho ga rnam par dag pa las blangs pa'i khyim pa'am rab byung gi sdom pa gang yin kyang sdom pa tsam zhig thob pa yin na'ang kun slong gi bye brag las/_'jigs skyob dang*/_legs smon gyi tshul khrims su song na/_de nam nges 'byung gi bsam pa rgyud la skyes tshe sor sdom mtshan nyid par gnas 'gyur ba 'du shes na 'phar ba'i dbang gis te gcung dga' bo ltar dang*/_de yang bsam pa rgya che ru song nas 'du shes gnas 'gyur ba yin kyang nyes spyod gang spong dam bcas pa de med du song ba ni min no/__/de ltar so thar gyi bslab tshig gsum po rim gyis nod na spang bya spong bar dam bcas pa'i bsam pa gong 'phel du song yang 'og ma'i ldog pa'i cha med pa min te/_phyis bslab pa gong ma phul na rim par 'og ma dge tshul sogs su babs par bshad la/_de'ang bslab tshig gong ma thob dus 'og ma gnyis sdom rdzas tha dad du der yod pa min te/_gal te yin na bsnyen rdzogs kyi sdom pa'i rten rab byung gang zhig de khyim ba'ang yin dgos te/_dge bsnyen gyi sdom rten yang de yin dgos pa'i phyir te de dus dge bsnyen gyi sdom pa'i ngo bo'i rdzas tha dad du yod pa'i phyir ro/__/de bzhin sor sdom steng gzhan phan don gnyer gyi byang sdom blang na sor sdom gyi ldog pa de la 'dres pa yod kyang rang nyid gcig pu thar 'dod kyi nges 'byung gi blo de gnas 'gyur nas don gnyis ldan pa'i byang sems kyi ngo bor tha mi dad par yod de/_de yang dper na zangs rdo zhu ba las zangs su 'gyur ba'i gnas skabs na sngar gyi rdo de las gzhan pa'i rdzas shig yod pa ma yin kyang de dus rdo'i khams dman pa de da dung yod pa yin na/_rdo yang yin la zangs kyang yin pa zhig dgos na de ni mi srid pa bzhin du nges 'byung gi bsam pa de nyid je bzang du song bas/_de las gzhan pa'i blo rdzas shig med kyang*/_de'i dus sngar gyi blo dman de yod na rang don yid byed kyang yin la gzhan phan don gnyer kyang yin pa de ni mi srid do/__/tshul des mtshon nas byang sdom steng sngags sdom thob tshe dbang don gyis ye shes bskyed rdzogs rang rang gi lam gyi gzhi dbang bzhi rang rang gi skabs su bshad pa rnams dngos su skyes na lta ci/_spyir dag mnyam tsam zhig la go ba'i nges shes skyes pa'i stobs kyis gzhan phan blo de na 'phar tshe/_gzhan phan gyi bsam pa de je bzang du song nas sngags sdom gyi ngo bor gyur nas rdzas gzhan zhig med kyang kun rdzob tsam du 'khor 'das blang dor 'dzin pa dang bral zhing*/_rang re las dang po pas sdom pa gsum rgyud la gnas tshul la bsam gzhig btang ba yin pas/_sngags sdom gyi ngo bo dag snang thos bsam gyi lta ba na 'phar stobs kyis 'du shes gnas 'gyur ba tsam la bya yi/_bsgoms stobs kyis ye shes skyes pa lta bu min no/__/sgom stobs kyis dpe'i ye shes sam khyad par don gyi ye shes mngon du gyur tshe sems ye shes su gnas 'gyur ba'i chos nyid kun tu 'gro ba la dbang thob nas 'dod yon nyon mongs thams cad chos nyid kyi lta bas dbang du bsgyur nus pas ji ltar spyad kyang ltung ba rang mtshan pas gos mi srid pas/_gzhan ngor don mthun gyi spyod pa ma gtogs rang ngos nas sdom pa 'og ma'i mtshan 'dzin med pas ched du spang blang dang bral na/_ngo bo gnas 'gyur thob nas tha dad med pa smos ci dgos te rang byung don gyi dge slong yin pa'i phyir/_de skad du gsang snying las/_bla med mchog gi dam tshig tu/_/'dul ba'i dbang gis tshul khrims dang*/_/ji snyed sdom pa bsam yas kun/_/ma lus kun 'dus rnam par dag_/ces dang*/_sa ra has/_smyig ma mkhan gyi bu mo phyag rgyar brten pa'i rjes la/_kha sang yan chad bram ze yin/_/kha sang yan chad dge slong min/_/de ring tshun chad dge slong yin/_/he ru ka dpal dge slong mchog_/ces gsungs nas de'i rjes la klu sgrub kyi mkhan po mdzad pa lta bu'o/__/mdor bsdu na 'du shes gnas 'gyur sems ye shes su'am zag bcas zag med du gnas 'gyur khyad par ba gnyis su yod par blta dgos pa yin no/__/'o na sngags byang gnyis cho ga la brten nas nod pa'i tshe gnas 'gyur ma thob na/_ngo bo tha dad du yod bar mi 'thad par bshad pas sdom pa gtan nas mi thob snyam na/_khams rang bzhin rnam dag bde gshegs snying po la lam dang 'bras bu'i yon tan thams cad mngon du 'gyur rung yod pas sad byed kyi rkyen la brten nas nus pa bzhag pa tsam las kyang rang rang gi lam gyi ngo bo mngon du 'gyur rung ba'i rten 'brel nus mthu bsam mi khyab 'di ni rtog ge'i rig pas dgag par mi bya ste phrin las rmad du byung ba'o/__/de ltar rten 'brel gyi rnam bzhag pa de tsam ngo bo gcig gam tha dad ces brtag bya min te/_spyir dge mi dge'i bye brag bag chags bsam gyis mi khyab cing*/_khyad par lam pa rnams kyi rgyud kyi dge ba la yang zag bcas dang zag med sogs du ma zhig yod na de dag gi bag chags ngo bo gcig na dge mi dge gcig tu 'gyur ba dang*/_tha dad du 'dod na gcig gi rgyud du ma 'gyur ba'am/_yang na rgyud las tha dad pa'i dge mi dge yod dgos na de ni mi 'thad do/__/de yang*/_rtog ge brten cing ma nges la/_/ma khyab kun rdzob skyo ba can/_/byis pa la ni brten par 'dod/_/ces pa ltar rang lugs 'dzin pa rnams kyis dpyad de nges shes gting nas rnyed pa gal che'o/__/yon tan yar ldan ni/_so thar rang lam nas thabs shes phyogs gcig gis bzung nas nyes spyod sdom pa de rang nyid 'khor ba las thar ba'i thabs su gyur pa'i yon tan nyi tshe ba tsam zhig thob pa de byang sdom gyi ngo bor bsrung na thabs shes rgya chen pos zin pas bla na med pa'i byang chub kyi rgyur 'gro bas byang sdom ma blangs pa'i dus su bsrung ba las ches phan yon mchog tu 'phags pa de gnyis ka sngags sdom gyi ngo bo bsrung na/_thabs shes shin tu myur lam zab cing rgya che bas myur du tshegs med par bla na med pa'i byang chub la reg pa'i rgyu yin pa'i phyir de bas kyang yon tan lhag par che'o/__/gnad kyi mi 'gal ba ni/_las dang po pa'i dus su gzhan phan gyi spyod pa rgya chen po dang brtul zhugs kyi spyod pa rlabs po che dngos su bsgrub pa'i nus pa ma thon pa'i gnas skabs na lus ngag gi kun spyod phal cher 'og ma so thar gyi lugs bzhin bsrungs nas bsam pa dang lta sgom gong ma'i lugs bzhin rgyud la ci lon byas na/_byang sngags kyi spyod pa thun min la ma bslab pas 'gal ba ltar snang ba dag gis nyes pa mi bskyed cing*/_rang don yid byed kyi blo gtan nas med pa'am chung ngur gyur nas gtso bor gzhan don sems pa dang*/_sngags kyi lta sgom nar son nas chags pa rang rgyud pa dag pa'i tshe na gzhan don du dngos grub rnam gnyis thob pa la sogs pa'i phyir sbyor sgrol la sogs pa 'og ma'i bslab pa dang 'gal ba ltar snang ba ci byas kyang so thar gyi skabs su dngos zhen dang bcas pa la/_ji skad bshad pa'i ltung ba'i yan lag tshang ba mi srid pas rma byas dug la bya ba bzhin nyes pas mi gos pa'i steng ye shes kyi grogs su 'gyur ba'i phyir gnad kyis mi 'gal te/_Ar+Ya de was/_kun nas nyon mongs spang 'dod pas/_/dam pa'i don ni 'tshol bar bya/_/zhes so/__/dus skabs gang gtsor spyad pa ni/_spyir las dang po pa nas rnal 'byor gyi dbang phyug gi bar rang nyams dang dpag pa'i spyod pa dus tshod dang 'brel ba nyid de/_tshogs kyi dbus na ni/_kha na ma tho ba med pa kun tu bzang po'i spyod pa lnga la khrel bag yod par bya ba nyid do/__/de yang gnas dag pa dgon pa dang bas mtha' 'o/__/'tsho ba dag pa log 'tsho dang ma 'dres pa'i chos dang mthun pa'o/__/sdom pa dag pa las dang po so thar gtsor gyur pa las rim gyis snying rje chen po dang*/_thabs mkhas pa dang*/_don dam par shin tu ma skyes pa dang*/_dngos po med pa'i blo nus nar son pa dang bstun gong ma gong ma'i dgos pa gtso bor bsgrub cing so thar byang sems rig 'dzin gsum la nyes pas mi gos pa'o/__/grogs dag pa tshangs pa mtshungs par ldan pa'o/__/chos dag pa stong nyid snying rje'i rtsis zin pa'o/__/de skad du yang gsang ba 'dus pa las/_phyi ru nyan thos spyod pa skyong*/_/nang du 'dus pa'i don la dga'/_/zhes pa dang mthun par rdzogs pa'i sangs rgyas pad+ma skyes kyang bzhed do/__/gsang spyod kyi dus na ltung ba nang ma 'doms pa rnams ni 'dres pa med cing mtha' dag rdzogs par bsrung la/_'dom pa'am brtul zhugs la slob pa'i tshe sngags gtso bor byas nas 'og ma khyad du gsod pa ma yin kyang gong ma'i thabs shes kyis zin pas nyes pa mi 'byung ngo*/_/de lta na'ang 'jig rten ma dad par gyur pa'i cha sdom pa gnyis su mthun pa rnams de nyid ltar bsrung bar bya ste/_spyod 'jug las/_'jig rten ma dad gyur pa kun/_/mthong dang dris te spang bar bya/_/zhes dang*/_rab dbye las/_'di la sdig to mi dge'i phyogs/_/phal cher nyan thos lugs bzhin bsrung*/_/'dod pas dben pa'i ltung ba 'ga'/_/byang chub sems pa'i lugs bzhin bsrung*/_/'jig rten ma dad gyur pa'i cha/_/gnyis ka mthun rnams 'bad pas bsrung*/_/zhes so/__/mdor na/_las dang po pa dang*/_lam rnal 'byor pa dang*/_grub pa thob pa dang*/_thams cad mkhyen pa'i gnas skabs de dang de dag gi spyod pa ma 'dres pa blang dor bya bar dus 'khor 'grel chen las gsungs so/_/gnyis pa bzhed srol gzhan gyi gnad bsdu ba ni/_de ltar de bzhin gshegs pa'i chos tshul rgya mtsho'i nyams len thams cad sdom gsum du bsdus nas gang zag gcig gis nyams su len tshul bshad pa na/_sdom gsum rgyud gcig tu ji ltar rdzogs shing grub pa'i tshul gyi mtha' la dpyad pa zhugs pa rnams kyi bzhed pa mi 'dra ba drug yod la/_de dag kyang ngo bo gcig tu 'dod pa dang tha dad par 'dod pa'i lugs gnyis su 'du'o/__/drug po gang zhe na 'di ltar/_dang po ni rgyud las/_bla med theg chen rab nges na/_/nyon mongs las rnams gang spyad kyang*/_/byas la mi sogs tshogs 'gyur te/_/tshul khrims sdom pa phun sum tshogs/_/zhes pa'i steng du sleb tshe 'phags bod kyi skyes chen phal mo che'i mdzad pa lta bu ste/_sdom pa yin min dngos por blta ba las byung ba yin na/_de dag la ni mngon zhen mi mnga' ste/_kun rtog thams cad ye shes su gnas 'gyur zin nas ldog pa'i ngo bo zhes tha snyad las 'das so/__/'on kyang sngon bod 'dir a tsa ra dmar po zhes bya ba zhig byung ba des/_dbang bskur thob nas sngags kho na bsrung bas chog par bshad pa'i rjes su 'brangs nas kha cig ngo bo dang ldog pa gnyis ka gnas 'gyur bas gong ma thob tshe 'og ma bsrung mi dgos par sngags sdom gyi ngo bo gcig tu yod ces 'dod pa'ang gong du bshad pa de dang tshul mthun par snang yang*/_de ni mnyam nyid rtogs grol chen po'i rnal 'byor par 'thad kyang*/_las dang po pas de ltar byas na 'og ma khyad du bsad pa'i ltung ba char bzhin 'bab bo/__/gnyis pa ni/_so byang gi sdom pa'i ngo bo sngags su gnas 'gyur tshe ngo bo sngags sdom gcig pu la ldog pa gzhi mi mthun par tha dad du 'dod pa ni rang lugs te/_'di snga 'gyur gyi rgyud sgyu 'phrul drwa ba sogs las gsal bar bstan pa ltar 'phags bod kyi skyes chen tshad ma rnams kyi bzhed pa ste/_'od phreng las/_gzhan yang kha cig sdom pa gsum/_/rten sa rten 'brel chu gru 'dra gzhi rten du/_/'dod ces sgrog pa 'khrul gnas yin/_/bdag nyid chen po rta dbyangs dang*/_/slob dpon sgeg pa'i rdo rje sogs/_/don 'di ldog pa du mas 'byed/_/ces dang*/_bod kyi rong zom chos kyi bzang po dang*/_zur lugs kyi bla ma phal che ba dang*/_khyad par kun mkhyen gnyis pa dri med 'od zer dang gter chen 'gyur med rdo rje sogs rnying ma'i mkhas grub rnams dang*/_gsar ma'i lo chen rin bzang*/_'jam dbyangs sa paN rjes 'brang dang bcas pa ste gsar rnying gi mkhas grub rnams kyi dgongs pa rma med pa yin no/__/gnas 'gyur gyi tshul ni bshad zin to/__/de yang ngo bo gcig tu 'dod na shi ba'i tshe byang sngags gtong ba'am/_yang na so thar kyang myang 'das bar mi gtong ba'i skyon du 'gyur ro/__/gsum pa ni/_sdom gsum gyi rnam bzhag dper na snod gtsang mar chu dwangs pa blugs pa'i nang rin po che in+d+ra nI la bzhag na/_snod chu gnyis in+d+ra nI la'i kha dog tu 'gyur yang de gsum rdzas tha dad pa ltar so byang sngags gsum ka rgyud gcig la rdzogs pa'i tshe so so'i rdzas tha dad du yod pas 'gal yang*/_yon tan gyi ngos nas gong 'phel gyi dbang gis so byang gnyis sngags sdom gyi yan lag tu 'dod pa yin zhing*/_de yang rten dang brten pa'i tshul du 'dod do/__/de yang gong ma'i thabs shes kyis 'og ma zil gyis gnon par mi nus pa'i blo ngo na ldog pa tha dad du yod pa mi 'gal yang*/_rten brten pa thams cad la khyab mnyam du 'dod na rten so thar gtong tshe brten pa sngags byang gnyis kyang gtong bar 'gyur bas mi 'thad do/__/bzhi pa ni/_spyir bka' brgyud pa rnams kyis sdom pa gsum gtong rgyu dang gtong mtshams dus tha dad pa dang*/_thob byed kyi cho ga tha dad pas ngo bo tha dad yin zhes so so'i gtong mtshams thob mtshams tha dad pas ngo bo tha dad pa'i rnam dbye byed 'dug pas de la bshad chog par snang yang*/_bka' brgyud pa las gzhan yang dngos don ni 'og ma'i sdom pa gtong ba'i mtshams gong ma thob pa'i tshe yin no zhes gtong thob kyi mtshams nas rnam par dbye ba ni/_blo chung dag grol du 'dzin pa'i gang zag la dgongs nas/_dam pa dang po las drang srong nyi ma'i shing rta lta bu blo chung gsang sngags thos na log ltas spangs shing ngan song du ltung ba de las bsrung phyir re zhig gsang sngags thob par mi byed pa/zhing don zab mo ring du spang bar 'gyur ba rnams la rjes su gzung phyir thog mar de skad du brjod pas gdod sngags la 'jug pa'i rgyur gsungs pa lta bu dang*/_dgos dbang gzhan yang rab byung spyod pa lhod pa rnams gong ma'i thabs bskyed rdzogs shes khyad par can gang yang med par rab byung gi phyogs kyi bslab khrims yal ba 'dor ba la dgongs nas/_lam sgron du/_gsang ba shes rab dbang bskur ni/_tshangs par spyod pas blang mi bya/_/zhes pa lta bu yin na ni 'thad rung la/_rnam pa thams cad du de ltar 'dod na sum ldan rdo rje 'dzin pa mi srid pa dang*/_dbang bzhi ma rdzogs na sangs rgyas mi thob pa dang yang 'gal lo/__/lnga pa ni/_a b+ha yA ka ra'i thub dbang dgongs rgyan las byung ba ste/_gser gyi rgyan gser du rigs gcig kyang mgo rgyan rkang rgyan lag gdub sogs tha dad pa bzhin du sdom pa gsum po spong ba'i sems su rigs gcig kyang rdzas tha dad du bshad pa dang*/_dong rtse brtsegs pa nas so sor ma 'dres par yod pa bzhin sdom pa gsum so sor ma 'dres par rgyud gcig la yod pa yang 'dod pa yang de dang gcig go_/de yang sdom pa'i rang ldog ma 'dres pa'i ngos nas tha dad du yod pa 'thad kyang*/_ngo bo la de ltar 'dod na srog gcod spong sems lta bu'i sems byung rigs mthun gsum gang zag gcig gi rgyud la gnas pa mi 'thad do/__/drug pa ni/_shAkya shrI'i slob ma bi b+hu titsan+d+ra'i lugs 'od phreng las byung ba ste/_dper na nyi zla skar gsum po rim can du tshogs pa ltar te/_zla ba shar ba na skar 'od zil gyis mnan nas bag la zha bar gyur kyang rang rang gi 'od dang bcas pa ma nyams pa ste gtan med du song ba ma yin par tha dad du yod pa bzhin/_sdom pa gsum po yang gong ma gong ma thob pas 'og ma 'og ma zil gyis mnan te bag la zha bar gyur pa ni nus pa'i khyad zhugs pa tsam yin gyi ngo bo tha dad par yod do zhes 'dod do/__/de yang shes bya gzung 'dzin shes byed kyi blo dang bral nas gong ma gnyis thabs dang shes rab kyi ngos nas nus pa che bar song ba'i tshe 'og ma rnams sun 'byin pa med kyang rang bzhin gyi tshul khrims gang yin pa'i rigs sad nas 'og ma'i cha bag la zhar 'thad du rung ste/_slob dpon chen po bi ma las sems can gang gis las de bya ba'i sems de la ngo bo nyid med par so sor rtog pa'i phyir ram chos thams cad rang bzhin med par bsgom na de'i tshul khrims rnam par dag pa kho na yin par rig par bya'o/__/zhes gsungs pa ltar ro/__/gzhan du na sdom gsum mtshan nyid so sor 'dzin bzhin bag la zha bar mi 'thad de/_blang 'das so sor bsrung dgos na ni bag la ma zha la/_mi dgos na so sor yod pa mi rung bas mi 'thad do/__/de la sogs sdom gsum gang zag gcig gi rgyud la yon tan yar ldan ldog pas btags pa tsam du gnas tshul dpyad pa btang tshe blo'i rang bzhin ni rtog dpyod kyi rjes su 'brang zhing*/_tshig ni dpe don dang mtshungs par 'jug pas rnam pa'i khas blangs mtha' yas pa zhig yod na'ang*/_de bzhin gshegs pa'i bstan pa ni rton pa bzhi dang ldan pa yin pas/_de dag thams cad kyang gnad bsdu na 'di ltar sdom pas rgyud bsdams pa med na bsod nams khyad par can dang ltung ba gnyis ka med cing*/_dge ba byas na yang bar ma'i dge ba zhes bya ste srid pa las mi 'da' bas/_zhing yod pa rnams than pa dang ser bas 'jigs dgos pa ltar rnam grol don du gnyer ba'i sdom pa thob dgos shing*/_sdom pa yod pa rnams kyis nyes pas 'jigs nas tshul bzhin bsrung dgos pa'i phyir sdom gsum rang gi thob byed cho ga'i dus su ji skad bshad pa ltar btags yod kyi cha nas rang rang gi ldog pa ma 'dres par yod pa de bzhin du bsrung bar bya ba dang*/_gsum ka'i bsrung mtshams nang 'dom pa'i dus na dgag dgos gang du tshang ba de ltar byas na 'gal ba med de dge sdig rnam rtog gi gzugs brnyan yin pa'i phyir dang*/_'dus byas kyi sdom pa rnam par rtog pa'i spyod yul can de dag 'dus ma byas pa'i tshul khrims su gnas 'gyur ba'i ngo bo ni tshogs brgyad kyi rtog pa thams cad chos nyid ngo bo nyid med pa'i don dang 'dres te sdom sdom min du 'dzin pa'i kun rtog thams cad dang bral ba'i ye shes khyad par can rgyud la skyes pa'i mthus byed pa yin te mdo las bshad pa ltar ro/__/de ltar ldog pa ma 'dres pa la sogs pa'i chos drug brtsi ba spyir btang yin la/_dmigs bsal ni sdom pa nod tsam gyis nges 'byung sogs 'du shes khyad par can ma skyes na rang rang gi sdom pa mtshan nyid par mi 'gyur bas/_nges 'byung sogs la sems rgyud je bzang du 'gro ba'i thabs la brtson pa dang*/_'du shes gnas 'gyur tsam thob kyang ldog pa so sor bsrung dgos pa dang*/_ye shes khyad par can don gyi 'od gsal ji bzhin skyes pa'i tshe na ni ldog pa'i bsrung bya tsam yang tha dad du mi dmigs pas ji ltar byas kyang nyes par mi 'gyur ba'i dbye ba phyed pa khyad par rnams shes dgos pa yin no/__/de skad du/_rin chen phreng bar/_spyir btang ba la dmigs kyis bsal/_/bstan bcos kun la rab tu bsngags/_zhes so/__/des na chu phran thams cad rgya mtshor phyin tshe ba tshwa can du 'gyur ba yin gyi/_lam du so sor ma 'dres pa ltar las byed pa po dge mi dge'i sems las bde sdug thams cad 'byung ba'o/__/sdom pa so so'i spang blang gi mtshams gleng bar byed pa'i gzhi ldog pa'i steng nas 'jog dgos pas na/_ldog pa yang dang po nas gnas 'gyur bar 'dod pa de'i lugs la ni/_ltung ba 'og ma phyir bcos pa'i thabs med de/_dper na so thar ngos nas byung ba'i chos gos 'bral ba lta bu'i ltung ba gcig_/so thar rang ngos nas spang bral sngon du gtong ba lta bu'i sgo nas 'chos na/_so thar gyi ldog pa tsam yang gnas 'gyur zin te med pas 'gal la/_gong ma byang sngags lta bu'i ngos nas 'chos na gong ma de nyid la ltung ba ma byung bas na phyir bcos mi dgos pa de bcos pa'i thabs kyang ma bshad do zhes bsnyon te de skad brjod par bya'o/__/rgyud tshod dang sbyar nas nyams su len tshul bsdu na/_de la bye brag smra bas lus ngag gi rnam pa rig byed las skyes pa yin phyir sdom pa'i ngo bo rnam pa rig byed ma yin pa'i gzugs can du 'dod/_mdo sde pa ni/_rgyud gzhan dang gzhan du skye ba can nam gong 'og khyim pa nas bzung yongs su 'gyur ba can du 'dod/_sems tsam pa ni spong ba'i sems pa rgyun chags sa bon dang bcas pa la 'dod de/_de dag ni dngos po bden zhen dang ldan pa yin la/_dbu ma pa ni/_stong nyid snying rje thabs mkhas kyis lam gyi grogs su bsgyur nus pa dang*/_gsang sngags kyi lam du 'khyer ba'i thabs khyad par can gyis ma zin par theg chen lam du zhugs pa tsam dang*/_dbang bskur nod tsam re byas nas de dang de'i lam slob par byed na'ang*/_gnas 'gyur khyad par ba thob pa'i rdo rje 'dzin pa da rung min te/_sngags med dug gis 'chi ba ltar nyon mongs kyis bar du gcod pa'i phyir ro/__/des na sdom pa rnam par dag cing mtshan nyid par byed pa ni 'du shes te 'khor ba las nges par 'byung ba'i 'du shes kyis so thar dang gzhan don rdzogs byang bsgrub pa'i 'du shes kyis byang sdom mtshan nyid par 'gyur ba dang*/_'du shes gnyis po de'ang phung sogs chos la ma dag pa'i mtshan mar blta ba bcas blang dor la brtson pa yin pas dag byed ni gdan gsum lha yi dkyil 'khor du shes nas bskyed rim gyi rnal 'byor la rang byan chub dgos pa yin zhing*/_bskyed rim gyi lha de nyid gya nom du blta ba'i zhen pa yod na/_de dag byed rdzogs rim ngo bo zhen rtog dang bral ba'i ye shes la goms pa tshad du 'khyol na nam mkha' la rdul gyis mi gos pa bzhin du sngar gyi nyon mongs rang rgyud pas bskyed pa'i bcas pa'i ltung ba chos can kun rdzob kyi rang bzhin skye 'jig can des gnod pa'i rang mtshan mi 'dzin te/_nyon mongs dang las rang rgyud pa med phyir de 'dra'i gang zag de la rtogs pa bzang pos phan btags te yon tan thob pa dang*/_ngan pas gnod pa bskyal te gnyen po'i phyogs shor ba ste nyams par gyur pa gnyis ka med do/__/de yang 'di ltar theg pa la rim zhugs kyi gang zag rnams la dgongs nas ston pas sdom pa gsum gyi bcas mtshams rnam bzhag gi tshul las dang po pa'i gnas skabs na thar pa'i gegs su gyur pa'i nyon mongs dang*/_des bskyed pa'i sgo gsum gyi kha na ma tho sdom pa'i phyir/_thog mar so thar gyi bslab khrims gzhan phan gyi gegs rang don yid byed dang*/_des bskyed pa'i sgo gsum gyi las rnams sdom byed kyi thabs su bar du byang sems kyi bslab tshul bstan cing*/_de goms nas bsam sbyor gzhan don du 'gyur ba'i tshe gzhan don 'bad med myur du bsgrub nus pa'i gegs rkyen sgo gsum tha mal du bzung nas 'khor bar 'khrul 'dzin sdom phyir mtha' mar rig 'dzin sngags sdom ste/_nad pa la sman ltar rim gyis thog mtha' bar du 'gal bar mi gnas pa'i sdom pa gsum gyi ngo bo ni rten cing 'brel bar 'byung ba kun rdzob pa'i rang bzhin sems dang sems byung gi ngang tshul yin pas gnas skabs 'du shes je bzang du song ba'i gnas 'gyur tsam dang*/_mthar 'dus byas sems snang gi cha thams cad 'dus ma byas pa'i ye shes su gnas 'gyur ba ni grub pa yin no/__/da lta'i gang zag phal mo che ni thos bsam sgom pa legs par mi 'byongs bas gzhi rang nyid sogs la dang*/_bsam pa chang sred sogs rang rgyud la yod pa'i gnang bkag gi phyogs gnyis ka la bden zhen mngon gyur du ldan pa'i phyir lhar snang thabs shes zung 'brel gyi nyams len la mos pa lam byed kyi sgo nas spyod pa'i sdom pa gsum ldan gyi gang zag de la/_sdom pa gsum po nyams rkyen dang gtong rgyu ma byung bar so sor gnas pa'i tshe na/_ldog pa bye brag pa so so yod la/_bsrung na'ang gsum po'i spang blang gnas thams cad mnyam du bsres nas 'chol bar bsrung dgos shing*/_de ltar bsrung ba'i sgo nas skyon med par ldan na 'og ma rang rang sa nas bsrung bas gong ma'i ngo bo yar ldan du grub la/_'chos dgos na sdom pa gsum po rang sa nas nyams pa'i ltung ba de khol bur phyung ba'i rang rang gi sa nas ji skad bshad pa'i sgo nas phyir bcos na rnam par dag pa 'grub bo/__/ci'i phyir zhe na/_nyes pa bskyed na gzugs brnyan sogs la chags sred kyis chang 'thung lta bu skyon dang*/_phrag dog gi chos 'chad pa sogs yon tan gang ltar snang yang 'gog go_/rgyu dge ba dang 'bras bu yon tan bskyed par byed na gzugs brnyan phan sems kyis brdung brdeg byed ba sogs skyon ltar snang ba dang*/_phan sems kyis sbyin sogs gtong ba lta bu gang yin kyang spyod par gnang ba'i phyir/_gnang bkag gi bye brag 'tshams par byed kyi tshig gi phyogs gcig kho na'i lam na gnas pa min te gang zag rgyud mtho dman gyi bye brag dang 'brel nas gnang bkag gi mtshams legs par grub pa'o/__/gang zag gcig 'tshang rgya ba'i thabs tshang la ma nor ba ni/_pha rol phyin pa drug dang tshogs gnyis kyi shes rab te dmigs rnam dang bcas bsgrub pa'i cha bsod nams dang*/_rang rang gi 'khor gsum la bden zhen gyi rtog pa med pa'i ye shes kyi tshogs sogs nyan rang dang thun min yon tan rang rgyud la sngar ma skyes pa thabs dang rten 'brel du mas bskyed par byed pa ni gal che ste/_byang sdom len skabs/_rim pa bzhin du bslab par bgyi/_/zhes pa ltar dang*/_sngar skyes pa slar gong 'phel du spel ba la dge ba chos sdud kyi tshul khrims zhes bya la/_bslab pa gsum gyi nang nas sems kyi bslab pas bsdus te/_gtong ba sogs phyin drug rang rang gi ngo bo gyur ba'i dge sems rtse gcig pa yin pa'i phyir ro/__/byams dang snying rjes zin pa'i sbyin gtong dang thos bsam la sogs pa'i dge ba gcig la ni drug ka tshang ba yin te/_gnas skabs gang du sems can thams cad kyi don la dmigs nas byed pa de ni sbyin pa yin te 'bras bu la bdag 'dzin dang bral ba'i phyir ro/__/de la rang don yid byed kyi 'dod blo med pa tshul khrims yin la/_gzhan don gang la'ang skyo ngal dang 'khrugs pa med pa bzod pa'o/__/bsgrub bya de'i yon tan mthong nas lhag par spro zhing 'jug pa brtson 'grus yin te dge la spro phyir ro/__/sems can don la dmigs pa rtse gcig pa ni bsam gtan yin te gzhan du ma g.yeng ba dang*/_'khor gsum gyi dngos po bden 'dzin gyi mtshan mar zhen pa spangs pa shes rab ste/_rten 'brel gyi chos la khyad du mi gsod pa blang dor zhen 'dzin bral ba'i phyir ro/__/des na bsgrub bya'i dge ba de'i ngo bor pha rol tu phyin pa drug ka tshang ba de bzhin du rtag par thabs shes de lta bus zin na sgo gsum dge tshogs kyi bya ba thams cad phyin drug dang nam yang 'du 'bral med cing byang chub bsgrub pa la tshegs med pa'o/__/der ma zad byang chub sems dpa' rnams za nyal 'gro 'dug gi spyod lam lung ma bstan pa rnam pa bzhi kun la dran shes dang ldan pas/_spyod yul gang la 'jug kyang de dang rigs mthun smon lam 'debs pa'i sgo nas yongs su dag pa'i dge tshogs kyi nus pa brtan par gyur tshe tha na gom pa'i 'degs 'jog tshun chad sgo gsum gyi bya ba ci byas pa dag kyang phyin drug gi lam la ched du rtsol med 'jug cing thabs mkhas pa dang ldan pas tshogs rdzogs shin tu myur ba yin no/__/de dag gi bslab tshul gtso che ba'i dbang du ni las dang po pas bsrung ba/_mos spyod pas dag pa/_ma dag sa bdun la gnas pas btang ba/_dag sa la gnas pas spel ba'i tshul la bslab par gsungs so/__/rgyal sras thabs la mkhas shing rdzogs smin sbyangs gsum tshad phyin pas dngos su slong mo ba la sbyin pa gtong ba sogs sam/_brgyud ma nas chos bshad sbyin gtong dge ba la bskul ba sogs sems can kun la gnas skabs dang mthar thug gi phan pa lhur byed cing*/_zang zing sbyin pa dang*/_blo rim dang 'tshams par chos snyan par smra ba dang*/_don nam mngon rtogs la spyod du 'jug pa dang*/_rang yang don mthun par spyod pa ste bsdu dngos bzhi dang*/_de'i grogs rang rgyud la dge ba'i chos mtha' dag yongs su sdud pa'i tshul khrims kyis phyug na gtan pa med pa'i mchod sbyin gyi sgo 'phar phyes pa ltar gzhan don go skabs yangs pa yin no/__/gzhan la phan pa'i gzhi gang la brtag pa drug tu gsungs pa ste/_bdag dang*/_gzhan dang*/_zang zing gis phongs pa dang*/_zang zing gis 'byor pa dang*/_chos kyi phongs pa dang*/_chos kyis 'byor pa ste gnas drug po de'ang bdag gzhan ni chos dang zang zing gis 'byor rgud kyi gzhi yin pas gzhan bzhi po yang de'i khongs su 'du la/_gnyis po'ang rang gi chos la 'byor pa dang rgud pa brtag par 'du ste/_rang nyid lung rtogs kyi yon tan yod cing 'du 'dzi dang rnam g.yeng sogs kyis rang chos lam las ma nyams par 'gyur ba shes na gzhan don gtso bor bya dgos la/_gzhan don byas kyang gzugs brnyan tsam du song nas gzhan la phan mi thogs pa'i steng rang don bslab gsum gyi yon tan nyams te tshul khrims 'chal/_ting 'dzin g.yel/_shes rab rmongs pa la sogs pa'i nyes pas gnod par 'gyur bas/_so skye las dang po pas rang gi 'khrul pa'i kun rtog nyon mongs la dran shes kyis brtags nas nyon mongs de dag spong byed kyi gnyen po'i stobs gong du bskyed pa'i thabs la gtso bor bslab na gzhan phan thabs kyang don gyis byas pa yin no/__/gzhan bstan 'gro la phan pa rlabs chen 'grub srid na ni/_rang don tsam dang gzhan don nyi tshe ba tsam las med pa'i 'og ma'i bslab sdom lta bu bcas pa chung ngu rnams bag yangs su 'jog par gnang ba'i skabs yod do/__/dper na chen po grong khyer gyi phyir na chung ngu grong brdal lta bu dang*/_bdag gi lus srog gi phyir sdod gnas kyi sa gzhan la gtong ba dang*/_lung rtogs kyi chos rgya cher dar phyir bdag kyang gtong ba sogs gnang ba yin no/__/bslab khrims la gnas pa'i skabs 'di na grogs sam 'khor ni 'di yin te/_mi mjed pa ste sdug bsngal sogs rkyen thams cad theg pas bzod pa'i ngo bo ni sa gzhi bzang po lta bu la/_tshul khrims gsum gyi rang bzhin chos kyi me tog gi tshal la yon tan gyi dri bzang po kun nas rgyas pa rab tu bsrung ba'i ra ba lta bu/_rang gzhan don gnyis gang yin kyang dka' spyad dang sdug bsngal gyi khur chen po ci byung ba de nyid dang du len shing bzod pa dang*/_pha rol pos gnod 'tshe ci byas kyang ji mi snyam pa'i bzod pa dang*/_stong nyid sogs zab mo'i don la mi skrag pa ste rnam pa gsum mo/__/yid ni shin tu rengs pa ste gyong shing ma rungs par bya ba'i zhe sdang gi sdig pa'i mngon rtogs ni dga' bde sgrib pa'i mun pa lta bu dang*/_gsod pa dang brdung brdeg sogs nyes pa sna tshogs pa'i 'khri shing can yin la/_des ni thar du med pa'i dmyal bar 'phen zhing der 'dzul ba la skrag pa rnams/_nam yang khro ba'i rnam rtog sems la skye ba'i go skabs dbye bar mi bgyid de/_spyod 'jug las/_zhe sdang lta bu'i sdig pa med/_/bzod pa lta bu'i dka' thub med/_/de bas bzod la nan tan tu/_/sna tshogs tshul gyis bsgom par bya/_zhes so/_/gnod pa'i yul ni dpag tu med de/_dper na nags kyi tsher ma bsal gyis mi lang la der ma phyin na mi gnod pa bzhin/_gnod pa'i yul de dag thams cad 'dul gyis mi lang ste slar yang kun nas 'phel ba can du zad de/_de bas phan tshun mi 'dod pa'i bsam pas 'khon dang*/_de'i dbang gis khro ba'i kun kun rtog bzod par dka' bas rang gzhan kun gyi rgyud ma rungs par byed pa po ni/_thog mar yul la mi 'dod pa'i rnam par bzung nas nye bar len pa'i sems yid mi bde ba de nyid gcig pu shed ma rgyas gong du phag sna gtun brdung dang kong bu dro phyis zhes pa'i dpe ltar btul bar byas na/_bzod pa'i dka' thub ces mi thub khur chen po de yang bdag la mdza' bar 'gyur ro/__/pha rol pos skyon mtshang smras na/_tshig de dang*/_rang gi rna ba'i dbang po dang*/_shes pa ste gsum po phrad cing reg pa'i tshor ba shin tu rtsub pa'i rang bzhin du tshig gi rnam pa de shar nas/_dper na mdas skyes bu'i gnad la bsnun pa ltar snying tshal par 'gas pa tsam du sdug bsngal nas mi bzod pa drag po skye na'ang*/_brtag nas tshig de brag ca bzhin yin pas snying la zug pa ltar snang ba de la dngos su zug rngu zhig cang mchi'am ste cang med do/__/'o na ci zhe na/_tshig de nyid rang la gnod pa'i ngo bor dang du blang ba'i nyer len sgra don 'dres 'dzin gyi rtog pas yang yang myangs bas phan tshun gnod bya dang gnod byed rten dang brten par gyur nas khong 'khrugs bzhin des bskyed pa'i sdug bsngal gyis mnar bar 'gyur bas na/_srid pa'i gnas 'di na gnod pa'i rgyu ltar snang ba'i brdung brdeg 'phrog bcom ngan smras sogs spyi'i 'bras bu lus sems sdug bsngal mtha' yas su snang ba ji snyed thams cad bdag nyid las byung ba yin te/_dper na ca co'i sgra bsgrags pa dang brag ca 'byung ba bzhin yin te/_spyir bdag nyid ma byung ste gtan nas med na pha rol pos gnod pa bya ba'i yul med pas/_rang gis sngon byas rkyen gyis bos la ltos shig_/bzod pa gnod byed kyi rkyen las grub phyir brtags na gnod byed 'di ni gnod pa chen po ma yin la phan chen po yin te/_gnod byed dgra bo gang la brten nas theg chen rgya mtshor bgrod pa'i bzod pa'i gru gzings dang*/_de la brten nas byang chub sems kyi nor bu rin po che rang gzhan 'phral yun gyi phan bde dam pa'i rgyu 'thob par 'gyur bas na/_bzod pa'i rgyu de dang 'dra ba'i gnod pa byed pa'i dgra de bzod pa'i zhing du bsam nas dam pa'i chos ltar mchod par 'os so/__/chos la nges sems kyi bzod pa brtags tshul ni/_shin tu brtags shing dpyad na rang la gnod pa'i ngo bo de gnod byed yul gyi steng na 'dug gam/_des byas pa'i las kyi steng na 'dug gam/_gnod bya rang gi steng na 'dug gam zhes brtags na gzhan gang na'ang mi 'dug ste/__sngar bshad pa bzhin rkyen sna tshogs tshogs pa na rang gi nyer len sems kyis glo bur du bzos pa tsam yin la/_sems de yang brtags na mtshan nyid rgyun chags su 'dzin pa'i nus pa med de/_dper na chu yi ri mo ni mod la byung yang mod la med pa bzhin/_rnam par rtog pa dang bcas pa'i khro gnyer rtsub mo rang rkya ma thub par zhig pa'i mod la sems nam mkha' bzhin du rnam par dag pa rnam rtog thams cad dang bral ba ye stong chen por gnas pa la thob shor ram blang dor gang yang med pa de'i ngang bskyangs te rkyen dbang du ma song bar bya ba 'di yang zab mo dbu ma'i lam gyis nyon mongs chos nyid du sbyang zhes pa de yin no/__/gang gi phyir na bzod pa'i dka' thub la gsum ste/_las dka' ba la dang len dang*/_gnod byed la ji mi snyam pa dang*/_chos nyid la nges par sems pa ste 'og ma 'di med na gong ma gnyis yod kyang lam tsam las 'phags mi nus pas de rnams nyams shing med na sbyin sogs pha rol phyin pa gzhan lnga yang*/_dper na phyi mtha' thams cad dgra rkun gcan gzan du ma yis bskor ba'i bshul lam la dpung gnyen med par zhugs te song na rang 'dod pa'i sar phyin dka' ba de bzhin du sbyin sogs la brten nas lam dang 'bras bu'i yon tan thams cad bsgrub par 'dod kyang ji ltar 'dod pa'i don de thob pa'i gnas su phyin dka' bas/_rang bskul rang la gdab nas blo stobs bskyed de bsgom par bya'o/__/dus skad cig tsam yang thos bsam dang bslab gsum gyi nyams len de las g.yol ba med pa'i brtson 'grus kyis rang dbang nyid du bsgrub bya dge ba'i chos mtha' dag_/dper na skyed mos tshal du sgo nga la yid gdung ba'i ngang pa khyo shug bu'i nus pa rdzogs tshe phyi bshol med par 'gro ba bzhin du/_le lo gsum po'i g.yang sa la dge ba'i phyogs bskyud pa ste brjed nas lus pa med par 'jug pa gal che'o/__/bya ba ngan pa ni 'jig rten gyi bya bzhag sna tshogs la zhen cing skye bo mang po'i 'du long dang 'dzi ba ni 'dzings pa ste/_gnyen la chags pas 'brel/_dgra la sdang bas 'brel/_longs spyod gsog bsrung spel ba'i las kyis 'brel te de dag gi gseb nas mi thar ba ni/_dper na srin bu'i kha chu'i thag pas rang nyid dkris pa lta bu dang*/_dka' ba la sgyid lug pa'i le lo'i mthus non te dge ba la sbyor ba'i nus pa'ang btang ste phyi bshol du lus pa dang*/_bdag lta bus ga la nus snyam nas bdag nyid brnyas nas sems zhum pa'i brtul zhugs dang du blangs pa des ni rang gi chos skal rang gis bcad pa yin no/__/des na de 'dra'i gang zag le lo gsum gyi nyes pa'i rgya mtsho bying ba las thar pa'i go skabs med de/_dper na lcags gzer zhig pa'i gzings la zhon na chu ngogs su mi phyin pa bzhin no/__/theg pa chen po'i lam gyi gegs su gyur pa'i bdud bzhi yi dpung thams cad 'joms par byed pa dpa'o g.yul las rgyal bar byed pa blo snying stobs kyi go cha rkyen gang gis kyang mi shigs pa'i brtson 'grus dang*/_sa bcu'i ngo bo mthar phyin par byed pa slob lam bzhi po'i 'gros kyis tshul khrims gsum la rim gyis sbyor ba'i sgo nas lam lnga mthar phyin par byed pa'i brtson 'grus dang*/_/sngar dam bcas nas brtson pa'i bsam sbyor gnyis po de slar je zhan du song nas mi 'gong ba dang*/_rkyen gang gis kyang bar ma dor mi ldog cing*/_lam gyi yon tan gang byung yang chog shes med pa yi brtson 'grus can gyis ni/_gnas skabs dang mthar thug gi smon pa'i don kun 'grub pa the tshom med do/__/bdag gi tshe 'di la ni nyin mo'i snang ba bzhin da lta gnyen bshes longs spyod phun sum tshogs kyang*/_tshe zad tshul ni nyi ma nub rir phyogs pa ltar skad cig skad cig gis mthar gyur te/_myur ba myur bar grib so ltar 'chi ba'i mun nag gis tshur tshur gtugs te 'chi ba'i tshe na/_longs spyod 'di dag gis 'di bya'o zhes gnyen grogs rnams kyis yo byad bgo bsha' byed tshul yad yud tsam mthong ba'i 'khor ba'i bya bzhag 'jig rten gyi spyod pa mtshan mo'i rgyu skar las rnam grangs mang ba rnams kyis rang la sngar bsags med na/_shul mi rnams kyis dge tshogs ci byas kyang de yis bar do'i 'jigs skrag sogs las dbugs mi phyin te/_spyod 'jug las/_gshin rje'i pho nyas zin pa la/_/gnyen gyis ci phan bshes ci phan/_/zhes so/__/le lo'i skyon gyis 'dam chu lta bu'i rnyog pa dwangs bar byed pa'i brtson 'grus kyi grogs dang bcas nas/_lam gyi bgrod tshul dal 'bab ste kha babs chu bo bzhi lta bu ni chu phran phyogs su lhung nas skam pa'am 'khyil bar ston pa lta bu ma yin par rgya mtsho chen por ngang gis 'bab pa bzhin/_rnam pa thams cad kun mkhyen pa'i ye shes rgya mtsho chen por phyin pa de srid du rtag par thang lhod med pa'i gus sbyor dang rtag sbyor gyi brtson 'grus drag pos 'bras bu'i sar g.yo zhing myur ba'i sgo nas bgrod pa'i brtul zhugs nyams par mi bgyid do/__/gang du gzhi thams cad rtswa ljang dang ldum bu'i rigs sna tshogs kyis bkab pa la rma bya'i mgrin pa lta bu'i kha dog shin tu legs pa'i nags tshal yal 'dab me tog sna tshogs pas mdzes par spud cing nyams dga' bar 'khrigs pa'i gnas su rlung bsil bu'i rkyen gyis dri bzang po'i ngad phyogs kun tu ldang pa'i sman ljongs der ni/_'bab chu bsil ba'i sgra ha cang mi rtsub pa snyan par 'bab cing*/_mtshams mtshams su mtsho lteng ka ne seng sogs mu khyud can la ngang pa dang*/_dur pa la sogs pas skad snyan sgrog cing spyod lam shin tu zhi ba mang pos bsten par byas shing*/_ri yi ngos rnams su lta na sdug pa brag ri'i ngos 'jam zhing kha dog snum pa'i dkyil na rang byung gi phug pa dang*/_steng 'og rnams su brag them dang ri mo bkra zhing kha dog phyed pa'i dbyibs lta bu'i pha gu dang*/_rta babs kyi rnam pa can gyis mdzes pa'i spo na bya dang*/_ngos dang gsham rnams su ri dwags gzhon nu 'grogs na bde bas mdzes pa yod do/__/rang bzhin snying la dga' ba bskyed pa'i nags tshal lha mo lta bu gzugs mdzes pa'i rked chings ni/_shing bal gzhon nus lu gu rgyud du sprel ba'i drwa phyed g.yo ba na/_'tshe ba la dogs pas skrag pa min pa'i khu byug gi tshogs rnams/_'khor bar skyo ba'i gtam gyi spring yig gsar pa'i skad snyan 'grems par byed do/__/de lta bu'i chos mthun gyi dga' ba'i longs spyod mang pos brgyan pa'i dben gnas de ru gshegs shig su zhig na bsam gtan bsgom par 'dod pa rnams so/__/ci'i phyir na/_'jig rten gyi longs spyod glo bur ba mi rtag cing sprin gyi bla re lta bu'i nang shed na/_skyes bu rnams kyi tshe brtan cing srog 'tsho ba'i rkyen du phan par rlom nas rol zhing spyod na'ang*/_snang ba tsam las med pa'i glog gi 'gyur ba ni skad cig gis g.yo zhing 'dar nas zad par 'gyur ba las yud tsam sdod long med pa'i gnas skabs lta bu 'gyur ba'i sdug bsngal dang*/_sdug bsngal gyi sdug bsngal dang*/_khyab pa 'du byed kyi sdug bsngal te gsum gyi chom rkun lta bu dkyu zhing 'gro bas mnar bar byed cing*/_khyad par 'di phyi gnyis kar phung krol du ma skyed par byed pa ni dper na rba rlabs 'khrugs pa'i chu klung ca co can bzlog tu med par rgya mtshor 'gro ba ltar/_skye bo rnams longs spyod gsog pa dang*/_srung ba dang*/_spel ba gsum gyi ngal dub sogs sdug bsngal drag pos gdung ba'i ngang la 'dod pas chog mi shes pa'i rnam rtog ngan pas rgyud 'khrugs pa dang*/_longs spyod 'byor pa cung yod pas khengs shing pha rol khyad du gsod pa dang*/_de nas kha bri yi dogs nas 'jungs pa dang*/_rang gi kha zas rgyan gos tsam yang spyod mi bra ba'i ser snas bdas bzhin tshe yi mthar gtugs nas rgyu des 'bras bu ngan 'gro'i chu gter mu mtha' med par 'khyams so/__/rgyud mi drang ba'i bsam pa gya gyu ba'i g.yo dang*/_gzhan bslu sems kyi sgyu'i rang bzhin dper na dbyar dus kyi char sprin lta bu brnag pa'i mi dge ba'i bsam sbyor gyis rin thang can gyi longs spyod kyi dngos po nor ni ji tsam 'byor bzhin 'di phyi kun tu sdug bsngal dpag tu med pa'i rgyu yin no/__/des na yo byad bsnyungs ba rnams la dgra rkun 'tshe bas spang zhing*/_chog shes thob pa ni 'byor pa'i rtse mor 'gro ba yin no/__/so so'i skye bo'i nang nas phal ba blun po'i rang bzhin ni byis pa ma rabs zhig ste/_'di ltar byis pa rnams kyi rgyud ni bsam sbyor phyi na ci log gi nyes pa'i sprin gyis 'khrigs pa yin te/_bdag nyid bstod cing gzhan la mi snyan par sgrog pa dang*/_nyon mongs pa'i dug gis khog pa gang zhing bsam sbyor sbrul gdug gi lce bzhin bsam sbyor rtsub mo'i nyams bag la rtag tu bsten nas sdig pa mi dge ba 'phel ba'i 'jig rten pa'i dpal 'byor g.yo ba snying po med pa gang la'ang rtag par sems nas/_dge ba'i bshes gnyen sogs kyis phan pa ci byas pa la yang drin du mi gzo zhing*/_chos mthun gyi bsam sbyor bzang po ci byas kyang mgu ba'i gzugs brnyan phyin ci log tu 'khyog ste khro nas mi dga' ba'i rnam 'gyur ston to/__/'khon gyi zug rngu me lce lta bu cung zad yod pa'ang phra ma'i ngag sbyor rlung chen dag gis bskyod de 'thab par byed pa dang*/_rang bzhin mi brtan cing spre'u bzhin du spyod pa thams cad chos dang 'gal bas gnod pa'i rgyu mi dge ba sna tshogs pa ster ba/_chu srin kha gdangs pa'i nang srog chags sna tshogs rngub ste lto bar chud pa bzhin du sdig pa'i las sna tshogs bsgrub pa'i sems kyi lto ba yangs pa/_dug rlangs 'thul ba'i sbrul gdug bzhin du su dang phrad pa 'joms shing*/_khong khro la sogs pa'i dbang gis me chen po bzhin du rang bzhin du rang gzhan gyi rgyud kyi dge ba'i ljon shing bzang po thams cad skad cig yud tsam la sreg par 'gyur ba'i phyir na/_tha chad kyi byis pa'i grogs po ngan pa las ring du bsring bar bya'o/__/'dod pa'i yul gzugs sogs drug la dbang po drug g.yo zhing spyod pa ni/_rno myur dug las thu ste dug gis srog gcig kho nar nyen che zhing sngags sman rnams kyis ma zin na 'dor la/_'dis ni tshe rabs su ngan 'gror mnar ba'i rnam smin shin tu rtsub ste/_dug ni spyad pa'i mod la bda' ba'i ro mngar ba sogs bro zhing myong zin tshe sdug bsngal na yang sngags sman sogs kyis gso rung zhing*/_yul la spyad pa'i nyes pas ni tshe rabs gcig min la skye ba mang po'i dus thams cad du sdug bsngal zhing*/_nyes pa de ni gsang sngags mchog dang bzhi brgya rtsa bzhi sel ba'i sman gyis kyang gsor mi rung bas/_so skye gang zhig yul gyi 'dod yon dug gis myos pa'i sems kyi glang po che lhag mthong gis ma dul bar du/_slu bar byed pa'i yul gyi nyes dmigs mngon du mi mthong bas yon tan du brdzu zhing bslu thabs sna tshogs kyi rdzu 'phrul la yul las che ba med de/_nam zhig gzugs kyi phung po'i 'du byed zhig ste shi bas khyogs la bzhag nas mi bzhis btegs pa'am/_phyugs sogs la bkal te dur khrod du ma bskyal gyi bar de srid du 'du 'dzi'i rnam g.yengs zhi ba'i nags mthong sogs dben gnas dag la bsnyen par mdzod ces gdams pa'o/__/rgyang grags phyed dam grong zad pa'i mtshams bas mtha' dang*/_grong las rgyang grags yan chad 'phags pa'i 'brog dgon ni/_sems brtse ba med pas yid du 'ong zhing skyo shas 'phel ba/_tshong dang zhing las la sogs so nam dang bsam sbyor ngan pa'i sdig pa'i grogs la sogs rnams kyis spangs te med pa dang*/_dpya 'bebs pa ste 'u lag tu 'ded pa dang*/_khral 'jal ba dang*/_bran g.yog sogs gzhan gyi nus pa la brten nas 'tsho dgos pa zho shas 'tsho ba la sogs pa'i brel bas mi gdung zhing*/_de na 'khod pa'i bya dang ri dwags rnams ni bag phebs pa las mi snyan pa sgrog pa med la/_chu gtsang dang 'bras bu dang rtsa ba sdong bu myu gu lo ma yal 'dab la sogs pa 'phags pa dgyes pa'i nyer spyod rgya che la/_rang byung gi brag ri'i phug dang*/_lo ma'i spyil bu'i khang bzang spyod lam bzhi shong bas yangs pa dang*/_ljon pa'i shing gi grib bsil sogs nyams dga' zhing 'grogs na bde ba de dang mthun par nam zhig bdag ni lhan cig gnas par 'gyur na ci ma rung bsam mo/__/phun sum tshogs pa'i gnas de ru bsdad na phyi nam zla dus bzhi'i 'gyur ldog ni/_dper na mgron po snga ma snga ma'i rjes la phyi ma phyi ma gsar du slebs te brjes pa lta bu yis shing rnams mdog rim gyis dus su 'pho 'gyur mngon rtogs ngom pa'i nags tshal rnams kyis/_rang nyid nyon mongs pa'i rkyen ma yin par rgyal ba'i bka' la gtan tshigs su byas te/_gom bdun phyogs pa'i bsod nams tshad med do zhes sgrog pa la ltos shig ces rab btags kyi rgyan du sbyar nas bsngags te/_ting 'dzin rgyal po las/_gang la la zhig gis sangs rgyas thams cad la bskal pa'i bar du me tog dang*/_bdug spos dang zhal zas dang bde bar sbyar ba'i yo byad thams cad kyis bskal par mchod pa bas/_rab tu skyo ba'i sems kyis dgon par phyogs te gom bdun tsam bor na/_'di de bas kyang ches bsod nams kyi phung po dpag tu med de/_lus dang srog la blta ba rab spongs la/_/stong pa zhi ba mchog tu goms par gyis/_/[⁽1498⁾]brtson zhing rab tu brtson pa'i yid kyis kyang*/_/ri dwags bzhin du dgon par gnas par gyis/_/zhes so/__/dben gnas gang du bsam gtan la mnyam par 'jog pa shin tu ste skad cig kyang mi yengs par bsten pa ni/_lhag pa sems kyi bslab pa'i mtshan nyid de/_rten 'brel lus la bsgrigs nas 'dug tshul legs na rtsa dang rlung drang ba'i gnad kyi rten cing 'brel 'byung las rtogs pa sems la 'char bar 'gyur bas lus kyi cho ga ste 'dug tshul gyi bya ba ni/_stan bde ba la rnam snang chos bdun gyis 'dug par bya ste/_rkang pa skyil krung ngam skyil krung phyed pa bca'/_mig 'byed 'dzum ran par sna rtser gtad/_lus dgye sgur dang g.yas g.yon rnams su ma yo bar drang por bsrang*/_phrag pa mtho dman med pa nyid du mnyam par bzhag_/mgrin pa cung zad bkug la sna dang lte ba drang por bstun/_lce yang so yi drung du bzhag_/dbugs 'byin 'jug rang babs su dal bar bya ba ste/_de ni sems kyi srog shing can zhes srog shing btsugs pa bzhin gzhan du mi 'phro ba'i thabs so/__/dmigs yul gang la sems 'dzin pa de gcig pu las mi dge ba dang lung ma bstan lta ci dge ba'i dmigs pa gnyis pa la'ang gtad pa ma yin par dmigs yul de kho na la sems cha mnyam par bzhag pa la brtson dgos te/_de yang 'di ltar gzugs can nam gzugs can ma yin pa'i dmigs pa gang yang rung ba'i don la rtse gcig tu 'dzin pa dang*/_skabs skabs su dpyad pa'i stobs kyis yid ni dge ba'i don la rnam par bcing zhing dpyad 'jog spel mar bya ste/_las dang po pas rten sku gzugs sogs la blo gtad cing 'das 'ong sogs mtshan nyid gzhig la/_de nas rim par yun bsrings te bsgoms pas mthar rnam par rtog pa'i 'dzin stangs kyi spros pa'i snang ba thams cad chos nyid stong pa'i rang bzhin gcig tu nub cing*/_de yang snang cha 'gag pas phyang chad du ma yin par yul snang gzugs sogs ma 'gags kyang dngos po med pa'i lta ba mtshan nyid ma grub pa ltar dka' ba'i phyir der 'dzin med pa yin no/__/de lta bu'i ngang la bying rgod skyon gyis mi 'phrog pa'i shes pa yul la mi rtog par rtse gcig tu gnas pa'i cha mnyam bzhag gam zhi gnas yin la/_de dang ngo bo gcig pa'i ye shes rang bzhin yongs su shes pa'am/_nang sems nyid tsam la'ang ma zhen pa'i cha ni rjes thob bam lhag mthong ste/_dkon mchog sprin las/_zhi gnas ni sems rtse gcig pa'o/__/lhag mthong ni yang dag par so sor rtog pa'o/__/zhes pa'o/__/de la nang gses kyis dbye na/_byis pa so so'i skye bo rnams lam la nye bar spyod pa'i bsam gtan dang*/_don rab tu rnam par 'byed pa mthong lam gyi rgyur gyur pa'i lam zhugs 'jig rten pa'i rgyud kyi bsam gtan dang*/_'phags pa'i lam la zhugs pa'i rgyud kyi de bzhin gshegs dge'i bsam gtan ste rnam pa gsum dang*/_yang rtog pa dang dpyod pa dga' bde rnams yod med kyi mu bzhi'i dbye bas bsam gtan dang po sogs bzhi/_de bzhin nam mkha' mtha' yas sogs gzugs med bzhi ste rnam pa'i grangs snyoms 'jug brgyad rnams yod pa yin no/__/theg gsum gang rung gi lam la ma zhugs pa'i rgyud kyi ting nge 'dzin ni bsam gtan bzhi dang*/_gzugs med bzhi ste brgyad po ni byis pa nyer spyod kyi bsam gtan zhes bya ba yin no/__/bsam gtan bzhi po 'di dag gi don cung zad phral te bshad na/_bsam gtan bzhi dang*/_gzugs med bzhi las/_dang po bsam gtan la nyer bsdogs dang dngos gzhi gnyis las/_dang po nyer bsdogs la bsgom tshul mang yang*/_'jig rten pa'i lam rkyang pa la zhi rags kyi rnam pa can du bsgom pa shas che bas de ltar na/_dang po 'dod pa'i sems ni rags pa dang*/_ma zhi ba dang*/_mtshan mar dman par bltas nas bsam gtan dang po ni/_de bas lhag par yang zhi ba dang*/_bde ba gya nom pa'o snyam nas thos bsam 'dres ma'i tshul gyis yang dang dang du yid la byas pas nam zhig thos bsam las 'das nas sgom byung du song ste/_'dod pa'i nyon mongs che 'bring drug spangs pa'i bar ni bsam gtan gyi nyer bsdogs so/__/de nas 'dod pa'i nyon mongs pa chung ngu gsum spangs pa'i tshe na bsam gtan dngos gzhi'i sems thob pa'o/__/bsam gtan dang po la yan lag lnga ste/_rtog pa dang*/_dpyod pa dang*/_dga' ba dang*/_bde ba dang*/_ting nge 'dzin dang lnga'o/__/rtog dpyod gnyis ni mdzod las/_rtog dang dpyod pa rtsing zhib nyid/_/ces pa ltar sems ting nge 'dzin skyon med du gnas mi gnas rags par rtog pa dang*/_zhib par dpyod pa dang*/_sems ting nge 'dzin la gnas pas yid shes bde bas khyab pa dga' ba dang*/_de'i stobs kyis lus la shin sbyang gi bde ba skyes pa bde ba dang*/_sems rtse gcig pa'i ting nge 'dzin la gnas pa ting nge 'dzin no/__!__bsam gtan gnyis pa la yan lag bzhi ste/_rab dwangs dang*/_dga' ba dang*/_bde ba dang*/_ting nge 'dzin no/__/dran pa dang shes bzhin dang btang snyoms kyi ngo bo yin yang 'dir dga' ba'i g.yo ba dang ma bral ba'i phyir rab dwangs gi sgras bstan to/__/lhag ma gsum ni sngar bzhin no/__!__bsam gtan gsum pa la yan lag lnga ste/_bad \u0f7a ba dang*/_btang snyoms dang*/_dran pa dang*/_shes bzhin dang*/_ting nge 'dzin dang lnga'o/__/bde ba ni sngar dang 'dra la/_btang snyoms ni sems byings rgod med par gnas pa'i tshe rang babs su 'jog pa'o/__/dran pa ni ting nge 'dzin mi brjed pa'o/__/shes bzhin ni bying rgod la sogs byung ma byung rtog pa'o/__/ting nge 'dzin ni sngar ltar ro/_!