DKR-KABUM-02-KHA-050-16

Previous Text Back to Volume PageNext Text

Wylie title
Location	dil mgo mkhyen brtse bka' 'bum Volume 2, sde tshan 50, Text 16, Pages (Folios 1a to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. '. In Skyabs rje dil mgo mkhyen brtse rin po che'i bka' 'bum, Vol. 2: . Delhi: Shechen Publications, 1994.
Genre	Verses of Praise - bstod pa

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༈ ཞིང་འདིའི་སྟོན་མཆོག་ཐུབ་པའི་དབང་པོ་ལ་བསྔགས་པ་ཡིད་ཆེས་དད་པའི་གླིང་བུ་ཞེས་བྱ་བ། ན་མོ་གུ་རུ་ནཱིརྨ་ཀཱ་ཡ་མ་ཧཱ་མུ་ན་ཡེ། སྲིད་ཞི་ཀུན་ཁྱབ་ཕྱོགས་དུས་ཀུན་འགྲོ་བའི། །དཔེ་བྲལ་རྒྱལ་ཀུན་དབྱིངས་དང་གཅིག་འཁྱིལ་ཡང༌། །ཞིང་འདིར་ལྷག་པར་ཐུགས་བརྩེས་བཟུང་བའི་མཐུ། །རྣམ་འདྲེན་སྟོང་ལས་པད་དཀར་ལྟར་བསྔགས་རྒྱལ། ༡ །སྔོན་ཚེ་བདེ་གཤེགས་དབང་པོའི་ཏོག་ལ་སོགས། །རྐང་གཉིས་གཙོ་བོ་སངས་རྒྱས་འཕགས་པའི་ཚོགས། །གངྒཱའི་བྱེ་སྙེད་ཚུལ་འཛིན་མཐའ་ཀླས་འགྲོ། །སྒྲོལ་པའི་དེད་དཔོན་ཆེན་པོར་སྟོན་ལ་འདུད། ༢ །དེ་བཞིན་གཤེགས་པ་རིན་ཆེན་སྙིང་པོ་ཡི། །སྤྱན་སྔར་མི་མཇེད་ཞིང་གི་གདུལ་བྱའི་ཕྱིར། །སྙིང་རྗེའི་གཞན་དབང་གྱུར་པའི་སྨོན་ལམ་གྱིས། །དམ་བཅའ་ལྔ་བརྒྱའི་གོ་ཆ་བཞེས་ལ་བསྟོད། ༣ །མཚན་གྱི་ཉི་མས་ལས་སྒྲིབ་མུན་སེལ་ཞིང༌། །བདུད་རིགས་དཔའ་བཀོང་མི་འཁྲུག་རྒྱལ་བ་དང༌། །སྐུ་ཚེ་འོད་སྣང་འདུས་པ་དཔག་མེད་པའི། །མཚན་ཐོས་བདེ་ཆེན་ཞིང་འདྲེན་མགོན་པོ་རྣམས། ༤ །ཞིང་བཀོད་འཛིན་པའི་སྨོན་ལམ་བསྐུལ་བས་མཚོན། །ད་ལྟ་ཕྱོགས་བཅུའི་ཞིང་གི་རྫོགས་སངས་རྒྱས། །སངས་རྒྱས་སྤྱན་གྱིས་གཟིགས་ཀུན་མགོན་ཁྱོད་ཀྱིས། །སྨིན་པར་མ་མཛད་མེད་པའི་ཕྲིན་ལས་མངའ། ༥ །རྣམ་དག་དགའ་བ་བརྒྱ་ལྡན་སྐྱེད་ཚལ་ལས། །འཕོས་ཏེ་དམ་པ་ཏོག་དཀར་རི་བོང་འཛིན། །ཤཱཀྱའི་རིགས་འཚོལ་རྩེ་དགའི་ཁྲུས་ཞུགས་གནས། །འཇམ་དཔལ་དཔའ་བོ་ཟས་གཙང་མི་དབང་བརྟན། ༦ །མངོན་བྱང་ལྔ་རྫོགས་མཚན་དཔེའི་ཉིན་མོར་བྱེད། །ཤེས་བྱའི་བཟོ་རིགས་བཅུ་ཕྲག་སུམ་ཟུང་བཞི། །མཁྱེན་དཔྱོད་མེ་ལོང་རིང་ནས་གསར་བའི་གཟུགས། །མཐོང་བས་མཁས་མང་ཡིད་འཕྲོག་ལྷ་ཡི་ལྷ། ༧ །དོན་ཀུན་གྲུབ་པའི་རྒྱལ་པོའི་མཚན་སྙན་བསྒྲགས། །འདོད་སྲེད་འཆིང་བས་བཏང་ཡང་ཐབས་མཁས་དང༌། །ངེས་དོན་རྡོ་རྗེ་བཙུན་མོ་གོ་ལའི་དབུས། །ཞིང་གི་དཔལ་མོ་བརྒྱད་ཅུ་ཁབ་བཞེས་ཏེ། ༨ །ཆགས་ཆེན་སྤྱོད་པས་ས་བཅུ་རྫོགས་པར་མཛད། །ངེས་པར་འབྱུང་བའི་རྐྱེན་བཞིས་རྒྱལ་ཁབ་དབྱུང༌། །ཤིན་ཏུ་སྤྲོས་མེད་སྤྱོད་པས་ལོ་དྲུག་ཏུ། །དཀའ་སྤྱད་གདུང་བ་བཟོད་པའི་གོ་ཆ་ལ། ༩ །ཕྱོགས་བཅུའི་བདེ་གཤེགས་དགྱེས་ནས་འཚང་རྒྱ་བསྐུལ། །བྱང་ཆུབ་སྙིང་པོར་གཤེགས་ཚེ་དགའ་མོ་དང༌། །དགའ་སྟོབས་ཞིང་པའི་བུ་མོས་བ་མཆོག་གི །ཟས་དང་བཅས་པའི་སྙོམས་འཇུག་ཉེ་རྒྱུ་ཡིས། ༡༠ །མངོན་འཚང་རྒྱ་བར་བཞེད་པའི་ངོ་མཚར་བསྟན། །ཡིད་སྲུབ་མི་འཁྲུགས་ཁྲག་ཁྲིག་གཅིག་གི་དཔུང༌། །སྒྲོལ་མ་བཞད་པ་བརྒྱད་དང་མི་གཡོ་བས། །བདུད་ཀྱི་བུ་མོ་རབ་བཀྲམ་ཆགས་ཆེན་གྱིས། །བསྐུལ་ནས་མངོན་འཚང་རྒྱས་པས་སྒྲིབ་ཀུན་བཅོམ། ༡༡ །སྙིང་རྗེ་བརྩེ་ཆེན་རི་དྭགས་གཟུགས་བཀྲ་ཞིང༌། །གྲངས་མེད་གསུམ་གྱི་ཆ་ཤས་ལེགས་རྫོགས་ནས། །རྣམ་འདྲེན་བཞི་པའི་བདུད་རྩིའི་དཀྱིལ་འཁོར་གྱིས། །ལྔ་བརྒྱའི་གདུང་བ་བསྙིལ་པའི་དགེ་མཚན་འཆར། ༡༢ །གཏིང་མཐའ་མི་མངོན་འཁོར་མཚོར་བྱིང་པའི་འགྲོ། །འཁོར་ལོ་གསུམ་གྱི་རིན་ཆེན་གྲུ་ཡི་མཐུས། །ཐར་དང་ཐམས་ཅད་མཁྱེན་པའི་ནོར་བུའི་གླིང༌། །འགོད་པའི་ཕྲིན་ལས་ཚད་དང་བསམ་ལས་འདས། ༡༣ །ལོག་རྟོག་རིག་པས་རྒོལ་བརྩམས་མུ་སྟེགས་དཔུང༌། །ངོ་མཚར་ཆོ་འཕྲུལ་མཉན་ཡོད་ནས་བསྟན་ཏེ། །ལྷ་མིའི་དད་པའི་འདབ་བརྒྱ་གྲོལ་ཆེས་པས། །ནག་ཕྱོགས་སྐྱེངས་དང་གཟི་བརྗིད་མགོ་འཕང་སྨད། ༡༤ །སྐྱེ་ཤི་ལས་འདས་དབྱིངས་སུ་སྙོམས་ཞུགས་ཀྱང༌། །དཀར་པོའི་ཆོས་རབ་སྤེལ་བའི་རིང་བསྲེལ་གྱིས། །འགྲོ་ཀུན་སྒྲོལ་ལ་ཁྱོད་དང་མཚུངས་པ་ཡི། །གོ་འཕང་རྟེན་འདིར་ལོངས་སུ་སྤྱོད་གྱུར་ཅིག ༡༥ །བླ་མ་སྐུ་གསུམ་རྒྱལ་བའི་ཚོགས་ལ་བསྟོད་པའི་སྡེ་ཚན་དང་པོའོ།

[edit]