_bsam gtan bzhi pa la yan lag bzhi ste/_dran pa dang*/_tshor ba btang snyoms dang*/_'du byed btang snyoms dang*/_ting nge 'dzin no/__/dran pa dang ting nge 'dzin sngar dang 'dra la/_/tshor ba btang snyoms ni lung ma bstan no/__/'du byed btang snyoms ni sngar dang 'dra'o/__/de yang rtog dpyod la sogs yan lag lnga dang ldan pa ni bsam gtan dang po'i dngos gzhi tsam po ba yin la/_de las rtog pa med la dpyod pa dang bcas pa ni dngos gzhi khyad par can no/__/rtog dpyod gnyis ka spangs pa ni bsam gtan gnyis pa'o/__/rtog dpyod dga' ba gsum spangs pa ni bsam gtan gsum pa'o/__/de gsum bde ba dang bzhi spangs pa ni bsam gtan bzhi pa'o/__/bsam gtan dngos gzhi ma thob kyang bsam gtan dang po'i nyer bsdogs yang dag pa des kyang lhag mthong gi rten byas pas na nyer bsdogs mi lcogs med ces bya la/_nyer bsdogs de dang*/_dang po'i dngos gzhi la tsam khyad gnyis/_lhag ma gsum dang*/_drug la bsam gtan sa drug zhes bya'o/__/gnyis pa gzugs med rnams ni yan lag gi dbye ba med pas dmigs rnam gyis 'byed de/_bsam gtan bzhi pa thob pa des gru bzhi zlum po la sogs pa dbyibs kyi 'du shes dang*/_dkar ser dmar ljang sogs kha dog gi 'du shes dang*/_ri dang khang khyim la sogs thogs reg gi 'du shes gsum ka bkag nas chos thams cad nam mkha' ltar bsgoms pa gzugs kyi 'du shes thams cad las 'das nas nam mkha' lta bu'i ngang du gnas pa ni nam mkha' mtha' yas/_nam mkha' tsam du'ang 'dzin pa spangs nas nam mkha'o snyam byed rnam shes tsam gyi ngang du gnas pa ni rnam shes mtha' yas/_rnam shes tsam du'ang 'dzin pa spangs nas ci yang med do snyam du gnas pa ni ci yang med pa/_ci yang med do snyam du 'dzin pa yang spangs nas ci yang med do snyam mkhan gyi 'du shes brtags nas/_'du shes kyi 'gyu ba rags pa thams cad bkag nas/_'du shes phra mo tsam la gnas pa ni 'du shes med 'du shes med min gyi skye mched do/__/'di la yod min med min yang zer ro/__/theg gsum gang rung gi lam la zhugs pa'i gang zag tshogs lam dang sbyor ba'i lam du lhag mthong dang 'brel bar bsgom pa'i ting 'dzin gyis/_thar pa mthong lam mngon du byed pa don rab 'byed pa'i bsam gtan zhes rgyu las 'bras ming du btags par grags so/__/byang chub sems dpa'i 'phags lam gyi ye shes dang po'i sa rab tu dga' ba yan chad 'phags pa'i ting 'dzin te/_de dag gi rang bzhin zag pa med pa'i ye shes yin pas phyi ma ni de bzhin gshegs pa'i ye shes zhi lhag mthar phyin pas zag med kyi dge ba yin no/__/bsam gtan de dag kun kyang ngo bo ni phyi rol du mi g.yeng bar nang du sems rtse gcig tu 'dzin pa yin la/_de 'grub pa dang mthar phyin pa'i rgyu ni dmigs rnam mi brjed pa'i dran pa rgyun chags pa dang spro ba'i brtson 'grus kyi rkyen la ltos pa can yin no/__/rtse gcig pa'i dran pa nyams nas phyi rol du rnam par g.yengs par gyur na/_de ma thag shes bzhin gyis zin par byas te brtson 'grus kyis slar yang dmigs pa de la bslan nas bsgom par bya'o/__/des na thun mong gi bsam gtan bsgrub par byas na de'i byed las ni/_lus dang sems la shin tu sbyangs pa'i bde ba bskyed cing rdzu 'phrul sna tshogs 'grub pa'i rten byed la/_bsam gtan de 'grub tshe 'bras bu sngon gnas rjes dran sogs mngon shes dang zil gnon la sogs pa nyan thos dang thun mong gi yon tan thob pa yin no/__/de dag gi tshe bsam gtan dang po'i nyer bsdogs yid byed drug gi tshe rags par rtog cing zhib par dpyod pa tsam dang*/_dang po'i dngos gzhi'i skabs su rtog pa med la dpyod pa tsam dang*/_lhag ma bsam gtan gnyis pa sogs gsum por rtog dpyod gnyis ka med pa yin la/_bsam gtan dang pos gnyis pa'i nyer bsdogs byed pa sogs rim gyis snga ma snga mas phyi ma phyi ma'i nyer bsdogs byed cing*/_de bzhin du bsam gtan bzhi pas nam mkha' mtha' yas skye mched kyi snyoms 'jug gi nyer bsdogs sogs phyi ma gsum po'ang rim par byed do/__/des na snyoms 'jug dgu bo de la 'phags pa gsum ka'i mthong sgom gyi lam gyi rten gzhi zhes su grags so/__/theg gsum gyi lam dang 'bras bu'i yon tan ji snyed yod pa thams cad bskyed pa'i rgyu zhi lhag dang*/_khyad par theg chen lam dang 'bras bu'i yon tan kun gyi rgyur gyur pa'i bsam gtan ni/_sems can la dmigs pa'i snying rje dang ni spros pa dang bral ba'i ye shes dam pas zin pa de la goms stobs su gyur pa las rang dang ngo bo gcig ba'i ting 'dzin gyi sgo mang po dang ldan te/_theg chen thun min sa lam gyi yon tan ji snyed pa'i rnam pa thams cad 'grub par byed cing*/_de dag gis sgrib pa spong tshul yang*/_mnyam rjes la phye tshul gnyis las/_mnyam rjes ngo bo gcig pa'i dbang du byas na sems rtse gcig tu mnyam par bzhag pa'i tshe sems dang sems byung gi 'gyu ba rags pa thams cad nub nas sems rtog med du gnas pa ni mnyam bzhag yin la/_de'i tshe dbang shes ma 'gags pa la yul snang thams cad snang la 'dzin pa med pa gsal ba'i cha ni rjes thob yin pas blo'am rig pa rdzas gcig pa'i mnyam bzhag dang rjes thob de yis gzung 'dzin gyi rtog pa rim gyis spong bar byed la/_yul gyi rang bzhin med bzhin snang ba ni gzung ba dang*/_der 'dzin skyes pa ni 'dzin pa'am/_don tshogs brgyad yul gzugs sogs la de dang der 'dzin pa gzung rtog_/yul can tshogs brgyad kyi rtog pa la de dang der 'dzin pa 'dzin rtog zhes bya la/_de yang gzung 'dzin spong ba dang*/_gzung 'dzin gyi rtog pa spong pa na gzung 'dzin kyang spang ba yin pa'i phyir ro snyam ste blo gsal dag gis dpyod cig_/yang mnyam rjes tha dad pa ni/_sems rtse gcig tu mnyam par bzhag pa'i tshe na mnyam bzhag yin la/_de las langs nas za nyal la sogs spyod lam gyi tshe sgyu ma lta bu'i dran rtsi dang ma bral ba ni rjes thob bo/__/'gro 'dug sogs kyi dus su tshogs drug gi shes pa phyi rol du song ba la rgya yan pa zhes bya ste/_sa bdun tshun chad kyi 'phags pa de rnams la'ang skabs rer de 'dra ba kun na yod pa yin zhes gsungs so/__/bslab pa gsum gyi nang tshan lhag pa shes rab kyi bslab pa'i ngo bo dang dbye ba la sogs pa'i don nges par 'byed cing gsal bar bstan pa ni/_sgom byung gi shes rab kho na'i dbang du byas te ting nge 'dzin gyi sbyor ba nyer bsdogs la goms pa las de'i ngo bor skye ba dang sems las su rung zhing*/_sgrib rnyog dwangs pa'i bsam gtan dngos gzhi'i ngo bo skyes pa dang*/_rjes thob de'i stobs las chos rnams rang bzhin med par shes pa'i shes rab ngang gis byung ba'i rnam pa gsum gyi dbye bas shes rab bam/_yang thos pa dang*/_bsam pa dang*/_sgom pa las byung ba'i shes rab gsum la rim gyis bslab pas lhag mthong rnam par mi rtog pa'i ye shes yang dag par 'grub par 'gyur ro/__/byed las ni thar pa la bar du gcod pa'i nyon mongs pa'i tshogs dang*/_rnam mkhyen la bar du gcod pa shes sgrib 'joms par byed cing*/_chos nyid zab mo'i gnas lugs dang*/_chos can 'khrul ngor snang ba mtha' dag gi don ma nor bar shes pa'o/__/de ltar shes pas srid pa'i grong khyer las nyon shin tu brgal dka' ba 'di las myur du sdug bsngal mtha' dag las brgal te mya ngan las tshegs med par 'da' 'o/__/sbyin sogs rnam pa drug po'ang dman mchog dang rags phra'i dbang gis gong nas gong du snga ma snga ma las phyi ma phyi ma 'phags te/_khyad zhugs pa'i tshul de dag kun kyang shes rab kyi pha rol tu phyin pa la bsten nas pha rol tu phyin pa'i ming 'thob bo/__/de yang lam du zhugs pa'i skabs 'di na so so skye bo'i sar/_thos pa las byung ba'i shes rab la ma brten na/_bsam pa dang sgom pa'i yon tan gyi rgyags dregs de ni gnas min 'khyams te/_ting 'dzin rgyal po las/_gal te tshul khrims grags pas de rgyags shing*/_/mang du thos la brtson par mi byed na/_/tshul khrims 'bras bu slar yang zad nas ni/_/phyir yang sdug bsngal rab tu myong par 'gyur/_/zhes so/__/thos pa'i shes rab ni bsam pa dang sgom pa kun gyi rgyu ru gsungs te/_slob dpon dpa' bos/_thos nyung dmus long bsgom pa'i tshul mi shes/_/de med de ko ci zhig bsam par bya/_/de bas thos la brtson bya de rgyud la/_/bsam bzhin bsgom pas shes rab yangs pa 'byung*/_/zhes so/__/gzhal bya'i chos bden gnyis kyi don ston pa'i gsung rab yan lag bcu gnyis la/_'jal byed thos pa'i shes rab kyis/_'jal tshul drang don dang nges don gnyis dang dgongs pa bzhi dang ldem dgongs rnam pa bzhir gzhal ba yin no/__/de yang don ni rton pa bzhi'i sgo nas rtogs par bya ba kho na'o/__/'khor 'das lam gsum gyi bsdus pa'i chos rnams kun gyi ngo bo'am gshis kyi gnas tshul de bzhin nyid rang bzhin gyis rnam par dag pa sems nyid 'od gsal ba'i dgongs pa ni/_skye 'gags gnas gsum las 'das pa stong pa nyid mtshan ma med pa smon pa med pa ste rnam thar gsum gyi rang bzhin du gnas pa nges don yin la/_chos can kun rdzob kyi rang bzhin 'khrul ngor snang tshod tsam 'di la brten nas lam la rim gyis 'jug pa'i phyir/_gshis la ma grub bzhin rig pas gzhal nas sgro btags te gzhi phung khams skye mched sogs dang*/_lam theg pa gsum gyis bsdus pa'i rnam bzhag thams cad dang*/_'bras bu'i rnam bzhag myang 'das gsum gyi rang bzhin du bstan pa thams cad ni drang ba'i lam yin la/_de ston pa'i gsung rab rnams ni drang don gyi sde snod/_de'i dgongs pa 'grel ba ni drang don gyi dgongs 'grel bstan bcos so/__/de ltar drang nges kyi mdo sde gnyis pos brjod bya'i don ji ltar yin shes pas drang nges gang la yid rton pa dang mi rton ba'i tshul sngar bshad pa ltar shes pa de/_gsung rab kyi brjod bya sna tshogs dang ldan pa'i mdzod khang lta bu de dag so sor 'byed cing blta bar bya ba'i lde'u mig dang po lta bu yin no/__/drang nges de dag gi rang bzhin tha dad par gsal bar byas nas drang don gyi dgongs pa can gyi gsung 'di lta bu'o zhes ston pa dang*/_drang don gyi mdo'i dgongs gzhi dang dgongs pa la brtags nas mthar nges don gyi dgongs pa ji lta ba bzhin rtogs par bya ba'i phyir/_dgongs pa bzhi dang ldem dgongs bzhi ste gnyis bshad pa las/_dang po dgongs pa bzhi ni/_rang rang gi dgongs gzhi'i don de la cung zad sgro btags nas bshad du yang yod la/_gdul bar bya ba'i yul gyi gang zag rnams re zhig tshig tsam gyis dgongs gzhi'i don rtogs pa la kha drang ba gcig bu'i slad du bstan pa ldem dgongs lta bu'ang ma yin par/_de las gzhan yang dgos ched dang bcas nas dgongs pa rnam bzhir ston pa ste/_spyir chos thams cad kyi gnas lugs la bzang ngan dang tha dad med pas/_de bzhin gshegs pa thams cad kyang chos sku'i klong du mnyam zhing gcig pa nyid la dgongs nas nga nyid de yi tshe na yang dag par rdzogs pa'i sangs rgyas rnam par gzigs su gyur to zhes pa ltar/_snga phyi tha dad du snang ba dang*/_blang dor/_'khor 'das/_bzang ngan sogs snang ba shin tu 'gal ba lta bu yin na'ang*/_gcig tu bstan pas sku tshe thung ba dang*/_sku bong chung ba sogs su blta ba'i brnyas pa ldog pa'o/__/don gzhan ngo bo nyid med pa kun brtags la sogs pa gsum la dgongs nas gzugs nas rnam mkhyen gyis bsdus pa'i chos thams cad la dpyad na gang yang ma grub par bstan pas dpyad pa la sogs pa la brten nas bden zhen ldog pa'o/__/dus gzhan ma 'ongs pa zhig la 'tshang rgya ba'i rgyu'am sa bon tsam zhig thebs pa la dgongs nas gzungs sngags 'ga' zhig lan gcig brjod pa tsam mam/_de bzhin gshegs pa dri med zla 'od kyi mtshan bzung ba tsam gyis 'bad med 'tshang rgya bar bstan pa lta bu'i le lo can rnams dge sbyor la 'jug pa'o/__/gang zag la la sbyin pa la mngon par rlom pa dang*/_'ga' zhig tshul khrims mchog 'dzin sogs ni bdud las min kyang thar pa'i gegs yin pa la dgongs nas/_sbyin pa ni bdud kyi las so zhes smad nas tshul khrims sogs bsngags pa'am/_tshul khrims ni bdud kyi las so zhes smad nas sbyin pa sogs gzhan la bstod pa lta bu gang dang gang la mchog tu 'dzin pa de dang de yi mchog 'dzin smad nas mngon rlom zhi bar byed pa'o/__/ldem por dgongs pa zhes pa ni don ji bzhin min pa'i ngag gis don de nyid bstan pa ste/_de'i tshul ni gdul bya blo dman gang zhig la/_bden gnyis dbyer med dang sangs rgyas byang sems kyi thun min gyi yon tan ji lta ba bzhin gsal por brjod pa'i tshig gis bstan na/_de dag gi blo la mi chud par yid gnyis kyi gnas thob ste don la 'jug mi nus pa'i rigs rnams la/_re zhig de nyid kyi blor chud cing dga' bar 'gyur ba'i ming dang cha ldan cung zad yod pa'i rgyu mtshan gyis/_de las rnam par bskyogs nas yang dag pa'i dgongs gzhi de bsgrub pa'i lam la gzud pa'i phyir/_tshig ni nyan po de'i blo dang mthun pa ste 'tshams pa zhig yin yang don mi mthun par bshad par bya ste/_dbye na mdo sde rgyan las/_zhugs pa ldem por dgongs pa dang*/_/mtshan nyid ldem por dgongs pa gzhan/_/gnyen po ldem por dgongs pa dang*/_/bsgyur ba ldem por dgongs pa ste/_/zhes pa ltar zhugs pa dang*/_/mtshan nyid dang*/_gnyen po dang*/_bsgyur ba ldem por dgongs pa ste bzhi yod do/__/dang po zhugs pa ldem por dgongs pa ni/_gang zhig rigs dang mos pa sogs dman pa nyan thos dag la/_chos kyi bdag med yongs rdzogs ston pa'i gzhung yum mdo lta bu dang por bstan na/_des rten 'byung gi don mi go bar tha snyad kyis stong pas chad lta lta bur go nas brjod bya'i don dang rjod byed tshig gnyis ka la skrag nas theg chen gyi lam dang bka' gnyis ka spong ba de rnams la/_mdo las/_rab 'byor gzugs ni mtshan ma'o/__/sgra ni mtshan ma'o/_/zhes gsungs pa ltar gzugs la sogs chos rnams yod do zhes smos pas/_nyan po skrag pa mi skye zhing don la grub par go nas lam la rim gyis 'jug pa ni dgos ched yin la/_dgongs gzhi ni 'khrul ngor snang tshod rmi lam lta bur dgongs pa'o/__/gnyis pa mtshan nyid ldem por dgongs pa ni/_chos kyi gnas lugs ngo bo nyid med par bstan pa de gtan med lta bu ma yin par/_rnam thar sgo gsum gyi rang bzhin du gnas pa'i don de shes pa'i don du rim pa bzhin byis pas bden par sgro btags pa'i kun brtags dang*/_rten 'brel gyi ngo bor snang tsam pa'i gzhan dbang dang*/_rang bzhin spros pa dang bral ba'i yongs grub ste rnam pa gsum po dag las/_dang po ngo bo nyid med pa'i tshul ni/_kun brtags la mtshan nyid ngo bo nyid med de/_byis pa'i log shes kyi yul de don du nges par ma grub pa'i phyir/_dper na thag khra la sbrul du 'khrul pa bzhin dang*/_gnyis par ngo bo nyid med pa'i tshul ni/_gzhan dbang la skye ba ngo bo nyid med de/_skye ba ltar snang yang dpyad na mu bzhi las skye ba ma grub pa'i phyir/_dper na sgyu ma bzhin dang*/_gsum par ngo bo nyid med pa'i tshul la/_don dam ngo bo nyid med pa'i tshul ni/_yongs grub la don dam ngo bo nyid med de/_don dam pa yin zhing bdag nyid la ma dag pa la sogs spros pa'i ngo bo nyid med pa'i phyir/_dper na nam mkha'i ngo bo la sprin gyis ma gos pa bzhin yin pas/_don de rnams la dgongs nas gzugs nas rnam mkhyen bar gyi chos rnams ngo bo nyid med pa/_ma skyes pa zhes pa la sogs pa'i brjod pa zab pa gting dpog par dka' ba dag tu ston te/_mtshan nyid ldem dgongs 'di yongs grags la/_kun brtags rdzas su dang*/_gzhan dbang rang skye ba'i dang*/_yongs grub gzhan dbang las logs su med pa'i phyir ngo bo med pa ste/_de gsum la dgongs nas ngo bo nyid med par ston pa drang don no zhes sems tsam pa kho na'i 'dod par bshad pa dang 'di'i bshad tshul mi gcig go__/gsum pa gnyen po ldem por dgongs pa ni/_blo dman pa gzhan gyis 'di snyam du/_bskal pa bzang po'i mdo sde las/_sangs rgyas stong rtsa byon pa'i tshe de dag gi nang nas shAkya thub pa ni sku bong chung zhing*/_'od kyang 'dom gang*/_'dus pa nyung ba/_sku tshe yang thung bas gzhan las dman no snyam du log par rtog pa de ldog pa'i ched du/_'chad pa po'i sku tshe dang rigs dang sku bong tshad kyis 'jal ba min te/_sangs rgyas thams cad gzugs sku gdul bya'i ngor snang tsam dang*/_chos sku skye ba med par mnyam pa dang*/_tshogs gnyis kyi bya ba yongs su rdzogs pa dang*/_gdul bya'i yul la'ang phrin las rtsol med du 'jug pa la mnyam pa lta bur dgongs so/__/des mtshon nas gnyis pa lung gi chos la brnyas pa'i gnyen por gang+ga'i klung gi bye ma snyed dang mnyam pa'i sangs rgyas la bsnyen bkur byas na/_gzod theg chen gyi rtogs pa skye'o/_/zhes gsungs pa lta bu'o/__/de'i don theg chen gyi don la dgongs nas gsungs par bshad do/__/bzhi pa bsgyur ba ldem dgongs ni/_dge sbyong gau ta ma ma bskul na'ang chos 'chad do zhes 'phya ba bsal ba dang*/_lo drug tu dka' spyad des khyad par thob na chos de yang gting dpog sla'o zhes pa bsal phyir/_zab zhi spros bral sogs gsungs nas chos mi gsung ba'i tshul bstan pa lta bu dang*/_khyad par don zab mo 'dren pa 'di ltar bsad bya ma yin pa'i pha dang ma gsod par bstan pa dang*/_de bzhin du bcom bya min pa'i rgyal po dang ni/_bram ze dang dge sbyong ste gtsang sbra can gnyis dang*/_yul 'khor skor dang bcas pa rnams bcom na/_mi de dag pa nyid du gsungs pa de dag gi dgongs gzhi ni sred len kun gzhi la sogs te/_ched du brjod pa'i tshoms las/_pha sred pa dang ma len pa ni bsad bya zhing*/_rgyal po kun gzhi gtsang sbra can bram ze ni 'jig tshogs la blta ba dang*/_dge sbyong ni tshul khrims mchog 'dzin te gnyis dang*/_/yul 'khor skor bcas nang gi skye mched gzung 'dzin dang bcas pa'i rnam shes tshogs brgyad rab bcom na/_/mi de dag pa nyid du 'gyur/_/zhes so/__/de ltar btags pa'i don rnams rnal mar bzung na nor ba chen po yin pa lta bu'o/__/mdor bsdu na dgongs pa bzhi dang*/_ldem por dgongs pa bzhi ste gnyis po'i khyad par ni/_rang bzhin ci rigs par ngo bo gcig la bye brag tha dad par yod de/_dgongs pa sgras zin tshod de tshig de'i dgongs pa min par logs su bshad nas/_'di la dgongs nas gsungs so zhes smra ba pos yid la rnam par bzhag pa'i bsam pa tsam ston pa'i cha nas bzhag pa yin gyi/_pha rol po rjes su bzung ba la ltos pa min zhes de'i cha nas bzhag pa min no/__/ldem por dgongs pa ni thad dkar mi ston par 'khyog po'i ngag gis bstan pa'i dgos pa 'di'i zhes pha rol rjes su bzung ba la ltos pa ste dgos pa ston pa'i cha nas bzhag pa'i sgra don tshig dgos ched rnams du ma yod pa de tshul bzhin du rnam par 'byed shes pa'i shes rab ni gsung rab mdo rgyud rnams la lta bar byed pa'i lde mig gnyis pa yin no/__/gzhal bya'i ngos nas rgyal ba thabs mkhas la thugs rje ldan pas dug gsum cha dang mnyam ste nyon mongs brgyad khri bzhi stong 'dul ba'i gnyen por chos kyi sgo mo brgyad khri bzhi stong gsungs pa mtha' dag pa'i brjod bya don gyi dbye ba bsam gyis mi khyab pa zhig bstan na'ang bsdu na gnyis su 'du ste/_'jig rten 'khor ba'i chos sems dang sems byung yul gyi rnam pa snang ba dang bcas pa thams cad kun rdzob bden pa'i ngo bo dang*/_'jig rten las 'das pa'i ye shes so so rang rig pa chos dbyings dang ro gcig pa ni don dam bden pa'i ngo bo ste/_des na chos thams cad gtan la 'bebs par byed pa la bden pa gnyis po de las gzhan phung gsum pa zhig ma mchis so/__/kun rdzob pa de la'ang 'khrul ma 'khrul gyi snang lugs bden rdzun gyi rnam pa gnyis su phye ste/_dus de'i 'khrul shes kyi ngo la me chu sogs dang*/_zla ba gcig la sogs snang ba ji snyed pa de snyed kyi rang rang gis mes btso bsregs dang*/_chus rlan sdud dang*/_zla bas mun pa sel ba sogs snang tshod de nyid dang mthun par don byed pa rnams/_rang rang gi shes pa dang bcas pas bsdus pa la yang dag pa'i kun rdzob nyid du bshad de/_mthun par snang ba rgyu las skyes pa btags pas dben pa'i phyir de skad brjod do/__/'khrul ngor snang na'ang smig rgyu la chu dang*/_thag khra la sbrul/_zla ba gnyis snang lta bus rim bar brlan pa'i bya ba dang*/_dug gis gnod pa dang*/_mun pa sel ba'i don mi byed pa la sogs pa de dag gi shes pa dang bcas pa la log pa'i kun rdzob dang*/_tha snyad du rang gi mtshan nyid kyis grub ma grub yod pa'i dbang gis yang dag dang log pa'i kun rdzob ste gnyis su grags so/__/don dam pa'i bden pa ni gshis kyi bzhugs tshul lam gnas tshul 'khor 'das ro gcig pa'i ye shes te/_de'i ngo bo ni/_'khor ba dang ni mya ngan las 'das pa'i chos thams cad gzod ma nas ngo bo nyid med pas gnyis su med cing gdod nas spros pa thams cad dang bral bas/_snyam byed kyi blos bsam pa dang sgra tshig gis brjod pa las 'das pas na/_rtogs pa'i blo yis don dam yin pa dang*/_ma rtogs pa'i blo yis ma yin par ma bzhag ste rtogs kyang rung ma rtogs kyang rung chos rnams kyi gshis 'pho 'gyur bral ba zhig go__/de yang rgyal tshab byams pas/_ji ltar sngar bzhin phyis de bzhin/_/'gyur ba med pa'i chos nyid do/__/zhes so/__/de ltar bden gnyis ma he'i rwa ltar tha dad med pa'i tshul ni 'di ltar/_bden pa gnyis po ye nas ro gcig tu 'dres shing dbyer med pa'i snang stong zung 'jug ni/_dper na rdzing bu dwangs bar zhugs pa ste shar ba'i zla ba'i skye mched bzhin rten cing 'brel 'byung gi chos 'di dag gtan med ri bong gi rwa ltar ma yi na par/_snang tsam pa'i cha nas kun rdzob kyi bden pa dang*/_snang dus nyid nas rang bzhin gang yang ma grub pa'i cha nas don dam pa'i bden pa'o zhes gnyis su dbye yang rang bzhin med par ngo bo gcig go_/re zhig mos spyod pa'i lam la snang ba'i chos gzugs sgra sogs 'dod pa'i yul dbang po sgo lnga'i shes pa'i ngo la tshon ris kyi kha dog ma 'dres pa lta bus so sor snang ba na/_gzugs sogs yul lnga po snang tsam pa des mi 'ching mod/_de dag la gzung 'dzin du skyes nas 'dod pa'i longs spyod du nye bar len pa'i cha bzung ba ni/_de dang de la 'di ni gzugs so zhes sogs der 'dzin gyi sgo nas mi 'dod pa la dgag pa dang*/_'dod pa la sgrub pa'i blo sems dang rtog pa sems byung gi 'khrul snang bar ma chad pa snang ba de thams cad rang bzhin ma grub cing spros pa'i mtha' brgyad dang bral ba'i tshul/_skye ba med pa rmi lam lta bu/_'gag pa med pa sgyu ma lta bu/_rtag pa med pa smig rgyu lta bu/_chad pa med pa chu zla lta bu/_'ong ba med pa mig yor lta bu/_'gro ba med pa brag cha lta bu/_tha dad ma yin pa dri za'i grong khyer lta bu/_don gcig ma yin pa sprul pa lta bu ste sgyu ma'i dpe brgyad nyid du brtags nas snang stong dbyer med la nges shes bskyed nas rtse gcig tu 'jog par bya'o/__/der ma zad bden gnyis dbyer med sgyu ma'i dpe yis rang bzhin med par shes shing bsgoms pa de yang mthar thug chos kyi gnas lugs ma yin te/_ci'i phyir zhe na/_blo yis rnam par dpyad bzod de yul du bya rung ba zhig yod na/_de ni don dam ma yin te don dam pa ni rnam par mi rtog pa'i ye shes kyis yul dang yul can gnyis su med pa'i tshul gyis rtogs par bya ba yin la/_blo ni gnyis med kyi don la sgrib pa'i kun rdzob yin pa'i phyir/_gcig dang du ma dang yod med sogs spros pa dang rnam par 'gal ba'i spros bral dang*/_chos nyid dang*/_ye shes la sogs pa'i mtshan nyid rnams ni/_blo yi yul na nam du yang gnas ma myong ste/_don dam blo yi spyod yul min/_/zhes so/__/spyir bden gnyis kyi rang bzhin de ltar yin la/_re zhig nang pa sangs rgyas pa'i grub pa'i mtha' smra ba so so yis bka'i dgongs pa len tshul tha dad pa'i dbang gis rang rang gi gzhi lam 'bras bu'i don rnam par bzhag pa'i tshul ni/_tshogs drug gi shes pa rags pa'i don dam blo yis ji ltar dpyad kyang dus gsum du bgo ru med pa'i shes pa skad cig cha med dang*/_bem po dngos po'i chos kun rdul phran cha shas bsags pa'i rags par snang ba 'di yang yod mi rung bas de dag don dam par ni/_gnyen po tho ba la sogs pas bcom pa'am gzhig kyang cha shas phye ru med pa yi rdul phran phyogs kyi cha med zhig yod do zhes 'dod pa nyan thos sde pa bye brag smra ba'i lugs so/__/mdo sde pas chos rnams bden gnyis su gtan la phab tshul ni/_chu skyor gyi don byed pa'i bum pa dang*/_gdung ma 'degs pa'i don byed nus pa yod pa ka ba lta bu dngos po gang yin pa de/_'di pa'i grub mtha'i skabs 'dir ni/_don dam par yod pa min te rdzas su yod pa'i rdul phran du ma 'dus pa las ma 'das pa'i phyir ro/__/des na bem shes cha med gnyis 'dod pa bye smrar mtshungs kyang dus gsum rdzas grub dang nam mkha' rtag dngos sogs mi 'dod do/__/de las gzhan yid rtog pa'i snang yul la shar ba'i chu skyor ba la sogs pa'i don byed mi nus pa'i ka bum sogs lta bu ni don rang mtshan pa'i gnas lugs mthong ba la sgrib pa'i phyir kun rdzob yin la/_de yang 'khrul snang gi blo ngor snang tsam du yod pa las rang bzhin grub pa med do/__/de dag la rim pa ltar rang mtshan dang spyi'i mtshan nyid kyis bshad pa mdo sde pa'i lugs ngo bo rtog ger te tshad ma dang mthun no/__/bag chags kyi dbang gis gzung ba dang 'dzin pa gnyis su med bzhin snang ba'i yul gzugs sogs dang*/_yul can 'dzin pa'i sems sogs kun btags ni gzung 'dzin gnyis su med bzhin der bden par sgro btags pa yin pas kun rdzob bden pa nyid de/_gang kun brtags las gzhan snang gzhi gzhan dbang gi ngo bo gzung 'dzin gnyis med kyi shes pa rang rig dang*/_de'i steng na kun brtags kyis stong pa'i cha yongs grub gnyis ni don dam pa'i bden pa ru 'dod pa ste snga ma chos can don dam dang*/_phyi ma chos nyid don dam du 'dod pa sems tsam pa yi grub pa'i mtha' 'dzin pa rnams kyi lugs so/__/tshogs drug gi yul gzugs la sogs pa'i chos ji ltar snang ba thams cad kun rdzob tu rang gi mtshan nyid kyis grub pa ste/_tha snyad dpyod byed kyi ngor grub pa'i phyir zhes bzhed de/_des na bden grub sogs med kyang rang ngos nas grub pa dang*/_rang bzhin gyis grub pa dang*/_rang gi mtshan nyid kyis grub pa dang*/_rdzas su grub pa rnams ni don gcig cing de don dam dpyod byed kyi rtags kyi dgag byar mi 'dod do/__/des na bu ma'i gzhung lugs las rang bzhin ma grub par gsungs pa 'ga' zhig snang ba la don dam gyi khyad par sbyar dgos zhes bzhed par snang snyam mo/__/de yang rgyu rkyen rten 'brel tsam las snang ba'i sgyu ma lta bu'i mtshan nyid du grub pa de la/_las 'bras sogs chos rnams ma 'dres par rnam par 'jog tu yod na'ang*/_don dam dpyod byed kyi rig shes kyis yul rang gi grub tshul la dpyad na gang du'ang grub pa med pa nam mkha' ltar rnam par dag pa ste/_des na bden grub dang*/_rang bzhin grub pa dang*/_yang dag par grub pa dang*/_de kho na nyid du grub pa rnams don gcig pas don dam la dpyod byed kyi rtags kyis dgag bya mthar thug pa'o/__/chos kyi bdag dang gang zag gi bdag dgag byar 'dod pa de dag ni dbu ma rang rgyud pa spyi'i lugs so/__/'di ltar snang zhing srid pa'i chos mchis so cog thams cad rten cing 'brel bar 'byung ba sgyu ma dang rmi lam lta bu'i tshul du snang ba tsam 'di nyid grub ma grub sogs su ma dpyad par don dam pa'i bden pa la ni 'jug pa'i thabs su kun rdzob dang*/_chos can rang bzhin med pa chos nyid stong pa nyid du gdod nas gnas pa don dam pa'o zhes bya bar tha snyad kyi sgo nas btags pa tsam yin gyi/_don la de gnyis ka snang ba dang stong pa gang gi yang phyogs su ma lhung bar chos rnams rang gi ngo bo gzhi med rtsa ba las 'das pa/_spros pa'i mtha' thams cad dang bral zhing*/_gzugs sogs chos 'di dag tshogs drug gi yul la skye 'gag sogs kyi rnam par snang dus nyid nas gzugs brnyan dang smig rgyu bzhin skye ba dang*/_'gag pa dang*/_'gro ba dang*/_'ong ba sogs chos thams cad rang gi ngo bo na med de/_skye sogs su snang ba'i ngo bo yang grub ma myong ba'i phyir ro/__/sems tsam pas gzhan dbang gi shes pa rang gsal gyi ngo bo mi stong par 'dod pa dang*/_rang rgyud pas gzugs sogs rgyu rkyen gzhan dbang can gyi dngos po 'di dag tha snyad du grub par 'dod pa lta bu'i sgo nas ni/_kun rdzob kyi chos rnams kyang thal 'gyur ba de yi grub pa'i mtha' ru khas ma blangs na don dam par lta ci smos/_de ni thal gyur shing rta'i srol 'byed chen po lung zin gyi skyes bu dam pa dpal ldan klu yi dbang pos dgongs 'grel gzhan la ma ltos par rang stobs kyis bkral te dbu ma rigs pa'i tshogs rnams mdzad nas da lta'i bar du dar ba yin te/_de'i tshul ni/_lang kar gshegs pa las/_lho phyogs b+he ta'i yul du ni/_/dge slong dpal ldan cher grags pa/_/de ming klu zhes 'bod pa ste/_/yod dang med pa'i phyogs 'jig pa/_/nga yi bstan pa 'jig rten du/_/bla med theg chen rab bshad nas/_/rab tu dga' ba'i sa bsgrubs te/_/bde ba can du de 'gro'o/__/zhes dang*/_'jam dpal rtsa rgyud las/_de bzhin gshegs pa nga 'das nas/_/lo ni bzhi brgya lon pa na/_/dge slong klu zhes de 'bod 'byung*/_bstan pa la ni dad cing phan/_/rab tu dga' ba'i sa thob pa/_/lo ni drug brgya dag tu 'tsho/_/rig pa rma bya chen mo ni/_/bdag nyid chen mo des kyang 'grub/_/bstan bcos sna tshogs don dang ni/_/dngos po med pa'i don de rig_/gang tshe lus de bor ba na/_/bde ba can du skye bar 'gyur/_/de ni mthar gyi sangs rgyas nyid/_/nges pa kho nar yang dag 'thob/_/ces gsungs pa ltar ro/__/de nyid kyi gzhung rigs tshogs dang bcas pa'i don 'grel ba po slob dpon Ar+Ya de wa dang*/_sangs rgyas bskyang*/_legs ldan 'byed/_zla grags la sogs pa ste de dag las khyad par mi 'phrog pa'i mkhyen rab dang ldan pa dpal ldan zla ba grags pas ni slob dpon klu'i dgongs pa ma nor bar rtsa ba'i don 'grel dbu ma 'jug pa dang*/_tshig 'grel tshig gsal rnams mdzad de rgyal ba'i dgongs pa mthar thug pa'i don ji bzhin par bkral/_thal 'gyur ba'i grub pa'i mtha'i nyi ma 'dzam gling du shar bar mdzad pas lta ngan gyi mun pa mtha' dag gsal bar byas pa'i khyad chos dang ldan pa yin pas 'dir ni grub mtha' smra ba 'og ma gsum po'i rang rang gi blo yis chos rnams kyi mtshan nyid la btags shing*/_shes rab kyi yul bdag med dang*/_skye med dang*/_stong nyid dang*/_mtha' bral sogs su dpyad nas spros pa phyogs re tsam bcad kyang dngos zhen gyi rnam pa dang bcas pa ma zad/_rang rgyud pas tha snyad du grub par khas len pa la sogs pa thams cad la'ang brtsad cing brtags pas mthar 'dzin gyi zhen pa re re nas kyang thal 'gyur chen pos sun phyung ste 'di la rgol nus pa su yang med pas grub mtha' thams cad kyi nang nas gong ma'am rtse mo yin pa 'di su la'ang nor 'khrul mi 'gyur ro/__/rgya gar du phyi nang gi grub mtha'i dbye ba mang zhing bod 'dir yang rang rang gi 'dod zhen gyis sbyar ba'i grub mtha' sna tshogs byung zhing dbu ma gsang sngags sogs kyi srol 'dzin dgongs pa len tshul mang na'ang*/_rang rang gi ngor ltos te rang rang gi blos bzhag pa'i tshul de mthar thug gi don du grub par 'dod kyi/_zhib tu dpyad te grub pa'i mtha' yi rnam bzhag thams cad kyi mtshan nyid thos pa'i shes rab kyis nyams 'og chud par byas nas/_grub mtha' bzhi po de las blang bya dngos thal 'gyur pa dang*/_dngos 'dra rang rgyud pa dang*/_dngos min bye mdo sems gsum gyi mtshan nyid thams cad ma 'dres par so sor legs par phyed pa'i tshig tsam la ma ltos par nang du nges pa yang dag rnyed pa ni bsam pa'i shes rab yin kyang*/_de nyid ni thos pa dri ma med pa'i shes rab la brten nas 'byung zhing*/_de yis rnyed pa'i don la goms par byas shing chos rab tu rnam par 'byed pa'i shes rab yang dag pa des nang du nyon mongs dang mngon zhen gyi rtog pa thams cad bcil te rgyud la mi gnas par byed cing*/_mngon zhen dang nyon mongs med pa la ni bdud dang rgol ba ngan pa gang la'ang 'jigs pa med pa'i spobs pa rgya chen po de rnams thob pas bdud phyogs kyis glags mi rnyed cing brdzi mi nus so/__/de dag gi nang nas 'dir mthar thug gi nyams len gang bzung zhe na/_thal 'gyur gyi shing rta'i srol 'byed chen po rnams kyis ji ltar bstan pa'i don chos rnams kyi gshis kyi bzhugs tshul chos dbyings rang bzhin gyis spros pa dang bral ba la/_ngag gi smra ba dang*/_blos bsam pa dang*/_tshig gis brjod du med pa spros bral zhi ba de ni don dam bden pa mthar thug pa yin no/__/de ltar rtsal snang 'gag pa med pa rten 'brel gyi snang cha 'di la blo ste sems sems byung gi rtog pa yi cha nas smra bsam brjod pa ru btags shing*/_btags pa ji lta bar snang ba'i cha 'gag med du 'char ba kun rdzob bden pa'i char bzhag nas/_mnyam bzhag tu rnam par mi rtog pa'i ye shes nam mkha' lta bu'i ngang la 'jog cing*/_rjes thob tu sgyu ma lta bu'i dran 'dun gyis bsod nams kyi tshogs mi 'gog par bsgrub na'ang bden gnyis so so'i phyogs su lhung ba ma yin par rjes thob snang bcas kyi gnas skabs su'ang rang bzhin gshis kyi bzhugs tshul las g.yo mi srid la/_mnyam bzhag spros pa dang bral ba la gnas pa'i tshe na'ang chad stong ci yang med par 'gyur mi srid pas dus nam du yang gnyis po zung du 'jug cing 'du 'bral med pa'i don de ni chos kyi dbyings kyi rang bzhin yin pas/_de'i ngo bo rtogs bya yul dang rtogs byed blo'am shes pa sogs blos btags pa'i gnyis chos thams cad las 'das pa yin pas/_gang zag sus kyang shes bya shes byed kyi tshul gyis mngon du byar med la/_dmigs rnam can gyi lta bas bltar med cing*/_rtsol ba dang bcas lam bsgrubs pas sngar med gsar du thob pa dang mthar phyin rgyu yang rdul tsam med la/_lam ma bsgrubs par rang gar tha mal du bsdad kyang ma thob pa ste thob shor gang yang med la/_chos nyid rnal ma'i ngos na de gnyis ka bzang ngan med par mnyam pa nyid kyi phyir ro/__/chos nyid stong pa nyid du gnas pa la de dang nges par rjes su mthun pa'i blo mthar 'dzin gyi dri ma thams cad zad cing*/_/yul yul can ro gcig pa'i tshul du skyes pa ste/_lan tshwa chur zhu ba ltar chos nyid dang tha dad med par gyur pa la/_stong nyid rtogs pa dang 'bras bu thob pa la sogs pa'i bla dwags te ming gi tha snyad du btags so/__/gzhi lam 'bras bus bsdus pa'i chos gang zhig rten cing 'brel bar 'byung ba'i rang bzhin du gnas pa'i don 'di ni gsung rab kyi chos rnams ma lus pa kun gyi brjod byar gnas pas mdzod du gyur pa'o/__/gang zhig rten 'byung gi don de lta bu thos pas gtan la phabs pa'i rjes su/_gnad don gcig tu bsdus te bsam pa'i shes rab kyis mthar 'dzin gyi phyogs zhen dri mas ma bslad par yang dag par 'jug pa ni gsung rab kyi brjod don zab mo'i sgo 'phar 'byed pa'i lde mig lta bu yin no/__/'di ltar snang ba ni bslu zhing rdzun pa srid pa ni g.yo zhing 'du byed pa/_'khor ba ni kun 'byung rang rgyud ldan/_'das pa ni myang 'das rang bzhin chos nyid la ming du gdags pa ste de ltar chos rnams thams cad kun/_dang po gang nas kyang ni ma 'ongs la/_tha mar gang du'ang ma song*/_bar du gang na'ang mi gnas pa ste chos rnams ye nas dus gsum mnyam pa nyid kyi rang bzhin du gnas pa ni/_gshis la gnas pa'i rten cing 'brel bar 'byung ba yin te/_yab sras mjal ba las/_chos 'di dag thams cad ni dus gsum du mnyam pa nyid kyis mnyam pa dag ste/_sogs gsungs pa ltar ro/__/yang 'di ltar chos can sna tshogs su snang ba nyid kyang skye 'gag la sogs pa ltar snang yang*/_snang dus de nyid nas ngo bo rang bzhin ma grub pas/_rang gi rang bzhin stong bzhin du snang ba ma 'gag par shar bas yod med sogs spros pa'i mtha' gang la'ang mi gnas pa'i don la shes rab kyis nges pa gting nas rnyed cing*/_chos can mthun snang du grub pa med pa'i stong nyid la brten nas gdags pa tsam du shes pa'i lam de ni/_mtha' bral dbu ma'i lam gyi rang bzhin nyid du bstan no/__/de yang gshis rnal ma'i ngo bo la dag pa dang ma dag pa gnyis ka med kyang sems rtog glo bur ba langs pa'i bag chags kyi dbang gis don la med pa yin kyang med bzhin du phyi nang gi snang ba sna tshogs 'di dag snang zhing*/_snang ba de la 'di yul lo/__'di ni yul can no zhes sogs gzung 'dzin gyi rnam par kun tu sgro btags te blang dor dgag sgrub tu zhen pas nye bar len pa'i sgo nas 'khrul snang dang 'khrul rtog lu gu rgyud du bar ma chad par 'khor ba yin la/_yang gshis kyi gnas lugs tshol bar 'dod pa'i phyi nang gi grub mtha' smra ba po dag gis tshul de la rtog cing yang yang dpyad pas/_mtha' bral ji bzhin blor ma chud nas sgro skur gyi mtha' bzhi byung ba yin te/_gang zhe na/_rang sde rnams kyis phyi don nang rig la sogs pa yod par lta ba dang*/_dngos po rang sa dang gzung 'dzin la sogs bkag pa'i med pa med dgag stong rkyang tsam du 'dod pa dang*/_phyi rol pa dag gtso bo bdag la sogs pa rtag par 'dod pa dang*/_da lta'i snang ba 'di tsam glo bur du byung ba las snga phyi'i rgyun sogs chad par lta ba sogs dang*/_mtha' dang bral ba'i dbus zhes blos bzos te mchog 'dzin de la gnas par byed pa'ang chos nyid kyi don la mkhas pa min te 'ching byed gang rung mtshungs te/_ji ltar dar gyi srin bu zhes sdom srin gyi kha chus thag rgya bran te des rang gi rkang lag bcings nas mi thar ba bzhin du/_rang rang gi 'dod pa'i grub mthas rang nyid bcings pa des bag chags kyi mthu brtas pa'i skabs 'di na/_blo yis sgro btags shing snang tsam pa'i chos 'di dag thams cad kyi rang bzhin skye med gshis lugs yin la/_dang po skye ba 1dang*/_mthar 'gag pa 2dang*/_bar du gnas pa 3dang*/_phar 'gro ba tshur 'ong ba min te/_ci'i phyir na/_don gcig pa ma yin la/_rang gzhan tha dad pa'ang min/_'pho 'gyur med pa rtag pa ma yin la/_dang po yod nas mthar chad pa'ang min te de ltar med pa drug dang ma yin pa gnyis te spros pa'i mtha' brgyad po dag nye bar zhi ba'i rang bzhin yin te/_mgon po klu'i dbang po zhal nas/_gang gis rten cing 'brel bar 'byung*/_/'gag pa med pa skye med pa/_/ chad pa med pa rtag med pa/_/'ong ba med pa 'gro med pa/_/tha dad don min don gcig min/_/spros pa nyer zhi zhi ston pa/_/zhes so/__/des na de lta bu'i gshis thog nyid du blo phebs shing ji bzhin pa'i gnas lugs shes pa ni/_bsam byung shes rab kyi ngo bo ma nor ba yin no/__/tha snyad 'khrul ngor snang yul sa chu me rlung ste 'byung bzhi dang*/_go 'byed nam mkha' yang snang zhing*/_bye brag ri dang nags tshal dang*/_khang bu brtsegs pa dang*/_bum pa dang*/_snam bu/_re lde/_sa myug sogs 'dus byas kyi dngos po thams cad rang rang gi rgyu las thams cad skyes te/_rtsa ba/_sdong bu/_yal ga lo ma/_me tog_/'bras bu ste rgyu dang 'brel ba drug 'byung ba lnga dang dus kyi 'gyur ba ste drug po la rkyen dang 'brel ba drug ces bya ste de lta bu'i rang bzhin du phyi don gyi bag chags ma zad pa de srid du 'khor ba phyi yi rten cing 'brel 'byung bcu gnyis yin no/__/yang ma rig pa las 'du byed de/_de bzhin du rnam shes sogs gcig la gcig brten gyis rga shi'i bar du ma chad par 'brel te thog med nas 'khor ba ni nang gi sems dang lus kyi bag chags ma zad kyi bar du 'byung ba nang gi rten cing 'brel bar 'byung ba bcu gnyis su gsungs so/__/myang 'das kyi rten cing 'brel 'byung ni/_slob pa'i lam bzhi'i gnas skabs dang*/_'bras bu mi slob pa'i gnas skabs gnyis su gnas pa yin la/_de yang slob pa'i lam gyi dus su ni/_'khor ba'i rten cing 'brel bar 'byung ba ma rig pa nas rga shi'i bar lugs su 'jug pa bcu gnyis kyi rtsa ba/_bden gnyis kyi don de kho na nyid la rmongs pa'i ma rig pa chen po ni/_tshogs lam du thos bsam gyis de'i gnyen po bdag med pa'i don rig pa'i ye shes ji lta ba bzhin gtan la phab ste sbyor lam du dad sogs lnga'i sgo nas don spyi'i tshul du bsgoms te ma rig pa nyams smad par byas nas/_mthong lam du rig pa'i ye shes de ji lta ba bzhin mngon sum du mthong ste ma rig pa'i sgo nas srid par 'phen byed kyi las mi gsog cing*/_sgom lam sa dgu por ye shes de'i rgyun goms shing gong du 'phel stobs kyis ma rig pa'i bag chags rim gyis ldog pas 'du byed la sogs pa'i yan lag gzhan rnams kyi bag chags kyang lugs ldog tu 'gags nas rgyun mtha'i rdor ting gis srid pa'i rtsa ba ma rig pa'i bag chags shin tu phra ba gnyis snang dang bcas pa spangs pas rgyun chad de 'bras bu chos sku'i ye shes mngon du gyur te 'gag med thugs rje'i rol pa cir yang 'char bar 'gyur ba ni 'bras bu'i rten 'brel yin no/__/de ltar gzhi lam 'bras bu'i chos thams cad rten cing 'brel 'byung gi tshul du snang tsam las ngo bos ma grub pa'i mtshan nyid ma nor bar mthong ba'i skyes bu de yis sdug bsngal gyi bden pa snang tsam las rang bzhin med par shes shing*/_de'i rgyu kun 'byung nyon mongs kyi rtsa ba ma rig pa spong ba'i rten 'brel gyis 'gog pa myang 'das dam pa mngon du gyur par shes nas lam bden bdag med rtogs pa'i shes rab mchog gi don bsgom pas mngon du mthong ngo*/_/gong du ji skad bshad pa de ltar 'khor 'das lam gsum gyi snang ba thams cad skye ba med pa'i rang bzhin du bsam pa las byung ba'i shes rab rnam par dag pas gtan la phab pa de'i tshe gnas lugs kyi rang bzhin ma nor shes pa'i chos nyid de'i ngang la gzung 'dzin gyi rtog pas ma bslad par 'jog pa ni/_sgom pa'i shes rab ces su thun min mdo dang*/_dgongs 'grel rnams su dang*/_tshad ma'i skyes bu rnams la grags so/__/'di ltar nam mkha' ni gzung du med pa/_bstan du med pa/_gzugs can ma yin pa/_mtha' dbus med pa de bzhin du sems kyi rang bzhin ye nas rnam par dag pa'i chos kyi dbyings su mnyam par bzhag nas bsgom pa'i don chos nyid dang yul can ye shes ro gcig tu gyur pa'i sems kyi gshis lugs de la/_dngos po'i mtshan ma med pas gzugs sogs phung po lnga dang*/_'dus ma byas pa yin pas rnam shes tshogs brgyad kun kyang yod pa ma yin no zhes mtha' bzhi'i skye ba 'gog pa'i dam bca' ston pa nyid dbu ma thal 'gyur ba'i bzhed pa yin kyang*/_med ces yod mtha' blo yis bkag nas med pa zhig glo bur du bsgom par byar med de med pa gshis la mi gnas pa'i phyir na/_gshis kyi gnas tshul shes pa'i shes rab nyid dang lhag par yang 'gal ba yin te/_sems kyi rang bzhin rnam thar sgo gsum du gnas pa 'di ni cang med phyang chad pa nyid ma yin par de bzhin gshegs pa rnams kyi sku dang ye shes kun gyi 'byung gnas yin pas mdzod lta bu'o/__/des na gnas lugs ji bzhin mngon sum mthong ba ni 'phags pa kho na yin mod so skye'i dus na'ang chos rnams kyi rang bzhin chos nyid du rnam par dag zin pa'i yang dag pa'i don nyid la/_bcos ma'i blo yis ma bslad par yang dag lta bar byed pa ni/_dmus long ltar rkyen ma tshogs pa'am gnyid log pa lta bu'am 'du shes med pa'i snyoms 'jug ltar min la/_lhag mthong gi ye shes dang lhan cig pa yin no/__/blta zhes bya ba de'ang kun rdzob tsam du brda sprod pa'i ming ste/_rang bzhin ma bcos pa'i ngang de las gzhan du ma yengs shing mi bsgom pa'i tshul gyis ma g.yos na/_gnas lugs ji bzhin bsgom pa'i phyir gzhan las mchog go__/de ltar mnyam par bzhag pa'i ye shes de yi mdun te yul na blo zhes gtso sems dang ni/_yid byed sogs sems byung gis bsdus pa'i rtog tshogs yul bcas gzung 'dzin gyi rnam pa thams cad gnas pa min te so sor rtog pa'i shes rab bo/__/shes rab de 'dra bar blo 'byong zhing chos thams cad sgro skur dang bral ba yongs su shes na/_sems bskyed dang sbyin sogs kyi thabs kyis rnam par grol bar 'gyur ro/__/shes rab de med par mngon zhen dang bcas ba'i thabs kyis ni/_mu stegs can gyi lam bzhin du srid pa'i gnas su rang rgyud bcings pa nyid las grol ba med do/__/lam gang du mnyam bzhag tu stong nyid dang rjes thob tu snying rje chen po'i sgo nas tshogs bsags pa ste rnam pa gnyis dang por rgyud la bsten nas rim gyis goms par byed pa tshogs lam chung 'bring che gsum yin no/__/mthong lam la myur du sbyor ba'i lam de la drod/_rtse mo/_bzod pa/_chos mchog ste bzhi yod pas chos mchog man chad bzhi po'i gnas skabs thams cad du mnyam rjes gnas skabs rim bzhin stong pa dang snying rje ngang gis 'char ro/__/de nas mthong lam thob nas stong nyid snying rje gnyis po ni zung du 'jug cing*/_mnyam gzhag stong nyid rjes thob snying rje zhes tha mi dad la lhan cig stong nyid snying rje ngo bo nyid la 'du 'bral med de/_stong nyid la mnyam par bzhag pa na snying rje chen po'i rtsi dang mi 'bral zhing*/_rjes thob sbyin sogs spyod pa la bslab pa na/_'khor gsum mi rtog pa'i shes rab kyis zin par bsgrub pas so/__/rab tu dga' ba dang po'i sar chos rnams la chos kyi mig rdul med cing dri ma dang bral ba rnam par dag pa thob pas chos nyid kyi bden pa mngon sum du mthong bar 'gyur ro/__/de nas 'phags pa'i sgom lam la ma dag sa bdun du thabs shes zung du 'brel kyang mnyam rjes kyi nyams len tha dad du yod la/_dag sa thob nas rnam kun mchog ldan gyi stong pa nyid kyi ting nge 'dzin la brten nas zag med kyi dbyings su de bzhin gshegs pa'i yon tan gyi rnam pa bsam gyis mi khyab pa rnams rim gyis thob pas mtshan med 'bad rtsol bral ba'i lam la brten nas rang gzhan gyi don gnyis lhun gyis grub pas mnyam rjes kyi nyams len dbyer med du 'gyur ro/__/de ltar sgom lam mthar phyin te sa bcu rgyun gyi mtha' ma la/_gnyen po rdo rje lta bu'i ting nge 'dzin gyis/_shes sgrib phra ba'ang lhag med du bcom nas mi slob pa'i lam du mngon par rdzogs pa'i byang chub brnyes so/__/'di'i skabs su mnyam par ma bzhag pa'i dus med pa sogs rgyal ba'i ma 'dres pa'i chos bco brgyad dang*/_gzhan yang stobs bcu dang ni/_mi 'jig pa bzhi sogs mkhyen pa'i ye shes zag med kyi chos sde tshan nyer gcig po mtha' dag mngon du gyur nas sangs rgyas pa yin no/__/'di ltar pha rol phyin pa drug ston pa'i sde snod rnams dang*/_de dag gi brjod bya'i don rnams ni/_dus gsum du byon bzhugs 'byon 'gyur gyi rgyal ba kun slob pa lam gyi gnas skabs na thos bsam byed pa'i gzhung dang nyams su len pa'i lam ste/_mthar 'dzin dang bral ba'i lta bas lam bsgrub tshul la ma rmongs shing*/_spyod pa phar phyin drug gi don spyod pa la'ang shin tu rnam par dag pas tshogs gnyis mthar phyin te/_nges pa lnga ldan 'og min du 'gro ba ste der mngon par sangs rgyas te sku gnyis mngon par 'grub bo/__/de yan rgyu mtshan nyid kyi theg pa bstan te zab mo lta ba dang*/_rgya chen spyod pa'i tshul gtan la phab pa'o/__/yon tan rin po che'i mdzod dga' ba'i char zhes bya ba las/_smon 'jug gi bslab bya bstan pa'i tshoms te le'u dgu pa'o//___//da ni lam gyi sbas don gsang sngags rdo rje theg pa ltar bstan pa la/_thog mar lo rgyus mdo tsam brjod de/_nyi zla kha sbyor las/_lo rgyus don gyis ma bshad na/_/gsang chen nges pa'i bka' 'di la/_/yid mi ches pa'i skyon du 'gyur/_/zhes dang*/_rna rgyud lung gi phreng ba las/_rgyal ba rnams ni 'jig rten byon pa'i tshe/_/de yis gsungs pa'i lung chen rnams la ni/_/phyi rol rgol ba ngan pa 'byung srid kyi/_/dang por srid pa chos kyi lo rgyus smos/_/zhes gsungs pa ltar nang rgyud yo ga gsum gtsor gyur pa'i rgyud sde byung tshul ni/_spyir snga 'gyur bka' ma thams cad la brgyud pa gsum ldan dang*/_gter ma rnams la brgyud tshul drug dang bdun dang dgu rnams su nges pa las/_dang po ni/_rgyal ba dgongs pa'i brgyud pa/_chos sku/_rtogs pas rgyud don tshul bzhin rig pa/_rig 'dzin brda yi brgyud pa/_rigs lnga longs sku/_gang zag snyan khung brgyud pa sprul sku ste gsum mo/__/gnyis pa ni/_brgyud pa gong ma gsum gyi steng du/_mkha' 'gro gtad rgya'i brgyud pa/_bka' gter srung mas las can la gdams pa gtad/_smon lam dbang bskur gyi brgyud pa/_gter ston skyes chen la gdams pa/_shog ser tshig gi brgyud pa gter chos shog ser la btab ste gter du rgyas btab pa byin rlabs che bar gsungs ste drug go__/gsum pa ni/_shog ser brgyud pa dor te snga ma lnga'i steng du/_bka' bab lung bstan gyi brgyud pa chos bdag la 'gro don lung bstan pa dang*/_nyams len byin rlabs kyi brgyud pa bskyed rdzogs bsnyen sgrub lhan skyes ye shes gnyis bsnan pas bdun no/__/bzhi pa ni/_de bdun gyi steng snyan brgyud dmar khrid kyi brgyud pa dang*/_phrin las phyag bzhes kyi brgyud pa ste dgu'o/__/de sogs las byung ba'i rgyud sde rnams kyi lo rgyus rgya cher gsungs kyang mdo brgyud pa'i lo rgyus tsam mo/__/de ltar brgyud pa de rnams ni rim bzhin bdag cag gi bla ma rnams kyi bar du brgyud pa yin la khyad par du bstan bcos 'di nyid mdzad pa po rig 'dzin 'jigs med gling pa zhes/_'phags pa sems nyid ngal gso nyid dngos su dge ba'i bshes gnyen gyi tshul du bzung nas/_pad+ma sam+b+ha dang*/_bi ma mi tra/_kun mkhyen klong chen rab 'byams sogs las dgongs pa'i pha phog thob ste thugs dgongs dbyer med du gyur pa 1dang*/_de dag gi brda thabs rten 'brel gyi rnam 'phrul bstan pa thams cad dang dbugs dbyung zhal bzhes rjes gnang sogs rig 'dzin brda brgyud 2dang*/_dgongs gter mtha' dag thugs la bkra lam mer shar ba ste dgongs brda snyan brgyud kyi brgyud gsum chig rdzogs su blangs te/_las dang skal par ldan pa la bstan pa yongs rdzogs kyi chos kyi 'khor lo chen po bskor zhing mngon par rdzogs pa'i sangs rgyas su bzhugs pa yin te/_ji skad du/_lus ni gang zag lha mi yang*/_/dgongs pa dam pa sangs rgyas dngos/_/zhes pa ltar ro/__/de yang man ngag gi bstan bcos kyi gzhung 'di nyid dam pa de nyid las/_'jigs med phrin las 'od zer gyis gsan/_de las rgyas sras gzhan phan mtha' yas/_de las o rgyan 'jigs med chos kyi dbang po/_de las bka' drin mtshungs med o rgyan bstan 'dzin nor bus gsan/_de las yon tan rgya mtsho/_de gsum las mkhan chen bsam gtan rgya mtsho/_de las tsan+d+rarasmi'am mkhan po zla 'od/_de las chig rdzogs su nod pa'o/__/de yang sngags kyi skabs su spyir rgyal bas sems can rnams kyi don du blo dang 'du shes kyi rjes su 'gro ba'i theg pa'i rnam dbye bsam gyi mi khyab pa zhig gsungs pa mtha' dag bsdu na gnyis su 'du ba yin te/_theg dman dang*/_theg chen no/__/theg chen la'ang rnam pa gnyis yod de/_theg chen tshul sgrub las/_theg pa chen po rnam gnyis te/_/pha rol phyin dang gsang sngags so/_/zhes so/__/de'i rgyu mtshan theg chen gyi gdul bya byang chub sems dpa' de la'ang dbang po rnon po dang*/_shin tu rnon po'i rigs can gnyis yod pa'i gnyis ka'ang snying rje'i gzhan dbang gis bla na med pa'i byang chub sgrub par mtshungs kyang*/_sgrub tshul mtshan nyid theg pa las bde gshegs snying po'i sa bon yod pa tsam/_tshogs gnyis kyi rkyen las gong 'phel du song nas sangs rgyas thob par 'dod cing*/_rgyu 'bras snga phyi 'brel bas rgyu yi theg pa zhes bya la/_sngags su snying po de sems can kun la rang chas su yod pa la yon tan thams cad lhun gyis grub pa'i sbyang gzhi nyi ma lta bu de nyid la/_sbyang bya 'khor ba'i rang bzhin tshogs brgyad kun gzhi dang bcas pa'i 'dus byas kyi sems glo bur ba sprin dang 'dra ba'i sgrib pa nyid/_sbyong byed dbang dang bskyed rdzogs kyis sbyangs pas/_sbyangs 'bras rang ngo'i yon tan ji bzhin mngon du 'gyur bar 'dod pa ste/_des na sngags kyi theg pa zhes pa'i don ni/_ma na yid dang*/_tra ya skyob pa'i sgra bsdus pa man+t+ra zhes bya ste/_gang skyob na/_yid shes te de yang rig pa la brjod de/_'bras bu'i gnas skabs su'ang rig pa'i ye shes zhes brjod pa'i tshul/_gsang snying las/_bcom ldan 'das byed pa po rdo rje yid kun tu bzang po'o/_/zhes so/__/gang las skyob na/_gzung 'dzin dang bcas pa'i tshogs brgyad las/_ji ltar skyob na/_bde myur gyi tshul du skyob pas na de skad ces bya'o/__/de la 'bras bu'i theg pa zhes kyang bya ste/_de'i don ni gzhi gtan la phab pa'i dus su mthar thug gi sangs rgyas kyi sku dang ye shes sogs chos khams rgya mtsho lta bu/_sems nyid bde gshegs snying po'i rang rtsal du rdzogs pas 'bras bu gzhi la gnas par 'dod pa dang*/_lam nyams su len pa'i dus su 'bras bu sku dang ye shes kyi bzhugs tshul dang mthun pa'i lam bsgoms pas 'bras bu lam du byed pa dang*/_'bras bu mngon du byed pa'i dus su tshe lus gcig gis 'bras bu mngon du byed pas 'bras bu'i thus ka ste/_dper na sman thams cad kyi nus pa phyogs gcig tu bsdus pa lta bu lam gyi man ngag gi nus pa thams cad gcig tu 'dus pa'i don gyis na de skad ces bya ba'am/_yang na ni mtshon byed dpe'i rdo rje dang rjes su mthun pa'i chos nyid don dam pa'i rdo rje bde gshegs snying po'i yin lugs bla mas ngo sprad pa de nyid/_phar mtshan ma'i rnam rtog thams cad 'joms pa la thogs pa med pa dang*/_tshur mtshan ma'i rnam rtog thams cad kyis glags mi rnyed pas na rdo rje ste/_de nyid brjod bya'i gtso bor bstan pas na rdo rje'i theg pa zhes brjod pa dang*/_yang sbyin pa lta bu spyod pa'i sgo re re yang thabs du ma'i sgo nas sgrub pas thabs mang ba dang*/_nyon mongs lnga yang lam du byed pas thabs mkhas pa dang*/_'dod yon lnga yang spang mi dgos par lam du byed pas thabs bde ba dang*/_skal pa dang ldan pa'i gang zag shin tu rnon po zhig ma gtogs khong du mi chud pas thabs zab pa dang*/_tshe gcig gis kyang 'bras bu 'grub pas thabs myur ba'i phyir thabs kyi theg pa zhes bya la/_rig pa bde gshegs snying po'i chos nyid bla mas ngo sprad pa de nyid mi 'bral bar 'dzin pa'i rig 'dzin ni/_gsang sngags nyams su len pa'i gang zag yin la/_de dag gis nyams su blang bya'i sde snod yin pas na rig pa 'dzin pa yi sde snod ces grags shing*/_spyir sde snod ces pa'i don/_tshig dang don gyi sde tshan du ma'i snod yin pas na sde snod ces brjod pa yin no/__/rgyu mtshan de rnams kyi phyir rgyu mtshan nyid kyi theg pa las khyad par 'phags pa yin te/_tshul gsum sgron me las/_don gcig na'ang ma rmongs dang*/_/thabs mang dka' ba med pa dang*/_/dbang po rnon po'i dbang byas phyir/_/sngags kyi theg pa khyad par 'phags/_/zhes pa ltar 'bras bu sangs rgyas sgrub par don gcig na'ang*/_sgrub tshul la rmongs ma rmongs kyi khyad par yod de/_mtshan nyid theg pa las phyi snang ba'i bden zhen ldog pa la/_sgyu ma lta bur bsgom pa la sogs pas 'byung ba'i rig pa la rmongs/_nang phung po lnga lhar ma shes pas gnas pa'i don la rmongs/_gsang ba rtog tshogs dang nyon mongs pa ye shes su ma shes pas lam gyi rnam pa la rmongs/_thams cad dag mnyam chen po bden pa dbyer med du ma shes pas rtogs pa'i lta ba la rmongs pa nyid/_sngags su phyi 'byung bar snang ba yum lnga/_nang phung por snang ba yab lnga/_gsang ba rtog tshogs kun byang chub sems dpa' sems ma ye shes lnga yi rang bzhin/_thams cad dag mnyam bden pa dbyer med chos sku chen por gtan la phab nas bsgom zhing*/_blang dor dang 'dzin pa med pa'i thabs mkhas kyi spyod pa gong du bshad pa lta bu'i sgo nas 'bras bu la myur du sbyor ba'i dbang po shin tu rnon po'i dbang du byas pa yin no/__/yang rgyun chags pa ste sangs rgyas sems can gyi ngos na yod pa'i don gyi ngos nas bshad na/_tan+t+ra zhes pa'i sgra las drangs na rgyud de/_de yang rgyud phyi ma las/_rgyud ni rgyun chags la bshad de/_/lam thabs dang gzhi rgyu las 'bras bu'o/_/zhes rgyud ces pa ni rgyun chags pa'i don te/_gang zhig rtogs par bya ba gzhi'am rgyu'i rgyud dang*/_gang gis rtogs shing bgrod pa thabs sam lam gyi rgyud dang*/_gang du mthar phyin pa 'bras bu'i rgyud do/__/de la dang po gzhi'i rgyud ni/_sems nyid bde bar gshegs pa'i snying po gnas lugs don dam pa'i ye shes rig pa byang chub kyi sems lhag pa'i bden pa dbyer med blo yi spyod yul dang bral ba'i rang bzhin 'ching grol med par sems can thams cad la ye nas gnas pa'i don la bya ste/_gsang snying las/_bcing med rnam par grol med pas/_/ye nas lhun rdzogs sangs rgyas chos/_/zhes dang*/_rgyas pa las/_thams cad rang rig byang chub sems/_/de ni lung gi tshad mar bshad/_/ces so/__/de la ci'i phyir gzhi'am rgyu'i rgyud ces bya zhe na/_de nyid thabs kyi rkyen gyis ma zin na 'khor ba dang*/_zin na myang 'das su snang bas de gnyis ka'i 'byung gzhi'am rgyu lta bur gyur pas de skad ces bya'o/__/de yang rim gsum las/_tha snyad gnyis kyi chos rnams kun/_/ma lus 'byung phyir gzhi zhes bya/_/zhes dang*/_ma pham pas/_ji ltar sngar bzhin phyis de bzhin/_/'gyur ba med pa'i chos nyid do/_/zhes gsungs pa ltar ro/__/de yang tha snyad tsam du dbye na/_sems kyi chos nyid bde gshegs snying po ni sbyang gzhi nor bu lta bu yin pas gnas lugs ngo bo nyid kyi gzhi zhes bya la/_log pa'i zhen snang yul dang bcas pa ni sbyang bya 'dam rdzab lta bu ste/_med snang glo bur ba yin pas 'khrul pa brtags pa'i gzhi zhes gsungs te/_'di med snang 'bras bu'i nyer len gyi rgyu dang rgyud mtshan nyid pa ma yin no/__/gnyis pa lam gyi rgyud ni/_gzhi de nyid glo bur gyi dri ma dang bral bar byed pa'i thabs gnas lugs ji lta ba bzhin shes pa'i lta ba dang*/_rang bzhin yongs shes kyi don bsgom pa'i ting nge 'dzin/_grogs spyod pa dam tshig dang bcas pa la bya ste/_rgyud las/_ngo mtshar cho 'phrul rmad kyi chos/_/gzhan nas yod 'ong ma yin te/_/thabs la brten nas shes rab nyid/_/de lta bu yi ngang du 'byung*/_/zhes so/__/de la ci'i phyir thabs sam lam gyi rgyud ces bya zhe na/_'thob bya 'bras rgyud nyid mngon du byed pa'i lhan cig byed rkyen yin pas thabs dang*/_gang gis gang du bgrod pa'i rten yin pas na lam ste/_mdo yi don bsdus las/_bgrod lam dang de chos yon tan ldan pa dang*/_/zhes pa la sogs pa ltar ro/__/de yang rnal 'byor bla na med pa khyad par gyi lam 'di 'bras bu la nye ba'i lam rgyud yin la/_phyi rgyud rnams ni ring ba'i lam rgyud do/_nang rgyud la ltos na ring ba'i lam rgyud dang*/_mtshan nyid theg pa las nye lam/__/lam de la rgyud ces smos pa'i don ni/_gzhi shes bya dang lam shes byed du dang*/_'bras bu 'thob bya dang lam 'thob byed du 'brel ba'i phyir dang*/_lam dang po bsgrub pa nas 'bras bu'i bar du ma chad par rgyun chags su 'byung bas na de skad ces bya'o/__/gsum pa 'bras bu'i rgyud ni/_gzhi yi gnas lugs la sgrib par byed pa'i dri ma lam gyis yang dag par sbyangs nas/_gzhi ji lta ba bzhin mngon du gyur pa la bya ste/_sgyu 'phrul bye brag bstan pa las/_thub pa'i bskyed rdzogs rnal 'byor 'bras bu lhun grub kyi rnal 'byor che/_/'bras bu lhun grub ji bzhin mngon byas pa'ang*/_/btags pa tsam ste gzhi 'bras la tha dad gnyis pa med/_/de phyir de la de brjod do/_/zhes so/__/de yang gnyis pa med ces pa gzhi 'bras ngo bo bdag gcig gis 'brel bas gzhi las tha dad pa'i 'bras bu med pa'i don no/__/de la ci'i phyir 'bras bu'i rgyud ces bya zhe na/_bla na med pa mchog gi 'bras bu mthar thug pa don du gnyer ba rnams kyi bsam pa yongs su rdzogs pa'i 'bras bu dang nam yang rgyun mi 'chad pas rgyud du bzhag pa yin no/__/de la spyir rgyud gsum gyi rnam bzhag de ltar yin pa'i gnad kyis bye brag lam rgyud kyi dngos po rnams kyang*/_mtshan nyid theg pa las 'phags chos du ma dang ldan pa yin la/_de'ang nang gses kyi dbye ba byas na/_rjod byed sgra yi rgyud dang*/_brjod bya don gyi rgyud/_snga ma la'ang las phra mo sgrub pa'i cha lag dang*/_thun mong gi dngos grub brgyad sgrub pa'i dang*/_mchog dngos mthong sgom gnyis kyi ye shes sgrub pa'i thabs ston pa'i sgo nas dbye ba dang*/_rtsa ba'i rgyud dang*/_yan lag gi rgyud kyi dbye ba dang*/_phyi nang gi dbye ba sogs mang na'ang*/_bsdu na/_de bzhin gshegs pa rnams kyi ye shes la dang*/_gdul bya rnams kyi sems la snang ba sgrar snang ba'i rgyud dang*/_sngar gsang ba'i bdag pos gsungs pa sogs nas smra ba pos dngos su brjod pa sgrar grags pa'i rgyud dang*/_blo gros thabs ldan gyis rgyud rnams yi ger btab pa sogs nas rgya bod sogs kyi yi ge'i gzugs su bkod de glegs bam gyi bar du yod pa sogs la brdar gyur pa'i rgyud ces brjod pa yin no/__/phyi ma brjod bya don gyi rgyud sde la'ang dbye ba mang du snang mod/_don gyi snying po gzhi'i gnas lugs lta bas gtan la 'bebs tshul gyis rgyu'i theg pa las khyad du 'phags pa'i stobs kyis lam nyams su len tshul yang*/_spyir theg chen thams cad bsod nams dang ye shes kyi tshogs gnyis la brten nas thabs shes zung 'brel du bsgrub pa tsam du mdo sngags mtshungs na'ang*/_gsang ba sngags kyi skabs su ni bsod nams kyi tshogs bsags pa'ang*/_phung sogs kun rdzob kyi chos rnams la ma dag pa'i mtshan mar bltas te sbyin sogs la slob pa lta bu ma yin par/_rang bzhin ye nas dag pa'i rnam pa lhar gsal ba'i bskyed rim gyi ngang nas dkyil 'khor mchod pa la sogs pa'i sbyin pa dang*/_mtshan 'dzin sdom pa la sogs pa'i tshul khrims kyis mtshon sngags kyi phyin drug gi spyod pa dang 'brel ba'i sgo nas sgrub pa dang*/_ye shes kyi tshogs kyang rjes su dpag pa'i shes rab kyis spros bral sogs su lta ba tsam ma yin par/_bla ma'i man ngag gi thabs kyis ngo sprad pa'i rang gnas kyi ye shes la mnyam par 'jog pa'i rdzogs rim gyi sgo nas sgrub pa ste/_tshul de gnyis la brten nas thabs dang shes rab khyad par zung du 'brel nas nyams su len pa la/_mtshan nyid theg pa ltar thabs la mi mkhas pas mgo dang yan lag gtong ba sogs dka' thub mthu yis yun ring por mi gdung bar 'khor ba'i rgyu 'bras thams cad gang yang spang mi dgos par nyon mongs dang 'dod yon sogs lam du byed cing*/_mtshon rtul pos ma chod pa'i dngos po gang zhig_/rnon pos yud tsam gyis gcod nus pa bzhin/_thabs dman pa 'og ma'i lam gyis gdul ma nus pa'i gang zag sdig pa dang*/_sgrib pa stobs chen pos non pa yang lam 'dir 'jug rgyu yod pas sgo yangs shing*/_gang zag dbang po shin tu rnon po'i nyams su len pa'i dbang du byas pa'i lam yin pas/_shes rab zab mos sngags kyi lta sgom spyod gsum ya ma bral bar gsang sngags rang gi skabs su bshad pa sgra ji bzhin par nyams su blangs na/_de lta bu'i sdig pa can yin yang mi gos par zung 'jug gi 'bras bu mthar thug pa tshe gcig la sogs pa las mi 'gor bar sbyor bas na/_lam bgrod pa'i brtul zhugs te tshul gzhan las myur ba yin no/__!__dbye ba la dang po phyi rgyud sde bzhir dbye ba ni/_de yang 'di ltar gang gis ston pa longs sku/_gang bstan pa gsang sngags kyi chos ni ji ltar na sgra tshig brjod bral longs sku'i bstan pa yin pas/_rgyal ba kun gyi spyi gzugs rdo rje 'chang chen pos/_dus thog ma med pa nas 'khor tshad med pa'i nang du gsungs pa'i phyir/_bde gshegs snying po kun la yod kyang dus bab kyi gdul bya'i ngor sems can mtha' yas pa'i blo dang chos kyi dbyings 'byams klas pas sangs rgyas kyi chos kyang de'i rjes su 'gro bas na/_gdul bya bye brag pa'i ngor mchog gi sprul pa'i sku'i bstan pa'i rgyud gsang 'dus la sogs pa ltar/_bstan pa'i gnas tshad dang*/_dar tshad/_byang chub sogs dus kyi thog mtha'i tshad dang*/_rtsa rlung gi byed pa sdom byed kyi gnyen po/_rang gnas ye shes lam byed kyi theg pa dang*/_rgyud sde'i grangs la sogs pa mtha' gcig nges gzung bya rgyu med de/_rdo rje snying po rgyan gyi rgyud las/_gsang dang gsang chen shin tu gsang*/_/rnal 'byor rnal 'byor chen po dang*/_/rjes su rnal 'byor chen po dang*/_/zhes dang*/_gsang sngags gsang chen shin tu gsang*/_/rgyud rnams kun gyi spyi bo ste/_/zhes pas shin tu rnal 'byor dang rjes su rnal 'byor sogs gsal bar bstan la/_de bzhin du dpung bzang las/_lha dang lha min mi la phan gdags phyir/_/gsang sngags rig sngags rnam pa sna tshogs dag_/bye ba phrag gsum dang ni 'bum phrag lnga/_/rig 'dzin sde snod gsal bar rgyal bas gsungs/_/zhes so/__/de dag kyang sde tshan du snang ba'i tshul skye 'gro'i lus la rtsa stong phrag bdun cu rtsa gnyis kyi rim pas der 'bab pa'i khu rdul gnyis dang*/_rlung gi 'du ba las chos kyi rnam grangs de snyed cig gdul bya'i blo la bde bar gshegs pa'i bdag rkyen las rang bzhin 'char ba'i tshul/_bshad rgyud rdo rje'i phreng ba las/_stong phrag nyi shu rtsa bzhi ni/_/khrag 'bab pa ni shes par bya/_/stong phrag nyi shu rtsa bzhi ni/_/byang chub sems ni rab tu 'bab/_/stong phrag nyi shu rtsa bzhi ni/_/rlung rgyu bar ni shes par bya/_/zhes pa dang mthun par rgyud sde'i grangs/_klu sgrub zhabs kyi rim lnga'i 'grel pa las/_gsang sngags kyi dbye ba ni stong phrag bdun cu rtsa gnyis so/_/zhes gsungs so/__/de lta bu'i sngags kyi rgyud sde yod do cog thams cad 'dod yon dang nyon mongs lam du byed tshul dang*/_gdul bya'i blo rim sogs kyis bsgrub tshul gyi rnam grangs dang*/_sde tshan gyi grangs 'dzin sla ba'i phyir chings chen po lnga yis bcings te ston pa ni/_gsang ba grub pa las/_gdul bya dus dang 'dul byed kyi/_/skal pa can rnams don gyi phyir/_/gsang sngags tshul chen rnam pa bzhi/_/'jig rten khams su bsgrags pa yin/_/zhes so/__/de yang dus dang rigs dang dbang po sogs la dgongs te gsungs pas/_dus la dgongs pa ni/_'dzam bu gling pa rnams la sbyang gzhi 'dod chags kyi 'jug tshul bzhi rim par byung ste/_tshe lo sa ya drug 'bum yan chad du nyon mongs mngon gyur med cing*/_tshe lo dpag med thub pa dang*/_lus kyi 'od dang*/_rdzu 'phrul dang*/_bdud rtsi'i zas te yon tan rnam pa bzhi po thams cad rdzogs par yod pas rdzogs ldan te/_'di'i dus na nyon mongs 'dod chags cung zad langs kyang shas chung bas gcig la gcig bltas pa tsam gyis tshim pa dang*/_rim par yon tan de dag las gcig nyams te gsum ldan gyi dus na bgad pas tshim pa dang*/_yang gcig nyams pas gnyis ldan gyi dus na phan tshun reg pa dang bcangs pa tsam gyis tshim pa'i 'dod chags dang ni/_yon tan thams cad nub ste phan tshun rtsod par byed cing 'khyud sbyor gyi 'dod chags dang ldan pa ste bzhi yi gnyen por gsungs pa yang*/_bsdus rgyud las/_rdzogs ldan dang po bya ba'i rgyud/_/gsum ldan gnyis pa spyod pa'i rgyud/_/gnyis ldan gsum pa rnal 'byor rgyud/_/rtsod ldan bzhi pa bla med do/__/dus bzhi la ni dgongs nas kyang*/_/rgyud sde rnam pa bzhir bshad do/_/zhes so/__/rigs la dgongs pa ni spyod pa'i sgo nas dbye ste/_'di ltar bram ze rnams gtsang sbra dang dka' thub la spyod pa dang*/_rje'u rigs rnams ni sgo gsum cha mnyam la spyod pa gzo ba dang*/_rgyal po'i rigs rnams rgya chen po la mos shing sems kyi las gtso bor spyod pa dang ni/_dmangs rigs sam gdol pa rnams ni gtsang sbra chung zhing nyon mongs pa'i brtul zhugs shas che ba de rnams dang mthun par bstan pa ste bzhi'o/__/de yang bde mchog rol pa'i rgyud las/_bya ba bram ze gtsang sbra bstun/_/spyod pa rje rigs rang don du sems kyi yang dpyod/_lus kyi yang dmangs rnams skyong phyir thabs byed/_ngag gi yang smra ba ste sgo gsum cha mnyam par gzo ba de bas lhag_/rnal 'byor rgyal po 'khor tshogs mang*/_/gzhi rmongs dmangs phal pa gdol rigs rnams la gdod nas grol ba ste/_/gzhan du su la'ang ma bstan par/_/mdzes ma khyod la bstan pa yin/_/zhes so/__/dbang po bzhir dgongs pa ni/_dbang po rtul po rnams kyis sems kyi kun tu brtsam pa chen po nyams 'og tu mi chud pas lus ngag gi bya ba che thang du mthong ba dang*/_'bring gis sems kyi brtsam pa chen po yang rtogs su rung la lus ngag gi bya ba dang sems kyi brtsam pa cha mnyam par blta ba dang*/_rnon pos sems kyi brtsam pa gtso bor blta zhing lus ngag gi spyod pa grogs tsam du brten pa dang*/_dbang po mchog gis sgo gsum gyi bya ba thams cad mtshan ma dang blang dor du mi blta bar zung du tshud par shes pas de dag gi phyir gsungs te/_rdo rje gur las/_dman pa rnams la bya ba'i rgyud/_/bya min rnal 'byor de ltag la/_/sems can mchog la rnal 'byor rgyud/_/rnal 'byor bla med de ltag la'o/_/zhes so/__/de dag 'dul byed gsang sngags kyi chos ni rim pa bzhin du gdul bya de rnams dang mthun par ston pa ste/_bya ba'i rgyud du 'dod chags lam du byed pa'i thabs lha bri zhing bsgom pa'i tshul yang sems nyid stong gsal gyi rang bzhin gang du'ang 'char rung bas phyag na rdo rje mngon par dbang bskur ba'i rgyud las/_dbus su ni bcom ldan 'das spyan ras gzigs dbang bri/_de yi g.yon du na bza' dkar mo bcom ldan 'das la blta ba bri'o/_/zhes dang*/_rdo rje gtsug tor las/_dkyil 'khor gyi ni lha tshogs rnams/_/pho yang mo la blta ba dang*/_/mo yang pho la blta ba bri/_/zhes so/__/spyod pa yang khrus dang gtsang sbra dang*/_dkar gsum za ba dang*/_gos gsum brje ba sogs bya ba gtsor lhur len pa dang*/_sems kyi bsgom pa yang med pa min kyang lus ngag gi bya bar che thang du brtson no/__/spyod pa'i rgyud du chags pa lam du byed pa'i lha bri zhing bsgom pa'i tshul ni/_rnam snang mngon byang las/_rnam par snang mdzad rgyal po che/_/yid tsam 'dzum pa'i zhal du bri/_/zhes dang*/_de yi g.yas su lha mo ni/_/sangs rgyas spyan zhes bya ba ste/_/lha mo cung zad 'dzum pa'i zhal/_/zhes sogs gsungs pa ltar ro/__/spyod pa yang sgo gsum gyi bya ba cha mnyam par byed la/_bsgom pa yang sems kyi brtsam pa chen po byed nus pa'i dbang gis kun spyod gtso bor mi 'don no/__/rnal 'byor rgyud du 'dod chags lam du byed pa'i thabs su lha bri zhing bsgom pa ni/_dpal mchog dang po las/_dkyil 'khor gyi ni lha tshogs rnams/_/dpung pa yid tsam dam par bzhag_/ces dang*/_de yi logs la rdo rje che/_/mda' ni gsor ba la brtson pa/_/snyems pa'i phyag gis yongs 'khyud pa'i/_/chu srin rgyal mtshan sgreng dang bcas/_/zhes sogs gsungs pas lha thams cad phyag rgya sbrel bar 'byung ngo*/__/spyod pa yang lus ngag gi bya ba mi dgos pa min yang gtso bor mi ston pa grogs tsam du ston la/_bsgom pa ni mtshan bcas lha'i rnal 'byor dang mtshan ma med pa'i don bsgom pa lhur len pa gtsor byed do/__/bla na med pa'i rgyud sde rnams las ni/_chags pa lam du byed pa'i lha rnams thabs shes zung 'brel te/_gsang 'dus las/_dbang po gnyis kyi sbyor ba yi/_/'di snang gi dngos po thams cad lam du byed pas brtags par bya/_/zhes dang*/_gsang snying las/_rang gi lag cha sna tshogs te/_/btsun mo 'jigs pa'i tshogs dang 'khril/_/zhes sogs so/__/spyod pa yang gtsang sme dang nyon mongs sogs la blang dor med par spyod cing*/_bsgom pa ni mnyam nyid blang dor dang bral zhing thabs shes zung du 'jug pa'i don la mnyam par 'jog par byed nus pa'o/__/gzhan yang lha bzhi'i rjes su zhugs pa'i phyin ci log bzhi dang*/_nang pa'i grub mtha' smra ba bzhi rjes su bzung ba'i phyir rgyud sde bzhir phye ba'ang*/_mdo sngags gnyis mthar thug dgongs pa gcig tu 'bab pa dang*/_sangs rgyas rnams ni thabs la mkhas shing thugs rje dang ldan pas gdul byar ma gyur pa'ang med la/_'dul tshul yang rang rang gi mos pa dang mthun par ston pas mi 'thad pa med do/__/rgyal ba'i phrin las su shar ba'i lha bzhi ni/_bya rgyud la gtsang sbra sogs gti mug can tshangs pa gtsang sbra chos su smra ba dang*/_spyod rgyud zhe sdang can khyab 'jug 'tshe ba chos su smra ba dang*/_nga rgyal can lha yi nga rgyal rnal 'byor brgya byin rigs dang 'byor pas rgyags pa dang*/_chags pa can bla med chags pa lam byed dbang phyug 'dod chags chos su smra ba rnams so/__!__phyi rgyud sde gsum spyir bshad pa ni/_de ltar gsang sngags rgyud sde bzhi po de dag gi nang nas dang po bya spyod rnal 'byor gyi rgyud gsum la ni gsang sngags phyi pa zhes bya ste/_thub pa chags bral gyi rnam pas dngos su gsungs pa'i mtshan nyid theg pa dang*/_gtsang sbra byed pa dang*/_nyes spyod sdom pa'i tshul khrims kyi kun tu spyod pa phal cher mtshungs pa'i phyir/_dka' thub rig byed kyi theg pa'am thub pa rgyud kyi theg pa zhes kyang bya'o/__/des na 'di dag nyams len thabs shes gnyis ka'i sgo nas mtshan nyid theg pa las khyad par du 'phags na'ang*/_spyir theg chen mdo sngags kyi nyams su blang bya thams cad snying rje dang stong nyid zung 'jug lam du gcig cing*/_nyon mongs pa dang kha na ma tho bas mi gos par byed par mtshungs pas/_thun mong theg pa'i nyams len dang sdom pas rgyud sbyang zhing byams snying rjes gzhi bzung ba zhig dgos kyi/_rang gar sngags lam du zhugs pa tsam gyis lam gong ma'i khyad chos rgyud la mi 'byong ba ma zad rgyud chud zos su 'gyur ro/__/sngags phyi pa 'di dag gis ni sngar bshad pa ltar rtsod pa'i dus kyi dbang po gnyis sbyor dang 'gal ba'i bltas bgad lag bcangs kyis tshim pa'i 'dod chags kyi kun spyod lam du byed pas na/_lha yang de dang mthun par bri ba dang bsgom pa'i tshul ston gyi/_yab yum zung 'brel gyi tshul ston pa min la/_dkar gsum gyi zas dang*/_ras gos sogs gtsang zhing gsar par gyur pa'i gos dang longs spyod rnams bsten par bya ba las sha lnga dang bdud rtsi lnga dang*/_zhing lpags rus rgyan sogs la longs mi spyod do/__!__bye brag tu bshad pa la dang po bya spyod kyi khyad par bshad pa ni/_de la spyir sngags kyi dbye ba byas na ni/_rigs sngags dang*/_gzungs sngags/_gsang sngags zhes thabs dang*/_shes rab dang*/_gnyis su med pa'i ngo bo gsum du gnas pa'i tshul/_dgongs pa grub pa'i rgyud las/_gsang sngags kun gyi dbye ba ni/_/rnam pa gsum du shes bya ste/_/rig sngags thabs kyi ngo bo yin/_/gzungs sngags shes rab ngo bo yin/_/gsang sngags gnyis med ye shes so/_/zhes pas de'ang bya ba dang ni spyod pa'i rgyud du ni/_thabs kyi lhar shar ba sems dpa' dang*/_shes rab kyi lhar shar ba sems ma dang*/_'jam dbyangs dang dbyangs can ma lta bu gnas lugs shes pa'i shes rab dang ye shes 'brel ba'i ngo bo lhar shar ba rig sngags kyi lha dang*/_shes rab dang dran pa 'brel ba'i ngo bo lhar shar ba gzungs sngags kyi lha ste sgrub tshul bya ba'i rgyud las lha ye shes pa rje bo dang bdag khol po'i tshul gyis dang*/_spyod pa'i rgyud la/_lha ye shes pa dang bdag dam tshig pa gnyis mchog dman med par spun dang grogs po'i tshul du bltas te sgrub par byed do/__/de la bya rgyud kyi lam ni dpung bzang gi 'grel par spyod pa'i sgo bzhir bsdus te/_'jug pa'i spyod pa dbang gis snod rung du byed pa/_sbyor ba'i spyod pa rigs gsum gyi lha bsnyen pa/_sgrub pa'i spyod pa rdzas dang cha rkyen 'dzoms pas bzlas brjod la brtson pa/_grub pa'i spyod pa lha dang skal mnyam rig 'dzin mkha' spyod grub nas mthar 'bras la sbyor bar bshad pa'i spyod pa bzhi las/_dang po 'jug dbang ni 'og tu 'chad la/_gnyis pa sbyor ba'i spyod pa rigs gsum gyi lha bsnyen pa ni/_bya bas rje bo dang khol po'i rnam par bsgrub pa yin par bshad pa de la'ang*/_bdag lhar bskyed pa med pas rang nyid dman par bltas te tha mal pa'i tshul du bzhag pa la ni bya rgyud tsam po pa'am rang rgyud pa zhes bya la/_bya rgyud la lar bdag lhar bskyed pa yod de/_de la ni bya rgyud khyad par ba zhes zer zhing*/_'on kyang gtso bor mdun bskyed byas nas de la dngos grub zhu ba'i tshul du ston to/__/de yang bdag nyid lhar bskyed pa'i tshul ni de kho na nyid bzhi'i sgo nas te/_de la dang po bdag gi de kho na nyid ni rgyud 'di'i lta ba'i ngang la 'jog pa ste/_chos nyid dag pa'i lha zhes sems nyid don dam stong gsal gyi ye shes yod med snang stong gi mtha' bzhi dang bral ba'i chos nyid rtogs nas kun rdzob kyi chos thams cad lhar bsgom na/_stong nyid yin pa'i gnad kyis lcags khams la gser 'gyur gyi rtsis thebs pa bzhin/_rten 'brel snang cha thams cad mthar thug pa sangs rgyas tshe lhar yongs su dag par 'dod do/__/gnyis pa lha yi de kho na nyid ni/_sangs rgyas gsang bas/_stong pa de kho na nyid yi ge zla dkyil sgra bzla bya'i sngags gzugs spro bsdu'i lhar gsal ba dang*/_phyag rgya lha gang yin dam rgya _mtshan ma lha drug go_spyod lam kun tu de'i mtshan ma dang mi 'bral ba'o/_/zhes pa ltar ro/__/de nas rang mdun gzhal yas khang zhing khams dang bcas gsal la ye shes pa spyan drangs/_bstim/_bzhugs gsol bya ba rje dang rang nyid lhar bskyed pa bran gyi tshul du byas nas mchod bstod rgyun bshags bya'o/__/gsum pa sgrub pa'i spyod pa ni/_de kho na nyid phyi ma gnyis po yin te/_bsam gtan phyi ma las/_sgra dang sems dang gzhi la gzhol/_/zhes pas gzhi ni bdag mdun lhar bsam pa/_sems ni de dag gi thugs kar zla dkyil bsam pa/_sgra ni de steng sngags phreng rang sgra sgrogs par bsam la bzlas pa tshul bzhin bya ba'o/__/bzhi grub pa pa bsam gtan gyi de kho na nyid ni/_de nyid bsam gtan phyi ma las/_gsang sngags mer gnas dngos grub ster/_/sgrar gnas rnal 'byor ster bar dran/_/sgra mthas thar pa ster bar byed/_/ces pas rang nyid lhar gsal snying gar me 'bar ba'i nang du/_zla bar sngags phreng bkod nas/_srog bsdam pa'i sbyor bas bsgom pa las bzhi 'grub pa'i gzhi'o/__/sgrar gnas ni sngags 'bru rnams rang sgra dril bu'i sgra ltar bsam pa'o/__/rnam 'byor ni zhi gnas skye ba'i rten yin no/__/sgra mthas thar pa ster ba ni/_sgra yi rgyun je phrar song nas mi dmigs par 'jog pa ste/_lhag mthong khyad par can rgyud la skye bar byed pa'o/__/de ltar nang gi sgom pa dang phyi yi bya ba khrus dang gtsang sbra la gtso bor bsten pas bdag mdun mchog dman gyi tshul du bsgrub pa'o/__/bzhi pa grub pa'i spyod pa mkha' spyod rig 'dzin grub ste/_rten de la sngags kyi phyin drug gi spyod pa spyad nas mthar thug gi 'bras bu mchog gi dngos grub lha'i sku gsung thugs dang mnyam par sbyor ba'i rigs gsum rdo rje 'dzin pa'i go 'phang mngon du byed par 'dod pa ste/_he ru ka gal po las/_mi tshe bdun na sangs rgyas pa/_/rigs gsum mgon pos 'gro ba 'dul/_/zhes so/__!__spyod rgyud ni/_bya ba'i rgyud las bshad pa'i khrus dang gtsang sbra sogs thabs dang*/_nang gi lta ba dang*/_bsgom pa'i rnal 'byor yo ga'i rgyud ltar byas nas de gnyis la cha mnyam par spyod pas spyod pa'i rgyud du grags pa yin te/_rang shar las/_u pa ya ni 'di lta ste/_/lta ba yo gar lta ba dang*/_/spyod pa kri yar spyod pa ste/_/de phyir gnyis ka'i rgyud du grags/_/zhes so/__/de la dang po rang nyid dam tshig sems dpa'i lhar bskyed pa la/_sngags dang phyag rgya la sogs pas byin gyis brlab/_de nas gnyis pa rang gi mdun du bskyed cing bzhugs pa'i ye shes kyi lha'i thugs ka'i zla dkyil la sngags phreng bkod nas/_srog bsdam zhing rtse gcig pa'i sbyor bas ting nge 'dzin brtan par byed de/_de yang bden pa dbyer med kyi don la je bzang du song bas dam ye gnyis la dman mchog med par/_spun dang grogs ltar bltas te dngos grub len par byed pa yin no/__/de ltar mtshan bcas dang*/_mtshan med ting nge 'dzin gyi rim pa sogs kyis 'bras bu dngos grub thun mong dang*/_khyad par mi tshe lnga'am ring mtha' bskal pa gsum mam gcig gis sku gsung thugs kyi rigs gsum dang rin chen rigs te rigs bzhi rdo rje 'dzin pa'i sa mngon du byed par 'dod do/__!__rnal 'byor ni/_rnal 'byor gyi rgyud kyi lha'i rnal 'byor dkyil 'khor bsgom pa'i skabs su gzhal yas khang gi gru chad man chad kyi khyams dang*/_phyi rol gyi srung ba'i bar phal cher la/_bkod pa chen po rang snang longs spyod rdzogs pa'i zhing dang gzhal yas khang ltar bstan na yang*/_nang gi lha gdan 'khor lo sogs dang*/_gzhal yas khang gi dbus phyur bu'i rnam pa dang*/_rtse mo dang*/_rgyan gyi rnam grangs la mi 'dra ba mang du yod la/_lha rnams kyang sngar bshad pa ltar yab yum zung 'brel ma yin la/_lha bskyed nas de la sems gtad pa dang*/_rdzogs rim mi rtog pa bsgom pa'i thabs kyi rnal 'byor dang*/_shes rab kyi rnal 'byor gnyis rim can du bsgom pas so so ba yin te/_lam rim las/_lhun grub mnyam par ma rtogs pas/_/chos kun rnam dag ye shes kyi/_/thabs shes rim can du bsgom pas/_/bskyed rdzogs so so ba nyid do/_/ces so/__/byang sems dang ldan cing the tshom dang yid gnyis bral ba'i gang zag des/_ji ltar bsgrubs pa'i tshul yang*/_nang gi rnal 'byor bsgom pa gtsor spyod cing*/_khrus dang gtsang sbra sogs lus ngag gi bya ba rnams grogs su ston pa yin la/_de yang thabs kyi mngon byang lnga ni/_gal po las/_mi rtog zla ba gsung rdo rje/_/spro bsdu bsgoms pas sku ru gsal/_/zhes pa ltar rgyud sde 'og ma gsum gyi lugs min kyang rnam byang dang bstun mngon byang lnga dang*/_cho 'phrul bzhi ste/_gal po las/_ting 'dzin gtso 'khor bskyed byin rlabs dbang bskur mchod/_/ces pas cho 'phrul bzhi dang ldan pa'o/__/de ltar bdag lhar bskyed la dbyings nas ye shes pa dgug cing bdag dang lha don la mnyam pa'i nges shes kyis chu la chu bzhag pa ltar dbyer med du bstims nas/_sku yi rnam pa phyag rgya chen po/_gsung gi rnam pa chos kyi phyag rgya/_thugs kyi rnam pa dam tshig gi phyag rgya/_'od zer spro bsdu la sogs pas sgrub pa las kyi phyag rgya ste bzhi yis rang gi sgo gsum bya ba dang bcas pa lha'i sku gsung thugs phrin las dang bcas pa'i ngo bor rgyas btab ste dbyer med du bcing zhing*/_dam tshig pa dang ye shes pa gnyis ro gcig pa'i ngang nas bzlas pa la brtson zhing*/_dngos grub rnam pa gnyis len pa yin no/__/de ltar bsgrub cing dngos grub blang ba'i bzlas brjod byas pa'i mtha' la gshegs gsol bya ba ste bskyed rdzogs kyi rim pa bya ba'o/__/de ltar bsgrubs pas 'bras bu thun mong gi dngos grub mkha' spyod kyi rig 'dzin dang*/_mchog gi dngos grub mi tshe gsum na rigs bzhi'i steng las kyi rigs te rigs lnga stug po bkod par mngon byang lnga'i thabs kyis ye shes lnga'i ngo bor 'tshang rgya ba yin no/__/de skad du gal po las/_yo ga stug po bkod 'dod pas/_/mi tshe gsum na grol bar 'dod/_/ces so/__!__nang rgyud kyi sde spyir bstan pa ni/_lta sgom spyod gsum phyi rgyud las khyad par 'phags shing*/_'di dag gi gong na rgyud sde gzhan med pas bla na med pa/_/thabs shes sam bskyed rdzogs dbyer med du nyams su len pa'i phyir gsang sngags nang pa zhes bya la/_nang rgyud sde gsum po 'dir ni bskyed rdzogs gnyis med kyi lam ston yang*/_gtso che chung tsam du bskyed pa'i rim pa rgya cher ston zhing lha yi rnam pa pho shas che la/_dar dang rin po che'i rgyan sogs mang ba dang*/_rdzogs pa'i rim pa mtshan bcas mtshan med thams cad tshang bar ston zhing*/_lha yi rnam pa mo shas che la/_gcer bu rus rgyan g.yang gzhi thal byug sogs mang ba dang*/_yang thabs shes zung du 'jug pa 'od gsal ba'i ye shes gtso bor gsal bar ston pa ste/_de gsum gyi dbang las tha snyad kyi dbye ba pha rgyud dang*/_ma rgyud dang*/_gnyis med rgyud de gsum du bzhag la/_pha ma gnyis po'i rgyud 'di mtha' gcig tu'ang ma nges la/_gtso bo go 'pho la gtso mo go mi 'pho ba thabs pha yi rgyud/_gtso mo go 'pho la gtso bo mi 'pho ba shes rab ma'i rgyud de/_go 'pho dgos pa ni/_dbang dus su me tog gang la phog pa'i rigs de gtsor byas na myur du 'grub cing*/_de gtso bor byed dgos pas rigs kyi yab de'i gtso bor brje zhing yum rang gi go sa nas mi 'pho ba dang*/_de las ldog pa khyad par ro/__/nang rgyud kyi lha thams cad ni thabs shes gnyis su med pa'i ye shes kyi rnam pa yab yum 'khril sbyor gyi tshul dang*/_dam tshig gi rdzas kyang 'og mas bsten du mi nus pa'i khyad par can sha lnga dang bdud rtsi lnga la sogs par longs spyod nus shing*/_de yang lta ba dag mnyam chen por rtogs pa'i gnad kyis gtsang ba btsog pa sogs gnyis chos thams cad la bzang ngan gnyis 'dzin sogs med par 'ga' zhig spong ba dang*/_'ga' zhig dang du len pa med par ro mnyam du blta zhing spyod pa'i rang bzhin can no/__/de yang spyir mdo sngags kyi khyad par 'og ma bya rgyud kyang dbu ma las khyad par du 'phags shing*/_phyogs mthun tsam du grub mtha' smra ba bzhi dang*/_rgyud sde gong 'og gi lta spyod 'dra re snang yang gong 'og gi khyad par dbye shes pa de ltar ro/__!__bye brag tu spros pa rgya chen po'i sgo nas sgom par byed pa'i rnal 'byor chen po pha yi rgyud de/_'dis ni thabs bde ba chen po ye shes kyi rang rtsal la gzung 'dzin glo bur ba rtog pa'i dbang gis phung sogs kyi chos snod bcud kyi rnam par snang zhing*/_der sgro btags pa'i kun brtags kyi cha sbyang ba'i phyir/_rang bzhin yongs shes kyi lta ba'i ngang nas snod bcud thams cad zhing dang*/_gzhal yas khang dang*/_lha dang*/_lha mor gsal ba'i lam bskyed pa'i rim pa gtsor byas nas bsgom zhing*/_rdzogs rim ni gsal stong rnam par mi rtog pa'i ye shes bskyed pa'i phyir/_'byung ba'i dwangs ma rlung lnga dbu ma'i dbyings su dag par byed pa la sogs pa'i sgo nas dngos grub rnam pa gnyis su sgrub par byed do/__/bskyed rim la goms pa brtan pa'i rjes su sgom par byed pas sam rjes chags ye shes bskyed pa gtso bor 'don pa'i phyir rjes su rnal 'byor ma rgyud de/_'dis ni rdo rje'i lus kyi rtsa rlung thig le la yang dngos su gnad du bsnun nas gzhan dbang gi ngo bo sems dang sems byung gi rtog tshogs thams cad/_dbyings kyi rang bzhin shes rab stong pa nyid kyi ngang du dag pa'i stobs kyis/_bde stong lhan cig skyes pa'i ye shes dngos su bskyed pa'i lam rang lus thabs ldan sngon du song nas/_gzhan lus phyag rgya bsten pa'i rdzogs rim gtso bor byed cing*/_khams las su rung zhing zhu ba las dga' bzhi bde ba chen po'i ye shes bskyed pa sogs dngos grub rnam pa gnyis dmigs pa goms pa kho na la mi ltos par/_rtsa thig rlung gsum las su rung ba las sgrub par byed do/__/shin tu nyams myong dga' ba'i rang bzhin ye shes ji bzhin rjen par bsgom pas shin tu rnal 'byor te/_'dis ni bskyed rdzogs sam thabs shes gnyis gtso che chung med par/_yongs grub zung 'jug gi ye shes mngon du byed pa'i lam la goms pas gcig dang du ma'i rang bzhin mtha' dang bral ba'i chos nyid 'od gsal lhun grub chen por sbyor zhing*/_phung po'i snyigs ma dwangs ma'i 'ja' 'od du dwangs par byed do/__!__bla med kyi rgyud sde kun gyi nang nas bshad pa'i thabs bskyed pa'i rim pa dang*/_shes rab rdzogs pa'i rim pas gnad du bsnun pa'i gzhi ni/_gang zhe na/_gsang sngags nyams su len pa'i rten 'byung ba lnga rnam shes dang bcas pa'i khams drug po rags pa mngon gyur dang ldan pa'i lus 'dod khams pa dang*/_khyad par mi yi 'gro ba yin par bshad do/__/de ltar yin pa'i rgyu mtshan yang*/_phung po lnga dang*/_khams bco brgyad dang*/_skye mched bcu gnyis po thams cad snang ba'i gzhi rags pa'i rtsa thig rlung gsum dang ro gcig pa'i gnyug ma'i khams dri ma dang bcas pa rnams ni/_zung 'jug e waM gyi rang bzhin stong pa bzhi dang*/_snang ba bzhi'i ye shes dang gnyis su med pa'i sku gsung thugs rdo rje'i ngo bor ye nas gnas pa yin te/_dam pa dang po'i rgyud las/_thig le snying stobs zla ba zhe sdang khu ba lus sku/_/rnam par e waM gyis bcad bya 'dod chags rdul dmar cha nyi ngag gsung*/_/a yig srog rlung mun gti mug can sems thugs rab brjod/_/nam mkha' e la rnam par gnas/_/zhes so/__/des na rten lus la gnad du bsnun pas brten pa las su rung ba las/_bskyed rim gyis rtsa dag pa mtshan dpes lus brgyan pa'i sku/_rdzogs rim gyis rlung dag pa yan lag drug cu'i gsung*/_zung 'jug gis thig le dag pa ye shes lnga'i rang bzhin thugs rdo rje gsum gyi yon tan ma lus pa kun myur du skyed par byed pa ni/_rdo rje theg pa'i lam yin pa'i phyir gzhan las khyad par du 'phags so/__!_'di ltar rdo rje theg pa'i nye lam zab mos nyams su blang bya'i ngo bo chos thams cad kyi rang bzhin sems nyid bde gshegs snying po rig pa rang byung gi ye shes nyid sku dang ye shes ye nas lhun gyis grub pa'i dkyil 'khor chen po ru gnas pa yin te/_de nyid nyams su myong ba ni/_mos gus kyi pha phog thob pa'am/_dbang dus su ngo 'phrod pa'am/_bskyed rdzogs sogs kyi sgo nas gzhi'i rang bzhin nam gnas lugs de nyid dang po thos bsam gyi lta bas thag bcad la/_chos nyid kyi don phyin ci ma log pa blos bya rtsol bral ba'i lta ba de'i ngang nas bsgom pas nyams su blang ba ni/_snang srid 'khor 'das kyis bsdus pa'i chos thams cad gdan gsum tshang ba'i dkyil 'khor chen por ye nas gnas pa'i gsal snang bskyed rdzogs la 'du 'bral med par dbyer med du nyams su len pa yin no/__/de ltar nyams su len pa'i tshe grogs spyod pas gzung 'dzin gyi la dor bar byed pa ni/_phyi nang gi snang ba dang blo'i 'gro ldog bzang ngan thams cad tha mal gyi snang bas mi dpyad cing*/_'dod yon la rang gar zhen pas dug lnga rang rgyud du ma shor ba thabs kyis zin pa'i mnyam rdzogs chen po'i rol pa ste/_lta ba'i rdzong zin cing*/_sgom pa'i 'phrang las grol ba/_spyod pa'i srog mkhar tshugs pa zhig la sngags kyi rnal 'byor pa zhes bya'o/__/de yang ji skad du/_lta ba ni stong nyid bco brgyad yin/_/the tshom dang bral ba'i rdzong zhig dgos/_/sgom pa ni phyogs chos so bdun yin/_/bying rgod kyi 'phrang las 'da' ba dgos/_/spyod pa ni pha rol phyin drug yin/__rang 'dod dang bral ba'i srog tshugs dgos/_/zhes gong ma dag gis gsungs pa ltar dang*/_gzhan yang*/_bdag nyid lha yi rnal 'byor du gsal thebs pa bskyed rim gyi rdzong*/_snang stong zung du 'jug pa'i gnas lugs 'dus ma byas pa'i chos nyid kyi ngang la 'jog pa ni rdzogs rim gyi srog_/bying rgod dang dman pa'i sems sogs gnyis ka'i 'phrang rnams las grol ba ni/_kun tu bzang po'i spyod pa zhes bzhed do/_/zhes pa 'di dag gi don nges par byas nas/_lta sgom spyod gsum zung du chud par bya'o/__/de ltar lta bas gtan la phab pa'i don rdzogs rim gyi 'bras bu rang don chos sku dang*/_bskyed rim gyi 'bras bu gzhan don gzugs sku'i bkod pa rtsol med du snang zhing*/_spyod pa mtha' phyin pas 'khor ba ma stongs kyi bar du rtag khyab lhun grub chen po'i phrin las kyis 'gro don mdzad pa ste/_de ltar don gnyis phun sum tshogs pa'i yon tan thams cad tshegs med du 'grub pa yin no/__/de yang gzhi rang bzhin lhun grub chen po'i dkyil 'khor lta bas gtan la phab/_lam bskyed rdzogs zung 'jug gi don sgom pas nyams su blang zhing*/_spyod pas grogs byas pas 'bras bu sku dang ye shes kyi dkyil 'khor mngon du snang bar 'gyur bas de gsum ka rgyud la yang dag par brten pa yin no/__!_'di ltar 'jug pa'i sgo ni/_sku gsung thugs ye shes rdo rje bzhi'i ngo bor ma smin pa smin par byed pa'i dbang yin te/_khog gzhung las/_rno la ngar btags nus pa bzhin/_/nus pa skyes pa thob pa'i tshad/_/ces so/__/rang la gnas pa'i ye shes sgrib gnyis bag chags dang bcas pa las grol bar byed pa'i thabs ni/_bskyed rim dang rdzogs rim rnam pa gnyis yin pas yang yang bsgom dgos so/__/lam de dang tshul mthun pa'i grogs su sngags kyi gzhung nas ji skad bshad pa'i dam tshig gi rim pa yang dag par bsrung ba'i spyod pa dang gsum po tshang na/_gsang sngags kyi lam phar phyin gyi theg pa las khyad par du 'phags pa mchog ma nor ba yin pas rnal mar nges pa yin gyi/_de las gzhan ma smin bzhin bskyed rdzogs phrin las sogs gang la'ang ltar snang tsam las don med do/__/gsang sngags lam gyi 'jug sgo dang po dbang bskur thob dgos pa ci'i phyir zhe na/_dbang ma thob bzhin sngags lam la ci ltar brtson kyang dngos grub thob pa med de/_dper na bye ma btsir ba'i bya bar ji ltar 'bad kyang*/_de las zhun mar 'byung ba med pas 'dod pa'i don mi thob pa bzhin te/_rnam snang mngon byang las/_dbang med pa la dngos grub med/_/bye ma btsir las mar mi 'byung*/_/mkha' la khu tshur brdeg pa dang*/_/smig sgyu'i chu ni 'thung dang mtshungs/_/zhes so/__/dngos grub med pa ma zad gsang sngags kyi chos la dbang zos pa dang*/_gsang sngags kyi rgyud dang gdams ngag gzhan la 'chad pa dang*/_rang gis nyan pa dang*/_bskyed rdzogs kyi lam bsgom pa dang*/_blang dor med pa'i spyod pa la brtson kyang gsang sgrogs kyi nyes pas/_phyi ma dmyal ba'i gnas su nges par 'gro ste/_dus 'khor las/_dbang bskur med par rgyud 'chad dang*/_/zab mo'i de nyid sgom byed pas/_/de don legs par shes na'ang*/_/dmyal bar 'gyur gyi grol ba med/_/ces sogs gsang snying las kyang rgya cher gsungs so/__/dbang thob pa'i phan yon ni/_dbang gi sngon rdo rje'i rnal 'byor du sems bskyed pa dang ldan pa'i skyes bu de dper na rgyal bu rgyal srid la mnga' gsol ba bzhin/_theg chen rgyal sras de la rgyal ba rnams kyis nye ba'i sras su dgongs par 'gyur te/_gsang snying las/_dus 'di phyin chad rgyal ba'i sras/_/ngan song thams cad med pa dang*/_/tshe ring bde ba phun sum tshogs/_/mtho ris thar pa'i bdag por 'gyur/_/zhes so/__/der ma zad dkyil 'khor mthong ba tsam gyis kyang mtshams med lnga sogs sdig pa thams cad las rnam par grol te/_gdan bzhi'i rgyud las/_mtshams med lnga yi las can yang*/_/tshon rtsi mthong bas grol bar 'gyur/_/zhes so/__/dbang bskur thob nas dam tshig rnam dag bsrung na/_gang du skyes kyang sdig pa dang*/_phyin ci log gis ma bslad par gtsang ma'i rigs su skyes nas gsang sngags kyi chos dang 'phrad pa dang*/_yon tan gyis skye ba bdun phan mi 'gyang bar skye ba de dag gi tshe na lam gyi mthus ma bsgrubs bzhin bskyed rdzogs kyi yon tan nges par 'grub cing 'phags pa'i sa bcu po bgrod nas sangs rgyas kyi sa 'thob par bshad de/_gsang mdzod las/_dbang bskur yang dag sbyin ldan na/_/skye zhing skye bar dbang bskur 'gyur/_/de yi skye ba bdun na ni/_/ma bsgrubs par yang 'grub par 'gyur/_/zhes dang*/_gsang 'dus las/_dbang bskur bas ni sa bcu non/_/zhes so/__/de yang gsang sngags kyi dngos grub rtsa ba ni bla ma la rag las pas/_de yis dbang bskur te sku bzhi'i sa bon rgyud la 'jog nus dgos na/_slob dpon ngan pa bskyed rdzogs rim pa gnyis kyi don ma chud cing*/_nyams len gyi gdeng dang bral bas rigs rus cho 'brang sogs kyis brgyags nas/_rang gi 'dug sa'i gnas te bsti gnas dgon sde bla brang sogs kyi mgo 'dzin gyis g.yengs shing*/_gtsug lag khang dang dge 'dun gyi dkor rdzas la byung rgyal du spyod pa/_sdom pa gsum gyis sgo gsum ma bsdams shing*/_tshul 'chal las 'bras khyad du gsod pa'i zhen sred can/_sbyin bdag sogs kyi khyim la chags shing gson gshin gyi longs spyod sdud pa dang*/_gdug rtsub che zhing snying rje chung ba dang*/_rgyud dang sde snod rnams la shes rab kyi mig zum pas ltar snang rtog ge zol mas zil gyis non nas/_gang la'ang phod pa che ba des ni dbang bskur bar byas kyang*/_dper na be'u sbrel g.yang sar lhung ba ltar gnyis ka ngan song du ltung bar 'gyur te/_ye shes 'khor lo'i rgyud las/_dad ldan gcig bslus sems can brgya bsad bas/_/sdig pa shin tu che ba rgyal bas gsungs/_/de phyir rang 'dod bslu ba'i chos mi bshad/_/ces so/__/bsten bya'i slob dpon ni/_phyi yi de nyid bcu ni/_/rdo rje snying po rgyan gyi rgyud las/_/dkyil 'khor phyi rgyud sde kun gyi ting 'dzin bskyed rdzogs phyag rgya lag gidang*/_/rkang pa'i stang stabs las bzhi'i 'dug stangs snying po bzlas brjod dang*/_/las bzhi sbyin sreg mchod pa phyi nang gsang las sbyor mchog thun gyi dang*/_/slar sdud pa yi rnam pa bskyed rdzogs mnyam bzhag ni/_/phyi yi de nyid bcu yin no/_/zhes so/__/nang gi de nyid bcu ni/_dkyil 'khor 'bri ba sogs nang rgyud la bstun pa'o/__/gsang ba'i de nyid rnam pa bcu ni/_rgyud de nyid las/_ting nge 'dzin dang _phyir zlog rdzas kyi srung 'khor gnyis kyi cho ga dang*/_/gsang dang shes rab ye shes dbang bskur gnyis dang*/_/kha sbyor 'byed pa'i cho ga sgrol ba dang*/_/gtor ma sbyangs rtogs sbar gsum rdo rje'i bzlas pa dang*/_/drag shul ma grub pa btsan thabs spogs pa'i rtsub mo'i cho ga dang*/_/rab tu gnas dang dkyil chog sgrub/_/gsang ba'i de nyid bcu yin no/_/zhes so/__/de ltar tshul de rnams ji lta ba bzhin rig cing*/_gzugs brnyan tsam shes pas mi chog ste/_gsang sngags lta sgom gyis rang nyid kyi rgyud grol ba'i bla ma zhig bsten pa gces te/_sAMb+hu Ti las/_slob dpon smin pa'i las kyis ni/_/slob ma yongs su smin par bya/_/zhes so/__/de lta bu'i bla ma de yis/_slob ma sngar bstan bzhin dad gus dang ldan cing khrel dang ngo tsha shes pa'i snod kyi yon tan slob ma'i rgyud la ldan nam mi ldan brtags shing lo bcu gnyis sogs la brtags par gsungs dpyad la/_snod dang ldan na bum dbang nas bzung dbang bzhi po bskur te rim pa bzhin ma nor bas sbyin par bya'o/__/de skad du gsang snying las/_dad brtson brtul zhugs rab rtogs na/_/phan pa'i dbang sbyin nus pa'i dbang*/_/rim pa bzhin du sbyin par bya/_/snying rjes chud ma zos par zungs/_/zhes so/__/thog mar slob dpon rang gi rgyud dag par byed pa bsnyen pa bya ba dang ni/_bdag po'i gzhi la dbang mi za zhing sa dang sar 'dzin gyi rtogs pa dbyings su mnyam par bya ba'i sa yi cho ga dang*/_dkyil 'khor dang slob ma'i las la thod rgal du mi 'jug pa sta gon gyi rim pa dang ni/_slob ma'i rgyud rim gyis dag cing smin par bya ba'i phyir du dkyil 'khor du 'jug pa sngon du byed cing*/_zhugs pa de la smin par byed pa'i dbang dngos bskur dgos te/_cho ga'i mngon rtogs bzhi po de re re nyid la'ang*/_yan lag bzhi bzhir yongs su tshang zhing rdzogs dgos pa'i phyir/_gsang snying las/_bsnyen pa dang ni nye bsnyen dang*/_/sgrub pa dang ni sgrub chen po/_/zhes bsnyen pa'i yan lag bzhi dang*/_sa gzhi mnyam pa dang*/_sa bslang ba dang*/_dbang du bya ba/_sbyang ba ste sa chog yan lag bzhi dang*/_sa lha/_dkyil 'khor pa'i lha/_bum pa/_slob ma sta gon yan lag bzhi dang*/_rang nyid 'jug pa dang*/_slob ma 'jug par gnang ba nod pa/_dkyil 'khor du gzhug pa/_zhugs pa la dbang bskur ba ste 'jug cing smin pa'i yan lag bzhi ste/_cho ga'i yan lag bcu drug po las gang rung ma tshang na/_so so skye bo'i slob dpon la ni/_cho ga'i yan lag phra mo nyams pas/_byin rlabs dngos grub la sgrib par 'gyur bas slob ma'i rgyud smin par byed nus pa ma yin no/__/rgyud sde bzhi po so sor 'jug sgo dbang gi rigs dbye mang du mchis la/_bsdu na bya ba'i rgyud la 'jig rten 'das pa'i rigs gsum gang rung gi dkyil 'khor du gzungs bcas bum pa'i chu yi dbang dang*/_rigs gang yin gyi dam tshig gi phyag rgya cod pan gyi dbang ste gnyis kyi dngos gzhi dang*/_mtha' rten bzlas lung*/_byab bkru bsrung gsum rdzas kyang sbyin pa rnams so/__/spyod pa'i rgyud la snga ma gnyis po de yi steng rdo rje ming ste/_mi bskyod pa'am rnam snang gi dbang bsnan par gsungs la/_yang rdo rje/_dril bu/_ming dbang rnams dang*/_me long*/_thur ma/_chos 'chad kyi rjes gnang sogs bskur ba mang nyung slob dpon so so'i gzhung ltar ro/__/rnal 'byor rgyud du slob ma'i dbang la/_bum pa/_chu/_cod pan/_rdo rje/_de rnams kyis mtshan pa'i dril bu ming ste rig pa'i dbang lnga dang*/_de nas slob dpon gyi dbang*/_phyir mi ldog pa'i dam tshig gsum bzung ba/_gsang dkyil du gsang ba'i 'jug pas zhugs shing mthong ba lha dang*/_dkyil 'khor gyi de nyid ston pa bka' yi dbang zhes yo ga rang gi thun min gyi chos 'chad rjes gnang dang*/_lung bstan dbugs dbyung gzengs bstod de slob dpon gyi dbang drug dang bcas bcu gcig po mtha' rten dang bcas rdzogs par bskur ro/__/rnal 'byor bla med la/_rig pa'i dbang lnga dang*/_drug pa rdo rje 'chang gi dbang ste drug gi steng rdo rje slob dpon gyi dbang dang bcas pas bum dbang dang*/_gsang dbang dang*/_shes rab ye shes kyi dbang*/_tshig dbang rin po che ste bzhi po nang gses kyi dbye bas bcu bzhi ni/_bshad rgyud rdor phreng las/_dang po'i dbang ni gtso bo ste/_/gnyis pa gsang ba'i ming can no/__/gsum pa kun nas sbyor ba ste/_/bzhi pa don ni dam pa'o/__/gtso bo'i dbye ba bcu gcig ste/_/bcu gnyis pa ni gsang ba'o/__/bcu gsum pa ni yang dag sbyor/_/bcu bzhi pa ni don dam ste/_/dbang bskur re re sa rol/_/rnam pa gsum ni rgyu yi dbang*/_/bzhi pa 'bras bur shes par bya/_/zhes so/__/ye shes thig le las kyang*/_/rnal 'byor bla ma yi ni mtshan/_/gsang ba yi ni dbang rgyal bshad/_/shes rab ye shes bla na med/_/bzhi pa yang ni de bzhin no/_/zhes so/__/spyir rgyud sde dang sgrub sde so so'i dbang gi grangs ni ma nges pa sna tshogs te/_dus 'khor las/_byis pa 'jug pa'i dbang bdun dang*/_gong ma la 'jig rten pa gsum dang*/_'jig rten las 'das pa'i bzhi pa ste bcu gcig tu gsungs pa sogs rtsa rgyud las/_chu dang cod pan dag dang ni/_/rdo rje dril bu brtul zhugs dang*/_/ming rgyal dbang gi rnam pa bdun/_/byis pa rnams ni gzung phyir dang*/_/gsum pa 'jig rten kun rdzob dang*/_/bzhi pa don gyi dam pa'o/__/bum pa gsang ba'i dbang dang ni/_/shes rab ye shes zhes bya dang*/_/de nas shes rab chen po yi don gyi dbang*/_/ye shes zhes bya rdzogs pa dang*/_/byis pa 'jig rten pa 'gyur dang 'jig rten 'das pa mi 'gyur bar chad can/_/bar chad med pa de las gzhan/_/zhes bcu bdun dang*/_snga 'gyur thun min lugs la rgyud lung man ngag sgrub sde bzhi las/_sgyu 'phrul drwa ba ltar na/_phyi phan pa'i dbang bcu ni/_snying po lnga dang dbu rgyan dang*/_bum pa cod pan phreng ba ste/_/go cha rgyal mtshan gdugs phyag rgya/_/bza' btung dbang rnams rim bzhin bskur/_/zhes pa rnams so/_nang don gnyis nus pa la dbang bas nus pa'i dbang lnga/_rang don nus pa'i brtson 'grus can la nyan dbang dang sgom dbang gnyis/_gzhan don nus pa'i brtson 'grus can la 'chad dbang dang phrin las dbang gnyis/_gnyis ka'i don nus pa la rdo rje rgyal por mnga' gsol ba bka' rab 'byams kyi dbang ste lnga'o/_/gsang ba zab mo'i dbang gsum rdzogs rim mthar thug yin pas gsang sher bde ba chen po'i dbang ste gsum mo ste dbang mchog bco brgyad dang*/_lung a nu yo ga la/_kun 'dus rig pa'i mdor/_phyi dngos bstan gyi dbang rgyud kyi chu bo bcu/_bka' rtags rigs lnga'i sku/_rtags kyi mtshan ma rdo rje sogs/_rig tsaka gam dril bu/_bum pa/_rdzas brgyad/_sna bdun/_rin chen pad+ma seng khri sogs/_cod pan sogs rgyan brgyad/_ming dbang*/_'khor lo'o/_nang dbang ma dag pa'i 'byung lnga'i snyigs ma lus lhar smin pa 'byung ba'i chu bo bcu gcig_/nyan pa dang slob ma'i dbang rdzas glegs bam/_phrin dbang sna tshogs rdo rje/_'chad pa'i dbang 'khor lo/_/rdo rje rgyal po'i dbang rdo rje rtse dgu/_gdan khri/_thun min gyi rin chen sna bdun/_phyag rgya'i dbang lha tsaka yongs rdzogs/_thod rgyan/_sku gsung thugs kyi lha tsaka_/bdud 'dul rdzas rtags brgyad/_/ming dbang ngo*/_sgrub dbang du a nu rang lugs la grags pa grags pa'i chu bo bcu gsum shes rab rig pa'i dbang sgron me/_snying rje rtags kyi dbang nyi zla/_hU~M las byung ba'i thong gshol/_dug gsum dkrugs pa'i mdung dmar/_srid gsum sgrol ba'i mtshon cha/_skyon gyis ma gos pad+ma/_las bzhi rdzogs pa'i bam dbyug_/gnyis med 'khril ba'i sbrul chun/_/gsang ba sbyor ba'i rig ma/_'dod yon la longs spyod pa'i 'dod yon/_sgrub dbang zhi khro'i gtso tsaka_/sgrub rdzas phyi nang gsang gsum/_rtags kyi ming dbang ngo*/_/mchan/_gsang dbang rdzogs pa'i chu bo gnyis ni/_bdud rtsi'am gsang ba'i dkyil 'khor mtshon byed chos 'byung*/_rig pa'i rtsa la dbang ngo*/_/mchan/_sum cu rtsa drug gi dbye ba sogs dang*/_drang nges dang sa zin 'jog mtshams ni yon gzhung ltar ro/__/theg pa'i rtse mo man ngag a ti yo ga'i dbang gi rim pa man ngag sde ltar na/_dbang bzhi bye brag tu dbye ba byas pa/_spros bcas bum dbang dang*/_spros med gsang ba'i dbang dang*/_shin tu spros med shes rab ye shes kyi dbang dang*/_rab tu spros med tshig dbang ngo*/__/zab khyad sgrub dbang sogs spyir na rgyud sde so so'i dbang gi dbye bsdu mtha' yas pa zhig yod kyang*/_de dag gi tshul jo bo'i dam tshig bsdus pa las/_bla ma'i zhal las byung ba'i dbang dang*/_yi dam gyi lhas byin gyis brlabs pa'i dbang dang*/_rdo rje mkha' 'gro mas lung bstan pa'i dbang dang*/_rang gi sems nyid kyi rtsal las thob pa'i dbang dang bzhi'o/_/zhes pa ltar/_dang po ni/_dbang gi cho ga'i sgra la ji lta ba bzhin de la ltos pa dag dang*/_gnyis pa ni rgyal po dza'i khang steng glegs bam babs pa sogs lhar dang*/_gsum pa ni slob dpon klu sgrub dang*/_'gro bzang gis o rgyan d+ha rmA gany+dzo chos kyi gtsug lag khang nas brtag gnyis dang*/_ma hA ma yA gnyis ma byin par blang bas bdag gir byas pa na/_mkha' 'gro mas bsnyags te rjes zin pa'i tshe/_chos de'i bdag po gyis la shod ces rjes su gdams pa lta bu dang*/_bzhi pa ni chos nyid lta bas thob pa rig pa'i rtsal dbang ste/_de la brten nas bskur bya'i slob mas dngos grub thob pa ni dbang gi 'bras bu yin pas/_tha snyad phyogs gcig pa la zhen nas/_dbang gi grangs dang*/_bskur tshul dang*/_thob tshul tha dad pa dag la mi 'thad par mi sems par kun la dag snang byed pa gal che'o/__/des na bla med kyi dbang gis rnam grangs ji snyed cig yod pa thams cad gang las dbye ba dang*/_gang du bsdu ba'i gzhir gyur pa'i grangs nges pa'i sa zin 'jog mtshams bum gsang sher dang tshig dbang ste rnam pa bzhi po yin no/__/de la gsang sngags kyi theg pa bla na med pa'i dbang du ni gzhi rang bzhin lhun gyis grub pa'i dkyil 'khor chen por phung po dang*/_khams dang skye mched thams cad kyi 'char gzhi bde gshegs snying po'i rang bzhin gnyug ma'i sgo gsum ye shes dang*/_bum dbang sogs dbang gi ngo bor ye nas gnas pas gzhi'i dbang dang*/_de nyid dbang bzhi bskur ba'i thabs la brten nas smin rung du byed pa dang*/_lam dbang gis bogs 'don par byed par ni lam gyi dbang dang*/_'bras bu sku bzhi'i ngo bor mthar phyin pa 'bras bu'i dbang bzhi ste/_de dag kyang gnas skabs gsum du bzhag pa tsam las rang bzhin chos nyid gcig gi ngo bor dbyer med pa ru sems can thams cad la gdod nas grub pa yin te/_dbang mchog rgyal po'i rgyud las/_dbang mchog rang la med gyur na/_/bskur bas thob par ga la 'gyur/_/bra sran 'bras su dbang bskur yang*/_/de la 'bras kyi dngos snang med/_/ces so/__/sems can thams cad sangs rgyas sam zhe na/_de ltar sems can thams cad bde gshegs snying po'i rang bzhin yin pas mthar thug 'tshang mi rgya ba med cing*/_gsang sngags kyi snod rung yin par lung dang rig pas grub mod/_/gnas skabs dbang gi rten du rung ba ni/_bum dbang gi rten rtsa dang*/_gsang dbang rten rlung dang*/_sher dbang khams dkar dmar thig le'i cha dang*/_tshig dbang ngo bo sems rtog rags pa ste/_rten de rnams mngon gyur du yod pa'i rten khams drug dang*/_brten pa bde gshegs snying po gnyis ka rang chas su yod pa de nyid de de ltar slob ma'i rgyud la mtshungs par ldan pa'i rgyud dang ldan pa dang*/_de smin par 'gyur ba'i lhan cig byed pa'i rgyu ni/_rdo rje slob dpon gyis lha sngags ting nge 'dzin gyi byin gyis brlabs pa'i dbang dang*/_rig ma rnams te rgyu rnam pa gnyis yin la/_de steng dad pa sogs snod du rung ba'i slob bu rgyu yi rkyen yin la/_lta ba rtogs shing bdag gi de kho na nyid dang*/_lha'i de kho na nyid dang*/_gsang sngags kyi de nyid dang*/_bzlas brjod kyi de nyid dang*/_'phro 'du'i de kho na nyid de sngags kyi yan lag lnga'i dgongs pa dang ldan pa'i rdo rje slob dpon ni bdag po'i rkyen yin te/_lta dgongs bral na rdo yi sa bon bzhin no/__/man ngag ji bzhin slob ma'i rgyud smin nus pa'i cho ga mkhyen pa dmigs pa'i rkyen yin te/_de mi ldan na byis pa'i rtsed mos dbang mi thob pa bzhin no/__/dkyil 'khor du zhugs nas bum dbang bskur te de la gsang dbang sogs snga ma snga ma'i rten cing 'brel 'byung gis go phyes nas/_phyi ma phyi ma rnams rgyud la thob pa de ma thag pa'i rkyen yin te/_snga ma ma thob na phyi ma mi 'byung ste gyang med na ri mo med pa bzhin no/__/mtshungs ldan dang lhan cig byed pa'i rgyu gnyis dang*/_rgyu dang bdag po dmigs pa de ma thag ste rkyen bzhi tshogs las dbang bskur 'grub ste/_thugs thig las/_rgyu gnyis rkyen bzhis yang dag rnyed/_/drug la gnas pa'i thob bya de/_/ngo bo nyid ces rnam par bshad/_/ces so/__/de la gnyen po thabs tshul dpag med yod kyang grangs nges sgo nas bsdus te bzhag pa ni/_spyir rigs drug dang khyad par mtho ris kyi rten khams drug ldan rnams dang*/_bye brag mi'i 'gro ba mngal nas skyes pa rnams thog mar lte ba'i rtsa mdud nas rim par lus chags shing*/_de'i dbang gis phyi'i lus snod/_bar gyi lus 'gro ba gzhan lus rnams kyang snang bas/_lus kyi dag bya'i gtso bor gyur pa rtsa yin te/_de dag byed bum dbang phyi nang gsang gsum bstan la/_rtsa'i rnam pa rig drug gi dag bya dang*/_dag byed sku gsung thugs dang thabs shes sogs yi ge'i gzugs su a sogs gnas pa de la g.yo byed kyi rlung brten nas/_da lta 'khrul pa'i gnas skabs su byed las sna tshogs su shar zhing*/_'khor ba'i sgra tshig rang rgyud par snang ba'i phyir/_ngag gi dag bya gtso bo rlung yin pas/_de dag byed gsang dbang bskur nas rang lus thabs ldan gyi rdzogs rim bstan la/_rlung de yis rtsa khams thams cad la bkod pa byang chub kyi sems khams dkar dmar dwangs ma chen po rnams 'gro 'ong can du khrid cing gnas pa'i sgo nas brten pa de'i sems kyi rten byed pas/_sems dag pa la rtsa khams gnad du bsnun dgos/_de dag byed sher dbang bskur nas rten las su rung bar byed pa gzhan lus thabs ldan gyi rdzogs rim bstan pa dang*/_khams de la sems kyi rang bzhin chos nyid don dam byang chub kyi sems sam dri bcas ye shes kyi khams brten pa'i tshul du yod pas/_de mngon du 'gyur ba la/_sems kyi bag chags sgrib byed kyi rnam par yod pa nyid dag dgos pas/_de dag byed tshig dbang rin po che bskur nas zung 'jug gi rdzogs rim 'od gsal ba'i ye shes bsgom par bstan pas dbang bzhi lam dang bcas pa'i nyams len der 'du ba yin no/__/gsang sngags ni nyon mongs dang 'dod yon lam byed thabs mkhas yin pas 'dod pa'i khams kyi gang zag 'phags pa'i sprul sku lta bu ma yin pa'i rang rgyud pa kun la bltas dgod lag bcangs gnyis sbyor te/_'dod chags rnam bzhir gnas pa sogs dag bya/_dag byed bum pa sogs dbang bzhi lam dang bcas pa la brten nas grangs nges pa can du yang 'jog pa yin no/__/dang po 'di la ngag gi gnyen por che ba pho mo phan tshun bltas pas tshim pa'i 'dod chags ni/_gzhan 'phrul dbang byed pa la gnas pa ste/_dkyil 'khor gang la brten na rdul tshon gyi dkyil 'khor la brten nas dbang bskur ba bum pa'i dbang ste/_lha dang gzhal yas khang dang slob dpon gyi de kho na nyid bstan pa sogs bum pa'i dbang dngos gzhi yan lag dang bcas pa bskur bas/_sgrib pa gang 'dag na gtso bor lus kyi sgrib pa dang*/_las kyi sgrib pa dang*/_gnas skabs bzhi las sad pa'i snang ba rags pa dang bcas pa dang*/_lus kyi thig le'i sgrib pa 'dag_/phung po'i bdud 'joms pa'o/__/lam gang bsgom pa la dbang na snod bcud brtan pa dang g.yo ba'i rang bzhin du snang bas bsdus pa'i phung po lnga dang*/_khams lnga dang*/_skye mched bcu gnyis kun phung khams gshegs pa gshegs ma'i gdan/_phyi nang skye mched sems dpa' sems ma'i gdan/_yan lag gam lus kyi dbang yul reg bya khro bo khro mo'i gdan te/_gdan gsum tshang ba'i dkyil 'khor gcig tu gzugs snang stong*/_sgra grags stong*/_sems rig stong zung 'jug gi rnam rol du shar te bskyed rim bsgom pa la dbang ba yin no/__/lta ba gang rtogs na snang ba lha'i dkyil 'khor du gsal ba bskyed rim dang*/_rang bzhin zhen snang dang bral ba stong pa'i ngo bo rdzogs rim dang*/_de gnyis la ched du rtsol mi dgos par lhun grub bskyed rdzogs zung 'jug ste ngo bo nyid gsum gyi rang bzhin du rtogs pa'o/__/grub mtha' gang gi rjes snyogs na 'khor 'das kyi chos thams cad skye ba med pa'i rang bzhin gnyis med mnyam pa chen po'i ngang du rtogs pa yin la/_skabs 'dir grub mtha' ma snyogs tshe 'da' ka ma'i man ngag gang yin na rnam shes 'od kyi thig ler dmigs nas 'pho ba ste gong bu phaT dang hika sogs sgra yis 'pho la/_'bras bu gang thob na rtsa yi ma dag pa'i 'gros bar ma chad par yod pa de nyid dag pa ye shes kyi ngang du thim ste dag nas bskyed rim gyi 'bras bu sngar ji ltar goms pa de'i sprul pa'i sku yi rnam rol nam mkha' khyab par snang yang*/_sku yi ngo bo rdo rje ltar 'pho 'gyur bral ba'i 'dus ma byas mngon du gyur pa'o/__/b+ha ga'i dkyil 'khor la brten nas dbang gang bskur na gsang dbang bskur/_gang gi gnyen por che na dgod pas tshim la 'phrul dga'i 'dod chags kyi gnyen po dang*/_sgrib pa gang dag na rdzun sogs ngag gi sgrib pa sbyangs/_nyon mongs pa'i sgrib pa dang*/_gnas skabs bzhi las rmi lam dang*/_de'i snang ba phra ba dang bcas pa dang*/_brjod 'dod kyi rtsa ba ngag gi thig le'i sgrib pa 'dag_/nyon mongs pa'i bdud 'joms pa'o/__/lam gang bsgom pa la dbang na/_bdag nyid rtsol bas rtsa thig rlung gsum las su rung zhing ye shes khyad par can gyi ngo bor byin rlobs pa'i lam gtum mo'i man ngag gis rtsa rlung gi byed pa bcing ba dang 'bar 'dzag gi dmigs pa sogs la brten nas gzung 'dzin gyi rlung ro rkyang gi lam brgyud nas dbu mar 'dzud pa'i thabs rgyud dang man ngag so so ltar ro/__/lta ba gang rtogs na rang byung ye shes rtogs pa/_nyon mongs sngar bas rags pa nyon mongs rtsa 'khor du chud pa nyon mongs rang byung ye shes/_rlung sems dbu mar tshud pa'i rnam rtog rags pa ni rnam rtog rang byung ye shes/_rtsa 'khor du rlung tshud pa sngar bas rmongs pa snrel zhi rang byung ye shes/_rig pa gsal dwangs sngar bas che ba yangs pa rang byung ye shes so/__/grub mtha' gang snyogs na/_ngag dag pa A li kA li la rang dbang thob nas 'gro drug gi sgra skad che chung bzang ngan thams cad ma 'dres par sangs rgyas kyi gsung rnam par dag pa'i rang bzhin du yongs su rdzogs shing rtogs pa'o/__/'da' ka ma'i man ngag ni/_tshe 'dir grub mtha' ma snyogs na 'chi kha'i sdud rim gyi rkyen gyis rlung thams cad dbu mar thim pa la phyogs pa na/_sngar gyi lta ba de'i ngang ma shor bar mi rtog pa'i ting 'dzin dpe yi 'od gsal chen po'i ngang du 'pho ba'o/__/'bras bu gang thob na/_rtsa khams kyi yi ge rlung gis bskyod nas rnam rtog yi ge'i rnam par skye zhing brjod pa'i sgra dang snang ba dang*/_ma dag pa'i 'gros 'dus byas pa thams cad skye ba med pa'i dbyings su thim nas/_'dus ma byas pa'i rang gdangs 'gag pa med pa longs spyod rdzogs pa'i sku dang gsung dbyangs yan lag drug cu la sogs pa gsung gi yon tan thams cad rig pa'i ngo bor lhun gyis grub cing yongs su rdzogs pa'i gsung rdo rje mngon du gyur pa yin no/__/phung khams sogs gdan gsum lha yi mngon rtogs ji bzhin ngom zhing*/_rgyud nas gsungs pa'i mtshan nyid dang ldan pa'i mdzes ma yi/_gsang ba'i dkyil 'khor la brten nas dbang gang bskur na/_sher dbang gis bskur/_gnyen po gang la zhe na/_lag bcangs tshim pa dga' ldan 'dod chags sogs dag_/sgrib pa gang 'dag na yid kyi sgrib pa sbyangs zhing*/_shes sgrib rags pa dang*/_gnas skabs bzhi las tshogs drug snang ba dang bcas pa 'gags pa'i gnyid 'thug gi gnas skabs dang*/_yid 'dzin pa'i thig le 'dag_/'chi bdag gi bdud bcom/_lam gang bsgom pa la dbang na/_gzhan lus pho nya la brten nas byang sems yas 'bab mas brtan gyi mthar/_thabs snang ba'i ye shes dang*/_shes rab mched pa'i ye shes dang*/_zung 'jug nyer thob kyi ye shes gsum gyis drangs pa'i lhan cig skyes pa'i ye shes bsgom pa la dbang ba dang*/_lta ba gang rtogs na bde stong dga' bzhi'i ye shes kyi khams kun rdzob byang chub sems kyi zhu bde'i thabs la brten nas 'grub pa yin no/__/grub mtha' gang snyogs na/_bde stong dbyer med pa'i lta ba de'i ngang la phyag rgya ma brten pa'i tshe na'ang rtag tu gnas shing nyams su myong ba dang*/_'da' ka'i man ngag ni/_tshe 'dir grub mtha' ma snyogs na'ang 'chi kha'i sdud rim gyis rkyen byas nas don dam byang chub sems kyi rten khams kyi thig le kun rdzob pa rnams lhan cig tu tshogs shing dbu mar cung zad zhugs pa'i gnas skabs der/_snang la ma grub pa'i ye shes rdo rje stong pa dang*/_sems bde ba ste bde stong gzhi dus kyi 'od gsal ngo 'phrod nas grol ba ste/_de yang snying ga'i rtsa mdud grol ba'i stobs kyis dpe'i ye shes shar ba de nyid gzhi'i 'od gsal dang ma bu 'dres nas grol ba yin no/__/'bras bu gang thob na/_mthar thug grol ba'i tshe rtsa khams kyi dwangs ma'i thig le rlung gis 'pho ba'i 'gros dbyings sam zung 'jug ngang du thim ste chos kyi dbyings dang nam mkha'i mthar khyab tshad las 'das shing*/_bsam gyis mi khyab pa'i ye shes zung 'jug thugs kyi rdo rje sems sems byung gi rnyog pa zhi ba'i dwangs ma ye shes kyi sku mngon du 'gyur ro/__/dpe'i 'od gsal de ni don dam du byang chub sems kyi myu gu lta bu de la slob bu rnams mnyam par bzhag pa'i dkyil 'khor la brten nas/_yas 'bab mas brtan gyi bde stong dga' bzhi'i ye shes dbang don gsum pa'i ngo bo nyams su myong zhing rdzogs pa chen po'i ngo bor slob dpon gyis tshig gis mtshon pa'i ngo sprad bde ba chen po'i dbang ngam dbang gi dam tshig gi bzhi pa yin la/_gnyen po 'thab bral man chad 'khyud sbyor 'dod chags dang*/_sgrib pa sgo gsum phra ba'i sgrib pa dag ste de yang sgo gsum tha dad du 'dzin pa spyong zhing shes sgrib ches phra ba 'pho ba'i bag chags cha dang bcas pa dang*/_gnas skabs bzhi las snyoms 'jug gi gnas skabs dang*/_sgo gsum phra ba'i bag chags 'dzin pa'i thig le'i sgrib pa rnams 'dag_/lha'i bu'i bdud 'joms pa'o/__/lta ba spros pa dang bral ba'i stong pa'i thig le rang bzhin gsal ba rig pa'i gdangs ma 'gags pa las/_thugs rje'i rol pa sku dang ye shes su 'char ba'i snying po can rnam thar sgo gsum gyi rang bzhin rtogs so/__/lam gang bsgom pa la dbang na/_'od gsal phyag rgya chen po'am rig stong rdzogs pa chen po la dbang*/_de yang nang rgyud thun mong ltar na rdzogs rim bsgom pa'i skal ldan du byas/_theg rtse'i bye brag thob na ka dag khregs chod dang*/_lhun grub thod rgal gyi lam thun min la dbang ba yin no/__/grub mtha' gang snyogs na/_bsam gyis mi khyab pa'i ye shes bde stong phyag rgya chen po rtogs pa yin te blang dor med pa'i rtogs pa'o/__/'da' ka'i man ngag ni/_gsang chen phyag rgya chen po sngar gyi lta ba de'i ngang 'pho ba yin la/_'bras bu gang thob na/_snying po ye shes rlung gi 'gros thim zhes ye shes kyi rlung*/_las rlung gis bslad pa'i cha shin tu phra ba dang bcas pa thams cad dag nas mngon du gyur te ye shes rdo rje mkha' khyab dbyings