!___zhing 'di'i ston mchog thub pa'i dbang po la bsngags pa yid ches dad pa'i gling bu zhes bya ba/__na mo gu ru nIrma kA ya ma hA mu na ye/__srid zhi kun khyab phyogs dus kun 'gro ba'i/__/dpe bral rgyal kun dbyings dang gcig 'khyil yang*/__/zhing 'dir lhag par thugs brtses bzung ba'i mthu/__/rnam 'dren stong las pad dkar ltar bsngags rgyal/_1_/sngon tshe bde gshegs dbang po'i tog la sogs/__/rkang gnyis gtso bo sangs rgyas 'phags pa'i tshogs/__/gang+gA'i bye snyed tshul 'dzin mtha' klas 'gro/__/sgrol pa'i ded dpon chen por ston la 'dud/_2_/de bzhin gshegs pa rin chen snying po yi/__/spyan sngar mi mjed zhing gi gdul bya'i phyir/__/snying rje'i gzhan dbang gyur pa'i smon lam gyis/__/dam bca' lnga brgya'i go cha bzhes la bstod/_3_/mtshan gyi nyi mas las sgrib mun sel zhing*/__/bdud rigs dpa' bkong mi 'khrug rgyal ba dang*/__/sku tshe 'od snang 'dus pa dpag med pa'i/__/mtshan thos bde chen zhing 'dren mgon po rnams/_4_/zhing bkod 'dzin pa'i smon lam bskul bas mtshon/__/da lta phyogs bcu'i zhing gi rdzogs sangs rgyas/__/sangs rgyas spyan gyis gzigs kun mgon khyod kyis/__/smin par ma mdzad med pa'i phrin las mnga'/_5_/rnam dag dga' ba brgya ldan skyed tshal las/__/'phos te dam pa tog dkar ri bong 'dzin/__/shAkya'i rigs 'tshol rtse dga'i khrus zhugs gnas/__/'jam dpal dpa' bo zas gtsang mi dbang brtan/_6_/mngon byang lnga rdzogs mtshan dpe'i nyin mor byed/__/shes bya'i bzo rigs bcu phrag sum zung bzhi/__/mkhyen dpyod me long ring nas gsar ba'i gzugs/__/mthong bas mkhas mang yid 'phrog lha yi lha/_7_/don kun grub pa'i rgyal po'i mtshan snyan bsgrags/__/'dod sred 'ching bas btang yang thabs mkhas dang*/__/nges don rdo rje btsun mo go la'i dbus/__/zhing gi dpal mo brgyad cu khab bzhes te/_8_/chags chen spyod pas sa bcu rdzogs par mdzad/__/nges par 'byung ba'i rkyen bzhis rgyal khab dbyung*/__/shin tu spros med spyod pas lo drug tu/__/dka' spyad gdung ba bzod pa'i go cha la/_9_/phyogs bcu'i bde gshegs dgyes nas 'tshang rgya bskul/__/byang chub snying por gshegs tshe dga' mo dang*/__/dga' stobs zhing pa'i bu mos ba mchog gi__/zas dang bcas pa'i snyoms 'jug nye rgyu yis/_10_/mngon 'tshang rgya bar bzhed pa'i ngo mtshar bstan/__/yid srub mi 'khrugs khrag khrig gcig gi dpung*/__/sgrol ma bzhad pa brgyad dang mi g.yo bas/__/bdud kyi bu mo rab bkram chags chen gyis/__/bskul nas mngon 'tshang rgyas pas sgrib kun bcom/_11_/snying rje brtse chen ri dwags gzugs bkra zhing*/__/grangs med gsum gyi cha shas legs rdzogs nas/__/rnam 'dren bzhi pa'i bdud rtsi'i dkyil 'khor gyis/__/lnga brgya'i gdung ba bsnyil pa'i dge mtshan 'char/_12_/gting mtha' mi mngon 'khor mtshor bying pa'i 'gro/__/'khor lo gsum gyi rin chen gru yi mthus/__/thar dang thams cad mkhyen pa'i nor bu'i gling*/__/'god pa'i phrin las tshad dang bsam las 'das/_13_/log rtog rig pas rgol brtsams mu stegs dpung*/__/ngo mtshar cho 'phrul mnyan yod nas bstan te/__/lha mi'i dad pa'i 'dab brgya grol ches pas/__/nag phyogs skyengs dang gzi brjid mgo 'phang smad/_14_/skye shi las 'das dbyings su snyoms zhugs kyang*/__/dkar po'i chos rab spel ba'i ring bsrel gyis/__/'gro kun sgrol la khyod dang mtshungs pa yi/__/go 'phang rten 'dir longs su spyod gyur cig_15_/bla ma sku gsum rgyal ba'i tshogs la bstod pa'i sde tshan dang po'o/