kyi rang bzhin zung du 'jug pa'i ngo bo nyid sku thob pa'o/__/dbang zhes pa'i skad dod sgra don dang sbyar na/_dri ma 'khrud pa dang nus pa 'jog pa gnyis la 'jug ste a b+hi Shiny+tsa zhes pa'i sgras ye shes la sgrib pa'i glo bur ba'i dri ma thams cad/_dbang thob pa tsam gyis skal ba dang ldan par byed de gtor ba'i don ston pa dang*/_She ka ta zhes pa'i sgras/_skal ba blugs pa ste chos nyid la sku bzhi'i yon tan rang chas su yod pa de/_dbang rang rang gi lam gyis sgrib pa bsal nas lam bsgom rung dang yon tan skye rung*/_rgyu sgrib pa spang bar dbang ba dang*/_yon tan thams cad thob par dbang ba ste de ltar rnam pa gnyis su grub bo/__/dbang bzhi'i ngo bo mchog gi yon tan sku gsung thugs ye shes rdo rje'i rang bzhin rang la lhan skyes sman gyi ro nus dang dri dang zhu rjes ltar gnas pa yin te/_de yang khams drug gi nang nas sems ni ming bzhi'i phung po can ye shes kyi rten dang*/_phung po lnga'i rten 'byung lnga/_'byung ba'i rten rtsa dang*/_rtsa'i brten pa srog gi rlung*/_rlung gi brten pa byang sems yin pas dbang bzhi'i mtshungs ldan rtsa rlung thig le sems dang bcas pa rang la ldan zhing*/_de thams cad kyi rang bzhin bde gshegs snying po dbang bzhi'i yon tan 'byor pa de ni/_rgyu yi dbang zhes bya ba yin te/_de ltar rgyu dbang rang la gnas pa de nyid mngon du byed pa'i thabs su/_slob dpon mtshan nyid dang ldan pa nyid kyis sbyor dngos rjes gsum gyi cho gas bskur ba dang*/_de las gzhan bdag 'jug bla ma'i rnal 'byor zab mo'i dbang bzhi dang*/_byin rlabs 'pho ba'i rgyun la rang gi dmigs pas yang yang 'dris shing goms par byed pa lam gyi dbang*/_rgyu mtshan nyid theg pa'i skabs su slob lam mthar phyin nas sa bcu'i rgyun mtha'i dus su 'od zer chen po'i dbang thob par bshad pa bzhin du/_rang sems la ye nas ldan pa'i dbang de'i glo bur dri ma rnams lam dus kyi dbang dang bskyed rdzogs rnams kyis sbyangs nas sku bzhir mngon du smin pa ni 'bras bu'i dbang zhes bya'o/__/de ltar dbang bzhi mtha' brten bcas rdzogs tshe rig 'dzin sdom pa yang mnyam du thob pa yin no/__/thob pa'i phan yon ni/_dbang thob pa'i skyes bu'i rgyud ni dper na zhing sa la gshol sogs kyis tha ba'i skyon sbyangs pa'i zhing sar sa bon bzhag pa ji bzhin du/_sngar gyi yon tan skye mi rung ba legs par sbyangs te sku bzhi smin rung du byas pa'i dbang so so'i bskyed rdzogs la gzhol ba'i rkyen dang 'dzom na skad cig re re bzhin sgo gsum dang tha dad du 'dzin pa ste bzhi dang*/_las dang nyon mongs shes bya bag chags te gnas skabs kyi sgrib pa bzhi rim gyis dag ste slob bzhi'i byang phyogs so bdun/_phar phyin bcu tshogs gnyis sogs rim gyis gong du 'phel te rdo rje bzhi dang*/_sprul sku/_longs sku/_chos sku/_ngo bo nyid sku ste sku bzhi mngon du byed do/__/gnyis pa rang bzhin ye nas dag pa'i lam la bskyed rdzogs rnam pa gnyis las/_dang po bskyed rim lam du byed thabs yin pas mi dang dud 'gro la skye gnas bzhi ka srid cing*/_byang sems dang lha dang dmyal ba bar do rnams rdzus skyes/_yi dwags la mngal rdzus gnyis te skye gnas rnam pa bzhi'i bag chags sbyang phyir/_mngal skyes/_rdzus skyes/_sgong skyes/_drod skyes te skye gnas bzhi po de dang mthun par bskyed rim rnam pa bzhi ston pa yin no/__/ji ltar bskyed tshul 'chi srid dang mtshungs pa'i stong nyid/_bar srid dang mtshungs pa'i snying rje/_dri za nye bar len pa'i shes pa dang mtshungs pa'i sa bon dbang po yongs su rdzogs nas skye ba sogs dang mtshungs pa'i lha yongs rdzogs bsgom pa dang*/_de yang skye gnas bzhi po rang rang sbyong byed kyi gnyen po bsgom pa sogs 'khor ba'i skye 'chi bar do gsum dang*/_skye gnas bzhi sogs rnam pa dang mthun par bsgom pas/_bskyed tshul bzhi po re re la'ang sgo gsum gyi 'jug pa'i sgo yi snang zhen dang*/_rigs drug gi skye gnas kyi bag chags kun sbyong byed du 'gyur bas/_lus snang ba 'dod srid/_ngag phyed snang gzugs kyi srid pa/_yid mi snang ba gzugs med pa'i srid pa ste srid pa gsum gyi sgo gsum po'i bag chags phyi rol du snang ba'i khams gsum po'i snang zhen ma lus pa sbyang zhing dag par 'gyur ba dang*/_yang mya ngan las 'das pa dang bzhugs tshul mthun pa yi/_ting nge 'dzin rnam gsum po sku gsum dang 'dra ba lam du byed pa dang*/_zhing dang gzhal yas khang mtshan dpe 'od zer sogs lha yi rnam pa lam du byas shing bsgom pas 'bras bu sku gsum gyi yon tan thams cad gzhi la ye nas gnas pa yongs su rdzogs shing*/_mngon du sad rung gi nus pa khyad par can gsos thebs pa dang*/_de ltar dag rdzogs gnyis ka tshang ba de'ang rdo rje'i lus kyi rtsa thig rlung gsum la brgyud nas gnad du bsnun pa'i thabs yin pa dang*/_sems kyi chos nyid bde gshegs snying po'i gnas lugs dang mthun par bsgom pa yin pas/_de lta bu'i bskyed rim brtan nas rdzogs pa'i rim pa rnams bsgom na/_de'i ye shes dpe dang don gyi 'od gsal skye ma rag par 'gyur bas rim pa gnyis pa'i smin byed du 'gro ba'i phyir na/_dag rdzogs smin gsum 'di nang rgyud bskyed rim spyi la gces pa'i gal po che yin no/__/'khor ba'i rnam pa grub tshul ji ltar na spros pa can sgong skyes bya ma dang sgo nga ste lan gnyis skye ba ltar/_bdag sras dang gzhan sras rnam pa gnyis su bskyed tshul 'di gnyis las dang po par bsngags so/__/bdag gi sems nyid bde gshegs snying po ni 'khor 'das kyi chos thams cad kyi 'phro gzhir gnas pa de gtso bo yab yum du bskyed nas/_de'i sras su gzhan de bzhin gshegs pa rnams bskrun te 'khor du bkod par bya ba'i don gyis yin te/_'di la lnga ste/_rnam smin gyi rang lus sogs chos thams cad stong nyid du sbyang ba sogs ting nge 'dzin gsum gyi man ngag la brten nas rang gi rig pa'i ngo bo sa bon yig 'bru'i rnam par bsgoms pa las byung ba'i sa bon rnams spros te 'byung ba rim brtsegs bsgom/_b+h+rU~M yig kha dog lnga ldan 'phros pa las gzhal yas khang gdan dang bcas pa bsgom nas/_dbus kyi gdan steng du sa bon gyi yi ge babs pa yongs su gyur pa las ni/_rgyu yi he ru ka zhal gcig sku mdog sogs gtso bo bskyed pa dang*/_yab yum mnyam par sbyor ba'i ye shes kyi 'od zer gyis phyogs bcu'i sangs rgyas thams cad bkug nas yab kyi spyi bo nas zhugs/_yum gyi mkhar bstim pa dang*/_yang 'od zer gyis sems can bkug nas sgrib pa sbyong zhing mkhar bstim par bya ba dang*/_de nas 'khor 'das kun gyi spyi dpal gnyis su med pa'i bdag nyid chen po la che ba'i nga rgyal bskyed pa dang*/_lha tshogs thams cad mkha' gsang nas bton nas so so'i gdan la 'god par byed pa'o/__/gzhan gyi sras su bdag bya ba zhes pa 'di'i don bdag sras kyi skabs su gzhan de bzhin gshegs pa thams cad rang la bstim nas/_mngal 'byin gyi sgo nas sras kyi rnam par 'khor du bkod pa de rnams gtso bo'i thugs su gyur nas bdag gi rtog tshogs yi ge'i rnam par yod pa mkha' ru phab ste/_sras su bskrun nas 'khor du bkod pa'i don 'di la rnam pa brgyad yod de dper na sgong skyes dang po sgo nga smin pa de dang*/_de nas sgong khyim brdol nas dbang po yan lag yongs su rdzogs pa der 'gyur ba bzhin du/_gtso bo yab yum 'od du zhu nas thig le'i gong bu sa bon phyag mtshan gyis mtshan par gyur pa dang*/_de nyid yongs su gyur pa las/_'bras bu he ru ka yab yum dbu dgu phyag bco brgyad sogs gang rung skye mched rdzogs pa bskyed pa dang*/_de'i tshe yab kyi rtog pa thams cad yi ge'i ngo bor gyur nas sras 'don gyi nus pa med par bsam pa dang*/_yum las 'od zer 'phros pas bskul te 'khor gyi lha tshogs rnams la sras bskyed pa'i don du gsol ba gdab pa dang*/_de nas 'khor gyi rtogs pa mngon gyur gyi bde gshegs lha tshogs kun kyang rang nyid gtso bor yod pa de'i thugs kar bstim ste thugs su gyur nas dkyil 'khor kun gyi khyab bdag ye shes chen po'i bdag nyid nga'o zhes nga rgyal bzung ba dang*/_de nas gsang ba byin gyis brlabs te phyag rgya bzhis snyoms par zhugs nas mkha' ru byang chub sems kyi 'od zer lan gsum phab pa'i dang pos thig gdab/_gnyis pas rten gyi dkyil 'khor gzhas yas khang bcas pa bskyed pa dang*/_gsum pas rtog pa zhe gnyis yi ge'i ngo bor yod pa rnams yongs su gyur pas gtso 'khor lha tshogs yongs su rdzogs par gsal te mkha' gsang nas phyir gdon pa dang*/_bdag gi thugs ka nas phyag rgya'i lha mo bzhi spros te lcags kyu mas dbyings nas ye shes kyi dkyil 'khor gyi rten la reg tsam gyis bskul te/_zhags pa mas gnas nas bskyod la spyan drangs nas/_lcags sgrog mas dkyil 'khor du bstim la/_dril bus dgyes pa bskyed pa yi sgo nas dam ye dbyer med du brtan par bcings pa dang*/_gnas gsum rdo rje gsum gyis rgyas gdab par byas te 'khor rnams so so'i gdan du 'khod/_gtso bo 'bras bu'i he ru ka la bstim/_gzhal yas khang gzhal yas khang la/_gdan rnams so so la bstim pa'o/__/sgong skyes lan gnyis skye ba ltar bsdu na thog mar rang nyid gnyug ma'i lhar gsal bas/_mdun gyi nam mkhar gang bsgom pa'i dkyil 'khor gyi lha tshogs rten brten pa thams cad gsal gdab pa dang*/_rang gi thugs ka nas dkyil 'khor spro ba dang*/_dbyings nas spyan drangs shing mdun mkhar bzhugs par dmigs pa ste gsum gang rung gi mdun du rgyun bshags yan lag bdun pa'am brgyad pa bcu pa gang rung bya/_mthar bdag dang tshogs zhing gnyis ka mi dmigs pa'i ngang nas slar yang lha so so'i dkyil 'khor mngon rtogs skye gnas gang sbyong ba'i cho ga yin kyang de ji lta ba bzhin sgom par byed pa'o/__/spyir bskyed tshul gcig gis skye gnas bzhi ka sbyong mod kyang*/_gtso cher rang rang gi bag chags sbyong bas na mngal skyes kyi bag chags sbyong phyir de dang mthun par mngon byang bzhi yi sgo nas bskyed pa'am/_rdo rje'i cho ga gsum bskyed dam/_mngon byang lnga bskyed de gsum las/_dang po bzhi bskyed ni khrag 'thung gal po'i dgongs pa ltar bshad pa ste/_gal po las/_dang po stong pa byang chub sems/_/gnyis pa sa bon 'byung ba ste/_/gsum pa la ni gzugs rdzogs pa/_/bzhi pa la ni yi ger 'god/_/ces pas/_dang po sbyang bya'am dag bya rang bzhin brgyad cu'i rtog tshogs thams cad 'khrul stobs kyis nub pa'i 'chi srid dang*/_slar yang las rlung mched pa'i stobs kyis bar dor snang ba yad yud du 'byung ba dang bcas pa dag pa'i phyir/_spros bral stong nyid kyi ngang snying rje sgyu ma lta bu'i byang chub kyi sems gnyis bsgoms pas chos sku dang longs sku gnyis gzhi la rdzogs/_'od gsal dang sgyu lus gnyis kyis smin byed du 'gyur ro/__/dri za nye bar len pa bar do'i rnam shes de pha ma'i khu khrag gi dbus su zhugs te 'dres pa'i cha ni/_stong nyid snying rje zung 'jug gi ye shes lha yi sa bon hU~M la sogs pa lam gyis gsal bas sbyang zhing dag_/sprul sku gzhi la rdzogs/_dpe'i 'od gsal las sgyu lus kyi lha skur ldang ba'i smin byed du 'gyur ro/__/gsung rdo rje'i sa bon gyis sbyong tshul ni/_rnam shes de nyid kyang khu ba dang*/_rdul te khrag dang*/_rlung dang gsum 'dres pa'i cha de rlung gi byed las kyis mer mer dang*/_nur nur gyi gnas skabs su gyur pa de sa bon gyi yi ge nyid las thugs rdo rje phyag mtshan sogs su gyur pas sbyong la/_de las ltar ltar dang mkhrang gyur du song ba'i gnas skabs ni/_ye shes rdo rje phyag mtshan de 'od gong du gyur pas sbyong zhing*/_de nas rim gyis brtas te khyab 'jug nya dang rus sbal gyi rnam pa dang*/_mig la sogs pa dbang po dang yan lag yongs su rdzogs pa'i gnas skabs ni/_sku rdo rje lha yi rnam par gyur nas sbyong ba'o/__/de ltar bsgom pas zung 'jug ngo bo nyid sku gzhi la rdzogs/_don gyi 'od gsal zung 'jug gi lha skur ldang ba'i smin byed du 'gyur ro/__/mngon byang bzhi pa ni/_sbyang bya btsas nas dbang po yul la sad de sna tshogs su 'dzin pa'i dngos po la longs spyod pa'i zhen pa dag_/sbyong byed lha mngal 'byin gyi sa bon spro ba'am gnas gsum la sogs par yi ge bkod de rgyas gdab pa la'ang sbyar du rung bar gsungs la/_'dis lhun gyis grub pa'i phrin las gzhi la rdzogs/_rdzogs rim zung 'jug gi lha skur ldang nas 'dod yon snang ba zhen med du rol pas rig pa'i rgyan du 'char ba'i smin byed du 'gyur ro/__/de nas 'khor gyi lha tshogs spro ba sogs dngos gzhi'i rim pa lhag ma dang rjes rnams rang rang gi gzhung ltar ro/__/de la lha sku phyag rgya chen po gsal ba ni/_de bzhin gshegs pa thams cad kyi sku rdo rje'i ngo bo yin la/_sa bon yig 'bru bsgom pa gsung rdo rje dang*/_thugs rdo rje'i ngo bo nyid ni/_phyag mtshan yig 'brus mtshan pa nyid du sbyor ba la bshad do/__/'di'i bsgom tshul ni ting 'dzin gsum yan sngon du song nas/_snang stong gnyis su med pa'i ye shes kyi ngo bo nyid rdo rje sogs bsgoms pas/_mngal du khams dkar dmar tshogs pa la dri za'i rnam shes zhugs pa sbyong*/_phyag mtshan yi ger gnas 'gyur ba'i gsung AHsogs yig 'bru bsgoms pas khu khrag sems gsum 'dres pa'i gnas skabs lnga sbyong*/_de spro bsdus sku yongs rdzogs bsgom/_dbang po dang yan lag thams cad rdzogs pa'i gnas skabs sbyong ba ste/_'di la rdo rje'i cho ga gsum zhes pha rgyud spyi'i lugs so/__/de la mngal zhugs kyi rim pa dang lam dang 'bras bu'i chos mthun tshul bar dor longs skur mi ldang ba'am gzhan don sprul sku lam 'khyer bar ma do nas sems bskyed dang ldan pas lus rten 'tshol ba tshogs kyi lam dang*/_chos ldan lus rten thob pa'i mngal sgo bdams nas ma'i mngal du rnam shes hU~M yig la sogs par 'jug pa sbyor lam ste/_lhums su zhugs dus kyi khu ba rdul rlung sems 'dres pa'i cha ste byang chub lnga po mer nur sogs gnas skabs lnga'i rim pas byed las rang rgyud pa rnams sbyong ba mthong sgom gyi lam dang*/_de'i tshe zla ba bcu'i yun ni sa bcu dang rab sbyar nas/_btsa' ba na lhag pa'i lha gang yin pa ltar bzhengs pa mi slob pa'i lam gyur nas/_zung 'jug skye ba sprul pa'i sku 'grub tshul klong gsal las/_mngal zhugs byang chub rnam lnga ste/_/zla ba bcu ni sa bcu'i tshul/_/skye ba rang bzhin sprul pa'i sku/_/lhun grub sku gsum bdag nyid do/_/zhes so/__/de yang bar dor lus rten tshol ba dang*/_tshogs lam du thos bsam gyis lam yang dag tshol ba gnyis mtshungs shing*/_rnam shes mngal nas phyir mi ldog pa sbyor lam rigs nges pa thob pa dang mtshungs/_rnam shes khu khrag sogs 'dres pa'i ming gzugs phung lnga tshogs pa tshang ba ni/_bdag med rtogs pa tshang bar rnyed pa dang mtshungs pa'o/__/mer nur sogs gnas skabs lnga'i rim pas zla bcu gong du 'phel ba ni/_sgom lam du rtogs pa gong 'phel gyis rim pas sa bcu bgrod pa dang mtshungs/_lus yongs su rdzogs te btsas nas dbang yul tshogs drug la dbang bsgyur ba mi slob lam du rtogs pa yongs su rdzogs te/_shes bya thams cad mkhyen pa'i ye shes sad de gdul bya 'gro drug gi don la mnga' dbang bsgyur ba dang chos mtshungs pa yin no/__/mngon byang dang po rnam snang gi sa bon A li sogs zla ba'i dkyil 'khor du me long gi gzugs brnyan ltar bsgom pa ni rnam pa lam byed/_me long ye shes su mos pa ni mos pa/_'bras bu chos sku/_tshogs gnyis byin rlabs lam byed/_sbyang bya gzugs phung*/_sa khams/_lus/_kun gzhi'i rnam shes/_gti mug_/mngal skyes kyi khu ba sbyong*/_drod gsher skyes kyi gsher te rlan gyi cha sbyong*/_sgong skyes kyi pha dang*/_rdzus skyes kyi stong pa'i cha rnams sbyong ba'o/__/de bzhin du mngon byang gnyis pa rin 'byung gi ngo bo kA li las byung ba'i nyi ma'i dkyil 'khor du bsgom pa yang rnam pa lam byed/_mngon byang dang po 'di gnyis skabs su mtshan bzang sa bon A li dang*/_dpe byad kyi sa bon kA li'i phreng ba nyis rim re zla nyi so so'i khong seng du bsgom par gsungs/_chos rnams mnyam nyid du rtogs pa'i ye shes su mos pa ni rgyu mos pa lam byed/_sems can dang sangs rgyas ro gcig tu thugs su chud pa'i ye shes sgrib med du gsal ba ni 'bras bu lam byed do/__/sbyang bya tshor phung me khams ngag nyon yid nga rgyal mngal skyes kyi rdul dang*/_drod gsher skyes kyi drod/_sgong skyes kyi ma dang*/_rdzus skyes kyi gsal ba'i cha rnams sbyong ngo*/__/mngon byang gsum pa 'od dpag med kyi sa bon phyag mtshan dang bcas bsgom pa rnam pa la ma byed/_chos kun ma 'dres par rtogs pa mos pa lam byed/_chos kun ma bsgribs par gsal mkhyen so sor rtogs pa 'bras bu lam byed do/__/sbyang bya 'du shes phung po/_chu khams/_yid/_yid shes/_'dod chags/_mngal skyes kyi khu rdul gnyis bar rnam shes zhugs pa dang*/_skye gnas bzhi po'i bar do'i rnam shes skye gnas su zhugs pa sbyong ba'o/__/mngon byang bzhi pa don grub kyi ngo bo zla nyi phyag mtshan te rnam pa gsum po gcig tu 'dres par bsgom pa ni rnam pa/_de'i ngo bo ye shes su mos pa/_'bras bu bya grub ye shes/_sbyang bya 'du byed phung po/__/rlung khams/_sgo gsum gyi bya ba sgo lnga'i rnam shes/_phrag dog mngal skyes dang sgong skyes mtshon khu rdul sems gsum ro gcig 'dres pa dang*/_drod gsher skyes kyi drod gsher gnyis dang rnam shes dang*/_rdzus skyes kyi gsal la stong pa'i cha tsam dang*/_bar srid rnam shes 'dres pa'i cha rnams sbyong ba yin no/__/mngon byang lnga pa mi bskyod pa'i ngo bo he ru ka yab yum gyi sku ru bskyed cing grub pa ni rnam pa lam byed dang*/_yon tan thams cad chos dbyings su mos pa/_'bras bu chos dbyings ye shes/_sbyang bya rnam shes phung po dang*/_mkha' khams dang*/_sgo gsum cha mnyam bag chags dang*/_tshogs brgyad du 'dzin pa'i cha dang*/_zhe sdang dang*/_skye gnas bzhi po'i rang rang gi yan lag dang*/_nying lag dang*/_skye mched thams cad yongs su rdzogs nas/_reg pa'i yul gzugs sogs la dbang po mngon sum du sad pa yi 'khor ba'i 'khrul snang gi rnam pa cha dang bcas pa sbyong ba yin no/__/de ltar khams lnga dang*/_phung po lnga dang*/_rnam par shes pa'i tshogs brgyad nyon mongs dang bcas pa'i tshogs sbyang zhing*/_gnas su dag pa gdan gsum tshang ba'i lha ru rdzogs pa ni/_mtshan dpe'i rang bzhin phan pa rgya cher 'grub pa'i mya ngan las 'das pa dang*/_yon tan dang ye shes mthar phyin pa'i bzhugs tshul mthun pa lam du byed pa'i tshul ni/_rgyu rdo rje 'dzin pa yab yum 'od du zhu nas thig ler gyur pa las/_'khor gyi lha mos zhu ba glus bskul te sgra yi rkyen gyis 'bras bu'i he ru kar bzhengs pa dang*/_don gnyis sgrub pa'i phrin las sogs 'jug pa nyid do/__/sbyang bya srid pa'i rang bzhin khu rdul rlung gsum sems dang bcas pa'i cha rnam par dag pa rgyal ba'i bzhugs tshul dang mthun pa'i mos pa lam byed bsgoms pas/_'bras bu sku gsung thugs yon tan phrin las te 'bras chos lnga dang*/_ye shes lnga'i yon tan thams cad gzhi la rdzogs/_dag rdzogs de gnyis ka snang ba dang*/_mched pa dang*/_nyer thob dang*/_'od gsal dang*/_zung 'jug la sogs pas rdzogs rim smin byed du 'gyur ba yin no/__/lam byed kyi mtshan dpe sogs/_drod gsher skyes ni de gnyis po lhan du 'dus pa la bar do'i rnam shes zhugs pa'i mod la/_mngal skyes ltar yun ring ma dgos par gzugs 'grub pa bzhin/_lha yi snying po brjod pas mtshan dang mngon rtogs kyi rnam pa dran tsam las/_shes rab kyi dbyings stong nyid kun tu bzang mo'i klong las kun rdzob bden pa'i cha rten dang brten pa'i lha'i phyag rgya yongs su rdzogs pa'i bskyed rim tshang bar bsgom pa ni snang ba bden med sgyu ma'i bskyed rim zhes bya'o/__/'di ltar sems can brdzus te skye ba rnams ni gsal stong gi cha la rnam shes zhugs pa tsam gyis lus yongs rdzogs grub pa ni drod gsher skyes las kyang myur ba ltar/_skad cig gis lta ba goms pa'i ngang las snying po tsam dran pa'i mod la dkyil 'khor yongs su rdzogs te/_ming ngam snying po brjod pa dang lha'i gzugs kyi rnam pa la/_rim gyis sems gtad pa sogs kyi spros pa la ma brten par chu las nya 'phar ba bzhin rten dang brten par bcas pa thams cad wal gyis gsal/_dper na gang zag gcig la'ang byis pa/_dar ma/_rgan po'i gnas skabs gsum bzhin bskyed rim gyi bsgom tshul skye gnas bzhi sbyong byed du bstan pa bzhi po'ang dang po'i las can gsar du bskyed rim la goms su 'jug pa rnams kyis/_sgong skyes sbyong ba'i bskyed rim gtso bor bsgom pa dang*/_rim bzhin goms pa brtan pa yud tsam la rags pa'i dkyil 'khor du byed nus pa'i bar/_mngal skyes sbyong ba'i bskyed rim dang*/_brtan pa che ba'i dus spyan dkar nag tshun chod gsal snang thob pa la drod skyes sbyong byed/_shin tu brtan te dkyil 'khor yongs rdzogs yud tsam la rdzogs tshe rdzus skyes sbyong byed bsgom pa'i goms cha che chung gi ting 'dzin gyi mthu dang mthun par slob bo/__/gsang sngags nang pa'i bskyed rim kun kyang ting 'dzin rnam gsum dgos pas dang po de bzhin nyid kyi ting nge 'dzin ni/_zab mo stong nyid kyi gnas lugs spros pa'i mtha' kun dang bral ba'i rang bzhin shes pa'i shes rab kyi don la mnyam par 'jog pa yin pas/_thog mar gzhi rang bzhin lhun grub kyi gnas lugs de bla ma'i man ngag dbang dus su ngo 'phrod de byin rlabs 'pho ba sogs stobs kyis shes na smos ci dgos/_gzhan thos bsam la brten pa'i nges shes rnyed pas chos rnams bsam bral de kho na nyid gzugs brnyan tsam snang ba de bzhin nyid de'i gdangs/_kun tu snang ba'i ting nge 'dzin kun snang snying rje chen por shar ba'i 'phen pas rgyu'i ting nge 'dzin gdan gsum lha'i dkyil 'khor du bsgom pa'i bskyed rim skyon med du shar ba thabs kyi lam thams cad kyi nang nas mchog tu gyur pa'i sngags kyi thabs ma nor ba yin zhing*/_dkyil 'khor gang rung sgyu ma ltar gsal te/_dkyil 'khor gyi lha tshogs rgyan cha thams cad yongs rdzogs ma 'dres par gsal yang snang dus nyid nas rang bzhin ma grub pa zung 'jug chen por lam gyis gsal btab pa ting nge 'dzin gyi gzer ni/_skye gnas bzhi gang rung gi bag chags sbyong ba dang 'brel ba'i phyi snod gzhal yas khang dang*/_nang bcud lha dang lha mo sgyu ma lta bur gsal te/_snang cha nas dbus kyi gtso bo nas me ri'i bar thams cad ma 'dres par de dag gi ri mo yan chad yongs rdzogs gsal yang*/_snang dus nyid nas rang bzhin ma grub pa zung 'jug chen por lam gyis gsal btab la/_ye shes lnga'i dbang bskur zhing sku gsung thugs kyi rgyas gdab pa sogs yan lag tshang bar byed pa yin te/_de yang zhi ba yin na tshul dgu dang*/_khro bo yin na gar gyi nyams dgu dang ldan pa ste/_zhi tshul dgu ni/_sku dang zhal phyag sogs gyong khengs kyi rnam pa shing la sogs pa lta bu ma yin pas mnyen pa/_phra sbom sogs rim par skabs phyed pas lcug pa/_sku sha lhod por ma gyur pas 'khril bag chags pa/_tshigs mtshams sogs 'phrul ldem dang ldan pas ldem pa/_sku sha rgyas shing pags pa srab pas gzhon tshul can/_rgyan dang sku mdog mtshan sogs kha dog ma 'dres pas gsal ba/_de dag kyang mu med pa'i 'od zer 'phro ba dang ldan pas 'tsher ba/_sku skyes bu chen po'i mtshan dang ldan pas brjid bag gi mdzes pas lhun sdug pa/_thams cad zil gyis gnon pa gzi byin dang ldan pa ste dgu'o/__!__gar gyi nyams dgu ni/_'gro la snying rjes chags nyams kyis sgeg mdzes pa pa/_khro nyams kyi dpa' zil che ba ba/_rmongs nyams kyi mi sdug pa ste sku'i nyams gsum/_ha ha hU~M hU~M sogs bzhad pa'i gad mo 'byin pas dgod pa/_bsdig pa'i nga ro sgrog pas gshe ba/_sgra gdangs che zhing bzod par dka' bas drag shul te gsung gi nyams gsum dang*/_rmongs pa'i 'gro khams rjes su 'dzin pa'i snying rje/_ma rungs pa'i sems can khro bas 'dul ba'i rngam bu g.yang sar lhung ba la mas nan gyis ldog pa ltar pa/_bzang ngan thams cad chos nyid du ro mnyam pa'i zhi ba ste thugs kyi nyams gsum dang bcas dgu'o/__/de lta bu lha zhi ba la longs spyod rdzogs sku'i rgyan chas dar mthing khra'i zi ldir/_sna lnga'i cod pan/_gar gyi phu dung*/_dar dkar po gser gyi ngang ris can gyi stod g.yogs/_tshigs gu'i smad dkris te chas gos lnga dang*/_rin po che'i dbu rgyan/_snyan rgyan/_mgul rgyan/_dpung rgyan/_do shal/_se mo do/_phyag gdub/_zhabs gdub ste rgyan brgyad dang bcas pas bcu gsum dang*/_sprul sku rnams la chos gos rnam pa gsum la sogs brgyan pa dang*/_!_khro bo rnams la/_mi lpags kyi g.yang gzhi/_glang chen gyi stod g.yogs/_stag lpags kyi sham thabs rnams te bgo ba'i gos gsum dang*/_'dogs pa'i rgyan gnyis te/_thod skam lnga'i dbu rgyan/_rnyid pa'i se ral kha zhes pa'ang snang*/_rlon pa khrag 'dzag pa lnga bcu'i do shal/_thod tshal gyi dpung rgyan/_phyag zhabs kyi gdu bu sogs so/__/klu rgyal rigs dkar po'i skra chings/_rje rigs ser po'i snyan cha/_bram ze'i rigs dmar po'i mgul chu/_dmangs rigs ljang khu'i phyag zhabs kyi gdu bu/_gdol pa'i rigs nag po'i do shal te thams cad dug lnga gnas su dag pa'i gdug pa sbrul gyi rnam pa can gyi chun po lnga'o/__/de ltar thod sbrul gdags pa'i rgyan gnyis dang*/_thal chen gyi tshom bu/_rak+ta'i thig le/_zhag gi zo ris te byugs pa'i rtsi gsum mo/__/de ltar bgo ba'i gos gsum/_'dogs pa'i rgyan gnyis/_byugs pa'i rtsi gsum ste dur khrod kyi chas brgyad du grags so/__/gzhan yang gzhal yas khang gi steng rgyan logs rgyan sogs bkod pa'i rnam pa thams cad dang bcas pa gsal brtan tshad brgyad dang ldan par bsgom ste/_gsal ba'i tshad bzhi ni/_spyan dkar nag tshun chad ma 'dres par gsal bas sal le/_rig pa'i gsal ngar bral ba'i bying nyams can ma yin par gsal stong seng bag dang bcas pa'i rig pa'i ngar dang ldan pas seng nge*/_sems med bem po'i rnam pa 'ja' tshon lta bu ma yin par ba spu'i khung bu dang skra'i nyag ma tshun chad rnams thams cad mkhyen pa'i ye shes kyis zin pas dbang shes dwangs pa'i yon tan brgya phrag tu 'char zhing bkra hrig ger bzhugs pas lhag ge_/de lta bu'i sku de yang de ltar yin no dang*/_yod do tsam gyi rjes dpag gi blo rtog ma yin par yid ngor mngon sum lta bur 'char bas lhang nge ba ste bzhi'o/__/brtan pa'i tshad bzhi ni/_le lo dang brjed ngas sogs kyis mi g.yo/_rab rib dang mog mog por gyur pa sogs kyis mi 'gyur/_yun ring du mnyam par bzhag kyang rnam rtog phras mos kyang mi brdzi bas mngon par mi 'gyur/_sku mdog dang zhal phyag dang*/_byon bzhugs dang 'od zer gyi spro bsdu sogs ji ltar bsgom pa de ltar 'byung ba ste bzhi'o/__/de yang rnam par gsal ba zhes kyang bshad do/__/de ltar yang yang goms pas nyams lnga mthar phyin te yul gsum gyad du gyur pa na grub pa yin no/__/de la yul gsum gang zhe na/_dpal chen zhal lung las/_ye shes lnga yi phyag rgya kun/_/dang po yid kyi yul du gsal/_/sems nyid shin tu sbyangs pa'i mthar/_/rang bzhin dbang po'i yul du gsal/_/mthar ni bden gnyis dbyer med kyi/_/lus sems shin sbyangs thob pa'i lha/_/lus kyi yul du mngon par gsal/_/zhes pa ltar ro/__/dag dran sbyar ba sogs kyang shes par bya'o/__/sngags kyi gzer ni de bzhin gshegs pa thams cad kyi gsung gi gsang ba zab mo'i snying po bzlas pas snang yang brjod bral stong pa'i rang sngags sgra gdangs bcas pa dang*/_rdor bzlas lam du 'byong bar byed pa dang*/_dgongs pa'i gzer ni thabs snang cha lha sngags kyi rang bzhin shes rab khyad par can dang*/_'phro 'du'i gzer lha sngags chos nyid gsum dang 'brel ba'i lam dag pa'o/__/de las 'gal ba'i dmigs bcas bskyed rim ni/_mu stegs byed dang gdon gyi rigs mkha' rgyu sogs la'ang yod par bshad de/_rgyud las/_dgongs pa mi 'gyur gzer med na/_/dpal chen 'grub kyang thun mong las/_/mchog mi 'grub cing ru trar gol/_/zhes so/__/sngags su zhugs pa'i gang zag des byang chub sems dpa'i lam mtshan nyid theg pa las bshad pa'i mthong lam rnam par mi rtog pa'i ye shes de la phyag rgya chen po mchog gi dngos grub ces gsar rnying gi rgyud sde thams cad na shin tu grags pa de nyid myur du mngon du byed pa'i thabs ma nor ba yin te/_gsang sngags kyi lam ni thabs mang dka' ba med pa'i lam/_mtshan nyid theg pa'i lam dka' ba sogs las khyad par du 'phags la/_de yang bskyed rim gang bsgom yang*/_pho brang rnam snang*/_rjes chags rdo rje 'chang*/_dbang bskur mi bskyod pa/_mchod pa don grub/_bstod pa rin 'byung*/_bdud rtsi myong ba 'od dpag med de yan lag drug rdzogs sogs snang cha thams cad lha skur gsal ba'i sgo nas gzugs sku phrin las dang bcas lam du byas pas bsod nams kyi tshogs dang*/_de la rang bzhin ma grub par shes pa'i sgo nas chos sku lam du byas pas dmigs med ye shes kyi tshogs te/_tshogs gnyis nye rgyur bsten pa'i sgo nas sam dbang rnon dag dang*/_rgyu'i theg pa lam lnga dang 'brel ba'i bskyed pa'i rim pa la gsal dag brtan pa thob ste 'byung ba'i snyigs ma sbyang bas bogs thon nas tshogs sbyor gyi lam du drod rtse bzod gsum gyi lam stegs mngon du byas te chos mchog chen por rnam smin rig 'dzin mngon du byas pa ni bsnyen pa/_rten des mthong lam du thog mar slob pa'i zung 'jug gi sku mngon du byas pa tshe dbang rig 'dzin brnyes pa nye bsnyen/_sgom lam du yi dam lha dang 'dra ba'i phyag rgya chen po'i rig 'dzin mngon du byas te don gnyis mnyam du sgrub pa ni sgrub pa/_mthar rang don rtsol ba chad de rjes thob du de bzhin gshegs pa dang phrin las mnyam ste/_sku lnga lhun grub rdo rje 'chang gi cha lugs 'dzin te spangs rtogs mthar phyin pa sgrub pa chen po lhun grub rig 'dzin te/_rig 'dzin rnam pa bzhi'i dag mnyam rdzogs pa'i yon tan gong nas gong du them skas bgrod bzhin 'phel ba nyid las nges pa lnga ldan sogs sku lnga'i yon tan thams cad mthar phyin te 'og min zhing du ring por mi thogs par thabs shes khyad par can gyi stobs kyis mig 'phrul lta bur 'gro ba yin no/__/gnyis pa shes rab gtso che ba rdzogs pa'i rim pa nyid bshad pa la'ang*/_pha rgyud gshin rje gsang 'dus rnam 'byor chen po'i rgyud rnams las 'byung ba lnga yi rlung dbu mar zhugs te rnam par dag pas/_zab gsal lam gsal stong rnam par mi rtog pa'i ye shes bskyed par byed do/__/ma rgyud yang dag phur pa/_kun 'dus rig pa/_'khor lo sdom pa/_dgyes rdor sogs rnal 'byor gyi rgyud rnams las khams byang sems thig le la gtso bor gnad du bsnun te zhu bde yi ye shes bskyed pa'i phyir/_gtum mo 'bar 'dzag gi sbyor ba sogs rang lus thabs ldan dang*/_gzhan lus phyag rgya la bsten nas dga' bzhi'i ye shes bskyed pa gzhan lus thabs ldan gnyis ka ston/_gnyis med rgyud rdor sems sgyu 'phrul drwa ba/_dus 'khor/_sangs rgyas mnyam sbyor sogs las gsal dang mi rtog pa dang*/_bsam gyis mi khyab pa'i ye shes gcig dang du bral gyi thig le chen po'i 'od gsal gtsor sgom par byed pa las zag med kyi ting 'dzin skye'o/__/de gsum las snga ma gnyis ni rlung dang thig le'i rdzogs rim gtsor ston pa snang bcas dmigs pa'i lam/_phyi ma gcig ni zung 'jug gi ye shes gtso bor ston pa'i rdzogs rim snang med 'od gsal te/_dang po snang bcas phyogs la lha yi bdag nyid du g.yo ba med par gnas pas na gnas pa rtsa dang ni/_khams gsum thams cad 'du byed pas na g.yo ba rlung zhes bya la/_de gnyis ka'i brten pa lta bur gyur cing rlung gis gang du bkod pa'i gnas su 'gro 'ong byed pas na/_bkod pa rang bzhin dri ma dang bral zhing yon tan lhun gyis grub pa'i byang chub sems/_rtsa rlung thig le rags pa'i rnam pa gsum du gnas pa ni rten khyad par can te/_rdo rje zhes bya ba ni mi phyed pa'i don te sku gsung thugs gsum mam sku gsum gyi rang bzhin dbyer mi phyed pa'o/__/phung po ni du ma spungs pa'i don te rang bzhin rnam par dag pa'i rtsal snang gzugs la sogs pa du ma 'dus pa'i don no/__/de dag rang byung rig pa'i ye shes kyi bzhugs gnas yin pas grong zhes bya'o/__/des na rten de dag la gnad du bsnun na brten pa sku gsum gyi dgongs pa tshe 'di la mngon du 'gyur ba'i thabs rmad du byung ba'o/__/gling gsum du skyes pa'i mi'i lus rten thob pa rnams bar do'i rnam shes de ma'i mngal gnas su khu khrag gi dbus su zhugs te/_de nyid rten du 'dzin pa'i thog ma ru/_rtsa khams grub pa'i tshul mig gnyis dang ni/_lte ba'i rtsa mdud de gsum po sgrog mdo ltar chags shing*/_de las snod kyi 'jig rten chags pa'i dus dwangs ma rnams dbus ri rgyal lhun por song nas rim gyis gser gyi ri dang*/_snyigs ma rnams gling dang khor yug sogs su gyur pa dang tshul mthun par/_rim pa bzhin du lus bskyed pa'i tshul ni/_dwangs mar gyur pa yi rtsa dbu rkyang ro gsum lus kyi dbus na ka ba lta bur gnas pa'i nang na phyi ru lus ngag yid gsum/_nang du nyon mongs dug gsum/_gsang bar sku gsung thugs gsum gnas pa dang*/_snang ba sogs kyi rten byed pa'i yi ge gsum gtso 'khor lta bur gnas te/_de yang so sor gnas pa'i tshul rgyud dang man ngag rnams la mi 'dra ba snang na yang*/_rtsa gsum po'i byed las kyis mtshon na/_ro mar oM/_rkyang mar AH_dbu mar hU~M yig rnams gnas par bshad kyang chog par snang ngo*/__/de la dbu ma zhes pa'i don gnas tshul gyi dbang du byas na de nyid dbus na yod pa'i phyir dang*/_chos nyid kyi dbang du byas na yod med gnyis ka'i mtha' dang bral bas de skad do/__/rtsa de'i yar sna na/_pha las thob pa'i thig le dkar cha thabs kyi rang bzhin haM yig gi rnam par gnas pa dang*/_mar sna na/_ma las thob pa'i thig le dmar cha shes rab kyi rang bzhin a thung gi rnam par gnas pa gnyis po rim pa bzhin spyi bo tshangs pa'i sgo dang*/_gsang ba'i gnas gnyis la zug pa'i bar na gnyis med kyi rang bzhin kun gzhi'i rten srog rlung gi rnam par gnas te nam mkha' bzhin no/__/de'i g.yas dang g.yon na rim bzhin ro ma zhes pa rang bzhin du bzhag na don byed mi nus pas ro dang 'dra zhing gnad du bsnun na bde ba'i ro myong bar byed pa'i rtsa dang*/_rkyang ma zhes pa rang bzhin bzhag na gzhan dang mi 'brel bar reng bu ltar gnas pa dang*/_gcud pa'i man ngag las chos nyid rtog bral gyi nyams skye bas rtog pa'i yan lag dang mi ldan par byed pa'i rtsa gnyis gnas pa'i kha dog ni/_rim par dkar ba dang dmar ba nyid do/__/bud med nyid la thabs shes rten 'brel las ro rkyang de gnyis go ldog du gnas pas rkyang ma g.yas su yod do/__/de gsum ni rtsa thams cad kyi phyi mo yin pas ma sgra zhugs pa'o/__/dbu ma de'i mdog ni sngo skyar yod do/__/der ro rkyang de gnyis pos lte ba nas gyes mkhal mar gcer ba sogs spyi bo'i bar lug rgyud du phan tshun bsnol zhing gcu ba'i tshul gyis mdud pa nyi shu rtsa gcig gi tshul du byas pa la/_rim bzhin sbyang bya dug gsum dang*/_sgo gsum gyi sgrib pa dang sbyangs 'bras sku gsung thugs gsum gyi yon tan mngon du byed pa'i phyir sbyong byed lte ba mgrin pa snying ga'i 'khor lo gsum bsgom par gsungs pa'i grangs sam/_de bzhin du sbyang bya sgo gsum bya ba dang bcas/_sbyangs 'bras sku bzhi'am sku gsung thugs yon tan phrin las te lnga thob phyir/_sbyong byed de'i steng spyi bo'i 'khor lo dang bzhi'o/__/yang sbyang bya dug lnga dang phung lnga/_sbyangs 'bras sku lnga dang ye shes lnga thob phyir de steng gsang gnas kyi 'khor lo bsnan pa dang*/_yang sbyang bya dug lnga dang ser sna bcas drug dang*/_phung lnga bag chags bcas sbyangs nas/_sbyangs 'bras ye shes lnga dang rang byung gi ye shes te drug gam/_phyin drug gam/_sku lnga dang bde ba chen po'i sku ste drug thob phyir gtsug tor nam mkha'i 'khor lo ste grangs kyi 'khor lo'i rtsa 'dab rnams phri ste gsum du byas pa nas drug gi bar du bsnan par gyur pa dang*/_yi ger 'god pa sogs sbyang gzhi sems can gyi rgyud kyi nyon mongs pa dang*/_rtsa dbang po sogs dang*/_sbyong byed kyi man ngag bsgom tshul tha dad kyang 'bras bu tha dad med do/__/lte ba sprul pa'i 'khor lor rtsa 'dab drug cu rtsa bzhi/_mgrin pa longs spyod kyi 'khor lo la rtsa 'dab brgyad tshan gnyis ste bcu drug dang*/_snying gar chos kyi 'khor lo rtsa 'dab brgyad/_spyi bor ha~M gnas bde chen gyi 'khor lo rtsa 'dab sum cu rtsa gnyis/_gsang gnas bde skyong 'khor lo na rtsa 'dab bdun cu rtsa gnyis/_de bzhin du gtsug tor nam mkha'i 'khor lo la nam mkha' ltar dwangs pa'am rags pa'i rtsa ma yin pas rtsa 'dab grangs med pas nam mkha' lta bu'i khams kyi 'khor lo zhes su grags so/__/gzhan yang rtsa 'khor lo drug po re re'i lte ba dang so so'i bar mtshams rnams su/_rlung gi 'pho ba bcu gnyis kyis rtsa gnas rnams su dkar dmar gyi dwangs ma khrid cing bkod pa'i rten 'brel las phyi rol du go la'i rlung gi steng du nyi zla gnyis rang 'gros kyis bgrod pa'i gnas dus sbyor te khyim bcu gnyis dang*/_de bzhin du nang gi sems can rnams las nyon gyis 'khor bar bgrod cing 'khor ba na'ang rten cing 'brel 'byung bcu gnyis kha brgyud de 'khor bar snang ba'i gzhi'am rtsa bar gyur pas na gnas zhes bya'o/__/des na rnal 'byor pas rtsa rlung gi byed pa bcings nas khams la gnad du bsnun te ma dag pa'i rtsa gnas su 'pho ba de spangs pa'i thabs kyis ro rkyang lam nas brgyud de dbu ma'i mar sna nas yar lugs ldog gi 'gros kyis/_gsang gnas ye shes kyi 'khor lor phyin pa dang mnyam du rlung gi 'pho ba gcig dang rten 'brel gcig 'gags nas dang po'i sa yi rtogs pa dang yon tan rnams 'char zhing*/_de ltar rim pa bzhin gtsug tor nam mkha'i khams kyi 'khor lo'i bar du 'khor lo re dang bar mtshams rer rlung gi 'pho ba dang rten 'brel re re'i cha ldog pas/_sa ni gnyis pa sogs bcu gnyis rab tu rdzogs pa'i mthar/_rlung sems thig le dang bcas pa nam mkha'i khams dang 'dres pa'i tshe/_'khor ba'i rten cing 'brel 'byung phyi nang thams cad rgyun chad nas mi 'gyur bde ba chen por mngon par 'tshang rgya bar 'gyur ba ni dang po'i sangs rgyas dus kyi 'khor lo'i lugs yin no/__/rgyud sde tha dad pa'i rdzogs rim shes phyir sgyu 'phrul drwa ba ltar na gong du bshad pa de dang rnam grangs drug tu mthun pa'i rtsa 'dab la/_lam gyi sbyang gzhir gnas shing so sor bag chags 'dzin pa'i rigs drug sa bon ma rig pa gnyis las byung ba'i ma dag pa'i rlung thig le dang yig 'bru'i rnam par gnas pa rnams/_sbyong byed rig pa'i rang bzhin dag pa ye shes kyi rlung dang thig le la gnad du bsnun pas rigs drug gi bag chags thams cad thul bas thub pa'am skyes bu rnam drug dang*/_der gnad du bsnun pas ser sna sogs dag cing phyin drug gi yon tan rang bzhin gyis rdzogs par 'gyur bas 'khor lo drug gi dag pa'i rlung thig dang*/_de bsgom pa'i man ngag rnams la pha rol phyin pa drug ces bya ste de dag gis sbyangs par byas pa las/_sbyangs 'bras me long lta bu sogs tha dad pa yi ye shes rnam pa lnga dang*/_de thams cad kyi rang bzhin bsam gyis mi khyab pa rang byung gi ye shes gcig dang drug ces sangs rgyas kyi sa yi yon tan thams cad rdzogs par 'thob bo/__/de bzhin sgyu 'phrul rtsa rgyud kyi rang lugs 'di bzhin te/_snying ga rang byung gi ye shes lnga'i rang rtsal 'gag pa med pa las rtog tshogs thams cad lhar dag pa'i rten gyi rtsa dang thig le gnas pas zhi ba'i 'khor lo dang*/_spyi gtsug zhi ba'i gting mdangs 'char ba'i gzhi'i rtsa thig gnas pas khro bo'i 'khor lo ste rnam pa gnyis po de la/_zhi khro'i lha dang rnam grangs mnyam pa'i snying khar rtsa 'dab zhe gnyis dang*/_dung khang na lnga bcu rtsa brgyad de dam pa rigs brgya'i grangs dang mnyam par gnas so/__/phra ba ni bsam gyis mi khyab kyang khams dang rlung 'bab kyi rtsa stong phrag bdun cu rtsa gnyis sogs so/__/rgyud dang gdams ngag ltar bshad pa'i dbang du byas nas thabs lam dang grol lam gnyis bsgom pa'i man ngag bkral ba ni/_grol lam bskyed rim gtso bor ston pa zhi khro so so'i sgrub thabs ltar yin la/_thabs lam la steng sgo rnam grol gyi lam dang*/_'og sgo khams gsum rol pa'i lam gyi sgo gnyis kyi thabs la brten nas 'od gsal gyi dgongs pa dus gcig mngon du gyur par 'dod pa rgyud thams cad kyi 'phro gzhi man ngag thams cad kyi rgyal po rdor sems sgyu 'phrul drwa ba'i lugs so/__/g.yo ba rlung la 'byung ba sa chu me rlung gi rlung che ba dang*/_chung ba gnyis/_che ba ni skyes bu dar ma nad kyi skyon dang bral ba zhig la nyin zhag phrugs gcig dag la ni/_nyi khri chig stong drug brgya'i grangs su 'gyu ste/_thal 'gyur las/_rtsa la brten pa'i rlung dag ni/_/nyi khri dang ni stong phrag gcig_/drug brgya dag tu 'gyu ba ni/_/'gyu ba chen po dag tu 'dod/_/ces so/__/de la rgas pa rnams la ni 'byung ba'i grwa nyams pas lnga bcu rtsa brgyad kyis ma tshang la/_'byung ba ma rgyas pa'i gzhon nu rnams la ni sum cu rtsa gnyis kyis ma tshang ngo*/__/'byung ba chung ba'i rlung ni kun tu rtog pa can gtso cher nyon mongs pa brgyad khri bzhi stong gi grangs dang mnyam pa'i rtog pa de dag gi bzhon pa lta bur rgyun mi 'chad par gnas te/_sgyu 'phrul las/_gzhan ni bzhi stong brgyad khri'o/_/zhes so/__/de yang kha sna nas 'gyu ba ma gtogs pa rtsa'i nang na rtog pa dang ye shes kyi rten du 'gyu ba'i rlung longs spyod 'khor lo las gyes pa'i 'phar rtsa nas 'gyu ba rnams bsdoms pas chig 'bum nyi khri drug stong drug brgya nang du 'gyu bar gsungs/_'byung ba che chung thams cad kyi rtsa bar gyur pa'i rlung ni srog 'dzin gyi rlung dang*/_me mnyam gyi rlung dang*/_khyab byed kyi rlung dang*/_gyen rgyu'i rlung dang*/_thur sel gyi rlung ste lngar gnas pa'i/_byed las rim bzhin srog 'dzin snying na gnas te srog brten par byed do/__/me mnyam ni lto bar gnas te me drod bskyed par byed do/__/khyab byed ni lus byings na gnas te lus nyams brtas par byed pa dang*/_gyen rgyus dbugs kyi 'gro 'ong gi bya ba byed pa dang*/_thur sel gyis 'gro 'dug dang bshang gci 'phen pa'i bya ba byed la/_de'ang pho rlung gyen rgyu ni stod na gnas/_mo rlung thur sel ni smad na gnas pa dang*/_ma ning gi rlung gzhan gsum ni stod smad mnyam par gnas pa yin la/_sna nas rgyu ba'i gnas skabs na/_g.yas nas pho rlung thabs kyi cha/_g.yon nas mo rlung shes rab kyi cha/_ma ning mnyam par rgyu zhing phyi rlung rags pa'o/__/snga ma de dag las kyang phra zhing nang gi byed pa gtso che ba'i rlung ni sa rlung ser po/_chu rlung dkar po/_me rlung dmar po/_rlung gi rlung ljang khu/_nam mkha'i rlung mthing kha ste 'byung lnga'i kha dog can/_dbyibs kyang rim par sa rlung gru bzhi/_chu rlung zla gam/_me rlung gru gsum/_rlung gi rlung gzhu bdungs pa lta bu/_nam mkha'i rlung zlum po rnams so/__/byed las ni phung po khams dang skye mched thams cad rlung de dag las rlung gi rang bzhin du gnas shing ma thim pa de srid du snang zhing gnas pa'i rten byed de/_'khor ba ji srid bar 'khrul snang gi rten byed do/__/sems dang ye shes kyi rten byed tshul bye brag tu bshad na/_'di ltar ma dag pa sems kyi gnas skabs na rlung lnga po de'i nyon mongs pa dug lnga rang rang gi rkyen nye bar gnas pa'i tshe rtsol ba med par mched par 'gyur ba'i rten dang ni/_dag pa ye shes kyi dus ji lta ba dang ji snyed pa'i shes bya thams cad la mngon sum pa'i ye shes rnam pa lnga po snang ba'i gzhi yin pas na/_rlung lnga rgyu lta bu las sems dang ye shes 'bras bu lta bur mched pa'i rten byed do/__/khyad par du 'byung ba dwangs ma'i rlung lnga po rlung sems gcig tu bcings pa'i thabs kyis d+hu tir te dbu mar chud pa na/_rlung lnga las su rung ste g.yas rlung dbu mar chud pas du ba lta bu dang*/_g.yon rlung chud pas smig sgyu lta bu/_me rlung las 'od 'bar ba/_chu rlung las sprin dang mthongs khung gi zla 'od lta bu/_sa rlung las gser mdog dang glog 'od lta bu/_mkha' rlung las mthing kha dang 'od lnga'i thig le dang thams cad chud pas 'od lnga gzha' tshon thig le lha sku sogs snang ba du mar 'char ro/__/khyad par zad par sa chu me rlung nam mkha' yi ting nge 'dzin grub nas dngos po thams cad sa la sogs par sprul bsgyur sna tshogs pa'i rdzu 'phrul gyi bkod pa ston nus pa dang*/_nyon mongs lnga dag pa dang*/_nyams snang 'od lnga gsal ba dang*/_zhing khams lngar bgrod pa dang*/_ye shes lnga mngon du 'gyur ba la sogs pa'i yon tan dang*/_rdzu 'phrul sna tshogs par 'grub te/_sgyu 'phrul drwa ba las/_rlung lnga'i dwangs ma stobs gyur na/_/'od ldan nang gi ye shes lnga/_/sku lnga bgrod pa'i zhing khams lnga/_/zad par lnga sogs 'thob par 'gyur/_/zhes so/__/shin tu rtogs dka' ba'i gsang ba'i rlung ni chos nyid don gyi ye shes rnam pa lnga yi rang bzhin yin pas phyir dbyibs dang kha dog la sogs pa'i rags pa'i chos dang rnam par 'gal ba yin pa'i yon tan gong du bshad pa rnams dang*/_lhag mthong mi rtog pa'i rang bzhin 'od gsal gyi dgongs pa mthar phyin par 'gyur ro/__/gsum pa rnam shes kyi rten khams dwangs ma khu rdul gnyis rlung gis rtsa gnas su bkod pa byang chub sems kyi khams ji ltar 'bab pa'i tshul ni/_ro ma'i yar sna las ni spyi bo'i ha~M yig gi rgyun zla ba'i bdud rtsi ste dkar cha 'bab ste lus thams cad khyab pa dang*/_rkyang ma'i mar sna las ni gsang gnas kyi a shad las nyi ma'i rdul te dmar cha mched de rtsa gnas thams cad du 'bab cing khyab par 'gyur la/_thabs shes kyi rten 'brel gyis pho yi shes rab kyi rtsa rkyang ma dang mo yi thabs kyi cha ro ma'i sna mdud par gyur pas pho rnams la khams dmar po dang mo la dkar po ste gnyis 'dzag pa bsrung ste mi 'pho'o/__/ro rkyang rgyu ba de las gzhan du de gnyis po las mched pa'i/_'khor lo so so'i rtsa 'dab sogs rtsa mdud yi ge'i rnam par yod pa'i yul nyer bzhi'i rang bzhin du brjod pa la sogs kun na khams kyi dwangs ma dkar cha thabs dang*/_dmar cha shes rab kyi ngo bor gnas pa gnyis/_dpa' bo yab dang ni de'i yum rnal 'byor ma'i tshul du snang stong gnyis su med pa'i sems kyi rtsal mdangs thabs shes dbyer med kyi ngo bor bzhugs nas yab yum phan tshun 'khril zhing sbyor bas zhu bde'i rnal 'byor bsgom pa'i rnal 'byor pa rnams las bde stong gnyis su med pa'i mchod pa len pas tshogs gnyis myur du rdzogs par 'gyur ro/__/mdor na lus kyi rten gnas pa rtsa ni chu 'dren pa'i lam yur ba dang 'dra/_ngag gi rten g.yo ba rlung ni 'khor 'das gnyis khar 'gro ba dang*/_'ong ba'i kha lo ba lta bu/_yid kyi rten byang chub sems kyi thig le ni rlung gi gnad la brten nas chu dang 'dra bar khrid sar 'du'o/__/de yang 'khor lo drug po steng 'og tu brtsegs pa'i srog shing lta bu dbu ma ste/_de la chos nyid dbu ma ni yod la rdzas su ma grub pas sgra gcan te/_phyir snang ba'i sgra gcan gyi gdong mjug gnyis kyis nyi zla za ba ltar/_nang du dkar dmar gyi rang bzhin a ha~M gnyis dbu ma'i yar mar gyi rtse snar gnas pa'i 'bar 'dzag gi ting nge 'dzin goms pa las/_dbu mar rlung zhugs gnas thim gsum gyi bya ba byed cing*/_nyi ma dang zla ba'i rang bzhin khams dkar dmar gnyis rgyun mi 'chad du dbu ma'i dbyings su 'bab par bsgom pa'i byed bcing la nus pa thob na/_phyi rol nyi zla gzas 'dzin par mi nus shing rtod la gnon pa sogs nus pa'o/__/de yang rta gdong gi mes rgya mtsho za ba ltar/_a shad las byung ba'i mes phung khams ma lus pa za bar byed pa'i phyir na gtum mo zhes bya ste/_de'i man ngag ni dbu ma sgra gcan dbyings su srog ces pa rlung dang*/_rtsol ba ni sems te de gnyis dbyer med du bcing ba'i shing rtas 'khor lo so so'i gnas su rgyu ba'i rlung rim gyis drangs pa las/_rlung sems 'byongs nas rim gyis dbu ma'i mdud pa gnyis gnyis grol ba dang*/_rlung dang khams kyi dwangs ma rnam pa gnyis re sgra gcan ltor zhugs pa dang mnyam du dang po'i sa'i rtog pa dang*/_yon tan thams cad mngon du gyur pa nas bzung sa bcu'i yon tan thams cad gong nas gong du 'phel te thams cad kyi tha ma rtsa mdud nyer gcig pa grol ba'i tshe/_rlung sems kyi dwangs ma thig le dang bcas pa gtsug tor du 'gro zhing rdo rje 'chang 'grub bo/__/khyad par snga 'gyur rgyud sde thams cad kyi rgyal po sgyu 'phrul drwa ba slob dpon chen po bi ma la'i gsang thig gis bkral ba'i lugs/_phyi nang snod bcud kyi rang bzhin rang gi lus sems la rdzogs pa rdo rje phung po'i grong khyer gyi dbus ni rang bzhin rnam par dag pa chos sku'i bzhugs gnas te ji ltar zhe na/_'das pa dang ma 'ongs pa dang da lta ba ste dus gsum char du lung du ma bstan pa'i sems kyi chos nyid ni bde gshegs snying po ste/_mtshan brjod las/_dus gsum dus med rtog pa po/_/zhes so/__/gnas lugs mngon du gyur pa kho nas dus gsum gyi sangs rgyas mtha' dag mngon sangs rgyas shing 'tshang rgya bar 'gyur ba yin la/_de nyid mngon du byed pa'i thabs sgyu 'phrul drwa ba chen po'i lugs 'dir 'khor 'das skyed sdud kyi sa bon snying kha na gnas pa la gnad du bsnun pa'i rdzogs rim 'chad do/__/de yang mi phyed pa'am mi 'gyur ba'i don gyis rdo rje'i gdan dang*/_dbyings zab pas snying kha chos kyi 'khor lo la dpal gyi be'u zhes smos nas de'i khong seng na/_'khrul snang dang ye shes skyed byed rtsa yi dwangs ma brgyad du gnas pa yi dbus na sbyang gzhi sbyong byed ltar gnas pa'i sa bon du gnad du bsnun pa'i tshul bi ma'i gsang thig las/_gang la yod pa rnam pa brgyad du shes/_/zhes dang*/_de'i 'grel par/_gang la yod na snying khong stong gi dkyil na rtsa yi dwangs ma rtsa phran rgyus pa bldad pa 'dra ba brgyad yod pa las/_gsum chos nyid kyi rtsa/_gcig ye shes kyi rtsa/_gsum rang rgyud kyi rtsa/_gcig yon tan gyi rtsa ste brgyad du shes par bya'o/_/zhes so/__/de dag rnams las dbus ma gsum ni sku gsum dang chos nyid mi 'gyur ba'i rten yin la/_de'i mdun ma na gcig yod pa ni ye shes bzhi 'char bar 'gyur ba'i rten gyi rtsa yin zhing*/_rgyab na ni yon tan gyi rtsa gnas pa las zhing khams dang gzhal yas khang la sogs pa dag pa'i snang ba mu med par 'char ro/__/g.yon na rang rgyud pa'i rtsa gsum ni khams gsum dang dug gsum rang mtshan pa'i 'khrul snang mtha' dag 'char ba'i rten/_rtsa bzhi po so so'i dbus na 'khor ba dang myang 'das kyi yig 'bru rnam shes tshogs brgyad dang bcas pa ni/_sbyang gzhi dang sbyong byed kyi tshul du gnas pa yin te/_'di ltar chos nyid kyi rtsa 'od snang ser la zlum pa'i rnam pa can gyi dkyil na lha min dang byol song gi sa bon su dang tri'i steng du sku rdo rje'i snying po oM rang 'od za 'og gur ltar gsal ba dang kun gzhi'i rnam shes gnas so/__/ye shes kyi rtsa mthing ga gru bzhi'i sbubs na lha dang mi'i sa bon a nr-i dkar dmar gyi steng na thugs rdo rje'i rang bzhin hU~M mthing kha dang yid kyi rnam shes gnas so/__/rang rgyud pa'i rtsa dmar po zla gam gyi dkyil na dmyal ba dang yi dwags kyi sa bon pre dang du'i steng du gsung rdo rje'i rang bzhin AHyig pad+ma rA ga ltar 'tsher ba dang nyon yid gnas so/__/yon tan gyi rtsa dmar nag gru gsum gyi dbus na sgo lnga'i rnam shes gnas so/__/des na 'khor ba'i gnas rigs drug por 'phen pa'i bag chags ni sbyang bya yig 'bru drug po'i steng du bsags nas de'i 'khrul snang bskyed la/_thar pa'i 'bras bu 'thob byed sgo gsum gyi dge ba spyi dang*/_bye brag rdo rje gsum gyi lam byed rnams yi ge'i steng du bzhag nas lam 'bras kyi yon tan snang bar 'gyur zhing*/_khyad par sbyang gzhi dang sbyong byed kyi yig 'bru rnams dngos su gsal btab nas de la gnad du bsnun pa'i rdzogs rim dang 'bru gsum gyi bzlas pa sogs byas pas sku gsung thugs kyi yi ge rnams stobs 'phel bas 'khor ba'i sa bon gyi yi ge dang*/_des bzung ba'i bag chags thams cad dag ste rdo rje gsum gyi dngos grub 'thob par byed pa'o/__/snying kha'i rtsa 'dab kun gyi dbus na dwangs ma lnga 'dus kyi thig le yod de/_rtsa 'dab brgyad po'i dbus ma ni rgyud sde gzhan ltar na/_yang dag pa'i dbu ma yin la dbu ma'i rlung dwangs ma yang ye shes kyi rtsa la 'jug dgos pas dwangs ma'i 'od rtsa dkar po shel gyi skud pa lta bu phra ba'i cha nas rta rnga'i bcu cha tsam du phra ba'i nang na/_rdul te khrag dang dbugs kyi dwangs ma 'dres pa la brten pa'i rlung sems shin tu phra ba'i snang cha ma 'gag pa'i gdangs 'od kyi thig le ye shes kyi rang 'od kha dog lnga pa shin tu phra ba nyid yod la/_de yang*/_'byung ba lnga ka'i dwangs ma yin te sa yi dwangs ma ni dar dkar gyi skud pa lta bu'o/__/chu yi dwangs ma ni khrag gi rang bzhin rgya mtshal gyi khu ba lta bu'o/__/me'i dwangs ma ni me long nyi ma la bzhag pa'i ngad lta bu'i drod do/__/rlung gi dwangs ma ni gser sa 'og na yod pa'i rlangs lta bu'o/__/nam mkha'i dwangs ma ni go 'byed pa'i cha tsam mo/__/de rnams ni rnam par shes pa'i chos nyid rang bzhin gyis 'od gsal zhing 'dus ma byas pa'i byang chub sems kyi rten yin la/_rgyu mtshan des na snying kha chos kyi 'khor lo ni/_rig pa'i ye shes snang stong gnyis su med pa kun bzang yab yum dang*/_de'i gdangs ye shes lnga'i ngo bor ma 'gag pa ni rigs lnga ste bsam gyis mi khyab pa'i chos nyid de la rang gi ngo bo'i rten dang brten pa med na'ang tha snyad du de la brten pa ltar yod pas bzhugs pa'i gzhal med khang zhes bya la/_snying kha chos kyi 'khor lo'i dbus gang du rlung sems kyi dwangs ma rnams 'dus pa'i tshe na/_mya ngan las 'das pa'i ye shes kyi rang gdangs zhing dang*/_gzhal yas khang sku dang 'od zer dang*/_ye shes kyi snang ba mtha' dag lam dus su'ang 'char la/_mthar thug snang cha'i 'od lnga po'i rtsal/_las rlung gis bslad de phung khams skye mched ma dag pa'i chos su snang ba'i cha thams cad dang bral ba na/_rang bzhin spros pa dang bral ba stong pa nyid kyi cha'i chos sku mngon du gyur te/_de gnyis don la dbyer med pas gcig tu 'dre ba med kyang 'khrul pa'i snang ba bag chags dang bcas pa thams cad dbyings su ldog nas snang stong ro gcig tu 'dres pas lam gyi tshogs gnyis 'bad med du rdzogs par 'tshang rgya'o/__/'tshang rgya ba'i gnas 'og min rnam dag tshad dang bkod pa mtha' yas pas brgyan pa'i zhing khams stug po bkod pa zhes khams gsum gyi gnas 'di las sam rang gi sems nyid las gzhan du rang mtshan pa zhig mi gnas te/_dbyings la sgrib par byed pa'i dri ma rlung sems ma dag pa'i cha mtha' dag pa ste thams cad nam zhig spangs par gyur pa'i dus der ye shes kyi rang snang lhun gyis grub pa yin no/__/de yi phyir lus ni rig pa'i ye shes 'khor 'das lam gsum gyis bsdus pa'i chos thams cad kyi chos nyid khyab gdal chen po'i rten yin no/__/de ltar 'khor ba 'khrul pa'i dus nyid na'ang sems nyid rang gi ngo bo'i bzhugs tshul rang bzhin gyis rnam par dag cing sku dang ye shes kyi chos thams cad ma tshang ba med par lhun gyis grub pa la nyams pa ste grangs nyung zhing 'bras bu'i chos ma tshang ba dang*/_dman pa'am zhan par gyur pa gnyis ka med de/_dper na dngul chu thal gseb tu lhung yang mi 'dre ba bzhin no/__/de lta bu'i 'gyur ba med pa'i chos nyid don dam byang chub kyi sems bde gshegs snying po ni 'jag ma'i srin bu yan sems rgyud kyis bsdus so 'tshal thams cad la ma khyab pa med de/_dper na til yin no cog thams cad la mar gyis khyab pa ltar gnas zhes rgyud lung man ngag thams cad las gsal ba ji bzhin no/__/'di ltar rten rdo rje'i lus kyi rtsa rlung thig le la sogs pa'i gnas lugs dang*/_brten pa sems kyi rang bzhin gdod ma nas gnas pa'i chos nyid gzhi yi bzhugs tshul dag shes par byas nas/_rdzogs rim man ngag gsar rnying gi rgyud sde thams cad las gsungs pa'i chos drug po 'dir ma 'dus pa med do/__/rdzogs rim gyi lam thams cad kyi rtsa ba gtum mo yin te/_thabs kyi cha thams cad shes rab skye ba med pa'i ngang du dag dgos pa dang*/_lam gyi gzhi ma ni sgyu lus yin te/_dag ma dag gi chos thams cad rang bzhin med pa sgyu ma lta bur goms dgos kyi/_dngos zhen gyi lam nas grol mi nus pa'i phyir ro/__/lam gyi drod tshad ni nying 'khrul rmi lam gyi lam nas sbyang ba yin te/_tshe 'di'am 'chi srid dam bar do sogs 'od gsal du bsdu ba la bslab dgos pa'i phyir ro/__/lam gyi snying po ni 'od gsal yin te/_bsgom bya don du gnyer ba'i don po yin pa'i phyir ro/__lam gyi mun nang ni bar do yin te nyams len 'bras bur sbyor ba'i mtshams sbyor gyi rkyen yin pa'i phyir ro/__/lam gyi blo chod ni 'pho ba yin te tshe 'dir mthar ma phyin na man ngag gis rnam shes dag zhing du btsan thabs su 'pho dgos pa yin no/_/de ltar chos dang ni lam gyi gzhi ma sngar sgyu lus kyi skabs su sgyu ma lta bu'i lha sku de yang bsdu rim gyis 'od gsal du bsdu ba dang*/_gtum mo gzhan lus phyag rgya'i lam gang rung la brten nas dga' bzhi lhan cig skyes pa'i ye shes sogs la goms pa las/_stong pa bzhi'am dga' ba bzhis drangs pa'i 'od gsal rgyud la skye bar 'gyur ro/__/de yang stong pa bzhi ni/_dang po rnam shes snang ba la thim pa'i skabs su zhe sdang gi rtog pa so gsum 'gags/_phyi rtags su ston gnam nyi zla 'od kyis bslad pa ltar dkar lam pa'i snang ba dang*/_nang rtags su gsal ba'i nyams mtha' dbus med par 'char te stong pa zhes bya'o/__/de nas snang ba mched pa la thim pas 'dod chags kyi rtog pa bzhi bcu 'gags/_phyi rtags su ston gnam nyi 'od kyis bslad pa lta bu dmar lam pa dang*/_nang rtags su bde ba mu mtha' med par 'char te stong pa chen po zhes bya'o/__/de nas mched pa nyer thob la thim pas gti mug gi rtog pa bdun 'gags/_phyi rtags su ston gnam smag gis bslad pa lta bu'i nag lam pa dang*/_nang rtags su rnam par mi rtog pa'i nyams mtha' dbus med par 'char te shin tu stong pa zhes bya'o/__/de nas nyer thob 'od gsal la thim pa zhes zer ba yang*/_don du sngar nyer thob kyi skabs kyi mi rtog pa de nyid cung zad sad nas rang bzhin gzhir gnas kyi 'od gsal don dam lhan cig skyes pa'i ye shes bcos min du shar ba ni/_ston gyi dus su tho rangs kyi nam mkha' bslad byed kyi rkyen gsum dang bral ba lta bu ste thams cad stong pa'i 'od gsal zhes bya'o/_!_zhe sdang gi rtog pa so gsum ni/_yul mi 'dod pa'i rnam pa can la shas chung ngu*/_'dod chags dang bral ba dang*/_'bring 'dod chags dang bral ba bar ma dang*/_chen po shin tu 'dod chags dang bral ba dang*/_gang yid kyi 'ong ba dag dang yul mi snying dmar ba mnga' thang longs spyod sogs la spro sems yod pa'i yid nang gi yul la tshur 'jug pa/_yid kyis 'gro ba dang spyir phyi yi yul la phar 'gro ba/_song ba dang yul gyi rjes su bye brag_mya ngan dang yul yid du 'ong ba dang bral ba'i sems kyi gdung ba chung ngu*/_mya ngan bar ma dang 'bring*/_shin tu mya ngan dang chen po/_sems nye bar gnas pa'am yang na sems rnal du 'dug pa'i dal ba zhi ba dang*/_rgod par gnas pa'am yang na sems rtsing par rtog pa rnam par mi rtog pa dang*/_yul yid du mi 'ong ba dang phrad nas sems skrag pa chung ngu 'jigs pa dang*/_'bring 'jigs pa bar ma dang*/_chen po shin tu 'jigs pa dang*/_yul la zhen pa tha ma sred pa dang*/_'bring sred pa bar ma dang*/_rab shin tu sred pa dang*/_dmag gyod sogs kyis rdzas su 'dod yon gyi yul rnams kun tu 'dzin pa/_nye bar len pa dang*/_dge ba'i las la yid gnyis za ba'am yang na rang gi sems mi gsod pa mi dge ba dang*/_zas 'dod pa bkres pa dang*/_btung ba 'dod pa skom pa dang*/_sdug na bde/_bde na sdug_/ci yang ma thub pa'i btang snyoms gsum la yul gyi sgo nas chung ngu tshor ba dang*/_'bring tshor ba bar ma dang*/_chen po shin tu tshor ba dang*/_rig pa dang*/_rig pa po rang dang*/_rig par byed pa yid dang*/_rig bya'i yul las te gsum la rtog pa gsum du gsungs pa ltar na/_gong gi song ba zhes pa mi bgrang*/_yang na/_rig pa dang rig bya gnyis la rtog pa gnyis su byas nas song ba bgrang ba'ang yod la/_rig pa 'dzin pa'i gzhi dang*/_so sor rtog pa rig pa dang mi rig par dpyod pa dang*/_rang ngam/_chos rgyu mtshan du byas nas sam bdag gis pha rol po 'di ma thub na gzhan gyis khrel dog ste kha na ma tho ba la 'dzem pa ngo tsha shes pa dang*/_sdug bsngal dang bral bar 'dod pa snying rje ba dang*/_dmigs bya yongs su bsrung ba dang sdug pa dang phrad 'dod pa ste gsum la brtse ba dang*/_brtse ba bar ma dang*/_shin tu brtse ba dang*/_pha rol po'i ci byed yang yang snyam pa'i yid 'phrig zos zer ba'i 'phrig pa de yin pa'i sems nges par mi gnas pa dogs pa dang bcas pa dang*/_gzhan gyi yo byad gzhan gnod pa'i ched du rang gis sdud pa'i sems kyis sdud pa dang 'di la bsags zhes pa'ang snang ste 'dra'o/_/yo byad kun tu 'dzin pa'i sems ser sna rnams so/_'di la phrag dog ces 'byung ba ltar na gzhan gyi phun tshogs la sems 'khrugs pa'o/__!_'dod chags kyi rtog pa bzhi bcu ni/_'di la zhen pa zhes dmigs yul rang gi thob pa'i yul la yid chags par gsungs pa 'dod chags dang*/_ma thob pa'i yul la yid chags pa dang*/_yid du 'ong ba mthong nas sems dga' ba chung ba dang*/_'bring dga' ba bar ma dang*/_chen po shin tu dga' ba dang*/_'dod don grub pa'i bde ba'i sems pa rangs pa dang*/_de'i rnam pa sems kyi yang dang yang du myong ba rab tu mgu ba dang*/_gtam sna tshogs pas 'di ci yin nam snyam du the tshom za ba'am yang na sngar ma byung ba'i don la sems pa mthong ba ngo mtshar ba dang*/_yid du 'ong ba mthong nas sems g.yeng ba rgod pa dang*/_bde ba'i rnam pa myong ba'am yang na yul des ngoms pa'i rtog pa tshim pa dang*/_'khyud pa dang*/_'o byed pa dang*/_'jib pa ste de rnams bya bar 'dod pa'i sems gsum dang*/_rgyud dben pa'i yul de las mi 'gyur ba'i sems brtan pa dang*/_dge ba la gzhol ba brtson pa dang*/_mtho bar sems pa khengs pa dang*/_bya ba rdzogs par byed pa dang*/_nor 'phrog par 'dod pa 'phrog pa dang*/_gzhan dpung 'joms par 'dod pa stobs dang*/_dge ba'i lam la sems gom par byed pa'i sems spro ba dang*/_dregs pa'i dbang gis mi dge bar spyod pa'am yang na yul la 'bad pas sbyor ba chung ngu tsham tshom med pa dang*/_'bring tsham tshom med pa bar ma dang*/_chen po shin tu tsham tshom med pa dang*/_rgyu mtshan med par yang dam pa rnams dang rtsod 'dod pa dregs pa dang*/_yid 'ong mthong bas 'gying ba'am rtse bar 'dod pa rnam par sgeg pa dang*/_'khon du 'dzin pa'i sems zhe 'gras pa dang*/_dge ba'i las la rtsol bar 'dod pa dge ba dang*/_gzhan gyi go bar smra 'dod pa tshig gsal ba dang*/_'du shes ma bsgyur bar smra 'dod pa bden pa dang*/_'du shes bsgyur bar smra 'dod pa mi bden pa dang*/_yi dam shin tu brtan pa nges pa dang*/_yul yongs su mi 'dzin par 'dod pa nye bar mi len pa/_bdog pa thams cad gtong bar 'dod pa sbyin pa po nyid dang*/_gzhan le lo can bskul bar 'dod pa btul ba dang*/_nyon mongs sogs kyi dgra las rgyal bar 'dod pa dpa' ba dang*/_bdag gam chos kyi dbang du byas nas mi 'dzem par mi dge ba bcu la 'jug pa ngo tsha med pa dang*/_bcos mas gzhan bslus g.yo can dang 'di la sgyu zhes pa'ang zer/_lta ba ngan pa la byang ba gdug pa can dang*/_gzhan la mtho mtshams pa mi bsrun pa dang*/_rgyud mi drang ba gya gyu che ba rnams so/__!__gti mug gi rtog pa bdun ni/_don du gnyer bya'i ngo bo ji bzhin du mi shes 'dod chags bar ma dang*/_dran pa nyams pa brjed ngas dang*/_smig sgyu la chur 'dzin pa sogs 'khrul pa dang*/_smra snying mi 'dod pa mi smra ba dang*/_yid srun pa skye ba skyo ba dang*/_dge ba la mi spro ba le lo dang*/_bden pa rnams la yid gnyis za ba'am yang na las 'bras dang chos nyid la yid gnyis za ba the tshom rnams so/__/de ltar snang gsum mam yang na dga' bzhis drangs pa'i 'od gsal gang yin kyang 'dra ste de la 'od gsal tsam du 'dra yang*/_dpe don gyi 'od gsal du ma dang*/_dpe'i 'od gsal la yang mchog dman gyi rim pa du ma yod kyang*/_des na mthong lam skyes tshun dpe'i 'od gsal yin no/__/mthong lam gyi bden pa mthong ba ni don gyi 'od gsal yin te/_de phyin chad don gyi 'od gsal la 'gyur ba med do/__/'chi dus kyi thim rim rdzogs pa'i mtha' dang*/_gnyid dus sogs 'od gsal shar ba ni gzhi'i 'od gsal yin la/_rnal 'byor pa'i lam goms pa'i stobs kyis de nyid ngo shes par byas nas dpe don gyi 'od gsal gang rung sbyor ro/__/lam gyi bsun ma ni bar do yin te/_nyams len 'bras bur sbyor ba'i mtshams sbyor gyi rkyen yin pa'i phyir ro/__/lam gyi blo chod ni 'pho ba yin te/_tshe 'dir mthar ma phyin na man ngag gis rnam shes dag zhing du btsan thabs su 'pho dgos pa yin no/__/de ltar chos rnam pa drug skyes bu gang gis lam bsgom pa'i rtsol ba dang bcas pas rang lus rtsa rlung thig le gnad du bsnun pas 'grub kyis gzhan phyag rgya'i rkyen la rag ma lus phyir/_rang lus thabs ldan nam steng sgo rnam grol gyi lam zhes bya'o/__/rang lus thabs ldan la brten nas rtsa drang thig le gnas su 'chun/_rlung byang ste gsum ka la gnad du song nas las su rung bar gyur pa na/_slar yang bde stong lhan cig skyes pa'i ye shes gcig char du ngo 'phrod nas 'phags pa'i lam du sbyor bar byed pa gzhan lus thabs ldan 'og sgo khams gsum rol pa'i lam phyag rgya la brten pa yin te/_'khor ba'i chos su snang ba kun gyi gzhi rtsa rlung thig le thams cad kyang 'od gsal chen por grol ba'i lam du 'gro ba'i thabs rmad du byung ba ni thabs kyi lam gcig char ba'am gzhan lus phyag rgya chen po yin no/__/yang na bskyed rdzogs kun kyang yang dag pa'i lam du 'gro bas na thabs kyi lam khyad par ba yin no/__/gnyis pa spros bral snang ba med pa'i rdzogs rim du dag dgos pas de'i tshul ni/_mtshan ma zhal phyag la sogs pa'i rnam par gyur pa'i bskyed rim dang*/_rdzogs rim gyi lha gang yin yang*/_mthar mi dmigs par 'jog pa ste de yang ma dag pa'i dngos zhen sbyangs te dag par bsgoms pa'i snod bcud kyi dngos po thams cad zhing dang gzhal yas khang lha dang lha mo sogs rang bzhin gyi brtan g.yor snang ba kun/_'od du zhu zhing gzhal yas khang nas rim bzhin 'khor/_gtso bo/_ye shes sems dpa'/_de snying ga'i sa bon gyi bar rnams la thim zhing*/_sa bon hU~M yig lta bu yin na zhabs kyu nas thig ler thim pa de'ang mas rim nas/_nA da'i bar du thim nas spros bral ngang du bzhag pas nam mkha' dwangs pa bzhin stong par gyur pa nam mkha'i ngo bo nyid/_kun rtog gi spros pa bral zhing so so rang rig pa'i ye shes chen po'i spyod yul nyid la bzhag par bya'o/__/byed las bskyed rim gyis ni gnas don lus kyi bag chags sam sgo gsum du snang ba'i bden zhen 'gog cing*/_rdzogs rim gyis ni gya nom lhar zhen te/_snang spyod thams cad sgyu ma lta bu'i lhar gsal bas zhen rtog spong*/_thig le la brten nas bde ba dang*/_rlung la brten nas gsal ba dang*/_rtsa la brten nas mi rtog pa dang lhan cig skyes pa'i ye shes 'dus ma byas pa rnams 'char ro/__/de ltar shin tu zab pa'i rdzogs rim rtsa thig rlung gsum gnad du bsnun te lhan skyes kyi ye shes bla na med pa rnams ni/_bla med rgyud sde rnams las 'og mar gyur pa phyi rgyud sde gsum las bsdu ba tsam dang*/_mi rtog pa bsgom pa tsam las gsungs pa med do/__/des na dbang rnon brtson 'grus dang ldan pa tshe gcig la rdo rje 'chang gi sar 'gro ba'i nye lam/_snod min la sbas shing skal med kyi spyod yul du ma gyur pa shin tu zab mo yin no/__/gsum pa de'i mthun pa'i rkyen bskyed rdzogs rnam pa gnyis lam du 'gro zhing dngos grub gnyis 'grub pa'i grogs su gyur pa dam tshig yin la/_de bsrung tshul ni/_dang po gsang sngags la zhugs shing dbang thob pa'i dus su ji ltar khas blangs pa'i sngags kyi brtul zhugs spang blang gi gnad thams cad mi nyams par bsrung dgos la/_de yang gsang sngags ni nyon mongs dang 'dod yon thams cad lam du byed pa'i thabs khyad par ba yin pas/_theg pa 'og ma ltar spang blang la don dam par rdzas su mi lta bar ma zad/_tha snyad tsam du'ang mtshan mar ma zhen pa'i sgo nas sngags lam gyi khyad chos dang ldan pas gang zag rang rang gi rgyud tshod dang bstun pa'i lta sgom gyis zin nas lam du byed pas nyon mongs rang mtshan pa kun gyi gnyen por 'gro ba'i rten 'brel mi 'chol bar bya ste/_dper na rma bya'i mgrin par gzhan dag 'chi bar 'gyur ba'i btsan dug zhugs na bcud len du gyur nas 'dab ma lta na sdug pa ltar/_rang gi grogs su gyur cing lta sgom gyi bogs 'don du spyad dgos so/__/de la dam tshig dang ni sdom pa zhes tha snyad 'dogs pa'i tshul gyi khyad par ni/_sa ma ya zhes pa'i sgra las drangs na dam tshig ste/_de yang mi nyams par bsrung na phan yon thob pas dam tshig tu bshad de/_rdo rje gur las/_dam pa rnams kyi dgongs pa la/_/dbang dang byin rlabs thob pa yin/_/dam pa'i tshul bzhin de spyad na/_/mi mthun phyogs rnams 'tshig par 'gyur/_/zhes so/__/dam tshig de las 'da' bar bya ba ma yin la/_sdom pa ni gnang bkag gi mtshams la dpyad de blang bya sgo gsum dkyil 'khor gyi ngo bor sdom par bya ba dang*/_blang bar mi bya ba'i dngos po mtshan rtog dang bcas pa las kyang sdom pa'i mtshams nges par byed pa ste/_des de gnyis sngags sdom ngo bo gcig pu la'ang ldog chas dbye ba'o/_/'dir tshig rkang gnyis kun mkhyen rtsom gzhir bri bsub byas 'dug pas mi dgos gsungs so/_sngags kyi bslab pa kun gyi spyi don te rten gzhi ni sngags sdom yin la/_de ma thob pa dang*/_kun dkris tshang ste ltung nyams dang*/_bslab pa phul ba la sogs pas btang ba dang*/_ltung ba'i sa mtshams mi shes pa'i smyo ba la sogs 'du shes rang bzhin du mi gnas pa la/_ltung ba dang dngos grub med de rten min pa'i phyir ro/__/de lta bas na sngags sdom ldan zhing ma nyams pa dang*/_bslab pa ma btang la/_shes pa rang bzhin rnal du gnas te ltung ltung min gyi sa mtshams shes shing dran nus pa de/_ltung ba dang ni dngos grub gnyis ka 'byung ba'i snod lta bu yin no/__/rtsa ltung lnga pa byang chub kyi sems btang ba ni pham pa dngos yin la/_de las gzhan pa'i rtsa ltung bcu gsum mam bcu gnyis po la/_rtsa ltung gi dngos gzhir grub byed kyi kun dkris zhes bya ba'i yan lag brtsi tshul ni/_slob dpon la smod pa lta bu'i nyes pa zhig byed bzhin pa na/_da dung bya ba de byed 'dod ma log pa dang*/_bya ba de la nyes dmigs su bltas nas 'gyod pa med pa dang*/_rang ngor ltos pa'i gsang sngags kyi sdom 'gal gyi nyes pa byung ba shin tu gnong snyam pas ngo tsha mi shes pa dang*/_gzhan ngor ltos pa'i khrel yod med pa ste/_chos gsum mam de steng nyes pa de dag la dga' zhing mgu ba bsnan pa ste bzhir byed pa'ang yod la/_de dag kun gang ltar tshang ba'i kun slong ngan pa de skyes pa'i skad cig gnyis pa nas bya ba de yongs su rdzogs pa'i mthar gtugs pa de srid du rgyun chags bar ma chad par yod par gyur na/_kun dkris tshang ba'i ltung ba chen po bskyed pas mthun phyogs sdom pa gcod cing*/_gnyen po'i phyogs pham par 'gyur ba yin no/__/gal te rtsa ltung bskyed pa'i kun slong skyes pa nas dngos gzhi ma rdzogs pa'i bar der dus kyi bar chad nas rgyun chags su med pa'am/_'di la nyes pa 'di lta bu yod do snyam nas spyod 'dod log pa dang*/_ngo tsha khrel yod kyi blo skyes pa dang*/_dga' mgu log pa'i yid cung zad skyes pa ste chos gsum gang las gcig shos ma tshang na/_dngos gzhi bskyed par bya ba'i yan lag thams cad ma tshogs pas pham pa'am rtsa ltung dngos min yang nyes pa sbom por 'gyur ro/__/kun dkris brtsi tshul de yis ltung ba'i mtshams legs par nges shing shes par byas nas/_rtsa ba dang yan lag gi dam tshig mtha' dag kun/_rtsa ltung bcu bzhi yan lag gi sbom po brgyad lta bu'i nang du gnad bsdus te yid kyis bsrung sems mi spong lus ngag gnyis kyis dor bar mi bya ste/_dgra la so 'dzugs pa ltar bsrung bya thams cad mi brjed pa'i dran pas nyin thun gsum dang*/_mtshan mo thun gsum ste cha drug bgos pa la/_cha re'i nang du rtsa ltung bcu bzhi po'i nyes pa byung ngam ma byung brtag dpyad zhib tu btang nas bsngo bgrang bya/_de ltar byas tshe gang rung gi nyes skyon gyis gos par gyur na/_btang snyoms mi bya bar 'gyod pa bskyed cing phyi bshol med par de ma thag phyir 'chos pa'i thabs la sems shing bshags par bya'o/__/nyes pa gang gis kyang gos pa min na dga' ba bsgom zhing dge rtsa gzhan don du bsngo/__/deng sngon chad ltung bas gos sam ma gos gang yin kyang*/_da phyin chad srog la bab kyang rtsa ltung gi nyes byas kyi las phyogs mthun sbom po tsam gyis kyang gos par mi bya ba'i sdom sems shin tu brtan par bya'o/__/gang tshe nyin mtshan cha drug gang yang rung ba'i nang du bsngo bgrang byed pa'i 'du shes rmongs te brjed par gyur na/_dran shes kyi sgo nas bsngo bgrang byed pa las 'das te kha na ma tho ba'i sbom po zhes pa 'byung zhing*/_sngo bgrang dran shes ma byung bar thun tshod kyi cha drug ka'ang 'das na sbom po drug tu 'phel bar 'gyur la/_de ltar 'phel ba'i nyin zhag de'i khongs su dran shes ma slebs te phyir bcos pa'i thabs ma grub na/_zhag phyi ma'i skya rengs dang po 'char ba dang*/_nyes pa sbom po bcu gnyis dag tu 'gyur bar bshad pas nyin zhag re bzhin 'phel 'gyur la gzhig ste gzab par bya'o/__/yan lag gi dam tshig la'ang de yis 'gre shes par bya'o/__/thog mar dus 'khor/_gshed dmar/_dgra nag sogs bla med rgyud sde spyi'i nyams len la gces pa'i chings chen po yin pas/_rtsa ltung bcu bzhi'i rab dbye la 'di ltar brtags par bya'o/__/yul khyad par gyi dbang du byas na rang gi dang po dbang thob slob dpon smos ci dgos/_sngags rgyud tshig bcad gcig pa yan chad kyi don phan sems kyis ma nor bar bkral nas bslab pa dang*/_sgom byung gi gnad rdo rje theg pa'i lam gyi man ngag zab mo'i khrid tshul bzhin du ston pa ste gsum la/_byang chub snying po'i bar du chos kyi lam ston du 'brel ba'i phyir zhabs tog rnam pa gsum gyi sgo nas g.yo zol med par bsnyen bkur dgos pa de'i khur bor ba dang*/_zhe sdang phrag dog kun slong ngan pa sogs kyis brnyas shing smod par byed pa ni/_mtshams med lnga bas kyang thu ba yin la/_bshags sdom gyis sor chud par mi byed pa de la/_sngags kyi dngos grub lta ci thar pa yod pa ma yin te mar gyi zang thal du 'gro ba yin no/__/gnyis pa so byang sngags kyi sdom pa gsum po spyi dang*/_bye brag tu bslab pa'i gnas rnams bde bar gshegs pa'i gnang bkag mtshams las 'das pa dang*/_de bzhin mtshan nyid ldan pa'i bla ma yi gdul bar bya ba'i yul/_'dul ba'i dus tshod dang*/_dbang po dang*/_skal pa'i rim pa sogs la dgongs te snga phyi 'gal ba lta bu dang*/_gnas skabs mi 'tshams pa lta bu dang*/_chos dang chos mi mthun pa 'dra ba ci byung yang dgongs gzhi dang dgos pa khyad par can yod do snyam du gsung sna khrid na phyis de'i dgos pa shes shing don dang ldan par 'gyur la/_de ltar min na mi rung snyam pa'i sgo nas bka' la khyad du bsad mi rung la/_de khyad du bsad na gnyis pa nyams pa yin no/__/gsum pa yul ni dbang gral gcig tu pha ma gcig pa'i spun bzhin 'dres pa'i mched la ku re yan chad zhe sdang phrag dog 'khon 'dzin gyi bsam pas skur pa 'debs pa dang*/_mi bkur zhing brnyas pa byas pa la sogs pa kun dkris tshang na de ltung ba 'gyur tshul/_sangs rgyas ye shes zhabs kyi rim pa rnam par bzhag pa las/_dkyil 'khor slob dpon rig ma gcig_/dbang bzhi dag gi bye brag gis/_/nye dang khyad par bye brag go_/zhes dang*/_shAn+ti pas kyang*/_spun zhes bya ba ni gang dang slob dpon gcig la dkyil 'khor du dbang thob pa ste/_de la phrag dog gi dbang sogs kyi rgyus skyon rnams brjod par mi bya'o/__/zhes sogs snga phyir byon bzhugs rnams kyi dbye srol mkhas pa rnams kyis dmigs kyis bsal bar mdzad na yang*/_de shin tu gnyan pa tsam las gzhan bsrung dgos te/_de yang mtha' yas pa'i sems can thams cad bde gshegs snying po'i rigs gcig gis bsdus pa'i spun yin pa'i phyir spyi'i mched dang*/_bstan sgor zhugs so 'tshal chos brgyud gcig pa ring ba'i mched dang*/_gsang sngags sdom par dam tshig gcig pa nye ba'i mched yin pas/_de rnams kun la'ang bsrung dgos pa mtshungs te/_gsal bkra las/_mtha' yas sems can rang rig phyir/_/gang dag bdag las gzhan med cing*/_/bde gshegs snying po'i spun yin phyir/_/ma 'ongs sangs rgyas rang bzhin na/_/spyi yi mched de pha tshan bzhin/_/sangs rgyas chos zhugs ring ba dang*/_/lta spyod mthun pa nye bar bshad/_/pha gcig dam tshig nang 'dres pa/_/zhes so/__/bzhi pa bsam pa ngan zhing sbyor ba rtsub pas kun la gnod 'tshe byed pa'i sems can zhig mthong ba'i chos tshe 'di rang gi sngon las kyis lus sems sdug bsngal gyis mnar bar gyur pa de la dga' ba bsgoms nas sems can gcig la'ang byams pa'i sems gtong ba de ni/_byang chub sems dpar nyes pa rab tu lci ba yin na/_sems can gzhan bde ba dang bral bar 'dod pa de la gsang sngags kyi rtsa ltung 'byung ba smos ci dgos/_lnga pa gzhan don du byang chub don du gnyer ba'i dam bca'i bsam pa dang 'gal ba'i byang chub sems zur gnyis gang rung nyams te spangs pa'i blo skyes pa'i mod la smon sems rtsa ba nas gtong ba'i phyir/_theg chen mdo sngags kyi lam gyi rtsa ba byang sems yin pas de btang ba tsam gyis kun dkris tshang ba'i pham par 'gyur ba yin la/_yan lag gzhan tshang mi dgos so/__/gnang ba'i skabs bdun ni/_gsang ba'i dbang dang gsum pa dang*/_/ro mnyam pa dang lha mchod dang*/_/rigs rgyud spel dang ril bu dang*/_/'chi ltas brtags pa'i dus yin no/__/zhes bdun po'i skabs ma gtogs par chags sems kyi kun slong gis khu ba gtan nas nyams rung ba min pa la/_der khu ba phyung na pham ltung ngo*/_/drug pa ni spyir theg pa phyi nang gi phyogs la lta ci/_mu stegs pa'ang mi smod par gsungs na nyan rang byang sems te theg pa gsum gang rung la ltos pa'i rgyal ba'i bka' mdo sngags kyi tshul mtha' dag dang*/_ston pa po'i slob dpon sogs la 'phya smod kyis dpyas te brnyas shing*/_'di 'dra ba ni ston pas ma gsungs/_bka' min/_lam rnam dag min no zhes smra ba dang*/_gzhan yang las phran tshegs dang*/_las bzhi dang*/_dngos grub gnyis kyi rgyur rung ba'i dag snang dang*/_bka' gter gyi phyogs su gtogs pa'i sngags chog dang*/_man ngag dang*/_khrid sogs dang*/_mdo sngags kyi dgongs 'grel bstan bcos rgya bod kyi mkhas grub rnams kyis gsungs pa gzhan thams cad rgyal ba'i bka' dang dgongs pa mthun zhing rjes su gnang ba'i bka' dang*/_sku gsung thugs yon tan phrin las sogs kyi byin gyis brlabs pa'i bka' dang dbyer med kyang bka' ru ma bltas te brnyas na'o/__/bdun pa gsang sgrog ni/_dbang gi cho ga ma byas pa/_rjes gnang tsam yang ma thob pa la bskyed rdzogs ston pa dang*/_cho ga ma rdzogs te dbang gong ma ma thob pa la rdzogs rim ston pa dang*/_nyams te rtsa ltung phyir mi 'chos shing khe nyen la yid mi ches pa dang*/_snod ngan te dbang thob kyang gsang sngags zab mo'i lta spyod la skrag pa'i rigs dang*/_sngags kyis 'dul ba'i dus kyis bskal te zab mo ston pa'i skabs su ma bab pa dang*/_gnas kyis bskal te dgag bya dmigs bsal yod pa la/_gsang sngags rdo rje theg pa'i thun min zab mo'i don dang*/_nyams len gyi dgongs pa dang*/_spyod pa rmad du byung ba 'di zhes khrid kyi sgo nas gsang ba bsgrags pa ni dmigs bsal te rtsa ltung dngos gzhi yin gyi/_gzhan du rig gtad dang rjes gnang bzlas lung tsam gyis kyang*/_gsang sgrogs du 'gyur bar ngos 'dzin yod na'ang 'dir ni snod la brtag par gces te rtsa ltung du 'gyur ba'i phyir ro/__/brgyad pa gzugs sogs phung po lnga ni rnam snang la sogs rgyal ba rigs lnga dang*/_'byung lnga yum lnga dang*/_de bzhin du skye mched rnams sems dpa' sems ma sogs lha skur ye nas gnas pa mi shes par/_kun 'byung gis bskyed pa'i sdug bsngal gyi bden pa'i rang bzhin du mngon par sgrub par byed pa'i theg pa 'og ma'i rtog ge'i blos gzhal te/_brnyas sems kyis yan lag gtub pa dang*/_dug dang g.yang sar mchong ba sogs dang*/_smyung gnas sogs dka' thub mthu yis lhag par gdung bar byed cing 'du shes log ste brnyas sems mthar thug skyes te kun dkris tshang na'o/__/dgu pa chos rnams rang bzhin gdod nas dag cing bsam gyis mi khyab pa'i stong nyid zung 'jug gi don sgrib pa thams cad dang bral ba'i sangs rgyas kho na'i spyod yul nyid yin gyi/_de las gzhan sems can gyi khams bde gshegs snying po dang 'brel bar bzhugs pas glo bur gyi dri ma dag ma dag tsam las sangs rgyas sems can dbyer med pa'i don gsungs pa la/_byis pa rnams skrag pa spangs te lam la spro ba bskyed phyir rang bzhin med pa tsam la dgongs nas gsungs pa'i phyir ldem dgongs su bzung ste the tshom zos nas/_yang dag pa'i lam de la dkri bar spangs ba'i blo skyes na kun dkris tshang ba'o/__/bcu pa gdug pa can mi bsgral ba'i ltung ba de la spyir dkon mchog gsum dang*/_bye brag rang gi bla mar smod pa dang*/_thabs sna tshogs kyis lung rtogs kyi bstan pa 'jig par byed pa sogs khongs nas dam tshig nyams kyang mi gso zhing nyams pa'i spyod pa mi gtong ba dang*/_sngags kyi theg par zhugs pa las slar log ste khyad gsod byed pa dang*/_gsang sngags kyi chos la 'khu ba dang*/_sngags spyod la 'du bar mi dbang yang rku thabs sam shed spyod kyis 'ong ba dang*/_sems can yongs la 'tshe ba dang*/_dam tshig can la dgra byed pa dang*/_mi dge ba kho nar spyod cing 'jug pa ngan pa'i ngang tshul can te sdug bsngal gyi rgyu la spyod pa dang*/_'bras bu ngan song gsum gcig tu brtsi ba ste/_gsal bkra las/_dkon mchog_sangs rgyas sku gzugs yan chad/_chos lung rtogs/_dge 'dun ser gos byon pa yan chad dam/_slob dpon sku dgra slob dpon la 'tshe ba ni/_rgyal bstan yongs rdzogs kyi mnga' bdag slob dpon yin phyir gnyis/_/dam nyams log dang 'khu ba dang*/_/'du bar 'ong dang yongs la gnod/_/dam dgra ngan pa'i ngang tshul can/_/ngan song gsum dang bcu po ni/_/rnal 'byor kun gyis dang du blang*/_/zhes nus pa thob pa'i rnal 'byor pas drag shul gyi cho ga yi sgo nas sgrol ba'i las mngon du spyod pa'i yul te/_de rnams ni mi bsgral la bsran cing bzod nas de la yi rang ba'i sems kyis spyod lam 'dris shing*/_phan 'dogs pa'i bshes su sbrel nas lus ngag gis byams par byas pa'o/__/bcu gcig pa ni/_ming chos kyi dbyings zhes 'dra dpe mtshon brda sogs dang bral zhing*/_tha snyad las 'das kyang chos nyid de kho na nyid la tha snyad pa'i blo tshad mas stong dang bdag med sogs gzhal kyang*/_chos kyi bdag med ni so so rang rig pa'i ye shes kyi spyod yul las tha snyad pa'i blo'am shes pa dang rdzas 'gal ba yin bzhin/_rtog dpyod kyi rig pa rnon pos phung sogs chos rnams stong pa nyi tshe bar gnas lugs su rlom zhing lta ba mchog tu 'dzin pa'i blos/_skye ba med pa'i grub mtha' chos nyid bsam gyis mi khyab pa'i don rtog pa rang mtshan pas rlom ste 'jal ba'o/__/bcu gnyis pa ni sngags kyi snod rung man ngag 'dzin pa la dbang ba'i gdul bya'am/_min kyang rang bzhin du chos la dad pa dang*/_'dun pa dang*/_yid ches te dad pa gsum dang ldan pa la/_des don du gnyer ba'i chos de ston nus bzhin du le lo sogs kyi dbang gis mi ston pa tsam ma yin par/_g.yo sgyu sogs kyi kun slong ngan pas gzhan de'i don du gnyer bya de la 'gal tshig smras te sems sun phyung nas/_dad pa dang*/_'dun pa phyin ci log tu skyogs pas chos de la dad 'dun log cing kun dkris tshang bar gyur pa'o/__/bcu gsum pa dus tshod 'brel ba'i spyad bya'i dam rdzas gsang sngags dang 'brel ba'i rigs sha lnga dang*/_bdud rtsi lnga sogs la rang rgyud du bltas nas/_dri nga zhing*/_ro mi zhim pa sogs la la spong zhing*/_de las ldog pa la la dag ni sred zhen gyis bsten pa dang*/_chos nyid mnyam pa nyid kyi don rtogs pas ye shes kyi rgyan du blang dor med par rol pa'i sngags kyi brtul zhugs ji lta ba bzhin/_lta sgom gyi stobs kyis nyams 'og tu ma chud par nyan thos kyi spyod pa phyogs gcig par zhen pa'i mchog 'dzin gyis mi bsten pa'am/_lta dgongs kyi gdeng med bzhin bab col du spyod pa ste mtha' gnyis mal du 'khyams pa dang kun dkris tshang ba'o/__/bcu bzhi pa ni rnal 'byor ma sogs 'jig rten las 'das pa'i ye shes kyi mkha' 'gro ma dag la smad na/_yo ga dang bla med gnyis ka'i rtsa ltung du gsungs la/_ma mo mkha' 'gro la sogs 'jig rten gyi tshul bzung nas legs nyes kyi stangs 'dzin cing dam tshig gi rjes gcod pa'i sngags kyi rnal 'byor ma rnams ni 'khor 'das kyi so mtshams 'dzin pa gnas dang zhing las skyes pa'i ye shes dang 'jig rten gyi mkha' 'gro ma rnams la smod pa dang*/_'byung ba lnga yi khams la yum lnga yi rang bzhin du ma shes nas rang rgyud par bltas te snying nas smod par byed pa dang*/_spyir bud med thams cad shes rab kyi rang bzhin dang*/_khyad par du bde chen lhan skyes ye shes skyed pa'i zab mo'i dbang gi rten gyur bud med smod cing kun dkris tshang ba'o/__/rtsa ltung bcu bzhi'i yan lag sdom pa gtong byed kyi pham pa min yang*/_dngos grub thob pa la gegs su che ba'i sbom po brgyad yod de/_dbang gis rgyud ma smin pa dang*/_dam tshig sdom pas rgyud ma sbyangs pa'i tha mal du gnas pa'i bud med rig mar brten pa dang*/_rgyud las gsungs pa'i mtshan nyid ma tshang zhing bsten byar 'gal ba'i dran pa'i khron pa ste mkha' gsang nas/_bde stong gi ye shes bskyed pa'i cho ga ji lta ba ma yin bzhin pas ril bu'am bde ba skyed pa'i rgyur bdud rtsi ste dmar cha rlung stobs kyis len pa'o/__/dbang ma thob pa dang*/_lhag par gsang sngags kyi chos la dad pa med pa'i rigs la/_yi dam lha yi sku gzugs dang*/_rgyud lung man ngag gi sgrub thabs glegs bam/_rdor dril sogs phyag mtshan/_bca' ba'i phyag rgya pad kor sogs dgos med du ston pa dang*/_tshogs kyi 'khor lo sogs gsang sngags kyi cho ga'i tshogs gral du 'dus pa'i dus na/_bla ma'am rdo rje spun la 'thab rtsod dang*/_bab col du dran shes ma bsten par mtshar gtam sogs kyal kas bsam gtan gyi brtul zhugs tha mal du sbyar nas g.yeng bar byed pa'o/__/snod rung dad pa dang ldan pas dam chos 'dril ba la/_de'i don shes bzhin du de las 'gal ba'i snyon dor te/_de las gzhan don med pa zhig lan du ldon pa'am smra ba'o/__/sngags kyi lta spyod la skur zhing nyams sad pa ste tshod lta ba'i nyan thos dngos sam rtog ge pa'i nang du zhag bdun longs par bsdad pa dang*/_sngags kyi rgyud sde'i don dang*/_phyi nang gsang ba'i de kho na nyid kyi cho ga mi shes bzhin du/_bdag rdo rje 'dzin par rlom nas nga rgyal gyis gzhan mgo skor ba'i rdzun dang 'grogs pa'o/__/dbang bskur tsam thob kyang sngags kyi lta dgongs zab mo la ha cang mi dad pa'i the tshom can tshogs bshad tsam bstan bya'i yul de la slar yang gsang ba'i don man ngag slob bshad du 'chad pa ste grangs brgyad po 'di ni/_klu sgrub kyis bsdus pa de bzhin du cha mthun slob dpon dpa' bo dang*/_rnal 'byor ma lak+Sh+mI ka ra te phun tshogs 'byung gnas kyis sbom po brgyad 'dra ba las bdud rtsi len pa dang sngags par rlom pa gnyis po de las don gzhan pa/_grangs dus mtshan ma'i bsnyen pa gang rung gis lha'i rnal 'byor dag par ma byas bzhin du dbang bskur ba dang*/_rab gnas sbyin sreg sogs dkyil 'khor gyi bya ba la zhugs nas slob ma 'khor du bsdu bar rings pa ste sngas pa dang*/_tshogs 'khor gyi dus las gzhan du yang phyi dro'i kha zas sogs so byang skabs kyi bcas pa la dgos pa chen po yod pa mi shes par khyad gsod med kyang*/_ji mi snyam du 'da' ba yi sbom po rnams kyis kyang bdag nyid kyi bslab pa sun 'byin te skyon can du 'gyur na/_dngos grub 'phrog ste gegs byed pa'i rgyur 'gyur bar gsungs pa'i sbom po de rnams la'ang brtag par bya bar rigs so/__/'di ltar rnal 'byor bla med rgyud sde thun mong gi_/rtsa ltung bcu bzhir b+ha wi lha ste slob dpon dpa' bos bsdus pa/_bla med kyi rgyud sde kun la khyab cing gsar rnying thams cad la yongs su grags pa ste/_gzhan du bya spyod rnal 'byor gyi rgyud sde bzhi po so so'i rang lugs kyi rtsa ltung bcu bzhi'i grangs nges pa yod de/_'di ltar dus kyi 'khor lo dang*/_gsang ba spyi rgyud/_rnam snang mngon byang*/_de nyid snang chen sogs las gsal por gsungs pa rnams kyang nges par bya'o/__/rnal 'byor la brtson pa dang ldan pa rnams ni 'chi ba'i rkyen la bab pa'am srog gtong dgos kyang sla ste/_dus rtag tu dam tshig mngon lkog thub pa zhig bsrung bar ma byas na/_sngags lam la zhugs shing spyod pa'i skyes bu dam tshig nyams shing phyir ma bcos na sbrul smyug dong du bcug pa bzhin du ngan song dmyal gnas su 'gro ba dang*/_dam tshig rnam par dag na ring mtha' skye ba bcu drug gam nye ba tshe gcig nas sangs rgyas 'grub pa dang*/_gnyis po de las 'gro sa gsum pa med do/__/rgyu mtshan de nyid kyi phyir na ltung ba byung na bdag nyid 'gyod pa drag pos sun phyung ste bsam sbyor gnyis ka'i nyes ltung la smad nas/_phyir bcos thabs la bshol med par de ma thag tu 'bad par bya'o/__/khyad par rtsa ltung dang po slob dpon la smod pa ni nyes pa shin tu lci ste/_sgyu 'phrul drwa ba'i rgyud las/_bla ma la ni smod pa dang*/_/thugs dkrugs pa yi nyes pa ni/_/phyi yi rgya mtsho chen po las/_/chu de skra yis gtor gyur pa/_/de yi tshad du sdug bsngal myong*/_/rdo rje'i dmyal bar grags pa yin/_/zhes so/__/gal te ltung ba byung bar gyur na/_snying nas 'gyod pa drag po'i sgo nas bla ma la dad mos kyis bsnyen bkur ba dang*/_'khor gsum yongs dag ste yod dgu thams cad 'bul nas thugs zin par bya zhing*/_de'i rjes su dbang bskur bskyar nas zhus te sdom pa gsor gzhug cing*/_bla ma mi bzhugs pa'am phyogs su nye bar rang mi gnas pa dang*/_lam 'phrang gi 'tshe bas bkag pa lta bus mi nus na/_bla ma dkyil 'khor gyi khyab bdag tu shes pas gsal gdab la bdag 'jug lan grangs mang du blangs nas sor chud par bya'o/__/de bzhin du gzhan sbom po gtsor gyur pa'i nyes ltung rnams la khrel yod dang ngo tsha'i rten du gal te bla ma med par gyur na sngags kyi sdom pa yang dag dang ldan pa'i mdun bshags par bya ste/_snying po rgyan las/_ltung sogs nyes pa'i rim pa las/_/dang po bdag sems sun phyung ste/_/yul mdun snyan gsan dbab nas kyang*/_/gsum blang gsum 'gal bshags pa dang*/_/zhes so/__/de yang dpa' bo'i ston mo sogs kyi rjes phyag dang spyod lam dul bas/_rgyal sras rig pa 'dzin pa chen por mkhyen par gsol nas/_rang gi gsang ba'i ming smos nas/_bdag ma rig pa dang*/_nyon mongs pa'i dbang du gyur pas rig pa 'dzin pa'i sde snod chen po'i tshul khrims kyi bslab pa'i gzhi las rdo rje theg pa'i 'dul ba dang*/_'gal ba'i nongs pa bla ma la smod pa la sogs pa rtsa ba'i ltung ba bcu bzhi dang*/_yan lag sbom po'i rnam grangs brgyad las 'di dang 'di byung bas/_rgyal ba sras dang bcas pa rnams dang*/_rig pa 'dzin pa chen po'i spyan sngar 'chab ste sbed cing gsang na ni/_bdag nyid nyes ltung dang bral ba'i bde ba la reg pa'i gnas skabs 'byung bar mi 'gyur bas/_'chab pa med par snying nas bshags shing phyin chad legs par sdom par bgyi'o/__/zhes gsol nas/_bshags yul gyis/_de la khyod kyi nyes ltung 'di rnams la nyes par mthong ngam zhes dris pa na/_rang gis mthong lags brjod/_bshags yul gyis phyin chad legs par sdom par byed dam dri ba na/_rang gis kyang sems brtan pa'i dam bca' dang bcas chos bzhin 'dul ba bzhin du spyi bos nod/_ces mthong sdom dri ba dang bcas pa lan gsum brjod la/_rjes su bshags yul gyis thabs yin no/__/zhes nyes ltung dag pa'i thabs yin par bstan pas/_rang gis legs so zhes nges shes bskyed par bya'o/__/gal te de lta bu'i phyir bcos 'gyangs na/_zhag re re bzhin du nyes ltung gong 'phel du 'gro bar 'gyur te/_snying po rgyan gyi rgyud las/_rtag tu bag med par gnas dang*/_/nyes pa chung ngu phra mo yang*/_/sbrul gyi mche bas btab bzhin du/_/lus ngag sems ni nyams par byed/_/ces so/__/de ltar 'phel bar 'gyur ba de yi gnyen po ru dmigs nas nyin mtshan drug gam gsum sogs su gsang chen rigs gcig gi rdor sems spyi bor bsgom ste stobs bzhi tshang ba'i ngang nas/_yig brgya nyer gcig brgya stong sogs ma yengs par bzlas pas rtag tu bshags shing rtsa ltung bcu bzhi'i bsngo bgrang brjod pa'i bshags tshig b+ha wi lhas mdzad pa sogs kyang gdon par bya'o/__/de yang yi ge brgya pa 'don tshul ni/_sbom po'i 'grel ba las/_de'i me'i sar ming spel bar bya'o zhes pas/_sarba sid+d+hi me che ge mo pra yats+tsha zhes gdon pas ltung ba 'phel bar mi 'gyur ba snying po rgyan las gsungs te/_rdo rje sems dpa' la dmigs te/_/yi ge brgya pa cho ga bzhin/_/nyi shu rtsa gcig re re bzlas/_/ltung sogs byin gyis brlabs gyur pas/_/'phel ba ru ni mi 'gyur zhes/_/grub pa mchog rnams kyis bshad pas/_/thun mtshams su ni sbyang bar bya/_/'bum phrag du ni bzlas gyur na/_/rnam par dag pa'i bdag nyid 'gyur/_/zhes so/__/gsar rgyud rnams dang thun mong du ma gyur pa'i khyad par mdo dgongs pa 'dus pa dang*/_rgyud sgyu 'phrul drwa ba dang*/_sems sde rdzogs pa chen po ste snga 'gyur rgyud sde gsum po'i ring lugs kyi bsrung bya dam tshig gi rim pa ni/_zhes pa'o/__/dang po spyi mdo dgongs 'dus kyi lugs ni/_spyi mdo dgongs pa 'dus par/_sku dang gsung thugs rdo rje yi/_/bsrung dang spyad dang yid 'ong dang*/_/mi 'dor shes bya bsgrub pa dang*/_/zhes pas rtsa ba'i dam tshig gsum ni/_bsrung ba'i yul lha dang bla ma gnyis su med pa gtso bo yin la/_srung tshul phan 'dogs pa dang*/_gnod pa spang ba'i gzhi'i gtso bo lus yin pas/_sku yi dam tshig du bla ma dang lha la gus par blta zhing*/_mched dang lcam dral gyis mtshon pa'i 'gro ba thams cad bla ma'i sku yi gdul bya yin pas gnod pa spang ba dang*/_rnam par smin pa'i lus kyi snang zhen bskyed rim gyis sbyong bar byed pa'o/__/dge mi dge'i rnam 'gyur thams cad ngag la brten nas bskyed pas/_gsung gi dam tshig tu sngags dang phyag rgya rgyun mi gcod pa dang*/_ngag gi nyes pa spang phyir bla mas ci gsung bsgrub pa dang*/_mched lcam gyi ngag mi gcog pa dang bcas pa'o/__/'khor bar bskyed pa'i rgyu'i gtso bo yid yin pas/_thugs rdo rje yi dam tshig tu yid kyi nyes pa spang zhing gsang ba gzhan la mi spel ba dang*/_byang chub kyi sems rnam pa gnyis bskyed cing bla ma dang thugs yid bsre ba dang*/_ting nge 'dzin gyi sgo du ma la spyod pa ste/_gsal bkra las/_rang lus rgyal ba'i phyag rgya che/_/sems can khams kyang der shes shing*/_/snang stong gnyis med rdo rje'i sku/_/byas mthong thos pa thams cad kyang*/_/sems phyir gang yang byas snang med/_/dran dang shes bzhin sngon btang la/_/dus gsum rgyun du ma dran na/_/theg chen sngags par ci yis chud/_/ces so/__/de ltar rtsa ba'i bsrung bya gsum dang*/_yan lag gi dam tshig thabs ldan du spyad par bya ba ta na sgrol/_ga na sbyor ma byin pa rdzun ngag 'khyal te lnga dang*/_yid 'ong ste spang byar mi blta ba lam du byed pa nyon mongs lnga dang*/_sme bar bltas nas mi 'dor ba dri chen _dri chu _maM sa _rak+ta _zil pa ste bdud rtsi lnga dang*/_lta bas lhar shes par bya ba phung lnga rigs lnga/_'byung lnga yum lnga/_yul lnga sems ma lnga/_dbang lnga sems dpa' lnga/_kha dog lnga ye shes lnga phung po 'byung yul sogs lnga dang*/_bsgoms pas dbyer med du sgrub par byed pa de bzhin gshegs pa'i rigs/_rdo rje/_rin chen/_pad+ma/_las kyi rigs te lnga'i dbye bas nyi shu rtsa lnga dang*/_rtsa ba'i gsum ste nyer brgyad do/__/rgyud sde sgyu 'phrul gyi lugs rtsa ba'i dam tshig rnam pa lnga gsungs te/_gsang snying las/_bla med mi spong bla ma bkur/_/sngags dang phyag rgya rgyun mi bcad/_/yang dag lam du zhugs la byams/_/gsang ba'i don phyir smra mi bya/_/'di ni rtsa ba lnga rnams te/_/grub dang bsgrub pa'i dam tshig mchog_/ces dang*/_yan lag gi dam tshig rnam pa bcur bshad de/_gti mug chags dang zhe sdang dang*/_/nga rgyal phrag dog mi spong ngo*/_/dkar rtsi dmar rtsi dri sha chen/_/dag pa'i snod chu mi dor ro/_/zhes so/__/dang po rtsa ba'i dam tshig gi phyogs bshad pa la ni/_gsal bkra las/_byang sems rnam gnyis slob dpon drug_/mched bzhi sngags gsum phyag rgya bzhi/_/gsang bcu rtsa bar shes par bya/_/zhes pas/_dang po bla med mi spang ngo*/_/zhes byang chub kyi sems gnyis te/_don dam byang chub kyi sems lhag pa'i bden pa dbyer med chos sku chen po'i ngang du 'jog pa'o/__/kun rdzob byang sems de ltar ma rtogs pa'i sems can sgrol 'dod kyi lhag pa'i bsam pa ste/_yi dam gyi lha bsgom pa nyid la 'du ba'i dbang du mdzad de logs su ma gsungs so/__/de yang theg chen spyi'i lugs kyi byang sems mi gtong ba dang*/_dkon mchog la bsnyen bkur mi 'dor ba dang*/_sngags phyi pas de'i steng du rang gi lhag pa'i lha mchod cing bsgom par bstan pa de dag kyang 'dir stong nyid dang snying rje zung du 'jug pa'i ngang las rtags kyi lha sku phyag rgya bsgom pa la 'du ste/_sangs rgyas dang dge 'dun ni thabs shes gnyis su med pa'i byang chub sems kyi bye brag yin la/_chos ni de'i chos nyid yin pas/_byang chub kyi sems rin po che dang chos nyid ni kun rdzob tsam du chos can bdag nyid gcig pa dang*/_don dam spros pa nyer zhi'i rang bzhin yin pas/_zung 'jug ye shes de yi rtags kyi phyag rgya lha sku yin te/_dkon mchog 'grel las/_dkon mchog gsum gyi rang bzhin byang chub sems/_/de stsol ba'i bla ma de rtags kyi phyag rgya rgya lhag pa'i lha/_/zhes gsungs/_de ltar 'du ba'i tshul shes par byas nas bshad bya bzhi ste/_de yang*/_bla ma la bkur ba'i yul slob dpon drug ste/_gsal bkra las/_spyi dang 'dren dang dam tshig dbang*/_/nyams chag skong dang shes rgyud 'grol/_man ngag lung gi slob dpon drug_/ces pas/_kun gyi bkur gnas su gyur cing*/_rang gis kyang chos 'brel cung zad thob pa spyi'i slob dpon dang*/_rab byung gi mkhan po lta bu chos sgor 'dren pa'i slob dpon/_dbang bskur ba po dam tshig dbang gi slob dpon/_ltung ba bshags pa'i yul nyams chag skong ba'i slob dpon/_rgyud sogs 'chad pa po shes rgyud 'grol ba'i slob dpon/_khrid 'chad pa pa \u0f7c man ngag lung gi slob dpon te drug yin zhing*/_de dag las gsang sngags kyi chos bka' drin thob pa ni rdo rje slob dpon du gyur pas gnyan la/_khyad par dbang bskur rgyud bshad man ngag ston pa gsum shin tu gnyan pas de rnams mi spong zhing bkur stis ji ltar bsnyen pa'i tshul ni/_bka' drin thob tshul gyi dpe dang sbyar nas rim par/_gsal bkra las/_yul la dbang ba'i rgyal po bkur 'os dang*/_/lam 'dzud khu bo dbang nod pha dang bshags yul ma dang rgyud 'chad mig_/man ngag ston pa bas snying lhag pa'i tshul bltas te/_/zhes so/__sngags rgya rgyun mi bcad pa'i yul ni/_gsal bkra las/_rtsa ba hU~M sogs/_rgyu ma nor ba dang skyed pa rkyen dang bzlas pa las sngags dang*/_/dam tshig las dang chos dang ni/_/sku nyid phyag rgya chen po bzhi/_/zhes pas sngags gsum dang phyag rgya bzhi po rab chu bo'i rgyun bzhin nyin mtshan thun la gnas pa/_'bring zla rer dus drug gam bzhi sogs dang*/_tha mas kyang lo zla dus mchod kyi rgyun mi gcad pa dang*/_mched la byams yul ni sngar spyi yi mched sogs/bzhi po yin la/_de rnams las kyang*/_yang dag pa'i lam du zhugs pa'i mched phyi ma gsum dang de'i nang nas kyang 'dres pa'i mched lhag par gnyan par shes pas/_rim pas de rnams la rtag tu mi 'bral zhing phan 'dogs pa'i lhag bsam gyis brtse zhing gdung bas byams par byed pa ste/_rngam glog las/_rdo rje'i spun la gdung sems kyang*/_/'dres dang ma 'dres yongs kyi spun/_/yang dag lam du zhugs pa la/_/rngan skyon dang bcas pa'i sems tsam yang*/_/rtag tu spang bar bya ba yin/_/brtse zhing gdung ba'i shugs phyung la/_/gcig la gcig ni mig bzhin blta/_/mdor na srog la'ang mi chags par/_/spun dang ming sring dgos pa sgrub/_ci phyir rdo rje'i spun rnams ni/_/'di nas byang chub bar dag tu/_/mi 'bral 'grogs pa'i grogs mchog ste/_/me mar 'od dang sdong bu 'dra/_/zhes so/__/gsang ba mi smra ba'i yul ni/_phra rgyas las/_dam nyams de las log pa dang*/_/dam med dkyil 'khor ma mthong dang*/_'dres dang ma 'dres thams cad la/_/zhes lta ba zab mo ni theg dman sogs blo 'phang dma' ba thams cad la gsang zhing spyod pa ni ma 'dres pa thams cad la gsang ngo*/_lha yi ming gzugs sogs ma 'dres pa la bstan na dam tshig nyams shing*/_'dres pa la yang sgrub pa mthar ma phyin bar bstan na'ang dngos grub nyams par gsungs pas gsang ngo*/_/gang zhig gsang bar bya ba'i don ni/_/phra rgyas las/_spyi dang bar gsang bzhi bzhi dang*/_/'os dang gnyer gtad rnam pa bcu/_/zhes gsang ba bcu po de rnams rang rang gi yul dang dus kyi dmigs nges pas gzhan la mi bsgrags pa'o/__/de la spyi gsang bzhi ni/_gsal bkra las/_lta zab spyod pa brlang po dang*/_/lha yi ming gzugs grub rtags rnams/_/spyi gsang rnam pa bzhi yin no/_/zhes so/__/bar gsang bzhi ni/_de las/_sgrub pa'i gnas dus grogs dang rdzas/_/bar du gsang la bsgrub par bya/_/zhes so/__/gsang bar 'os pa ni/_thun mong ma yin pa'i sngags kyi spyod pa dang*/_dam tshig gi rdzas/_mched kyi ngan spyod sogs mthong thos su mi rung ba rnams dang*/_gsang bar gnyer gtad ni/_bla ma dang mched lcam gyis gsang bar bka' rgyas btab pa rnams so/__/rtsa ba'i dam tshig 'di rnams la srung tshul dang sgrub tshul mi 'dra ba cung zad re snang yang*/_byang sems dang sngags rgya gnyis bsgrub pa'i dam tshig gzhan rnams bsrung ba'i dam tshig yin la/_de yang sku gsung thugs kyi dam tshig gi dbang du byas na/_bla ma dang mched bsrung ba sku'i dam tshig_/sngags rgya gsang gi dam tshig_/gsang bcu thugs kyi dam tshig yin zhing*/_byang sems kyang der bsdu ste/_bde 'dus zhi rgyud las/_byang chub sems gsum bsgom pa ni/_/rdo rje thugs kyi dam tshig go_/zhes gsungs so/__/rtsa ba'i dam tshig de dag la dbye na/_brgya dang drug cur dbye ba'ang yod do/__/rtsa ba srung byed kyi thabs su gyur pa'i yan lag gi dam tshig ni/_mi spang ba dang*/_mi dor ba'i sde tshan gnyis su bsdu bar bya zhing*/_dang po'i phyogs la ni/_gti mug_/'dod chags/_zhe sdang nga rgyal phrag dog ste nyon mongs pa lnga mi spong ba yin no/__/de yang log pa'i dug lnga dang*/_sbas don yang dag pa'i dug lnga ste gnyis su yod/_de las log pa'i dug lnga ni nyon mongs dngos yin zhing*/_de mi spong ba'i tshul ni/_chags sogs kyi rang bzhin shes pas nyon mongs pa'i de bzhin nyid dam rang gi ngo bo ni ngo bo med pa yin la/_dper na smig sgyu'i chu la chu rags mi dgos pa bzhin/_spong byed kyi gnyen po mi dgos la/_thabs kyis zin na rna bar chu zhugs pa chus 'gugs pa'am/_rma byas dug zos pa dang 'dra bar ye shes kyi grogs su 'gyur bas rang gi gnyen por rang che bas mi spang ba ste/_rgya mtsho las/_nyon mongs lam ni dag pa ste/_/thabs kyi 'dod yon rgyan gyi mchog_/thams cad thams cad rol pa yis/_/myur du he ru ka dpal 'gyur/_/dkon mchog brtsegs pa las/_ji ltar grong khyer ser skya'i mi gtsang lud/_/de ni bu ram shing pa'i zhing la phan/_/de bzhin byang chub sems dpa'i nyon mongs lud/_/de ni rgyal ba'i chos kyi zhing la phan/_/zhes dang*/_theg bsdus las/_thabs chen rnams dang ldan pa la/_/nyon mongs byang chub yan lag 'gyur/_/zhes so/__/de ltar yin pa'i rgyu mtshan ni/_ye nas rigs lngar gnas pa'i tshul shes nas lam du byed pas/_rmongs pa'i sgrib pa dag nas ye shes lngar 'gyur te/_/dper na snum 'dod pas til mar sgrub pa lta bu'o/__/de skad du dam tshig nyer brgyad pa las/_phrag dog la sogs nyon mongs lnga rnams ni/_/ye nas rigs lnga'i rang bzhin yin pa'i phyir/_/zhes so/__/de yang*/_gti mug rnam par snang mdzad kyi dam tshig ste chos dbyings ye shes 'dod chags snang ba mtha' yas kyi dam tshig ste sor rtog ye shes/_zhe sdang mi bskyod pa'i dam tshig me long ye shes/_nga rgyal rin 'byung gi dam tshig mnyam nyid ye shes/_phrag dog don grub kyi dam tshig bya grub ye shes so/__/sbas don yang dag pa'i dug lnga ni/_/'khor 'das mnyam pa nyid du rtogs nas lta ba la phyogs ris spyod pa la blang dor gyis 'byed pa med pa gti mug_/de ltar ma rtogs pa'i sems can la thugs rjes chags pa 'dod chags/_log rtog rnams sgrol ba zhe sdang*/_mnyam nyid rtogs pas lta ba gshongs su mi 'bebs pa nga rgyal/_gnyis 'dzin gyi lta spyod chos nyid kyi klong du mi shong ba phrag dog ste 'di rnams lta ba'i ngang skyong ba la tshang bas rtag tu nyams len bya'o/__/gnyis pa mi 'dor ba'i phyogs ni/_rdo rje zil pa/_rak+ta/_dri chen/_maM sa/_dri chu ste bdud rtsi chen po lnga yin la/_de dag kyang dang du blang byar nges pa ste/_grub pa bzhi dang*/_yin pa gsum/_grub pa bzhi ni/_chos nyid ngo bos grub pa bdud rtsi lnga po chos nyid kyi ngos na gtsang rme gang du'ang ma grub pa'i chos nyid spros pa dang bral ba'i ngo bor gyur pas/_de nyid rtogs pa'i ye shes kyi rol par dang du blang bar bya ba dang*/_chos can rang bzhin gyis grub pa de dag chos can ltar snang ba'ang rang bzhin rnam par dag pa rigs lnga'i rang bzhin nyid du grub pas de ltar shes pa'i sgo nas blang bya dang*/_nus pa'i mthus grub pa de dag la brten nas mchog dang thun mong gi dngos grub thams cad bsgrub na 'grub pa'i nus pa dang ldan pa'i dam rdzas yin pas blang bya dang*/_byin gyis rlabs kyis grub pa dam tshig gi rdzas de rnams sngon dpal chen po sogs kyis dam tshig gi rdzas su byin gyis brlabs pa'i dbang gis tshul bzhin du bsten pa'i sgrub po de la ma mo mkha' 'gro thams cad 'du zhing sgrub pa'i grogs byed cing*/_dngos grub thob pa la nye bas dang du blang bar bya'o/__/yin pa gsum ni/_nad sel ba'i sman yin te/_dri chen gyis dug nad/_dri chus gag pa/_mA~M sas mdze nad/_rak+tas grang ba/_byang sems dkar pos tsha ba rnams sel lo/__/thun mong gi dngos grub bsgrub pa'i rten yin te/_dri chen gyis mthu che/_dri chus skad snyan/_mAM sas tshe ring*/_rak+tas bkrag mdangs gsal/_byang sems dkar pos mi brjed pa'i gzungs thob pa'o/__/rigs lnga ye shes lnga'i rten te/_dri chen bud+d+ha'i rigs chos dbyings ye shes/_dri chu las kyi rigs bya grub ye shes/_mAM sa rin chen rigs mnyam nyid ye shes/_rak+ta pad+ma'i rigs sor rtog ye shes/_byang sems dkar po rdo rje'i rigs me long lta bu'i ye shes so/__/de dag gis mtshon nas chos thams cad dag mnyam gyi ngo bor rtogs nas blang dor med pa'i spyod pa ni/_sangs rgyas kun gyi brtul zhugs te tshul yin pas de bzhin dang du blang nas spyod par bya'o/__/de la dbye na/_yan lag bcu po mi spang ba lnga dang*/_mi dor ba lnga/_de re re la thabs kyis zin pa'i cha dang*/_shes rab dang ma bral ba'i cha gnyis rer phye bas bcu/_de la sku gsung thugs yon tan phrin las dbye bas lnga bcu re ste brgya/_de re re la'ang shes rab thabs su ldan pa dang*/_thabs nyid shes rab dang ldan pa'i cha shas kyis dbye ba byas na nyis brgya'i grangs su nges pa ni/_rtsa ba'i dbye gzhi bcu po thabs shes kyis phye bas nyi shur bsdu ba ni/_kun gzigs rong pa'i lugs te rong zom chos kyi bzang po'i dkon mchog 'grel du gsungs so/__/de ltar dbye ba'i khungs ni/_rtsa rgyud las/_rtsa ba'i dam tshig lnga la ni/_/gcig la'ang gnyis dang bcu phrag gsum/_/yan lag dam tshig lnga gnyis la/_/gcig la'ang bcu phrag gnyis su dbye/_/zhes so/__/gsum pa la gnyis/_dang po bsrung du yod pa'i dam tshig ni/_sems kyi rang bzhin ji bzhin ngo 'phrod cing ngang skyong nus pa'i phyogs la ni/_phyi snang ba rten med du go_/nang rig pa yul med du go ba'i dus na rig pa'i gshis la spang bya gzhi la ma grub pas/_blang dor gyi dgag sgrub gang yang med par 'jog pa ni/_med pa'i dam tshig ste/_thig le kun gsal las/_rang rig ye shes chen po la/_/bsrung dang srung byed gnyis med pas/_/nyams dang ma nyams gnyis su med/_/theg brgyad bcos ma'i tshig gi grangs/_/ngas mi bsrung bas med ces bya/_/zhes pa ltar dang*/_sdom pa dang sdom min/_dngos dngos med/_skye 'gag sogs gnyis chos dang*/_rtog rlom thams cad chos nyid gcig tu gyur/_bltas pas ma mthong bas rang bzhin gcig_/tshig gis mi mtshon pas ye shes gcig gi ngang bsal bzhag med par gnas pa'i cha nas tha snyad btags na gcig pu'i dam tshig zhes bya ste/_de nyid las/_bsrung du med pa'i dam tshig las/_/'da' mi srid pa'i bsrung thabs ni/_/rang rig ye shes gcig pu la/_/gcig pu zhes su btags pa yin/_/zhes pa dang ni/_yang de ltar phyi nang yul med du rtogs pa de gcig pu'i ngang la 'jog pa'i tshe sgo lnga rang yan gyi rig pa la snyem byed kyi blo zhen mi 'jug par chos thams cad chos nyid yangs par la bzla ba ni phyal ba zhes bya ste/_kun byed las/_dngos po mi spyod ye shes ma 'gags pa/_/de la phyal ba zhes su btags pa yin/_/zhes dang ni/_gzhan yang de lta bu'i chos nyid kyi rig pa ka dag gi gdangs la mkhyen cha yon tan gyi chos rang bzhin lhun grub tu gnas pa chos can snang bzhi'i nyams len dang mi 'bral ba la lhun grub kyi dam tshig yin no zhes bya bar grags pa ste don la thod rgal snang bzhi'i nyams len min kyang ka dag gi rig pa skye 'gag dang bral ba'i snang ba thams cad ye shes kyi ngo bor lhun gyis grub phyir gzhan las btsal du med phyir de skad ces bya ste/_kun byed las/_ji ltar snang ba'i chos rnams ma lus kun/_/yid chos byang chub sems su rdzogs pa'i phyir/_/lhun gyis grub pa zhes su nga yis bshad/_/ces so/__/de ltar rnam grangs bzhir gsungs pa yang rig pa ka dag gi ngang yengs bsgom dang bral bar bzhag pa la ldog pas dbye ba tsam las ngo bo tha dad pa ma yin no/__/des na chos nyid bsam gyis mi khyab pa nam mkha' lta bu'i ngang nas spang blang gnyis ka bral bas bsrung mtshams dang bral ba'i chos nyid de la rtag tu gnas pa rnams la 'da' bar bya ba'i chos rdul tsam mi dmigs pas/_rig pa'i ngo bo'i bzhugs tshul la rtogs bya dam tshig chen po bzhi'i chings kyis bcings nas/_gnas lugs kyi gshis de las gzhan du mi g.yo ba'i don du bstan pa ste/_rin po che spungs pa las/_de dus bsrung ba'i mtshams 'das pa'i/_/dam tshig lhun grub chen po'i ngang*/_/med dang gcig pu phyal ba yis/_/rdzogs chen nyams len de yi grogs su de 'gyur ro/_/zhes so/__/tshul de ni ye nas nyams pa med pa gzung 'dzin gyis mi phyed pa'i gnas lugs don gyi rdo rje'i ngang la gnas pas snang sems thams cad la chos sku'i ye shes kyis dbang bsgyur ba'i phyir rgyal po'i lugs zhes bya la/_'og ma khyad du gsod pa'i tshig tu 'khrul par mi bya ste/_slob dpon chen po sangs rgyas gnyis pas/_rgyal po chen po nga yi gsang sngags 'di/_/lta ba chos sku dang bstun/_spyod pa byang chub kyi phyogs dang bstun nas/_lta ba'i phyogs la spyod pa ma shor bar mdzod/_shor na dge med sdig med du song nas phyis gsor mi rung*/_spyod pa'i grogs su lta ba 'brang na dngos po mtshan mas bcings nas grol bar mi 'gyur ro/__/nga yi sngags sems phyogs 'di lta ba shas che/_ma 'ongs pa na tshig gi gdeng ni shes te lta ba'i gdeng ma rnyed pa mang po zhig ngan 'gror 'gro'o/_/zhes gsungs so/__/de'i phyir nyams len la brtan pa ma thob nas/_rdzogs chen gyi chos skad mthon po 'ba' zhig gis dge sdig rgyu 'bras med/_'du 'dzi dang yul rkyen gyis mi gnod/_bsgom bya dang sgom byed med zer nas tha mal du lus pa ni bstan pa'i bla btsong zhing rang gi chos skal chad pa yin pas/_sgo gsum chos dang bstun pa'i sgo nas nyams len la rgyun du 'bad pa ni shin tu gnad che'o/__/gnyis pa bsrung du yod pa ni/_gong du bshad pa lta bu'i sgo gsum gyi spyod pa la blang dor byed pa'i bya ba la ched du ma brtson yang*/_ye bsrung chen po'i dam tshig la gnas pa'i stobs kyis kha na ma tho'i nyes pa thams cad zil gyis mnan nas/_nam mkha' la rdul gyis mi gos pa bzhin nyes pa gang gis kyang mi gos pa'i rigs rnams la de ltar chog mod/_'on kyang rang bzhin rdzogs pa chen po'i lam la gsar du zhugs pa'i las dang po pa rnams kyis rang rgyud nyes pas mi gos shing*/_nyams len rnam par dag par bya ba'i phyir/_bla ma'i bka' bzhin bsgrub cing spang gnyen gang la'ang ma zhen pa'i sgo nas nyes pa gang gis kyang mi gos pa'i thabs la dran shes bag yod dang bcas pas brtson zhing*/_gal te nyams par gyur na yang phyir bcos pa'i thabs yod de/_dper na rin chen gyi bum pa bzang po zhom yang bcos sla ba bzhin/_bla ma'i bka' bzhin phyir bcos na sor chud sa phyir 'bad pas bsrung ba gal che ste/_'jam dpal bshad rgyud las/_dbang rnams 'dzin pa'i rten dag ni/_/dam tshig yin te nyams na yal/_/dper na gyang dang ri mo bzhin/_/zhes pa ltar gzhi dam tshig ma dag na rtogs pa bzang po rgyud la skye ba ni gnas med do/__/dbye ba'i dbang du byas na/_rang shar las/_'bum sder gsungs pa'i dam tshig rnams/_/mdor bstan legs par yid la zungs/_/de yang mdor bstan 'di lta ste/_/rtogs bya lta ba'i dam tshig dang*/_/spyod pa rgyun gyi dam tshig dang*/_/bsgrub pa spyi yi dam tshig dang*/_/thun mong spyi yi dam tshig dang*/_/sku gsung thugs kyi dam tshig dang*/_/yan lag grangs kyi dam tshig dang*/_/gal mdo nges pa'i dam tshig go_/ces bdun du gsungs pa de rnams kyang bsdu na gsum du 'dus te/_zhi rgyud las/_so sor thar dang byang chub sems/_/bya spyod rnal 'byor rgyud rnams las/_/bsrung bar bya ba gang gsungs pa/_/thun mong spyi yi dam tshig yin/_/zhes so/__/gnyis pa khyad par gyi dam tshig la sems phyogs 'dir spyi mdo dang phyogs mthun sku gsung thugs gsum dbye ba'i sgo nas/_dam tshig rnam par bkod pa las/_sku dang gsung dang thugs dag las/_/re re la'ang dgu dgu ste/_/'jug dang las kyi rnam pas bshad/_/ces pa'i grub mtha' ste tshul nyi shu rtsa bdun du dbye bar bya ste/_de yang rang bzhin rdzogs pa chen po'i lta sgom phyin ci ma log par skye ba ni bla ma la rag las te dang po rtogs pa ngo sprad/_bar du gegs sel bogs 'don/_tha ma chos nyid zad sar skyel bar byed phyir/_bla ma ni dus gsum rgyal ba kun 'dus rigs dang dkyil 'khor rgya mtsho'i khyab bdag rdo rje gsum gyi ngo bor bzhugs phyir/_bsrung bya'i rtsa ba ni bla ma'i sku gsung thugs gsum yin la/_gsum po re re la'ang phyi nang gsang gsum re ste phye bas gsang gsum gyi dam tshig gsum tshan gsum gyi dbye bas nyer bdun no/__/dang po sku'i phyi yi gsang ba'i dam tshig la/_sems can yin no cog srog gcod spang ba dang*/_phyi yi nang la mi tshangs pa spyod pa spang ba dang*/_phyi yi phyi la brku ba spang ba rnams so/__/de bzhin sku yi nang gi phyi la pha ma spun sring rang lus rnams la smod pa dang*/_nang gi nang la theg pa che chung gi chos rnams la 'jug par 'dod pa dang*/_zhugs pa dang*/_zhugs te gzugs brnyan 'dzin pa'i gang zag rnams la smod pa dang*/_nang gi gsang bar/_rang lus lha yi dkyil 'khor dug mtshon sogs kyis gnod pa byed pa rnams spang ba'o/__/'di yang rtsa ba'i dam tshig rang lus zhes pas bsdu dgos par snang ngo*/_/sku yi gsang ba'i gsang bar bla ma'i grib ma 'gom pa dang*/_spyan sngar mtshon cha 'dzin pa dang*/_rkang lag rkyong ba dang*/_sgeg chos byed pa sogs ma gus pa'i bya ba byed pa dang*/_gsang ba'i nang la bla ma'i yum la gtses ba dang*/_gsang ba'i phyi la rdo rje'i spun dang sring mo rnams kyi lus dang rgyan sogs la smad pa dang*/_de dag la brdeg gam brdeg par brtsam pa'am/_brdeg tu bcug kyang rung ste de rnams spang ba'o/__/gsung gi phyi nang gsang gsum la/_dang po gsung gi phyi la rang 'dod kyis 'gro ba phal la'ang rdzun smra ba dang*/_phyi yi nang la pha rol dbye ba'i tshig phra ma smra ba dang*/_phyi yi gsang bar gzhan gyi zhe gcod pa'i tshig rtsub mo rnams spang ba'o/__/gsung gi nang gi phyi la chos smra ba rnams dang*/_nang gi nang la don sems shing sgrub pa rnams dang*/_nang gi gsang ba la gnas lugs zab mo'i don bsgom pa rnams la gshe zhing skur pa 'debs pa rnams dang*/_mi bkur zhing brnyas pa rnams spang ba'o/__/gsung gi gsang ba'i gsang ba la/_bla ma dang*/_gsang ba'i nang la bla ma'i yum dang*/_gsang ba'i phyi la rdo rje'i spun sring ste de rnams la smod pa dang 'di gyis shig ces pa la sogs pa'i tshig rnams dang du mi len cing khyad du gsod pa rnams spang ste mi brnyas pa'o/__/thugs kyi phyi nang gsang ba'i dam tshig gsum la/_dang po phyi'i phyi la brnab sems/_phyi yi nang la 'gro ba phal pa yan chad la gnod sems/_phyi yi gsang bar grub pa'i mtha' rnams la log lta ste yid kyi rnam pa gsum spang ba dang*/_nang gi phyi la spyod pa log pa bag med pa dang tho co dang*/_nang gi nang la sgom pa log pa bying rgod dang gol sgrib dang*/_nang gi gsang ba la/_lta ba log pa rtag chad dang mthar 'dzin rnams spang ba'o/__/gsang ba'i gsang ba la bla ma la mos gus dang*/_gsang ba'i nang la yi dam gyi lha dang rdo rje'i mched spun sogs dang*/_gsang ba'i phyi la/_rdzogs pa chen po'i lta sgom spyod pa gsum ste/_de rnams nyin mtshan thun drug la sogs pa dus kun tu mi sems pa rnams spangs nas sems shing dran par bya ba'o/__/'di dag gi don ni rgyud kyi gnas ji lta ba bzhin no/__/de dag kyang mdor bsdu na da res rang re rnams 'khor ba las sgrol ba'i lam mkhan bla ma yin pas de'i sku gsung thugs dang 'gal bar mi spyod pa'i don du 'dus pa yin te/_dam tshig mchog gi rgyud las/_lus dang ngag dang yid stobs kyis/_/ci nus pa yis bla ma la/_/bsnyen bkur sri zhu sus byas pa/_/'di la mthu dang nus pa'i tshogs/_/byin rlabs thogs pa med par 'byung*/_/zhes so/__/sngags bla med kyi rnal 'byor pa rnams kyis chos rnams dkyil 'khor gsum gyi rang bzhin du rtogs nas snang spyod thams cad la kun tu bzang po'i phyag rgyas btab pa las mi 'da' bar spyad na phal pa rnams 'khor bar 'ching byed kyi las dang nyon mongs gang gis kyang de la mi gos par ma zad/_rang gi tshogs rdzogs shing phan pa rlabs po che sgrub par byed pas/_de lta bu'i thabs kyi khyad par rmad du byung ba'i dbang du gyur pa yan lag gi dam tshig nyi shu lnga/_ta na sgrol ba/_ga na sbyor ba/_ma byin len pa dang*/_rdzun dang*/_kyal pa'i tshig ngag 'khyal/_de dag ni lus ngag gis spyad bya lnga po ste de ni rtogs goms kyi gding dang ldan pa dang*/_gzhan don 'gyur nges su gnang ba dang bkag pa'i sa mtshams ji ltar bshad pa bzhin du shes pas spyod par byed do/__/'dod chags zhe sdang la sogs nyon mongs lnga ni/_mi spang ba lnga yin pas de ni 'ching byed rang rgyud pa dang bral bar spyod pa dang*/_dri chen dri chu maM sa rak+ta zil pa ste dkar cha rnams dang len lnga la gtsang sme'i gnyis rtog 'bral bar spyod pa dang*/_phung po lnga rigs lnga/_'byung ba lnga yum lnga/_yul rnams sems ma lnga/_dbang po lnga sems dpa' lnga/_kha dog ye shes lnga'i lhar shes par bya ba lnga ni dag mnyam rtogs pa'i shes rab stobs kyis spyod do/__/rdo rje rin chen pad+ma las de bzhin gshegs pa'i rigs te/_bsgrub bya lnga ni rtogs pa'i don de nyid cho ga lnga dang*/_ting 'dzin sogs dag mnyam du goms pa'i mthu yis bsgrub par bya'o/__/de ltar lnga tshan lngar bshad pa 'di dag dam tshig gsal bkra'i dgongs pa ste/_de nyid las/_spyad pa lnga dang mi spong lnga/_/dang du blang dang sgrub de bzhin/_/shes bya lnga rnams thun min bshad/_/ces so/__/lhag pa'i dam tshig ni/_phur pa myang 'das chen po'i rgyud las/_gcan gzan rgyal bla mar mi brnyas po seng+ge bsad mi bya/_za ma tog bla ma'i yum la mi gtse tu ngan pa'i dug mi spyo/_rin po che yi lcug dad pa can gyi tshogs mi bcad ma rtsar mi bcad/_/gangs kyi zhun chu khol dkor la mi 'bag cing phung khrol gyi smyo chu mi 'thung ma yongs mi btung*/_/pad+ma rgyas pa'i ze'u kha mi mched kyi rig mar mi spyad dbye/_/bug rdol can mtshan ngan mi bsten gyi snod du bcud mi blug_/ma brtags pa yi 'dre can dang rtsod can gyi nor mi bsten zhing nor dang zas mi 'brel byin gyis ma brlabs pa'i zas mi za/_/shel gong dkar po rdzab tu bsnub sems bskyed nyams mi 'jug _mi bya/_/snod snod min la gdams pa mi ston ngan nang du seng+ge'i zho mi bzho/_/yid bzhin nor bu thab snod ldan gyi slob ma mi spong tu bsreg mi bya/_/bya yi rgyal po khyung gi gshog yum mi 'bral ba'i don bde stong la sbyor mi bcag_/gnam lcag sder mo sa la mched lcam nang 'thab mi byed brdab mi bya/_/stag gzig rol gzhan gyis 'bags lhag mi spyod pa'i zas mi bza'/_/rdo rjes bla ma'i gdan sa la mi brlam gtams pa'i brag rnams yongs mi bshig_/rdo rje ra bas bskor rang dang gzhan dag gi mtshams rgya mi dbral ba'i go mi hral/_/mun pa sel ting 'dzin dang lhag mthong mi 'bral ba'i sgron me yongs mi gsod/_/rdo rje'i chu bzlas brjod dang cho ga'i rgyun mi tshig gi bar mi gcod pa bo 'ol ka bcad mi bya/_rgyal po'i rtags kyi phyag rgya sbyin mi bya dbang rtags kyi phyag rgya las mi 'da' zhing rgyud nas gsungs pa'i brda gzhan la mi brjod/_/rdo rje'i mkhar rdzong gtams pa'i rming mi bzlog_/rnal 'byor pa'i dkyil 'khor mi dkrug cing skye bo'i mthu ldog mi byed pa dang*/_/rgyal mtshan rtser btags nor bu rin po che rigs kyi bdag po bla ma mi spong ba'o/_/'dod par gyur pa'i mtshan mas dpag mi bya/_/zhes ldem dgongs kyi sgras/_spyi dang khyad par dam tshig la gnas nas tshogs chen gyi sgrub pa la sogs pa'i gnas skabs su bsrung na lhag par bstan pa'i dam tshig nyi shu'o/__/gsal bkra las lnga tshan lngar bstan pa de dang mtshungs pa'i rnam grangs sam/_de bzhin du dus kyi 'khor lo las/_bslab pa'i gzhi sdig pa lnga/_nye ba'i sdig pa lnga/_gsod pa lnga/_'khu ba lnga/_chags pa lnga ste brtul zhugs nyi shu lnga las/_dang po sdig pa lnga spong ba ni/_srog chags phra mo yan chad kyi srog 'tshe lta ci/_mnar sems dang bcas pa/_bslu sems kyis rdzun/_dud 'gro yan chad kyis bdag gir byas pa rku ba/_'dod pa'i log g.yem/_phung khrol gyi 'byung gnas myos chu btung ba myos byed dang lnga ni/_'khor bar 'ching byed kyi zhags pa dang mtshungs la/_ma bsrungs na brtul zhugs lhag ma rnams kyang mi sbyin pas bslab pa'i gzhi lnga zhes bya'o/__/gnyis pa nye ba'i sdig pa lnga ni/_cho lo mig mang sogs rgyan 'gyed pa dang*/_bza' ba dang rin gyi don du bsad pa'i sha sogs kha na ma tho ba'i zas dang*/_dmag 'khrug tshong gtam sogs ngag 'khyal rigs dang*/_pha myes kyi mtshun gsol nad pa'i don du nor phyugs sogs kyi mchod sbyin byed pa 'byung po'i chos lugs la dga' ba dang*/_rang gis bsad pa'i sha sogs las gzhan mi bza' zhing*/_gos dkar po dang*/_bya gag gi btung ba 'ba' zhig bsten pa sogs lha min gyi 'jug pa can kla klo'i chos lugs la spyod pa ste lnga ni nye ba'i sdig pa yin pas spang ngo*/__/gsum pa gsod pa lnga ni/_mtho ris 'dod pas mchod sbyin la dmigs nas ba lang gsod pa dang*/_ma mo mchod pa la byis pa gsod pa dang*/_skyes pa'i don du skyes pa gsod pa dang*/_bud med kyi don du bud med gsod pa ste mi'i mchod sbyin gnyis/_lha mi'i bla ma gsod pa zhes bya ba rgyal ba sras dang bcas pa'i sku gzugs dang bka'i glegs bam dang mchod rten rnams bsnun te bshig pa la gsod pa'i sgras btags te/_'tshe ba chos su smra ba kla klo'i chos lugs sdig las rngam chen dge bar 'dod pa'i skabs yod pas logs su dgar nas de las ldog pa'i don du bshad pa ste/_des na dkon mchog la bsnyen bkur la bsnyad nas/_khal g.yag phyugs lug gsod pa yang kla klo'i grub mtha' ma shes kyang spyod pa la mtshungs ldan du slob pa yin no/__/bzhi pa 'khu ba lnga ni/_dge ba'i grogs po dang*/_rje bo rgan rabs dang sangs rgyas dang dge 'dun dang bla ma dang mkhan slob ste yul lnga po de dag la khong khro zhing 'khu ba ste lnga tshan bzhi po yid kyis sdom zhing spyod lam gyi sgo nas spang bar bya ba'o/__/lnga pa chags pa lnga ni/_theg chen sde snod thams cad nas/_mig gi 'dus te reg pa'i rkyen gyis tshor ba dang zhes pa nas/_/lus kyi 'dus te reg pa'i rkyen gyi tshor ba'i bar te/_dbang shes phan tshun rten dang brten par 'brel ba las yul lnga la zhen cing chags nas yang srid 'phen nus kyi las su rdzogs pa de dag spang bar bya ste/_spong tshul ni bskyed rim gyi sgo nas dbang yul dang reg bya reg shes sogs lha skur sbyang zhing rdzogs rim so sor sdud pa'i rnal 'byor gyis dbang po lnga yul lnga la 'jug pa'i rgyun gcod pa'o/__/de yang rdo rje sems dpa'i brtul zhugs nyer lnga zhes rgyud 'grel las gsungs pa'i don te/_de dag las 'da' bar bya ba ma yin pas dam tshig dang*/_sgo gsum de'i ngo bor son pa nyid kyis na brtul zhugs zhes grags so/__/gsang 'dus sangs rgyas mnyam sbyor zla gsang sogs tshig rkang gcig 'di mchan dkyus su song ba 'dra ste rnam mkhyen shing rtar mi 'dug go _bai ro ska cog sogs nas rin bzang la thug gi bar snga 'gyur te sngon dang*/_rin bzang phyin chad 'gyur ba'i rgyud sde yi spyi don du gyur pa thun mong rigs lnga'i sdom pa la/_dang po sangs rgyas rnal 'byor te de bzhin gshegs pa'i rigs la/_smon 'jug sems bskyed kyi khyad par bdag rdo rje sems dpar gyur nas/_sems can thams cad kyang de'i go 'phang la dgod par bya'o snyam pa'i smon sems blangs nas/_'jug sdom ni tshul khrims gsum brtan por bzung bas shugs la blang bar gyur la/_de yang tshul khrims gsum gyi khyad par/_tha mal snang zhen las ldog pa'i nyes spyod sdom pa/_'byung lnga ye shes su sdud pa dge ba chos sdud/_las bzhi'i phrin las la 'jug pa'i sems can don byed do/__/mi bskyod pa'i rigs la rdo rje dang dril bu dang lha'i phyag rgya dang bla ma gzung ba rnams so/__/rin 'byung gi rigs la chos dang nor dang mi 'jigs pa dang*/_byams pa rnams sbyin par bya'o/__/snang mtha'i rigs la/_so byang sngags kyi theg pa gsum 'dzin cing chos rnams bshad pa'o/__/don grub kyi rigs la/_sras bcas rgyal bar mchod bstod sbyin sreg sogs phrin las kyi rigs kun la gus par bya'o/__/rten gang zag khyad par ba rnal 'byor bla med kyi lta sgom spyod pa'i gnas gang yin pa gdengs su gyur cing rigs lnga'i sdom pa ni/_dang po rdo rje'i rigs gyur srog la 'tshe ba ste srog gcod par gsungs pa yang*/_phyi zhing bcu tshang ba'am nyams pa bdun ldan bsgral ba dang*/_nang de las gzhan dbu mar rlung rtog gsod pa dang*/_gsang bar rtog pa skye med du gsod pa'o/__/gnyis pa rin chen rigs la ma byin blang bya ni/_nang ltar mtshan ldan gyi gzungs ma thabs kyis dbang du bya ba dang*/_skal med skye bo'i nor 'phrogs te dge bar 'khris med du gtong ba/_gsang ba ltar na rdzogs pa'i byang chub kyi yon tan thams cad sus kyang ma byin pa rang stobs mthu yis blang ngo*/_/gsum pa pad+ma'i rigs la ri dwags mig can mchod pa'am bsten par gsungs pas/_gsang ba ltar na shes rab kyi rang bzhin stong pa nyid kyi bud med rnam kun mchog ldan ma/_rig pa'i ye shes kyi phyag rgyar kun tu spyod pa dang*/_nang ltar na yid rig chos kyi phyag rgya/_gtum mo dam tshig gi phyag rgya gnyis bsgom pa dang*/_phyi ltar na dngos rig las kyi phyag rgya dang*/_chos dang dam tshig dang*/_phyag rgya chen po rnams rang bzhin gsum du bsten pa la 'du ste/_rim pa bzhin 'du shes gsum ldan gyi lha bsgom pa/_thabs zin gyi spyod pa rtogs goms ldan pa'i phyag rgya gsum dang mtshungs ldan brten nas zhu bdes drangs pa'i dpe'i ye shes la brten/_don dam lhan cig skyes pa'i ye shes 'gyur ba med pa mngon du byed pa'o/__/bzhi pa las kyi rigs la/_phyi bla ma dang*/_sems can gyi srog dang*/_rang gi dam tshig sogs kyi ched du rdzun tshig sgyu ma lta bur sgrog_/nang ltar ngag gi rtsa ba srog rlung snying khar thim nas chos kun tshad med par 'char ba dang*/_gzhan la'ang rang rang mthun pa'i chos sgyu ma lta bur ston pa dang*/_gsang ba ltar sems can thams cad med snang 'khor ba las sgrol ba'i rdzun tshig sgyu ma lta bur sgrogs pa'o/__/lnga pa 'khor lo'i rigs la/_phyi ltar na bdud rtsi lnga dang sha lnga sogs rdzas rnams dang*/_gzugs sogs yul rnams kyi 'dod pa'i yon tan lnga sogs la zhen med sgyu ma lta bur spyod do/__/nang ltar na dbang lnga'i dwangs ma sogs gzhil te mi rtog pa'i chos nyid bza' ba dang*/_chang btung ba ste rtsa rlung gi zhu ba de yas bab mas brtan sogs lhan skyes kyi ye shes la bzung ba dang*/_gsang bar snang sems dag mnyam chen por sgrub med du dag par byed pa'o/__/smon 'jug gi sdom bzung de yi rjes su rigs lnga'i sdom bzung gi yan lag sems bskyed de'i dmigs rnams so sor phye ba tshig gis gab pa ni/_nyan rang sogs ma bsgral bsgral dang*/_ma grol dgrol/_dbugs ma dbyung rnams dbyung ba sogs byang sa dang thun mong pa rnams ni le'u brgyad pa'i skabs ltar ro/__/lha dang lha min gsang ba pa rnams la'ang mi brnyas pa dang*/_phyag rgya bzhon pa mtshon cha mtshan ma la smad par mi bya zhes/_lha lha min gnyis ni dngos bstan te mi smod pa dang*/_gsang ba pa ni gnod sbyin te ston pa'i bstan pa skyong ba rnams dang*/_phyag rgya ni bzhi ka la mi smod pa dang*/_khyad par yi dam sogs sku gzugs yongs rdzogs la mi smod pa dang*/_bzhon pa ni bla ma'i khri sten dang chibs pa dang de la sogs pa'i yo byad rnams so/__/mtshon cha ni ral gri gtun shing sogs lha yi phyag mtshan gyi ched du byas pa'i rigs rnams la mi smod pa dang*/_mtshan ma ste rigs lnga'i phyag mtshan rnams la mi smod pa dang*/_gzhan yang lha'i sku gzugs dang*/_bla ma dang*/_mchod rten la sogs pa'i sku gsung thugs rten thams cad kyi grib ma 'gom la smad pa'i sgra yis bkag pa yin pas/_gal te thabs med byung na badz+ra be gA a kra ma hU~M zhes rdo rje'i shugs kyi sngags rgyas mkhar btegs te 'gro bar bya'o/__/de bzhin du lha la phul ba'i mchod rdzas rnyings pa la dman mar grags te mi 'gong mi bza' 'gom sar khyab gdal du mi dor/_mar zan sogs kyis lha'i phyag mtshan gyi rnam par byas pa'ang bza' bar bkag pa yin pas mi bza'o/__/khyad par du rdo rje theg pa'i rigs lnga'i dam tshig las gsod pa dang*/_ma byin len pa dang sogs khongs nas mi tshangs spyod dang*/_rdzun dang phra ma tshig rtsub ngag kyal rnams te dngos bstan nyid dang*/_dgongs pa lung ston gyi tshul du yod pa'i rlung rtog dbu mar gsod pa dang*/_theg chen gyi don de kho na nyid ma byin pa len pa sogs ldem dgongs kyi rnam dbye ma phye na/_sngags pa thur la mnar med sogs kyi gnas su lhung bas na bag yod byed pa gal che'o/__/mdor bsdus te bshad na/_rang la ye nas gnas pa'i sems nyid kyi gnas lugs nyid mkhris nad can la dung gi dkar snang gab pa bzhin thog med nas tshogs brgyad kyi rtog pas bsgribs te ma mthong zhing gab pa'i tshul du yod pa la/_gsang ba zhes bya ste/_gsang snying las/_e ma ho ye nas gsang ba'i chos/_/sna tshogs snang la rang bzhin gsang*/_/ngo bo nyid kyis rab tu gsang*/_/gzhan du min las shin tu gsang*/_/zhes tshul bzhi'i sgo nas mngon sum du de nyid zab mo ma rtogs par de srid skal dman rnams la brda la sogs pa'i sgo nas/_sbas pa'i gsang ba sbyor sgrol sogs spyod mi nus pa'i cha thams cad mngon par 'chal te spyod par mi byed par de 'dra'i rigs kun la gzur nas dus tshod dang bstun nas gdams par bya'o/__/sdom pa'i rten ni nyin re bzhin du bram ze gsod pa dang*/_pha ma gsod pa sogs mtshams med kyi las la spyod pa lta bu'i sdig can yin kyang*/_sngags sdom skye ba'i rten du rung bas na/_theg pa 'og ma las kyang gsang sngags rdo rje theg pa thabs kyis che zhing khyad par du 'gyur ba smos ci dgos/_ltung ba so so'i blang dor gyi mtshams mi shes pa dang*/_de'i gnad 'doms pa'i bla mar mi gus pa dang*/_bslab pa'i gnas la gzob par ma byas na bag med pa la goms pas nyes pa 'dod rgyal du byed pa dang gsum/_gal te bag yod byas kyang nyon mongs pa shugs drag la mthu che bas gnyen pos mgo mi non pa ste/_de bzhi po ni ltung ba 'byung ba'i sgo bzhi yin la/_de'i steng du ltung ba legs par shes kyang brjed ngas che ba dang*/_dran pa mi gsal ba ste ltung ba byung min brtags pa'i shes bzhin lhod pa gnyis bsnan pas dam tshig nyams pa'i rgyu drug yin no/__/de bas na gnyen po dran pa dang shes bzhin gyis nyon mongs gang che de'i gnyen po bskyed pa yis/_dper na long ba de la sman pa mkhas pas thur dpyad kyis dbye ba'i gnas skabs thob pa na/_de'i shin tu bsgrims te bag zon dang bcas pas bsrung ba ji lta ba de bzhin du sngar bshad pa ltar nyin mtshan thun drug tu/_spang blang gnad la bsgrims shing bsgrims shing lhod pa med par brtags la dpyad par rigs so/__/nyams na gso ba'ang 'og ma las 'phags te/_nyan thos sdom khrims nyams pa ste pham pa bzhi gang rung byung nas 'chab sems ma skyes na/_bslab pa sbyin pas lan bdun gsor yod la/_spyir pham pa 'chab med can bslab sbyin byas pa de yis bslab pa phul te dge slong gi sdom pa blang du yod par gsungs te/_karma sha taM gyi 'grel par skyes pa ni rab tu byung ba lan bdun len du snang ba'i phyir zhes byung ba la sogs pa'o/__/'chab pa dang bcas pa ni lan gcig kyang*/_gso ba'i yul med de dper na rdza be'u chag pa bzhin no/__/byang sdom ni dper na rin chen nyer spyad chag pa dang 'dra ste mgar mkhas pas bcos su yod pa dang mtshungs la/_gzhan rkyen dge ba'i bshes gnyen la bsten nas gso ba yin la/_gsang sngags kyi sdom pa nyams pa ni/_rin chen gyi snod cung zad zhom pa ltar/_gzhan rkyen la ma ltos par rang stobs bskyed rdzogs sogs kyi mthu yis gso ru byar yod pas khyad par du 'phags te/_de yang bla ma rdo rje slob dpon/_rdo rje'i spun rnams la rmi lam tshun brnyas thabs shor na/_'phral du sgo gsum gyis gus shing bkur te tshogs dang yo byad sogs kyi thugs mnyes par byas la nyams pa skong ba'i rgyu mtshan/_bkod pa chen po las/_bla ma dang ni nye ba'i 'khor/_/rdo rje'i spun dang sring mo la/_/ngan smras tshig gi zur tsam yang*/_/brda'am dngos su brjod mi bya/_/gal te rmi lam dag tu yang*/_/byung na yid kyis bshags par bya/_/dngos dang zhe yis byas pa dang*/_/gal te dran pas ma zin nas/_/thal bar gyur kyang ma bshags na/_/thur du bltas te dmyal bar 'gro/_/zhes so/__/de rnams kyi gsung gi tha tshig las nyams shor na rtsa ba'i bla ma de nyid de bzhin gshegs pa thams cad kyi gsung rdo rje'i ngo bo sangs rgyas rdo rje chos sku mdog dmar po can spyi bor ram/_yang na bdag dang dbyer med du bsgom la snying po pad+ma satwa'am de'i yig brgya 'bum ther 'don pa dang*/_bla ma'i yon tan brjod pa 'ba' zhig la don du gnyer bar bya'o/__/gnod sems dang gsang ba bsgrags pa sogs thugs kyi dam tshig las nyams shor na/_bdag nyid de bzhin gshegs pa thams cad kyi thugs rdo rje'i ngo bo rdor sems su gsal ba'i spyi bor bla ma bsgom la/_yan lag bdun pa phul nas dbang bzhi blangs rjes bla ma rang la bstims ste lo gsum smra ba bcad la thugs yid dbyer med du bsres pa'i ngang la rtse gcig tu mnyam par bzhag pa ni gso ba'i thabs su bshad do/__/dus la ltos pa'i nyin mtshan thun drug tu bcad pa'i cha gang rung zhig gi nang du ltung ba la sbyor ba'i bya ba brtsams nas thun de'i nang du gnyen pos ma sleb par dus tshod las thal te/_thun tshod 'da' ba'i mtshams la thun gyi ltung ba zhes brjod pa yin la/_de bzhin du 'gal ba dang*/_nyams pa dang*/_'das pa dang*/_ral ba zhes bzhi po'ang zhag dang zla ba dang*/_lo gcig dang*/_lo gnyis sam gsum tshun chod 'das te thun tshod la bshags pa byas na gso bar rung ste/_snga ma las kyang phyi ma phyi mar lci zhing*/_lo gsum 'das na bshags pa byas kyang gso bar rung ba ma yin la/_de dag las dang po 'gal na/_tshogs kyi 'khor lo sngon du 'gro bar bya ba dang*/_nyams na bla ma dang lha la bdog dgu spong dag phul nas bskang zhing*/_'das na de las kyang phangs pa'i bu dang chung ma nor gyi dbyig sogs rin po che gang bzang phul nas bskang*/_ral na rang gi srog la'ang mi lta bar brtson 'grus drag po dag gis gso ba'i rnam bzhag rnams ni/_rdo rje nyi ma rnam par bkod pa'i rgyud sde nyid las gsungs so/__/bsdus te don gong du bshad pa de las gzhan yang 'di ltar bla ma las/_dbang bzhi po bskyar nas blang ba dang*/_rang gi dmigs pas bdag 'jug blang*/_dben par bskyed rdzogs bsgom pa dang*/_las kyi bskang ba ni sbyin sreg gtor ma bzlas brjod la brten pa rnams te/_de yang kun tu nyams pa la tshig 'bum sum khri/_rtsa ba nyams na lnga khri sum stong*/_yan lag nyams na lnga stong sum brgya/_zlas nyams te nyams pa dang 'grogs pa la brgya phrag gsum/_rang gi ched du min kyang gzhan gyi ngo dgar sogs zhar nyams la lnga bcu rtsa gsum mo/__/de yang rdzas kyis bskang ba dang*/_'dun pas bskang ba dang*/_ting nge 'dzin gyis bskang ba sogs bya la/_'pho med kyi tshul khrims rdzogs rim rang lus thabs ldan sogs spyi dang*/_thig le'i rnal 'byor 'bar 'dzag bsgom pa dang*/_zhi ba'i sbyin sreg dang*/_'khor 'das lhar gsal ba la gtor ma gtong ba dang*/_yo ga nas bshad pa'i dral ba'i sngags rgya ltung ba slong ba'i phyag rgya dang*/_de'i sngags kyi rim pa la brten nas ngan 'gro dgug dral dang*/_de bzhin du rdo rje yang tog gi rgyud las/_yig 'bru sngags kyi sbyang ba ni/_/rkang mthil gnyis su yaM gnyis bsam/_/gsang ba'i sgo ru raM bsam mo/__/lte bar rigs drug yig 'bru bsam/_/snying khar phaTaHkyi gdan dag la/_/sku gsung thugs kyi snying po bsam/_/yaM las ye shes rlung byung ste/_/raM las ye shes me sbar nas/_/rigs drug bag chags thams cad bsreg_/sgo gsum sku gsung thugs su gyur/_/phaTaHkyis chos kyi dbyings su 'phang*/_/zhes pa'ang man ngag shin tu zab la/_rnam 'joms sme brtsegs sogs gzungs kyis bsgrubs pa'i bum chus bkru ba dang*/_mkha' dbyings su shar ba'i dbang lha las rigs pa'i dbang lnga blangs nas bkru ba'i 'dun pa dang*/_chu klung sogs baM las mA ma kI'i bdag nyid du mos nas brtul zhugs kyis lus bkru ba sogs bkru ba'i rim pa dang*/_gtum mo'i mes lte bar kaM yig dang snying khar sha za'i gzugs kyi sdig pa bsreg pa dang*/_rlung la brten nas sbyang ba yang gtsug lag khang sogs su 'phan dar sogs bsgrengs pa dang*/_tshogs mang dbus sam rten byin can gyi drung du nyes pa bsgrag pa dang*/_tshogs 'khor sogs dang*/_srog bslu gsung rab spyi dang*/_thar mdo dri med bshags rgyud sogs bklag pa dang*/_gzungs sngags spyi dang khyad par de bzhin gshegs pa'i yig brgya bzla ba dang*/_maN+Dal 'bul ba dang*/_yan lag bdun pa 'bul ba dang*/_de bzhin gshegs pa'i spangs rtogs kyi gzugs brnyan mchod rten bzhengs pa dang*/_mi nus pa yin na'ang sAts+tsha gdab pa la sogs nyams chag sbyong ba'i thabs kyis gnyen po'i rim pa zad cing gtugs srid pa ma yin la/_de dag ni sbyong tshul spyi dang*/_khyad par spyi khrus na rag dong sprugs bshags pas mi 'dag pa med de/_ji skad du/_gang gis sgyu 'phrul zhi khro yi/_/dkyil 'khor lha la phyag 'tshal na/_/nyams chag thams cad byang 'gyur te/_/mtshams med lnga yi sdig kyang 'byang*/_/na rag gnas kyang dong sprugs te/_/rig 'dzin rgyal ba'i zhing du grags/_/zhes so/__/de ltar dmigs bcas kyi bshags pa kun la 'gyod sems bskyed pa ni lhag par gces so/__/ma bshags na tshe 'dir sgrub pa thams cad phyin ci log tu 'gyur zhing*/_bde legs kyi yon tan thams cad 'grib pa dang*/_tshe thung nad mang sogs dang*/_phyi ma dmyal ba gang gis kyang do zla med pa'i rdo rje'i dmyal bar ltung bar 'gyur ro/__/dam tshig dang ldan pa ni/_skye ba bcu drug gam/_myur na tshe 'di'am 'chi kha'i bar ma dor sogs gang rung ba'i dus der grub pa brgyad sogs yon tan 'thob ste/_ji skad du/_mkha' spyod/_pha rol las rgyal byed ral gri gang sgrub lag tu thogs pa'i lus mi snang ril bu dang*/_/yud tsam rgya mtsho'i mtha' yang 'khor ba rkang mgyogs/_mi zad pa'i gter gyi bum pa gnod sbyin sde brgyad bran du khol/_/bcud len dang ni mig la byug na gter sogs mthong mig sman no/__/zhes dang*/_dbang bcu ni/_mdo lam du bshad pa de rnams ma dag sa bdun na phyi dang*/_dag pa gsum na nang du bzhag pa dang gnyis yod de/_dbang bcu shin tu rnam dag ni sangs rgyas kyi sa na yod do/_/dbang phyug brgyad ni/_phra chos rnams spros bral du mthong zhing yang 'jig rten khams rnams su 'gro ba la phra rab gnyis snang nub pa nus pa dang*/_/spyod 'dod yon lnga chos nyid la rol par nus dang bdag mthu stobs kyi bdag por gyur pa nyid chen po dang*/_/dga' 'gro rnams ci 'dod mgur byed dang sems can thams cad tshogs gnyis kyi dbang du 'gyur/_rdzu 'phrul gyis ci 'dod byed dang dbang phyug don brgyad do/__/ces de dag gang la mnga' ba'i gnas skabs rig 'dzin rnam pa bzhi sngar bshad pa ltar dang*/_sku rnam pa thams cad du shes bya'i gzugs brnyan yod rgur 'char ba'i kha sbyor/_/gsung sgra tshig gi sgrib bral longs spyod rdzogs/_thugs gzung 'dzin gyi rtog pa las grol ba'i 'gyur med bde chen la rol/_/dpyad mtha' las grol ba'i so so rang rig pa'i mtshan nyid can te bzhi ni rang don phun tshogs dang*/_snying rjes gzhan don 'bad med du 'byung ba dmigs med thugs rje chen po dang*/_de nyid rgyun chad med pas rtag pa/_gdul bya'i mos ngor skal pa 'tshams pa'i gzugs sku snang zhing chos sgo mtha' yas 'gog med du 'char ba gzhan don phun tshogs te mchog gi dngos grub kha sbyor yan lag bdun shugs la 'grub pas/_sku lnga'i yon tan thams cad yongs su rdzogs te 'og min gyi zhing du 'gro zhing don gnyis lhun gyis grub pa la sangs rgyas zhes bya'o/__/yon tan rin po che'i mdzod dga' ba'i char zhes bya ba las/_rig pa 'dzin pa'i sde snod bstan pa'i tshoms te le'u bcu pa'o//___//thabs mkhas thugs rje can rgyal bas las dang po par 'khor lo dang por bden bzhi mi rtag bcu drug sogs dang*/_dbang po 'bring la 'khor lo bar par rgyu mtshan ma med pa/_'bras bu smon pa med pa/_ngo bo stong pa nyid de rnam thar gsum/_bstan bya'i ngo bo nyams su len bya so so rang rig pa'i ye shes chen po nyid bka' tha mas ston/_bar pa'i bstan bya sems can thams cad kyi khams la bde gshegs snying po ru/_rang bzhin gyis bzhugs par gzungs kyi dbang phyug rgyal pos zhus pa'i mdo dang*/_mya ngan las 'das pa chen po'i mdo sde rnams las rgya cher gsungs shing*/_dbang rnon ngor shes bya'i gshis ji ltar gnas pa'i tshul tha mas ston te/_de ltar bar tha gnyis kyis bstan bya'i snying po chos thams cad kyi gnas lugs zab pa zhi ba rang bzhin spros pa dang bral zhing*/_'od gsal ba'i chos nyid de sems dang ye shes logs su phye nas/_ye shes rang gi ngo bo rjen par ston pa la rdzogs pa chen po zhes bya bar grags pa yin pas na/_ston tshul tsam las mthar thug pa'i don du ni zung 'jug dbu ma _phra ba nang gi dbu ma _chen po dang yang don gcig go__/de yang rang rig pa'i ngo bo la 'khor 'das kyi chos thams cad rdzogs pas na rdzogs pa srid zhi kun khyab kyi ye shes yin pas chen po'o/__/gzhi lam 'bras bu'i rdzogs pa chen po rnams gdul bya'i khams gang du/_mos pa dang 'tshams pa'i chos kyi rnam grangs rgya che zhing grangs mang ba'i lam bzang po myang 'das su dkri bar byed pas/_dam pa'i don nyan thos nas a nu'i bar mtha' dag blo yi dri ma byi dor byed pa kho na'i phyir gsungs pas/_theg pa de dag gi nyams len sdom pa gsum dang*/_pha rol tu phyin pa drug dang*/_gsang sngags thun mong ba'i lam gyi bskyed pa dang rdzogs pa'i rim pa sogs ji snyed pa de kun kyang rdzogs pa chen po'i lam stegs yin no/__/'khor 'das dbyer med rang bzhin rdzogs pa chen po gtan la phab pa'i skabs 'dir ni 'khor ba dang mya ngan las 'das pa'i chos thams cad dbyings las ma g.yos pa'i phyir/_gnas lugs ma rtogs pa'i 'khrul snang 'di byung yang rig pa'i rang bzhin rnam par dag pa las gzhan du 'gyur ba med de/_ri rwa bzhin ngo bo ci yang med do/__/des na 'khor 'das gnyis ka ma grub bzhin du 'khor 'das su snang ba'i gzhi rig pa yi chos nyid kyang*/_ngo bo dag pa chos sku/_rang bzhin gsal ba longs sku/_thugs rje rig pa'i snying po can sprul sku ste sku gsum du ye nas rdzogs pa gzhi de nyid kyi ngang las gzhi snang shar ba'i dus na/_tshogs brgyad kyi nyer len sprin dang 'dra ba rnams rang sar dengs pas sku dang ye shes kyi snang ba rnam par dag pa'i sangs rgyas dang*/_gzhi snang de nyid lhan skyes ma rig pas bsgribs te kun tu brtags pa can gyi ma rig pas rang snang la yul du bzung bas gzung 'dzin gnyis su mched de/_ma dag 'khor ba'i rang bzhin rmi lam lta bur snang bas sems can te 'khor 'das gnyis kyi cha ru snang na yang*/_gnyid kyi ngang na rmi lam gyi snang ba bzang ngan ci shar yang gnyid de las gzhan du mi g.yo ba bzhin/_gzhan las gsar byung min pas gang nas kyang ma 'ongs la gzhi las g.yos pa med pas gzhan du 'pho ba'ang med do/__/re zhig rdzogs pa chen po'i lam la zhugs pa rnams kyis/_gzhi de yi bzhugs tshul yin lugs la dpyad pa btang ste rang rang gis ji ltar 'dod pa'i phyogs bzung nas/_grub pa'i mtha' smra ba rnams kyi lugs la rnam pa bdun te/_la las ka dag_/la las lhun grub/_la las ma nges pa dang*/_la las nges pa don/_la las cir yang btub pa dang*/_la las cir yang khas blang du btub pa dang*/_la las sna tshogs su 'char bar 'dod pa'i gzhi bdun po thams cad kyang gtan la dbab bya'i ngo bo ni/_ka dag dang lhun grub zung du 'jug pa'i gzhi'i rang bzhin gcig pu'i phyogs re re la/_so sor 'di kho na gnas lugs so snyam nas blos btags pa'i rang rang gi gzhung 'dzin pa gzhan rnams kyang gzhi'i phyogs re tsam la ma rmongs te shes na'ang*/_rang bzhin ji bzhin ma rtogs pa'i skyon ni dper na/_ye shes snying po'i mdo las/_sngon rgyal pos dmus long du ma bsags te glang po che bstan nas/_glang po che 'di'i mtshan nyid so sor smros shig ces bsgos pas/_sna la reg pa rnams ni lcags kyu dang 'dra'o zhes zer ro/_/mig la reg pa rnams kyis phor pa dang 'dra'o zhes zer ro/_/rna ba la reg pa rnams kyis zhib ma dang 'dra'o zhes zer ro/_/rgyab la reg pa rnams kyis khyogs dang 'dra'o zhes zer ro/_/mjug ma la reg pa rnams kyis tha gu dang 'dra'o zhes zer ro/__/long bas glang po che las gzhan smras pa ma yin kyang thams cad du rtogs pa ni ma yin no/__/de bzhin du sangs rgyas kyi rang bzhin yang stong pa nyid dang*/_sgyu ma lta bu dang*/_'od gsal ba sogs tha dad smras kyang thams cad du rtogs pa ni ma yin no/_/zhes dang*/_nyan rang byang sems gsum gyis sangs rgyas kyi snying po ji bzhin mi mthong ba'i dpe/_dmus long zhig gis gzhan zhig la mar gyi kha dog dris pas kha ba dang 'dra'o zhes smras pa dang*/_des kha ba la reg pas mar gyi kha dog grang mor 'dzin to/__/dris pa/_kha ba'i kha dog ci 'dra/_smras pa/_ngang pa'i gshog pa dang 'dra'o/__/ngang pa'i gshog sgra thos pas _kha dog 'ur 'ur por 'dzin to/__/dris pa/_gshog pa'i kha dog ci 'dra/_dung dang 'dra'o/__/dung la reg pas 'jam por 'dug na/_/de yang 'jam por 'dzin no/__/de ltar khong long ba bdun gyis glang po'i skye mched dang*/_ngang pa'i kha dog brjod pa ji bzhin no/__/'dir ni rig pa'i ngo bo spros bral ka nas dag pa la/_rang gsal ma 'gag pa'i rang gdangs sku dang ye shes kyi bdag nyid nyi ma dang zer lta bu/_yon tan gyi cha ye nas lhun gyis grub kyang snang stong gi ldog pa tha dad pas gcig pa ma yin pa dang*/_ngo bo gcig las med pas bum pa dang de'i stong pa dbyer med pa ltar rdzas tha dad pa min te/_dper na chu dang rlan bzhin la/_'di ltar stong pa'i ngos nas dbyibs dang kha dog sogs ngo bo 'di lta bu'o zhes ngos gzung rgyu'i dngos po mtshan ma'i spros pa thams cad dang bral bas rnam gcod kyi sgo nas spros pa thams cad gcod pa las/_rang rang gi ngo bo la yongs gcod kyi sgo nas 'di ltar zhes brjod du med pas ka dag ces brjod pa yin la/_de yang nam mkha' bzhin cang med pa min la/_snang ba'i ngos nas gting gsal gyi cha rang gdangs 'gag pa med pa thugs rje'i rtsal cir yang 'char rung du yod pas lhun grub bo zhes brjod pa yin te/_mu tig phreng ba las/_ngo bo ka dag brjod gzhi bral/_/rang bzhin lhun grub cir snang rdzogs/_/zhes gsungs ba ltar rtag chad zhor la spangs pa yin no/__/'o na khyed kyis ka dag dang lhun grub so so ba'i gnas skabs de skyon can du bsgrub na/_'dir yang gnyis yin du bshad pa'i skyon de mi 'du'am zhe na/_'dir ni gzhi sems kyi chos nyid ngo bo gcig la yod med dam/_snang phyogs nas lhun grub/_stong phyogs nas ka dag gnyis ldog pa'i dbye ba tsam las rdzas su tha dad med pas 'gal ba gnyis 'du ba'ang ma yin te/_dper na gnyid du phyogs pa na rags phra'i rtog pa thams cad rim gyis 'gags te gnyid 'thug tu 'gyur skabs rang bzhin brgyad cu'i rtog pa 'gags pa'i shes pa'i ngo la rmi lam med pa dang*/_mched pa'i mdangs rlung gi chas khur ba'i shes ngo la rmi lam du snang ba'i gnyid dus kyi shes pa gnyis/_gnyid gcig gi ngo bo las ma g.yos pa ltar/_ngo bo ka dag gi cha la 'khrul pa gzhi la ma grub pa yin pas 'khor bar 'khor sngar yang ma myong*/_da lta mi myong*/_myong bar mi 'gyur na'ang rang bzhin lhun grub kyi rtsal lam gdangs 'gags pa med pa las rol pa sna tshogs pa 'khor 'das cir yang snang rung ba yin no/__/dpe ji ltar na/_nor bu baiDUr+Ya yi rang 'od dang*/_'ja' shel gtsang ma 'ja' ldan rnams kyi rang 'od ni/_nang du gting gsal gyi rang bzhin yod kyang nyi 'od sogs kyi rkyen gyis ma bskyed par rang 'od phyir mi snang ba mngon sum du shes rung ste/_gzhi dang gzhi snang gi dpe de bzhin du 'chi srid sogs gzhi'i 'od gsal la gnas tshe/_ka dag gi rig pa ston gnam g.ya' dag pa lta bu rkyen gang yang med pa'i gnas skabs na/_gzugs la sogs pa yul dang de dag 'dzin byed kyi tshogs drug sogs ma dag pa'i snang ba dang*/_sku dang 'od zer sogs dag pa'i snang ba ste/_mdor na dngos po mtshan mar snang ba'i cha thams cad spangs pa ste dus der med kyang*/_rang bzhin lhun gyis grub pa'i rang gdangs nang gsal gyi tshul du yod pa lhun grub kyi snang ba phyi shar du mched pa'i rkyen dang ma 'phrad pas rgya ma ral te phyir ma shar ba gzhon nu bum pa'i sku/_ngo bo rnam rtog phra rags thams cad kyis bsam brjod dang bral bas skye med du stong la/_rang gdangs lhun grub kyi cha las sku gsum gyi snang ba ma 'gags par 'char rung du yod pas/_'khor 'das kyi snang ba kun gyi 'char gzhir gzhi'i rig pa de nyid du bzhugs pa yin kyang*/_ka dag dang lhun grub ngo bo gcig pas stong pa'i 'od gsal gzhi las gzhi snang g.yos pa med pa'i gnas lugs de la ni phung po lnga'i dri mas gdod nas gos ma myong bas gzhi snang ye nas dag pas byang la/_sku gsum gyi yon tan rang chas su yod pas chub cing 'char tshul cing yang ma 'gags pas sems zhes bya la de lta bu'i byang chub kyi sems/_phra ba'i ye shes nang gsal gyi tshul du gnas pa de'i tshe na kha dog dang bdag gzhan sogs mtshan ma dag ma dag gi 'khor 'das 'khrul grol gyi rnam pa can ris su chad pa can du phyir mi gsal ba yin no/__/gnas lugs 'khor 'das kyi spyi gzhi de ni ka dag gi ngos nas sku dang ye shes su rang bzhin gyis grub pa med pas sangs rgyas ma yin/_phung khams skye mched sogs med pas sems can min no/__/thig le nyag gcig tu brjod kyang gcig rgyu'i dngos po med pa dang*/_sku gsum sogs btags kyang dbyings gcig la tha dad du grub pa ma yin la/_spros pa dang bral bas mtha' dbus su bzhag tu yod pa min la/_rang bzhin lhun grub kyi cha nas gzhal na stong pa phyang chad ma yin par sku dang ye shes kyi 'char gzhi yin kyang dngos po rdos bcas su grub pa min no/__/'khrul grol gyi rkyen gang yang med pa'i gnas skabs de ni/_ngo bo la yod med sogs spros pa'i mtha' thams cad dang bral ba'i chos nyid gang du'ang ma grub pa'am ma phye ba'i ka dag_/rang bzhin 'gag pa med pas sku dang ye shes 'du 'bral med pa'i lhun grub/_thugs rje go ma 'gags pas mdzad pa phrin las 'khor 'das kyi spyod yul kun la khyab pa'i snang ba gsum dang thabs gcig gi rang bzhin las 'du 'bral med pa'i bdag nyid du bzhugs pa gzhi rkyang pa'i rnam bzhag go__/gzhi'i gnas lugs bum sku'i rang gdangs de nyid kyi ngang las gzhi snang lhun gyis grub pa'i cha thams cad 'char bar 'gyur ba yin la/_gzhi zung 'jug gi 'od gsal de la stong pa'i 'od gsal zer/_de'i ngang las snang stong zung 'jug rig pa'i ye shes phyogs lhung dang bral ba srog gam snying po'i bdag nyid can du bzhugs pa la/_gyen rgyu rang ngo shes pas shes rab kyi rta dang*/_thur sel yul snang sad pa shes rab kyi zer mdangs 'od dang*/_me dang mnyam pa smin par byed pa'am 'bar bar byed pas stobs can dang*/_khyab byed yongs su grub cing rdzogs par byed pa'i stobs can te bzhi po yan lag tu yod pa'i rlung lnga'i rang bzhin lhun grub kyi snang ba thams cad 'char ba'i gzhi'am snying po'i tshul du gdangs 'gag med rlung lnga'i stobs kyis phyir 'phags te skyod par brtsams pas nang 'od gsal gyi sku ye shes thugs rje rnams rlung lnga dang dbyer med ro gcig tu gnas pa dngos su grub pa med pa/_gzhon nu bum pa'i sku yi tshul du yod pa de'i phyi rgya ral nas/_dus gcig la phyir gsal du gdod ma'i gzhi ka dag gi ngang las g.yos pa med bzhin du ye shes 'od kyi sbubs sam gzhi'i snang ba shar ba ni/_rang bzhin lhun grub kyi snang ba zhes bya'o/__/lhun grub kyi snang ba shar ba gang tshe ngo bo'i gdangs nam mkha' ltar go phye ba'i tshul du rang bzhin gyi gdangs 'od lnga'i rnam par shar ba na/_thugs rje'i rig gdangs rnam pa'i yul de nyid la dpyod par byed pa'i shes par shar tshe ka dag gi ngo bo nam mkha' sprin bral bzhin/_ma rig pa zhes bya ba gzhi la ma grub kyang thugs rje'i gdangs rig par shar ba la ltos te rang snang ngo ma shes pa'i ma rig can gyi cha bzung bas/_dper na sprin bral nam mkha' ji bzhin dwangs pa'i ka dag las/_lhun grub kyi snang ba phyir gsal du g.yo ba la 'char ba'i tshul drug sgo gnyis te brgyad du shar te/_lhun grub ltar shar te thugs rje ltar 'char ba'i sems can gyi don byung*/_yang na lhun grub shar ba de mi bgrang bar 'od ltar 'char bas 'od zer khyab par snang*/_ye shes ltar shar ba'i longs spyod ma 'gags pas/_ye shes kyi rang 'od zhing khams dag pa mngon sum du gsal/_lha sku ltar 'char ba'i ngo bo ma 'gags pas rig pa sku ru smin te snang ba thams cad rigs lnga'i tshom bur snang*/_gnyis chos kyi 'dzin pa thams cad dang bral/_gnyis med ltar 'char ba'i lta ba ma nges pa gcig dang du ma las grol ba'i mi rtog pa'i ting nge 'dzin la gnas/_mtha' grol ltar 'char ba'i thabs ma 'gags pas 'khrul snang rang rgyud par mi gnas te chos nyid la dar gcig gnas pa'o/__/sgo gnyis ni de ltar rang snang gi ye shes su snang ba de rang snang yin par rig na gdod ma'i gzhi la kun tu bzang por mngon par byang chub pa'i sgo dang*/_ma rig na sems can 'khrul pa'i sgo ste gnyis so/__/'di la snang ba 'di'i yar 'khrul mar 'khrul las kun tu bzang po'i grol gzhi shes par bya'o/_/zhes gsungs so/__/gzhi'i gnas skabs na snang ba thams cad 'khrul stobs kyis thim ste snang ba nang gsal du gnas pa dang*/_lam gyi gnas skabs na gzhi snang snang gzhi sogs ni 'khrul grol gnyis ka 'dres pa dang*/_'bras bu'i gnas skabs na gzhi snang rang snang du grol stobs kyis thim ste sangs rgyas kyi chos khams rgya mtsho lta bu'i 'char gzhi ste gzhi lam 'bras bu'i lhun grub gsum mo/__/'char tshul brgyad dam lhun grub kyi sbubs gsum po 'di ni 'khor 'das gnyis ka phyogs su ma chad par 'brel ba'i sgo 'phar te/_theg pa thams cad kyi rtse mor gyur pa shin tu rnal 'byor a ti yo ga'i rgyud sde rnams dang*/_de'i dgongs 'grel 'phags yul rig 'dzin dag gi man ngag rnams kyi lde mig lta bu ni/_bod gangs ldan ri yi ljongs 'dir ye shes dri ma med pa mkhyen pa'i 'od zer blo gros kyi snang ba stong dang ldan pa'am 'gro ba'i mig gcig kun mkhyen chos kyi rgyal po klong chen rab 'byams bzang po gang gis theg mchog rin po che'i mdzod du legs par phyes pa yin no/__/gzhi'i 'od gsal ka dag gi rang gdangs shar ba de'i tshe gzhi snang rang ngo mthong ba'i skad cig mar khyad chos drug gi tshul du grol te/_sangs rgyas thams cad kyi snga rol du bzhugs pa'i dang po'i dus nas rang gi sems nyid rang byung gi ye shes de nyid ngo shes pa de ni thog ma'i sangs rgyas gzung 'dzin bden zhen gyi nyes pa thams cad las grol ba spyod yul yongs su dag pa'i kun tu bzang po des/_ji ltar mthong zhing grol ba'i khyad chos drug ni 'di ltar rang ngor snang ba/_gzhi las 'phags pa/_bye brag phyed pa/_phyed thog tu grol ba/_gzhan las ma byung ba/_rang sar gnas pa ste/_rim pa bzhin gzhi snang shar ba de la shes pa kha phyir bltas kyis zhen nas 'khrul pa rgyun chags par ma mched de/_rang rig pa'i ngor snang ba dang*/_rang snang du rig pas grol 'khrul gang du'ang lung ma bstan pa'i rang bzhin gyi gzhi dang*/_gzhi snang lhun grub kyi cha de gnyis rang bzhin de las 'phags te/_grol gzhi ru song bas phyis 'khrul gzhi mi byed pa dang*/_sngar med gsar byung med pas gzhi snang gi rig pa nyid rang ngo shes nas 'bras bu ye shes su smin pa zhes/_sgrib byed dri ma bral ba'i shes rab bam ye shes kyis ngo bo shes pas/_skad cig gcig po de nyid la dbyings la yon tan rang chas su ldan pa rang snang du bag chags sna tshogs pa'i kun gzhi'i sgrib pa ye nas sangs te nyi ma sprin las grol ba ltar 'khor ba'i gzhi las khyad par du 'phags pa'i bye brag rab tu phyed pa dang*/_bye brag phyed pa'i thog gam de ma thag tu shes rab nyid kyang ngo bo nyid skur smin nas/_ye shes chos kyi sku dang dbyer med par ka dag gdod ma'i gzhi la btsan sa zin te rtag tu 'pho 'gyur med par gnas pa dang*/_rang rig mngon sum de gzhan gyis bstan pa sogs las byung ba'i rkyen la ma ltos par rang gi ngo bo rang stobs kyis rig nas sangs rgyas pa dang*/_grol gzhi gdod ma'i ngang du rang sar gnas te 'khrul pa'i rkyen mi 'jug pa'i phyir ro/__/de ltar khyad chos drug gis sku dang ye shes bsam gyis mi khyab pa rgya mtsho'i 'bras bu bum sku'i bdag nyid du/_gzhi snang mthong ba'i tshogs ye rdzogs/_sgrib pa ye dag gis skad cig gcig la mngon par byang chub pa ni thog ma'i sangs rgyas so/__/'di ltar gang tshe dbyings dag mnyam spros bral ka dag gdod ma'i gzhi chos sku'i dbyings las ma g.yos bzhin/_sgrib byed bag chags las rnam par grol ba'i dbyings kyi yon tan nang gsal du rgyas pa'i lhun grub kyi sgo las rang shar te/_rang snang longs spyod rdzogs pa'i zhing khams dang rigs lnga'i sku ru snang bar byas nas/_rigs lnga de yi so so'i rtsal las rigs lnga gangs chen mtsho'i sku gsung thugs mi zad pa rgyan gyi 'khor lo la brten pa'i zhing khams rab 'byams bsam las 'das pa tshangs chen bskal pa nam mkha' dang mnyam par bkod pa mdzad do/__/sgrib pa phal cher dag pa byang sems rnams la rang bzhin sprul sku'i zhing khams dang ston par snang ba dang*/_ma dag pa 'khor ba'i sgo las shar ba'i sems can rnams la ji ltar snang ba ni/_khams dang mos pa'i bye brag sna tshogs pa can gyi so so'i snang ba nyid dang mthun pa'i mchog gi sprul sku nas sna tshogs sprul ba'i bar ston pa yis/_'khor ba'i 'khrul snang thams cad stongs par mdzad pa'i phrin las kyi 'jug pa ji srid nam mkha'i srid mtha' ma zad pa de srid du zad mi shes par snang ba yin no/__/ye nas rang bzhin dag pa'i chos dbyings sam zag pa med pa'i ye shes bde gshegs snying po rang ngo shes pa'i stobs kyis glo bur gyi sgrib pa bag chags dang bcas pa dag nas dag pa gnyis ldan kyi 'bras bu mngon du gyur te rtsol bas ma bsgrubs kyang rang bzhin yongs shes kyi shes rab kyis ye shes kyi tshogs dang*/_dbyings na lhun grub tu yod pa yon tan thams cad mngon du gyur pas bsod nams kyi tshogs te dge ba'i tshogs gnyis kyi yon tan la mnga' dbang rdzogs pa'i longs spyod rdzogs sku'i ston pa chen po de'i zhing khams kyi bkod pa dang*/_gzhan don mdzad pa phrin las kyi rol pa sems can re re'i grangs ltar chos kyi dbyings dang mnyam par snang bas/_sangs rgyas nyid kyi ye shes kyi snang ba de tsam du tshad las 'das te/_rgyal sras byang sems kyis kyang dpogs mtha' dang bral na phal gyi blor byar mi bsam mo/__/sangs rgyas de la se mas dang sems byung gi bag chags zad pas na gnyis su 'dzin pa yod pa min pas/_gdul bya sems can 'di dang 'di la 'dul byed kyi sku dang mdzad pa 'di ltar ston zhes rnam par mi rtog kyang*/_dgos 'dod 'byung ba'i nor bu mchog dang*/_dpag bsam gyi shing chen po ltar/_rtsol ba med bzhin du mdzad pa'i phrin las chos sku spros pa dang bral ba'i ngang nas thugs rje chen po'i gdangs ma 'gags par gzhan ngor snang ba yin te/_theg mchog rin po che'i mdzod las/_dbu ma thal 'gyur ba dag_/sangs rgyas dngos ni chos sku rnam dag stong pa de la 'dod la/_rang ngor yod med kyi spros pa zhi ba'i sku dang ye shes tsam yang ma grub cing*/_gzhan snang la sangs rgyas kyi thugs rje dang*/_gdul bya'i smon lam las gzugs sku'i phrin las dang bcas pa snang ba ni/_nam mkha' lding gi mchod sdong dang*/_nor bu dang*/_dpag bsam gyi shing ltar 'dod de/_'jug pa las/_zhi sku dpag bsam shing ltar gsal gyur cing*/_/yid bzhin nor bu ji bzhin rnam mi rtog_/'gro grol bar du 'jig rten 'byor slad rtag_/'di ni spros dang bral la snang bar 'gyur/_/zhes so/__/gzhi snang lhun grub rin po che'i sbubs shar ba de nyid rang snang yin par ma rig pas/_zhi gnas rtse gcig pa'i gzhi las 'khrul snang mched tshul lam/_spang gnyen gyi goms tshul te gang rung sems ming bzhi'i phung po la brten pa can gzugs med khams dang*/_yang dag pa'i lhag mthong dang bral ba'i bsam gtan gyi sems dwangs ma 'od kyi lus la brten pa can gzugs khams/_sna tshogs su snang ba 'gyu ba'i rtog pa rags pa'i sems gdos bcas kyi sha khrag gi lus la brten pa can 'dod khams ste khams gsum sems can de rnams su snang ba ni/_thog ma'i gzhi ka dag lhun grub kyi ngo bo de la/_'khrul pa'i snang ba rgyu dang bcas pa ma mchis kyang zhes rgyu med ces pa'i gzhi la ma rig pa med pa'i don yin gyi/_gzhi snang 'char rung du yod pa'i gdangs tsam med par bshad pa min no/__/'o na 'khrul pa'i gzhi ci las byung zhe na/_gzhi yi gdangs rang snang du sgo brgyad po shar ba'i rnam pa rang snang yin pa ma shes pa'am ma rig pa'i cha de gzhi la'ang med/_phyis gzhi thog tu grol dus na'ang med pas na glo bur gyi rkyen de ni/_rig pa'i rang rtsal sgrib byed du song bas na ma rig pa dang bdag nyid gcig pa'i ma rig pa zhes bya ste/_de nyid nus pa je thur song nas dpyod byed kyi shes pa'i nus pa phra mo lang ba lhan cig skyes pa'i ma rig pa yin la/_de rang gdangs yin pa ma shes nas myu gu lta bu sogs ming dang don dang bdag tu rtog pa rags pa ma shar kyang 'char rung du song ba'i ldog pa ni kun tu brtags pa yi ma rig pa ste gsum po de las 'khrul pa'i rkyen bzhi mched de/_ji ltar mched tshul ni/_gzhi la ngo bo rang bzhin thugs rje gsum yod pa las/_ngo bo'i gdangs nam mkha' ltar go 'byed kyi char song ba la rang bzhin gyi gdangs nyid 'od khyim gyi rnam pa ltar shar zhing gnas pa 'khrul pa'i yul can skyed pa'i rgyu yi rkyen skyes bu gzugs dang yan lag rang chas ltar ro/__/rgyu rkyen du snang ba de la thugs rje rig pa'i gdangs rtog dpyod kyi rnam pa phra ba shar ba de'i dbang gis 'khrul pa phyi ma rnams 'byung ba bdag po'i rkyen byad me long du 'dzin pa lta bu'i cha'o/__/de nyid lhan du tshogs pa las phyi yul dang*/_nang yul can med bzhin tha dad du dmigs pa'i yul du song ba ni gzung 'dzin gnyis kyi dmigs pa'i rkyen te/_me long gzugs brnyan tha dad med kyang tha dad du 'dzin pa ltar ro/__/rkyen de gsum po dus gcig tu mtshungs par ldan pa las 'khrul pa rgyun mi 'chad par 'byung ba'i rkyen byed pas de ma thag pa'i rkyen te/_de bzhi po las rgyu dang 'bras bu dang*/_ming dang snang ba sna tshogs 'khrul tshul yang*/_bkra shis mdzes ldan las/_de yang rkyen bzhi yis 'khrul te/_tha ma rkyen bzhi la thug go_/rgyu dmigs pa can du 'dzin pa'i rkyen las 'bras bu sna tshogs pa'i rgyur 'khrul/_bdag po yul can du 'dzin pa'i rkyen las ming sna tshogs su 'khrul/_dmigs pa blo can du 'dzin pa'i rkyen las 'bras bu thug pa med par 'khrul lo/__/de ma thag 'dzin pa can gyi rkyen las snang ba sna tshogs su 'khrul lo/_/zhes gsungs pa ltar 'khrul yang de ltar 'khrul la/_ngos zin na de dag rang thog nas grol ba'o/__/de ltar ma grol ba rnams ni rgyu rkyen tshogs pa las rim bzhin 'khrul pa'i snang ba 'khrul 'dzin dang bcas pa goms pa stobs su gyur nas tshul min yid byed kyi rtog pa dang*/_nyon mongs pa'i tshogs gnas don lus kyi bag chags 'phel ba'i dbang gis/_'khor ba'i gnas mtho dman dang rigs sna tshogs pa 'di grub pa ltar snang ba yin te/_de ltar 'khor ba'i gnas skabs na ma rig pa nas bzung rten 'brel bcu gnyis shing rta'i 'phang lo bzhin no/__/de yang thugs rje'i rang 'od ngo ma shes pa'i ma rig pa gsum ni ma rig pa'o/__/de las rkyen bzhi ni 'khor bar 'du byed do/__/de las shes pa rags pa 'phel bas yul gyi rnam pa la dpyod pa ni rnam shes so/__/de las tha dad pa'i ming dang gzugs su 'byung ba ni ming gzugs so/__/de'i khyad par 'byung ba so so'i cha dang kha dog grub pa ni skye mched do/__/de las yul la longs spyod pa ni reg pa'o/__/de las dga' gdung bar gsum skye ba ni tshor ba'o/__/de las bde ba la sred cing sdug bsngal mi 'dod pa'i shes pa ni sred pa'o/__/de las yul dang du len pa ni len pa'o/__/de las las dang nyon mongs rgyas te phyi ma'i skye bar 'phen pa ni srid pa'o/__/de las 'gro ba tha dad du skye ba ni skye ba'o/__/de las byis gzhon gyi gnas skabs myong nas rgas pa dang shi ba ni rga shi'o/__/tshe 'di lta bu la mtshon na snga ma'i 'chi srid gzhi'i 'od gsal nub ste/_srid pa bar do snang rung gi skad cig dang po ngo ma shes pa ni ma rig pa ste/_de nas bzung phyis 'chi ba'i dus la bab tshe phyi dbugs chad dus shi ba ste lugs 'byung bcu gnyis yin la/_de phan chad kyi thim rim rnams rdzogs nas gzhi'i 'od gsal steng du sleb pa ni lugs ldog ste/_de yang gzhi dang gzhi snang la ma rig pa med pa de ngo ma shes na 'khor ba yin la/_shes na grol bas 'khor ba myang 'das su grol ba zhes bya'o/__/'di ltar gzhi snang la bdag 'dzin tu brtas pa'i dbang gis 'khor ba snod bcud kyi chos dpag tu med pa thams cad bsdu na/_mtho ris gsum dang ngan song gsum ste rigs drug dang*/_skye gnas rnam pa bzhi po'ang med bzhin du rab rib mthus skra shad ltar snang ba la/_sgyu ma'i rang gzugs bzhin rang gi ngo bo la rdul phran tsam yang ma grub pa snang dus nyid nas rang bzhin med pa/_yod ma myong ba'i stong gzugs nyag gcig la brten nas da lta'i 'khrul skabs 'di'i thog ma la ma rig pa dang*/_ma rig pa'i rol pa las sems/_sems kyi rgyan 'dzin pa las yid/_yid las nyon mongs su shar bas 'khrul lo/__/dpyod byed yid drug ni/_ma rig pa dang mtshungs ldan gyi yid lhan cig skyes pa'i bdag te nga'o snyam pa dang*/_yid kyi rnam par shes pa'i yid kun tu brtags pa'i bdag sogs dang*/_gtan bzang ngan la 'bebs pa'i yid dang*/_kun tu tshol ba'i _bde sdug dang*/_rnam par rags pa'i yid srog gcod sogs dang du len pa dang*/_nges par 'jog sems la yang yang nges par byed pa'i mi brjed pa'i yid do/__/de ltar yid drug po langs te de nas tshogs drug gi rtog pa shin tu rags pa rnams shar/_de ltar med pa la yod par 'dzin pa'i rnam par rtog pa'i dbang gis chos rnams btags pa ba de la/_bdag tu 'dzin pa'i 'ching ba dam po de ni rab tu mthu che/_sems nyid nam mkha'i khams lta bu ngo bo nyid med spros bral 'ching grol gyis dben pa 'di yang*/_gnyis 'dzin gyis rab tu bcings nas chos dang zag gi bdag gnyis su bden par snang zhing med pa la yod par bzung nas de la zhen pas mgal me'i 'khor lo bzhin te/_yul 'khor skyong gis zhus pa'i mdo las/_chos rnams gang la'ang rang bzhin 'ga' med de/_/sgyu ma smig sgyu chu yi zla ba 'dra/_/mi mkhas bden par zhen pas 'ching 'gyur te/_/rtag tu rdza mkhan 'khor lo bzhin du bskor/_/zhes pa ltar phyi don du rang bzhin ma grub cing nang sems kyi bag chags kyi rnam smin yin pa'i rgyu mtshan srid pa 'khor ba'i gnas na/_nyi ma gcig pu la mi sogs la la'i snang ba gsal byed dang*/_'ug pa sogs la la'i ngor mun pa ltar 'gyur zhing*/_de bzhin du chu bo gcig pu 'di la lha sogs la la'i bdud rtsi/_mi sogs la la'i chu dang*/_dmyal ba pa rnams la me ltar snang ba ste bde sdug byed las sna tshogs pa dang*/_de sogs phan tshun kun nas rnam par 'gal ba'i 'du shes rnams/_bag chags goms tshul gyi rjes su 'gro ba las/_yul gyi ngos nas nges pa 'ga' yang med de/_yid bzhin rin po che'i mdzod las/_sems kyis 'du byed sems kyis las kun byed/_/sems la snang zhing sems kyis brtags pas na/_/'khrul pa'i sems gdul slad du 'bad par mdzod/_/ces gsungs so/__/sems kyi bag chags smin pa las gzhan yul med pa de lta na'ang snang yul 'di dag sems dngos ma yin te/_dper na bzhin gyi gzugs brnyan me long nang zhugs kyang*/_rten cing 'brel bar 'byung ba'i rkyen tsam las bzhin dang me long nam yang 'dres ma myong ste/_ting 'dzin rgyal po las/_me long ngos sam 'bru mar snod dag tu/_bud med kha bzhin brgyan pas bltas pa na/_/de na bzhin gyi dkyil 'khor kun snang yang*/_/yod pa ma yin med pa'ang ma yin ltar/_/chos rnams thams cad de bzhin shes par bya/_/zhes so/__/bag chags kyi dbang gis med bzhin snang ba'i chos thams cad la der 'dzin 'khrul pa'i sems rtog glo bur ba/_dper na yul gzugs lta bu la mtshon na thag khra mthong ba'i tshe/_mig bslad pa'i rkyen gyis sbrul du 'dzin byed kyi shes pa rtog med tshor phung gis bskyed pa'i sems kyi skad cig ma zhes pa dang po de ni gzung ba'i chos gzugs sogs yin la/_mdo sde pa lta bur yul gyi rnam par shar ba dang*/_gzung 'dzin gnyis yul dang yul can gyi sgo nas min no/__/de'i rjes la sems byung gis rtog dpyod zhugs te sbrul du shes pa 'dzin pa la sems zhes pa'o/__/gal te phyi rol gyi snang yul sbrul dngos la sbrul du snang ba tsam gzung ba yin la/_'dzin pa ni bdag po'i zhes gang la snang ba'i gang zag de'i shes pa tsam zhig yin par smra bar byed na/_gzung 'dzin las grol ba'i 'phags pa rnams la sgyu ma lta bu'i snang ba med par 'gyur ba dang*/_sangs rgyas kyi ji snyed mkhyen pa'i ye shes kyis phung po sogs shes bya thams cad mkhyen pa yang mi rung ba sogs skyon du ma yod la/_khyad par du snang ba'i sems dang snang yul so sor ma phyed par snang ba thams cad sems yin no zhes 'dod pa ni skyon che ste/_yid bzhin mdzod las/_mi shes pa de thams cad sems yin lo/__/snang ba rnam gsum don la shin tu rmongs/_skyon mang phan tshun 'chol zhing ha cang thal/_/skyong byed dag gi lugs ngan de spongs shig_/ces pa ltar skyon du ma 'byung ba dang*/_skyes bu gcig sangs rgyas tshe thams cad sangs rgyas dang*/_dngos po yod tshe sems de yang snang ba nyid dang lhan cig yod par 'gyur zhing*/_dngos po med pa'i tshe'ang de dang lhan cig 'gro ldog byed pa dang*/_rang shi tshe yul thams cad med par 'gyur ba sogs skyon du 'gyur ro/__/de ltar gzung 'dzin du gol ba'i rtsa ba stong na mya ngan las 'da' tshul 'di ltar/_chos nyid gang du'ang ma grub pa'i ma rig pa'i dbang gis gzung 'dzin sgro btags glo bur ba'i rkyen ngar 'dzin lhan skyes byung la/_srid pa'i rtsa bar 'gyur pa'i bdag po ni nga snyam pa dang nga yi bar 'dzin pa nyid yin te/_'jug pa las/_dang po nga zhes bdag la zhen gyur cing*/_/bdag gi 'di zhes dngos la chags bskyed pa/_/zo chun 'phyan ltar rang dbang med pa yi/_/'gro la snying rjer gyur gang de la 'dud/_/ces so/__/des na don la yod par bzung nas med bzhin pa la 'khor bar 'khrul pa'i gzhi gzung 'dzin rtsa ba stongs te rgyun chad par gyur na/_kun byed rgyal po zhes rig pa la smos te 'khor ba'i chos glo bur gyi dri ma thams cad rgya mtsho las rlabs ltar sngar rig pa'i dbyings rang las byung zhing phyis su yang rang la thim ste 'tshang rgya'o/__/yon tan rin po che'i mdzod dga' ba'i char zhes bya ba las/_/gzhi'i bzhugs tshul bstan pa'i tshoms te le'u bcu gcig pa'o//____//skal pa dang ldan pa'i gang zag gang zhig 'bras bu'i mthar thug slob pa min pa'i gzhi nyid mngon du gyur pa chos sku dang gzugs sku zung 'jug gi go 'phang la/_dkri zhing sbyor ba'i dus gsum rgyal ba kun gyi mdo sngags kyi gzhung lam chen po phyin drug gi yon tan te gnas skabs lam gyi tshogs gnyis rdzogs pa dang*/_mthar thug 'bras bu sku gnyis 'thob par byed pa'i nus pa ni rnam pa kun tu chos rnams kyi gnas lugs sems nyid spros pa dang bral zhing*/_rang bzhin gyi 'od gsal ba'i don ma nor bar rtogs pa'i shes rab kyi pha rol tu phyin pa la yang dag par bsten pa yin te/_sdud pa las/_dmus long dmigs bu med pa bye ba khrag khrig rnams/_/lam yang mi shes grong khyer 'jug pa ga la 'gyur/_/shes rab med na mig med pha rol phyin lnga yang*/_/dmigs bu med pas byang chub reg par nus ma yin/_/gang tshe shes rab kyis ni rab tu zin gyur pa/_/de tshe mig rnyed gyur cing 'di yi ming 'thob bo/_/zhes so/__/thabs shes zung du 'jug pa'i chos nyid kyi don ji bzhin mthong ba'i lam de nam yang srid ba dang nyan rang sogs gzhan gyi rgyur mi 'gyur ro/__/'o na dbu ma pa dang mtshungs sam zhe na/_'di ltar ye nas rdzogs pa'i sems nyid rdzogs pa chen po'am bde gshegs snying po yon tan ye rdzogs su bzhugs pa'i gzhi nyid ye nas rang la yod kyang ngo ma shes pa ye gsang thabs kyis chod pa gzhan gyis rtogs par dka' ba sangs rgyas kun gyi thugs kyi gsang ba rdzogs rim mthar thug pa'i ngo bo stong pa nyid kyi gnas lugs don dam pa'i bden pa de la/_dag ma dag sogs kyi mtshan nyid mi gnas shing*/_spros pa'i mtha' thams cad dang bral ba'i don la blo'i 'jug pa dbyings su zhi nas dbu mar bzung ba'ang med cing mi dmigs pas/_rang gi ngo bo nyid spangs pa ste stong la/_lhun grub kyi cha nas dwangs gsal g.yo ba med pa'i 'od gsal ye shes kyi sgyu ma mi 'gags pa ni rdzogs pa chen por grub pa yin no/__/rang phyogs sgrub cing gzhan phyogs rgol ba'i rtsod pa mngon par 'phel ba'i bsam byung gis bskyed pa'i rtog ge'i rig pa rnon pos ni/_ji ltar brtags shing dpyad kyang zab mo'i don la skur 'debs tshul gyis rjes su dpag pa'i don dam las 'das te/_kun rtog gi 'thor rlung g.yo ba'i phyi bzhin 'brang bas na/_don dam ye shes kyi spyod yul ni bsam yul las 'das pa'i chos nyid de dang 'gal ba can te/_spyod 'jug las/_don dam blo yi spyod yul min/_/blod ni kun rdzob yin par brjod/_/ces dang*/_lang gshegs las/_byis pa ngan pa rtog ge pa/_/ro dang 'dra bas 'di ltar brtags/_/zhes so/__/de kho na nyid ni 'phags pa'i mnyam gzhag gi tshe na'ang so so rang rig gi ye shes spros bral ni yongs gcod du bsam zhing brjod pa'i yul las 'das pa'i phyir ro/__/sems tsam man chad kyis gnas lugs ji bzhin ma rtogs pas dngos por smra ba grub mtha'i rtog ge dang*/_rang rgyud 'dzin pa dang bcas pa sa mtshams dman pa sbyor lam man chad kyi so skye'i rtog ge yi rtog dpyod las 'das pa rgyal ba'i ye shes rang byung gi dgongs pa ni/_gdod nas grol ba'i chos nyid yin pas/_da gzod grol byed kyi rkyen la mi 'jug kyang rang bzhin rdzogs pa chen po'i lam du rig pa'am chos nyid shes bya gzhi'i bzhugs tshul snang phyogs su yod mthar ma lhung ba/_snang bas ma bcings pa/_stong pa'i rang bzhin dngos po'i gzhi thog tu phebs pa/_stong phyogs med mthar ma lhung ba/_stong pa de yang rang bzhin 'od gsal ba'i snying po can te zung du 'jug pa'i 'od gsal 'gag med ni/_rig pa rang byung gi ye shes bcings grol dang bral ba/_sangs rgyas chos sku'i dgongs par bzhugs pa'i chos nyid kyi rang rtsal sku dang ye shes chos khams rgya mtsho lta bur ye nas 'du 'bral med pa ni/_nyi ma'i snying po la 'od zer 'du 'bral med pa bzhin te/_de'i tshe na gzugs sogs snang yul ma 'gags par shar yang*/_de yi rnam pas rig pa de la ma gos pas stong la/_rig pa yul thog tu ma shor bar rang so zin pas snang yul la blo yis ma gos pa'am 'dzin pas stong ste/_ngo bo gang du'ang ma grub pa'i phyir na stong pa ka dag dang*/_lhun grub kyi rtsal 'gag pa med pa de gnyis zung 'jug gtad med kyi rig pa bar med har sang du song ba ni/_bsal bzhag dang bri gang med pa'i chos nyid phyam gcig tu gnas pa ste/_nam mkha' klong yangs las/_gang yang ma spangs kun las 'das pa'i don/_/phyogs bral rig pa gtad med rang yan te/_/'di zhes mi mtshon bsam pa kun dang bral/_/gnyis med yangs pa chen por phyam gcig go_/zhes so/__/chos nyid bya rtsol dang bral ba blo 'das rdzogs pa chen po'i gnas lugs gang la/_ngo bor dbye ba dang bzang ngan ma grub kyang dbang po dang blo yi rim pas 'jal lugs rnam pa gsum du gsungs pa yin te/_a ti bkod pa chen po las/_yid can rnams la sems kyi sde/_/nam mkha' can la klong gi sde/_/rim rtsol bral la man ngag go_/zhes pa ltar rang gi sems nyid las gzhan du gyur pa'i chos gang yang spang bya las grol bar gnas pa sems kyi sde ni/_chos kun rig pa'i rol pa sna tshogs pa'i gsal shas che ba rtsal du me long dwangs ma'i mdangs ltar gsal la 'gag pa med par shar te/_kun byed las/_snang srid snod bcud sangs rgyas sems can kun/_/sems kyis byas shing sems kyi ngang du gcig_/ces so/__/klong gi sde ni yin min phyogs bral rang snang bkod pa'i rgyan stong shas che ba las sems sde ltar rang rtsal mi 'dod de phyogs bral ye stong klong 'byams chen po'o/__/sems sde ni rtsal te nye bar 'phros pa lta bu/_klong sde rgyan te tshur rig pa lta bu'o/__/man ngag gi sde ni chos thams cad med bzhin snang bas yin lugs gshis thog tu phebs pas spang gnyen gnyis ka'i mtha' las grol ba'i stong pa'i gzugs brnyan nyag gcig yin la rnam rtog grol ba dang ngang la 'jog pa gang yang med pas khyad par du 'phags so/__/kun kyang thog mtha' skye 'gag med pas grol bar bya ba'i gzhi sems kyi chos nyid ye nas grub ma myong ba'i smig sgyu la chu rags mi dgos pa lta bu gzhi gang yang med pa'i byang chub sems/_gang gis sgrib pa/_gang zhig dgrol bar bya ba/_thabs gzhan yang spangs pa'i yul snang ma 'gags pa rang gsal gyi gdangs 'gags med du de yang phyang chad lta bu ma yin par ye nas 'gags ma myong bas stong bar mthong dgos kyang de la stong gzhi dang gnas byed kyi rtsa ba med pa'i rig pa rang gdangs ka dag gi klong na rang gsal ba ni grol ba lnga'i khyad chos dang ldan pa yin te/_ye grol ni/_tshogs brgyad sprin lta bu'i dbus na rig pa nam mkha' ltar srid pa'i skyon gyis ma gos shing spros pa dang bral bas na/_phyi nas rkyen gyis rnam rtog gang shar yang byas shing bcos pa med pas/_dang po nas ye grol du yod pa yin no/__/rang grol ni/_bla mas ngo rang thog tu sprad pa de nyid rang babs su 'jog pa las med/_'on kyang rnam rtog rags pa rgyun mthud pa gnyen po cung zad brten dgos pa'i chos thams cad rig pa rang gis rang grol ba/_dper na chu 'bab pa la ded mi dgos pa ltar rkyen la rag ma lus so/__/gcer grol ni/_rnam rtog 'khrul 'byams su song na rig ngo la bltas pas grol ba/_dper na khyi la rdo 'phangs bas rdo ded pa ltar/_rnam rtog gi rjes bsnyeg pa ma yin la/_seng+ge la rdo 'phangs na gang zag la bsnyeg pa ltar rig ngo la gcer gyis bltas pas grol ba yin pas gnyis por ltos pa dang ltos gzhi kun dang bral ba'o/__/mtha' grol ni/_rig pa'i ngo bo skye med kyi cha nas yod mtha' las grol kyang*/_'gag med kyi cha nas med mtha' la mi gnas/_rgyun mi 'chad pas med mtha' las grol kyang*/_rtag dngos min pas yod mtha' la mi gnas/_rtsal snang sna tshogs su 'char bas gcig pur ma grub pa dang*/_spros pa dang bral bas du mar gdags pa'i mtha' las grol ba'i kun tu bzang po'o/__/gcig grol ni/_bden pa dbyer med kyi rig pa spros bral la/_gcig dang du ma ma grub kyang*/_tha snyad du chos sku thig le nyag gcig ces bya bar btags pa'i zang thal gyi ye shes gcig po rnam rtog thams cad rig pa'i klong der grol bas chos gang yang med pa nam mkha' dwangs pa ltar mtshan nyid med do/__/gang dag 'og tu 'chad pa'i rtogs ma rtogs kyi cha ma rig pa tshogs dang bcas pa'i sems las 'das pa'i gzhi gnas kyi rig pa rjen cer du ngo sprad pa ni/_rang bzhin rdzogs pa chen po'i thun mong ma yin pa'i khyad chos yin te/_rig pa'i chos nyid tshul bzhin du rtogs pa rnams ni gzhi las gzhi snang ngo shes nas rig pa rang bzhin med pa'i ngang der grol te/_chos nyid zad sar thug pa na kun tu bzang po'i zhing du phyin te chos sku'i rgyal sa zin pa'o/__/rig pa'i chos nyid ma rtogs pa'i sems can gzung 'dzin gnyis su snang ste rig pa'i dbyings de nyid las ma g.yos bzhin kun gzhi'i ngang du 'khrul snang 'khor ba'o/__/mdor na sems rig gnyis po de dpe yi rnam pas dbye na/_rig pa ni tshogs brgyad rlabs lta bus ma dkrugs pa rnal du gnas pa rlabs bral gyi rgya mtsho'i chu lta bu dang*/_sems ni rnam rtog gis dkrugs pa chu bur bzhin no/__/rtog med gnas pa tsam ni rig pa min te/_mnyam bzhag gi skabs 'gyu ba mngon gyur ba 'gags nas rtse gcig tu zin pa sems rtog med rig pa yul med du zin pa rtog med gnyis gnas pa tsam du sems rig mtshungs na'ang*/_'byed chos ni rig pa rang bzhin med pa'i chos nyid yongs shes kyi ngo bor bden 'dzin mtha' dag dang bral ba zang thal gyis gsal la/_sems ni lteng ka ste khron pa lta bur 'khyil zhing ma rig pa dang mtshungs ldan gyis rig pa rang byung gi sgron me sgrib nas rmongs la/_rig pa ni yid yul du mi 'jug pa so so rang rig gi ye shes te/_dper na gnam stong zla ba rang 'od phyir mi gsal la gting gsal dang 'dra bar ye shes lnga po lhun grub tu yod kyang yul gyi rang bzhin la mi rtog go_/sems ni gnas pa tsam yod kyang yul sna tshogs pa'i rjes su 'gyu bas bco lnga'i zla ba rang 'od phyir 'phros te yul thams cad la 'dres pa dang mtshungs so/__/lhag mthong gsal ba'i cha la ma rig pa'i rnyog pa med pas dwangs la/_yul gyi rnam pas gos pa med la snang stong zung du 'jug pa ni rig pa'i yon tan yin te/_de las gzhan pa'i myang 'das gud du med la tshogs drug gi yul dang kun nas 'dres pa ni sems kyi khyad de/_kun byed las/_rang byung ye shes yul la mi rtog pas/_/rnam par rtog pa'i bag chags gos mi 'gyur/_/zhes so/__/de bzhin rig pa zang thal du ngos zin pa'i ngang la gnas na de ni chos nyid rang gi gshis lugs la ye nas gnas pa'i shes rab bam lhag mthong ste/_ngo bo bsal bzhag dang bral ba/_bsam gtan ni thabs gzhan la ma ltos par rang gsal ngar dang ldan pas bying rgod dang bral ba yin zhing*/_sems lam du byed pa'i bsam gtan ni/_dmigs pa'i yul lha sku sogs la 'dzin stangs dang bcas pas rtse gcig tu 'jog pa yin pas bsgom pa'i ting nge 'dzin dang sngar gtan la phab pa'i lta ba'i don de gnyis yul bsgom bya lta ba'i rang bzhin rten dang yul can sgom byed ting nge 'dzin brten par zung du 'brel bas na/_gzung 'dzin dang bral ba'i rig pa'i sgrib byed du song nas gnas skabs rnam rtog ngal gso ba'i bsti gnas tsam las chod chung ba nyid de/_rdzogs chen ye shes nam mkha' dang mnyam pa'i rgyud las/_bsam gtan shes gzhi byar med dang*/_/rdzogs chen lhag mthong rig pa gnyis/_/'dra dang nor bas gol te 'gro/_/zhes so/__/rig pa yul la shar ba ste thugs rje'i rtsal mdangs ma 'gags par snang ba yin kyang*/_rang ngo dang rtsal shar ba gnyis tha dad du gyes te yul gyi rjes su rtog pa mthud nas rtsa ba chod pa min phyir phyi tshogs drug gi yul du ma dpyad/_nang sems su ma brtags/_bar du chos nyid skye med la gzhag bya 'dzin stangs dang bral ba'i chos nyid blo 'das kyi rig pa rjen par bud pas gzhan du mi 'gyur ba'i phyir/_snang ba yi zil gyis mi non pa dper na dngul chu sar lhung na rdul dang mi 'dre ba dang 'dra la/_sems ni gzung ba'i yul la rang ngo ma shes pa 'dzin pa'i cha dang bcas pa yi/_rnam rtog sna tshogs pa nye bar len pa'i phyogs dang 'dres nas las sogs par 'gyur te/_klong drug las/_rang rig bsam pa bral ba dang*/_/sems kyi byung tshor sna tshogs gnyis/_/'dra'o 'dra'o nor ra re/_/shes rab rang rtsal rdzogs pa dang*/_/yid kyi dran bsam sna tshogs gnyis/_/'dra'o 'dra'o nor ra re/_/zhes so/__/de yang ngo bo rig pa la bzhag dus sems gang dgar rang sangs la bskyur ba yin no/_/rang bzhag gnad 'di do gal shin tu che ba yin gsungs/_rig pa ni sems kyi chos nyid yin pas na/_sems can gyi dus na sems de nyid gzhan du ma spangs bar de'i khyab byed du yod kyang*/_sems dang rig pa gnyis snang mun bzhin lhan cig mi 'du bas/_rig pa ngo 'phrod de rang babs su gnas su rgyun bsring na bzung ba'i yul dang*/_de 'dzin par byed pa'i rnam par shes pa ma rig pa dang mtshungs ldan gyi shes sgrib can rang dang rdzas gcig pa'i chags sogs nyon mongs rnams kyang*/_yul dang yul can gyi gzung 'dzin de dang lhan cig sbran nas te gcig gis gcig la skad btang ba bzhin rig pa la bros nas nam mkhar sprin dengs pa bzhin rang dengs la 'gro ba yin no/__/de ltar bros shing 'gags pas gzung 'dzin gyi rnam par rtog pa dang nyon mongs pa'i btson ra shin tu brgal dka' ba de las/_tshegs med du thar pa nges par 'byin par byed pa yi man ngag sde pa yi khyad par gyi chos yin te/_lam 'di las gzhan du gyur pa rnams la man ngag 'di dang mi ldan pa'i phyir te/_'di ltar nyon mongs pa'i tshogs thams cad nyan thos dang rang rgyal rnams kyis spong zhing*/_byang sems kyis stong nyid sogs gnyen pos 'dul ba dang*/_a nu man chad kyi sngags spyir nyon mongs lam du byed pa'i thabs gtum mo sogs la brten nas bde stong dga' bzhi'i ye shes bskyed pa'i lam la gtong kyang*/_spang gnyen gnyis mnyam du mi 'byung ba'i phyir/_mi mnyam na lam byed kyang mi rigs so/__/sems sder rtog pa gang skyes thams cad ngos zin nas gshis thog tu grol bar 'dod kyang ngos zin mkhan de sems yin dgos na/_sems rang gis rang mi mthong bas mi grol/_klong sder snang sems thams cad rig pa'i rgyan du bltas nas chos nyid gcig tu mnyam par bzhag nas dag par 'dod kyang rig pa ni ye shes ngo bo yin pas de'i ngang la sems med pa'i phyir/_ye shes kyis sems mi mthong bas de ltar dbyings kyi ngang du 'jog pa sogs dag byed kyi rtsol ba gang yang mi dgos pa/_rig pa'i chos nyid kyi klong na chos can rang ngos nas stong pa dang*/_chos nyid gzhan ngos nas stong pa'i 'dod zhen grub mtha' thams cad rang tshugs zhig ste/_spang gnyen gang yin kyang rang grol rjes med du gyur pa shin tu ngo mtshar ba gzhan las khyad par du 'phags pa'o/__/de bzhin ma dag pa'i rten kun gzhi dang ni/_ye shes kyi rten chos sku gnyis ka dag stong pa'i dbyings su gcig kyang*/_chos sku ni rgya che la gting zab pa rlabs bral gyi rgya mtsho dang 'dra la/_kun gzhi'i rnam shes ni rig pa de yi sgrib cha ste/_kun gzhi zhes dge ba'i bag chags kyi rten mi dge ba'i bag chags rang nyid dag byed lcags kyi btsa' lta bu dang*/_mi dge ba'i bag chags ni chos sku'i sgrib byed tsam las kun gzhi gzhan na med do/__/gru pa bzhin du dge mi dge'i las la brten nas 'khor 'das gnyis kar lding ngo*/_/gzhi'i gnas lugs 'od gsal de nyid nas ngo ma shes na 'khrul pa yin la/_ngo shes na grol ba'i chos de nyid kyi mtshan nyid kyang*/_dper na rmi lam sna tshogs kyi rten gnyid du song ba dang*/_rmi lam rgyun chad nas de las sad pa bzhin te/_'di ltar kun gzhi'i ngang du 'khrul pa na ye shes kyi mkhyen cha ma rig pas sgrib pa ni sgo lnga'i dbang po nang du sdud de nyams pa'i gnyid stug gi gnas skabs ltar la med snang sna tshogs la spyod pa ni dper na rmi lam bzhin no/__/sgrib pa las grol te chos sku'i rang zhal mngon du mjal pa ni/_gnyid de las sad pa'i tshe sgo lnga'i yul mngon sum du mthong ba'i gnas skabs dang 'dra'o/__/thog ma'i 'khor 'das gang du'ang ma phye ba'i grol 'khrul gang gi'ang rgyur nges pa med pa gzhi yi rig pa ka dag gi ngang nas lhun grub kyi gdangs 'gags med de dang*/_lam mthar phyin tshe dag pa gnyis ldan gyi grol sa'i ka dag glo bur gyi dri ma bral ba gnyis po ni/_ngo bo rang bzhin thugs rje gsum ldan gyi dbyings kyi ngo bo la 'pho 'gyur med pas rdzas su gcig kyang*/_slad kyi 'khrul pa'i gzhi byed dang mi byed khyad par ni/_thog ma'i gzhi lhun grub ni ma rig pa cha dang bcas pa'i 'khor 'das gnyis ka'i 'char gzhi yin pas 'khrul gzhi byed la/_grol gzhi la ma rig pa med pas 'khrul gzhi mi byed pas de gnyis kyi khyad par shes pa gces so/__/tshul de bzhin dbyings kyi yon tan mthar phyin pas grol sa ka dag nang gsal gyi ye shes de dang*/_da lta'i rnal 'byor pa'i mnyam gzhag gi ngo bo brjod med kyi rtogs pa lam gyi rig pa ka dag ngang la mnyam par bzhag pa gnyis kyang gnyis snang dbyings su nub ste rang bzhin spros pa dang bral bas rgya gar yang ma chad cing snang stong la sogs pa'i phyogs su lhung ba med par mnyam pa tsam yin na'ang grol sa ka dag gi dbyings nyid ni ma dag pa'i rlung sems bag chags kyi cha dang bcas pa rnam par byang zhing lam bsgom stobs kyis dag par 'gyur ba'i phyir 'khor ba'i 'khrul snang med par ma zad ye shes kyi gsal cha'ang dbyings su thim nas mya ngan las 'das pa'i snang ba yang med par ka dag gi rig pa chos sku'i ngang las mi g.yo ste 'khor 'das gang du'ang mi gnas so/__/lam dus su rlung sems ma dag pa'i cha gtan zad du ma song bas rkyen dbang gzung 'dzin dang 'grogs shing*/_gnyug ma'i rig pa sgrib byed sems dang sems byung dri ma'i chas rig rtsal bslad cing khur bas rig pa ka dag gi dbyings la gnyis snang nub pa'i tshul gyis dngos su gnas pa ni res 'ga' tsam mo/__/de lta na'ang sems rang babs su 'jog par bslab na nam zhig gi tshe na 'dzin stangs dang bral ba'i rig pa rtogs nus so/__/de bzhin du da lta lam 'dir zhugs nas nyams len la brtson zhing khyad par lhun grub thod rgal gyi nyams len la goms pa brtan po rnams bar do dang por ma grol kyang chos nyid bar do'i skabs gzhi la lhun grub tu yod pa'i rig gdangs lhun grub chen po'i lha sku zhing khams sogs snang ba rnams bsam gtan gyi zhag grangs su rim gyis 'char ba dang*/_da lta'i rtog bcas bskyed rdzogs bsre 'pho la goms pa'i stobs kyis srid pa bar dor lha yi sku sgyu ma lta bur ldang nus pa'i sgyu lus gnyis po bar dor lha skur snang ba tsam du mtshungs kyang*/_snang ba zhing khams su shar ba de gnyis snga ma ni 'dus ma byas kyi rang gdangs rtsol med du shar ba yin pas rgya che zhing rang snang du ngo shes pa tsam gyis nang dbyings thog tu grol bar 'gyur ba dang*/_phyi ma ni bag chags bzang goms rlung sems rtsal las snang ba yin pas gong mar ltos na rgya chung zhing*/_da dung lam gyi lhag ma bgrod dgos pas mi grol ba'i khyad par yod pa shes dgos so/__de la las dang po pas rtogs pa bla ma'i thugs rjes ngo sprod pa de sa dang po'i rtogs pa yin lugs dper na shel gdung du bltas pa'i tshe rgyang ring po na yod pa rnams drung na yod pa ltar snang ba lta bu yin te rang stobs kyi tshogs bsags pa dang sgrib pa dag pa te rlung sems sogs kyi khyad par du rdzogs pa chen po'i lam 'dir zhugs pa'i nyams len gyi gnad goms mthar phyin pas dam tshig rnam dag bsrung ba'i skal pa can zhig yin na/_sa bcu'i bar gyi rang rang gi snang bas bsdus pa'i byang sems rnams la sangs rgyas longs sku de mthong ba la yun ring 'thogs pa ma yin te/_longs sku de yi dpe byad ni me long du shar ba ltar rang snang lhun grub kyi sgo las sangs rgyas kyi thugs rjes rang bzhin sprul pa'i zhing khams lhag par bkod pa la tshe 'di brjes ma thag tu srid pa bar dor chos nyid bden pa'i byin rlabs kyi mthus lam gyi lhag ma bgrod nas myur du gdod ma'i dbyings su rmi lam sad pa ltar 'gro'o/__/kod pa chen po las/_snyigs ma lnga brgya dus kyi tha ma la/_/gsang ba'i snying po 'di ni mi yul snang*/_/de rjes 'dzin pa'i gang zag skal pa can/_/snying po 'di ni su la snang gyur pa/_/de dag rnams ni mi 'gyur sa la 'da'/_/gal te snyigs ma tshe thung nad mang bas/_/snying po'i don 'di gding du ma gyur kyang*/_/'di nyid mthong bas dbugs chen nyid 'byin pa/_/bcu gcig kun tu 'od de sprul pa'i zhing*/_rdzus skyes dag pas mngal gyi rgya las grol/_/zhes so/__/khyad chos dang ldan pa de yi phyir na rang bzhin rdzogs pa chen po'i lam 'di ni gsang sngags rdo rje theg pa'i lam thams cad las nye lam mchog tu gyur pa ste/_glo bur gyi dri ma gshis la ma zhugs pas gzhi la 'ching grol med pa gdod nas spros pa thams cad las grol ba'i rig pa ka dag de'i ngo bo ni/_rnam thar sgo gsum gyi rang bzhin te ye nas stong pa spros bral ngo bo stong pa nyid la yod pa lta ci med pa'ang bral ba bsam brjod yul las 'das pa'o/__/tshad dbyibs gnyis chos sogs las 'das pas na mtshan nyid blo yi brjod pa'i yul las 'das pas blo reg gi thug pa spangs pa/_'bras bu'i chos sku dang ye shes sogs nyi ma la zer ltar rang chas yod pas blang dor bya rtsol gyi 'bras bu la smon pa med pa rang babs su bzhag pa la rig pa'i yon tan thams cad rdzogs pa'o/__/rig pa'ang shes bya'i yul gzung 'dzin lam la mi gnas pas phyir na/_nga dang nga yir 'dzin pa'i dngos 'dzin gyi chos yod med kyi mtha' dang bral ba'o/__/de ltar ngo 'phrod pa'i lta ba de'i ngang la 'jog pa las gzhan sgom pa po dang bsgom par bya ba zhes lta ba tha dad pa'ang med de/_shes pa 'di ka'i ngang la ma bcos rnal mar rang babs su bzhag na/_zang thal du rig pa'i gnas lugs rjen par mthong ngo*/_/mthong ba de yi rang gi ngo bo rnam rtog bzang ngan las grol te rkyen gyis gzhan du mi 'gyur na/_ma rig rnam rtog gi 'dzin pas srid par 'khrid pa'i las gsog par mi nus so/__/'di ltar phyi rol yul gzugs sogs dang*/_der 'dzin gyi blos bdag tu zhen pa'i ma rig pa dang*/_de las byung ba'i rtog tshogs rnams/_dbang phyug sogs gzhan byed pa pos ma byas te glo bur du skyes pa'i sems rtog gis rgan mos stag bsgom pa lta bu de nyid la zhen pa dang rtog ge'i bag chags mthu brtas pa las grub pa'i phyir/_/rten par byed pa'i snang ba 'di dag thams cad gzhi sems nyid nam mkha' ltar cir yang ma grub pa'i ngang las rang gdangs 'gag med kyi stong gzugs cir yang shar ba dang*/_rtsa ba sems nyid rang gi ngo bo grub pa med bzhin ma rig pas bslad pa las 'khor 'das kyi chos thams cad skyes pa ltar snang yang skyes tsam nyid las rig pa'i chos nyid skye ba med par rdzogs te/_mu tig phreng ba las/_chos sku nam mkha' lta bu la/_/glo bur rnam rtog sprin gyis bsgribs/_/ma 'khrul ba yi chos nyid kyang*/_/blo la 'khrul pa'i tshul du snang*/_/zhes so/__/de ltar lta sgom spyod gsum zung 'jug ngang la goms su 'jug pa las gzhan pa'i rtogs par bya ba'i 'bras bu zhes pa yod pa ma yin pas bsgrub mi dgos te de nyid klong du phebs tsa na/_phyi yul med du rtogs pas gzung ba'i chos dag_/nang yul can du mi gnas pas 'dzin pa gzhi med rtsa bral du song*/_rten gzhi med pa'i rig pa la blos mtshon du med pas nam yang 'khrul mi shes pa'i tshe na gsung rab klog pa dang*/_tshig don blo la 'dzin pa dang*/_dmigs pa la rtse gcig tu ting nge 'dzin bsgom pa dang*/_bstan bcos sogs kyi don la sems shing brtags pa la sogs pa mtha' dag kun rtog gi blo yi grub mtha' tha snyad bcos ma'i chos la ltos mi dgos pas/_thun dang thun mtshams kyi dbye ba med par lta sgom spyod pa'i khrigs zhig_/dran pa chos nyid du sangs pas ched du bsgom pas gnyen po'i chos zad/_rig pa chos skur shes pas sangs rgyas dang sems can du ye nas ma grub pa'i gdeng rnyed par gyur pa na/_rang rig gzung 'dzin dang bral ba de las gzhan na yid smon gud na tshol du med pa'i chos nyid la dus gsum gyi sangs rgyas thams cad kyi dgongs pa rdzogs par 'gyur bas na 'bras bu ni rang gi rig pa de nyid do/__/khregs chod las kyang khyad par ba bla na med pa'i thod rgal gyi lam ni/_bsgom dus khregs chod kyi lta ba de la nges pa rnyed nas bzhugs stangs dang nam mkhar gzigs stangs sogs kyis gnad gcun bas rnam rtog rags pa 'gags shing phra ba rang yal du song ste/_thog ma nas dbyings kyi snang ba 'od lnga dang rig gdangs rdo rje lu gu rgyud nas lha sku'i bar dbang po'i mngon sum du mthong bas sku thig le la sogs snang ba la ma zhen na gol ba'i gdangs bral nas gzhan stong nyid gshis shor gyi gol sa nyung zhing*/_phyi 'byung sa rdo ri brag sogs tha mal gyi yul snang gi bag chags thog med nas bzhag pa'i rdos bcas dri ma ngang gis zad pa'i dngos po phyi nang thams cad la thogs med zang thal du thar ba sogs 'byung chen gyi yul thams cad ye shes 'od gsal chen por dwangs par byed pa'i lam snang bar rdzogs shing mngon du byed pa yin pas/_nang rang gi phung pos bsdus pa'i 'byung ba rnams khregs chod tshad du phyin pa'i stobs kyis/_rdul phran nyid du 'gro ba tsam las 'od lus su dwangs par ma nus pa'i phyir 'pho ba chen po'i sku mi 'thob pa'ang*/_'pho ba chen po zung 'jug gi ye shes skye 'chi bgres rgud dang bral ba rdo rje'i skur snyigs ma'i dwangs ma lus ngag yid gsum sku gsung thugs su smin nas rten des gzhan don 'khor ba ma stongs bar du mdzad pa ni/_rgyal dbang pad+ma bi ma la dz+nyA na sU tra rnams lta bu'o/__/rgyu mtshan de'i phyir na theg pa 'og mar rang gi sde pas yid dpyod kyi lam las 'das pa sems klong sogs lta ba sems nyid mtha' bral du gtan la phab pas/_sgom pa de'i ngang du ma bcos par 'jog pa las lha bsgom sogs mi dgos la/_sgom pa gang shar rang grol du 'gro bas dgag sgrub mi dgos par spyod pa/_'bras bu gzhan du mi re bas ye nas 'bras chos sku dang ye shes rang rtsal du rdzogs pas 'og ma kun dang khyad zhugs pa'i khyad chos kyi mtshan nyid gnad rnam pa bdun te/_brtson 'grus che chung dbang po rno [᪔ᝋ]med pa'i gnad dang*/_de bzhin mngon sum bltar yod pas yid dpyod la mi ltos pa dang*/_don ji bzhin mthong bas tshig la mi ltos pa dang*/_rang gsal mngon du gyur pas gzhi lam 'bras bu dus la mi ltos pa dang*/_rgyu 'bras bzang ngan la mi ltos pas 'bad rtsol blang dor med pa dang*/_rang byung gi 'od gsal khong nas 'char bas na so la rgan gzhon med pa dang*/_sku gsum lam snang du rdzogs nas ka dag gi klong du lhun grub rig pa'i gtan srid zin pa'i gnad bdun legs par phyed pa man ngag 'di lta bu dang 'phrad pa'i don yin pas 'bad par gdams so/__/de lta yin mod kyi 'on kyang bdag dang bdag gir 'dzin pa dang bcas pa'i tshogs brgyad glo bur ba nang gi 'khrul pa'i rkyen/_chos dbyings ka nas dag pa'i klong du ma nub par te nub par byed mi nus pa'i snang ba yul gyi blo can rnams la rig ngo cung zad re 'phrod kyang glo bur ba phyi yul rkyen bzang ngan te nad gdon dang thob mnga' thang sogs rkyen gyis bslu bar 'gyur ba'i phyir na/_rtog tshogs thams cad gzung 'dzin gyi chos su snang zhing bslad pa 'di 'dul thabs la brtson dgos te/_tha mal pa de nyid rang lugs 'khor ba'i gnas su 'phen pa'i tshul las gzhan du ma 'gyur pa'i srid pa'i rtsa bar gyur pas bdag po ste gzung 'dzin de yis/_dang po'i las can rnams kyi rig pa'i ngo bo la sgrib pa'i phyir na thun mong pa dang mthun pa'i sems gnas bsgrub tshul yang*/_de'i gnyen po zhi gnas dang lhag mthong ngo bo gcig pa yi khrid tshul dang*/_zhi lhag so so ba yi 'khrid tshul te rnam pa gnyis las 'dir dang po zhi lhag ngo bo gcig pa'i phyogs 'phags pa 'da' ka ye shes kyi mdo'i dgongs pa ltar/_dmigs rten gang rung la sems gtad nas dran pa la brten nas bsgom pa'i tshe de la gnas cha'i sems rtse gcig pa'i bsam gtan dang*/_rang bzhin med par gsal cha'i so sor rtog pa'i shes rab ni/_zhi lhag zung du 'brel ba las tha dad pa gzung 'dzin gnyis su 'dzin pa min pas mtha' bral chos nyid kyi don la mnyam par bzhag pa ste/_mnyam gzhag tshe stong nyid dang*/_rjes thob tshe snying rje zung du 'brel ba'o/_/bsgom pa'i mdo thams cad 'dir bsdus so/__/gnyis pa zhi lhag so so ba'i phyogs la'ang dbye ba gnyis su grub ste/_gtso bo thos bsam gyi shes rab las byung ba dang*/_bsgom thabs kyi gdams ngag las byung ba ste gnyis yod par mdo las kyang 'byung ngo*/_shes rab las byung ba ni sgra yi rjes su mthun pa gzhung gang rung la thos bsam gyis sgro 'dogs bcad de de'i ngang rang bzhin med par nges shes bcas dpyad 'jog dbu ma dang mtshungs so/__/dang po thos pa dang bsam pa'i don la sems gnas pa'i thabs dgu la sogs pas rtse gcig par rnam rtog zhi ba dang*/_de las bdag med dang spros bral gyi don rtogs te dmigs pa'i 'dzin stangs dang bral ba lhag mthong mtshan nyid pa yin pas 'bad pas sgrub pa nyid do/__/man ngag las byung ba ni sgra tshig rtog dpyod la mi ltos par don gyi rjes su 'gro ba ste zhi lhag sgrub pa'i thabs bla mas man ngag bstan pa'i don la mnyam par 'jog pa ste/_de yang phyi'i dmigs pa sku gzugs sa bon la gtad nas bsgom pa'am/_nang dmigs rlung thig sogs la sems 'dzin pa dang*/_lus gnad rtsa rlung sogs gnad du gcun pas bde gsal mi rtog pa skye ba sogs dmigs pa de dag gi ngang la sems ni rnam rtog gis g.yo ba med par rtse gcig tu gnas pa zhi gnas la/_gang snang ba de yi rang bzhin gdod nas spros bral 'od gsal ba'i bdag nyid can du shes nas gang du'ang 'dzin pa med pa ni lhag mthong mtshan nyid pa ste/_mdor na rtogs pa klong du rdol ba'i gang zag rab kyis ngan rtog thams cad shar dus de nyid na rjes mthud med par grol na gang shar kun chos skur lhongs pas/_rnam rtog bzang ngan gang skyes kyang mgo mnyam par gyur pa na gnyen po gzhan bsten mi dgos te/_nyal 'dug dkyil 'khor gyi rol pa/_rkang rjes rdul tshon gyi thig le/_sgul skyod thams cad phyag rgya'i rol pa yin no/__/'bring gis sngar gtan la phab pa'i lta ba'i ngang dwangs zhi lhag zung 'brel gyi lam la goms pas/_bzang ngan rtog pa mtha' dag nam mkha'i dbyings su sprin dengs pa bzhin ka dag gi dbyings su nub bo/__/tha mas mdo phyogs ltar thog mar zhi gnas 'ba' zhig btsal te/_lha sku sa bon gru chad sogs gang dmigs kyang gtan tshugs kyi brtan pa thob nas/_lhag mthong gi ye shes so sor rtog pa bskyed de zhi lhag zung 'brel la goms par byed na/_rim gyis mthar gyis rnam rtog rang sar grol ba'i dus zhes bya ba dper na gser gling nas sa rdo mi rnyed pa bzhin/_sems dang sems byung rtog pa gang skyes kyang*/_snang sems dbyer med ro gcig tu 'dres tshe grub rtags zang thal sogs phal cher ston nus shing*/_gzhi grol klong yangs chen por 'char ro/__/rnam rtog dag par byed pa'i thabs kyi lam mchog tu bzang ngan gyi rtog pa gang shar yang*/_dgag par mi bya bsgrub par bya ba med la/_tha mal pa ltar rjes su mi 'brang*/_'dzin stangs ci tsam yod kyang dang po dran pa bsten te dran pa'i ngang ma bor ba gal che/_de la goms pa na rim gyis sems gnas cha thob tshe gnyis snang nub bo snyam pa lta bu'i nyams dang*/_mngon shes sogs 'char yang de dag bden par mi zhen pa gal che ste/_nyams snang la nam zhen bdud kyis bar du gcod pas gang du yang ro snyoms kyis skyong ba shin tu gal gnad do/__/gang gi yang rjes su mi 'brang ro snyoms te gol sa dang bral nas/_skye med du rtogs pa'i rig pa rnal ma'i ngang de las ma g.yos tsam du rang sar gnas te dbang po'i sgo mi dgag par tshogs drug tu lhug par bzhag na/_sha yi mig dang*/_lha yi mig dang*/_shes rab kyi mig sogs spyan lnga dang*/_sngon gnas rjes dran sogs mngon bar shes pa drug sogs pa yul snang ma 'gags par 'char ba'i dbang po dang shes pa rang bzhin dwangs pa'i lam gyi yon tan mtha' dag rtsol sgrub mi dgos par 'thob par 'gyur te/_gsang snying las/_ngo mtshar cho 'phrul rmad kyi chos/_/gzhan nas 'ong yod ma yin te/_/thabs la brten pa'i shes rab nyid/_de lta bu yi ngang du 'byung*/_/zhes so/__/rnam rtog dang po skye dus tha mal pa dang skye tshul mtshungs kyang skad cig gi rtog pa tsam gyis las mi gsog kyang rnam rtog rgyun mthud de zhen pas 'ching ba'o/__/rtog pa tshogs drug gi yul dang 'brel na tha mal pa 'khor bar 'phen byed las mi 'da' ste/_de ltar ma yin par me long g.ya' dag pa lta bur dwangs pa'i shes pa la/_snang yul gzugs sogs gzugs brnyan ltar ma 'gags par rgya mtsho la gza' skar bzhin sna tshogs rol pa'i cha de dbang po'i gdangs ma 'gags pa'i yon tan du bkra yang*/_snang dus nyid rang gi ngo bos stong ste yul la der 'dzin gyi rjes dpyod byas te shes pa snang thog tu ma shor na/_rnam par 'dzin pa'i blo yis gos par ma gyur te 'dzin med du 'gro ba des na/_gzung ba'i yul dang 'dzin pa'i sems gnyis phan tshun yul yul can gyi 'brel ba yul med kyi rig pa'i ngang du chad pas/_so so rang rig pa'i ye shes rnam par mi rtog pa'i ngang la shugs 'byung gi dran pa bskyangs pas phyi nang gi 'byung ba'i snyigs ma rang dag tu song nas chos nyid zad sar bskyal te rgyal kun gshegs shul ye shes bla ma'i sa la tshe rabs mang po dang yun ring po'i mthar ltos mi dgos par da lta nyid du phyin par 'gyur ro/__/mdor na rang bzhin rnam dag gi dbyings kyi lam ni chos thams cad gzhi ka dag gi ngo bor chos nyid gcig tu dbyings de ma bor bar rtogs pa/_rig pa'i lam ni shes rab khyad par can 'di gnyis don la dbyings rig zung 'jug go_/'od gsal gyi lam ni/_'khor 'das kyi snang cha 'dzin pa'i rgyang zhags chu yi sgron ma/_snying nas mig tu 'brel ba'i rtsa/_ka dag gi gdangs thig le zlum gor du shar bas thig le stong pa'i sgron ma de rnam pa gnyis po la brten nas 'od gsal gyi snang ba 'char zhing 'phel bar byed do/__/phyi dbyings nam mkha' ches dwangs pa ltar rkyen bral nang dbyings rtsal sgom byung gi shes rab rig gdangs lu gu rgyud rig pa skye med du 'pho 'gyur bral ba'o/_khregs chod lam ni rtog tshogs thams cad ka dag tu thag bcad pas gzhi med yul med rten med ming med du song nas shar grol dus mnyam ste/_'das rjes las/_snang srid thams cad chos sku'i zhing du shar/_/shar ba de nyid rang gi thog tu grol/_/zhes so/__/thod rgal lam gyi ngo bo ni/_dbyings dang rig pa gnyis po sgron ma gnyis po'i lam du snang zhing shes rab rang byung gi sgron me'i rtsal dang gdangs kyi yon tan gsum ldan du 'char ba yin no/__/'di dag rang bzhin rdzogs pa chen po yi thun mong ma yin pa'i lam mchog lngar sku gsum lam snang du rdzogs nas tshe lus gcig la 'bras bu khyad chos drug ldan gzhi thog tu phyin pa dang*/_'bring dang tha ma'ang bar dor grol ba mkhyen 'tshal nas med snang glo bur ba yin pas ma rig pa'i grogs dang 'khrul pa'i bslu brid kyis/_mu mtha' med pa 'khor ba'i 'brog dgon 'jigs su rung bar/_'ching byed kyi las dang de kun nas slong byed kyi nyon mongs pa'i 'du byed lcags sgrog lta bu dag gis/_de ring phan chad de da ltar yan chad la bcings pa de la skyo ba'i sems bskyed nas zhi ba dam pa sku gsum lhun gyis grub pa'i grong khyer ga la ba der myur du mya ngan las 'da' zhing*/_gdod ma'i sa la gtan srid zin nas 'gro don rtsol med du 'byung ba'i khregs chod thod rgal gyi lam sogs lam mchog lnga po myur du bsnyen par mdzod cig_/yon tan rin po che'i mdzod dga' ba'i char zhes bya ba las/_rang bzhin rdzogs pa chen po'i lam thun mong ma yin pa bstan pa'i tshoms te le'u bcu gnyis pa'o//____//sngar bshad pa'i skabs su gzhi snang rang ngo shes nas grol ba kun tu bzang po'i khyad chos drug gis 'phags te/_sangs rgyas longs sku'i zhing khams kyi bkod pa la'ang gdul bya la snang tshul mdo tsam bstan pa de nyid rgyas par bshad pa las 'bras bu gzhan bshad pa med pas/_de ltar rang bzhin rdzogs pa chen po'i gzhi yi gnas lugs gtan la phab nas lam thun min bya rtsol med pa'i mtshan nyid legs par rtogs nas gom pas/_gdod ma'i gzhi ji bzhin mthar phyin te 'bras bu rten sku dang brten pa ye shes gnyis ni/_sngar gzhi la med pa zhig lam bsgoms pas kyang gsar du ni gzhan las ma byung ste/_rig pa'i ye shes la sgrib byed kyi dri ma glo bur ba 'khor ba'i bag chags thams cad 'dzin pa'i rten mtshan nyid theg par kun gzhi gnas 'gyur dang*/_sngags nang rgyud ma hA ltar na de nyid lhar snang dang*/_don la ni gzhi snang ngo ma shes pa yin pas kun gzhi'i rnyog pa dwangs pa na/_de la brten pa'i sems dang sems byung yul dang bcas pa'ang chos kyi dbyings su zhi ba yin te/_rgyud bla ma las/_nyes pa glo bur dang ldan dang*/_/yon tan rang bzhin nyid ldan phyir/_/ji ltar sngar bzhin phyis de bzhin/_/'gyur ba med pa'i chos nyid do/_/zhes so/__/de yang dper na nyi ma sprin gyis bsgribs pa yang rtsa ba ni nyi ma'i rang rtsal la thug ste/_nyi zer gyi rtsal rgya mtshor phog pas drod rlangs na bun mkhar 'khrigs pas sprin du song ste na bun long long po des nyi ma nyid bsgribs pa ltar/_tshe rabs thog med nas 'khrul pa'i dbang gis dus gang du gzhi yi rig pa sku gsum gyi rang bzhin can de las gzhi lhun grub kyi rtsal snang g.yos pa yi tshe na rang snang du ngo ma shes par/_bdag dang gzhan du 'dzin pa'i bag chags goms pa de'i rol pa shes bya'i yul snod bcud 'khrul chos su shar ba'i cha dang bcas pa 'dzin pa'i yul can tshogs brgyad kyi rtog pa srid pa nyer len gyi rang bzhin can rig pa'i ye shes sgrib byed glo bur gyi sprin dang 'dra ba rnams/_chos dbyings su rnam par dag pa'i tshe rang byung gi ye shes mngon du 'gyur tshul dper na/_nyi ma ltar lhun gyis grub pa ni/_shes bya thams cad la chags thogs kyi sgrib pa med pa chos dbyings nam mkha' lta bu'i ngang du rang bzhin gyis 'od du gsal ba yin no/__/stong nyid chos sku'i ngo bo sku gsum dbyer med rdo rje'i sgras bstan pa chos dbyings dag pa gnyis ldan gyi cha nas mi 'gyur rdo rje/_yon tan gyi snang cha so sor ma 'dres pa'i cha nas mngon par byang chub snang stong zung 'jug gi rang gdangs 'gags med la/_gnyis snang gi 'jug pa thams cad dang bral ba chos dbyings ye shes te/_nang gsal sku gsum po 'di la ye shes gcig gis dbye na/_ye don gyi kun gzhi chos dbyings sgrib bral rig pa'i ngo bo la sgrib byed bag chags sna tshogs pa'i rten kun gzhi sgrib gnyis bag chags mtha' dag tshogs gnyis kyis bsal la/_ngo bo ye dag nyid la glo bur dri ma gnyis po cha dang bcas spangs pa glo bur bral dag ste/_dag pa gnyis dang ldan pa mthar thug gi 'bras bu byang chub mchog gi dngos gzhi sku dang ye shes rgya mtsho'i bdag nyid/_gdod ma'i dbyings kyi chos nyid mngon du gyur pas sangs rgyas dag mnyam chen por smon pa med pa'i dbyings la/_dper na nya rgyas zla ba 'od snang gi spros pa phyir gsal ba can de nyid gnam stong gi cha la dbyings su nub te 'od snang mi mngon pa ltar/_yul yul can rnam pa kun tu mi rtog pa'i chos nyid 'pho 'gyur dang bral ba rang bzhin med pa/_sku dang ye shes thams cad kyi dbyings kyi char ngo bo rtag pa 'dus ma byas ye shes kyi snying po can mi 'gyur rdo rje'i sku'o/__/yon tan gyi rnam pa kun gyi mchog ldan 'phags pa'i mnyam bzhag gi stong nyid snang stong zung 'jug gi cha spros pa mtha' dag zhi ba'i dbyings su glo bur gyi dri ma rang sar dag pa'i stobs bcu la sogs yon tan gyi chos tshul rgya mtsho lta bu kun sangs rgyas pa'i skad cig ma der byang chub kyang*/_sku dang yon tan gyi snang cha rang rang ngo bor ma 'dres pa'i tshul du yod pas na/_stobs bcu/_mi 'jigs pa bzhi/_ma 'dres pa bco brgyad thugs rje chen po/_byang chub phyogs chos sum cu rtsa bdun sogs sangs rgyas kyi yon tan spangs rtogs kyi cha nas gzhal ba la ni/_mngon par byang chub pa'i sku'i mkhyen cha ma 'gags pa me long ye shes so/__/phyi shes bya'i yul gzugs sogs la yul can blo yi 'jug pa zhi bas/_nang shes byed kyi blo la mtshan mar 'dzin pa'i bden zhen mtha' dag dbyings su nub pa'i kun rdzob cha dang bcas pa spangs nas/_de kho na nyid gzhi gnas so so rang rig mtha' bral gyi don rtag chad gang gi'ang mthar ma lhung ba ye shes kyi gsal cha dbyings su thim ste zhi ba la gnas kyang ma rmugs pa zhes mkhyen cha gtan med du song ba ma yin par shin tu phra ba'i nang gsal gyi ye shes ni mkhyen cha 'gag pa med pa/_sku dang ye shes rgya mtsho'i rten ni sangs rgyas kho na'i spyod yul shin tu mnyam par bzhag pa dang ma bzhag pa mi mnga' ba sangs rgyas rnams kyis mthong gi gzhan gyis ni min no/__/rten nam 'char gzhi'i ldog pa gang yin pa de la zhi ba chos kyi sku zhes brjod do/__/so so rang gis rig byar gnas pa nang gsal sku gsum rgyal ba'i khams zhes pa ste/_don la gcig dang du mar grub pa ma yin pas dngos po can ma yin pa dang*/_ji snyed mkhyen cha nang du gsal bas dngos med las kyang 'das la/_rang bzhin rnam par dag pas nam mkha' ltar sku dang ye shes sogs rnam par mi rtog la/_ma dag pa'i mtshan mas gos pa med cing rnam 'gyur gyi spros pa phyi gsal dbyings su zhi la/_de'i rang bzhin ni ngag gi yul las 'das te chos nyid don dam bden pas bsdus pa'i phyir na/_rtog dpyod dang tha snyad kyi dpe dang gtan tshigs sgra sogs kyis kyang mi mtshon/_blo ste sems dang snyam byed de sems byung dang dpe sogs dang 'gal ba'i phyir/_rgyal ba'i yon tan mtha' dag sa bcu'i dbang phyug gis kyang spyod yul min no/__/'dren pa sangs rgyas rnams kho na la mngon sum du gyur pa'i gnas ni/_chos kyi dbyings stong nyid spros pa dang bral ba ste de ni bsam gyis mi khyab pas zab pa/_sems dang sems byung gi rnam rtog thams cad rang bzhin gyis rnam par dag pas zhi ba/_zung 'jug gi spros pa thams cad dang bral bas rang bzhin de'i mkhyen cha 'gag pa med pa'am 'pho 'gyur dang bral bas gzhon nu/_phyi gsal longs skur ma spros pa'i nang gsal du bzhugs pa'am/_sangs rgyas kyi chos khams rgya mtsho lta bu 'char ba'i gdangs ma 'gags pas bum pa'i khang mdzes nang zhes tha snyad btags te/_rgyud las/_phyi dang nang med pa/_kun tu yang nang du gyur pa na/_zhes so/__/de lta bu'i klong na dus gsum sangs rgyas rnams ni dgongs pa mnyam par rtag tu bzhugs kyang*/_rang snang dbyings su thim pa'i rnam pa'i cha nas gzhal te sangs rgyas gcig gis gcig mi gzigs te/_rmad byung rgyal po las/_chos kyi dbyings kyi pho brang na dus gsum gyi sangs rgyas thams cad gcig gis gcig mi gzigs pa'i tshul gyis bzhugs te/__zhes so/__/de yang chos rnams kyi rang bzhin ni gcig dang du ma'i spros pa bral ba'i bdag nyid can du gnas la/_dbyings de'i rang bzhin du rtogs pa mthar phyin pa ni de bzhin gshegs pa rnams te/_de'i phyir chos nyid kyi ngos na sangs rgyas thams cad dgongs klong ro gcig tu gyur nas gzigs bya gzigs byed med pas dper na baiDUr+Ya'i nam mkha' la rang gi ngo bo 'di ltar yod ces smra mi shes pa ltar mi gzigs so/__/thog mar yang gzhi las gzhi snang shar ba'i ngo ma shes pa tsam gyis 'khor bar snang la mthar grol na yang zhi dbyings su ro gcig tu gyur pas na rang byung rang la thim zhes pa'o/__/nang dbyings spros bral gyi ngang las mi g.yo yang 'od gsal gyi mkhyen cha 'gag pa med pa'i ye shes kyi rang gdangs las lhun grub kyi sgo brgyad/_thugs rje phyir gsal theg chen chos la longs spyod rdzogs pa'i sku ru snang ba ni/_gnas 'od gsal stug po bkod pa dang*/_dus gzhir rdzogs bsam mi khyab pa dang*/_ston pa rigs lnga'i sangs rgyas dang*/_chos rang bzhin rdzogs pa chen po dang*/_'khor nyid las mi gzhan pa ste/_nges pa lnga dang ldan par shar zhing*/_de yang gtso bo 'khor sogs so sor ma 'dres par gsal ba sku dang zhing khams dang*/_mtshan dpe sogs yon tan rgya mtsho'i bdag nyid can rnams bzhugs pa'o/__/dang po gnas ni rig pa'i ye shes kyi rang rtsal rtsol sgrub bral bas lhun rdzogs rang snang gang gi'ang 'og tu ma gyur pas 'og min gyi zhing ye shes rang snang gi bkod pa phun sum tshogs pas brgyan pa'i phyir na stug po bkod pa ste/_de na ye shes lnga yi rang rtsal 'gag med du shar ba'i 'od zer gsal 'tsher 'bar bas mkha' dbyings thams cad dbang po'i mtshon chas te 'ja' tshon gyis bkab pa bzhin du khyab cing*/_stong nyid snying rje'i brdar gzhi rin po che las grub pa'i rang bzhi na mnan na nem zhing btegs na 'phar ba la sogs pa de lta bu'i bkod pa phun tshogs pa'i yon tan bsam gyis mi khyab pa zung 'jug ye shes lnga'i rang bzhin/_che ba'i yon tan thams cad rgyas pa'i rtags gzhal med khang gru bzhi'i rnam par mdzes pa sgo 'phar rnam bzhir ldan pa ni rnam thar sgo gsum dang*/_'dus ma byas shing 'od gsal ba ste bzhi dang*/_tshad med bzhir mtshon pa'i brda'o/__/rnam thar brgyad mtshon phyir pad+ma/1_sgrom bu/2_rta rkang*/3_zar tshag4_shar bu/5_chun 'phyang*/6_rin po che'am rdo rje'i khyung mgo ste rta rkang ngam rta babs brgyad ldan/_ye shes lngar snang bas dgos 'dod kyi re ba skong ba'i brdar rtsig pa phyi nang rim pa lnga glo 'bur bzhi dang bcas pa/_chos nyid mi 'gyur ba'i brdar pha gu ser po dang*/_rin po che'i drwa phyed 'phyang ba nyi zla'i rlung bskyod dang bcas pa/_'gro rnams thugs rjes skyob pa'i brdar mda' yab/_chos nyid bsam mi khyab pa'i brdar pu shu mchod rten sum bsgrigs can/_'dod yon ma spangs ye shes kyi rang snang rgyan du rol pa'i brdar snam bur 'dod pa'i yon tan mig yangs ma ste mchod pa'i lha mo gzugs rdo rje ma sogs bde stong mchod sprin rtse zhing dga' ba'i rnam 'gyur gar stabs sna tshogs pa'i g.yo ba can/_yon tan phrin las sna tshogs pa'i brdar steng phyogs rnga yab 'phan gdugs rgyal mtshan dgos 'dod 'byung ba'i nor bu'i tog_/rin po che'i rigs sogs dar zab sna tshogs pa'i bla bre/_pad+ma la gnas pa'i chos 'khor rin po che bcu gsum gyi zar tshags dang bcas pa'i gtsang khang phyur bur mdzes shing*/_chos dbyings rgya tshad dang bral ba'i rtags su chu zheng dang mtho dman srid tshad du mi mngon par gang bltas gang du gyur pa ye shes 'od lnga dwangs pa'i gzhal yas khang las mi 'da' bar snang zhing*/_yon tan tshad bzung med pa'i brdar gzhal yas khang gi tshad grangs kyis mtha' mi gtugs pa mkha' dbyings thams cad snod gyur bzhin gsal bar snang ba'o/__/de lta bu'i rten gzhi gzhal med khang mkha' dbyings khyab pa re re'i nang na/_brten pa'i gtso bo rigs lnga yi gdan khri ni/_thugs mi 'jigs pa mtshon cing bdud bzhi 'joms pa'i brdar 'phrog byed de seng+ge'i khri/_mi dge ba bcu 'dul ba'i brdar gnyis 'thung ste glang po'i khri/_rdzu 'phrul la mnga' brnyes pa'i brdar cang shes te rta mchog gi khri/_dbang bcu mthar phyin pa'i brdar zlos gar can te rma bya'i khri/_phrin las bzhi sgrub pa'i brdar shang shang te'u/_'khor ba'i skyon gyis ma gos pa'i brdar chu skyes/__thabs shes zung 'jug gi brdar nyi zla'i steng du bzhugs pa'o/__/dus gsum sogs las 'das te chos nyid 'pho med gzhir rdzogs kun tu bzang po 'dus ma byas pa'i dus na/_skye 'chi bgres rgud dang bral ba rtag brtan lhun grub chen por ngo bo chos nyid las g.yo ba med pas 'pho 'gyur bral ba'i ye shes kyi sku mtshan bzang so gnyis/_dpe byad brgyad cu sogs yongs su rdzogs pa'i dgongs brgyud ston pa lnga snang ste/_kun rig rnam snang mthing ka chos dbyings ye shes/_mi bskyod rdo rje dkar po me long ye shes/_rin chen 'byung ldan ser po mnyam nyid ye shes/_gsung pad+ma'i rigs 'od mtshan stong 'bar le brgan te dmar po sor rtog ye shes/_phrin las don yod grub pa ljang gu bya grub ye shes te yab lnga ni zhal gsum phyag drug go__/phyag mtshan ni/_rdo rje me long las/_g.yas nas rim par_/rdo rje 'khor lo ral gri 'bar/_/g.yon nas dril bu pad+ma rin po che/_/gzhan gang 'khor lo'i gnas su rdo rje shes/_/dang po thugs dang g.yon 'khyud pa'o/__/zhes so/_/thabs shes dbyer med pas rang rang rigs kyi yum dbyings phyug ma/_spyan ma/_ma ma kI/_gos dkar mo/_dam tshig sgrol ma rnams yab mdog zhal gcig phyag gnyis g.yas rang rtags/_g.yon dril bu dang bcas pa rnams yon tan thams cad rdzogs pa/_kha sbyor yan lag bdun gyi bdag nyid chen por bzhugs pa'o/__/ston pa'i thugs ye shes chen po 'khor gyi tshul du snang ba rang las mi gzhan pa'i sems dpa' brgyad dang sems ma brgyad la sogs pa'i 'khor/_sgo ba bzhi dang*/_de bzhin so so'i yum sgo ma bzhi dang bcas pa'o/__/smra bsam brjod 'das kyi rang bzhin rdzogs pa chen po'i chos 'khor ni/_sems nyid rang bzhin gyis 'od gsal ba snang stong zung 'jug de nyid sgrib gnyis mtha' dag dang bral ba rtogs pa'i 'od gsal de'i ngang las mi g.yo tsam las gzhan med kyang de chos 'khor gyi sgras smos so/__/grags pa'i sgra brjod pa'i tshig mtshan ma'i yul las 'das par 'khor rnams la snang bar bskor ba ni/_mdo las/_rgyal ba'i sras po cang mi gsung*/_/ma gsungs pa nyid rgya cher gsungs/_/zhes so/__/steng khang zhi ba byang chub snying kha mi shig thig le ye shes lnga'i rang 'od lha tshogs bzhi bcu rtsa gnyis gsal ba'i bdag nyid can du yod pa la snying po'i gnas rang snang 'og min gyi zhing na dbang mdzad zhi ba bzhi bcu rtsa gnyis su bzhugs yod pa las/_dbyings ye zung 'jug la dam pa'i stangs dpyal snang stong ngam thabs shes du smos pa kun bzang yab yum gnyis ni longs sprul gnyis kyi sprul gzhi ste/_gtso 'khor kun la khyab byed du yod pa'i thugs kyi rang bzhin la zhal phyag sogs med par brdal ba chos kyi sku yin pas dkyil 'khor du ma bkod pa yin/_lha la sogs pa'i 'gro drug so so'i gnas su don mdzad pa'i rig pa'i skyes bu thub pa drug ni gzhan gdul bya'i ngor sprul par shar ro/__/rang snang don gyi 'og min gyi gnas longs sku'i zhing na bzhugs pa'i gzugs sku dngos snang ni rgyal ba sum cu rtsa bzhi ste/_gtso bo rigs lnga yab yum bcu la phyi nang gi sems dpa' yab yum bcu drug dang sgo skyong yab yum brgyad de nyer bzhi 'khor gyi tshul du bzhugs so/__/rgyud sde 'og ma'i lugs ltar phung khams gnas su dag pa'am/_dpal rdor sems sgyu 'phrul drwa ba'i lugs chos nyid stong pa nyid dang chos can snang ba nyid ni rang bzhin gyi rdo rje phung po/__/de'i yan lag tu phung lnga yab lnga khams lnga yum lnga/_phyi nang gi skye mched bcu gnyis dang*/_de dag gi khams bcu gnyis dang*/_rnam par shes pa'i khams drug ste bco brgyad po sems dpa' dang sems ma sgo skyong khro bo khro mo'i rang bzhin du ye nas gnas pa'i phyir srid gsum thams cad sangs rgyas kyi zhing khams su gdod nas rnam par dag pa'i lha gdan gsum tshang ba'i dkyil 'khor chen por gnas pa yin no/__/tshul 'di dag sgyu 'phrul drwa ba sangs rgyas mnyam sbyor gsang 'dus rgyud snga phyi gnyis sogs bla med rgyud sde phal mo che las lus grub kyi dkyil 'khor ni/_ji snyed bstan pa rnams rang snang gis bsdus pa'i zhing khams yin pas de rnams dang rnam dag tshul kyang mtshungs pa yin no/__/spyir gzhi dus kyi rang snang ni longs spyod rdzogs sku la khro bo med par 'dod pa'ang yod kyang*/_don gyi dus na thabs shes nam yang 'du 'bral med pas shes rab kyi rig gdangs las khro bo'i dkyil 'khor snang ba yin pas 'dir rang snang khro bo'i dkyil 'khor 'di ni 'bras dus kho na la bshad pa yin pas gzhi dus rtog dpyod tshogs kyi dag dran med par bzhed do/__/zhi ba'i gzhal yas khang gi 'og na rang byung gi khang pa tshogs chen 'dus pa'i pho brang lhun grub tu snang ba ni/_yum lnga'i mkha' klong rnam par dag pa'i rang bzhin 'byung ba rim brtsegs rus pa'i ri rab dang bcas pa'i khar rin po che'i brag chen gtams pa'i steng ye shes kyi rang 'od me'i phung po rab tu 'bar ba'i klong na gzhal yas khang thod mkhar phyi nang rim pa dgu rngam zhing 'jigs su rung ba/_sgo khyams rim pa dgu pa'i bar khyams dgu po nang rim par dang po gsum ser dkar dmar ba/_de nas gsum ser dmar dkar ba/_de nas gsum nag po dang phyogs mdog dkar ser dmar ljang khu'o/__/sgo phyi mar rgyu 'bras kyi rta bab gnyis las dang po stegs babs zhon gyi tshul du yod cing*/_gnyis pa sgo khang gi steng na rgyan gyi rnam par ldan pa/_pho brang dbus ma'i nang du gru chad bzhi po gru chad las cha phran phyed mtho ba'i phyogs mdog glo 'bur gyis mdzes pa'i steng na 'khor lo rtsibs brgyad pa'i lte bar rin po che'i brag dang*/_rdo rje'i rtse gsum rtse lnga sogs brag chen gtams pa'i steng pad+ma dkar po 'dab ma stong brdal ba la/_thabs shes kyi rang bzhin nyi ma nyer bzhi dang zla ba nyer bzhi kha sbyor du bkod pa'i steng dbang phyug khyo shug ni/_nyi shu rtsa bzhi byi chings su bsnol ba'i steng du dpa' gtum stag dang*/_'jigs byed seng+ge dang*/_gdug pa gzig dang ni/_gtum pa dom dang*/_stobs chen glang po dang*/_brjid pa'i ma he dang*/_'dzin pa'i chu srin dang*/_zhe sdang lto 'gro ste byol song gi gtso bo brgyad po re res/_dregs pa pho rnams kha sbub tu yod pa'i sog phrag dang mo rnams gan rkyal du yod pas nu phrag tu bzung zhing brdzis pa'i steng na/_'khor 'das kun gyi spyi dpal chen po bcom ldan 'das/_'jig rten gsum na che ba'i lha chen po sogs las kyang mchog tu gyur pas sam/_dkyil 'khor gyi lha tshogs thams cad kyi yon tan gcig tu rdzogs pas che ba'i che mchog sku mdog in+d+ra nI la'i mdangs can/_nyi ma bye ba'i 'od ltar 'bar ba'i gzi byin dang ldan pa/_zhal bdun gsum nyer gcig gi rtsa zhal sku mdog dang mtshungs pa/_g.yas zhal gsum ser dmar ljang ba/_g.yon zhal gsum dmar sngo ljang ba/_de steng dbus zhal ser po/_g.yas gnyis dmar po dang ljang gu/_g.yon gnyis mthing dang dkar po/_de steng dbus zhal mthing ga_/g.yas gnyis ser ljang*/_g.yon gnyis dkar dmar/_de'i steng dbus smug_/g.yas dkar/_g.yon ljang*/_kun gyi steng zhal dmar po rta skad 'tsher ba'o/__/zhabs brgyad bgrad pa phyag ni bzhi bcu rtsa gnyis kyis dang po gnyis na kun bzang yab yum dang*/_lhag ma g.yas kyi nyi shu na rigs lnga sems dpa' brgyad khro bo bzhi mtho ris kyi thub pa gsum dang*/_g.yon nyi shu na yum lnga sems ma brgyad khro mo bzhi ngan song gi thub pa gsum ste zhi ba'i lha tshogs bzhi bcu rtsa gnyis bsnams pa/_rus pa'i phyag rgya drug dang*/_dur khrod kyi chas brgyad dang*/_dpal gyi chas brgyad kyis brgyan pa/_dbu re re la sangs rgyas kyi sku re/_de'i dbur rin chen bdun gyi mchod rten rtse mo tog stong gi 'od zer 'bar ba/_gnam zhal yum mchog dbyings phyug ma sngon mo dbu dgu phyag bco brgyad/_zhabs brgyad bgrad pa/_rtsa ba'i phyag gnyis rdo rje dang dung khrag 'dzin pa/_lhag ma g.yas brgyad na gnas kyi ma mo dang*/_g.yon brgyad na yul gyi phra men bsnams pa/_yab yum khro mkhar te sman sgrub skabs lta bur dkyil 'khor gyi dbus su dbang mchog he ru ka dang*/_de'i dbu thog tu dbyings phyug ma/_de'i dbu thog tu che mchog rnams tho brtsegs kyi tshul lam/_yang na dbang mchog gi phrag pa gnyis yum gyis brdzis nas yum gyi mkhar yab kyi dbu phyed nub pa sogs dbu sbyor dang*/_gnam zhal ma'i dbu brgyad che mchog gi zhabs brgyad kyis brdzis pas yum gyi zhal dbus ma'i spyan dang*/_yab kyi gsang ba sbyor ba'o/__/de sogs mnyam par sbyor ba'i tshul du bzhugs pa/_srid pa khams gsum dang zhi ba theg dgu'i lam dang 'bras bu'i chos khams ma lus pa kun bcom ldan 'das dpal chen nyid kyi zhabs kyi gdan khri nas/_steng gi dbu rgyan 'khor lo'i bar la rang bzhin gyis rdzogs par snang ste 'dod khams khrag gi rgya mtshor rdzogs/_gzugs khams zhing chen gyi sa gzhi la rdzogs/_gzugs med keng rus kyi ri rab la rdzogs/_nyan rang byang sems gsum rin po che'i brag chen la rdzogs/_phyi rgyud gsum rdo rje'i brag chen la rdzogs/_bskyed pa'i rnal 'byor pad+ma dkar po la rdzogs pa dang*/_rdzogs pa'i rnal 'byor dbu rgyan gyi sangs rgyas dang rgyal mtshan bcu la rdzogs/_rdzogs pa chen po'i rnal 'byor tog stong 'od 'phro ba la rdzogs pa sogs so/__/ma hA man chad gdan/_a nu sku lus/_a ti dbu thog rgyal mtshan tog la rdzogs pa'o/__/gtso bo dpal chen po'i mdun du dbang mchog he ru ka sku mdog mthing nag dbu dgu phyag bco brgyad zhabs bzhi pa yum khro mo dbyings phyug ma dang ni mnyam par sbyor ba'i tshul gyis bzhugs pa/_sgo gsum la bdag tu 'dzin pa dang khams gsum sa dgu dag pa'i he ru ka dpal dgu las/_dbang mchog gi mdun du badz+ra he ru ka dang 'khor lo'i rtsibs brgyad kyi phyogs bzhir bud+d+hasogs bzhi dang*/_mtshams bzhir rak+sha sogs bzhi ste dpal dgu po thams cad zhal gsum phyag drug yab yum mnyam par sbyor ba'i tshul du bzhugs so/__/glo 'bur bzhi dang gru chad rnam bzhi ste brgyad la rnam shes tshogs brgyad dag pa kau rI ma la sogs brgyad/_dkyil 'khor dang po'i khyams la yul brgyad dag pa'i rang bzhin seng gdong sogs phra men brgyad/_gnyis pa'i khyams la phyogs mtshams kyi dngos po gnas su dag pa nyi zer can la sogs spor ma rnam pa brgyad/_sgo bzhir 'byung ba bzhi dag pa rgyas 'debs ma sogs sgo ma bzhi dang*/__gsum pa'i khyams la sgal tshigs nyer brgyad dag pas dbang mo nyi shu brgyad/_kun la rang rang gi sgo ma bzhi bzhir ldan cing lha tshogs de dag thams cad kyang sku mtshan dpe'i dpal dang*/_gsung rngams pa'i gdangs kyi dpal dang*/_thugs snying rje'i dpal du 'bar ba'i rnam rol gar dgu'i nyams kyis brjid do/__/khyams gsum po yan chad 'di dag sangs rgyas rang snang longs sku'i dkyil 'khor te/_gzhi ka dag phyi gsal gyi snang cha ye nas lhun grub gzhi snang thabs kyi cha nas zhi ba dang*/_shes rab kyi cha las khro bor shar ba yin pas rang lugs su khro bo la rang snang longs skur 'dod pa yin zhes pa'ang yod la/_lhun grub don gyi 'og min yin no/__/bzhi pa'i khyams la shar du mkha' 'gro dga' byed ma sogs bdun dang*/_lhor 'joms byed ma sogs bdun dang*/_nub tu gnod sbyin ma sogs bdun/_byang du phag gdong ma sogs bdun/_sgo bzhir mkha' 'gro bum sna ma la sogs pa bzhi ste mkha' 'gro sum cu gnyis/_lnga pa'i khyams la rdo rje kun grags sogs ma mo bdun/_sgo bzhir gling bzhi'i mgyogs ma sogs sring mo bzhi rnams so/__/drug pa'i khyams la phyogs rer gsum re dang*/_sgo bzhir re re/_shar nub gnyis su bka' nod pa re re ste ging chen rdo rje 'byung po sogs drug tshan gsum ste bco brgyad do/__/bdun par rnam rgyal dang snyems ma sogs khro bo yab yum bcu phrag drug phyogs mtshams brgyad du gsum gsum dang*/_shar nub kyi nang dang sgo bzhir re re'o/__/brgyad pa'i phyogs bzhir sku gsung thugs yon tan phrin las kyi pho nya drug cu re gnas pas nyis brgya bzhi bcu ste phyogs mdog tu snang ngo*/_/dgu pa'i khyams la pho nya ma mo drug cu rnams phyogs bzhi po re rer bco lnga bco lnga'o/__/khyams bzhi pa nas dgu pa'i bar du 'khod pa 'di rnams log 'dren ma rungs pa rnams 'dul phyir gzhan snang sprul pas bsdus pa'i phyir/_rigs drug ngor thub drug lta bur bgegs sogs gdul bya so so'i rang ngor snang ba yin pa de phyir rang snang 'og min gyi dkyil 'khor min no/__/de dag rang snang du bzhugs pa'i tshul chos sku'i ye shes 'dus ma byas pa ngo bo nyid kyis rtag pa'i ngang las phyi ru gsal bar snang ba'i rang gdangs/_phun sum tshogs pa lnga ldan longs skur rdzogs pa'i gnas rgyun kyi rtag pa'i zhing khams su lhun gyis grub nas sprul pa rgyun mi 'chad par rtag pa'i 'char gzhir bzhugs pa ni/_slob pa'i lam mthar phyin pa'i dus gang du khams la sgrib par byed pa dri ma mtha' dag spangs par gyur pa'i sangs rgyas kho na'i rgyud kyi bsdus pa yi ye shes kyi rol pa gnas dang ston 'khor sogs snang ba nyid kyi phyir/_rten zhing khams dang gzhal yas/_brten pa gtso 'khor du snang yang phyi nang mchog dman med de thams cad kun tu bzang po rang byung gi ye shes gcig gi rnam rol du mnyam pa yin no/__/de ltar rang snang longs sku kun gyi thugs kyang chos sku'i ngang las ma g.yos pas rnam par mi rtog cing gsung ni sgra tshig gi mtshan ma las 'das pas brjod pa dang bral la/_sku ni gzi brjid chen por snang bas mtshan dang dper gsal bar rdzogs shing*/_rang snang chos thams cad ye shes mthong ba dag pa'i spyan gyis gzugs sku phan tshun gcig gis gcig gzigs pa la dus nam du yang sgrib pa med do/__/de ltar dus gsum rgyal ba rnams kyi khams dang yon tan gyi spyod yul ni nam mkha' ltar bsam gyis mi khyab pas/_bla na ste gong na med phyir rtag chad kyi mthar ma lhung la/_srid zhi'i phyogs kyis ma bsdus pa'i phyir sa dang po nas bcu pa'i bar gyi dag pa'i sems can chen po byang sems 'phags pa rnams kyis kyang mthong bar mi nus te rgyal ba'i ji lta ji snyed mkhyen pa'i ye shes bsam gyis mi khyab pa de dang 'gal ba'i khams kyi sgrib pa'i cha da dung ma spangs phyir/_'das dang ma 'ongs pa dang da lta ste 'dus byas kyi dus gsum kun rdzob pa kun gyi nges pa las 'das pa'i rang snang don gyi 'og min chen po na/_rtag pa rgyun gyi 'khor lor bzhugs pa'i sangs rgyas bsam gyis mi khyab pa'i dus bzhi'i bdag nyid can gtso 'khor dgongs pa mnyam phyir ngo bo la bzang ngan tha dad med pas gcig tu mthun pa'i rang snang ngo*/__/rang snang longs sku de nyid ngang las dag ma dag gi gdul bya sems can rnams 'dul ba'i phyir/_ston pa'i thugs rje las 'dul byed ston pa gsum du rtsol med bzhin bkod pa ni/_longs sku dang tshul mthun par rang bzhin sprul pa dang*/_'gro drug gi ston par snang ba 'gro 'dul sprul pa dang*/_sems ldan dang bem po sogs su snang ba sna tshogs su sprul pa ste gsum las/_dang po rang bzhin sprul sku ni/_rgyal ba chos kyi sku'i ye shes phyir gsal du snang ba 'og min gyi zhing na dbyings snang longs sku'i rnam par bzhugs pa'i dpe byad ni dwangs shel nang 'phos pa ste shar ba lta bu'i rgyal sras 'phags pa gdul bya mchog rnams la snang ba'i gzugs brnyan ni rang snang gi ston pa dang cha 'dra bas longs skur yang bgrangs la/_gdul bya'i snang bas bsdus pas sprul pa'i phyogs su yang bgrangs pas phyed sprul longs sku'i gnas te/_dper na ston zla dwangs mkhar shar tshe chu snod dwangs rnyog dang mthun par gdul bya'i ngor snang ngo*/_/dbus na sku chos dbyings ye shes kyi rang rtsal las dbang phyug chen po'i 'og min gyi zhing dang*/_shar na thugs me long ye shes kyi rtsal las mngon par dga' ba'i zhing dang*/_lho na yon tan mnyam nyid ye shes kyi rtsal las dpal dang ldan pa'i zhing dang*/_nub na sor rtog ye shes kyi rtsal las pad+ma brtsegs pa'i zhing dang*/_byang na phrin las bya grub ye shes kyi rtsal las las rab grub pa'i zhing dang rnam pa lngar snang ba yin no/__/zhing khams lnga po der rim pa bzhin gzugs kyi rgyal po rnam par snang mdzad dang*/_la sogs pa'i sogs khong nas rnam par shes pa'i rgyal po mi bskyod pa/_tshor ba'i rgyal po rin chen 'byung ldan/_'du shes kyi rgyal po snang ba mtha' yas/_'du byed kyi rgyal po don yod grub pa ste/_ston pa mchog lnga po mtshan dang dpe byad sogs yon tan rgya mtsho'i bdag nyid can/_gdul bya'i dbang gis zhi dang khro bo'i rnam 'gyur rang snang longs sku dang cha 'dra bar mthun snang dpag tu med cing mtha' yas par snang ngo*/_/de ltar zhing khams lnga por ston pa lnga so sor snang yang rgyud tha dad pa ma yin par sangs rgyas kyi ye shes gcig gi rnam rol du shar ba'i rigs lnga'i thugs ye shes rnam pa lnga po re re la'ang*/_'di ltar rnam snang gi thugs chos dbyings ye shes la chos dbyings ye shes kyi me long lta bu'i ye shes sogs bzhi yod pa ltar/_gzhan me long lta bu'i ye shes la'ang me long lta bu'i ye shes kyi chos dbyings ye shes sogs bzhi dang ldan pas mtshon lhag ma rnams la yang bzhi bzhi'i 'khor dang bcas pa'i ye shes nyi shu rtsa lnga las/_dang po chos dbyings ye shes chos thams cad chos nyid la tha dad med pa ltar mtshan 'dzin gang gis kyang g.yo ba med pa ni snod bcud thams cad la khyab cing ngo bo brjod mi nus te/_dper na nam mkha'i gzugs smra brjod las 'das pa bzhin chos thams cad la khyab cing brjod pa dang bral ba mkhyen yang*/_shes bya'i mtha' las 'das pas chos dbyings su ro gcig go__/gnyis pa me long ye shes ni/_dper na me long ngos ni gzugs brnyan 'char rung du dwangs kyang*/_rtsol sgrub dang bral ba bzhin mkhyen cha 'gag pa med pa'i ye shes gzung 'dzin gyi rdul dang bral ba ni/_mngon par 'du byed pa'i g.yo rtsol med bzhin mched pa'i shes bya mkhyen tshul ldog pa'i dbye bas ye shes phyi ma gsum 'char ba'i gzhi lta bur gyur pa'o/__/gsum pa 'khor 'das kyi chos thams cad bzang ngan med par ro mnyam pa mnyam nyid kyi rang bzhin yin la/_de mkhyen pa'i ye shes kyis kyang chos kun bzang ngan blang dor sogs mtshan nyid med par srid zhi dbyer med spros pa thams cad zhi ba'i dbyings su thugs zhugs pa'i tshul du mkhyen pa'o/__/bzhi pa rten 'byung gi chos thams cad rgyu 'bras ma 'dres par snang ba ni so sor rtog pa yin la/_de mkhyen pa'i ye shes kyis kyang chos nyid ji lta ba bdag med pa dang*/_chos can shes bya phung sogs nas rnam mkhyen gyi bar chos ji snyed pa thams cad rtag thogs med par mkhyen pa'o/__/ye shes lnga pa bya ba ni gzhan don gyi mdzad pa yin la de rtsol med du grub cing mkhyen pa'i ye shes kyis sku gsung thugs kyi phrin las gzhan phan rlabs chen sgrub pa'i tshul can la sgrib byed kyi cha chags thogs spangs pa'i mdzad pa 'khor ba ma stongs bar lhun gyis grub pa'o/__/ye shes de rnams bsdu na/_chos dbyings ye shes ji lta mkhyen pa'i ye shes/_gzhan bzhi ji snyed mkhyen pa'i ye shes so/__/ston pa rang las rgyud gzhan pa'i tshul gyi 'khor ni sa dang po nas bzung sa bcu'i bar gyi byang sems 'ba' zhig dang thabs gcig tu bzhugs pa la/_chos phun sum tshogs pa sku yis theg pa chen po'i chos rnams gdul bya'i blo la 'jal ba'i thabs kyi 'od zer bkye bas/_rang rang gi byad kyi dri ma rang gis mi mthong ba de me long gi nang du gsal nas khrus sogs kyis sbyong ba ltar/_sar gnas byang sems des sprul pa'i longs sku la bltas pas rang sgrib yod pa ngos zin pas da dung byang sems bdag dang ston pa longs sku'i khyad par ji ltar yin pa mthong nas/_byang chub chen po'i 'bras bu la sgrib pa'i dri ma gting dpag dka' ba ste shes sgrib kyi cha shin tu phra ba ngos zin dka' ba dag_/yongs sbyongs kyis rim gyis sbyangs te yang sa dang po la ser sna/_gnyis par tshul 'chal/_gsum par khong khro/_bzhi par le lo/_lnga par rnam g.yeng*/_drug par shes 'chal/_bdun par thabs la mi mkhas pa/_brgyad par gzhan don gyi snying stobs la sgrib pa/_dgu par smon pa'i don la g.yel ba/_bcu par shes sgrib phra mo dang bcas pa dag nas bcu gcig kun tu 'od la 'gro ste byang chub pa'i tshul gsang snying las/_'og min bla med gnas mchog tu/_/sku ni rnam par snang mdzad tshul/_/byang chub sems dpa'i 'khor rnams la/_/de bzhin gsung mchog mi smra ste/_/sku yis chos rnams 'jal bar ston/_/me long bstan pa'i tshul bzhin du/_/dngos kyi mdog ngan thams cad sel/_/'khor gyis de bzhin sku bltas na/_/byang chub sgrib pa gting dpag med/_/me long bzhin du sku la snang*/_/de nas sa bcu rim gyis 'byang*/_/bla med byang chub yang dag 'thob/_/ces so/__/gzugs brnyan longs sku'i ston pa de ji tsam snang ba'i dus ni sa bcu'i dbang phyug chen po rnams/_'jig rten mgon po chos sku ngo bo nyid med pa'i dbyings mi zad rgyan gyi 'khor lo sku gsung thugs kyi ngang du ston 'khor dgongs pa gcig tu ma gyur gyi bar du mya ngan las 'da' tshul mi ston pas/_'chi ba'i bdud bcom zhing dag pa'i 'jig rten byang sems rnams la theg chen yon tan gyi 'byor pa khyad par can bsgrub pa'i slad rtag pa rgyun gyi 'khor lor bzhugs pa'o/__/gdul bya'i gti mug la sogs sbyang bya'i dri ma nyon mongs pa bag nyal lnga po gang gi gnyen por che ba'i 'og min sogs zhing khams lnga dang*/_zhing der ston par bstan pa'i sku rnam snang sogs lnga yis chos dbyings ye shes sogs tha snyad las 'das pa'i chos rab lnga bstan pas gti mug gnas 'gyur ba chos dbyings ye shes sog ye shes rnam pa lnga po thob pa'i tshul yang*/_sgyu 'phrul brgyad cu par/_'dod chags la sogs nyon mongs lnga/_/rnam dag ye shes lngar bshad do/__/zhes pa gti mug gi dri ma sbyong dus bcom ldan 'das gzugs kyi rgyal po las chos dbyings ye shes/_de bzhin zhe sdang la rnam par shes pa'i rgyal po las me long ye shes/_nga rgyal la chor ba'i rgyal po las mnyam nyid ye shes/_'dod chags la 'du shes kyi rgyal po las sor rtog ye shes/_phrag dog la 'du byed kyi rgyal po las bya grub ye shes te ye shes kyi chos lnga bstan pas gnas 'gyur thob pa yin par gsungs so/__/de ltar lnga tshan lnga yang sa bcu dang sbyar na/_mthong lam gyi dus su kun brtags las gyur pa'i gti mug gnas gyur/_kun gzhi dbyings su nub pa chos dbyings ye shes kyi ngo bo sa dang po rab tu dga' ba thob/_rnam snang mthong*/_de nas rim par sgom lam chung ngu gsum du nga rgyal gnas gyur/_yid kyi rnam shes dbyings su nub/_mnyam nyid ye shes brnyes/_dri med 'od byed 'od 'phro gsum thob/_rin 'byung mthong*/_'bring gsum du chags rtog gnas gyur/_nyon yid dbyings su nub/_sor rtog ye shes thob/_sbyang dka' mngon gyur ring song gsum thob/_snang mtha' mthong*/_chen po gsum la zhe sdang gi rtog pa nub/_kun gzhi'i rnam shes gnas gyur/_me long ye shes brnyes/_sa brgyad pa thob/_mi bskyod pa mthong*/_sa dgu dang bcu par phrag dog gi sa bon dag_/sgo lnga'i shes pa dbyings su nub/_so so yang dag rig pa bzhi thob/_bya grub ye shes brnyes/_don grub mthong*/_de ltar mthong lam nas bzung sa bcu rgyun mtha'i bar sgom lam sa dgu rim gyis rdzogs nas sa bcu'i mthar 'od zer chen po'i dbang thob nas rdzogs pa'i byang chub snying por 'gro ba'o/__/phyed sprul du gdags pa'i 'thad pa zhing lnga po 'di sa bcu'i byang chub sems dpa' kho na las/_nyan rang sogs gdul bya gzhan gyi spyod pa'i yul du dngos su snang ba min zhing*/_de bzhin ston pa lnga po longs spyod rdzogs skur snang na yang*/_'khor dang zhing khams sogs rang snang thun mong ma yin pa kho na min te rgyud gzhan pa byang sems sar gnas rnams kyi sems dag pa'i snang bas bsdus pa yin pa'i phyir/_phyed snang longs sku'i rang bzhin sprul pa'i zhing khams zhes nyi zla kha sbyor chen po'i rgyud kyis bstan pa yin no/__/khyad par thun mong ma yin pa'i lam rang bzhin rdzogs pa chen po yi gdams ngag dang 'phrad pa'i gang zag de ni dbang po tha ma yin yang sa thob pa'i nges pa sogs la spyir lam thun mong par sa lam rim gyis bgrod dgos kyang 'dir sa lam gcig chod yin pas gzhan la ltos mi dgos par/_da lta snying gar yod pa'i rig gdangs rang snang ye shes kyi dkyil 'khor dam pa mngon sum du snang ba yid dpyod las 'das pa de ru/_bzhugs stangs gsum dang gzigs stangs gsum sogs kyi thabs khyad par ba'i gnad kyis gcun nas gnas lugs mchog gi don gzigs pa'i bla ma dam pas thod rgal rig pa'i rtsal dbang bskur te ngo sprad nas byin gyis brlabs pa dang*/_de'i srog dam tshig dag cing ma nyams la/_nyin dus bzhugs stangs dang gzigs stangs kyi rang snang mngon sum zer gdangs kyi 'od gsal ngang dang*/_mtshan mo snying kha'i 'od gdangs shes bya bum 'jug gi man ngag la goms pa rnams kyis de ltar nyams su bla ngas kyang snang ba cher yang ma 'phel/_rtogs pas chos zad ka dag gi dgongs pa ngo ma 'phrod pas rtogs pa'i rang bzhin tshad du ma phyin te tshe 'dir ma grol yang*/_mi dge ba'i 'jug pa srab ste rmi lam dge bar 'gyur ba'i skal ldan de/_sngon goms dang chos rnams kyi chos nyid bden pa dang bla ma'i byin rlabs kyis/_lus rten gyi rgya ral ba'i tshe na srid pa bar dor bag chags zad nas sa thob rnams dang rang bzhin sprul pa'i zhing der skal pa mtshungs par gyur nas/_rang la yod pa'i gzhi snang lhun grub kyi sgor sangs rgyas thugs rjes 'od zer bkod pa'i phyogs bcu sprul pa'i zhing dag par 'gro ba'o/__/spyir zhing bcu me ri 'bar ba dang*/_bcu gcig yod kyang khyad par srid zhi las rnam par grol zhing gdod ma'i sa la dbugs chen 'byin bar byed pa zhing khams lnga por bsdus te bstan pa ni/_shar nas rim bzhin shar na mngon dga'i zhing gzhi dang gzhal yas sogs shel las grub pa dang*/_lhor dpal dang ldan pa'i zhing su war+Na ste gser las grub pa dang*/_nub pad+ma brtsegs pa'i zhing pad+ma rA ga las grub pa dang*/_byang na rin chen rnam par bkod pa'am las rab grub pa'i zhing rin po che in+d+ra nI la'i sa gzhi dang gzhal med khang ste de rnams kyang*/_sgo khyams bzhi dang ldan pa'i steng rta babs kyis brgyan pa phyogs bzhir snang byed ba glang mig lta bu las nyi ma shar ba na nang du 'od lnga dang byang du 'od ljang 'char ba/_zur bzhir mu tig las grub pa'i mchod rten bzhi dang*/_de'i bar dril bu dang g.yer khas sbrel ba'i dpyangs thag rlung gis bskyod pa'i sgra las/_rnam thar sgo gsum dang ldan pa'i chos kyi sgra dbyangs dar dir du sgrog pa/_phyogs bzhir rlung gis bskyod pa'i dri zhim po sna tshogs 'byung bas spos sprin g.yo ba'i dar sna tshogs pa'i ba dan bzhi yod pa/_gzhal yas khang gi phyi rim yan lag brgyad dang ldan pa'i rdzing bu'i 'gram na/_tA la'i ljon pa dri bzang gi ngad dang ldan pa lo ma dang yal ga rnams rin po che sna tshogs kyi drwa phyed 'phyang 'phrul g.yo ba can mang pos brgyan pa/_de 'i phyi rol na mtshe'u brgyad yod pa/_der bya rigs 'di lta ste/_mthing ril dang*/_shang shang te'u dang*/_rma bya dang*/_ka ta ri dang*/_ne tso mi skad 'byin pa dang*/_ngang pa gzhon nu dang*/_ri [*no sa?]skegs dang*/_zer mo dang*/_sbab dang*/_kang+ka ri dang*/_lha'i bya dril bu'i sgra can dang*/_khu byug dang*/_gser gyi rdo rje'i gzugs can kri ti pa la sogs pa ste/_g.yu ltar sdo ba dang*/_bye ru ltar dmar ba dang*/_in+d+ra nI la ltar ljang ba dang*/_dung ltar dkar ba sogs kha dog so sor phyed pa'i bya rigs sna tshogs pa rnams kyis skad snyan yid du 'ong ba sgrog cing*/_mgrin pa'i rgyud mang phyogs mthar dus kun tu 'khrol bas dga' bar byas pa dang*/_zhing de na bzhugs pa'i byang chub sems dpa' rnams skye ba gcig gis thogs pa sha stag la/_zas dang skom yang yid la dran pa tsam gyis tshim zhing*/_nyon mongs pa'i gnod pa med pas mchog tu bde la/_byung srid na'ang rang bzhin zhi ba'i nus pa dang ldan pa'i chu klung la khrus byas pa dang*/_longs spyad pa tsam gyis sel zhing phyis 'du ba'i nad dag mi 'byung ba dang*/_gzhan yang gos rgyan sogs yid la ci dang ci bsam thams cad dran pa'i mod la 'byung zhing*/_mdor na zhing snga ma gsum sum cu rtsa gsum pa'i lha dang longs spyod mnyam zhing*/_las rab grub pa ni gzugs khams kyi lha dang mnyam mo/__/phyi rim na rin chen sna bdun las grub pa'i lcags ri pha gu can yod do/__/de rnams kyi dbus na rin po che sna tshogs las byas pa'i chos khri dang ldan pa yod do/__/zhing mchog de na rigs bzhi'i ston pa rdor sems rin 'byung snang mtha' don grub ste bzhi po yis/_nyin mtshan gyi dus bzhir dam pa'i chos kyi sgra sgrog pa rgyun mi 'chad de/_de yang rdo rje sems dpa' sogs ston pa gsum gyis srod la rgyu mtshan nyid kyi theg pa'i chos/_nam phyed na sngags phyi pa'i chos/_tho rangs na sngags nang pa'i chos/_nyin phyed na rdzogs pa chen po 'bras bu bla na med pa'i chos 'chad do/__/don yod grub pas srod la gdams ngag gi khrid chos/_tho rangs spyod pa'i chos/_nam phyed na dbang bskur ba'i chos/_nyin phyed na lta sgom gyi chos ston to/__/zhing khams de dag kun gyi dbus kyi bar snang na he ru ka dpal chen po'i zhing dur khrod chen po me ri 'bar ba zhes bya ba yod de/_de na gzhal yas khang 'di lta bu ste/_thod mkhar gru bzhi pa/_thod pa skam pos 'bras bu byas pa/_sha ra ri yod pas rtsig pa byas pa/_b+han+d+ha lcang lo can gyis kha bad byas pa/_rgya dpang tshad las 'das pa gnam lcags kyi gzer gyis btab pa/_rak+ta'i zham chu 'bab pa/_nyi zla'i ka gdan/_chu srin kha'i ka gzhu/_lha chen brgyad kyi gdung du bres pa/_mchog chen pos grab btang ba/_nyin mo rlung 'tshubs pa/_mtshan mo me 'bar ba/_gru bzhi na zhing chen gyi gdugs phub pa/_lha mo lnga gar byed pa/_sa gzhi thams cad rak+ta'i rba klong 'khrugs pa'o/__/gzhal yas khang de na ston pa sprul pa'i sku phyi ltar rgyal ba shAkya thub pa dang*/_nang ltar rdo rje 'chang du snang ba/_gsang ba ltar gzhon nu dpa' bo stobs ldan zhes bya ba'i bcom ldan 'das thugs zhi ba'i ngang las ma g.yos kyang*/_khro bo'i cha byad du bstan pa lag na rdo rje la sogs dpa' bo dang*/_mkha' 'gro pur+Na nye bar zhi dang*/_tshangs pa dung mgrin can dang*/_drang srong zla 'od gzhon nu dang*/_yang 'khor mkha' 'gro e ka tsa ti spun drug dang*/_de'i bran mo bcu bzhi dang*/_g.yog mo lnga bcu rtsa brgyad dang*/_yang g.yog 'bum khri 'bum stong la sogs pa mkha' 'gro'i sprin phung dpag tu med pa 'phro ba dang*/_dga' rab rdo rje la sogs mi'i 'khor dpag tu med pas bskor ba'i dbus nyid na/_'bras bu gsang sngags bla na med pa'i chos 'khor bskor nas 'khor gyi rgyud grol bar mdzad do/__/zhing de rnams la pad+ma las rdzus te skyes pa'i rgyal sras dpag tu med pa thams cad kun kyang lha dang lha mo dang khye'u dang*/_bu mo'i rnam pa gsang sngags bla med kyi brtul zhugs mthar son pa'i drang srong dngos grub rnam pa gnyis brnyes pa'i bdag nyid can no/__/de rnams la gzung 'dzin gyi rnam par rtog pa med cing bag chags 'dzin pa'i kun gzhi dang*/_nyon mongs can gyi yid dang*/_de dang ldan pa'i sgo lnga'i 'jug pa ste sems gsum kyang med la/_'khrul pa skyed byed dpyod par byed pa'i yid drug dang ni rtsa ba'i nyon mongs pa drug kyang med cing*/_ma rig pa gsum kyang med la rkyen bzhi yod ma yin/_de dang mtshungs par ldan pa sems sems byung rnams kyang med do/__/zhing de dag ni ston pa bcom ldan 'das rdo rje 'chang gi byin rlabs las/_rang bzhin nyid du bkod pa yin pa'i phyir rang bzhin ni sprul pa'i zhing zhes rgyal sras rig pa 'dzin pa rnams la grags so/__/zhing lnga po de dag snang ba'i rgyu ni snying ga na me long lta bu la sogs pa ye shes rin po che nang gsal ba'i rang gdangs dang*/_dung khang na khro bo'i dkyil 'khor du ye nas bzhugs pa'i snang ba las shar ba yin pas na rang bzhin rdzogs pa chen po'i mngon sum 'od gsal la goms pa'i gsang lam du snang ba yin pa rig pa rang shar chen po'i rgyud las bstan to/__/gzhan du de mthun gnas thun mong du grags pa zangs ma dog dpal ri/_sham+b+ha la/_lcang lo can la sogs pa lta bu bde chen sngags la spyod pa rnams kyi rang snang dag zhing ste/_de yang yul nyer bzhi lta bu'i gnas kyis mtshon na nam mkha' nas 'ong ba'i lha dang dri za la sogs pas bzung ba'i gnas brgyad la mkha' la spyod pa zhes grags pa dang*/_sa steng nas 'ong ba'i gnod spyin srin po'i 'khor sogs kyis bzung pa'i gnas brgyad la sa spyod zer/_yang klu dang ri rab khong seng nas 'ong ba'i lha min sogs kyis bzung ba'i gnas brgyad la ni sa 'og la spyod pa zhes grags so/__/de lta bu'i zhing de rnams su don gyi 'od gsal la dbang thob pa'i lhan cig skyes ma'i ye shes kyi DAki ma dang*/_dang po nas yul chen nyer bzhir spyod pa'i zhing skyes ma dang*/_sngags kyi sgom spyod goms pa'i stobs kyis gnas de dag tu bgrod nus pa'i sngags skyes ma la sogs pa rig 'dzin dpa' bo dang rnal 'byor ma/_rdo rje theg pa'i lam gyi bsod nams dang ye shes kyi tshogs kyis stobs nus mthun par sad pa'i dbang gis rje btsun ma hA gu ru dang*/_gsang bdag lag na rdo rje la sogs pa'i tshom bu'i 'khor dang lhan cig tu tshogs pa rnams dang skal pa mnyam pa'i rig 'dzin gyi gral gang yin pa de thams cad du song nas/_bskyed rdzogs kyi lam gyi 'phro sbyong ste rang rang gi lam ston du gyur pa'i rig pa 'dzin pa yi rdo rje'i bla ma rnams ni gnas 'di dang zhing 'dir bzhugs 'dir mi bzhugs zhes med de mos gus dag pa'i snang ngor rang nyid gang du song ba'i zhing der mngon sum rab tu bzhugs pa'i drung nas/_sngags kyi lta ba zab mo'i bogs 'don dang*/_de la brten nas brtul zhugs kyi spyod pa rlabs po che la spyod nus de/_rig 'dzin bla ma'i phrin las sna tshogs pas 'jig rten gyi khams sna tshogs par dad ldan rjes su bzung ba dang*/_snod min tshar gcod pa sogs mos pa dang 'tshams par don byed pa'o/__/zhing 'di dag rang gi mos gus dang dag snang sogs dge ba'i sa bon mthu brtas pa dang*/_bskyed rim gyis rang snang dag par shar ba dang*/_rdzogs rim gyis rtsa thig rlung sems las su rung ba sogs zab mo'i brtul zhugs mthar son pa'i gsang sngags kyi nus mthu rang dbang du son te grub pa thob pa rnams la snang ba de las gzhan ma dag pa'i rtog dpyod rang rgyud pas 'dod pa can gyi sgo nas song na phyin du yod pa yi gnas ris su chad pa can mthun snang du grub par bsam par mi bya la rang snang dag pa kho na la snang bar shes par bya'o/__/chos sku spros bral de nyid kyi ngang las snang ba'i longs spyod rdzogs pa yi/_sangs rgyas kyi sku yi gnas drug las yi ge'i sprin gyi phreng ba'i 'od zer rab tu 'phros pas rigs drug gi 'jig rten rnams su 'gro ba 'dul bar byed pa'i sprul pa'i sku mchog snang ba ni/_mkha' 'gro snying thig las/_longs sku yab yum gyi ljags las/_'a chos nyid spros dang bral ba'i sgra/_a gzung 'dzin gnyis snang dag pa'i sgra/_ha chos nyid rang byung gi sgra/_sha shes rab 'gag pa med pa'i sgra/_sa chos nyid rang byung gi sgra/_ma chos nyid mnyam pa nyid kyi sgra ste/_yi ge drug pa'i 'khor los 'dzam bu'i gling bye ba phrag brgya la sogs 'jig rten drug gi phyogs mtshams kun tu 'brel bas phyed sprul te/_longs sku'i dkyil 'khor la snang ba rang bzhin sprul pa'i sku dang*/_thub pa drug ste 'gro 'dul sprul sku dang*/_so so'i snang ba dang mtshungs par bzo dang skye ba la sogs pa ma dag pa sprul pa'i sku dpag tu med pa 'phros nas 'gro ba'i don mdzad ces pa ltar mtho ris gsum dang ngan song gsum ste/_gnas rigs drug gi gdul bya so so'i snang ba la de dang 'tsham pa'i sprul pa bstan te 'gro ba drug por rang rang gi rgyal po sogs ming gi mngon brjod lha dbang brgya byin la sogs pa lta bu skal pa dang 'tshams par rjes su 'gro ba'i/_'dul byed rig pa'i gsang sngags grub pa rnams mtshan dpe can me chu thogs pa zhig dmyal gnas su med mod rang gi snang tshul gyi dbang las chos rgyal la sogs par snang nas/_de dag gis sdug bsngal gtad pa'ang sdug bsngal zad pa'i phyir sangs rgyas kyi phrin las 'jug pa ni nges pa'o/_/zhes 'grel par gsungs so/__/de yang rang gi mos pa dang 'tshams par lha'i rnga bo che sogs snang tshul mtshon pa'i skyes bu thub pa drug sogs gdul bya'i bye brag phyogs bcu'i 'jig rten gyi khams mtha' yas mu med pa'i stong gsum gyi stong chen po yan man du rgya them brtsegs pa lta bu dang*/_phan tshun za 'og kha phye ba lta bu tshad med du snang ba de snyed dang mnyam par rab tu sprul nas/_gdul ba bzhi yi tshul gyis 'khor ba ma stong gi bar du 'gro don bsam mi khyab par mdzad do/__/de yang dang po sku bsod nams chen pos 'dul ba ni/_dga' ldan gnas nas 'pho ba sogs mchog gi sprul sku yi mdzad pa chen po bcu gnyis sogs su ston nas 'gro don mdzad pa yin no/__/gnyis pa gsung gi mdzad pa gdul bya'i rna bar tshig gi sdeb sbyor legs pa dang*/_tshangs dbyangs drug cu dang ldan pa'i gsung gis bstan pa'i theg pa'i rnam grangs nyan rang byang sems ste theg pa gsum mam bla med kyi theg pa gcig rnams ston par mdzad la chos sgo gang yang gdul bya'i sems can rang rang gi 'du shes sna tshogs pa'i rjes su 'gro ba yin te/_sems can gyi rgyud kyi nyon mongs dug gsum cha mnyam dang bcas pa re re la'ang nyi khri chig stong re phye ba'i grangs kyi gnyen por dgongs te gsungs pa la sde snod gsum sngags dang bcas pa bzhi po re re la'ang nyi khri chig stong re phye bas chos kyi sgo 'phar brgyad khri bzhi stong grangs su gsungs pa ltar snang yang*/_rnam par rtog pa'i kun slong gis bskyed cing lce mchu'i rtsol bas sgra tshig rang mtshan pa ma yin par gdul bya'i sems can gyi khams la rgyal ba'i thugs rje'i byin rlabs kyi mthus snang ba yin te/_ngas ni ci yang ma bstan te/_/sems can rnams la khyab gdal snang*/_/zhes pa ltar gsung gcig gis kyang gdul bya'i blo yi khyad par sna tshogs pa'i ngor so so'i rnam par rig pa de nyid dang mthun par tha dad par shar ba yin no/__/gsum pa thugs kyis gdul ba ni gdul ba'i dus 'dul byed kyi thabs sna tshogs par dus gsum chags thogs med par mkhyen cing gzigs pa sngon gnas rjes dran gyi mngon par shes pa dang*/_de ltar dus gsum gyi dngos po thams cad ma 'dres par gzigs kyang 'di ni dus so zhes mtshan ma can du so sor mi rtog ste dus gsum skye med kyi dbyings su bag chags rang zad gyur pa'i dus bzhi mnyam pa nyid kyi/_rang bzhin gdod ma'i gnas skabs kun tu bzang po'i sku gsung thugs mi zad pa rgyan gyi 'khor lo yongs su rdzogs par mkhyen pa zag zad mkhyen pa'i mngon shes dang*/_gzhan sems can gyi dge mi dge lung ma bstan sogs sems rgyud sna tshogs pa mkhyen pa ste gzhan sems shes pa'i mngon shes dang*/_de bzhin du sems can gyi mos pa dang mthun pa'i don spyod pa rdzu 'phrul chen po'i mngon shes dang*/_gzigs pa lha'i spyan gyis 'jig rten kun gyi sems can rnams 'di nas 'chi 'pho zhing 'dir skye'o zhes sogs mkhyen pa lha yi mig gi mngon shes dang*/_gsan pa snyan gyi mngon shes kyis 'jig rten thams cad kyi sgra gsan pa sogs lha'i rna ba'i mngon shes te drug dang*/_gzhan yang mkhyen pa'i stobs bcu la sogs sku gsung thugs kyi yon tan dpag tu med pa'ang*/_mdor bsdu na mngon shes drug po de rnams thugs kyi rjes su 'gro bas gdul bya dus las skad cig kyang yol ba med par don mdzad do/__/bzhi pa phrin las bsam gyis mi khyab pas gdul bar bya ba kun tu 'gro ba'i blo dang mthun par sku dang zhing khams nyi shu rtsa lnga sogs sna tshogs pa dang*/_kun tu thugs spangs rtogs bsam gyis mi khyab pa dang*/_de bzhin kun tu zhal zhi ba dang khro bo sogs dang*/_dus kun tu gsung gi gsang ba bsam mi khyab pa yan lag rgya mtsho'i brda thabs kyis chos ston pa'o/__/de ltar 'dul bzhi pos 'gro don mdzad pa na sku gsung thugs gsum gyis ni dngos su don mdzad la/_phrin las kyis ni dngos brgyud gnyis kar mdzad la/_mdor na kun du mdzad pa lhun grub rgyun mi 'chad do/__/de ltar chos sku'i dbyings las longs sku dang de las sprul pa'i sku mchog rnams kyis mkhyen cha chos nyid la ltos ji lta'i ye shes kyis zab mo don dam bden pa dang*/_chos can gzigs pa la ltos ji snyed mkhyen pa yi ye shes kyis kun rdzob bden pa yi chos thams cad ma 'dres par so sor mkhyen pa'i ye shes gnyis po de nyid kyis gdul bya'i rgyud 'grol zhing*/_de yang brjod bya don dang ldan pa dang*/_rjod byed ngag tshig dri ma med pa dang*/_byed las nyon mongs nye bar spong ba dang*/_'bras bu zhi ba'i phan yon ston pa ste khyad par bzhi dang ldan pas phyi rol pa la sogs pas bstan pa dang ma 'dres shing thun mong du ma gyur pa'i chos tshul mtha' yas par ston pa'o/__/de las yang sprul rnam pa brjod mi lang ste 'gro ba bsam gyis mi khyab par de snyed sprul pa'ang bsam gyis mi khyab bo/__/'on kyang 'gro ba drug gi gnas rigs de snyed du/_lha rnams 'dul byed tshangs pa dang*/_lha yi dbang po brgya byin dang*/_bde 'byung ste khyab 'jug sogs gnas rigs so so'i gtso bos 'khor rnams kyi sdug bsngal sel bar byed la/_de bzhin du mi la yang theg pa so so'i rigs dang mthun par nyan rang byang sems rnams dang*/_dge bcus khrims kyis 'dul bar 'os pa'i dus su 'khor los sgyur ba'i rgyal po dang*/_rgyal phran blon po sogs dang*/_de bzhin lha ma yin la thag bzang ris la sogs dang*/_bya rnams la shing rta mo dang*/_rma bya'i rgyal po gser ldan dang*/_sreg pa la sogs pa dang*/_ri dwags rnams kyi phyir du seng+ge'i rgyal po yi dam brtan pa dang*/_sha ra b+ha dang*/_kun+da la sogs pa sprul pa'i rnam rol rdo shing yan chad bsam gyis mi khyab bo/__/mdor na dmyal ba yi dwags kyi 'gro ba sogs sems can rnams gang dang gang*/_'dul byed de dang de 'dra'i gzugs sprul nas/_sems can don la snyoms las dang gzhan dbang sogs dus nam yang g.yel ba med par sprul pa'i rnam par rol pa'i grangs 'di ni phyogs bcu'i 'jig rten drug gi zhing rab 'byams rnams su snang ba yin la/_'jig rten drug ni/_gsang snying las/_las kyi dbang gis snrel gzhi dang yan man gyi 'jig rten drug gi_/zhes snrel gzhi dang yan man gyi sems can gnas pa'i snod kyi bye brag gru bzhi dang*/_zlum po dang*/_zla gam dang*/_gru gsum dang*/_gzhi phyal pa dang*/_steng g.yogs med pa ste drug go_/snrel gzhi zhes pa sogs ni phal po che las/_las kyi bye brag bsam mi khyab/_/dmyal ba'i 'jig rten thur 'phyang zhing*/_/gshin rje'i 'jig rten snrel gzhi ste/_/byol song lha mi gyen du 'gro/__/zhes pa ltar ro/__/de ltar 'jig rten drug gi 'gro ba de dag rang rang gis las bsags tshul dang*/_las des bag chags dge ba dang sdig pa dang 'dres ma dag byas pa'i rgyu las ni 'bras bu'i dus kyi gnas rigs lha'i bde ba dang*/_dmyal ba'i sdug bsngal kho nar spyod pa dang*/_mi sogs 'ga' la 'dres ma dang*/_lha mi sogs steng dang*/_ngan 'gro 'og ste mtho dman ltar 'khrul ngor snang ba'i gnas skabs rgyal ba'i thugs rjes rnam par 'phrul pa yang tshad med par 'gro ba rang rang gi snang ba dang mthun pa'i ston pas don so sor mdzad cing*/_chos kyang ma nges pa sna tshogs su gdul bya'i blo rtog ltar snang ste/_spyir rgyal ba'i bka' la zhal nas gsungs pa dang*/_byin gyis brlabs pa dang*/_rjes su gnang ba'i bka' gsum du yod cing*/_byin gyis brlabs pa la'ang gsum las sku gsung thugs kyi byin gyis brlabs pa gsum du yod par gsungs pas mtshon ston pa po'ang ma nges te/_bshad sbyar las/_ston pa 'di yi byin rlabs kyis/_/bya'am shing bu rde'u dang*/_/pad+mo dag dang dpag bsam shing*/_/rnga bo che las byung ba yang*/_/rgyal bas byin gyis brlabs pa'i phyir/_/de dag bka' zhes bya bar 'dod/_/ces dang*/_sdud pa las/_rgyal ba'i nyan thos gang dag ji snyed chos ston dang*/_/'chad dang rigs pa dag dang ldan par brjod pa dang*/_/mchog 'phags bde ba byed dang de yi 'bras thob pa/_/de dag kun kyang de bzhin gshegs pa'i skyes bu'i mthu/_/ci'i phyir zhe na rgyal bas chos tshul gang bstan pa/_/de la mi mchog slob mar gyur pas mngon bslabs shing*/_/mngon sum byas nas bslab pa ji bzhin ston byed pa/_/sangs rgyas mthus byed rang gi stobs kyi mthus ma yin/_/zhes pa ltar ro/__/ston tshul yang bsam gyis mi khyab ste/_dper na spos kyi yongs su brtsegs pa'i zhing khams na/_byang chub sems dpa' spos kyi shing chen po'i drung na gnas pa na/_shing de'i dri tshor ba tsam gyis rgyud la rnam par thar pa'i ting nge 'dzin skye bar 'gyur ba de bzhin du 'jig rten gyi khams na la la kha zas zos pas/_la la chos gos gyon pas/_la la sku la bltas pas/_la la rmi lam la sogs pas sangs rgyas kyi mdzad pa nye bar bsgrub pa'ang yod de bsam gyis mi khyab bo/__/zhes sgra tshigs ma nges par snang tshul dkon mchog brtsegs pa las byung ba bzhin no/__/don mdzad pa'i dus kyang ma nges par gdul bya rang rang gi skal ba de'i rjes su 'gro ba yin la/_ma dag zhing gi 'gro ba mtha' dag la de ltar snang ba yin no/__/gdul bya'i 'gro ba gang zhig la 'dul byed kyi sprul pa sna tshogs snang ba yang dri bral rang bzhin shes pa'i sangs rgyas kyi byin gyis brlabs pa dang*/_sems can so so'i smon lam dang dge ba'i las snang 'dzom pa las/_nang gsal dbyings kyi sku gsum pa'i thugs rje phyir gsal du shar ba'i ye shes dang phrin las dag pa'i gzugs sku gnyis dang*/_khyad par so skye'i ngor mchog sprul shAkya seng+ge sogs 'ga' zhig snang ba ni gnyid du song ba'i rmi lam gyi nang du sangs rgyas mthong ba ltar rang gi sems snang tsam yin la/_rmi lam lta bur sprul pa'i chos bstan pa de gnyis po la yang ngo bo nyid med kyang sangs rgyas zhes rang bzhin gnyis pa zhig ma grub la/_gang la snang ba'i sems de yang bdag med cing 'od gsal ba dang*/_gang zhig snang ba'i sangs rgyas de yang stong pa nyid rang bzhin med pas gsog tu rig par bya'o zhes zab mo'i mdo sde dag las gsungs te/_dkon mchog brtsegs pa las/_ngas ni rmi lam lta bu'i 'gro ba la/_/rmi lam lta bur sprul nas chos bstan yang*/_ngo bo med de rang bzhin gnyis su med/_/bdag med stong pa gsob tu rig par bya/_/zhes so/__/rgyu mtshan de bas na 'khor 'das kyi chos thams cad rmi lam lta bu'i rol pa la yin pa'i phyir dang*/_gdul bya'i snang ba'i sprul pa'i sangs rgyas kyang ngo bo ye nas dag pa gnyis ldan chos kyi sku las ma g.yos na yang sprul pa'i gzugs brnyan gdul bya nyid dang mthun par sdug bsngal gyi bden pas bsdus pa ltar snang ba'i phyir/_rang bzhin med pa 'khor 'das thams cad sgyu ma dang rmi lam lta bur ma dag pa'i 'gro ngor thugs rjes rol pa'i sprul pa snang ba yang*/_ji srid 'khor ba ma stongs pa de srid du gdul bya de'i rjes su 'gro ba'i don rgyun mi 'chad par snang la/_de ltar gdul bya 'dul byed gnyis kyang dbyings gcig las ma g.yos bzhin dri bcas gnas skabs na 'khor ba dang*/_dri ma las grol ba'i tshe myang 'das rnam 'gyur du shar ba'i gnas lugs gshis thog tu phebs pa la de kho na nyid mthong ba'i skyes bu zhes bya ste/_chos thams cad 'byung ba med pa'i mdo las/_sangs rgyas med cing chos dang dge 'dun med/_/de ltar sus shes de ni mkhas pa yin/_/sems can rang bzhin byang chub nyid du gsungs/_/byang chub rang bzhin sems can thams cad de/_/sems can rnams dang byang chub gnyis ma yin/_/de ltar sus shes skyes bu mchog tu 'gyur/_/zhes so/__/'dir bshad pa'i rang bzhin sprul sku 'di mdo phyogs su longs sku yin pas de nyid ngang nas ngo bo tha mi dad kyang thub drug sogs sems ldan dang bem po sogs sna tshogs su sprul pa ni/_yid kyi byed pa po dang chos su bya ba med bzhin du ri brag yul ljongs la sogs par sku gsung thugs rten rnams rang bzhin du byon par snang ba dang*/_yul nyer bzhi la sogs pa'i bkod pa dang*/_mgar ba lha bzo sogs kyi 'du byed las byung ba yi de bzhin gshegs pa'i sku gsung thugs kyi snang brnyan 'bur du byas pa dang ris su bris pa dang*/_thags su btags pa sogs rgyal ba'i phrin las yin te/_mdo las/_sku gzugs rnam pa mang po der sprul te/_/'gro ba dge la spyod pa'i don byed do/_/zhes dang*/_khyad par ston pa thugs rje can gyi zhal nas/_lnga brgya'i tha mar gyur pa na/_/nga ni yi ge'i gzugs su snang*/_/nga yin snyam du yid byos la/_/de tshe de la gus pa gyis/_/zhes pa ltar khyad par cung zad tsam yod pa ma yin no/__/gzhan yang gan+d+ho la ste gtsug lag khang dang*/_khang bzang dang*/_skyed mos tshal dang*/_gnas khang nyer spyad gang yang med pa'i mya ngam thang du 'khyams pa rnams la sprul pa'i grong khyer du snang ba dang*/_me tog sna tshogs pa'i pad+ma'i tshal dang*/_dgos 'dod 'byung ba'i dpag bsam shing dang*/_yid bzhin gyi nor bu rin po che dang*/_chu bo rnams la gru dang*/_gzings dang*/_zam pa dang*/_de bzhin du bgrod par byed pa'i shing rta dang*/_zas gos la sogs pa gang la gang 'dul gyis sems med bem po'i tshul du snang ba rnams rang gi sgrib pa'i mthus dngos su mi snang yang*/_sdug bsngal las thar ba dang bde ba ldan pa'i gzhir gyur pa'i thabs dang bcas pa rnams so/__/skye ba sprul sku ni dngos sam brgyud nas phan 'dogs par byed pa ste/_mu ge'i tshe na nya yi rgyal po pad+ma skyes te nya bo che ru sprul nas rang gi sha yis tshim par byed pa dang*/_sman gyi gsor mi rung ba'i nad kyis gdungs ba'i skye bo rnams la srog chags des pa ru sprul nas rang gi sha za ru bcug nas nad sel bar byed pa dang*/_mi mang po srin mo'i gling du srog gi 'jigs pas mnar ba la cang shes ba la ha ru sprul nas bsgral ba dang*/_mi gtsang ba'i 'dam du skyes pa'i srin bu'i rigs rnams la gser gyi bung ba la sprul nas sgras bung bung zhes bsgrags pas tshe 'phos te thams cad bde ba can du byang chub sems dpa' kha na spos kyi dri ngad ldang ba zhes bya ba sha stag tu gyur pa sogs/_sprul pa sna tshogs su rnam par snang ba kun gnas skabs dang mthar thug phan pa dang bde ba'i gzhir gyur na yang*/_'di ltar don byed snyam pa'i rtog pa med cing*/_byed rtsol gyi g.yo ba med bzhin du ji skad bshad pa de lta bu'i sprul pas 'gro ba'i don chen gyis ni dngos dang brgyud nas phan bde'i dpal du nye bar gnas te/_las brgya pa las/_rgya mtsho chu srin gnas kyi rlabs/_/dus las yol bar 'gyur srid kyi/_/gdul bar bya ba'i sras rnams la/_/sangs rgyas dus las yol mi mnga'/_/zhes so/__/de lta bu'i phrin las de dang por yang dbyings las byung zhing mthar yang dbyings su spros pa nye bar zhi tshul/_gal te sku dngos kyis gdul bar bya ba'i dus yol te don mdzad zin nas gdul bya spyi dang bye brag gang yang med pa'i gnas skabs na/_de 'dul byed kyi gzugs sku dbyings su nub par gyur pa'i tshul de mtshon par byed pa'i dpe ni/_ji ltar na sa steng gi chu snod gang yang rung ba de med tshe der shar ba'i chu zla'i gzugs brnyan de yang*/_sprul gzhi nam mkha'i zla ba nyid la thim pa zhes gcig la gcig 'dres pa lta bu min kyang gar song cha med du yal ba ltar/_dag ma dag gi gdul bya'i snang bas bsdus pa'i sprul pa nas rang bzhin sprul pa'i bar du snang ba rnams/_rang snang don gyi 'og min longs spyod rdzogs pa'i dbyings su thim nas dbyer med du gyur te snang cha mi mngon no/__/rang snang longs sku de yang chos skur thim tshul dper na tshes bcu drug nas gnam stong gi bar du zla ba gcig shos nas gcig tu thim pa'am gtan med du song ba med kyang phyir gsal gdangs nang dbyings 'od snang phyir spros pa med pa'i gting gsal gyi ngang thim pa ltar/_longs spyod rdzogs pa'i sku dang zhing khams rang snang du shar ba de yang nang dbyings spros pa med pa'i chos kyi sku'i ye shes chen por 'khyil ba ste/_sgron ma snang byed las/_chos sku'i ye shes gzhi gnas te/_/shes pa'i cha nas gsal byed la/_/'dzin pa rags pa'i rtog pa med/_/ngang ngam shugs kyi thugs rje 'o/__/gsal zhing shes pa rig dang bcas/_/cha la 'dres pa med par gnas/_/zhes so/__/de lta bu'i sku gsum gyi dgongs pa ro gcig tu gyur pa'i gnas skabs de nyid la/_dbu ma thal 'gyur ba rnams ni sems dang sems byung gi 'jug pa gnyis snang shin tu phra ba'ang spros pa thams cad dang bral ba chos kyi dbyings su bud shing zad pa'i me bzhin zhi ba'i tshe/_theg dman gyi dgra bcom lta bu bag chags phra ba'ang ma zad pa'i 'gog pa nyi tshe ba tsam ma yin par rgyal ba'i 'gog pa mthar thug dam pa zhes 'dod la/_'jug pa las/_shes bya'i bud shing skam po ma lus pa/_/bsregs pas zhi de rgyal rnams chos sku ste/_/de tshe skye ba med cing 'gag pa med/_/sems 'gag pa de sku yis mngon sum mdzad/_/ces so/__/chos sku dbyings su 'khyil tshul 'dir rang bzhin rdzogs pa chen po'i lugs su ni/_glo bur gyi dri ma tshogs brgyad dang bcas pa'i khams gsum gyis bsdus pa'i sems dang sems byung thams cad 'gags kyang so so rang rig ye shes nyid ni 'gag pa ma yin te/_yon tan mtha' dag nyi ma dang zer bzhin rgyun mi 'chad pa lkog gyur du yod tshul/_kun gsal las/_gnam stong nub mo zla ba rdzogs gyur kyang*/_/nyi ma'i stobs kyis mngon du mi snang bas/_/tshes gcig gong nas bco lngar rdzogs gyur te/_/de nas zla ba bskyed du med pa ltar/_/rin chen sbubs la 'du 'bral med kyis kyang*/_/'khrul pa'i stobs kyis mngon du gsal ma nus/_/zhes pa ltar slob lam pas sgrib pa rim gyis bsal nas sangs rgyas pa'i tshe na phra zhing rtogs dka' ba'i ye shes nang gsal chos kyi dbyings dang dbyer med du gzugs sku phyir gsal gyi cha thim la gdangs 'gag pa med cing thams cad mkhyen pa'i ye shes dang ldan pa'i phyir na rang bzhin ma rmugs pa gzhon nu bum pa'i sku nang gsal mngon du gyur te zla ba nya gang ba ltar spangs rtogs kyi yon tan thams cad mthar phyin nas de las gong du bgrod pa med la/_thugs rje'i zer ram gdangs de yang gnas dus gang du gdul bya'i yul 'gro ba snang ba de'i mod nyid la/_'gag pa med pa thugs rje'i gdangs las ye shes phyir gsal sku dang phrin las rgyun mi 'chad par rtsol med du mched pa'i gzhi ru gyur pa ste/_de lta bu'i bsam gyis mi khyab cing shin tu mnyam par bzhag pa gnyis snang mtha' dag dbyings su nub pa'i chos nyid ni/_'bras bu sangs rgyas kho na'i ma 'dres pa'i chos mnyam par ma bzhag pa med pa'i yon tan lhun grub chen po'i go 'phang yin la/_de yang dbyings skye ba med pa nam mkha' lta bu'i ngang na/_nyi ma dang zer bzhin sku dang ye shes bri gang 'pho 'gyur med par lhun grub tu bzhugs te/_kun mkhyen chen po'i gsang 'grel las/_rgyud kyi mdzad pa rdzogs nas dgongs pa chos nyid du bzhugs pa'i tshul brjod pa'i skabs su/_rgyud kyi don de skad ces brjod pas rang snang 'od gsal du bkod pa'i de bzhin gshegs pa rigs lnga til gyi gong bu ltar ji snyed kyis nam mkha'i dbyings kyi mtha' dbus khyab pa de dag thams cad gnyis su mi dmigs shing*/_ngo bo dbyer med par dgyes nas dus gsum 'pho 'gyur med pa'i ngang*/_gzhi rdzogs lhun gyis grub pa'i rang bzhin/_dus bzhi chos nyid 'khor lo mnyam pa nyid kyi dbyings su mtha' dbus med pa'i zhing khams snang zhing bkod pa thams cad ston pa nyid kyi sku dang gsung dang thugs mi zad pa rgyan gyi 'khor lo'i rang bzhin las lhun sta[?] po bkod pa'i rgyan nyid du sngon ji lta bar phyis kyang de bzhin nyid de/_nam mkha' bzhin du rang bzhin 'pho 'gyur dang 'phel 'grib med pa'i tshul gyis bzhugs so/_/zhes so/__/yon tan rin po che'i mdzod dga' ba'i char zhes bya ba las/_mthar phyin 'bras bu sku dang ye shes bstan pa'i tshoms te le'u bcu gsum pas gzhung don yongs su rdzogs so//____//spyir bstan bcos rtsom pa dang dgongs 'grel sogs rang stobs kyi shes rab kyis 'grel ba rgyu gsum tshang dgos tshul ni/_gzhung 'di rtsom pa po bdag rgyud mtshan nyid 'phags pa sa thob la sogs pa'i snod kyi dpyad pa thams cad yongs su rdzogs te ma tshang ba med par gyur pa ni/_'phags bod kyi mkhas grub rgyal sras slob mar gyur pa'i bstan bcos byed pa po rnams yon tan legs par tshang nas rgyal tshab tu gyur pa'i bstan pa'i chos mdzod 'dzin pas bka' dang dgongs 'grel gyi bstan bcos sogs mdzad pa bzhin 'dir yang chu dwangs par gzugs brnyan 'char ba ltar bsam yas mchims phur sgrub par gzhol ba'i tshe/_bde gshegs ri rab mar me rgyal mtshan du 'gyur ba'i 'jig rten gsum gyi mgon po kun mkhyen dri med 'od zer gyi skus byin gyis brlabs te ye shes kyi sku'i zhal mngon sum du mthong*/_gsung gis byin gyis brlabs te bstan bcos rtsom pa'i gnang ba byin/_thugs kyis byin gyis brlabs te thugs yid dbyer med du 'dres te de ltar sku gsung thugs kyis byin gyis brlabs nas/_thugs rjes dbugs 'byin par mdzad pas bstan bcos rtsom pa'i spobs pa skyes pa yin gyi/_gal te de lta bu'i yon tan khyad par can ma thob na/_rnam grol gyi lam min las sna tshogs pa'i 'khor ba'i g.yang sar rtag tu 'phyan par 'gyur bas na dal ba'i rten bzang stong log byas par zad do/__/rgyu mtshan de phyir na gzhung 'di la bstan bcos rtsom pa'i rgyu gsum legs par tshang bas bshad pa'i cha skyon med rnam dag mchis pa ni/_bla ma'i byin rlabs dang rang gis bsgoms byung gi stobs kyis chos nyid bden pa mngon sum du mthong zhing*/_de ltar mthong ba de yang yi dam lha dang 'du 'bral med cing mngon sum la shes bya bden gnyis kyi rnam bzhag so sor 'byed pa'i shes rab ngang gis skyes te rgyu de rnams tshang ba las brtsams pa yin gyi mngon su ma mthong bzhin rjes dpag thos bsam gyi rtog ge'i rig pas mchog 'dzin sogs ma bskyed pas na/_nyes 'gal med kyang grub mtha' 'dzin pa po rnams rang rang gis 'dod pa'i gzhung gi phyogs dang 'gal na 'chags la bzod par mdzod ces pa'o/__/rgyal bas drang nges kyi chos tshul rgya mtsho lta bu rgya che zhing gting dpag dka' ba'i don ni/_chos nyid kyi don la mnyam par bzhag pa kho na'i khyad chos nyid las/_/de kho na nyid ji lta ba bzhin rtogs shing*/_rjes thob la ji snyed pa'i chos thams cad ma nor ma 'dres par so sor mkhyen pa'i ye shes kyis rtogs pa'i gnas yin gyi/_de las gzhan du phyogs tsam las ji bzhin mi rtogs la/_kho bos ni mkhyen gnyis ye shes mngon du gyur nas gsung rab kyi dgongs don zab mo yang dag bar mthong nas brtsams pa 'di la/_shes rab gsum gyis zhugs te nyams su blang na nam yang bslu ba med do zhes gdams par mdzad do/__/de ltar legs par brtsams pa'i dge ba 'di yi mthu la brten nas bdag dang mtha' yas pa'i sems can rnams/_rgyal ba'i ring lugs nor ba med pa'i theg chen mdo sngags kyi lam bzang po sgrib pa gnyis kyi rnyogs pa dwangs pa'i ste skyon gyis mi brdzi bar gzings chen por zhugs nas/_'bras bu mthar thug byang chub chen po'i go 'phang mtha' gnyis kyi dri ma nye bar zhi ba chos dang gzugs sku'i yon tan rin chen gling dam pa der myur du phyin par shog cig_/de ltar ma thob kyi bar du nags mthong nyams dga' ba ri dwags sna tshogs phan tshun dkyu zhing rtse ba'i sman ljongs yid du 'ong ba na/_dus bzhi'i mngon rtogs gsar du ngom pa'i ljon pa rnams kyis ni/_der gnas pa'i drang srong rnal 'byor pa rnams la mi snyan pa'i gtam sgrog par mi byed la/_snying la 'bab cing yid du 'ong ba'i sgra sna tshogs par smra pa'i bya yi tshogs dag gis kyang*/_dug sbrul gdug pa 'khri zhing 'khyil ba'i shing gi drung na 'dug pa lta bu'i 'khor ba 'dir snying nas skyo ba'i nges 'byung gi shing rtas rnal 'byor pa'i yid thar par 'dren pa'i skad snyan gyi ca co shin tu zhi ba sgrog pa'i sgra thos pa sogs nags kyi yon tan la brten nas/_dbang po rnam g.yeng nye bar zhi ba'i bsam gtan zhi lhag zung 'jug gi dpal phun sum tshogs pa thob par shog cig_/mdor na gnas lugs rtogs pa'i lta ba ni rtog ge'i yid byed mthar 'dzin gyi rlung gis ma dkrugs pa seng+ge lta bu la/_sgo gsum gyi spyod pa wa lta bu thams cad rgyal ba'i thugs kyi sras dam pa byang sems 'jig rten dbang phyug la sogs pa'i 'gro ba'i mgon po rnams kyi rjes su 'gro bas/_skye ba 'di nas bzung tshe rabs nam yang sems can gzhan gyi ba spu'i khung bu gcig tsam la'ang gnod pa'i khur du mi 'gro zhing*/_thabs la mkhas shing rlabs chen po'i phrin las kyis dngos dang brgyud gang rung gis mtha' yas pa'i 'gro ba ma lus pa'i phan bde'i dpal du 'gyur bar shog cig ces pa'o/__/yon tan rin po che'i mdzod dga' ba'i char zhes bya ba/_gtsang la stod pa chos rje brag phug pas bskul ba'i ngor/_dpal o rgyan gyi slob dpon chen po sangs rgyas gnyis pa pad+ma saM b+ha wa'i zhabs rdul la spyi bos reg pa'i rdzogs chen pa chos sku'i dgongs pa rang byung don gyi rdo rje yi gnas lugs nam mkha' ltar mngon du gyur nas longs sku'i ye shes mkhyen brtse'i dkyil 'khor mchog tu rgyas shing sprul sku 'i mdzad pa gang 'dul phrin las kyi 'od zer stong 'phro ba yid can kun gyi lam ston du gyur pa/_mtshan gzhan 'jigs med gling pa zhes grags pa'i rig sngags 'chang ba klong chen nam mkha'i rnal 'byor gyis/_che ring ljongs kyi dben gnas 'od gsal gnyug ma'i pho brang dpal ldan pad+ma 'od gling du sbyar ba'o//___//smras pa/_ka dag rang byung rdo rje dbyings chen por/_/lhun grub 'od gsal yon tan pad+ma'i tshal/_/dbang chen ye shes rol pa'i rig rtsal 'chang*/_/sku gsum dbyer med 'jigs bral gling pas skyongs/__/thugs rje'i phrin las rtogs pa chos kyi sku'i/_/'dra 'bag yongs rdzogs bstan pa'i mchod sdong che/_yon tan rin chen mdzod kyi shing rta'i lam/_/gsal byed skal bzang kun dga'i dpal du spel/__/'khrul pa'i blo rgyud chos bzang tshal zhugs nas/_theg gsum 'gal med chos kyi lam bgrod gnyen/_/ma 'khrul bde myur ye shes mchog gi sar/_/sbyor byed legs bshad lta bu'i lang tsho'i gsos/__/mtshan don gsal byed nor bu'i me long 'di/_/rang nyid thos bsam sgom pa'i lag rjes dang*/_/don mthun chos grogs dgyes ston 'gyur snyam gyis/_/'gro kun rnam grol bgrod pa'i mig gyur cig__/theg mchog bstan pa'i bshad sgrub las gsum 'phel/_/snyigs ma'i skye dgu phan bde'i dpal gyis 'byor/_bdag gzhan yang dag gzhung bzang 'di lta bu/_/'chad nyan sgom pas don gnyis 'grub gyur cig__/ces mkhas grub bzang po'i spang rtogs kyi yon tan phul du phyin pa'i rdo rje slob dpon ngag dbang grags pa bstan 'dzin klong chen ye shes rdo rje'i yon tan mdzod mchan 'grel gzhung zur du ma phyag bris dngos las zhal bshus kyis gzhung gcig tu sdebs nas zhu dag gi sri zhu skabs bar mtshams rnams su rang tshig gis zhal skong ci rig par bgyis shing slad nas 'phrul spar du spel 'grem skabs dbu gsham gyi tshigs bcad 'di ltar bris zhes rje de'i sku gsung thugs kyi sras lcam dral dang*/_dad slob dkon mchog bstan 'dzin nas yang yang bskul ba bzhin slob gral du gtogs pa mang+ga la shrI b+hU tis rdor gling kun bzang chos 'khor gling nas bris pa theg pa mchog gi lam srol la bya ba byed par gyur cig/__//